EZEKIEL By Havali Adam (CHAPTER 8)

EZEKIEL

By

Havali Adam

Chapter 8

"Haw mai rawh Aruatte, kei hian ka tihlim zo tawh chuang lo vang che" a rawn tih leh chuan rang zetin ka ding nghal a, ka ṭah reng a chhuak tawh rih lo, ka mak tihna chuan ka rilru zawng zawng a luah khat vek a ni. 

"Eng thu maw i sawi zawh chiah kha!? Kei nen hian inṭhen i duh tihna maw!? Ni lo, kei hian nang hi ka ṭhen ngai lo vang che, kan in lamah haw ka duh bawk lo, haw turin min nawr lui mah la ka haw chuang lo vang" ka ti hlawk hlawk a, ka ṭawng zawi lo khawp mai.

"Haw rawh, i tan haw a ṭha zawk a ni. A fapa thattu bulah hian i awm rei thei dawn chuang lo, chuvang chuan in in lamah haw la a ṭha ang" min en chunga a tih chuan insum hman lovin a hmaiah ka beng sawk a, ani chuan na a tih hmel teh chiam lo.

"I â zo ta em ni LALCHHANHIM? Pathian hmaah dam chhunga cheng dun turin kan intiam tih te kha i hre tawh miah lo em ni? Engati nge heti ang hian i awm tlat? Engati nge kei hi min ngaihtuah ve miah loh?" ka ti phiar phiar a, min chhang let lo hrim hrim.

"Kan fapa thih aṭang thla tam a liam tawh, kei ang hian hmasawn luih tum ve ta che, mipa i ni lo'm ni? Awm hran te kha sawi chhuah i zak miah lo em ni?" thinrim tak chuan ka tih zawm leh nghal a, ka ṭawngkam chu a mawi lo tih hre mah ila ka ngaihtuah si se hman tawh lo a ni. 

"In in lamah haw mai zawk teh, i mualpho theihna turin chet ka duh miah lo, keini pahnih hi ṭha taka kan inṭhen a fuh ber a ni" a thu sawi mal tin chuan min ṭhawng lutuk a, chhan let mai dan tur pawh ka hre lawk lo nghe nghe. 

"Nang hian ngaihzawng i nei tak tak em ni LALCHHANHIM? Nang hian ngaihzawng i nei chiang ti raw? I ngaihzawng nu chuan ka neih loh eng nge a neih bik? Eng nge ka tluk lohna? Sawi rawh LALCHHANHIM, nupa nunah ka ti lawm tawk lo che em ni?" ka ti leh tuar tuar a, ka thawmhnaw chu ka phelh nghal sawk sawk bawk.

"I thil tih tum kha a ṭul chhe tê them lo LALRUATTLUANG, tawp nghal vat rawh" a rawn ti vin ve ta hrawk a, mahse kei chuan tawp ka tum der lo, saruak vekin ka pasal hmaah chuan ka ding a, ka chet dan engkim chuan a tihamhaih ve hle a ni tih a hriat hle.

"LALRUATTLUANG!" vin zeta tiin a kap zawna ka ṭhingṭhit rual chuan ka kut pahnih chu na zet hian a hmer a, ka theih tawpa chhuahin min vawnna aṭang chuan ka tal chhuak a, a kawnghren phelh sakin a kekawr zipper ka hawng a, zah reng ka hre tawh lo. 

"LALRUATTLUANG, heti ang hian awm suh ka ti che a ni lo'm ni?" tih leh khuma min theh thal lawp chu a rual nghal a, thawh leh pawh ka tum tawh chuang lo, ruak veka mu tawm chawihin ka ṭap khur ngawt ngawt a, ka pasal nena inṭhen ka hlauh luatah nawhchizuar ang maiin ka khawsa a ni ber.

"Khawngaih takin inṭhen lam emaw awm hran lam sawi tawh suh PC, kan fapa Ezekiel-a vang tal paw'n sawi tawh suh. A ni chuan kan awm dan engkim hi van aṭang a hmu vek dawn asin, khawngaihin sawi tawh suh aw" ṭap hliam hliam chung chuan ka ti a, ka pasal chu ṭhen ka hlau ngawih ngawih a ni. 

"In ha ṭha thuai la, khati anga i awm lai kha ka nu leh pate'n an hmuh ka duh miah lo a nia, ka thu sawi chu i hria em?" khauh zet hian a rawn ti chhum bung hmuk a, a lam ka hawi chuan a kekawr a lo siamṭha vel mek bawk.

"Fa neih leh tum ang PC, kan thei tih ka chiang a ni. Keini hi kan beidawng thei lo, fa kan neih leh chuan kan inkar pawh hi a ṭha leh mai ang, a hma ang chiah khan nang paw'n min hmangaih leh theih phah bawk ang" ṭhu chhuakin ka ti mawlh mawlh a, ka nu min hrilh ang tak tak khan chet ka lak hmasak a ngai tawhin ka hria.

"Fa dang kan nei thei tawh lo tih chu kum 10 chhung khan i hriat chian viau ka lo ring asin, â lutuk teh suh Aruatte" ti hmukin room aṭanga chhuah chu a tum a, mahse kei chuan ka lo chelh ding vat vat a, a inrin hmain ka fawp zui ta mial mial. 

"LALRUATTLUANG, êngmah hi i hrethiam lo em ni?" ti vin hrawkin min nam hla dâwr a, khum lu lama bangah chuan ka chhip ka tauh ri chawrh a, min nam na ang reng bawk nen ka chhip chu ka khawih nghal vat a, ka rin ang chiahin a lo thi tak tak! 

"Ka ṭhen dawn chuang lo che, keini hi kan inṭhen dawn lo" kawngka lam a pan lai chuan ka ti leh tuar tuar a, hawi pawh rawn hawi let lo hian kan nupa room chu a chhuahsan a, ka ṭah pawh a chhuak tawh lo, ka hlauthawngin ka thin a rim em em zawk a ni. 

"Engati vak vak nge Aruatte? In inhau em ni? Khawiah nge PC-a kha a kal dawn?" room aṭanga ka chhuah rualin ka nu chuan a rawn ti nghal a, thawmhnaw ka inbel vek tawh a, ka nu leh pate chuan ka awm dan chu hre ve ngat se chuan min khawngaih hle ka ring. 

"Aw hau e" tih chiahin ka lo chhang a, ka pasal chu a kal tumna ka hre bik miah lo, a ngaihzawng bulah a kal dawn te pawh a ni ang, mahse ngaihzawng a nei tak tak dawn em ni? Ni lo, kei hian ama'n a sawi ngei a nih phawt loh chuan ngaihzawng a neih ka ring tur a ni lo. 

"A va han mak zo zai ta ve le, lo haw teh se LALCHHANHIMA chu, tun ṭum chu ka en liam mai mai tawh lo vang" ka pa chuan thinrim tak hian a rawn ti bul hmuk a, a hmel aṭang chuan a thin a rim hmel tak tak hle.

Ei rawng ka lo la bawl reng reng lo tih hre chhuak thutin choka lamah ka che nghal zung zung a, ka nu leh pa lakah pawh chuan ka inthlahrung khawp mai. Kan nupa room-a ka pasal nen kan awm dan leh kan inbiak dan te chu hria se chuan an thinrim zual dawn tih ka hria, mahse kei chuan sawi chhuah ka tum der lo. Chaw chhumin chawhmeh ka siam nghal zung zung a, ka nu paw'n min rawn pui ve tho va, ka pa erawh chuan phone a hmang deuh char char thung. 

Tlai dar 5 bawr velah chaw ei kan peih titih chu a ni nghal mai a, ka rin ai takin ei rawng chu ka bawl zo hma. Ka pasal chu nu Chawii leh pa Zuala chuan inkar thlakin biak pawh an tum sek a, chhanna erawh an dawng ngai chuang lo. Chuti anga ka pasal a awm ziah chu ka ning ru ve reng tawh, naupang pawh a ni tawh lo va, in chhuahsan zawnga a awm ziah chu ṭha ka ti lo hle a ni. Ka nu leh pa'n biak pawh tum ve chhin tura min tih chuan ka pasal chu beisei sang em em lovin ka call ve nghal mai a, ka beisei loh takin ka phone call chu a lo pick up ve teh mial.

"Lo haw rawh, chaw kan ei tawh dawn, nangmah chiah kan nghak tawh che" ka ti ringawt a, chu bak thu dang han sawi leh mai tur pawh ka hre tawh em em bik chuang lo, a ngawih reng avang chuan ka off ta daih a, a rawn haw ve mai chu ka ring. 

Ka lu chu a na ngut ngut a, a nat thu sawi lah chu thil tih chi a ni bawk si lo. Ka nute hmuh lo laiin ka khawih zeuh zeuh a, thisen khar chu ka samah a lo bet nual hlawm a, mahse langsar lutuk a ni hran lo vang ka ring. Kan nupa room-ah lutin ka intleuh thuak thuak a, ka lu pawh ka su a, ka suk zawh chuan khawih ṭhat ngam loh khawpin a rawn na zual thung. 

Dim tea ka khawih ringawt paw'n ka chhip vir bul chu a kak tih ka hre thei, chuvanga na em em pawh chu a ni. Damdawi hnawih tur ka zawn lahin Detol deuh chiah ka hmu a, lei tura ka chhuak a nih chuan an hre chhuak dawn bawk si. 

Detol tih loh damdawi dang hnawih miah lovin ka lu na chu ka tuar ta tlawk tlawk a, ka chhungte lam pawh va hrilh ka tum chuang lo. Ka pasal chu khaw thim thet thet awm velah a rawn haw a, ka pa chuan a en run a, mahse eng thu mah a la sawi chhuak lo. Ka nu erawh a ṭawng nasa hman hle a, ka pasal chu ṭawngthei lo ang maiin a awm leh tlat tawh thung. 

"LALCHHANHIM, i awm dan hi siam ṭha thuai ang che, ka dawh rei tawh mah mah che a ni" chaw kan ei laiin ka pa chuan a ti khauh fak a, ka pasal chuan thlenga chaw chu a ei mial mial a, vawiin tlai zet zawng chawhmeh pawh ka suah ṭha peih lo. 

"Aruattei hi an in lamah haw phei rawh se" a nu leh pa hmaah chuti ang thu chu a sawi ngam pawh ka lo ring lo va, mahse ka pasal chuan zamna emaw pawi tihna nei miah lo hmel pu chungin a sawi a nih chu! 

"LALCHHANHIM!" tiin ka pa chu a ṭhutna aṭang a tho nghal hluai a, a chaw ei pawh a ngaihsak tawh lo, kei erawh ka lo kun ngur a, ka nu paw'n ka pasal chu mak a ti ve hle a, a mak ti lutuk chu ṭawng mai nachang pawh a hre lo hial zawk a ni. 

"Kei hian inṭhen ka duh a ni" ka pasalin a tih leh rualin ka pa chuan a beng hawi sawk a, mipa kutthlak a ni bawk nen a na thawkhat khawp ang, ka pasal ve thung erawh chuan luhlul zet hian chaw a bar leh mial mial a, chaw ei châkna reng ka nei tawh lo.

"Min hrethiam mai teh u ka nu ka pa, ka nuam lo êm mai" tih leh ka ṭhutna aṭanga thawh chu ka rual nghal a, thleng chu Glass tile-ah dahin ka kut ka sil sawk sawk a, dik tak chuan ka pasal thu sawiin ka rilru a tih nat mai bakah ka lu chu a na tawh tak zet a ni. 

"Kal sawn rih suh Aruatte" choka ka chhuahsan dawn lai takin ka pa chuan a rawn ti a, mahse ka ding duh ta chuang lo, ka pa chuan zah lo viau ang paw'n min ngai mah se pawi ka ti lo, ka chhip na lutuk chu an hria ang tih ka hlau zawk tlat. 

Kan room-a ka luh rualin damdawi kan dah ṭhinna lamah ka kal phei nghal rawk rawk a, damdawi ei chi hmawmin tui te chu ka in khawlh khawlh a, tlai lam lêtin ka lu chu a rawn na zawk zawk tawh bawk. Khumah ka mu chiah chu ka ṭhen nghal chawi chawi a, ka mu zangthal palh tih hriain ka bawkkhup nghal thuai a, awm a va'n nuam lo tehreng em.  

Chutia na ti em ema ka awm lai chuan ka phone a lo ri ral ral a, ka nau Saidingi hnen aṭang tih pawh ka hria, ka biak theih mai kha ka ring a, mahse phone ka pick up rualin ka chau zual a, a ṭawng pawh engmah ka hre ṭha thei lo. Kut lum vung vungin ka kut chu a hum a, chu chu ka harh ruala ka thil hriat hmasa ber a ni. 

Ka ngaihtuahna te'n ngai an rawn awh chhoh leh hnu chuan chauh luatah nikhaw hre lovin ka awm ngei tih ka hrethiam nghal mai a, meng miah lo mah ila ka kut humtu chu ka pasal PC Lalchhanhima a ni tih ka hre chiang em em. Ka meng riai riai a, min lo en rengtu ka pasal hmel ka hmuh rual chuan ka ṭhen sak a, khum bulah chuan Saidingi leh ka nu leh pate pawh an lo ding ṭhap bawk. Ka kut lehlamin ka kut hum mektu ka pasal kut chu ka hum hnan a, tun ṭum chu hmâna ka pasal ang chiah chiah khan ka hmu tlat a ni. 

"Engtin nge i luah hian hliam i neih theih ka u? I tlu sual em ni? Doctor khan sawi lo se chu tûma'n kan hre kher lo vang, zep nei miah lovin min han hrilh teh ka u" Saidingi chuan a rawn ti a, ka lua hliam ka neih chhan dik tak chu sawi ka tum lo nasa a ni.

"LALCHHANHIMA hian kut a thlak che em? Han sawi teh Aruatte, ka fapa lak tlak loh zet hian kut a thlak che em?" ṭawng ka tum lai takin ka pa chuan a rawn ti vin hrawk a, kei chuan na ka nei tih hre miah lo hian ka lu ka lo thing vat thung a, ka lu chu a rawn na zawk zawk bawk. 

"Amah vanga ka lu hi na a ni lo, khum ka siam ṭhat laiin ka ke ka chhep sual palh a, khum tlangah hian ka tauh palh alawm maw le" aw dam taka ka tih chuan Sadingi chu a lo meng nûr nang a, a hmel aṭang chuan ka thu sawi chu  dawt a nih a rin hmel khawp.

"Thu dik tak sawi rawh ka u, i sawi lo a nih chuan ka pa ka hrilh vek dawn a nia, ani chuan u PC-a bula i awm reng hi a phal rei ka ring lo. In awm dan zawng zawng hi a hre vek; in inbiak ngai loh thu thlengin" Saidingi chu kan en nghal ṭhap a, mak ti hlawm tak kan ni. 

"Ka pa sawn a ngaihtuah teh mai che a nia ka u, u PC-a'n kut a thlak che tih hi hre phei se chu zanin la la hian a hruai haw duh nghal ang che ka ring" a ṭawng laklawh laiin ka lo khap vat a, room chhunga awm zingah chuan a naupang ber a, a ṭawng mawi lo mah mah ṭep zawk a ni. 

"Duh tawk teh Saiding, min ngaihtuah tih chu ka hria alawm, mahse ka pasal hian kut min thlak ngai reng reng hleinem" zaidam aw zet hian ka lo ti vat a, ka ngaihah chuan ka pasalin kut min thlak avanga ka lu chu na a ni lo miau a ni.

"Dawt sawi tawh suh ka u, hmangaih viau mah la a dik lohnaah chuan u PC-a hi ṭan phet tum bawk suh. Khum siam ṭhat laia ke chheh sual palh vang mai maiin khati ang khawpa na kha i luah hliam a awm thei lo, nu Chawii leh pa Zuala pawh hian an hrethiam vek" ti vin tuarin room aṭang chuan a kal chhuak a, thawk ka la vang vang ringawt. 

"I nau sawi kha a dik chiah Aruatte, dawt muhlum i sawi a ni. Engti ang chiahin nge LALCHHANHIMA hian kut a lo thlak che? Sawi rawh le, a harh chhuahna tur a nih dawn phawt chuan kut ka thlak hreh teuh hleinem" ti khauh hmukin ka pa chuan a kawr ban chu a thlep mial mial a, kan boruak chu a va'n buai zual ta êm. 

"Ni lo ka pa, chuti angin PC-a hian kut min thlak lo tak tak alawm, khawngaihin he thil hi chu kan nupa chinfel turah min dahsak rawh u ka nu ka pa. Nangni leh zel in lo tel chuan kan buai zual ang a, ṭhat lam aiin keh darh lam kan hnaih tial tial ang tih ka hlau a ni" ka ti thuai thuai a, ka pa pawh a che tawp zui nghal hmak.

"In nupaa chinfel chu thil ṭha ber a ni ngei alawm Aruatte, mahse in thei dawn em ni? In awm dan aṭang phei hi chuan inhauh bak in hmabak lo, i lua hliam i neih lai a ni bawk nen thu dik tak chu sawi mai rawh" ka nu'n a rawn tih chuan nui lui zeuh chung hian

"Kan thei ang ka nu, min ngaihtuah lutuk duh suh u. Keini chu nupa inhmangaih leh inthlahlel tak alawm kan nih, thla tam tak liam tawh mah se kan fapa thihna khan min la tina dun em em a, kan ṭha ve leh ṭep tawh ang" ka lo ti a, ka nu leh pa chuan mawl min tih hmel tak zet. 

"I chhuak phawt mai teh ang" tiin ka pa chuan ka nu chu a chhuahpui a, ka nu leh pate an awm lo chiah chu a reh tlawk tlawk a, ka pasal lah chuan ṭawng a tum bawk si lo, mahse a kut lum vung vungin ka kut a chelhna ringawt pawh chuan min thlamuan thei a ni. 

"Ka nam vang che kha a ni em?" rei tawk tak kan ngawih dun vang vang hnu chuan a rawn ti hniam ruih a, ama thu ngeia min be hmasa ve ta te chu ka lawm tawk a lo tling em em a, kei chuan lawm loh chi ah pawh ka ngai lo.

"Aw ni e, mahse inthiam lo duh suh. A na lutuk tawh lo ve, ka ṭha ve leh thuai mai ang" nui chunga tiin ka pasal kut chu ka pawt a, ani pawh khuma lo mu ve turin ka duh tih hrethiam takin a rawn che chhuak ve teh mial a, ka sira a mut rual chuan ka lo kuah nghal vat bawk.

"Ka hmangaih lutuk che PC, ka hmangaih reng bawk ang che, inṭhen lo vang aw? Inṭhen lam sawi tawh suh aw, rilru a tina duh êm mai. Pathian hnenah kan dil ang a, fate chu kan nei leh thei lutuk ang. Beidawng mai lovin kan tum dawn alawm, nang nena fa tam tak neih ka duh a ni" a âwma bei chunga ka tih chuan

"Ngaihtuah chiang rawh Aruatte, kan nupa inkar hi a ṭha tak tak thei tawh dawn chuang lo. Kei ang mipa lak tlak loh lutuk leh a fapa che sual lai hmu reng chunga chhan thei lo tu hi engtik niah emaw chuan rilru nat vangin min la kalsan dawn tho tho, a chhan chu kei hi mi pangngai ka ni tawh lo" a rawn ti thum dup dup a, ka lo kuah nghet sauh thung. 

"Kan fapa Ezekiel-a thihnaah hian inhnamhnawih angin in ngai tawh suh PC, engmah thiam lohna i nei lo. Vanduainain kan chungah ro a rel a, kan nunah vanneihnain hmun a chan theih nân keini nupa hian hma lam kan pana kan inhmangaih zual deuh deuh a ngai zawk a ni" 

"Kei hian ka la hmangaih chiah che em tih pawh ka hre tawh lo" ka pasal thu sawi tluka hriat nuam lo leh ka thinlung tina tu chu ka la hre ngai lo, a âwma hmai nawr vakin ka ṭap chhuak hawm hawm a, ani paw'n min kuah nghet khawp mai. 

"I rilru na hmel te hi hmuh hrehawm ka ti a, ka tel lovin hlim taka nung turin ka duh che a ni Aruatte. Kei chu engtik lai paw'n ka fapa thattuah ka inngai tawh a, chu chu thil nih dan dik tak a nih avangin ka pawm thiam em em bawk" a rawn tih leh chuan ṭap pur chung hian

"Aih! Ka duh lo, i tel lova awm ka duh bawk lo. I tel lo chuan ka hlim thei lo, nang pawh ka tel lovin i hlim thei chuang lo. Kan fapa thihna kha vanduai palh vang liau liau a ni; nangmah vanga thi leh i thah a ni lo" ka lo ti zuah zuah a, a ngaih dan dik lo tak chu thlak thuai se ka va'n duh ngawih ngawih tak em. 

"Ka bulah hian i awm rei thei tak tak dawn chuang lo" thawk la ri hawk chung hian a rawn ti ram deuh hmuk a, kei erawh naute ang maiin ka lo ṭap chhuak leh hawm hawm a, tunah chuan ka taksa hliam lam aiin ka rilru chu a na fê tawh zawk a ni.

Chumi zan chuan mu thei lovin ka tlaivar ta ṭhak a, kan hma lam hun chu ka ngaihtuah nasa em em bawk. A tuk aṭang chuan ka theih tawp tak meuh chhuahin ka pasal chu ngai awh tir leh ka tum a, min biak hmasak loh paw'n a be hmasa tu zawkah ka ṭang zel a, inṭhen ka hlauh luatah ka taksa na te chu ka hre chang tawh lo hrim hrim. 

Office a kal dawn apiangin kan in kawt thleng ka thlah ziah a, a rawn haw apiangin ka ei rawng bawl laklawh lai pawh ni se ka pasal chu ka dah pawimawh hmasa ber zel a, engkim chu ka buaipui sak vek ṭhin. Ka nu leh pate lam chu ka awm dan avang chuan an thin a lo rim khawp mai a, chuti ang teh fakaua ka pasal ka buaipui ta chu an hmu mawh ṭan tawh a ni ber. 

Saidingi lah chuan zep nei miah lo hian ka pa chu engkim a hrilh a, mahse a u min ngaihtuah lutuk vang a ni tih ka hriat avangin a lakah ka lungawi lo hran chuang lo. Ka pa chuan min rawn biain haw ka duh leh duh loh thu vawi tam min rawn zawt ṭhin a, kei erawh ka pasal chu ṭhen tumna rilru pawh ka la nei chhin lo hrim hrim. Nu Chawii leh pa Zuala pawh ka chhungte lakah chuan an inthlahrung em em a, ka khawngaih thei hle.

Ka chhungte chang ni lo ka ṭhiannu Mary-i paw'n kan nupa inkar derthawnzia chu a hre vek a, ka hrilh pawh a ni lo. Ka nau Saidingi chu a bulah lo va kalin kan awm dan engkim a lo va hrilh vek hi a ni a, Saidingi chuan ka pasal ṭhen mai tura min thlem tur te'n a lo hrilh a, chutah erawh kei pawh ka sa ve ta phat. 

Saidingi chu phone kaltlangin ka hau hrep a, a chet dan chu a em em tawh lam hret a ni. Ani pawh a rawn thinrim em em a, unau inchhangbung inhau ngai miah lo kha phone kaltlang chuan kan inhau ta hrep a, kan inbiak ṭhat loh rei phah khawp mai. Mary-i pawh chiang takin ka chhungte ṭanna lamah aṭang tih ka hria, ka pasal chu ṭhen mai turin min rawn ṭhin bawk, mahse kei chuan ka ṭhen dawn lo hi a ni tawp mai. 

Ṭhenawm khawveng thlengin kan chhungkaw boruak ni nuai nuai chu an hre leh zel a, Christmas kan hnaih tawh bawk si a, hunpui lo thleng tur chu nuam taka kan hman theih ka ring chiah lo a ni. 

Ka pasal chuan kei ang lo takin inṭhen a la duh reng a, a duh chhan pawh kan fapa thattu anga a inngaih vang leh min hmangaih leh ngaih loh a hriat chian theih tawh loh vang a ni. Kei erawh chuan min la hmangaih reng a ni tih hriattir tumin ṭan ka khawh par par a, ṭawngṭai pawh ka ṭawngṭai hnem a, zing ṭawngṭai inkhawm kal te chu ka hmaih ngai lo.

Kei chauh ka ni lo, nu Chawii pawh ka rualin a kal ve ṭhin a, a fapa tan chuan a ṭawngṭai ve ziah ṭhin. Pa Zuala pawh a bang bik chuang lo, a fapa chu a kawm hrang ziah a, kan pathum chuan ka pasal chu siam ṭhat kan tum tlang hlawm hle. 

Vawi khat phei chu ka beidawng deuh thut a, ka pasal harh chhuak mawh lutuk chuan min tilungngai a ni. Ka nu chuan min hnem a, ka pasal chu ṭhen lo hram turin min ti mawlh mawlh a, ṭhen ka tum vanga lungngai pawh ka ni chiah lo, ka lungngaih chhan zawk tak chu hmabak ka la ngah lutuk chu a ni. 

Saidingi nen pawh a hma angin kan la inbe ṭha em em thei lo, ka pasal chu a huat hian a haw hlur a, a mi huata lah chuan a hua tih pawh a hre der si lo. Zan tin ka chhungte nen kan inbe ziah a, ka chanchin min zawt ziah bawk a, kei chuan kan ṭhat thuin ka lo chhang mai zel.

Nilaini a ni a, chhuak turin ka insiam mial mial a, ka taksa ka enkawl uluk tawh lo bawk nen a hmaa ka lo hak ṭhinte chu ka ha hleithei tawh miah lo leh nghal. Kan fapa thihna avangin ka pasal birthday pawh ka lo theihnghilh daih kha a ni a, November thla tawp lam ni tawh mah se ka pasal chu birthday present pek ka tum ta tho. 

A inhmeh tur awm taka ka hriat sana ka leisak a, silver rawng niin a man pawh a tlawm hran lo, mahse ka pasal tan chuan ui ka nei reng reng lo, ka pawisa inkhawl sa zawng zawng hman ral ngai dawn pawh ni se ka hmang ral mai ang. 

Ka pasal Office awmna building kawt kan thlen rualin Taxi aṭang ka chhuak nghal a, chhun thil ei hun lai vel tak a ni a, a buai êm lo turah ka ngai. Building bula Momo lo zuarnu chuan ka mit a la em em a, hun kal tawh ka hre chhuak leh ta nge nge. Ka pasal nena kan ei turin Momo chu ka lei nual a, thil kan ei dun khât tawhzia pawh ka hre chhuak zut zut mai. 

Ka pasal Office bul ka thlen chuan Receptionist hian min lo be siam siam a, tu nge ka nih min hre chiang tho va, hawihhawm takin ka pasal office-a ka luh theih thu chu min hrilh bawk. Thawk la hmasa leh tê têin kawngka chu ka nam hawng a, chuta ka thil hmuh chuan min va han ṭhawng chiang tehreng em. 

End of Chapter 8