EZEKIEL By Havali Adam (CHAPTER 15)

EZEKIEL 

By

Havali Adam

Chapter 15

Ruah chu a sur buan buan a, sur tam tak a ni. Thinlung na takin ka ṭap a, ka pa chuan ka room lamah min pawm phei a, nghet taka muthilh vang vanga thawh leh tawh loh ka châk ngawih ngawih a ni. Khuma ka mut hnuah pawh ka la insut feih feih a, ka ṭah nasat lutuk avangin ka hnar te chu a ping vek a, muthilh duh em em mah ila ka muhil thei der si lo. Ruah sur karah kawl a phe zawk zawk a, khawpui riin a rawn chhunzawm leh nghal zat bawk a, chu ni chu engtikah mah ka theihnghilh leh theih tawh pawh ka ring lo. 

June ni 15 a ni a, ka fapa Ezekiel-a piancham a nih rualin chatuan ram min pansan ni a ni a, chutah a nu leh pate kan inṭhen ni a ni leh zel a, hriat reng loh theih loh khawpin thil chu a thleng tlat a ni. Ka muhil thei lo chu ka ṭhu chhuak ta hlawl a, ruah a la sur nasa ang reng bawk si nen dik tak chuan PC-a chu ka ngaihtuah ru reng a, a awmna ngaiah a lo la awm reng ang tih ka hlau a ni. Ka room aṭang chuan ka chhuak a, kawngkapui bula tukverh parda chu keuin kan in kawt lam chu ka en a, ka hlauhthawn ruk ang ngeiin PC-a chuan ruah a lo la do reng ta mai. 

Ka pasal hlui a ni a, ka la hmangaih em em a, chuvang pawh chu a ni ang ka ngaihtuah em em ni! Current a awm lo va, ka nu leh pa chu an room lamah an awm rih a nih ka ring. Nihliap chu ka zawng nghal chûk chûk a, ruah a do reng a nih chuan PC-a chu a dam lo dawn chiang lutuk tih ka hria a ni. 

Kawngka ka hawng dawn chiah tihah ka rilruah ngaihtuahna dang a rawn lut a, ka va buaipui leh vel a nih chuan min lo chelh leh ngei ang a, engkim ka ti khaw lo leh zo vek zawk ngei ang. Nihliap chu a awmna ngaiah ka dah a, mahse ka rilru erawh a nuam thei tak tak chuang lo. 

Ka awm hle hle thei lo va, a tawpa tawpah chuan nu Chawii ka be ta tawp a, kan in kawta PC-a awm reng thu leh ruah a do rei tawh thu chu ka hrilh nghal zung zung a, ani paw'n an rawn kal nghal tur thu a sawi a, a aw aṭang chuan a hlauhthawn hmel ve khawp mai. 

Ka nu leh pate chu engmah ka la hrilh lo va, hre miah lo mah se pawi tihna pawh ka nei chuang lo. Rei lotê hnuah nu Chawii leh pa Zuala hmel chu kan in kawtah ka hmu ta thuai a, pa Zuala chuan PC-a chu a pawt tho a, kei chuan kan in chhung aṭang ka lo en reng a, mahse PC-a erawh a tho duh hauh lo. 

Pa Zuala chuan a kawr âwma ṭham pahin a beng hawi sawk a, a thin a rim ve tawh bawk a ni ang. Motor an hunna lamah a hnuhin a hnuk titih a, PC-a erawh mi â ang maiin kan in lam chauh a lo hawi a, hla takah awm mah se a hmel chu vawt tih vangin a dâng nasa tawh hle tih ka hmu thei vek tho. 

Motor chhunga pa Zualan a nawr luh dawn thleng chuan PC-a chuan kan in lam a rawn la en hram hram a, ka mittui chu a lo hnai leh kûar tawh. An tlan liam thlengin ka thlir ṭawk ṭawk a, khawvela ka mipa hmangaih ber chu ka thlir liam a ngai ta si a ni. 

Kan hmangaih ber te bulah kan awm reng thei lo tih ka hre chhuak zut zut nghal a, nuih luih pawh tum ila har tak a ni. Ka tih tur ber hre lo chu room lamah ka lut leh tawp a, tlaia ei rawng bawl tur paw'n ka tho chhuak peih lo maithei a ni. Ka mut hmunah PC-a bawk chu ka ngaihtuah leh a, a dam ṭhat var var theih nân ka ṭawngṭai sak sep sep bawk. 

Ka harh leh meuh chuan khua a lo thim vek tawh a, current pawh a lo eng tawh bawk a, ruah erawh a la tla ser ser thung. Sitting room lama ka chhuah chuan ka pa hian TV a lo en a, ka nu'n chaw ei a lo siam mial mial a, mahni in lum ngeia han awm leh chu nawm riau dan a awm. Ka nu lamah chuan pui turin ka phei nghal a, ka hmel a hmuh rualin ka nu chuan

"I lo tho tawh maw? Chawi ei siam zawhah rawn kaih thawh che ka tum tho a, i lo tho chhuak chu a ṭha hrim hrim e. Paa, lo phei la, chaw i ei ang u" a lo ti nghal zung zung a, ka pa pawh a rawn phei ve mai. 

"Aruatte, naute avang khan lungngai miah suh aw, i nu leh pate hian kan enkawl pui vek dawn che a nia" chaw kan ei mawlh mawlh laiin ka nu chuan a rawn ti chhuak hlawl a, mahni nu dik tak hnen aṭanga hmangaihna leh ngaihtuahna dawn zawng rilru a no hma hle. 

"Ka nau pai avang hian ka lungngai hleinem ka nu, engmah lungngaihna ka nei lo" mittui khap let zawk zawk chung chuan ka ti ve sep a, lungngaihna nei lo ang maiin insawi mah ila ka naute hma hun tur chu ka ngaihtuah thleng daih tawh zawk a ni. 

Chaw kan ei kham chuan thleng ka seng fel pui a, ka nu chuan ka chet phal lo mah se ka che lui ta tho. Ka nu leh pate nen chuan ka chungchang sawiin kan titi a, ka laka PC-a awm dan leh ka awm dan chu ka hrilh thuak thuak a, a zawng zawng ka hrilh a nih chuan min khawngaih luatah thil ṭha lo a thleng palh ang tih a hlauhawm a ni. 

Saidingte lam pawh ka haw thu engmah ka la hrilh lo va, Mary-i thlengin engmah ka la hrilh lo a ni. Tih tur ka nei em em lo bawk a, room-ah ka awm leh tlawng a, chhun lamah ka lo mu tam ang reng bawk si nen zan chu a rei duh viau dawnin ka hria. Dar 11 leh a chanve velah pawh ka la meng kar a, thil chi hrang hrang ka ngaihtuah kual nasa khawp mai. 

PC-a min lei sak a nih miau avangin Scooty pawh ka hawn duh ta lo kha a ni a, ka pawisa khawl aṭanga ka lei te chu ni se ka hawn mahna le. Dar 12 rik nân minute tlem tê chiah a awm tawh a, mut erawh ka la mu thei lo tluang zel. 

Chutia ka mut meng kar lai chuan kawngkapui chu a rawn ri dawt a, pawn lama rawn chumtu chuan a chum na thawkhat bawk a ni ang ka room aṭang paw'n ka hre thei. Room aṭang chuan ka chhuak thuai a, chuta ka thil hriat chuan min ṭhawng khawp mai. 

"Ka pu ka pi, khawngaihin min luh tir teh u. Aruatte, i la meng em? Keimah i pasal ka lo kal e, ka pu leh ka pite an mu tawh a ni paw'n nang tal chuan kawngka hi min hawn ang ti raw?" pawn lam aṭang PC-a chuan a rawn ti lawm lawm a, ka nu leh pa hmel pawh ka hmu rang hle.

"Min ngaidam hram rawh Aruatte, i laka ka thu sawi kha min theihnghilh sak thei mai lo em ni? Kan inṭhen miah lo a nia aw Aruatte? Ka bulah chuan i hahdam tak tak thei rih lo va, nau i pai bawk nen in inah hahdam i tum mai mai chauh ti raw Aruatte?" PC-a ṭawng chu kan pathum chuan kan ngaithla ṭhap a, tûma'n ṭawng kan tum lo. 

"I hmel ka hmu châk lutuk Aruatte, khawngaih takin i hmel ka hmuh phal hram rawh, aw? Engkim ka hre vek tawh, ngaihzawng i nei tak tak lo tih pawh ka hria, min ngaidam lûl teh" a tih leh chuan ka pa chu ngawi rengin a che hrut a, ka nu chuan a lo dang vat thung. 

"Kawngka bulah tal hian ka riah phal rawh aw, zaninah i hmel ka hmu thei lo a nih paw'n naktukah tal hmuh ka duh a ni" ka hmui chu ka hup thuai a, chuti ang taka PC-a tlawm lai chu ka la hre ngai lo.

"Mut theih loh khawpin a bengchheng a ni" ti ram hmakin ka pa chuan ka nu chelhna chu a hui kiang a, kawngkapui chu a va hawng ri sawk sawk a, eng rilru pua hawng nge a nih tih ka nu nen chuan kan hriatthiam hmel loh kher mai.

"Rawn lut rawh" a tih bul hmuk rualin PC-a ngei chu kan in chhungah a rawn lut thuai thuai a, ka hmel a hmuh chuan hmanhmawh bak lêk hian ka lam a rawn pan nghal a, dam lo kawr a ha tlat chu mak ka ti em em bawk. 

"Ka ngai lutuk che Aruatte" ti hniam ruihin nghet zet hian min kuah vawng vawng a, min kuah nghet lutuk chu ka na dâwn dawn a, kuah let pawh ka tum em em lo, kuah let ringawt thei pawh ka ni tawh chiah lo a ni. 

"Min kuah na a nia" ka tih chuan min kuahna chu a phelh thuai a, ka taksa khawi lai pawh chu a en dik zui nghal mawlh mawlh a, a awm dan chu hmâna ka pasal ni ṭhin PC-a kha a ni tawh reng reng lo, tunah tak chuan mi â a ang tawh zawk.

"Engati nge kan inah hian i lo kal leh? Damdawi ina awm i ang em em leh nghal, zan a rei tawh bawk si va haw thuai rawh" ka tih leh chuan ka biang chu a kut pahnihin a dawm a, ka nu leh pate awm lai rengin min rawn fawp a nih chu! 

"LALCHHANHIM!" ka nam sawn rualin ka ti vin nghal ṭhawt a, a bulah chuan ka pa pawh a rawn ding zui nghal a, kei chauh min zah lo a ni lo, a chet dan chuan ka nu leh pate thlengin a zah lo tih a tichiang a ni.

"Haw rawh, i haw duh lo a nih chuan nu Chawii emaw pa Zuala ka call dawn a nia, anni paw'n i awm dan hi an duh bik kher lo vang. Dik takin min chhang ang che, nu Chawii te'n hetah hian i lo kal tih an hria em?" aw dam deuh zawka ka tih chuan ṭhutthlengah a ṭhu hnawk a, min chhang lo hrim hrim. 

"An hriat pawh ka ring chiah lo" keimah bawk chuan ka ti leh a, ka phone hmet engin nu Chawii chu ka call zui nghal a, a lo la ring ral ṭhak zui, pa Zuala ka call erawh chuan a lo pick up thei thung a, kan ina PC-a a awm thu ka sawi hnu chuan

"Âw, a va buaithlak tak! Kan lo zawng mek asin, a khawsik a san lutuk avangin damdawi inah kan lut a, a ruah do vang kha a nih hmel. Aw le, kan lo kal nghal dawn nia" a rawn ti a, engmah kan sawi zui tawh lem lo.

"Engati nge damdawi in aṭang i lo kal? I nu leh pate mang i ti ang asin, ruah pawh do tawh miah lo vang che. Ṭha takin nung la, ka tel lovin hlim takin awm zawk rawh" a hma zawna ṭhingṭhi chung chuan ka ti a, kan inen chiang khawp mai. 

"I tel lovin ka awm thei lo vang Aruatte, ka awm a nih chuan nunna nei lo tluk ka ni mai. Khawngaihin ka bulah lo let leh rawh, engkim ka siam ṭha vek ang tih ka tiam a che" ka kut fawp vang vang hian a ti sup a, inṭhen tawh mah ila ka kut a tawhna chuan min la tidanglam chiang hle.

"Ni lo ve, i thei lutuk ang. Ezekiel-a'n min kalsan hnu kha chuan ka tel lovin nun i hmang char char tawh zawk alawm, kei khan ka lo hrethiam har mai pawh a!" tih leh thawh ka rual a, rei lovah nu Chawii leh pa Zuala pawh an rawn thleng ve ta bawk.

"Min hrethiam hram teh u, a chhuak tih rêng kan lo hre lo a ni. Lo kal rawh le PC, i haw tawh ang" nu Chawii chuan a ti nghal zung zung a, PC-a chu a kai tho sawk sawk a, mahse PC-a chu ka pa zawnah a ding leh ta tlat mai.

"Ka pu, khawngaihin Aruattei hi ṭhen ka duh lo, kan inṭhen reng reng lo tih lo hrilhfiah hram rawh aw" ka pa kut vuan chung chuan a ti phawlh phawlh a, ka pa paw'n chhan dan tur a hre mai lo nghe nghe.

"Enteh, ka hrilh ve mai mai ang che. In fapa in chan hnu aṭang phei kha chuan ka fanu hian Pathian ang maiin a ngai hial che asin, khati ang khawpa a hmangaihna che leh a zahna che kha neih let leh tum pawh ni la hun leh tha tam tak i seng tawh ngei ang" aw pangngai deuh hian ka pa chuan a ti a, nu Chawii leh pa Zuala chu an lo zah hmel khawp. 

"Lo kal rawh le PC, dam lo i nih kha! Damdawi inah kan let leh vat a ngai a nia, Doctor te pawh an mang a ang tawh lutuk ang" pa Zuala zawk chuan a rawn ti dam diai a, PC-a chuan ka lam a rawn pan leh ta daih mai.

"Ka beidawng dawn lo Aruatte, i lakah hian ka beidawng dawn reng reng lo. Kan awm dun leh theihna tur a nih phawt chuan ka tih theih apiang ka ti a, ka ti ngei ang" ka dar tawna tawna chelh chung hian a rawn ti a, kei chuan 

"Heti anga kan awm ngai lo hian engkim kha a ṭha vek thei asin PC, engti ang pawhin bei la ka rilru hi ka sawh sawn mai mai ka ring tawh lo a ni" ka lo ti let ve ta sep a, hmangaih em em mah ila kan awm hran chu a ngai miau si a ni.

"Engtikah mah ka beidawng dawn lo Aruatte, nang leh kan fa lo piang tur hi ṭha takin ka enkawl dawn che u a ni" ti leh supin ka chalah chuan a rawn fawp vang vang a, engmah sawi belh tawh lovin in aṭang chuan a chhuak zui nghal a, nu Chawii leh pa Zuala paw'n an zui ve ngal thuai bawk.

"Engati nge maw a rawn kal leh reng reng ni âw" ka nu chuan a ti vawng vawng a, PC-a chu a khawngaih ve ni mai hian ka hria, kei ngei paw'n dik tak chuan ka khawngaih a, a dam lo hmel ka hmuh khan ka buai ru hman hle a nih kha!

Room lama kan kal hnu chuan dar 1 a lo ri ṭep tawh a, ka muhil thei lo chiang khawp mai. Ka phone chu ka phawrh a, PC-a nen kan inṭhen hmaa kan chhungkaw thlalak chu ka en a, ka mittui pawh a rawn luang leh ta nge nge e! Ka phone chu khupin ka mit ka chhing ta vang vang a, ka rilru leh ngaihtuahnaah PC-a hlir a rawn lang a, ka mitthlaah te chuan a hmel chauh lo chu a awm thei rih lo a ni. 

Thawm ri deuh nawk nawkah chuan ka harh hlawl a, ka harh dan teh thut chu a chiang khawp mai. Zan lamah khan dar 3 vel thleng chu ka meng ngei a, a hnu lam erawh ka hre zui tawh lo a nih kha! Ka room aṭang chuan ka chhuak a, ka pa chu hna kal turin a lo inpeih fel diam tawh a, chaw an ei tawh a nih ka ring. 

Ka nu chuan chaw an ei tawh thu leh min kaih thawh loh law law thu a lo sawi a, kei pawh thleng lain chaw chu ka ei va nghal mai a, thawh hlim mah ni se ka chaw ei chu a tui phian leh nghal. 

A sar hû lai ang em emin ka rilru pawh a no tawh lo va, pangngai taka nun hman chhoh ka tum tawh zawk a ni. Saidingi chu phone kaltlangin ka haw thu ka hrilh a, mak a lo ti kher mai. Kan ina lo len nghal a tum thu a rawn sawi a, a rawn thlen har vâk ka ring lo.

Ka nu chuan eng eng emaw ni min sawipui ṭeuh a, mahse PC-a nena kan inkar lam a ni lo thung. Ka naute pai chu a hmuh châk tawh thu a sawi deuh chhen a, anmahni ai mahin keimah zawk chuan ka hmu châk tawh a ni. Khawvel eng rawn hmu thuai thuai se, ka lungngaih rukna pawh a kiam duak duak theih ka ring. 

Chuti anga upa a la ni lo va, nau chhiat awlsam lai tak a ni bawk a, ka nu chuan ka chet dan engkimah indim thiam hle turin min hrilh awl lo va, kei paw'n indim chu ka tum khawp mai. Saidingi chu a rawn leng ta ngei a, mahse a thu sawi reng reng chu PC-a chungchang lam deuh vek a ni. Nau ka pai tih chu a lo la hre ve reng reng lo va, ka la hrilh miah loh vang a ni pakhat.

"Nizan hmasa khan min rawn be hlawl a, mak ka lo ti khawp mai. U Chhuanmawia chanchin min zawh mai bakah a phone number te kha min dil zui nghal a, a lakah ka lo lungawi lo laklawh ve tawh bawk si a, phone ka off khum daih alawm" Saidingi chuan a rawn ti mial mial a, a hmel aṭang chuan ngaihtuah let a ang.

"Chuti angin awm ṭhin mah ta che, zah lo takin i u pasal awm khum ṭhin suh" ka nu chuan a lo ti thuai a, ka nu hian PC-a hi ngaidam leh nghal mai turin min duh deuh tlatin ka hria, a awm dan leh a ṭawngkamah hian PC-a a ngaihtuahzia ka hre thei tlat.

"An inṭhen tawh tho alawm ka nu, ka u ang hi ka dinhmun ni ta se chuan u PC-a hi ka ṭhenna a rei tawh zawk ang" Saidingi chuan lungawi lo zet hian a rawn ti leh nghal a, kei erawh engmah sawi pawh ka châk lo.

"I haw thu hi u Mary-i i hrilh tawh êm? Nge a hre tawh zawk?" ka lam lo hawiin Saidingi chuan a rawn ti leh nghal zat a, nui zeuh chungin ka lu ka lo thin khum mai a, tu vak mahin ka pasal nen kan inṭhen thu chu la hre rih lo zawk se ka duh a ni.

"Ti teh u, ei tur i siam daih teh ang u" ka nu chuan a rawn ti a, ka rilrua awm a hrethiam te pawh a ni ang, dik tak chuan ka naute chanchin emaw thil dang daih emaw sawi ila nuam ka ti zawk ngei ang. 

Chhun thil ei tur atan Âṭa kan nawr a, kei leh Saidingin kan nawr laiin ka nu chuan a lo kang zel thung a, ka nu Âṭa kan hi chu kan naupan lai aṭang tawh a tui reng mai a ni. Hmeichhe awm khawm tih takah thil kan sawi luam a, chaw ei khawm lam te kan sawi kai a, chu erawh Saidingi rawn rawt a ni thung. 

Kei chuan chaw ei khawm lam chu ka ûk sak vak rih lo, mi hmai te ka zah ve a, a bik takin nu Chawii leh pa Zuala hmai chu ka la zah a ni. Pasal ṭhen nuam ti lutuk angah te min lo ngai palh ang tih ka hlau a, pasal ṭhen ka duh lohzia erawh keimah chauh lo chuan an hrethiam tak tak lo vang ka ring. 

Dar 3 velah Saidingi chu a haw a, ka nu nen chuan ei rawng kan bawl chhunzawm nghal a, ka pa pawh a rawn haw har em em hran lo. Zanah chuan sitting room-ah kan ṭhu ṭhap a, mak tak maiin PC-a hmel hmuh leh ka inbeisei vel a nih chu! Keimah leh keimah chu ka indem ru nghal mawlh mawlh a, tlawm ka inti a, thil ṭul lo tak ka lo beisei kual vel leh chu mawl ka inti hnuhnawh hle bawk. 

A tuk aṭang chuan zing ṭawngṭai inkhawm turin ka kal ta ziah a, PC-a nen kan inṭhen avangin ṭawngṭai inkhawm kal chu ṭhulh ka tum chuang lo a ni. Ka ṭawngṭai thupuiah chuan PC-a atan ka dil awl lo va, ṭha taka naute ka neih theih nân leh ka hma hun zawng zawnga min kaihruai turin ka dil mawlh mawlh ṭhin. 

Ni 3 hnuah Mary-i chu PC-a nen kan inṭhen tawh thu leh kan ina ka haw tawh thu ka hrilh a, mak a lo ti khawp mai. Chhuanmawia hnen aṭang ka rai thu engkim a hriat vek tawh avangin PC-a nen chuan kan hlim chhoh a lo ring zawk hi a ni a, kei paw'n a hun lai kha chuan ka ring hman a nih kha! 

PC-a'n an ina a va kal chilh thute chu Mary-i chuan min hrilh zawm ta zel a, Chhuanmawia pawh a hmuh ngei ka ring. Engkim a hriat vek tawh thu min hrilh tawh tak alawm, awmzia erawh a nei thui lo khawp. 

A inchhir dawn thu thlengin ka sawi lâwk vek a, inṭhen ka duh loh thu thlengin ka hrilh lawm lawm a, mahse hnung chhawna chhuak tura min tihna bak ka hlawh chuang lo a nih kha! Thla tam tak chhung ka tlawm a, chu pawh amah ka siam ṭhat duh vangin a ni a, tlawm reng zawng a lo har ngâng a ni e. 

Chhuak lo thei lo khawpin min siam a, ka chhuahsan hnuah erawh inchhirin ngaihdam min dil leh lawi a, ka tan chuan lo pawm mai mai theih a ni tawh lo, a chhan chu a awm dan tur zawng zawng ka sawi lâwk chung paw'n chhuak turin min ti lui tlat a ni. 

Ka pasal nen kan inṭhen aṭang kar khat a liam leh tawh a, veng chhung mite sawi neuh neuh ka kai ṭan a, uire ang te'n mi ṭhenkhat chuan min sawi a, mahse an thu sawi chu engah mah ka ngai duh lo lui tlat thung. Kan in dik taka kar khat ka awm tuk aṭang lehkhathawn leh thilpek ka dawng ta ziah a, tu hnen aṭang nge tih lah ka hre chiang ropui mai bawk si. 

Lehkhathawn leh thilpek ka dawn hmasak ber tuk chuan mi dang daih emaw ka ti a, thu ziak ka chhiar hnuah erawh PC-a hnen aṭanga ka dawn a ni tih ka hrethiam zui nghal a ni. Thla khat a liam hnu phei chuan dahna hmun tur awm lo khawpin ka dawng hnem a, a chang leh naute kawr tur ka dawng a, a chang leh pangpar ka dawng thul, khap tur ringawt paw'n a hmel ka hmuh duh tawh bawk si lo. Ka pa lah chuan

"Nangmahni ngeiin ching fel rawh u" a ti mauh mai bawk si, ani pawh hi ka hrethiam tawh bik lo, ka nu ang maiin PC-a chu a khawngaih hmel ta viau zawk a, chu tak chu ka thil hriatthiam mai theih loh chu a ni.

Thla hnih a ral leh a, PC-a hnen aṭang thilpek ka dawng awl lo tluang zel a, mipa naupang kawr lam hlir hi a rawn la dah ziah zui. Zep lovah chuan nuam ka ti bik reng reng lo, inṭhen lo thei ila chuan inṭhen loh ka duh lutuk tlat, mahse chhuak turin amah zawkin min ti miau a, ka tan chuan chhuah lohna chi a ni tawh lo a ni. A thu sawi theihnghilh sak mai tur te khan min ngen vel a, chhuak tura min tih thu kher kha chu ka theihnghilh theih pawh ka ring chiah lo. 

Ka pum chhunga nautein thla 5-na a hman thla chuan ka ning ve ta deuh a, PC-a hnen aṭanga thilpek dawn reng ringawt chu ka kham tawh a ni. Chu bakah tun ṭum ka nau pai chu huat leh ngai theih loh ka ngah zual em em a, chawhmeh ei duh loh pawh ka ngah mai. 

Chuta karah PC-a ber kher chu ka ngai viau leh lawi si a, engkim chu ka duh loh dan vek ni mah se ka thlak danglam ngawt thei si lo a ni. Ka pum pawh a puar lian ve ṭan tawh hle a, thil hotê têah ka thin lah chu a rim deuh reng bawk a, ka nu leh pa chuan ka awm dan chu an hrethiam em em thung.

"Eng thil mah i hnen aṭang hian dawn ka duh tawh lo" PC-a hnenah chuan ka ti deuh tawp a, biak ka duh avangin in chhungah ka luh tir kha a ni a, ka nu leh pa an awm lo ve ve tho bawk a, hun remchang tak a niin ka hria. 

"Bawihpuia chu a va lian tawh ve, lo chhuak thuai thuai se ka hmu châk tawh tak zet" nui hmel pawh a pu lo va, Department pakhata Deputy Director ni lo ang maiin a hmel te chu a bawrchhawr hle a, ngaihtuah erawh ka ngaituah thui duh lo.

"I fa a ni ve tawh lo PC, nang chuan thu dik ka hrilh lai chea i awih duh loh zan aṭang khan i fa a nihna aṭang i paih tawh a ni. Min rawn ngaihtuah tawh lo la, inmet fai la, hlim takin nun hmang leh tawh zawk rawh" ka tih chuan

"Ni lo ve, i tel lo chuan ka hlim thei hleinem Aruatte. Keimah chauh ka inngaihtuah luatah i chapona ka kai chhuak hi pawi ka ti a, pawi ka la ti zel bawk ang. Ngaihtuah tawh lo tur che chuan min tawh suh Aruatte, nang leh ka fapa lo piang tur hi ka ngaihtuah em em zawk che u a ni" a rawn ti nghal duah a, ka thin a rawn rim ta thut mai.

"I fa a ni ve tawh lo LALCHHANHIM, ka hrilh chiang viau tawh che a ni lo'm ni? Chu bakah mipa ni tur angte khan sawi lâwk vel suh, hmeichhia pawh a ni maithei" ka tih hlawk hlawk chuan a kiai suk a, ka kut a rawn vuan chiah chu ka mur chhuak vekin ka hria.

(Tu zawk hi nge thiam lova in ngaih ve le!? An la inhmangaih ve ve hmel bawk si a, an hlim leh theih in ring em?)

End of Chapter 15