EZEKIEL By Havali Adam (CHAPTER 3)

EZEKIEL

By

Havali Adam

Chapter 3

"Eng lo, ka sawi lo angah ngai leh si rawh PC, ka sawi tum ber pawh a ni lo. Ar chaw ka zu pe ang e, lo inbual la, i duh duh thawmhnaw i lo ha mai dawn nia" tih leh room aṭang chuan chhuah ka rual nghal daih a, ka pasal hmelah chuan rilru natna ka hmu tlat a ni.

Ar chaw ka pek lai te chuan mawl ka inti hnuhnawh em em a, sawi loh tawp tur ka sawi tih pawh ka hria, mahse ka sawi vek tawh tlat. Kei ang thovin fa neih leh a châk ve dawn tih ka hriat chian teh lûl nen engati nge ka lo sawi chhuah thawt thawt le, ka va han mawl tak! Keimah leh keimah chu ka inhau deuh mawlh mawlh a, ka pasal lakah chuan ka inthlahrung thar zui nghal hle bawk. Ar chaw pek pawh chu ka ngaihsak lutuk hran lo, rilru mumal lo zetin ka pe a ni ber. 

Ar chaw ka pek zawh chuan in chhungah lutin ei rawng bawl nghal ka tum a, mahse a la hma lam hret chu a ni. Kan nupa room-ah chuan thawm dim ru deuh hian ka lut a, ka pasal chu a lo la inbual hauh lo mai. Khumah ṭhu ngawi rengin tukverh lam chu a hawi a, a awm dan chuan ka inthiam lohna a belhchhah a ni. A rilru tur dawn hmasa miah lova ka lo sawi thawt thawt chu a pawi ta ber, sawi lo ila chuan kan hlim dun dawn tehreng nen, engtin emaw tak ka pasal chu ka tihhlim a ngai a ni.

"Ka tihpalh PC, ka sawi tum chu a ni tho a, mahse inentir turin ka duh leh lo che. Ka tihpalh lutuk, khati ang thu kha i beng hriatah ka sawi tawh miah lo vang" a hnung lam aṭang kuah pahin a beng bulah chuan ka ti sep sep a, ani erawh a la ngawi reng thung. 

"I ngawih reng chuan hrehawm ka ti a nia PC, ka lam lo hawi teh" tiin ka kuai her zawm zat a, chiang takin kan inen a, a mitmengah chuan rilru natna leh thil chi hrang hrang ka chhiar thiam si loh chu ka hmu nawk nawk a, a biang chu ka dawm ta ringawt. 

"Ka hmangaih che, ka thu sawi avang khan i rilru a na tih ka hria, chuvang chuan i rilru tina thei engmah ka sawi leh tawh ngai lo vang" ti lehin a hmuiah chuan ka fawp vang vang a, mahse chhan letna pakhat mah ka dawng lo thung.

"PC" ti sepin a mitah tak chuan ka en a, ani paw'n min en reng a, ngawi reng lovin min bia se, ka thu sawi avanga a rilru a nat thute chu sawi chhuak zawk se ka duh, a ngawih reng chuan ka inthiam lohna a zual tulh tulh a ni.

"Min ngaidam teh PC, engati nge ka mawl em em le. Zep lovah chuan fa nei leh ka duh a, nang paw'n i duh ve ngei ka ring, mahse kan nei leh har phian bawk si a, ka rilru hi a duham ta mah mah a ni" nghet taka kuah chung chuan ka zui leh mawlh mawlh a, ka pasal chu a rawn ṭawng chhuak ve ta.

"I sawi dik vek alawm Aruatte, kei hian dik lohna ka nei te pawh a ni maithei asin, naktukah kan pahnihin Doctor kan hmu dawn nia" a rawn ti chuan ka en nghal hau a, ani chuan min lo nuih zeuh thung.

"Aih! Ka duh lo, inentir turin ka duh leh lo che. Doctor hmuh pawh a ngai lo, Ezekiel-a chiah hi fa nei dawn mah ila pawi ka ti lo, ka ti lo tak tak" ka lo ti thuai thuai a, nui hmel pu tawh mah se kei chu ka la nui ve thei hauh lo.

"Kan fapa hian a lo chhun ngawt mai che, i ṭawngkam engkim hi a lo la a nih dawn hi! In thil duh loh zawngah chuan 'Aih!' in ti leh ringawt zel a, lawmawm dun nufa lutuk mai" ti sup supin min rawn fawp a, a pangngai leh ta viau chuan min tihrilhhai lek lek a ni. 

"Ka sawi kha i hria ti raw? Naktukah kan pahnihin Doctor chu kan hmu dawn nia, rilru hlauthawng leh rilru nat hmel zetin min en tawh lo la ka duh Aruatte. Kan inentir ang a, engkim a ṭha vek mai ang" dam zet hian a rawn ti leh a, ka rilru na hmel chu a hai lo khawp mai.

"Ka tilui miah lo che a nia aw PC, kei chuan Doctor hmuh kher pawh ṭul ka ti lo a ni. Ka hrilh tirh chea i hmel mawlh khan ka ṭawngsual tih min hriat chhuahtir a, i rilru a nat avangin inbual pawh i lo inbual lo bawk" 

"Ka lo ngaihtuah zui vang vang alawm, mahse engmah rilru natna ka nei lo. I thu sawite kha thil ni thei tak a ni a, keimah zawk hian ka lo ngaihtuah thleng ngai lo a ni. Ka inbual loh chhan erawh ka lo nghak che alawm, inbual dun ang" 

"Lawk! Lawk! Lawk! Ka nute an lo haw thut ang e" bathroom lama min pawh dawr dâwr lai chuan ka ti a, a ban chu ka kut lehlamin ka chelh ran bawk a, kan inbual laiin ka nu emaw mi dang tu emaw an lo lut a nih vaih chuan a mawi lo khawp ang.

"Tûmah an lo kal ring suh, inbual thuai thuai zawk teh ang. Bawihpuia hruai tura ka kal a hun leh ṭep tawh zawk a nia, lo kal rawh le" tih leh bathroom chhunga min pawh luh chu a rual a, ka rin ang ngeiin kan inbual lai chuan nupa nun kan hmang a, kan inbual dun tawh hi chuan chuti ang chu a thleng ve fô ṭhin.

Bathroom aṭanga kan chhuah hnu chuan rilru natna emaw inthiam lohna pawh ka nei reng ta bik lo, kan inbual chhung zawng khan eng eng emaw ni kan sawi dun ṭeuh a, inthiam loh ngawt thei ka ni lo tih te chu min hrilh a, a sawi dik ve tho. Nupa inhmangaih tawn tih takah kan lungngaih chhung chu a rei lo hle mai, keini nupa hi a hre chiang apiangin min awh zualte ka ring hial ṭhin a, ka nau Saidingi phei chuan hmaichhanah min hrilh leh nulh nulh zel. 

Ka pasal chu kan fapa hruai turin a kal a, chawlhte a la ve kha a ni a, mahse a chawl rei thei lo khawp. Vawiin pawh a chawlh lak tawp ber ni a  lo ni leh reng tawh a, chu bakah a tel lo chuan an Department lamah thil a kal sawt tak tak thei lo a ni. Zanah ni se phone call a dawng deuh chhen a, a hna lam a ni tih pawh ka hria, a theih ang angin kei paw'n a hahdam theih nân ka lo pui ve ṭhin. Thingpuite ka siamsak ṭhin a, ei tur erawh a duh loh avangin zan lamah hi chuan ka siam duh ngai lo.

Nupa inlungrualna leh inpawh tawnna nei tur hian thil nasa tak tih a lo ngai miah lo, chu chu tun hnai mai khan ka hre chhuak ve chiah a ni. Kum kal ta chhung zawnga kan nupa awm dan leh inkar chu ka ngaihtuah let a, ka pasal duh dana awm diak diak turin famkim loh chang ka nei tih te chu ka hre kuar kuar a, mahse ani chuan ṭawngkam khat paw'n lungawi lohna emaw thinrimna thu a chhak chhuak ngai lo. Ka mizia zawng zawng a hre chiang a, ka mizia ang ang chuan min hmangaih a, min dawhthei a, min thlir liam tawp a ni ber. 

Chuti ang bawkin kei paw'n a awm dan chu hmangaihna avangin ka dawhthei a, a huat turin thu lah ka sawi ngai hek lo. Kan awm dan chu inthlir liamsak tawnin inzilh ngai lem lo mah ila a dik lo erawh kan hre chiang dun em em thung a, mahniin kan insiamrem zung zung ṭhin. A chhan bulpui ber chu hmangaihna a ni a, hmangaihna avangin kan mi hmangaihte lung kan tiawi lo vang tih kan hlau a, chuvangin kan nupa inkarah chuan inhauhna a leng lo hrim hrim a ni.

Kan inneih tirh phei kha chuan han u lo tawp kha mawi lo ka ti a, kei ai kum 6 laiin a upa bawk si nen ka pasal chhungte kha ka hmai zah ve pah hrim hrim bawk. Ka pasal erawh chuan u lo turin min ti thung a, a thu sawi chu ka awih ve leh mai bawk. Ka mo tirh te khan ka va han che chhe thei tak, thla khat chhung kha chu engtin pawh che ila thil eng emaw ni tak kha chu ka tichhe palh ngei ngei hi a ni tawp. Min hringtu ka nu leh pate pawh phone kaltlangin ka hrilh fai vek zel a, anni lah chuan an lo nuihpui duh lek chauh ṭhin leh nghal. 

Chuti ang khawp chuan mo thar che chhia ni mah ila ka pasal kâ aṭang erawh lungawi lohna emaw zilhna pawh ka dawng ngai chuang lo, ka chet chhiatna te chu min hmangaih zual phah emaw tih turin a awm zawk a, ani ang em ema mipa rinawm leh fel pasala ka nei hi ka phu lo hliah hliah zawk a ni. Ani lah chuan min phu loh thu a sawi ve ziah leh ta nghal a, a awihawm loh lutuk avangin a thu sawite chuan min ti lai dawn dawn ṭhin. Eng pawh thleng se, eng pawh tawk ila kan nupa inkarah hmangaihna leh inrintawnna a awm tlat a, chu chu kan nupa inhauh ngai lohna chhan mite hriat ve si loh thuruk chu a ni.

Kan inneih hnu aṭang phei kha chuan hlimna chhiar sen loh hlir kan dawng a, a nuam hi ka ti veng veng ṭhin. Kei ve mai mai hi mi ṭhenkhat chuan nupui atana duhthusam ka nih thute an lo sawi ṭhin a, chu pawh ka pasal PC-a bulah ngei a la ni zui. Khami ni kha chuan ka pasal pawh a rawn hlim haw khawp a, mi min lo sawi dan min hrilh chhawn leh lai te khan laih lutuk avangin ka sen ṭawn ṭawn a, nupui duhthusam dinhmun hauh tur chuan ka la nep mah mah ka ti bawk. 

Mak ka tih deuh pakhat chu nupa ni tawh si ngaihzawng an inneihsan thei te, uirena suala an tlu lut thei te hi a ni. Nupa nih tawh chuan tu pawh ni se, eng mi pawh ni se Pathian hmaa hmangaihna thu an tiam dun tawh an ni a, inhmangaih tawn em em turah ka ngai hmiah. Ka pasal hi ka ngaihzawng hmasa ber a ni a, a tawp ber pawh a ni a, ka pasal hmasa ber leh tawp ber pawh a nih ngei ka ring. Ani erawh kan intawn hmain ngaihzawng pakhat chu a lo nei ve tawh a, mahse chu chuan kan intawn hnuah eng harsatna mah a thlen lo a ni.

Zing khua a var rual deuh thawin ka harh hlawl a, ka mumangah lah chuan sava ka la hmu zui. Chutah savate chu ka lo man vel a, mahse ka harh ta daih kha a ni a, mak ka ti ang reng khawp. Mumanga sava hmuh chu eng nge a awmzia pawh ka hre lo, thil ṭha lo tak kan chhungkuaah chuan a thleng ang tih ka hlau hle a ni. PC-a pawh zingkar hma takah a rawn tho chhuak ve teh mial a, chokaah kan titi a, keimah ka ṭawng char char a ni mah zawk. A thawh hlim hi chuan ka nu emaw ka pa biakna pawh hian awmzia a nei thui lo ṭhin, kei erawh a nupui kha ka ni ve tlat a, min chhang tawi thei khawp. 

Tukṭhuan kan ei laiin ka mumanga ka thil hmuhte chu ka sawi chhuak a, Ezekiel-a chu phur zet hian a rawn ṭawng chhuak hmasa ber a, ka nu chuan mumanga sava man a ṭhat thu a rawn sawi ta hlauh mai. A sawi dan chuan mumanga sava man emaw sava hmuh chu vanneihna a lo nih hmel a, mahse han rin em emna ka nei chuang lo, ka ngaih erawh a ṭhat phah viau tho chuan ka hre thung. Mizo hnamah hi chuan puithuna ang chi sawi neuh neuh hi kan ngah hrim hrim a, thleng dik awm mah se a tam zawk hi chu tun laiah chuan a thleng dik thei tawh meuh lo.

"Vawiin chu i chawl leh rih mai dawn tihna em ni?" ka pasal chu phone khawihin a ṭhu awn duai a, Ezekiel-a School-ah a va thlah zo deuh chiah bawk a, chhuak tur chuan kan hman a ni deuh ber tawh.

"Chawl mai ang" khuma a phone theh thlain a rawn tho chhuak a, office lamah a kal dawn lo bawk a, a thawmhnaw hak tur pawh ka phawrh ta lo law law, kan chhuah dun dawn tho avangin vawiin chu ama'n a duh duh ha zawk teh se!

"Ka'n intleuh zuai teh ang, i kawr ka la chhuak kher lo a nia" towel kengin bathroom lamah chuan ka kal a, rang zet hian min lo chelh a, a chet dan teh thut avangin kei chuan ka lo en deuh hû a, min lo nuih ringawt.

"Intleuh dun ang, kei pawh kan chhuah hma inchiah daih zuai ka duh alawm" tih leh a thawmhnaw hak lai phelh chu a rual nghal a, kei pawh bathroom-a lut ta mai lo chuan a towel tur ka va laksak ta zawk.

"I rilru ka hre deuh reuhin ka hria, mahse i rilrua awm ang kha chu a hun miah lo" tui vawta inphuh tir seng seng pah chuan ka ti a, ani pawh ka hmaah ruak veka dingin Gel chu a inchulh a, inbual tum miah lo kha kan inbual ta ringawt bawk. 

"I hre sual tlat mai ka duhlai, nge nangmah zawk khan i châk a, zep tum deuh siin i rilru dik tak i rawn sawi lang zawk?" min koh dan leh min chhan let dan chuan min tizak kher mai, ani lah chu a la nui ruh ruh zui.

"Inbual thuai thuai ila, i kal vat zawk teh ang. Vawiin phei chu zingkar aṭang tawh khua a hniam ruih leh nghal a, ruah a sur dawn a ni maithei" ti daihin Gel chu ka inchulh zui nghal mawlh mawlh a, ka hnunga rawn chul pah hian

"Ruah sur mah se a pawi hleinem ka duhlai, khaw lum laia ruah sur te chu a lawmawm zawk hlei hlei alawm le" a rawn ti sup a, a sawi ang tak takin a kut chu a hlei thui hran lo, a hun rih lo ve êm bawk a ni.

Bathroom aṭanga kan chhuah hnu chuan kan insiam nghal a, a thawmhnaw pawh ka lak chhuahsak leh ta vek tho. Mi tu emaw ni nen hian an inbia a, towel chu a kawngah a la veng reng a, a mi biak chu hna lam thil a nih lo paw'n a pawimawh thawkhat viau a nih ka ring. An inbiak zawh chuan a thawmhnaw hak tur ka lo dah chhuahsak sa chu a inthawlh ve nghal mai a, chhuah hmanhmawh lutuk loh tum kha kan ni a, mahse khaw awm dan reih ruih avangin kan hmanhmawh leh ta zawk a ni. 

In aṭanga kan chhuah dawn chuan ka nu chu kan hrilh thlap a, kan kalna hmun tur min zawh chuan kan len chhuah lawk tur thu PC-a'n a lo hrilh hmak a, ka nuih a za ang reng. Ka pasal hian dawt hi a sawi khât viau a, a nu leh pa bulah ngat phei chuan tun lo hi a sawi awm pawh ka la hre lo. Nizan aṭang tawh kan thil tih tur chu ka nu leh pate hriattir ve kher ṭul kan ti lo ve ve a, kan zah vang pawh a ni lo, ṭul kan ti lo ve tawp a ni mai. Ka nu chuan engmah min zawt zui duh ta bik lo va, lehlam kawng zawng tak chuan a nuam lo ve reng. 

"Result aṭang hi chuan in nupa hian ṭhat lohna engmah in nei hran lo, nupa nun in hmang khât te pawh a ni maithei" Doctor chuan a ti dap dap a, nupa nun erawh a hre sual ve deuh chuan a lang, kan hmang khât lutuk lo.

"Nupa nun chu kan hmang ṭha pangngai khawp mai, fa dang kan nei leh har lutuk a, kan buai ru deuh mai mai maw le" PC-a chuan a lo ti ṭha ve mai a, ka hlauhthawn ruk ang ni lova kan ṭha ve ve ta daih chu ka lawm kher mai. 

"Fa dang neih leh in duh hmanhmawh a nih chuan Surrogacy lam hi in ngaihtuah chhin tawh em? Tun laiah chuan Mizoramah pawh ti an awm ve pheuh pheuh tawh asin, in duh phawt chuan tih dan kan ngaituah dawn nia" Doctor-in a rawn tih leh chuan rang zet hian

"Ni lo, ka duh lo. Surrogacy em em chu ka duh lo" ka lo ti thuai a, ka ṭhutna aṭang chuan ka tho nghal tharh bawk a, Doctor hnenah chuan lawm thu sawi zeuhin room aṭang ka kal chhuak hlawk hlawk a, hawihhawmna pawh ka hre chang tawh lo a ni.

"Aruatte!" kawngpui ka thlen hnu rei lovah PC-a aw ka hre nghal a, min ngaihtuah hmel zeta ka dara chelh chung hian a lam hawi turin min kuai her a, Surrogacy tih thumal ka hriat hnu kha chuan ka buai vek a ni ber.

"Haw ang PC, kan pahnihah ṭhat lohna pawh a awm chuang lo va, engkim hi Pathian kutah kei chuan ka dah tawp tawh a ni" ka tih chuan a Car Lock chu a hawng a, kawngka hawngin ka ṭhu lut zui nghal a, ani pawh a rawn ṭhu lut rang khawp. 

"Kan leng kawi mai mai dawn em ni ang? I ṭha chiah lovin ka hria Aruatte, hahdam takin awm tum teh. Doctor thu sawite kha thil ni thei tak chu a ni alawm, i hlauthawng nghal bur a nih khâ, Surrogacy lam" tia a ṭawng laklawh lai chuan 

"Sawi tawh suh PC, khawngaihin sawi tawh lo hram teh. Surrogacy lam hi ngaihtuah pawh ka ngaihtuah duh lo, Doctor thu rawn kha i la thutak ang tih ka hlau em em bawk PC. I hria em, Surrogacy hi nupa tam tak inṭhenna a ni châwk asin" ka lo ti phawlh phawlh a, chi ai vek ang paw'n min ngai mah se pawi ka ti lo.

"Aruatte!" mak tih hmel zet hian a rawn ti hluai a, kawngsir motor tlan lohna hmunah chuan motor chu a tiding a, khawl chu a off zui nghal bawk a, a lam hawi tura ka khabe rawn chelhin min en chiang ta khawp mai.

"Min en teh le Aruatte" dam zeta a rawn tih leh chuan muangchangin a mitah tak ka en riai riai a, a mitmengah chuan thutakna hlir ka hmu a, thutak loh theih pawh a ni hleinem, Doctor thu rawn kha a hlauhin ka hlau a ni mah zawk.

"Surrogacy lam hi ngaihtuah pawh ka la ngaihtuah ngai lo, mahse a tih dan kalhmangte chu ka hre ve tho thung. I hlauhthawn ang kha a thleng dawn lo tih hria la, Surrogacy hi tih ka duh bik reng reng lo" a tih chuan rem leh rem lovin ka kuah nghal a, ka hlauhthawnna te chu a la reh famkim thei der lo. 

"Dik tak chuan maw fa neih leh kan duh lutukna lamah hian kan nupa inkar a chhe palh ang tih thleng ka ngaihtuah a, tunah inhmangaihin inthlahlel em em rih mah ila kan hma hun kan hre si lo. Inṭhen ka duh lo alawm PC, inṭhen ka duh lo" a âwma ka bek nghatin ka meng kar a, ka thin phu pawh a hma ang em emin a rang tawh bik lo. 

"Lungngai suh Aruatte, nang nen hian kan inṭhen tawp lo vang. Surrogacy lam hi a them paw'n kan sawi chhuak tawh tur a ni lo, keini tan chuan lungawi zir a ni mai. Pathianin fapa duhawm tak min pe tawh a, kei chu ka lungawi tawk em em a ni" 

"Engkim hi fa dang neih leh ka duh luat vang vek a ni tih ka hria, vawiin aṭang chuan Ezekiel-a chiah hi fa nei dawn mah ila ka lungawi tawh ang. Ka thiam loh a ni e PC, ka awm dan leh ka rilru puthmang hi a mawi lo hle a ni" ka ti ve ta sep sep a, ka pasal hnen aṭanga thlamuanna ka dawn hnu chuan ka rilru pawh a hahdam ta huai huai mai.

Kan in lam pana kan tlan laite chuan rilru tihahdam turin min hrilh zui mawlh mawlh a, min ngaihtuah hle tih pawh ka hria, tunah chuan ka rilruah eng hlauhthawnna mah a awm tawh lo a ni. Khua chu a hniam viau emaw tih laiin ruah chu a sur nghal lawk duh der lo va, boruak lah chu chawhma lam aiin a lum blehchhah te'n ka hre hial a ni. In kan thlen chuan dar 12 vel a lo ri chiah a, chhun thingpui pawh tuma'n kan in peih ta lo, khaw lum nen thingpui sa lo in chu a fuh teh chiam lo a ni. 

Zanah chuan ka lo rin rilruk ang ngeiin ruah chu a rawn sur ṭeuh a, a lum ve bawk em a, sur mah se a pawina ka hre lo. Ezekiel-a chu kan inkarah a muhil bam a, chhun lama kan awm dante chu ka ngaihtuah chhuak bawk a, ka fapa duh khawp lo ang maia ka awm chu ka indem ru hle. Ka pasal lam ka hawi chuan a muhil tawh a ni ngei ang a mit a lo chhing daih tawh a, kei erawh ka muhil thei mai lo. Dar 1 rik dawn bawr velah ka mut a rawn chhuak ve ta chauh a, mut theih loh ai ngawt chuan zia tak a ni. 

"Aruatte" min kotu chu mipa aw ngei a ni a, thawm lo chhuahna lam ka hawi chuan B.A kan kal lai aṭang tawh ka mi nel ve em em a lo ni reng a, min lo nuih var var a, hmân ang chiah khan tunah pawh a hmel hmuh chu a lo la nuam reng a nih dawn hi!

"Engtin nge? Eng nge hetah hian i tih? Kan va inhmu khât ve le, i dam ṭha maw?" ka bula a rawn din hnu chuan ka lo ti nghal sawk sawk a, ka thil ei lai pawh ngaihsak lovin ka ding a, ka hma zawna a ṭhut chuan ka ṭhu ve leh nghal mai bawk.

"I chawlhna Restaurant hi ka ta alawm a nih, ka dawrah te i lo chawl ve teh mial a, kei pawh hian ka hmu thut che hi mak ka ti khawp mai" a tih chuan a hma ai zawngin mak ka ti zual a, ani hi chu Mizoram pawnah hna a thawk daih a ni lo'm ni?

"B.A Final Year kan kal laia i hna hmuh kha i thawk tawh lo tihna em ni?" ka lo ti leh nghal thuai a, ani paw'n kum tam a thawh loh thu chu min hrilh ṭha ve mai a, MCS hna a chelh zuai thu min hrilh leh chuan a ban chhan tak hre châkin ka zawt leh ta nge nge. 

"Ka theih tawp chuan ram leh khawtlang siam ṭhat ka tum a, ka bial chinah ngat phei chuan a beih pawh ka nasa, mahse keini aia lute lam an dik loh hi chuan kawng kan su kaw mawh lutuk a, term laklawh loh lai takin ka bang ta daih a ni" a rawn ti ṭha ve leh mai a, chuti anga thawh hrehawm a nih ka lo rin loh teh lûl nen mak ka ti leh kher mai. 

"A nih chû, mahse nang chu thluak hmang thiam ta reng reng kha i ni a, hei i awm mai mai lo tawp hi! I han inchibai teh ang, kum eng zah nge kan inhmuh tawh loh pawh ka hre thei tawh hleinem" ka tih chuan nui sun sun hian min rawn chibai a, kan chawlhna dawr kawngka bul aṭanga min lo en rengtu ka pasal hmel ka hmu chiah chu ka phu nasa teh e! 

B.A kan zir lai aṭanga ka lo hriat tawh leh ka ṭhianpa ni bawk Chhuanmawia kut ka vawnna chu rang zet hian ka pawt thla vat a, ka awm dan zawng zawng chu ka pasal rinhlelh theih tur hlirin a la awm leh ta nghal a, uire lai an man ang maia ka hlauthawn chhan chu ka hrethiam lo kher mai. Ka pasal bulah chuan amah aia kum upa tih hriat deuh pahnih an ding bawk a, ka pasal hmelah chuan mak tihna leh rinhlelhna ka hmu zut zut a, mipa dang kut ka vuan lai a rawn hmu kher kher chu a pawi ta a ni. 

A bula mite'n an biak mawlh mawlh lai pawh chuan a mit chu kan ṭhutna lamah a fuh ngar ngar a, va pawh ringawt lah chu a tih chi ang em ka hre bik si lo. Engmah hrethiam lo tih takah Chhuanmawia chuan min la be chhunzawm reng a, mahse min biakna te chu ka thluak chhungah a lut thei tawh lo hrim hrim. Ka pasal hnenah chuan va kalin Chhuanmawia chu ka ṭhian hlui a nih thu ka va sawi mai dawn em ni ang? Ni lo, kei hian engmah ka tisual hleinem le, hlauthawng viau tur pawh ka ni ringawt lo.

Ka lu chu thing nawk nawkin ka pasal leh a hnathawhpuite ni ngei tur ṭhutna lam chu ka hawi leh a, mahse ka pasal leh a ṭhiante hmel reng ka hmu tawh lo. Minute tam pawh a la liam hauh lo va, engtin nge chuti anga ranga an kal bo hman!? Kei hian ka hmu sual zawk em ni le, mahse hmu sual tur chuan tun lawka thil thleng a ni bawk si.

End of Chapter 3