By
Havali Adam
Chapter 1
Tui aṭanga ka lak chhuah rualin anṭam chu ka thing per ṭhawt ṭhawt a, rin ai takin a bal a, sil ngun a ngai fû mai. Sana ka en chuan dar 2 a lo ri vel chiah a, March thla kan hmang tawh bawk a, khua chu duhthusamin a lum nghal. Nipui kan la thleng miah lo leh ta nghal a, nupui thla han chuankai chu a huhphurh awm rum rum nghal alawm le. Mizoram te pawh tunah chuan a lum ve ta hle mai, vai ram phei chu engtin tak awm ang maw!
Mizoram lêtin a lum dawn tih chu hriat sa a ni a, ka Mizo pui vai rama awm mek nakin lawka nipui hma chhawn tur te chu ka khawngaih lawk zawk e a! Bazar aṭang ka haw deuh chiah bawk a, anṭam silin tui khawih mah ila ka thlan chu a la tla nasa hle a, tukverh aṭanga thli rawn thaw lut heuh heuh chu dawn nuam tak zawng a ni.
Tui chu hmun dangah ka suak chhuak a, anṭam chawp chuan tukverh lamah ka inchawi phei ta daih bawk a, thli thaw dawn chu ka mamawh tak zet a ni. Thli fim dawng deuh si, dawng chiang leh mang si lova awm chu ka ning a, hahdam taka chet ka duh a ni ber. Ka sil zawh hnu pawh chuan ka che sawn duh mai lo va, thli fim siamtu thingkung ṭha hnem ve tak dinna kan huan chu ka en reng bawk.
Kan in hi in lian leh zau ṭha ve tâwk tak a ni a, kan in ka'n ti tak naa ka pasal te in a nih mah zawk. Amaherawhchu Mizo danah chuan kan pasalte in chu kan in dik tak ang a ni nghal mai a, kan inṭhen te a nih ngawt loh chuan kan in nghet tih te paw'n a sawi theih tho ang. Ka pasal hian thing phun lam a ngaina em em a, kan kawmthlanga thingkung te pawh ama phun deuh vek a ni. Ka pui ve ṭhin ngei a, mahse ka ṭangkai lo thei khawp.
Ka pasal hi Vety Department lamah Deputy Director a ni mek a, tun hnai khan a kai sâng deuh chiah a ni. A tleirawl chhuah aṭanga thawk a ni a, a thawk rei ve ngar ngar tawh hle. Kan inngaihzawn lai te khan min rimna hun kha a nei vak ngai lo va, Aizawl khawpui hlat tak takah an post ṭhin bawk nen a hun lai kha chuan kan inngai thei khawp. Phone-in kan inbe awl lo va, ni khatah vawi hnih chu kan inbe ngei ngei zel. Min rawn be lawk lo a nih paw'n keimah zawkin ka be hmasa mai zel a, darkar 24 chhung a aw hre miah lova awm kha ka thei hlawl lo a ni.
Ka pasal hi kei ai kum 6-in a upa a, Class 12 ka zir laiin kan inhria a, min duh thu pawh thla eng emaw zah hnuah a sawi chauh. Kei lah mipa duh tawh leh hmelṭha tih zawng chu vei bur ang chi hmeichhia ka lo ni bawk nen kum 10 lai ka pasal lo ni ve ta PC Lalchhanhima hmel ka'n hmu chiah kha chu hmelṭha ka va han ti tehreng em, a hun lai kha chuan amah avangin ka zirlai pawh ka ngaisak ṭha thei lo ṭhin. First division-a pass ziah ṭhin kha Second division-ah te ka pass phah vel a, vei ve tak chu ka ni.
Class 12 ka zir laiin ani chuan B.A a zo dim diam tawh a, chung hun lai chuan Vety Department lamah a thawk daih tawh a, mahse eng angin nge a thawh ka hre tawh chiah lo. Survey leh eng eng emaw tiin kan School-ah khan an pute nen an lo kal a, khami ni kha chu ka dam chhungin ka theihnghilh theih ka ring lo. Higher hmeichhia mai ni lo High School hmeichhiaho pawh khan chhe lo kan ti tlâng vek a, kei phei chuan Mizo mipa ka hmuh tawhah hmelṭha ka la ti ber nghe nghe.
Kar khat a liam hnuah pawh hmeichhe dang ang lo takin PC-a hmel chu ka mitthlaah a cham reng zel a, ka ṭhiante phei chuan min chhaih nasat phah hle. Chutah ka beisei hauh lovin kan School bulah hmuh tur a awm zuah zuah leh ta zel a, mahse amah chauhin a ni ṭhin thung. Lunch Break laiin a ni tlangpui a, hmeichhe dang chuan an ngaihsak leh tawh chuang lovin ka hria, hmelṭha an ti tak tak lo te pawh a ni ang. Ka thil ei lai theihnghilh ṭhak khawpin ka thlir ṭhin a, min rawn en kha chuan ka hawi sawn rang thei teh e!
Amah ka vei em em hnu thla khatna ah min be hmasa ta a, ka lawmzia chu pui tak a ni ringawt. Min duh thu pawh a sawi hran lo va, tlangval a ni tawh vang nge ni a ṭawng duh lutuk lo. Kan Class-a mipate ang turah ka lo ngai ngawt pek kha a ni a, mahse a lo ni teuh lo. Lunch Break apiangin kan awm dun ziah a, kei phei chuan rei lovah ka ngaina a, ka duh em em bawk. Ani erawh a duh tê lo chu a sawi ngai lo va, chuti anga thla 4 chhung vel kan inkawm hnu chuan min duh thu a sawi ve ta chauh.
Kha thu, min duh leh hmelṭha min tih thu a sawi ni kha chuan chawhnu Class ka awm lo chiang teh e! Ka lawm lutuk leh hlim lutuk kha ka sa chhuak vek a, zuan vak vak te ka châk a, chutah PC-a chuan min la fawp zui. Khawvel chu a reh vek emaw ka ti hman hial a, min fawp tih chauh lo chu hriat dang engmah ka nei lo. Ka beng a ngawng ti dawn ila a thaw ri te chu ka hre vek bawk si, ka First Kiss rutu chu ka duhthusam mipa a va'n ni chiang tak em.
Chumi ni aṭang chuan inngaizawng angin kan awm chho ṭan ta a, amah ka duh leh duh loh min zawh miau loh avangin ka duh thu chu ka zep char char phawt a, duh em em mah ila a mizia kha mak ka ti thei hle. Kan inngaihzawn hnuah pawh a ṭawng duh loh ngaiin a la ṭawng duh lo tluang zel a, kei erawh sawi tur ka hre thei em em thung. Zirtawpni hi chuan kan in thleng min thlah ziah a, mahse kan inah a rawn peng lut duh ngai miah lo thung.
Class 12 ka pass chiah chu phai lamah zirna chhunzawm ka duh nghal a, thu rualpui tur ka ṭhiante pawh an tam hle. Chuti ang bawkin PC-a pawh thingtlang lamah an sawn ta daih a, hlauthawnna ka nei nghal. Thingtlang lamah ngaihzawng a nei vel ang tih ka hlau a, a pian a ṭhain a hmelṭha ang reng bawk sia thingtlang hmeichhiate mitah chuan a tlak nat ka ring khawp. A ni pawh kei ang tho, Vaiho karah lehkha ka zir dawn a, amah lo ngaihzawng dang ka nei ang tih a hlau ve em em te chu min tihlimtu a ni.
Zirna avang leh hnathawh avanga kan awm hran hnu chuan kan inngai thei em em a, mahse kum thum chhung chu kan rinawm tluan ṭhak. Vawi khat erawh ka rinhlelh theih tur deuhin a awm a, chung hun lai chu BA 3rd Year ka zir lai a ni nghe nghe. Lungngawi lo takin a phone call pawh ka chhang duh lo va, zu a in ṭhin thu leh hmeichhe hnim hnaih deuh a nei tih ka hriatna chuan ka rilru a tina a ni. Ani paw'n ngaihdam min dil mawlh mawlh a, ka ṭang rei thei ta bik lo. Ka ngaihdam hnu chuan zu in a sim hmak a, hmeichhe dang lakah pawh zuamawmin a awm tawh ngai lo va, kan inkar pawh rei lovah a ṭha leh vat bawk.
B.A ka zir zawh aṭanga kum 1 naah inhmangaih tawn na nâ na chu kan innei zui nghal mai a, ani tluka rilru ṭha leh pasal nih tlin hi ka la hre lo. Thawnthuah pawh ka la hre ngai lo va, Film velah pawh PC-a ang em ema nupuite hmangaih leh duat hi chu ka la hmu lo tak tak, chuti ang khawp chuan a fel ve a, ka ṭhiante bulah pawh hian a ṭul phawt chuan ka fak hreh lo thei hle.
Ka ṭhiante pasal nen ka tehkhin chang phei hi chuan ka vanneihzia ka hre thar leh ṭhin, mipa dang angin a intipa vûk lo va, amah hi a pa em em tawp zawk a ni. Kei paw'n ka theih tawpin ka duat ve a, a hna ban te hian ka nu leh pate pawh ka zah zo bik lo, ei rawng ka bawl lai pawh ni se hmel hlim sâng hian lo biak hram hram ka tum ṭhin a, ka be ziah reng bawk.
Ama'n a zir lutuk nge nupa ni tur dik tak kan ni zawk pawh ka hre lo, kum 10 lai nupa kan nih chhung khan thinrim takin vawi khat mah inhauhna kan nei ngai lo, mak tak a ni. Ka nu leh pate phei chu an ngaih a ṭha lo hial a, kan inhmangaih tak tak lo emaw te min tih phah vel a, fiamthu deuh taka
"Vawiin chu kan inhau ve chhin dawn em ni ang?" han tih chang pawh ka pasal chuan a ngah phah a, khumah kan nui dun kar kar zel a, ka nu leh pate hlauhthawn ang lo takin keini nupa chu kan inhmangaih em em zawk a ni.
Kan inneih aṭanga kum 2-naah fapa ka hring a, ka hlim tluk zetin PC-a pawh a hlim ve a ni. Kan fapa in kum 3 a tlin kum chuan thingtlang lamah ka pasal chu an post a, kan chhungkua tê chuan Quarter-ah kan awm a, hlim ve thei tak kan ni. Ṭhian pawh ka siam hman nual a, thingtlang khua tih takah keini chhungkua chu khaw mite'n min hre deuh vek a tih theih. Ka pasal phei chu rawn len chilh tu a ngah thei hle a, ani paw'n a lo induh khum mai ngai lo.
Aizawl mi a ni a, mahse ka pasal chuan ṭhian ṭha ang maiin a in lengte chu a lo kawm vek zel a, zirlai naupang ṭhenkhat phei chuan an Star ṭhin nghe nghe. Amaherawhchu thikna emaw huat tur engmah ka nei lo, ka pasal chuan min hmangaih tih ka hria a, fapa kan nei tawh bawk a, kei leh a fapa chu min thlahthlam mai mai dawn lo tih ka hre chiang êm a ni.
Kan fapa in kum 4 a tlin kumah Aizawlah kan insawn thla leh a, a pawi ka ti lo khawp mai. School a kal ve thei tawh dawn a, thingtlang School ai chuan khawpui school-ah ngei zirna ṭan thei se ka duh a ni. Kum 5-na a hman kumah School chu a kai ṭan a, Pre-school a ni deuh mah zawk. Naupang tak tak a ni ve tawh a, a ṭhiante zingah pawh a ṭuan a ṭhain a harh ang reng khawp.
"Mi dang tumah an lo la haw lo em ni Aruatte?" aw lo chhuahna lam chu ka hawi vat a, ka nu chuan a chawhmeh rawn hawn chu dawhkanah a dah chhuak diat diat a, ka bazar tih a hre lo a ni ngei ang.
"Aw lo la haw, i rawn bazar haw duh a nih khâ ka nu, ka chhuak zuai a, chawhmeh chu ka lei nual alawm" tih leh ka ṭhutna aṭang chuan thawh ka rual a, anṭam ka silna tui chu ka leih bua a, hun pawh a kal leh dûak hman tawh.
"Zanin tlai chu Badam hi ka'n kang teh ang, ka ei châk riau mai" tiin ka nu chuan polythene aṭang Badam chu a la chhuak a, kan sak tum mah ila a duh leh dawn chuang lo tih ka hre chiang em em a, chuvanga ṭawng ta lo pawh chu ka ni.
Ka pasal nu, nu Chawii hi a hma chuan zirtirtu a ni ṭhin a, mahse kum eng emaw zah chu a ni tawh lo. Ka pasal pa, pa Zualan a chawlh tir ni thânin ka hria, ka pasal nen kan inneih hnu lawka thawh zawm tawh lo a ni bawk. Ka sawi tawh angin ka pasalte chhungkua hi mi awm thei ve tak an ni a, hmel hriat pawh an ngah khawp mai. Khawiah pawh kal se lo hretu emaw lo betu pahnih khat tal an nei zel a, chhuah vah vel paw'n an bula kal hi chu hmel hriat neih hnemna a ni ringawt.
Mi hausa an ni e ti lo chuan an zau em em lawi a, hmel hriat ngah awm reng pawh an ni. Chhung khat laina hnai an ngah ang bawkin mi ṭanpui leh biak an hreh lo va, thintlang lam aṭanga in leng kan neih te hian artui emaw thil eng emaw tal chu kan hawn tir ngei ngei zel. Ka lawi luh hma aṭang tawh zo ar ngei vulh kha an ni bawk a, kei paw'n a tirah hlau ru viau mah ila tunah chuan arpui tui lai pawh ka khawih bawrh bawrh ngam ve tawh a ni.
"Thawm aṭang chuan an lo haw a ni ngei ang, nuam hi an ti dun thei bawk si" ka nu chuan nui var var chung hian a rawn ti a, a sawi dik ka ring, kan in kawt lamah motor horn ri a ring leh tawh em mai, chu chu tlai tin deuh thaw kan hriat ṭhin a ni tlat.
"Nu, motor ka khalh thiam ṭep tawh" phur fê hian kan fapa Ezekiel-a chuan a rawn ti lut nghal a, a hnungah a pa chuan a rawn zui lut bawk a, nui sun sun mah se PC-a chuan ka mitmei a veng tih ka hre thei.
"A va ṭha ve, mahse naupang mai i la ni a, motor chu khalh tam miah lo tur, i chesual palh ang" ka lo ti ve mai bawk a, Ezekiel-a erawh ka thu sawi pawh a ngaihsak leh tawh lo, ṭhutthlenga a bag dahin bathroom lamah a lut daih a, lum a tih hmel hluam hluam bawk êm a ni.
"Ka rawn khalh haw tir leh a, mahse ka veng reng tih hria la, hlauthawng lutuk suh aw" ka pasal chuan ka bula a rawn din rualin a ti sup a, Ezekiel-a motor khalh zir chu pawi em emah pawh ka ngai lo, mahse chet sual theih a nih avangin ka fimkhur hle zawk a ni.
"A la naupang bawk si a, Motor khalh hi zirtir tawh lo mah la pawi ka ti miah lo PC. Nangmah hian thiam la a tawk rih, a nih lo paw'n kum 15 emaw 16 emaw tal tling phawt se, dik tak chuan motor khalh i zirtir hi ṭul ka ti rih lo a ni" ka tih chuan
"Ka duat duh si alawm, a châk zawng tih tir leh a duh zawng chu ka theih apiang pek ka duh a ni. A che sual em lo vang, ka awm alawm, hlauhthawn awmin ka zirtir ngai lo hrim hrim" a rawn ti ve leh nghal a, rilru hahdam deuh si dam lutuk si lovin ka lo bu ve mai bawk.
"I hmai a va tai ṭha ve, min lo ngai chiang mai" ka nu a awm tawh lo bawk a, a ṭawngkam chu a tlangval leh ṭan tawh hle, kei lah chu insum buai lovin ka lo nui chiam a, ka hmai taih chhan chu a ring dik lo nasa lutuk.
"A lum ka tih vang alawm ka hmai hi a taih, ka ngaih vang che a ni lo. Kal rawh, a rawn ko leh ṭep tawh ang che, in ei tur hi tui mangkhengin ka lo siam ang" ka tih lai mekin bathroom aṭang Ezekiel-a ngei mai chuan
"Pa, i lo kal dawn lo em ni?" a rawn ti ta reng a, khi vur vur hian ka pasal chuan min chhuk melh nghal a, zawlnei te pawh ka ang lek lek awm le, mahse School ban apiangin an inbual dun ṭhin tih hre sa tan chuan sawi lawk loh theih pawh a ni lo.
"Min ngai tih ka hre tho, ka va kal thuai ang e" tiin ka biangah a rawn fawp zeuh a, ka hma maiah chuan a inphelh sawk sawk zui nghal bawk a, Deputy Director lai ni ve bawk si hi a fapa leh a chhungkaw tan hi chuan a va han che naupangchhia thei tak.
Minute khat pawh a liam hmain Bathroom aṭang chuan an pafaa inchhaih hlim thawm ka hre zawm zat a, anṭam hel kan pah chuan ka lo nui ver ver a, an pafaa an inchhaih hlim thawm ringawt pawh chuan ka chhungril a tihlim a ni. Chawhmeh chhuan pahin ka pasal thawmhnaw leh pheikhawk chhuata darh nuai chu room lamah ka dah lut a, an inbual zawha an hak tur kawr ka la chhuak nghal bawk a, room-ah chuan ka awm rei hran lo.
Choka lamah ei rawng bawlin ka awm leh ta char char a, ka pa hna bang lo haw lai paw'n Ezekiel-a te pafa chu bathroom aṭang an la rawn chhuak lo va, thawm lah chu an dim lo nasa mai bawk si. Ka pa paw'n a hrethiam a ni chêk ang a khi ṭhaw a, kan chhungkua bik chuan Ezekiel-a te pafa awm dan chu ngaiah kan nei tawh zawk a ni. Ka nu erawh an room lamah a la tawm char char a, Badam pawh a la kang ta chuang lo, lo kan sak ringawt chu tih chi a ni lo tih ka hre kar thung.
"Zanin chu kan va leng phei dawn em ni ang? Bawihpuia khan kan inbual laiin len phei a sawi tlat mai, a leng châk te pawh a ni ang" thawmhnaw inthawlh mial mial chung hian ka pasal chuan a rawn ti a, kei paw'n eng eng emaw tih fel pahin ka lo aw ve leh mai.
"Hei!" tih chauh chu ka sawi hman, ka inrin loh laiin khumah min kuai mu thlawrh a, tal chhuah ka tum rualin a ke chuan min kherh bet tlat bawk a, eng tak hria ni maw! Tlai dangah a awm ngai tawp si lo, nge a ni hian thil min hrilh tur a nei zawk.
"Min thlah la, ka la che laklawh a nia" ka tih chuan naute pawm ang maiin min pawm hlu hlu a, kei lah a taksaah chuan ka leng halh halh bawk si, min kuah rei hnu phei chuan ka mut a chhuak dâwn dawn alawm le.
"Zan mut dawnah thil ka hrilh ang che, ka hrilh hma che chu dilchhut awih loh" tiin min fawp zeuh a, kei chuan ka lo en hau a, a sawi vang pawh ni kher lovin dilchhut rilru nghal tak ka ni, min tidilchhut vek zawkin ka hre hial.
"Tunah sawi mai la, mut dawnah kher sawi a ngai lo, ka hre châk" nui sen sena ka tih chuan min rawn fawp leh a, a kut pawh ka kawr chhungah rawn zen lutin ka taksaah chuan a va kualtir leh den den tawh.
"A nih loh chuan ka titau a ni mai" ka tih leh chuan za zet hian a rawn nui chhuak hawk hawk a, kei pawh ka nui ver ver a, a nui chhan leh ka nuih chhan pawh chu ka hre chuang lo, ka pasal hlim nui ri chuan min tihlim a nih ka ring.
"I duh phawt chuan titau rawh, han titau nghal teh, ka thlem châk tawh teh mai che a nia" a tih chuan a nuih chhan ka hre ve chiah a, kan nupa inkarah intihtauh khum vel a awm ngai lo tih ka hre chhuak a, chutah ka pasal chuan ka tihtauh lah chu a la duh em em zui.
"I chau em?" tiin thil dang chu sawipui ka tum ta daih a, ka thil tih lai te chu tih chhunzawm pawh ka tum leh ta chuang bik lo, inbual zo hlim tih hriat taka ka pasal rim chu hriat reng ka duh a, a rawn haw tirha a sawi ang chiah khan kei hian ka ngai thar riau a ni.
"Ka chauh leh chauh lo fiah zuai ila" a aw aṭang chuan a nuih a za tih ka hre thei, kei pawh ka nuih a za tho, nupa nun hman dawn hi chuan a chau ngai lo, a phur thei em em zawk, kei lah pek hi phur vak lo emaw ka intih hian engtin tin emaw ka lo phur ve leh thuai ṭhin.
"Heti hian awm rih zawk teh ang, min kuah nghet deuh teh" ka tih chuan min rawn kuah nghet nghal a, ka hnung chu zawimuang hian a chul riak riak bawk a, eng vanga ngai thar em em nge ka nih pawh chu ka hre lo.
"Ka'n duat hlak ang che" ti supin min kuah reng chung hian min awi titih a, a chet dan avang chuan ka lo nui hak thung a, chutia kan inkuah chial lai chuan Ezekiel-a a rawn lut a, kan inkarah chuan awm a rawn tum leh ta chat mai.
Kum 8 lai a ni ve tawh a, mahse kum 5 bawr vel ang maiin in chhungah hi chuan a awm ṭhin. A pa hi a ngaina em em a, a pa paw'n a duat hlum loh chauh reng a, kei paw'n ka duat tho, mahse a chang chuan kei ai mahin a pa chu a ngaina zawk emaw ka ti ṭhin. Chuti ang ngaih dan ka neih chang te chuan fanu neih leh te ka châk a, mahse a rem rih lo a nih ka ring. Fa nei leh turin nupa nun pawh kan hmang khât hran lo, dik tak chuan Ezekiel-a chu duatin hmangaih em em mah ila fanu neih chu ka châk ru reng a ni.
Zanah chuan kan in lamah kan leng phei ta ngei a, ka nau Saidingi fate pawh min hmu chu an lo hlim hle. Ezekiel-a te ang rual tho an ni a, an inkawm nghal chawt hlawm a, a pute'n hauh an tum bawk si lo, bengchheng ṭha tak an ni. PC-a'n a khap deuh tâkah chuan an reh deuh duak a, mahse a khaptu ber lah chu a inthiam lo leh ta zawk a, ka nu leh pa chu an lo nui ringawt. Saidingi pasal chu Committe an neih avangin kan haw dawn hnaihah chauh a hmel a rawn lang a, a ṭawng duh ve ang reng a, haw tak tak hmain thil pawh a sawi nual hman tho.
"Naktukah ka zin dawn a" ka pasal thu sawi avang chuan ka ṭhu chhuak nghal a, nui suk hian min rawn en a, a zin dawn vang a ni chiang mai tlai aṭang tawh ka ngaih ruk em em, min hrilh hnuhnawh lutuk chu ka lungawi lo lek lek a ni.
"Engtia rei nge i cham dawn? Khawi lamah nge i zin dawn reng reng?" ka mut ṭhat rual chuan ka ti a, ani paw'n ngainatawm zeta min en chung hian Ezekiel-a hmai chu a chul a, kan fapa chu a muttui barh barh tawh hle thung.
"Kar khat a nih ka ring, Khawzawl lamah kan Department-in building an hawng thar dawn a, hawnna ka neih pui dawn a nih hmel. Tih tur ṭul ang ang kan ti nghal bawk ang a, kar tawpah chuan ka rawn haw hman mial maithei a ni"
"A nih chû, i hna a nia, i zin a ngai si alawm ti raw? Phone te paw'n kan inbe thei tho a, kan lo awm ve nawk nawk mai a ni ang chu! Ezekiel-a paw'n a ngai leh dawn hle mai che, naktuk" tia ka ṭawng laklawh lai chuan
"Aruatte, i dik chiah lovin ka hria, i awm dan hi ṭum danga ka zin tur thu i hriat lai ang a ni miah lo" a rawn ti a, ṭawng zawm tawh lovin ka hnung chhawn a, thawm aṭang chuan ka lamah a rawn insawn phei tih ka hre thei.
"In che sual dawn tlata hriatna ka nei PC, tlai aṭang tawh ka ngai thar em em che a, ka hlauhthawn tur ngeiin i zin leh dawn bawk si, ka ngaih hi a ṭha chiah lo a ni" min kuah hle hle hnu chuan ka ti sep a, ka hlauhthawn ruk riauna chhan tak chu ka hre bik lo.
"Che sual lo ve le, Driver ṭha tak ka nei alawm, hlauthawng lutuk duh suh" ngaih ṭha fê hian a rawn ti a, kei erawh ka ngaih a la ṭha thei chuang lo, a bula han kal ve ngawt lah a chi si loh, ka kal vaih chuan Ezekiel-a'n kal ve a tum nghal a ni mai.
"Hei" ti thum dupin a lamah min kuai her a, a mitah chiang takin ka en ran a, hahdam hmel zeta nui suk hian min fawp vang vang a, lo chhang let ve teh mah ila ka la pangngai thei der lo a ni.
"I awm dan hian ka awm a tinuam dawn lo riau a nia Aruatte, Pathian zarah kan chesual êm lo turah ngai tawp rawh, a ṭha em?" a rawn tih chuan ngawi rengin ka kuah nghet sauh a, ani chuan min thlamuan tum tih hriat tak hian ka chhip sam chu a fawp vang vang thung
Ka harh leh meuh chuan khua a lo eng kuar tawh a, ni pawh a chhuak tawh a, keiniho pathum erawh khumah kan la mu ṭhap mai. Ka pasal taksa ngheng chuan ka mu meng kar a, kan piah lawka muhil Ezekiel-a chu ka thlir reng a, ka ngaihtuahna erawh hmun dang daihah a awm thung. Ka pasal tih harh hlau takin ka tho ṭhem ṭhem a, a hmel chu hmangaih takin ka en a, kan inngaihzawn lai leh kan inneih tirh lêtin a hmelṭha zual a ni.
Mipa hi chu an mak ve ngawt mai, kum 50 chin pawh ni se an la lang valai em em thei a, an kum a upa tawh lutuk te a nih loh chuan inenkawl uluk peih chin hi chu hmeichhe tan pawh iai awm loh an ni thei zel. Ka pasal pawh kumin Octorber thlaah kum 37 a tling dawn a, a ṭhat lai ber emaw tih theih khawpin a hmelṭha zual a ni.
End of Chapter 1
Comments
Post a Comment