EZEKIEL By Havali Adam (CHAPTER 9)

EZEKIEL

By

Havali Adam

Chapter 9

Hmeichhe hmel changkang zet pakhat hian ka pasal chu a lo be siam siam a, chu nu chu Hotel Regency bula ka hmuh nu kha a ni tih chiang takin ka hre bawk. Kawngka bulah ka ding reng tih pawh hre lovin chu hmeichhia chuan ka pasal chu a be mawlh mawlh a, ka pasal erawh a ngawi reng thung. Thingpui emaw ni hi an in dun a an awm dan vel chuan ka thinlung a tina kher mai. 

Thawm chhuah miah lovin minute 5 chhung vel chu kawngka bulah ka ding a, ka mittui te chu a rawn tling tam tial tial a, mahse ṭah ka tum hauh lo. A tawpa tawpah chuan aw ka thian ri kharh a, ka insum thei tawh ngâng lo a ni. Ka pasal chuan phawk zet hian min rawn en hâw a, a bula hmeichhe ding pawh chu a phu nasa khawp mai. 

Nui lui var varin ka pasal leh a ngaihzawng ni ngei tur dinna lamah chuan ka phei a, ngawi rengin ka bag aṭang ka pasal nen kan ei dun tura ka lo lei ve Momo chu ka phawrh a, anni pahnih pawh chu an ṭawng leh tawh lo hrim hrim. Ka pasal dinna bula dawhkanah chuan ka thil lei chu ka dah a, ka pasal hmel pawh ka en chuang lo. 

"Kan ei turin Momo hi building kawta mi khu ka lo lei nual a, mahse in pahnih hian ei zawk r'u. Tih tur ka nei tih ka hre chhuak thut a, ka va haw leh zawk ang e" tlawm inti ngawih ngawihin ka pasal lam chu ka hawi a, ka thu sawi chu a awih vak lo a ni ang a chal a tichuar nasa hle.

"Titi leh r'u" nui var vara ti sepin kawngka lamah chuan ka kal pawk pawk a, ka pasal bula hmeichhe ding chu kei a nupui hian ka tluk lo tih ka hre chiang thar em em a, ka zak ngawih ngawih a, ani ang hmeichhe hmel changkang tak lakah chuan ka inhmu tê chem chem a ni.

"Pi Aruatte, i va haw hma leh si ve" tia Receptionist-in min biakna pawh chu ka chhang thei tawh lo, hmanhmawh zetin ka kal thuai thuai a, ka rilru na viau mah se mi hmuh laiin ka ṭap palh ang tih ka hlau em em a ni. 

"Aruatte!" ti deuh hmukin building kawt ka thlen thlak rual chuan ka pasal ngeiin min pawt ding a, ka pasal lam chu hawiin muangchang hian a kut chu ka dah thlak sak a, ka mittui te chu a hmu vek tih ka hria, ani lakah em em chuan inthup buai ka tum ta lo law law a ni e.

"Eng lo a nia, lo kal pawh ka tum em em lo. Ka hmu châk thut che a, ka lo kal ve tawp" chiang nial lo zeta ka tih chuan chik zet hian min en ngur a, mahni pasalte hmaah dawt chiangbal ka sawi chu a ni si a, nupui nep leh pasal te tilawm zo lo chu ka va ni chiang êm.

"Dik tak chuan lo kal chhan ka nei a, thla hmasa khan i birthday ka lo theihnghilh daih bawk si a, ka inthiam lo tak tak a ni. Hnuhnawh tawh viau mah se birthday present atan sana ka leisak che a, chumi chu rawn pek che ka tum maw le" keimah bawk chuan ka ti leh nghal a, dawt sawi chu ka thei thlawt lo a ni. 

"Aruatte" a rawn ti deuh sup a, kei chuan mittui nen nui lui var var hian ka bag aṭanga ka phawrh sana chu a kutah ka hmehbel a, ka mit chu ka khap zawk zawk bawk a, tunah chuan ṭah hawm hawm tluka châk ka nei rih lo. 

"Ka va haw ang e, Momo kha tui deuhin in lo ei dawn nia, lo haw tlai lutuk lo la aw" pangngai zeta sawi chhuah ka tum kha a ni a, ka thei lo chiang hle, ka dinna aṭang chuan hmanhmawh takin ka kal sawn thuai thuai a, a tlanin ka tlan a ni ber.

Ka mittui chu ka hru tâwk a, ka ṭah chhuak em em mah se khawlaia ṭah chu ka duh hauh lo a ni. Bus-a ka chuan lai te chuan ka mit ka chhing vang vang a, ka pasal leh a ngaihzawng ka hmuh dun lai te chu ka ngaihtuah chhuak a, ka hmui chu pet nasa tak ka ni. Ka mal chunga bag chu ka hmer ṭawng ṭawng a, ka thil hmuh tur ni miah lo ka hmu chu pawi ka ti ngawih ngawih. Kan in ka thlen hnu chuan ka ṭah chhuak lutuk pawh a bo ve tial tial a, a hun lai a nih tawh loh vangte pawh a ni ang. 

Darkar tam a liam hnu chuan ka nu bulah ar chaw ka pek tur thu sawiin huan lamah ka chhuk a, mahse ar chaw pek reng ka ngaihsak lo thung. Ar chaw chu pe ve teh mah ila ka mumal lo lutuk chu min hmutu awm se mak an ti khawp ang, chuti ang khawpa mumal lova min siamtu chu ka pasal a ni. Ani chuan ngaihzawng min neihsan a, a ngaihzawng neih thu chu ka nu leh pate hrilh erawh ka tum hran lo, a chhan pawh ka pasal chu ka ṭhen dawn lo va, kan nupa inkar tichhe zual thei hrim hrim chu sawi chhuah ka duh lo a ni.

Ka chawna thosi bet vâ chu ka en reng a, ka thisen dâwtin a bet reng tih hre mah ila ben hlum pawh ka tum chuang lo. Nunna nei tawh lo leh chhia leh ṭha hriatna nei lo ang maiin ka ṭhu ngawi reng a, chhun lama ka thil hmuh chuan tlai lam thlengin min la tibuai a ni. Ka na a, ka na vawng vawng a, na ngawih ngawih mah ila ka pasal chu ṭhen ka la duh chuang lo. 

Ka chhungte'n ka thil hmuh ang chu hmu ve ta se chuan a ranga rangin min hruai haw duh nghal ang ka ring, mahse kei erawh chu hmangaihna avangin ka â vek tawh thung. Ka mittui chu a dir zawih zawih a, ni tla tur chu ka en thlir ngawt ngawt bawk a, chu ni tla mek chuan kan hun tawn mek ngaihtuah let ngam loh khawpa hrehawm chu liam pui vawng vawng se ka va han ti tak êm. 

Ka ṭap ri miah lo va, ṭap ri pawh ni ila ar dawkdawlâk thawm chuan a hliah vek tho ang. Darkar 1 chuang fê ar in bula ka ṭhut hnu chuan ni pawh a tla fel titih der a, thawk la hawkin ka ṭhutna aṭang chuan ka tho va, vawiin tlai zet chu ka pasal hmel ka hmu hreh kher mai. Ka hmu a nih chuan rilru nat avangin ka ṭap ngei ang ka ring, mahse ṭap thei ka ni lo, ka pasal nu leh pate'n an hrethiam nghal a ni mai.

In chhunga ka luh chuan choka lamah ka nu'n ei rawng a lo bawl mial mial a, pui turin ka lut duh ta lo. Kan nupa room-ah inbual turin ka lut a, ka pasal chu a lo awm vâng tawh bawk. Min en tih chu ka hre ru reng a, kei chuan a lam hawi duh miah lovin ka thawmhnaw hak tur ka la chhuak malh malh a, a hmel hmu miah lo mah ila ka ṭah chu a chhuak nghal em em ringawt. 

Bathroom lama ka kal lai te chuan min la en reng a, a chhan pawh tlai dang ang ka ni lo tlat. Tlai dangah te chuan hmel hlim sângin ka lo be ṭhin a, mahse tunah chuan ka thei rih ngâng lo a ni. Rei tawk tak bathroom chhungah chuan ka inkhung a, ka inbual rei pawh a ni hran lo, inbual zawh hnuah ka chhuak duh nghal mai lo zawk a ni. 

Room chhungah chuan thawm engmah a awm loh avangin ka pasal chu a chhuak a nih ka ring a, chhuak daih rih mah se pawi tihna ka nei miah lo. Bathroom aṭanga ka chhuah chuan tukverh bula lo ding run ka pasal chu ka hmu thut a, pawn lam hawi lo se chuan kan inen chiang khawp ang. Ka thawm hriaa a rawn chet rualin hmun dang ka melh nghal vat a, chuti ang em ema ka pasal hmel hmuh duh loh chu ka la nei ngai lo. 

"Aruatte" Lotion ka inchulh malh malh laiin ka hnung lam aṭang a rawn ti zawi sup a, ṭawng ring lo hle mah se thawm a tlêm êm avangin min kohna chu ka hre chiang thawkhat hle a, a lam hawi erawh ka la tum lo hrim hrim. 

"I hmuh ang kha a ni lo, ngaihzawng ka nei lo" min kuai her sawk chung hian a rawn ti deuh hrawk a, chiang takin kan inen a, ka rin ang ngeiin ka mittui te chu an lo chhuak a, ka hmai khawih a rawn tum chuan ka lo beng sawn vat bawk. 

"Engati nge ngaihzawng min neihsan? Ka tum nasa asin, nun pangngai i neih leh theih nân hian ka theih tawp ka chhuah asin PC. He lai hi, hei lai tak hi, a na lutuk, ka thinlung hi a na lutuk" ka awm chum pah chuan ka ti phawlh phawlh a, rei lovah ka ṭhu sawp hnawk zui nghal a, ka ṭah avangin ka ṭawng tawp lam phei chu a fiah mang lo. 

"Ngaihzawng ka nei hauh lo" ka dar tawn tawn chelh chunga a rawn tih khauh hmuk pawh chuan ka lu ka lo thing nawk nawk a, zep emaw thup tum mah se chhun lama ka thil hmuh khan ngaihzawng a neihzia chu min hriattir tawh a ni.

"Nei rawh, i duh dûh zat ngaihzawng chu min neihsan rawh, mah se kei leh nang hi kan inṭhen dawng chuang lo. Ka tuar mai ang, hlim taka kan awm dun leh theihna tur a nih phawt chuan eng pawh ka tuar mai ang" ti tuarin chhuat aṭang chuan ka tho zui nghal a, kan nupa room-a awm reng chu ka tan ṭangkaina a awm rih lo a ni. 

Kan thawm chu ka nu'n a lo hria a ni ngei ang room pawn ka thlen chuan min lo en reng a, a hmelah chuan mak tihna hlir a lang bawk. Ṭawng miah lovin chokaah chuan ka lut a, ei rawng bawl tum miah loh khan ei rawng chu ka bawl leh ringawt a, mahse ka nu'n a lo bawl nual tawh avangin bawl tur a tam tawh lo hle. Rei lotê hnuah ka nu ang thawm chu ka hre zui nghal a, ka pasal chu a hau tih pawh ka hria, chungte chuan ka ṭah a tichhuak thar em em a, nutling ni tawh mah ila ka pasalin ngaihzawng a nei tih ka hriatna chuan min tina lutuk tak zet a ni. 

Zanriah kan ei laiin ka nu leh pa chuan ka pasal chu an hauh rawn a, a ngaihzawng neih lai chu ṭhen nghal turin an hrawk mawlh mawlh a, mahse ka pasal chuan ngaihzawng a neih loh thu a sawi tlat thung. Khati khawpa chiang khan ka hmu tawh a, a hmeichhia lah khan a haw lo tih ka hre chiang em em a, chuti ang bawkin ka pasal paw'n a haw bik lo tih ka hria, chuvang chuan anni pahnih chu an inngaizawng tih ka hre bawk. Chaw eina vel ka seng fel hnu chuan room-ah lutin ka thawmhnaw lum lam ka inbel mial mial a, thlasik thla kan chuangkai tawh bawk nen boruak pawh a vawt ang reng hle.

"Ngaihzawng ka nei lo tak tak" chhuak tura ka insiam laiin ka pasal chuan a rawn ti deuh tawl a, tlai lam ai thlawt chuan a ṭawngkam chhuak pawh hriat a nuam ve ta deuh alawm, a ngaihzawngnu nen ka phawk chiang lutuk kha a inthlahrun phah te pawh a ni mahna.

"Ka nute in lamah ka leng phei lawk dawn a nia, ka lo haw har lo vang" a thu sawi hre miah lo ang mai chuan ka ti daih a, ani chuan mit tizim sun hian min lo en chhuk run a, zanin atan chuan kan in lama riah mai pawh pawi ka ti chiah lo. 

"Ngaihzawng ka nei lo LALRUATTLUANG!" kawngka lam ka pan lai chuan a rawn ti vin hrawk a, a lam hawi zawngin min kuai her sawk bawk a, a thinrim zawk tur leh lungawi lo em em zawk tur ka nih laia a lo thinrim ve ringawt chhan chu ka hrethiam pha lo.

"Ngaihzawng chu i nei thei ka tih tawh khâ, i duh dûh zat i nei thei alawm PC, mahse ngaihzawng eng zata tam pawh mei mah la kan inṭhen dawn chuang lo" dam zeta tiin a ban chu ka dar aṭang ka dah thla a, ngawi rengin kan nupa room aṭang chuan ka chhuak zui ta vang vang. 

Kan inah chuan kei leh ka pasal chiah kan awm a, a reh tlawk tlawk khawp mai. Ka nu chu kohhran hmeichhe thil velah chawi ei kham hnu lawk khan a chhuak tawh a, ka pa erawh a chhuah chhan tak ka hre lo. Kan in kawt ka thlen chuan ka hnungah ka pasal chuan min lo zui zel a, eng vanga min lo zui ringawt nge a nih ka hre hauh lo. 

Kan in kawtah Taxi tlan lai changin ka ding vang vang a, ka pasal chuan min thlah tum mah se ka duh hauh lo vang, chumi chu a hria pawh a ni mahna min thlah a tum thu a sawi ri lo hrim hrim. Ka duh phawt chuan Saidingi call-in ka inlam tir thei a, mahse ka call buai duh ta lo law law a ni. Kan nupa chuan inhmel hriat ngai loh ang maiin kan ding ngawi reng a, ngaihtuahna a kal thui duh khawp mai. 

Zan dar 7 leh a chanve vel chiah a la ni a, ka rin ai takin Taxi tlan chu a vang daih. Ka sir lama ding ngawi run ka pasal chuan min en zeuh zeuh tih ka hre reng a, kei erawh hma lam ka en ding ngar ngar a, inbe miah lova awm chu nuam lo viau mah se a nawmna chen a awm tho. 

Kan inbia a nih chuan ka ṭah a chhuak leh nghal emaw te kha a ni ang a, khawlai a ni tawh avangin han ṭah ringawt chu a mawi chiah bawk si lo a ni. Darkar chanve dawn kan in kawta kan din hnu chuan Taxi lo tlan ka hmu a, phar din ka lo tum khawp.

"Ngaihzawng ka nei lo Aruatte" ban vai lauh lauha Taxi lo tlan lai ka phar laiin ka pasal chuan a rawn ti hniam ruih a, a lam chu hawi chho rang tak ka ni, ka rilru na ru reng chu lan chhuahtir duh tawh lovin ka nuih lui zeuh a, kum 10 chuang kan lo chen dun tawh avangin ka nui lui tih a hriat chian hle ka ring. 

"Zanin chu min hrethian mai rawh aw PC, ka rilru ipik lutuk hi tihthawla ka nu leh pate bulah awm ve lawk ka duh a, mahse inṭhen lam ka ngaihtuah miah lo a nia" nui var var chuan ka ti a, ka bula Taxi a lo din rualin ka lut zui nghal a, kan veng lamah ka tlan tir zui nghal bawk.

Ka sei lenna in ngei ka va thlen chuan ka nu leh pate chuan mak an lo ti dun hle a, an beisei lo deuhin ka lang hlawl a ni ngei ang. Ka nu chuan ka tlan emaw a lo ti hman hial a, kei erawh ka lo nui ringawt thung. Thingpui lumin ka nute nen chuan thil chi hrang hrang kan sawi a, kan nupa inkar lam kan la sawi rih miah lo thung. Ka pa chu a ngawi deuh reng a, zan danga ka len ṭhin angin a ṭawng tam lo khawp mai. 

Ka nu chuan Sadingi te lam a be pawp zui nghal a, an hman chuan leng turin a sawm bawk a, nupa chauha awm an nih avangin an khua a har ve thei ngawt ang ka ring. Saidingte chhungkua an rawn thlen chuan kei pawh ka harhvang sawt em em a, ka nau fate chuan ka fapa min hriat chhuahtir ṭhin mah se lungngaiin ka indawm kun duh tawh bik lo a ni. 

Saidingi pasal te hi mi zau tak an ni a, a chang chuan Saidingi pawh len chhuah uar lutuk lo turin ka hrilh ṭhin nghe nghe. Mo nih tawh hi chuan kan nun dan thlak hlawk hi a ngai ṭhin reng a, kan nulat laiin len pharvar nuam ti chi ni mah ila mo kan nih tawh hi chuan kan nulat laia kan nuam tih ṭhin pawh tih chi loh a tam tawh ṭhin. 

"Inbe lawk teh ang" ka pa chuan rawn ti supin room-ah a lut zui nghal a, kei paw'n ngawi rengin ka pa chu ka zui lut a, mi dang erawh naupang nen kan nih nuai avangin an bengchheng khawp a, choka lamah ei tur an siamin ka hria.

"Eng nge nita ka pa?" hmel nelawm zet pu chung hian ka pa chu ka bia a, ani chuan ngawi reng hian min en run a, a lamah kalin ka pa chu ka kuah vawng vawng a, ka kuah tâkah chuan ani paw'n min lo kuah let ve mai bawk.

"I pasal hi ṭhen mai ta che Aruatte" aw dam zet hian ka pa chuan a rawn ti a, rang zeta inla hrangin ka melh chho ral a, a mitah chuan min khawngaihna leh hmangaihna nasa tak ka hmu a, chungte chuan chawp leh chilhin ka ṭah a rawn ti chhuak a, ka mittui te chu a rawn tling rang ang reng hle. 

"Ka ṭhen thei lo ka pa, ka pasal hi ka hmangaih a ni. Ka hmangaih avangin a nungchang hi ka siam ṭha ang a, ka hmangaih avangin a bulah ka awm reng ang a, ka hmangaih avangin a ṭhat chhuah theihna tur a nih phawt chuan engkim tawrh ka huam a ni" ka mittui chu a baw zawih a, ka ṭap chhuak feih feih zui nghal.

"I pasal hian a hmangaih ve tawh lo che alawm ka fanu, heti hian lo haw tlang nghal la, i pasal bulah chuan let tawh lo mai rawh. I fapa thihna avanga i nat dawn teh lûl nen i pasal chuan natna dang a pe leh che a, i pa hian maw i na lai hmel hi hmuh reng har ka ti a ni ka fanu" a rawn tih chuan 

"Ka pa" ka ti ṭuau a, insum karna nei hauh lovin ka ṭap chhuak hawm hawm a, nghet zeta kuah chung chuan a kawr hnung chu ka ṭham tawn tawn a, ka pa min hmangaihna leh thlamuanna ri chuan hmangaihna leh thlamuanna ka mamawhzia min hriat chhuahtir a, mahse ka pasal lak aṭang chuan ka dawng tawh ngai si lo.

"Saw ti ang mi saw a ni dawn tih hria ila chuan pasalah ka neih tir miah lo ang che, i rilru na hmel te, i khawhar hmel te leh i lungngai hmel te ka hmuh hian keimah zawk hi ka inchhir ngawih ngawih asin" tiin ka pa chu a ṭawng mawlh mawlh a, kei erawh uar takin ka lo ṭap thung.

"Haw tawh suh aw, i pasal bulah sawn let tawh suh aw, kan bulah hian lo awm tawh mai rawh" duh tawka ka ṭah hnu chuan a rawn ti leh a, kan pafa chuan kan la inkuah reng a, ka pa rilru chu hrethiam hle mah ila ka pasal chu ṭhen ka la duh lo cheu a ni.

"Ni lo ve ka pa, ka va haw leh zawk ang e. Heta ka awm reng chuan nu Chawii leh pa Zuala paw'n leng rei min ti lutuk palh ang, ka haw phei a hun tawh viau a ni" nui var var hian ka ti a, ka pa chuan ka rilru ipikna leh lungngaina zawng zawng chu a la kiang vek ni maiin ka hria. 

"Engati nge maw i luhlul tlai mai le Aruatte? I pa hian ka ngaihtuah che alawm, ani bulah saw chuan hlimna i hmu thei tawh lo. I rilru a na ang a, a la na zual zel dawn tlata hriatna ka nei a ni" a tih chuan nui chung hian ka lu ka lo thing nang nang a, tunah chuan lungngaihna leh rilru natna te hneha hma chhawn turin tha thar ka nei leh tawh zawk a ni. 

"Nichina ka ṭah vak vak khan ka lungngaihna leh ka rilru natna zawng zawngte kha an bo duak alawm ka pa, nangma'n min thlamuan vang a ni tih pawh chiang takin ka hria. Chuvangin min ngaihtuah em em tawh lo la, keini pawh a rem chuan kan lo leng ziah dawn alawm, a beidawng zawngin thil ngaihtuah suh ka pa" 

"Heti ang tak hian i tuar a chhel ang tih rin ngaihna pawh ka hre lo, i rilru a lo puitling ve tak tak tawh a nih dawn hi! Aw le, a nih chuan i pasal lak tlak loh zet saw a hmaa i pasal ang khan siam leh la, inhmangaih taka in awm dun leh theih nân duhsakna ka hlan a che" 

"Ka lawm e ka pa, ka lawm tak zet a ni. Zanin chu ka rawn leng fuh hle mai a, ka pasal siam ṭha turin ka chak leh ta sawt a ni" nui sen sen hian ka ti a, ka pa pawh chu a lo khi ve suk a, room aṭanga kan chhuah te chuan hlim tak ka ni. 

Thil kan ei lai te chuan ka ṭawng melh melh a, titi ka vawrh char char a, Saidingi phei chuan mak tih hmel zet hian min en leh haw haw ṭhin. Kei ngei pawh hian mak ka ti ve tho, chuti ang em ema ka pangngai leh theih chu ka ring bik reng reng lo, mahse ka awm dan leh ka zia chu hmâna keimah ngei kha ka ni leh tawh tlat a ni. Saidingi fate chu ka pawm a, ka chhaih a, ka infiam pui bawk a, mahni in dik takah zawng hlimna a lo awm nge nge a nih dawn hi! 

Dar 9 leh a chanve velah ka pa nen chuan kan inphur chhuak a, ka haw dawn khan zanin tal riak turin min ti leh hram kha a ni a, mahse kei chuan ka lo hnial tlat thung. Motor-a kan chuan chhung zawng chuan ka ṭawng siam siam a, ani pawh a nui leh hak hak ṭhin a, kan boruak chu nuam ngawih ngawih tak a ni. Kan in kawta kan din rualin lo lut ve turin ka sawm a, ani chuan fiamthu ti tak deuh reuh hian ka pasal hmel a hmuh peih lo thu a rawn sawi a, ka sawm lui duh ta bik lo.

"LALCHHANHIM, va hruai nghal rawh! Zanin hi a riak a nih chuan a lo haw duh tawh lo ngei ang, mawlah pawh hian mawl chin tawk awm" kan nupa room-a ka luh dawn lai takin ka nu aw vin tak chu ka hre nghal a, ka ding chiang hle bawk.

"A lo haw leh tur thu a sawi alawm, hnawt chhuak emaw min ti ringawt suh ka nu, ama duh thu ngeia leng chhuak a ni" ka pasal aw chu a khauh ram hmuk a, a ṭawng zawh rual deuh thawin thil ri sawk a awm a, ka nu chuan a beng a nih ka ring. 

"Heti ang em ema mi nep i nih hi ka lo ring ngai lo asin PC, nang lêtin Aruattei hian in fapa thihna kha a tuar thiam lo zawk ngei ang. A hmangaih êm che avangin a inti chak lui hram hram a, a hlim lui hram hram a, Aruattei hmai hi nangmah vang hian ka zah tawh lutuk" ka nu aw chu a zawi sawt hle a, a ṭap tih pawh ka hre thei.

"Chutah nang lah chuan ngaihzawng i la neihsan zui a, engati nge Aruattei pawh hi a mawl em em le? Kei chuan nang ang pasal nep lutuk hi chhuahsan vang vang che mah se demna pakhatmah ka nei lo, a chhan chu nang hian chhuak lo thei lovin i siam tlat a ni" ka nu bawk chuan a ti leh a, bang nghengin ka ding ngawi reng a, ka mittui te chu an rawn hnai leh ta kûarh mai.

"Ngaihzawng ka neih loh thu hi vawi engzah nge ka sawi ngai dawn ka nu, a tawp nân ka sawi leh ang. Kei hian ngaihzawng ka nei lo va, in awih emaw awih lo emaw ka sawi tawh lo vang" ka pasal chuan a ti ve leh nghut a, room kawngka chu a rawn inhawng a, ka pasal nen chuan kan inmelh chiang ta hle. 

"Lo kal teh" ti deuh hmukin ka banah chuan min kai dawr dawr a, choka lamah chuan min luhpui a, thinrim hmel tak hian min melh chhuk run a, ka mittui rawn tling te chu a tlak mai hlauin ka khap let sawk sawk a, ka pasal nen chuan kan indin hnaih mah mah a ni.

"Hre reng rawh LALRUATTLUANG, ngaihzawng ka neihsan hauh lo che. I duh chuan ka thu sawi hi i awih thei a, i awih lo thei bawk. Tun bak hi chu ka sawi leh tawh lo vang, nang paw'n sawi chhuakin min zawt tawh ngai suh ang che" a rawn tih chuan

"Ka ring che alawm PC, ka ring che. Ka pasal i ni a, ngaihzawng min neihsan duh tur khawpa mawl i ni lo va, i ni ngai lo bawk ang. Ka hmuh tirh che u kha chuan ka rilru a na lutuk a, ka ngaituahna kha a kal kawi lo thei lo a ni" a bianga dawm pah chuan ka lo ti daih a, mak a tih hmel khawp. 

"Ngaihzawng i nei lo va, chuvang chuan hmân ang khan nupa hlim tak leh inhmangaih tak ni leh tawh ang aw? Tun tut tutah chuan harsa i la ti dawn tih ka hria, mahse engkim ka kutah dah rawh. Ka hmangaih che a, kei hian nang hi ka siam ṭha dawn che a ni" tih leh dingdihlip âka fawh chu ka rual a, rei pawh ka fawp lo.

End of Chapter 9