EZEKIEL By Havali Adam (CHAPTER 7)

EZEKIEL 

By

Havali Adam

Chapter 7

"PC" tih chiah sawiin ka ṭap chhuak leh ta hawk hawk a, ka pasal chu chhuatah let tualin a zangthal a, kei paw'n a taksa hnaih taka muin ka kuah nghal a, ka pasal chu a la ṭap chuang miah lo, a rilru na lutuk chu a ṭap thei lo a nih ka ring ta ber. 

"Ni lo, ka fapa hi a la thi lo. Vawiinah in vui thu i sawi a, kei chuan ka la vui ve reng reng lo, apa berin ka thlah liam hma chu ka fapa hian min kalsan thei ringawt lo" chiang nial lo zet hian a rawn ti a, kan chhungte pawh chu an bang bik lo, kan nupa awm dan chuan a ti ṭap lo thei lo a ni. 

"A thi tawh PC, kan fapa Ezekiel-a hi a thi tawh, chu chu keini nupa hian kan pawm thiam a ngai a ni" nghet zeta kuah chung chuan ka ti ṭuau a, mahni pasal te bulah ngei ka'n awm ta chu ka rilru a no zual a, ka mittui te chu awm tawh lo emaw ka tih kha a ni a, tunah chuan ka ṭap nasa leh ta hle.

"I chhuak rih teh ang u" pa Zuala chuan a lo ti a, a thu sawi ang chuan mi dang paw'n an zui chhuak ve nghal a, keini erawh chhuatah kan la mu reng a, theih se chu kan fapa bulah kal ve ve kan duh ngei ang. 

"Ka thiam loh a ni; engkim kha ka thiam lo a ni. Kei mi mawl leh lak tlak loh lutuk hian ka hmu asin, a tawlh liam lai kha ka hmu reng asin, kei hi pa ni tlak pawh ka ni lo" ka pasal hmel chu ka en vat a, a bekah chuan mittui a luang thla zawih zawih a, a mit erawh a khap eih lo. 

"Ni lo PC, i thiam loh a awm lo, engah mah khan thiam lohna i nei lo. A pawi ta ber chu Picnic Spot-a birthday kan lawm kher a ni; a bak puh tur a awm lo" tiin ka pasal chu ka chhoh melh ral a, ani chuan a lu a lo thing vat thung. 

"A mangang hmel kha ka hmu hman asin Aruatte, kha hmel kha, ka fapa mangang hmel kha, ni lo, Bawihpui, khawngaih takin thi suh. Anu leh apa bulah hian lo let leh hram rawh, khawngaih takin" ka pasal chu zawi takin a rawn ṭap nghawr dat a, nghet zet hian min kuah bawk. 

Chumi zan chu kan fapa thihna avanga a ṭah awm chhun a ni a, vawi khat mah a ṭap leh tawh ngai lo. Kei erawh ka ṭah a chhuak hma em em a, engkim chu kan fapa Ezekiel sulhnu ang vekin ka ngai a, thihna chu dawnsawn a harsa ka va'n ti tehreng em. Kan in lama awm phei rih tum kha ka ni a, ka pasal nu leh pate paw'n phal viau mah se ka duh leh ta lo. Ka pasal chu ṭanpui a ngai tih ka hria a, thlamuan a ngai tih pawh ka hria, chuvang chuan ka pasal hlatah ka awm hrang ringawt thei lo a ni. 

Kan fapa kan vui tuk aṭang ka pasal chu a hna lamah a kal nghal a, ṭawngthei lo leh bengngawng ang maiin mite biakna pawh a chhang tawh ngai lo va, ka biakna tak ngial pawh a chhang tawh ngai lo. Ka biak hi chuan mi en reng a, chu chu min chhan letna a ni ber. Pa Zuala phei chu a thin a rim a, a fapa chu a beng nghe nghe bawk a, ṭawng tur leh a biakna chhang tura a tih paw'n ka pasal chuan ṭawng chhuah a tum ngai chuang lo. Ni tin Office-ah a kal a, dik tak chuan a hna lamah la kal rih lo se ka duh a ni. 

Kan fapa thih aṭanga thla khat a liam hnuah chuan ka pasal chu a pangngai ka beisei ve deuh tawh a, mahse a hma ai lêtin a dik lo zawk thung. Ka biak paw'n en pawh min en duh tawh ngai lo va, a nupui chu ngaihtuahna chhe tê mah min nei lo a ni ber. Ka theih tawpin ka pasal nungchang siam ṭha tur chuan ṭan ka la a, ṭan ka lakzia chu ka nu leh pate ngei paw'n an hre chiang khawp. 

Chaw ei lai te hian ka pa chuan a zilh leh zauh zauh ṭhin a, ka pa chu a fapa lakah chuan a beidawng rum rum zelin ka hre hial ṭhin. Ka nu pawh a bang bik chuang lo, ka pasal chu vawi tam a zilh a, nun dan pangngaia nung leh tawh turin a hrilh mawlh mawlh zel a, ka pasal erawh chuan tu thu sawi mah a zawm duh lo. 

Zan a lo nih te hian ka khua a har ṭhin, nupa nun lama khawhar ka ni lo va, ka pasal lak aṭang chuan duatna leh hmangaihna dawn ka mamawh ngawih ngawih a ni. Khuma kan mut dun te hian min si miah lo hian a mu tawp zel a, rizai sin nachang pawh a hre ngai lo. A taksa si lova awm hrehawm ka tih avangin keimah zawkin ka va kuah leh nge nge zel a, kan fapa thihna chuang engtik thleng nge kan nupa inkar a nghawng dawn ka hre lo a ni. 

Thla hnih kan hmang ral leh a, ka pasal chu a awm ngaiin a la awm reng bawk a, ka nu leh pa paw'n an zilh buai duh tawh lo. Inkhawm thlengin a ti tawh ngai lo va, kei erawh a hma ai zawngin inkhawm ka taima thung a, kan nupa inkar a ṭhat leh thuai theih nân Pathian hnenah ka dil nasa thei hle. 

Zingah ni se hma takah thovin biak inah zing ṭawngṭai inkhawmin ka kal ziah a, kan fapa thihna chuan Pathian min hnaih zual tir tih chiang takin ka hria. Zinga ka thawh apiang lah hian ka pasal chu a lo mu meng kar zel a, Celing en tlawk tlawkin a ngawi reng ṭhin bawk. A muhil ngai miah lo ti dawn ila darkar tam tak muhil lova men reng chu a theih ka ring chiah bawk si lo va, ka rilru a tibuai thei khawp. 

Ka ṭawngṭai thupui ber chu ka pasal a ni a, Pathian hnenah ka pasal chu ka hlan tawp a, hmâna ka pasal dik tak ni ṭhin anga awm leh turin ka dil lawm lawm ṭhin. Ṭap chunga ṭawngṭai pawh ka ngah a, kohhran upate chuan min hnem awl lo bawk a, chu chu Kristian nih ṭhatna leh nawmna chu a ni. Ka pasal ka ngaihtuah chhuah loh chang leh a hmel ka hmuh loh chang hi chuan hawihhawm avanga han nuih zeuh zeuh ka nei a, mahse ka nui rei thei ngâng lo ṭhin.

Tin, kan in kawta dawr tê kan siam ve zuai pawh chu kan ṭhiat leh ta vek a, a chhan chu Ezekiel-a kan hriat chhuah zel vang a ni. A dam lai te khan School ban apiangin a pa nen thil an rawn ei ṭhin a, kei paw'n phal takin ka lo ei tir ṭhin kha a ni a, mahse tunah chuan chung zawng zawng chu mitthla mai chauh a ni ta. Kan fapa thihna chuan keimahah nghawng nasa tak nei mah se Pathian rinchhan chung zelin hma lam ka pan lui zel a, ka intihlim lui hram hram ṭhin. 

Mo ka nihna chu ka theihnghilh lo va, Ezekiel-a kan chan hmaa ka awm ang chiaha awm leh tumin tih tur awm ang angte chu ka ti zung zung ṭhin bawk. Ka pasal nu leh pa chuan min khawngaih avangin ka pangngai leh hma chu awmpui lak zawk mai te an rawt a, mahse kei chuan ka duh tlat lo thung. 

Ka pasal berin min duatin min ngaihsak tawh ngai bawk si lo nen in chhung khur tih fai leh ei rawng bawla chet chu ka inhnemna a ni ta ringawt a, engtik niah emaw chuan Pathianin ka ṭawngṭaina te chhangin ka pasal chu ka lam a lo hawi leh thei ka beisei tlat bawk a ni.

Ka pasal chu a nungchang thlak tura nawr tut tut chi niin ka hre ta lo va, zawl dawh tak leh hmangaih taka enkawl hmasak chi niin ka hre ta zawk. A awm lai te chuan a hma ang bawkin ka ṭawng siam siam zel a, ka ni hman dante ka sawi mial mial zel a, ka hlim lui nasa lutuk chu keimah berin hrehawm tih chang ka ngah mai. A hna lam thil vel a ziah laia thingpui pek leh a dar hmehsak te chu ka ti awl lo va, zawi zawiin ka pasal chu siam ṭhat ka duh a ni. 

A chang phei chuan a hnung lam aṭang ka kuah tawp ṭhin a, a biang leh hmuiah te chuan ka fawp ṭhin bawk a, mahse ka pasal hnen aṭang chuan biakna aw emaw fawh letna emaw thlakhlelhna pawh ka dawng ngai lo thung. Kan nupa awm dan engkim chu ka ṭhiannu Mary-i paw'n a hre ve vek a, ani bulah chuan ka nu bula ka sawi lan ngam loh pawh ka sawi ṭhin. Min khawngaih thei hle tih ka hria, mahse min khawngaih zawngin thil a sawi ngai lo va, ṭha takin min fuih ṭhin zawk.

"Aruatte, fa neih leh lam hi in beidawng mai ta em ni? Nangmah hian ṭan la mai rawh, PC-a lah heti mai hi a ni bawk si a, nangin i ṭan hmasak chuan ani pawh a lo danglam thuai maithei asin" ka nu chuan thingpui in pah hian a rawn ti a, zingkar a ni bawk a, a la hma ṭha khawp mai.

"A tih chi dawn em ni ka nu? Kei chuan dawhthei takin nghak leh rih phawt ila ka lo ti zawk asin, kan hmanhmawh luatah engkim a buai chuar leh zawk ang tih ka hlau a ni" ka lo ti ve thung a, ani pawh a bu ta nghat nghat. 

"Ni ve tho mai, i lakah pawh hian i pa nen kan inthlahrung zozai ta khawp mai. A bik takin i chhungte lakah kan inthlahrung zual a, i laka PC-a awm dan hi an ngai thei lo vat ang a, an rawn hruai haw daih mai ang che tih ka hlau"

"Chuti ang chu a thleng lo vang ka nu, PC-a hi ka hmangaih alawm, ka thinlung leh tih tak zetin ka hmangaih a ni. Ka nu leh pate lungawi loh vang mai maiin ka kalsan dawn lo va, nupa hlim tak kan nih leh hma chu ka theih tawp ka chhuah ṭang ṭang dawn a ni" 

"Ni e, kan fapa nungchang hi siam ṭha hram teh Aruatte, nang lo hi chu innghahna leh rin ngam pawh kan nei tawh lo. Nang chu a nupui i ni a, i siam ṭha thei em em ang. Heti ang hian mi â ang maiin awm ṭhin mah se a thinlungah i awm reng a, a la hmangaih reng che tih pawh ka hria" 

"Tukin chu hma kan sawn ve deuh chuan ka hria asin ka nu, ṭawngṭai inkhawm tura ka thawh lai khan ka chhuah lawk dawn thu ka hrilh a, min en pawh ka beisei loh laiin ka lam a rawn hawi ve teh mial a" nui zeuh pah chuan ka ti a, ka thinlung chhungril chu a hlim ve tak tak.

"A va ṭha ṭan ve, i thei tih ka hria Aruatte. Nang chauh lo chuan PC-a awm dan hi kan siam ṭha thei tawh lo vang, Ezekiel-a a rawn dam leh te a nih ngawt loh chuan" ka fapa hming a lam rik tâkah chuan ka nui tawp riai riai a, ka ngai nghal vawng vawng. 

Tukṭhuan kan ei lai te chuan ka pasal chu chawhmeh ka suahsak a, a tui lai lai te ka pe a, a chawhmeh duh ber ka siam bawk a, zing dang ai chuan chaw pawh a ei hnem deuhin ka hria. Office kal tura a insiam lai chuan ka insiam pui a, a thil ken tur a keng kim em tih te chu ka Check zung zung a, a tan chuan khawvela nupui ṭha ber nih ka tum ruh em em a ni. 

Khumah lawnin necktie chu ka awrh tir a, ka suih sak lai chuan ka nghawng vel chu a en reng a, a ngaihtuahna erawh hmun dang daihah a awm tih ka hre thei. Necktie siam ṭha mial mial pahin ka pasal hmel chu ka en a, a hmelṭhat ngaiin a la hmelṭha reng a, a hmel pa hrak te chu a la bo miah lo, mahse a rilru leh nungchang erawh tunah rih chuan a bo ṭhen tawh a ni. 

Engtin nge Office lamah a awm ang tih te chu ka ngaihtuah chhuak a, a hnuaia thawkte tan biak hrehawm khawpin a awm dawn tih ka hre chiang hle. Thil dang zawng aiin a thawhpuite bulah a ṭawng chhuak ang em tih chu ka ngaihven zual a, lo ṭawng ta pawh ni se thumal hnih khat bak a sawi ka ring lo. Ka duh ang taka a necktie ka siam ṭhat hnu chuan ka nuih sen sen a, a biang vun nem taka dawm chungin

"Ka hmangaih che PC, ka hmangaih reng ang che. Hah lutukin thawk lo la, lo haw leh thuai rawh aw, i hmel ka hmuh lo rei hi chuan ka ngai ṭhin che a nia" ka ti sep sep a, a lama tawlh hnaiin a hmui lum vung vungah chuan ka fawp vawng vawng a, ka rin ang ngeiin min chhang let leh ta chuang lo. 

Kan in kawt thleng ka pasal chu ka thlah leh thlap a, driver-in a lo nghak ran tawh a, motor-a a ṭhut luh hnu chuan hmel hlim sângin ka vai liam a, kan in kawt aṭanga an tlan hlat tial tial rualin ka hlimna pawh a bo tial tial zui nghal bawk. Ni lengin in chhungah ka che char char a, a, tlai lamah ar chaw pein kan huan lamah ka chhuk zeuh tih loh chu in chhuahsan lai ka nei lo. 

Ka nu chuan in leng a nei a, keima in leng a ni mah zawk. Kan fapa thihna chu mi dang paw'n min tawrh pui hle a, chuvanga lo leng pawh chu an ni. Kei erawh chu in lengte pawh ngaihsak lovin ka che mial mial a, insuk tur awm ang ang chu Washing Machine-ah ka su a, awm awl mai mai ka duh loh avangin a ṭhen chu kutin ka su nghe nghe. 

Engmah ti lovin minute 1 pawh awm ila hun kal tawh ka hre chhuak zel a, hriat chhuah tawh loh ka duh avangin chet chawlh lai reng ka nei lo. Ka hun hman dan chu a felfai thlap a, thlan tla bawrh bawrha chet chang lah ka ngah, ka nu chuan chawl hahdam turin min ti ve ṭhin mah se ka chawl hahdam duh der lo, thihna avanga lungngaih leh ka peih tawh lo tlat a tin ni!

Tlai lama ka pasal a rawn haw chuan ka thil tih laklawh lai chu ka lo dah hmak a, hmel hlim taka chhawnin ka lo bia a, room-ah zui lutin ka ṭawng siam siam a, thawmhnaw a phelh lai te chuan ka lo pui zung zung bawk. A bag te chu rem fel sakin a inbual zawha a thawmhnaw hak tur chu ka la chhuak zawm zat a, ani pawh ngawi rengin bathroom-ah a lut ve mai bawk a, a inbual zawh nghah pahin choka lamah ka phei zeuh zeuh bawk.

A inbual zawh chuan tlai dang ang lo takin kan nupa room aṭang a lo chhuak ve teh mial a, ni dangah chuan chaw ei tur leh hna kal tur bakin kan nupa room chu a chhuahsan ngai lo a ni. Fridge aṭang tui vawt la chhuakin ka ei rawng bawlna bulah chuan a in ri khawlh khawlh a, kan huana theihai kung chu a thlir leh ta reng a, theihai chu a ei châk a nih te ka ring rum rum. Ka thil chhuan lai off pahin 

"Theihai khu i ei châk em? Ka zu lo ang aw, tui deuhin kan bawl dawn nia" ka ti chhuak ta nge nge a, ani chuan min chhang lo va, a en ngai chu a la en tlawk tlawk a, be tawh lovin theihai lo tur chuan huan lamah ka chhuksan ta daih. 

Theihai kung bula mau ro chuan theihai chu ka vaw tla nual a, kan ei tur chiah lawh ka tum kha a ni a, lawh ve rau rauva tlêm tê lawh ting tang kha chu a ho ka ti ve leh ta deuh a ni. Theihai hmin a la awm mang lo va, a awm pawh a la hun chiah lo. A hnaite chu ka pawm ṭun avangin ka kawrah a bet nuai a, ka kawr hak lai chu ka ui duh ta lo law law, hnathawh kawr atan hmang ila a ṭhat phian zawk ka ring. 

Theihai bawl pahin ka pasal chu chhun lama ka ni hman dan ka hrilh melh melh a, a hman dan erawh ka zawt duh lo, chhanna ka dawng leh dawn chuang lo tih ka chiang êm mai. Hmarcha telhin chi leh sahang chu theihai zai lêpah chuan ka thlak a, fianin ka chawk kual a, pakhat chu lain ka bula ding ngawi reng ka pasal chu ka barh a, ani paw'n a lo hmawm ve mai bawk. Ṭawng siam siama barh leh ka tum chuan a kal sawn daih a, ka thil ei tuina zawng zawng chu a bo nghal vek. 

Fridge hawngin ka theihai bawl sa chu ka dah lut a, ka nu leh pa paw'n an ei châk ve ngei ka ring. Kan nupa room-a luh chu ka tum deuh ûk a, mahse lut lovin ei rawng ka bawl ta zawk. Ka ei rawng bawl laiin ka nu a rawn haw a, rei lovah ka pa a rawn haw zui nghal bawk a, Ezekiel-a thih aṭang thla eng emaw zah liam tawh mah se min la ngaihtuah khawp mai. PC-a haw tawh leh tawh loh thu min zawh chuan a lo haw tawh thuin ka lo chhang a, thil dang erawh min zawt zui ta lem lo. 

Dar 4 leh a chanve velah ei rawng ka bawl fel a, tun ṭum chu zing lama ka chawhmeh siam a bân deuh nual avangin ka che zo hma phian mai. Kan nupa room-ah lutin ka pasal bula awm hrim hrim chu ka duh a, ka biakna min chhang dawn lo mah se a bula awm tawp pawh chu nuam ka ti em em tho. Tukverh bula ding ngawi rengin pawn lam chu a thlir tlawk tlawk a, a kut ding lam chuan Ezekiel-a thlalak ngei mai chu a keng ran bawk a, vawiin tlai chu a fapa a ngai zual a ni ngei ang.

A hnung lam aṭang nghet takin ka kuah a, a rimtui tak chu ka hip lut vang vang a, kawr chhanah pawh a taksa lum sik nawmzia chu ka hre thei. Chutia ngawi renga kan awm dun lai chuan a phone a rawn ri a, mahse ani chuan lak pawha tum chuang lo. Kei pawh ka awm ngaiin ka la awm char char a, phone chu a ring tawp ve mai bawk. Ka pasal la kuah reng chung chuan hma ka lak dan tur te chu ka ngaihtuah neuh neuh a, ka pasal nun dan leh rilru chu thlak thuai thuai ka duh tawh a ni. 

Chutia ngawi renga awm dun tlawng chu keimah zawk chuan ka ning deuh thut a, ka kuahna phelhin kan nupa room aṭang chuan ka kal chhuak ta ringawt a, thla tam a liam tawh avangin ka pasal hnen aṭang chuan biakna ka dawn ve ka ring ṭan tawh kha a ni a, mahse thumal khat pawh ka pasal kâ aṭang ka la hre lo thung. 

Zanriah kan ei lai te chuan tlai dang ang bawkin chawhmeh tui lai lai chu a thlengah ka suah sak a, ani chuan ngawi rengin a lo ei mial mial a, Ezekiel-a'n min kalsan tâk aṭang kan chhungkua chu chaw ei laiin ka ṭawng tlêm sawt hle bawk. 

Ni khat chu ṭhutthleng vel ka nawh fai mawlh mawlh laiin Mary-i a lo leng hlawl a, ka che reng duh ta bik lo. Ka ṭhiannu nen chuan thil kan sawi hnem ang reng hle a, kan nupa inkar ṭhat lohzia tam tak hretu a ni a, ka dinhmun chu min hriatthiampui khawp mai. Kan nupa inkar ka hrilh ṭhin tak nâ a, a zawng zawng erawh ka hrilh duh tawh bik chiah lo. A hma kha chuan ka hrilh deuh nual zel kha a ni a, ka ṭhiannu chu ka rin loh vang pawh ni lovin tunah chuan hrilh chin tawk ka hre tawh zawk a ni. 

Bazara chhuahpuiah min sawm a, kei chuan ka nu ka be hmasa tê tê phawt a, ka nu'n a phal hnuah Mary-i chu chhuahpui ka remti ve chauh bawk. Ka khua a har a, ka chhungril a ruak em em a, tlêma intihthawveng ve deuh chu ka duh ve pah hrim hrim a ni. Zarkawt kan thlen chuan KFC ei puiah min sawm leh a, kei paw'n ka lo duh ve leh mai. KFC dawr chhung aṭanga kan chhuah chuan ka pasal taksa ruangam ang zet mai hi ka hmu hlawl a, ka en chian chuan amah ngei a ni; mahse eng thil nge ka hmuh tâk hi! 

Ka pasal bulah chuan hmeichhe pakhat kei aia sang leh hmel changkang zet hi a kal a, ka pasal chu nel tak hian a be mawlh mawlh a, ka va han thik tak êm. An lam pana ka pen pawk pawk laiin motor chhungah an lut daih a, khawlai a nih avangin koh erawh ka ko duh êm bik ta lo. 

Mi â ang maiin Hotel Regency opposite footpath-ah chuan ka ding a, ka hnung lam aṭanga ka ṭhiannu min kohna chuan min tiharh zawk bawk. Lal Buaia Shopping-ah chuan min luhpui leh a tum a, mahse kei chuan ka lo hnial vat tawh thung. Haw thuai thuai chu ka duh tawh, ka pasal chuan ngaihzawng a nei mai ang tih ka hlau em em a ni. 

Kan haw lai te chuan kal lam ang lo takin ka ngawi tluan ṭhak a, in ka thlen thlengin ka rilru chu la buai tak a ni. Ei rawng bawl hun ṭan tawh mah se chet pawh ka la tum lo va, vawiin tlai chu ka pasal ka biak ṭawng ngei ngei a ngai tawh a ni. 

Tlai dang zawng aiin ka pasal chu a rawn haw tlai a, hmeichhe dang nen ka hmu dun tawh vang nge pawh ka hre lo ka hmu dik lo nghal vek a, ngaihzawng nei tur angin ka ngai ringawt bawk a, mahse ngaihzawng min neihsan tur chuan ka phal miah lo thung. 

Room-a a luh rualin ka zui lut ve nghal a, a thawmhnaw a phelh lai te chuan ka en reng a, puih tumna pawh ka nei lo. Ani paw'n mak a ti ve deuh a ni ang min rawn en zeuh a, engah mah ngai lo ang maiin a hawi sawn leh mai bawk. 

"PC, thil zawh duh che ka nei, khawngaihin min chhang hram rawh aw" ka ti hmasa tê tê a, thinrimin chawhnu lama a hmeichhe kalpui kha thik em em mah ila ka insum hram hram rih a ngai, chuti lo chu a thin ka tirim mai ang tih ka hlau a ni. 

"Vawiin chawhnu lama i hmeichhe kalpui kha tu nge? I ngaihzawng em ni? Ngaihzawng min neihsan lo ti raw? Min han hrilh teh PC, ka rilru hi i timangang tak zet a ni. Ṭawng duh tawh la, hmân ang khan min ngaihsakin min hmangaih leh tawh rawh" aw dam tak chuan ka ti mawlh mawlh a, ani chuan min en zeuh ringawt. 

"PC, khawngaihin kei tal hi chu min be ve tawh em em la, i nupui ka nih hî. Kan fapa thihna hi ka tuar na ve tho asin, indawm kun rengin awmzia a neih loh avangin hlim luiha hma lam pan ka tum lui mai chauh zawk a ni" a bul hnaih taka ding chung chuan ka ti leh a, min la chhang chuang lo. 

"A tawp nân ka zawt leh ang che, ngaihzawng emaw hmeichhe kawp i nei lo ti raw? I ngawih reng hian ka ngaih a ṭha lo zual a, ngaihzawng nei turin ngai ringawt dawn che ila ka phal bawk si lo" ka tih chuan min en ngawt ngawt ringawt a, ngaihzawng chu min neihsan lo hram se ka va'n ti tehreng em.

"I nupui hi min khawngaih ve tawh em em lo em ni? Min ngai ve miah lo em ni PC? Kei chuan ka thlahlel che a, ka ngai che a, ka hmangaih em em bawk che a, mahse maw ka laka i awm dan hian min tichau ṭhin a ni" a la ṭawng duh chuang loh avangin ka ṭawng zawm leh ta nge nge.

"PC" ti sepin ka hmui chu ka hup thuai a, khumah ṭhuin ka ṭap chhuak feih feih a, ka pasal chuan min en reng tih pawh ka hria, mahse a lak aṭang chuan thlemna emaw kuahna emaw pawh dawn ka inbeisei ngam tawh lo, min hmangaih tawh lo ni ta berin ka hria.

"Ezekiel, ka fapa, engati nge i nu leh pa hi min kalsan reng reng? I pa min tihhrehawmzia te hi i hmu ve vek ang ti raw? Ka ngai lutuk che ka fapa, min kalsan lo la chuan maw heti ang hian ka lakah i pa pawh hi a awm miah lo ang maw le" ka tih laiin ka pasal ngei chu ka bulah a rawn ṭhu thla a, keimah pawh min en chuang lovin kawngka lam chu a en ngar ngar thung.

"In in lamah haw mai ta che" thla tam tak liam hnua ka pasal min biakna ṭawngkam chuan ka ṭap lai a titawp nghal hmak thei a, a thu sawiin min ṭhawng lutuk chu ka hit sawng sawng ni berin ka hria, engtin nge chuti ang thu chu ka hnenah a sawi theih zawk!?

"PC" ti thawp sepin a mitah tak chuan ka en kal a, ani paw'n min en chiang hle. 

End of Chapter 7