THE ONE WHOM MY SOUL LOVES (M&B) By Havali Adam - Page 2

THE ONE WHOM MY SOUL LOVES (M&B)

By

Havali Adam

6 May 2022

Chapter 11

Manuel-a chuan Loicy-i chu a dam lo kawr hlih sakin thawmhnaw a hak tir mial mial a, a insum nasa hle a, dam lo lo ngat se chu fawh bawrh bawrha a rilrua thil awm chu a ti buan buan duh ngei ang. Loicy-i paw'n Manuel-a hmaa inthlak vel chu zahna a nei buai duh rih lo law law a, a rilruah Practical Exam lam chu a lian em em zawk a ni. Chu bakah Manuel-a nen chuan hmangaihna pawh ṭum thum lai an chen dun tawh a, hmeichhe pangai tan chuan zah tawh lohna tham a ni.

Car chhunga an chuan hnu chuan Loicy-i kut chu Manuel-a chuan a vuan deuh chawt a, rei lotê tê han vawn loh zawk a nei ṭhin tih loh chu kut insik loh lai pawh an nei lo. A chang leh la kangin a fawp leh vang vang ṭhin bawk a, chuti anga a awm chu Loicy-i'n hmuh nuam a lo ti em em a, a tan chuan Manuel-a tawhna hrim hrim chu a hahdamthak ngawih ngawih a ni.

School Campus-a an din rualin Loicy-i chu Car aṭang a chhuk nghal a, a ṭhutna bul kawngka hawn tuma lo kal Manuel-a pawh a nghak zo tawh lo a ni ber. A bana sana chu en zeuhin hun an nei tam tawh lo tih pawh a hria, chutah amah ang lo takin Manuel-a lah chu a la hmanhmawh lo em em zui. A kal chak lutuk chu Manuel-a chuan a kut a rawn kai vat a, kal muang deuh tura a hrilhna te chu a hre lo der hmak a, Manuel-a awm dan vel chu a hun lo a ti kher mai.

Step-a an kal chhoh lai te chuan ni dang ang bawkin zirlai naupang ṭhenkhat chuan an en duh vawng vawng leh hle a, sawi pawh an sawi zui leh sep sep bawk a, mahse Loicy-i chuan engah a ngai lo lui ve hmiah hmiah thung. Mi dang vengthawng reng renga awm chu hrehawm a ti a, Manuel-a'n mi dangte mitmei veng reng lo tura a tiha te kha a awih telh telh bawk. Engthawl taka awm a duh a, Manuel-a chu a mipa kawp a nih avangin lo sawiseltu te chu a hre lo der ve hmak hmak tawh a ni.

"Min ngaihtuah hmel tak khan min en lo teh Manuel, ka ṭha alawm, ṭha takin Practical Exam hi paltlang ka tum bawk" Manuel-a'n a chhuk melh run avang chuan a ti hluai a, Exam room-a an luh lohna chu kawngka hawn leh hawn loh chiahin a dal tawh.

"Ka ngaihtuah tlat si che alawm, ka awm dawn bawk si a, i zam leh vek ang tih chu ka hlau ru khawp mai" a ṭawng tawp lamah chuan Manuel-a chu a nui zeuh a, Loicy-i pawh a lo nui ve zeuh bawk.

"Ka zam lo turah ngai ang, lut hmasa rawh, endiktu tur i nih kha" tiin Loicy-i chuan kawngka hawngin a nam lut a, ani pawh rei lotê hnuah a lut zui ve nghal.

Jessica-i chuan a bula ṭhu turin a lo hui vat a, zirlai naupang chu an lo awm kim deuh vek tawh bawk a, mahse Professor te erawh an lo la thleng kim lo thung. An sir deuh fêa ṭhu Thomas-a chu a va hmu a, Section tina an ṭhut hran ṭheuh avangin inbiak lawng lawng chu a rem teh chiam lo a ni. Jessica-i chuan a huphurh ruk thu a hrilh malh malh a, Loicy-i tak pawh chuan a huphurh ru ve tho.

Piece thiam chian leh chian loh chu thuhran ni se Manuel-a a ṭhu ve dawn tlat a, a hmaa mi ang chiah khan rilru pe lo zetin a awm mai ang tih a hlau a ni. Chuvanga huphurh ru ve em em chu a ni a, thil dangah erawh zamna leh huphurhna a nei hran lo. Miss Lily-i pawh a dam tawh a ni ngei ang a hmel a hmu tlat, pasal a nei tawh tih a hriat hmaa a ngaihdan chu a hre chhuak a, a zak ru ngei a mai.

"Loicy Wilson" tia Professor pakhatin a hming a rawn lam rual chuan a hawi chhuak vat a, Piano inhunna lamah chuan a kal zui nghal bawk.

Piano lam pana a kal lai chuan Manuel-a chu a en zeuh a, ani chuan ngaihtuah hmel fê hian a lo en ran a, hawi sawnin a hma lam chu a hawi leh nghal a, mahse a lu a rawn hai thut avang chuan a tlu teuh kher mai. Rei lotê chu a pai deuh nawk a, inthing harhin a kal pangngai ve leh mai bawk. Manuel-a chu a ṭhutna aṭang thawha rawn buaipui nghal a tum a, hmu hman lo se chu a ṭhutna aṭang chuan a ding hman ngei ang.

Buaipui a duh lo tih leh a kal ṭha pangngai thei tih lantir nân Loicy-i chuan a lu a thin khum zeuh a, mi dang chuan an hrethiam kher lo vang, mahse Loicy-i leh Manuel-a erawh an inhre chiang em em thung. Piano hma ṭhutthlenga a ṭhut thlak rual chuan Professor zinga pakhat chuan a play tur Piece hming a rawn sawi a, Loicy-i chuan Piano chu a hmet ri ta.

"I thei tur a ni; i thei ngei tur a ni Loicy" Manuel-a chuan a lo ti rilru mawlh mawlh a, dam kawr tih hriat zeta hmel dâng bal Loicy-i chu a ngaihtuah tak zet a ni.

Manuel-a chuan Piece a play dik em tih lam pawh a ngaihsak tawh lo, a play dan vel ai mah chuan a taksa lam a ngaihtuah zawk a, a ṭan lutukna lamah a pen ken lai chu a hum kawi vek a, chu erawh mi dang hmuh theih lovin dawhkan phenah a ni thung. Loicy-i'n a play zo chiah chu a lo thaw chhuak hawk a, a bul chiaha ṭhu Professor phei chu a lam a lo hawi phah nghe nghe.

Lily-i leh Loicy-i kal dun lai chu a en zui vawng vawng a, Lily-i'n Loicy-i ngaihsak tura a mitmei te chu a hmu vek a, endiktu te ṭhutnaah pawh chuan ṭhut rei a tum tawh lo hle. Mi dang an koh chhuah leh hmain Professor te bulah chuan Loicy-i dam loh thu leh buaipui a ngaih thu chu a sawi a, kal mai a ngaih thu leh endikna pawh an kuta a dah thu sawiin a kal sawn zui nghal bawk.

"Manuel, kha hawpui vat teh, Loicy-i hi a ṭha miah lo. Nang pawh lo hruai luih loh mai tur che a nia, Exam nei lo mah se a Grade a ṭha thawkhat viau asin" room pawn a thlen rualin Lily-i chuan a lo ti nghal bawrh bawrh a, Loicy-i hnen aṭang a dam loh thu a hre tawh a ni ngei ang.

"Loicy! Engtin nge i awm!?" hlauthawng ru takin Manuel-a chuan a ti nghal a, a lam panin a darah chuan a chelh a, Loicy-i chu a zawiin ding ngil tur tak ngial paw'n tha a nei mumal tawh lo tih a hrethiam chhunzawm nghal.

"Ka ṭha alawm Manuel" nui lui tih hriat zet hian Loicy-i chu a ṭhen tawi tak a, Manuel-a chuan a pawm nghal lâwp a, Loicy-i thu sawi chu a them paw'n a awih lo a ni.

"Hrep tak che hian Loicy, ka thu kha awih la chuan heti ang hian i awm hauh lo vang" ti bul hmukin Step-ah chuan a pen thla hlawk hlawk a, tun atan chuan damdawi ina hruai chu a fuh ber a ring bawk.

Ṭawng ri neuh neuh thawmah chuan Loicy-i chu a harh a, ṭawng mek chu hmeichhia a ni tih pawh a hria, Doctor a nih ngei a ring bawk. A mit a men chuan Manuel-a leh Doctor lo inbe lai chu a hmu nghal zat a, inbia ni mah se Manuel-a chu a ṭawng ve lo hrim hrim. Doctor nu thu sawi chu a ngaithla deuh tawp a, a kutah chuan lehkha var a keng ran bawk. Loicy-i chuan thawm nei miah lo hian a en reng a, chiang takin a hmel hmu thei lo mah se Manuel-a chu ṭha a ti ve thlawt a ni.

Doctor chuan a harh tawh a ni tih hriain Loicy-i lam chu a rawn hawi a, Loicy-i chuan a mi biak mek pa chu hrilh rih lo turin a lo signal vat thung. Doctor nu pawh chuan a harh thu a hrilh ta bik lem hlei lo va, Doctor hmel awm dan en se chu Manuel-a chuan Loicy-i lam a hawi vat ngei ang, mahse ani chuan ngawi rengin chhuat a melh ngur ringawt.

"Manuel" a tih sep chuan a lo hawi rang kher mai, ama hriat tawk lekin a sawi emaw a ti a, Manuel-a chuan a hriat phak tak tak pawh a ring lo, mahse a lo hre chiang em em thung.

"Loicy" tiin Manuel-a chuan Loicy-i awmna lam chu a pan nghal ruak a, a kuta lehkha var chu a kekawr ipteah a ak ṭha zui nghal hmak a, Loicy-i awmna chu a thleng phei rang kher mai.

"I ṭha em?" Manuel-a awah chuan ngaihsakna leh ngaihtuahna hlir a ri chhuak a, chu ringawt pawh chu Loicy-i chuan hriat nuam a lo ti em em a, a dam sawng sawng ni mai hian a hre hial a ni.

"Ka ṭha tawh e, eng nge Exam chû? Ka tih ṭhat hmel em Manuel?" nui var var hian Loicy-i chuan a ti a, mahse Manuel-a erawh a ngawi reng thung, dik tak chuan a zawhna chu chhan dan tur a hre mai lo a ni.

"Ka hre lo" Manuel-a chhanna avang chuan Loicy-i chu a nui sen sen a, Manuel-a fiamthu thawh dan chu a nuihzat thlak lam ai mahin a hmel leh a ṭawngkam inperhsan lutuk chuan a tihlim zawk a ni.

"Hre tur chu i ni alawm Manuel, endiktu i nih khâ, i hre tawh lo em ni? Fiamthu thawh lovin min han hrilh ṭha teh, ka tih ṭhat vak pawh ka ring lo, mahse Exam kha ka duh hrim hrim"

"Ka fiamthu reng reng hleinem Loicy, i Piano play ri kha ka ngaihsak reng reng lo. I taksa chauh hmel tak te khan ka rilru zawng zawng a luah khat a, thil dang dah ṭhain nangmah chiah ka ngaihtuah che a ni"

"Manuel" Loicy-i chuan a lo ti sep a, Manuel-a chuan dawt a sawi reng a ring lo, a chhan chu a hmelah dawt a sawi lohzia chiang takin a lang tlat a ni.

"Min kuah thei ang em Manuel? I taksa nghenga mut ka duh, ka rilru i tihhahdamzia hi hrethiam la chu i hlim ve ngei ka beisei" a ti leh chiah chu rang takin Manuel-a chu khumah a inthawlh nghal a, Loicy-i thil duh hotê anga lang mah se a thlakhlelh em em si chu tih loh a tum lo chiang hle.

"Exam chu kan zo fel a ni ta mai a, in ram lama haw i tum em Loicy? Haw lo la ka duh ngawt mai, Chicago lamah min lo zui haw ta che, ka chhungte hmel hriattir che ka duh a ni" a kutzungṭanga a biang nul sak pahin Manuel-a chuan a ti sup a, Loicy-i erawh chuan

"Ni lo ve, kan ramah Christmas hmang tura haw ka tum vek tawh a ni. Chawlh kan neih chhung chu ka cham rih ang, ka chhungte paw'n anmahni ka ngaih ang chiah hian min ngai tawh hle ang ka ring" tiin a lo chhang thung a, chutah amah bawk chuan

"I hmeichhe lo kawp tawh te ang ka ni lo tih hre bawk la ka duh Manuel, anni chu vawi tam i chhungte i lo hmel hriattir tawh pawh a ni mahna, kei chuan a la hma mah mah ka ti a ni" a ti leh nghal zat a, a chhungte han hmuh ringawt pawh chu a duh rih chiah lo a ni.

"I danglam teh asin Loicy, ka hmeichhe lo kawp tawh ṭhin te ang i nih lohzia chu kei tluka hre chiang an awm lo vang. Ka chhungte hmu turin tûmah ka la sawm ngai lo, nang chauh hi ka sawm awm chhun i ni" Manuel-a chuan duat taka kuah vawng vawng chungin a ti thum ṭial ruai a, a thu sawi chuan Loicy-i thinlung a dek ta zar mai.

"Manuel!" ti deuh hluaiin Manuel-a mit chu a melh ral a, a rilru chhung chu a hlim veng veng a, Manuel-a sawmna pawh chu pawma Chicago lama kal chu a duh nghal rum rum a, inngaihtuah chhuak lo se chu a sawm nawn pawh ngai lovin a zui duh thu a sawi ngei ang.

"Ni lo, kei chuan ka chhungte bulah hun ka hmang ang, nang pawh i chhungte bulah hlim takin i hmang dawn nia" amah bawk chuan a ti leh a, Manuel-a erawh a ngawi reng tawh thung.

"Manuel, min chhuahpui lawk teh, ka chhungte biak ka ngai a ni. Ka phone lah chu nimin thil vel avang khan a chhe ta daih bawk si a, phone lei ka ngai tihna a nih ber chu!" a phone a chhia tih chu a hre chhuak ve chiah a, a chhungte'n biak an lo tum ngei pawh a ring.

"Muhil rih phawt la phone lei tur chuan kan chhuak dawn nia, tun atan chuan i taksa hi tihahdam phawt rawh le" dam zet hian Manuel-a chuan a ti a, Loicy-i pawh a awm ve ta hle hle.

Darkar 3 chuang damdawi ina an mut hnu chuan Loicy-i pawh a harh ṭha sawt hle a, a damdawi ei a ngeih bawk nen Phone lei chu a ti deuh chhen bawk. Manuel-a chuan phone zawrhna hmunpui changkang zetah a kal pui a, Loicy-i phone tur chu a leisak thlap bawk a, chu chu a thilpek pek hmasa ber a ni nghe nghe. Amah leh amah pawh chu mak intih chang a nei leh thut ṭhin, a chhan chu tu hmeichhia mah thil a lei ngai lo tlat a ni.

Rosy-i kha a hmeichhe lo kawp tawh ṭhinah chuan a kawp rei ber pawl a ni a, thla eng emaw zat an inkawp chhung khan eng thil mah a leisak ngai lo. Amah Rosy-i zawkin a duh hunah pawisa dilin a lei mai zel a, hmeichhe thil ngainat lei tura chhuah chhen te chu a peih hlawl lo a ni. Tunah erawh Loicy-i nen an inkawp leh tawh a, a hmeichhe duh hmasa ber a nih vang pawh a ni ang an inkawp rei chu a ring tlat a ni.

Loicy-i chuan Manuel-a thil leisak chu lak mai a duh lo va, mahse la lo thei lovin a siam tlat bawk si. Inthlahrung ru takin Manuel-a thil leisak chu a pawm ve ta ringawt a, chuti ang phone ṭha leh changkang chu ama thawhchhuahin lei dawn ta se chu ni eng emaw zah a inhlawh a ngai ngei ang. Chuti ang khawpa to leh lak mai inthlahrunawm chu a ni a, Loicy-i tan chuan han pawm mai harsa mah se a pawm lo thei bawk si lo a ni.

Tin, Manuel-a chuan Camera ṭhat hmel zet mai hi a lei nghal bawk a, a thlalak hmasa ber chu Loicy-i thla a ni. A khawih dan vel tur kalhmang a hre sa vek bawk a, a thlalak ṭhenkhat phei chu Loicy-i chuan nalh a ti hlawm hle. Darkar 1 vel thil lei nân hun an hmang a, chumi zawh chuan Manuel-a in lamah an inkhalh haw a, Loicy-i chuan ama Apartment vela awm chu a tum tlat bik lo, Manuel-a nena khum khata mut dun chu a thlahlel ve tho a ni.

"Aw a nih hi! Ka pa leh Johny-a pawh kha lo hrilh rawh, a hmaa mi kha chu a chhe daih alawm" tiin Loicy-i chuan phone dang a hman thu chu a nu a hrilh melh melh a, dinner tur chu a siam pah reng bawk.

"I lo haw thei turah keini lam chuan kan ngai a nia Loicy, i theih hmel em?" a nu chuan a rawn ti a, ani paw'n a haw theih dawn thu leh thil dang a sawipui luam a, mahse Manuel-a nen an chanchin a zawt miah lo chu mak a ti ru hle.

"Ka nu, ngaihzawng ka nei a" mahni nute bula thu zep nei reng chu a thei tawh lo, a nu lah chuan zawh a tum bawk si lo, Manuel-a nena an than dan te chu a hriat vek tawh a ring ru reng a ni.

"Ka hria alawm Loicy, mahse nang ai chuan a upat hmel mah mah a ni. He lam chanchinbuah pawh kan hmu reng che u alawm, i pa'n sawi buai vel ṭul a ti lova ka sawi ngai lo mai mai a ni" a nu chuan a rawn ti ta nge nge a, chutah Loicy-i chuan

"Engtin nge ka pa chuan min sawi? Kan Professor nena kan inngaihzawng thu pawh a hre vek tawh a, ka chungah a lungawi lo viau em ka nu?" tiin zawhna a lo nei leh nghal a, a piah lawka ding Manuel-a chuan a lo en chik ta hle.

"Nei ve mah se a pawina a awm lo a ti ve teh mial a, nakinah amah pawh hi i la be hrim hrim dawn nia, mahse a vengthawng ru hle che tih ka hre vek" a nu chuan a lo ti ve leh mai a, a fanu ngaihzawng neiah chuan a buai em em hran lo a ni.

"Engtin nge?" anu leh Loicy-i an inbe zo chiah tihah Manuel-a chuan a lo ti deuh tawp a, a zawhna chu tawiin mawl mang hle mah se Loicy-i chuan a hrethiam em em thung.

"Dinner ei hunah ka hrilh dawn che a nia, tunah chuan kan ei tur hi kan siam zung zung phawt ang e. Ka ril lah chu a ṭam ru phian tawh leh nghal, vawiin tlai chu hma taka dinner ei inbeisei ang" tiin Loicy-i chu a che mial mial a, a awm dan leh ṭawng dan vel chuan Manuel-a lung a tiawi hliah hliah a ni.

Dinner an ei laiin Loicy-i chuan a chhungte nena an inbiak dan chu a hrilh ta melh melh a, tui tak hian a ṭawng siam siam a, Manuel-a bulah chuan zalen takin a awm thei tawh tlat a ni. Manuel-a ve thung chuan engmah a sawi lo va, a chhungte hnena hmel hriattir lam pawh a sawi chhuak leh tawh lo hrim hrim bawk. A rilru chu Loicy-i ṭawng siam siam ri leh hmelin a luah khat vek a, a hmaa ei tur inhung pawh ei nachang a hre lo leh nulh zel.

Dinner an ei zawh chuan room-ah an awm dun leh tawp a, tih vak tur an hre lo a ni. Zan rei tawh lamah Loicy-i chuan Movie en dun a châk thut a, Manuel-a chuan a lo hnial lo nasa mai, a dam ṭha deuh tawha a hriat avangin chhuahpui chu a châk ru hle zawk a ni. Movie an en lai chuan Manuel-a chuan Movie aiin Loicy-i hmel chu a en leh vawng vawng ṭhin a, chu pawh an thil en lai hmuhnawm loh a tih vang a ni pakhat.

Chawlh kar 2 a ral leh meuh chuan Loicy-i leh Manuel-a pawh thla 3 chuang an inkawp ve ta reng mai, a sarhu lai ang em em ni lo mah se mi sawi zui an la hlawh dun hle a, Loicy-i ngat phei chu a lar chak hle a ni. A hriat lovin sawmna pawh a dâwng a dawng tawh ngei a, Manuel-a'n a lo cancel sak zel ṭhin thung. Manuel-a chuan Loicy-i chu miin hre vak lo se a tihnuhnawh ve leh ta zawk a, a hmeichia chiah ni se a duh ang chiahin mipa dang reng reng bula awm turin a phal hlawl lo a ni.

New England Conservatory of Music School pawh kum tawp a hnaih tawh avangin khar fel vek tawh a ni a, Loicy-i chuan an ram lama haw a hnaih ta hle bawk. Manuel-a ve thung chuan haw lo turin a ti deuh reng a, an pahnih chauha hun tam tak hman dun a duh thute chu a hrilh ve luam a, mahse Loicy-i chuan haw a tum thu a hrilh ta tho. Kum dangte pawh a la awm ang a, chung hunah chuan Christmas pawh an la hmang dun thei mahna.

"Kum thar lamah chuan ka chhungte nen inhmel hriattirna ka neih pui tawh ngei ang che Loicy, tun thleng hian haw lo la ka la duh tak zet" Manuel-a chuan a ti sup sup a, Loicy-i chu a kuah nghet hle bawk.

"Ni e, kum thar lamah te chuan kei paw'n i chhungte hmuh chu pawi pawh ka ti hran lo. Nang paw'n ka chhungte la hmu ve la a ṭha ang, mahse anni chuan an hre deuh reuh chein ka hria" Loicy-i ṭawng laklawh lai chuan a fawp chat a, zan hun hriat reng tlak pek a duh a ni.

"Min ngaih zui vawng vawng theihna tur thil ka hnutchhiah dawn a ni" ti thum ril ruihin Manuel-a chuan duhthaw tak hian a fawp a, a tuk maia US ram a chhuahsan tawh dawn avangin Loicy-i paw'n lo dan a tum hauh lo.

Manuel-a chuan Loicy-a chu phelh ruak vek a, a taksa mam var han te chu a hmuiin a nul kual chhuak vek a, hmaih nei miah lova chet chu a thil tum ber a ni. Hriat reng tlak khawpa nawmna vawrtawp pek tumin Loicy-i taksa chu a sawngbawl vel a, rei lovah a thil tum chu a hlawhtling nghal der mai. A taksa no leh deh nuam tak a fawh mawlh mawlh laiin Loicy-i chu a lo eu tawn tawn a, thawk te chu a la ri halh halh bawk, Manuel-a mamawhna hlirin a khat tawh a ni.

"Manuel" ti tham ṭial raihin Loicy-i chu a ṭe chhuak ta halh a, Manuel-a hmuiin a hmeichhiatna a si chiah phei chu awm ngaihna reng a hre tawh lo a ni.

Manuel-a sam buk khawih nuam tawk chiaha nem chu a ṭham tawn tawn a, a rilru leh taksa engkim chu Manuel-a thu neihna hnuaia awm a ni ber tawh a, Loicy-i chuan ṭum danga hmangaihna an chen dunna ai mahin a dawngsawng ṭha a ni. A mipatna hmang miah lova siam khur ngawt ngawt theitu Manuel-a chu a en ṭawk ṭawk a, a taksa chhung inling let chho nasa tawh lutuk chuan zawi lo thei lovin a siam a ni.

A taksa chhunga a lo luh lai te chuan ang hlawi hlawiin a ṭe chhuak hak hak a, muangchang lo taka Manuel-a chetna chuan nawmna vawrtawp vawi eng zah nge a thlen tir pawh a hre mumal thei tawh lo. Chet zawm pah rengin Manuel-a chuan a rawn fawp tawn tawn a, a thinlung zawng zawngin Manuel-a chu a hmangaih a ni.

A hmangaih thu chu sawi mawlh mawlh mai a duh a, mahse Manuel-a chet dan engkim chuan ṭawng chhuak theiin a siam lo tlat, ṭe chhuah hawk hawk tih chauh lo chu tih theih a nei rih lo a ni.

"Loicy!" Manuel-a aw chu hlauhthawnnaa khat ang mai hian a vung vut a, a hma zawna hmeichhe hmelṭha tak mu zangthala tal ruai ruai chu bawh betin a phu awt awt a, a insum zo tawh ngang bik lo a ni e.

"Ka hmangaih che Manuel, ka hmangaih lutuk che" meng mang hlei lova Loicy-i thu rawn sawi chuan a va tihlim tehreng em, engtikah mah Loicy-i nen chuan an awm hran theih a ring ta lo.

Manuel-a chu a che leh phat a, Loicy-i taksa chhung aṭanga a la chhuah miau loh avangin a chet zawm leh nghal mial mial a, chuti ang teh hrepa a châkna ti chhuak thei hmeichhia chu khawvelah an awm leh theih pawh a ring tawh lo hial a ni.

Nawhchizuar ang maiin Loicy-i chu a ṭe chhuak leh hak hak a, chu erawh eng dang vang ni lovin a laka Manuel-a chet dan dawnsawn nawm lutuk vang a ni. Minute rei lotê hnuah an chau dun leh ta hnawk a, Loicy-i tak phei chuan vawi tam tak nawmna vawrtawp chu a thleng hial a ni.

"Ka ngai dawn lutuk che Loicy Wilson" a âwm nghenga hmeichhe muhil thaw ri sêk sêk en vawng vawng pahin Manuel-a chuan a ti sup a, a mipatna chu harh ṭha leh viau tawh mah se insum tlang a tum ta zawk.

"I chhungte tih loh mipa dang i hnaih vaih chuan ka rawn kal nghal ang" a ṭawng hre lova muhil bulah chuan a ti leh sup a, Manuel-a chuan a ngaih dawnzia chu tihlan dan a thiam lo a ni ber.

"Heti ang hian awm reng thei mai ila ka duh ngawt mai Loicy" ti hniam leh ruihin a mit a chhing ve ta vang vang a, a awm dan chu hun kal tawha Manuel Firth-a awm dan a ni ngai lo tih ngaihtuah chhuakin a khi suk a, men erawh a meng tawh lo hrim hrim thung.

THE ONE WHOM MY SOUL LOVES (M&B)

By

Havali Adam

Chapter 12

A tukah chuan Airpot lamah an inkhalh chhuak a, Loicy-i paw'n Manuel-a chu a ngai dawn lutuk tih chu a hre ve reng tho, mahse an rama a haw ngei a ngai bawk si a ni. Manuel-a erawh chuan engmah a sawi leh tawh lo va, haw lo turin ṭawngkam a chhak chhuak tawh lo eih lo. Car chhunga an chuan chhung zawngin an inbe lo va, mahse an chet ziain an inngaih dawnzia an tilang ve ve thung. Loicy-i chuan Manuel-a kut lum thar thar chu chelh ran a, nghet taka vuanin a fawh sak zeuh zeuh a, chu chuan Manuel-a pawh a tihlim ru hle.

Kawnga an tlan laklawh laiin Manuel-a chuan Car a tiding nghe nghe a, duhthaw taka Loicy-i fawp bawrh bawrhin hmangaihna chenpui leh mai te chu a duh hial bawk a, mahse kawngkam a nih vang leh Car chhung chep tak a nih avangin hmangaihna chenpui lo turin a insum thei hram a ni. A nihna takah chuan sawi tawh lo mah se Loicy-i chu an ram lama haw lo turin a duh ngawih ngawih a, Chicago lama a chhungte hmel hriattir a duh tawh a ni ber.

"Inthlah nân min kuah dawn lo em ni Manuel?" thlawhna lam a pan laiin Loicy-i chu a ding leh rih a, a ṭap thei mai dawnin a hria, Manuel-a chu an ramah rawn zin ve daih se pawi a ti teuh lo.

"Ka kuah emaw ka fawp che a nih chuan ka insum theih pawh ka ring tawh lo Loicy, min hnung chhawnin kal thuai la, zahna tur i nei lo zawk ang" Manuel-a awah chuan khawhar ruk riauna a tel a, chu chu Loicy-i chuan a lo hre chiang khawp mai.

"A hma kha chuan ka zak ṭhin ngei alawm, mahse tunah chuan ka zak tawh lo. Nangmah nen a nih phawt chuan ka zak tawh lo vang Manuel, a chhan chu ka hmangaih tawh lutuk che a ni"

"Loicy, i tlai phah vek chuan ka thiam loh a ni lo vang" ti bul hmukin Manuel-a chu kawlphe ang maia rang hian Loicy-i dinna lam a thleng phei nghal ruak a, pawm kang lawpin a fawp zui nghal mawlh mawlh bawk.

"Han sawi nawn leh teh Loicy, ka thinlung sak tak hi nang tê hian awlsam takin i tituiral mek a, i tizawp vek tawh zawk hialin ka hria" Loicy-i hmai zawna thaw lum ham hamin Manuel-a chuan a ti thum chhal a, Loicy-i pawh zirlai thu awih tak ang maiin a rawn ṭawng chhuak ve nghal.

"Ka hmangaih che Manuel, kan awm hran laia hmeichhe dang nen ka hmuh duh vaih che u chuan hmangaih tawh che mah ila ka ṭhen nghal ang che" nui deuh seih paha a tih chuan Manuel-a pawh a rawn khi suk a, an awm danah chuan mi dang mitmei pakhat mah an veng tawh lo a ni.

"Chu zawng a thleng lo turah ngai ang, kei pawh in ramah mipa dang nen in awm dun a nih vaih chuan ka rawn kal nghal ang a, i mipa awmpui pa chu ka sawisa hrep duh hial ang tih hre rawh Loicy"

"Nangmah tih loh mipa dang chu ka awmpui ngei a ngai si alawm Manuel, ka pa leh ka nau hi mipa an ni a, anni em em chu i thik thei lo vang. Kei paw'n i chhungte ka thik hleinem, hmeichhe dang alawm ka thik ni!"

"Nangtê reuh hian ka thluak i tichawmawlh zo tawh a nih ber hi Loicy, leiah ka dah thla che ang a, lo hawi let miah lova i kal nghal a nih loh chuan Australia ramah ka haw tir miah lo vang che" tih leh lei lama nghah thlak chu a rual a, Loicy-i paw'n thlawhna lam chu a pan ve nghal mai bawk.

Ngawi renga kawng dawmin Manuel-a chuan Loicy-i chuanna thlawhna van sâng lama thlawk bo riai riai chu a thlir dauh dauh a, a sir velah thla la tawk an awm tih hre mah se a ngaihsak der lo. Loicy-i chuan a thinlung leh rilru zawng zawng a thlawh bo pui emaw a ti hial a, a ruak ta lutuk chu a hrethiam lo a ni. Muangchangin a Car-ah a ṭhu lut a, tlan chhuak ta mai lo chuan Loicy-i bawk a ngaihtuah leh vung vung a, hun remchang hmasa bera a chhungte hmel hriattir chu a tum ruh khawp mai.

A ṭhut ngawih vung vung hnu chuan a ina haw tlang nghalin a thawmhnaw te chu a siam ve zung zung a, Loicy-i ber a awm tawh lo bawk nen Chicago lama thlawh haw ve nghal mai chu a duh a ni. A chhungte bulah kar leh lama haw a tum thu lo sawi lawk tawh mah se a tum loh deuhin a awm thut a, kar khat chhung vel Loicy-i nena len chhuahna hun neih a duh ve vanga kar leh lam daiha haw tum pawh a ni reng a, mahse a tum ang chuan a awm lo chiang hle a ni.

Chicago a thleng chiah chu Christmas ni tak ang maiin engkim chu an lo inchei eng sep sep tawh hlawm a, a awm ve tho mai, Christmas a hnai ve tawh êm bawk a ni. Thla khat leh a chanve teh meuh School chawlh an nei dawn a, a awmzia chu Loicy-i nen thla khat leh a chanve an inhmu dawn lo tihna a ni ber. A tuar chhuak thei ang em a hre lo va, a tawrh chhuah theih loh leh a kal chilh pawp tawh mai a ni ang chu!

A chhungte'n Manuel-a an han hmuh teh thut chu mak an ti ang reng hle a, hrilh lawk miah lova a haw ziah chu a nu chuan a lo zilh mawlh mawlh bawk a, Manuel-a paw'n engtin mah a chhanglet hran lo. Loicy-i'n a chhungte a ngainatzia a hmuh khan a ruk tak chuan a awt ve a, a chhungte bula hun a hmang tam ngai lo chu a nel loh chhanah te a puh bawk a, a awm dan chu Loicy-i avangin siam ṭhat a duh a ni.

"A tua chu maw Loicy-i tih hming pu chu Manuel? I awah lah khan ngaihsakna tinreng a lang bawk si, i hmeichhe kawp thar kha em ni?" a pa zawhna avang chuan a nui tawi tak a, hrilh tlang chu a hun ve tawhin a hre bawk.

"Aw ni e ka pa, Loicy-i chu tuna ka hmeichhe kawp lai mek hi a ni alawm, Australian a ni a, ka duh engkim a nei vekin ka hre hial asin" a en ngai en reng hian a ti ve luam a, a awm dan avang chuan a pa chu a lo hlim ru hle thung.

"Han sawi zel teh ka fapa, heti anga kan titi lohna chen pawh hi ka hre tawh hleinem le, i danglam riau te hian ka hria Manuel, i hmeichhe kawp lai chanchin hi kimchang deuh min hrilh la a ṭha ang"

"Chuti angin kan inkawp chhung leh kan inhriatna pawh a la rei lutuk lo, ani chu ka zirlai naupang a ni a, a tum a ruh reuh khawp mai. A hmel chu chanchinbu vel aṭang i hmuh vek tawh ka ring, sawi vak dan pawh ka hre hran lo"

"A hmel kha chu ka lo hmu zing malh malh khawp asin, mahse a naupang deuh mah mah lo maw ka fapa, nge nia a hmaa i hmeichhe lo kawp tawh te ang thovin i thutak lem lo zawk?"

"Tun ṭum chu ka thutak ve viau chuan ka hria, ka hmuh tirh phat aṭanga ka ngaihtuahna tibuai em emtu kha a ni a, ka hmeichhe duh hmasa ber leh ka duh thu ka sawina hmasa ber chu Loicy-i hi a ni"

"Austrlian i ti em ni khâ? Australia ram mipuite chu an taima hlawm teh asin, kan rama ṭhalai tam tak hian Australia rama ṭhalaite khu an tluk miah lo vang, naupang ang deuh khuan lang mah se hna an nei kat deuh fur zel"

"I sawi dik ka ring ka pa, Loicy-i pawh Boston lama kan awm lai khan Part Time hna a nei reng alawm, ka tan chuan naupang viau mah se a puitlingin hmeichhe rilru nghet tak a ni"

"A ṭhat chu, tu hmel te hi ka hmu ve châk tawh a nia Manuel. I nau lah khu chuan pasal lam a la ngaihsak hmel loh bawk si, chuvangin nang tal hi chuan nupui nei thuai thuai la, tu hmel min han hmuh tir vat teh"

"Vawiin chu i ṭhat hmel viauin ka hria, damdawi i ei tawh hrim hrim em?" a pa thu sawi sawi chhunzawm lem lo chuan a ti ta daih a, Boston-a a awm lai pawh khan a pa chu a ngaihtuah ve tak zet a ni.

"Ka ṭha tawh alawm, i lo haw tawh bawk a, ka ṭha sawt turah ngai ang" nui var vara a pa'n a tih chuan a inthiam lo ru deuh nghal a, a pa hmuh lai chuan a nui rei lo hle bawk.

"Chhungkua i ngaihpawimawhzia ka hria alawm ka pa, kei hian heti lamah chuan ka chhun lo mai che pawh a, mahse hun remchangah chuan rawn haw ziah ka tum tawh ang" Manuel-a chuan a ti hniam raih a, a pa kut cher ve tawh tak chu la kangin a fawp zeuh a, a pa ve thung chu a lo lungawi hmel khawp.

"Puitling i ni tawh a, ka thih hnuah pawh ka rinna zawng zawng hi nangmah a awm vek tih hria la, i nu leh i nau hi uap lum hram hram ṭhin ang che" a pa thu rawn sawi chuan Manuel-a ngaih chu a tiṭha ta hauh lo.

"Thihna lam hi sawi kai ṭhin lo teh ka pa, Doctor te paw'n i dam chhuah theih thu an sawi vek alawm, thi tur anga i insawi ziah hian ka lung a awi miah lo a nia, sawi tawh miah suh" a ti bul hmuk hmuk a, a pa erawh a lo nui leh var var tawh.

"Eng pawh ni se inhnuai lamah i zu chhuk ang hmiang, dinner ei hun pawh a hnai kuar tawh alawm hei" tiin a pa chu a mutna khum aṭang chuan thawh a rawn tum nghal a, Manuel-a paw'n a lo buaipui zui ve vat bawk.

Loicy-i te unau chuan in chhunga Christmas Tree ding chu an chei mawlh mawlh a, tunah chuan Christmas pawh naktuk mai a ni ta. Johny pawh a u a lo haw chu sawi lang kher lo mah se nuam a ti ru em em a, unau pahnih chuah an nih avangin a u awm loh hi chuan a khua a har ve ṭhin a, a nu leh pate bulah a sawi ngai lo mai mai zawk a ni. Mipa a nihna erawh a lang ve tho a, hmeichhia angin mi han ngaih a pe na lutuk lo a ni.

Tin, a pa Company-a hmeichhe tleirawl pakhat chuan a mit a le em em a, pafa inkawm ngeih ta reng reng chu a pa hnenah a hrilh nghal tawp a, chu a hmeichhe mit la taktu avang chuan Company lamah pawh a chuangkai ngun mawlh mawlh hle. Pu Wilson-a lah chuan a fiam deuh chhen zel a, an pafa chuan pi Wilson-i hrilh rih lo tur te'n an inthurual vel bawk a, an awm dan chu mi dang tan pawh a awhawm ngawih ngawih a ni.

Chhungkaw kima an han awm chiah chu Loicy-i nu leh pate pawh an hlim hle a, a nu phei chuan Loicy-i chu a ngaih thu a hrilh mawlh mawlh zel a, chuti ang bawkin Loicy-i pawh a bang bik chuang lo. Zan lamah ni se Loicy-i ṭhiante an lo kal khawm ṭhin bawk a, Guitar perhin Christmas hla an sa vak vak zel a, têt tê aṭanga inkawm an ni hlawm bawk a, zan pawh an meng rei thei hlawm hle.

A chang phei chuan Manuel-a phone Call pawh Loicy-i chuan a lo hmu hmaih palh ṭhin nghe nghe a, mahse Manuel-a chuan a chhan a zawt ngai chuang lo, chuvang chuan Loicy-i paw'n a thinrim lo ni turah a ngai ve hmiah zel bawk a, an inbiak tawh hi chuan Manuel-a'n sawi vak tur hre lo mah se ani erawh a ṭawng duh thei hle thung.

"Aw le hei, kum tawpah kan chhungkuain kan inhmu khawm ve thei ta hram a, a lawmawm khawp mai. Kan fanu neih chhun Loicy-i pawh ram dang aṭangin a lo haw a ni a, bialpa a nei ve ta erawh ka ui ru khawp mai" a pa chuan a ti dam dap a, Loicy-i chu a lo lai kher mai.

"Him dam taka Christmas min hruai thlengtu Pathian hnena ka ṭawngṭai zawhah kan ei ṭan mai dawn nia" a pa bawk chuan a rawn ti leh nghal a, chuti ang chuan Christmas ni apiangin pu Wilson-a te chhungkua chuan an lo ti fô ṭhin a ni.

A pa ṭawngṭai zawh chuan hlim takin thil an ei zawm nghal a, Loicy-i pawh insum buai duh hauh lovin a ei mawlh mawlh a, Model a ni lo bawk nen pian nalh duh avanga thil ei tlem tih vel chu a rilruah a lang lo khawp. Tukṭhuan an ei kham hnu rei vak lovah Jessica-i hnen aṭang phone call a dawng a, rei ve ang reng tak chhung chu an inbe nghe nghe. An inngaih tawn thute an inhrilh mawlh mawlh a, an ṭawng duh barh barh dun hle.

Chhun lamah chuan Simon-a a rawn lang hlawl a, Loicy-i paw'n a lo kawm nghal vat a, mipaah chuan a ṭhian ṭha ber kha a ni ve tlat a, a haw aṭang an la inkawm deuh char char a ni. A nau Johny-a chu a len chhuah dawn thu sawiin a kal chhuak nghal a, chuti ang bawkin a nu leh pate pawh an chhuak a, amah leh Simon-a chiah chu inah an hnutchhiah a ni ber.

"Eng lo a nia Loicy, vawin chu boruak nuam lutuk lo mah se mi pawh an leng chhuak sup sup a, chuvang chuan ka" Simon-a tih laklawh lai chuan a kuta ṭawng tawh lo turin a lo ti thuai a, Loicy-i chu Simon-a ṭawng dan vel avang chuan a nui var var bawk.

"Hmâna Simon Wallace-a ngei kha i la ni e, i kum tam ve tawh mah se i la puitling reng reng lo ka ṭhian. Len chhuahpuia min sawm i duh chuan tlang takin sawi nghal mai ta che Simon, ka nuih i tiza hle a ni" tiin a la khi ver ver a, Simon-a pawh a lo nui ve ringawt.

"Ka sawi tum ber i rawn sawi tawh bawk a, kan leng chhuak dun thei tihna em ni Loicy?" Simon-a chuan a rawn ti leh nghal zat a, Loicy-i pawh a lo bu ta nghauh nghauh.

"Ka chhungte an leng vek bawk sia leng chhuak ve daih ang, ka insiam chhung min lo nghak lawk la, kan chhuak dawn nia" tiin Loicy-i chuan a room a pan a, a room-a a pen luh hmain Simon-a chuan

"Inthuam lum rawh aw Loicy, pawn boruak chu a vawt ru phian a nia, hritlang kai a hlauhawm" a rawn ti leh hram a, Loicy-i pawh chuan a ṭawng chu a hre pha vek a, pawn chhuah dawn rau rau chuan inthuam lum a tum sa hrim hrim zawk.

Simon-a sawi ang ngeiin pawn an han chhuak chiah chu a rin aiin a lo vawt lehzual a, mahse an kalna hmun turah ni a sat dawn avangin an lungphang em em hran lo. Simon-a nen chuan hmun nuam tak tak an fang dun a, a hmeichhe ṭhian kawm ṭhenkhat te ai pawha a kawm ngeih kha a ni a, nuam pawh an ti dun hle. Tlai dar 3 velah an haw a, Loicy-i chuan an ina zanriah ei turin a sawm nghe nghe a, mahse Simon-a erawh a haw tlang thung.

Khumah bawk zalin a phone chu a phawrh a, Manuel-a hnen aṭang missed call vawi thum lai a lo awm ta kuau mai. A rawn Call hun chu a en a, an haw lai tak vel a nih hmel. Call back nghal a tum laiin a phone chu Battery a tlem tawh lutuk avangin a thi daih a, Manuel-a chu a Call Back thei ta lo. A phone chu a charge thuai thuai a, vawi thum lai Missed Call a awm bawk si a, Manuel-a chu a lakah a lungawi lo vang tih a hlau kher mai.

Tlai dar 4 velah a nu leh pa chu an rawn haw a, a nau Johny-a erawh a la rawn haw lo thung. A pa chuan eng eng emaw sawipui luamin room-ah a awm hran pui a, a zirna lampang chungchang a ni ber. A pa chuan ngaihzawng pawh nei se a thil nih tum chu dah pawimawh hmasa rih turin a hrilh a, Manuel-a te ang mipa chu a tan an ṭhat tak tak a ring lo bawk. A pa chuan a ṭhian kawm ngei em em Simon-a te ang mipa chu kawp zawk se a duh a, mahse Loicy-i chuan a lo hnial vat thung.

Simon-a chu têt tê aṭanga a ṭhian ṭha leh kawm ngeih em em chiah a nih thu a hrilh ve mawlh mawlh a, a pa ngaih dan chu awm lo pawh a ti hran lo. Fate tan nu leh pa chuan a ṭha ber hlir an ngaihtuah ṭhin tih pawh a hrethiam vek alawm, mahse a ṭhianpa Simon Wallace-a ber kher chu ngaihzawng atan a duh lo a ni.

A nihna takah chuan Simon-a te chu mipa fel leh taima tak, a ṭawngkam lawmawm zet zet avanga Loicy-i tihlim em em ṭhintu a ni a, mahse a pa sawi angin Loicy-i chuan a en thei der lo a ni. Simon-a tak paw'n a en theih chuang bik a ring lo va, ṭhian leh ṭhian han inngaihzawn ringawt chu thil har tak ni turah a ngai hmiah. A chhan chu Thomas-a nen pawh an inkar khati kha a ni tawh a, chu bakah Manuel-a chauh chu a mipa hmangaih awmchhun a ni.

Manuel-a a ngaihtuah chhuah rualin room aṭang chuan a tlan chhuak a, a pa thu hrilh pawh chu a ngaihven zui tawh lo. A phone charge chu eng zat nge a nih tawh a en thuai a, Battery la tam em em lo mah se a hman theih tih a hmuh chuan a phawi nghal vat a, Manuel-a chu biak a ngai a ni. Manuel-a phone chu a ring ral ral a, a ring tawp dawn ṭep-ah a rawn pick up ta.

"Tunah hian Airport lam ka pan mek, ka rawn kal dawn, min hmuh lo inbeisei ang che Loicy Wilson" ṭawng pawh a ṭawng hmain Manuel-a chuan a rawn ti ram hmuk a, a rawn kal chhan tur ber chu a hrethiam hauh lo.

"Eng vanga lo kal tum nge i nih Manuel? I phone call vawi thum lai ka pick up lo tih chu ka hria, ngaihdam pawh ka dil nghal che ni rawh se. Ka zawhna che kha han chhang teh Manuel, eng vangin nge lo kal thut i tum tâk mai?"

"Ka sawi lawk vek tawh a ni lo'm ni Loicy Wilson? Mipa dang nen in awm dun a, ka tel lovin hlim takin i nui a, kha pa bulah khan i awm leh tawh hauh lo vang" a rawn ti khauh hmuk hmuk a, Loicy-i chuan mak a ti ta hle.

"Engtin nge i hriat Manuel? Vawiin lama ka len chhuahpui kha chu Simon-a a nih khâ, ani chu ka têt tê aṭanga ka ṭhian ṭha em em a ni. Min han hrilh chiang teh, engtin nge chuti ang chu i lo hriat daih?"

"Kha pa phiangsen nen khan hmun tin inluah khat tlat alawm, phone-ah lah mi sawi nasat ber in kai hial tawh a, hre miah lo ang kha chuan awm miah suh Loicy Wilson. Keimah thleng thlenga demna thu ziak a awm tawh asin, ka lung i tiawi lo hle a ni"

"Simon-a nena kan len chhuahna chanchin Media velah chhiar tur a awm maw!? Ni lo, min lo ngaithla teh Manuel. I thil chhiar engkim kha dawt vek a ni tih hre tawp rawh, Simon-a chu ka ṭhianpa mai a ni" Loicy-i chuan a ti ta ringawt a, eng nge a chhiar pawh chu a hre chuang lo.

"Eng pawh ni se ka rawn kal dawn, chu chu a ni tawp mai. Ka be reng peih rih lo che Loicy Wilson, i lakah ka lung a awi lo nasa hle a ni tih erawh i hre dawn nia" nelawmna tel miah lo hian Manuel-a chuan a rawn ti bul hmuk a, phone chu a hmet tawp zui nghal hmak bawk.

Loicy-i chu khumah a ṭhu hnawk a, Manuel-a nena an inkar chu nuam a ti ta tawp lo. Nizanah te kha chuan hlim takin an inbia kha a ni si a, tunah erawh an inbiak dan chu duhthu a sam ta hauh lo mai. Manuel-a thu sawi hre chhuakin a phone chu a hmet nghal mual mual a, a thil hmuh chu a rin phak bak a ni. Simon-a nen chuan inngaizawng ang chiahin an lo thang a, ani lah chu Manuel-a nen an inkawp mek avangin mi ngaihven hlawh lo thei a ni bawk si lo.

Rilru hah zetin Manuel-a chu a call leh a, ring char char mah se a lo la duh tawh ṭhak lo. A hnu deuhah chuan Simon-a a call ve leh a, engkim chu a phone aṭang a hmuh ve vek tawh tho a ring a ni. Phone call a pick up rualin Loicy-i chuan thil awmzia a sawi nghal zung zung a, Simon-a erawh chuan engah mah a lo ngai ve lo va, Loicy-i chu buai phili vak lo turin a lo hrilh let daih.

Dinner an ei lai te chuan rilru pangngai lo zetin a ei a, zing lam nen chuan inang lo tak a ni. Ei tur te chu a hmingin a ei ve satliah mai mai a, mahse a chhungte hriatthiam theih turin a awm lo thung. Dinner ei zawh chuan a ṭhiante an lo leng leh a, tun ṭum zet zawng a ṭhiante chu lo kawm a châk zawk zawk lo kher mai. Manuel-a chuan a rilru a luah tlat a, a insawi angin Australia ramah chuan a lo kal ngei a ring bawk.

Darkar 19 chuang teh meuh thlawhnaah a rawn chuang dawn a ni a, an awmna khawpuite chu a hriat pawh a ring lo, Manuel-a hnen aṭanga phone call lo lut chu a chang deuh tawp a, chu chiah chu a tih theih awmchhun a ni rih tlat. Tlai khaw thim dawn hnaiha Airport lam pan a nih avangin Manuel-a chu zing lamah daih Australia ram a lo thlen a rinawm a, rilru nuam lo zetin Loicy-i pawh a mu ta ringawt.

"Manuel, i lo thleng tawh em ni?" phone call a pick up rualin thophang aw zet hian Loicy-i chuan a ti thuai a, a lu bul lawkah phone a dah bawk nen Manuel-a hnen aṭanga phone call lo lut chuan a tiharh rang hle a ni.

"Melton khawpui Airport-ah ka awm mek, in in hnaih ber Hotel-ah khan lo awm ang che, chutah chuan inhmuh kan tum dawn nia" tih leh phone off chu a rawn rual nghal a, Loicy-i chuan a phone chu a en hû ringawt.

Che chhuak thuai thuaiin chhuak tur chuan a insiam nghal sawk sawk a, zing lam a nih avangin boruak pawh a vawt zual hle a ni. A chhungte tihharh hlau takin Loicy-i chu a chhuak a, Taxi-a Hotel lam a pan lai te chuan Manuel-a ringawt a ngaihtuah a, an awmna khawpui leh Hotel awmna a rawn hre chat thei chu mak a ti a ni. Hrilh tawh te chu ni se a hrethiam thei mai ang a, mahse Loicy-i chuan engmah a la hrilh lo.

Zing lam dar 7 leh a chanve a rik chuan Loicy-i chu Hotel-ah a ṭhu vang tawh a, Manuel-a pawh a lo thlen thuai a beisei. A phone-ah dar zat a en zeuh zeuh pah reng bawk a, darkar chanve a liam leh meuh chuan a ngaih a ṭha tawh chiah lo. Manuel-a chu kawng a bo emaw a nih a ring a, mahse kawng a bo a rin lohna a tam zawk. A tawpa tawpah chuan Manuel-a hmel tak run chu a hmu ta, a hmel aṭang chuan a thinrim tih a hre chiang em em bawk.

Lift lam pana a kal lai te chuan a hnungah zuiin a en tlawk tlawk a, Manuel-a awm dan teh thlawt chuan a rilru a tinuam lo zual a ni. A lung a tiawi lo tih chu a hre ngei a, mahse Lift an chuan lai thleng thlenga an la inbe miah lo chu hrehawm a ti tawh tak zet a ni. A be hmasatu zawk ni dawn ringawt se a biakna a chhan duh a ring chuang bawk si lo, Manuel-a hmel tur lutuk chuan a ṭah a tichhuak ta hial zawk a ni.

Room pakhatah an lut a, a lan danin Manuel-a chuan engkim a lo ruahman lawk vek a nih hmel. Insum thei tawh lovin Loicy-i chuan a be hmasa ta nge nge a, mahse chhanna pakhat mah a dawng lo. A kuah lahin kuah let emaw pawh a tum bawk si lo, Loicy-i tan chuan a beidawnthlak lam lek lek tawh a ni. A vawi hnihna atan Loicy-i chuan a be hmasa leh a, mahse chutah pawh chuan chhanna a dawng lo leh ta

"Khawiah chuan nge kal i tum?" Manuel-a aw khauh tak a hriat rualin kawngka lam pana a kal lai chu a ding chat a, a dinna lama lo kal pawk pawk Manuel-a chuan eng nge a chungah a tih dawn tih reng a hre bik lo.

THE ONE WHOM MY SOUL LOVES (M&B)

By

Havali Adam

Chapter 13

"Ka biakna che i chhang duh bawk si lo va, ka tan chuan haw leh mai a ṭha zawk a ni" ti thawp raihin Loicy-i chuan a hmaa ding run Manuel-a chu a chhoh melh ral a, a mittui chu a rawn hnam ṭiam ṭiam bawk.

"Thil sawi fel hmaa kal daih i tum te'n a dik nâng, ka lungawi lohna hi a namai lo hle a ni Loicy Wilson" Manuel-a aw chu a la khauh tluang zel a, mahse chu chu Loicy-i rilru tina ber tu a ni hauh lo.

"Ka thiam loh a ni tih hriain thupha chawi ka tum a, ka biak che lahin min chhang duh bawk si lo va, i mood a ṭhat deuh hunah kan inbe zawk dawn nia Manuel" tia a inher leh chiah chu a rawn che phut a, a dar tawn tawnah chuan a man chiang hle.

"Eng vang teh hrepa i mittui tling ringawt nge a nih Loicy Wilson? I mittui tling tur khawpin ṭawngkam ṭha lo ka la phuh chhuak lo va, ka chet dan pawh nang angin a mawi lo miah lo bawk" a rawn tih ram hmuk chuan Loicy-i chu a lo nui tawi tak a, mahse a nuih a za hlawl lo a ni.

"Nge nia kha pa phiangsen bulah khan va kal i tum zawk? I mittui te va hruk hul tir i tum mai em ni? Tum buai duh suh Loicy Wilson, engtikah mah chuti ang chu a thleng ngai lo vang" Manuel-a bawk chuan a rawn ti leh a, ani erawh a mittui a dang zo ta ngâng lo.

"Min thlah teh Manuel, ka rilru ni lo pui pui i sawi chhuak a, tunah chuan min ṭawngkhum dan leh ka laka i chet dan hian ka rilru a tina hle a ni" tiin Manuel-a ban chu a dah thlak sak a, room aṭanga chhuak ta lo chuan tukverh lamah a kal phei zui ta daih bawk.

"Rilru na tur chu nang ni lovin keimah zawk hi ka ni, i lakah ka lungawi loh luatah US aṭang ka rawn kal vang vang hial asin" a hnung lama Manuel-a ṭawng ri bul bul chu a hre vek a, mahse chhanlet a tum tawh hauh lo.

"Min en teh Loicy Wilson" tih leh a dara rawn kawih her chu a rual a, tunah chuan an inen leh te nge nge, a mit aṭanga mittui luang chhuak te chu hruk hul a tum lo law law a ni.

"Tei vet che hian Loicy Wilson, i mittui titla reng suh" khauh taka Manuel-a a rawn ṭawng leh chuah a ṭah a chhuak zual sauh a, a hming tawp tela a koh fak fak reng chu a rilru tina ber tu a ni rih tlat.

"I vinna awkâ dawn reng hi a hrehawm asin Manuel, ka rilru dik tak i hre turah ka lo ngai a, i lo hre lo a nih dawn hi! A nih loh paw'n i hre lo der zawk te pawh a ni ang, a chhan chu ka hrilh tawh tlat che a ni" Loicy-i awah chuan ṭah chhuak insum hlir a lang a, Manuel-a paw'n tih ngaihna a hre tawh bik lo.

"Kha mipa nena ka hmu dun che u kha ka lungawi lo em a ni Loicy, kei hian nasa takin ka thik a, sawisak hrep ka châk hial asin" a hma ang em emin Manuel-a aw pawh chu a khauh tawh lo va, mahse Loicy-i rilru chu a no laklawh tawh a ni.

"Tunah chuan ka hming tawp pawh i lam ri ta lo ve, i mood pawh a pangngai chhoh zel ka ring. Ka va haw leh phawt zawk ang e Manuel, kan inhmuh hun hi a fuh viau lo pawh a ni mahna" tia kal a tum chiah chu a âwmah a rawn kuah bet nghal vat a, chutah zet zawng Loicy-i pawh a ṭap ri ve ta.

"Min hrethiam teh Loicy, i hming tawp ka lam tel chhen tih pawh ka lo inhre tawh hleinem, a chhan chu nang hian ka engkim hi i luah khat hneh lutuk a ni" Manuel-a chuan a ti dam raih a, Loicy-i hnung chu duat zet hian a chul riak riak bawk.

"Kan inhmuh tirh aṭang ka lakah i lungawi lo nghal em em ringawt a, sawifiah tuma ka biak che lahin i ngawi run bawk si, ka tana a nawm loh dan tur i ngaihtuah thleng pha miah lo a ni" ṭap chungin a ti zuah zuah a, Manuel-a erawh a lo ngawi reng thung.

"Ka hming tawp i lam tel ziah bawk a, mi dang chu ni se ka la na miah lo vang, mahse nangmah i ni tlat a ni. Ka mipa rin em em, ka lo thlakhlelha ka lo ngaih ve em em khan ka ṭawng pawh ngaithla hmasa duh lovin min ṭawngkhum hmuk hmuk a, ka tan chuan" tia Loicy-i ṭawng mawlh mawlh lai nghak tluan zo lovin Manuel-a chuan

"A tawk e Loicy, ka tihpalh a ni e. Ka insum zo lo leh ṭhin alawm, mipa dang leh ka hmeichhia an awm dun tih ka hriat khan ka buai vek a, nichin thleng khan ka la buai a, mahse tunah chuan ka hahdam tawh e" a rawn ti ve thuai a, a aw pawh a dam ta zaih mai.

Manuel-a chuan Loicy-i chu khum lamah a pawm phei a, khuma an mut hnu pawh chuan Loicy-i chu a rilru a la dam hlei thei der lo. Amah kuah ber ran tu taksa lian tak lah chu a ngawi reng a, a rilru tina lo zawnga ṭawng thlamuan emaw thlem emaw pawh a tum lo va, chu ringawt pawh chuan Loicy-i rilru a tina tlat tawh a ni. A taksa hnung chhawn zawnga inher a tum lahin Manuel-a lah chuan a kuah nghet sauh bawk si, an awm dan chu a nuam nge nuam lo tih pawh a hre lo.

Manuel-a chuan kum hniamin Loicy-i chal leh bek vel chu a fawp zeuh zeuh a, Loicy-i laka a awm dan chu mawi lo a ti ve tho, mahse engkim chu thikna vang leh a hmeichhia chan a hloh vang a ni thung. Chu chu Loicy-i chuan hrethiam se a duh a, a ṭawngkhum dan avang leh a hming tawp a lam tel chhen avangin a lungawi lo tih hre mah se thlem turin ṭawngkam a thiam hlawl lo a ni.

"Simon-a kha ka naupan têt aṭanga ka ṭhian ṭha em em a ni a, Christmas ni a nih avangin len chhuahpuiah min lo sawm a, kei paw'n ka lo remti ve mai a ni" Loicy-i chuan a ti sap sap a, a ṭah pawh a chhuak hran tawh lo.

"Loicy" Manuel-a a rawn ṭawng chhuah lai chuan a kutin a hmui a lo hupsak thuai a, a insawifiahna chu ngaithla tluan tling turin a duh a ni ber.

"Ka bulah awm ni la chuan Simon-a nen ni lovin nangmah nen kan leng chhuak dun ngei zawk ang, mahse nang leh kei chu ram hranah ve ve kan awm thung. Chu bakah kan thla an lo la tih pawh ka hre lo, ka beisei lo bawk" a ti leh charh charh a, Loicy-i aw chu a zawi viau naa Manuel-a chuan a hre chiang em em thung.

"Australia ramah hian awm turin min duh em Loicy? I duh thu han sawi mawlh teh, School ṭan hma zawng chu he ramah hian ka awm duh hial ang" chiang zetin Manuel-a chuan a en ran a, ani chu Manuel-a hmel leh awm dan vel chuan a tihlim ta daih.

"Zawhna min zawt a, mahse ka chhan hma hauhvin chhang turin thu min pe leh lawi si a, eng tin nge ka chhan dawn che pawh ka hrethiam lo. Thu min pe bawk si a, ka rilru dik tak paw'n ka chhang thei lo vang che Manuel"

"Loicy le! Nangtê hian fiamthu i thawh ve reuh tihna em ni?" meng nûr nanga Manuel-a'n a rawn tih chuan a lo nui var var a, tunah chuan a hmaa a rilru nat rukna zawng zawngte chu a bo fai vek tawh a ni.

"Australia ramah hian awm ve rih la ka duh Manuel, phone kaltlanga inbiak ringawt zawng a ho ka ti a ni. Ni lo, ni leh lo, engati nge kei hian ka rilru hi ka sawi chhuah tawp mai le" thil hre chhuak thutin a ti phawlh phawlh a, a bula mi chuan a lo en chik kher mai.

"Thil dik lo a awm em ni Loicy? Ka bulah chuan i rilru dik tak sawi la ka lawm zawk ngei ang, mahse eng vanga i thu sawi tawh sut leh tum ang hrima i ṭawng chhunzawm nghal mai?" Manuel-a chuan a rawn ti ta chiah a, ani chuan a lo kuah nghet vak ringawt.

"Loicy, hnuai lam hawi tlat lo hian min en zawk teh. I chhanna nghakin ka beng hi ka chhi reng a nia, eng vang chuan maw i rilru dik tak sawi chhuah chu inchhir ang maia i awm?" a khabea chawi pahin Manuel-a chuan a rawn ti thum bul a, Manuel-a nen chuan an inen chiang leh ta hle bawk.

"In ramah chuan haw leh zawk rawh Manuel, a chhan chu kei ang thovin chhungte i nei ve tlat a ni. Anni paw'n an ngai ang che; chuti ang bawkin nang paw'n" a tih chuan a hmuiah a rawn fawp a, Manuel-a hmui mawlh chu sik reng mai a duh a ni.

"Ka chhungte ai chuan ka ngaiin ka thlahlel daih zawk che asin Loicy, chu vanga lo kal vang vang pawh ka ni" a hmai bula thaw lum ham hama Manuel-a'n a rawn tih chuan

"I lungawi loh vanga lo kal vang vang i ni zawk lo maw Manuel? Min thlakhlelh vang ni lovin mipa dang nen min hmuh avangin i lo kal niin ka hria, i hmel aṭang paw'n ka hre vek thei" a lo ti ve kauh a, thutak lo mah se chuti anga han fiam vel chu nuam a ti ve tlat a ni.

"I hre sual tlat mai Loicy, kei hian nasa takin ka ngai che a ni. Australia rama ka lo kal ngei ngei theih nâna mipa dang nen in lo awm te hi tunah chuan ka lawm letling hial tawh zawkin ka hria, a chhan chu i taksa siin ka awm thei miau tawh a!"

"Manuel" ti chhuak sepin Loicy-i chuan che thutin a hmuiah a fawp vang vang a, Manuel-a thu sawi chu dawnsawn nuam a ti a, a mipa hmangaih em emin a lo ngaih ve zia leh amah ang thova a lo thlakhlelh ve zia thu chu hriat mawlh mawlh a duh a ni.

"Ka insum rei tawhzia hria la chu min khawngaih zawk hial ang Loicy, nawmna chi tinreng pek che ka duh, i taksa leh i rilru hi ka ta chauh an ni kumkhua ang" ti ril raihin Manuel-a chuan a fawp leh nghal bawrh bawrh a, duhthaw dun tawh tak an ni.

Manuel-a chuan Loicy-i thawmhnaw te chu a hlihsak zung zung a, amah ngei paw'n a thawmhnaw hak lai chu a hlip rang sawk sawk hle. A kekawr phelh ta mai lo chuan Loicy-i taksa chu a sawngbawl chhunzawm nghal a, rei tak inhmu tawh lo ni lo mah se kum tam tak inhmu tawh lo ang maiin a inngai a, Loicy-i taksaah chuan thu neitu a nihzia tihlan tumin a che buan buan a, insum karna reng a nei thei tawh lo tak zet a ni.

Loicy-i taksa khuhtu hrim hrim chu bawlhhlawh ang maiin a paih hmawk hmawk a, chutia a chet laia Loicy-i tisa châk hmel chuan a tiphur zual a ni. A âwm bawr no nalh zet leh amah phu lova poh lian ve lârh chu rilṭam lutuk tawh ang maiin a hap buan buan a, a kut te chu a dah awl thiang lo hi a ni tawp. Loicy-i taksaah chuan muangchang hian a vah kual tir riak riak a, a chet dan avangin Loicy-i chu a rawn thaw ri leh hak hak ṭhin bawk.

Loicy-i âwm bawr aṭanga insawn chho thutin a hmuiah chuan a fawp leh tawn tawn a, a hmeichhe delh beh mek chuan a taksa chu a lo chul ve mawlh mawlh bawk a, an pahnih chuan tisa châkna hlirin an khat tawh a ni ber. A hmui a fawhna aṭanga insawn thla lehin a kap zawnah chuan a bur leh nghal chat a, tu hmeichhia mahin chuti anga phur chuan an siam ngai lo, Loicy-i chauh lo chuan tiphur lo se a duh bawk a ni.

A nih dan tur ang thlapa a chet mial mial laiin Loicy-i chuan a samah a rawn ṭham ve tawn tawn a, thawchham tur ang maia thawk a la hrawk hrawk ri te chuan a rilru chhungril a tihlim veng veng a, a kekawr chu a phelh lo thei ta lo. A phelh lawk theih loh avangin a pawt chhe nghe nghe a, Manuel-a chu a phurin a so sang tawh lutuk tak zet a ni.

Hmeichhe tam takin hmangaihna chenpui an châk hliah hliahna chhan ber a mipatna hrawl lian ve tak chu a kutin a sawngbawl ve pah reng bawk a, a kut lehlam pawh a awl chuang teuh lo. A lei leh a kut chu a hmeichhe thlakhlelh em em Loicy-i hmeichhiatnaah chuan a bur ngar ngar a, nuam tih lutuk avangin Loicy-i pawh a insum zo tawh bik lo. Manuel-a khawihna vel chuan a thinphu a tirang dawt dawt a, men pawh a meng hlei thei tawh lo a ni.

Manuel-a lah chuan a la duh tawk der mai si lo, Loicy-i chu a mipatna hmang miah lova nawmna vawrtawp thlen tir a tum ruh hle a, Loicy-i awm dan aṭang chuan a theih mai ring bawk. Zei taka a hmeichhiatna a sawngbawl mial mial hnu chuan Loicy-i chu a rawn phu awt awt a, ani paw'n a kutzungṭanga thil lo kai a hmuh chuan a hrethiam nghal a, hlim avangin a ṭhen zui suk bawk.

"Loicy, tunah chuan kei chauh hi min ngaihtuah tawh ang" ti deuh nawk nawkin Loicy taksa chhungah chuan a luh zawm nghal a, ang hlawi chunga Loicy-i lo rum chhuak ri chuan a va han tiphur zual tehreng em.

"Ka ta chiah, ka hmeichhia chiah i ni Loicy" ti leh nghutin mipa a nihzia chu chet ze hmangin a lantir ta mawlh mawlh a, Loicy-i chuan a mamawh engkim a nei ni mai hian a hria a ni.

Loicy-i pawh a taksa danglam nasat tawh lutuk avang chuan a si hlarh hlarh a, engmah reng chu zahpah pawh a nei tawh bik lo a ni. A taksa chhunga lut zawt zawt Manuel-a chu kuai kunin a nghawn zawnah a pawm bet a, a hnungzâng chu awm ngaihna hre lo zet hian a ṭham tawn tawn a, Manuel-a chet dan engkim a dawngsawng ṭha lutuk chu an boruak tiso sang zual tu a ni.

Loicy-i chuan vawi engzah chiah nge nawmna vawrtawp a thlen pawh a hre lo hial a, chuti ang khawpa danglama siam theitu leh nawmna pe theitu awm chhun chu a mipa hmangaih em em Manuel-a chiah a ni. Duhthaw taka hmangaihna an chen hnuah pawh Loicy-i thin phut dan leh thawk dan chu a la pangngai hlei thei lo va, a zing hun hman tawhah chuan chu zing anga dangdai chu a la hre lo a ni.

A thawk dan leh rilru a pangngai hnu chuan khum sira a phone let reng chu a ban nghal a, a rilru a fim ṭha tawh bawk nen tunah chuan a chhungte lakah a inthlahrung ru ta hle mai. A phone a hmet eng chiah chu a chhungte hnen aṭang Missed Call vawi thum lai a lo awm a, Call back a tum lai takin a bula mipa kut lian zet chuan a rawn chhuhsak daih a, Manuel-a chuan a phone chu lukham hnuaiah a dah ta hmak mai.

A phone lak tumin Loicy-i chu a che chhuak nghal phat a, mahse a va che sawn rei lo chiang em. Manuel-a chuan a tlan bo vang vang hlau ang mai hian a âwmah a kuah bet tlat a, tal chhuah a tum lahin a thei bawk si lo. A phone lak a tum chhan sawi a tum rual chuan a hmuiah tak a rawn fawp leh chat a, hmangaihna chen dun zo chiah mah se a fawhna ringawt pawh chuan a tidanglam leh vek tawh a ni.

"Ka chhungte biak ka ngai alawm Manuel" thawk dan pangngai lo zet hian Loicy-i chuan a ti thei hram a, Manuel-a kut chu a taksaah vak kual tawh lo se a duh ru hle bawk, a vak kual reng a nih chuan a hnar thei leh dawn hauh si lo a ni.

"Nakinah i be dawn nia" Manuel-a chhan dan chuan a lung a tiawi lo ru viau a, mahse an awm dan chu nuam a ti bawk si, chet sawn pawh tum lovin a awm ta hle hle ringawt.

"Loicy" ti thum ṭial chhal ri a hriat rualin a meng chhuak thuai a, Manuel-a chuan a kutin a biang a lo nul sak mek bawk a, chutah a lo muhil daih tih a hre chhuak zui nghal bawk.

"Dar eng zat nge ni tawh Manuel? Kei hi ka lo muhil daih vel a, engmah ka ngaihtuah lo reng reng" ti thuai thuaiin Loicy-i chu a tho vat a, a thawmhnawte chu a ha sawk sawk a, Manuel-a erawh a awm ngaiin a la awm reng thung.

"Zing lam dar 9 a pel fel var var tawh e" Manuel-a thu sawi avang chuan a che chu a tawp chat a, tunah chuan a chhungte bula chhuanlam siam dan tur bakin a rilru a luah tawh lo a ni.

"Ka haw vat a ngai, chuti lo chu kan awm dan hi ka chhungte'n an hre chhuak mai ang" tih leh kal chu a rual nghal a, Manuel-a chuan lo chelh ding chatin a en ran a, Loicy-i chuan a kut chu thin thlak a tum mah se a thei leh ta hauh lo.

"Eng vanga i chhungte chu hlau em em nge i nih Loicy? Kei nena kan inkawp thu chu an hriat vek tawh ka lo ring asin, chanchinbu leh Internet aṭang paw'n an hriat daih tawh ka lo ring zawk" Manuel-a'n a rawn tih chuan a thaw halh a, a chhungte chuan a hre tawh chiang a, mahse thil dang hriat loh an la nei thung.

"Nang nen kan inkawp tih chu an hre tawh ngei alawm Manuel, mahse vawi tam hmangaihna kan chen dun tawh tih erawh an la hre hauh lo. Kei hi hmeichhe thianghlim angin min la ngai tihna a ni ber, ka thianghlim tawh hauh si lo"

"Chhiar tham lêka tam chauh alawm hmangaihna kan la chen dun Loicy; vawi tam ni lovin. A thu hrimah hlauthawng lutuk lo teh, i remtih chuan vawiin hian i chhungte chu hmuh ka tum a ni"

"Enga!? Ka chhungte hmuh i duh maw!?" ti hluaiin Loicy-i chuan Manuel-a tho ṭuah ṭuah chu a en reng a, thawmhnaw a inbel lai te chu a en kar a, a awm dan chu a hrethiam chiah lo, a chhungte a hmuh duh pawh a ring lo a ni.

"Hmuh chu ka tum ngei alawm" tih chiahin Manuel-a chuan a rawn chhang a, Loicy-i paw'n thil dang engmah a sawi tawh lo, a chhungte nen chuan inhmu mah se pawi tihna a nei leh ta lo zawk a ni.

Hotel aṭanga chhuakin Loicy-i te in lam pan chuan an tlan a, kawngah chuan a tua mah chu an ṭawng lo ve ve a, chu chu an motor chuan dun ṭhin dan pawh a ni reng. Loicy-i mood a pangngai deuh chang chuan titi tur pawh an nei ve ṭhin, mahse a ngawih tawh chuan a reh tlawk tlawk a ni mai. Manuel-a lah a duh hun têa ṭawng chi a lo ni kher bawk si a, khang thla kal ta chhung zawng pawh khan titi dun luam hi chu an nei tam lo thei khawp.

In kawt an thlen rualin a pa hnen aṭang Loicy-i chuan phone call a dawng a, an in hma lawka an din reng tawh tho avangin a la duh ta lo law law bawk. Manuel-a lam chu a hawi chho zeuh zeuh a, a hmelah chuan zamna emaw hlauhthawn emaw pawh a hmu lo hrim hrim. Manuel-a tih tur chu a chanah a dah a, ani chu ni se a zam ru dawn lutuk tih a hre chiang hle.

"In mudun tawh em?" a pa zawhna avang chuan Loicy-i chu a meng kawk a, a fanu en miah lovin pu Wilson chuan Manuel-a chu a melh ngur a, pi Wilson-i paw'n a pasal zawhna chu awm lo a ti tho.

"Mudun tawh e" Manuel-a chuan a lo ti mai a, Loicy-i ngaih chu a ṭha thei hauh lo, in chhung an luh tirh aṭang a pa chuan Manuel-a chu a nel loh hmel a ti tawh a, buaina a awm ang tih chu a hlau ru ngawih ngawih a ni.

"Vawi eng zat?" pu Wilson-a chuan a rawn ti leh nghal a, pi Wilson-i chuan a fanu rilru ngaihtuah tel ranin a pasal chu a khap ta vat a, mahse Loicy-i pa chuan engah mah a lo ngaih sak lo thung.

"A vawi khatna tih lovah chuan vawi nga lai kan mudun tawh, a hmasa ber chu a vawi khatna a nih avangin kan tluan tling thei lo a ni" awlsam zet hian Manuel-a chuan a lo ti ve leh mai a, Loicy-i chu a hawi chhuak ngam tawh lo hrim hrim.

"I hriat chian tluk zetin ka fanu hi i ngaihsak hle turah ka ngai, kan hmeichhe ngaihven te nena kan thil tih dun ṭhin chu kan hre chiang ṭhin reng alawm, ni lo'm ni Martha?" pu Wilson-a chuan uang miah lo hian a rawn ti ta daih mai le, a fanu leh a nupui chu an va meng phawk nasa teh reng em.

"Aw le, tun atan chuan kan in aṭang hian chhuak phawt la, zanriah ei turin tlai lamah i hmel hmuh ka lo inbeisei ang" Loicy-i pa bawk chuan a rawn ti leh nghal a, Manuel-a pawh a nui ve ta suk.

"Vawiin chawhma lamah hian i fanu hi len chhuahpui ka duh a, i remti thei ang em pu Wilson?" a ṭhutna aṭanga a thawh rualin Manuel-a chuan hawihawm tak hian a ti a, a awah chuan pu Wilson-a a zahzia chu a hriat theih a ni.

"Amah Loicy-i ber hian a duh chuan i len chhuahpui ka remti ni rawh se, mahse fimkhur ang che u. Hmuh tur in tam tawh a, mi hian an thlithlai reng che u a nia, keini paw'n tukinah kan fanu leh a ṭhianpa chungchang kan hriat ringawt kha!" Loicy-i pa thu sawi tawp ber chuan Manuel-a rilru chu a tihahdam lehzual a, tunah chuan Loicy-i leh a ṭhianpa inkar chu rinhlelh a duh tawh lo a ni.

Manuel-a chu Loicy-i lam tura a kal leh tur thu sawiin in aṭang chuan a chhuak a, Loicy-i pawh a room lamah chhovin a inbual fai nghal zung zung a, Breakfast la ei miah lo mah se a ril ṭam leh ṭam loh pawh a hre lo. Chutah a huhphurh ang huin Manuel-a leh a chhungte inkar boruak chu a tluangtlam daih a, chungte chuan a rilru ipik ru ṭun chu a ti bo tial tial a, a hahdam ta sawng sawngin a hre bawk.

Leng chhuak tura a inpeih feih rual deuh thawin Manuel-a hmel a hmu nghal zat a, nui sen senin a melh a, Manuel-a nena len chhuah chu a phur tawh tak zet a ni. In aṭanga an chhuah chuan an in kawta Car mawi tak inhung chu engtin nge a lo neih hman a hre hauh lo, a lo thlenna a la rei lo hle kha a ni si a, a nih loh paw'n a hawh a ni ngei ang.

Hmun ualau lo takah Manuel-a chuan a kalpui a, chu lai hmun chu a lo kal ṭhin tawhna ni mah se Manuel-a nen a nih avang chuan nuam a tizual a, mawi taka phul a hring dup lai huna an kal lo erawh a ui ru veng veng. Manuel-a chuan Camera awrhin thla chu a la chhen a, a Camera-ah chuan Loicy-i thlalak pawh a tam tawh hle, mahse Loicy-i chuan a thlalak tam tak a kawl a ni tih reng a hre lo.

Ni danga a inthuam ṭhin dan ang lo takin Manuel-a chu Formal Dress taka inthuam tawh lovin thawmhnaw pangngai ve mai chu a inbel a, Loicy-i phei chuan inhmeh a ti letling daih zawk a ni. Che thutin Loicy-i chu a paw nawlh a, phul sang ve taka ṭo karah chuan a tlanpui a, Loicy-i hlim thawm chuan a va tihlim chiang tak em. An lu leh lu insiin an mu zângthal a, van lam en pahin Loicy-i chu a ṭawng melh melh a, chutia a ṭawng lai tak chu Manuel-a paw'n remchangah a la ta hmak.

"Khawiah nge i kal dawn?" phul aṭanga a thawh rualin Loicy-i chuan a rawn ti vat a, ani erawh nui sukin a ngawi reng a, a thil tih tum chuan Loicy-i chu a ṭhawng dawn tih thlengin a hria a ni.

"Manuel" a hmaa a ke lehlam a ṭhingṭhit rualin Loicy-i chuan a lo ti nghal hluai a, ani paw'n a tih tur tih chhunzawm zelin a kekawr iptêa inhualna zungbun Loicy-i tana a siamtir ngat chu a phawrh a, Loicy-i chu a lo inhup tawp tawh ringawt.

"Loicy Wilson, min nei duh ang em?" tih leh inhualna zungbun bawm keu hawn chu a rual nghal a, Loicy-i ṭah chhuak hmel te chu a hmu ning miah lo, a chhan chu a hlim tih a hre tlat a ni.

"Manuel" ṭah chhuak aw zet hian Loicy-i chuan a rawn ti ṭuau a, ani'n a chhanna chu a lo nghak reng thung a, Loicy-i chuan a sawmna chu pawm thuai thuai se a duh tawh a ni.

"Aw...ka nei ang che Manuel, ka nei ang che" Loicy-i'n a rawn ti chiah chu a ṭhingṭhitna aṭang rang takin a tho chhuak nghal a, insumna tlachham zetin a fawp nghal tawn tawn a, mahse insum hun a ni tih chu a hre chhuak leh ta vat.

"He zungbun hi keimah ngeiin ka phawi chhuak a nih loh chuan i phawi tur a ni lo, a chhan chu hei hian ka ta i nihzia leh ka nupui hual i nihzia a tichiang dawn a ni" tih pahin Manuel-a chuan Loicy-i kutzungṭang mawi takah zungbun chu a rawlh lut riai riai a, Loicy-i chu a rawn ṭap chhuak ta feih feih.

"Ka hmangaih che Manuel" tiin Loicy-i chuan a rawn kuah a, ani'n a lo pawm kang vawng vawng nghal a, chuti ang bawkin Loicy-i chuan a kawngah a lo kherh nghal chial bawk.

"Australia ram i tihhmingṭhat hma chu ka nupui hual i ni tih hre reng la, mipa dangin an rawn lêm vel che paw'n i kutzungṭanga zungbun awm hi i hmuh zel tur a ni. Tin, kei paw'n tunah hian i pasal hual ka nihzia i hriat theih nân leh mi dang hriat theih nân i zungbun ang chiah hi ka bun bawk a ni"

"Tak tak maw!?" ti hluaiin Loicy-i chuan Manuel-a kuta zungbun chu a en nghal a, a chet dan naupangchhia lutuk chuan Manuel-a pawh a tinui leh ta ruh ruh mai.

"Ka hna tur a tam ta hle mai Loicy, nang hi Classical Pianist ropui tak ni turin ka zirtir che ang a, chumi zawhah nupui atan ka nei nghal ang che. Vawi tam tak ka ngaihtuah hnua ka hmeichhe sawm hmasak ber i ni a, a tawp ber i ni bawk ang" tiin Loicy-i hmui chu a fawp leh vawng vawng a, tunah chuan nupui atan Loicy-i neih baka thlakhlelh leh duh a nei tawh lo.

THE ONE WHOM MY SOUL LOVES (M&B)

By

Havali Adam

Chapter 14

Hlim takin khawpui lam panin Manuel-a chuan an tlan hawpui leh a, Loicy-i pa hnena chawhma chhung chauh chhuahpui a lo dil kher kher chu a inchhir hnuhnawh hle a, Manuel-a chuan zanriah ei hma zawng len chhuahpui a lo dil lo chu mawl a inti hnuhnawh hle bawk. A bula ṭhu Loicy-i chu hlim tih hriat zet hian a ṭawng siam siam a, kum thar lama a hun hman dun vel a sawi liam liam lai chuan a lo en zeuh zeuh a, a kutṭang tiche vel te chu Manuel-a chuan a en ning thei der lo.

In kawt an thlen chuan Loicy-i chu inthlahna thu pawh sawi lova chhuah nghal mai a tum a, mahse Manuel-a chuan a lo chelh ding chiang hle. Manuel-a chuan a nupui hual ni ta Loicy Wilson-i ngei chu a fawp tawn tawn a, motor chhungah pawh chuan hmangaihna chenpui a hreh leh ta miah lo. Loicy-i nen an intawn hma kha chuan chuti anga tisa châkna chhuak hma chu a ni ngai hauh lo, mahse tunah chuan Loicy-i'n a thlak danglam vek tawh a ni.

A thlenna Hotel a luh hnuah pawh Manuel-a chu a la nui deuh sung a, a nui reng mai chu a inhrethiam lo lek lek zawk hial a ni. A bungrua vel engmah la inrem fel loh chu a rem fel nghal zung zung a, Loicy-i te bulah chuan kum thar hman ngei a tum bawk. Tunah chuan Loicy-i chhungte a hmu tawh bawk a, a beisei ai takin an lo dawngsawng ṭha phian bawk a, Loicy-i nena an inneih pawh an remtih ngei a ring a ni.

Bathroom-ah lutin a inbual zung zung a, tlai lamah zanriah ei turin Loicy-i pain a sawm bawk nen a phur ru rawh hle. Bathroom aṭanga a chhuah chuan thawmhnaw ha ṭha mial mialin a phone chu a en a, a chhungte hnen aṭang Missed a lo awm vâ bawk. A pa phone number chu a hmet chhuak a, rawn Missed call tu ber a nu chu a be leh ta lo zawk. A pa nen chuan an titi dun thei zawk tlangpui a, a biak loh avangin a nu lakah chuan lungawi lohna a nei hran chuang lo, mipa leh mipa chu an inhrethiam tawn zawka a hriat vang a ni.

"Eng nge kan dinhmun ni ta zel Manuel?" a pa chuan a rawn ti nghal a, Manuel-a chuan Loicy-i nen an inkar engkim a hrilh tawh miau a, a pa zawhna pawh chu thil dangdai vakah a ngai lo.

"A naupan laia a ṭhianpa a lo a nia, ka lung awi lo hma mah mah deuh chu a ni" Manuel-a chuan a lo ti ṭha ve mai bawk a, a pa erawh hlim tih hriat zet hian a rawn nui huah huah a, Manuel-a pawh a pa nui thawm avang chuan a khi ve ta suk ringawt.

"Ka hrilh mawlh mawlh che alawm ka fapa, mahse i awm dan hi a awm tho e. Tuna i hmeichhe kawp hi i thutak ve tak zet a nih dawn hi a, i kal thui ngam ta riau mai" a pa'n a rawn tih leh chuan

"Ka thutak tih chu hrilh ngai lovin i hre sa reng alawm ka pa, Loicy-i hi nupuia neih ka tum bawk a ni. Chawhma lamah khan ka sawm tawh a, ani paw'n min neih a duh thu a sawi tawh e" a lo ti ve luam a, a pa erawh chu a ngawi ta daih mai.

"Ka pa" a pa'n thawm engmah a rawn neih loh avang chuan beng chhi karin a pa chu a ko leh a, a khuh deuh kharh kharh ri a hre chiah chu a thaw huai a, a pa taksa chu enkawl ṭhat vat vat a duh a ni.

"Doctor lam ka lo bia ang ka pa, inah khan rawn kal chilh che rawh se. Loicy-i nena kan inneih hunah pawh taksa hrisel taka la nei turin ka duh che, kan fate thlengin i pawm ang chu maw le" Manuel-a chuan tihhlim tum zetin a pa chu a be leh mawlh mawlh a, a dam ṭha lo bawk nen a zin bosan daih pawh chu a inthiam lo ru ve tho.

"Ka chil ka lem sual deuh alawm maw le, eng thu chiah nge i sawi kha ka hre chiang lo tlat mai. Min han hrilh ṭha leh teh, i awki aṭang kha chuan thu hriat nuam lampang a nih ka ring bawk" a pa chuan a rawn ti ve leh a, pangngai taka a pa a rawn ṭawng leh ta chu a hahdam zual phahin a hria.

"Kei hian nupui neih ka tum alawm ka pa, ka zirlai naupang Loicy-i hi ka nuipui atan ka sawm tawh a, ani paw'n min neih a duh ngei e" a tih chiah chu a pa chuan phur tak hian a rawn sawi zawm nghal a, Manuel-a paw'n hun remchang hmasa berah Loicy-i chu a chhungte bulah hmel hriattir ve a tum ruh ta hle bawk.

"Ka pa, Loicy-i hnen aṭang phone call ka dawng a, ka'n pick up lawk ang chû?" a pa ṭawng mawlh mawlh laia Loicy-i call a lo luh avang chuan a ti a, a pa ai chuan Loicy-i chu a be châk zawk tlat a ni.

"I pa ai pawhin ani chu a lo pawimawh tawh a va nih hmel ve ka fapa, thil pawi erawh chu a ni chuang lo e. Kan ta ni tura kan hmeichhe thlan chu mi dang aiin kan ngai pawimawh zawk tur reng a ni; keini hi chu kan la thi thuai dawn alawm" a pa'n a rawn tih luam chuan

"Ka pa! Thihna lam ringawt sawi kai ṭhin lo teh, i thi dawn hleinem, tunah khan dam ṭha lutuk lo mah la i dam ṭha leh thuai ang. Doctor pawh chu ka lo bia ang, Loicy-i call hi ka'n pick up tawh ang e" a lo ti ve nghal a, Loicy-i phone call chu a pick up zui nghal bawk.

"Enteh Manuel, ka chhungte hi ka hrilh duh ang em? Kan inhual tawh thu hi ka hrilh duh ang em? Nge zanriah ei hunah kan pahnihin kan hrilh zawk ang? Ka ngaihtuahnaah a awm ngut ngut a, ka rawn be tawp che a nih hi!" Manuel-a chuan Loicy-i thu rawn sawi chu ho a ti ru kher mai.

"Ṭha i tih ang khan ti tawp mai teh, a enga mah ka hrethiam lo Loicy" tih chauhin Manuel-a chuan a lo chhang a, an thu sawi ho hle mah se Loicy-i rilru hlim leh hlauthawng ru bawk si aw chu hriat nuam a ti hle thung.

"Tih dan tur ka hriat loh vang alawm ka rawn biak che Manuel, min han hrilh vat mai teh. Tunah hian ka chhungte an awm kim vek tawh a, hrilh nghal mai pawi pawh ka ti lo, ka phur nge ka zam pawh ka hre lo Manuel, ka awm dan hi ka hrethiam lo a ni"

"A nih chuan i chhungte chu vawiina inhualna zungbun kan inbun tir chungchang vel kha hrilh la, anni tan pawh zanriah ei laia hriat ai chuan a ṭhawn dan a dang deuh mahna" Manuel-a chuan a ti ve ta nge nge a, Loicy-i awm dan vel avang chuan a khi leh suk ṭhin.

"Aw le, ka lo hrilh tawp mai ang, mahse ka chhungte mah ni se ka zam deuh reuh, an mak ti hmel ka hmuh châk lutuk lo a ni" Loicy-i chuan a rawn ti leh lawi a, Manuel-a chu a nui chhuak ta hawk hawk.

"Loicy le! Hmeichhe inring tawk ve tak leh puitling tawh takah ka lo ngai che asin, mahse ka lo ngaihtuah chiang lo hle a ni. I kum phû lovin fing fel mah la i naupanna chu a la lang tho a nih dawn hi, ka hrethiam e" nui deuh var var chunga a tih chuan lehlam aṭang Loicy-i chuan

"Manuel! Ka fiamthu miah lo a nia, ka chhungte mak ti hmel tur hi ka hmu châk em em hran lo alawm, mahse i thu ka awih ang. Ka lo hrilh dawn nia, zanriah ei hunah i hmelṭha tak kha hmuh ka lo inbeisei ang" a lo ti ve leh mai a, an inbiakna tih tawp a tum lai takin Manuel-a chuan rang zet hian

"La hmet tawp lo teh Loicy, ka thu hriat nawn châk tak thil pakhat i sawi a ni. Ka beng hriat ngeia i sawi nawn leh lo a nih chuan kan inbe reng a ni mai, han sawi leh teh le Loicy" a lo ti thuai thuai a, mahse Loicy-i chu Manuel-a thu sawi avang chuan a bo ta hû mai.

"A enga ber chu maw ka sawi dawn Manuel? I thu sawi awmzia hi ka hrethiam ṭep a, mahse ka hrethiam hauh lo. Eng chu nge i thu hriat nawn châk ka lo sawi reng reng a?"

"Min fiam lo teh Loicy, hmelṭha min tih thu kha i sawi ngei ka hre leh duh ka tihna a ni e. I la hrethiam lo der cheu dawn em ni?" Manuel-a'n a tih chuan Loicy-i chu a ngawi nghal hmak a, hmel inhmu lo mah se a lai ru tak zet a ni.

"Han sawi teh le Loicy, i ṭawng ngaichangin ka beng ka dawh reng a nia, i hmel ka hmuh châkzia te hi hria la chuan min kuah nawk nawk duh zawk ngei ang" a ti zo chiah tihah Loicy-i chuan

"Chawhma lamah kan inhmuh zawh chiah khâ, i sawi awihawm loh lutuk Manuel" a lo ti ve nghal a, mi â ang maiin a nui ver ver a, a ngai te bawkin Manuel-a chuan ṭawng turin a rawn phut leh ta.

"I hmelṭha alawm Manuel, North America khawmualpuiah pawh Sexiest Man Alive i ni a, tu hmeichhia paw'n hmelṭha an ti vek che; kum upa lam tawh thlengin" Loicy-i thu sawi tawp ber avang chuan Manuel-a chu a nui sun sun a, a zirlai naupang mai mai ni si chuan awlsam takin a nuih tir thei chiang a ni.

"Hmelṭha min tih thu i kâ ngei aṭanga hriat chu a dangdaiin hriat a nuam hle a ni Loicy, zanin chu i pa hnenah len chhuahpui che ka dil leh ang a, a phal leh ngei pawh ka ring" a tih laia Loicy-i hmel ner chu a hmu ve hauh lo; Manuel-a awa inrin tawkna lang tam lutuk avanga Loicy-i chu ner a ni.

An inbiak zawh meuh chuan hun pawh a lo kal duai hman a, Manuel-a tak phei chuan an inbiak chhung chu rei lo a ti ngei mai. A thawmhnaw thlak lehin awm hmun kawr mai mai ni lo chu a hak zawm mawlh mawlh a, vawi khatna atan a hmeichhe kawp leh a ngaihzawng ni mek; a nupui hual lai ni tawh hmeichhe nu leh pate kiangah zanriah a ei dawn a ni a, huphurh lo ang takin awm mah se a vawi khatna a nih miau avangin a awm dan chu a hrethiam chiah bik lo, a zam nge zam lo pawh a hre lo a ni.

Loicy-i erawh a thil tih tum avang chuan a zam ru em em thung a, a hlim ang chuan a chhungte chu an lo hlim ve lo palh ang tih a hlau a ni. a chhungte chuan a Music zirna lam an ngaihtuah thleng nghal dawn tih pawh a hre vek a, mahse a hrilhfiah vek a ni mai a ni ang chu! In hnuai lamah chhukin sitting room-a a chhungte lo ṭhu ṭhap lam chu a pan a, a pa leh Johny-a chu an titi tui ang reng hle bawk.

"Ka pa, thil sawi duh ka nei a" ṭhutthlenga ṭhut thlak paha a tih chuan Johny-a leh a pa chu an rawn hawi rual nghal ṭhawt a, an sira ṭhu a nu pawh a bang chuang lo.

"Eng lo a nia ka pa, Manuel-a khan chawhma lam khan a nuipui atan min sawm a, ka lo remti ve tawp a ni. Ka sawi tum ber chu kan inhual tawh ka tihna; Manuel-a hi pasalah neih ka duh a ni" zam ru takin Loicy-i chuan a ti a, a chhungte hmel chu danglam tak a ni.

"Engti zia nge Loicy? Tun tut tutah pasal i neih duh ka lo ring lo asin, kan ram tihhmingṭhat te kha i tum a ni lo'm? I kutzungṭanga zungbun awm danah dawt i sawi lo tih chu a chiang reng a, Music lam hi engtin nge ni ta ang?" a nu chuan ding hluai chungin a rawn ti nghal a, chu chuan a tizam zual kher mai.

"Ka zirna lam chu ka la chhunzawm thei dawn alawm ka nu, Manuel-a khan min pui dawn a ni. Ani chuan Classica Pianist ṭha tak ka nih theih nân min puih a intiam tawh a, chumi hma chu kan innei dawn lo" a tih laiin a pa chuan

"Tuna i mipa kawp lai mek hi ring nghal bur suh Loicy, i vawi khatna a nih avangin a bum thei che tih hre rawh. Ani ang mipa ngat phei chu a hmeichhe mi viau ka ring, fiahna chi hrang hrang a paltlang hma loh chuan in inneih hi ka remti mai mai lo vang" a rawn ti khauh hmuk a, Loicy-i chu ṭawng tawh lovin a lo ngawi reng ringawt.

"Simon-a bia la, zanriah rawn ei ve rawh se" a pa bawkin a rawn tih leh chuan Loicy-i chu a meng phawk nghal hraw a, amah mai ni lo a nu leh a nau chuan a pa thu sawi chu mak an ti ve tho a ni.

"Zawhna min zawt hauh suh Loicy, ka sawi ang chuan ti tawp mai rawh. I chungah hian ka lung a awi teh chiam lo a nia, i duh thua thil kaltlang pui i tum ringawt hi a ṭha lo" pu Wilson-a tih loh chu tûmah an ṭawng tawh lo va, chhungkaw pa ber mood chu a fuh lo ta khawp mai.

Loicy-i chu an in kawt lamah chhuakin Simon-a chu a call nghal a, zanriah ei turin a sawm zawm zat bawk a, Simon-a erawh chu engmah hrethiam lo tih takah Loicy-i sawmna avang chuan a phur ru hle a, Loicy-i paw'n a pa tih tir tih a sawi lang bik chuang lo bawk nen Simon-a tan chuan Loicy-i irawm chhuaka sawmna anga ngaih loh theih pawh a ni. Australia ramah Manuel-a a rawn kal tih reng a la hre lo va, dinner an ei ho dawn tih pawh a hre lo hrim hrim bawk.

Simon-a nena an biak zawh chuan Loicy-i chu in chhung lamah a lut leh a, a chhungte nena an boruak chu a rit ru ta hle. A nu leh a nau kha chuan engmah pawh an sawi em em lo va, Manuel-a duh lohna lam pawh an sawi ri lo va, sawi rikna hun pawh an nei lo a nih ber kha! A pa erawh a aw aṭang leh a hmel aṭang a lungawi lo tih chiang takin a hre nghal a, chu tak chu a awm tinuam lo tu ber pawh a ni.

"Ka pa, i thil tih tum hi a ṭha chiah ang maw? Manuel-a nen kan inkar zawng zawng i hre vek a, nimina Simon-a nen kan thlalak pawh kha a lungawi loh phah hle bawk a, chuvanga kan rama rawn zin vang vang pawh hi a ni" tiin Loicy-i chuan a pa lehkha chhiar lai chu a va be thawr a, Manuel-a chu rilru na deuhin a awm ang tih a hlau a ni.

"I pa hi kha i ngaihzawng mi lar pa i ngaihtuah avangin min hnial dawn tihna em ni Loicy?" en chuang miah lo hian a pa chuan a rawn ti a, Loicy-i tih ngaihna hre lo leh rilru buai ru tawh bawk si chu a pa bulah chuan a ṭhingṭhi ta ringawt.

"Enteh ka pa, Manuel-a hi mipa dawhthei tak a ni hran lo. Mipa dang thik pawh a pe na thei khawp asin, chuvang chuan a thinrim hmel ka hmu duh lo a ni" a pa khup vuanin Loicy-i chuan a melh chho ral a, a pa lah chuan a lo la en duh ṭhak lo leh nghal.

"Ka pa" tiin Loicy-i chuan a pa khup chu a nawr che det det a, a pa chu in chung lam melhin thawk a la ri hawk a, a lehkha chhiar lai pawh a fanu avang chuan a chhiar tui thei bik lo a ni.

"Enga mah hmain min hnial chhen suh Loicy, ka tih tum leh i ṭhianpa ka sawm chhan pawh i hre reng reng hleinem le. Kan room aṭang hian chhuak la, kan hriat miah lova i pasal hual lo ni ta chu lo kal turin Call tawh rawh, zanriah ei a hun dawn"

"Eng thil chiah nge tih i tum ka pa?" a pa thu sawi chuan zawhna chi hrang hrang a ngaihtuah chhuah tir a, a rilruah chuan zawhna leh mak ti ruk riauna hlir a khat tawh a ni.

"Zawhna min zawt tawh lo la, zanriah ei lai emaw ei zawh emaw i hre mai ang" tih chauh sawiin a pa chu a tho a, room aṭanga a chhuah hnu chuan Loicy-i paw'n awm reng a tum ta bik lo.

Darkar 1 leh a chanve a liam hnu chuan Manuel-a hmel pawh a hmu ta, a hmel nung sâr leh awm dan pangngai zet chu rei lotê hnuah a danglam thuai dawn tih a hre chiang ropui bawk si. Loicy-i nu leh pa chuan thil chi hrang hrang an sawipui a, a pa phei chuan zawhna a zawt chik thei hle. Chutia an titi mawlh mawlh lai chuan Simon-a chu in chhungah a rawn lut ve ta, mi dang zawng ai Manuel-a chu a meng buai nghal nak a, a meng rum nghal a ni mah zawk.

Manuel-a awm dan leh hmel lan dan danglam chu Loicy-i chuan chik zet hian a lo en kar a, innel taka Simon leh a pa an inbiak laia Manuel-a hmel awm dan te chu Loicy-i chuan a hmuh hmaih hauh lo. A pa leh Simon-a inbe lai a enna aṭanga mit la sawnin Manuel-a chuan a lam a rawn hawi vut a, Loicy-i tih ngaihna hre lo leh sawi tur hre lo chu a nui ringawt a, mahse a nui rei lo ngei mai.

"Ti r'u le, zanriah i ei ang u" tiin Loicy-i pa chu a ṭhutna aṭanga thovin a ding hluai a, Loicy-i chuan Simon-a leh Manuel-a inen dan no lo zet chu en liam mai harsa a ti hle a, a pasal hual ni ta leh a ṭhian ṭha em em inkarah chuan buaina awm lo se a duh a ni.

Zanriah chu an kil ho ṭhap a, Manuel-a leh Simon-a leh Loicy-i te inkar chu hmuh theih si lovin a ṭang ru em em a, nuam taka zanriah kilho an inbeisei tehreng nen a nuam lo hle thung a ni. Loicy-i chuan Manuel-a chu a en zeuh zeuh a, hrehawm a va'n ti tehreng em. A pasal hual Manuel-a chu a pa'n biak khat paw'n a be ve tawh lo va, Simon-a erawh a titi pui luam thung a, Manuel-a chan chu a chanah a dah chhin a, a rilru a na ru vawng vawng thei.

Manuel-a lah chu a ngawi ngul a, zanriah ei chhung zawng chuan Simon-a leh Loicy-i pa chu an ṭawng deuh char char a, mi dang zawng chu an ṭawng lo hrim hrim a tih theih. Zanriah ei khamah a pa chuan Simon-a chu leng rih turin a ti bik leh kher a, Manuel-a erawh a sawm ve miau loh avangin haw mai loh chu tih theih a nei ta lo. In aṭanga a chhuah dawn chuan

"Ka va haw nghal mai ang e, tih tur ka nei a" te chu a ti mawi ve tak na a, a hmelah leh a awm danah chuan a rilru a nain a thinrim hle tih a hriat thei vek, Loicy-i chu Manuel-a laka a pa awm dan vel avang chuan a lungawi hle bawk.

"Manuel" ngawi renga Car-a ṭhut luh a tum laiin Loicy-i chuan a ko ding a, a hnung lam aṭang nghet zet takin a kuah a, Manuel-a a khawngaih lutukna lamah a ṭap thei mai dawnin a hria.

"Ka tihpalh aw, ka pa awm dan kha ka hrethiam lo. I rilru tina tur taka Simon-a a lo lang leh zel te kha pawi ka ti, i rilru na hmel kha hmuh hrehawm ka ti lutuk" Loicy-i chuan a ti deuh ṭuau a, a mi kuah lah chu a ngawi reng bawk si.

"Manuel, ṭawng ve la, zanriah ei lai aṭang tawh min biak emaw ṭawng emaw i tum miah lo a nia, ka tan hian a hrehawm ve tho asin" a tih leh chuan Manuel-a chu a lamah a rawn inher a, an pahnih tan chuan Christmas boruak nuam lo tak zawng a ni rih tlat a ni.

"Hotel lamah ka va phei ang e, ka lo bia che a nih loh chuan min lo be suh ang che" ti deuh hmukin Manuel-a chu Car-ah a lut nghal a, a tlan chhuak chak lutuk chu a thawm pawh a reh hma viau.

Manuel-a laka inthiam lohna hlirin Loicy-i chu a khat tawh a, engkimah chuan a pa ngawr ngawr a dem a ni. In chhunga lut mai lovin pawn boruak vawt ru tak hnuaiah chuan a ding reng a, kawr lum pawh a ha chuang lo. Chu khaw vawt chuan a rilru hah rukna te chu tireh daih se a duh a, a rilru chhungril bera inthiam lohna awm reng chu vawt a tihna chuan rei lotê tal theihnghilh tir se a duh bawk a, mahse a mitthlaah leh a rilruah erawh Manuel-a hlir a awm thung.

Ṭawng thawm a hriat avangin ri lo chhuahna lam chu a hawi a, a pa leh Simon-a lo inzui chhuak lai chu a en reng a, tun ṭum chu a pa lakah chuan a lungawi lo ve tak zet a ni. Simon-a reng reng pawh chu a ngei ru viau a, ni dang ang lo taka a zia a chhuah chu mak pawh a ti a ni. Zanriah ei lai te khan Manuel-a mit tikham tur deuha chet chang a ngah a, Loicy-i kut han nul thuak thuak pawh a nei ṭhin, chuvang chuan Loicy-i pawh Simon-a lakah a lungawi lo ru hle a ni.

Boruak hrehawm ru tak kara zanriah an kil hona aṭang ni thum lai a liam leh tawh a, Loicy-i leh Manuel-a chu vawi khat chiah an la inbe nghe nghe. Manuel-a chuan a biak loh chuan be rih lo turin a hrilh leh a, a awmna Hotel-ah pawh kal miah lo turin a hrilh bawk. Loicy-i chuan a hmel a hmu châk em em thung a, a thiam loh awm miah lo mah se ngaihdam dil mawlh mawlh mai a duh a ni.

Loicy-i chuan a pa chu thinrim takin a be ngam bawk si lo, a nu hnenah chuan a pa chu titi pui turin a ngen leh tawp zel a, mahse awmzia a awm thui lo khawp. Johny-a paw'n hmeichhia an inah a hruai lut ve ngei a, zanriah te an lo en pui a, mahse chung zawng zawng chu Loicy-i tan chuan rilru natna mai a ni. A pa'n Johny-a ṭhiannu a lo dawnsawn dan te chu hmuh hrehawm a ti ru em em a, an awm dan engkimah chuan Manuel-a a hre chhuak lo thei lo ṭhin a ni.

"Loicy" a pa biakna chu a hre lo der hmak a, kum thar a ni bawk nen kum bul a ṭan dan chu a duh lo hle a, mahse a hun tawn mek a ni tlat bawk si.

"Loicy" room chhunga a pa lo lut thawm chu a hre reng a, a bul lawkah a rawn ding tih pawh a hre vek, mahse a pa chu melh khat paw'n a melh duh lo a ni.

"Ka laka i lungawi lohna hian awmzia a nei lo Loicy, hmanni lawka i pasal hual ve ringawt hian ka rin lawk ang ngeiin a fiam mai mai che a nih hmel, a reh rei vang vang tawh em mai" a pa'n a rawn tih chuan

"Lo len leh châkawm loh khawpin i lo awmkhum miau alawm ka pa, chutah a mipa thik em em Simon-a nen leh nghal" a lo ti hluai a, Manuel-a laka a pa rilru put dan vel chu a beisei loh lam daih a ni.

"I tana mipa ṭha a ni nge ni lo ka fiah mai a ni Loicy, lo tha nat pui duh suh, awmzia a awm chuang lo vang" tiin a pa chu room aṭang a chhuak nghal a, Loicy-i erawh chuan a en ngai a en tlawk tlawk ringawt.

A phone chu a hum ran a, Manuel-a nena an inbiak khât ziate chu a ngaihtuah a, a ngai ve tak zet tawh a ni. A insum thei tawh lo chuan a call ta tawp a, Manuel-a aw ri tal chu hriat a duh a ni. Kar khat chuang an inbe tawh lo va, a la rawn be miah lo te chu mak a ti hial zawk a ni. Phone chu a ring ral ṭhak a, tih nawn erawh a tum tawh kher lo.

Zanah pawh Manuel-a hnen aṭang Phone call a la dawng lo cheu a, a Missed Call-na a hmuh a rin avanga a call ngaichang deuh reng pawh a ni. Zing dar 1-ah pawh a la muhil thei chuang lo, Manuel-a chungah chuan eng emaw ni tak a thleng a nih a ring ta ber. A thu sawi pawh zawm duh lova Hotel-a va kal chilh tawp chu a tum a, mahse biak hmasak chu a duh leh phawt zawk a ni.

"Hello" Manuel-a phone lo chhangtu chu mipa a ni ta hauh lo mai, a aw aṭang chuan hmeichhia a ni tih chiang takin a hre nghal a, mahse tu nge tih lam a ngaihtuah thiam lo.

"Khawngaihin Manuel-a kha min lo biak tir zawk mai ta che, a nupui hual ka nia" hawihawm tak anga lang si mah se ngeiawm ru deuh chuan a ti fak a, hmeichhe dangin Manuel-a phone an lo chhang ringawt pawh chu a thinrim tawh a ni.

THE ONE WHOM MY SOUL LOVES (M&B)

By

Havali Adam

Chapter 15

"Manuel-a chu a buai ang reng viau a, a be hman rih lo che naupang, i duh chuan nakinah i rawn call ṭha leh zawk dawn nia" rawn ti chang let faktu aw chu hriat tawhna a nei ngei a, mahse a ngaihtuah chhuak thei mai lo.

"Tu nge i nih? Ka pasal hual phone lo chhang ngam tur hi i ni miah lo, Manuel-a kha han pe thuai teh" Loicy-i aw chu a nem lo tial tial a, thawm a reh ṭhuap tawh avangin a ṭawng ring lo hle bawk.

"A buai ka tih chu maw le naupang, kei chu min hre sa reng alawm, a hmeichhe kawp mek Rosy hmelṭha chuai thei lovi ka ni e" lehlama miin a rawn ti chiah chu

"Enga!? Hmeichhe kawp lai a!?" a lo ti nghal hluai a, thil awm dan chu a hrethiam lo va, Rosy-i ber kherin Manuel-a phone a lo chhang te chu mak a ti ta tawlh tawlh mai.

"Ka dah dawn a nia, dawt thu phuahchawpin ka Manuel-a hi rawn zar buai tawh suh" tiin Rosy-i chuan phone a rawn off khum hmak a, Loicy-i erawh eng thil dang mah ngaihtuah buai tawh lovin a room aṭang chuan a kal chhuak nghal hlawk hlawk a, tunah chuan Hotel-a Manuel-a kal chilh chu a tum nghet bur tawh a ni.

Taxi pharin Loicy-i chuan Hotel lam a pan nghal a, a rilru chu a hmanhmawh hle bawk. A hmeichhe kawp hlui Rosy-i nen chuan an lo inkawp leh tak tak ang tih a hlau a, a hmangaih tawh em avangin Manuel-a chu chan a duh lo a ni. A rilru chu a ni nuai nuai a, hmeichhe dang kawpsan tur êm chuan Manuel-a chu a ring phal bawk si lo. Inhualna zungbun lai a bun tir tawh a, a phatsan leh nghal theih mai a ring thlawt lo a ni.

Hotel chhunga a luh lai te chuan a tlanin a tlan titih a, a hmanhmawh luatah Lift te chu kal muang ti tak a ni. Manuel-a awmna floor a thlen rualin room lam chu a pan nghal a, kawngka chu hawn tumin nam mah se a hawn theih ta tlat lo mai. Chhung lam aṭanga kalh a ni lo tih chu a hria, a chhan pawh kawngkaah chuan eng khawl mah a thawk tlat lo a ni. In hnuai lamah chhuk leh thuaiin Receptionist hnenah chuan

"Min lo hrethiam teh, Floor 7-a room number 12 hi a hawn theih miah lo va, a chhan min hrilh thei ang em?" tiin zawhna a zawt nghal a, chuta Receptionist lo chhan dan chuan a va tibang bo chiang em.

"Room number 12 luahtu chu kar hmasa khan a chhuak daih tawh alawm" hawihhawm tak hian Receptionist chuan kawngka inkalh tlat chhan chu a lo hrilh a, Loicy-i chuan ngaihtuahna sen dan tur pawh a hre mai tawh lo.

"Ka lawm e" ti sepin pawn lamah chuan a kal a, Manuel-a awm dan chu a hrethiam hlawl lo, an ramah a haw dawn te a nih chuan a hrilh hmasak ve phawt te a ring a, mahse Manuel-a chuan a hrilh hauh si lo.

Rosy-i'n Manuel-a phone a lo chhan daih theih dan te chu a ngaihtuah chhuak leh a, a rilru chu a mangang ru tawh tak zet a ni. Manuel-a chu Chicago-ah a kir leh tih a hrethiam mai a, mahse engmah a hre ve miah lo chu a rilru tinatu pakhat a ni. Chutah Rosy-i'n a phone a lo chhansak leh zel a, inkawp leh tur erawh chuan a ring thei bawk si lo a ni. A tih ngaihna hre lo chuan Manuel-a chu a Call leh tawp a, mahse chhanna pakhatmah a dawng lo.

A khuma a mut hnu thlengin a ngaihtuahna chu a la buai nuai nuai a, zing khua a var thlengin a muhil lo tluan ta ṭhak a ni. Zan lam aṭang tawh a mood a dik lo sa bawk nen tukṭhuan ei lai te chuan ṭawng pawh a ṭawng peih lo va, mi dang chuan Manuel-a laka a pa chet dan hawihhawm lo zet avanga lungngai a nih an ring ngei ang, mahse tunah chuan chu chu a lungngaih chhan ber a ni tawh lo a ni.

"Loicy" chanchinbu chhiar lai pawh ngaihsak zawm lova kotu a pa lam chu a hawi nghal vut a, zanah a mu ṭha lo bawk a, Loicy-i chu a mut a chhuak ru kher mai.

"Manuel-a chanchin i hre tawh em?" a pa bawk chuan a rawn ti leh a, chu chuan Loicy-i rilru nguai tak chu a rawn tiharh chiang hle, Loicy-i chuan chuti ang thil a pa'n a rawn sawi a ring lo ve bawk êm a ni.

"I hriat duh chuan chanchinbu hi i chhiar thei ang" rang takin a pa lamah chuan a kal phei nghal a, eng thil chiah nge Manuel-a chungah chuan thleng ang tih ngaihruat dan pawh a hre lo.

"The DJF Company neitu pu Derrick Jason Firth-a chuan vanduai thlak takin chatuan ram min pansan ta, a thih hlim aṭang Company lamah buaina a chhuak nghal a, Shareholder te chuan Company enkawl an inchuh nasa hle" tih thu chanchinbua inziak chu a rilruin a chhiar a, a hma ai zawngin tunah chuan hrehawm a ti zual leh ta sauh.

Room-ah chhovin khumah chuan a ṭhu hnawk a, Hotel-a va kal chilh a tum ni aṭang ni thum lai a liam tawh a, Manuel-a laka a lo lungawi lo ve ringawt te chu a inthiam lohna tizual tu a ni. A phone hmet engin Manuel-a chu a call leh nghal a, mahse a ngaite bawkin chhanna pakhat mah a dawng leh ta chuang lo. A laptop phawrhin Manuel-a chanchin chu Internet aṭang chhiar a tum leh ta tawp a, mahse a thil hmuh chuan nasa takin a rilru a tina a ni.

Manuel-a bulah chuan hmeichhe pakhat a ding ve zel a, chu nu chu Manuel-a hmeichhe kawp hlui Rosy-i ngei a ni. Thlalak engkimah Rosy-i chu a lang ve zel a, a nupui hual zawkin engmah a hre ve lo te chu a zak ru ngawih ngawih a, hrehawm a ti ru hle bawk. Rei pawh en duh lovin Laptop chu a khup thuai a, Rosy-i a thik lutuk chu a ṭap thei mai dawnin a hria.

Simon-a lo len lai te chuan a kawm peih lo leh ta zel a, a mood chu a va ṭha lo tehreng em. Chicago-ah kal ve ringawt dawn se a chhungte'n an remtih a ring bawk si lo, chu bakah Manuel-a te awmna chu a hre lo hrim hrim. Amah ang lo takin Rosy-i chuan a hria a ni ngei ang thlate a lakpui bik a, Manuel-a chu tawrhpui viau pawh tum mah se tunah chuan Rosy-i thikna hlirin a rilru a luah khat tawh a ni.

Rosy-i chu tluk lovah a inngai nghal em em a, Rosy-i anga Manuel-a bula hun hman ve theih te chu a châk a, Manuel-a lah chuan a phone tak ngial pawh a la thei si lo. A tawpah phei chuan a pa thu hrilh te chu a dik mai ang tih a hlau rum rum a, Manuel-a'n a lo fiam mai mai a nih vaih chuan a chan a chhe hle dawn tih pawh a hria, mahse a pa aiin Manuel-a chu a la ring rih zawk tlat a ni.

Ni a ral a, kar a ral leh a, Manuel-a hnen aṭang phone call pakhat mah a la dawn chhunzawm lo tluang zel bawk a, a nu phei chuan Loicy-i chu a khawngaih ve ta hial. Loicy-i lah a vawi khatna atana hmangaihna khura a tluk luhna a lo ni kher bawk nen a la na em em a, Manuel-a zun chu a do zo ngang lo a ni. A ngai em em a, a ngaih lutukna lamah zan mut theih loh chang pawh a nei ṭhin.

A nu mangang ru deuh chuan Simon-a chu an inah a chuankai tir awl lo va, mahse Loicy-i tan chuan Simon-a chu eng tham mah a ni lo; a rilru na leh a nun khawhar tikiam turin Simon-a chuan tihtheih a nei tlem hle a ni. Vawi khat phei chu Simon-a awm lai ngeiin a ṭap chhuak tawp a, thlahlelin ngai ngawih ngawih mah se Manuel-a erawh a reh tlat bawk si a ni.

"Thil ho mai maiah i nun tat lut tawh lo la, rawn hlawhtling haw ngei ang che ka fanu" kuah chungin a pa chuan a ti dam dap a, ani paw'n tunah chuan a pa thu sawi bak chu zawm a tum tawh lo hle a ni.

Zirna lam chhunzawm tura thlawhna chhunga a chuan luh hnu chuan a mit a chhing vang vang a, thla khat chuang be miah lova awm thei Manuel-a chu a ngaihtuah zawng ringawt pawhin a mittui a hnai kûarh thei a, Loicy-i chuan rin leh a duh tawh lo a ni. A kuta inhualna zungbun awm ran chu a tuai pah neuh neuh bawk a, chu tal chu Manuel-a hriatreng nân kawl a la duh cheu a ni.

Amah ngaihsak tawh miah lotu Manuel-a te ang mipa a hmangaih tlat chu tlawm thlak a ti a, a thinlunga hmun chang lian ber tu chu vawm bo vang vang a duh hial a ni. Amaherawhchu hmeichhe rilru nghet leh a duh huna paukhauh tak a nihna chu a la bo bik lo, tunah chuan Australia ram tihmingṭha tur chauhvin Boston khawpuiah chuan a awm leh dawn a ni.

Kawngka hawnga room chhung lo pen lut mek chu inher lo mah se a nu tih Manuel-a chuan a hrereng a, a sawi tur thlengin a hre lawk vek zawk a ni. A pa'n a thihsan aṭang an chhungkuaah leh Company lamah a beisei loh takin buaina a awm chho zut zut a, a pa'n a thih hma aṭang tawh Company enkawl tir a duh tlat avanga rilru buai ru em em pawh a ni. A nu lahin a tur chhen ṭhin bawk si a, a pa tel lova han awm chiah chu a phur a rit a ti sawt hle a ni.

"Engmah ka ngaithla peih rih lo ka nu, tunah chuan ka rilru hi a la insual nasa lutuk a ni" ti hmukin Manuel-a chuan pawn lam chu a en ding ngur a, a pa a chan chiah chu thawk leh khatah a dinhmun a danglam dâwrh nghal a ni.

"I ngaithla tur a ni Manuel, thla khat chuang inngaihtuahna hun i nei asin, i pa thihna hi kan tuar na tlang vek. Chuvangin fim takin ngaihtuah la, thu tlukna siam bawk ang che, chuti lo zawng Company hi a tlu chhe thuai ang"

"Ka nu! Khawngaihin min be tawh rih lo hram teh, rilru siam fel tuma ngaihtuahna ka sen lai hi chuan mahni chauha awm ka duh a ni" Manuel-a chuan a ti hluai a, a nu pawh ṭawng tawh lovin room aṭang chuan a chhuak ve mai bawk.

A kekawr iptea a phone ri ral ral chu phawrhin call lo lut chu Manuel-a chuan a en vung vung a, a ṭawng peih thlawt loh avangin a hmet tawp ringawt. A pa thih aṭang thla khat lai a liam tawh a, Company pawh zawi zawiin a tla chhia a, a rilru chu a buai nuai nuai a ni ber. A hna lam ni se Boston lamah pawh a School an hawn leh tawh avangin a kal chu a hun tawh ngei a, mahse a la kal thei der lo a ni.

A pa thihna chuan dengin tuar na em em mah se a rilru tina ber tu chu Loicy-i hnen aṭanga phone call vawi khat pawh a dawng lo chu a ni; chu chuan a mipa rilru chapona chu a ko chhuak chiang hle bawk. Nupuiah hial neih tumin inhualna zungbun te a pe vek tawh a, mahse a laka Loicy-i awm dan chu tlawmah lain a rawn biak loh chhung chu biak a tum ta bik lo a ni.

A phone bawk chu a rawn ri leh a, lo call tu chu tu dang ni lovin a pa thachhang dawltu pu Stalon-a a ni. A rawn call tluk tluk chhan pawh a hre vek a, Manuel-a chuan Company leh Music School lam chu buk ṭhin mah se a rit zawk a la hre thei lo cheu a ni. A pa duhthusam anga a kal dawn chuan Company a enkawl chhunzawm ngei a ngai ang a, mahse ani chuan a tui der bawk si lo.

A tuina lamah leh a eizawnna lamah kal ringawt dawn se a pa'n a rochun a nih miau avangin Company chu a ngahtuah lo thei bik si lo, a nau kutah hlan ringawt ta se a enkawl zawh dawn lohzia a hre chiang leh em em bawk si, awm dan tur ber pawh hriat theih loh khawpin a nun leh a rilru chu a chep a ni. Chutah a ngaihtuahnaah Loicy-i a lo lang ve chhen bawk a, a pa thihna chuan a nghawng na hle tih chu amah baka hre chiang an awm lo vang.

"Ka pu, i hman chuan lo kal thuai teh, tunah hian Company-ah buaina a chhuak mek a ni" phone call a pick up rualin a pa thangchhang dawltu pu Stalon-a chuan a rawn ti sawk sawk a, ani chuan a rawn call ngun êm avangin thil thleng chu a awm a ring sa hrim hrim.

"Ka lo kal ang" ti bul hmukin Manuel-a chuan an inbiakna chu a hmet tawp zui nghal a, in hnuai lama a chhuk thlak laia a nu biakna pawh chu hre lo ang maiin a awm a, a rilru engmah hre lova a nu'n a nawr tet tet ṭhin chu a kham a ni.

Company building kawt a thlen rualin car aṭang chuan a chhuak nghal a, thlalatu pawh an lo tam leh tawh hle. Building chhunga a luh chuan hnathawkte'n thil awm dan an lo hrilh zung zung a, mahse chungho thu sawi ai chuan pu Stalon-a thu sawi chu a ring daih zawk. Kum tam tak a pa hnuaia lo thawk tawh a ni a, an hna thawhna pawh la rei lo tih hriat tak takte ai chuan pu Stalon-a chu rin a duh zawk hrim hrim a ni. Lift-a a chuan laiin pu Stalon-a chu a call nghal a, a office-a hmuh a duh thu a sawi zawm nghal zat bawk.

A office awmna floor a thlen rualin amah aia kum upa fê fê te chuan zawhna chhan sen loh an zawt nghal mawlh mawlh a, a hne lutuk chu kutthlak mai a duh rum rum. Ṭhenkhatin thinrim takin an ṭawngkhum hrep hlawm bawk a, Meeting-naa a tel loh vanga lungawi lo em em an ni tih pawh a hre vek a, a tua mah chu chhan a tum lo bur.

"Kum khat chhung ka pa Company hi enkawl mai ta che pu Stalon, kei chu inzir chawp fê ka la ngai dawn bakah mi tu emaw ni hnenah thu ka lo tiam tawh a ni" a tih chuan pu Stalon-a chu a meng buai nak a, Manuel-a erawh chuan a pa Company enkawl turin ani tluka rin zawh a nei lo thung.

"Ni lo Manuel, pu Derrick-a khan engkim hi i hming vekin a dah tawh alawm, chuvangin kei chuan i pa Company rochun che hi kum khat chhung ringawt pawh lo enkawl chi ka ni lo" tia a rawn hnial laiin Manuel-a chuan

"Enkawl chi chu i ni tak meuh mai pu Stalon, kei pawh ka theih tawpin ka lo inzir ve ang a, kum khat hnuah chuan enkawl turin ka rawn let leh ang" a lo ti ve nghal a, tunah chuan pu Stalon-a chu a rilru a buai ve ta hle.

"I pa Company enkawl lova i hna lam zawm i tum lui tlat hi ka hrethiam lo che Manuel, pawisa lam ni se mahni Company ngei enkawl chu a hlawk daih dawn si a, i nu leh i nau paw'n Company enkawl tur hi chuan min ring zo lo ngei ang"

"Ka nu leh ka nauvin an rin che a ṭul ber lo pu Stalon, kan naupan lai aṭang tawh ka pa thachhang dawltu i ni a, engkim hi i enkawl zo dawn lutuk tih ka hria a ni. I lakah hian kum khat chhung chu ka rinna zawng zawng ka nghah a ngai, Company hi enkawl hram rawh pu Stalon"

"Engtin nge Shareholder nei lian te hi ni ta ang? Ka lakah thikna nasa tak an nei ngei ang, thil hi ngaihtuah chiang rawh Manuel, vawi leh khatah Company hi a tlu chhe vek thei asin" pu Stalon-a pawh chuan Manuel-a chu a khawngaih ve tho va, mahse Boston-a kal a la tum tlat chu a hrethiam bik chiah lo a ni.

"Vawi tam ka ngaihtuah tawh alawm, nang baka Company enkawl zo tur hi hnathawkte ah an awm lo a ni" tiin Manuel-a chu a ṭhutna aṭang a tho a, kawngka lama kal a tum lai takin pu Stalon-a chuan

"Manuel, eng thil chiah nge heti em ema Boston khawpuia awm tir châk che ni reng reng? I pa rin ngam tur khawpin i kum pawh a tam ve tawh a, chu tal chu min han hrilh teh" a rawn ti leh a, Manuel-a chu a fapa ni se chuan a lungawi lo viau tawh zawk ngei ang.

"Hmeichhe pakhat vang maw le, ani chu ka nupui hual a ni bawk. A hlawhtlin ngei theih nân ka puih tur thu ka tiam tawh a, ka thu lo tiam tawh ang chuan ka awm dawn a ni. Ka nu leh ka nau chuan an la hre chiah lo, i hrilh kher pawh ka ring lo" Manuel-a chu room aṭang a pen chhuak zui nghal a, Loicy-i lakah lungawi hran lo mah se a nupui hual a ni tawh tlat.

"Manuel, ka lo call che tih pawh i hre lo leh pek em ni? Engtin nge ni dawn? Kan ka rual ngei chu a ngai ang, Ticket pawh ka chang tawh lo" Office a chhuah rualin Rosy-i chuan a lo ti nghal a, zep lovah chuan a hmel chu a hmu hne ru khawp.

"Ka ruala kal i châk vanga Ticket chang lo te hi i lo ni lo maw Rosy? Ka pa kan thlah liamnaa i rawn lang erawh ka lawm a, ka lawm avangin ka lakah engmah beisei chuang suh" Manuel-a aw chu a nem lo khawp mai, mahse Rosy-i chuan chungte chu engah mah a ngai lo thung.

"Chuti ang chuan min ngai lo teh Manuel, i lakah hian beisei engmah ka nei tawh lo. Kei chuan kha leh chen kan lo inkawp ve tawh avang khan ṭhian ṭha tak nih chhunzawm ka duh mai a ni; chu bak engmah thil dang a awm lo" nui var var hian Rosy-i chuan a rawn ti a, ani erawh a ṭawng reng hman lo.

"A nih chuan i thlenna Hotel-ah lo va awm rih la, tlai lamah emaw zan tir lamah emaw kan kal dawn nia, Company-ah hian lo lut zen zen lo la ka duh bawk" Manuel-a chuan a ti leh deuh hmuk a, Rosy-i chu ngaihsak tawh lovin a kal sawn ta daih bawk.

"Pu Stalon, tunah Meeting kan nei ang. Conference Hall-ah ka awm a, mi dang pawh lo ko khawm rawh" tiin Manuel-a chuan pu Stalon-a chu phone-in a bia a, Company enkawl turin pu Stalon-a ruata Boston khawpui lama thlawh nghal chu a tum a ni.

Darkar khat chuang Meeting chu an nei ta ngei a, hnathawk ṭhenkhat chuan Manuel-a thu tlukna siam chu an pawmpui lo hle a, pu Stalon-a hrilh lawk ang ngeiin an mitmengah leh an che ziaah thikna nasa tak a hmu zut zut bawk. Mawihnai lo taka ṭawngho phei chuan banna theh luh te an tum a, pu Stalon-a te angin Company a enkawl tur leh an pu a ni ta mai tur chu an ngai ngam hlawl lo a ni.

Manuel-a erawh chuan Paper-ah a hming a sign mial mial thung a, a thu tlukna thlawp lo tute chu Company aṭang bang daih mah se pawi tihna pakhat mah a nei lo a ni. A thu tlukna pawm lo tute chu an ṭhahnem hran lo va, chuvanga ui der eih lo pawh a ni. Tin, chuti maiin vawi leh khatah Company chu a tlu chhe nghal mai dawn lo tih pawh a hria, a chhan chu pu Stalon-a'n a enkawl dawn tlat a ni.

Meeting an zawh fel rualin an in lamah a inkhalh haw nghal a, a thawmhnaw leh a mamawh chi hrang hrang chu a khung mawlh mawlh a, a nu leh a nau chuan a che vel chu an lo en tawp a, dan pawh tum se an dang zo dawn chuang lo tih an hre chiang em em a ni. In aṭanga a chhuah dawn chuan kum khat hnua a haw dawn thu leh Company enkawl tura a haw tur thu a sawi a, lungawi chiah lo mah se a thu sawi chuan a nu pawh tlemin a tilungawi ve ta deuh.

Rosy-i nen chuan thlawhnaah an chuang dun ta ngei a, a biakna te chu chhan khat paw'n a chhang lo hrim hrim. Rosy-i rilru chhungril tak chu a hmu tlang vek a, a la beisei em em tih leh a la ngaizawng ru em em tih te chu a hre tlang vek bawk a ni. Amaherawhchu Manuel-a chuan a thinlungah hmeichhe pakhat chiah a awm tir a, chu chu Loicy Wilson-i a ni.

Loicy-i hmel hmuh a châk rualin pan hmasatu nih chu a hreh leh lawi a, amah aia kum naupang fê thu hnuaia awm ringawt chu nuam a ti lo a ni. A pa thihna boruak avangin buai em em mah se Loicy-i hnen aṭang chuan phone call dawn a inbeisei ru reng zel kha a ni a, mahse thla khat chuang a liam hnuah pawh a phone call pakhat mah a dawng lo chu a nih kha!

A nupui huala a lo sawm hmanhmawh te chu inchhir tum viau mah se a thei tlat lo, a chhan chu Loicy-i chuan amahah hmun a chang hnem tawh lutuk a ni. Be hmasatu zawk nih hre siin Camera-a an thlalak dunna te chu a en leh ringawt zel a, a khawharna hnem tu chu thil ho lam tak a ni. Chutah Rosy-i a lo lang ve leh chhen zel bawk si a, a pa vuina thlalakah pawh an lang dun ngun mawlh mawlh hle.

Boston khawpuia an ṭum rualin a in lamah a tlang phei nghal a, Rosy-i chu ngaihsakna pawh a nei tawh chuang lo. Ina a innghah fel hnu chuan Loicy-i Apartment awmna street-ah a kal leh nghal a, be hmasa lova va kal chilh tawp chu a tum ta zawk a ni. Loicy-i Apartment a thlen chuan luh nghal mai tumin kawngka a kik a, mahse vawi tam a kik hnuah pawh chhawntu a nei hauh lo. Kawngka chu nam hawn a tum leh ringawt a, a thei lo chiang kher mai.

Hnathawkte chuan Loicy-i awmna room a ruah tawh thu an lo hrilh a, mak a va ti tehreng em. A awmna ngaia a awm a lo ring kha a ni a, mahse tunah chuan a rin ang ngawt chu a ni ta hauh lo. Thawk la hawkin a rilru chapona a dah ṭha a, Loicy-i chu a call ta nge nge a, a insum thei tawh lo a ni.

Amaherawhchu vawi thum lai a call hnu paw'n a tlang thei reng reng lo mai a, thil awmzia chu Manuel-a chuan hrethiam tawh lo tak a ni. Loicy-i call tawh lovin Lily-i chu a call ta zawk a, Lily-i chuan Loicy-i awmna a hriat a rin vang a ni. Car khalh pahin Lily-i chu a bia a, Lily-i lah chu Loicy-i nena an inkar hre lo tih takah a lo ṭawng duh nasa mai bawk si, Manuel-a chuan a zawh tum tak pawh a zawt hlei thei lo a ni.

Lily-i te in a thlen chuan a pasal paw'n a lo be ṭha viau a, thawk khat lai kha chuan Lily-i nen an inngaizawng emaw te kha a ti a, an inngaihzawn lohzia hre leh vat lo se chu an inhmu ṭha lo tluan thei ngei ang. Lily-i chuan a lo be siam siam a, ani erawh a thu sawi turah a lut tlang nghal tawp a, mahse Lily-i chuan Loicy-i awmna chu a lo hre bik mai lo.

Lily-i chuan School-a Loicy hmel a hmuh ṭhin thu leh Manuel-a awm loh hlana thla khat leh a chanve chuang zirna an ṭan leh tawh thu a sawi mawlh mawlh a, Manuel-a awm danah leh ṭawng danah chuan an inkar a ṭha lutuk lo tih a hrethiam vat bawk. Manuel-a chu thil awm dan kimchang a zawt a, a pa thihna lam thlengin a zawt kai a, mahse Manuel-a chuan Loicy-i nen an inkar chu mumal takin a hrilh duh lo thung.

Zanah chuan Manuel-a chu a mu meng kar a, zing ni chhuah hun thlengin a muhil lo hrim hrim zawk a ni. Breakfast a ei zo chiah chu insiam thuaiin school lamah muangchang lo takin a kal thuai a, School ṭan hma fêin a office-ah chuan a ṭhu ran a, Loicy-i hmel mawlh chu a hmu châk tawh a ni. A hmel hmuh mai a ni lo, eng vanga phone tlang theih miah loh nge tih leh eng vanga a awmna chu sawn nge a nih tih a hre duh hle bawk a ni.

"Loicy-i chu a ṭhiannu nen an lo kal tawh sâw, Class ṭan tak tak hma hian i va hmu dawn nge School banah i hmu zawk dawn?" Lily-i aw a hre chiah chu indawm kun ngul tawh lovin a tho nghal a, a che reng reng chu hmanhmawh tak a ni.

Office aṭanga a chhuah chuan Loicy-i hmel a zawng ruai nghal a, a ṭhiannu nen hlim tih hriat taka an inbe bawrh bawrh a hmu chiah chu sawifiah theih si lovin a hahdam huai huai a ni ber. A va nanchin hmain Classroom-ah an lut ta daih a, mahse Loicy-i chu biak loh reng a tum tawh lo. Classroom chhungah lutin zirlai naupangho lo Wish-na pawh chu a chhang let lo va, a ngaihtuahnaa awm chu Loicy-i chiah a ni.

A hmel a hmuh rualin Loicy-i pawh a lo meng phawk hrâ a, a bana a kaih lai te chuan a lo tal lo hrim hrim bawk. Zirlai naupangte chuan an awm dan chu hmu ngai lo ang maiin an lo thlir leh ṭhap a, Manuel-a chuan a chet dan chu a mawi leh mawi loh lam a ngaihven tawh lo a ni. A car chhungah Loicy-i chu nawr lutin chak tak hian a tlan chhuah pui nghal a, hmun fianrial taka an inbiak ngei a ngai a ni.

THE ONE WHOM MY SOUL LOVES (M&B)

By

Havali Adam

Chapter 16

Thil thlen dan teh thut leh Manuel-a nen an inhmuh dan chu Loicy-i chuan mak a ti kher mai, thla hmasa chhung zawnga rawn be miah lotu leh a phone call pawh chhang duh lotu nen Car chhungah an chuang dun thut bawk a, thil a thleng rang vut vut lutuk chu a la dawngsawng thiam chiah lo a ni. Manuel-a hmel pawh en duh lovin pawn lam chu a hawi daih a, a kut chu a tuai neuh neuh bawk a, vawt tih vang ni miah lovin a tha chu a khur der derin a hre bawk.

Manuel-a Car tih dinna hmun chu khawi lai hmun nge a nih pawh a hre lo, chu lai hmunah chuan a la kal ngai lo a ni. Manuel-a chuan a sira kawngka chu rawn hawngin a kai chhuak leh sawk a, ani ang mipa tha chak takin a pawhna chu a tan chuan a na lam lek lek a ni. Manuel-a chuan a chhuk melh run tih a lam hawi lo mah se a hre vek a, a mipa rin duh tawh miah lo nen an indin chilh leh ta reng chu a ni si a, engtin nge an awm zel dawn tih pawh Loicy-i chuan a hrethiam lo a ni.

"Class kal ka ngai a nia, a theih chuan School lamah min phur let leh la ka lawm ngawt ang" Manuel-a a ngawih reng avangin Loicy-i a ṭawng chhuak hmasa ta nge nge.

"Inhre ngai lo ang mai khan min be hlek suh Loicy" a bula mipa khan sang zet chuan a rawn ti bul hmuk a, ani chuan huat tur engmah a sawi awm reng a hre lo thung.

"Eng vang teh hrepa min rawn be miah lo nge i nih Loicy? Ka pa chanchin thlengin i hriat vek chu ka ring, i lakah hian nasa takin ka lungawi lo a ni" Manuel-a awah chuan thinrimna hlir a khat a, chu chu Loicy-i chuan a hriat hmaih lo chiang khawp.

"Keini te chu kan inṭhen fel tawh alawm Manuel, i laka ka pa chet dan avangin i lungawi loh tih pawh ka hria e" a ti let ve ta sep a, Manuel-a ang bawkin ani pawh chuan hma lam chu ngaihtuahna dang daih puin a melh reng ringawt.

"Nang leh kei hi kan inṭhen awm ka hre hauh lo Loicy, i duh dûha min thunun tum hlek suh, ka ngaithei der lo tih hria ang che" Manuel-a chuan a rawn ti leh hmuk a, mahse Loicy-i chuan School-a let vat chu a duh tawh a ni.

"School lamah min hruai let vat mai teh Manuel, vawiin hian Presentation ka pe dawn leh nghal" tiin Loicy-i chuan a bula mipa taksa lian zet chu a en chho ve ta, Manuel-a hmel chu dang ta riauvin a hre bawk.

"Ka phalna tel lo chuan School-ah i let tawh lo vang tih hre rawh Loicy, eng vanga phone tlang theih loh nge i nih? Eng vangin nge i Apartment i sawn leh tawh?" Manuel-a aw chu hriat a nuam lo leh ta hle mai.

"Chu zawng ka hrilh kher che a ngai tawh lo ve, a chhan chu nang nen hian inzawmna neih ka duh tawh lo" ti salhin Loicy-i chuan a melh chho ngar a, tunah chuan intih huaisen chawp a mamawh a ni.

"Thu lawi lo sawk hlek suh Loicy, khawiah nge kan inhualna zungbun kha!? Nang hian eng vanga bun tawh lo nge i nih?" a kut rawn hmerin Manuel-a chuan a ti ram hmuk a, mahse ani chuan chhan a tum hauh lo.

"Keimah lo chuan an phawi thiang tawh lo ka ti a ni lo'm ni Loicy? Ka chapona kai chhuak chhen tur hian tu chiah nge i nih? I hma hun zawng zawng tichhe thei khawpin i chungah hian ka che thei tih i hre lo em ni? Ka thu chauh awih tawh ang che; mi dang thu ni lovin"

"Nang hnaih che hi ka duh tawh lo ve Professor Manuel, nang chuan kei min ngaihsak lovin i hmeichhe kawp hlui i hruai kir leh tawh bawk a, chu pawh inhualna zungbun min pek hnu lawkah leh nghal" Loicy-i chuan a ti ve ta fak a, a ngawi reng thei bik lo a ni.

"Khati ang khan min ko tawh suh tih vawi eng zat nge ka hrilh dawn che Loicy Wilson? Ka huat zawng tak hian awm ṭhin suh, ka nupui hual leh ka zirlai naupang mai i ni, min zah hle tur i ni bawk" Manuel-a chuan a rawn ti hrawk a, phut pawh a phut nasat phah hle.

"Ka pa khan a lo sawi dik chiah a nih dawn hi! Nang hian kei ang hmeichhia inngaihzawnna kawnga chin chang engmah la hre lo hi min fiam vel mai mai tih ka hrethiam tawh e, heti ang mipa hi i nih ka ring hauh lo asin" ti leh kal a rual a, mahse Manuel-a chuan a banah a rawn man bet leh nghal chat.

"Kan inkara boruak ṭha lo tak awm mek chhanah hian min puh tum hauh suh Loicy, a chhan tak chu nangmah hi i ni. Ka pa thihna chungchangah pawh i hnen aṭang ngaihvenna pakhat mah ka dawng hleinem"

"Ka ngaihsak reng che alawm, mahse i mamawh lo a ni ang. Nang chuan Rosy-i i nei a, ani chuan kei letin a thlamuan thei zawk che pawh ka ring" Loicy-i aw chu a ring hran tawh lo, inhnial reng te chu a kham ru tawh em em zawk a ni.

"Nang teh hrep hian ka ngaihsak i phu hauh lo zawk a ni Loicy Wilson, i duh duh dan chuan awm mawlh teh" Manuel-a rawn ṭawng chhuah dan chuan a lam chu a hawi tir lo thei ta lo, nek pai nawkin a kal pel hmak a, Loicy-i chuan Car-a a tlan chhuak lai chu a thlir tlawk tlawk ringawt.

A chiang ta, tunah chuan a chiang ta e. Insawifiahna pakhatmah a nei duh lo lai tak chu Loicy-i rilru a tina zualtu a ni a, a pa thihna chungchanga a ngaihsak ve zia pawh hrilh hman loh khawpin a kalsan daih a, a rilru na lutuk chu a ṭap chhuak ta feih feih mai. Phulah chuan a ṭhu tawm chawih a, khupa chal nghatin a kun ngul a, a hun tawn mek chuan a vaw chhe vek ni mai hian a hria a ni.

Minute eng emaw zah ngawi renga a ṭhut hnu chuan a inthing harh a, Presentation pe tur a ni tih a inhre chhuak bawk a, Manuel-a nena an inṭhenna chuan amahah nghawng na tak a nei a ni. Taxi pharin School lamah chuan a kal nghal a, tlai tawh viau mah se miss Lily-i chuan a lo hriatthiam hram a beisei ru tho bawk.

Chumi ni aṭang chuan inhualna zungbun lai lo inpe tawh mah se Manuel-a leh Loicy-i chu inngaizawng angin an awm tawh ngai lo va, inhmuh pawh an inhmu mumal tawh ngai lo zawk a ni. Kar tawpah Master Class chu Manuel-a zirtirna hnuaiah zirlai naupangte chuan Class an nei ziah a, chung hunah pawh chuan Loicy-i leh Manuel-a te pahnih chu inhmel hriat loh ang maiin an awm ṭhin a, dik tak chuan Loicy-i chu a rilru a na tak zet a ni.

A mipa hmangaih em em leh a rinna zawng zawng nei ṭhintu Manuel-a awm dan teh thlawt chu hmuh reng hrehawm a ti a, an inṭhen chhanah chuan a thiam lohna han zawng ṭhin mah se a hre ngâng lo a ni. Chutah a rilru tina zual turin Manuel-a leh Rosy-i chu inkawp angin chanchinbuah a thang chiam bawk a, tunah chuan American mipate zia dik tak chu Loicy-i chuan a hrethiam ve ta.

A pa pawh khan American mipate rilru ngheh lohzia leh hmeichhe kawp lawr tak an nih thu a hrilh tawh reng a, Manuel-a a hmangaih luatah a awih duh lo vel a nih kha! Ni e, Manuel Firth-a chu a thinlung zawng zawngin a hmangaih a, a mipa ngaihzawn hmasa ber leh a mipa hmangaih hmasa ber a ni bawk a, tunah erawh an pahnih chu inhre ngai lo ang maiin an awm thung si, an inkar buai chhan bera a hriat tâk chu hmangaihna a ni.

Manuel-a chuan a hriat turin a hmangaih thu pawh a sawi chhuak ve ngai lo va, khum lai zawlah hmangaihna chen puiin thlahlel em em ve ṭhin mah se tunah chuan engkim chu lemchan ang vekin a ngaihruat tawh a, Manuel-a nen chuan engtikah mah an inkawp leh theih a ring tawh lo.

Nitinin Manuel-a zun chuan Loicy-i chu a chen chilh zual zel a, Manuel-a chu a ngai tulh tulh bawk a, awm ngaihna pawh a hre lo hial ṭhin. A ṭhiannu Jessica-i chuan a rawn riah pui ṭhin nghe nghe a, mahse a ṭhiannu hnemna te chuan a rilru na chu a tidam thei chuang der lo. Jessica-i chuan vawi tam tak inbe turin leh pangngai taka inhmu leh turin a rawn fo va, Loicy-i erawh chuan Manuel-a hmuh leh chu thil awmze nei lo mai a nih dawn tih a hre chiang em em thung.

Thla nga chuang lai an lo inkawp ve hman a, inkawp satliah mai pawh ni lovin hmangaihna an chen dun ṭhin bawk a, chu mai a la ni lo. Manuel-a chuan a nupui ni turin a sawm hial a, chungte avanga ngai leh thlahlel zual em em chu a nih a ring ta ringawt bawk. Manuel-a nen an inṭhen aṭanga thla khat a liam hnuah pawh Loicy-i chu a la pangngai thei chuang lo va, pangngai taka nung leh thei Manuel-a chu a awt ru ngawih ngawih bawk.

"Eng nge i lo tih dawn? Engtin nge ka awmna hi i hriat chat theih?" Simon-a hmel a hmuh rualin Loicy-i chuan a ti nghal sawk sawk a, Boston khawpuia a hmu thut chu a mak tih chhan ber pawh a ni.

"Ka hna lam thil a nia, ka haw leh thuai pawh ka ring. Pu Wilson-a khan i Apartment address min pe sa hrim hrim a, kan thlenna Hotel nen inhlat viau mah se i hmel ka hmuh châk avangin ka rawn kal vang vang a nih hi!" nui sun sun hian Simon-a chuan a ti a, Loicy-i pawh a awm mai mai bik ta lo.

"Ni dawn tak e! Tun ṭum chu ka awmna ka chhungte'n an hre tak alawm, hmuh i nuam hle mai Simon" tih leh a ṭhianpa chu kuah a rual nghal a, a laka Simon-a rilru puthmang a hre vek tawh bawk nen khawngaihna ruk riauna a nei a ni.

"Zanriah min kilpui ta che Loicy? I rilru pawh ka hre vek a, ka hmanhmawh lo vang, i remtih chuan zanriah kil dun ila ka duh khawp mai" Simon-a mitmengah chuan ngenna nasa tak leh inthlahrunna a hmu a, chungte chuan a khawngaih zual tir a ni.

"Aw le, zanriah kil dun turin ka lo inbuatsaih dawn nia, min rawn lam turah ka ngai hmiah mai asin; i buai lutuk loh chuan" Loicy-i chu a nui lui hram hram a, Manuel-a vanga mipa dang reng reng a ngaina thei ta miah lo chu a buaina pakhat a ni.

"Ka rawn lam ang che" tiin Simon-a chu a kal liam nghal a, Loicy-i chuan ngaihtuahna thui tak sengin a en vawng vawng a, khang thla kal ta chhung khan Simon-a chuan a awm dan a hre ve vek a, biak pawh an inbe ngun hle a ni.

Darkar tam a liam hnu chuan Simon-a leh Loicy-i te chu dawhkan pakhatah inhmachhawnin zanriah an kil dun a, Simon-a ṭawngkam thiam lohna chuan an boruak a tinuam leh ta phian bawk. Manuel-a leh Loicy-i te inṭhenna chuan khawvel pum a luah emaw tih theih turin hre lo pawh an awm mang lo va, chumi hun tak chu remchangah lain Simon-a chuan a ṭhiannu a hmangaihzia chu a hrilh tlang nghal tawp a, Loicy-i erawh chuan engtin mah a chhang lo thung.

Kum kha leh chen kha an lo inkawm ve tawh a, Loicy-i chuan Simon-a chu ngainat pawh a ngai reng, mahse hmangaih turin a thinlung chu a hawng thei tawh lo a ni. A thinlung chu mi pakhat tan chauh a hawng a, chu mipa chu tu dang ni lovin Manuel-a ngei a ni. A beisei loh lutukin inhualna zungbun lai an inbun tir hnu thla tam pawh la liam hmain an inṭhen leh lawi a, tunah chuan a thinlung chu tu mipa mahin hmangaihna khura lut dun tura an hawn leh theih a ring tawh lo a ni.

"Loicy, ka hmangaih che, ka hmangaih lutuk che, ka nupui i ni thei hi ka lawm a ni" Manuel-a chuan bianga mittui luang ngiaiin a kuah a, kuai kunin a fawp vang vang a, khawvela a mipa hmangaih ber nen nupa an ni thei chu a lawm lutuk avangin a ṭap ta ringawt bawk.

"Manuel" a tih lai takin thawm bengchheng tak a rawn awm thut a, a ngaihtuahna aṭang chu thawm bengchheng leh Alarm ang maia ri ral ral chuan a pawt chhuak chiang hle a, a tak ang maia a tawn zawh chiah chu mumang vek a ni tih a hriat chhuah chuan a hnual nghal rawih thei.

"Ka ngai hle mai che Manuel" ti sepin a mit a chhing leh vang vang a, a kuta awm ṭhin a ṭhi atana a awrh tâk zungbun chu a khawih neuh neuh a, an inṭhenna aṭang thla tam liam leh tawh mah se Manuel-a nena an inṭhen dan teh tawp chu a ho a ti ve thlawt a ni.

A khum lu bula Alarm lo la ri reng chu hmet tawpin khum aṭang chuan a chhuk a, Bathroom-ah lutin a intifai nghal zung zung a, kum chanve lai thleng leh tawh mah se thil hriatreng tlak emaw nuam tih tak pakhat mah a la nei lo a ni. Internet lamah lut se Manuel-a leh Rosy-i chungchang hmuh tur tam tak a awm a, chu bakah Company lama Manuel-a a thawh thuai dawn thute a hmu ṭhin bawk a, chu kum chu hmangaihna avanga a la lunglen ber ṭum a ni ngei ang.

Breakfast pawh siam peih lovin a insiam mial mial a, School kalkawnga Fast food emaw thil dang ei chu a tum rilru ta zawk a ni. Taxi-a a chuan chhung zawngin a mumang chu a ngaihtuah let a, Manuel-a'n hmangaihna biahthu thlum tak a hlan laite chu a rilruah leh mitthlaah a cham reng a, mahse engkim chu a tak a ni ve thei tawh si lo. Chu bakah Manuel-a chuan amah angin a lo hmangaih ve miah lo tih chiang takin a hre tawh a, a lak aṭanga hmangaihna phut chu a thil nuihzat thlak tak a ni zawk ang.

School a thlen chuan a ṭhiannu Jessica-i'n a lo be nghal siam siam a, tunah chuan Jessica-i paw'n ngaihzawng nghet a nei ve tawh a, amah ang lo takin a ṭhiannu chuan a kum rualpui a nei thung. A hun tawn mek engkim chuan hun kal tawha a nun lo hman dan a ngaihtuah chhuah tir lo thei lo va, Manuel-a ni lovin a kum rualpui awm vel nen lo inngaizawng ta se chu hmangaihna avanga a nat te a ring lo hnuhnawh leh vel a, a enga mah lah chuan sawtna a nei tawh der si lo.

Third Period chu Practical neih hun a nih avangin Practical Room-ah an chho dam dam a, an Mentor tur pawh Manuel-a a ni a, zirlai naupang ṭhenkhat chu an phur hle bawk. Loicy-i erawh chuan phurna pawh a nei hran lo, a chhan chu tunah chuan Manuel-a a hmangaih vang ni lovin an ram tihmingṭha tur chauhvin US-ah chuan a awm tawh tlat a ni. Zirlai naupang sawm chuang zetin an play hnu chuan a hun a rawn thleng ve ta, piano hmaah chuan inrin tawknaa khat ang maiin a ṭhu a, mahse a inring tawk hauh si lo.

"Ti ṭha leh rawh, a inziak ang hian i play lo hrim hrim a ni" a play laklawh laiin Manuel-a chuan a rawn ti ram hmuk a, a inrin loh laiin a rawn ṭawng chhuak thut kher bawk nen Loicy-i chu a lo phu dâwrh nghe nghe.

"A bul aṭang khan play leh rawh, a nih dan tur dik takin play bawk ang che. Zirlai thiam châk lo tak i ni, he School-a i kal chhan hi hre rawh; mipa lêm kual vela hmingthang lo hian" Manuel-a chu ṭawng hnem a ti kher mai, thil dang zawng aiin dawta a puh ringawt chu a hua a ni.

"Aw le Professor" Loicy-i awah chuan a lungawi lohzia a lang vek a, mahse Manuel-a chauh lo chuan an hrethiamin a aw rik chhuak dan chu an hre pha kher lo vang a, a chhan chu zirlai naupangte ṭhutna leh Piano inhunna chu a inhnaih lutuk lo.

"A bul aṭang bawkin Play ṭha leh rawh, a Note inziak kha en ta che" a play dik vek emaw a tih laiin Manuel-a bawk chuan a rawn ti leh a, a aw khauh tak leh hriat nuam lo tak chuan a tizam er er thei hial a ni.

"Ka tihpalh a ni Professor" ti sepin Loicy-i chuan a mit a chhing vang vang a, mahni chuahin emaw a room-ah emaw awm se chu a ṭap chhuak tawh ngei ang, vin tak taka Manuel-a ṭawngkhumna chuan a ṭah a tichhuak a ni ber.

"I thiam hma chu i haw lo vang, a awmzia chu i Stay Back dawn tihna" ban dar a rik rualin Manuel-a chuan a rawn ti nghal a, ani paw'n Manuel-a lam chu a hawi chho vat a, chuti ang chuan tlai dangah a awm ngai hauh lo, Loicy-i chuan haw thuai thuai a duh kher mai.

Zirlai naupang dangte chu Manuel-a chuan an haw theih thu a hrilh zawm nghal zat a, mahse ani erawh chu haw duh viau mah se a haw ve thei hauh si lo. Piano hmaah chuan a ṭhu ngawi reng a, Music note chu engmah ngaihtuah lovin a en ngawt ngawt a, a rilruah chuan thil dang daih a awm thung. Manuel-a aw ram hmuk a hriat rualin a inthing harh a, tunah chuan an inkarah Professor leh zirlai nihna chauh a awm tawh a, hun kal tawh a lo ngaihtuah let hmanhmawh chu mawl a inti tak zet.

Manuel-a awah chuan thinrimna hlir a ri a, a dik lo lai a hrilh te chu a hre zung zung thei tawh lo, a chhan tak pawh a hre bik lo a ni. Chutia an inzirtir lai chuan Rosy-i a rawn lang hlawl a, Loicy-i phei chuan a hmel hmuh a lo inbeisei lo khawp. A bula ṭhu Manuel-a hmuiah Rosy-i chuan Loicy-i hmuh lai ngeiin a rawn fawp tawk a, chutah zet zawng Loicy-i chu a insum thei ta ngang bik lo.

"Toilet-ah kal ka ngai tlat mai Professor, ka lo let har lo vang" tih leh Practical room aṭanga kal chhuah chu a rual nghal a, Manuel-a phalna pawh chu a la hman tawh lo, Second nga lêk pawh a awm a nih chuan a ṭap chhuak thei mai dawnin a inhria a ni.

Toilet room a thlen chuan a inkalh hnan nghal a, lungchhe takin a ṭap chhuak nghal feih feih bawk. A rilru chhungril a nat lutuk avang chuan a ṭhi chu pawh chaha zungbun chu paih bo daih mai a duh rum rum a, mahse a thei chuang lo, zungbun paih bo tur chuan a inring tawk lo va, a hlawhchham ta ṭhak. Vawi eng zah nge Manuel-a vang chuan a ṭaha a rilru a nat tawh pawh a hre lo, a huat em em rualin a la hmangaih tlat bawk si.

Minute 10 chhung vel Toilet room-a a ṭhut ngawih reng hnu chuan a hmai a tuai thuak thuak a, a hmai te chu a phih sawk sawk a, Manuel-a leh Rosy-i chuan a ṭap tih an hria ang tih mawlh a hlau tawh a ni. Pratical room a thlen chuan kawngka chu a lo inkalh ta tlat mai, thil awmzia chu a hre hauh lo bawk. Room chhungah a Bag leh Music note vel a awm vek a, a chunga Manuel-a chet dan chuan a rilru a tina leh nghal a, tunah chuan a êm em a ti ve ta, hmangaih loh tawp tur a lo la hmangaih reng chu â a inti hliah hliah tawh a ni.

"Professor" tih bak a sawi hman lo, Manuel-a office chhunga thil thleng mek chu mi â ang maiin a en reng a, a hma zawna Rosy-i leh Manuel-a te inthlahlel tih hriat taka infawp bawrh bawrh chu a thil hmuh awm chhun a ni.

"Babe!" Rosy-i awah chuan tisa châkna a khat a, Manuel-a chuan fawp reng chungin a rawn en a, Loicy-i chuan thawm a chhuah ang tih hlau takin a kâ chu a hup a, harh chhuak thutin a kal sawn ta vang vang bawk.

"Khawngaihin hmun reh takah min hruai teh, tûmah min tihbuai theih lohna turah" Taxi driver bulah chuan a ti phawlh phawlh a, a ṭah chhuah lutuk avangin a aw te chu a fiah lo vek a, Taxi driver-in a be zawm miah lo te chu a lawm a, bia pawh ni se a chhang kher lo vang.

Zan dar 7 a rik hnuah pawh Loicy-i chu amah chauhin a la ṭhu reng a, a hmaa tui innawk per chhawk chhawk chu a thlir tlawk tlawk a, Manuel-a leh Rosy-i awm danin a rilru a tihnat lutuk avangin a ril pawh a ṭam thei lo a ni. Ṭhut reng chu a ning ta deuh a ni ang vaivutah chuan a mu zangthal a, vana arsi eng tle sep sep te chu a chhungte ang maiin a suangtuah a, hmu theiin be thei reng mah se an awmna chu a inhlat tlat a ni.

A mit chu a chhing vang vang a, thil chi hrang hrang a ngaihtuah a, School aṭanga chhuaha an ram lama haw thlengin a ngaihtuah kai a, mahse kum chanve chiah a hmabak tawh avangin haw ringawt chu dikin a hre bawk si lo. Manuel-a theihnghilha hmangaih tawh loh thut chu a thei dawn chuang lova a inhriat avangin a tum buai ta lo law law a, chu ai chuan Australia ram tihmingṭha tura Master Class zir zawh chu a tum nghet ta bur zawk a ni.

A lo muhil tlang a ni ngei ang a ke vawt seng seng chuan a tiharh a, a men rualin ni eng takin a mit a rawn chhun a, tui chuan a ke chu a rawn chiah huh zeuh zeuh bawk. A mutna aṭanga a tho chiah chu a pum a rawn ri nghal a, chu chuan a ril ṭam tawh zia a tichiang hle. A awmna hmun bulah dawr emaw thil eina a awm lo va, a awmna chu khawpui daifêm a ni mah zawk.

Taxi hmang bawkin khawpui chhungah a lut a, a inei puar zawh chuan Apartment-a kal mai lovin School lamah a tlang ta zawk a, a chhan pawh School ṭan hun a hnaih tawh vang a ni. School a thlen rualin a ruk thei ang berin Practical room-ah chuan a lut tlang nghal a, a Bag leh a thil pawimawh te chu mi dang hmuh hlau takin a la zung zung a, School-a awm reng pawh chu a peih chiah lo a ni.

Apartment a thlen hnu rei vak lovah Jessica-i hnen aṭang phone call a dawng a, a ṭhiannu chuan Class-a a hmuh loh thu leh a kal dawn leh dawn loh thu a lo zawt a, ani chuan kar khat chhung a chawlh dawn thu a lo hrilh thung. Jessica-i pawh chuan Manuel-a vanga chawlh tum a nih a ring thiam nghal a, thil dang pawh a zawt zui duh ta bik lo.

Kar khat chhung tawp chu a chawl ta reng a, mahse a awm mai mai hauh lo. A room-ah mahniin Music Note chhiar te chu a zir char char tho va, Manuel-a rin phak baka thiam chu a tum a ni. Kar khat a zawh chuan School kal chu a peih leh ta chuang hauh lo, kal ai chuan chawlh leha rilru tihthawvenna hun neih chu a duh leh ta zawk a ni.

Scholarship hmanga zirna chhunzawm a ni tih inhre ranin sum pawh chu a ren duh ta lo va, zin khawthawn chu a thil tih châk ber a ni rih tlat. Monday zing hma tak a ni a, a thawmhnaw leh a mamawh tur engkim chu Bag-ah a khung mial mial a, intihhlim chawp a tum lutuk chu a nuihzat thlak letling zawk.

Darkar 1 a liam hnu chuan New York khawpui lama ṭum tur thlawhna chhungah a chuang ran tawh a, a tum dan chuan New York khawpui fan kual vel leh Los Angeles khawpui fan kual vel chu a duh a, harsatna a tawk te a nih loh chuan a tum anga a awm theih ngei pawh a ring. A zirna lam chu a ngaihtuah ve tho va, mahse kar hnih chhung lêk a chawlh dawn tho avangin buaina a awm phah a ring hran lo a ni.

New York a thlen tukah chuan a taka a hmuh châk em em Statue of Liberty chu a tlawh nghal a, a Camera awrh chu lekin thla a la mawlh mawlh a, ral aṭanga lo hmutute chuan Photographer emaw an ti ngei ang, mahse chu chu a nihna a ni hauh si lo. Manuel-a vanga Camera hmang ve ta ringawt a ni lo va, a kalna hmun vel thlate chu lak a châk avanga inzir chawp leh lei ve mai chauh a ni zawk.

A lei tirh phei chuan dawr nghaktu te'n thlalak dan leh a hmeh tur te an hrilh nghe nghe a, zin khawthawn duh lo se chu Camera pawh a lei kher lo vang. New York-a ni thum a cham hnu chuan Los Angeles lamah a kal leh a, mahse Los Angeles chu New York khawpui ang em emin a lo pui lutuk lo.

A mit la zawng leh mawi tih zawng chu thla a laksak mawlh mawlh a, tlang panga HOLLYWOOD tih intung tlar ṭhap te chu thla a laksak bawk a, amah ngei paw'n thlalak a ngah ang reng hle. Kar thar lama School kal ve tawh a duh avangin Weekend a lo nih chuan Boston khawpui lamah a thlawk kir leh a, Airport a thlen chuan a beisei loh deuhin a nau Johny-a hnen aṭang phone call a dawng ta nawlh mai.

"Eng nge ni ta Johny? In ṭha maw? Nang nen kher phei chuan kan inbe khât hle mai, ka nu leh ka pa an ṭha em?" phone a pick up rualin Loicy-i chuan a ti nghal a, a bungrua chu a hnuk ri deuh ṭawk ṭawk bawk.

"Kan ṭha e, mahse chuti ang lam sawipui tuma lo bia che ka ni lo. Tunah khawiah nge i awm? Boston-ah i awm lo em ni? Kha pa, Manuel Firth-a kha kan inah a lo kal a, i awmna min lo zawt a, mak ka ti khawp asin" a nau thu sawi avang chuan a ding nghal chawt a, eng vanga Manuel-a chuan zawng nge a nih a hre bik hauh lo.

"Kan ramah daih daih khan Manuel-a a rawn kal maw!? A hmel i hai a ni lo maw Johny? Ani te chu heti lamah hna a nei alawm, Boston khawpuiah hian a awm ngei zawk ang" a ti zo chiah tihah a nau chuan

"Ni lo Loicy, kha pa hmel kha ka hai hauh lo. Inah keimah chauha ka awm laiin a rawn lang hlawl alawm, chu chu niminah khan a ni. Ka nu leh pate pawh hrilh lovin ka rawn hrilh hmasa che a nih hi, theihnghilh lo ila chuan nimin la lâ khan ka rawn hrilh nghal ang che" a rawn ti leh a, Loicy-i chuan mak a la ti khawp.

"Kei chuan a rawn kal chhan leh ka awmna a zawh chhan che ka hre lo, tunah chuan Boston-ah ka awm e. Engmah i hriatthiam loh ang chiah khan ka hrethiam bik lo Johny, ani nen chuan kan inkarah engmah a awm tawh lo bawk" Loicy-i aw chu a hniam hran lo, a thinrim ru deuh ṭun pawh chu eng nge a chhan a hre chuang lo.

"A nih chu, ka dah dawn, Company lamah let ka ngai" pangngai taka Johny-a'n a rawn tih chuan an inbiakna chu an titawp a, kal pahin Australia rama Manuel-a kal chhan tak leh amah a zawn chhan tak chu a ngaihtuah neuh neuh a, an inkawp tawh loh hnua chuti anga a rawn la awm thei chu mak a ti a ni.

A Apartment awmna kawtthler a thlen chuan rilru hlim ru takin building chhung lamah a pen lut a, rilru tihthawven tuma zin a ni bawk a, a haw lam zet zawng a hlimin a rilru a thawveng ve tak zet a ni. A thil tih châk ber chu a thlalak ena Laptop-a dah luh a ni a, amah ang kum ruala tihah chuan a ho ang reng hle a ni.

Lift a inhawn rualin a room kawngka lam a pan ding nghal a, mahse room kawngka bula mipa lo ding a hmuh rualin kea char beh ang maiin a awm a, Manuel-a chu chuti ang lai hmuna a hmuh a inbeisei hlawl lo a ni.

THE ONE WHOM MY SOUL LOVES (M&B)

By

Havali Adam

Chapter 17

"Khawiah hrep chuan nge i kal Loicy Wilson? Eng vangin nge kar hnih chhung ngawt School lamah i hmel ka hmuh loh?" a hmel a hmuh rualin Manuel-a chuan a rawn ti nghal hrawk a, Loicy-i ve thung chuan a zawhna chu chhan a tum hauh lo.

"Khawngaihin awm sawn teh Professor Manuel, ka kalna tur i dal a, room-ah hian luh ka duh a ni" tiin Manuel-a chu a dinna aṭang nam kian a tum a, mahse lung lian tak nam ang vel a ni.

"Khati ang khan min ko tawh suh Loicy Wilson, ka ngaina teh chiamlo tih chu i hriat reng kha! Khawi maw lo la teh, i chungah hian ka lungawi lo hle a ni" ti hmukin a Card ken lai chu a rawn phih thlak sak hmawk a, Loicy-i chuan a thil tih tum chu dan pawh a tum ta lo.

Manuel-a che vel chu ngawi rengin a en a, a Card hmanga kawngka a hawn rualin a phalna tel miah lovin room chhungah a lut nghal hmak bawk a, chuti anga a laka a rawn awm vel chu a ngaithei lo ṭep tawh a ni. Room chhunga a luh rualin Manuel-a chuan kawngka a lo khar leh nghal hmak a, an inkarah inngaihzawnna emaw tal la awm se chuan Manuel-a awm dan chu a dem hran lo vang, mahse tunah chuan an inkarah engmah a awm tawh lo tlat a ni.

A thawmhnawte chu phawrh nghal malh malhin a rem fel nghal zung zung a, ngawi renga entu Manuel-a chu a ngaihsak lo lui char char a, room khata awm dun ringawt pawh chu a duh tawh lo a ni. Han duh lo ringawt mah se room khatah an awm dun miau a, eng nge thleng zel dawn a hre bik lo. Inhauh a ṭul leh inhauh a huam a, eng pawh thleng dawn se hmel hriat loh anga Manuel-a hma chhawn tur chuan châkna a nei tam tawk ve tawhin a inhre bawk.

"Duh tawk teh" ti ram hmukin Manuel-a chuan a darah a rawn chelh a, ani paw'n a thawmhnaw thleh fel lai chu a tih chhunzawm thei ta lo, Manuel-a hmerna avang chuan a ban bul chu na a tiru kher leh nghal.

"Eng vangin nge kar hnih chhung School-ah i rawn kal loh?" a hma ang bawkin Loicy-i chu a ngawi ran a, Manuel-a zawhna chu chhan enah pawh a en lo, a chhang peih hlawl lo zawk a ni.

"Loicy Wilson!" vin taka a rawn tih leh chuan che thutin a âwmah a nam vak a, Manuel-a hmelah chuan a zawhna chhang turin a duh tih pawh a hre reng, mahse chung zawng ai chuan a laka chaldelh taka a che vel chu a thinrimna kai thotu a ni.

"I eng nge ka la nih? Maw!? Heti anga i duh hûn huna thinrim khuma hnuaichhiah tur hian i eng nge ka la nih? Ka duh leh thla khat chuang pawh chawlh hmangin ka zin bo ang chu, kan inkarah hian engmah a awm tawh lo" Loicy-i chuan a ti vin ve ta phiar phiar a, a ṭang lutuk chu a sa vek thei hialin a hria.

"Nangmah avanga ka nun buaizia te hi i hre miah lo em ni? Kan inṭhen hnuah pawh rilru natna ka la nei reng a, ka hmaa i rawn inlan lo chung pawh hian min tina tawk em em asin, ka nun awm dan ka nin luata ka zin bo avang hian ka laka thinrim thei pawh i ni lo" rawn ṭawng a tum lai takin Loicy-i bawk chuan a ti leh phiar a, a ṭah chu a chhuak ru hle tawh bawk.

"Loicy" aw hniam ruiha Manuel-a kohna chuan a rilru a tino zual a, a dar rawn chelh leh a tum te chuan a lo tawlh sawn thuai thuai a, Manuel-a hmela lungngaihna ni awm tak lang chu dawt bak a nih a ring tawh lo a ni.

"Khawngaihin heta ṭang hian chhuak hram teh Manuel, i hmel ka hmuh hma kha chuan ka rawn hlim haw hle asin, tunah erawh nangmah vang bawkin ka rilru a na leh ta a nih hi!" Loicy-i chuan a ti leh sep a, ṭawng ring tur pawhin tha a seng buai peih tawh lo.

"A chiang viau ta e, zanin aṭang chuan nang hi ka thluak aṭang hian ka paih chhuak tak tak tawh ang che. Ka chapona dah ṭhain ka rawn pan leh che a, mahse kei hian ka tisual a ni. Ka tel lova i hlim theih phawt chuan hlim ang che Loicy, i laka ka thutiam erawh ka hlen ngei ang" kawngka lam pana Manuel-a a kal pawk pawk lai chuan

"Manuel" tiin a ko ding leh hram a, an inṭhenna hmasa zawk ang mai maia inthlah dan ho lam zet neih chu a duh tawh lo va, a chhan pawh Manuel-a chu a vei zui leh vawng vawng ang tih a hlau a ni.

"Nang pawh hlim ang che Manuel, Rosy-i nen khan in hlim ngei ang tih ka hre thei. Keini hi chu inkawp lo tur kan ni a ni ang e, ka laka i thu lo tiam tawh hlen i tum avangin ka lawm bawk e" nui lui chung hian Loicy-i chuan a ti a, Manuel-a pawh chhuak ta mai lovin a ding ngawi ve leh ta reng mai.

"In ram i tihhmingṭhat hnuah chuan kei pawh ka pa Company ka luah tawh dawn a, chumi hnuah chuan engtikah mah keini pahnih hi kan inhmu leh tawh ngai lo vang" pangngai zet hian Manuel-a chuan a rawn ti a, room aṭanga a chhuak lai chu hmu reng mah se Loicy-i chuan a ko ding duh ta lo.

"Ka hmangaih che asin Manuel, tlawm i inti maw? Chapona bak i rilruah a awm lo, i tlawm vanga lo kal i ni reng reng lo. Min hmangaih thu sawi ta che, vawi khat tal pawh sawi la ka rilru i hliam tawhna zawng zawng hi a kiam vek thei asin" tiin Loicy-i chu a ṭap chhuak ta nge nge a, Manuel-a chuan hmangaih ve se a duh ngawih ngawih a ni.

"Ni lo, nangte chuan kei aiin Rosy-i kha i hmangaih zawk tak e! Ka mawl a ni; kei hi ka mawl tak zet. Hmangaih dang i nei tih hrereng chungin i hmangaihna ka phut vel a, ka zak lo ngawt mai, mahse ka hmangaih em em si che a ni Manuel" Loicy-i chu mi â ang maiin amah leh amah a inbia a ni tawh ber.

A bul lawka Alarm ri thawmah chuan a harh zawk a, a mit a men rualin room chhunga ni eng lo lut chu a hmu zawm zat bawk. Khum aṭanga thovin a phone-ah dar zat a en leh nghal a, a la tlai chhe lutuk lo e. A vawi eng emaw zah nân Manuel-a vangin a ṭap muhil leh ngei tih chu a hria a, zan lama an inbiak dan a ngaihtuah let chuan thawveng tur a nih tawh tehreng nen a thawveng leh thei chuang hauh si lo. A hmasa zawk aiin an inkarah engmah a awm tawh lohzia a chiang tawh a, tunah chuan nun pangngaia a nun a ngai ve tawh tak zet a ni.

A sawi lawk ang ngeiin Manuel-a chuan a them paw'n a be tawh ngai lo va, a hmuh turin a hmel a lang khât sawt hle bawk. Rosy-i nen la inkawp reng mah se a tana hmuh nuam lo turin an awm dun tawh ngai lo va, engkim chu an intawn hma ang vek kha a ni ta. Practical Class an neih paw'n an inbe ngai mang lo va, Manuel-a chuan a hrilh paw'n ngawi rengin tiang hmangin a hrilh mai zel a, Loicy-i tan erawh Music a man hrim hrim avangin harsatna a awm hran lo.

Thla hnih laiin kum chanve pawh an kal pel leh tawh a, an hma lawka Competition lo awm tur atan Loicy-i chu a inbuatsaih urhsun em em a, chu hun baka chance ṭha chu a nei tawh dawn lo tlat a ni. Piano Competition vawi hnih lai hma chhawn tur a nei a, pakhat chu Inter-School Piano Competition a nih laiin pakhat zawk chu ram pum intihsiakna a ni thung. A chhungte lam pawh kum hmasa ai thlawt chuan a be ngun a, a nitin hun hman dan te a hrilh ṭhin a, a chhungte mai bakah Simon-a nen chuan an inbe awl lo bawk.

A chang phei chuan Manuel-a nen an la inngaizawng emaw a ti leh thut zel a, Simon-a nena inbiak reng te chu phatsanna rawng a kai lek lek ni maiin a hre hial ṭhin a, mahse chung zawng zawng chu a suangtuahna vak vel mai mai a ni tih a hre chhuak hnuhnawh ziah tho. Ṭum dang zawng aiin Simon-a chuan a rawn be ngun lehzual a, a hmangaihin a duh em em tih pawh Loicy-i chuan a hrethiam ve vek a, mahse a thinlung chu a nazawnga hawn leh mai mai a tum tawh lo a ni.

"The DJF Company rochuntu tur Manuel Jason Firth-a leh Rosy Laila Cathrine-i te chu an inhual tih thu thang a tam hle a, a hmeichhe lam zawk hi chuan an inhual thu a sawi chiang tawh hle a, a mipa lam pawh hian" Loicy-i chuan a laptop chu a khup hmak a, a chhiar zawm ngam tawh thlawt lo a ni.

"Ka tel lova i hlim zel thei bik hi ka awt ngawt mai che Manuel" ti sepin Celling chu a melh ngat ngat a, a rilru chu hmun dang daihah a awm thung, thla tam liam tawh mah se Manuel-a leh Rosy-i inhual thu thang chuan a la tina hle a ni.

Chutia lungngai leh rilru na ru taka a mut lai chuan Simon-a hnen aṭang phone call a dawng a, a ṭhianpa chuan a mood ṭha lutuk lo chu a tihdanglam theih ngei a beisei bawk. Simon-a nen chuan thil chi hrang hrang an sawi dun a, an naupan lai te an sawi chhuak a, Loicy-i paw'n nuih ver ver chang a ngah ve ta mai.

An titi dun fê hnuah Simon-a chuan Boston lama zin a tum thu chu a sawi a, Loicy-i pawh a lo phur thiam khawp. A ṭhianpa chu a khawharna hnemtu awm chhun a ni a, a chhungte bula a sawi ngam loh a sawina a ni bawk a, a tan chuan hlu vet vet tak a ni.

Thla leh maiah Inter-School Piano Competition a awm tawh dawn bawk a, mu lova Music Note chhiar tlaivar ṭhak ṭhak te a nei a, School aiawha pakhatna lawmman lak ngei chu a tum a ni. Kar a ral chuan Simon-a nen pawh an hmu ta, mahse Simon-a chu Hotel dangah a thleng a, Loicy-i apartment-a thlen chilh tawp zawng hawihhawm loh thlak a ti ve deuh a ni.

"Thla lehah khian Inter-School Piano Competition kan nei dawn a, i hman chuan awm ve la ka ti khawp mai. Competition ka hma chhawn apianga i lo awm ve hian pakhatna ka ni ziah tih hria la, pakhatna ka nih leh theih nân min han pui leh teh" Loicy-i chuan nui var var hian a ti siam siam a, a hma zawna ṭhu Simon-a pawh a nui lo bik chuang lo.

"A sawmtuin a zir bawk a, chuti chu Boston-ah hian ka cham rih a va ngaih hmel ve, pakhatna i nih ka duh ve ngei bawk si a" Simon-a chuan a rawn ti ve mai a, an zanriah ei boruak chu ṭhian inkawm ngeih tih takah a nuam an ti dun leh hle bawk.

"I awm theih dawn chuan a ṭhat hlauh chu, ka pakhatna ngei pawh ka ring" Loicy-i chuan Simon-a chu awm ve se a ti tak tak a, a naupan lai aṭang tawh Simon-a'n a ṭawiawm chuan a pakhatna ngei ngei ṭhin.

Chutia an inbiak mawlh mawlh lai chuan an piah aṭang Camera a rawn de zawk a, mahse Loicy-i chuan engah mah a ngai tawh lo. Manuel-a nen thla eng emaw zah an lo inkawp ve tawh avanga mi hriat leh lar ve mai chauh a ni tih a hria a, chu chuan an inṭhen hnu thlengin a chen chilh tih pawh a hria, tunah erawh palzama ngaia neih chu a thiam chho ve ṭan tawh a ni. Simon-a chuan a kut chu rawn chelh kangin a fawh sak zeuh a, infawh a nih tawh hi chuan Manuel-a a hre chhuak leh nge nge ṭhin.

Simon-a chet dan chu pawi tihna pawh a nei hran chuang lo, engah mah ngai lotu Manuel-a paw'n nupui hual lai a nei leh tawh a, chuvang chuan ngaihzawng neih ve leh mai chu a duh ta a ni. Pangngai takin Simon-a nen chuan inngaihzawnna an la nei lem lo va, mahse Simon-a chuan a hmangaih em em tih a hre thung. A laka Manuel-a chet dan vang tal paw'n Simon-a chu duh ve a tum ṭhin a, mahse duhna tak tak a nei thei der lo a ni.

Thla a ral chuan Loicy-i te Competition ṭan ni pawh a rawn her chhuak nghal a, a lo sawi lawk tawh ang ngeiin Simon-a paw'n Competition an neih niah chuan a ṭawiawm bawk. Tin, Loicy-i chu School aiawha tel a nih avangin Professor pahnih leh Miss Lily-i'n an kalpui a, ṭawiawmtute zinga Professor pakhat zawk chu Manuel-a a ni.

Manuel-a chuan Competition an ṭan hma aṭang tawh Piano Piece har zet mai play turin a hrilh a, mahse vawi khat chiah a sawi thung. Chumi ni aṭang chuan Loicy-i paw'n Manuel-a Piano Piece sawi chu in lamah a zir zawm char char zel a, an inkarah engmah a awm tawh lo bawk nen a Mentor thu sawi chu a kipa kawia zawm vek a tum a ni.

Darkar tam pawh a liam hmain Loicy-i perform hun chu a rawn thleng a, Manuel-a awm ve vang nge ni a zam ru em em bawk. A perform hmain Simon-a ṭhutna lam chu a hawi leh hram a, Simon-a paw'n hmui phunin a lo fuih mawlh mawlh a, zam ru hle mah se ṭha takin a perform tluan thei ta hlauh mai.

A perform zawh chuan dingin mipui hawi zawngin vawi hnih a kun a, tlar hmaa lo ṭhu Manuel-a chu a en zeuh bawk a, mak tak maiin Manuel-a lo buk khum zeuhna chuan a rilru a tihahdam sawng sawng thei a ni. Green room-a a luh rualin miss Lily-i chuan a rawn zui lut nghal a, a perform ṭhat thu ringawt chu a sawi bawk. Loicy-i chu a nui deuh reng a, ṭha taka a perform thei chu a lawm ve êm a ni. Miss Lily-i thu sawi pakhat erawh chuan a rilru a tikal thui khawp mai, a hlimna te chu an bo ta vek emaw a ti hial a ni.

Miss Lily-i chuan Manuel-a'n pakhatna a nih dawn thu a lo sawi lawk dan vel chu a hrilh melh melh a, a perform zawh hnu lawka Manuel-a haw daih thute chu a sawi leh zel bawk a, Miss Lily-i chu a en deuh hû ringawt. Miss Lily-i lah chu a ṭawng tui mai bawk si, dik tak chuan Manuel-a chanchin chu sawi thui vak lo se a duh a ni. Engtin mah a chhan let loh tâk avangin Lily-i pawh chuan a sawi zawm zel ta lo va, tunah chuan Manuel-a kaihhnawih hrim hrim chu hriat loh a duh tawh zawk a ni.

"Ka lawmpui a che Loicy, i tiṭha lutuk" tiin Simon-a chuan a kuah chawt a, a inrin hma hauhvin a hmuiah a rawn fawp vawng vawng a, Inter-School Piano Competition-a pakhatna dinhmun a hauh thei chu awih harsa a la ti fân a, a lawm tho bawk si.

"Ka sawi kha maw, min ṭawiawm avangin pakhatna ka ni leh ta a nih hi!" hlim zet hian Loicy-i chuan a lo ti ve a, hma hun hre lo mah se Simon-a chu a khawngaih tlat tawh a, ani nena inngaihzawn chu inchhir awm loh turah a ngai tawh a ni.

Competition an neih ni chuan result puan nghal a ni a, Loicy-i chu vanneih thlak takin Inter-School Piano Competition-ah pakhatna a ni a, amah ang thova pakhatna dinhmun hauh mi dang pakhat a awm bawk. Simon-a nena an inkuaha an infawh lai chuan an sir lam aṭang miss Lily-i chuan a lo en reng a, mak a tih hmel hle bawk. Miss Lily-i hmel inthlak danglam lutuk chu Loicy-i chuan a hre lo pawh a ni lo, a hre lo der mai chauh zawk a ni.

Apartment an thlen hnu chuan a chhungte chu pakhatna a nih thu a hrilh nghal bawk a, an lo lawmpui thiam khawp mai. Competition an neih hnu lawkah Simon-a chu Australia ramah a thlawk haw a, Loicy-i chu a khua a har ru nghal vawng vawng a, Simon-a nen chuan inngaizawng angin awm ve tawh mah se a hmangaih lo tih chu an pahnih chuan an hre ve ve thung a ni.

November thla an chuang kai a, thlasik khaw vawt hnuaiah pawh Loicy-i chuan a thil zir a la ṭhulh chuang lo. Ram pum huapa inelna a hma chhawn leh tur chu Inter-School ang mai mai chuan a ngai thei hauh lo va, chuvanga zir urhsun zual em em pawh chu a ni. Thla hmasa mai khan Simon-a hnen aṭang nupui atana sawmna a dawng hlawl a, mahse ani chuan a lo hnar thung. Simon-a chuan a laka a beidawn mai mai dawn loh thu a hrilh a, a nghah theih thu chu a sawi deuh reng bawk.

December thla tir lamah ram pum huap inelna chu neih a ni dawn a, Japan ramah nghah a ni dawn bawk a ni. Kum danga an lo tih ṭhin dan angin November thla tawpah chuan Graduation Day an hmang a, zirlai naupang hlim taka an awm laiin Loicy-i ve thung chuan hlimna tak tak a nei thei lo a ni. School neitu hnen aṭang School aiawha pakhatna a nih avangin chawimawina te chu a dawng a, mahse a hlim chhung a rei hlawl lo, Simon-a nen inngaizawng tawh mah se Manuel-a chu a la hmangahin a la ngai em em tlat a ni.

"Pakhatna ni leh turin duhsakna ka hlan a che, i perform chhung zawngin i piece play bak i rilruah awm suh se" Manuel-a chuan aw dam zet hian a ti thum dup a, ding chungin pawn lam chu a thlir voh voh a, Japan rama a kal hma hmuh a duh vanga Loicy-i nen chuan inhmu an ni bawk.

"Aw le Professor, min duhsakna hi tihhlawhtlin ngei ka duh a ni" tiin Loicy-i chuan a lo chhang let ve sep a, minute 10 chuang an ngawih dun reng hnu chuan sawi tur a neih tawh loh ringin Loicy-i chu Office aṭang chuan a chhuak a, School Campus a chhuah rualin Simon-a hmel chu a hmu zui nghal.

Japan rama a kal hun a ni tawh avangin Simon-a chuan rawn ṭawiawm leh a duh tlat a, Loicy-i paw'n pawi a lo ti lo nasa a ni. Loicy-i chuan Simon-a chu a vannneihna bulpuiah a ngai tawp a, a rawn ṭawiawm chuan ram pum huap ni mah se pakhatna dinhmun a hauh theih leh hlauh a ring bawk. Engkim chu a nih dan tur ang thlapin a zir thiam tawh a, a piece play tur pawh a hma ang bawkin Manuel-a thlan sak leh a ni nghe nghe.

Darkar 14 dâwn thlawhnaa an chuan hnuah Japan ram chu an thleng a, Tokyo-ah inbengbel nghalin an awm man engkim chu School-in a tum sak a, a rin ai daihin Japan ram boruak chu a lo nuam bawk. An thlen zan la lâin Loicy-i leh Simon-a chu an hawi khawthawng nghal a, zan boruak nuam tak zawng a ni chiang a ni. Zawi zawiin Loicy-i paw'n Simon-a chu a ngaina ve zel a, a hma ang ngawt kha chuan a en reng thei bik tawh lo tih chu a hre chiang em em.

Tokyo-a ni hnih an cham hnu chuan Competition pawh ṭan a ni ta, Loicy-i chu a zam kher mai. Audience Seat lamah mipui chu an ṭhut khat vek a, intihsiaknaa tel tur pawh an tam a ti hle bawk. Inter-School Competition ang ngawt kha chu a nih a ring lo sa hrim hrim a, mahse ram pum huapa inelna boruak zet zawng Loicy-i tan chuan a zam awm thlawt a ni. Intihsiaknaa tel tur te chu room khatah an awm khawm vek a, hall chhung chu thil puang riin a luah khat hneh tawh hle.

Minute-a rei lotê hnuah Loicy-i hming chu an rawn lam ta mai, a beisei aia a perform hma tur chuan a tizam zual a, chuti ang reng chuan a la zam ngai lo. A awmna room aṭanga chhuakin Stage lamah chuan a kal a, Stage-a a hmel a lan rualin mipui chuan kut an lo beng dur dur a, zâwng zawng ṭhin mah se Simon-a hmel reng a la hmu thei lo zui. Mipui hmaa vawi khat a kun hnuah Piano bula ṭhutnaah chuan a ṭhu a, chu veleh thawm chu a reh nghal ṭhuap bawk.

Loicy-i chu maimitchhingin a dak vang vang a, a piece play tur Note chu ngaihtuah letin second eng emaw zah chhung chu a ṭhu ngawi reng a, chu chu Manuel-a zirtir dan vek a ni. A mit mengin zawimuang hian a kut chu piano chungah a dah a, Music Note-in a sawi tum ber play chhuak turin a hmet ri ta. Music Composer leh Classical Pianist hmingthang ni bawk Chopin-a phuah 'Revolutionary Etude' ngei mai chu rilru pe takin a play mawlh mawlh a, a rilru a pek lutukna lamah a hmeh tur chu pakhat mah a en lo hial a ni.

A piano piece play awmzia ngaihtuah pah rengin Australia ram tana chhuak a nihna te chu a ngaihtuah kir a, Australia ram chu a theih ang anga tihhmingṭhat a duh a ni. A play zo chiah chu kut beng dur durin mipui an lo ding suau a, ani erawh a la meng thei rih lo, chuti ang taka rilru pe chuan a la play ngai lo va, amahah chuan thlamuantu awm ang tlata hriatna a nei a ni. Maimitchhinga ṭhu reng thei a ni lo tih chu a hre chhuak a, a din rualin mipui chuan kut an lo beng nasa zual a, zam em em chunga a play chhuak thei chu a lawm a ni.

Hall pawna a chhuah rualin Simon-a hmel a hmu nghal a, Simon-a chuan a perform ṭhat em em thu a lo hrilh mawlh mawlh a, tunah chuan a ni khatna an zo fel ta. Hotel lamah letin a tuka a play tur chu a zir leh nghal mial mial a, Simon-a phei chuan chawl hahdam ve rih turin a ti nghe nghe a, mahse ani erawh chawlh hahdam a tum teuh lo. Eng vangin nge a Mentor Manuel-a chuan chuti ang piece chu play tura a tih a hrethiam lo va, hrethiam miah lo mah se Music Note inrem dan leh a rawn rik chhuah dan hrim hrim chuan a rilru chhungril a fan tlat thung.

Zing dar 3 velah pawh Loicy-i chu a la meng kar a, Simon-a erawh a muhil bawrh bawrh tawh thung. A muhil thei lo chu Music Note a chhiar nawn tluk tluk a, darkar eng emaw zah a liam leh hnuah mipui hmaah a perform leh dawn tih chu a hre reng a, a helhhawlh nge a huphurh tih pawh a inhre lo a ni. Ni a chhuah rualin room chhunga Piano chu a hmet ri nghal a, khuma muhil mek Simon-a lakah chuan a inthlahrung buai vel duh tawh lo a ni. A piano piece play tur chu a perform hmasak zawk anga ri buan buan chi a ni tawh lo va, lungkuai em em a ni tawh thung.

Darkar 5 a liam a, Loicy-i chu Green room-ah a ṭhu leh reng tawh. Zing lama Simon-a fuihna te chu a rilruah a awm leh tawh lo hrim hrim a, mahse ni khatna ai ngawt chuan a zam tawh lo deuh thung. Chawhnu lamah Loicy-i chu Perform turin an ko chhuak leh a, a play chhung zawngin a mit a chhing leh tlat a, a piece play mekin a zir bawk a, a mittui chu a dang zo lo hial a ni.

Tunah chuan a hrethiam ve ta chiah e, Manuel-a'n chu piece kher play tura a tih chhan chu a hrethiam ve tawh a ni. Hmangaihna avanga a nun a hlim lai te, Manuel-a nen ho lam taka an inṭhen lai leh a nun hlui tam tak chu a ngaihtuah chhuak lo thei lo a ni. A play zo chiah chu kut bengin mipui an lo ding leh suau a, ani erawh a ṭah a la chhuak ru em em thung.

"Loicy, kei hi i pasal atan min nei ta che? I hun kal tawh ka hria a, hmangaihna avangin i na tih pawh ka hria e. Kei chuan ka hmangaihna sang berin ka vur che ang a, min hmangaih let ve ngei theih nân ka theih tawp ka chhuah bawk ang" an thlenna room chhunga an awm laiin Simon-a chuan a rawn ti hlawl a, Loicy-i erawh a meng buai nasa hle.

"Simon!" ti hluaiin sawi leh tur pawh hre chuang lo chuan a ngawi reng a, a hmaa mipa ṭhingṭhi chu a en ngawt ngawt a, amah hmangaih em emtu a ṭhianpa chu beidawng taka siam a duh bawk si lo, a rilru a va'n buai ta em.

"Min ring rawh Loicy, kei hian ka hmangaih tak zet che a ni. Ka thu sawi zawng zawng kha ka rilru chhungril aṭanga rawn chhuak a ni a, natna ka pe ngai lo vang che" a hmaah Simon-a chu a la ṭhingṭhi reng a, chhan mai dan tur pawh a hre lo.

"Ka ngaina ve tawh viau che alawm Simon, mahse hmangaihnaah hian zuan luh leh ka la duh rih lo a ni. Hmangaihna hian min tina a, ka hriatthiam phak bakin min tidanglam bawk" Loicy-i chuan a ti ta ringawt a, a rilru chu a insual nasa hle bawk.

"Ka hria, ka hre lutuk alawm Loicy, khawngaihin ka sawmna che hi pawm hram rawh" Simon-a thu sawi avang chuan thawk a la hawk a, a rilru chhungril berah chuan Manuel-a a la besei tlat a, mahse rei lovah a rilru chapona chuan a thinlungah hmun a rawn chang ta.

"Aw le, ka nei ang che, mahse ka hmanhmawh lo Simon" a tih rualin Simon-a chu a ṭhingṭhitna aṭang a tho nghal thuai a, Loicy-i chu a fawp vawng vawng a, mahse Loicy-i chuan Manuel-a fawhna nen a danglamzia chu a hre chiang hle a ni.

"Ka lawm e Loicy, ka lawm tak zet a ni. Naktukah Competition result a chhuak ang a, pakhatna i nih leh ngei beisei ang. Kan rama kan haw hunah chuan kan awm dun zel ang a, inneih pawh i hmanhmawh deuh sawt maithei a ni" Simon-a fiamna avang chuan a nui hak a, Loicy-i chuan a hma angin thu tlukna siam sual tawh lo hram se a duh ber tawh a ni ber.

A hnung lam aṭanga kuahtu thaw ri sêk sek chu thawm awm chhun a ni tawh a, zan a rei ve tawh bawk nen muthilh loh a hun tawh lo hrim hrim zawk a ni. Loicy-i lah chu a mut a chhuak lo tulh tulh a, dik tak chuan a ngaihtuahna a la buai a ni. A kutzungṭanga zungbun awm chu a en leh ṭhin, Simon-a chu rilru na takin a siam mai mai ang tih a hlau ru ta hle bawk. Manuel-a leh Rosy-i an inhual thu a ngaihtuah chhuah thut avangin a tha a na tlat a, Manuel-a anga hma lam pan chu a duh ve tawh vanga Simon-a sawmna pawh pawm a ni.

"Lawmman pakhatna dinhmun changtu chu New England Conservatory of Music School aṭanga Graduate hlim hlawl, Australia mi leh sa ngei Loicy Wilson a ni e" thu puangtuin a hming a rawn lam chiah chu a kun tlawk tlawk a, tunah chuan Loicy-i chu a duhthusam thleng dikin a hlawhtling ta.

Lawmman an pek lai te chuan lawm lutuk avangin a hnuk a ulh hial a, a rilrua rawn lang hmasa ber chu Manuel-a a ni. Engkimah a pui a, inngaizawng tawh lo mah se a tan Mentor ṭha em em a ni a, amah vang chauha chuti ang dinhmun hauh thei chu a ni tih a hre chiang ta hle bawk. Japan rama cham rei pawh duh lovin Loicy-i chuan haw a rawt nghal a, Simon-a paw'n a lo hnial hran chuang lo.

Loicy-i chu a nui deuh reng a, a ṭah a chhuak ru deuh reng bawk. Zing chhuah an nih avangin chawhnu lamah Boston khawpui chu an thleng a, khawiah mah kal kawi hmasa lovin Loicy-i chuan Manuel-a office lam a pan nghal chat a, lawmthu sawi a ba tak meuh a ni. Office a luh rualin Manuel-a hmel tak run chu a hmu nghal a, a bula Rosy-i lo ding reng pawh chu a hmuh hmaih hauh lo.

"Ka lawmpui a che Loicy, tunah chuan i nih châk em em chu i ni ta e" nui lui tih hriat zet hian Manuel-a chuan a rawn ti a, Loicy-i erawh a insum thei tawh lo, Manuel dinna lam panin a phei hmawk hmawk a, Rosy-i lo en dante chu a ngaipawimawh duh tawh lo a ni.

"Nangmah vang chauh a ni Manuel; nangmah vang chauh. Ka lawm e, ka lawm lutuk, ka laka i thutiam i hlen avang hian ka lawm lutuk" Manuel-a taksa nghet taka kuah chung chuan a ti mawlh mawlh a, a ṭap chhuak thei mai dawin a hria.

"Ka lawmpui bawk a che u, nupa hlim takin in ni dawn nia" ti lehin a ṭhi chu a pawt chhuak a, a ṭhia zungbun chu la chhuak lehin Manuel-a kutah chuan a dah a, Manuel-a mitah chuan hriatthiam lohna a lang nasa hle bawk.

"Tunah chuan ka theihnghilh ve tawh tak tak ang che Manuel, ka hriat chhuah tâk chu maw kan hmangaihte ai hian min hmangaihtute hi an lo pawimawh zawk tih hi a ni" tiin muangchang hian a kut chu Manuel-a biang zawnah dah chho riai riai a, mahse a awm dan chu hre chhuak thutin a dah thla leh nghal vat.

"Ni lo, tunah chuan i hmai si ve ringawt thei pawh ka ni tawh lo e. A chhan chu mi pasal hual i ni tawh a, kei pawh mi nupui hual ka ni tawh tlat" Loicy-i chu a nui lui sang a, a nuih erawh za lo tak a ni.

"Ka kal ang e, a tawp nân heti ang dinhmun ka thlen theihna chhan chu nangmah i ni a, i chungah ka lawm nawn leh ni rawh se" a tih lai te chuan Manuel-a mit chu a kutzungṭangah chauh a la bur ngar ngar a, chu ringawt pawh chuan a tiṭap thei mai dawna a hriat avangin Loicy-i chu a chhuak ta vang vang.

THE ONE WHOM MY SOUL LOVES (M&B)

By

Havali Adam

Chapter 18

School Campus chhuahsan tumin Loicy-i chu a kal pawk pawk a, kalkawngte chu a hmu phe vek a, a mittui chu a biangah a dir zawih zawih bawk. School Campus pawna lo nghaktu Simon-a hmuha ṭap hmel put chu a duh bik hauh lo, mahse a mittui chu a dang thei chuang si lo a ni. A mita mittui a tlin nasat lutuk avangin a tluk ṭhelh nghe nghe a, a khaw hmuh chu a fiah lo vek tawh a ni ber.

A bianga mittui luang hru tâwkin a van vadaka a, thawk chu a la hawk a, tlai lama Boston khawpui chhuahsan an tum avangin a kal leh ta sawk sawk. A kal chak viau emaw a tih laiin vawi leh khatah tha chak zet hian a rawn pawt ding chawt a, leh hawia Manuel-a hmel a hmu chiah chu a ṭah a chhuak zual sauh a, Manuel-a pawh zah zo lovin a ṭap ri ta nge nge.

Manuel-a chuan nghet takin a âwmah a kuah bet thuai a, ani paw'n a theih tawpa nghetin a lo kuah let ve ṭai bawk a, Loicy-i chuan chu ni chu Manuel-a nen an inkuah hnuhnun berna a nih a ring tawh a ni. A ṭah chhuak zualpui a reh fel hnu chuan Loicy-i chu a inla hrang a, Manuel-a chu a chho melh zawm zat bawk.

"Kal suh Loicy, kal miah suh, ka bulah awm rawh" Manuel-a'n a rawn tih sup chuan za lo zet hian a lo nui tawi tak a, a hmelah chuan lungngaihna leh hlauhthawnna ni awm tak tak te chu a hmu zut zut a, mahse engkim chu lemchanna a ni tih a hrethiam tawh a ni.

"Ni lo, ka kal ang. Vawiin hi kan inhmuh tawp berna tur a nih ngei ka beisei. Vawiin aṭang chuan nang ka hmangaihna che hi ka vawm bo ang a, min hmangaiha min hrethiam em emtu Simon-a hmangaih ka tum tawh thung ang a, pasalah ka nei bawk ang" Loicy-i chuan a ti zawi raih a, kal mai a tum chu Manuel-a chuan a lo la chelh ran mai.

"Kha pa ai let khan sum ka ngah asin, chu bakah kei hi min theihnghilh mai mai dawn bawk lo. Chuvang chuan kal suh, ka bulah awm rawh" Manuel-a thu sawi avang chuan a thinrim lek lek tawh zawk a, tunah chuan a zia a hre chiang ta bawk a, an inṭhen te chu a lawm hliah hliah a ni.

"Heti ang em ema mi chapo i nih hi ka lo beisei lo asin Manuel, ka hmangaih ṭhin em che avangin heti ang mi i nih hi ka ring phal ngai lo bawk. Tunah chuan i hmel hmuh leh pawh hi ka duh tawh lo ve, hrereng rawh Manuel, i chapona hian engtik niah emaw chuan a la tichhe ngei ang che" tiin Loicy-i chu a kal hmawk hmawk a, a ṭah reng a chhuak tawh lo, a thin a rim em em tawh zawk a ni.

"I ṭha em Loicy? I ṭap em ni? Ka phal lo chung kha pa kha hmuh i duh tlat a, ka rin lawk ang ngeiin rilru na hmel i pu leh ta" Car chhunga a luh rualin lungawi vak lo hian Simon-a chuan a lo ti nghal a, a ṭhianpa leh a pasal hual ni lo se chu a chhang kher lo vang.

"Ka rilru chu a na ngei a, mahse a na lo thuai ang. Airport lamah kan kal nghal mai dawn em ni Simon? Darkar tam pawh kan nei tawh lo, kei chuan phei nghal mah ila pawi ka ti miah lo" Loicy-i chuan Boston khawpui chu chhuahsan thuai thuai a duh a ni.

"Aw le, he ram hi zawng i tan pawh a nuam reng lo vang, Austrailia ramah i kir vat zawk tak teh ang" tiin Simon-a chu a tlan chhuak nghal a, Loicy-i awm dan chu a hrethiam vek a, hmangaih hle lo se chu thikna avangin a thin a rim ngei ang.

Thlawhnaa an chuan chhung zawngin Loicy-i rilru chu a la pangngai thei lo va, a kutah emaw a nghawngah emaw Manuel-a nena an lo inhual ve tawhna zunbun chu bunin awrh tawh lo mah se vawi leh khata theihnghilh mai chu a la harsat tlat a ni. Simon-a kokiah a lu a nghat a, Simon-a paw'n thlamuanna thu sawi lo mah se a chal leh a samah chuan a fawp deuh chhen a, chu chu Loicy-i chuan thlamuan a tumnaah a ngai mai bawk. Thlasik rim a nam ṭha leh vah vah tawh bawk a, Australia ram chhung boruak chu North America boruak ang ngawt chu a ni lo hle.

Airport aṭang an in lam pana an tlan lai te chuan Manuel-a chunga a awm dan chu a ngaihtuah let a, khawvel hriata amah hmel hriattir tu leh an ram a tih hmingṭhat theihna chhan ber laka a awm dan chu mawi lo a ti hnunhnawh a ni. Kum 2 chhung ngawt Manuel-a hnuaiah zir lo se chu a nih tum a ni thei kher lo ang a, mi hriat pawh a hlawh kher lo vang, a hlawhtlinna bulpui ber chu Manuel-a a ni a ti lo thei lo a ni.

Australia rama an awm hnu rei lovah Loicy-i chuan sawmna neuh neuh a dawng zawm nghal mawlh mawlh a, khawvel huapa pakhatna ni thei kha chu sawmna dawng zing awm pawh a ni. Ram hruaitute hnen aṭang lawmpuina chi tinreng a dawng a, a lawk zual phei chuan a puala Music Academy din emaw Foundation siam sak an rawt nghe nghe a, Loicy-i chuan phu a inti lo kher mai. A nu leh pate erawh chuan ṭha an lo ti em em thung a, chuti anga mahni puala Academy a nei thei tur chu a lawmpui viau tawh zawk a ni.

Christmas lai vel paw'n Australia ram chhunga Music School hrang hrang te'n an sawm awl lo va, a chhungte bulah pawh kum dang angin hun a hman hnem lo phah ta reng a ni. Kum thar an chuangkai a, Minister leh mi hausa zual deuh te chuan ram lei sakin Music Academy tur an sak sak nghal a, chu pawh Melton khawpuiah ngei a ni. A beisei phak bakin Loicy-i chuan mi duhsakna a dawng a, News velah pawh a lang ngun mawlh mawlh thei hle.

"Vawiinah chuan i kal dawn em Manuel?" Manuel-a chuan pu Stalon-a biakna chu a hre reng a, mahse thu tlukna a la siam hlei thei tlat lo, chhan let dan tur a hriat loh avangin a hma zawna zu bur chu a en tlawk tlawk ringawt.

"Manuel, i kal dawn a nih chuan i hun hman dan tur hi siam danglam a ngai dawn a, chu bakah i kal dawn chuan chhuah a hun tawh viau mai" pu Stalon-a chuan a rawn ti leh a, ani erawh a la ngawi ngul thung.

"I kal tur angin ka ziak fel mai dawn asin, zu te kha in tawh lo bawk teh. I taksa a tihchhiat mai bakah Company lamah rilru fim i hman theih loh phah ang. Company hi i ta a ni a, a tluk chhiat i duh loh chuan insiam ṭha thuai teh Manuel"

"Ka kal lo vang, Australia ramah chuan ka kal dawn lo ni rawh se" pu Stalon-a ṭawng laklawh laiin Manuel-a chuan a ti nghet charh a, Loicy-i hnen aṭanga sawmna a dawn chu a en reng a, dik tak chuan Loicy-i chu a pawh ngam chiah tawh lo a ni.

"Aw le, kal lo tur angin ka ziak dawn che a nia, vawiin tlai dar 3-ah Meeting a awm dawn bawk e" tiin pu Stalon-a chu office aṭang chuan a pen chhuak zui nghal a, Manuel-a erawh a Necktie pawt thawlin zu chu a in leh ringawt thung.

"Eng nge?" Rosy-i hnen aṭanga phone call dawn a pick up rualin a ti bul hmuk a, Rosy-i aw hriat reng chu a hne a, inhualna an sut leh hnu pawha a la rawn zar buai chhen te chu a ning hluah hluah a, a rilru leh ngaihtuahnaah chuan Loicy-i tih loh hmeichhe dang reng an awm thei lo a ni.

"Ka lo kal dawn a, i awm leh awm loh ka rawn zawt lâwk mai mai che maw le, kan inhmu dawn nia" Rosy-i chuan a rawn la ti ham ham a, mipa chu ni se vawi eng emaw zah kut a thlak tawh ngei ang.

"I hmel ka hmu peih teh hrep lo ve Rosy, nangmah vangin ka ât lutuk man ka tel mek a nih hi!" a ti ve ta hrawk a, tunah chuan Loicy-i thik tura inhualna a lo neih pui thawt thawt te kha a inchhir tawh em em zawk a ni.

"Keimah vang ni lovin i â tawh tak zet a ni Manuel, Loicy-i chuan thla lehah khian pasal a nei dawn tih i hre vek tawh alawm, mi tam takin an hre tawh zawk maw le" Rosy-i'n a rawn tih leh chuan a ngawi reng a, a chhan pawh a sawi dik tlat a ni.

"Eng pawh ni se lo kal lo vang che, ka hmuh peih lo che a ni tih hrethiam rual i ni tawh bawk. I lo kal lui a nih ngat chuan Security te'n mualpho takin an hnuk chhuak che ang a, nang nen inzawmna kan nei tawh lo tih i hriatfiah lehzual theihna turin ka che ang"

"Ni lo Manuel, nang nen chuan inkawp tur" lehlam aṭanga Rosy-i aw a hriat rualin phone chu a hmet tawp hmak a, a thinrim lutuk chuan zu bur chu a vawm keh chuai a, a nun ram chu a chau ngawih ngawih a ni.

Company a enkawl aṭang thla 5 lai a liam leh tawh a, mahse nuam tihna pakhat mah a nei lo a ni. Loicy-i hnen aṭanga a sawmna dawn chu a bih nawn leh ṭhin, tunah chuan Boston khawpui a chhuahsan hmaa Loicy-i thu sawite chu a dik tih a hre fiah tulh tulh tawh a ni. A rilru chapona avanga a hun tawn mek chu ngaihtuah pawh a ngaihtuah let ngam lo, ngaihtuah let tlak ni pawhin a hre lo a ni. A hun lai khan lo chapo lo deuh se, lo tlawm leh hret se zawng Loicy-i chu a chan hauh lo vang.

Ni hnih kalta mai khan Loicy-i hnen aṭang Music Academy thar hawnnaa tel tura sawmna a dawng tawh a, mahse kal loh law law chu a duh zawk a ni. A tirah phei chuan mak a ti ang reng hle a, a mimal Email address ngeia sawmna a rawn thawn chat thei chu mak a tih chhan ber a ni. Loicy-i chuan amah ang lo takin hma a sawn hle tih a pawh a hria, amah hmangaih em emtu mipa nen thla leh maiah an innei dawn tih thlengin a hria a, ani erawh zu ngawl vei ang maiin zu chu a khawharna hnemtu a ni thung.

Meeting an neih zawh chuan in lamah a haw tlang nghal a, tlai dang ang lo takin Bar velah a peng kawi lo ve teh mial bawk. In a thlen chuan a nu chu a lamah a lo phei nghal a, mahse a nu biakna erawh pakhat mah chhang lo. A nu chuan a room thleng a zui lut zel a, tlai lama an ina Rosy-i kal thu te chu a sawi malh malh a, Rosy-i a ngainat tawh loh thute chu a hrilh mawlh mawlh bawk. A nu chuan a awm dan chu a khawngaih tih a hre ru reng a, mahse a nu khawngaihna chuan engmah a thlak danglam thei chuang si lo.

Chuti ang bawkin a nau mitmengah chuan amah khawngaihna a hmu fô ṭhin bawk a, hmuh kân pawh tum se a thei lo a ni. A nu leh a nau mitmenga khawngaihna lang nasa lutuk te chuan rilru natna chauh a pe a, hlimna tal pe se a duh teh lûl nen eng hlimna mah a dawng si lo. A tih theih awm chhun chu zu in emaw lungngai taka indawm kun tlawk tlawk a ni mai, a bak eng thil dang mah tih theih neiin a inhre tawh lo a ni.

"Manuel, kei zawng Loicy-i hi hmuh mai ka duh, heti ang em em hian i awm ka ring ngai lo. Zah pawh dawn lovin hmu ila a ṭha ang, i hmeichhe hmangaih kiangah awm la ka duh ber a ni ka fapa" zanriah an ei laiin a nu chuan a rawn ti a, ani chuan lu a lo thing vat thung.

"Ni lo ka nu, thla lehah khian pasal a nei tawh dawn alawm, kan va tihbuai loh a ṭha ang" tiin a hmaa thleng awm chu a nawr sawn a, eitur chu a ngai ngaiin a la awm a, ei châkna a nei lo hrim hrim a ni.

"Ka kham ang e, nangni erawh tui takin ei rawh u" tih leh chaw ei dawhkan awmna aṭanga kal sawn chu a rual nghal a, zu a in châk pawh a ni lo, a rilru leh taksa pum chu inchhirnain a khat tawh a, chuvang chuan awm dan tur tak ngial pawh a hre tawh lo a ni.

Loicy-i a hmangaih a ni tih a inhre chhuak har lutuk chu a nat phah a, mipa nih avanga hmeichhe thû thua awm loh a lo tum ṭhin ringawt te chu âtthlak a ti a ni. Loicy-i chu a hmangaih ngei a, mahse a tlai tawh thung. A hmangaih thu hrilh tumin Australia ramah pawh a kal ngei a, mahse Loicy-i chuan a pasal hual Simon-a chu a hmangaih em em tawh tih a hre tlat a ni. A inchhir nawn awn awn a, a inchhirna chuan engkim siam ṭha thei se chu chhiar sen loh khawpa tam inchhir a duh hial a ni.

Khumah chuan a bawk khup a, a hun kal tawh te chu a ni tin tih ṭhin dan bawkin a ngaihtuah let a, Loicy-i nen hlim taka an awm dun lai te chu a mitthla a, chu ringawt pawh chuan a tinui thei tawh a ni. A tak ni tawh lo, mitthla mai chu a hlimna a ni a, mahse a lungawi vek tho. A chan tawkah ngaiin an hun kal tawha a hlimawm lai chu hlimpui a tum hram hram ṭhin a, hlimpui chang aiin hlimpui loh chang a nei tam zawk ṭhin thung.

"Loicy, i va ngaihtuah ding awm ve le, ka biakna che pawh i hre miah lo a nia" Simon-a'n a rawn tih chuan Loicy-i chu a inthiam lo kher mai, a awm dan chu mawi lo a ti a, zahzelah Simon-a chu a nuih ver ver ringawt.

"Ka zirlai naupangte lam ka lo ngaihtuah daih alawm maw le, eng maw i lo sawi a? I mi biakna ka hriat loh avangin ka tihpalh ni rawh se, tunah chuan ka ngaithla tawh e" Loicy-i chuan a ti zung zung a, dawt erawh a sawi tel hram a, a thil lo ngaihtuah chu Simon-a hriattir chi niin a hre lo a ni.

"Eng pawh ni se zan a rei hma hian ka va haw ang e, naktuk chu ka phur nasa tawh mai bawk si, nang pawh i hmel aṭang i phur ve tawh hle a ni tih ka hre thei" Simon-a'n a rawn tih leh chuan khi ver ver hian a lo bu nghauh nghauh a, Simon-a thawh rual chuan a tho zui ve nghal mai bawk.

"Naktuk chu kan pahnih tan ni Special tak a ni dawn a, mo thuam famkim nena i hmel hmuh ka châk tawh ngawt mai Loicy, ka hmangaih che" a pasal ni mai tawh turin a tih chuan a hmangaih thu a lo hrilh let ve nghal a, an infawh zeuh hnuah Simon-a chu a tlan liam ta vang vang.

Loicy-i chuan Simon-a chu pasal atan neih a inpeih tawh a, thla tam tak a liam hnuah ama duh thu ngeiin thu tlukna pawh a siam fel tawh a ni. A pasal tur chu a nihna engkim hretu leh amah hmangaih em emtu a ni tih a hria a, chuvangin ani paw'n tunah chuan a hmangaih ve tawhin a hre bawk. Inneihna Card thlengin sem chhuah a ni tawh a, mi hriat a lo hlawh ve tawh tho bawk nen News-ah leh Magazine velah pawh a lang tam leh ta hle. A ṭhenin a pasal tur Simon-a chu vannei an ti a, mahse ani chuan amah chu vannei a inti daih zawk a ni.

Khatia Music Academy an peih fel hnu khan Manuel-a hnenah telpui tura sawmna a thawn ngei a, a hmel erawh Music School hawn niah pawh a hmu ta chuang lo a nih kha! A sawmna lehkha a hmu lo ti dawn se a mimal Email address-ah ngei a thawn a, a hmuh lo chu a ring lo hrim hrim. Khata ṭang kha chuan beisei leh chuan tur pawh a nei tawh lo tih a hre chhuak hnuhnawh a, a hlawhtlinna phena Manuel-a a awm tlat avanga sawm pawh a ni; khami ni aṭang kha chuan biak pawh a tum leh tawh lo a ni.

"I va han mawi tak em Loicy, i hmelṭha lutuk, a hmuh hunah che Simon-a chu a thidang mai ang tih a hlauhawm zawk alawm le" a mo kawr hak lai chul ṭha mawlh mawlh pahin a nu chuan a ti a, ani erawh a lo lai nasa hle thung.

"I mawi e Loicy, inneihna hmunah chuan i va kal thuai teh ang u. Kan tlai lutuk chuan a chi lo vang, mipui pawh an lo awm tawh nual zawk maithei a ni" a pa chuan a bianga piai zeuh pah hian a rawn ti a, a pa hmelah chuan hlim tak tak lohna awm tlatin a hria a, mahse chu zawng thil theih a nih a ring lo a ni.

Inneihna hmun tur an thlen chuan mipui chu an lo ṭhu ṭhap tawh hlawm a, mahse a beisei loh deuhin Pastor bulah chuan Simon-a hmel reng a hmu lo. Amah ang bawkin a kuta chelhtu a pa chu a meng buai nghal nak a, Simon-a pa pu Wallace-a chu a biak zawm nghal zat bawk. Pu Wallace-a chuan a fapa chu a call char char a, mahse a tlang thei lo a ni ngei ang a mangan hmel tawh tak zet. Thil dik lo a awm tih hrethiam zetin mipui chu an phun deuh sar sar a, Loicy-i tan tak pawh chuan a zahthlak ve reng.

A tua te ma'n an biak tlang theih loh avangin a pa chuan Loicy-i chu Simon-a biak tum ve chhin turin a hrilh ta tawp a, ani pawh a che chhuak rang khawp. A vawi khat call naah chuan a ring ral ṭhak a, a vawi hnih nân a call leh a, a beisei loh deuhin Simon-a chuan a rawn chhang ta hlauh mai. Rang takin thil awm dan leh a awmna a zawt nghal zung zung a, a auin a au a ni ber. Simon-a chuan a rawn kal dawn thu leh thil eng emaw tih dun an ngaih thu a rawn sawi daih a, Loicy-i chuan a thu sawi awmzia chu a hrethiam lo kher mai.

"A lo kal mek" tiin an inbiak zawh rualin a pate bulah chuan a ti thawp raih a, ṭhenkhat lah chuan mo thuam nena a ding tlawng chu thla an laksak chhen a, mahse ani chuan a ngaihsak buai vel peih tawh lo, a zak ru ngawih ngawih tawh zawk a ni.

Minute 10 hnu velah Simon-a chu awm hmun kawr nen a rawn thleng a, a inthuam dan chu tu paw'n mak an lo ti vek a ni. A nupui neih nia a awm dan chu mi pangngai tih chi a ni lo, a chhungte phei chu thinrim tak an ni. A chhungte lo biakna pawh ngaihsak lovin Loicy-i chu car chhungah a nawr lut a, chak takin a tlan chhuahpui nghal bawk. Loicy-i chuan thinrim takin Simon-a chu a be mawlh mawlh a, a mi biak erawh ni dang ang lo takin a ngawi ran thung.

A hnuah phei chuan Loicy-i chu a ṭap chhuak tawp a, a thil tawn teh nuai chu a zo lo mai dawnin a hria. Chutah a pasal ni mai tur Simon-a lah chuan a rawn thlem eih lo va, Simon Wallace-a a ni lo emaw a ti ta hial bawk. Hmun reh leh thli thawt heuh heuhna hmunah an ding a, chu hmun chu Loicy-i chuan a hre chiang khawp mai. Chu lai hmun ber khera an dinna chhante chu a hre châk a, mahse Simon-a chuan a zawhna pakhatmah a chhang duh der si lo.

"Ni lo, i lo kal ngei tur a ni" ti deuh hrawkin Simon-a chuan a phone a off zui nghal zat a, Loicy-i chu a lo phu dâwrh nghe nghe a, a chhan pawh chuti anga vin leh hriat nuam loh chuan Simon-a chuan phone-ah mi a la be ngai lo tlat a ni.

"Ka tihpalh Loicy, kei hian ka nei thei lo che a ni" Motor Steering bawh ngul chung hian Simon-a chuan a ti zawi sup a, Loicy-i chuan sawi tur pawh a hre lo, chuti ang taka a vanduai chhan chu a hrethiam tawh bik lo a ni..

"A vawi hnihna atan thu tlukna ka siam sual leh ta e" pawn lam hawi vang vang chungin Loicy-i chuan a ti ve a ta sep a, Simon-a chu a haw thar em em a, amah avangin chanchinbuah leh Magazine tam takah a lang nual dawn tih a hre tlang nghal vek bawk.

"Engkim hi ka thiam loh a ni Loicy, min ngaidam thei lo mah la ka dem lo che. Nizan khan kan inneihna tur lawmpuina Mail-ah ka dawng a, min lo thawntu chu i hre duh em? Min lo thawntu chu i mipa hmangaih em em Manuel-a a ni asin; i thinlung aṭanga i paih chhuah theih loh mipa kha!"

"Min hre chiang lo hle mai Simon, ka hmangaih che avangin pasalah hial neih che ka duh a, min tibeidawng zual tak zet a ni" Loicy-i aw chu a zawi lo hle a, Simon-a rilru puthmang dik lo ta lutuk chu eng nge a chhan hriat a duh a ni.

"Ni lo, min hmangaih emaw i tih lai kan min hmangaih reng reng lo Loicy, min khawngaih mai chauh zawk a ni. Nizan khan Manuel-a chu ka chhang let a, ka insawi theih khum a ni ber. Inneihna thuthlung kan tiam laia kan ṭawng hre tur te'n ka sawm vel a, a rilru a khei hle a ni ang a rawn kal ta reng bawk"

"Enga!? Manuel-a Australia ramah a lo kal maw!?" mak tih lutuk avangin Loicy-i chu a insum hman thlawt lo, a ṭawng chhuah dan avang chuan Simon-a chu a lo ṭhen suk thung a, Loicy-i chuan thil awm dan chu a hrethiam lo tulh tulh a ni.

"In thup tawh suh Loicy, i têt tê aṭanga i kawm ṭhin hian ka hre chiang lutuk che. Manuel-a hi i la hmangaih reng a, ka hmangaih luatah che hma ka sial thui ṭep a, mahse tunah chuan keimah hian nuam ka ti tawh lo zawk a ni"

"Eng vangin nge heti ang hian i awm Simon? I â zo ta em ni? Kan inneih ni tur a nih hî, tu paw'n innei tur angin min ngai vek tawh asin, Manuel-a chanchin pakhat mah ka hre duh tawh lo bawk" Loicy-i chuan a rilrua awm ber a hre tawh lo hial a, Simon-a thu sawite chuan a timangang zual a ni.

"A chhan chu ka hnangaih che alawm Loicy, kei chuan i hlim ka duh ber. Lo innei ta ila ka hlim ngei ang, mahse nang chu i hlim tak tak dawn lo. Nizan khan ka tlaivar ṭhak asin, Manuel-a i hmangaihzia ka hre vek a, ka thei tawh thlawt lo a ni"

"I awm dan hian min tichau ngawih ngawih Simon, a vawi hnihna atan nang hian ka vanduaizia min hriat chhuah tir a ni. Ni e, i duh lo a nih te chuan kan innei lo vang, ka ṭhian ṭha em em leh ka pasal ni mai tawh tur hnen aṭanga phatsanna dawn chu a na khawp mai"

"Khati ang zawng khan ngai suh Loicy, tunah i rilru na rih mah se nakinah chuan i la hlim zawk ngei ang. Manuel-a pawh kan awmna a lo thleng ṭep ang, ni lo, a lo thleng tawh reng zawk a ni" Simon-a hawina lam chu a hawi phei nghal vat a, Manuel-a hmel ngei chu a hmu ta.

"Motor aṭang hian chhuak rawh le Loicy, hmangaih che mah ila i rilru dawn lovin ka zar buai tawh lo che ang a, ka thlah zalen tawh zawk ang che" Simon-a'n a rawn tih chuan a ṭhu ngawi reng a, a chhuak duh lo tih hrethiam takin Simon-a chuan a rawn kai chhuak ta hmak mai.

"Engkim sawi fel ang che u" nui var var hian Simon-a chuan a rawn ti leh a, Motor chhungah ṭhu lutin chak zet hian a tlan chhuak nghal a, Loicy-i leh Manuel-a erawh inhma chhawn reng tawh mah se an la ṭawng chhuak lo hrim hrim thung.

"I nalh hle mai" Manuel-a aw a hre chiah chu a chhungril aṭang tur tu a rawn awm tet tet a, chiang takin a ṭah a chhuak nghal em em tih pawh a hria, rei tak an din ngawih reng hnua Manuel-a biakna chuan amahah nghawng nasa tak a nei a ni.

"Loicy" dam raiha a biak leh na a hriat rualin a mittui chu a dang zo ta ngang lo, a ṭap chhuak feih feih a, rang zeta Manuel-a rawn kuahna te chu a ṭah tichhuak zualtu a ni a, a hnuah phei chuan a ṭap ri ta hawm hawm.

THE ONE WHOM MY SOUL LOVES (M&B)

By

Havali Adam

Chapter 19

"Ka tihpalh, ka tihpalh lutuk Loicy. Kei hian thil ka tisual a ni, min ngaidam mawlh teh" Manuel-a chuan Loicy-i chu a kuah nawn mawlh mawlh a, a hah te chu a dam sawng sawng a, Loicy-i lakah chuan inchhirna hlirin a la khat bawk.

"Ka hmangaih duh tawh lo che Manuel, i bula awm pawh hi ka duh tawh lo, a chhan chu nang chuan a tawpah natna bawk min hnutchhiah leh dawn tih ka hria a ni" ṭap chung hian Loicy-i chuan a rawn ti a, Manuel-a erawh rilru na takin a ngawi reng thung.

"Ka sawmna che pawh i hai der a, i rawn kal duh lo va, ka ngaihsan êm che avang leh ka hlawhtlinna bul ber i nih avangin ka sawm che a, mahse nang chuan min hnung chhawn tlat thung a ni" Loicy-i chuan a rawn ti leh mawlh mawlh a, Manuel-a chu a insum thei ta bik lo.

Loicy-i chu pawm kang nawlhin a fawp vawng vawng a, Loicy-i lo chhan letna te chuan a tiphur zual a, amah vanga ṭap mek hmeichhia chu a hmangaih tak zet tawh a, rilru na taka a ṭap hmel te chuan a thinlung chhung a tina pha hial bawk. Duh tawka an infawh zawh chuan leiah a la nghat thla duh mai lo va, a taksa aṭang chuan awm sawn tir emaw awm hlat tir a tum tawh lo a ni. Loicy-i pawh ṭap lovin a ngawi reng a, Manuel-a chuan duat zet hian a kuah bet ran a, an inkar chu ṭha tawh se a duh a ni.

Loicy-i nen an inhmuh leh theihna chhan ber Simon-a a ngaihtuah chhuak a, Loicy-i a nei duh leh lo thut te chu a lawm a, chu baka Chance ṭha chu a hmuh leh tawh pawh a inring lo bawk. Simon-a'n rawn be miah lo se chu khawi hmunah emaw kal daiha thla khat chhung vel chu engmah hre lova awm a duh a, a hmeichhe hmangaih ber Loicy-i'n pasal neih lai chu a hmuin a hre duh lo a ni. Natna tam tak a lo pek tawh Loicy-i chu namên lova nasain a hmangaih a, hmangaihna awmzia hriattir tu a ni bawk.

"Loicy" Manuel-a chuan a ti sup a, a bula mi erawhin a biakna hre lo ang maiin hma lam chiah a en ngar ngar a, a kut chu lak kân sakin a fawp a, mahse a chet dan avangin Loicy-i chu a la danglam chuang lo.

"Loicy" a tih leh chuan a lam a rawn hawi a, a nui lui zeuh bawk a, ṭap tawh lo mah se a hmel aṭang chuan a rilru a la na ngawih ngawih tih a hria, chuvang chuan eng pawh tih ngai dawn se Loicy-i chu neih let leh a duh a ni.

"Tunah chuan ka tan hian pasal neih emaw hmangaih neih a thiang ve lo tih ka ring thiam ta e, ka tan chuan hmangaihna hi natna mai a ni. Haw tawh rawh Manuel, vawiin hian inneihna a awm lo vang" Loicy-i biang chu a va dawm vat a, a mittui tling te chu tih kian vek a va châk tehreng em.

"Ka hmangaih che Loicy, kei hian ka thinlung leh tih tak zetin ka hmangaih tawh che a ni. Ka tidik lo tih ka hria, na takin ka siam che tih pawh ka hria, tunah erawh nang ka hmangaih che avangin ka danglam zo tawh a ni" Manuel-a chu hlauhthawnna hlirin a khat a, Loicy-i chu a chan hlen tak tak mai ang tih a hlau a ni.

"Min hmangaih ka ring lo Manuel, nang chuan Rosy-i chiah alawm i hmangaih" Loicy-i biangah chuan mittui a luang zawih a, chu veleh Manuel-a chuan che thuaiin a lamah a kuai her a, Loicy-i rin dan chu a dik lo tih fiah a duh a ni.

"Nang ang renga hmeichhe hmangaih hi ka la nei lo asin Loicy, i sawi lawk ang chiahin ka chapona chuan min vaw chhia a ni. Ka hmangaih che Loicy, ka hmangaih tak zet che" a tih laiin Loicy-i chuan

"Eng vangin nge insawifiahna hun pawh min pek loh? Min hmangaih a nih si chuan eng vangin nge min ṭhen? Rosy-i nen in inhual bawk a, engkima kha ka tan chuan natna a ni asin" a rawn ti phiar phiar a, ani erawh a ngawi leh ta reng.

"Ka ngaihtuah lutuk che avangin i pa chanchin rawn zawh che ka tum a, ka lo phone ṭhin bawk che a, mahse ka chan tawk chu mawi lo tak taka Rosy-i ṭawngkhumna leh phone tlang theih loh chiah a ni" Loicy-i thu sawi chu a hrethiam bik ta hauh lo mai.

"Enga!? Rosy-i'n ka phone a lo chhang maw!? Min hrilh chiang teh Loicy, hun eng emaw ti chhung kha chu ka phone ka khawih reng reng hleinem" Manuel-a chuan a lo ti vat a, mahse Loicy-i erawh chuan lu a lo thin khum daih thung.

"Awmzia a awm tawh chuang lo Manuel, kei chuan engtikah mah Rosy-i hi ka tluk dawn chuang lo. A chhe zawnga a chanchin ka sawi ringawt pawh hi i rilru chhungril tak chuan na i ti ngei ang, min hrethiam dawn nia"

"Min en teh Loicy, min en lûl teh" ti deuh hrawkin Loicy-i hawi sawn tawh chu a kuai her leh a, a aw chu a thunun hman bik ngang lo, Loicy-i nen an inkara Rosy-i chet dan tur chu a hrethiam nghal kuar kuar a, chuvanga thinrim pawh chu a ni.

"Min la hmangaih a nih phawt chuan i pa hnenah i laka ka chet dan avangin ngaihdam ka dil ang a, nupui atana neih che ka dil nghal bawk ang. Nang hian chapo theiin min siam tawh lo a ni Loicy, a chhan chu ka hmangaih tawh lutuk che" a tih chuan Loicy-i chu a rawn ṭap chhuak hak a, ani paw'n a lo kuah leh nghal thuai bawk.

"Ka la hmangaih reng che alawm, engtik lai mahin ka theihnghilh ngai lo che. I chanchin thlengin ka zirlai naupangte ka hrilh ṭhin asin, chuti ang khawp chuan na taka min hnung chhawn hnuah pawh ka thinlungah hian i awm reng ṭhin" Loicy-i thu sawi avang chuan a mit a chhing vang vang a, an chal chu a insik tir nghal zat bawk a, a inchhir lutuk chu thawk lak dan tur pawh a hre lo a ni.

"Ka tihpalh Loicy, min ngaidam thei ang em? Min la hmangaih reng si chuan khawngaihin ka ta chiah ni leh rawh, ka hmeichhia chiah, ka nunna leh ka engkim ni turin ka hnenah lo let leh thei la ka ti khawp mai" thuk raih hian a ti a, Loicy-i lakah chuan a beisei sang nghal mah mah ang tih a hlau ru hle.

"Lo let lo ta ila" a mita en kal chungin Loicy-i chuan a rawn ti thawp raih a, chhan mai dan tur pawh hre lovin thawk a la ri hawk a, a hnenah Loicy-i a let duh tawh lo a nih vaih chuan tih theih a nei tawh dawn lo tih a hre chiang em em.

"Ka thlah zalen che ang a, inchhirin ka nun ka hmang reng ang a, engtikah mah keimah leh keimah hi ka inngaidam thei tawh lo bawk ang" tih leh an ṭhutna phul aṭang chuan thawh a rual a, tunah zet zawng Loicy-i chuan a pawm leh theih a ring tawh lo a ni.

"Ka hmangaih che Loicy, ka thinlungah hian nang tih loh tu hmeichhia mah an lut leh tawh lo vang. I laka ka chet dan avangin min ngaidam thei dawn lo tih ka hre thei Loicy, mahse i thiam loh engmah a awm lo" tiin Manuel-a chu a Car hunna lamah a kal a, kal erawh a kal thui hman lo hle.

"Manuel Firth, mi chapo pa, i ngaih dan chiah kha a dik emaw ti suh, ka rilru dik tak pakhat mah i hre lo" nghet taka a hnung rawn kuah chungin Loicy-i chuan a ti vin phiar phiar a, ani pawh a inher chiang kher mai.

"I tlawm ve ka duh alawm, i laka ka tlawm ṭhin ang chiah khan tlawm ve la ka duh a ni Manuel. Tunah chuan i tlawm ve tak tak tawh a ni mahna, Simon-a hmai pawh zah zo lovin ka chelh duh tlat zawk che a nih hi!" Loicy-i bawk chuan chhoh melh ral hian a rawn ti leh a, a men deuh pur bawk.

"Ka hmangaih lutuk che Loicy, min la hmangaih reng avang leh pasala min neih dawn avangin ka lawm hle bawk a ni" inring tawk zetin Manuel-a chuan a ti hniam ruih a, an hmui chu a inbawh thuah zui nghal a, Manuel-a phei chu ramsa koham tak ang mai a ni.

Manuel-a chuan duhthaw zet hian a fawp bawrh bawrh a, Loicy-i pawh a bang bik chuang lo. Manuel-a chuan a insum theihna a hloh ṭan mek a, a fawp reng a nih chuan an awmna hmun pawh ngaihtuah lêk lovin hmangaihna a chen pui duh ngei a ring. Inthlahlel taka an infawh lai chuan vawi leh khatah Loicy-i chu a nam sawn dâwr a, a chet dan chuan Loicy-i chu ṭhawng tak a ni. Loicy meng phelh deuh nuai chu a hmuh zawm zat a, va kuah leh tuma a pan chuan Loicy-i chu a lo tawlh hla leh ta tlat mai.

Van lam hawiin thawk chu a la hawk a, Loicy-i hmela lungawi lohna langte chuan a tihlim ru tawh em em zawk a, a awm dan chu Loicy-i chuan hre chiang ngat se zawng a lungawi lo phal dawn lo tih a hre chiang lutuk a ni. A dinna lama kal hnaiin a dar tawn tawnah chuan a chelh a, a hmuiah rei lotê tak tak a fawp leh hram bawk a, Loicy-i hmel duhawm zet chuan a rilru chhungril na leh thla tam khawhara nun a lo hman tawhna chu a tikiam nghal vek theiin a hre hial a ni.

"Min hrethiam teh Loicy, ka fawp reng che a nih vaih chuan kan awmna hmun hi ka ngaihtuah thleng zo lo mai ang" kiai suk pah hian Manuel-a chuan a ti thum dap a, Loicy-i mitmengah chuan hriatthiam lohna a hmu nghal zut zut bawk.

"Eng nge i sawi awmzia?" chuti anga a rawn zawh chu a ring sa vek a, hlim tih hriat zet hian Manuel-a chu a vei nuih leh suk a, tunah chuan a nunah hlimna eng a rawn lut ve leh tak tak tawh e.

"Ka thlakhlelh luatah che hmangaihna chen dun ka hreh hauh lo Loicy, thla eng emaw zah chhung chu hmeichhe taksa hi ka si tawh lo asin, a awmzia chu maw ka hmangah lutuk che avangin hmangaihna ka chenpui mai ang che tih ka hlau" a tih chuan Loicy-i chu lai zet hian a awm nghal a, chu chu Manuel-a tan erawh hmuh nin har tak a ni si.

"Nang ka hmangaihna che thu i hriat laia i hmel mawlh hian min tihlim a ni Loicy, ka ta ni leh thei la ka ti, chu chu khawvela ka duhthusam sang ber a ni bawk" a tih leh chuan Loicy-i hmel chu a rawn danglam leh nghal ta vek mai.

"Min hmangaih a ni lo'm ni Manuel? Kei paw'n ka la hmangaih reng che tih i hria a, chuti chung chuan i ta ka la ni lo cheu tihna em ni?" Loicy-i aw chu a nem lutuk hran lo, chu bakah a lungawi chiah tawh lo zawk a ni.

"Keimah ka inhmangaih ai pawhin ka hmangah che alawm Loicy, mahse ka ta ni leh tur chuan thil eng emaw ka tih a ngai, nang paw'n hmangaihna avangin min pawm leh la ka duh a ni" tiin a ṭhi chu a pawt chat a, Loicy-i nena an zungbun pahnih chu a phawrh a, a hmaa hmeichhe ding chuan a chet dan vel chu a lo en chiang hle bawk.

"Manuel" a hmaa a ṭhingṭhit rualin Loicy-i chuan mittui tling pam hian a rawn ti thawp raih a, an awmna hmun chu inhualna zungbun an lo inbun tir tawhna hmun ngei a ni a, engkim chu hun hrana daih ni mah se an pahnih chuan nunhlui an hre chhuak lo thei lo a ni.

"Ka ta ni rawh Loicy, ka nupui ni la, i mamawh engkim ka pe ang che. Ka hmangaihna thuk leh ril bera enkawl che ka duh a, nang nen fa neih ka duh bawk a, ka hmangaih lutuk che avangin mi ṭhenkhat chuan mi â emaw min la tih phah ngei ang" nui var varin Manuel-a chuan a ti a, Loicy-i chu hlim avanga ṭah nuih hawkin a lo bu ta nghauh.

"Aw le Manuel, a vawi thumna atan thu tlukna ka siam leh ta chu a ni a, khawngaihin tun ṭum chu min tibeidawng tawh lûl suh. Rilru na taka min siam leh a nih chuan ka tawrh zawh tawh ka ring lo, min tiam thei ang em Manuel?"

"Ka tiam a che ka hmangaih Loicy, kei hian hmeichhe dang ka pansan leh tawh ngai lo vang che. Ka dam chhungin ka hmangaih reng che ang a, kum tam kan nih hnuah pawh min nin mai loh nân kei hian ka siam dawn che a ni" a tih rualin Loicy-i chuan nui ver ver hian a kut chu a lamah a rawn lek a, ani paw'n a tih tur chu a hre chiang hle.

"He zungbun hian kumkhuaa ka ta leh ka hmeichhia chiah i nihzia a nemnghet ni rawh se, ka hmangaih che Loicy" tih leh zungbun chu bun tir a rual nghal a, Loicy-i paw'n a kut lehlama zungbun chu laksakin Manuel-a sawi ang chiah chuan

"Nang pawh he zungbun hian ka ta leh ka mipa chiah i nihzia a nemnghet ni rawh se, ka hmangaih che Manuel" a rawn ti ve nghal a, Loicy-i nui sen sen hmel a hmuh rualin Manuel-a chu a insum thei leh ta pek lo.

"Kan inneih hmaa hmangaihna chen dun ka duh tawh rih lo tih hre tel la a ṭha ang Manuel" nuih insum zet hian Loicy-i chuan a ti a, Manuel-a hmel lan dan te chuan a nuih a tiza zual sauh a, a vawi khatna mah ni se Manuel-a fiamthu han thawhkhum vel chu a zawngchhang chi dawn riauin a hre bawk.

"Min hrem dawn tihna em ni? Ka mamawhna che a nasatzia hi i hrethiam pha kher lo vang Loicy, ka theih loh tawp tur zawngin min hrem tum lo teh" Manuel-a'n a rawn tih chuan nui miah lo hian

"Ka hrem rih dawn che tih hre rawh Manuel, khang thla kal ta chhung zawnga min rawn hmuh pawh i tum ngai loh avangin ka hrem i phu tlat. Ka hremna che pumpelh i duh a nih chuan ka pa bia la, nupuia min neih i dil thei reng alawm" a lo tihkhum hmak a, Manuel-a car inhunna lamah chuan a pheisan ta daih bawk.

"Eng maw i sawi kha!? Ni lo, ka hria e, i sawi dik Loicy. I pa chu vawiin ni la la hian ka bia ang, nang hi nupuia neih che ka dil dawn a ni. A phal hma chu bawkkhup pawhin ka dil mai ang, nang nena awm dun loh ai chuan tlawm ral vek pawh ka huam tawh zawk a ni" kuai her sawkin Manuel-a chuan a rawn ti phawlh phawlh a, Loicy-i chu a lo nui dir nghal char char thung.

"I lo fiamthu renga maw Loicy?" Manuel-a hmelah chuan lungawi lohna leh hamhaihna a inawm pawlh nawk nawk a, chungte chu Loicy-i chuan a hmuh hmaih lo, a nuih a zat zual phah em em zawk a ni.

"Aw" ti sepin Loicy-i chu a khi ver ver a, chu veleh Manuel-a chuan kawngka hawn sakin Car chhungah a nawr lut nghal rawk rawk a, chak zet hian chu hmun aṭang chuan an tlan chhuak zui nghal bawk a, lungawi lo taka Manuel-a phun bui bui ri chu Loicy-i chuan hriat nuam a ti leh tawh hle.

Chu ni chu Loicy-i tan chuan hlimna niah a chang a, Simon-a nen an inneih leh loh thut avangin a lungngai hman em em kha a ni a, mahse engkim chu a kal dik ta pûrh vek zawk a ni. Manuel-a nen chuan an in lamah hawin a chhungte chu an hma chhawn a, mak an lo ti ngei mai. Simon-a lah ni se a reh zui ta hmak bawk si a, thil awmzia an hriat chuan Loicy-i leh Simon-a chhungte chu an inngaidam tawn ta ringawt. Simon-a pa pu Wallace-a zawk chu a inthlahrung em em a, pu Wilson-a paw'n pangngai takin a lo dawngsawng a, an chhungkaw inkarah chuan inngaihdam tawnna awm mai se ṭha an ti ta zawk a ni.

Manuel-a chuan a sawi ang ngeiin Loicy-i pa hnenah ngaihdam a dil a, a fanu na taka a siam avang leh an inṭhen avanga nun nuam a hman theih loh thute a sawi chhuak hial a, a inchhirzia chu mi â tan lo chuan hriatthiam loh theih pawh a ni lo. Loicy-i pa pawh a ngawi mai mai bik lo, a fanu laka Manuel-a lo chet tawh dan avang chuan a zilh ta hrep a, Manuel-a erawh a ngawi reng thung. Thiam thu sawi tur reng a hre lo va, Loicy-i pa zilhna zawng zawng chu a dik vek tih a hre chiang êm bawk a tin ni!

"American mipa hi chu in heti tlat zel a, mi lerh tak in ni tlangpui a, ka rin lawk ang chiahin nang pawh i ni ta reng a!" Loicy-i pa chuan a ti charh charh a, a hma zawna ṭhu Manuel-a chu a melh kal bawk.

"Richard, duh tawk ve tawh em em la, zanriah ei lai tal hi chuan sawi tawh lo vang u. I fanu hlimna hi i duh ber tih ka hria, i fanu hlimna chu Manuel-a ngei hi a ni a, chuvang chuan thil liam tawh chu sawi duah lo la a ṭha ngawt ang" Loicy-i nu chuan a lo ti vat a, zanriah ei puiah Manuel-a chu an sawm ve ting tang a, chuti mai han ṭawngkhum leh si chu mawi a ti lo a ni.

"Ka fanu hi i tihlim thei tak tak ang maw? Dik tak chuan Simon-a laka rinna ka nghah ang khan i lakah hian rinna ka la nghat pumhlum thei lo, i duh chuan min hauin min ngei thei ang, mahse tunah chuan chu chu ka rilru a nih rih tlat"

"Ka pa!" Loicy-i chuan a lo ti thuai a, a pa ṭawng duh dan chu Manuel-a tan hriat nuam a ni dawn lo tih a hre chiang em em a, han khap vak dawn se a pa a ni bawk si, a rilru chu Manuel-a a ngaihtuah lutukna lamah a na vawng vawng thei.

"Loicy, a sawi hi a dik vek alawm, ka laka i pa rilru puthmang hi ka hrethiam lutuk e. A hma chuan hmeichhe kawp lawr tak ka ni ngei a, mahse i fanu ka tawn hnuah erawh ka danglam vek tawh a ni pu Wilson" tiin Manuel-a chuan Loicy-i pa chu inthlahrung ru takin a biak zawm zat a, Loicy-i pawh Manuel-a khapna avang chuan a ngawi ve leh mai bawk.

"In inneih chu ka phal ang, mahse ka fanu hi i tina leh ang tih mawlh ka hlau a ni. Ka fanu hi ka thisen a nih bakah ka hmangaih a, a nat ka phal lo va, nang erawh chuan rilru na takin i siam tawh a, rilru na taka i siam leh a nih ngat chuan engtikah mah ka fanu hi i rawn beisei thiang tawh lo vang" Loicy-i pa chuan a ti ram leh hmuk a, a sawi tawp thei lo a ni ber.

"Ka lawm e pu Wilson, Loicy-i hi ka nupui a nih hnuah chuan ka ṭhen leh tawh ngai lo ang a, a rilru tina turin hmeichhe dang ka pansan lo bawk ang a, tawp chin nei lovin ka hmangaih ang tih ka tiam e" Manuel-a chuan thutak zet hian a ti a, a bula ṭhu Loicy-i kut chu dawhkan hnuai lamah a chelh ran a, chuti ang em ema a thutak chu a la nei ngai lo a ni.

"Eng pawh ni se i hmaa ei tur inhung kha ei phawt mai teh, chuti lo zawng zanriah ei tura ka sawmna che hian awmzia a nei lo mai ang" Loicy-i pa chuan a rawn ti ta daih a, a hmelah chuan fiamthuna pawh a lang chuang lo.

Chumi zan aṭang chuan Loicy-i pa pawh Manuel-a lakah nelawm lo takin a awm tawh ngai bik lo va, Loicy-i leh a nu leh a naute chu a pa awm danah chuan engtin mah an inrawlh ngam lo hrim hrim a, a nu'n a khap lawk tawh avangin Loicy-i chu a inrawlh lo a ni ber zawk. Manuel-a chu Hotel pakhatah a thleng a, Loicy-i pa phalna thlap thlapin Loicy-i pawh a hmu ṭhin a, chuti ang leh lutuka a tlawm chu Loicy-i chuan a khawngaih ngawih ngawih a ni.

Loicy-i pa remtihna kaltlang vekin kar eng emaw zah a liam hnuah Manuel-a nen chuan Chicago lamah an kal a, Loicy-i chuan Manuel-a nu leh a unaunu chu a hmu ve ta, a zam ruk ang em em chuan a lo zamawm loh thung. Chutah a beisei loh takin Manuel-a nu chuan a lo ngaina nghal em em a, Manuel-a unaunu pawh chuti tho, Loicy-i chu Manuel-a chhungte chuan sawiselna an nei lo hrim hrim tih chiang takin a hriat theih a ni.

THE ONE WHOM MY SOUL LOVES (M&B)

By

Havali Adam

Last Chapter 20

Friday a ni a, khua chu a thiang kâk a, ni sat dan te chu a tawk chiah a, Loicy-i pawh mo thuam famkim nen a inthuam ta thlap mai. Chumi ni chu khawvel mite ngaihven rawn ang maiin hriat a hlawh a, a chhan pawh Manuel-a leh Loicy-i chuan inneihna thutiam an chham tawh dawn vang a ni. Mi ṭhenkhat chuan Loicy-i chu an dem em em a, pasal neih a ṭhulh hnu lawka pasal neih a tum leh nghal mai chu an dem chhan ber a ni bawk. Loicy-i chuan nuam a ti bik miah lo, mi sawi dante chu a hre lo a ni bik lo, duh thlan tur dang a nei tawh lo a ni.

Pu Wilson-a'n inneih a phal tawh miau avangin Manuel-a chuan a rang thei ang bera nupaa insiam a duh a, chu chu Loicy-i chuan a lo hnial reng thei bik lo a ni. A tirah chuan mi hmai a zah avangin a duh lo ve ngei a, mahse a duh lo rei thei lo, Manuel-a chu a hmangaih tlat a tin ni! Mi sawi sep sepna hriaa lungngai mai lovin a thinlung duh zawng lam chu a pan ta zawk a, an inneih ni a rawn her chhuah meuh chuan hlimna leh hmangaihna chiahin a thinlungah hmun a chang tawh a ni.

"Khami ni kha chuan i hlim tak tak lo tih kha ka hre reng a, Simon-a nena in inneih in tum ni kha chuan keipaw'n lungngaih ruk riauna kha ka nei tlat a ni" Pastor leh Manuel-a dinna lama an kal phei laiin a pa chuan a rawn ti a, Loicy-i pawh a hnuk a ulh thei mai dawnin a inhria.

"I hmelah khan eng emaw ni tak chu a awmin ka hre reng asin ka pa, mahse tunah chuan ka hlim tawh lutuk tih hria la ka duh. Pasal ka neih avang hian i fanu ka nihna a bo lo va, ṭah chhuak hmel deuh kha chuan ṭawng lo hram teh ka pa"

"Chan tur ang mai che hian ka inhre tlat a ni Loicy, mahse i hlim tih ka hriat hian ka lawm tho bawk si, i pasal tur saw chu kei ang lo takin a phur hmel tawh hle a ni" a pa'n a rawn ti leh chuan Manuel-a lam chu a hawi a, hmel hlim sanga lo entu Manuel-a chu a nuih zeuh a, a chhungril takah chuan zam rukna a awm reng bawk.

"Ka lawm e ka pa, Manuel-a nena kan inneih i phal avang hian ka lawm a ni. Tin, Manuel-a ang mipa ka pasal a ni hi i la lungawi dawn lutuk a, chuvang chuan lawmthu ka sawi lawk bawk e" Loicy-i chuan nui sen sen hian a ti a, a pa pawh a rawn nui chhuak ve ta hawk.

"I hre dik ngut ang emaw âw ka fanu, eng pawh ni se Manuel-a lakah hian beiseina ka nei sang nghal em em tih hria la, i lo hrilh dawn nia" a pa'n a rawn tih leh chuan ṭawngna hun pawh a awm tawh lo, Pastor leh Manuel-a dinna bul chu an thleng a ni der.

"I thutiam kha hre reng ang che" Manuel-a kuta a fanu kut a nghah rualin pu Wilson-a chuan a ti leh hram a, ṭawng erawh a ṭawng ring hran lo va, mipuite chuan a hriat phak kher a rinawm loh.

"Aw le pu Wilson, i laka ka thutiam kha ka hlen ngei ang" Loicy-i kut vawn pahin Manuel-a chuan a lo ti nghet ve charh a, Loicy-i pa pawh bu zeuhin ṭhutna lam chu a pan a, Manuel-a chuan kun hniam zeuh hian

"I hmelṭha lutuk Loicy, hun serh hi zo thuai thuai se ka duh" tiin Loicy-i chu a hrilh ru sar sar a, Pastor chuan an awm dan leh inbiak dan chu lo hre ve vekin Manuel-a darah chuan a nam a, mipui pawh an lo nuih phah nghe nghe.

Minute 20 chhung vel inneih hun serh an hman hnu chuan khawvel dan dik takin Manuel-a leh Loicy chu nupa an ni ve ta, an inneih thla latu pawh an tam leh tawh khawp mai. Chaw hnu lama innei an nih avangin zanriah ei zawhah After Party an nei leh nghal a, Simon-a hmel pawh an hmu hlawl mai. Pastor-in inneihna thuthlung a chham tir lai vel kha chuan an hmu hauh lo va, After Party-ah erawh an hmu thung a, Simon-a chuan lawmpuina thu a hlan ve luam bawk. Manuel-a paw'n a lo be ṭha khawp a, be ṭha lo chi reng a ni lo, Chance siam sak leh tu kha a ni tlat.

After Party-ah chuan thu sawi neuh neuh a awm a, chung zingah chuan Manuel-a nu paw'n a thu a sawi ve a, Manuel-a pa dam laia inneihna a thleng hman lo chu pawi a ti hle a ni. A nu thu sawi aṭang chuan Manuel-a rilru chu hun kal tawhah a kir vawng vawng a, a pa chu a ngaihtuah chhuak lo thei lo. A pa hriselna leh Company lam pawh ngaihtuah ṭha mumal lova a eizawnna lam ringawt a lo buaipui ṭhin chu âtthlak a ti hnuhnawh hle a, pawi han ti viau mah se engmah chu a siam ṭhat theih chuang si loh a ni.

"Vawiin khan ka duhthusam ang ngeiin i nalh a ni Loicy, nang ka nei thei che hi khawvela mipa vannei ber ang hialin ka inngai" a bianga chul riak riak pahin Manuel-a chuan a rawn ti sup a, Loicy-i pawh a ngawi reng duh bik lo.

"Kei pawh nangmah ngei, ka mipa hmangaih ngei, hmangaih satliah mai ni lo ka mipa hmangaih hmasa ber leh hnuhnung ber tur ka nei che hi ka lawm em em asin Manuel, mahse thil zawh duh leh hriat fiah duh ka la nei a ni" a thu sawi tawp lam chuan Manuel-a beng a verh ta hle.

"Min zawt rawh Loicy, i hriat fiah duh engkim chu min zawt rawh, thu dik tak lo chu i hnenah hian ka sawi tawh lo vang. Ka rin dan chuan Rosy-i chanchin hi i ngaihven a nih hmel, chu chu i rilru a nih leh nih loh erawh huai takin ka sawi ngam lo"

"A dik alawm Manuel, Rosy-i chanchin ngei a ni e. Kan inṭhen lai khan vawi khat mah hmangaihna in chen dun lo tak tak em? A hma kha chuan min hrilh tawh tho va, mahse min hrilh leh la ka duh a ni. Kan inneih zanah hian, zanin ngeiah hian thu dik sawi la, engmah rilru natna ka nei tawh lo vang"

"Loicy, ka sawi vek tawh khâ" ti hluaiin Manuel-a chuan a biang tawn tawn chu a rawn khuap a, Loicy-i mitmengah chuan zawhna chhang tura a duhna hlir a lang a, Manuel-a chu a thaw ri leh hawk ringawt.

"Ka sawi leh ang Loicy, nang nena kan inṭhen hnu kha chuan hmeichhe ka mutpui leh tawh ngai lo hrim hrim, Rosy-i thlengin mamawhna reng ka nei tawh lo, a chhan chu nangmah chiah hian ka tisa mamawhna leh rilru hahdamna i phuhru thei tlat a ni" a rawn ti zo chiah tihah Loicy-i chuan rang zet hian

"A nih leh khawiah nge Rosy-i hi tunah a awm?" a lo ti thuai a, vawi leh khata Rosy-i hmel a hmu lo thut chu mak a la ti reng a, an inneih hmaa a rawn vauna te chu ngaihtuah letin Rosy-i awmna chu a hre châk tlat a ni.

"Boston lamah a kir leh tawh ka ring, ṭawngkam bawlhhlawh tak taka ka nu leh ka nau a biak avangin kut ka thlak a, a la na khawp mai, chuvanga Chicago chhuahsan pawh hi a nih ka ring" Manuel-a thu sawi zawng zawng chu a ring famkim tawh a, rin loh pawh duh mah se Manuel-a hmelah chuan dawt a sawi lohzia a hmu vek tawh a ni.

"Dik tak chuan kan inneih hma khan a hnen aṭang vauna thu ka la dawng cheu a, khati ang mi kha a nih ka lo ring ngai lo. Min hmangaih tih ka hria a, ka bulah i awm tlat dawn tih thlengin ka hria a, chuvang chuan ka thla a muang tawh a ni" tih leh Manuel-a kut chu fawh a rual a, Manuel-a pawh a rawn che chhuak rang hle.

"Engmah sawi tawh suh, ka mamawh tawh lutuk che Loicy" tiin Manuel-a chuan a fawp bawrh bawrh a, Loicy-i paw'n duhthaw takin a lo fawp let ve mial a, an thawmhnaw chu a hnawk lam hret a ni.

"I nupui ka ni tawh a, ka pasal i nihzia chu han fiah ta che" Manuel-a inphelh mawlh mawlh laiin Loicy-i chuan nui sen sen hian a lo ti a, chu chuan Manuel-a a tiphur zual a, a hmanhmawh luatah a Kamis te chu a pawt ri ṭhawt ṭhawt hial.

Loicy-i hmuia fawp reng pahin Manuel-a chuan a kut chu a awm mai mai tir lo chiang hle a, thla tam tak hnuah a hmeichhe hmangaih ber nen an inneih zanah ngei hmangaihna an chen dun a, a lo khawhar tawhna zawng zawng chu hrikthlak vek a duh a ni. Chet buan buan lam aiin dimdawi tak leh zun nei em ema chet a duh zawk avangin zawimuangin a chet dan chu a thlak a, Loicy-i awm dan leh a tawhna a lo dawnsawn dan chuan a tihlim a, amah ang chiahin Loicy-i chuan a lo mamawh ve tawh tak zet a ni tih a hre chiang em em bawk.

Manuel-a chet dan avangin Loicy-i chuan awm ngaihna a hre lo va, zah pawh dawn lovin a ṭe chhuak hak hak a, boruak te chu a hip hrawih hrawih a, vawi eng zah nge nawmna vawrtawp a thlen tawh tih lam reng a ngaihtuah thei tawh lo. Manuel-a chet dang engkim chu a dam raih a, chu chuan mamawh lo thei lovin a siam a, thlahlel ngawih ngawihin a siam tlat a, a tan chuan chuti anga thil dawnsawn nuam chu lo hnar reng theih a ni lo a ni.

"Kha ngei kha hmangaihna chen dun awmzia chu a ni Loicy, hmangaihna tel lova kan inmamawh tawnna inphuhruk sak ringawt ai chuan hmangaihna tel ngeia hmangaihna chen dun hi a hahdam thlak zawk a, a danglam em em bawk" maimitchhingin Manuel-a thu sawi chu a ngaithla ran a, a thla a muang ru ngawih ngawih bawk.

"I chau em ka hmangaih Loicy?" Manuel-a chuan a rawn ti ril leh raih a, Loicy-i chuan a chauhzia lantirin a lu a lo bu nghat nghat a, vawi khat aia tam daih inneih zanah hmangaihna an chen dun a, a mut chhuah dan chu pui tak a ni.

"Naktukah Paris lama kal nghal kan tum bawk si a, muhil phawt ang aw" insiam ṭha sawt sawtin Manuel-a bawk chuan a rawn ti thum chhal a, Loicy erawh chuan chhan pawh a chhang peih tawh lo, muthilh vang vang chu a duh tawh a ni.

Zing ni eng chuan room chhunga mu nupa tuak tharte chu a chhun siar siar a, Loicy-i leh Manuel-a pawh an muhil reng thei ta bik lo. Tho chhuakin an awmna Hotel chhawng sang tak aṭang chuan khawpui chu an thlir a, Loicy-i chu sawi tur ngah tak hian a ṭawng siam siam bawk a, nupa tuak thar an ni bawk a, an hlim dun barh barh hle. Breakfast an ei lai te chuan kum tam tak nupa lo ni tawh ang maiin an awm dun a, mipa hrisel ṭha veh vawh tih takah Manuel-a chu a insum thei leh ta lo.

Kawr ha mang lova Loicy-i'n thawmhnaw a thleh lai chuan hnung lam aṭang a pawm a, khumah bawk chuan a nghat a, Loicy-i paw'n a tir lamah lo hnial ve deuh mah se a hnial rei leh ta bik lo. Am taka hmangaihna an chen dun hnu chuan shower hnuaiah an ding a, inbual ṭha thei lek lovin an inchhaih nui ar ar a, chawhnu lama Paris lam pan tur an nih tho avangin an hmanhmawh em em lo bawk. Loicy-i duh ang ngeiin Manuel-a chuan an Honeymoon chu Paris khawpuiah hmanpui a tum ruh hle a, engkimah a nupui ni ta Loicy-i chu tihlim zel a duh ber tawh a ni.

Darkar 10 dâwn thlawhnaa an chuan hnu chuan Paris khawpui chu an thleng a, Hotel changkang tak pakhata innghatin Loicy-i chuan leh chhuah a rawt nghal a, Manuel-a paw'n a lo hnial chuang lo. France ramah chuan Manuel-a leh Loicy-i te chu hre tu an lo awm nual a, an chhuah vahna velah pawh thlalak puitu an awm deuh reng a, chungte chuan Loicy-i chu a tihhlim letling a ni. Manuel-a ve thung chuan a ning ṭan lek lek tawh a, a nupui nena hun thawl leh kalkawnga inbiakna hun an nei thei meuh lo chu ṭha a ti lo a ni.

France ram khawpui Paris-a ni thum an cham hnu chuan an chhuah apiangin hmel inthupin an chhuak ta zel a, chu chu Manuel-a duh dan ngei a ni bawk. Loicy-i paw'n Manuel-a rilru chu a lo hrethiam khawp a, a pasalin hun thawl neih dun a duhzia a hriat chuan a lawm veng veng zawk a ni. Khawpui fanga an chhuah apiangin Loicy-i chuan Eiffel Tower awmna lama kal a rawt ziah a, chu Tower mawi leh sang tak chu a hmu kham thei thlawt lo a ni.

Thla khat tling ṭep Honeymoon hmangin Paris khawpuiah Loicy-i leh Manuel-a chu an cham a, nupa tauk thar tih takah nuam an ti ngâng mai. Chicago-a an let leh hnu rei vak lovah in hrang an chang nghal a, kar tawpah erawh an chhungte nen an inhmu khawm ziah tho. Loicy-i pate pawh kar eng emaw zah chhung Chicago-a an cham hnuah an ram lamah a haw a, pasal neih nuam a ti lutuk zawk nge ni Loicy-i erawh chuan chhungte ngaihna chang pawh a hre lo. Manuel-a chhungte a lakah an ṭha bawk si, an titi tui thei bawk si a, a chhungte ngaihtuah chhuak lêk lo khawpa rilru hlimin a awm a ni ber.

Chuti ang bawkin Manuel-a pawh a nun a hlim a, Company lamah ni tin a kal ṭhin bawk a, a pa dam lai ang maia changtlungin Company chu enkawl a tum a ni. A hahdamna leh a hlimna ber Loicy-i chu nupuiah a nei tawh bawk a, hna a thawh lai te chuan hah reng a hre lo emaw tih theih turin a thawkrim a, a office chhunga zu bur awm tam tak chu a la chhuak fai vek bawk. Manuel-a a inthlak danglam tâk em avang chuan pu Stalon-a pawh a lo hlim ru veng veng a, a pu hlui zawk pu Firth-a a rawn dam leh hial emaw a ti rum rum ṭhin.

A thawkrim thawkhat bawk a, thla tam a ral hmain Manuel-a chuan Company chu dinhmun ngaiah a hlang kai a, tunah chuan a hma zawnga amah thlawp lotu te paw'n an be ṭha leh ta hle. A sawisel nasa sa kha fakna ṭawngkam chhak chhuak thiam thiamah an ṭang leh lawi a, Manuel-a chuan an nun chu lem a ti kher mai. Company lamin dinhmun ngai awh leh tawh mah se Manuel-a chu a la duh tawk mai lo, chu aia ropui leh filawr chuan Company chu dah a duh a ni.

Company lama a beng a chhut ngawn tlat lai kha chuan a pa'n a enkawl ṭhin kha a ni a, Chicago khawpui chhunga Company sum la lut hnem zingah pawh a tel pha ziah zel a nih kha! Tun hnuah erawh Manuel-a ngeiin a enkawl tawh a, a tum ber chu sum la lut hnem ber leh Company dangte entawn theih khawpa hmasawn chu a ni. A mimal sumdawn ve na zawng zawngte chu Company hmingin a thlak ta vek a, fakna lamah pawh a ṭhianpa Matthew-a Company hmangin an invawrh chho char char a, awihawm loh khawpin Company chu a ṭhang reng bawk.

"Tun lai hi an buai khawp mai Manuel, an hmanraw ṭhenkhat a chhe nual a, tihluih a ang mah zawk a ni" thil a ziah mial mial laiin pu Stalon-a chuan a rawn ti a, ani pawh a thil tih lai chu a tawp nghal chat.

"Mi chhawr la, chhui chiang turin hrilh nghal bawk ang che. Kei pawh thla tawpah hian ka zin ang, ka tlawh khât riauin ka hria" tiin Manuel-a chuan pawn lam a hawi zawm zat a, Loicy-i pa Company dinhmun chu a ngaihtuah zui reng a, engtin emaw tak a chet leh chu a ngai a ni.

Pu Stalon-a kaltlangin Loicy-i pa Company chu a hre reng zel a, mahse pu Wilson-a hnenah chuan a chet dan hrilh hranpa pawh a tum chuang lo. Ngawi rengin a pui mai zel a, Loicy-i tak ngial pawh a la hrilh duh lo a ni. A theih phei chuan hriattir loh law law a duh a, mahse engtik niah emaw an la hre chhuak dawn tih a hre vek tho. Email leh Transaction hmangin Loicy-i pa Company chu a pui deuh ber ṭhin a, Email phei chu a lem a siam phah nghe nghe.

A nihna takah chuan Loicy-i pa rinna chu engti kawng zawng paw'n hlawh chhuah a tum a, a hmuh hma loh zawng rilru nuam famkimin a awm thei lo a ni. Loicy-i pa hnen aṭang chuan lawmthu sawina Mail a dawng ziah a, an Company-a pawisa thun ṭhintu chu tu nge a nih hriat a duh thu lah a zawt awl lo, mahse Manuel-a chuan chuti anga Company dinhmun chawikan nâna pui tu a nih thu chu a them pawhin a sawi ngai lo thung.

A nupui Loicy-i pawh a awm awl mai mai chuang lo, Boston lama Music School chu Chicago aṭang a enkawl pah reng a, nupa inhmangaih tak ni mah se Manuel-a chuan an awm dan chu ṭha a ti lo tulh tulh a ni. A thil tihtum zawng zawng a tih puitlin hnuah an nupa chauha zin khawthawn a tum rilru ran a, Loicy-i erawh chuan a tum dan chu engmah a hre leh ta pek lo. A nupui leh a nu an inkawm ngeih em em mai te chu Manuel-a ngei paw'n mak tih chang a nei a, a chhan ber a zawh lahin Loicy-i chuan fiamthu hlirin a lo chhang daih ṭhin bawk si.

A nu leh Loicy-i awm dan chu a awt a ni ber a, chuti ang chuan Loicy-i pa nen an inkar ṭha ve tawh se a ti tak zet a ni. Ni khat chu Loicy-i hnen aṭang phone call a dawng nawlh a, Loicy-i chuan a pa'n biak a duh thu leh phone tlang a harzia chu a rawn sawi mawlh mawlh a, mak a ti ang reng hle. Loicy-i pa'n biak a rawn tum hrim hrim chu mak a ti a, chuti angin Loicy-i pa chu a awm ngai hauh si lo a tin ni! Loicy-i nen an inbiak zawh chuan a pa phone number chu hmet chhuakin a call nghal a, ring pawh a ring rei lo.

"A rang thei ang berin Australia ramah lo kal nghal ang che, ka hmu duh che, vawiin ngeiah hian" Loicy-i pa chuan a rawn ti ram hmak a, Manuel-a erawh a bangbo hle a, Loicy-i pa lah chuan phone chu a hmet tawp hmak leh nghal.

"Pu Stalon, Company Private Jet kha lo inring rawh se. Tunah hian Australia ramah ka kal nghal a ngai, hmanhmawh takin hrilh rawh" coat ha ṭha mawlh mawlh paha a tih chuan pu Stalon-a chuan

"Tun thla tawpah Australia ramah chuan i kal dawn alawm Manuel, thil thleng a awm em? I hun hman dan turah hi chuan tun thla tawpa kal tur i ni"

"Ka thu sawi chu awih tawp mai rawh pu Stalon, ka sawifiah si se lo vang, mahse pu Wilson-a'n min hmu duh a ni" pu Stalon-a ṭawng laklawh lai pawh nghak zo lovin a ti deuh hrawk a, chutah erawh pu Stalon-a paw'n thil hmanhmawh thlak a ni tih a hrethiam ve nghal mai.

"Manuel, pu Wilson-a hian a hre chhuak a ni thei ang em?" pu Stalon-a thu rawn sawi avang chuan a ding chawt a, Email lem a siam tlat avangin thil ni thei niin a ngai si lo, mahse hriat chhuah theih dan chu a awm tho bawk si.

"Ka hre hauh lo, tunah chuan he ram hi ka chhuahsan phawt a ngai" tih leh ding taka kal a rual nghal a, Company Private Jet awmna an thlen chuan thlawhna pawh a lo inpeih fel diam tawh a, chuang lutin a thlawh chhuah tir nghal a, Loicy-i chu a biain a chanchin a zawt a, mahse Australia ram lam pana a kal mek thu a hrilh duh leh ta chuang lo.

Thlawhnaa a chuan chhung zawngin Loicy-i pa'n a hmuh duh chhan chu a ngaihtuah char char a, thil hrang hrang a ngaihtuah thleng a, a chhan ber erawh a hre thei lo thung. Pu Stalon-a thu sawi pawh a rilruah a awm lo chuang lo, a chhungrilah chuan nuam tih chiah lohna a awm a ni ber. Australia ram an thlen rualin Loicy-i pa Company awmna lamah a inkhalh phei nghal a, a hmeichhe hmangaih em em pa a nih miau avangin Manuel-a chuan pu Wilson-a lung chu a tiawi lo mai ang tih a hlau a ni.

Company-a an inhmuh hnu rei lovah pu Wilson-a chuan in lamah a haw pui a, an chuan dun chhung zawngin an inbe lo va, Manuel-a chuan a hmel aṭang pu Wilson-a chu a lungawi lutuk lo tih a hrethiam nghal vek bawk. In chhung an luh chuan mi dang tûmah an lo awm lo va, pu Wilson-a chuan sitting room lamah a kalpui a, Manuel-a paw'n engmah a la hrethiam bik lo, han ngaihruat dan tur tak ngial pawh a hre hlawl lo. A hre chhuak ti dawn se a ring chiah bawk si lo va, a rilru chu a buai ru khawp mai.

"Eng vangin nge ka Company hi a ruka i lo puih char char?" pu Wilson-a lam chu rang zet hian a hawi nghal a, a rin deuh si rin chiah si loh angin thil chu a thleng ta ngei a, tunah chuan pu Wilson-a paw'n a pui ṭhin tih a hre chhuak ta nge nge e.

"A ruka ka pui che a nih loh chuan ka puih i duh dawn hleinem pu Wilson, i lung ka tiawi lo a nih chuan min ngaidam dawn nia" Manuel-a chuan thu zep a nei buai duh ta lo law law a, zep pawh tum se awmzia a awm tawh lo a ni.

"Engkim kha a mak a, nang hi rawn rinhlelh nachang che pawh ka hre lo hial zawk. Mi ka chhui tir ta a, kar hmasa mai khan ka hre chhuak chauh che a ni" pu Wilson-a aw chu a pangngai ang reng hle a, Manuel-a paw'n chuti anga pangngaia a rawn ṭawng chu a beisei lo khawp.

"Eng vanga min pui nge i nih?" pu Wilson-a chuan en ran chung hian a rawn ti leh a, ani chu thawk la hawkin a ngawi vang vang a, sawi mai dan tur pawh a hre lo, engkim chu Loicy-i a hmangaih vang tih erawh a chiang em em thung.

"A chhan chu i mi rinna hlawh chhuah ka duh a ni pu Wilson, Loicy-i ṭhianpa Simon-a i rin ngamna let atam hlawh chhuah ka duh a ni" tiin Manuel-a chuan a rilru dik tak a sawi a, chuti ang baka sawi dan a hre lo tlat a ni.

"Simon-a chu tluk tum duh suh, in inang lo lutuk. Loicy ber nupuiah i nei tawh a, eng vanga Simon-a chu la thik em em nge i nih? I laka rinna ka nghah ngam theih nân maw!?" pu Wilson-a'n a rawn tih chuan thinrim ru tak hian

"Aw" a lo ti bul hmuk a, a ṭawng rik dan avang leh a hmel lan dan avangin pu Wilson-a chu a rawn nui chhuak hawk hawk a, Manuel-a ve thung chuan a hrethiam lo kher mai, a chhan danah chuan nuihzat thlak a awmin a hre lo bawk.

"I fing viau emaw ka lo ti asin Manuel, nang chuan ka fanu i neih hnu rei lovah khan ka rin ngamna che i hlawh chhuak daih tawh alawm, chuvangin Simon-a chu thik buai duh tawh suh, ani ka rin dan leh nang ka rin dan che inthlau tak a ni"

"Pu Wilson! I fiamthuin ka hre si lo, i fanu tihlim tur leh kumkhua a mipa hmangaih nihna chelh reng tur hian min ring ngam tawh tak tak em?" Manuel-a awah chuan mak tihna hlir a lang a, pu Wilson-a a biak dan pawh chu a ngaihtuah fim hman tawh lo a ni ber.

"Ka ring lutuk che alawm Manuel, chutah ka Company dinhmun chhiat laiin min rawn pui leh ta bawk a, nangmah i nih tih ka hriat hnu kha chuan ka lawm khawp asin, min zah leh lutuk hian awm lo la a ṭhat zawk ka ring" hahdam hmel zeta pu Wilson-a'n a rawn tih chuan a lo ṭhen suk a, tunah chuan a thaw a veng ta huai mai.

"Ka lawm e pu Wilson, min rinna hi engtikah mah tih chhiat ka phal ngai lo vang. I fanu hi khawvela ka hmeichhe hmangaih ber a ni a, kan nupaah inkarah hian hlauhthawnna rilru nei lo la ka duh a ni" inrin tawknaa khatin Manuel-a chuan a ti a, a aw ri chu hriat nuam tak zawng a ni chiang a ni.

"Ka hlauthawng tawh lo ve, min puih avangin ka lawm em em bawk. Naute lam hi eng nge kan dinhmun? I che viau tawh ang chu ka lo tia, nge nang hian Company lam chauh ngaihtuahin ka fanu hi nupa nunah i tilungawi thiam lo lutuk zawk em ni?" Manuel-a chu a kiai suk a, tlangval ang maia pu Wilson-a a rawn ṭawng chu a beisei lo lutuk a ni ber.

"Ka che viau tawh alawm, mahse a la hun rih lo pawh a ni ang. I sawi tâkah chuan thla 6 chuang chu kan innei ve tawh a, a hun ve tawh viau mai, ṭan ka lo la zual dawn nia" ṭhen zeuhin Manuel-a chuan a lo ti ve leh mai a, a rilru chhungril chu a hahdam vawng vawng tawh hle.

"Zanriah ei ve nghal mai la a ṭha ang, naktukah i haw leh mai ang a" pu Wilson-a'n a rawn tih chuan lu a lo thing vat a, Loicy-i tel lova zan hman ral chu a duh teuh lo, chu ai chuan tlai lam ni tawh mah se Chicago lama thlawh haw leh vang vang chu a duh zawk.

"Ni lo ve pu Wilson, ka haw zawk ang. Ka laka Loicy-i a lungawi loh vaih chuan vawiina ka hlimna hian rei a daih dawn lo tih ka hria, i fanu hian a duh duhin min hruai kual vel a nih ber hi!" fiamthu deuh taka a tih chuan pu Wilson-a pawh a rawn nui vur vur a, hre chiang lo tan chuan pafa emaw tih theih turin an boruak chu a ṭha a ni.

Pu Wilson-a chelh derna pawh hnarin Manuel-a chu Chicago lamah a thlawk haw leh ta ngei a, a kal lam ang ngawt chu a va ni lo chiang em. Thlawhnaa a chuan lai te chuan Loicy-i pa nena an inbiak dan chu a ngaihtuah let a, a pa pawh a ngaihtuah chhuah phah nghe nghe. Chicago an thlen rualin thlanmual lamah a kal nghal a, zan dar 7 pel tawhin khua chu a thim ruih tawh bawk a, mahse Manuel-a chuan a pa thlan chu tlawh a duh tlat a ni.

Thlanmual aṭang chuan rilru hlim zetin a haw leh a, a nupui hmelṭha tak chu a kuah châk tawh a, a fawp châk em em tawh bawk. An in chhunga a pen luh rualin Loicy-i hmel chu a zawng nghal a, a la hmu mai lo zui. An room-a a luh chuan tui taka a nupui muhil chu a hmu nghal a, Loicy hmel duhawm zet chuan a lung a tiawi hliah hliah a ni. A bula a mut thlak laite chu Loicy-i chu a la muhil tui em em a, ni dang aiin Loicy-i hmel chu a hmu ṭha zual a, a vun te chu a mar no nalh zualin a hre bawk.

Wednesday a ni a, Loicy-i chu room-ah Laptop khawihin a ṭhu ngawi reng a, Melton lama Music School-a mi tur thil eng eng emaw a buaipui malh malh a, Melton lam aṭangin rawn be lo se chu thil lei turin a chhuak ngei ang. A ruka Doctor a pan hialna chhan a pum chu a zut zeuh a, a hlim a ni. A pum chhungah chuan naute thla 2 hniha upa a lo pai reng tawh hi a ni a, a vawi khatna a ni bawk nen nau pai chu nuam a ti tak zet. A hriatna a la rei bik loh avangin Manuel-a pawh a la hrilh hman lo va, a duh chuan a hrilh hman reng, a hrilh duh rih lo zawk mai chauh a ni.

Laptop a off rualin pu Stalon-a hnen aṭang teh daih phone call a dawng zui nghal a, mak a ti ang reng khawp. Engkima Manuel-a puibawmtu leh a hun hman dan zawng zawng remruatsak vek tu a ni a, Loicy-i paw'n pu Stalon-a chu a ngaina a, mahse phone kaltlangin an la inbe ngai lo thung. Phone chu pick up-in hawihhawm zet hian pu Stalon-a chu a bia a, pu Stalon-a thu rawn sawi chuan a va ṭhawng chiang tehreng em. Khum aṭanga chhuk vatin a che sawk sawk a, pu Stalon-a rawn hrilhna lam Hospital chu a pan nghal thuai thuai bawk.

Hospital a thlen hma zawng chuan rilru nuam rengin a awm lo va, a ṭah te chu a chhuak tet tet a, Manuel-a chu a thi mai ang tih a hlau a ni. Pu Stalon-a chuan Manuel-a'n Accident a tawh thu a rawn hrilh kha a ni a, thu tam pawh sawi lovin Hospital awmna chiah a rawn sawi a, Loicy-i tan chuan hlauhthawna ṭah chhuah lohna chi reng a ni lo ve êm bawk a ni. Hospital a thleng chiah chu a tlanin a tlan a ni ber a, a rilru a mangang tawh bawk nen a mittui te chu a dang zo thlawt tawh lo a ni.

Pu Stalon-a hmel a hmuh rualin Manuel-a awmna room a zawt nghal phawlh phawlh a, Loicy-i chu a pangngai tawh lo tak zet a ni. Pu Stalon-a hruaina lamah chuan a kal mawp mawp a, pu Stalon-a'n na lutuk a nih loh thute chu hrilh ve mah se awmzia a awm lo, Manuel-a mawlh chu a hmu châk tawh a ni. Room chhung an luh rualin Manuel-a chuan dar dawm chung hian a lo nuih var var a, Loicy-i erawh a nui ve thei hauh lo. Manuel-a mutna lama kal pawk pawkin Loicy-i chuan a kuah nghal thlawp a, a ṭap chhuak nghal feih feih bawk.

"Min chhuahsan teh u" Manuel-a chuan a ti a, room chhunga Doctor leh mi dangte pawh chu an chhuak nghal mai a, Loicy-i ṭap chu a thlem zui nghal mawlh mawlh a, mahse Loicy-i ve thung chu hmangaihna avang leh hlauhthawnna avangin a la ṭap bang thei lo.

"Ṭap tawh suh le Loicy, accident ka tawh chhan hi tih luihna a ni a, Motor-a min sutu pawh Police lamin an man fel tawh e" a tih hnu fêah Loicy-i chu a ṭap tawp ve thei chauh a, dik tak chuan Manuel-a chu a chan dawn emaw a ti hman tawh a ni.

"Loicy, ka ṭha vek tawh tak tak a nia, min ngaihtuah lutukna lamah i rilru i tihrehawm ang e. Thla eng emaw zah chhung chu chawlh ka la ang a, Honeymoon hman leh ang aw, keini pahnih hian hun hman dun kan mawhmawh a ni" Manuel-a'n a rawn tih chuan Loicy-i chu a hawi chhuak vat a, a ṭah pawh a chhuak tawh lo.

"Manuel, kei hian naute thla hnih mi ka pai mek asin, chuvang alawm i thih ka hlauh zual em em. Ka hriatna a la rei lo va, tun hi sawi hun a ni chiah em tih pawh ka hre lo" a tih laiin Manuel-a chu rang zet hian a ṭhu awn nghal duai a, a hmelah chuan hamhaihna leh lawmna a inpawlh nawk nawk zui nghal.

"I chiang em Loicy? Han sawi nawn leh teh, kei hian fa ka nei thuai dawn tihna em ni? Nui lovin sawi chiang teh Loicy, i nuih reng chuan i fiamthu emaw ka ti mai ang, fiamthu ni lo hram se ka ti em em lawi si"

"Kei hian i fa ka pai mek Maneul, heti ang tak hian fa i awh ka lo ring miah lo. Hrisel takin dam dun zel ila, fa tam tak pek che ka duh a ni" Manuel-a âwma bei chung hian Loicy-i chuan a ti a, hlim avangin a la nui ver ver bawk.

"Ka hmangaih che Loicy, ka hmangaih lutuk che. Nang leh kan fa lo piang tur hi duat takin ka enkawl che u ang a, Music School i enkawl pawh ka phal tawh lo. Mi dang chhawr la, neitu nihna chu i la nei dawn tho va, nang chu nu i ni tawh dawn avangin hahdam i mamawh" Manuel-a ṭawng dan chuan a thla a timuang hliah hliah a ni.

"Ka tum alawm Manuel, School chu mi dang enkawl tir ka tum tawh a ni. Kan duh dan a inang chiah zel bawk si a, inhmangaih tur dik tak kan ni ngei e" kuah nghet lutuk ngam lovin Loicy-i chuan Manuel-a chu a kuah a, a hlim lutuk avangin a ṭah ṭhelh nghe nghe.

"Naktukah Honeymoon hmang turin kan zin nghal ang, naute kan neih hmain chu chu tih vat ka duh a ni. I rilru ka hria Loicy, ka taksa na avang hian nang nena hun hlu tak kan hman dunna tur hi ṭhulh ka tum der lo a nia, ka nat lohzia chu i hmu mawlh mawlh mai ang" Manuel-a chuan a rawn ti leh luam a, Loicy-i chuan lo sawi belh tur reng a hre lo, a nuih a za em em zawk.

Zanah chuan Loicy-i nau pai thu chu an chhungte ve ve an hrilh nghal a, anmahni ang bawk in an lo lawm ve a ni. A tukah chuan phur takin Honeymoon hmang leh tur chuan an insiam a, Manuel-a phei chu na nei tawh lo ang mai a ni. A nu phei chuan kal lo mai turin a ti a, mahse Manuel-a te ang mipa thu duh ve tak chuan kal loh chu a tum lo khawp. Thlawhnaah chuan inhma chhawnin Loicy-i leh Manuel-a chu an ṭhu dun a, an kut chu an inchelh sak ve ve bawk a, hmangaihna thu chu an inhlan mawlh mawlh a ni ber. Dawhkan sirah chuan Tape tê reuh tê hi a inhung a, Manuel-a'n a play chiah chu Loicy-i a kâ ta ho mai.

"Engtin nge i neih theih Manuel? Ka pa'n a pe che em ni?" meng phawk deuh chung hian Loicy-i chuan a ti chhuak hluai a, Manuel-a music play chu a naupan laia a Piano play ngat a ni a, chu vanga mak ti em em pawh chu a ni.

"Kan inngaihzawn hma khan i chanchin engkim ka chhui tawh alawm Loicy, Piano play i thiamzia thlengin ka hre vek asin, ka nupui i ni a, i chanchin hriat loh ka nei lo" ṭhen sukin Manuel-a chuan a ti ril raih a, rilru hlim lutuk avangin Loicy-i chuan Manuel-a kut chu a fawp vawng vawng ringawt.

"Nang hi ka thlarau thlenga ka hmangaih tawp theih loh tur hmeichia chu i ni Loicy, ka hmangaih reng ang che" Loicy-i kut fawp let ve zeuhin Manuel-a chuan a ti hniam ruih a, Loicy-i pawh hmangaihna avang bawkin a ngawi reng thei ta bik lo.

"Kei paw'n ka hmangaih che Manuel, ka thlarau thlenga ka hmangaih tawp theih loh tur mipa chu nang chauh hi i ni Manuel, nang nena hun hman dun baka thlakhlelh hi ka nei lo, thlakhlelh dang neih pawh ka duh lo a ni" Loicy-i chuan a ti let ve leh nghal a, an innuih a, an inkarah chuan hmangaihna chauh lo chuan hmun a chang tawh lo.

A TAWP TA