EZEKIEL By Havali Adam (CHAPTER 16)

EZEKIEL

By

Havali Adam

Chapter 16

"Ka fa a nihzia chu kei leh nang hian kan hre chiang ber alawm Aruatte, i pum chhunga naute hi mipa a ni dawn bawk. Ka mumanga Bawihpuia lo pawm mipa naupang ngei kha a ni tih ka hre lawk thei, ka hre chiang a ni" a rawn tih leh chuan ka lo men deuh pur a, ka rilru chu a no nghal em em ringawt. 

"Engati nge heti ang hian i awm tlat PC? Min hmangaih leh hmangaih loh pawh i hre tawh lo a ni lo'm ni? Min hmangaih tawh loh vang leh chhuak tura min tih vanga inṭhen kan ni tih te kha i theihnghilh ta em ni?" ka ti ṭuau a, ka ṭap lo thei ta lo. 

"Lo hnai teh Aruatte" ti supin amah zawk chuan a âwmah min kuah bet thuai a, ka tal chhuah hlau em em hian min kuah nawn mawlh mawlh a, a taksa ka sikna chuan awihawm loh khawpa nasain hahdamna min pe a, PC-a chu ka ngai ngawih ngawih a ni. 

"Ka lo mawl êm a ni ti raw? Bawihpuia kha ka ngaih lutuk luatah ka ngaihthah che a, i tawrhna hrethiam hauh lovin ka awm khum che a, min dem mawlh mawlh rawh. Engtik niah emaw chuan tuna i rilru put hmang hi i thlak ve theih hram ka besei, ka beiseina hi tichhe suh aw?" a rawn tih zawm leh nghal a, chhan pawh ka chhang thei lo. 

"Ka ngai lutuk che Aruatte, i laka ka inthiam lohna hi a zual tulh tulh dawn a nih hmel. Office lamah pawh ka kal thei rih lo, chawlh ka la tawp a ni" a âwm aṭang min nam hla deuh hlek a, ka biang leh ka chala sam te chu a hui kiang a, nui mah se a inchhir tih chu ka hre vek thei.

"Lo kal tawh suh, min rawn hmu tawh suh PC. Thilpek pawh rawn dah tawh lo la, ka awm pawh a nuam deuh ang. Heti anga i awm hian ka rilru i tikhingbai zual asin, min rawn ngaihven tawh suh" ka tih chuan a kutzungpuia ka biang nul zeuh pah hian

"Ka thei hleinem Aruatte, ka hmangaih em em che a ni tih hi hre reng rawh aw? Chu chuan zawi zawiin i rilru pawh a thlak thei zawk ang a, ka rawn ngaihven tawh lo che a nih chuan kan awm hrang hlen tak tak mai ang tih ka hlau a ni" a rawn ti hniam ruih a, kan awm dan a dik lo tih hre chhuakin ka inla hrang ta vat. 

"Haw tawh la a ṭha ang, naute kawr tur emaw eng pawh i hnen aṭang hian dawn ka duh tawh lo tih hria ang che. Ka nu leh pate pawh an lungawi tawh chiah lo a nia, chuvangin pangngai takin nung tawh rawh" tiin amah hlat deuh tak chuan ka ding a, ka kawr chu ka chul ṭha zui nghal bawk.

"Ka va haw ang e, ka beidawng dawn chuang lo tih erawh i hriat ngei ka ring Aruatte. I thinlung chhungah khan min hmangaihna nasa tak a la awm tih ka hria, tunah rih chuan i rilru chapona khan a la hneh rih lutuk che a ni" ti supin kawngka lam chu a pan a, ka lama lo inher thutin

"Keimah ang hi chuan tisual ve suh aw Aruatte, min ngaidama min pawm leh ngei turin ka duh che a ni. Min hmangaihna kha ring ngam la, i rilru chapona kha chuan inchhirna bak a pe dawn lo che" a rawn ti leh a, nui lui sukin a chhuak ta vang vang. 

A chhuah hnu chuan ka rilruah thil chi hrang hrang a rawn lut zut zut nghal a, min hmangaih thu chu vawi tam a sawi tawh ngei a, mahse  eng nge ka duh khawp loh ber pawh ka hre tawh bik lo. A bula let leh tur chuan ka inngai ngam tawh lo va, amah ka hmangaihna erawh a reh phah hauh lo. Eng ang paw'n duh lovin haw mah ila ka pum chhunga naute pa chu PC-a ngei a ni tih ka hre chiang em em a, a hun laia awih duh miah lo khan tunah a awih leh em em bawk a, engkim chu a laklawh kual vel vek tawh a ni ber. 

Tih tur a awm lutuk lo bawk nen ka room-ah ka lut a, ka mu leh tawp a, ka pum chu puar lian ve reuh tawh tak a ni. Rei lovah Mary-i hnen aṭang phone call ka dawng zui nghal a, kan inbe rei ang reng khawp mai. Tlaiah chuan ei rawng bawl tumin ka tho chhuak a, ka nu chuan a lo phal lo hle thung. 

Keimah berin ka la duh chiah loh avangin chaw ei khawm pawh kan la nei lo ta zel a, kan sawina rei tawh viau mah se ṭul ka ti leh ta vak lo zawk a ni. Ka nu leh Saidingi paw'n an sawi ri leh tawh lêm bik lo va, ka pa phei chuan chuti ang thil vel chu a hre lo hrim hrim. 

Thla kan hmang ral leh a, ka naute paw'n thla 6 a tling ve leh ta der mai. Ka hrethiam bik lo, PC-a sawi kha a dik dawn te pawh a ni ang, ka pum chhunga naute chuan thawm a rawn nei chho ṭan a, a thawm lah chu a hriat em em zel leh nghal. 

Zing ṭawngṭai inkhawm pawh tunah chuan ka kal tlem sawt ta hle a, ka nu leh pa thu ka zawm vang a ni pakhat. Vanduai palh vangin ka chhiat ang tih an hlau a, an ngaih dan chu ka hriatthiampui khawp mai. Chu bakah kan veng biak in luh dawnah step a awm kher a, ke ngei paw'n ka tlu sual thut palh ang tih chu ka hlau ru ve tho. 

A hma ai zawngin PC-a chuan min rawn ngaihven zual a, naute thawmhnaw lam lo dah tawh ngai lo mah se lehkhathawn erawh dah a ṭhulh chuang lo. Lehkhathawnah chuan a hun hman dan engkim a ziak lang a, min ngaih thu leh min hmangaih thu chu tlar tinah a lang zut zut a, mittui dir zawih zawih chunga chhiar chang pawh ka nei ṭhin. PC-a bulah chuan 

"Let leh ka duh chiah em?" tiin keimah leh keimah chu ka inzawt ru neuh neuh zel a, ka rilru dik tak erawh kei ngei paw'n ka hre bik chuang lo. 

Dik tak chuan let leh ta ila ka nat leh ka hlau a, chhuak tura min ṭawng khum zan aṭang khan let leh tawh lo turin ka rilru ka siam fel vek tawh bawk a, ka naute ngaihtuah em em mah ila let leh ringawt chu ka ngai ngam tawh lo te pawh a ni mahna. 

"Ehê, lo kal rawh, lo leng rawh, engtin nge kan in awmna hi i hriat a?" Chhuanmawia hmel ka hmuh rualin ka lo ti nghal hluai a, pawnah insuk pho turin ka chhuak kha a ni a, a hmel hmuh chu ka inbeisei lo khawp mai.

"Hmuh che ka duh mai mai maw le, kha naute chu a va lian ve tawh ve? Eng mah lah chu ka rawn sawi leh tawh si lo va, a dera i ngaihzawng ka nih vang paw'n rawn ngaihven ve deuh tur che chu ka ni alawm" nui sun sun hian a rawn ti a, a fiamthu tih hriain kei pawh lo nui ve var var bawk.

"Lawk aw, insuk hi ka'n pho zo law lawk mai. Min lo nghak rawh, in chhungah kan lut rual dawn nia, thingpuite i in ang chû?" ka tih chuan a lo nui leh mai a, ka bulah chuan a rawn ding a, ṭawng erawh a ṭawng tawh lo.

"Tun lai chu ni hi a sa rei thei lo lutuk a, Christmas boruak kan chuangkai chho tawh bawk nen tlai dar 3 leh a chanve velah hi chuan ni eng pawh kan dawng meuh tawh lo, chuvang alawm ka chet zung zung" amah pawh en chuang lo chuan ka ti leh a, ngawih reng chu nuam ka ti lo a ni. 

"I ṭha maw? Naute lam eng nge a an?" ka thil sawi zawm loh deuh hian a rawn ti daih a, ṭawng kâa chhang lovin ka lo bu nghauh nghauh a, insuk pawh chu ka pho zo titih a ni nghal mai.

"Lo kal rawh, in chhung lamah lut ang. Thingpui te i in dawn nia, keimah chauhin ka awm alawm" tih leh in lam pan chu ka rual a, ani paw'n min rawn zui ve nghal a, in chhunga kan luh rualin

"Lo ṭhu rawh, thingpui ka'n lum nghal ang e" ka ti zung zung a, Gas lamah thingpui lum tur chuan ka phei a, ani erawh ṭhu lo hian banga kan chhungkaw thlalak intar chu a lo en reng a, min hnung chhawn deuh tlat avangin ka be tawh lem lo. 

Thingpui kan in lai chuan hmeichhe lam ka zawt a, a sawi ṭha duh vak lo vel khanglang a, mahse a ngaihven hmel ang reng hle thung. A sawi dan chuan College zirlai naupang a nih hmel a, a sawi tirh phei chuan insum thei lovin ka lo nui chhuak hak hak a, a sawi chhunzawm duh tawh loh phah vel a, ka ngen fê hnuah a sawi chhunzawm duh leh ta chauh a ni. 

Zep lovah chuan a duh naupang ka ti reuh, kei aiin kum hnihin a upa a, ani ang kumin tun lai tleirawl rual vel a melh daih chu mak ka ti a ni. An inkar erawh sawi theih ka nei lo, an induh tawn te chuan chu baka ṭha a awm chuang hleinem. Thingpui in zawh chuan PC-a chanchin min rawn zawt nulh a, mak tih avangin ka chhang lawk lo nghe nghe. 

Ka laka PC-a awm dan vel chu hrilh vek ka tum deuh tak nâ a, mahse ka hrilh vek ta lo. A thuak thuak chiah ka sawi a, chu pawh min zawt lo se chu ka sawi kher lo vang. Anni pahnih hi an lo inhmu vel ang a, rawlthar tir ang maiin an lo khawsa ang tih ka hlau ru hle bawk. 

Mipa hi chu mipa an ni ve tlat a, insual te hi an awlsam a, puitling tawh pawh ni se an thlah tak tak thei lo ṭhin. Kan thingpui inna no chu ka sil mial mial a, chutah thil ka hre chhuak zawk mai. Calendar kan tarna lamah chuan ka kal phei nghal a, ka in check-up ni a ni tih ka hai chiang lutuk. 

"Awi, vawiin hi ka in check-up ni tih reng ka lo hre tawh lo" ti hluaiin ka phone chu ka khawih zawm nghal a, theihnghilh lo ila chuan zing lamah ka pa emaw Saidingi emaw ka hrilh ang a, min kalpui tawh ngei ang. 

"Ka lo kalpui dawn che em ni ang? Ka hman alawm, i duh phawt chuan ka lo kalpui ang che"  ka pa ka call laiin Chhhuanmawia chuan a lo ti a, ka lo nuih zeuh ringawt a, ka pa lah chuan phone call a la pick-up thei miah lo zui.

"I buai lo tak tak maw?" ka ti deuh tawl a, vawi thum lai ka pa chu ka call tawh a, a la thei lo zel a, chutah Saidingi paw'n a pick up thei lo bawk a, ka nu em em chu a len chhuah lawk avangin ka call buai duh ta lo a ni. 

"Buai lo ve, khawi Hospital-ah nge? Nge Clinic-ah zawk? I thil sil lai saw va sil zo la, kan kal nghal mai dawn nia" a lo ti sam êt a, kei pawh kal sawnin no chu ka sil ta zung zung a, amah berin a hman thu a sawi tho bawk a, inhruai tir chu ka tum ta mai.

Doctor chuan min check ta ngei a, mu ṭha turin min hrilh a, a sawi ang tak takin tun lai chu ka mu ṭha lo hle a ni. Ei lam pawh ka thei em em chuang lo, Ezekiel-a ka pai lai nen chuan danglam tak a ni. Ei tur ṭha ṭhâ te chu ka lei ve ngei a, ei pawh ka ei awl lo va, mahse chaw tak erawh ka ei tam thei lo thung. 

Purun rim mai mai te'n ka luak an pawt hma em em a, thlai hnah lam kan hmeh hi chuan ka ei thei pangngai viau ṭhin. Chawlhni zingah te hian vawk sa kan hmeh ṭhin bawk si a, ka pa pawh a inthlahrung thei khawp. Ka pa hian vawk sa hi a duh ve em em a, chawlhni ah hi chuan hmeh loh kan nei ngai lo ṭhin. 

A chang phei chuan an chaw ei laiin thil dang ka ti daih a, ka ril a la ṭam loh thute ka sawi a, mahse an laka ka inthlahrun vang zawk a ni. Sa kan hmeh tawh hi chuan eng sa pawh ni se ka hne em em vek a, tum lui ngial mah ila ka luak chu a rawn chhuak ngawih ngawih zel tho. 

Doctor kan hmuh zawh chuan haw turin kan chhuak nghal a, ka naute pawh a ṭha viau rih e. Ka tih theih awm chhun chu chaw ei ṭhat leh mut ṭhat a ni a, mahse ka thei ngût ang emaw! Chhuanmawia motor park na bul kan thlen rualin Chhuanmawia chu motor bang tauh chawrh khawp hian a leng dâwr a, rei lovah PC-a hmel ngei chu ka hmu zui nghal bawk. 

"Nang hian ka nupui hi i lo la beisei vela maw!? Ka hrilh chiang viau tawh che a ni lo'm ni?" ti vin hrawkin lei a let reng Chhuanmawia chu a hnek zawm mawlh mawlh a, PC-a chu sakawlh chiah chiah hi a ni mai. 

"PC! Duh tawk rawh, miin an en ṭhup che u a nia" an awmna hlat deuh tak aṭang chuan ka lo ti thuai thuai a, ka va hnaih a nih chuan a tum loh deuhin min khawih na palh ang tih ka hlau, ka lo rai puar lian ve tawh tho bawk si.

"LALRUATTLUANG, i pasal ka awm reng a, min rawn hrilh mai ta che. Ani ber kher nen in kal vel a, he pa nen hian vawi khat mah inhmu tawh reng reng suh u" thinrim taka min en chung hian a ti khauh hmuk a, Chhuanmawia chu leiah a lo la let tual thung. 

"Hrep che hian! Khati ang khan he pa phiangsen hi en hauh suh, nge nang hian ani hi i lo hmangaih hle zawk?" tih leh ka lama rawn pen phei a rual nghal a, na zet hian ka ban chu a chelh zawm zat bawk.

"Ka nunah rawn inrawlh tawh suh, thu neihna i nei tawh lo. Kan inṭhen tawh tih hria ang che LALCHHANHIM, i hmel pawh hi ka hmu reng peih lo" ka ti vin te hmarh a, kawnga kal te'n min en hrek hrek avang chuan ka ṭawng ring hran lo. 

"Kan la inṭhen reng reng lo, kan inṭhen emaw ti ziah suh. Hre rawh, saw pa nen sawn in awm dun leh a nih chuan ka che rapthlak tawh khawp ang, i pasal ka ni tih hre reng ang che" ti khauh hmukin min kai dawr dawr a, a motor chhungah min luh tir zui nghal ta hmak.

"Ka chhuk duh, i bulah hian ka awm peih teuh lo LALCHHANHIM. Kawngka hi hawng nghal rawh, sakawlh chiah chiah i nih hi!" ka ti vin tuar tuar a, kawngka chu hawn ka tum ṭhin, a sak tlat bawk si.

"Kha pa bulah khan i let tawh hauh lo vang, keima'n ka thlah mai ang che" ti bul hmukin chak zet hian a tlan chhuak nghal a, ka pum chu ka lo dawm vat a, ka va han insawh na teuh tehreng em.

"Aruatte" aw dam lutuk tak mai hian ka hming a rawn lam a, a âwah chuan hlauhthawnna hlir a khat a, ka tih ngaihna hre lo chu ka ṭap chhuak ta nge nge a, a taksa leh ka taksa an insik rual chuan ka ṭah chu a chhuak zual em em bawk.

"Ka tihpalh Aruatte, i insawh na hman lo ti raw?" nghet zeta min kuah chung hian a rawn ti leh nghal a, a bulah chuan ṭah miah loh ka duh a, hmeichhe chak tak leh hlim tak anga awm ka tum a, a tel lova ka awm theihzia hmuh ka tum a, mahse engkim chu ka hlawhchham vek a ni.

"Kha pa kha nasa takin ka thik alawm, a hma paw'n nang hnaih tawh lo tur che hian ka hrilh vek tawh. Ka hmu dun leh kher bawk si che u a, ka insum zo ngâng lo a ni e" ka tukhum sam chul hliau hliau pah hian a rawn ti dam dap a, ka ṭah lah chu a la chhuak zual em em zui. 

"Min rawn ngaihven tawh suh ka ti che a ni lo'm ni? Enga tinge ka thu sawi te hi i awih hreh em em bik? Min rawn hmu tawh lo la chu maw ka hlim zawk ngei ang, nang pawh ka tel lova nun i thiam hle tawh khâ" a âwma nam ṭai chung chuan ka ti a, mahsa ka awm sawn thei chuang lo. 

"Ni lo Aruatte, in nufaa ka rawn ngaihven tawh lo che u a nih chuan tun let hian i lungngai dawn, chu chu ka hre tlang vek asin. Kei ngei pawh hian awm dan ka thiam dawn lo, a chhan chu keini pahnih hi pum khat kan ni tawh tlat a ni" tiin thawk chu a la ri hawk a, min kuahna chu a thlah dul tial tial bawk. 

"Khawngaihin min ngaidam tawh rawh, ka tuar hnem tawk tawh i ti lo em ni? Min fiah i duh a ni lo'm ni? Ka hmangaihzia che hi i haider ka ring huah lo, chu chu min fiah i duhna chhan ber a ni tih pawh ka hria" a rawn tih leh chuan rum zeta melh chung hian

"Tuar hnem tawk tawh a!? Kum khat deuh thaw nang siam ṭha tur che khan ka bei asin, mahse a tawpa ka hlawh chhuah chu chhuak tura tih leh dawta puh bak a ni lo" ka ti hlawk hlawk a, min rawn kuah leh ta vat.

"Min thlah nghal rawh LALCHHANHIM, ka rilru hi i tina zozai tawh lutuk! Ka mamawh lai che khan khaw'nge i awm ṭhin? Biak khat paw'n min be hmasa ngai em? A teuh lo, nang chuan min hmangaih ve tawh miah lo zawk a ni kha!" ti ṭuauin tal chhuah ka tum a, tal chhuah chu harsa tak a ni.

"Ka pa sawi kha a dikna chen a awm asin PC, Pathian ang hialin ka zah che a, i ṭhat loh hlau reng rengin hma ka la a, mahse nang chuan ka hahna zawng zawng chu engmah lo maiah i chantir a nih kha! Kha zan kha i la hria em? I inchhir dawn thu ka sawi zan kha!?" ṭap feih feiha ka tih leh chuan 

"Sawi tawh suh Aruatte, keimah zawk hi ka inthiam loh ngawih ngawih a ni. I thu sawi kha lo awih ila chuan kan hlim em em tawh zawk ang, i sawi dik chiah. Kan nupa inkar hi keima'n ka tichhe vek a ni; Bawihpuia thihna vang ni lovin" a rawn ti hniam ruih a, a inchhir tih chu hriat loh theih a ni lo. 

"Ka inchhir lutuk avang hian ka thlahthlam ngawt thei bawk si lo che u a, khawngaihin min ngaihdam hun chu nei hram rawh aw? Min ngaidam thuai rawh ka ti lo va, chapona aia hmangaihnain i thinlunga hmun a chan hnem zawk hunah chauh min ngaihdamna thu i sawi dawn nia" ka chala fawp zeuh hian a ti leh a, awm dan tur pawh ka hrethiam tawh bik lo. 

"Enga tinge kei hian ka huat rei theih miah loh che le? Huat ngawih ngawih chea khawngaih miah loh che ka duh lutuk LALCHHANHIM, ka laka i awm dan engkim vang pawh khan ngaidam thei tawh lo tur che ka ni asin" ka kuah let chiah chu min rawn kuah nghet sawt khawp mai.

"Ka hmangaih che Aruatte, hmangaih tawh lo ang maia ka lo awm khum che kha maw tunah chuan pawi ka ti tawh tak zet a ni. Ni lo, tunah khan eng thu maw i sawi!? Min ngaidam thei i tihna a ni em Aruatte? Sawi lûl teh, min ngaihdam dawn thu sawi hram teh" a âwm aṭanga min nam hla thut hian a ti phawlh phawlh a, ka lo thaw hak thung. 

"Ka hre lo, tunah tak chuan ka la sawi thei rih lo. Ka haw rei thei miah lo che erawh a chhan ka hre bik lo, kei hian rilru fim tak pua inngaihtuah ka mamawh a ni" hma lam thlir dauh dauh chung chuan ka ti ta nge nge a, kan buai rei tawh lutuk chu ka hne ve tawh te pawh a ni ang. 

"Aw le, min ngaihdama ka hnen i lo let tur thu i sawi hma chu i rilru ka tihna tawh miah lo vang tih ka tiam a che. Ka lawm e Aruatte; min ngaihdam dawn avangin" nui suk hian a rawn ti a, chutah amah vek chuan ka rai kawr chu nawr tawm chhovin

"Bawihpui, lo chhuak thuai thuai rawh aw? Anu leh apa hian kan hmu châk tawh lutuk che a nia, i lo chhuah hma pawh hian kan hmangaih nghal em em che tih lo hre rawh aw?" a ti leh a, ka dul chu mi nung ang mai hian a bia a, a fawp chiah chu inhum ruh tak ka ni!

"Awm...awm sawn thuai teh" nam sawn pahin ka ti phelh deuh phang a, ka mur chhuak vek tih te chu a hria ang tih ka hlau em em a, a hriat vaih chuan min zuam sawt dawn tih ka hria, chuvanga a hriat pawh chu duh lo ka ni. 

"Ka nupui leh ka fapa hi an in lamah ka'n thlah tawh ang e, anu min en dan hi a dik leh tawh lo tlat a nia Bawihpui" ti deuh kherin a nui ruh ruh a, chahbi chu herhin a tlan chhuak zui nghal a, ka lam lah chu a rawn hawi duh tawh miah lo leh nghal.

"Mipa a ni ringawt lo vang, hmeichhia pawh a ni thei. Thil inla hre viau suh, i hre dik vek bik lo" ka ti hmarh hmarh a, huat viau pawh tum ila ka haw hlei thei lo che ka hne, ka pa perfume inkah rim ringawt pawh ka huat hma teh lûl nen ani lah chu ka haw thei bawk si lo, hua anga awm ka tum a ni ber. 

"Pathianin fapa min pe dawn tih ka hria alawm Aruatte, ka ṭawngṭainaah pawh ka dil tel ziah a, ka mumang thlengin ka hmu ṭhin bawk" ka lam lo hawi lo mah se a nui tih ka hre thei, ka hlim ru ve reng a, tih lan erawh ka la tum teuh lo.

"Pathian pawh i hre tawh lo chu a nih khâ, zinga ka thawh hma paw'n i rawn kal ve duh ngai lo va, tuna taka Pathian hming lam leh vel, ka ring hauh lo che" ka ti leh hmawk hmawk a, min chhan dan tur chu ka hre châk ru tawh khawp mai.

"Pathian hi i ta chiah a ni bik reng reng lo, ka mamawha ka biak chuan min chhang ve tho aw? Ka rilru leh ngaihtuahna zawng zawng hi ama siam a ni a; ka mumang thlengin. Ani chuan ka fapa te pahnih min hmuh tir ziah a, amah chu ka ring em em bawk" a tih chuan ka hawi sawn hmak a, a rawn nui ri hawk thung.

"Kan awm dan hi a nuam ka tih zawng tak, nupui hmelṭha leh rilru ṭha tak mai ka nei leh dawn bawk si. Kei chu ka hlim leh tawh hle zawk asin Aruatte, min hmangaih avangin ka bulah hlimna chi tin reng nei turin i lo let leh ngei dawn tih ka hria a ni" a rawn tih leh chuan

"Ka hmangaih tawh bawk lo che" ka lo ti deuh bawl a, ka dar a rawn khawih rualin ka lo phih thlak sak hmak a, pawn lam ka la hawi char char a, a hlim tih chu hre tho mah ila a lam hawi ka la tum rih hauh lo. 

"Aw le, minute rei lotê chhung chu min hmangaih tawh lo angah ka ngai lawk mai ang" a rawn tih chuan tûr zet hian ka melh hrep a, min chhaih kawlh thiam vel lutuk chu ka ning, kan in thleng thuai thuai ila ka ti tawh tak zet.

"Ka bula lo cheng leh tawh turin ka phur tlang dawn che nge i chhuk dawn le!?" min nuih var var hian a rawn ti leh a, Steering chu a bawh run pah bawk a, a awm dan avang chuan kan lo ding reng tawh tih ka hre chhuak a, mawl ka va han inti ngawih ngawih tak.

"Haw vang vang rawh" tih khum hmakin motor aṭang chuan ka chhuak a, kal pawh kal thui hman lovin ka let leh a, ani pawh a lo la tlan chhuak miah lo va, a awm ngaiin a lo awm char char a ni mah zawk.

"Inmet fai ang che" ka ti deuh tawp a, hlim hmel emaw hmel pangngai pawh ka pu chuang lo, ani ve thung chu ha lang meuhin a rawn nui a, min buk khum nghauh nghauh hnu chuan kan in lamah ka let san ta vang vang. 

Ka mutnaah chuan PC-a nena kan inkar chu ka ngaihtuah nawnn tluk tluk a, a hnena kir leh chu ka duh tih chiang takin ka hria, mahse let tawh miah lo ang tur te khan ka lo insawi laklawh tawh bawk si a, nu Chawii leh pa Zuala hmel pawh ka hmu zak deuh reuh tlat a ni. 

Tin, kan nupa inṭhen chhanah chu PC-a thiam loh a nih rualin ka thiam loh pawh a awm ve tho bawk ka ti, min rinhleh theih tur ang zawng takin chet ka la kher a, ngaihzawng kha lo nei der kher lo ila chuan chhuak turin min ti lo ve thei tho bawk, mahse a hun lai kha chuan ka buai tawh a ni. Rilru nat avangin ka rum a, ani erawh chuan a hmuh kân tlat a nih kha!

("Kohhran inan loh avanga inhuatna emaw nupa inkar buaina emaw sualin hnehna a chan rih avanga buaina zawng zawng chu Pathian kaltlangin he 'Remna Ni' hian hna thawk mawlh teh se" tih hi ka duhthusam a ni e. Remna Ni Chibai vek u)

End of Chapter 16