EZEKIEL By Havali Adam (CHAPTER 2)

EZEKIEL

By

Havali Adam

Chapter 2

Tukṭhuan kan ei laiin ka pa chuan a zin dawn thu a rawn sawi ta hlawl mai, hlauhthawn tawh sa nak a laiin ka hlauthawng zual ta hle. Ka pasal chuan sawi zawmin a zin tur thu a rawn sawi ve leh nghal a, chutah chiah chuan ka nu pawh a lo hlauthawng ve ta. Ka nu mai a ni lo, Ezekiel-a chuan a pa bula kal a tum nghal a, mahse ka pasal chuan a lo phal lo thung. 

Ka nu chuan in khat aṭanga chhim leh hmar zawnga chhuah a ṭhat loh thu chu a sawi ta luam a, a thu sawi ka pawm vang pawh ni lovin PC-a chu la zin rih lo se ka duh a ni. Ka pa chuan zin ngei ngei a ngaih thu a sawi a, ka pasal pawh chuti tho, rilru a nuam lo duh teh e! 

Ezekiel-a lah a hriat loh hlana a pa zinsan a hlauh avangin School kal a peih lo leh ta zel a, kei paw'n ka thlem bang thei mai lo. A tawp tawpah PC-a chuan zin a tum loh thu a sawi ta nge nge a, mahse naktuk lamah chuan Khawzawl lama zin ngei ngei a ngaih thu a sawi tel bawk. Ezekiel-a pawh School a kal lo tlang law law a, ka pasal a zin ta lo chu ka hahdam huai thei.

Chhunah chuan ka nu a leng chhuak a, keini erawh inah kan awm thung a, mahse rei lotê hnuah kan leng chhuak ve daih. Kan chhungkua bik tê chuan hmun hrang hrangah kan leng kual a, a nuam reuh khawp mai. Chhuak ngai lo chu ka ni miah lo, mahse chhungkua ang zawng chuan ka la leng chhuak ngai lo a ni. Ka chhuah paw'n chawhmeh lei turin leh in chhung thil eng eng emaw lei turin ka chhuak mai ṭhin a, tih tur em em ka nei hran lo ve ṭhin tho bawk. 

Chhungkuaa kan han leng khawthawng vel chu Ezekiel-a tak chuan nuam a ti a, a ṭawng deuh char char a, ka pasal paw'n hruai fuh a inti khawp mai. PC-a lakah chuan ka inthiam lo ru ang reng hle a, phone call a dawng reng bawk si a, ka tan chuan nuam lo ve duh tak a ni. Ka hlauhthawn avangin Khawzawl lamah a kal lo va, ka lo ngaihtuah tawi deuh hret a ni. A hna thil a ni a, keia hlauhthawn avanga a zin ta lo ringawt te chu zia lo ka ti thar a, mahse a zin kha ka phal lo em em bawk si a ni.

"Pa, School ka kal chuang lova Motor khalh min  zirtir leh la" in chhung kan luh rualin Ezekiel-a chuan a ti siam siam a, ka pasal chhan dan tur chu ka ngaichang ru reng a, an lam pawh ka hawi chuang lo. 

"Vawiin chu zir rih lo phawt mai ang Bawihpui, inkhel zawk ila, kan in kawtah sawn inkhel zawk ang aw" ka pasal chhan dan avang chuan ka thaw huai a, dik tak chuan Motor khalh chu zir tawh lo mah se pawi ka ti miah lo.

"Aw pa, insiam nghal ang, Ball ka pet châk tawh" kan fapa pawh chuan a rawn ti ve leh mai a, a pa chu room lamah a nawr kal nghal sawk sawk reuh a, Motor khalh inzirtir vel ai chuan in kawta infiam pui chu a ṭha ka ti daih zawk a ni. 

Ei rawng bawl pahin Veranda lamah ka chhuak zeuh zeuh a, an pafa infiam hmuh ka duh vang a ni ber. Kan in kawt hi a zau ṭha ve ang reng a, duh tawka infiam theihna tham a ni a, kan in kawt mai ni lo kan in Compound hrim hrim hi a zau a, mi ṭhenkhat tan phei chuan a awhawm ngawt ang. Ka pasal pa hi thluak hmang thiam ve tak mai hi a ni a, inkhawl ṭang ṭangin kan awmna hmun pawh hi a lei a, an hun lai chuan tun ang em emin to lo mah se a to ve thawkhat viau tho. 

Ezekiel-a chu nui vak vak chungin a tlu leh thlawrh thlawrh ṭhin a, keimah nen infiam ila chuan a ṭap daih tawh ang. A pa bulah ve lem a tlu na viaua ka hriat paw'n a nui mai mai a, a hlim em em zawk a, ṭah lam reng a ngaihtuah lo a ni. PC-a chuan a fapa Ball pet chu a lo man ṭhelh der vel a, an pafa infiam ka en tui lutukna lamah ka ei rawng bawl pawh ka theihnghilh phah nghe nghe. Ka thil chhuan chu a tui a lo kang hman deuh duak a, chaw ka chhum ut hman lo hram erawh tih chi tak a ni. 

Veranda lama chhuak tawh lovin phone chu ka khawih ta zawk a, rei pawh ka khawih hmain ka  ṭhian Mary-i hnen aṭang phone call ka dawng zui nghal zat bawk. Mary-i nen hian kan inrual chiah a, tiat pawh kan intiat hle. Higher kan kal lai aṭang tawha inhria kan ni a, Pathian zarah pasal ṭha tak kan nei ve ve tawh bawk a, kei ang lo takin ani chuan fa pathum lai a nei tawh a ni. A chang chuan ka awt ru ṭhin, ka ṭhiannu anga fa han neih leh vat vat chu ka duh a ni. 

Amaherawhchu fa neih leh neih lovah kan thu a awm lo va, Pathian thu thu zawk a ni. Mihring kan ni a, kan rilru han kal sual changte pawh a awm fo mai, mahse chung zawng zawng chu thil dik a ni lo tih ka hre vek thung. Fa ka neih leh lawk theih loh avangin hnual chang ka nei ṭhin ngei e, mahse rilru ṭha lo ka pu rei duh ngai lo, engkim chu Pathian kutah ka dah tawp zawk a ni. Fa kan nei thei tawh lo a nih paw'n Ezekiel-a kan nei tawh tho a, lungawi lohna nei thut ṭhin mah ila lungawi chu ka tih makmawh a ni. 

Zan hun a ral a, zingkar ah ka pasal chu thovin Khawzawl lama zin turin a insiam mial mial a, Ezekiel-a tih harh kan hlau dun hle bawk. A harh a nih vaih chian a ngen leh emaw a ni ang a, PC-a atan paw'n a buaithlak thuah hnih tawh dawn lutuk. Kan in kawta kan din hnu chuan thlahlel zet hian min fawp leh hram a, kei paw'n ka ngai dawn tih ka chiang a ni. Zan lamah inthlahna tur deuh reuhin nupa nun te chu hmang mah ila inthlahna neih erawh ka duh ber lo, kan bulah awm reng thei se ka ti daih zawk a ni. 

Nupa dangte hi an ni ve tho ang em le tih te ka ngaihtuah thleng a, mahni pasal te zin bo dawn chuan nupa nun an hman ve ṭhin tho ka ring. Thil sual a ni lo va, nupa kan nih tawh avangin a tur ve rengah ka ngai zawk. Tisa châkna lama sang lutuk nih vang a ni paw'n ka hre chuang lo, nupa inhmangaih tawn na nâ na chu nupa nunah pawh engtik lai pawhin an inlungrual tur zawkin ka hria. Ka pasal nen ngat phei hi chuan kan inhmangaih tawn em em a, mi dang nena intehkhin theih ringawt pawh a ni lo a ni. 

"Ka ngai ngawt ang che" tih chu a tlan liam dawna a thu sawi tawp ber a ni a, kei paw'n ka ngai dawn lutuk, a bula kal turin min sawm ve se chu ka zui mai duh tak tak ang, mahse ani chuan engkim a ngaihtuah avangin min sawm der duh ta lo a ni.

Ka pasal hi chuan min hmangaih thu a sawi lang sek ngai lo va, min hmangaih tih erawh ka hre chiang em em thung. A mizia ve hrim hrim a ni a, kan inngaihzawn lai aṭang tawh min hmangaih thu hi chu a sawi tam lo khawp. Ka pasal tlan liam hnuah pawh ngawi rengin ka la ding a, varṭian boruak chu a thiang ṭha bawk a, hip nuam tak zawng a ni. Tawi tê hian ka nui zeuh a, tunah chuan zin tawh mah se ka lungngai em em tawh miah lo. A hma te kha chuan ka pa zin ve dawn vang te pawh a ni ang ka hlauthawng ru em em a, chet sualna an tawh kha ka hlau ngawih ngawih a nih kha! 

In chhungah lutin kan fapa Ezekiel-a chu ka va thlithlai a, a lo la muhil tui khawp mai, a harh hun erawh a ruk tak chuan ka huphurh a ni. A pa ngaiin a nuar leh ngei ang a, School hial a kal duh lo leh mai ang tih ka hlau deuh reuh, mahse chuti ang em a thleng turah ngai rih lo phawt teh ang. Nuapang thu awih lo leh luhlul a ni lo va, naupang fel leh harhvang tak a ni zawk. A nu leh pa sawi a nih phawt chuan peih lo viau mah se thu awih takin a ti hna hnâ zel a, chuvangin a pa zin rih mah se Ezekiel-a chu School a kal theih mai ka ring, nuar erawh a nuar ngei ang.

Thingpui in tur ka lum a, chet nghal ka tum deuh ûk a, mahse ei rawng bawl nân erawh a la hma mah mah a ni. Zing dar 5 a pel vel âwrh a, ka nu pawh a rawn la tho chhuak lo. Thingpui in pahin ka pasal chu ka ngaihtuah a, ka ngai a ni. Kum 10 chuang zet chu kan innei ve tawh a, a zin dawn hi chuan ka ngai em em zel, ngaiah ka nei thei lo a nih ka ring. Ka phone chu ka hum ran bawk a, Aizawl khawpui a chhuahsan tak tak hmaa min rawn biak leh hram chu ka ring ru deuh a, chu chu a zin dawn apianga a tih dan ṭhin a ni. 

Chutia ka ngaihtuahna ka lo kawm melh melh lai chuan ka nu a rawn tho chhuak hlawl a, tho hma ka ti ang reng khawp. Thingpui ka lo siam nghal a, ani paw'n PC-a kal tawh leh tawh loh thu te min zawt a, ṭha takin ka lo chhang ve mai bawk. Ka pa a zin ve tho a,  a mutui tak tak bik thei lo a nih ka ring. Hmeichhiate hi chu kan mak ve ngawt mai, a chang leh kan rilru a na hma em em a, ka lungte a leng hma leh em em a, hmangaihna te hi mipa ai hian kan ngah zawk mah te'n ka hre ṭhin. Ei rawng ka bawl laiin PC-a hnen aṭang phone call ka dawng a, la rang vet vet tak ka ni.

"Signal a awm lo char char a, ka rawn be thei chiah che a nih hi! Bawihpui a tho tawh em?" hriat nuam zet hian ka pasal chuan a rawn ti nghal a, a aw aṭang chuan a huphurh ru ve reng tih ka hre thei bawk.

"La tho chiah lo ve, khawi lai nge in thlen tawh? Fimkhur hle r'u aw, in che sual ang tih mawlh kha ka hlau a nia, Driver te kha khalh chak tir lutuk miah suh ang che" ka lo ti ve zung zung a, nuin fapa a ngaihsak em em ang mai hi ka ni ringawt.

"Keifang leh Saitual peng kan thleng vel chiah e" a rawn tih chuan tlan chak ka ti kher mai, Khawzawl leh Aizawl inkar hi darkar 5 leh minute tlêm tlan a ni a, tun ang hun dar 8 pawh la ri lovah chung lai hmun an thleng tawh a nih chuan an thleng har tawp lo vang.

"In va thleng thui tawh ve, i tlan chak tih ka hrethiam mai. Driver kha tlan chak lo turin hrilh rawh PC, tlan muang mah ula in tlan tluang chuan in thleng dawn tho tho" ka tih chuan ka thu sawi lai perhsan deuh hian

"Bawihpuia a harh tawh em? School kal kha a lo duh lo ang e, buaina a awm chuan min rawn be dawn nia, theihnghilh miah suh" a rawn ti daih a, a fapa mizia chu hre chiang bawk a, Ezekiel-a lungawi loh hunah pawh amah ngei hian thlem se a ṭha tak ang.

"I awm lo thut bawk si a, School kal a peih pawh ka ring chiah lo, mahse engtin tin emaw kan inbuai thei mai ang. Tunah chuan a la muhil rih a, a harsat deuh tlat leh ka rawn bia ang che" ka lo ti ṭha ve mai a, thu tam sawi tawh lovin kan inbiakna chu kan ti tawp a, ei rawng ka bawl pah bawk nen hun thawl deuha biak chu a finthlak zawk a ni.

"I pa pawh tlai lamah emaw zan lamah a rawn haw theih hmel a, PC-a awm lo mah se Ezekiel-a chu a puin a tihlim thei lutuk tho ang. In kum hi inngaih a nat zual lai vel a ni bawk si a, i ngai viau paw'n ka hria" ka nu chuan a rawn ti a, a sawi dik fû mai.

"Nia, ngai ve e" tiin ka thil kan lai chu ka chawk zui nghal daih a, ani paw'n ka pa a ngai tih hre ru reng mah ila ka sawi kai duh ta lo, nu Chawii leh pa Zuala te hi chu kum 10 lai ka lo hrawn ve tawh a, nupa inhmangaih tak an ni tih ka hre chiang em em.

Ka rin lawk ang ngeiin Ezekiel-a chuan a thawh tirh phat aṭang a pa a zawng nghal a, dawt ka hrilh duh ta lo. A pa'n Khawzawl lamah a zinsan thu a hre chiah chu rilru na tak hian a ṭap a, a nu ni mah ila ṭap tawh lo tura ka thlemna te chuan sawtna a nei lutuk lo a ni. Kei chauh ni lo a pi paw'n a thlem nasa hle a, mahse awmzia erawh a awm leh chuang hauh lo. 

A duh lo chung chaw ka ei luih tir a, School kal luih tir pawh ka tum khawp. School kal hun a nih chuan Uniform ka hak tir mawlh mawlh a, ani erawh a ngawi reng a, a la lungawi lo hle a ni. PC-a pawh be ta lo chuan School-ah ka hruai a, mahse keimah chu ka dik ta tlat lo. 

Ka fapa hmel chuan mi tilungngai a, ka thu a awih vanga School kal ve mai chauh a ni tih pawh ka hria, ka fapa chu ka khawngaih thar ta ngawih ngawih a ni ber. Ka nau Saidingi chu ka call a, a fate School kal leh kal loh ka zawt nghal a, an lo kal lo hlauh e. School Gate aṭang ka fapa chu ka kai sawn a, Taxi hmangin Saiding te veng lamah chuan kan kal a, Ezekiel-a chu a la ngawi reng thung. 

A nutei te in kan thlen rualin Ezekiel-a chuan School a kal dawn lo tih a hre chhuak ve chiah a, zing aṭang tawh a pa bak a rilruah a awm ka ring lo. Saidingi fate a hmu chiah chu naupang tih takah a hlim nghal em em a, ka nau nen chuan titi pahin kan fate inkawm chu kan thlir reng bawk. Chhun thil kan ei lai te chuan Ezekiel-a chu a ṭawng leh bawrh bawrh tawh zawk a, ka awm pawh a nuam ta sawng sawng mai. Chutah ka nu hnenah kan chanchin pakhat mah ka la hrilh lo tih ka hre chhuak a, rei min ti phian maithei a ni. 

Phone-in ka nu chu Ezekiel-a  School kal loh thu leh Saiding te ina kan len rih dawn thu ka hrilh nghal zung zung a, hrilh hnuhnawh chu ka inti ve reng, mahse ka nu chuan a lo phal khawp mai. In chhung thil vel khawih loh tur leh lo che miah lo tur te chuan ka hrilh ve tak na a, a lo tih luih leh tho chu ka ring. Ezekiel-a te chu an inbual nghal a, tui khawih nuam ti chi a lo ni bawk nen an inbual rei ngei mai. An dam loh ka hlauh avangin keimah zawk chuan Bathroom aṭang ka ko chhuak ta ringawt a, an inbual rei ve êm bawk a ni. 

Kan haw dawnah ka nau chuan chaw ei ve nghal mai turin min sawm a, mahse ka lo hnial thung. Ni leng deuh thaw kan leng tawh a, tlai ei rawng bawl lova len bo ringawt zawng a tih chi loh em mai. Kan in lam pana kan haw lai chuan Ezekiel-a pawh a ngawi reng tawh bik lo va, ka nau fate nena an infiam dan leh thil chi hrang hrang min hrilh a, School ka kal tir lo chu ka ti fuh phianin ka hria, kal lui se chu amah mai ni lo keimah pawh hahdam takin ka awm thei bik lo ngei ang. 

In chhunga kan luh hnu rei lovah Ezekiel-a awm dan chu a rawn danglam a, a ngawichawi leh ta em em a, a pa a hre chhuak a ni tih ka hrethiam nghal. A awm awmin ka awm tir a, han thlem vel mah ila awmzia a awm dawn lo tih ka hre chiang a ni. Ka nu nen chuan ei rawng bawl pahin eng eng emaw ni kan sawi a, kan titi pawh a kal viau a, Ezekiel-a chanchin thlengin kan sawi kai bawk. Ka nu chuan kan titi tawp lamah fa neih leh lam a sawi lang zeuh a, mahse ka rilru a hriat vek avangin a sawi thui duh lo thung.

Ka pa chuan ka nu chu a rawn bia a, a rawn haw mek thu a sawi chuan ka nu pawh a hlim hmel hle. Ei rawng kan bawl zo tawh na a, ka pa chaw eia kan nghah dawn avangin kan room-ah ka awm ta daih a, Ezekiel-a pawh a lo muhil bam bawk. A pa kawr ngei mai chu muhil chungin a lo kuah a, ka va'n khawngaih zual phah tehreng em. A bulah mu thlain a biangah chuan ka fawp zeuh a, nghet taka ka fapa kuah chung chuan ka mit ka chhing vang vang a, ka ngaihtuahnaah chuan rawn lut a tam zui nghal hle. 

Ka nu thu sawi ber chuan ka rilru a luah a, theih ni se fa neih leh chu ka duh ngawih ngawih a ni. Kei ang bawkin Ezekiel-a pi leh pute chuan tu dang an duh tih ka hria, nawr erawh min nawr tut tut ngai lo thung. Vawi hnih thum chu Doctor te hnenah ka pasal hriat lovin ka inentir tawh ngei a, mahse result-ah chuan ka ṭha vek a ni. Kum 30 ral ka kai tawh bawk si a, fa ka nei thei tawh lo tluan mai ang tih chu ka hlau a ni. PC-a erawh a der paw'n inentir lam ka la sawipui duh lo va, sawipui ta ila a lo lungawi loh viau phei chuan rilru na tur chu keimah bawk a ni. 

"Aih! Aih! Aih! Ka duh lo, min hruai ve thei reng" ṭawng ri bawl bawl thawm chuan min ti harh a, Ezekiel-a aw ngei a ni tih pawh ka hria, mahse tu nge a biak ka hre nghal mai lo thung, a harh tawh a ni ngei ang.

"Ka lo haw thuai dawn alawm, a nu kha a awm hnaih chuan phone kha han pe teh le, ka lo be lawk ang" lehlam aṭanga rawn ti tu chu PC-a a ni a, Ezekiel-a'n Loud Speaker a on avangin an inbiakna chu ka hre thei vek a ni.

"Aih! A nu chu a muhil rih, min lo hruai rawh pa, i bulah ka kal ve duh" Ezekiel-a chuan ṭap ṭep aw hian a ti ṭuau a, ka khawngaih lutuk chu ka ṭap ve thei mai dawnin ka hria, chu bakah PC-a zin chu ṭum dang aiin Ezekiel-a chuan a ngai zual a ni.

"Ka lo haw thuai dawn alawm Bawihpui, ka hman veleh ka lo haw nghal ang. Lo ngaithla teh le, kei pawh hian anu nen khan ka ngai lutuk che u a nia aw, ka hmangaih em em bawk che u" ka pasalin a rawn tih chuan ka mittui a lo hnai kuarh a, kei ngei pawh hi ka dik zo tawh lo. 

"I awm loh chuan School pawh ka kal peih lo, a nuam lo em mai pa, min hruai ve rawh" Ezekiel-a chuan min hnung chhawn tlat a, thawm siam lo mah se a ṭap tawh tih ka hria, chungte chuan ka thinglung a khawih em em bawk.

"Ṭap suh le Bawihpui, khati anga i awm chuan ka awm i ti nuam bik miah lo a nia, ka rawn hruai thei rih lo che alawm, ka thu awih rawh aw, ṭap tawh lovin min be rawh le" a pa tih takah phone kaltlang paw'n a fapa chu a ṭap tih a rawn hre rang teh e!

"Zin tawh lo mai la pa, i zin chuan anu nen kan ngai zel bawk che si, a hrehawm em mai" Ezekiel-a chu a ṭap tawh lo va, chu pawh a pa thu a awih vang tih ka hria, mahse a ṭah erawh a la chhuak ngawt ang ka ring.

"Ka hna a ni si alawm Bawihpui, anu leh nangmah nuamsa taka in awm theih nân hna ka thawh a ngai a, heti anga ka zin kual loh chuan ka hna thawh lai hi ka chan daih dawn asin" dam zet hian PC-a chuan a rawn ti a, Ezekiel-a chu a ngawi ta reng a, a pa thu sawi chu a ngaihtuah chiang ve te pawh a ni mahna.

"Ezekiel" zawi ang reng taka ka tih sep chuan inherin ka lam a rawn hawi vat a, a mit chu a sen deuh ram a, ka lamah rawn tawlh phei thuai thuaiin nghet zet hian min kuah chawt a, a phone ken lai chu ka lo laksak nghal daih bawk.

"PC, chaw in ei tawh em? In thleng tluang maw?" aw pangngai thei ang ber chuan ka ti ta zung zung a, ka mit te chu mittui a tlak mai loh nân ka khap zawk zawk bawk a, ka aw aṭang ka lung a chhia tih hre lo hram se ka duh a ni.

"Kan thleng tluang e, chaw erawh kan la ei chiah lo. Tun ṭum ka zin chu ka ngai zual khawp mai che u Aruatte, Bawihpuia kha lo hrilh fiah mai ta che" a rawn tih chuan Ezekiel-a chu ka âwma hmai nawr vakin a rawn ṭap chhuak hawk hawk a, ka mittui chu ka dang zo ta bik lo. 

"Kha kha Bawihpuia a ni em Aruatte? Min hrilh thuai teh, ka awm a tinuam miah lo a nia, khawi maw amah kha ka lo be leh lawk ang e" a rawn tih leh chuan phone chu Ezekiel-a lamah ka dah thla a, mahse Ezekiel-a chuan a lo nam sawn vat thung. 

"A be duh lo che a ni ang" tih leh phone dah hlat chu ka rual nghal vat a, ka aw aṭang chuan ka ṭap ve a ni tih a hriat ngei ka ring, ka mittui te chu ka biangah a luang ngiai a, hruk hul pawh ka tum em em lo.

"Nang leh zel pawh maw Aruatte!? Khati ang khan awm lo hram teh u, in ṭap tih ka hriat khan ka rilru chhungril hi a rum vawng vawng ve tho asin" a aw ah chuan a lungngaihzia a lang chiang khawp mai, keini nufa pawh chuti tho chu!

"Kan ngai che a nih hî PC" tih chiah chu ka sawi thei hram a, ka hmui chu ka hup zui nghal bawk a, Ezekiel-a erawh a ṭap muhil a ni maithei, a thawm a reh ta êm mai, ṭap muhil daih rih mah se a pawi lohna chen a awm zawk. 

"Kei pawh hian ka ngai em em che u alawm, zanin chu ka muhil lo dawn chiang hle mai Aruatte. A bik takin nang ngat phei chu ka lo hruai ve mai lo che a ni te ka tihnuhnawh a, mahse Bawihpuia kha School kal a ngai tlat bawk si a ni" a tih chuan ka lo ngawi reng a, chutah amah bawk chuan 

"Ka tiam a che u, ka zin leh dawn a nih chuan in pahnih khan ka hruai chiang tawh khawp ang che u" a rawn ti leh nghal phawlh phawlh a, thawk a la ri hawk hawk ri te chu ka hre vek a, ka awm dan chu a nutling zia lo tih ka hria, mahse PC-a chu ka ngai ve êm a tin ni!

Kan inbiak duh tawk dawn hnaih lamah Ezekiel-a chu kai thovin aw dam zet hian a thlem leh hram a, a fapa bulah chuan zirtawpnia haw a intiam nghe nghe bawk. Ezekiel-a pawh engtin tin emaw a lungawi ve leh mai bawk a, naupang tih takah an rilru a la thianghlim a, naupang hi chu rei lotê hnuah an lungawi ve leh mai zel ṭhin. Ka pa chu tlai dar 5 leh a chanve velah in a lo thleng a, khua pawh a la eng ṭha khawp mai. Chu bakah ka pa lo haw chu a fuh phian ka ti, Ezekiel-a pawh a nui leh theih phah bawk a, mipa leh mipa hi an inngaina zawk te pawh ani ang. 

Ni 4 chhung zan riakin ka pasal chu a awm bo vang vang a, tun ṭum zet zawng kei ngei paw'n ka inhrethiam bik lo. Ka ngai ngawih ngawih a, ka thlahlel ngawih ngawih a, a rimte chu hria ang mai te'n ka inhre hial bawk a, zan lam thlengin mutmu pawh ka tuah ṭhat loh phah a ni. Kei ang bawkin a ni paw'n keini nufa chu min ngai ve tho tih ka hria, zan rei lam tawh Ezekiel-a muthilh hnuah kan inbe leh ziah a, a rawn haw hma zanah phei chuan kan inbe tlaivar ṭhak maw le. 

Zirtawp tlaia kan in a rawn pen lut chiah chu ka lo kuah nghal thlawp a, ka nu leh pa an awm lo bawk nen tu mitmei mah ka veng buai duh lo, ka pasal chu ka ngai em a ni. A Driver-in a bungrua a rawn ken luh lai te chuan min fawp ngawng ngawng a, chokaah awm mah ila ka ei rawng bawl te chu ngaihsakna chang ka hre tawh lo hrim hrim a ni. Ezekiel-a erawh a muhil rih thung a, mahse PC-a chuan a kai tho lui ta tho. A pa hmel a'n hmu chiah chu Ezekiel-a pawh a tho nghal vat a, thawh phan a nei lo reng reng. 

Khumah tluk puiin PC-a paw'n nghet zetin a fapa chu a kuah vawng vawng a, kan room chhungah chuan ka awm rei duh ta lo. Ka awm reng a nih chuan ka ṭap mai ang tih ka hlau, hmeichhe ṭahbelh tak ka ni ngai lo asin maw le. Ka nu leh pate lo haw lai chuan ka pangngai leh vek tawh a, ka hlim ru em em tawh zawk a ni. A mak hi ka la ti bang thei lo, ka pian tirh ata zan 4 ka hman tawh zawng zawngah ka pasal zin chhung chu hman hrehawm ka la ti ber hial ang. 

"PC, eng lo, thil sawipui che ka duh a" kan nupa room chhunga kan luh rualin ka ti nghal a, tui connection pipe kan siam dun lai aṭang tawh ka rilruah thil sawipui duhna a awm reng tawh a, kan buai dun êm avang leh pipe vel a siam ṭhat laklawh êm avangin ka sawi lawk duh lo a ni.

"Aw sawi la, ka ngaithla alawm" tiin a kawr hak lai chu a hlip zui nghal mial mial a, inbual a tum tih pawh ka hria, sawipui rih loh te chu ka duh ta rum rum a, ka thu sawi tum chu engti ang chiahin nge a lo dawn sawn ang tih ka ngaihruat thiam lo a ni.

"Doctor hnenah inentir ve chhin la ka lo ti mai mai, kei chu i hriat lovin vawi thum lai chu ka inentir tawh a, mahse result aṭang chuan ka ṭha vek thung" ka tih chuan chal tichuar nang hian min en nghal thuai a, a lo zin hawna pawh kar khat laiin a liam tawh a, tunah erawh ka thu sawi avang chuan kar khat chhunga a hmel hlimna zawng zawng te kha a bo nghal vek ni maiin ka hria. 

End of Chapter 2