EZEKIEL By Havali Adam (CHAPTER 17)

EZEKIEL

By

Havali Adam

Chapter 17

December thla kan chuangkai a, thlasik boruak a ni tawh tih hriat takin khua chu a vawt deuh sûk a, ni lum ai pawh a nuam thei khawp mai. Ka nu nen veranda-ah ni lum ai pahin kan titi ṭhin a, a chang chuan ka pa paw'n min rawn zawm ve ṭhin. Ka pum chu a puar lian leh zual tawh a, kum thar tir lama nau nei tur ka ni a, engkimah chuan a hma ai zawngin ka indim leh zual tawh bawk. 

Ka nu leh pa bulah chuan ka rilru dik tak ka la sawi duh lo va, an lungawi ka ring chiah lo a ni. Kan inṭhen tirh khan ka pa'n engkim a va tifel vek kha a ni a, ka nu phei chuan kut thawh zawngin a che palh ang tih a hlau nghe nghe a nih kha! A sawi dan chuan nu Chawii leh pa Zuala te'n an lo titi pui a, mahse ka pa chuan kei leh PC-a chu inṭhen turin thu tlukna a siam lui ta tho a ni. 

Khati anga a fanu min hruai haw hun lai leh engkim a buaipui fel vel lai kha chu hun kal tawh a ni a, tunah erawh ka pa rilru hi a danglam ni maiin ka hria. A tua te mah kan hlim lo tih a hmu chiang em em a, a hre chiang em em bawk a, min khawngaih ruk hle ka ring bawk. 

Inṭhen ê ti lo chuan kei tak paw'n PC-a chu ka ngai em em a, kum 10 chuang zet ka pasal a lo nih ve tawhna chuan min chenchilh ni berin ka hria. Kan inṭhen hnu kha chuan ani paw'n min ngai ve ṭhin tho niin a lang, chuti ni lo se lehkhathawn leh naute kawr tur a rawn thâwn a rawn thawn peih kher lo vang. 

Ngun takin PC-a nen kan inkar chu ka ngaihtuah chiang a, a bula let leh chu ka duh ngei tih chiang takin ka hre bawk a, ka pum chhunga naute tan pawh a ṭha zawk ngei ang. Dik tak chuan ka awm dan chu a Pathian hnaih loh thlak ka ti ve ṭhin tho, miin an rilru leh tih tak zetin ngaihdam min lawm lawm a, ngaidam thei lotu nih tlat chu harsa ka ti lutuk a ni. 

Ka rilru chhungril tak chuan ka ngaidam fel daih tawh zawk, mahse thil dang zawng ai min dah pawimawh hmasa se ka ti a, keimah ang khan tlawm ve ngawih ngawih se ka ti a, a tlawm lai erawh ka hmu rei leh thei chuang hauh si lo. Ka khawngaih zawk zel a, a na hmel leh a inchhir hmel chu hmuh hrehawm ka ti em em zawk a, ka hmangaih êm vang te pawh a ni mahna le!

Tin, Chhuanmawia chu phone kaltlangin ngaihdam ka dil mawlh mawlh a, ani erawh a lo nui mai thung a, mahse a rilru a nat ve tho chu ka ring. Mi hmuh laiin khati ang khan an inkhawih a ni si a, mi pangngai tan chuan zah lova rilru nat lohna chi a ni lo hrim hrim a ni. Ka nu leh pa emaw ka nau leh ka ṭhian te'n engmah an hre ve lo va, an hriat kher pawh ṭul ka ti lo. 

Kei leh PC-a leh Chhuanmawian kan hre chiang em em thung a, ka inhrethiam zozai tawh bik lo, Chhuanmawia chu hmai chhana hmuh leh châkna ka nei tawh lo hrim hrim. A laka ka inthlahrung vang a ni lo tih chiang takin ka hria, PC-a'n min hmuh dun leh ka hlau a ni ber zawk. Ngaihdam ka va dil ṭum tih loh chu phone kaltalng paw'n Chhuanmawia nen chuan kan inbe tawh ngai lo va, phone-a ka mi biak tam ber chu PC-a a ni mai. 

Khatia kan inthlah tlai aṭang khan PC-a chuan phone kaltlangin min be awl lo va, chhan loh emaw a phone call chu lo pick up loh bik ka tum teuh lo. Ka nghakhlelin ka phur thei em em zawk a, ka pasal hlui PC-a chu ka ngai a ni. 

Room chhung aṭang ka biak ṭhin avangin ka chhungte chuan an hriat pawh ka ring chiah lo, kan inbiak lah hian sawi vak tur kan hre lo dun thei ropui bawk si. Ni lo, kei chuan sawi tur ka hre ṭeuh a, ama'n titi tur vawrh hmasa se ka duh ṭhin avangin ka ṭawng tam duh lo mai chauh zawk a ni. 

"Ei châk te i nei em? I neih chuan sawi tawp rawh, ka lei nghal ang che" in chhunga a rawn luh rualin PC-a chuan a ti zung zung a, a lo len dawn khan ka nu leh pa awm leh awm loh thu min zawt hmasa thlap a, awm se chuan a lo kal ngam leh ka ring lo. 

"Nei hran lo ve, i office ka lo ring asin, i kal lo rei tawh viauin ka hria" ka lo ti ve mai a, ka bul chêtah rawn ṭhu thlain ka kut chu a la kang a, a fawp vang vang a, a hmel chu a felfai sawt leh tawh khawp mai. 

"Office lam chu ngaihtuah a ngai lo, kan buai em em rih lo tlat. Nangmah leh ka fapa lo piang tur hi ngaihtuah in ngai zawk, engati nge nangmah chiah hian i awm leh ṭhin?" a tih chuan ka lo nui tawi tak a, ani erawh a nui hauh lo.

"Keimahin awm lo ta ila i rawn leng ngam dawn em ni? Ka nu leh pa i la hmuh hreh êm kha aw, kan inah i awm tih rawn hmu ta se chu mak an ti awm" fiamthu ru tak chuan ka ti a, ani pawh a lo khi ve ta suk a, a hawi voh vôh bawk.

"Ka nu leh pa pawh tun thleng hian ka lakah an la lungawi famkim thei lo, i laka ka chet dan avang khan an lungawi thei lo a ni ber. Ka pa phei chuan min vin deuh reng mai, kan inkar lah hi ka hrilh duh bik lawk si lo" a rawn tih chuan

"Kei paw'n engmah ka la hrilh hleinem, mahse zana kan inbe thawm hi chu an hriat thawi tawh chu ka ring deuh tho" ka lo ti ve nghal a, ngawi rengin min kuah ta hle hle a, ka pum chu tawh nat a hlauh hmel ang reng hle.

"Hmangaiha ngaihsak leh viau tur si che hian ka ti na em em che tih ka lo hre har hi a pawi ka ti hnuhnawh a, ka hlauhthawn ber chu ka bulah i lo let duh tawh lo vang tih hi a ni" a tih thum dap dap chuan ka mit ka chhing vang vang a, hun kal tawh chu ngaihtuah chhuah loh theih pawh a ni lo.

"I dawhthei a, i tuarchhel a, min hmangaihna a sang em em bawk a, i rilru chapona ka ko chhuak tawh chung pawha min pawm leh thei hi ka lawm a ni Aruatte" ka mit taka en ran chung hian a ti sup a, hmul awm tawh lohna a biang dawm pah chuan

"Kei paw'n thiam lohna ka nei ve tho ka tih tawh khâ PC, ngaihzawng kha nei der kher lo ila chuan heti ang em em hian kan inkar a awm bik nâng" ka lo ti ve thuai a, ani chuan rang zetin ka hmui a rawn hup ta vat.

"Engkim kha a bul chu ka thiam loh alawm, ngaihzawng nei pawh ni la tunah chuan dem thei che ka ni lo tih ka hria, a chhan chu i laka ka awm dan khan a zir êm a ni" a hmelah chuan inchhirna hlir a lang a, chuti ang hmel pu tur chuan ka duh hauh si lo.

"Sawi tawh lo vang PC, kan inkar pawh heti hi a ni leh tawh a, kan thil lo paltlang te kha kan inkar tinghettu atan i hmang zawk teh ang" ka ṭawng zawh rualin min rawn fawp nghal a, kei paw'n hmangaih takin ka lo chhang let a, min fawh dan chu a ril tak zet. 

"Office lamah kal leh tawh rawh aw, hetia i awm reng chuan hektu che i nei ang a, Deputy Director pawh ni mah la hmingchhe deuhin i hna hi i chan mai ang" ka tih chuan a nui tawi tak a, a dar ngheng turin min kuai zawm zat bawk. 

"Kum tharah law law ka kal ṭan ang, kan fapa lo pian hma tal hian ka bula cheng kumkhua tawh turin i lo let leh thei tawh la ka duh ngâwt mai Aruatte?" tukverh lam thlir dauh dauh pah hian a rawn ti a, a ṭawng zawnga a hrawk bawk che ralh ralh te chu hmuhnawm ka ti ru em em a, a zawhna ka hriat chhuah rual chuan aw thian kharh kharh pah hian

"Ka hre lo le, dik tak chuan maw pa Zuala leh nu Chawii hmel ka hmu hreh a, lo haw tawh miah lo tur angte khan ka insawi ve vek tawh a, ka pa lah khan hma a rawn la chak bawk si a, anni paw'n ka rawn let leh chuan min hmu eng emaw vek tawh ang ka ring" ka ti ta tawp a, chu chu ka ngaihtuahna luah rengtu pakhat a ni.

"Ni lo Aruatte, i hlauhthawn ang leh i rin ang kha a ni lo. Ka nu leh pa chuan i lo let leh hi an duh ber zawk ngei ang, ka bulah sawi duh lo mah se an awm dan aṭang ka hre vek thei" chiang zeta min en chung hian a ti a, dawt a sawi chu ka ring chiah lo va, mahse ka la zak ru deuh tho.

"Naute i neih hmain ka bulah i lo let ang ti raw Aruatte, kei hian duat taka enkawl che ka duh a ni. Ka bulah rawn awm tawh la ka duh, i awm loh chuan lungmuangin ka awm thei lo a ni" a kut chuan ka biang tawn tawn a rawn dawm zui nghal zat bawk. 

"Ka hre rih lo PC, lo let chu ka duh tawh ngei a, mahse ka chhungte rilru tur ka hre bik lo a ni. Ka nu leh pa'n an remtih hûn hunah ka lo let ang, zanriah ei hunah sawipui ka tum tawh hrim hrim" ka tih chuan min rawn fawp leh vang vang a, kawngka lam aṭanga thawm lo awm chuan min pawt ṭhen chiang hle.

"Nang maw!?" PC-a hmel a hmuh rualin ka nu chuan a ti hluai a, chhan let dan tur hre lo zetin PC-a chu a tho thuai a, kei pawh ka pum dawm chungin ka ding ve mai bawk a, ka nu chuan keini pahnih min hmu dun chu mak ti tak a ni.

"I dam ṭha maw ka pi? Eng lo a nia, Aruattei hi ka rawn hmu zuai a, ka va haw phei tawh ang e" tih leh PC-a chuan kawngka lam pan a rual nghal a, a awm dan leh a ṭawng danah chuan inthlahrunna hlir a lang a, kei phei chuan ka lo khawngaih ru viau mai.

Ka nu chuan a chhuahna tur kawng lo kianin a kal liam hnu thleng chuan a thlir zui vawng vawng a, kei erawh ka din ngaiin ka lo la ding reng a, ka nu awm dan chu ka lo en a ni ber. Ka lam a rawn hawi rualin ka hawi sawn thuai a, ka nu lakah chuan nuam lo tihna ka nei ru ve deuh tho mai. 

Êngmah min zawt lo hian a chawhmeh khai bawr ṭun chu dawhkanah a nghat a, a kut leh a hmai vel a sil chhungin keiin a thil rawn khai haw chu ka lo thliar zung zung a, a ṭhen Fridge chhungah ka dah lut zui nghal bawk a, ka nu nen chuan kan la inbe lo hrim hrim a ni. 

Ka nu chu lungawi lo mah se ka dem miah lo, PC-a nen kan inkar dik tak pawh ka la hrilh duh lo va, ka pa phei chuan min rawn hmu se chu a lung a awi lo zual ngawt ang ka ring. Ka nu nen chuan kan inbe ta ngei a, mahse PC-a nena min hmuh dun chungchang lam engmah a sawi ri lo thung. 

Ei rawng a bawl malh malh a, kei paw'n ka theih ang angin maian chu ka lo hihpui ve a, ka pum a puar lian ve tawh ang reng bawk si nen ka che chak thei lo khawp mai. Min hnung chhawn zawnga a thil bai chawh mawlh mawlh pah hian

"Zanriah ei hunah kan sawi dawn nia, i pa paw'n hre tlang vek tawh se a ṭha ang" a rawn ti ta nge nge a, a ṭawng danah chuan PC-a nen kan inkar a ṭha leh tawh tih a hria a nih hmel, mahse engtin nge a hriat theih?

"PC-a nen kan inkar hi i hre vek tawh em ni ka nu?" tiin zawhna chu ka zawt zui nghal a, ka lam rawn hawi zeuh hian a bu nghat a, ka thaw deuh huai mai, ka nu hmelah chuan lungawi lohna ka hmu paw'n ka hre lo. 

"Zan rei lama in inbe thawm ka hre ṭhin alawm, i pa erawh chuan a hre ve kher lo vang" a rawn ti leh mai a, engtin nge ka pa chuan min tih ang le tih lam ringawt ka ngaihtuah zawm nghal a, chuti maia ka let leh chu ka ring chiah lo. 

"Nu! Ka nu! Ka dik lo, min lo buaipui vat teh" tiin dawhkan tlâng chu na zet hian ka hmer ṭawng ṭawng a, ka nu pawh ka aw ri a dik lo tih hriain a rawn hawi thuai a, ka bulah chuan a rawn phei rang khawp mai. 

"Engtin nge i awm? Nâ i nei em ni Aruatte?" mangan hmel fê hian ka nu chuan min en a, kei erawh ka lu a hai muai muai a, ka thlan fim te chu an rawn chhuak ni mai te'n ka hria, ka nu zawhna pawh chu ka chhang hlei thei lo.

"Ka chau lutuk" taksa zawi zet chuan ka ti chhuak thei hram a, ka tluk mai hlauin ṭhutthleng ban chu ka dap rawk rawk a, ṭhutthlengah ka let thla hnawk zui nghal bawk a, ka naute chu ka chhiat ang tih mawlh ka hlau a ni.

"Awi Aruatte! I ṭha miah lo, i pa ka'n call thuai ang e. Ni leh lo, ani chu a awmna a hla mah mah. Khawiah nge i phone i dah? PC-a call zawk ila a ṭha ang, men tum hram hram teh Aruatte" ka nu chu hlauthawng fê hian a ṭawng mawlh mawlh a, kei erawh ka zawi tawh em em thung. 

"Aruatte, inti harh hram hram teh" ka biang beng thek theka rawn ti tu chu ka nu a ni tih ka hria, ka taksa a chet dat dat avangin ka hawi kual nghal a, motor chhungah kan lo chuang reng tawh zawk hi a ni a, motor khalhtu chu a hnung lam aṭang paw'n PC-a ngei a ni tih ka hre thei.

"Meng lui hram hram rawh aw, engati nge maw heti ang hian i awm le? A mak teh thut êm mai, min tihlauthawng lutuk, i nau pai hi i chhiat mai ang tih a hlauhawm" tiin ka nu chu a ṭawng zawm leh char char a, ka pum chu ka theih anga rangin ka khawih vat a, a lo la puar ringawt pawh chuan min tilawm a ni. 

"Kan thleng" PC-a chuan a rawn ti bul deuh hmuk a, motor a tih din rualin ka awmna lamah a rawn phei nghal a, min pawm chhuah lai te chuan ka lo en reng a, a âng chhunga ka awm leh tawh vang nge ni ka ṭah chu a chhuak ru hle a, mahse ka thla erawh a muang em em lawi si.

"Lungngai suh aw Aruatte, i ṭha leh ngei ang. Khati ang hmel kha hmuh nuam ka ti lo, engkim hi a ṭha leh vek dawn" min chhuk melh zeuh zeuh pah hian a ti nghet charh a, a lam hawi chho duh tawh lovin a âwmah chuan ka bei ta ringawt. 

Ka mit ka men rualin PC-a hmel ka hmu hmasa ber a, ka kut chu a lo chelh ran a, kan bulah ka nu leh ka pa an lo awm ve reng tawh bawk. Ka beisei loh lutukin pa Zuala leh nu Chawii hmel ka hmu hlawl a, kan awm dan ṭhep ṭhup chuan ka ngaih a tiṭha lo hial a ni. Ka nu chuan ka harh tih a hriat rualin Doctor a va ko nghal a, ka pa paw'n min ngaihtuah tih hriat zet hian min lo be zung zung a, rin ai takin ka harh ṭha phian tawh a, luhai tih vel pawh ka nei tawh lo hrim hrim bawk. 

Doctor chuan ka taksa a chak loh thu leh ei in tiṭha turin min hrilh a, zan mu ṭha turin min hrilh bawk a, ka dik loh thut chhan chu ka taksa chak loh vang a lo ni ngei e. Damdawi in aṭanga kan haw hnu chuan kan in lamah PC-a leh pa Zualate nupa chu an lo lut ve zel a, an awm dan chu ka hrethiam lo kher mai. Ka nu chuan thingpui a siam a, ka pa leh pa Zuala chu ṭhian inkawm ngeih tak ang hian an inbia a, kei leh PC-a pawh ṭhutthlengah kan ṭhu dun a, ka pate chuan kan chanchin an sawi nghe nghe. 

"In pahniha ka en che u hian in la inhmangaih ve ve tih ka hria, in lo inṭhen hman kher erawh a pawi khawp mai. Christmas boruak vel chhung hi chu kan bulah awm rih la kan duh viau a, mahse i pasal i ngaihzia ka hre vek tho si" min en ran chung hian ka pa chuan a rawn ti a, a hmel aṭang chuan a fiamthu nge a thutak pawh ka hrethiam lo. 

"Ka pa" ka sawi tur hre lo lutuk chuan ka ti thawp sep a, pa Zuala leh nu Chawii chu an lo nui var var a, ka nu pawh a bang bik chuang lo, ka pa erawh hmel danglam a la pu eih lo va, ka bula mi lah chuan ka kut a la chelh nghet em em zui. 

"I pasal bulah va let leh tawh rawh, in inti hrehawm tawn mai mai tawh a nih ber hi! PC-a pawh khati ang khawpa inphah hniam khan Aruattei hruai let leh min dil a, inṭhen mai mai tawh lo ang che u" ka pa aw chu a dam raih a, mahse a zahawm hle thung. 

"Ka pa!" ka pa thu sawiin min ṭhawn lutuk avang chuan ka ding hluai a, ka bula mi pawh a rawn ding ve nghal a, ka pa hian eng nge a hriat!? A phal tak tak nge a fiamthu mai mai zawk!? Ni lo, a fiamthu hmel hauh si lo. 

"I pasal hnenah va let leh tawh rawh, i pum lah a lian ve tawh bawk si nen keini ai chuan PC-a hian a duat thiam zawk ang che, nang paw'n i thlahlel zawk ngei ang" a rawn tih leh chuan hlim zetin ka nui a, a lamah pheiin ka kuah nghal thlawp bawk. 

"I pasal chu hei i siam ṭha ta a nih hmel, i tum ve nasa bawk si a, i nu ang chiah i ni. Hlim takin va awm dun leh tawh ula, mahse len erawh in rawn len ngun deuh a ngai ang" nui var var hian ka pa chuan a ti a, ka la awih famkim thei lo. 

"Ka pa, i phal tak tak em ni? Ka lawm e ka pa, ka lawm lutuk" ka ti ta mawlh mawlh a, ka hlim lutuk chu ka khi reng ringawt a, thingpui kan in lai te chuan nutling ûai tawh si chu ka lai thar em em a, pa Zuala leh nu Chawii ka zah a ni ber. 

"Zanin chu hetah riak leh phawt la, naktuk lamah keima'n ka va hruai phei dawn che a nia, mu thei lovin i tlaivar ṭhak mai ang tih erawh a hlauhawm viau mai" ka pa fiamthu thawh chu kan nuih pui hak hak hlawm a, kan awm dan chu a nuam vel vek hi a ni mai. 

Ka pa sawi ang tak takin mut hun tawhah pawh chuan ka mu hlei thei hauh lo mai a, PC-a chu ka be châk a, a aw ri ka hre châk a, mahse a muthilh tawh ka ring bawk si. Ka tih tur hre lo leh muhil thei bawk si lo chu ka kal kual sêk a, ka tlaivar theih tak tak ka ring. 

Khati ang khawp khan ka rilru a na a, ka luhlul ve ngar ngar bawk a, mahse kan mi hmangaihte tlawm hmel leh rilru na hmel chu hmuh reng har tak a lo ni. Ka hmangaih êm avangin a inchhir thu min hrilhna leh ngaihdam min dil mawlh mawlhna khan ngaidam lo thei lovin min siam a, ka ṭang rei thei ngâng lo a ni. 

Ka beisei loh lutukin dar 1 bawr velah phone call ka dawng nawlh a, chutah PC-a hnen aṭang a la ni zui. Ka lak tirh chuan mu tawng deuhin ka ṭawng a, biak phur ru em em siin ka phur lo der a ni ber. Kei ang chiahin ani pawh a muhil thei bik lo va, thil chi hrang hrang kan sawi a, keiin hmeichhia neih ka duh laiin ani chuan mipa a nih dawn thu a rawn sawi tlat thung a, heti ang em ema hriat chian hi a la nei lo. Ezekiel ka pai lai khan hmeichhia a nih a ring a, keiin mipa ka ring thung a, tun ṭum chu ring dik tawh tak ang maw!

Zingah chuan ni êngin min tiharh a, khum aṭanga ka thawh chuan dar 8 a lo ri vang tawh mai. Keimah leh keimah chu ka inawih lo hial zawk, a chhan pawh chuti anga rei ka mu ngai lo tlat a ni. Zanah ka mu ṭha lo a nih paw'n a tlai berah dar 7 hma hi chuan ka tho ngei ngei zel, tukin zet zawng ka muttuiin ka tho tlai hle a ni. 

Zan lamah khan dar engzah thleng nge kan inbiak ka hre hauh lo va, inbe lo ila chuan ka muthilh theih pawh ka ring lo. Hmai phihin room aṭang chuan ka chhuak a, rai lai ka ni bawk nen ka kal muang khawp mai. Kan chaw ei laiin PC-a chu a rawn lut nawlh a, ka pa leh ka nu chu an nuih a va za tehreng em. Kei pawh ka nuih a za ve tho, tlangval ang maia a rawn helhhawlh lutuk chu a nuih loh theih loh tlat. 

Kum 40 pawh a hnaih ve tawh em em zawk a, a chet dan erawh a naupangchhia ru viau thung si, mahse engmah sawiselna ka nei lo. A awm dan leh chet dan chuan min hmangaih a ni tih a tichiang a, kei ang chiahin chen dun leh thuai thuai chu a phur tawh tih ka hrethiam bawk. 

Ka pa chuan min thlah a tum viau tak na a, PC-a chuan min hruai theih thu a sawi tlat a, chu bakah ka pa chu hna lamah kal a ngai teh thut hrim hrim bawk a, PC-a chuan min hruai ta mai. Ka pasal te in, ka mona in ngeia ka'n pen lut leh chiah chu a nawm dan a danglam tak zet. Nu Chawii lah chuan min lo be siam siam a, ei tur chi hrang hrang min lo pe nghal a, chaw ei kham tirh deuh chauh a ni bawk nen ei châk lo tak ka ni. 

Theihai erawh tlem ka ei sak ve hram a, mahse theihai ka ei chiah chu ka kâ chhung leh ka pum lam a rawn danglam nghal vek a, thei ei châkna hlirin ka khat a, mak tak a ni. PC-a ngei paw'n hamhaih zet hian min thlir reng a, min khap a tum chuang lo. Nau ka pai avangin thei chu ka ei tui hle tih pawh ka hria, insum ka tum pôh lah ka thei lo zual ting a ni. Pum 5 zet ka ei zawh hnu chuan ka ha a rawn ṭim ṭan a, ka ei zawm zel duh ta lo. 

Christmas ni te chuan hlim tak ka ni, ka nu leh pa leh Saidingi te kan in lamah an rawn leng phei a, chaw te kan ei khawm bawk a, ka pasal chuan a fanu ang maiin min ngaihtuah bawk si, ka hlim ngawih ngawih hi a ni tawp mai a ni. Kum thar kan chuangkai a, Frebuary thla lai hawl lama nau nei tur ka ni a, neih thuai thuai chu ka châk tawh tak zet. Ka pasal pawh a phur em em tawh a, a hna lamah pawh a kal ngai mang lo. 

A hna thil lam chu in lam aṭang a thawk a, ka hlat takah awm a duh lo hrim hrim a nih ka ring. Kei ve thung chu muthilh ka awlsam em em a, tlai dar 3 bawr vela ka mu te hi zan dar 8 dâwn dawnah te ka harh chauh zel a, mahse chu chuan ka zan mut pakhat mah a tibuai leh chuang ngai lo. Ka harh hi chuan ka bulah ka pasal a lo awm ngei ngei zel a, chu chuan ka thla a timuang hliah hliah ṭhin. 

February thla kan chuangkai tawh a, ni khat chu mi tu tih pawh ka hriat loh te hi an rawn lut a, ka pasal hmel pawh ka hmu har lo. A mi rawn hruaite chu doctor leh nurse te an ni hlawm a, damdawi in ni lova kan in ngeia nau te min neih tir a tum chuan mak ka lo ti khawp mai. 

Ka ngaihtuah chiang a, a remruat dan chu a ṭha phian dawnin ka hre bawk. Nau vei thei reng dinhmunah ka ding tawh a, ka phur rualin a huphurh awm ve ka ti tho. A san chhuah lai tak hi buaithlak ka ti ṭhin, Ezekiel-a ka hrin dawn pawh khan hrehawm ka ti hle a nih kha! 

Zirtawpni a ni a, doctor te leh nurse te chuan min vil reng a, ka awm dan engkim an hriatthiam vek avangin sang turin min la ti lo va, ka pum leh ka tai erawh a awm riai riai thung. Ka pasal chuan duat takin ka kut a chelh a, kan nupa room chhungah chuan min kal kualpui a, chu pawh Doctor te thu rawn vek a ni. Ka awm dan chu a rawn dik lo ṭan deuh a, mahse doctor chuan hun lo a la ti tlat bawk si. Sang thei reng dinhmuna ka din tawh avangin khumah chuan min mut a, ka pumah eng emaw ni an rawn hnawih mial mial bawk.

Doctor chuan ka ke kuai kâkin sang tur chuan min ti ta ngei a, kei pawh ka theih tawp chhuahin ka lo sang a, hrehawm tak a ni. Ka mittui te chu a parawl kûng a, chutah ka la chau hma em em zui. Ka pasal chuan ka kut chu a lo chelh ran a, dam zet hian thlamuanna thu min hrilh dap dap a, ka chalah a fawp deuh chhen bawk a, naute lah chu ka la sang chhuak thei mai bawk si lo. Doctor chuan a chhuah ṭep thu leh sang leh hret turin min hrilh a, minute rei lotê hnuah erawh naute ṭap ri kan hre ta. 

"Ka lawmpui a che u, mipa in nei e" nui var var hian Doctor chuan a rawn ti a, thisen la kai deuh phung ka fapa ngei chu ka pawm a, ani erawh piang hlim tih hriat takin a ṭap uar em em a, ka hlim lutuk chu ka mittui ka dang zo leh ta lo.

"Ka hmangaih che u" ti supin ka pasal chuan ka chhip samah a rawn fawp a, doctor leh nurse te chuan kan fapa chu oil hian an rawn hru neuh neuh a, naute chu ka pasal kutah ka hlan a, ani paw'n a lo pawm rang khawp mai.

"Bawihpui, Ezekiel, i hming chu Ezekiel Rochanhlua tho a ni ang aw, kan fapa thi ta ai kha i rawn awh zo em em dawn tih ka hria asin" naute chala a chal sik tirin ka pasal chuan a ti ṭuau a, lawm lutuk avanga ka pasal ṭap khur det det chuan room chhunga awm ve te mittui pawh a ko chhuak hialin ka hria. 

"Ka tiam a che, i tan pa ṭha tak ka ni tawh ngei ngei ang. Ka mumanga ka hmuh ṭhin ngei kha i ni e, ka hmangaih che Bawihpui, anu nen hian kan hmangaih lutuk che" tiin naute biang leh chal vel chu a fawp tawn sêk a, kan fapa ber lah chu a ṭap tawh miah lo leh nghal. 

"Kan Bawihpuia chuan a pa aw chu a va hre nghal reuh ve le, i pate pawh ka hrilh zo deuh chiah a, an lo kal mek ang" pa Zuala chuan a lo ti a, ka lo ṭah nuih hawk a, ka kut ngeia ka fapa Ezekiel Rochanhlua ka pawm leh te chuan sawi tur pawh ka hre lo. 

"I ṭha ti raw?" ka pasal chuan min si chêt hian a rawn ti hniam ruih a, a mit bul velah mittui a la chambang nuai a, a zawhna chu ṭawngkâa chhang lovin ka lo buk khum mai a, ka hmuiah tak min rawn fawp zui zat bawk. 

"Khawiah nge ka tupa chu a awm?" room-a a lo luh rualin ka pa chuan a rawn ti nghal sawk sawk a, keini chuan kan lo nuih ṭhaw hlawm a, ka nu nen chuan pawm te an inchuh nak nak a, an awm dan chuan min tinui lo thei lo a ni. 

Minute tam a liam hnu chuan room aṭang an chhuak ta sap sap a, keini chhungkua tê bik erawh khum khatah kan la awm ṭhap a, kan fapa in hnute a hne dâwk dawk lai te chu hmuhnawm ti tak kan ni. Ka pasal chuan a kutzungchalin kan fapa biang chu a nul neuh neuh a, ka hrin chhuah dawna ka natna lo tawrh ve te chu kan fapa chuan a rawn tidam vek a ni. Chauh chu ka la chau ngei a, mahse naute pawm thei lo khawp a chau chhia erawh ka ni lo thung. 

End of Chapter 17