𝐊𝐀 𝐅𝐀𝐓𝐄 𝐏𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐅𝐮𝐥𝐥 𝐂𝐡𝐚𝐩𝐭𝐞𝐫)

KA FATE PA (Mizo Novel)

By

Havali Adam

9 March 2022

Chapter 1

“I sawi ve ziah, amah i hmuh hunah i buai leh vek dawn tho tho”

“Ka hre tawh bik lo, buai loh ka tum pawh hian maw ka buai vek zel, a mak lutuk”

“Hrilh tawp mai la”

“A chi nâng, hmeichhia zawkin hrilh hmasak te chu ka duh teuh lo mai, hrilh ai chuan hre lo kumkhua mahse pawi ka ti lo zawk”

“Ti leh tlat bawk si, i duh tak tak lo a nih kha!” ti hmakin ka thil tih lai chu ka ti mial mial a, ka ṭawng dan chuan Hlimhlimi rilru chu a tibuai leh dawn tih ka hre nghal.

“Âaaa...…kei chu awm dan tur pawh ka hre tawh lo, amah zawk hian min duh ve mai se ṭha ni mai tur” a thil tihtur pawh ngaihsak lovin a rawn ti ta ngei a, hmun dang chu a hawi daih bawk.

“I duh tih tal te chu hria se chu thu hran, i duh tih tak ngial pawh a hre lo a nia, hmeichhia mah ni la i duh tak tak chuan hrilh tawp mai rawh”

“I ngaih ang ngawt khan a awlsam ringawt lo, awlsam se chuan min hrilh ngai lovin ka ti daih tawh ang”

“Chutia i ngaih tlat chuan i thil tihtur kha han ti hmasa phawt mai teh, vawiin chu order a tlem deuhin ka hria” ka sawi ang chuan a ti ve leh mai bawk a, kan dawr thawhna neitunu chu a rawn lang zui nghal.

“Chawl tawh rawh u, eitur pawh a rawn thleng ṭep ang. Vawiin chu ni dang aiin order kan dawng tam lo deuh a, dar 5 pawh kan thlen kher a ngai lo vang” kan pi chuan a rawn ti a, kan haw hma thei tur chu ka lawm ru hle.

Tunah chuan puan ṭhuina dawra ka thawhna pawh kum 3 lai a lo ni ve leh reng tawh a, mahse a thawkte zingah chuan a senior pawl ka la ni pha chuang lo.

Kum 6 chuang daih lo thawk tawh te an awm hlawm a, mahse hnathawkte inkara inbiak duh loh emaw inngeih loh tih vel a awm ngai loh avang chuan nuam kan ti tlang hle.

A tam zawk chu nu lam leh kum upa lam deuh vek an ni a, kei leh ka ṭhiannu Hlimhlimi chu a mi lai vel kan ni. Keini aia nau ve leh chhawng an awm a, chungho chu College kal lai te an ni fûr bawk.

Kan pi, kan thawhna dawr neitunu kan ngainat em em chhan pakhat chu mi hriatthiamna a ngah lutuk vang a ni. College kal lai puan ṭhui thiam leh tuite chu Part Time Job angin a thawh tir vek a, an thil ṭhui tur a hrangin a dah sak mai ṭhin.

Tihtur tam tak pawh a pe ngai lo va, kan dawr chu a lian ṭha ve tho bawk nen hnathawk pawh kan tam hle. Hnathawk zawng zawng chu hmeichhia vek kan ni a, kan hlim tlang thei hle.

Thla tin hian Picnic kan nei ṭhin bawk a, kan pi chuan hnathawkte mi tih hlim dan leh kaihhruai dan a thiam thlawt. Amah hi nu lian leh ngo lam, mahni lu zo ve tak hmeichhia a ni a, fanu pakhat neiin a pasal chuan a thihsan tawh bawk.

A hma chuan eng hna mah a thawk ngai bik o va, a pasal eizawnna chu a eizawnna a ni ve mai. A pasalin a thihsan hnuah erawh puan ṭhuina dawr a siam a, a ti fuh hle chuan ka hria.

Kan pi sawi lawk ang ngeiin kan bang hma ta reng a, mahse kan inah ka haw tlang nghal mai lo. Hlimhlimi chu Zarkawt lama min kalpui turin ka sawm a, ani paw’n a lo peih ve mai.

Nilaini a nih avangin KFC lei ka rilruk deuh a, chuvanga haw tlang nghal mai lo pawh chu ka ni. Scooty tih vel kan neih ve loh avangin Bus in kan kal mai a, mahse kei chuan Scooty chu ka tuak ru reng thung.

KFC kan lei zawh chuan Taxi phar kan tum a, mahse a lo vâng ngâng mai. Chanmari Bus Stand lam chu a hnai zawka kan hriat avangin kan pan a, thil chi hrang hrang sawiin kan titi tui dun leh hle.

Bus stand kan thlen phei hma kawng zau lai takah chuan mi hmuh kan nei ta, ka rin ang ngeiin ka bula mi chu ka phenah a rawn kal nghal. Bus-a kan ṭhut hnu thleng chuan a la zam vel reuh a, kan kum inrual mahse a naupang chhia ka ti reuh tawp.

“Saw a lo en reng che” ka tih chuan a hawi let thuai a, a insiam ṭha leh rang hle.

“Awi min lo en tak tak” tiin a ṭhu biru nghal a, a awm dan chu ka lo nuih ringawt.

“A nu’n order a rawn siam leh hunah chuan keimah ni lovin nangma’n ṭhui tawh ang che, mark score zeuh a ni mai” ka tih chuan min nghawk sawk a, a awm dan chu nuih loh theih pawh a ni lo.

“Sawi tawh suh, ka la zak a nia” a rawn ti a, ka ngawi zui ve mai bawk.

Kan haw kawnga mi vei vak nûai nuai chuan hna ka zawn laia ka kal kual nasatzia min hriat chhuah tir a, puan ṭhuina dawra ka thawh ṭan dan thleng chuan ka ngaihtuah chhuak bawk. Ka khi sâk a, a chhan chu ka hlim ve tawh tak zet a ni.

Hun harsa leh buaina chi hrang hrang paltlangin nun ka hmang chho kha a nia, tunah erawh khang ka hun kal tawh te khan hlimna min pe ta zawkin ka hria.

“Nu!” in chhunga ka luh rualin ka fapa chuan phur zet hian a lo ti thuai a, chutiang bawkin ka fanu pawh a ṭhutna aṭanga thovin ka lam a rawn pan ve nghal.

“Fate u, hei thil ka lo hawn che u a” nui sâng chuan ka thil hawn chu ka phawrh a, an lo lawm dun hle. KFC chu dawhkan lamah an keng phei a, an ei nghal mial mial bawk.

“Ei ṭeuh rih suh u aw, chaw ei a hnaih tawh hi!” ṭhutthlenga ṭhut thlak pahin ka ti a, kan ban hma vang pawh a ni ang ka zâng hâh mai.

“Vawiin tlai chu in lo bang hma deuh tihna em ni?” ka pa chuan a rawn ti a, a inbual zo chiah tih hriat takin a sam pawh a la hnawng chap.

“Nia, vawiin chu order kan dawng tlem deuh a” tiin ka ṭhutna aṭang chuan ka tho a, ei rawng bawl turin choka lam chu ka pan nghal bawk.

Ka nun hmasa lamah te kha chuan nula hmelṭha ve tak, hlim thei em em leh hmeichhia nih nuam ti tak kha ka ni ṭhin a, mahse ka bialpa nen kan chet sual avangin ka nun leh ka ei zawnna zawng zawng chu a danglam vek ta a ni. Ka tet tê aṭanga zai tui mi ka ni a, ka len hunah chuan

“Zai thiam hlawhtling tak ka ni ang” tiin duhthu ka sam ṭhin.

Class 12 ka pass hnuah zaia eizawnna lam luh chilhin Delhi-ah ka awm a, ka tih tirh phei chuan hrehawm ka ti ve det. Zai tui hle lo ila chuan kan haw leh daih ka ring, mahse keimah leh keimah chu ka infuih a, hlawhtlin ngei chu ka tum bur.

Ka chhungte chuan an phal lutuk lo nghe nghe a, keimah berin lehkha zir tawh lova zaia ei zawnna neih ka duh tlat avangin an phal ve mai chauh zawk a ni.

Ka vanneih a siamin thla khat pawh a ral hma chuan Contract ka hmu nghal a, mi zai thiam tih chi ka lo ni kher bawk nen sawmna pawh ka dawng ngun mawlh mawlh thei khawp.

Kum khat chhung tawp chu Delhi-ah ka inbengbel a, ka chhungte pawh a theih ang angin pawisa ka thawn ve ṭhin. Delhi-a aṭang Contract vangin Chennai-ah ka insawn leh a, chumi dawtah Mumbai-ah, Mumbai-ah phei chuan mi lar an tam sia a nuam ka ti tawp. Chutiang vel chuan hun ka hmang kum tin a, Bar-ah emaw tlema Event lian tham deuhah ka zai tlangpui ṭhin.

Band lam aṭang pawh sawmna ka dawng zing thei hle a, mahse Band ang zawnga kal chu ka duh lo. Kan tum ber chu pawisa thawh chhuah a ni a, Band ai chuan Solo ang zawnga ei zawn chu a hlawk zawka ka hriat vang a ni bawk. Ka Mizo pui te paw’n min duhsak thei hle a, zaina tur chi hrang hrang min kawhhmuh a, hlawh pawh a chhe lo thei hle.

Mumbai-a kum khat ka awm hnuah Bangalore-ah ka insawn leh a, mahse chu kum chu ka tan kum chhia a ni dawn tih reng ka hre lo.

Mizo band pakhat te nen Event lian tham deuhah kan zai ho a, an band Guitarist Rintea chu ka mipa duh zawng a lo ni ta tlat mai.

A bula ka awm te chuan ka zam ru thei em em a, ka aw pawh a chhuak ṭha hlei thei lo hialin ka hria. Ka bula a rawn din changte chuan ka buai hma thei hle a, a mi uap chu a na thlawt a ni.

A band mate te angin a harhvang ve lo va, a ngawichawi a ni mah zawk. Mahnia thil tih mual mual a ching a, a ṭhiante nena kan nuih ho bâwk bawk lai pawhin ani chuan Guitar a lo herh ṭha mial mial zel.

A ngawi reng e ti lo chuan a pa ka ti tlat a, a hmelṭhat bakah a zia chu ka duh chi tak a ni. Amah ang lo takin a ṭhiante erawh an ṭawng duh par par hlawm hle a, zu pawh an in nasa tih ka hre thei.

Rintea erawh a bula ka awm pawhin zu rim awm reng a nam ngai lo va, a perfume hman rim te chu amah nen a inhmeh thei tawp.

Kar khat hnuah Delhi lamah min let san a, mahse an awm loh aṭanga thla khat hnuah min hmuh a duh thu a rawn saw ta tlat, ka phurin ka va zam ru si em.

Bangalore-a lo kal lawk a tum thu chu min hrilh a, amah chuan inhmuhna hmun leh ni pawh a rawn ruat lawk vek bawk. Kei paw’n kan pute lam ka be thuai a, Rintea ka hmuh châk em avangin dam lo angin ka insawi ringawt a, anni paw’n min lo hrethiam ve mai.

Bangalore-a a rawn thlen thu min hrilh chuan zam tak tê hian ka zam zual a, hmuh leh loh mai chu ka duh rum rum. Ani erawh min hmuh tumin Delhi aṭang a rawn thlawk chho vang vang a, chu chuan mipa a nihzia a ti chiang.

Mahni thusawia ding nghet tak a nih ka ring nghal mai a, mahse min hmuh a duh chhan chu ka la hre lo. Kan inhmuhna hmun tura kan ṭhut hnu chuan a ngawi reng a, kei pawh ka bang bik lo.

Kan awmna hmunah chuan tumah an awm ve lo va, a thlang thiam ka ti phian. Min duh thu a sawi lai chuan awm dan tur pawh ka hre lo, ka hmuia a rawn fawh phei chuan ka mur chhhuak vekin ka hria.

Chumi ni aṭang chuan Rintea nen chuan kan inngaizawng chho ta char char a, Delhi-a a chhuk leh hnuah erawh duh ang thâlin kan inbe tam thei ta lo va, mahni hna ve vea kan buai vang a ni pakhat.

Hmun hrang hranga Gig an neih ṭhin avangin inbe lova ni 2 awm tawp tawp te kan nei a, keipawh Contract a nih maiu avangin ka hna lamah chuan ka buai ve mawp mawp thei hle.

Thla thum kan inngaihzawn hnu chuan Bangalore-a lo zin a tum thu a sawi leh a, ka lo phur nghal hle. A sawi ang ngeiin a rawn zin a, kan han inhmu chiah chu kan inkuah a, induh tawn takin kan infawp nghal ngawng ngawng.

Chutiang chuan hun leh nite chu kan hmangral a, Rintea pawh thla khat danah min hmu turin a rawn thlawk chho vang vang ta ziah bawk.

Ka Apartment-ah a riak ve mai zel a, thla 7 chuang kan inngaihzawn hnuah erawh kan che sual ta nge nge a, mahse inchhirna pakhatmah ka nei lo.

Ka bialpa Rintea chu ka thinlung leh tih tak zetin ka hmangaih tawh, chumi avanga kan che sual chu inchhir miah lo ka ni bawk.

Vawi khat mai ni lo vawi tam kan che sual a, a tawpa tawpah chuan ka rai ta. Rintea chu ka pasal atan ṭha tawkah ka ngai a, ka mipa hmangaih fa ka pai chu ka hlim a, mahse ka hma hun pakhat mah ka hre der si lo.

A fa ka pai thu ka hrilh hma hauhvin ngaihzawng nghet a neih reng thu a ṭhiante kâ aṭangin ka hria a, a ṭhiante daih daihin min hrilh chhan pawh ka phone call a pick up duh ṭhin loh vang a ni.

Ka mipa rin leh hmangaihin min lo kawp reng tih ka hriat chuan ka na a, na satlaih mai ni lovin ka na tak zet a ni. Amah ka hmangaih luatah ka thianghlimna thlengin ka hlan a, mahse ani chuan infiamna’n lek min lo hmang a, ka tan chuan rilru nat loh ngaihna a awm lo.

A fa ka pai thu hrilh ta lo chuan ka awm awmin ka awm a, vawi khat pawh min be lova a awm thei chu a mak ka ti zawk. Khatiang khawp khan min duh ve ni khan ka lo hria a, mahse ka thil hriat chu dawt mai a lo ni.

Min lo biak thut takah tiin ka Sim Card pawh ka thlak duh lo va, mahse thla tam a liam hnuah pawh a hnen aṭang phone call ka dawng ngai chuang lo. A tawpah erawh Rintea chuan sex vang chauhin min lo ngaizawng tih ka hrethiam ta a, ka rai avangin ka ei zawnna zawng zawng chu a chhe nghal vek bawk.

Contract kan sign tawh sa chu sut leh vek a ni a, naute chu tihtlak duh mai ila chuan ka ei zawnna a chhe miah lo vang, mahse tualthah ka duh si lo.

Thla 1 chhung vel chu engmah ti lovin ka awm tawp a, ka chhungte pawh ka hmu hreh ngawih ngawih. A chang chuan Rintea phone number chu ka hmet chhuak a, call tawpa engkim hrilh chu ka duh ṭhin, mahse min hmusit zual dawna ka hriat avangin ka insum hram hram zawk a ni.

Chu bakah call pawh ni ila a pick up duh leh chuang lo vang, ani te chuan min be duh tawh hleinem. Ka chhungte chuan Mizorama ka haw chho thut chu mak an lo ti hle a, zep awm lovin engkim ka hrilh tlang nghal a, ka pa phei chuan min beng nghe nghe.

Ka dul chu thup tum mah ila a puar lian tawlh tawlh a, khawtlangah pawh Vai fa pai angin ka thang ta chiam bawk. Naute ka neih ni chuan phir mipa leh hmeichhia ka hring a, ka fate hmel chuan ka rilru an tina ngawih ngawih.

Ka chhungte chuan vawi tam ka fate pa chu tu nge a nih min zawt ṭhin a, mahse a them pawhin ka hrilh duh lo. Kei ngei pawh hian theihnghilh ka duh, ka duh lutuk, mahse ka mipa hmangaih hmasa ber a nih vang a ni ang tun thleng hian ka la theihnghilh thei lo, a mak ve ngawt mai, ka fate hmel vang pawh a ni mahna.

Zirtawpni a ni a, kan dawr lam pawh kan buai ve leh khawp. Hlimhlimi chu a ṭawng leh char char tawh a, ka thil ṭhui chu a hautak bawk nen a thusawi hriat mumal pawh ka nei lo.

Kan pi berin mo kawr ṭhui turin min ti tlat a, a hatu tur duh ang design dawra a awm loh avanga ṭhui ka ni bawk. A tirah kha chuan order ver mai se ka lo ti rilru khawp a, chu bakah kei kher min ṭhui tir chu mak pawh ka ti.

Kei aia senior zawk leh thiam zawk te ṭhui tir tura ka tih lahin a duh bawk si lo va, ṭhui thiam tura min ngaih tlat avangin ka ṭhui ve ta tawp chu a nîa.

Design a awm sa vek a, a ṭhui tak chu thil har a ni hran lo, mahse thawmhnaw pangai ṭhui nen chuan a inang chiah lo deuh a ni.

Hlimhlimi pawh a duhthusam a thleng dik nge ni a mipa star em em nu hnen aṭangin order kan dawng leh a, ka ṭhui tur chu ka ṭhui tir zaih a, a nui ver ver ringawt. A uluk ve hle a, uluk loh chi pawh a ni lo, a theih tawp chu a chhhuah ve chiang a ni.

Chhun chawlh kan neih lai te chuan ṭhui nuam a tih thu ringawt a sawi a, a hlim vel lutuk chu a nuihzat thlak zawk.

A hmaa a bialpa ai thlawt chuan tuna a mipa duh chu a vei zawk chiang alawm, a hmaa mite kha a duh thlawt lovin ka hria, a bialpa khan a duh em mai mai zawk a!

Chawhnu lam her a ni leh tawh a, kawr ka ṭhui mawlh mawlh lai chuan phone call ka dawng a, ka fate Miss aṭangin a lo ni daih thung.

Home work an thiam lo emaw ni dawn chu le ka ti rilru nghal a, an thiam vek chuan ka hre tho si. Class test-ah an fail a nih ka ring leh a, mahse fail tur khawp chuan an thiam loh ka hre si lo, ka fate Miss-i’n min lo call chhan awm ang tur chu ka hre thei miah lo.

“Hello” ka thil ṭhui lai chawl datin ka ti a, min rawn call ngai loh avangin tlemin ka aw ah chuan mak tihna a awm maithei a ni.

“Lalrinnungate unau nu a ni mial em le?” an Miss aw chu ka beisei lo lam daih a ni!

“Aw ni e, an nu ka ni e. Enge nita?” ka lo ti ve thuai a, class test-ah an fail a nih chu ka ring ru ta ber.

“A pawi ka ti khawp mai ka pi, i fapa hi motor in a su palh hlauh mai a, tunah hian Aizawl Hospital lamah kan inphur phei mek a, lo kal ve nghal mai rawh aw” a thu rawn sawi chuan min ti chi ai vek a, a ṭawng pawh chu ka hre mumal tawh lo.

Ka ṭhutna aṭang chuan ka tho thut a, Hlimhlimi chuan min lo en nghal vat a, min biakna pawh chhang lovin ka kal chhuak zui nghal. Ka hmanhmawh em avangin Taxi chu ka phar nghal zung zung a, Hospital lamah chuan kan tlan phei nghal vat bawk.

Kan dawr awmna chu Bazar daih a ni a, kan tlan laite chuan ka hmanhmawh lutuk avangin tlan chak turin ka ti chhen a, ka awm mai mai thei tawh lo.

Ka kut chu ka hmer ngawng ngawng a, Hlimhlimi hnen aṭanga phone call ka dawn pawh chu ka pick up duh lo, a chhan chu ka fate chiah ka rilruah an awm tawh a ni.

Hospital chhunga ka luh rualin ka fate Miss chuan min lo be nghal vat a, thil awm dan a sawi chuan ka ṭhu hnawk. Ka fapa chuan thisen a lo hloh hnem ang reng hle a, doctor te chuan an buaipui zung zung bawk.

Motor-a ka fapa sutu hmel ka hmuh chiah mak tihna in ka khat a, ani ber kherin ka fapa a lo su chu ka thin a rim hle. A lam pan chuan ka phei phawk phawk a, rum takin ka melh ran a, ka hmel a hmu chu ani paw’n mak a tih ve hmel hle.

“I mit a del em ni? Nge motor i khalh thiam lo zawk? Ka fapa chungah hian thil ṭha lo tak a thleng a nih vaih chuan ka en liam mai mai lo vang che tih hre rawh” ka ti hlawk hlawk a, tumah zahpah ka nei tawh lo.

“I fapa maw!?” mak tih hmel zet hian a rawn ti a, a zawhna min zawh chuan ka thin a tirim zual.

“Ka fapa a ni ka tih vek tawh khâ, i beng a ngawng em ni?” ka ti leh hrawk a, ka mittui chu a tling pam tawh.

“Tunah hian naupang hian thisen a mamawh nghal a, chuan a blood group hi A+ a ni e. Kan tih thuai thuai chuan a taksa tan pawh a ṭha zawk ang, tu nge pe thei awm che u?” Doctor chuan a rawn ti a, kan lo en nghal ṭhap.

“Keimah, keima’n ka lo pe ang, A+ ka ni alawm, khawiah nge ka lo” ka bula mi’n a tih thuai thuai lai chuan

“A ngai bawk lo, i thisen kha ka fapa hian a dawng hauh lo vang” ka ti vin tuar a, ka mittui chu ka biangah a luang thla zui nghal bawk.

“Ka pi, tunah hian thisen kan pek a hun tawh lutuk, ani loh chuan thil pawi a thleng palh zawk mai ang” Doctor chuan a rawn ti leh a, ka phone phawrhin ka chhungte chu ka be ta thuai.

Aw phelh phangin thil thlen dan leh thisen kan mamawh dan te chu ka hrilh a, Hospital lam an lo pan nghal tur thu an sawi a, ka bula mite chuan min en ṭhap ringawt.

“Thisen chu keima’n ka lo pe ang Doctor, kal rawh ka lo zui ang che” ka bula mi chuan a rawn ti ram hmak a, engtin nge chutiang thu chu a la rawn sawi ngam zawk reng reng ni!

“I thisen kha ka fapa hian a dawn ka phal bawk lo LALRINAWM” ka ti tuar a, mahse ani chuan Doctor chu a kal sawnpui nal nal a, ka thusawi chu a ngai pawimawh duh lo hrim hrim.

Ka fapa leh Lalrinawma thisen chu a inmil dawn chiang tih ka hria, a chhan chu ka fapa pa chu tu dang ni lovin amah ngei a ni.

Chapter 2

Eng vangin nge tunah kher ka mit hmuhah a rawn inlan leh? Engati nge khang kum 8 liam ta chhung zawng khan biak khat pawha min rawn biak ngai loh? Engati nge ani ber kher hian ka fapa a lo sut reng reng?

Theihnghilh tumin kum tam tak ka bei a, ka theihnghilh theih miau loh avangin ka beidawng a, a tawpah amah hre reng chunga nun dan ka zir a, ka thiam chho ve ṭan chiah tihah ka hmaah a rawn inlan leh si. Hlimna tluan tling ka neih hi a rem ve thlawt lo zawk em ni?

Ka tum ve nasa asin, a tel lo khan hlim ka tum ve nasa lutuk, ka fate vang tal pawhin hlim luih ka tum ṭhin, mahse ka chhungril nun chuan hlim tak takna a pawh thei chuang lo.

Ka fate pahnih Bawihtei leh Bawihpuia te paw’n an pa chanchin min zawt fo ṭhin a, mahse ka sawi duh ngai lo. An pa chu a thi nge a dam tih ka hre tawh bik lo va, hriat pawh ka duh hek lo.

Ka sawi duh loh avanga han lungawih loh bung bûng changte chu nei ve mahse an lungawi lo rei ngai hran lo va, ka pa phei chu a thin a lo rim thei khawp. Kum 8 chhung zet pa an neih thu hrilh lovin ka enkawl tawh a, kumin hi pa tel lo va kum 9 ka enkawlna tur a ni nghe nghe.

Ka chhungte phei chuan ka luhlul lutuk avangin ngaiah min nei tawp tawh zawk a, ka sawi dawn chuang lo va an hriat avangin ka fate pa chu tunge a nih tih lam min zawt ngai tawh lo.

Doctor leh Lalrinawma te min hnung chhawn zawnga kal chu ka en tlawk tlawk a, room chhunga an luh hnu thlengin ka en ngai chu ka la en reng a, ka ngaihtuahna chu a nû vek hian ka hria.

Ka phone chu ri râl ral mahse ka rilru a dik loh vek tawh avangin pick up ka tum buai lo va, tunah chuan tumah biak châkna reng ka nei lo.

Ka fapa Miss erawh a lo inthlahrun hmel hle a, a hmel aṭang chuan kei aiin a naupang dawn tih ka hre nghal. A thu kimki chawih a, kei lah thinrim takin ka ngawi reng bawk si, ka bula awm chu a nuam lo ve ngawt ang.

“Engtin nge ka fapa hian accident a tawh theih?” a bula ṭhu thla chung chuan ka ti a, ka aw chu a la dik thei chiah lo, pangai taka ṭawng tur pawhin ka thei lo a ni.

“Ka hre bik lo ka pi, a ṭhiante khan min lo hrilh thuai a, chuta ṭanga hre ve mai chu ka ni” nuam a ti bik chiah lo tih chu a hriat hle a, chutiang bawkin ka rilru a la pangai thei lo tluang zel.

“A mak ka ti hle mai, ni dangah pawh ṭha takin a rawn haw mai zel a, hetiang hian accident a tawk ngai lo” ka mittui chu a rawn hnam ṭan a, nu tan chuan rilru natna chi a ni lovin ka hre lo.

“A pawi ka ti ka pi, vanduaina vang liau liauin i fapa hian accident a tawkin ka hria. Accident a tawhna ka zu thlen chuan nichina thisen pek tumtu pa khan a lo buaipui mek a, a nu emaw min tih a nih ka ring ngaihdam kha min dil nghal mawlh mawlh a, thisen vel ka hmuh khan kei pawh ka buai vek” a thaw deuh hawk hawk a, thisen nen ka fapa chu hmu ve ta ila chuan engmah ka tih theih ka ring lo.

“Motor-ah khan kan hlang vat a, Hospital hnai ber kan panpui ta tawp a ni. Hospital kan thlen pawh khan ka chet ngai lovin amah vek khan a buaipui a, a inthiam lo ve hle chuan ka hria” a rawn ti leh sep sep a, ka rilru hah lutuk tur chu thlamuan a tum a ni ber.

Chutia thil thlen dan kimchang min hrilh lai chuan ka chhungte an lo thleng a, an rawn hlauthawng nghal hle a, ka u pawh a lo kal tel ve bawk.

Ka fanu Bawihtei chu ka lamah a rawn phei vat a, ka lo kuah thuai a, lungngaih hmel pu lo mahse a hrilhhai hmel hle thung. Ka u nupui erawh a rawn lang ve lo va, a buai a nih ka ring mai.

Ka pa chuan thil awmzia min zawt a, mahse ka chhan ngai lovin ka fate Miss chuan a lo sawi zung zung. Ka nu chu a ṭap titih nghal a, kei ang bawkin a mangang ve a ni.

Thisen an pek mek thu chu ka hrilh a, kan chhungkuaa ka fapa blood group ang nei kan awm lo chu hrehawm ka ti, chutah ka mihring huat ber thisen a dawn a la ngaih phah zui.

Darkar chanve hnu velah Lalrinawma chu room aṭangin a rawn chhuak a, ka bula ṭhu ka fanu chu a rawn melh nghal chat.

A hriat hlau takin ka fanu chu ka ṭhut hliah hmak a, a hmelah chuan mak tihna a awm nghal. Inngaihtuah chhuak thutin ka ṭhut dan chu ka siam ṭha a, hlauh tur nei niin ka inngai tawh lo.

Hlimhlimi hnen aṭangin phone call ka dawng leh a, ka fapa in accident a tawh thu ka hrilh chuan pawi a lo ti ve hle. Kan pi min hrilh sak mai tur chuan ka chah nghal a, Hospital-a lo kal ve nghal a tum thu a sawi hnu chuan kan inbiakna kan titawp zui nghal bawk.

Ka chungte chuan kan sira mipa ding ve reng chu an zeuh zeuh a, tu nge a nih an hriat miau loh avangin an be hran lo.

A ban dawm chungin ka fanu bawk chu a rawn en leh a, a naupang sut leh ka bula mi chu phir an ni tih a hrethiam ta a ni ang rei pawh a en tawh lem lo.

“Min lo hrethiam teh u, kei hian in fapa hi ka lo su palh hlauh mai a, a pawi ka ti khawp mai” ka pate bula ding chung chuan a rawn ti ta ngei a, kan lam pana a lo kal lai khan eng emaw tak a sawi ka ring reng a ni.

“Engtin nge i sut theih zawk!?” u Mawia chuan a rawn ti nghal phiar a, a kut pawh a hum ruh ṭha hle a, insual inpeih nghal ât ang vel a ni.

“Insum teh Mawia, naupang chhia pawh i nih tawh loh kha!” tiin ka pa chuan u Mawia chu a lo zilh vat a, Rintea erawh a inthlahrun hmel kher mai, nge ka hmu sual zawk.

“Thil thlen dan min han hrilh chiang teh? Zu i rui em ni? Kan tupa hi i sut tur takin a rawn inbarh chu ka ring chiah lo, a chhan chu kawngpui kan dan tur pawh ṭha takin kan zirtir thlap ṭhin a ni” ka pa aw chu a nem hran lo va, mahse thinrimna pakhat mah a lang chuang lo.

“Ka thiam lo tak zet a ni ka pu, min hrethiam teh u. Amaherawhchu zu ka rui lo tih min hriat sak ula, tihpalh a nih rualin ka fimkhur tawk lo ve bawk a ni. Phone be chung khan ka khalh a, ka lo hmanhmawh ve deuh bawk nen motor pakhat ka tlan pelh rual khan ka su palh ta a ni”

“FIR ka theh lut dawn khawp mai LALRINAWM, mi lak tlak loh tak i lo la ni tluang zel e” ka aw chu a vin ṭhak a, ṭawng ka tum em em pawh a ni lo, ka ṭawng chhuak thut a ni ber.

“He pa hi i hmel hriat em ni Puii?” ka pa chuan a rawn ti nghal a, mi dang pawh chu ka lam an lo hawi ṭhap a, mahse ka fapa sutu nena kan inhmelhriat dan chu sawi vak ngaihna ka hre lo.

“Ni e, ka hmel hriat satliah mai a ni e” ka ti salh a, ka ṭawng dan chu a ngaihnatawm loh hle bawk. Ani chuan min lo en ran a, inthiam loh hmel tak a pu ve vel a nih chu!

“U Mawi, Police Station lamah min va kalsak mai teh” tiin ka u chu ka hrilh zawm zat a, chiang takin Lalrinawma nen chuan kan inmelh ran a, a tihsual man chu tuar ve ngei se ka duh a ni.

“A ṭul rih lo ve, Bawihpuia dinhmun hi ngaichang phawt ang” ka pa chuan a rawn ti thuai a, u Mawia pawh kal tum deuh ûk tawh chu a kal leh ta lo.

A tua mah chu kan ṭawng leh tawh lo va, chutah Lalrinawma chu ka bul hnaih takah a la rawn ding zui. Ka fanu chu hliah pawh ka tum buai duh ta lo va, a hriat chhuah theih tura awm pawh ka tum lo.

Phone hian mi tu emaw ni a bia a, kan bul lawka ding a nih avangin an inbiak dan zawng zawng chu ka hre vek thei.

An inbiak zawh chuan a ngawi reng a, kan ṭhutna bul lawka a din ve tlat avang chuan ka zam a ni. Ka zam ru tlat chu mak ka ti a, keimah leh keimah ka inhau ru mawlh mawlh bawk.

Ka awm dan chu ka hrethiam lo, a lam hawi chhovin a hmel hmu lo mah ila min en reng ang tlata hriatna ka nei a ni.

Bawihtei chu nghet takin ka kuah a, ani paw’n min ngheng ve chial a, Lalrinawma chuan a fanu a ni tih a hriat chhuah ka hlau ta ber.

A hriat chhuah vaih chuan ka lak aṭang ka fate chu lak bo a tum ngei dawn tih ka chiang, a chhan chu mi luhlul leh thu duh ve tak a ni tlat.

Kum 1 pawh inngaizawng tling lo ni mah ila a zia tam tak chu ka hre ve hman a, a hun lai kha chuan ka hre chiang em em tawh zawk emaw ka ti a, mahse mahni hming pu zo lo tak mihring a ni tih ka hriat chhuah kha chuan thil a kal buai vek hman tawh.

A hmel chu ka mitthla let vel a, nupui nei tawh hmel a pu deuhin ka hria, a lam hawia ho chhoh lah chu ka tum lo bur. Duh leh nupui chu nei daih rawh se, kei leh ka fate hian kan mamawh chhe te lo.

An nu kei ka awm a, putea an nei a, pi leh pu fel tak an nei bawk a, ka fate hian amah ang mihring lak tlak loh hi pa atan an mamawh reng reng lo.

Ka thil ngaihtuah avang chuan ka thil hmuh a phe ruai a, ka mittui chu a tlak mai loh na’n ka khap let vat a, ka pa chuan min lo la en reng zui. Ka fanu chhip samah chuan ka fawp deuh chhen a, a unaupa chu a ngaihtuah ve hlein ka hria.

Darkar 2 a ral hnu chuan Doctor hmel kan hmu a, hlawhtling taka ka fapa an zai thu min hrilh rualin a dinhmun chuan min tilungngai tak zet. Ka fapa ke ding lam ruh chu a tliak a, a lu ah hliam a nei bawk.

A kea thir an phum nghal thu Doctor chuan a sawi leh a, chutah ka fapa ke aṭang an thir phum chu kum 1 hnuah chauh an la la chhuak dawn zui, ka rilru chu a na tak zet a ni.

Senso ngai vel leh a enkawl dan tur chu Lalrinawma chuan a lo zawt zung zung a, ka fapa harh hun tiamin, Doctor pawh chuan darkar 4 emaw darkar 5 emaw hnu velah chauh a harh a rin thu a lo sawi ve mai bawk.

“Ka tihpalh tak zet Nunpui” ka dara a kut nghat chungin Lalrinawma chuan a rawn ti thum chhal a, ka hming ngeia min koh avang chuan ka thin a rim ta.

“Min khawih suh, min khawih miah suh LALRINAWM” ka tih vin tuar avang chuan a kut chu a la sawn vat a, ka mittui chu a rawn tla zui nghal. Amah avangin ka chhe vek tawh a, tunah amah avang bawkin ka fapa in a tuar leh a, ani hi kan tan chuan chhiatna thlentu mai a ni.

“I fanu hriatah au vak vak ṭhin suh Puii, chuan nang pawh kha i fimkhur loh man hi i hmuh ve ngei a ngai ang, FIR kan theh lut emaw thil dang kan ti a nih pawhin sawisel miah suh, tlema tlemah nunna i la lo chauh zawk a nih hi!” ka pa chuan a rawn ti ram hmak a, a thusawi dan chu ka pawm zawng tak a ni.

“Tunah erawh i chungah engtin nge kan chet dawn tih a la chiang thei lo, thinrim lai ni lovin kan rilru a pangai hunah kan sawi chhunzawm leh ang” ka pa bawk chuan a rawn ti leh a, ka bula mi erawh a ngawi ran thung.

“Kut ka thlak châk hle mai che” u Mawia chuan a rawn ti tawl a, Doctor ber a awm tawh lo bawk nen kan boruak chu a ṭang ṭha hle.

“Mawia!!!” tiin ka pa chuan a lo khap vat a, u Mawia erawh ka pa’n en deuh hrawk mahse a la thinrim hmel ngâng a ni.

“Awm lo la chuan saw pa saw ka hnek chiang viau ang ka pa, a fimkhur loh lutuk avangin Bawihpuia pawh a kal ṭha thei tawh dawn lo asin” u Mawia rilru tur chu ka hriatthiampui khawp, a chhan chu ka fate’n pa ang tak taka an en chu amah chiah a ni tlat a tin ni!

“A hmel pawh saw ka hmu reng peih rih lo, ka insum thei lo palh ang” tiin ka bula ṭhu Bawihtei chu a rawn kai a, khaw’nge a kal pui dawn tih erawh kan hre lo tlang hle.

“A pawi ka ti khawp mai ka pu” Lalrinawma aw chu hmâna ka hriat ang kha a ni tawh lo, a aw aṭang chuan a inchhir ve hmel tak takin ka hria, mahse ka hre sual leh tho ang, ka hre chiang ngai hleinem, hriat chian pawh ka duh tawh lo.

“Ni e, a pawi khawp mai, fimkhur deuh la chuan hetiang em em hi a thleng miah lo vang” tiin ka pa chuan a melh ran a, tumah chu kan ṭawng leh tawh lo.

Ka nu chu ka bulah a rawn ṭhu thla a, ka kut chu min hnem a tum tih hriat takin a hum zui nghal bawk. Kei erawh ka la pangai thei meuh lo, ka rila rah ka fapa ngei chu ni khaw hre lovin a awm a, pangai thei ka ni lo hrim hrim.

Rei lovah ka pa chu a kal sawn ve ta daih a, ka nu leh kei leh Lalrinawma chauh chu kan awm ta. Ka fapa ngawr ngawr chuan ka rilru leh ngaihtuahna a luah a, Hlimhlimi hmel ka hmuh hlawl avang chuan lawm tak ka ni.

Kan bulah rawn ṭhu thlain thil thlen dan kimchang min zawt nghal zung zung a, ka nu chuan a lo hrilh ve mai bawk.

Ka fapa Bawihpuia a rawn harh chuan khua a thim vek tawh a, min thihsan lova a awm ringawt pawh chu ka lawm, mahse ka lawmna erawh a famkim chuang lo.

Lalrinawma’n ka fapa a en duh lutuk chu ka ngaih a ṭha lo, a hre chhuak mai ang tih ka hlau ru ngawi ngawih. Bawihpuia chu kan kil ṭhap a, a taksa na vel avang chuan a ṭap feih feih bawk.

Tihnat belh hlau em emin ka kuah a, ka awm lohna lamah u Mawia’n a ṭawng thlamuan char char bawk. Nurse pakhat chuan chim huai huai lo turin min rawn ti thuai a, kan bawr hnem ve bawk em a ni. Ka mit taka min lo en zeuh pahin Lalrinawma chu a chhuak a, a rualin Hlimhlimi pawh a chhuak ve nghal.

A taksa vel na a la tih em avangin Doctor chuan Bawihpuia chu a chiu muhil leh tawp a, ka khawngaih lutuk avangin ka ṭap chhuak ta nge nge. U Mawia chuan room aṭangin min kuah chhuak a, ka awm dan avangin mi dang chu an lo chi ai hman hle.

U Mawia’n thil awmzia a sawi chuan min hnem nghal mawlh mawlh a, mahse ka thlamuan phah teuh lo, ka nat zual phah daih zawkin ka hria, ka tan chuan hahdam taka awm a harsa ve em a ni.

Hlimhlimi chuan min ṭhutpui deuh chawt a, biak erawh min be tawh lo, ka rilru tur a hre chiang thawkhat te pawh a ni ang.

Kan ngawih ṭhap laiin nu pakhat leh tlangval pakhat hi an rawng hlawl a, Rintea chuan a lo be nghal vat a, thil awmzia sawi pahin kan lam chu a rawn hawi zeuh zeuh bawk.

Chutah chu nu chuan kan ṭhutna lam chu a rawn pan a, ka nu leh pate bulah chuan a fapa aiawhin ngaihdam a rawn dil mawlh mawlh a, inanna an nei deuha ka hriat avangin chu nu chu Rintea nu a nih ka lo ring sa hrim hrim.

Puitling tih takah ka nu leh pate chuan hawihawm takin an lo titi pui luam a, Rintea bula ding tlangval la naupan hmel tak chu a nau a nih ka ring nghal ringawt bawk.

Rintea nu chu ka lamah rawn phei lehin ka kut chu a rawn vuan a, ngaihdam min dil zui nghal a, lo chhan dan tur pawh ka hre mai lo, ka hamhaih rualin ka rilru a la na ru reng.

A mawiah tiin inthiam lo lutuk lo tur chuan ka ti ve ta tawp a, Rintea nu thiam loh chu a awm lo tlat a ni. A thiam lo zawk Lalrinawma paw’n ngaihdam min la dil lo va, a tihpalh thu sawi mahse ngaihdam dilna awka pakhat mah ka la dawng lo.

Eng vanga ngaihdam min dil tura lo ring reng reng nge maw ka nih le? Ani te chuan kan inngaihzawn lai pawhin ngaihdam dil harsa a tih ber ṭhin thu a sawi tak alawm, ka lo ngaihtuah tawi hle mai.

“Bawihpuia a lo harh leh tawh an ti Nunpui” Hlimhlimi’n a rawn tih chuan ka harh zawk a, Rintea nu min vawnna pawh ngaihsak lovin ka tho nghal vat.

“Lut ang” ti deuh tlawngin ka fapa awmna room lam chu ka pan hmawk hmawk a, mi dang chuan min lo zui ve mai bawk. Room chhunga ka luh chuan ka thaw a ipik zual, ka fapa chuan min thihsan em lo mahse ka awm a nuam thei ngang lo.

Min hmuh rualin ka fapa chu a rawn ṭap leh nghal ringawt a, ṭap tawh lo turin ka thlem thuai thuai a, a ṭap bang ve leh mai.

Thil hlimawm leh a rilru tidanglam thei chi hrang hrang ka sawipui a, tlang takin a ke a nat thute chu ka hrilh melh melh a, mahse ruh tliak ang zawngin ka sawi lo thung.

Na satliah leh dam leh thuai thei angin ka sawi tawp a, a hmuhah hlim hmel pu mah ila hrehawm ka tih dan chu pui tak a ni.

Nurse an awm lo chiah tihah mi dang chu an lo lut ve nghal a, Doctor sawi angin ka fapa chu chim huai huai lo ila ka duh hle.

“Ehêeeeee” rawn ti hluai tu Rintea nu chu kan en ṭhap a, ka fapa chu a la en chiang em em leh nghal. Amah tih loh chu ṭawng kan awm lo va, a rawn ṭawng chhuah dan teh thut chuan min ti hamhaih vek a ni.

“Ka tih awmzia chu i fapa kha a hmel ṭha hle mai ka tihna zawk, lo dam thuai thuai rawh se. Mama, i pa khan thil min chah thut a, inbe lawk teh ang” ti bah nuaiin a chhuak zui nghal daih a, a awm dan chuan ka ngaih a tiṭha lo, Rintea lah chuan a la zui chhuak hmak zui.

“Ka zun a chhuak em mai ka va zung lawk” tia chhuanlam siamin Rintea te nufa inzuina lam chu ka pan thuai a, Rintea nu hmel buai vek khan hlauhthawnna min pe a ni.

Room pawn ka thlen chuan ka zawng kual nghal a, in hnuai lam pana an chhuk thla ka hmuh rualin ka zui ve nghal bawk.

Ka chet dan chu a mawi lo tih ka hria, mi ṭawng ngaihthlak ruk tuma ka awm ringawt chu dik ka ti bik lo, mahse ka hlauhthawn nasat em tawh avangin an ṭawng ka ngaithla lo thei si lo.

In hnuai ka thlen thlak chuan pawnah an lo ding dun a, an hmuh theih lova awmin ka ding ta reng.

“Enge ka pa chuan a chah che a? Ka hman viau lo asin, ka naupang sut hi a ngaihtuahawm phian leh nghal” pangai tak hian Rintea chuan a ti a, a aw chu hmana ka Rintea chiah chiah kha a la ni.

“Enteh Mama, dawt ka sawi tawp a nih kha!” a nu thusawi chuan ka beng a verh nghal zar a, enge a sawi tum chu hriat ka châk zual sauh.

“Mâw? Enge i sawi awmzia? Engati nge dawt i sawi? Thil min sawipui duh i nei zawk tihna em ni?” Rintea awah chuan mak tihna a awm ve tho a, a nu awm dan chu a ring lawk bik lo te pawh a ni ang.

“Aw, ni chiang e. Naupang kha, kha naupang nen khan in va han inang em em ve le, a hmel ka hmuh tirh khan ka buai vek alawm, nang lah chuan nupui i la nei der bawk si lo, mak ka ti em avangin ka ko hrang tawp che a nih hi!” ka hlauhthawn ang ngeiin Rintea nu chuan a rawn ti ta, ka lung chu phu rang tawh tak a ni.

“I sawi ho em mai ka nu, fa ka la nei lo tih chu i hriat chian em khâ" Rintea chuan a lo tih khum hmak a, ani tan chuan Bawihpuia chu a fapa a ni tih hriat ngaihna a awm lo.

“Ka hre tawh bik lo Mama, naupang hmel ka hmuh khan ka buai vek tak tak alawm, i naupan lai chiah chiah a ni. Hmeichhe naupang nen pawh khan in inang ka ti tawh a, mahse a pa ni awm takin a chelh reng avang khan ngaih ṭhat lohna em em pawh ka nei lo. Room chhunga mipa naupang hmel kha chuan ka thinlung hi a dek zar asin, hmeichhe naupang nen khan phir an nih ngei ka ring bawk”

“Chutianga kan inan em em pawh ka lo hre lo, inang chu inti ve deuh tho mah ila anni nen khan inzawmna kan nei ringawt hleinem ka nu. Ka kal mai dawn, bill vel ka va pek lawk sak vek ang e, chuan ka chungah eng pawh ti se lo thinrim miah lo vang che”

“La kal lo teh, ka phone-a i naupan lai thlalak tal hi han en ve leh mah teh Mama, ka inhrethiam tawh bik lo, engati nge kha naupang kha i naupan lai ang chiah chiaha ka hmuh le, kei chu mak ka ti em mai” ka kut chu ka hum ngar ngar a, Rintea ṭawng ri chiah chu ka ngaichang tawh.

“Hei kher chu!” a ti sup a, ka rilru mangang leh hlauthawng chuan thawm ka siam mai ang tih ka hlauh avangin ka kal sawn ṭhêm ṭhem a, an awmna ka hlat chinah chuan a ranga rangin ka tlan nghal.

Room ka thlen chuan ka fapa kut chu ka chelh ran a, tuma’n min laksak ka phal lo.

Chapter 3

Room chhunga Rintea leh a nu an lo luh leh lai chuan ka lo melh kar a, ka fapa kut chu ka vuan ran bawk. Rintea chuan kei ni lovin ka fapa zawk chu a en reng a, a hma ai zawngin a en chik leh zualin ka hria, ka ngaihbel pawh a ni lo, ka fapa chu uluk takin a en chiang a ni.

Chutiang bawkin a nu pawh chuan ka fapa chu a en chik a, a fapa fa ni eng ang mahse ka lak aṭang engtikah mah an la bo chuang lo vang, ka thih phah dawn pawh ni se ka thi mai ang.

A nu erawh chuan rei a en lo va, a chhan pawh rum taka ka lo melh reng vang a ni. Rintea ve thung chuan a mit a la la sawn eih lo, kei paw’n amah chu ka lo la melh ve ran bawk.

Doctor chu a lo kal hlauh a, ni lo se chuan ka ṭawng chhuak chiang khawp ang. Doctor chuan kar 1 vel damdawiina kan awm rih phawt a ngaih thu a sawi a, ka fapa chu ka khawngaihna a zual.

A zirna lam ni se a buai vek dawn a, chutianga pawl sang tak a la ni lo, mahse a ṭhiante aia a hnufual tur chu ka ngaingam lo a ni. A tawrh ai chuan tawrh theih ka châk a, nu hmangaihna avangin fate tan chuan engmah tih hreh ka nei lo, ka keruh chu tliak zawk se ka ti ngawih ngawih.

Kei chuan a tawn ang chu tawng ila ka tuar thei em em ang, mahse ani chu naupang mai a la ni a, a tan chuan a ke na chu a namai lo hle dawn tih ka hria a ni.

Doctor chuan damdawiin kan chhuah hnua Wheel chair hmang turin min hrilh nghal a, enkawl dan tur leh exercise lak dan tur erawh min la hrilh zel tur thu a sawi bawk.

Doctor kal sawn hnu chuan ka fate Miss chu ka bia a, inthlahrung lo turin leh haw tawh mai turin ka tih zawm zat bawk.

Ani paw’n min hawsan ve mai a, awm pui nghal ka tum avangin ka chhungte chu haw turin ka ti leh a, mi pahnih chauhin an awm pui theih dawn vanga haw tir ka ni.

Hlimhlimi min awmpui tura ka sawm lai takin Lalrinawma chuan ka fapa awmpui a tum thu a rawn sawi ta mauh mai, thinrim hmel takin ka en nghal hrawk.

“A ngai lo ve, va haw rawh” ka lo tih khum hmak a, Hlimhlimi chu a lo bangbo hmel hle. A awmpui ka duh reng reng lo, haw daih zawk se ka ti, ani ai chuan Hlimhlimi chuan min awmpui se ka ti fê zawk.

“Keimah vanga hliam nei a ni a, ka awmpui chu a ngai ngei ang” a rawn ti nghet ve charh a, ka fapa chu a harh ve reng bawk si a, a hriata inhnial ka duh loh avangin ka ngawi ta ringawt.

“Ka lo va haw zawk mai ang, mi pahnih chiah awmpui an phal bawk si” Hlimhlimi chu a inthlahrun hmel ta deuh a, Rintea lah chuan a lo melh ran a, chu chu a inthlahrunna chhan pawh a ni maithei.

“Nu” ka fapa min kohna avang chuan ṭawng ka tum tawh chu ka insum leh phah a, ka fapa lam chu ka hawi thla vat bawk. Ka fapa chuan min lo en reng a, ṭah chhuak deuh hmel hi a pu ran bawk.

“Enge Bawihpui? Na i nei em ni? I khawi lai nge na?” tiin a bianga dawm pah chuan ka zawt nghal zung zung a, a rawn ṭap chhuak nghal feih a, ka awm a tinuam lo leh ta vek.

“Ṭap suh le Bawihpui, i ṭah chuan Bawihtei khan a chhaih leh mai ang che, i enge na han sawi teh le” ka fapa tan chuan a na dawn tih ka hria, mahse ṭah tir loh dan ka zawn hram hram a ngai bawk si.

“Ka ke hi a na lutuk nu, a hrehawm” ka fapa chuan a rawn ti ṭuau a, ka lo ṭawng thlamuan nghal char char a, eng erawh a ang thei rih lo. A ke nat avang chuan a la ṭap reng a, mahse a ṭap ring hran lo.

“A tur a nih dawn kha, Doctor ka va ko ang e” Rintea chuan a rawn ti thuai a, room aṭang chuan a chhuak zui nghal. Hlimhlimi erawh a hmel hmuh tur a awm tawh lo va, a haw lai pawh ka hre lo.

Doctor chuan ka fapa chu a chiu muhil leh tawp a, ka fapa ka khawngaih luatah ka ṭap ve leh ta nge nge. Ka epah Rintea chu a ṭhu ve ran a, ka fapa hmel chu a en chiang thei hle.

A kut te chu a en vawng vawng a, a zir chiang ni berin ka hria. Min rawn en zeuh a, kei chuan ka lo en chiang hle thung, a hmelah chuan amah ang lo takin inthlahrunna a lang bawk.

A hmate kha chuan mipa inring tawk tak niin zamna pawh a nei ngai lo va, tunah erawh a hmelah chuan zamna tam tak ka hmu thei tlat.

Mi pawh en rei ngam lovin hmun dang chu a melh ta daih a, a awm dan vel chu ka hriat thin Rintea kha a ang lo tak zet.

Kum 8 hma lama Rintea te kha chu rilru khauh leh ngawichawi ve tak, mahni inring tawk leh thil ti mai mai ngai lo a ni a, amahah khan ka rinna zawng zawng ka nghat fai vek ṭhin.

A bula awm a thlamuan thlak lutuk avangin a bula awm chhung pawh rei lo ka ti thei hle a, a mi uap na lutuk avangin ka engkim tih kha a dik lo kual vek zel a nih kha!

Tunah erawh ka hmaah a ṭhu ran a, hmel hriat lo ang maiin kan awm a, motor in ka fapa su lo se chuan kan intawn leh kher pawh ka ring lo. Kum liam taa mi ang lo takin a hmelah chuan thil tam tak ka hmu a, a lo thau ve tawh hle bawk.

“Khawi suh!” ka fapa kut vawn a tum lai chuan ka lo ti hriam hraih a, min lo en rang hle bawk. Ka fapa a khawih ringawt tur chu ka phal lo, sik pawh si lo se, a hmel pawh hmu miah lo se ka duh a ni.

“A kut kha si miah suh ang che, a taksa hrim hrim i si tur a ni lo. Ka fapa a thih loh avang hian ka ngaidam che tihna a ni lo a nia, hre reng rawh” ka aw chu a nem lo hle a, ka fapa ber a muthilh leh tawh avang chuan ka insum buai duh tawh lo.

“I fate hi phir em ni?” a kut la thla zal zal chung hian a rawn ti a, a zawhna min zawh pawh chu ka chhang peih lo.

Mi â tak an ni te a nih ngawt loh chuan Bawihpuia leh Bawihtei te chu phir an ni tih a hriat ngawih ngawih, chuvanga a zawhna pawh chhang buai vel peih lo ka ni.

“Nunpui” ka ngawih reng avang chuan a rawn ti leh sup a, a lam ka hawi chuan min lo en reng bawk.

Chiang takin a mit chu ka en a, mahse ka en rei thei der lo zui. A hmai leh hmui vel chu ka en ta daih a, min koh dan chuan ka rilru a rawn tina thar leh tawh.

“Khatiang khan min ko suh LALRINAWM, ka hming khan min ko tawh miah suh, nang nena inhmel hriat nih pawh hi ka duh lo. Hmel hriat loh angin min be zawk rawh, kei paw'n nuam ka ti zawk ngei ang”

“I fapa ka sut vanga thinrim i nih rual hian thil dang vanga thinrim i ang ka ti” a thusawi chuan hlauhthawnna min pe nghal a, a nu'n thil eng eng emaw a lo hrilh ti tâng tawh bawk si nen ka hlauthawng lo thei lo.

“Min be tawh suh, ka be reng peih lo che” kha faka ka tih chuan min la en ran a, ka lo fimkhur tawk lo tih ka inhre chhuak nghal bawk. A lam hawi tawh lovin Bawihpuia muhil chu ka thlir a, ka rilruah erawh thil dang daih a awm.

“Khawiah nge i fate pa hi?” a zawhna avang chuan ka mittui a rawn tling nghal pam a, ka thunun hmain ka mittui te chu an lo chhuak a ni mah zawk.

A hmuh laia ṭah hlau takin ka mittui te chu ka khap let zawk zawk a, min en reng vang pawh a ni ang ka za mer merin ka hria.

“A tirah kha chuan mipa pakhat kha a ni dawn emaw ka ti hman a, mahse in inbiak dan vel aṭang kha chuan u a ni bawk si” ani ber kherin ka fapa a lo su chu a pawi, a pawi tak zet, su lo se chuan chutiang zawhna chu a kâ aṭang ka dawng hauh lo vang.

“Nunpui, khawiah nge i fate pa hi? Engati nge tun thleng thlenga a la rawn inlan loh? I fapa khum betin a na a, mahse a hmel reng hmuh tur a la awm lo" a rawn tih leh chuan amah chu ka fapa pa a nih thu sawi tawp ka châk thut a, mahse ka insum leh thuai.

“Engati nge min zawh chhen a? I lo buai ve na tur a awm miah lo, duh leh a lo kal ang a, duh leh a lo kal lo vang, lo buai ve tawh suh” beidawng deuh hian ka ti thluk awn duai a, ka mittui chu ka biangah a rawn luang thla zui nghal.

“Ka hre châk mai mai maw le, nge nia i pasal chu hnam dang mi a ni sia in inṭhen leh tawh zawk?” tiin min melh ran a, a thusawi awmzia chu pakhat mah ka hre lo. Thu tam a sawi miah lo, mahse ka chhungril chu a na nghal veng veng.

“Ka sawi lo angah ngai rawh, thil ṭul lo tak ka lo sawi chhuak mai mai a ni e. Bill hi ka pe lawk vek tawh a nia, chuan i fapa enkawlna tur zawng zawng pawh ka tum ang, a dam ṭhat leh hma chu!” a awm danah chuan inthlahrunna emaw zamna emaw pakhatmah a lang leh tawh lo, ka lo hre sual ngei a nih leh dawn hi!

“Tu nge ka pasal chu nia i lo hriat a?” hnam dang mi pasal nei anga min ngai chu ka ti thei ṭhak lo, ka thin a rim ru tet tet tawh. Ani thleng thlengin hnam dang ka ngaizawng emaw a ti ta chu ka la nâ, ka tawt pup pupin ka hria.

“Sawi ta che LALRINAWM” mi pawh chhang lova a ngawih reng avang chuan ka ti leh vak a, Cabin-a kan awm avangin zahpah tur ka hre lo. Ka fapa lah damdawi hmangin an chiu muhil daih a, a rawn harh mai mai dawn lo tih ka chiang.

“Thil awmze nei lo sawi hi a sawt lo, thil ṭul lo tak a ni” ka zawhna a pehhel zel chu ka hua, haw tak ka ni. Amah zawkin a rawn sawi chhuak a, ka pasal nia a lo hriat chu ka hriat ngei ka duh, mahse a sawi duh kher ka ring lo.

“Haw rawh” tiin ka ṭhutna aṭang chuan ka tho a, a lamah chuan ka kal phei nghal. Ka zawhna a chhang dawn lova ka hriat tawh avangin chutiang chuan ka che a ni ber, a hmel hmuh reng pawh chu ka duh tawh lo.

“Tunah hian haw nghal rawh, lo kal tawh suh. I pawi khawih ni mahse ka ngaidam angah che ngai tawp rawh, chuan i hmel hi kan chhungkaw hmaah rawn inlan leh tawh ngai lo vang che” tiin a banah chuan ka kai a, pawh thawh ka tum chu ka thei lo nasa a ni.

“Ka sawi tawh kha, i fapa hi keimah vanga hliam tuar a ni a, chuvang chuan ka awmpui reng ang” a rawn ti nghet charh a, ka ban chu na zet hian a phih thla hmak bawk.

“Inbe lawk teh ang” amah ka en tlawk tlawk lai chuan a rawn ti leh nghal a, ka banah vuanin min kai chhuak dawr dawr a, min thlah tura ka tih pawh chuan min thlah duh der lo.

“LALRINAWM” room pawn kan thlen chuan ka ti leh hrawk a, min vawnna kut chu seh ka tum rualin a lo thlah ve nghal. Rum zet hian min melh a, kei pawh chuan ka lo melh rum ve hle bawk.

“Lut rih lo teh” tiin room-a luh leh nghal ka tum chu ka darah a lo chelh chat a, min hmer na hle bawk. Ani nena sawi tur kan neih ka hre lo, inbiak rawt mahse biak chhan tur ka nei tawh lo.

“Min thlah rang rawh, inbiakna tur kan nei lo” thinrim taka ka tih chuan a hmai aiin ka dar chu a rawn hmer na a, ka ṭhen nghal sawk a, ka dar chu a hmer nat em avangin chhunrilah a thip vawng vawng.

“Ka dar hi i hmer na tak zet” a nat em avang chuan ka ti zawi sep a, ṭawng zawi hle mah ila ka thusawi chu a hria a ni ngei ang a thlah rang kher mai.

“Haw zawk rawh, min awmpui a ngai lo. Haw la, ka fapa pawh hi rawn ngaihven a ngai tawh lo ang” ka dar vei lam dawm pah chuan ka ti leh a, thinrim tak paw’n ka ṭawng peih tawh lo.

“Nangmah ka awmpui dawn hleinem che, i fapa alawm ka awmpui dawn, rei lotê chu inbe lawk teh ang” a rawn tih chuan rang takin room chhungah ka lut nghal daih.

“Nunpui, thil hrilh lawk che ka duh a nia” tia min biakna pawh chu ka hre lo der hmak a, a thil min hrilh duh chu eng pawh ni se ka ngaithla duh lo, ka tan ṭangkaina a awm dawn bawkin ka hre lo a ni.

RINTEA POV

Kawngka bul aṭang chuan Nunpuii leh a fapa chu ka en vawng vawng a, haw erawh ka tum hauh lo. Nunpuii chuan ka lam a rawn hawi eih lo va, ka thawm chu a hriat tho ka ring. A fapa kut chu a vuan reng a, a kun ngul a, a rilru chu a hah hmel tak zet.

Ngawi rengin ka phei a, ka ṭhutna ngaiah chuan ka ṭhu thla ve leh nghal. Biak chu ka tum deuh ûk a, mahse a kun tlat vang leh a rilru a dik rih loh avang chuan ka be leh ta lo.

Sawi pui tur chu ka nei chiang alawm, ka nu min hrilh lam pawh a ni lo, kan inṭhen hnua a hlim leh hlim loh chu zawh ka tum mai a ni. Kum 8 hnuah daih hmai chhanah ngei a hmel ka hmu leh a, kan inhmuh leh dan erawh a fuh teh chiam lo.

Ka fimkhur tawk loh avangin naupang pakhat keruh a tliak a, chutah chu naupang chu Nunpuii fapa a lo la ni zui. Haw san emaw ngaihtuah zui loh chu thil tih chi a ni lo, chuvanga awmpui duh tlat chu ka ni bawk.

Ka chhungte lam pawh ka hrilh lawk vek tawh a, anni paw’n awmpui turin min lo duh hle thung. Phone kaltlanga naupang pakhat ka sut thu ka hrilh tirh te khan pawi an lo ti nghal em em a, ka nu phei chu a lo hlauthawng hle a nih kha!

Ka hma lawka ṭhu chu ka en reng a, a changing a fapa chu ka en leh zeuh zeuh ṭhin. Ka nu’n ka naupang sut nena kan inan thu min hrilh aṭang khan ka ngaihbel dâwn dawn a, mahse awmze awm lo mai a ni. Khawvelah mihring tam tak kan awm a, chung zinga pahnih khat hmel inang awm te chu thil ni thei tak a ni.

A nihna takah chuan kei paw’n ka hmuh tirhin inang intih rukna ka nei a, a phirpuinu ni awm tak ka hmuh phei kha chuan mak ka ti leh zual. Amaherawhchu anni chu Nunpuii fate daih an ni a, kei nen inzawmna pakhat mah kan nei lo.

Thil pakhat mak ka ti deuh chu Nunpuii fate chuan Vai anna reng an nei lo, an pa Vai a ni awm reng si a, a mak ve ngawt mai. Chu ai zawnga mak ka tih leh bawk chu Nunpuii pasal hmel ka la hmu miah lo chu a ni, khaw’nge a pasal chu a awm ang? A fapa dam lovin damdawiinah a awm reng a, engati nge lan khat pawh a la rawn lan loh? Nge Nunpuii pasal chu a lo thi tawh zawk?

Kan boruak chuan hun kal tawh min ngaihtuah chhuah tir ta nge nge a, kei min phatsana Vai umtu Lalnunpuii chu ka hmaah a awm reng a, mahse biak khat pawhin min be lo hrim hrim.

A hun lai kha chuan ka thinlung leh tih tak zetin ka duh hman a, mahse ani chuan kei min kawpzui duh lovin a ei zawnna lama puitu leh ṭangkai em em Vai pakhat a kawp tlat a, ka hriat tirh te khan rilru na tak ka ni.

Dik tak chuan ka thiam loh pawh a awm ve tho, ngaihzawng nei reng chung khan kan inngaizawng a, mahse ka ngaihzawng neih lai chu duhna emaw pawh ka nei tawh lo, min zar buai chhen vanga hmeichhe dang ka melh ta pawh ka ni.

Chutah ka hmeichhe ngainat zawng leh duh zawng tak Nunpuii ka tawng a, kan ei zawnna lam a lo inang deuh reuh bawk nen duh tak tê khan ka duh ve a, kan inkawp rei pawh ka ring hman hial, mahse kum 1 pawh ka inzui ta lo.

Ka duh em avang leh min duh ve ema ka hriat avang chuan kan che sual ta reng a, amah hmu tura Bangalore-a ka zin chhoh chang chuan sex kan hmang ziah a tih theih.

Chutiang khawp chuan kan inkawp nghet ve tawh a, mahse min zar buai chhentu ka bialnu chu ka la thlah fel hlei thei chuang lo. Kei chuan ka ṭhen fel hmak tawh a, ani erawh chuan kan inkar tih tawp a lo la duh teuh lo.

Delhi-a awm ve tho a nih avangin kan Hotel thlennah te min rawn kal chilh tawp tawp a ching a, ka ṭhiante chu zu te a inpui hial ṭhin.

Ka hmeichhe kawp tawhah chuan ka la tihsual ber a nih ka ring, ka duh lo ni mai lovin biak pawh ka be ṭha peih tawh lo. A tawpa tawpah chuan a beidanwg ve ta hlauh a, ka lawm rilru khawp, mahse ka hlim chhung chu rei lo te a ni.

Ka bialnu nia ka lo hriat Nunpuii chuan Vai a ngaihzawn thu ka hre leh a, thla khat lai chu kan inbe miah lo nghe nghe.

A hnen aṭang chuan phone call ka dawng ṭhin ngei alawm, mahse ka ngaihtuahna a lo kal dik lo laklawh tawh bawk si a, a phone call pawh pakhat mah ka pick up duh ngai lo.

Kei Mizo tlangval hi ka tha a na, ka bialnu’n Vai min pansan avang chuan ka tha a na thlawt a ni. Amah ka duhna te leh ka vei em emna te chu paih bo tumin thil chi hrang hrang ka ti kual a, tlaivar ṭhak ṭhaka guitar perh leh recording tih te pawh ka nei ṭhin, mahse Nunpuii chuan ka rilru luah loh lai pawh a nei lo.

Thla khat zen zawn kan inbiak loh hnuah chuan hmaichhana hmu turin leh engkim zawt fiah vek turin Bangalore-ah ka thlawk chho a, mahse a hmel reng hmuh tur a lo awm tawh lo.

Ka rilru chu na ru reng mahse nat tir loh ka tum nasa khawp mai. Ka rilru chapona chuan zawng buai tawh lo turin min rawn ti nghal mawlh mawlh a, zawn buai vel chu ka tum ta lo reng bawk.

Ani aia ṭha hmeichhia ka tawng leh awm tho ang tihna rilru pu chung Delhi-ah ka thlawk thla leh a, mahse ka chhuk hnu pawh chuan Lalnunpuii chuan ka rilru a luah tlat tho.

“Nu!” tia lo au chhuak thut naupang chu ka melh vat a, a taksa chu a la na viau ang ka ring, ka inthiam lo tak zet a ni. Lo fimkhur deuh hlek ila, phone be chung te khan lo khalh chak lo ila chuan na a tuar miah lo ang maw le.

“Aw Bawihpui, na i nei leh em ni?” tiin Nunpuii chuan a fapa chu a lo be thuai thuai a, a fapa erawh a hmel aṭang chuan a pangai hmel tawh phian.

“Ka ril a ṭam nu” a fapa Bawihpuia chuan rawn ti ṭial ruai a, ka ṭhutna aṭangin ka lo tho nghal vat.

A hma daih khan ngaihtuah chhuak tur ka ni zawk asin, ni danga thil ngaihtuah kim viau ṭhin si kha ka ngaihtuahna ka hmang hlei thei tlat lo chu mak ka ti a ni.

“Eitur chu ka zu lei ang” tiin room chu ka chhuahsan a, zan tlai lutuk a la nih loh avangin Hospital bula dawr vel chu an lo la inhawng ṭhap a, dawrah chuan ka lut zui nghal.

Lays tih vel leh drinks lam pang chu ka lei nual a, tun lai naupangho ei tam ber nia ka hriat awmchhun a ni. Hospital chhunga ka luh dawn chuan ka hmel hriat pakhat hi ka hmu a, hmanhmawh ru viau mah ila ka ei zawnna lam kaihhnawih a sawi avang chuan ka titi pui ve leh ta duah.

Zaipawl lamin recording tih an duh avanga inbia kan ni ber a, kan Studio lama ka naute an awm tho avangin ka tel lo va an tih theih thu ka sawi a, mahse ka kut chhuak ngei lo chu a lo duh tlat lo.

Minute 15 vel kan titi hnu chuan ka khawihsak tur thu ka sawi ta tawp a, hmanhmawh takin Nunpuii te nufa awmna room chu ka pan nghal vat bawk.

“Ka lo thleng e” room chhung ka luh rualin ka ti a, Nunpuii chuan min lo melh rum ṭha khawp mai. A rilrua awm tur pawh ka hre thei nghal, tih thinrim reng chu nuam ka ti bik lo.

“Keima’n ka lo lei zawk lo kha ka inchhir, rilṭam takin ka fapa a awm tih hre reng chungin i rei lui tlat dawn tih hre lawk ila chuan i kal ngai lovin ka kal chiang ngawt ang” a rawn ti salh salh a, nuam lo ka ti zual.

“Ka hmel hriat pakhatin min lo bia a, ka ei zawnna lam pang a ni bawk si a, ka theih tawp chuan ka lo hmanhmawh ve e” pangai tak chuan ka ti a, tunah rih chuan a awm nem zawka ṭan rih a ngai.

“Keini min ngaihtuah lo hian i ei zawnna lam chu va buaipui rawh, i ngaihtuah kan ngai miah lo” a rawn ti leh deuh hmuk a, ka insum rei tawh bawk sia ka insum thei lo mai ang tih chu ka hlau a ni.

“I fapa hi keimah vanga na tuar a ni a, ka kalsan dawn lo ka tih tawh kha! Le, thil ei in ang aw Bawihpui” tiin a thusawi pawh ngaihsak duh lovin a fapa chu ka be ta daih a, Bawihpuia pawh chuan ka ei tur lei sak chu a lo ban ve mai.

“Nu, mumang mak deuh ka nei asin, ka mumang kha a mak lutuk, khatiang kha ka la hmu ngai lo” tui tih hmel taka thil ei chungin Bawihpuia chuan a rawn ti a, taksa na em em a nei tawh rih lovin ka hria.

“Aw han sawi la Bawihpui” a biang tuai zeuh chungin Nunpuii chuan a ti a, a ṭap reng ringawt chu ka hrethiam tawh bik lo, a fapa vang a ni tawh chiah lovin ka hria a, mahse a ṭan chhan tak ka hre si lo.

“Ka mumangah chuan apa ka hmu a, Bawihtei leh api leh apute pawh ka hrilh ve dawn, mak an ti ve ngawt ang” a fapa thu rawn sawi avang chuan Nunpuii chu a phu deuh zuk a, Nunpuii pasal chu a thi tawh tih ka ring thiam ta mai.

“Bawihpui tiin min lo ko a, chuan min koh ang chiah chiah khan min ko, in aw pawh a inang” tiin Bawihpuia chuan min lo melh chat a, ka lo nui ringawt, lo nuih loh chu tihtheih ka nei lo tlat a tin ni!

“I mumangah apa i hmu bik sia a nuam awm, apa chu thi tawh mahse vanram aṭang a lo thlir reng dawn che alawm” a biang tawk zeuh chung chuan ka ti a, ka ṭawng dan vel chu keimah ka ang lo ngawih ngawih.

“Apa chu a la thi hleinem, anu’n a thih thu a la sawi lo” a rawn ti ta kauh mai, Bawihpuia ni lovin Nunpuii chu ka en nghal vat a, Nunpuii chu a lo hawi sawn rang em em leh nghal.

“Thil kha ei rawh le Bawihpui” tiin Sprite chu Dispo-ah a thlit chhuah sak a, a tha a khur vel tlatin ka hria, ka hmu sual zawk nge ni! Ni lo, ka hmu sual lo, a zam chianh a ni.

“Bawihpui, khawiah nge apa chu a awm a?” ka zawt lo thei lo.

Naupang mai a ni a, a nu ang lo takin a pa awmna chu ṭha taka min hrilh mai ka ring, dik tak chuan mahni fate pawh ngaihsaka a awm loh avangin a pa chu ka dem rilru nghal hle.

“Ka hre lo, anu hian min hrilh duh ngai lo va, Bawihtei nen pawh kan zawt nasa thei lutuk” min chhan dan avang chuan mak tihna hlirin ka khat leh a, chutah Nunpuii chuan

“Hmel hriat loh hnenah ṭawng zuah zuah loh tur ka tih khâ Bawihpui” a rawn ti thuai a, sawi mai tur pawh ka hre lo. Nunpuii hmel chu ka en a, eng emaw dik lo chu a awm chiang alawm, enge dik lo tih lah hriat mai a harsa hle thung si.

“Ka hmel hriat alawm nu, ka mumangah pawh amah hi ka hmu” Bawihpuia chuan a rawn ti leh ta, chutah zet zawng thil dik lo a awm chiang tih ka man thiam leh zual tawh.

Ka nu thu min hrilh te chu ka ngaihtuah let a, Bawihpuia leh kei chuan inzawmna kan nei tlata hriatna ka nei zui nghal.

Chapter 4

NUNPUII POV

“Bawihpui!!! Khatiang i sawi zel dawn chuan i ke hi a rawn na vak mai ang, nute thu awih tur ka tih vek tawh khâ, engati nge i la sawi chhunzawm zel?” Rintea awm lai khera chutiang thu a sawi chu ka duh lo, a hre chhuak ang tih ka hlau a ni.

“Ka tihpalh nu, mahse apa kha ka vawi khat hmuhna alawm, min pawm bik asin” tih pahin a rawn ṭap chhuak hak reuh a, ka rilru na lutuk chu ka ṭap ve leh ta tawp. A mumang ringawt pawh a hlimpui a ni a, a pa dik tak hre phei se chuan a va hlim dawn em.

“Bawihpui, apa chu i la hmu ngai miah lo maw!?” Rintea chuan a rawn ti ve leh a, ka fapa chu a ngaihtuah hmel hle bawk. Chutiang lam pang hlir kan sawi ta chuan ka awm a tinuam lo tulh tulh a, khap daih theih lah an ni ringawt si lo.

“Aw, hmu ngai lo, ka mumangah chiah ka la hmu” ṭap ṭuau chung hian ka fapa chuan a ti a, ka ṭawng peih rih thlawt lo. Kan boruak hip mek chuan nasa takin min tichau a, ṭawng reng peih chi zia zâng ka ni lo a ni.

“Nunpui” tia Rintea min kohna pawh ka chhang duh lo law law a, ka fapa kut hum chung chuan ka kun vang vang a, an hmu theih si lovin ka lung chu a chhe ru tak zet a ni.

“Inbe lawk ila a ṭhat ka ring Nunpui” a rawn ti leh pawh chuan ka la ngawi reng a, chu bakah ani nena inbiak chu a ṭulin ka hre lo. A hnenah eng thil mah sawi lan emaw sawi chhuah ka tum lo, kei leh ka fate chanchin ngat phei chu!

“LALNUNPUI!” a rawn ti hriam hraih a, kei pawh chu ka hawi chhuak ve ta nge nge. Ka rilru leh taksa a chauh lutuk avangin thinrim tak pawhin ka en thei tawh lo, ka hmel aṭang chuan ṭawng ka peih lo tih a hriat vek ka ring.

“Inbiakna tur kan nei em ni? Enge kan sawi dun ang a?” ka aw chu a zuai raih a, ka rilru chhungril thinrim mahse ka aw chu a vin thei tawh lo. Tunah tak chuan ka eng tih mah a tho lo, tih châk pakhat mah ka nei lo hrim hrim zawk.

“Inbiakna tur chu nei e, sawi tur pawh a awm nual maithei, ka hriat sual loh chuan” a thusawi avang chuan ka en tlawk tlawk a, chutah rawn che phutin ka lamah chuan a rawn phei nghal ringawt.

“Min thlah teh, Bawihpuia hi kalsan ka tum hleinem, min be duh a nih chuan a muthilh hnuah min be thei ang” ka bana a vawnna thin thlak pah chuan ka ti a, ani pawh chu a ṭhutna lamah a phei ve leh mai.

“Bawihpui, i ke tih loh na dang i la nei em? I lute kha a la na em? Na i neih chuan sawi tawp rawh aw” tiin ka fapa chu ka be leh nghal zung zung a, a hmuh laia kan awm dan chu a ṭha lo tak zet, ka epa mi lah a ngawi leh reng tawh bawk si.

“Nu, engtikah nge Bawihtei te an lo kal dawn?” a rawn tih chuan zing lama an lo kal tur thu ka hrilh a, eng eng emaw ni sawi puiin thu hlimawm deuh deuh ka hrilh a, rei lotê hnuah a muhil ve leh ta thuai.

Zan dar 11 velah Doctor a rawn lut a, ka fapa dinhmun ṭhat leh ṭhat loh chu a rawn check a, a ṭhat chhoh ve zel thu a sawi chuan ka rilru a nuam huai thei.

Ka fapa keruh chu a dam na’n hun tam a ngai dawn tih ka hriat ve vek avangin beiseina ka nei sang duh lo law law rih a, a taksa danga natna em em a nei tawh lo ringawt pawh chu ka hlim a ni.

Ka fapa muhil bam sam chu ka chul hliau hliau a, a biangte chu ka fawp vang vang a, Rintea erawh room-ah a awm tawh lo thung. Room a chhuahsan lai kha chu ka hre ngei a, mahse enge a tih dawn tih ka hre lo.

Minute 10 hnu velah room chhungah a rawn lut leh a, a rim aṭang chuan meizial a zu tih ka hre nghal. Kan inngaihzawn lai kha chuan a zu ngai miah lo, ruih theih thil kaihhnawih hrim hrim a ti ngai lo a nih kha!

Tunah erawh hun leh ni a danglam a, ani pawh a lo danglam ta viau ni ang. Engati nge maw kei hian a chanchin hi ka lo ngaihtuah zui vak vak kher zel le, ka ngaihtuah a phu hauh si lo.

A duh leh meizial chu zu se, duh leh zu lo se, ka lo buai ve na tur pakhat mah a awm lo. Ka tan engmah a ni tawh lo va, a tan pawh engmah ka ni tawh hek lo. Ka fate pa a lo ni kher kher hi ka thin a rim, lo intawng lo tawp zawk ila a ṭha zawk ngei ang.

Amah avangin mipa dang reng ka melh theih tawh loh phah a, hmangaihna kawngah hian ka zuang lut duh tawh lo hrim hrim zawk a ni.

“Bawihpuia a muhil tawh bawk a, kan inbe thei tawh turah ngai ang” ka bula ding reng pah chuan a rawn ti a, ka fapa a koh dan chuan ka thinlung a khawih zak, a pa dik takin ka fapa hming a lam chu ngaiah ka la nei thei lo a ni.

“Sawi tur ka nei lo tih hre hmasa ang che” ti sepin ka ṭhutna aṭang chuan ka tho tharh a, en pawh en lovin kawngka lam chu ka pan nghal hmak.

Thawm aṭang chuan min lo zui tih ka hria, eng pawh sawi se ka inven fimkhur viau a ngai ang.

Room pawn ka thlen chuan bang nghengin ka thaw chhuak hawk a, hriat chhuah awlsam taka thil a thlen zung zung chhan chu ka hrethiam tawh bik lo, mahse ka fate pa chu tu nge a nih tih ka la zep tho ang.

A pa dik takin a hming ngeia a fapa a koh lai kha chuan ka insum hman lo, ka mittui a baw nghal zawih a, hmuh hlau em emin ka inhru thuai thuai a nih kha!

Chutah ka fapa chuan a mumangah a pa a hmuh thu a la sawi ta deuh deuh a, Rintea chu a mumanga mi nen an inan thute a sawi a, Rintea tan chuan rinhleh loh ngaihna a awm lo, mahse engti kawng pawhin a hre chhuak tur a ni lo.

Kei Lalnunpuii hian ka theih chhung chu ka fate pa dik tak hi ka sawi lang lo vang, Lalrinawma ngat phei chuan a hre chhuak tur a ni lo hul hual, a hriat chhuah vaih chuan buaina bak ka tawk dawn lo.

“Engati nge a i fate pa hi i zep tlat? I fate tal hi chu thu dik hrilh ta che, i fate pa chu Vai a ni tih i sawi zak leh si em ni?” a rawn ti chang fak fak a, ka ṭawng chhuak a nih chuan ka ṭah palh ka hlau, a hmuh laia ṭâh ṭah ka duh bawk si lo.

“Nunpui, min chhang teh” a rawn ti leh a, ka fate pa chungchanga a buai ve em em chhan chu ka hre lo, thu dik lo hre chhuak ta pawh ni se kei chuan engtikah mah ka fate pa atan ka pawm theih ka ring tawh lo.

“LALNUNPUI!” a rawn ti deuh hrawk a, ka dara a chelh lai chuan a phone a rawn ri ral ral a, a kekawr ipte aṭanga a phawrh chuan caller ID-ah hmeichhe hming a lo lang va va a, a bialnu a nih ngei ka ring.

“Hello” phone call a pick up rual chuan a ti deuh hmuk a, a ban leh lam chu ka lo nam sawn thuai a, min lo en nghal run. Kan indin hnaih em avangin hmeichhe ṭawng zet zet thawm chu ka hria a, a bialnu a ni tih ka chiang leh zual.

“Hman lo vang, zanin chu ka lo leng hman lo” tiin phone chu a hmet tawp hmak a, a betu tan chuan a va han nuam dawn lo tehreng em ka lo ti rilru vawng vawng.

Engati nge a thinchhiat tâk em em? A hma te kha chuan a zaidam viau khan ka hre si a, ni lo, a danglam tawh tak alawm maw le.

“Sawi rawh le” ka hma taka ding chung hian a rawn ti leh a, kei erawh ka lo thaw hawk ringawt. Ka fate pa chanchin bawk sawi turin min ti tih ka hria, mahse sawi mai dan tur ka hre hlawl lo a ni.

“Engati nge ka fate pa chungchang hi i lo ngaihven ve em em?” a mita en ran chung chuan ka ti sep a, a hmel chu a danglam nghal vek. Ka chhang thei mai rih lo, chutianga zawhna ka zawt let a nih loh chuan min man chhuak hma dawn lutuk.

“Ka hre lo, ni e, lo buai ve sek tur hi ka ni lo asin maw le. Engtin nge ngaihtuahna dang kha ka lo put theih zawk reng reng ni! I fapa pa hi chu Vai a ni dawn tih a chiang reng alawm, sawi duh lo mah la ka thiam lo lo che” a ngawih vang vang hnu chuan a rawn ti phawlh phawlh a, room chhung lama kal a tum lai tak chuan

“Ka fate pa hi Vai a ni lo, chu zawng chu ka sawi theih a ni. Ka beng hriatah leh mi dang hriatah khatiang khan tawng miah suh ang che, a chhan chu mi dang chuan a dawh mai mai dawn lo che a nia” ka ti chang fak a, a rawn hawi let rang khawp mai.

“A nih si chuan i fate pa hi tu nge? Bawihpuia khan a la thi lo a ti a, a la thih loh chuan engati nge a fapa tal hi a rawn ngaihven loh? Eng vangin nge ka hriat ngai loh leh vawi khat pawh ka la hmuh ngai loh naupang hian a mumangah chiang takin min hmuh?”

“Ka fapa in a mumanga a hmuh chhan che chu ka hre bik hauh lo, a hmu che a ni ve mai” ka tih chuan mit tizim sun hian min en a, ka thusawi chu a awih loh hmel khawp. Ka lo ṭawng leh kher kher chu a pawi, kal sawn a tum vek tawh asin le.

“Chu chu thuhran ni se, i fapa pa hi tu nge? A chhan ka hre lo Nunpui, Bawihpuia nen hian inzawmna kan nei tlatin ka hria, mahse engtin nge kan inzawm dan erawh ka hre si lo” a aw chu a hma aiin a khauh tawh lo va, a pangai viau tawh zawk.

“Bawihpuia pa chu a thih tawh, ani te chu a thi daih tawh” ka ning lutuk chuan ka ti hluai a, thawk ka la zui hawk a, zawhna chu min zawt tawh lo se ka ti ngawih ngawih. Dawt ka sawi tih chu a hria ang tih ka hlau, ka hlau ru ngawih ngawih.

“Bawihpuia’n a la thi lo a tih kha, i fapa leh kei hian inzawmna kan nei chiang em? Nangmah ngei hian min han hrilh teh, sex kha chu kan hmang dun fo hman a nih kha!” ka hlauhthawn ber leh ka chhan peih loh ber chu min zawt ta, chhan dan tur pawh ka hre tawh lo.

“Ka zawhna chhang rawh LALNUNPUI” ka ngawih reng avang chuan a rawn ti leh hrawk a, kei chu ka lo maimitchhing tawp, ka rilruah chuan enge awm ber pawh ka hre tawh lo. Hrilh tawp ila min hmusit zual dawn si, nep taka awm ka duh tawh bik hauh si lo.

“Lo kal teh” ti lehin min kai dawr dâwr a, ngawi rengin min tih ang ang chuan ka awm a, ṭawng châkna reng ka nei rih lo. Min hruaina hmun chu eng pawh ni se sawisel ka tum lo, ka tum lo pawh lovin ka sawisel buai peih lo zawk a ni.

“Ka nu khan i fapa a hmuh tirh hian kei nena kan inan em em thu min hrilh nghal a, mahse ngaih khatah ka lo ngai mai” hmun reh lai deuha min dinpui hnu chuan a rawn ti a, min vawnna chu ka thing thla nghal bawk.

“Chuan ka fapa pa hi i nih i inring deuh tihna em ni? Eng vanga inring ringawt nge i nih? Ka taksa chauh duha sex min hman pui tawh vang khan maw!?” ka ti ve ta salh a, ka dawhtheina in a tlin tawh bik lo.

“Ka hre bik lo, ka hmuh tirh kha chuan inang ka inti ru ve tho, chutah i fapa a lo la ni leh zel a, mahse i fapa pa ni thei hian ka inhre si lo. Ni ila chuan hre tur tak ka ni, Bawihpuia hmel leh mumang khan ka rilru a tibuai a ni”

“I fa a ni lo, ka fate pa chu a thi tawh. Min zawt tawh lo teh, ka kham lutuk tawh, ka fate pa hi engtikah mah i ni ngai dawn chuang lo” ka chhan dan avang chuan min en chik lehzual a, ka hawi sawn ta hmak.

“Dawt sawi suh Nunpui, i kut kha ka hmu emaw ti lo bawk la, dawt i sawi chuan i ti che reng zel a nih kha!” min hre chiang lutuk chu hrehawm ka ti, kei erawh chuan ka hre chiang ve hauh si lo. Ka kut reng reng pawh chu engati nge ka lo tih chet kher, ka ning lutuk!

“Ka kut ka tih chet leh chet lovah lo buai suh, ka danglam tawh, hmana i hmeichhe hriat a rinna zawng zawng a bialpa hnena nghattu kha chu ka ni tawh lo, nasa takin ka danglam tawh” ka tih chuan

“A teuh lo, i danglam miah lo, i hmel leh vun te chu danglam deuh tawh mahse i zia chu a la danglam ve miah lo zawk a ni” a rawn ti nghal thuai a, a thusawi avang chuan ka melh tlawk tlawk a, chutiang bawkin ani pawh chuan min en ve reng.

“Ka lut dawn, Bawihpuia a lo harh thut palh ang” tia ka kal chu min pawt let chiang kher mai. Na zet hian ka melh ral a, ani pawh chuan min en rum hle, mipa ve ve ni ila chuan kan insual tawh ngei ang.

“I kal ka phal ringawt hleinem, chuan thu kan la sawi zo lo bawk. Kei hi i fapa pa hi ka ni em? Engati nge ka zawhna pehhela min kalsan zel i tum? Chiang tak chhanna min pek i tum bawk si lo, a thi tawh tih ringawt kha chu ka awih hauh lo a nia” a rawn tih chuan ka thinin a tuar leh ta bik lo.

“Ka fapa pa i hre duha ti raw, Bawihpuia leh Bawihtei pa dik tak chu nang anga mi lak tlak loh a ni ve lo. Ka thusawi chu i hre chiang em? Bawihpuia pa hi i ni lo va, chutiang bawkin a unaunu Bawihte pa pawh i ni bawk lo, in hmel a inan avang ringawt khan inzawmna nei emaw inti suh” a âwma nam pawp chung chuan ka ti a, ka aw chu a nem lo hle bawk.

“Ka fate pa hi min zawt buai tawh lo vang che, min zawt leh a nih chuan ka fapa i buaipui hi ka phal tawh lo tak tak ang” ka ti leh nghal a, ka tha a khurh avangin ka aw te chu a dik lo vek. Ka mittui chu a rawn hnam ṭuam ṭuam a, ka ṭah a chhuak lutuk tak zet.

“Nunpui, ka” a rawn tih lai chuan ka ke ka per vak a, kum 8 liam taa min koh dan chiah chiaha min ko ziah chu ka ngaithei lo a ni. Ka nun hlui ka hre chhuak a, chu chuan natna bak min pe chuang der si lo.

“Khatiang pawh khan min ko tawh suh LALRINAWM, nang mi tenawm leh lak tlak loh khan ka hming hi lam ri tawh miah suh” ka ti lo ti vat a, kan awmna hmun aṭang chuan ka kal sawn ta vang vang.

Ka fapa awmna room lam chu ka pan mawp mawp a, hawi pawh ka hawi chhuak mang lo. Kalna kawng chiah chu ka en a, ka rilru chu a chawmawlh vek a ni.

Ka fapa avangin ka rilru a hah a, chutah Lalrinawma hmel ka hmu leh a, chu mai ni lovin ka fapa pa chu tu nge a nih min la zawt leh ta zel a, ngaihtuah tur a tam lutuk chu ka thluak a keh mai dawnin ka hria.

Ka hna lam pawh ka ngaihtuahnaah a awm reng a, ka thawmhnaw ṭhui mek te thleng chuan ka rilruah a awm a, ka chhunzawm theih pawh ka ring ta lo hial.

Room chhung ka thlen chuan ka fapa kut vuanin ka ṭhu kun ngul a, dawt ka sawi zawh chiah avang chuan ka inthiam loh rualin ka inthiam ru tho, chhan dan tur dang ka hre tawh thlawt lo a ni e.

Ka fate pa dik tak chu amah ngei a ni tih hrilh ngat ila chuan tun let hian thil a buai dawn, ka hre lawk sa vek.

Ka fate chu min chhuhsak ang tih ka hlau, naupang enkawl nuam lai tak an ni bawk si nen ka fate chu ka humhim tlat an ngai a ni.

Chu bakah ka thisen zawmpui te tak ngial pawh ka hrilh ngai lo va, chuta kara Lalrinawma ber kher lo hrilh chu ka tum lo nasa a ni.

Kawngka inhawng thawm aṭang chuan a rawn lut tih ka hre mai a, hawi chhuak lovin ka awm dan ngai chuan ka lo awm reng a, a hmel chu ka hmu peih rih lo a ni.

Kun ngul chung chuan thil chi hrang hrang ka ngaihtuah a, inhnaih taka Lalrinawma nen kan awm dun leh chu ka duh lo, inhmu tawh miah lo mah ila pawi tihna ka neih pawh ka ring lo.

Kum 8 lai kan inhmu tawh lo va, a tel lovin hun harsa tak tak ka tawng chho a, tunah lem buaina siam zawngin ka hmaah a rawn inlan leh si, hlimna tluan tling lo nei reng mihring nih hi a hrehawm ka ti ngawih ngawih.

Zing dar 3 vel a ri tawh a, ka hmaa mi chu melh khat pawhin ka melh eih lo. Ani pawh ka ṭawng khum vak vang nge ni a rawn ṭawng tawh lo hrim hrim a, zawhna pawh min zawt leh tawh lo hrim hrim bawk.

Ṭhu kun ngul tawh lovin ka fapa mutna khum bawh chung chuan ka meng kar a, mahse ka men rei theih ka ring chiah lo. Ka mit te chu a thip ru vawng vawng a, ka lu pawh a hai riai riaiin ka hria.

Chhun lamah khan chawlh pawh nei lovin thil ka ṭhui mawp mawp a, zawh thuai thuai ka ngaih vang a ni pakhat, mahse ka tum loh deuhin hun ka hmang leh ta bawk si, ka taksa leh ka rilru chu a hah ru tak zet.

“Yes, Iron Man an te chu ka duh alawm, ka ṭhiante paw’n pa min ti ngawt ang” hlim hmel taka ka fapa ṭawng ri chuan min ti harh a, mahse ka mut a la chhuah em avangin ka meng lawk duh lo.

“Ti ngawt ang, chuan Iron Man chu fel deuha awm tur ka tih kha aw” Rintea aw ka hre ve leh nghal a, an pafa inbe thawm chuan ka rilru chhungril a tihlim veng veng, an inbe thawm chu hriat reng ka châk.

“Apa kha i ang e apu, ka mumanga mi ang chiah chiah kha i ni alawm, dawt ka sawi lo. Anu khan sawi tawh lo turin min ti a, mahse a muthilh laiin ka sawi leh mai mai” ka fapa thu rawn sawi leh chuan min tiharh nghal kawk a, ka rilru hlimna te chu a reh nghal vek bawk.

“Nu, good morning” ka ṭhut ṭhat rualin ka fapa chuan nui ver ver hian a rawn ti a, kei pawh chuan

“Morning le Bawihpui” tiin ka nuih let ve var var a, Rintea chu en zeuhin ka fapa chu ka en leh nghal.

“Nu, apu hian Iron Man ka an thu min hrilh a, ka ke chhungah hian thir a awm tak tak ti raw” ka fapa chuan a rawn ti leh a, puitling hmel hriat loh koh dan tur ka zirtir ang thlapin a bula mi chu a ko a, Rintea erawh chuan pu tih a lo duh loh hmel khawp.

“Aw awm tak tak e, Man tihna a nih kha aw” tia ka chhan rualin a bula mi chuan

“Iron Man chu a tirah a ke a na phawt a, chuvangin nang pawh a tirah chuan Wheel chair- hmangin kal i zir ang a, i kal pangai theih hunah chuan nuam i ti ngawt ang” a rawn ti ve nghal a, chutiang lam hawi zawng chuan ka fapa chu ka lo la titipui ngai lo hrim hrim.

“Tak tak maw pu, Wheel chair-a kal zir chu ka va’n châk tawh tak” naupang tih takah phur zet hian ka fapa chuan a rawn ti a, ka ṭah a rawn chhauh thut avangin hmun dang ka hawi ta daih.

A sawi ang ngeiin Rintea chuan damdawinah ka fapa a awmpui ta char char a, ka fapa in a ngaina ta em em chu ka dem lo.

An vawi khat inhmuhna a ni a, mahse thisena inzawmna an neih tlat avangin an inkawm ngeih nghal lutuk. Ka bianga mittui luang ka hruk hul hnu chuan an lam hawi zawngin ka inher a, Rintea chuan min lo en ta chat.

A mit hmul san zeuh pah chuan min en reng a, a mitmengah chuan zawhna ka hmu ṭeuh bawk, mahse ka fapa in a biak tui em avangin rei erawh min en lo.

Ka fapa awm dan chuan ka lung a tichhia, a mi biak mek chu a pa dik tak a ni tih hre phei se chuan nuam a va ti dawn em. Amaherawhchu ka fate pa dik tak chu hrilh ka la tum chuang lo, a chhan chu ka rilru a na em a ni.

Sex vang chauhin min ngaizawng a, vawi tam biak ka tum pawha ka phone call pick up duh lo tu chu ka fate pa ni mahse a them paw’n sawi chhuah ka tum lo bur.

Chutah hriat chhuah awlsam takin Bawihpuia lah chuan a pa chanchin a sawi a, a hmel hriat ngai loh hnenah a vui vel a ni kha!

Khatiang khan Bawihpuia kha a awm ngai lo, ka hrilh nasat ṭhin em avangin a hmel hriat ngai loh bulah a ṭawng zuah zuah ngai lo bawk, mahse a pa dik tak bulah chuan a vui awlsam em em lawi si.

Zing dar 9 velah ka chhungte an lo kal a, tlawh theih hun lai tak a nih avangin an lo kal kim hle. U Mawia nupui u Atei pawh a lo lang ve a, an fate thlengin an lo hruai vek.

Rintea chhungte erawh an rawn lang tawh lem lo va, mahse hmeichhe pakhat changkan hmel deuh a lo kal thung. A awm dan vel leh a ṭawngkam hman dan vel aṭang chuan Rintea bialnu a ni tih ka hre nghal a, ka hriat tirh chuan ka na zawk nghe nghe.

Ngaihzawng nei reng chunga ka thianghlimna chauh duhtu leh ka mihring huat em em ni mahse bialnu a nei tih ka hmu chiah chu ka na lo thei lo, a chhan chu ani tih loh mipa hmangaih ka neih tawh loh vang a ni.

Rintea bialnu chu Zonuni a ni a, a ṭawng siam siam a, ka fapa biak dan vel chu a thiam thlawt. A che zia vel chu fel fai thlap mahse ka ngaina lutuk lo, ka ngainat loh chhan pawh chu ka hre chuang lo.

Bawihtei chu ka bulah a rawn ṭhu nghal chat a, min lo ngai tawh hle a ni ang. Bawihpuia chuan Iron Man a nih dawn thute a lo hrilh nghal mawlh mawlh a, a ke a na tih reng a hre tawh lo.

Bawihtei lah chuan Wonder Woman nih a lo duh ve nghal a, an unau titi chuan puitling ho chu min tinui dar dar. Zonuni chuan ka fapa chunga thil thleng chu pawi a tih thu a sawi ve reng a, kan awm kim laiin Rintea chu a hau nghal bawrh bawrh bawk.

Kei chuan ka fapa kut ka chelh a, an lam hawi lovin an inbiak dan chu ka ngaithla a ni ber. Ka chhungte chuan min thlak an tum a, mahse ka lo duh teuh lo.

Dar 10 rik dawn hnaihah ka chhungte chu in lamah an haw a, kei paw’n ka hnathawhna lam ka be nghal.

Hlimhlimi’n a hrilh tawh tho chu ring mah ila kan pi chu ka be ve leh ngat a, kan dinhmun vel ka sawi chuan kar khat chhung chawlh min pe a, a hman remchan vela ka fapa lo kan a tum thu a sawi zawm zat bawk.

Phone ka biak zawh chuan ka hmaa mite lam chu ka hawi a, Bawihpuia erawh a damdawi ei a rui deuh a ni ang a muhil leh daih tawh thung.

Intlawh hun zawh na’n minute 15 vel a la awm a, Zonuni chu a la thu ve reng bawk. Rintea chu a be siam siam a, a hmelṭhain a vun chu a no nalh tak zet, dik tak chuan an inhmeh em avangin ka thik a ni.

Thik loh ka tum paw’n ka thei lo, ka mipa hmangaih ngaihzawng a nih avangin ka thik lo thei lo a ni. Rintea chuan phone call a dawng deuh chhen bawk a, a buai hle a nih ka ring.

“I hna lamah va kal la, i duh leh zan lamah i lo kal ṭhin dawn nia” ka tih chuan min lo en thuai a, ka fapa avanga a hna lam thleng thleng tihbuai chu ka duh lo a ni.

“Recording tihtur ka ngah lutuk a, min hrethiam dawn nia, zanah erawh ka rawn riahpui leh ngei ngei ang” tiin a ding uai a, Zonuni kuta vuan chungin room chu an chhuahsan zui nghal.

An kal liam hnu chuan ka khi sak a, mahse ka nuih a zat vang a ni lo. A ruka ka rilru nat vang leh ka beidawn vang a ni mah zawkin ka hria, Rintea chu ka tan leh ka fate tan beisei phak a ni tawh lo.

Chapter 5

Kar khat chhung damdawi ina kan awm hnu chuan kan inah kan insawn lut a, damdawi ina kan awm chhung zawngin Rintea chuan ka fapa chu a riahpui tluan ṭhak.

Kar khat chhung lêk awm dun mahse kum tam tak lo inhre tawh ang maiin an awm dun a, an titi a, an nui dun a, pafa dik tak an nih tih an hriat hunah chuan chu aia an innel leh zual ka ring.

Bawihtei ve thung chuan Rintea chu a la nel lutuk lo va, ka bula ṭhu chungin a unuapa leh a hmel hriat ngai loh inbia chu a en kar zel.

Ka hlauhthawnna leh ka rilru tibuai bertu pakhat chu ka nu leh pate an ni tawh, an mitmengah chuan zawhna chi hrang hrang ka hmu a, mahse zawhna engmah min la zawt lo thung.

Hospital aṭanga kan chhuah hnu ni khatnaah Rintea chuan Wheel chair a rawn lei nghal rup a, Bawihpuia size chiah chiah a rawn lei bawk.

FIR case file lam chu ka rilruah a awm leh tawh lo hrim hrim, case lo file ta pawh ni ila engmah a danglam thei tawh dawn chuang lova ka hriat vang a ni.

Chu bakah ka fapa sutu chu tu dang ni lovin Rintea a ni a, ani kher ni lo se chuan FIR case file lam chu ka titlang maithei a ni.

Keimah ber ka ngawih tâk avang chuan ka chhungte paw’n engmah an sawi leh tawh lo va, ngaihdam min dil vak vak lo mahse a awm danah Rintea chu a inthiam loh ve tak zet tih a hriat hle.

Damdawi in aṭanga kan chhuah zan aṭang Rintea chu a rawn leng ta ziah a, a chang chuan a bialnu Zonuni nena lo len chang pawh an nei ṭhin.

Kan pawi a sawi chhunzawm tâk loh em vang pawh a ni maithei a tua te ma’n kan be chhe hran tawh lo va, thinrim taka lo biak emaw pawh ka nei tawh lo, mahse kan lung erawh a la awi famkim chuang lo.

Kei nen ngat phei chuan biak pawh kan inbe ngai lo va, ka fate nen chuan an inbe nasa thei hle a, an hlim tlang thei khawp mai.

“Nu, hei apu khan ka keah hian Iron Man tih a ziak bik asin, a nuam ê nu, apu kha a lo leng ziah ang ti raw ” ka fapa chuan a rawn ti lawng lawng a, ka fapa ke intuam chhah bur chu ka en ve nghal a, a sawi ang ngeiin a lo inziak reng bawk.

“A ni maw!? I va’n pa bik em em, chuan apu kha chu a buai thei lutuk a, a lo leng ziah thei ang em ka hre lo va Bawihpui” ka tih chuan a lo nur nâng a, a pa chu rei lotê chhung paw'n a lo ngai hman em em tih ka hria.

“E chuan maw nu, Bawihtei pawh Wonder Woman thlalak a pe bawk a, apu kha a fel lutuk nu, mahse amah khan apu tia koh a duh lo va” a rawn ti leh reuh a, a thusawi chuan ka beng a verh nghal zar.

“Engtia koh nge a duh a apu khan?” ka awm dan chu ka hrethiam lo, Rintea leh ka fate awm dan chuan min tihlim pawh a ni maithei. Engtin nge Rintea chuan koh a duh ka hre châk, ka duh loh zawng a nih loh hram ka beisei.

“Pa Rinte tia koh a duh a, a lo kal leh hunah chuan ka lo ko tawh ang, chuan Iron Man lem pawh min lo ken dawn bawk. Kei chu lo leng leh tawh se ka ti ê nu, engtikah nge a lo len leh ang?” ka fapa chuan a pa a ni tih hre miah lo chung pawhin a lo ngai hman em em tawh a, kei lah chuan ka zep a ngai tlat bawk si.

“Ka hre lo le Bawihpui” ka ti zawi raih a, ka hre lo tak tak a ni. A hma ang em emin a hmel chu ka hmu duh lo pawh a ni bik tawh lo, ka fate hlimna a nih phawt chuan ka hlim chawp ve zel thei te pawh a ni mahna.

“Puii, kan room-ah lo kal lawk ta che, inbe lawk teh ang” kan room kawngka bul aṭang ka pa chuan a rawn ti a, ka hawi rang hle. Ka pa chu rei pawh ding lovin a kal sawn zui nghal a, ka ṭhutna aṭang chuan ka tho zui ve nghal bawk.

“Bawihte, i u hi lo chhaih miah suh aw, a ke a na bawk sia infiam miah loh tur” tiin ka fanu chu ka kal dawn chuan ka chah leh thlap a, ka thusawi hrethiam taka a buk nghauh nghauh hnu chuan kan room aṭang ka chhuak zui nghal.

Ka pate room lam pan chuan ka kal a, ka kal lai chuan a thusawi awm ang tur chu ka ngaihtuah a, phat dan tur mawlh chu ka hre lo a ni.

Kar khat chuang zan awl nei miah lovin Rintea hmel an hmu tawh a, anni tan chuan rinhlelh loh ngaihna a awm lo.

An awm dan aṭang an ringhlel tih ka hriatna pawh a rei leh tawh, mahse anmahni zawkin engmah min zawh loh avangin ka sawi buai duh ta lo a ni.

Room chhung ka luh chuan min lo en ve ve a, ka nu chuan an khuma ṭhu turin min lo ti zui nghal sawk sawk.

“Puii, enteh, kan tupa sutu nen hian in lo inhre tawh ti raw? Engtin nge in inhriat dan? Kimchang takin min han hrilh teh, kan hriat ngei ngei tur chi a awm em?” ka nu chuan a rawn ti a, kei chuan nui lui sak chung hian

“Kan inhriat dan a ho lutuk, inhmelhriat satliah ang mai mai kha alawm kan nih, chuan chutianga in hriat ngei ngei tur chi pawh a awm hran lo” ka lo ti thuai a, ka aw chu ka theih ang angin ka ti pangai bawk.

“Ka zep lo vang, Bawihpuia te unau leh ani kha an inang thlawt a ni” ka nu bawk chuan a rawn ti leh a, ka pa erawh a la ngawi reng thung.

Ka nu sawi chu a dik chiah tih ka hria, pafa an nih miau avangin inang tih loh theih a ni lo, mahse ka theih chhung chu ka zep tlat tur a ni.

“Inang vak em ni?” ka thusawi chu kei ngei paw’n dawt chiangbal a ni tih ka hria, mahse ka fate pa chu tu nge a nih ka la sawi thei lo.

Chu bakah dawt ka sawi reng chu hrehawm ka ti ve tho, chuvangin min zawt tawh miah lo se ka ti a ni.

“Inang lutuk tlat, nang paw’n inang i tih ve ngei ka ring, chuan ani kha i fate pa dik tak hi a ni em? I sawi chiang fak duh bawk si lo, i fate nen an awm dan aṭang hi chuan pafa an ang tak zet, an innel bawk si"

“Ni lo, engtin nge ani daih daih kha ka fate pa a nih theih ang?” ka rilru chuan ngaihdam ka dil mawlh mawlh nghal a, dawt sawi loh chu tih theih ka nei lo, amah vanga natna ka tawrh zo zâina chuan zep lo thei lovin min siam a ni.

“Anih chuan tu nge ka tute pa dik tak hi sawi rawh, LALNUPUI! Kum 8 chhung chu i zep tawh a, i sawi duh tlat loh avangin zawh tawh loh che pawh ka tum, mahse ka tupa sutu hmel ka hmuh chian kha chuan ka rilru ka thlak” ka pa chuan a rawn ti ram hmak a, a kut chu a hum ruh hle bawk.

“Ka hrilh thei lo che u” ka tih rualin ka pa chuan min pawt tho lawp a, thinrim hmel zet hian min en reng bawk. Kei erawh chuan hlau ru zetin ka en let ve kar a, a hmel aṭang chuan a thinrim tih hai rual a ni lo. Chutah min thing vak vak pah hian

“I thei tur a ni, sawi rawh. Tu nge i fate pa dik tak hi? Eng vanga zep reng nge i nih? Ka lung i tiawi lo tak zet tawh, vawi eng zat chiah nge sawi tura ka tih che a ngaih? I pa ka nih hi min zah ve ta che, sawi rawh!” a rawn ti vin leh ṭhawt a, ka insum thei ta ngâng bik lo.

“Ka fate pa dik tak hian fa a nei tih hriat a phu lo, a phu hlawl lo, chuvang alawm tun thlenga ka la zep. Ka chan te hi ngaihtuah thiam ve ta che u, kum 8 chhung ngawt pa tel lova ka fate ka enkawl chhan te hi dawn ve ula, ka tuar hnem ve viau asin” tiin ka men pur a, ka pa chu a ngawi ta reng.

“Ka thianghlimna min laksak hnu rei lote ah min kalsan a, ngaihzawng nei lai a ni tih hre miah lovin ka lo hmangaih hman a, a fa ka pai thu ka hrilh dawn paw’n min hnung chhhawn tlat asin, chuti chung chuan ka fate pa dik tak hi sawi chhuah ka duh in la ring cheu em ni?” ṭah loh ka tum ngar ngar a, ka aw pawh a ring hran lo.

“Ani chuan min bum a, min bumna avangin ka ei zawnna lamah ka tlak chhiat phah a, khawtlangah lah Vai fa ka pai emaw min ti bawk a, chutah kut min thlak ngai miah lo tu ka pa’n min ben phah bawk a, khawngaih takin ka fate pa chungchang hi min zawt tawh suh u” tiin room chu ka chhuahsan hmawk hmawk a, kan room-a lut lovin bathroom-ah ka lut tlang nghal hmak.

Ṭhu kawm ngutin ka ṭap khur beuh beuh a, ka thinlung chhungril chu a na tak zet a ni. Ka fate pa chuan kum 8 chhung khan ngaihsak pawh min rawn ngaihsak eih lo, fa a nei tih pawh a rawn ngaihven lo hrim hrim. Ka rai thu hrilh tum khan vawi tam ka call a, mahse ani chuan min bengkhawn duh lo lui tlat a nih kha!

Chu bakah min lo zawna min lo hmuh tal a tum ve te ka ring a, kum eng emaw zat chhung kha chu beisei theih tawh loh leh thi tawh kha a nung emaw ka ti tlat a, ka lo beisei ve fan fan ṭhin, mahse a tawpah beidawnna bakin min tlak buak leh ta chuang lo a nih kha!

“Puii” bathroom kawngkhar chum ri dat chung hian ka pa chuan a rawn ti a, ka ṭah chu a rawn chhuak zual sauh.

Ka rai thu a hriat tirha min ben lai te chu ka ngaihtuah chhuak a, nutling pawh ni tawh mah ila ka thil tawn mek chu paltlang a harsa thlawt a ni.

Ka nu leh pate’n ka fate pa min zawt chhen chu a awm ka ti, a dik reng, a awm reng bawk. Kei pawh ni ila an awm ang tho chuan ka awm ve ang ka ring, mahse kei chuan ka fate pa chu sawi chhuah ka duh tawh lo hrim hrim a ni.

Ka fate’n kum an tlin hunah chauh sawi chhuah ka tum bur, chumi hma chu eng ang pawhin min zawt mahse ka sawi chhuak chuang lo vang.

Ka ṭah chhuak zualpui a reh hnu chuan ka inphih fai zung zung a, ka awm dan chu a puitlin loh thlak ka ti hle.

“Puii” bathroom aṭanga ka chhuah rualin ka pa chuan a rawn ti a, ka lo nuih lui seih a, ka nui lui tih pawh chu a hre chiang khawp ang. A fanu ka ni a, ka awm dan lem zet chu an hrethiam vek lo thei nâng.

“Muttui u” tiin ka nu leh pa chu kal pel a, kan room chhung ka luh chuan thawk ka la leh hawk. A tawpna ni tawh rawh se, ni tawh lul teh se! Lalrinawma chungchang sawi lan leh ka duh tawh lo, ka duh tawh lo hul hual a ni.

Kan khum chhak lamah Bawihpuia chu a muhil bam a, thlang lamah Bawihtei a muhil bawk a, kei pawh a laiah chuan ka inthawlh zui ve nghal.

Bawihtei chuan Rintea pek ngei mai Wonder Woman lem chu a hum ran a, a âwmah a pawm bet tlat a, a u angin sawi lo mahse Rintea chu a ngaina ve tawh hle tih ka hrethiam mai.

Ka muhil thei mai dawn emaw ka tih chu ka muhil thei mai lo va, dar zat ka en chuan zan dar 12 a lo hnai kuar tawh. Ka mut dan chu ka thlak a, ka muthilh laia a tlak palh ka hlauh avangin Bawihpuia chu ka kuah ran bawk.

Damdawi in kan chhuahsan hnu aṭang thla 1 a liam leh tawh a, Bawihpuia paw’n Wheel Chair chu a hmang thiam ve tawh hle. A khalh dan tur te chu Rintea chuan a zirtir vek a, zan khat awla rawn leh loh pawh a nei ngai lo tih theih tluk a ni.

Bawihpuia ber chuan Wheel chair khalh vel chu nuam a ti a, a nau lah a bang bik lo, an pahnih chuan an hlim dun thei khawp.

Bawihtei chuan school a kal chhunzawm duh bik ta tlat lo va, a u tel lova a kal duh bik miah lo chu ka hrethiam khawp mai.

Ni khata piang rual ni mahse Bawihpuia a pian hmasak zawk avangin Bawihtei chuan a u en ve char char a, u turin zirtir nasa hle lo ila chuan a u duh bik pawh ka ring chuang lo.

Chutiang zelin kei pawh ka hna thawhna lamah ka buai ve leh char char tawh a, mahse a hma angin ka rilru chu a pangai thei tawh chiah lo, ka fapa chu dam tawh te chu ni se a pangai thei mahna.

Hlimhlimi pawh a ṭawng duh ngaiin a la ṭawng duh reng a, a star pa’n a a star ve deuha a hriat thute chu min hrilh a, min tih nuih ver ver chang a ngah leh tawh khawp.

Ka fapa ngaituah reng rengin ka lungngai ngai tawh lo va, mahse ka ngaihthah tihna a ni chuang lo. Ka hna leh ka fapa chu ka ngaihtuah kawp reng a, Bawihpuia chu exercise a lak ṭhat theih na'n thil hlimawm lam hlir ka hrilh ṭhin bawk.

Ni lo, kei aiin Rintea chuan a hrilh hnem zawk, ka letin ka fate tihhlim dan chu a hre daih zawk maw le. A rawn len apiangin eitur leh naupang thil lawm eng eng emaw ni hi a rawn keng ziah a, zilh pawh ka zilh buai duh tawh lo.

A tirah kha chuan lo keng tawh lo turin ka ti a, mahse ka thu awih lovin a rawn keng zel tho. Ka nu leh pate paw’n engmah ka fate pa lam min sawipui ngai leh tawh lo bawk a, an laka inthlahrun chang chu ka ngah thei khawp.

Rintea leh ka fate awm ho lai han thlir dauh dauh chang pawh an nei ṭhin, an rinhlelh chu a dik a ni tih hria se chuan min hau nasa khawp ang.

Kar khat chiah ka thil ṭhui lai ṭhui zawh na’n hun ka nei tawh a, mahse ka huphurh em em hran lo, ka zo fel titih a ni mah tawh zawk.

Mo kawr a nih miau avangin chawlhsan reng kha a tih chi lo va, inneihnaa hak hman theih tura ka ṭhui zawh ngei ngei a ngai zawk a ni. Chutia kawr tlang vel ka thui mawlh mawlh lai chuan Zonuni hmel ka hmu hlawl a, mak ka lo ti nasa a ni.

Ani pawh min hmu thut chu a bang bik lo, mak tih hmel zetin ka lam chu a rawn pan a, mahse a hnunga lo lut ve mek mipa chuan ka mit a la ta ber.

“Hetah hian i thawk maw u Nunpui, thil ṭhui i lo thiam reng chu a va’n mak, mahse a ṭha tho” nui sâng chung hian Zonuni chuan a rawn ti bawrh bawrh a, keia awm dan tur hre lo chuan ka lo nuih ringawt.

“Nia, puan ṭhui lam hi nuam ka tih zawng tak a nia” tiin ka lo chhang ve vat a, ka tui chawp a ni tih chu hrilh kher ṭulin ka hre hlo, zai ka tui tih hre phei se chuan mak a ti ngawt ang. Chutah amah vek chuan

“Ehêeee….mo kawr kan order hi nangma’n min ṭhuisak tihna em ni? Hei hi kan order kha a ni em? Kar leh lawka hak theih tawh tur kha!” a rawn ti leh a, a thusawi avang chuan ka nui tawp riai riai a, Rintea lam chu ka hawi chho thuai bawk.

“Aaaa…ka…ka hre lo reng reng, order ang ang hian ka ṭhui tawp a, in ta tur pawh chu a ni maithei a ni” ka aw chu a dik lo nghal vek a, Rintea’n nupui a nei dawn tih ka hriat meuh chuan ka buai lo thei lo.

“In lo kal a ni maw, kan zo ṭep tawh e, lo ṭhu r’u lo ṭhu r'u, coffee te kan in dawn nia” kan pi chuan a rawn ti ve thuai thuai a, Zonuni pawh chuan nui sen sen hian a lo be let ve nghal a, Rintea erawh a la ngawi reng thung.

“Kan zo ṭep ti raw Nunpui? I khawih sawt hle bawk a ni ang thil harsa em em ṭhui tur pawh a awm tawh lovin ka hria, ti raw Nunpui?” kan pi chuan a rawn ti a, kei pawh chuan ka aw thian kharh chung hian

“Aw zo chu a ni tawh mai, naktukah chuan ka zo fel dim diam tawh ang” ka lo ti ṭha ve mai a, an hmuhah chuan ka nui lui var var bawk. Rintea hmuh laia nuih luih erawh a har khawp, ka rilru chhungril hre vek ang te chuan a awm leh ta nghal a!

“Bathroom-ah kan kal lawk ang e, lo leng reng r’u aw Zonun” pangai tak chuan ka ti leh a, an la len reng tur thu a sawi hnu chuan bathroom lam panin ka kal ta vat.

Bathroom ka lut chiah chu kawngka ka kalh nghal thuai a, ka kut chu na zetin ka hum a, kum an tlin hnua ka fate an pa dik tak hrilh ka tum chu sut a ngai tih ka hre chawpchilh nghal.

Thla khat chuang teh meuh ka fate leh an pa dik tak an awm ho ka hmuh hnu aṭang beiseina ka lo nei leh hman der tawh tih chu ka inhre chhuak a, keimah leh keimah chu ka indem ngawih ngawih.

Tunah chuan ka fate pa paw’n nupui a nei dawn a, engtikah mah ka fate pa dik tak chu sawi chhuah a rem dawn lo tih ka hrethiam ta mai e.

Engmah ti lovin bathroom aṭang chuan ka chhuak leh hna hnâ a, Rintea bawk chuan min lo en ran a, ka thil ṭhui lai chu a lo khawih neuh neuh bawk.

Zonuni leh kan pi erawh an lo la ṭawng tui hle a, an sawi duh zawng a inan em avang chuan an titi pawh a kal dun khawp mai.

Ka ṭhutnaa ṭhu ṭhain ka thil ṭhui lai chu ka tih zawm mial mial a, ka bula mi chuan min din hnaih em avangin ka thil tih a tinuam lo vek.

Ka chhungril chu a zam ru em em a, a awm dang aṭang a hmel hmu kher lo mah ila min en reng tih ka hria, chuvanga zam ru em em pawh chu ka ni.

Kan pi leh Zonuni chu ṭawng tui viau mahse keini pahnih erawh kan ngawi reng a, Hlimhlimi tal awm ve se chuan a zia, a awm bawk si lo nen nuam ka ti vak lo.

“Kan kal phawt mai ang, naktukah emaw ni dangah emaw kan lo kal leh dawn nia, chuan thil dang pawh ṭhui tir duh che ka nei nûal a nia aw u Nunpui, i thui thiam dawn tih ka chiang” Zonuni chuan a rawn ti ta deuh deuh a, ani leh a bialpa lam kaihhnawih thil chu ṭhui ka duh miah lo tih hria se chuan min haw khawp ang.

“Aaa..nia..aw le, ka lo ṭhui sak dawn che nia” hawihawm tak chuan ka lo ti ve ringawt a, mahse ṭhui sak chu ka tum lo nasa, lem ka chang mai mai a ni.

“Anih leh kan kal aw, zanah kan lo leng dawn bawkin ka hria” a bula mipa ding en chho ral chung chuan a ti leh zet zet a, Rintea erawh a lo kiai suk ringawt.

An kal liam chiah chu ka thaw hawk a, an awm lai khan thawk harsa ka va ti tehreng em. Ka thil tih lai chawlin dawhkan chu ka bawh a, ka mit ka chhing vang vang a, ka tha chu a zuai deuh nghal vekin ka hria. Chutia dawhkan bawha ka awm veng veng lai chuan kan pi chuan

“I chau deuh em ni Nunpui? Vawiin chu khua a lum deuh phian bawk sia i chau a ni ang, i inṭhui ngawrh ve bawk alawm”a rawn ti a, inthlahrun avangin ka awm dan chu ka siam ṭha rang hle.

“Aih, chau hran lo ve, thil dang daih ka lo ngaihtuah a, chutiang ka chau miah lo a nia ka pi” dawt bawk ka sawi leh ta, ka chauh thu sawi tlawng chu sawi chu a fuhin ka hre si lo, lemchan reng chu ka ning leh thut zel.

“I thil ṭhui lai i zo ṭep tawh tho bawk a, vawiin chu i bang hma daih dawn nia, chu bakah Hlimhlimi lo kal loh vang nge ni vawiin chu i hmel a nung lo hrim hrimin ka hria” kan pi chuan a rawn ti siam siam a, a sawi chu a dikna lai chen pawh a awm tho mai.

“Dik tak chuan vawiin chu ka nuam lo deuh sa hrim hrim a” dawt ka sawi buai peih tawh loh avang chuan ka ti ta tawp a, ka ban hma theih tur thu sawi lehin a kal sawn a, kan khuma mut vang vang leh ka fate hmel hmu chu ka chak ber tawh.

Tlai dar 3 a lo rik chuan ka haw theih thu kan pi chuan min lo hrilh leh thlap a, kei pawh tlawmngai kual vel lovin haw tur chuan ka insiam a, kan dawr kawt ka thlen chuan Bus stand lam panin ka kal zui nghal.

Mi ṭhenkhat hian min lo hre leh nawlh zel a, khawlaia ka kal chang te hian min lo be leh nawlh zel, mahse min betu te chu phai lama awm ṭhin te vek an ni thung.

An besei anga ka awm chhunzawm loh avang chuan mak an ti thei hle a, ka chanchin an sawi zui nasa thei ngawt ang ka ring.

Bus stand ka thleng ṭep tawh tihah ka hmaah tak Bike pawl hi a lo ding a, a khalhtu’n a helmet a phelh chuan mak ka lo ti hle.

“Eng lo, engati nge vawiinah i ṭhiannu kha a lo kal loh?” a rawn ti tawl a, ka ṭhiannu chu a duh ve chiang tih ka hrethiam mai. Hlimhlimi'n hria se nuam a va ti dawn em, ka hrilh châk tawh lutuk chu ka za zek zekin ka hria.

“A damsam lo deuh a” pangai tak chuan ka lo ti ṭha ve mai a, a awm dan vel chuan ka nuih a tiza ru reuh, mahse ka awm danah pakhat mah ka tilang lo.

“A phone number min lo pe teh a, in inkawm ṭhin tho sia” a aw aṭang chuan a inthlahrun ve hmel deuh. Hlim ru zetin ka ṭhiannu phone number chu ka pe a, Hlimhlimi chu ka chhaih châk tawh a ni.

Chu pa lah chuan a phone number a neih thu hrilh miah lo turin min ti a, an awm dan vel chuan ka nuih an tiza lutuk, kum lamah pawh an naupang vak tawh lo ve ve leh nghal.

Kan inthleng chu min thlah a tum tlat a, a luhlul reuh em avang chuan ka inthlah tir ta tawp. Kan in lam pana kan tlan lai chuan Rintea leh Zonuni ka hmu leh a, Rintea chuan chiang takin min lo en mahse Zonuni erawh min hmu lo hrim hrim.

Zanah chuan an pahnihin an lo leng ta ngei a, Rintea phei chuan zan dang aiin min en chik zualin ka hria. A hmelah chuan thinrimna hlir ka hmu a, mahse eng vanga thinrim nge a nih ka hre hauh lo.

A tuk zanah chuan amah chauhin a rawn leng tawh thung a, kei ni lovin ka fate bawk chuan nuam an lo ti leh tawh. Kan in aṭanga a haw dawn chuan ka pate’n thlah tura min tih avangin pawn thleng ka thlah a, mahse a motor chhungah chuan min nam lut daih a nih chu!

Chak takin a tlan chhuak nghal a, khawiah nge min hruai a tum chu ka hre lo, a awm dan avang chuan ka en hâw ringawt.

Hmun zawl zau reh deuh takah motor chu a tiding a, a jacket chhung ipte aṭang chuan lehkha pakhat hi a rawn phawrh chhuak a, ka kutah chuan a rawn hmeh bel nghal chat.

“Enge hei hî?” tih pahin paper chu ka keu a, ani chuan motor steering chu a bawh run thung. Ka kuta lehkha var hân chu zawimuangin ka keu a, eng thil nge a nih ka hrethiam miah lo.

“Eng vangin nge min hrilh loh? Eng vangin nge ka fate an nih tih min hrilh loh LALNUNPUI? DNA Test ti lo phei ila chuan ka hre hauh lo vang, min hrilh tur i ni asin” na zeta min en chung hian a rawn ti ram hmak a, sawi tur reng ka hre tawh lo.

Paper chu ka en chiang a, DNA Test result-ah chuan 100% a lo inti kuau mai. Engtin nge ni dawn? Tunah chuan a hre tawh, a fate an nih thu a hre tawh.

Ka hnen aṭang ka fate hi awm hran tir ka duh hauh lo, tum pawh ni se ka phal lo. Hre lo law law se ka ti asin, thil engkim a kal buai leh vek dawn ta a nih hi!

Chapter 6

“Min chhang rawh LALNUNPUI, eng vangin ka fate an ni tih min hrilh loh?” a hma ai chuan a rawn vin a, ka lo maimitchhing tawp, hre chhuak lo law law se a pawi lo asin le, mahse tunah chuan a hre chhuak tawh si.

“Kan inah khan min va thlah leh ang che, ka chhungte paw’n rei min ti tawh ang, haw thuai teh ang” ka thusawi avang chuan ka kut chu na zet hian a rawn hmer vek a, ka kut chu a hum bo hneh khawp.

“Keima’n haw ka tih hma chu kan haw lo vang tih hre rawh, chuan kan thil sawi lai hi zanin ngeiah hian sawi fel ka duh bawk” a rawn tih vin ṭhawt a, ka thinrimna a rei tawh em avangin ka insum thei tawh lo chuan

“Ka chungah hian thuneih tum hauh suh” ka lo ti ve nghal phiar a, kan inmelh no lo dun hle. Ka fate chu a fate an ni tih a hre ngei mai, mahse a hriat tawh avangin a thu hnuaia a dah theih tura awm ka tum lo bau.

“Ka thin tirim zawng hian awm suh Nunpui, ka laka i thil zep hi a namai lo hle a ni. Min hrilh ve tal ta che, thiam lohna nasa tak i nei a ni. Chuvangin ka thu hnial lo hian awm rawh, ka insum theih chin a pelh vaih chuan”

“I insum theih chin a pelh vaih chuan enge? Eng pawh ti rawh, i duh duh danin min tih tum mah la kum 8 kal taa i hmeichhe bum kual mai mai theih ang kha ka ni tawh lo tih hria ang che” a ṭawng laklawh pawt chatin ka lo vin ve ṭhawt a, ka thin a rim lutuk chu ka tha a khur thei hial.

“Ka bum hauh lo che, bum hmang ang khan min sawi chhen lo teh, bum hmang dik tak chu nangmah zawk a nih khâ” min rawn chhan let dan avang chuan nuih za miah si lo hian ka nui ri lui hak a, bum hmanga anga min sawi vel chu a zahthlak letling zawk e a!

“A ni vel ang, dawt sawi pawh i thiam ngaiin i lo la thiam tluang zel e. Hetiang mipa dawt sawi hmang, hmeichhe âwm nem zawk te pawh bum kuala an thianghlimna chuah duh mi i ni tih hria ila chuan a hnaih pawh ka hnaih lo vang che” ngeiawm tak chuan ka ti salh salh a, ka kut a hmerna chu a na tawh hle bawk.

“LALNUNPUI, khatiang khan min sawi miah suh, nangmah a nih khâ kei ni lova Vai thlangtu kha! I sawi ang mizia kha ka nei lo, ka nei ngai lo bawk ang” ka kut lehlam chuan a hmaiah tak ka beng ri nghal thlawp a, ka insum thei tawh thlawt lo.

“Engati nge nang ang mi lak tlak loh hi ka lo tawn reng reng che ni! Duh duha min bum kualtu kha ka lo duh ve em em che a, ka lo ngai em em ṭhin vel che a, nang ang mipa ka thianghlimna chauh duhtu ka lo tawng che hi khawvela thil pawi ber a ni” ka beng na thawkhat bawk a ni ang ka kut chu a la thip ser ser a, ka kutzungṭang pawh ka chet tir ngam rih lo.

“Bumtu ang zawng kha chuan min sawi ziah lo teh LALNUNPUI, ka ngaithla hne, bumtu zawk chu kei ni lovin nangmah i ni” a rawn ti chang fak a, inhauha inhnial reng pawh chu ka ning tawh, ka ning tawh lutuk!

“Aw le, ka bum che, ka bumah che ngai tawp rawh, tunah chuan haw tawh ang” ka ti ta thlawt a, ka nihna lo pui puia min sawi tur chu ka hre peih tawh lo a ni. Haw vat ka duh, ka chhungte'n rei min tih tawh hle ka ring.

“A teuh lo, ka thu lo chuan i haw lo vang” a rawn ti chang fak a, ka en tlawk tlawk ringawt. Kei ang bawkin ani paw'n min en reng a, ka chunga thunei tak tak chet a tum chu ka dawhthei bik lo, ka chau vek tawh ni mai hian ka hria.

“Engati nge ka nun hi i tihbuai reng mai le, i hlim phah em ni? Harsatna leh natna tam tak paltlang tura min hnung chhawn kha i la duh tawk lo em ni? Eng em em nge i lakah hian tihsual ka neih?” ka aw chu a chhuak chang châng a, ka ṭap thei mai dawnin ka hria.

“DNA Test aṭang hian i fate hi ka fate an ni tih ka hre tawh a, chu tak chu ka buaina a ni. Hun kal tawh leh thil dang chu sawi ka tum lo, awmzia a awm tawh lo bawk. I ka aṭang ngei hian ka fate an nih thu sawi la ka duh, han sawi the, ka fate an ni em?” chiang taka min en chung hian a rawn ti a, a aw pawh a hriam hran tawh lo.

“Ni lo, i fate an ni lo, ka fate pa chu kum 8 kal ta khan a thi tawh. Ani chuan fa a nei tih pawh hriat a duh lo va, a fate leh kei chu hnung chhawnin min bum a, khata ṭang khan ani chuan pa nih theihna a nei tawh lo” ka ti sep sep a, ka mittui chu ka dang hman tawh lo.

“Khatiang thu ho lam mai mai kha sawi suh, pangai deuhin min hrilh ṭha zawk rawh Nunpui” a rawn ti deuh hmuk a, engkim chu a thiam loh vek a ni tih a hriat loh der tlat avang chuan ka rilru a na zual.

“Thu ho lam mai mai a ni lo asin, a pawi lo e. Ka fate pa dik tak chu ka bialpa hmasa ber leh hnuhnung ber a ni a, ani chu ka duhin ka hmangaih em em ṭhin, mahse ani chuan ngaihzawng nghet a lo nei reng a, ngaihzawng nei reng chunga min kawp tih ka hriat hnu pawhin a fa ka pai thu hrilh ka tum ṭhin ngei alawm, ani erawh chuan min ngaihsak tawh ngai lo thung”

“Chu chu keimah min sawina a ni em?” ka thusawi awmzia chu a hriat chian awm tehreng nen, hrethiam lo ang taka a awm tlat chu ka ning tawh. Mi â pawh a ni lo, mahni tawka fing ve tak leh rilru hawiher zau ve tak a ni zawk.

“Min thlah haw tawh rawh Rinte, i hriat duh tak chu ka sawi tawh e” tiin ka kut chu a kut aṭangin ka pawt chhuak a, a hmer nat em avangin a lo sen vek thei. Ka tuai hauh huah a, a na deuh riai riai bawk.

“Min thlah a ngai leh lo mai” ka ṭawng pawh hre lo anga a ngawih reng avang chuan ka ti leh a, motor kawngkhar hawngin kawngpuiah chuan ka kal zui nghal. Chutia rilru hah ru taka ka kal lai chuan

“Ka thu lo chuan i haw dawn lo ka tih kha” ti ram hmakin ka banah a rawn vuan a, min zui tih reng ka hre lo. A lam hawi turin min kuai her lâwp a, mipa a nihna angin thâah chuan ka hneh lo ngei mai.

“Min thlah rawh” ka ti vin hlar a, min vawnna aṭanga tal chhuah chu ka tum nasa hle. Ani erawh chuan ka thusawi pakhat mah a ngai pawimawh duh ṭhak lo, ka kut a vawnna chu a tinghet tulh tûlh emaw tih tur a ni.

“Ṭha deuhin sawi teh ang, naupang chhia pawh i nih tawh lo hî” a rawn ti vin ṭhawt a, kei pawh ka tal tawp hmak.

Naupang chhia chu ni tawh lo chiang e, kei ni lovin amah zawk hi naupang chhia taka awm tlat chu a ni. A hrethiam vek tawh tih ka hria, a hrethiam lo der tlat hi ka hua, ka haw ngawih ngawih.

Tu mihring mahin ka fate pa chanchin ka sawi ang kha hrethiam lo an awm lo vang, mahse engati nge zawhna mawlmang tak tak zawta min la tih buai reng!?

“A hun lai khan ka kawp che tih chu ka pha lo, mahse engati nge nang pawh khan ka rilru tina zawnga Vai i lo um kher?” a thusawi avang chuan a hmaiah ka theih tawpa nain ka beng leh pawp a, min melh rum hle bawk.

“I zak lo ka ti ngawih ngawih, Vai ka um lo hrim hrim. Ni lo, heng thil vel sawi hian awmzia a nei hauh lo, chuan ka fate hi lo hmu tawh lo vang che, ka laka i awm dan vel hian ka lung a tiawi lo tawlh tawlh LALRINAWM”

“Ka fate ve tho an nih avangin ka duh hun hunah ka hmu thei, thu min pe hlek suh. Chuan chiang takin dawt i sawi bawk, Vai nen chuan in inngaizawng chiang alawm, in thlalak nen lam ka nei vek”

“Ka chau, ka chau tawh lutuk, nang hi awm lo la chuan ka hlim ni mai tur, mahse nang chuan buaina hlir min siam bawk si. Engati nge ka hlim ve tak tak dawnah hian i rawn lan leh kher?” ka chau lutuk chu din pawh ka ding ngil tha thei tawh lo.

“Zaninah ngei hian kan sawi fel ang, ka sawi vek tawh kha! Puitling ve ve kan ni tawh a, inhau chhen tur pawh hi kan ni tawh lo” tih thu a rawn sawi bak chu ka hre tawh lo, engkim chu a ni muai muai ni berin ka hria.

“A ṭha leh thuai turah ngai phawt ang, duh leh min lo va hawsan tawh rawh. Eng êm kan thleng bik nâng, ka sawi kha a nih duh hmel ber alawm, ngaihtuahawm a nih leh kan lo buaipui ve mial mial tawh anga a ni mai”

“Ni lo ve, rawn harh phawt se ka haw zawk dawn nia” mi pahnih inbe thawm chu ka mang hriat ruai ruai a, ka lu chu a na deuh ngut ngut bawk.

Meng chuang lovin ka awm dan chu ka ngaihtuah let a, nikhaw hre lovin ka tlu a ni tih ka hre chhuak nghal.

Ka bul lawka inbia te chu ka nu leh Rintea an ni tih meng lo pawhin ka hria, an aw aṭang ka hre thei.

Ka nu chuan min ngaihtuah hmel zet hian thil a sawi sep sep a, Rintea erawh chu a ṭawng zeuh zeuh thung.

Rei lovah thawm dang a rawn awm a, ka pa chuan ṭawng mawlh mawlh pahin ka biang leh chal vel chu a rawn dek a, ka harh vela ORS ka in tur a siam fel tawh thu a sawi bawk.

Ka meng riai riai a, ka nu leh pa leh Rintea te chu ka hmu hmasa ber a, ka pa erawh ka hmu miah lo.

“Puii, i lo harh ta maw, engati nge BP hniam em em tur khawpin i taksa i chhawr rim? I taksa hi a pawimawh teh asin, tun aṭang chuan inenkawl uluk tawh rawh” ka nu chuan a rawn ti nghal mawlh mawlh a, ka lo chhang let lo hrim hrim.

“Tun kar chu i hna hi chawlh rih la a ṭha ang, thawk tawh lo mah la a pawi miah lo” tia ka pa lo ṭawngna lam chu ka hawi thuai a, ka intur in ORS chu noah a thli chhuak zawm zat bawk.

“Tun kar tak phei chu ka chawl thei lo, kar leh lawkah innei tur an awm a, mo kawr ka ṭhui mek a, an hak hmana ka ṭhui zawh a ngai” tih pahin Rintea chu ka en kar a, ani paw’n min lo en ve reng.

“Âww...a va buaithlak leh zel ve, a nih chuan i ei leh in tiṭha hle la a ni mai, i fate hi chu hna thawk tawh lo mah la kan chawm hneh ve lutuk tho alawm” ka nu chuan a rawn ti leh a, a sawi dik chiah, hna chu thawk miah lo pawh ni ila ka pa hlawhin kan inchawm thei lutuk.

“Chu lam pawh a ni lo nu, mahni fate chawm thei lo khawp nu nih ka duh hleinem” Rintea chuan ka sawi chhan tih a hria a ni ngei ang min en reng a, duh leh lo inngaih bel mai mai rawh se, ka ngaihven buai peih lo.

“Kha, i ṭhut theih chuan ṭhu kang la, hei hi han in phawt teh” tih pahin ka pa chuan no chu ka hmaah a lo lek vâ a, kei pawh chuan ṭhu chhuakin ka lo ban ve nghal.

“Va haw tawh rawh” ka ti deuh tawp a, ka mi biak pa chu tu nge a nih a hriat hle bawk. Mawl biak tawp chu ka tum bik em em lo, chutiang vawi leh khatah ka ṭawng chhuak pawp ni berin ka hria.

“Ni e, va haw tawh rawh, hei Puii pawh a ṭhat leh tawh hi!” ka nu chuan a lo ti ve leh a, Rintea pawh bu nghutin a ṭhutna aṭang a tho a, kal ta mai lo chuan min en leh vang vang kher.

“Lo inenkawl ṭha ang che, hna thawk nasa lutuk lo bawk la” a rawn ti sup a, ka pate room aṭang chuan a chhuak zui nghal vut.

A sawi a nih avang hrim hrim chuan ka taksa chu enkawl ṭhat loh ka châk, min ngaihtuah ang deuha a awm vel chuan ka thin a tirim ru tlat a ni.

RINTEA POV

Kan in pana ka tlan lai chuan Nunpuii leh ka fate ringawt chu ka rilruah an awm a, thil awmzia ka hriatthiam rualin rin harsa ka la ti fân a ni.

DNA Test aṭang chuan ka fate ngei an ni a, mahse fa ka neih awm reng ka hre si lo. Nunpuii nen khan pangai takin thla 7 chhung vel kan inngaizawng a, a hnuah erawh ho lam takin kan inṭhen a nih kha!

Kan inngaihzawn chhung khan sex pawh kan hmang dun ṭhin, mahse a rai awm reng ka hre lo. Rai ni se chuan min hrilh ngei ka ring, mahse ani chuan a them pawhin min hrilh lo. A fate ka hmuh tirh kha chuan mak tihna ka nei a, a fate nena kan inang ve deuha ka hriat vang a ni ber.

Chutah ka nu’n inang min ti leh em em a, Bawihpuia chu ka naupan lai chiah chiah a nih thute min hrilh a, mahse ka fa a nih ka la ring ngam chuang lo.

Ka inhrethiam tawh bik lo, ka cousin fate pawh chhaih ngailo leh ngaina ngai miah lo khan Bawihpuia chu ka ngaina tlat a, a bulah chuan nuapang chhia deuh deuha ṭawng ka ching a, ani paw’n min lo ngaina ve em em bawk.

Mak ka tih em em pakhat chu Bawihpuia’n a mumanga min hmu daih kha a ni, a la hriat chiang em em zui leh ta nghal!

Min hmuh dan zawng zawng chu a sawi chhuak leh thei vek a, ka aw leh ka hmel te thleng chuan a hre chiang em em vek. Ka rilru a buai ṭan deuh avangin Nunpuii chu ka be hrang ta ngei kha a nia, Bawihpuia pa chanchin chu hriat belh ka duh tak zet a ni.

Thinrim titihin Nunpuii nen chuan kan inbia a, a fate pa a thih tawh thu leh ngaihsak lo tura min tihna chuan ka ngeng a chhun leh ta zawk, ka bialnu hlui fate pa ka lo ngaihven ve em em chu mawl ka inti hnunhawh hle.

Khami zan aṭang kha chuan ngaihsak ka tum buai tawh lo va, mahse Bawuhpuia ka ngainatna erawh a la kiam thei chuang lo.

A ke naah te chuan Iron Man tih thu ka ziahsak a, chu te chu a hlimpui em em a, mak tak maiin ka chhungril chu a lo hlim ve veng veng zel.

A unaunu Bawihtei pawh ka ngaina ru nghal em em ringawt a, mahse ani chu hmeichhia a nih vang nge ni a dan a dang deuh.

Bawihpuia ang em emin min be zet zet lo va, ka bulah chuan a lai vel tlatin ka hre ṭhin, a unaupa nena hlim taka kan inbe ṭhin chu a chak ve ni tlatin ka hre bawk.

An in pangaia Bawihpuia te an awm hnu chuan zan awl pawh nei lovin ka leng zan tin a, ka mawhphurhna a ni tlat a ni. FIR lam pawh an sawi ri tawh lo va, chungte hlei hlei chuan ka rilru ipik lutuk tur a tihahdam vek.

Ka tihpalh a nih rualin ka fimkhur loh avangin Bawihpuia ka su a, a keruh hial a tliak a, ka chungah eng pawh ti se pawm lo thei ka ni lo.

Ka hna lam pawh ngaihsak ṭha mumal lovin Bawihpuia chu ka ngaihsak a, ani pawh ka hmel a hmu chuan a lo phur thei khawp mai.

Kum khat tawp school a kal thei dawn lo erawh pawi ka ti hle, thiam thu sawi tur reng ka nei lo.

Zan khat Bawihpuia te in aṭanga ka haw zan chuan ka nu hi a lo la meng a, a ngaihtuah muk hmel hle bawk.

Ka room-ah pawh chho lovin ka nu lam chu ka pan a, min hmuh rualin sitting room lamah chuan min hruai phei nghal vat.

A rilru kaptu leh tibuaitu ber min hrilh chuan chhan mai dan tur pawh ka hre lo, Bawihpuia ne kan inan em avang leh a rilrua kan awm kawp tlat avangin ka nu chu a muhil thei lo a lo ni.

DNA Test nei turin min ti tawp a, kei chuan ṭul ka ti lo hle. Bawihpuia chu ka fa ni se chuan Nunpuii paw’n min hrilh ngei ka ring, mahse min hrilh loh avangin ka fa a nih ka ring lo a ni.

Ka nu mai ni lo ka pa leh ka nau te’n a ruka DNA Test nei tur chuan min tur leh ta a, kei pawh chuan an duh anga tih chu ka tum ve ta tawp. Bawihpuia sam chu ka pawt thla zeuh a, chu erawh Nunpuii awm loh lai a ni thung.

Bawihpuia sam ka lak sak chuan ka awm mai mai thei bik lo, hlauhthawn ruk riauna ka nei a, eng vanga hlauthawng nge ka nih ka hre hauh lo bawk.

Dik tak chuan Bawihpuia pa chu ka nih ka inring em em lo, mahse kan inan em avang chuan pawngpaw rin loh ngawt pawh a theih bik chuang loh, chu tak chuan ka rilru a tibuai a ni.

Chhun lamah chuan ka hna lamah ka tal char char a, ka bialnu Zonuni pawh school an ban hnuah a rawn peng kawi ziah bawk.

Zonuni hi High School Teacher a ni a, kum 2 zen zawn chu kan inzui ve leh reng tawh. Min duh huam huam angin a awm ngai lo va, chu chu ka ngainatna pakhat a ni.

Amaherawhchu kum 8 kal taa mi ang tak takin hmeichhe lakah rilru ka pu thei tawh lo, Nunpuii kha ka lo duh lutuk hman pawh a ni ang. Chu bakah bum nih leh ka hlau, hmeichhia zawkin min bum leh ang tih ka hlau a ni.

Tlai khat zanriah kan ei laiin ka nu chuan DNA Test result ka lam tawh leh tawh loh min zawt thut a, result chhuah hun a lo pel daih tawh tih ka hre chhuak nghal.

Chaw ka ei kham rualin ka Doctor rawn ber chu ka call nghal a, an ina min hawn sak thu leh ka lam theih thu a lo sawi ve mai bawk.

An in lam pana ka tlan lai te chuan ka mumal lo reng reng, chutiang em ema ka hlauhthawn chu ka nunah a la awm lo hial ang ka ring.

An in ka thlen rualin paper chu min lo pe a, rei pawh awm lovin lawmthu te ka hrilh hnuah ka chhuak leh nghal. Ka motor chhunga ka ṭhut luh rualin light chu ka on a, result ka hmu chiah chu ka hlauhthawnna zawng zawng a reh vek, Bawihpuia chu ka fapa ngei a lo ni, chutiang bawkin a unaunu Bawihtei pawh ka fanu tihna a ni.

Hmanhmawh takin Nunpuii te in lam pan chuan ka tlan chhuak nghal a, ka chhungte pawh ka la hrilh duh rih lo, Nunpuii chu ka biak hmasak phawt a ngai a ni.

An in kawta ka din rualin ka chhuk nghal a, mahse ka lut nghal mai lo. Ka lo hmuh sual palh a nih tâkah tiin Test result chu ka en nawn leh ngat a, Bawihpuia leh Bawihtei te chu ka fate ngei an ni tih ka chiang ta.

In chhung ka luh chuan Bawihpuia leh Bawihtei te chuan min lo au nghal chul a, zan dang ang bawkin ka Wheel chair leisak hmangin an lo innawr kual leh vak vak tawh tih ka hmu zawm zat.

Nunpuii pawh hlim hmel zet hian a fate chu a lo en a, a nu leh pate an awm ve kur avangin ka kal chhan tak pawh ka sawi leh ta lo.

Ka haw dawn chuan pawn thleng min rawn thlah a, chu chu remchangah ka la ta hmak. Hmun zawl zau reh laiah chuan ka dinpui a, a hmel ka en chuan a lung a awi loh kher mai, mahse a ni letin ka lung a awi lo.

Ka fate pa ka nih leh nih loh thu chu a ka ngei aṭang hriat ka duh a, tlang takin sawi lo mahse a ṭawngkam aṭang chuan a fate pa dik tak chu keimah ngei ka ni tih ka hrethiam ve ta.

Ka hmaiah vawi hnih lai a beng a, engkima min mawhpuh vek chu ka thil hriat thiam loh tak pakhat a ni bawk. Ka biak mawlh mawlh laiin a chau thut a, kawngpuia a tlu tur chu ka dawm hman hram a ni.

Zep lovah chuan ka hlauthawng lutuk, Nunpui chuan ka rilru a ti chi ai nghal vek thei, haw a duh thu a sawi laia ka haw pui lo chu ka inchhir hnuhnawh hle bawk. Ka motor chhungah chuan ka mut tawp a, engmah hre lova a awm te hlei hlei chuan min tihlauthawng zual a ni.

An in chhunga ka pawm luh chuan a nu leh pate chu an lo meng phawk hrâ a, a nu phei chu a lo buai nghal vek. An veng Private Clinic dawra thawk nurse pakhat chu an call thuai a, ani pawh a rawn thleng rang hle.

Nunpuii chu a BP a lo hniam ang reng hle a, ka khawngaih reuh khawp. A tukah chuan hna ka ngah leh khawp a, Recording Studio-ah ka tal deuh chawt a ni ber.

Zan lama len leh ka duh dawn avangin ka hna chu ka khawih zung zung a, chhun lama zawh fel hman vek chu ka duh a ni.

Chu bakah Nunpuii te dawra kal chu ka duh hrim hrim, thil sawi fel loh kan la nei tlat. Ka hna ka zawh fel thawkhat hnu chuan Nunpuii thawhna dawr lam ka pan a, puan ṭhui a thiam tih reng ka hre ngai lo.

Kan inṭhen hnu aṭang phei kha chuan zai lamah a hlawk hle ka lo ring zawk a, mahse ka beisei loh deuhin puan ṭhuina dawrah a lo thawk daih.

“Enge i lo tih dawn?” min hmuh rualin a rawn ti ram hmak a, chhan pawh ka tum hran lo. Min hmuh chu a inbeisei lo tih a hmel aṭang ka hre vek, mahse engah mah ka ngai duh der lo.

“Enteh, ka hna thawhnaah leh zel hi chuan min tibuai lo la ka duh khawp mai” a rawn ti leh a, a bula hmeichhe pakhat chuan min en zeu zeuh a, kei chuan Nunpuii chu a fala biak ka duh ru hle thung.

“Inbe lawk teh ang” tiin a banah chuan ka chelh a, ka pawt tho zui nghal, a thawhna dawr neitu nu chuan min lo hmu reng tih hre mah ila ka hre lo der hmak, min rawn biak luam chu ka hlau zawk a ni.

“Min thlah rawh LALRINAWM” ring lutuk lo leh mi hriat hlau tih hriat tak hian a rawn ti vin ṭhawt a, kei chuan thlah ka lo tum lo nasa, pawn ka thlen pui titih der tawh zawk.

“Eng vangin nge Bawihpuia leh Bawihtei te hi ka fate an ni tih ka lakah i zep?” an dawr building bul mi awm lohna laia kan dinpui hnu chuan ka ti khauh ve fak a, ani chuan ei loh hmel deuhin min lo en kar.

“I ninawm em mai Rinte, ka chau teh mai a nia” a rawn ti thawp raih a, a ṭah a chhuah hmel hle bawk. Ṭap tum reng ringawt mai, ṭah tum reng hmeichhia hi ka hmu hne, mahse a mittui a tlak hian ka buai vek zel bawk si.

“Ka zawhna kha chhang mai la, chhan harsa pawh a ni nâng. Thil hi a awlsam zawngin a kal thei reng asin, engati nge fapa leh fanu ka nei tih min hrilh miah loh? An pa ka nih angin hre tur tak ka ni, mahse ka hre hauh si lo" ka aw chu a nem ve ta deuh.

“Vawi tam ka lo call ṭhin che a, I pick up duh ngai lo a nih khâ, chu bakah ngaihzawng nghet nei reng chungin min lo kawp a, khata ṭang kha chuan rawn biak buai che kha ka tum tawh lo” lungngaihnaa khat aw chuan a rawn ti a, ka phone chu a rawn rik zawm nghal. Caller ID ka en chuan Zonuni a lo ni a, chu chu a lo hmu ve a ni ngei ang.

“Nupui ṭha tak i nei dawn bawk a, keini nufa chu min rawn ngaihven buai duh suh, Zonuni kawr hak tur pawh ka ṭhui zo tep tawh e” a rawn ti leh a, a aw ah chuan thikna awka ka hre tel ta tlat.

Kal sawn a tum chu ka che thut a, ka kuah ringawt chu ka inhrethiam bik lo.

Chapter 7

"Min thlah rawh LALRINAWM!" tiin a rawn tal vak vak a, kei chuan ka kuah nghet sawt khawp. Kum 8 hnua a taksa ka sik lehna hmasa ber a ni a, ka danglam tih chu ka inhre chiang hle.

"Min thlah hram teh" a tal vak vak hnu chuan zuai raih hian a rawn ti leh a, a aw aṭang chuan a beidawngin ka hria, ka kuahna aṭanga tal chhuah pawh chu a tum zui ta lo. Kan awmna lai chu mi hmuh theih lohna lai a ni a, chuvanga thlah duh mai lo ka ni bawk.

"Rinte" a rawn ti leh sep a, a aw chu in awm hnaih hle lo ila chuan ka hre kher lo vang, zawi tak a ni. A taksa a chet deuh dawt avang chuan a ṭap tih ka hria, kei paw'n ka kuah beh runna chu tithawlin ka lam hawi zawngin ka kuai her nghal bawk.

"Nunpui, ka thisen an ni a, ka fate an ni a, engati nge engmah min hrilh ve loh? Ka nu'n i fapa nen kan inan em avanga DNA Test ti turin min ti lo phei se chuan ka hre chhuak dawn miah lo tihna a ni a, eng vangin nge ka lakah hetiang hian i awm?" chiang zeta en chungin ka ti a, ani chuan lungngaih hmel fêin min en thung.

"Hrilh theihin i awm em ni?" mittui tling pam hian a rawn ti a, chhan mai dan tur pawh ka hre lo. Kan mit chu hmun dangah a sawh sawn lo ve ve a, chiang taka inen tih loh chu tih dang reng kan nei lo.

"Sawi ta che, a hun lai khan i fa ka pai thu hrilh theihin i awm em? Vawi tam tak ka rawn call che a, mahse nang chuan i pick up duh ngai lo" a sawi zawng zawng chu a dik vek, ka fa a pai thu min hrilh tumin min lo call tih hria ila a phone call kha ka la chiang khawp ang.

"I phone call ka pick up loh chhan chu Vai nena in ngaihzawn thu ka hriat vang a ni, kha khan ka rilru a tina em alawm, kei ni lova i ei zawnna kawnga puibawm theitu che Vai i thlang khan ka rilru a tina lutuk, chuvang chuan ka"

"Engati nge Vai ngaizawng anga min ngaih ziah a? Hetiang em em hian i rilru a lo chhia a ni maw? Kei ang hmeichhe der dep ve mai natna tam tak min tawrh tir hi i tum lawk a ni tih hria ila chuan ka duhin ka lo hmangaih ngai miah lo vang che" ka ṭawng laklawh lai chuan a rawn ti a, a ṭah mai loh na'n a hmui chu a pet fan fan bawk.

"Min thlah rawh le, in inneih huna Zonuni mo kawr hak tur ka ṭhui zo hman lo palh mai ang" ka ngawih reng avangin amah zawk chuan a rawn ti leh nghal a, Zonuni nena innei tur anga min ngai pawh chu a awm lo hran lo.

"Min thlah teh" ka la chelh reng avang chuan a rawn ti thluk awn duai a, a biangah chuan a mittui te chu a rawn baw nghal zawih a, ka thinlung chhungril chu a che ta dawt, ka awm dan chu ka sawifiah thiam lo.

"Aw le, tun atan chuan duh tawk rih ang. Chuan mipa lawi lo zet inthlah tîr inthlah tir lo khan i fate hi ngaihtuah zawk ang che, chuvangin vawiin tlai chu ka thlah ang che" ka ṭawng chhuak chu a nem hran lo, hmanni lawka mipa thlahtu kha namen lovin ka thik a ni.

"Enteh Rinte, ka nunah leh ka fate nunah hian thuneih rawn tum buai tawh suh. Ka fate'n an ngaina lutuk che tih pawh ka hria, a chhan chu an pa i ni miau a, mahse kei leh ka fate hi min lo hmu tawh lo zawk la ka duh a ni"

"Ni lo ve, ka fate an nih angin ka rawn hmu zel ang. Chuan nang pawh ka fate nu i nih avangin ka hmu zel bawk ang che, hmeichhia zawkin thu min pê min pe lo vang che" ka chapona rilru chu ka khap dai hman lo a ni ber.

"Ka fate hi ka lak aṭanga lak sawn i tum a nih chuan i tisual chiang khawp ang, i nupui tur nen pawh fate chu in la nei thei reng alawm, kan inah lo kal tawh lo vang che" a rawn ti ta fak a, a lut chu ka vawnna aṭang a thing thla hmak bawk.

"Nupui ka nei dawn ziah lo, nei tur ang khan min sawi chhen suh" ka ti ram ve hmuk a, ani erawh a rawn nui daih, mahse a nuih a zat vang a ni lo tih kei leh ani chuan kan hre chiang em em.

"Ka awih che ring suh, bialnu nghet nei reng chunga min kawp duhtu leh ka laka Sex chauh duhtu kha i ni a, vawi khat mah min lo hmu leh tawh lo vang che" tiin a kal sawn hmawk hmawk a, ka um zui duh ta lo.

An dawr piah lawka Restaurant-ah chuan ka lut a, eitur ka chah zui nghal. Ka ril a ṭam vang em em pawh a ni lo, Nunpuii chu nghah ka duh vang a ni zawk, chu bakah kha mipa lak tlak loh hmel zet khan a thlah leh ang tih ka hlau, ka awm chhung chu a thlah tawh hauh lo vang.

Minute rei lotê hnuah ka thil chah chu an rawn chhawp a, ka ril a lo ṭam ve tawh tho bawk nen ka ei nghal mial mial. Ka thil ei mawlh mawlh lai chuan ka riluah thil pakhat a rawn lang zawk a, ka thil ei pawh a tui lo vek nghal.

Engtin nge Nunpuii khan ngaihzawng nei lai ka ni tih a hriat theih? Vawi khat pawh a beng hriatah ngaihzawng dang nei chunga ka kawp thu ka la sawi ri lo, kan inkarah hian thil eng emaw tak chu a awm a ni.

Ani paw'n vawi khat mai ni lo vawi tam Vai a ngaihzawn loh thu min sawi khum tawh a, kei lahin Vai nena an inngaihzawn thu ka hre ve leh tlat bawk si, kei phei chuan thu mai ni lovin an thlalak nen zawng zawng ka hmu a, chuvanga rinhlehna pawh nei eih lo ka ni.

Tunah erawh Nunpui kâ aṭang leh a fate hmel aṭang paw'n mi â ber tan pawh Nunpuii fate chu Vai fa an ni lo tih a hriat theih a, chutah a fate chu ka thisen, ka fate ngei an ni tih ka hre leh zel a, engkim chu a inkawkalh nuai ni berin ka hria.

"Ka pu, i phone kha a ri a" ka dara min sawi dat chungin hmeichhe tleirawl pakhat hian a rawn ti a, chu veleh ka ngaihtuahna aṭang chuan ka harh chhuak nghal.

Caller ID ka en chuan Zonuni a lo ni a, hmeichhe tleirawl pawh chu a kal sawn ve leh nghal mai bawk.

"U Rinte, phone call i va'n pick up har em em, chuan engati nge Studio-ah i awm loh? Kan bang chiah a, ka lo peng kawi asin" ka pick up rualin Zonuni chuan a rawn ti nghal mawlh mawlh a, a lakah chuan ka inthiam loh tulh tulh.

"Nia, hmun dangah ka kal lawk a" tih têin ka lo chhang a, thil dang a sawi zawm erawh ka bengah lut mahse ka rilruah a lut thei tawh lo. Ka mi hmuh avang chuan ka tho vut a, dawhkana cheng 500 dahin ka kal chhuak zui nghal.

"Ka pu" tia min kohna ri pawh chu hre reng mah ila ka hawi let tawh lo, ka hma lam chu ka pan mawp mawp.

Ka phone chu ka en zeuh a, Zonuni chuan a lo hmet tawp chiah, hmet tawp rih mahse pawi tihna ka nei lo hrim hrim.

Nunpuii te dawra lut mek mipa pakhat chu en reng chungin ka pan hnai a, Nunpuii Bike-a phurtu ngei kha a ni tih ka hre bawk.

Ka kut chu a za zek zek a, ka chhungril chu a sa pup pup a, insual chu ka inpeih em em ringawt, ka inhrethiam tawh bik lo.

Dawr chhunga ka luh chuan hlim hmel zeta Nunpuii nen an inbe lai chu ka hmu a, ka pan phei hmawk hmawk nghal. Ka lang thut chu Nunpuii chuan mak tih hmel zet hian min lo en a, a hmaa mipa ding erawh min hnung chhawn avangin min hmu ve lo thung.

Kuai her lâwpin ka hnek thal nghal tawp a, dawr chhunga thawkte chu an lo ṭe chul a, kei erawh chuan ka thil tih lai chu ka tawp duh hauh lo.

Nunpuii chuan ka hming puma min ko chungin min lo ṭhelh a, ka ban ka phar laklawh lai tak a lo ni bawk nen a leng nghal dâwr.

"Nunpui! Awi, i chal a thi a nia" tih ri ka hriat avang chuan ka thil tih lai ka tawp chat a, ka mi hnek pa pawh chu a thi deuh nuai tawh.

Nunpuii lam chu ka hawi a, a chal a lo dawm vâng avang chuan ka hlauthawng hle.

"Min hnaih suh" a hma zawna ka ṭhut thlak rualin a rawn ti vin tuar a, a ṭap nghal feih feih bawk.

Chutianga kan boruak a nih nuai lai chuan dawr neitunu hmel a rawn lang vat a, thil awmzia an sawi chuan min hau nghal phiar phiar.

"Lo kal teh" tiin Nunpuii banah chuan ka chelh a, ṭang ve mahse ka pawt tho zui nghal.

A bula hmeichhe pakhat, a ṭhiannu ni awm tak chuan ka hnek pa chu a va buaipui thuai a, dawr chhunga awm reng pawh chu ka tum ta lo.

"Nang kha! Nunpuii hi lo hmu tawh suh ang che, i hmu leh tih ka hriat vaih chuan kha aia na khan ka khawih ang che" Nunpuii kuta chelh reng chung chuan ka ti ram hmuk a, kal chhuah nghal ka tum chu ka pai ve ta chhawn chawn mai.

"Zawnga, i duh chuan Fair takin ti ila" inhum ruh ṭeu chuan a rawn ti ve phiar a, Nunpuii kut erawh ka la thlah eih lo.

Ka inrin loh laia min lo hnek ve avang chuan ka kiai suk a, mahse ka chhungril thinrim vanga kiai suk ka ni.

"A tawk! In zak miah lo em ni? Ka dawr a nih hî, Police ka koh hmain chhuak rawh u. Chuan Nunpui nang pawh, ka rin ang i lo ni lo hle mai, awm lo la chuan buaina hi kan tawk miah lo vang, tuna i thil ṭhui lai hi ṭhui zo la, bang ang che" dawr neitunu chuan a rawn ti chang ta fak!

"Ka pi" Nunpuii chuan a ti thawp raih a, chutiang thleng thlenga thil a kal chu ka ring bik lo.

A kut ka chelhna chu ka la thlah duh ta chuang lo va, ka chelh tawh a nih avangin ka thlah mai mai tawh lo bawk ang.

"I fel viau khan ka hria asin Nunpui, chu bakah kha pa khâ Zonuni bialpa kha a ni lo'm ni? I kutah te a vuan leh nghal a, mi ngaihzawng lo ngaizawngtu i nih ka lo ring ngai reng reng lo" dawr neitunu chuan a rawn ti leh hmarh hmarh a, ka bula mi chu a melh rum hle bawk.

"Ka pi, i hre dik lo, Nunpuii hian he pa hi a hre ngai lo, he pa hian a rawn tibuai ringawt alawm, khawngaihin Nunpuii hi a hna aṭang ban lo hram rawh" a ṭhiannu chuan a rawn ti thuai thuai a, Nunpuii erawh a kun ngul a, a chal pawh a dawm tawh lo.

"Ni lo, chawl rih rawh se. Nakinah duh leh keima'n a thawh a ngaih hunah ka be leh mai ang, a thil ṭhui lai hi ṭhui zo se, chawl rih se a ṭha ang" dawr neitunu ṭawng chu hriat a nuam lo kher mai, chutah Nunpuii chu

"Aw le, ka lo chawl rih dawn nia, keimah avangin buaina a awm a, ka thiam loh a ni e. Min hruai rawh le, min hruai chhuak rawh le, min chhuahpui kha i tum a ni lo'm ni?" tiin a rawn ṭawng chhuak ve ta, ka mitah tak chuan min chhoh melh ral a, a mitah chuan lungngaihna leh beidawn hlir a khat.

"Chhuak ang, he dawrah hian thawk tawh miah suh" ti supin ka inher a, mahse ka va kal thui lo chiang kher em!

Kan hmaah chuan Zonuni a lo ding reng a, ka hmel leh Nunpuii kut ka vawnna chu a en tawn zak zak a, a rilrua awm ang tur pawh chu ka hrethiam nghal.

"Nakinah engkim ka hrilh ang che" ti hmukin Zonuni chu kan kal pel a, min chhan letna thawm pakhat mah ka hre lo. Nunpuii chu ka kaih ang ângin a awm tawp a, motor chhunga ka luh tir lai pawh chuan a ṭawng lo hrim hrim.

"Nichina ka chet dan vang leh keimah vanga i hna i chan avang khan ka tihpalh, mahse hna dang ka hmuh sak leh thuai ang che" ti supin motor chu ka tinung a, ani erawh a ngawi ngul thung.

Kan tlan chhuah hnu rei lotê ah phone call ka dawng nghal a, ka rin rilruk ang ngeiin Zonuni a lo ni. Ka phone chu ka hmet busy hmak a, mahse phone call chu ka dawn chhunzawm char char tho.

Call rawn lut apiang chu ka hmet busy zel a, a tawpah phei chuan ka phone chu ka switch off hmak, tunah rih chuan tûmah ka be peih rih lo, Nunpuii tih chauh lo chu!

An in lama tlan lovin Durtlang lamah ka tlan daih a, hawpui nghal chu ka tum teuh lo, sawi tur kan ngah lutuk.

Kan sawi fel a ngai, engkim a bul aṭang râta kan sawi fel a ngai tak zet a ni. Kei ang bawkin ani paw'n sawi tur a ngah dawn tih ka hria, kei lêtin sawi tur a ngah zawk hial ang, mahse a ṭawng duh kher ang emaw!

Inbe miah lovin kan chuang dun char char a, kan rilru kan kawm ve ve te pawh a ni ang.

Kalna tur hmun leh dinna tur hre ber awm zia zângin Durtlang lamah ka tlan chho ve ringawt a, ka hre bik teuh si lo. Durtlang leitan kan thlen chuan Sihphir lamah ka tlan leh a, Durtlang leh Sihphir inkar kawng reh lai vela inbiak chu ka tum ta ringawt.

Minute 10 vel kan tlan hnu chuan ka duh ang taka hmun reh leh mi tlawh pawh lohna chu kan thleng a, motor chu ka tiding zui nghal. Nunpuii lam chu ka va hawi a, ani chuan pawn lam hawiin min lo hnung chhawn daih.

Ka aw ka then deuh kharh hnuah chuan a ṭhut dan a siam rem a, ka lam erawh a la rawn hawi duh chuang lo.

"Engtin nge kum 8 kal taah khan ngaihzawng nei chungin ka kawp che tih i hriat?" ka ti nghal ringawt a, ka pehhel buai vel peih lo, sawi tur ka ngah lutuk chu sawi fel thuai thuai ka duh tawh zawk a ni.

"Nunpui, min chhang la, tun hi thil sawi fel hun tak a ni" ka tih pawh chuan min chhan chu a tum hmel loh khawp mai.

Thawk ka la ri hawk a, a awm ngaia a awm reng thei chu mak ka ti zawk. A hna a chan avangin min vin bawrh bawrh ka ring kha a ni a, mahse min vin hauh lo.

"Kan sawi fel hma chu i haw ka phal dawn miah lo a nia" vo titih chuan ka ti leh a, tlemin ka aw chu ka ti khauh deuh fak bawk. Ka lam a rawn hawi ve ta, mahse lungngaihna leh beidawnna bawk ka hmu leh tawh.

"Thi daih ila a ṭha zawk ang ti raw?" tih pah chuan a rawn nui lui seih a, ka beisei loh lam daih a rawn sawi avang chuan mit tizim sun hian ka lo en a, ka thinlung chhung chu a hlauthawng ru em em bawk.

"Nang nena kan intawng kha chu pawi ka ti lo, mahse a hun laia naute ka lo titla duh lo kha tunah chuan ka inchhir ta hle a ni. A hma kha chuan ka fate avang hian ka hlim ṭhin, ka fate nena min uap lumtu pasal nei lo mah ila ka fate avangin hlim châng ka ngah a, mahse tunah chuan hlimna ka nei tawh lo" ṭah insum tih hriat takin a hmui chu a pet fan fân a, engkimah chuan min demna hlir a lang.

"A chhan chu nang i rawn lang leh tawh a, nang chuan ka lak aṭang ka fate hi min laksak i tum ngei dawn tih pawh ka hria, chuvangin tunah chuan ka hlauthawng em em tawh zawk a ni. Khawngaih ka dil tawpa che Rinte, i fate nu ka nih na ang tal pawhin keini nufa hi min lo tibuai tawh suh" a rawn tih zawm leh zat a, a mittui chu a tling pam bawk.

"Ka fate hi ka thlahthlam duh i ring reng reng em ni? Chutiang bawkin ka fate nu pawh, nge mi â emaw min ti zawk? Chu bakah pa tel lo chuan ka fate hian nuam an ti tak tak dawn chuang lo, chuvanga thil sawi fel thuai thuai duh chu ka ni"

"Nuam kan ti e, i tel lo pawhin ka awm thei. Ni e, dik tak chuan ka fate pa tel lova kum 8 chhung ngawt nun han hman chu a nuam famkim miah lo, mahse tunah chuan kei leh ka fate hian i tel lova nun kan thiam chho ṭan mek a ni. Khawngaihin min lo hmu tawh suh, min lo tibuai tawh suh, khawngaih takin" a biangah chuan mittui a rawn luang ta nge nge.

"Enteh, khawngaih min dil reng lo hian thil sawi fel zawk ang. A hmasa ber atan chuan ka en liam mai mai dawn lo che u tih lo hre phawt la, i duh emaw duh lo emaw chu chu ka tihtur a ni. Tu nge ngaihzawng ka nei reng tih lo hrilhtu che chu? Han sawi teh, chuan kan inkawp lai khan ngaihzawng ka nei tih ka pha lo, mahse kha ka ngaihzawng kha ṭhen ka duh tawh lutuk zawk a ni"

"Hun kal tawh leh thu awmze nei lo sawi ka duh tawh lo ve, hun kal tawh avanga intih nat reng pawh ka bansan tawh, tunah chuan ka thi a nih loh chuan ka fate tan leh ka chhungte tan chauh ka nung tawh a ni" awkâ vin pakhat mah a hmang lo chu mak ka ti, a chau pawh a ni maithei a ni.

"Ka zawhna i chhang duh lo bawk a, thu tawp keima'n ka siam mai a ngai a ni ang chu! Ka fate hi ka awmpui ang, kum 8 chhung zet chu i lo enkawl tawh a, chu pawh ka hriat miah lovin, tunah chuan ka enkawl ve hun tawh" ka tih chuan na zet hian min en a, a mitmeng chu a ling hlar.

"A teuh lo, a teuh lo lutuk! Nang hian ka fate hi i enkawl lo vang, i fate an nih ve loh avangin i enkawl ka phal bawk lo" a rawn ti phiar phiar a, ka thusawi zet chuan a thin a tirim hle pawh a ni ang a awm dan zawng zawng a danglam vek.

"Ka fate an nihzia chu kei leh nang tluka hre chiang an awm lo, ka chhungte pawh engkim ka hrilh ang a, nang paw'n i chhungte hrilh vek bawk ang che. Zonuni pawh ka hrilh ngei a ngai ang, kan inkawp reng thei dawn chuang lovin ka hria"

"Engati nge!? Engati nge ka nunah hian buaina i siam reng? Engati nge i fate enkawl i duh chuan khang kum kal ta chhung zawng khan ngaihven pawh i rawn ngaih ven loh? Vai fa i ti a ni lo'm ni? Mahni fate pawh Vai fa tih duh hial khawpa rilru ṭha lo mihring i ni a, kei leh ka fate hian kan mamawh tawh lo che" ring tak hian a rawn ti tuar a, a ṭap chhuak nghal feih feih bawk.

"Khang hun lai kha chuan ka fate an ni tih ka hre bik hleinem, min dem thei i ni bik lo" a ṭap hmel chu hmuh hrehawm ka ti, ka tawt up up a, kan inngaihzawn ve laia a ṭap hmel ka hmuh ngai loh avangin a ṭap hmel chuan ka thinlung chhungril a khei zak zak thei.

"Enge ka tih ang? Kei leh ka fate min lo hmuh tawh lohna tur a nih phawt chuan engmah tih hreh ka nei lo, min hrilh rawh, enge ka tih ang? Bawkkhupa ka dil kher che i phut em ni? A pawi lo, ka ti mai ang, ka ti vek ang" a rawn ti zung zung a, mi â ang maiin a che buai vek.

"Awm ṭha teh!" ti khauh fakin a darah chuan ka chelh thuai a, a rawn ṭah rik feih avang chuan ka kuah leh ta ringawt. Kan awmna hmun chuan a zir lo hle ná a, a rem ang ângin ka kuah ta reng tho.

"Ka tel lovin kum 8 lai hun in lo hmang tawh a, tunah chuan ka fate leh an nu hi ka thlahthlam tawh dawn lo che u tih hria ang che. Chuan i ṭap hmel hi min hmuh tawh lo hram teh, ka dawngsawng thiam lo" nghet taka kuah chung chuan ka ti a, a hma aia uarin a rawn ṭap zawk ta daih.

A ṭah ang âng chuan ka kuah bet ran a, ka pawm a nih tawh mah zawk. Ka mal chunga ṭhut tirin ka kuah a, ani pawh chuan min kuah nghet khawp mai.

A rilru a na thawkhat hle pawh a ni ang a awm dan chu engmah a sawisel lo va, ka kokia hmai phumin a ṭap hawm hawm a, tih theih chu nei tlem tak ka ni.

Motor light enna lam chu ka thlir reng a, tunah chuan inthiam lohna ka nei ve ṭan ta. Ka rilru chapona te chuan lan an rawn la tum hram a, mahse thil tihsual ka nei tih ka inhriatna chuan ka rilruah hmun an chang tam ta zawk.

Ngaihzawng nei reng chungin lo kawp vel lo ila, a phone call te kha ka rilru chapona te dah ṭhain lo pick up ta ila, engkim chu a buai nuai ka ring kher lo.

Amaherawhchu khang hun lai kha chuan ngaihzawng ṭhen tum reng ka ni a, ka ṭhen tum berin min ṭhen duh miau loh avanga ngaihzawng la nei reng pawh ka ni.

Chutiang bawkin kei aia Vai a thlan thu kha hre lo ila chuan a phone call ka pick up chiang viau ang, mahse tunah chuan engkim a buai zo tawh.

Ka beisei loh deuhin fa phir ka lo nei reng a, Nunpui lah chuan Vai a ngaihzawn loh thu a sawi chiang viau si. Ni lo, kei hian thil hriat sual ka nei chiang alawm, ka bialnu in Vai a ngaihzawn thu min hrilhtu kha!

Lalpa le! Nunpuii hian dawt a sawi hauh lo vang, ka tel lova kum 8 chhung ngawt kan fate a lo enkawl danah hian dawt a sawi mai mai dawn lo tih ka chiang.

"Nunpui, ṭhu ṭha tawh la, mi tu emaw ni hmuh ngei ngei kan ngai, chu chu kan buaina bulpui ber hi a niin ka hria" ka tih chuan rang takin a awm dan chu a siam ṭha a, a ṭhutna pangaia a ṭhut ṭhat hnu chuan a kut a sik niap niap bawk.

"Kum tam liam tawh mahse ka mitah chuan hmana Nunpuii chiah chiah kha i la ni" ti supin ka kiai suk a, ani chuan engin mah min chhang let lo, min chhan let pawh ka besei hran lo.

"Kal ang aw, ka rualin i lo kal ve ang a, kan inkar hi kan siam fel vek ang. Tunah phei chuan fa duhawm tak tak kan nei tawh leh nghal a, awm hrang chi kan niin ka hre tawh lo" tlan chhuah pah chuan ka ti a, ka rilru dik tak pawh a ni.

Ka aw te chu a dam deuh ruih tawh a, ka fate leh Nunpuii lakah chuan ka inthiam lo tulh tulh dawn tih ka hre nghal bawk.

"Kan awm dun thei tawh lo" zawi deuh tak hian a rawn ti sep a, a hmel chu ka en zawk nghe nghe. Pawn lam chu a lo thlir dauh dauh a, motor khalh lai ka nih avangin rei pawh ka en duh ta lo.

"Thei tehreng mai, kan fate avang hian kan awm dun ngei ngei a ngai zawk" steering herh kual zung zung chung chuan ka ti a, ka tlan muang lem lo, kan mi hmuh tur chu hmuh vata thil awmzia hriat ka mamawh tawh tak zet a ni.

"Nupui i neih dawn khâ" a thu rawn sawi avang chuan ka inrin hmain ka nui chhuak hawk a, a lam hawi lo mah ila min lo en deuh hâw tih chu ka mit sirin ka hmu thei tho.

A awah chuan thikna aw bawk ka hre leh, ka hriat sual loh chuan Nunpuii hian min la theihnghilh bik lo a ni.

"Nupui ka neih dawn pawh ka lo hre hleinem, mahse i ngaihtuahna awm tur chu ka hrethiam mai e! Kar lehah khian Zonuni u te an inneih dawn a, chuvanga mo kawr kha rawn ngaihven chhen kan ni. Zonuni pawh pangai taka ka titipui a ngai ngei ang, min lo hriatthiam hram ka beisei"

"Ni lo, keini nufa vangin Zonuni kha ṭhen tum miah suh. Ka duh lo, ka sawi vek tawh khâ, min lo ngaihtuah buai duh suh, chuan hna pawh min zawn sak a ngai lo, ka zawn chuan ka hmu leh thuai mai ang" a rawn ti thuai a, a thusawi chu ka bengkhawn duh loh lam tak a ni. Minute 20 vel kan tlan hnu chuan keima puala ka siam

Recording Studio chu kan thleng a, Nunpuii chuan mak a tih hmel khawp. Motor aṭanga chhukpui thuaiin a kut chu ka chelh leh nghal hmiah.

Chapter 8

Studio chhung-a Common room kan luh chuan ka nau te ho pawh an lo la awm kim ṭhap a, kei min hmu chiah chu mak an lo ti hle.

A awm ve tho, chutiang hunah chuan ka kal ngai lo miau alawm, ka mi hmuh tum ber erawh a awm lo thung.

An mak tihna tizual tur ting tangin Nunpuii chu ka la kai reng a, ka Recording Studio-a thawkte zawng zawng hian Zonuni nen kan inngaizawng mek tih an hre vek a, chuvanga mak tih hmel hlawm em em pawh chu an nih ka ring. Common room aṭang chuan ka kal sawn pui vut a, recording ti mek pawh an lo awm nghe nghe.

Ka mi hmuh duh ber awmna room ka luh chuan min lo en thuai a, min nuih var varin Recording a tih mek thu a rawn sawi a, mahse ka bula mi hmel a hmuh chuan a nui tawp chiang hle.

Recording chu tawp lawk turin ka ti a, mi dangho zawng zawng chu chhuak rih vek turin ka ti nghal bawk. Sumdawng ka ni a, mawi lo taka ka che lai mi dang hmuh tir ka duh lo a ni.

Ka sawi ang chuan mi dangho pawh chu an chhuak dam dam a, recording ti lai mek te hnenah chuan hun kan lak hek dawn avanga Rate ka hniam tur thu ka sawi nghal bawk.

"Eng vangin nge Nunpuii hi Vai ngaizawng anga min hrilh?" ka ti tawl a, chu veleh Damdama, kum 8 liam taa kan Band Bassist ni ṭhin chu a rawn ding nghal a, a hlauhthawn hmel hle, chu chuan ka rinhlelhna a tizual.

"Maw? Aaaaa..ih...Rinte, chutiang ka sawi em ni?" ka kut chu engtik laiin nge a chet chhuah hman pawh ka hre lo, hniak phawi miah lova dawt a sawi thei chuan nasa takin ka thin a tirim zual a ni.

"Tho rawh, chuan ka zawhna kha chhang ang che LALDAMPUI" ti hrawkin a kawr âwmah chuan ka ṭham a, chhuat aṭang chuan ka ṭham tho a, ka insum thei lo tluang zel mai ang tih a hlauhawm, Nunpuii erawh a lo ngawi reng thung.

"Min chhang ta che" ti leh hrawkin a vawi hnih na'n ka hnek let leh tawp a, Nunpuii chu a rawn ṭe chhuak ta. A hmel ka en chuan hlauh hmel fê hian a lo awm a, ka chet dan avanga a lo thlabar em em chu nuam ka ti bik lo.

"Nunpuii hian Vai a ngaizawng reng reng lo, nang hian dawt min lo hrilh char char a, i dawt sawi avangin thil pawi tam tak a thlen phah asin" Damdama lam hawi chuan ka ti leh a, ka awah chuan nelawmna pakhat mah a tel thei tawh lo.

"Eng vangin nge dawt i sawi?" ti vin leh ṭhawtin a lam chu ka pan hnai a, mahse ka chet hmain a rawn che hmasa ta zawk.

Ka hmaah tak chuan a rawn ṭhingṭhi thuai a, a chet dan chuan min tihhamhaih rualin ka thinrimna erawh a la reh chuang hauh lo.

"A chhan chu khang hun lai khan Nunpuii hi ka duh alawm, nang nena in inngaizawng kha ka thik a ni. Ngaihzawng pangai nei reng chunga i kawp avang khan ka thin a lo rim a, inṭhen tir che u kha ka tum ta a ni" ka hmaa ṭhingṭhi chung chuan a rawn ti a, a kun ngul bawk.

"Tho teh!" ti hmukin a banah chuan ka ṭham tho a, kan inmelh chiang ta hle, mahse ani chuan min en rei ngam lo, ngam tur pawh a ni lo.

Thui tak pha kawi phei se chuan kut ka thlak hman nual ka ring, pha kawi lovin a inpuang vat zawk mai pawh a!

"Nang mah vang hian fa ka nei tih kum 8 chhung zet chu ka hre lo asin, i thil tih pawizia hi i hria em? Ka ṭhian emaw i nih ka lo ti asin, engati nge ka hnung lam aṭang a ruka min lo beih reng? Thil dang zawng aiin ka fate'n kum 8 chhung ngawt min hriat loh chhan hi nangmah i ni a, i chungah hian ka thin a rim hle bawk"

"Min ngaidam dawn nia, min ngaidam thei lo a nih paw'n a pawi lo, chuan fa i nei tih ka hre bik reng reng lo" a aw chu a khur deuh dar dar a, ngaihdam min dilna chuan engkim siam ṭha thei se chuan ka lawm khawp ang, mahse engmah a thlak danglam theih tawh loh avangin ka la pangai thei der lo.

"Kei chauh ni lo Nunpuii bulah pawh sawn ngaihdam dil rawh, pawi nasa tak i khawih a ni Damdam" thawk ka la hawk hnu chuan ka ti a, thinrim tak pawhin ka be thei tawh lo, thinrim khum reng chuan awmzia pakhat mah a nei lo bawk.

"Ka tihpalh Nunpui, min ngaidam dawn nia, mahse khang hun lai khan i rai ang tih ngaihna reng ka hre lo, ka thiam loh tak zet a ni e" Nunpuii lam hawi chuan a ti ṭha ve leh mai a, kei min kal pelin kawngka lam chu a pan zui nghal.

"A mak ngawt mai, khati khawpa ka beih hnu pawh khan ka nei thei ta chuang lo va, Nunpuii hian duh satliah mai ni lovin a lo hmangaih hman tawh che tih ka lo hre miah lo kha ka â hle a ni. A harsa tawh maithei, mahse in inkarah fate an awm tawh phei chuan inngeih taka in awm leh theih na'n duhsakna ka hlana che u" kawngka bul aṭanga rawn ti lehin a chhuak zui nghal.

Nunpuii lam chu ka hawi a, bang nghengin a melh ngai chu a melh ngawt ngawt a, a dinna lamah ka phei tih pawh hre lo ang maiin a awm a, a dara ka khawih pawh chuan min rawn en lo hrim hrim.

Chiang takin a hmel chu ka en a, milim ang mai a ni. Biak a hun rih lova ka hriat avang chuan ka be duh ta lo law law a, a kuta kaiin room aṭang chuan ka chhuahpui ta tawp.

Dik tak chuan kei ngei pawh hi biak ka duh lo, ka thinrim rualin ka inthiam lo tho bawk si, fate ka nei tih ka hriat loh chhan chu eng pawh ni se ka fate leh Nunpuii lakah chuan ka inthiam lo thar em em a ni.

Ka Studio-a hnathawk pakhat chu Recording tih chhunzawm turin leh Recording Rate 50% a tlawm turin ka ti a, thil dang sawi belh leh tawh lovin ka motor lamah ka kal zui nghal hmawk hmawk.

Motor chhunga kan chuan luh hnu leh kan tlan chhuah hnu thlengin a tua mah kan ṭawng lo va, kei chu ka rilruah ka fate chiah an awm, ani erawh enge a rilruah awm ang tih ka hre lo.

An veng lamah chuan ka tlan mial mial a, khua pawh a lo thim titih duai tawh. Ni khat chhunga thil tawn atan chuan a nasa mah mah a ni, a bik takin Nunpuii tan chuan rilru fim tak put a har khawp ang.

Keimah avangin a hna thawhna aṭang ban a ni a, chutah thu dik kan hre chhuak leh a, thu dik ni mahse thinlung chhung a tina duh ngâih ngâih hle a ni.

An in kawt kan thlen chuan engkim a pate hrilh turin ka ti a, mahse min chhang lo hrim hrim. Zana ka len theih dawn loh thu chu ka sawi leh a, thil tih fel tur ka la ngah em avangin ka len hman ka inring lo a ni.

Ngawi rengin motor aṭang chuan a chhuk a, keiin ka ṭhutna aṭang in lam pana a kal chu ka lo thlir reng a, a chauh hmel tak zet.

Chau awm pawh a ni e, chauhna tham fê chu a tawng alawm, kei ni ta ila ani ai chuan ka chauh hmel zawk ka ring.

Kan in ka thlen chuan khua a thim fel vek tawh a, in chhunga ka luh chuan ka chhungte paw'n zanriah an lo kil mek a, chaw ei ve nghal turin min lo ti nghal bawk.

"Mama, DNA Test Result kha min la hrilh ve miah lo a nia, enge chanchin?" chaw ka bar mawlh mawlh laiin ka nu chuan a rawn ti a, ka nau leh ka pa chuan min lo en nghal ran a, kei erawh chaw ka ei mial mial thung.

"Rinte" ka pa aw ka hriat chuan ṭawng peih lo viau mah ila thil awm dan ka sawi fiah ngei a ngai dawn tih ka hria, zep lovah chuan min be miah lo mahse pawi ka ti miah lo.

Ka chaw ei tawp hmakin ka pa chu ka en ran a, mi dang pahnih chuan ka ṭawng chu an lo ngaichang reng bawk.

"Fa phir ka nei" ka ti tawi sup a, ka nu chuan thawm a lo chhuah zawm nghal thuai a, ka pa erawh hahdam huai hmel a pu daih.

Ka nu chu a rawn ṭawng nghal zawt zawt a, mahse a zawhna chu ka chhang duh tawh rih lo, chaw ei vat vata Zonuni hmuh ka ngai tawh tak zet a ni.

Chaw chu ka ei kham rang hle a, thil dang min zawh chhunzawm miah lo chu lawm tak ka ni.

Ka room chhunga ka luh chuan ka inbual nghal sawk sawk a, insiam vata chhuah leh thuai thuai ka duh. Zonuni min lo dawnsawn dan tur chu ka ngaihtuah thiam lo, a tan chuan a rilru nat thlak khawp ang le.

Chhun lama kei leh Nunpuii min hmuh te khan a hmelah mak tihna leh rilru natna ka hmu a, mi hrang hrang laka buaina ka thlen reng mai chu nuam ka ti bik miah lo.

"Kei chu khang naupang pahnih kha i fate an nih ka ring bur a, khatiang em ema nang nena inang naupang an la awm lo tlat a tin ni! Chuan engtin nge? Engtin nge tuna i bialnu hi i tih dawn?" ka room chhunga ka insiam mawlh mawlh laiin ka nu chuan a rawn ti a, chhang lovin ka insiam zawm mial mial.

"Min chhang teh Mama, vawi hnih khat vel lêk lo la hruai mah la nula pangai tak a ni chuan ka hria, ṭha takin engkim i hrilh fiah dawn nia" a rawn ti leh a, ka insiam zo thawkhat tawh bawk nen ka en ve ta ran a, ka hmel aṭang chuan ka rilru a hah tih a hriat ngei ka ring.

"Zanin hian Zonuni chu ka hrilh ang, vawiin khan min hmu titih tawh a, mahse engmah a la hrethiam tak tak lo vang" tiin ka phone chu ka kekawr ipteah ka khung a, kawngka lam chu ka pan zui nghal.

"I lo haw hunah kan sawi chhun zawm dawn nia, ka lo la meng reng ang" ka nu chuan a rawn ti leh hram a, buk khum nghauhin ka chhuahsan zui nghal.

Kan in ka chhuahsan ṭep tihah ka pa chuan min lo be leh a, ani paw'n ka nu sawi ang chu a rawn sawi ve leh tho.

Zonuni te in lam pana ka tlan lai chuan ṭawng dan tur ka ngaihtuah char char a, thu khuh a chi tawh dawn loh avangin sawi dan tur chu ka ngaihtuah chhuak thiam der lo.

An in chhunga ka luh rualin a nau chuan min lo be nghal a, Zonuni nen kan lo inzui rei ve deuh tawh avangin min ngaina ve tawh hle. Amah Zonuni ber erawh a room lamah a awm thung a, a nau chuan a va ko thuai bawk.

Zonuni lo chhuah hma chuan a pa nen kan lo titi a, a nu erawh a boral tawh thung. Room aṭanga Zonuni a lo chhuah rualin ka lo en nghal vat a, ngainatawm deuhin ka lo nuih suk a, mahse ani chuan min nuih let ve miah lo.

A pa bulah chuan len chhuahpui lawk ka dil a, a lo phal ve mai bawk. Kan haw har ka rin loh thu ka sawi lai chuan a ngaihna hriat loh hmel fê hian Zonuni chuan min lo en a, ka hre lo der char char tawp.

"Va insiam la, kalpui lawk duhna che ka nei a" ka tih chuan a rawn bu zeuh a, a room lam panin a let leh a, a rawn chhuah leh meuh chuan a nalh sawt hle.

A hmelah chuan rilru buai rukna ka hmu a, chhun lama ka chet danah zawhna pawh a ngah hle ka ring. Zan dang ang lo takin motor-a kan chuan hnuah pawh a rawn ṭawng miah lo va, awm thiam lo tak ka ni.

A hmate kha chuan min be zet zet a, min fiam bawrh bawrh a, thil chi hrang hrang a sawi kual vak vak ṭhin kha a ni a, tunah erawh hmui ṭawn sak ang maiin a ngawi reng a, ka en zeuh zeuhna pawh chu a hriat vek ka ring.

Kan boruak nuam lo lutuk tih zângkhai na'n zai chu ka play ri ral râl a, Zonuni chu ka vengthawng em em hi a ni tawp.

Ṭawng bawrh bawrh se, min be leh mawlh mawlh se, ka chhan lawk loh avangin han titau kual leh vel se, chutiang chuan awm se nuam ka ti daih zawk ang.

A ṭhen a zar chu Nunpuii thawhna dawr neitu hnen aṭang a hriat ka ring tawh tho a, chumi avang leh a phone call ka pick up duh loh vanga lungngawi lo a nih ngei ka ring.

"Zonun, thil pawimawh tak sawi dun kan ngai a ni" ka ti sup a, motor ka tih dinna pawh a rei leh tawh, rawn ṭawng chhuah hmasak a tum miah loh avang chuan ka awm thiam lo ngawih ngawih.

"Nia, sawi dun tur kan neiin ka hria" amah ang lo takin a ṭawngkam hman chu a tawi hle a, en reng mah ila ka lam a rawn hawi duh ṭhak lo.

A kut chu lain ka hum vang vang a, ka sawi tur chu ka huphurh ru ve tak zet a ni.

"Kan inṭhen a ngai" ka tih chuan rang zet hian min lo en a, mahse a hawi sawn leh nghal.

A kut ka hum lai chu a tiche neuh neuh a, ka en chuan a lo hum ruh ve hle. Ka thusawi chuan a ṭhawng a ni, nasa takin a ṭhawng a ni.

"Eng vangin?" a aw chu pangai taka chhuah tum mahse a pangai thei lo tih ka hria, chuti teh thuta kan inṭhen a ngaih avang chuan a lakah pawh ka inthlahrung lutuk.

Hma lam pawh en rei duh lovin a sir lam chu a hawi daih a, ka kut chhunga awm a kut pawh a tiche neuh neuh bawk.

"A chhan chu kei hian fanu leh fapa ka nei, mahse kum 8 chhung chu bumna avangin ka hre lo tluan ṭhak a ni. A pawi ka ti Zonun, i rilru a na dawn tih ka hria, mahse ka fate leh ka fate nu hi ka thlahthlam thei tawh lo. Ka tel lovin kum kha leh chen kha an lo awm tawh a, tunah chuan anni chu ka"

"U Nunpuii leh a fate kha ti raw?" ka ṭawng laklawh lai chuan a rawn tisin raih a, ka lam hawi zawnga ka kawih her chuan a mittui a lo tling pam a, awkâa chhang lova ka buk khum rualin a mittui a rawn baw nghal zawih.

"Ka tihpalh, ka tihpalh lutuk Zonun, ka tum a ni bik lo" tiin ka kuah thuai a, ring lutuk lo hian a rawn ṭap chhuak a, a rilru nat dan tur chu hriatthiampui lo mah ila a na thawkhat dawn tih chu ka hria a ni.

"A pawi lo" ti ṭuauin ka kuahna aṭang chuan a awm sawn a, a kut ka hum lai reng pawh chu a pawt chhuak zal zâl a, min hlat duh hmel taka a awm nghal chu hrehawm ka ti, hrehawm ka ti ve tak zet.

"Kar leha ka ute inneihnaah kan kal dun ang chu ka lo ti a, mahse a pawi lo ve, ka tuar dam thei mai ang. Keiin hmangaih che mah ila min hmangaih ve miah lo tih hi chu ka hriatna a rei tawh a, min hmangaih ve theih mai erawh ka ring ṭhin" nui lui sak chung hian a rawn ti a, ka ṭawng dawn chiah tihah amah bawk chuan

"Hlim takin awm rawh u, chhungkaw hlim tak in ni dawn nia, kei erawh ka leng tar tawh mai ang. Ka bialpa hmasa ber avang khan mipa ka rinna a tla hniam nasa em em a, nang tih chauh lo chu mipa hmangaih leh rin ka nei leh tawh lo. Tunah erawh a ngaite bawkin ka awm leh dawn ta a ang, ka vanduaina a kal tluang zel a nih dawn hi!" a rawn ti leh sep sep a, za lo zetin a nui ri hak hak bawk.

"Zonun, i lakah hian nasa takin ka inthiam lo a ni. Nunpuii leh ka fate hi awm lo se chuan nupuiah ka nei ngei ang che, nang baka ka nupui ni tlak hi ka hre lo. Chuan len tar lam kha sawi tawh reng reng suh, nula fel leh hmelṭha em em i ni a, kei aia innghahna tlak mipa i tawng leh ngei ang"

"Ni lo ve, ngaihzawng neih hi ka peih tawh lo, a lo hrehawm em mai, ngaihzawng neih ai chuan pasal neih tawp te hi a nuam daih zawk ang" a ṭawng lai chuan nui reng mahse a ṭah a chhuak tak zet tih chu ka hre reng.

"Haw ila, ka chhungte pawh keima'n ka lo hrilh vek dawn nia, tlang taka hrilh law law a ṭhat zawk ka ring. Kar leh lam atana ka plan erawh a flop vek dawn ta a nih hi!" a rawn tih chuan rang zet hian

"Ka kalpui ang che, ka lo kalpui ang che. Chumi hma chu i chhungte pawh kan la hrilh dawn lo a nia" ka lo ti thuai a, mahse ani chuan lu a lo thing nâng nang thung. A kut chu tawkin ka hum vang vang a, la kangin ka fawp zeuh bawk.

"A ngai lo ang, keimah pawhin ka kal thei alawm, kan inkar chhe ta avanga ka rilru natna hi zaninah hian liam vek zawk rawh se. Haw ila, kan sawi tur ber kan sawi zo tawhin ka hria, chuan min ngaihtuah hmel deuh khan awm suh, ka ṭha a nia" min nuih sen sen chung hian a rawn ti a, kei erawh ka nui ve thei hauh lo.

An in lam pana kan haw lai te chuan kal lam ang lo takin a ṭawng melh melh a, a rilru na lutuk chu amah leh amah intih hlim chawp a tum ni berin ka hria.

A duh phawt chuan a ṭah theih thu ka sawi tawp a, mahse a ṭah a chhuah loh thuin min chhang hmak thung. Kha leh chen kha kan lo inzui ve tawh a, a ṭah a chhuahzia chu ka hre chiang em em.

Ka awm lai chuan pangai taka lan a duh a, rilru na lo ang deuha awm a tum hram hram a, keimah avanga len tar a tum ringawt te chu ni theiin ka hre lo a ni.

An in kawt kan thlen chuan motor kawngka hawngin a chhuak nghal tharh a, kei pawh ka chhuak ve nghal. An ina lut lo law law turin min ti a, ka motor bula dingin an in lam pana a kal hnek hnek chu ka thlir ta reng.

Chutia ka en reng lai chuan a kal lai tawp chatin a ding a, ka lam hawi zawngin a rawn inher a, ngawi rengin min lo pan nghal bawk. Kei chuan a chet dan chu ka lo en reng a, motor-ah thil theihnghilh a nei a nih ka ring ber.

"U Rinte, a tawp na'n ka fawp thei che ang em?" ka hma lawka a din rualin a rawn ti a, nui sen sena min biak teh thut avang leh a thusawi avang chuan ka hamhaih ngâng mai. Hnai leh zualin ka bulah a rawn ding a, lo en kar chungin

"Zonun, inṭhen leh rih lo mai" ka ti ta thlawt a, ka khawngaih tak zet a ni. A lama ka lu kuai kunin a rawn dingdihlip âk a, ka hmuiah tak chuan a rawn fawp ta chat.

Kei pawh chuan ka lo chhang let ve mai a, mahse ka fawh ve tak tak hmain a inla hrang ta daih.

"Tun aṭang chuan mipa reng reng ka ring leh tawh lo tak tak ang, chuan ka hnaih leh tawh ngai bawk lo vang" tiin min hnung chhawn thuai a, ka pawh din hma chuan a tlan ta vang vang.

A tlan lai chu ka en reng a, duh chuan in chhung a luh hmain ka va man leh hman ang, mahse ka umzui chuan thil a kal buai leh vek dawn tih ka hre kar thung si.

Kan in ka thlen chuan an sawi ang ngeiin ka nu leh pa hmel chu ka hmu a, ka nau erawh a mu tawh a ni ang ka hmu ve lo.

Sitting room-ah chuan kan ṭhu ṭhap a, zawhna chi hrang hrang min zawt a, ka hun kal tawha ka nun hman dan leh thil dang tam tak min zawt a, kei chuan engkim a nihna ang thlapin ka chhang fai vek.

Zonuni nen kan inkar thlengin min zawt ta zel a, chu pawh dik takin ka chhang a, ka nu phei chuan Zonuni chu a khawngaih hle. Ka pa chuan

"Chutiang a nih si chuan awm mai mai thei i ni lo, Nunpuii chu nupuiah nei ngei ang che. In fate tan pawh a ṭha zawk ang a, mipa i nih angin i mawphurhna hi i hlen ngei tur a ni" a ti nghet charh a, ka lakah chuan a lungawi loh rualin a lungawi lo em em chuangin ka hre lo.

Khuma ka mut hnu thlengin ka pa thusawi chuan ka rilru a luah tlat a, Nunpuii chu nupui atana ka neih ngei a ṭhat ber ka ring ve ta.

A hma kha chuan kan fate in kawl chhawk kha ka tum mai a, mahse ka nu leh pate thu min hrilh chu ti zawk ila a sual lo ber ang ka ring.

Kawr pangai hain khumah chuan mu tawh mah ila ka muhil thei tlat lo, ka mit ka chhin rualin ka fate hmel ngawr ngawr chu ka mitthlaah a awm a, va call ringawt dawn ila Nunpuii phone number pawh ka nei der si lo.

Dar zat ka en chuan 11:30 lai hi a lo ri tawh a, mut hun viau tawh mahse ka tum chu tih tlang ka tum lui ta tho.

Ka khum aṭang chuan ka tho tharh a, ka awm hmun kawr nen chuan room aṭangin ka chhuak zui nghal. Kan in chhung thawm chu a reh ṭhiap a, ka nu leh pate pawh an muhil tawh a nih ka ring.

Helmet pawh khum lovin ka nau Bike chuan Nunpuii te in lamah ka tlan vang vang a, Paizama leh T shirt pawl duk chauh inbel ka nih vang pawh a ni ang vawt ka ti reuh hle.

Khua erawh a lum chho ṭan a, Bike in tlan lo ila chuan vawt ka tih kher pawh ka ring lo.

Nunpuii te in kawt ka thlen chuan Bike chu ka hung ṭha nghal sawk sawk a, chutiang zan rei lam tawha ka kal hnuhnawh leh si chu nuam lo ka ti ru viau, mahse ka fate hmel ka hmu châk ngawih ngawih tlat a ni.

Door bell chu ka hmet a, tûma'n min lo chhang lo. In chhung lamah chuan thawm ri deuh nuai nuai hi a awm a, chu chuan an la mut lo tih min rin tir ve ringawt.

Door bell ka hmeh ṭhat leh hnu pawh chuan hawn sak tu ka la nei chuang lo va, kawngka hawngin ka lut ve ta hmiah. Nunpuii te room lam chu pan nghal a, sitting room-ah tak ngial pawh tumah ka hmu lo.

"A theih lo alawm Bawihpui, ani te chu veng hranah daih a awm a, a mu daih tawh ang. Naktukah a lo kal ngei ngei ang, ka promise thlap e" Nunpuii chuan a lo ti mawlh mawlh a, Bawihpuia erawh chuan ṭap hliam hliam chung hian

"Apa Rintea kha ka hmu duh alawm nu, ka hmu duh" a lo ti ve thung a, an khum bulah chuan an vaiin an lo awm kim ṭhap a, Bawihtei pawh a lo la muhil bik lo.

Kawngka bul aṭanga an nufa inthlem lai thlir reng chu ka thei ta lo, room chhungah chuan ka pen lut zui nghal.

"Engati nge ka Iron Man-a chu a lo ṭah a?" tiin Bawihpuia lam chu ka pan a, mi dangho chuan mak tih lutuk avangin min lo en haw hlawm a, ka hmu lo der ta vek.

Bawihpuia bulah chuan ka ṭhu hniam a, Bawihtei pawh nui ver verin ka lamah chuan a rawn insawn phei nghal.

"Apa Rinte, engati nge i rawn len loh?" Bawihpuia chuan la ṭap reng chung hian a rawn ti reuh a, ka lo nui ri hak a, ka âwmah ka kuah bet zui nghal.

Ka kuah duh ve hmel taka min lo en rengtu Bawihtei pawh chu ka kuah a, mi dangho chu ka zah buai duh tawh lo.

"Hei ngei hi a ni ka mamawh chu!" ti supin ka fate chhip sam chu ka fawp tawn sek a, Bawihpuia pawh a ṭap bang ve ta thuai.

Kan inkuah zawh hnu chuan ni danga ka tihpui ṭhin angin Rock Paper Scissors game chu ka tihpui a, ka fate hlim nui thawm chuan min tihahdam sawng sawng.

Nunpuii leh a nu leh pa chu rei pawh awm lovin an chhuak ta daih a, kei paw'n ka fate chu tihmut tumin thil dang ka tihpui a, thawnthu bei tham zet ka hrilh hnu chuan an muhil ve mai bawk.

Keia thawnthu sawi ve teh lûl ngaihnawm an ti chu a nuihzat thlak zawk, mahse pafa kan ni miau a! Room aṭanga ka chhuah chuan sitting room-ah an lo ṭhu ṭhap a, Nunpuii pa phei chuan zawhna mitmeng hlirin min en.

Ngawi rengin an epah chuan ka ṭhu thla ve a, ka inchei dan a ho lam bawk sia mak chu min ti ve ngawt ang.

Chapter 9

"Engati nge i rawn kal? Puii hnen aṭang i lo kal dawn loh thu kan hre si a" Nunpuii pa chuan a rawn ti a, kei erawh ka lo nui ringawt a, mahse nui miah lova min en ṭhap hlawm avang chuan ka nui tawp ve leh thuai.

"Muthilh ka tum kha ka fate hmel ka mitthlaah an lo lang tlat a, ka tum ngial pawhin ka muhil thei tlat lo va, chuvanga lo kal ta vang vang ka ni e" pangai tak chuan ka ti a, Nunpuii lam ka hawi chuan thip zet hian min lo en kar.

"Ka fate a!?" Nunpuii nu leh pa chuan an rawn ti rual ṭhawt a, an thu rawn sawi chuan min tibangbo letling zawk ta hle. A chhungte hrilh vek tur khan ka ti ngei si a, a lo la hrilh lo a nih ngei dawn hi!

"Tute nge i fate chu?" Nunpuii pa bawk chuan a rawn ti a, Nunpuii lam ka hawi chuan a lo hawi sawn daih. Rei pawh ṭhu lovin a ṭhutna aṭang chuan a tho a, a awm dan chu a nu chuan a thlir reng bawk.

"Eng lo, ka fate chu, Nunpuii hian a la hrilh lo che u em ni?" ka ṭawng sual laklawh tawh avangin Nunpuii chu a tel lo thei ta lo, dik tak chuan Bawihpuia leh Bawihtei te chu ka fate an nih thu a lo sawi vek ka ring tawh zawk a ni.

"Puii lo phei teh, thil awmzia ka hrethiam ta lo tawp mai. Thingpui kha siam suh, tunah rih chuan rawn ṭhu phei phawt rawh" tiin a pa chuan a ko zui nghal a, Nunpuii pawh a pa hmel en ngam lovin a rawn phei ve ta zal zal.

"Enge thil awmzia hi!? Ka fate a tih hi tute nge?" a pa chuan a ti ram leh hmak a, a bula a nupui erawh chuan a hmui a lo hup tawp, an tunu leh tupate pa chu ka ni tih a hrethiam pawh a ni maithei a ni.

"Bawihpuia leh Bawihtei" zam aw tak hian Nunpuii chuan a rawn ti a, ka beisei loh lutukin ka bulah ngat a la rawn ṭhu thla zui, mahse min ṭhut hlat khawp mai. A nu leh pa hmel pawh en lovin a kun ngul a, keiin ani chu ka lo en char char thung.

"Enge i sawi awmzia Puii? Bawihpuia leh Bawihtei pate chu i sawi ngai si lo va, kan nawr luih ṭauh ṭauh che paw'n i sawi duh ngai lo a ni si a, tuna i thusawi hi rin tur nge rin loh tur?" a nu zawk chuan a rawn ti ve ta hluai.

"Bawihpuia leh Bawihtei te hi ka fate an ni, khang kum kal ta chhung zawnga anmahni hre lo leh ngaihsak lova ka lo awm avangin min hrethiam dawn nia, bum kan tawh ve ve avangin hetiang hian Nunpuii nen kan inkar a awm chho ta nuai a ni" ka bula mi'n a chhan hma chuan ka lo ti thuai a, a pa bawk chuan min en chiang leh ta.

"Ka ring hauh lo, Puii i kâ ngei aṭanga hriat ka duh" a rawn ti ram hmak a, a hmel aṭang ka thusawi chu a awih loh ka ring sa hrim hrim. Ka bula mi chuan a ṭhut dan a tidanglam a, a aw chu a thian zui khârh kharh bawk.

"A dik alawm ka pa, ka fate pa dik tak chu Rintea hi a ni. A theih chhung chu zep ka tum kha a ni a, mahse ka zep chung pawhin amah zawk hian a fate an nih thu a rawn hre chhuak ta a ni" a aw chu a la phelh deuh phung a, a zam ru tak zet tih a hriat hle.

"Ka pi ka pu, min ngaih dan tur chu ka hre miah lo, ka chunga in lungawih loh erawh ka ring hle thung" tiin ka ṭawng tawp dat a, ka fate nu ni bawk an fanu chu nupuia neih ka tum thu sawi ka tum deuh nâ a, a la hma mah mâha ka hriat avangin ka sawi leh ta lo zawk.

"A mak ka tih rualin ka rinhlelh rukna che a rei tawh, ka fanu berin i nih loh thu a sawi tlat avangin ka en liam mai mai zawk che a ni" Nunpuii nu ve thung chuan a rawn ti a, chutiang taka a fate pa ka nih duh lotu ka bula mi chu ka en vawng vawng a, ani chuan hnuai lam a lo la bih ngur.

"Ka va haw phawt ang e, naktuk lamah pangai taka inhmel hriattirna nei turin ka lo kal leh dawn nia" tiin ka ṭhutna aṭang chuan ka tho a, tûma'n min chhan loh avangin kawngka lam chu ka pan nghal hmiah.

A awm ve reng, a bik takin a nu leh pate tan chuan a hrilhhai thlak ve dawn tih ka hria. Bike-a ka chuan hnu chuan tlan chhuak mai lovin ka fate awmna in chu ka thlir vang vang a, ka ngaihtuahna erawh a kal thui hle.

Nunpuii chu nupuia ka neih ngei a ngai, a duh dawn leh dawn loh chu ka hre chuang hauh lo. A nu leh pate lam chu ka ngaihtuah kai leh a, ka laka an awm dan aṭang kha chuan min ngaina teh chiam lo niin a lang, mahse a pawi ka ti lo, ka bul hnaia ka fate an awm theihna tur a nih phawt chuan eng pawh ka ti mai ang.

Inthing harhin Bike chu ka tinung a, kan in lam pan chuan ka tlan chhuak zui nghal. Kan in ka thlen chuan ka zângkhai vah a, chhun ni se chuan rilru hahdam lutuk avangin ka faifuk ngei ang ka ring.

Khuma ka mut thlak rualin Nunpuii phone number ka dil theihnghilh tih ka hre chhuak a, mawl ka inti hnuhnawh khawp. A tuk zing ka tho te chu ka phur sârh a, ka nau phei chuan min fîam min fiam phah nghe nghe.

Chaw kan ei laiin zan lama ka len chhuah leh tur thu ka sawi a, ka pa chuan ka ruala lo kal ve a ṭhat thu a sawi nghal bawk. Kei pawh chuan a thusawi chu ka ngaihtuah chiang a, a ṭha phian dawnin ka hria a ni.

Chhunah chuan ka Studio lamah ka tal leh chawt a, Damdama hmel erawh ka hmu tawh miah lo.

Ka thinrim insum zo lo khan kut hial ka thlak a, mahse ka ṭhian a nihna chu a bo chuang lo, hun kal tawh avanga intihbuai reng ka duh lo a ni ber e.

Mixing vel ka khawih mawlh mawlh laiin nu Thani hnen aṭang phone call ka dawng hlawl a, ka thil tih lai dahin ka pick up zui ve nghal mai bawk.

"Rinte, nizanah Damdama in inah a lo riak em? A lo riah chuan lo haw lawk teh se, phone call lah a ring ral tir ṭhak ṭhak bawk si" ka ṭawng hma hmain nu Thani chuan a rawn ti nghal a, Damdama chu kan inah a riak teuh lo mai.

"Riak miah lo, inah a rawn haw lo em ni?" thil khawih chhunzawm ka tum pawh chu ka ti leh ta lo, Damdama chuan a thil lo tih ṭhin a ti leh ang tih ka hlau, a lo tih leh vaih chuan amah mai bakah a chhungte bawk an khawngaih thlak leh dawn.

"Haw nâng, in inah a riak emaw ka lo ti asin, khawiah chuan nge maw a awm ang le" a rawn ti rauh rauh a, a awmna awm tur chu ka hre ṭeuh, mahse khawi lai hmun berah nge a awm ang ka hre lo a ni.

"Biak ka'n tum ve chhin ang e" tiin kan inbiakna chu ka titawp a, Mixing lam pawh chu ka khawih chhunzawm ta lo law law.

Ka khawih chîn chin chu ka Save tawp a, khawih chhunzawm leh mai harsa lo turin ka dah nghal bawk. Room aṭang chuan ka chhuak a, ka Studio room pakhat chu Live Music atana hman mek a nih avangin thawm pawh a reh lo hle.

Ka naute hnenah chuan ka chhuah tur thu leh ka let hun tur ka hriat loh thu ka sawi a, anni paw'n ṭha takin min lo chhang ve mai.

Damdama chu ka call pah reng a, a nu sawi ang tak takin phone call chu a ring ral tir ṭhak ṭhak.

Vawi ruk chuang ka call tluk tluk hnuah a pick up ve ta hram a, mahse phone lo latu chu amah a ni hauh lo.

"I va ninawm sek ve le, rawn call tawh suh, kan be hman lo che" hmeichhe aw ngei hian phelh nuaiin a rawn ti vin hlar a, hmeichhia zawkin min vin avang chuan ka thin a sa ta zak. Insum rei thei lovin

"Phone neitu kha pe nghal rawh" ka ti khauh ve fak a, ri ṭek ṭek chu ka hre zawm nghal zat.

Ka lo hlauhthawn rilruk ang ngeiin Damdama chu a awm leh tih ka chiang, chu chuan ka thinrimna a tizual hle bawk.

"Aw, bumtu hi min lo la be duh a ni maw?" ka ṭhianpa aw ngei chu ka hre ta, mahse a aw aṭang chuan a pangai lo hle tih ka hria. Motor-a chuang lutin ka tinung a, ka tlan chhuak zui nghal.

"Khawiah ber khan nge i awm?" ka zawhna avang chuan a rawn nui ri suk a, a nui thawm thleng thleng chuan a pangai lo tih a hriat ngawih ngawih.

Zawhna chu zawt ve teh mah ila min chhang dawn lo va ka hriat avangin a awmna ni awma ka rinna ber lam ka pan tawp a, a lo awm lo a nih leh ka zawng leh mai ang.

"Lo kal suh" zawi aw tak hian a rawn ti deuh duai a, ka phone chu ka off zui nghal hmak.

Biak reng a ṭulna ka hre lo, ngawi rengin va kal chilh tawp ila a fuh zawk ang, a awmna ni awm lam ka pan chu lo dik hram se ka ti hle.

Traffic lah chu jam titih, jam chiah si lo angin a awm reng a, ka hmanhmawh rilru bawk nen hne tak ka ni.

Zemabawk ka thlen chuan chak mang khengin ka tlan a, Traffic jam a awm tawh loh avang chuan mi dang pawh an tlan muang hran lo.

Falkland ka tlan thlen rualin kawngkam vel chu ka en pah reng a, ka tlan chak em em tawh lo bawk. Ka tlan a, ka tlan zel a, ka la hmu thei mai lo zui.

World Bank Road chu ka tlan thleng titih a, ka tlan zel a nih chuan Mualpuiah emaw Zampuimangah emaw daih ka chhuak dawn.

Ka motor chu herin ka tlan zawh chiahna lamah chuan ka tlan kir leh a, zawn nawn leh hram chu ka duh a ni.

Thui pawh ka tlan hmain kawng thlang lama thil che neuh neuh chu ka hmu a, ka motor chu tidingin ka chhuk ta vat.

Mi dang pawh an lo tam phian a, an lam panin ka kal tih pakhat mah an hre lo a ni ngei ang.

An bul hnai ka thlen chuan ka mi hmuh duh ber leh ka hruai haw duh ber chu ka hmu ta, a mitmeng leh awm danah chuan a rui tih chiang takin ka hre nghal.

"Hei, nang kha tu nge nia i inhriat a?" Damdama ban ka vawn rualin an zinga pakhat, harhfim deuh ber chuan a rawn ti vin hlar a, insum hman lovin ka hnek let tawp a, mi dangho chuan min lo hlauh hmel ngâng mai.

"Rui tawh suh ka ti che a ni lo'm ni LALDAMPUI? Naupang chhia pawh i ni tawh lo, hetia rui mai mai lo hian pangai takin nung rawh, vawi eng zat nge i lo inchiu hman?" ka biakna leh zawhna ngaih pawimawh loh hmel zet hian a rawn nui a, men pawh a meng ṭha hlei thei tawh lo.

"Nang kha! Vawi eng zat nge a lo inchiu hman sawi teh" tiin kan bul lawka min lo thlir rengtu chu ka be zawm nghal zat a, ka aw a khauh em avang chuan a lo phu deuh dawrin ka hria, min hlau viau mahse pawi tihna ka nei lo.

"Vawi hnih" a rawn ti sep a, a aw aṭang chuan a la rui lutuk lo tih ka hre nghal.

Damdama chu ka tung ding a, rawn tal ve deuh mahse a ruih em tawh avangin a tal ṭha hlei thei lo. A tal lai chuan ka pu lâwp a, a awm ṭha ta hle hle.

Motor seat hnungah chuan ka mut a, thawm reng a rawn chhuah tawh lo hrim hrim. A pawi lo, muhil daih zawk rawh se.

An in lama hruai lovin kan inah zawk chuan ka hruai a, ka nu chuan min lo buaipui nghal zung zung. Ka pa erawh a hna lamah a kal tih hriat takin a hmel hmuh tur a awm lo va, chutiang bawkin ka nau paw'n College a kal bawk.

Ka room-ah chuan ka mut a, a rim chu a tui teh chiam lo. Damdawi rim leh perfume inpawlh rim a nam a, a rawn harh veleh inbual thuai se a ṭha ang.

Studio lama let leh ta lo chuan inah ka awm reng a, tihtur a vang kher mai. Nunpuii leh ka fate hmuh chu ka rilruah a lo lang leh thut a, ka nu hnenah chuan ka chhuah lawk dawn thu sawiin Nunpuii te in lam chu ka pan leh ta ringawt.

An in ka thlen chuan naupang ṭawng thawm ka hria a, kawngka a lo inhawn deuh huau avagin ka lut tlang nghal tawp a, Washing Machine ri chu ka hre zui nghal bawk.

Sitting room-a ka fate lo inchhaih nui uar uar chu ding chungin ka thlir reng a, min hmuh rualin Bawihtei chu a lo tlan phei nghal.

Bawihpuia erawh Wheel Chair nen a la nih miau avangin muangchang hian a rawn innawr kal a, ka fate tih loh tûmah ka la hmu lo thung.

"Ka Wonder Woman hi a lo fel em aw" tiin Bawihtei chu ka pawm kang a, ka fanu chuan nuam a lo tih hmel khawp.

Bawihpuia pawh chuan nui ver ver hian min lo en a, bathroom aṭanga lo chhuak chiah chu ka en zui nghal haw.

"Chhunah pawh i lo leng ziah tawh dawn em ni apa Rinte? Lo leng ziah tawh la" Bawihtei chuan a rawn ti a, ka sam chu a chul heuh heuh pah bawk.

Mahni fa ngei te'n mi hrang hlak anga min ko ziah chu nuam ka ti lo ta hle, an pa ka nih thu an hriat vat a ngai a ni.

"Chhunah chuan ka hman chiah lo va, vawiin chu ka lo kal mai mai alawm" a bianga piai sak zeuh chung chuan ka ti a, bathroom kawngkhar bul aṭanga min lo en rengtu Nupuii lam chu ka hawi leh a, a insu a ni ngei ang a kutah chuan Surf phuan a la kai nuai mai.

"Apa Rinte, chhunah pawh lo kal ziah la, i awm loh chuan exercise lak pawh ka peih lo ê" Bawihpuia chuan a rawn ti ve thung a, ka fanu chu chhuatah ka din tir a, ka fapa bulah ka ṭhingṭhi zui nghal bawk.

"Exercise i lak ṭhat a ngai alawm, Iron Man te chuan exercise an la ṭha ṭhin tur a ni ka tih tawh khâ, peih loh tih sawi miah loh tur. Chuan chhuna ka lo kal nge zana ka lo kal in duh zawk?" tiin ka fate chu ka en tawn zak zak a, an ngawi ta ran mai.

"Chhunah leh zanah" Bawihtei zawk chuan a rawn ti kauh a, ka nui ta ringawt. Nunpuii dinna lam chu ka hawi thut a, a va han phu nasa mai mai tak em.

Inher thuaiin bathroom chhungah lut vat mahse a lo nui ve tih ka hmu hman vek a, a nui tawp rang hle bawk a nih kha!

"Ka thei lo alawm, in duh zawk zawk thlang ula, ka lo kal ṭhin dawn nia" tiin ka ṭhingṭhitna aṭang chuan ka ding ngil a, Bawihpuia chu an room lamah ka nawr phei zui nghal.

Bawihtei chuan Wonder Woman lem kengin min lo zui ve dat dat a, kan awm dan vel chu a nuam reuh phian.

"Anu kha ka va be lawk ang a, ka lo let leh thuai ang, Iron Man ke hi infiam na'n hman loh tur aw Bawihte" tiin ka fate chu ka chah a, room aṭanga ka chhuah chuan thawmhnaw lo Spin mektu lam chu ka pan a, ka thawm hre vek mahse min en duh der lo.

"I phone number min lo pe teh" pangai tak chuan ka ti a, ani erawh chuan mi pawh chhang lovin a Spin zawh chiah thawmhnawho chu a phawrh mial mial a, a nu leh pate an awm lo avangin tlem chuan ka ngampa ta deuh.

"I phone number chû" ti lehin a ban rekah chuan ka chelh a, a che tawp ve ta hmak.

Ka kut chu ngawi reng hian a en a, a ban ka vawn lohna lam chuan thawmhnawho chu a phawrh zawm leh ta mial mial.

"Luhlulnu!" ti supin amah chu ka chawi sawn lâwp a, rei lo mahse a rawn tal nasa hman ngei mai.

Ka banah chuan a rawn chum vak vak a, ṭawng thei lo ang maia a awm tlat chu ka ngaithei der lo.

"Kha, i phone number lo chhu ang che" tiin ka phone chu a kutah ka hmehbel a, a la phawrh zawh loh thawmhnawho chu ka phawrh ta sawk sawk a, kan awm dan chu nuam lo viau angin lang mahse nuam ka ti, mahse ka tilang dawn teuh lo.

"Ka phone number i neih hi a ṭul tawh lo, i duh chuan i fate hi i rawn hmu ziah thei ang. Phal loh bur ka tum a, mahse i fate an nih miau avangin lo phal lo ringawt thei ka ni lo tih ka hria" tiin ka kekawr ipteah ka phone chu a rawn rawlh a, lung ni lo zetin ka mel ta ran mai.

"Enteh, thil hi a buaithlak zawngin kaltir lo teh ang. Ṭha taka ka biak che chuan ṭha takin min chhang ve mai la, i phone number pawh ṭha takin ka dil che a, min pe ṭha ve mai ta che" ka tih chuan chiang zetin ka mitah min en reng a, Washing Machine chu ka off hmak bawk.

"Ka phone number chu nei ta la enge i tan ṭangkaina awm? Eng hlawkna nge i neih ang? Ka phone number nei lo chung pawhin i lo kal zan tin thei alawm, chuvang chuan ka phone number hi nei kher lo mai rawh"

"Keima'n ka be duh che alawm maw le, chu bakah ka rawn kal hman loh châng pawha ka fate biak na'n ka duh alawm, i phone number chu chhu vat mai teh" tiin a kutah bawk chuan ka phone chu ka hmehbel leh a, ṭha takin min pe mai se ka ti a ni.

"Ka pe ang che, mahse nang nen hian inhnim hnaih ka duh tawh lo tih hria ang che. Ka fate i biak châk chang chauhin lo call a, kei min be tur erawh chuan lo call buai ngai lo vang che" ti hmawk hmawkin a number chu a chhu mial mial a, a thusawi chu ka engah mah a thawk lo, ka duh hunah chuan ka be awm tho em mai.

A phone number a chhut zawh chuan ka save nghal a, min ngainatna pakhat mah nei tawh lo ang maia a awm tlat avang chuan ka fate bulah ka phei leh ta thuai.

Bawihpuia chu exercise ka lakpui a, Bawihtei paw'n a lo ti ve zel. Tlai dar 3 velah ka haw ve thei chauh a, fate bula awm zawng ka beisei aiin a lo nuam daih. Hunte chu kal chak ka ti em em a, ka hlim vang leh an bula awm ka kham loh vang pawh a ni maithei a ni.

Motor khalh pahin Nunpuii chu kum 8 hnua a vawi khatna atan ka call a, mi dang emaw min ti a ni ngei ang a lo la rang kher mai.

Zana ka chhungte nen kan len tur thu chu ka sawi a, min chhan let hmain ka off nghal daih. Hmai chhanah hrilh ngat ila chuan a duh lo nasa dawn lutuk, ka hre lawk vek, chuvanga phone kaltlanga hrilh pawh chu ka ni.

Kan in chhung ka luh rualin ka room lam ka pan nghal a, room chhung ka luh chuan tumah ka hmu lo. Bathroom lam aṭanga thawm lo awm chu Damdama a nih ngei ka ring, ka hrilh ngai lova a lo inbual fel diam chu a thawven thlak ngei mai.

Kan inkawmna a rei ve tawh a, kan inhre chiang a, kan in leh an inah pawh kan ngampa dun tawh hle. Bathroom aṭanga a lo chhuah chuan pangai takin ka lo awm a, biak erawh ka be chuang lo.

Ani pawh ngawi rengin a thawmhnaw chu a inbel mawlh mawlh a, a inhak fel chuan room aṭang chhuah a tum nghal ringawt.

"Zanin aṭang Studio-ah lo kal leh tawh ang che" ka aw chu a nem hran lo, mahse vin tak tihtur erawh a ni chuang lo.

Nui lui sak chung hian min lo en a, kei ve thung chuan nui miah lovin ka lo en reng thung.

"Ka bang ni rawh se, hna dang ka zawng mai ang. Thawh tur te chu a tam alawm, thawh zah emaw thawh duh loh ka nei te a nih ngawt loh chuan ka hmu em em ang. Ka va phei ang e, nu Asangi khan a chhuah lawk tur thu a sawi bawk aw" tia ka room chhuahsan a tum chu vin tak hian

"LALDAMPUI, ka phalna tel lovin ban tum reng reng suh. I inchhir tih ka hria, inchhir avang khan ṭhian kan nihna a bo phah lo. Chu bakah ka mamawh che tih i hria, i rawn kal lo a nih chuan ka rawn hruai tho ang che" ka ti hrawk a, ka ṭawng tawp lam chu a pangai hman ṭâwk a ni.

"Ka hre lo le, rawn thawh leh thawh loh chu ka lo ngaihtuah ang. Kei aia thiam leh ṭha tak tak pawh chhawr tur i hmu ṭeuh ang chu, zawng ve hrim hrim la, kei chuan chawlhsan ka tum rilru tawh zawk a ni"

"I hlawh san i duh em ni? I sawi zat zat i hlawh dawn nia, hun kal tawh avangin kan inṭhian ṭhatna hi tihchhiat ka tum reng reng lo. Min pui thuai thuai zawk ta che, ruih hlo bawiha zuang lut leh lo hian ka fate leh an nu ka neih let leh theih na'n min pui char char zawk ta che"

"Hlawh san leh san loh lam ka sawi lo, chuan Nunpuii leh i fate nen chuan hlim takin awm zel rawh u. Tunah rih chuan in la hlim tak tak theih ka ring lo, mahse in hlim thuai ka beisei. In inṭhen hnu khan vawi tam ka bia a, mahse ani chuan nang chauh lo chu hmangaih dang reng neih a duh lo va, ka bansan ve ta tawp a nih kha!"

"Hun kal tawh rawn sawi thar tawh suh, ka hre hne lutuk, awmze nei lo mai a ni. Kar khat chhung chawl lawk la, chumi hnuah erawh Studio-ah i rawn thawk leh ngei tur a ni. Tin, buaipui ngaiin awm tawh lo bawk ang che, damdawi lam hi bansan vang vang tawh rawh"

"Amuana Bike a awm chuan ka khalh haw lawk dawn, nakinah ka rawn dah leh ang" tiin room aṭang chuan a chhuak a, ka thaw a veng ta huai mai.

Kum 10 chuang teh meuh kan lo inkawm ve tawh a, Studio-ah a rawn let leh ngei dawn tih ka hriatna chuan min tihahdam huai a ni.

Zanriah kan ei lai chuan ka nu chu a ṭawng zet zet a, a phur fal bik lutuk chu nuih loh theih pawh a ni lo. Naupang lawm tam tham zet mai hi a lo lei lawk ṭeuh a, tlaia a bo vang vang lai khan a lei ṭeuh a nih ka ring ta.

Ka pa chuan keng ṭeuh lo tur leh phur viau lo turin a ti a, mahse a sawt lo khawp. Nunpuii te veng lam pana kan tlan lai te chuan a la ṭawng char char a, ka pa chuan a zilh deuh reng bawk.

Motor chu ka khalh a, ka bulah ka nau Amuana a ṭhu a, a seat hnung lamah ka nu leh pate an ṭhu bawk. An inkawt kan thlen chuan muangchang lovin kan chhuk sang sâng a, dik tak chuan ka chhungte nen kan ni nghal lawih dawn bawk sia ka zam ru ve reng.

Nunpuii leh a chhungte chuan engtin nge min lo dawn sawn ang tih ka hre lo, a lo hrilh lawk vek tawh chu ka ring ve ringawt.

Door bell ka hmeh hnu rei lotê ah Nunpuii ngei chuan kawngka a rawn hawng a, ka lo nuih tawi tak a, ani chuan mi pawh en rei lovin ka hnunga mite chu a en ta daih.

In chhunga kan luh chuan an lo awm kim ṭhap a, Nunpuii u te nupa pawh an ṭhu ran mai. Ka nu leh pate chuan ṭawng an chuh hmasa a, ṭawng siam siam pahin ka fate chu an thil ken an pe a, nu leh pa tih loh chu ṭawng reng kan awm lo.

"Hei kan fapa kâ aṭanga kan hriat danin fa a lo nei ringawt mai a, thil thlen dan zawng zawng chu kan hriat tlan vek tawh avangin sawi ṭhat leh pawh ka tum tawh lo. Engtin nge ni ang? Rintea leh Nunpuii hi innei ta mai se, palaite rawn tir ta mai ila a ṭha ang em? Nge rei lotê han inzui ve leh phawt se in ti zawk?" ka pa chuan a tidam dap a, Nunpuii pa pawh chuan

"Thil a nih tur ang ang a ni zo tawh a, a theih ang ang hi chuan siam ṭhat thuai thuai a ṭha ang. Inneihna lam em hi chu a hunin ka la hre rih lo, han inzui ve leh deuh phawt zawk teh se. Karah fate awm tawh mahse nupa inngeih lo lutuk an nih a hlauhawm, anmahni thu thu a ni e" a rawn ti ve nghal a, ka rin aiin thil an sawi tlang hma daih.

Chapter 10

"Ka duh teuh lo mai, LALRINAWM nena inngaihzawn emaw nupa nih hi ka duh hauh lo. Engati nge min rawn ve eih lo ka nu ka pa? Ka duh dan te min zawt ve ta che u, mi mawl emaw min ti em ni?" insum theihna tlachham tih hriat zet hian Nunpuii chuan a rawn ti a, kan en nghal ṭhap.

"Puii, i tan leh in fate tan ṭha ber tura i nu nen kan ngaihtuah a ni. I u Mawia leh Atei pawh kan hrilh ve a, anni paw'n i fate pa nen hian innei mai ula ṭha an ti ber" a pa chuan a rawn ti thuai a, Nunpuii chu a ṭhutna aṭang a ding chhuak ta.

"Ka thei lo, hetiang mihring pawh ni lo leh lak tlak loh zet hi ka nei thei lo. A fa ka pai thu hrilh tuma vawi tam ka call pawhin a pick up duh lo asin, ani chuan min hnung chhawn tlat a, chuti chung chuan pasalah neih tir min la tum maw!? Ani neih ai chuan keimahin ka fate hi ka enkawl kumkhua mai ang, min nawrlui miah suh u" a sawi chu a dik vek, bumna vang ni mahse ka lak tlak lo ve em bawk a ni.

"Puii, khatianga in awm chhan kha chu i hriat vek tawh khâ, thar thawh leh chi pawh a ni lo. Kan hriatthiam loh vang chea hetiang thutlukna siam hi kan ni lo va, kan hriatthiam vang che leh i tana ṭha ber tur a nih avang zawk a ni" a nu zawk chuan a rawn ti ve a, Nunpui hmel ka en chuan mittui nen a lo awm pur tawh.

"Min hrethiam ni ula chuan LALRINAWMA hnena let tur hian min ti miah lo vang, keh chhe veka min siamtu hnenah hian ka let dawn tawh lo" rilru nat hmel zeta rawn tiin kawngka lam a pan a, naupangho awm ve ṭhap lo se chuan chu aia a ṭawng vin chu ka ring.

"Ka va bia ang e" ti supin Nunpuii chhuahna lamah chuan ka chhuak ve nghal a, pawn ka thlen chuan a biang tuai zêuh zeuhin kawngpuiah a lo kal a, a rilru a na dawn tih chu hre tho mah ila biak erawh ka tum nghet bur.

A hnungah chuan ngawi rengin ka kal kal a, a kal muang ang reng hle. Biak nghal thawt thawt ka tum kha a ni a, mahse ka tum dan chu a awm dan avang chuan ka ṭhulh leh ta zawk.

Ring lutuk lo hian a ṭap chhuak feih feih a, mi veivak leh motor tlan vel pawh chu a ngaihven lo hrim hrim, kei chuan a hnung lam aṭang ka veng hi a ni ber.

Kawngpui sira thing ding bulah chuan a ding a, ka thawm chu a hre lo tak tak nge ni ka lam a la rawn hawi eih lo. Thing bula ṭhutthleng siam chawpah chuan a ṭhu thla a, min la hmu ta chuang lo cheu.

A lamah chuan ka kal hnai leh deuh hlek a, a tawpa tawpah chuan min rawn hmu ve ta alawm. A ṭhutna aṭanga tho tharhin ka lamah a rawn kal nghal pawk pawk a, ka bul a rawn thlen chuan min melh chho rum hle bawk.

"I ruahmanna vek ti raw LALRINAWM? Engkim hi i ruahmanna vek tih ka hre mai, ka fate ka lak aṭanga lak sawn i duh avangin enge hetiang zawng hian i chet kher? I hmuh theih thu ka hrilh vek tawh che khâ, chu chu a tawk i la ti lo em ni?" a rawn ti hlawk hlawk a, a mit chu mittui vangin a la chiau pur bawk.

"Ka ruahmanna a ni bik lo, ka nu leh pate chuan kan fate avanga innei mai turin min ti ngei a, chuan kei pawh hian kan pahniha kan inneih mai hi a ṭha berin ka hre ta a ni" ka ṭawng zawh rualin ka hmai chu a rawn ri thlawrh a, hmui pet fan fâna min en chung hian a kut chu a la thla zal zal a, ka biang chu a thip ta veng veng.

"I duh duh dana i tihkawi theih mihring ka ni em ni? Ka fate pa i nih avang hian min namnul tum miah suh, chuan nang hi pasalah ka nei dawn lo che tih hre bawk ang che" ti salh salhin ka âwmah chuan a rawn nam a, sawi mai tur pawh ka hre lo.

"Enteh Nunpui, kan inkarah hian hmangaihna emaw induh tawnna emaw pawh a awm tawh miah lo tih chu kan hre ve ve, mahse kan fate tan hian thil thui tak kan thlir a ngai a ni" ka tih chuan a vawi hnihna atan ka hmai chu a rawn beng ri leh ta sawk.

"Eng vanga tuna taka Bawihpuia leh Bawihtei ngaihtuah ve em em hi nge i nih? Khawiah nge? Khawiah nge kan mamawh em em lai che khan i awm? Khawtlangin Vai fa pai anga min sawi luai luai lai te khan ka bulah i awm em? Hun harsa ka tawn lai te khan ngaihtuah pawh min rawn ngaihtuah ngai lo a ni lo'm ni?" a ṭawng zawh chuan a ṭah zawm feih feih a, ka âwmah ka kuah bet nghal thlawp.

"Ka tihpalh, min mamawh laia i bula ka awm loh avangin ka tihpalh tak zet Nunpui. Bum kan ni tih erawh hre reng la ka duh, mahse ka thiam loh a ni tih ka pawm vek e" ka tih chuan nghet tak hian min lo kuah let a, ka beisei loh em avangin mak ka ti hle.

"I lakah khan beiseina ka la nei ru fân ṭhin asin, beiseina thi tawh leh beisei theih tawh loh kha a nung emaw tiin ka lo la beisei ṭhin che a, mahse a tawpah erawh beidawnna bak ka tawng si lo. Hetiang em ema ka nun tihhrehawm tur hian i lakah eng thil fakau nge ka tihsual?" a ṭawng zo chiah chu a ṭap leh nghal a, van vadakin ka thaw chhuak hawk ringawt.

"Hetiang tak hian i lo tuar ang tih rin ngaihna reng ka hre lo, ka tel lova kan fate enkawl hi a awlai dawn lo tih ka hria, mahse tunah chuan ka awm tawh a, in bulah ka awm reng tawh ang. Chuvangin innei mai ang aw Nunpui?" a hnung chul hliau hliau chung chuan ka ti a, inneih chu duh mai se ka ti.

"Ka thei lo, nang nena awm dun hi ka duh tawh lo a ni. Enge a tawpah ka chan leh chuan ang, natna bawk ka tawng leh dawn tih ka hria. A chhan chu hming pu zo lo tak mihring i ni a, nangmahah hian rinna pakhat mah ka nghat ngam tawh lo a ni" min haw ngawih ngawih tih hriat zetin ṭawng mahse min kuah nghet em em lawi si.

"A hma ang mai maia ka awm kha chu ring suh Nunpui, khang hun lai kha chuan ka rilru a la puitling lo em a tin ni!" a chhip sama fawp zeuh pah chuan ka ti a, puitling lo taka awm chu ka tum tawh lo tak tak a ni.

"Kan inkarah hmangaihna emaw induhna emaw pawh a awm tawh loh thu i sawi vek khâ, chuti chung chuan engati nge nupuia min neih i la duh ṭâlh? Kan fate chu i rawn hmu ni tin thei a, an bulah i awm zan tin thei bawk" a aw chu a ring tawh lo hle.

"Ka theih leh ka ring, ka duh leh theih che ka ring. Kan fate nu i nih vang pawh a ni lo, i taksa ka sik hian hmân ang chiah khan ka danglam a ni. Chutiang bawkin nang pawh i danglam tih ka hria, kan induh tawn leh theih ka beisei tlat Nunpui" ka ti sup a, ka rilru dik tak pawh a ni.

"Kei chuan ka theih ka ring tawh lo, ka thinlung hi a hliam thuk tawh lutuk, ṭhui pin theih chi zia zâng a ni lo tawh lo a ni Rinte. Khawngaihin inneih lam hi ṭhulh turin ngen rawh, thil thleng thei ngai lo tur a ni" beidawnnaa khat aw hian a rawn ti a, ka âwm aṭang chuan ka nam hla ta vat.

"Ni lo, i thei tur a ni, i thei ngei tur a ni. I thinlung hliam chu ka ṭhui pin min phalsak rawh, keimah ngei hian ka ṭhui ping leh ang a, nang leh ka fate nen hlim taka awm ho ka duh a ni. Min hmangaih a ni lo'm ni? Min hmangaih chuan i thei ngei ang"

"Hmangaih ṭhin, hmangaih ṭhin zawk a ni. Khawi aṭanga i hriat nge chu ka hre lo, mahse tunah chuan ka hmangaih ṭhinna che chu huatna leh natnain a hliah khuh vek tawh a ni" min melh chho ral chung hian a rawn ti ṭuau a, min hlat tum tih hriat takin a ding sawn nghal bawk.

Ngawi rengin a hmel chu ka en a, a bianga mittui luang zawih zawih chu a hru tawk a, a mittui erawh a rawn chhuak zel tho.

Min kal pelin an in lam chu a pan a, chelha auh din pawh ka tum lo, ngawi rengin a hnungah ka zui leh tawp a, chu bak tihtheih ka nei rih lo.

In chhung kan luh chuan min lo en ṭhap a, naupangte erawh hmuh tur an awm tawh lo. Nunpuii chu a pa chuan a lo be thuai a, mahse a ngaite bawkin inneih a duh loh thu a sawi leh nghal hmak.

Chu veleh keimahah chuan mit a rawn fuh ṭhup a, sawi tur ka hre lo hle. Inneih lam pawh sawi zui duh tawh lovin chhungkaw chanchin chu an sawi ta daih a, ka pa chuan ka hna thawh mek te chu a sawi mial mial bawk.

Nunpuii chu an room-ah a lut daih a, ka tihtur hre lo leh ka fate hmu ve châk deuh bawk si chuan ka zui lut ve leh ta ringawt.

Ka fate'n min hmuh chuan min lo ko nghal a, min koh dan lah chu an pa ka ni tih ka hriat hmaa ka zirtir ni mahse ka hre hne tawh khawp mai.

Ka fate bulah chuan anmahni aia nuapang hret tur mipa naupang pakhat hi a awm ve a, chu chu Nunpuii u fa a nih ngei ka ring.

Khum tlang aṭangin Nunpuii chuan ka che vel chu min en reng a, ka lo nuih suk a, ani erawh a nui ve hauh lo.

"Apa Rinte, thawnthu min hrilh leh la, ka mut a chhuak tawh ê" Bawihpuia chuan a rawn ti nang nâng a, Nunpuii chu a lo meng phawk nasa ngei mai.

Ni e, ani te chuan ka thawnthu sawi lai a la hre ve hleinem, mak ti pawh ni se a awm lutuk.

"Aw le, mu r'u le" tiin ka fate chu ka mut ṭhat tir a, Nunpuii u fa pawh an bulah ka mut tir ve mai bawk.

Ka aw chu ka thian khârh kharh a, dik tak chuan Nunpuii a awm ve reng sia ka lai ve deuh, ka ni ṭût mai.

Ka thawnthu hriat ang ang chu ka sawi ve tawp tawp a, naupangho lah chuan tui em em hian an lo ngaithla a, thawnthu pakhat ka sawi zawh chuan Bawihpuia chu a lo muhil fel der tawh. Mi dang pahnih erawh an la muhil ve lo va, mahse an mut chu a chhuak tawh tih a hriat hle thung.

Zan dar 10 a rik fel meuh chuan an muhil tui em em tawh hlawm a, Nunpuii nen pawh inbe miah lovin room aṭang kan chhuak a, sitting room-a ṭhute chuan min lo en chiang hle.

Rei lovah ka pa chuan haw phei a rawt a, innel taka kan chhungte an awm nghal thei mai chu mak ka ti, an inhmel hriat sa emaw te ka ti rum rum.

Kan in lam pana kan tlan haw laiin ka pa chu ka zawt ta tawp a, ka beisei loh deuhin inneih lam an sawi zawm tawh miah loh thu min hrilh.

Kan awm loh laia an lo sawi dan ṭhenkhat erawh inneih hmaa inhmu tam turin min lo ti a, chu bak thil dang sawi belh an nei tawh lo thung.

In kan thlen chuan ka room-a lut mai lovin ka nu leh pa chuan sitting room-ah min titipui leh tê te a, Nunpuii laka ka awm dan tur an sawi a ni ber.

Ka fate ina leng zing turin leh Nunpuii rilru hneh thuai turin min ti a, a chhan pawh kan fate an ngaihtuah vang a ni pakhat.

Kei pawh chuan nupuia neih leh a rilru hneh thuai ka tum thu chu ka sawi ve mai a, ka fate leh Nunpuii ka bula an chen theihna tur a nih phawt chuan eng pawh ka ti mai ang.

Khuma ka mut hnu chuan thil chi hrang hrang ngaihtuahin ka meng kar a, ka tihtur chu a namai dawn lo tih ka hria, mahse beidawn nghal ka tum mai lo.

Ka khum bul dawhkana ka phone dah chu ka la a, Nunpuii hming chhu chhuakin ka call zui nghal.

"Hello" rei pawh a ring hmain a rawn ti a, ka phone call a lo pick up hma viau chu a lawmawm rualin mak ka ti ru deuh.

Zan rei lam tawh a ni a, a lo lak duh pawh ka rin chiah loh avangin mak ka ti a ni.

"In video call lawk ang, ka fate hmel kha ka hmu duh" tiin video call chu ka switch nghal a, ani pawh chuan a lo accept ve mai bawk.

Ka hmuh theih turin ka fate pahnih muhil bam chu a rawn ti lang a, ani erawh a la mu lo a ni ngei ang.

"Chuan i hmel pawh" ka ti leh a, mahse ka hmuh theih turin a hmel chu a rawn tilang duh ṭhak lo.

Phone call a lak tirha a ṭawng tih loh chu a ṭawng leh tawh lo hrim hrim a, min huaa min be duh lo tlat pawh chu ka dem hran lo.

"Naktuk aṭang chuan ka lo ngaizawng leh tawh dawn che a nia, nang paw'n a hma ang khan min nel lo tum ang che. Engkim hi kan fate tan chauh a ni lo, kan pahnih tan pawh hian a ṭha ber a ni" ka tih chuan rang zet hian

"Tum buai suh, ka rilru hi i tidanglam thei chuang lo vang" a rawn ti hmak a, ka ṭawng leh hmain phone chu a off zui nghal daih.

A awm dan ka ngaihtuah let a, keimah avanga a thinlung hliam nasa em em tawh chu tihdam ka tum nghet bur a ni.

A tuka tukṭhuan kan ei lai chuan ka rilrua awm dik tak chu ka chhungte bulah ka sawi a, anni paw'n pawi an lo ti lo hle.

Ni e, chuti maiin Nunpuii rilru hi ka hneh thei dawn lo tih ka hria, chuvanga kum 1 tal a ral hma chu inneih pawh duh leh ta lo ka ni.

Zan lamah nasa takin ka ngaihtuah tawh bawk a, ka fapa Bawihpuia ke a dam chian hma chu hma lak thawt thawt ka duh leh ta lo a ni.

Keimah vekin Nunpuii nu leh pate chu ka hrilh a, ka tum dan chu an lo thlawp ve khawp mai. Nunpuii erawh a awm ṭhin danin a lo ngawi leh reng a, min hnial emaw min vin emaw pawh a tum chuang lo.

A pa phei chuan Bawihpuia leh Bawihtei te hnena ka nihna dik tak sawi mai turin min ti nghe nghe a, min ringa min nel ta viau chu ka hrethiam lo hle, a tupa leh tunu te pa ka nih vang pawh a ni maithei.

Studio lamah ka buai ni leng ṭhin a, Damdama awm lo zet chu ka hah phah ngei mai. Kar khat chawlh ka pe ve ringawt a, keimah zawkin ka mamawh leh si.

Kar khat pawh a chawlh thlen hmain an inah ka kal chilh a, Studio lama thawk leh tawh turin ka va hruai ta tawp. A hlawh pawh ka san nghal a, ka ṭhian a nih vanga san ka ni lo, a thiamna nen a inmil em vanga san ka ni zawk.

Kan Band kan keh darh aṭanga kum rei lotê hnuah ruihhlo lam a ti ṭan a, buai pawh kan inbuaipui nasa thei khawp mai.

Tun hnai kum 2 kum 3 hnuah a bansan ṭan a, a taksa chhunga damdawi kap lut leh tawh lo tur pawhin ka hrilh nasa thei hle bawk.

Kan hun lai kha chuan Band sawm hlawh leh lar ve tak kha kan ni a, mahse kan Band Vocalist duham zet avangin kan keh darh ta a ni.

Kei nen phei chuan kan insual nghe nghe a, kan Band keh darh aṭang tun thlengin a hmel ka hmu leh tawh ngai lo.

Hun leh ni te a liam zel a, kei pawh ka fate hmel hmu turin ka leng phei ziah a, Sunday zanah pawh len ka ṭhulh ngai chuang lo.

Ni lo, ka fate chauh hmu turin ka leng lo, ka fate nu Nunpuii hmu tur pawhin ka leng ṭhin. Ka biak chuan pangai takin min chhang a, ka biak loh chuan min be hmasa ngai lo.

A chang chuan ka hne thut zel, mipa zawk inphah hniama ka be hmasa chhen chu ka ning thut ṭhin, mahse ka laka a awm dan chu dem thei ka ni chuang hauh bawk si lo.

Rilru na takin ka siam a, a thinlung ka hliam a, ka tel lovin kum 8 chhung ngawt kan fate a lo enkawl bawk a, ka hnena hruai kir leh tur chuan a awlai dawn loh tih ka chiang.

Khawtlangah Vai fa pai anga a than thu a sawi lai te khan ka rilru a lo na ve em em a, kan khawtlang pawh hi ka dem a ni.

A enga mah hmaiin an sawi luai luai ringawt a, a fate hmel an hmuh hma hauhin Vai fa a pai emaw an ti a, mahse Vai fa ni lovin Mizo dik tak fa ngei a lo ni reng si.

A fate chu ka thisen leh ka fate ngei an ni a, ka beng hriatah Vai fa angin sawi nâ se chuan ka insum thei hauh lo vang, Minister pawh ni eng ang mahse kut ka thlak chiang viau ang.

Thla te a liam zung zung hnu chuan Bawihpuia pawh a ṭha chho tial tial a, Wheel chair pawh hman ngai tawh lovin tiang nen kal a zir thei tawh a, Iron Man kawr ka leisak chu a hlip phal ṭhak lo zui.

A chang chuan ka fate hnenah chuan an pa dik tak ka nih thu sawi pawp mai ka duh rum rum ṭhin a, mahse ka sawi ngai chuang lo.

Ka fate nu rilru chu hneh hmasa phawt ila, kan inkarah inngainatna awm hmasa phawt se, chumi hnuah chauh chuan thu dik sawi a fuh zawkin ka hria.

Nunpuii chuan hna a zawng reng a, zawng lo tura ka tih pawhin a duh der lo, a tawpa tawpah hna chu a hmu ta ngei a, chu pawh Restaurant-ah a la ni zui.

Restaurant-a hna thawh chu phal loh tak tê hian ka phal lo bur a, mahse ka thusawi pakhat mah a zawm duh chuang lo. Ni tin hna thawkin a chhuak a, inrinni pawh an awl lo.

A hmel erawh ka mitah chuan a ṭhat ngaiin a la ṭha reng a, a hma aiin a thau tawh tih mai loh chu danglam awm ka hre miah lo.

Ni e, kei hian Nunpuii hi ka ngainain ka duh leh tawh lutuk a ni. Ka fate hmuh châk chhuanlamin ka be ziah a, mahse ka fate lam reng ka sawipui ngai lo.

Ani pawh a tir ang em emin ka lak aṭang a inla hrang tawh bik lo va, mahse min hnaih chu hreh tak a la ni.

A kuta ka vawn chang te hian a ṭang ṭun zel a, lak sawn a tum lahin ka vuan nghet sauh zel a, ṭah chhuah hmel zeta min en te hian ka rilru a lo na ve vawng vawng zel.

Zirtawpni a ni a, Valentine's day a ni bawk. Thil tih tum ka neih avangin ka Studio chu ka khar hmak a, Nunpuii pawh a hna lama kal lo turin ka hrilh a, mahse a lo va kal lui tho.

Ka thinrim deuh bawk nen an dawrah ka kal chilh hmiah a, customer leh hna thawkte awm laiin a hmuiah tak ka'n fawp mai a nih kha!

Rei lotê fawh ka tum kha a ni a, a hmui thlum leh fawh nuam em em chuan rei tak min hip bet thung. Ani chuan min chhang let lo hrim hrim a, ka lak aṭanga tal chhuah chu a tum nasa hle zawk.

Kan infawh zawh chuan chawlh ka dil sak hmiah a, dawr neitu chuan khi ver ver chungin a lo phal a, Nunpuii chu a kuta chelhin ka chhuahpui nghal hmak.

Motor-a kan chuan dun lai chuan nasa takin min hau a, min hrawk a, ka zah theih loh thute a sawi vak vak a, kei erawh ka lo ngawi mai mai thung.

A ṭawng tawp lamah erawh a rawn ṭap titih a, a lam hawi chuan ka ngaihven nghal hle bawk. Ka hmuh hlau takin a mittui chu a khap let thuai thuai a, an in kan thlen hma chu kan ṭawng tawh lo ve ve.

In kan thlen chuan ka fate chu an lo phur leh nghal hle a, a chhan pawh ka len chhuahpui tur thu ka sawi lawk tawh vang a ni. Nunpuii chu insiam turin ka ti nghal a, kan len chhuah dawn thu ka sawi chuan mak a lo tih hmel khawp.

Bawihtei chuan a nu chu insiam turin a lo tur ve chhen a, Nunpuii pawh a fate'n an tur reng avangin a insiam ve ta nge nge.

Millenium Centre-ah ka luh pui a, Nunpuii leh ka fate chu thil leisak ka tum ru hle bawk. Bawihpuia chu a ke a nat rih miau avangin ka pawm char char a, ka fate chuan an tana ka thil lei ho chu hlim zet hian a lo duh zel a, chu chuan awlsam takin min tihlim veng veng a ni.

Building chhunga thil einaah chuan kan chawl a, mahse ka tum loh deuhin Zonuni ka hmu ta tlat mai. A thil chah a lo la fel vel mek a, ṭhutthleng ruaka kan ṭhut hnu pawh chuan ka la en reng tho.

A thil ei lai chuan a hawi chhuak a, min rawn hmu ta chat. Chu veleh a thil ei lai chu a tawp hmak a, a ṭhutna aṭang a tho vat a, pawisa phawrhin dawhkana chuan a dah a, ka lam rawn hawi leh tawh lovin a kal chhuak nghal thuai thuai.

"Zonun" ka lo ti hluai a, min kal pel tawh mahse ka kohna chu a hre pha tih ka hria, mahse rawn hawi let lovin a kal tlang hmiah hmiah.

Ka ṭhutna aṭang chuan ka tho a, a hmela natna leh inthlahrunna nasa lutuk awm chu ka hmu hmaih hauh lo.

"Ti khan lo ṭhu lawk r'u aw, ka lo let har lo vang" tiin ka ṭhutna aṭang chuan ka tho vut a, Zonuni kalna lamah chuan ka kal zui nghal.

Thil pawh ei ṭha hman lo khawpa min hmu hreh chu ṭha ka ti lo, pangai takin nung se ka duh a ni. Building kawt ka thlen chuan amah awm reng ka hmu tawh lo, ka hawi kual vak vak chung pawhin ka hmu tawh lo hrim hrim.

Rilru nuam zân lovin building chhung lamah ka lut leh a, mahse ka awm dan chu a dik lo tih ka hre chhuak zui nghal.

Nunpuii chu ka ngaihtuahna ah a lo awm hmasa ber a, mawl inti em emin an lam chu ka pan a, thil eina dawrte ka va thlen chuan ka fate leh Nunpuii chu ka hmu tawh hauh lo.

Ka thil leisak zawng zawng chu kan ṭhutna bulah a lo inhung ṭhap a, ka inchhir nghal ngawih ngawih. Ka thil lei vel chu khaiin dawr aṭang chuan ka chhuak thuai a, building kawt ka thlen chuan Taxi-a an lut vel mek chu ka hmu a, umzui erawh ka tum buai tawh lo.

Ka motor-ah ṭhu lutin ka tlan chhuak nghal a, ka tum loh deuhin boruak chu a awm leh ta vek mai. Hlim taka ka fate leh Nunpuii nen awmho ka tum kha a ni a, engkim chu a nih loh dan tur ang hlirin a awm thung.

An in kawt ka thlen chuan inkhai bawr ṭûnin ka chhuk thuai a, in chhung ka luh rualin thinrim taka min lo entu Nunpuii chu ka hmu hmasa ber.

"Lo kal tawh suh, bum hmang pa, kei leh ka fate hi min lo hnaih tawh lo tak tak rawh" a lo ti nghal a, a thinrim hmel aiin a aw chu a nem daih. Ka fate erawh room lamah an awm a nih ka ring, ka la hmu miah lo.

"Ka sawi fiah thei, i ngaih ang kha engmah a awm lo. Zonuni nen khan kan inṭhen tawh, kan inṭhen fel vek tawh. Ka laka a inthlahrun lutuk avangin biak ka tum mai chauh a ni, chu bak engmah kan inkarah a awm tawh lo"

"Ni lo, Zonuni kha hmeichhe ṭha tak a ni. Keini min buaipui lo hian ani kha va buapui rawh, i buaipui ngai kan ni lo. Kal rawh, haw rawh, nang nen hian inzawmna neih ka duh tawh lo" a rawn tih chuan

"A teuh lo mai, duh lo eng ang mah la inzawmna chu kan nei chiang e. Buaipui suh min ti maw? A teuh hian a hnai lo, vawi khat ka tisual tawh a, vawi hnih tisual ka tum awzawng lo. Tum ve ta che, min rin tum ve ta che LALNUNPUI" ka ti hrawk a, min hlat a tum phet chu ka tithei tawh lo.

"Nangmah hian i zir em? Tum lo ka nih bik i ring em ni? Ka fate avang pawh hian ka tum ru ve reng asin, ka tan chuan nang rin leh che hi a harsa a nih hî, nang ni la i thei dawn bik em ni?" ṭap hawk chung hian a rawn ti a, a hmuiah chuan ka fawp nghal chat.

Ka fawp bawrh bawrh a, ani erawh chuan min chhang let lovin a la ṭap reng a, ka fawh rei hnu chuan ka fawh dan pawh ka thlak ta.

Chapter 11

Nunpuii POV

Ka hmui chung lam leh hnuai lam chu a rawn pet ne nê a, min fawh dan a dam tâk lutuk avang chuan ka chhang let lo thei ta lo.

Bianga mittui luang chung chuan ka hmui chu ka kau riai riai a, ka hmui tiche in a hmui chu ka fawp let ve a, chu chuan engkim a rawn thlak danglam nghal.

Ka chet dan avanga phur tih hriat zetin min rawn fawp duhthaw sawt em em a, hahdam lutuk avang leh lungawi lutuk avangin ka ṭah reng a chhuak tawh lo.

Ka mit te chu ka meng phal tawh lo hrim hrim, chutianga fawh nuam chu kum tam tak chhung ka tawng tawh lo tlat alawm, min fawptu lah tu dang ni lovin ka fate pa Rintea ngei a ni bawk si.

Ka taksa danglam nasa lutuk chuan ka rilru zawng zawng a kuai peng vek a, rilru natna emaw thinrimna emaw pawh ka nei tawh miah lo, mak tak a ni!

Ka taksain thil dang nghen chhan a neih avang chuan fawp let reng chungin ka meng lui ṭawk ṭawk a, phe ruaiin a hmel chu ka hmu a, ka chung lamah awmin min bawh ran bawk.

Vawi leh khatah har chhuak thutin ka meng kawk a, fawh pawh fawp let duh tawh lovin a âwmah chuan ka nam vak a, ani erawh awm sawn a lo la tum teuh lo. Ka tih ngaihna hre lo chuan a bengah ka pawt vak a, a rawn meng ve ta.

Chiang zetin kan inmelh ral a, kan hmui erawh a la inchuktuah reng thung. Zawimuangin a hmui chu ka hmui aṭang a la sawn riai riai a, kei chuan a âwmah ka lo nam ve ṭang ṭang bawk.

Engtin em em nge chutiang chuan ka lo awmpui theih reng reng ni! Engtik laiin nge ṭhutthlengah chuan min pawm pheia min nghah pawh ka hre lo, ka awm dan chu a zahthlakin min ngaihnep leh phah vek ka ring.

"Tho rawh, tho vat rawh" ti thuaiin a âwmah chuan ka nam ṭang ṭang a, a tho ve mai a, mahse a tho hmanhmawh lo hle.

Ka chet theih turin a awm sawn chiah tihah ṭhutthleng aṭang chuan ka chhuk vat a, ka fate mawlh chuan min lo hmu ang tih ka hlau.

Kan room kawngka lam chu ka en vat a, tûmah an lo awm lo hlauh. Rintea chuan ka che vel chu min lo thlir reng a, a hmui chu a liak zeuh zeuh bawk.

A hmelah chuan nuiza hmel ka la hmu zui, kei erawh ka nuih a za lo nasa a ni.

"Haw thuai teh, chuan tuna thil thleng zo chiah kha a thleng lo angah ngai rawh. A leh pek a awm leh tawh lo vang, ka thiam loh a ni e" ka tih chuan a hmui chu a tuai rauh rauh a, a kiai zui suk bawk.

"Thleng lo anga ngaih chu a har khawp ang Nunpui, kum 8 hnu lama ka hmui fawh tawhah chuan a la nuam ber ang" min tiel zet hian a rawn ti kher a, ngaihzawng a lo neih hnem hman bikzia a sawina ni mahse kei chuan ngaihzawng pakhat pawh ka nei tawh ngai lo.

"Ngaihzawng i neih ṭeuh thu kha sawi lan kher a ngai lo, haw thuai la a ṭha ang. Duh leh zan lamah lo leng leh zawk rawh, Bawihpuia leh Bawihtei te pawh hmu kher a ngai tawh lo, ka lo hrilh fiah mai ang" ka ti zung zung a, ani erawh a lo nui ringawt thung.

"Tlêm chuan hma ka sawn tihna em ni?" tawi têa nui chung hian a rawn ti sam êt a, a zawhna min zawh chuan ka rilru zawng zawng a tikal dik lo leh ta vek mai.

Hma chu a sawn chiang alawm, mahse chuti maia inhneh tir ka tum teuh lo.

"Eng hmasawnna mah a i nei lo, kan thil tih zawh chiah avang khan beiseina nei buai tingtang duh suh, i lakah hian eng rilru mah ka pu tawh lo tih hre rawh" kha fak chuan ka ti a, ka thusawi ngai pawimawh lo zet hian a ṭhutna aṭang a rawn tho a, a awm dan vel chuan ka pawi a sawi em em ringawt.

"Happy Valentine's Day" ti thum chhalin a lamah chuan min pawt phei dâwr a, ka inrin loh em avangin a âwm chu ka va ngheng dawt a, a lam ka hawi chho rualin ka hmuiah tak a rawn fawp leh nghal hmiah.

"Mak i va tih hmel ve" min fawh zawh hnu chuan a rawn ti a, a la nui var var zui.

Engmah ka hre hman lo, ka beisei loh zawnga a chet thut avang chuan thinrim nachang tak ngial pawh ka hre hman lo a ni.

"Vawi khat leh" tiin ka hmuiah bawk chuan a rawn fawp leh zeuh a, chutah zet zawng ka awm mai mai thei ta lo.

Ka nam vak dawn tih hria ni awm fahran hian a ding sawn thuai a, min nuih sukin kut ka thlak phak lohnaah chuan a ding daih.

"LALRINAWM, khatiang khan vawi khat mah che tawh suh, i zak miah lo em ni?" ti ram hmakin kan room lam pana a kal lai chu ka bul lawka Cushion awm remchang chuan ka vawm pawp a, a lo man chat vel a nih chu!

"LALRINAWM!" vin tak chuan ka ti leh vak a, min nuih sun sun vel chuan ka thin a tirim zual tak zet a ni.

A namnul mai mai theiha ka lo awm khanglang te chu ka inhua, ka inhaw ngawih ngawih.

"Enge ni ka Valentine" tiin min rawn chhang kher a, kan room kawngka bulah chuan a ding titih der tawh bawk.

Chu bakah a Valentine te chu kei ni lovin Zonuni kha alawm, zak lo leh lutuk mai.

"Ka ni bawk lo, min ngainep deuh hian awm ṭhin suh" ka tih rualin ka fate awmna room-ah chuan a lut hmak a, ka chhan letna chu a hriat hman pawh ka ring chiah lo, ni lo, a hre hman khawp ang.

Ka mi biak ber room-a a luh tâk daih avang chuan kan choka lam ka pan hmawk hmawk a, ka lung chu a awi hlawl lo a ni. Ei rawng bawl ka'n tum ve ngawt pek a, dar zat ka en chuan ei rawng bawl a lo la hun teuh lo.

Kan room aṭanga ka fate nui uar uar thawm te chuan min tithinrim ru tlat a, ka tel lova an hlim vel lutuk chu ka ngei a ni.

Lalrinawma reng reng pawh Zonuni nen an inṭhen tawh thu a sawi vel tak nâ a, awih ru deuh tho mah ila ka awih lo lui tlat.

Zonuni awm dan aṭang khan ka hre vek, nasa takin Zonuni khan a la duh a ni. Hmeichhe sual a niin ka hre lo, kei aiin naupang mahse a rilru erawh a puitling phian a, Bawihpuia a rawn kan ve ṭum pawh khan ka nu leh pate a be thiam hle a nih kha!

Khata ṭang kha chuan lehkha zir sang a nih ka ring nghal ringawt a, ka ring sual kher lo bawk ang. Kei leh ka fate pahnih vanga Rintea leh Zonuni an inṭhen chu ka duh dan leh ka tum a ni bik lo, min rawn ngaihven miah lovin inngaizawng reng se ka ti zawk.

Dik tak chuan pasal leh pa min uap lumtu tur chu kan mamawh ngei alawm, mahse tu berin nge min uap lum ang tih erawh ka hre lo a ni.

Ka fate tan chuan an pa Rintea chu a ṭha ngei mai, ani tluka ka fate enkawl thei tur leh tihlim thei tur an awm kher lo vang, mahse keimah zawk hi ka dik tlat tawh lo a ni.

Damdawi in aṭanga kan chhuah hnu thlengin kan inah a rawn leng zan tin a, tiang nena ka fapa a kal theih thlengin zan khat rawn len loh pawh a nei ngai lo.

Ka nu leh pate phei chuan ka fate pa a ni tih an hriat vek tawh avangin pasala nei mai turin min tur tut tut a, ka fate pawh hrilh tawh mai turin min ti nghe nghe.

Ni e, pasalah ka nei dawn lo a nih paw'n ka fate tal chuan an hriat ve a hun tawh pawh a ni mahna, eng dang zawng aiin buaina ka tawk leh ang tih ka hlau ber. Mualphona te, zahna te leh rilru natna te ka tawng leh a nih ngat chuan ka tawrh chhuah zawh ka ring tawh lo.

Nilaini a ni a, ka awm a nuam lo riai riai a, damdawi te eiin ka ṭhat ve leh mai ka ring a, mahse ka pangai thei mai lo. Ka eitur sem te chu ka ke chheh a dik hlei thei lo va, ka tlu dâwn dawn ṭhin.

Chhuanlam siamin bathroom-ah chuan ka lut vat a, ka hmai te chu ka phih thuak thuak a, chutih lai chuan Hlimhlimi hnen aṭang phone call ka dawng bawk.

Hlimhlimi nena kan inbiakna chuan tlêmin min tiharhvang deuh a, mahse vawi leh khatah ka buai ta thut. Ka thil hriat hnuhnun ber chu kawngka chum ri a ni a, a bak engmah ka hre zawm tawh lo.

Thil ri seng seng leh vawt riai riai chuan min tiharh a, ka mit erawh ka la meng peih der lo. A vawt ka tih ruk deuh avangin ka ban chu ka ti che a, chu veleh ka kut chu tu emaw ni hian a rawn chelh nghal.

"Nunpui, i harh em ni? Doctor ka va ko ang aw, ka rei lo vang" rawn titu chu Hlimhlimi a ni tih ka hria, ka mit ka men chuan kawngka hawnga a chhuak chiah chu ka hmu a, oxygen pek mek ka ni tih ka hre zawm zat bawk.

Room chhung chu ka theih ang angin ka en kual a, chutiang taka chau leh na ka ni tawh hran lo. Doctor leh Hlimhlimi lo luh lai te chuan ka lo meng kar tawh a, Doctor chuan ka oxygen hip lai chu a phelh sawk sawk a, ṭhu kangin ka dinhmun chu ka zawt zui nghal.

"I BP hi a sang ang reng khawp mai a, i thil ei fimkhur ang che. Thil pakhat pawi tak a awm bawk, mahse lo hlauthawng lutuk nghal lo la" Doctor-i'n a rawn tih chuan ka hlauthawng nghal, kei ang bawkin Hlimhlimi pawh a lo meng danglam nghal ve bawk.

"Engati nge tun aia hma hian i rawn kal loh? Hetah kher lo damdawi in dangah pawh kal tur i ni asin, i kal hi a function ṭhat theih tawh loh avangin kan thlak thuai thuai a ngai a ni" Doctor thusawi chuan min va tiphu chiang tehreng em.

"Enge i sawi awmzia Doctor? Kei hian kal function thei tawh lo ka nei tihna maw!? Engtin nge ka la dam theih si? Ka thi thuai dawn tihna em ni?" ka chi ai vek tawh avangin ka aw te chu a phelh phung a, ka fate chuan ka rilru an rawn luah nghal lo thei lo.

"Ni lo, chuti mai zawngin i thi dawn hleinem, Donor kan hmuh theih chuan i dam leh thuai ka ring. Hlauthawng lutuk suh, i hlauhthawn luatah nangmah leh nangmah i inti hrehawm mai mai ang tih ka hlau zawk a ni" a rawn tih chuan

"Hlauhthawn lohna chi a ni em ni? Fate pawh ka nei asin, engtin nge ka tel lovin ka fate an awm ang? Thih ka la duh lo, ka thi duh miah lo, ka fate bulah ka awm reng duh" ka lo ti ṭuau a, ka dinhmun chhe tak avangin ka rilru chhungril chu a na vawng vawng a ni.

"I thi nghal mai dawn lo ka tih tawh khâ, Donor kan hmuh phawt chuan i dam leh ngei ang" Doctor thusawi chu ka bengah lut mahse ka ngaihtuahnaah a awm thei tawh lo, Cancer natna nei ang maia ka inhriat avang chuan thi ngei ngei tur ang chiahin ka inngai tawh a ni.

"A dik chiah Nunpui, i thi nghal ringawt dawn lo. Nichin lawk khan Bawihpuia te pa hnen aṭang phone call i dawng a, damdawi ina i awm thu ka sawi a, a lo kal nghal tur thu a sawi bawk" ka ṭhiannu thusawi chuan chiang takin min harh chhuahtir nghal.

"I hrilh tur a ni lo, ka chanchin hi Rintea'n engmah a hre tur a ni lo. Doctor nang pawhin min zep sak hram rawh, ani ber kher hriat chu ka duh lo a ni. Ka chhungte chu in hrilh thei thung ang, ka fate pahnih tiam lovin"

"Nunpui, hetiang thu hi zep chi a ni hleinem, i ti awm ang lo leh lutuk mai. Bawihpuia te pa chu lo thleng thuai se ka lo hrilh vek dawn nia, a tih hian a tih chi loh reng reng" Hlimhlimi chuan a lo ti bawrh bawrh a, a thil tih tum erawh ka duh loh zawng tak a ni.

"Hlimhlim khawngaihin hrilh miah suh, a hma paw'n i huat em khâ, engati nge tuna taka ka chanchin lo hrilh thawt thawt chu i tum?" Rintea ka fate pa a nih thu a hriat tirh te kha chuan a haw em em zawk a, tunah erawh haw lo ang hmakin a awm leh lawi si.

"Ka huat leh huat loh chu thu hran ni se, tun atan chuan i fate pa a nihna angin a hriat a thiang a ni. I chhungte pawh amah nena kan inbiak hma daih khan ka hrilh tawh a, an lo thleng ṭep tawh ang ka ring" hrilh chu tum teh mahse ka duh tlat bawk si lo.

"Khawngaihin Hlimhlim hrilh suh, a zia i hre chiang lo a nih kha! A tan chuan engmah ka ni tawh lo, ka tan erawh ka fate pa a ni reng a, a ni reng bawk ang. I hrilh a nih chuan min hmusit leh mai mai zawk ang, Rintea hi hmana ka mipa hmangaih em em ṭhin kha a ni tawh lo" ka ṭap chhuak ta nge nge.

"Nunpui" a rawn ti thawp sep a, kun ngula ka ṭah khur ngawt ngawt lai chuan ka kut a rawn hum a, min kuah zui nghal bawk.

Kei erawh ring lutuk lovin ka ṭah chhunzawm zel a, ka ṭhiannu chuan eng thil mah a sawi belh tawh lo.

"Ka lo va chhuak ang e, chuan ka hmel hriat Doctor dang te ka lo be kual ang a, kei aiin tih dan te pawh an lo hre mial maithei asin, lungngaiin in dawm kun reng suh" Doctor chuan ngaihthlak nuam zet hian a rawn ti a, min chhuahsan zui nghal bawk.

Lo thleng hmasa zawk tura ka rin ka chhungte aiin Rintea chu a rawn thleng hmasa hlawl a, ka hmel a hmuh rualin hmanhmawh tak hian a lo kal phei a, a hmel aṭang chuan a hlauhthawn hmel ve tak takin ka hria.

Thil thlen dan chu kimchang lo takin Hlimhlimi chuan a lo hrilh zung zung a, kal thlak ka ngaih thu a beng hriata a sawi ri miah lo chu ka lawm tak zet a ni. Ka kuta chelh ranin Rintea chuan min en reng a, mahse kei chuan ka en let ve ngam lo.

Ka en a nih vaih chuan ka mit aṭang thil dik lo a awm tih a hre nghal ang a, min zawt leh ngei dawn tih ka hre lawk vek. Min biak pawh chuan ka chhang eih lo, a chhan chu ka dik lo ṭan leh tawh tlat a tin ni!

Ka awm dan chu ka sawi fiah thiam lo, ka lu te chu a hai muai muaiin ka hria. Ka taksa chhung chu a phu zawk zawk a, ka thi dawn ni mai hian ka hria, mahse ka fate thihsan chu ka va duh si lo em.

"Nunpui! Doctor va ko thuai teh, harh teh Nunpui, i awm dan hi ka ngainat zawng a ni miah lo" tia Rintea ṭawng mawlh mawlh chu ka hre ruai ruai a, a bak engmah ka hre leh tawh lo.

Thil ri mur mur chuan ka beng a rawn verh zawk zawk a, ka rilru leh ngaihtuahna te chu a fim tial tial a, thil ri mur mura ka hriat chu mihring ṭawng thawm ngei a ni.

Ka mit chu zawimuangin ka meng a, ka hnar leh hmui bul vela khawl thil invuah run avang chuan oxygen ka hip mek tih ka hria, nikhaw hre lovin ka awm leh ngei a nih dawn hi!

Ka meng tih chu Rintea'n a rawn hre hmasa ber a, ka chhungte paw'n an rawn hre chawpchilh ve nghal bawk. Rei lovah Doctor pawh a rawn lut thuai a, ani paw'n ka chanchin leh dinhmun dik tak a sawi ri ta bik lo.

Rintea bulah chuan ka fate pahnih ka hmuh duh thu ka sawi a, ka bula lo hruai turin ka ti bawk. Ka pa chuan u Atei'n a awmpui thu a lo sawi ve thuai a, Rintea erawh ka thu awihin Cabin aṭang chuan a chhuak rang khawp.

A awm lo ta maw tihah ṭap chungin ka chhungte bulah ka dinhmun khirh leh chhe tak chu ka sawi a, ka sawi hleih theih tâk loh avangin Doctor chuan a lo sawi chhunzawm bawk.

Rintea hriattir ka duh loh thu ka sawi chuan min hau nghal a, anni chuan hria se an lo ti em em zawk, mahse kei chuan a them pawhin hre lo se ka duh a ni.

Ka nu chuan ṭap chhuak hawk chungin min rawn kuah vat a, chungte chuan ka ṭah a tichhuak zual. Ka rilruah chuan ka fate hlir an awm a, a changin Rintea pawh a awm tho.

Ka fate ka bula lo hruai tura ka tihna chhan chu an pa dik tak chu hre tawh se ka ti a, ka thih hmaa an hriat chu a ṭul a ni.

Doctor chuan ka thih theih ringawt loh thu a sawi ngei alawm, mahse keimah zawk hian thih ka hlauin ka inring bur tlat bawk si.

Ka fate hmel ka hmuh rualin ka lo au ngal chul a, a kal ṭha pangai thei zawk Bawihtei chuan min rawn pan a, Bawihpuia erawh Rintea'n a pawm thung.

"Bawihpui Bawihte, apa tak tak kha in hmu duh tawh em?" nui lui sâng chuan ka ti a, ka fate tih loh mi dangho chuan min lo en nghal ṭhap.

A bikin Rintea chuan min en chiang leh zual a, a hmelah chuan hamhaihna bak a lang lo.

"Aih nu, kei chu apa Rintea bula awm hi nuam ka ti" Bawihtei chuan a lo ti a, ka fanu thusawi avang chuan ka ṭah ṭhelh a ni.

Rintea chu an pa dik tak a ni tih hria se zawng an va hlim dawn em, chutah Bawihpuia ve thung chuan

"Kei pawh nu, apa tak tak chu ka hmu duh lo, apa Rintea chiah hi ka hmu duh" a rawn ti a, a pa chu a kuah let chial a, Rintea pawh chuan a chalah a lo fawp vang vang.

An pafa awm dan avang chuan ka nui seih a, Rintea ber chuan kan boruak chu mak a la ti a ni.

"Apa tak tak chu apa Rintea kha alawm, apa tak tak chu apa Rintea kha a ni e" ka ṭah loh na'n ka hmui ka pet fan fan a, ka fanu leh fapa te lam pawh hawi rei duh lovin hmun dang ka hawi daih.

"Tak tak maw nu!? Yes, apa tak tak i ni maw apa Rinte?" Bawihpuia bawk chuan a rawn ti a, Bawihtei pawh a pa lamah chuan a kal zui nghal. A pa kekawr chu a va vuan ṭai a, a chho melh ral bawk.

"Apa tak tak i ni maw!? Engati nge a hma khan kan bulah i awm ngai loh?" Bawihtei chuan a ti ta kauh mai, a fanu zawhna avang chuan Rinte hmel pawh chu a buai ve nak a, mi dang erawh a ṭawng chhuah nghakin kan lo ngawi ṭhap.

"Ka tihpalh Bawihte, a hmate kha chuan ka....eng lo......ka zin daih alawm" tiin Rintea chuan dawt a sawi tawp a, ka mittui te chu a lo dir zung zung.

Ka thih tawh dawn vang pawh a ni ang ka fate hnena an pa dik tak ka hmel hriattir tâk, mahse thihna pumpelh chu ka va duh si em.

"I zin bo leh daih dawn em?" ka fanu chu puitling ang mai a ni, chutiang em em chuan thil a lo ngaihtuah ang tih ka ring pha lo.

A u ai chuan a fing zawk ngei mahse naupang kum 10 pawh la tling lo a ni a, a nu hian pa an mamawh lutuk tih ka lo hre har em a ni.

"Dawn tawh lo ve Bawihte, in bulah apa hi ka awm char char tawh ang. Anu te, Bawihpuia te, nangmah te hi ka kalsan tawh miah lo vang che u, ka promise thlap e" Rintea'n a tih chuan ka fanu chu a pa kawng zawn vela a hmai phumin a rawn ṭap a, nu tan chuan lo ṭah ve loh theih a ni lo.

"In bula ka awm tam loh avangin ka tihpalh lutuk fate u, ka zin bo san tawh miah lo vang che u" Bawihtei kuah theih tura ṭhu hniam chung chuan a ti leh a, Bawihpuia pawh a pa darah chuan a kun ve chial mai.

Kei erawh mittui nen lo awm pur mah ila ka thaw a veng huai, ka fate'n an pa dik tak an hriat tawh avang chuan ka thla a muang riai riai a ni.

Rintea chuan ka fate pahnih chu pawn lamah a pawm chhuak ve ve a, ka pa chuan min rawn hnaih chilh nghal.

"I hrilh dawn lo tak tak em ni? I hrilh hreh viau te a nih chuan keimah hian ka hrilh zawk mai ang, ka sawi hreh reng reng hleinem" ka pa chuan a rawn ti a, a ngaite bawkin hrilh lo turin ka lo ti ve leh nghal.

"Nichin khan ka Doctor hmel hriat te ka be kual a, Mizoramah chuan chuti maiin Donor tur an awm loh hmel khawp mai. Amaherawhchu Delhi-a Manipal Hospital-ah khuan Mizo thawk pakhat a awm a, ka biak kha chuan putar pakhat thi lek lêk tawh hi a awm thu a sawi a, chu chu in tan ka beisei ru deuh a" Doctor chuan a rawn ti a, chutah ka pa chuan

"Han sawi chiang teh Doctor, chu putar chuan a kal chu mi dang pek a duh tihna em ni?" ka pa chuan a lo ti leh thuai a, Rintea leh ka fate an awm tawh lo bawk a, kan ṭawng zawi tawh lo tlang hle.

"Chutiang deuh chu a nia, mahse phai lama zu kal kher ngai lovin nangmah ni pawh hian in pe thei tho a nia, chu erawh in thutlukna ni se" Doctor chuan a rawn ti leh a, chu veleh mi dang ṭawng hma hauhin

"Ka duh lo, ka chhungte tumah hian min pe suh se, keimah avanga taksa peng kim an nei lo ringawt tur hi ka duh lo a ni. I sawi ang khan phai lamah chuan kal zawk ang Doctor, mahse chu pawh ka fate leh Rintea hriat loh bawkin ka duh a ni" ka lo ti vat a, keimah avanga ka chhungte'n kal an nei lo tur chu ka duh lo tak tak.

"Ti hian ti teh ang u, phai lamah chuan zu kal phawt ula, kei paw'n ka ṭhianpa chu ka lo biak fel sak vek dawn che u a nia, mahse eng emaw thut a awm palh tâkin in zinga pakhat tal hi chu inring tawp mai r'u" Doctor chuan a rawn ti dam leh raih a, tûmah kan ṭawng tawh lo.

"I kal dinhmun hi a ṭhat loh em tawh avangin a rang lama chhuk thlak chu a ṭhat ber ka ring, naktukah hian chhuk thla thei ula, thil awm dan zu hre vat vat ula chu duthusam maw le" a rawn ti leh a, kei pawh a ngaihdan chu ka pawm zawng tak a ni.

"Kal kan thlak hian ka thi dawn lo ti raw Doctor? Thih ka la duh miah lo a nia, ka fate tan ka dam a la ngai a ni" ka ti leh tawp a, thih chu hlauh tak tê hian ka hlau tawh a ni. Chutah Doctor pawh chuan

"Thi dawn lo ve, a hma ang chiahin i dam ṭha leh var var dawn alawm, chuan kal petu te pawh i chhungte lo ni mahse natna dang emaw transplant neih laia vanduaina an tawk te a nih ngawt loh chuan an thi thei bik chuang lo" a rawn ti dam thlup a, ka rilruah chuan hlauhthawnna leh hlim rukna a inawm pawlh nuai mai.

"Naktukah keimah nen Manipal Hospital-ah chuan kan zu kal dawn nia Puii, buaina leh harsatna a lo awm thut a nih leh keima'n ka kal hi ka pe mai ang che. Min hnial suh ang che, min hnial a nih vaih chuan i dinhmun hian Rintea leh i fate beng a thleng ang. I awm dan leh i rilru put dan hi a ṭha miah lo, i rilru kha hrisel takin awm tir zawk rawh" ka pa chuan a rawn ti nghet charh a, ka chhang let duh ta lo.

Rintea leh ka fate lo luh lai chuan kan lo ngawi ṭhap a, an rawn hlim lut hle bawk. An lo luh hmaa thil pawimawh engkim kan sawi zawh hman vek avang chuan tlêmin ka rilru pawh a pangai ṭan a, mahse rilru hahdamna tak tak erawh ka nei thei rih lo.

Ka fate chuan an pa dik tak an hre tawh a, hlim awm tak pawh ka ni ngei mai, ka kal dinhmun ṭha lo tak hre lo ila chuan ka hlim ve theih ka ring.

Rintea vang ni lovin ka fate hlim hmel vang zawk chuan hlimna ka neih ve theih ka ring a, mahse tunah chuan ka hlim em em chuang lo.

Ka taksa awm dan chu ka ngaihtuah let a, zun theih loh ṭhak ṭhak ka neih laia hlauhthawnna ka nei ngai miah lo te kha mawl ka in ti, ka kal ṭhat tawk loh vang a ni awm reng si a.

Doctor chuan ka BP dinhmun a dik loh leh thut a hlauh avangin zan khat tal riak turin min ti a, Rintea bawk chuan min awmpui a tum leh ta.

Chapter 12

"Bawihpui Bawihte, naktukah apa ina len phei kha in châk em? Apa inah chuan api leh apute pawh an awm ve asin" tiin ka fate chu intihlim luiin ka bia a, ka fate aiin Rintea chuan ka awm dan leh ṭawngkam chu mak a lo tih hmel zawk.

"Tak tak maw nu!? Api leh apu ni lo mi dang api leh apu kan nei maw!?" hriatthiam loh hmel zet hian Bawihpuia chuan a rawn ti heu a, Bawihte pawh ṭawng lo mahse a mitmeng aṭang ka thusawi chu a hrethiam lo tih ka man thiam.

"Aw nei e, tak tak alawm, apa bulah khan in duh chuan naktukah in leng thei ang" ka ti leh chuan Bawihpuia chuan thawm a rawn chhuah nghal a, a hlim lutuk chu awm ngaihna a hre lo a ni ber.

Rintea pawh a fapa awm dan avang chuan a kia ve suk suk a, ka dinhmun dik tak hre chiangtu te erawh an ngawih ṭhap.

"I lo kal ve dawn em nu?" Bawihtei chuan a rawn ti ta kauh mai, ka fanu zawhna chuan min tihlauthawng nghal.

A zawhna pawh chhang mai lovin ka nui lui sak a, Rintea bawk chuan min lo en leh reng tawh, mahse a lam ka hawi duh lo hrim hrim.

"Ka hman hleinem Bawihte, kei chu hnathawh ka ngai alawm, ka awm loh hlanin apa nen khan hun nuam tak in lo hmang dawn nia, apa bulah in awm dawn sia a nuam awm bik ê" tihhlim tumin ka fanu chu ka bia a, a hmelah erawh hlimna ka hmu hauh lo.

"Naktuk chu chawl leh mai la, thil harsa pawh a ni nâng" chik zeta min en chung hian Rintea chuan a rawn ti sup a, ka pa nena kan zin dawn tih hria se chuan a phal ka ring hauh lo.

Ka taksa dinhmun ni mek hi a hriat pawh ka duh lo, a hriat vaih chuan engkim a buai leh ngei ang.

"Ka thei lo tih i hriat khâ, naktuk phei chu kan buai ka ring deuh" dawt sawi reng ringawt chu ka ning ve tawh lutuk, thu dik tak hrilh ringawt ila thil a kal fel dawn bawk si lo, tun atan chuan dawt sawi a ṭha rih ber a ni.

"Ka lo hruai ang che, keima'n in pute ka lo dil sak dawn che a nia" a rawn tih chuan a lam ka hawi vat a, a thusawi zawh chiah ang chuan a ti leh tak tak ang tih ka hlau, chhan let dan tur pawh ka hre tawh lo.

"Naktuk chu i fate nen hun hmang rawh u, pangai taka awm ho pawh in la nei mang hleinem, anni paw'n i bula hun hman chu an châk phian ang" ka pa chuan a rawn ti ta hlauh a, ka ṭawng ngai lova min ṭawng khalh chu lawm tak ka ni.

Chutia ka pa berin a sawi tâk avang chuan Rintea chu a rawn ṭawng leh tawh lo va, mahse a lawm hmel teh chiam lo. Ka pa chuan min riahpui tur thu a sawi a, mi dang chuan an hnial ngam ta lo.

Rintea pawh ka pa'n min riahpui tur thu sawi lo se chuan min riahpui ngei ang, ka pa chuan Bawihpuia leh Bawihtei riahpui turin a ti hlauh zawk a!

Ka pa chuan an in lama hruai phei nghal pawh a remti vek a, keini ni lovin Rintea ber chuan mak a ti a ni. Ka fate pahnih chuan zan tina an tih angin min mangṭha a, min mangṭha awkâ chu a tawpna a ni ang tih ka hlau ber.

A tuka ka zin bo rih dawn thute chu hre ta se engtin nge an ngaih ang? Lo thi hlen palh ta ila kei hi min dem viau ang em? Ni lo, chuti maiin ka thi dawn lo tih Doctor-i'n a sawi kha maw le, ka fate hi ka thihsan tur a ni lo.

Ka damna tur a nih phawt chuan eng pawh ka ti mai ang, mahse ka chhungte emaw ka tana mi hlute taksa ringa nun chu ka duh lo bur, ka chhungte taksa hawh chu pumpelh hram ka duh a ni.

An haw tak tak dawnah ka nu chuan min ṭawng thlamuan leh hram a, ka kal dinhmun avanga lungngai lutuk lo turin min chah lâwm lawm bawk.

Nu tan chuan fate hi an lo hlu em a, nu ni ve lo tan chuan hriatthiam mai pawh a harsa ang, mahse nu ka nih ve tawh avangin ka nu min ngaihtuahna te chu awm ka ti hliah hliah.

Zan a rei hnuah pawh ka pa nen chuan thil chi hrang hrang kan sawi a, ka tana ṭha tura a hriat zawng zawng chu min hrilh fai vek bawk.

A sawi uar ber erawh ka fate pa Rintea chu pasala nei turin min ti a, ka tan mai bakah ka fate tan pawha a ṭhatzia a sawi chamchî a, a sawi chu dik vek mahse ka rilru erawh Rintea lamah chuan a let thei tawh rih lo.

"Hmeichhia chu pasal tel lo hian in kim lo asin Puii, hna sang emaw hlawh sang tak emaw pawh nei mah ula nghenchhan tur leh hringnun hmanpui tur pasal in neih si loh chuan nangmahni ah hlimna tluantling a awm thei tak tak chuang lo vang" tia ka pa min hrilhna chuan ka rilru a luah hle a, thu dik tak a sawi rualin ka rilruah zawhna a rawn awm a, mahse kemah vekin a chhanna ka hre leh nghal.

Ni e, pasal nei lo nutling hi chu zuam pawh kan lo awl bik a ni ang e. Kum kha leh chen pasal tel lova ka fate ka enkawl chhung pawh khan tlangval tam tak chuan min hnaiha min hriat chian an tum ve ṭhin alawm, mahse ka rilru a dik theih tawh loh avangin ka thinnlung kawngka chu ka kalh tlat a nih kha!

Pasal ka mamawh lo pawh a ni bik lo, hmeichhia ka nih ve tho avangin ka mamawh lutuk zawk. Kei leh fate nen hmangaih taka min enkawltu tur leh min uap lumtu tur ka duh ve tho asin, mahse ka tan chuan tu mipa mah hi an tlingzo tawh lo a ni ber.

Engati nge hmeichhia kan nih avanga zuam te kan awl bik kher? Engati nge kei anga fa nei tawh pathlawi tam tak pawh mi sawi sep sep an kai ve ngai loh?

Ka thik, ka thik ṭhin a ni. Mihring ve ve kan ni a, eng ang pawhin mipa nen inan tum mah ila a theih dawn si loh. A dik, eng tikah mah hmeichhia leh mipa hi kan inang thei dawn lo, a chhan chuan Pathian min siam dan a ni miau a!

Eng vangin nge mipa te aiin hmeichhiate hi kan mualpho hma loh tehreng ang nî, khawvel dan leh kalphung a ni tlat alawm!

Kan khawtlanga mipa an mualpho mawh bik lutuk te kha ka lo thik vel ṭhin a, â ka inti letling zawk, mahse mi fing ber pawhin ât chang an nei ve ṭhin bawk alawm le.

Ka beisei loh deuhin Rintea hnen aṭang phone call ka dawng a, zan a rei ve thawkhat tawh avanga mak tih ru em em pawh ka ni.

"Hello" ka ti sep a, room chhungah chuan keimah chiahin awm lo ila chuan ka pick up pawh ka ring lo.

Ka pa chu coffee in turin a chhuak lawk a, a chhuah dawnah rei a thang loh tur thu min hrilh thlap bawk.

"I la mu bik na nge? Ka muhil thei leh tlat tawh lo" pangai tak hian a rawn ti a, a muthilh theih loh thu min hrilh ringawt chhan chu ka hre lo, a aw lah chu ni dang ang lo takin a la zângkhai em em zui.

"Ka rawn video call lawk dawn che aw" a rawn ti leh a, ka pa awm loh a hria emaw ni ka ti hman rum rum. Rei lovah a rawn video call ta reng a, mahse ka accept duh ta ṭhak lo.

Phone call pawh ka pick up hram hram a, video call leh zel pick up te chu a!

"Accept ta che Nunpui, min hmu duh lo em ni? Kei chuan ka hmu châk viau che a nia, hun kal tawh avangin inti lungngai reng lo la" a ṭawng dan vel kher chuan ka thin a tirim leh nghal a, chhan pawh chhang let lovin phone chu ka off hmak.

Phone call chu a rawn luh zawm nghal zat a, mahse ka pick up duh mai mai tawh lo. Min thunun taka awm a tum te chu ka duh lo, a zuam theiha awm pawh ka tum hauh lo bawk.

Kan inngaihzawn ve lai te kha chuan mahni thu a duhna kha amah tipa tu ah te ka ngai ṭhin a, ka duh zual phah a, a bula awm nuam ka tih phah a, ka hmangaih zual phah ṭhin a nih kha!

Tunah chuan a ni tawh lo, engkim a danglam vek tawh. A taksa ka sik rualin ka la danglam ṭhin tih chu ka pha lo, amah paw'n a hre chiang hle a nih kha!

Amaherawhchu ka taksa aiin ka rilru a pawimawh zawk tih ka hria, ka taksa chu ka rilru control a ni tih ka hre kar thung.

Ka taksa danglam avangin a lama let duhna rilru ka pu nghal ngawt lo va, pu nghal ngawt pawh ni lovin let leh ka tum tawh lo hrim hrim zawk.

Vawi tam ka phone a rik hnuah message tone a rawn ri a, ka open chuan

"Ka phone call i pick up loh chuan ka lo kal ang" tih hi a lo thawn a, ka chhiar zo chiah ang tih velah a hnen aṭang phone call ka dawng ta reng a, message min lo thawn anga a tih duh leh tak tak ka hlauh avangin ka pick up leh ta tawp.

"Enge tun ang zan rei tawhah min lo biak chhen a? Ka be peih vak lo che a nia" ka ti nghal tlawng a, leh lama mi erawh a ngawi reng thung.

Ka aw chu a nem em em hran lo, a ruk takin ka thin a rim ru ṭun bawk.

"Keima'n ka be peih che alawm le, chuan zanin khan thil dik lo eng emaw chu a awm a ni ti raw? I hmelah khan thup nei i ang ka ti, thup i nei em Nunpui?" a ṭawng tir lam vin deuh mahse a tawp lam erawh a nem ta viau.

"Enge thup se min la tih a? Thup hlen theih ni se chuan ka fate pa i ni ti pawh hi i hre kher lo vang, chuan min ngaihtuah tak ang khan ka lakah awm suh, kei aiin Bawihpuia leh Bawihtei te an pawimawh zawk" ka lo ti deuh hmuk a, leh lama mi chu a lo ngawi ran bawk.

"Sawi tur i neih tawh loh chuan ka dah mai dawn, ka mut a chhuak deuh tlat" a reh vang vang avang chuan ka ti leh a, a ngawi rei ve bawk em a ni.

Ka mut a chhuak te ka ti vel a, ka mut chu pakhat mah a chhuak lo, amah biak ka peih loh vang a ni mah zawk.

"Ka tan chuan i pawimawh viau asin" a rawn titawi tak a, phone kaltlang mah ni se chawp leh chilhin ka danglam nghal vek thei.

Kan inngaihzawn ve laia a ṭawng dan chiah chiah kha a ni, a aw rik chhuah dan pawh a la ngai vek.

"Ka fate ang tho hian i pawimawh tih i hre lo em ni?" nem taka min be ta daih chu ka hrethiam lo, thinrim leh awkâ vinin inbia ila ka dawngsawng thiam zawk ngei ang, mahse ka beisei ang chuan min be hauh si lo.

"Ka dah dawn, mut ka duh" ka lo ti thuai a, kan thil sawi chu a dik lo ṭan dawnin ka hria.

Aw pangai tak leh min ngaihtuah ang taka min biak hi chuan ka nem leh vat ṭhin, chu chu ka duh lo a ni. Ka rilru tihpaukhauh ka duh zawk, a hnena let leh lam ni lovin.

"Naktuk zanah kan inhmu dawn nia, ka chhungte paw'n pangai taka hmuh an duh che, i ṭap lai leh i thinrim lai kha chu an hmu tawh ngei a!" a thusawi tawp lamah chuan fiamthu tih hriat tak hian nuih insum ṭawng ri ka hria a, kei chu ka nuih a za ve der lo.

"Naktuk zan pawh ka hman lo vang" ka lo ti vat a, a chhungte hmuh chu ka duh teuh lo mai.

Chu bakah naktukah te chuan Delhi-ah ka zin dawn, ka cham hun chhung tur pawh ka hre lo. Ka kal thlak a awlsam leh sam loh a ni mai, chumi chhung chu ka zin bo rih a ngai bawk.

"Bawihpuia leh Bawihtei an muhil tawh em?" Keimah bawk chuan ka ti leh a, ka mut tak tak hmaa an ṭhat leh ṭhat loh hriat ka duh a ni.

Chutih lai mek chuan ka pa a rawn lut a, tu nge ka biak tih hriat tum ni awm tak hian min en chik hle bawk.

"Aw muhil tawh e, a laiah ka mu a, ka ngaih ang chiahin anni pahnih pawh hian min lo ngai a nih dawn hi! Chuan mi pakhat pawh ka ngai khawp mai, mahse ani chuan ka ngai tih pawh a inhre lo vang" a mi ngaih chu Zonuni bak a nih ka ring lo, ka rilru chu a na em em nghal ringawt bawk.

"I duh chuan i ngaih thu i hrilh thei reng alawm, min vengthawng duh suh, nang nen inzawmna kan nei tawh lo tih i hriat vek kha! Ka dah a nia, ka mut a chhuak tawh" ti hmakin phone chu ka hmet tawp a, ka pa chuan zawhna mitmeng hlirin min lo en.

"Tu nge i lo biak Puii?" a rawn ti ta reng a, chhan pawh chhang lovin ka mu nghal daih.

Rizai chuan ka inkhuh a, ka mit te chhung chhing ve mah ila ka rilru a kal kual nasat lutuk avangin ka mut a chhuak thei der lo.

"I ṭawngkam leh awm dan vel aṭang kha chuan Rintea a nih ka ring mai, i chanchin hi hrilh i duh lo tak tak maw Puii? Kei chuan hrilh ve mah ila pawi ka ti miah lo, a hriat hunah i chan a chhe viau zawk ang tih ka hlau" ka pa chuan a rawn ti leh a, ka muhil lo tih a hria a ni ngei ang.

"Hrilh ka duh loh chhan hi tam tak a awm alawm ka pa, chuvang chuan khawngaihin ka chanchin hi hrilh loh hram tum ang che, ka nu leh ka ute nupa paw'n hrilh loh theih chuan lo hrilh lo hram hram rawh se"

"Eng pawh ni se naktukah Delhi kan pan ang a, Pathian zarah engkim a ṭha turah ngai ang. I duh ang chuan Bawihpuia leh Bawihtei pa pawh ka hrilh dawn lo a nia, mahse kan zep reng theih erawh ka ring hran lo, a hriat chhuah hun chu a la awm tho tho ang"

"Zep theih chhung zep a ni mai" ka ti leh sep a, luhlul chu min ti ve ngawt ang ka ring.

Luhlul lo thei pawh ka ni lo, ka fimkhur tawh tlat a tin ni! Luhlul tur leh tuarchhel tura hnutchhiah ka ni tawh a, ka tan chuan ani hnaih leh tura ke pen leh chu thil harsa tak a ni.

A hnena let leh ngat phei chu thil theih a ni tawh lo, keimahah hian mipa duhna leh hmangaihna ang chi reng reng a awm tawh lo.

Zingah chuan hma takah ka tho a, ka pa erawh rem leh rem lovin a mutui ang reng phian. Ka pa pawh kai tho ta lem lovin Doctor chu ka va hmu a, ani chuan min buaipui nghal char char bawk.

Manipal Hospital-a thawk a ṭhianpa a biak fel vek tawh thute chu min hrilh a, a patient ngei kan ni tih lantirna turin lehkha min ken tir thlap bawk.

Ka pa nen chuan kan inah ka haw a, ka nu chuan min lo ngaihtuah leh hle. Ka fate pawh hrilh lovin Airport lam chu kan pan thuai thuai a, thlawhna chhunga kan ṭhut hnu thlengin ka rilruah ka fate pahnih an awm reng.

Ka tel lova mi dang ina an riak thei ringawt chu mak ka ti dâwn dawn a, mahse ka ti leh ta lo. Chu bakah an riahna in chu tu dang ni lovin an pa in a ni a, a bulah ngei an mu a, thlamuang taka an mu thei chu ka dem hran lo.

Engkim chu a kal tluang parh ka ti dawn nge ka hre lo, thlawhna ticket thleng chuan a awlsam vel vek a ni ber. Min enkawltu Doctor berin emergency angin min sawi a, ticket la lawk vek tawh pawh an cancel phah hial, chutiang khawpa min buaipui zung zung avang chuan ka kal dinhmun chu a ṭha tawh lo tak tak hle a ni ang.

Delhi kan thlen rualin Hotel-ah kan thleng a, chu pawh min enkawltu Doctor ruahmanna vek a ni leh ta zel. Mizorama kan awm lai khan hmel hriat emaw thlenna tur kan neih leh neih loh min zawt a, mahse keini chuan kan neih loh thuin kan chhang a, a bak chu ama'n engkim min buaipui sak nghal.

A ṭhianpa nia a sawi Doctor chu kan be pawp thuai a, ni khat pawh awl lova ka kal chu thlak thuai ka duh a ni. Manipal Hospital-a thawk Mizo Doctor chuan min hmuh rualin a tihtur ang ang chu a ti nghal zung zung a, biak pawh a nuam viau mai. Ka pa nen phei chuan an titi tui thei khawp a, Doctor chuan Mizo patient a neih khât thu a lo sawi ve bawk.

"Test neuh neuh kan nei ang a, kan neih zawh veleh Kidney Transplant chu kan ṭan nghal mai dawn nia ti r'u? Ka ṭhianpa khan i kal dinhmun thlalak te min lo thawn lawk vek tawh a, kan muangchan a hun viau lo a ni" Doctor chuan a ti a, keini pahnih pawh kan lo bu nghauh nghauh.

Doctor chuan room hranah min dah a, ka pa chu awmpui min la phalsak bawk. Darkar 2 hnu velah Vai putar ve deuh tawh nen an lo kal a, an bula kal turin min sawm zui nghal bawk.

Ka pa chuan ka kut chu a thlah duh miah lo va, ngawi reng mahse a hlauthawngin min ngaihtuah tak zet tih ka hre thei.

Chutia kan kal lai chuan ka nu hnen aṭang phone call kan dawng a, ka pa chuan kan awm dan chu pangai takin a hrilh a, rei pawh an inbe lo. Chutah room pakhata kan luh rualin Vai putar sam ṭuak phung tawh chu a rawn ṭawng chhuak a, a rak a ni ber.

Hindi ṭawngin thil a sawi vak vak a, kei leh ka pa chuan kan hrethiam lo dun hle. Doctor chuan a dara chelh pahin Hindi ṭawng tho chuan a bia a, mahse chu Vai putar chu a ngawi duh der lo.

A hma ai aiin a rawn ṭawng bengchheng a, a hnuah phei chuan a kal sawn ta daih mai. Ka hamhaih rualin ka hlauthawng a, ka hlauhthawn ang chu thleng lo hram se ka ti.

"Min hrethiam hram teh u, ni dangah chuan a duh asin maw le, engati nge a hunah tak a duh leh lo ka hre lo a ni. Tlang takin ka'n sawi mai ang e, ka pu khan Kidney Transplant tih a duh leh lo a ni" ka hlauhthawn ruk ang ngeiin Doctor chuan thu a rawn sawi ta.

"Chuan engtin nge ni dawn? Beiseina kan lo nei sang ve tawh asin, Mizoram aṭang kan lo kal vang vang a, kan ring em em bawk che" ka pa aw chu a chang fak a, kei erawh ngawi rengin ka lo ding a, kan bula ṭhutnaah chuan ka ṭhu thla ta hnawk.

"A pawi ka ti khawp mai ka pu, hetiang hian a rilru a thlak leh thut ang tih ka hre lawk bik lo a tin ni! Ka lo be ṭha leh dawn nia, ka'n kal nghal ang e" tiin Doctor chu room aṭang a kal chhuak thuai a, ka pa nen chauh chuan kan awm ta.

Ngawi reng hian ka kutah a rawn vuan a, ka ṭhutna aṭang chuan min kai tho a, kei chuan thih bak hmabak ka nei tawh lo ni berin ka hria.

A hmate kha chuan beseina sang tak ka nei ve a, mahse tunah chuan ka beiseina zawng zawng chu a chhe leh ta vek e!

Ka pa chuan khawi lam nge min panpui pawh ka hre lo, a kaih ang angin ka kal ve tawp a ni ber.

Ṭhutthleng pakhata min ṭhutpui hnu chuan lungngai miah lo turin leh ka tana a engkim hlan a huam thu min hrilh a, mahse kei chuan ka duh ve hauh lo.

Keimah avanga taksa peng kim lova a awm tur chu ka duh lo a ni. Ka thih a hun tak tak tawh pawh a ni ang, hetiang em ema ka vanduaina a kal tluan tak ni!

Ni e, kei hi zawng thi tlak ngawih ngawih ka ni. Ka fate tan lah nu nih tling lo leh tihlim thiam lo tak ka ni a, ka nu leh pa tan lah khawtlanga mualphona thlentu mai ka ni a, kei hi ka chau a ni, ka nun ram a chau tawh tak zet.

Khang kum chhung zawng khan ka tawrh chhuah theih ringin ka nung ṭhin a, a tawpah erawh thihna leh beidawnna mai ka hmachhawn leh ta chu a nih hi!

"Vawiin atan chuan a duh lo bur ka pu, a pawi ka ti tak zet, mahse ka theih ang angin ka lo zawng ang, ka zawng hmu ngei ngei ang tih erawh ka tiam thei lo che u" tia Doctor thusawi chu ka hre reng a, mahse mi â ang maiin ka awm thung.

"Doctor nep tak i ni, i laka rinna nghatin kan lo pan ve em em che a, heti mai hian maw min tih dawn a!? A ṭha e, kha Vai putar rilru mumal lo zet kal kha ka fanu hian a dawng hauh lo vang, keima'n ka kal ka pe ang" ka pa thusawi chuan min tiharh ta zawk.

"Ka pa, Hotel-ah let leh rih phawt ang. Naktuk lamah kan ngaihtuah ṭha dawn nia, ka chau tawh em mai" ka tih chuan min lo en thuai a, ka pa kal hman ka duh loh vang a nih rualin tun tut tuta tih chu ka duh ta lo law law a ni.

Ka pa chuan ka thusawi awih takin Hospital aṭang chuan min hruai chhuak a, ka rilru chhungril chu hria se a lung a va han awi dawn lo rua em. Hotel kan thlen hnu rei lotê ah ka inbual a, ka inbual zawh chuan ka mu nghal hmak.

Engmah ngaihtuah buai lo va awm chu ka duh, tuma'n min tibuai lo bawk se ka duh tak zet. Ka pa chuan min ṭawng thlamuan char char a, a lang chuan ka nui ve ṭhin tak nâ a, ka hlim teuh lo.

Tu nge hlim thei ang? Ka dinhmun ang chu nei ve ta se an hlim thei hian ka ring bik lo.

Zanah chuan Hlimhlimi ka call a, thu tam tak sawiin kan titi a, kei phei chu ka ṭap nghe nghe. Ka ṭhian ṭha ber a ni a, ka thinlung chhungril ipikna leh beidawnna zawng zawng chu ka hrilh vek bawk.

Ani paw'n min lo khawngaih em em a, tlan bo vang vang ka duh thu ka hrilh chuan ti lo turin min rawn ti nghal vat. Ka fate'n min zawn thu chu a rawn sawi a, chu chuan ka ṭah a tichhuak zual.

Zan a nih tawh avangin kan in lamah ka fate an awm phei leh tawh a, Hlimhlimi leh ka chhungte chuan ka zin thu an lo hrilh ṭha ve mai a, ka fate paw'n ngaih ṭhat lohna an nei hran lo.

Rintea ber zawk chu buaina a ni ta, ka zinna hmun leh a chhan a lo zawt reng a ni awm e. Ka chhungte leh Hlimhlimi lahin an lo hrilh duh bik si lo, hrilh loh theih chhûng chu hrilhlo se ka ti.

Chutiang vel thil chi hrang hrang sawia kan ṭah chiam hnu chuan kan inbiakna pawh kan titawp ve thei hram a, ka thawl ka ring kha a nia, ka thawl hawk miah lo.

Thawl hawk thei pawh ka ni lo, rilru beidawnna nen nun ka hmang mek a, chutah ka hma lawkah thihna in min lo la hmuak reng zui.

Zingah chuan ka tai a nat em avangin ka harh hlawl a, a na lutuk chu ka thi dawn ni mai hian ka hria. Ka aw pawh chhuah ṭha hlei thei lovin ka awm a, ka thlan te chu a rawn chhuak nasa em em a, lum ka tih vang erawh a ni hauh si lo.

Ka theih tawp chhuahin ka mit chu ka meng lui hram hram a, mahse ka pa hmel awm reng ka hmu lo. Ka rilruin a hming lam mawlh mawlh mahse ka kâ aṭang ri reng a chhuak thei lo thung.

Rei lovah ka ni muai muai a, ka bianga mittui luang zawih zawihin ka fate hmel chu ka mitthla a, ka thihsan dawn ngei ta pawh a ni ang. Thawm ri deuh pawp pawp chu ka hre ruai ruai a, tu ngaihsak mah ka beisei buai duh tawh lo.

Ka fate ka thihsan tur erawh pawi ka ti, mahse tunah chuan kei aia tihlim thiam leh enkawl thiam pa an nei tawh alawm, lungngai ru em em mah ila ka fate enkawltu tur Rintea a awm tawh tih ka hriat avang chuan hlim luih ka tum hram hram.

Hlim hi ka phu ve reng asin, ka thi dawn hnaiha rilru ka la sen theih ṭek ṭek chhung tal hi chuan ka hlim ve tur a ni.

"Puii!" hlauthawng aw taka rawn titu chu tu nge a nih pawh ka hre chiang thei tawh lo.

Ka ngaihtuahna leh engkim chu a thim mup mup a, ka beng te chu a kiui vawng vawng a, eng thil dang mah ka hre zui ta lo.

Chapter 13

Mipa ṭawng ri thum sep sep chu ka thil hriat leh hmasa ber a ni a, ka rilru lam harh tawh mahse ka taksa chu pakhat mah ka tiche thei lo. Ka kut chu tu emaw ni hian a chelh reng bawk a, ka kut chelhtu kut chu a lum nuam em em bawk.

Ka ngaihtuahna chu ka tifim a, ka rilru lamin chutianga thil hriatna a neih avang chuan ka thi lo tih ka inhre chhuak nghal a, ka lawm rualin hlauthawnna chu ka nei a ni.

Tu nge kal chu min pe ta ang? Ka dam leh chhan chu kal ka neih vang bak a nih ka ring lo. Ni lo, ka pa a ni thei mai ang em?

A theih loh, ka duh lo asin, a kal hman ai chuan kei an fanu chhuanawm loh leh zahpuiawm tak hi thih vang vang ka duh zawk.

Ka fate pahnih Bawihpuia leh Bawihtei te chu ka ngaihtuah lo a ni bik lo, ka rilruah an awm reng zawk, mahse lo thi ta pawh ni ila anni chuan enkawl thei tur pa an nei tawh a ni.

Thih ka duh bik reng reng lo, duh thlang thei ni ngat ila zawng taksa hrisel lohna nei lova dam ṭhat var var ka thlang ngei ang. Khawvela ka fate nen len dun te chu ka duhthusam a ni a, an puitlin hun thleng dam puia hmuh chu ka châk a ni.

Chutianga thil chi hrang hrang ka ngaihtuah kual theihna chhan chu ka ngaihtuah chhuak a, ka pa lakah ka inthiam lovin ka va inthlahrung tak em.

Ani chuan a fanu ka nih avangin a kal min pek chu a pawisa miah lo vang, a fanu ka ni miau a, min hmangaih tlat a tin ni!

Kei pawh ni ta ila ka ti ve tho ang, mahni rila rah fate damna tur a nih phawt chuan ka tih theih ang ang ka tih ngei ka ring.

Ka pa kal vangin ka dam leh chu a ni si a, ka taksa te chu tiche theiin harh chiang tawh ila chuan lungchhiat lutuk avang leh lawm lutuk avangin ka ṭap ngei ang ka ring.

Âw engati nge, engati nge ka thih hlen mai loh? Ka pa chu taksa peng kim lova nun tir ka duh reng reng lo, engtikah mah ka duh ngai lo vang, mahse a taksa peng ringin ka dam chu a ni si.

Kei an fanu ve mai hi chu an tan harsatna leh buaina thlentu mai ka lo ni e, engkimah keimah hian buaina ka siam a ni. Ka nuapan lai aṭang tawh duat leh hmangaih takin min enkawl a, u Mawia phei chuan min thik nasa hle ṭhin nghe nghe.

A bikin ka pa chuan min duat zual a, ka nu'n min duat ve lo ka tihna erawh a ni lo. Keimah avangin u Mawia chu a titau a, a nuar a, kei chu min thik nasa ṭhin. Ka ngaihtuah let hian ka u in min lo thik ṭhin kha awm ka ti hliah hliah, duat rawn kha ka ni miau a!

Min duat em em e ti lo chuan ka luhluin ka khirh em em thung a, College pawh kal lovin ka kawng zawh duhna lamah ka kal lui tlat a, a tawpah chuan nu leh pate thuawih loh man bawk ka hmu leh a, mahse inchhirin awmzia a nei tawh lo.

Khawtlangah keimah avangin dem an hlawh a, nu leh pa ṭha tawk lo leh fate pawh enkawl thiam lo angin miin an sawi sep sep a, an tan chuan a va rilru nat thlak dawn tak em. Amaherawhchu kei chuan ka dem lo, ka nu leh pate chu engtin mah ka sawisel ngam lo, ka chhuangin ka zah em em zawk.

Keimah avanga an tawrhna zawng zawng chu ka fate hmel an hmuh rualin a bo vek emaw tih theih khawpin an hlim a, an hmela hlimna lang chuan kei ngei pawh min tihlim.

Chutah keimah bawk chuan buaina ka siam leh a, ka fate pa chu tu nge a nih ka sawi duh leh ta tlat lo. Ni e, duh lo eng ang mah ila ka nunah leh ka fate nunah hian Rintea chu a bet tlat a ni.

A hunlai kha chuan zan khat pawh amah theihnghilha mut ka nei ngai lo, a chhan chu amah chhun em emtu ka fate hmel ka hmuh ziah vang a ni.

Kum 8 hnuah kan intawng leh a, mahse kan intawn dan erawh duhthusam loh tak a ni thung. Amah chu ka hmangaih leh theih pawh ka ring tawh lo, duh pawh ka duh tawh lo, mahse kan taksa a insik kha chuan nasa takin ka danglam a ni.

Ka taksa a danglam avangin ka duh leh tihna a ni lo va, ka hmangaih leh tihna pawh a ni chuang lo. Ka thinlung hi chu ka fate leh ka chhungte tan chauh ka hawng tawh, mi dang tumah an rawn luh leh theih ka ring tawh lo.

Ṭawng ri thum dam dap chu ka hre leh a, ka ngaihtuah chiang chuan ka pa aw niin ka hre ta hauh lo. Uluk takin ka beng chu ka chhi a, a rawn ṭawng leh chiah chuan tu nge min be mektu chu a nih ka hre nghal.

Ka taksa chu a hma ang lo takin ka tiche thei tawh a, ka kut ka tih chet rualin ka bul lawka awm mipa chuan ngaihtuah hmel fê hian min lo be nghal mawlh mawlh.

Maimitchhing reng chungin ka mittui chu ka bekah a rawn luang chhuak a, eng vanga a bula rilru no thar em em chu nge ka nih ka inhre tawh bik lo.

Dim leh dam zet hian ka mittui chu a kut hrawl leh lum nuam em em chuan a rawn tawk a, muangchangin ka mit chu ka meng a, hre lo tura ka duh berin ka taksa dinhmun a hriat tâk avang chuan ka lung a chhia a ni.

Min ngaihtuah lo se ka duh, min ngaihtuah miah lo se ka duh ngawih ngawih, a chhan chu min ngaihtuah reng a nih chuan rei lovah ka rilru a nem thuai dawnin ka hria, chu chu ka duh lo a ni.

"Tho suh, thawh tum suh, tunah chuan i taksa hian awm hahdam a mamawh ang" thawh kan ka tum rualin aw dam zet hian a rawn ti a, ka darah chuan min chelh ran bawk.

"I lo harh ta chu ka va lawm em Puii, Doctor ka va ko nghal ang e" ka sir lam aṭang ka pa chuan a rawn ti a, room aṭang chuan a chhuak zui nghal.

Thil pakhat hriatthiam loh ka nei ta, engati nge ka pa khan kawr pangai mai mai a hak? Ka hnaih taka awm min en rengtu Rintea chu ka melh chho ral a, a inthuam dan chuan min tiharh kawk theiin ka hria.

"Eng vangin nge kha kawr kha i hak? Engati nge ka inthuam ang hian i inthuam ve ringawt?" ka aw chu a chhuak cheng cheng a, pangai taka ka ṭawng chhuah theih ka ring kha a ni a, mahse a lo ni teuh lo mai.

"Kha lam kha chu nakinah ka hrilh dawn che a nia, i lakah hian ka lungngawi lo hle a ni Nunpui. Engati nge i taksa dinhmun leh i harsatna tawh mek hi min hrilh loh?" a zawhna chu chhan enah pawh ka en lo.

"Min chhang teh Nunpui, kan fate avang tal pawh hian i dinhmun hre turin dikna ka nei ve lo em ni? Thi ta la engtin nge awm se min tih? Hlauthawng leh thlabar hian min siam ṭhin suh, ka ngaina miah lo" a hlauhthawn chhan chu ka hre hauh lo, eng vangin nge a lo hlauhthawn ve ringawt reng reng!?

"Tu nge kal min pe?" a thusawi lai ngai pawimawh lo lui zet hian ka ti sep a, ani chuan ka kut chu la kangin a hmui lum ther ther chuan a fawp vang vang a, kal min petu chu amah a ni ang tih ka hlau ru tak zet.

"Keima'n" ka hlauhthawn ang chiahin a kal min pek thu chu a rawn sawi a, ring ru deuh tho mah ila a kâ ngei aṭanga min pek thu han hriat zet zawng a va lungchhiat thlak em.

Ka lung a chhe lo thei lo, khawvela ka mi huat ber leh ka fate pa ni bawk kal chu kei hian ka ring a, tlawm ka intih lutuk avangin ka lung a chhia a ni.

Ka kut chu a vawnna aṭang zawimuangin ka pawt thla zal zal a, ani chuan ka chet dan chu a lo en reng thung. Rilru nat hmel zeta min en te chuan ka rilru a na zual, rilru na pawh nise a nat chhan ka hre hauh lo.

"Engati nge nang ber kherin min pek? Ka duh lo asin, nang hnaih che hi ka duh leh tawh lo, engati nge i kal hi min pek kher?" tiin ka mit chu ka chhing vang vang a, ka mittui te chu chawl lovin an lo luang chhuak nghal zung zung.

"Chhan a awm alawm Nunpui, chhan ṭha tak a awm. Tun aṭang chuan kei leh nang hian kan fate vang pawh ni lovin inzawmna kan nei tawh, kan inzawmna hi a hma ang mai maia pawh chah theih a ni tawh lo leh nghal" a thusawi te chuan ka lung a tichhe zual, mahse ṭah reng ringawt chu ka tum tawh lo.

"Thi daih ila i hlim zawk lo em ni? Engati nge ka nunna chhan zawnga i chet kher? I tan engmah ka ni tawh lo tih chu kei leh nang hian kan hre chiang viau a ni lo'm ni?" ṭawng chu ṭawng reng mah ila ka mit erawh ka la meng thei lo, a hmel hmuh ka duh rih lo a ni.

"Thihna chungchang sawi chhen lo teh Nunpui, ka fate nu i ni a, i dam ṭhat veleh ka nupui i ni bawk ang. A chhan chu ka tan hian i pawimawh tawh lutuk, ka nupui i nih theih na'n chuan eng pawh ka ti ang" a rawn ti nghet charh charh a, ka pa leh Doctor lo lut thawm chuan min ngawih tir ta kar.

"I lo harh ta maw? Ka beisei aiin i lo harh hma phian a, Kidney Transplant hi chu kar 3 aṭanga kar 6 vel inkarah an rawn harh tlangpui a, nang pawh kar 4 naah i rawn harh a, a lawmawm khawp mai" Doctor chuan a rawn ti siam siam a, chutiang em ema rei ka mut chu ka lo inring miah lo.

Doctor chuan min check leh zung zung a, Rintea pawh fimkhur turin a hrilh mawlh mawlh bawk. Doctor-i'n a check lai chuan ka sira khumah a mu phei a, dam lo kawr ha chunga a awm ve ringawt te chu mak ka la ti lo thei lo. Engtin nge ka dam lo tih a hriat tih rin ngaihna reng ka hre lo, Delhi-ah kan zin tih pawh pakhat mah a hre si lo.

"Amah sawn ka phal lo chung a kal a pe lui tlat che a, a ngaihtuah tak zet che a ni Puii. I thih kha a hlau em em a, engtin nge kan awmna hi a rawn hriat theih ka hre lo, mahse i nute'n engkim an lo hrilh a ni awm a, chu pawh a zawh ngun lutuk avangin a ni awm e" ka rilru hrethiam zet hian ka pa chuan a rawn ti a, kei chuan kan sira mi chu ka la en reng thung.

Ka pa chuan ka nu leh ka fate pawh Delhi-a an awm mek thu a sawi mial mial a, an Hotel thlenna hmuna kan awm ve nghal tur thu te chu a sawi a, mahse kei chuan Rintea bak ka ngaihtuah thei rih lo.

A kâ ngei aṭang a tana ka pawimawh thu a sawi a, a sawi lai kha chuan ka lo ring em em nghal ringawt a, tunah erawh a thusawi chuan ka rilru a tibuai hle tawh zawk.

A taksaa inṭhuina tih hriat tak Doctor-i'n a endik lai vel chu ka lo en reng a, keimah avanga hliam ser leh taksa peng kim lova a awm chu nuam ka ti thei lo, ka inthiam loh rualin min thunun na'n hman a tum ang tih chu ka hlau a ni.

Chutia ngunthluk fêa a taksa leh a hmel ka en tawn reng lai chuan ka lam a lo hawi thut a, kan mit chu a intawng ta chat mai. Hawi sawn pawh ka tum hran lo, chutiang bawkin ani pawh chuan min lo en ve reng a, min nuih suk pawh chuan ka lo nuih let ve lo hrim hrim.

Keimah leh keimah chu ka inkhawngaih a ni mah zawk, Rintea puihna dawn ngai khawpa ka hrisel lo leh puih ngaia ka awm chu ka inkhawngaih a ni.

Ka pa sawi ang ngeiin ka fate pahnih chu Delhi-ah an rawn chhuk ve a, an vawi khat kalna a nih vang pawh a ni ang nuam an ti dun hle.

Inzai ka tawh zawh khan Pathian hnena lawmthu sawi nachang pawh ka lo hre lo va, tunah erawh thi hlen lova ka awm thei ringawt pawh chu ka lawm tawh a ni.

Hospital-a kar 1 vel ka awm leh hnu chuan kan chhuak a, mahse ka taksa chu ka la dim hle. Ka fate pawh duh ang takin ka chhaih bawrh bawrh ngam lo va, chutiang bawkin Rintea pawh chu a indim hle chuan ka hria.

Ka fate chuan kan taksa dinhmun leh inzai zo hlim kan ni tih engmah an hre lo va, keima'n hrilh ka duh loh vang bawk a ni.

Bawihpuia pawh accident a tawh aṭang kum 1 dawn a ni tawh avangin tiang hmang lovin a kal thei ve sawih sawih tawh a, mahse a ke chhunga thir an phum erawh lak chhuah ngei a la ngai dawn a ni.

Hospital-a kan awm man leh Hotel kan luah man zawng zawng chu Rintea chuan a pe vek a, ka pa'n tlem tal pek ve a tum pawhin a phal ṭhak lo.

Mizorama kan let leh hnu chuan a rawn leng zing zual a, chhun lamah pawh a rawn kal awl tawh lo. A hna lama kal turin vawi tam ka hrilh a, mahse ka thusawi chu vut laka vawih ang mai a ni.

Keimahah chuan danglam a awm chiang alawm, min ngaihtuah taka a awm avang chuan zawi zawiin ka ngaina tih ka inhria, mahse chu chu ka thil duh loh zinga pakhat a ni.

Rintea chu ngainat leh ka duh tawh lo, hnaih leh pawh ka duh tawh lo, a nupui nih ngat phei chu ka duh lo leh zual.

Ka taksa a la dam chian loh avangin Restaurant-ah pawh chuan ka thawh chhunzawm ta lo va, ka pa phei chuan a phal tawh lo bur.

"I lo inngaihtuah ta em?" Rintea chuan a rawn ti sup a, kan awmna hmun chu a fal raih raih khawp mai. Inbiak a duh avanga zui ve mai ka ni a, eng pawh sawi se ka tan chuan thil pawimawh tak a nih ka ring tawh lo.

"Ngaihtuah e, chuan kan pahniha kan inneih kher hi a ṭulin ka hre tawh lo bawk" pangai tak chuan ka ti a, ka rilru dik tak a ni. Innei kher lo pawhin kan fate kan awmpui thei alawm, ani nena inhnim hnaih zawnga awm chu ka duh tawh lo bur.

"A ṭul, a ṭul lutuk Nunpui. Kan fate tan mai a ni lo, keini pahnih hi kan inmamawhtawn a ni. Hun kal tawha kan awm dun dan leh kan inkar chu sawi leh chi pawh a ni lo, kei chuan intihbuai tir ka tum lo bawk" zamna nei miah lova a a ṭawng ziah chu ngaiah ka nei tawh, a zia kha a ni ve miau a!

"Bawihpuia leh Bawihtei te thusawi pawh i hriat vek khâ, kan fate hian nu leh pa awp behna hnuai awm an châk asin" amah bawk chuan a rawn ti leh a, ka fate thusawi chu ka hre lo bik pawh a ni lo, ka tan chuan thil a harsa vek tawh a ni.

"Dik tak chuan maw mipa rin leh hi ka harsat tawh em a ni. Kan innei a nih chuan ka pasal i ni ang a, pasal i nih angin engtik niah emaw chuan ka ring leh che ang a, mahse a tawpa ka chan tur chu ka hre chiang viau lawi si"

"Enge a tawpah chuan chang tura i lo inbeisei?" kan pahnih chuan hma lam kan en ran a, a aw chu a chhuak pangai viau.

Chutiang bawkin kei pawh ka ṭah a chhuak eih lo va, ka rilru chhungril erawh a tawt ru khawp.

"A ngai bawk maw le, beidawnna bak ka tawng leh chuang lo vang. I kal min pek avangin i lakah ba nei tlat angin ka inhria a, nang ngei paw'n min thununna hmanrua atana i la hman thuai ka ring" ka tih chuan a ngawi kar a, sawi tur a hre ve lo pawh a ni mahna.

"Ka fate'n kan palia awmho an châk thu min hrilh zan aṭang tun thleng hian ka rilru a la buai, rin chea rawn hnaih che pawh ka tum thar leh a, mahse ka laka i awm dan hian a zir thlawt lo" ka tih chuan ka lam a rawn hawi a, min en reng chung chuan

"Engtin nge ka awm? I duh loh zawnga ka awm awm ka hre miah lo, chuan ka kal ka pek avang che khan thunun ka tum che ring hauh suh" a rawn ti a, a tir lam ngaihthlak nuam viau mahse a tawp lam erawh a ram hmak thung.

"I ngaihtuah ve em? Kum kha leh chen kha i thil hriat sual avangin ka fate ka lo enkawl a, mahse tun thleng hian i ka aṭang ngaihdam dilna pawh ka la dawng lo. A awm lo ka ti hran lo, ṭawng tam lo leh rinawm hmel deuh mahse chapo ru tak leh mi dangte rilru dawn miah lo mihring kha i ni tlat alawm"

"Ka tihpalh ka tih vek tawh khâ, kha kha ka ngaihdam dilna che a ni lo em ni? Ka inchhir ve tho asin, i chunga ka lo chet dan avang khan pawi pawh ka ti, nang chauh ni lo kan fate leh zelin an lo tuar hi pawi ka ti lutuk"

"Ka tan chuan i hnena lo let ngamna chi zia zâng a ni ta lo, i lo chapo em mai Rinte, hetiang em em hian ngaihdam dil i hreh ang tih hria ila chuan ka phut rilru miah lo vang che. Inneihna chu awm suh se aw, kan fate avanga hlim luih kha ka tlin lo zawk ang"

"Ni lo, ka hnenah hian i lo let leh ngei tur a ni. I lo let leh theih na'n chuan eng pawh ka ti ang, eng pawh, i sawi apiang chu ka ti vek ang. Ka rilru a chapo tih chu ka pha lo, mahse i hnenah hian ngaihdam dil ka hreh hauh lo tih hre rawh"

"Mawl hi ka inti ngawih ngawih, nang ang mipa hi pasal atan hial ka lo duh ve ṭhin che a, mahse kan inṭhen ta kha Pathian remruatna zawk pawh a ni ang. Langsar taka sual ni si lo hian i zia hi a dik lo, i rilru puthmang hi a dik lo a ni"

"Engtin chiah nge awm tura min duh a? Ka zia ni ngai lo pui puia i bula awm ka ching zawk asin, engtiang chiaha insiam ṭha turin nge min duh? Han sawi teh le Nunpui, kei chuan ka ngainain ka duh leh tawh tak zet che a ni"

"Khawngaih takin dawt sawi tawh lo zawk teh, kei ang bawkin min duhna pakhat mah i nei tawh lo. Chuvang chuan keini pahnih inkar hi chu a siam ṭhat theih tawh lo vang, kan fate vang pawh ni se tum buai tawh lo law law zawk teh ang"

"Ka laka rinna i nghah leh theih na'n hian enge ka tih ang? Eng pawh sawi rawh, chu chu inneih aia ka thil tih hmasak ber tur niin ka hria. Eng thil chiah nge ka tih ang ka hrethiam lo, mahse nang chuan ka hnen aṭanga i mamawh i hria, min hrilh ngei la ka duh"

"Chutiang i tih a ngai lo, ka thinlung hneha ka rin leh theihna tur chea thil tih tum pawh a ngai lo. Kei aiin ka fate hi ngaihtuah zawk rawh, an ngai che tih hriain lo leng ṭhin la, keimahah erawh beiseina rawn nei buai tawh lo vang che"

"I laka beiseina neih loh chu ka tan chuan thil harsa tak a ni ang, a chhan chu ka bula cheng turin ka duh em em tawh si che a, hlim taka kan awm dun leh theih na'n zanin aṭang chuan theih tawp ka chhuah tawh ang. Haw phawt ang aw, i chhungte paw'n an lo ngaihtuah tawh ang che" dam zeta a rawn tih avang chuan amah a ang lo tak zet.

Kan in pana kan tlan lai chuan kan ṭawng lo ve ve a, ṭawng chu ka tum leh thut ṭhin, mahse ka ṭawng lo leh nge nge zel. Ka hre lo, a awm dan chuan ka ngaihtuahna a tithui.

Ka tan tiin a kal min pe a, a tana ka pawimawh thu min hrilh bawk a, ka fate pa a ni bawk a, chung avang tal te chuan kei pawh ka insiam ṭhat ve a ngai tain ka hria.

Amah hmangaih leha duh leh ka tum lam a ni lo, pangai taka nun hman chu ka tum a ni mah zawk. Amah nen inngeih taka kan awm theih chuan kan fate tan pawh a ṭha ang a, hlimna kan siam a ni mai.

Ni e, ngaihzawng hlui emaw hmangaih hlui emaw angin Rintea hi en loh law law a fuh zawk, tunah chuan ṭhian angin hlirin ka en tawh ang.

A laka ka rilru puthmang hi zep rual lovin a danglam nasa tawh si a, amah paw'n a rei hunah a hrethiam ve mai ang.

Chumi avanga beidawng taka siam ve kher ka tum lo, engtik ni ah emaw ni chuan a laka ka rilru puthmang dik tak chu ka la hrilh ang.

"La chhuk lo teh" kan inkawt kan thlen ruala chhuk ka tum lai chuan a rawn ti a, sawi duh a nei nia ka hriat avangin kei pawh ka ṭhut ṭha ve leh mai bawk.

"Naktuk aṭang chuan ka nun dan ka thlak tawh ang, i lakah hian ṭhat theih tawpin ka ṭha ang a, chutiang bawkin ka fate lakah pawh. Kar tawpah kan leng ho ziah ang a, chu chuan keini pahnih inkarah pawh inngainat tawnna a siam thuai ka beisei" a ṭawng lai chuan ka lo ngawi reng a, sawi tur ka hre lo miau alawm.

"Keini pahnih hi a hma ang khan awm leh ang Nunpui, i thinlung nasa takin ka tihliam tawh tih ka hria, ka inthiam lo hle bawk. Kei hi chuan ka tum dawn a, ka nupui i niha ka bula i lo let leh theih na'n theih tawp ka chhuah dawn. Lo tum ve rawh aw Nunpui, kan fate avang tal pawhin min ngainat leh i tum hram hram dawn nia"

"Kei chuan ṭhian ang bakin ka en theih che ka ring tawh lo Rinte, chu chu ka thil tum ber a ni bawk. Nang pawh hian tum lo law law mai rawh, i tan leh ka tan pawh a ṭha zawk. I kal min pe ringawt te hi ka ngaihtuah let hian i lakah ka inthlahrun phah, thil tum i nei rana hriatna ka nei bawk"

"Ka kal ka pek chhan che chu chhan dang a awm ka tih tawh khâ, nangmah thununna tur emaw i rilru tih natna tur lam a ni lo. Ka fate nu i ni a, ka ngaihzawng hlui i ni a, ka tan chuan hmeichhe satliah i ni lo. Lut tawh rawh le, Bawihpuia leh Bawihtei chu ka lo hmu tawh lo mai ang"

"I tan chuan eng chiah nge ka nih?" tiin ka rilrua rawn lang hmasa ber chu ka zawt tawl a, lut turin min ti mahse motor chhungah chuan ka la ṭhu lui tlat a, a hnenah kir tawh dawn lo mah ila a tana hmeichhe satliah ka nih lohzia chu sawi fiah ve reng reng se ka ti a ni.

"Ka tan chuan hmâna ka ngainat leh duh em em ṭhin hmeichhia Nunpuii chiah chiah kha i ni leh tawh" a rawn ti sup a, nuih zat vang pawh ni miah lo hian ka lo nui chhuak hak.

Mawl ka inti hnuhnawh lutuk, eng vangin zawhna kha ka lo zawh kher kher le. Min hmangaih thu a sawi te ka lo ring ru ve tawh a, ka beiseina chu a hma ang bawkin a lo thlawn mai a ni leh ta. Ni e, ani hi chuan eng tikah mah min hmangaih ngai lo vang, hmangaihna nei lo mihring alawm a nih!

Dik tak chuan a kal min pek chhan kha min hmangaihna vang a nih ka lo ring a, min hmangaih thu sawi se chuan engkim a danglam theih ka ring, kei ngei paw'n amah hmangaih leh ka châk ka ring, mahse tunah chuan min hmangaih ngai dawn lo tih ka hre tawh.

"Muttui le" ti hmakin motor kawngka chu ka hawng a, ka che vel reng reng chu min lo en kar tih ka hria, mahse a lam chu hawi khat pawhin ka hawi duh lo.

Kan in kawngka zawn ka thlen thlengin motor tlan chhuak thawm ka la hre lo va, kawngka hawng paha a lam ka hawi chuan motor bula ding hian min lo en reng.

A kut ding lam chu a hmai zawn velah a phar zeuh a, min mangṭhana tih hre tho mah ila chhang let lovin ka luh san ta daih.

A tuka tukṭhuan kan ei laiin ka pa chuan thil eng eng emaw min sawipui a, ka nu pawh a bang bik chuang lo. Rintea nena kan induhtawnna lam ngaihtuah hmasa lova kan fate ngaihtuah hmasa turin min ti leh ta zawk a, kan fate avanga nupa han ni ringawt zawng a dikin ka hre lo a ni.

Chapter 14

A sawi lawk ang ngeiin Rintea chu a awm a, ka fate pawh an in lama hruai phei chang a ngah ta khawp. Hruai phei a tum em em pawh a ni lo, Bawihpuia leh Bawihtei zawkin phei an duh tlat ṭhin a ni.

A tirah kha chuan ka rilru a kal sual laklawh bawk nen ka mangang hman thei khawp a, kei aiin ka fate chuan an ngaina zawk mai ang tih ka hlau ṭhin, mahse tunah chuan chutianga hlauh em emna pawh ka nei tawh lo.

Ka fate rilru tur chu ka hriatthiam pui, an pa dik tak chu an ngaiin an thlahlel hle tih ka hria a ni. Rintea lah an ngainat tur tak hian a awm thiam em em a, naupang ngaina mi a nih ka rin loh tehreng nen a fate bulah chuan nuam ti ve thei tak a ni.

Kan ina a lo len chang te chuan infiamna chi hrang hrang a tihpui ṭhin a, ka nu leh pa paw'n Rintea chu an ngaina tawh khawp mai. Ani leh keima inkar erawh a la ngai reng a, ngai reng se ka duh bawk.

A ṭul tawp khawk lovah chuan min be tawh ngai lo va, phone kaltlang tak ngial pawhin min be tawh ngai lo. A zia erawh a thlak nasa hle thung a, ka bulah phei chuan ṭhat tâwp hian a ṭha a ni tawp.

Min be vak hran lo, mahse ka awm dan leh thil tih zawng zawng chu a chik em em vek a, amah avangin Restaurant-ah pawh ka thawh zawm ta lo. Ka thawk leh ang tih ka hlau hnuhnawh zawk, ka taksa chu hahdam taka siam phawt ka duh rih a ni.

Chhun lamah rawn leng ziah mahse zan lamah erawh a rawn lang khat deuh a, chumi avang chuan a fate lung pawh awi loh chang a tam ta fô.

Kei paw'n ka fate pahnih chu ka theih ang tawkin ka hrilh fiah ve nasa ṭhin, mahse a sawt lo thei hle thung. A tirah an nuar a, a tawpah an ṭap leh tawp zel.

Engtin em em nge Rintea chuan a tih bik ka hre lo, chutiang taka a fate'n an ngaih chhan chu ka hre lo hle bawk. Loh theih lohna avangin han call hmasak te chu ka nei ve ta zeuh zeuh a, chu erawh ka fate vang bak a ni lo.

Zana a rawn len loh avanga a fate awm dan ka sawi chuan a buai lai pawh ni se a rawn kal vang vang zel, mahse a hna tibuai pha chuang lovin a fate chu a Studio-ah a hruai hmak ṭhin thung.

Ka kuta rawn vawn leh thut te hi a ching a, biak erawh min be ngai lo thung. A awm dan chuan kan inngaihzawn lai vel min hriat chhuah tir ta fo bawk a, kan inngaihzawn ve laia a nungchang ang chiah chiah min hmuh reng chu ka hrethiam lo, ka laka a awm dan chu ka lo thlir tawp a ni ber.

A chhungte nena rawn len an nei deuh thut zel bawk a, kei leh Rintea tih loh chu inpawh tawh tak an ni. Rintea nau Amuana pawh ka fate'n an ngaina ve em em a, an putea reng mai.

Ka nu leh pa chuan a mawiah tal tiin Rintea te ina leng phei ve tur te paw'n min ti ṭhin, mahse keimah tak hian ka peih lo a ni.

A chhungte sual ka tih vang lam pawh a ni lo, a chhungte chu ka lakah an ṭha lutuk zawk. Amah Rintea ka hmuh peih loh vang leh ka biak peih loh vang pawh a ni chuang lo, keimah chuan nuam ka ti dawn lo hrim hrim zawkin ka hria.

Va leng ve ta ila a nu leh pate nen titi a ngai ngei ang a, inpawhna tak tak awm lova han inpawh der vel chu ka peih lo a ni. Nakinah len te chu ka la leng ve mahna, mahse tun thawt thawtah chuan len ka la duh rih lo.

Kei ang lo takin ka fate chu an leng phei ngun hle a, ka tel lova riah pawh an nei tam tawh khawp mai.

Thawhlehni a ni a, Bawhpuia ke chhunga thir inphum Doctor te'n an lak chhuah ni tur a ni bawk. Ka bulah Bawihtei a ṭhu a, a hmaah Bawihpuia leh Rintea an ṭhu a, Rintea chuan a fapa chu ni dang ang bawkin a be thiam leh hle.

Kan palia kal ho a tih tlat avangin ka hnial duh lo kha a ni a, a motor ni lo motor danga kan chuan pawh a phal tawh miah lo.

Khawiah pawh kal dawn ila hmun hla tham deuh a nih chuan amah hlirin min hruai a, ka rilru hneh a tum dan chu a mak ka ti letling a ni.

Ṭawngkama min tlawna min biak vel kha ka ring a, mahse ani chuan a chetziaa min hneh a tum ni berin ka hre ta.

Hospital kan thlen chuan Bawihtei ka kai a, ani'n Bawihpuia a pawm a, kal thei deuh tawh mahse a pa pawm chu a ngen tlat vel a nih chu!

Doctor chuan keiniho min hmuh rualin room hranah min kalpui a, damdawi thil a khawih neuh neuh laiin Rintea chu Bawihpuia lo be turin a ti a, Rintea pawh chuan a sawi ang chuan a ti ve nghal mai bawk.

A fapa hnenah chuan a ke chhung aṭanga thir an phawi chhuah tawh dawn thu a sawi melh melh a, Bawihpuia chuan hlauhna pakhat mah a lo nei lo. Kal theih chu a châk ber tawh thu a rawn sawi daih a, ka fapa chu ka lo khawngaih reuh khawp mai.

Doctor chuan kah mutna hmangin Bawihpuia chu a chiu a, keini chu room pawna awm rih turin min ti a, hun rei tak hman a rin loh thu min hrilh bawk.

Pawna kan ṭhut hnu rei lotêh Bawihtei chuan a pa pawm a ngen ve thung a, Rintea pawh chuan duat leh hmangaih hmel em em hian a lo pawm ve thuai.

"Ka lo tiam tawh angin zanin chu Bawihpuia leh Bawihtei hi ka bulah lo riak phei mai rawh se aw, anmahni pahnih pawh hian lo riah phei chu an châk khawp mai" kan ngawih vang vang hnu chuan a rawn ti a, Bawihtei chu a pa âwm nghengin a lo muhil fel der tawh bawk.

"Min dil kher a ngai hleinem, i fate alawm an nih. Anmahni'n an duh phawt chuan ka phal vek, mahse buaina a awm ang tih ka hlauh pui thung che. Bawihpuia ke hi a la na dawn tih hria la, zanah te khan a tlun ang tih ka hlau"

"Tlun em lo vang, keima'n ka buaipui dawn alawm, ka duh dan tak chuan nang pawh kan bulah lo riak ve la ka ti hle a ni" a rawn tih chuan ka melh zeuh a, min lo en chiang khawp. Ka hawi sawn thuai a, a zawhna chu chhang lovin ka ngawi ta reng.

"I lungawi tiawi lo zawnga chet ka nei a nih chuan sawi hreh lo la, i sawi loh chuan insiam ṭhat dan tur ka hre lo a nia. Kan ina i lo kal duh loh tlat chhan pawh hi keimah vang a nih ka ring, chuvang chuan tlang takin min hrilh mai rawh Nunpuii"

"Nangmah lam a ni lo, chuan i chhungte vang lam pawh a ni chuang lo. Kemah zawk hi alawm, lo len phei kha ṭulin ka la hre lo tlat a ni. Chu bakah inpawh tak anga inbiak vel kha ka peih rih lo, kan la inpawh tak tak bawk si lo"

"I tum loh chuan i thei nâng, i rawn leng ang a, ka chhungte pawh i be ve ang a, kei ngei pawh, rei lovah inpawhna tak tak a lo awm mai dawn alawm" dam zet hian a rawn ti a, a thusawi chuan dikna lai chen a nei tho.

"Nang paw'n min be ngai hleinem, i ngawi reng a, i awm âwmin i awm tawp a, ka tan chuan biak che hi thil harsa tak a la ni rih, i chhungte erawh ka be hreh em em pawh a ni lo" ka ṭawng chhuak chu a vui awkâ lek lek a, ka tum pawh a ni em em bik lo.

"Ka biak i duh loh ka lo ring viau zawk asin, khang thla hnih thum liam ta chhung khan biak châk loh hmel zetin min en ṭhin a nih khâ, a pawi lo e. Eng pawh ni se ka biak i phut phawt chuan ka be tawh dawn che a nia, mahse min biak let ve chu ka phut thung aw" kiai suk hian a rawn ti a, chutah kei chuan rang zet hian

"I biak ka phut ka tih miah loh khâ, min be ngai bik lo ka ti mai alawm, i ngaihdan kha kalpui ringawt tum suh" ka lo ti thuai a, ani erawh a rawn nui ri hak. A nuih chhan ber pawh chu ka hre lo, nuihzat tur awm ang ka hre lo hrim hrim bawk.

"I awki, i hmel leh i awm dan aṭang kha chuan phut i ang em alawm, ka hre sual ve thei tho bawk. Zanin chu lo riak ve la, mahse lo riak ve ngei ngei turin ka sawm che pawh a ni lo, i duh phawt chuan i lo riak ve thei ang" a ṭawng tir lamah nui deuh suk mahse a tawp lamah erawh nui hmel pakhat mah a lang leh tawh lo.

"Zan lamah hna i thawk ṭhin a ni lo'm ni? Nge Bawihpuia leh Bawihtei hi Studio-ah hruai leh i tum zawk? Bawihpuia ke hi a la na dawn a nia, Studio-a hruai kha a chi miah lo vang" ka lo ti daih a, an bula riah leh riah lovah chuan ngaihdan ka la siam thiam lo.

"Ka hria alawm, zanin chu keimah bik ka chawl dawn a, Bawihpuia chu Studio-a hruai ka tum teuh lo mai. Chuan ka sawmna che kha min la chhang miah lo a nia, i rilru dik tak kha sawi tawp mai rawh, min vengthawng suh" tiin a ngaite bawkin riah leh riah loh chu a rawn sawi chhunzawm leh nghal.

"Ka rawn riak ve rih lo mai ang, ni dangah ni rawh se. Buaina a awm a nih chuan min lo phone thuai dawn nia, mahse buaina a awm em em ka ring hran lo, zan dangah pawh i bulah an mu ziah tho a" ka lo ti ṭha ve mai a, a tua mah kan ṭawng zawm leh ta lo.

An zai zawh aṭanga darkar 5 hnuah Bawihpuia chu a rawn harh a, a ke a nat thu pakhat mah a rawn sawi lo. Tu dang lam hmasa lovin Bawihpuia chuan a pa a ko hmasa ber a, a ke nat miah loh thu leh Iron a nih tawh thute chu a sawi melh melh reuh a, mahse a ke chu a la hmang ṭha lutuk thei rih dawn lo tih a pa chuan a hrilh nghal zung zung bawk.

Zan a lo ni a, sawi lawk ang ngeiin Bawihpuia leh Bawihtei te chu chaw ei kham aṭang Rintea te in lamah an phei nghal a, kan inah chuan kei leh ka nu leh pa chauh kan awm ta.

Zan a rei tulh tulh a, ka fate ka ngaihtuahna a zual tulh tulh. A ke na avanga a tluna a dam loh vak chu ka hlau a, mahse phone call pawhin buaina an neih thu an la rawn sawi hauh si lo, ka awm dan chu ka hrethiam lo.

Ka rilru a buai ruk em avang chuan ka phone chu la kangin Rintea ka call ta tawp a, a la pick thei lo zui. Kan khumah chuan ngawi rengin ka ṭhu a, Rintea hnen aṭang phone call ka dawng ve nghal zat.

"Buaina a awm em? Bawihpuia kha a dam lo em? A dam lo dawn tlata hriatna ka nei, ka rilru hi ka hrethiam tawh bik lo, zan dangah hetiang hian ka awm ngai miah lo asin" phone call ka pick up rualin ka ti nghal mawlh mawlh a, chutah leh lama mi chuan

"Engmah chutiang a awm lo, hei tunah chuan an muttui dun tawh khawp mai. I ngaihtuah lutukna lamah nangmah i buai vek zawk a ni kha, he lam chu engkim a ṭha, hahdam deuh khan awm rawh" a rawn ti dam dap a, thawk la hawkin phone chu ka off hmak.

Bathroom-ah kalin hmai ka phih sawk sawk a, ka ha ka nawh lai thlengin ka rilru chu a la pangai thei lo. Khuma ka mut hnu chuan ka muhil nghal thei mai dawn emaw ka ti a, ka muhil thei teuh lo.

Ka phone hmet engin thil chi hrang hrang ka en kual a, ka mut tihchhuah chu ka tum nasa hle. Dar zat chu ka en sek a, a tlai tulh tulh mai bawk si. An muhil tawh tih hriat takin ka nu leh pate room chu a reh diak a, ka tihtur hre lo leh ka muhil thei bawk si lo chu ka tho chhuak ringawt.

Khum bang nghengin ka ṭhu awn duai a, dar zat ka en chuan dar 12 a lo ri vel chiah. Ka phone chu ka hum ngawt ngawt a, ka thil tih tum avang chuan ka rilru pawh a insual nasa hle.

A tawpah erawh ṭha bera ka rin chu ka ti tawp a, ka awm dan chu a zahpuiawm ka ti, mahse ka awm dan a ni miau bawk si.

"Hello" a rawn ti ṭial deuh ruai a, a aw aṭang chuan a muhil tawh tih ka hre mai.

Ka phone call pawh a pick up har viau a, a pick up tawh dawn lo emaw ka tih hnuah chuah a rawn pick up a nih kha!

"Eng lo, ka muhil thei lo. Ka fate kha ka ngaihtuah tak zet, buaina a awm lo tak tak ti raw? Min hrilh duh loh i neih vaih chuan nakinah a pawi zawk ang, chuvangin thu dik tak min han hrilh teh. Bawihpuia kha a tlun em? A dam lo em?"

"Ka lo hruai i duh em?" tiin ka zawhna pawh chhang lovin zawhna min rawn zawt let daih a, a zawhna tawi fel ât chuan ka awm dan zawng zawng a tidanglam vek nghal.

"Lo insiam la, ka lo hruai ang che" rawn ti leh supin phone chu a off hmak a, an bula riah chu a ṭha ber ang em ka hre lo.

Ka rilru chu a la insual nuai a, Rintea lah a rawn kal ngei ka ring tho bawk si. Zawimuangin ka ṭhutna khum aṭang chuan ka ṭhu chhuak a, ka fate bula va riah chu a ṭhat ber ka ring ta nge nge.

Thawm dim thei ang berin room aṭang chuan ka chhuak ṭhem ṭhem a, ka nu leh pa chu ka riah sawn dawn thu hrilh ka tum hran lo bawk.

Pawn ka thlen chuan rin ai a lo vawt ang reng hle a, mahse boruak chu hip a nuam khawp mai. Kan in kawt khera a rawn din ka duh loh avangin kan in piah deuh lawka thingkung bulah chuan ka lo ding a, rei lovah Rintea motor ni awm tak chu ka hmu zui nghal.

A tlan chak thawkhat a nih ka ring a rawn thleng hma em mai, phone-a kan inbiak aṭang phei chuan la rei lo tak a ni. Ka dinna bul chêtah hian motor chu a tiding a, a rawn chhuak zui nghal.

Ṭawng miah lo hian ka kut chu a rawn chelh a, motor hel zawngin min kal kualpui a, a tih ang anga awmin a chet dan vel chu ka lo en tlawk tlawk ringawt. Motor kawngka chu hawng sawk sawkin min ṭhut luh tir a, ani pawh driver seat lama pheiin a rawn ṭhu lut ve mai bawk.

Muangchangin a tlan chhuak a, kan pahnih chuan kan ngawi leh ta kar. Sawi tur a vang ve ê, kan awm dan chu a lai hi a ni tawp, nge keimah zawk chu ka dik lo ni! In pakhat lian leh mawi ang reng deuh kawtah hian kan ding a, mahse kan chhuk mai lo.

Ka lam chu a lo hawi a, ka kut a rawn chelh thut avang chuan a lam ka hawi rang hle. Lak sawn tumin ka ṭang a, a thlah duh miah lo leh nghal. Ka kut chu la kangin a fawp zeuh a, engtin emaw ni ka awm a nih chu!

A hma zawng paw'n ka kut te chu a fawp ṭhin alawm, ka engah mah a thawk ngai lo, mahse engati nge tuna taka ka danglam? Engati nge ka phut zuk kher? A mit chu a chhing vang vang a, a hmui chuan ka kut chu a la si reng bawk.

"Chhuk ila" ka tih chuan a rawn meng thuai a, ka kut pawh chu a thlah ve ta. Motor aṭang chuan a chhuk a, kei pawh ka chhuk ve nghal. A dinna bulah chuan ka ding a, an ina a lut hmasa zawk nih chu ka duh teuh lo mai.

"Kan lut dawn lo em ni?" ka ṭawng chu hria ang pawhin a awm lo, min en reng ringawt. An veng chu kan veng ai a la vawt leh ta nghal a, mahse vawt ti tak anga lan chu ka duh chuang hauh lo.

"Lut dawn e, thil dang daih ka lo ngaihtuah alawm maw le. Lo kal rawh le, lut ang aw" zângkhai fêa tiin ka kut bawk chu a rawn chelh leh chat a, ka kut leh a kut a insi ngun ta viau chu mak ka ti a ni.

In chhung kan luh chuan a lo thim deuh ṭhap tawh a, keini pahnih pawh la inkai rengin in chung lam kan pan zui nghal. Ama room ni ngei tur kawngka chu a hawng a, ka fate pahnih hmel chu ka hmu a, ka hah a dam sawng sawngin ka hria.

"Saw lamah sawn mu la, kei he lamah ka mu mai ang" tiin ka kut a vawnna chu a thlah a, a sawina lamah chuan ka phei ve nghal.

Ka kawr lum hak lai hlipin Bawihtei mutna bulah chuan ka ding a, khum chu a len ṭhat em avangin kan pali paw'n kan leng ngei ang.

Ka inrin loh lai takin Rintea chuan ka hnung lam aṭang min rawn kuah thut a, engtin nge ka bul chu a lo thlen hman zawk pawh ka hre lo. Ka nam sawn thuai a, a awm dan vel chu ka duh loh zawng tak a ni leh lawi si.

"I awm dan hi ka duh dan a ni lo tih i hriat khâ, nangmah hmu tura lo kal ka ni lo, ka fate ka ngaihtuah em avangin ka lo kal mai chauh zawk a ni" ring lutuk lo chuan ka ti thluk awn duai a, a mi tawhna avang ka awm dan chu a hriatthiam loh ngei ka beisei.

"Ka mu dawn a nia, khawngaihin ka duh loh zawngin awm miah suh aw" ti lehin ka fanu bulah chuan ka inthawlh a, ka fanu kuah pahin ka mit chu ka chhing zui nghal vang vang.

A che thawm leh khuma a lawn thawm chu ka hre ru reng a, thawm aṭang chuan kan lamah a rawn awn phei ni mai hian ka hria. Kan awmna lam chu a hniam sut sut a, chutah aw dam zet hian

"Muttui aw ka fanu" ti supin a tawlh phei riai riai a, ka la meng duh rih lo.

Hmu miah lo mah ila a awm dan tur awm ang chu ka mitthla thiam vek, duat taka a fanu a bia te chuan ka rilru a khawih hle bawk.

"Muttui aw ka fapa" a ti ri leh sup a, zep lovah chuan dam taka ka fate a biak ang chuan min be ve se ka ti, min be ve thei awm reng sia!

Ka kut chu ka hum ruh hle a, ka chet chuan ka la harh tih a hria ang tih ka hlau bawk si, ka awm dan chu hrehawn ru tak a ni.

Darkar chanve dâwnah pawh ka la muhil ve thei lo, zawimuanga ka mit ka men chuan Rintea leh Bawihpuia hmel ka hmu hmasa ber.

Rintea chuan hmangaih leh duat tih hriat zet hian Bawihpuia chu a kuah a, mahse a kuah nghet em em hran lo.

A hlata awm hlau tak a ang mah zawk, chutiang bawkin Bawihpuia pawh chuan a pa kutzungṭang chu a chelh ṭawk ṭawk a, a muttui tawh em avangin a chelh tih pawh a inhre kher lo vang.

Ka fapa leh a pa awm dan hmuh nuam zet avang chuan ka khi sak a, ka mit ka chhing zui ta vang vang.

"Nu, anu, kan bulah i lo mu ve maw!?" tih thawmah chuan ka harh riai riai a, ka nghen chhan lah chu zing dang lo takin a la lum nuam em em zui.

Ka mit ka men rualin mak tih hmel zeta min lo entu Bawihtei chu ka hmu a, ka nui lui sak bawk. Ka kawng zawna thil inkham ruah chu enge a nih ka hre lo, mahse chu chuan ka mut a ti chhuak zual tlatin ka hria.

"Muhil leh rawh Bawihte, a la hma em mai" mut chhuah lutuk avangin ka ṭawng pawh chu a chhuak cheng cheng a, ka fanu chuan a hriat fiah tak tak pawh ka ring lo.

Ka mutna a dup nuam em em a, ka thil nghen lah a lum nuam em em bawk a, ka kawnga thil inkham chu lukham ang maiin ka dul zawnah ka pawm bet a, mahse ka thil vawn mek chu ka tihchet ni miah si lo hian a rawn che ta tlat mai.

Ka dul chu a rawn hup a, ngaih ṭhat lohna em em pawh ka nei lo, ka mut chu chhuah tak têa a la chhuah vang a ni. Ka dul huptu thil chu nghet zetin ka vuan a, mahse a rawn chet leh avang chuan kut a ni tih ka hre chhuak nghal.

Ka rilruah chuan ka dula kuah mektu kut chu tu nge a nih ang tih ka ring nghal char char a, chawp leh chilhin ka mut chhuak chu a reh nghal vek thei. Kei lah chuan chu kut chu ka lo vawn hnan vel a, inher dat data ka hnunga mu ka en chuan ka va han meng phawk nasa tehreng em.

Rintea chuan a mit a lo la chhing reng a, a muthilh leh muthilh loh ka hre thei miah lo. Ka mutna leh ka thil nghen kha a dang ka ti reng a, Rintea taksa ngheng chunga ka lo mu vel awr awr chu zak lo ka inti ru hle.

Inherin ka fate lam chu ka hawi leh a, Bawihpuia chu a la muttui hmel khawp. Bawihtei pawh harh tawh mahse mu leh tura ka tih avangin a mu ṭha ve leh mai a, a hmel aṭang chuan a muhil leh der tawh tih ka hre mai.

Ni lo, ni lo, kei hian eng rilru nge ka put!? Ka va han mawl tehreng em, engtin nge a chhungte hmel ka hmuh ngam ang? Chu bakah ka nu leh pate pawh min hmuh loh chuan an rilru a buai ve khawp ang, rilru fim pawh hmang thei lo khawpa ka awm chu a mak zawk.

A muthilh ka rin avangin a kut chu dim te hian ka chawi kang riai riai a, mahse rei pawh ka chawi kan hmain a rawn che thut a, a hma aia nghet chuan ka dul chu a kuah nghal hmak. Chu veleh a harh vek tawh tih hriain a kut chu lak sawn vat vat ka tum a, a va han harsa tehreng em.

"Min thlah thuai teh, ka haw duh. I chhungte leh ka chhungte paw'n ka riak tih hi an hre miah lo a nia, in bula ka lo riak ringawt hi ka thiam loh a ni e" ti sawk sawkin a ban chu ka sik a, min la thlah duh ta chuang lo.

"Min thlah mawlh teh Rinte, ka zak a nia, i harh vek tawh tih ka hria. Chuan eng vangin nge ka bulah i rawn mut? Ka phalna tel lovin engati nge ka bulah i rawn mut? Bawihpuia sawn min hmuh chuan a chi loh viau ang, chuvangin phei vat mai teh"

"Kei ang bawkin nuam i ti tih ka hria" thum dam zet hian a rawn ti sup a, a aw aṭang chuan a mut a la chhuah hmel hle bawk.

Min kuahna aṭanga tal chhuah ka tum leh ṭhin, ani lah chuan min kuah nghet ropui bawk si.

"Zak duh suh, i hmel an hmuh chuan ka chhungte chu an lawm viau zawk ang. Chaw i ei ve nghal ang a, kan fate nen kan ina len rih i duh leh zel a nih chuan ka hna lam pawh ka chawl mai ang, i bulah leh ka fate bula hun hman hi ka châk a ni" a aw ah chuan tawrhna ri ka hre tlatin ka hria, mahse ka hre sual leh dawn tih ka chiang.

"Lo len ka duh ringawt lo, chuan chaw pawh ka ei duh lo. Tunah chuan ka haw duh, i chhungte thawh hmaa haw thuai ka duh. Ka nu leh pate paw'n mak an ti ngawt ang, kei hi ka â tak zet, lo inhruai tir lo tawp tur che hi ka ni asin" tiin a kut chu ka chawi thei ve mial a, kuah pawh min kuah run tawh lo.

"Chaw chu ei ve nghal mai rawh" a rawn ti tawi tuk a, min ngaih hmel zeta min en avangte hlei hlei chuan min ngaih ka ring lo zual, a chhan chu ani chuan min bum ṭhin miau alawm, bum ka lo nuam viau pawh a ni ang.

"Ni lo, ka ei lo zawk mai ang, ka haw duh zawk" tiin ka kawr vel chu ka tuai mam ṭha sawk sawk a, khum bulah ding tawh mah ila ani erawh a la mu reng a, mit tla lêk lo hian min en reng bawk.

"Ka lo thlah ang che, mahse ka nu emaw ka pa emaw an harh tawh maithei a nia, kei chuan i lo riah thu hi hre ve law law se pawi ka ti lo khawp mai" tih pahin a rawn tho chhuak a, ni eng a la lan loh avangin a la hma thawkhat tih ka ring thiam.

"Min thlah dawn chuan lo kal thuai teh, muangchan a chi vak tawh lo" tiin ka tur a, a che muang vel lutuk chu ka ngai thei lo. Room aṭang chuan kan chhuak a, thawm ka dim em em laiin ani erawh chuan a dim ve hauh lo.

Chapter 15

Vanneih thlak takin a chhungte hmel pakhat mah ka hmu lo va, ka hmel pawh an hmu bik lovin ka hria. Kan in kawta kan din rualin ka chhuk nghal a, Rintea pawh a haw ve leh nghal mai bawk.

Kawngka chu zan lama ka khar ang ângin a lo la inkhar a, in chhunga ka luh chuan a lo la reh ṭhuap a, ka nu leh pate chu an la mu a nih ngei ka ring. Room-ah chuan ka lut thuai a, khuma ka ṭhut thlak rualin thawk ka la hawk.

Ka mut pawh a chhuak tawh lo, ka ngaihtuahna chu a kal bing hle a ni. Ka awm dan te chu ka ngaihtuah let a, Rintea taksa nghenga mut kha nuam ka ti viau tih pawh ka hria, harh chhuak lo phei ila chuan ka mualpho viau zawk ngei ang.

Min ngaihdan tur ka ngaihtuah thleng leh a, nep min tih loh paw'n min zuam phah sawt ka ring. A pawi lo, ka nihna a ni chuang hleinem le, a zuam theih leh ngaihnep theihin ka awm tur a ni lo.

Thla 1 a ral leh meuh chuan Bawihpuia pawh a zia ve leh tawh viau a, chhun lamah hi chuan an pafa hian an inawm deuh chawt zel. Kei pawh a ṭul ṭul tiin in chhung sekrek vel ka khawih mial mial zel a, ka rilru chu a phir tlat tawh a ni.

Ngainat pawh ka duh tawh loh leh ngainat theiha ka rin tawh loh Rintea chu ka ngaina ṭan a, mi dang bulah thup eng ang mah ila keimah leh keimah chu ka inbum thei lo a ni.

Ni e, kei hian chiang takin Rintea hi ka ngaina leh ṭan tawh a ni. Awlsam taka ka rilru a hneh thei mai chu mak ka ti, kei chauh ni lovin ka fate rilru pawh a hneh awlsam em em bawk.

Tin, a zia leh ka laka a awm dan lah chu a thlak nasa em em a, ka rilru hneh tumin a bei tih chu ka hria, mahse chutiang em em chuan a danglam thei ang tih rin ngaihna ka hre lo.

August thla kan chuangkai a, Bawihpuia ke pawh a zia tawh viau mai. A pain exercise a lakpui ngun bawk a, hma chu sawn chak tak a ni.

Tlan leh chak taka kal erawh a la thei chiang chiah lo va, thla hnih thla thum hnu velah chuan a theih mai a rin thu Doctor paw'n min hrilh bawk.

Nilaini niin ni 21 pakhat a ni a, ka fate pahnih piancham a ni bawk. Ka lo tum lawk ang ngeiin Birthday Cake ka order sak a, ka fate pawh an lawm hle. Birthday lawmna hmang turin Rintea chhungte pawh kan in lamah an rawn leng phei a, kan chhungte chu an hlim tlang dar dar phian.

An inbe bawrh bawrh a, an titi bawrh bawrh a, an nui ho a, ka fate pawh an bang chuang lo. Kei erawh ka mal a, betu pawh ka nei ve lo. Ngawi rengin kan in aṭang chuan ka chhuak a, kawng reh takah chuan keimah chauhin ka kal a, ka lungngai ngawih ngawih.

Ka nun chu a hlim lo, a hlim tak tak thei lo. Ka fate an hlim phawt chuan ka hlim theih ka lo ring kha a nia, ka awm ve tih pawh hre miah lova ka fate an hlim chiah chu ka lungngai leh lawi si. Hringnun hi a lo mak ngawt mai, chhiar dan hi thiam a har a ni.

Kan duh ang ang hian thil hi kal tlung purh se ka ti ṭhin, chutiang ni se chuan kei pawh ka nun dan hrehawm ru zet chu ka tawng bik kher lo vang. Thli thaw heuh heuh chuan ka awm a tinuam sawng sawng a, ka ngaihtuahna chu a vak kual nasa hle bawk.

"I nuam lo em ni?" aw lo chhuahna lam chu ka hawi vat a, Rintea chuan min lo en ran mai.

Ka ṭhut dan siam ṭha sawk sawkin ka aw hnawk miah lo chu ka thian a, vawt tih vang ni hauh si lovin ka zam ru em em bawk.

"Nuam e, va lut leh rawh, Bawihpuia leh Bawihtei'n an lo zawng palh ang che" ka tih chuan kal sawn a tum lo tih hriat zet hian a dinna ngaiah a la ding reng a, min la chhuk melh reng bawk.

"Amuana te nen nuam an ti rih viau" ti supin ka bulah chuan a rawn ṭhu thla a, insi lovin ṭhu mah ila a mi uap chu a na kher mai, engkim chu kum 8 liam taa mi ang vek a ni.

Ka rilru thlengin a danglam chak a, a bulah chuan amah duh leh hmangaih ang maiin ka awm tlat.

"Nang erawh chuan nuam i ti hauh si lo, chutiang bawkin kei paw'n nuam ka ti bik lo" a rawn ti leh a, ka hma lam chu ka en ngar ngar.

Ka mal chunga ka kut chu a rawn hum a, ka va han ṭang ru nasa tak em.

"Nunpui, Bawihpuia leh Bawihtei birthday kan lawm zawh hnua i lehkhabu ken kha ka en ve a rem em? Room chhunga i luh pui daih tâk kha a nia ka tih, ka hmu ve thei ang em?" a rawn ti daih a, a lam chu ka hawi ta hâw.

Min lo hmu vek tihna a ni ngei ang a, mi dang kha chuan min hmuh ka ring lo.

"I hmuh duh chi a nih i ring em ni? Kum tin ka fate birthday a lo thlen hian ka ti ziah alawm, thil ka ziak tih pawh i hriat vek ka ring. Chu bakah hmu duh suh, i rilru a na mai mai ang? Ni lo, i rilru a na leh lo vang, i nat ve theih pawh ka ring lo"

"Chutiang em ema rilru sakhat chu ka ni bik hleinem, tunah lek phei chuan ka rilru hi a nem tawh viau zawk asin, min hriatthiam ve tum la. I laka ka rilru puthmang hi nasa takin a danglam tawh a, ka chet dan zawng zawng i chhui let chuan ka rilru tur awm ang pawh i hriat ngei ka ring"

"Ka laka i rilru puthmang hrethiam tur chuan min beisei lo la, ka tan chuan thil theih loh tawp a ni. I ni emaw ka tihin i lo ni lo va, chutiang khawpa hriatthiam harsa chu i ni asin" ka ti a, ka aw chhuak chu a zuai raih bawk.

"Dik tak chuan ka ngaina ṭan tawh che, i awm dan engkim hi kan inngaihzawn lai ang khan i awm a, i thil tum pawh ka hria, mahse ka rin leh theih che hi ka inring tawh lo tak tak a" ka ti leh nghal a, ka thate chu a khur ru reng bawk.

"Ka tum dawn alawm, chuti maiin ka beidawng dawn teuh lo. I rinna neih let leh hi ka thil tih hmasak ber tur a ni a, ka fate ai pawhin tunah chuan ka ngai pawimawh tawh zawk che a ni" ngaihthlak nuam zet hian a rawn ti a, ka kut chu lakangin a fawp zawm zat.

"Engati nge i kal kha min pek?" tiin kan thusawi inmil lo zet chu ka zawt a, chhan dang a awm tia min chhanna khan ka hriat châkna a tizual, keimah avanga a taksa peng kim lova a awm ringawt chu tun thleng hian ka la hrethiam thei lo a ni.

"Engati nge i kal ṭhat loh thu leh thlak a ngaih thu ka lakah i zep? Ka zawhna hi chhang la, kei paw'n a chhan dik tak ka hrilh ang che" a zawhna min zawh chuan tlawm duh lo mihring a nihzia min hriat chhuah tir leh ta.

"A chhan chu min khawngaih ka hlau, i khawngaihna leh puihna dawn kha ka duh lo bur, mahse min pui ta tho chu a ni si a! Chu bakah ka chungchang hre kilh kelh lo la ka ti, kha leh chen kha min ngaihtuah lovin i awm thei a, min ngaihtuah lo law law la ka duh a ni"

"Nunpui, min en teh" tiin a kut chuan ka biang a rawn khuap a, amah vek chuan a lam hawi zawngin min kuai her nghal.

A chet dan teh thut avang chuan mak ka ti a, kan mit chu a intawng chiang hle bawk.

"Ka hmangaih che, ka kal ka pek chhan che chu ka hmangaih vang che a ni. Nung damin awm la, ka ta chauh ni la, ka bulah awm kumkhua la ka duh a ni" a rawn tih chuan ka tal thut a, ka ṭhutna aṭang chuan ka ding nghal.

"Ni lo, min hmangaih miah lo, min khawngaihna a nasat em avangin min hmangaih emaw i ti a nih kha! Kha kha alawm ka duh loh, min khawngaih suh, khawngaih ngai ngawih ngawihin awm pawh ni ila min khawngaih loh dan zawng hram rawh"

"Khawngaihna vang a ni lo Nunpui, ka hmangaih chiang che a ni. Hrethiam lo rual ka ni tawh lo, chik duh la chuan i laka ka awm dan zawng zawng aṭang hian i hre thei vek ang" a ṭhutna aṭanga dingin a rawn ti a, chutah a âwma nam sawk sawk chung hian

"Engati nge tunah chauh min hmangaih? Ka hmangaih lai che khan min hmangaih ve ta che, min hmangaih miah lotu leh min phatsantu hmangaih kha a namai lo asin, min hmangaih thu i sawi avang hian thil a danglam phah i ring em ni?" ka ti a, ani chuan nghet zet hian min kuah thuai a, ka ṭap leh ta nge nge.

"I tlai tawh, i tlai tawh lutuk, kum kha leh chen kha chance i nei asin, mahse vawi khat pawh i rawn lang ngai lo. Bum kan ni em tih chhui chianna chang pawh i hre lo va, chhui chhuak vat la chuan kan inkar pawh hi hetiang em em hi a nih ka ring bik lo" tiin ka ṭah ṭawng zuah zuah a, ka hnung chul hauh hauh chung hian

"Engkim hi ka thiam loh vek a ni, min ngaidam lûl teh Nunpui. Thil liam tawh chu ka siam ṭha thei tawh lo tih ka hria, mahse kan tun hun hi chu ka la thlak danglam thei a ni" a rawn ti a, a aw ah chuan inchhirna leh inrintawkna hlir a lang.

"A hma ang em emin ka haw tawh lo che tih chu chiang takin kan hria alawm, mahse i lakah hian ka rinna ka nghat ngam tawh lo ni berin ka hria" ka tih chuan a âwm aṭang min nam hla deuh hlek a, a kut pahnihin ka biang tawn tawn chu a rawn khuap zui nghal.

"Min ring rawh, vawi khat chiah min ring leh rawh, ka hmangaihna che hian engkim a siam ṭhat leh theih ka ring. I rinna tlu chhe tawh chu ka tung ding leh ngei ngei ang, ka tiama che, min ring hram rawh" thutak zet hian a rawn ti a, ka mittui te chu a rawn hnam leh ṭiam ṭiam tawh.

"Dik tak chuan maw Rinte, awlsam taka ka rilru i hneh zung zung hi a mak ka ti. Ka hua che a, ka haw em em che a, kum 8 lai i tel lova nun hmangin hrehawm tam tak ka tuar a, nang erawh chuan kum 1 vel lekah ka huatna zawng zawng che i tireh titih thei a, lo ring ta che ila ka tisual leh ang tih ka hlau a ni"

"Ni lo, tun ṭum chu i tisual tawh lo vang. Ka tum dawn alawm, eng pawh tih ngai se min rinna tur a nih phawt chuan ka ti vek ang, vawi khat chiah min rin tum leh rawh aw, maw Nunpui!?" tiin min sawi deuh laih laih a, rin te chu ka duh ve lutuk.

"Ka lo beidawng viau asin, nang chauh i ni lo, mipa dang reng reng pawh hi ka ring mai mai thei tawh lo. Ka thinlung hi nasa takin i lo hliam tawh a, he ka thinlungah hi chuan hlauhna chiah a khat tawh rih" ka ti a, ka thaw chu a chham mai dawnin ka hria.

"Ka dik lo, ka...ka awm dan a dik lo, Ri...Rinte" ti sepin din pawh ka ding ngil ṭha hlei thei lo va, ka ni muai muai a, ka taksa chu engtin mah ka control thei tawh lo. Ka chau a ni, ka chau tawh lutuk.

"Nunpui! Min enteh Nunpui, i ṭha miah lo, hetiang hian awm ziah suh, ka ngaina lo ka tih tawh khâ" ti deuh phul phulin min thing a, ka harh deuh zawk.

Chiang lo ruaiin a hmel chu ka en a, a lo hlauhthawn hmel ngang mai.

"I mit kha chhin tum miah suh, i rilru tihfim tum hram hram ang che" tiin min pawm kang lâwp a, thil ri vut vut avang chuan ka meng lui ṭawk ṭawk a, fiah lo ruaiin Rintea motor khalh chu ka hmu a, a bak engmah ka hre zui tawh lo.

Ka harh chuan khumah ka lo mu fel thân a, ka kut chu kun ngul hian Rintea chuan a lo vuan a, dawmdawi inah ka awm tih ka hre nghal.

Chutianga luhaia ka awm fô chu ka hrethiam lo, natna dang ka nei ang tih ka hlau ru ngawih ngawih. Ka chhungte pawh an lo awm kim deuh ṭhap a, u Mawia te nupa leh ka fate erawh an awm lo, ka harh tirh khan ka hmu lo mai pawh a!

"Puii, i lo harh tawh maw? Doctor kha va ko teh Amuan" ka nu chuan a lo ti a, Rintea chu a rawn hawi chhuak rang hle.

A mitmeng aṭang chuan min hmangaih tak tak ang mai hian ka hmu a, mahse min hmangaih chu ka la ring hlei thei lo.

"I BP sang hi i zo lo leh ṭhin, i thil ei fimkhur rawh. Inzaipui tawk tawh i ni a, i taksa hi i enkawl uluk hle a ngai a ni. Rit lak lam te hi i lo tipalh hlauh ang e, i taksa hian a la zo dawn teuh lo a nia" Doctor chuan a lo ti a, ka indim ve viau chuan ka hre si a!

"Doctor, natna dang a la nei em? A taksa ah hian natna dang a awm em? Zep miah lovin min hrilh rawh, ka hre duh" Rintea chuan a ti nghet charh a, a hmel chu a rum ṭha hle bawk.

"Nei hran lo ve, a taksa hi hrisel taka a enkawl a ngai zawk a ni. A ei tur chin pawh ka lo list sak thlap a, thla 6 chhung vel chu ei char char se, chumi hnuah erawh ei tur pangai pawh a ei ve leh thei tawh ang"

"I sawi awmzia chu natna dang a nei tawh lo tihna a ni maw? Aw le, ka hrethiam e. Ka lo ngaihtuah tawk lo che a ni ang, mahse tun aṭang chuan ka ngaihtuah tawh viau ang che Nunpui" tiin Rintea chuan ka kut chu a rawn vuan nghet sauh a, kan awm dan chu kan chhungte chuan an lo en ṭhap.

"Kan haw nghal thei em Doctor?" tiin Rintea chuan a zawt leh a, Doctor pawh chuan kan haw nghal theih thu a lo sawi ve mai.

Rintea chuan min kuah chung hian damdawi in aṭang min chhuahpui a, motor-a min ṭhut luh tir te chuan min dim thiam khawp mai.

Motor seat hnung lamah ka nu nen kan chuang a, a hmaah Rintea leh ka pa an chuang thung. Rintea chhungte erawh motor hranah an chuang a, kan hnung lawka an tlan bawk.

Ka pa leh Rintea chu an titi mawlh mawlh a, kan pahnih chungchang bawk a ni leh tawh. Ka pa chuan kan inkar siam ṭha thuai turin min ti a, Rintea erawh a ngawi reng thung.

Front glass aṭang chuan min lo melh zeuh zeuh a, ka mit lah chu a la intawng fuh thei em em zui. Kan in chhunga kan luh rualin ka fate chu ka lamah an lo tlan phei nghal a, Bawihpuia chu a la tlan chak thei lo hle.

"Nu, engati nge damdawi inah i awm?" Bawihtei chuan a rawn ti a, pangai tak leh pehhel takin ka awm chhan te chu ka hrilh ve mai a, u Mawia leh u Atei paw'n min lo ngaihtuah hmel hle. Bawihtei bawk chuan

"Nu, thil ka lo dil che" a rawn ti leh a, a bulah chuan ka ṭhu hniam nghal. Bawihpuia ve thung chu a pa bulah a awm leh ran tawh a, mi dangho chuan kan nufa awm dan vel chu an lo thlir ṭhap bawk.

"Aw sawi la Bawihte, i duh dûh min dil rawh, ka tih theih zawng a nih phawt ka tihsak ang che" nui sen sen chuan ka ti a, ka fanu chu a lian ve tawh tak zet. Ka ṭhut hniam chuan ka chen tawh teuh lo, ka chhoh en a ngai zawk.

"Apa nen hian innei tawh ula, apa pawh ka dil ziah, mahse anu thu thu a ni mai a tia, hmana kan palia kan mut ho ang khan ka mu leh châk tawh ê" a rawn ti ta mai, ka fanu zawhna chuan min tihamhaih tak zet.

"Maw nû? i duh dûh min dil rawh i tih vek tawh khâ, apa nen hian innei ula ka duh. Apa a haw zel te hi a nuam ka ti tawh lo, apa leh nangmah bulah ka awm duh tawh" ka kut vuan chungin ka fanu chuan a rawn ti leh a, chhan dan tur ka hre hlawl lo.

"Bawihte lo kal teh, ka lo pawm daih ang che" tiin Rintea chuan lo hruai hran a tum a, ka fanu chuan a lo duh lo nasa mai. A pa kuahna aṭang chuan a tal chhuak a, ka bulah bawk a rawn ding leh chat.

"Maw nu?" ṭap ṭuau chung hian ka fanu chuan a rawn ti a, ka insum zo dawn lova ka hriat avangin room-ah ka lut thuai a, kawngka chu ka kalh nghal hmak.

Kawngka ngheng chuan ka ṭhu tawm chawih a, rilru na takin ka ṭap zui nghal. Ka fate duh pawh tipuitling thei lo nu nih chu a hrehawm, a hrehawm ka ti ngawih ngawih.

Theih ngat ila chuan Rintea chu pasalah ka nei chiang viau ang, ka fate vang tal pawhin ka nei ang. Ka hun kal tawha ka chunga a chet dan chu ka ngai pawimawh tawh lo, ngai pawimawh pawh ni ila awmzia a awm tam lo tih ka hria.

Rintea chu ka ngaina leh ṭan tawh tih chu haider theih a ni lo, mahse ka ngainat dan hi a dan a dang. Ngaihzawng emaw pasal tur emaw ang zawngin ka ngaina thei tawh lovin ka hria, duhin hmangaih leh thei ila ka ti ve lutuk tho.

Hmangaih leh theiin inhria ila chuan hmangaihna avangin kum tam tak chhung min tih hrehawmna te chu ka ngaidam thei ngei ang, chu chu kan za vai atan pawh a ṭha ber.

"Nunpui lo hawng teh, inbe lawk teh ang. Bawihtei leh Bawihpuia pawh an hruai chhuak tawh, kan pahnih hian inbe turin min duh a ni" kawngka chum ri dat dat chung hian Rintea chuan a rawn ti a, ka ṭah chhuak zualpui chu a reh ve leh mai bawk.

"Lo hawng teh Nunpui, kan inbiak hi a ngai tak zet. Bawihtei thil ngen kha kei chuan tihhlawhtlin sak ka duh, nang paw'n i fanu thil dil che kha tihhlawhtlin sak i tum dawn lo em ni?" a rawn tih leh chuan kawngka chu ka hawng a, mittui tling pamin ka en a, amah tih loh mi dang tûmah ka hmu tawh lo.

"I thei dawn em ni? I tan leh kan fate tan harsatna siam ka duh hleinem. Ka hmangaih lo che tih hre reng chungin min nei lui duh ang maw? Kan fate hmuha a dera nun reng kha i thei tak tak ang maw? Chung zawng zawng chu ka ngaihtuah thleng asin, engati nge min hriatthiam ve miah loh?"

"A pawi lo, a pawi ka ti lo. Min hmangaih lo mah la ka bulah i awm dawn phawt chuan pawi ka ti lo, ka duh ber chu nang leh ka fate ka bula awm tir a ni. Ka hmangaih che a, min hmangaih ve lo mah la kei chuan ka hmangaih reng ang che"

"I ti ve ziah, kan inngaihzawn lai pawh khan ka ta i ni kumkhua ang i ti a, mahse phatsantu leh bumtu chu nangmah tho i ni. Chuvangin min hmangaih thu kha chu sawi tawh suh, dawt tih ka hre chiang lutuk"

"Hun kal tawh i sawi chhuah reng hian ka inthiam lo ve tho asin, hrehawm ka tih loh bik i ring a ti raw? Kei hian hrehawm ka ti lutuk zawk, nang leh kan fate hnung chhawna ka awm te kha ka inchhir lutuk, inchhirin awmzia a nei tawh bawk si lo"

"Chuvang chuan keini pahnih hi chu awm dun tawh lo mai ang, kan awm dan hi a hrehawm ka ti em mai. Engati nge hlimna tluan tling leh nun pangai tak hi ka neih ve theih loh? La hmangaih reng che ni ila chuan a pawi pawh ka ti lo, mahse tunah chuan ka thinlungah hian hlauhna hlir a khat tawh"

"A pawi ka ti lo ka tih tawh khâ, engtin pawh awm la ka bulah a nih phawt chuan ka pawm vek. Ka hmangaihna hmanga tuam dam che erawh ka thil tihtur pawimawh ber a ni a, i dam hma chu hmangaih leh duat takin ka enkawl ang che"

"Keimah ang tho i ni dawn asin, ka lakah hian beiseina i neih vak ka hlau a ni. Âw engati nge maw keini hi kan lo intawn kher kher le, intawng miah lo ila kan hlim em em awm zawk si a" ka tih chuan a rawn che thut a, ka hmui leh a hmui chu a inchuktuah nghal.

"Intawn loh kha sawi miah suh Nunpui, kan intawng hi Pathian remruat liau liau a ni. Ka nupui ni rawh aw, vawi khat chiah i thinlung chhunga ka lo luh theih na'n chance min pe leh rawh, i thinlunga min luhtir i phal phawt chuan a bak zawng chu keima'n ka ti vek ang" kan chal insik tir pahin a rawn ti a, a thaw lum ham ham bawk.

"I beidawng hmel hmuh ka duh lo asin" ka ti sep a, ani chuan min lo fawp leh nghal chat. Kei ang bawka thinlung beidawnga a awm tur chu ka duh lo, ka lo tawn tawh ang chu tawng ve se ka duh lo a ni.

"Ka beidawng hmel i hmu ngai lo vang, chuan nang hi ka hnen aṭang i awm hran ka phal tawh lo bawk. Min ngaidam thei lo pawh ni la a pawi ka ti lo Nunpui, mahse ka hmangaih tak zet che tih hi chu i hre dawn nia" tiin ka chal chu a fawp leh vang vang a, ka lo maimitchhing tawp.

"Min nei ang ti raw Nunpui? Kan fate vang ni lovin chance min pek leh i duh vangin pasalah min nei ang ti raw? Min hmangaih ve i tum leh dawn avangin min nei ang ti raw? Min chhang lûl teh, min neih tur thu sawi lûl teh" tiin zawhna chu min zawh zawm mawlh mawlh a, inrintawkna reng nei tawh lo ang mai a ni.

"Aw...aw le, ka nei ang che, mahse min beisei sang miah suh. Ni e, ka awm dan hi ka hne, tun ṭum chiah hi hmangaih leh ka tum ang che, ka thei ngang lo a nih chuan min dem lo ang che" ti sepin ka kuah a, ka fate pa a nih vang hrim hrimin chance vawi khat chu pek a phu a ni.

"Ka lawm e Nunpui, chance min pek leh avang hian ka lawm tak zet, hma hun chu hre lo mah ila min hmangaih leh theih na'n theih tawp ka chhuah ang tih ka tiama che" tiin ka chal chu a fawp vang vang a, a taksa aṭanga ka tal chhuah hlau zetin min kuah nawn mawlh mawlh bawk.

Room aṭanga kan chhuah chuan tûmah an lo awm lo va, pawnah kan chhuak leh a, an lo awm ta ngei e. Bawihtei chu a la ṭap uar em em a, min hmuh rualin ka lamah a rawn tlan phei nghal. Ka kawnga kuah chatin min chhoh melh ral a, Bawihpuia pawh a unaunu ṭah avang chuan a lo ṭap ve tho.

"Ṭap tawh suh le Bawihte, zanin aṭang chuan ka hma ka sial tawh lo vang, chuan i thil min dil pawh kha ka phal e. Apa nen kan innei dawn aw, ṭap tawh suh le" a mittui hru hul chung chuan ka ti a, ani chuan la ṭap hliam hliam chung hian

"Min promise rawh nu" a rawn ti leh hram a, nui ver verin ka promise thlap thu chu ka sawi a, a la ṭap bang thei mai lo. Rintea chuan a pawm kang a, ka fanu pawh a pa dar bawhin a bei chial mai.

"Bawihtei bula i thusawi kha dawt nge i ti tak tak?" ka nu chuan a rawn ti a, Rintea chhungte leh ka nu leh pa chuan ka chhanna an nghak ta ṭhap.

Bawihpuia chu ka lamah a rawn phei a, a ke a la dam ṭhat lutuk loh avangin a kal chak thei lo hle a, ka bul a thlen rualin ka lo kuah nghal hmak.

"Ka ti tak tak e, Rintea nen hian kan innei dawn" ka tih chuan thawveng huai hmel hi an pu hlawm a, Rintea chu Bawihtei pawm chungin kan bulah a rawn ding nghal bawk.

Ka pa chuan in chhunga luha thu rel ṭhat a ngaih thu a rawn sawi a, a sawi ang chuan kan lut ta vek. Bawihtei chu a pa dar bawhin a ṭap muhil ta daih a, ka khawngaih reuh khawp mai.

Bawihpuia pawh a nau ang thovin ka mal chungah a muhil bam a, puitlingho erawh thu pawimawh tak sawi a ngaih avangin kan la meng ṭhap. Kan nu leh pate ve ve chu a ṭawng berah an ṭang a, an thu rel pawh a puithu sawt khawp mai.

Chapter 16

Rintea nena kan inneih hun leh ni tur chu kan chhungte'n an ruat fel thlap nghal a, a awlsam ang reng khawp. Kan inhriat chian tawn em avang leh karah fate an awm tawh avangin palai tirh vel pawh awlsam takin kan ti a, kar leh maia innei turin thu kan rel bawk.

Tun ṭum chu ka fate vang a nih tho rualin Rintea chu chance pek leh ka duh vang a ni a, ka tisual leh a nih chuan engtikah mah mipa dang tan ka thinlung hi ka hawng leh tawh ngai lo tak tak ang.

Ka fate avangin Rintea chu hmangaih leh ka duh a, pasal leh min uap lumtu tur ka mipa hmangaih tak ni leh turin ka duh a, ka hmangaih leh thei a nih hlauh chuan tû pawh kan hlim tlan ka ring zawk bawk.

Ni e, a sawi ang khan ka tum ve tur a ni. Hmangaih ka tum leh ang a, tunah chuan min hmangaih ve tak tak tawhin ka hria, mahse min hmangaih hun erawh a fuh chiah lo a ni.

Ka beidawn tawpah leh a laka beiseina leh rinna ka nghah ngam tawh loh hnuah min hmangaih thu a sawi ve chauh a, thinlung leh tih tak zeta ka hmangaih lai khan min hmangaih se chuan engkim hi a dik vek ang.

Ka fate avang leh khawngaihna avanga min hmangaih ni khan ka hria a, mahse tunah chuan a ni em em tawh bikin ka hre lo.

Min hmangaih thu ka beng hriatah a sawi a, a tana ka pawimawh em em thu a sawi a, chutah ka nun chhanhim na'n a kal min pe leh ta zel a, a kal min pek vang hrim hrim pawh hian min hmangaihzia ka hre thar a ni.

A taksa peng ṭha lai chu ka tan a hlan a, chumi vang ringawt pawh chuan chance peka a tana ka thinlung kawngka lo hawn leh chu a phu ve ngawih ngawih tain ka hria.

Ka ti dik lo ang tih erawh a ruk tak chuan ka la hlau ru fân a, heng ka hlauhna te hi dah bova hmangaih let ve ka duh a ni. Ka thei kher ang em ka hre lo, mahse ka tum ve dawn, ka theih tawp chhuahin hmangaih leh chu ka tum ve dawn a ni.

Hlimhlimi chu mo ṭhianah hman ka tum a, ani paw'n min lawmpui thiam khawp mai. Rintea chuan Damdama ṭhiana hman a tum thu min hrilh tawh a, ka hriat tirh chuan mak ka ti deuh.

Mipa hi chu an mak ve ngawt mai, insualin kut han inthlak mahse awlsam takin an inngeih leh mai a, pangai takin ṭhian an ni leh thei mai a, keini hmeichhia erawh ṭhian inkara buaina a awm tawh chuan inpawh taka inkawm leh kan harsat ṭhin, mipa hi zawng mak ve tak chu an ni!

U Mawia nupui u Atei'n an ina leng thla lawk turin min sawm a, veng khata awm kan ni a, an in leh kan in pawh a inhlat vak lo.

Bawihpuia leh Bawihtei erawh a pa hovin an awm leh tawh a, ka ngaihtuah em em hran lo, anni paw'n in aṭanga ka chhuah dawnin min ngen lo hrim hrim.

"Puii, i lo leng thla khât lutuk a, ka khua a har alawm" u Atei chuan thingpui chawh pahin a rawn ti a, a ṭawng siam siam hi chuan a mood a on tihna a ni mai, a mood a off erawh hi chuan biak châkawm loh ve tak a ni.

"Nia, ka rawn len ngai loh chhan pawh ka hre bik lo" ka lo ti ringawt a, dawt ka sawi miah lo bawk. Rintea nen kan inhmuh leh aṭang khan ka leng thla ngai tawh lo ti ila a sual lo ang, a chhan ber lah chu ka sawi fak thei hauh si lo.

"Lo leng thla tura ka tihna chhan che chu thil sawipui che ka duh a, i pasal neih tur lam hi a nia, mahse chutianga ngaihṭhat loh tur lam a ni lo" min vengthawng zet hian a rawn ti a, a thil min sawipui tum chu ka hre châk ta khawp.

"Rintea hian a hmangaih tak zet che tih ka hre thei, chuan hun kal tawh avangin a inchhir hle bawk. A hma daih khan inhmuh puiah ka sawm tawh a, a chhan pawh harsatna i tawh ṭeuh hnua a rawn lan chauh vang a ni" a rawn ti leh a, kei chuan

"Maw? Rintea nen hian in lo inhmu ṭhin maw!?" ka lo ti hluai a, u Atei leh Rintea chu inhmu turin ka lo beisei lo hrim hrim.

Chu bakah an inbe ngai hauh si lo va, an awm dun chang pawhin an inbe lai vawi khat mah ka la hmu lo.

"Hmu ṭhin tih chu a dik chiah lo, vawi khat chiah kan la titi dun. Kan inhmuh chuan ka hau hrep a, pa nih a tlin lohzia sawiin ka ṭawnkhum hrep a, ani erawh a ngawi reng ringawt. Dik tak chuan in innei tur hi ka lawm, i inkar chu hre lo mah ila in pahnih tan leh in fate tana ṭha ber a ni"

"Kan fate tan chuan a ṭha ber tih ka hria, mahse kan pahnih tan hian a ṭha ber ang em ka hre lo. Kan intina tawn mai mai ang tih ka hlau, a bik takin amah zawk hi! Min hmangaih tih chu ka hre vek tawh a, ka hmangaih ve leh thei ang em tih erawh ka hre si lo"

"Hetiang rilru i pu hi ka dem miah lo che Puii, kum kha leh chen i tawrh tawh avang khan i awm dan hi tûma'n kan dem thei lo che. Tunah erawh in innei dawn a, hei hian in inkar hi siam ṭha vek se ka ti, hmangaihna avanga i hlim hmel hi ka hmu châk tawh"

"Ni e, Rintea bulah pawh hmangaih leh ka tum dawn thu ka sawi vek tawh a, amah phei chuan hmangaih thei rih lo mah ila beidawn a tum loh thu a sawi nghe nghe. Ka hlauh ber chu a hma ang bawk khan rei lotê ka hlim ang a, lungngaihna chiah min hnutchhiah leh ang tih a ni"

"A ni em em tawh bik nâng, chu bakah chutiang ti duh tur khawpa rilru ṭha lo a ni lovin ka hria, a hma kha chuan bum in tawh vang a ni tih kha hre reng rawh Puii. Tunah chuan ani pawh a rilru a puitling leh zual tawh ngei ang a, nang leh a fate hi hmangaih taka a enkawl theih che u ka ring"

"Engati nge Rintea hi i rin tâk em em a u Ate? An lo len paw'n in inbe ngai hauh si lo, ngainat loh hmel zetin i awm ṭhin zawk a ni si a" ka ti ta thlawt a, a awm dan chu a mak ve em alawm, hriatthiam a har.

"A chhan chu amahah hian i tana innghah ngamna tur thinlung leh mipa ka hmu tlat tawh alawm, i u Mawia ka hmangaiha amaha ka innghat ang chiah hian Rintea lakah awm la ka duh, a tawpah chuan lungngaihna ni lovin hlimna bak i tawng dawn lo tih ka chiang" a rawn tih chuan ka ngawi ta vang vang.

Chawhnu dar 2 leh a chanve velah kan inah ka haw chho a, ka haw chhoh thlengin u Atei thusawi chuan ka rilru a luah. Kan in ka lut chu thawm a lo reh ṭhiap a, sitting room-ah pawh tumah ka hmu lo.

Thli vanga tukverh inkhar ri chawrh chuan min tiphu zawk a, ka kalh ṭha ta vat. Ei rawng bawl a la hun loh avangin ka che buai duh tingtang lo va, ka rilru chhungril chu a hahdam ru viau bawk. A chhan ka hre lo, pasal ka neih dawn vang pawh a ni mahna.

Room chhung ka luh chuan ka rin ang ngeiin ka fate leh Rintea chu an lo muhil bam hlawm a, khua a duai reuh ruih avangin mut chu a chawh viau, mahse kei chu mu ve ringawt thei ka ni lo. Darkar a liam ang a, ei rawng bawl nghal ka ngai dawn.

Chutia ka pasal ni mai tur leh ka fate muhil ka thlir dauh dauh lai chuan phone a rawn ring thut a, ka va han phu leh mai mai tak em.

Ka phone emaw tiin ka indap a, mahse ka phone a lo ni awzawng lo. Rintea chu a rawn che ṭuah ṭuah a, a kekawr iptea phone chu a phawrh a, a phawrh rualin phone chu a ring tawp leh daih.

Mut chhuah hmel zet hian min rawn en a, a meng fiah telh telh a, ka hnung chhawn thuai. Ngawi rengin room aṭang chuan ka chhuak a, eng vanga zam thar em em nge ka nih ka hre lo.

Thingpui a in duh tâkah tiin gas chu ka on a, tui lum ka chhuang zui nghal. Room kawngka inhawng thawm chu ka hre reng a, Rintea a ni tih ka hre chiang hle bawk.

Ka tui lum chhuan chu ka en reng a, a la so dawn lo nasa mai bawk si. Ka hnung lam aṭanga min rawn kuah avang chuan ka phu deuh zawk a, ka lam panin a rawn kal khan ka hre rêng a ni!

"Khawiah nge i kal bo char char a?" ṭawng peih lo aw zet hian a rawn ti a, ka nghawng zawn vela a thawk lum ham ham avang chuan ka ṭang ru ṭeu a, ka awm dan chu a hriatthiam vek ka ring.

"U Atei'n leng thla lawk turin min ti a, ka zu leng zuai a nih kha!" pangai thei ang ber chuan ka ti a, ka aw chu a dik hlei thei miah lo leh nghal.

Ka dul zawnah chuan a kut pahnih a suih a, ka zamna tizual tur takin ka nghawng chu a fawp zeuh bawk.

"Engati nge i ṭan ṭun a Nunpui? Ka tina dawn hleinem che, min hlau em ni?" a rawn ti sup a, hrilh ngai lovin a lo hre leh ta vek mai.

A kut chu tim daiin ka vawn hnan a, hrethiam zet hian a rawn hum ve leh nghal chat.

"Ka tum pawh a ni lo, ka zam ru hle a ni. Eng lo, hetiang hian kan awm dun khât tawh bawk si a, chuvang pawh chu a ni ang. Awi le! Ka tui chhuan, ka tui chhuan a lo so tawh a nih hî" tiin gas chu ka off thuai a, ani erawh zawi te hian a lo nui thung.

"Thingpui min siam dawn em ni? A va lawmawm awm ve, kum 8 hnua i thingpui siam ka in lehna hmasa ber tur a ni a, a tui ngei beisei ang" tih pahin min kuahna chu a tithawl a, a taksa si lova ka awm chiah chu ka ruak huaiin ka hria.

Thingpui chu uluk takin ka siam malh malh a, a tui loh ka hlau ta viau chu a mak a ni. A sawi ang tak takin kum 8 hnuah a vawi khatna atan ka thingpui siam a in dawn chu a ni a, tui lo a ti palh ang tih chu ka hlau ve khawp mai. A in lai chuan chik zet hian ka lo en kiau a, a hmel a la pe chhe em em zui.

"A tui vak na nge? Ka uluk ve viau asin" ka tih chuan min lo en a, a nui leh ringawt. Nui lovin ṭawng se, a tui leh tui loh chu sawi mai se ka ti.

A hmel aṭang chuan tui a tih hmel vak lo, a kha a tih a nih ka ring. Thingpui fe pawh a tawk chiahin ka telh khan ka hre si a, a tui lo tak tak emaw ni le.

"Khawi maw ka lo in ve chhin" tiin a no ken lai chu ka ban a, ani paw'n min lo pe ṭha ve mai bawk.

Thingpui chuan tui lohna pakhat mah a nei lo, mahse engati nge tui tih loh hmel zeta a awm kher?

"A tui lohna a awm miah loh hî, ni danga ka siam ang tho a ni. Ni dang ai aiin ka uluk zawk, tui lo thei a ni lo" tiin thingpui chu ka in nawn leh ngat a, a lo nuih hawk hawk avang chuan a hmel chu chiang zetin ka en nghal.

"A tui lo tih ka sawi miah lo, nangma'n a tui loh i lo ring ve ringawt a nih khâ" a rawn tih chuan no chu ka pe let thuai a, a sawi chu a dik chiah, a tui loh thu a sawi ri lo hrim hrim.

"A nih si chuan engati nge tui tih loh hmel zeta i in kher?" ka ti a, ka inna zawnah tak chuan ten miah lo hian thingpui chu a in a, a nuih a zat hmel hle bawk.

Vawi leh khatah tlak pawpin ṭhutthleng banah no chu a dah a, a che vel chu ka lo en chik hle.

"I awm dan ka hre châk alawm, chuan i hmui thlum tui hmel tak kha ka fawp châk hle a ni" tiin a che vut a, min rawn fawp ta chat. Ka tal tur chu min chelh bet a, ka tal rei duh ta bik lo.

"Min fawp let ve rawh Nunpui, zawi zawiin keimahah hian i rinna nghat la ka duh a ni. I rilruah ka tina dawn lo che tih awm tir reng la, keiin ka lo nemnghet zel ang" ka hmui bula thaw lum ham ham hian a ti a, min fawh zawm leh nghal.

Kei pawh chuan ka thiam ang tawkin ka lo chhang let ve a, nupa kan nih tawh dawn tho avangin lo duh loh tlat chu a dik berin ka hre lo. Min pawm kang lawp a, a kawnga ka kherh theih turin ka ke chu a siam reng a, kan hmui pawh a la inchuktuah reng. Engkim chu amah tih vek a ni mai, ka awm dan tur thleng chuan ama'n min control vek.

Ka hnute a khawih rualin ka harh chhuak zawk a, a taksa aṭang chuan ka tal thla ta vat. Infawh chauh kha chu pawi ka ti miah lo, mahse infawh piah lam thleng thleng kan kal dawn tlatin ka hria, tun atan chuan ka duh rih lo.

Engtin nge khatiang em ema nasa khan ka danglam theih zawk!? Nuam chu ka ti chiang alawm, ka taksa dang kha khawih lo se chuan ka harh chhuah pawh ka ring lo.

"Duh tawk teh ang, kan awm dan a dik dawn lo tlat. Tun tut tutah chuan ka duh rih lo, nupa pawh kan la ni êm hleinem" tia kal sawn ka tum chu ka banah a rawn chelh a, min la vuan nghet em em zui.

"Nupa chu kan ni thuai dawn, mahse i sawi ang khan tun atan chuan kan duh tawk rih ang. Hetia kan awm dun reng chuan nang paw'n min ngainat leh thuai ka ring, titi dun thei ṭhin phei ila chu duhthusam" a rawn ti a, ka kut chu a thlah riai riai bawk.

"Nia, nupa kan nih hunah chuan kan la titi dun thei mahna" tiin ka kal sawn a, a thingpui inna no chu ka sil sawk sawk a, ka nih leh pup pup tawh avang chuan ka hnungah a ding tih ka hre thei.

"Zam ru zet hian awm tum lo la, min pawh luih tum hram hram la, chuan min hmangaiha min ngainat thuai ka ring bawk" ka hnung lam aṭang chuan a rawn ti leh a, ka awm dan zawng zawng a lo hre leh vek tawh a nih dawn hi!

"Nia" tih têin ka lo chhang a, no chu ka sil zo rang kher mai. Choka aṭang chuan ka kal sawn a, min lo zui ve zel ringawt. Tukverh chu a lo inhawng leh a ni ngei ang a rawn inkhar ri leh pawp a, ka va kalh ṭha nghal vat.

Dar 3 leh a chanve velah a haw a, a haw dawn chuan a fate hmuh loh laiin min fawp leh hram. Ka fate chuan zana a bula kal an ngen a, ani chuan amah ni lova keimah min dil turin a lo ti daih a, phal lo ru tak chungin ka phal a ngaih leh phah.

A haw hnu chuan ei rawng ka bawl zawm nghal a, ka zângkhai ru viau chu a chhan tak sawi tur ka hre lo. Dar 4 velah ka pa hna bang a rawn haw a, Bawihpuia leh Bawihtei chu a bulah an tal leh nghal chawt.

Zanah chuan ka fate tel lovin ka awm a, ka nu leh pa awm ve reng mahse a reh kher mai. Dar 10 velah pawh an lo la haw loh avang chuan ka ngaih a ṭha chiah tawh lo, ka phone lahin an lo haw ṭep thu a sawi a, an lo thleng thei mai bawk si lo nen ka rilru chu a hah khawp.

Dar 11 velah chuan an lo haw ve thei ta hram a, ka thin a lo rim ru khawp mai. Studio-a kal phal tawh lo ringawt dawn ila a dik bawk si lo, ka fate chu Rintea bulah chuan an thla a muang em em zawk, chutianga thlahmuanna neih ve chu ka châk a ni.

Vawi leh khata ka ring nghal pawp thei lo te, ka hmangaih nghal pawp thei lo te chu hrehawm ka ti, keimah ber hian hrehawm ka ti a ni. A bula ka fate hlim taka an awm ringawt te chu ka thik a, ka duh ve ṭan tawh tih chu chiang takin hre mah ila hmangaih erawh harsa ka la ti fân.

Kan chhungte'n thu an rel aṭanga kar khat hnuah kan inneih a, mi sawi kan kai nasa khawp mai. Social Media a chak tawh ang reng si a, ka nun hlui leh ka zai ṭhin lai te chu a lar ta khawp.

Kei ang bawkin Rintea chu a lar a, kei aiin mi sawi a kai mah zawk. Fa kan neih thu chuan mi beng a verh leh zual a, a ṭhenin min lawmpui rualin sawiselna pawh kan dawng tel tho.

Nuam lo ka tih tehreng nen ani chuan a ngaihthah thiam em em thung a, Social Media-a an sawi duh dan te chu engah mah a ngai eih lo.

Kan inneihnaah chuan mi pawh an lo kal tam vak lo, tlêma kohhran mi leh kan chhungte ngawr ngawr deuh chiah an lo kal a, incheina pawh ka nei sang lem lo hle.

Dan 2 a ni a, mi an lo kal tam kha chu ka ring lo hrim hrim. Chu bakah kan ti deuh thut bawk si a, keimahni leh kan chhungte tih loh kan inneih tur thu hria an tam loh hle ka ring.

Bawihpuia leh Bawihtei ber chuan kan innei chu nuam an lo ti a, an hlim lutuk chu ka hlim ve veng veng. Inneih thlalakah chuan Rintea'n Bawihpuia a pawm a, keiin Bawihtei ka kai bawk. Chutianga lak chu kan duh dan pawh a ni lo, kan fate pahnih chuan kan zinga lo tel ve a châk tlat a tin ni!

Hmun mawi zeta Wedding Photo Shoot kan neih lai chuan ka hlim ve tak tak, ka pasal ni tura ka lo suangtuah ṭhin chu ka pasal a ni ta ngei a, mahse kan inneih dan erawh a dang deuh a ni.

Ka rilruah chuan hmangaih leh hmangaih loh lam ka awm tir duh lo lui ve tlat a, ka pasal neih ni a nih avangin hlim taka awm chu ka tum lui ve ngar ngar a ni.

Ka pasal ina ka lawi luh chuan min lo lawm thiam em em a, kum khat leh tih lai lo inhre tawh mah ila inpawh tak takna kan la neih loh avangin ka pasal chhungte lakah chuan ka ṭi ru hle.

Zan a lo ni a, ka huphurh ru khawp mai. Dik tak chuan nupa nun hman chu ka duh leh duh loh ka hre lo, hmang rih lo mah ila pawi ka ti miah lo bawk.

Rintea chuan hman a duh tlat ang tih ka hlau ru thung, nupa nun hmang em tur chuan kan inkarah hmangaihna lian ber se ka ti a ni. Ka beisei loh lutukin Rintea chuan

"Honeymoon tih vel chu nei rih lo vang aw, i duh chuan kan hmang thei tho a nia, i thu thu a ni mai. Tin, nupa nun pawh hman ka ti kher lo, i la inpeih lo nasa dawn tih ka hria, ka bulah awm kumkhua la a ni mai" a rawn ti a, kan inbual fai vek tawh avangin khumah chuan a mu zui nghal bawk.

"Min hrethiam rawh Rinte, nupa nun kan hmang dawn a nih chuan hmangaih phawt che ka duh, hmangaihna tel lova nupa nun hman chu ka duh lo a ni" khuma ṭhu thla pah chuan ka rilrua awm hmasa ber chu ka sawi a, min en reng chung hian a kiai ta suk.

"I inthlahrung a nih khâ, min hmangaih leh i tum tih ka hriat ringawt pawh hian ka hlim a ni. A hming chauhin zanin chu kan pahnihin kan mu dun dawn alawm, engtin mah ka che lo vang" dam zet hian a rawn ti a, a bula mu turin min duh tih lantir na'n khum chu a beng thek thek a, kei pawh a bulah chuan ka mu ve mai.

Amah hnung chhawn zawngin ka mu saisir a, a âwm ngheng turin min duh tih hriat tak hian a lamah min pawt phei a, ka dul zawnah chuan nghet zet hian a rawn kuah zui nghal.

"Ihhhh....eng lo.....titi ila, mahse i mut a chhuah chuan titi chu ka ti kher chuang lo" ka ti sep a, amah hlir ṭan lak hmasak tir chu a ṭha ka ti lo, ka insiam ṭhat ve a ngai a ni.

Bawihpuia leh Bawihtei an awm lo bawk a, a duh phawt chuan titi chu a ṭha dawn phianin ka hria.

"Vawiin kha i chau em? Kei chu thlalak kha ka ning ru khawp a, ka sawi duh lo mai mai a nih kha!" a rawn ti sup a, ka chhip sam chu a thawk khum tih hriat takin a vawt seng seng a, sawi lo mahse titi chu a duh tih ka hrethiam ve mai.

"Chau lo ve, ka rin aiin a awlsam phian a, pheikhawk sang bun kha ka ning ber. Chuan, eng lo, i kal min pek avangin ka lawm e aw" ka ti sep a, che hrutin min kuah nghet sauh a, a kein ka ke chu a rawn khuap nghal bawk.

"Kei pawh fa duhawm leh nangmah chhun em em min pek avangin ka lawm lutuk alawm" a rawn ti thum dap a, a aw chuan ril riau dan a neia hriatna ka nei leh tlat tawh.

A taksa lum nuam em em chuan min ur a, a bula mut chu a nuam thlawt a ni.

"Min chhun em ni? Kei chu nangmah an chhun viau zawk chein ka hria, mi dang paw'n an ti vek, an hmel aṭang pawh hian i fate an ni tih a hriat ngawih ngawih" thluk nei deuh tak chuan ka ti nang nâng a, hman aṭang tawh a bulah hi chuan naupan chhia ruk dan riau ka nei tlat ṭhin.

"Zonuni kha nangmah dawta ka hmeichhe kawp rei ber a ni a, lo lang leh lo la chuan nupuia ka neih ngei pawh ka ring. A felna leh a nelawm em emna kha ka ngainat chhan a ni a, mahse ka hmangaih miah lo thung" a rawn ti daih a, ka lo ṭang nghal ṭung.

"A khawngaih thlak asin, keimah avangin mipa dang melh leh a tum tawh loh thu min hrilh a, len tar a tum thu min hrilh a, kei aia ṭha zawk mipa dang a tawn leh theih thu ka sawi pawhin ka thusawi a ngaithla duh lo" ka kut chu ka hum ruh sawt hle a, a lo hrethiam a ni ang ka kut chu a rawn hum chat.

"I rilru tina suh Nunpui, nang chu hmeichhe tam tak zinga ka nupui leh ka hmangaih awmchhun i ni a, Zonuni nen kan inkara thil thleng ka hrilh chhan che chu nakina buaina kan neih loh na'n a ni. I rilru tih nat leh hi ka duh lo, min ring thei tawh lo vang tih mawlh hi khawvela ka thil hlauh ber a ni"

"Zonuni chu hmeichhe sual a nih ka ring lo hrim hrim, Bawihpuia leh ka nute a biak dan aṭang khan a sual dawn lo tih ka hre bawk, chuan in inṭhen a ngai hi a pawi ka ti" pangai tak chuan ka ti a, tlang takin min hrilh lo se chu ka thin a rim ka ring.

"Pawi ti reng reng suh, kei chu ka lawm viau zawk asin, a chhan chu amah ka ṭhen avangin ka hmangaih che tih ka hre chhuak a, inṭhen lo ila chuan ka hriat chhuah pawh ka ring lo. Ka lam lo hawi teh, i hmel ka hmu duh" a rawn tih chuan thuawih takin ka inlet a, engati nge a bula awm chu a hahdam thlak tâk viau le?

"I rilru a na lo ti raw? I rilru a nat chuan vawi khat mah ka sawi leh tawh ngai lo vang, i rilru a na nge na lo Nunpui?" a kut vei lama ka biang chul pah chuan a ti a, min en chiang hle bawk.

"Na lo ve, ka rilru a na lo. Tlang taka min hrilh hi ka lawm zawk, mahse kei chuan hrilh tur che ka nei ve lo. Kan inṭhen aṭang kha chuan tu mipa mah ka hnaih buai duh tawh lo, ka fate tih chauh lo chu!"

"Hnaih leh dawn pawh ni la ka phal lo, ka tan chiah i thinlung hi inhawng se ka ti, chu erawh kan la hre chawp ve zel chauh dawn bawk si. I rem tih chuan ka fawp châk lutuk che Nunpui, a bak engmah ka ti lo vang" a thil min dil avang chuan ka hamhaih ve hle.

"Ni dangah min dil ngai tawp si lo va, engati nge tunah min dil kher?" ka aw aṭang chuan mak ka tihzia a hriat theih ang, infawh ringawt te chu pawi ka ti lo lutuk zawk, kan infawh tam chuan amah ka thlakhlelh zual phah teh ka ring hial a ni.

"Nia, a hma kha chuan i duh nge duh lo ka lo ngaihtuah ngai miah lo va, tunah chuan i duh loh zawnga chet ka duh tawh lo a ni. Chuan ka fawh che chu i rem ti em?" tiin zawhna bawk chu min zawt leh a, ka buk khum rualin min rawn fawp nghal.

Zun nei zet hian min fawp a, a mi fawhna chu dawnsawn a nuam tak zet a ni. Rei tak min fawp lo va, chutianga min vengthawng taka a che zel a nih chuan ka hmangaih ve leh theih thuai ka ring.

Thil chi hrang hrang ka sawipui a, han nuih hek hek chang pawh kan nei, kan awm dan chu a nuam ka ti reuh lutuk. Kan chhungte chuan nupa nun kan hman an ring ngei ang, kan inneih zan te a ni a, rin loh chu a harsa hle zawk ang.

Keini erawh nupa nun hmang miah lovin kan awm dun a, kan titi a, ka ṭawng apiang leh ka thil sawi apiang a lo sawi ve a, zawldawh taka min titi pui chu nuam ka ti tak zet, ka pasal hmangaih leh tur chuan ka theih tawp tak meuh ka chhuah dawn a ni.

Chapter 17

"Puii, vawiin chu khawiah maw kal in tum a!?" tiin ka nu ni ta, Rintea nu chuan min rawn bia a, inrinni zing a nih avangin ka tho hma hle a, ei rawng pawh ka bawl fel titih der rawh zawk.

"Ka hre lo, khawiah nge min hruai a tum pawh ka hre lo hrim hrim, kar hmasa kha chuan min bazar pui daih a, tun ṭum chu eng thil tak min tihpui leh ang maw!" pangai tak chuan ka lo tiṭha ve mai a, ka thil chhuan lai vil pah rengin phone chu ka en zeuh zeuh bawk.

"Kei pawh vawiin chu in in lamah ka va leng teh ang, Bawihpuia leh Bawihtei hruai tel ka duh ruk nen ka bulah an kal duh awm der si lo" thingpui in pah chuan a ti a, a thawhna a la rei lo bawk a, hmai pawh a la phih lovin ka hria.

"Chuti chu kan leng chhuak lo mai ang, Bawihpuia leh Bawihtei chu va hruai zawk tak rawh, a ṭha phian ang" ka lo ti thuai a, ka fate hruai a duh phawt chuan ka phal lutuk alawm, a hruai chhuak khât ve em mai.

"A! I ti ho ṭhin em mai, i pasal khian min hau let leh hrep zawk mai ang. Tak takah len phei chu ka tum hrim hrim a, Rintea pa ka kalpui mai ang. I danglam ve tawh lutuk tih chu hre tho mah ila inthlahrung deuh hian awm ṭhin suh, awm bawrh bawrh la a nuam kan ti daih zawk"

"Chutiang pawh a ni lo ka nu, ka inthlahrung hleinem. I tute i hruai chhuak duh a nih phawt chuan ka phal vek alawm, Bawihpuia leh Bawihtei chu ka lo be chhin hrim hrim dawn nia"

"Aw le, an duh loh chuan ka tilui chuang miah lo. An duh hlauh chuan nangni nupa paw'n hun thawl in neih ka lo ring zawk a, chuvang mai mai chu maw le. E chuan, naute lam hi ka rin aiin in nei leh har daih mai"

"Maw? Aw...aaa..nia, naute lam chu" tiin ka riat nawk nawk a, naute ber kher chu a rawn sawi lan ka ring hauh lo.

Naute nei leh tawh tura min beisei pawh chu a awm khawp mai, keini lah chuan kan la neih hmel der si loh.

"Ka sawi mai mai a nih kha, Pathianin rem a tih hunah chuan in nei em em ang. Ṭan han la deuh ula, a bak chu Pathian kutah dah rawh u" thawven hmel zet hian a rawn ti a, ka chhang duh ta lo law law.

"Kei pawh ka va inphih fai ang e, eng chawhmeh nge i siam? Awi, chingit leh bawkbawn bai em ni? Ka ei châk lai tak a ni leh nghal, sahâng i thlak hnem viau em?" ka bula lo dingin a ti leh a, ka thil chhuan mek chu a ei châk tawh hmel tak tak hle.

"Thlak hnem lutuk lo, tun lai hi chingit awm lai tak a nia, tukin ka bazar khan ka lei alawm, mahse kum dang aiin a to tial tialin ka hria" nui chung hian ka lo ti ve hluai a, ka nu chu a ngainatawm tak zet a ni.

"To ve zel e, an sumdawnna a ni ve miau bawk si, dâwn dawn te hi chin miah loh tur" tiin kan choka bula bathroom kawngka lam chu a pan a, ka nu sawi ang tak tak chuan ka dawn ngai lo hrim hrim, ka zak zawk e a!

"Rintea hi a la tho lo em ni? Nizan khan a rawn haw har viauin ka hria, ei rawng te hi bawl dun fô ula a ṭha ang" a lut tawh emaw ka tih hnu chuan a rawn ti leh a, a lam chu rang zetin ka hawi zawm zat.

"Nia, nizan kha chu a rawn haw har khawp mai, zan dang aiin a rawn haw har, an laklawh pawh a ni maithei. Ei rawng bawl vel kha chu ka lo sawipui dawn nia, mahse a thiam ngut dawn emaw ni le ka nu?" nui chung chuan ka ti a, ka nui lo thei lo.

"A thiam loh paw'n i zirtir dawn nia, amah paw'n i bul a nih chuan a phur leh khawp ang. In inpawh tawnna tur a ni tih hria la, in fate hruai tel zel lo hian leng dun ṭhin ula ka ti nghe nghe asin" ka nu hi chu âw, min va han ngaihtuah thei tak, ka nu dik tak ang mai a ni.

"Aw le aw le, kan lo tum dawn nia" nui ver ver chuan ka ti a, Rintea nena ei rawng bawl dun chu a nawm dawn rualin a zei dawn lo lutuka ka nuih a za lawk.

Chutah ka nu chuan bathroom kawngka aṭanga lo dak leh chung hian

"Rintea chu han kai tho nghal teh, tukin aṭang hian practice nghal rawh se. I rai hun pawha awl thei tur khawp chein i lo zirtir dawn nia, mipa pawh ni se a thiam tur a ni. I pa pawh hi kan inneih tirh khan a peih lo chung chung ka zirtir a, mahse a lo ṭha khawp mai" a rawn ti leh duah a, ha nawhna a la hmuam ṭun bawk sia ka nui dir char char.

"Aw le ka nu, ka han kai tho nghal ang e" tiin ka thil chhuan lai chu ka Sim a, nuih za em emin kan room lamah chuan ka chho nghal.

Room chhung ka luh chuan ka fate leh ka pasal muhil chu ka hmu a, ka fate chu an mu kawi dun khawp mai. Tui tih hriat zet hian an mu hlawm a, Rintea ngat phei chu kaih thawh leh loh ka duh rum rum, nizan lamah a rawn haw har bawk si, a chauh viau ka ring.

Kawngka lam bera a mut avangin a bulah chuan ka ṭhingṭhi a, a muhil hmel chu ka en reng a, khawngaih ruk riauna ka nei.

Kan inneih aṭang a thutiam hlen loh a la nei lo va, amaha rinna ka nghah leh theih na'na a bei nasa lutuk chu ka khawngaih a ni.

Kar tawpah a sawi ang ngeiin min len chhuahpui ziah a, kan chhungkua chuan nuam kan ti tlang thei hle. Kei phei chu ka nui reng a, kan boruak chu a nih tur ang thlapin la ni lo mahse nuam ka ti em em tho.

Ka che thut a, ka hmui chuan a biangah ka fawp zeuh a, a muhil tui thawkhat a ni ang a che lo hrim hrim. Ka ṭhingṭhitna aṭang chuan ka ding ngil a, kaih thawh chu ka duh leh lo zawk, zing dangah ni mai rawh se.

"Ti leh rawh" ka kal sawn tawh tur chu ka ding chat, maimitchhing reng chunga a rawn ṭawng avang chuan mak ka ti hle bawk.

A mit a men rualin ka kut chu a rawn chelh a, a kut khing khat chauh paw'n ka kut chu hum bo hneh tak a ni.

"I muhil emaw ka tia, i lo muhil der reng a ni maw?" ring vak lo chuan ka ti a, Bawihtei mu chu a che hlek a, ka hawi rang khawp.

Ka kut chelhtu lah chuan min en reng bawk si, enge tihtur ber pawh ka hre lo.

"Ka taksa i sik rual khan rang takin ka harh nghal, ṭek ang maia rangin ka taksa hi a mur chhuak" a rawn ti sup a, ka awih em em teuh lo mai, a sawi uarna ah ka ngai hmiah.

"I harh tâk si ah chuan ka nu'n ei rawng bawl dun turin min ti a nia, lo tho la, chhuk teh ang" ka ti ve leh mai a, a lo ner nasa ngei mai. A tho hlim hmel nen zawng zawng chuan a nuihzat thlak, mahse ka insum ru nasa khawp.

"Ei rawng bawl dun a!? Lo hnai teh, ka taksa chungah hian lo mu teh" tiin min pawt a, ka ṭang ve deuh tak nâ a, ka ṭang rei duh ta lem chuang lo.

A âwma bawkin ka mu thân a, ani paw'n duat zet hian min kuah run bawk.

"Ka rimtui teh chiam lo vang aw, ei rawng bawl mek ka ni tih hria la, chhuk leh ka ngai tih hre bawk la, hetiang hian kan awm rei thei hauh lo tih hre bawk ang che" ka ti zawt zawt a, ani chuan nui nghawr dat chung hian

"Aw le chingit rim nam nu" a rawn ti kher a, a lam chu ka hawi chho rang khawp.

Ka hnarah chuan na lutuk lo hian a rawn piai a, a âwm aṭang a hmai zawnah min sawn chho zui nghal.

"Nichina i thil tih kha kum tam tak hnua min fawh hmasak ber a ni a, mahse a famkim lo, ka hmuiah tak hian han fawp leh teh, chuan a famkim chiah ang" a thaw chu a lum ham ham a, perfume tih ang vel ni kher lo mahse a la rimtui em em zui.

"A! I ti zahthlak e a! Nichin te kha chu i muhil emaw ka ti alawm, i men lai chuan ka la ngam chiah lo, i hmuia fawh ngat phei chu!" chiang zeta en pah chuan ka ti a, ka sawi tur hre tawh lo chu ka nui ringawt bawk.

"Min fawp tawp rawh, i tihṭhan chuan i pangai tial tial mai ang. I thua min fawh i la nei miah lo a nia aw, a nih loh chuan ka titau mai ang" naupang chhia zet hian a rawn ti a, a âwma chum dat pahin ka nui ver ver.

"I sawi chu a dik tho bawk si, a nih chuan maimitchhing rawh. Chuan rei deuh infawh awih loh, ka chhuk leh vat a ngai" tiin ka rilru chu ka siam fel a, tawi tê hian a lo nui a, a maimitchhing zui nghal.

"Ti thuai teh" a rawn ti hluk a, ka hnungah chuan min la kuah run bawk.

A hmuiah chuan ka duhthu ngeiin a vawi khat na'n kan inneih hnuah ka fawp ve ta, nasa takin ka danglam a, min fawh let zei em avang chuan chin tawk ka hre lo vang tih ka hlau hial.

"Zing tin ti ṭhin ila a ṭha ang, ka mood off chang leh ka chauh changin ti ziah ila a ṭha dawn lutuk" nui suk chung hian a rawn ti a, a âwmah ka chum ri leh dawt.

"Hei over hauh suh, chutiang em em ka peih lo. Min kuah tawh lo la, ka chhuk a hun viau tawhin ka hria, bai ka la chhuang leh nghal" tiin thawh ka tum a, min lo chelh bet rang hle.

"Chuan thil thar a awm ti raw? Tukin i awm dan hian ka beiseina a tisang zual, hrilh tur min nei em? Engati nge ka muthilh lai khan min fawh?" phur zet hian a rawn ti a, a hre vek tawh emaw ka tia, nge a hre lo der zawk.

"Chutiangin thil thar vak a awm lo, ka duhin ka ngaina ve em em tawh chea a ni. Ka rilru chu i hriat vek tawh khâ, mi zawh nawn leh kher" ka ti nang nâng a, ka rin loh lutukin a rawn che leh ta.

Khum aṭang chuan min thawhpui thut a, tlak hlau zetin a kawngah chuan ka lo kherh nghal. Ka mawngah a ban pahnih chuan a dawm a, min zo lah lah khawp mai.

"Han sawi leh teh, min duh thu kha han sawi nawn leh teh, kan inngaihzawn laia i aw chiah chiah kha a ni" a tih chuan mak ti zetin ka lo en a, rei lotê hnuah a hlim hmel chuan min tihlim ve leh ta vek.

"Ka duh che, ka duhna che chu a rei tawh, kan inneih hma vel kha a ni ang. Chuan ka hmangaih leh theih che ka ring, mahse a ruk tak chuan hmangaihna hi ka la ṭih deuh tlat a" ka ṭawng zawh rual chuan min rawn fawp ta vawng vawng.

"A pawi lo, i theih ang anga min hmangaih i tum hi ka lawm a ni. Ka hmangaih che tih hria la, hmangaih mawlh mawlh mai che ka duh" nui var var hian a ti a, a hmel hi chu a ṭha ve chiang thlawt alawm, ka hmangaih leh hmangaih loh ka la hrethiam lo mai pawh a!

Phur zet hian in hnuai lamah min pawm thla a, min pawm tawh lo tura ka tih pawh chuan a duh ṭhak lo. Ei rawng chu min bawlpui tak tak a, a nuam ka ti ta phian. Ka nu chu rei lotê kan bulah a rawn ṭhu a, Rintea chu zing tin min pui tawh turin a ti nghal bawk.

A chhan a zawh lahin ka nu chuan ka rai huna min awl vek theih na'n tiin a lo chhang mai a, Rintea chuan min en chiang ta hle.

Rai emaw naute lam emaw sawi hi chuan kan awm dan a danglam ve ve ṭhin, a chhan chu kan inneih aṭang nupa nun kan la hmang dun lo miau alawm, chu chu kan pahnih duh dan a ni.

Ka nu reng reng pawh chu naute lam a sawi chhen chhan ka hre lo, zing dang a ang lo, kan pahnih inkar chu hria a ang ka ti mah zawk.

Kan la inhmgaih tawn lo tih chu kan chhungte ve vein an hre sa a, mahse khum lai zawlah nupa nun kan hmang ngai lo tih erawh tuma'n an hriat ka ring lo.

Vawi khat phei chu ka inthlahrun em avangin hman ka rawt tawp a, ka châk pawh a ni hran lo, amah ka khawngaih vang leh kan awm dan a dik lo nia ka hriat vang a ni.

Ani erawh chuan a lo duh lo nasa ngang mai, hmangaihna tel lova nupa nun hman chu a lo duh bik ṭhak lo. A chhan pawh ka hre lo, kan inneih zana ka sawi vang pawh kha a ni maithei a ni.

Hna thawh nei lo leh ina awm tawp ka nih avangin min ngaihtuah em em a, phone in kan inbe deuh chhen ṭhin. Ka fate pawh ni tin school an kal a, an unau chuan Rintea'n school-ah a thlah thlap zel.

Bawihpuia chuan bike khalh thiam ve a châk tlat a, a pate Amuana chu a tibuai thei khawp mai. Amuana lah chuan a lo phur kual ve mai zel bawk a, chu chuan a tikhalh thiam châk berin ka hria.

Tukṭhuan kan ei kham chuan eina dawhkan leh thleng vel ka seng fel nghal zung zung a, ka nu leh Amuana'n ka phal lo chung min tihfel pui bawk. Ka nu chuan ka pa chu len chhuahpui ah a sawm a, ka pa pawh chuan a lo remti ve mai.

Mak tak maiin Bawihpuia leh Bawihtei chuan ka nu zui chu an duh tlat reuh a, a awmzia pawh ka hre map lo. Inrinni tin kan leng chhuak ṭhin a, chu chu an hriat vek ka ring, mahse engati nge vawiin ber khera ka nu leh pa zui an tum chhan chu ka hre lo.

"Bawihpuia leh Bawihtei khu kan bula lo kal ve an duh lo tak tak em ni?" insiam mawlh mawlh pahin ka ti a, ka pasal Rintea chu bathroom aṭang a rawn chhuak chiah thung. Chutah kawr ha miah lo leh nghalin, en pawh ka en rei duh lo.

"Tukina kan chaw ei hma khan ka nu ka bia a, Bawihpuia leh Bawihtei len pui turin ka ti a, ani lah chuan lenpui a lo tum nasa mai. Vawiin chu kan pahnih tana ni special tak a ni a, kan pahnih tan chauh thil pawh ka order fel vek tawh" a tih chuan ka lo ngawi reng a, kan pahnih tana ni special a nihna ka hre ve miah lo.

"Engtia special in maw? Enge kan pahnih tan a special na?" hrethiam lo zet hian ka ti a, ani chu kamis dum dak hlarh kilh ṭha mawlh mawlhin a lo nui mai thung.

Ka lam chu a rawn pan a, a inchei tawh hi chuan hmeichhe dang tan mit lak loh ngaihna a awm lo.

"Vawiin hi kan inneih Anniversary vawi 1 a ni alawm, i theihnghilh ka ring reng a!" a rawn tih chuan chawp leh chilhin ka inthiam loh nghal, pasal nei ve si chutianga kan inneih Anniversary pawh ka hre lo chu mawl ka inti lutuk, a lakah chuan ka inthlahrung em em bawk.

"Awi ka tihpalh lutuk, ka lo mangnghilh chiang hle mai. Ka va mawl tak, hre tur ka ni asin maw le" ka ti thuai thuai a, ani chuan ka dara chelhin min nuih suk a, chutah dam zet hian

"A pawi lo, inthiam lo duh suh. Kei pawh ka phone-ah set thlap lo ila chuan ka hre tawh bik miah lo vang, a ho lutuk" a rawn ti a, mahni inthiam lo ru deuhin ka awm ang tih a hlauh vanga sawi ni mahse ka inthiam lo tho tho.

"Ka mawl ngawt mai, engmah ka lo ngaihtuah tawh lo hrim hrim. Min hrethiam dawn nia, a leh pekah chuan ka theihnghilh tawh miah lo vang" ka ṭawng zawh rualin a hmui chuan ka hmui a rawn khar nghal chat.

"Hmâna ka hmeichhia, ka ta chauh Nunpuii chiah chiah i ni leh tawh hi ka lawm" zawi sup hian a ti daih a, a thusawi leh ka thusawi chu inperhsan vet vet tak a ni.

In hnuaia kan chhuk thlak chuan Amuana leh a ṭhiante an lo awm a, mi dang chu an chhuak diam tawh a nih ka ring. Rintea chu pawn lamah a kal chhuak nghal a, kei chuan kan chhuah lawk tur thu Amuana chu ka hrilh leh hram a, kan haw har ka rin loh thu nen.

Hotel changkang zet pakhatah hian min hruai a, Mizoram ni mahse kan awmna chu ka lo hre ngai miah lo, Mizorama awm atan chuan a changkang mah mah bawk.

Kan table order man te chu a to dawn tih ka hre lawk sa, engkim chu Mizoram pawna Hotel ang mai a ni. Chuti teh lûain kan titi lo va, mahse kan inpawh thawkhat tawh viau chuan ka hria.

Zing lamah khan ka nu'n naute chungchang a sawi ri zeuh kha a ni a, kan mood a dik loh ka rin ruk nen boruak chu a pangai vek. Thil eng eng emaw ni ho tê te ka sawipui a, han sawipuia titi chiam tur a awm lo ve thlawt.

A ṭawng tam zawkah chuan ka ṭang char char a, kan inneih Anniversary-a han inbiak loh reng chu a dikin ka hre lo a ni.

Sawi tur hre tawh lova kan ngawih vang vang hnu chuan zai ka inhuam leh huam loh thu min zawt thut a, chhan pawh ka chhang nghal mai lo.

Zai lam chu ka ngaihtuah tawh lo hrim hrim, fanau enkawl tur ka nei a, chu bakah ka aw paw'n a zir tawh lo vang, zai ṭhan loh chuan zai mai mai chi ka ni tawh lo. A zawhna ka chhan hmain order a rawn thleng a, a tui hmelin a to hmel tak zet.

Kan awmna hmun lah chu a fâl ang reng si a, mi lah chu an la tam phian zui. Hotel ṭha ve tawk tak chu a ni tih ka hrethiam ta mai, a awmna a hlat hlat nen mi chi hrang hrangin an pan duh tlat.

Dar 1 velah min hawpui a, kan pahnih inkarah chuan inngainat tawnna nasa tak a awm tawh a ni. In kan thlen chuan ei rawng bawl nghal thuai thuai turin min ti a, dinner min ei chhuahpui a tum thu min hrilh leh bawk.

Ka rilru chhungril chu a hlim em em a, ka zuang tâwr tawr châk lutuk chu a hmuh loh laiin ka khi ṭhaw reng ringawt.

Dar 5 velah in aṭang dinner ei turin min chhuahpui a, Bawihpuia leh Bawihtei chu ka pate inah chaw an ei nghal a, lam haw nghal kan tum bawk.

Khawi hmun nge tih pawh ka hriat lohna ah chuan dinner kan ei dun a, kan thil ei a tui bawk nen kan boruak chu a ṭha chho hle. Chhun lam aṭang tawh kan inkar chu a ṭha hrim hrim, kan fate pawh kan hre chang lo hial.

Bawihpuia leh Bawihtei lam tura kan kal chuan riak turin ka nu leh pate'n min lo sawm a, aw nghal pawp ka tum chu ka ṭhulh leh, ka pasal chu rawn hmasak a ngai zawk tih ka hria. A lam hawia riah a duh leh duh loh thu ka zawh chuan

"Riak ila a ni mai alawm, in châk viau hlawmin ka hria" a lo ti mai a, lawm avangin ka nui ta ver ver.

Ka nu leh pa awm ve kur lo se chuan ka kuah ngei ang, rang zeta ka kuah ka ring.

Pasal ka neih hmaa ka fate nen kan room ni ṭhinah chuan kan mu khawm dal a, Rintea chuan thawnthu a sawi leh a, rei lovah kan fate chu an muhil ta thuai. A sir ve ve ah kan mu a, mahse chutiang chuan kan mu rei lo khawp.

Bawihpuia bulah Bawhtei chu a sawn a, min kuah chial hian a rawn mu zui nghal. Kei paw'n ka lo kuah let ve mai a, a taksaah chuan ka leng hah hah khawp mai.

Tlai khat chu ka nu a lo lang hlawl a, pasal ka neih tâk aṭang hian kan inah kan inhmu khât khawp mai. A lo leng duh lo pawh a ni lo, a hman lo ve hrim hrim zawk a ni.

Kan nupa inkar chu min sawipui a, kan thusawi chuan thil tam tak min ngaihtuah tir zui bawk. Kan nupa inkar chu ṭha lutuk lovin a hria a, Rintea ka siam beidawng mai ang tih a hlauh thu sawi nasa hle bawk, mahse ka nu chuan a hre dik lo.

Kei hi awihawm loh khawpin ka danglam tawh, ka pasal Rintea chu a beidawng ngai lo bawk ang, a chhan chu a hlawhtling tawh miau a ni.

Ka hre lo der char char a, thla tam kal ta khan a thil tum a hlawhtling tih ka hre tawh, mahse fiahna dang ka zawng leh hram a, tunah erawh eng fiahna mah ka mamawh tawh lo. Ka pasal hrilh chauh chu ka hmabak tawh, a thil tum a hlawhtling var var tih chu!

Ka nu haw hnu chuan hlim rilru zetin ei rawng ka bawl zawm a, darkar 1 hnu velah ka pasal hmel ka hmu zui nghal, mahse ka hmuh duh dan a ni hauh lo. A lam pan chuan ka phei thuai a, zawhna tam tak ka nei nghal.

"Engati nge? I accident em ni? Engati nge i chal te hi a thi? In insual em ni? Min hrilh vat teh!" hlauthawng fê chuan ka ti thuai thuai a, ka din hnaih tawh hle.

"Insual em lo ve, insual rual pawh ka ni tawh hleinem. Room-ah chho ila, accident satliah mai mai a ni e, hlauthawng suh" tiin in chung lamah a chho a, gas off in ka chho ve nghal.

"Accident satliah i ti maw!? I chal pawh a thi deuh nuai khâ, engati nge Bike-a i kal kher? I thi daih thei asin, fimkhur ve ta che" room-a kan awm hnu chuan ka ti tawn tawn a, min lo en rang hle.

"Engati nge min la ngaihtuah em em a? Ka ṭhat em hî, hliam na tak pawh ka nei lo. Hlauthawng suh Nunpui, ka chal thi vel hi chu mut titui tawk vel chauha na alawm a nih!" kiai suk hian a ti a, ka awm a la nuam thei teuh lo.

"Eng vangin nge ka ngaihtuah lo ang che? Ka pasal alawm i nih, min ngaihtuah ve miah lo em ni? Thi daih ta la engtin nge ka awm leh ang? I tel lo bawka kum tam tak awm tir leh min tum em ni?"

"Enge i sawi awmzia Nunpui? Vawiin tlai hi tlai dang i ang miah lo, thihna chungchang kha chu sawi suh, chuan ka tel lovin i awm dawn lo bawk" ka hnaih taka ding chung hian a ti a, chho melh ral chung chuan

"Ka hmangaih che Rinte, ka hmangaih tawh lutuk che avangin min thihsan ang tih ka hlau alawm, i tel lova nun leh kan fate enkawl ka zuam tawh lo" ka ti ta nge nge a, mak tak maiin ka rilru ipik zawng zawng a reh nghal vek.

"Lalpa le! Min hmangaih maw!? Dawt a ni em? Ka hlawhtling tihna em ni? Kei hi ka hlawhtling tawh tihna em ni? Sawi teh Nunpui, i kâ ngei aṭang khan min hmangaih thu leh ka hlawhtlin thu han sawi teh" a phili buai vek tawh a ni ber.

"Aw, chiang takin i hlawhtling tawh, kei hian ka thinlung zawng zawngin ka hmangaih tawh che a ni" ka ṭawng zawh rualin min rawn fawp tâwk a, awm sawn vatin min pawm nghal a, a hlim lutuk chuan ka ṭah a tichhuak zawk.

"Ka hmangaih che, tawp chin awm lovin ka hmangaih che. Min hmangaih leh hi ka phu lo, ka phu hlawl lo, mahse min hmangaih thu hriat tluka nuam hi a awm si lo"

"Ni lo, i phu lutuk zawk alawm, keimah hi ka luhlul rei mah mah zawk, ka thiam loh a ni. Chuan hun kal tawh avangin intibuai tawh lo vang, nang pawh inchhirna rilru nei lo la, ka hmangaih che avangin ka ngaidam vek tawh che" tia kun hniamin a hmuiah chuan ka fawp a, min chhan let ṭhat dan chu pui tak a ni.

"Zanin chu Honeymoon kan hmang ang, kan hmang chiang khawp ang" thaw chham lek leka kan infawh hnu chuan a rawn ti a, tlang taka a sawi hmiah mai chu a zahthlak ka ti lek lek.

"Hliam i neih kha aw, Honeymoon hman kher a ngai lo, chu bakah zan dangah pawh kan hmang thei tho alawm" tiin a darah chuan ka kut ka nghat a, min la chhuk tir duh der lo.

"A teuh lo, zanin ngeiah hian Honeymoon danglam tak kan hmang dun ang. Kum leh thla hial ka nghak tawh che a, chuan zanin chu ka che na viau bawk ang" a ṭawng tawp lamah chuan a nui deuh suk a, zah avangin ka lo ner nasa ngei mai.

Last Chapter 18

Zanriah kan ei lai te chuan ka awm dan a dik lo, ka chawhmeh suak te chu ka lai lutuk, Rintea chauh lo chuan a chhan an hre kher lo vang. Bawihpuia leh Bawihtei chu ka nu leh pa inkarah an ṭhu a, ka vei lamah Rintea a ṭhu a, ka ding lamah Amuana a ṭhu thung. Ka pasal awm dan chu ka hrethiam lo, keimah ang thovin a zam lawk ve nge ni!

A zam erawh ka ring hauh si lo, mahse engtin emaw ni tak chuan a awm ve chiang alawm, min hai theih loh ang bawkin ka hai thei bik lo. Ka ke chu a rawn tauh euh euh vel a, a lam ka hawi lah chuan min en lo hian a nui sun sun a, a awm dan chu a naupang chhia ngawih ngawih.

Chutah a Chapal bun lai chu a hlip a, ka ke chungah a ke a rawn nghat vel a nih chu! Mi dangin kan awm dan tak an hmu der si lo, insum hman lovin ka nui chhuak hak a, min va han en rang hlawm teh chiang em. Ka tih ngaihna hre lo chu ka khuh der vel a, ka bula mi lah chuan

"I lem sual deuh em ni? Fimkhur rawh, muangchang khan ei la" a rawn ti vel a, amah vanga chutianga awm chu ka ni reng si a, a hre lo der hmak.

Chaw kan ei kham chuan tihtur ang ang ka tifel zung zung a, Amuana pawh tihtur a neih avangin a leng chhuak zui nghal bawk. Ka hman veleh room-ah ka chho a, tûmah ka hmu lo.

Bathroom-ah lutin ka inbual a, zep lovah chuan ka phur ru ve tho. Ka mipa hmangaih leh ka pasal ni bawk nen inneih zana kan hman tâk loh nupa nun kan hmang dawn a, tu pawh ni se hmangaih te nen chuan an zamin an phur ru ve tho ang ka ring.

Inneih zan ang maiin ka kawr hnuai leh ka panty te chu ka thlang uluk a, ani erawh bathroom aṭanga ka chhuah hnuah pawh ka la hmu lo. Phelh mai awlsam zet thawmhnaw chu ka inbel a, mahse room kawngka ka thlen rualin thil hriat chhuah ka nei.

Engtin nge nupa nun chu kan hman ang a? Kan inkarah kan Bawihpuia leh Bawihtei an mu zan tin a, kan tan chuan hman ngaihna a awm lo, kan thawmah an harh vek a ni mai.

Rintea ber lah ka hmu mai bawk si lo, hman a ti lui tlat ang tih ka hlau leh ta ber zawk. Room aṭanga ka chhuah chuan dar 9 a pel tawh a, in hnuai lamah ka chhuk a, mahse ka fate emaw ka pasal hmel reng ka la hmu ta chuang lo cheu.

In chung lama chhovin kan room bul chiah Amuana room-ah chuan ka lut leh a, chutah chuan an lo awm ta ngei e! Ka pasal chuan kan fate chu khuma mu chungin thawnthu a lo hrilh mawlh mawlh a, Bawihpuia leh Bawihtei chu an muttui hmel tawh khawp mai.

Min hmuh rualin ka pasal chuan a hmui zawnah a kut a dah a, bengchheng lo tur chuan min duh hle. Dim zet hian Bawihpuia kuahna chu a dah sawn riai riai a, thawm dim takin a lo kal phei ta ṭhem ṭhem. Ka dinna bul a rawn thlen rualin kawngka chu a khar a, min pawm nghal nawlh.

"Lawk lawk lawk! Hei, kan ti leh thei ringawt lo, Bawihpuia leh Bawihtei te an awm ve dawn a nia, hman leh a chi loh" ka tih chuan a rawn nui a, room chhunga min pawm luh rualin kawngka a kalh nghal hmak.

"Ka ti tak tak a nia Rinte, zanin ber kherah chuan ti leh lo mai ang. Kan fate'n kan thawm an hre vek dawn asin, chuan engati nge Amuana room-ah khan i lo awmpui daih? Amuana a lo haw hunah a buaithlak mai mai, va pawm phei rawh" ka ti leh zung zung a, mi pawh chhang lovin khumah min bawh tlu nghal.

"Nang hi i nau room-a i fate riah tir i tum tak tak em ni? Zan laiah an rawn harh palh ang e aw, an harh vaih chuan kan buai thui mai mai zawk ang. Chu bakah Amuana pawh i hrilh lawk tawh reng reng em ni? I hrilh lai ka hre miah lo, va pawm phei rawh"

"Amuana chuan a hrethiam mai turah ngai ang, zanin chu kan pahnih chauhin kan mu ang" ti supin min fawp a, thu duh ve tak a nih avangin ka hnial rei duh ta bik chuang lo.

Ka kawr hak lai chu awlsam zet hian a phelh a, ka hmui leh ka taksa danga fawp kual reng chungin ani pawh a inphelh ve mial mial tho.

Min sawngbawl dan chuan nasa takin min tiphur zual a, kum tam tak hnuah chutiang chu ka pasal hnen aṭang ka tawng leh a ni a, insum buai ka tum tawh bik lo.

Hmangaih leh phur em emin a mi fawhna leh tawhna te chu ka lo chhang let ve mawlh mawlh a, chu chuan a chet a tiphur zual sauh.

Ka taksa chhunga a rawn luh lai te chuan nawmna tin rengin min hual vel ni maiin ka hria, a taksa ham tawn tawn leh thawm chhuah zeuh zeuh tih loh chu tih theih ka nei lo.

Min hrilh lawk ang ngeiin a che duhthaw em em a, inhmangaih taka nupa nun kan hman zawh meuh chuan zing dar 4 a lo hnai thuak tawh a, kan lo inmamawh tawn hle a ni tih chu hai theih a ni mawlh lo.

Hlim lutuk avangin a hmel chu ka en a, ka hlim lutuk chu ka ṭap thei mai dawnin ka hre hial zawk. A chala pem a neih chu dim zet hian ka chul sak neuh neuh a, ani paw'n min en chiang ngâng mai.

Ruak vekin kan la inkuah chial a, phurna nasa tak a la nei tih a taksa a danglam chak em avang chuan ka hre thei, mahse kei chu vanram tla fual tawng leh tur chuan ka chau tawh lutuk a ni.

"Muhil tawh ang" ka ti sep a, a âwmah chuan ka bei thlawp a, thlan nen la ni chuap mah ila tenna ka nei lo. Ani paw'n min ten lo tih hriat zet hian min kuah a, a thaw leh hawk hawk ṭhin bawk.

"Zantin Honeymoon kan hmang thei dawn lo erawh a pawi ta a nih hi!" a tih chuan ka nui sak a, ka mit ka chhing zui ta vang vang.

Ka taksa za mer mer avang chuan ka harh a, meng lo mah ila min khawih mektu chu ka pasal a ni tih ka hre chiang khawp. Zan lama kan mut har em avangin ka mut chu a la chhuak ru em em thung a, zinga ei rawng bawl tura thawh pawh chu ka peih lo rum rum.

Ka thawha ei rawng ka bawl erawh a ngai ngei ang, chu chu mo tihtur leh ka pasal te ina ka lawi luh chhan a ni. Inletin ka pasal chu ka hnung chhawn a, ka awm dan ka thlak rualin ka hnute chu a rawn hup nghal chat.

Ka dul lamah ka dah thlak sak a, mahse a chhuk thla rei lo ngei mai. Kan khum bula tukverh aṭang chuan ni eng a rawn lut a, thawh a hun viau tawh chuan ka hria, chuti lo zawng thawh ka hai palh mai ang.

A kut chu la kangin ka fawp zeuh a, khum aṭang chuan ruak velin ka tho zui nghal. Ka thawh tirh chuan ka zak deuh thut a, mahse a hmuh vek tawh avangin ka zak buai duh ta lo law law. Bathroom-a ka luh rualin a rawn lut ve nghal a, meng phar nasa tak ka ni.

"Enge i lo tih ve ringawt dawn? Chhuak teh, ka intifai duh a nia, kawngka kha lo va hawng tawh bawk rawh, kan fate pawh an lo kal thut duh ang" tiin bathroom aṭanga chhuak tur chuan ka nam a, mahse a chhuak duh der lo.

"Tun ang hunah an tho ngai lo, chuan ka tihtur hi hria la chu kawngka hawng turin min ti hauh lo vang" tiin a che vut a, min fawp leh ta bawrh bawrh.

Angel ang maiin nupa nun hmang chuan kan thlawk dun delh delh a, awlsam taka ka inpeih thuai zel chu kei ngei paw'n mak ka ti, ka rilru lamin hnial ve ṭhin mahse ka taksa erawh chu a bu ang thlap a ni thung.

Chau hnepa kan awm hnu chuan kan inbual a, ama'n min bual a ni ber. Bathroom aṭanga kan chhuah chuan zing dar 6 leh a chanve a lo ri tawh a, ei rawng bawl chu a hun thawkhat tawh viau bawk.

"Pa, zingah khan pate Amuana bulah ka lo mu daih a, nangmah emaw ka ti ṭep a, mahse Bawihtei pawh a mu ve tho" tukṭhuan ei laiin Bawihpuia chuan a rawn ti hlawl a, ka nu leh pa chuan min lo en rang khawp mai.

"Nizanah khan kan mu duh in ti tlat alawm, Bawihtei nen khan mut in châk a, in mutui em?" Rintea chuan a lo ti vat a, kan nupa inkara thil thleng chu thleng ve tur reng ni mahse sawi lan chi a ni der si lo.

"Mutui lutuk" Bawihpuia chuan a lo ti ve mai a, engmah pawh kan sawi chhunzawm ta lo, sawi zel kha a fuh lo tlat.

Chumi ni aṭang chuan kan nupa inkar chu a nghet leh zual a, hmangaihna avangin kan inring tawn a, kan inngaidam tawn a ni ber.

Chhun lamah a Studio-ah a kal ni tin a, Bawihpuia leh Bawihtei te'n school an kal ziah bawk a, kei leh ka nu tih loh mi dang chu an chhuak vek zel.

Ni khat chu MHIP lam programme vangin ka nu a chhuak a, mahni chauha awm ka neih ngai loh avangin nuam ka ti lo hle.

Chhun dar 12 velah ka pasal hnen aṭang phone call ka dawng a, keimahin ka awm tih a hriat rualin a lo haw nghal tur thu a sawi a, phal lo eng ang mah ila a rawn haw ngei dawn tih ka chiang.

In a lo thlen chuan a inbual nghal a, Studio lama let leh tum tawh lo ang maiin a awm. A inbual zawh chuan awm hmun thawmhnaw hi a inbel a, a hna lama let a tum leh tum loh thu ka zawt ta nge nge.

Ani chuan zanah chauh kal a tum tawh thuin min chhang a, min awmpui tura a lo haw vang vang chu ka lawm ru em em bawk. Kan room-ah kan awm dun a, kan titi a, ka thil sawi apiang chu a ngainat zawng pawh ni lo mahse min sawipui ve zel a, chu chu amah ka hmangaih zual phahna a ni.

Nupa nun chu am takin kan hmang dun leh a, chuta ṭang chuan chhun lamah deuh char char kan hmang ṭhin ta zawk. Zana han hman te chu nei ve fô mah ila fate an awm ve kur tawh avangin kan hmang tam lo, khum khatah kan mu bawk sia a rem teh chiam lo a ni.

Tichuan ni leh thlate chu a liam zung zung a, chu kum chu ka nuna ka hlim ber kum a nih ka ring. Kum tam tak chhung chu harsatna, beidawnna leh manganna ka lo tawk tawh ngei mai, mahse hmangaihna avangin engkim chu a danglam tawh.

Pasal ka nei a, ka pasal chu ka hmangaih em em bawk a, ani paw'n ka hmangaih ang chiahin min hmangaih tih ka hre bawk. Fa duhawm tak tak amah chhun em em pahnih kan nei leh ta zel a, chungte chuan ka hlimna a belhchhah a ni.

Ber thla kan kai tawh avangin khua chu a vawt deuh seng seng a, chhuah vah dawn paw'n kawrlum hak zel a ngai tawh. Tlai khat Studio aṭanga ka pasal lo haw chu a ngawichawi zual em em a, mi pawh a be hmasa lo.

Ka zawhna zawh apiang tawi fel takin min chhang mai a, ka hrethiam lo hle. Ka ei rawng bawl lai dahin kan room-ah chuan ka chho a, ka pasal chu a lo muhil fel der. Room leh lamah Amuana leh kan fate an infiam a, an bengchhen tehreng nen a muhil thei chu a mak zawk.

"Vawiin chu i va chau awm em em ve le, inbual phawt la, chuan i mu ṭha leh zawk dawn nia" tiin rizai chu ka sin ṭhat tir a, a muhil tawh a ni ngei ang min chhang lo hrim hrim. A hmai leh a chal vel chu ka dek a, hlauhthawnna nasa lutukin ka khat nghal.

"Rinte! Hei! I dam lo em ni? I pang hi a sa lutuk, engati nge a tirah khan min hrilh loh?" tiin be vak vak mah ila thawm a rawn chhuah eih lo, chu chuan ka hlauhthawnna a ti zual, ka pasal chu a thi mai ang tih ka hlau ngawih ngawih.

"Harh teh, min en teh, i awm dan hian ka awm a ti nuam lo a nia, LALRINAWM!" mangang lutuk chuan ka ti a, ka ṭap titih der tawh. Ka sawi leh vak vak chuan a rawn meng ṭawk ṭawk a, a awm dan chu ka duh hlawl lo.

"Engati nge u Pui? Engati nge i au vak a? Ehê, ka u chu le! Engati nge ka u hi?" kan room-a a lo luh rualin Amuana chuan a rawn ti a, kei chuan ka chhang thei tawh lo, ka tawt vek ni berin ka hria.

"Ka u awm dan hi a dik miah lo, Hospital-ah hruai vat teh ang" tiin Rintea chu a kuah tho a, amah aia a len fê zawk avangin a kuah ṭha hlei thei lo.

Rintea lah a lo zawi vek tawh bawk si, Amuana chuan rit tih hmel zet hian a pua a, in hnuai kan thlen chuan ka nu a lo buai phili nghal vek. Rintea tih loh motor khalh thiam ber ka pa chu a hna lamah a la kal a, chu chu kan buaina pakhat a ni.

Amuana chuan a Bike-a phur tawp chu a duh a, mahse ka nu chuan Taxi koh a ṭha zawk a tih tlat avangin Taxi chu kan hmang a, Hospital-ah chuan kan vai kal ta vek. In lam pawh kan ngaihtuah hman si se tawh lo, Rintea chuan min thihsan mai ang tih ka hlau ber a ni.

Doctor te chuan an endik zung zung a, damdawi hmangin an chiu nghal bawk. Ka pasal, ka mipa hmangaih Rintea chu mitthi ang maiin a awm a, chet pawh a che lo, a hmel te chu mitthi ruang Postmortem tur ang maiin a dâng vek tawh.

Doctor-i'n a taksa chauh lutuk avanga chutianga awm chu a ni tih min hrilh chuan ka thaw a veng huai a, thihpui theih khawp natna dang a nei ang tih chu ka thil hlauh ber a ni.

Darkar 1 hnu velah ka pasal chu a rawn harh a, lawm lutuk avang leh amah ngaihtuah lutuk avangin ka lo hau nghal bawrh bawrh. Chutiang taka chau tura hnathawh chu ka phal tawh lo, a taksa chu ngai pawimawh hmasa ber se ka duh.

Kan in lam pana kan haw laite chuan a âwmah ka bei chial a, a thi ang tih ka hlauh lutuk avangin ka fate tak ngial pawh ka ngaihtuah hman tawh lo. Min ṭawng thlamuan char char a, kei erawh ka thla a la muang famkim thei lo thung.

Ka pa paw'n kan chanchin a hriat chuan pangai takin a zilh a, zan meng rei lutuk lo turin a ti bawk. Ka pa thusawi chu a dik chiah, zan a meng rei ṭhin lutuk leh a thawk rim lutuk chu a chauh chhan ber a ni.

Zanah chuan ka bulah a rawn mu phei leh a, kan fate tihharh chu a hlauh hmel hle bawk. Kei lah chuan nupui ka nih angin ka pasal chu ka thlahlel em em zel a, dam kawr tih hre reng mah ila a taksa si lova mut chu harsa ka ti tawh hle a ni.

Zan a rei tak tak hmain a taksa enkawl uluk zual turin ka ti a, a ṭul chuan hna zawn mai pawh ka pawisak loh thu ka sawi nghe nghe. Hna zawn ka tum tih a hriat chuan a phal loh thu a chhak chhuak hmasa ber a, a phal loh dan chu pui tak a ni.

Hna ka thawh luih vaih chuan ka hna thawhna hmuna min zui zel a tum thu a sawi a, chu chuan min tinui ta nge nge, ani erawh a nui ve hauh lo.

Kar a liam leh meuh chuan kei pawh a ngaite in inah ka awm leh tlawng a, Rintea pawh Studio-a kal thei tur khawpin a taksa a dam ṭha leh tawh, mahse a hma ai chuan a inenkawl uluk ta khawp mai.

Zan lama a chhuah changin dar 10 hnu lamah a rawn haw ngai lo va, mut hmuna thil sawi dun nen dar 11 leh a chanve velah hi chuan ka mu tlangpui ṭhin.

A hmate kha chuan dar 1 pelhah te rawn haw chang a nei fo va, kha khan a taksaah hriat loh karin hna a lo thawk reng tih kan hre si lo a nih kha!

"Engati nge Puii? I chaw ei a va tui loh hmel ve, nge ei sual i nei zawk?" ka nu chuan tukṭhuan kan ei laiin a rawn ti a, mi dang chuan ei mawlh mawlh mahse ka ei ve thei der lo, eng chawhmeh ber nge ka ei châk loh chhan chu ka hre lo bawk.

"Nia, ka awm dan hi a dik chiah lo, ka luak a chhuak deuh ut utin ka hria" tiin chaw chu ka bar lui a, ka chaw ei a va han tui lo chiang teh kher em.

Bai chu ka hawp lui leh ngat a, rang zetin ka thlengah ka chhak chhuak leh nghal. Ka chet dan chu a ṭhing ka ti, mahse ka insum hman tawh lo a ni. Bai khan ka luak a tichhuak a, luak chhuak zek zekin min awm tir tlat a ni.

"Min hrethiam teh u" ka ṭhutna aṭang chuan ka tho thuai a, kut pawh si lovin choka bul lawka bathroom-ah chuan ka tlan lut zui nghal.

Ka uak vak vak a, ka thawm pawh chu ka dim peih tawh lo. Uak vak vak e ti lo chuan ka luak chhuah lah chu a tlem em em lawi a, thil tui hnang vel bak ka luak chhuak thei hauh lo.

Ka luak chhuak zualpui a reh meuh chuan ka chau ve hnawk thei, ka lungphu leh ka taksa awm dan chu a la dik chiah lo a ni.

"I ṭha meuh maw?" ka hnung lam aṭang ka pasal aw ngei hian a rawn ti a, chhan pawh ka chhang peih lo.

Ani pawh chuan min biak zawm ta lem lo va, bathroom aṭang min kuah chhuak ta ringawt.

"Puii, i ṭha deuh tawh em? Nang hi nau i pai a ni lo maw? I awm dan vel hi nau pai ṭan tir i ang ka ti, mahse i taksa chak loh vang pawh a ni thei tho bawk" min hmuh rualin ka nu chuan a rawn ti ta mai, thil ka hre chhuak nghal zawk.

"Ka hre lo ka nu, mahse ka period lohna chin pawh ka hre tawh lo, thla hmasa pawh khan ka nei lovin ka hria" ka tih chuan ka nu chu phur zet hian a ṭhutna aṭang a tho thuai a, chutah ka pa chuan

"In sawi hun lo em mai, chaw ei lai lai a! Chaw ei khamah sawi zawk rawh u, chaw ei in titui lo zo vek palh ang e" a rawn ti a, ka nu chuan a chaw bar lohna lamin a darah a chum nghal zawt.

"Mawl thei ê, i mo hian i tupa tur emaw tunu tur emaw a pai maithei asin, ngaihtuah tawi" tiin ka nu chuan ka lam a rawn pan zawm zat a, ka bula ka pasal ding reng hmel ka en chhoh chuan mak tih hmel zet hian min lo en a, ka nu thusawi chu a hriatthiam bik loh hmel khawp.

"Han insiam rawh u, in nupa khan Hospital-ah va kal ula, Test Kit lei tur awm tho mahse Hospital-ah ngei va chian zawk teh u. Chanchin min lo hrilh thuai ula, i lo rai lo a nih pawhin min hrilh hreh reng reng suh u" tiin ka nu chuan min nawr kal dat dat a, Rintea nen chuan kan room lamah kan chho ve mai bawk.

Room chhunga kan luh chuan ka rilru chhungril chu a hlim em em a, a chhan pawh rai ni tlata inhriatna ka nei a ni. Ka pasal erawh ngawi rengin a insiam mual mual a, lawmna a nei pawhin ka hre lo.

Hospital kan thlen chuan kut inkai rialin kan kal dun a, mi pawh chuan min en duh hlawm hle. Min en zui vang vang hlawm mahse pawi tihna ka nei lo, kan nupa chuan kan inhmangaih ve a ni mai a, an sawi theih a awmin ka hre lo a ni.

Doctor chuan Test Kit pathum min pe a, a tih dan tur dika ka in test fel thlap hnu chuan ka result ka hre ta, hlim avangin ka khi ver ver a, ka pasal chu a fa ka pai thu ka hrilh châk zek zek tawh.

"Eng...Enge re...result Doctor?" ka pasal aw chu a chiang nial lo em em a, mahse a awm dan chu ka dem hran lo. A tan chuan a vawi khatna a ni dawn, a chhan chu Bawihpuia leh Bawihtei ka pai thu kha a hre lo tlat.

"I nupui hi a rai e, naute duhawm tak nei turin duhsakna ka hlan bawk a che u" hriat nuam zet hian Doctor chuan a ti a, a nui sâng bawk.

Rintea chu a rawn che thut a, khawiah nge kan awm tih pawh ngaihtuah lovin min fawp vawng vawng a nih chu! Kei lah chuan kan awmna ka hre kar si, zak chung chungin ka lo fawp let ve a, Doctor chu a lo nui ver ver ringawt. Chutah ka rin loh lutukin ka kawr hak lai chu a hlim thut a, dul langin ka awm ta kûng mai.

"Ka fapa, lo chhuak thuai ang che aw, apa hian ka hmu châk tawh teh mai che a nia" ka pasal awm dan leh ṭawng dan vel avang chuan ka nui chhuak hak a, kan bula Doctor pawh chu a bang bik chuang lo.

"Engati nge ka fapa i tih ringawt a? Mipa nge hmeichhia a nih dawn pawh i hre ngawt em ni? Tawp tawpa che, hmeichhia a ni daih mai ang?" tih pahin ka kawr a hlim chhoh chu ka pawt thla a, a rawn ding ngil ve nghal mai.

"Mipa a ni dawn tih ka chiang, mipa ni ngei turin ka che alawm, a ni lo thei lo" a rawn ti a nih chu!

"LALRINAWM! Mawla, mi dang an awm ve reng hî" ka zak lutuk chu ka sen vekin ka hria, Doctor lah chu a lo nui ṭiah ṭiah bawk si, hlim viau tur ka nih laiin ka zak leh ta viau zawk.

"Nangma'n zawhna min zawt a nih khâ, min zawt lo la chuan ka sawi kher nâng" mi chhan let dan lah chu a la thiam em em zui.

"Haw ang, mawl leh lutuk mai" ti hmukin room aṭang chuan ka chhuak tau nghawng nghawng a, kan haw lam thleng chuan ka ṭawng duh ṭhak lo, ka zak ve em a tin ni!

Chu ni, ka rai tih kan hriat ni aṭang chuan hlimna chhar sen loh kan chhungkuaah a rawn tla ni maiin ka hria, ka nu leh ka pa pawh hming phuah an inchuh nasat lutuk avangin an intithiam lo fô.

Ka pasal lah chu ka rai hma ai aiin a insum thei lo zual a, chhan nei rana inbual dun pawh kan nei ngun thei khawp. Kei taka pawh chuan ka lo mamawh ve zel a, ka pasal chuan amah thlahlel lo thei lovin min siam thiam tlat a ni. Tin, ka eitur thleng chuan min ngaihtuah em em a, a chhan ka zawh lahin

"Bawihpuia leh Bawihtei i pai laia ka tih loh zawng zawng kha tih ka duh alawm, ka ngaihsakna leh enkawlna bak hi dawng lo la ka duh. Ka nu leh pate pawh hian duat vak lo che se la ka ti, keimah chiah hian ka duat duh che" a ti vel duah kher zel a, ka pasal chu ka hmangaih thlawt a ni.

Christmas kan nang chho a, khua a vawt bawk nen chet hrehawm tih chang chu ka nei a, ka rai len lai vel tak a nih avangin chet chu harsa ka ti chho ṭan a ni.

Ka pasal chuan engkimah min awl a, ka chhuahna apiangah min zui hna hna zel. Doctor-i'n rai laia nupa nun hman a theih vek thu a lo sawi kher kher chu a pawi ta a ni, ka duh aiin kan hmang zing mah mah.

Kum thar April thla kan chuangkai a, ka nau neih thla a ni bawk. Inring reng rengin kan awm ṭhap a, Bawihpuia leh Bawihtei pawh an phur ve tawh khawp mai.

Doctor te'n ka neih ni tura an ruat hmain nau chu ka vei ta tlat mai, ka pasal phili buai vel lutuk chuan min tinui nasa ngang a ni.

Nau vei zawng zawngah ka la hlim ber ang, ka pasal chuan chutiang mizia chu a nei tih ka hriat phah nghe nghe bawk.

"Ka fapa tê reuh te, hmelṭha te, anu chhun te" tiin ka pasal chuan kan fapa la sen ve tak chu a chhaih vel a, tun ṭuma kan fapa chuan min chhun ve tak tak, mahse pianah chuan a pa a chhun dawn tih ka chiang.

"Kha le, kan inneih hmaa en min dil kha a nih hi!" tiin lehkhabu chu khumah ka dah a, kan fapa chu ka pawm a, ani paw'n lehkhabu chu a keu zui nghal.

Lehkhabu a en zawh chuan rilru nat hmel zet hian min en vawng vawng a, a mitmengah chuan inchhirna hlir a khat bawk. Ka kut chu a rawn hum a, hmangaih takin a tuai neuh neuh bawk.

"Bawihpuia leh Bawihtei pian laia ka awm loh avang leh innghahna tur rin tlak mipa i mamawh laia i bula ka awm loh avangin min ngaidam hram ang che aw Nunpui, ka chanchin i lo ziah dan hi a dik vek a, i lakah hian ka inthiam lo ngawih ngawih bawk"

"Inthiam lo tawh suh, ti khan i hmuh duh chu ka hmuh tawh che a, i rilru a na dawn tih pawh ka hre lawk vek alawm, mahse tun aṭang chuan i hmu leh tawh lo vang, ka hal ral vek tawh dawn a ni" tiin lehkhabu chu ka laksak a, ani chuan nuam lo tih hmel zet hian min la en reng.

"Ka pasal i ni a, ka mipa hmangaih awm chhun i ni bawk a, ka fate pa i ni leh zel te hi ka lawm. Ka fate pa i nih vang liau liau pawh hian ka hmangaih che a, nang tluka hmangaih mipa hi neih ka duh tawh lo. A chhan chu ka thinlung neitu i ni a, fa duhawm tak tak min petu i ni a, ka fate pa i ni bawk"

"Ka va han hmangaih tak che em Nunpui, ka dam chhungin ka hmangaih reng tawh ang che" tiin ka hmuiah chuan a fawp vang vang a, insawn thlain ka fapa hnek loh lam ka hnute chu a hne ve ringawt a nih chu!

"Ti lawk ang" tiin khum aṭang chuan a tho vut a, room kawngka va kalh ṭha sawk sawkin khum lam chu a rawn pan a, ka hnute hne mek tu kan fapa chu khumah a sawn thla hmak.

"Hei! Kan fapa awm lai hi chuan a chi miah loh" ka tih chuan a lo khi vur vur a, a thawmhnaw chu a phelh sawk sawk a, a Boxer a phelh chiah chu sawi tur reng ka hre tawh lo.

"Naute mai a la ni a, min hmu eng ang mahse engmah a la hrethiam tak tak lo" tiin min khumah chuan min bawh tlu a, ka pasal min tawhna vel chuan min tiphur ve leh ta thuai.

A TAWP TA