EZEKIEL By Havali Adam (CHAPTER 4)

EZEKIEL

By

Havali Adam

Chapter 4

"Enteh Chhuanmawi, saw laiah sawn puitling pathum lo ṭhu kha i hmu ve em?" tiin ka ṭhianpa chu ka zawt ta tawp a, a mak ve êm alawm, minute 10 pawh a la ral lo vang tihah ka pasal leh a ṭhiante chu an bo thut tlat a ni.

"Hmu e, mahse rei ṭhu lovin an chhuak leh nghal daih alawm, engati nge? I hmel hriat an awm em ni?" a rawn tih chuan an zinga pakhat chu ka pasal a nih thu ka lo hrilh ve nghal mai a, ani pawh chuan

"A nih chû, i pasal chu pangngai takin min la inhmel hriattir ve la a ṭha ang" a lo ti ve leh mai bawk a, ka thil ei thleng chuan a tui tawh lo zo vek, a chhan chu ka pasal hmelah khan thil dik lo a awm tih ka hmu thei a ni. 

Kan in ka thlen chuan Bazar aṭanga ka thil hawnte chu Fridge-ah ka dah lut nghal zung zung a, nakin lawkah Ezekiel-a ka va hruai a ngai dawn a, ka muangchang hman vak lo a ni. Ezekiel-a a hruai hman dawn loh thu ka pasal chuan zing lamah min hrilh lawk vek tawh a, chuvanga hruai tum pawh chu ka ni, mahse nichin maia kan inhmuh dan khan ka awm a tinuam thei hauh lo, a lo haw hunah a thin a rim ngei pawh ka ring. 

Ezekiel-a hruai turin ka chhuak dawn chiah tihah ka pasal hmel chu ka hmu hlawl a, vawiin zet zawng a enga mah hi a dik paw'n ka hre tawh lo. Tlai dang aiin a rawn haw hma a, chhun lamah lah khati ang khan min hmu bawk a, ka chhuah dawna ka biak paw'n min chhang hauh lo. School lam pana ka kal laite chuan ka rilruah ka pasal ngawr ngawr a awm a, eng vangin nge ka biakna te kha a chhan duh loh? A hre reng awm si a, a thinrim hle a ni ngei ang.

"Khaw'nge apa nu? Apa'n min rawn hruai dawn emaw ka ti asin, mahse a pawi chuang lo" Taxi Stand lama ka kal pui laiin Ezekiel-a chuan a ti barh barh a, School Compound kan chhuahsan hnu aṭang tawh a la ṭawng char char reuh a, vawiina an zirlai chu nuam a ti hle te pawh a ni ang.

"Apa chu a hman lo leh thut a, ka lo hruai ta mai che a nih hi! Apa chu inah a awm tawh aw, a lo haw hma hlauh a" ka tih chuan a rawn nui nghal ver ver a, apa lam sawi tawh lovin a zirlai lam chu kawng tluanin kan sawi dun ta zawk bawk.

In kan thlen chuan pangngai hmel zetin PC-a chu a fapa bulah a awm a, kan in kawtah chuan inbual hma an infiam leh tê tê nghal bawk a, mahse kei hian ka pasal chu a hlim lo tih ka hre chiang lutuk. A fapa bulah chuan a nui a, a hlim hmel em em bawk a, a chhungrilah erawh vawiina mipa dang nen min hmuh dun avang khan a hlim lo tih a hriat ngawih ngawih thung. Veranda aṭang ka pasal leh ka fapa infiam chu ka en reng a, ka pasal chuan ka en tih hriain min lo en zeuh zeuh ṭhin ngei a, mahse tlai dang ang a ni hlawl lo a ni. 

Ni engin hniam lam a hnaih chuan in chhungah lutin ei rawng ka bawl zui ta mial mial a, ka pasal chawhmeh duh em em chu ka siam bawk a, engtin emaw tala a rilru chu tihhlim ka duh a ni. Kum 10 chuang kan lo innei ve tawh a, vawiin ang hian a la awm ngai lo. Min thinrim khum ngai loh ang bawkin ka biakna chhan duh loh a nei ngai lo va, ka la tawng ngai lo kher bawk nen kan awm dan chu hrehawm ka tiru tak zet.

Zanriah kan ei kham chuan ei leh inna ka seng fel zung zung zui nghal a, Ezekiel-a chu a pu nen an inkawm a, ka pasal erawh kan room-ah a tawm nghal chat thung. Thleng chu ka sil zo thuai a, ka pasal nen chuan kan inbiak a ngai a ni. Kan room-a ka luh chuan thil a lo ziak mawlh mawlh a, a buai hmel ang reng khawp. Ngawi rengin a hnungah chuan ka ding a, a dar te chu ka hmehsak a, thingpui siam nân a la hma deuh bawk si a, ka la siamsak duh ta rih lo. 

Zan dang angte chu ni se ka kut chu a rawn hum hnan ang a, inherin min fawp ang a, a hna thil chu a khawih rei peih leh miah lo vang, mahse zaninah erawh a ngawi reng a, ka tawhna te chu engah mah ngai lo ang maiin a awm tlat a ni. A dar chu hmeh sak tawh lovin a hnung lam aṭang chuan ka kuah a, ani ve thung chuan a chet a la chawl chuang hauh lo. Kan nupa awm dan chuan ka rilru a tina a, siam ṭhat thuai chu ka tih ngei ngei tur a ni. 

"I hmuh ang kha a ni lo PC, a ni lo tak tak! Kan inchibai lai tak i rawn hmu a, ani kha chu B.A kan zir laia ka ṭhianpa mai chauh a ni" engkim a hriat vek tawh avangin ka ti tlang nghal rawk a, inhau miah lo mah ila chuti anga awm tluka hrehawm chu ka la hre lo. 

"Awm dan tur ka hre lo a nia PC, heti ang hian awm reng lo teh. Ngaihzawng nei turah min ngai niin ka hria, ka neih lohzia chu nangma'n i hre chiang ber ang" ka tih chuan a thil ziah lai chu a tawp hmak a, a che chhunzawm leh lo hrim hrim bawk. 

"I laka insawifiah hian awmzia a nei dawn chuang lo a ni ang, insawifiah hi a ṭul miah lo va, mahse mipa dang nen min hmuh dun avangin i rilru tur ka dawn a, ka insawifiah mai chauh a ni" ka rilru chu a pangngai chiah tawh lo va, ka ṭah êm erawh a la chhuak rih lo thung.

"Thingpui ka va siam ang che aw, ka ṭawng ri pawh hi i ning palh ang" tih leh ka kuahna aṭang chuan awm sawn ka rual nghal a, ka pasal laka inthlahrung ru zeta kawngka lam ka pan lai chuan ka ṭah a rawn chhuak ve ta hial a, chuti ang chuan kan inkarah hlim lohna a la awm ngai lo tlat a ni.

"PC" ka hnung lam aṭanga min rawn kawih her rualin men deuh pur chuan ka ti chhuak ṭuau a, insum thei tawh lovin nghet zet hian ka kuah zui nghal thlawp bawk a, ani paw'n min kuah nghet ve ta khawp.

"Ka thik lutuk alawm Aruatte, ka awm dan hi ka hrethiam bik lo. Ka rilru kha a na nghal em em a, ka vawi khat hmuhna a nih vang pawh a ni ang kha pa kha namen lovin ka thik a ni" a rawn ti ve sup sup a, ri meuhin ka ṭap chhuak ta hak hak.

"Mipa dang ka pansan tawh che em ni? Maw!? Kum 10 chhung khan ngaihzawng ka nei ngai em? Min han hrilh teh PC, i rinhlelh tur talin ka awm ngai em?" ka ṭah avangin ka aw chu a fiah mang lo va, ka pasal taksa chu ka kuah nghet zual em em bawk.

"Ka tihpalh a ni e, min hrethiam hram rawh Aruatte" ti dam thlupin min pawm a, khuma min mutpuiin duat zet hian ka hnung chu a chul hauh hauh a, a chet dan engkim chuan ka ṭah a ti chhuak zual tingin ka hria.

"Ka hmangaih che asin, ka hmangaih em em che a, khawngaih takin ngaihzawng dang nei turin emaw nang lo mipa hmangaih tur ang zawng chuan min ngai tawh suh, min ngai tawh miah suh PC" ka ti leh mawlh mawlh a, ani chu a ngawi reng thung. 

"Ka hmangaih che" a ngawih vang vang hnu chuan a rawn ti hniam ruih a, ka khabe chawiin chiang takin min en a, ka mit leh biang velah chuan mittui a la awm phung a, a kut lum vung vung chuan ka hmai chu a chul a, min rawn fawh chuan ka lo chhang let rang khawp. 

"Ka manganzia i hre miah lo em ni? Min be duh bawk si lo, ka biakna lah i chhang duh bawk si lo. Heti ang hi chuan awm tawh lo hram teh PC,  a hrehawm ka ti êm mai" ka ti leh tawn tawn a, ka ṭah chu chhuak lutuk tawh lo mah se mittui erawh tla tur a la awm reng tho. 

Ka pasal chuan chhun lama a hun hman dan min hrilh zui nghal a, chhun aṭang tawh a mood a chhe sa hrim hrim zawk hi a lo ni a, chuvanga lungawi lo zual em em pawh chu a ni. Kei paw'n Chhuanmawia nena kan inhmuh dan leh kan inhriat dante chu pangngai takin ka hrilh ve leh mai bawk a, engkim ka hrilh hnuah chuan a hrethiam ve ta khawp. A hna lam pawh tih chhunzawm tawh lovin khumah chuan min kuah bet run a, kei paw'n ka kuah let ve ran bawk. 

Kan ni hman dan chu ka ngaihtuah let neuh neuh a, tunah chuan a vawi khatna atan kan nupa inkarah rilru natna leh lungngaihnain eng a rawn chhuah ve ta, rei tak erawh kan lungngai lo va, kan rilru pawh a na rei hek lo. Thik thu vangin ka buai a ni ber a, ka pasal chu ka dem hran lo, kei pawh hian hmeichhe dang nen an inkhawih lai hmu ta ila chuan ka thik ngei ang a, ka laka ka pasal awm ang chiah chuan ka awm ve ngei ka ring bawk.

Thla kan hmang ral a, nipui pawh ka hnaih sawt sawt a, khaw lum kara ruah a rawn sur ve leh zeuh zeuh ṭhin chu a tih zia phian bawk. Kan in lamah pawh kan leng phei fô va, mahse Saidingi te ina len phei chu kan uar mah zawk. Chhun lamah hi chuan hna nei lo tih takah ka nu nen inah kan awm deuh chawt zel a, kan huan te chu kan tifai leh ringawt ṭhin. Tin, kan huanah hian thei a tam ang reng a, theihai bawl tur pawh la sen deuh mah se a awm thluah tawh a ni. Kei leh ka nu hi chu Housewife deuh tawp ang chi hi kan ni a, kan pasalte pahnih hian min chawm zo hle bawk. 

Nu Chawii leh pa Zuala te hian fapa pakhat leh fanu pakhat an nei a, pakhat zawk chu ka pasal hi a ni a, pakhat erawh vanduai thlak takin Cancer natna avangin a boral tawh thung. Ka pasal nena kan inhriat hma daihin ka pasal unaunu chu a boral tawh a, PC-a paw'n a sawi lang ngai tawh lo, kei lah hian lo hnem vak dan tur ka hre lo ropui bawk si, ani tan chuan sawi chhuah loh law law kha a ṭhatna a awm tho. Fanu an chan tawh vangte pawh a ni ang ka pasal nu leh pa chuan fanu ang tak takin min en a, Ezekiel-a ka hrin ni te khan lawm tak an ni. 

Chhun ni sat ver vawr lai a ni a, ni dang ang lo takin khua pawh a lum teh chiam lo va, in chhungah fan kan on tho bawk nen kan in chhung boruak chu a dai nuam raih mai. Kan inte hi chu la zia tak a ni zawk, mi dang in phei chu a lum thei khawp mai. Kan in leh a chheh velah thing a tam a, chungte chuan thli a siam a, ni sa viau ṭhin mah se thli thaw a awm hi chuan lum lutuk tur pawh a lum dan a nep deuh ṭhin. 

Ka nu nen kan titi mawlh mawlh laiin tui a rawn haw thut a, titi zawm lovin keini pawh chuan tui lam chu kan buaipui zui nghal a, tui hi chu kan hnianghnar ve chiang a ni. Tui kan buaipui zawh chuan dawhkana ka phone chu ka en a, Mary-i hnen aṭang Missed call a lo awm a, kei paw'n ka call back ta nghal a, tun lai chu kan inbe khât ang reng khawp, a buai ve te pawh a nih ka ring.

"Eng nge ni ta? Tui a haw a, ka lo buaipui daih alawm maw le" phone a pick up rual chuan ka ti nghal a, ka nu chuan a inbual dawn thu min rawn hrilh lawng lawng bawk a, lu ka lo buk khum nghat bawk.

"B.A final Year ho khan Reunion neih an rawt a, chu chu rawn hrilh che ka tum mai mai. I kal ve dawn em? Group-ah pawh khan an sawi nasa tawh khawp a nia, i kal chuan ka kal ve ang" a rawn tih chuan

"Keini tan chuan a zahthlak deuh lo maw? Mi dang chuan hna an nei deuh fûr awm bawk si, keini pahnih lah chu pasal kan nei daih tawh leh nghal a, kan zak mai mai ang tih ka hlau" ka lo tih zawm nghal zat a, ṭhiante mitmei veng reng renga han awm chu ka phur teh lûa lo a ni.

"A ho êm mai, min awt viau zawk ang. Anni chuan sum leh hna nei tawh mah se pasal emaw nupui emaw an la nei lo tlat a, chu chu min awh viauna tur pawh a ni. Nupui emaw pasal emaw an duh ve vek, hna nei ringawtah i rilru pe suh" a rawn tih leh chuan a sawi dik ka ti ve tho. 

"Ka hre lo le, ka pasal ka lo rawn ve phawt ang a, a phal leh phal loh a ni mai. A thu hrimah engtika neih nge an tih hrim hrim? Nang pawh in pa khan a phal ngawt dawn em ni?" Fridge hawng paha ka tih chuan

"Kan pa chuan a phal lutuk, ka hrilh vek tawh zawk. Tun kar tawpah hian neih an ti a, a hmun tak erawh an la sawi chiang lo. PC-a khan han phal lo nâ teh se, ka hau hrep a ni mai. A phal lo thiang lo, i sawipui hnua a phal lo a nih chuan keima'n ka lo bia ang" a lo ti leh zung zung a, Mary-i hi chuan ka pasal hi a ngam ve hrim hrim.

"Ni e, a lo phal loh tâk leh nangma'n i be tawh mai dawn nia, mahse Reunion neih vel hi ka phur teh chiam lo a ni Lal Mer" tiin ka lo chhang ve mai a, thil dang sawiin an nupa chanchin ṭhenkhat chu a rawn sawi ta daih a, kan nui dun leh nasa hawk hawk khawp.

Tlai dar 3 bawr velah ka pasal leh ka fapa chu thawm bengchheng tak siamin an rawn inphur haw leh a, Motor-ah hla an play dum dum bawk a, eng tak nge an tih dun leh ang tih pawh ka ngaihtuah thiam lo. Inbual châk tawh hle mah ila ei rawng bawl chu zawh fel thuai thuai ka duh ta zawk a, tlai dangah chuan inbual fai ver vawr hnuah ka bawl ṭhin. 

Ezekiel-a chu ṭhenawm naupangte'n an rawn len chilh a, kan inah chuan rei pawh an awm lo. Kan in kawtah ball petin an infiam zui ta daih a, ṭhian ngaina mi tak a ni reuh a, kan ṭhenawm naupangte nen pawh hian an inkawm thei viau. Ei rawng chu dar 4 leh a chanve velah ka bawl fel diam a, chaw ei dawna chhuan lum leh zeuh a harsa tawh lo bawk nen inbual chu ka tum zui ve ta mai. 

Kan room-a ka luh chuan ka pasal chu inbual miah lo hian thil a lo ziak a, a hak tura thawmhnaw ka dah chhuah sa pawh ka dah ang angin a lo la awm thlap. Tawnzau leh Boxer chauh hain a hna thil chu a ti mial mial a, tibuai duh lovin ka inbualsan ta daih a, ka thawm chu a hre lo nge pawh ka hre lo, min bengkhawn lo hrim hrim niin a lang.

"Aruatte, towel ka ken luh theihnghil daih mai, min lo pe lawk mai ta che" tiin bathroom aṭang ka pasal chu a rawn au lawng lawng a, inbual zo hlim ka ni bawk a, thawmhnaw chu inbel sawk sawkin towel pe tur chuan ka phei a, ka beisei lo deuhin kan awm leh ta ringawt.

"Khawi maw min thlah teh! Ka inbual fai tawh, thawmhnaw pawh hi a thar vek a nih hi ka hak" ka pasal min chelh beh tlatna chu phelh tumin ka ṭang ve viau a, ka la thei der lo zui, chutah ani lah chuan ka towel pek chu bang ṭhain bathroom-ah chuan min pawh luh a tum hmel hle leh nghal.

"PC!" ka tal chhuah theih loh avang chuan ka ti leh deuh ṭhawt a, naupangchhia pawh a ni tawh lo, min fiam tih hre tho mah ila intih huh ka duh tawh teuh lo mai, ka pasal ve thung chuan min pawt lut tial tial mai bawk si.

"Min thlah teh LALCHHANHIM, ka huh duh tawh miah lo a nia, kawr thlak ka peih tawh lo" tiin ka tal leh vak a, rin loh tukin ka tal chhuak a, mahse balance hlohin ka zangthal thlawrh a, ani chuan rang takin ka keah a rawn man leh ta chat.

"I lo lut dawn khawp alawm ka duhlai, ka mamawh che hi chuan min hnar ngai miah loh khâ" nui ruh ruha ti chung hian bathroom chhungah chuan min pawt lut a, kawngka pawh khar lovin min fawp nghal bawrh bawrh a, duh lo viau mah ila tunah chuan ka huh ve leh ta vek.

"Nu" ka fapa aw ka hre chiah chu ka va han lawm tehreng em, bathroom kawngka bula ka fapa lo dinna lam chu ka hawi thuai a, PC-a paw'n a chet a tawp nghal hmak a, nam sawnin Ezekiel-a chu ka va kuah ringawt bawk.

"Bawihpui, i va rawn kal hun lo ve le" naupangchhia zeta ti bui bui hian ka pasal chu bathroom aṭang towel veng chung hian a chhuak nul nul a, a awm dan vel chuan ka nuih a tiza ang reng khawp, lungawi vak lo mah se kei erawh ka hlim hle thung.

Zanriah kan ei lai thlengin ka pasal chu a titau vel reuh a, ka va han hlim phah mai mai tak. A ṭha ve hrim hrim, han intihtauh khum bawrh bawrh ila, inhmangaih em em bawk ila, chhungkua hi chu kan hlim a ni mai. Dawhkan hnuai aṭang a ke chu ka va tlawh zeuh zeuh vel a, ani chu titau tih takah ka lam pawh a rawn hawi duh lo. 

A ke ka tlawhna te chu hre lo ang hmakin a awm a, ka nu leh pa biakna chu a chhan zawm daih a, kei chuan ka lam hawi tir ka tum ruh hle thung. Ka chaw bar lohna lam chu dawhkan hnuaiah ka dah thla riai riai a, ka pasal mal chu ka va zut ta vel alawm, chutah zet zawng ka pasal pawh a insum thei tawh bik lo a ni ngei ang. 

Antui a hawp lai a lo ni kher bawk nen a hak ṭhawt a, a antui hawp lai chu a phuh a ni mah zawk. Chuti anga a awm chhan chu hre vek mah ila hre lo ang deuh chuan ka awm vei hmak reuh a, ngaihtuah pawh ka ngaituah duh bik der lo. Chaw ka bar mawlh mawlh laiin a rawn che ve ta, a kut chu ka mal chungah mai ni lo rawn vah tih a tum a, meng kâwkin kei chuan ka lo man bet rang hle.

Zan mutnaah erawh kan inchhaih dan vel chu hlim zet hian ka sawi chhuak barh barh a, ani pawh a lo nui ve suk suk a, Ezekiel-a chu a muhil leh daih tawh. Zanin chu a muhil thei nghal mai lo va, mahse a meng rei chuang lo. A mut theih loh hi chuan PC-a hian thawnthu a chhiarsak loh leh Mizo thawnthu a hrilh mai ṭhin a, rei lovah a muhil leh vat zel. Ṭawng a hriatthiam tirh aṭang tawh chuti ang chuan ka pasal leh ka fapa chu an inawi mu ṭhin a, a chang chuan kei ngei pawh ka pasal thawnthu sawi chuan min timuhil ṭhin. 

Vety Department lamah thawk thar an neih thute a sawi ve luam a, ka pasal hi chu a nihna sangin thu viau mah se a hnuaia thawkte tan hrawn hrehawmin a awm ka ring lo. Thawk thar chu mipa nge hmeichhia a nih ka zawh chuan hmeichhia a nih thu a rawn sawi a, fiamthu takin ka'n thik der nghal vel bawk a, ani pawh ka ṭawng dan vel avang chuan a nui ve nasa hle. Dar 11 vel thleng chu thil chi hrang hrang kan sawi a, kan muthilh lai pawh ka hre lo, ka harh chuan zingkar a lo ni daih tawh. 

"Aruatte, vawiin chu Gas a rawn thleng dawn a, kan va in line ve dawn em ni ang? Gas pu turin Muṭia kan chhawr mai ang a, Gas pawh hi Stock sa bur khat chiah kan nei tawhin ka hria" ka nu chuan a rawn ti a, Gas rawn thlen tur thu erawh ka hre miah lo.

"Gas a lo thleng dawn tih pawh ka lo hre reng reng hleinem ka nu, tukinah an au em ni?" ka tih chuan a lo bu nghat a, kei chuan ka hre lo tak tak, ei rawng bawlin ka che malh malh kha a ni a, veng chhung information mic aṭanga thupuan hre lo tur khawp chuan eng nge ka lo ngaihtuah ni!

"Dar 11 leh a chanve vela thleng tur ang khan an rawn puang a, Gas bur tlar pawh an tam leh tawh viau ang ka ring. I hman hun sawi la, Muṭia kan zawng bawk ang a, kan va in line ve dawn nia" a tih chuan ka insiam nghal a, ka nu sawi ang chuan Gas bur tlar an tam leh tawh tak tak ngawt ang.

Chaw kan ei kham fel vek tawh a, ka nu leh kei tih loh chu an chhuak vek tawh bawk a, ka pasal pawh Reunion chungchang engmah chu ka la sawipui ta chuang lo. Nizan khan ka sawipui ang ka ti a, mahse tlai aṭanga a titau der vel khan ka sawi tur zawng zawng min titheihnghilh a ni. Khuma kan mut hnu thleng paw'n ka hre chhuak lo leh ta zel a, nizan kha sawipui hun tak a ni asin maw le. Kal a phal loh pawh ka ring chuang lo, mahse tlêm chuan mak a ti ve deuh ka ring, zan lamah hian a tel lovin ka chhuak khât ve em mai. 

Kan in kawt maia Muṭia kal lai chu ka hmu fuh hlauh a, ko dingin Gas bur chu ka phurhtir zui nghal a, Gas lakna hmun tur kan va thlen chuan lo tam leh tawh tak an ni. Kan veng nu ṭhenkhatte nen chuan Gas chan pahin kan titi a, ṭhenkhat erawh chuan min biak peih hmel vak loh. Kan vengah hian a hausa pawl kan ni pha ve a, ka pa leh ka pasal hnathawh a sang ve tho bawk si a, a ṭhen hi chuan min tlawn ka ti dawn nge min zah ru pawh ka hrethiam lo. Ṭhenkhat erawh min ei lo tlat ang chi kha an ni a, awm dan chin tawk thiam a ngai khawp.

Dar 12 velah Gas chu a lo thleng a, ni dang ai chuan kan chang rei loh deuhin ka hria. Ni dangah te chuan dar 10 bawr vela thleng tura kan ngaih kha dar 1 dawnah te a rawn thleng chauh ṭhin a, ṭhutna mai tur a awm loh phei hi chuan a hneawm duh thei khawp mai. Han hawsan ringawt dawn ila a lo thlen thut a hlauhawm ve leh tho ṭhin bawk si a, mi ṭhenkhat ṭawng hlawk zual deuh phei hi chuan Driver te lam an ṭawngkhum hrep zel. 

Amaherawhchu kei chuan Driver te lam pawh ka thiam lo hran lo, kan hun tawn a inang vek lo va, theih se chu lo thlen hma an duh ve tho ka ring. Traffic Jam karah te an lo tlan ve ngei awm ṭhin si a, chuta kara lo ankhum chiam chu a fuh ber lo a ni. 

Traffic Jam chhan te hi ka ngaituah ve rauh rauh zel a, in sa te'n kawngpui kan nek lutuk nge kawngpuiin kan in a rawn nek lutuk zawk pawh ka hrethiam chiah lo. Lehlam kawng zawng tak chuan a hmaa kawng ni ngai reng reng lo kha kawng a rawn ni ta ṭhin a, in a lo ding thluah ve ṭhin tawh bawk nen kawngpui chu a zim lo thei ta lo va, chuvanga Traffic Jam tam em em pawh hi a nih ka ring ta ringawt. 

"I inbual hmain lo kal lawk teh, thil sawipui che ka duh. Zanah ka theihnghilh leh ka hlau a, tunah hian sawi ila a ṭha ang" tiin ka pasal inbual tum tawh chu ka ko ding a, an lo hawna pawh a la rei lo va, sawipui nghal mai ka duh avangin ka hmanhmawh ve deuh a ni.

"Tun kar tawp inrinni zanah hian ka ṭhiante'n Reunion neih an rawt a, ka kal ve i phal em? B.A 3rd Year kan zir laia Mizoho bik kan ni dawn a, Mary-i khan min rawn sawipui a, mahse ka thu ngawtin ka lo remti ta lo" ka tih chuan mit hmul kan âk chung hian

"Nangma'n kal chu i châk hrim hrim em ni?" a rawn ti a, kei chuan inthlahrung ru zet hian ka lo buk khum nghauh nghauh a, a hmelah mak tihna chu ka hmu ngei a, a phalh loh chuan kal luih ṭalh ka tum bik lo.

"Nangmah berin i châk te chuan kal ve la a ni mai alawm, ka phal ni rawh se" a tih sup chuan ka khi ver ver a, mahse ka lawmna a la famkim thei rih lo, ka nu leh pa ka dil ve phawt a ngai, anni'n zana chhuah ṭul an ti lo a nih chuan ka pasalin phal mah se ka kal chuang lo vang. 

End of Chapter 4