EZEKIEL By Havali Adam (LAST CHAPTER 18)

EZEKIEL

By

Havali Adam

Last Chapter 18

Fapa kan kan neih hnu chuan ka pasal chu hun liam tawha ka pasal ang chiah kha a ni leh tawh a, a fel a, a chezia aṭang a fapa leh a nupui min hmangaihzia a hmuh theih leh tawh a, kan pathuma a office-a kal chang pawh kan ngah thei mai. A thawhpuite paw'n kan fapa Ezekiel-a chu an lawm thiam em em a, hmelṭha leh duhawm an tih thu an sawi hi chuan keini a nu leh pate hi chu kan lo hlim veng veng zel. Hun kal tawh ang chiahin kan chhungkua chu kan hlim thei hle a, Ezekiel-a leh a pa pawh an inchhaih nui uar uar thei tawh a, an hlim hmel hmuh baka nuam chu a awm lo a ni.

"Maw!?" ka hnute hum chat chung hian a rawn ti a, nupa nun hman lam chu ka châk loh pawh a ni bik lo, a chet dan vel chuan min tihlim a, fa kan neih leh theih a beisei tlat chu tun thleng hian awihawm ka lo ti lo a ni.

"Ka upa tawh si, hmeichhia chu kan dan a dang a nia aw, mipa ang kan ni ve lo" a lam hawi zawnga inherin ka ti sep sep a, amah hnaih chêtin min pawt a, min rawn fawp nghal ringawt a nih chu!

"Hei" tiin a awm chu ka lo nam ṭai a, ani pawh a awm sawn ve leh mai a, mit tizim sun hian min melh chhuk run a, mipa hrisel ṭha ve tawk tak a ni a, nupa nun kan hman lohna a rei ve tawh bawk nen a awm dan chu ka hrethiam tho mai. 

"Bawihpuia paw'n kum 1 a tling tawh" a rawn ti bul deuh hmuk a, ka kawr chhungah a kut rawlh lutin ka taksa chu a zut riak riak a, a mi tawhna dawnsawn nuam zet chu ka hnar rei thei leh ta bik lo.

Chumi zan aṭang chuan nupa nun pawh kan hmang uar ve leh ṭan ta deuh a, dik tak chuan fa ka neih leh theih ka ring tawh lo tak tak a ni. Ka kum lah a tam ve ang reng tawh bawk si, fa dang neih leh erawh ka duh hle thung. Pathian zarah rai leh thei hram ila ka ti bawk, chu chu kei leh ka pasal duhthusam a ni. Nupa ni tawh hi chuan fa an awh ve vek ka ring tho, nu leh pa nih te kan châk a, kan fate enkawl kan thiam emaw thiam lo emaw nu leh pa nih hrim hrim hi khawvelah chuan a ropui ber pawl a ni hial ang.

Ka nu leh pate paw'n min duat em em a, a hma ai zawngin min duat ni mai te hian ka hre ṭhin. Ka nu nen chuan kan inkawm ngeih ngaiin kan la inkawm ngeih em em a, ka pa paw'n min be peih thei khawp mai. Min be ṭha hlawm thei lutuk leh min kawm ngeih dun lutuk chu ka hrethiam lo lek lel zel, ka haw leh an hlau a nih te ka ring hial a, kei chuan ka pasal chu ṭhen ka tum tawh hauh si lo. 

Thawhṭanni chawhnu lam a ni a, ka pasal pawh a rawn haw hma ang reng  viau a, in hnuai lamah chhukin kan zo ar vulh lai pakhat chu a rawn keng chho a, ka lo en deuh hû ringawt. Min nuih ruh ruh hian chempui a la a, ar chu a talh zui nghal a, thil lawmawm a awmin ka hre bawk si lo, a chet dan vel chu mak ti tak ka ni. Tui lumah ar chu chiahin a puah nghal mawlh mawlh a, ka nu lo haw pawh chuan mak a ti teh e! 

"Min lo zui lawk teh" tih leh kan room lama min kaih a rual nghal a, room chhunga kan luh chuan min kuah vawng vawng a, vawiin chu a awm dan hi ka hrethiam lo tak zet, a rawn haw hma bawk si, a hlim hmel bawk si.

"Doctor ka hmu a, i awm dan engkim hi ka hrilh vek a, ani chuan nau i pai a nih a ring a" a tih chuan ka kâ hâu a, ka kutah Pregnancy Test Kit hi a rawn hmehbel zawm zat a, min nawr kal dat datin bathroom-ah min nawr lut a, chet nachang pawh ka hre lo. 

"Ka fa pai leh hram rawh aw Aruatte" ka pasal aw ka hriat rualin ka harh chhuak zawk a, ka kuta ka thil ken chu ka en ngawt ngawt a, ka pasal sawi ang tak tak chuan rai leh ila ka va'n ti tehreng em.

"PC!" bathroom kawngka ka hawn hma hmain ka ti chhuak thuai a, kawngka ka hawn rualin hlauthawn hmel fê hian min lo en a, ka dar tawn tawnah a chelh ran bawk a, ka nui hmel a hmuh rualin

"I pum chhungah hian ka fa a awm ti raw? Sawi teh Aruatte, sawi mawlh teh" a ti phawlh phawlh a, nui var var chunga ka buk khum zeuh chuan rang zet hian min kuah a, ka rai leh tawh tih reng ka inhre lo chu mawl ka inti thar ngawih ngawih.

"Ka lawm e Aruatte, ka hmangaih che, ka hmangaih lutuk che. Lapa ka lawm e, enga tinge min hriat lawk tir ziah mai le? Ar ka talh chhan pawh Doctor thu sawi kha ka ring nghal em em a, i awm dan engkim hi ka chik ṭhin asin" a rawn tih zawm nghal mawlh mawlh a, min fawp leh vawng vawng bawk. 

"Ka rai tih hi ka hre miah lo tak tak, engtin nge ka hriat miah loh theih le?" ka ti mawl tawp a, ka pasal chuan nui sun sun hian min melh chhuk run a, ka hlim lutuk chu sawi tur dang pawh ka hre tawh lo.

"Kei chuan i awm dan leh i hmel a danglam tih ka hre thei asin; chuvang alawm Doctor pawh i hriat loh laia ka rawn ni. Ar ka talh sual lo ve, Bawihpuian nau a nei dawn bawk a, indim nghal hle ang che" a tih chuan ka lo ṭhen ṭhaw ringawt. 

Ka nu'n nau ka pai leh tih a hre chiah chu a au vak a, ka pa a call haw nghal bawk a, hlim tlang tak kan ni. Ei duh loh leh rim ngainat loh tih vel engmah ka la nei lo bawk a, chaw chu ei tui em em leh nghal. Ka nu leh pa chuan ei tur chi hrang hrang min siam nghal a, PC-a ang chiahin ka pa chuan chet tam a phal lo nghal ringawt a, chu zan chu zan hlimawm tak a va ni chiang êm.

Tun ṭum zet zawng ei ka thei zual em em a, mut erawh ka mu ṭha lo thei hle. Ka chhungte lam pawh an lo lawm khawp mai, keimah ber chu ka lawm a ni. Ka rai tih pawh ka hriat loh laia lo hretu ka pasal lah chuan duat namên loh hian min duat nghal a, Bawihpuia a pawm apiangin nau a neih dawn thu a hrilh ziah bawk a, lo nuih ver ver loh chu tih theih ka nei lo a ni e.

Ka pum chu ṭhangin a'n puar lian chho ṭan a, Ezekiel-a ka pai lai angin ka pasal chuan office kal a ṭhulh phah ta êm bik lo va, mahse a lo haw hma thei khawp mai. KFC hi ka ei châk deuh reng zel a, min lo hawn ziah bawk. KFC chauh ni lo thil dang ei châk pawh ka ngah thei hle a, ei tur a lo hawn hi chu ei theih loh pawh ka nei lo a ni zawk mah. Chaw lah ni se ka ei hnem thei em em bawk a, nau pai laia ei chi loh thil erawh ka nu leh pate thu zawmin ka ei lo ve leh mai bawk. 

Rai lai hi chuan neuh neuh hi a lo tam duh khawp a, rai hma zawnga kan ei ṭhin te pawh kan ei loh a ngai rih a, mahse chung zawng zawng chu naute leh a paitu tana ṭha vek tur a ni thung si. Ka ṭhiannu Mary-i paw'n ka rai leh ta chu min lawmpui ve hle a, min hre chiangtu tan chuan lawmpui loh theih ka ni lo. Fa kan nei thei tawh lo turah te ka ngai hman ṭhin a, engkim chu Pathian kaihhruaina leh remruatna vek zawk a ni.

Thla eng emaw zah ka pum chhunga naute a awm hnu chuan nau ka vei leh ta nge nge a, dawmdawi in lamah kan awm a, Ezekiel-a ka hrin lai ang em em chuan hrehawm ka ti lo bawk. Kan fa pahnihna atan mipa bawk kan nei leh a, a hmingah ka pa chuan Malsawmhlua tih a phuah a, ka pasal nu leh pate paw'n an pawmpui khawp mai. Mak tak maiin mipa kan nei leh chu lungawi lohna ka nei miah lo va, ka pasal chuan hmeichhia kan neih loh avanga lungawi lo turah min ngai ringawt a, kei erawh ka hlim em em thung si. 

Khua chu a dul ruih a, ni chu la eng ve teh mah se chhum duk chhah pui puite chuan an hliahkhuh vat a rinawm. Kan in kawtah chuan ka pasal leh kan fate an infiam a, Artificial Grass kan phah vek tawh avangin inkhelh chu naupangin nuam an ti zual a, ruah a rawn sur mai ka la rin chiah loh avangin ka ko lut duh rih ta lo. Veranda-ah ṭhuin ka fate leh ka pasal hlim nui hmel chu ka thlir reng a, hmuh nuam tak zawng an va ni chiang em. 

"Ka fate" tiin ka ngaihtuahnaa awm ang chu ka phun chhuak sep a, ni e, tunah chuan Pathian malsawmna vang liau liauin fate tih tham kan nei ve tawh a ni. 

Kan fapa naupang zawk Malsawmhlua ka hrin chhuah ni te khan ka ṭap leh nghe nghe a, ka pasal erawh kei angin ṭap ve lo mah se a lawm lutuk kha awm ngaihna a hre lo va, mipa kan nei leh kha a lawm a ni ber. Kan fapa upa zawk Ezekiel-a'n kum 2-na a hman laiin Mampuia chu ka hring a, ka pasalin ei tur ṭha chi tin rengin min chawm bawk nen kan hrisel nufa hlawm em em a, kan chhungkawpa ber chu amah leh amah a inngaihtuah lo lam hret zawk a ni. 

Tunah chuan kan fate pawh an hleikang ve tawh ang reng hle a, Ezekiel-a'n kum 6-na hmang mekin a nau zawk Mampuia chuan kum 4-na a hmang thung a, ṭhian dang neih hi an ngai lo reng reng, a mak hi ka ti zawk ṭhin. PC-a hna lama a kal chang paw'n an unauin an inkawm tlei thei em em a, an pa lo haw hunah erawh a thleng hmasa zawk nih inchuhin PC-a lamah chuan an intlansiak ṭhin bawk. 

Nikum aṭang khan Ezekiel-a chuan School a kal ve ṭan a, vanduaina avanga kan chan tâk kan fapa hmasa ber Ezekiel-a chiah chiah hi a ni ringawt. Ezekiel-a kha la dam se chuan tuna kan fapa upa zawk Ezekiel-a nen hian phir tluk an ni ngei ang, chuti ang khawp chuan an inang a ni. A hringtunu ka ni a, kei ngei pawh hian inang ka ti lutuk tak zet. 

A hmel ka en chian phei chuan ka ṭah a chhuak thei tawh lo, kan fapa thi ta kha a lo let leh tak tak ang maiin ka ngai a, ka hlim em em tawh zawk a ni. Ka pasal paw'n Ezekiel-a hmasa zawk a lo let leh ang maiin min hrilh ṭhin, ani chuan a sên lai aṭang min hrilh daih tawh zawk a ni. A thu sawi te kha ka ngaithla liam mai mai zel a, ka fapa hmel chu chik tak paw'n ka en ngai lo, mahse kum 5 a rawn tling chho chiah kha chu kei ngei pawh hi min ṭhawng a ni. 

Saidingi phei chuan a thla laksakin Ezekiel-a hmasa zawk thlalak nen chuan a en kawp nghe nghe a, danglamna chhe tê mah an nei lo maw le. Kan Ezekiel-a mizia lah chu a hma ang chiah khan mi hlim thei tak a ni leh zel a, sawisel bo khawpin kan fapa hmasa ber Ezekiel-a leh tuna kan Ezekiel-a chu an inang thlawt a ni. 

"Hei, eng nge i lo tih a?" ka pasal chuan ka hnung lam aṭang min rawn kuah a, a mi uap hi chu a nâ ve chiang alawm, kan fate a timu tawh bawk a, tunah chuan kan nupa paw'n hun kan nei ve thei tawh e.

"Kan chhungkaw thlalak hi ka lo en vel mai mai a, hetah te hian kan lang ṭha hlawm tawp, hetah pawh hian" tiin ka lo kawk zet zet a, nui suk hian khumah min kuai mu a, ka mut chu a chhuak lo khawp. 

"Mu ang" Album dah ṭhat tura thawh ka tum rualin min kuah nghet sauh chung hian a rawn tithum ṭial dap a, a aw aṭang chuan a mut a chhuak tawh a ni ngei ang, mut hun viau tawh mah se ka mut erawh a chhuak lo nasa mai bawk si. 

Thla a ral a, June thla kan lo chuangkai ve leh reng tawh mai. Kan room chhunga bathroom chu kan Extend a, a chhan pawh an pafa thuma inbualho an duh vang a ni. Bathtub thar te kan lei bawk a, bengchheng thei tak an ni. Tuia inchiah rei lutuk ka phal loh avangin an inbual rei ngai lo va, kan fate chuan ka thu mai bakah an pa thu chu an awih thei khawp. Ezekiel-a chuan School a kal dawn leh School an ban te hian a pa hruai ngat a duh kher zel a, ka tan chuan a hahdam thlak letling daih zawk. 

Mampuia pawh Agandwadi lamah a tal tam em em a, ṭhian te a kawm ve melh melh zel a, Agandwadi-a kal a phur thei khawp mai. Naupang ngawichawi leh fel tak a ni reuh a, ṭhian a kawm paw'n a u têt lai ang em emin a harhvang lo va, a ṭawng tam lo va, a tal tâlin a tal ve tawp tawp zel. Hmeichhia leh mipa naupang ṭhenkhat nen an inkawm ṭhin a, keini naupang nu leh pate chuan lungawi zet hian kan fate infiam lai chu kan lo thlir ṭhin thung a, Mampuia ṭhiante nu leh pa ṭhenkhat nen pawh kan inbe nel viau tawh bawk. 

"Vawiin kha aw, kei pawh Office ka chawl dawn a nia" ka pasal chuan a rawn ti a, ka lo bu nghauh a, Ezekiel-a pawh School kaltir kan tum lo va, Mampuia chênin vawiin chu kan awl vek dawn a, a chhan chu kan fapa chan tâk Ezekiel Rochanhlua thih ni leh piancham a nih vang a ni. 

"Khaw'nge Ezekiel-a leh Mampuiate hi an awm? Siam ka duh a nia, ka pate room-ah an la awm em ni?" ka tih chuan aw tih nân min buk khum zeuh a, room aṭanga chhuakin ka fate awmna lamah chuan ka kal a, ka siam peih fel vat loh chuan kan tlai mah mah dawn tlat.

"Ka pa, chhuah kan tum bawk si a, ka lo siam tawh mai dawn em ni ang?" ka pate room kawngka bula ka din rualin ka ti nghal a, khumah an putu ho chuan an lo infiam a, nuam an tih hmel bawk si a, ka inthlahrung ru ve deuh reng. 

"Ni tak maw, in room-ah kal tawh r'u le ka tupa te u" ka pa chuan a lo ti ṭha ve mai bawk a, Ezekiel-a chu room aṭang a tlan chhuak nghal a, a nau chuan a theih anga chakin a um zui ve a, an tlu palh ang tih ka lo hlau bawk nen

"Tlan lovin kal pangngai r'u, hmanhmawh deuha tlan vak vaka kha a ngai lo Ezekiel, Mampui" ka ti lawm lawm a, ka fate pahnih erawh ka ṭawng pawh an hre lo a ni ang, kan room-ah chuan an tlan lut rang dun khawp mai. 

Kan room ka thlen chuan an pafa hovin an lo infiam leh daih a, khumah an lo inbuan a, an râk chel chul bawk a, ka khum siam mar sa zawng zawng chu a chuar leh ta vek mai. Mampui lah chuan bal bawma thawmhnaw suk tur awm chu lain a chalah a hreng a, a pa'n a hrentir a ni mah zawk. Ezekiel-a lah chu ti bawk, an pathum chuan an chalah an hreng vek a, TV-a an en ṭhin angin an inbuan fiam a, kan va han hman hma dawn lo chiang em. 

Kawng dawm meuha minute tam ka en reng hnu chuan PC-a chuan insiam an ngaih tawh thu a hrilh a, anni paw'n an pa thu chu an awih ve leh mai bawk a, Ezekiel-a chuan ka lungawi lo tih hriain min tlawn vel a, ka nui chhuak ta tawp. Ka nui chiah chu an pathum chuan an lo nui ve hawk hawk hlawm a, anniho pathum bulah hi chuan lungawi loh rei pawh a theih loh a ni e. Thlanmual lam pana kan tlan lai te chuan a pa berin hla a play a, kan fate lah phur em em hian an lo la lam zui. 

"I nu thisen ring ngeia i lo let leh avangin ka lawm e ka fapa, rawn piang nawn leh lo la chuan kei i pa lak tlak lo zet hi maw ka harh chhuak zo miah lo vang maw le" ka pasal chuan a ti hniam ruih a, thlan lung hmaah a ṭhingṭhi ran a, keini erawh a hnungah kan lo ding thung. 

"Tunah erawh i lo let leh tawh a, kan chhungkuaah hmun i rawn khuar a, kan chhungkua hlimna thlentu chu nangmah ngei i ni EZEKIEL, nangmah ngei i ni" ti supin thlan chu a chul a, Ezekiel-a chuan a pa chu a hnung lam aṭang a va kuah ta thut mai.

"Pa, a u hian ka hming ang a nei tak tak maw!?" tiin a pa chu a va zawt ta ngei a, hnukulh hmel zet hian PC-a chu a lo bu nghauh nghauh a, Ezekiel-a chu hmangaih takin a lo kuah vawng vawng bawk.

"Pa" tih leh Mampuia chuan an lam pan a rual ve nghal a, PC-a chuan an pahnihin a lo kuah a, pawm kâng pahin ka lam an rawn hawi a, ka pasal chuan min nuih zeuh a, ka hma taka a rawn din rualin

"I haw ang u hmiang, lenna tur kan la nei a nia" a rawn ti a, kan fate pahnih chu phur lutuk tak mai hian an lo au chhuak a, kan nupa chuan kan nui leh ta nge nge.

"Lo va kal rawh u, ka lo phei har lo vang" ka ti sep a, anni pawh chu an kal ve nghal mai a, ka fapa thlan awmna lam chu panin ka ṭhu hniam a, ka fapa hmasa ber Ezekiel-a chu ka ngai khawp mai.

"Ka fapa, i pa thu sawi te kha i hre vek ang ti raw, tunah chuan kan lungngai tawh lo. Kan hlim lutuk tawh zawk asin; kan bula i rawn let leh avangin. I thlarua khan i nau te pahnih hi venghim tlat rawh aw" tiin thlan chu ka fawp a, chu thlan chu ka fapa ang maiin ka chan a ni ber.

"EZEKIEL" tia phun chhuak leh sepin ka mitthlaah chuan a hmel hlir a rawn lang a, maimitchhingin ka nui zeuh a, keimah ah chuan lungngaihna reng a awm tawh lo. 

"Mangṭha aw EZEKIEL" tiin ka fapa thlan chu ka hnung chhawn a, ka pasal leh ka fate pahnih chuanna motor lam chu ka pan a, motor chhunga ka luh hnu rei lovah kan tlan chhuak zui nghal bawk.

A hma zawnga a seat hnung lama ṭhut nuam ti em em kha Mampuia chuan ka pawm a rawn ngen teh tlat a, a hnung lam aṭang rawn vak kaiin ka mal chungah chuan a rawn ṭhu a, Ezekiel-a pawh a awm hle hle thei leh ta hauh lo. Ani chu a pa lamah a ṭhu thung a, a pa mal chungah ṭhuin motor Steering chu a vuan chhin vel a, kan nupa chu kan inmelh rang teh e!

"A ṭul miah lo" ka ti nghal deuh tawp a, PC-a chu a lo khi suk thung a, a ṭhut dan siam remin a khalh muang sawt a, a fapa chu a pawm ṭha deuh bawk a, a thil tih tum chu ka hre chiang khawp mai.

"Lungngai suh Aruatte, a chhan chu ka hmaa ṭhu mipa naupang hi EZEKIEL-a a ni tlat, kan fapa EZEKIEL-a ngei kha!" tiin ka pasal chu a kiai suk a, a chhan ber pawh ka hre lo, ka hlauhthawnna zawng zawng chu a bo vek a nih chu!

(EZEKIEL thawnthu chu kan lo zo fel ta der mai, a tawp khar erawh a har ngaiin a la har reng e. He thawnthu i hmuh dan te Comment Section lamah ka lo chang reng a nia, Feedback ang zawng pawhin a ngaih theih ang)

THE END