EZEKIEL By Havali Adam (CHAPTER 10)

EZEKIEL 

By

Havali Adam

Chapter 10

Ka hmel a hmuh rualin ka nu chuan min lo ko nghal thuai a, ka haw leh avangin lawm thu min hrilh mawlh mawlh bawk a, kei chuan sawi vak tur pawh ka hre lo. Ka pasal ka ṭhen dawn loh thu leh ka pate in lama ka len lawk thu chu ka hrilh ṭha ve mai a, chu thu a hriat hnu chuan a hah a dam hmel ta khawp. 

Ka pa chu dar 10 rik dawn velah a rawn haw ve chauh a, a rawn haw hnu chuan meng rei tawh lovin kan nupa room ve ve ah kan kan lut zui nghal bawk. Ka pa chuan a rawn haw hmaa kan awm dan engmah a hre ve lo va, mahse mut hmunah ka nu'n a hrilh tho ka ring. 

Min hnung chhawn zawng hian ka pasal chu khumah a ṭhu ngawi reng a, room chhung kan luh aṭang tawh a ṭawng leh tawh lo hrim hrim a, a mut a chhuah vak pawh ka ring chiah lo. A bul hnai set sawtah ka ṭhu a, ani chuan Ezekiel-a thlalak bawk chu a melh leh ngur a, a ngaihtuahnaa awm pawh ka hre thei hialin ka hria. 

Ka rin dan chuan kan fapa chu ama thah emaw a ti leh ngei ang a, a nih loh paw'n a chhan hman loh avangin pa ni tlak lovah a inngai leh tawh ngei ang. A kuta Ezekiel-a thlalak chu ka laksak a, dawhkan chungah chuan ka hung ta daih a, ani erawh ngawi ngulin chhuat a melh reng thung. 

"Mu tawh ang aw PC? Tun lai phei chu kan mu ṭha lo dun si, mut tam kan mamawh a ni. Mu hma ila, zingah tho hma leh bawk ila, kan taksa tan pawh a ṭha zawk ang" tiin ka pasal chu khumah ka kuai mu a, ka khawih ang ang chuan a awm tawp a ni ber. 

"Zanin khan ka pa'n kan ina haw mai turin min sawm a, haw erawh ka duh ta lo mai. Ka pa bulah ka va ṭap chiam pek a, mahse ka rilru natna leh ipikna zawng zawng kha a bo vekin ka hria" a biang khawih neuh neuh pah chuan ka ti sep sep a, ani paw'n min lo en chiang khawp.

"I pa chuan haw turin a duh tawh che a, haw zawk mai rawh Aruatte. Keimah vanga i rilru na hmel hmuh reng hi nuam ka ti bik lo, kei chuan ka hmangaih leh hmangaih loh che pawh ka hre tawh lo chu a nih hî" ngen ngawl deuh hian a rawn ti a, a hmui chu ka lo hup ta vat. 

"Min hmangaih alawm PC, i thinlung zawng zawngin min la hmangaih tih ka hre thei. Ezekiel-a thihna khan nangmahah nghawng nasa tak a nei a, nangmah vanga thi emaw i ti tlat a, kan fapa thihna bak kha i rilruah a la awm thei lo mai zawk a ni" 

"Keimah vanga thi a ni miau alawm, fimkhur tura min chah lai te khan ka fimkhur tawk lo va, tui hnaih taka an awm te kha ka phal lo tur zawk a ni a, mahse kei chuan engmah ka ti lo" lungngai zeta a rawn tih leh chuan nghet taka kuah chung hian

"A tawk PC, sawi tawh suh, kan fapa hi i thah a ni lo. Ka sawi tawh khâ, engkim kha vanduaina vang zawk a ni. Chhan thei ni la chu i chhan ngei ang, theih ngat se chu i fapa thih ai khan i nunna hlanin i thi duh zawk ngei bawk ang" ka lo ti vat a, a ban chu min kuah turin ka kawngah ka dah a, min kuah erawh a tum rih lo a nih hmel. 

"Ka fapa thi lai kha ka mit ngei hian ka hmu a, ka kut ngei hian ka chelh a, a pa hian chhan tur ka nih laiin ka chhan thei hauh si lo" a rawn ti hniam leh ruih a, a ṭawng zawh rual chuan nghet takin a âwmah min kuah bet run a, a rilru chu a na thar hle a nih ka ring.

"Min thlah tawh miah suh, min kuah reng rawh. Heti anga i kuahna hi ka thlahlel lutuk, ka ngai lutuk che PC, ka ngai tak zet che a ni" ka ṭap chhuak zui nghal hak a, ani pawh chuan min kuah nghet sauh a, chungte chuan ka rilru a tino zual a ni. 

"I hria em, June thla lai hawl aṭang kha chuan heti ang hian min kuah tawh ngai lo asin, mahse ka dem phal lo che PC. Kan fapa i ngaihzia leh i hmangaihzia ka hre vek a, kan fapa thihna khan a tina lutuk che tih thlengin ka hre vek a ni" insut ri feih feih chuan ka ti a, ṭah chu insum ka tum reng reng lo. 

"Ka ngai lutuk che PC, khawngaih takin i nupui hi khawharin min siam tawh suh. Min siam tawh lûl suh, a hrehawm êm mai" ka ti leh lawm lawm a, ka pasal kawr âwm chu a huh dup tawh a, ka mittui erawh a kiam thei rih lo a ni ber.

Ka mut chu a rawn chhuak tial tial a, ka ṭah nasat lutuk avanga mut chhuak ka nih ngei ka ring. Ka pasal taksa lum nuam tak chuan min ur cher cher a, a âwmah min la kuah bet reng a, ṭawng chhuak miah lo mah se min kuahna ringawt pawh chuan min tihahdam sawng sawng thei a ni. A muhil nge muhil lo pawh ka hre chuang lo, hre tur paw'n a lam ka hawi chho pei tawh lo, chuti ang khawp chuan ka mut a chhuak tawh a ni. Ka mit chhing reng chung chuan ka ṭhen zeuh a, ka awmna hmun chu vanram tiin sawi ta pawh ni se dawt a nih ka ring lo vang. 

Vawi leh khatah ka harh deuh thut a, ka thil hmuh hmasa ber chu ka pasal âwm a ni. Ka ngaihtuahna a fim tak tak hma chuan mak ka ti hman em em a, mah se zan lam boruak ka hriat chhuah nghal zut zut avangin ka buai rei lo. Ka pasal tihharh hlau tak chuan ka che ṭual ṭual a, min kuahna a ban chu dim thei ang berin ka dah sawn a, a hmel ka en chian chuan a ro deuh phulhin ka hria. Chu bakah kan fapa thih aṭang a muhil hmel chu ka vawi khat hmuhna a ni a, a muttui hmel kher leh nghal. A hmui lum nem taka ka fawh zeuh chuan tho phang tih hriat zet hian a rawn meng sen nghal ram a, tihharh ka tum em em pawh a ni lo.

"Zing ṭawngṭai inkhawm ka kal dawn asin, i lo kal ve duh em?" thawmhnaw lum inbel mawlh mawlh pah chuan ka ti a, ani ve thung chuan ṭhu awn duai hian ka che vel chu min thlir reng a, chiang takin hma ka sawn tih chu ka hre thei a ni. 

"Lo kal ve la, a nuam i ti phian maithei a ni. An fel hlawm bawk si a, ka nu pawh ka rualin a kal fô alawm, chham tur i hriat loh paw'n a pawi lo" ka tih leh chuan a lu a lo thing vut a, kei erawh ka nui ri hak thung, ka nupa inkar chu chuti teh lûa in la ṭha lo mah se ka pasal awm dan chuan min tihlimn thlawt a ni. 

"Lo tho chhuak ve nghal hrim hrim la, biak ina ka kal hma thingpui ka lo siam ang che" ka tih chuan in chung lam hawiin a thaw ri deuh hawk a, kei lah chuan eng nge a ngaihtuahnaah awm ang tih ka hre bik der si lo. 

"I lo tho dawn em? I lo thawh dawn chuan thingpui ka siam hman tak tak che a nia, minute 15 lai hun ka la nei" kawngka bul ka thlen chuan lehhawiin ka ti leh hram a, ka beisei loh lutukin a rawn tho ve teh mial a nih chu! 

"I duh leh lo va inphih fai la, ka siam peih har lo vang" chokaa kan luh rual chuan ka ti nghal zung zung a, ka sawi ang tak tak chuan bathroom lamah ka pasal chu a kal a, mak ka ti lutuk chu che lovin ka ding ang phuau nghe nghe.

A inphih fai hnu chuan choka lamah a rawn kal leh a, tukin taka ka thu a awih ta viau chu ka hrethiam lo lek lek a ni. Thingpui chhuan lai chuan rilru hlim zetin ka ṭawng melh melh a, ka pasal erawh a ngawi leh reng tawh a, zawhna zawh emaw titi pui tum lam aiin ka duh dûh ka sawi a ni mah zawk. A la hma ang reng a, pawn chhuak lo mah ila in chhung boruak ringawt pawh chu a vawt sûrh a, thingpui sa tui tak in chu a châkawm tawh kher mai. 

Min en hi chuan ka lo nuih ver ver zel a, ani erawh a awm ngaiin a awm tawp thung a, ka pasal chu a pangngai ṭep tawhin ka hre bawk. Thingpui chu a so rualin ka suan nghal a, noah thli chhuakin bawnghnute chu ka pawlh nghal zat bawk a, ka che reng reng chu a dik vel thlap a ni. A thluma ka in laiin ani chuan a hangin a in thung a, zawh pawh ka zawt hmasa hran lo, a hanga in a duh zawk ṭhin avangin ka siamsak nghal tawp a ni. 

Ka ṭawng tawh lo bawk nen in chhung chu a reh nghal ruih a, sana ban inkhawng ri leh kan thingpui in ri chu thawm awm chhun a ni deuh mai. Thingpui kan in zawh chuan hun a la tam tho bawk nen no chu ka sil leh zung zung a, ei rawng bawl erawh ka haw huna tih atan ka dah thung. Ka nu chu ka nghak deuh ren rawn a, mahse a rawn lang mai lo, tukin chu a tho peih chiah lo te pawh a ni maithei a ni.

"Awi, i va'n inhmeh em em. Ka lo hmu miah lo va, i inhmeh lutuk, a bun tur dik takin i bun a ni" ka pasal bana ka sana pek ngei ka hmuh chuan ka ti chhuak nghal hluai a, ka leisak a nih vang pawh ni lovin a inhmeh ka ti tak tak, sana chuan a tilang officer zualin ka hria.

"Ka lawm e" ring vak lo hian a ti thum ṭial dup a, a hmelah chuan lawm hmel pawh a lang leh chuang lo, mahse kei ve thung chu lawm avangin ka khi ver ver a, ka pasal hnen aṭanga lawm thu sawina ri ka hre thei chu ka lawm hliah hliah a ni.

"Lawm thu sawi a ngai lo, i phu ve reng zawk alawm, i nupui hi ka tlaw chhit chhet lutuk a, i birthday taka ka pe thei lo che kha nuam lo ka ti hle zawk a ni" ka tih chuan a sana chu a thlek vung vung a, bun reng se ka ti ru kher mai. 

"Ka kal dawn aw, ka rin aiin hun a lo kal chak thut a, ka lo ṭawng tui deuh te pawh a ni ang" ti mawlh mawlhin ka tho tharh a, ka pasal biangah chuan ka fawp zeuh a, kan in aṭanga chhuakin biak in lam pan chuan ka kal ta vang vang.

Ka ṭawngṭainaah chuan Pathian hnenah lawm thu ka sawi bang lo va, ka lawm lutuk chu ka chham hnu pawh ka chham nawn deuh chhen nghe nghe a, Pathian chuan 'awma' a nihzia a rawn tilang chiang êm bawk a ni. Ezekiel-a thihna kha a remruat a nih ka ring thei mai lo va, mahse Pathian chu ka dem ngai chuang lo. Pathian dem zawng leh Pathian duh loh zawng ti duh tur khawpin rilru ṭha lo ka pu ang tih ka hlau a, sual chu ka inhneh tir mai ang tih ka hlau a, engkim chu kan nupa tana ṭha turin rem a ruat sa vek tawh ka ring zawk bawk a ni. 

Pathian chu engkim ti thei, engkim hria leh mihringte tana thil ṭha lo ti duh ngai lo Pathian nung a ni a, chuvang chuan kan nupa inkar pawh a kutah ka dah tawp a, keiin theih tawp chhuahin ka tih theih ang ang ka lo ti ve bawk a, ka pasalin rilru pangngai put lam a hnaih leh chhan pawh chu Pathian thil tih theihna vang liau liau a ni. Hmeichhiate hian thil tih theihna riau kan nei ve reuh a, kan pasal te'n Pathian lam hnaih lo mah se kan hnaih tir thei tih ka chiang em em a ni.

Kan tleirawl chhuah tirh thleng khan ka pa hi zu in nasa ve ṭhin tak a ni a, ka nu tawrhchhelna leh taimakna azarah Pathian hmel a hmu a, zu in simin nun dan pangngaiin a nung a, a hnathawhna hmunah pawh mi sawi neuh neuh a kai tawh ngai lo. Zu a in ve ṭhin lai kha chuan veng chhungah pawh miin an sawi duh thei hle a, kohhrana zirtirtu ṭhenkhat phei chuan fiamthu deuh reuh hian ka pa chu entirnân te an hmang ṭhin. 

Ka la hre reng, puitlinga ka inkhawm ṭan kum a ni a, kan pawl piah chiaha pawl pakhat zirtirtu chuan nui deuh sûng hian zu in ṭhat lohzia a sawi kai a, ka pa ngei chu a hming nen lam a sawi ri a, ka zakin ka rilru a na hle. Kan in ka luh rualin ṭap pur chungin ka pa chu biak ina ka thil tawn ka hrilh a, ani pawh a rilru a nat hmel khawp.

"Heti ang vang hi alawm ka inkhawm peih loh" ka pa chuan min kuah chung hian a lo ti mai a, ka nu ve thung chuan thu ṭha tin reng a fah awl lo thung a, a hmeichhiatpui ṭhenkhat phei chuan pasal te siam ṭha thei lo ang te'n an sawi ṭhin bawk a, mahse ka nu chu tuarchhel tak a ni. 

Ka pa chu a hun awl neih apiangin a awm hran pui a, zu in a tum apiangin hmun fianrialah a len chhuah pui daih zel bawk a, ka pa hlawh aṭanga a pawisa khawl ṭhin tam lo ve tak te chu ka pa tan chuan a ui ngai lo. Hmun changkang leh nula leh tlangval te len dunna hmunah te a kal pui ṭhin a, ka pa chu siam ṭhat a tum ruh em em ṭhin. Ka pa paw'n zawi zawiin zu in chu a bansan chho tial tial a, zu in aiin ka nu nena awm dun chu nuam a ti chho ṭan bawk a, keini a fate thlengin min duat thar a, engkim chu ka nu thawhrah vek a ni. 

Chuti ang chiah chuan kei paw'n ka pasal chu kawng dik lam zawh tira ka lam lo hawi tir leh ka tum a, min hmangaiha hlim taka kan awm dun leh theihna tur a nih dawn phawt chuan tih hreh leh ui reng ka nei lo a ni. Ka pa siam ṭha tura ka nu chet lêtin ka pasal siam ṭha tur chuan ka chet hah a ngai dawn lo tih ka hria, a chhan chu ka pasal chuan ka pa angin zu a in ve miau lo a ni. 

A rilru lam chu buaipui ngai ber a ni a, chu chauh chu ka siam ṭhat ngai awm chhun a ni. Engtikah nge ka pasal nen chuan kan hlim dun leh theih ang tih erawh ka hre lo va, ka tih tur ang ang ka ti mawp mawp ang a, a bak zawng chu Pathian kutah ka dah tawp a ni.

"Awi Aruatte, nangni hi in ṭha leh tawh em ni? I hmel te hi a eng sawt sawtin ka hria, nge nang hian mipa dang melh i tum deuh zawk?" fiamthu tih hriat tak hian Mary-i chuan a ti zawt zawt a, ka lo nui hak hak thung a, ka pasal nen chuan kan inkar la ṭha famkim lo mah se hma chu sawn tawh tak kan ni. 

"Nakinah i hre mai ang, tunah chuan ka hrilh buai peih rih lo che. Nangni in ṭha zel zawk maw? In pa lah hi i tikawi hneh ve bawk si, a nu leh pate sawn an ning ru ngawt ang che" ka sawi dan kalhmang aṭang chuan ka fiamthu ve tho tih a hriat ngei ka ring. 

"Awi, kan pa hi chuan min duh ve hluah hluah em mai, ka nu leh pate pawh i rin ang ngawt kha an ni bik teuh lo" ner sawng chung hian a rawn ti ve leh nghal a, thil eng eng emaw sawiin kan nui dun leh hak hak zui nghal bawk. 

"Enteh Aruatte, kei chu maw Chhuanmawia hian a la duh tlat chea hriatna ka nei. Hmâna kan inhmuh paw'n dawr pakhatah kan chawl dun a, hun kal tawh sawi chhuakin i chanchin ka sawi kai pui vel a, a ṭawngkam aṭang kha chuan a la duh chiang che a ni" a rawn tih chuan

"Thu ho mai mai sawi ṭhin suh, Chhuanmawia tih vela buai hman pawh ka ni lo. I sawi tâkah chuan ka pasal bulah ka kal a hun ṭep tawh zawk tak ang a, ka pasal beng hriatah khati ang thute kha i sawi hlauh ang e" ka lo tih zawm daih a, inhmuh apianga Chhuanmawia chanchin a sawi lang ve ziah chu a ninawm ka ti a ni.

"Tak tak a, in awm dan leh lan dan aṭang hi chuan in la ṭha lo hle tih ka hre chiang a, mahse vawi khat tal chu han lerhsan chhin ve teh. Hmangaih tawh lo che angah a inngai a, ngaihzawmg nei chhin la a rilru dik tak chu i hre zawk maithei asin" a tih chuan nuih pawh ka nui peih tawh lo.

"I sawi ho ṭhin êm mai Lal Mer, ka kal dawn, ka pasal chuan min lo ngai tawh viau ang" tih leh thawh ka rual nghal a, ani erawh a rawn nui vak vak a, a nuih chhan chu ka hre chiang khawp mai, ka pasal chuan min ngai dawn lo tih a hre chiang ve êm bawk a ni. 

Christmas hmang zovin kum thar lam kan chuangkai leh diam tawh a, ka pasal phei chu office-ah nitinin a kal leh ziah tawh bawk. Ngaihzawng a neih loh thu a sawi aṭang kha chuan engmah hlauhthawnna ka nei duh tawh bik lo, ka pasal chu ka ring nghet hmiah a, rin zel pawh ka duh a ni. 

Nutling ni tawh mah ila taksa enkawl uluk lam ka uar sawt em em a, ka pasal ngaihzawng anga ka lo ngaih hman chu an inngaizawng lo tih hre tawh mah ila ka la thik em em tho a ni. Ani chu ka pasal bulah nitin a awm a, a hnuaia thawk a lo ni kher bawk nen namen lovin ka thik ṭhin. 

Nitin chhun chawlh lai awm velah ka pasal office-ah chuan ka kal ziah a, a ei tur ka kensak chu kan ei dun ṭhin a, chu chu ka remruatna a nih rualin ka nu remruatna a ni mah zawk a ni. Thla khat chhung velin ka taksa te chu nula ang deuh thawiin ka enkawl hman a, taksa mawi tak nei turin ka ṭang ve bawk êm a ni. 

Chu mai a ni lo, online-in ei tur ṭha ṭhâ ka chah bakah exercise lak dan tur chi hrang hrangte chu ka en ṭhin a, zing ṭawngṭai inkhawm banah pawh exercise ka la ziah ṭhin bawk. Ka taksa tih mawi ka tum chhan ber chu ka pasal a ni a, ani chuan Ezekiel-a dam lai ang mai khan min hmangaih leh se, min thlahlel leh se ka duh a ni.

"Vawiin chu ka rawn kal lamah Mary-i nen kan inhmu hlawl a, kan titi leh nual a, ka rawn tlai deuh a ni" ka pasal office-a ka luh rual chuan nui var varin ka ti nghal a, ani pawh a hma ai thlawt chuan a hmel hmuh a nuam khawp mai.

"Lo kal ziah hi a ngai chuang lo, i tan a buaithlak bakah i hah mai mai" dawhkana kan ei tur ka dah lai chuan a lo ti hniam sup a, a awah aṭang chuan thinrim ang paw'n a lang chuang lo, chu chu a ṭawngkam ve reng pawh a ni. 

"Chu min ngaihtuah ve deuh tihna em ni PC? Min ngaihtuah ve ti raw? Ka hah i hlau a, kei hi min ngaihtuah ve chiang ti raw?" mawl hmel zeta a lam hawi chung chuan ka ti nghal mawlh mawlh a, ka pasal kâ aṭanga min ngaihtuahna ri ka hre ta mai chu hlim loh theih pawh a ni lo.

"Ka nupui i ni alawm" tlang takin sawi lo mah se a sawi tum chu ka hre chiang em em thung a, ka thil tih lai dah hmakin a mal chungah chuan ka ṭhu thuai a, a biang chu ka kut pahnihin ka khuap zui nghal bawk.

"PC!" mittui tling pamin ka pasal hmel chu ka en ngawt ngawt a, min ṭhen a duh thu sawi tawh lova a nupui ka nih thu a sawi ringawt te chu ka hlimna a ni a, chutah ka beisei loh lutukin min ngaihtuahzia ka la hre leh zel zui.

"Lo kal tawh lo mah la a pawi lo, i chauh phah lutuk palh ang" aw dam zeta a rawn tih leh chuan chhang let tawh lovin ka fawp vawng vawng a, ka pasal chuan ka beisei loh lutukin min rawn fawp let ve a nih chu! 

Ka pasal mal chung aṭang chuan ka chhuk thuai a, a office chhunga bathroom lian lutuk lovah chuan ka tlan lut nghal zui bawk. Kawngka kalhin ka hmui chu ka hup a, ka ṭhutna chu a balh leh balh loh pawh ka ngaihtuah tawh lo. Ka ṭap khur ngawt ngawt a, kan nupa inkara thil thleng chuan min tihlim lutuk a, ka ṭah a chhuah êm avanga chuti anga che thut pawh chu ka ni. 

Hlim avanga nui hmel pu tur ka nih vei nen hlim avanga insum thei lovin ka mittui te chu ka dang zo lo zawk a, ka mittui chu tuipui sah huk ang maiin a baw zawih zawih a, ka pasal chuan ka ṭap tih a hriatthiam ngei ka ring. Minute 10 vel chhung chu bathroom-ah ka inkhung char char a, ka ṭah chhuak zualpui a reh deuh hnu chuan tuiin ka hmai ka phih a, ka thawmhnawte chu ka beng fai thuak thuak bawk. 

Ka ṭah chhung zawng khan kawngka emaw lo hawn a tum miah lo va, mahse pawi ka ti lo. Min ngaihtuah takin lo hawn tum se chu ka ṭah a chhuak zual ngei ang a, minute 10 aia rei daih bathroom chhungah chuan ka inkhung ngei bawk ang. Bathroom aṭanga ka chhuah chuan dawhkan bih ngur ngur hian a lo ṭhu ngawi reng a, a ngaihtuah mûk hmel hle. Ka thawm hriain zawimuang hian ka lam a rawn hawi a, kei chuan ka lo nuih var var a, tunah chuan ka ṭah reng a chhuak tawh lo.

"Thil ei ang aw? Chhun thil engmah i la ei bik lo vang ti raw? Kei chu ka ril a ṭam lutuk, ei vat ang" phur zet hian ka ti a, ani chuan ngun thluk fê hian min lo en a, mahse min en dan chu ka hmu lo der hmiah hmiah thung. 

"Kha le!" tiin ka pasal chu Momo ka barh a, ani paw'n ṭha takin a lo ei ve mai zel a, ka vawi thum barhna ah erawh a lo thle sawn daih a, rilru na ngawih ngawih hmel hian min en vawng vawng a, thaw ri hawkin a indawm kun ngul a, a awm dan teh thut chuan min tihamhaih chiang khawp mai.

"PC, engati nge? I awm a nuam lo em ni? I dam ṭha lo em ni? Zing lamah kha chuan i ṭha vek si a, engati nge heti ang hian i awm thut?" ti zung zungin a bek leh a chal te chu ka dek a, dam lo han tih tur em chu a ni hran lo, mahse a awm dan leh a hmel aṭang chuan a ṭha chiah lo a ni. 

"PC" ti leh sepin a indawmna kut chu ka kawih sawn sak a, a biang tawn tawnah chelhin ka lam hawi zawng chuan ka kuai her a, chiang takin kan inen ran a, a mitmeng aṭang a rilru tur awm ang hre thei lo mah ila a rilru erawh a buai nuai nuai ka ring. 

"Ka rilru i tihah" a rawn ti thum ṭial hniam ruih a, kei chuan chhan let dan tur emaw sawi tur hrim hrim pawh ka hre lo, keimah avanga a rilru hah thu hmai chhanah ngei min hrilh a, ka na lo ka tih chuan dawt chiang tak ka sawi ngei ang.

"Engtin nge i rilru ka tih hah? Min hrilh rawh le PC, engtin chiah nge i rilru ka tih hah? Ka insiam ṭha ang, i duh dan sawi la kei chu ka lo siam ṭha vat ang" ka en tlawk tlawk hnu chuan harh chhuak thutin ka ti ta zung zung a, kawngka lama thawm rawn awmah chuan ka hawi rang dun hle.

"Sir, Meeting kha i theihnghilh ta em ni? Chawhnu dar 1-a neih tur a ni a, tunah hian dar 1 chu a ri tawh a, Conference Hall-ah i hmel ka hmu bawk si lo va, ka rawn ko tawp che a nih hi!" nui sen sen chunga rawn titu chu kha nu bawk kha a ni; ka pasal ngaihzawng emaw ka lo tih nu ngei kha! 

"Ka lo kal ang" tih leh ka pasal chu a ṭhutna aṭanga thawh a rual a, dawhkana lehkha inrem fel thlap chu keu thuak thuakin File chhungah a khung mawlh mawlh a, kei leh kawngka bula hmeichhe pakhat lo la ding ve reng chuan a che vel chu kan lo thlir reng ringawt. 

"Ka hman e" ka pasal chu hmanhmawh tak hian kawngka lamah a kal phei nghal a, rawn kotu hmeichhe hmel changkang zet pawh chu room aṭang a chhuak ve nghal a, ka hlim chhung chu a va'n rei lo tak êm.

"Meeting kan nei dawn a, i duh chuan i lo va haw thei ang" kawngka lo hawn leh thut pahin ka pasal chuan a rawn ti a, kei chuan ngawi renga min chhuahsan lai ang bawkin ka thlir ngai ka lo la thlir reng thung. 

End of Chapter 10