EZEKIEL By Havali Adam (CHAPTER 12)

EZEKIEL

By

Havali Adam

Chapter 12

"I fiah tawh em? A hmangaih che tih chu i fiah tawh em ka u? Ni lo, a hmangaih tawh miah lo che. Ani chuan in fapa in chan aṭang khan a hmangaih tawh lo che, heti ang mipa hun kal tawh avanga mahni nupuite thlahlel miah lo bulah hian cheng tawh suh" dam zet hian Saidingi chuan a rawn ti a, vin hrâkin sawi se chu ka chhang let ngei ang. 

"Ka thu sawi hi ring rawh ka u, Isaac-a meuh paw'n vawi hnih lai ka bulah a sawi ri tawh asin, nge nang hian i pasal hi i hmangaih hlum lo chauh zawk?" a tih leh pawh chuan sawi tur ka hre lo, ka thluak chhung chu a ni nuai nuaiin ka hria.

"Ka thu sawi i awih thei ngâng lo a nih chuan fiah tal la, a la hmangaih reng che em tih tal chu fiah hram rawh ka u, a hmangaih tawh loh che tih i hriat hnuah chuan ṭhen pawh i zuam ve tawh mahna" ka nau thu sawi zawng zawng avang chuan ka ṭah a chhuak lo va, a sawi ang chuan fiah ka tum ta deuh zawk a ni.

"I duh ang chuan lo fiah dawn ta pawh ni ila engtin nge fiah se min tih? Fiah dan tur pakhat mah ka hre lo, i thu sawi zawng zawng hi thu dik lo a nih leh si phei chuan min haw khawp ang Saiding, Isaac-a nen chuan in hmu sual lo tak tak maw?" ka ti leh hram a, rin ka duh rualin ka rilruah chuan rinhlelhna a la awm lo thei lo. 

"Kan hmu sual lo tak tak alawm, min ring rawh. Kei chuan ngaihzawng a neih ngei ka ring, chu a ngaihzawng chu a hnuaia thawk chu a ni ngei bawk ang. Fiah dan tur kha chu ka hre bik chiah lo, u Mary-i rawn chhin la, ani chuan tih dan ṭha zawk a lo hre mial maithei asin"

"Eng pawh ni se tunah chuan fiah leh fiah lo lamah rilru ka pe thei rih lo, rilru fim loh laia thu tlukna siam hi a ṭha lo hrim hrim bawk. Ngun taka ka ngaihtuah hnuah chauh thu tlukna ka siam ang a, zaninah ngaihzawng a neih leh neih loh chu ka zawt leh bawk ang"

"Heti anga in ṭhat loh reng chuan i na rei mai mai, kan in lamah haw phei mai rawh. Ka nu leh pate pawh an khua a har a, i awm chuan an lawm viau ka ring. Ka ti tak tak, u PC-a lah hi a chiang nial lo ropui bawk si, khawngaih che lah hian i ṭan zawk emaw tih tur hian i awm thung a!" Saidingi chuan a ti leh hmawk hmawk a, a sawi chu a dikna chen a awm ve tho mai.

"Ka va haw ang e" tih leh thawh ka rual a, ani pawh min thlah turin a rawn tho chhuak ve nghal a, ka rilru chu a buai ru ve tak zet, ka pasal chuan ngaihzawng a lo nei tak tak a nih chuan ṭhen tumna ka neih ve tawh tak tak ka ring.

"Scooty kha i duh leh kawl rih rawh, tun lai chu ka khalh chhuak ngai lo tluk a ni. Petrol pawh a la tam phian ang, i dun chen chen i kawl dawn nia" pawn kan thlen chuan a rawn ti a, mahse ka lo hnial thung, ka pawisa inkhawl aṭang Scooty chu ka lei thei ṭep tawh zawk a ni. 

Scooty lei ka duh avangin ka taksa tana ṭha tur thil chah lam pawh ka ṭhulh hnem a, exercise erawh ka la ziah tho, duh chuan a lo insum theih khawp mai. Chu bakah Scooty khalh ka zir laite khan awlsam takin ka thiam zung zung a, ka neih a rem pawh a ni maithei a ni. 

Saidingi ngei paw'n a thiam har thu min hrilh a, chuti ang taka Scooty khalh ka thiam chak chu mak a ti ve hle bawk. Ka pasal erawh engmah ka hrilh duh lo va, min zawt ngai lo va, a awm âwmin a awm tawp a ni ber. Min ngaihtuah tih hi chu ka hre ru ve reng tho, mahse a hma kha a la pha thei hlawl lo. 

In ka thlen chuan engmah pawh ka ti nghal lo va, ka pasal ka biak dan tur leh zawhna ka zawh dan tur chu ka ngaihtuah ngawt ngawt a, ka nau sawi mah ni se ka pasal ngeiin ngaihzawng a neih thu a sawi te a nih loh chuan ka la awih thei mai lo a ni. 

Thil dang zawng aiin min lo la hmangaih ve reng reng em  tih fiah leh fiah lovah chuan ka buai ta ber zawk a, vawi tam tak ka ngaihtuah hnuah pawh ka rilru chu fiah ngei tumna chuan a buk rit hle bawk. Ei rawng bawl lai thlengin ka ngaihtuah a, ngaihzawng a nei emaw nei lo emaw min hmangaih leh hmangaih loh chu fiah ka tum ta bur bawk.

Ka nau min rawn angin Mary-i chu ka be pawp a, ani hi chu ka ṭhian ṭha a nih mai bakah ka unaunu ang ve deuha ka en a ni a, Higher kan kal lai aṭang tawh harsatna kan tawh hi chuan kan intlansan ngai lo. A pum a nat te hian School aṭang ka haw pui mai zel a, ani pawh kei ang tho, ka dam loh te hian School aṭang min haw pui mai zel ṭhin. 

Higher kan kal lai kha chuan Teacher te khan mi pakhat zelin kan haw pui kha an phal ṭhin a, ṭhenkhatte kha chuan Class lak peih loh avangin dawt te an sawi a, an haw daih zel, mahse chung chu an hre chhuak thuai a, class 12 kan zir kum khan haw pui an phal tawh lo zui bawk. 

Ka nau nen kan inbiak dan leh kan thil tih tum chu a pawimawh lâi lai ka hrilh a, Mary-i thu sawi chuan min va han ṭhawng chiang ber kher em. Lal Mer-i chuan Chhuanmawia biak nghal a tum a, Chhuanmawia nen chuan inngaizawng anga awm turin min ti a nih chu! 

Ka duh lo lutuk leh Chhuanmawia hmai ka zah lutuk avangin be lo turin ka hrilh thuai thuai a, ani ve lah chu a lo la nui mai mai zui. Chhuanmawia leh zel kan nupa inkara inrawlh tur leh kan buaina hre tur chuan ka duh lo va, ka zah mai bakah thil tih chi ah pawh ka ngai lo. Mary-i chuan a biak dawn tho tho thu sawiin min dah khum hmak a, rilru nuam lo duh tak a ni. 

Zanriah ei lovin ka pasal chu a rawn haw leh ta ngei a, chhun lamah Saidingi nen thil chi hrang hrang kan lo sawi dun chiam bawk nen a rim te chu hmeichhe rim nam tlatin ka hria a, ka ngaihbel paw'n ka hre chuang lo. A inbual zawh chuan choka lamah kan chhuak phei a, chaw ei ka siam zui nghal mawlh mawlh a, chhiahhlawh ang maiin a thil ei lai chu ka vil a, ngaihzawng a neih leh neih loh thu chu ka la zawt duh rih lo bawk. 

Chaw a ei kham chuan ka seng fel zui nghal a, mak tak maiin min lo nghak ve teh mial a, ka thleng sil chhung zawngin ka bulah ngawi reng hian a ding a, kei chu ka lo lawm leh em em tawh. Kan nupa room-a kan luh hnu chuan khumah ka ṭhu ren rawn a, engtia han zawh ṭan dan tur ber nge pawh ka hre lo. A hma kha chuan sawi a duh tawh lo thu min hrilh ngei a, mahse Saidingite nupain an hmu miau bawk si a, ka zawh ngei chu a ngai a ni. 

Dar 9 a rik pawh chuan engmah zawt lovin ka la ngawi char char a, chhun lama ka rilru a paukhauh tehreng nen a hun taka ka zawt hreh leh em em si chu a chhan ka hre bik lo. Bathroom aṭanga rawn chhuah rualin kan room kawngka chu a kalh zui nghal a, kei chuan a che vel chu ka lo en kar ringawt. 

"Mu ang" ti supin min kuai mu a, kan nupa inkar a chhiat em em hnua a vawi khat min kawih mutna a ni kher bawk nen mak ti zet hian ka en hâw a, khuma min kawih mut hnu chuan ka biang chu a kut pahnihin a dawm leh nghal zat a, a chet dan chu hrethiam lo tak ka ni. 

"Ka mamawh che" thuk raiha a tih chuan a hma ai zawngin ka hamhaih a, meng zau kâwka ka en laiin ani chuan dam zet hian min rawn fawp a, chhan let nachang pawh ka hre lo, kan fapa kan chan hnuah a duh thu ngeia min fawh leh tawh ngai loh avangin ka tan chuan thil thar ang vek a ni. 

"Aruatte" ka thinlung leh taksa chhung zawng zawng fan chhuak vek thei khawpa ril hian a rawn ti thum dam leh dap a, meng kuau chungin min fawh nawn lehna pawh chu ka lo la chhang let ta chuang lo va, mahse rei erawh a ni tawh lo, a hmui chuan ka hmui chu che châk zek zekin a siam chiang khawp mai. 

Ka hmui ti chea ka fawh let rualin ramsa koham lutuk ang mai hian a rawn che ta buan buan a, min fawh dan chu duham sawt tak a ni. Ka chungah rawn bawkin min fawp tawn tawn a, ka hlim lutuk avangin ka mittui chu ka bekah a luang a, ka pasal chuan hmangaihna min chenpui ngei dawn tih ka chiang em em bawk. 

Ni e, kei pawh hian ka mamawh tak zet a ni. Nupa kan ni a, mipa leh hmeichhia kan ni a, dik tak chuan ka pasal chu sawi lan chi ni lo mah se tisa lamah pawh ka mamawh ve tho, a engkim chu ka thlahlelin ka mamawh em em vek zawk a ni. Min fawp reng chung chuan a kawr leh kekawr chu a phelh mawlh mawlh a, kei pawh ka bang bik lo, phur ru takin ka thawmhnawte chu ka lo phelh ve sawk sawk a, chuti ang em ema nupa nun hman dawna kan phur dun chu ka la hre lo. 

Min mamawh lutuk tih hriat ngawih ngawih hian ka pasal chu a che mawlh mawlh a, min tawhna engkim chu ka tan chuan a nuam vek a, sawisel bo a ni hial zawk ang. Nawhchi zuar ang maiin ka pasal chu ka lo dawngsawng a, zah reng ka hre tawh bik lo, zah hunah pawh ka ngai lo hrim hrim.

Am taka nupa nun kan hman zawh hnu chuan thlan tui nen kan inkuah chial a, vawi khat mai ni lo kan hmang bawk a, zep lovah chuan ka mut a chhuak nghal ngawih ngawih. Ruak vekin kan inkuah a, rizai pawh kan sin peih lo. A ngawi reng a, kei pawh ka ngawi reng a, tunah rih chuan muthilh vang vang ka duh a ni. Ka mut dan siam remin ka pasal âwmah chuan ka bei a, ani paw'n duat zet hian min lo kuah a, ka hnung ruak kâng chu a zut heuh heuh a, chungte chuan ka mut a tichhuak zual sauh bawk. 

Zan lama kan chet dun vang te pawh a ni mahna zingah chuan thawh ka hai chiang hle a,  zing ṭawngṭai inkhawm tur paw'n ka tho chhuak eih lo. Ka harh chuan dar 7 leh a chanve a lo ri daih tawh zawk a, tuk dang anga ka tho hma lo chu ka nu paw'n mak a ti ve ngawt ang ka ring. 

Ka pasal, ka hmangaih em em leh ka engkim muhil hmel chu lungchim zet hian ka thlir dauh dauh a, ka ngaihtuahna chu a kal thui leh ta hle. Ezekiel-a dam lai kha chuan nupa nun kan hman apiangin min hmangaih thu a sawi ṭhin a, kei phei chuan vawi tam tak ka sawi ṭhin, mahse nizan kha chuan a kâ aṭang chuti ang thu reng reng a sawi lo a nih kha!

"Scooty lei ka tum a, ka inkhawl daih tawh chu a ni mai" ka tih chuan chal tichuar nang hian min melh chhuk run a, kan harh ve ve tawh tho bawk nen kan ngawi rei lutuk chu ka awm thiam lo va, a ṭawng hmasa zawkah ka ṭang leh ta nge nge. 

"Sawi ta che, ka leisak thei reng che alawm" a ṭawngkam chhuak chu a pangngai hle a, kei ang bawkin nizana kan awm dun dan chuan mood ṭha tak a siam ve tho a nih ka ring, kei chu ka lo nui var var ringawt.

"A ho lutuk, thinrim suh aw, i pawisa min pek ṭhin aṭang ka lei dawn tho va, min lei angah inngai tawp rawh" ka tih chuan min en tawh lovin Ceiling chu a melh ngur a, engtin pawh awm se ka pasal hi chu a hmelṭha thlawt a ni.

"Hna neiin thawh chhuah te chu nei ve ila chuan i pawisa hi ka hman a ngai lo vang, i lakah inthlahrun viau ka tum a, mahse ka pasal i nih miau avangin ka inthlahrung lo ve hmiah" ka tih leh chuan min rawn en a, a ruk tak chuan ka inthlahrung deuh tho.

"Engtikah nge lei i tum? Tu nen nge?" a tih chuan ka lei hun tur ka hriat loh thu ka lo sawi a, kalpui tur ka neih em em loh thu leh Saidingi kalpui ka tum deuh thu pawh ka sawi zawm leh nghal bawk.

"Leina hmun tur ka hria" a rawn tih leh chuan nui sen senin ka kuah vawng vawng a, a ṭawng dan aṭang chuan min kalpui dawn tih ka hre chiang em em a, ka pasal nen Scooty lei dun tur anga ka suangtuah zawng ringawt paw'n hlim lutuk avangin ka au chhuak lo chauh a ni.

"Awi le!" ti thutin khum aṭang chuan rang tak hian ka chhuk a, saruaka awm pawh chu zahna ka nei tawh lo, thil dang zawng aiin ei rawng ka la bawl lo chuan ka rilru a luah a, mo tan chuan ei rawng bawl theihnghilh ṭhak khawpa mut chu a mawi lo ve êm a tin ni!

"Lo tho ve nghal mai rawh, a hma tawh chuang lo" ka chhuah dawn ṭepah ka pasal lam hawi chuan ka ti leh hram a, ani erawh hamhaih hmel zetin a meng buai nak a, ka thawh thut chhan chu a ngaihtuah a ni ngei ang. 

Tukṭhuan ei lai te chuan ka mood a fuh em em a, ka pasal erawh a awm ngai rengin a awm tawp a, ka nu leh pa biakna pawh a chhang duh tawh lo bik lo. Ṭawng erawh a ṭawng chhumbung thei hle thung a, hawihhawmna lantir dan pawh a hre tawh khawp mai. A hma kha chuan nu leh pa zahna tlachham ang mai khan a awm ṭhin a, a luhlul em em bawk a, mahse tunah a ze ṭha lo tam tak chu a paih tawh a ni. 

A hna kal dawn chuan kan in kawt thleng ka thlah leh thlap a, hmangaih takin ka fawp bawk a, ani paw'n min chhang let ve ta zeuh zeuh e! Kan nupa room-a ka luh leh chuan khum chu nui var varin ka siam a, ei rawng bawl loh ka hlauh lutukna lamah ka siam hman lo kha a ni a, mahse engkim chu a nuam vel vek a ni mai. 

Lawm lova nui chu mi mawl an ti ṭhin a, mahse a ni ringawt lo. Khum ka siam lai chuan tûma'n min lawm lo va, ka thil ngaihtuah avangin ka hlim a, ka nui a, ka mawl tihna erawh a ni lo chiang khawp. Ka ngaihtuah thui telh telh a, ka pasalin min la hmangaih ve reng em tih fiah ka tumna chu ṭhulh leh mai te ka duh rum rum a, vawi khat tal min hmangaih thu sawi se chuan ka thil tih tum chu ka ṭhulh nghal vek ngei ang.

Mary-i hnen aṭang phone call ka dawng a, Chhuanmawian min biak a duh thu min hrilh chuan engkim a hrilh vek tawh tih ka hrethiam mai. Thaw huaiin kan thil tih tum chu ṭhulh leh mai ka duh thu ka sawi a, ani chuan ṭhulh lova titlang turin min rawn fuih char char thung. An ngaih dan chu ka hriatthiampui lutuk, ka hma khua an ngaih vang leh rilru natna ka tawrh an hlauh vang tih pawh ka hria, mahse kan nupa inkar khik zualna tur a ni ang tih mawlh kei chuan ka hlau a ni. 

Ka pasal rilru dik tak hriat turmin Chhuanmawia nen lo inngaizawng ta tehreng pawh ni ila Chhuanmawia lakah pawh inthlahrun a na dawn lutuk, chu lovah Chhuanmawia pawh chuan a lo duh tak tak dawn reng reng em ni? Mary-i nen kan inbiak zawh chuan chhuak turin ka insiam zui nghal a, Chhuanmawia nen kan inhmu dawn a, eng pawh sawi dawn ila rilru fim tak pu chunga ka sawi a ngai a ni. 

Bazar lama ka kal laiin Chhuanmawia hnen aṭang phone call ka dawng a, min lo nghahna hmun chu min hrilh a, Mary-i kaltlangin ka phone number chu a nei a nih ka ring. Thingpui dawr changkang ve tak pakhat chhungah hian min lo nghak a, a inthuam dan chu a zahawm khup a, chu thingpui dawr chhungah chuan ka hmel hriat emaw min lo hretu dang an lo awm ang tih ka hlau ru em em leh nghal. 

"I ṭhiannu leh i nau hnen aṭang in nupa chanchin ka lo hre vek tawh a, inthlahrun phah reng reng suh Aruatte" a rawn tih chuan mak ka ti ang reng khawp mai, Saidingi a lo tel ve zel chu ka mak tihna chhan pawh a ni. 

"Ka pui hreh lo che a nia, i ṭhian ka nih anga ka pui tlem lutuk che hi nuam lo ka ti daih zawk a ni. I pasal harsatna chu ka hrethiam lutuk bawk e, in fapa chu a hmangaih hle a nih ka ring" amah bawk chuan a rawn ti leh a, ngawih reng chu a dikin ka hre ta bik lo.

"Dik tak chuan maw Chhuanmawi, tlang takin ka sawi ang. I lakah hian a inthlahrun awm ka ti, ka pasal rilru hriat tumin kan inngaizawng der vel dawn chu a ni si a, kan thil tih tum avang hian buaina i tawk ang tih ka hlau a ni" ka ti ve ta nge nge a, chu chu ka rilru dik tak a ni bawk

"I nau leh i ṭhiannu kâ aṭang i pasal i hmangaihzia leh ṭhen i tum lohzia ka lo hria a, thla tam tak chhung i tawrh tawh thute pawh ka hre vek a, kei chuan puih hrehna che ka nei miah lo" chiang taka min en chung hian a ti a, ka lo bu zeuh ringawt.

"Eng lo, tun tut tutah la ti rih lo ila? Ka sawi awmzia chu Scooty lei dun kan tum a, kan thil tih tum hi a hriat palh hlauh chuan kan buai nghal a ni mai" ka tih chuan a lo bu nghat a, sawi dun vak tur a awm tawh lo bawk nen kan chhuak ta ringawt a, kan in thleng min thlah a tum chuan ka hnial ta lem lo. 

Zirtawpni a ni a, ka pasal nen chuan ka Scooty tur lei tumin kan insiam dun malh malh a, ani chu a insiam zo vek tawh zawk. Ka insiam chu ngawi reng hian min lo nghak a, min en reng a, mahni pasalte bulah ka lai dawn alawm le. A awm ve tho mai, chuti ang teh thlawt chuan min en lohna a rei tawh lutuk a, ka buai deuh a ni ber. 

Dar 10 velah in aṭang kan chhuak a, hna kal ṭhulh ṭhak khawpin Scooty min leipui dawn chu a ni si a, nuam ka ti khawp mai. Saidingi leh Mary-i hnen aṭang lah ka pasal leh a thawhpuinu chanchin ka hre deuh chhen a, an inhmuh fuh thei bik lutuk chu a mak a ni. Show room kan thlen chuan thlan ber tur pawh ka hre lo, a mawiin a ṭhat hmel em em vek a, ka pasal chu a duh dûh ka thlan tir ta ringawt. 

Cheng 90000 man dawn chu ka pasal chuan a thlang nawlh a, ka va han buai nghal tak êm. Cheng 80000 man emaw chu aia tlawm vel lei ka tum kha a ni a, ka pasal thlan ber kher chu ka pawisa inkhawlin a daih lo a ni. Min rawn miah lo hian engkim chu a la tifel ta zung zung leh nghal, ni lo, ani hian min leisak a tum chiang mai, ka va han hre chhuak har tak!

"PC" tia ka kohna te chu hre lo ang maiin a awm a, pawisa pekna lamah chuan a kal phei daih a, keiin ka zui phei vat bawk a, a banah chuan ka sik thul, mi hmuh laia han ṭawng chiam lah a mawi bawk si lo, ani lah chu a luhlul ropui bawk si, rilru a va tikhingbai tak em.

"A ṭul dang chu ni dangah kan ti dawn nia" tih leh kal sawn a rual zui nghal a, a hnungah chuan ka zui dat dat a, min phurh phei hisapin kal lam aṭang tawh Car a khalh chhuak lo va, a awm dan vel chu lawm tur nge lawm loh tur pawh ka hrethiam teh nuai rih lo a ni. 

"Min leisak turin ka ti miah lo che, engati nge mi pawh rawn hmasa miah lova min leisak ringawt?" kan in kawta kan din rualin ka ti nghal tawn tawn a, hmangaih em em mah ila a chet dan chuan ka lung a tiawi hlawl lo.

"Han khalh chhin teh, zir i duh chuan ka hman" tiin Scooty aṭang chuan a chhuk a, ka tluk hlau tak hian Scooty chu a lo chelh ding a, ka lungawi lo laklawh ve tawh bawk nen a ban chu ka phih thla deuh sawk a, a hmuh lai ngeia ka'n khalh nghal par par chiah chu a meng buai nasa khawp mai.

"Scooty i khalh ngai si lo va, i khalh thiam tih hi min hrilh miah lo" meng nur nang hian a rawn ti deuh hmuk a, vawiin chu nuam kan tih dun em em ka lo ring ve vel a, a nuam leh chuang hauh lo, kan hlim rei thei tawh lo tak tak a ni ang. 

"Hrilh theih i ni ngai hleinem, zanah ni se tlai tak takah i rawn haw ziah a, zingah ni se i biak ṭawng theih ngai bawk si lo. Chutah chhun a lo ni a, office i kal leh daih a, i hnathawhna hmunah lah" ka ṭawng tawp thut a, a ngaihzawng chanchin ka va han sawi kai teuh em.

"I buaizia ka hria, tih buai belh che ka duh lo" aw nem zawk chuan ka ti leh a, Scooty chu hung ṭha sawk sawkin in chhung lamah ka luh san daih a, a lo lu leh luh loh pawh ka ngaihsak duh rih lo, ka mood chu a ṭha lo em em ringawt.

Chumi tlai chuan inthiam lo ni ve awm tak hian a hmel chu a pha deuh dui a, mahse inthiam lohna thu engmah a sawi chhuak leh ta chuang lo. Zana kan mut dun paw'n ka hnaih hmasa duh tawh lo va, a awm dan chu ka ning ve deuh tawh te pawh a ni mahna. Zinga ka harh erawh chuan ka hnung lam aṭang min lo kuah run a, a harh leh dawn thova ka hriat avangin dim takin a ban pawh chu ka dawn sawn lo, ka chet rualin a rawn harh ta reng bawk a, ka pasal chu a muhil nghet ngai hlawl lo a ni ber. 

Thla khat leh tih a liam hnu chuan ka laka ka pasal rilru dik tak hriat ka duh avangin kei leh Chhuanmawia chu kan inngaizawng der ta a, ka inthlak danglam nasa khawp mai. Ka nu chuan min zawt ngai lo mah se zana len chhuah ka ching ṭan chu mak a ti tih ka hai lo, dik tak chuan kei paw'n nuam ka ti em em bik lo, mahse chuti anga ka awm ngei chu a ngai bawk si a ni. 

Chhuanmawia nen chuan inngaizawng angin kan han awm ve tak nâ a, inhmu khat tak kan ni. Kar tawpah vawi khat kan inhmu ṭhin a, chutah pawh chuan lem chang ka nih miau avangin kan titi rei thei lo, Mary-i te inah kan leng daih zel. Nitin zan tin awm dun ta na nâ na chu ka pasal chuan ka awm dan engkim a hmu a, ka danglam sawt hle tih pawh a hria, ngaihzawng ka neih a ring ngei bawk ang. 

Leh lam kawng zawng tak chuan ka ti fuh phian ka ti, a mitmemgah min ngaihtuahna leh thikna ang reng deuh te chu ka hmu zeuh zeuh ṭan a, min hmangaih avanga ka ngaihzawng chu ṭhen tura min tih thuai ka ring, chu thu a sawi hun chu nghakhlel tawh tak ka ni. 

A dera Chhuanmawia nen kan inngaihzawnna pawh thla hnih a ni leh tawh a, kan rilruah inngaihzawnna tak tak a awm lo bawk nen thil dang kan sawi daih zel. Vawi khat phei chu hmeichhe ngaihven thar a neih thu a sawi chhuak hlawl a, a thlalak pawh min hmuh nghe nghe. 

Zan khat chu Chhuanmawia chuan len chhuahpuiah min lo sawm a, ka lo remti ve mai. Motor-a kan chuan lai chuan ka dik lo deuh thut a, motor ka rui ti dawn ila niin ka hre bawk si lo. Ka pangngai leh meuh chuan damdawi inah ka lo mu daih a, thil thlen dan vet vut chu ka hrethiam bik lo kher mai. 

"I ṭha em?" min ngaihtuah hmel tak hian Chhuanmawia chuan a rawn ti a, ka lo bu nghat a, mu tawh lovin ka ṭhu chhuak a, natna ka nei ang tih chu ka hlau ru khawp.

"I lo rai reng a" a thu rawn sawi leh chiah chuan a denin min deng ni maiin ka hria, engkim chu reh duak ang hialin ka hre bawk.

End of Chapter 12