THE ONE WHOM MY SOUL LOVES (M&B) By Havali Adam - Page 1

THE ONE WHOM MY SOUL LOVES (M&B)

By

Havali Adam

6 May 2022

Chapter 1

Fûr lai a ni bawk a, ruah chu a sur duh cher cher ngei mai. Chu ruah sur chuan a tua te mah tibuai lo ang maiin mipui chu an zi nuai nuai tho va, mahni hna ṭheuh an thawk a ni hlawm ber. Cafe leh Hotel nei te'n an dawr lam panin pheikhai an vawr hlawk hlawk a, Company neiin an Company Building chhung luh nân hun an hmang rei lo hlawm hle bawk. Ram dangah erawh ruah chu a them paw'n a tla lo va, Austrailia ram khawpui ber Canberra-ah erawh ruah a sur reng thung.

Mipui sing ruk leh tih chenna Melton khawpui aṭanga khawpui zawk pan mek Richard Wilson-a te chhungkua chuan harsatna awm miah lovin Canberra khawpui chu an thleng thei hram a, ruah sur nasa viau lo se chuan chu aia an thlen hma a rinawm.

Pu Richard Wilson-a, a nupui pi Martha Wilson-i leh an fapa Johny Wilson-a te chuan Loicy Wilson-i; a nu leh pate tana fanu neih chhun leh a unaupa tana unaunu awm chhun chu an hmu châk tawh hle a, ruah sur tam avangin Signal lah chu a la awm ṭha lo leh ta nghal.

"In be tlang thei tawh em? Kei chu ka tum paw'n a theih loh, nge nia ama Apartment-ah kan va innghat tawp mai dawn zawk em ni?" pi Wilson-i chuan a benga phone chelh bet reng chungin a ti a, Car chhunga Tape zai ri rât rat Volume chu a herh zawi zui zat bawk.

"Nu, kei paw'n ka Call tlang thei bik lo. Ama Apartment bul vela dawrah lo awm rih zawk ila, Apartment-ah chhungah kan lut thei ringawt lo vang" Johny-a chuan a ti a, pu Wilson-a erawh a la ngawi reng thung.

"Duhtak, i fapa sawi ang chuan awm a va ṭhat zawk hmel ve, dawr velah chuan kan lo nghak mai dawn em ni?" tiin pi Wilson-i chuan a zawt leh ta nge nge.

"A ṭha alawm, kan Johny-a paw'n thluak hman nachang a hre ve tawh alawm" pu Wilson-a chuan a fapa chu a fiam zui zauh a, a fapa huat tawk a tling dawn tih pawh a hre vek.

"Ka pa! Mipa ka nih hi aw, ka rualpuite zingah pawh ka thluak chu a ṭha ber" Johny-a chuan a rawn ti ta reng a, pi Wilson-i erawh a pasal leh a fapa infiam dan chuan a tihlim hle.

Canberra khawpui chhung an tlan luh tak tak hnuah phei chuan ruah chu a sur duh leh zual a, pu Wilson-a te chhungkua chuan tih theih an nei tlem khawp mai. Loicy-i Apartment awmna Building hmaah chuan an ding tawh ngei a, mahse Car chhung aṭang chuan an la chhuak thei lo. Ruah a sur dawn tih an hriat lawk bik miau loh avangin nihliap pawh an keng lo va, fûr lai mah ni se an ken theihnghilh ve hrim hrim bawk a ni.

Building bul vela han tawmna mai tur dawr lah chu a inkhar ṭhap hlawm a, a awmzia an hre lo kher mai. Darkar khat chuang Motor chhunga an ṭhut ngawt ngawt hnu chuan ruah sur paw'n han lam a hnaih ve ta, ruah a sur nasa viau e ti lo chuan ni eng hmuh tur a awm leh lawi a, chu ni eng chuan chhimbal mawi tak a siam a, ruah han pawh nghak zo lova chhimbal thla la châk chu an awm ta fur mai.

Thlalatute Camera chu a ṭha hlawm chêk a ni ang ruah an nan tir pawp pawp a, anmahni paw'n huh an hlau eih lo, chuti ang thil mai mai la tura tha an seng peih chu leh lam kawng zawng tak chuan an fakawm, a chhan chu an ei zawnna pakhat kha a ni miau a!

Amaherawhchu pu Wilson-a te chhungkua chuan engmah an hrethiam lo, thlalatute chet dan vel chu an thlir deuh tlawng a, ruah han tial tial pawh chuan an rilru a luah ta ber lo a tih theih.

"Loicy-i hnen aṭang Phone Call ka dawng hlauh mai" tih leh pu Wilson-a chuan Phone pick up a rual nghal a, Johny-a leh a nupui chu a lam an hawi rang teh e!

"Aw pa, Taxi-in ka lo haw mek, Traffic a Jam nasa lutuk a, ka lo tlai maithei a ni. In lo thlen ngei chu ka ring tawh a, min lo nghak hram hram rawh u" Loicy-i chuan a ti nghal zung zung a, theih se zawng a chhungte hmuh mawlh chu a nghakhlel tawh a ni.

"Aw le, i chanchin lo sawi zel la a ṭha ngawt ang. Keini lah hian Signal kan nei hlei thei tlat lo leh nghal a, mahse kan neih thuai chu ka ring" pu Wilson-a'n a tih chuan

"Ka lo hrilh zel dawn che u a nia" a lo ti nghal thuai a, a pa aw ri hriat chu nuam a tiin inbiak reng mai chu a duh a, mahse amah tak paw'n Signal chu a nei ṭha bik lo a ni.

"Kan inbiak theih lai hian khawiah emaw lo chawlh lawkna tur hnai vai deuh hlek min hrilh ta che, chutah chuan kan lo nghak dawn che a nia"

"Ka Apartment awmna Building bulah in awm tawh em? In awm tawh chuan hmar lamah khan kal zeuh ula, dawr a lo awm ang a, kei paw'n Fast Food lak nân leh chawlh nân ber ka hmang ṭhin alawm"

"A ṭhat chu, kan lo awm dawn" a tih laklawh lai takin Signal a rawn bo va, pu Wilson-a chuan a ngaihna a hriat loh hmel kher mai.

"Loicy-i chuan eng nge a lo sawi a? A lo thleng tawh dawn em?" tiin pi Wilson-i chuan a pasal chu a zawt nghal a, pu Wilson-a erawh a bu nghut ringawt.

"Johny, ruah hi a do ngam tawh em tih han fiah ta che, ka Company i enkawl dawn avangin Tranining i la mek a ni tih hria la" a pa fiamna chu Johny-a chuan a nuih pui ta chiam a, pu Wilson-a leh a nupui pawh an bang chuang lo.

"Pa, min tih dan vel hi a naupangchhia deuh hret chuan ka hria a ni. Ruah tla hi a do ngam tawh tih te chu mitin kan hmu thei reng alawm, chhuah i duh ta mai em ni?" nui ver ver hian Johny-a chuan a ti a, pafa inkawm ngei tak chu an ni ve chiang a ni.

"A nih si chuan i chhuk ang u, hmar lamah sawn chawlhna chu a awm a nih hmel" tih leh pu Wilson-a chuan chhuk a rual a, a nupui leh a fapa pawh an chhuk ve nghal thuai bawk.

Motor tam tak chu kawngpuiah a intlar phei dul a, chu ni ber khera Traffic a Jam chu Loicy-i chuan a haw ru hle a, a awm dan chu huain ning hle mah se khawiah mah thinrim hrik thlakna tur a nei chuang si lo.

Taxi Driver lah chu nelawm loh zet hian a awm deuh hmuk bawk si a, a boruak hip chu khaw chhiat nen nuam a ti hlawl lo a ni. A Apartment bul lawkah a chhungte an awm tawh tih a hriatna te chuan a tihmanhmawh zual a, Motor lah chu an la insawn muang em em zui.

"Ka pu, Short Cut kawng lamah khan kal theih dan a awm mai lo em ni?" a ti leh ta thlawt a, Taxi Driver chuan darthlalang aṭanga melh zeuh pah hian

"A tlai tawh ka tih khâ nula, kawngah hian kan tang laklawh tawh" a lo ti deuh hmuk a, thinrim pawh ni se a awm ve reng, a zawt ngun mawlh mawlh êm a ni.

Sawi leh tur hre lo zet hian Loicy-i chu a thaw hluai a, motor insawn beuh beuh en chu a tih theih tawk a ni mai. Minute 15 vel sawt lo taka an tlan zeuh zeuh hnu chuan kawng chu a thawl thut a, remchangah lain Taxi Driver paw'n muangchan a tum tawh teuh lo.

A chak thei ang berin a tlan chhuak nghal a, Minute 15 chauh mah ni se Canberra khawpuia Traffic Jam rei ber a ni hial ang. Ṭum dangah chuan a rei berah pawh Minute 5 vel a ni tlangpui ṭhin a, tun ṭum erawh tu paw'n Traffic Jam chu an ning vek a nih hmel.

Apartment Buidling awmna lam Street chu rei lovah an thleng ta thuai a, ruah pawh a sur tawh lo. Chu chu Loicy-i chuan mak a ti khawp mai, University kalkawngah kha chuan ruah a la sur ngei a, mahse a Apartment awmna Street-ah erawh ruah hmi pawh a tla tawh lo thung. Inthing harh vatin a chhungte lam chu a ngaihtuah ta zawk a, a hmanhmawh luatah Taxi Fare chu a pek theihnghilh ṭep nghe nghe bawk.

A chhungte nen an han inhmu chiah chu engmah pawh an sawi lo, an inkuah chung chung ringawt. Dawr chhunga lo chawl ve te pawh chuan kut an lo beng dar dar a, thla la tawk pawh an awm a, mahse pu Wilson-a te chhungkua chuan tu mitmei mah an veng zo lo.

Loicy-i phei chu a hnuk a ulh deuh nghe nghe a, a chhungte chu a ngai ve êm a ni. Kum 3 chhung ngawt chu an tel lovin khawpui zawkah Music zirin a awm a, a chhungte lahin an tlawh hman bawk si lo.

Kum 21 leka upa hmeichhe tleirawl Loicy Wilson chu an khua Melton aṭanga Music zirin Canberra khawpui lamah a insawn a, chu pawh ama duh thlanna vek a ni. A tet tê aṭang tawh Piano Class a kal ṭhin a, a nih châk ber chu khawvel huapa Classical Pianist lar nih a ni.

Hmeichhia mah ni se a rualpui mipa te ai pawhin a rilru a lian zawk a, a tumah a chiang em em bawk. A naupan lai aṭang tawh Progidy huang chhunga sawi tham lawihin boruak a nei hak a, Piano a'n hmeh rik dan vel chuan mi mit leh beng a verh hle a ni.

Amaherawhchu a pa pu Wilson-a chuan TV lamah emaw mipui hriat leh zualna tur atana Interview neih vel chu a phal tlat lo va, Loicy-i chu thup rih a duh a ni ber. A nihna takah chuan a naupan laiin a lar vul chûk ang a, a len hnuah erawh mi hriat a hlawh leh si lo vang tih a hlau a ni. Loicy-i paw'n a pa thu chu a kipa kawiin a zawm mai zel a, naupang mai a nih avangin a pa thu chu hnial enah pawh a en ngai lo.

A chhungte tel lovin khawpui lamah a'n awm chiah mai chu Australian a nihna a lang chiang kher mai, a pa chawm ngai lo khawpin pawisa a thawk chhuak a, a ṭhiante ai paw'n hah pawh a hah reng a ni.

Amah chauh a ni reng reng lo, a nau Johny-a paw'n lehkha zir pahin hna a neih kat deuh fur a, kum 18 an tlin tawh chuan sum thawh chhuah chu an tih turah an ngai hmiah a, chu chu Australia ram kalphung a ni hrim hrim bawk.

"Engtin nge awm zel i tum? Master of Music lamah i kal dawn nge kan hnenah i lo awm ve tawh dawn?" Apartment-a an luh rualin pu Wilson-a chuan a ti a, mi dang erawh an bungrua vel an remfel mek thung.

"Kan Professor te khan University ṭha deuh mai min kawhhmuh a, mahse pawisa ka la nei daih chiah lo deuh a, dik tak chuan zir belh leh chu ka duh a ni" Loicy-i chuan a lo ti ve mai a, pu Wilson-a pawh a bu ta nghat nghat.

"Thil pakhat leh, chumi University-ah chuan Entrance Exam ka pe tawh a, chuta tling tlingte chu Australia Nationality University hian Schorlaship angin an zirtir dawn bawk" a tih zawm leh zat a, pi Wilson-i ve thung chuan

"Melton lamah lo let leh tawh zawk mai rawh, Music Foundation emaw Academy emaw dinin sum tam tak i thawk chhuak thei ngei ang" a lo ti daih a, a fanu chu a ngai ve tawh hrim hrim.

"I sawi dik tho mai ka nu, mahse Entrance Exam Result te chhuak ve phawt se ka ti, hna nghet nei lova awm reng hi hrehawm ka ti ve tho" a lo ti ve leh mai a, a nu chu ngai lo bik a ni lo.

"I nih duh tak chu ni tum phawt mai teh, mahse i zin kual nasa ngawt ang chu Loicy. I chhungte bulah pawh i awm hman meuh nâng, i nu lah hian a ngai ropui bawk che si" pu Wilson-a chuan a rawn ti a, Johny-a erawh sawi vak tur a hre lo.

"Master Class tal lak leh ka duh deuh maw le, chu bakah khawvel huapa lian tham Competition-ah kan ram ai awha tel ka duh bawk. Kan ram tihmingṭha tur hian hma lam ka pan a, kan Professor te phei chuan min beisei sang teh asin" Loicy-i chuan a la ti cheu a, zir zawm chu a duh tak zet a ni.

"Eng pawh ni se i Apartment hi chhuahsan rih ang u, Hotel lamah kan vaiin awm ila a nuam zawk ngei ang. Tun ṭum chu i Apartment luah man ka pek phal tawh ang che, kal ang u" tiin pu Wilson-a chu a tho tharh a, pa ber tih takah tûma'n a thu an hnial ngam lo.

Pu Wilson-a te chhungkua chu Hotel changkang ve tak pakhatah an insawn chhuak rih ta ngei a, Loicy-i pawh chuan pawi tihna a nei lo. Vacation lai a ni bawk a, a chhungte bula awm bak thil dang thlakhlelh a nei meuh lo zawk a ni.

Kum dangah chuan Vacation-ah tak ngial pawh an khaw lamah a haw ngai lo va, inhlawhna tur a dap thuai thuai ṭhin. Canberra khawpui chu a changkan bakah an khua aia pawisa thawh chhuah a awlsam zawk avangin chhuahsan a hreh a, zan lama thawhna tur dawr pawh a nei fur tawh bawk.

Kar thum chhung chu Hotel-ah an awm a, chu kar thum chhung chuan chhungkuaa leng chhuakin hmun chi hrang hrang an tlawh kual nasa hle a, pu Wilson-a te chhungkua chu an hlim dar dar thei hle.

Eng pawh sawi se chhungkua an nihna chuan a phuar tlat a, chu chu an hlimna thuruk pakhat a tih loh theih loh. Pa ber lahin a fapa a fiam awl lo va, mi ṭhenkhat phei chuan awh hmel taka thlir vawng vawng chang an nei hial a ni.

Hotel an awm hnu aṭanga kar lina a rawn inher chhuah chuan Loicy-i Entrance Exam Result pawh hriat theih a ni ta, vanneih thlak takin Scholarship hmute zingah a tel ve ta hlauh mai.

Chu Result chu a tan lawmawmin phurawm hle mah se a chhungte tan erawh a lawmawm hran lo, a chhan chu an bulah awm ve tawh se an duh ru hlawm hlawm em em a ni. Loicy-i ve thung chuan Classical Pianist ṭha tak tak hnuaia Master Class lak te chu a la duh hle zawk a, a tuina a nih miau avangin hriatthiam loh theih pawh a ni lo.

Chutia Scholarship hmute zinga a tel ve tâk hnuah chuan pu Wilson-a chuan a fanu chu an khaw lama haw lawk turin thu tlukna a siam nghal a, mahse ram danga Music zir chhunzawm tir erawh a tum ru tho.

Loicy-i pawh chuan a pa thu sawi chu hnialna chhe tê mah a nei lo, ram danga a awm tawh dawn avangin hun tlem tê la awm chu a chhungte bula hman a duh a ni. An khuaa a haw zet chu a ṭhian hluite nen an inkawm nghal deuh chawt bawk a, chung zinga a ṭhian ṭha ber chu Simon Wallace-a a ni.

Simon-a leh Loicy-i te chu tet tê aṭang tawha School kalho leh ṭhian inkawm ngeih em em an ni a, High Schhool an kal hnu phei chuan an ṭhiante'n inngaizawng emaw an ti hial a, chuti ang khawpa inkawm tam leh inzui tam chu an ni ve a ni.

Anni pahnih inkarah erawh inṭhian ṭhatna chauh a awm a, Simon-a phei chuan bialnu nghet a nei nghe nghe. Kum 4 dawn hnuah an inhmu leh ta chauh a ni a, anni ṭhian dun chu inngai lo thei pawh an ni lo.

Friday chawhnu her lam a ni a, khua chu ni dang ang lo takin a thiang deuh kâk a, Loicy-i leh a chhungte chu Airport-ah an ṭhu leh ran tawh mai. Loicy-i leh a nu chu an titi melh melh a, mipa pahnih erawh an ṭawng lo hrim hrim thung.

Khawvela Music zirna atana ṭha ber pawl New England Conservatory of Music daih daiha zir tur a nih tawh avangin Johny-a paw'n a ngai hle dawnin a hria a, Canberra khawpuia a awm lai kha chuan ram inangah an awm a, mahse tunah chuan ram hranah an awm tawh dawn tlat a ni.

"Tluang taka thleng turin duhsakna ka hlan mawlh mawlh a che u" Information Mic aṭanga thu puan an hriat rualin pi Wilson-i chuan a ti nghal a, a fanu chu a kuah vawng vawng bawk.

"Ka awm loh chhung a rei dawn lo va, Company hi a vawi khatna atan i kutah ka dah dawn a, i Part Time hna kha chu chawl rih mai rawh" tiin pu Wilson-a chuan a fapa chu a hrilh ve mial mial a, Johny-a paw'n a pa rin theiha awm chu a tum ruh hle.

"I duh chen chen cham rawh pa, kan Company chu nangmah aia leta ṭhain ka lo enkawl ang" inring tawk taka a tih chu a pa chu a nui chhuak ta hawk hawk.

"I unaunu hi Apartment luah tur ka buaipui sak zung zung ang a, ka lo let leh thuai ang" tih leh a fapa kuah chu a rual a, an inchen deuh thuak tawh avangin a fapa chhip sam pawh a fawp pha meuh tawh lo.

"Nang pawh min lo ngai lutuk lo la, ka lo haw leh thuai ang" tiin pu Wilson-a chu a nupui lamah a phei a, a hmuia fawh zeuh pahin a kuah zawm zat a, pi Wilson-i pawh chuan a pasal chu ngai dawn hle a ni.

Darkar 19 chuang lai thlawhnaa an chuan hnu chuan Loicy-i leh a pa chuan North America ram chu an hmu ve thei ta, chu chuan Loicy-i chu a tiphur zual sauh a, a pa kut lum vung vung chu a khal niap niap ringawt.

Boston khawpui an thleng chiah chu a vawi khat hmuhna a ni bawk nen ropui a ti hle a, a boruak pawh a duh ang taka hip nuam a ni. Airport aṭang chuan Massachusetts lamah an inkhalh phei leh a, chu chu Loicy-i zirna chhunzawmna tur New England Conservatory of Music awmna hmun a ni bawk.

Pu Wilson-a chuan a fanu Apartment luah tur chu a zawng nghal zung zung a, an ram ang mai mai chuan Apartment luah man a lo tlawm lo hlawm hle bawk. A tawpah erawh School Buidling aṭanga hmun hla lutuk lo; chhim lam deuhah a hmu ta hlauh mai a, a changkangin Room chhung chu a zau ṭha ang reng hle bawk.

Boston khawpui chu US-ah pawh a lian pawl a ni a, mi reng reng chu an changkang hlawm hle a, hmun tlawh tur mawi tak tak pawh a awm fur nghe nghe.

Ni thum a cham hnuah pu Wilson-a chu an ram lamah a let a, Loicy-i chuan a ngai nghal em em ringawt. Amah chauhin Room chhung mawi leh zau takah a awm a, Music lamah zirna chhunzawm dawn lo se chu a nu thu awhin an ramah a awm ngei ang. Amaherawhchu a kawng a ni tih hriat takin Schorlarship te a hmu leh zel a, chuti anga hun remchang chu bawhpelh a duh bik tlat lo a ni.

"Oh! Ka tihpalh, ka tihpalh lutuk" ti mawlh mawlh pahin Loicy-i chuan a mi sutnu lehkhabu chu a chhar zung zung a, zan lamah hna a thawk chau deuh bawk nen a nuamsam chiah lo a ni.

"A pawi lo, kawng ka lo en bik loh vang a nih khâ" rawn titu chu a aw phawi aṭang English a nih a ring lo ringawt a, a hmel a hmuh chuan a rinna a dik tih a hre nghal bawk.

"Loicy Wilson ka ni e" tih leh a kut phar a rual a, nelawm zet hian a nui a, a hmaa ding Asian nu pawh chu a awm mai mai thei ta bik lo.

"Jessica Wang ka ni e, ka hmu che chu ka lawm khawp mai" hawihawm zet hian a lo ti ve nghal vat a, chibai pawh an inchibai rei hran chuang lo.

"Australia ram aṭang Classical Music zir tura Scholarship hmu ka ni a, vawiin hi ka First Day a ni nghe nghe. Nang erawh i vawi khat kalna a ni lo vang ti raw? Ka Room awmna tur hi ka la bo khawp mai, min hrilh theih chuan ka lawm ngawt ang" Loicy-i'n a tih chuan

"Ni lo, kei pawh China ram aṭang daiha lo kal ka ni alawm, vawiin hi ka First Day ve tho a ni e" tiin Jessica-i chuan a lo chhang ve nghal a, sawi leh tur pawh hre chuang lovin an nui dun ta ringawt.

"Nulate u, he lamah hian lo kal rawh u le" hmeichhe aw lo chhuahna lam chu an hawi rual ṭhawt a, chu nu chu an Piano Teacher tur Lily-i a ni tih reng an hre lo.

Thu awih takin Loicy-i leh Jessica-i te chuan anmahni kotu awmna lam chu an pan ve mai a, Room chhung an luh chuan mi dang pawh an lo tam ang reng hle. Loicy-i leh Jessica-i chu ṭhutthleng khatah an ṭhu dun nghal a, innelna hun la awm rih lo mah se an innel em em tawh thung.

Miss Lily-i chuan Introduction te a pe zung zung a, First Day a nih avangin Piano Class a awm dawn loh thute a sawi a, zirlai naupang chuan Self-Introduction an nei thluah thluah bawk.

School-ah chuan rei pawh awm lovin zirlai naupangte chu an haw leh dam dam a, a tam zawk chu School Building luah an ni a, duh se chu Loicy-i paw'n a luah ve thei reng, mahse Schorlarship a nih tho avang leh Apartment luaha Part Time Job zawn a duh avangin a hnawl ta zawk a ni.

Amah ang thovin a ṭhian chhar thar Jessica-i chu Apartment luah ve tho a ni a, mahse an awmna Street erawh a inang lo thung. Ani chhim chhak lama a awm laiin Jessica-i erawh hmar lamah a awm a, an vawi khat inhmuhnaa an innel nghal em em te chu mak a ti ang reng hle.

"Nula, saw lai pa chu puih a va ngaih hmel ve" Taxi Driver hawina lam chu a hawi ve thuai a, Car dum mawi tak bula mipa taksa lian leh sang zet chu a thil hmuh awm chhun a ni.

"Puih i ngai em tlangval?" a zawn an thlen rualin Taxi Driver kum upa tawh lam chuan a ti nghal zung zung a, a mi biak pa erawh a ngawi ngul ringawt.

"Khawiah nge i kal dawn? I Motor kha ka lo en sak dawn che em ni?" Taxi Driver bawk chuan a ti leh a, chu pa erawh chuan

"Ka lo hmang zawk ang che" tih leh Taxi chhunga luh chu a rual a, Loicy-i chuan a bulah a'n ṭhu ta chiah chu pa lian a tizual kher mai.

"Khawi lamah nge kal i duh hrim hrim tlangval? Ka Passenger hi kan va thlah thleng phawt ang a, i duhna hmunah chuan kan kal dawn nia" Taxi Driver chuan a ti a, Loicy-i chu a lo ngawi kar thung.

"New England Conservatory lamah kal ka duh" chu mipa lian leh chawn sei zet chuan a ti bul deuh hmuk a, a aw thum tak avangin Loicy-i chu a lam a hawi phah nghe nghe.

"Aw haw, kan lo tlan chhuahna lam a nih chû, eng nge chutah chuan i tih dawn?" hriat nuam tak hian Taxi Driver chuan a ti a, mahse Loicy-i bula ṭhu mipa erawh chu ṭawng tum tawh lo ang maiin a hmui a chip hmuk daih.

Loicy-i chuan a kut chu a sik neuh neuh a, a awm dan teh thut chu a hrethiam lo kher mai. A bula ṭhu mipa lah chu a lian em em mai si, Taxi chhung chu a tan chuan a tê mah mah tih theih khawpin a ke a tawm a, ani tan erawh a tê miah si lo.

Hlauhthawn vang pawh ni miah lo hian a thin phute chu a panggai lo tial tial a, a chhan tak lah a hre bik si lo. A bula mipa ṭhu Perfume inkah rim te chu hip a duh tawh lo, mahse a hip a ngai tlat lawi si.

A rim mai bakah Motor pakhata chuan dun ringawt pawh chu hrehawm a ti a, chuti ang renga mi uap na mihring a la tawng ngai lo a ni. Pawn lam a hawi lai takin belh chian tumin Loicy-i chuan chik zet hian a en a, a eng ber chuan nge tizam tih a hre thei chuang lo. Chutia a en lai tak chuan a rawn hawi ta thut mai, Loicy-i chuan hawi sawn nachang reng a hre lo.

THE ONE WHOM MY SOUL LOVES (M&B)

By

Havali Adam

Chapter 2

"Min hrethiam dawn nia" ti sepin Loicy-i chu a hawi sawn ve thei ta chauh a, a mi en reng pain chal tichuar nangin en lo se chu hawi sawn nachang a hre lo rei khawp ang le.

Apartment lam pana an tlan lai chuan a awm dan chu a ngaihtuah let a, chuti tak maia hawi sawn nachang a hre lo chu mak a ti a ni. A nihna takah chuan a rilru lamin hawi sawn turin a rawn ti ngei alawm, mahse a taksa chu ama thunun theih loh ang maiin a awm tlat si a ni.

Tu nge a nih a hre lo va, a hmuh ngai pawh a hre lo va, hmuh zel a duh em tih tak ngial pawh a hre thei tawh lo. Chu mipa mi hipna ngah ru tak leh uap na em em chuan Second rei lotê chhungin a tidanglam vek chu a nia, awihawm loh zawk!

"Kan thleng e nula" Taxi Driver aw a hriat rualin a chhuk thuai a, lo ṭawng lo se chu thil ngaihtuah ngut nguta a ṭhut leh char char theih a ring hial a ni.

"Nula, Taxi Fare min pe dawn lo em ni?" tih thawm a hriat leh chuan mawl inti lutukin a ding chawt a, amah chu a dik lo kual vel vek tawh a ni ber.

"Oh! Ka tihpalh lutuk, min hrethiam teh ka pu" tiin pawisa chu a phawrh zung zung a, en rengtu awma a hriatna lam a hawi chuan a hawi sawn rang leh kher mai.

Apartment a luh thleng chuan a thin phu chu a la rang em em a, Room tukverh aṭangin a en leh ta tawp a, a chuanpui pa chuan namen lovin a tizam chiang a ni. Phat theih a ni lo, pha dawn pawh ni se phat ngaihna a awm lo.

Shower-a inphuh tir ser serin a taksaah Shower Gel te chu a hnawih kual a, a mit a chhin a piangin Taxi-a a chuan pui ngei mai chu a mitthlaah a rawn lang zel a, inbual pawh ngaihsak lovin a ngaihtuah chhunzawm ta tawp.

A bul hnai takah awm tawh lo mah se awm ang maiin a rim te chu a hre thei hialin a hria a, chu rim chu mipa Perfume hman rimah chuan a la rimtui ber ni te'n a hre leh zel a, a hmel zawng zawng nen a han mitthla phei chuan awihawm loh khawpin a inhmeh a ni.

A hmel mawlh kha, a vawi khat hmuhna mah ni se Magnet ang maia chakin mi hipna chak tak a nei a, chu chu Loicy-i ngei pawh chuan a do zo bik lo niin a hria, a tawpah phei chuan a indem duh ta lo law law ringawt.

Ani ang mipa mi hipna ngah leh uap na em em kha chu tu hmeichhia paw'n ṭhutpui se amah ang thova an awm a ring a, chuvanga indem buai duh ta lo law law pawh chu a ni. A tirah kha chuan a indem ngei a, hmel hriat loh mai mai laka a awm dan chu tlawm thlak a ti a, a chhungte leh an ṭhiante'n an hria ang tih a hlau hle bawk.

A inbual fai zawh hnu chuan Lotion inchulh hmasa leh tê têin thawmhnaw chu a ha a, a mitthlaah erawh a Taxi chuan pui pa hmel chu a la awm ru reng tho.

"Hello" a nu hnen aṭang phone call lo lut a hmuh rual chuan a pick up nghal a, Boston lama a insawn hnu aṭang an inbe khât ta viau bawk.

"Loicy, i ṭha zel maw? Min lo biak i tum ngai bawk si lo, Class te in ṭan tawh em?" a nu chuan a ti nghal zung zung a, Loicy-i pawh chuan

"Aw nu, vawiin khan Class kan ṭan chiah e, mahse vawiin chu self introduction pek nân kan hmang a ni deuh ber" a lo ti ve mai a, a nu chu a ngai ru reuh hle mai.

"Khati lam boruak eng nge a an? Keini lam chu fur thla zo tawh mah se ruah hi a la tla deuh reng a, kan hun lai ang khan khawvel sik leh sa inthlak dan pawh hi chhiar thiam theih pawh a ni tawh lo"

"Heti lamah chuan ruah a sur tawh reng reng hleinem, khua a ṭha pangai hle tawh zawk a ni. Boruak te hi a vawt ru sûk deuh a, a nuam khawp mai"

"A nih tak chû, zanriah kan ei dawn a, mamawh i neih chuan min be hreh lo ang che. I pa pawh rawn be ṭhin la, sawi lo mah se a ngai ṭhin che a nia"

"Aw le ka nu, hun ka neih apiangin ka lo be ṭhin dawn che u a nia" tiin rei lovah an inbiakna chu an hmet tawp a, Loicy-i chuan a zanriah ei tur a siam zui nghal bawk.

Kar te chu a liam zung zung a, Loicy-i paw'n Boston khawpui chu a fang kual ngun ta hle. A awmna hmun a nih miau avangin hriat chian a duh a, a chang phei chuan zanah te Apartment a thleng ve chauh zel.

Music School lamah pawh ṭhian a nei deuh fur tawh a, mahse chuti teh vakin a nel lo hlawm thung. A ṭhiante zinga a nel ber chu Jessica-i a ni a, mi dang phei chuan Asian a nih avangin an kawm ṭha duh lo nghe nghe.

Amaherawhchu Loicy-i chuan a kawm ngeih em em zawk a, a kawm ngeih tâk em avangin sawiseltu leh kawm duh lotu a neih tam phah a, Loicy-i chuan chuti ang taka an lo Racist chu a ring reng reng lo.

Vawi khat phei chu School buidling bula ṭhutthlengah chuan mahni chauha ṭhuin Jessica-i chu a ṭap keuh keuh a, Loicy-i chuan a khawngaih avangin a ṭhiannu hmusittute chu a hau hrep a, chumi ni aṭang chuan tûma'n kawm enah pawh an en tawh ngai lo.

"Le le le, tunah chuan thla 3 lai kan lo inzirtir ve tawh bawk a, vawiin chu Recital nei chhin mai mai ang aw, a hmasa ber atan Jessica Wang Perform turin i lo sawm ang" Miss Lily-i'n a tih chuan zirlaiho chu an lo phun sep sep a, chu chuan Jessica-i chu a tizam thar hle bawk.

"Bengchhen loh tur, tumah lo bengchheng s'u" tiin Lily-i chuan a kai chhuak a, Jessica-i awm dan chu Loicy-i chuan a lo khawngaih kher mai.

"Play tur ka hre lo" Jessica-i chuan inthlahrung tak hian a ti thawp sap a, Lily-i pawh chuan a khawngaih lek lek ta hial a ni.

"Eng Piece nge i zir tawp ber? I zir chin chin play la, zamna tur a awm reng reng lo a nia, mi dang mitmei veng lovin play tawp rawh le"

"Flight of the Bumblebee chu ka zir ngei a, ka thiam tawh ngei bawk, mahse ka zam deuh a ni Miss" a play tawh mai dawn emaw tih laiin Jessica-i chuan a ti leh hram a, mahse Lily-i chuan a lo fuih thuai thuai thung.

Piano khawih riin Jessica-i chuan zam chung chungin a Play ta mawlh mawlh a, amah en hranga kawm duh lotu a zirlai pui te chuan mak an ti ngei mai. A nihna takah chuan anmahni aiin Jessica-i chu a thiam zawk hial a, Lily-i lung pawh a awi khawp mai.

A ṭhiannu ber leh a kawm ve ber Loicy-i chu a lo khi ver ver a, a ṭhiannu chuan a beisei phak bakin a Perform a ni. A play zo chiah chu Loicy-i chuan ding chung hian kut a beng vak vak a, mi dangho erawh chuan an beng ve mang lo.

"I play dik kher mai Jessica, a note nen ka lo en kawp a, engkim kha a dik vekin ka hria" tiin a ṭhiannu chu a lo lawmpui nghal zung zung a, Jessica-i pawh a rawn nui chhuak ve ta.

"Isaac-a kha lo kal rawh le, i hun a thleng e" Miss Lily-i chuan mi dang a ko leh nghal a, a ṭhiannu ang lo takin Loicy-i erawh a phur ru hle tawh thung.

A hun a rawn thlen ve meuh chuan hmel hlim sârh hian Piano inhunna lamah chuan a kal a, zep lovah chuan First Year atana Piano Lession chu a thiam vek tawh tlat. Mi dangin an thiam em tih erawh a hre bik lo, zawh pawh a zawt ngai lo, a ṭhiannu tak ngial pawh a la zawt lo va, a thiam vek tawh thu chu tu hnenah mah a la sawi chhuak lo zawk a ni. Piano hmaa a ṭhut rualin a mit a chhing vang vang phawt a, a Piece ngainat ber chu en miah lo leh rilru pe em emin a play chhuak ta.

"Loicy, engati nge kha Piece kha i play?" Lily-i chuan a lo ti vat a, mak pawh a ti hle, mahse Loicy-i erawh a nui var var thung.

"Tihsual ka nei em ni Miss Lily? Ka Piece ngainat ber a ni a, ka play ta tawp a ni" Loicy-i'n a tih laiin Lily-i chuan

"Play dik loh chu i nei miah lo, mahse Piano Lesson-ah hian i Piece play kha a awm miah lo alawm, engati nge Piano Lesson-a Piece awm ho hi i play loh?" a lo ti leh nghal zat a, chutih lai chuan zirlai lo nui ru tawk pawh an awm nghe nghe.

"Ka...eng lo a nia, ka tihpalh a ni e Miss Lily, dik tak chuan Piano Lesson-a piece ho hi ka thiam vek tawh a ni. Play ber tur hre lovin ka awm a, ka piece ngainat ber ka rawn play ta a ni e" zam ru tak chuan a ti a, an Miss chuan a hau hrep ang tih a hlau a ni.

"Enga!? Piano Lesson ho zawng zawng hi thiam vek tawh maw!? Ka awih thei lo, dawt i sawi em Loicy?" an Miss chuan mak ti zet hian a ti ta thlawt a, ani lah chuan lu a lo thing vat bawk si.

"Aw le, vawiin atan chuan tawk rih rawh se. Loicy, ka office-ah min lo zui lawk ta che, inkawm lawk teh ang" tih leh kal chhuah nghal a rual a, Loicy-i chuan an Miss awm dan chu a hrethiam bik chiah lo.

"Vawiin chu kan haw rual thei dawn lo a nih hmel, ka lo va haw hmasa mai ang" Jessica-a chuan a rawn ti a, Loicy-i pawh chuan

"A pawi khawp mai Jessica, eng nge kan tih dawn lah ka hre der si lo. Min hrem mai ang tih ka hlau teh asin, nangin engtin nge min tih i rin?" a lo tih zawm ve nghal zat.

"Ka hre bik lo, mahse Miss Lily-i te chu a fel alawm, engtin mah a tih che ka ring chiah lo, ka kal ang e" tiin Jessica-i chu a kal liam nghal a, Loicy-i pawh chuan an Miss room lam chu a pan ve leh ta ringawt.

"Min han hmuh te le, a tir aṭang khan play chhuak vek rawh aw, i hun ka pawt hek duai dawn tih hre mah ila ka hmuh a ngai tlat bawk si" room chhunga a luh a rualin Lily-i chuan a lo ti a, Piano hmaah Loicy-i chu a ṭhut tir zui nghal bawk.

An Miss thu awihin Loicy-i pawh chuan a tir tê aṭang chuan a play ta mawlh mawlh a, a thiam bel chian hneh tawh hlawm em avangin a play tawh chinah tihsual pakhat mah a la nei lo. Chungte hlei hlei chu an Miss chuan mak a lo ti em em a, note nena a en kawp tak ngial paw'n dik lo a awm lo tluk a ni.

Lily-i chuan sawisel tur zawngin a lo ngaithla kar a, mahse engkim chu a ri dik vek bawk si. A hnuah phei chuan a mood-ah a cheng ta nghe nghe a, chuti ang taka zirlai thiam chak a nei chu a lawm hliah hliah a ni.

"A va han ṭha tehreng em, tun ṭum chu kum tam tak kan neih tawh loh kan nei dawn a va nih hmel ve le" Lily-a chuan a ti chhuak ta hial a, Loicy-i chuan nuih tur nge nuih loh tur pawh a hre lo.

"Ka sawi awmzia chu maw Loicy, kum 10 chuang nang anga thiam chak zirlai kan nei tawh lo, nang hian kan School i tihmingṭha thei ngei dawn tih ka hre thei" a ti leh nghal zat a, chutah erawh Loicy-i pawh a nui ve ta zeuh.

"First Year i zawh veleh Second Year atan Most Expert Pianist bulah Master Class i lak theih ka ring hial a ni" a tih chuan Loicy-i chu a hlim hle a, an Miss thu sawi chu thleng dik thei se a duh a ni.

"Miss, Master Class nei turin ka tling tawk ang maw? Ka phur rualin ka zam nghal hle mai, a chhan chu Most Expert Pianist te hi an khirh thei lutuk an ti asin" an Miss a nel tâk em em chhan pawh chu a hre bik lo.

"Ni lo, chuti ang an ni vek kher hleinem. Kan School-a Most Expert Pianist erawh i hlauh ang ngei chuan a khirh a, mahse a mit i tlung zo dawn tih kei chuan ka hria alawm Loicy"

"Keimaha beiseina sang tak i neih avang hian ka lawm e Miss, chuan min ti phur em em bawk a ni"

"A ṭhat hlauh chu, va haw tawh rawh, i hun ka la hek hnem ta mah mah a ni" hawihawm taka Lily-i'n a rawn tih chuan

"Aw le" ti sepin Loicy-i pawh chu room aṭang a chhuak ve mai a, a rilru chu a hlimin a hahdam huai a, inhauhna awkâ dawn aia induhsakna leh beiseina awkâ a hre ta zawk chuan a tihlim a ni ber.

Apartment a thlen chuan a mu deuh tawp a, zan lamah hna a thawk rei ve deuh bawk nen a che peih mang lo a ni. Apartment building aṭanga hla lotê ah dawra thawhna tur a hmu hlauh mai a, hmeichhe dang chu ni se chuti angin Part time job a zawn kher a rinawm loh, a chhan chu Scholarship hmanga zirna chhunzawm a ni a, a mamawh leina tur pawisa chu a nei chiang a ni. Chu bakah a pa hnen aṭang paw'n pawisa a dawng thei reng a, mahse ani chuan a duh bik tlat lo, chu chu Australian a nihna tilang chiangtu a ni.

Tin, Part time job chu kar khatah ni thum chauh a thawk ṭhin a, ama'n duh khawp lo hle mah se a chhungte erawh chuan pawi an ti lo hle. A nu pi Wilson-i phei chuan thawk hah lutuk lo tur leh leng chhuak ve ṭhin turin a ti zawk a, zirlai leh hna ngawr ngawr ngaihtuah lo turin a chah nasa thei hle bawk. A tlangpuiin Tuesday, Thursday leh Saturday-ah a thawk ṭhin a, a dang zawngah chuan a nu chah angin a leng chhuak ve ṭhin bawk.

Zanriah chu mahni chauha ei leh a room chhunga ei chu a peih ta tlat lo va, a ṭhiannu Jessica-i chu biain zanriah ei puiah a sawm a, Jessica-i pawh chuan a lo duh ve mai. An vawi khat ei chhuah dunna tur a ni hrim hrim a, an pahnih hnîh chuan an phur dun khawp.

Ei duhna bik pawh an nei hran lo va, sum rena mahni inchawm zo em em zawk Loicy-i chuan dawr changkang ve taka ei a rawt ta zawk tlat a, Jessica-i pawh chuan a lo hnial leh ta bik chuang lo.

"Ka pate an lo zin dawn asin, i hmu duh ang ti raw?" thil ei pahin Jessica-i chuan a ti a, Loicy-i chuan a ṭhiannu chhungte chu hmuh loh a tum lo hle.

"Tehreng mai, ka hmu châk tawh viau a ni" tiin ani pawh chuan a hmaa ei tur awm chu a ei zawm mial mial a, mahse Jessica-i hnunga thil ei mek hmel a hmuh chuan zam rukna a nei nghal ringawt.

Kha pa kha, Taxi-a a chuanpui pa ngei mai kha a hmu a, chu chuan a thil ei pawh a ṭhulh tir leh ta hial. Thil ei lova a thil en ngai a en rei lutukna lamah Jessica-i chuan a biak phah nghe nghe a, chuti ni lo se chu thil ei chhunzawm nachang pawh a hre leh kher lo vang.

Inṭhut hlat ang reng hle mah se amah ringawt pawh chuan a uap hneh em em tho a, chungte chu mak a ti thlawt a ni. A mi hmuh pa bulah chuan hmeichhe sam buang chhe lo tak leh ṭawng duh siam siam tak hi a ṭhu bawk a, chu nu chu Loicy-i chuan a ngaihzawng emaw a nupui emaw a nih ngei a ring ve hmiah.

"Eng em em nge i la en cheuva Loicy?" tiin Jessica-i chuan a ṭhiannu hawina lam chu a en ve leh ta tawp a, mahse ani chu a ṭhiannu angin a danglam ve eih lo.

"Engtin nge i awm?" Loicy-i chuan a ti deuh tawl a, Jessica-i erawh a ṭhiannu zawhna chuan a ti bang bo hle.

"Eng nge i sawi awmzia? Eng thil nge ka hmuh i lo beisei a? Engati nge i hmel leh i awm dan a danglam vek zawk?" tiin a ṭhiannu chu a zawt let ta daih thung.

"Eng lo...ka...nia, i danglam ve loh chuan sawi thui pawh ka duh lo" a ṭawngkam chhuak chu a nawi ang reng hle a, chuti ang chuan Loicy-i chu a ṭawng ngai hauh lo.

"Eng vangin nge ka danglam ringawt ang?" Jessica-i'n a tih lai tak chuan inhlat taka awm chung pawha tidanglam theitu mit leh Loicy-i mit chu a intawng ta chat mai.

Loicy-i chuan hawi sawn mai a tum a, a thei leh ta pek lo. A tih ngaihna hre lo chu tawi tê hian a nui a, mahse a nui rei lo chiang hle. A mi en pa ber chuan nuih chu sawi loh, chhe tê paw'n a hmui a lo tiche ve eih lo va, Loicy-i tan chuan zah rum rumna tham a ni. A bula ṭhu hmeichhe sam buang chuan a lam hawi zawnga kuaiin a fawp a, chutah zet zawng ani tan chuan hawi sawn lohna chi a ni tawh lo.

"Ka..eng lo..i inei puar tawh em? Kei chu ka puar tawh a, i inpeih hûn hunah kan kal kal thei a ni mai" a ṭhiannu hmai a zah avang chuan a ti ringawt a, Jessica-i erawh chuan a lo en chik hle thung.

"Ka puar tawh chu a ni mai" tiin Jessica-i chuan a hmui vel chu a hru zui mawlh mawlh a, a ṭhiannu awm dan chu mak ti ru hle mah se zawhna zawh vak a tum hran lo.

Dawr an chhuahsan hnu chuan an haw tlang nghal a, Loicy-i pawh chu a pangngai leh vek tawh a nih hmel. Apartment-a a luh rualin Piano Piece chi hrang hrang chu a zir leh a, chu chu a zan tin tih dan a ni.

Sight Reading chak nân tiin Piece chi hrang hrang a la khawm a, a zir urhsun em em a, amah angin mi dang chuan zir ngawrh ve ta se chu an thiam chak ve tho a ring ṭhin. A zir peih mai bakah a man chak ve hrim hrim bawk a, kum khat chhunga zir tur pawh thla 3 chhung lekin a thiam nghe nghe.

Thla khat a ral leh meuh chuan harsatna a tawk ve ta, zirlai ṭhenkhat chuan zirtirtute hriat lovin a dawhkanah ṭawngkam bawlhhlawh tak tak inziahna lehkha an lo hnutchhiah ṭhin a, chu pawh a ṭhian kawm ngeih ve tak Jessica-i vang a ni.

Loicy-i erawh chuan pawi a ti lo, chung lehkha avang chuan ṭan a khawh sauh sauh zawk. Eng lehkhaah pawh chuan hmeichhe vawt tak leh mipa hipna reng nei lo a nih thute chu a inziak tel zel a, a ziaktu lah a hre thei bawk si lo nen miss Lily-i bulah pawh a Report duh ta lo law law a ni.

"Ka tlai avangin ka tihpalh miss, thawh ka hai palh hlauh alawm maw le" room chhunga a luh rual chuan a ti nghal a, zirlai naupang dangte chuan a lo sawi zui sep sep nghal bawk.

"A pawi lo, i tlai chhe lutuk hleinem. I ṭhutna turah va ṭhu la, vawiin chu thil dang dai deuh kan ti dawn a ni. In chung lamah i chho ang ule, bengchheng lo ila" Loicy-i chuan miss Lily-thu sawi awmzia chu a hre lo kher mai.

"Inter-School Competition a awm dawn a, chuta tel tur te chu vawiinah Professor te'n an thlang dawn" a ṭhiannu awm dan hrethiam zetin Jessica-i chuan a lo ti vat a, ani pawh a bu ve ta nghat.

Zirlai naupangho chu in chung lamah an chho sap sap a, Selection neihna tur room an thlen chuan Professor pathum an lo ṭhu diam tawh a, ṭhutna pakhat erawh a la awl thung. Chung Professor ho chu kum upa tih hriat takin an sam a ṭuak phung tawh hlawm a, an vun pawh a chuar ve tawh hle.

Lily-i chuan a Student te aṭang Loicy-i chu a ko chhuak hmasa ber a, a chhuang ve êm bawk a ni. Loicy-i chuan mawi leh thiam nal tak hian Piano Lesson zinga har ber mai chu a play chhuak a, Professor te lung pawh a awi hmel hle.

Mi dang chuan an thiam ang âng an play ve zel a, Loicy-i play ang chiah rawn play te pawh an awm ve tho, mahse amah ang em ema play mawi erawh an awm lo thung. A ṭhiannu play dawn lai takin room chhungah chuan mi dang an rawn luh belh a, lo lut mek hmel a hmu chiah chu a zam ru leh der der tawh.

Lily-i chuan introduction a lo neih sak zung zung nghal a, Most Expert Pianist a ni tih leh an Professor a ni tih Loicy-i'n a hriat chuan a kâ hau ringawt.

"Manuel Firth" zawi tê hian a ti zui sep a, Lily-i'n a hming sawi lo se chu a hre hauh lo vang, Taxi-a an chuan dunna te chu a ngaihtuah chhuak lo thei leh ta lo.

Motor pakhatah an chuang dun a, mahse ani chuan an Professor a ni tih reng a lo hre si lo. Khami nia a chet dan te kha a va han mawi lo tak, Taxi Fare a pek theihnghilh hial a nih kha! A la hre ve reng ang em? Ni lo, a hriat reng chu a ring lo.

Thla hmasa lawka an thil ei laia an inhmuh dante chu a ngaihtuah chhuak leh a, thil dang zawng aiin hmel upa lo taka Professor a ni thei leh Most Expert Pianist a ni thei chu mak a ti a ni.

A lam pana lo kal mek Jessica-i chuan a inngaihtuah chhuah tir vat a, Professor Manuel- Firth-a lo thlen hmaa a Perform zo hman te chu a lawm hnuhnawh hle. A perform laiin ṭhu ve ngat se chuan zam avangin a play dik thei lo ngei ang, chu chu chiang takin a hria a ni.

Selection Result chu rei lovah puan nghal a ni a, Loicy-i pawh miss Lily-i beisei ang ngeiin an School aiawha Competition-a tel tur zingah an thlang te ngei e. Hmeichhe pahnih leh mipa pahnih an thlang a, hmeichhe pahnih te chu Loicy-i te ṭhian dun an ni.

"Loicy, i la chhuk ve thei lo, Professor Manuel Firth-a'n a Office-ah a hmu duh che" chu thu chuan a tizam leh ta, Lily-i hnenah chuan a hman loh thu sawi a duh rum rum.

"A Office-a a awm tur thu a sawi a, tunah hian va kal nghal mai rawh" tiin Lily-i chu a kal sawn zui nghal a, Loicy-i pawh Professor Manuel-a Office awmna zawng pahin a phei a, tih theih dang nei hek lo.

Kawngka tawp ber chungah chuan amah hmu duhtu hming chu a intar ta kuau mai, luh tawp tur nge kik phawt tur tih pawh a hrethiam chiah lo. Na zeta thawk la hawkin a ding ngil a, a mit chhing vang vangin inrintawkna leh zam lohna neih a tum a, a men rualin kawngka chu a kik zui nghal bawk. Kawngka chu a lo inkalh reng reng lo va, a kik zawng chuan a inhawng titih der a, room chhunga mipa ṭawng ri thum bul bul chu a hre zawm nghal zat bawk.

"Ka hria, mahse ka tui lo. Keima'n ka enkawl mai ang, sawi reng ka hne tih chu i hria alawm" an Professor awah chuan nelawmna pakhat mah a awm lo va, rang takin zam loh a tumna te chu a bo leh ta duak mai.

"Inbiak tawh rih loh hi a fuh ber, ka duh tawk ni rawh se" ti leh hmukin an Professor chuan phone chu a hmet tawp a, Loicy-i chuan chhuah daih mai a duh tawh zawk.

"Ka..ka...ka tihpalh" Professor Manuel-a'n a rawn hmuh rualin a lo ti nghal nawk nawk a, an inbiakna ngaithla ru angin a ngai ang tih chu a hlau ngawih ngawih.

"Khawiah nge i kal dawn?" pawn lama chhuah tuma a inher laiin Professor Manuel-a chuan a rawn ti ta chat mai, a ke pen a va tawp chiang tehreng em.

"Ka hmuh duh thu che Miss Lily-i hnen aṭang i hriat tawh ka ring" a rawn tih leh chuan a lam hawi zawngin a inher leh a, mahse a beisei aiin an inawm hnaih ta hle.

"Nia, eng lo..ka hria alawm, miss Lily-i chuan min hmuh i duh thu min hrilh ngei e" a ti ve ta sep a, Professor Manuel-a huhang na zet avang chuan a ṭawng ring ngam thlawt lo a ni.

THE ONE WHOM MY SOUL LOVES (M&B)

By

Havali Adam

Chapter 3

A hmaa mipa taksa lian leh sang tak amah hnung chhawn zawnga kal chu a thlir tlawk tlawk a, tih ber tur pawh a hre lo. Professor Manuel-a lah chu a ngawi leh reng tawh bawk si, Loicy-i tan chuan mahni thua ṭawng chu huphurhawm tak a ni. Chutah Professor Manuel-a lah chu Professor satliah mai mai ang a la ni lo zui, a hmel aṭang chuan Most Expert Pianist a ni tih a hriat ngawih ngawih a ni. Loicy-i chu lungmuang lo zetin a ding reng a, han chhuah lah chu tih chî a ni der bawk si lo.

"Ka awm hman si lo va, i Piano play chu hriat ngei ka ngai a ni" Professor Manuel-a chuan a lam pawh a la rawn hawi chuang lo va, a rawn ṭawng chhuah thut avangin Loicy-i chu a phu ang reng hle.

"Chu chu ka koh chhan ber che a ni" tih zawm leh nghal zatin Professor Manuel-a chuan a lam a rawn hawi ta, tunah chuan an inmelh chiang ta khawp mai.

Piano inhunna lamah chuan a kal ve nghal mai bawk a, mahse eng Piece ber nge play tur a hre hauh lo. A zam lutuk tak zet, a hriatthiam phak bakin Loicy-i chu a zam a ni. Bul ṭan dan tur tak ngial pawh a hre lo hial a, Miss Lily-i bul chu ni se rilru hahdam tak leh thawveng takin a play nghal thei ngei ang, mahse tunah chuan Most Expert Pianist bulah a awm tlat. Chu tak chu a zamna chhan a ni ber lo, eng vanga chuti anga zam nasa em em nge a nih pawh chu a hre thei chuang lo.

Professor Manuel-a chuan play turin a mitmei zeuh a, chutah Loicy-i chuan thawk a han la hmasa vang vang phawt a, mood-a chen awl em em piano piece chu a play ta. A play chhung zawng chuan a mit a chhing tlat a, a mood-a chen tum zetin a rilru chu a sawr bing a, mahse a hlawhchham tluan ta ṭhak thung.

A play chhung zawngin maimitchhing ve teh mah se a mitthlaah erawh an Professor hmel rum tak chu a lang tlat a, chu mai chu a la ni lo cheu. A mit a chhing tlat chung paw'n a rim leh a huhang te chuan a la chenchilh hneh hle a, a duhthusam ang pawhin a play thei lo ta reng bawk.

"Engtin nge School ai awha Competition hma chhawn turin an thlan theih zawk che!?" an Professor aw chu a khauh fak a, a ri chu hriat a nuam hlawl lo.

"Tih sual ka nei em ni Professor? Play dik loh ka neih awm ka hre miah lo asin, eng lai kha nge ka tih dik loh lai?" intihuaisen chawpin Loicy-i chuan a ti a, chutah Professor chuan a hma aia khauh zawk hian

"Beng fah reng i play chhuak zo lo ve, i rilru leh tih tak zetin i play lo bawk" a rawn ti ram nghal hmuk a, Loicy-i chu a awm reng a nuam tawh lo.

"A chhan chu ka zam a ni Professor" zep nei lovin a ti chhuak ta tawp a, a ṭhutna aṭangin a ding zui nghal bawk.

"Eng vangin?" a mood a fuh lo laklawh kher bawk nen Manuel-a chuan a aw chu thunun a tum teuh lo.

"Ka hre lo, ka zam lutukna lamah ka rilru pawh ka pe thei lo. Miss Lily-i bulah chuan ni se ka awm dan pawh a dik ang a, i beng fah tak pawh ka play chhuak ngei ang"

"Chu i sawi kalhmang aṭang chuan keimah vangin i play dik thei lo tihna a ni maw?" Loicy-i chuan Manuel-a zawhna chu a ngaihtuah vang vang a, chhan mai dan tur pawh a hre lo.

"Aw Professor" tiin a tawpa tawpah chuan a ṭawng chhuak ta a, Manuel-a erawh awih lo tih hriat zetin a lo meng nur nasa hle thung.

"Heta ṭang hian chhuak la, School ai awhin Competition-ah i tel dawn lo tih inhre bawk ang che. Tel tlak i ni rih lo, thil ho lam mai mai vanga i buai chhung chu hma i sawn lo vang" Loicy-i chu a ṭah a chhuak tet tet a, chuti ang renga intham lohna awkâ chu a la dawng ngai lo tlat a ni.

"Ni lo Professor, min thlang vek tawh alawm, i lo thlen hma khan Professor dangin min thlang vek tawh" fiah deuh fak chuan a ti a, Competition-a telna chance chu bawhpelh a duh bik lo.

"Kei hi New England Conservatory of Music School-a Most Expert Pianist leh Expert Conductor awm chhun ka ni a, ka rem tihna tel lo chuan tûmah Competition-ah an tel thei lo, i hre chiang tawh em?" Manuel-a chuan zawi ang reng tak hian a ti ram leh hmuk a, zirlai naupang mai maiin a thu a hnial ngam chu a tha a na lam lek lek a ni.

"Ka tling tawk a ni" Loicy-i chuan a la ti hram a, zamna te chu a la nei teh meuh mai, mahse chung a zamna te chu hre lo derin a chhang let ve tawp a ni ber.

"Chhuak nghal rawh!" a hma ai zawnga vinin Manuel-a chuan a ti hrawk a, Loicy-i chu a lo hlauthawngin a lo phu bawk nen Professor hmaah chuan a mittui a tla ta ringawt mai.

Hmanhmawh taka inherin Professor Office aṭang chuan a tlan chhuak titih a, Office pawn a thlen ruala an Miss Lily-i biakna pawh chu a chhang thei lo. Taxi lain ama Apartment lamah a tlan haw nghal vang vang a, mahse Taxi chhungah chuan mi dang an awm ve avangin ṭah rik a la hlau khawp. Apartment a thleng chiah chu khumah bawkin a ṭap nghal tlawk tlawk a, Professor Manuel-a'n a hrawkna leh a tlin tawk lohzia a sawi chu a la na tak zet a ni.

A tet tê aṭang tawh tûma thiam lo tih leh mi duh khawp tling lovin piano a la play ngai reng reng lo, thlirtu leh a piano play ngaithlatute chuan an fak chamchî ṭhin zawk a ni. Amaherawhchu Ptofessor Manuel-a ve thung chuan a play dan chu a lo duh hauh lo va, Competition-a tel tlak a nih loh thu a sawi lai te chu a ngaihtuah let a, a ṭah chu a chhuak zual ta sauh. Amah pawh chu a indem hle a, hmeichhe inring tawk tak leh ṭap mai mai ngai lo kha a ṭap a, Professor Manuel-a vanga a zam em em te chu a inhaw ru kher mai.

"Loicy-i chungah khan eng nge thleng Manuel? Eng thu nge i lo hrilh? Ka biakna pawh min chhang lovin a rawn ṭap chhuak a, i va ṭawngkhum na awm ve le" office chhunga luh pahin Lily-i chuan a ti a, Manuel-a erawh a ngawi run thung.

"Manuel" Lily-i bawk chuan a ti leh halh a, a thil ken lai chu dawhkana dahin kum tam tak a lo thawhpui tawh Mauel-a chu a en chik hle bawk.

"Competition-a tel tlak a ni lo" Manuel-a chuan a ti deuh hmuk a, Lily-i ngaihdan erawh a ni lo nasa ngang mai, zirlai zingah Loicy-i bak baka tel tlak a hre lo a ni.

"Kei chuan tel tlakah ka lo ngai hle asin, a kut thlak a mawiin a dik zaih bawk. Kum thar lamah i hnuaia Master Class la tura rawn sawn chhoh ka tum nghe nghe, chuti ang khawp chuan a thiam a ni"

"A thiam lo ka ti miah lo Lily, mahse thil ho lam tak avanga a zam kha ka duh lo a ni. Ka chhungte nen kan inbe ṭha lo laklawh bawk si a, ka insum hman lo a ni"

"Eng vanga zam nge a nih? Thil ho lam tak avangin a zam ka ring lo, chuti ang mi a ni pawhin ka hre lo bawk"

"Ka awm avangin a zam thu a sawi a, chu chu thil ho lam leh thil ṭul lo tak zawng a ni e. Competition-ah chuan endiktu tam tak an awm ang a, tun let hian a zam ngei ang"

"Ni tak e, a sawi tawh tak alawm Manuel, a hmuh hma aṭang tawh chein a hlau nghal em em che a ni. Most Expert Pianist chu khirh lutuk turah a ngai vek a, nang lah chu i lo khirh ta reng bawk si"

"Min hmu tawh alawm, tun hnai ni lovah kan inhmu tawh ngei e" Manuel-a chhan dan avang chu Lily-i chu a meng buai deuh nak a, Manuel-a lah chuan a ngaihsak chhunzawm der tawh si lo.

"Khawiah chuan nge in lo inhmuh tawh a Manuel? In inhmuh tawh vang em ni i lakah chuan a zam em em?"

"Chu zawng ka hre hauh lo mai, sawi tawh lo zawk teh ang. Min chhuahsan rih mah la a pawi miah lo Lily, vawiin chu ka mood a dik lo hle a ni"

"Aw le, hei hi kan zirlaite Attendance a ni a, endik pawh a ngai tawh lo, a tawpah khan i hming sign diat diat la, chu zawng chu a ni mai" dawhkan chunga lehkha var sâr ho kawk zeuhin Lily-i chuan a ti a, thil dang sawi belh tawh lovin a chhuak zui nghal bawk.

A nu nena an inbiakna ngaihtuah ngut ngut tawh lovin Manuel-a chu a inthing harh a, paper tawp lamah chuan a hming a sign zung zung a, mahse paper pakhat erawh a en rei hle thung. Competition-a tel tlak loh thu a lo sawikhum; a zirlai ni bawk Loicy Wilson-i hming chu a en vawng vawng a, a ṭawngkhum avangin inthiam lohna nei lo mah se a chhungril erawh a danglam tlat a ni. Chutia Loicy-i a ngaihtuah lai chuan a bialnu Rosy-i hnen aṭang phone call a dawng a, a lo kal dawn thu a sawi chuan pawi pawh a ti hran lo.

"Ka ngai lutuk che Manuel, nang lah chuan min lo biak i tum bawk si lo" office chhunga a rawn pen luh rualin Rosy-i chuan a ti a, a vuina aw chu a bialpa Manuel-a chuan hria se a duh khawp.

"I chau tawh em?" ti lehin Manuel-a mal chungah chuan a ṭhu nghal tharh a, a hmuiah chuan a fawp zeuh bawk.

"Kan leng chhuak rih dawn em ni ang?" tia a sawm lai chuan Manuel-a chu a rawn che thut a, a kawr tawngchham zet zet chu a hlip sawk sawk a, chu chu Rosy-i duhthusam ngei pawh a ni.

"Manuel" tiin zahna nei map lo hian Rosy-i chu a ṭe chhuak hak hak a, a bialpa chet dan chuan nawmna vawrtawp a pe a ni tih mi zawng zawngin hria se a duh a ni mahna le.

Amaherawhchu Manuel-a chu a dik thei ta hauh lo, ni dang chu ni se Rosy-i taksa chhungah chuan rei tak a awm ngei ang. Hahdamna a hmuh inbeiseiin Sex a hman pui kha a ni a, mahse a lo ni teuh lo. A hma ai zawngin a chiang lo leh zual ta zawk a, chuti ang chuan vawi khat mah a la awm ngai lo.

A bialnu taksa aṭanga a chhhuah hnu chuan ruak ngal ngatin tukverh bulah a kal ta daih a, mahse Rosy-i zawk chuan a lo duh khawp lo nasa mai. Manuel-a dinna lamah phe thuaiin

"Babe, ka la mamawh che asin" tih leh ṭhingṭhit a rual a, vanduai thlak takin a bialpa mipatna hrawl ve tak chu a kai tho zo tawh tlat lo.

"Duh tawk ang Rosy, ka awm a nuam chiah lo" ti supin Manuel-a chuan thawmhnaw a inbel zui ta daih a, a mitthlaa Loicy Wilson-i mittui tla hmel lang tlat chu a hrethiam lo hle a ni.

Bangbo zetin Rosy-i pawh chuan a bialpa che vel chu a en reng a, a tawpah phei chuan lungawi lo ru zet leh kham khawp hmu lo zetin a inha ṭha ve leh ta ringawt. Manuel-a awm dan teh thut chu mak a ti a, ni dangah chuti ang chuan a awm ngai hauh lo.

Ni dangah te chuan am takin Sex an hmang a, ani phei chuan vawi tam tak nawmna vawrtawp a thleng hial ṭhin. Chu ni zet zawng Rosy-i tan chuan a hamhaih thlak a, a kham khawp hmuh loh ni awm chhun a ni bawk.

Manuel-a chuan a bialnu chu len chhuah puiin rilru tih thawven a tum hle a, a bialnuin nuam ti leh tawh hle mah se ani erawh chuan nuam a ti tak tak thei lo. Hmun mawi tak taka kalin boruak hrisel tak te chu hip mah se amahah chuan eng emaw mawlh tlattu a awm a, eng thil nge a nih tih lah chu hriat chhuah dan leh zawn chhuah dan a thiam bau lo zui. Chutah a rilru tibuai tur tawk lekin Loicy Wilson-i hmel bawk chu a rawn lang chhen a, dik tak chuan a ning ru hle tawh zawk a ni.

Hawi sawn hlek se a mitthlaah a lungngai hmel a rawn lang nghal zat a, a bialnu Rosy-i biakna te chu hriat loh a nei ta zeuh zeuh bawk. Taxi khata an chuan dun ni kha chuan hmuh tawhna nei thân khan a inhria a, mahse a ngaihtuah zui buai duh lo a nih kha!

Tunah erawh a ṭawngkhumna avangin a hmaah a mittui a tla a, khawngaih loh tum viau mah se a khawngaih tlat tawhin a inhre bawk. Ngaihdam dil emaw biak emaw a tum hauh lo, thil thleng chu niin a liam pui mai a ring a ni.

"Hi, Thomas-a ka nia, ka hmu che chu ka lawm khawp mai" Loicy-i chuan a hmaa ding mipa hmelṭha leh fai ser sawr tak chu a en nghal vat a, a lo berah amah aia a upat paw'n kum tam a nih a ring lo.

"Keimah maw!?" mawlmang zet hian Loicy-i chuan a lo ti a, mahse chuti ang vela a awm chu Thomas-a tan chuan hmuh nuam tak a ni thung.

"Aw nangmah kha, zaninah Movie min enpui duh ang em? Tricket pawh ka lak kep vek tawh che, i ṭhiannu pawh ka lak kep nghe nghe" Thomas-a thu sawi chu a awih lo lam lek lek a ni.

"Min hrethiam la, ka hre mai lo che. Min hria em ni? Min biak dan aṭang hi chuan min hriatna a rei tawh hmel a, mahse kei chuan ka hre ve mai bawk si lo che a ni" a tih chuan

"Hre daih tawh e, Class kan ṭan ni aṭang khan ka hre tawh che alawm Loicy Wilson. Kei chu min hre lo pawh ni la a awm tho e, Violin Section lam daih ka ni e" a lo ti ve nghal a, Loicy chuan mak a ti ngei mai.

"Ticket chu i la vek tawh tak tak em ni?" a ṭhiannu Jessica-i zawk chuan a lo ti a, Thomas-a lah chu a lo bu nghat bawk si.

"Chutia kan tana Ticket i lak vek tawh si chuan ka ṭhiannu nen hian kan en pui dawn che a nia, zaninah em ni?" Loicy-i chuan a ti ta nge nge a, hawihhawm lo tak nih chu a duh bik lo a ni.

"Aw zaninah, in awmna sawi ula ka lo lam ang che u" Thomas-a chuan a ti nghal zung zung a, a hmel duh leh ngainat em em Loicy-i nena Movie an en dun thei tur chu a lawm rilru hle tawh bawk.

Loicy-i te ṭhian dun chuan pangngai takin an Apartment awmna hmun ve ve chu an sawi a, rei pawh ṭawng tawh lovin Thomas-a chu a kal sawn ve leh mai bawk. Class Room-a an awm lai chuan Jessica-i chu a titi malh malh a, chutianga a ṭhiannu inthlahrung miah lova a ṭawng duh ve ta em em chu a lawm ru hle. Amaherawhchu hlim ang deuhin lang mah se a hlim ve thei lo, Thomas-a sawmna a tihhlawhtlin chhan pawh kha hawihhawm chhuah a duh vang mai chauh a ni.

Chumi zan aṭang chuan Loicy-i te ṭhian dun leh Thomas-a chu an inkawm ngeih chho ta em em a, an Section inang lo mahse inhmuh an ṭhulh chuang lo. Loicy-i'n a ngaina ve tawh hle a ni tih a hriat chinah phei chuan Thomas-a chu a phur zual sauh a, hnaih leh zuala a bialnua siam chu a tum nghet bur a ni. Mipa tih takah a ṭhian hnai vai te chuan an chhaih fîam an chhaih fiam tawh a, a duh thu la hrilh dawt lo mah se nasa takin a duhzia chu a tilang ṭhin thung.

Hun te liamin Inter-School Competition zawh felna pawh thla 2 laiin a pel leh tawh a, mahse chung thla 2 chhung chuan hlimna reng a nei lo. Part Time hna lama ṭuan vak changte a nei a, dik tak chuan Competition-a a tel thei lo chu a ui tak zet a ni.

A tel loh vang nge pawh a hre lo lawmman pakhatna latu chu an School ni lovin School dang daih a ni a, Japan rama Music School a ni nghe nghe. Miss Lily-i ngei paw'n a uipui a, Manuel-a chungah pawh a lungawi loh phah hial a ni.

"Loicy Wilson" Manuel-a chuan ngaihno bei lo zet hian a ti bul hmuk a, Loicy-i leh Thomas-a chuan a lam an rawn hawi rang kher mai.

"Aw Professor, eng nge ni ta?" Loicy-i chuan a lo ti ve mai a, mahse a mitmeng rum tak leh thuk tak chu a en rei duh lo.

"Class-ah lut rawh" Manuel-a chuan a ti leh hmuk a, a bula ding ve reng Lily-i chuan a thawhpuipa awm dan chu a hrethiam leh ta lo.

"Vawiin tlai chu Taxi-in haw suh aw, ka lo thlah ang che" Thomas-a chuan Loicy-i lam hawiin nui chung hian a ti a, kal sawn a tum lai takin Manuel-a bawk chuan

"Naupang, in Section-ah phei rang rawh!" a ti leh hrawk a, a tua te mah chuan Professor Manuel-a awm dan chu an hrethiam lo va, ngaihruat dan tak ngial pawh an hre lo a ni.

"Loicy Wilson, ka thu sawi i hre lo em ni?" hmanhmawh taka Thomas-a a kal liam hnu chuan a ti bul leh hmuk a, Lily-i chu a rawn inrawlh ta nge nge.

"Loicy, lo va lut rawh le" hriat nuam tak hian a ti a, a bula ding pa chu a pawt sawn thuai thuai a, Manuel-a pawh chuan a Lily-i kaihna chu a thing thla bik chuang lo.

"I dam lo em ni Manuel? Chawhma lam kha chuan i ṭha vek khan ka hre si a, kan zirlaite pahnih inbiakna vang mai maia thinrim chu i nih ka ring lo" Lily-i chuan a tifiah ta fak mai, Manuel-a erawh chuan chhan enah pawh a en lo hrim hrim.

"Manuel, ka zawhna kha ngaihsak ve deuh teh, Loicy-i lakah khan i thin la rim rengna chhan tur a awm lo. Competition pawh thla hnih laiin a liam tawh a, eng lawmman mah kan dawng lo bawk. Eng vanga thinrim ringawt nge i nih?" Lily-i ṭawng danah chuan demna a lang tam hle.

"A chhan ka hre lo" Manuel-a chuan a ti tawi sup a, Loicy Wilson-i leh zirlai pakhat inbiak lai kha chuan sa pup pupin a thin a rim ngei a, mahse chuti anga a awm chhan chu pakhat mah a hre lo.

"Kum eng zah chiah nge kan thawh dun tawh? Heti ang hian vawi khat mah i awm ngai lo Manuel, Loicy-i lakah hian i mit i len ṭan em ni?"

"Engti zawnga mit len nge i sawi ka hrethiam pha hauh lo, mit len erawh a ngaih changte chu a awm ve bawk ang. A chhan chu ka zirlai a ni a, nakumah ka bula Master Class la tura lo sawn chhoh i tum thu min hrilh a ni lo'm ni?"

"Aw ka hrilh ngei che alawm, ka sawi ang khan thil a kal ka ring bawk, mahse ka thu sawi awmzia i hre lo der nge i hre lo tak tak zawk?"

"Ka hriatthiam miau loh chuan hre lo der tih tur pawh ka ni hleinem, thu awmze nei lo sawiin hun kan khawh ral mai mai a ni e"

"Loicy-i i mitmei dan hi hriatthiam fak theih si loh hian a awm tlat alawm Manuel, i ngaina ti dawn ila i thinrim khum reng lawi bawk si, chu bakah ngaihzawng nei lai i ni bawk"

"Ngainat maw!? Ha! Kei hian khati ang hmeichhia inrin tawkna pawh nei lo kha ka ngaina lûl lo ve, Loicy Wilson-i ka mitmei dan nia i hriat chu ka hrethiam ta chiah e"

"Sawi tawh loh hi a ṭha zawk a ni ang e, mahse i hmeichhe kawp mek hi a rawn kal ngun mah mah a ni. Professor dangte paw'n an ngai thei lo ṭep ang, lo kal tam tawh lo turin hrilh ang che" Lily-i'n a tih chuan

"Chu zawng ka thu ni rawh se, buaina a siam loh phawt chuan a pawina a awm hran lo tih i hre chiang alawm Lily" ti deuh hmukin Manuel-a chu ama Office lamah a kal nghal nul nul a, Lily-i erawh tih ngaihna hre lovin a thaw hawk ringawt.

Office chhung a luh rualin Manuel-a chu Chair-ah a ṭhu hnawk a, a thawhpui leh a ṭhian ṭha em em Lily-i thu sawi chuan a rilru a tikal thui khawp mai. Khang thla kal ta chhung khan engtin chiah nge a awm tih a chhut let paw'n amah leh amah a inzahpui hial zawk, a chhan chu a zirlai ve mai maiin a rilru a luah tlat a tin ni!

Chutah a hriatna pawh a la rei lo em em a, mahse an intawn dan leh an inhriat dan chu hriat rei a awl em em lawi si, a mitthlaa Loicy Wilson-i a lo lang chhen avangte chuan nep a inti ru ngawih ngawih a ni.

Ni e, Lily-i sawi kha a dik chiah. Hmeichhe kawp lai nei a ni a, vawi tam tak Sex pawh an hmang tawh nghe nghe, mahse thla hnih chhung khan vawi khat mah Sex an hmang lo, a chhan chu amah zawkin a hnar zel a, a hnar chhan lah thil ho tak a la ni zui.

Rilru buai ruk tawh sa nak a laiin a nu hnen aṭang phone call a dawng chhen bawk a, a thla hnih hman nawm loh ber a la ni ngei ang. A pa chuan Chicago lama haw turin a ko deuh chhen a, a damsam meuh tawh loh vang a ni bawk.

"I ṭha maw ka pa?" a tih tur ber hre lo chuan a pa a call ta ringawt a, a nu leh a nau erawh an ṭawng duhthaw theih em avangin a be peih rih lo a ni.

"Aw ka ṭha ve zel e ka fapa, lo haw lam chu i rilruk ta em ni? Kha lama lo kal lah i phal bawk si lo, ka Company hi hmeichhe kuta dah ka tum lo bur a nia" a pa chuan a rawn ti siam siam a, ngainatawm tak hian a nui hek hek bawk.

"Ka sawi ngun tawh viauin ka va hre ve ka pa, Company chu ka nau hnenah khan hlan mai rawh. Kei chuan Professor nih hi ka duh reng dawn a, ka rilru ka thlak theih pawh ka ring tawh lo"

"Hmeichhia chu ka ring zo si hleinem, eng pawh ni se lo haw phawt mai teh. Kan inhmu khât em mai, ka dam ṭha lo tih pawh i hre vek tawh a ni lo'm ni?" a pa zawhna leh biakna chu a chhang lo hrim hrim a, haw pawh ni se a nu leh a nau hmel a hmu peih lo a ni.

"Manuel" a pa aw a hriat rualin a aw a thian kharh a, a nu leh a nau vang ni lovin a pa vang tal pawha haw zawk chu a tum ve ta.

"Aw le, ka lo haw zuai dawn nia ka pa, mahse ka cham rei thei lo thung ang aw, chuan hmeichhe pakhat ka rawn hruai maithei bawk" a tih chuan a pa chu a lo phur nghal hle a, a fapa nupui nei lai chu hmuh hman ve ngei a duh a ni.

"A va ṭha dawn ve le, i nupui hual a ni tawh em?" a pa thu sawi avang chuan a nui chhuak hak a, chutah a nuih khâtzia chu a hre chhuak a, a nui tawp rang kher mai.

"Nupui hual ka la nei hleinem, Chicago khawpuiah kan inhmuh ngei ka beisei, ka nu leh ka nau erawh lo hrilh lo mah la a pawi maih lo" a tih chuan

"Ka lo ngawi thei turah ngai ang" tiin a pa chuan a rawn chhang ve leh nghal zat a, rei pawh inbe tawh lovin an inbiakna chu an titawp zui nghal bawk.

Tlai dar 3 a rik chuan khua chu ruah sur tur ang maiin a duai deuh khup a, ni dangah chuan khua a ṭha thei vah vah khawp mai. Conducting Class a pek zawh chuan a Office-ah bawk a let leh a, ban a hun tawh tho avangin lehkha pawimawh ho chu Bag-ah a khung mawlh mawlh a, a bialnu Rosy-i chuan a lo call lo ve teh mial bawk.

Office aṭanga a chhuah rualin ruah chu a rawn tla titih nghal a, mahse ani tan chuan buaina a awm lo. A car park-na lamah kalin dar zat chu a en zeuh a, a sir lam aṭanga Loicy-i aw ngeiin

"Hmanhmawh rawh" tia mipa dang a be thawm a hria chu Car chhunga lut ta mai lo chuan a en reng a, ṭum dang ang bawkin a chhungril chu a rawn sa leh ta pup pup mai.

THE ONE WHOM MY SOUL LOVES (M&B)

By

Havali Adam

Chapter 4

Loicy Wilson-i leh zirlai pakhat hlim tih hriat taka ruah do chunga an inphur chhuak chu mit tla lêk lovin a thlir zui vawng vawng a, a thlir rei lutukna lamah ruah a innan huh tir tih reng a hre lo. A awm dan âtthlak zet avang chuan za lo zet hian nui tawi tak a, a lu a thing vut bawk a, chuti ang chuan hmeichhe pakhat vangin a awm ang tih a ring thei lo hial zawk. Car chhunga a luh hnu pawh chuan a la inngaihtuah vung vung a, a chunga thil thleng mek chu eng chiah nge a nih a hre lo chiang kher mai.

"Manuel! Manuel! La kal lo lawk teh" chu aw chu Lily-i aw ngei a ni tih a hria, tlan chhuah a tum tawh pawh chu a ṭhulh leh ta rih bawk.

"Vawiin chu min phur haw mai ta che, ka pasal a hman lo tlat mai" Lily-i chuan ngampa tak hian a ti a, ṭhian an nih bakah kum tam lo thawk dun tawh an ni a, ngam viau pawh ni se a awm a ni.

"A nih chuan ruah do lo khan lo lut thuai ta si che" Manuel-a aw chu a hawihhawmin a hriat a nuam hran lo, mahse Lily-i chuan chuti anga a biakna mai mai te chu ngaiah a nei daih tawh.

"Min phur khât ta hle mai" tih leh Car chhunga luh chu a rual nghal a, a mi biak pa erawh a lo ngawi leh run tawh.

School Campus aṭanga an tlan chhuah rualin Lily-i chu a ṭawng char char a, chu chu a mizia ve reng pawh a ni. Manuel-a chuan a ning ta deuh a ni ang zai chu a play ta daih a, Lily-i lahin a lo off hmak thung a, chuti ang vel chuan an inthlah thleng ve leh mai bawk a, inngam taka an awmna chuan an inṭhian ṭhatna a tinghet zawk emaw tih tur a ni. Car aṭanga Lily-i a chhuah lai chuan a pasal chu a lo thleng ve chiah a, Manuel chu a en duh hle bawk.

"I lo va thleng hma leh si ve duhtak" tiin Lily-i chuan in chhung lamah a kuah lut nghal a, Manuel-a pawh rei ding lovin a tlan chhuak ve leh ta thuai.

Ruah chu tam lutuk lovin a la tla ser ser a, Loicy-i leh Thomas-a pawh room khatah an awm dun reng tawh a, a ṭhiannu berin leng tura a sawm avangin Thomas-a chu haw a tum bik teuh lo. Loicy-i lah chuan a laka Thomas-a rilru puthmang chu a them paw'n a hrethiam lo, a chhan chu vawi khat mah ngaihzawng a la nei lo tlat.

Thomas-a erawh chuan a chetziain hriatthiam tir a tum ngar ngar a, han sawi dawt chu a la zak ve deuh a ni. Thla hnih chhung zet chu nel takin an inkawm tawh a, a ruk tak chuan a awm dan chu Thomas-a chuan hrethiam har a ti hle.

"Loicy" a che vel en reng pah chuan a ti a, Loicy-i erawh an ei tur siamin a buai ang reng hle thung.

"Loicy" a tih leh chuan a lam a rawn hawi nghal vat a, nui seih hian ei tur a siam zawh ṭep tawh thute chu a rawn sawi a, mahse chu chu Thomas-a rilru a ni ve tawh lo.

"Ei ang le" ti hluain Loicy-i chuan ei tur chu a ṭhutna lamah a rawn chawi phei nghal zat a, a sawi tum tak sawi lovin a ei ve leh ta ringawt bawk.

Loicy-i chu a ṭawng melh melh a, a tan chuan Thomas-a chu a naupan lai aṭang tawh a ṭhian kawm ngeih em em Simon-a ang mai a ni a, ani chuan ṭhian ang bakin en lo mah se Thomas-a tan erawh ṭhian mai chu a ni ve hauh lo. Thomas-a awm dan leh chetzia hrethiam turin experience engmah a la nei lo va, Movie velah mipa leh hmeichhe inngaihzawnna lam en ve fô ṭhin mah se a takah erawh a hrethiam lo hle a ni.

Thomas-a chuan a hmaa hmeichhe duhawm tak leh vun nalh tak thil ei mial mial chu tui takin a thlir voh vôh a, ei tur ei nachang reng a hre lo a ni.

"Ei ta che Thomas, engati nge min en char char?" nui zeuh hian Loicy-i chuan a rawn ti ta nge nge a, Thomas-a erawh a la hawi sawn duh chuang lo.

"I thil ei lai kha Movie hmuhnawm tak ang maiin a hmuhnawm tlat si alawm Loicy, i laka ka rilru puthmang hi hre ta la min kawm duh tawh lo mai ang em?" tiin zawhna chu a zawh zawm nghal zat a, Loicy-i pawh a thil ei lai a tawp ve ta hmak.

"Eng lam hawi zawngin nge ka lakah chuan rilru i lo put a Thomas? Ka ṭhian ṭha tak i ni a, ni reng la ka duh hle bawk a ni"

"Nang chuan ṭhian ang chauhin min en tih ka hria alawm, mahse kei chuan a tir tê aṭang khan ka en ve hauh lo che. Ka awm dan aṭangte hian i hrethiam turah ka lo ngai a, mahse i hrethiam har phian bawk si"

"I thu sawi awmzia hi ka hre ta miah lo, ṭhian anga min en loh thu i sawi zawh chiah kha eng i sawi tumna nge? Min kawm duh ta lo tihna em ni zawk?"

"Ni lo Loicy, kawm duh tehreng mai. Kei chuan ṭhiang ang ngawtin ka en thei lo mai zawk che alawm, a chhan chu ka duhin ka vei em em che a ni"

"Thomas!" mak tih lutuk avangin Loicy-i aw chu hlauthawng rawng a kai lek lek a, chuti ang rilru chu a put a ring lo hrim hrim ve bawk a ni.

"Sawi lovin ka awm rih ang ka ti zet na a, ka sawi lo thei ta lo a ni Loicy. I rilru tur chu ka rawn hriatpui miah lo che, mahse nang nena inngaihzawn erawh ka duh tih min hriat sak dawn nia"

Loicy-i chu a la ngawi reng a, Thomas-a hmel pawh chu a en ngam tawh lo, a zak ru ve em a ni. Chuti anga chiangin tu mipa mahin hmaichhanah an la hrilh ngai lo va, lo dawnsawn dan tur a thiam lo tak zet a ni. A thil ei lai chu ei tuina reng a nei tawh lo va, a chawk a chawk vel ringawt bawk.

A laka Thomas-a rilru puthmang dik tak chu hre tawh mah se ani chuan ṭhian ang bakin a en lo tih chiang takin a hria, a rilru dik tak sawi dawn se a ṭhianpa chuan a huat a hlau bawk si, awm dan tur leh ṭawng dan tur a hre lo lutuk chu a thaw leh hak ṭhin.

"Ka va haw ang e, khawngaihin i lo inngaihtuah dawn nia Loicy. I ngainat zawng ka ni em tih lam ka hre lo va, mahse ka laka i rilru puthmang dik tak hre tur erawh chuan ka lo inbeisei ang" tiin Thomas-a chu room aṭang a chhuak a, Loicy-i chuan chelhna awkâ chhuah pawh a tum tawh lo a ni ber.

Thomas-a thu sawi mal tin chu a ngaihtuah chiang a, ni theiin a la hre lo cheu. Ani ang hmeichhia ve mai mai a duh chu a ring thei lo, a chhan chu mipa dang paw'n hmeichhe vawt tak a nih thu leh mipa hipna reng a neih loh thu an hrilh ṭhin miau alawm, a tan chuan rin mai a harsa ve êm bawk a ni.

Khumah muin Piano piece lam pawh ennawn lovin Thomas-a leh a thu sawi chu a ngaihtuah ta char char a, a laka a awm dan te chhui kirin a nelzia te chu a hre ngei mai, mahse ṭhian ang ni lova ngaihzawng anga en chu a thei chiah ang em a hre lo a ni.

Kar khat a liam hnuah pawh Loicy-i chuan a ṭhianpa laka a rilru puthmang dik tak chu a sawi thei ta hauh lo, a hma te kha chuan ṭhian ang chauhin a en emaw a inti a, sawi chhuah harsaah pawh a ruat lo hial a ni.

Tunah erawh nula leh tlangval anga inchanin Thomas-a nena an inkar thu chu chik takin a ngaihtuah a, sawi fak dawna harsa siin a rilru chu a kawkalh nuai tawh a ni ber. Thomas-a hmel chu a ṭhat leh ṭhat loh tak ngial pawh a ngaihtuah thiam lo, ani chuan ṭhian ang bakin a en lo thei lo tlat a tin ni!

Professor Manuel Firth-a lah chu zirlai naupang vang mai maiin mutmu pawh a tuah ṭhei lo tluang zel a, Chicago lamah pawh a la haw ta chuang lo va, a bialnu Rosy-i aia Loicy Wilson-i'n a ngaihtuahna leh a thluak a luah khat tlat chu a hne, a hne lutuk tak zet.

A thluak chhung aṭang Loicy-i hlim tih hriat taka a nui hmel leh a mittui tla hmel te chu paih chhuah vang vang a duh a, mahse Loicy-i hmel chu char beh tlat ang maiin a thluakah a awm tlat thung.

"Ka hre lo, kei chuan ka theih ka ring lo. Min hrethiam teh Thomas, i rilru ka tina a nih chuan min ngaidam dawn nia" Loicy-i aw a hriat rualin Manuel-a chu a ding nghal chat a, a chet dan chu mawi lo hle mah se insiam ṭhat pawh a tum chuang lo.

"Khawngaihin Loicy, ka duh satliah mai che ni pawhin ka inhre tawh lo. Ka hmangaih che ni berin ka hria, vawi khat tal chu i tum chhin ve ang chû, i thei ngang lo a nih chuan ka tawpsan ang che" chu thu a hre leh zet chu thinrim takin a kal sawn vut a, a so bulh bulh a ni ber.

Conducting class pe tur si kha a Office-ah lutin Piano chu thinrim takin a play bawrh bawrh a, Loicy Wilson-i mipa dang ta a ni tur chu a phal lo tawp khawk a ni. Ni e, a thawhpui Lily-i sawi kha a dik te pawh a ni mahna, Loicy-i chu a en liam mai mai thei lo tih a inhre chiang tawh hle a ni.

A thinrimna zawng zawng chu Piano-ah a hri thla ta vek a, Loicy Wilson-i ngaihtuah ran chungin a play mawlh mawlh a, darkar chanve dawn a play hnu chuan a thlan a tla phung thei. Piano chu ngawi runin a bawh ngul a, zirlai naupang vang mai maia a rilru a buai chu nep a inti ngawih ngawih a ni.

Lily-i khan a mitmei a rin thu kha a sawi tawh ngei a, a lo sawi dik chiah a ni. Nasa takin Loicy Wilson-i chu a mitmei a, mipa dang bula a awm chang lahin a lo thinrim em em zel bawk a, phat rual lovin Loicy Wilson-i chu a ngaihven chiang a ni.

A hmai phih sawk sawkin darthlalangah chuan a inen vawng vawng a, a hmeichhe kawp lai mek Rosy-i lakah pawh a inthlahrung rum rum hial a, sawi chhuah chiah pawh a ngai lo. Class pek tum lo si kha Class pe turin a chhuak leh lawi a, a rilru tih thawven a duh vang a ni pakhat.

"Engtin nge ni ta?"Loicy-i chuan a ṭhiannu zawhna chu a chhang peih lo kher mai, mahse a chhan ngei chu a ngai bawk si.

"Han sawi teh Loicy, Thomas-a nen chuan in inkawp dawn ta em ni? Kei chuan inkawp mah ula pawi ka lo ti lo teh asin, in hmel a ṭha dun thova in inhmeh khawp ang"

"A ni lo lamah ka rilru thlek tir tum lo hram teh Jessica, ka thu tlukna siam avang khan ka buai ru viau zawk a ni"

"Eng thu tlukna chu nge i siam ka ṭhian? Mipa leh hmeichhia chu inkawp tura siamtu duan alawm kan nih, chuti ang chiah chuan nang leh Thomas-a hi inkawp tur in nih ka ring"

"Ka theih ka rin loh thu ka sawi alawm Jessica, kei hian ngaihzawng pawh ka la nei ngai lo hrim hrim. Tun atan phei chuan neih ka duh chiah em tih pawh ka hre lo, ka tum hi hlawhtlin phawt ka duh zawk"

"Oh My God! Thomas-a ang mipa hmelṭha leh hmeichhiate kawm thiam em em hi i duh loh thu i hrilh tihna em ni ka ṭhian? I hrilh tih sawi miah suh, i hrilh a nih vaih chuan hmeichhe ngaituah tawi tak i nih ka ring"

"Ka duh loh thu chu ka hrilh dawt ngam bik lo, mahse inkawp êm tur chuan ka la inpeih lo nasa a ni. Ka rilru tibuai ta ber chu amah ka khawngaih avanga inkawp tura thu tlukna ka siam kha a ni, sut leh dawn ila min kawm duh tawh loh phah ka hlau bawk si"

"A laka i rilru puthmang dik tak min han hrilh teh Loicy, Thomas-a hi i mipa duh zawng a ni lo hrim hrim nge i duh ve thova mah se hlawhtlin i duh hmasa phawt zawk?"

"Dik tak chuan Thomas-a hi ka duh leh duh loh pawh ka hre lo, chuti ang khawp chuan nula leh tlangval inngaihzawnnaah hian kawng ka la dai thuk lo a ni"

"A nih chuan i duh ve theih mai dawn chu, thla khat vel tal han inkawp chhin phawt ula, engkim a ṭha turah ngai tawp ang" a ṭhiannu thu sawi chu pawmpui ang takin a bu ve nghat a, mahse a pawmpui vanga bu nghat a ni lo, sawi chhunzawm zel a peih tawh loh vang a ni.

Kar khat a ral leh meuh chuan Manuel-a pawh Chicago khawpui lam pan turin thlawhnaah a chuang ran tawh a, a pate bula haw chu han phur em emna pawh a nei hran chuang lo. A pa hnena a sawi lawk tawh ang lo takin Rosy-i chu a hruai lo va, chu pawh zirlai naupang Loicy Wilson-i vang mai mai leh nghal.

A hmeichhe kawp lai mah ni se Rosy-i chu a zin bo rih tur thu pakhat mah a hrilh lo va, hrilh nachang pawh a hre lo, chuti ang khawpa rilru buaia siam thei chu hmeichhe pakhat chiah an la awm, chu chu Loicy Wilson-i ngei a ni.

Thlawhna a thlawh chhuak hnu thlengin a thil ngaihtuah chu a ho kher mai, Loicy Wilson-i chuan ngaihzawng a nei mai ang tih a hlau a ni. Kha zirlai naupang kha, ani kha a kawng daltu turah a ruat deuh tawp a, Loicy Wilson-i chu Boston khawpuia a kir leh huna buaipui zui turin a rilru a siam ta tawp bawk.

A bag chhunga File chu phawrhin thlalak leh thu inziak te chu a rilruin a chhiar thla melh melh a, chu lehkhaah chuan Loicy Wilson-i chanchin kimchang taka inziahna a awm thla tuâr mai.

Australia mi a ni tih leh chhungkaw rethei lutuk lo an ni tih te chu a hre ta zel a, a thil hriatthiam loh pakhat erawh an rama Music a zir lo chu a ni. Australia ramah chuan Music zirna ṭha tak tak a awm ve thluah a, ram dang aṭanga pan pawh an awm ve nual zel, mahse Loicy Wilson-i chuan eng vanga US lam daih daiha lo zir nge nih ang le!?

Chungte chu amah biak theihna tur chhuanlam ṭha takah a ngai nghal hmiah a, tûma'n a bulah fiamthu thawhin tihnui tum lo mah se a thil ngaihtuah hoh lutuk avang chuan a kiai ta suk.

Darkar hnih vel thlawhnaa a chuan hnu chuan Chicago khawpuia inchhawng sang leh mawi tak tak te chu a hmu a, chung zingah chuan a pa Company building pawh a langsar hle.

Mi hausa an ni tih hai rual lova in lianah chuan a pen lut tharh tharh a, a nu leh a nau hmel chu a hmu hmasa ber a, an lo chiau au nghal viau bawk. A nau chuan hmel hlim zet hian a lo kuah nghal vawng vawng a, ani paw'n a lo kuah let ve mai bawk.

"Ka fapa Manuel, i va ngaihawm em em ve maw le" tiin a nu chuan kuai kunin a biangah a fawp zeuh a, anu kuahna chu Manuel-a chuan a lo kuah let ve leh a, a pa erawh a zawng ru reng thung.

"Khawiah nge ka pa hi a awm? Hmuh ka inbeisei asin, Company lamah a kal zawk em ni?" a nu chuan a lu a lo thing thuai a, a pasal chu Company-a kal thei pawh a ni lo hrim hrim zawk a ni.

"I pa chu in chung lamah a awm, a lo nghak reng che a ni. Chumi hma chuan thil zawh che ka duh, engati nge i lo haw dawn thu min hrilh loh?" a nu'n a rawn tih chuan

"Ni lo ka nu, tunah rih chuan sawi lo ang. Zanriah ei hunah kan sawi dawn nia, ka pa ka han hmu phawt ang e" tiin Manuel-a chu in chung lamah a kal chho nghal pâwk pawk a, a pa awmna room chhung chu a thleng har lo hle bawk.

"Ka pa!!!" room chhunga lut ta mai lovin kawngka bulah chuan a ding chat a, chuti ang hmel pu chuan a pa chu hmuh a inbeisei reng reng lo.

"I lo thleng ta maw?" zawiawi ang reng dêuh hian a pa chuan a ti lo thawp raih a, a fapa hmel a hmuh avang chuan a nui var var a, mahse Manuel-a chuan a en chik ngar ngar hle thung.

"Ka pa, eng vanga heti anga awm hi nge i nih? Doctor in rawn tawh em? Engati nge engmah min hrilh loh?" a pa bula a ṭhut thlak rualin a ti nghal zung zung a, a pa awm dan chuan a lung a tiawi lo tak zet a ni.

"Khawi mawi min han pui lawk ta che, ka ṭhu châk riau mai" tiin a pa chuan thawh a tum ṭuah ṭuah a, Manuel-a pawh chuan a lo pui nghal thuai.

"I lang upa zual sawt mai ka fapa, hmuihmul leh khabehmul neih chu a nuam viau em ni?" a pa chuan nui hek hek hian a ti a, mahse Manuel-a rilru erawh hmun dangah daih a awm thung.

"Ka pa, eng vanga min hrilh miah lo nge i nih? Thla ruk chhunga i hmel danglam nasat tawhzia hi i hria em? Hre tur ka ni asin, nang erawh chuan min hrilh pawh i tum miah lo niin a lang"

"Min zawt ngai chuang em ni ka fapa? Lo zin dawn lahin Company lam ngaihtuah a ngai bawk si a, i nu leh i nau hnenah pawh ka chanchin hrilh lo tur chein ka hrilh alawm"

"A nih leh engati nge heti ang em ema i dam loh thu hi chanchinbu lam aṭang tal pawha ka hriat loh? I taksa a chak tawh lovin i kum a upa tih chu ka hre ngei a, mahse heti ang lutuka i cher hi ka beisei miah lo"

"I pa hi min dem a va nih hmel ta ve ka fapa" tiin a pa chu a nui chhuak hak hak a, a nuih zawng ringawt pawha a taksa a nat ṭhin avang chuan a indawm leh rih ṭhin bawk.

Manuel-a chuan zawhna chi hrang hrang a zawt ta mawlh mawlh a, dik tak chuan amah ngei pawh chu a inthiam lo a ni. Mahni pa ngei na takin a dam lo tih a hre lo chu nuam a tih loh chhan ber a ni a, a nu leh a nau han dem viau dawn mah se a thiam lo zawk chu amah a ni tlat bawk si.

Chanchinbua a pa dam loh thu engmah a lan loh chhan chu an zep vang tih te a pa chuan a hrilh a, zep lo se chu a hmu khawp ang. A chhan chu Company lian tak a nei a, Chicago khawpui chhungah chuan a lawk ber pawl a ni pha tlat a ni.

Zanriah an ei dawn chuan a pa chu a rawn tho chhuak peih teh mial a, zan dangah chuan a fanuin khumah chaw a pek chilh tawp ṭhin. Zanriah an ei mial mial laiin a pa bawk chuan hmeichhia a hmuh a inrin thu a sawi chhuak ta ngei a, a nu leh a nau beng pawh a verh ta zak mai.

Manuel-a erawh chu chhanna mumal pawh thei lovin a riat deuh nawk nawk a, chu chuan a pa nuih a tiza hle bawk. A pa tan chuan a awihawm lovin a nuihzat thlak miau alawm, inrin tawknaa khat leh sawi tur tlachham ngai lo a fapa chu a fapa a ni lo emaw a ti ru hman hial zawk a ni.

"Aw" tiin Lily-i phone call chu a chhang tawi deuh hmuk a, a aw thum bul hriam hrak leh nelawmna tel miah lo chu hriat a nuam lo ve chiang a ni.

"Engtikah nge lo haw i tum? I lehkha kha chu kan hmu tawh ngei a, Professor te paw'n an hriatthiam rual chein an hrethiam chiah lo che" Lily-i'n a rawn tih chuan

"Eng chu nge i sawi tum ber?" a lo ti tlang nghal hmak a, a bul lawkah a pa a muthilh tawh avangin a ṭawng ring hran lo hle bawk.

"Kan School-in Music Festival kan dawng dawn tih kha i theihnghilh ta em ni Manuel? Kum tir aṭang tawh i inpuahchah ru hle khan ka hre si a, i mumal lo tial tial a nia Manuel" Lily-i thu sawi avang chuan thil hriat chhuah a nei nghal.

"Ni dawn tak, tun thla tawpah nge thla thar tawpah? Ka buai ang reng viau a, ka buai dan lah hi a namai lo a ni" ti supin Balcony lam chu a pan a, chutah a ṭhiannu chuan

"I buai chu ka ring tho a, mahse heti lamah i lo haw vat a ṭhat ka ring. Tunah pawh hian Professor Franklin-a'n zirlai naupangte ko khawmin tun thla tawpa Perform-na tur zir puiin i ai a awh rih mek a, mahse i lo haw hman chuan ken tho che a tum thu a sawi" a rawn ti leh nghal zat a, Manuel-a chu a thaw hawk ringawt.

"Aw le, ka lo haw thuai ang. Festival thlen nân ni 3 bak a awm tawh lo va, kum tir aṭanga Conduct ka tum tawh avangin keimah ngeiin Orchestra chu ka kaihruai ang" a tih chuan Lily-i chu a lo lawm ru ve hle a, khawvel huapa Music School ṭha an kal nual dawn avangin Manuel-a chuan Conduct ngei se a duh a ni.

A tukah chuan Manuel-a chu Boston khawpui lama haw turin a inbuatsaih leh nghal a, Music Festival a awm dawn tih theihnghilh lo se chu a pa vang tal paw'n rei tak cham chu a duh a, mahse a rilru sen tawk loh azarah a haw leh thuai a ngai bawk si.

A pa pawh chuan a dinhmun leh a tih tur hriatthiam pui takin a chelh khawmuang buai duh lo va, mahse zin leh turin a chah nasa hle thung. Chutah vanduai thlak takin a thlawhna chuan tumna chu a chhe ta thut a, thlawhna danga chuan dawnin Ticket a lo full vek tawh bawk si, mangang ru tak a ni.

A pa chu call thuaiin thil awm dan a hrilh zung zung a, Company Privet Jet hman chu a fuh ber a rin avanga bia pawh a ni. A pa chuan a fapa thil dil chu a lo phal nasa khawp a, Manuel-a pawh a lawm kher mai. Dar kar 2 chhung van sanga an thlawh hnuah New England Conservatory of Music School building kawtah chuan an ṭum a, thlawhna aṭanga chhuk thuaiin Lily-i office lam chu a pan ding nghal chat bawk. Manuel-a hmel a hmuh rualin Lily-i chuan

"In chung lamah chho nghal ang" a lo ti thuai thuai a, chu ni chu Rehearsal an neih tawpna ber tur a nih avangin vawi khat tal chu Rehearsal nei ve hman se a duh a ni.

Hall an thlen chuan music chu an lo play ri chuah chuah a, Manuel-a chu tlai tawha a inhriat avangin a inlam let lek lek a, Professor Franklin-a chuan Conduct tlang law law se a duh hman hial a, mahse Pianist hmel a hmu chiah chu chawp leh chilhin a rilru a thlak nghal vek.

Professor dinna lamah chuan a phei a, music note te chu a en zung zung a, a tan chuan a harsa lo teh e! Conducting Competiton-ah pawh a zawna vawi hnih pakhatna ni thei kha a ni a, music note chu a thiam nghal vek ti ila a sual tampui lo vang.

Professor Franklin-a pawh chuan a dinna tur te a lo kian zung zung a, Music note te chu pe zung zungin a chhiar tir a, mahse Manuel-a chuan a lo chhiar daih tawh zawk a ni. Podium-a din rualin Loicy Wilson-i lam chu a hawi a, chu veleh Loicy-i chu rang zet hian a lo hawi sawm vat a, a zam ru leh nghal em em tawh bawk.

Thawk la vang vangin Conductor lam chu a hawi chho zeuh a, mahse amah tizam em emtu mipa sang tak chuan a lo en tawh lo hlauh. Darkar chanve lai hun hmangin Rehearsal chu an zo thei ta hram a, Loicy-i tak phei chuan Professor Franklin-a'n Conduct se a duh daih zawk.

Ni khat a ral hnu chuan Music Festival neih ni chu a lo inher chhuak ta, Music School hrang hrang aṭanga Perform pawh an tam hle a, chu chu Manuel-a beisei ang ngei a ni. A tawp berah chuan New England Consevatory of Music School chu Perform turin an sawm a, Manuel-a'n zamna pakhat mah nei lo mah se Loicy-i ve thung chu a zam em em thung. Mipui kut beng ri dur dur te chuan a tizam zual sauh zawk a, a play chhung zawng chuan rilru leh tih tak zetna a nei lo hrim hrim.

An perform zawh rualin mipui lamin kut an lo beng dur dur a, Loicy-i chuan an perform ṭhat leh ṭhat loh pawh a hre lo, mahse Competition a nih loh avangin perform chhe ta pawh ni se a lungawi lo chuang lo vang. Professor Manuel-a chu Podium aṭanga chhukin Piano bulah a rawn ding a, ani chuan a lo en kar ringawt.

Chutah a lamah an Professor chuan a kut hrawl leh hlai tak chu a rawn phar ta mai, a va han che buai hman tak em. Tim daiin Professor Manuel-a kut chu a vuan a, a kut a sik rual chuan a phu zawk a, a kut vawn lai mek neitu lah chuan a hma ai zawngin a rawn la en chiang zui.

Professor nen chuan mipui lamah a rualin vawi thum an kun a, a rin loh lutukin Professor kut chu a la nem daih zui. An inthlah tawh mai dawn emaw a tih hnuah pawh an la inthlah leh ta tlat lo, Loicy-i chuan pawh chhuah a'n tum deuh zawk a, Professor Manuel-a lah chuan a lo la vuan nghet ngâng mai.

Musician te lam chu an hawi leh ringawt a, duh aiin an inthlah har tawh mah mah a ni ngei ang mipui pawh chu an phur mur mur ṭan a, mahse Manuel-a chuan chungte chu engah mah a ngai lo.

"Loicy Wilson" ti thum chhalin a koki chen vel leka sang hmeichhia ngo ving veng tak lam chu a hawi a, kun hniamin mi zawng zawng hmuhah a fawp ta siah mai le!

Loicy-i chuan a theih tawpa na hian a lo nam sawn nghal vat a, a kut a vawn lohna lam chuan a beng ri sawk zui nghal bawk. Mipui chu a tam zawk zirlai naupang an nih avangin an lo au dur dur a, Manuel-a leh Loicy-i chuan ennawm an chhuah a ni ber.

Thla latu te lah chuan thlalakna chu an hmet de zawk zawk a, an hma hunah eng nge thleng dawn tih reng Loicy-i chuan a hre hauh lo. Manuel-a chuan a vawnna chu a thlah ve thei ta hram a, kiai sukin a biang chu a tuai zeuh a, zahna leh hrehawm tihna pakhat mah a nei lo bawk.

THE ONE WHOM MY SOUL LOVES (M&B)

By

Havali Adam

Chapter 5

Thinrim leh zak takin Loicy-i chu a kal sawn thuai a, Dressing room a lut chiah chu na zet hian thawk a la hawk a, Professor Manuel-a chu huatna hlirin a khat tawh. A hmasa zawkah pawh thu hriat nuam lo taka ṭawngkhumin a mittui hial a tih tlak phah tawh a, tun ṭum chu a mittui tla lo mah se a rilru a buai zual daih zawk. A thin phute chu an rawn chhuak mai dawn emaw tih turin a phu ri dawt dawt a, ṭhut pawh a la ṭhu peih lo, bang nghengin a ding ngawi reng ringawt a ni.

Zirlai zawng zawng kal liam hnuah pawh Stage aṭang Manuel-a chu a la chhuk ve hauh lo mai, eng vanga ding reng a nih pawh a hre chuang lo. Thlalatute lah chuan an sum hmuhna hnar tur a ni tih an hai hauh lo bawk a, a din chhûng chu thla an la lo char char a, Lily-i kohna hre lo se chu a ding ngawi reng hial ang.

Lily-i chuan a pawt sawn dawr dawr a, Dressing room lamah pawh kalpui lovin room dangah a luh pui a, chu Music Festival chu School hrang hrang Performance-in luah khat lovin Professor leh zirlai infawpin a luah khat dawn tih a hre chiang hle bawk.

"I â zo ta em ni Manuel? Eng vanga Loicy-i kha fawp ringawt nge i nih? I mualpho dan tur thlengin i ngaihtuah em? Nang chauh i mualpho dawn lo, kan School hi chanchibuah a lang nasa hle dawn asin" Lily-i chu a insum thei tawh lo, a ṭhianpa chet dan chu a mawi lo ve thlawt a ni.

"Ka hre lo, eng vanga fawp nge ka nih ka hre lo Lily, ka hre lo tak zet. Kha zirlai naupang kha, ani kha eng vanga ka thluak chhunga awm reng hi nge a nih ka hre lo bawk"

"Lalpa le! Nang hian Loicy-i hi i mitmei tak tak em ni? Ni lo, hmeichhe kawp lai nei i ni a, chuti ang mai maiin i zirlai naupang lakah hian rilru i pu thut lo vang Manuel" Lily-i chuan a ṭhianpa thu sawi chu mak a ti ngei mai.

"Nang hian ka buaina hi i ching fel thei dawn bik lo a nih hmel, amah ngeiin min chhang thei ang" tiin Manuel-a chu kawngka lamah a kal nghal a, mahse Lily-i chuan a chhuah tak tak hmain

"Khawiah nge i kal dawn? Professor te hmu la a ṭha ang, i chet dan avang khan ngaihdam pawh dil rawh" a ti leh hram a, Manuel-a erawh za lo zetin a nui suk ringawt.

"Professor te chu nakinah ka hmu mai ang, tunah chuan ka thluak chhunga awm reng Loicy Wilson-i tê reuh kha ka hmu dawn" ti nghet charhin Manuel-a chu a kal chhuak nghal a, miin an lo en hrek hrekna te chu a hmu lo der hmiah hmiah bawk.

Dressing room-ah chuan Orchestra member ho chu mahni hmanrua ṭheuh khung felin an che sap sap hlawm a, an ṭhiannu Loicy-i chu an en duh hlawm hle a, ani chuan an zawhna te chu a chhang duh lo hrim hrim.

A hmel hriat loh leh a biak ngai pawh ni lo te chuan Professor Manuel-a nen an inngaizawng emaw an ti thul, thil nih dan dik tak erawh an inngaizawng lo nasa mai bawk si. Professor Manuel-a hmaia a ben chungchang chu pakhat mah an zawt lo teh daih a, an infawh thu ringawt an sawi chamchi chu a ning hluah hluah.

"Loicy Wilson-i tih loh chhuak vek r'u, tunah chhuak nghal vek r'u" aw lo chhuahna lam chu a hawi nghal thuai a, a mi hmuh chu tu dang ni lovin Professor Manuel Firth-a ngei a ni.

"Khawiah chuan nge kal i tum ve ringawt Loicy Wilson?" chhuah tuma kawngka lam a pan lai chuan a rawn ti khauh hmuk a, a bana a chelhna chu thin thlak tum mah se a thei teuh lo.

"Khawngaihin min kal tir teh Professor, ka laka i chet dan hi a mawi lovin Professor te chet dan tur a ni lo a ni" a hmel pawh en ṭha ngam lova tih chuan

"Nang hian ka awm dan tur min hrilh i tum tihna em ni? Loicy Wilson, nang hian min tibuai tak zet a ni" a rawn ti daih a, a thu sawi avang chuan Loicy-i chu a bo tulh tulh thung.

"Eng vanga ka thluak chhunga awm reng hi nge i nih? Eng vanga ka mitthlaa i hmel lang reng hi nge a nih? Min hrilh nghal rawh Loicy Wilson, chhanna ṭha tak ka beisei bawk"

"I thu sawi awmzia leh i zawhna min zawh te hi pakhat mah ka hrethiam bik lo Professor, khawngaihin min kal tir thuai teh"

"Ni lo, i hre tur a ni. Nangma bul ṭan a ni a, nangmah bawkin a tawp i khar tur a ni bawk. Ka thluak aṭang hian chhuak thuai rawh, chuti lo zawng ka duh dan ni miah lovin ka che leh palh mai ang"

"I thluak chhungah ka awm tih pawh ka hre si lo alawm, i thu sawi hian awmzia pakhat mah a nei lo. Min thlah nghal rawh, mualpho taka min siam pawh duh tawk lova i awm hi a mawi lo tak zet a ni" a ti ve ta hrawk a, Professor Manuel-a chu a zah buai duh bik tawh lo.

"Khawi maw, lo la teh" tiin a phone ring lai chu a rawn chhuhsak hmak a, Screen-a Thomas-a hming lang chuan Manuel-a thin a tirim zual kher mai.

"He pa hi be tawh suh ang che, vawiin aṭang hian vawi khat mah i be tawh tur a ni lo" ti ram leh hmukin phone chu a off hmak a, Loicy-i chuan a chet dan leh ṭawng dan engkim chu a lo en kar thung.

"Ka ṭhian a ni a, ka duh chuan ka be thei alawm, i inrawlhna tur a ni lovin ka hria Professor" tiin phone chu a laksak nghal thuai a, chutia a ṭawng lai tak chuan a lamah Professor Manuel-a chu a rawn kun leh ta riai riai mai.

"Awm sawn rawh" ti ṭhawtin Professor Manuel-a'n fawh leh a tum chu a lo nam sawn vat a, a duh hun huna fawh theih hmeichhe ang tura a ngai chu a haw ngawih ngawih a ni.

"Ka tana hrehawm tihna turin awm belh tawh lo hram ang che Professor" ti salhin kawngka lam chu a pan vat a, Manuel-a pawh chuan chelh emaw chhan let emaw a tum tawh chuang lo.

Dressing room-ah chuan mi â ang maiin a ṭhu ngawi reng a, a laka Loicy Wilson-i awm dan leh ama chet dan vel chu tlawm thlak a ti hnuhnawh hle a, mahse a hun lai chuan ngaihtuahna fim tak ngial pawh a hmang thei lo chu a nih kha! Room aṭang chuan a chhuak ve leh mai bawk a, ama Office-a lut lovin Professor dangte room-ah chuan a lut a, a chet dan avanga thupha chawi chu a tih makmawh a ni tlat.

Amah aia kum upa Professor te chuan an zilh ta luam hlawm a, mahse ani chuan chhan let emaw hnial emaw a tum lo hrim hrim, a chhan chu a dik lo miau a ni. Live-a pek chhuah a nih avangin thlirtute titi a titam zual dawn tih pawh a hre vek, mahse Loicy Wilson-i vang mai maiin chung zawng zawng chu a theihnghilh thung.

A Professor puite Room aṭanga a chhuah rualin phone call a dawng nghal zat a, chu chu a hmeichhe kawp lai mek Rosy-i a ni. Biak a châk thlawt loh avangin phone chu a hmet tawp hmak a, mahse Rosy-i chu a lo beidawng lo nasa mai.

"Eng thil chiah nge i tih kha Manuel Firth? Ka lung i tiawi lo hle mai, insawifiahna ṭha tawk tak i neih ngei ka beisei" phone a pick up rualin Rosy-i chuan a lo ti nghal bawrh bawrh a, ani erawh ṭawng pawh a tum eih lo.

"Tunah hian ka lo kal nghal dawn, kan inhmuh ngei a ngai" a tih laklawh lai chuan phone chu a off hmak a, Rosy-i aw chu a bengchheng mah mah a ni.

A office chhungah chuan ngaihtuahna mumal lo zetin a ṭhu ngawi reng a, dawhkana a ke hlang chhovin Loicy Wilson-i nen an awm dan chu a ngaihtuah let a, zahna leh thinrimna pawh nei lovin a nui leh ta suk mai. Engkim a thlen vek tawh avangin inchhirna neih pawh a tum chuang lo, thil thlen dan chu a nih dan tur dik tak angin a ngai hmiah zawk a ni.

Loicy Wilson-i kut a sik rual khan nasa takin a danglam a, amah ang chiahin Loicy-i pawh a danglam tih a hria, khang te khan a tiphur zual sauh a ni. Tin, an infawh laia nam sawna a rawn benna te chuan a tihlim letling daih a, amah hnaih a ti châk zual sawt bawk.

Manuel Firth-a'n thil thleng engah teh vak mah a ngaih loh laiin Loicy-i ve thung chuan a la thutak hle thung a, a zirna lam thlengin a nghawng ang tih a hlau a ni. Jessica-i zawhna pawh chhang peih lovin Apartment lamah a haw nghal daih a, Thomas-a hnen aṭanga phone call lo lut chhen te chuan a rilru a tihah zual ting a, pick up pawh a pick up pei lo hial a ni.

Ama Apartment a luh rualin khumah a bawk thlawp a, a thawmhnaw te chu thlak reng reng a la tum lo, a zak lutuk leh a thinrim lutuk chu ṭah mai te a duh rum rum a, mahse ṭahna tham tlingin a hre leh bawk si lo.

"Ka phone call lo pick up teh Loicy" Thomas-a message a chhiar zawh rualin phone call a dawng nghal zat a, thawk la hmasa tê têin phone call chu a pick up ve ta ringawt bawk.

"Professor Manuel-a nen khan in inkarah eng thil nge awm? Amah vang kha em ni kei nena inkawp i duh loh? Min hrilh chiang law law teh Loicy, tui lai rapa awm ka duh lo" Thomas-a chuan a rawn ti nghal zung zung a, ani chuan lo chhan let mai dan tur pawh a hre rih lo.

"Ngawi reng lo khan min han hrilh teh Loicy, ka rin dan hi a dik a nih vaih chuan mak ka ti ang a, nang nena ṭhian ang tala inkawm reng pawh ka tan chuan thil harsa a ni tawh ngei ang" a rawn tih leh chuan

"Ni lo Thomas, Professor Manuel-a nen kan inkarah eng thil mah a awm lo. Thil thlen dan kha duh lo viau mah ila a lo thleng thut a, sawifiah ngaihna pawh ka hre lo a ni" a lo ti ve ta nge nge.

"I sawi kalhmangah chuan in inngaizawng lo tihna a ni a, mahse mi sawi huai huai tur khawpa in awm erawh ka lung a awi lo hle a ni" Thomas-a aw chu a khauh deuh fak a, a nihna takah chuan Loicy-i chu a chan mai ang tih a hlau a ni.

"A pawi ka ti Thomas, mahse kei leh Professor Manuel-a inkarah hian engmah a awm lo tak tak. I duh chuan ka thu sawi hi i awih thei a, i duh chuan i awih lo thei bawk" ti leh phone off chu a rual a, tûmah biak a duh tawh lo tak zet a ni.

A zan mut thlengin chhun lama a boruak tawn zahthlak leh hrehawm ru zet chuan a tibuai zawm zel a, mut pawh a muhil thei lo hial a, chutah Professor Manuel-a hmel thip leh tak run chu a mitthlaah a la châm reng zui.

Chu tak chu timu thei lo tu a ni a, ngaihtuah loh a tum paw'n a rilruah leh a mitthlaah a rawn lang zel bawk si, ei tur te siamin zing dar 2 thleng chu a meng thleng ta ringawt.

A muthilh lai pawh hre lovin zingah chuan a harh hlawl a, dar zat a en chuan a lo tlai nasa tawh hle leh nghal. Tho thuai thuaiin zing chaw pawh a ei lo va, kalkawnga Fast Food ei mai chu a tan a awlsam zawk a ni.

School a thleng chiah chu zirlai te'n an lo en hrek hrek a, a kal pelh apiangte chuan an sawi zui sep sep bawk a, hrehawm pawh a tiru viau mai. Classroom a luh rualin mipaho chuan an lo au nghal dur dur a, Professor Manuel-a nena an infawp lai thlalak lian zet an lo keng pharh a, mak a ti ngei mai.

A ṭhutna tura a ṭhut thlak rualin Jessica-i chuan a kutah News Paper a lo hmehbel nghal a, News paper chung bera thlalak leh thu inziak a hmu chiah chu a kâ ho ringawt.

"The DJF Company neitu pu Derrick Firth-a fapa Manuel Firth-a leh a zirlai an inkawp em ni?" tih chu lian puiin a inziak a, a Headline an siam dan lah chu mipuite ngaihven ngei ngei theih tur a la ni zui.

"Ni lo" Loicy-i chuan a ti sep a, a bula ṭhu ngawi reng Jessica-i chuan a lo en tlawk tlawk a, an Professor leh a ṭhiannu inkar chu a hrethiam tawh bik lo a ni.

Chhiar pawh chhiar zawm duh lovin News Paper chu Loicy-i chuan a hmer khawr deuh vak a, a zakin a thin a rim tak zet a ni. Ngawi rengin a ṭhutna aṭang chuan a tho tharh a, miss Lily-i lo lut mek pawh chu a ngaihsak buai peih tawh lo.

Tunah chuan Professor Manuel-a chauh chu hmuh a duh, News Paper-a Headline an siam dan zawng zawngte chu thlak tir se a duh a ni. Professor Manuel-a room a luh rualin pawn lam hawia mipa sang tak lo ding ngawi reng chu a hmu nghal a, a pen thawmah Professor Manuel-a paw'n a lam a rawn hawi ve mai bawk.

"Khawngaihin he thil hi titawp rawh, heti ang hi thil nih dan a ni lo bawk" tiin Loicy-i chuan News Paper chu a pe nghal a, Manuel-a erawh chuan engah teh vak mah a lo ngai lo thung.

"Tih theih ka nei tam lo khawp asin, nimin thil thleng avang khan sum pawh an hmuh tam phah dawn reuh hi a" ngaihsam fê hian a lo ti duh lêk chauh a, Loicy-i ve thung chu a lung a ni lo khawp mai.

"Hrehawm i ti ve miah lo em ni Professor? Eng vanga buai ve miah lo nge i nih? Nge nang hian engkim kha i lo tum lawk sa vek zawk?" a ti phawlh phawlh a, zam ru em em mah se a thin a rim ve tawh êm bawk a ni.

"Ka tum lawk chu a ni lo Loicy Wilson, nangma'n mih hip tlat a nih khâ, thiam lohna ka neih pawh ka hre lo. Tin, News Paper-ah chuan duh leh lo lang vel mai mai ang hmiang, thil ho tak zawng a ni e" Manuel-a chuan a lo tih khum leh ta mauh mai.

"Khawngaihin tireh hram teh Professor, ka hma hun a chhe vek thei tih i hre lo a ni. He rama ka lo kal chhan chu Classical Pianist ni tur chiahin a ni; News Paper-a lang tur ni lovin" a awah chuan ngenna a lang tel ta, chu chu Manuel-a pawh chuan a hai lo khawp.

"Enteh Loicy" ti thum bulin a dar tawn tawnah a rawn chelh a, a kut hlai leh lian em em chuan a tizam er er a, a taksa chhung chu a sa hut hut leh tawh zawk a ni.

"Nang hian min hip tlat a ni Loicy, min hip lutuk tak zet, inhmu miah lo mah ila ka mitthlaah i awm reng ṭhin. Eng nge a chhan ka hre lo, nang lah chuan min hrilhfiah thei bik si lo" Manuel-a thu rawn sawi chuan a va han ṭhawng tehreng em.

"Ka...ka hip che maw!?" zawi têin a ṭawng emaw a tih chu a hmaa mipa ding huhang na zet chuan a lo hre pha vek a, a zawhna chhangin a lo buk khum zeuh bawk.

"Ni lo, heti ang hian ka awm tur a ni lo" tia kal sawn a tum chu a hma aia nghetin a lo chelh nghal vat a, a tal leh chiah tihah a âwm khauh takah chuan a bet ta ran mai.

"Loicy, nang hi kei hian ka ngaina che ni mai hian ka hria" chuti ang thu chu Manuel-a chuan a kâ aṭanga a chhuah pawh a ring ngai lo, a chhan chu hmeichhe dang lakah a la chhak chhuak ngai lo hrim hrim a ni.

"Tal suh" tiin Loicy-i tal tur chu a âwmah a kuah bet ran a, zirlai naupang vang mai maia a thin phu rang lutuk te chu reh thuai se a duh a, a duh thu a sawi ta ringawt te chu tlawm thlak a ti leh ta hle zawk, mahse a sawi vek tawh tlat.

"Min thlah Professor, i zirlai laka i ṭawngkam hman leh i awm dan hi a hawihhawm lo tak zet a ni" Loicy-i chuan a tha tawpin a nam sawn thei hram a, a thin phu ri chu a hmaa mipa chuan a hre pha mai ang tih a hlau hle bawk.

"Thomas Muller-a kha be tawh suh, a bul hnaiah awm tawh lo bawk ang che" kawngka lam a pan laiin a rawn ti deuh hmuk a, a hawi let lo thei ta lo.

"I zirlai chu ka ni ngei e Professor, mahse ka nunah leh ka ṭhian kawm tur thleng thlenga i lo buai a ngai lo" a tih khum ve ta hmak a, Manuel-a erawh chuan a hlimawm chho ṭan dawn viauin a hre thung.

"A ṭha e Loicy, engtin pawh awm mah la kei hian ka taah ka siam thuai ang che. Min ngaina lo tih ka hmuh hian ka phur sawt zawk, ka thu sawi awihin Thomas Muller-a kha hnaih tawh lo la a ṭha a ni mai" a rawn tih charh charh chuan chhanglet buai vel duh tawh lovin a chhuak ta hmawk hmawk.

Class-ah pawh lut duh tawh lovin a haw nghal vang vang a, a awm dan engkim chu a duh lo vel vek a ni. Piano Class a kal lo ringawt te chu pawi a ti a, mahse School-a awm hrim hrim a peih lo bawk si. A peih loh chhan ber chu Professor Manuel-a a ni a, a hmel hmuh pawh a duh tawh lo a ni.

Zanah chuan a chhungte hnen aṭang phone call a dawng a, chutah News Paper-a an thlalak chungchang chu an la zawt zui, a chhungte ni lo se chu a be rei hauh lo vang. Thil nih dan dik tak chu a hrilh ve mai a, engtin nge Australia ram aṭang daih daih an lo hriat pawh a hre lo.

Thla khat chhung teh meuh chu Music Festival boruak vel vang chuan a buai a, a zirlai pawh a zir ṭhat theih loh phah vek nghe nghe. School a kal lahin thla laksak tawk leh chhaihtu a ngah em em a, chu vanga Class off pawh a ngah ta. Jessica-i leh Thomas-a chuan a Apartment-ah kal chilhin rilru dang put tir an tum ṭhin a, mahse a sawt lo khawp.

Chutah Professor Manuel-a hmel chu a mitthlaah a la cham reng zui a, a ṭawngkam zawng zawng chu a bengah a ri nawn tluk tluk bawk a, a rim te chu a hre thei hialin a hria, mahse chungte chu paih bo vek a duh thung.

"Miss Lily, khawngaihin nangma'n min submit sak thei mai lo em ni?" tiin Loicy-i chuan an Miss chu a ngen tawp a, Professor Manuel-a hmel chu a hmu peih lo ngawih ngawih a ni.

"Nangmah chiahin Composition Assignment hi i submit tawh lo, submit ringawt te chu thil harsa pawh a ni hleinem, ka kal a nia" ti leh Lily-i chuan kal sawn a rual a, peih lo hle mah se Loicy-i chuan Professor Manuel-a chu a hmachhawn a ngai dawn ta a nih hmel.

"Lalpa le! Eng thil nge ka hmuh zawh chiah kha!" a thinphu rang lutuk dawm chungin Loicy-i chuan a ti zawi sep a, a hmuh sual a nih ringin kawngka chu a hawng leh dê de a, mahse a hmu sual lo chiang khawp mai.

Hmeichhe vawt tia an sawikhum fô ṭhin Loicy Wilson-i tak ngial pawh hip bet theitu Professor Manuel Firth-a; mipa hleitling leh mi hipna ngah tak chuan a Office-ah hmeichhe dang a lo awmpui a, awmpui satliah pawh ni lovin an awm dan chu Loicy-i chuan a ten lek lek zawk.

"Oh My God!! Babe, hei ngei hi a ni Black tam tak paw'n an tluk lohna che chu!" a kap zawna ṭhingṭhi mek hmeichhe sam buang chuan a mipatna sawngbawlsak mawlh mawlh pahin a ti a, tenna nei miah lova a awm thei chu Loicy-i chuan mak a ti hle bawk.

"Han sawi teh Babe, khati ang i zirlai ve mai mai ai kha chuan ka zei ti raw? Khati ang hmeichhe naupang mipa pawh tilawm thiam lo tur khawpa naupang ai kha chuan ka siam nuam che em?" chu nu bawk chuan a ti leh thar thar a, chutia an awm dan Loicy-in a en lai tak chuan Professor Manuel-a chu kawngka lam a hawi ta thut mai.

"Duh tawk teh ang" Professor Manuel-a chuan a ti bul hmuk nghal a, a hmaa hmeichhe ṭhingṭhi tisa châknaa khat chu nam sawnin a kekawr chu a siam ṭha zawm zat bawk.

Manuel-a'n kawngka lam a hawi leh chuan Loicy-i chu a lo thaw hlei thei tawh lo a ni ber, chutia a dinna lam pana a pen phei pâwk pâwk lai chuan

"Ni lo" tia a hriat tawk leka phun sepin Loicy-i chu a kal sawn thuai a, a File ken lai chu pek loh law law a fuh zawk rih a ni.

"Loicy!!" thum bula a kohna pawh chu hre lo derin ka kal hmawk hmawk a, a hmuh loh tawp tur hmuah a inngai a, a mipa duh loh tawp tur duhah a inngai nghal vawng vawng bawk.

"Loicy Wilson!!" vin deuh taka ti leh hrawkin Manuel-a chuan a banah a rawn chelh chat a, Step lo awm thut chu a rap sual kher bawk nen a tluk ṭhelh hial a ni.

"Min thlah teh Professor Manuel" ring vak lo hian Loicy-i chuan a ti vin deuh hlar a, an Professor mah ni se a zah buai duh tawh rih lo, a hmel hmu lova awm bo daih rih chu a duh a ni.

"I hmel aṭang khan thil min hmuh duh i nei tih ka hre tlat si a ni" ti bung deuh hmukin Manuel-a chuan Loicy-i File ken chu en a rual a, hmuh duh chu a nei ngei alawm, mahse tunah chuan hmuh a châk hlawl lo a ni.

"Ka ban hi i thlah theih chuan ka lawm ngawt ang, ni dangah ka thil hmuh duh che chu ka hmuh dawn che ni mai rawh se" ti ngatin Loicy-i chuan a ban chu a thing a, a lo thlah ve mai bawk.

"Kal sawn rih lo la a ṭhat ka ring" ti lehin a ban rêkah bawk chuan a rawn chelh leh nghal zat a, an sira zirlai naupangho chuan an en hrek hrek tawh bawk.

Ni e, en hrek hrek pawh ni se a awm, a awm lutuk tlat. Magazine-ah leh News Paper-ah lai Professor Manuel-a nen chuan an lang dun tawh a, chutah an infawp lai thlalak a la ni zui. Amaherawhchu Loicy-i chuan a fawp ve hauh lo, an Professor zawkin a fawp thut a nih kha!

Reporter te lah chu sumdawng tih takah mipui beng tivir tawk lêka Headline siam leh thlalak pho chhuah an thiam bawk si, Loicy-i ngat phei chuan thinrim taka a ben lai te chu pho chhuak ve se a ti rilru rum rum a, an an inkarah engmah a awm lo a ni tih tilang chiangtu ber tur an tarlang leh si lo chu a lungawi lo hle a ni.

Chu thil avang chuan a chhungte hnen aṭang zawhna chhan sen loh a dawng nual bawk a, chuti ang em em chuan Professor Manuel-a chu a lo lar ang tih rin ngaihna pawh a hre lo hial zawk. Thla khat lai a liam tawh, mahse Professor Manuel-a nena an chanchin chuan tun thlengin sawi leh ngaihven a la hlawh cheu a nih chu!

"Kal luih i tum tlat dawn em ni Loicy?" a hming te chu hre reng lo se a ti zawk, theihnghilh vang vang se an pahnih tan chuan a ṭhat ngei a ring.

Kal sawn tuma a tal leh rualin Manuel-a chuan a lamah a pawt hnai dâwr a, an infawh hmasa zawk ang chiahin a fawp leh ta siah mai. A kut a chet rualin Manuel-a chuan hrelawk ang hrim hian a lo man bet thuai a, a kut leh lama a tukhum chelhin a fawp ta ngawng ngawng. Tun ṭum erawh Loicy-i chuan amah leh amah pawh a inhrethiam bik lo, a chhan chu Manuel-a fawhna chu dawnsawn a nuamin a dangdai tak zet a ni.

"Nang hian min hip tih ka sawi tawhin ka hria Loicy, min hnar tlat te hian hnaih che min tichâk zual sauh asin" thaw lum ham ham hian Manuel-a chuan a ti sup a, an chal chu a insi rial bawk.

Manuel-a sawi chu a dik chiah, a hnar tlat ṭhin reng alawm, mahse thla khat liam ta aṭang kha chuan Loicy-i ngei paw'n a awm dan a sawi fâk thei tawh lo. An infawh hmasak zawk aṭang phei kha chuan a dik lo chho ṭan a, Manuel-a chuan a ngaihtuahna a luah ngut ngut tih pawh a hre ru reng, mahse chung zawng zawng chu a haider lui mai chauh zawk a ni.

THE ONE WHOM MY SOUL LOVES (M&B)

By

Havali Adam

Chapter 6

"Ni lo, khawngaihin heti ang hian awm suh Professor, i awm dan tur a ni lo bawk. Office-a i hmeichhe awmpui khan a lo nghakhlel tawh ang che, va kal tawh rawh" tia kal sawn a tum mai chu Manuel-a chuan a chelh leh ta chat a, an indin chilh reng chuan a rilru dik tak a hre mai ang tih a hlau a ni.

"I awah khan thil dang eng emaw hriat belh ka nei tlat mai Loicy, chu chu hriat chian ka duh bawk. He lai hmun aṭang hian i kal sawn thuai teh ang, a nih loh chuan i duh lo dan bawkin News Paper kan luah khat leh a ni mai" ti thum chhalin Manuel-a chuan a kai sawn dawr dâwr a, ṭan eih pawh a tum ta bik lo.

"Office-a mi hmeichhia kha engtin nge ni dawn? Ngawi renga kalsan daih ringawt hi a dik lo Professor, mi hawihhawm tak i nih ka lo beisei asin le" Car man to hmel tak chhunga an chuan luh hnu chuan a ti sep a, chuti anga ṭawngkhum tur chu a ni lo tih hre mah se Professor Manuel-a awm dan chuan a zir tlat lo a ni.

"Nangmah hian hawihhawmna pawh ngaihtuah thei lêk lovin min siam tlat alawm Loicy, eng vang teh hrepa heti anga danglam em em bik hi nge i nih?" a zawhna chu Loicy-i chuan chhan ngaihna a hre leh ta hauh lo.

Professor Manuel-a zawhna chu chhang lovin a ngawi vang vang a, chhang dawn pawh ni se sawi tur a hre hlawl lo a ni. An kalna hmun lam chu hriat pawh a hre ngai lo, khawi kawtthlêr nge a nih te chu a hre lo lehzual, a chhan chu chung lai hmunah chuan a la kal ngai lo tlat a ni.

In mal ding chhungkaw chenna ni awm tak hmaah chuan motor a tiding a, School Campus aṭanga an chhuah laia an inbiak tawi tê tih loh kha chu an inbe leh tawh lo hrim hrim, a zui ve ringawt te chu amah Loicy-i ngei paw'n mak a ti a ni.

Car aṭanga chhuakin Manuel-a chu Loicy-i ṭhutna lamah a kal kual a, kawngka hawn sakin a kuta vawn leh hruai chhuah chu a rual nghal a, an kut a insik apianga thil danglam awm ṭhin te chu ngaiah neih tum mah se a thei der lo.

Loicy-i lah chuan Professor Manuel-a chet dan chu a hrethiam lo tluang zel a, ṭawngkâ talin a tih tur leh an awm dan tur sawi se chu a bangbo viau kher lo vang, mahse a kut vuan rengtu Professor Manuel-a erawh a ngawi tlat thung si.

In chhung an luh chuan a lo reh duak a, engkim chu mawiin nalh em em vek mah se tlawhpawh tam loh tih hriat tak hian bungrua vel chu a inrem ṭha thlap a, Loicy-i phei chuan ramhuai an awm te a ring ru hial bawk. A kut vuantu Professor Manuel-a kut chu dah thlak a tum ve ṭhin ngei alawm, mahse a vuantu zawk chuan a phal tlat lo a ni.

Manuel-a chu a koki chen vel leka sang hmeichhe vun mam hân leh amah hip em emtu lamah a hawi chhuk run a, chu a hmeichhe vei em em lah chuan en pawh a lo en ṭha ngam lo. Chu tak te chu a ngaina zual a, Loicy-i chu a taa siam thuai thuai a duh a ni ber.

"Hei hi ka chenna in a nih hi" chu thu lo chu sawi tur vak pawh a hre lo, ama duh thuin a inah hmeichhia a la hruai lut ngai lo va, Loicy-i chu a hmeichhe hruai luh hmasa ber a ni bawk.

"A nih ka ring, mahse ramhuai an awm duh hmel" hawi kual zawk zawka Loicy-i'n a tih chuan a inrin hmain a kiai suk a, a thu sawi ho têin a tinui thei chu thil mak tak pawh a ni.

"Loicy Wilson, ka ta ni rawh" a dawngsawngtu tana a nawm leh nawm loh tur pawh ngaihtuah hmasa lovin a ti leh deuh tawp a, Rosy-i ang mai maiin a en lo tih chu a hre chiang khawp mai.

"Professor" a hmaa hmeichhia dingin a rawn tih thawp sep lai chuan kun hniamin a fawp leh nghal chat a, Loicy-i chuan Mangnet ang maiin a hip bet ni tawh maiin a hria.

Hmui lum nuam em em che reng chuan a insum theihna zawng zawng tikeh chhiain Loicy-i chuan a hmui chu a chet ve zauh a, che veleh a mi fawh mek lei chu a kâ chhungah a rawn lut zui nghal thuai bawk. Chhan let loh tumin nasa takin a bei a, a rilru thlengin a infuih ru ngar ngar a, mahse a ṭum thumna erawh a insum zo tawh bik thlawt lo a ni.

Chhan let loh theih loh khawpa zun neiin an Professor chuan a fawp miau a, Loicy-i tan chuan insum reng chu thil har tak a ni. A pa tih loh mipa a vawi khat fawhna a ni a, Movie-ah te chuan a en ve tawh ṭhin ngei alawm, mahse Professor Manuel-a hmui baka fawh nuam chu a awm leh theh pawh a ring lo, hmangaih taka a pa'n a fawh zeuh ṭhin ai letin nuam a ti a ni.

An infawh lai reng chuan a kang deuh lâwp a, zah hre lo ang maia a kawngah a lo kherh bet ve chial te chu thil dik a ni lo tih leh thil mawi a ni lo tih chiang takin a hria alawm, mahse a taksa engkim chu a taksa ni lo ang maiin a thunun thei tawh lo a ni.

Men pawh meng phal lovin a fawp let ve tawn tawn a, chu chuan an Professor chu a tiphur zual sauh tih reng a hre si lo. Mipa hmui lum nuam tak nena an infawh reng lai chuan a meng diar diar a, an awmna hmun chu a hmaa an awmna hmun a ni ta hauh lo mai, engtin nge chu lai hmunah chuan an awm daih theih pawh a hre lo.

A taksa chhungril aṭanga thil intur ut ut chu Manuel-a chuan haider buai a tum tawh lo chiang hle a, a fawhna zei lo taka chhang let ve tawn tawntu fawp reng pah chuan a Coat leh Kamis chu a phelh sawk sawk a, chu hmeichhe taksa chhungah chuan nawmna vawrtawp thlenga luh chu a châk zek zek tawh a ni.

A kekawr phelh nghal mai lovin a pheikhawk chu a tlawh chhuak thuai thuai a, a inhlih pah chuan Loicy-i chu a la fawp pah reng bawk. Amah phu lova âwm lian leh duhawm zet chu a ṭhamsak tawn tawn a, a phur nasatzia chu amah ngei paw'n a hrethiam zo tawk bik lo a ni.

"Ni lo" a thawmhanw phelhsak a tum rualin Loicy-i chuan a rawn ti vin ṭhawt a, a âwm chu a kuta hup betin pawngsual hlau tak ang maiin a meng a, Manuel-a erawh chuan mak a lo ti hle thung.

"Ka mamawhna che a nasat ang chiahin min mamawhna pawh a nasa a ni Loicy, phat buai tumin ṭang duh suh" tiin Loicy-i chu sawngbawl zui leh mai a tum a, mahse a hmaa hmeichhe ṭhu tawm chawih chuan

"Ka laka i chet dan hi a mawi lo lulai tak zet a ni Professor Manuel Firth" lo ti vin leh tûarhin a vawi hnihna atan a hmaiah a rawn beng ri leh ta sawk a, a hamhaih lutuk avangin na pawh a ti hran lo.

"Kan mamawh chu kan inphuhru tawn tur a ni lo'm ni Loicy Wilson? Ka mamawh em em che a, nang paw'n phat rual lovin min mamawh bawk" ti nghet charh charh mah se Loicy-i chuan a hlauh hmel em em tawh thung.

"A ṭha e, vawiin atan chuan tawk rawh se" tih leh din a rual a, a hmaa mipa ding kap pawng ul chu Loicy-i chuan a hmuh hmaih lo chiang hle, en pawh en rei duh lovin a hawi sawn vat bawk.

"Ka sawi leh ang Loicy Wilson, nang leh kei hian inzawmna kan neih a ngai. I laka ka rilru put hmang ang chiah hi ka lakah i pu tih ka hria, chuvang chuan in thup buai tum tawh lo law law ang che" Kamis ha ṭha mawlh mawlh pahin Manuel-a chuan a ti leh a, Loicy-i erawh a ṭawng buai peih tawh lo.

"Ka lo thlah ang che, i awmna pawh ka hriat a ngai reng a ni" ti deuh hmukin Manuel-a chuan a kutah a chelh leh nghal hmak a, Loicy-i chu a hmeichhiaah a ngai nghet hmiah tawh a ni ber.

Loicy-i pawh chuan hnial buaina nei lovin a hruai ang ang chuan a zui ve mai a, Professor Manuel-a thu sawi zawng zawng chu dik lo pakhat mah a awm lo. In chung aṭanga an chhuk thlak lai te chuan in chung lama an chhoh lai chu a ngaihtuah let roh rôh a, mahse engtik laiin nge an chhoh a hre chhuak zo tawh hauh lo.

Car chhunga an chuan lai te chuan an awm dan chu a ngaihtuah let char char a, khati ang em ema mipa a mamawh kha a la hre lo, Sex la hmang ngai miah lovin mipa a mamawh lutuk te kha mak a tiin zahthlak a ti ngawih ngawih a ni.

Apartment lam pana an tlan chhung zawngin an inbe lo tluan leh zak a, inbe dawn pawh ni se sawi tur vak an nei lo hrim hrim. Manuel-a a hlim ruk em em laiin Loicy-i erawh a rilru a buai ru em em thung a, Professor Manuel-a chu a hlawhtlinna kawng daltu lian tak a ni dawn tih a ring nghet bur bawk.

Building kawt an thlen rual chuan chhuk mai a tum a, mahse Manuel-a chuan amah pawh en lovin a lo chelh ding leh ta chat mai. Professor Manuel-a hawina lam chu a hawi ve leh ta tawp a, chuta a mi hmuh chu tu dang ni lovin Thomas-a ngei a ni.

"Ka hrilh chiang viau tawh chein ka hria Loicy Wilson, Thomas Muller-a saw hnaih tawh suh. I bul hnaia a awm lui tlat a nih chuan zirlai a ni tih theihnghilhin ka che duh mai ang" a rawn tih chuan

"Khawngaih takin ka nunah leh ka ṭhian kawm turah lo inrawlh suh Professor, ka tan chuan Professor ve mai i ni" a lo tih khum ve ta salh a, Manuel-a rilru chu a ni lo kher mai.

"Ka fawhna che i lo chhan let aṭang kha chuan i laka ka nihna chu ka hre chiang tawh viau mai, nang chuan i haider lui mai mai zawk a ni" Manuel-a awah chuan tihelna a lang tam hle a, a lo fawh let ve kher kher avangin Loicy-i pawh a inchhir ta rum rum.

"I mi fawhna kha chhanlet ka tum bik hauh lo, ka chhanlet palh avang khan ka inchhir hle bawk. Ka tan engmah i ni lo va, i ni ngai lo bawk ang" inring tawk takin ti ve mah se a duh rukzia chu a hria ang tih a hlau hle thung.

"Ka hun tawn ka ngaihtuah hian Mood fuh hliah hliah tur ka ni, Thomas Muller-a vang mai mai sawn tih chhiat pawh ka duh lo. Chuvangin vawiin chiah chu i hmuh ka phalsak ang che, ni dangah erawh ka en liam mai mai dawn lo che tih i lo hre dawn nia" pangai taka a rawn tih rualin Loicy-i chuan

"I zak lovin i ngampa sawt hle mai Professor, nang nen hian inzawmna pakhat mah kan nei lo va, nang ang mi chapo leh mahni chauh inngaihtuah hi inzawmna neih pui pawh ka duh hek lo" a ti fiah ve ta fak fak a, a duh loh dan bera an Professor biak chu mawi a ti bik reng reng lo.

"Chhuak rawh" Manuel-a chuan a ti bul hmuk a, Loicy-i pawh Car aṭang chuan a chhuak rang khawp mai, an awm dan leh inbiakna chuan a tichau deuh nghulhin a hre nghe nghe.

Thomas-a chuan a lam pana Loicy-i lo kal phei lai a hmuh rualin ngaihtuah hmel fê hian a en kar a, a rawn chhuahna Car dum tliang zar chhunga mi chu tu nge a ni tih a hriat theih loh avangin a en reng duh ta lo bawk. Loicy-i chuan a kuta kaiin Buidling chhung lamah chuan a luh pui a, a chet dan chuan Thomas-a chu a tihamhaih kher mai.

Room chhunga an luh hnu chuan Thomas-a kut chu a thlah ve leh mai a, a duh aiin a vuan rei hret a ni. A awm dan chuan beiseina a pe ang tih a hlau hnuhnawh hle a, Professor Manuel-a hmuh atan chauha a kut chu vuan a ni thung si.

Thomas-a chuan Socia Media leh News Paper vela a lar leh tawh thu a hrilh mawlh mawlh a, darkar tam pawh ni lo liam taa Professor Manuel-a nen an infawp lai thlalak a lo darh nasa leh tawh hle a ni tih a hmuh chuan thawk ngaihna pawh a hre lo hial zawk. Chuti ang khawp chuan an mit a chakin an thang chak ang tih rin ngaihna pawh a hre lo va, mahse an lar tawh viau tih chu hai theih a ni mawlh si lo.

A haw dawnah Thomas-a chuan a biangah a fawh sak zeuh a, ani paw'n Building kawt thleng te chu a thlah ve thlap a, mahse a rilruah a awm rei tak tak thei lo. A fawhna te chu eng atan mah a ti lo va, a danglam eih lo hrim hrim zawk a ni. Ho lam taka Professor Manuel-a tawhna te erawh dawnsawn dan thiam lo khawpin a danglam phah ṭhin a, mahse chuvang chuan a duh tawhzia hrilh kher a tum chuang lo.

Ni e, Loicy-i chuan nasa takin Professor Manuel-a chu a duh tih a inhre tawh a ni. Amah leh amah ngei pawh inringhlelin a inhaw em em a, Professor Manuel-a te ang mipa chu a duhin a vei tlat ang tih a hre lawk lo hrim hrim, engkim chu a thleng thu a ni ber.

A mizia leh Professor Manuel-a mizia awm ang te chu a khaikhin ṭhin a, inmil theiin hre lo mah se inmil dan riau an nei tlat bawk si. Dik taka sawi chuan a ngainat thu a hrilh khan a chawmawlh vek a, chhanlet dan thiam lo khawpin a rilru a buai nuai nuai a, awm dan tur ber pawh a hre lo nih kha!

Amaherawhchu chuti maia a thu sawi chu awih a tum lo hulhual, a chhan pawh Professor Manuel-a chu hmeichhe kawp lai nei a ni tlat. Composition Piece submit tuma a kal laia a thil hmuh te chu a ngaihtuah chhuak leh a, a hmeichhe kawp lai nena an khawsak dan chu tenawm a ti thar ngawih ngawih.

Chutah phur zeta an infawh lai te chu a ngaihtuah chhuak leh a, nuam ti zeta a lo chhang let ve ringawt te chu amah hmuhsit phah theihna tur a ni tih a hre chhuak tlai mah mah a ni. A tum loh lutukin a din ruala a mipatna pawng ul chu a mitthlaah a rawn lang leh a, hmun khatah awm miah lo mah se a mitthlaa a thil hmuh chuan a tizam thei a ni.

"Manuel, vawi eng zah nge ka zawhna chhang lova i pumpelh zel tawh pawh hi ka hre lo. I rawn zin leh thuai turah ka lo ngai a, mahse kan Company lam thlengin zawhna kan dawng nasa ta khawp mai" a pa chuan a ti charh charh a, Manuel-a erawh a ngawi ran thung.

"Lo haw zuai la, kan sawi dun dawn em ni ang? Nang paw'n nuam i tih chiah ka ring lo, Boston lam ai kha chuan Chicago lam hi i awmna tur dik tak a ni" rawn ti leh mah se a pa thu sawi ang chuan awm a tum lo nasa mai.

"Ni lo ka pa, heti ang te chu ka tawng ngun tawh alawm, ka palzam thei mai ang" ngaihsam hmel fê hian a pa chu a chhang a, amah tak chuan engah mah a ngai hran lo, Loicy-i zawk chu a ngaihtuah a ni.

"Manuel Firth! Mi suak sual pa, min phatsana maw!?" Office kawngka lam aṭanga Rosy-i aw chu hriain a hawi vut a, a pa nena an inbiakna pawh a titawp zui nghal hmak.

"I lo tenawm hle mai Manuel, in infawh hmasak zawk pawh khan ka la na hle tawh a, tunah a vawi hnih nan khawlaiah in infawp leh a, kei tak ngial pawh khawlaiah min fawp duh ngai lo a ni lo'm ni?" tiin Rosy-i chu a an chhunzawm bawrh bawrh a, a sawi chu dik lo pakhat mah a awm lo leh nghal.

"Insawifiah ka tum lo Rosy, i duh chuan kan inṭhen thei ang. Ni lo, kan inṭhen hi a fuh zawk maithei, ka hne deuh tlat che a ni" hriat nuam loh zet hian a ti deuh tawl a, chungte hlei hlei chuan Rosy-i chu a tithinrim zual ta sauh.

"Mipa zawng zawngah i lo tenawm ber e, nang ang mipa hmeichhia pawh ngaihtuah thiam lo hi ka ṭhen nghal hmak a che" tih khum phiar phiarin Rosy-i chu Office aṭang a chhuak a, Manuel-a erawh a nui suk ringawt.

Rosy-i nen an inṭhen fel ta chu rilru nat a hnêkin a lawm ru em em zawk a, Rosy-i chu eng atan mah a lo ngai reng reng lo tih a hriat chhuah chuan a nuih a za zual, inthiam lohna pawh a nei lo, nei tur pawhin a inngai lo hrim hrim zawk a ni. Ni dang ang lo takin a zâng huai a, a ngaihtuahna te chu a fim kâk a, Rosy-i nen an inṭhen chu thil chânah pawh a inngai lo.

Loicy-i nen School-a an infawh ni chu ni 2 laiin pel leh tawh mah se an thlalak erawh a tam tulh tulh a, Reporter lamin an ngaihven zual sauh bawk tih te chu a hre vek a, an lar ta viau pawh chu thil awm lo a ni hran lo. A inkhung fel mawlh mawlh lai chuan a ṭhianpa Mathew-a hnen aṭang phone call a dawng nawlh a, sumdawnna vang baka lo call a nih pawh a ring lo.

"I dam maw ka ṭhian? Tun lai chu boruak i va luah hneh ve le, New York lamah pawh kha hmeichhia nena in lanna chanchinbu hralh a kal khawp mai" a ṭhianpa'n a rawn tih chuan

"Eng nge min lo biak chhan?" tiin tlang takin zawhna a lo zawt let daih a, a ṭhianpa rawn chhanna chu a rin ang ngei a ni; Mathew-a chuan sumdawnna vang bakin a lo call tawp lo e.

"Ti teh ka ṭhian, i duh ngei ngei a ngai. Kan Company hian Brand thar kan siam nual a, chung zawng zawng chu min faksak leh la ka duh a ni. Min pui a ni mai, i hlawh pawh ṭum dang aiin a sang ngei ang" a ṭhianpa sawmna chu ani chuan hnar a fin thlak zawkin a la hre tlat.

"Tun ṭum chu Model dang hmang mai rawh Mathew, ka buai ru ang reng viau a nia, min hrethiam mai teh" a tih chuan a ṭhianpa chu rawn ṭawng leh vatin

"Ni lo Manuel, hun ṭha hi bawhpelh ka tum reng reng lo. A sarhu lai a ni a, Underwear leh Kamis leh Jean kekawr hak a ni mai. Writer ṭhenkhat phei chuan kha hmeichhe naupang nena in chanchin kha Script ang zawnga ziah an tum deuhin ka hria, in hausa thur thur dawn e" a rawn ti ta luam a, mahse Manuel-a hriat duh loh zawng tak ṭawngkam a chhak chhuak palh ta hlauh mai.

"Ṭawng tam suh Mathew, hmeichhe naupang tiin ka beng hriatah sawi leh tawh suh ang che. Lo sawi lo sawi ve chhen tur pawh i ni hrep lo ve, ka puih i duh chuan Loicy Wilson-i chanchin hi a them paw'n sawi tawh lo bawk ang che" a ti ram hmuk a, a ṭhianpa chuan a rilru tur awm ang a hrethiam ta khawp.

"Aw le, ka lo sawi tawh dawn lo a nia, mahse i hauh na nghal mah mah a ni ka ṭhian. I kawp rei leh tak tak chuang lo vang, i lak thutak pawh ka ring leh chiah lo" tia a ṭawng laklawh laiin Manuel-a chuan

"Ka pui dawn che nge ka pui dawn lo che? Ka sawi zo chiah a ni lo'm ni?" a lo ti vin leh nghal ṭhawt a, a puihna mamawhtu zawk Mathew-a chuan thupha chawiin a tlawn zawm nghal zat bawk.

Manuel-a chuan a phur em em vang pawh ni lovin a ṭhianpa chu puih a tum nghet ta a, a lo tih fô tawh a nih avangin thil harsa a nih pawh a ring lo. Ni khat chhunga zo fel vek turin an inbe rem a, a ṭhianpa chauh ni lo Company dang paw'n an rawn biak thuai a ring. A tan chuan sum hmuhna leh mi hriat hlawhna mai a ni a, engah mah a ngai lo, ngaiah a nei tawh zawk a ni.

Amaherawhchu amah chiah inngaihtuah thei a ni lo tih a hria, Loicy-i ber chu Reporter lamin an chim buai zui nghal dawn tih a hre vek bawk, chuvanga a awmna hmuna kal chilh tum pawh chu a ni. Dik tak chuan a beisei ai daihin an lar ve tho, hun kal tawh ngaihtuah chuan infawh mai mai vanga a la lar ber ṭum a ni hial ang.

"Lo lut rawh" tiin Loicy-i chuan kawngka chu a hawng a, mahse a hmaa hmeichhe sam buang amah aia sang lo ding chu tu nge a nih a hre thei mai lo.

"Nang mi zakthei lo nu, ka bialpa i lo fawp ngam vela maw!? I châk dawn lo lutuk, lo hnaih leh ngam tawh lo tur khawpin ka siam dawn che a ni" tiin Rosy-i chuan a rawn kek nghal bawrh bawrh a, Loicy-i pawh chuan chu nu chu tu chiah nge a nih a hre zui nghal.

"Khawngaihin duh tawk rawh" tia a ngen lawm lawm lai pawhin Rosy-i chuan a kek chawl lo va, amah aiin a lian kher bawk nen a hneh lo lam lek lek chu a ni.

"Duh tawk nghal rawh!" mipa aw thum khauh tak rawn awm avangin Rosy-i chu a tawp chat a, chuti anga rawn vin tu aw chu a hre chiang em em bawk.

"Heta ṭang hian chhuak nghal ang che, he inah hian i kal leh tih ka hriat vaih chuan ka en liam tawh hauh lo bawk ang che Rosy" tiin Manuel-a chuan a pawt chhuak dawr dawr a, Loicy-i erawh khum bulah ṭhingṭhiin a lo ṭap khur tlawk tlawk thung.

"Loicy" Manuel-a'n khawih a tumna chu na zet hian a lo vai sawn thuai a, a sik hlek pawh chu a duh tawh lo, ani chu buaina siamtu mai a ni.

"Min hawsan rawh Professor Manuel, buaina neih belh ka duh tawh lo a ni" mittui tling pama a tih lai chuan a pa hnen aṭang phone call a dawng a, pick up chu a peih lo kher mai.

Phone call a pick up rualin a pa chuan a ṭhat leh ṭhat loh thute a zawt a, ani paw'n a ṭap tih an hriat hlau zetin a lo chhang ve zel a, a insum theihna chu a puak keh mai ang tih a hlau ru hle bawk.

"Pa, ka lo haw mai dawn emaw ni le?" a pa ṭawng mawlh mawlh laiin a beidawng ru tawh lutuk chuan a ti chhuak ta tawp a, a rin phak baka Boston khawpuia a thlalak leh Professor Manuel-a thlalak tam ta em em chu a zo lo a ni.

"Teuh lo mai" ti ram hmukin Manuel-a chuan a phone chu a rawn laksak daih a, a hmuh lai rengin a off zui hmak bawk.

"Ka tihpalh Loicy, in ram lama haw tum suh, engkim hi ka siam ṭha ang. Ka tiam a che, engkim hi ka tireh vek ang" tih leh kuah a rual nghal a, chu veleh Loicy-i chu a pa âng chhunga awm ang maiin a ṭap chhuak ta hawm hawm.

"Nang hnaih che hi ka duh lo Professor, ka tan chuan buaina leh harsatna thlentu mai i ni" a ṭah avangin ṭawng pawh a ṭawng ṭha hlei thei lo va, Manuel-a chuan a awm dan a sawi fak thei ta lo, a rilru a na ve ni maiin a hria a ni.

"Min en teh Loicy, min en teh le" Manuel-a awah chuan amah ang lo takin dawhtheihna tlachham zet aw leh hriat hrehawm reng a lang tawh lo, khawngaihna leh tawrhpuina chauh a lang tawh zawk a ni.

"I laka ka rilru puthmang hi i hrethiam tih ka hria, kei ang chiahin min ngaina ve a ni tih sawi teh. Chu chauh chu sawi turin ka phut che, a bak zawng chu ka ti vek ang" a chal sam chul sak hliau hliau chung chuan a ti sup a, Loicy-i pawh chuan zep buai duh tawh lovin

"Ka ngaina che alawm Professor, mahse ka haw em em bawk che" a ti ta ṭuau a, a thu sawi chuan nasa takin Manuel-a chu a tihlim thung.

"Ka hmeichhia chiah i ni ang a, i ni kumkhua bawk ang. Nang ang em ema hmeichhe ngaihsak hi ka la nei lo Loicy, ka phalna tel lovin in ramah i haw lo bawk ang" ti leh fawh chu a rual nghal a, la ṭap deuh pur mah se Loicy-i chuan a lo chhang let ve leh ta nge nge.

THE ONE WHOM MY SOUL LOVES (M&B)

By

Havali Adam

Chapter 7

Pawm kang lâwpin Manuel-a chuan khumah a mutpui a, Loicy-i paw'n lo duh loh emaw lo ṭan tlat vel chu a tum buai lo hrim hrim bawk. Chutia amah hip em emtu leh a rilru aṭanga a paih chhuah hleih theih loh hmeichhe taksa a sik tâk rengah chuan zawi zawiin Manuel-a chu a danglam a, a mipatna te chu a rawn tho ṭuah ṭuah a, a hmeichhe kuah mek erawh chuan mut hahdam a mamawh hmel hle bawk si.

Manuel-a chuan a hmeichhe kuah mek chu a en chiang a, Loicy-i chu a lo muhil ta daih mai. Muhil lo ngat se chu a che chhuak ang a, am takin hmangaihna a chenpui ngei ang. Eng ang paw'n insum tum mah se a taksa sik chuan a châkna a ko chhuak tlat bawk si a, a tawpah phei chuan Bathroom-ah lutin a châkna chu a hrithla ta ringawt.

Zan dar 12 a pelh hnu pawh chuan a la mu meng kar a, Loicy-i taksa si lova mut chu a tum lo hle bawk. A âwmah kuah betin a chhim sam chu a fawp vang vang a, muthilh pawh a tum lo law law, a thei dawn chuangin a inhre lo a ni. A kut chu a hlei leh tial tial ṭan a, Loicy-i âwm poh ve lâh chu a kawr chhanah a tawk dê de a, chuti anga ṭi chuan tu hmeichhia mah a la khawih ngai lo.

Hmeichhia zawkin an taksa hmangin a lem kual a, ani'n an thil duh chu a lo phuhruk sak mai ṭhin bawk. Chutia kawr chhana Loicy-i âwm itawm tak a khâwih a khawih tâkah chuan insum theihna a tlachham leh ta nge nge a, a kawr chhunga zen lutin a ṭham sak chiah chu hmangaihna chenpui mai a duh leh ta rum rum.

"Loicy Wilson, eng ang hmeichhia nge maw i nih reuh chu le; heti ang em ema min tidanglam thei tur hian?" tia phun supin a kut chu a la chhuak a, a khawih sak reng a nih chuan a tawp chu Sex bak a ni dawn lo tih a hre chiang hle a ni.

Muhil thei lo ta na nâ na chu ngawi rengin thil chi hrang hrang a ngaihtuah kual a, chung zingah chuan a hmeichhe kawp hlui ni ta Rosy-i pawh a tel bawk. Loicy-i nen chuan a rilruin a'n khaikhin vel a, an mizia a inan lohzia leh a hmuh dan a inan lohzia chu a ngaihtuah chhuak a, Loicy-i lakah chuan a beh ngheh viau pawh a ring.

Hmeichhe kawp nghet chi a ni lo va, chi hrang hrang kawp chi a ni tih amah hre chiangtu te chuan an hre vek. Amaherawhchu tun ṭum erawh amah ngei paw'n a kawp ngheh a ring ve hial a, a chhan chu a kâ aṭanga a ngainat thu a chhuahna hmasa ber hmeichhia chu Loicy Wilson-i a ni tlat a ni.

"Pa, i lo zin em ni? Nge ka mumang zawk?" ti thawp sepin Loicy-i chuan mipa taksa lum nuam zet chu a kuah nghet sauh a, a muttui em em chhan chu a ring thiam nghal mai.

Muhil lo tih takah Manuel-a chuan Loicy-i awm dan chu a hmu chiangin a ṭawng dan te chu a lo hre hle a, meng miah lova a rawn ṭawng ri ngawt te chu mak a ti khawp mai. A taksa kuah nghet em emtu hmeichhe lian lo ve tak chu chiang lehzual zawkin a thlir vawng vawng a, chuti ang em em chuan a hmelṭha tih a lo hre ngai reng reng lo.

Kun hniamin a biang no sen chêkah chuan a fawp zeuh a, a hmuiah a tawlh thla zawm zat bawk a, mahse Loicy-i tan chuan a hmuia fawptu an awm avangin harh loh theih a ni ta lo. A fawptu hmui lah chu meng miah lo mah se a hre chiang em em a, a meng ta nge nge.

"Professor!" ti hluaiin Manuel-a taksa aṭang chuan rang tak hian a tawlh sawn vat a, a chet dan chu Manuel-a paw'n a ring bik lo a ni ang a lo chelh hman lo hrim hrim.

"Eng vangin nge ka Apartment-ah hian i awm? Eng thil ṭha lo nge ka chungah i tih? Police hnenah ka report thei che asin, khawngaihin ka Apartment aṭang hian chhuak thuai rawh" khum hlat taka dingin a ti hlawk hlawk a, Manuel-a pawh khum aṭang chuan a chhuk ve mai bawk.

"Ka rualin School i kal dawn a nia" Manuel-a chuan ngaihsam deuh hian a lo ti daih thung a, Loicy-i erawh a thinrim hmel ta khawp.

"Ka phalna la hmasa hawt lova min mutpui avang hian Police hnenah ka report thei tak tak che a nia Professor, hmeichhia mah ni ila i hma lam hun tichhe vek thei khawpin ka che thei a ni" a ti fak fak a, a hmel hmuh reng pawh chu a duh tawh lo a ni.

"Chu min vau ve deuh tihna em ni Loicy?" nui lui hak pah hian Manuel-a chuan a ti leh daih a, Loicy-i thu sawi chu engah mah a ngai lo a ni ber.

"Ka vau che ni lovin thil thleng thei ka sawi mai a ni, ka Apartment hi i chhuahsan vat theih chuan ka lawm khawp ang" tiin Loicy-i chuan a melh ral a, zan lamah engti ang chiahin nge a chungah a lo chet ang tih pawh a ngaihtuah ngam rih lo a ni.

"I rilru tur chu ka hrethiam alawm Loicy, mahse i rilrua awm ang kha engmah ka ti lo. Ka insum nasatzia i hre kher lo vang, i harhfim lai lo chuan i taksa chhunga luh ka tum reng reng lo bawk" a thu sawi chuan a hma ai letin a tithinrim a, a bula lehkhabu chuan vawm chawrh mai a duh tawh hial a ni.

"Professor Manuel Firth, tunah hian ka Apartment i chhuahsan nghal lo a nih chuan Police ka call nghal ang" tih leh phone lek kan chu a rual nghal a, a zam ru der der chu a hriat vaih chuan a zuam sawt ngei ang.

"Ka sawi kha i hre lo em ni Loicy? Nang leh kei hi kan kal rual dawn, tum mah la ka rual lo chuan i kal lo bawk ang" tiin Manuel-a chu a lamah a rawn phei vut a, ben a tumna kut chu a lo man nghal chat bawk.

"A chhan chu nang leh kei hi kan inngaina tawn a, kan inmamawh tawn hle bawk" a hmuiah tak chuan a rawn fawp nghal hmiah a, Loicy-i chu a lo inring hman lo hrim hrim a ni.

"Nang hi ka ngaina ngai lo vang che, engtikah mah nang mi chapo hi ka ngaina ngai lo vang che" a âwma a nam vak hnu chuan a ti hlawk hlawk a, duh dûha tihkual theih hmeichhia nih a duh reng reng lo.

"Min ngainat thu nizan mai khan i sawi tawh ngei alawm" lungnih lo hmel taka a rawn tih chuan zan lama thil thleng chu a ngaihtuah chhuak a, a rilru dik tak a lo hrilh hman chu pawi a ti ngawih ngawih a ni.

"Ka rilru fim loh lai a nih dawn chu, a enga mah kha lo la thutak duh suh. Zirlai leh a zirtirtu an inngaizawng ngai lo, thil awm thei pawh a ni lo" a thil hriat beitham zet hmang chuan inven a tum ve tak na a, awmzia a awm lo kher mai.

"Ka rilru ka hriat chian tluk hian i rilru pawh ka hre chiang a ni Loicy, nang hian nasa takin min ngaina a ni. I la hria em; ka Office-a piano pawh i play dik theih loh ni kha!? Kha tah pawh khan i zam thu i sawi a, eng dang vang ni lovin ka laka rilru dang i put vanga zam i ni" a rawn ti ta chat mai le.

"Ni emaw i ti mai mai a ni Professor Manuel, i lakah hian eng rilru mah ka pu lo, ka pu duh lo bawk" a rilru dik tak hre vek tawh mah se thup chu a la tum hram a, an inbe nileng mai ang tih te pawh a hlau a ni.

"Sawi tawh lo zawk teh ang, nizan aṭang khan ka hmeichhia chiah i ni tawh tih hre reng ang che. Ka lak aṭang hian awlsam takin i kal dawn lo va, ka ṭhen che a nih ngawt loh chuan kan inkar a ṭha a ni mai" a ṭawngkam chapo tak chu chhan a tum buai duh tawh lo, awmzia a awm kher lo vang.

"Insiam rawh le, nge hetah hian Breakfast kan ei dawn? Khawiah emaw thil ei pui che erawh ka duh viau a, i duh dan ka zahsak ang che" a rawn tih leh chuan en lovin a insiam malh malh a, a sawi vang ni lovin School tlai a hlauh vang a ni bawk.

Buidling kawt an chhuak chiah chu beisei loh lutukin Reporter an lo awm fur a, Professor Manuel-a nena an thla chu an la de zawk zawk a, Loicy-i tan chuan Professor Manuel-a bula chuan nghal mai loh chu tih ngaihna a awm ta lo. A lo tum rilruk dan chuan ngawi renga Taxi lak daih a tum kha a ni a, mahse chung Reporter te chuan a ruahmanna an tichhe ta vek mai.

Reporter te leh thlalatute mit la zual tur takin Manuel-a chuan a banah a rawn vuan vat a, hmanhmawh takin Car chhungah a nawr lut a, an tlan chhuah hnuaah pawh Loicy-i chu a dik thei tawh lo, tûma tihbuai phak lohna hmuna awm daih chu a duh tawh a ni.

"Ka bulah rawn cheng ta che, buaina pawh i tawk tlem deuh ang" Manuel-a sawmna chu âtthlak ti zetin a nui chhuak hak a, Apartment sawn dawn pawh ni se ani bulah kher chuan awm a tum lo nasa a ni.

"Loicy" chhang lova a ngawih reng avangin Manuel-a chuan a rawn ti leh sup a, a lam a hawi chuan hma lam chiah a lo en ngur a, na taka ṭawngkhum riap riap duh mah se an Professor a nihna chu a zah lo thei bawk si lo.

"Nizan khan engkim i tih reh tur thu i sawi a, i thu sawiah i din ngei ka beisei" tiin thil dang chu sawipui a tum ta zawk a, a bula chen lam pang chu sawi kai leh pawh a duh tawh lo.

"Ka ti reh thuai dawn alawm, lo lungngai lutuk duh suh. Kar lehah khian New York-ah ka zin lawk dawn a, i duh phawt chuan min lo zui thei ang" pangngai taka Manuel-a'n a rawn tih chuan

"Ka duh lo ni mai rawh se, ka duh loh turzia hre sa vek chunga min sawm ngam hrim hrim pawh hi a inhmuh hniam thlak ka ti Professor, khami ni khan min fawp miah lo la chu eng buaina mah ka tawk lo vang" a lo tih khum ta salh a, a buaina tawn mekah chuan a dem ve tak zet a ni.

"Nangma'n fawp lo thei lovin min siam tlat alawm Loicy, theih chu ni se ka zirlai naupang mai mai hi ka ngaihven reng peih lo ang che" a rawn ti leh mai a, huat tur awm ang a sawi loh miau avangin a ṭawngkam chu a haw thei tak tak lo a ni.

School thlen hma zawng chu inbe lovin an chung dun ta ṭhak a, Loicy-i phei chuan ṭawng châkna reng a nei lo a ni. Ṭawng dawn pawh ni se eng nge a sawi ang? A thu sawi apiang lo hnialtu Professor Manuel-a a bulah a awm tlat bawk a, a tan chuan ngawih reng chu a fuh zawk a ni. School Campus-a an din rualin a chhuk nghal thuai a, Professor Manuel-a biakna pawh a hre lo der hmak bawk.

Classroom-a a ṭhut hnu rei lovah Professor pakhat a rawn lut a, Theory lam a zirtir malh malh a, zing lam aṭang a mood a dik lo sa bawk nen hneawm a ti kher mai. A bula ṭhu Jessica-i paw'n eng zawhna mah a zawt duh lo va, a hriat vek tawh ring tho mah se a zawt lo te chu a lawm ru hle a ni.

"Manuel, kan va lar ta em em ve le, boruak neih belh tawh lo la ka duh khawp mai" phone call a pick up rualin a pa chuan a rawn ti nghal a, Manuel-a erawh a lo thaw ri hak ringawt.

"I lo haw dawn ta em? Lo haw leh ngei chu i tum khan ka hria, i lo haw dawn a nih chuan lo haw thuai la ka duh khawp mai" a pa'n rawn tih leh chuan

"New York lamah ka ṭhianpa ka pui lawk ang a, Chicago lamah lo thlawh kawi ka tum bawk. Ka pa, ka ṭawng peih rih vak loh bakah tih tur ka nei a, kan duh tawk rih mai dawn em ni?" a lo ti ve ta sup a, a pa pawh chuan a awm dan tur hrethiam takin phone a off zui ve mai bawk.

"Manuel" Lily-i kohna avang chuan a ding deuh dawt a, kal leh mai a tum lai takin a rawn ko leh a, thil pawimawh awma a rin avangin ani pawh chu a ding ṭha ve leh mai.

"School-ah hi chuan Professor ti tel la ka lawm khawp ang Lily" a ti chang deuh bawl a, Lily-i erawh chuan a thu sawi khauh tak chu engah mah a lo ngai teuh lo.

"Lo kal teh, inbe teh ang" tih leh a office-a pawh luh chu a rual nghal a, Manuel-a chuan titi pui a peih lo kher mai, hun pawh a nei vak lo hrim hrim.

"Tukin chanchinbuah kan zirlai Loicy-i nen in lang dun leh a, nizanah in riak dun em ni? Engati nge hmun khat aṭanga in chhuah dun kher kher, kan School hi i tihmingchhe thei asin" Lily-i chuan a ti hlawk hlawk a, Manuel-a awm dan chu en liam mai mai harsa a ti tawh a ni.

"Loicy-i nena kan riah dun leh dun loh chu i ngaihtuah ber tur a ni lo, nang chuan ka hnena Master Class la tur rawn chhawp chhuak zawk ang che" tia kal sawn mai a tum chu a rawn ṭawng leh ta.

"Loicy-i nen hian in inkawp nge thu leng vel hi dawt mai mai?" Lily-i chuan a ti hmarh hmarh a, a ṭhianpa leh a thawhpui a nihna lai chenah a mualpho vak mai ang tih a hlau ve a ni.

"Aw kawp e, ka hmeichhia a ni tawh, a tawk em? I hriat duh tur ka sawi tawh bawk a, ka kal ang e" ti thum bul hmukin Manuel-a chu a chhuak nghal a, Newspaper leh Magazine Comany lam a hmuh ngei ngei a ngai tawh a ni.

School Campus aṭanga a tlan chhuah dawn lai takin Loicy-i leh Thomas Muller-a hlim hmel taka an inbia chu a hmu leh hram a, Car chu a tiding ṭep nghe nghe. Thinrim inseh ruh ṭunin vung zet hian a tlan chhuak a, tunah chuan thinrima kal chilh hman a ni lo, Loicy-i tan Magazine leh Newspaper Company lam a hmuh vat a ngai zawk a ni.

Company a thlen rualin thlalatute chuan a thla an lo la sap sap hlawm a, a ning ve tawh bawk nen Camera ṭhenkhat phei chu a vawm chhiatsak nghe nghe. CEO te chu hmu nghalin a chanchin leh a hmeichhe kawp thar chanchin tarlang tawh lo turin a hrilh zui mawlh mawlh a, a vau a ni mah zawk.

"Tun hnaiah ka beisei loh takin ka bialnu nen kan thang chiam mai a, chu chu kei ai mahin ka bialnu tan a ṭha lo a ni. Dawt thu phuah chawpa kan chanchin theh darh tawh lo turin ka ngen che u ni rawh se, a tilui in la awm cheu a nih chuan tlak chhiat in inhuamah ka ngai ang" tiin Manuel-a chu Live Studio aṭang chuan a kal chhuak nghal a, CEO berin mi dang hriata sawi mai tura a tih vanga chuti anga sawi pawh chu a ni.

"Ka ring che a nia, ka rin ang i nih leh si loh chuan a pawi dawn tih i hriat ka ring" Manuel-a chuan CEO chu a chhuk melh run a, a mi biak pa chuan a lo tlawn nasa khawp mai.

School lamah Manuel-a chu a tlan kir leh nghal thuai a, a mood a fuh lo laklawh bawk nen Thomas Muller-a leh Loicy-i a hmu dun leh a nih ngat chuan a insum zo tawh hauh lo vang le. School a va thlen chuan Loicy-i chu a zawng nghal a, Thomas Muller-a nen an awm dun tawh lo hlauh e, a rilru pawh a nuam ta huai mai.

Eng nge a chhan em em pawh a hre bik lo, Loicy-i chu mipa dangin hnaih lo se a duh a ni tawp. A hmuh tirh ang em emin Loicy-i vang chuan a rilru a buai tawh hran lo va, mahse a thluak chhungah chuan a la awm reng tho, a hmeichhia ni tawha a hriat avangin a hahdam deuh tawh a ni ber.

Office-ah lutin Paper endik tur te chu a endik mawlh mawlh a, buaina chi hrang hrang kara rilru nuam taka hna a thawh leh vawi khatna a ni ngei ang. Loicy-i hmel suangtuah chungin a khi leh suk suk ṭhin a, a nui tam ta viau te chu amah a ang lo lek lek zawk a ni.

News Paper leh Magazine Company lam ni se a chingfel titih tawh a, tunah chuan Loicy-i nen hun hman dun chiah hma chhawp a nei ta, mahse Loicy-i chuan a lo duh ve kher ang em tih erawh a rilru tibuaitu pakhat a la ni thung.

A beng hriatah ngei a ngenna tihlawhtlingin a ngainat ve thu a hrilh a, a huat em em thu a sawi bawk a, zing lamah khati ang khan an thu inkalh leh mah se eng thu dang mah a awih duh tawh lo. A ṭah laia a rilru dik tak a sawi chauh chu a pawm a, a awih a, awih reng pawh a duh nghe nghe.

Tin, vanneih thlak takin a hmeichhe kawp hlui ni ta Rosy-i chuan a rawn ngaihven zui lo va, ngaihven zui pawh ni se awmzia a awm tawh lo. Ani kha chu Sex-a a tui halna hrik thlak nân a hmang ṭhin a ni ber a, a ngainat em em pawh a hre hran lo.

"Thu dik tak min han hrilh teh Loicy, Thomas-a tan pawh rilru put dan thiam a har tawh ngawt ang. Professor Manuel-a hi i ngaina em?" School Campus chhuahsana an kal laiin Jessica-i chuan a ti deuh tawl a, Loicy-i chuan a chhang peih lo kher mai.

"Nang chauh ka hrilh ang che Jessica, Professor Manuel-a hi ka ngaina ngei a, mahse ka ngainat avangin ka hnaih dawn tihna a ni lo. Professor Manuel-a nen hian tun hnaia inhmu mai kan ni lo, a hma paw'n Taxi-ah kan chuang dun tawh" a thu sawi chuan a ṭhiannu chu ṭhawng tak a ni.

"Enga!? Professor Manuel-a nen hian Taxi-ah in chuang dun tawh maw!? Ni lo, eng thu maw i sawi kha!? I ngainat thu i sawi chiang a ni Loicy, engtin nge Thomas-a hi awm se i tih reng reng? A ngaina chein a hmangaih ve tak zet che asin, ka bulah pawh a sawi ṭhin" a ṭhiannu'n a rawn tih chuan a thaw deuh hak a, Thomas-a chu khawngaih lo bik pawh a ni lo.

"Dik tak chuan Thomas-a hi chu ṭhian ang bakin ka en thei lo Jessica, amah ka khawngaih avangin kawppui tur anga en te chu ka tum ve tho alawm, mahse beiseina lo thlawn siamsak ai chuan ka hrilh tlang pawp ang"

"Kei zawng Thomas-a chu ka khawngaih lawk hle mai, engtin tak i thu sawi tur hi dawngsawng ang maw!? A ṭha tho mai, rei tak rial lova i rilru dik tak hrilh tawp kha a fuh zawk a ni. Professor Manuel-a nen hian in inkawp dawn tihna a ni mai em?"

"Ka ngaina ka tih avang khan kan inkawp nghal dawn tihna a ni hleinem Jessica, kei chuan ka zirna hi ka ngai pawimawh ber. Kan ram tan khawvel huapa intihsiaknaah pakhatna niin ka la hlawhtling ang a, chumi zawhah te chuan ngaihzawng neih pawh ka awlsam ve tawh mahna"

"Professor Manuel-a hi chuan a ngaina che tih chiang takin kan hre fur hlawm a, a ngaihvenzia che lah kan hmuh hmaih bawk si lo. Ti daih ila a hmui fawh kha a nuam em? Sexiest Man Alive atana an thlan ngat mipa fawh chu a nuam em?" Jessica-i chuan a rawn ti ta daih mai, chhan pawh chhang duh lovin

"Kal thuai thuai ang, ka Apartment-ah lo peng kawi ang che, thil kan ei dawn nia" a ti zung zung a, a awm dan hrethiam zetin Jessica-i chuan a nuih tet tet ringawt.

Taxi-a an chuan hnu chuan thil chi hrang hrang sawiin an titi barh barh a, Taxi Driver la upat hmel lutuk lo chuan ṭawng nuam tawkin a lo zawm ve zeuh zeuh bawk. Apartment awmna buidling kawt an thlen chuan Taxi Fare te pein an chhuk a, Building kawta thlalatute an awm ta miah lo chu a lawm ru kher mai, a room kawngka a hawng tur chu a sak ta ṭalh mai le!

Chahbi a dik lo emaw tiin a check a, hawn leh a tum pawh chuan a hawng thei ta chuang lo. In hnuai lamah chhukin Reception-a Duty pakhat chu a zawt fiah a, a thu hriat chuan a va han ṭhawng tak em. Loicy-i chu a awmna Apartment neituin boruak leng vel avangin chhuak turin a lo ti hi a ni a, a rilru a buai leh ta vek mai.

"A pawi lo ka ṭhian, ka Apartment-ah pawh i awm thei reng alawm" Receptionist hriat tur kherin Jessica-i chuan a tih khum hlak a, Loicy-i chuan hrehawm a ti thar hle bawk.

Jessica-i Apartment lam an pan lai chuan a ngawi kar a, Professor Manuel-a nena an lo inhnimhnai ta reng reng pawh chu a inchhir leh ta ngawih ngawih. A hma kha chuan North America huam chhunga Sexiest Man Alive a ni tih reng a hre lo va, miin an hriat êm avangin Internet lamah a en nghe nghe a, tunah chuan engkim chuan nghawng a nei thui ta hle a ni.

Jessica-i Apartment an thlen chuan a lo inthlep fel mawi hlawm hle a, a vawi khat kalna ni lo mah se hmuh nuam tak a ni. A rilruah erawh thil dang a lut thei lo, a Apartment awmna neitu chu mak a ti ngawih ngawih a ni. A dinhmun te chu hriatthiampui se a ti a, a duh vanga lar a ni lo a ni tih te chu hria se a duh a, mahse a hriatthiampui loh hmel bawk si.

"Tu nge maw ni le?"Jessica-i chuan a ti nghut a, pawn lam aṭanga kawngka inchum ri dawt dawt chu an ṭhian dunin an ngai thla kar a, Loicy-i phei chuan hawn sak pawh a tum lo hrim hrim.

"Tu nge âw?" kawngka hawng mai lovin Jessica-i chuan a ti hmasa leh tê tê a, chuti ang zan rei tawhah inleng a nei ngai lo tlat a, hawn ringawt chu thil dik ber pawh a ni chiah lo a ni.

"Lo hawng rang rawh" pawn lama mipa ṭawng thum bul chu tu aw nge a nih Loicy-i chuan a lo hai lo nasa hle mai, a ṭhutna khum aṭang chuan a chhuk thla vat bawk.

"Jessica Wang, kawngka hi i hawng lo a nih chuan First Year Exam nei lovin ka siam duh ngei ang che" pawn lama miin a rawn ti leh chuan Jessica-i pawh a meng buai ta nak mai le, tu nge tih lah chu a hre ve der si lo.

"Professor!" kawngka a hawn ruala a mi hmuh avangin Jessica-i chuan a ti chhuak hluai a, Professor Manuel-a daih daih a hmu chu mak a ti hle a ni.

"Lo kal rawh le, awmna tur i nei lo a nih chuan min rawn be mai ta che" tiin Manuel-a chuan Loicy-i ban chu a chelh chat a, kawngka lam panpui a tum chuan a lo duh lo nasa ngei mai.

"Hetah hian ka riak dawn, kei min buaipui lo hian i in lamah haw zawk rawh Professor" a kut pawh chhuah tum pahin Loicy-i chuan a ti a, mahse a pawt chhuak lo chiang hle.

"Ka inah i riak ang Loicy, i duh lo a nih chuan tih luihna hman pawh ka hreh lo a nia, nge hetah hian ka riak ve dawn zawk em ni?" Manuel-a chu thinrim takin a melh a, a enga mah hmaa a thu hnuaia dah nghal a tum ringawt chu a duh lo a ni.

"I zak lo hle mai Professor Manuel, he lai hi i in pawh a ni lo va, thu neihna engmah i nei lo. Ka kut hi thlah la, haw thuai zawk rawh" a tih chuan Manuel-a chu Jessica-a lama hawiin

"A bungrua vel lo khung sak rawh, ani hi chuan a khung duh dawn lo tih ka hria" a ti nghet charh a, Jessica-i lah chu a sawi ang chuan a la che chhuak zui, chu chu Loicy-i ve thung chuan a duh lo a ni.

"He room aṭang hian ka pawm chhuak dawn che nge ṭha takin min zui dawn Loicy? I kut hi ka thlah ang a, ka duh loh zawngin che miah suh ang che" ti leh a kut thlah chu a rual a, Loicy-i chuan sawi tur reng a hre lo.

THE ONE WHOM MY SOUL LOVES (M&B)

By

Havali Adam

Chapter 8

Loicy-i chuan a ṭhiannu che malh malh chu a thlir tlawk tlawk a, leh lam kawng zawng tak chuan Professor Manuel-a zui chu a fuhna chen a awm tho. Jessica-i Apartment-ah chuan cheng ve ta se Reporter leh thlalatute lamin an chimbuai leh ang tih a hlau a, amah avangin a ṭhiannu chu buai ve lo se a duh a ni.

Khumah chuan a ṭhu hnawk a, a dinhmun lai zet chuan rilru siam dan tur a tihre lo a ni. Professor Manuel-a chu zui ringawt dawn se hmeichhe nep tak leh a duh dûha a tihkawi theih hmeichhia anga a hmuh a hlau ve leh tingtang bawk si, a tih ngaihna hre lo chu a thaw leh halh ṭhin ringawt.

"Kal mai rawh Loicy, in pahnih tan pawh a ṭha zawk ang" a ṭhiannu lam chu a hawi a, Professor Manuel-a kuta a thawmhnaw bawm a pe lai te chu a en kar a, zui mai chu ṭhain a hre ve ta, chuti lo zawng buaina a awm leh palh zawk mai ang.

Motor-a an chuan lai chuan Apartment dang awmna zawn tumin rilru a seng nghal a, Professor Manuel-a bula awm reng chu a tum lo a ni. Kum a tawp hnai tawh tho bawk nen an ram lama haw chu a ngaihtuah kai a, a chhungte tak paw'n an hmu châk ve tawh viau a ring a ni. Professor Manuel-a lam chu a hawi zeuh a, ani chuan hma lam chiah a lo en a, tlaia a thil hmuh avangin a lakah chuan a lungawi lo ru ve ringawt bawk.

Sawi chhuak kher lo mah se Professor Manuel-a chu hmelṭha a ti a, a hmel pa hrak te chu hmuh nuam a ti a, a ngaina em em tawh zawk, mahse a hlauhthawnna chu a paih bo thei bik si lo. A laka a lungawi loh ve ringawt chhan te chu ho a ti hle a, miss Lily-i'n hre phei se chu a lawm lo ngawt ang.

"Kan thleng e" tiin Manuel-a chu Car aṭang chuan a chhuak a, Loicy-i ṭhutna lamah kal kualin kawngka a hawn sak thlap a, Seat hnung lama a bungrua chu a la chhuak zui nghal bawk.

"Keimahin ka kal thei" a kuta kaih a tum laiin Loicy-i chuan a lo ti hmak reuh a, thinrim mai lovin ama in lam pana Loicy-i kal hnek hnek reuh te chu lawmawm a ti ru ta viau zawk.

"Khum pakhat chiah a awm a, chutah chuan kan mu dun ang" in chhunga an luh rualin Manuel-a chuan a ti mai a, Loicy-i erawh a lo meng phar nasa hle.

"A teuh lo mai, nang nen hian khum khata mut ka duh reng reng lo. Naktukah Apartment awmna tur ka zawng nghal ang, zanina ka lo zui chhan che pawh hi buaina dang ka duh loh vang a ni" a hmaa hmeichhe lian lo tak chu a en reng a, a hmui che vel chu a fawp châk tak zet a ni.

"Thu awmze nei lo sawi suh Loicy, zanin aṭang chuan ka bulah hian i awm char char tawh ang. Khum pakhat chauh ka neih avangin kan mu dun ang, ka insum thei te a nih chuan Sex kan hmang lo vang" nui sukin Manuel-a chuan a ti a, Loicy-i chuan ben a châk kher mai.

"Nang nena khum khata awm dun ka duh hauh lo, tihpalh thil thua kan lo awm dun tawh erawh a pawi ka ti a, min zuam phah nân hmang miah suh Professor Manuel"

"Ka taksa sia mut kha nuam chu i ti viau alawm Loicy, i thla a muang hliah hliah tih ka hre thei bawk. Mut dun ka sawi avang khan Sex chiah ka sawi lo, i bulah lo chuan ka mu dawn lo tih hre bawk ang che" tiin Manuel-a chu a kiai suk a, chutah amah vek chuan

"Khumah kan tisa châkna inhrikthlak sak tawn ngat phei ila chu duhthusam a ni Loicy, ka sawngbawl dan che nuam tih lutuk avangin nang paw'n i zawngchhang ngei ka ring" a rawn ti leh nghal zat a, hnuaichhiah taka a ṭawngkhum reng chu Loicy-i chuan a ngaithei ta lo.

"Mi chapo tak i lo ni chiang e Professor Manuel Firth, kan Professor niin Most Expert Pianist pawh ni mah la ka ngaisang tawh hauh lo che" ti hmarh hmarhin a hmaiah chuan a beng ri sawk a, Manuel-a pawh a meng buai nak ta.

"A vawi hnihna maw Loicy, a vawi thumna chu a thleng tawh lo vang" tiin a kut chu nghet takin rawn a hmer a, Loicy-i tan chuan a hmerna chu a na lam lek lek a ni.

"Min cho taka min biak te hian ka phur zual sauh asin Loicy, tunah chuan ka insum theihna i tichhiaah in ngai tawp rawh" tiin Manuel-a chuan a pu ta nawlh a, in chung lamah chhoh puiin khumah a nghat a, a rawn chet hmaa bawh betin a fawp zui nghal bawrh bawrh bawk.

Dimna nei miah lovin a kawr chu a pawh thler sak hmiah hmiah a, Manuel-a chu a insum thei tawh ngang lo a ni. Loicy-i âwm bawr duhawm lutuk a hmu chiah chu a mipatna a tho nghal ṭuah ṭuah a, kaih thawh chawp a ngai lo hrim hrim zawk a ni. Loicy-i hnute no leh duhawm tak chu rilṭam lutuk ang maiin a hap bawrh bawrh a, a ban lo che tur chu a chelh bet tlat bawk a, tal chhuah tum mah se a taksa pum a delh beh tlat tawh avangin awmzia a awm tam lo hle.

Loicy-i âwm bawr ringawt pawh chuan a tisa châkna zawng zawng a phuhru thei mai dawnin a hria, mahse a tum ram chu kal thlen loh reng a tum lo. A pum vel chu a fawh thlak zawm leh zat a, chhuk thla zelin a kap chung deuh hlekah chuan a tawp chat a, ṭang buai tawh lova Loicy-i thaw hlawi hlawi hmel chuan a lung a tiawi kher mai.

Loicy-i chuan rilru fim reng a pu thei tawh bik lo, chuti ang em ema mipa khawihna dawnsawn nuam chu a la tawng ngai lo a ni. A tira duh lova tal chhuah tum kha tha reng a neih tawh loh avang leh nawmna mak danglam tak a tawn avangin a awm hle hle a, a thaw te chu a chham mai dawnin a hre bawk.

Professor Manuel-a ban a chelhna te chu a tawlh tial tial a, a tih theih awm chhun chu Bedsheet hmer ṭawng ṭawng a ni mai. A taksaa thu neihna nei mek tu mipa lah chuan a âwm chu a hrawm nawk nawk pah reng a, Loicy-i chu a mumal tawh lo tak zet a ni.

"Loicy!" mak tih lutuk avangin Manuel-a chuan a ti a, a hmaa zawna mu zangthal hmeichhia chuan na tih hmel zetin a mit a chhing tlat thung a, a khup chu a tawm chial bawk.

"Loicy Wilson, min hrilh hmasa tur i ni asin" a laka dik lo taka chetu zawkin demna awkâa a bia chu Loicy-i chuan a la na kher mai, tunah chuan Manuel-a lakah hmeichhe hmuhsitawm tak a ni ta.

"Min pawngsual a ni Professor" a ti thawp sep a, Professor Manuel-a hmuh laia a ṭap ringawt te chu inchhir mah se a insum thei tawh lo, a chunga thil thleng mek chu ngaihtuahin a ṭah a chhuak tak zet a ni.

"Ka..eng lo" tih thu bak Manuel-a chuan sawi tur pawh a hre lo, a hmeichhe ngainat em em leh a taa siam a duh em em chu a tum pawh ni miah lovin a thianghlimna a hawn sak chu a ni si a, Loicy-i ṭap khur beuh beuh hmel chuan a rilru a tina ve chiang a ni.

"Loicy" ti deuh supin a taksa chhung aṭang chuan zawimuangin a chhuak zul zul a, a mipatnaa thisen lo kai nuai chuan lehlam kawng zawng takin a tilawm leh tlat tawh.

"Loicy" ti lehin a sirah chuan a mu thla zui nghal a, a lama pawt hnaiin a kuah chial a, chutah Loicy-i chu a rawn ṭap ri chhuak ta, Manuel-a rilruah erawh pawi tihna leh lawm ruk riauna a inawm pawlh ta nawk nawk a ni ber.

Ngawi rengin Loicy-i chu a kuah hle hle a, tal chhuah a tum paw'n a kuah nghet sauh a, a tawpah phei chuan a ṭap muhil leh ta nge nge. A beisei lo a ni; Loicy-i chu hmeichhe thianghlim a nih reng a beisei lo a ni. Ani ang kum rualpui te chu hmeichhe thianghlim an awm tawh mang lo zawk, chutih laia Loicy-i ber a lo la thianghlim tlat chu mak a tiin a lawm hnuhnawh a ni.

Kum kha leh chen kha a lo hmang ral ve tawh a, hmeichhia a zat hre lo khawpin a kawp ve tawh a, Loicy-i aia kum naupang zawk pawh thianghlim tawh lo an tam mai. Loicy-i erawh a lo la thianghlim tlat a, amah ngeiin a thianghlimna chu a hawng bawk a, tunah chuan pawi tihna aiin lungawinain a rilru a luah hnem zawk a ni.

A hmai zawna eng lo lut chuan Loicy-i chu a tiharh a, a men ruala amah kuah bet runtu hmel a hmu chiah chu zan lama thil thleng a hre chhuak nghal zut zut a, che thutin Professor Manuel-a kuahna aṭang chuan a tal chhuak sawk sawk bawk. Chhuata a ding chiah chu ruak deuh thawin a awm a, a thawmhnawte chu hak tlak reng a ni tawh lo.

A awm dan avangin Professor Manuel-a pawh chu a lo harh a, a lam a rawn hawi rualin a kut chuan a inhup vat a, a kawr ṭet deuh nuai chu chhar vatin a inkhuh leh ringawt bawk. Professor Manuel-a lah chuan hmun dang hawi lek lovin a thlir leh ta nghal a, a tan chuan zam chhiat lohna chi reng a ni lo.

"Loicy" ti supin khuma aṭang Manuel-a chu a tho ṭuah ṭuah a, a hmaa hmeichhe ding vun nalhzia chu sawi chhuah phawng mai a duh rum rum hial a ni.

"Vawiinah kan ramah ka haw ang, i hmel hmuh ringawt pawh hi ka duh tawh lo. Khawngaihin room aṭang hian chhuak rih rawh Professor, inthlak ka duh a ni" thunun tum viau mah se Loicy-i chuan a aw chu a thunun thei lo, tunah chuan Master Class pawh neih a duh tawh lo hrim hrim bawk.

"Enteh Loicy, ka phalna tel lo chuan in ramah i haw dawn lo tih hre rawh. Classical Pianist ropui tak nih i duh tih ka hria, i nih duh chu kei hian ka tihhlawhtlinsak ngei bawk ang che" Manuel-a'n a tih laklawh lai chuan

"Ka lung tihawi nân leh ka rilru ka thlak theih nâna sawi mai chauh i ni Professor Manuel, nang hian min bum tawh lo vang. Nizan maiah ka thianghlimna i tichhia a, Police hnena ka report nghal lo che hi lawm hle tur i ni zawk asin" a lo tih zawm hmarh hmarh a, room aṭang chuan chhuak vat se inthlak thuai thuai a duh tawh a ni.

"Nizana ka chet danah kha chuan thupha ka chawi e Loicy, i thianghlim tawh lo emaw ka tih vang a ni. Chu bakah nasa takin ka tisa châkna i tichhuak a, ka tan chuan insum a har lutuk tlat; chutah hmeichhe dang ni lovin nangmah i la ni zui"

"Ka laka heti anga awm tur hian i eng nge ka nih? Ka tan eng nge i nih? Kei leh nang hian eng inzawmna mah kan nei lo Professor, kan lar dun chiam avang khan inzawmna kan neih phah lo" tiin a ṭap chhuak feih feih a, Manuel-a chu a awm hle hle thei ta lo.

"Loicy, ṭap tawh lo teh Loicy. I mit pawh a bui nasa viau a nia, School pawh i kal ngam lo mai ang. Ka tan hian hmeichhe hlu tak i ni Loicy, kei pawh i tan mipa hlu tak ka ni thuai ang" nghet takin Loicy-i chu a kuah a, a hmeichhe kuah erawh a lo la ṭap khur beuh beuh thung.

"Nang hian, nang hian min pawngsual a ni Professor. Ka ngaina che a, i bulah chuan ka nihna lo pui puiin ka awm bawk a, mahse chu chu tih lan ka duh ngai lo, a chhan chu ka ring zo lo che a ni. Tunah chuan ngainat che pawh ka duh tawh lo, ka rilru i tina tak zet a ni" Loicy-i thu sawi chuan a va deng kher em.

"Ni lo Loicy, min ngaina reng rawh, min ngaina reng turin ka duh che a ni. Tun aṭang chuan i duh lo chung Sex ka hmanpui leh tawh lo vang che, mahse nizan kha chuan min mamawh ve tak zet a nih kha Loicy" a awa inrintawk lohna awm chu Manuel-a chuan a awih lo hial zawk a ni.

"Tu hmeichhiain nge khati ang tawhna kha dawng se rilru mumal pu thei bika i rin reng reng? Nang hnaih che hi ka tan a ṭha lo Professor, chuti ang bawkin i tan pawh ka ṭha lo. Nang chuan bialnu ṭhen leh tawh mah la Miss Lily-i nei a, in hlim dun bawk ang" Loicy-i thu sawi tawp ber avangin Manuel-a chu a nui chhuak teuh hle.

"Ka bula hmeichhe dang an awm avanga lungawi lohna aw leh thikna aw ka hre tlatin ka hria Loicy, mahse chu chuan ka rilru a tihlim hle thung si" tiin a nui suk a, a ṭawng dan avang chuan Loicy-i chu tal chhuah a tum nghal phat bawk.

"Min thlah rawh Professor, ka inthlak chhung chu room-ah hian awm lo bawk ang che" Loicy-i chu a tal ve tak na a, amah kuahtu mipa chuan chhuah tir a tum bau lo.

"Awm ṭha hle hle teh Loicy, heti anga awm hi nuam ka tih ang chiahin i ti ve tih ka hre vek alawm, hmeichhe rilru hi chu hriat ka harsat lo khawp asin" a ṭawng dan aṭang hmeichhia a lo kawp hnem tawhzia chu a hriat vek a, chu chu Loicy-i chuan a thik a ni.

"I duh dûha i hmeichhe kawp mai mai theih ang chi hmeichhia kha ka ni ve lo, ka ni ngai lo bawk ang, a chhan chu nang leh kei hi inkawp tur kan ni lo tlat" a ti chang ve leh ta fak a, Manuel-a chu a lo nui mai mai thung.

"Ka hmeichhe tawn tawh zawng zawngah chuan i la danglam ber Loicy, chu chu ka ngainat zualna che a ni reng bawk a, a nih reng pawh ka ring. In hnuaiah ka zu chhuk ang e, lo inthlak la a ṭha ang" tiin a kuahna chu a ti thawl a, a lama Loicy hmel rawn inpho a hmu chiah chu a insum thei leh ta lo.

"Engati nge ka duh em em mai che le Loicy Wilson, i engkim hi ka ta a nih loh chuan tû ta mah a ni bik lo vang" ti leh fawh chu a rual nghal a, mahse rei erawh a fawp lo, a fawp rei a nih vaih chuan a tawpah a taksa chhungah a lut duh leh ngei dawn tih a chiang a ni.

Rum nghutin Loicy-i chu a nam hla deuh dawr a, melh pawh melh duh tawh lovin room aṭang chuan a chhuak ta vut. A melh leh a nih chuan a fawp leh ang a, kawr ha mumalin a awm lo bawk nen insum reng chu ani ang mipa hrisel ṭha leh insum thei lo ve tak tan chuan en liam mai mai a harsa tlat a ni. In hnuai a thlen chuan tui a in khawlh khawlh a, Loicy-i taksa no mam han chu a mitthlaah a rawn lang zut zut a, a thluak chhung aṭanga tih bo tumin a lu a thing vut vut ringawt.

Gas Stove lamah pheiin chhuar aṭang chuan Frying Pan chu a la chhuak a, chhuan pahin tel tam lutuk lo chu a leih nghal bawk. Artui pum hnih chu a la chhuak leh a, Loicy-i nena an ei tur Breakfast atan Omlete chu siam a tum a ni. Chutia a chet mawlh mawlh lai chuan Loicy-i chu in chung aṭang a lo chhuk a, Manuel-a pawh chuan a lam hawi lo mah se a lo hre ru kar tho.

"Breakfast ka peih e" tih leh a ei tur siam chu dawhkana hun a rual nghal a, Loicy-i chuan mak a lo ti hle thung a, ani erawh a lo nui deuh suk ringawt.

"Ei rawng i bawl thiam maw!?" mak ti zet hian Loicy-i chu a ṭawng chhuak ta nge nge a, Professor Manuel-a chuan ei rawng bawl a thiam reng a ring lo a ni.

"Han ei phawt la ka thiam leh thiam loh chu a hriat chauh ang, tui i ti lo a nih erawh chuan ei rawng bawl ka thiam lo ni rawh se" tiin Manuel-a chuan a lo chhang mai a, a hma zawna ei tur chu a ei zui nghal mial mial bawk.

"Eng nge a an?" Professor Manuel-a'n a rawn tih chuan Loicy-i chu a lo meng â leh deuh hû a, chuti anga pangngai chuan an la inbe ngai miau lo hek!

"A tui loh hranpa loh hi!" a chhan dang avangin Professor Manuel-a chu a nui chhuak ta hawk hawk a, chu pawh Loicy-i tan chuan thil mak bawk a ni leh ta.

"I nuih chhan ka hre miah lo Professor, sawi sual pawh ka nei lovin ka hria" Loicy-i'n a tih chuan Manuel-a chu a nui tawp riai riai a, a mak a ni; Loicy-i bulah chuan a danglam tlat.

"Nang tê hian min tihlim hle a ni Loicy, ka chhungte chuan ka awm dan hi hmu se chu an awih kher pawh ka ring lo" ti pahin a khi leh suk a, a nuih a za em em pawh a ni tawh lo, mahse Loicy-i bula nuih chu nuam a ti a ni.

"Chhungte i sawi tâkah chuan kan ramah ka haw dawn, chuan ka lo let tawh lo bawk ang" Loicy-i chuan a ti ta hmak a, chu chuan an boruak chu a rawn tichhe leh ta vek.

"I haw dawn lo ka tih tawh khâ Loicy, i haw dawn a nih chuan ka remtihna a tel phawt a ngai. Thil kha ei la, School-ah kan kal rual dawn nia" tiin Manuel-a chuan a ei zawm leh mial mial a, thinrim paw'n a sawi hran lo.

"Piano Class kal ka tum reng reng lo, heti anga mit bui hian tûmah an kal duh bik lo vang. Ni lo, kei hian thil theihnghilh ka nei a ni. Dawr kha, ka thawhna dawr kha, zanin ka thawh hun a ni tak alawm, thil awm dan hi hrilhfiah vat ka ngai" Loicy-i chu hmanhmawh takin in chung lamah a chho leh a, chhuak turin a insiam nghal thuai thuai bawk.

"Khawiah chuan nge i kal dawn Loicy?" kawngka a hawng tur chu Professor Manuel-a chuan a lo chelh chat a, Loicy-i chuan hun lo a ti kher mai.

"Part time hna ka nei alawm, zanin hi ka thawh hun a ni bawk. Ka awmna hmunin a zir tawh loh avangin ka hman tawh dawn loh thu vawiina ka hrilh ngei a ngai, chuti lo chu min lo ring ang a, an buai phah vek ngei ang" a tih zo chiah tihah Manuel-a chuan

"Keima'n ka hruai ang che" a lo ti nghal a, pawn lamah kai chhuakin Car chhungah chuan a ṭhut luh tir a, Loicy-i chuan a chet dan vel chu a lo en kar ringawt.

A awm ṭhinna Apartment hlui bul an thlen chuan dawrah lut nghalin Loicy-i chuan pi Smith-i; a thawhna dawr neitu chu thil awm dan a hrilhfiah mawlh mawlh a, pi Smith-i pawh chuan a dinhmun chu a lo hrethiampui khawp. Thla bia hlawh la ṭhin ni mah se pi Smith-i chuan a thawh zat chhutin hlawh chu a lo pe nghal vek a, Loicy-i pawh a lawm kher mai.

Manuel-a ve thung chu Car chhungah ṭhuin a New York lama a ṭhianpa Mathew-a nen an lo inbia a, sumdawnna lam bawk a ni an sawi leh ni! Mathew-a chuan zin vat turin a duh a, Manuel-a lah chu a hmanhmawh lo nasa mai bawk si. Car chhunga Loicy-i a lo luh chuan phone chu a off daih a, a ṭhianpa ṭawng laklawh lai pawh a ngaihsak tawh lo.

"Naktukah New York-ah ka zin dawn" in lam pana an tlan laiin Manuel-a chuan a ti tawi sup a, Loicy-i chu a bialnu a nih ve tawh miau avanga hrilh a ni bawk.

"Ka hriat ṭul lo tak a ni e, chu ai chuan Apartment min zawn sak la ka duh, kan rama ka haw i duh loh chuan ka awmna tur Apartment min zawn hmuh sak rawh" tiin Loicy-i chuan a dai khalh ve ta kauh mai.

"I haw lohna tur a nih phawt chuan a ṭha tho e, mahse i Apartment-ah chuan ka lo chuangkai fô dawn a nih hmel" a lam hawi zeuhin Manuel-a chuan a rawn ti a, ani chuan a lo melh no lo hle.

"Kawngka ka kalh miau chuan i rawn lut thei tawp lo vang" tih leh pawn lam hawi chu a rual a, Professor Manuel-a nui ri hak thawm chu engtin emaw ni tak hian hriat nuam a ti tlat a nih chu!

Loicy-i chuan a awm dan leh nizan maia a thil tawn chu a ngaihtuah a, a hriatthiam loh ber chu Professor Manuel-a a haw rei thei miah lo chu a ni. A thianghlimna hawnga pawngsualtu a ni a, mahse chuti chung pawh chuan a haw hlei thei tlat lo. A duh lutuk thu leh hmel ṭha a tih lutuk thute chu sawi chhuah chiah pawh a ngai lo, Professor leh zirlai chu inkawp theiin a ruat lo tawp a ni.

Chu bakah ngaihzawng nei turin US-ah a kal lo va, Classical Pianist nih tumin a kal tih chu a intihpaukhauhna pakhat a ni a, mahse Professor Manuel-a bulah meuh zawng ngaihtuahna fim put a har a ni. A fawhna te chu a suangtuah let a, zep lovah chuan fawh nuam tak hmui a nei tih a hre chiang hle.

"Ni lo ni lo" ti sepin a lu chu a thing nawk nawk a, a suangtuahna âtthlak zet chu a bula ṭhu ngawi run chuan a rawn hre palh ang tih a hlau ta hle a, amah nena infawh nuam a tih thu a hria a nih vaih chuan a chhe vek a ni mai.

In an thlen hma chuan a pa hnen aṭang phone call a dawng a, a pa chuan haw a duh thu a lo sawi thawi zuai tawh chu a rawn zawt leh ngat a, mahse Loicy-i chuan Christmas dawna haw a tum thu a lo hrilh thung. A hma kha chuan rilru beidawn avangin haw nghal rum rum a duh a, a ngaihtuah chian hnuah erawh hlawhtling lova awm chu a duh leh ta lo a ni.

A haw dawn rih loh avangin Professor Manuel-a nen inkawp a duh chuang lo va, dik tak chuan ani chu a hlawhtlinna kawng daltuah a ngai ṭan tlat tawh a ni. An inhmu reng a nih chuan a zirlai a ngaihtuah ṭha thei lo ang a, hma a sawn chak thei lo ang a, mi sawi turin an lar leh hat hat ang tih a hlau tel bawk.

In chhung an luh rual deuh thawin Jessica-i hnen aṭang phone call a dawng leh a, School lama a hmel a hmuh loh chhante chu a rawn zawt luam a, ani erawh chuan a chhang ṭha duh lo. Nizana Professor Manuel-a nena an awm dun dan chu sawi chhuah leh chi ni pawhin a hre lo, a ṭhian kawm ngeih em em mah ni se a zep tlat a ngai a ni.

Manuel-a lah chuan Loicy-i phone be reng chu a lo hne ru khawp a, dik tak chuan a thik a ni. Hmeichhia a bia emaw mipa a bia emaw a tan chuan a ngai reng, Loicy-i biak hrim hrim chu a thik em em vek a ni. Loicy-i'n phone a hman zawh te chuan a lo thaw huai a, Loicy-i tê reuh chuan a va han thlak danglam chiang tak em.

"Professor!" a dara a chelh rualin Loicy-i chuan a rawn ti hluai a, Manuel-a erawh a meng buai vek tawh a, Loicy-i dar no tak lang zeuh chuan a tibuai vek a ni.

"Loicy, hmangaihna ka chenpui che phal lul teh, chuti lo zawng ka puak keh mai dawnin ka hria" tih leh fawh chu a rual nghal a, a tirah lo duh lo viau mah se Loicy-i chu a danglam tih hai rual a ni lo.

"Min pawngsual leh dawn em ni Professor?" khuma a nghah rualin Loicy-i chuan a rawn ti a, pawngsual anga a ngai tlat chu a duh lo, mahse han sawifiah vak dan a hre bawk si lo a ni.

"I rin phak baka nuamin ka siam dawn che a ni Loicy" tih bak a sawi tawh lo, a bak zawng chu chet ziain a lantir ta mawlh mawlh zawk a ni.

Professor Manuel-a thu sawi zawh chiah chu Loicy-i chuan a dikzia a hre chawpchilh nghal a, a hmeichhiatna na miah lova a siam thiam te chu amah tiphur zualtu a rawn ni chhunzawm zel a, zei taka mipa lei a taksaa vak kual vel chu tenna pakhat mah a nei tawh lo. Nawmna nasa lutuk a dawn mek avangin a ṭeh chhuah ṭhelh hial a, a kap kara bur ngar ngar Professor Manuel Firth-a ngei chu awihawm loh khawpin a mamawh tawh zawk a ni.

"Professor!" fiah mang lova ti chhuak halhin a sam buk kir nem deuh chhupah chuan a ṭham tawn tawn a, Loicy-i awm dan leh mamawh chu Manuel-a chuan a lo hre rang khawp mai.

"Loicy, Loicy Wilson, kei leh nang hian nawmna vawrtawp kan thleng ngei dawn e" tiin a mipatna hrawl ṭha tak chu zawimuangin Loicy-i taksa chhungah chuan a luh tir a, bul ṭan chauh mah se Loicy-i chu a lo ang hlawi hlawi thung.

Vawi leh khatah Manuel-a chu a che thut a, Loicy-i chu na tih avangin a lo maimitchhing vawng vawng bawk. A vawi hnihna mah ni se Loicy-i tan chuan a la na dawn tih pawh a hria, chuvang chuan chet pawh a chet chhunzawm duh lawk lo va, a taksa awm dan hrethiam taka cheta a theihnghilh theih tawh loh tur nawmna pek a duh zawk a ni.

A hmui leh a ir vel chu a châkna tichhuak leh turin a fawh chhawk pah reng a, Loicy-i paw'n dawnsawn nuam a ti leh ṭan tawh khawp. Manuel-a chu Loicy-i taksa awm dan ngaichang pahin zawimuang chuan a che ve zel bawk a, tunah chuan Loicy-i tan pawh na lutuk a nih a ring tawh bik lo.

"Loicy" ti supin a hmuiah chuan zun nei lutuk hian a fawp mawlh mawlh a, hnuai lam chu a hma aia rang deuh zawkin a chet tir mial mial bawk.

A dawngsawng ṭha tawh hle tih a hriat chinah phei chuan Manuel-a chuan muangchanna pakhat mah a nei tawh lo, an awmna khum insawi laih laih khawpa phurin a che a, Loicy-i pawh a inzep thei tawh bik lo a ni. Chuti ang renga thil nuam leh dangdai chu vawi khat mah a la tawng lo, Professor Manuel-a chauh lo chuan an pek theih a ring lo bawk. Nawmna chi tinreng nei ang maiin a thle kâwi a thle kawi a, awm ngaihna a hre tawh hlawl lo a ni.

"Pro..Professor" fiah mang lo leh sawi ṭha hlei thei lo chuan a ti ruai ruai a, chu veleh Manuel-a chuan kun hniamin a rawn fawp leh nghal ta chat.

"Ka hming lam rawh le Loicy, min mamawhna a nasat tawh lutuk avangin ka hming lam rawh, chu chuan min tiphur lehzual dawn a ni" thu pe aw taka Professor Manuel-a ṭawng ri chu hriain Loicy-i chuan

"Manuel..Manuel" a ti deuh mawlh mawlh a, chutah Manuel-a chuan a ṭawng laklawh chu nghak thei lovin a rawn fawp nghal bawrh bawrh a, ani paw'n thei leh thei lovin a lo chhang let ve a, a mur chhuak vek tawh ni berin a hria.

Duhthusam phak baka nuamin hmangaihna chu an chen dun a, an hmang zo chiah chu chau dun tak an ni. Ni lo, Loicy-i a chauh em em laiin Manuel-a erawh hmangaihna lipuia lut dawn chauh ang maiin a phur leh nghal em em a, mahse Loicy-i awm dan a hriat chian em avangin a insum rih mai chauh zawk a ni.

Thil dang dai tak chu Manuel-a chuan Loicy-i taksa chhungah chuan fa hial siam theihna a tichhuak tlat mai, a tum pawh a ni lo. Mak tak maiin hmeichhe dang a mutpui laia a harhfim angin a harhfim hauh lo va, engmah chu a thunun hman bik lo a ni.

A bula ruak veka muhil thaw ri sêk sek Loicy-i hmel chu lungawi takin a thlir dauh dauh a, kum khat em pawh la inhre lo mah se a thinlung leh tih tak zetin a duh tawh tih chu a hre chiang a ni. A biangah leh a hmuiah chuan a fawp leh zeuh a, zan la ni miah lo mah se an muthilh ngei chu a ngai ang, chuti lo chu chauh lutuk avangin Loicy-i'n Dinner a ei thei lo a ni mai.

THE ONE WHOM SY SOUL LOVES (M&B)

By

Havali Adam

Chapter 9

Phone ri ral ral chuan an muhil lai chu a tiharh ve ve a, Manuel-a phone zawk a ri a, mahse thawha pick up emaw a tum lo hrim hrim. Tukverh lam a hawi chuan khua a lo thim dim diam tawh a, mahse dar eng zat chiah nge a nih a hre lo thung. Loicy-i pawh Manuel-a âwma beiin a mu meng kar a, a ngaihtuahna chu a kal thui hle bawk.

Professor Manuel Firth-a chu a duhin a vei em em ngei alawm, mahse a rilru kil khatah chuan a hlauhthawnna a la awm tlat a, chu tak chu a rilru tibuaitu a ni bawk. Lo inkawp ta tak tak se ani ang hmeichhe mi lutuk chuan a kalsan leh mai ang tih te a hlau a, a thinlung zawng zawnga a duh tawh avangin nat a zuam lo a ni.

"In hnuai lamah kan chhuk dawn em ni ang? Dinner kan la ei miah lo a nia Loicy, chhunah khan engmah i ei bawk si lo, i ril a ṭam tawh ka ring" duat aw taka Professor Manuel-a biakna chu a hre reng a, mahse a lam a hawi chho duh rih lo.

"Loicy" ti hniam leh ruihin a khabeah a rawn chawi a, a mitmeng pawl fiah ral chu chiang takin a en a, a mumang thlenga a lo hmuh fô ṭhin Professor Manuel-a hmel a hmu leh chiah chu a hmangaih ni maiin a hre tawh a ni.

"Ka rilru hi ka hrethiam tawh bik lo, ka la hlauthawng tlat a ni Professor. Nang chu hmeichhe mi tak leh hmeichhiate duh rawn i ni a, nakin lawkah ngaihzawng pawh i nei leh thei mai ang. Keini pahnih hian heti hian inhriat rengnaah ngai ila, inkawp loh hi a ṭha berin ka hria" a ti sep sep a, Manuel-a pawh a thutak hmel ta hle.

"Inhriat reng nân mai chauh chuan nang hi ka phal lo che Loicy, ka nunah ka phalna la hmasa lovin i rawn lut a, ka phalna tel lo chuan i chhuak leh tawh lo bawk ang. I ṭap hmel ka hmuh khan ka ngaihtuahnaah i awm ngut ngut asin, chuti ang khawp chuan ka vei che a ni" dam raih leh hriat nuam tak chuan a ti a, Loicy-i chu a kuah nghet sauh bawk.

"Kei paw'n ka mumangah hial ka hmu ṭhin che a, ka duh che tih chu ka pha lo Professor, mahse hlauhthawnna ka la nei tlat si chu a nih hi! Mite'n hmeichhe vawt tia an sawikhum fô ṭhin hian duh phakah ka ngai lo che a, lo inkawp ta pawh ni ila ka nat mai mai ka hlau a ni" Loicy-i thu sawi chuan Manuel-a chu a tiṭang ṭeu nghal.

"Tu phiangsenin nge hmeichhe vawt lo ti che Loicy, mi â lailet der a nih dawn chu! Kha zirlai naupang Thomas Muller-a kha em ni? Kha pa kha hnaih tawh suh, kei hian ka thik lutuk tak zet" a ti chhuak ta hial a, a vawi khatna atan a thik thu chu a sawi chhuak ve ta.

"Nang chuan bialnu i ṭhen zo chiah a, miss Lily-i nen room khatah in awm dun leh a, ka chunga i chet ang chiah hian i che lo vang tih tu nge sawi thei?" Loicy-i pawh chuan an Miss Lily-i chu a thik ve tak zet a ni.

"Loicy le! I thik thu awkâ hi ka thu hriat tawhah chuan hriat a la nuam ber hial awm e. Lily-i kha ka ṭhian mai chauh a ni a, i laka ka rilru put hmang ka hriatthiam loh lai pawha min hrilhfiahtu a nih kha" nui deuh suka a tih chuan

"Ka awih lo, room khatah pawh in lut dun" a lo ti tlat reuh a, Loicy-i chuan hmeichhe dang a thik ve zia chu thup a tum buai duh tawh lo, a rilru zawng zawng chu Professor Manuel-a hnenah a awm vek tawh a ni.

"Ngaithla teh Loicy duhawmtê, Lily-i te kha chuan pasal ṭha tak a nei tawh alawm, chuti chung chuan kan inkawp thei dawn em ni? Thei hauh lo vang, a chhan chu kei chuan nang chauh hi ka hmeichhia atan ka thlang che a, ka nemnghet tawh bawk" a ti nghet charh charh a, Loicy-i ve thung chuan Lily-i pasal neih tawh thu chu mak a lo ti em em thung.

"I mak ti hmel duhawmzia hi i hre lo a ni Loicy" ti thum dam dapin a hmuiah Manuel-a chuan a rawn fawp leh a, a chhan let dawn lai taka a inla hrang daih chu a run kher mai.

"Ka fiamthu a nih khâ Loicy" amah hnung chhawn zawnga mu tlat hmeichhe vun nalh tak chu Manuel-a chuan a kuai her riai riai a, duhthaw takin a fawp leh nghal buan buan bawk.

"Ka chau a nia Professor" thaw hlawi hlawi chungin Loicy-i chuan a ti chhuak thei hram a, a âwm bawra chet la mial mialtu Professor Manuel-a chuan a tidanglam leh vek tawh tih a aw aṭang paw'n a hriat ngawih ngawih.

"Hrep tak hian, insum theih ka zir a ngai a ni" ti hawkin Manuel-a chu khum aṭang chuan a chhuk thla vut a, a hmai chu rilru fim pu tawh lo tih hai theih loh khawpin a tuai tuai puat a, Loicy-i chu hmangaihna chenpui leh a châk tak zet a ni.

"Professor" Loicy-i chuan a ti sep a, a lam hawia Professor Manuel-a a rawn inher chiah chu hawi sawn rang tak a ni; a taksa chhungah hial lutin nawmna pe tawh mah se a mipatna chu chuti ang em em a nih a ring lo.

"Zak duh suh Loicy, hmangaihna chenpui leh che ka châk lutuk avangin ka thunun thei rih lo a nih hi!" tiin Manuel-a chu bathroom-ah a lut nghal a, a tih tur chu a hre chiang hle bawk.

Loicy-i chu a thawmhnaw chharin a lo inha ṭha sawk sawk a, Professor Manuel-a rawn chhuah hmaa lo inhak fel vek chu a duh a ni. Minute rei lotê hnuah Professor Manuel-a chu a rawn chhuak ngei a, chutah ruak ngal ngatin a la ni zui. Loicy-i chuan en pawh a lo en ṭha duh tawh lo va, a zak ve miah lo te chu mak a ti thlawt a ni.

Hnung chhawnin Manuel-a thawm chu a ngaichang ru kar a, room aṭang chuan chhuak ringawt dawn se ruak veka a lo la awm a hlau bawk si, a awm dan chu a lai tak zet a ni. Khuh deuh kharh kharh riah chuan hawi mai a tum a, a insum leh hman hram a ni.

"Ka inha fel tawh alawm Loicy, min zah takin awm ṭhin suh, lo hawi rawh le" nuihza aw lek leka Manuel-a'n a rawn tih chuan a hawi ve mai a, a sawi ang ngeia a lo inhak fel diam tawh avang chuan a lawm ru kher mai.

In hnuai lamah chhukin Manuel-a chuan ei tur a siam zui nghal mawlh mawlh a, Loicy-i ve thung chuan a hmaa mipa taksa lian zet che vel chu a lo thlir reng ringawt. Hmeichhia zawk mah ni se chet pawh a tum lo, Manuel-a che vel chu hmuhnawm a ti thlawt a ni. Khabe dawm meuhin a che vel chu chik takin a en reng a, chuti ang mipa nena an mu dun thei leh in khata an awm dun ringawt pawh chu insawi theihna tham hial a ni.

A tirah kha chuan tu chiah nge a nih a hre lo va, mahse News Paper-a an lar dun tâk êm avang khan a chanchin a chhui ve ta a, khata ṭang kha chuan lar lo thei pawh an ni lo tih a hrethiam ve chiah. North America khawmualpui chhunga mihring piang tawh zingah a zawna vawi thum Sexiest Man Alive-a thlan chhuah theih a ni a, mipuiin hre fûr mah se a awm hliah hliah a ni.

"I duh chuan pawn lamah pawh Dinner kan ei dun thei reng a nia, i thu thu a ni mai" amah hnung chhawn reng chunga a rawn tih chuan a awm dan chu a siam ṭha thuai a, hmu se chu a fiam phah ngei ngei ang.

"Ka duh lo ni mai rawh se, kan pahniha min hmu dun a nih lek phei chuan Boston khawpui hi kan luah khat leh palh ang tih ka hlau a ni" tiin a rilru dik tak chu a sawi chhuak a, Manuel-a chuan a rawn sawi zawm tawh chuang lem bik lo.

Dinner an ei dun laiin Loicy-i chuan zan hmasa lama a awmna a hriat dan te chu a zawt a, chu chu a thil hriat châk tak pakhat a ni reng bawk. Professor Manuel-a chuan Lily-i hnena Jessica awmna address a dil thuin a lo chhang mai a, a awm ṭhinna Apartment-a a lo awm tâk loh avanga a buai rukzia te chu a sawi kai nghal bawk a, a tawpah ngainatawm takin Loicy-i lamah a rawn kiai suk bawk.

Loicy-i pawh chuan a lo nui let ve var var a, Professor Manuel-a bula awm chu hahdam thlak a tiin nuam a ti tawh hle a ni. A thianghlimna a hawn sak hnu aṭang khan amahah Professor Manuel-a chu bet tlatin a hre tawh a, a thei dawn chuang lova a hriat avangin a ngaihtuahna aṭang paih chhuah a tum lo hrim hrim bawk.

Tin, mak tak maiin a taksa nghenga a mut tawh chuan a pa emaw tih chang a nei leh thut ṭhin a, Professor Manuel-a taksa lum nuam ngheng chiala mut chu nuam a ti tih chiang takin a hria a ni. A hmaa ei tur ei theihnghilh ṭhak khawpin hmangaihna an chen dun lai te chu a ngaihtuah chhuak a, a vawi hnihna atana a taksa chhunga a rawn luh tir kha chuan la na deuh mah se rei lotê hnuah a danglam vek a nih ber kha!

A thil ngaihtuah chu a hun lo tak zet a ni tih hre chhuakin a lu thing nang nang a, Professor Manuel-a lam a hawi chiah chu a lo en chiang kher mai. A sawi tur hre lo leh lai lutuk chu a nui ringawt a, mahse a va nui tawp chiang si em. Professor Manuel-a chuan chik lehzualin a lo en ran a, rei pawh melh duh lovin a hmaa ei tur inchhawp chu a ei hmawk hmawk ringawt.

"Thil dik lo a awm em?" a rawn tih chuan Loicy-i chu a che tawp hmak a, ṭawng chhuak chuang lovin a ngawi reng a, a rilrua awm ngut ngut chu sawi chi a ni ang em a hre lo a ni.

"Loicy, ka ngaituah viau che a nia" aw dam deuh zawka a rawn tih leh chuan thawk a la halh a, eng vanga sawi châk zek zek nge a nih pawh a hre tawh bik lo.

"Ka thianghlimna i tih chhiat zan kha ka lo ngaihtuah a, thil ding pawh ka ngaihtuah kual a, thil ṭha tak ka ngaihtuah pawh a ni lo" ti thawp sepin Chair inhûng chu a en daih a, Professor Manuel-a lam chu hawi loh law law a duh zawk a ni.

"Enteh Loicy, i chunga ka chet dan kha a mawi lo tih chu ka hria alawm, mahse i thianghlim tih reng ka hre lo a ni. Ka pawngsual lo che a, a hawngtu tur dik tak i thianghlimna kha ka hawng mai a ni. A tha em?" ti dam dap dapin Manuel-a chuan a darah a rawn chelh a, a bula a rawn phei lai reng a hre leh pek tawh lo.

"Ka rin ngamin i awm thei tak tak ang maw Professor?" a ti leh tawp a, Professor Manuel-a chu a duh ve tak zet tawh a, hlauhthawnna la nei mah se hmeichhe dang tan a phal bik lo a ni.

"I rin ngamin ka awm ngei ang Loicy, khawiah pawh awm la ka ta i nihzia miin an hre zel ang. Chuti ang bawkin kei pawh i mipa chauh ka ni ang a, ka nihzia nang leh mi dangin an hre zel bawk ang" thuk ril raiha a rawn tih chuan a vawi khatna Loicy-i chuan a fawp hmasa ve ta.

"Ka ring che Professor" ti sepin a nghawng bulah chuan a hmai a phum thla zui nghal a, tunah chuan Manuel-a paw'n lungngawina famkim a nei ta.

"Professor tih kha paihin ka hming pangngain min ko zawk rawh Loicy, nawmna vawrtawp ka pek lai chea ka hming i lam ang chiah khan" Manuel-a'n a rawn tih chuan zak ru takin a hnungah a ṭham vak a, a mipa ṭham lah chu na ti lo zetin a lo nuih mai mai thung.

A tukah chuan Manuel-a chu New York lamah Advertisement nei turin a kal ta ngei a, ṭum dang ang bawkin Loicy-i chauh chuan a rilru a luah leh vek tawh. A phone number te chu a nei reng a, mahse a call duh chuang lo. New York a thlen hunah law law biak chu a duh a, Loicy-i chuan amah ang chiahin ngaihtuah ve se a duh a ni.

Chawl miah lova darkar khat leh a chanve thlawhna chhunga hun a hman hnu chuan New York khawpui chhungah an ṭum a, Loicy-i biak nghal a tum lai takin a ṭhianpa Mathew a hnen aṭang phone call a rawn lut a, a la ve ta mai bawk. Mathew-a chuan amah lam tura a hnuaia thawkte a lo tirh thu a hrilh a, Manuel-a paw'n pawi a ti lo khawp.

A beisei aia rangin amah hruaitu tur motor chu a lo thleng hma a, Company lam pana an tlan lai te chuan ṭawng loh theih lovin a bula mi chuan a be chhen a, zep lovah chuan a ning ru hle a ni. Company an thleng chiah chu a ṭhianpa chuan a lo buaipui nghal sawk sawk a, ni khat chhunga tlak fel vek an duh avanga hmanhmawh an ni a, chu pawh Manuel-a duh dan a ni.

Shooting Room an thlen chuan Manuel-a chu Shooting nei turin a inthlak ve nghal mial mial a, chung laia hmeichhe awm ṭhenkhat chuan an thil tih lai pawh ngaihsak hlei thei lovin Manuel-a taksa mawi tak chu an thlir ṭhup a, Mathew-a chuan a zilh hlawm hlawm nghe nghe a, Manuel-a pawh a khi ve suk bawk.

"Aw ti khan awn deuh la, Claire-i kha hnim hnai deuh bawk la, mi mit a hip lehzual ang" tiin Photographer chuan a hrilh mawlh mawlh a, Manuel-a paw'n ti tura an hrilh ang chuan ti ve zelin a bula Model chu a hnim hnai deuh a, rin ai takin hun an hmang rei dawn lovin a hria.

A tawp ber atan Underwear chauh hain Manuel-a chu Photographerte hmaah chuan a ding a, hmeichhe pakhat chu insum zo tawh lovin a rak chhuak ṭhawt a, Manuel-a paw'n mak a ti kher mai. Chu hmeichhia chuan thla lakpui a duh thu a rawn sawi chhuak ta hial a, Manuel-a kuah chung chuan a ṭap chhuak tawp a, chuti ang em ema amah thlalak pui duh tu chu Manuel-a chuan a la tawng lo a ni.

Hawihhawm chhuahin a'n kuah ve mai bawk a, dik tak chuan a khawngaih lek lek zawk a ni. Underwear fakna tur atana Shooting an zawh chuan thawmhnaw pangngai a in bel nghal a, a inha fel chiah chu hmeichhe pakhat chauh ni lo chu lai hmuna hmeichhe awm te chuan lak pui an lo duh hi a ni a, a tih ngaihna hre lo chu a kiai suk ringawt.

"Kei chu in inkawp ta hi pawi pawh ka ti chuang lo, in inhmeh dawn phian bawkin ka hria, in chanchin hi thawnthu te pawh a ang reuh ê" Jessica-i chuan thil ei pahin a ti melh melh a, Loicy-i chu hlim ve tawh tak a ni.

"Ka lawm e ka ṭhian, mahse thawnthu chu a an kher ka ring lo a ni. Hma hun hi kan lo hre lo khawp mai, heti ang em em hian Professor Manuel-a hi ka duh ang tih rin ngaihna pawh ka nei lo" a ti ve ta sep sep a, a ṭhiannu leh zelin inhmeh a ti chu a rilru a nuam veng veng mai.

"Eng pawh ni se tluang taka in inkawp theih beisei ang, Thomas-a erawh a khawngaih thlakin a chan a chhe ta deuh thung a ni e" Jessica-i'n a rawn tih leh chuan a nui tawp riai riai a, dik tak chuan Thomas-a chu a khawngaih ve a ni.

Loicy-i rilru tur hrethiam takin Jessica-i chuan Thomas-a chanchin lam a sawi zui pui duh ta lo va, Loicy-i paw'n a sawi belh lo hrim hrim. School aṭanga an haw chuan Loicy-i chu Professor Manuel-a in lamah a haw a, a chhan pawh a rawn let leh hma chu lo awm rih tura a chah vang a ni. Ni khat pawh la tling lo mah se Manuel-a chu a ngai ru em em a, rawn haw leh thuai se a duh ngei mai.

Professor Manuel-a berin Manuel tia ko turin a ti tlat a, amah a ngaihtuah zawng ringawt paw'n a hming hmaa Professor tih lam tel loh chu a la harsat viau dawnin a hre bawk. In a thlen chuan room-ah lutin khumah a bawk zal a, Laptop chu phawrh lehin Music lam chu a en ta daih a, mahse a tum loh lutukin Manuel-a thlalak chu a hmu ta hlauh mai.

Thlalakah chuan Manuel-a chuan kawr rawng chi hrang hranga inpawlh a ha a, a bulah hmeichhe chhe lo tak a ding bawk. A tum pawh ni miah lovin Manuel-a leh hmeichhe pakhat thlalak chi hrang hrang chu a en zawm ta zel a, Underwear nen chauha thla an lak dunna phei chuan a deng dawt ni mai hian a hre nghe nghe.

A ennawn ngun pôh leh a rilru chu a na zual zel a, a hnuah phei chuan Laptop chu a off ta ringawt bawk. A nihna takah chuan a lo biak ve te a beisei ru em em a, mahse Manuel-a hnen aṭang phone a la dawng hauh lo thung. A buai a nih ringin amah leh amah te a inhnem chawp vel a, hmeichhe chhe lo tak pakhat nena an thlalak dunna chuan a rilru a tina a ni.

Khumah chuan muin rizai chuan a inkhuh a, a mit a chhin rualin Manuel-a leh hmeichhe pakhat ding dun chu a mitthlaah a rawn lang leh nghal a, Manuel-a dul phiar mawi tak khawihtu hmeichhia chu a thik ngawih ngawih a ni. A kal dawnah Manuel-a chuan sumdawnna thil vanga a zin dawn thute chu a hrilh ve ngei alawm, mahse a thlalak hmuh chu a tan chuan sumdawnna pawh a ang hlawl lo a ni.

A mit a chhin vang vang lai chuan a phone a rawn ri ral ral a, Manuel-a hnen aṭanga phone call lo lut a ni tih a hmuh rualin a hmet tawp nghal hmak a, tun atan chuan inbiak loh a duh rih tlat a ni. A hmeh tawp zel hnuah pawh phone chu a rawn ri zel a, a tawpah chuan lungawi lo ru zetin a pick up ve ta nge nge.

"Eng vanga ka phone call la duh lo nge i nih Loicy? I hmet tawp zel tih pawh ka hria, a chhan ṭha tak min hrilh loh chuan ka lungawi hauh lo vang" Manuel-a chuan a rawn ti deuh hmuk a, a mood a dik bik lo bawk nen Loicy-i chu a sa ve ta phat mai.

"Ka be peih lo che tih i hriatthiam mai ka lo ring asin, ka tihpalh a ni e. Sumdawnna thil chu nuam pawh i ti hmel khawp alawm, kei hian rin che aiin rin loh che ka duh ta rum rum a ni" a tih chuan

"Eng thil chiah nge i sawi tum Loicy? Hriatthiam theih turin sawi teh, vawiin nilengin ka rilruah i awm a, ka buai teh asin" a rawn ti ve leh nghal a, Manuel-a aw chu a nem hran lo hle bawk.

"I rilruah ka awm maw!? Ka tan chu zawng thil awih harsa tak a ni rih tlat, Model chhe lo tak nena hun hman dun chu nuam i ti khawp ang" tiin Loicy-i chu a ṭawng ve leh ta hmarh hmarh a, phone-ah ni lo se chu chuti anga a ṭawng ngam pawh a ring chiah lo.

"Thil hriatthiam loh i nei a ni Loicy, sumdawnna avanga hmeichhe dang thla lak pui mai chauh ka ni, hriatthiam tum ve zawk ta che" a rawn tih lai chuan

"A nih chuan sumdawnna avangin hmeichhe chi hrang hrang thla i lak pui zel dawn nia, thui tak kan kal hma hian kei chu ka lo inthiarfihlim zawk ang e" a lo tih khum ve salh a, Manuel-a nui thawm a hre daih chu a hamhaih lek lek a ni.

"Hmeichhe dang i thikzia ka hriat hian ka hlim phah ṭhin asin Loicy, zaninah ka lo thlawk haw ang a, Chicago-ah ka hruai ang che" ani a thin a rim ruk em em laiin Manuel-a chuan rawn ti duh lek chauh a, Chicago-a kal pui pawh chu a duh chiah lo.

"Ni lo ve Professor, zanin hian ka lo insawn chhuak dawn a nia, ka tibuai tawh lo law law zawk ang che" Loicy-i chuan a ti sep a, chuti ang chuan ṭawng chhuak mah se Apartment luah tur a la hre teuh lo.

"Loicy Wilson, nang chuan Professor tia min ko lo turin ka hrilh chiang viau tawh chein ka hria, ka in aṭang khan lo chhuak reng reng suh ang che, tunah hian ka lo thlawk haw nghal dawn" ti leh phone off chu a rual a, Loicy-i pawh a thaw halh ringawt.

"Hrep tak hian!" ti deuh hrawkin Manuel-a chuan dawhkan chu a chum ri ṭhuai a, a bula a ṭhianpa rawn ding nghal chu a lo melh rum vak bawk.

"Thil a kal dik lo a nih vaih chuan i thiam loh a ni ang Mathew" ti leh hmukin Office aṭanga chuan a kal chhuak pawk pawk a, Mathew-a chuan Manuel-a awm dan leh thu sawi awmzia chu a hre lo hle thung.

Kawngpui a thlen thlak rualin Manuel-a chuan Taxi a phar a, Airport lama tlan turin a hrilh nghal zung zung a, Loicy-i chu a in aṭang a lo chhuak tak tak ang tih a hlau a ni. Vau te chu a vau ve ngei kha a ni a, mahse Loicy-i chu a hmeichhe lo kawp ṭhin tawh te ang a ni lo tih a hriat tlat avangin a hlauthawng ru hle zawk a ni.

Rilru nuam takin ni khat chhungin faknaa mi tur Shooting an nei zo chu a lawm em em kha a ni a, mahse tunah chuan Loicy-i vang bawkin lawmna pakhat mah a nei tawh lo. Loicy-i ngaih dan tur te chu a ngaihtuah vel a, a lo thik pawh chu a awm thawkhat tho mai. Hmeichhe dang a thik dawn tih hre miah lova a awm thei te chu mawl a intihnuhnawh a, awmzia lah chu a awm tawh der si lo.

Thlawhna a chuan lai te chuan inthiam lohna hlirin a khat tawh a, Loicy-i laka thupha chawi chu a tihmakmawh a ni ta. Internet-ah chuan Model pakhat nena an thlalak lak dunna chu a lo darh chak leh tawh hle a, chu thlalak chu Loicy-i paw'n a hmu tawh ngei a ring. Chutah chu thlalak ber kher lah chu Underwear fakna atana an lak dunna a la ni zui a, chu thlalak tak chu Loicy-i lungawi loh chhan pawh a nih ngei a ring bawk.

Model nu kha chuan mutpui pawh a hreh lohzia a mitmeng aṭang a hmuh mawlh mawlh a, mahse ani chuan Loicy-i tan chauha mipa nih a duh avangin a hnar zel a nih kha! Duh chu ni se vawi tam hmangaihna a chenpui thei ngei ang, chuti ang khawp chuan Model nu chu atan a inphal tih a hre vek bawk.

Boston khawpui a thlen rualin Taxi hmang bawk chuan a in lamah a tlan phei nghal a, khua chu a thim ṭan det det tawh bawk. A phone phawrhin Loicy-i chu a call nghal zat a, mahse a ring ral ṭhak thung. Vawi eng emaw zah a call hnuah pawh chhanna pakhat mah a dawng lo, tunah chuan a buai phili ve tak zet ta e.

Taxi Driver chu khalh chak turin a tur chhen a, Loicy-i chuan a chhuahsan ang tih mawlh a hlau a ni. In kawt a thlen rualin Taxi driver chu pawisa a pe sawk sawk a, eng zat chiah nge a pek tih lam a ngaihtuah si se hman tawh lo. In chhungah tlan lutin room lamah a tlan chho nghal a, room chhunga tui taka lo muhil Loicy-i hmel a hmu chiah chu a hahdam sawng sawng thei hial a ni.

"Loicy" tiin a bulah chuan a inthawlh ve nghal a, Loicy-i erawh a lo muhil tui ngang mai, a bulah a mu tih pawh hre lo ang maiin a muhil bawrh bawrh a, Manuel-a chuan hlauhthawnna reng a nei tawh lo.

"Min tibuai em emtu" ti leh supin Loicy-i chu a fawp vang vang a, tihharh chu a duh leh lo ta zawk a, chuti anga mutdun mai mai chu a thlahlel zawkin a hria a ni.

Loicy-i chhip sam hnim vang vangin Manuel-a chuan a buai phili hmanzia chu a ngaihtuah let a, chahbi tel miah lovin inah a lut thei tih a hre chhuak leh a, a kiai zui ta suk bawk.

THE ONE WHOM MY SOUL LOVES (M&B)

By

Havali Adam

Chapter 10

Loicy-i chuan a awmna hmun chu khawi lai nge a nih pawh a hre lo va, mahse a hahdam thlakin a lum nuam em em tih chu a hre thung. Khum lah chu a dup nuam em em a, a Apartment-a khum chu dup nuam a ti tak zet a ni. A nghenchhan ber chu Teddy Bear mah ni se a lianin lumna a ngah em em a, a naupan laia a Teddy Bear mutpui ṭhin ang maiin a ngai a, Australia ramah a awm hialin a inhria a, mahse US-ah a awm tih chu a hre pah reng tho.

Zawi zawiin a ngaihtuahna chu a rawn fim chho ṭan a, a bula mu Teddy Bear anga a ngaih chu mihring a ni tih pawh a hre chhuak zui nghal a, mahse kuah loh emaw a hlata awm a tum reng reng lo. A bula mu mek chu Manuel-a a ni tih pawh a hria, a ngaih lutuk avangin a hlata awm chu a duh lo va, a bula mut char char chu theih se a ti zawk a ni.

"Min zinsan tawh suh" meng diar diar chung hian a ti sep a, Manuel-a hmel ṭha tak leh pa hrak mai chu fiah mang lovin a hmu a, amah ang thova a lo muthilh ve avangin mut leh chu a thil tih châk ber a ni rih tlat.

"Loicy" ti thum dam dup aw chu a hre ruai ruai a, a bianga hmui lum thar tharin a rawn tawhna te chu nuam a ti em em bawk a, a mit a men ruala a hmel hmuh hmasak ber chu Manuel-a hmel a ni.

"Dinner kan ei a ngai a ni Loicy" Manuel-a'n a rawn tih chuan tukverh lam chu a hawi a, khua a lo thim vek tawh tih a hmuh chuan a thaw hawk a, dinner ei tura intihharh chu a tum zui nghal bawk.

"Loicy!" khum aṭanga a chhuk thut avangin Manuel-a chuan rawn ti nghal a, a hmelah chuan mak tihna a hmu nghal zut zut a, mahse Loicy-i chu inhre chhuakin a lungawi lo thar thut a ni ber.

"Naktuk aṭang chuan Apartment ka zawng ang a, chutah chuan ka awm bawk ang" Loicy-i chuan inrintawk hmel deuh hian a ti a, a inrintawk lohzia erawh amah aia hre chiang tur an awm lo ang.

"I la lungawi lo reng em ni? I pangngai vek tawh emaw ka ti asin, ka insawifiahna ngaithla phawt la i rilru pawh a dam mahna" ti supin Manuel-a chuan khumah a pawt ṭhu leh a, Loicy-i pawh a tih ang ang chuan a lo awm ve leh mai.

"Model pakhat nena kan thlalak i hmu tih ka hria e, mahse kei chuan nang chauh hi ka duh che tih hre reng rawh Loicy" a tih laklawh laiin Loicy-i chuan

"I taksa te i khawih tir a, ngainat hmel zetin hnai taka i en bawk a, ka rinna che hi a chhhe tial tial dawnin ka hria" a lo ti nghal vat a, Manuel-a chuan ngawi rengin a lo kuah nghet sauh thung.

"I duh chuan ka taksa i khawih ve thei reng alawm Loicy, kha Model nu khawih aia thui pawh i khawih thei chiang e, a chhan chu i taksa leh rilru zawng zawng ka ta a nih ang chiahin kei pawh hi i ta ka ni"

"Chuti ang lam ka sawi tum a ni hauh lo mai Manuel, ka rinna lam zawk a ni ka sawi tum chu! Ka rin theih thu che min hrilh a, mahse rei lotê hnuah ka rilru tina tur takin i awm leh lawi si a, ka rilru a na dawn tih pawh i hre vek ang chû"

"Loicy" ril raih hian Manuel-a chuan a ti thum chhal a, Loicy-i ṭah chhuak hmel chu a hmuh reng theih a ring lo, amah avanga rilru nuam lova a awm chu pawi a ti ve hle bawk.

"Kha Model nu mitmeng kha ka hrethiam asin, tisa châknaa khatin a melh che a, kei tak ngialin ka hriatthiam chuan tu paw'n an hrethiam ngei ang. Nang paw'n it hmel takin i en a, kan pahnih hian inkawp loh" tia Loicy-i ṭawng laklawh lai chuan a hmuiah a fawp chat a, Loicy-i chu a ṭap ni maiin a hre hial a ni.

"Ni lo Loicy, ni lûl lo ve, nang chauh hi ka tisa châkna phuhru thei awm chhun chu i ni. Kha hmeichhia khan a them paw'n ka mit a la lo, ka thu sawi hi ring tawp rawh" ti mawlh mawlhin a fawh zawm leh nghal a, Loicy-i paw'n a thiam ang tawkin a lo chhang let ve ta.

Inthlahlel taka hmangaihna an chen dun hnu chuan thlan tui nen an inkuah chial a, rei lovah Manuel-a chuan a insum theihna a hloh leh ta vek mai. A thawh hnih nân hmangaihna chu a chenpui leh nghal zat a, chau em em chungin Loicy-i paw'n a lo dawngsawng ṭha thei hle bawk si a, an inmamawhtawnna chu nasa tak a ni. An zo fel chiah chu an inkuah hle hle a, Loicy-i chu a chau tawngkhawng tawh a ni.

Chuti ang tak chuan Manuel-a'n nawmna vawrtawp a pek theih a beisei lo va, a ring lo hrim hrim bawk, mahse Manuel-a chuan a pe miau bawk si a ni. A lungawi lohna leh hmeiche dang a thikna zawng zawng te chu a bo leh vek tawh a, a mipa duh hmasa ber leh a bialpa hmasa ber ni bawk Manuel Firth-a chu a hmangaih ngawih ngawih tawh a ni.

Nula leh tlangval inkara hmangaihna inher lum chhoh dan a hrethiam ngai lo va, mahse tunah chuan a hrethiam ve ta. Hmangaihnaah chuan khum lai zawla tlat dun ai mahin rilru a pawimawh zawk tih te a hre chhuak a, hmangaihna avangin thikna nasa tak a neih theih tih te chu a hre leh zel a, a nun hman mek chu hrehawm viau tura a ngaih kha a ni a, mahse tunah chuan hrehawm tihna pakhat mah a nei tawh lo.

Chutia thil a ngaihtuah roh roh lai chuan Manuel-a chu a ngaihtuah zawm a, a hmangaih ang chiah chuan a lo hmangaih let ve ang em tih a hrethiam ta hauh lo. Hmangaihna chen dunin inthlahlel em em ṭhin mah se a ka aṭang hmangaihna thu a hre ngai lo va, a ngainat thu leh a duh em em thu chauh a hre thung.

Chu ringawt pawh chu Loicy-i chuan a hlimpui em em lawi a, a mipa hmangaih takin a thianghlimnna a hawngte chu a lawm hnuhnawh leh ta hle a, mahse in khata awm dun erawh thil ṭha ber niin a hre lo a ni. A nghenchhan mek mipa muhil hmel chu thil dang melh thei lêk lovin a thlir dauh dauh a, a mtiah chuan Manuel-a chu a hmelṭha thlawt a ni.

Ni lo, a mit chauha hmelṭha a ni teuh lo. A mipa hmangaih ni ta Manuel-a chu hmeichhe tam tak duh rawn leh hmelṭha tih a ni a, chung hmeichhe tam tak zinga ani ang zirlai ve mai nen an inkawp ta mai chu lawm hliah hliahna tham a ni; chuvang chuan Loicy-i chu lungawi lohna nei tawh lovin a lawm hliah hliah reng bawk.

"Christmas hmang turin in ram lamah i haw dawn em?" Jessica-i chuan a ti a, Loicy-i paw'n haw a tum thu a lo hrilh ve mai bawk a, kum tawp a hnai ve tawh tho bawk nen zirlai ṭhenkhat chu an haw tawh hlawm nghe nghe.

"Nang haw i tum em?" tiin Loicy-i chuan a ṭhiannu chu a zawt let ve leh nghal a, Professor te an lo la lut lo bawk a, Classroom chhunga lo titi mai mai chu nuam an ti dun phian.

"Kei chu ka haw lo vang, heti lamah ka chhungte'n min rawn hmanpui zawk dawn a nih hmel. Saw i Professor bik em em a lo kal, Class a lo la dawn a ni ngei ang" Jessica-i hawina lam chu a hawi ve nghal a, a bana chum taih pahin

"Khati ang khan sawi kher zel suh, ngaiah ka la nei thei lo. Professor Manuel-a nen hian kan inkawp ta mai te hi mak ka la ti reng, ka vannei tak zet a ni" a lo tih zawm nghal melh melh a, hlim ruk avangin a ṭhen sak bawk.

"Hmeichhe tam tak thik rawn i ni a, ṭhen tum miah suh ang che" nui var vara Jessica-i'n a rawn tih leh chuan a nui chhuak hak a, a chhang let tawh hran lo.

"Tunah in za vaiin in chung lamah chho r'u le, Miss Lily-i a dam loh avangin vawiin chu a ai ka awhsak lawk dawn a ni" Manuel-a aw chu a thum fiah fak a, a nel lo tan chuan a aw chu engtik lai paw'n hriat nuam loh a ni reng thei ang.

Manuel-a chu room aṭang a chhuak leh nghal a, zirlai naupangho paw'n a sawi ang chuan in chung lam an pan dam dam a, Loicy-i leh Jessica-i chu haw leh haw loh lam sawiin an la titi tui dun hle. Step-a chhoh pahin an la ṭawng melh melh a, a changin an nui dun leh hak hak ṭhin bawk.

Jessica-i chu vawi leh khatah a ṭawng tawp hmak a, Loicy-i chuan a hrethiam lo hman hial a ni. A hawina lama a inher chuan tu dang hmu lovin Manuel-a chu a hmu nghal zat a, chu lai hmuna hmuh chu a inring chiah lo a ni.

"Lo han chho rawh, ka lo chhohpui ang" Manuel-a aw ram deuh hmuk chu zawm loh chi a ni lo hrim hrim, chuvanga Jessica-i chu in chung lama chho rang em em pawh a ni.

"I hmel hmuha i rim hriat hi ka châkna a rei tawh asin Loicy" Manuel-a chuan bangah a rawn nawr bet nghal a, a ṭawng dawn chiah tihah a hmui chu a rawn khar zui nghal hmak bawk.

"Manuel, kan awmna hmun hi a ualau mah mah a ni" a ti hman ṭawk a, Manuel-a chuan a fawp duh tawk thei leh mai ta lo, Loicy-i paw'n insum rei zo lovin a lo fawp let ve leh ta tho.

"Kei hian ka ngaiin ka thlahlel em em che a ni Loicy, nangtê hian ka do zawh loh khawpa chak zun i nei chiang a ni. Nei la, nei reng la, mipa dang bulah erawh he i thil tih theihna hi hmang ve miah suh ang che"

"Manuel" nui chung hian Loicy-i chuan a lo ti a, a nghawng zawna thaw lum ham hamtu thu sawi chu fiamthu mah ni se a nuihzat thlak loh lutuk a, chuvanga nui ringawt pawh chu a ni.

"Ka fiamthu der lo a nia Loicy" a rawn tih leh pawh chuan Loicy-i chu a nuih a la za ru reng a, a awm dan ngel ngul chu engtin emaw tak hian hmuhnawm a ti a, a ṭawng dan te chu hriat nuam a ti ru hle bawk.

"Nizan maiah ka Apartment-ah i lo kal khâ Manuel, i insawi ang em em hi chuan min ngaih ka ring lo" a tih chuan Manuel-a chu a rawn rum nghut a, chu ringawt pawh chuan Loicy-i chu a tihlim tlat tawh.

Manuel-a awm dan chu Loicy-i chuan awih harsa a ti ru kher mai, thla 2 lai inkawp ve leh reng tawhin mi paw'n sawi zui enah an en ta vak lo hlawm kha a ni a, chu tak chu Loicy-i chuan pawi a lo ti lo nasa hle. Apartment luah tur pawh Manuel-a in hlat lo têah a hmu a, ama hmuh pawh a ni chiah lo, Manuel-a zawn hmuh sak a ni mah zawk.

Eng ang paw'n inthlahlelin hmangaihna chen dun ṭhin mah se nupa an la ni tlat lo va, zirlai leh zirtirtu inngaizawng mai an la ni a, chuvangin in khata chen dun chu Loicy-i chuan a duh lo a ni. Tin, a ngaih danah chuan a mawi pawh a mawi lo hrim hrim, inneiin nupa te chu ni tawh se chuan in khata chen dun chu a theih chauh turah a ngai bawk.

"I hmel ka hmuh lai reng pawh hian ka thlahlel em em tho che asin Loicy" ti leh supin Loicy-i hmui bawk chu a fawp leh a, Loicy-i tak pawh chuan a ngai ru ve reng tho, a sawi duh lo mai chauh a ni.

"Ka Apartment-ah i rawn chuangkai tam mah mah lo maw Manuel, mi dang paw'n min sawi sep sep thuai mai ang. Weekend-ah te rawn kal ṭhin zawk la, mi mit kan tikham lo deuh mahna"

"Weekend-ah chauh lo kal turin min beisei hauh suh Loicy, mi dang mitmei i veng a nih chuan ka inah lo awm mai rawh, kei chuan hlimna chi tinrengin ka lo vur ang che"

"Sawi tawh lo vang Manuel, in chunga kan chhoh vat a ngai a ni. Kan awm rei lutuk chuan a ṭha lo, chho ang le" tia a nam sawn rualin Manuel-a chuan a rawn fawp leh tawk a, a hmui chu a thlum hialin a hre thei.

"Kal hmasa rawh, i hnungah ka lo zui ang che. Chu chu i duh dan a nih ngei pawh ka ring, kal rawh ka tih laia i kal lo a nih chuan hmangaihna chenpui che ka hreh miah lo a nia" Manuel-a thu sawi avang chuan Loicy-i chu a tlanin a tlan chho thuai a, Manuel-a pawh a nui chhuak ta hawk hawk.

First Year Course zawh nan thla khat pawh a awm tling tawh lo va, Final Grade pekna tur zirlaite chuan Music Exam an nei dawn a, Manuel-a pawh a buai mawp mawp hle. Lily-i lah a lo damsam lo kher bawk nen engkim chu ama'n a kaihruai vek a, exam an neih dan tur chu zirlaite a hrilh bakah endiktu ah a ṭang leh lawp lawp a, a indaih lo kher mai.

Loicy-i paw'n Manuel-a buaizia chu ral aṭang a lo hrethiam ve vek a, Piano Exam an neih dawn tak takah phei chuan a lam pawh a rawn hawi hman meuh lo a ni. Manuel-a chu Paper endik leh sign velin a buai chhunzawm zel a, amah chauh ni lo a Professor puite pawh an buai ve tho va, an buai tlang a ni ber.

Professor an nih avangin Section hrang hranga zirlai naupangte chhanna an endik a ngai a, chuti ni lo se chu an buai em em kher lo vang. Chu bakah Theory lam exam ni a ni hrim hrim a, Practical exam ni ai chuan buai a na dawn tih a hrelawk sa vek bawk.

"Ka haw tlang nghal mai dawn, Part Time hna ka hmu ve hlauh a, zan lamah hna thawh ka ngai bawk si, ka kal aw" Jessica-i chuan tiin a kalsan a, Loicy-i erawh Manuel-a'n nghak tura a lo hrilh tawh avangin a haw nghal mai bik lo.

School Campus-a ṭhutna awmah chuan a ṭhu ngawi reng a, mi che vel te chu a thlir kual a, ni dang zawng aiin chumi ni chuan an School chu nuam a ti a ni. Van lam a thlir a, khaw awm dan chu a inṭhen phawk ni mai hian a hre bawk.

Hmar lamah khua a dur em em a, chhim lamah erawh ni a lang vût thung. Darkar 2 chuang mahni chauha a ṭhut hnu pawh chuan Manuel-a hmel reng a la hmu lo va, a hnen aṭang phone call tak ngial pawh a la dawng lo a ni.

Manuel-a berin lo nghak turin a ti tlat a, a sawina hmun ngeiah a awm bawk a, a nghah chhuah ve theih mai pawh a ring, mahse rei a ti tawh tak zet a ni. School kawngkapui ber chu an khar tawh nghe nghe a, an khar lai pawh a hmu reng, mahse pawna lo nghah a duh avangin a lut duh lo mai chauh zawk a ni.

A phone-ah dar zat a en a, tlai dar 3 a lo ri thuak tawh. A tlai thawkhat tawh tih hriat zetin mi vei vak hmel reng hmuh tur a awm tawh lo va, khua lah chu hmar lam khaw dur ngut chuan a rawn hliah khuh tial tial a, khaw dur dan aṭang chuan nasa taka ruah a sur duh hmel hle bawk.

A vawi khatna atan Loicy-i chuan Manuel-a chu a call a, mahse ring pawh a ring eih lo. A call nawn leh ngat a, rei lotê a ring tihah a tawp nghal daih a, phone aṭang chuan hmeichhe aw hian signal a bo thu a rawn hrilh nghal bawk.

Ruah mal lian tak tak te chu a rawn tla ṭan ta, Loicy-i chu a hlauthawng tawh kher mai. Ruah a sur tak tak huna tawm hulna tur zawngin a tlan kual ruai a, mahse pakhat mah a hmu lo. Ruah lah chu a rawn tla tam tam tial tial mai bawk si, a mangang ru tawh ngawih ngawih a ni. Jessica-i ruala a lo haw ve daih lo te chu a inchhir hnuhnawh em em a, mahse inchhirin awmzia pakhat mah a nei tawh der si lo.

Ruah chu namen lova tam hian a sur buan buan a, Loicy-i chuan do tawp loh chu tih theih a nei lo. School kawngkapui ber bulah chuan a ding khur ngawt ngawt a, a taksa chu huh lo lai reng a awm tawh lo bawk. A file chhunga lehkha pawimawh te chu a huh zawr vek tawh a, nihliap tal nei se chu ruahin a nan huh vek bik tawp lo vang. Kawngkapui chu chumin a au vak vak a, mahse chhung lama awmte chuan a ṭawng an hre thei lo thung.

Thli chu na takin a tleh a, thli thaw ri vuk vuk bak chhung lama awmte chuan thawm hriat an nei lo tlat a ni. A chungah eng nge thleng dawn tih pawh ngaihtuah buai duh tawh lovin Loicy-i chu kawngkapui nghengin a ṭhu tawm kak a, vawt a ti lutuk chu a ha chung leh hnuai a intauh ri bawp bawp bawk.

"Loicy, i harh ti raw? I harh tawh ti raw? Min en teh, ka tihpalh lutuk Loicy" a mit a men ruala lo ti sawk sawk tu chu tu dang ni lovin Manuel-a ngei a ni a, chuti anga ngaihvenna awkâ a hre chiah chu a ṭap chhuak ta hawk.

"Ka tihpalh, ka tihpalh tak zet Loicy, min hrethiam lûl teh. Exam Paper check ngawr ngawrin ka rilru a luah a, nang ngaihsak lo chea ka awm kha ka inthiam loh tak zet a ni" Manuel-a chuan a ti leh mawlh mawlh a, Loicy-i chu a ṭap uar sauh thung.

"Nghak tur chein min ti a, i rual lova ka haw pawh i phal lo va, mahse nang chuan min ngaihsakna pakhat mah i nei leh si lo. Thli leh ruah te kha ka hlau asin, ka hlau lutuk tak zet" sawi zawm thei tawh lovin Loicy-i chu a ṭap hawm hawm a, rilru na zetin Manuel-a chuan a âwmah a lo kuah bet ta thuai.

"Ka thiam loh hulhual a ni e Loicy, i duh tawkin ka lakah hian i thinrim thei ang, mahse ṭap tawh lo la chu ka duh a ni. Tunah hian i dam lo mek a, darkar 8 chuang chu engmah hre lovin i awm tawh a ni" Manuel-a awa inthiam lohna ri a hriat rualin Loicy-i chuan a lo kuah nghet suah a, a ṭap tawp thei mai bik lo a ni.

"Ka tihpalh Loicy, nang ngaihsak lo che hian ka awm leh tawh ngai lo vang tih ka tiam a che" ti supin Manuel-a chuan a chalah a rawn fawp vawng vawng a, te viau mah se dawmdawi in khumah chuan a inthawlh chho ve nghal a, Loicy-i chuan a lo la kuah nghet ve hle bawk.

A ṭah nasat lutuk avanga muhil ta Loicy-i chu Manuel-a chuan duat zet hian a âwmah a kuah bet ran a, a hnung chu a chul riak riak pah reng bawk a, kum 30 chuang khawvelah lo nung ve tawh mah se chuti ang taka hlauthawng chuan a la awm ngai lo a ni. A phone te kha check lo ngat se zawng a ngaihtuah thui ngam lo zawk, a chhe ber thlengin Loicy-i chu a chan hial a ring a ni.

Nghet taka kuahtu hmeichhe vun no leh hmelṭha zet chu inthiam lo takin a thlir ngawt ngawt a, a mamawh lai a awm lo te chu a inchhir a, a khawngaih thar em em bawk. A biang no chêk mittui vanga val thla deuh kulh te chu a hmuh hmaih hauh lo, engkimah chuan mawhpuh vek mah se pawi a ti teuh lo bawk, a chhan chu a thiam loh a ni tlat.

"Aw ka pa" tiin a pa phone chu a chhang a, vawi tam lo call lo se chu a pick up kher lo vang, Loicy-i hlata awm chu a duh tawh lo hrim hrim a ni.

"Khati lamah khan Cyclone a tleh ve em Manuel? Keini chu hei a tleh zo deuh chiah a, ka rawn hre chhuak nghal che a nih hi!" a pa chuan a rawn ti a, a aw aṭang chuan a ngaihtuah hmel tak tak hle.

"Heti lamah chuan tleh zo tawh e, ruah pawh a sur tawh lo" Manuel-a chuan a lo ti ve mai a, a pa a rawn ṭawng siam siam lai chuan a sir lam aṭang Loicy-i chuan meng mang lo hian

"Manuel! Manuel!" a rawn ti vak vak a, a awah chuan hlauhna chi tinreng a khat a, Manuel-a chu a phei rang kher mai, a phone pawh chu a ngaihsak hman tawh lo.

"Heta hi ka awm e Loicy, i bulah ka awm tawh e, i bulah ka awm reng e" Loicy-i kuah thuai chung chuan a ṭawng thlamuan nghal mawlh mawlh a, Loicy-i pawh chu a muhil ve leh nghal mai bawk.

"Zawhna ka nghah nghal teh a nia ka fapa" a pa aw ri a hre leh chiah chu phone a la off lo tih a hre chhuak zawm zat a, inbiak a peih tawh rih loh avangin a off zui nghal hmak.

"Loicy" ti supin a hmeichhe kuah mek chu a en a, mahse Loicy-i chuan tui taka mu hmel lo pu leh daih tawh a, a dam ṭhat hma chu damdawi ina awmpui a ṭhat a ring a, kum tawp lam a nih tawh tho avangin School pawh chawlh rih mai se pawi a ti lo.

Kawngka inkhar ri thawmah chuan a harh zawk a, a men chuan khua a lo var vek tawh a, a bula la muhil tui em em Loicy-i chu a en chhuk zeuh a, harsatna dang tawk miah lova zan hun an hmang ral thei chu a lawm ru hle bawk. Doctor chuan a rawn en zeuh zeuh a, dam lo ber Loicy-i chu a dinhmun check a duh a, mahse nimin lama Manuel-a'n a vin chiam avangin a pawh ngam lutuk lo thung.

Doctor chu hmeichhia a ni a, mipa te chu ni se a che bawrh bawrh ngam ngei ang, mahse Manuel-a chu a hlau ru deuh tlat tawh a ni. Tim daiin dam lo mutna bulah chuan a kal phei a, Manuel-a lah chuan a lo la en run zui, chungte hlei hlei chuan a tizam zual a ni. Loicy-i pang a deh lai te chuan a lo en chik em em a, Manuel-a chu mi hriat hlawh tak ni lo se chu a zah em em kher lo vang.

"Dam lohna a nei hran tawh lo va, mahse a taksa hi a la chak lo hle a ni. Zan khat chu riak leh ula duhthusam a ni a, mahse chu erawh in thu thu a ni e" Doctor ṭawng riah chuan Loicy-i chu a lo harh a, Manuel-a'n

"Zanin chu kan riak leh turah ngai ang" a ti bul hmuk chu a hre leh nghal zat a, mahse ani chuan damdawi ina riah chu a duh tawh lo hrim hrim, riak thei pawh a ni lo.

"Ni lo, ka ṭha tawh alawm, damdawi inah hian kan riak tawh lo vang" Doctor leh Manuel-a chuan Loicy-i lam chu an hawi rual ṭhawt a, a harh tih reng an hre lo ve ve tlat a ni.

"I taksa a la chak tawk hleinem Loicy, School pawh kal rih lo ang che. Damdawi inah hian ka awmpui che ang a, i dam ṭhat hnuah chauh kan chhuak ang" Manuel-a'n a tih chuan

"Ka thei lo Manuel, vawiinah Piano Practical Exam ka nei dawn alawm, ka hmaih thiang lo a ni" a lo ti ve vat a, Doctor chuan a awm rengna tur niin a hre ta lo va, ngawi rengin a chhuak zui daih bawk.

"Ka phal teuh lo mai Loicy, dam lo chunga ka exam tir che ring hauh suh, endiktu ka nih dawn avangin nang chuan First Year Course i paltlangah inngai hmiah rawh" Loicy-i chuan Manuel-a thu sawi chu a zawm duh teuh lo, dik taka paltlang ngei a duh a ni.

"Chuti anga exam hlei lova paltlang ringawt ka duh hleinem, ka thei mai ang. Dam lo pawh ka ni tawh lo va, School-ah chuan min hruai thuai zawk rawh Manuel"

"Ngaithla teh Loicy, heti anga i awm hian i laka ka inthiam lohna a nasa tulh tulh tih i hre lo em ni? Exam laiin dam lo zual ta la engtin nge ka awm ang? Ni lo, ka thu awih la, exam pek pawh a ngai lo"

"Khawngaihin min exam tir hram zawk rawh Manuel, ka thiamna hmang ngeia First Year Course hi paltlang ka duh a ni" Loicy-i chuan men deuh pur hian a ti a, a ṭah a chhuah em em chhan pawh chu a hre bik lo.

"Hrep tak che hian Loicy, khati ang hmel kha min hmuh tawh suh. Aw le, a ṭha e. Practical Exam chu i pek ka phal hram ang, mahse kan haw leh nghal ang a, ka inah i awm rih bawk ang" Manuel-a chuan a ti nghet charh a, Loicy-i paw'n a lo hnial miah lo va, eng pawh ni se Exam ngei ngei chu a duh a ni.