EZEKIEL By Havali Adam (CHAPTER 5)

EZEKIEL 

By

Havali Adam

Chapter 5

Vanneih thlak takin ka nu leh pate chuan Reunion-a ka tel ve an lo phal leh zel a, ka kal ve a rem te pawh a nih ka ring. Chutah Ezekiel-a chuan ka bula rawn kal ve a ngen leh ta tlat a, hruai ve mai pawh chu ka tum rum rum a, mahse ka pasal chuan a lo phal lo thung. Ka ngaihtuah chian chuan a phal lo chu pawi ka ti em em chuang lo, fate lo nei tawh pawh ni se tûma'n Reunion kan neihna turah chuan an hruai kher ka ring lo a ni. 

Mary-i nen chuan kan inbe pawp deuh reng a, ani zawng a phur tawh khawp mai. An pain a hruai dawn thu bakah thil chi hrang hrang min hrilh leh a, kei paw'n ka pasalin min hruai dawn thu chu ka hrilh ve mai bawk. Inrinni zan tir lam a lo nih chuan Reunion kan neihna tur lamah ka pasal nen chuan kan inphur phei a, tui takin ka ṭawng siam siam a, ka incheina erawh a ho ang reng fû. 

Ka pasal berin inchei nalh lutuk a phal lo tlat a, kei paw'n inchei vul chûk ka tum bik hran lo. Reunion kan neihna tur hmun kan thlen hnu rei vak lovah ka pasal chu a inkhalh haw leh nghal a, haw ka duh huna call turin min chah bawk. Ka ṭhiante nen kan han inhmu chiah chu kan râk chel chul a, duthusamin kan bengchheng a ni. A ṭhen chuan hna an nei deuh fur a, ṭhenkhat erawh kei ang thovin nu an lo ni ve tawh a, a hmeia pain kan hlim tlang hle. 

"Chhuanmawia saw a va'n hmelṭha ta ve, a hma aiin a thau tawh bawk si, kan ṭhiante saw chuan an Star chiang mai" Mary-i chuan ka beng bulah a rawn ti sep sep a, a thu sawi erawh mi dang chuan an hriat ve ka ring chiah lo, thawm a tam êm mai.

"I va sawi ho tak! Mi nupui i nih tawh kha, fa pawh i nei tawh leh nghal, khati ang ngaituah rual pawh i ni tawh lo bawk" ka tih chuan nur nang hian min en a, ka ṭawng dan chuan a lai chhun a ni ngei ang. 

"Ka thengthawngah Lalchhuanmawia saw a thawk pha der lo, ani ai saw chuan kan pa ka hmangaihin ka duh fê zawk, ka sawi tum i hriat hmain khati ang khan min ring ringawt suh" a rawn ti bak deuh hlar a, Beer a lo in ve leh kher kher chu a rui ṭan tawh ni maiin ka hria.

"Enteh Aruatte, tun thlenga nupui emaw ngaihzawng emaw pawh a la neih loh zel chhan hi a lo la nghak fan fan che a ni lo maw?" amah bawk chuan a rawn ti leh a, ka thil ei lai chu ka phuh chhuak ṭep nghe nghe a, Lal Mer-i thu sawi chu thil awihawm loh tawp khawk a ni.

"Thil ni lo lô sawi kai ṭhin suh Lal Mer, min nghak awzawng lo vang. Min lo nghak ta pawh ni se awmzia a awm lo, hmân ang bawk khan kei chu mi dang ta ka ni daih tawh" ka tih chuan a ngawi zui ve leh mai bawk a, Mary-i nena kan inbe lai chu Chhuanmawia chuan min rawn en zeuh zeuh leh ta nghal a, Mary-i sawi ang chu a nih ka ring chiah lo.

B.A kan kal lai khan Chhuanmawia hi ka mipa ṭhian neih hmasa ber a ni a, hnam dang kara Mizo mipa ngei mai ṭhian han neih kha chu nuam ve tak a ni. Mipa hleitling ṭha ve tawk tak kha a ni a, Fisrt Year kan zir laiin kan College Mister-ah an thlang nghe nghe bawk. Chuti ang khawpa chhe lo leh College-a lar ve tak chuan min duh ve teh tlat a, kei erawh mipa dang reng reng ngaih melh ka lo tum tawh lo thung. 

PC-a nen kan inngaizawng tawh miau a, Chhuanmawia chu mipa fel leh pian nalh tak ni mah se kei chuan PC-a ka duh zawk tlat a ni. Chutia ngaihzawng nghet duh deuh ka neih thu ka hrilh hnu chuan ani pawh a inthiar fihlim ve leh mai a, keimah tak paw'n nuam ka ti chiah bik lo. Ṭhian ang chuan kan la inkawm reng a, kan inkarah engmah a awm loh avangin PC-a pawh ka hrilh ngai chuang lo. 

Chhuanmawia chuan rei lovah bialnu a nei ta thuai a, chu nu chu Vai pian nalh leh chhe lo zet mai hi a ni a, ka thik tur ang zawngte khan a awmpui deuh ṭhinin ka hria, kei chuan a them paw'n ka thik lo thung. Khatih hun lai kha chuan ka la upa lo hle a, tleirawl mai ka la ni a, mahse ka ngaihzawng PC-a lakah khan ka rinawn ve em em a ni. 

"In va inkawm hrang deuh bik ve" mipa aw ka hriat rualin ka hawi chhuak nghal a, min rawn betu lah chuan Chhuanmawia a la ni zui, mahse ka tan a pawina a awm lo, ka tan engmah a ni hleinem le. 

"Inkawm deuh bik em ni? Keini pahnih ang lo takin nangni chuan hnate in nei fûr hlawm tawh bik si a, kan lo inthlahrung deuh mai mai maw le" ka tih chuan a kiai suk a, ka bula ṭhu chu a en zeuh a, a hawina lam ka hawi chuan Lal Mer-i chu a rui tawh hle a ni ang a lo muhil daih a nih chu! 

"I in ve miah lo em ni? I ṭhiannu lah chuan Beer mai mai pawh a rui a nia, a Dos a sang lo ve khawp mai" Lal Mer-i en reng chunga a rawn tih leh chuan nui zeuh pah hian ka in loh thu ka lo sawi ve mai a, mak a tih hmel em em leh nghal. 

"Ka lo la zawt miah lo che a, nupui i neih lam te hi i tum tawh êm Chhuanmawi?" kan ngawih dun reng hnu chuan ka ti deuh tawl a, kan piaha kan ṭhiante zai thawm a rin em avangin ka aw chu a zawi hran lo, kan ṭhiante chuan Karoke chu an hlimpui hle a nih hmel.

"Neih tum rih teh nâng, keini chuan nangni angin nupui tur pawh kan hmu zo lo a nih hi! Ka tlangval rei ta viau hi ka inthlahrung lek lek zawk dawn alawm le, nupui neih chu ka ngai ve tawh a ni" ka ṭawngkam hnan dan ang deuh chiah chuan a rawn ti sup sup a, a nuih a zat hmel ang reng hle bawk. 

"Ni chiah mai, nupui neih chu i hun ve tawh khawp mai. Chuti lo chu tlangval senior ral i kai mai dawn, senior lutuk chuan hmeichhiain an iai mai ang che" fiamthu rilru tak chuan ka ti a, ani pawh a rawn nui ve leh ta suk.

"Theihnghilh che ka tum ṭhin a, mahse theihnghilh i har khawp mai Aruatte. Pasal i nei tawh tih ka hria, i bulah heti ang thu sawi ringawt tur ka ni lo tih thlengin ka hria, mahse dik tak chuan hmân ang chiah khan i hmelṭhat ngaiin i la hmelṭha reng a ni" a rawn tih chuan ka nui tawp chiang teh e!

"I duhawm ngaiin i la duhawm reng a, tun thlenga nupui ka la neih loh chhan pawh nangmah hi i ni asin, mahse tunah hian ka rawn beisei thar leh che tihna pawh a ni lo. Nangmah i ni a, ka rilru dik tak ka sawi mai a ni" a rawn tih zawm leh chuan rang zet hian

"Ka awih lo" ka lo ti chhuak nghal phawng a, kum 10 chuang a liam tawh a, keimah vang em ema nupui a neih loh chu ka ring hlawl lo, College kan kal ho lai khan min duh ve hle tih chu ka hre ngei a, mahse tun thleng thlenga min la duh tur khawpin a â lo a ni.

"Awih lo mah la a ni tlat si alawm, engmah hlauthawn phah chuang suh Aruatte. Mi nupui i ni a, fapa i nei tawh bawk a, in chhungkaw boruak tichhe zawnga awm ka tum vanga heng thute hi sawi ka ni lo" a tih laklawh lai chuan a ṭawng pawh ngaithla tluan duh lovin

"Sawi tawh lo vang Chhuanmawi, khawngaihin heti ang lam zawng hi chu sawi tawh lo hram ang. Hun pawh a lo kal duak tawh alawm le, haw mai ka duh tawh" tiin ka ṭhutna aṭang chuan ka tho a, Lal Mer-i chu kaih thawh tumin ka che a, keimah mai chuan ka kai tho zo teuh lo. 

"Khawi keima'n ka lo pawm ang, mi dang saw chu in haw tih hrilh kher lo mai ang, nuam an la ti dar dar em mai. In in thleng ka va thlah ve ve dawn che u a nia, rem i tih chuan" ka ṭhiannu pawm kang lâwp chung hian a rawn ti a, a ṭawngkam chhuak chu a hawihhawm khawp. 

"Thlah kan ngai lo vang, kan rawn kal lamah ka pasal ka lo hrilh lawk tawh a, ka call ang a, a rawn thleng thuai mai ang" ka tih chuan a ṭawng tawh lo va, pawn lamah Mary-i chu a pawm chhuak zui nghal daih a, Lal Mer-i reng reng pawh chu engtin tak a pasalin ti ang maw!

"Thlah chu in ngai lo tak tak maw?" pawna kan chhuah hnu chuan a rawn ti leh a, kei chuan kan ngaih loh thu ka lo sawi leh a, dik tak chuan Chhuanmawia nena inhnaih vak chu ka duh rih lo, khati ang khawp khan PC-a'n a thik tawh a, min luhsan daih mah se pawi ka ti miah lo. 

Minute 15 vel a ral chuan ka pasal motor ngei chu kan hmaah a rawn ding a, ka pasal chuan kei ni lovin Chhuanmawia chu a melh ta chat mai. Mi â lo tih takah Chhuanmawia chuan ka pasal chu hawihawm zet hian a lo be nghal a, an inchibai bawk a, ka pasal erawh a ṭawng lutuk lo, Chhuanmawia zawhna ṭhenkhat chu a chhang duh lêk chauh a ni. 

Mary-i chu an veng lamah kan thlah phei a, an in kawt kan thlen ruala hlan thlak kan tum lai chuan a rawn harh deuh a, mahse a harh chiang hran lo. Eng zat em em nge a lo in hman ka hre lo, nu nih tawh phei chuan a mawi lo asin le. A phone laksakin a pasal chu ka call nghal a, a pasalin ka ṭhiannu awm dan a hmu chiah chu a lungawi hmel teh chiam lo. A awm ve reng, tu mipa nge mahni nupuite rui taka an haw laiin lungawi reng reng ang ni! 

Kan in lama kan inphur phei laiin PC-a chuan zu emaw Beer ka in leh in loh thu min zawt ta chat a, ka lo in ve duh miah lo kha ka ti fuh tak tak a ni. A them pawha ka in loh thu ka sawi chuan a lo thaw huai a, a thu hrimah hmeichhe zu in thei nih hi ka duh reng reng lo, nu ni tawh ngat phei chuan mi hmuh dan ka dawn ngam lo zawk e a! 

Kar khat vel hnu lawkah ka pasal chu zin a ngai leh ta thut mai, mahse tun ṭum erawh a zin dawn thu min hrilh zan aṭang a bula kal ve turin min sawm nghal a, Ezekiel-a phei chu phur tak a ni. Kei paw'n ka nu leh pate'n rem an tih chuan zui ve mai chu pawi ka ti em em bik hran lo, mahni pasal te ngaih zawng a natzia ka hre chiang tawh êm mai. 

Tukṭhuan ei laiin ka pa chu ka dil hmasa a, ka pasal pa a nih angin ka zah a, ka ngaina bawk a, a thu tlukna siam tawh reng reng hi chu ngaituah chet chet paw'n a ṭha fû zel, heti ang lam kawngah rau rau hi chuan PC-a hian a chhun fuh khawp. Ka pasal nu leh pate chuan PC- a zui chu an lo phal nasa khawp a, Ezekiel-a erawh kal ve lo mai se an ti fiamthu a, kan fapa ve thung chuan a pa bula zin ve chu a tum ruh khawp. 

Kan chhungkua chuan kan zin ta ngei a, Quarter-a kan thlen avangin a nuam ang reng phian. Mi in vela thlen hi nuam ka ti chiah lo ṭhin a, Ezekiel-a ka pai lai khan vawi khat chu mi inah kan thleng tawh a, sim chiang tak ka ni. Mi ina thlen zawng kan thlen inte lo hawihhawmin lo fel viau mah se inthlahrun a na duh ka ti, chuta ṭang chuan ka rilru hrethiam takin mi ina thlen loh dan hram ka pasal chuan a ngaihtuah ṭhin zui ta bawk.

"Lo lut tawh teh u, in hritlang mai ang. PC nang pawh i fapa thu thuin awm ṭhin suh, a nuam tih zawng tak te hian awm ṭalh lo ṭhin teh, in dam loh vaih chuan a pawi zawk" kawng dawmin ka pasal leh ka fapa chu ka be lawng lawng a, vawiin chu ruah a sur deuh reng a, anni pafa lah  chuan ruah do nuam an ti ropui mai si.

"Han ko lut tawh tak teh, an do rei mah mah tawhin ka hria, an dam loh chuan a pawi thui mai mai zawk" ka nu chuan kawngka hawng zau deuh pah hian a rawn ti a, kan zin haw hlim deuh chiah kha a ni a, in kan thlen hnu rei lovah ruah a rawn sur leh kher bawk nen tui ngaina pafa chu kan khap dai thei meuh lo zawng a ni e.

"PC! Lo lut tawh rawh u, in dam lo mai ang" hlauthawng ru zetin ka ti leh vak a, ka nu chuan vawi khat vel chiah a ko va, an rawn lut mai dawn lo tih a hriat chian êm vang pawh a ni ang a luhsan daih a, ka vawi thum kohnaah erawh an rawn lut ve ta hram.

Bathroom-ah an pafa bawkin an inbual dun zui leh nghal a, Ezekiel-a chu a nui leh vak vak tawh a, engtin emaw ni tak chuan an inchhaih leh tawh a ni ngei ang. Ka lo hlauhthawn ruk ang ngeiin an pafa chuan a dam lo nghal a, ruah an do rei ve ang reng bawk si a, an dam loh reng ka ring lo hrim hrim zawk a ni. Khumah an pahnih chuan ka mut dun tir a, inkuah chial hian an mu dun a, damdawi an ei tawh tho avangin naktuk lamah chuan an pangngai ve leh mai ka ring bawk. 

Chokaa ka luh rualin ka nu chuan PC-a te pafa awm dan ṭhat lohzia chu a lo sawi nghal mawlh mawlh a, a hauh tum berin a muthilhsan daih bawk si a, a lungawi lo ve hranpa hrim hrimin ka hria, ka lakah erawh lungawi lohna a nei paw'n ka hre lo thung. Ruah sur tam lai takin ka pa a rawn haw a, a ṭawng laklawh bawk nen ka pa chu a lo hau leh nghal mial mial a, ruah sur lai ber khera a rawn haw te chu a ṭawng titam tu a ni a, ka pa erawh ka nu mizia a ni tih hrethiam takin a ngawi reng thung. 

"Ina awm hi i ning ṭhin em?" thawmhnaw ka thleh fel mawlh mawlh laiin khuma ṭhu mu awn duai chung hian ka pasal chuan a rawn ti sup a, room-a ka luh lai khan a lo harh tawh a, a pangngai tawh viau pawh a ni maithei. 

"Ning hran lo ve, ina ka awm loh te'n khaw'nge ka awm chuang ang" ka lo ti ve mai a, thawmhnaw chu ka thlep fel zo chu a ni der, ruah lah chu a la sur duh phian zui a, kan zin haw aṭang tawh a sur tawp leh tawh lo hrim hrim.

"Dawr siamsak che ka lo rilruk a" ring lutuk lova a rawn ti leh chuan a lam ka hawi rang kher mai, ani erawh ka awm dan teh thut vang pawh chu a ni ang a lo kiai suk a, a sawi tâkah chuan dawr neih chu ka duh lo hran miah lo. 

"Eng dawr?" tih leh khuma lawn chu ka rual nghal a, a ban vei lam chu a lo phar duai a, a bula inthawlhin a darah la lu ka nghat a, current chu a rawn awm lo leh ta zel a, ruah a sur nasa ang reng bawk si a, a awm lo har ka lo tiru viau tawh zawk a ni. 

"Eng dawr nge i duh? I duh duh a ni mai, sawi tawp rawh" a tih chuan ka ngaihtuah vang vang a, kan in hlat taka dawr neih erawh ka duh lo, ka ngaihtuah chian chuan dawr pangngai neih ka châk leh lo thut a, chu ai chuan mi vei vakte ei tur Momo emaw Mix ṭhut pui chu a fuh phian dawnin ka hria. 

"Dawr siam ai chuan kan in kawt kawngpui sir velah sawn Momo leh thil chi hrang hrang kawnga kalte ei theih mai tur zuar zawk ila a va ṭhat hmel ve, dawr ang tak tak a nih dawn loh avangin ei rawng bawl vel pawh a buai phah lo ang a, eng nge i ngaih dan?" ka tih chuan mak tih hmel fê hian

"Chuti ang teh daih chu i châka maw!?" a rawn ti chhum bung deuh hmuk a, nui ver ver hian ka lo bu nghat nghat a, dawr min siamsak a tum kha a ni a, ka thu sawi avangte chuan a ṭhulh leh mai ang tih ka hlau ru nghe nghe, ka thil tih tum chu a hlawk dawn phianin ka hria a ni.

"Dawr pawh a ni dawn hleinem le, i duh dan a nih chuan naktuk aṭang pawh kan siam nghal thei ang chû, siam a harsa lo khawp ang" a rawn tih leh chuan ka khi ṭhaw a, lawm avangin a biang chu ka piai deuh vak a, a meng no lo teh e! 

A kut khal niap niap pahin ka thil zawrh tur chu a hlawk ka rin thu ka sawi melh melh a, mipa kut tih takah a kut chu ka kut lêtin a lian a, lumna lah chu a ngah em em a, a kut lakah chuan ka kut chu hmeichhe naupang kut ang vel leka lian a ni. Ruah chu a la sur char char a, Current pawh a la awm chuang lo. Kawl pawh a phe nasa khawp mai, ka mut chu a rawn chhuak riai riai ta vat a, kan awm dan tê chu kan insi chial hlawm bawk si a, a nuam reuh phian. 

Kan lo muhil tlang vek a nih ka ring ka harh leh chuan ruah a lo sur tawh lo va, current pawh a awm tawh bawk a, ka nu leh pa thlengin kan lo muhil vek hi a lo ni a, zanriah chu dar 7 leh a chanve vel daihah kan ei phah nghe nghe. Chaw ei laiin ka pasal nena kan titina chu ka sawi a, ka nu chu a phur ber berah a rawn ṭang nghal a, chu chuan min tihlim zual khawp mai. Zan a rei ve leh tawh tho bawk nen mut hmunah phone ka khawih melh melh a, Reunion kan neih laia thlalak te chu ka en a, rin ai takin a nalh hlawm phian.

"Kha kha tu nge?" ka pasal chuan a rawn ti a, kei paw'n chu thlalak ber kher chu hmuh ka inbeisei lo, ka phone ken lai chu a rawn la hmak a, ka phone-a kei leh Chhuanmawia inbe lai thlalak chu chiang deuh hian a en run a, nuam lo duh vet vet tak a ni. 

"Ngaihzawng i nei em?" a rawn ti ta hmuk mai, Chhuanmawia a thik hle tih chu ka hre tawh ngei a, mahse chuti ang em ema min rin nghal chu ka lo beisei hauh lo, thil ṭul miah lovah ka insawifiah a ngai leh dawn ta a nih hmel. 

"Nei teuh lo mai, nei tur ang hian min ngai ringawt suh PC. Chhuanmawia hi ka ṭhian mai chauh a ni a, hemi zan pawh hian ama'n min rawn be hmasa zawk a, kei chuan ka be hmasa reng reng lo" tiin phone chu lak ka tum a, ani chuan a lo phal der lo.

"He pa hi hmu tawh suh, a bul hnaihah pawh awm tawh suh, ka thu sawi awmzia chu i hria em? Ni lo, mipa dang hnaih hrim hrimah awm tawh suh" a rawn ti leh mawlh mawlh a, a la dam chiang lo ti dawn ila a pangngai viau tawh chuan ka hre bawk si.

"Engati nge tun hnai hi i thik thu a chhiat thar em em a? Khang kum kal ta chhung zawnga min ringhlel ngai miah lo khan min ringhlel thut thut bawk a, mipa dang ka melhsan lo che tih i hre chiang turah ka lo ngai asin" ka tih chuan

"Ka hre lo, ka thik thu hi a chhe thar tak tak a ni. I ṭhianpa nen hian inzawmna innei lo tak tak maw Aruatte? In lo nei a nih vaih chuan kutthlak mai pawh ka pawisa miah lo a nia, a tawp nân min han hrilh leh teh" a rawn la ti hram a, ka lo thaw hawk ringawt. 

"Mawl va rung, nang lo mipa dang ka duh reng reng lo, Chhuanmawia lêt khan ka hmangaih che tih hria la, lawm avangin nui var var la, intithei hle zawk ta che" ka tih leh chuan hahdam hmel zet hian a awm a, a rawn nui zui suk bawk. 

"A ṭhat chu, kum upat lamah hian thik thu a chhe hma te pawh a ni ang. Thla leh ni 15 khi Bawihpuia Birthday a nih kha aw, theihnghilh chi miah loh" ka phone min pek let pah hian a rawn tih zawm ta daih a, sawi lo mah se Ezekiel-a Birthday te chu ka theihnghilh teuh lo mai.

"Ka hria alawm, eng nge kan tih sak ang tih lam te ka lo ngaihtuah vek tawh, tun ṭum chu surprise lovin hrilh lawk ila, amah hian duh thlang se a ṭha ang" tiin ka phone chu ka hmet thim a, phone en rei lutuk hi chuan ka mitin a zo lo ṭhin, ka lute hi a na bur zel.

"A ṭha khawp ang chû, mahse birthday cake leh brithday present tur chu kan leisak tho turah ngai ang" tih leh rizaia min khuh chu a rual nghal a, zanin chu a pi leh pute bulah Ezekiel-a a riak ve teh mial a, keini nupa paw'n hun thawl kan neih ve phah. 

Tlai lamah kan lo muhil kher bawk nen kan harh ṭha dun khawp a, nupa nun pawh vawi hnih lai kan hmang a, Ezekiel-a a awm loh vang nge ni a che duhamin min dim lo khawp. Kei lah chuan ka lo thlahlel ve leh em em zel bawk a, ka pasal bulah hi chuan nupa nun kan hman lai pawh ni se thawm chhuah chu ka zak duh bik reng reng lo. Nupa nun kan hman zawh chuan dar 1 leh a chanve vel a lo ri daih tawh a, kan intifai dun leh thlap a, zanin chu kan zalen ta phian. 

A tuk aṭang chuan kan in kawt kawngpui sirah chuan ei tur zuarin ka ṭhu ve ta ziah a, pawisa nei loh pawh ka ni lo, keimah chuan ka châk ve tlat a ni. Ni hnih hnuah in tê ang deuh reuh ka awmna tur ka pasal chuan min siam sak a, ruah sur chang paw'n hulhiap atan a ṭha phian a, chu lai in tê chu ka nu nena kan hun hman tamna ber a ni zui ta bawk. Kar 3 kan hman ral meuh chuan Ezekiel-a birthday pawh a rawn thleng ta, a pa nena kan leisak Birthday present chu hlim zet hian a hawng a, mi dang hnen aṭang pawh bithday present a dawng nasa khawp mai. 

Kan fapa brithday a nih avangin Picnic Spot lamah kan chi leh kuang hrim hrim chu kan kal vek a, kan ṭhenawm te thlengin an rawn tel kim ang reng hle a, a nuam pawh kan ti tlang hle bawk. Tui cheng thiam lo ve tak ka ni a, kawng china thukah pawh hian ka che sual ang tih ka hlau em em zel. Ka pasal erawh kei ang lo takin a cheng thiam em em thung a, vawi eng emaw zah min zirtir nghe nghe a, mahse keimah zawk chu ka beidawng a ni. 

Swimming pool aṭanga ka chhuah hnuah pawh an pafa chuan an la inzirtir ngat ngat a, Ezekiel-a chuan a hleuh thiam thuai dawnin ka hria. Ka kal sawn dawnah fimkhur turin ka chah leh thlap a, anni chuan ka ṭawng pawh an ngaisak lo, an hlim dun em em ringawt. Tui lam hi chu chet sual palh a awm thei a, fimkhur zual a ngai ka ti, tui thiam apiang hi an tla hlum duh leh ta nghal a, chuvanga PC-a te pafa pawh fimkhur tura chah leh hram chu ka ni. 

Ka intleuh fai hnu chuan ei rawng bawlna lamah ka kal a, ka pasal chhungte leh ka chhungte chu titiin an lo nui dam dam a, mi ṭhenkhatin ei rawng an bawl bawk a, tun ṭum zet zawng ka fapa birthday chu kan lawm pui ang reng hle. PC-a chu la huh zawr zet hian choka lamah a rawn lang hlawl a, mi hmuh loh laiin min chhaih vel a, kei chuan intleuh thuai turin ka lo ti thung. Swimming pool pawna a ṭhiante nen infiam Ezekiel-a ka hmuh chuan ka ngaih a ṭha deuh, a pa nen a nih loh chuan tui cheng lo se ka duh a ni. 

Vawi leh khatah rang zet hian ka pasal chu a che chhuak thut a, kei phei chu hamhaih tak ka ni. Chak taka ka pasal tlanna lam ka hawi chuan mi dang chu an lo rak chel chul a, ka pasal chu Swimming pool-ah a zuang lut nghal bawk a, ka thil hmuh avang chuan ka buai vek ni maiin ka hria. Ka theih anga rangin Swimming pool lamah chuan ka tlan phei nghal hlawk hlawk a, kan vaiin kan tlan phei a ni ber zawk. Hah vang ni miah lovin ka thinphu te chu a rang em em a, ka rilruah chuan hlauhthawnna hlir a awm bawk. 

End of Chapter 5