EZEKIEL By Havali Adam (CHAPTER 6)

EZEKIEL

By

Havali Adam

Chapter 6

"Ezekiel!" tiin ka fapa hming chu ka lam mawlh mawlh a, hlauhthawn lutuk avangin ka aw te chu a dik lo vek a, ka pasal chuan Ezekiel-a chu tui aṭang a pawm chhuak thuai thuai a, ka nunah chuti ang renga hlauhthawn ka la nei lo. 

"PC! PC! Engtin nge a awm!? Engtin nge Ezekiel-a hi a awm? Maw!? Min hrilh rawh, a ṭha em?" ka pasal bula ṭhingṭhi pah chuan ka ti hlawk hlawk a, ani chuan Ezekiel-a âwm chu a nem deuh chawrh chawrh a, a hnar hmet pingin a kâ chhung chu a ham deuh chhen bawk a, kei chu lo ka chi ai vek tawh a ni ber. 

"Harh rawh" thaw hlawi hlawi chung hian ka pasal chuan a ti a, kei ang thovin ka pasal chu a hlauthawng ve tih ka hria, chu thu bak chu sawi pawh a sawi lo, kan fapa tih harh tum chuan a bei char char a, mahse Ezekiel-a erawh a harh thei der si lo. 

"PC!" kan fapa pawm kang lawpa motor lam a panpui pâwk pawk lai chuan ka lo ti hman ṭawk a, rei lovah motor chu tinungin chak zet hian a tlan chhuak zui nghal a, ka nu leh pate chuan ka ṭhu sawp hnuang chu min rawn kai tho vat bawk. 

Ka pasal tlanna lamah chuan muangchang lovin kan tlan chhuak ve nghal a, minute 10 hnu velah ka pasal chu kan va um pha a, kan hmaah a tlan reng a, kan tlan chak hlawm lutuk chu kan accident ang tih a hlauhawm hial zawk. Hospital lo awm hmasa ber zawnah ka pasal chuan motor tidingin Ezekiel-a chu a pawm chhuak nghal a, keini pawh kan muangchang lo. 

Hospital chhunga kan luh hnu rei lovah Doctor te an rawn lang nghal a, Ezekiel-a chu khum nawr kal theihah mutin an nawr liam nghal a, ka pasal chu ṭawng vin tak a ni. Nu Chawii leh pa Zuala chuan an lo zilh vat a, mahse awmzia a awm lo. Kei ang bawkin a chi ai vek a, awm hle hle thei lovin a tei sek a, kei chu Saidingin min ṭhut pui a, ka mittui chu a tlang reng tawh bawk. 

Ka pasal awm dan leh hmel ka hmuh phei chuan ka ṭah a chhuak zual a, ka kut chu ka hmer tawn tawn a, ka thin phu ri te chu mi dang paw'n an hriat theih vek ka ring. Ka pasal chu tawnzau var leh boxer pawl chauh hain a tei sek a, a kut te chu a hum ruh em em a, a nupui ni mah ila ka va pawh ngam mai lo, a rilru a buai vek tawh avangin keimah ka ni tih hre lovin min lo khawih hrep duh mai ang tih ka hlau a ni. 

"Doctor a lo chhuak" darkar chanve vel rilru thlabar zeta kan ṭhut ngawt ngawt laiin Saidingi chuan a rawn ti a, hawi chhuak vatin Doctor lam chu ka pan phei nghal thuai a, ka pasal pawh Doctor bulah chuan a ding rang khawp mai. 

"A pawi ka ti, in fapa nunna hi kan chhan hman ta lo, a chuapah tui a lut hnem" tia a ṭawng laklawh laiin Doctor chu chhuatah a thal nghal ṭhuai a, ka pasal chet dan chu ka beisei lo bawk nen ka lo rak nghal ṭhawt a, ka pasal chu a la duh tawk mai lo. 

"Eng thu maw i sawi kha!? Ka fapa chu a thi i ti em ni? Nang Doctor phiangsen hian ka fapa i chhan thei lo maw!? I ngam chuan han sawi leh teh, han sawi leh nâ teh, nangmah zawk hi ka that hreh hauh lo che" tiin Doctor chu a hnek zawm mawlh mawlh a, mi dang chuan an lo pawt hrang thuai bawk. 

"LALCHHANHIM!" ti hrawkin pa Zuala chuan ka pasal chu a rawn beng chawrh a, mahse awmzia pakhat mah a awm chuang lo, Security pathum vel paw'n ka pasal chu an man nghet zo ṭha ṭhum lo va, ka pasal lah chuan Doctor chu kutthlak a la tum em em thung. 

"A thi i ti maw? A teuh lo mai, ka awih teuh lo. Nanga thu sawi kha a them paw'n ka awih lo vang, ka awihna chhan tur pakhat mah a awm lo, min thlah nghal rawh u" ti vin tuar tuarin PC-a chu a tal vak vak a, Security te chuan an man nghet zo lo leh ta nge nge. 

"A pawi ka ti, mahse i fapa hi a thi tawh miau a ni. A chuapah tui a lut hnem lutuk a, chu chuan a lung lam a nghawng a, Oxygen tlakchham avangin a thi ta a ni" ka pasalin banga a nawr beh laiin zamna nei lo ang mai hian Doctor chuan a ti a, a hlauh ruk ve tho chu ka ring. 

"Doctor nep tak i ni!" ti nghutin chhuatah ka pasal chuan Doctor chu a paih tlu hnawk a, Doctor lo chhuahna room-ah ka pasal chu a lut zui nghal a, kei chu ka fapa thihna thu ringawt pawh chuan min ti zawi vek tawh a ni. 

"Harh tawh rawh le Bawihpui, apa ka lo kal a nia, engati nge ka tel lova tui chen i la thiam chian loh te chuan min lo koh mai loh? Le! I chungah pawh ka thinrim miah lo vang, han meng teh le" Ezekiel-a bianga ben thek thek pahin PC-a chuan a ti thum dam dap a, insum thei tawh lovin ka ṭap chhuak ta hawk. 

"Engati nge i lo ṭah Aruatte? I ṭahna khan ka mang a ti ang zual a nia, Bawihpuia a harh thei mai rih bawk si lo, kha Doctor pa sawi kha a dik ang tih ka hlau hle a ni" ka pasal chuan awkâ vin pakhat mah a hmang tawh lo va, a awah chuan lungchhiat rukna a awm tawh zawk a ni.

"Kei zawng a pawi ka ti êm mai" nu Chawii chu pa Zuala kuah chung hian a rawn ṭap chhuak ve leh ta hawk a, pa Zuala paw'n nghet takin a lo kuah let a, keima nu leh pate ngei pawh an bang bik chuang lo. 

"Harh ta che, harh vat rawh ROCHANHLU!" ti hrawkin PC-a chuan Ezekiel-a taksa zawi hnuang tawh leh engmah hre tawh lo chu a thing nawk nawk a, mi â ang maiin a ṭawng zawm mawlh mawlh bawk. 

"Ni lo, ka tihpalh Bawihpui, apa hian ka vin tawh miah lo vang che. Tunah chuan lo meng tawh rawh le, tui chen i duh leh a nih paw'n keimah nen hlir kan zir tawh dawn alawm, lo harh hram teh Bawihpui" PC-a chu aw vawi leh khatah a nêm leh nghal vek a, mi dang chu kan lo ngawi ṭhap ringawt.

"Bawihpui" PC-a chuan a ti thluk awn leh duai a, thei leh thei  lovin ka pasal leh ka fapa awmna lamah chuan ka kal phei a, ṭap feih feihin ka pasal chu ka kuah thlawp a, kei chuan Ezekiel-a chu a thi tawh tih ka hre chiang em em a ni. 

"Ezekiel, ka fapa" ti ṭuauin ka fapa nunna nei tawh lo chu ka kuah a, ka pawm vawng vawng a, rilru na lutukin ka ṭap chhuak hawm hawm a, ka pasal erawh che thutin room aṭang chuan a kal chhuak vang vang a, koh din tumna pawh ka nei lo. 

Ka ṭah nasat lutuk avang chuan a hma ai zawngin ka taksa chu a zawi zual a, ka ban leh ka dara an chelhna te chu ka hre vek a, min pawm lai te chu ka hre vek bawk a, mahse ka mit tak ngial pawh ka meng thei tawh lo. Saiding ni ngeia ka hriatin min kohna chu ka hre hla tial tial a, ka fapa hlir ka mitthlaah leh ka rilruah a rawn lang a, ka rilru a na lutuk chu ka thi thei mai dawnin ka hria. Ka kut an hmeh sawk sawkna chuan min tiharh leh zawk ṭhin a, thawm aṭang chuan an buai hmel viau a, mahse kei erawh ka chau tawngkhawng tawh tak zet a ni. 

Thawm ri nuai nuai chuan mi ti harh a, ka mit ka men rualin Saidingi mit sen ram hmel chu ka hmu hmasa ber a, chu chuan engkim chu ka mumang a nih lohzia leh thil thleng mek a nihzia min hriattir chiang hle. Kan inah kan lo awm daih tawh a, kan in bangte chu ṭhenawm khawveng te'n an ṭhiat fel thlap tawh a, ṭhalai lamin YMA ṭhutthleng an rawn pu lut diat diat bawk a, ka nau Saidingi kuah chung chuan ka ṭap chhuak leh ta hawm hawm ringawt. Ani pawh kei ang thovin a ṭap a, engkim chu a lem vek ni mai se ka van ti tehreng em. 

"Khaw'nge PC-a?" kan room-a kan luh hnu chuan ka ti tham chhal a, ka aw te chu a chhang vek tawh a, aw rawl chhuah tur pawh ka nei tawh lo tluk a ni a, duh lo em em mah ila thihna chuan kan chungah ro a rel mek bawk si a ni. 

"U PC-a chu a lo la haw lo hrim hrim, damdawi in aṭanga a chhuah hnu khan tûma'n kan be pawp thei lo" Saiding thu rawn sawi zet chuan min va han tiharh chiang êm, kan fapa thihna avangin ka pasal chuan thil ṭha lo tak a ti mai ang tih ka hlau ta hle. 

"Khaw'nge ka phone hi!?" tih leh zawn ka rual nghal a, ka indap mawlh mawlh laiin Saidingi chuan min rawn pe a, kei paw'n hmanhmawh takin PC-a chu ka Call nghal a, ka nau sawi ang tak takin a call tlang theih loh, vawi tam ka call nawn paw'n Switch off a inti tlat a, ka va han hlauthawng zual mai mai tak em.

"Zawng ang" khum aṭanga chhukin ka nau bulah chuan ka ti deuh tawp a, ani pawh ka kalna lamah chuan min hnial miah lo hian a lo kal ve nghal a, ka fapa hmel dang bal ka hmuh rual chuan ka insum leh thei ta lo. 

Kuang lamah chuan kal phei rawk rawkin ka ṭap leh ta chiam a, ruang lo kiltu ka chhungte pawh insum zo lovin an lo ṭap khur ngawt ngawt a, Ezekiel-a pa lah chuan ka rilru a la tibuai em em zui. Tlai dar 5 bawr vel a ni tawh a, khawhar ina lo kal an awm belh zel a, ṭhutthleng pawh kan in chhung khat deuh thawin an rem fel vek tawh a, min khawngaih hmel taka min lo thlir vawng vawngtu te chuan ka ṭah an tichhuak zual. 

Thil hre chhuak thutin Ezekiel-a taksa zawi hnuang chu kuang chhungah ka mut ṭhat leh a, engmah sawi lovin kawngka lamah ka kal pawk pawk a, mi dang chuan min lo en duh khawp mai. Pawn ka thlen rualin ka bianga mittui luangte chu ka hru tawk a, Saidingi pawh a rawn lang har lo. 

Scooty-a inphurin ka pasal chu kan zawng a, a kalna awm zawng zawngah kan kal vek tawh, mahse ka pasal hmel reng reng kan la hmu lo. Ka pasal chhungte leh ka chhungte hnen aṭang phone call ka dawng awl lo va, anni paw'n ka pasal chu an ngaihven ve khawp mai. Pa Zuala phei chuan damdawi in aṭanga kan haw rualin a lo zawng char char tawh zawk hi a lo ni a, kan inah khan a hmel ka hmu lo reng a ni. 

"PC, khawngaihin lo haw teh, thil ṭha lo ti miah suh aw, khawngaihin ka hmaah i hmel rawn inlan tawh hram teh" phula ṭhingṭhi chung chuan ka ti sep a, chu lai hmun chu kan inngaihzawn ve laia kan kal ṭhinna a ni a, a awm ka rin teh lûl nen a lo awm chuang lo. 

"Min tibeidawng suh" ka ti tham ṭial leh raih a, ka beidawng lek lek tawh zawk, mahse ka pasal chu hmuh ka duhin thil ṭha lo a tih ka hlau em em bawk si, a hmel lah hmuh tur reng a awm si lo, Lalpa min pui hram teh. 

"Haw phawt mai ang, u PC-a pawh a lo haw tawh zawk maithei asin, kei chuan Ezekiel-a hi a awm bosan rei theih ka ring lo" ka nauin a rawn tih chuan ka harh leh zawk a, a thu sawi chuan beiseina min neihtir a, a sawi chu thil ni thei tak a ni. 

"Haw vat ang" tiin phul aṭang chuan ka tho thuai a, kan in lam pana kan tlan lai te chuan hmanhmawh turin ka ti chhen a, ka pasal chu kan inah lo awm tawh se ka ti a, mahni chauha lusun zawng a hrehawm em mai, ani nen chuan ka rilru natna pawh a kiam deuh ka ring a ni. 

Kan ina kan luh chuan mi pawh an lo ṭhu khat hnûr tawh a, khua pawh a thim famkim tawh a, dar 7 leh a chanve a pel fel der tawh bawk. Kuang awmna lamah ka kal phei nghal thuai thuai a, ka pasal chu ka zawn nasat tehreng nen kuang bulah chuan a hmel reng ka la hmu lo ta cheu. Zawng tura chhuah leh mai ka tum laiin ka nu'n min lo chelh ding vat a, chhun aṭang tawh engmah ka la ei loh avangin ei tur min pe a, mahse ei châkna pakhat mah ka nei lo. Ka nu dar ngheng chuan ka ṭap leh ta tlawk tlawk zawk a, ka fapa ka chan ta mai chu hriatthiam harsa ka la ti ngawih ngawih a ni. 

Ka mit ka men rualin Ceiling ka hmu hmasa ber a, khumah ka mu tih pawh ka hre chhunzawm nghal a, engmah hre lovin ka lo awm leh tawh a ni ngei ang. Room chhungah chuan keimah chiahin ka awm a, khawhar hla an sak thawm te chuan ka mittui a rawn ko chhuak leh ta nge nge a, chawhnu lama tawhsual tawk kan nih avangin mitthi lumen a ngai a, naktuk lamah ka fapa chu vui a ni dawn bawk. Ka pasal chu ka hre chhuak thut a, ka phone phawrhin ka call zui nghal a, mahse a ngai te bawkin Switch off a inti leh tlat tawh. 

Zing dar 3 bawr velah pawh ka pasal hmel reng ka la hmu lo va, zawn buai pawh ka tum tawh lo. Ezekiel-a thihna chuan kei ang bawkin a deng na dawn tih ka hria, chuvanga awm bo vang vang rih pawh chu a nih ka ring ta ber. Ezekiel-a hmel dâng tak chu ka en ngawt ngawt a, vawi leh khatah mitthi chu a ni ta mai si a, a tel lova awm ka ngaihtuah zawng ringawt paw'n ka lung a chhe thei. Ka mittui erawh tla tur pawh a awm tawh rih lo va, a hul phak a, ka ṭah nasat lutuk avangin ka mit te chu a bui lûk a, mahse ka hmel chu ka ngaihsak buai peih lo, ka fapa thihna mawlh chu hriatthiam har ka la ti ngawih ngawih a ni. 

Kuang chhunga mu ka fapa Ezekiel-a biang chu hmangaih takin ka chul leh ṭhin a, kum 9 a tlin ni ah a nu leh pate min kalsan chu a ni a, Picnic Spot-a kan lo kal kher kher te chu ka inchhir hnuhnawh em em a, inchhirin awmzia a nei tawh der si lo. Ṭhalai leh kum upa lam deuh tawh te chuan khawhar hla an la sa ṭhup ṭhup a, zing dar 5 a rawn rik meuh chuan ṭawngṭaina hmangin an ṭin ta sup sup a, mi tlêm tê erawh an la ṭhu khawmuang tho. Chaw ei hunah pawh chaw chu ka ei hlei thei lo va, ka na thar leh a ni ber. 

Dar 10 a rik hnu phei chuan ka hlauthawng zual a, ka fapa vui hun lah a hnai telh telh mai bawk si. Pastor leh ṭhenawm khawvenga mite chu an rawn leh lut sup sup ṭan a, hun chu kal chak tak a ni. Dar 11-ah ka fapa Ezekiel-a chu Pastor-in a vui ta ngei a, thu chah tawi tê hi a sawi a, mihringte tan thihna chu zalenna a nih zawk thu leh kan chunga thil thleng reng reng chu Pathian remruatna a nih thu a sawi a, tun ṭum zet zawng Pastor thu sawi chu ka pawm thei hauh lo. Pathian chuan kan fapa neih chhun min laksak duh ka ring lo va, kei chuan kan fapa thihna chu Pathian remruatna a nih ka ring thei lo a ni. 

Vuina hun kan hman zawh chuan thlanmual lamah kan kal a, thlan khur thuk taka ka fapa a zal tawh mai tur chu ka va'n ngai thiam lo tak êm. Min thlamuana min hnemtu tur mamawh em em mah ila a pa lah chu a hmel reng hmuh tur a awm lo va, amah avangin thla pawh ka lak loh phah a, dik tak chuan thlalakna neih vel kha ka ngaina lo a ni. 

Pastor bawk chuan Pathian thu chhiar lehin thu tlêm a sawi belh zeuh a, ka fapa neih chhun, ka hmangaiha ka duat em em Ezekiel-a chu thlan khur thuk tak chhungah chuan an dah thla riai riai ta mai. Insum zo lovin ka ṭap chhuak leh hawk a, ka nu'n min rawn kuah rual chuan

"Ezekiel, ka fapa, ka hmangaih che. Anu hian ka ngai dawn lutuk che, i thih ai hian thi zawk thei ila ka va'n ti tak êm" ka ti lawm lâwm a, vuta thlan khur an vur lai te chuan leiah ṭhu sawp hnuangin ka ṭap a, ka lungchhe lutuk chu ka na chhuak vekin ka hria. 

"Haw tawh ang le Aruatte, heta kan awm reng chuan i rilru a na rei mai mai zawk ang. Inah haw ila, mut hahdam i mamawh tak zet a ni" ka nu chuan a rawn ti a, ka fapa thlan bulah chuan a chhungte tih loh tûmah an awm tawh lo va, Ezekiel-a nui hmel chu chiang takin ka mitthlaah a rawn lang zui nghal bawk. 

"Lo kal rawh le, i haw tawh teh ang" ka nu bawk chuan a rawn ti leh a, nu Chawii leh pa Zuala te nupa chuan lainat hmel tak hian min lo en reng a, duh lo eng ang mah ila ka fapa chuan min kalsan tawh tlat si, haw mai loh chu tih theih ka nei rih lo a ni.

"Kan in lamah lo awm rih rawh se, in leng neuh neuh in la nei dawn bawk si a, a lung a chhe thar leh mai mai zawk ang" in kan thlen dawn ṭepah ka nu chuan a ti a, ka pasal nu leh pate chu a hrilh a ni ber zawk. 

"Ni e, a pawi miah lo. Kan fapa lah hi khawiah chiah nge a awm kan la hre lo tluang zel chu a ni a, rilru sen dan tur pawh ka thiam tawh lo" nu Chawii chuan a lo tih chhunzawm nghal a, ka nute chuan min hruai phei ta ngei a, Saidingi pawh a pasal te inah a haw tlang nghal duh mai bik lo. 

Zanriah ei hun a lo nih chuan zing lam aiin ka zia hret a, chaw pawh tlêm chu ka ei ve thei a, mahse ka taksa mamawh zat chu ka ei lo chiang hle. Saidingi te pawh an chhungkuain kan inah a rawn phei ta vek a, min ngaihtuah lutuk avangin min riah pui a duh a, a u mah ni ila ka tluk lo tak zet a ni. A pasal paw'n min ṭawng thlamuan char char a, mahse chhe tê paw'n ka lung a chhiat loh phah lo. An fate hmel ka hmuh phei chuan Ezekiel-a ka hre chhuak a, rilru na takin ka ṭap leh ta nge nge. 

Zan dar 8 velah ka pasal nu hnen aṭang phone call ka dawng nawlh a, ina ka pasal a haw tawh thu a rawn sawi chuan rang zetin ka inperh tho nghal a, Saidingi chu chhuah puiah ka sawm zui nghal bawk. Saidingi pasal chuan kan pahnihin min kalpui ta zawk a, kan in kan va thlen chuan in leng an lo awm nual a, min hmuh rualin ka nu chuan min lo ko vat a, ka pasal chu kan nupa room-a a awm thu a sawi chuan muangchang lo tak ka ni. Min thihsan lova a la dam ve hrim hrim te, an raw haw leh te chuan min tihlim a, tunah chuan ka pasal chauh chu ka thlamuanna leh ka hlimna kawltu a ni tawh a ni.

"Aruatte, lo kal teh. Bawihpuia thil ka lo hawn a, a duh ngawt ang ka ring. Khawiah nge amah hi a awm hrim hrim? Zanin chu min va ngai lo ve le, keiin ka ngaih tehreng nen" kan nupa room-a ka luh rualin ka pasal chuan a lo ti mawlh mawlh a, naupang kawr tih hriat tak hi a lo keng vâng bawk. 

"PC" ti hluaiin a dinna lamah chuan ka tlan phei a, nghet zet hian ka kuah nghal thlawp a, ani chuan min nam hla deuh pah hian min nuih var var a, ka hmuiah chuan a rawn fawp zeuh bawk a, a awm dan engkim chu ka hrethiam lo tak zet a ni. 

"Engati nge i ṭah mai Aruatte? Le! Ṭap tawh suh le, Bawihpuia tana ka thil leisak hi maw i ti ve em? Han en dik teh, nang i mit a fing deuh" tiin kawr chu ka kutah a rawn hmehbel a, ka pasal chu a â ti dawn ila a â hauh si lo, mahse eng vangin nge heti ang hian a awm?

"PC, Ezekiel-a chuan min kalsan tawh, vawiinah khan lei hnuaiah zalh a ni tawh a ni" ṭap hliam hliam chung chuan ka ti phelh deuh phang a, ani erawh a mittui far khat pawh a tla lo va, ka thu sawi chu awih lo ti hriat zetin a lu a lo thing nang nang thung.

"Ezekiel-a chu vawiin khan ka hmu alawm, ina haw turin min ti nghe nghe asin. Kei paw'n nimin kha chuan min kalsan ta emaw ka ti hman a, mahse Bawihpuia hian min kalsan lo reng reng" a rawn ti a nih chu! A thu sawi chuan awmzia pakhat mah a nei lo. 

"Harh rawh PC, i thluak fim kha hmang rawh, in leng te lo len chhante saw i ngaihtuah thiam lo em ni? Kan in bang kaw huau te hi i ngaihtuah thiam lo em ni? Kei pawh hi ka na, ka na lutuk, mahse kan fapa hian min kalsan tawh a ni" ṭap pur chunga ka tih chuan

"A teuh lo, min kalsan awzawng lo" a rawn ti vin hrawk a, min nam hla dâwrin room aṭang chuan a kal chhuak nghal a, kei paw'n ka zui vat a, chuta ka thil hmuh chuan min va ṭhawng tehreng em, ka pasal chuan thinrim tak hian in lengte chu haw vek turin a ti a nih chu! 

"LALCHHANHIM!" ti vin tuarin ka pasal hmaiah tak chuan ka beng ri sawk a, a awm dan zahthlak zet leh mawl mang zet chuan ka lung a tichhe zual a, harh chhuakin rilru fim pu tawh se ka duh ngawih ngawih a ni. 

"Ni lo, a ni thei lo, a theih loh, Bawihpuia hian min kalsan thei lo. Ka fapa hi ka tel lo chuan khawiah mah a kal duh lo vang, ka phal bawk lo" ti leh phawlh phawlhin kan nupa room-ah bawk chuan a lut leh a, ka nu leh pate paw'n a chet dan chu an thlir tawp ringawt. 

"PC" bianga mittui luang zawih zawih chung chuan ka ti chhuak ṭawk ṭawk a, ani chuan tur zet hian min en run a, ka hmel chu zir chiang ang maia a en reng hnuah a meng zau kawk a, hawi kual zak zakin a lu chu a dawm a, engkim chu a hrethiam ta pawh a ni ang. 

"Ni lo, min thihsan tak tak lo ti raw Bawihpui? Ka tel lova i awm duh loh ang bawkin apa hi i tel lo chuan ka awm duh hleinem, ka hmaah rawn inlan vat teh Bawihpui, ka hmu châk tawh lutuk che" chhuata ṭhingṭhi rawpin a ti mawlh mawlh a, a â vek tawh a ni ber.

Vawi leh khatah che thutin ka pasal chu thinrim tak hian a au tuar tuar a, a bul hnaia thil lo awm te chu na zet hian a vawm keh chuai chuai a, Saidingi pasalin khap daih a va tum lai chuan a lo hnek thal tawp a, ka pasal chu sakawlh chiah chiah hi a ni mai. A hnuah phei chuan au tawh lovin thil chhe thei engkim chu a hnek kek pawp pawp a, darthlalang a hnek kehna avangin a kut te chu a thi phung a, hnaih ngam chi zia zâng a ni lo. 

Pa Zuala chuan duhtawk turin a vin ṭhawt ṭhawt a, awmzia erawh a awm lo nasa mai. A pa meuh paw'n ka pasal chu a hnaih ṭha ngam lo va, kei tak phei chuan tuma'n hnaih rih lo law law zawk ila ka duh, tum loh deuhin kan inhliam palh ang tih ka hlau a ni. Dawhkan chunga Ezekiel-a thlalak pakhat intung a hmuh rualin ka pasal chu a che tawp hmak a, thalak chu lain a en vawng vawng a, ṭhu sawp nuai chung hian

"Bawihpui, Ezekiel, ka fapa" tiin a phun sup sup a, thlalak chu fawpin a âwm zawnah a nawr bet a, kun ngawih ngawihin a chal chu chhuatah a nghat a, ka pasal chuan kei lêtin kan fapa thihna chu a tuarna tih ka hrethiam ve ta chiah.

"Khawngaihin lo kir leh rawh, khawngaih takin Bawihpui, min thihsan suh" tia a ṭawng mawlh mawlh lai chuan a awmna lama phei vatin ka va kuah ta nge nge a, rilru na em emin awm mah se ka pasal mittui chu far khat pawh a la tla lo.

"Bawihpui" ti hniam leh ruihin thawk a la hawk a, kei chuan ka mittui te chu ka dang seng thlawt lo a ni.

(A thawnthuah kan lut ṭan chiah e)

End of Chapter 6