EZEKIEL By Havali Adam (CHAPTER 14)

EZEKIEL 

By

Havali Adam

Chapter 14

"Enga!? Eng thu maw i sawi kha!? Min hruai let rawh, kan in kawtah khan min va hruai let rawh" lungngawi lo zet chuan ka ti a, ani erawh a tlan muan ngaiin a tlan muang reng a, kan in lamah pawh a inher chuang lo. 

"LALCHHANHIM! Ka thu sawi kha i hre lo em ni? Min thlah duh lo a nih paw'n pawi tihna ka nei lo, keimahin ka haw mai ang. I kawngka lock hi hawng la, Taxi lain ka haw thei reng e" ka tih leh pawh chuan a ngawi ngul a, kawngpui sirah car chu a tiding zui zat bawk.

"Kawngka hi hawng rawh le PC, chuan dun reng pawh hi kan pahnih tan chuan a ṭha ber tawh lo a ni. Kan inṭhen tawh a, kan inṭhen tawh avangin kan inah ka haw ngei a ngai a ni" ka tih chuan min rawn en a, kei chuan ka en ve duh lo thung.

"Kan la inṭhen lo" a rawn tih chuan a lam chu ka hawi lo thei ta lo, lungngaih hmel fê hian min melh run a, ka taksa chhung chu a rawn sa pup pup a, kan inṭhen tawh hnua chuti ang thu a la sawi thei chu ka thinrim chhan niin ka hria.

"Ni lo ve, kan inṭhen tawh alawm, i thil hriat sual vang mai maiin chhuak turin min ti tawh a, ka tan chuan i bula awm leh ngamna chi a ni tawh lo. Kawngka hi hawng rawh le, ka haw a ngai tawh a ni" aw dam tak chuan ka ti a, vin vakin awmzia a nei dawn chuang lo a ni. 

"Aruatte" hniam ruih hian a rawn ti a, a awah chuan inṭhen a duh leh lo ni mai hian ka hria, mahse chu zawng thilh awihawm loh lutuk a ni thung si, ani chuan chhuak turin mi ti zawk a nih kha! 

"Inṭhen lo vang, inṭhen ka duh lo" a rawn tih leh chuan hma lam chu ka hawi nghal thuai a, ka mittui te chu a rawn tling pam a, inṭhen ka duh loh thu ka sawi lawm lawm lai pawha chhuak tura min tihna chu ka rilruah a lang lian khawp mai. 

"Ka thu sawi i hria em Aruatte? Keini hi inṭhen lo vang, inṭhen thei kan ni lo" ka mittui chu a bawi ta zawih a, nizan te khan chung thu chu sawi se chuan ka rilru ka thlak ang a, hlim takin hun kan hmang ngei ang. 

"Min en teh Aruatte" tiin ka biang chu a kut pahnihin a rawn dawm a, a hmel en turin min kuai her a, tunah tak chuan ṭawng pawh ka ṭawng chhuak peih rih lo, ka ṭah a chhuak ngawih ngawih zawk a ni. 

"Ka hmangaih che" a tih leh chuan thaw chhuak hak chung hian ka lo nuih zeuh a, a mitmeng leh a hmel aṭang chuan dawt a sawi lo tih chiang takin ka hria, mahse chung ka hriatna te chuan engmah a thlak danglam thei tawh si lo. 

"Ka hria alawm PC, min hmangaih leh hmangaih loh i hriat loh lai pawh khan min hmangaih tih chu ka hre reng asin" ti sepin a kut chu ka pawh thlak sak a, a mitmeng chu a buai deuh nâk a, ka chet dan leh ka thu sawi chuan a ṭhawng hle a nih ka ring. 

"Le! Tunah chuan motor hi tinung la, kan in lamah min va thlah tawh rawh le! Heti anga kan inbiak reng chuan kan intina tawn mai mai, keini nupa chu kan inṭhen tawh a ni" ti lehin ka nui lui hram hram a, hlim angin lang mah ila ka hlim bik hauh si lo. 

"Nizan khan Bawihpuia nen kan inhmu asin, ani chuan nau mipa a lo nei a, a hlim hmel lutuk" Steering bawh run hian a rawn ti chhuak sup a, a mumang a sawi tih ka hrethiam mai a, ka ngawi reng thung. 

"Ka zak a, nep ka inti a, nasa takin ka inhaw bawk. Dik tak chuan ka awm dan a dik lo tih ka hria, zawi zawiin insiam ṭhat ka tum a, min hmangaihna leh i dawhtheihna te khan min thlak danglam tial tial a, mahse i rai thu khan min deng na lutuk a ni" a ti thum leh chhal a, kei chuan ka pum chu ka lo dawm ringawt. 

"Ngaihzawng i nei tih pawh ka hria, i ngaihzawngpa chu hmâna i mipa ṭhian kha a ni tih thlengin ka hria, nizan khan ka mumangah Bawihpuia leh mipa naupang hmu lo ila chuan tun thleng hian mi dang fa emaw ka la ti ngei ang" a lam chu ka hawi a, ani paw'n min lo en ve reng. 

"Ka pum chhunga naute awm mek hi i fa a ni ve tawh hleinem PC, nang chuan nizan khan i fa a nihna aṭang i paih bo tawh a ni. Ka pum chhunga awm hi ka fah chiah a ni tawh; ka fa chiah" ṭah insum tak chuan ka ti a, ṭah rêng pawh chu ka tum bik reng reng lo. 

"Aruatte" a rawn ti thawp sup a, ka kut te chu ka lo hum ruh em em a, ka hlauhthawn ruk ang ngeiin a inchhir a, min hmangaih thu min hrilh hnuhnawh bawk a, min kal tir vang vang se chuan ka thaw pawh a veng hawk zawk maithei a ni. 

"I inchhir tih ka hria PC, mahse maw nizana ka ngen lawm lawm lai che kha i la hre ve reng ang ti raw? I inchhir dawn thu thlengin ka sawi lawk a, mahse nang chuan min ngaithla duh ta chuang lo a nih kha!" ka ti leh rualin 

"Aruatte" a rawn ti ve leh nghal zat a, ka pum ka dawmna kut chu a kut lian leh lum vung vung chuan a rawn hum a, hmâna min hmangaih em em ṭhintu ka pasal a nih ve lai ang chiahin a fawp vang vang a, mahse tunah chuan kan tawp tak tak a ngai tawh si.

"Kan inah min thlah tawh rawh le PC, kan inṭhen chuan nang pawh i hlim ngei ang. I hria em, kum 1 dawn chu nang siam ṭha tur che hian ka bei ve asin, tunah erawh siam ṭha tur che paw'n ka ding ngil thei tawh lo, ka ruh zawng zawng hi a tliak tawh a ni" ka mittui chu ka hru tâwk a, kawngka tal chu lock lo se chuan ka chhuak vang vang maw le.

"Inah chuan i haw duh maw?" a rawn tih chuan ka lo buk khum nghat a, inchhirin sawtna a nei tawh lo tih a hrethiam pawh a ni mahna, motor chu tinungin a inher a, kan in lamah a tlan zui nghal a, ruah pawh nasa takin sur tawh lo mah se a la tla ser ser tho. 

A tua mah chu kan ṭawng leh tawh lo va, kan hun kal tawh chu ngaihtuah chhuah loh theih pawh a ni lo. Ezekiel-a dam lai kha chuan hlim takin kan awm ho a, kan inhmangaih em em bawk a, inhauh ni kha ka nei mang ngai lo ṭhin. Kan fapa kan chan rualin kan nupa inkar a chhe nghal vek a, vawi leh khata siam ṭhat theih pawh a ni lo. 

Kan nupa inkar siam ṭha tur leh ngai awh leh turin ka theih tawp ka chhuah a, natna pawh ka paltlang nasa hle a, mahse chung zawng zawng chuan awmzia a nei lo tih nizan khan ka hre chhuak ve chiah a ni. Ka pasal chu ka hmangaih em em a, ka thinlung leh tih tak zetin ka hmangaih a, ani ang em ema mipa hmangaih leh thlakhlelh hi khawvelah ka neih leh theih pawh ka ring tawh lo hial zawk a ni. 

Kum 10 chhung pumkhat anga ka lo chenpui tawh a ni a, keimah ka inngaihtuahna ai mahin amah chu ka ngaihtuahna chu a nasa zawk a, keimah ka inhmangaihna aiin amah ka hmangaihna chu a sang zawk bawk. Chuti ang khawp chuan ka hmangaih a, inṭhen ka duh bik reng reng lo, mahse tunah chuan kan inṭhen vang vanga kan awm hran a ṭha ber a ni.

"Engati nge!? Engati nge i din loh!? Ding rawh PC, kan in kan tlan pel tawh a nia, khawiah nge min hruai i tum? Ding thuai rawh PC, ding rawh ka tih chu LALCHHANHIM!" kan in kawta a din miah loh avang chuan ka ti thuai thuai a, a tawp lam phei chu ka insum hman tawh lo.

"LALCHHANHIM! Ding rawh, min thlah peih lo a nih chuan i tel lo paw'n ka haw thei. Ding tawh rawh, ding thuai mai teh PC, i awm dan hian ka mang a tiang zual a nia, mi â ang maiin awm ṭhin lo teh" ka ti chhuak leh phawlh phawlh a, a la ding duh chuang lo cheu a nih chu!

"I mawl em ni!? Kan accident thei tih hre rawh, Aruatte" a dara ka sawi rualin a kut vei lam chuan min lo nam sawn thuai a, a khalh muang deuh sawt bawk a, min melh rum ṭha khawp mai, kei erawh chuan engah mah ka ngai lo thung. 

"Ding mai ta che, i motor khalh lai ka tih buai che i duh loh chuan ding vat mai rawh" ka ti vin tuar a, chuti ang em ema min zah lo chu ka thinin a tuar tawh bik lo, nge ani hian ka hmangaih êm avangin ka thu sawi pawh thutakah a la duh lo zawk?

"Hrep tak che hian! Nangmah ka ngaihtuah vang chea ka motor khalh lai min tibuai tawh lo turin ka hrilh che tih hrethiam rawh, mi â i ni lo" a rawn ti vin ve ta hrawk a, ka theih tawpa ringin ka ṭe chhuak vak a, kan awm dan chu ka ning hluah hluah a ni.

"Thih ka duh, he ka nun tawt leh ipik lutuk hi ka kham zozai tawh lutuk, Ezekiel-a bulah kal vang vang ka duh" ṭap zawih zawih chung chuan ka ti hawm hawm a, dam reng chu ka tan hrehawm tawrhna mai niin ka hria. 

"Dam ka thlahlel tawh ngang lo Lalpa, min pui lûl teh. Eng nge ka tih ang? Ka fapa bula lo kal tur khan eng nge ka tih ang? Min hrilh teh Lalpa, he khawvela awm hi zawng ka tan chuan a nuam tawh thlawt lo a ni" kun ngawih ngawihin ka ṭap a, min rawn kuahtu chu tu nge a nih ka hre chiang khawp mai. 

"Thih lam sawi tawh suh Aruatte, sawi tawh miah suh, i pasal hian i thih ka phal reng reng lo. Ka tihpalh a ni; ka tihpalh lutuk tak zet" hlauhthawng aw tih hriat ngawih ngawih hian ka pasal chuan a rawn ti mawlh mawlh a, min kuahna aṭang chuan tal chhuah pawh ka tum chuang lo.

"Ka pasal i ni tawh lo PC, nang chu ka pasal hlui i ni tawh zawk a ni. Khawngaih takin min thlah zalen tawh rawh, i lak aṭanga zalen hi ka phu i ti ve em em tawh lo em ni?" nghet zeta kuah let chungin ka ti ṭuau a, a tawp nân tak tak a taksa chu kuah leh ka duh a ni ber. 

"Min ngaidam lûl teh, engkim hi ka kutah dah tawp rawh, ka siam ṭha vek ang. Keini pahnih hi engtikah mah kan inṭhen ngai lo vang, inṭhen hrang thei kan ni lo" a tih chuan ka kuah nghet sauh a, chu erawh a bula let leh ka tum vang a ni hauh lo. 

"Chhuak ang le, kan in kawt kan thleng tawh a nia" a tih chuan har chhuak zawkin ka inla hrang nghal thuai a, ka mona in kawt ngeiah chuan kan lo awm tak tak a, chu chuan ka rilruah thinrimna hlir a rawn tuh nghal bawk.

"Heti ang em em hian min ngaihnep ka ring lo asin PC, i bulah hian ka lo let tawh dawn reng reng lo. Eng ang paw'n ngaihdam min dilin inchhir mah la lo let ka tum tawh lo tih hria ang che, chuti ang khawpa luhlula min siamtu chu nangmah hi i ni tih hre reng bawk ang che" ka ti  salh salh a, ka thin chu a rim nghal ṭun mai. 

Motor kawngka chu hawngin a chhuak vut a, ka awmna lamah lo kal kualin kawngka chu a hawng a, min pawt chhuak nghal sawk sawk a, lo ṭang ve teh mah ila thaah chuan hneh lo nasa tak ka ni. Ruah chu a rawn sur tam zual a, ka theih tawp chhuahin ka lo tal a, ani erawh chuan in lamah min kai phei lui zel thung. 

Ka tih ngaihna hre lo chuan a kut chu ka seh tawp a, mahse awmzia a awm em em lo, na tiin min vawnna chu a thlah mai kha ka lo ring kha a ni a, a rawn hawi let duh lek chauh. A kut aṭang chuan thi a rawn luang chhuak a, ka seh na thawkhat bawk a, thisen a chhuah loh reng chu ka ring lo. Min thlah tura ti vak vakin ka tal chiam a, ani erawh chuan in chhung lam min panpui tum tak hian min pawt kal hmawk hmawk a, kan huh zawr dun tawh khawp mai. 

In chhunga min hruai luh rualin kawngkapui chu a kalh nghal hmak a, ka nu chuan ka pa an lo inbe malh malh a, keini pahnih min hmu chiah chu an lo meng phawk nasa hle. Ka pa chu hna kal tih hriat tak hian a la inthuam deuh thlap a, ka nu'n a call haw a ni ngei ang. Ka nu leh pa chu kan awmna lamah an rawn kal phei nghal a, ka huh ṭha bawk nen ka dinna chinah chuan tui a tling puau bawk.

"Aruatte, in hru hul thuai rawh, in va huh nasa em em ve, tun ang hun laia ruah do hi a ṭha lo asin" ka nu chuan a rawn ti zung zung a, towel la turin a kal sawn zui nghal a, ka pa erawh chuan mak a la tih hmel hle. 

"A ngai lo ka nu, ka let leh nghal dawn, in fapa hian ka duh lo chung min rawn hruai let leh a, ka tum loh deuhin ka lo lang hlawl a nih hi!" ka tih chuan ka nu chu a ding chawt a, a rawn hawi let rang khawp mai. 

"I let tawh dawn lo" ka hnung lam aṭanga rawn titu chu rum zet hian ka melh a, kawngka ngheng hian a lo ding dir zut zut a, a lamah chuan muangchang lo tak hian ka pen phei a, kawngka hawn ka tum rualin ka ban chu a lo man ding ta chat. 

"Ka ban hi thlah rawh le, ṭha taka ka sawi lai hian min kal tir mai rawh PC. Heti anga i awm luih tlat hian i nu leh pa i timualpho tih hria la, nang chuan ka tel lova nun i thlakhlelh zawk kha maw le" ka ti hmawk hmawk a, min rawn la kuah ngam a nih chu! 

"I zak miah lo em ni LALCHHANHIM?" ti vin tuarin ka nam sawn dâwr a, ka theih tawpa na in ka beng hawi sawk zui nghal a, ka chet dan chu ka ngaihtuah hman tawh lo, ka nu leh pate pawh ka zah zo tawh thlawt lo a ni.  

"Kan inṭhen dawn lo" a rawn ti sup a, nuih zat vang ni miah lovin ka lo nui chhuak hak hak a, zep lovah chuan ka ṭah a chhuak ru tet tet zawk, vawi eng zah nge ka ṭhen dawn loh thu kha ka sawi ve le!? Ani vawi hnih khat sawi lek hian ka lung a tiawi ang maw!? A teuh lo mai! 

"Min kal tir lo a nih chuan ka pa ka call dawn a nia, ka laka i chet dan zawng zawng hi ka pa'n a hriat vaih chuan a insum rei thei hauh lo vang" ka tih pawh chuan kawngka bulah a ding tlat a, eng ang paw'n ding mah se ka haw dawn tho tho, chu chu a ni tawp!

"Ka pa, i buai loh chuan min lo hruai mai ta che.  Ka lo haw tawh dawn e, ka pasal nen kan inṭhen fel tawh" phone a lak rualin ka pa hnenah chuan ka ti nghal thawr a, ka ṭah a chhuak bawk nen ka aw chu a dik hlei thei meuh lo.

"I ṭha em? I ṭap em ni Aruatte? Ani khan kut a thlak che em? Han sawi teh ka fanu, kut a thlak che em?" a rawn ti nghal mawlh mawlh a, kei chuan engmah a thlen loh thu ka lo hrilh ve leh mai a, rei pawh inbe lovin kan ti tawp a, min lam tur chuan a rawn tlan chak hle ka ring.

"Ka nu ka pa, tun hun bak hi sawina hun ka neih tawh hmel si lo va, he ina ka rawn mo thei hi ka lawm tak zet a ni. In bula awm a nuam em em a, ka ngaina em em che u a, in fanu ang maiin min duat tih pawh ka hria, mahse hma hun hi hriat a lo har êm a ni" pa Zuala leh nu Chawii te lam hawi chuan ka ti a, nu Chawii zawk chu a ṭah a chhuah hmel hle. 

"Mo zawng zawngah nang tluka fel leh pasalte hmangaih hi an awm kher lo vang, kan mo i ni thei hi vannei kan inti hle zawk a ni. In in lamah chuan va haw zawk tak rawh, kan fapa lak tlak loh zet hi chuan a phu lo ngawih ngawih che a ni" pa Zuala chuan a ti dam dap a, ka lo bu nghat nghat bawk. 

"Aruatte, haw lo la chu ka la duh fân a, mahse i lo tawrh tawhna zawng zawng ka ngaihtuah hian LALCHHANHIMA hi ṭhen mah la ka dem lo che, naute erawh a pian hunah te chuan min lo hrilh ve tho rawh aw, a pi leh pu kan nih tal chu i phal ang ti raw?" nu Zualin a rawn tih chuan

"Tehreng mai ka nu, in fapa thisen a tel ve miau avangin in tupa a nihna a bo thei chuang lo a ni. Ka pum chhunga naute hian pa erawh a nei lo kumkhua tawh dawn a, neih châk eng ang mah se a pa zawkin a duh tawh lo tlat a ni" ka lo ti ve nghal a, pa Zuala chu a rawn meng rum ta khawp mai.

"LALCHHANHIM le! Aruatte nau pai mek hi i fa a nih i la ring lo tlat vela maw, mi â pa, nang ang mihring suak sual lutuk hi engtin nge ka fapa i nih theih zawk!?" pa Zuala chuan a ti ram hmarh a, ka pasal dinna lama kal a tum chu ka nu chuan a lo dang vat bawk.

"Aruattei pum chhunga naute hi ka fa a ni tih chiang takin ka hria, ka thlahthlam mai mai lo bawk ang" inrin tawk hmel zet hian ka pasal chuan a rawn ti khauh ve fak a, ṭawng pawh ka ṭawng peih tawh lo, awmzia a awm dawn chuang lo tih ka hre chiang em em a ni. 

Nu Chawii chuan ka kuta vuan chungin an fapa ai awhin ngaihdam min dil ṭha leh mawlh mawlh a, ṭhen lo turin min duh tih ka hria, mahse kei chuan inṭhen chu a ṭha berin ka hre tawh zawk a ni. Pa Zuala pawh min ui tih hriat tak hian a ṭawng hniam sup sup a, ka pasal ber erawh kawngka bulah a la ding reng thung. Nizan te khan ka thu sawi awih se, min hmangaih thute sawi se chuan ṭhen ka tum bik miah lo vang maw le. 

Ka ngaihtuah let chang phei chuan ka inkhawngaih zawk, khati ang khawp khan ka hmangaih a, ka tuar a, ka tawrhna zawng zawng chuan rah ṭha a chhuah chuang der si lo. Minute rei lotê hnuah ka pa chu a rawn thleng hlawl a, enga mah hmain ka pasal hlui ni ta PC-a chu khawih nghal mai a tum a, kei chuan ka lo dang vat a, dang lo ila chuan a insum zo lo ngei ang. Pa Zuala leh nu Chawii chuan ṭha taka titi pui hmasa phawt an lo tum leh hram a, ka pa erawh thinrim tawh tak a ni. 

In chhung aṭang chuan min kai chhuak dawr dawr a, PC- pawh chuan ka pa chu a dang tawh bik lo. Ka pa chuan PC-a motor aṭang ka bungruate chu a la chhuak sawk sawk a, a che reng reng chu hmuh hrehawm khawpin a thinrim tih a hriat a, mahse ka pa chu ka dem miah lo. A fanu hi min hmangaih êm a, ka nat leh a phal tawh lo tih ka hre chiang em em a ni. Kan in lama kan tlan chhung zawngin kan inbe lo tluan ṭhak a, kan in kawt kan thlen rualin PC-a chu a rawn lang leh ta hlawl mai, min lo zui tih reng ka hre lo. 

"Ka pu, khawngaihin min hrethiam hram teh. Aruattei nen hian inṭhen ka duh lo, kan la inṭhen lo. Ni lo, Aruattei hi nau pai lai a ni a, heti lama rawn awm hahdam a duh mai chauh a ni. Kan la inṭhen reng reng lo, kan inṭhen thei lo hrim hrim" motor aṭanga kan chhuah rualin PC-a chuan ka pa kut vuan chung hian a ti mawlh mawlh a, hmân ang kha chu ni se ka khawngaih ngawt ang.

"Enga!? Ka fanu hian nau a pai a!?" ka pa chuan a ti deuh ṭhawt a, min rawn en chhuk run chuan nui tawi takin ka lo bu zeuh a, zawi zawiin a thinrim hmel chu a reh tial tial a, ruah pawh tam em em lovin a la sur reng a, a tua te mah chuan ruah do kan pawisa lo a nih hmel.

"Aw ka pu, tunah hian Aruattei hian ka fa a pai mek a ni. Aruatte, inṭhen ka duh lo. Nizana ka ṭawng dan avang khan min ngaidam la, khawngaihin inṭhen lam ngaihtuah tawh lo teh" tiin PC-a chuan min rawn biak zawm daih a, ka lo ngawi kar thung.

"I nupui laka i awm dan hi a em em lutuk tawh a, ka fanu hian a thei tawh thlawt bik lo a nih ber hi! Ṭhen che a duh miah lo asin, haw tura ka tih paw'n siam ṭhat che a duh avangin a rawn haw duh ngai lo va, rawn haw a duh tawh hi chuan i hnenah hian a lo let leh ka ring tawh lo" ka pa chuan dam zet hian a ti a, kan in lamah min kal phei pui zui nghal zat bawk.

"Khawngaih takin ka pu, i fanu hi ka hnenah lo let tir leh hram rawh" PC-a chuan a rawn ti leh hram a, ka pa kut ni lovin ka kut zawk chu a chelh bet ran a, ka bulah ka pa a awm tlat tawh avangin min vawnna chu thin thlak pawh ka tum hran lo. 

"Keiin tih theih ka nei lo, nangmah hian in nupa boruak engkim i tichhe vek niin a lang" tiin  ka pa chuan min kalpui hmawk hmawk a, kan in Veranda kan thlen chuan ka hawi let a, ruah dovin PC-a chu a lo ṭhingṭhi a, zep lovah chuan ka thinlung chhung a na ve reng tho. 

"Ka pa, lo va lut rawh, a tawp nân tak tak a ni tawh ang" tih leh PC-a lama kal phei chu ka rual nghal a, ka pa pawh a lut ve mai chuan ka hria, a bula ka din rualin PC-a chu a rawn tho thuai a, ka ṭah chu chhuak ru tak a ni. 

"A pawi a ni ti raw PC, thil dang zawng zawng aia pawi ber chu maw min lo hmangaih ve tak tak miah lo hi a ni. Min hmangaih la chuan ka tawrhna te kha i hre ve ang a, kan nupa inkar pawh a ṭha lo rei miah lo vang" ka tih chuan ka kut a rawn vuan a, mangan hmel fê hian min en chhuk run bawk.

"Min hmangaih tih ka hria, kei pawh hian ka hmangaih che tih i hra, mahse vawiin aṭangin nang ka hmangaihna che hi a reh tial tial tawh ka ring. Nang pawh i hnuaia thawknu nen khan inngaizawng reng ula, hlim ula, zan rei tak tak thleng awm dun leh ula, hlim turin duhsakna ka hlan a che u" ka ti leh sep a, hmeichhe dang ka la thikzia chu a hriat vek ka ring. 

"Aruatte" tih chauh hi a rawn sawi a, a lama pen hnaiin ka kuah vawng vawng a, PC-a chu ka va'n ngai dawn tak êm, kha leh chen kha ka pasal a lo ni ve tawh a, dik tak chuan amah ka hmangaihna chu a reh theih pawh ka ring tawh lo. 

"Aruatte, ka hmangaih che. Ka hmangaih lutuk che, khawngaihin kal suh, khawngaih takin inṭhen lo vang" ka kuahna aṭanga ka inlak hran hnu chuan a rawn ti mawlh a, kei erawh ka hnung tawlh tial tial a, a lam erawh ka la hawi pah reng thung.

"Kei paw'n ka hmangaih che alawm PC, min hmangaih lêtin ka hmangaih che asin, mahse i hnenah ka rawn kir dawn lo, ka rawn kir thei tawh lo, a chhan chu nangma'n min tichhe vek tawh a ni" ka awm hlat telh telh avangin ka ṭawng ring tial tial a, ani pawh a dinna ngaiah a ding reng a, a hmel te chu a hlauhthawn hmel zualin ka hria.

"Aruatte!" ring zet hian a rawn ti vak a, kawl phe zawkin khawpui chu a rawn ri zui nghal a, ruah chu a rawn sur tam sawt a, PC-a chu a ṭap tih ka hre thei, kei pawh ka bang bik chuang lo, ka mittui chu baw nasa tak a ni. 

"Khawngaihin!" veranda ka thlen hnu chuan a rawn ti leh vak a, a kut chu a hum ruh em em bawk a, amah en reng chung chuan ka ṭap chhuak ta feih feih a, let leh turin ka inngai tawh lo va, ka rilru chapona chuan ka thinlungah hmun an chang hnem tawh lutuk a ni.

"Ka thinlung hi a na lutuk, a puak keh mai dawnin ka hria ka pa" in chhunga ka luh rualin ka ti ṭuau a, ka pa chuan a âwmah min kuah bet nghal a, ka ṭap chhuak zui ta hawm hawm.

End of Chapter 14