EZEKIEL By Havali Adam (CHAPTER 11)

EZEKIEL 

By

Havali Adam

Chapter 11

"Aruatte" a rawn tih nawn leh tâkah chuan zawimuangin a lam chu ka hawi a, ani chuan mak tih hmel fahran hian min lo en a, ṭawng miah lovin a mitah tak chuan ka en char char a, ṭawng châkna reng ka nei rih lo a ni.

"Ka sawi kha i hria em?" a tih chuan ṭawngkâa chhang let lovin ka lo buk khum zeuh a, a kal leh nghal mai tura ka ngaih chu thaw hawkin kawngka bulah chuan a ding reng a, zawhna dang pawh min zawh belh tawh chuang lo. 

"Kal rawh, Meeting chu va nei rawh, ngaihtuah ka ngai lo ve, hetah hian ka lo nghak ang che" ka aw chu tih nem ka tum tehreng nen ka thei lo chiang khawp mai, a hretu tan chuan hriat a nuam lo lek lek zawk maithei a ni. 

"I thu thu le" tih leh kawngka khara kal chu a rual nghal a, mahni chauhin ka pasal room-ah chuan ka ṭhu ngawi reng a, ka hmaa Momo ei tur awm nual pawh chu ei châkna reng ka nei tawh lo, ka hlim ve dawn chauh emaw ka tih laia lungngaihnain min rawn chenchilh zel chu ka hne ngawih ngawih a ni. 

"Ni lo, kei hi ka lungngai tur a ni lo, ka hlim hle zawk tur a ni. LALRUATTLUANG, mawl suh, mahni insit duh mah ta che. Ani te kha chu a hnuaia thawk mai chauh a ni a, nang erawh a nupui i ni thung" tiin keimah leh keimah chu kan infuih mawlh mawlh a, hlim miah si lovin hlim luih chu ka va'n tum tehreng êm.

Inthing harhin ka ṭhutna aṭang chuan ka tho hluai a, ka pasal office chhung chu ka hawi kual thuak thuak a, mipa awmna tih hriat takin a hnawk rem rum a, chuta ka thil hmuh pakhat chuan min ṭhawng khawp mai. Dawhkan hnuaiah chuan meizial zuk zawh tawh bung hi a lo tla nuai a, ka hriat tirh ata ka pasal hian meizial a la zu ngai reng reng lo, zu phei chu a in duh lo hrim hrim, mahse eng vanga a office chhunga meizial bung hi awm nge ni ta ang? 

A hnuaia thawk te zukna ti dawn ila ka awih chiah bawk si lo, ama'n a zu ti dawn ila ka ring phal leh chuang bawk si lo. Ngaihtuah buai rei duh lovin thil hnawk vel chu ka tih fai zawm ta mial mial a, bathroom thleng chuan ka ti fai a, office chhung chu zau ṭha ang reng viau mah se bungrua a tam lutuk loh avangin tih fai a hahthlak hran lo. 

Dawhkana paper inrem fel lo tak tak te chu ka rem fel sak vek a, a rawn luh leh hunah chuan a office chhung chu hmuh nuam a ti sawt khawp ang le. A nitin ṭhutna ṭhin ni ngei tur Chair tawlh theiah chuan ka ṭhu a, ka rin aiin a dup nuam phian mai. Chu bakah ka tan chuan a hniam mah mah, ka ṭhu chiah chu dawhkan pawh ka âwm zawn deuh thaw vel a ni daih.

Chair-a la ṭhu reng chung chuan pawhdawh chu ka hawng leh a, ka la tifai reng reng lo tih ka hre chhuak bawk. Pawhdawh pakhat zawk ka tih fai hnu chuan a bul chiaha pawhdawh chu tih fai tumin ka pawt hawng a, chuta ka thil hmuh chuan ka rilru leh ngaihtuahna a hruai dang leh ta vek mai. Pawhdawh chhungah chuan kan chhungkaw thlalak chi hrang hrang a lo awm nuai a, Ezekiel-a lanna pawh a tam hle, mahse thlalak zawng zawngah chuan ka pasal hmel chu a inchep bo zel a, chu chu tu dang ni lovin ka pasal thil tih ngei a nih ka ring. 

Thlalakah chuan kei leh kan fapa Ezekiel-a hmel hlir a lang a, Ezekiel-a thlalak bik leh keima thlalak bik pawh a awm ṭeuh a, chung thlalak tam tak zingah chuan ka pasal hmel lanna reng reng hmuh tur a awm lo. Ka hmu sual emaw tiin ka lu chu ka thing nawk nawk a, thlalak chu a mal tê têa en ṭha leh vekin ka chul vel a, engkim chu ka hmuh hmasak ber ang hlirin a la awm thung. Chuti ang khawp chuan ka pasal chu a inthiam lo vang tih pawh ka lo ngaihtuah pha ngai lo, ka  pasal ka khawngaih dan chu pui tak a ni. 

"Lalpa, khawngaihin ka pasal hi mahni inthiam lohna neih tir tawh suh" ka hriat tawk lek chuan ka ti chhuak sep a, thlalak zawng zawng pawm ṭunin ṭhutthleng sei lamah ka ṭhu phei a, ṭhut pawh ka ṭhu rei lo.

Mu zal chungin thlalak chu ka en nawn sek hlawm a, ngai zetin Ezekiel-a hmel chu ka chul a, ka fawp vawng vawng a, rawn dam leh thei se ka ti ngawih ngawih a ni. A nu leh pa min kalsan lo se chuan hlim takin kan awm ho ang a, keiin thinlung lamah natna ka nei reng lo ang a, ka pasal paw'n inthiam lohna a nei reng lo bawk ngei ang. Kan hun tawn mekah erawh kan fapa chu mi nung a ni tawh lo va, lei hnuaiah zalah a ni tawh a, mitthlaah bak a hmuh theih tawh loh a ni. 

Ka lo muhil tlang daih chu niin ka harh leh chuan ka pasal kawr chung ngei mai hi ka lo sin a, February thla tawp vel âwrh chauh a la nih avangin thlasik boruak chu a la kiam lutuk lo. Ka hmai bulah chuan ka muthilh hmaa ka thlalak en te chu a lo la awm kim vek a, khua pawh a thim ṭan tawh hialin ka hria. Ka pasal ṭawng ri bawl bawl lam chu ka hawi a, phone-a mi a biak avangin ka harh tih pawh a hre lo a nih hmel. Kamis var hain necktie a la awrh deuh thlap a, necktie tak erawh chu a pawt thawl ang reng khawp. 

"Kan lo haw ang, ei rawng kha chu lo bawl mai rawh. Ka hre lo, a la muhil rih. Chu zawng a harh hunah ni rawh se, lo sawi lawk chiam hian awmzia a nei lo" indawm kun ngul chungin ka pasal chuan phone-in mi a bia a, ka harh hnua ka hmuh tirh aṭang tawh a la maimitchhing char char bawk.

"Ka dah" a ngawih vang vang hnu chuan a ti leh deuh tawp a, ka rin dan chuan ka nu nen an inbia a nih ka ring a, ei rawng bawl chungchang vel kha sawi lo se chu ka nu kher a biak pawh ka ring chuang lo, ka pa'n ei rawng bawl ngai hek lo le!

"Ka lo muhil daih a ni maw!" ti thluk awn deuh duain ka zi mar ṭaih ṭaih a, ka mut chhuah vang pawh ni tawh lovin ka la ham bui bui zui a, ka pasal chuan a thil ziah lai chawl meuhin min lo en reng a, ka lo nuih var var thung.

"I va'n la buai awm mawp mawp ve, khua a thim tawh dawn hî" a lam pana kal phei pah chuan ka ti a, a coat chu ka darah a la inbat reng a, vawt ka ti deuh bawk nen intuam lum chu a nuam riau mai. 

"Kan haw thei" tih leh a thil ziah lai chu dah a rual a, paper chu dawhkana sawh ri zeuhin a rem fel deuh thlap a, a chet dan tê chuan min tihlim reuh lutuk, an meeting lai khan ka lo rem fel thlap bawk si a, a inthlahrung deuh pawh a ni maithei a ni. 

"I coat hi i ha duh lo em ni?" ka ti ve tak na a, a coat hatu keimah ber pawh chuan phelh ka tum chuang hlei lo va, dik tak chuan a coat hak chu nuam ka ti ru reng a, ka sawi duh lo mai mai zawk a ni.

"Vawt ka ti lo" a rawn ti teh daih a, min chhan dan chu ka hrethiam khawp mai, chuti anga tlang chuan a hma pawh khan ka zawhna a chhang nghal mai ṭhin a, thu pehhel lam ai chuan a rilru dik tak leh thil nih dan dik tak a sawi tlang nghal pawp ṭhin. 

"Sir, i haw dawn chiah em ni? Kei pawh ka hman deuh chiah a, kan haw rual thei a ni mai alawm ti raw?" office pawn kan thlen ruala rawn titu chu zak lo hawr hawr ka va'n ti tak, henu hi hmel changkang viau mah se nungchang mawi a hre vak lo chu a nih dawn hi! 

"Lo zu kal rawh, ka'n be lawk" ka pasal chuan min en chung hian a rawn ti sup a, mi pawh en rei lovin kan hmaa hmeichhe din lam chu a hawi a, min ngaihtuah tawh lo tih hriat takin a kal phei zui nghal bawk. 

Ka rilru kal dik lo thutin vung zet chuan ka kal hlawk hlawk a, buidling kawt ka thlen rualin ka pasal Car chungah a Coat chu ka dah tawp a, Taxi lo tlan lai chu phar dingin ka hawsan ta vang vang. Kan in chhunga ka pen luh hnu rei lovah ka nu chuan min lo bia a, ka pasal awmna min zawh bakah kan haw rual loh chhan min zawt tel bawk a, kei chuan tih tur dang a la neih avanga ka hawsan tâk thuin ka lo chhang ve zaih. 

Kan nupa room chhunga ka luh chuan engmah ti lovin khumah ka ṭhu ngawi ran a, ka hlim rei hi a rem ve lo tak tak a ni ang ka ti hial a ni. A kâ ngeiin ngaihzawng a neih lo thu a sawi tawh a, sawi chhuah leh pawh a duh tawh lo va, kei ngei paw'n amaha rinna nghat pum hlumin a thu sawi zawng zawngte chu ka awih sak a, mahse ka pasal leh a hnuaia hnathawk hmeichhia chu inngaizawng ang chiahin ka la hmu deuh tlat a ni. 

Hmuh loh der ka tum a, hai der ka tum a, rin loh ka tum bawk a, ka thil hmuh leh hriat te chu a tak a ni lo tiin ka rilru aṭanga paih bo vang vang ka tum ṭhin, mahse a har ve êm a ni. Kawngka inkhar ri khepah chuan ka hawi chhuak a, ka pasal chu ka lamah a rawn kal a, a hmel chu a ṭi deuh duiin ka hria, ka hriat sual ngei ka ring. 

"Hna thil a nia" tih chauh chu a sawi a, ka bulah ngawi rengin a rawn ṭhu thla a, a thu sawi chu awih tur nge awih loh tur pawh ka hre rih lo, ani chuan inṭhen a duh ngawih ngawih a, thinrim taka ka awm te chu a duh zawk ngei ang. 

"A nih ka ring" ka lo ti tham chhal a, ka aw chhuah dan dik loh lutuk vang pawh a ni maithei rang zet hian ka lam a rawn hawi vut a, kei ve thung chuan bathroom kawngka lam ka hawi lui ngar ngar a, kha hmeichhia kha ka thik tih hre vek chunga a be hrang thei te kha min tina tu chu a ni. 

"Ka inbual dawn" pangngai zet hian a rawn ti leh mai a, min be tawh rih lo mah se pawi tihna ka nei lo, a din hnu pawh chuan kal sawn ta mai lovin min en leh vawng vawng a, eng tak hria ni maw!

"Kal ta che, va inbual rawh, i thawmhnaw hak tur ka lo phawrh ang" ngawi renga min en chhuk run lai chuan keimah zawkin ka ti chhuak ta ringawt a, siam ṭha tur ka nih laia ka thinrim khum ringawt chu âtthlak ka ti thar hle.

"Kal rawh" a la chet sawn miah loh avangin thluk deuh duai chuan ka ti leh tawp a, a lam hawi chhovin ka nui lui sak a, ka nuih a za pawh a ni hran lo, bathroom-ah chuan lut bo rih daih se ka duh zawk a ni. 

"I nawm loh chuan damdawi ei ang che, dam loh ai chuan a ṭha zawk" min ngaihtuah ve ni awm tak hian a rawn ti sup a, a rilru dik tak ni se chu ka lawm ngawt ang, mahse ka lan dan dik loh vang leh nichin maia a hnuaia hnathawk nen an awm dan ka hmuh vek vanga inthlahrung a ni tih chiang takin ka hria. 

Min biakna chu chhan pawh ka tum chuang lo, ani pawh kal sawnin a thawmhnawte chu a phelh mial mial a, ka hmaah tak chuan a ding a, keiin ka lo en tlawk tlawk thung. Boxer nen chauha a din hnu chuan ka lam a rawn hawi a, hawi sawn rang tak ka ni. Mahni pasal te hmaah zak takin ka awm chu a ni si a, a âtthlak ka ti ngawih ngawih. Che sawk sawkin chhuata a thawmhnaw let phungte chu ka chhar a, ani pawh rei min en lovin bathroom-ah chuan a lut ve leh mai bawk. 

A thawmhnaw chu bal bawmah ka vawm lut a, a inbual zawha a thawmhnaw hak tur ka lak chhuah sak lai te chuan ka la dik thei lo. Dik tak chuan ka rilruah beidawn tumna a rawn lang lian em em a, ka pasal chu ṭhen ta ila a fuh mai zawk ang em tih te ka ngaihtuah a ni. Ka ṭhen a nih chuan ka let tawh dawn lo chiang a, kan inṭhen a nih ngat chuan eng ang paw'n min koh kir tum mah se ka let tawh dawn lo a ni. 

A tel lova nun chu harsa ka ti dawn hle tih pawh ka hria, thla emaw kum eng emaw zah chhung chu ka pangngai loh phah ngei bawk ang, chumi ka hriat chian êm avanga ṭhen harsa ti em em pawh ka ni. Inṭhen ta ila ka hlim ka ring chuang lo, chuti ang bawkin ani pawh a hlim chuang lo vang, kumkhuain kan lungngai ve ve ang ka ring.

Zanriah ei lai te chuan ni dang ka pha lo hle a, ṭawng châkna pawh ka nei mang lo a ni. Ka nu chuan min en hrek hrek a, ka awm dan chu a chik hle tih pawh ka hria, kan haw lama ka thil hmuh leh tawn khan min tichau zo a ni ber. Chaw kan ei kham chuan kan in lama va len phei ka tum rilru deuh a, mahse ka leng leh ta lo. 

Room-ah awm ringawt dawn ila ka pasal nen kan ni leh tlawng ang a, zanin na nâ na chu biak pawh ka peih lo hrim hrim a ni. Ka nu leh pate an len chhuah phei chuan nuam lo ka ti zual a, ka pasal chu ka huat vang pawh a ni em em lo. TV chu enin sitting room-ah keimah chauhin ka ṭhu ngawi reng a, ka pasal erawh kan nupa room lamah hna thil a khawih thung. 

TV ka'n en ta chu ka en khât zia ka hre chhuak a, a awm ve tho mai. Tun laiah chuan TV pawh hian hlutna a nei lutuk tawh lo niin a lang, phone kan nei deuh fur tawh a, kan nulat ve lai leh ka hun tawn mek chu inang lo tak a ni. Kan hun lai te kha chuan phone awm tawh tho mah se TV khan hlutna a la nei sâng em em a, Vai film kha hmuhnawm ka ti thei ber zel. Chutia ka TV en pawh ngaihsak lova thil dang ka lo ngaihtuah daih lai chuan

"Eng nge i ngaihtuah?" tiin mipa aw hi a rawn awm a, ka pasal aw ngei a ni tih pawh ka hria, a lam ka hawi chhoh rualin ka bul hnaih takah a rawn ṭhu a, a zawhna pawh chhang chuang lovin ka lo khan nghal chial bawk.

"I rilru a na em ni?" a rawn ti leh sup a, a hmel awm dan tur chu ka suangtuah chhin vel a, min ngaihtuah hmel a pu ngei ang, mahse chu chu a tak tak ni lovin lemchanna mai a ni tih ka hria, chuvanga a lam pawh hawi chho duh rih lo ka ni.

"Aruatte" a rawn ṭawng leh rual chuan thawk ka la vang vang a, ka bula Remote chu lain channel dang ka hmet chhuak a, Star Movies-ah chuan Titanic film hi a lo chhuak mek a, ka en châk vang em em pawh ni lovin ka hmet sawn duh ta lo. 

"Ni lo, min be tawh rih lo teh PC, zanin chu ka ṭawng châk hlawl lo a ni" ka khabe chawia a lam min hawi tir rualin ka ti chhuak ta nge nge a, a hmela lungngaihna thuk tak awm chu ka hmuh sual leh bawk a nih ka ring. 

Ka ngenna chu a hrethiam ve te pawh a ni ang ngawi rengin TV chu kan en dun a, kan film en chu lawng chhiat hma a lo la ni a, a changtupa Jack-a leh Rose-i te inhriat ṭan tirh lai vel a ni a, ka rin aiin ka en tui daih mai. Vawi tam ka en tawh ngei a, Mizo ṭawnga an lehlin hma paw'n ka en vek tawh a, mahse zanin chu ka en dan a dang tlat a ni. 

One Break Movie a nih avangin fakna pawh a awm khât hle a, rei lovah vur tlang an sut lai vel chu a rawn thleng a, Jack-a leh Rosie-i te dinhmunah chuan ka inchan a, ka awt ngawih ngawih a ni. Anni pahnih chu inhmangaih em em mah se thihna avangin an inṭhen a ngai a, keini erawh la dam ve ve mah ila inṭhen kan hnaih em em thung si. 

Dar ri teng teng chuan min tiharh a, ka mit ka men chuan varṭian a lo ni leh reng tawh a, TV pawh a lo in off fel thlap tawh bawk. Min tiharh tu dar ri chu ṭawngṭai inkhawm dar ngei a ni a, thawh ka hai teuh hle mai. Tuk dangah chuan dar rik hmain ka harh ziah ṭhin kha a ni si a, tukin erawh eng nge a chhan pawh ka hre lo, ka mu nghet ang reng hle a ni. 

Ka pasal chu min kuah chung hian a lo la muhil a, a thaw ri sêk sek a, ṭhutthlenga mut dun chu a nuam ka ti phian leh nghal. Nizan te khan ka nute an lo haw awm ngei si a, keini lah chu kan lo muhil daih a nih hmel. Ka nu leh pate paw'n mak an ti ve ngawt ang ka ring, kan mutna lah chu a ualau ang reng bawk si. 

Kan thil sin chu pawt kauin ka tho ṭhem ṭhem a, ka pasal chu a rawn harh chiang khawp mai. Phawk hra hian min en a, a hmel chu hlauhthawnain a khat ni berin ka hria. A harh tawh tho tihna rilru pu chungin ka tho chhuak a, ani chuan min lo en reng a, ka lo nuih ringawt thung. 

Zingkar a ni a, biakin awmzia a neih ka rin loh avangin ka be lo law law a, choka lama ka phei hnu rei lovah a rawn lut ve leh hlawl a, tun lai chu zingkar lamah hian a awm dan hi a mak thei tawp, ka hrethiam bik lo ṭhin. Thingpui tur tui ka chhuang a, a so rualin ka siam sak nghal mial mial a, kei chuan in ka tum lo. Ka in a nih chuan hun a lo kal leh duai hman tawh emaw kha a ni ang a, ṭawngṭai inkhawm chu ka tlai ang tih ka hlau zawk a ni. 

A thingpui in lai chuan ka kalsan a, mahse eng nge a hriat, min rawn zui zel a nih chu! T Shirt leh Paijama nen deuh tlawng a awm bawk si a, pawn boruak chu vawt a tih hmel loh kher mai. Biak in lam pana ka kal lai chuan ka ding thut a, a kutah chuan ka va vuan a, ka rualin a kal ve duh a nih ka ring ta. 

"Engati nge? I lo lut dawn lo em ni?" biak in compound kan luh tur chiah chu a ding tlat a, ṭang ru taka ka pawh paw'n a che sawn eih lo, hamhaih deuhin ka en a, ṭawngṭai inkhawmnaah a rawn kal ve duh emaw ka ti a, a duh leh chiah lo a ni ang. 

"Hetah hian ka lo nghak ang che" a tih chuan a hma ai zawngin mak ka tihna a zual a, insiam ṭha vatin ka nuih sen sen a, zingkar aṭanga mood fuh loh ai thlawt chuan kan nupa awm dan chu lungawi thlak hliah hliah tak a ni. 

Kan ṭawngṭai lai chuan Pathian hnenah lawm thu ka sawi mawlh mawlh a, a thil tih theihzia leh a ropuizia chu ka pasal awm danah a lang chiang em em a, ka lawm em avangin ka ṭawngṭai lai chuan ka ṭap hial bawk. Biak in aṭanga kan chhuah sap sap chuan ka pasal hmel chu ka hmu nghal a, a kekawr ipte zen ve vein van lam a lo thlir voh vôh a, min hmuh chuan a hahdam hmel hle leh nghal. 

Nimin lamah kan boruak ṭha teh chiam lo mah se tukin chu a tir aṭang a fuh nghal em em a, vawiin zet zawng ni nuam tak ka hman ka ring. In kan thlen hnu chuan muangchangin ei rawng ka bawl a, chawhmeh siam bang a lo awm deuh nual avangin siam thar ka nei lutuk lo. Ka pasal pawh ka bul hnaihah a la awm reng a, a ṭawng lo va, mahse chu lek pawh chu nuam ka ti em em tho. 

Tlangval pakhat hian Vanglaini chanchinbu hi a rawn dah a, ka pasal chuan lo lak sakin a chhiar zui nghal a, a in turin thingpui chu ka siam leh bawk. Tukṭhuan kan ei laiin ka nu chuan nizana min hmuh dan a rawn sawi chhuak a, a lawmzia te a sawi luam a, ka pasalin engah mah a ngaih loh laiin kei erawh ka lo lai vel a nih chu! 

Thla thar kan chuankai leh meuh chuan ka pasal pawh danglam ve tawh tak a ni; chu chuan hlimna nasa tak min pe bawk. Kan fapa kan chan kum lêtin a danglam a, mahse a hma chu la pha lo tak a ni. Ka nu leh pa paw'n chaw ei laiin an zilh tawh ngai lo va, kei paw'n ka zilh tawh ngai hek lo. A hna lamah erawh a buai zual em em a, rawn haw tlai chang pawh a ngah ṭhin mai. 

Vawk vulh thar an tam bawk si a, endik leh Meeting neih neuh neuh a lo tam ve leh zel bawk nen kei paw'n ka hrethiam khawp. Lo haw tlai tawh lo se chu ka duh ngei a, mahse hna lam thil a nih miau avangin ka hrilh duh ngai lo thung. Taxi-in Saidingi te in lamah ka phei a, leng tura min sawm ngawrh êm avanga len tum ka ni bawk. Tun lai phei chu ka leng chhuak tam a, a bik takin ka nau Saidingi te inah chuan ka chuangkai hnem a, nu Chawii leh pa Zuala lakah pawh ka inthlahrung ve reng. 

Ka len phei apiang hian Scooty khalh min zirtir ziah a, tunah chuan kei pawh Scooty khalh ka thiam ve der tawh. Ka pasal hrilh miah lovin Scooty chu ka tuak tlauh tlauh a, mahse ka pasal hlawh aṭang bak ka tuak thei lo. Hna neiin thawh chhuah te chu nei ila inthlahrun pawh a zia deuh ang, ka pasal hnen aṭanga ka pawisa dawn ṭhin erawh ka lungawi tawk em em tho. 

"En teh maw ka u, hrilh loh che chu ka duh viau a, mahse ka u i ni miau a, i hlim hmel hmuh hi nuam ka tih rualin u PC-a thlazar hnuai aṭang hian zalen tawh la ka duh" Saidingi chuan a rawn ti hlawl a, a hmaa kan titina thupui nen chuan inperhsan tak a ni.

"Hmanni khan u PC-a nen kan inhmu a, hmeichhe pakhat nen hian an lo chhuak dun a, amah paw'n min rawn hmu reng. Ka ngei bawk si a, ka zak bawk si a, ka khawngaih bawk si che a, biak enah pawh ka en lo, ka kalsan hmak" a rawn tih zawm leh nghal a, mak ka ti viau dawn a, ka ti leh ta lo. 

"I hmeichhe sawi chu a hnuaia hnathawk kha a ni ngei ang, kei paw'n a hma chuan an inngaizawng emaw ka ti ve tho alawm, mahse a lo ni lo nasa mai" nui deuh hak hak pah chuan ka ti a, ka nuih erawh a za em em lo. 

"Ngaihzawng a nei chiang alawm u PC-a hian, kei chauhin ka hmu reng reng lo" a rawn tih leh tâkah chuan tlêmin ka thutak ta deuh a, tun hnai phei chu kan nupa inkarin hma a sawn em em zawk a, ka pasal chuan ngaihzawng a neih ka ring thei lo a ni. 

"Tu chuan nge hmu ve a? Saiding, ka hlimzia i hre vek a ni lo'm ni? Ka hlim chuan kan nupa inkarah buaina a awm lo tihna a ni mai alawm, ka rilru tina zawngin ṭawng lo zawk teh" ka ti ve ta hmak a, ka ngaihtuah chet chet paw'n ka nau sawi ang chuan ka pasal chu a awm ka la ring chuang lo. 

"Ka thei lo, ka hrilh ngei che a ngai. Isaac-a paw'n vawi hnih lai a hmu tawh, zan lamah leh nghal, zanah a rawn haw ṭhin em? Min chhang teh ka u, zanriah ei lova rawn haw a nei ṭhin em?" a tih chuan ka khawng deuh âwt a, ka nau pasal Isaac-a leh zelin a hmuh thu ka hriat meuh chuan ka hlauthawng ta hle.

"Aw" tih chauh chu ka kâ aṭang a chhuak a, ka ngaihtuahnaah ka pasal hlir a awm a, chuti ang khawpa ka nau leh a pasalin an hmuh dun tawh chuan ngaihzawng a nei a ni ngei ang, kei hi engtin nge ka awm tâk ang? Ka ṭhen tawh mai dawn em ni? Nge ka beidawng tak tak tawh mai dawn zawk?

"Ni lo, a theih loh, ka pasal chuan keimah ang bawkin min hmangaih alawm, ani chuan ngaihzawng min neihsan hauh lo vang" ka ti phelh deuh phang a, ka aw aṭang chuan ka inrin tawk lohzia chiang takin a hriat theih ngei ka ring bawk.

End of Chapter 11