SIR MAMA (Forever Young) By Havali Adam

                        SIR MAMA (Forever Young)

                                           By 

                                    Havali Adam

Chow chu ka ei mial mial a, zing lamah chaw ka ei ṭha lutuk lo bawk nen ei tui tak ka ni. Chhun chawlh hun lai a nih avangin Restaurant pakhatah kan chawl a, kan hnathawhna Canteen-ah kan chawl peih lo a ni ber e. Dik tak chuan a tui lo ve êm alawm, a to phian bawk si. Thil man to a nih rau rau chuan tui tal se emaw tam tal se la, kan Canteen-a mi lah chu a tam lutuk hran lo leh nghal.

"Noel, saw Sir Mama" ka ṭhiannu chuan a rawn ti deuh tawl a, a hawina lam chu hawi nawn leh kher ka ngai lo chiang khawp.

"Ka hria alawm, a rawn luh tirh khan ka hmu tawh" ka lo ti sep a, kan thil eina hmun ber khera a rawn lut ve teh hlawl chu a awihawm loh lek lek zawk a ni.

"I danglam miah lo em ni?" a rawn ti leh a, amah pawh en chuang lovin ka nui zeuh a, chu erawh nuihzat vang a ni lo tih a hriat chian viau ka ring, kan inkawm rei ve ngar ngar tawh êm mai.

"A mak ê Sir Mama hi, hmâna a Student kan nih lai aṭang tawh tun thlengin a hmel saw a la danglam paw'n ka hre lo, amah saw Forever Young an tih ang chi hi a ni ang" zawhna min zawt zui tawh lova a tih chuan ka ngaihtuahna a kal thui nghal hle.

High School kan kal ṭan tirh aṭang tawh a ruka ka duh kumhlun kha a ni ṭhin a, mahse amah chuan engmah a hre lo thung. Higher thleng khan hmun danga zirna chhunzawm thei reng si kha kum tluana a hmel hmuh reng ka châk lutuk avangin School ngaiah bawk ka kal tluan leh zak a, ka tan chuan ani tluka mipa hmelṭha leh amah ang baka mipa famkim an awm theih ka ring lo ṭhin bawk. 

Tunah erawh kum tam tak liam hnuaah a hmel ka hmu leh hlawl a, ka ṭhiannu sawi ang chiah a ni. A hmel chu a ṭhat ngaiin a la ṭha reng a, a pa ngaiin a la pa reng a, a hma aiin a thau tawh tih leh hmui hmul tlêm a nei ve deuh tawh tih mai loh chu danglam ka hmu lo. Chungte chuan a tilang ṭha zual sauh leh ta nghal a, a cher lai ai aiin ka mitah chuan a ṭha zawk fê a ni. 

"Danglam chu i va ang si ve" rawn titu chu phu zukin ka en a, ani chuan a hmaa ei tur awm chu a lo ei zo vek tawh a, kei erawh a la awm hnûr a, a ruk taka ka danglamzia chu a tan chuan hai theih a ni mawlh lo.

"Hun a va kal chak ve, ka'n ei zo ve thuai thuai ang e" tiin thil dang chu ka sawi ta daih a, thil ei pahin Sir Mama ṭhutna lam chu ka en zeuh a, chiang zet hian min lo en reng a nih chu! 

"I ei sual ang e aw Noel, buan buan che chuan" tih ngai khawpin ka thil ei chu ka hmanhmawh a, ka mipa hmuh duh tawh lovin ka mitah tak min rawn en run kher lo se chuan chuti ang em emin ka buai lo vang. 

Restaurant aṭanga kan chhuah lai te chuan min lo en reng a, kum tam vei tawh mah se ka la zam ru er er thei tlat maw le. Ngaihtuah chian chuan a awm lo hran lo, Higher kan zawh hnu thleng khan ka mipa duh ruk a la ni reng a, amah avangin College ka kal chhung zawngin ngaihzawng ka nei lo tluan ti tih bawk a, ka ṭhiannu Fakzualin mipa dang min tihpui lo se chuan ngaihzawng ka nei miah lo vang. 

Kan Final Semester kumah Mizo Department-a mi nen kan inngaizawng ve a, thla eng emaw tih chhung chu kan inzui ve nghe nghe. Ka rilru dik tak ka hrilh a, ani chuan min la duh reng tho, mahse keimah zawk chu ka pangngai thei ngâng lo a ni. Sir Mama vang lam pawh a ni tawh chiah lo, bialpa emaw pasal emaw neih chu ka châk hlawl lo a ni e. 

Ka ṭhiani chuan min beidawn pui ta ṭhak a, ani erawh keimah ang lo takin bialpa nghet a nei a, an inzui rei ve tawh hle bawk. College kan kal tirh aṭanga inzui tawh an ni a, inneih lam an hnaih viau tawh zawk maithei a ni. Computer hmaa ka ṭhut hnuah pawh hun kal tawh chuan min la chenchilh reng a, Sir Mama ka lo duh ruk nasat theihzia te chu ka ngaihtuah chhuak lo thei lo a ni. 

College ka zawh kumah Master lam zir zawm tawh lovin hna ka zawng nghal a, hna hmuh lo harzia ka hriat phah chiang hle bawk. LDC aṭangin bul ka ṭan a, vawi 4 Written Test ka paltlang hnuah ka tling ve chauh a, a nghet a nih avangin ka hnathawhah chuan ka lungawi tâwk em em a, hna sâng thawka hlawh ngah tak tak te ang ni lo mah ila ka hlawhah chuan ka vui ngai lo. 

Kum 2 ka thawh kumah ka ṭhiannu Fakzuali chuan a rawn ti ve a, tlin har a'n ti mai mai khawp a, ka puihna te min dil hial a, han puih dan vak lah chu ka hre bik chuang der si lo. A vawi hnihna ah a tling thei ta hlauh a, kan thawk dun thei ringawt pawh chu lawmna tham a ni. A ni tak réng asin, hnaa inziah tlin chu har tak a ni. Kei ngei pawh kha interview vawi 4 lai ka hma chhawn kha a ni a, kan Mizoram sawrkara ṭha lo ka tih em em chu hmelhriat te nih avanga kan inthun ṭhin hi a ni. 

Kan hmelhriatte an ni emaw ni lo emaw hna thawk tura an tlin tâwk phawt chuan lak mai ni se ka ti ṭhin, chu erawh tunah chuan thil theih loh tluk a ni tawh thung si. Thuneihna sâng zawk te nena inlaichinna ṭha neih avanga hna nei ta hriat pawh ka ngah a, ka vui ve ṭhin chiang alawm, mahse lungngaia indawm kun lovin ka tum ka tiruh zawk ta ṭhin a, chu chu ka hna neih theih chhan pawh a ni reng. 

"Noel, i Phone-ah Documents ka rawn thawn tawh a, naktuka mi tur a ni a, lo siam fel mai teh aw" kan pu lam chu ka hawi chho vat a, bu nghauh nghauhin ka phone chu ka en nghal a, thil dang ka ngaihtuah luatah message tone chu ka lo hre lo hrim hrim.

"Eng em em nge i lo ngaihtuah leh bik tawh a, a message hmu thei la chu pu ber kha a lo kal miah lo vang maw le" Fakzualin a rawn tih chuan a dik hmel ka ti hle a, pu ber message hmu lo khawpa ka lo awm chu a mawi chiah lo a ni. 

"Keini te chu ni ila chuan min vin hrep ngei ngei ang, nang nu hi i luck ve reuh reuh nen hian i buaithlak ru tlat, pasal hi neihsan tak tak che ila ngaihzawng neih i châk sawt ka ring" a tih leh chuan

"Nei tak tak teh, tun lai chu sa ka ei khât bawk si, ka ei châk teh a nia" ka lo ti ve nghal a, ka phone leh Computer chu thlun zawmin pu ber min thawn File chu ka edit a, titi melh melh paha hnathawh chu nuam ka tih zâwng tak a ni.

"I sawi ai reng rengah ka nei lawk lo vang, ngaihzawng i neih hmâ chu pasal ka nei lo maithei a ni" a tih chuan a fiamthu tih ka hre mai a, thil dang sawi pahin kan hnaah chuan kan bur zui dun ta char char bawk.  

Kan hnathawhnaa pu ber hi kumin aṭanga rawn zawm thar a ni a, tlangval ngat a la ni a, a hmel pawh a chhe hran lo. Tun hnai deuh hian min hnaih dan riau a nei tlatin ka hria a, Fakzuali phei chuan min ngaizawng angin a ring hmak tawh nghe nghe. Tun hnai tih lemah thla 6 chhung vel chu kan inhrawn ve leh reng tawh a, mi â tan lo chuan ka laka pu ber awm dan leh chet dan vel chu hriatthiam loh chi a ni hran lo, mahse min ngaihzawn êm chu ka la ring thei chuang hauh lo. 

Hna kan bang a, inah ka haw tlang nghal a, kar tawpah hi chuan thil ei khawm hun kan nei zauh zauh a, vawiin pawh kan ei khawm hun ni a ni reng, mahse awm khawmuang lovin ka haw tlang ta zawk a ni. In ka thlen chuan intifai peih rih lovin ka mu nghal daih a, hna thawk hah tak ni lo mah ila ka chau ru deuh nghulh a, ka mut chu a chhuak em em bawk. 

Ka harh leh meuh chuan khua a lo thim vek tawh a, zan dar 8 leh a chanve veleh chaw ka ei ve ta chauh a, ka chhungte chuan min sawiselna an nei chuang lo. TV enin sitting room-ah an ṭhu ṭhap a, an thil en chu an en tui hmel hlawm khawp mai. Rei lovah ka ril a rawn ṭam leh a, chaw ka ei tlêm ve bawk êm a ni.

"Dawrah ka kal lawk dawn a nia" tih leh in aṭanga chhuah chu ka rual a, tûma'n min lo chhang lo va, an en tui hlawm hle a ni ang. 

Kan unau hi pa 4 kan ni a, upa ber ka ni a, ka chhang chiah hi zirna avangin Bangalore-ah a awm mek bawk a, mi dang zawng chu Mizoramah kan awm kim vek thung. Ka nu leh pa hi sawrkar hnathawk an ni lo ve ve a, ka pa hian ar a vulh ṭeuh a, ka nu'n a pui bawk a, hna ka neih hma chuan chu chu kan eizawnna leh kan chhungkaw inchawmna ber a ni ṭhin. Hmân aṭang tawh reithei lutuk tia sawi tur kan ni ngai lo va, hausa vûr pawh kan ni ngai chuang lo. 

Dawr ka thlen chuan Waiwai leh Lays tih ang reng vel chu ka lei nual a, Cococola bur lian chu ka lei tel bawk a, ka nau te'n an duh ve leh ngei dawn tih ka chiang a ni. Kan in bul ka thlen chuan Car hi a lo inhung a, kan ṭhenawm te inleng a ni ang ti dawn ila Car in-park-na chu a rawn phei deuh bawk si, inleng kan neih lah ka ring chiah bawk si lo. Chutia ngaihtuahna sênga roh rôh chunga ka kal lai chuan car chhung aṭang tu emaw ni hi a rawn chhuak thut a, ka phu dâwrh nghe nghe.

"Noel" ka hming ngeia min kotu lam chu ka hawi let a, a aw lah chu ka hriat hnu a la ang em em zui, hlau ru deuh tho mah ila kan in ka hnaih thawkhat tawh avangin hlau ang taka lan chu ka tum leh ta lo. 

"Eng nge i tih?" a aw aṭang chuan mipa a ni tih chiang takin ka hre thei a, ka dinna lamah a rawn phei zel a, a aw chu ka hriat hnu mah ni se ka hre chhuak thei rih mai lo va, khawiah emaw ni tak chuan ka hre tawh chiang a ni.

"Ka lo kal a" tih leh en awmna china rawn din lan chu a rual nghal a, a lo kal hnai tial tial a, a hmel ka hmu thei chiah chu ka va han hamhaih tehreng em. 

"Sir Mam!" ka ti deuh hluai a, tun ang huna a hmel hmuh chu ka inbeisei teuh lo, chutah kan in kawt maiah leh nghal, engtin nge kan veng leh kan in awmna chu a hriat reng reng? 

"Lut ila" ti supin min rawn din hnaih zual a, mawl hmel zet hian ka lo chhoh en hâ a, ka thil pawm bawr ṭun a hmuh chuan a meng nur hle bawk.

"Eng nge lo tih i tum? Eng nge i lo tih dawn?" ka zawhna chu a âtthlak tih ka hria, a awm danah chuan lo len a tum tih ka hrethiam tho nain lo len a tum chhan chu chu ka hre lo a ni. 

"Eng nge ka lo tih i rin?" a rul tawk chiah hian min chhang let zel a, a ṭawngkam vel chuan hmâna kan Sir Mama ṭhin kha min tihre chhuak nghal a, ani pawh kha zawhna hmang veka inchhan a uar tak alawm a nih.

"Ka hre lo, i rawn lang teh thut bawk si a, mak ka ti deuh alawm le. Lo kal rawh, ei tur te hi kan ei dawn nia" tiin kan in kawngka lam chu ka pan a, zep lovah chuan ka zam ru leh er er tawh a, mahse tihlan erawh ka tum hauh lo. 

In chhunga kan luh chuan ka nu leh pate chu an lo hawi chhuak lawk lo va, sir Mama an hmu chiah chu an ṭhu ṭha nghal sawt sawt a, ka nau te pahnih pawh an ṭhu ngil thuai a, ṭhutna tur an luah hneh ve êm bawk a ni. An bula ṭhu khawmuang lovin choka lamah ka lut a, Cococola chu Fridge-a dahin thingpui chu ka lum zui nghal bawk a, thingpui nena ka chhuah leh chuan ka pa leh sir Mama chu an lo ṭawng melh melh a, a khât tâwkin ka nu pawh a ṭawng ve zeuh zeuh.

Waiwai leh Lays bawl chu thingpui hmeh atan ka chhawp a, ka nau te nen tui ti taka kan ei laiin sir Mama erawh chuan a ei duh miah lo thung. Thingpui chiah chu a in a, ka thil ei lai chuan min rawn en leh zeuh zeuh ṭhin a, kan inen fuh apiang chuan ka hawi sawn rang thei khawp. Thingpui kan in zawh rualin ka seng fel leh vek a, no leh plate ka sil lai te chuan sitting room lam chu ka va thlek leh ṭhin a, ka ngaihtuah ngîal paw'n sir Mama lo len chhan chu ka hre lo a ni. 

Ka sil zawh chuan sitting room lamah ka ṭhu phei a, tih tur awm tawh hek lo. Room-a han luhsan daih lah chu thil mawi a ni der si lo va, sawi tur hre lo zetin sitting room-ah chuan ka ṭhu ngawi reng ringawt. Ka phone khawih ka tum deuh ûk a, mahse ka la charge full bawk si lo. Ka phone hi a chhe ve ang reng tawh a, a battery hi a chhiatna ber chu a ni mai. Charge full thlap hnuah pawh rei lo tê khawih ila battery a kal thla dûak dûak zel a, tun thla hlawh ka lak hunah lei ka tum phah hial a ni. 

Dar 9 leh a chanve bawr velah sir Mama chuan haw lam zai a rel ta a, ka nu leh pa chuan lo leng ziah turin an chah thlap a, kei erawh ka la ngawi reng a, sawi tur ka hre hlawl lo a ni. Lo leng ziah turin ka nu leh pate hriat lai chuan han sawm ve ringawt dawn ila kan inngaizawng emaw an tih ka hlau ru tho bawk si, a theih chhung ṭawng loh chu a finthlak zawkin ka hria. Sir Mama nen chuan pawnah kan inzui chhuak a, ka hmaah ngawi reng hian a kal a, a rawn leh hawi thut a, ka ding ve chawt nghal.

"Min hlau em ni?" a rawn ti ta ngei a, ka awm dan aṭang chuan hlau te pawh ka ang tak tak a, mahse ka hlauh vang pawh a ni chiah lo, amah chu ka zah ru deuh tlat zawk a ni.

"Chuti ang lam pawh a ni lo" ka ti thâm ṭiak a, ka duh dan tak chuan haw thuai thuai se ka ti, inawm hnaih lutuk lo mah ila a huhâng chuan min rawn khuap pha tlat a, a nuam lo lam lek lek a ni. 

"A nih chuan eng lam nge?" dilchhut zeta a rawn ṭawng dan vel chuan hun kal tawh min hriat chhuahtir leh ta nge nge a, a bikin Higher kan nih ṭan tirh kuma chahbi ka dil lai kha ka hre chhuak lo thei lo.

Chumi ni chuan a tuk maia kan Section-in Devotion kan Conduct dawn avangin Rehearsal neih kan tum a, kan Class Representative-in chahbi la turin min tir a, chahbi tel lo chuan Hall chhungah a luh theih tlat loh a tin ni! Zam chung chungin zirtirtute room-ah chuan ka lut a, an lo ṭhu kual ṭhap a, min ngaihsak lutuk hlawm lo mah se ka zak ru em em tho. 

Sir Mama Table lamah chuan ṭi dêkin ka kal phei a, ani chuan buai hmel taka lehkha a ziah mial mial avangin a ṭhutna lam ka pan tih pawh a hre kher lo vang. Ka aw thian kharhin sir Mama chu ka ko va, min rawn en chiah chu zam namên lovin ka zam zui nghal. Mizo ṭawngin chahbi ka lak duh thu chu ka sawi a, min en ran ta mai.

"English-in sawi rawh" a tih deuh hmuk avang chuan English-in ka sawi ṭha ve leh mai bawk a, ka chhungril lam chu a khur der der a, ka thinphu pawh rang ṭha tak a ni.

"Eng atan nge?" English-in zawhna min rawn zawt leh a, sawi mai tumin ka kâ chu ka âng zuai a, mah se sawi hlei thei lovin ka awm tlat a, ka tih ngaihna hre lo chu ṭawngthei lo ang maiin ka ngawi ta ringawt. 

A tarmit kar aṭanga min en run pahin Class 9 leh 10 te'n Pre-Board Exam an neih thu chu min hrilh hmasa tê tê a, eng eng emaw ni a sawi hnu chuan chahbi chu min pe ve thei ta hram bawk. Khami ni kha ka hun tawn mêk ang maiin ka la hre chiang em em a, hmaichhana kan inbiakna hmasa ber ni a nih vang pawh a ni maithei.

High School zirlai kan nih aṭang tawha duh ru ngawih ngawih kha ka ni miau a, mahse amah tak chuan a laka ka rilru puthmang chu a hre ngai lo. Ka duh bur a, ka vei bur bawk a, ka chan phakah erawh ka dah ngai chuang lo va, amah avangin ngaihzawng ka neih rei theih loh phah hial bawk. Chuti chung chuan ka pawh ṭha ngam lo va, ralkhat aṭang a tan ka lo rinawm ve em em ringawt a ni ber. 

"Ka ṭawng i hria em?" rawn ti tu lam chu phu zukin ka hawi thuai a, min lo din hnaih zual tawh a, hun kal tawh lo ngaihtuah kual vel vak vak lo ila chuan ka meng buai lo tawp ang maw le. 

"Aw, eng lo....ka...ka hria e" bah nawk nawk chuan ka tichhuak thei hram a, eng vang teh thuta ṭawng harsat chu nge ka nih ka hre bik lo, kan indin hnaih tawh em em zui leh nghal. 

"Hmân ang kha i la ni em?" a zawhna avang chuan kâ hau chungin ka en chho vat a, hamhaih zetin awm mah ila ani chu a thutak hmel hle thung a, a zawhna chu han chhan mai dan tur pawh ka hre lo.

"Min chhang dawn lo em ni?" a rawn ti leh sup a, chhungril zam em em chung chuan thawk ka la halh a, kum a liam tam tawh tehreng nen engati nge ka la zam tlat mai le, thil a tibuaithlak zo vek.

"Ka hre lo" chu thu bak chu sawi tur ka hre rih lo, inngaihtuahna hun tlêm tê tal awm se chu chhan dan tur ṭha zawk pawh ka hre mahna, mahse tunah chuan a chawpchilh tawh lutuk a ni. 

"Lo leng duh ta ila i phal ang em?" zawhna hlirin min bia a, leh lam kawng zawng tak chuan a hneawm ṭan tawh, zawhna tel lo paw'n kan inbe thei reng ang chû.

"Ka phal leh phal loh lam pawh a ni hleinem, i lo len duh phawt te chuan i lo leng thei reng alawm, ka nu leh pate paw'n an phal êm khâ" ka ti ta duah a, a bula ka la ṭawng thui ber ṭum a ni hial ang.

"Nang berin i sawi loh chuan ka rawn leng inthlahrung deuh alawm" he pa hian eng thil chiah nge a hriat le, mi ina leng inthlahrung turin rawlthar pawh a ni tawh lo va, a thusawi chu ka awihsak duh der lo.

"I duh chuan lo leng ziah rawh" ka tih chuan a lo nui suk a, chu pawh hnai taka a nui hmel ka hmuh vawi khatna bawk a ni leh ta.

"I lo puitling viau tawh ang chu tih nâk a laiin Waiwai leh Lays tih vel mai mai ngaina rual ang lêk i lo la ni reng a nih dawn hi!" nui ri zeuh pah hian a rawn ti a, a dinna aṭang chuan kal sawnin motor chhungah a ṭhu lut a, min tlan pelh pahin a rawn nui tawi leh tak bawk. 

In chhunga lut ta mai lo chuan pawnah ka ding deuh vung vung a, ka biang tawn tawn chu ka khawih a, ka hmai chu a sa hut hutin ka hria. A ṭawng dan kalhmangah kha chuan hmân aṭang min lo hre ve tawh ang mai alawm a nih le, chu erawh thil theih loh tluk a ni. Ani te chu zirtirtu a ni a, kei lah zirlai tam tak zinga hmeichhe pakhat ve mai chauh kha ka ni a, min hre thei lo hrim hrim. 

Kum 10 dâwn liam hnuah tum loh deuhin kan inhmu leh ta chauh a, engtin chiah nge kan veng leh kan in awmna a hriat ka hre lo va, keimah thlêng thlenga min rawn hre chat te chu mak ka ti tak zet. Ka duh ru em em ṭhin tih leh tun thlengin amah avanga ngaihzawng nghet pangngai tak ka la nei thei lo tluang zel tih te chu a hre palh reu reu ang tih ka hlau thar hle a, a hriat vaih chuan ka thi a ni mai.

Khuma ka mut hnu thleng chuan ka ngaihtuah roh roh a, a mak ve êm asin, ka ṭhiante pawh hrilh ila chuti ang teh thuta kan inhmuh chu an ring bik hauh lo vang. Kan ina a rawn len thu sawi phei ila chuan an awih lo nasa dawn lutuk, kei ngei paw'n ka la awih pumhlum thei lo zawk maw le. Ngaihtuah buai duh tawh lovin rizai chuan ka inkhuh hmak a, ka mit chu ka chhing zui vang vang bawk. 

Zingah chuan dar 6 leh a chanve velah ka harh a, ka Alarm set erawh dar 7 velah a ri daih thung. Tui taka mut tum hle si kha ka muhil ṭha thei der lo va, chuvanga tho hma pawh chu ka ni reng. Dar 6 leh a chanve te chu mi nawlpui thawh hun a ni a, mahse ka tan chuan a hma lam hret chu a ni. Ka nu chu ei rawng bawl pahin a zai rât rat a, zai thiam hran lo mah se zai hi chu nuam a ti ve chiang a ni.

Tukṭhuan ei laiin ka pa chuan sir Mama chanchin min rawn zawt deuh hlawl a, chhan dan tur ka va'n baihvai tak em. Ka mipa duh ruk kumhlun a nih thu han sawi ringawt lah chu a tih chi loh nasa mai bawk si, ka ngawih deuh vang vang hnu chuan High School-a kan zirtirtu a nih ṭhin thu chu ka sawi ta tawp. Ka ṭhianpa tia phat mawi chu ka tum hman deuh a, mahse dawt chiangbal a nih avangin thu dik ṭhenkhat chu ka sawi ta zawk a ni. 

Thla tawp kan chuangkâi a, ka phone chhe ve tawh zet chu thlak turin dawrah ka kal a, ka ṭhiannu chu hman se chuan keimahin ka kal miah lo ang. Phone lei ka tum ni ber kherah an chhung leh khat te nen picnic an nei dawn a, kei pawh min sawm ve nghe nghe a, mahse ka kal duh ta lo. Ni lah chu a sa ang reng viau a, nihliap tal lo keng ila chu a zia deuh ang maw le. Khaw lum thla a ni tawh a, sik leh sa inthlak danglam avanga lo lungawi loh ringawt pawh chu a fuh ber lo, awmzia a awm lo tlat a tin ni! 

Arsa deliver nân ka Scooty ka pa'n a hmang daih a, Bus-in Bazar lamah ka kal a, Temple kan thlen chuan Traffic a rawn Jam titih der a, a Jam rei hmel fû bawk si a, kein ka kal ta ringawt. Zodin Bus Stand bul vel ka kal phei lai te chuan kawngpuiah motor an intlar phei ṭhap a, an nin hmel hlawm hle. Traffc Jam hi chu a ninawm thawkhat ve chiang alawm, hmanhmawh thil thuah phei chuan kea kal pawh a hlawk zawk lek lek chang a awm ṭhin.

"Noel" ka hming ngeia min kotu lam chu ka hawi duh lawk lo va, a aw aṭang mipa a niin ka hria, kal reng pah chuan ka hre sual a nih ring ru zetin ka hawi let a, ka mipa va hmuh chuan min tiding deuh chawt a, min lo la en chiang em em zui. 

"Khaw'nge kal i tum?" kan awmna a inhlat lutuk lo na a, a rawn ṭawng ring ang reng hle, kal sawn ta mai lo chuan muangchangin ka let leh ta zawk a, kan Sir kha a lo ni ve tawh miau a, min biak chuan ṭha taka chhan mai ka tum.

"Bazarah thil lei lawk tur ka nei a, Traffic a Jam rei hmel bawk si a, kein ka kal ta ringawt a nih hi!" ka aw chu a zâng vah a, ka rawmawl chuan ka hmaia thlan lo chhuak tur chu ka dep hul zeuh zeuh bawk.

"Lo chuang zawk ta che, a Jam rei ka ring tawh lo" a tih chuan ka lu ka thing nâng nang a, ani nena motor chuan dun chu ka duh chiah em tih ka hre lo, amah chauhin a ni leh ta nghal a, inhnaih lo law law ila a ṭhat ka ring. 

"I tilawmawm lutuk Sir, mahse kea kal hi ka duh zawk mah a, ka kal nghal mai dawn" nui lui sâng chung chuan ka ti a, aw leh aih paw'n min rawn chhang tawh lo va, muangchang hman vak ka nih loh avangin ka kal sawn zui nghal ta nal nal.

Kan ina a rawn kal zan aṭang khan kar 2 lai a liam leh tawh a, zan tin lo lêng duh ni awm takin min dil mah se a hmel ka hmu chhunzawm ta lo char char a, tunah kan inhmu leh thut a, kan Sir a nih vang nge ni ka pawh ṭha vak ngam lo. Nêla pawh viau tur ka ni chiah em tih te ka ngaihtuah roh roh a, mahse ka ngaihtuah rei duh lo, a ṭul teh chiam lo tlat a ni. Lo len a duh thu a sawi a, a lo leng leh chuang lo va, a duh dûhin awm rawh se, lo ngaihven ve vak tur ka ni lo. 

Phone dawrah chuan thlan chhuak ser sêrin ka lut a, ka rawmawl chu ka hmang ngun khawp mai. Dawr nghaktunu chuan Samsung Company min lo recommend a, a to phian leh nghal. Samsung Company phone hi chu ka ngaina lutuk lo, a ṭha chin tawh hi chu a to zel bakah duh aiin a chhe hma hret ka ti, rei tak hman atan chuan ka duh lo a ni ber e. 

Company chi hrang hrang chu ka en kual den den a, a ṭhat hlawm viau rualin a to pangngai hlawm hle. Phone nei rei chi tak ka ni roh a, chuvang chuan chhe hma deuh tur chu lei ka tum lo bur. Cheng 5000 man bawr vel chu ka lei a, ka en kual fê hnu pawha ka duh ngat kha a ni ve a, chuti maia a chhiat hma ka ring lo. A battery ni se ka phone hmasa lêt a ni a, servicing a awlsam mai bakah lo tichhe palh ta pawh ni ila a part Aizawlah a awm kim nghal vek bawk. 

"Noel" dawr aṭanga ka chhuak tur chu mipa aw bawk ka hre leh ta, kan hnathawhnaa kan pu ber chuan mak tih hmel deuh hian min lo en a, kei pawh ka bang chuang lo, phone dawr chhunga kan inhmuh chu ka ring lo a ni.

"Eng nge i tih a Sir?" zah ru tak chungin ka ti hluai a, phone a lei ti dawn ila lei hmel a pu bawk si lo va, a awm dan aṭang lah a mikhual lo tih a hriat hle a, dawr nghaktunu pawh chuan phone en kual turin a ti ve miah lo. 

"Eng ti lo ve, hei hi ka dawr alawm a nih" a tih chuan a hma aiin mak ka ti lehzual a, ka bulah a rawn kal phei a, hnathawhnaa kan pu ber a ni bawk si a, ka lo en ṭha ngam der lo, a dawr ber khera phone lei chu ka tum bik lo asin le.

"Eng zat man nge a lâk? 30% velin i tlawm dawn nia, a kal duh tawh ang han tihsak law law rawh" tiin dawr nghaktunu chu a biak zawm leh zat a, ka tan chuan ngawihna chi a ni ta lo.

"A ngai lo Sir, kan inpe fel vek tawh alawm, min tlawm duh suh" ka ti ta thuai thuai a, ka hmaa dawr nghaktunu lah chuan pawisa a rawn phawrh a, a chhiar diat diat a, min pek a tum ta tak tak mai. 

"A ngai lo tak tak a nia Sir, ka kal dawn" ti lehin dawr aṭang chuan ka kal chhuak ta vat a, dawr hlata ka awm chiah chu ka thaw huai a, pu ber hnen aṭanga chuti ang dawn chu ka duh teuh lo mai, min hmuh dan a dang vek palh ang. 

Footpath-ah chuan hahdam zetin ka kal a, Bus-a chuan châkna pawh ka nei chuang lo. Higher kan kal lai aṭang tawha sa chek kan ei ṭhinna ber zawnah chuan ka ding a, an sa chek siam rim chuan ka chil tiput tak a ni. Dawrah chuan lutin ka ṭhu zui nghal a, dawr chhung chu a tê ang reng a, kan tleirawl chhuah tak tak laia mi ang tho kha a la niin ka hria. Hmeichhia mah ni ila sa chek hi ka ngaina teh tlat a, ka ṭhian mipa te nen kan ei nasa ve ṭhin alawm, tui ti miau hek! 

Artui chu ka chhu keh a, sa chek ka hawp loh laiin ka ei leh zeuh zeuh ṭhin a, a va'n tui tehreng em. Chawhnu her a ni ṭan vel chiah a, ka ṭhutna bul tukverh hlui ve tawh tak aṭang chuan thlifim a rawn thaw lut heuh heuh a, ka inei puar hnuah pawh ka ṭhut deuh reng phah nghe nghe. Dawr aṭang chuan ka chhuak a, footpath-a mitdel lo ṭhu chu pawisa ka pe leh hram a, khawmuang tawh lovin ka kal ta vang vang. 

Treasury Bus Stand ka thleng phei a, kawng zawh hi an lo awm a, school emaw college naupang an ang ka ti chiah lo, Party lampang an ang ka ti mah zawk. A ṭul leh ṭul loh lam ai chuan a ṭul kan tih hunah hian kawng kan zawh mai ṭhin ni te'n ka hre ta hial a, thil reng reng hi chuan hun dik tak leh hmun dik tak a nei chiang a ni. Inrinnia kawng an lo zawh daih chu mak ka ti thawkhat a, khua a lum bawk si nen an taima letling zawk alawm le. 

Kan in ka thlen chuan eng dang ti hmasa lovin ka inbual nghal a, dai nuam sawng sawng tak a ni. Ka pa pawh a lo haw tawh a, inrinniah hi chuan ni dang ai kan buai zual ṭhin tlangpui a, Hotel vela order neuh neuh bakah bazara ṭhutpui tur kan pe chhuak nasa thei hle. Ei rawng bawl nân la hma deuh mah se behlawi hnah chu ka thliak neuh neuh a, vawiin tlai chu buh nen ka'n bai teh ang, ka ei châk tlat. 

Khua a rawn thim a, dar 6 leh a chanve velah chaw kan ei a, chaw kan ei lai takin ka phone a rawn ring a, mahse chaw ei lai hi chu ka ngaipawimawh hrim hrim a, ka la duh ta lo. A ring tawp hnu lawkah a rawn ri leh a, chutah erawh thil eng emaw a awm a nih ringin ka tho chhuak a, caller ID ka en chuan Boss David-a tih a lo inziak kuau a, ka la rang teh e!

"I buai em ni? Ka lo call hun hi a fuh vak lo zawk nge?" dam thlup hian a rawn ti a, hna thil avanga office kal lawk a ngaih thu a rawn sawi turah ka ngai hmiah a, mahse a rawn ṭawng zawm nghal mai lo.

"Buai lo ve, chaw kan ei mek a, eng nge ni ta Sir?" chil lem kâlh pah chuan ka lo ti ve mai a, ka chaw ei tui lai tak a ni a, a bo vek ang tih erawh ka hlau hle, chaw ei laia thaw sêk hi chuan a ei tui tak tak theih loh ṭhin. 

"Eng ni lo ve, zanin chu ka rawn lêng ang chu ka tia, ka lo sawi lawk mai mai maw le, chaw kha ei pûk puk leh tawh rawh" tih leh kan inbiakna chu tihtawp a rual a, ka hlauh ang ngeiin chaw ei châkna ka nei zui ta vak lo, pu ber thusawi chu a mak teh thut êm a tin ni!

Chaw kan ei kham chuan rilruah pu ber thusawi chu a awm deuh reng a, a rawn kal duh tak tak ka ring chiah lo va, ka ring deuh tho bawk si a, ka rilru chu a inkawkalh nûai mai. Phone thar ka nei ta bawk a, ka thleng silna bulah chuan ka zai tir a, thleng sil pahin ka sak pui sep sep a, mi dang erawh sitting room-ah an awm leh vek tawh thung. 

Thleng ka sil zawh rual deuh thawin inlêng kan nei a, mahse ka mi hmuh chu beisei lo tak ka ni. Enga tinge zanin ber khera a rawn lan thut le, pu ber lahin lo len a tum thu min hrilh tawh bawk si. Thingpui siam nân a la hma ang reng hle a, sitting room-ah chuan ka ṭhu ve ren rawn a, phone ka khawihsan ta daih. Sir Mama leh ka pa erawh eng emaw ni an sawi a, ka pa chuan zawhna a zawt vak lo bawk. 

Ka pa hi chu a ni ve hrim hrim, mi a kawm tam hma hi chu an mimal hna leh thil dang a zawt duah ngai lo va, a kawm kawmin a kawm tawp zel. Kei chuan Sir Mama chu zirtirtu a nih char char ka la ring a, a chezia vel aṭang chuan a nih hmel tlat. Ka in chhung ngeiah a ṭhu chu a ni si a, a mak ve ngawt mai. Kum eng emaw zah chhung ka lo duh ruk ve ngar ngarin min rawn len chilh a, mahse a lo len chhan tak hriat a la ni lo thung. 

Kawngka chu pawn lam aṭang an rawn kik a, ka nu chuan a lo chhawn thuai a, pu ber a rawn lang ta hlawl mai. Pu ber chu ka bulah tak a lo ṭhu a, sir Mama lam ka hawi zeuh a, min lo en chiang teh e! Sir Mama ang lo takin hnathawhnaa kan pu ber David-a chuan an veng leh ka ṭhian a nih thu chu hawihhawm takin a sawi a, ka pa chuan zawhna min rawn zawt ta chiah a, kan inhriat dan leh a nihna chu ka sawi zui nghal. 

Dar 8 bawr velah thingpui lum thawh khatna ka nei a, thingpui ka pek lai leh ka in lai te chuan Sir Mama mit chu keimahah char char a fuh a, ka pa ṭawng chu a hriat tak tak pawh ka ring lo. Kan boss David-a ve thung chu a tlangnel nghal hle a, ka pa nen pawh an titi thei viau a, ka nu thlengin thil a sawipui vek thei. Kei chu ka nau te pahnih bulah ka ṭhu ta daih a, Sir Maman min en reng chu nuam lo ka ti ru hle.

Dar 9 leh a chanve velah thingpui lum thawh hnihna ka nei leh a, Sir Mama chuan min en run tawh bik lo va, ka awm a nuam sawng sawng mai. Dar 10 rik dawnah kan boss David-a chu a haw a, Sir Mama erawh a lo len hmasak zawk ang lo takin a la ṭhu reng a, ka chhungte chuan min la mutsan daih zui. Inhmachhawnin kan ṭhu ngawi reng a, sawi tur vânzia chu pui tak a ni. Kan TV-a lang mêk lah chu Ben 10 tih vel a la ni zui, hmuhnawm loh ti zetin ka en lui ngar ngar ringawt. 

"Haw ka va hnaih ang e" tiin a tho ûaih a, kei pawh ka tho ve nghal vat a, dik tak chuan haw tawh mah se pawi ka ti lo, sawi tur a vâng si, amah talin sawi tur hria te chu ni se thuhran, a hriat hmel bik der si lo. 

Pawn lamah ngawi reng bawkin kan chhuak dun a, hriat nuam takin inmangṭhana thu chu ka sawi a, a motor hunna bul thleng chu a kal hman tawh tihah a rawn leh hawi a, ka dinna lamah chuan a lo phei leh ta mai. Zawhna hlir ka rilruah a awm a, zawhna mitmeng bawkin Sir Mama chu ka lo en kar bawk. 

"Ka tlai tawh nge la tlai chiah lo?" a zawhna chu a mual bovin ka bo va, mawl hmel zetin ka en chho hû ringawt a, ani ve thung chu a hma ang bawkin a lo thutak hmel run leh tawh.

"I zawhna awmzia ka hre lo" ka tih chuan min en reng chung hian a kekawr iptê a zen rawk rawk a, phone ṭhat hmel zet hi a phawr chhuak a, ka lama rawn lek pahin

"Rem i tih chuan i phone number min pe ta che?" a rawn ti sup a, ka lo meng â leh ta vek, pek tur nge pek loh tur tih tak ngial pawh ka ngaihtuah thiam rih lo va, a chet dan leh a thusawi chuan min ṭhawng a ni ber.

"Noel" tih leh a phone chu ka kuta hmehbel a rual nghal a, sir Mama laka ka awm dan âtthlak zet chu ka hre chhuak a, keia phone number ve mai mai te a duh a nih phawt chuan pe mawlh mawlh tur zawk ka ni. 

"Aw....nia...rem ti e" ka ṭawngkam chhuak chu a phelh deuh phung a, a hmel en tawh lovin ka phone number chu ka type zawm ta malh malh a, a rim nâ lutuk lo amah nena inmil ru riau chu ka hip lut a, kan indin hnaih bawk si nen ka zam ru leh tawh hle. 

"Hmân ang kha i la ni em?" a phone ka pek lai chuan a rawn ti thum bul a, chu zawhna chu a vawi hnih min zawhna a ni tawh, a hmasa zawkah kha chuan ka hriat loh thu ka sawi a nih kha! 

"I student kan nih laia mi ang te kha chu kan ni reng thei bik nâng, kum tam a liam tawh ang bawkin kan danglam ve zel alawm" mawihnâi tak chuan ka ti a, ka chhang ṭha viauin ka hria.

"A nih chuan a harsa tawh dawn tihna a ni maw?" min bia nge amah leh amah a inbia pawh ka hre lo, min en tawh lovin hmun dang a hawi a, kal sawn erawh a la kal sawn lo cheu. 

"Ka va haw phawt ang e, muttui" amah bawk chuan a rawn ti leh a, ka chhan lêt hmain a kal nul nul a, min tlan pelh dawn lai tak chuan min buk khum zeuh a, engtin mah ti lêt ve lovin ka lo en tawp ringawt. 

Thla thar kan kâi chho chiah chu thla dang zawng aiin kan buai a zual a, kan boss David-a pawh pu ber ni mah se a awl mai mai bik lo. Zan dar 6 dawna haw te kan nei ngun ta hle a, pu ber chuan kan hlawh a pun dawn thu a sawi leh zauh ṭhin bawk. Kan hah tlâng a, kan buai tlâng a, kan haw tlai tlâng bawk a, mahse a tua te ma'n nuam lo tihna kan nei chuang lo.

Hnathawhna hmuna thil ei khawm te kan chîn thar phah ta zawk a, kan taksa lam chau tlâng mah se ka rilru erawh a zâng vah a, rilru ber a nawm hi chuan eng pawh ti ila a tih luih theih vekin ka hria. Kan boss David-a chu kar khatah vawi 3 te a rawn lêng ta ziah a, ka nu leh pa paw'n an hrethiam deuh tawh nghe nghe. Sir Mama erawh a reh leh vawng vawng tawh a, lo len a phur leh chiah lo a nih ka ring. 

Phone number ka pek zan la lâ khan Whatsapp-ah message ka dawng a, number save tura in tihna thu chauh a ni a, chu chu amah a nih ka ring hmiah bawk. Naupang thu awih tak ang maiin a number chu ka save ve mai bawk a, mahse chu thu bak chu a hnen aṭang ka dawng leh tawh lo. A buai ti dawn ila a hnathawh dik tak ka hre leh chuang miah lo va, ngaihtuah zui loh chu a finthlak zawk a ni. 

Thla kan hmang ral a, kan hlawh chu a pung ta ngei a, dine out te kan nei hial a, tun ṭum chu tel lohna chi a ni lo, a nuam ka ti ve tlat. Kan boss David-a chuan zu in a phal lo bur a, mipaho chuan an keng lo reng bawk a, mahse kan boruak chu a nuam daih zawk. Zu te in se chuan an rui emaw te kha a ni ang a, buaina a chhuak lo vang tih pawh a sawi theih loh. 

"Pu ber nen hian in inngaizawng tak tak tawh em ni? In veng lama a kal zin thu ka hria a nia, a kal chhan chu nangmah i nih ngei ka ring bawk" Fakzuali mai mai ṭhin hi chu âw, a rin thuin thil a sawi tawp tawp zel mai zawng a nih hi!

"I ti awm ang lo thei em mai, pu ber nen hian kan inngaizawng reng reng lo, ani nen chuan ṭhian mai chauh kan ni" ka tih chuan awih loh hmel zet hian a chek ri tlak tlak a, a awih nghal mai dawn lo tih ka hre chiang em em bawk.

"I la zep hram chu a nia, min hrilh ma lêk rawh, nakinah thu dik chu a rawn lang chhuak mai ang" lungawi loh hmel deuh hian a ṭawng a, ka nuih a tiza letling zawk, khawvela titau rei lo ber a ni leh ngei ang. 

Kan hna ve ve chu kan thawk leh ta mial mial a, thla hmasa ang em emin kan buai tawh lo va, pu ber chu hna thil avangin a zin rih a, a awm lo chiah chu kan nawi tlâng thei khawp. Ka thawhpuiteho nen hian kan inrual khat hle a, upa fâl tia sawi tur kan awm lo va, kan Department-ah chuan pu ber David-a tih loh chu kum 30 kâi pawh kan la awm lo a ni. Chuti ang kan nih avang chuan hnathawkho chu kan titi a rual lo thei lo, mahse kan hna kan thawk ṭha em em tho. 

Zan khat chu sir Mama a rawn lêng leh hlawl a, ka chhungte chu ka pu te inah an lêng vek a, kei erawh in lama khawih chhunzawm tur hna ka neih avangin ka lêng ve ta lo va, mahse hna chu ka thawk sawt mawh khawp. Inlêng neih laia Laptop ringawt ensan daih chu a mawi bawk si lo va, a hnuah phei chuan ka khup ta tawp a, thingpui te ka lum hnuhnawh leh vel a, kan ṭawng tam lo dun leh hle. 

"Zanina khawih zawh ngei ngei tur ka nei a, ka ti lawk dawn aw Sir Mam" inthlahrung ru zet chuan ka ti a, a lo bu nghat nghat a, Laptop chu ka on zui nghal a, zep lovah chuan ka inthlahrung ve tak zet. 

Ka hna thil chu khawih mial mialin minute eng emaw chen ka awm a, Sir Mama pawh ka ngaihsak lutuk thei lo. Ka khawih zawh rualin ka zi mar ṭuah ṭuah a, Sir Mama lam ka va hawi chuan lehkhabu pakhat hi a lo en a, a tlei tleiin a tlei ve reuh khawp mai. A ṭhutna lamah chuan ka phei a, a thil en lai chuan ka mit a la tlat a, ka song book a ang ka ti em em bawk. 

A bul ka thlen rualin a thil en lai chu rang zetin ka pawt thla vat a, ka hlauh ang ngeiin ka song book ngei a lo ni e. Lehkhabu kar aṭang chuan thlalak pakhat a la tla zui a, ka va han che buai tak em. Chhuata thlalak awm chu a en reng a, ka kein ka va rap vat a, ka ke vek chuan ka hnuk phei sawk sawk a, ka zah dan chu pui tak a ni. 

Engkim a hmu hman vek awm si a, enga tinge ka lo ngaihtuah kim miah lo le. LALNUNHLIMA khan ka song book chu a la chhuak a ni ngei ang, chaw ei kham tirh khan a zai tak e. Lo dah fel vat tur ka ni asin le, Laptop ka khawih chhung zawng khan a lo en char char dawn tihna a nia, ka zak lutuk chu ka thi thei mai dawnin ka hria. 

"Noel" min koh pawh chuan a lam ka hawi ngam tawh lo hrim hrim, engtin nge ka hawi ngam tehreng ang ni, ka song book-a a thlalak ka bel zawng zawng a hmu vek dawn tih lah ka chiang ropui si, ka maimitchhing tawp ringawt. 

"Haw mai rawh, haw hram teh, tunah tak chuan keimah chauha awm ka duh rih a ni. Muangchang suh aw, haw vat vat teh" kun ngul chung chuan ka ti mawlh mawlh a, engtin pawh awm se ka en tawh dawn lo hi a ni tawp mai. 

"Ka hmu lo angah ngai tawp mai rawh" a rawn tih chuan zah lutuk avangin ka mit chu ka chhing nghet zual sauh a, zawh buai ngai lovin a ṭawng dan aṭang chuan engkim a hmu vek tih ka hre thei.

"Khawngaihin haw rawh Sir Mam" ka ṭap thei mai dawnin ka hria, Higher kan kal lai khan hre ta se tun lêt hian ka zak lo maithei, a chhan chu tleirawl ve mai chauh ka la ni miau a, tun thlenga a thlalak chi hrang hrang ka lo la kawl ṭeuh chhan chu a hre chiang tawh dawn lutuk tlat. 

"Aw le" ti supin a chhuak thawm chu ka hre zawm zat a, a awm lo chiah chu ka room-ah ka lut a, lukhamah ka hmai phumin ka au vak vak a, engmah lah chu siam ṭhat theih a ni tawh der si lo.

Ka bula phone chu a rawn nghawr dat a, en pawh ka en peih rih thlawt lo. Khumah chuan ka ṭhu awn duai a, ka song book chu ka la pawm ran bawk a, ka ngaihtuah lêt zawng ringawt paw'n ka zak a, LALNUNHLIMA tê zik zek chu ka hau chiang khawp ang, a zai duh apiangin ka song book a la chhuak ziah a, tun ṭum chu zah nen ka thin a rim tak zet. Phur lo zetin ka phone chu ka la a, ka message open hmasak ber chu

"Ka thaw a veng deuh hûai mai" tih hi a lo ni a, a rawn thawntu chu tu dang ni lovin Sir Mama ngei a ni a, min zuam phah sawt ka ring, mahse a zuam tura awm ka tum hauh lo, puitling ka ni tawh. 

Motor horn thawmah chuan ka harh a, zing kar a lo ni reng tawh a, ka lo muhil tlang daih tih ka hre chhuak zui nghal a, thawh phan ka nei lo chiang hle. Hmai phih sawk sawkin room aṭang chuan ka chhuak a, Nunhlima chu ka zawng a, mahse a hmel reng hmuh tur a awm lo. Ka thawh hma lutuk loh avangin hnaa kal turin ka ka insiam ta ringawt a, zan lama thil thleng avang chuan ka thinrim thar kher mai. Nunhlima kha chaw ei khamah zai vel lo se chuan Sir Maman ka song book a hmu lo vang a, a thlalak ka bel khat tûar tih pawh a hre lo ngei ang.

Chaw ei dawn têah ka pa nen ka hmu dun a, ka nu leh pa pawh ka zah zo tawh lo. Nunhlima chu ka hau hrep a, mahse kut erawh ka thlak lo thung. Duhthaw zetin ka ṭawng hmawk hmawk a, ka nu leh pate lah chuan engmah hrethiam lovin an lo chhan a, kan buaina chu hrilh chi a nih loh avangin ka sawi duh lo hrim hrim bawk. Ka lo ṭawng nasa deuh a ni ang Nunhlima chu a rawn ṭap ringawt a, mahni nau te ṭap hmel ka hmu chiah chu nuam lo ka ti nghal vawng vawng a, ka khawngaih leh em em tawh zawk a ni. 

Chaw ei chhung zawngin ka nu leh pate chuan min zilh ta char char a, kei erawh ka ngawi reng a, ka hauh vak vak chhan min zawh paw'n ka sawi duh der lo. Hnathawhna hmun ka thlen thlengin ka rilru chu a nuam lo tluang zel a, hau chiam tur ka ni lo tih ka hre chhuak bawk. Ani te chu naupang mai a ni a, engmah a hrethiam ve tak tak tawp nâng. Rilru pe lo zetin hna chu ka thawk malh malh a, Fakzuali min biakna pawh chu mumalin ka chhang thei mang lo va, chawhma chhung zawng chu ka mood a off tluan ta ṭhak. 

Chawhnu lamah erawh tlêmin ka mood chu zia deuh a, office aṭanga a lo chhuah apiangin pu ber chuan min rawn nuih zeuh ṭhin a, awm dan tur ka baihvai thei khawp mai. Lo nuih lêt ve ta ringawt ila beiseina a nei sâng nghal viau ang tih ka hlau si a, han nuih let loh lah chu a mawi leh chuang tawp si lo, ka rilru chu a insual nasa hle. Nilaini a nih avangin zan lamah a rawn lên ngei ka ring a, ani hi chu Sir Mama ang lo takin hunbi nei deuh hian a rawn lêng ṭhin a, a rawn lên zan tur ka ring thiam deuh tawh a ni. 

"Nichin khan kan inbia a, a hnaah a kai sâng a, zanina lawm a rawt a, nang pawh sawm tur chein mi ti a, i lo kal ang ti raw" hlim hmel zet hian Fakzuali chuan a ti siam siam a, zung turin a kal emaw tih laiin a bialpa Matthew-a nen an lo inbe leh hman tawh a ni ngei ang. 

"Ka hre nâng, Matthew-a chu ka va lawmpui ve âw" Computer lam hawi reng chung chuan ka ti thluk awn duai a, ka thil khawih lai chu a laklawh thawkhat a, ka khawih zo ṭep tawh nghe nghe bawk.

"Rawn lam kher i ngai ang em? I pa'n Scooty a hmang dawn em? Matthew-a nen kan lo lam thei tho che a nia, i lo kal loh ai chuan lo lam che kan inhuam zawk ang" 

"Ka hre lo le, zanin tak chu...eng lo a nia" ka tih laklawh lai chuan 

"Chhuanlam a siam theih loh, chhuanlam pakhat mah a awm tur a ni lo. I chhungte pawh keima'n ka dil vek mai ang, i lo kal ngei ngei a ngai" a lo ti thuai thuai a, ka rilru chu a buai leh ta hle.

"Dik tak chuan inlêng ka neih ka ring deuh a, lo awm bo daih kha a chi ber hleinem" ka ti ta sep a, Fakzuali chuan min rawn nam thle sawk a, ka ṭhiannu ni lo se chuan ka thinrim teh ang chu!

"Nang nu hian khawia inlêng mah i nei dawn lo tih ka chiang, awi......ni leh lo, nang hi bialpa i nei tak tak em ni? Pu ber nen hian in inngaizawng tak tak maw!? Awi Noel, awih harsa ka va ti ve" amah leh amah chu inhnial te pawh a ang zawk alawm le. 

"Ringawt che chuan, inlêng ka neih ka rin thu ka sawi avang khan bialpa ka nei tihna a ni lo. Chu bakah pu ber nen min sawi zawm tawp tawp zel suh, kan inkarah engmah a la awm lo" 

"A la awm lo, mahse a awm hnai thung ti raw? Awi kei chu ka lo lai vel, nang meuhin ngaihzawng i nei ve tawh dawn chu a nia, ka hlim nge hlim lo pawh ka hre lo" 

"Duh tawk teh LALFAKZUAL! I rin thu khan thil sawi vak vak zel ṭhin suh, a ni lo nasa thei si. Kan thawhpui dangte hriat laiin i sawi palh reu reu ang e, a chi loh viau ang" ka thil chhut lai chawl meuhin ka ti a, engah mah a lo la ngai lo zui. 

"In mak dun awm reuh ê Noel, pu ber lah hi a hmelṭha suah bawk si a, nang lah i hmel chhe ve reuh si, saw ka sawi chhuak ta hlawl alawm, kan awmna lamah a lo la kal zui" a tih chuan a hawina lam ka hawi vat a, pu ber chu a lo kal phei mêk tak tak a, hna lam pawh ka khawih chhunzawm thei ta lo. 

"Noel, Scooty i keng lo em kha?" tiin pu ber chuan min rawn be ta ngei a, kan bulah chuan a ding reng tawh a, kan bul tih lêmah kan hmaah a ni mah zawk, min en chiang khawp mai. 

"Aw keng lo ve, engati nge Sir? I hmang duh em ni? Fakzuali hian a keng alawm, i hman duh chuan a hman theih ka ring" ka tih chuan a ṭhen zeuh a, a nuih chhan chu ka hre der lo. 

"Hmang duh lo ve, Scooty i keng bawk si lo va, ban hunah thlah che ka lo rilruk deuh a" a rawn tih leh chuan ka meng buai deuh nak a, Fakzuali chu leh lam a lo hawi daih a, sawi mai tur ka hre tawh lo chiang hle.

"I ṭhiannu rual hian haw suh aw, keima'n ka thlah dawn che a nia" ti supin a kal sawn ta nal nal a, Fakzuali lah chu a lo nui dir char char a, a nuih chhan tak ka hre bawk si lo va, za lo zetin ka nui ve ta ringawt.

"Awi Noel, kei chu in awm dan leh in inbiak dan khan min tilai vel lutuk, ka insum thei thlawt lo" tiin a nuih zawm leh nghal a, rilru pe lo zetin Computer chu ka khawih daih a, pu ber min biak dan teh tlawng kha chu a awihawm loh ve êm a ni. 

Chhum lo chat lova hna ka thawh hnu chuan ka kut leh kawng chu a kham hle a, vawiin atan ka khawih tur chin ka zo titih chu a ni mai a, ka hahdam ta huai e. Ka thawhpui dangte ai hian kawng ṭhenkhatah chuan ka tih tur a tam deuh ṭhin a, a chhan pawh pu berin min ring deuh tawp a, a chang chuan a personal assistant te pawh ka ang lek lek ṭhin. Hrehawm tihna erawh ka nei lem lo va, ka hna a ni a, lungawi taka thawh chu ka tih tur a ni. 

Tlai a lo ni a, ban hun a ni tawh nghe nghe a, mahse ka ṭhiante rual chuan ka chhuak duh ta lo. Pu ber hnen aṭang nghak tura sawmna ka dawng tawh a, lo hawsan leh daih si chu a mawi lo a ni. Building kawtah chuan ka lo nghak a, minute rei lo tê hnuah a hmel chu ka hmu a, min nuih sun sun pah hian a phone chu a phawrh a, phone call a dawng ni awm tak a ni. Sawi tur hre lo leh awm dan tur hre lo zetin ka lo ding tawp a, ani chuan phone-ah mi a be mawlh mawlh thung. 

"Ti rawh le, kan kal dawn em ni ang?" kawng thlang lam hawi tawh lovin a lam chu ka hawi thuai a, mi a lo be tawh miah lo va, nui sukin Car kawngka chu a hawng a, lut turin min thlek khum zeuh bawk.

Car-a a rawn ṭhut luh hnu chuan hriat nuam tawk chiahin zai a play a, ṭawng erawh kan ṭawng lem lo. Kan tlan zel a, kan ngawi dun char char a, hnathawhnaa kan pu ber nen han chuan dun chu a nawm leh nawm loh pawh ka hre lo, amah a zahawm khep khup lutuk a, ṭawng hmasak zawk nih chu a fuh ber lovin ka hria. Sawi tur a hre lo hrim hrim nge ka hre lo, a ngawi reng ve tho va, chuang dun awm tak pawh ka ni e.

Kan veng pengah kan tlan lut a, kalkawngah chuan zirlai naupang kan tawk phei nual a, Sir Mama ka hre chhuak zawk mai. Ani khan engtin tak min ngai ang maw!? A thlalak tam tak ka bel tih a hre vek tawh si a, zahthlak viau mah se tunah chuan engah mah ka ngai tur a ni lo, hmeichhe puitling leh hna nghet lai nei ve tawh ka ni a, tleirawl rilru la pu reng ang maiin ka zak tur a ni lo. Ani pawh khan a ngaihtuah zui vak bik chuang nâng, mahse ka zak tih leh hrehawm ka ti tih kha chu a hre chiang a ni. 

"Zanin chu ka lo leng ang aw, chhuahna tur te i nei em?" pangngai deuh hian pu ber chuan a rawn ti a, kan in kawtah kan ding reng tawh a, min biak avangin ka chhuk nghal mai duh ta bik lo. 

"Eng lo a nia Sir.....zanin hian" ka tih laklawh lai chuan a kut a lo phar zeuh a, sawi chhunzawm lovin amah chu ka en reng a, a nui leh suk suk ṭhin chu ka hrethiam lo tak zet. 

"Hnathawhna a nih loh chuan Sir min ti tawh suh Noel, David tiin min ko zawk rawh, chu chu ka duh dan zawk pawh a ni" a tih chuan sawi tur ka hre lo lehzual a, ka ngawi ta reng ringawt.

"Sawi zawm tawh la, ka ngaithla reng a nia" amah bawk chuan a rawn ti leh a, a nui ri hak hak zui bawk a, sawi ka inthlahrung vek tawh, lo lên a tum hmel si. 

"Eng lo a nia Sir, ka tih awmzia chu pu David. Zanin hian ka ṭhiannu bialpa hna kaisan thar kan lawm dawn a, inah ka awm ka ring chiah lo" ka ti ve thei ta hram a, a rawn ṭawng chhuah dan tur chu ka hre huphurh hle. 

"A ni maw, lo len a fuh chiah lo a nih chu a, naktip khian ka zin dawn a, mahse ka lo haw hunah ni tawh mai rawh se" a ti hniam deuh sup a, a lam ka hawi chuan hma lam a en reng a, pu ber a ni bawk si a, inthlahrun chu nâ duh tak a ni. 

Kan in kawt aṭanga a tlan liam hnu thleng chuan ka en zui vawng vawng a, kei ve tehlûl min rawn hnaih ve duh chu ka phu lo ngawih ngawih. Kei aia hmelṭha leh fel hmeichhe tam tak an awm a, duh ngat se chu a hmu ṭeuh ang maw le. Dik tak chuan mipa dangah hian ka rilru ka pe tak tak thei tawh lo ni berin ka hria, tu mipa pawh hmu ila Sir Mama ka hre chhuak zel a, ka khaikhin zel a, thil sâwt lo tak mah ni se ka ngaihtuahnaah a awm zel bawk si. 

Zanriah kan ei lai chuan ka chhuah tur thu ka sawi a, ka pa chuan kalpui nei turin min ti nghal thawr a, zana ka chhuah dawn hi chuan min ngaihtuah tlat zel. Ka nu pawh a ngawi mai mai chuang lo, hmeichhe tan mualpho awlsamzia te min hrilh luam a, ka hre zing tawh bawk si nen ka hne ru khawp mai. Nunhlima pawh a pangngai leh vek tawh a, a harhvang chi a ni hrim hrim a, a ṭawng duh bawrh bawrh leh tawh hle a ni. Kei paw'n thirimna rilru engmah ka pu tawh lo va, nau te laka thinrim reng chu a theih tlat loh a ni. 

"Tu nen chuan maw in kal dawn a?" chhuak tura ka insiam zo sitting room-a ka phei laiin ka pa chuan a lo ti a, rei lo tê min en zawk a, TV lam a hawi leh nghal daih. 

"Fakzuali khan min lo hruai theih thu a sawi alawm, ka phone ang a, ka inhruai tir mai ang chu ka ti" ti niah niahin dar zat chu ka en a, dar 7:30 a ri thuak tawh a, duh aiin ka chhuak har mah mah dawn tlat. 

"Scooty ken chu phal mai la, a ṭhiante tih buai vel ai chuan a ṭha zawk alawm" tiin ka nu chuan ka pa chu a bia a, ka dil fê paw'n ka pa chuan Scooty ken a phal lo tlat a, chuvanga inhruai tir tum tawp chu ka ni. 

"A ngai lo, a ṭhiante'n an rawn hruai theih chuan a ṭha zawk" ka pa chuan a lo ti leh mai a, sâwi sawiin awmzia a nei dawn lo tih a hre chiang bawk a, ka nu chu a ngawi zui ve mai bawk.

Ka benga phone ka chuktuah laiin kawngka an rawn kik a, lut turin ka lo chhawn a, chuta kan ina lo lut mêk hmel ka hmu chiah chu ka zak thar âwn awnin ka hria. Ka phone chu ka ak ṭha sawk sawk a, zanin angah te a rawn lêng ve teh mial a, a rawn lên zan a ni ngai lo asin le. Ani hi chu a dan a dang deuh a, a reh vawng vawng hnuah a rawn lang leh chauh zel a, mahse zanin chu min ṭhawng khawp mai. 

"Zanin hian tih tur ṭul deuh te i nei em?" ka pa chuan a lo ti nghal ringawt a, ka nu nen chuan Sir Mama lam chu kan hawi a, Sir Mama pawh chu a hriatthiam loh hmel hle.

"Nei lutuk hran lo ve" tih chiahin Sir Mama chuan a chhang a, min rawn en ta chat a, ka va han hawi sawn chiang kher em, ka pa lah chuan ngaihsam zet hian

"Noel, va inhruai tir rawh. In lo haw rual leh bawk ang a, rei lutuk loh tur" a rawn ti leh ta mai, ka pa hian eng nge a hriat reng reng ni, engtin nge Sir Mama hi a rin nghal ngawt theih; an inhriatna a la rei lo tehreng nen. 

"I ti ho thei em mai ka pa, ani te chuan tih tur dang a nei ṭeuh ang. Ka ṭhiante ka inhruai tir thei reng alawm, an harsat lo lutuk" ka tih mawlh mawlh laiin Sir Mama chuan

"Ka hman alawm, ka va hruai dawn che a nia" a lo ti a, nelawmawm loh zetin ka melh ran a, ani'n nur nângin mi en chhuk run thung a, ani nen ber khera motor chuan dun chu ka peih lo a ni e.

"Kal tawh rawh u, dar 9:30 hmain lo haw tur aw Noel" ka pa chuan a rawn ti leh a, Sir Mama chu a chhuak nghal daih a, ka tih theih awmchhun ni ta chu zui chhuah a ni mai. 

Pawn ka thlen chuan motor a lo tirum vut vut tawh a, awlsam taka ka pa'n a ring mai chu a awihawm loh zawk a ni. Ka dinna zawnah motor chu a rawn ti ding a, lo chhuak lovin ka ṭhutna lam tur kawngka chu a hawng zui nghal bawk a, ka ṭhu lut ve ta nge nge. Kan chuang dun chiah chu ka sawifiah thiam lo, min uap hneh lutuk ni berin ka hria. A rim a nâ ti dawn ila a perfume hman rim chu a nâm chêk chek chauh a, a eng ber chuan nge min uap ka hre lo a ni. 

"Khawi vengah nge?" kan tlan chhuah hnu deuh lawkah a rawn ṭawng chhuak hmasa a, kan kalna lam tur chu pangngai takin ka sawi mai a, inbe lo tluan ṭhak mah ila pawi tihna ka nei der lo.

"Eng nge i tih dawn? Ni lo, eng nge kan tih dawn?" a rawn ti thum leh sup a, a lam chu ka hawi zeuh a, ani pui roh hian ka kalna hmuna lo kal ve chu a tum tak tak emaw ni le?

"Hna kaisan thar lawmna kan nei dawn a, chung vel mai mai chu maw le. Ka kalna tur thleng min hruai la, i duh chuan i haw leh nghal daih dawn nia, ka tibuai lutuk palh ang che" ka ti ta duah a, ani erawh a ngawi reng thung. 

Ka phone chu phawrhin Fakzuali chu ka Call a, an awm tawh leh tawh loh ka zawt a, ka rin ang ngeiin an lo awm tawh e. A bialpa nghet Matthew-a te chhungkua hi an awm thei ve pangngai tak an ni a, an in a ropuiin a lian ṭha bawk a, thil lawm nî khuaah pawh hmun dang hmang lovin an in an hmang nghal mai ṭhin. An in awmna erawh a fâl ve deuh hlek a, chu chu kal min ti peih lo tu ber a ni bawk. Fakzuali hian lên puiah min sawm ve ziah a, ṭul tawp khawk a nih loh chuan ka hnar fithla ṭhak zel. 

Ka bul lawka ṭhu ngawi run pa chu ka en leh zeuh zeuh ṭhin a, a huhang nâtzia chu pui tak a ni. Zam lo ang deuha lan te chu ka tum nasa hle a, mahse ka zamzia chu keimah bawkin ka hre chiang. Tshirt pawl dum lam lek lek hi a ha a, light tê reuh tê a in on avangin a ban bul lian leh ngo mawi tâwk em em chu a lang chiang hle a, a sana bun te chu a ta tur liau liaua siam emaw tih theih tur khawpin a inhmeh a, dik tak chuan a sir zawng ringawt paw'n a hmelṭha thlawt a ni. 

Ṭhutna nghengin ka ṭhu awn duai a, Sir Mama ringawtah chuan ka mit a fuh a, a rawn hawi fê te a nih loh chuan ka ṭhut awn deuh avangin min hmu thei lovin ka hria. A hnar ngul sei mawi tâwk chiah te, a biang leh bengkâwm fresh zet te chu Sir Mama a nihna a ni a, a Student kan nih lai pawh khan a fresh ṭhin reng a ni. School Week kan neih laia lukhum hma thlawk a khumna thlalak te kha ka la kawl ṭha thlap a, ani lah chuan a hmu vek tawh leh nghal. 

Zep lovah chuan ka zak ru em em a, ka duh ru ṭhin tih a hre chhuak ta mai chu nuam tih lohna ka nei ngei mai, mahse keimahah hian engtin emaw tak thawlna leh hahdam ruk riauna a awm tlat lawi a, a mak ang reng khawp mai. Chutia amah en chunga thil ka ngaihtuah kual duah lai chuan ka lam a rawn hawi thut a, phu zukin ka ṭhu ṭha nghal sawk sawk a, ka awm dan leh chet dan chu a va han mawi lo teh thlawt em. 

"I sawina lai hmun chu kan thleng titih e" a tih chuan ka hawi chhuak a, Matthew-a te in chu ka hmu zui nghal a, ka hrilh dan a beitham tehreng nen hre sa ang maiin a tlanna chu a dik vek a, mak ka ti ru khawp. 

"Ka lawm e Sir, i duh chuan haw nghal daih rawh. Haw lam chu ka ṭhiante'n min thlah thei tawh ang ka ring, min ngaihtuah duh suh" motor aṭanga chhuak ta mai lo chuan ka ti a, ani ve thung chuan

"Duh lo ta ila" a rawn ti daih a, sawi tur hre lovin ka dang der a, nui suk hian motor aṭang chuan a chhuak a, kei pawh ka chhuak thuai a, a lo kal ve duh tak tak ka ring hauh lo.

"Sir....eng lo" 

"I pa thusawi kha ka hre reng alawm, kal lam ka hruai tawh che ang bawkin haw lam pawh ka thlah ang che" a ti nghet charh a, ka sawi tum chu ka sawi chhunzawm lo chiang hle. 

Keimah ni lovin amah zawk chuan in lam a pan nul nul a, kawngkapui bula a din rualin min rawn en a, thawk la hakin ka kal phei ta nge nge. Kawngkapui bulah chuan kan ding dun a, kawngka min hawn sak zui nghal a, ka laka a chet dan vel chu ka hrethiam lo tulh tulh, inngaizawng ang maiin ka lakah a che ni berin ka hria. In chhung kan luh rualin Fakzuali ka zawng ru nghal a, Sir Mama nen min hmu dun thut chu a meng phawk teh e! 

A mit kô a sân zeuh zeuh a, keiin ka lu ka thing nawk nawk thung a, min hmutu tan chuan ṭawng thei lo kan ang ngawt ang. Kan awmna lamah a rawn phei a, ka bula ding ngawi reng zawk chu a bia a, a chhan dan aṭangin Sir Mama chuan ka ṭhiannu chu a la hre ve a nih hmel. Hria pawh ni se a awm lutuk tho, High School kan kal chhung zawng khan a Student kan ni miau a, mahse zirlai naupang kha kan tam tham a, min hre tawh lo pawh ni se ka dem hran chuang lo vang. 

Lawmna hunserh kan hman zawh rualin Fakzuali chuan min kai dawr dâwr a, bathroom-ah min luh pui hmak a, a mitmengah chuan zawhna ka va hmu tam tehreng em. Min hre chiangtu tan chuan Sir Mama nen kan kal dun thut chu a mak ve thlawt alawm, khati khawpa ka vei mipa kha a ni ve a, a hun lai phei kha chuan ka Classmate ṭhenkhatte khan mawl min ti hial a nih kha! 

"Sawifiah nghal rawh Noel, engtin nge a nih theih? Engtin nge Sir Mama nen sawn in lo kal dun theih? Matthew-a te nen an inchhung hauh si lo, sawi vat teh Noel" insum theihna tlachham ang maiin a ṭawng zung zung a, ka lo thaw hak ringawt. 

"Sir Mama nen hian in lo inngaizawng reng tawh zawk em ni? A ni chiang ti raw? Ka danglam tawh te kha i ti vel a, i danglam theih kha ka ring lo reng a ni" a zia dik tak a rawn chhuah leh ṭan dawn ta.

"Kan inngaizawng hauh lo, mahse ka song book a hmu tawh" ka tih chuan phawk zet hian min en a, ka song book chhunga awm zawng zawng min hriatpui vek a, mak ti ve viau tur pawh chu a ni. 

"Engtin nge a hmuh daih theih? I song book te chu in inah a awm daih alawm, ngawi teh, i sawi awmzia chu i inah Sir Mama a rawn kal em ni?" a tih chuan buk khum zeuh pah hian

"A lo lêng ṭhin alawm, mahse a lo lên dan a chhang khât lutuk, engtin nge kan veng leh kan inawmna a hriat pawh ka hre bik lo. Ka pa lah chuan a la ring em em zui a, chuvang alawm kan lo kal dun ni!" ka lo ti niah niah a, Sir Mama nen kan inhnaih ta viau chu kei ngei paw'n mak ka la ti.

"Awi Noel le! I dream chu a thleng dik dawn ta a ang, High School aṭang tawh i veh ngar ngar kha a nia, in awm dan vel hi in inngaizawng dawn chiang lutuk, ka hre sual miah lo vang" nui ver vera a rawn tih chuan ka nuih pawh a za ve lo. 

"Pu ber chu ka va khawngaih lâwk ê, a chang dawn ta si lo che a, bialpa nei lo ila chuan ka nei daih ang maw le" a tih leh chuan ka nui chhuak ta hak a, min ṭawng el tih ka hrethiam vek. 

Bathroom aṭang chuan kan chhuak a, Fakzuali chuan mi dang hriat phak si lovin min fiam ta zeuh zeuh a, Sir Mama hmai pawh a zah duh der lo. Matthew-a'n a hruai hrang ta hlauh zawk a, chuti ni lo se chu hneawm khawpin a awm leh ngei ang. Dawhkanah chuan Beer, Vodka tih vel leh in tur chi hrang hrang a inhung ṭhap a, bana in nghal theih mai a ni hlawm a, mahse zû lam kaihhnawih hi chu in ka tum lo bur. 

Beer tih vel ni lovin Orange Juice chu ka in ta zawk a, chutih lai chuan Sir Mama phone a rawn ri a, pawn lamah a chhuak zui nghal daih bawk. A lakah chuan inthlahrunna chen ka nei a, mahse amah zawkin min thlah haw leh thlap a tum miau a, inthlahrung viau tur pawh ka ni leh chiah lo a ni. Sir Mama ṭhutnaah tak chuan mi pakhat hi a rawn ṭhu ringawt a, min en dan vel chu ka duh lo kher mai. 

Min en reng hnu chuan min rawn be ringawt a, mahse ka chhang lo chiang hle. Min biak dan chu pangngai deuh hlek te ni se chuan ka chhang ngei ang, ngaih kawih theih tur leh hawihhawm lo takin min be tlat a, ka tan chuan chhan chi a ni lo a ni. Dawhkana Beer chu kheuh hawngin a inri khawlh khawlh a, a zam loh dan em em chu mak ka ti zawk. Ka ban reka zut zeuh pahin min rawn be leh a, ka awm sawn chiang teh e!

Ṭhen ṭhaw hian Beer chu min la in khum ham ham a, kei erawh ka ding tawh thung. Vawi leh khatah a ṭhutna chawpin chu pa chu a tawlh hnung dâwr a, Sir Mama hmel ka hmu zui nghal bawk a, a lo luh lai reng ka hre lo. Ka lamah a rawn kal phei pâwk pawk a, ka kut chu hum chatin pawn lamah min kalpui a, kei chu min kaih ang angin ka lo awm tawp a ni ber. Sir Mama pawh len dâwr pa lah chu a ṭawng pawr tawlh tawlh a, min dang chuan keini pathum chu min en ṭhup bawk.

Kawngkapui lam pana kan kal lai chuan hnung lam aṭang Sir Mama lu chu Beer bur hian a rawn vawm leh hram a, lehhawi a tum rualin a banah ka lo hmer thuai a, min en chhuk run lai chuan lu ka lo thing thuai thuai a, ngawi rengin min hruai chhuak zui nghal. Motor chhunga min ṭhut luh tir lai te chuan thinrim tih hriat tak hian a awm a, a thawm chu a nâ hle a, a rawn ṭhut luh ruala motor kawngka a khar rik bur chuan ka phu zawk a, lungawi loh hmel deuhin min rawn en a, ka hlau lek lek zawk a ni.

"Vawi khat mah khati ang mipa bulah khan ṭhu tawh suh ang che" a ti ram hmuk a, rum zet hian min en ran a, engtin mah ka chhang lêt lo va, motor steering a chum ri pawp chiah chu ka phu leh ta hle.

"I hria em?" a rawn tih leh chuan ka awm a nuam bik chiah tawh lo, ka duh thua ṭhutpui pawh ka ni bik hleinem, phone biain kal sawn daih lo se chu kha tlangval hawihhawm lo zet kha ka bulah a rawn ṭhu tawp nâng.

"Min hruai haw dawn nge vin takin min ṭawngkhum reng dawn?" lungawi lo ru tak chuan ka ti ve ta salh a, ka kut chu nâ zetin ka hum ngawt ngawt a, a thu hnuaia awm ka nih loh bakah min vin thei ringawt a ni lo.

"Min chhang mai rawh Noel, ka thinrim chhan hi a awm tih i hrethiam lo em ni?" a awah chuan nelawm pakhat mah a la awm lo tluang zel a, ka thinin a tuar ta bik lo te pawh a ni ang.

"Min hruai haw kher a ngai lo vang, mi dang paw'n min hruai haw thei reng alawm" tih leh motor aṭanga chhuah chu ka rual nghal a, Matthew-a te in lamah chuan ka kal phei hlawk hlawk a, vawi leh khatah tha chak zet hian min rawn chelh a, ka ding chiang hle. 

"Min thlah nghal rawh" ti vin ṭhawtin ka ban chu pawh thlak ka tum a, Sir Mama chuan a vuan nghet sauh thung a, kan Sir lo ni ṭhin tawh mah se a thu hnuaia awm ka ni lo chiang êm mai, ka thing thla dawn hi a ni hrim hrim.

"Min thlah rawh Sir, i chet dan hi a mawi lo tak zet" ka aw chu a hma aiin a zuai ta deuh a, phih thlak ka tum paw'n ani ang tha chak lutuk vawnna aṭang chuan ka tal chhuak thei chuang lo. 

"Ngaithla teh Noel, ka lakah hian thinrimna chhan tur pakhat mah i nei lo. Mi dangin an hruai haw lo ang che; keimah chauh lo chuan" tiin a lamah min pawt hnai dâwr a, ka kut leh lamin a âwm chu ka nam deuh rawk rawk a, min chhuk melh chiang hle bawk. 

"Nang pawh ka lakah hian thinrimna chhan tur i nei bik lo" kan indin hnaih ṭha tawh bawk a, ka ṭawng ring lo khawp mai, engtin emaw ni tak hian ka la zam ru der der zui.

"Nei chiang e, zu rui mai maiin ngamtlâk taka a be thei che kha ka tan chuan thinrimna tham a ni. A harhfim lo leh nghal a, engtin i ban te kha i zut tir theih zawk?" a ṭawng dan aṭang chuan engkim a lo hmu vek tih ka hrethiam ta mai.

"Nangmah a nih khâ, chhuak daih lo la chuan ka bulah a rawn ṭhu tawp lo vang. Min biakna kha pakhat mah ka chhang reng reng lo, ka ban ngat phei kha chu a rawn khawih dawn tih ka hre lo hrim hrim" 

"Duh tâwk teh ang" ti supin ka ban a chelhna chu a thlah dul deuh a, a hmer nâ thawkhat bawk a, a sen vek thei maw le.

"Ni e, duh tâwk ang, i laka insawifiah chiam tur pawh hi ka ni lo" tih leh ka kut chu phih thlak ka rual a, ka ban rêk chu ka tûai zawm zat a, zep lovah chuan a nâ lo miah lo, mahse nâ tak tih tur erawh a ni chuang lo.

"Ka hmer nâ mah mah em ni?" min ngaihtuah hmel deuh hian a rawn ti ta ngei a, rum zetin ka melh chho ral a, chhan pawh ka chhang peih rih lo, ka lung a tiawi lo ve thlawt a ni.

"Noel?" 

"A nat loh i ring em ni?" ka aw chu a nêm lo hle a, ka insum hman tawh lo a ni ber, chuti anga vin vak tur chu ka ni miah lo, mahse tunah tak chuan kan Sir a nih tawhna te chu ka theihnghilh rih a ni e.

"Min hrethiam teh" ti supin a âwmah chuan min pawm bei thlawp a, tal chhuah ka tum rualin min kuah nghet zual sauh a, a hnuah phei chuan ka tal buai duh ta vel lo, ka tih theih awm chhun chu a rim hip luh vawng vawng a ni mai. 

Kan inkuah tâkah chuan zawi zawiin ka lungawi lohna te chu a kiam tial tial a, ka thin phu a rang tawlh tawlh bawk a, kuah lêt tur a ni em tih pawh ka hrethiam lo. Kan awm dan chu a dik lo tih ka hria, ka zam rualin nuam ka ti ru viau lawi a, ka mumang thlenga min chen chilh ṭhintu mipa nen kan inkuah mêk chu a nia, chu pawh amah zawkin min kuah hmasa leh nghal. Keimahah chuan lungawi lohna ni lovin mak tihna leh hahdam ruk riauna hlir a awm tawh thung a, sawi tur ka hre lo lutuk chu ka ngawi kar ringawt. 

Dim tê hian a taksa aṭang chuan min nam sawn a, ka zak thar ta lutuk chu a hmel pawh ka en ngam lo. A âwm zawn vel ka en lo leh a dar vel chu ka en daih a, hmun dang hawi tum hram hram mah ila kan indin hnaih tawh lutuk a, ka hawi sawn thei der lo. A huhâng chu ka sawifiah thiam lo, nâ tak a ni. Rilru fim ka pu tawh bawk nen zam namên lovin ka zam a, han kal sawn ringawt dawn lahin min la chelh deuh tlat bawk si, sawi tur leh awm dan tur a va'n vâng tak em. 

"Kan haw dawn em ni ang?" aw dam zeta a rawn tih chuan rang deuh hian ka en chho a, che chhuak thutin motor lamah chuan ka kal phei nal nal a, motor chhunga ka ṭhut luh hnu thlengin ka thinphu a la rang zawt zawt hle. 

Rei lovah a hmel ka hmu zui nghal a, ngawi reng hian a rawn ṭhu lut ve mai a, kan tlan chhuah hnu chuan min rawn en leh zauh zauh ṭhin bawk. Kei erawh ka kun deuh tlat a, Sir Mama nen kan inhnim hnai ta lutuk chu a der paw'n ka ring chhin ngai lo. Ka kut chu kut lum nuam tak hian a rawn si a, chu chu tu kut nge tih ka hai lo, Sir Mama kut ngei a ni. Ka laka a awm dan chu ka hrethiam lo tulh tulh a, a hmel erawh ka en ngam tawh rih lo thung. 

Motor khawl thil a khawih rualin ka kut chu ka la sawn thuai a, ka kawr chhungah ka thun titih a, ka chet dan chu naupangchhia hle mah se ka tih ngei a ngai si a ni. Min rawn en leh zauh zauh ṭhin a, ka mit sirin ka hmu ru reng a, ka hmu tih pawh a hriatthiam vek ka ring. Kan in kawt kan thlen hnu chuan chhuk nghal mai ka tum a, mahse kawngka chu ka nam hawng thei der lo, a Lock tih ka ring thiam nghal bawk. 

"Engati nge heti ang hian ka chungah i awm Sir?" ka ti ta nge nge a, min chhan tum loh hmel zetin hma lam a en char char a, kei paw'n motor kawngka chu nam hawn ka tum zui ta bik lo, awmzia a awm lo tlat a ni. 

"Ka laka i chet dan hi a mawi lo hle a ni Sir, a chhan ka hre bawk si lo. Heti ang a nih chuan kan ina lo leng tur paw'n ka duh chiah tawh lo che, i student hlui ka nih vang maiin min zuam a nih hmel" ka ti nghet leh charh charh a, min rawn en chiang ta hle. 

"Kawngka i lock-na hi phelh la, ka chhuk duh tawh" a ngawi reng bawk si a, ka ṭawng zel mai loh chuan kan ṭhu tlaivar thei mai ang, motor chhung boruak chu a nuam hlawl lo. 

"Keini pahnih hian sawi dun tur kan la nei; mahse zaninah ni lo" pangngai zet hian a rawn ṭawng a, ka bula kawngka chu a ri khep a, a lock tawh lo tih ka hre chiah chu chhuak rang tak ka ni. 

"Engmah sawi dun tur kan nei tawh lo, lo leng tawh suh Sir" kal sawn ta mai lo chuan ka ti leh hram a, nula puitling ka ni tawh a, ka duh ru ngawih ngawih tih a hriat vang maia inzuamtir ka tum teuh lo, a lakah chuan hawihhawmna ka chhuah hman tawh lo a ni ber. 

In chhung ka luh chuan ka chhungte min lo biakna pawh ka chhang ṭha duh lo va, room-ah ka lut tlang nghal daih a, Sir Mama chu ka ngaihtuahnaah a awm leh reng ta mai. Eng vanga min kuah ngawt kha nge a nih ang le? Kan vawi khat inkuahna leh insikna a ni a, a chiang ṭha bawk a, ka zam ru der der chu a nih kha! Chhan awm lovin min kuah tawp lo vang, mahse min kuah chhan lah hriat theih mai a ni bawk si lo a tin ni! 

Zing khua a lo var a, tuk dang ang bawkin tlai lutuk lovah ka tho a, ka chhungte chuan zawhna min zawt lo hlauh a, ka lawm ru ang reng hle. Scooty hmangin hna lamah ka kal a, pu ber David-a a zin rih bawk a, thleng tlai deuh mah ila a inthlahrunawm lutuk lo. Ka thawhpui ṭhenkhat chu an lo la thleng bik lo va, Fakzuali hmel pawh ka la hmu lo hrim hrim. Nizan khan kan hawsan daih kha a ni a, a thuak thuak tal ka hrilhfiah a ngai ngei ang. 

Ka phone message tone chu a rawn ri mawlh mawlh a, ka en chuan pu ber David-a hnen aṭang a lo ni hlawm a, mak ka ti hman khawp. Whatsapp hmang hian kan inbe khât viau a, phone call hmang erawh chuan a duh hunah min rawn be mai ṭhin. A message rawn thawn chu ka hawng a, file dahkhawm tur hlir hi a lo ni a, ka awl mai mai dawn lo tih ka hre chiang leh ta hle.

Thil dang khawih tur ka ngah thawkhat viau asin le, mahse ka thil tih tur chu thil harsa lutuk a ni hran lo. A kuma kum ka lo thawh ve tawh avangin ka ti zung zung a, chawhnu lama hahdam taka awm ka duh a ni. Pu ber lo thawn file vel ka khawih mial mial laiin Fakzuali a lo thleng ve chiah a, vawiin chu a rawn thleng tlai tak tak hle mai, thawh a hai a nih hmel. 

"Nizan khan engmah sawi lovin kan haw daih a, in ka thlen rualin ka mu nghal bawk si a, ka rawn hrilh ta lo che a nih kha" thil chhu ri mawlh mawlh pah chuan ka ti a, a lam pawh ka hawi chuang lo. 

"Matthew-a nu'n in haw chhan a lo sawi alawm, engtin chiah nge Isaac-a chu i chungah a lo chet a? Matthew-a nitei fapa a ni a, a rui reng zel" a tih chuan ka ngawi deuh ren rawn a, mahse ka ṭhian ṭha ber a ni a, a lakah chuan zep ka tum ta lo law law.

"Hawihhawm lo leh hriat nuam loh deuh hian min be ringawt a, chhan pawh ka chhang duh lo, mahse ka ban a rawn zut leh ringawt a, min ngainep ni berin ka hria" 

"I bulah Sir Mama a awm lo em ni?"

"Awm chiah lo, phone call a dawng a, a chhuak daih alawm, mahse Matthew-a nitei fapa khan min rawn hnaih a tum leh lai takin Sir Maman a lo pawt sawn dawr a, mi dangte hriat lovin dang lo ila chuan kut a thlak hrim hrim ang" 

"Thil thlen laia Matthew-a nen kan awm lo chu a pawi ngawt mai, Isaac-a khan Matthew-a hi chu a hlau deuh tlat a, a vin hrawk tawh hi chuan a ṭawng ngam tawh ngai lo. Nizan pawh khan a nu zawk nen an inhnial deuh vak a, ka tan thlengin a nuam lo" 

"Lo kal lo law law ila chuan buaina engmah a thleng lo vang maw le, nuam ka ti lo teh mai a nia" ka ti sep sep a, chhungril takin nuam lo ka ti ru veng veng a, Matthew-a leh a nitei inhnial chhan chu keimah ka ni chiang si. 

"A ho êm mai, nuam lo ti ngawt duh suh. Matthew-a'n biak che a duh nghe nghe zawk alawm, i laka Isaac-a chet dan vel vang a nih ka ring. Ti daih ila Sir Mama hian a rawn ngaihven riau chein ka hria, in inkarah hian eng nge awm?" 

"Engmah a awm lo, thil awm ang lo deuh deuh kha i lo ngaihtuah leh ringawt ang e" ka ti ve tak na a, ka rilruah chuan Sir Mama a awm zui ta reng a, ka thil chhut laiah pawh ka insawrbing hlei thei ta tlat lo. 

Kan hna ve ve chu kan thawk malh malh a, a thil tih lai chiah a rilruah a awm tih hriat takin Fakzuali chuan hna a thawk a, kei erawh ka la pangngai thei lo ta cheu. Ka laka Sir Mama chet dan vel chu ka ngaihtuah let a, zep lovah chuan min duh ve ni maiin ka hria, mahse chu zawng thil theih a ni si lo. Ani khan min duh lûl lo ang e, min kuah chhan pawh kha engmah a ni lo vang. 

Hna kan bang a, in ka thlen rualin ka nau hnen aṭang phone call ka dawng a, rawn haw a duh rih loh thute a sawi lûam a, ka nu leh pa dilsak turin min ngen bawk. A lo haw duh rih loh chhan ka zawh chuan inhlawh a duh thu a sawi mai a, exam an zawh tawh avangin pawisa thawk chhuak mah se pawi ka ti hran lo, ka nu leh pate zawkin an remti lo maithei a ni. Ka dilsak tur thu ka sawi hnu chuan rei kan inbe ta lo va, a enga mah hmain lawmthu min hrilh nghal ringawt bawk. 

Zanriah einaah ka nau nena kan inbiak dan vel chu ka sawi ta ngei a, ka pa chuan a phal lo nghal pang a, ka nu erawh a ṭawng tam vak lo. Ka thiam ang angin intodelh a ṭhatzia chu ka sawi a, hmeichhia kan nih avanga chawmhlawm nih ringawt dik lohzia thlengin ka pa chu ka hrilh a, mahse a la pawm hlei thei tlat lo. A fate hi min ngaihtuah em em a, min chawm nân rim takin hna a thawk a, amah anga kan thawhrim chu a phal lo ni berin ka hria. 

Ka nu chuan a lo tuihnih ve ta nge nge a, ka nu sawi vang nge pawh ka hre lo, ka pa chuan a phal deuh thut a, ka nau chu a call zui nghal bawk. Loud Speaker-ah a dah a, an inbiak dan zawmg zawng kan ngaithla ṭhap a, ka pa chuan zawhna chi hrang hrang a zawt kual duah a, interview an ang lutuk chu ka nuih a za zawk hial a ni. A tawp lamah erawh hlim takin an inbe thei hram a, ka nau pawh a lawm khawp mai. 

Hun a kal a, thla tawp lam kan thleng leh reng tawh a, pu ber David-a pawh kan inah a rawn chuangkai ngun leh ta khawp mai. Sir Mama ve thung chu a reh hmak a, ka ṭawngkhum dan kha a la nâ viau a nih ka ring. A awm ve tho mai, a zirlai naupang ni ṭhinin kan ina leng tawh lo tur te'n ka hrilh siah siah kha a nia, ani ang puitling ṭhankin tawh tan chuan lak nâtawm tak pawh a ni e. 

Zan khat pu ber David-a lo leng chu zan dang lo takin a thutak hle a, chuti ang chuan a awm ngai bawk si lo va, ka hrethiam lo lek lek zawk a ni. A haw dawna ka thlah tur chu ka kutah a rawn chelh a, min ngainat thu leh min hriat chian a duh thu a sawi ta mai, ka va han bangbo chiang tak em. Thumal khat lek pawh sawi tur ka hre lo va, a tlan liam hnu thleng chuan mi â ang maiin ka ding ngawi reng ringawt. 

Ka ngaihtuah chiang a, pu ber David-a chu mipa fel leh innghahna tlâk tak a ni tih ka hria, ka laka a awm dan aṭangin min duh tih ka hre thei bawk, mahse keimah lam zawkah dik lo a la awm tlat thung. Dik tak chuan engtikah mah ka neih theih loh tur Sir Mama te ang mipa vanga mipa dang ka kawp thei lo ṭhin chu ka ning tawh, a rei ve tawh bawk a, ka ning ve tak tak tawh a ni. 

Mipa dang nen han inngaizawng ringawt dawn ila an rilru ka tinâ mai mai ang tih ka hlau leh lawi si, mipa dang nghah la nei ang maiin ka inhria a ni. Pu ber David-a te ang mipa chu ka phu lo hliah hliah zawk, ka tan chuan an ṭha mah mah a ni. Sorkar hna zahawm tak a thawk a, sawi leh sawi hnu, kei lo hmeichhe dang changkâng leh hmelṭha tak tak a hmu hnem dawm êm mai. 

Hnathawhna hmunah te chuan a ruk deuh si hian min hnaih tial tial a, kei chuan a lakah inthlahrunna chiah ka la pu thung. Zan hnih ngawt chu ka ngaihtuah tawh a, pu ber David-a nena inngaihzawn chu ka theih ka ring ngâng lo a ni. Tu mipa chiah nge ka tawn dawn ka hre lo va, ka mipa tawn tur chu keimah nena inmil tak ni se ka ti ber. A chhan chu mi rilru tihnat ka hlau a, ka duh lo bawk. 

Thawhlehni a ni a, sorkar chawlh a nih avangin ka inkhalh chhuak mai mai a, rin ai takin kawng chu a thawl ṭha phian. Ka rilruah bazar a rawn lang thut a, lei tur pawh ka hre chuang lo. Dawrpui biak in bul Traffic Point kual laia ka tlan thla tur chu motor pakhat hian min rawn su thal tawp a, ka ke nât dan chu pui tak a ni. Kawngpuiah chuan ka vial ngawng ngawng a, Scooty lam reng ka ngaihtuah thei tawh lo. 

Traffic Police pahnih chuan min lo buaipui vat a, ka ke chu si miah lo turin ka ti ta thlawt a, a nâ ve bawk êm a ni. Thi lah chu a chhuak duh phian leh nghal a, tih tur nei mang hlei lo va ka lo inkhalh chhuak kher kher chu ka inchhir ngawih ngawih. Ka ke chu khawihtu an awm avangin ka meng chiang hle a, chuta ka hmel hmuh chuan min ṭhawng viau mah se ka ke nâ chuan eng thil dang mah min ngaihtuahtir thei tawh lo a ni. 

"Tuar hram hram rawh, kan thleng ṭep" mipa aw thum bul bul ka hriat rual chuan ka meng chhuak leh zawk a, Sir Mama chuan min lo pawm reng tawh a, damdawi inah min kalpui dawn a nih ka ring. 

"Awm sawn thuai teh u!" chuti ang em ema Sir Mama awkâ vin chu ka la hre ngai lo, a tlan hian min tlanpui dawr dawr a, a hmanhmawh khawp mai. 

Nurse pakhat hi nêm fahran lo hian a bia a, khumah min mut zui nghal bawk a, khuma min nghah zawng ringawt paw'n ka ke chu a la tur ut ut thei. Rei lovah doctor hmel kan hmu thuai a, ka ke a khawih rualin ka lo ṭe ṭhawt a, nâ tak a ni. Sir Mama kut chu ka hmer ngawng ngawng a, ka thlan fimte chu a chhuak thei hial a, mahse engtin chiah nge ka ke chu a awm ka hre thei lo. 

"Nâ a ti ang reng êm mai, chiu hmasa zawk phawt mai teh ang" tiin Doctor chuan damdawi lam thil eng eng emaw ni khawih nghal zung zung a, min chiu lai chuan ka lo hlauthawng hle. 

"I ṭha leh thuai ang" Sir Mama min biakna chu ka thu hriat tawp ber a ni a, bengngawng ang maiin eng ri mah ka hre thei ta lo va, ka tha chu a zuai riai riai bawk a, ka hit vekin ka hria. 

Ka harh leh meuh chuan ka chhungte hmel ka hmu dual a, ka nu'n min lo ngaihven hmasa ber a, ka ke lam chu ka en a, a lo intuam bûr a, tunah chuan a tliak a nih ka ring ta ber. Ka chhungte nen kan awm lai chuan Doctor a lo lut a, min endik pahin ka ke ruh a khik thu a sawi a, ka chawn chu thuk lutuk lova a kak thu a sawi leh a, ka lo hlauthawng nghal em em ringawt.

Ka hmel aṭang a hrethiam a ni chêk ang chu hlauhthawnawm lutuk a nih loh thu a sawi zawm leh nghal a, mahse chuti maiin ka hlauhthawnna te chu a bo thei lo. Doctor sawi dan chuan a rei lo berah thla khat chhung engmah ti lova ka awm a ngai dawn a nih hmel a, hna ka kal thei lo tur chu ka huphurh lâwk hle. A dam ṭhat tak tak hun chu thla thum hnu vel daih a ni dawn a, Doctor chuan damdawi ei tur min chawh nghal nûal bawk. 

Zan khat tal riak turin Doctor chuan min ti a, chutih lai tak chuan Sir Mama a rawn lut hlawl a, Doctor nen chuan eng eng emaw ni an sawi a, Doctor zawk chu a chhuak ta daih. Ka nu leh pa bulah chuan min riahpui a dil thlap a, ka nu zawkin a lo phal mai lo va, min riahpui a duh vang a ni pakhat. Ka pa chuan ngaihngam deuh hian Sir Mama dilna chu a phalsak mai a, ka nu chuan mak a ti teh e! 

A mak ve alawm, awlsam taka ka pa'n Sir Mama a ring nghal mai zel chu a mak a ni. Ka chhungte an haw hnu chuan Sir Mama nen chiah room chhungah kan awm a, zawhna ka ngah khawp mai. Zawhna zawh hman loh khawpin phone-ah mi a be deuh reng a, a biak zawh chuan ka bulah a rawn ṭhu a, ka kut chu a hum lum vung vung a, kan inen chiang ta hle.

"Min hrethiam teh Noel, thil ka lo ngaihtuah mûk lutuk palh a ni e" a thusawi awmzia chu pakhat mah ka hre lo, eng lam hawi zawngin nge a sawi tih tal pawh ka hre lo a ni. 

"Accident i tawh chhan hi keimah ka ni alawm, kei hian i Scooty khalh lai kha ka su che a ni. A pawi ka ti tak zet, min huat phah lo la ka duh" a rawn ti leh chiah chu ka sa pup pup a, ka thin te chu a phu rang tawlh tawlh a, ka pangngai thei ta hauh lo mai. 

"I va fimkhur lo ve, ka hma hun i dawn ve miah lo em ni? Hna thlengin ka kal theih loh phah dawn asin, engtin nge min sut theih zawk?" ka ti tawn tawn a, ka mittui te chu koh chhuah chawp a ngai lo reng reng. 

"I lakah hian ka inthiam lo tak zet a ni" tih leh ka kut chu fawh a rual a, ka ṭap chhuak ta feih feih a, ka rilru a no thar em em chhan chu ka hre bik lo, tunah tak chuan ṭah hawm hawm ka châk a ni.

Khumah chuan a rawn ṭhu chho a, a âwm chu ka nghen theih turin a ṭhu awn hê deuh duai a, a kut leh lamin ka sam chu a chul hliau hliau bawk. Ka kut a vawnna chu a la thlah lo va, a taksa ka ngheng tawh kher bawk nen min uap lum nuam tak zet. A tua mah chu kan ṭawng leh tawh lo va, ṭawng leh dawn pawh ni ila sawi tur ka hre tawh lo a ni. 

Ka biang za mer merah chuan ka harh a, mahse ka maimichhing leh nghal daih. Ka mutna khum baka mutna nuam chu ka la hre ngai lo, a lum nuam em em bawk si, nilêng paw'n ka mu duh hial ang ka ring. Ka hmui chu kutzungṭang hian a rawn tawk leh a, chutah erawh ka va han harh chhuak chiang mai mai tak em. Thawh ka tum rualin min kuai bet leh nghal a, ka mihring nghen mêk chu Sir Mama a ni tih ka hre chiang hle. 

"Tun hun hi thil sawi dunna hun remchang tak a ni" a tih chuan ka lo ngawi reng a, muangchang hian a ṭhut dan chu siam rem a, min hma chhawn zawngin a ṭhu ṭha a, ka mit takah a en ran bawk. 

"Ka zawhna hi chhang hram la ka duh, ka student i nih lai ang chiah khan ka lakah rilru i la pu reng em Noel? Dawt tel miah lovin min chhang teh le, ka thil hriat chian duh em em a ni" a tih chuan ka kun thuai a, min kuai dâk leh nghal thung. 

"Sawi zak miah suh, kei pawh hian thil hrilh tur che ka nei. Han sawi teh le, Sir te thu an hnial ngai lo" a nui pah zeuh a, ka zak thar lutuk chu ka mit ka chhing char char a, ani paw'n a kut chu ka khabe aṭang a la la sawn bik chuang lo. 

"Ka sawi hmasak i phut em ni?" a rawn tih leh chuan maimitchhing reng chungin ka bu nghat nghat a, ka hmuiah tak a rawn fawp chiah chu meng chiang tak ka ni. 

"Ka mitah chuan hmeichhe hmelṭha tak i ni a, i vun a no nalh a, ka veiin ka duh em em bawk che tihna a nih kha" ti thum chhalin min fawh zawm leh nghal zat a, tunah chuan ka duhthusam ang ngeiin ka mipa fawh hmasak ber chu Sir Mama a ni ta tak tak e. 

"Ka zawhna i chhan hun chiah" ka biang tawn tawn chu a dawm a, ṭawngkâa chhang lova ka buk khum nghauh nghauh lai chuan 

"I sawi ngei alawm ka phut" a lo ti sup a, kan inen hnai lutuk leh kan inthawk khum hnai lutuk chu ka dik thei lo, ka khur der derin ka hria, ka zam lutuk vangte pawh a ni mahna.

"Ka rilru a la ngai reng" ka tih chuan a kiai suk a, min rawn fawp leh a, a vawi thumnaah chuan ka lo chhang let ve ta, mahse ka zei hlawl lo.

"Nang ang hmeichhe thianghlim lutuk hi vawiin aṭang chuan mipa dangin nêl takin an be thiang tawh lo che; in pu ber tiamin" a âwmah ka nam ṭai a, min be hnai mah mah chu a ni.

"Engati maw?" chu lo chu zawhna dang ka nei rih lo, a thusawi tum ber hrethiam hek lo le.

"A chhan chu ka ta chiah i ni tawh alawm, i hre lo em ni? Nge ka ta i nihzia ka hriat nawntir zawk dawn che?" ka hmai chu a sa hut hut a, ka ke chu nâ lo se chuan ka kal sawn vang vang tawh ngei ang.

"Awm sawn tawh teh Sir, ka awm i tinuam lo em mai" ka ti ta ringawt a, ka thusawi avang chuan a rawn nui ri hak a, kei erawh nuih lam chu khawi lamah! 

"I laih hian i duhawm zual tih i hre lo a nih hmel, ei tur ka zu lei ang e, ka lo chhoh leh hunah erawh min biak bawrh bawrh ngam ka besei" tiin ka hnar chu a tawk zeuh a, room aṭang a chhuak chiah chu ka kun ngawih ngawih ringawt. 

Ka zak bawk si, ka hlim tho bawk si, ka ke nâ pawh chu ka hre chang meuh tawh lo a ni. Au chhuah vak vak mai ka duh rum rum a, a tih chi der bawk si lo. Sir Mama nena kan awm dan leh kan inbiak dan vel chu ka ngaihtuah let a, ka la zak thei tho maw le. Ni e, amah ngei hi a ni hmân aṭang tawha ka mipa nghah leh ka mipa duhthusam ber chu! Tunah lem min duh thu leh a ta chiah ka nih tawh thu a sawi a, dawnsawn dan leh chhan lêt dan ka va'n thiam si lo êm.

Rei pawh hun hmang lovin a rawn chho leh thuai a, lai ru tak chungin ei tur min leisak chu ka ei a, ka la ei tui phian zui. Damdawi in kawt vela mi a ni ngei ngei ang, a tui êm mai. Sir Mama nena kan awm dan leh kan inkar chu ka ngaihtuah chiang a, mak ka la ti ru khawp mai. Kan inngaizawng chu a ni ve ta mai a, keimahah chuan chu tluka duhthusam thleng dik a awm lo maithei, mahse a thleng rang teh thut êm a, ka la inring hman chiah lo a ni ber e. 

Thil ei lai chuan min en leh vawng vawng ṭhin a, kei lah chu lai chhe takin ka lo nui ringawt zel a, awm dan tur ka thiam hlawl lo a ni. A hma ai ngawt chuan kei pawh ka ṭawng duh ve ta deuh a, kan mipa duhthusam te nena awm dun leh inngaihzawn zet zawng ka beisei phak bakin a dangdai a, a nuam ka ti hle bawk. Ka mizia erawh ka tilang lutuk lo, a chhan chu eng nge ka hma hunah thleng dawn hriat a la ni lo tlat. 

Inngaizawng tawh mah ila nupa êm kan la ni lo va, inṭhen thei reng dinhmunah kan ding tih hriat tel tho a ngai a ni. Nupa nih hnuah pawh inṭhen tam tak an awm a, inngaihzawnna tih vel hi chu a la ho lam mah mah zawk a ni e. Ka vawi khat ngaihzawng neihna chu a ni chiah lo va, mahse experience tia sawi tur pakhat mah ka nei lo thung. Inngaihzawnna lamah hi chuan a mual bovin ka bo ve ang reng a, ngaihzawng ka nei ta sa sa inzir ve det a ngai ngei ang.

Kei ang lo takin Sir Mama erawh chuan bialnu tam tak a lo nei tawh dawn tih ka hre vek a, sawi miah lo mah se a hriat tlat a ni. A student kan nih lai paw'n khati khawp khan hmeichhiate duh rawn a ni a, nula pangngai tan ngat phei chuan ngaihzawn tlâk tak a ni dawn hrim hrim. A inchengvawng bawk si a, a hmelṭhain a pâ leh zel bawk nen tu hmeichhia mahin an hnar theih ka ring lo. Ni lo, kei hian engmah ka ngaihtuah chiang hauh lo mai, ka va'n mawl tak! 

"Sir, eng lo..ngaihzawng i nei em?" ka ti deuh tawl a, ka thil ei lai pawh chu ka ei zawm ta lem lo, ngaihzawng nei lai a lo nih reng chuan ka duh teuh lo, nei lai a nih rinna hlirin ka khat nghal bawk.

"Nei e" a rawn ti ta mai, ka ngaihtuahnaa awm ang chu a ngaihtuah ve miah lo tih hriat takin thil a ei zawm mawlh mawlh a, ka en reng tih pawh a hre lo hrim hrim, engmah ngaihtuah chiang lova ka rilru dik tak ka lo hrilh thawt thawt chu ka tisual a ni e. 

"Chu hmeichhia chu ka hmaa ṭhu mek; amah ni lo ngaihzawng dang ka nei emaw tia hlauthawng em em a ni a, a hlauthawng viau a ni ang a thil ei lai pawh a ei chhunzawm duh tawh der lo" min en miah lo hian a rawn ti leh a, mak ka va ti tehreng em. 

"Sir!" ka tih hluai chuan min rawn melh ta chat a, nuih insum hmel a pu thânin ka hria, a ṭawngkam chhah chhuah dan vel chuan min tilai leh em em tawh a, han lungawi loh ringawt dawnin lung nih lohna tur a awm der bawk si lo.

"Hmeichhe dang laka ka kalsan che i phal reng reng em ni?" ti ril ruihin ka khabe chu a chawi a, min nuih suk te chuan hawi sawn ka tum a, mahse ka thei lo, ka khabe mai ni lovin ka biang chu a dawm ran a, kan inen hnai mah mah tawh a ni. 

"Han sawi teh le Noel" tiin min awm hnaih sauh a, ka hmai zawnah chuan a thaw lum ham ham a, kei erawh zam lutuk avangin ka thaw ṭha ngam lo thung a, engkim chu ka tan chuan thil thar vek a ni tlat. 

"Phal chuang nâng, kawp lai nei i ni ang tih ka hlau alawm Sir. Lo nei ta pawh ni la engmah ka hre dawn der si lo, a chhan chu nang chuan" min rawn fawh thut avangin ka ngawi ta hmak a, ka lo meng kur ringawt. 

"Ka chet dan ang zelin ti ve la, i thiam vat ka ring" awm hrang deuh hlekin a ti thum dap a, ka inrin hma chuan min rawn fawh zawm leh nghal a, tun ṭum zet zawng ka inhrethiam bik lo, ka lo fawp lêt ve tawn tawn a nih chu! 

Min fawh dan chu ka sawi thiam lo, min hne dâwk dawk ni berin ka hria, kei lah pek chuan a tih ang zelin ka lo ti ve a, ka rilru leh taksa chu awihawm loh khawpin ka thunun thei miah lo bawk. Kan duh tâwk meuh chuan ka thaw dep dêp a, ka thin phu ri te chu a hriat phak vek ka ring. Min fawh dan aṭang hrim hrim pawh chuan a zei thawkhat dawn tih ka hrethiam nghal a, hnar mai mai theih lovin a che thiam miau a ni. 

"Zirtir nuam tak i ni" nui zeuh paha a tih chuan a âwmah ka chum taih a, ka mipa fawh hmasa ber chu amah a ni a, a tawp ber ni tur paw'n amah tho ka duh, tunah chuan infawh dangdaizia leh nawmzia chu ka tem ve ta. 

Ni e, amah tih loh mipa dang ka la fawp miah lo tak tak. College ka kal lai khan a hmingin ngaihzawng ka nei ve tawh ngei a, kan inṭhen har lo hle thung. Ka mipa duh zawng a nih loh vangte pawh a ni ang ngaihsak dan ka thiam lo va, khang hun lai kha chuan min ning ru thei ngawt ang. Ka rilru dik tak ka hrilh tlang tawp kha a ni a, thla tam pawh inngai zawng lovin kan inṭhen ta reng a, kha tih hun lai kha chuan lawm tak ka ni.  

Kan inngaihzawn chhung zawng khan vawi khat mah kan infawp lo va, inkuah erawh kan uar ve thei hle. Rilrua mipa dang a awm tlat chuan tih ngaihna a awm lo alawm, tu mipa pawh tawng ila Sir Mama nen ka khaikhin zel a, ka rilruah mipa dang an awm thei ngâng lo ṭhin. Hnathawhnaa kan pu ber chen hian ka khaikhin fo va, a chang phei chuan bansan mai ka duh a, mahse tunah erawh kan inngaizawng ta tak tak chu a nih hi!

Inhlat lo takin khumah chuan kan ṭhu dun a, nam sawn chu tum ve teh mah ila a nam sawn theih loh a ni. Amah a pa lianin a rit bawk si a, lung lian pui nam sawn tum ang vel ka ni mai. Ka ke chu a endik vel ṭhin a, inthiam lohna thu chhak chhuak lo mah se a inthiam lo tih a hriat hle. Kan thil eina vel chu a tifai leh thlap a, polythene-ah khungin a paih vek bawk a, hmana ka hriat ṭhin Sir Mama kha a ang ta lo hial zawk, a awm dan chu inphah hniam ni maiin ka hria. 

Dar 10 bawr velah ka chhungte an lo kal a, Doctor paw'n ka chhuah theih thu a sawi tawh bawk a, kan in thleng Sir Maman min thlah a, ka chhungte chu a lakah an lawm thiam khawp. Haw ta mai lo chuan thingpui a in khawmuang a, ka chhungte awm ṭhap lo se chuan ka bulah a rawn ṭhut ka ring, min en ngun em mai. Tlai chhe lutuk lovah a haw a, ka rin ai tak chuan a lêng rei ve phian; ni dangah a awm rei ngai loh tehreng nen. 

Ni khat a ral a, ka thawhpuite chuan ka chanchin an hre ve ta. Min khawngaih hlawm viau a, pu ber phei chuan min ngaihtuah zual hle. Fakzuali paw'n min lainat hmel viau a, mak tihna erawh a la nei nasa mai. A mah tih ber chu Sir Mama nen kan inkawp ta chu a ni a, kei pawh ni ila mak ka ti ve tho ang. Kan inkawp teh deuh thut bawk si a, rei tia sawi tur awm miah lo khawpa kan la inkawp rei lo vang a ni ber. 

Pu ber David-a erawh chuan Sir Mama nena kan inkar engmah a la hre ve lo va, an rawn kal hun a innang fuh palh ang tih chu ka hlau ru thei hle. Pu ber hnenah chuan ngaihzawng ka neih thu sawi kher ka tum ta lo law law a, a hma kha chuan min duh ve deuha ka hriat avangin sawi ka tum a, mahse ka ṭhulh leh ta zawk a ni. Ka laka a rilru puthmang chu ka lo hre sual ve thei tho bawk a, sawi ta ila ka rin dan ang a lo nih leh si loh chuan zahna mai mai. 

Ni thum hnuah pawh Fakzuali chuan a la awih hlei thei lo va, ka nuih a tiza ang reng. Sir Maman hmaichhana a hrilh paw'n awih harsa a la ti ngâng a, ka ṭhiani hi chu a mak ve a ni. A chang leh ka thusawi a ring awlsam em em a, a chang leh a ring mai duh lo leh lawi a, hriatthiam ngai tak a ni. Sir Mama nena kan inngaihzawng ta pawh chu a awih ve leh mai ka ring, nawr chiam a fuh ber lo a ni. Kar khatah vawi thum vel min rawn tlawh kawi ṭhin a, kan veng inhlat lo phei se chu a rawn kal ngun thei khawp ang. 

Pu ber David-a pawh a bang chuang lo, mahse hun a nei lutuk lo va, ka hrethiam khawp mai. Fakzuali hnen aṭang an buai zual thu ka hre vek a, kei tal lo awm ila chuan buai a nep deuh ang maw le. Pu ber chuan hnathawk dang lâk loh law law a ti tlat a, ka dam chian hnua zawm leh nghal turin min ngai bawk. A thutlukna siam chu zahawm ka ti a, a lakah pawh ka inthlahrun phah nghe nghe a, kei chuan mi dang la daih rih mah se pawi tihna ka nei lem lo a ni. 

Hun a kal a, kan venga mi ṭhenkhat chuan min lo kan zeuh zeuh ṭhin a, an fel liam liam ka ti hlawm hle. KṬP ṭawngṭai inkhawmnaah te min lo ṭawngṭaisak hi a ni a, ka inkhawm khât tehreng nen a nuam duh chiah lo a ni. Veng chhunga ka ṭhian kawm ve ṭhin te paw'n an hman châng changin min rawn tlawh kawi a, a tam zawk chu KṬP bawk an ni leh a, dam chian hunah chuan a theih ang ânga inkhawm ve tawh ka duh a ni.

Activities a tam lutuk hi ka inkhawm peih loh chhan pakhat a ni ṭhin a, a chhan bulpui ber erawh kan hnathawhna lam vang a ni thung. Inkhawm ngai lo tawp chu ka ni bik lo va, thawhṭanni zanah te, nilaini leh inrinni zanah te pawh ka inkhawm ve ṭhin tho, mahse mi dangte angin ka inkhawm zing thei lo mai chauh a ni. Pathianni te hi chu inkhawm ngei ngei turah ka ngai tawp a, dam lohna emaw taksa nawm lohna ka nei te a nih ngawt loh chuan ka inkhawm ngei ngei ṭhin bawk.

"Vawiin chu hma kan sawn em?" ti supin Sir Mama chuan ka kut a vuan ran a, ka chhungte paw'n kan inngaizawng tih an hre vek tawh a, ka pa tak phei chuan kan awm dan aṭang rin dan a lo nei thiam mai a, ka nu pawh a bo viau hran lo.

"Sawn ve zel e, nitin i lo kal ziah erawh inthlahrun a nâ duh khawp mai" ka tih chuan a nui suk a, tlai dar 3 a pelh tawh hi chuan a lo thleng hnaiah ka ngai tawp zel, vawiin pawh tlai dang ang bawkin a rawn thleng hma leh e!

"Office lama awm reng ka thei lo alawm, nang ngaihtuah reng reng che hian hun ka hmang ṭhin" tiin ka biang chu a rawn tawk a, kan inhmu ngunin min khawih ngun ve tawh bawk a, a tir ang em em chuan ka zam chhe tawh bik lo. 

"Ka chhungte an lo kal em?" amah bawk chuan a rawn ti leh a, ka lo buk khum nghat nghat a, tihpalh thil thua Sir Maman min hliam aṭang khan vawi tam an lo kal tawh a, kei leh ka chhungte tan tak pawh a lawmawm rualin a nuam lo duh hle.

"Dam thuai thuai tawh la ka ti ngawt mai, i hmel lah hi a ṭha tulh tulh leh nghal" a tih chuan lai ru takin ka lo nui sen sen a, lungawi hmel deuhin min en vawng vawng a, ka laih hian ka hmelṭha zual thu min hrilh tawh a, a tak tak a ni em tih erawh ka hre chuang lo. 

"Ka ke chu dam ta se eng nge? Hna ka zawm leh daih ang a, tun ang hian kan inawm chilh thei tawh kher nâng" ka ti niah niah a, a lakah hi chuan zirlai naupang ang chiaha awm nuam ka ti tlat a, thil mi zirtir te hi a thiam ngaiin a la thiam reng a, tunah chuan infawh pawh ka zei ve tawh lutuk.

"I dam chian hunah hrilh che ka tum a, mahse hrilh hmasak che hi a ṭha zawkin ka hria. Kei hian nupuia neih che ka tum alawm Noel, ka laka i rilru puthmang ka hre chiang thawkhat tawh a, keimah zawk hi ka chiang lo rei mah mah a ni" a thu sawi chuan min va han ṭhawng tak em.

"Enga!?" chu thumal bak chu sawi tur ka hre rih lo, ka ṭhu ngil deuh nghal awt a, ani ve thung chuan min ṭhut hnaih sauh a, ka ke tih nât hlau zetin min awm hnaih tial tial a, ka thin phut ran dan chu pui tak a ni.

"Ka nupui i ni duh ang ti raw? Kumkhuaa ka nupui ni turin ka thinlungin a thlang tawh che a, ka thlah mai mai tawh lo ang che" a tih leh chuan ka ṭap hawk ringawt a, ka ṭah a chhuak em em pawh a ni lo, ka hamhaih lutuk chu ka insum hman lo a ni ber. 

"Ka awih lo, dawt i sawi chiang mai Sir Mam. Ni lo, ka awih ngam lo, a lem vek a ang êm mai" ka ti ṭuau a, ka mittui te chu hruk hul pawh ka tum lo, ka thin a phu rang em em a, a hre pha hial ang ka ring. 

"Dawt a ni hleinem, tu nge heti ang thu serious lutukah dawt sawi duh ang, dawt ka sawi lo Noel" ti dam dapin min nuih suk a, a âwmah chuan min kuai bei zui nghal a, a mi tih ang ang chuan ka awm tawp ringawt. 

"Ka awih thei lo, thil thleng thei a ni lo hrim hrim. Tuma'n an mipa duh ruk em em te pasalah an nei ngai lo, Movie-ah pawh lungngai takin an awm ziah, nge tuna kan awm dan hi ka mumang vek zawk!?" ka ti zuah zuah a, ka aw chu a la dik hlei thei lo.

"Nang nu tê reuh hi i lo la puitling lo tak tak a nih dawn hi!" tih leh min fawh chu a rual nghal a, a hmui lum nuam tak chuan ka hmui a chettir ve zel a, chu erawh ama min thununna rah vek a ni.

"Nupuia neih ngei che ka tum a, i chhungte bulah erawh lo la hrilh lo la ka duh, kei leh nang chiahin hre rih ang. Min nei duh ang em? I pasal ni turin kei hi min nei duh ang em Noel?" a tih leh chuan awih loh theih a ni ta lo e. 

"Ka hre lo, ka hre lo tak zet Sir Mam. Ka buai vekin ka hria, ngaih dan siam dan tur tak ngial pawh tunah rih chuan ka thiam lo" la ṭap deuh feih feihin ka ti mawlh mawlh a, rilru nât vang emaw hlim vanga ṭap ka ni lo va, hamhaih lutuk vanga ṭap ka ni tih ka hre chiang hle thung.

Kawngka kik thawmah chuan ka insiam ṭha sawk sawk a, Sir Mama erawh awm sawn mai a tum lo va, inngaizawng eng ang mah ila ka nu leh pa ka la zah ru em em a, zah tur ka ni reng bawk. Ka nu chuan thingpui a rawn chawi lut a, Sir Mama in atan a siam tih ka hrethiam nghal mai. Kei pawh ka ṭap tawh lo va, ka ṭah a chhuak tawh lo hrim hrim bawk. Ka nu chu rei awm lovin a chhuak leh nghal a, kan boruak chu a nuam nge nuam lo pawh ka hre lo a ni. 

A haw dawnah Sir Mama chuan zana lo len a tum thu a sawi a, min fawp leh hram bawk a, a tawpa tawpah chuan ka nui ve thei ta. Ka mipa duh ber leh ka rilru zawng zawng kum tam tak chhung lo luah khat reng tawh tu hnen aṭang sawmna ka dawng a, sawmna azawnga ropui ber nupuia sawmna a la ni zui a, min sawm laia ka thi dang lo te kha a mak ka ti hnuhnawh zawk. Ka ke nâ lo ngat phei se chuan ka zuang tâwr tawr ang ka ring, ka piana hnu lamah chu thu baka hriat nuam chu ka la hre lo a ni. 

Zanah chuan a lo leng ta ngei a, beisei loh deuhin thil a thleng ta tlat mai. Hnathawhnaa kan pu ber David-a chu a lo lêng hlawl a, min kan nân eng eng emaw ni a lo la keng zui a, Sir Mama chuan a ngaitheih loh hmel kher leh nghal. Ka room chhungah kan pathumin chauhin kan awm a, Sir Mama chuan mi dang hriatthiam loh hlau tak ang mai hian ka kut a hum ran a, sawi tur a vâng duh hle. Kan boruak ṭang lutuk tiziaawm turin titi te chu ka'n vawrh ve tak nâ a, min sawi zawm rei pui peih thlawt lo. 

"Noel-i hi a fâlin ka lo be lawk ang chû?" David-a chu ka en thuai a, ani chuan Sir Mama a lo en daih thung a, chutah ka rin loh lutukin Sir Mama chu a tho nalh a, room aṭang chuan ngawi reng hian a chhuak ta daih mai. 

"Bialpa i nei tih ka lo hre miah lo va, ka duh lutuk hman ang che tih erawh a hlauhawm khawp mai" David-a chu a nui tawi tak a, rilru nuam lo zetin ka lui a, a hma khan hre thawi deuh tho mah ila ka ring ngam chiah lo va, tunah chuan min lo duh reng tih chu ka hrethiam ve ta chiah e.

"Keini ang mai mai min lo duh ve hi a lawmawm lutuk Sir, eng lo a nia..... Sir Mama kha chu hmân aṭang tawh" ka ṭawng laklawh laia min lo khap zeuh chuan ka ngawi ta hmak a, min la nuih vur vur zui, hlim lo hmel a pu miah lo te chu a mak letling zawk ang reng.

"Ka hre vek tawh alawm, ka tum loh deuhin ka hre zawk maw le. Ka hriat tirh chuan ka awih lo va, Fakzuali kâ aṭang ngeia ka hriat tâk si ah kha chuan bawh zui vak che a mawi lo tih ka hre chhuak ta a ni" a hmelah chuan lungawi lohna pakhat mah a lang lo tluang zel a, chu chuan min tiinthlahrung zual thung. 

"Ka va haw ang e" tiin a ṭhutna aṭang chuan a tho chhuak a, kawngka lamah thawm a rawn awm nghal a, Sir Mama chu a lo lut rang khawp mai, ni lo, he pa hian kan inbiakna kha a lo ngaithla ru reng tihna em ni ang?

David-a chu ṭawngkâin ka thlah a, ka ke a damsam lo miau a, tiang hawl chungin kal thei tawh tho mah ila ka tho buai duh ta lo law law. Sir Mama ber zawk chu mak ka ti, mi dang laka min hauh ṭung ang hian a awm vel tlat a, a naupangchhia reuh tawp. David-a chhuah dawn te khan a hmuh tur kherin ka kut a fawp vel kha a nia, tunah lah ka bul chêtah a ṭhu a, pa in naute a uap ang mai hian min uap run bawk.

"Engati nge heti ang hian i awm tlat a? David-a pawh a haw daih tawh khâ, i awm dan hi a puitlin loh thlak em mai" ka ti ta nge nge a, ani lah chuan engah mah ngai lovin min rawn fawp ringawt a, a rui ti dawn ila a rui der bawk si lo.

"Mipa chuan a nupui ni mai tur chu mipa dang lakah a hauh tlat tur a ni; a them paw'n an melh che hi ka phal lo bur" khauh zet hian a ti a, a thinrim emaw ka ti hman hial a, eng vanga David-a la thik tlat chu nge a nih ka hre lo a ni. 

"Thil dang sawi ang, engati nge tarmit hi i vuak tâk reng? I mit lam a ṭha tawh lo em ni? Nge i lo tar tawh viau zawk?" nuih insum ru zet hian ka ti a, ani chuan ner nang hian min en a, ka nui chhuak teuh hle.

"Ka tar leh tar loh chu kan inneih zanah i hre mai ang" tiin ka hnute chu kawr chhanah a rawn ṭham zeuh a, rei lo mah se engtin emaw ni ka awm hman hram a, a fiamthu tih ka hre zui nghal bawk. 

"Hmân ang khan hmelṭha min la ti reng em Noel? I rilru dik tak min han hrilh teh le, i mitah hian ka tar tawh viau tak tak em ni? Ka la inchengvawng ve viau asin, min heltu pawh an la kat ve nûk a nia" nui suk hian a rawn ti leh a, ka nui chhuak ta nge nge.

"Ka first love kha i ni ve miau a, ka mitah chuan i chuai thei lo tawp a ni mai. I hmui hmul leh biang hmul vel erawh tun hnaiah i ziat fai lo a nih hmel, ka hmu thei tlat" ka tih chuan a biang khawih nghalin

"Ka ziat hman meuh lo, tun lai chu nangmah hlir ka rilruah i awm a, ka inngaihtuah lutuk hman lo a ni mahna, ka lo inziat fai vek dawn a nia" a rawn ti zung zung a, ka mita lan ṭhat loh a hlau vel lutuk chu a lawmawm reuh tawp. 

"Ziat fai rawh ka ti kher chuang hleinem, i inhmeh ka ti phian zawk asin, mahse buk chhur ang chi kha chu ka duh chuang lo. Tuna mi ang hian tawi tê têin ṭo sep sep se i inhmeh a, i lang ṭha zual a, i pâ em em bawk" ka rilru dik tak chu ka zep reng thei ta bik lo a ni e. 

"Hmelṭhanu" tiin min rawn fawp tawk a, a nuih te hian a hmelṭha leh zel a, amah a ngo bawk nen a kawr hak te chu inhmeh ka ti hle a, chu erawh ka sawi lang ta lo, a rim leh min fawhna mawlh hian ka chhungril a dek zar ṭhin.

Thla a liam a, kei paw'n hma ka sawn ve zel a, engmah ti lovin thla 2 zen zawn chu inah ka awm ta. Ka kal thei tawh ngei a, mahse ka la kal chak thei lo hle thung. Ka kal chak zawng hian a ruh lam a rawn nâ leh ṭhin a, ruh khi a ni miau a, doctor phei chuan dim turin min chah awl lo va, kan in-check up chang hian tliak thei dinhmunah a la din reng thu min hrilh ṭhin nghe nghe bawk. Ka pa paw'n eng ka tih mah a la phal lo hrim hrim a, ka nau te pahnih thlengin min awl hneh khawp mai. 

Ka chhang chiah Remremi pawh a rawn haw tawh a, ka pa'n awm reng ṭha a ti lo miau a, chhungkawpa ber thu chu hnial theih a ni lo tlat. Chu bakah tun lai chu inruk bo tih vel chanchin thar lamah an puang reng a, chu chuan ka pa a tihlauthawng zual ni berin ka hria. Aizawlah a awm ta bawk a, a tih zawm tur te kan rel a, a tawpah chuan B.Ed training se kan ti ta a ni. Remremi pawh chuan hnialna a nei lem lo va, zirtirtu nih lam a tui tho bawk a, a tih chi tak a nih ka ring. 

Sir Mama nen kan inngaizawng tih a hriat tirh chuan mak a ti hle a, Sir Mama chu a en leh vung vung ṭhin. Hmuh tawhna a neih thu a sawi nuap nuap zel a, kei lah chuan a hmu tawh ngei tih ka hre chiang ropui bawk si. Kar khat hnu velah a hmu tawhna chu a rawn sawi chhuak ta phawng mai, ka song book thleng thlengin a sawi kâi a, thu dik vek mah ni se ka zak ve reng, ka nau chuan min puan chiang leh lutuk a, zan 2 chhung vel chu Sir Mama pawh ka en ṭha ngam vak lo hnuhnawh leh vel bawk. 

David-a chu a reh ta hmak a, ngaihtuah chhuah chang hi chuan a nuam lo duh khawp mai. Keini ang mai mai te min lo duh ve a, min hriat chian tumin a lo bei ve a, kei lah chuan mipa dang ṭâng belh ka thlang zawk tlat si a, a tan chuan tih ngaihna a awm lo a ni. A hnua ka hriat leh danin Sir Mama nen an lo inbe vek tawh hi a lo ni a, chung chu Sir Mama bawkin min hrilh leh a, min hrilh lai te chuan a thikzia chu ka hmu thei vek, a awihawm loh zawk alawm le.

Hun a'n kal leh deuh hnu chuan Remremi B.Ed training-na tur pawh kan tifel tawh a, Entrance exam leh Interview pal tlangin Châltlang lamah a kal nitin tawh dawn a nih hmel a, a huphurh lo tulh tulhin ka hria. Kei erawh engmah ka la ti lo tluang zel a, ka ke lam erawh chuan hma a sawn viau thung a, ka kâl ka kal ve thei tawh nghe nghe. Tlan lam erawh ka la ngam lo nasa a, ka kal chak deuh chuan nâ a la awm tlat a, ka tih duh pawh tithei lova dim a ngai ṭhin chu ninawm chang a tam mai. Ka chawna ser awm te chu tihreh dan tur ka zawng rilru ṭhin a, hmeichhia nih chuan a ngaihna chen a awm tlat. 

Ni khat chu Remremin chhuahpuiah min sawm a, kan chhuah dun khâtzia ka hriat chhuah phah hial a, ka pa paw'n a lo phal lo chuang bik lo. Bus-in Bazar lam chu kan pan a, rin ai takin kan thleng phei hma bawk. Remremi nen chuan kawr kan en dun a, ka pa engmah a dil buai duh lovin a pawisa khawl sa hmang chuan thil kan lei a, a puitling sâwt ka ti hle. A u ve lah chu hna nei lo mai ka ni rih ta mai si a, ka hna ngai zawm leh thei tura dam thuai thuai ka ngai a ni. 

A kawr tur chauh emaw a lei dawn ka tih laiin ka kawr tur thleng thlengin a en kual a, ṭul ti lovin hrilh ru su su mah ila awmzia a awm lo, a duhna ah chuan luhlul ngil ngel ve tak a ni. Kei pawh ka bang bik chuang lo, ka nu kan chhunna pakhat a ni a, ka nu pawh hi a tihtauh tawh chuan ka pa'n a thlem ngar ngar zel, a tihtauh hun chu a tawp khawk tawh tihna a ni mai. Ka pa nen hian inhauh an nei zen zen lo va, an hnathawh laiah an inpui tawn thiam em em ṭhin, mahse inhauh chang chu an nei ve ṭhin tho.

Haw turin Bus stand bulah kan ding a, Remremi chuan min be mial mial a, kei paw'n ka lo chhang ve zel a, a zarah thawmhnaw thar ka nei ta ringawt chu a nia, nau te mah ni se a inthlahrunawm ru duh khawp mai. Kawngpui chhak lam ka hawi chiah chu Sir Mama ka hmu teh daih a, chutah a bulah chuan hmeichhe pakhat amah ang rual vel tur a kal bawk a, chu nu chu hmuh tawhna ka nei thânin ka hria. Ka dinna aṭang chuan pen sawn deuh hlekin ka en chiang a, kan zirtirtu ni ṭhin Miss Tei ngei a lo ni e. 

Ka rilru chu a nâ nghal vawng vawng a, hmeichhe dang nena Sir Mama an awm dun chu ka rilru nât chhan a nih piah lamah chu hmeichhia chu tu dang ni lovin Miss Tei a ni tlat a, chu chuan ka rilru a tinâ ber zawk. Zirlai kan nih lai khan inngaizawng thanin an thang fô ṭhin a, keini paw'n inkawp tak tak emaw kan ti hial ṭhin. A thik pawh ka thik nasa thei hle kha a nia, tunah lah chuan an pahnihin ka hmu dun nawlh a, ka rilru chhungril chu a nâ tak zet. 

Remremi chuan a hmu ve lem lo va, Bus-a kan chuan chhung zawng chuan ka thin a rin em em a, ka rilru a nâ vawng vawng bawk. Keimah leh keimah chu ka inzahpui a, Sir Mama te ang mipa vantlang chung lam tan chuan keini chu kawp mai mai tham lek kan ni tih ka hre chhuak ta mawlh mawlh a, mahse ka hmangaih tlat si chu thil pawi ber a ni. Duh satliah mai chu ni ila ka la nâ em em hran lo vang, duh mai ni lovin ka hmangaih hle tawh thung si a, mawl ka inti ngawih ngawih. 

Zanah chuan ka rin ang ngeiin a rawn lêng lo va, phone kaltlangin a hman loh thu erawh min hrilh leh thlap a, awih harsa ti tawh tak ka ni. Rei pawh be peih lovin chhanna mumal ka pe lo va, zan 3 ngawt chu a zawnin a lo lêng tawh lo, chu pawh a hna lama buai a intih vang a ni. Miss Tei nen Bazarah hmu dun lo ila chuan ka awihsak leh mai ang a, phone-ah pawh ṭha takin ka chhang ngei ang, mahse tun ṭum chu a dan a dang zar a, hmeichhe dang nen min kawp ni tlata hriatna ka nei bawk.

A tuk zanah chuan a rawn lêng ve ta hram a, hmelṭhain pâ viau mah se hmuh dan ka nei ru ran a, ka pa nen an inbiak lai te chuan ka lo en kar a, thil tisual lo ang maia a awm thei chu mak ka ti a ni. Thingpui ka siamsak a, a in turah chuan chini ni lovin chi ka al ṭeuh a, ka theih dan kawnga thinrim khum hrep chu ka duh a ni ber. A thingpui tur chu a tawp berah ka pe a, mi dangin lâk an tum tlat ang tih ka hlau ru hle. Thingpui a in chiah chu a phuh nghal ṭhawt a, kan inmelh chiang khawp mai.

"Engati nge?" ka pa chuan a lo ti thuai a, Sir Mama chuan ṭha taka biak pawh a phu lo, tunah tak chuan haw vang vang mah se pawi tihna ka nei lo, ka pa ni lovin keimah zawk chu min en run leh ta nghal a, lo melh lêt nâ tak ka ni. 

"A sâ deuh maw le" ka pa zawhna a chhan dan avang chuan za lo zetin ka nui a, ka nui ri lem lo va, a nupui ni tura min sawmna te kha dawt vek a nih ka ring ta, ka lo hlim ve hman em em kha a nia, hlimna tluan tling a ni der si lo.

A haw dawn chuan ka thlah peih lo kher mai, ka chhungte lah chuan engmah an hrethiam lo va, ani erawh a mitmeng aṭang thil dik lo awm a hria tih ka hmu thei vek. Êng awmna chin thleng chu thlah ka tum a, eng thu mah chhak chhuak lova lêt ka tum laiin min pawt her sawk a, ka ke a rawn nâ zawk nghal. Chhung lamah a tur et et a, a nât dan chu a thuk khawp mai, ka mittui chu a parawl zui nghal bawk. 

"Eng thil nge dik lo awm?" tiin min en chhuk run a, chhan pawh ka tum lo, ka ke chu a nâ tawh hle a ni.

"Sawi rawh Noel, in chhunga i awm dan leh min en dan kha a dik miah lo, zan dang ang a ni lo" amah bawk chuan a rawn ti leh nghal a, ka kut a chelhna chu pawh thlak ka tum a, ani chuan a vuan nghet sauh thung. 

"Dawt sawi turah ka ngai lo che asin Sir, mahse vawiin khan dawt sawi thiam tak i nihzia ka hre ve chiah a ni. Miss Tei nen khan hlim deuhin awm dun zawk rawh u, kei hi chu i tan ka naupang mah mah a ni ang e" ka ti ta nge nge a, ka ke lam nâ chu sawi ka tum lo bur. 

"Eng thu nge i sawi hi!? Eng vanga Miss Tei te daih daih lo sawi chhuak nge i nih? Min hrilh chiang rawh Noel, ka duh ka hriat hma chu i lut tawp lo vang" a aw chu a khauh sâwt ta hle.

"Nimin khan ka hmu vek che u alawm, hlim takin thil in lei dun a nih kha maw le. Min thlah tawh rawh Sir, zanin bak hi chu kan inhmu tawh loh a ṭha berin ka hria" pangngai deuh hian ka ti dul raih a, a meng buai ve ta nâk mai le.

"Ka sawifiah thei" a tih chuan lu ka lo thing nawk nawk a, ka ṭah chhuak viau mah se a hmaa ṭah ka duh bawk si lo, ka ke lah chu a nâ tulh tulh leh nghal.

"Sawifiah a ngai lo, inṭhen leh zawk mai ang" tia ka tawlh hla tur chu a lamah min pawt hnai dâwr a, thinrim tur ka nih laiin kei aiin a thinrim hmel daih zawk.

"Ngaithla teh Noel, vawi khat mah inṭhen kha sawi tawh suh, kan inṭhen ngai dawn chuang lo. Miss Tei nen kan inkarah engmah a awm lo, dawt ka sawi lo" nêm fahran lo hian a ti hrawk a, ka ṭap chhuak ta hawk. 

"Min ring rawh Noel, Miss Tei kha chuan min la duh ngei a, vawi tam min rawn biak tum ṭhin, mahse a phone call ka pick up ngai mang lo. Bazara kan kal dun chhan kha chu kan inhmu fuh lutuk a, mi zawng zawng hmuh laiin min pawt ding ṭâlh a, mualpho ai chuan ka kalpui ta ringawt a ni" a tih zawm mawlh mawlh a, kei erawh ka ding rei thei ta ngâng lo. 

"Lalpa le! Sawi ta che Noel, kei hi ka mawl tak zet!" a awah chuan hlauhthawnna hlir a lang a, min pawm kâng láwp a, ka ke ka tawm zawng ringawt pawh chuan nâ ka ti tawh hle.

In chhungah min pawm lutin ka room lam min panpui nghal a, ka pa te pawh an rawn lut har lo khawp mai. Ka nu chuan ka damdawi ei lai chu min eitir nghal thuai thuai a, ka pa'n ka ke nât dan a zawh lai te chuan Sir Mama chu a ngawi reng thung. Ka kut a hum ran a, ngaihtuah hmel zet hian min en bawk. Ka damdawi ei chu a thawk chak chi a ni a, ka ke chhungril nâ lutuk pawh a zia ta. Ka chhungte chu an chhuak vek tawh a, Sir Mama erawh a la ṭhu reng a, ka kut a hum reng bawk a, ka thle sawn ta daih. 

"Ka tihpalh Noel, ka tihpalh tak zet. I ke lam ngaihtuah miah lova ka pawt che kha mawl ka inti ngawih ngawih, hre tura ka duh che chu Miss Tei nen khan kan inkarah engmah a awm lo, kei chuan nangmah chiah ka duh che, ka thlang reng bawk ang che" a tih chuan a lam hawi chuang lovin

"Rinhleh loh theih i ni hleinem, High School kan kal lai aṭang tawh inngaizawng thanin in thang a, tun hnuah in Bazar dun leh a, ka tan chuan a harsa lutuk. Zan 3 ngawt i lo leng tawh lo va, ka buai i tih avangin sawiselna che ka nei lo, a chhan chu ka ring tawp che a ni. Tunah erawh chuan rin che hi ka duh leh lovin ka hria, kan nihna leh kan nunphung a inthlau êm mai" ka lo ti ve thung a, dim têin a lam hawi turin min kuai zui nghal thung. 

 

"Min bansan i tum thu sawi miah suh Noel, ka thinlung leh tih tak zetin ka hmangaih che, kei hian ka hmangaih tawh che a ni" a thusawi avang chuan insum theihna tlachhamin ka ṭap chhuak ta feih feih a, ka chal leh a chal chu a insik tir nghal thuai bawk.

"Min ring lûl teh Noel, nang chân che hi ka duh lo, kumkhuaa ka nupui ni turin ka duh zawk che a ni" a rawn ti leh a, min kuai dâk a, min fawp vawng vawng a, ka ṭah chhuak pawh zawi zawiin a kiam ve ta.

"Ka hmangaih che, hre reng rawh, kei hian ka hmangaih lutuk che" a vawi hnihna atan min hmangaih thu a sawi nawn leh chiah chu ka lo ṭah nuih hawk a, ka mittui luang a hruk hul lai te chuan ka lo en kar a, tunah chuan dawt a sawi ka ring tawh bik lo. 

"Kei paw'n ka hmangaih che" ka ti ve ta sep a, kan inawm hnaih bawk a, sawi rin kher a ngai hran lo, chutah kiai suk chung hian

"Ka hre daih tawh alawm, min hmangaih em emtu hi ka lo hmangaih lêt har mah mah zawk che a ni" ti leh min fawh a rual nghal a, hmangaihna biahthu inhlan hnua infawh zet zawng a nuam dangdai kher mai. 

Ka mut chu a rawn chhuak riai riai a, ka damdawi ei hnathawh a ni tih ka hria. Sir Mama pawh ka bulah a la awm reng a, ka rilru nâ thawi dam tumin a duatna awkâ chu ka hre awl lo va, ka rilru erawh a nâ tawh miah lo, a dam fel vek tawh zawk a ni. A inthiam loh thu a sawi deuh reng bawk a, ka ke nâ a zia lutuk tawh thu ka sawi paw'n a inthiam loh thu chu a sawi bâng chuang lo. 

Thla 2 kan hman ral hnu chuan ka ke pawh ka hmang pangngai thei var var tawh a, Scooty thlengin ka khalh thei tawh a, mahse ka fimkhur sâwt hle. Tin, ka hna lam ka zawm leh tawh bawk a, David-a'n zawm turin min ti lo se chu ka zawm tawh kher lo maithei a ni. A chhan pawh Sir Maman inneih lam a sawi deuh reng a, amah a lo naupang zawk zawk tawh lo tho bawk nen mak ka ti hran lo. Kan inneih hnua hnathawh a phal lo lawk diam bawk a, min duat chu a tum hmel khawp mai. 

Remremi te paw'n class an ṭan tawh a, kal lamah hian Sir Maman a rawn lam leh zauh ṭhin a, an kalna lam tur a inang deuh reuh a, nitin erawh an inphur ngai chuang lo. Keimah ber zawk hi min thlah ziah a, Scooty khalh a phal lutuk lo bawk a, mahse a hmuh loh lai chuan ka khalh tho. Ka chhungte paw'n an ngaina ve tawh hle a, Nunhlima ngat phei chuan ngaina tawh tak a ni. Naupang tih takah a duh duh hi a sawipui a, pakhat lah hian ning miah lovin a lo sawipui ve mai zel bawk a, Sir Mama hi chu nu leh pate tan pawh rinchhan ngam mipa a ni chiang a ni. 

Tlai khat chu ka hna bang tur min lo hruai a tum tlat a, kan awmna a inhlat ang reng bawk si a, ṭul ka ti teh chiam lo hle. Chu bakah Fakzuali nen pawh kan haw dun thei reng a, inneih hma hmaa tihbuai vak chu ka duh lo a ni. A rawn kal ta ngei a, David-a nen kan inbe lai tak a rawn hmu fuh a, haw kawngah vawi khat mah min biak duh loh phah ṭhak. Thik tur a nih lohzia leh David-a nen kan inkara engmah a awm loh thute chu kawng tluanin ka hrilh mawlh mawlh a, kan in kawta kan din hnu thlengin a ṭawng duh chuang lo, biak loh law law chu a fuh ta zawkin ka hria.

Chumi zan chuan a rawn lêng lo nghe nghe a, phone kaltlanga biak ka tum lahin a la duh bawk si lo. Ka lung a awi tawh bik chiah lo va, khati ang khawpa ka hrilhfiah chung paw'n min ring duh lo a nih chuan min biak loh theih chhung chu biak loh ka tum ve ta a ni. Ka pa chuan Sir Mama hmel a rawn inlan khât thu a sawi leh zauh zauh ṭhin a, zan hnih lai chu a lo lêng lo tawh lo, ka call pawh a la chhang duh lo tluang zel e. Biak loh tum si khan be lova awm reng ka thiam leh tlat lo va, biak tum hmasa zawkah ka ṭang ngun hle.

Tin, Sir Mama hian TV siam leh khawl thil khawih vel a thiam fû a, kan TV a chiangkuang lo leh tawh bawk nen ka pa chuan lo lêng turin a duh a ni ber. Ni 2 chhung ngawt min be lovin a awm thei a, ka phone call a chhang duh lo bawk a, a tawpa tawpah chuan ka rilru chapona a chhuak ve ta. Inneih hial kan sawi kâi tawh a, nupa niha khum khata mut dun mai mai a châkawm thute kan sawi dun ṭhin, mahse ka laka a awm dan chuan min tihrilhhai hle a, ka rilru a tina ru hle bawk. Ṭhen tumna rilru erawh ka pu chiah lo, inṭhen ka hlau a ni mah zawk.

"Ruata chu âw....lo lêng hman vat se ka ti asin le" ka pa chuan a ti leh ṭhin a, kar khat lai chu a rawn lêng tawh lo va, ka chhungte bulah a buai thu ka sawi mai zel a, ka lung a awi lo ve tawh tak zet.

Biak ka tum lahin a tawp hmak a, tlang pawh a tlang thei tawh lo. A hma te kha chuan a ring tal a, khang hun lai khan lungawi lo tho mah ila tuna ka lungawi loh dan nen chuan inang lo tak a ni. Rilru nuam lo zetin hna lamah ka kal nitin a, thil dang ngaihtuah tum ṭhin mah ila ka rilru leh ngaihtuahnaah Sir Mama bak a awm thei ngai chuang lo. Tlai khat phei chu ka ṭap tawp a, ka ngai ve êm bawk a ni. Chuti maia min tawpsan tur chu ka ngaingam lo va, ka phal lo va, min tawpsan dawn lo ni se lo lan loh a hun tawh bawk si lo, ka lo hmangaih tawh lutuk a ni e.

"Noel, i phone a ri a nia" Fakzuali chuan a rawn ti a, ka thawhpui dangte kalsanin ka phone chu ka ban a, number lawng tawp hi a lo ni a, Vai emaw Company vel bak a nih ka ring lo, pick lovin ka off ta daih. 

"Tu tak ni ang maw!?" ti sepin ka phone chu ka en reng a, number ngai bawk aṭang phone call dawng nawn leh ngat lo ila chuan khawih pawh ka tum tawh lo, kan piah lawkah David-a a awm a, pute hmuh laia phone hman chhen chu a mawi lo a ni. 

"Hello" ka tih chuan leh lam aṭang mipa aw hian

"Lo chhuak la, in building kawtah ka awm e" a rawn ti dam dap a, ka mi biak mêk pa aw chu ka hre chiang em em a, ka tan chuan hai theih a ni mawlh lo.

"Sir Mam!" ti hluaiin ka ding ngil nghal zawt a, ka thawhpuite chuan min lo en deuh ṭhap a, David-a tak ngial paw'n min lo en a, ka inthlahrung hnuhnawh khawp mai.

"Hmuh che ka duh Noel, sawi tur pawh ka ngah ang reng viau mai" a ṭawng laklawh lai chuan ka off khum hmak a, ka chhungril chu a sa deuh pup pup a, ka thinrim thar ngawih ngawih bawk.

Sir Mama chuan a lo call nawn leh ngat a, ka switch off ta daih, ka be peih rih thlawt lo a ni. Kha chen chen kha min be lovin a awm thei a, min hmu lovin a awm thei bawk a, min rawn biak tâk avanga a thu thua awm ka tum tawh teuh lo. Thinrim ru ṭûnin Computer chu ka khawih ri sawk sawk a, ka ṭhiannu chuan chik zetin min en tih pawh ka hre vek, mahse ka hmu lo der hmak thung. Rilru pe lo zetin hna ka thawh zawm a, chhut sual ka la ngah em em zui; engkim chu VANLALRUATA vang vek a ni. 

Ka ban rawn hmer chattu an awm rualin ka hawi chhuak thuai a, Sir Mama nen chuan chiang deuhin kan inen a, tal chhuah ka tum chiah chu min kai dawr dâwr a, David-a paw'n min hmu reng, mahse engtin mah Sir Mama chu a dang chuang lo. Building kawt kan thlen thlak hnu chuan a motor chhungah min nawr lut titih a, chhuah ka tum ta bik lo. Kan inkar mumal lo zet chu sawifel a ngai a, a ṭul a nih chuan hmangaih em em chungin ka ṭhen mai a ni ang chu! 

Khawi lam nge min panpui a tum tih pawh ka ngaihtuah buai peih lo va, a duh duh nâ na ah min hruai se, engkim sawifel chu ka duh ber tawh a ni. Kan tlan zel a, kan tlanna lam kawng chu ka hriat hnu a ni tlat. An in kawtah kan ding a, an inah hian ka chuangkai zen zen lo va, a chhungte erawh ka lakah an inthiam lovin an ṭha viau tho. Ka kutah chelhin in chhung lamah min luhpui a, dan tumna pawh ka nei lo, awmzia a awm dawn lo chiang êm mai. A hmel chu ka en leh zauh ṭhin a, thinrim hmel a pu lo va, lungawi hmel a pu chuang paw'n ka hre lo.

"I lungawi loh chhan hi ka hrethiam alawm Noel, kar khat chhung ngawt ka rawn biak loh vang che a ni ti raw? Ka hna lama ka buai mai bakah buaina ka tâwk leh zel a, min hrethiam dawn nia" a khuma kan ṭhut hnu chuan a ti dam raih a, hriat nuam viau mah se la lungawi lo tak ka ni.

"En teh maw Sir Mam, ka ngaihtuah chiang a, buaina neuh neuh kan nei reng te hian ka rilru a tikhingbai tak zet tawh a ni. Kei chuan ka hmangaih ngei che a, mahse ka laka i rilru puthmang awm ang tur pawh hi ka ring thiam tawh lo" ka tih chuan

"Ngaithla teh Noel, thil hi a ni lo zawngin ngai ṭhin suh. Hna thilah ka zin a, ka phone min ruksak leh zel a, thil pawimawh tam tak ka dah bawk si a, duh aiin ka lo haw har phah ta a ni" a rawn tih zawm nghal a, ka biang chu a dawm a, a thusawi chu rin harsa ka la ti tlat thung. 

"Ka ngai viau che asin" ti leh supin min rawn fawh a tum a, ka lo thle sawn daih a, ngawi reng hian min en a, a lungawi ka ring bik tawh chiah lo, mak a ti viau bawk ang, a chhan chu vawi khat mah min fawh a tumna ka la hnar ngai lo a tin ni!

"Noel" a aw chu a nêm hran tawh lo va, ka laka a insawifiahna chu ka la pawm thei lo a ni ber, amah ngaia ka ṭahna te kha hre ve ngat se zawng min khawngaih ngei ang, ka rilru chapona a chhuak laklawh tawh bawk si nen a insawifiahna chu ka duh khawp lo a ni e.

"Inṭhen i duh em ni?" a lam chu ka hawi thuai a, mitmeng thip ram hian min lo en run a, a hmel thutakzia chu ka hmuh hmaih hauh lo, inṭhen em em ka lo ngaihtuah pha miah lo va, a thusawi chuan min ṭhawng ang reng hle.

"I thusawi dan kalhmang aṭang hian inṭhen i duhin ka hria, min chhang teh Noel" amah bawk chuan a rawn ti leh a, eng nge a chhan pawh ka hre lo, awlsam zetin ka mittui a rawn tling a, ka ṭah mai loh nân ka hmui ka pet ta ringawt. 

"Min chhang lo a nih chuan ka duh danin ka che dawn a nia" a ṭawngkamah chuan min ṭhen a tum tih ka hrethiam nghal a, ka rilru chapona chu pakhatmah a awm tawh lo; rilru nâtna leh lungngaihna tih mai loh chu!

Vawi leh khatah a rawn che chhuak thut a, min rawn fawp buan buan a, khumah chuan min bawh bet zui nghal bawk a, min fawh tawn tawn lai chuan ka ṭap chhuak ta hak. Ka ṭap tih a hriat rual chuan a che tawp hmak a, nula ve ûai tawh si awlsam taka ka ṭap thei mai chu inzahpuina ka nei ru deuh tho va, mahse chu chuan ka rilru a luah ber lo. Min fawp tawh lovin a âwmah min kuah bet a, a kawr hnung chu ka hmer vak a, naute ang mai alawm ka nih le.

Ka ṭah lai reng chuan min kuai dâk a, dam zet hian min fawp a, zawi zawiin ka ṭah chhuak chu a reh a, a hnuah phei chuan ka fawp lêt ve nghe nghe. Ka hmui ka tih chet rual chuan a rawn che duhthaw sawt a, mamawh lutuk ang mai hian min fawp mawlh mawlh a, ka vai rûaiin ka hria. Ka hmuiah mai ni lo ka irah leh ka nghawngah te chuan a fawp thla zel a, ka âwm bawrah insawn thlain ka hnute chu a ṭham leh chat a, zauthau nasa tawh tak ka ni.

A samah chuan ka lo ṭham tawn tawn a, ani erawh a chet ngaiin a la che reng a, zep lovah chuan engti kawng mahin ka dang thei lo a ni. Ka tum lo hrim hrim a, tum pawh ni ila a harsa dawn lutuk, a chhan chu ka engkim a thunun hneh em em vek tawh tlat a ni. A che tawp thut a, ka harhfim nghal tial tial a, keimah leh keimah ka inen chuan kawr pangngai reng ka lo inbel tawh lo, ka inzahpui hnuhnawh khawp mai. Kei ang bawkin Sir Mama chu a pangngai lo ve tho va, duh ngat se chuan thui tak min thlenpui thei ngei ang. 

"Kan inkarah hian buaina emaw lungawi lohna awm tawh lo se ka duh, ka rilru dik tak i hria a, ka hmangaih che tih pawh i hria. I lungawi loh avangin inṭhen lam ngaihtuah tawh lo la, i inchhir lehna mai mai tur a ni tih hre reng ang che; a chhan chu ka hmangaih ang chiah chea min hmangaih avangin" a tih chuan ka ngawi reng a, ka dik lo ve tho tih chu ka hre chhuak nghal.

"I phone a tlang theih lai khan min be duh lo va, David-a nen kan inkarah engmah a awm lo tih hre reng chungin ka lakah i lungawi lo va, i rilru hi hriathiam har ka ti ṭhin a ni. Inṭhen ka duh bik miah lo, ka rilru chapona ka khap daih zawh loh rualin i thiam lo hmasa zawk tlat a nih khâ" ka ṭawng chhuak pawh a pangngai ta viau e.

"I sawi dik e, ka thik thu hi a chhe leh thut ṭhin alawm maw le. I rilru ka tihnât avangin ka tihpalh ni se, zaninah palai ka rawn tir dawn tih i chhungte lo hrilh bawk rawh. A hun ve tawh chuan ka hria, chuti lo zawng inneih hmain nichin aia thui kha kan kal palh ang tih ka hlau tlat" a thusawi tawp ber chuan min tizak thar hle.

"Eng lo....dan che kha ka tum lem lo, ka inhrethiam bik tawh lo, ka dang theih lo che ka ring ve tawp. A zakthlak ka ti ang reng, hmeichhe sihhnîp lutuk angah min ngaih loh hram ka beisei" ka ti ta sep sep a, min ngaihnep duh ka ring chiah lo va, chance erawh a awm tho. 

"Kei pawh ka insum zo lo ṭep chu a nih kha le, ka tar leh tar loh fiah a hun ṭep tawh e" kiai suka a tih chuan hmui tipawrh vakin ka melh chho nghal thuai a, ka thusawi a la fuh ta lutuk chu a buaithlak, a sawi reng mai. 

An inah chuan kan awm dun ta reng a, a chhungte tûmah an awm lo bawk nen kan free khawp. Free ti lêmah engmah phei chu kan ti chuang lo va, ei tur te kan siam dun a, a bulah hi chuan awlsam takin ka hlim leh thei mai zel, ka hmangaih vangte pawh a ni mahna. Thil kan ei dun lai te chuan ka ṭawng duh barh barh leh hle tawh zawk a, ani pawh a nûi a nui ve mai. A nuih hian hmuh nuam ka ti a, a ha var rual mawi tak te hi hmuh a nuam ṭhin hle bawk.

Waiwai ka chhum a, chaw nen ei ka tih tlat avangin a ei ve mai a, a ei ngai miah loh thu a sawi chuan mak ka ti viau. A chhan chu vawi khat pawh a la ei loh thu a sawi tlat a, ka awih lo dâwn dawn a, mahse ka awih ta tho, thil ni thei a ni ve tlat. Ka pa paw'n a ei ngai bik chuang lo, a rim aṭang a hne tawp zel. Sir Mama erawh chuti ang em em a ni lo va, ei ve tura ka tih angin a ei ve mai a, a ei ngai lo ve hranpa hrim hrim a nih hmel. 

Thil kan ei zo a, awm reng chu a mawi chiah lo tih ka hria, haw ka rawt lahin a la phal der lo zui. A sawi dan chuan nizan lamah a lo thleng chiah a, zing lamah mu rei deuh lo se chu min rawn hmuh ngei a tum thu a sawi bawk. Thinrimna nei tawh lo na nâ na chu ka'n kuah leh ringawt ṭhin a, ka ngai ve tak zet a, a lakah chuan inthiam lohna ka nei ru ṭûn mai. Ani lah chuan ka awm dan vel aṭang chuan a lo man thiam vek a, zep nei hauh lovin ka rilrua thil awm chu ka sawi chhuak leh ta ringawt.

Zanah chuan min hrilh lawk ang ngeiin palai a rawn tir tak tak a, a palai rawn tirh te leh ka chhungte inbiak chhung zawng chuan phone-in kan lo inbe ve thung a, a number thar chu ka save leh diam tawh a, ka save dan pawh a hmaa ka save ang tho a ni. A hmeichhia zawk tih takah ka'n ṭawng duh leh khawp a, zan rei tak thleng kan inbia a, Fakzuali nena kan inbiak ṭhin ai paw'n kan inbe rei daih zawk. Kan inbiak zawh meuh chuan thawm a reh ṭhuap a, ka chhungte chu an mu vek tawh a nih ka ring. 

A tukah chuan tukṭhuan ei laiin ka pa'n zan lama an inbiak dan chanchin chu a sawi a, palai hmel kan hmuh leh dawn thute chu a sawi leh a, pasal neih lam ka hnaih ve tawh lutuk chu a awihawm loh zawk. Hnathawhna hmun ka thlen chuan Fakzuali ka hrilh ve nghal a, mak a ti lutuk chu ka nui ta chiam. A chhan chu keia pasal neih tum hmasa ngar ngar kha a ni a, ka neih khalh daih tur chu a ngaingam lo a ni ber. A bialpa Matthew-a be nghalin

"Palai lo tir vat rawh, nachangte hre ve ta che, Noel-i hian mi neih khalh a tum a nia" a ti nghal zawt zawt a, a duh hunah chuan a ṭawngthei ve chiang alawm, Matthew-a lah chu a lo nui hawk hawk ringawt a, ka ṭhiani chu a lo fiamthu awzawng lo leh nghal.

Ka pasal nei tur chu a thik hian min thik a ni tawp mai, mo ṭhiana ṭan hmasak a duh loh thu thlengin a sawi kai a, kei lah chuan hman ka tum nasa ropui mai bawk si. Matthew-a chuan runluih titih deuh hlek hian inneih lam a la ngaihtuah loh thu a sawi a, Lalfakzuali thinrim dan chu pui tak a ni. An han inthlem leh tê tê a, chuti ang em em chuan a naupangchhia ang tih rin ngaihna pawh ka hre lo. Matthew-a chuan a tihlim ve thei leh mai bawk a, Sir Mama pawh ka hrilh ve nghe nghe a, a nuih a zat ve hmel khawp mai. 

Ni thum ral hnu chuan palai hmel kan hmu leh a, Sir Mama nen kan inneih hun tur chu ruat fel a ni ta. Mut hmunah ka ngaihtuah rauh rauh ṭhin a, High School aṭang tawh ka mipa vei em em nen kan innei tak tak tawh dawn chu a ni si a, ngaihtuah chian chuan a awihawm lovin a mak ve thlawt a ni. Kan inbiak changte hian ka sawi ri leh zauh ṭhin a, ani erawh a lo nui mai a, ka hmangaih avangin lawmthute hi min hrilh leh nulh ṭhin a, a lawm tak takin ka hria. 

A thiam lovah chuan ngaihdam dil a hreh lo va, lawmthu sawi a hreh miah lo bawk a, chungte chu amah ka hmangaih zualna chhan pakhat a ni. Kan inneih ni hma zawng chu zan awl awm miah lovin a lo leng zan tin a, office bana lo pen kawi zeuh zeuh a nei bawk a, ka nu leh pa phei chu an nui tawp. Chuti ang em ema min duhtu mipa ka nei chu mak an ti bang thei lo va, a hma zawngin ngaihzawng ka nei mumal ngai lo bawk nen mak an ti pawh chu a awm viau tho e, ka dem hran lo.

Thla kan hmang ral a, kan inneih ni a lo her chhuak ta. Ka phur rualin ka zam em em a, mi sawi kai hak khawpin kan lar a, a chhan chu Sir Mama vang a ni. Kan inhmuh loh chhung zawng khan ngaihzawng a lo nei nual hman a ni ngei ang, zaithiam lar tak tak te thlengin a ngaihzawng hlui ka hre ta nual a, a ṭhiante kâ ang aṭang vekin ka hre thung. Zawhna ka zawh lahin a nui mai zel a, chhan enah pawh a en ngai lo, a ngaihzawng hluite eng atan mah a tih tawh loh thu erawh min hrilh chiang hle.

An veng biak in lian leh ropui zetah chuan mo kawr nen ka pen lut a, Sir Mama leh a ṭhianpa chu an lo ding a, chuti ang em ema a hmelṭha theih chu ka ring ngai lo. A coat hak te chu a inhmeh hle a, a lakah chuan ka insit chem chem thei. Pastor-in ṭhu tura min tih lai te chuan a lam ka hawi zeuh a, thuchah kan ngaihthlak lai te chuan ka insum zo lo lek lek ṭhin, a va han hmelṭha chiang tehreng em. A ngo dan lah a tawk si a, a hmuihmul erawh a met fai vek a, Forever Young a nihzia chu ka hre nawn leh ta âwn awn mai. 

Hunserh kan hmang zo va, thlalak chhung chu rei ti tak ka ni. Pheikhawk sâng ka bun bawk si a, ke a kham duh khawp mai. Fakzuali phei chu ka beng bulah a phun char char a, mo han ni zawk ngat se chuan a ning khawp ang, a phunchiar lutuk te chuan min tinui leh ang lawi a, boruak chu a inpawlh nuai a ni ber. Mo ṭhiana sawm ka tum te khan a va han khirh mai mai tak, kar khat chhung an inah ka riah phah ringawt a, Sir Mama a lo len tluk tluk phah nghe nghe. Thla kan lak lai te chuan ka beng bul chêtah

"Kei aia pasal i nei hmasa hi ka la pawm thei lo" a rawn la ti hram a, thlalak lai ni lo se chuan ka nui chhuak chiang khawp ang, Sir Mama banah ka hmer vak ringawt a, chu chu ka nuihza lutuk tur tihreh dan awm chhun a ni. 

Cake kan zai lai te chuan mipuiin kut an lo beng dur dur a, host lah chuan kan intawn dan min la sawitir ve ve zui. Sir Mama chuan pangngai takin a sawi mai a, kei erawh ka sawi nghal thei lawk lo. Mipui lamin sawi tura min nawr luih fê hnuah ka sawi ve ta chauh a, ka va han zep ṭhen nasa tehreng em. Fakzuali zawt zawt chuan min puan ta vek a, ka song book-a ka thlalak bel thlengin a sawi chhuak a, ka zak lutuk chu ka hawi chhuak ṭha ngam lo hrim hrim hi a ni tawp. 

Inneih ruai chu tam pawh ei lovin thla la tur bawk chuan kan kal leh a, pheikhawk sâng bun  a ngai tawh em lo va, a zia viau. Hmun mawi zetah thla kan la a, Sir Mama chuan min han fawp vel ngei a, ka zak ru tak tak a ni. A chhan chu kan inneih thlalak tur a ni dawn miau a, mi dangin an hmuh hunah zawhna an nei ngei dawn tih ka hre lawk vek thei, chhan dan tur ka vân khawp ang le. Camera man lah chuan ti leh turin Sir Mama a hrilh a, a phur phurah a la ṭang zui.

Zan lamah chuan After Party kan nei a, zaithiam an zai nual a, Sir Mama bialnu hlui pakhat pawh a zai nghe nghe. Pasal nei tawh a ni a, mahse ka lo thik ru ve em em tho. After Party kan hmang zo va, Sir Mama nen chauh chuan room khatah kan awm dun ta. A bula awm nuam ti em em ṭhin si kha ka zak thar em em a, a inbual lai te chuan tih tur ka lo dap chhen a, ka inbual fai vek tawh avangin ka awm tawp a, tih tur ka hre hlawl lo. 

Bathroom aṭanga a rawn chhuah chuan ka phu zuk a, min nuih ruh ruh pah hian ka awmna lamah a lo phei a, towel chiah a veng bawk si nen ka zam ru tak zet. Khumah chuan a rawn ṭhu a, a taksa mawizia chu ka sawifiah thiam leh ta hauh lo mai. Six pack tih vel a nei hran lo va, mahse a mawi em em tho. A tihrawl hrim hrim chu a lian vel vek a, zam ru viau e ti lo chuan ka thlir ta reng mai.

"Che tawh ila" a tih chuan ka harh chhuak zawk a, naupang ang maiin hlim hmel zet hian min lo en reng a, khum aṭanga thawh ka tum rual chuan min pawt ṭhu thuai a, ka inneih zan mah ni se ka zamin ka zak ru hle.

"Sir Mam, eng lo....thawmhnaw eng emaw tal inbel phawt la" khuma min nam mut a tum lai chuan ka ti sep a, kan inmelh hnai thawkhat viau a, vawi leh khatah a rawn nui chhuak ta hawk hawk. 

"Thawmhnaw inbel ka mamawh tawh hleinem Noel, a chhan chu ka phelh leh thuai dawn tho tho. Nang nu tê hi i zam viau em ni? I zak a ni maw? I hmai a sen vek a nia, ka zirtir ang che, zirlai thiam thei tak i nih kha maw le" ti leh khuma min nam beh a rual nghal a, ka maimitchhing tawp ringawt. 

Ka hmuia fawp mawlh mawlhin ka thawmhnaw chu a phelh den den a, min fawhna leh a kut lawnga ka taksa a zut kualna vel chuan min tidanglam chiang hle. Ka mumal thei tawh lo va, engtin nge chuti ang chuan ka awm theih pawh ka hre bik lo. Ka zauthau em em tawh a, min sawngbawl mektu ka pasal ni ta Sir Mama chauh lo chu ka rilruah tu dang mah an awm thei tawh lo. Thlahlel zetin ka lo fawp lêt ve tawn tawn a, zah ka hre tawh lo reng reng a nih chu! 

Nupa nun kan hman hmasak berna ah chuan nuam tihna pakhat mah ka nei lo, ka taksa a nâ vawng vawng zawk. A vawi hnihna aṭang erawh a dan a dang zar a, awihawm loh khawpin ka taksa a danglam a, a hmasa ber nen chuan inang lo tak a ni. Ka pasal a nih angin a che mawlh mawlh a, keiin mamawh em emin ka lo dawngsawng a, inhmangaih takin nupa nun chu vawi thum lai kan hmang nghe nghe.

Zingah chuan hma tawkah ka harh a, mahse Sir Mama chu kei aiin a harh hmasa a nih hmel. Min lo en reng a, min en rei lovin min fawp zawm leh nghal zat a, a che zawk ni lo mah ila zan lama kan awm dan avang chuan ka chau ve em em tho. Zingkarah nupa nun kan hmang dun leh a, nupa nun kan hman lai hi chuan ka chau pawh a ni lo, a hnuah hian ka chau daih zel. 

"Han sawi teh le, ka tar nge tar lo" nupa nun kan hman zawh hlim hlawl chuan a ti a, a âwmah ka nam vak a, chuti ang thil chu chhan chi ah pawh ka ngai lo, a la ṭawng zawi lo viau leh nghal a, mi dangin an lo hria ang tih ka hlau khawp. 

Zing thingpui semna ah chuan ka che chhe ta alawm, ka va han zak mai mai tak. Thingpui no chu ka thlauh keh darh chuai a, chhar khawm ka tum chuan Sir Maman a lo phal lo va, Sir Mama nu leh pate pawh an nui nasa mai. Sir Mama nu, ka nu ni ta chuan mo thar tuka chet sual a awlzia a sawi mial mial a, ka zak tih a hre vek a, ka rilru chu thlak danglam a tumin ka hria. Chaw pawh ei ngam lovin room-ah ka tawm tlat a, tlai lamah erawh zinga ka awm dan avang chuan ka zak hnuhnawh hle. 

Mo fel leh nupui ṭha tak nih tumin ka insiam rem a, ka lawi luhna chhungkua an fel bawk a, hrehawm ka ti lo kher mai. Kar khat hnuah pawh mo thar tuka ka awm dan chu an la sawi deuh reng a, ka nui tawp zel, sawi tur a vâng thei êm a ni. Rei lovah ka nu leh pate chu ka nel thuai a, pasal ka neih hnu chuan ka hnathawh lai ka bansan vek a, Sir Maman ka thawh la phal se chu ka thawh tho ka ring. 

Zan lamah hun kan hmang dun ngun ber a, min duh chhoh ṭan dan a sawi chuan mak ka ti hle. High School kan kal lai aṭang tawh min lo hre ve reng chu niin, a mak khawp mai. College ka kal tirh bawr vel aṭanga min thlithlai ruk ṭan thute chu a sawi a, mahse ka duh tawh loh a rin avangin min bawhzui a tum lem lo thung. A tawpah erawh a insum thei ta lo va, min rawn kal chilh a nih tak kha le, khata ka hamhaihzia kha!

Kan inneih aṭang thla khat leh a chanve vel a ral a, ka dik lo tih ka inhre nghal a, Sir Mama hriat lovin doctor ka rawn a, ka mipa hmangaih em em Sir Mama fa ka pai tih ka hre chiah chu hlim tak ka ni. Doctor chuan indim turin min chah nghal a, ka aw liam vel ta mai mai a, ka hlim lutuk chu thil dang ka ngaihtuah thei tawh thlawt lo. Inah ka haw thuai a, tumah ka la hrilh duh lo va, mahse ka zep rei thei kher lo maithei a ni. Ka naute chu thla tam a la ni lo va, mahse lo piang chhuak nghal mai tur angin ka suangtuah tlat a nih chu! 

Ni lo, ka naute chiah a ni bik lo, Sir Mama nena kan naute zawk a ni e. Insum thei tawh lovin Sir Mama chu ka bia a, naute chungchang erawh ka sawi leh ta chuang lo. Ni dang ang bawkin thil chi hrang hrang ka sawipui a, ka aw aṭang chuan thil zep ka nei tih a hriat ka hlau hle bawk. Lo haw hma a tum thu a sawi chuan ka lawmna leh ka hlimna a zual a, ka pasal chuan kei tih lovah ka rai thu chu hre hmasa ber se ka duh a ni.

"Papa" kan room chhunga a rawn pen luh lai chuan ka lo ti a, nui suk hian min rawn pan a, ka bianga fawp zeuhin a thawmhnaw chu a thlak a, ka thusawi awmzia chu a la hrethiam lo a ni ngei ang.

"Papa" nui sen sen chung chuan ka ti leh ngat a, chutah zet zawng a hrethiam ta a ni ang a rawn hawi vut a, min hnaih chilh nghal thuai bawk a, a mitmengah chuan zawtna ka hmu zut zut mai.

"Vawiin khan doctor ka va hmu a, nu leh pa kan ni ve tawh dawn" ka tih chuan a kut pahnihin a lu a khawih a, ring ngam chiah lo hmel hi a pu a, chuti ang em ema a ṭhawn chu ka ring bik teuh lo.

"Dawt i sawi lo ti raw Noel? Lalpa le! Kei hi pa ka ni dawn maw!? Pa ka ni ve tak tak tawh dawn, ka lawm e Noel, ka fa ngei i pai avangin ka lawm tak zet" tiin min pawm kâng lâwp a, khumah min tluk zalpui nghal bawk.

Ka pasal hlim hmel chu hmuh a nuam ngawih ngawih a, min tihlim veng veng thei. Ka pasal berin a hre ta bawk a, mi dang chu kan hrilh darh nghal a, min lawmpui thiam hlawm khawp mai. A tuk aṭang chuan tlai tin ei tur min lo hawn ta ziah a, min chawm hneh leh lutuk chu ka thau phah vek mai dawn zawk alawm le. Chutah Fakzuali chuan min han awt leh mai mai khawp a, a fate aia ka fate an upa zawk tur chu a tha a nâ leh tlat tawh. 

August ni 28 a ni a, chu ni chu ka pasal duh tak piancham a ni a, Facebook lamah zak miah lovin a thlalak ka lo kawl tawh zawng zawng chu Wish nân ka upload a, ka song book-a ka thuziak ṭhenkhat chu ka post tel bawk a, like leh comment a pung chak kher mai. Chu bakah Sir Mama ka Tag hrim hrim a, a Wall-ah a lang ngei ang a, ka hmel hriat loh hnen aṭanga comment tam chhan pawh chu chu a niin ka hria. Ka thlalak upload-ah chuan

"Ka pasal duh tak Sir Mam, i kum eng emaw zahna chu a ni ta, i kum zat tak ka tarlang lo mai ang. Ka kianga awm reng turin dam reng ang che, Happy Birthday" tiin Caption ka dah a, darkar khat hnu velah ka pasal chuan a rawn hmu ve ta. 

"Zanin chu aw Noel, ka piancham a nih manah kan tlaivar dawn nia" a comment dan ber kher avang chuan mi dangin an reply nghal sup sup a, kei phei chu ka nui tawp a, a thusawi tum chu hrethiam lo an awm pawh ka ring lo.

"Nangmaha i tlaivar ka ring" tiin amah bik chu ka reply ve ngat a, a fiamthu deuh tho ka ring sa a, chimawm chhuah chu a nuam reuh phian leh nghal. 

"Sir Mama hi a chi a chak e, i rai hma zia hi ngaihtuah teh Noel" tih chu Fakzuali hnen aṭang Messenger-ah ka dawng nghal bawk a, Sir Mama hriat laiin a sawi palh reu reu ang tih ka hlau, zep lah hi a nei lo thei bawk si. 

"I sawi ho êm mai LALFAKZUAL" tih chauhin ka chhang lêt a, ka thil post lamah ka ṭuan leh a, Sir Mama nena kan in-reply-na bikah chuan comment a lo tlar thla dul a, kan inchhan dan nuihzat thlak zet React tu pawh an tam khawp mai. 

Zanah chuan ka pasal birthday lawmin hun kan hmang a, amah tak phei chuan ṭul a ti lo hle. Ka nute nen kan inthurual a, birthday cake pawh a Cial rem rem khawp. Cake chu min barh hmasa ber a, kan inneihna la rei miah lo mah se kawng engkima min ngai pawimawh thiam lutuk chu min tihlim em emtu pakhat a ni. Min duat thiam a, min hmangaihzia a lantir thiam bawk a, hmeichhia zawk si hian ka tluk lo lek lek ṭhin.

"Chhuak rih teh, ka intleuh lawk dawn a nia" bathroom-ah min rawn zui lut ringawt a, kan nupa room-ah kan awm tawh tho va, nupa nun kan hman dun ka rin tho avangin lo va mu daih se ka ti, chhuah lah chu a la tum der lo zui.

"Chhuak teh Sir Mam, ka intifai zuai duh a nia" ka tih leh chuan

"Min pumpelh tum reng reng suh, zanin chu ka duhthaw zual dawn" a rawn ti zawm nghal zat a, bathroom kawngka chu kharin min din hnaih sauh a, a thil tih tum chu a va hun lo tak ém.

"Zanin chu nghei rih mai rawh, ka chau tlat. Chu bakah naute hi ngaihtuah a ngai, insum rih mai teh" ka nuih chhuah mai loh nân a hmel chu ka en reng duh ta lo va, a lungawi lo hmel chu ka mitsirin ka hmu ru reng thei.

"A teuh lo mai" ti bul hmukin min pawm thut a, bathroom kawngka chu hawngin min chhuahpui a, a taksa aṭang chuan awm hran ka tum tawh bik lo.

"I hmel hi hmân ang tho khan a la Young reng mai, Forever Young-pa, chuai thei lovin hmelṭha reng la, min hmangaih em em reng bawk ang che" a nghawnga kuah ran pahin ka ti sep a, kiai suk hian min rawn fawp a, engkim chu a kutah ka dah vek tawp.

The End