EZEKIEL By Havali Adam (CHAPTER 13)

EZEKIEL 

By

Havali Adam

Chapter 13

"Enga! Ka awih lo, dawt i sawi" meng phawk lutuk chuan ka ti deuh nghal phawlh phawlh a, ani erawh a rawn nui mai a, ka rai ka ring hauh lo, dik tak chuan natna eng emaw ka neih ka ring zawk a ni. 

"Doctor paw'n min hrilh vek tawh alawm, nupa emaw min ti nghe nghe asin, kan nih loh thu pawh ka sawi bik chuang lo. Ka lawmpui a che, i pasal nen hian in inkar a ṭha leh ngei dawnin ka hria" nui sun suna a rawn tih chuan ka kâ la lo hup thuai a, nau ka pai la ring ngam chiah lo mah ila ka hlim hman em em tho. 

"Dawt i sawi lo tak tak em Chhuanmawi? Kei hi ka rai tak tak em? Min han hrilh nawn leh teh, ni lo, nang chuan min hrilh tawh suh. Khawngaihin doctor min va koh sak ta che, Doctor kâ aṭang ngei hriat ka duh a ni" ka tih chuan a ṭhutna aṭanga tho chhuakin a kal ve mai a, ka mittui te chu a rawn hnam ṭiam ṭiam a, rai tak tak ila ka ti ngawih ngawih.

"I lo ringhlel deuh a ni maw? I rai ngei alawm, tunah khan i pum chhungah naute thla 1 leh a chanve vel upa a awm mek a ni" room chhunga an lo luh hnu rei lovah Doctor chuan a rawn ti a, insum thei tawh lovin ka ṭap chhuak feih a, ka hmaa ding te chu zahna pawh ka nei tawh lo. 

"Aruatte!" Chhuanmawia awah chuan hlauhthawnna a lang a, kei chu ka khupa ka chal nghatin ka ṭap khur dat dat a, min rawn kuah lai te chuan ka awm ngaiin ka awm reng a, ka pum chhunga naute awm mek chuan ka lung a tichhe ngawih ngawih a ni. 

"Naute pai chu i duh lo viau em ni Aruatte?" min kuah chunga a rawn tih leh pawh chuan chhang thei zia zâng ka ni lo, lu ka lo thin khum nawk nawk a, ṭawng chhuah pawh tum ila tunah tak chuan ka theih ka ring lo. 

"Damdawi in aṭang hian chhuak phawt ang aw, zanin chu a mak dangdai hle mai" ti supin min kai tho va, damdawi in kawt kan thlen lai te chuan ka biangah mittui a la chambâng nuai a, ka hlim lutuk avang leh ka lungchhiat lutuk avangin ka ṭap a ni ber. 

"In in lamah ka thlah haw nghal dawn che nge hawi khawthawn law law i duh?" motor chhunga kan ṭhut luh hnu chuan hriat nuam tak hian a rawn ti leh a, kei pawh ka rai tih ka hriat tirh ang em emin ka ṭah a chhuak tawh lo. 

"Haw tlang nghal mai ka duh, ka rai thu hi ka pasalin a hriat hunah chuan a hlim ve ngei ang. Zanin aṭang hian kan inngaihzawn derna hi tih tawp ka duh Chhuanmawi, ṭanghma hai min ti mah la pawi ka ti lo, ka pasal rilru tina thei zawnga awm hi ka duh tawh lo a ni" ka tih chuan

"Aw le, kan haw tlang nghal dawn nia" tih leh tlan chhuah a rual nghal a, kan in lam pana kan tlan chhung zawng chuan ka pasal hrilh dan tur mawlh chu ka ngaihtuah a, ka hlim lutuk chu ka khi ver ver reng a, Chhuanmawia paw'n min nuih tawp ringawt. 

Kan in kawt kan thlen chuan muangchang lo tak hian ka chhuk sawk sawk a, a mawiah Chhuanmawia chu leng turin ka sawm a, mahse a lo duh lo hlauh a, a pawi ka ti lo khawp. A tlan liam hnu chuan rilru hlim zetin kan in chhungah ka lut a, ka nu leh pa chu sitting room-ah an lo titi dun melh melh a, ka rai thu chu hrilh ka tum deuh ûk a, ka hrilh duh mai rih bik lo. 

Ka pasalin hre hmasa ber se ka ti a, kei ang bawkin a hlim ve dawn tih ka hre chiang a ni. Ka nu chuan ka awm dan leh ka ṭawng duh lutuk te chu mak tih hmel zet hian min en a, za lo takin min nuih tawi tak tak bawk a, ka awm dan vel chuan a ṭhawng a ni ber. Dar 8 leh a chanve a ri tawh a, ka pasal erawh a rawn la haw lo va, a hna lamah a buai a nih ka ring. 

Ni lo, ani te chuan ngaihzawng deuh reuh a nei tak alawm, hun an hmang dun pawh a ni maithei, mahse ka pum chhungah naute a awm thu a hriat hunah erawh a danglam ve dawn chiang a ni. Ngaihzawng neih a bansan ang a, a  nupui leh a fa lo piang tur hi duat takin min enkawl ngei bawk ang. Chuti ang mi chu ka pasal a ni a, chu chu amah ka hmangaih loh theih lohna a ni bawk. A lo haw hun ka nghakhlel lutuk chu ka za cheng a, awm dan tur pawh ka hre mumal lo a ni. 

Dar 9 pelh hretah ka pasal chu a rawn haw a, chaw ei ka siam dawn chuan a ei tawh thu a sawi a, kei pawh chuan room-ah ka zui lut ve leh mai bawk. A chauh hmel ang reng hle a, a thawmhnaw a hlih lai te chuan hmâna a nupui ang chiahin ka lo pui zung zung a, ani paw'n mak a ti khawp mai. 

Thla khat leh a chanve vel chhung kha chu ka pui tawh ngai lo va, ka be hmasa tawh ngai bawk lo va, mak ti viau pawh ni se a awm tho mai. Ka pum chhungah naute a awm thu chu sawi châkna in ka khat a, mahse a hun ka la ti lo tlat bawk si. A inbual laiin a thawmhnaw hak tur ka lo lak chhuah sak thlap a, Pathian hnenah ka rilruin ka ṭawngṭai mawlh mawlh a, chu zan chu kan nupa inkarah hlimnain hmun a rawn luah zan ni leh tawh se ka duh a ni. 

Bathroom aṭanga a rawn chhuah lai te chuan hmangaih takin ka lo en tlawk tlawk a, kan fapa thihna a tuar nasa bawk nen a dul te chu a lo kiar ve ṭan tawh a, kiar tih lêmah a hma aiin a thau zual a ni deuh mah zawk, mahse ka mitah chuan a taksa mawina chu chhe tê them mahin a bo phah lo a ni. Tin, inchengvawng lo tih hriat takin a biangah chuan hmul a awm nual tawh bawk a, ka pasal chu ka ngaihsak tawk lo tih ka hre chhuak chiang hle bawk. 

"PC, thil hrilh tur che ka nei a, i hriat hunah chuan mak i ti ve ngawt ang" T-shir a hak lai chuan ka lo ti a, a inhak fel hma chu insum hram hram ka tum kha a ni a, mahse ka thei tawh thlawt lo a ni. 

"Khumah hian titi lawk ila?" a inhak fel zawh rualin ka lo ti leh a, khum chu ka beng thek thek a, ani pawh ngawi a rawn lawn ve mai bawk a, a kut chu la kangin ka pum chungah ka nghat a, ka chet dan chuan a ṭhawng leh khawp.

"PC, kei hi ka rai a ni" nui sen sena ka tih chuan phawk lutuk hian min rawn en vat a, a kut chu ka pum a khawihna aṭang zawimuangin a pawt thla riai riai a, ka rai leh theih a rin loh lutuk avanga hmel buai em em pawh a nih ka ring. 

"A mak ti raw? Kei pawh hian ka rai thu ka hriat tirh khan mak ka ti lutuk a, Doctor te kha ka zawt nawn leh nghe nghe asin, ka hlim lutuk kha ka ṭap tawp bawk" a biang dawm chunga ka tih chuan ka kut chu a rawn phih thla sawk a, a chet dan chu ka beisei loh zawng tak a ni.

"LALRUATTLUANG!" ti hrawkin thinrim hmel lutuk hian min en run a, min en reng chungin khum aṭang chuan a chhuk thuai a, kei erawh ka lo meng buai hle thung a, a thinrim chhan chu pakhat mah ka hre lo.

"PC! Eng vanga heti anga awm thut hi nge i nih?" ka tih chuan min ngaihnep hmel fahran hian a rawn chek ri tlak tlak a, khum aṭang chuan ka chhuk ve ta nge nge a, ka rai thu chuan hlimna a rawn siam ka rin tehreng nen kan hlim leh chuang hauh si lo. 

"A tawpa tawpah chuan i uire ta nge nge maw? A ṭha e, uire mawlh rawh, kha i ngaihzawngpa hnenah khan i duh chuan zanin la la hian i kal nghal thei ang" a tih chuan a rilru ka hrethiam ta chiah a, mahse a ngaih dan angin eng thil mah a thleng lo thung.

"Ni lo PC, ngaihzawng ka nei tak tak reng reng lo, min la hmangaih leh hmangaih loh hriat tumin ngaihzawng ka nei der mai chauh a ni. I ngaihtuahnaa awm kha thil nih dan a ni lo, kei hi ka uire lo hrim hrim bawk" ka tih chuan

"Ṭawng tawh suh LALRUATTLUANG, dawt muhlum kha sawi kual vel lo mai teh! Ngaihzawng nei angte khan min ngai vel a, ka haw hnu pawha lo la haw ngai lo khawpin nangmah zawkin ngaihzawng i nei a, tunah chuan i uire ta ngei bawk e" a rawn ti vin leh hrawk a, a hmel aṭang chuan kut min thlak châk hmel ngawih ngawih a ni.

"Ka uire bawk lo LALCHHANHIM, ka pum chhunga naute awm hi tu dang ni lovin i fa ngei a ni. Kan pahniha kan fa a ni a, thil hre chiang hmasa lovin min puh chhe nghal ngawt suh" ka ti ve hmarh hmarh a, tûma'n dawta inpuh reng chu an duh bik ka ring lo.

"Dawt sawi tawh suh LALRUATTLUANG, zanin la la hian chhuak nghal ang che. I uirena pa hnenah chuan va kal la, i chhungte pawh engkim hrilh vek ang bawk ang che" a rawn tih chuan kal hnaihin ka beng hawi ta sawk a, a rawn la nui a nih chu!

"Thu dik chuan a khei fak che a nih hmel, in aṭang hian chhuak rang rawh. Ka nu leh pate chu mipa dang laka i uire thu hi ka lo hrilh mai ang, ni lo, kan thawm hriain an lo lut ṭep tawh zawk ngei ang" a tih chuan a vawi hnihna atan ka beng leh sawk a, ka ṭah chhuah mai loh nân ka hmui ka pet fan fan bawk.

"PC, khawngaihin heti ang hian awm lo teh, i ngaih ang khan eng thil mah a thleng lo. Ṭha takin sawi zawk ang, ka thinrim insum zo lovin ka beng che erawh pawi ka ti" ka ti ta thlâwt a, ka aw chhuak reng reng chu a dik hlei thei tawh lo.

"I dawt sawi ngaithla turin min beisei hauh suh LALRUATTLUANG, i ngaihzawngpa nen in chhuak dun ṭhin tih thlengin ka hre fai vek, i bula mut pawh hi ka châk hrep lo" thinrim taka a tih laiin ka nu leh pa chu an rawn lut ta ngei a, thawm kan dim lo dun ve êm bawk a ni. 

"Engati tuar tuar nge? Kan room aṭang paw'n in inhau thawm kan hre pha alawm le, buaina in neih chuan ṭha takin sawi dun tum zawk rawh u" ka nu chuan a rawn ti nghal a, ka awm nuam lo lutuk chu ka sa pup pupin ka hria. 

"LALRUATTLUANGI hi a uire, tunah hian mi dang fa a pai mek, a ngaihzawngpa fa a pai mek a ni" nuihsawh hmel zeta min en chung hian ka pasal chuan a ti a, ka nu leh pa chu an meng buai nasa khawp mai. 

"Ni lo ka nu ka pa, kei hi ka uire reng reng lo, PC-a hian chiang takin a hre sual a ni. Tunah hian kan pahniha kan fa thla khat leh a chanve vela upa ka pai mek a, a ngaih dan hi thlak sak hram teh u" tiin ka nu leh pate chu ka ngen ta tawp a, ka pa zawk chuan ka pasal dinna lam hawi chung hian

"A uire tih chu i hre chiang em ni? Aruattei hi uire duh tur khawpa hmeichhe nasa a ni lo, i hriat sual ngei ka ring PC" a rawn ti a, ka pasal erawh nuih zat vang ni miah lovin a nui chhuak hawk a, keini pathum chuan a awm dan chu kan lo en ṭhap ringawt. 

"In fapa ai paw'n in mo chu in ring ta zawk a ni maw? A ṭha e, in duh chen chen LALRUATTLUANGI hi ring rawh u. Naktuka  chhuak turin lo insiam ang che, i hmel hmuh reng pawh hi ka châk hlawl lo" min tih khum salhin ka pasal chu room aṭang chuan a chhuak a, ding ngawi reng lovin ka um zui nghal ta vat. 

"PC, kal suh, khawngaihin heti ang hian awm reng lo teh, inngaihtuah chiang rawh. Ka uire lohzia hi i hre duh a nih chuan Chhuanmawia pawh i zawt thei ang, i fa ngei ka pai a ni" a bana vuanin ka ti lawm lawm a, in kawtah kan ding reng tawh a, veranda aṭang ka nu leh pa chuan min lo thlir reng bawk.

"PC, luhlul chhuah tlat lo teh. Ka rai thu hi ka hrilh châk em em che a, zanin khan Chhuanmawia nen kan inngaihzawn derna pawh kan ti tawp nghal a, a chhan chu i fa ka pai miau vang a ni" ka tih leh chuan 

"Zanin chu ka lo haw kher lo vang, ka lo haw hunah erawh chhuak turin lo inpeih fel thlap tawh la, in in lamah keimah ngeiin ka thlah ang che" a rawn ti chang rut a, ka mittui te chu ka dang seng leh ta hauh lo mai.

"Khawngaihin heti ang hian awm tawh lo hram teh PC, i inchhir dawn a nia, ka hmangaih ang chiah che hian min hmangaih tih ka hre thei. Ka haw a nih chuan i hnenah ka rawn let leh tawh dawn lo. I la inchhir ngei ang a, inchhir turin ka duh lo che a ni" ka mittui chu a baw zawih a, thawk la hawkin min en run a, ka kut chu dah thlain a car lam a pan a, a tlan chhuak ta vang vang.  

Ṭap khur ngawt ngawtin ka ding a, ka nu chuan in chhung lamah min kuah lut a, hrehawm ka va'n ti tak êm. Kan hlim ka lo beisei ve tawh kha a ni a, tunah chuan ka bei a dawng ve ta tak tak e. Ka pasal duh ang ngei chuan ka chhuak ang a, kan in ka thleng tawh a nih chuan eng ang paw'n ngaihdam min dilin a bula let leh turin min ngen mah se ka let tawh lo vang. 

Kan fa lo piang tur chu a duh lo angah ka ngai hmiah a, khati khawp khan ka hrilhfiah a, tunah chuan tih theih ka nei tawh lo a ni. Kan fa lo piang tur chu ka fa chauh a ni tawh a, ka enkawl zo em em bawk ang. Ka ṭah chhuak lutuk a reh hnuah ka nu leh pa chuan zawhna chi hrang hrang min zawt a, thil nih dan dik takin ka chhang zel a, zep engmah neih ka tum hauh lo. 

Ka pasal hnen aṭang hmangaihna ka dawn leh theih nâna ka thil tih an hriat chuan min dem miah lo va, chuti ang khawpa ṭan ka la chu min khawngaih zawk a ni. Ni e, kei hi hmeichhe khawngaih thlak tak zawng ka ni chiang e. 

Pasal te hmangaih theih tawh loh ka ni a, uirea puh ka ni bawk a, ka pum chhunga naute chu a pa'n a duh lo leh zel a, thih daiha Ezekiel-a bula kal ka châk ngawih ngawih a ni. Ka thinlung chu nat avangin a rum vawng vawng a, tidam tur chuan tih theih ka nei tlem ropui bawk si.

"Aruatte, khawngaihin ka ngenna avang tal pawh hian haw lo hram rawh, kan fapa hi a la inchhir dawn lutuk, nang paw'n a inchhir hmel chu i hmu reng thei dawn em ni? Tunah phei chuan nau i keng tel tawh leh nghal a, chhuah chu tum lo mai ta che" ka thawmhnaw ka khung mawlh mawlh laiin ka nu chuan a rawn ti a, mahse chhuah chu ka tum hle thung. 

"Ni lo ve ka nu, nangni ai chuan ka pasal hi ka mamawh zawk a, ka thahlel zawk a, nangni ang hian min ngaihtuahin min hmangaih se chuan chhuah ka tum miah lo vang, mahse ani chuan min hmangaih tawh lo a ni" tiin thawmhnaw chu ka khung zawm a, hrehawm tih hmel zet hian ka nu chu a lo thaw ri leh hawk ṭhin.

Ka pa chu kan room chhungah a vei tawn sek a, ka pasal chu vawi tam biak pawh tumin a bei tawh a, mahse chhanna a la dawng thei lo tluang zel a ni. Ka nu ngei paw'n biak pawh chu a tum nasa hle a, kei erawh a mawi paw'n biak ka tum tawh reng reng lo. Ka bengah chhuak tura min tihna chu a ri nawn tluk tluk a, ka lo dawhthei mah mah zawk a ni. Saidingi sawi kha a dik chiah, hmâna hmanah khan lo chhuahsan ila chuan tun ang em em hian natna ka tuar tawp lo vang. 

Kan nu leh pate nen chuan muhil lovin kan tlaivar ta ṭhak a, keimah vanga an tlaivar ve ta ringawt chu nuam lo ka ti khawp mai. Zingkar aṭang khua chu a chhe em em a, zing ṭawngṭai inkhawm erawh ka kal lui ta tho. Pathian hnenah chuan ka hma lam hun a kutah ka hlan tawp a, ka awm dan tur zawng zawngah rem min ruat sak turin ka ngen bawk. Chhuak turin ka thawmhnawte chu ka khung fel vek tawh a, dar 9 a rawn rik chuan thil hriat chhuah ka nei nghal zawk. 

Rain Coat chu ha sawk sawkin Scooty ka tinung a, ka nute pawh ka kalna tur hrilh lo chuan chak zetin ka tlan chhuak nghal a, ka fapa Ezekiel-a piancham leh min kalsan ni chu ka lo theihnghilh hman ṭep alawm le. Thlanmual ka thlen chuan ruah chu a rawn sur nasa zual em em a, Raincoat ha lo phei ila chuan ka dam lo tawh ngei ang.

"Ezekiel, vawiin hi i piancham a nia, kum 9 i tling chiah aw, vanram chu a nuam i ti em? I nu hian maw ka ngai thei lutuk che a, i tel lo chuan i pa nen pawh kan inkar a ṭha thei tawh lo. Vawiin hian kan inṭhen tak tak tawh dawn asin, i nu hi min dem suh aw" ka fapa thlan chul pah chuan ka ti mawlh mawlh a, ka mittui leh ruah tui te chu ka biangah an luang zawih zawih bawk.

"Ka ngai lutuk che ka fapa, ka ngai tak zet che a ni. I pa chuan maw vawiin hi i piancham leh min kalsan ni tih pawh a hre ve tawh miah lo vang, i pa chuan i nau tur ka pai mek hi a fa a nih a ring lo bawk asin" ṭap chungin thlan lung chu ka kuah ngawih ngawih a, rilru na tak ka ni. 

"Khawngaihin ka fapa hi mi nung nih tir leh rawh Lalpa, khawngaih takin ka fapa hi khawvelah hian lo hruai kir leh rawh. Ka fapa Ezekiel, i nu hi min khawngaih ve tho ang ti raw?" lei ṭham tawn tawn chuan ka ti leh a, ka awmna china ruah mal a far tawh loh thut avang chuan ka ṭap tawp chiang hle.

"Ezekiel, nangmah i ni em? Nangmah i ni ti raw? I lo let leh tak tak dawn em ni?" ti phawlh phawlin ka ṭhingṭhitna aṭang chuan ka tho thuai a, nihliapa min rawn zawntu lam ka hawi chiah chu ka nui tawp rang kher mai.

"Nang maw!?" ka ti deuh hluai ringawt a, a nihliap ken lai chuan min la zawn char char a, ruah a sur ṭhahnem ang reng bawk nen a lo huh zawr hnuang tawh a, mahse nihliap chu khum a tum chuang lo, a chet dan chuan min tihamhaih lek lek zawk a ni. 

"Ruah sur nasa tak do tur khawpa mawl i ni lo, i taksa ngaihtuah hle tur zawk i ni. I pum chhungah khan naute a awm i ti a ni lo'm ni? Nangmah chiah i ni tawh lo tih hre ta che, puitling i ni tawh" a tih chuan ka lo ngawi reng a, chhan let dan tur pawh ka hre mai lo. 

"Min ngaihtuahna ka mamawh lo ve, vawiin hi ka fapa piancham a ni a, kum 9 a tlin ni chiah a ni a, nang ve thung chuan i theihnghilh a ni. I lo sawi dik chiah e, nang hi pa lak tlak loh tak i ni" ka ngawih ren rawn hnu chuan ka ti let ve ta salh a, a thinrim viau ka rin laiin ani erawh a thinrim hmel loh khawp. 

"Inah haw ang" a rawn tih leh chuan ka hnung chhawn a, ka fapa thlan chu fawp vawng vawngin ka hmangaih thu ka sawi chhuak sep a, ka hnunga ding chuan min lo la nghak reng a, minute tam pawh awm khawmuang tawh lovin ka Scooty hunna lam chu ka pan ve ta mai bawk. 

In lam pana kan tlan chhung zawngin ka hnungah a tlan char char a, min leh pelh pawh a tum chuang lo a nih hmel. Kawng a nal ṭhain ruah a sur nasa ang reng bawk si a, ka khalh chak ngam lo hrim hrim. Muangchangin ka tlan a, ka fimkhur bawk a, in chu kan thleng har hle. Kan in kawta ka tlan luh rualin Scooty chu ka hung ṭha nghal a, ka ṭhen hmabak ka pasal pawh chuan a car chu a hung ṭha ve nghal mai a, in chhunga kan inzui lut ka nu'n a hmuh chuan mak a lo tih hmel hle leh nghal. 

Raincoat pawh hlip chuang lovin kan nupa room-ah ka lut a, ka bag te chu ka khai chhuak a, ka thawmhnaw chu a vai vaiin ka khung duh ta lo. Ka pasal chuan ka thil khai lai chu a rawn khai hmak a, zan lamah amah ngeiin min thlah phei a tum thu kha a sawi tawh ngei a, a la hre ve reng te pawh a ni ang. 

Ka nu chuan ṭap chungin min chelh a, mahse a chelhna avang mai maia awm thei ka ni tawh lo tlat a ni. Ruah sur hân hnuah tal haw turin min ti a, dik tak chuan chu chu ka tum dan deuh a ni a, mahse ka pasal berin ka bungruate chu Car chhungah a khung fel vek tawh miau si a, chu chuan ka chapona a kai tho lo thei lo a ni. 

A tawp nân ka nu chu ka kuah vawng vawng a, ka ngai reuh ngawt ang. Nu ṭha tak a ni a, rilru zau tak a nih bakah mo te ngaihtuah em em a ni a, vawiin aṭang chuan kan inhmu tawh awm si lo. Ka pa erawh a hna lamah a kal ngei ngei a ngai a, phone kaltlangin ka haw thu chu hrilh ka tum ta mai. Scooty pawh chu hawn ka tum reng reng lo, a chhan chu ka lei a ni lo tlat a ni. 

Ka pasalin min leisak ni lo se chu hawn pawh pawi ka ti lo, tunah chuan ka pasal hnen aṭang engmah dawn ka duh tawh lo a ni. Car chhung lut tura ka kal chhung ringawt paw'n ka huh nual hman a, ruah chu sur hnem tak a ni. Kan in thlen thuai thuaia mut vat chu ka châk a, khua chhe lo se chu ka inthlah tir miah lo vang. 

Ngawi rengin kan chuang dun a, dik tak chuan ka lung a chhe lawk a ni. Engtik niah emaw thu dik tak a la hre chhuak ve ngei ang a, chumi hunah chuan inchhir lutuk avangin ngaihdam min dil ngei bawk ang a, mahse kei chuan ka lo pawm thei tawh dawn si lo. Mittui tling pamin kan hma lam chu ka melh tlawk tlawk a, min rawn en zeuh zeuh tih pawh ka hria, ka ṭah a chhuak tih thlengin a hriatthiam ka ring. 

Kan in kawt kan thlen chuan ka mittui chu ka hru tâwk a, hmangaih loh vanga ṭhen chu ni ila ka lung a chhe em em miah lo vang, mahse kei chuan ka chunga a chet dan zawng zawng hre vek chungin ka la hmangaih em em tho si a ni. Ruah chu tlêmin a hân ta deuh a, chhuah hun vel tak a ni. 

"PC, vawiin bak hi chu kan inbiain kan inhmu tawh awm si lova ti raw? Hlim takin nung ang che aw, ka nu leh pate kha ka ngai dawn lutuk tih i lo hrilh bawk dawn nia" a lam hawiin ka ti leh hram a, chhuak tura kawngka hawn ka tum chu a sak ta tlat mai.

"Kawngka hi i lock em ni? Hawng tawh rawh le, ka chhuk dawn e" ka tih pawh chuan a che sawn miah lo va, tuna taka kawngka a lock tlat chhan chu ka hre bik lo.

"PC" ka ṭawng chhuah rualin Steering hnuaia chahbi chu a herh zeuh a, chak zet hian a tlan chhuak zui nghal a, ka lo inring lo bawk nen nghenchhan chu ka tauh ri dawt a, meng phawk nasa tak ka ni. 

"LALCHHANHIM!" vin taka ka tih tuar pawh chuan beng ngawng ang maiin a ngawi ngul a, kan tlan chhuah tirh letin a tlan chak tawh a, kan accident mai ang tih chu ka hlau ber, chu bakah eng vanga min tlan chhuahpui daih nge a nih hrim hrim?

"LALCHHANHIM! I mawl em ni? Khalh muang rawh, ka hlau a nia, ka pum chhunga naute awm mek hi chan ka duh miah lo bawk" ka ti leh tuar chuan harh chhuak thut ni awm fahran hian a tlan muang zui nghal a, a tlan muang deuh thut bawk nen ka insawh nat loh nân ka lo innem vat nghe nghe. 

"I haw lo vang" a thu rawn sawi avang chuan a lam chu ka va han hawi phei rang tak êm. 

End of Chapter 13