𝐏𝐑𝐎𝐓𝐄𝐂𝐓𝐈𝐕𝐄 𝐇𝐔𝐒𝐁𝐀𝐍𝐃 (𝐂𝐡𝐚𝐩𝐭𝐞𝐫 𝟏 - 𝟏𝟎) 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

PROTECTIVE HUSBAND

By

Havali Adam

28 March 2022

Chapter 1

Nipui chawhnu lam her a ni a, Winter season chu hnaih vet vet tawh tak kan ni! Ka nu'n ka hming a phuah chhan Daisy pangpar pawh kan in kawtah a par vul leh chûk tawh hlawm a, ka pangpar ngainat ber a nih bakah kan pangpar neih zinga mawi ber a ni bawk.

Ni lo, a mawi ber kher lo, ka mitah leh ka nu mitah chauh a mawi ber. Ka unau dangte chuan pangpar an ngaina ve hauh lo, ka pa phei chuan a sawi pawh a sawi buai peih lo hial zawk. Ka nu nen erawh kan ngainat ber chu pangpar a nih avangin kan enkawl taima hle a, kan pahnih tih lo chuan tûma'n buaipui enah an en lo.

Tulips te, Daffodil te, Lily par te, Bluebell leh Allium par te chu kan in bul vela kan pangpar chin dangte an ni a, Rose pawh kan in kawngka bul hnaih takah a awm bawk. Ni chu sa eng siar siar mahse boruak erawh a vawt ru deuh ruih a, Winter hmel pawh kan hmuh thuai ka ring.

"Daisy, khatah khan i lo awm leh reng tawh a ni maw? Lo lut teh, i pate pawh an lo haw ṭep ang, an eitur i siam dun teh ang" kan in kawngka bula ding chung hian ka nu chuan min lo ko a, kei pawh chu ka phei ve nghal mai.

In chhunga ka luh rualin eitur rimtui tak rim chuan ka hnar a verh nghal zat a, dawhkan lam chu ka pan a, Grilled cheese sandwich leh Pasta Salad chu a lo inchhawp thluah.

Ka ei châk em avang chuan ka tem zeuh a, khawvela mihring zawng zawng hian ka nu thil siam chu ei sei tui lo an ti bik hauh lo vang, chutiang khawpa tui chu a ni. Eitur ber lah chu a inchhawp hnem ang reng si a, mi khual kan nei dawn te pawh a ang alawm le.

Ka hmaa awm ei châkawm zêt zet te chu ka en tlawk tlawk a, ka tem leh châk lutuk chu ka chil ka lêm ka lem mai. Chokaa ka nu hmel a rawn inlan mai loh avang chuan ei ṭhen leh tumin ka kut chu ka chet a, chutih lai tak chuan ka nu chu a rawn lang ta hlawl mai.

"Daisy, lo ei miah suh, i pa leh i unaute an lo thleng thuai dawn a nia, in leng kan nei dawn leh nghal. A thu hrimah i kut te kha i sil fai tawh reng reng em? Phul leh pangpar rim nen chuan i thil ei tum kha a inhmeh miah lo vang" ka nu chuan a lo ti a, ka kut chu ka la sawn rang kher mai.

"Ka ei châk ê nu, pakhat chiah hi ka lo ei chhin, chuan ka pate lo haw hmain ka ei zo hman ang tih ka tiam a che. Ka kut pawh ka sil dawn, eitur siam belh tur pawh ka pui vek ang che" tiin ka kut chu ka sil thuai thuai a, a phal leh phal loh pawh zawt tawh lovin Grilled cheese sandwich chu ka ei nghal hmak.

"I thil ei zawhah khan chhuara Fresh Juice bawm kha la la, thlit chhuah inring rengin lo awm ang che" a tih lai chuan kan in kawta motor ding thawm kan hre nghal a, kawngkaa ka pa lo lut ka hmuh chuan ka kal phei nghal.

"Pa, vawiin chu ka nu hi eitur ka lo siampui a nia aw, chuvangin zanin chu khawpui lamah min len chhuah pui la" ka thil ken lai ei zo thuai thuaiin ka lo ti nghal zaih a, ka pa chuan min nuih suk ringawt.

A hnungah chuan ka unaupa te'n an lo zui lut a, hmel hriat miah lo te pawh ka hmu bawk. A ṭhen chu kum upa tawh tih hriat reng reng hi an ni hlawm a, ṭhenkhat erawh la tlangval ṭha veh vawh tak an ni.

An vai chuan mi sawm chuang an ni a, kan in lengte chu tûmah ka hre lo. Ka pa Company-a thawk te pawh an ni maithei, an inbiak dan vel aṭang chuan an inpawh hmel hlawm hle bawk. Ka nu chuan min lo ko hrang vat a, eitur buaipuiin kan che dun ta malh malh.

"Fresh Juice kha no ah lo thli chhuak rawh le, an vai sawn eng zat nge an nih chhiar la, an indaih tur khan i thli dawn nia" tiin ka nu chuan eitur siam mawlh mawlh pahin min bia a, kei pawh a thusawi ang chuan ka ti ve mai.

"Nu, ka pa kha nichin khan ka bia a, zanin chu khawpuiah va leng ve ang û? Min dil sak ve la, tun hnai hi khawpuiah kan kal khât teh a nia aw, anni chu Company-ah an kal ni tin a, kei erawh ina lo awm tawp a ni mai, a hneawm ve ê"

"Khatiang sawi hun pawh a ni rih lo, i thil tih lai kha uluk takin ti phawt rawh. Saw i pa sawn min lo signal a nia, i thlit zawh veleh lo phei ve nghal ang che" eitur keng chungin ka nu chu ka pate ṭhut khawmna lamah chuan a phei a, nupui ṭha leh pasal te tana inpe zo hi chu a ni ve chiang a ni.

Glass noa Juice ka thlit chhuah zawh chuan an awmna lamah ka phei ve nghal a, dawhkana ka dah tur chu min lo kian sap sap bawk. An thil sawi tak hre lo mah ila an nui ho dar dar a, an hlim tlang hle tih chu ka hria. Choka lamah chuan ka phei a, Juice leh Grilled cheese sandwich chu ka ei in nghal.

Tui ti takin ka ei mial mial a, Fridge chhunga eitur awm chu ka en dêk dek a, French Fries a lo la awm ṭeuh mai. La chhuakin a bula bawnghnute bawm chu ka la chhuak tel bawk a, hmeichhia mah ni ila ei hi chu thei ve vet vet tak ka ni.

"Daisy, Pasta Salad kha lo lak belh teh, chuan Juice pawh kha aw, a bur khan lo chhawp tawp mai rawh, an tan pawh hian a awlsam zawk ang" ṭhut khawmna aṭang ka nu chuan a rawn ti lawng lawng a, a sawi ang chuan ka che chhuak nghal vat.

Ṭhut khawmna aṭanga ka let leh hnu chuan ka thil ei lai chu ka ei zawm leh mawlh mawlh a, ka nu siam a nih avang chuan a tui ka ti ngei mai, chu tluka Lunch tui chu a awmin ka hre lo.

Kan in leng zinga tlangval pakhat chuan ka thil ei lai chu min en duh hle a, tlangval ka ti ve ringawt a, nupui a neih tawh leh tawh loh ka hre miah lo, mahse nei hmel a la pu lovin ka hria a ni.

Ka hmu lo der ve hmak a, Salad ei pah te chuan min lo thlir reng a, kei lah chuan zah emaw thil ei tlem emaw ka tum hauh lo thung. An haw dawn chuan ka bulah a lo phei a, mi dangho chu pawnah an chhuak vel mek.

"Hi, Viktor Parker ka nia, Viktor tiin min ko mai dawn nia, i duhawm hle mai" tiin a kut chu ka lamah a lo phar a, kei pawh chuan ka lo chibai ve mai.

"Ka lawm e Mr Parker" nui seihin ka ti a, a hmel chuan ṭhat dan riau a nei a ni.

"Parker ni lovin Viktor zawk aw, mi tam zawk chuan Parker min ti tho mahse nang chuan Viktor min ti thei ang" ngainatawm zeta nui chung hian a ti a, ka kut la sawn riai riai chung chuan

"Aw, ka lo theihnghilh hman a va ni mai awm ve Viktor" ka ti a, chutiang chuan mipa dang bulah ka la awm ngai hauh lo, mahse ani hi chuan mi tihdanglam theih dan riau a nei te pawh a ni ang.

"A ni mahna, mahse tunah chuan min koh dan tur pawh i thiam tawh alawm, thil thiam thei tak leh hmeichhe hmelṭha tak i ni. I hming min hrilh thei ang em? I pa leh i unaute hi chu Company lam vel aṭang ka hmu tawh ngei a, nang erawh ka la hmu ngai hauh lo che"

"Nia, Company-ah ka kal ve ngai lo va, chu bakah ka pa hian khawpui vela tla tam lo tur hian min duh deuh a, chu vang pawh chu a ni mahna min hmuh ngai loh. Daisy Taylor ka ni e, kan in kawta Daisy pangpar aṭang hian ka hming an phuah chhan chu i hriat mai ka ring"

"Hming mawi tak zawng a ni e, chuan Daisy pangpar ang chiahin i rimtui bawk. Ka kal phawt ang e, engtik ni ah emaw ni chuan kan la inhmu leh thei ang ti raw?"

"Theih loh thu pawh a awm hleinem, kan inhmuh fuh leh fuh loh a nih mah zawk ang chu!" ka chhan dan avang chuan a kiai suk a, ṭawng tawh lovin kan in aṭang chuan a kal chhuak zui nghal.

Ka pa lo lut chu ka hmu a, mahse an room lamah a lut nghal daih. Ka nu min kohna pawh ngaihsak lovin ka pa awmna lamah chuan ka kal a, khawpuia kal chu dil ṭhat leh ka duh a ni. Room chhung ka luh chuan a thawmhnaw a lo hlip vel mek a, Company lama let a tum tawh lo a ni ngei ang.

Ngai zet hian a hnung aṭang chuan ka kuah a, ani erawh a chet ngaiin a che mial mial. Ka pa chu ka ngai ve chiang alawm, ka tan hun pawh a nei ngai mang lo va, hna ringawt a buaipui ṭhin. Mipa a nihna chu ka hrethiam, mahse a fanu ka ni a, tlem tala min ngaihsak chu ka phut ve a ni.

"Pa, nang chu min duat lo thei bik em mai. Zanin chu khawpuiah min len chhuah pui leh tawh la, kan leng khât leh tawh teh mai a nia aw, chu bakah Movie en châk deuh ka nei bawk" tiin ka pa chu ka en a, ka kuah reng duh ta lo bawk.

"Bawnghnute i in leh tawh em ni?" mi pawh en miah lo hian a rawn ti daih a nih chu! Ka pa tak hi chu âw, ka nu tan pawh hian titi pui hi a har thei ngawt ang.

"Aw in leh tawh e, chuan ka dilna che kha ngai pawimawh ve deuh la, phal hram teh" ka ti leh ngat a, a rawn nui mai a, a nuih tawh hi chuan a mood a pangai thawkhat tih ka hria.

"I hmelṭha si, nui ziah rawh pa, ka nu nen hian in lo innei lo vang tih ka hlau, ka piang awm tawp si lo a! Chuan Exercise lak i ngai leh tawh a nih hî, zing tin ka lak pui ang che" ka ti leh nghal zawt zawt.

"Khawpuia len i châk avangin min tlawn tihna em ni?" tiin min en a, a hmelah chuan insum mahse a nuih a za tih a hriat khawp.

"Tlawn deuh reuh, tlawn chiah lo. Taylor thlah ka nih hî ka pa, i fanu ka nihna ang hian min hrethiam ve em em teh. Ka rualpui te chu duh duhin an leng kual a, an zin kual ṭhin zawk asin"

"Weekend-ah khawpui chu kan kal ziah alawm, engati nge tuna taka kal i rawt? Mi hmuh tum i nei em ni?"

"Nei teuh lo mai, tu nge kei hian hmu se min tih a? Ka kal châk chhan chu Movie en te, kan chhungkuaa Dinner ei te, inkawm hlim te ka châk alawm, unaunu ka nei ve bawk si lo"

"Chuan unaunu neih chu i châk ta viau a!?" ka zawhna leh ka dilna tak pawh chhang lovin zawhna min zawt let zel a, chu chu ka pa zia dik tak a ni.

"Ka châk em em pawh a ni hran lo, unaunu neih ai chuan nangmah hian min duat zawk rawh. Company lamah ringawt ka u te nen in kal a, i duat ka thlahlel ve alawm" tiin ka kuah leh a, a taksa chu a lum nuam ngei mai.

"Aw le, zanin chu mi tlawn i thiam em avang leh bawnghnute i heh em avangin Dinner kan ei chhuak dawn nia" a rawn ti chiah chu ka zuang tawr tawr nghal.

"Ka hmangaih che ka pa, khawvela pa ṭha ber leh hmelṭha ber leh fel ber i ni" kuai kunin a biangah chuan ka fawp a, ka kuah chung chung bawk.

"Awi ka phur tawh lutuk, ka nu ka va hrilh vat teh ang. Ka u te pawh, zan ni thuai thuai se âw" tiin ka kuahna chu ka phelh a, room kawngka lam chu ka pan zui nghal.

"I unau te chu Company-ah an let leh vek, i hrilh theih ka ring chiah lo, keima'n ka lo be mai dawn nia" ka pa thusawi avang chuan ka hawi let a, nui ver verin ka buk khum nghauh nghauh.

Ka nu ka hmuh rualin ka pa nena kan thil sawi chu ka hrilh chhawng nghal zet zet a, mak a lo ti ngei mai. Mak tih loh theih pawh a ni lo, kei paw'n a phal tak tak ka ring lo bawk. Weekend-ah chauh khawpuiah kan kal ṭhin a, mahse khawpui dai deuha kan awm chu a fuh thlawt. Khawpuiah awm ila chuan pangpar chin kan neih ṭeuh theih pawh ka ring lo, kan awmna hmunin a zir dawn miau lo a!

Weekend-a khawpui kal chu a tawk viau, mahse tun ṭum chu a hun lovah khawpuia kal ka châk tlat a, a chhan ka hre der lo. Viktor Parker-a kha ka hmu châk ti dawn ila hmuh châkna ka nei hauh si lo, chu bakah ngaina tak tak tur chuan kan inhmel hriatna a la rei lo hrim hrim.

Tlaiah chuan ka inbual fai zung zung a, ka kawr ngainat em em chu ka inbel bawk. Ka unau te pawh an lo haw kim ṭhap tawh, mahse inthlak lovin ka pa nen ṭhut khawmnaah thil eng eng emaw ni an sawi a, Company emaw sumdawnna lam emaw bak a nih ka ring lo.

Dar 5 velah kan in aṭang kan chhuak a, kan in leh khawpui inkar hlat zawng hi Kilometer 7 vel a ni a, a hla lutuk lo bawk nen kan thleng phei rang viau. Hotel-a kan ṭhut hnu chuan naupang ber leh unaua hmeichhe awm chhun tih takah ka ṭawng duh em em a, ka nu tih loh mipaho erawh an kul muk hlawm hle. Min chhang chiahtu ka u Andrew-a hi mi dang ai chuan tlemin a ṭawng duh ve deuh a, ka unau dangte ang lo takin mi pawh a fiam peih ber.

"Emily, i fanu hian unaunu neih a châk leh a nia, kan tum leh chhin dawn em ni ang?" Dinner kan ei mawlh mawlh laiin ka pa chuan a rawn ti a, kan en rang hlawm khawp mai.

"Maw? Daisy, chutiang thu chu i pa bulah hian i lo sawi em ni?" ka nu chu a rawn ṭawng chhuak hmasa ber a, mak tih hmel zetin min en kiau bawk.

"Sawi e, unaunu chu ka duh alawm, mahse in nei thei tawh dawn em ni?" nui ver ver chuan ka lo ti ve mai a, a rawn thaw huai ringawt.

"Nau ka pai leh theih pawh ka inring tawh lo" ka nu'n a tih chuan a kutah ka pa chuan a lo chelh thuai a, keiniho chuan kan lo en ṭhap.

"I theih loh leh i thei lo a ni mai, kan tum ringawt dawn alawm" thlamuan aw tak hian ka pa chuan a ti a, ngaih ṭha takin thil chu kan ei zawm ta mial mial.

Dinner kan ei zawh chuan kan chhungkuain Movie kan en a, mipaho chu hmeichhe thû thuin an awm a nih rih ber. Ka unaupa te phei chu ka tan chuan Body Guard an ni mai, an palian hlawm si, kei ka te si, mi paw'n min en duh thei viau.

Movie kan en lai zawngin phone an khawih vek a, ka nu nen chauh chuan Movie kan en a ni ber. Ka pa chuan phone call a dawng a, rei pawh ṭhu lovin phone be tur chuan a chhuak zui nghal daih.

Zan boruak nuam tak kan hman zawh chuan kan in lamah kan haw a, in chhung ka lut chiah chu ka mut a chhuak nghal vek thei. Chauh thlak tak thil tih ka nei miah lo, mahse ka mut chu a chhuak viau tho bawk si.

Kei hi Daisy Taylor; Mark Taylor leh Emily Taylor te fa naupang ber ka ni a, kan unau hi panga lai ni mah ila unaunu pakhat mah ka nei lo. Ka unaunu anga ka en leh ka ṭhian awm chhun chu ka nu leh pangpar an ni mai, anni bul tluka nuam tih ka nei lo.

Kan awmna hi khawpui aṭanga hmun hla lutuk lo a ni a, mahse a reh reuh khawp mai. Ṭhenawm pawh pahnih pathum vel chauh kan nei a, bengchheng lutuk lo mahse kan awmna hmun chu a nuam ka ti thlawt, a chhan chu pangpar kan ngah em vang a ni.

Ka pa hian Company lian ang reng tak mai a nei a, chu chu kan chhungkaw inchawmna ber leh kan ei hmuhna ber a ni. Ka unau dangte chu ka pa Company-ah an thawk vek a, nupui nei pakhat mah an la awm lo bawk. Company lam chiah lo thil dang tih tel pawh an nei ṭhin a, mahse chu erawh ka hre kilh kelh tawh lo.

Kum 20-a upa niin tleirawl vun no leh hmelṭha ve tak ka ni a, khawpuia kan kal changte hian min mitmei tu hi chu an lo awm ve ngei ngei zel. Tin, zirna lamah hian kan unau chu kan chawl deuh ṭhup, kei pawh ka kumin tlin viau tawh mahse University ka rap lo hrim hrim. Ka pa chuan a phal tlat lo, sum hman ralna mai mai niin a ngai.

Kei ang bawkin ka u te chuan University-ah lehkha an zir ngai lo va, in lamah lehkhabu leiin ka pa chuan a zirtir vek ṭhin. Thiam tawka a hriat veleh Company-ah a luh tir vek a, kei erawh a piang hnufual ka nih avangin lehkha min zirtir tawh lo thung.

Kei chu ka u te'n min zirtir ṭhin a, an zir hnu vek a nih avangin mi zirtir pawh an thiam khawp. Ka unaute chu infiam pui te ka châk ve ṭhin, mahse mipa an nih tlat avangin ka kawm ngeih tak tak thei lo.

Ka nu tih lova ka ṭhian ṭha ber chu pangpar a ni ka tih tawh kha, ka nu awm loh chang phei chuan ka rilrua awm zawng zawng ka sawi chhuahna chu pangpar a ni. Ka naupan lai chuan pangpar bula mut te, biak melh melh te, ṭhian ang maia kawm te ka ngah thei hle a, ka puitlin hnuah erawh ka ni lutuk tawh bik lo.

Nula kha ka ni ve tawh miau a, ka rualpui hmeichhe ṭhenkhatte phei chuan pangpar lawm lovin mipa an lawm tawh zawk. Kei ve thung chuan a them paw'n bialpa ka la nei lo, mipate va ngaizawng tur menin ka meng lo hrim hrim zawk a ni.

Kan ṭhenawmah hian in pahnih pathum vel lek a awm a, mahse tunah rih chuan Nipui chawlh an hman vek avangin tûmah an awm lo. Ka naupan lai chuan kan ṭhenawm chiah pi Watson-i te inah ka leng fô va, nuam ka tih theihzia chu pui tak a ni. Kan in ang chiahin ka tal a, tun hnu hian engtin nge in leng atan khan min lo duh theih zawk ka ti a ni.

Pi Watson-i te nupa hi fa nei lo an ni a, an pahnih chauha khawsa an ni bawk. Chuvang pawh chu a ni maithei kei hmeichhe naupang harh ve thei tak pawh min ngainat em em, kei paw'n ka ngaina hle bawk.

Kan ṭhenawm leh chiaha mi te erawh keini nen chuan inbe ngai lo tluk kan ni a, kan sual pawh a ni hran lo, anmahni zawk chu biak theihin an awm lo. In hmuh changte hian inbe lova in kal pelh kan ngah mai, ka chhungte nen ngat phei chuan en pawh an inen ngai lo.

Kei chu ṭawng tam ta hrim hrim kha ka ni a, a be hmasa tu zawka ṭan chang pawh ka ngah, mahse anni chuan ka puitlin hnu thleng hian min be hmasa ngai lo thung.

Nipui chawlh an hmang mek a, season a zawh tawh dawn avangin an lo haw ṭep tawh ka ring. Lo haw ta pawh ni se pi Watson-i te tih loh chu biak theih an ni leh tak tak chuang lo vang.

Anni nupa erawh hi chu kan inah pawh an rawn chuangkai ve fô va, ka chhungte paw'n mi dang ai thlawt chuan an ngaina a, an be peih bawk. Pi Watson-i te nupa hi kum 70 an pel ve ve tawh a, mahse an vun a la nalh dun hle.

Pi Watson-i chuan ka nu chu vun mawi reina leh mar ṭhat dan chi hrang hrang a hrilh ṭhin a, an kum aia naupang fê ni mah ila an thusawi chu ka lo ngaithla ve kar zel.

Zan khat chu thil ri deuh ṭhek ṭhek avangin ka mu chu ka harh hlawl a, thawm lah chuan ka thauah min man tlat. Vawi leh khatah Bomb puak ang mai hian kan in chu a rawn che nghawr dawt a, ka mut kawr nen room aṭanaga ka chhuah chuan mangang tak ka ni.

Kan in kawngka leh tukverh te chu a lo chhe vek a, pawn lamah chuan Coat Suit dum ha an lo ding tlar ṭhap bawk. Chutah silai inkap ri chuan in chhung chu a rawn luah khat a, ka beng hupin ka ṭhu tawm châwih nghal.

"Daisy! Tho rawh, tunah hian kan kal nghal vat a ngai" ka pa hmel chu ka en thuai a, hlauthawng em emin awm mah ila ka bula ka pa a awm avang chuan tlêmin ka thla a muang deuh sawt.

"Khawiah nge mi dang? Khawiah nge ka nu?" ka ṭawng chu a dik thei der lo, in chhunga mei alh hluah hluah te chuan min ti ṭim sawng sawng.

"I nu chu a thi tawh, kan inrin loh laiin min lo bei a ni. Tunah hian keini pahnih leh Simon-a chiah kan dam tawh, chuvangin he in aṭang hian kan chhuah thuai a ngai" ka pa thusawi chu a awmzia reng ka hre lo.

"Enge i sawi awmzia ka pa!?" ka nu thih thu chuan na takin ka thinlung chhungril a vit a, ka mittui te chu ka dang seng lo, ka biang chu mittuiin a luah khat nghal vek.

"I zawhna chhang hman ka ni lo Daisy, kan kal nghal a ngai. Kan lêtin an tam, min thah vek pawh an tum ngei ang" a rawn ti leh hrawk a, ka ngawi chiang ta hle.

Min kaih ang âng chuan ka kal pawk pawk a, a kal châk em avangin kal pawh ka kal ṭha hlei thei lo hial. Ka pa chuan kawngka pakhat hi a hawng a, chu kawngka chu kum 20 ka nih thleng hian ka la hmu lo, a awm tih pawh ka hre lo.

Kan hma chu ramngaw vek a ni tawh a, mihring tûmah hmuh tur an awm lo bawk. Hmanhmawh taka kan kal lai chuan silai mu puak ri chu a rawn awm a, ka pa chu a pai ta chhawn chhawn mai.

Chiang takin ka pa chu an kap fuh tih ka hria, ka buaipui hma hauhin phulah chuan a tlu thlawp a, ka va han hlauthawng tehreng em.

"Pa, ka pa, ni lo, i thi thei lo" ṭap pur chuan ka ti a, a pa len em avangin chawi pawh ka chawi kang zo lo.

"Kal rawh Daisy Bawihte, ka daih rei dawn lo, ka hmangaih che" ka pa mitmeng chu a dik lo, meng ṭha thei lo tih hriat lutuk hian a meng ṭawk ṭawk a ni.

"Aih ka pa, ka kalsan dawn lo che, ka u Simon-a pawh a lo kal vat ang" tiin ka pa chu pawm thawha kuah ka tum leh ṭhin, ka thei thlawt lo.

"Ni lo, Simon-a chu an that tawh tih ka hre thei. Kal rawh, kal mawlh rawh Daisy" a ṭawng zawh rualin silai inkap ri chu a lo awm leh a, ka pa chu phula bawkin a zal ta hnak.

Ka theih tawpa chakin ka tlan a, ka biangah chuan mittui a dir zung zung bawk. Kan in kang hluah hluah lam pawh chu ka hawi duh tawh lo, ka hawi a nih chuan silai kap thiam tak khan min kap hlum ve mai ang tih ka hlau a ni.

Tlan pahin ka kekawr chu ka suih nghet sauh a, mut kawr nen ka la nih avangin tlan pawh ka tlan chak thei lo. Ka bul lawka thingkung chu an lo kap per chhawk a, chu chuan nasa takin hlauhna min pe nghal. Ka theih tawpa chak leh zualin ngaw chhungah chuan ka tlan a, a hma aiin ka tlan chak nge chak lo pawh ka hre lo.

Ka tlan nasat lutuk tawh avangin ka thin te chu a na vek a, ka thawk te chu a rang em em tawh bawk. Ka hnunga min umtu te lah chu ka tlan na lam panin an lo kal ve zel a, zan ni mahse ka tlanna lam an hre chat chat chu mak ka ti a ni.

Ke lawnga tlan ka nih avangin na ti chung chungin ka tlan a, vawi leh khatah ka thil rah avang chuan ka tlu ta thlawrh. Na ti em emin ka ke chu ka en chiang a, thing zum hi a lo invit bur vâ mai. Beidawng duh mai lovin ka bawkvak a, thih chu ka hlau ngawih ngawih a ni.

An thawm chu hla taka awm ang maiin ka hre tawh a, ka tlan tawh loh vang pawh a ni ang. Ka kea thing invit bur lah chu ka si ngam tawh lo, phawi pawh ka phawi duh lo.

Chu bakah buaipui ka la duh lo, ka buaipui chuan a nat lutuk avangin ka ṭap chhuak ang a, min umzui mek tu te'n min man phah dawn tih ka hria a ni. Ngaihtuahna fim pawh pu thei lovin ka bawkvak mawp mawp a, thing ni awm tak hi ka su ta chawrh.

Ka en chian chuan thing a lo ni reng reng lo, mihring ke ngei mai hi a lo ni a, lawmna leh hlimnain ka rilru chu a khat nghal. Puih ka ngaih thu chu sawi mai ka tum a, mahse ka sawi thei tlat lo. Ka ṭap chhuak feih feih a, ka hmaa ding keah chuan ka vuan a, ani chauh chu ka innghahna neih chhun a ni tawh.

Silai puak ri chuan min tiharh zawk a, ka hmaa mihring ding chu ka en chho nghal. A hmel chu a rum em em a, ṭawng tum lo tih hriat zet hian a hmui chu a chip hmuk a, min en chiang hle bawk.

"Khawngaihin, khawngaih takin min pui lûl teh ka pu, tu tih pawh ka hriat loh te'n min thah an tum a ni. An pawi pawh ka sawi lo, kan in an tichhe vek a, ka chhungte thlengin dam an awm tawh lo" ka tih chuan a rawn kun hniam a, min pawt ding zui nghal.

"Ka ke, a na lutuk!" ka ti chhuak thuai a, ding thei zia zâng ka ni lo.

"Ka keah hian thing zum a lut a, kal pawh ka kal ṭha thei tawh lo. Nang chauh hi ka innghahna awm chhun i ni, khawngaih takin min pui rawh" ka ti leh ṭuau a, kan piak lawka silai puak ri chuan lung muangin min awm tir thei thlawt lo.

"Min pui lûl teh ka pu, thih ka la duh lo" ka tih leh chuan min ṭhut tir a, ngawi rengin ka ke chu a endik zui nghal.

Ka ke na lutuk avang chuan ka ṭe chhuak tuar a, ka mit hmuhah ngei thing zum chu a rawn lek ta vâ va mai. Ka ṭap hliam hliam a, tunah chuan ka thawm siam avangin min man tawh ngei dawn a nih hi!

Kei chauh ni lo, ka ke buaipui mektu pawh hi an that ve ngei ang. Min pawm tho lawp a, a nghawngah chuan nghet zetin ka lo kuah nghal chial bawk. Kan din rualin min umtu te chu silai nen an lo kal a, min puitu chu tlan thuai se ka duh tawh tak zet.

"Ka pu khawngaihin kal rawh, tlan rawh, min dah thla la, tlan chhe rawh. Keimah avangin i tuar ve palh ang e, an thah hma che hian tlan chhe thuai ta che" ka tih pawh chuan a che sawn duh der lo.

"Thih ka la duh lo asin, tunah chuan ka thi ngei dawn ta a nih hi! Ni lo, ka thi thei lo, hma hun ka la ngah lutuk. Min pui rawh ka pu, khawngaih takin ka nunna hi chhan la i duh apiang ka tihsak ang che" lungchhe fêa ka ṭah hnu chuan ka ti leh phawlh phawlh a, ka chi ai buai vek tawh a ni ber.

"Ka duh apiang maw!?" a aw chu thum ṭha rem rem tak a ni, a aw aṭang chuan eng mi nge a nih ka hre thei mai lo, English dik tak chu a nih ka ring chiah lo.

"Aw, i duh apiang, thihna min pumpelh tir a nih phawt chuan i sawi apiang ka ti ang, ka tiama che" ka tih lai chuan min umtu te chu an lo hnai zel a, an ṭawng ri pawh ka hre pha ta.

"Min tlanchhiat pui hram teh, chuti lo zawng ka thi mai ang" ka ṭap leh ta nge nge, a âwmah chuan ka hmai ka phum a, ka thih loh reng ka ring tawh lo.

Min umtu te zinga pakhat chu vin zet hian a rawn ṭawng a, a ṭawng hman lah chu English ṭawng a la ni der lo zui. Ka hriat sual loh chuan Italian emaw German ṭawng emaw a hmangin ka hria, mahse a thusawi awmzia pakhat mah ka hre lo thung.

Thawm aṭang chuan hawi chhuak lo mah ila min din hual vek tawh tih ka hria, min pawmtu lah chuan din sawn a tum eih si lo, Movie anga thil tih theihna chak tak nei te pawh a ni mahna.

"Hunter!!" aw vin tak hian a rawn ti ṭhawt a, chutah a taksa ka nghen mek pa chuan a aia vin leh khauh zawk hian

"Griffin!!" a ti ve ṭhawt a, phut lutuk avangin a lam chu ka hawi chho nghal.

A hmel chang rut leh a mitmenga zamna reng reng awm lo chu ka en kar a, a aw zet zawng khawpui leh ṭek ang maia hlauhawm a ni. A kawr chu ka pawt ṭai a, a hmelah chuan nelawmna pakhat mah a lang lo.

Chiang takin a hmai chu ka en a, kan piah lawka in kang hluah hluah eng chuan a vun chu a chhun siar siar a, a hmui leh a hnar inkarah chuan hmul tlem a ṭo bawk. Kei anga hlauhna a nei miah lo te, a zam ve miah lo te, thih hlau lo ang maia a awm tlat te chu mak ka ti zual.

"Hunter, kha hmeichhe phiangsen kha hum tum miah suh, ka pa duh dan a ni dawn lo tih i hriat chian em kha!" ka hma lawka ding pa chuan a rawn ti khauh ta fak.

"Thu min pe ngam tur i ni lo Griffin, eng vanga a hriatthiam tur khera ṭawng nge i nih?" an awm dan chuan min tihhrilhai nasa ngei mai.

"A chhan chu i taksaa bet mek hmeichhe lawi lo zet khan ka that dawn tih hria se ka duh vang a ni" ka mi kuah mek pa nghawng chu a hma aia nghet leh zualin ka kuah a, ka chhungril chu a khur nghal beuh beuh.

"Ka thu lo chuan i that lo vang, a hliam hi atan chuan a na thawkhat viau. Haw rawh u, in vai khan in awmna hmun turah kal rawh u"

"Hunter!! I thil tih hi a dik miah lo, i hmelma reng reng chu that chimit vek tur i ni"

"Griffin Hudson! Min hnial tei vet suh, ka that dawn lo pawh ka ti em ni?" a ṭawng vin lutuk avang chuan ka phu leh zawk a, an awm dan chu hrethiam lo tak ka ni.

"Aw le, ka hrethiam e. I tihtur chu i hriat ngei ka ring, ka pa duh loh zawng i tih loh hram pawh ka beisei" tiin chu pa, Griffin Hudson-a chu a kal sawn a, a rualin mi dangho zawng zawng pawh chu an kal sawn ta dual.

Min pawm mek tu chu a che hrut a, ngaw lamah chuan min kalpui ta nal nal. A ke pen reng reng chu a hlawk em em a, min thah an tum lai khan min tlanchhiat pui duh ni se chuan min thah hmain kan pilbo hman chiang khawp ang.

Kei hi ka â zo ta em ni? Nichin lawk khan min thah leh thah lovah an inhnial zo chiah a, he pa pawh hian min that dawn tihna em ni?

A kawr hak chu chik leh zualin ka en a, min umtu te inthuamna ang chiah chiah a lo inbel a, ka thlamuanna leh hahdamna zawng zawng chu chawp leh chilhin a bo nghal vek.

Amah chu min humhim thei tu awm chhunah ka lo ngai a, mahse tunah chuan ani nena hmelma kan nih thu ka hre tawh, chu chuan chiang takin ka thi ngei dawn tih min hriattir zui ta bawk. A hmel pawh chu ka en ngam tawh lo, ka hmelma pa chuan ka nunna a chhan duh ka ring hlawl lo a ni.

Motor tlan lenna chiah chiah awm vel kawngah hian min chhuahpui a, Car dum chu hmuh theihin a lo lang nghal bawk. Car chhungah chuan min nghat a, min tih zel dan tur ka hre bawk si lo nen ka ṭap chhuak ta tawp. Motor chhunga light chu a on a, min en reng tih hre mah ila ka en ngam thlawt rih lo.

"Eng vang teh hrepa ṭap nge i nih?" ram hmuk hian a rawn ti a, ka ṭah chu a chhuak zual sauh.

"Min that dawn ti raw? Engtin nge hmelma kan nih theih? Ka hre ngai lo che a, nang paw'n min hre ngai hek lo" ṭap reng chung chuan ka ti a, ani erawh chuan ngawi rengin ka ke chu a buaipui mial mial.

"A na! A na lutuk!" ka ti leh ṭuau a, ka ke a khawihna chu nat tak tê hian a na a ni.

"A nat rih a ngai" a ti thum ram hmuk a, ka ke chu dimna tel hauh lovin a tuam zui nghal pawp pawp bawk.

"Khawngaih takin min that lo hram rawh ka pu, a hma paw'n min thah tumtu te lak aṭang min chhan khâ, thih ka la duh lo a ni" ṭah chuan awmzia a nei lo, thih loh dan hlir ka ngaihtuah a ngai zawk tawh a ni.

"Ka thah ngei che chu a ngai alawm" nelawmna tel miah lo hian a rawn ti a, ka kut chu a hmuh turin ka suih ta tawp.

"Enge ka tih ang? Min that lo hram rawh, kei hmeichhe belh tur nei tawh lo leh der dep ve tak hi nung damin min awmtir hram rawh"

"Muhil phawt teh" tiin ka nghawng chu a kut hrawl zet chuan a rawn khawih zeuh a, awlsam takin ka zawi ta riai riai.

Ka taksa chu a che thei tawh lo va, ka rilru erawh a la harh ṭawk ṭawk thung. Kei hi min rek hlum tihna em ni? Thih ka la duh lo asin, ka thi mek chu a ni si a!

PROTECTIVE HUSBAND

BY

Havali Adam

Chapter 2

"A pawi lo, ka room-ah khan han mut rawh, a bak chu keima'n ka lo buaipui vek ang"

"Aw le Sir, mahse i pa'n a hriat hunah chuan kan pahnih hian kan tuar dawn asin Sir, thil pawi tak a thleng ang tih ka hlau a ni"

"Ka lo buaipui ang ka ti reng alawm, min hnial lovin ka thusawi kha zawm tawp rawh. Lo harh thei reng dinhmunah a ding tawh a, tlan chhhuah erawh a thei lo hul hûal ang, a chhan chu a ke kha a la na dawn lutuk"

"Aw le Sir, i sawi ang chuan ka'n ti nghal ang e" mipa pahnih aw rik dan inang lo zet inbe thawm chuan min tiharh a, min pawmtu erawh tu nge a nih ka hre tawh lo, min thah tumtu te laka min chhantu taksa nen kha chuan a taksa chu inang lo tak a ni.

Ka rilru leh taksa chu a harh ṭha pangai vek tawh a, ka ke chu a na em em bawk. Khum dup nuam zetah chuan min nghat a, kawngka a rik khep rualin ka meng chhuak nghal. Room chhung eng lut tam lutuk lo chuan ka ngaihtuahna a tithui em em a, Table light chuan kan in kang leh ka chhungte ka chan dan min ngaihtuah chhuahtir ta zung zung bawk. Meng reng chungin ka mittui chu ka biangah a luang zawih zawih a, zan khat thil thua ka nun danglam nasa lutuk chuan lungngaihna dawn sen loh min pe a ni.

Thih leh dam inkarah ka awm a, ka la thi mai lo te chu mak ka ti letling ta zawk. Ka thil hriat hnuhnun ber kha chu ka nghawnga a rawn khawih kha a ni a, min rek hlum ni berin ka hria a nih kha!

Tunah erawh dam ṭha pangai thlapin khumah ka mu a, ngaihtuahna fim puin la dam var mah ila manganna leh lungchhiatna nen rilru ka seng a, la dam mah ila ka thi ngei dawn tih chu ka chiang ropui si. Khum aṭang chuan ka ṭhu chhuak a, ka kutah pawh engmah an ṭawn lo tih chu ka hmu chiah.

Room chhung chu ka en kual leh ṭhin, engkim chuan kan in kang chhe vek ta kha min hriat chhuahtir lo thei lo a ni. Eng vangin nge min rawn thah an tum ringawt? Eng vangin nge hmelma kan nih?

Engmah chu ka hrethiam ve lo, hmelma kan neih awm reng pawh ka hre lo, mahse hmelma chu kan lo nei ngei tih chu hai der a har ngang a ni.

Khum aṭang chuan ka chhuk a, mahse ka ke chu ka hmang ṭha ngam hauh lo. Bai auh auhin ka kal a, tukverh bulah chuan ka ding a, pawn lam chu zing ang maiin khua a lo var vek tawh.

Nizana beihna leh thah tumna kan tawh lai khan zan lai a pel tawh a, zing a ni mah tawh zawk. Ka awmna hmun zing a lo ni ta daih chu awm lo ka ti hran ta lo, khawi hmunah nge ka awm erawh ka hre thei hauh lo thung.

Tukverh parda chu ka ṭham ṭawng ṭawng a, ka thisen zawmpui ngei te thih fai vekna chuan min tiṭap lo thei lo a ni. Din pawh ding rei lovin ka ṭhu sawp hnuang a, ka khupa ka hmai phumin ka ṭap ri feih feih a, min thah tumtu te inah ka awm tih inhre miah lovin ka ṭap chhuak zawm ta hawk hawk.

Ka ke lah chu a tur ut ut a, ka piana hnu lamah chu ang renga na chu ka la tawng lo. Âw ka chhungte kha ka va ngai tak em, anni chuan ka ke nat thu chu hria se min buaipui leh chûk chuk hlawm awm si a, mahse tunah chuan mitthi mai an ni tawh.

An unaunu leh an fanu thil tawn mek hi hre ve ngat se zawng hetianga min awmtir tu hi an that duh ngei ang, ka pa tal khan min dampui se chuan thlamuanna ka la nei thei mai tur. Ka mit hmuhah ngei an kap hlum a, a thih dawnah khan min hmangaih thu a sawi a, kha kha ka beng hriata a vawi khat sawina a ni bawk.

Kawngka chu a lo inhawng thut a, kei pawh ka ṭap tawp hmak nghal. Hmeichhe pakhat Maid tih hriat tak uniform ha hi a lo lut a, ka awm tih hre miah lo anga a awm chu mak ka ti hle. A che mial mial a, zawi tê hian a zai rât rat bawk.

A hmel aṭang chuan a la upa lutuk lo tih ka hria, kei aiin a upa âwrh vel chauh ang tih tur a ni. Kei chu ka che miah lo va, thawm pawh ka chhuah miah lo, ani erawh min hmuh miau loh avangin a engthawl hmel bik khawp mai. Khum chuar vel chu a zut mam hân a, chutah min rawn hmu ta.

"Awi ka duh lo, Ramhuai! Ramhuai! Ka hlau lutuk!" ti tuar tuarin room aṭang chuan a chhuak thuai a, ramhuai hmuha min hmu tlat chu a mak ka ti leh ta ngei mai.

"Nang maw!? I lo la dam phiangsen a ni maw? Hunter Hudson le! He hmeichhia i lo la zuah hram hram avang hian i va inchhir dawn em, ka pa hremna i pumpelh thei hauh lo vang" kawngka bulah chuan mipa lian zet hi a rawn ding a, min thah tumtu ngei kha a ni.

"Lo kal rawh le, tun ṭum chu thihna i pumpelh thei tawh lo vang" ka bul chu a rawn thleng titih nghal der a, ka samah kekin min hnuk chhuak ta pawp pawp.

Ka theih tawpin ka kut chuan thlah turin ka bei let ve ngial a, mahse awmzia pakhat mah awm lo. Ka kut chu a rawn elh thut a, ka ṭap chhuak ta hawk. A na lutuk, ka kutzungṭang ruh chu a tliak chiang a ni.

Ka sam ṭhenkhat chu ka beih letna avangin a tla phung a, tunah chuan bei let thei ka ni tawh lo. Ka kutzungṭang ruh a tliak a, ka ke ah hliam na tak ka nei bawk a, a mi khawih ang ang chuan ka awm ta tawp.

Step-ah chuan min hnuk thla bawp bawp a, chutiang renga mihring nunrawng chu khawvelah hian ka la hre lo. Floor kan thlen thlak rualin min theh bawk thlawp a, ṭhutthleng chang tak chu ka tauh nghal chawrh bawk.

Hawi chhuakin min thah duh em emtu hmel chu ka en a, min lo melh rum ṭha khawp mai. Ṭhutthlenga mi dang ṭhu ve te pawh chu an lo ding nghal thuai a, keimahah chuan an mit a fuh ta vek.

"Eng thil nge i tih hi Griffin? He hmeichhe naupang hi khawi bawlhhlawh bawm aṭanga i hmuh nge a nih?" putar hmel deuh tawh hian a rawn ti ram hmuk a, min hnuktu leh keimah chu min en tawn sek bawk.

"I fapa ngaih hlut em em Hunter Hudson-a room-ah a lo awm nawlh a, hetiang bawlhhlawh ṭawm hnawk lutuk paih bo vang vang tur a lo kawl ruk rân chhan kha han zawt ta mauh che"

"Hunter, i nau sawi hi a dik chiah em?" chu putar bawk chuan a ti leh a, nizan maia min thah ngei a ngaih thu sawitu lam chu ka hawi a, chu hmunah chuan a awm ve tih reng ka lo hre lo.

"Griffin-a thusawi kawih thiamzia chu kan hre vek alawm ka pa, kan mite awm lai pawhin min hnial ngam a ni a, chu chu tuna kan thusawi lai ai chuan kan sawi tur zawk tak a ni" a aw mawlh chu a thum leh hle tawh, engtin emaw ni tak hian thinlung chhung khawih thlen dan a nei tlat.

"Griffin, nizanah i u hi kan mite awm laiin i lo hnial em ni?" chu putar aw chu vin ṭha tak a ni, mahse Hunter-a tia an koh aw ang em em chuan a thum ve hauh lo, hriat pawh a nuam lo kher mai.

"Eng lo a nia ka pa, nizan kha chuan ka insum hman lo a ni e. Min ngaidam dawn nia, mahse tun thlenga hmelma fa a hum tlat chhan hi sawi chhuah ṭul i ti ve lo em ni?" Griffina-a tia an koh chuan a rawn ti ram ve hmuk a, English ṭawng an hmang vek bawk sia an thusawi zawng zawng ka hrethiam ta vek.

"Aw le, in unau hian hremna pumpelh inring hauh suh u. Nang pawh Hunter, eng vanga hmelma fa chu nung dama lo hruai haw nge i nih chiah min han hrilh teh" putar aw chu a nem ta deuh a, a lung erawh a la awi hmel teh chiam lo.

"Kan inremsiam alawm ka pa, chu bakah a taksaa hliam a neih avangin thah ṭulin ka la hre rih lo a ni" eng inremsiamna nge kan lo neih hman tih chu ka ngaihtuah a, inremsiamna kan neih awm ka hre miah lo.

"I duh chuan min hrem thei ang, mahse ka hmeichhe rawn hruai haw erawh ka kutah dah rawh" amah bawk chuan a ti leh a, ka tan chuan lo ṭawng ve ngamna chi reng a ni.

"A theih loh ka pa, kan that ngei tur a ni. A chhung leh khatte paw'n rawn zawng chhuakin kan tan a la ṭha lo thei, chuvang chuan tunah hian keimah ngeiin ka that dawn" tiin Griffin-a chuan silai a phawrh a, min tin ta ran mai.

"Griffin! A chhungte emaw amah nena inzawmna nei tawh phawt chu kan that fai vek tih a hre chiang ber tu i ni, i nungchang avang hian nasa taka hrem i phu ngawih ngawih" Hunter-a tia an koh aw khuah lutuk avang chuan ka kimki chawih nghal.

"Silai kha hmet puak reng reng suh Griffin, i kalna hmun tur chu i hria e. Chuan nang pawh Hunter, i thil tih dan hi ka duh lo hle a ni. He hmeichhia hi buaipui mawlh la, i nau nen a hmun ngaiah lo awm ang che u" tiin putar chu a tho a, a kal sawn ta vang vang.

"I â zo ta em ni Hunter? Eng vang phiangsenin nge he hmeichhia hi buaipui i la tum ṭalh? I tan leh kan chhungkaw tan a pawi thei tih" a ṭawng laklawh lai chuan chhuatah a let tawp a, thawh pawh tho hlei thei lovin a che ṭual ṭual bawk.

"Ṭawngkam vin emaw zah lo taka min be leh a nih chuan kha aia na khan kut ka thlak ang che" Hunter-a chuan a ti hrawk a, a hnek tluk tawp pa Griffin-a erawh thawh pawh a la tho thei lo.

"Maimitchhing rawh" ti hmukin min chhuk melh run a, ka va han maimitchhing rang tehreng em.

Ka taksa chu a rawn chawi kang lâwp a, hlau chung chungin a nghawngah chuan ka kuah leh ta tawp. A hma ang bawkin in chung lamah min pen pui pawk pawk a, a lakah chuan naute ka ni ringawt.

Ka meng dê de a, a hmel tak run chu ka hmu zui nghal. A hma kha chuan a hmui leh a hnar inkarah chauh hmul awm emaw ka ti a, mahse a lo ni teuh lo. A biang leh a khabe kual velah chuan hmul a ṭo siar siar a, ka unaupa te ai pawhin a upa zawk ang tih ka chiang.

Zawimuangin chhuat lam chu ka en thla a, min thlauh nâ se chuan ka tla na vawng vawng khawp ang. Chu chuan ka awmna chu a sang thawkhat tih min hriattir a, mahse ka awmna chu in chhawng ni lovin mihring ngei a ni.

A awmzia chu min pawmtu chu palian leh sang tak a ni a, a engkim chu hlauhawm em em mahse mi thlamuan theih dan riau a nei tlat thung.

Room chhung kan luh dawn ṭepah Maid pakhat hi a bia a, damdawi a mamawh tur thu leh a rang thei ang bera pe turin a chah a, kei erawh ka mut a chhuak ru hle. Room chhunga kan luh rualin khumah min ṭhut tir a, khum chu a dupin a lian hle bawk.

Ṭhu hniamin ka ke tuamna chu a phelh mawlh mawlh a, dimna nei miah lova a chet mial mial avang chuan ka lo ṭhen sawk sawk a, ka kut chu a sik palh hlauvin ka chawi kang deuh reng bawk.

Thawm awmna lam chu kan hawi rual ṭhawt a, kawngka hawnga lo lut mek Maid pakhat chu a zam hmel hle. Zam lohna chi pawh a ni lo, ka bula mipa rorum zet, a hmel aṭang pawha tual thah thiam tih hriat em em hian huhang a ngah tak zet a ni.

Amah chuan min ur ni mai hian ka hria, lum tih vang leh sik leh sa danglam vang ni miah lovin kei pawh chu ka sa thei hial a ni. Tuna min buaipui vang chauh a ni lo, ka mangan em em laia min pawm lai aṭang tawh khan a huhang natzia chu ka hre daih tawh.

Maid chuan tim dai hian a bulah First Aid Box leh a hman tur ṭul ang ang chu a dah a, ngawi rengin a ding ta reng. Doctor ang maiin ke tuamna puan var chu a laiah a chep phel hmawk hmawk a, Antiseptic damdawi bur ni ngeia ka hriat chu a hawng a, ka ke pem laiah chuan a rawn hnawih tâwk tawk ta mai, a na lutuk chu ka ṭe chhuak hawk a, ani paw'n min lo en nghal zawk nghe nghe.

A mit chu, a mit mawlh chu a thipin a va han mawi tehreng em. A pawl ni chiah si lo hian a hring tel deuh raih a, a ṭial a ni mah zawk. English mi dik takah chutianga mitmu rawng nei chu an awmin ka la hre lo, a vun rawng zawng zawng nen chuan chutiang mitmu rawng nei awm tak pawh a ni. En rei ngam lovin hmun dang chu ka en vat a, ka en reng a nih chuan a thin a rim ang tih ka hlau, a thinrim kutthlak natzia lah ka hmu zo chiah bawk si.

A chet ngai chuan a che mual mual a, ka ke a khawih dan pawh a hma ai chuan a dim ta deuh. Ka ke a tuam zawh chuan thawh mai a tum a, mahse a ṭhu hniam zui leh nghal.

Ka chawn inthai rang nuai chu a zut a, electric man ang maiin ka awm a, zut kher lo se chuan chutianga ka awm pawh chu ka ring bik lo.

Ka ke a tuam ang chiahin ka chawna hliam awm vel chu a tuam a, ka ke ang em emin ka chawn chu a na hran lo, a khawih pawh chuan na ka lutuk lo bawk.

"Na dang i la nei em?" ka lam lo hawi miah lo hian a rawn ti thum dup a, a aw chu a thum satliah mai a ni lo, a thum chhah ṭial tel deuh ruih a ni.

"Maw? Aw..aa..ih...ka kutzungṭang hi a tliakin ka hria" ka hmelmapa, min thah ngei a ngaih thu min hrilhtu bulah chuan pangai takin ka ṭawng chhuak a, hlau ru tak chunga ka aw a chhuak pangai viau leh lawi si chu a mak a ni.

"Khawi" ti chhum bung hmukin a kut chu a rawn dawh a, chiang takin ka mitah chuan a en ran a, kan bula lo ding ve reng Maid en chungin ka kut chu ka pe ta riai riai.

Ka kut chu a khawih neuh neuh a, a kut leh ka kut inlen hleih dan chu pui tak a ni. A kut chu tupui lawng lian tak ang ni se, ka kut erawh a bula Boat lo tla vel mai maiangg lek a ni thung. A chang leh ka kut chu a pawt a, a dim ang reng hle bawk.

A kutkhing khat pawha a hum hneh tehreng nen a kutkhing hnih chuan a khawih a, vawi leh khatah a rawn pawt ri ta tûar mai. Phawk zetin amah leh ka kut chu ka en tawn sek a, pawt ri tûar mahse na pakhat mah ka hre lo.

"A vung dawn a, dim ang che. Ka hmel i hmuh hma chu room aṭang hian chhuak lo vang che, thih i duh a nih leh i chhuak lui dawn nia" tiin a ṭhutna aṭang chuan a tho vut a, a aw ah chuan nelawmna reng a awm lo.

"Ka...ka thi dawn lo i tihna em ni?" phawk zeta en chung chuan ka ti a, thihna pumpelh theihna kawng a awm a nih phawt chuan chu kawng chu ka zawh duh a ni.

"Ka hre lo" kawngka lam chu a pan zui nghal hmawk hmawk a, ka bul lawka Maid pawh chuan a hnungah a zui a, ka rilruah chuan hlauh ruk riauna a awm leh tawh.

"Ih...Eng lo...Khawiah nge i kal dawn?" kawngka bul a thlen lai chuan ka ti chhuak phawng a, min kalsan daih tura ka ngaihna chuan hlauhthawnna min pe a ni.

"Chu zawng i hriat ṭul lo tawp a ni" lo lehhawi zeuh pahin a ti ram hmuk a, ka ṭawng leh ngam tawh lo hrim hrim, ani pawh chu ngawi rengin a chhuak zui nghal.

Ka tihtur hre lo chu ka mu tawp a, boruak vawt seng seng chuan rizai min sin châk tir a, mahse rizai sin tur reng ka hmu lo. Ka ke chu ka zu khawih a, a lo vawt khawp mai. Lukham chu lain ka ke chu ka delh tir a, ka ban khamin ka mit ka chhing ta diar diar.

Muthilh vang vanga harh vela hlim deuha awm ka châk, ka thil tawn mek chu mangchhia mai mai ni se ka ti, a tak tak ni tur atan chuan ka duh lo a ni. A vawt ka tih em avang chuan mut pawh ka muhil thei mai lo, ka beidawng lutuk chu ka ṭap chhuak feih feih ringawt.

Kawngka inkhar thawmah chuan ka harh zawk a, meng chiang tak ka ni. Ka lo ṭap muhil ngei a ni ang khua pawh a thim vek tawh, chutah tu nge room-a lo lut chu ka hre hauh lo leh nghal. Hunter-a, ni e amah kha Hunter-a tiin an ko a nih kha!

Ani khan room aṭanga chhuak miah lo turin min ti a, ka chhuah chuan thi thei ka ni tih min hrilh bawk. A rawn luh leh hma loh chu room-a tawm tlat turin min ti a, mahse tu nge room-a lo lut mek chu ni ta ang.

Ṭi em emin ka inher chhet chhet a, Hunter-a hmel ka hmuh ruala ka thlamuang lutuk chu ka thaw nghal huai bawk. Ama chet chetin a che mual mual a, Wardrope lian leh chhah ṭha tak chu a hawng a, rizai lian zet chu phawrh chhuakin khum lam a lo pan a, ka chungah chuan enge a tih dawn ka hre hauh lo.

A rizai ken lam ni lovin a hmel tak run leh rum zet chu ka lo en daih a, a mit ko leh a hmui sir chu a thi deuh ser ser a, an insual a nih loh pawhin mi dang thah an nei a nih ka ring nghet ta bur.

"Sin rawh" ngaihno bei lo fê hian a rawn ti tawi tûk a, a rizai rawn theh thlak chu ka lo ban ve nghal vat.

Ka duhthusam ang thlapa ka sin hnu chuan Hunter-a awmna lam chu ka en a, min hlat tak hian Chair-ah a lo ṭhu daih a, room chhung light eng var han chuan a vun rawng a tilang chiang ta hle.

Vun ngo lutuk tia sawi theih ni lo mahse a vun chu hang ni si lo hian a uk lam rawng kai mah a ni a, a vun ngo dan chu Viktor Parker-a anga ngo vût lovin a mawi tawk hle.

Viktor Parker-a kha, ani kha engtin nge a awm zel tâk ang le? Kei nena inhmuh leh a duh thu kha a sawi ngei a, kei lah chuan buaina thuah tam tak ka tawk mek si.

Kan awmna hmun aṭang hian min lo hruai chhuak se, heng misual leh ka hmelmate hnen aṭang hian min lo la chhuak thei se ka ti a ni.

Chu erawh thil harsa tak a ni dawn tih ka hria, khawiah chiah nge ka awm tih a ni chuan a hre dawn lo, kan in kang leh ka chhungte thihna khan khawpui mite beng a thlen ngei ka ring bawk. Engtin nge kei hi min ngaih ve ang le?

Ni lo, kei te chu thi angin ka than ngei ka ring tawh zawk. Kan in a kang chhe vek ngei ang a, ka chhungte lah an thi fai vek bawk si, ka pa Company te kha engtin nge ni zel dawn?

Kei hi ka la dam a, mahse ka dam hun chhung tur hi ka hre lo. Vawiinah emaw zaninah emaw pawh thi thei reng dinhmunah ka ding a, naktukah pawh thi thut thei ka ni.

Ka thil ngaihtuah avang chuan thawk ka la ri hawk a, thaw chham ang mai hian ka awm a ni. Ka rizai chhunglam chu ka kut na lo lamin ka hmer ṭawng ṭawng a, ka piah lawka ṭhu ngawi reng Hunter hmel pawh kan en duh tawh lo.

Ani chu ka hmelma a ni tlat, mahse engati nge a pa leh a naupa hnenah khan min buaipui a tum thu a sawi si? A chhan ka hrethiam thei lo, hmelma kan nih avangin min thah hlen vang vang ka ring a, ka ngenna kha chu atan chuan thil ho mai mai a ni ngei ang, mahse ni khat chhung nung damin min la zuah tlat a, a chhan awm ka ngaihtuah pawhin chutianga ka chunga a chet chhan chu ka hre thei mai lo a ni.

Ka mit chu mengin Hunter-a lam chu ka hawi phei leh a, ani chu a lo maimitchhing daih. Ka hawi chhan chu ka ke a na, ka ke chu a na tak zet tawh a ni.

A tur et et a, ka thawm a hriat loh na'n ka hmui chu ka pet fan fân a, ka tal deuh sek bawk. Ka tum loh lutukin ka hmui ka pehna chu ka tithawl thut a, ri meuhin ka thaw chhuak ta hawk.

Chu veleh ka hma maia ṭhu muhil emaw ka tih chu a rawn meng a, min lo en chiang khawp. Min hmuh tawh tho avangin a hma ai chuan ka tal na ta deuh a, ka lam pana a lo kal lai chuan

"Ka ke hi a na tak zet, ka tuar zo lo mai dawnin ka hria" ka lo ti thuai a, ṭawng chu ka insum thei tawh thlawt lo, min buaipui vat vat se ka ti a ni.

"Khawngaihin min ensak teh, ka ke hi min ensak leh hram teh, a kher zawk zawkin ka hria" tiin ka rizai sin lai chu ka hlim a, ka kut chu na deuh mahsa ka ke na chuan a hliah vek.

"Damdawi leh natna hrik an inbei mek a nih kha!" ti hlukin rizai chu min sin ṭhat tir leh a, ka tuar zuau vang pawh a ni lo, ka ke chu a na em a ni.

"Heti hian ka tuar tawp dawn tihna em ni? Tih dan i hre mial em? Tlem tala a na tizia awm deuh tur hian i khawngaih ka dil leh tawp che, i rilru chhungril a sual lo tih ka hria" ka ṭawng dan avang chuan min en chiang hle.

"Khawngaihin, ka ke hi a na em mai" ṭap ṭepa ka tih chuan a che vut a, a dinna aṭanga pen pawk pawkin room chu a chhuahsan ta nal nal.

Minute 5 hnu velah a lo lut leh a, a kutah chuan damdawi ni awm tak leh Water Bottle a rawn keng vâng a, khawngaih ka dil apianga min puih zel avang chuan mi sual tak chu a nih ka ring thei tawh lo.

Damdawi chu hmawmin tui ka in zawm zat a, ka thlan pawh a lo chhuak nasa hman khawp mai. Rizai hlimin ka ke chu a en fiah vel a, damdawi ei tawh mah ila na ka la ti khawp mai. Ka lu a hai deuh riai riai avang chuan ka ṭhu rei thei lo, ka mu a ni nghal der.

"Ka lawm e, ka lawm lutuk, min puih avangin, i ti thei a nih chuan ka...ka...he hmun aṭanga ka tlan chhuah theih na'n hian min pui la ka ti" ka ti zawi raih a, ka ṭawng chu a chhuak dik hlei thei lo.

Ka thil dil chu a âtthlak ka tih rualin amahah chuan ka innghat ngam miau bawk si, tunah chuan ani tluka mihring rin ka nei tawh rih lo. Ka awmna aṭang chuan min hruai chhuak daih se, let tawh miah lo ila ka ti a ni.

Ka tan chuan chu hmun chu hremhmun tenau a ni ringawt, natna chi tinreng ka dawng bawk si, chutah thih leh dam inkarah ka ding reng bawk nen chu hmuna awm thlakhlehna reng chu ka nei lo a ni.

Ka mut chu a chhuak telh telh a, ka mit vun chu thil rit tak ang mai a ni tawh. Ka maimitchhin dawn tê ah chuan a hmel ka en ṭawk ṭawk a, a mitmengah chuan min tihlum dawn lo ni tlata hriatna ka nei a ni.

Enge a chhan ka hre lo, min buapuitu leh ka hmelma ni bawk chu thlamuanna hmun angin ka ngai tlat. Hmelma kan ni a, hmelma maw!?

Ni lo, kei chuan hmelma kan ni tih pawh ka hre lo, ka chhungte an thah vek zan kha thleng lo se chuan hmelma kan neih awm reng ka hre lo vang.

"Zaninah i chung thu kan rel dawn, dam i duh chuan ka thu thuin awm ang che" thum dupa a rawn tih chuan ka ke na ti em em chungin ka khi lui sak a, damna chance ka la neih thu chuan ka chhungril a tihlim veng veng a ni.

Ka sawi reng kha maw, he pa, Hunter-a, tualthah hrat hmel zet leh palian rorum zet, kutthlak na zet hian khawngaihna chu a nei chiang alawm, a rilru chhungril tak pawh mi dang angin a chhiat ka ring lo kha a ni a, tunah amah ngeiin a rilru sual kherek lohzia a rawn fiah ta chu a nih hi!

Min pui dawn, ani hian min puih dawn thu a sawi tlat. Chance ka neih thu kha a sawi zo chiah alawm, damna chance ka neih thu min hrilh alawm le, eng vang teh lûlin nge a thu thua awm chu ka hnial ngam ang nî?

Eng pawh ti rawh se, ka chungah engtin pawh ti dawn se ka nunna a zuah dawn a nih phawt chuan tihhreh leh tawrh theih loh ka nei lo vang.

"Ka lawm...ka lawm e aw...Hun...Hunter" thei leh thei lovin ka ti a, nasa takin a mitmeng leh a hmel leh a awm dan chu a danglam nghal vek.

"Engtin maw min koh a!?" ram hmuka a rawn tih chuan ka mit ka chhing vang vang a, ka thluak chu a chawl tial tial ni berin ka hria.

A hminga koh chu ka tum lawk pawh a ni bik lo, mahse mak tak maiin ka ko chu ka inchhir lo hrim hrim. A aw ram hmuk chu ka hre hla sawt em em a, ri emaw thawm emaw pawh engmah ka hre tawh lo.

Meng ila chuan a hmel awm dan hlauhawm zet leh rorum zet ka hmuh ngei ka ring, mahse ka damdawi ei vang pawh a ni ang ka mit chu ka kau thei tawh lo.

Kut hrawl leh lum nuam ang reng takin ka hmai a rawn tawh chu ka thil hriat leh awmchhun a ni a, chu bak thil dang reng hriat ka nei zui ta lo.

Ka hmai sa deuh vung vung avang chuan ka harh a, ka men rualin thuka mei intuah alh chu ka hmu a, khawiah nge ka awm ka hre ta hauh lo mai.

Ka thil hriat hnuhnun ber lai kha chuan khumah ka mu a, ka bulah Hunter-a a awm bawk, mahse tunah chuan thuk bulh ka awm daih thung.

Ka lu kânin ka hawi chhuak a, min lo en ṭhap mai. Ka bulah chuan Maid pakhat hi a lo ṭhu ve a, Maid dang erawh an lo ding tlar ṭhap. Hunter-a chu ka zawng ru deuh nghal a, a pa bulah a lo ṭhu fel thlap.

Mipa sawm chuang Coat dum suit inbel chuan min din hual a, chu hmun aṭanga tlan chhuah chu theih loh tluk a nih ka ring ta, Hunter-a'n min pui duh tak tak te a nih ngawt loh chuan.

Hunter-a pa bulah chuan Griffin-a a ṭhu ve ran a, Sakeibaknei te'n sakhi ei châk hmel zeta an veh thlem ang mai hian min en a, thah min châk tak zet tih chu hai theih rual a ni lo. En pawh en rei ngam lovin a laia ṭhu putar chu ka en ta zawk a, ani pawh chuan min lo en chiang hle.

"Enge i hming pangai ni reng reng? Taylor thlah i ni tih chu i mitmeng aṭang paw'n ka hre thei, tunah hian i thih leh dam chungchang kan sawi mek bawk" putar chuan a rawn ti a, thih leh dam a sawi rual chuan ka tha a khur der der nghal.

"I hming chu sawi ta che" rum zeta min en chung hian Hunter-a chuan a rawn ti hmuk a, ka chil chu ka lo lem khawlh a, ka zam ru hle bawk.

"Daisy Taylor; Mark Taylor leh Emily Taylor te fa naupang ber" ka tih chuan ka hma zawna ṭhu putar chu a nui chhuak hawk hawk a, kei ang bawkin a fate chuan mak an tih hmel hle.

"I nu leh pa chu i chhuang ve hle mai maw, sawi lo mah ila ka hre vek alawm, i pa kha duhamin ka huangah buaina chawk chhuak lo se chuan heng zawng zawng hi a thleng miah lo vang" nui sun sun chung hian a ti a, nuihzat thlak awm miah lova a nuih avangte chuan amah ka ṭih zual phah.

"Enge ka pa chuan i pawi a sawi a? Engati nge ka chhungte zawng zawng in thah vek?" zam ru em em chuan ka ti a, chutah a ṭhut dan siam ṭha sauh hian

"Nang pawh thi tur i ni, i thi lo hi i vanneih hle zawk tih hria ang che" a rawn ti khauh fak a, ṭawng leh tawh lovin ka ngawi ta vang vang.

"Ka pa, Geneve lamah chuan kan kal thuai a fuh zawk ang. Nakin lawkah chhuah kan ngai ang a, saw hmeichhia saw kan tihriral vat a ṭha ber" a vei lama ṭhu Griffin-a chuan a ti a, Hunter-a chu ka en nghal vat.

"Ka pa, hmeichhe dam chhuak an awm chuan kan zuah ṭhin a ni lo'm ni? Chu bakah ani nen sawn inremsiamna kan lo nei tawh a, chuvangin kei chuan thah kher a ṭulin ka hre lo" Hunter-a chuan a ti ve a, inremsiamna tia a sawi fô chu ka hre ve hauh lo.

"Ni lo ka pa, tun ṭuma hmeichhe dam chhuak hi chu a dan a dang tlat. Kan thisen zawmpui ngei mai Hunter-a'n humhim a tum tlat te hi chhan a awm ka ring, nakin lawkah kan tan thil pawi a thleng thei reng a nia" rawn titu chu Griffin-a ve thung a ni.

"Ka pa i ni hauh lo Griffin, ka pa chiah ka bia, a ṭawng hmaa ṭawng kha sim tawh rawh" hlauhawm tham khawpa nghet leh thumin Hunter-a chuan a ti a, Griffin-a pawh chu a ngawi chiang hle.

"Inhnial reng lo teh u, hriat a hneawm em mai. Eng pawh ni se eng inremsiamna nge he laia tleirawl hi i lo neih pui Hunter? Chhan ṭha tak vanga hum tum i nih ngei ka ring, a nih loh erawh chuan ka tihtur i hriat kha!" putar chuan a rawn ti ta, Hunter-a ṭawng chu kan ngaichang ta ṭhap.

"Ka duh apiang tih a inhuam thu a sawi tawh a, chuvang chauha nung dama la awmtir chu ka ni e. Ka room enkawltu hi thlak ka duh, ka duhthusamin ka room khi a enkawl thiam lo a ni" Hunter-a chuan a ti ta daih mai.

"Hunter Hudson, hmelma fa i hum tum chhan chu a va ho leh si ve, ani ni lo pawh hi mi dang tam tak an awm alawm" Griffin-a chuan a rawn ti a, nui mahse a nuih a za hauh lo tih ka hria.

"A nih chuan zanina kal i tum loh bur chhan kha sutin i nau hi i kaihruai dawn em?" Hunter-a pa chuan a ti a, chu veleh Griffin-a zawk chuan

"Ka pa!! Min ring zo ve thlawt lo em ni? I fapa ka nih ve tho hî, naupang enzui ngai reng pawh ka ni tawh bik lo" a rawn ti ṭhawt a, a pa chuan a kutin ngawi turin a khap zui nghal.

"Aw le, tun thla atan chuan tun ṭum chiah hi ka chhuak tawh ang, tual thah reng hi ka hne ta deuh pawh a ni ang e" Hunter-a chuan a ti sup a, chutih lai chuan a pa chu a ṭhutna aṭanga ding chhuak pah hian

"Aw le, i duh dan a nih te chuan i room enkawltu tur chu kan thlak a ngai a ni mai alawm" a rawn ti a, nui deuh sâng hian a kawnga silai chu phawrhin Maid pakhat chu a kap tlu ta tawp.

"Ka pa, thisen chhuah lam ka sawi miah loh khâ, eng vangin nge i thah kher?" Hunter-a aw chu a chang ṭha em em a, kei chu hlauh lutuk avangin ka lo khur zawih zawih.

"Hmelma chuan thlak thleng a nei ngei tur tih kan hre tlang vek, i thluak a ṭhat tehreng nen i theihnghilh hi a mak ka ti zawk" a pa chuan a ti khauh ve fak a, Hunter-a erawh rum deuha mengin a ngawi hmuk thung.

"Kal tawh rawh u, i room enkawltu thar pawh kha hruai chho nghal rawh. A vanneih hle tih hrilh bawk la, nang kherin khatiang thutlukna kha siam lo la chuan a thi tawh ngei ang" a pa chuan a ti leh a, Hunter-a chu ka lamah a lo phei ta vut.

"Lo kal rawh!" a rawn ti hrawk a, min dimna nei miah lo hian min pawt tho a, min kaih rualin ka ngik ta feih.

"Hrep tak che hian!" ka lam lo hawi let chung hian a ti hluk a, ka inrin hma hauhin zo zet hian min pawm kang ta nawlh.

Step-a min chhohpui lai chuan ṭhut khawmna lam chu ka en a, chu lai hmuna awm zawng zawng chuan keini pahnih in chung lam pan mek chu min lo thlir ṭhap.

Chhuata Maid pakhat thisen nena awm nuai chu ka en leh a, ka lo en kher kher chu ka inchhir hle a ni. Room chhung kan luh chuan dim baksak lo hian khumah min theh thla pawp a, ka ke na avang chuan ka ṭhen chai chai zui nghal.

"Nang hmeichhia, chutah kan hmelma fa leh nghal, eng vang teh hrepa hum duh tlat che nge ka nih pawh hi ka inhre nek lo e!" vin tak hian a rawn ti tuar a, ka hlau lutuk chu a hmel pawh ka en ngam lo.

"Thah ve nghal law law che hi a fuh zawk maithei, Griffin-a sawi kha a lo dik phei chuan ka chan a chhe khawp ang" a tih leh chuan ke na leh kut na pawh ngaihtuah lovin khum aṭang ka chhuk a, a ke vuan chuan ka ṭhingṭhi ta thuai.

"Min that suh, min that lo hram rawh aw? Ka tiam a che, i room hi ṭha takin ka enkawl ang, i duhthusam ang ngeiin ka enkawl ang" tiin ka ṭap chhuak hawk a, chu room chhungah chuan in hnuaia Maid an thah ang mai khan min that ve nghal mai ang tih ka hlau a ni.

"I chung thu rel tura ka thluak ka hmang hlei thei ṭhak lo pawh hi ka hrethiam lo, zanin aṭang chuan nang hi ka khumah hian i mu tawh tur a ni lo. Maid room a awm hrang a, chutah chuan i riak zan tin tawh ang" tiin room aṭang chuan a chhuak a, chhuatah chuan ka bawk thlawp ringawt.

PROTECTIVE HUSBAND

By

Havali Adam

Chapter 3

Kar leh thla a liam a, Winter season chuan kan in kawta Daisy par min hriat chhuah tir a, nun pangai neih leh baka thlakhlelh ka nei lo. Ka chhungte an thih aṭang thla 1 chu a liam ta der mai, thi lova ka awm chu chung lam zahngaihna a nih rualin Hunter-a vang a ni tih chiang takin ka hria.

Ani chu awm lo se chuan min thah châk zek zek tu a unaupa ni bawk Griffin Hudson-a khan min tihlum tawh ngei ang, mahse kei chu nung damin ka la awm tlat, a chhan pawh Hunter-a vang a ni.

Ka chung thu an rel zan aṭang khan a room-ah ka riak leh tawh ngai lo va, room chhung ka tifai te a nih ngawt loh chuan ka lut tawh ngai lo hrim hrim. Amah nen tak pawh kan inhmu tawh ngai lo, zep lovah chuan ka hmelma ni mahse ka nunna chhan him tu a nih avangin ka tan chuan a hlu a ni.

Ka ke chuan zia lam a pan chho ve zel a, la na tho mahse rah ngam loh khawpa na a ni tawh lo. Hremhmun in chhung ang maia ka ngaihna hmuna Maid ka nih zan aṭang kha chuan ka ke ka hman theih ngei ngei a ngai, ka hmang lo a nih chuan Hunter-a unaupa Griffin-a khan min thah tur thu min hrilh miau alawm, ka tan chuan hman ngam lohna chi a ni lo.

Mihringte hi kan lo danglam thei khawp mai, khang thla 1 chhung lek khan nasa takin ka inthlak danglam a ni. Tuarchhel ka zir a, taksa dam ṭhat lohna nei eng ang mah ila ka hna leh ka tihtur chu a ngai reng tho, tûma'n min tihsak thei lo.

Chu ina Maid te chu kan vaiin 9 kan ni a, kei chu a Junior ber ka nih avangin Maid ka nih tuk aṭang chuan min tiduhdah nghal khawp mai. Ka laka an chet dan chu tû hnenah mah sawi lo turin min vo a, an ṭang khawm vek bawk sia ka tan chuan hnial theih an ni lo a ni.

Ka chungah chuan an thinrim hlawm em em bawk a, a chhan pawh keimah vanga an ṭhiannu kah hlum a nih vang a ni. Dik tak chuan ka inthiam lo ve tho, keimah avanga mi dangin nunna an chan chu a pawi ka ti, mahse thil thleng vek tawh a nih avangin engmah ka thlak danglam thei lo.

"Daisy khawngaih thlak te, heti lamah hian i tihturin a hmuak che a nia, i thil tih lai kha dah la, lo phei ta che" Sharon-i, Maid zinga kan pi en ber chuan a rawn ti a, ka dawhkan hruk lai dahin min kohna lamah chuan ka phei a, mi dangho chuan min lo nuih sâwng hlawm.

"Eng thil nge ni ta pi Saron?" ṭha tak chuan ka ti ve mai a, duh ang thâla ka ke ka la hman theih loh avangin ka kal bai chawt chawt bawk.

"Hei thleng sil tur hi a tam khawp mai a, keini lah chuan tihtur kan nei ṭheuh bawk si a, i tihturah kan dah tawp a, han sil mai ta che" nelawm zetin ṭawng mahse a rilru chhungril a khâk em avang chuan ka nel hauh lo.

"Kei paw'n tihtur ka nei alawm, pu Hunter-a room tih fel ka ngai nasa hle a ni. Ka tifel fai lo a nih vaih chuan ka chan a chhe hle ang, mi dang i tih tir thei zawk ang em?" ka ṭawng zawh rualin ka biang chu a ri sawk a, min beng na ngei mai.

"I zak miah lo em ni? Min hnial ngam vela maw!? Maid zingah hian ka thu ber tih i hria em? I ngam chuan ka thusawi hnial zawngin min han chhang let leh teh, i inchhir ngawih ngawihna turin ka che ang"

"Mi dang pawh hian engmah an ti hleinem pi Sharon" ka tih chuan ka samah a rawn ṭham a, thleng silna bulah chuan min theh phei ta dâwr.

"Thuawih tak khan sil ang che, i sil lo a nih vaih chuan thah che kan hreh miah lo a nia, lo thi ta pawh ni la tu nge ngaihven zui chuang ang che?" ka mittui chu a far fep a, pi Sharon-i chu ka chhang let ngam tawh lo.

"Min chhang rawh, i inla luhluh ve deuh tihna em ni? Min han chhang teh, thi ta la tu nge ngaihven ang che?" ka sam chu a rawn kek leh a, min kuai dak âwrh bawk.

"Tuma'n...tuma'n...tûmah min ngaihven tu tur an awm lo" ka tih chuan a nui ri hak a, ka sam chu thlahin a dinna aṭang chuan a tawlh sawn deuh a, min nuih leh ver ver tawh.

"I sawi dik chiah, tûma'n an ngaihven dawn lo che. Chuvang chuan ka thu hi awih la, i dam rei a ni mai" tiin a kal sawn a, mi dangho chu chawh min tih hmel zet hian an lo nui a, rilru na em emin thleng chu ka sil ta nge nge.

Chutiang chu ka ni tin hun hman dan a ni a, kutthlak pawh ka dawng nasa thei khawp mai. Pangai taka han chhan let thut te ka nei ṭhin bawk si a, chuvang pawh chuan an sawisak leh kut tawrh chang ka ngah phah hle.

A changin bathroom zawng zawng min tihfai tir a, in lian ṭha ve tawk tak a nih avangin mi pakhat tihfai atan chuan a hahthlak mah mah a ni.

Chutih rualin hna pangai thawh tur ka nei reng a, Hunter-a room chu ka enkawl ṭhat viau a ngai bawk si, a duhthusam ang taka a room ka enkawl lo a nih chuan thih bak hmabak ka nei lo.

Tlai dar 5 a ri tawh tluk a ni a, a rik lohna vel chiahin a dal tawh ti ila ka sawi sual lo vang. Hunter-a chu a rawn haw thut ka hlau, a room engmah ka la tifel si lo va, ka tifel lo tih a hmuh vaih chuan min that duh ngei ang.

Ka theih tawpa chakin thleng chu ka sil zung zung a, eng thil mah an ti der si lova mi dangho chuan min pui ve mai se ka ti ngawih ngawih. Thleng sil pahin dar zat chu ka en leh ṭhin, ka tihtur ber ti hman lovin ka awm tak tak ang tih ka hlau a ni.

Dar 5 leh Minute 15 a rawn ri ta, ka tan chuan dawhkan nawh fai nen room chhung tihfel faina hman a awm tawh lo. Ni lo, ka tihtur ber zawk chu room enkawl a ni a, dawhkan chu a ṭul changa ka tihtur mai chauh zawk a ni.

Ka thil tih lai chu kalsanin in chung lamah ka tlan chho a, ka ke a lo na kher bawk nen ka tlan chak thei lo khawp mai. Thleng sil zawh khan dawhkan vel nawt fai lo ila chuan ka tifel hman var var ang, tunah chuan Hunter-a lo haw hmaa ka tifel thuai thuai a ngai a ni.

Room chhung ka luh rualin ka theih anga rangin ka tifel zung zung a, khumte chu ka pawt mar a, khum lian tak a nih avangin pawh mar na'n hun ka hmang hnem hle. Rizai hlai ṭha zet chu ka thlep fel leh sawk sawk a, room chhunga sana intar chu ka en pah reng bawk.

Khum ka siam fel hnuah Wardrope chu ka hawng leh a, mumal lo taka thawmhnaw inkhai thluah chu ka siam ṭha mawlh mawlh a, chutih lai tak chuan in hnuai lam aṭang dar a rawn ri ta bawl bawl mai, chu chuan Hunter-a leh a pate an lo haw tih chiang takin min hriattir zui nghal.

Room aṭanga tlan chhuah mai chu ka tum a, a chhan pawh Hunter-a chuan a room chhunga ka hmel hmuh leh a duh tawh loh vang a ni.

Kawngka bul ka thlen rualin khum bul hnawk nuai chu ka hmu ta hlawl, a hma zawnga hmu si lo khan hun lo takah tihfel tur dang ka hmu leh hram a, hmanhmawh takin ka che zui nghal sawk sawk.

Chutia rilru hlauthawng leh mangang ru taka ka tihfel lai chuan kawngka chu a rawn ri ta khep mai, intibo thei ila chuan ka intibo ngei ang. Kawngka lam chu muangchangin ka hawi a, ka thinphu ri te chu ka hre thei hialin ka hria.

"Eng vanga ka room chhunga la awm reng nge i nih?" ram hmuk hian a rawn ti a, min hmu lo der thei hram se ka tih tih nen min hmu chiang khawp mai.

"Eng lo...In hnuai lamah khan pi Sharon-i'n thleng min siltir a, chu chuan ka hun tam tak a la hek a ni" thu dik tak chu hrilh ila a ṭhat zawk ka ring.

"Thleng sil chu i tihtur a nih awm ka va hre lo ve, i tihtur chu ka room enkawl chauh hi a ni" a kut chu a kuangkuah zawm zat a, min en rum em dawna ka hriat avangin a mit chu ka en ngam der lo.

"Dawt ka sawi miah lo, min ring rawh, pi Sharon-i'n thleng sil tur tam tak min pe alawm" min ring hram se ka ti, a hmelah chuan min rin hmel pakhat mah a lang bawk si lo, ka tan chuan a beidawn thlak ta hle.

"Pi Sharon-i chuan chutiang thil a tihtir che pawh ka ring lo, ani chu he inah hian kum tam tak a thawk tawh" ka thusawi a rin lohzia nemngheh na'n chuan a rawn ti a, ka tan chuan eng pawh sawi ila awmzia a awm tawh lo.

"Room aṭang hian chhuak rawh, i chhuak lo a nih chuan i chan tur chu i hre chiang khawp mai" na zeta min en chung hian a ti a, min thah chu a châk hmel ngawih ngawih.

"Aw...aw le..aw le...ka pu" ti thuai thuaiin kawngka lam chu ka pan hmawk hmawk a, thil dang a sawi leh hmain chu room chu ka chhuahsan ngei ngei a ngai a ni.

"Ding teh!" khauh faka a rawn tih leh chuan ka ding chiang hle a, ka chhuak hman ta lo chu a pawi ngawih ngawih, engtin nge min tih dawn lah ka hre si lo.

"Eng vanga i hmai kha duk nge a nih?" ka bul lawka a din hnu chuan a rawn ti a, ka beisei loh lutuk zawhna min avang chuan ka en chho ta hâw.

"Maw? Nia...aw...ka hmai hi...ka tlu palh a, ka intauh alawm maw le" thu dik tak sawi chi a ni tawh lo, a awih lo nasa dawn lutuk, a hma pawh khan ka thusawi a awih miah lo a nih kha!

"I va tlu ngun awm ve" hriat nuam loh zet hian a rawn ti leh hmuk a, ka hmai chu a duk thleh thluah dawn tih pawh ka hre vek, chuvanga zawhna min zawt pawh chu a ni ang ka ring.

"Nia, ka lo fimkhur tawh dawn nia" tih ringawtin ka chhang a, chhan let dan tur dik ber pawh ka hre lo, ka ṭawng sual vaih chuan chuti hlauh a ni mai.

"Eng lo....ka....ka chhuak aw" chhuak turin thu min pe bawk si lo va, ngawi rengin min en run bawk si a, ka tan chuan chutia tih tawp loh chu tih ngaihna a awm lo.

Ka chhuah theih thu pawh a sawi chuang lo, min koh din leh hmain room chhung aṭang chuan ka chhuak ta thuai. Room pawn ka thleng chiah chu ka thaw huai a, chutah kawngka chu a rawn inhawng ta thut mai.

Phawk zet hian kawngka lam chu ka hawi a, Hunter-a nen chuan kan inen chiang leh ta khawp. Hawi sawn vatin hma lam chu ka pan vat a, step-a bul ka thlen chuan ka bul a lo thleng phei hman der.

A hmel pawh en duh tawh lovin Step-ah chuan ka chhuk a, mahse vanduai thlak takin ka rap sual ta. Ṭe chhuak vakin ka ban chu ka vai a, parda nge eng emaw ni ka vawn fuh hmasak ber chu nghet zet hian ka chelh a, mahse chu chuan min tiding zo hauh lo.

Ka let thuma lian vel ni awm tur taksa hian min lo delh a, chu chu tu nge a nih hrilh ka ngai lo, ka hre chiang lutuk tlat. Kan pahnih chuan Step-ah kan tawlh thla ri pawp pawp a, thing ang maia khauh ṭhain ka taksa hnung lam aṭanga min chawi tlat avangin kei chuan na pawh ka hre mumal lo.

Chhuat kan thleng chiah chu zangthal zawngin kan let phung a, ka vei lama mu run leh a ban ka kham mek pa chu ka en a, ani chu Chandelier en tlak tum ang maiin chung lam a hawi a, min buaipui tura lo kal te thawmah chuan ka che sawn ve ta chauh.

Min buaipui tura ka beisei te chuan kei ni lovin ka bula mu chu an buaipui ta zawk a, mi pangai anga ka lo ngai leh hman hlawm chu mawl ka inti hnuhnawh hle. A din ngil rualin Hunter-a chuan min en run a, chutah amah vek chuan

"Fimkhur ta che" a ti ram deuh hmuk a, engtik lai paw'n a aw chu a nelawm lo vek ti ila a dik ber ang.

"Ka tihpalh lutuk pu Hunter, a leh pek a awm tawh miah lo vang" tiin ka kun ngul a, rum nghutin choka lamah min kal pel hmak a, a rim chuan na ni si lo hian rimtui dan ruk riau a nei bawk.

Dinner ei lai zawngin keini Maid ho chuan engmah kan ei ve lo va, an eitur leh mamawh apiang pek inring rengin kan awm a ni ber. Mak ka tih ve deuh pakhat chu tual thah hmang leh sumdawnna ṭha lo tak kalpui an ni a, mahse an hote nen chuan Dinner leh Breakfast an kil ho vek zel.

Zing lamah hian an tlem deuh a, zan lamah erawh an ṭhahnem thei khawp. Hunter-a erawh khang thla kal ta chhung khan ka hmu ngai mang lo va, ka hmuh paw'n a chhuak tur chiah ka hmu ṭhin. Dinner ei laiin emaw Breakfast ei lai pawhin ka hmu ngai lo, mak ve tak chu a ni.

Dinner an ei zawh chuan kan tifel sang sang a, ka che fimkhur hle bawk. Chutia thleng chawia ka kal lai chuan Maid pakhat hian min rawn nek deuh chawrh a, loh theih lovin ka tlu ta, ka fimkhur ve tehreng nen mi dang suah sualna avangin ka che sual ta fô.

Rang lutukin chhuata thleng keh darh chuai chu ka chhar khawm a, Hunter-a leh a pate hovin min en ṭhap tih chu ka mit sirin ka hmu reng a, mahse an lam ka hawi ngam hauh lo. Tu ber nge pawh ka hre lo Maid pakhat hian min lo chharpui sawk sawk a, ka ril a ṭam tawh bawk si nen ka ṭah chu a chhuak ru hle a ni.

"Lak tlak loh tak zawng a ni e, chu bakah a la naupang mah mah a ni. Engtin nge saw tiang hmeichhe naupang mai saw i room enkawl tura i duh tlat mai le? A hmaa mi ai khan a ṭhat zawk pawh ka ring nek lo, mahse thlak thleng hial i duh kha a ni si a" tia ṭawng hmarh hmarh chu Griffin-a a ni tih chiang takin ka hre thei.

"Kan tipalh lutuk ka pu, ṭha takin training ka lo pe dawn nia" kan sir lam aṭanga rawn titu chu pi Sharon-i ve thung a ni.

"Pe mawlh teh, chuti lo zawng in chhung bungrua zawng zawng hi kan chan vek palh mai ang e" Griffin-a bawk chuan a ti bul leh hmuk a, ka chanchin an sawi dan chuan ka rilru a tina tak zet.

"Inngaihtuah lung puam lo khan tho rawh, hengho hi bawlhhlawh bawmah va paih bawk la" pangai taka min betu ka bul lawka lo ṭhu Maid chu ka en zawk a, ani chuan min en miah lo.

"Kal rawh, khawmuang lo khan kal mai rawh" ka en reng lai chuan a rawn ti leh a, a ṭawng ring lo kher mai, kan pahnih chauh lo chuan a ṭawng chu an hre lo vang tih theih khawpa zawi a ni.

Ka ṭhutna aṭang chuan ka tho thuai a, thleng keh chu kengin bawlhhlawh bawm awmna lam chu ka pan a, ka kal tumna hmun ka thlen chuan ka mittui a lo tla fel leh der tawh.

Duh lo eng ang mah ila ka hun tawn mek chu ka nun dan a ni miau a, chhiahhlawh pawh ni ila chutiang em ema ka tawrh chu ka lo ring miah lo kha a ni a, mahse ka ring sual chiang hle a ni.

Hunter-a chhungte mai bakah ka chhiahhalwh pui te vekin min tiduhdah zel ta cheu a, thih chu hlau em em lo ila chuan beidawn avangin ka intih hlum daih tawh ka ring.

Maid hovin Dinner kan ei laite chuan eitur tui hmel leh tam tak pawh ka nei ve lo, a chhan pawh pi Sharon-i rorel dan vek a ni.

Tleirawl mai ka la ni a, thil ei tui lai leh ei duh hun lai ka tawng mek a, mahse ka duh ang takin eitur chu ka hmu si lo, ka mamawh zat tak ngial pawh ka ka ei ngai lovin ka hre ṭhin.

Thawk thar ka nih miau avangin ka chunga an chet dan chu ka sawisel ngam tawh lo, ka sawisel leh a nih chuan kut bak ka tuar leh dawn chuang lo tih ka hre chiang em em tawh a ni.

Kan awmna hmun chu Switzerland daih a ni a, chu pawh ka hriatna a la rei lo. Chhiahhlawh ang maia ka awmna leh tihduhdahna nasa tak ka tawrhna in chhungah chuan Hunter-a pa; pu Robert Hudson-a chu a thu ber a ni a, a nupui erawh a thi tawh thung.

Hunter-a leh Griffin-a tih loh fanu pakhat a nei a, ani erawh Italy lamah a cheng thung. An chhungkua chu ka hrethiam lo, sumdawnna pangai nei reng chungin tual thah hmang an ni a, tual that lo pawh ni se an inchawm zo lutuk ang ka ring.

Chung zawng zawng chu hriat ka tum a ni hauh lo, ka Maid pui ṭhenkhatte thusawi aṭanga ka hriat vek zawk a ni. Chu in, ropui leh mawi zet, mahse a chhung boruak chhe em em sia Maid ho chu an hmelma te fa vek kan ni hlawm a, pi Sharon-i thlengin kan ni fai vek.

Ani erawh chu an manna a rei tawh a, chu ina Maid hmasa ber chu a ni hial. Thu awm reng pawh a lo ni, a thawhna a rei tawh dawn em mai. Pi Sharon-i chu tu paw'n kan hlau vek, Maid ho zingah chuan a rorel dan hnial ngam kan awm meuh lo.

Zan lai hnaih tawh lam a ni a, eng zan ber nge a nih pawh ka hre lo. Awl lai pawh nei lovin hna ka thawk a, mi dang let chuan ka thawk nasa ṭhin a ni. Ka ril ṭam lutuk chuan min timuhil thei lo, ka pum chu a ri leh thut thut ṭhin.

Room chhunga mu ve te chu an muhil vek tawh tih hriat takin an thaw seng seng hlawm a, thawm dang pakhat mah hriat tur a awm lo. Ka tih ngaihna hre lo chu room aṭang ka chhuak a, a ruka thil ka ei mai loh chuan ka thi thei mai ang, thih ka la duh teuh si lo.

Thawm dim em emin choka lamah ka kal a, mi dang hmuh chu ka hlau em em bawk. Dinner ei laiin ka che sual leh pek a, chuvangin pi Sharon-i chuan chaw ka ei a phal lo a ni.

Ka chet sual apiangin min hrem tur thu a sawi leh ta zel a, ka tan chuan chu hmun leh ka hna thawk mek chu lungngaihna mai a ni.

Choka-a ka luh chuan bel chu ka hawng a, thil ei bang chu a lo awm tuarh mai. Ngawi rengin ka hmawm mawlh mawlh a, mahse ka va hmawm rei lo si em.

"Nang! I tlai chaw pawh duh khawp lovin i awm vela maw!? A ruka thil tih hi ka huat zawng tak a ni asin, zilh hlak che chu i ngai a ni" tiin ka chhim samah mipa pakhat hian a rawn ṭham a, a ṭawngkam aṭang chuan Griffin-a bak a nih ka ring lo.

"Han sawisak vel che hi ka châkna a rei tawh, zanin chu chance ṭha tak ka hmu e" chhuat laia min theh phei lâwp hnu chuan a rawn ti leh hrawk a, a kawnghren chu a phelh zui nghal.

"Ka ril....ka ril a ṭam lutuk a, thil ka lo ei mai a ni. Khawngaihin min ngaidam rawh, min sawisa lo hram rawh ka pu" tiin a hmaah chuan ka ṭhingṭhi a, kawnghrena invuak kher chu ka tawrh zawh ka ring lo a ni.

"Ni lo ve, thil ei châkna pawh nei thei lo tur khawpin ka'n zilh hlak che ang e!" tiin min tlawh leng dâwrh a, a kawnghren chu lek kangin min rawn vaw ta.

Ka lo maimitchhing tawp a, mahse na ka hre miah lo. Hamhaih leh hlauthawng em em chungin ka meng chhuak a, Griffin-a ban chu che thei lêk lo hian Hunter-a ngei chuan a lo chelh ran a, an meng no lo dun khawp mai. Engtin nge Hunter-a chu kan bulah a rawn kal hman zawk? Engtin nge chokaah chuan kan awm tih a hriat reng reng?

Ani hi chu ka tan a va hlu tehreng em, hmelma ni mah ila amaha thlamuanna ka hmuh theih na'n ka lakah a awm tlat a ni.

Thihna ata min chhan chhuak a, ka taksa na a buaipui a, a chhung te'n min thah duh em em mahse min hum tlat a, a chhan tak hre lo mah ila a lakah chuan bat tam tak ka nei a ni.

Kha zan, ka chhungte an thih fai vek zan pawh khan ani chuan min pui thung a, ka chhungte thahnaah a inhnamhnawih ve miah lo a nih kha!

"Eng vanga min lo dang nge i nih?" a ban lak thlak tum pahin Griffin-a chuan a ti ram hmuk a, mahse a ban chu a la thla lo chiang khawp mai.

"I room-ah chho rawh, keima'n ka lo buaipui ang" Hunter-a aw chu zawi mahse a hlauhawm leh hle.

"Ni lo, i hum ziah hi ka hrethiam thei lo che. Zanin chu hrem a phu, a ruka thil ei ru turin he in chhungah hian dikna a nei lo"

"Min hnial leh dawn tihna em ni? Nge ka kutthlak i tuar duh leh zawk?" a ban theh per lâwp chungin Hunter-a chuan a ti a, Griffin-a pawh chuan a u chu a melh rum hle.

"Hunter Hudson, i la tisual khawp ang. Nang nu pawh kha, kan la ching fel zo lo tih hria ang che" tiin Griffin-a chu choka aṭang chuan a chhuak a, kawngka chu a khar na hle bawk.

"Eng vang teh hrepa hum ngaia awm ziah nge i nih!?" Hunter-a chuan a rawn tih zawm nghal a, ka phu nasa hle.

"Ka tihpalh, mahse ka ril a ṭam em a ni. Dinner kha ka la ei ve lo va, pi Sharon-i'n ka ei a phal tlat lo a tin ni!" tiin ka ding a, thu dik ka lo sawi ta kher kher chu ka inchhir hle, ka thusawi chu a awih leh chuang hauh lo vang.

"Dawhkanah sawn lo va ṭhu rawh" tiin a che vut a, a sawi ang chuan kei pawh chu dawhkanah ka ṭhu phei thuai a, Hunter-a chet dan bak chu thlir tur ka nei lo.

Chhuar pakhat chu a hawng a, bel lian tak chu chhuatah a nghat a, bel pakhat la lehin a rawn keng phei a, a tan chuan bel pahnih chu a te râwih thei. Bel chu ka tan chuan a lian khawp mai, chawi pawh ka chawi zo ve lo vang.

Ani erawh chuan a kut pahnihin a rawn keng mai a, zo hliah hliah tak a ni. Dawhkana bel pahnih chu a rawn nghah chawrh hnu chuan tui bottle a rawn la leh a, kawngka bulah inkuangkuahin a ding zui ta daih.

"Min en reng lo khan ei ta che" min biakna chuan min tiharh zawk a, ka ṭhutna aṭanga dingin bel chhunga eitur chu ka ei ta mial mial.

Tui ti zetin eitur chi hrang hrang chu ka hmawm mawlh mawlh a, Hunter-a lam chu ka en zeuh zeuh bawk. Ka en apiangin min lo en run zel a, a hmel chu en rei ngam a ni lo.

A hmel tak pawh en ngam lovin a inchei dan te chu ka en daih a, a thawmhnaw inbel chuan a tilang palian leh zual. A lo berah Hunter-a chu feet 6 leh inches 5 emaw 6 emaw vel a nih ka ring, kei nen chuan inlen hleih deng deng tak kan ni.

Ka pa kha palian theng thawng tak a ni a, a fapa te paw'n kan chen lo hrim hrim. Chutiang bawkin ka nu pawh a te hran lo, kei erawh kan chhungkuaah ka te ber thung.

Feet 5 leh inches 9 vel chauh ka ni a, ka chhungte chu feet 6 an kai deuh vek. Ka nu tak ngial pawh feet 5 leh inches 11 a ni a, ka nu ang tala san chu ka châk ve ṭhin.

Ka thil ngaihtuah ho zet avang chuan ka inthing harh a, ka awm dan chu kawngka bula ding run Hunter-a chuan a lo en chik hle. A palianin a sang thlawt, kawngka chu sang lutuk lovin zuang se a tawng pha ngei ang.

Puar taka ka ei hnu chuan tihfel tumin ka che a, bel chu ka chawi zo awzawng lo. Hunter-a chu a che hrut a, ka thil chawi tum chu zo zet hian a rawn chawi nghal hmak.

"I room-ah phei rawh" min en miah lova a rawn tih chuan ka lo ding ngil zawt a, ka phut lutuk vang a ni ber.

"Maw?" ka ti hê hâw a, a thusawi chu ka hre lo pawh a ni lo, bel remfel mawlh mawlh paha min be thut chu mak ka ti a ni.

"Hrep che hian, ka thinrimna tih belh chhah tum suh" min en chung hian a rawn ti hrawk a, rang takin room aṭang chuan ka chhuak nghal thuai thuai.

Lung muang zetin khumah chuan ka mu a, mahse ka muhil thei hauh lo thung. Khua a vawh ṭan tawh avangin rizai chuan ka intuam a, mu lovin tukverh bulah chuan ka ding a, khaw awm dan chuan ka ngaihtuahna a tithui khawp mai.

Ka roommate pahnih chu an mutui em em a, ka thawm pawh an hre lo hrim hrim. Room khatah pathum zelin kan mu a, mi dang ang em emin ka roommate te chu ka chungah an sual hran lo.

Tin, an la Junior ve tho bawk a, roommate te ni ve mah ila biak khat pawhin kan inbe ngai lo hrim hrim. Kei chauh min be duh lo pawh a ni lo, anmahni pahnih inbe lai hmuh tur pawh chu a vang em em a, mahni tal talin kan tal hlawm a ni ber.

A pawi ka ti lo, kei chuan min be miah lo mahse pawi ka ti lo. Ngawi rengin kan tihtur ṭheuh ti ila, mi dang phut buai lovin che ila, mi dang nunah inrawlh tam lo ila ka duh ber.

A chhan chu kan inbiak chuan buaina a awm mai mai zawk ka ring, chu hmun hremhmun ang maia ka ngaih chuan a chhunga chengte rilru a hruai dik lo vek tawh a ni.

Khua chu a duai deuh ruih a, ni eng pawh a lang lo. Chutiang bawkin Hunter-a hmel pawh ka hmu leh tawh ngai lo. Kha zan aṭang khan kar khat zet chu a liam leh tawh, mak tak maiin Griffin-a zawk chuan min tibuai tawh ngai miah lo.

Hmuh chu ka hmu ṭhin ngei alawm, mahse ka hmaah rei tak a awm lang duh tawh ngai lo. A hma ang em emin ka lakah pawh a sual tawh lo va, chu chuan ka ngaih a tiṭha chuang hauh lo. Thil tum a nei ran ang tih ka hlau, ṭha deuh anga lang siin min beih thut ka hlau a ni.

"Nang naupang!" min kek bu lâwp chung hian pi Sharon-i chuan a rawn ti a, ka lo inring lo bawk nen ka pai chhawn chhawn mai.

"Nangmah vang hian kar khat chhung chu hmun hrehawm takah ka awm phah tih i hria em?" chhuatah chuan min theh bawk thlawp a, mi dang pahnih chuan min rawn tung tho leh nghal.

"I sawi awmzia ka hre lo" ka ti chiah chu ka hmai a ri sawk a, sawk ni lovin a ri zawt zawt a ni mah zawk, min benna avang chuan ka ka chhung a rawn lum pup bawk.

"Ka hre lo te i ti vela maw!? Zak thei lo nu, pu Hunter-a bulah min lo hek a ni lo'm ni?" a ṭawng zawh rualin min lo beng leh chawrh a, min hnek hialin ka hria.

"Hre rawh, nangmah vanga hrem ka tawk leh a nih vaih chuan nung damin ka chhuah tawh lo vang che" ti hmarh hmarhin bawm hi min pe a, min nam kal nghal det det.

"Bawm khat hi Apple lo la, mi dang puihna dil hlek suh ang che" tiin pawnah chuan min nam chhuak a, Step a lo awm thut avangin ka lum thla a, ka thawh kan meuh chuan ka khup a lo thi ser ser.

Huanah chuan peih lo leh rilru na em em chungin ka kal a, ka khup thi pawh chu ka ngaihsak hman tawh lo. Ka buaipui a nih chuan ka buaipui chhungin hun a lo kal leh duak ang a, Apple lawh nen ka tihtur ber Hunter-a room chu ka tifel fai hman lo vang tih ka hlau a ni.

Apple chu ka lo zung zung a, bawm khat ka lawh hnu chuan in lam pan mai ka tum a, ka chawi zo ta tlat lo. Chawi luia ka kal a nih chuan ka kawng a chhe vek a ni mai, a nih loh paw'n ka taksa eng emaw ni ber chu a chhe nasa hle ang.

Rit ti takin bawmrang chu ka hnuk a, ka kal chak thei lo lutuk chu ka mang a ang. Darkar 1 dâwn lai hun ka sen hnu chuan in chhung ka lut ve thei ta hram a, mahse pi Sharon-i chuan bawm dang min lo pe leh nghal zat.

Huana Grape rah tûar chu lo turin min ti leh a, ka hnial ngam tawh bawk si lo nen ka ngawi ngul ringawt. Min biakna ka chhan loh avang chuan bawm nen min nawr chhuak leh a, bawm phei chu a vawmin a vawm chhuak nghe nghe.

Engati nge Hunter-a pawh hian pi Sharon-i chu a lo hrem reng reng? Buaina min siam sak a ni ringawt alawm, a hnu leha thil thleng thei engmah a ngaihtuah tawh bawk si lo. Hrem lo se, ngawi mai mai se, pangai takin ka nung zawk ngei ang.

Tun ṭum zet chu Hunter-a ka haw hle mai, amah avangin ka phur a rit a, pi Sharon-i ka chungah a thinrim phah a, Hunter-a chu ka nunna chhantu ni mahse ka ngei khawp mai.

Grape ka lawh zawh chuan a ngai te bawkin ka hnuk phei leh hnak hnak a, Apple ang em emin a rit lutuk lo va, hun pawh ka seng hnem em em hran lo. In chhung ka luh rualin tihtur min lo hrilh leh zat zat a, ning ru zetin ka ti leh nge nge zel.

Lunch kan ei lai chuan an awm khawm deuh dal a, kei chu ka hrang nalh bik. An bulah pawh ka ṭhu lo, an hlat takah ka ṭhu zawk.

Mak tak maiin kan roommate te pahnih chu an inbe ve a, an thil sawi erawh ka hre lo. Ni dangah ka hmu laiin an inbe ngai miah lo, tuna taka an inbe thut chu mak ka ti a ni.

Lunch kan ei zawh chuan Maid pakhat nen thleng kan sil dun a, mi dangho chu an kal darh vek tawh. Ka thleng sil pui nu nen chuan inbe lo tak kan ni, thleng sil ri chu thawm awmchhun a ni.

Zanah chuan thawm ri neuh neuh avangin ka harh a, ka men rualin ka roommate te insiam mawlh mawlh chu ka hmu zui nghal. Pakhat zawk chuan Rocksy Bag hi a lo ak fel thlap a, lukhum hma thlawk a khum bawk.

Pakhat ve thung chu a la insiam mek a, an incheina chu mak ka ti hle. Jean kekawr ve ve an ha a, hmeichhia ni mahse an inthuamna chu mipa kawr deuh vek a ni.

Chutia ṭawng lo leh che lova an insiam mawlh mawlh ka en reng lai chuan ka lam an rawn hawi a, kan inmelh chiang ta hle. Engtin emaw ni zam ruk riauna ka nei a, anni pahnih lah chu ka khum lamah an lo la phei zui.

Enge ka tih ang? Ka lo inveng dawn nge? Ni lo, min tina lo vang, ka roommate te alawm an nih. An hmel aṭang chuan min sawisak duh hmel viau bawk si, awm dan tur pawh ka hre lo.

"Min hmuh vek tawh avangin kan bulah i lo kal ve a ngai" pakhat zawk chuan a rawn ti a, ka mutna aṭang chuan min pawt tho lâwp nghal.

"Enge?...Enge in tih dawn? In bula lo kal ka duh hleinem, min thlah teh u" ka ti zo chiah tihah a sang zawk chuan ka hmui a rawn hup a, kawngka lamah min kai dawr dâwr a, kei aia an len ve ve avangin ka hneh teuh lo.

Ka hmui chu puanin an tuam a, ṭawng tum eng ang mah ila an ṭawn ngheh em avangin ka aw chu a ri chhuak thei lo tluk a ni.

Min hruai ang ang chuan ka kal ve tawp a, kawngkapui lam pan lovin hmun kil khawr deuhah hian kan kal a, thil tiru tur kan ni ta berin ka hria. Zan lai a pel fel vek tawh a, keini pathum tih loh chu an muhil vek tawh a ni ngei ang.

In aṭang chuan min chhuahpui a, pawnah chuan mihring ka hmu ta. Ka dara chelh tlat tu hmeichhia chuan a hmui zawnah a kutzungchal a dah a, thawm dim zet hian min kal pui a, thil ṭha lo tak kan ti dawn tih ka hre zawm zat.

Coat Suit haa ding mipa pakhat chu kan kal pel a, huan lam panin min tlanpui ta dawr dawr. Grape kung bulah chuan min dinpui a, ka hmui chu pakhat zawk chuan a rawn phelh ta.

"Tunah hian he in hrehawm zet hi kan tlanbo san dawn a, nang pawh kan rualin i lo kal ve dawn a ni. Thawm bengchheng chhuah lo la, kan zinga i lo kal ve thei ringawt pawh hi lawm hle zawk rawh" ka bula mi chuan a rawn ti a, chutah phul hai mawlh mawlh zawk chuan

"Zanin bak hi chance kan nei lo, chuvangin fimkhur taka kan tlan chhuah ngei a ngai a ni" a rawn ti ve leh a, an ṭawng dan aṭang chuan thil awmzia ka hrethiam ve ta chiah.

"Kal ang u le, minute tam pawh kan nei lo" ka hma zawna mi chuan Grape zar zam duai keu pah hian a ti a, bang chhah taka ka lo ngaih chu a kaw ta huau mai, engtin nge chutiang bang chhah ṭha tak chu an tih kuak theih zawk reng reng?

Ka hmaa mite pahnih chu chu bang verh kuakah chuan an lut fel vek tawh, kei erawh lut lovin ka la ding reng thung. Ka ngaihtuahna chu a buai em em a, ka rilruah tlan chhuah lam aiin Hunter-a chiah a awm. Ani chuan ka nunna a chhan a, thihna ata min chhan chhuak a, ka tan a hlu em em a, a lungawi lohna tura awm chu a dik ber ang em?

Chu in hremhmun ang hiala hrehawm chu tlanbo san ka duh ngei mai, mahse Hunter Hudson-a zawk chuan ka rilru a tibuai a ni. Chutia ka din reng lai chuan thil a rawn ri vak vak a, ka hnung lam aṭang tu emaw ni hian ka lu ah na zetin min lo khawng a, ka tlu tawp a, engmah ka hre zui ta lo.

PROTECTIVE HUSBAND

By

Havali Adam

Chapter 4

"Harh rawh, harh rawh le!" tia ka hmai an ben deuh sawk sawk avang chuan ka meng riai riai a, ka lu chhungril chu a na ngei mai.

"A la harh ṭha duh lo tlat, khaw maw tui kha lo khai teh u, i harh dawn khawp alawm" tih thawm ka hriat hnu rei lotê ah tui chuan min theh huh vek a, harh chiang tawh tak ka ni.

"Aw, i lo harh ta maw, hmeichhe khawngaih thlak tê. Hremna i hmachhawn dawn tih han hre hmasa phawt mai la, i duh chuan i ṭap lawk thei bawk" min nuihsawh zet hian Griffin-a chuan min bia a, chu lai hmunah chuan mi dangho zawng zawng pawh an lo awm kim vek tawh.

"Sawi rawh le, khawiah nge i thurualpui hmeichhe pahnih te kha an kal? An thlen thui tak tak hmain kan hre thuai dawn a, i zep a nih chuan tun darkarah hian i thi nghal ang" Griffin-a bawk chuan a ti leh a, sawi tur reng ka hre lo.

"Sawi rawh ka ti lo em ni?" tiin min beng hawi sawk a, ka biang a beng na lutuk chu ka mittui a tling nghal pam.

"Ka hre lo, ka hre miah lo tak tak. Room chhung aṭang ka duh lo chung min hruai chhuak a, an ruahmanna pakhat mah ka hre lo" ka tih chuan

"Dawt sawi suh, a ruka tlan chhuah tumin ruahmanna in siam tih a hriat vek alawm" a rawn ti vin ṭhawt a, a hmel chu en pawh ka en rei ngam lo, min thah a châk tak zet a ni.

"Ni lo, kei hian dawt ka sawi lo, dawt ka sawi miah lo" tiin ka kun ngul a, ka bih lai mek chhuatah chuan ka mittui a far fep fep a, ka thusawi chu ring hram se ka ti.

"Dawt ka sawi lo te i ti vel a..Ha! A nih chuan dawt i sawi lohzia min hmuh rawh le, engtin nge dawt i sawi lo tih chu i prove ang? Naupang thil hrethiam lo rual emaw min ti em ni?" a rawn ti leh a, thu dik chu ka sawi ngei ngei a ngai tawh.

"Kei chuan tlan chhuah kha ka tum ve lo, tum ni ila chuan min khawn thluk hma khan ka kal thei reng alawm, mahse ka tlan chhuak tlat si lo" ka ti thawp sep a, mitmeng de sâwrin min en a, min din hnaih em avangin Hunter-a leh a pa Robert Hudson-a hmel pawh ka hmu thei lo.

"Eng vanga tlan chhuah tum ve lo nge i nih?" a rawn ti ram hmuk a, ka tlan chhuah duh loh chhan thleng thleng sawi chu ka duh dan a ni bik lo, mahse sawi a ṭul miau bawk si.

"A chhan chu Hunter-a ka ngaihtuah alawm, tlan chhuak ta ila ka lakah nasa takin a lungawi dawn lo tih ka hria a ni. Ani chuan damna chance min pe a, ka chunga a ṭhatna chu phatsanna hmangin ka thungrul thei lo" ka tih chuan a rawn nui hak a, ding sawnin Hunter-a leh a pa lam chu a hawi zui nghal.

"Enteh ka pa, he nu tê reuh hian ka u kha a hmingin a ko ngam vel maw le, a nuihzat thlak zawk" tiin Griffin-a chu a nui huah huah a, a nui hmel chu rapthlak tak a ni.

"Ka u Hunter-a i ngaihtuah vangin i tlan chhuak lo bik vela maw!? Khawvelah i thusawi hi a awihawm loh ber ang, i zak nachai nge!?" tih pahin ka âwmah tak chuan min tlawh a, ka let chiang hle.

"Griffin!" rawn ti hrawk tu chu tu dang ni lovin Hunter-a ngei a ni tih ka hria, besei nei takin mittui nen a hmel chu ka en a, amaha beiseina ka nei tlat zel chu a mak a ni.

"I ti mah mah ang e, keima'n ka lo dawp ang" Hunter-a chu Griffin-a bulah a ding run a, Griffin-a chuan taksa len zawngah a tiat lo ngei mai.

"Enge i hriat a? Kei paw'n ka dawp thei reng alawm, nge a dawt sawi zawh chiah kha i lo awih hman zawk?"

"Ka pa bulah sawn phei mai rawh, chuan i thusawi lawi lo zet kha ka hre reng peih hauh lo" Hunter-a aw chuan in chhung a luah khat vek a ni ber, thum ṭha hem hem tak a ni.

"Enteh Hunter, ka u i ni a, hetiang hian i awm ngai miah lo. I danglam tial tial hi a chhan ka hre thei bawk si lo, ka pa pawh hian i danglam sawt hle tih chu a hre ngei ang" ti salh salhin Griffin-a chu a kal sawn a, ka hma zawnah Hunter-a chu a rawn ṭhu hniam zui nghal.

"Dawt ka hua, dawt i sawi a nih chuan ka that ang che. Khawi hmun nge i roommate pahnih te khan an pan dawn?" Hunter-a chuan khauh zet hian a rawn ti a, ani tal chuan ka thusawi awih hram rawh se.

"Ka hre lo, an pahnih ruahmanna vek zawk a ni. Kei chu an insiam laia ka harh palh avangin min hruai a, ka sawi chhuah an hlauh avangin min hruai tel ve mai chauh a ni" ka tih chuan a ding a, a kawng sira silai chu phawrhin a load ta mai.

"Dawt ka sawi lo tak tak, khawngaihin ka thusawi hi ring hram rawh" ka tih chuan a rawn ṭhu hniam leh a, ka chalah silai chu a chuktuah ta ran a, ka thih loh reng ka ring tawh lo.

"Eng vanga tlan chhuak lo nge i nih?" min kap ta mai lo chuan a ti leh a, chu zawhna bawk chu sawi hrehawm ka ti, dawt ka sawi vaih chuan ka thi dawn bawk si.

"A chhan chu nangmah ka ngaihtuah che, i lungawi loh ka hlau a ni. Ka nunna chhantu i ni a, hmelma ni mah ila ka tan chuan hlutna tam tak i nei a ni" a mit taka en chung chuan ka ti a, ka mittui chu ka dang zo leh ta ngâng lo.

"Hrep tak che hian!" tiin a ding chhuak a, engtin nge min tih zel dawn pawh ka hre lo, kei chu chhuat bihin ka lo kun ngul ringawt.

"He nu hian thu dik a sawi ka pa, ani hian engmah a hre lo, inrawlhna a nei lo" chu thu a sawi zo chiah chu ka hawi chhuak vat a, ka rilru chhungril chu nasa takin a ṭap a, chu erawh hlimna vang a ni.

"I chiang chiah maw Hunter? Inrawlhna a neih loh chu rin harsa tak a ni a, nang lah chuan inrawlhna a neih loh thu i sawi tlat bawk si, enge thil awmzia hi!?" pu Robert-a chuan a ti a, chu veleh a bula ṭhu Griffin-a zawk chuan awih loh hmel zet hian

"Dawt, dawt i sawi Hunter, a hma ang bawka hum leh i duh leh vang a nih kha! A tawk tawh em em e, kha hmelma fa kha thah nghal hmiah a fuh ber" a rawn ti thuai a, a chek ri tlak tlak bawk.

"Kei tluka mi dawp thiam leh mi chhui thiam hi an awm kher lo vang tih chu i hria alawm Griffin, i thu duhna rilru kha zet kha paih bo la, ka pa zawk kha ṭawng tir teh" Hunter-a aw chu ṭum dang ang lo takin a pangai phian.

"A nih chuan nangmah a ngaihtuah vang chein a tlan chhuak lo tih chu i awih em em a!? I awm dan hi a awihawm loh hial zawk Hunter, chhiahhlawh thusawi chu i awih a nia, chutah hmelma fa a la ni leh zel zui" Griffin-a'n a ti zo chiah tihah Hunter-a chuan kawlphe leh khawpui ang maia hlauhawm hian

"A thusawi hi ka awih hrep lo Griffin, i kam tam mah mah ṭêp tawh a ni" a ti khawk rum rum a, a ṭawng zawi lo hle bawk.

"Inhnial tei vet ṭhin teh suh u, lo ṭawng tawh miah lo vang che Grifffin" tiin pu Robert-a chu a rawn ṭawng chhuak ve leh a, tûmah kan ṭawng chhunzawm lo.

"Hunter, i chiang chiah em? Nang berin i sawi hi chuan awih loh hi a tih chi ngawt bawk si loh, ka thisen ringa nungah chuan nang tluka ṭha an awm lo, eng pawh ni se thil awm dan tur hi ngaichang rih phawt mai teh ang u" pu Robert-a'n a tih chuan

"Ka pa!!!" tiin Griffin-a chu a ṭhutna aṭang a tho thuai a, thik hmel zet hian Hunter-a chu a en a, rei pawh awm lovin a kal chhuak ta vut.

"Room-ah phei rawh" Hunter-a chuan min en chung hian a rawn ti nghet charh a, a thusawi awih takin room chu ka pan ta thuai thuai.

Khua chu a var ṭan titih tawh a, ka tlan chhuak ve ta lo chu ka lawm hliah hliah. Lo tlan chhuak ve ta pawh ni ila kalna tur ka hre lo, awlsam takin min zawng hmu ngei ang.

Khumah chuan ka mu teh meuh mai, muthilh erawh ka thei lo nasa, ka hun tawn mek chu tawng ve ta se tumah an muthilh theih bik ka ring lo. Ka thi mai lo te chu mak ka ti hnuhnawh a, Hunter-a bawk chuan min chhanhim leh ta tih pawh ka hria, a mak ve ngawt mai.

Ni e, Hunter Hudson-a hi ka hmelma leh tual thah hmang ni mahse rilru chhe tak zawng a nih ka ring hauh lo, ka ngaihdan phei chuan tih luihna vanga tual that ṭhin niin ka hre ber zawk.

Griffin-a min sawisak tumna aṭang min chhanhim a, keimah vangin pi Sharon-i a hrem bawk a, thihna lak ata min chhan chhuak bawk a, eng ang mihring chiah nge a nih? Ka hrethiam lo, a rilru dik tak hi hriat ka châk ngawt mai, chu erawh thil theih loh bur a ni.

Pawn lam aṭanga aw vin taka mipa au tûarh tuarh thawm chuan chuan min tiharh zawk a, nghet lo zetin ka lo muhil hman a ni ngei ang. Chutah hmeichhe ṭap ri thawm ka hre zawm leh zat a, ka rilru chu hlauhthawnnain a khat nghal.

Kawngka an lo chum rik dawt dawt avang chuan ka phu dâwrh a, ka phu lutuk chu ka lung a chhuak lo chauh. Rang takin ka tho a, kawngka chu ka va hawng nghal thuai.

"Pu berin a hmu duh che" Maid pakhat hian a lo ti a, thu dang engmah sawi lovin a kal sawn zui daih a, kei pawh chu ding reng lovin a kalna lamah chuan ka kal ve nghal.

Ṭhut khawmna hmun ka thlen chuan ka roommate te pahnih hmel ka hmu a, mak tih lutuk avangin ka meng phawk nghal hle. An taksa chu a thi deuh seng sung a, nasa taka sawisak hnu an ni tih chu lai hmuna awm te chuan kan hre vek.

Sarang chungah hian an ṭhingṭhi a, mipa rual chuan an din hual ṭhap bawk. Hunter leh a pa chu ṭhutthlengah an ṭhu a, Griffin-a erawh an mi man te bulah a ding ran thung.

"Han sawi teh u le, he nu hi in thil ruahmanna ah hian a tel ve em?" tih pahin Griffin-a chuan min lo en a, ka roommate te pawh chu ka lam an lo hawi nghal.

"In sawi dawn nge ka that ve ve nghal dawn che u" a tih leh chuan Hunter-a chu a rawn che hrut a, Griffin-a bulah chuan a ding a, a kawng sira silai chu a phawrh zawm zat bawk.

"Thu dik sawi zawk zawk chuan dam beiseina pawh in la nei thei mahna" tiin hmeichhe pahnih chu a silai ken chuan a tin a, a hmaa mite chuan an lo hlauh hmel ngâng mai.

"A tel ve lo, ani saw chuan kan ruahmanna a hre lo hrim hrim. Khawngaihin ka pu min ngaidam rawh, tlan chhuah kan tum leh tawh lo vang" pakhat zawk chuan ṭap hliam hliam chung hian a rawn ti a, chutah Hunter-a bawk chuan

"Thu dik sawi eng ang mah ula dam tlak in ni tawh lo" tiin a silai ken lai chu vawi hnih a hmet puak a, a mi kah te tan chuan chet sawn hman ngaihna a awm lo, thi nen sarang chungah an let phung ringawt.

"A tawk ta e, ti kha chuan kan zo fel ta. Hre rawh u, tlan chhuah tum in awm vaih chuan thih bak in hmabak lo tih kha hria ula, thih in duh ṭâlh a nih chuan tlan chhuah luih in tum dawn nia" tiin a kawng sirah silai chu a thun a, a room lam panin a pen chho zui nghal pawk pawk.

Inthlahrung ru zeta che chhuakin room lamah chuan muangchangin ka kal a, tûma'n min koh din eih loh avang chuan ka lawm kher mai. Room chhung ka luh rualin kawngka chu ka kalh a, thawk la huaiin khumah chuan ka bawk thlawp. Ka mit chhing vang vangin lukhamah chuan ka hmai ka phum tâwk a, thil thleng zo chiah chu ka ngaihtuah let bawk.

Ka rilrua awm ber chu ka hrethiam ta hauh lo mai, hlauhna leh lungchhiatna pawh a awm tawh lo va, mahse ka rilru chhungril erawh a hlim chuang der lo. Thisen, tual thah leh insawisak tih vel chu ngaiah ka nei tawh ni berin ka hria, ngaia neih chu ka tan a ṭha ber pawh a ni ang e.

Chu ina ka awmna chin chu chiang taka hriat chhuah tham lêka rei lo a la ni a, mahse keimahah chuan nunpui thiam ruk riauna awm tlat tawh thung a ni.

Ngaihtuah em em pawh nei lovin thleng chu ka sil malh malh a, thleng sil chiah chu ka rilruah a awm a ni ber. Thleng silna phuan puak pep pep en reng chungin ka hna chu ka thawk mial mial a, ka bula che ve reng Maid pawh chu ka ngaihsak hran lo.

Kan zavai chuan inngaihsak tawn lo ila a ṭha zawk, kei ngat phei chu thla khat liam taa ka roommate te pahnih thihna khan keimahah nghawng a nei nasa em em a, chu in aṭanga tlan chhuah chu ka tum lo hul hual a ni.

"Hei" tih pahin tu emaw ni hian ka darah a rawn sawi deuh laih laih a, min betu lam ka hawi chuan mak ka ti ang reng hle.

"I hming enge?" ka Maid pui; ka bul lawka hna thawk nu chuan a rawn ti a, min biak dan pangai zet chuan min tihamhaih leh ta hle bawk.

"Maw? Aaaaa....ih.....Daisy....Daisy Taylor ka ni e" ka lo ti bah deuh nuai a, bu nghutin min hnung chhawn a, dawhkan chu a tihfai zawm leh ta mial mial.

"Eng lo....i hming enge ni ve? Min hrilh ve thei ang em?" ka tih chuan a ngawi reng a, ka biak hre lo ang maiin a awm a, min hrilh duh lo a ni tih ka ring thiam ta mai.

"Min hrilh duh loh paw'n a pawi lo, ka zawt mai mai che a nih kha!" ṭha deuh chuan ka ti leh a, ka hma zawna thleng sil tur la tam ang reng tak lam chu ka hawi zawm zat.

"Julie Sean...Julie Sean ka ni e, he hmuna ka awm chhan chu nangmah ang tho, rawng taka ka nu leh pate an thah hnuah ka tlanbo tur min man a, he inah hian kum 10 zet chu ka awm ve tawh" a thusawi chuan thleng pawh min sil tir thei lo.

"Kum 10 a!?" mak tihnaa khat aw chuan ka ti chhuak hluai a, chutiang taka rei chu a awm ka lo ring hauh lo, a nih chuan pi Sharon-i awmna chu a lo va rei tawh dawn em.

"Aw ni e, he in hi chu ka in ang maiin ka ngai tawh. Ka chhungte leh ka hmel hriatte zawng zawng an that fai vek a, ka tan chuan tlan chhuak pawh ni ila belh tur an awm tawh lo" lungngaih hmel a pu lo va, hrehawm tih hmel pawh a pu lo hrim hrim.

"A awmzia chu kei pawh ka chhungte an that tawh a, ka hmel hriatte thlengin an that fai vek tihna em ni?" ka tih chuan a lo bu nghauh nghauh a, Viktor Parker-a chu ka rilruah a lo lang nghal zat.

"Viktor-a kha! Ka mipa hmuh tawha la ngainatawm ber kha, ani kha a thi tawh ngei awm si a!" tiin ka phun sep a, muangchangin thleng chu ka sil zawm bawk.

"Eng vangin nge pu Hunter-a hian a chhan bik zel che a? Dawi eng emaw tal i thiam em?" a zawhna avang chuan a lam ka hawi hâw a, dawi thiam tura min ngai chu a awihawm loh zawk.

"Dawi thiam a!? A teuh lo lutuk, dawi thiam ni ila ka chhungte bulah ka let ang a, heng inthahna rapthlak tak tak te hi ka tireh vek ang" ka tih chuan

"A nih si chuan engati nge pu Hunter-a hian i thih a hlauh em em? Engati nge sawisakna leh thihna lak ata a hum bik zel che?" a zawhna chu ka chhang thiam hauh lo, ka chhan thiam loh tluk zetin Hunter-a'n min chhan zel chhan chu ka hre lo bawk.

"Ka hre lo" tiin ka rilrua lo awm hmasa ber chu ka sawi chhuak a, thawm emaw ṭawng emaw awm tawh lovin a reh tlawk tlawk a, ka ngaihtuahna chu vak kual nasa tak a ni.

Eng vangin nge Hunter-a hian min chhan zel? Ni e, hei hi thil hriatthiam har tak a ni. Hmai chhanah amah zawt ngawt dawn ila a tih chi loh ropui bawk si, min that nghal duh ngei ang. Min pui turin leh ka nunna chhan tur chuan ka ti ṭhin na meuh mai, mahse ka dil miah lo chung pawhin min pui zel tho a, chu tak chu thil hriatthiam awlai lo chu a ni.

Griffin-a sawisakna lak ata min chhan a, a pa hremna ka pumpelh theih na'n min hum leh bawk a, a room chhunga ka lo awm avangin mi pawh that lovin min chhuahtir a, a taksa leh hmel chu rum em emin tual that ṭhin ni mahse a rilru chhungril chu a nem tlatin ka hria a ni. Nge kei hian ka hre dik lo zawk? A ni maithei, kei hian ka hre dik lo zawk a ni ngei ang.

Ni tinin in chhungah kan che mial mial hlawm a, chhun lamah chuan mipa reng reng hmuh tur an awm ngai lo. Khawiah tak nge an kal ṭhin ka hre lo, mahse chutianga awm chu an tih fô dan a ni. In kawtah tak ngial pawh hmuh tur an awm lo va, chu in hungna bang chhah tak piah lamah chuan an kal te pawh a ni mahna.

Pi Sharon-i chuan Bathroom tifai turin thu min pe a, a thu awih takin kei paw'n Bathroom awmna lam chu ka pan ve mai bawk. Mak tak maiin mi sawisak leh chhe tak taka mi biak a nei tawh ngai miah lo, mahse chu chuan tlêm talin rilru zalenna min pe a ni. A hmate kha chuan chet sual hlau reng rengin ka awm a, ka tum pauh leh ka che sual tam zawk mah ti ila a sual tam lo vang.

Tunah erawh chuan ka chet dan phung leh ka thil rem dan zawng zawng a dik fel thlap tawh a, a nih dan tur ang thlapin ka che tawh a ni.

Dinner ei laia awm dan tur te, Breakfast ei laia awm dan tur te, an mamawh lam apiang lo pek te chu ka tih ṭhan tawh em avangin thiam lo ka ni tawh hauh lo.

Maid pahnih tihhlum an nih avangin a hma ai chuan kan hah ngei mai, mahse thawh dan ka thiam tawh avangin ngaiah ka nei der tawh.

Bathroom chhung ka luh chuan tihfai ngai hmel pawh a lo pu lo va, in chhunga bathroom zawng zawng ka tihfai dawn avangin ka hna chu a tlem teh chiam lo.

A changin in chung lam bathroom tihfai a ngai ang a, a changa inhnuai lam bathroom ka tihfai a ngai leh bawk ang a, kar tawn chhen a ngaihna chuan hahthlak lutuk lo mahse a tihhahthlak zo vek dawn a ni.

A remchang zawka ka hriat vang leh hun heh lo zawk dawna ka hriat avangin in hnuaia bathroom ho chu ka tifai hmasa a, tui connection a ṭha par par bawk a, ka ren lo hle.

In bul lawka hian tui khawh thla sang zet mai hi a awm a, chu chu kan tui rin ber a ni ang. In chhung aṭanga hmuh theih khawpin tui khawh thla chu ka tam a, a sang a, ngaw ṭha tak kara awm a nih avangin a thianghlim sar sar hle bawk.

In hnuai bathroom ho ka tihfai zawh chuan in chung lamah ka chho leh a, mahse in chung lam bathroom chu in hnuai lam aiin a lo fai zawk mah.

Uluk tak chuan ka tifai mial mial a, Common room bathroom ka tihfai hnu chuan Griffin-a room-ah ka lut a, chutia ka tihfai lai chuan thawm a rawn awm ta. Bathroom aṭang chuan ka bih dêk dek a, ka mi hmuh chu Griffin-a ngei a ni.

"Tu nge?" ka bula tui no ka pal rik palh avang chuan a rawn ti hrawk a, bathroom lam chu a lo hawi a, rang takin ka pil bo nghal vat.

"Nang bawk maw? Enge he lai hmunah hian i tih? Ka awm laiin ka room-a luh theihna dan i nei lo tih i hre lo em ni?" bathroom kawngka bula ding chung hian a ti a, kei chuan hlau ru zetin

"Eng lo....Bathroom hi ka lo tifai a, pi Sharon-i'n bathroom zawng zawng tifai turin min ti a" ka lo ti a, ka hmanraw ken lai chu a rawn la hmak a, bathroom chhuatah chuan a paih ri pawp bawk.

"Lo kal teh" tiin ka banah chuan a rawn man a, na zet hian min pawt tho a, min kai dawr dâwr a, khumah chuan min theh tlu ta tawp.

"Ka lo luh changa ka room-a i lo awm chhan hi ka hre lo emaw ti suh, i duh chu ka hria alawm, chuan ka pe khawp ang che" tiin a kawr chu a phelh a, a tihtum ka hriat chian em avangin ka au chhuak ṭhat nghal.

"Min pui r'u, ka duh lo, khawngaihin min khawih chhe suh pu Griffin" tiin ka au chhuak lawm lawm a, hlau zetin khum lu lamah chuan ka tawlh chho a, ani erawh a lo nui mai mai thung.

"Vawiin chu a nuam dawn khawp e, chuan ka haw fuh hle bawk, lo haw ziah ila a ṭha ang" tiin a nui ri huah huah a, a kekawr chu a pawt thla zui nghal mawlh mawlh.

"Khawngaih takin min khawih chhe lo hram rawh, ka ngen tak meuh a che" ka tih chuan khumah a lo lawn fel der tawh.

"Ni lo ve, ka duh ang anga awm tur zawk i ni" tih pahin khumah chuan min pawt zangthal a, ka uniform chu a pawt chhe bawrh bawrh a, ṭang eng ang mah ila thaah ka hneh ngâng lo.

"Aw, i vun leh taksa chuan min va hip si em, i taksa mi hipna ngah tak leh mawi zet hi hre ru ranin Hunter-a hian a lo humhim tlat ṭhin che a ni hial lo maw?" tiin ka panty chu a pawt thler hrawk a, ruak vekin ka awm ta.

"Hunter! Khawngaihin, khawngaih takin min pui lul teh" zawi lutuk chuan ka ti chhuak sep a, ka ṭawng chu keimah chauh lo chuan an hriat ka ring lo.

"Taksa mawi tak zawng i nei chiang alawm" tiin ka hnute chu a kutin a ṭham a, a taksaa min delh beh tlat avangin ka tal chhuak thei lo, ka hmui chu a kut leh lamin a hup bet tlat bawk.

"Hunter, Hunter, Hunter" ka rilru chuan ka ti mawlh mawlh a, ka bekah chuan mittui a luang zawih zawih a, ṭe buai vel tum tawh lovin ka maimitchhing ta tawp.

Thawk leh khatah min delh bettu awm tawh lo ang mai hian ka ruak huai a, mahse ka la meng ngam chuang lo. Ka thi te pawh a ni ang, ka awm dan chu mumalin ka hre lo.

Thil ri chawrh chawrh thawm chuan ka rilru a rawn luah a, a rik zawm char char avang chuan ka mumang niin ka hre thei ta lo a ni. Meng chhuakin ruak ngal ngat chuan ka ṭhu a, vawt chuan ka taksa a rawn hmer nghal.

Khum bul lawka Hunter-a ngeiin a nau Griffin-a a lo hnek mawlh mawlh chu ka hmu zawm zat a, Griffin-a chu a u kutthlak dawl zo lo tih hriat takin a mu zawi hnuang a, zawi vek tawh mahse Hunter-a chu a la che chawl duh chuang lo.

Ka mamawh lai taka min chhan tur an awm avang chuan ka lung a chhia a, ka ṭap chhuak ta hawk. Chu veleh a thil tih lai chawl meuhin Hunter-a chu ka lam a lo hawi a, ka lawm lutuk avangin ka lo ṭah nuih hak hak ringawt.

"Nep leh lutuk mai!" Griffin-a lam hawi thla lehin a ti hluk a, Griffin-a nghawng chu a khawih zeuh a, chu chuan che theiin a siam tawh lo, Griffin-a chu a thi ni mai hian ka hria.

"Hunter" ṭap hliam hliam chung chuan ka ti a, ani pawh ka lam panin a rawn kal a, mahse hlauhna ka nei ve miah lo, a chhan chu ani chuan min khawih chhiat a tum ve dawn lo tih ka hre chiang em a ni.

"Ṭap khawmuang lo khan in ha thuai rawh, hrep che hian! I inha vat lo a nih vaih chuan kei hi ka.....ka....inha rang rawh" a kut hum ruh ngar ngar chung hian a ti a, a dinna aṭanga pen sawn pawk pawkin tukverh bulah chuan a ding a, a bula thing dawhkan chhah zet chu a hnek tliak rawp bawk.

Hmanhmawh takin kei pawh chu ka che a, ka thawmhnaw thler nuai tawh chu a chhiat ang angin ka ha mawlh mawlh a, kawr chuan ka kawng hnuai lam khuh thei mahse ka awm bawr vel erawh a khuh hlei thei tlat tawh lo.

Ka kutin thawmhnaw thler deuh nuai chu ka âwm zawnah ka dawm a, kal chhuah nghal mai ka tum chu ka rilrua thil a lo lan thut avangin ka ding chawt. Hunter-a dinna lam chu ka pan leh a, hlauhawm viau mahse amah chu ka hlau tawh miah lo.

"Hunter" chhoh melh ral chung chuan ka ti sep a, a dar pawh chen lo leh a zak chen vel leka sang ka nih avangin kan insan hleih deng deng hle.

"Ka lawm e aw, ka chunga i ṭhatna hi engtikah mah ka theihnghilh tawh lo vang" ka tih chuan ka hmel pawh en lovin ka awm bawr chu a en daih a, chu thil chuan min tisa chhuak vek thei.

"Insum theihna ka tlakchham hmain he room aṭang hian chhuak rawh" a rawn ti ram hmuk a, a thusawi awmzia hrethiam tak chuan

"Aw le, min chhanhim avangin ka lawm e" ka ti nawn leh sep a, amah hnung chhawn zawnga kalin ka chhuak zui ta vang vang.

Ka room chhung ka thlen chuan khuma bawkin ka ṭap tlawk tlawk a, ka ṭap ri an hriat hlau takin lukhamah ka hmai ka phum a, ka ṭah nasat lutuk avangin lukham chu a huh vek. Hunter-a kha awm lo ta se chuan engtin nge ka awm ang?

Ka thianghlim, kei hian ka thianghlimna ka hloh ang a, khawih chhiat ka ni ngei ang, mahse Hunter-a vang liau liauin tunah chuan ka la thianghlim a ni.

Ka chungah a thinrim tih chu ka hria, mahse a thinrim chhan ber ka hre lo. Min sawisak châk hmel zetin min en a, a insum theih loh palh a hlauh avangin room aṭang chhuak turin min ti bawk a nih kha!

Vanduaina ka tawh rual hian ka va han vannei tehreng em, min chhanhim zeltu an awm tlat chhan chu chung lam thil tih theihna leh ka chhungte thlarau puihna a ni ngei ang.

Inngaihtuah fimin ka ṭap bang hmak a, ka thawmhnaw chu ka thlak zung zung a, awm mai mai thei ka ni lo. Chhiahhlawh mai ka ni a, eng pawh tawk ila ka hna thawh tur chu a ngai reng tho tho.

Ka roommate te an thih ve ve tawh miau avangin room-ah chuan keimahin ka awm a, mi dang awmpui nei lova awm chu a nuam ka ti daih zawk.

Dinner ei lai chuan an chaw kilna bulah Maid ho chu kan ding tlar ṭhap a, Griffin-a pawh ngawi rengin a ṭhu a, thil chu a ei mial mial bawk. A hmai chu Hunter-a kutthlakna avangin a khem nuai a, a mit bul chu a duk langsar bik hle.

Pu Robert-a chuan thil eng eng emaw ni hi a sawi a, Hunter-a a bia tih hriat zetin a lam a hawi kher zel bawk. Hunter-a erawh a ngawi ngul a, a pa ṭawng hre vek mahse kam khat pawhin a chhang let lo.

"Griffin, eng vanga i hmai vel kha pem nasa em em nge a nih?" pu Robert-a chuan a rawn ti hlawl a, a hmu vek tawh emaw ka lo ti a, a lo la hmu hauh lo a nih hmel.

"I fapa rangkachak Hunter Hudson-a'n chhiahhlawh pakhat vanga kut min thlakna a nih hi!" Griffin-a chuan a ti deuh hmuk a, Hunter-a chuan a melh nghal hrawk.

"I nau sawi kha a dik em Hunter?" pu Robert-a chuan a rawn ti ve leh a, Hunter-a erawh ṭawng peih loh hmel zet hian a thaw deuh hawk a, min lo en thut avang chuan ka kun rang ngei mai.

"A kum mil lo taka a chet leh ṭhin vanga kutthlak mai chauh ka ni ka pa, Griffin-a hi naupang ang leka rilru puitling lo a nih ka lo ring tawh miah lo asin" Hunter-a aw chu a thum dup a, en châk em mah ila ka en ngam tawh der si lo.

"Eng vangin nge he chhiahhlawh nu Mark Taylor-a thisen hi i chhan tlat? A chhan ṭha tawk tak sawi teh Hunter, ani vang hian i kut ka tuar phah fô bawk" Griffin-a chuan a u chu a en ran a, chutah pu Robert-a chuan

"Ni e, i nau sawi ang khan i rilru dik tak sawi rawh. He chhiahhlawh nu hi i humhim tam ta mah mah e, nang hian a lakah rilru dang i pu em ni?" a rawn ti a, ka bula Maid ding ho chuan min lo en rang hlawm teh e!

"A chhan sawi tur ka hre hauh lo, chutiang bawkin a lakah eng rilru mah ka pu lo, ngainatna nei tur ang kha chuan min beisei suh ka pa" Hunter-a chuan a ti khauh fak a, a ṭhutna aṭang chuan a tho zui nghal.

"Eng pawh ni se khatiang lam kha chu sawi tawh lo vang, ka fanu hnen aṭang puih dilna ka dawng a, chuan nangni a u te pahnih hi a mamawh bawk che u" pu Robert-a chuan a ti a, Hunter-a erawh a hmui a hru fai mawlh mawlh thung.

"Italy-ah kan kal dawn tih i sawi tumna em ni?" Griffin-a chuan a rawn ti a, pu Robert-a chu a bu ta nghauh nghauh.

Hunter-a chu a che hrut a, dawhkan hlat zawngin a kal sawn ta vang vang. Kawngkapui lam pana a kal chu a hnung lam aṭang ka thlir vawng vawng a, a taksa lian zet leh invuah dik thlap chuan a tilang rorum zual.

Leather Jacket dum dak hlarh a ha a, mal lian tak a nei tih hriat theih khawpin a Jean kekawr hak chu a tawn mar ṭân a, a mal chauh ni lo a chawn thleng chuan a tawn mar thla vek a ni.

Chutiang em ema taksa inphut mawi tawk leh mipa lian chu a takah ka la hmu lo, Hunter-a chu a taka ka mihring hmuh tawhah a la lian ber.

PROTECTIVE HUSBAND

By

Havali Adam

Chapter 5

"Daisy, vawiin chu kan pahnihin kan thawk dun dawn a nih chu aw? Pi Sharon-i'n min hrilh zo chiah a, lo hrilh ve nghal mai rawh a tia" ka bula a rawn din rualin Julie-i chuan a ti siam siam a, ka lo bu ve nghauh nghauh.

Julie-i hi Scotland mi a ni a, a ṭawngkam a fel faiin kawm a nuam hle. Maid zingah chuan ka kawm ngeih ber a ni ta nghe nghe a, ani pawh ka bulah a tal hnem ve ta khawp.

Kan inkawm ngeih tih hrethiam takin pi Sharon-i paw'n kan tih dun tur min pe fô va, ka chunga pi Sharon-i a ṭha ta em em chu mak ka la ti bang thei lo.

A lung tih awi tumin ka awm ngai lo va, ka nihna ang angin ka awm tawp a, mahse vawi khat pawh min hau leh tawh ngai lo, ka chet sual khât tawh em vang pawh a ni maithei.

In chhung chu a rehin a ruak huai a, pu Robert leh a Body Guard te tih loh chu mipa dang hmuh tur an awm tawh lo. Ni a ral a, kar a ral a, thla a ral a, Hunter-a te Italy rama an kal ṭang kum 1 lai chu a liam ta.

An kal dawn khan rei tak an thang bo dawn tih hria ila chuan zah pawh dawn lovin a tawp na'n ka hmu ang, amah thlahna ang zawng talin ka hmu khawp ang. A chhan chu ka hmelmapa, tual thah hmang mahse rilru chhungril ṭha tak si Hunter-a chu ka ngai a ni.

Ka hriat tirh chuan a mak ka ti teh asin âw, Hunter Hudson-a ka ngai em em chu mak ka ti lutuk, mak ka tih em avangin kan ṭhian kawm ngeih em em Julie-i bulah pawh ka sawi duh lo va, tun thlengin ka la sawi lo hial zawk.

Lo sawi ta pawh ni ila min awih kher ka ring lo, tu mihring mahin tual thah hmang ka ngai tih chu an awih kher lo vang. Zan ka mut hmuna te chuan a hmel ka mitthla ah a cham ṭhin a, Hunter-a hmel chu awlsam taka paih bo theih mai a ni lo.

Ka tum lo, keimah hian ka mitthla aṭanga paih bo chu ka tum lo hrim hirm bawk. Awm reng se ka ti zawk a, ka mitthla a lo lang ṭhin avangte chuan tu hriat si loh hian ka hlim ru ve em em zel.

A room chhunga ka luh chang te chuan ngawi rengin khumah ka mu a, Bed Sheet te chu amah ngaihtuah reng chungin ka chul a, lawm miah lovin ka nui leh ver ver zel.

Chutianga ngampa taka ka awmna chhan chu kawngka ka kalh hmasa vek zel a, lo lut an awm dawn chuan thawm ka hre hmasa phawt dawn tih ka hria a ni.

Hunter-a laka ka rilru puthmang chu ka sawi chiang fak thei lo, ka ngainain amah ka ngai tak zet tih erawh ka hre chiang em em thung. Ka hmelma a ni tih chu ka hria, mahse ka lakah chuan hmelma angin a awm tlat lo a ni.

Vawi tam ka nunna mai bakah thil chi hrang hrangah min chhanhim zel a, chu chuan zawi zawiin amah min ngainat tir ni berin ka hre ta.

Vawi khat tal a hmel hmuh leh chu ka châk, kum 1 chhung zet hmu miah lova awm tawp chu hrehawm tih ruk riau na ka nei a ni.

Amah ang lo takin Griffin Hudson-a erawh rawn haw zeuh zeuh chang a nei a, mi en deuh vawng vawng ṭhin mahse min khawih chhiat tum zawngin a che tawh ngai lo. Amah hlauhna leh ṭih ruk riauna chu ka la nei reng a, Dinner an ei lai paw'n a bul hnaiah ka ding duh ngai lo.

Thlah 2 danah te a rawn haw ṭhin a, mahse a cham rei ngai lo thung. A cham rei ber ṭum chuan kar 1 vel a cham ve a, ka laka sual a chhuah tawh miah lo chu ka lawm ngawih ngawih.

Pu Robert-a nen chuan hlim takin thil an sawi dun ṭhin a, chu chuan Hunter-a bawk min hriat chhuahtir leh ṭhin. A chang phei chuan inthlahrungna nei miah lova

"Khawiah nge Hunter-a? Engati nge a rawn haw ve ngai loh? A chanchin min hrilh teh, a hmel ka hmu châkin ka ngai tawh tak zet a ni" tia ṭawng chhuah phawng chu ka châk zek zek zel, mahse ka rilru sawi chhuak lovin ka chhia leh ṭha hriatna chu ka inthunun tir ve tlat thung.

Chhun pa chan lai tak a ni a, pu Robert-a leh a Body Guard te eitur Lunch buatsaihin kan che melh melh hlawm a, mahni tawkah kan buai tlang hle.

Oven aṭang chuan Fried Chicken um lum thar tih hriat zeta khu vut vut chu ka la chhuak a, dawhkana Plate inchhawp kual duahah chuan ka dah zel bawk a, ka thil khawih mek a rimtui em avang chuan ka ril a ṭam nghal râwih thei hial.

Julie-i chuan French Frie leh Pasta Salad chu dawhkanah uluk takin a chhawp a, kei erawh a thil chhawp mek en chungin ka ding ngawi reng thung.

Pasta Salad leh French Frie chuan kan in min hriat chhuahtir a, ka chhungte min hriat chhuahtir a, kan in kawta Daisy par leh pangpar dangte thlengin min hriat chhuahtir a ni.

Kan inah awm ila chuan tui ti takin ka ei leh ang a, bawnghnute rim nam vung vungin ka awm leh tawh ngei ang, mahse tunah chuan chutianga awm thei dinhmunah ka ding tawh hauh lo.

"Daisy, i thil tih lai kha dah la huana Grape kha va lo lawk mai teh. Hei Grape Juice siam tur pawh a awm tawh mang lo, an duhkhawp in tur a awm loh chuan an lungawi lo ngei ang" pi Sharon-i chuan a rawn ti a, a thusawi zawm takin in aṭang chuan ka chhuak zui nghal.

Huan ka thlen chuan Grape lo rah tûar chu ka lo zung zung a, Lunch neih hun a hnaih thawkhat tawh avanga hmanhmawh rilru em em pawh ka ni. Ka bawm ken chu a lian hran lo, mahse chuti maiin ka lo khat zung zung thei lo thung.

Ka lawh zingah chuan a ṭawih a lo awm ve hman zel a, chu chuan min tikhawtlai a ni. A ṭawih ang angin sawr ringawt dawn ila a chi si loh, nasa takin pu Robert-a a lungawi lo a ni mai.

Chutia ka tihtur ka tih mawlh mawlh lai chuan Grape zar chu ka tih chet ni miah si lo hian a lo che dat dat a, en zeuh zeuh mah ila ngaih ṭhat lohna pawh ka nei hran lo, chutiang thil buaipui hman chu ka ni lo bawk.

Chu bakah ka en apiangin a che tawp zel a, ka en loh veleh a rawn che leh ṭhin. Ka hlauh ruk ve tho avangin ka zai ta tawp a, mahse ka zai ring lo hle.

"Hello" hmeichhe aw ni ngei tur hian a rawn ti a, thawm awmna lam ka hawi chuan ka au chhuak dawn a, ka kâ a rawn hup nghal chat.

"Ṭe suh, ṭe miah suh" tiin a kut chu a la thla ve leh mai a, a hmel chu a ṭha tak zet, chutiang teh fakuaa hmeichhe hmelṭha chu a takah ka la hmu ngai lo.

"A lem nge a tak i nih?" ka ti chhuak phawng a, a rawn nui sen sen a, ka thil tih lai chu pakhat mah ka ngaihsak tawh lo.

"A tak chu ka ni ve ngei alawm" a rawn tih chuan thil eng emaw ni hi a rawn ri tût tut a, chu ri chu ka roommate te an tlan chhuah dawna thawm chiah chiah kha a ni.

"Tlan rawh, kal rawh ṭhiannu, he hmun hi i tan awmna chi a ni lo, an rawn hmuh hma chea i tlan chhe lo a nih chuan an that ngei ang che" ka ti nghal thuai thuai a, tlan vat se ka ti.

"Kal rawh, engati nge i la din reng? Thih i duh em ni? Kal vat rawh, Body Guard an lo thleng ṭep tawh ang" a dinna ngaia a la din reng avang chuan ka ti leh hrawk a, che sawn lova a ding tlat chu mawl ka ti hle.

"Ka rualin i lo kal ve dawn lo em ni? Nang pawh hetah chuan chhiahhlawh mai i nih hmel si a, i tan chuan tlan chhuah a fuh zawk ngei ang" a tih chuan phawk hrâin ka en a, chet sawn tumna reng a la nei lo cheu.

"Kei chu ka tlan chhuak ve ringawt thei hleinem, heti lai hmunah hian awm chhan pawimawh tak ka nei a ni"

"Eng thil nge i nun zalenna tur pawh ngaihtuah lova he lai hmuna i awm chhan chu ni a?" a rawn tih leh chuan lungngaih hmel zetin ka en a, kei aia a san avangin ka chhoh en deuh hlek bawk.

"Pu Robert-a fapa upa zawk Hunter Hudson-a hian ka nunna a chhan alawm, chuvang chuan a lakah pawisa pawha rulh sen loh bat tam tak ka nei a, a lungawih lohna tura awm ka duh lo a ni"

"Hunter Hudson-a chuan nang ang hmeichhe naupang mai mai nunna hi a chhana maw!? Ka va awih chiah lo ve, min thah a tum ti la chuan ka awih zawk ngei ang"

"Thu dik alawm ka sawi, Hunter-a mizia nen chuan inmil lo tak pawh a ni maithei, mahse ani chuan ka nunna mai ni lovin sawisak leh hremna ka tawh tur thlengin min humhim zel a ni"

"Sweetie, i thusawi hi awih har ka ti khawp mai, chutiang mizia chu Hunter Hudson-a hian a nei ngai lo, dawt lah chu i sawi hmel lutuk si loh, awih tur nge awih loh tur pawh min tihre thei lo"

"Hunter Hudson-a hi hria maw!?" mak ti zeta ka tih chuan nui sâng chung hian a lo bu nghauh a, chutih lai tak chuan ka hnung lam aṭang mipa aw hian

"Che tawh suh u, man in ni e, in awmna hmun aṭang in che sawn leh a nih chuan thah nghal in ni ang" a rawn ti vin ṭhawt a, ka buai nghal vek.

"Ka hnunga mi hian thiam lohna a nei lo, a tum loh deuhin a lo lut a, a lo lut sual palh mai a ni" tiin ka bula hmeichhe hmelṭha zet chu ka din hliah thuai a, chutah kan hmaa mi chu a lo kal hnai ta mai.

"Awm sawn rawh, ka thusawi kha i ring lo em ni?" tiin ka bawm ken chuan ka lo vaw chawrh a, a pai nghal chhawn chhawn.

"Kal ta che, he lai hmun aṭang hian tlan chhuak ta che, i tawrh ai ka lo tuar vek mai ang, hmanhmawh takin tlan chhuak rang rawh" tiin ka hnunga mi chu ka en a, ka hawi let leh rualin mipa lian zet chuan ka samah a rawn kek ta chat.

"Nang chhiahhlawhnu mai mai hian min bei let ngam vela maw!?" tiin phulah chuan min hnuk a, min theh bawk thlawp zui nghal.

"I thih loh reng inring suh" tih hrawk pahin silai chu a phawrh a, ka lamah chuan a rawn lek a, silai chu a puak ta, mahse na engmah ka nei miah lo.

"I ṭha em?" hmeichhe hmelṭha zeti bawk chuan a rawn ti a, a kutah chuan silai a keng ran a, chutah Body Guard lam chu ka hawi leh a, ani chu thi tih hriat takin phul chungah a lo bawk run.

"Engtin....Engtin nge i thah theih? Engtin nge i ngam zawk? Ni lo, kal rawh, chuti lo chu kan pahnih hian kan thi ngei ang" ka tih chuan min tung tho a, a hma ang bawkin kal sawn a tum leh ta chuang lo.

"Che tawh suh u" kan piah lawkah chuan Body Guard tam tham zet hi an lo ding tlar ṭhap a, an silai ken ṭheuh chuan min tin ran bawk.

"Che ta ila" ka bula hmeichhe ding chuan hlauhna nei miah lo hian a ti a, huai taka a la ṭawng chhuak ngam te chu a âtthlak ka ti zawk.

"Ka that nghal ang che" kan hma lawka mipa ding chuan a rawn ti ve nghal a, ka bula mi chu a nui leh ringawt tawh.

"Khaw maw awm sawn teh u, tu phiangsen nge silai hmet puak kha!?" rawn titu chu pu Robert-a ngei a ni a, Body Guard ho chuan a kalna tur kawng an lo kian sap sap bawk.

"Lalpa le! Amelia, Amelia Hudson, ka fanu le! Enge thil awmzia ni ta ngai?" pu Robert-a ṭawng dan avang chuan ka bula mi leh pu Robert-a tih loh chu kan meng phawk hrâ hlawm a, kei phei chuan mak ka ti lutuk.

"Kan lo infiam vel mai mai alawm maw le, chuan i Body Guard te hi nangmah veng tur che hian an ṭha tawk lo deuh chuan ka hria ka pa" ka bula ding Amelia-i chu a nui var var a, pu Robert-a lama kalin a va kuah zui nghal.

"Nangmah hi em ni silai hmet puak tu kha ka fanu?" Amelia-i biang chul pahin pu Robert-a chuan a ti leh a, Amelia-a pawh chu a lo bu nghauh nghauh.

"Vawi khat chu ka hmeh puah a la ngai ngei alawm" tiin Amelia-i chuan a bul lawka Body Guard pakhat ding chu a kap let tawp a, a kah thih pa chu nichin maia min thah tum tu kha a ni.

"Lunch tui tak min lo buatsaih sak ngei ka beisei ka pa" a silai ak ṭhain pu Robert-a darah chuan a kuah a, min hnung chhawn zawngin an kal ta dual.

"Ngawi lawk!" tiin Amelia-i chu a ding a, ka lam a rawn hawi a, nui sen sen hian a lo kal a, hmelṭha viau mahse tual thah a thiam em avang chuan ka ṭih ru hle.

"Lo kal ta che, Lunch kan kil ho dawn nia" tiin ka kutah chuan a rawn chelh a, kei ang bawkin pu Robert-a leh mi dangho chuan Amelia-i min biak dan chu mak an ti ve tho.

"Amelia!" pu Robert-a chuan a rawn ti ta ngei a, a fanu erawh chuan min kai phei mial mial a, tu mitmei mah a veng ve hauh lo bawk.

"He Maid la naupan hmel zet, mahse huaisen ru em em hi ka ngaina ru tlat ka pa, tu nge ka nih hre lovin Body Guard lakah khan min chhan a tum reuh a, Lunch kilpui chu a phu i ti ve tho lo maw?" Amelia-i thusawi chuan min tikhur hial thei, an zinga Lunch ei ka duh teuh lo mai.

"Ka fanu duat leh Cial em em kha i ni a, chutah min rawn ṭhawng thut leh nghal, i thil dil chu tihhlawhtlinin a awm khawp ang Amelia" nui var var hian pu Robert-a chuan a lo ti a, zam tak tê in ka zam chhunzawm nghal.

"Kal ang le, enge i hming ni reng reng?" In ropui tak lama min kaih phei pahin Amelia-i chuan a rawn ti a, a hmel ka en chuan ngainatawm zet hian min lo en a, awm dan tur ka hre lo hle.

"Ih...eng lo....ka hming chu Daisy Taylor a ni e" ka tih chuan hma lam a hawi tawh chu min lo en leh thuai a, ka en rei ngam ta lo.

"Taylor thlah maw i nih? Mark Taylor thlah kha em ni i nih?" mak tih hmel zeta a rawn tih chuan ka lo bu nghauh a, min ngainat rei chu ka ring ta chiah lo, a chhan chu hmelma kan ni miau a!

"Hmuh tawhna che ka nei khan ka hre rêng a ni, khawiah emaw ni tak chuan ka hmu tawh che, mahse khawiah nge tih leh eng thilah nge tih ka hre thei mai rih tawh lo" a thusawi chu awih lo tak ka ni, Amelia-i chuan tun hmaa min lo hmuh tawh ka ring hauh lo.

In chhung kan luh chuan ka Maid puite chuan min lo en duh hlawm hle a, pi Sharon-i leh Julie-i phei chu an lo kâ hau a, keini lah kuta inkai chungin kan ka lut zui.

Amelia-i chuan a bulah tak min ṭhut tir a, min be lovin a pa nen chuan sumdawnna lam an sawi dun ta char char. Ka ding lamah chuan Body Guard ho chu an ṭhu tlar phei ṭhap a, anni paw'n an zinga Lunch ka ei ve ringawt chu mak an tih hmel hlawm hle.

Phur lo ru zet leh inthlahrung zetin Lunch chu ka ei ve ta ngei a, ka Maid puite chuan eitur leh intur te min lo pe a, dik tak chuan nuam ka ti hlawl lo. Chu bakah Lunch chu ei tuina pakhat mah ka nei lo, ka tan chuan ei tui a har a ni.

Lunch pawh ei ṭha mumal lovin ka hawi kual chhen a, Julie-i che vel te chu ka en a, ani paw'n min lo nuih sen sen, kei erawh ka nui ve thei hauh lo. Chutih lai tak chuan pu Robert-a chuan

"Grape Juice hi a la awm em? Ka rin aiin in lo thlit belh har daih mai" a rawn ti ta mai, ka tihtur ber ti lovin ka awm tih ka hre chhuak nghal.

"Ka tihpalh ka pu, Grape sawr tur hi lawh chawp a ngai tawh a, tunah ka va lawh tir nghal dawn a nia" pi Sharon-i chuan a ti a, pu Robert-a hmel chu a rum ṭha khawp.

"Lo inbuatsaih lawk vek ta che, hetiang hian ni dangah i awm ngai miah lo Sharon" pu Robert-a chuan a rawn ti ram deuh hmuk a, ka tan chuan nuam lo duh tak a ni.

"Ka tihpalh ka pu, pi Sharon-i thiam loh ni lovin keima thiam loh zawk a ni e" ka ṭhutna aṭanga ding chung chuan ka lo ti thuai a, keimah avang mi dangin an tuar tur chu ka duh lo a ni.

"Enge i sawi awmzia?" chu in chhunga thuneihna sang ber nei chu amah a ni bawk si a, hlauh namen lovin ka hlau, ka nunna in a tuar ang tih ka hlau ta ber.

"Pi Sharon-i'n Grape lo turin min tir daih tawh a, mahse lawh pawh lo lovin hun ka hmang a, ka tihpalh tak zet a ni" hlauthawng em em chuan ka ti a, pu Robert-a chuan min melh rum hle.

"Ni lo, a nihna takah chuan keima thiam loh a lo nih zawk ngei chu!" ka bula ṭhu pu Robert-a fanu Amelia-i chuan a rawn ti a, amahah chuan kan mit a fuh ta vek.

"Ka fanu" hriatthiam loh hmel zet hian pu Robert-a chuan a ti a, Amelia-i erawh a lo nui daih thung.

"Maid hian min chhan a tum ka tih tawh khâ ka pa, min chhan a tumna lamah a tihtur pawh a lo tih theihnghilh a, a awmzia chu keimah vangin Grape kha a lo hman ta lo a ni" Amelia-i chuan a ti leh a, ka uniform chu ka hmer nghet hle.

"Aw le, ka hrethiam e. A nih chuan Grape Juice a awm loh chuan Apple Juice tal kha lo thli thuai teh u, ka chhawl a hal ta khawp mai" pu Robert-a chuan a ti deuh hmuk a, a lung a la awi chiah lo tih chu tu paw'n kan hria.

"Kha ka ta hi in rih rawh ka pa, i dang ro lutuk tur pawh a zia phah mahna" tiin Amelia-i chuan a hmaa no intung chu a dah phei a, a pa pawh chuan a lo ban ve mai bawk.

Lunch kan ei zawh chuan Amelia-i leh pu Robert-a chu inbe turin an kal hrang a, kei pawh ka hna pangai thawkin ka che zawm leh ta mawlh mawlh.

Kan tihtur tih mial mial pahin Julie-i zawhna tam tham zet chu ka chhang a, ka sawi hnu pawh ka sawi nawn ngun khawp mai.

Kei pawh chuan mak ka ti ve tho, chutiang chuan ni ka hmang dawn tih ka hre lawk bik hauh lo, mahse ka rilru chhungril chu a hahdam huai huai a ni ber.

Pu Robert-a fanu Amelia-i chu thla khat lai a cham leh tawh, a hmelṭha bawk sia a hnathawh leh a nungchang chu inhmeh lo tih chang ka nei ṭhin, mahse inhmeh dan riau a nei leh tlat bawk si.

Nula hmelṭha leh nu zên angin lang mahse a rilru chhungril erawh a paukhauh em em thung a, mipa ang maiin ralthuam che lek te chu thiam tak a ni.

Vawi khat pawh a bula kal turin min ti tlat a, ka hna zawng zawng chawlin ka zui a, kan kalna hmun chu ka la kal ngai lohna hmun hlir a ni. Mihring lem ding tlar ṭhap chu silai chuan a kap thliah thliah a, kah fuh loh reng a nei lo.

Chutah silai chu min vawn tir ve a, min kah tir a tum ve ta mai, ka tan chuan lo hnial ngam chi a ni si lo. Silai lian leh sei ang reng tak chu ka keng ve ta tawp a, a kah dan tur te min hrilh a, ka kah rualin phulah ka thal ta ṭhuai.

Amelia-i chuan min nuih vak vak chung hian min kai tho a, za lo zetin ka lo nui ve mai a, silai chu sik leh pawh ka duh tawh lo.

In lama min haw pui lai chuan vana sava thlawk lai chu a kawk a, sava sa ka ei châk leh châk loh thu min zawt a, kei lah chuan awmzia hre map lovin ka ei châk thu ka lo sawi ve mai a, Amelia-i chuan a silaia tin vang vangin sava chu a kap thla ta nawlh.

Sava chu a lian ang reng hle a, van sanga a thlawh lai kha chuan a len vak loh hmel nen ka keng chiah chu kut khing hniha ken a ngai hial maw le.

In chhung kan luh rualin Dinner atan buatsaih nghal turin min hrilh a, kei pawh chu a thu min pek ang chuan ka che chhuak thuai a, Maid dangho erawh an tihtur ṭheuh tiin an bo duak, Julie-i tak ngial pawh hmuh tur a awm lo, in chhung chu a reh hian a reh dup.

Sava hmul chu ka puah mial mial a, ar nung lai thata kan puah fô ṭhin tawh avangin sava hmul puah chu ka thiam lo hran lo, awlsam takin ka puah zo zung zung.

Ka duh ang thlapa ka buatsaih hnu chuan Oven-ah ka dah lut a, lak chhuah hun tur nen chuan time chu ka fix nghal thlap bawk.

Oven chhunga sava sa ka ur lai chuan choka chu ka tifel a, kan hna leh vek tur tho a nih avangin lo tihfel zung zung chu a ṭha daih zawk.

Ka beisei ai daihin Amelia-i chu a cham rei a, tunah phei chuan a rawn awm aṭang thla 5 lai a liam leh tawh, kum chanve kan hmang titih der.

Griffin Hudson-a zawk pawh a hmel ka hmu leh ta zeuh zeuh a, mahse Hunter-a hmel erawh kum 1 leh a chanve dâwn tawhah pawh ka la hmu ve thei lo. Ka nun chu chiang takin a ruak tih ka hria, a hmel hmu lova awm chu a hrehawm ka ti ngawih ngawih tawh a ni.

Mi dang ang lova a lo haw ve ngai miah lo te chu ka ning a, innel hle tawh ang maiin a lakah chuan ka rilru a vui nasa thei em em bawk.

Amah ngaih lutuk avanga zan han mut theih loh tawp te chu ka nei fô va, mi dangin ka awm dan chu hre chiang se chuan zahpuiawm min ti ngawt ang. Ni e, ka zahpuiawm chiang alawm, mahse ka awm dan chu ka thunun thei lo, ka tum pawh a ni lo.

Hunter Hudson-a chu ka mipa hmuh tawha hleitling ber a ni a, mipa ka hmuh tawha nelawm bera ka lo ngaih Viktor Parker-a nena khaikhin chang pawh ka ngah thei mai.

Ka rilruin tu zawk nge ka tan nelawma ka ngainat tih ka buk ṭhin a, hun rei lotê chhung ka ṭhian ni hman Viktor Parker-a ni lovin ka hmelmapa Hunter Hudson-a zawk chu a buk rit zawkah a ṭang leh nge nge ṭhin.

Ka mipa khaikhin te pahnih chu an zia, an nungchang leh an hmelah pawh inanna an nei hauh lo, taksa len zawngah phei chuan in len hleih tak an ni.

Viktor Parker-a chu mi changkang leh hausa tih hriat takin a hmel a fai a, a vun rawng pawh hmeichhe tam tak ai chuan a ngo ngei ang, ka tan chuan mipa nelawm leh fel tak pawh a ni a, hun nei ila chuan ka pasal tur emaw ka mipa ngaihzawn a nih ngei ka ring.

Hunter Hudson-a ve thung erawh Viktor Parker-a ang lo takin a hmel a rorum a, a taksa a sakhat a, a vun rawng pawh a ngo ve hlui lo.

A bula awm chu sakawlh bula awm tluk zeta hlauhawm nih duh hmel mahse a ni hauh lo, a zaidam lo tih chu tute paw'n hre mah ila a rilru chhungril chu a ṭha em em thung.

A hmel rorumin tual that ṭhin ni mahse hmelchhia tih tur a ni chuang lo, a mitmeng chu thip ram mah ni se a hmel ni deuh hrak chuan min hip hle thung.

Ni e, Hunter Hudson-a hian nasa takin min hip a ni. A bula awm a nawm tluk zetin a hrehawm a, a mi uap na lutuk leh a bula awm thlamuan thlak ru zet chuan mumalin min awm tir thei lo ṭhin a ni.

A changin a hlauhawm em em a, mahse kei chuan ka hlau ve ngai chuang hauh lo. Khawpui ri leh Sakeibaknei ang maiin aw khawk rum rum khawpa hlauhawm nei mahse min tina ngai lo va, ka laka a awm dan chuan amah min tingaina lo thei lo a ni.

"Min lo thlah ang chu ti raw?" tiin Amelia-i chuan min bia a, a duh angin ka awm dawn tih lantir na'n ka lo buk khum zeuh.

In kawt phul hring cham dap lam chu kan pan a, Amelia-i chu ka hnaih takah a kal a, a bula a pa nen chuan kal pahin an titi zui char char bawk.

Thla 6 lai a liam leh tawh, Amelia-i awmna aṭang thla 6 lai a liam leh tawh, vawiin hi Amelia-i Italy rama a haw ni tur a ni tawh bawk.

Kar hmasa mai khan Griffin Hudson-a chu Italy ramah a let leh diam tawh a, Amelia-i haw hnu rei vak lova lo haw a tum thu a pa chu a hrilh bawk.

Helicopter chu van sang aṭangin kan bul lawkah a rawn ṭum a, a thla vir chak tak chuan nasa takin thli a siam a, kan sam te chu a leng phe siau siau a, ṭawng hriat theih loh khawpin thlawhna chuan thawm a chhuah a, a tua mah kan inbe lo hrim hrim.

Amelia-a chu ka lam lo hawiin min kuah a, kei paw'n pu Robert-a fanu tih hre reng chungin ka lo kuah let ve a, ṭhian ṭha kuah ang chuan ka kuah ngam chiah lo a ni.

Kar 4 a ral meuh chuan Amelia-i haw aṭang thla 1 lai a liam leh der tawh, Hunter-a hmel ka hmu har lutuk chu a mak ka ti tawh zawk.

Hmelmate nen an inbeihna ah a thi a nih te ka ring rum rum a, mahse chuti maia min thihsan tur chuan ka phal lo, vawi khat tal a thih hma chu ka hmaah a rawn inlan leh ka ring tlat a ni. Ni lo, a thi hauh lo vang, thihna min pumpelh tir thei tu a ni a, thihna lak ata a fihlim thei dawn tih ka chiang.

Kum 1 leh a chanve chu kan hmangral chiang ta khawp mai, Maid ho pawh inpawh thawkhat ve tawh tak kan ni. Han inbiak siam siam te chu kan nei chho ṭan a, pi Sharon-i paw'n hlim hmel pua min biak a ching ta zeuh zeuh. Kei paw'n hawihawm leh pangai takin ka be zel a, kan boruak chu Maid ka nih tirh boruak nen chuan inthlau vet vet tak a ni tawh, lei leh van ang vel a ni.

"Daisy, in chung lamah kan chho deuh vek dawn a, nang chu choka leh in hnuai lam hi lo buaipui mai rawh aw?" pi Sharon-i chuan a rawn ti a, kei pawh chuan hmel hlim sâng hian

"Aw le, in hnuai lam chu a nih dan tur ang thlapin ka lo tifai ang" ka lo ti ve thuai a, anni pawh an chho ta dual.

Store Room chhung chu ka phiat fai mial mial a, kan tifai ṭhang bawk nen chuti lutuka bal a ni hran lo, mahse ni khat pawh tihfai lova kan dah chuan lang bal thei reng dinhmunah a ding thung.

Store Room kawngka ka phiah lai chuan choka lamah thawm ka hria a, Body Guard ṭhenkhat an nih ka rin avangin ka ngaihsak em em lo. Chhuat chu ka phiat fai phei zel a, chokaa mihring lo ding ka hmuh chuan ka thil tih lai ka tawp chat.

"Hunter" ka hriat tawk lek chuan ka phun sep a, ka thil ken lai ka thlauh rik rualin ka lam chu a rawn hawi ta.

"Hunter, i lo haw tawh maw!?" a hriat theih ngei tura ring chuan ka ti a, ani erawh min en reng chungin tui a inri khawlh khawlh thung.

"Nangmah i ni tak tak em Hunter?" tiin a lamah chuan ka tlan phei thuai a, inthunun hman lo lekin ka kuah thlawp a, a taksa ṭang nghal ṭung chu ka hre thei.

"Ka ngai lutuk che asin, engati nge i rawn haw ve ngai loh?" tiin a lam chu ka hawi chho a, min kuah let miah lo leh mak tih hmel zet hian min chhuk melh run a, a hmui chu a chet lo hrim hrim.

"Griffin-a pawh a lo haw fô va, engati nge i lo haw ve ngai miah loh? I thi emaw te ka ti hial a, mahse i thih ka ring chiah si lo" ka ti leh mawlh mawlh a, kan inen chiang hle bawk.

"Min kuah ngam tur hi i ni miah lo" a rawn ti thum ṭial hmuk a, a thusawi avang chuan ka awm dan dik lohzia ka hre chhuak a, amah ka kuahna chu thlahin ka awm sawn ta vat.

"Ka....ih....eng lo...ka tihpalh....ka tihpalh lutuk" tiin choka aṭang chuan ka tlan sawn thuai a, hmun phiah pawh tum tawh lovin ka room-ah ka tlan lut ta daih.

Kawngka ngheng chuan ka ding a, ka thin phu chu rang ṭha tak a ni. Ka kut chu ka hum ruh ngar ngar a, Hunter-a bula ka awm dan chu mawi lo ka tiin ka inchhir tak zet.

Mawl ka inti a, a phalna la hmasa lova ka kuah ringawt te chu inhremna tham a ni. Ani chu keini Maid ho tan chuan kan pu a ni a, min sik a hrehzia tih hriat takin min kuah let ve miah lo a nih kha!

Room chhungah chuan awm reng thei ka ni lo tih ka inhre chhuak a, kawngka ka hawn dawn te chuan zam tak ka ni.

A nih nîh nih inhuamin room aṭang chuan ka chhuak a, choka lam reng ka melh ngam tawh lo, a lo la din reng phei chuan min hau hrem duh zawk ngei ang. Hmun chu ka phiat thuai thuai a, ka mood zawng zawng chu minute rei lotê chhungin a danglam vek a ni.

Choka chiah tihfai ka hmabak ta, mahse ka va huphurh si em. Kun ngul chungin chokaah chuan ka lut a, ka hawi chhuak a nih vaih chuan Hunter-a nen kan mit a intawn ka hlau a ni.

Ka thawm siam tih loh thawm dang engmah ka hriat loh avang chuan tim daiin ka hawi chhuak riai riai a, chokaah chuan mi dang tûmah an lo awm lo, lawm lutuk avangin thawk ka la huai bawk.

PROTECTIVE HUSBAND

By

Havali Adam

Chapter 6

Hunter-a lo haw aṭang kar 1 a liam leh tawh a, tihpalh thil thu pawhin kha ni, ka kuah ringawt ni aṭang khan a hmel ka hmu leh tawh ngai lo tih theih tluk a ni. Dinner leh Breakfast ei lai pawhin hmuh loh ka ngah a, mahse pawi han tihna emaw amah ngaihtuahna em em ka nei hran tawh lo.

A chhan chu kan bulah a awm leh tawh miau a, inhmu dawt lo mah ila ka bul hnaiah a awm tih ka hriatna chuan thlamuanna chhiar sen loh min pe a ni.

Hna ngai thawkin ni tin in chung lamah leh in hnuai lamah ka kar tawn chhen a, keimah chauh ka ni bik lo, Julie-i leh Maid dang pawh an ni ve vek tho.

Kan zinga mi pahnih an thih tawh miau avangin Maid chu 7 chiah kan ni a, kan tlem tâk sawt avangin indaih loh pawh a awm zeuh zeuh.

Tin, ka thawh ṭan tirh ang ngawtin mahni hna ṭheuhah kan bur fur thei tawh lo, tunah chuan kan inthawh pawlh nuai a ni ber mah tawh zawk.

"Daisy, Julie-i nen khan pu ber te bulah va kal lawk ta che u, an ei tur hi in keng phei nghal bawk dawn nia" pi Sharon-i chuan a rawn ti a, chokaa eitur siama kan awm dual lai a ni bawk.

"Aw le, eng tikah nge kan kal ang? Eitur ber kan la siam zo chiah bawk si lo va, i tih hûn hunah em ni kan kal ang?" nelawm tak chuan ka ti a, Hunter-a hmel hmuh pawh ka duh pah hrim hrim.

"Tunah pawh hian va kal nghal mah ula a pawi lo, hei Lunch ei a hun der dawn mai, eitur chu kan siam zo thawkhat tawh e" tiin eitur pack fel sa thlap chu kan lamah a rawn nawr phei a, keini paw'n kan lo ban nghal.

"Va kal ila a ni mai alawm" nui ver ver chung chuan ka lo ti mai a, ṭawng leh tawh lovin choka aṭang chuan Hunter-a te awmna lam panin kan kal chhuak zui ve mai bawk.

Hunter-a leh a pate awmna hmun chu in aṭanga hmun hla lutuk lo a ni a, Amelia-i nen kan lo kal tawh avangin kawng leh kal dan tur pawh ka hre thlap tawh.

Julie-i erawh la kal ngai lo tih takah kawng engmah a hre lo va, kum 10 teh meuh lo awm tawh mahse chu lai hmuna a kal ngai miah lo chu mak ka ti hle.

A kal ngai loh chhan ka zawh chuan in chhungah chuah a chet ṭhin thu a sawi mai a, kei paw'n a thusawi awmzia chu ka hrethiam ta kuar.

Pu berte awmna hmun kan va thlen chuan kut ding lam kekawr iptea zenin Hunter-a chu a lo ding ngawi run a, a bulah pu Robert-a a ṭawng mawlh mawlh a, Griffin-a erawh silai keng chungin meizial a pak khu laih laih thung.

In lam hnaih berah Hunter-a a ding a, a laiah pu Robert-a a ding leh a, a sir berah Griffin-a a ding bawk. Pu Robert-a chu kum upa a ni tawh tih hriat takin a tê ber a, a fate pahnih chu a chen lo ve ve. Griffin-a pawh a pa lakah chuan a lian thawkhat hle a, mahse Hunter-a chu a la chen teuh chuang lo.

Eitur pek ka tum lai takin Hunter-a chu Griffin-a bulah a va ding daih a, pu Robert-a chuan ṭawng mawlh mawlh pahin a zui phei nghal bawk. Pu Robert-a chu a laiah tho ding mahse a fate pahnih dinna erawh a danglam thung.

Kan hma maia ding ta Griffin-a lam chu kan pan a, eitur pek pawh chu a huphurhawm ru ka ti ngei mai, hun kal tawh mah ni se boruak ṭha lo kan lo nei dun ting tang tawh tlat.

"Vawiin chu Grape Juice ni lovin Apple Juice ka lo in ang e" Griffin-a chuan a rawn ti a, a bul lawk dawhkantê silai dahna bula eitur ka nghah lai tak a ni.

"Maw? Aw....eng lo...Grape Juice chiah kan lo keng asin" tiin ka ṭawng chhuak phawng a, ka mi pangai biak hmiah avang chuan min rawn en chiang ta hle.

"Ka tih awmzia chu ka va la leh ang e, Apple Juice chu ka va la leh thuai ang e" tiin ka che nghal sawt sawt a, ka bula ding Julie-i chuan ka bana vuan chung hian

"Eitur hi mi dang saw lo sem zawk rawh, keima'n Apple Juice chu ka va la ang e" a rawn ti thuai a, hmanhmawh takin a kal zui nghal.

Griffin-a kal pelin pu Robert-a leh Hunter-a dinna lam chu ka pan ve leh mai a, pu Robert-a chuan Grape Juice chu a lo ban nghal a, eitur erawh a bula dah rih turin min ti thung.

Eitur ka dah fel hnu chuan Hunter-a bulah ka kal phei ve leh a, a mi uap a nat em avang chuan ka tha zawng zawng a khur vek thei.

Ka zam ru lutuk chu a lo hre vek ang tih ka hlau, kan mit intawng miah lo chung pawhin ka zam thei a nia, a mak ka ti zawk.

A bul lawka eitur ka dah thlak rualin silai a rawn puak ri pawp a, ka phu lutuk chu khawiah nge ka awm tih pawh ngaihtuah lêk lovin ka ṭe tûar nghe nghe.

Silai puak thawmin ka thin a tihphut nasat em avang chuan ka ke chhe thlengin a dik lo nghal vek a, harhfim reng chungin ka tlu ta riai riai, mahse ka taksa chuan phul a si miah lo.

Hunter-a ngei mai chuan a ban lian leh tha chak tak hmangin nghet zet hian ka hnungah a lo dawm a, a kut khing khat chauh mah ni se min zo lutuk tlat.

A hmel chu chiang takin ka en a, chutiang khawpa chiang chuan kan la inhmu ngai lo, ka rin phak bakin a hmel chu a ṭha bawk.

A mit tak run leh thip ang taka lang mahse khawngaihna leh zaidamnaa khat si chuan min ti tuiral lo chauh, ka awm dan zawng zawng chu a dik lo kual chhuak vek a ni ber.

Ka hnunga a kut phah lumnaa khat leh hrawl lian tak chu a tiche deuh zawk a, chawp leh chilhin ka awm dan chu ka hre chhuak thuai a, zah lutuk avanga hmai sa hut hutin ka che ta thut.

A Leather Jacket chhah lian ṭha tak tlangah chuan ka pawt ṭai a, ka chet dan hrethiam zetin ani pawh chuan min dawm kang riai riai a, ka din ngil rualin ngawi renga kan awm dan min lo entu te pahnih Griffin-a leh pu Robert-a chu ka hmu zui nghal.

Zah lutuk avang leh inthlahrun lutuk avangin hawi pawh ka hawi chhuak ṭha ngam lo va, tu hmel mah chu ka en ṭha ngam tawh lo a ni.

"Ka pu, hei Apple Juice chu aw" Julie-i aw ka hriat rualin ka hawi chhuak vat a, ka hmaa dingte pahnih pu Robert-a leh Griffin-a pawh chu ka hawina lam an hawi ve nghal zat.

"Tui takin in ei dawn nia" tiin Julie-i dinna lam chu ka pan mawp mawp a, tum viau mah ila ka aw ah chuan hawihawmna pakhat mah a lang thei lo, zam lutuka ka aw chhuak dik lo chu an hriatthiam vek ka ring.

"Kal ang, kal thuai ang" Julie-i kut chelh chung chuan ka ti a, vawi khat pawh ka la vawn ngai loh kut ka chelh thut chu mak pawh ka ti buai peih tawh lo, inthlahrun lutuk avangin ka thi lo chauh zawk a ni.

"Hei hei hei, engati nge min kalpui thuai thuai a? An thil eina kha kan seng fel leh a ngai alawm, hmun hla taka awm thei kan ni lo" Julie- i thusawi chuan min tiding chawt a, thil ka ngaihtuah tawizia ka hre chhuak zawm leh ta zat.

"Kei chuan ka lo pui tawh lo mai ang che, nangmah chauh paw'n an ei inna seng fel kha chu a harsa tawh lo" a kut ka vawnna thlah pah chuan ka ti a, kal sawn mai ka tum chu min kuai her dâwrh.

"Enge dik lo awm min han hrilh phawt teh? Thil thleng a awm em ni?" chik zeta min en chung hian a rawn ti a, thawk la hawk chungin ka dak a, sawi ila ka rilru a pangai leh mai ka ring zawk.

"Griffin-a khan silai a hmet puak thut a, ka phu lutuk kha ka tlu a, mahse ka taksa chuan phul a si miah lo" ka tih lai chuan

"Enge i thu sawi awmzia hî? I tlu a, phul si ngei tur chu i ni alawm, phul i sik si loh chuan enge i sik a?" a rawn ti nghal vat a, thawk ka la hmasa leh tê te ringawt.

"Hunter-a, Hunter-a khan ka hnungah min lo dawm alawm, chuvanga tlu lo mai chu ka ni. Pu Robert-a leh Griffin-a khan kan pahnih awm dan kha an lo en reng bawk si a, engtia rei nge chutiang chuan kan awm pawh ka hre lo"

"Awi a va'n mak ve le, pu Hunter-a hi i laka a awm dan ang hian tu Maid lakah mah a awm ngai lo, dawi i thiam tak tak em Daisy?" a hmel chu mi â ang mai a ni.

"Dawi thiam ni ila chuan ka tih tum i hriat vek tawh khâ, dawi thiam ka ni lo" ka tih chuan ṭawng khalh hlau zet hian

"Chu tak reng chu alawm khatia ka zawh chhan che, engtin pawh awm la pu Hunter-a nen in inhnaih tlat hi mak ka ti a ni" a rawn ti a, a thusawi awmzia chu ka bo ta hle.

"Enge i sawi tum tak Julie? Mawl mang taka sawi lo khan ka hriatthiam turin min hrilh zawk teh, ka rilru chu a dik lo kual nuai tawh a ni" mumal lo zet chuan ka ti a, Hunter-a hmel hlir chuan ka rilru a luah khat leh tawh.

"Pi Sharon-i khan kan thawh ho lai khan a sawi chhuak tawh alawm, Hunter-a hian pi Sharon-i hi Dinner a nghei tir che avang khan a hau hrep a, kum 10 lai thawk tawh mah ila khatiang renga a thinrim hmel kha ka la hmu ngai lo"

"Chuvang em ni pi Sharon-i kha ka chungah a sual zual em em?" ka piah lawka thingkung ding tlar ṭhup chu ka en a, Hunter-a chet dan chu ring lawk deuh tho tawh mah ila a tak tak a nih ka ring lo a nih kha!

"A ni pawh a ni mahna, mahse maw khang zawng zawng pawh kha a lo hre leh vek. Pi Sharon-i hi a hrem nghe nghe asin, chuvang alawm tun hnu hian i chungah a ṭhat tâk em em"

"A ni maw!?" ât hmel zet chuan ka lo ti hû a, ka thu hriat chuan min ti â zo let der a ni ber, awih harsa hle mahse ka ṭhian neih chhun Julie-i sawi ngei a ni bawk si.

"Aw ni e, nang lah i lo sual hran si lo va, tunah chuan ngainatna tak tak nei chungin pi Sharon-i hian a be tawh zawk chein ka hria" a rawn tih leh chuan ka thaw huai a, ka hriat loh laia thil thleng tam zet chuan min tihhah rualin min tithawveng hawk.

"Eng pawh ni se kei chu ka lo let tawh lo law law mai ang, Hunter-a leh a pate hmel kha ka hmu ngam tawh rih lo, min hrethiam dawn nia Julie" tiin kan dinna aṭang chuan ka kal sawm thuai a, chelh beh tuma min ko miah lo chu ka lawm hle a ni.

In chhunga ka pen luh rualin thawk lo tum ngar ngar thaw thei bawk si lo vawi leh khata thaw chhuak thut thei ang maiin ka thaw hawk a, ka thaw ring deuh te pawh a ni ang pi Sharon-i leh Maid dangho chuan min lo en nghal ṭhap.

Ka tih ngaihna hre lo chu awmze nei lo zetin ka nui lui var var a, pi Sharon-i tih loh chuan min ngaihsak zui ta lo. An awmna lama pheiin ka chetpui nghal mial mial a, mahse rei ka chet hmain pi Sharon-i chuan Lunch ei a rawt nghal daih.

"I duh lo leh pek em?" darthlalang no lang tlang veka Grape Juice thlit thlak pahin pi Sharon-i chuan a rawn ti a, a thli uluk bawk a ni ang en pawh min en lo.

"Aw, duh lo leh mai. Eng lo...bawnghnute ka lo duh leh zawk ang, a rem chuan" ka lo ti ve mai a, Apple Juice emaw Grape Juice emaw ai chuan bawnghnute ka duh zawk tlat a ni.

"Bawnghnute i heh viau vang hi em ni i vun a nalh em em?" a rawn ti leh chuan a lam ka hawi a, ani chu a lo ṭhen sak.

"Nih pawh ka ring chiah lo, chuan ka vun a nalh hran pawh ka hre lo, kei aia vun nalh in tam alawm" ka hma zawna darthlalang no ah chuan bawnghnute ngei mai chu a rawn thli a, ka lo khi ver ver nghal.

"He in chhunga hmeichhe awm zingah chuan i vun a no nalh ber tih hai theih a ni hleinem Daisy, tu paw'n i naupan ngaihtuaha i vun nalhzia chu kan hre vek alawm" a rawn ti leh charh charh a, chhan dan tur pawh ka hre tawh lo.

Lunch kan ei lai chuan Julie-i pawh a rawn lut ve mai a, ka bulah ṭhuin Hunter-a te bula a awm dan chanchin a sawi zui nghal mawlh mawlh.

Pi Sharon-i leh Maid dangho chu pute an awm loh phawt chuan an ei duhna hmun takah an ei mai zel a, kei erawh chokaah ngat ka ei ṭhin, chu chu ka nun hmasa lam aṭang tawha ka lo tih fô ṭhin dan a ni.

Julie-i a rawn luh lai pawh chuan pi Sharon-i te chu an kal darh vek hman tawh a, chuvanga ṭawng duh siam siam hle pawh a ni.

"Enteh Daisy, min melh rum ṭha khawp mai, a hmel aṭang kha chuan min thah duh hmel a pu, nangmah ka lo kal tir zawk lo che kha inchhir tak ka ni"

"Engati nge a lo melh rum vak ringawt che? A pawi i sawi em ni? Nge kei ang thovin i va che sual zawk?"

"Che sual teh nâng, nang ang khan che sual ila chuan min that duh hial ang ka ring. Nang chu che sual emaw thil tisual emaw pawh ni mah la a hum tlat zel che alawm, keini leh nang chu inkhaikhin chi pawh a ni lo"

"Danglam turah min ngai ziah suh, kan inang reng. Maid ve ve kan ni a, min en dan a inang vek, a thu hrimah Hunter-a te chu engtik lai pawhin a meng rum ṭhin tih i hre vek tawh a ni lo'm ni?"

"Hre tho a, mahse nichina min en dan kha chu ka sawi thiam lo, min huat hmel ngawih ngawih a ni tawp"

"Chutiang mitmeng chu eng tik lai paw'n a nei reng alawm, a thu hrimah Hunter-a nui lai hi vawi khat tal i hmu tawh em?" ka zawt lo thei lo, kei chuan a nui hmel vawi khat mah ka la hmu lo a ni.

"Hmu nâng âw, kum 10 chuang chu thawk ve tawh mah ila a nui hmel emaw a hlim hmel awm ang hi ka la hmu lo hrim hrim, ka mitah chuan a ngai rengin ka hria"

"A mak ve ngawt mai, kum 2 pawh la chenpui tling lo mah ila hetiang em ema mipa ze mak leh mi uapna ngah hi ka la hre lo" ka ti chhuak phawng a, chu veleh Julie-i chuan hriatthiam loh hmel deuha min en chung hian

"Mi uapna ngah a!?" a rawn ti deuh tawl a, mak a tih hmel em avang chuan mak ka tiletling zawk, tu bulah pawh awm se Hunter-a chu mi uapna ngah an tih ve vek tho ka ring.

"Engati nge? I ti ve lo em ni? Hunter-a ang em ema mi uapna ngah mipa hi ka la tawng reng reng hleinem, a hmel lah a rorum em em bawk si"

"Daisy, pu Hunter-a hi i ngaina tih sawi miah suh" a rawn tih chuan ka khawng nghal awt a, ka ngainat thu sawi chhuak dawt lo mah ila ka ṭawngkam aṭang a lo hrethiam a ni ngei ang.

"Eng lo...ka...dik tak chuan damna chance min petu a ni a, ka tan chuan mi pawimawh tak a ni" ka ti chhuak sep a, ka hma maia inhung Oven chu ka en ta tlawk tlawk.

"Chu chauh lo chu pu Hunter-a lakah hian rilru dang i pu ti raw? Min han hrilh chiang teh Daisy, i rilru dik tak ka hre duh a ni"

"Aw ni e, Hunter-a hi ka ngaina tawh tak zet a ni. Ka mipa hriat tawhah chuan hlauhawm leh rorum ber ni mahse a bula awm hahdam thlak ka ti em em thung a, ka thinlung chhungril ah hian a awm reng ṭhin"

"Lalpa le! Eng thil pawi nge thleng ta hi! Nang ang chiah hian Daisy, nang ang chiah hian i rawn awm hma khan Maid pakhatin a vei em em tawh a, mahse Hunter-a chuan a that hmak asin, thih i duh a nih loh chuan i rilru kha thlak danglam vat rawh"

"Julie!" mak tih lutuk avangin ka aw chu a danglam vek a, ka biakna pawh ngaisak lovin Julie-i chu a kal sawn nghal vang vang.

Thil awmzia ka hre ta map lo mai, Maid pawi sawi lo zetin a ngainat avangin a that maia maw!? Ni lo, dawt a ni ang, dawt a ni hrim hrim ang, chutiang mi chu Hunter-a hi a ni lo, a nih ka phal bawk lo.

Hunter-a chuan tual a that ṭhin ngei alawm, mahse chutianga hmeichhe pawi sawi lo that duh tur khawpa rilru chhia a niin ka hre lo a ni.

Lo ni ta se engtin nge ni ang? Julie-i khan ka rilru thlak vat turin min ti a, a awmzia chu Hunter-a laka ka rilru puthmang ka thlak lo a nih chuan ka thi ve thuai dawn tihna a ni maw?

Dinner eia an ṭhut kual ṭhap lai te chuan hmun dang pawh melh eih lovin Hunter-a che vel chu ka en tlawk tlawk a, chutianga rei en ngam tura huaisenna ka neih chu ka inring ngai lo.

A thil dan zawng zawng leh a pa biakna a chhan zeuh zeuh dan te thleng chuan ka lo en chik em em a, hmeichhia that duh khawpa nunrawng a nih chu ka la ring phal ta chuang lo cheu. Julie-i thusawi erawh ka ngaihtuahna ah a awm reng a, mahse ka la awih tak tak ngam lo a ni.

Ngawi renga ka en vawng vawng lai chuan ka en tih a hria a ni ngei ang ka lam a lo hawi thut a, hawi sawn emaw lo kun nachang pawh ka hre lo, huai takin ka lo en tlawk tlawk ringawt.

Min en deuh tak vung vung hnu chuan a chhan pawh ka hriat miah loh hian ka mittui a rawn parawl a, a hmel chu ka hmu phe nghal ruai a, chumi hnu chuan ka hawi sawn ve ta chuah.

Ka mittui rawn tlin chhan chu ka hre lo va, ka ṭah a chhuah em em chhan pawh chu ka hre chuang lo. Ka mittui tlak hlau ru zetin ka khap let thuai thuai a, Hunter-a ṭhutna lam hawi leh tawh lovin kawngkapui chu ka en ta char char.

Chutah chu kawngkaah ngei mai chuan ka pa hmel ka hmu a, ka nu leh ka unaupa te hmel hlim deuh ka hmu bawk a, ka inrin hma hauhin ka kâ aṭang chuan thawm a rawn chhuak ta.

"Ka...ka tihpalh lutuk, ka hrawk a za deuh a" an vaia min lo en ṭhap avang chuan ka ti thuai a, ka hmel aṭang chuan ka hrawk zat vanga thawm chhuah ka ni lo tih leh ka ṭah a chhuak tih an hre vek ang.

"Daisy, room-ah phei rawh. I dam lo ni khan ka hre reng a, zanin chu lo chhuak tawh miah lo vang che, nep leh lutuk mai" vin tak hian pi Sharon-i chuan a rawn ti ve nghal a, min chhan a duh vang tih pawh ka hrethiam vek.

"Ka tihpalh tak zet a ni" ti nawn leh sepin ka room lamah chuan bing takin ka kal vat vat a, an hriat laiin ka ṭap chhuak thei tak ngial dawn.

Room chhung ka luh rual chuan chhuak em em hian ka ṭap khur ngawt ngawt a, kawngkapui lian taka ka chhungte hmel lo lang khan ka ṭah a tichhuak ngawih ngawih a ni.

An fanu leh unaunu duat, a duh apiang an tihsak ṭhin hian ka chhungte chu ka ngai lutuk, dam ṭha pangaiin la awm vek se, ka awmna aṭang hian min lo la chhuak thei se ka ti, chu erawh khawvel tawp hma chu a thleng ngai lo vang.

Zanah chuan mit bui chûkin khumah ka ṭhu a, thla eng fiah ṭha tak te chuan thing hlim chhah tak a rawn siam a, chu thla eng chuan romei zam chiai chiai chu a chhun tlang thei titih bawk.

Chu thla eng ang mai chuan chawp leh chilhin ka rilru chu a fiak kâk a, mahse a fiah dan chuan min tiṭap zui leh ta dawt dawt, ka thinlunga cham reng chuan ṭap lo thei lovin min siam a ni.

Lukham pawm chung chuan ka ṭap chhuak leh ta hak hak a, chhung lam aṭanga kawngka ka kalh thlap tawh avangin ka thawm chu pawn lam aṭang an hriat theih ka beisei lo.

Rei tawk fang ka ṭah hnu chuan ka ṭah chhuak zualpui pawh a reh ve ta tial tial a, chutih lai tak chuan ka room kawngka chu a lo inkik ri ta karh karh.

Ka hmai leh sam vel tuai ṭha thuak thuakin kawngka chu ka va hawng a, Julie-i nen chuan kan inhma chhawn ta ran.

"Dinner i ei ve bawk si lo va, natuka i chauh lutuk loh na'n hei tal hi i ei dawn nia" tiin thlenga eitur inchhawp hi ka kutah a rawn hmehbel a, ka ṭawng hmain a kal sawn leh nghal vat.

A kal liam hnu chuan kawngka kalh ṭhain khum lamah bawk ka phei leh a, room chhung chu a zauh lutuk hran loh avangin khum chauh lo chu awmna nuam tak pawh a awm lo. Bathroom pakhat a awm a, tukverh pahnih a awm leh a, room light pawh common room anga eng ṭha a ni lo.

Chutiang khawpa room zim leh chhiaah chuan kum 1 leh thla eng emaw zat chu ka lo hmang zan tin ve tawh a, ngaia neih duh lo mah ila ka awm danin a zir miau avangin ngaia neih loh chu a harsa lam hret a ni.

Julie-i eitur min lo pek chu tui ti takin ka ei mial mial a, zalen taka ei anga ka inhriat vang a ni ang rilru chhungril thawven tak tak na nen ka ei a ni.

Ka ei zawh chuan tlem têa ka ngaih si kha ka puar em em lawi a, inngaihtuah lung kuai reng tawh lovin ka taksa leh rilru pawh a harh ta sawt sawt.

Ka mutna tur khum chu ka siam a, thawh vela hak theih turin ka Uniform pawh chu ka thlep fel thlap a, ka khum bul lawkah chuan ka dah bawk.

"Daisy, nang huan lamah i tla ṭhang tawh bawk a, Salad-a pawlh tur Yellow Bell Pepper leh Cucumber va lo lawk ta che" pi Sharon-i chuan pangai tak hian a ti a, zan lama ka chunga a chet dan avang chuan lawm thu sawi mawlh mawlh ka ba a ni.

"Aw le, chuan nizan avang khan ka lawm lutuk aw pi Sharon" tiin dawhkana kho chu ka la a, ani pawh a lo bu ve mai.

Thlai awmna bik huan ka thlen chuan phul leh thlai hnah chungah dai a lo la awm fep fep a, zing kar deuh reuh a la nih avangin ni pawh a la chhuak lo.

Yellow Bell Pepper kung awmna lamah chuan ka kal hmasa phawt a, Salad tur a nih tho avangin lawh hnem lutuk pawh ka tum lo.

A tawka ka hriat chin ka lawh hnu chuan Cucumber zamna lamah ka phei ve leh a, pum 3 vel ka lawh lai chuan ka hnungah thawm a rawn awm ta tlat.

"Tu nge i nih!?" ka mi hmuh thut avang chuan hlauthawng zetin ka ti a, thlai rah lawh chhunzawm pawh ka tum tawh lo, chu Body Guard la tlangval hmel tak chuan min ti ralṭi vek tawh a ni.

"Ni lo, min hlau duh suh, mi dang ang ka ni lo. Huan lam pana i kal kha ka lo hmu reng che a, puih che ka tum mai a ni" a thusawi chuan hlauhna min pe suah zawk.

"Eng vangin nge min puih i tum?" Cucumber chu ka kut ding lamah ka hum ran a, min beih a tum vaih chuan lo vawm pawp ka inring khawp.

"Dik tak chuan nang hian mipa hipna leh zun chak tak i nei, i hmel hi ka ngainat zawng tak a nih avangin puih che ka tum a, i bula awm ka châk avangin ka rawn zui tawp che a ni"

"Ka awih hauh lo" chuti maia a thusawi chu awih ka tum lo, chung laia mipa tawh phawt chu a hlauhin ka hlau vek tawh, Hunter-a tih chauh lo chu!

"I tan chuan awih pawh a harsa mahna, mahse ka ngainat chi tak hmeichhia i ni miau alawm" a rawn ti leh a, lan nelawm tum tih hriat takin a khi sak bawk.

"Tihtur ka nei a, min khawih emaw min sual emaw i tum a nih chuan ka au vak ang. Nangniho vang mai mai hian ka tihtur hi ka ṭhulh thiang lo, min lo si miah suh ang che" tiin ka hma maia Cucumber rah tûar chu ka lo mawlh mawlh a, chu Body Guard chu ka la mitmei ru reng.

"Christopher-a ka nia, i hming min hrilh ve thei ang em?" min biakna chu hre lo ang hmakin ka awm a, a zawhna chhan chu ka bat a ni lo tlat.

"Zing kar boruak chu a nuam dangdai hle mai, ka mi hmuhin a zir bawk a, tunah rih chuan kan awmna hi hmun nuam tak a ni e" ama ṭawng ṭawng chuan a ṭawng reng a, kei chuan vawi khat mah ka chhang lo.

"I lo zo em ni? Mi dang hmuh theiha kan awm hma chu ka lo ken sak dawn che em ni?" tia a ban a lo phar lai chuan thlipui ang maia kut tha chak hian ka bula mi chu a ṭhuai thal tawp a, Hunter-a chu eng tik laia lo kal nge a ni tih ka hre miah lo.

"Nang! Nang teh hrep hi! Tho rawh!" vin tak hian Hunter-a chu a ṭawng a, Body Guard pawh chu kun ngul chungin a tho ta thuai.

"A bul hnaihah i awm leh tih ka hria emaw ka hmu leh che a nih chuan ka that nghal ang che" Hunter-a chuan a ti hrawk a, a aw chhuak hlauhawmnaa khat avang chuan ka lo kimki chawih.

"Aw le Sir, ka tihpalh a ni" tiin chu Body Guard chu a dinna hmun aṭang chuan a kal sawn ta thuai thuai a, chutah Hunter-a mitmeng sen ram chu ka hmu ve ta.

"Nang pawh, eng vangin nge ani nen khan in lo awm?" a rawn ti vin hrawk a, huanah ni lovin in chhungah awm ngat ila zawng a aw chu a khawk rum rum ngei ang.

"Eng lo...a bula awm ka tum lo, amah khan min lo zui a" ka tih chuan van vadakin a thaw hawk a, a kawng chu a dawm zui zat bawk.

"Ka thu hnial miah suh, thihna ka pumpelh tir che a, ka thu awih hliah hliah tur i ni" zaidamna aw kâ tel miah lo hian a rawn ti leh a, na zetin min chhuk melh run a, lo en let ngam chi reng a ni lo.

"Aw le, ka hria alawm" ka ti thawp sep a, ka tih theih awm chhun chu ngawi renga Cucumber leh Yellow Bell Pepper ka lawh sa en ngawt ngawt chu a ni mai.

"Hre rawh, kha mi lak tlak loh bulah khan awm tawh reng reng suh" a rawn ti bul hmuk a, chuti fakaua a thinrim chhan ber chu ka hre lo, chutah zing kar a la ni zui.

"Nizan ah thil i em?" a rawn tih leh tâk daih avang chuan ka chhoh en nghal thuai a, a thusawi inperhsan lutuk chu a awihawm loh zawk, amah a ni lo emaw ka ti dawn rum rum.

"Aw ei e" aw thian hmasa kharh kharhin ka ti a, eng vang nge ka hre leh ta lo chuti em ema min melh rum chhan chu!

"Dawt ka hua tih i hria a ni lo'm ni? Chokaah pen khat pawh i pen lut hauh lo, thu dik tak sawi rawh" tiin a kut hrawl zet chuan ka biang a rawn hmer a, a hmer na tial tial bawk.

"Ka ei alawm, ka inei puar ngei alawm, Julie-i'n eitur min lo pe a ni" ka tih chuan tlemin ka biang a hmerna chu a thlah dul deuh a, mahse a kut chu a la la sawn chuang hauh lo.

"Eng vangin nge i mit hi a bui em em?" a rawn ti ram leh hmarh a, a awm dan vel chuan ka awm a tinuam lo tak zet, tal sawn tum ringawt dawn ila thil tih chi ber a ni lo tih ka hre chiang ropui si.

"Engmah a ni lo, ka mu thei lo va, chuvanga bui mai mai chu a nih hi!" ka ṭawng zawh rual chuan a hma ang chiaha thinrim hmel zet hian

"Dawt ka duh tei vet lo, thu dik chauh sawi rawh, i sawi lo a nih chuan i chunga ka chet dan tur ka sawi lawk thei hauh lo vang" a rawn ti vin leh ṭhawt a, ka thin chu a thlawk chhuak dawn emaw ka ti hman.

"Ih...Eng lo....ka ṭap a, zan rei tak thleng ka ṭah vangin ka mit a bui a ni e" ka tih chuan a chhan sawi nghal tura min ti ni awm tak hian min la melh reng a, ka ṭah chhan sawi chu a fuh ber ang em ka hre lo.

"Kawngkapui ah khan ka chhungte hmel ka hmu thut a, ka ngaih lutuk avangin ka ṭah a rawn chhuak em em a, chuan zan rei thleng ka...ka" maimitchhing ka ṭah zawm nghal a, ka ṭawng duh tawh rih lo.

"Ka mit hmuhah hian ṭap ziah suh, nang hian...nang hian nasa takin...hrep che hian ṭap tawh suh" tiin a kut pahnihin ka biang a rawn khuap a, a kut lum nuam tak chuan ka ṭah a tichhuak zual sauh.

"Ka ngai em mai, ka chhungte kha min kohkir leh sak thei hram teh. Thihna min pumpelh tir a, mitthi tawh pawh i kai tho leh thei ang ti raw?" ṭap hliam hliam chung chuan ka ti a, a taksa khauh leh chhah lum nuam tak chu ka kuah leh lo thei lo.

Ka ṭahna hmun chu vanram ang maiin ka suangtuah a, chu ai hmun hahdam chu ka nunah a la awm lo miau a ni. Ka chhungte ka mitthlaah an lo lang zut zut a, ṭap reng mah ila ka chhungte hmel ka mitthla avang chuan ka ṭhen pah zeuh zeuh a, hahdamin hlim ru em em mah ila ka nui chhuak chuang lo.

Vanram ang maia ka lo suangtuah char char chu a che hrut a, mihringah a rawn chang ta daih mai. Hunter-a chu ka chhoh melh ral a, ani paw'n keimah ang thovin hmel pangai deuh hian min lo en kiau.

"Ka...ka tihpalh" tiin a taksa aṭang chuan ka tal chhuak thut a, phula ka kho dah chu ka la kang a, in lam panin ka tlan ta vang vang.

In chhunga a rawn pen luh lai chuan ka lo en duh ṭhak lo va, en ngam tur pawh ka ni lo. Ngainaa vei em em ngam tur pawh ka ni lo, Julie-i sawi kha a dik chiah, a laka ka rilru put hmang ka thlak vat a nih loh chuan thihna bak ka hma chhawn dawn lo tih ka hre chiang ta.

A hma kha chuan Julie-i thusawi kha ka ring zo lo a, tunah erawh a sawi dik ngei ka ring ta. Thih chu tu nge duh teh lûl bik ang? Thihna ai chuan damna ka thlahlel a, chuvang chuan Hunter-a hi ka pumpelh char char a ngai tawh a ni.

PROTECTIVE HUSBAND

By

Havali Adam

Chapter 7

Kar thar kan chuang kai a, chutiang zelin thla thar pawh, ka hun hman dan chu tihdanglam tum nasa tak ka ni. Hunter-a ngaihtuah loh tumin ka rilru ka seng char char a, hna thawh tur awm reng reng chu ka thawk bawrh bawrh zel.

Chhiahhlawh dik anga awm ka tum nghet bur a, Hunter-a laka ka rilru puthmang chu paih bo vang vang ka duh a ni. Awmzia a awm lo, eng ang pawhin ka thinlunga mipa awm hmasa ber ni mahse awmzia a nei thui dawn chuang lo tih ka hre chiang em em tawh a ni.

Dinner an ei lai leh Breakfast an ei lai paw'n a hmuh theih lohna lam pi Sharon-i bulah ka awm daih zel a, ka hmu emaw a hmuh theiha ka awm emaw a nih chuan ka tum angin ka awm theih ka ring lo a ni.

Pi Sharon-i bula chet tlat chu a nuam ta phian zawk a, chawhmeh leh thil dâng dang sem tur ka lo suak chhuak zel a, pi Sharon-i awla keima tih vek chang pawh ka nei hnem ta fû, mahse pawi tihna emaw hahthlak tihna ka nei lo hrim hrim, a nuam ka ti daih zawk.

Chutiang chuan thla 2 chuang zet chu choka lamah ka tal chawt a, thla khat hnuah phei chuan pi Sharon-i tel lovin keimah hlir chuan ka buaipui zui ta nghe nghe. Pi Sharon-i hi nu upa lam tawh tak a ni a, keini ang kum rual tan chuan awl hliah hliah tham a ni.

Maid ka nih tirh kha chuan sual ka tiin min tiduhdah em em a, mahse tunah chuan engkim a danglam tawh, thisen inzawmpui ang maiin kan titi chu a kal hle tawh zawk a ni.

Helicopter thla vai ri ring zet chuan ka mu lai min kai harh hlawl a, tukverha ka dah chuan khua a lo var fel vek tawh hi a lo ni.

Hmanhmawh bak lêkin khum aṭang chuan ka tho a, khum bula uniform ka thleh lawk sa thlap chu lain ka inthawlh nghal ta thuai thuai.

Room pawn ka thlen rualin Julie-i chuan min lo pan nghal chat a, bathroom bul bang kil bulah min dinpui zui nghal bawk.

"Engati nge i thawh har em em a? Zing dangah hetiang hian i awm ngai tawp si lo, tukin phei chu pu Robert-a mood a fuh lo teh mai a nia aw" a thusawi avang chuan za lo zetin ka ṭhen sak a, ka inthlahrun lutuk vang a ni ber.

"Nia, ka thawh tlai chhan hi ka hre bik lo" tih bak sawi ka nei lo, zan lama ka men rei vang a ni tih chu hre tho mah ila ka sawi chhuak duh ta kher lo.

Kan awmna hmun aṭanga kal sawnin mi dangho awmna ah chuan kan kal phei leh thuai a, mi dang hna thawh mawlh mawlh laia lo inbiak hran daih kha a fuh chiah lo a ni.

Zing kar a nih avangin Breakfast tur chu kan siam zui mial mial a, chaw ei an tam tham ṭhin em avang hian eitur siam pawh a hautak ve phian.

Body Guard nazawngin dawhkan chu an kil lo va, tlema an ṭhuihhruai deuh bik leh Senior tawh deuh hlek te chauhin dawhkanah chuan chaw an kil ṭhin a ni.

Ṭawng siam siam paha in chhunga lo pen lut mek ka hmuh rualin hnung lam ka hawi thuai a, Amelia-i chuan min hmuh vaih chuan min be dawn tih ka chiang, mahse kei chuan mi dang zawng zawng awm laia inbiak ka duh teuh lo mai. Pi Sharon-i thil chawk lai chu ka va tihsak thuai a, ani paw'n hrethiam takin min lo kian ve nghal mai bawk.

Minute 10 hnu velah chuan keimah chauhin ka awm leh ran tawh a, mi dang erawh an awmna hmun tur lam panin an kal liam duak tawh thung.

Eitur chu ka tem chhin a, ka nu eitur siam ang maiin a tui tak zet, chu bakah siam thar a ni tih hriat takin a thar lam em em bawk.

Plate-a eitur ka suah chhuah lai chuan Maid pakhat hi a lo kal a, Amelia-i'n min hmuh a duh thu a rawn sawi chuan ka thil tih lai chu ka tawp nghal.

Amelia-i chu ka hmu hreh pawh a ni lo, amah ai mah chuan Hunter-a hmel ka hmu peih lo daih zawk. Chhiahhlawh mai ka ni a, an thusawi chu awih lo thei ka ni bawk si lo, peih lo leh hreh ru tak chungin Breakfast eina lamah chuan ka phei ve ta nge nge.

Amelia-i te awmna ka thlen chuan a lo titi siam siam a, a bul chiaha ṭhu run Hunter-a nen chuan ka duh loh ang ngeiin kan mit a intawng ta siah. Rang takin hmun dang ka hawi a, ka en rei duh tawh lo a ni.

"Aw Daisy, i lo thleng ta maw? Ka rawn thlen tirha i hmel ka hmuh loh avangin i chungah ka lo lawm lo ru khawp mai, lo kal hnai teh" Amelia-i chuan a rawn ti ta mai, muangchangin ka kal phei ringawt.

"Hetah hian lo ṭhu ve teh, Breakfast ei pui che pawh a khat alawm, tawlh phei teh Hunter, Daisy-i ṭhutna tur hi i dip hle a ni" a la ti ta deuh deuh.

"Ni lo pi Amelia, hna thawh tur ka nei a, ni dangah ka ei pui zawk mai ang che" tia kal sawn ka tum rualin ka banah a lo chelh a, min la vuan nghet phian zui.

"Nang awl tur che hian mi dang an tam alawm, an eng tih mah a buai phah chuang nâng, Breakfast hi ka bulah han ei phawt mai teh" a la rawn ti hram a, chair-ah chuan min pawt ṭhu nghal hmak.

Sakeibaknei bula awm ang maiin ka inchan a, a chhan chu ka bul lawkah ka thinlung zawng zawng luahtu leh ka ngainat phak ni lo mipa Hunter Hudson-a a ṭhu tlat a ni.

Griffin-a, pu Robert-a leh Maid ho chuan mak tih hmel deuhin min en zeuh zeuh ṭhin tih pawh ka hmu ru vek, mahse hre lo anga awm tlang law law chu a fuh ber.

Eng dang zawng aiin ka bula mipa ṭhu huhang ngah zet leh mi uapna tak chuan ka awm a tinuam lo hle a, ka biang leh ka bek a sat hut hut avang chuan min en reng tih ka hre thei.

Eitur chu ka ei mang lo va, ka Maid puite pawh ka dinhmunah chuan ding se an ei ṭhat theih bik ka ring lo. Amelia-i lah chuan min be leh tawh bawk si lo, a pa nen an ṭawng char char a, a changin Griffin-a chu a lo ṭawng ve zeuh zeuh bawk.

Ka bul chiaha ṭhu Hunter-a erawh a ngawi reng a, a thil ei thawm pawh ka hre lo hrim hrim. Dawhkan hnuiah ka kut ka hum ruh em em a, chu zawng chu ka tihtheih awmchhun a ni.

"Daisy, min lo zui lawk teh" Breakfast kan ei zawh hnu eina vel kan tihfel mawlh mawlh laiin Amelia-i bawk chuan a rawn ti leh a, min ngaina ta lutuk chu ka hrethiam lo.

Amelia-i chu ka zui ve leh mai a, an tan chuan chhiahhlawh kan nih miau avangin Maid te chuan an thu kan hnial thei lo a ni. Hmun reh zawl zau deuhah hian min hruai a, chu lai hmunah chuan ka la kal ngai hauh lo.

Thlai huan vel aiin phul ṭo leh hnim sang a tam deuh a, ram ngaw chhah tak chu kan piah lawkah a lang thei reng bawk. A hawi kual vak vak hnu chuan min dinpui a, a awm dan chuan ka ngaih a tiṭha lo rum rum.

"Enteh Daisy, Maid i ni tih chu hre tho mah ila ka ngaina em em che a, thil hrilh tur che ka nei a ni" a rawn tih chuan ngaihven zet hian ka lo en a, mahse ka en rei ngam chuang lo.

"Mipa hmangaih deuh i nei tawh em? I thinlung chhungril ber luahtu mipa i tawng ve tawh em?" kan hma lawka tui khawh thla sang tak en reng chung hian min rawn zawt thut a, ka va han phu tehreng em.

"Ni lo, i neih ka la ring lo. Nang chu i la naupang a, hmangaihna awmzia tak pawh i la hrethiam lo zawk ang" amah bawk chuan a rawn ti leh nghal a, ka lo ṭang ṭung ringawt.

"Mipa hmangaih em em hi ka nei a, mahse ani chu ka chhungte hian an pawm dawn lo tih ka chiang. A bulah kalin pasalah nei ila chuan ka hlim ngei ang, mahse ka hlim hun chhung a rei dawn lo thung" a rawn tih leh chuan

"Engati maw pi Amelia?" ka lo ti ve ta nge nge a, hmangaihna awmzia hre hawt lo mah ila a mipa hmangaih nena an chanchin chu hriat châknain ka khat a ni.

"A chhan chu maw pasala ka nei a nih chuan ka chhungte hian ka pasal chu an that nghal dawn tih ka hria, ka mipa hmangaih erawh thihna khura hruai luh ka duh hauh lo thung" a hmel ka en chuan a mittui a lo tling pam.

"Vawi tam ka pa min neih dil a tum tawh a, mahse keimah zawkin ka phal lo zel a ni. Ka pa hian a hmuh rualin a that duh ngei ang ka ring, chu chu ka hre sa vek" a biang chu a tuai zeuh a, a ṭah lai pawhin Amelia-i chu a hmelṭha em em tho.

"Pi Amelia, engti ang chiahin nge chu pa chu i hmangaih a? Ni lo, ka zawt lo angah che ngai rawh, ka va han mawl tak!" ka kâ thawt thawt chu ka veng hman lo, ka sawi vek tawh bawk si.

"Ka mu thei lo hial ṭhin, amah ka ngaih lutuk avangin ka mu thei lo fô asin Daisy. Engtik lai pawhin ka ngaihtuahna leh ka rilru a luah a, a bula ka awm te hian ka zam em em zel" a thusawi chuan ngaihtuahna dang daih min put tir nghal.

Amelia-i sawi ang chiah chiah chuan kei pawh Hunter-a lakah rilru ka pu chiang alawm, a awmzia chu Hunter-a hi ka hmangaih tihna em ni?

Amah ngaihtuah avangin zan khaw tai rek thleng mut theih loh te ka nei a, amah ka thlakhlelhna zawng zawngte chu hmangaihna vang a ni thei mai ang em?

Ka thinlung chhungril bera hmun luah hnem ber tu chu amah chauh a ni a, ani lo chuan hmun an chan theih tawh pawh ka ring lo.

Ni e, Amelia-i sawi hi a dik a nih ngat chuan Hunter-a, ka hmelmapa Hunter Hudson-a hi ka hmangaih chiang a ni. Ka mit ka chhin rualin ka mitthlaah a hmel a lo lang a, lu thing nâng nangin paih bo te tum ṭhin mah ila ka lo hmangaih tawh miau avangin awlsam takin ka tibo thei lo a ni.

Eng vangin nge ka hmangaih kher? Hmelma kan ni tih hre reng chungin ka hmangaih a nia, kei hian nasa takin thil dik lo ka ti a ni.

Ni lo, ka tum hauh lo, Hunter-a hi hmangaih ka tum bik hauh lo. A tir tê aṭang, a tir tê aṭang khan engkimah min buaipui a, min humhim zel a, rothap tak angin lang mahse ka chungah chuan a sual miah chuang lo.

Kha zan, amah nena kan intawn hmasak ber zan pawh khan a duh chuan awlsam takin min that thei ngei alawm, tûma hriat lovin ramsate ei turin ka ruang pawh a dah thei reng, mahse a ti hauh lo, tun thlengin amah avangin ka la dam ṭawk ṭawk zawk a nih hi!

"Daisy" ka dar sawi det det paha min kotu lam chu ka hawi a, Amelia-i chuan min lo en chik hle.

"Engati nge kan indin hnaih tehreng nen ka koh pawh i hriat miah loh? Thil hmuh tur che ka la nei a, mahse inah ka va lak lawk a ngai a, hetah hian lo awm rih la ka lo phei leh vat ang" a tih chuan ka bu thuai a, ani pawh a kal sawn zui nghal.

Chutia Amelia-i in lama a kal lai chuan ngaihtuah em em pawh nei lovin ngaw leh hnim vel chu ka lo en kual mai mai a, chu lai hmun boruak chu a hrisel phian, a thiang kâk ni mai hian ka hria a ni.

Ka bul lawka pangpar mawi zet chu ka khawih neuh neuh a, eng par nge a nih ka hre thei lo, chu pangpar chu ka vawi khatna hmuhna a ni nghe nghe.

Hnim che deuh laih laih chuan ka mit a la ta vat a, hlauh emaw ngaih ṭhat loh emaw enah pawh ka en hran lo, thli tih chet a nih ka ring ber zawk. Ka hawi sawn rualin a hma aia thawm ring hian hnim chu a lo che leh laih laih a, ka en chik zui ta hle.

Ka en reng lai chuan ka dinna lam pan hian hnim chu a rawn che phei zel a, thil hlauhawm tak a nih ka rin tawh avangin ka tawlh hnung tial tial bawk.

Vawi leh khatah rul dum lian zet mai hi hnim che laih laih kar aṭang chuan a rawn tleng chhuak thut a, hlauh lutuk avangin ka ṭe chhuak tûar a, ka petek sawn nghal dawr dawr bawk.

Chutah chu rul lian leh dum zur chu ka kawng zawn velah a rawn thlawk thut a, chutianga a rawn thlawh chhuah theih ka rin loh avang chuan ka che hman eih lo.

"Ka duh lo" tia ṭe vak vakin ka tal vak vak a, rul chu khawiah nge a awm pawh ka hre tawh lo, ka tlan tur chiah chu ka la tlu zui.

Ka chawn chu na lutuk lo hian a rawn thip zawk a, ka âwm zawnah tak chuan rul lian zet mai chu a rawn tleng chho ta, ka hmaia a chuk loh reng ka ring tawh lo. Min tihnat ngei tum tak hian a ding ût ut a, min la chuk miah lo mahse ka zawi riai riai thung.

Chau tial tialin ka maimitchhing zeuh a, ka mit ka men leh chuan ka hma zawnah rul awm reng hmuh tur a lo awm tawh lo.

"I ṭha em?" chu aw chu ka hriat ṭhan tak a ni a, amah ang lo taka min ngaihtuahna aw kâ chuan ka thinlung a rawn thleng nghal vat a, ka harh deuh zawk thei hial a ni.

"Hrep tak hian! A lo chuk hman che em ni? Rul khan a lo chuk hman che em? Sawi teh, sawi thuai teh" a kut pahniha ka biang dawm chung hian a ti leh hrawk a, a aw vin zet avang chuan amah ngei a ni tih ka chiang leh zual.

"Harh teh!" tiin ka zawi riai riai tur chu min thing harh leh zawk a, han meng lui ve ṭhin mah ila ka meng rei thei tak tak tawh lo.

"Ka hre lo" ka ṭawng chu a chhuak cheng cheng a, rul chuan min chuk hman em tih ka hre lo, mahse ka taksa zawi chak lutuk avang chuan min chuk hman ngei a nih ka ring hmiah.

"Lalpa le! I chawn, i chawnah a lo chuk hman ngei chu a nih hi!" tih pahin ka chawn lamah chuan a tawlh thla thuai a, ka hmuh lai rengin ka chawn na ru vawng vawng chu a kâ chhungah a dah zui nghal.

"Harh teh, harh hram teh" ti mawlh mawlh ri chu ka hre leh a, sakawr chunga chuang ang maiin ka che deuh laih laih a, ka mi hmuh chu Hunter-a bawk a ni.

"A ṭha, khatiang khan men reng tum ang che" a rawn tih chuan ka lo nui sak a, a mit hmuha nui ngam tur ka nih lo vei nen ka in control zo tawh lo a ni ber.

"Hrep tak che hian! Harh rawh, meng reng rawh ka ti che a ni lo'm ni? Ka thupek hi hnial hauh suh ang che, i maimitchhing lui leh a nih ngat chuan i lakah ka thinrim nasa viau ang" vin taka min biakna chuan min tiharh leh zawk a, mahse ka tlin rei ta ngang lo.

"I awm dan hi ka hrethiam hauh lo, ka tihsual a ni tih chu ka pawm e, mahse i rilru dik tak hi min hrilh rawh" hmeichhe aw ngei chuan min tiharh a, ka taksa chu a na ṭhum mai.

"I ngawi tlat dawn em ni Hunter? Min han hrilh teh, Daisy-i laka i rilru puthmang dik tak hi sawi teh. Griffin-a khan Maid pakhat buaipui zel i neih thu min hrilh tawh ngei a, Daisy-i hi a ni em?"

"Fimkhurin kalsan lo la chuan hetiang hian kan buai miah lo vang" Hunter-a aw chu a bul deuh hmuk a, an thusawi chu ka ngaithla ru a ni ringawt.

"Ka fimkhur loh vang tih chu ka hria alawm, ka zawhna kha han chhang phawt mai teh. Daisy-i laka i awm dan ang hian tû hmeichhe lakah mah i la awm ngai lo, ani hi i ngaina em?"

"Ka hre hauh lo, chuan kha zawhna kha min zawt tawh suh Amelia" Hunter-a chuan a ti ram leh hmarh a, ka chungchang an sawi kai daih chu ka hrethiam lo.

"Ka zawh ngei che a ngai, Daisy-i hian i thinlungah khan hmun pawimawh tak a chang ti raw? I unaunu ka ni a, thil hrethiam lo turah min ngai miah suh Hunter"

"Hrep che hian!" ti hrawk thawmah chuan ka meng lo thei ta lo, chutah Hunter-a chuan a nau Amelia-i chu bangah a lo rek bet a nih chu!

"Hunter!" ka ti chhuak hluai a, ka aw hriain an pahnih chuan an lo hawi nghal vut a, Amelia-i chu a lo hlauhthawn hmel hle bawk.

"Chhuak rawh, room aṭang hian chhuak rawh" Hunter-a chuan a unaunu chu ngainat loh hmel zet hian a melh run a, Amelia-i pawh ngawi reng a chhuak ta hna hnâ.

Ka lam pana Hunter-a lo phei chu ka lo en reng a, a hmel chu changin tak run mahse a hmel ṭhatna erawh a bo chuang lo. Kha leh chen kha in khatah kan lo cheng ho ve tawh a, a hmel pa tak leh ṭha em em chu ka thlir ning thei rih lo a ni. Kei hian zep leh tur chuang awm lovin Hunter-i ka hmangaih tawh, chiang takin ka hmangaih tih ka hre tawh a ni.

"Ka thu i zawm hauh lo" ka bul a rawn thlen chuan a ti chang nghal hmuk a, khum bula dingin min chhuk melh run bawk.

"Ka tihpalh, mahse muthilh kha ka tum a ni bik lo, ka taksa kha a chau tawh em a ni" pangai taka ka ṭawng chhuak thei chu a mak zawk, hlauhna lah chu ka nei miah lo leh nghal.

"I dam ṭhat tawh chuan ka room aṭang hian chhuak la, i room-ah zu mu ang che, hna pawh thawk reng reng suh" a ṭawngkam chhuak reng reng chu a nelawm loh vel vek, mahse ka hmangaih tawh miau si.

"Aw le" ti sepin khum aṭang chuan ka tho a, ka chhuk lai te chu chik zet hian min en a, ni dang ang bawkin hlauh vang ni miah lovin ka zam ru leh hle tawh a ni.

Chhuat rapa ka kal chiah chu ka pai deuh chhawn chhawn a, ka lu chu a hai ngei mai. Ka ke lah a la intuam deuh bur a, nat erawh a na em em hran lo.

Lu hai deuh chung chuan ka kal lui a, mahse ka kal rei lo, vawi leh khatah ka kang nghal nawlh. Hunter-a chuan zo zet hian min pawm a, hlim rilru zetin a nghawngah ka lo kuah nghal chial.

In hnuai lam pana min pawm chhung zawng chuan a mitmeng thip ram chu ka en reng a, min pawm mek tu Hunter Hudson-a, tual thah hmang leh ṭek leh khawpui ang maia aw hlauhawm nei chu hlauhna chhetê mah nei lovin ka en reng a, ka thin phu erawh a taksa leh ka taksa a insik avang chuan a phu rang em em thung.

Step-a min chhukpui laite chuan ka kuah nghet leh zual a, a taksa ṭang ṭung chu ka hre lo der hmak. Keima'n en reng mah ila ani erawh hma lam a en ngur a, a kal hrim hrim chu a sawt bik ngawih ngawih hi a ni tawp.

Room-ah kan lut dawn emaw ka tih chu choka lamah kan lut daih thung a, a thil min tihpui tum chu ka hrethiam leh ta lo hle.

Dawhkan hnuaia chair inhung chu min la pawm reng chung hian a pawt chhuak a, min nghat thla zui nghal bawk. Eitur awmna bel chu a va la chhuak a, chutiang chuan eitur awmna a hre kilh kelh ang tih rin ngaihna ka hre lo hle.

Plate pakhat chu lain a suak chhuak mial mial a, mahse a che fel thlap thlap kher lo, eitur chu dah hrang lovin a suah pawlh vek zawk.

"Ei rawh" dawhkanah chuan Plate chu a rawn nghat ri chawrh a, kei pawh chuan thuawih takin lo banin ka ei nghal mial mial.

Zing lam leh chhun lam boruak hre lo khawpin ka awm a, eng thil chiah nge ka chungah chuan thleng ka la hre lo a ni. Rul khan min chuk ngei tih chu ka hria, thih ka inrin tehreng nen ka thi leh miah bawk si lo.

Ka thih loh chhan chu Hunter-a bawk a nih ka ring, ka mangan lai leh harsatna ka tawh laia min veng rengtu Hunter-a a awm zel chu ka vannei tak zet a ni.

Thil ei reng pah chuan ka piah lawka Sana lian zet intar chu ka en a, zing dar 3 a lo ri daih tawh. Ka thil ei lai chawlin ka hmaa ding run chu ka en leh thuai a, ani chuan kut kuangkuahin Common Room lam a lo melh ngawt ngawt thung.

A sir lam zawng aṭang paw'n a hmel chu a ṭha thlawt, chutah a palianin a la sang em em zui, chutianga mipa tawh khirh leh hmel pa hrak chu ka hmangaih ang tih rin ngaihna ka hre lo.

"A ngai lo, ka kal thei tawh ang" ka lam pana a rawn pen phei lai chuan ka lo ti a, ani pawh ka thusawi avanga ding chawtin min en leh ta run mai.

"Min buaipui a ngai tawh lo vang, a tlai tawh em mai min chhohsan tawh zawk rawh. Chuan ka lawm e, i zarah liau liau thihna ka pumpelh leh ta" nui lui sak chuan ka ti a, Plate keng chung chuan thleng silna lam ka pan a, mahse ka ke chu ka la hmang hlei thei der lo.

"I thu ni lovin ka thu chauh zawm tur i ni" ti nghutin ka taksa chu a rawn chelh a, ka thil ken chu dah tawpin min pawm leh ta nawlh.

"Hunter" ka ti sep a, ka ṭawng chu ri zawi hle mahse insi renga kan awm avangin a hre pha vek a, min lo en chiang hle bawk.

"Engati nge ka chungah hian i ṭhat em em a? Ka tan thil i tiharsa zo vek asin, sual tak angin mi dang chuan ngai che mahse i rilru chhungril ṭhatna hi kei chuan ka hmu thei" ka tih leh chuan a hawi sawn hmak.

"Pi Amelia-i kha hau tawh miah suh aw, thiam lohna a nei lo, keima thiam loh vek zawk a ni" ka ṭawng a hre hne tih hriat zet hian min lo en a, ka ṭawng zui duh ta bik lo.

Ka room kawngka chu min la pawm kang reng chung hian a hawng a, a hawn dan vel chu hnehsawh tak a ni. Ka khumah chuan min nghat a, min dim lo ang taka chet tum mahse min dim ru hle tih ka hria, chu chuan ka chhungril a ti hlim veng veng bawk. A che vel chu thuawih hmel zet hian ka lo en kar a, kawngka lam a pan lai chuan aw pangai deuh hian

"Hunter" ka ti leh hram a, ani pawh a ke pen tawpin a lo lehhawi a, min melh dan chu ni dang ang lo takin a rum lo hle bawk.

"Hna thawk suh ang che, i thawk lui tih ka hriat vaih chuan i chung a pik hle zawk ang" chawp leh chilha a hmel leh awm dan zawng zawng thlakin a rawn ti a, mahse kei chuan a inhmeh ka ti daih tawh zawk.

"Ka lawm e, ka lawm tak zet, ka mamawh laia i lo awm zel angin lawm thu ka hrilh mawlh mawlh a che" ka tih chuan mi pawh a chhang eih lo, ngawi rengin a chhuak nghal daih.

Mut hmunah chuan ke na lam pawh ngaihtuah miah lovin ka nui vur vur a, mi â ang mai ka ni, mahse ka hlim em avanga chutianga awm chu ka ni thung.

Ka thinlunga riak reng, ka mipa hmangaih hmasa ber, ka hmelma ni bawk chuan min tihlim a ni. Awihawm loh khawpin ka thinlung chhungril chu a hlim a, a thawveng hawk a, ka ke a na tih chu ka theihnghilh lek lek ṭhin.

Hunter-a berin hna ka thawh a phal loh miau avangin kar khat chhung deuh thaw chu ka room chhungah ka tawm ngawt ngawt hi a ni ber. Tu mah lah chuan min rawn ngaihven ngai hran lo va, Amelia-i leh Julie-i thlengin an reh vek, a mak ka ti zawk.

Julie-i chuan eitur min rawn pe ziah mahse biak pawh min be ngai lo, biak ka tum paw'n hmanhmawh takin a kal sawn vat zel.

Kar khat chhung awm hahdam ta na nâ na chu ka ke pawh a zia viau tawh a, a hma ang chuan la dam ṭha var lo mahse a hman theih tawh khawp mai. Zan rei ve tawh ang reng tak a ni a, a tuk mai chu kar thar a ni leh der tawh.

Ka Uniform chu a tuk zinga hak theih nghal mai turin ka thlep fel leh thlap tawh a, ka mutna khum pawh ka siam fel diam tawh bawk.

Mu tura khuma ka ṭhut thlak rualin room kawngka chu pawn lam aṭang an lo chum ri dawt dawt a, chutiang huna ka room kawngka hmaa awm tura ka rin hmasak ber chu Julie-i chauh a ni.

Ka hawn mai loh avangin kawngka chu a rawn ri leh dawt dawt a, mahse a tir ang em em chuan a ring tawh lo. Kawngka ka hawng chiah chu ka mi hmuh avangin ka ang phuau a, thu zawk a ni tih hriat takin a rawn lut zui nghal.

"Eng lo...Enge i lo tih dawn?" hmanhmawh taka kawngka ka khar hnu chuan ka ti a, ka mi biak erawh chu tukverh bula dingin pawn lam a hawi daih thung.

Ka room chhung light chu eng tak ni lo mahse a hnung lam aṭang paw'n a taksa inkhai thli lian zet leh a hmel nena inrem tak vun rawng chu ka hmu chiang em em a, in awm hlat deuh hlek mah ila a huhang chuan min uap hneh em em tho.

Muangchanga che hrut hrutin ka lam chu a rawn hawi a, a hmel pa hrak chuan kei hmeichhe naupang ang maia an ngaih hi min titui ral lo chauh a ni.

"I ṭha em?" mi pangai ang maia a ṭawngkam chhuak chuan min men zau tir kâwk a, amah a ni lo ti dawn ila a ni tih ka hre chiang ropui mai bawk si, a ṭawngkam leh awm dan chuan min tibangbo hle.

"Aw...aw...ka ṭha e" ka lo ti bah nuai a, chutiang chuan mi dang pawh bia se kei ang thova mak an tih ve tho ka ring, kei ai aiin an hamhaih zawk hial ang.

"Hna thawk hah suh ang che" tiin ka dinna lam chu a rawn pan vut a, min din hnaih pauh leh zamna ka ngah ting a ni mai.

"Aw le" ti sepin ka hmui chu ka liak kual zeuh a, hmui liah zeuh chu ka tihtur hre lo leh awm dan tur hre lo tih a ni ber.

"I hmui kha ka hmuh laiin liak hlek suh" rum lutuka min melh chung hian a rawn ti ram hmuk a, kei lah pek chuan a sawi zawh rual chiahin ka hmui chu ka lo liak leh zeuh kher a, ka tum pawh a ni der lo, amahin a rawn che tawpin ka hria.

"Hrep tak che hian!" kawlphe ang maia rang hian a rawn che thut a, a hmui chhah nem leh lumna nei chu ka hmuiah tak a rawn bawk ta run mai, Electric Current man ang maiin ka mur chhuak nghal vek.

Ka kawnga chelhin ka chet ngai miah lovin min chawi kang nawlh a, kan hmui erawh a la inchuktuah reng a, phelh mai harsa khawpin a inzawm zawk a ni.

Bangah chuan min nawr bet a, ka mipa fawh hmasa ber chu ka mipa hmangaih a nih vang nge ni infawh chu a nuam kher mai.

Min fawh dan lah chu fawh let loh theih loh khawpa dawnsawn nuam leh mi tiphur thei a ni a, insum theihna reng ka nei zo tawh lo.

A kut pakhatin ka kawng chu a chelh a, pakhat erawh ka âwm bawrah chauh a tal reng thung. A kut hrawl zet chuan ka hnute chu a hum bo titih vek zawk a, kei paw'n a sama ṭham tawn tawnin ka lo fawp let ve bawrh bawrh bawk.

Infawp reng pahin room chhung zim tak chu zau deuh ang mai hian min fan kual pui a, chutiang tak chuan a fawh leh khawih chu dawnsawn a nuam ang tih ka ring pha ngai lo.

Thaw chham lek leka kan infawh hnu chuan chal insi rialin kan awm a, bangah chuan min la nawr bet ran a, sawi tur a vang kher mai. Zam ru tak chungin a mit chu ka en a, mahse ani chu a lo maimitchhing daih.

Thawm nei miah lova kan awm deuh vang vang hnu chuan a rawn meng thut a, a ban chu ka kawng aṭanga la sawnin chhuatah min nghat zui nghal.

"Thleng lo angah ngai rawh, a thleng leh tawh ngai lo bawk ang" ti bul hmukin a pen pawk pawk a, room chhung chhuahsan na'n chuan hun a hmang rei lo hle.

Kawngka kalh ṭhain khumah chuan ka ṭhu a, ka hmui chu ka tuai neuh neuh a, Movie-ah lo en fo tawh mah ila chutiang tak chuan infawh a nawm ka ring pha ngai lo. A bik takin Hunter hmui fawh chu a nuam tak zet, ka pa hmui letin a lum nuam bawk.

Tin, a hmui chauh paw'n awlsam takin ka taksa a tidanglam vek thei a, amah fawh let châkna nei turin phurna nasa tak min pe bawk a nih kha!

Ka rizai chu ka sin ṭha set sawt a, hlim avanga nui ver verin ka inkhuh zui hmak a, mahse ka muhil thei teuh lo. Muhil lo chiang tak ka ni, zing khua a var thleng chuan ka la meng kar zawk a, mut chhuahna pawh ka nei chuang lo, Hunter-a chuan ka taksa mai ni lo ka mood zawng zawng pawh a thlak danglam vek a ni.

PROTECTIVE HUSBAND

By

Havali Adam

Chapter 8

HUNTER POV

Hrep tak hian! Eng thil nge ka tih zawh chiah kha! Lalpa le! Hmelma, hmelma fanu a ni ngei alawm, mahse eng vang teh hrepa rilru fim pu thei lêk lo nge ka nih ka inhre lo.

Ka awm dan hrim hrim chu hmeichhe tleirawl pakhat vang maiin a danglam vek chu a nia, a awihawm lo zawk, keimah ka ni lo emaw ka ti ta rum rum, harh chhuak mawlh teh Hunter Hudson.

Tui chu ka in khawlh khawlh a, awm pangai pawha min awm tir thei lo tu Diasy Taylor-i chu ka haw hluah hluah, a taksa mi hipna ngah tak pawh chu ka haw tel, ka tum loh dan deuhin ka awm ang tih ka hlau ta hial a ni.

Room tukverh bulah chuan ka ding ngawi reng a, ka pa emaw Griffin-a emaw Amelia-i'n nichin maia ka awm dan kha hria se chuan an lung a awi lo khawp ang, kei ngei pawh hi mi dang ni se chuan ka lungawi hauh lo vang, mahse keimah ber zawk chu ka danglam tlat bawk si.

Ka hmui chu ka tuai zeuh a, dik taka sawi chuan a hmui teh hrep kha fawh a nuam tak zet, awlsam takin phurna nasa tak min pe thei a ni.

Harh chhuakin ka awm dan a dik lo tih hre lo ngat ila zawng kha room zim leh thim ang reng takah khan khum lai zawl ka thlenpui ngei ang, chu chu ka chiang a ni.

Chutiang khawpa thisen so sang chak tur chuan ka tan a taksa leh a hmui chauh pawh kha a ṭha tawk a, ka fawh chhan kha chu insum thei ta ngang lo a ni ber.

Ka naupan lai aṭang tawh insual leh thil chi hrang hrang ka pa hnen aṭang zirtirna ka dawng ṭhin a, kum 15 ka nih chuan tual ka that der tawh.

Thlahtu te lam aṭanga tual thah hmang leh mahni ram vawng uluk em em chhungkua kan ni a, kan ram chin emaw kan huang chin emawa buaina siamtu te chu damin kan chhuah ngai lo.

Tual thah chu ka tih ṭhan a nih miau avangin kum 20 ka nih chuan ngaiah ka nei der a, hrehawm tihna emaw mi thah hrehna ka nei ngai lo.

Switzerland rama inbengbel leh awm ni mah ila ram hrang hrangah keini ang thova tual thah hmang thawhpui leh ṭawiawmtu chhungkua kan ngah hle a, kei tak ngial paw'n ka hre seng lo.

Kum 10 ka nih aṭang khawi hmunah pawh kal se ka pa chu ka zui char char zel a, a tual thah ṭhin dan thlengin ka hmu vek zel a, chu chuan keimahah nasa takin hmasawnna a awm tir phah bawk a ni.

Kum 30 ka nih meuh chuan kei aia tual thah thiam an awm lo tih theih tluk a ni a, chu kum chu ka tana kum ṭha a nih rualin kum chhia a ni tel bawk.

Italy-a ka zin bo lai takin Switzerland-a kan in chu hmelma te'n an lo bei a, ka pa leh ka nau Griffin-a pawh ram danga an kal lai tak a ni. Ka nu thihna chuan ka nun zawng zawng a thlak chiang hle a, mi dang nena indawrna kan neih paw'n ka nui ngai tawh lo.

Ka nu thattu chu beih kan tawh hnu rei lotê ah ka zawng chhuak thuai a, tû puihna mah ka dawng lo, keimah ngatin ka nu thattu chhungkua leh a pawlte ho chu ka that fai vek.

Ka pa tak ngial paw'n chutiang thil ka ti tih chu a hre lo, chanchin thara thihna rapthlak tak a thlen thu an puan aṭang chiahin a hre chauh zawk a ni.

A hnua min zawh leh paw'n ka chet dan kimchang tak ka sawi duh tawh lo, thil liam tawh a nih avangin sawi chhuah leh ka duh tawh lo hrim hrim.

Ka nunrawng sawt em em a, ka awm mai mai pawh hlauhawm tham khawpin ka awm a, kan mite ah pawh min hlau lo reng an awm lo.

Griffin-a; ka unaupa Griffin-a ber hian zah lo taka min biak a ching ber a, unau ni mah ila ka lung nih lohna ah chuan ka dim ngai bik hauh lo. Kum tawp lamah Italy ramah ka zin ziah a, a chhan pawh ka nu thlan a awm vang a ni.

Tual thatin nunrawng em em mah ila mihring ve tho ka ni a, mi dangte ang bawkin thinlung ka nei a, mi dangte ang bawkin ka rilru chu a na ve ṭhin a ni.

A him zawk na'n tiin ka nu chu Italy ramah a ruang kan phum a, chumi kum aṭang chuan ka unaunu Amelia Hudson-i pawh venhimna ṭha tak nena enkawlin Italy ramah kan awm tir ta vang vang.

Chutia tual that thiam hming thang ka ni tâkah chuan mi dang hriat ka hlawh chho em em a, thah tumna leh beihna pawh tawk ve ṭhin mah ila keimah zawkin min lo beitu te chu ka lo that chimit vek zel.

Mi hausa leh nei nung tak tak te hnen aṭang ka chhungte hriat lova tual that tura rawih ka ni chhunzawm ta châwk a, sum pawh min pe ṭhahnem thei khawp mai.

Vawi khat chu Mexican pa hausa deuh mai hian a thurualpui te'n an phatsan thu min hrilh a, thah vek a duh thu leh ka thah theih chuan pawisa tam tawk tak, ka dam chhung hman khawp tura tam min pek a tiam a, chutiang taka pawisa tam min pek tum chu ka la tawng ngai lo.

Kei lah chuan sum duh vang em em pawh ni lovin tual thah nuam ka tih zawk avangin ka offer dawn chu ka lo pawm nghal mai a, a hlawh pawh ka hlawhtling chiang hle.

Pawisa tam tak hlawha ka mi thah turte chu mi hausa leh beih harsa fê fe ni turah ka lo ngai a, mahse an lo ni hauh lo. Mi pangai ve mai, chhungkaw chawm na'na ni tin hna thawka chhuak ṭhin leh Company-a hna pangai thawk ve mai mai te an lo ni hlawm a, hlawhtling takin ka hna thawk mah ila chu offer ka tihhlawhtlinsak hnu aṭang chuan ka kut ngeiin ṭul tawp khawk lovah chuan tu mihring mah ka that leh tawh ngai lo.

Ka mumang thlengin ka chhungkaw thah te chuan min mawlh zui zel a, kum tam tak chhung nuam tih vanga ka lo tih fô ṭhin tual thah chu bansan ka duh ta hial a ni. Thisen tam tak leh ruang inbawh thuah nuai te chu ka mitthlaa awm chawl lo an ni a, a chang phei chuan ka room chhungah an awm ni mai te hian ka ngai ṭhin.

Ka pa chu tual thah emaw kan hna thawh mek bansan ka duh thu hrilh tlang tawp ka tum fo va, mahse a phal dawn tih ka chian em avangin ka ngawi leh ta zawk ṭhin. Zan ni se ka tan chuan chhun ang mai a ni a, Mexican sumdawng hausapa duh dana ka chetna chuan min timu thei lo zan tin ta ṭhin a ni.

Ka tual thah avanga ka pawisa hlawh te lah chu Bank-ah a awm ṭhup ringawt a, hman châkna reng ka nei lo, hmang dawn pawh ni ila ka mi thahte ka hre chhuak zel zawk.

Kum tam tak tual that mang lova ka awm hnuah ka pa chuan Griffin-a ngaihven turin min tir a, a chhan chu a ngai bawk, ka pa rama buaina siam an lo awm leh pek vang vek a ni.

Griffin-a te bul ka thlen chuan in a lo kang hluah hluah tawh a, ka hah a dam sawng sawng nghal. Ka tel lova buaina an ching fel der chu pawi ka ti lo khawp, inrawlh buai ka duh vak tawh lo a ni.

Rilru thawveng zeta ka awm laiin hmeichhe tleirawl mut kawr nena ka awmna lama lo tlan chu ka hmu a, ka awm a nuam lo zui nghal. A hnung lam chu ka hawi thuai a, Griffin-a ngei chuan a lo um bawk.

Chu tleirawl hlau zeta lo tlan chu vawi leh khatah a tlu tawp a, silai kah vanga tlu erawh a ni hauh lo, a chhan chu eng silai ri mah a puak lo tlat.

Muangchangin a tlukna lam chu ka pan a, ka hmu chiang chiah chu thim deuh tawh mahse a ke ah thing zum a lo bur vâ tih ka hmu zui nghal.

Min hmuh rualin ka puihna min dil lawm lawm a, lungchhe zet hian a ṭap hliam hliam bawk a, a mittui tla leh a ṭap hmel mawlh chuan ka thinlung chhungril a tiche dawt thei.

A kea thing invit bur vâ chu lak chhuahsakin ka pawm kang a, a hmel chu thlalak ai letin a danglam, mahse engtiang chiaha danglam nge a nih erawh ka hrethiam hauh lo thung.

Ni e, ka pa'n Griffin-a bula kal tura min tih tirh pawh khan an chhungkaw thlalak chu ka hmu tawh ngei alawm, ka mit a lak em avangin ka paih bo duh lo va, ka ipteah ka kawl ṭha reng zawk a ni.

Eng thil mah, an chhungkaw thlalak ka kawl ṭhat chhanah chuan eng thil dang mah a awm lo, an fanu tleirawl hmel vang tih chauh lo chu!

A hmel chuan a tak ngeia amah hmuh min châk tir a, ka rilru chu ka hrethiam lo kher mai. Chutah a taksa ka sik rualin ka awm dan a dik lo nghal vek a, kawr chhan mai mai pawh ni se ka lung phu a tirang vek thei.

Ka pawm lai reng chuan ṭap chung hian a ṭawng melh melh a, thih a duh loh thu leh kei chauh a innghahna ka ni tawh thute chu a sawi a, a tawpah phei chuan amah avanga ka thih a hlauh avangin tlanchhe thuai turin min ti zui ta nghe nghe.

A ṭap hmel chu ka en rei thei lo, ka sa pup pup ni ber hian ka hria, ka tih ngaihna hre lo chu Griffin-a lam ka hawi vut ringawt.

Kan mite awm lai leh hmuh lai ngeiin chu hmeichhe tleirawl chu ka humhim a, Griffin-a phei chu a lungawi lo nasa hle. Ka duh chuan ka that thei reng alawm, ka motor ngeia a chuan lai te chuan a hriat miah lovin ka that thei reng, mahse that lovin kan ram ka hruai thleng ṭhak. Ka room-ah ka pa leh Griffin-a hriat lovin ka dah lut a, ka chet dan chu a phatsantu zia hle a ni.

A ke na leh a kutzungṭang na ka khawih lai te chuan ka va han insum nasa tak em, ka taksa chhung chu lirnghing na tak ang maiin a che dawt dawt a, ka pa te'n that lova ka la humhim cheu tih an hriat phei chuan thutlukna siam dan tur pawh ka hre lo.

Inrem siamna nei angin ka sawi ta tawp a, awmze nei map lova min siamtu hmeichhe tleirawl chu ka room enkawltu atan ka duh a ni.

Griffin-a phei chuan nuihsawh deuh deuhin min ṭawngkhum nghe nghe a, kei ang bawkin hmelma fa ka chhan him tlat chhan chu an hre bik hauh lo.

Ka unaupa'n duh lo hle mahse ka pa chuan ka duh dan chu rem a lo ti hlauh a, mahse phut let a rawn nei rang khawp mai.

Ka pa a ni miau a, kha leh chen kha hmelma beiin kan lo tal dun tawh bawk a, thil phut let nei lo chuan ka duh dan a pawm mai mai dawn lo tih ka hre chiang em.

Thisen, tual thahna, a va han rang teh thut ve. Ka pa chu awkâ vin takin ka bia a, mi dangho zawng zawng awm laia Maid pakhat a kap hlum ringawt chu ka duh dan a ni tawh lo, mihring thlak thleng lek phei chu!

Ka pa chuan min zilh let ta hrep zawk a, thil theihnghilh ka neih thu chu a sawi zui nghal bawk. Kei ngei pawh hian a mak ka ti, kan hmelma fa chu a thih ka duh loh avangin dan awm sa ka theihnghilh thei a nia, awihawm loh hial zawk.

Chu zan aṭang chuan Maid room-ah ka riah tir char char a, mahse ka rilruah awm loh lai a nei lo. A ke na leh a kutzungṭang na te chu ka ngaihtuah thleng vek a, chutiang teh hrepa hmeichhe ngaihsak leh ka rilru luahtu chu ka nunah an la awm ngai hauh lo bawk.

Italy lam aṭanga puih dilna ka pa'n a dawng hlawl a, ka tan chuan vanneihna a ni ringawt. Chuti lo zawng ka pa leh Griffin-a te chuan min hre chhuak thuai ang, kei lah chuan hmelma fa laka ka rilru put hmang dik tak chu ka hre thei mai bik si lo.

Kum 1 leh a chanve lai Italy ramah ka awm a, tual erawh ka that lo hrim hrim, ka hnuaia mite ka thah tir zel tawh zawk. Zan lamah erawh ka la mu thei lo tluang zel a, mahse ka taksa chakna turin ka ei ka tiṭha em em thung.

Mut loh hi chu mumang maksak tak tak ka neih hma aṭang tawh ka tih ṭhan fô a ni hrim hrim a, taksa lamah chuan harsatna ka neih phah em em hran lo.

Italy rama ka awm chhung zawng pawhin amah bawk ka rilruah a awm a, ka thluak aṭanga thai bo ka duh avangin zu te ka in thul, mahse a them paw'n ka rilru aṭang chuan a bo thei hauh lo.

Zu inin awmzia a nei lo tih hriain kum tak tak ka tih tawh loh tual thah dan te chu ka zir leh vel a, mi dang ka that dawn pawh a ni lo, ka rilru lak pen na'n ka taksa chu ka sawizawi mai a ni.

Chutia exercise ka la vel chu Amelia-i tak ngial paw'n mak a lo ti thei hle a, ka mi beih tur chu mi hlauhawm tak a nih a ring nghal ringawt. A rin ang lah chu a ni lo nasa mai bawk si, han hrilh ngawt lah khawvela ka thil tih loh tur berte zinga mi a nih ka ring.

A hming kha, a hming aṭang reng reng pawh khan ka haw hluah hluah, mahse a thih emaw a nat emaw ka phal leh chuang si lo, a nat ka hlauh avangin Griffin-a pawh vawi tam kut ka thlak ta hial.

Mumala awm thei lo khawpa min siam chu ka huat chhan ber a ni a, ka huat rualin a nat ka hlau leh em em lawi si a, mi dang tihnat ka phal lo em em te chu ka dik lohna a ni. Amah avangin pi Sharon-i hial pawh ka hrawk a, hmelma fa avangin kum tam tak kan ina Maid lo nih tawh ka hrem vel a nih chu!

Kum 1 leh a chanve hnuah Italy aṭang Switzerland-ah ka haw leh a, ka pa'n haw tura min chah ngun em avanga haw ka ni bawk. Dik tak chuan kan ina haw leh ka hmeichhe vei em em hmuh chu ka duh lo, a chhan chu ka awm dan a dik lo leh vek dawn tih ka hre chiang lutuk, ka chhungte'n an hriat vaih chuan ka chungah leh a chungah thil pawi tak a thleng ang tih ka hlau a ni.

Body Guard pakhat nena ka hmuh dun zing te khan ka va han sa tehreng em, kha Body Guard lawi lo zet kha thah nghal mai ka duh rum rum.

Chutah Amelia-i fimkhur loh lutuk avangin rulin a keah a la chuk zui a, ka nunah khatiang renga hlauhthawn kha ka la nei lo.

Ka theih anga rangin rul tur chu ka hip chhuaksak thuai a, Amelia-i phei chu ka hauh nasat lutuk avangin a buai vek nghe nghe.

Ka pa leh Griffin-a pawh zah zo tawh lo khawpa rilru buaiin ka che thuai thuai a, an hmela mak tihna leh zawhna tam zet chu ka hmu lo der hmiah hmiah bawk.

Zing lam dar 3 velah pangai takin a lo harh thei hram a, a harh tih ka hmuh tirh kha chuan ka rilru ipikna leh hahna zawng zawng chu a bo nghal vek a tih theih awm e.

A taksa dam ṭhat loh leh a nat ka hlauh avangin kar khat ngawt chawlh ka pe a, ka pa leh Griffin-a chuan an ngaihven lo bawk a, eng thil mah min zawt zui lo.

Amelia-i erawh hmeichhia tih takah chik zet leh zawhna ngah hmel zeta min en chang a ngah a, chu erawh hre lo ang maia hmuh loh der ka ngah ta hle.

Italy rama a kir leh vat lo te chu a mak ka ti tulh tulh, kum dangah te chuan cham pawh cham rei duh lovin a haw vat ṭhin a ni si a, chu bakah chhiahhlawh mai mai leh hmelma fa laka ka rilru puthmang hriat chian har zet chu a hre ru thânin ka hria a ni.

"Hunter, lo kal teh, inbe lawk teh ang" ka pa chu min hnung chhawn zawngin a room lamah a kal a, zui turin min duh tih ka hrethiam nghal bawk.

"Lawk ka pa, Hunter-a hi thil sawipui tur ka nei a, kan inbiak zawhah a lo kal dawn nia" tiin Amelia-a chuan ka kutah a rawn vuan a, kawngkapui lamah min kai phei ta dawr dâwr.

Pawn kan chhuah rualin khaw duai deuh raih chuan ka mood a ti off nghal vek thei, ruah pawh a sur har ka ring hauh lo bawk.

Thlai leh eng eng emaw awmna huan lamah chuan min kalpui a, a hruai ang ang chuan ka kal ve mawp mawp a ni ber.

A din rual chuan ka ding ve chawt a, ka kut pawh a vuan tlat tawh em bik lo e. Muangchangin a hawina lam chu ka hawi phei a, ka thil hmuh avang chuan ka thin a so nghal bulh bulh.

"Hrep tak chuan!" tiin kal ka tum a, mahse Amelia-a ka banah min lo chelh ding vat a, ka melh rum ṭha hle.

"Min thlah nghal rawh" ti deuh hrawkin ka ban a chelhna chu ka lak sawn sak a, mahse rang zet hian a rawn chelh leh nghal thuai.

"Ka hre ta Hunter, i danglam chak em em chhan hi tunah chuan ka hre tawh" a rawn tih chuan kal sawn tuma ka beihna chu ka titawp nghal hmak.

"Ka danglam hauh lo" ti hmukin a ban bawk chu ka dah thlak sak leh a, kal sawn ka tum tawh lo tih a hrethiam te pawh a ni ang min chelh zui ta bik lo.

"Ni lo, hun rei lotê chhungin i danglam nasa lutuk tawh zawk, ka pa leh Griffin-a hrilh i tum em? Anni chu mipa an ni a, an hrethiam lo che pawh a ni maithei, mahse kei chu hmeichhia ka ni tlat"

"Eng thil chiah maw ka pa leh Griffin-a hrilh tura min beisei chu!?" ka ti deuh salh a, thu awmze nei lo mai mai a sawi reng chu ka kham ru hle bawk.

"I rilru hi maw le, Daisy-i laka i rilru puthmang leh amah avanga i danglam nasatzia hi ka pa leh Griffin-a i hrilh ve dawn em ka tihna a nih ber chu!"

"Enga!?" tiin ka chhuk melh run a, hlauthawngin thinrim ru em em mah ila ani ve thung chu hma lam hawiin a lo nui mai a, Amelia-i thil hrethiam chak lutuk chu ka haw leh ta hluah hluah.

"Hlauthawng suh Hunter, ka pate i hrilh duh lo a nih chuan kei pawh hian ka sawi chhuak lo vang" a rawn tih leh chuan ka kekawr ipte chhungah ka kut ka hum ruh ngar ngar a, ka hmaa mite pahnih lah chuan min tithinrim zual em em bawk.

"Kei pawh hi ka buai mek, i tawn ang chiah hi ka tawng a ni. Mipa hmangaih zet mai hi ka nei a, ani chuan ka nihna dik tak a hre lo thung" a tih leh chuan

"Enge i sawi awmzia?" ka lo ti nghal thuai a, Amelia-i te ang hmeichhe naran lo takin mipa hmangaih a nei chu a awihawm loh zawk, thil theihah pawh ka lo ngai ngai lo.

"Ka mipa hmangaih chu British mi a ni a, zin kual velin Italy ramah a lo kal a, thlalak a tui hle bawk. Kar khat kan in date chhung lek aṭang khan ka hmangaih tih ka hre nghal a, keimah pawh hi ka inawih lo hial zawk"

"Thil awihawm loh leh rin harsa tak a nih chu Amelia" ka lo ti sup a, ka hmaa mite pahnih chu ka en reng thei lo ṭep tawh, va thah hmiah a nia ka duh ni!

"Ni e, i sawi dik, rin harsa tak a ni. Chuvang alawm ka pa leh Griffin-a pawh ka la hrilh ve duh loh, kan neih theih loh tur va hmangaih tlat hi kan tan chuan a ṭha lo hle si" a rawn ti leh sep a, min sawi tel tlata hriatna ka nei.

"Hmangaih neiah min ngai em ni? Chhiahhlawh mai mai saw hmangaih turin min ngai maw!? Â lutuk teh suh Amelia, kei hian hmangaihna ka hrethiam ve nek lo ve!" tiin ka nui chhuak hak a, mahse ka nuih a za hauh lo.

"I awm dan hi hmangaihna vang a ni tih i hriatthiam hunah chuan lawmthu min la hrilh zawk dawn nia, chuan saw Body Guard saw i rilru hriat chian ka duh vanga ruai chawp ka ni a, that lo vang che"

"Eng thil maw i sawi kha!? Thah loh maw!? Ka thah loh i ring reng reng em ni?" ti hrawkin a thusawi mawlmang zet avang chuan ka en hû a, ka insum thei lo lek lek tawh zawk a ni.

"Aw thah loh, i thah chuan ka pate'n i thah chhan an zawt che ang a, i tal buai mai mai zawk ang" a thusawi chu dik viau mahse ka insum thei tawh lo, ka kal ta hmawk hmawk.

"Ka pu" ka hmel hmuh hne zet Body Guard chu ka hnek thal tawp a, zah takin min pu vel mahse ka thu a awih loh man chu a hmu chiang khawp ang.

"A bulah hian awm tawh suh ka ti che a ni lo'm ni?" tiin ka ṭham tho leh lâwp a, ka hnek thal leh ta siah, kan inlen hleih bawk a, ka kutthlak chu dawl lo vet vet tak a ni.

"Hunter" thawp raiha rawn titu lam chu ka hawi rang hle a, ka duh lo dan deuhin a hmui bawk chu a pet leh tawh, chu chauh pawh chuan ka taksa chhungril chu a pump et et leh ta.

"Hunter" Amelia-i aw chuan hmun dang min hawi tir thei ta chauh a, chuti ni lo se chuan ka duh loh dan deuhin ka che chhuak leh ngei ang ka ring.

"Tun chiah hi Warning ka pe tawh ang che, a bul hnaia ka hmu leh che a nih chuan thi tlukah inngai rawh" tiin Body Guard chu ka nam sawk a, min hlau zetin a kal sawn ta vang vang.

"Nang pawh, nang pawh eng vangin nge ani nen khan in lo awm dun leh reng reng? Mipa dang bula awm ka phal lo a ni lo'm ni?" tia ka hrawk leh hrep laiin Amelia-i bawk chuan

"Hunter! Duh tawk rawh, a thiam loh engmah a awm lo" a rawn ti leh a, thinrim lutukin a lam chu ka hawi a, ka unaunu mah ni se khawih hrep chu ka châk hle.

"Kal rawh Amelia, insum theihna ka la neih lai hian kal mawlh teh" ka aw chu tihnem tum mah ila ka thei lo, ram hmukin ka ṭawng chhuak leh tho tho.

"Daisy-i kha tina miah suh ang che" tiin a dinna aṭang chuan a kal sawn zui nghal a, rei pawh en lovin ka hmaa hmeichhe ding reng chu ka chhuk melh leh ta run.

"Min chhang rawh le, kha mipa nep zet bula awm kha i lo châk viau em ni?" a dara chelh chung chuan ka ti a, kawr chhanah pawh ni se a taksa chuan min tidanglam leh nghal der tawh.

"Aih..Ka tihpalh..ihh...ka inrin loh laiin a lo kal a, a bula awm kha ka tum reng reng lo" zam hmek zet hian a rawn ti a, kan infawh hnu aṭang khan a hmel chu ka hmu ṭha tawlh tawlh leh nghal, mahse chu chu thil ni thei a ni si lo.

"Hre rawh, mipa dang bulah awm tawh suh ang che" ka tih leh khur khur chuan min lo chhoh melh ral a, chutiang em ema hmeichhe fawh châk chu ka la nei lo.

"Eng lo...Engati nge mipa dang bula ka awm chu i phal loh tâk em em a?" a aw chu chhuak ṭha ngam lo ang mai hian a ri a, a zawhna avang chuan ka ngawi reng ringawt.

"Ka tihpalh, ka zawhna che avanga i pawi ka sawi a nih chuan min ngaidam dawn nia" a ṭawng zawh rualin a hmuiah chuan ka zu fawp leh chat a, ka insum rei thei tawh thlawt lo.

Tui hal em emin mamawh ngawih ngawih tawh tih hriat taka tui a in khawlh khawlh ang mai hian ka hmui chu ka chettir buan buan a, ka taksa chu ka control theih piah lam thil a ni.

A ka chhungah chuan ka lei chu ka rawlh lut a, min lo fawh let ve tan tânna chuan nasa takin min tiphur zual a, a taksa chu ka taksa chhunga pawm luh vek mai ka duh.

"Harh chhuak rawh Hunter, i awm dan a dik lo" tiin ka rilru chuan min lo hrilh mawlh mawlh reng a, a tawpa tawpah chuan ka inthunun ve thei ta hram.

Ka nam hlat deuh hlek hnu chuan rei pawh awm hrang lovin chiang zet hian ka fawp leh tâwk a, ka kham thei lo, a hmui fawh nuam leh khawizu ang maia thlum tui chu eng tik lai pawha dawt ngawt ngawt ka duh rum rum a ni.

Kan infawh zawh meuh chuan a rawn thaw chhuak ham ham a, fawh leh châk hle mah ila fawh chu a ṭul ber tawh lo tih ka hre thung.

"Phei rawh" ti deuh hmukin a hnung lamah chuan ka kal phei a, thing ro lo ding chu ka hnek tliak rawp a, a laka insum theihna ka tlachham ziah chu ka inhaw ngawih ngawih.

Kar kal ta lawk khan kan infawp tawh ngei a, khatah pawh khan insum theihna ka hloh nasa hle. Thleng lo anga ngai tur te khan ka ti vel a, a thlen tawh dawn loh thu ka sawi bawk a, mahse keimah vekin ka thusawi chu dawt a nihzia ka tilang ta chiah.

Kut hum ruh ngawt ngawtin van sanga sava thlawk te chu ka en a, ka nu ka ngai reuh khawp mai. La dam ni se chuan ka awm dan buai nuai chu a hrethiam ngei ang a, min hrilh fiah leh ngei pawh ka ring.

Ka inher chuan tûmah ka hmu tawh lo va, hmanhmawh lem lo takin in lam pan chuan ka kal phei zui nghal. In chhunga ka pen luh rualin choka lam a pan mek lai chu ka hmu leh hram a, chhiahhlawh mai mai mah ni se ka thinlungah a riak tlat bawk si. Thawk la leh hawkin ka pa room lamah chuan ka kal a, zin bova intih thawven leh chu ka mamawh berin ka hre ta.

Ka pa nen chuan thil chi hrang hrang kan sawi dun a, ka chungchang engmah kan sawi lan loh avang chuan ka lawm ru hle bawk.

Darkar chuang fê kan titi dun a, a tawp lamah erawh a thusawi pakhat mah ka ngaihtuahna ah a lut lo, Daisy Taylor-i chiah chuan ka rilru chu a luah khat leh vek tawh zawk a ni.

Room aṭanga ka chhuah chuan inthlahrun hmel zet hian min lo en a, mi dangte ang thovin ani pawh chuan min hlau chiang a ni.

Hmun khata awm reng si thla khat chhung inhmu mang lova awm leh min pehhel char char te kha hrehawm ka va han ti tehreng em, mi dang mut reh vek tawh hnua a room kawngka kawta din chang lah ka ngah, chhiahhlawh zawng zawngah min la tibuai ber ang.

Thla khat a ral leh meuh chuan Amelia-i pawh Italy lamah a let leh tawh a, a haw dawn zingah chuan Daisy-i nena fimkhur viau turin min ti hram a, thu awmze nei lo mai sawi angah ka ngaihsak hmiah. Ka tih dan ngaite bawkin khuma mu lovin Chair-ah chuan ka ṭhu a, ka ngaihtuahna pawh a buai leh tawh khawp mai.

Ka ṭhutna aṭanga tho thutin room aṭang chuan ka chhuak a, in hnuai lamah chuan ka chhuk thla zui nghal. Ngawi rengin a room kawngka kawtah chuan ka ding leh ta ran mai, enge tih ber tur pawh ka hre chuang lo, mahse hmel hmuh châk ka nei tih chu phat rual lovin ka hre chiang a ni.

Kawngka chu ka kik ri karh karh a, a la rawn hawng thei mai lo zui, vawi leh khata nam hawn pawp chu ka duh leh ta hial. Kik tawh lovin ka chum ri leh dat dat a, mi dang an mut reh vek tawh avangin thawm dim lo taka chet chu a tih chi viau loh, ka pa leh Griffin-a ngat phei chuan ka thawm chu hre lo se ka ti a ni.

"Tu nge aw?" chhung lam aṭang chuan hlau aw zet hian a rawn ti tham ṭial raih reuh a, a lo muhil tui phian tawh pawh a ni ang.

"Keimah" ka ti deuh tawp a, room kawngka a hawng har lutuk chu ka chi ai mai dawnin ka hria, Hunter Hudson-a ka ni lo tial tial a ni ber.

"I hawn thuai loh avangin i laka ka lungawi lo hle a ni" kawngka a hawn rual chuan ka ti a, room chhungah chuan ka lut zawm nghal zat.

"Tun ang hunah eng nge lo tih i tum?" min hlat taka ding chung hian a rawn ti a, a hmel duhawm zet leh vun no zet avang chuan ngawi rengin ka en ta ran.

Insum leh thei tawh lovin a lam pan chuan ka kal phei leh pawk pawk a, ka ban phaka a awm hnu chuan ka lamah pawtin ka kuah nghal thlawp.

Nghet zetin ka kuah a, ani paw'n a theih tawpa nghetin min lo kuah ve leh mai bawk. Ka pawm kang nawlh a, ka kawngah chuan a kein min kherh ve nghal chial a, hnai taka kan inmelh leh ta ran.

"Engati nge hetiang hian ka lakah i awm?" ka mit taka en chung hian a rawn ti a, ni dang ang lonl takin min hlauh hmel miah lo bawk.

"Ka hre lo" ka lo titawi tuk a, chu veleh ka dara rawn bawkin min kuah a, a awm dan tê reuh chuan awm zel dan tur pawh min tihre lo.

"Hmelma kan ni hi a pawi ka ti, mahse hmelma ni lo ta ila kan inhmu awm tawp si lo va, kei chuan ka thinlung leh tih tak zetin ka ngaina tawh che a ni Hunter" ka dara la bei reng chung hian a rawn ti sep sep a, min ngainat thu a sawi chuan ka thinlung a dek leh ta zar.

A kawnga chelhin chhuatah chuan ka hlang thla a, kan infawp zui leh ta mial mial. Ka fawh apianga min lo chhan let ve avang chuan ka phur zual sauh zel a, chu chuan inthun theihna min tlakchham tir lek lek ṭhin a ni. Kan infawh zawh meuh chuan a rawn thaw hlawi hlawi a, engmah sawi tawh lovin room aṭang chuan ka chhuak ta nal nal.

Ka room-a ka luh hnuah pawh Daisy Taylor-i bawk chuan ka rilru a rawn luah leh nghal, a laka ka rilru puthmang chu hmangaihna a ni theiin ka hre lo, hmangaihna awmzia pawh ka hre hrep lo, Amelia-i khan dawt muhlum a sawi mai mai a ni. Mipa ka ni a, tual thata ei zawng ṭhin ka ni a, chuvangin hmangaihna tih velin ka rilru an tibuai tur a ni lo.

PROTECTIVE HUSBAND

By

Havali Adam

Chapter 9

DAISY POV

Hunter-a nena kan inkar teh nuai chu ka hrethiam tawh bik lo, a duh hûn hunah ka room-a lo kalin min fawp bawrh bawrh zel a, keimah ang thovin insum theihna a tlachham ṭhin ni berin ka hria. Huana thlai rah vel ka lawh lahin a room aṭang min lo en run zel a, ka engkim tih chu a chik a, khawiah pawh awm ila min en thla a ni deuh ber.

Hmelma mah ni se Hunter-a chu ka hmangaih em em a, hmangaih theih loh leh hmangaih ngam loh a ni tih hre reng chungin ka thinlung chu ka khap dai thei si lo, min ngainatna pakhat mah nei lo ang maiin ṭawng ṭhin mahse tunah chuan min thlahlelin min ngaina ve ṭan tawhin ka hria.

Dinner ei lai leh Breakfast ei lai te chuan chokaah awm daih mah ila a thil ei tur hmel vel chu ka la suangtuah hram zel a, chutiang khawpa ka rilru leh thinlung luahtu awm chhun chu amah Hunter-a chauh a ni.

A tlangpuiin zan rei tawh lamah ka room kawngka lo kik emaw chum dawt dawt a ching a, chutianga kar khat lai a tih tâk hnuah chuan a lo kal hun awmah ka lo muhil duh tawh ngai bik lo.

A chhan chu kei hmeichhia, chhiahhlawh mai mai leh belh tur nei tawh lo hian thinlung leh tih tak zetin ka lo thlehlel ve em em tawh a, a taksa si lova awm te chu ka tan chuan thil namai a ni tawh lo hial.

Hmelma kan ni a, kei chu a chhiahhlawh mai mai ka ni bawk. Ka laka a awm dan chu a awm dan tur ni lo tawp a niin ka hria, pu Robert leh Griffin-a te'n kan pahnih awm dan chu hre chhuak phei se chuan Hunter-a awm loh changin min that duh ngei ang.

Ka theih tawp chuan ka fimkhur ve a, kei angin a fimkhur ve em tih erawh ka hre lo, kan pahnih tana a ṭhat zawk na'n lo kal tawh lo mahse pawi ka ti lo.

"Daisy, tun lai hian thil han hriat thawi deuh reuh ka nei ṭhin a nia, i sawifiah ngei ka phut bawk" Julie-i thusawi avang chuan ka thil tih lai ka chawl dat a, ani erawh a che zawm mial mial.

"Eng?..Eng thil maw i hriat thawi Julie?" ka tih chuan ka mitah tak min lo en a, Hunter-a zan rei tawh lama ka room-a a lo kal ṭhin thu ni lo hram se ka ti, ka nunna in a tuar theih avangin tûma hriat ka duh lo a ni.

"Zanah hian tu chiahin nge i room kawngka lo kik ṭhin? Ka hre zing tawh lutuk, lo en dawn ila ka ngam chiah bawk si lo" ka hlauh ang ngeiin a rawn sawi ta, chhan dan tur pawh ka hre lo.

"Min chhang teh Daisy, pu Hunter-a em ni? Ka hrilh tawh che khâ, nang ang chhiahhlawh mai mai hi chu a ngaihven rei peih lo vang che" a rawn tih leh chuan

"Ka hmangaih alawm Julie, Hunter-a hi ka thinlung zawng zawngin ka hmangaih tawh a ni" ka lo ti thawp sep a, kan panhnih tih loh chokaa awm ve dang an awm loh avanga chutiang thu sawi pawh chu kan ni.

"Hmangaih a!? Daisy le! I tisual chhiava tih hre chhuak la, i ti fuh zawk ngei ang. Pu ber te'n an hriat vaih chuan i dam in ring suh, pu Hunter-a erawh a dam thung ang, thi mah la ani chuan eng atan mah a tih che beisei bawk suh"

"Ka hria alawm, chhiahhlawlh mai ka ni tih chu ka hria, mahse maw ka thinlung chhungrila thu dik tak hi ka hmuh kân thei lo a ni" tiin ka thil khawih lai chu muangchangin ka chawk a, kan thil sawi lai avang chuan ka mumal lo zo vek a ni.

"Ni lo, hmangaihna hre tur chuan i la naupang mah mah a ni. I hmangaih emaw i tih hi ngainatna satliah mai chauh a ni tih hre rawh Daisy, thih i duh loh chuan pu Hunter-a hi hmangaih tawh suh, pangai takin chhiahhlawh mai mai angin awm tawp rawh"

"Ka tum alawm, ka tum ve tho alawm Julie, mahse a hmel ka hmuh te hian ka thin a phu dup dup a, a rim ringawt te hian min tidanglam vek thei asin, min fawh te hlei hlei hian awm ngaihna ka hre tawh lo ṭhin"

"Enga!? Pu Hunter-a nen in infawp maw!? Dawt i sawi em Daisy? Pu Hunter-a hian chhiahhlawh mai mai a fawh duh ka ring lo, in inkarah hian eng thil chiah nge thleng?" mak ti zet hian a rawn ti a, mak a ti pawh chu ka dem hran lo.

"Min fawp ngei alawm, kei paw'n ka thiam ang tawkin ka lo chhang let ve ṭhin bawk" ka tih chuan thawk a rawn la ri hawk a, a hmelah chuan awih harsa a la ti tih ka hre thei.

"Sex in hmang tawh em?" a zawhna avang chuan ka phu deuh zuk a, sex em em hmang turin fiah taka hriat theih kan inkarah engmah a la awm lo tlat.

"Sex lam chu kan la hmang lo, hman pawh ka duh chiah em tih ka hre lo" tiin ka thil chawh lai chu kengin Oven lamah ka kal a, Julie-a paw'n zawhna min zawt reng ta bik lo.

Dinner ei hun a lo thleng a, ni dang ang bawkin Hunter-a leh a pate chu an rawn ṭhu leh ta ṭhap. Pi Sharon-i'n dawhkan bula che tla leh tawh turin min ti a, chuvanga Dinner table bula ding reng pawh chu ka ni.

Ka mit chu Hunter-a hmelah bawk a fuh leh ran tawh a, eng thuamhnaw pawh inbel se a lang zahawmin a lang lian em em vek a tih theih.

A bula ṭhute anga ṭawng pawh ṭawng lova thil a ei mial mial lai chu mit tla lêk lo hian ka thlir dauh dauh a, mi dangte thil ei leh a thil ei chu inang reng mahse a ei dan chu a tui hmel bik tak zet.

Muangchang hian a rawn hawi chhuak a, ka lam erawh a rawn hawi lo thung. A sir bera Maid ding aṭang chuan min en phei diat diat a, min zawng ni thâna hriatna ka nei.

Ka hmel a hmuh rualin ka bula Maid ding chu a en tawh lo hrim hrim, kei lah chuan hawi sawn a hnekin ka lo la en ve reng zui a, thinrim hmel emaw hmel rum tak a put loh avang chuan ka hawi sawn thei mai lo a ni ber.

Lu thing deuh nawk nawkin ka harh chhuak thut a, ka awm dan chu a zahpuiawm ka ti, chutah mi dangho awm laiin a la ni zui.

Tim dai hian a lam chu ka hawi phei leh a, ani chuan a hma ang chiahin min lo la en reng. Ka awm ngaihna hre lo chu tawi tê hian ka nui seih a, mahse min nuih let ve eih loh avang chuan ka nui tawp chiang kher mai.

Ni lo, thil âtthlak tak a ni. Hunter-a chu nui turin ka beisei vel a nia, a ha tak ngial pawh ka la hmuh loh chu nui tura beisei chi niin ka hre lo.

Zan rei lamah chuan mut tumin ka khum ka siam ṭha mawlh mawlh a, ka rilruah erawh chhun lama Julie-i thu min hrilh chu a ri ring hle.

Hunter-a nena kan awm dan chu a dik lo tih leh ka tan pawh thih theihna chance a ni tih chu ka hre teh meuh mai, mahse a hmui fawh nuam zet leh a taksa lumnaa khat sik chiah chuan inthunun theihna tlakchham loh a har ṭâlh ṭhin.

Rizai ka sin rualin ka room kawngka chu pawn lam aṭang an rawn chum ri det det a, a chumtu chu tu dang ni lovin Hunter-a ngei a ni leh dawn tih ka chiang. Ni e, zanin ngeiah hian sawi fel pui a ngai.

Chhiahhlawh mai mai mah ni mah ila a lakah chuan ka ṭawng ngam tur a ni, min that duh kher bik nâng, ani chuan min thah duh ka ring lo hul hual.

"Eng vang teh hrepa hawng har nge i nih!?" kawngka ka hawn rualin a rawn ti nghal a, a awah chuan thinrimna lang mahse a ṭawng ring hran lo.

"Phei rawh" tiin min nam a, ani pawh room chhunga lo lutin kawngka chu chhung lamah a kalh zui nghal hmak.

"Hunter" ka lam pana a rawn kal lai chuan ka lo ti hluai a, a taksa sik ka duh rih loh avangin ka tawlh hnung tial tial bawk.

"Min hlau ang tak khan awm suh, min hlau lo tih chu kan hre chiang khawp alawm" a ti ram hmuk a, ka tawlh hnunna lamah chuan a rawn pen phei zui zel.

"Ka ngaina em em che tih chu i hria e" ka lo ti ve leh mai a, ka hmangaih thu erawh ka hrilh duh lo, chhiahhlawh sawi atan chuan a mawi lo lam lek lek a ni.

"A nih si chuan eng vanga tawlh hnung zel nge i nih?" a ṭawngkam chhuakah chuan ngaihno beina pakhat mah a la awm lo tluang zel.

"Kan awm dan hi a dik lo" ka tih rual chuan tawlh hnun theih tawh lovin bang chu ka ngheng nghal a, ani paw'n ka bul a rawn thleng nghal thuai.

"Eng lo...Chhiahhlawh ka ni a, chuan nang chu ka pu i ni bawk. Lo kal tawh suh Hunter, kan nunna in a tuar thei tih thlengin ka hria a ni" ka tih chuan

"Ka tihtur leh tih loh tur min hrilh tur hian tu chiah nge i nih?" a rawn ti nghet charh a, ka dar tawn tawnah chuan a hmer nghet hle bawk.

"Engmah...Engmah ka ni lo, i hmelma fa leh i chhiahhlawh mai chauh ka ni" a hmel pawh en ṭha ngam lo chuan ka ti a, a hmui leh a hnar vel chu ka en ta daih.

"A niha hnû, min en teh" tiin ka khabe chu a kut lian leh lumnaa khat chuan a rawn chawi kang a, a mitah chuan ka en lo thei ta lo.

"Hunter, ka.." ka ṭawng thui hman lo, a hmui fawh nuam em em leh ka hmui ve mai mai chu a inbawh thuah tir a, min fawh dan duhthaw zet chuan nasa takin min tiphur zui ve leh nghal.

Ka hmui la fawp mawlh mawlh reng chung chuan min chawi kang leh lawp a, a mi tawhna leh fawhna te chu keia lo hnar theih chi zia zâng a ni lo.

A harsa lutuk, kei ang hmeichhe der dep leh amah lo hmangaih ve em em tu tan chuan hnar a harsa ngawih ngawih a ni. Ka khumah chuan a ṭhu a, kei erawh a mal chungah ka la ṭhu reng thung.

"Naktukah ka zin dawn....Daisy" a zin dawn thu ai mah chuan a tawpa ka hming a lam chu mak ka ti zawk a, a hmel chu ka en rang hle bawk.

"Ka..ka hming i hria maw Hunter?" hamhaihnaa khat chuan ka ti a, ka aw aṭang reng reng pawh mak ka tihzia chu a hre vek ang.

"Hriat harsa a ni hleinem" a rawn ti tawi tuk a, lawm lutuk avangin ka kuah nghal chung chung a, ka hminga min ko ringawt pawh chu hmangaihtu tan chuan zan muttuina tham a ni.

"Eng vangin nge i zin dawn? Tual i that leh dawn em ni?" ka awm dan siam ṭhain ka ti leh thuai thuai a, ka awm dan zawk zawk chu ka hrethiam tawh bik lo.

"Aih, that dawn hauh lo. Ka rilru dik tak hre turin ka awm bo rih dawn, ka awm loh hlanin mipa dang i si tih ka hriat chuan ka that duh hial ang che" tiin ka hmui chu a rawn fawp tawk a, rei lo mahse ka lo chhang let ve leh hman hram.

"I cham rei ang em?" mi pangai ang maia ka bîa ka be ta chu ka tum a ni bik lo, thinrimna awm miah lova min biak vangte pawh a ni mahna.

"Ka hre lo, ka tan hian eng chiah nge i nih tih hre turin ka zin dawn a ni" a rawn ti leh ngat a, a zin chhan a sawi chu ka lo beisei loh lam tak a ni.

"Aw le" ti sepin a taksa aṭang chuan ka chhuk a, ani pawh ka khum aṭanga thovin a ding ngil zui ve nghak bawk.

"Tluang deuhin i zin dawn nia" ka tih chuan ngawi reng hian min en deuh vang vang a, mi pawh chhang lovin room aṭang chuan a chhuak zui hmak.

Kawngka a khar zo chiah tih awm velah amah bawkin a rawn hawng leh nghal a, ding lutuk tak mai hian ka dinna lam chu a rawn pan a, kan indin hnaih rualin ka hmuiah chuan a fawp leh ta bawrh bawrh. Duhthaw taka min fawh hnu chuan zun nei fê hian min fawp leh vawng vawng a, a lei chet tir chu a thiam tak zet bawk.

"I taksa ang em ema min tidanglam chak hi ka la hre lo, ka zin bona tur hian chhanna ṭha tak min pek ngei erawh ka besei" thum chhal hian hian a ti a, ka hmuia fawp leh zeuhin a kal sawn ta nal nal.

Kei chuan engmah ka ti ve hman lo, chet emaw ṭawng emaw tak ngial pawh ka hman lo, a thleng rang teh thut ve em bawk a ni.

Kawngka kalh ṭhaa ka khuma ka mut hnu pawh chuan ka meng leh ta kar a, chhun lama Julie-i min hrilh ang chuan ka awm lo chiang hle tih ka hre chhuak zui nghal bawk. Muthilh tumin ka mit ka chhing a, eng pawh ni se tui taka muthilh vang vang ka duh a ni.

A tuk zingah chuan Hunter-a kal chhuah hun chu ka ngaichang ru reng a, mahse a chhuak thawm emaw Helicopter thawm emaw pawh ka hre lo hrim hrim.

Breakfast ei hun thleng pawhin a hmel ka hmu lo chhunzawm zel a, ka hriat loh hlanin a kal daih tawh a nih ka ring ta ber.

Ka ni leng hun hman dan chu ni dang ang bawk a ni a, mahse Hunter-a a kal bo rih tih ka hriatna chuan ka mood zawng zawng a ti down vek thung.

A kal bo aṭanga thla 3 a liam hnu chuan ka ngai leh tawh em em zawk a, tihrawla khat a mal chunga ṭhut te, a taksa chhah lian ṭha tak kuah te chu ka thlahlel leh ngawih ngawih tawh a ni. Ani erawh a reh hian a reh tlawk tlawk a, pu Robert-a nena an inbiak ngai pawh ka hre lo.

Griffin-a leh pu Robert-a chuan in an luah lum hle a, an chhuak ngai lo tluk a ni. Hunter-a tal awm ve se ka ti, a tel lo chuan hahdamna tluan tling ka nei lo a ni.

"Ka tihpalh lutuk, ka tihpalh tak zet ka pu" Hunter-a'n ka rilru a chenchilh lutuk avangin ka thil tih lai reng ka lo ngaihtuah tawh lo, Juice chu Griffin-a kawrah ka leih baw ta vek mai.

"Nang! Nang phiang sen hi! Kha leh chen kha ka en liam che a, tunah chuan ka thei tawh lo" tiin a ṭhutna aṭang chuan a tho a, ka samah chuan min ṭham dak âwrh nghal.

"I chet ṭawp man hi i hmu khawp ang, enge i chungah hian ka tih chiah dawn tih chu i ngaihtuah thiam phak bak a ni ang" ka sama la ṭham reng chungin min pawt dawr dâwr a, chutah pu Robert-a chuan

"Griffin, thah kher a ṭul lo a nia" a rawn ti ram hmarh a, thah leh thihna ṭawngkam an sawi tawh hi chuan thlamuangin ka lung a phu thei tawh lo ṭhin.

"That lo ve, mahse thih châk ngawih ngawihin ka siam thung dawn a ni" Griffin-a aw ah chuan min nuihsawhna ka hre thei, Hunter-a a awm lo chiah chu ka chan a va chhe leh ta tehreng em.

Khawi hmun nge pawh ka hriat lovah min hruai a, ka lu vun chu a ṭham nat em avangin a na hut hut tawh bawk. Room thim zetah hian min theh bawk thlawp a, rang takin ka tho nghal.

A lam ka hawi rualin a kut thlak na zet avang chuan ka pai chhawn chhawn a, a tawpah phei chuan ka ke chheh buaiin ka bawk leh ta thlawp.

"Ka tihtur ka tih zawh hnuah hi chuan thih i châk tawh zawk ngei ang" ram hmarha tiin min rawn rek tho lâwp a, ka chil lem dik lovin ka khuh nghal bawrh bawrh.

"Khaw.....Khawngaihin min tina suh, a leh pekah chuan ka fimkhur tawh ang" ka tih zawh rual chiah chuan bang deng dawtin min theh a, chhuatah ka tla thum dup zui nghal.

"Engtin pawh i chungah hian che ila sawisel thei i ni lo, hmelma fa leh chhiahhlawlh mai mai i nih hi" ka samah bawk a rawn ṭham leh a, kut min thlak ta siah siah.

A kutthlak na zet zet ka tawrh zawh loh avanga ka tluk apiangin min kai tho leh zel a, a ngaite bawkin kut min thlak chhunzawm char char bawk.

Chutianga vawi duai lo kut min thlak hnu chuan ka thih loh reng ka ring tawh lo, min hrilh lawk ang ngeiin thih chu ka châk tak zet tawh. Na tawrh reng ai chuan thih vang vang a, ka nu leh pa leh ka unau te bula awm ve daih ka châk a ni.

Ka mitthlaah chuan ka chhungte leh Hunter-a an inlan chhawk zut zut a, chumi te chu khawvela ka mihring mamawh ber te an ni. Ka hmai chu dimna tel miah lova sawisak a nih avangin ka harh leh zawk zawk a, thi si lo dam hrehawm ti deuh chuan ka awm a, tih theih lah ka nei mang bawk si lo.

Ka harh leh meuh chuan keimah chauhin chhuat laiah ka lo bawk a, ka taksa chu na lo lai pawh a awm lo. Hunter-a, Hunter-a chu ka ngai lutuk, ka ngai lutuk tak zet.

Ani tal awm se chuan chutiang em ema taksa ka neih chu ka ring lo, mahse ani chu ram dangah a zin daih a, ka tan chuan koh ei theih a ni lo.

Amah ka ngaih lutuk avangin ka mittui te chu an rawn hnam ṭuam ṭuam a, ngawi rengin ka biangah mittui a dir ta zung zung.

Ka awmna room thim leh rimtui lo zet chu khawi lai nge a nih pawh ka hre lo, Bulb dim lutuka eng chu chu room chhunga eng awm chhun a ni. Tukverh pawh pakhat chauh a awm a, Jail tang ang bakin ka inchan lo.

Ka bianga mittui chu hru tâwkin chhuat aṭang chuan ka ding a, ka hmaiah chuan hliam tam tak a awm tih hriat takin a hit vawng vawng bawk.

Room kawngka bulah chuan ka ding a, pawn lam thawm hriat tumin beng chhi kar mah ila eng thawm mah ka hre lo, a reh ṭhuap ringawt.

Beidawng zetin kawngka ngheng chung chuan ka ṭhu tawm a, ka ṭap khur beuh beuh zui nghal. Ṭah loh dan hram chu ka ngaihtuah ve ṭang ṭang a, mahse ṭah loh chu thil harsa tak a ni.

"Hunter, ka va'n ngai tak che em, ka ngai lutuk che" ka hriat tawk leka phun chhuak sep chuan ka ti a, thawm ka hriat thut avang chuan ka ṭap tawp ta hmak.

Kawngka hlat thei ang berah chuan ka kal phei thuai a, ka biru a ni ber zawk. Kawngka hnuai aṭang chuan eitur ni awm tak hi an rawn nawr lut a, thawm chu a hma ang bawkin a reh leh ta vang vang.

Thawm dim zetin kawngka lamah chuan ka kal phei ṭhem ṭhem a, eitur hmel ka hmuh rualin ka pum ruakzia chu ka hre chhuak nghal bawk.

Eitur bulah chuan lehkha var te hi a lo awm a, la kanga ka chhiar chuan kar khat chhung hrem ka nih thu a lo inziak ta kuau mai.

Kar khat chhung eitur pek phal ka nih loh thute chu a lo inziak bawk a, mahse a theih ang anga a ruka eitur min pek chu an tum tho a nih hmel, lehkhaa thuziaktu chu Julie-i a ni ngei ang.

Engkim chu pu Robert-a ni lovin Griffin-a ruahmanna vek zawk a nih ka ring a, chutianga ka chunga a sual thar leh ta em em chu ka hrethiam lo hle a ni.

Ni 3 zet a ni ta, ni 3 zet chu room thim leh rimtui lo zetah ka awm ta. Eitur erawh zan laiah mi dang mut reh hun awm velah ka dawng ziah a, Julie-i ang ṭhian ka nei chu ka lawm hle bawk.

Zan khat chu thawm danglam tak pawn lamah chuan ka hria a, ka ngaihthlak chian chuan tu dang ni lovin Griffin-a aw ngei a ni.

"Nang hian eitur pek i lo tum maw!? I zak miah lo em ni? I nunna in a tawrh phah thei asin, room chhunga awm ve hi i duh zawk em ni?"

"Ni lo, ni lo, ka pu, ka tihpalh, ka tihpalh min ngaidam hram rawh" a aw aṭang Julie-i chu a ṭapin ka hria, keimah avanga chutianga man chhuah a tawk chu ka khawngaih tak zet.

"I tihsual hma khan hria la chuan a ṭha ni mai tur" Griffin-a ṭawngkam chu a chang khauh fak a, thil ri sawk sawk a awm chhunzawm nghal.

"Hre rawh, eitur pek ruk i lo tum leh a nih chuan ka that nghal ang che" Griffin-a bawk chuan a ti leh hrawk a, thawm ri deuh phawlh phawlh hi a awm a, a reh zui leh ta vang vang.

Vawi leh khatah kawngka chu a rawn inhawng thut a, Griffin-a ngei nen chuan kan inmelh chiang ta hle. Thinrim hmel zet hian ka lam chu a rawn pan a, light dim nen a hmel chu rapawm tih piah lam a ni.

Ka nghawnga rekin min chawi kang a, a kutah chuan ka theih tawpa na in ka lo chum ve pawp pawp a, mahse awmzia pakhat mah a awm lo.

"Nang chhiahhlawh hian kut min thlak ngam ve vela maw!?" nui pah deuha tiin bangah chuan min nawr bet a, ka inrin hma hauhin a kutthlak chu ka tuar leh ta chawrh.

Ka ṭap chhuak hak hak a, a hmuh laiin ṭah duh lo eng ang mah ila ka thei tawh lo, chutiang khawpa mihring sual leh nunrawng chu ka la hre ngai lo bawk.

Zawi hnuangin chhuatah chuan ka bawk a, engtin mah min ti tawh lovin a kal sawn a, kawngka chu na zetin a khar ri ṭhuai bawk. Khup tawm chawihin ka mu kawm ngut a, tunah chuan Hunter-a ang baka mihring mamawh ka nei lo.

Kar khat a ni tawh, hremna ka tawh aṭang kar khat lai liam tawh mahse chu room hrehawm zet aṭang chuan ka la chhuak chuang lo.

Julie-i khan kar khat chhung hrem ka nih thu kha a ziak ngei a, mahse kar khat hnuah pawh thil danglam a la thleng lo tluang zel.

Julie-a pawh chu keimah avangin an hrem ang tih ka hlau hnuhnawh hle a, an lo hrem vaih chuan ka inthiam lo hle ang.

Kaw ruah tawh lutuk avangin ka pum te chu a ri ruk ruk a, eitur lah chu ni 4 chhung ngawt ka kâah a lut tawh lo va, ka tan chuan chu inhremna chu tawrh zawh a har khawp mai.

Ni khat pawh ka daih ka inring tawh lo, chaw ngheia ni khat ka awm leh chuan ka thih ngei ka ring tawh, a chhan chu kar khat pawh ni 3 laiin a pel tawh tlat a ni.

"Hunter, Hunter, ka....ka thi dawn, ka thih hma tal chu i hmel hmuh leh ka duh asin" ri cheng chêng chuan ka ti a, ka taksa chu a chau tawh tak zet.

"Ka hmangaih che" ka mit ka chhin rualin ka bekah mittui a luang a, ka rilru lam la harh deuh mahse ril ṭam lutuk avangin ka taksa chu a zawi vek tawh.

Thawm ri ṭhuai ṭhuai chuan min tiharh deuh zawk a, ka mutna chhuat aṭanga thawh ringawt chu ka tum a, ka thei lo nasa a ni. Thawm chu a ri zawm mawlh mawlh a, thing keh darh chuai ri awmna lam chu ka melh ṭawk ṭawk a, mipa lian tak hlim thla chu ka hmu nghal. Chu hlimthla chu ka awmna lamah a rawn phei zel a, engin a hmel a tih fiah rualin ka ṭah a chhuak nghal tet tet.

"Lalpa le! I la harh ti raw? Min en teh, min en lûl teh" min pawm kang lâwp chung hian a ti hriam hraih a, ṭah chhuak zetin ka lo men nghal pur.

"Tu nge? Tu nge phiangsen nge hetiang khawpa hmel danglam tur hian kutthlak che? Sawi rawh, sawi nghal rawh" a aw chu zawi thum viau mahse thinrimna in a khat thung.

"Tui, ka...tui..a hal lutuk" ka ti chhuak thei hram a, maimitchhingin ka ṭap zui nghal a, namen lovin a taksa lumna leh ka bulah a awm tawh tih ka hriatna chuan ka lung a tichhia a ni.

"Hrep tak hian!" ti leh ṭhawtin min kalpui dawr dawr a, step-a min pawm thlak lai te chuan kan thlawk ni berin ka hria, tui awmna chu kan thleng rang hle bawk.

A taksa sia min pawm bet reng chungin tui chu min in tir khawlh khawlh a, ka taksa chu zawi zawiin a hahdam ta sawng sawng a, tui ringawt pawh chuan ka taksa chu a tichak sawt hle.

Hunter-a chu ngai leh thlahlel zetin ka chhoh melh ral a, ani paw'n ka bianga khawih pahin min en reng a, ka insum theihna zawng zawng puak darhin ka ṭap chhuak ta hawm hawm.

Nghet zet hian a âwmah chuan min kuah bet a, naute ang maiin min awi ni berin ka hria, chungte hlei hlei chuan ka ṭah an ti chhuak zual sauh.

Ṭap hliam hliamin a lam chu ka hawi chho a, a khabe ruh kual vel chauh chu ka hmu thei. Ding takin a hma zawn chu a melh a, a hmel hmu thei tur chuan ka chet sawn a ngai a ni.

"Hunter" ka ti thawp sep a, ka aw ri a hriat rualin min lo en nghal vat a, ka lo ṭah nuih leh ta hawk.

"Engati nge i zin bo rei em em? Ka ngai lutuk che asin, kei chhiahhlawh mai hian maw ka ngai lutuk che" tiin lungchhe zet chuan ka ṭap chhuak leh hawk a, min pawm ṭha nghal vat.

"Han sawi teh leh, ka awm loh laia lo sawisatu che hi tu chiah nge a nih? Sawi mawlh rawh, chuti lo zawng ka duh loh zawngin ka che palh mai ang" thunun tum viau mahse a aw chu a la nem thei hauh lo.

"Ni lo, awmzia a awm lo. Keini hi inhmu tawh lo zawk ang, harsatna kan inthlen tawn mai mai a ni" ka tih chuan rang zet hian

"A teuh hian a hnai sai lo, ka hlatah i awm leh tawh lo vang, chhiahhlawh pawh i ni tawh lo bawk ang" a rawn ti khauh fak a, kei chuan ka lu ka lo thing vat thung.

"Ka ni ang, ka ni reng ang. Min ngaina tih leh min hum i tum tih ka hriat hian ka lawm rualin ka lungngai, a chhan chu kan hma hun pik zet tur ka hmu thiam tlat a ni"

"I ni tawh dawn lo ka tih chuan i ni tawh dawn lo a ni mai, min hnial tei vet suh" thinrim zet hian a rawn ti leh hrawk a, ka lo nui lui sak ringawt.

"I hre tawh lo em ni? Hmelma kan ni tih i hre tawh lo em ni? I bul hnaia awm pawh hi ka tan chuan thihna ko tlanga din nen thil thuhmun reng a ni a, ka tan chuan nang ngainat loh tawp che hi a fuh ber"

"Daisy Taylor, ka thin tirim zawngin ṭawng hauh suh" a ṭawngkam vin viau mahse duat zet hian ka hmai chu a chul thung a, ka tan chuan ani chu a sang lutuk tih leh ani nena awm dun chu thil theih loh a ni tih ka hre fiah tawh a ni.

"Sawi tawh rawh le, tu nge sawisa che? Tu nge kha inhremna room-ah khan khung che?" khauh chang faka a rawn tih leh chuan thil thlen dan zawng zawng chu ka hrilh a, a taksa insang mar ṭung chu ka hre nghal.

"Griffin-a phiangsen bawk maw? Griffin Hudson le! Tun ṭum chu ka ngaidam tawh hauh lo vang che, ka thinrimna i kai chhuak hnem zozai ta" tiin a tho vut a, rang takin ka lo chelh nghal thuai.

"Hunter, kal suh, min kalsan suh. Ka ril a ṭam, ni 7 chhung zet chu thil ka ei tawh lo" ka tih chuan nur nâng hian min en a, mi pawm kang leh lâwp chung hian

"Sawi thuai ta che" tiin choka lamah chuan min kalpui nghal hmawk hmawk a, ka taksa te chu la na ṭhem ṭhum mahse ka mipa hmangaih bula ka awm tlat tawh avangin ka thla a muang em em thung.

Choka kan thlen rualin dawhkan chungah naute ang maiin min ṭhut tir a, chhuara Plate awm chu la thlain ka eitur a buatsaih mawlh mawlh a, chutiang taka min ngaihtuah tu mipa ka nei chu ka vannei tak zet a ni.

A hnung lam aṭang paw'n a che reng reng chu a dik thlurh a, Kamis var chauh a hak avangin a taksa chuan kawr chu a tawn mar ṭha hle bawk.

Eitur chu dawhkanah a rawn chhawp a, chhuara fian chu la lehin ka bulah a rawn phei leh a, amah ngei chuan suakin min barh zui ta.

Chutianga em ema min duat tu chu ka chhungte ka chan aṭang ka la tawng ngai lo, a chet dan avang chuan lung chhe thutin ka ṭap chhhuak leh hawk a, eitur chu ka la hmuam ṭun bawk. Ka darah chelhin hnai set sawt hian min en a, insum hram hram chu ka duh a ni.

"Ṭap lo teh, i ṭap hmel hian ka thinlung chhungril hi awm ngaihna a tihre lo" tih pahin ka biang chu a rawn dawm a, la inhnit feih feihin ka ṭap tawp ve mai a, ka lung chu a chhe tak zet a ni.

"Hetiang taka duattu hi ka chhungte'n min kalsan vek aṭang khan ka dawng tawh ngai lo alawm" mittui tling pamin amah chu ka en leh a, a âwmah chuan min kuah bei nghal thlawp.

"Ka tihpalh Daisy, i laka ka rilru puthmang dik tak hi ka hre lo der rei mah mah a ni. Zanin aṭang chuan tu kut mah i tawrh ka phal tawh lo vang, i hria em?" tiin a âwm aṭang chuan min nam hla deuh a, kei erawh ka lo hlauthawng nghal.

"Hunter, hmelma kan ni tih hi i ngaihtuah tel em? Min chhan zel chuan i tan a pawi dawn asin, keimah avanga i tawrh hi ka phal lo" ka tih chuan ka hmui a rawn hup hmak.

"Hmelma kan ni emaw ni lo emaw i laka ka rilru puthmang hi a danglam chuang lo vang, chhiahhlawh pawh ni la ka hum zel tho ang che" a rawn tih chuan en chho ran chungin

"Hunter" ka lo ti sep a, ka hmuiah tak chuan a rawn fawp zui ta vawng vawng, chu chuan hahdamna nasa tak min pe a ni.

Eitur chu min barh zel a, keimaha ei thei lo pawh ka ni hran lo, mahse kei chuan min barh vel chu nuam ka lo ti em em thung. Puar taka ka ei hnu chuan ka taksa pawh a harh ṭha sawt hle a, ka tha leh zungte chu hman theihin an rawn awm ve leh ta.

Tui ka in lai te chuan chiang zetin min en a, chu ringawt pawh chuan ka thluak a tibuai pha, a chhan chu ka mipa hmangaih kha a ni miau a!

"Khawiah nge i kal dawn?" choka aṭanga chhuah tum ni awm taka a kal lai chuan ka lo ti a, ani pawh a ding nghal chat.

"Ka kut hian mi sawisak a châk zek zek tawh" a rawn tih chuan a tihtur ka hre nghal, mahse chu chu ti lo tura ka duh a ni.

"Ni lo Hunter, i thil tih tum kha ti miah suh, i tawrh phah ngei ang" ka lo ti thuai a, a bulah chuan ka kal phei nghal vat bawk.

"Ka ti ngei ang, ka ti lo a nih chuan kei hi Hunter Hudson-a ka ni lo vang" tiin ding zet hian in choka aṭang chuan a chhuak a, dan hman loh khawpa chakin a kal a ni ber.

Common room-ah chuan awm nuam lo zet hian ka ding reng a, ka Maid pui ho chu an mu vek tawh a nih ka ring. Julie-i tak ngial pawh a reh hmak a, a chhan lah ka hre der si lo.

Ka tihtur hre lo chu ka têi ka tei a, mu ringawt dawn ila Hunter-a ka ngaihtuah bawk si. Hunter-a chu engtin chiah nge a chet ang ka dawn thiam chiah lo, buaina punlun zawngin che lo hram se ka ti a ni.

Rilru buai ru zeta ka awm lai chuan kawngkapui chu a lo inhawng thut a, chumi rual chuan Griffin-a ngei mai chu a rawn bawk lut thlawp. A hmaia thisen awm nuai avang chuan ka au chhuah ṭhelh a, ka rap lutuk chu ka au chhuah mai loh na'n ka kâ ka hup ta tawp bawk. Ka dinna lamah Hunter-a chuan a rawn hnuk phei a, Hunter-a chet dan chu ka duh lo tak zet a ni.

"En rawh, En nghal rawh Griffin" tiin Hunter-a chuan Griffin-a khabe chu a chawi kang a, a hmer na hle a ni ang a biang pawh a la sawi thei vek.

"He hmeichhia, i hmaa ding mek hi kut i lo thlak leh emaw i tina leh a nih ngai chuan ka insum zo tawh lo tak tak ang" tiin chhuatah chuan a theh tlu leh tawp a, hlauhna hlirin ka khat tawh.

"Phatsantu, phatsantu mai i lo ni e Hunter. I chungah ka pa a lawm dawn lo tih hre reng rawh, thil lian tham tak i tisual a ni" Griffin-a chuan a rawn ti a, chu tak chu a ni ka hlauhthawn em emna chhan.

"Amelia-i bulah awm zawk rawh se, nangmah vang hrim hrim pawh hian heti lai hmun hi chu atan a him tawh lo" tiin Hunter-a chuan ka kutah a rawn vuan a, kawngkapui lam chu min pan pui nghal.

"Engti ang chiahin nge kha chhiahhlawhnu leh hmelma fa kha i tan a pawimawh? Ani vang khan i thisen zawmpui ngei pawh min sawisa duh a nia, inngaihtuah chiang rawh Hunter" Griffin-a zawhna avang chuan a ding chawt.

"I let tam takin ka tan a pawimawh tawh zawk" ti nghutin Hunter-a chuan pawn lamah min kal chhuahpui a, mahse eng thil nge ka hmuh tak hi!

PROTECTIVE HUSBAND

By

Havali Adam

Chapter 10

Kan hma maiah chuan pu Robert-a leh Body Guard tam zet an lo awm ṭhap a, kan dinna lam chu an lo pan mek bawk. Rei pawh min kalpui lovin Hunter-a chu a ding thuai a, pu Robert-a chuan keini pahnih min hmu dun chu mak a ti hle.

Chutah a fapa chuan ka kut a vuan tlat a, thlah lah chu min vawn dan aṭang a tum lo nasa tih ka hre thei. Pu Robert-a hmai ber chu ka zah a, kan hnung lama thawm rawn awm avang chuan kan hawi rual leh ta ṭhap.

Griffin-a chu hmai la thi hnuang hian a rawn chhuak a, a hmaia hliam chu nat hmel hle mahse a la nui thei tho. Kan hnung lamah Griffin-a a ding a, kan hma lamah pu Robert-a leh a hote an awm tlat bawk a, keini pahnih chu min kar cheh a ni ta ber.

Pu Robert-a chuan kan hmel en tawh lovin kan kut inkai rial chu a en ta reng a, chu chuan enge thleng dawn hre lawk lo mah ila ka tiril a tikhur thei a ni.

"Enge thil awmzia?" pu Robert-a aw chu a nem hran lo, kan hma lawkah an rawn ding chhunzawm nghal bawk.

"Ka pa, i fapa rangkachak kha phatsantu a ni tih i hriat hunah chuan i awm mai mai bik ka ring lo" kan hnung lam aṭang Griffin-a chuan a rawn ti lawng lâwng a, Hunter-a chu a hawi let eih lo.

"Han sawi teh Hunter, he chhiahhlawh hi khawia hruai nge i tum? A kut leh i kut pawh hi insi tur a ni hleinem, Griffin-a sawi kha a dik em?" pu Robert-a aw chu a khauh sawt hle.

"Phatsantu ka nih leh nih loh chu ka hre hauh lo, mahse he hmeichhia hi helai hmun aṭang ka hruai chhuak dawn a ni" Hunter-a chuan a ti nghet ve charh a, a pa chu a meng no lo ta hle.

"Enga!? Hruai chhuah i tum maw!? Ka phalna la hmasa lo chuan i hruai chhuak hauh lo vang, hetianga i awm hi ka beisei lo asin" pu Robert-a chuan a ti hrawk a, kei chu ka lo ngawi kar ringawt.

"Ni lo, ka hruai chhuak dawn chiang khawp mai. Min dang suh ka pa, thutlukna siam turin ka ngaihtuah kim vek tawh tih leh ka fing tawk tih chu i hria alawm"

"Chu zawng ka hria e, chuvanga inbiak ngei ngai pawh kan ni" pu Robert-a chuan a rawn ti leh hmuk a, Hunter-a chuan in lama inher thutin min kal pui zui nghal.

Kawngka bula Griffin-a kan kal pelh dawn lai chuan rapawm zet hian min lo nuih a, en pawh ka en ṭha ngam lo. Hunter-a ve thung chu a ngawi reng a, a kal ngaiin a kal mawp mawp a, a pen zau bik em avangin kei chu ka tlan titih a ni ber. In chhung kan luh rualin in chung lamah kan chho tlang nghal a, a hma ang thovin thawm chu a la reh diak tho.

"Ka hmel i hmuh hma chu lo chhuak suh ang che, i hria em?" a room-a min hruai luh rualin a ti bung vut a, ka lo mangang nghal hle.

"Hunter, i pa thu kha awih zawk mai rawh, keimah avangin i tuar ṭan mek chu a nih hî" ka kut thlah a tum chu ka lo chelh vat a, ngunthluk fê hian min en bawk.

"Ka tawrh leh tawrh loh ai chuan i tawrh leh tawrh loh a pawimawh zawk" tiin ka hmuiah chuan a rawn fawp tâwk a, engmah sawi tawh lovin kawngka lam chu a pan zui nghal.

"Hunter! Ni lo Hunter, min thihsan suh aw, nang tal chuan min thihsan tawh lo teh. I thi dawn tlata hriatna ka nei, chhuk lo zawk mai rawh" ka thusawi avang chuan a ding chawt a, kawngka chu a hawng hman titih der.

"Min ngaihtuah suh, ka thi dawn lo, ka thihsan ngai dawn bawk lo che" chu bak thu dang a sawi leh tawh lo, a kal liam thlir chu ka tih theih tawk a ni.

Room chhungah chuan keimah chauhin ka awm a, thil thlen dan leh awm dan chu a ṭha dawn lovin ka hria a ni. Darkar 1 dawn vel thawm a reh vung vung hnuah chuan silai puak ri ka hre ta, chu thil chuan nasa takin hlauhthawnna min pe zui nghal bawk. Kawngka lam chu ka pan thuai a, hawn ka tum chuan pawn lam aṭang a inkalh tlat thung.

Hunter-a chungah thil ṭha lo tak a thleng ang tih ka hlau, keimah avanga a tawrh vaih chuan eng tikah mah ka inngaidam thei lo vang.

Silai chu a puak ri leh pawp a, thisen leh thihna a awm dawn tih ka chiang tawh lutuk, pu Robert-a leh Griffin-a te chuan Hunter-a chu an that hreh hauh lo vang, an thisen zawmpui pawh ni se an that hreh dawn lo tih ka chiang a ni.

Ka inrin loh lai takin ka dinna bula kawngka chu a rawn ri ṭhuai a, phut lutuk avangin ka petek dâwr nghal. Body Guard pahnih hian room kawngka chu a rawn tichhia a, ka lam a lo pan lai chuan min man dawn tih ka hria, enge ka chungah thleng dawn erawh ka hre lo thung. In hnuaiah min hruai thla a, him piala Hunter-a hmel ka hmuh chuan tlêmin ka rilru a hahdam deuh.

Ka hmel a hmuh rualin Hunter-a chu ka awmna lamah a rawn phei vut a, a mit sen ram aṭang chuan a thinrim hle tih ka hre thei. Thlipui ang maia na hian ka bula Body Guard pakhat zawk chu a hnek tlu chawrh a, ka bul leha mi pawh chu a hnek tlu nghal chawrh bawk. A kawnga silai chu phawrhin a hmet puak a, chu Body Guard pahnih te chuan nunna reng an nei tawh lo.

"Ka thu lova a taksa in lo sik man a nih kha!" ti hrawkin mitthi tawh tih hriat taka let phung ruang pahnih chu a en a, ka kutah chuan a rawn vuan zui nghal.

"Chhuah tum hauh suh ka tih kha aw Hunter, chuti lo zawng i tan a pawi zawk ngei ang" pu Robert-a lam chu kan hawi rual a, mi dangho chuan min din hual nghal ṭhup.

"Kan sawi fel tawhin ka hria, ani hi Amelia-i bulah a awm ang. Heti lai hmun hi chu a tan a hrehawm mah mah, Amelia-i bulah awm zawk rawh se"

"Ka ring thei lo zawk che Hunter, kha chhiahhlawh mai mai avang khan i pa hi min hnial ngama maw!? Ka thu hnuaia awm i ni a, eng tik lai paw'n i awm reng ang"

"Ni lo, i hre sual. Zanin aṭang hian i thu hnuaiah ka awm tawh lo, he in hi ka chhuahsan dawn a ni" Hunter-a chuan a ṭhi awrh lai chu a pawt chat hmawk a, a pa ke bulah chuan a theh phei nghal.

"Eng vanga ti nge i nih? Kha hmeichhia vang khan maw!? Âtthlak lutuk, i tet tê aṭang hmangaih nei lo tura zirtir i ni, ka thusawi hi a kipa kawiin i zawm ngei a ngai bawk"

"I hre sual ziah ka pa, i thupek nunrawng zet zet ka zawm rengna chhan tur a awm tawh lo, ṭul lova tual thah reng mai te hi ka kham hliah hliah tawh a ni e"

"Aw, tunah chuan phatsantu chu i ni ta chiah e. Phatsantu chu engtin nge kan tih ṭhin i hria alawm, kha chhiahhlawh pawh khan a tuar nasa viau ang"

"I thisen ka ni a, ka nu khan mahni thisen thah chu a phal hauh lo vang tih i hria alawm, chuan ka tana mi pawimawh chu i that lo bawk ang" Hunter-a aw chu a khawk rum rum a, a pa leh amah tih loh chu tûma'n thawm an chhuah lo.

"A pawi khawp mai, i nu chu hmâna hmanah khan a thi tawh tlat. Mi nung ramah hian eng thu neihna mah a nei tawh lo ve, i â zo tawh a nih ber hi Hunter"

"Ka pa!!! Ka nu kha i nupui a ni asin, i hmangaih ve miah lo em ni? Thi tawh mahse a duh loh zawngin awm tum hauh suh, a thlarau tal zah ve ta che"

"Hmangaih maw!? Hmangaih teh nâng, khatiang nupui ni khua lo leh pasal te pawh ṭawiawm thiam lo mihring kha eng tikah mah ka hmangaih ngai lo vang" pu Robert-a chu a nui huah huah a, a rapawm ka ti tak zet.

"I naupan lai aṭang tawha ka awrh tir che i ṭhi hi rawn la la, kha chhiahhlawh kha that bawk la, pangai takin i nung ho leh zawk teh ang u" a rawn ti leh a, Hunter-a lam chu ka hawi chho ta vat.

"Ni lo ve, a teuh lo lutuk, tun aṭang chuan Daisy-i khawih nat tum emaw thah tum reng reng chu ka hmelma in ni tawh zawk ang" Hunter-a chuan kawngkapui lamah min hruai phei a, mahse pu Robert-a chuan ring leng lawng hian

"Dang r'u" a rawn ti hrawk a, kan hmaah chuan Body Guard ho chu an intlar nghal ṭhap a, Hunter-a chuan ka kut chu a vuan nghet sawt khawp mai.

"Hmelho" tiin Hunter-a che chhuak thut a, mi pahnih pathum vel kap tlu hman mahse a lu ah tak hnung lam aṭanga an vuak chawrh avang chuan a pai ta chhawn chhawn.

Ka kut chu thlah palh hlau zet hian a la vuan hram hram a, chhuata a tluk hnu thleng chuan a thlah duh hauh lo. Hmanhmawh takin a bulah chuan ka ṭhu hniam a, a thih chu hlauh namen lovin ka hlau a ni. A bianga dawmin ka ko mawlh mawlh a, ka aw ri a hriat rual chuan a rawn meng fiah ta vat.

Ka hnung lam aṭang tha chak tak hian min pawt sawn dâwr a, ka awm sawn rualin Hunter-a chu an sawisak rawn nghal zawt zawt. Ṭap chungin ka lo ṭe tuar tuar a, Hunter-a chu ka khawngaih lutuk, chutiang tak chuan pu Robert-a chu a sual ka ring lo. Mahni fate hial sawisak tir chu a duh ka ring lo kha a nia, mahse a sawisak tir ngei chu a ni si a!

Ka hmuh lai rengin ka mipa hmangaih chu an sawisak rawn a, hrehawm ka va'n ti tehreng em. A lu ah hliam tuar lo se chuan tûma'n an hneh hauh lo vang, a kutthlak an dawl dawn lo lutuk, mahse tunah chuan che ṭha thei lovin hliam a tuar mek bawk si.

Lalpa min pui hram teh, kei leh Hunter-a hi min pui hram teh. Ka chal sir lam chu a rawn na zawk a, chu bak engmah ka hre lo zui nghal.

"Ka tihpalh" tiin ka hmuiah chuan tu emaw ni hian a fawp deuh vang vang a, chu chuan min ti harh rang hle.

"Hunter" a hmel ka hmuh rual chuan lawm lutuk avangin ka mittui a rawn tling nghal pam a, min thihsan lova a la dam reng avang chuan ka lawm tak zet a ni.

"Ka tiam a che Daisy, he hmun aṭang hian him dam takin ka hruai chhuak ang che" tiin a âwmah chuan min kuah bet a, kan awmna hmun chu ka hre leh ta hauh lo.

"Kan thi dawn, kan thi dawn tih ka hria Hunter" ka ṭap chhuak hawk a, chu room chhung reh zau zetah chuan ka ṭap thawm chu a khawk rum rum a ni ber.

"Min en teh, ṭap lo khan min en teh Daisy" ka biang chu a kut pahnihin a khuap a, ṭah rik insum em emin ka en ve mai bawk.

"Kan thi dawn lo, ka dam chhung chuan i thih ka phal ngai lo bawk ang" nghet charh hian a rawn ti chang fak a, ka chal chu a fawp zui ta vang vang.

"Keimah avanga i tuar tel ve hi a pawi ka ti lutuk, a pawi ka ti tak zet" amah en ran chung chuan ka ti leh sep a, duat zet hian ka sam chu a chul a, ṭawng erawh a ṭawng lo thung.

A âwma ka hmai nghat chungin ka mit ka chhing vang vang a, kan thil tawn rapthlak tak chuan ka ngaihtuahna a luah lo thei lo.

Nghet zetin Hunter-a taksa chu ka kuah a, ka awm dan hrethiam deuh hian ani paw'n min lo kuah let ve a, kan pahnih chauh chuan awm dun char char ka châk a ni.

Hunter-a nen chuan hmelma ni lo ila, hmelma nei lo bawk ila, inhmangaih taka hringnun hman dun ka châk ngawih ngawih.

"Daisy, harh teh Daisy" tia min sawi che dat dat tu Hunter-a chu ka en thuai a, ka lo muhil hman a ni ngei ang.

"Tunah hian kan chet nghal a ngai, chuti lo chu naktukah kan pahnih hian kan thi dawn" a rawn tih leh chuan ka harh nghal kawk.

"Enge?...Enge kan tih dawn? Kan tlan chhuak dawn em ni?" hlauthawng zet chuan ka lo ti vat a, mu tawh lovin ka tho chhuak nghal bawk.

"Ni chiah e, lo kal rawh le" a kut chu ka vawn theih turin ka lamah a rawn phar a, rang takin ka lo chelh nghal.

"Min ring em?" a tih sup chuan ka lo bu vat a, ani bak baka mihring rin ka nei lo, amah chu ka nunna leh ka engkim a ni tawh zawk.

Tukverh bulah chuan min hruai phei a, thla eng pawh hmuh tur a awm tawh loh avangin lung muangin ka awm thei rih lo, kan thil tawnin a zir lo ve bawk em a ni.

Tukverh chu awlsam tak hian a hawng a, mahse a hnuai lam chu a va sang tehreng em. Tla na ila chuan dam chhuak tur kan awm lo vang, kan awmna hmun chu in pangai a ni lo tih ka hre zawm zat bawk.

"Ka hnungah hian lo lawn rawh le" a tih chuan mak ti zet hian ka lo en kiau a, kan tlan chhuah dan tur chu ka ngaihtuah thiam pha ta hauh lo.

"Engtin nge kan tlan chhuah dawn Hunter? Hrui kan nei bawk si lo, kan awmna hmun lah hi a sang ropui bawk si" ka ti ta ngei a, rilru hah hmel pawh a pu ve miah lo leh nghal.

"Min ring tawp rawh" tiin a ṭhu hniam leh a, kei pawh ngawi rengin a sawi ang chuan a hnungah ka lawn zui ve ta tawp.

"I theih tawpa nghetin min vuan la, thawm engmah chhuah bawk suh ang che, i hria em?" a rawn tih thum dup chuan ka lo bu nghauh a, amah chu ka vuan nghet nghal hle.

"Hlau suh aw Daisy, ka bulah i awm chuan hlauh i nei tur a ni lo" a rawn tih leh chuan ṭawng khalh hlau zet hian

"Engtin nge kan tlan chhuah dawn tih tal chu min hrilh rawh Hunter, ka awm pawh a nuam deuh mahna" ka lo ti thuai a, chu chu ka hriat duh tak pawh a ni.

"Kan hmaa thingkung dingah sawn ka zuang phei dawn a, hlau suh ang che. Ka tan eng tham mah i ni lo, i zâng lutuk. A nghet thei ang berin min vuan la, thawm reng reng i chhuah tur a ni lo" a tih chuan

"Aw le" ka lo ti ve nghal a, a tana ka zân zia kha sawi lo se chuan ka la hlauthawng ngei ang, mahse tunah chuan min zo dawn lutuk tih ka chiang a ni.

A tawlh hnung hret hret a, a tawk nia a hriat chinah chuan a ding ta. Chak zet hian hma lamah chuan a tlan leh a, kei chu ka lo maimitchhing tawp. Ka meng ngam lo, ka men vaih chuan hlauh lutuk avangin ka ṭe chhuak tuâr ang tih ka hlau a ni.

Ka ṭe chhuah vaih chuan mi dangin kan thawm an lo hria ang a, awlsam takin min man ngei ang, ka tan chuan maimitchhin a ṭha ber.

Kan pahnih chuan lirnghing na takin a sawi nghin ang maiin kan che dawt a, nghet takin ka vuan emaw ka tih chu thil nghawr na tak avang chuan ka thlah palh ta hlauh mai.

Ka men rualin Hunter-a chu ka hmu hla tial tial a, lei lamah ka tla thla mek tih ka hre chiang khawp. Vawi leh khatah ka kang dâwr a, ka hnungin a tauh chu thing a ni miah lo leh nghal.

Hnai set sawt hian Hunter-a nen chuan kan inmelh a, chutiang taka a chet ran chu ka ring lo a ni. A kut khing khat chauh chuan min pawm kang lawp a, leh lamin thingzar chu a vuan tlat bawk. Ka hlauhzia hrethiam tak hian a hnungah chuan zo zetin min bawh kai tir leh a, lo vuan nghet tawh tak ka ni.

"Hlau suh, kan zalen ṭep tawh" ka lama rawn thle deuh hlek hian a ti sup a, a thu sawi chu ka ring nghal em em.

Zawng ang maia hnehsawhin thingkungah chuan a che zung zung a, kei pawh a hnungah chuan ka lo bet ve ṭai a, min paw lo ang maia a chet avang chuan a tan ka zâng thawkhat tih ka hria.

Lei kan thlen thlak chuan dim zet hian a kal ṭhem ṭhem a, hnah ro tla vel a awm nual avangin kal rik loh chu harsa tak a ni. Minute 1 vela kan kal hnu chuan mihring ka hmu ta, kan hma lawkah chuan Body Guard pakhat hi a lo ding ran mai.

Chu Body Guard chuan min hnung chhawn a, a lan dan chuan kan thawm a hre lo a nih hmel. Hunter-a chu ka kuah nghet sauh a, ani erawh sapel ang maiin a che a, a taksaah bet lo ila chuan kan hmaa mihring ding chu ka chhuk melh hauh lo vang. Ka awmna taksa chhah leh khauh ṭung chu a sang em a, Body Guard chu ka chhuk melh lo thei lo a ni.

Body Guard chu kan thawm a hriat rualin a rawn hawi nghal thuai a, mahse thawm engmah a siam hman eih lo. A hmuia hup betin Hunter-a chuan a ring a ṭhuai ri tûarh a, Body Guard chu ka pawh chhawn lovin a thi zui nghal der. Thingkung phena hnuk pheiin a dah ṭha a, silai leh chemte chu a laksak zui nghal bawk.

"Kan zalen thei ṭep tawh tak tak e, a rei tawh lo vang" ti supin hma lam chu a pan hmawk hmawk a, thawm pawh a dim tawh lo hle.

Khua chu a rawn var ṭan tawh a, chhum pawh a zing riai riai a, umzui tu pawh kan nei miah lo. Chutia thlamuanna leh hlauhthawnna inpawlh nuai nena rilru ka sen lai chuan dar a rawn ri vawl vawl a, ka chhungril chu a rawn khur nghal der der. Hunter-a chu ṭawng chhuak chuang lo hian a ding deuh zawk a, hmanhmawh takin min tlanpui zui nghal.

Min tlanpui zel hnu rei lovah thil ri hum hum ri ka hria a, chu thil ri chu ka hmuh chian rualin ka meng phawk nasa hle. Kan hmaah chuan tui khawh thla sang tak a lo awm a, kan tihtur awm ang leh tlan chhuah na'na kan chance neih chu ka hrethiam zui nghal.

Chawl lovin Hunter-a chu a tlan zel a, tui khawh thla ri hum hum karah chuan hla taka mihring ṭawng thawm ka hre leh ta.

"Tunah hian kan zuang thla lo a nih chuan kan kalna hmun an hre thuai dawn, hmanhmawh takin zuang thla rawh" leia min dah thlak pah chuan a rawn ti ta mai, ka lu chu lo thing rang tak ka ni.

"Aih, ka duh lo. I tel lo chuan ka zuang thla duh lo, kalsan che ka tum hauh lo Hunter" a kuta chelh ran chung chuan ka ti a, ani erawh chuan ka kut chu a lo phih thla vat.

"Khatiang thu ho mai mai sawina hun a awm lo Daisy, i zuan thlak hnu lawkah ka lo zuang thla ve nghal dawn alawm" a tih pawh chuan

"Ka duh lo, keimah chauha zuan thlak ka duh lo. Kan pahnihin....kan pahnihin zuang thla rual ang" ka la ti ṭalh a, zuan thlak chu ka hlau em a tin ni!

"Hrep tak che hian Daisy, a nih chuan hmanhmawh ang" nghet zetin ka kut chu a rawn chelh a, hma lamah chuan min tlanpui nghal thuai thuai.

Tui khawh thla sang tak aṭanga kan zuan thlak lai chuan ka meng ngam lo, ka hlauh lutuk avangin ka meng ngam lo a ni. Tui thuk hmel zeta ka lo mitthlaah chuan kan pil lut bâwrh a, tui tha chak tak chuan kei leh Hunter-a chu min pawt hrang chiah hle. Tui chhungah chuan meng chuang lovin ka kut ka vai vak vak a, Hunter-a kut chu ka chelh leh duh a ni.

Tui chhungah chuan mumal lo zetin ka awm kual nuai nuai a, thil ruh leh chang tak hi ka tauh ta pawp, ka hriat sual loh chuan lung emaw thing chang tak a ni ngei ang.

Ka thaw a chham dawn lai tak chuan ka lang chhuak thut a, ka duh anga ka thawk leh hmain ka pil leh a, tui tal hleuh thiam ila chuan chutiang em ema ka buai ka ring lo.

Ka pum inlinglet leh ka hnar thip zet avang chuan ka harh chhuak hlawl a, tui chu ka hak zawm bawrh bawrh bawk. Ka mit ka men rualin Hunter-a hmel ka hmu hmasa ber a, hlauhthawn hmel zet hian min lo en a, min be mawlh mawlh bawk. A kâ che vel leh a phun mawlh mawlh chiah chu ka la hmu thei, a ṭawng ri erawh ka hre thei mai rih lo.

"Daisy, i harh chiang tawh em?" ka hmai beng thek thek paha min biakna chu ka thil hriat theih hmasa ber a ni a, a sam aṭanga tui lo far fep fep chuan min tiharh tial tial bawk.

"Hu...Hunter" ka ti sep a, chu veleh zo zet hian min pawm nghal vawng vawng a, kei paw'n ka tha zawng zawng sawm khawmin ka lo kuah ve ṭai nghal.

"Ni a chhuak ṭan mek a, kan kal thuai thuai a ngai" tiin a hnungah bawk chuan min bawh tir leh a, na nei lo ang mai hian a kal nghal pawk pawk.

Kan taksa chu ro deuh tawh mahse kan thawmhnaw erawh a la huh far thluah thluah a, kan awmna hmunah chuan tui khawh thla reng a awm tawh lo. Tuipui lian leh cham pawl ruih a lo ni tawh zawk a, hmun hla takah kan awm tawh ni mai hian ka hria.

Ram hnuaia darkar 2 zen zawn kan kal hnu chuan kawng kan pawh hlawl a, a taksa aṭang chuan min la dah thla miah lo bawk.

Motor Silver rawng hi a lo tlan a, Hunter-a chuan a lo phar nghal thuai a, mahse min phur duh lo a ni ngei ang min tlan pel zel. Chutiang chuan motor pali vel chu kan lo phar tawh a, tû motor-ah mah kan la chuang lo tluang zel.

Beidawng taka ka awm lai chuan motor pakhat hi a lo tlan leh a, Hunter-a min puakna aṭang chuan ka chhuk nghal vat.

"Lalpa min pui hram teh" ka hriat tawk leka phun sepin kawng lai takah chuan ka va ding thawr a, Hunter-a chuan min lo ko vak nghal.

"Engati nge kawng laiah i din?" motor khalhtu putar hmel tawh deuh hian a rawn ti a, ka hma takah motor chu a tiding bawk.

"Khawngaihin min pui hram rawh ka pu, i puihna kan mamawh tak zet" tiin a bulah chuan ka phei nghal thuai a, Hunter-a pawh a lo phei rang khawp mai.

"Khawiah nge kal in duh hrim hrim? Kei chu ka kal hla viau dawn asin, in kal duhna hmun a zirin in lo chuang thei ang" a ti zo chiah tihah Hunter-a chuan motor chhungah min nam lut a, ani pawh a rawn lut ve nghal.

"Tlan tawp rawh ka pu, i duh dûhna hmunah kal tawp rawh, he ram hlat tak a nih phawt chuan a ṭha vek" Hunter-a aw chu a nem hran lo, mahse tihnem chu a tum ve hle.

"A va mak ngai dawn ve, nupa in ni em ni?" motor tlan chhuah tir pahin putar chuan a rawn ti a, Hunter-a lam chu ka hawi nghal vat.

"La ni chiah lo, mahse kan ni thuai ang" tih pahin a âwmah chuan min kuah bet a, a lung chu a phu rang ve khawp mai.

"Zin vei vah hi nuam ka ti a, thlawhnaa chuan pawh ka peih lo. Hmun hla tak aṭang ka lo kal vang vang asin, ka bulah chuan in kal ve duh tak tak ang maw?" putar chuan a rawn ti leh a, Hunter-a bawk chuan

"Duh tak tak e, in hmun ṭha tak lei tur min kawh hmuh theih phei chuan a man let tam tak ka pe ang che, nangmah ngei hian nei phei la chu duhthusam, kan mamawh hle a ni" a ti leh a, kei erawh ka lo ngawi mai mai thung.

"I sawi tâkah chuan ram hralh tur chu ka nei asin, mahni chauha khawsa ka ni a, mahse rin ngam in nih leh nih loh hi ka la hrethiam lo. I lan dan aṭang chuan i sawi zat pawisa chu i neih hmel loh hle a, chu chu ka rilru tibuai tu chu a ni rih"

"Min ring tawp rawh, i inchhir lo vang. I dam chhung daih tur pawisa hman sen loh ka nei alawm, kan dinhmun hian zir se chu tunah pawh hian ka pe nghal duh ngei ang che"

"Pawisa tam leh tam loh lam pawh ka sawi tawh chiah lo, rinawmna leh rinawm lohna lam zawk a nia ka sawi tum zawk chu! Motor i khalh thiam em?"

"Thiam e" Hunter-a chhanna chu a bul hle a, mahse hriat nuam loh lutuk a ni tawh bik lo, kei chuan a ṭawngkam ve hrim hrimah ka ngai tawh.

"A ṭhat hlauh chu! Kan kalna tur hi a la hla dawn ang reng a, khalh chhawk pawh ka ngai ngei ang. Zanin chu Hotel-ah kan riak dawn nia, in duh chuan thlawhna hmangin in kal duhna hmunah chuan in kal thei tho a nia"

"Thlawhnaa kal duh ni ila zawng i motor-ah hian kan chuang rei lo tawp ang, mahse thlawhnaa chuan ni lovin motor ngeia kal kan duh si a ni"

"Thil eng emaw hlauh nei in ang ka ti, ka tan erawh han hriatthiam chi pawh a ni lo vang, mahse i sawi theih chuan a lawmawm viau thung ang"

"Hlauh chu nei e, kan nun hlui kan hlau a ni" Hunter-a chhan dan tawi fel tak chuan ka rilru a luah a, kan nun hlui hrehawm zetin min rawn nang ching leh ang tih kan hlau chiang a ni.

"Darling" ka bianga a tawk zeuh pah hian min chhuk melh run a, min koh dan avang chuan ka nui sen sen nghal.

"Darling maw!? A va mawi ve Hunter, i aw nen khan a inhmeh bik" tiin ka nui chhuak ta nge nge a, ani erawh hriatthiam loh hmel zet hian a meng a, a biang chu naupang chhia takin ka pia sak ta ringawt.

"I chau ang muhil rawh, ka taksa ngheng hian tui takin muhil ang che" ti thum dupin ka chalah chuan a rawn fawp a, ka thla chu a muang hliah hliah tawh a ni ber.

A thusawi ang ngei chuan ka mit ka ching vang vang a, ka taksa a chauh vang leh mut ka kham loh em avang chuan ka mut a chhuak zui ta hle.

A taksa lum nuam zet chuan min timuhil dâwn dawn ṭhin a, motor tlan nghawr det det avang chuan ka harh leh zawk ṭhin. A taksa chhungah chuan min dah lut daih se ka ti, vanram ang maia nuam a ni ngei ang.

Ka muhil tui hle a ni ang ka men leh meuh chuan chawhnu lam tih hriat tak hian ni chu a lo eng a, ka taksa nghen erawh a la che sawn eih lo. Driver seat lam chu a lo ruak huai a, ka hrethiam lo hle.

Ka awm dan siam ṭhain ka mit chu ka nuai nawk nawk a, chutia ka che vel chu Hunter-a chuan ngawi reng hian min lo en a, nui sen senin ka la ham bui bui zui.

"Khawiah nge a kal a?" tiin a kut hrawl zet chu ka chawi a, ka khawih neuh neuh bawk.

"Motor-ah hian Petrol thun mek a ni a, ani erawh eitur leiin a chhuak lawk" a ṭawng zawh rual chuan min bawh a, ka taksa chung lam aṭang chuan min en chiang hle.

"A remchan veleh ka nupui i ni ang? Min nei duh ang em Darling?" a zawhna min zawh avang chuan ka mittui a rawn hnam nghal.

"Aw..aw...ka nei ang che Hunter, ka thinlung zawng zawngin ka hmangaih che" tiin ka kuai kun a, ka thiam ang tawk chuan ka fawp hmasa ve ta.

Keimah ang lo takin ani chu a che duhthaw sawt em em a, tawp mai tum lovin min fawp buan buan a ni mah zawk. A tukhum sama ṭham tawn tawnin ka fawp uar ve sauh a, uar taka fawp let lo thei lovin min siam tlat a ni.

Ka kawr chhunga a kut zen lutin ka hnute chu a ṭham tawn tawn a, chu chuan nasa takin min tidanglam a ni. Sex hman châkna hlirin ka khat nghal a, ka ngaihtuahna fim pawh ka hmang thei tawh lo.

Motor kawngka inkhar ri thawm a rawn awm hnu chuan kan inthlah thei chauh a, mahse kei chuan Hunter-a min fawhna leh min tawh velna chu ka la kham lo em em thung.

Ka awm dan chu ka ngaihtuah let a, mak ka ti khawp mai. Tleirawl mai ka la ni a, chutiang em em chuan Sex hman châkna ka la nei ngai lo, Hunter-a chuan nasa takin ka rilru leh ka taksa a tidanglam a ni.

Khaw thim rualin kawng sir zawl zau laia Hotel awmna chu kan thleng a, kan awmna chu Switzerland ram nen chuan a inhlat tawh viauin ka hria.

Hunter-a chuan room pahnih book turin a hrilh a, pakhat chu a motor-a min chuan tir tu putar tan a ni a, pakhat leh chu kan pahnih tan a ni thung. Room chhung kan luh rualin bathroom-ah ka intifai nghal a, ka taksa khawi lai pawh chu ka sil châk vek tawh.

"I pate khan min lo la zawng ang em le?" khuma kan mut hnu chuan ka ti a, a ban khamin ka mu ran bawk.

"Zawng ngei ang, mahse an beisei aiin min hmu har thung ang" a ṭawng chu ngaihthlak a nuam em em a, a thum ṭha hliah hliah khawp mai.

"Engati nge thlawhna hman i duh loh tlatna chhan? Thlawhna chu hmang ila hei aia hla zawk hi kan thleng tawh ngei ang, chuan kan duhna hmun takah kan awm tawh ka ring bawk"

"Thlawhna hmang ila chuan min hmu thuai ang, an rin loh zawng taka chet hi a fuh ber" a thusawi chu ka awih lo hauh lo, a thil tih hnu vek a nih avangin a ngaihtuah kim zawk hle ang.

"Min zawn hmuh loh hram ka beisei" ti sepin a hmel tak run chu ka en chho hâ a, ani pawh ka lam a rawn hawi thla ve nghal.

"Min zawng hmu pawh ni se ka hlata i awm ka phal hauh lo, ka venghim zel ang che" ti supin a che thut a, ka taksa chungah chuan a rawn bawk titih der.

"Hunter" ti sepin a bianga hmul ṭo siar siar vel chu ka chul neuh neuh a, rei pawh mi en lovin min fawp zui ta mawlh mawlh.

Rizai chu chhuatah a theh thla thuai a, a kawr hak lai te chu phelh mawlh mawlh a, kei pawh insum buai duh tawh bik lovin ka lo inphelh ve thuai thuai. Ka hmuia fawp reng chungin ka taksa hmun tin chu a chul kual ruai ruai a, chu chuan ka thaw zawng zawng a tidik lo vek nghal. Ka panty chu dim lo zet hian a pawt thler hrawk a, chutah amah vek chuan phelh phang hian

"Daisy le!" a rawn ti hluai a, ka hmeichhiatnaa a hmui a chet tir rualin ka ṭe chhuak nghal hawk.

Zei takin a che zawm mial mial a, a hmui chet tir dan mawlh chuan nawmna vawrtawp min thlen tir a ni. Nuam tih lutuk avangin a sam chu ka lo ṭham ve vak vak a, chu chuan a tiphur zual sauh emaw tih turin a che leh ṭhin.

A kut leh lam chuan a mipatna lian leh sei zet chu a sawngbawl pah mial mial a, ka hmuh ringawt pawn ka ṭim uai thei, mahse mak takin a mipatna hrawl zet chuan min tiphur ru tlat thung bawk si.

"Darling!!!" ka hmui lama rawn insawn chhoh rualin a ti phelh phang a, ṭawng chhunzawm tawh lovin min fawp zui leh ta mial mial.

Ka kapah chuan a mipatna lumnaa khat chu a nghat a, ka hmeichhiatna nena innawk turin a nawr pial ta zawt zawt. Kei Daisy Taylor hian ka la tawng ngai lo, chutiang renga thil nuam leh dangdai chu ka la tawng ngai lo a ni.

A kâ chhungah te chuan ka thaw lut ham ham a, a lei chet tir dan te chuan phur taka fawh let theihna min pe a ni. Ka taksa chhungah chuan thil lian lutuk tak mai hi a rawn lut thut a, hawi sawnin ka mit chu ka chhing nghet hle.

"Ka tihpalh Darling, na i tuar rei lo vang tih ka tiam a che" tiin ka nghawng leh ka dar vel chu a fawp kual dân dan a, kei pawh chuan a duh ang taka chet tir ka duh a ni.

"Hunter, ka...ka mamawh che, nasa takin ka mamawh che, tawp suh" tih pahin a samah chuan ka ṭham a, ka fawp zui ta mawlh mawlh.

A tir lamah chuan min dim tih hriat takin a che muang hle a, mahse a tawp lamah erawh ka taksain a lo dawngsawn ṭhat em avangin a che rang sawt hle thung.

A chet dan chuan nuam takin min siam ṭan leh der tawh tih hriain a taksa chungah min bawh tir a, a mipatna khawng leh lian ṭha zet chu ka taksa chhungah hnuai lam aṭang a rawn lut ta zawt zawt. Awm ngaihna hre lovin ka kut chu a taksaah ka vah kual tir a, a rei hnuah phei chuan rum chhuak hak hakin

"Hu...Hunter..Hunter" ka ti ruai ruai a, chutiang tak chuan Sex hman chu a nuam ang tih rin ngaihna pawh ka hre lo.

Che tawp thutin a zangthal zawngin a taksa chungah min awm tir leh a, a mipatna lian leh khawng lawr vûk chu ka kapah a chuktuah zui leh nghal. A tir lamah muangchangin han che ve ṭhin mahse a daih rei lo, hmanhmawh takin a che leh nge nge zel. Minute tam chutianga kan awm hnu chuan a thawk a rawn rang ṭan a, a hma ai zawngin a che rang sawt bawk.

"Hu...Hunter" mumal lo zeta ka tih avang chuan a phur zual a ni ngei ang, kan taksa te lah chu a innawk ri chawk chawk a, vanrama awm ang maiin ka inngai tawh.

Duhthawh taka Sex kan hman hnu chuan thlan tui nen inkuah rialin kan mu dun a, kei ang bawkin a chau ve a ni ang a che zawi sawt hle. Ka tan chuan kan thil tih zawh chiah chu a vawi khatna a ni a, ka mipa hmangaih ber nen Sex kan hmang dun thei chu ka lawm a ni. A dar leh âwm vela Tatoo awm nuai te chu ka hmu nalh vek tawh, ka pasal ni mai tur a nih avangin inhmeh ka ti em em zawk a ni.