𝐇𝐄𝐍𝐑𝐘 𝐋𝐀𝐋𝐒𝐀𝐍𝐆𝐙𝐔𝐀𝐋𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟏𝟑 - 𝟐𝟒)

HENRY LALSANGZUALA

By

Havali Adam

15 January 2022

Chapter 13

"Junior-a chu kan hrilh ang a, a hrethiam ve mai ang. Ka fapa pawh hian nang ang renga hmeichhe ngainat hi a nei bik lo, chuvang chuan a pawm em em ang che" thawk a lak hawk hnu chuan a rawn ti a, rilru pangai hmel deuh chuan min en chhuk run leh tawh bawk.

"Mahse Junior-a hian" ka tih laklawh lai chuan a kutin ka hmui chu a lo tawk a, ṭawng zawm tawh lo turin min ti tih a hriat hle. Chutah Henry-a chuan aw dam tak hian

"Engkim a ṭha vek mai ang" a rawn ti thum chhal a, ka lama lo kun hniamin ka hmuiah bawk chuan a rawn fawp chat a, mipa dang fawh la nei miah lo mah ila a hmui ang renga hmui fawh nuam chu ka la hre lo.

"Ihhhh....kei chu ka lai êeeee, kan awm dan vel hi a zahthlak ka ti reuh" kan infawh zawh chuan ka ti ringawt a, nui ver verin Henry-a chu ka chhoh melh ral a, ani paw'n kiau suk hian min lo en thla ve reng tho.

"He i ka kal zet hian min tihlim a, i engkim hi theihnghilh mai atan chuan a uihawm lutuk" ka bianga piai chung chuan a rawn ti a, ka lo nuih ver ver a, ka ka chu a kal ve tak zet alawm, min sawi dan chu huat enah pawh ka en lo hrim hrim.

"Chuan ti hian kan inngaizawng vel ve tihna em ni? Awi kei chu a! Ka zak hnuhnawh reuh êeee, ka duh tho che bawk si a, Engzuali'n a hriat hunah chuan min va phurpui leh dawn tak!" ka ti niah niah a, ka rilrua âwm awm chu ka zep thei der lo, ṭawng ka insum rei ve tawh bawk em a ni.

"Chaw lo ei rawh aw" tiin motor lamah chuan min kuah phei a, a chet dan phut phut chu ka hrethiam lo leh lek lek zel.

Chaw ei tur te chuan min la sawm leh ta nghal a, ei a chi loh turu buru lutuk, chu bakah a zah loh thlak, han ti ve khanglang ila ka zah loh tehreng nen.

"Chaw chu ka lo ei dawn lo, a chi loh. Kan in lamah min hruai haw ang che" kan tlan chhuah hnu chuan ka ti a, ani erawh ka thusawi hria ang pawhin a awm leh tawh lo.

Ka zia leh a zia chu inperhsan em em mahse amah chu ka duhin ka vei em em thung si, eng pawh ni se hun kuta dah tawp chu a ṭha maiin ka hria.

"Ka fanu rual hian thu min pek i tum ve zet zet zel a" a rawn tih chuan a hmel chu rang takin ka en leh a, hma lam hawiin a lo nui tawi tak mai.

Engatinge a hmelṭhat bik em em le? Thlahpawlh a nih avangin a hmelṭha ti dawn ila thlahpawlh ani aia hmelchhia an tam ropui bawk si.

"A chi loh tak tak a nia aw Henry, vawiin tlai chu i nula rawn hruai kha eipui phawt rawh u. Kei chu duh leh ni dangah pawh ka la rawn ei thei alawm, hun a la tam" pangai tak chuan ka ti a, la inngaizawng lo ni ila chuan min chhan dan chu ka thinrim phah leh ngei ka ring.

"I thik hmel mawlh mai kha!" a rawn ti tawi leh sup a, a nui hmel chu ka hmû ka hmu ve ta. Ka lam erawh motor khalh lai a nih avangin a lo hawi lo va, mahse a sir zawng pawh chuan pa ka ti em em tho.

"Ka awm dan kha i lo hre vek tihna maw!? Awi awi awi, i hmeichhe rawn hruai ka thikzia kha pui tak a ni. Inhmelhriattir tih vel i sawi lai phei kha chuan ka na vawng vawng, Junior-a ka zirtir lai thlengin in awm dan tur ka ngaihtuah a, in inhmeh dawn bawk sia ka lo lungngai nghal em em ringawt"

"I thik hmel ka hmuh khan ka fawh avang chein ka lakah rilru dang i pu ve tho tih ka hrethiam a, step-a i chhoh laite khan ka khawngaih lek lek che a ni"

"Khatianga che vel kher lo khan min hrilh ṭha ve mai ta che, i tih dan vel hi a pathlawi nih thlak êeeee. Kei lah chu pathlawi zunah ka lo uai ve em em ringawt a, mahse i hmel ka hmuh loh kha chuan ka ruak huai tak tak asin. Zak lo min ti em? Kan inngaihzawn tlaiah ka inpuang nghal zawt zawt chu a ni si a, han sawi ve teh, han inpuang ve teh" ka tih chuan nui ri hawk chung hian

"I ka tak hi chu âw" a lo ti vawng vawng a, mak tak maiin min chhan vel dan chu ka haw thei tawh miah lo, huat viau pawh tum ila thil dik a niin ka hre lo, a chhan chu a sawi dik vek tlat.

"Tak takin keini hi inngaizawng chi kan ni meuh ang maw? Kei lah ka ṭawng thei si, min nin lutuk avanga kan inṭhen leh dawn tho a nih chuan inngaizawng lo law law ang, a tawpa na taka awm vel kha ka peih lo" a lam hawia ka tih chuan pawn lam chu a hawi daih a, ka thusawi pawh engmah a hre miah lo tihna em ni?

"Ka ti tak tak a nia Henry, kan awm dan a buaithlak kikawi kual vel dawn chuan ka peih leh lo. Ka duhin ka vei em em che tih chu ka pha lo, mahse hengte hi chu a reh ve leh theih mai ka ring" ka ti leh chuan min lo en zawk a, mahse rei pawh min en lovin hma lam chu a hawi leh nghal daih.

"Ṭawngmawhpa, ṭawng ve ṭhin rawh. Inla ṭawng duh lo vel ṭhin lo teh, ka biak chea min chhan miah lo hian nuam ka ti lo a nia, kan mizia aṭang ringawt pawh hian inngaizawng chi kan ni leh lovin ka hria" lungawi lo tak chuan ka ti chhuak leh hlawk hlawk a, ka hmel tak ngial pawh a en duh loh avang chuan pawn lam chu ka hawi ve ta hmak.

"I hlauthawng hma lutuk a nih khâ, hlauthawng suh" dam diai hian a rawn ti sup a, insum thei hlek lovin amah chu ka en leh nghal vat a, ani erawh a awm ngaiin a lo la awm char char thung.

"Engvangin? Engvangin nge ka hlauhthawn loh vang?" lung ni lo fê chuan ka ti zawt zawt a, thil awlsam tak ni tura a ngai tlat chu ka thei ve der lo, kei chuan ani ang lo takin kan hma hun ka ngaihtuah thui lutuk tlat.

"A chhan chu kum tam tak hnua ka hmeichhe thlan i ni a, ka thlah tawh mai mai lo vang che tih hre rawh" lai ril fan vawng vawng khawpa ril chuan a rawn ti a, min lo la nuih sak zui.

Kei LALRINHLUI erawh a thusawi chuan min hneh lutuk a, ka hlauhthawnna zawng zawng bo vekin ka ngawi ta hle hle.

Kan inah chuan min thlah ta ngei a, motor aṭanga ka chhuk dawn chuan min pawt let thut hian min fawp leh hram a, inla zei vel reuh lutuk! Kan in chhung ka lut te chu mi â ang maiin lawm lovin ka khi ver ver a, mahse ka chhungte hmuh lai erawh chuan vawi khat mah ka nui lang duh lo, lawm lovin ka hlim hle tih an hriat chuan zawhna an ngah leh dawn lutuk tlat.

Khuma ka mut thleng chuan Henry-a nena kan inkar chu ka ngaihtuah ṭha leh a, ka hlim hi a ni tawp mai a ni. A aw te kha a va'n pa bik tak, min thlah mai mai a tum loh thu a sawi kha chuan tui ang maiin ka luang ni berin ka hria.

Mipa dang ang lo takin eng emaw riauna a nei bik tlat alawm, mi hipna a ngah rualin a bula awm a hahdam thlak em em bawk si, pathlawi ni mahse ka vei thlawt.

Hre chhuak thutin Engzuali chu ka call a, a lo la la thei lawk lo zui. Ka vawi hnih call naah a pick up a, ka chhungte hriat hlau taka Henry-a nen kan chanchin ka hrilh chuan a awih lo nasa hle a, a awm ve tho.

Social Media-a kan thlalak a lar chiam khan kan inngaizawng emaw a ti a, kei lah khan kan inngaihzawn loh nasatzia ringawt ka lo hrilh a, a awih ve mai bawk. Tunah lem kan inngaihzawn thu ka hrilh leh a, ani tan chuan ka thusawi chu awih mai theih a nih pawh ka ring lo.

Engkim, Henry-a nena kan inkara thil thleng zawng zawng chu hmaih nei lovin ka hrilh ta vek a, chutah zet zawng ani paw'n a rawn awih ve ta. Ka beisei loh lutukin Henry-a mawngtam mawlh mai chu a hmuh ve châk thu a rawn sawi a, hlim takin kan nui dun leh ta vak vak.

A tuka tukṭhuan kan ei laite chuan ka lai ṭut vel a, ka hmeichhiatpui ka nu mawlh chuan ka awm dan chu a lo hrethiam vat ang tih ka hlau a ni. Mipa pahnihte chuan ka awm dan vel chu an ngaihsak vak lo va, dawr lam pang an sawi daih.

Ka chaw bar thleng chuan a dik thei ta hauh lo mai a, mahse chaw kan ei chhung zawng chuan tûma'n ka dik lo tih an hre lo. Chaw kan ei kham aṭanga darkar 2 hnu velah ka inbual fai a, kan inbual lai thleng thleng chuan Henry-a chu ka ngaihtuahnaah a awm leh ta.

Ani hi zawng mipa ah pawh zun ngah lutuk a lo ni chiang e, kan inhmuh hmasak ber ni aṭang tawh a hmelṭhat lutuk avangin ka en dauh dauh ṭhin a nih ber kha!

Ka room chhunga ka inthlak mawlh mawlh laiin ka phone-ah chuan notification a lo thleng a, ka en chian chuan ka pa birthday lo zu ni reng a!

Ka ngaihtuah nawn leh ngat hnu chuan tûman ka pa birthday a ni tih reng kan lo hre lo va, notification dawng lo phei ila chuan kei ngei pawh hian ka hriat chhuah theih ka ring lo.

Hmanhmawh takin Peksanga room-ah chuan ka lut thuai a, ka pa birthday a nih thu ka hrilh chuan a rawn tho ve vat nghal. Chutah ka nute room lamah chuan kan kal leh a, ka pa erawh Kohhran Commitee a awm avangin inah a awm lo hlauh.

Ka nu kan hrilh chuan mak a lo ti khawp a, keini pathum chuan ka pa birthday chu hlimawm zeta surprise dan tur kan rel nghal bawk.

Zanriah kan ei kham chuan ka pa chu sitting room-ah phone khawih mual mualin a ṭhu a, kan ruahmanna ang ngeiin Peksanga leh ka nu pawh inah an awm lo. Ka pa birthday cake kan order sa chu ka room chhungah ka dah ṭha ran a, a hmutu tur dik takin a hmuh hma hauhin a hmel a lo hem ang tih ka hlau khawp.

Chutia room chhunga ka awm lai chuan sitting room aṭanga ka pa ṭawng ri vak vak thawm ka hria a, ka va chhuah chuan ka pa chu a lo hlauhthawn hmel hle a, kan ruahmanna chu a kal fuh chai chai dawn lutuk tih ka hre nghal bawk.

Hmanhmawh takin a motor chuan Peksanga leh ka nu awmna lam chu ka pa nen chuan kan pan a, a hlauthawng thawkhat bawk a ni ang a tlan muang lo hle.

Peksanga awmna hmun kan va thlen chuan a lo reh ṭhiap a, motor vei vak pawh an awm mang lo. Ka pa ngaihtuah tur tak hian Peksanga chu kawng sirah a lo let reng a, a tal ṭaih ṭaih bawk.

Ka nu chu ka zawng ru nghal a, hmun thim lai aṭanga phone hmanga ka pa a lo tin vâng chu ka hmu a, ri lovin ka nui nghal cher cher.

Ani paw'n a kutin min lo hui vat vat a, keipawh ka pa hmuh loh hlanin ka nu awmnaah chuan ka kal ta vat. Chutah ka pa chuan ngaihtuah tih hriat tak hian

"Peksang, Bawiha, engatinge? I chungah hian enge thleng?" a ti thuai a, Peksanga bulah chuan a ṭhu thla zui nghal bawk. Peksanga mit duk vel chûr chu a en dik zung zung a, chutah Peksanga chu rang tak hian a rawn tho vut a, khi ver ver hian a tawlh sawn nghal vat bawk.

"Happy Birthday ka pa duh tak, kan Prank che" a tih chuan ka pa chu a ding tlawn zuah a, a ngaihna a la hriat loh hmel hle. Peksanga bawk chuan tlanchhiat inring zet hian

"Pa, ka na lo. Kan Prank mai mai che a nih kha" a ti nawn leh ngat a, chutah zet zawng ka pa chu harh chhuak zawkin a che chhuak ta.

A chet rualin Peksanga chu a tlan chhe ve nghal a, an inum kawi ta zawr zawr mai. Peksang chu a ṭe tuar tuar a, ka pa man chu a hlau bawk sia ka nu nen chuan kan lo nuih char char. Kawng sira coffee in ve te pawh chuan nui vur vur chung hian phone in an lo tin vâng hlawm a, nuih loh theih pawh a ni lo.

"Nu! Min chhan rawh, ka pa hmel hi a den lutuk, ka hlau a nia" nui vak vak chung chuan a rawn ti a, Peksanga'n ka nu a kuah tlat avang chuan phone chu ka lo la ta vat. Peksanga chu ka nu phenah a ding a, ka pa lah chuan man a tum nasa ropui bawk si.

"A tawk e u Kim, a tawk! Man tum tawh suh, i fapa a nih hî, kan Prank mai mai che a nih khâ" tiin ka nu chuan ka pa chu a darah a lo chelh a, ka nu chu nui ver ver mahse ka pa erawh a lung a la awi hmel loh nasa a ni.

"Enga!? MALSAWMSANG, i tel ve tihna em ni? Heng thil hi nangniho pathum ruahmanna lek maw!? Mi mawl ho!" tiin ka pa chuan ka nu chu a vin hrawk a, thinrim takin a motor lam panin a kal ta nal nal.

A tlan chhuah te chuan thinrim tih hriat tak hian chak zetin a tlan chhuak a, rilru chu a nuam duh chiah tawh lo.

Peksang hmel ka en chuan insualna ni awm tak hian a mit bul vel chu a lo duk chûr a, ka nu chuan make-up a hmang thiam rem rem hle tih ka hre nghal. Ka nu tel ve lo phei se chuan ka pa chu a sa ngawt ang ka ring.

Scooty pakhatah chuan tawt takin kan chuang haw a, in kan thlen te chuan lut hmasa zawk turin kan inti tawn sek a, ka pa chu kan hlau ve tawh a ni. In chhung kan luh chuan ka pa hmel hmuh tur a awm lo va, an room-a luh kan tum chuan chhung lamah a lo inkalh tlat mai.

Kawngka chumin pawn lam aṭang chuan ngaihdam kan dil mawlh mawlh a, chutah ka pa chuan kawngka a rawn hawng ta thut mai.

"Engvanga khatiang kha ti nge in nih?" ka pa chuan a rawn ti hmuk a, a mit chu laser ni ngat se zawng kan pathum chuan min en thluk vek theih ka ring. Ka pa chu thinrim em em mahse keini erawh kan lo khi ṭhaw hlawm a, ka nu pawh a bang bik lo.

"Pa, kan tihpalh, thinrim tawh lo la, i birthday te a ni bawk si. Kan tih chhan chu tun laiah Prank te a lar si a, Youtube-a upload te ka tum ve mai mai a, viewers pawh an tam phah ngawt ang ka ring" tiin Peksanga chuan a va kuah bet vat a, a ban che thei lo tura a kuah beh tlat avang chuan phakar ka va'n ti reuh tak! Chutah ka pa chuan nam sawn tum chung hian

"LALPEKSANG awm sawn rawh, ka thinrim a la reh miah lo a nia" a rawn ti ve leh hrawk a, Peksanga lah chuan a lo duh lo nasa mai.

Naupang chhia takin a tal vel a, ngaihdam pawh a dil ngun ta hle. A tawpa tawpah ka pa pawh a rawn pangai ve leh mai a, mahse thinrim aw taka

"Tu ruahman nge?" a rawn tih chuan kan inkawk kawi ta nâk mai! Keiin Peksanga ka kawh laiin ani'n ka nu a kawk a, ka nu lah chuan keimah min lo la kawk daih zui.

"Aw le, in vai hian ka hrem ang che u. Vawi 30 ṭheuh beng su r'u, in ti lo a nih chuan ka thinrim in tawng leh a ni mai" ka pa chuan a rawn ti a, ka nu chuan aw nem dai hian

"Paa, kei em em chu min hrem lo la, mutnaa min lo kuah ka phal lo tawp mai ang" a ti a, ka pa erawh a meng ling nasa mai. A enna avang chuan ka nu chu a kun nghal thuai a, ka pa mit chu tûma'n kan en ngam leh ta lo.

"MALSAWMSANG, min tlawn vel suh. Zanin chu i fate bulah riak ang che, ka bulah pawh lo mu hlek suh" ka pa chuan a rawn ti leh a, ka nu pawh a lungawi loh hmel ta hle.

Ka pa chuan sitting room lamah min hruai phei vek a, kan nufaa beng kan su lai chu ka pa chuan video-in a cover ve leh chhawng a, chutah amah vek chuan

"Peksang, hetianga inbeng su lai hi Youtube-a i upload tel lo a nih chuan i tawn tur chu i hriat kha!" a rawn ti leh ta nghal a! Peksanga lah chuan khi vur vur hian lu a lo buk khum nghauh nghauh a, kan lar dawn hlein ka hre ta.

Birthday Cake vel kan ei lai te chuan kan hlim tlang leh em em tawh a, ka pa pawh a pangai leh vek tawh. Ka pa chuan nu leh pate hmangaihna an fate laka a sanzia chu Peksanga a sermon khum ta hrep a, kei chuan ka lo nuih char char thung.

Mut hun a lo ni a, ka nu chu a buaithlak ve leh ta tlat. Ka khumah a mu tlat a, ka pa lah chuan an room lama mu turin a sawm ngawng ngawng thung. Ka nu chu a inkhuh hmak a, a awm dan chu ka nuih lo thei lo. Ka nu chuan la inkhuh reng chung hian

"Ka hmingpum te khan vawi 2 lai min ko vel a, i bula ka riah te kha i phal lo vel a, nang ang mipa ka lo hmangaih che hi ka inchhir hle a ni Chheban" a rawn ti hlawk hlawk a, ka pa ka en chuan a lo khi ver ver mai.

"Lo kal rawh le, naupang chhia pawh i ni tawh lo, fate khuma mu rual pawh i ni tawh lo bawk" tiin ka pa chuan a inkhuhna rizai chawp chuan ka nu chu a pawm kang lawp a, ka nu chu a rawn tal nasa mai.

"Min dah thla rawh LALDUHKIM, nangmah a ni lo'm ni i bula mut pawh phal lo leh ka fate bula mu tura min titu kha!?" tiin ka nu chu a leng vak vak a, ka pa lah chuan dah thlak a tum der lo.

"Ka birthday te a nih ve hi âw, zanin phei chu min duat viau a ngai ang" tiin ka pa chuan a kal phei pui hmawk hmawk a, ka nu chu a la tal tawp duh miah chuang lo.

"Duat pawh i phu lo, kan mut hunah pawh min lo si reng reng suh ang che, i sik pawh ka duh lo bawk"

"Ka thei ringawt lo, i taksa ka sik loh te chuan ka muhil thei nâng. Awm ṭha tawh rawh, naupangho paw'n mak an ti ang che"

"I thu lo, i thu hlawl lo Chheban, min dah thla thuai teh" tia ka nu leh pa inbe phei mawlh mawlh chu ka nuihpui chiam a, an inthlem rei leh dawn lutuk chu ka pa ka peih loh pui lawk, zankhua paw'n an inthlem leh thei tak tak mai ang ka ring.

"Ehêeeeeeee" ka phone ka en rual chuan ka ti hluai ringawt a, Henry-a missed call a lo tam ngang mai.

Ka phone chu dar 7 vel aṭang daih tawh ka khawih lo char char a, kan boruak a buai ta nuai bawk nen khawih tumna pawh ka nei lo a nih kha! Missed call hnuhnung ber chu 5 minutes ago chauh a la ni a, call back ka tum lai takin a hnen aṭang bawk chuan phone call ka dawng leh nghal.

"Eng teh hrep nge i tih? Ka call i va la duh lo em em ve, missed call pawh i hmu miah lo em ni?" aw nem lo fe hian ka pick up rual chuan a rawn ti nghal a, a thinrim em avang chuan awm dun lo mah ila ka kimki chawih a, min vinna aw ka hriat chuan hlauhthawnna ka nei ringawt.

"Lo chhuak ang che, ka lo kal dawn" ka chhan dawn lai tak chuan a rawn ti leh hmuk a, ka chhan letna pawh nghak zo lovin kan inbiakna chu a titawp zui daih.

A thinrim hmel bawk sia thil thleng a awm ni ah ka ngai ve tawp a, mu ta lo chuan pawn lam chu ka pan thuai thuai bawk. Rei pawh pawna ka din hmain Henry-a chuan kan in kawt a rawn thleng a, motor chhung aṭang chuan

"Lo lut rawh" a rawn ti leh hmuk a, aw vin tak taka thu min pe reng ringawt mai chuan ka awm a ti nuam lo, amah ka hlauh rualin hrehawm ka ti tawh tak zet a ni.

Ka ṭhut luh lai te chuan min be leh tawh lo hrim hrim a, kan tlan chhuah hnuah pawh min la be ta chuang lo. Ngawi rengin a hma lam chu a en ngur a, amah ka en tih pawh chu a hre reng, mahse ka lam chu hawi pawh a rawn hawi eih lo.

Kan tlanna lam chu an in lam a ni lo va, a thim vek tawh bawk sia khawi kawng nge a nih pawh ka hre lo. Kan tlan vang vang hnu chuan motor chu a tiding a, a tih din hnuah pawh a la rawn ṭawng mai lo va, ka ṭah chu a rawn chhuak em em ringawt bawk.

"Enge i tih? Ka lo call lai che khan tu nen nge in awm? Enge in tih?" tiin ka lam chu a rawn hawi a, kei erawh ka mittui a lo tling fel der tawh thung. A hmel chu a rawn danglam zawk a, ka awm dan vang pawh chu a nih ka ring.

"Ka pa birthday kan lo lawm a, i phone call ka pick up loh avangin ka tihpalh a ni e" ti sepin ka hawi sawn leh vat a, motor kawngkhar chu hawngin ka chhuak ta daih. Ka mittui tling chu ka hru sawk sawk a, min hmuh chu ka hlau hle bawk.

"Ka tihpalh" rawn ti thum dupin ka hnung lam aṭang chuan min lo kuah a, tal chhuah chu ka tum nghal deuh a, mahse min kuah hneh em avang chuan ka tum buai rei peih ta lo law law.

"Mipa dang nen awm dun tur ang tlatin ka ngai che a, ka buai phili vek a ni e. Aw vin tak taka ka biak avang che khan ka tihpalh, ka lam lo hawi teh Hlute" rawn ti lehin min kuai her a, kei chuan a hmel pawh ka en duh rih lo, ka rilru chu a na ve em a ni. Ka khabe chu zawimuangin a rawn chawi a, chutah zet zawng kan mit a intawng lo thei ta lo.

"Kan thlen thui hma hian inṭhen leh zawk mai ang Henry, kan inkar hi a buai dawnin ka hria, kan inṭhen chuan kan na lo ve ve zawk bawk ang" ka ti zo chiah tihah rang zet hian

"Aih! A theih tawh loh, nang hi ṭhen leh mai mai tura kawp che ka ni lo, eng pawh tawk dawn ila ka ṭhen mai mai tawh dawn lo che" a rawn ti khauh hmuk a, kei erawh ka lo thaw huai ringawt. Ka rilru chu a buai, thil ho tê têa kan inthinrim khum zel dawn a nih chuan inkawp loh ka thlang zawk.

"Ka vin avang che khan ka tihpalh, i ṭap tih ka hmuh phei kha chuan ka tidik lo hle a ni tih ka hre chhuak nghal a, mahse mipa dang nena in awm dun tur anga ka ngaihtuah tlat avangin ka insum thei lo a ni" ka rilru hria ni awm tak chuan a rawn ti leh nghal a, a mitmeng aṭang chuan a hlauhthawn hmel tak tak bawk.

"Nimin maiah bul kan ṭan a, buaina a awm ka hlauh avangin inkawp leh loh mai pawh ka rawt nghal nghe nghe. Tin, ngaihzawng nei ngai lo leh mipate duh zawng pawha awm thiam lo tak ka ni a, chung zawng zawng chu i hre vek. Engtinnge mipa dang nena awm dun tura min ngaih theih? Engtinnge nimin lawka ka bialpa ni ta chu phatsan leh nghal thei tura min ngaih theih zawk? Ka ṭawng thei em em tih chu ka hria, ka thaw a vengin ka harh em em bawk, mahse inbumna kher hi chu ka thil huat tak pakhat a ni asin" ka tih zawh rual chiah chuan ka hmuiah tak min rawn fawp vawng vawng a, ka mittui chu a baw zâwih zui nghal.

"Aw le, ka thiam loh ngawih ngawih a ni e. Ka ngai em che a, ka rilruah i awm reng a, ka phone call i la thei bawk si lo nen ka ngaihtuahna a kal sual ta a ni" kan infawh zawh chuan a rawn ti dam dap a, ka mittui te chu nui chung hian a hru hul mial mial a, ka biang chu a kut pahnihin a dawm ran bawk.

"Engatinge min vin vak vak kher? Ṭha tak paw'n a sawi theih reng alawm Henry suala, pathlawi" ti vakin amah chu ka kuah vak a, ani paw'n nui ri nghawr dawt chungin min lo kuah ve nghal.

"My Leihriamtei is back" nui chung hian a rawn ti leh a, ka thinrim ṭan tawh bawk nen a mawng chu ka ṭham sak vak ringawt.

"Khatiang khan min ko suh Henry suala, zun ngah viau vel khanglang lo la chuan nang ang pathlawi hi ka duh tawp lo vang che. Ka veia ka duh che pawh hi ka inring ngai lo, i mawng te lah chu a ngo zek leh nghal. Nâaa, hrawk hrep dan tur che pawh ka hre tawh lo. Engatinge!? Engatinge!? Ka laka i awm dan avang khan thinrim khum hrep che ka châk tehreng nen engatinge ka theih miah loh?" ka ti vak vak a, ka awm dan chu ka inhrethiam tawh bik lo. Ṭah chhuak tih vel chu khawi lamah hian a ni ringawt, ka ze pangaiah ka let leh daih tawh.

"Leihriamte, khawi maw ka'n fawp leh teh ang che" tiin a âwm aṭang chuan min nam hla deuh a, ka en chho lai tak chuan min lo fawp leh ta chat. Kei lah chu dawl ang maiin ka lo zawr leh hnâp nghal a, a lakah chuan in control theihna ka tlachham vek zel ni ta berin ka hria.

"Haw ang aw" tiin ka dara chelh chung chuan motor lamah min nawr phei dat dat a, min tih dan vel avang chuan ka tum leh ta bûr bur mai.

Motor-a kan chuan hnu thleng chuan ka la titau a, ka titau laklawh ve tawh tlat. Ani chuan ka bianga lo piai phet a tum a, a kut chu ka lo vai thla sawk sawk zel. Ka inrin loh lai takin ka malah chuan a rawn ṭham vak a, ka va han ṭe ring mai mai tak.

A za ka ti bawk si a, thlah tura ka tih lahin a thlah duh der bawk si lo. Motor khalh lai a nih avangin kan accident mai te ka hlau rum rum a, nui khek tuar tuar chunga min thlah tura ka tih chuan min thla ve ta hram. Thinrim tum em emi kha ka va han dang chiang em, kan in ka thlen te chuan hlim leh hah hah tawh tak ka ni.

Chapter 14

A tukah chuan ka nu chu a titau nileng ṭhak a, ka pa chuan a thlem leh ta hna hnâ mai. Ka thil ngaihtuah chhuah pakhat chu kan thil lo tih tawh anga nu leh pate Prank chin chu a ṭha lo ka ti, ka pa hlauthawng hmel lutuk khan tih leh duh tawh lohna min pe a ni.

A thinrim te kha awm ka ti hliah hliah a, Peksanga phei chu a bulah a la ṭi deuh dûk mai. A chang leh a tlawn vel a, ka pa erawh a la lungawi famkim zan lo thung. Ka pa chu a lungawi lo ve tak na a, ka nu ber thlem a ngaih leh si avang chuan lungawi lo rei thei pawh a ni lo.

Zan lamah erawh ka nu chu a hlim leh tawh em em a, ka pa nen chuan an inchhaih nui leh uar uar thei tawh. An thawm vel hriat chu a nuam, hlim taka an awm dun chu hmuh a nuam a ni.

Keipawh ka hna ngai lamah ka kal ni tin a, inngaizawng e ti lo chuan Henry-a nen chuan kan inhmu khât khawp mai. Ka riah chilh tawh bawk si lo va, inhmuhna hun kan nei lo dun hle.

Chhun lamah hi chuan min rawn be ngai lo va, a buai a nih ka ring mai. Zan lamah erawh phone call in kan inbe ṭhin thung a, mahse a ṭawng tam lo ve chiang alawm.

Zawhna eng anga sei pawh zawt ila tawi tê hian a point tak a rawn sawi daih zel. Kei erawh ka dang a nal ṭha em em a, ṭawng han insum ve deuh ka tum apiangin ka thei lo, a bulah chuan ka tumna zawng zawng vawi leh khatah a bo nghal vek zel, kei ngei pawh hian a mak ka ti zawk.

Rilrua thil awm zep reng thei lo tih takah ka ṭawng chu a nin leh nin loh te ka zawt tawp zel a, ani erawh chuan a nin loh thu min hrilh ve leh mai zel bawk.

An ina ka kal hi chuan a fal emaw vela inhmuhna hun pawh kan nei ngai lo va, mahse ka haw hma hi chuan in a rawn thleng hman ziah zel.

Tin, pangai taka kan inngaihzawn hnu aṭang chuan in lamah min thlah ta ziah a, chu chu hmel inhmua kan awm hran theih ve chhun a ni mai.

Inrinni tak ngial pawh awl lai a nei lo va, a buai thei mawp mawp khawp. A chhungte chu ka lakah an fel ngaiin an la fel reng a, mahse Henry-a nen kan inngaizawng tih lam engmah an la hre lo thung.

Han hrilh tlawng chu ka zak ve deuh a, amah Henry-a tak phei chuan engmah a sawi ngai lo hrim hrim zawk. A ngawi thei em em a, a chhungte hriatthiam theih tur ang zawngin a awm ngai lo va, a pawi pawh ka ti hran lo.

Vawi khat chu kan chhungte kan inngaihzawn chungchang hriattir ka duh leh duh loh min rawn thut a, chhan mai dan tur pawh ka hamhaih hman hle. Ka ngaihtuah vang vang a, hrilh chu ka la huphurh tak zet a ni.

Ka rilru dik tak ka hrilh chuan a lu a bu nghut a, engmah a sawi chhunzawm leh tawh chuang lo. Keiin hrilh a duh tawh leh tawh loh ka zawh ve chuan ka ngaih dana a innghah thu a sawi daih a, ani chuan hrilh pawh pawi a ti tawh chiah lo tih ka hrethiam ve ta mai.

Engzuali nen chuan kan inbe zan tin deuh thaw bawk a, min zawh ṭeuh ṭhin avangin Henry-a nena kan awm dante chu chipchiar lutuk lovin ka hrilh ve mai ṭhin. Henry-a nen chuan awm dan teh vak kan nei ngai lo va, mahse zep lovah chuan ka ngai thei tak zet a ni.

Wednesday a ni a, Junior-a te result puanni leh a perform hun tur ni a ni a, Henry-a pawh a hna lam ṭhulh ṭhak khawpin kan bulah a awm ve a, chutia kan bula a awm ve ta run chu ka lawm kher mai.

Ka sawi fiah thiam chiah si loh hian hahdamna leh thlamuan ruk riauna ka nei a, nuam ka ti ru em em bawk. Ani erawh Junior-a awm ve vang nge ni a awm ngaiin a awm tawp a, mi pawh a en duh ṭhak lo.

Ni dang ang bawkin Henry-a chu Coat nen thlap a inthuam leh khup a, a hna chelh mekin a lo zir vel kher bawk nen a lang zahawm thlawt a ni.

A driver ṭawng thei zeta kha ka hmu tawh ngai mang lo va, amah hlirin a fapa pawh school-ah a hruai ṭhin a, a hna kal velah erawh driver dangin an hruai thlap zel thung.

"Junior, i pa i hrilh tawh em? I tihtur hi i pa hrilh tawh em? Nge i la zep reng zawk?" Henry-a'n motor a park ṭhat lai chuan ka ti thuai thuai a, a banah chuan ka chelh tlat bawk.

"Aih Miss, ka la hrilh miah lo, zawh pawh min zawt chuang lo" pangai deuh hian a rawn ti ve mai a, Henry-a lam ka va hawi chuan a motor park dan a dik leh dik loh a lo thlek vak vak a, keini lam chu a ngaihsak lo hle.

"Eng pawh ni se ṭha deuhin i ti dawn nia, chet bon hle tur a ni tawp mai. Awi kei chu a! I thil tihtur hian i pa saw a surprise vel reuh dawn ê, i perform huna i pa hmel awm dan tur mawlh ka hmu châk tawh. Video in ka lo cover dawn che a, theihnghilh palh te kha i nei ang e" nui ver ver chuan ka ti a, ka phur tawh lutuk chu ka za zek zek mai.

"Ka ti ṭha viau ang" inla Champ deuh hian a rawn ti nui ver ver a, a sam chu ka tuai sak vak vak ringawt.

Chutianga kan awm lai chuan Henry-a paw'n kan bul a rawn thleng a, kan pathum chuan School compound lam chu kan pan zui nghal bawk.

"Mi hian min en duh ê Henry, ka zak ve deuh. Kan thlate an lain ka hria, nang lah chuan Coat te i ha vel kher a, enge vawiin angah te i hak chhan? Pangai deuhin kal ve mai la, tihtur la nei i ang?" ṭhutthlenga kan ṭhut hnu chuan ka ti sep sep a, Junior-a erawh Back Stage lamah a lut tawh a, engtik hunah nge a rawn chhuah dawn tih erawh kan hre lo.

"Min en mai mai rawh se, chuan Coat ka hak chhan chu Meeting kan nei leh dawn" Henry-a chuan ka lam pawh lo hawi chuang lo hian a rawn ti duh lek chauh a, mi awm dan vela a buai ve thei miah lo chu mak ka ti a ni, kei ka buai hma tehreng nen.

"Ka tan hian zahthlak ve duh deuh a nia aw, mi sawi neuh neuh ka kai tih pawh ka hre ve vek si. Chutah nupa ang maiin ti hian Junior-a kan ṭawiawm a, Parents Teachers Meet a ni kher bawk sia ngaihbel chu ka awl ngawt ang" ka ti niah niah a, mask te chu vuah ve eng ang mah ila ka zak ru em em tho.

"Junior-a nu i ni vat dawn tho alawm" a rawn ti sup a, a thusawi avang chuan a lam chu ka hawi chiang kher mai. Ani erawh a mit aṭangin a nui tih ka hre thei a, a ban vei lam chuan ka lu a rawn chelh a, Stage lam chu min hawi tir zui nghal.

"Enge i sawi awmzia?" tiin a lam chu ka hawi phei leh ngat a, min lo en duh tawh lo hrim hrim, phakar reuh lutuk!

A thusawi chu ka ngaihtuah nawn leh ngut ngut a, Junior-a nu ka nih vat dawn thu min hrilh avang chuan ka pangai thei tawh rih lo.

Chutia ding taka ngaihtuahna ka sen lai chuan thawm a rawn awm a, Stage-ah chuan hmeichhe hmel fai ving veng hian thu a rawn puang a, naupangte chu perform turin a ko chhuak zui nghal bawk.

A ṭhen chu group angin an rawn zai a, a ṭhen an rawn lam a, keipawh ka hlim leh tawh khawp mai. Henry-a chu ka en zeuh zeuh a, a hmelah chuan hlim hmel reng a lang lo.

Thawk a la leh hawk ṭhin a, a bana Sana chu a en leh vawng vawng zel. Zai leh lam kan thlir nual hnu chuan Host chu Stage-ah a rawn ding chhuak leh a, chutah Host chuan

"Tunah chuan Special Item kan thlir ho leh ang a, rawn perform tur hi Class 5 student niin a hming chu Henry Lalsangzuala Junior a ni a, i lo sawm ang u" tiin a rawn puang khawk rum rum a, ka bula mi paw'n a ṭhut dan a siam ṭha ta sauh sauh a, a fapa chu a hmu châk ve tawh te pawh a ni ang.

Junior-a chu amah chauhin a rawn chhuak hmasa phawt a, a hnungah an Teacher ṭhenkhatin a hmanrua vel an lo hnuk chhuak bawk.

Music cool mawi tak chu an play a, music mil chuan thil lem a rawn ziak ta zeuh zeuh mai. Thlirtute chuan hmuhnawm ti em em hian kan thlir ṭhup a, a lemziah lah chu a mawi phian a, kan lo zir lawk ang chiahin a rawn ziak chhuak vek bawk.

A ziak zo tawh emaw tiin kut an lo beng dur dur a, ka bula mi ngei paw'n a kut chu a beng nasa hle mai. Junior-a erawh chuan a tihtur a la ti zo teuh si lo.

Vawi leh khatah music play chu a rawn dang thut a, Junior-a tê pawh chuan a thawmhnaw hak a thlak zui nghal.

Rap music chu a rawn in play pawp pawp a, Junior-a chu lam pah hian a rap ta zet zet mai. Boruak a danglam tâk lutuk avangin mipui chu kan au dur dur a, Junior tê chuan boruak a va vaw hawt reuh si em.

Au dur dur chungin kan ding ta sup sup a, ka bula mi erawh a ṭhu leh ta tlat. Mak tih hmel lutuk hian a fapa chu a en a, a fapa chet dan chuan a ṭhawng ve hle bawk a ni ang.

Chutah Junior-a bawk chuan a lukhum khum lai chu a pa âwmah tak rap zet zet pah hian a rawn vawm thla a, Henry-a paw'n zei lo deuh hian a lo dawng chat a, a fapa chet dan chuan mipuite chu min tihlim tak zet a ni.

Keipawh ka au vak vak a, video cover reng a lang lo, ka boruak hip tur tak ka hip ni berin ka hria.

"Ding rawh Henry, ding ve rawh, mi dang zawng zawng pawh an ding vek a nia, a nuam i ti ve miah lo em ni?" tiin a zakah chuan ka pawt ṭawng ṭawng a, mahse lung lian tak chawi tum ang vel a ni.

"I zak a ni maw? I va ho tak, a nawm tehreng nen" a awm dan avang chuan ka ti leh hluai a, ani erawh a lukhum ken chuan a hmai a khuh tlat a, lukhum kar aṭang chuan zah hmel deuh hian a fapa che vel chu a en ṭawk ṭawk bawk.

Junior-a a perform zawh meuh chuan ring takin kut kan beng dur dur a, Henry-a lam ka hawi chuan tu mitmei mah veng lovin ka nui chhuak ta vak vak.

Stage lam pawh hawi ngam lo hian a lo indawm kun ngul a, a inchei dan a formal bawk sia amah chu a nuihzat thlak thlawt a ni.

A lukhum ken lai chu ka laksak a, ngam zet hian ka khum tir hmak a, min va han melh rum mai mai em. Kei lah chuan thawveng tih hriat ngawih ngawih hian ka lo nuih ver ver a, a nuih duh miah loh vel khanglang avang chuan ka insiam chhiat khum vak vak leh ta ringawt bawk.

A tawpa tawpah erawh ka insiam chhiat khum vak vak avangin a rawn khi ve ta suk a, hlim tak hi ka ni ringawt.

Zirtirtute nen chuan Hall pakhatah kan inhmu khawm leh a, naupangte pawh an awm ve vek bawk. Junior-a chu kan inkarah a ṭhu a, a hlimin nuam a ti ve hle tih a hmel aṭangin a hriat theih.

School Principal in eng thu thu emaw ni a sawi hnuah exam result an puang a, Junior-a pawh a pass ṭha phian. Mathematics subject bikah chuan Grade A a hmu a, promotion term a lo ni bawk sia a lawm hle bawk.

An exam na hmasaa a Grade hmuh te chu ka en a, Mathematics bikah chuan B hlir a lo hmu a, subject dang erawh a tiṭha pangai hlawm khawp mai.

Henry-a chuan a fapa Progress Report Card chu a en vawng vawng a, a en deuh vawng vawng hnu chuan lawm tih hriat tak hian min lo nuih ve ta sak. Keipaw'n ka lo nuih let ve sen sen a, Junior-a'n Grade A lai a rawn hmu chu ka lawm.

"Fapa i va nei Cial ve le pu Henry? Mipui zawng zawng pawh min chawk hlim vek alawm" motor awmna lam kan pan laiin pa pakhat hian a rawn ti a, keini pawh a lam hawi chuan ka ding ta ṭhap.

"I va tilawmawm ve, a Cial vak pawh ka lo hre hleinem" Henry-a chuan a lo ti ve mai a, chu pa erawh chu a khi deuh reng mai. Henry-a chu a chibai lâwp lawp a, Henry-a erawh chuan inchibai chu a peih loh hmel hle.

"Hei hi i unaunu em ni? A va hmelṭha ve, Thana ka ni e" tiin chu pa chuan ka lam hawi hian min lo bia a, chibai theih turin a kut chu a rawn phar chhuak a, kuhva a ei sen tûam tuam bawk sia a hmel chu ka ten chi tak a ni.

"Kan kal ang e, pu Than" ram hmaka lo tiin Henry-a chuan chibai ka tumna kut chu a rawn chelh vat a, motor a park na lamah chuan Junior-a nen min hruai phei ta vang vang.

Dik tak chuan chibai ka châk bik reng reng lo, hawihhawm thila ka ngaih avangin chibai kha ka tum ve mai mai a ni.

"Pa, ka surprise che em? Miss nen hian plan kan lo nei a, engkim kha Miss min zirpui vek a nia" motor-a kan chuan hnu chuan Junior-a chuan a ti zet zet a, Henry pawh chuan a sama tuai chung hian a nuih ve suk a, chutiang bawkin keipawh.

"Surprise tehreng mai, min tizak alawm Junior" nui chhuak hawk chung hian Henry-a chuan a ti a, a pa thusawi hrethiam ve tak tak ang hrim hian Junior-a chu a nui nasa hle.

In lam pana kan tlan laiin Junior-a chuan zana a pass lawm a rawt a, keipawh kal ve ngei ngei turin min leh zet zet tawh. Amah tê lah chu a hlim em em a, a pa nen kan inkar hre nâ se chuan a hlim rei ka ring lo, a pa chuan ngaihzawng a neih a phal ka ring lo a ni.

Henry-a pawh chuan a fapa duh chu tihsak a tum thu a sawi a, mi pawh rawn hmasa miah lo hian a fapa chu a pass lawmnaa ka kal dawn thu a hrilh leh ringawt tawh.

A hmel ka en lah chuan min en duh ṭhak lo va, kawng chiah chu a en zaih. Junior-a an ina kan dah hnu chuan kan in lama kan pan a, meeting a la neih dawn avangin a dress pawh engmah a la thlak bik lo.

Ka rin rilruk ang ngeiin kan in lamah kan tlan lo va, a awm ve tho. Thla 1 leh tih chauh la inngaizawng mah ila kan pahniha awm falna hun pawh kan nei ngai mang lo va, kan nei lo tluk a ni.

Min hruaina hmun chu a rehin a boruak pawh a thiang ṭha khawp a, khawi hmun nge a nih tih erawh ka hre miah lo thung. Motor aṭang chuan a chhuk a, a chet dan chu ka lo thlir reng ringawt. Ka ṭhutna lama lo kalin kawngkhar chu a hawng a, min kai chhuak nghal bawk.

A chet dan vel chu a romantic reuh ka'n ti khawp a, a hmuh loh lai chuan ka khi ver ver mai. Motor bul maiah kan ding mai dawn emaw ka tih chu ngawi reng hian hma lam min panpui mawp mawp a, min tih dan vel chu film-a mi a ang ka ti tawp.

Hei film-ah te chuan a changtupate'n a changtunute an kai hrang vel ngei zel a, hmun fianrial tawkah biahthu di an inhlan vel ṭhin kher hi!

Min dinpui hnu pawh chuan a la rawn ṭawng chhuak leh chuang miah lo va, a hawina lam ka hawi chuan Aizawl khawpui mawi tak chu ka hmu a, a mawi ka ti ngei mai.

"Meeting in la neih dawn kha Henry, kan in lamah min thlah vat zawk la" ka tih chuan a rawn thaw chhuak hawk a, ngaihtuahna buai hmel deuh pu hian min lo en a, a hmel lan dan avang chuan thil dik lo awm ni turah ka ngai ve ringawt.

"Enge dik lo awm a? I hmel a dik miah lo a nia Henry? Engatinge? Thil ṭha lo a thleng em ni?" ka ti zung zung a, ani chuan min en reng chungin ka kut a vawnna chu a tinghet sauh a, a rilrua awm chu ka hre châk tak zet a ni.

"Ka nupui ni thuai mai ta che" aw zawi deuh tak hian a rawn ti sup a, ring lo mahse a thusawi chu ka hre chiang em em a, ka bengah chuan a fiah hle zawk a ni.

"Maw? Engatinge i nupui atan chuan min duh hmanhmawh em em a? Thil dik lo a awm chiang ti raw?" tiin ka kut pahnih chuan a biang chu ka dawm a, hlauthawng rilru takin ka chhoh melh ral bawk.

"Awm lo ve" rawn ti leh supin a rawn kun hniam a, dam zet hian min lo fawp a, keipaw'n ka lo dawh mai mai thei leh ta bik lo. Vawi leh khatah min pawm kang lawp a, mahse kan hmui erawh a la inzawm reng thung.

"Min hrilh rawh Henry, thil eng emaw tak dik lo chu a awm chiang a ni" thawchham lek leka kan infawh hnu chuan ka ti sep a, ka chal leh a chal an insik reng avang chuan ka ṭawng ring hran lo hle.

"Natukah ka zin dawn a" ti supin min rawn fawp leh nghal a, a hmaa min fawh ngawng ngawng ang ni lovin min fawp deuh nghal zawt zawt a, a hmui zun ngah lutuk avang chuan chhanglet lo thei ka ni leh ta lo.

"I zin dawn a, chuan engatinge i lungngaih hmel em em? I thang rei dawn em ni?" ka nghawnga a hmai a phum reng tâkah chuan ka ti chhuak leh sep a, min la pawm kang reng a, lei chu ka la rap leh lo hrim hrim zawk a ni.

"Ka zin peih lo hle a ni" rawn tiin ka dar vel chu a fawp pah reng a, a thil tih mek avang chuan ka mur chhuak vekin ka hria. Ka thaw a rang a, ka kut chu ka hum ruh sawt hle bawk.

"Ka nupui ni tawh mai rawh Hlute, ka nupui ni tawh la chuan ka hruai ve ang che, ka zinna turah hian ka hruai chiang khawp ang che" ka mit taka min en chung hian a rawn ti a, a mitmeng mawi lutuk chuan min en tuiral thei mai dawnin ka hria.

"A la hma mah mah em mai Henry, thla 1 leh tih chauh kan la inngaihzawn hî" nuih sak chung chuan ka ti a, a hnar zum mawi tak chu ka piai a, ani erawh chuan nui miah lo hian min lo en reng thung.

"Kan inngaihzawn rei zawng lam ka ngaihtuah ve hleinem, nang hi ka nupui atan ka duh che a ni. Kei leh ka fapa Junior-a atan hian hmeichhe ṭha tak i ni dawn tih ka hria, chuvanga thlang che ka ni bawk" a rawn ti ril raih a, ka laiha ka laihzia chu pui tak a ni. Kan inmelh no vel bawk si a, chutah kan la inhnaih em em zui.

"Ihh......min....min tilai vel em mai Henry, i thutak hmel phian bawk si" ka ti ringawt a, ka thusawi avang chuan a rawn nui chhuak ta hawk. Kei erawh zah avangin ka sa vek a, ka hmel hmu reng se ka duh loh avangin ka kuah ta daih.

"Min nuih miah suh aw zun ngah vel pa, pathlawi zuna uai hi ka rin ai daihin a lo na, i hmel ka hmuh loh te hian ka ngai veng veng zel che" a nui thawm ka la hriat reng avang chuan ka ti leh tawp a, ani erawh chuan min virpui vak vak chung hian

"Nang tê reuh hian ka ti i tiza lutuk!" a rawn ti leh daih a, keipawh ka nui chhuak ve ta cher cher a, ka nuih chhan pawh kan thusawi a inmil loh theih lutuk avang leh kan in sawi sei hlei ṭhin em vang a ni.

"Min dah thla tawh teh Henry, ka ding duh tawh a nia, chuan ti hian nang hian min propose ve tihna em ni?" ka tih chuan min pawm tawh lovin leiah min dah thla ve mai bawk.

Ka zawhna pawh chhang leh ta chuang lo chuan min fawp leh ringawt tawh, ka hmui zek zawk lah chuan a lo chhang let ve hman ziah leh nghal.

"Haw tawh ang aw, chuan lo inngaihtuah ang che" kan infawh zawh chuan a rawn ti a, ka zawhna pawh chhang leh tawh chuang lovin motor awmna lamah min hruai phei a, a zia ni mahse ka la pawm thiam chiah lo ṭhin.

Kan haw lam chuan hla ka play a, ka zaipui vak vak a, Henry-a chu ka bialpa niin Mizoram Health Minister ni eng ang mahse ka zak thlawt lo. A bulah chuan ka ngampain ka thlamuang em em zawk a, ka awm dan chu mite'n hmu pawh ni se an la ringhlel tho ang tih vel tur a ni.

Khang thla kal ta chhung khan ani chuan ka zia zawng zawng a hre nghal vek a, min hrilh dan phei chuan kan inngaihzawn hma aṭang tawh ka zia awm ang tur chu a lo hre vek zawk a lo ni.

Kei erawh chuan ka duh ang takin a mizia ka la hre chiang ve thei lo va, a ṭawngmawh vang nge ni ka hre ve zung zung thei miah lo. Ka room-a ka luh te chuan kan awm dan chu ka ngaihtuah let a, mi mawl ang maiin ka nui leh ta ver ver mai.

Zan a lo ni a, Junior-a chuan a pa phone aṭangin min lo video call a, a pass lawmnaa kal ve tur chuan sawm tak tê hian min lo sawm ta.

Henry-a pawh chuan min sawm ve bawk a, ka kal loh chuan engkim ka chhungte hrilhah min vo a, ka va han ngei mai mai tak. A tawpa tawpah chuan Junior-a pass lawmnaa kal chu ka remti ve thei ta hram a, Henry-a chuan min lo hruai nghal tur thu a sawi bawk.

Ka chhuah lawk tur thu ka nute ka hrilh chuan mak an lo tih hmel hle a, mahse ka kalna tur leh ka kal chhan tur ka sawi hnu chuan an lo phal nasa mai. Ka nu phei chuan Henry-a laka mark score em em turin min ti leh ta hrep zawk a, ka nui vak vak ringawt.

Junior-a pass kan lawm chu boruak a nuam hle a, chhun lama a perform ang chiahin Junior-a chu a perform leh a, mahse Henry-a ber chu a la lungawi thei chuang lo. Zah hmel deuh hian a meng a, a fapa awm dan avang chuan a ṭhen chai chai ringawt.

Kei lah ka zia a zawnga ka control theih loh ber mai a lo chhuak leh pek a, Junior-a nen chuan kan han rap dun tak tak mai a nih kha! Pi Rinpuii leh ka pu pawh an nui nasa hle a, Henry-a erawh a lo kiai suk suk duh lek chauh.

Hlim takin thil kan ei ho a, zan dar 9:30 velah Henry-a chuan min thlah a, mahse kan inah chuan ka lut nghal mai duh bik lo. A tuk maiah a zin tawh dawn a, ka ngai dawn hian ka hria a ni.

"Junior-a te an chawl rih bawk sia ka lo kal tawh rih dawn lo a nia, Junior-a tan pawh chawlh hahdamna a ni mai" hma lam en ngar chuan ka ti sep a, ani chuan ka kut chu a la hum ran a, kan tlan chhuah aṭang tawh a la thlah mang lo.

"A pawi lo, ka lo leng ve tawh dawn alawm, zawi zawia kan chhungte hi kan hriattir ve a ngai tawh a ni" aw dam zet hian a rawn ti a, ni dang ang chu ni se ka duh lo leh ngei ang, mahse tunah chuan a thusawi chu ka pawm em em thung tawh a ni.

"Hmelṭha em em nu" a rawn tih leh avang chuan a lam chu ka hawi thuai a, min lo en ran mai. Ka thin phu chu a rang nghal em em a, ka sa chhuak leh vek tawh zawk.

"Pathlawi hmelṭha em em pa, zun ngah pa, i ka aṭanga ka hmelṭhat thu hriat chu a makin a lawmawm hle mai" tiin a biang chu nui ver ver chung hian ka piai sak vak a, ka zam lutuk tihreh ka tumna a ni pakhat.

"Lut tawh rawh le, i lut lo a nih chuan ka ru hreh miah bawk si lo che a, thil a kal dik lo palh ang" nui sak chung hian a rawn ti a, ka insum thei lo chuan a lama awn phei pahin a hmuiah ka va fawp zeuh a, min fawh let hmaa awm sawn let vatin ka chhuak ta thuai.

"Ka lo haw hunah i châk lo vang" motor chhung aṭang chuan nui chung hian a rawn ti a, kei chuan ka lo chhiat khum vak vak a, kan in kawngka ka thlen pawh chuan a nui ri chu ka la hre phak vek. Ban ka vai lâwp lawp hnuah a tlan chhuak a, a awm lo chiah chu ka ruak nghal huai mai.

Kawngpui ah chuan ka chhuk thla leh a, a motor tlan mek chu ka en zui vawng vawng a, mahse Henry-a motor ni ngeia ka hriat chu a ding ta. Inherin ka awmna lamah chuan motor chu a lo tlan let leh a, Henry-a motor a ni lo emaw ka ti hman hial.

Motor chu a rawn hnai zel a, chiang taka ka lo en chuan Henry-a motor ngei a ni e. Motor din rualin Henry-a rawn chhuak a, ka lam chu hmanhmawh tak hian a lo pan hmawk hmawk a, kei chuan a chet dan chu ka lo thlir reng ringawt.

A ban phakah ka awm chiah tihah a lamah chuan min pawt lâwp a, chiang zet hian min fawp zui nghal. Min fawh dan lah chu inhmu leh tawh ngai lo tur ang maiin a duhthaw em em a, keipaw'n ka thiam ang angin ka lo chhang let ve bawk.

Thaw chham lek leka kan infawh hnu chuan ka chal leh a chal chu a insik tir a, ka men rualin min lo pawm kang leh daih tawh tih ke hre ve chiah. Engtin em em hian nge maw a theih zawk ni!? Ka awm dan hre lek lo khawpa danglam hian min siam ziah a, ka tan chuan a special ve thlawt a ni.

"Naktuk chu lo kal ve mai ta che" a rawn ti sup a, kan chal chu a la insi reng a, a hmel ka en chuan a lo la meng chhuak lo hrim hrim.

"A chi loh Henry, mahse ka ngai ngawt ang che" ka lo ti ve sep a, kan awm dan chu a va nuam chiang kher em. A taksa lum ham hamin mi ur te chu nuam ka ti a, tlak hlau tak ang maiin ka kuah ṭai bawk.

"Aw le, lut tawh rawh le, keipawh ka va haw tak tak tawh ang e" kiai suk hian a rawn ti a, a va han hmelṭha chiang tak em, engtin nge Pathian hian ani anga hmelṭha hi a siam thiam zawk reng reng ni!

"Min dah thla la" nui ver ver chuan ka ti a, lut turin min ti mahse min pawmna aṭang chuan min la dah thla miah lo va, ka thusawi awmzia a hriat hnu a rawn nui ri ve ta hawk.

"Va lut rawh le" tiin min pawmna aṭang chuan zawimuang hian leiah min dah thla a, lei ka rah rual chuan ka thawmhnaw vel chu ka chul mar zui nghal mawlh mawlh.

"Kal hmasa la, ka lo thlir liam ang che" nui sen sen chuan ka ti a, a lut hmasa zawk ni lova a tlan liam lai thlir chu ka châk tak tak.

"I luh hma chu ka kal lo vang" a rawn ti leh tlat a, kan inthlahlel tawn vel lutuk chu a nuam chiang alawm, chhaih hrep chu châk hle mah ila a tlai ve tawh ang reng bawk si a, ka runluih buai duh ta lo law law.

"Aw le, a nih ka va lut ang e" tiin dingdihlip âk chung hian a biangah chuan ka han fawp leh hram a, a hma ang chiahin min man beh hmain ka tlan ta daih.

Kan in veranda-a ka din hnu chuan a lam ka hawi phei leh hram a, ngawi reng hian min lo en a, ban vai lauh lauh chungin kan in chu ka lut ve thei ta hram.

Chapter 15

Zan lamah boruak ka hip fuh bawk a ni ang ka zing tho te chu ka zâng vâh a, ka nu aiin ka tho hma zawk nghe nghe. Peksanga zing thovin ka ei rawng bawl lai min hmuh chuan mak a ti em em a, a tui in laite chuan min en vawng vawng kher.

Chutiang bawkin ka pa pawh chutiang huna ka thawh avang chuan mak a tih hmel hle a, ka lo nuih vak vak ringawt. Ka laka an awm dan chu awm ka ti hliah hliah, a chhan chu kei ṭawng thei leh thawveng em em hmeichhia hi ka tho hma ngai lo tlat alawm.

Nula ni ve si chu ka mu kawm kûk zel a, zing dar 7 hma hi chuan ka tho ngai lo hrim hrim hi a ni tawp. Amaherawhchu ka chhungte chuan min hau ngai chuang lo va, fiamthua min sawisel te a nih ngawt loh chuan kei ve teh lûl hian selna awka ka dawng ngai lo.

Chaw kan ei laite chuan ka mood a on em em a, ka chaw ei te chu a dik zaih a, ei tui tak hi ka ni ringawt. Tukṭhuan kan ei kham chuan Engzuali hnen aṭangin phone call ka dawng a, khuma mu der der pahin kan inbe ta char char.

Chutia kan inbiak lai vek chuan Henry-a hnen aṭangin call ka dawng leh nawlh a, a pawimawh a nih ringin Engzuali nena kan inbiakna chu ka titawp a, ka pick up zui nghal.

Henry-a chuan min hmuh a duh thu a rawn sawi a, kei tak pawh chuan a hmel chu ka hmu châk a ni. Ni lo, a hmel hmuh chauh ka châk lo, a bula awma a mi uapna hnuaia awm chu ka châk leh veng veng tawh a ni.

Dawra kal tur angin ka chhungte bulah chuan ka insawi a, rei pawh ka nghah hmain Henry-a chuan kan in kawt a rawn thleng nghal.

Ngawi rengin motor-ah chuan kan chuang dun a, Airport lam kawngah kan tlan miah lo bawk. A hmel chu ka en ṭhin a, a hlim nge a lungngai tih pawh ka chhiar thiam leh chuang lo.

A hmai vel chu mipa dang ang lo takin hmul leh eng ilo vel a awm lo va, a fai veng a, amah a ngo bawk sia a hmelṭha thlawt a ni.

Ka phone chu phawrhin a thla ka laksak a, ka lam lo hawiin a nui hmel mawi zet chu min hmuh ve ta. A va hmelṭhain a va han pa chiang em, a hmingah Henry Lalsangzuala tih ni tawh lovin Lalfamkima tih phuah sak mai ka nâp.

Steering hmaa a phone dah chu message lo thleng tih hriat zet hian a rawn eng vâ a, chuta ka thil hmuh chuan min ṭhawng chiang hle. Ka hmu sual a nih ringin a phone chu ka ban vat a, ani erawh ka chet dan avang chuan a rawn nui ri hawk thung.

"Engtinnge ka thlalak hi i neih theih Henry? Awi le! Ka la inrin loh hmel em em zui, a rukin ka thla i lo la a ni mâw?" ti niah niahin a phone wallpaper chu ka thlir dauh dauh a, ka zoom chian phei chuan zing tho hlim hlawl ka ang ka ti tak zet.

"Ka ta i nihzia a nih kha!" pa tak hian a rawn ti nghet charh a, a thusawi tawi tê chuan ka nileng mood a tiṭha leh vek dawn tih ka hre nghal. A lam hawiin ka khi ver ver a, va kuaha va fawh hrep mai ka duh.

"Enge min duh ve chhan Henry? Min lo duh ve pawh hi ka ring miah lo asin, kei phei chuan duh enah pawh en che ka tum lo kha a nia, tunah erawh ka mize oppisite chiangbal zunah ka uai hna hnâ chu a ni tawh ber hi!" a phone dah ṭhat pah chuan ka ti a, a bula awm a hahdam thlak bawk sia ka rilru chhungril chu a hlim veng veng mai.

"I vun no leh mam hân te, i mitmeng mawi leh i hmui khawizu ang maia thlum tui em em mai te hian nang hmu lo leh tawk lo thei lovin min siam a, ka hmuh tirh phat aṭang che khan i danglamzia hi ka hre nghal" a rawn tih chuan kan hma lam en reng chungin ka ṭhen ṭhâw a, lai em em mah ila ka lawm tho bawk si.

"I inla zei vel ê, khatianga biahthu di ril ûnkhan lutuk min hrilh fo chuan ka alh thei mai ang, chuan ka vun hi chu a mawi ve tak takin ka hria. Ka hmel pawh hi a chhe hran lo, mahse ka zia ber hi a buaithlak ta a ni. Eee chuan ka tawi hret ti raw? I tan hi chuan ka tawi mah mah maithei bawk, mahse a tê te hi kan duhawmin kan hmelṭha zek zel a nia" rilru thawveng zet hian ka ti zawt zawt a, ani pawh ka thusawi avang chuan a rawn nui ri ve leh ta hawk.

"Mi dang ni ngat la chuan i ṭawng theih lutuk avang hian kut hial ka thlak duh ang che, mahse nang tê reuh hian i zunin min phuar tlat bawk si a, ka dawl zo ngâng lo a ni e" motor la khalh reng chung chuan a rawn ti ril leh raih a, ka insum rei thei ta lo.

"Awi awi awi, ka awih vel thlawt lo. Sawi tawh suh, khatiang ṭawngkam thlum deuh kha sawi tawh miah suh, ka dawngsawng thiam lo, min tizak a! Nâaaaa, ninawm, mahse a nuam chu ka ti tho bawk si" a motor khalh laia va kuah vak vak pah chuan ka ti mawlh mawlh a, a bengah te chuan ka pawt thul.

Ani erawh chuan hma lam en rengin a lo dawh mai mai thung a, Lalzaidamvela leh Lalṭhachiangkuanga hi a ni ringawt!

"A hnungah khian ka ṭhu daih dawn" tiin a hnung lamah chuan ka ṭhu chho thuai thuai a, kan awm dan vel avang chuan ka la lai em em tho.

Min biak dan te, min duh thu sawi ri miah si lova min duhzia min hriattir dan te chu a ril thlawt a ni.

"Duhawm nu" khi suk hian a rawn ti a, darthlalang aṭang chuan kan mit a intawng chat bawk. Keipawh chuan ring zet hian

"Duhawm pa" ka lo ti let ve vak a, laih tawh loh ka duh avangin phone chu ka khawih ta daih.

Ka awm dan chu mite chuan hria se over min ti ngei ang, mahse ka tum a ni bik lo, ka mizia ang nei tan lo chuan hriatthiam theih pawh a nih ka ring lo bawk.

Motor chu a ding deuh dawt a, Henry-a chu pawnah a chhuak a, motor kawngkhar hnung lam lo hawngin ka bulah chuan a rawn ṭhu lut zui nghal hmak. Ka phone khawih lai chu a rawn la a, a chet dan avang chuan ka lo en ta hâw.

A taksa ngheng tur chuan min pawm kang lâwp a, a ngawi leh reng tawh bawk sia a chet vel dan chuan a tipa ka ti leh tlat tawh. Nui sen sena ka en lai chuan ka hmuiah tak a rawn fawp a, a tir tê aṭangin a duhthaw nghal khawp mai.

Min fawh dan a dangdai tâk êm avang chuan lo chhan let mai nachang pawh ka hre lo va, ka chhang let hman mang lo zawk a ni.

A lei chu ka ka chhungah a rawn hawlh lut a, ten miah lo hian ka lei chu ka lo chet ve a, chu chuan a tiphur khawp mai. Kan hmui chuan inzawm loh lai reng a nei lo va, ka taksate chu a chul kual dan dan pah bawk.

Vawi leh khatah ka hmui a fawhna aṭang chuan hmun dangah a pakai thut a, ka thaw chhuak hawk nghe nghe. Ka ir leh ka dar velah a hmui a vah kual tir zawm mawlh mawlh a, a kut chuan ka hnute a ṭham tawn tawn bawk.

Phat rual lovin min tih dan vel avang chuan ka danglam a, ka danglam dan lah chu tisa châkna a ni tih chiang takin ka hre bawk. Ka awm ngaihna hre lo chuan a coat hak lai chu ka hmer ṭawng ṭawng a, ani lah chuan a thil tih chu tawp mai a tum loh hmel khawp.

A hmui chu ka âwm bawrah a sawn thla leh a, ka thin phu rite chu a hriat vek theih ka ring hial a ni. Ka ngaihtuahna tihfima a chet dan chu lo dan hram hram ka tum a, mahse ka danglam nasat lutuk tawh avangin a harsa hle.

"Henry, kan awm dan hi a dik lo" men pawh meng mang lovin ka ti chhuak ṭawk ṭawk a, ka aw te chu a fiah lovin a zawi hle bawk. Ka thusawi avang chuan a chawl deuh dat a, ka mit takah chuan min lo en chho ta.

"Ka la virgin" tisa châknaa khat mitmenga min en reng avang chuan ka lo ti ringawt a, a awmna aṭanga rawn insawn chhovin ka hmuiah chuan a rawn fawp a, ka lo danglam leh nghal vek.

"Sex ka hmanpui lo vang che" min fawh vawng vawng hnu chuan a rawn ti phelh ve phang a, a aw aṭang chuan kei ang thovin in control a harsat ve tih ka hrethiam. Chutah ka kawr chu a hlim tawm chho vek a, ka va han hlauthawng hman mai mai tak em.

"Sex ka hmanpui dawn lo che, mahse nuam takin ka siam dawn thung che" ka awm dan hrethiam zet hian a rawn ti thuai a, ka hlauhthawnna erawh a la reh famkim thei chuang lo.

"Henry!!" ka Jean kekawr phelh mai a tum avang chuan ka lo ti leh thuai a, a kut chu ka chelh ran bawk.

Ka hlauthawng hle a ni tih hrethiam zet hian a kut pahnih chuan ka biang a rawn khuap a, chiang zeta min en chung hian

"Ka nupui i nih hma chu i taksa chhungah hian ka lut dawn lo, min ring rawh. Min ring em Hlute?" a rawn ti sup a, mak tak maiin amah chu ka ring nghal em em.

Ka rinzia lantirna'n ka lu ka bu nghauh nghauh a, pa lutuk tak mai hian a rawn kiai suk bawk.

A zun vei ngawih ngawih theih tur khawpa ril leh dam hian min rawn fawp a, min fawhna chuan hlauhthawn reng reng min pe tawh lo. Zawimuangin a hmui chu hnuai lamah a vah thlak tir a, ka hnute chu a rawn fawp ta.

A fawh loh lam chu a ṭham tawn a, a kut lum leh hrawl taka ka hnute a ṭham avang chuan ka buai leh vek a, hlauh vang ni miah si lo hian ka thate chu a khur thei hial.

Ka hnute hmur chu a fawp uar bik hle a, chumi avang chuan a ranga rangin ka tisa châkna a rawn chhuak nghal. A thil tih lai chuan eng thil dang mah min ngaihtuah tir thei tawh lo, amah leh tisa châkna tih chauh lo chu!

Ka hnute hmur a fawhna aṭang chuan ka kap lamah a tawlh thla leh a, ka lai fawp reng chunga ka kekawr a pawh thlak laite chuan ka che hlei thei lo va, engkim hre si khan ka taksa chu ka thunun thei miah lo.

"Henry! Henry! Ni lo, ka thei lo vang" ka hmeichhiatna a kuta khawih a tum lai chuan ka lo ti thuai thuai a, ka aw te chu a phelh phang mai. A kut chu nghet takin ka chelh a, ani paw'n min lo en chho rang kher mai.

"Ka inthunun zo dawn lo Henry, chutiang bawkin nang pawh i inthunun zo bik lo vang. Chuvangin duh tawk ang, kan inmamawh tawn luatah kan inneih hmain Sex kan hman mai ka hlau a ni" ka ti chhuak hliai a, kei phei chu ka inthunun thei lo chiangbal tawh zawk.

"Sex ka hmanpui lo vang che tih ka intiam e, mahse nawmna nasa tak pek che ka duh a ni" a rawn ti thawp sup a, engvanga a thusawi chu ring nghal em em zel nge ka ni pawh ka hre tawh lo.

Ka lo buk khum nghauh avang chuan a rawn insawn chho leh a, a hmui nem tak chuan min lo fawp zui leh nghal. A kut chuan ka hmeichhiatna chu a khawih a, kei erawh ka lo a ang nghal pham.

Kan la infawh reng avangin a ka chhungah chuan ka thaw lut ham ham a, a hnung chu ka hmer ṭawng ṭawng bawk. Ka kap lamah a insawn thla zâi zai a, ka lai fawp pah chuan ka hmeichhiatna chu a kutin a rawn nuai ta, kei chu nawmna nasa lutuk ka tawn avangin ka lo ṭe chhuak lo chauh a ni.

A nuai ne nê a, chutiang khawpa thil nuam leh ka tisa châkna ti chhuak thei chu ka la hre lo. Chutah a kut chu chet duh tawk tirin a hmui chuan ka hmeichhiatna chu a rawn liak a, a kut chung lama a rawn dah chhoh chu nghet takin ka lo hmer vak ringawt.

A lei chuan ka hmeichhiatna chu a thai kual vel a, zep lovah chuan Sex hman ka châk em em tawh zawk a ni. Ka hmui ang mai chuan ten miah lo hian ka hmeichhiatna chu a liak zawt zawt a, a tira a liah ne nê aiin chu chuan nawmna min pe hnem zawk. A tawpah chuan ka insum zo ta lo va, Sex hmang miah lovin a vawrtawp chu ka thleng ta der.

Henry-a chuan ka taksa chhung aṭanga thil lo chhuak riai riai chu tenna nei miah lo hian a lo liak a, kei erawh ka la phu euh euh thung. Ka kut chu a rawn la thut a, a belt phelh sawk sawkin a mipatna chu min khawih tir a tum ta mai.

"Ni lo Henry, ka ti ngai lo, ka la ti ngai lo" tiin ka kut chu phih thla vat a, kan awm dan chu ka duh lo vel vek tawh.

Ka awmna hmun leh kan thil tih lai hre lek lova min siam te chu ṭha ka ti lo hnuhnawh a, liam vek tawh mahse thil ṭha lo dang tihbelh ka duh tawh lo.

"Ka kekawr chhanah tal aw, min hrethiam teh Hlute" tiin ka kut chu a rawn la leh a, a kekawr chhanah chuan a mipatna pawng ûl chu min khawih tir a, ka tih ngai loh a nih miau avangin zam chhe tak a ni.

Ka zei loh em avangin a kut chuan ka kut chu a hum hnan a, ka meng ngam tawh lo hrim hrim. A kekawr chhanah ni mahse a mipatna chu a khawng ṭha em em a, a len hmel hle bawk. A lawng phei chuan ka hmu ngam lo sa, a len turu hmel em mai.

Minute 2 chhung vel chutianga a mipatna hrawl hmel zet min khawih tir hnu chuan ka kut chu la kangin a fawp vang vang a, ka kutṭang a fawhna ringawt pawh chuan min tidanglam leh vak thei, em em lutuk hian a!

Ka kawr inphelh phung chu min siam ṭhat sak leh vek a, a chet dan avang chuan engtin mah ka lo la insiam ṭha lo tih ka hre chhuak ve ta chauh.

Ka thawmhnaw vel min hak fel tir vek hnu chuan ka hmuiah min lo fawp leh vang vang a, engati nge amah chu ka thlakhlelh em em tâk ka hre lo, engtin pawh min tawk se nuam ka ti vek tawh ni ber hian ka hria.

"Engatinge i ngawih tâk reng?" kan haw lam chuan a rawn ti a, a hmel ka en chuan a lo nui sun sun a, hmelṭha viau mahse pawn lam chu ka hawisan daih a, chutah pawn lam la en reng chung chuan

"Ka zak ka zak! I hrethiam ve mai lo em ni? Khatiang kha vawi khat mah ka la tawng lo, mipa thil phei chu ka la khawih ngai lo, min tihluih tlat avangin ka ti ve tawp a nih kha! Awi kei chu a! Nasa taka Sex hmang ang maiin ka inngai tlat ringawt, ka virgin tawh lo tih dawn lahin ka la virgin var var bawk si" ka ti bawrh bawrh a, a rawn nuih hawk hawk avang chuan ka melh hrep a, nuih insum tih hriat zet hian hma lam chu a la en daih zui.

"I hriat reng tur thil a nih kha!" a rawn tih phei chuan a samah ka va kek pawp pawp a, ka kut thlakte chu na tih loh hmel zet hian a lo nuih pui mai mai a, ka titau ta ringawt.

Ka titau ve tak nâ a, motor a tihdin hnua min lo fawh avang chuan rei lovah ka rilru chu a pangai leh nghal vek thei. Chawhnu lama an thlawh chhuah tur thute min hrilh ve luam a, a awm dan aṭang chuan min ngai ve tak tak dawnin ka hria.

Kei phei chuan sawi kher lo mah ila ka ngai em em dawn tih ka hria a, ka awm dan aṭangin ani paw'n a hriatthiam vek ka ring. Kan ina ka lut te chu ka ni huih a, zing lama mood ṭha tak kha ka awm thiam leh tawh der lo.

Zanriah kan ei kham deuh âwr tihah kan Department group-ah chuan notification a lo thleng hlawl a, ka open chiah mai chu ka va han meng lian chiang em. PDF lo thleng hlim hlawl chu ka hawng vat vat a, serial number 35 ka en chuan Distinction-ah ka pass tih ka hmu nghal.

Ka au vak vak a, ka ṭe ri vel avang chuan ka chhungte chu an lo hawihai hle. Kei lah hlim lutuk avangin ka zuang tawr tawr a, ka nu chuan

"Engati chiam chiam nge Hlute?" a rawn ti ta nge nge a, engmah chanchin ka la sawi bawk si lova ka chhungte chuan ka awm dan chu an hrethiam lo chiang kher mai.

"Ka pass, ka pass chiang lutuk, Distinction-ah ngat ka pass maw le" tiin ka phone chu ka hmuh hlawm a, ka nu chu ka phone pawh bih hlei lo hian a rawn ṭe ve vak vak nghal a, hmeichhe pahnihte chu bengchheng tak hi kan ni ringawt.

"Ka awih vak lo kei chu, PDF hi edit a ang ka ti" ka huat tawk leka Peksanga'n a rawn tih chuan rang takin a lam chu ka hawi a, kan inum kawi zawr zawr nghal.

Ka man theih loh avangin Chapal in ka vawm tawp a, a lo la man ang hmak hmak zui.

Ka room-ah lutin Engzuali chu ka Graduate ve tawh thu ka hrilh zung zung a, ani paw'n min lo lawmpui thiam khawp mai. Rei lote chhung zirna lam kan sawi dun a, thil dangah kan pakai nghal char char.

Kan nui khek leh tuar tuar a, a bialpa sumo driver nena an awm dan a sawi phei chuan nuih loh theih pawh a ni lo. Aizawl lama lo awm thla leh tawh turin ka ti a, ani erawh chuan a lo duh teuh lo mai.

An khua nuam a tihzia chu hahipin min hrilh a, a bialpa lam a sawi rualin Henry-a chanchin lamah kan pakai zui nghal.

Chhun lama kan awm dan vel chu hrilh ka tum deuh a, mahse ka hrilh ngam rih thlawt lo. Zan dang em emin rei tak erawh kan inbe lo va, mahse thil chu kan sawi dun leh ṭeuh hman tho.

Zanlai dar 12 a lo rik chuan mi hriat chhuah ka nei a, ka room chhung dawhkanah chuan bawnghnute pawlh Chocos chu plate-ah ka chhawp a, Henry-a chu ka video call zui nghal.

Ka vawi khat call naah a la mai lo va, ka call nawn leh chuan a lo pick up ve ta. Coat nen thlap a lo la inthuam a, mask var pawh a la vuah vâ va mai.

An meeting zawh chiah thu leh an thlenna Hotel-a a luh chiah thute a rawn sawi a, sawi mai tur ka hriat loh avangin ka lo nuih ver ver ringawt.

Dawhkanah chuan a phone chu a tung a, ani erawh phone aṭanga ka hmuh theih turin a coat a phelh a, a kamis var ban chu a thlep tawm chho ve ve zui bawk.

Camera in a lak theih lohnaah a kal daih a, ka thil ei lai tawp meuhin ka lo zawng nghal vat a, a lo lang leh har phian zui.

"Ti hian ei dun ang aw" tiin ka ei ang chiah bawnghnute pawlh Chocos chu Camera hmaah tak a rawn chhawp a, a bo rei bawk sia ei tur a siam ni turah ka ngai thiam ta mai.

"Ni mai" tiin Chocos chu ka hawp pâwk a, ṭhial malh malhin a ei lai chu ka en a, a inthuam dan chuan a ti lang pa ka ti leh tlat tawh.

Coat hlip tawh mahse necktie chu a la awrh reng a, a kawr ban thleh zawng nen amah a fai bawk sia a ṭha thlawt a ni.

"Eee chuan! Ka pass aw Henry, a awmzia chu Graduate nula ka ni ve der tawh tihna a nih chu! Ka zir zawm leh ang em tih lam chu ka la ngaihtuah ṭha ang, mahse Master lam zir zawm leh chu ka duh deuh tho" ka tih chuan

"A ngai tawh lo, zir zawm tawh suh, ka nupui ni hmak rawh" a rawn ti ve nghal a, a ṭawngkam leh a hmel awm dan avang chuan ka nui chhuak leh ta nge nge. Lungawi loh hmel deuh hian min en a, Junior-a titau hmel nen a inang bawk sia Junior-a lian chi a ni ringawt.

"Ka zir zawm tawh loh i duh chuan a chhan ṭha tak i sawi a ngai, a chhan mumal hre lova i thu zawm tawp chu ka duh teuh lo. Tun laiah phei chuan hmeichhia paw'n hna an nei fur tawh leh nghal, ka châk ve alawm, chutiang ni lova kan chawlhsan mai te'n zir tlauh tlauh man a awm nâng" ka ti leh ta ṭeuh a, ani ve thung chuan

"Ka chau riau mai kan duh tawk tawh mai dawn em ni ang?" a rawn ti daih a, a hmel ka en chik chuan a chauh hmel ve tak tak. Kei pawh chuan pangai deuh hian

"Aw, a pawi lo. Kei thawvengi hian i chau ang tih reng ka lo ngaihtuah pha leh tawh hleinem, Sweet Dreams Henry" ka lo ti ve thuai thuai a, kan inmangṭha hnu chuan kan inbiakna chu kan titawp zui nghal.

Ka thil eina vel chu a awm ngai ngaiin ka kalsan a, bathroom-ah lutin ka hmai chu ka phih a, ka intih felfai hnu chuan ka mu nghal hmak. Muttui tum zetin ka inkhuh a, mumang nuam tak mang tuma ka ngaihtuahna ka hman rual chuan Henry-a nen chhun lama kan awm dan hlir chu ka rilruah a rawn awm ta tlat mai.

Ka mut dan thlakin lehlam chu ka hawi a, mahse ka ngaihtuahna chu a la dik thei chuang lo. Ka mitthlaah chuan a mipatna ngawr ngawr chu a rawn lang a, ka va han hne ber tak em.

Ka tih ngaihna hre lo chuan thovin bathroom-ah ka hmai ka va phih ṭha leh a, mahse chuti chung pawh chuan Henry-a thil hlir chu ka mitthlaah a rawn la awm tho. Ka phone chu ka hmet eng a, Henry-a phone number chu ka dial zui nghal ta ringawt bawk.

"Hello" aw zawi tak hian a rawn ti thum dup a, a muhil tawh a ni ngei ang a la har em mai. Ka aw te chu ka thian te te a, leh lama mi erawh a reh vung vung.

"Ka mitthlaah hian a lang reng a nia aw Henry, ka maimitchhin rual apiangin vawiina i mipatna pawng ûl ngawr ngawr kha a rawn lang tlat a, tihreh dan ka hre bawk si lo min pui teh" ka tih chuan thatchhe nuih zet hian a rawn nui a, kei erawh ka nuih a za lo hle.

"Nui suh, a hrehawm naka lai a! Tihreh dan chu min hrilh thuai thuai mai teh, ka buai teh mai a nia" ka ti leh tawp a, ka awm dan chu sawi zah chi ah pawh ka ngai lo, a nuam lo duh em mai.

"Vawiinah pawh i hriat reng tur thil a ni ka tih tawh khâ, tihreh dan a awm lo" awlsam têa a rawn tih chuan ka va han ngei mai mai tak em, awm dun nâ ila chuan ka kut a che chhuak leh tawh ngei ang.

"A nih chuan min tihmut a ngai a nih chu! I hna chu i hria maw? Chau viau mah la i tih ngei ngei a ngai, a chhan chu hetianga ka awm chhan hi nangmah vang a ni" ka ti hlawk hlawk a, ani chuan aw dam tak hian

"A saisir zawngin han mu teh le, chuan keimah chauh min ngaihtuah vang vang bawk la" a rawn ti a, ngawi rengin a sawi ang chuan ka awm ve nghal.

"Maimitchhing rawh le, ti khan min hmu thei em? Kei chuan ka hmu thei vek che a nia" a rawn tih leh chuan a hmel chu maimitchhing chungin ka ngaihtuah ngar ngar a, a tawpah chuan ka hmu thei ta.

"Aw ka hmu thei, ka hmu thei che Henry, i nui ti raw?" maimitchhing reng chung chuan ka ti a, ka mitthlaah chuan min lo nuih ver ver mai.

"Aw nui e, nang pawh ka bula mu ang maiin ka hmu che alawm" a rawn ti dam leh thlup a, kan awm dan chu a nuam tak zet, vanram a ang zawk.

"Henry i hmui leh i hmai vel kha khawih thei ila ka ti, ka ngai che Henry, ka ngai tak zet che a ni" la mitthla reng chung chuan ka ti thawp sap a, zawimuangin ka zawi tial tial a, ka mut chu a rawn chhuak zui nghal em em bawk.

"Keipawh hian ka ngai hle che a ni" a rawn tih chu ka thil hriat tawp ber a ni.

Hlim em em hian kan awm dun a, Henry-a chuan min pawm chung hian min virpui vak vak a, kan infawp deuh chhen bawk. Kan awmna hmun chu a thianghlim em em a, ka mumang mai a ni ang tih chu ka hlau hle a ni.

Kan bulah chuan an lo awm kan chhungte pawh an lo awm ve vek a, Junior-a phei chu a hlim hle. Tute pawh chu kan hlim hlawm em em a, chu ang renga nuam chu ka nunah ka la tawng ngai lo.

Chapter 16

"Ka ring reng a ni! Nimin te kha chuan i'n thawh hma ve tehreng nen, tho tawh teh Hlute, dar 8 lai a ri tawh dawn hnai a nia" tia ka nu min kaih thawhna avang chuan peih lo zetin ka meng a, ka lukham chu ka la pawm bet tlat bawk.

"Enge nimin kha i thawh hma ve em em na chhan? Min han hrilh teh, thil eng emaw chu i tawng chiang ti raw?" ka rizai sin lai pawh hlim pawp pahin ka nu chuan a rawn ti leh a, ka va han tho peih lo ber kher em.

"Nu! Ka la mutui viau a nia" tiin ka la mu tawm kâk a, ka lukham kuah chu Henry-a ang char chara suangtuah leh ka tum a, mahse ka thei tawh hauh lo.

"Mut a hun tawh lo, chaw kan ei dawn, i nauin chaw ei a siam mek" tiin ka mutna aṭang chuan min tung tho a, zawi zetin min tih ang ang chuan ka lo awm tawp ringawt.

"Nang hian thil tawn thar i nei chiang a ni. Tun hnai hian i danglam tlat, in result vangin i danglam ti dawn ila nizan maiah in result chu a chhuah chauh bawk si" a rawn ti niah niah a, ka nu tak hi chu âw, ka awm dan a lo hre leh vek tawh a ni hi!

"Danglam chiang lutuk, mahse ka danglam chhan ka la hrilh duh lo che" ka tih chuan min lo en vat a, a mitmengah chuan zawhna tam tak ka hmu zui nghal.

"Min hrilh mai mai rawh LALRINHLU, i nu ka nih hî" tiin ka lukham pawm lai chu a rawn la hmak a, khumah chuan a theh thla nghal daih.

"Bialpa ka nei, awih lo mah la ka nei miau a ni" ṭhen sak chung chuan ka ti a, ka beisei ang ngeiin ka nu chu a meng phawk teh e! Zawhna dang chu min zawt mai lo va, ka thusawi chuan a tihamhaih ve chiang a ni.

"Tunge!? Eng mi nge? Engatinge min hrilh vat loh? I bialpa nen chuan in inngaihzawnna a rei tawh em?" a rawn ti ta zawt zawt a, ka nu awm dan chuan min tinui ta chiam.

"Ka bialpa chu pa tak, hmelṭha tak, zun ngah tak leh min duh ve em em tu a ni tih hre phawt la a tawk mai" nui ver vera ka tih chuan a rawn chek tlak tlak a, a hmel aṭang chuan ka thusawi chu a awih lo nasa tih ka hria.

"Awi awi awi Rinhlu le! I nei tak tak em? Nge dawt i sawi zawk?" mi rinhlelhna mitmenga min en chung hian a rawn ti leh lawi a, mi rin a harsat lutuk ṭhin chu ka ngei lek lek a ni.

"I duh leh awih la, i duh leh awih suh, keimah berin ka nei ka tih chuan ka nei a ni mai" tiin khum aṭang chuan ka tho chhuak a, bathroom lam pan tuma ka kal chu min lo pawt ding chat.

"A nih chuan tunge i bialpa chu!? Kan hriat zawng a ni em? Pu Henry-a ti dawn ila i duh lo nasa bawk si a, tunge i bialpa chu min hrilh teh, a thlalak tal pawh min hmuh ta che" tiin khumah chuan min pawt ṭhu leh a, Henry-a hming a rawn lam tel avang chuan ka thin a lo phu dut dut nghal.

"Chungte chu a rawn len hunah i hre mai dawn alawm, ngaihzawng ka nei ve ta hi i phur lutuk a nih kha nu" tiin ka tho leh a, zawhna dang min zawh hmain ka kal sawn ta vat.

Bathroom chhunga ka awm lai te chuan mahniin ka khi vur vûr a, min hmutu lo awm palh ta se chuan mi ang lo emaw min ti ngei ang ka ring.

Thawm engmah ka hriat tawh loh avangin ka nu chu ka room aṭangin a chhuak tawh a nih ka ring ber a, Peksanga leh ka pa pawh a hrilh leh vek tawh ang ka ring. A pawi lo, hre ve ṭan tawh mahse pawi tihna ka nei tawh lo, Henry-a paw'n hriattir ṭan kha ṭha a ti tho alawm.

Chaw kan ei lai chuan ka nu chu a ṭawng char char a, zawhna pawh min zawt hnem khawp. Ka pa erawh bialpa ka nei chu a lo lawm em em thung a, kan ina lenpui vat turin min hrilh chhen bawk.

Peksanga ve thung chuan a la awih duh der lo va, he pa hi chuan a mita a hmuh hma chu min ring nghal mai dawn lo tih ka chiang.

Ka chhungte'n an hriat tawh thu leh tunge ka bialpa an la hriat loh thu chu Henry-a ka hrilh a, mahse a buai ka rin avangin Whatsapp message in ka hrilh thung. A buai leh pek a ni ngei ang chhun dar 12 rik dawnah pawh ka messsage thawn chu a la en lo va, ka lo thawn kher kher chu ka inchhir hnuhnawh.

Phone call-a hrilh chu ṭha ka ti leh ta zawk a, mahse message chu delete in awmzia a nei tawh lo, delete mah ila a hmu thei vek tawh dawn tho tho. Ka tihtur hre lo chuan Instagram-ah ka lut a, Henry-a fan account chu ka zawng a, ka lut zui nghal.

Thlalak thar chu a lo tam leh tawh khawp mai a, mahse ka lan ve na pakhat mah a awm tawh lo hlauh. Kan pahniha kan ṭhu dun lai erawh a la awm reng a, comments pawh a lo pung nasa tawh hle.

Tihtur ka nei lo bawk nen thlalak chu a tir te aṭangin ka en chho diat diat a, Henry-a mawlh chu a hmelṭhain a pa chiang alawm. Coat nena a inthuamna hlir a ni deuh vek a, Meeting na hmuna a thusawi laite chu a ṭha thlawt a ni.

A thlalak zawng zawngah chuan mask a vuah vek a, chutiang khawpa mi zah kai leh mi duh rawn ka bialpa a ni ta mai chu ka lawm a ni. Hmeichhe ṭhenkhatin min lo thik viau pawh kha ka thiam loh hran ta lo, a chhan chu Henry-a ah hian hmeichhe duhthusam chu a awm famkim vek tlat a tin ni!

Thlalak pakhat chu ka en chiang deuh a, ka va nui nasa tak em. A dang en kân ka tum pawh chuan chu thlalakah bawk chuan ka let thla leh a, nuih lohna chi a ni lo. Ka'n zoom ṭhin, caption zawng zawng nen chuan a nuihzat thlak thlawt a ni.

"Mizoram Health Minister Sexy zet mai Henry-a hi a lo khal mawi tawk hle" tih tê hian caption chu an hmang a, Henry-a motor chhunga a lut tur lai tak a hnung lam aṭanga lak tih hriat deuh thlalak chu an post vâng bawk. Comment ṭhenkhatah chuan

"Awi ka duh ê, he pa hi chu! A kekawr chhanah pawh ni se a mawng khi ka khawih châk, entinnge a awm ang le?" tih te a lo awm thla nual a, ṭhenkhat comment dan phei chu a bawraw lutuk a, mahniin ka nui cher cher ringawt.

Henry-a fan account siamtu chu hmeichhia a nih loh reng ka ring lo, followers lah chu 12.2k daih a la nei zui. Keini'n 3k pawh kan la neih tlin loh laiin a fan account ringawt paw'n 12k a pel a nia, ka thik dâwn dawn alawm le.

Henry-a chu Hastag ang zawngin ka zawng leh a, a thlalak chu tam tak hi a ni ringawt. Zonet account-ah te a thlalak chu an post a, a tam zawk chu a thusawi lai hlir a ni.

Mak tak maiin a thlalakah chuan a nui hmel avang em em a, naupangho bula thla a lak lai tih lovah chuan a nui hmel a awm lo.

Chutah pawh mask a la vuah tlat a, a mitmeng aṭangin a nui tih hriat theih loh se chuan a nui leh chuang tawp lo vang.

Ka khawih laklawh bawk nen ama account chu ka zawng a, ka hmuh chuan a lo in Blue Tick vel thlap a nih chu! Ka phur thut avang chuan message tihah ka lut a, khi ver ver chung chuan

"Pathlawi, thlawia, zun ngah pa, hei ka stalk vak vak mai che. I reh si, Henry Vaia, min ngai lo bik si, lo haw thuai rawh" tih vel chu ka type ta ṭeuh a, ka type zawh chuan ka thawn zui nghal.

A thlalak vel chu ka en thla leh diat diat a, mahse ama lanna a vang hle thung. Thuziak leh COVID-19 lam chanchin a tam tlûrh a, lehkhabu thlalak pawh a tam khawp mai.

A thlalak post hmasa ber ka en chuan nupa inkara naupang hmel fai veng vawng ding hi a lo ni a, caption ka chhiar chuan a nu leh pate nena an thlalak tih ka hrethiam nghal.

Caption-ah chuan a ngaih thu leh an tel lova awm a hrehawmzia te a sawi luam a, amah ang lo takin thuziak chu a beisei khawp. Keipaw'n a thuziak ngaihnawm tak leh lungkuai tak chu ka chhiar chhuak dâp a, ka chhiar zo chiah chu Henry-a khawngaihnain ka khat nghal.

Pi Rinpuii hnen aṭangin a nu leh pate a ruala a chan tawh thu chu ka hre ngei a, mahse khang hun lai kha chuan kan la inngaizawng lo bawk nen tun ang em em hian ka khawngaih lo a ni. Tunah erawh kan inngaizawng tawh a, a nun lo khawhar ruk ṭhinzia tur chu ka hriatthiam pui ve tawh.

Zanriah kan ei hnu thleng paw'n Henry-a hnen aṭang message emaw call emaw pawh ka la dawng lo va, call chu duh viau mah ila a buai a nih ringin ka call ngam rih lo, ka tibuai mai mai ang tih ka hlau.

Kan Department group-ah chuan ka lut a, kan professor te chuan Master atana entrance pe turte in report turin Notice an rawn chhuah a, ka rilru chu a buai ru ang reng hle.

Keima thu ngawta Master zir zawm leh chu a dikin ka hre bik chiah lo va, Henry-a lah rawn theihin ka bulah a awm bawk si lo, ka chhungte ka rawn chuan zir zawm turin min ti dawn chiang tih ka hria.

Inthlahrung ru deuhin Henry-a chu ka call leh ta tawp a, a la la thei lo zui. Ni e, ka zir zawm dawn rau rau a nih chuan kan University-a zir zawm leh chu a awlsam ber, a ṭha ber bawk.

"Aw haw! Viewers tam zia hi! Lo kal teh u pa, 100k viewers kan nei tling ṭep tawh a nia" sitting room aṭangin Peksanga chuan a rawn ti lawng lawng a, keini pawh kan chhuak phei ve nghal.

"Subscribers pawh 25k ka nei tling der mai, a va nuam em. Prank hi ti ziah ila a ṭha ang, commnent lah chu an la tam em em zui" Peksanga chuan a lo ti leh zuah zuah a, ka pa hmel a hmuh chuan a ṭawng sual tih a hre chhuak a ni ang a nui ver ver a, tlan chhiat pawh a inring ran.

"Khawi maw lo la teh" tiin ka pa chuan a phone chu a laksak a, kei leh ka nute nen kan pathum chuan kan en ho a, a nuam reuh phian.

"Pa comment kha chhiar lawk ang" tiin comment section chu ka va hmehsak a, kan chhiar chuan ka pa an khawngaih thu a lo tam khawp mai.

A ṭhenin a hmuhnawm an tih rualin ka pa bawk chu an khawngaih a, a rilru tur chu an hriatthiampui thu a tam hle.

Sitting room aṭang chuan ka room lamah ka phei leh a, ka room chhung ka luh chuan ka hnual nghal rawih thei. Khuma ka phone dah chu la kangin ka check a, mahse Henry-a hnen aṭangin phone call ka la dawng lo cheu.

Mut a hun ve tawh tho avangin ka hmai te chu ka phih a, ka mood erawh a la pangai thei lo. Ka mu meng kur a, ka bula phone awm pawh chu ka khawih peih eih rih lo. Phone call a rawn lut thut a, ka en chuan Engzuali lek a lo ni.

Lak chu ka tum ûk a, mahse ka ṭawng peih rih loh avangin ka la leh ta lo. A ring ral ṭhak hnu chuan ka lukham hnuaiah ka dah daih a, mahse phone call ka dawng leh nghal zat. Peih lo deuha ka en chuan Henry-a hnen aṭang a lo ni a, ka ṭhu chhuak nghal.

"Hello, ka buai lutuk a, phone pawh ka khawih hman chiah e" ka pick up rualin a rawn ti a, mahse kei chu engtin emaw ni ka awm tlat, ka rilru a na ni berin ka hria.

"Hei Leihriamte, min be dawn lo em ni?" a rawn ti leh a, a aw aṭang chuan a nuih a zat hmel hle a, kei erawh ka ṭah a chhuak em em thung.

"Ka ngai che a nia" ka la ngawih tlat avangin amah bawk chuan a rawn ti leh a, min ngaih thu chu sawi mahse ka biak duh laia a awm loh avang chuan ka rilru a na tlat tawh.

"Min ngaih tawp loh kha!" ka ti deuh hmuk a, leh lama mi erawh a rawn nui ri hawk thung. Amah pawh rawn lovin kan inbiakna chu ka titawp daih a, mahse call chu a rawn lut leh rang kher mai.

"Hei titau ṭhin lo la, naktukah ka lo haw dawn a, i hmel ka hmu châk tawh khawp mai" phone ka pick up rual chuan a rawn ti leh nghal zat a, a aw pawh a hma ai chuan a thutak ta deuh.

"Ka biak duh lai che paw'n i la thei lo va, rawn duhna che tam tak ka nei asin, i thu lova lo tih ngawt lah ka ngam bawk si lo. Whatsapp-ah nen, IG ah nen ka rawn message che a, i en duh bawk si lo. I buai dawn tih chu ka hria alawm, mahse tlem tala min ngaihsak a ni tih lantirna'n mesaage te reply ve ta che, a nghaktu tan a hrehawm duh em mai" ka insum thei tawh lo chuan ka ti chhuak ta phawk phawk a, mahse ka aw ah chuan vin awka engmah a awm lo.

"Aw le, ka tihpalh a ni e. Enge min rawn duhna chu sawi la, ka ngaithla ang, chuan i message zawng zawng hi ka chhiar vek tawh bawk e" a rawn tih chuan a thusawi a dik leh dik loh chu ka fiah a, a lo hmu vek tawh tak tak.

"Master zir zawm tur chu Professor te'n in report turin min ti a, chutah chuan ka rawn duh che maw le. Ka hre lo, ka ring ngam dawn che em tih hi ka la hre rih lo a ni Henry. Nangmah ka duh loh vang che pawh a ni lo va, ka dinhmun hi a harsa khawp mai" pangai tak chuan ka ti a, ani pawh a rawn thaw zui hawk.

"Master lam chu bei tawh lo mai rawh, ka nupui i ni ang a, Junior-a nen hian ka chawm thei lutuk ang che u. Min ring rawh, min ring ngam la ka duh Hlute" thutak zet chuan a lo ti a, rin chu duh viau mah ila harsa ka la ti tlat bawk si.

"Ka hre lo le, ring ngam tur che pawhin ka bulah i awm tam lo va, i buai reng zel a, kei atan chuan rin ngam che a harsa rih a ni. Amaherawhchu ka zirna lam tih lovah hi chuan ka ring che, ka ring ngam lutuk tawh che, min hrethiam dawn nia"

"Ka lo haw veleh engkim kan tifel ang, i pate bulah pawh i bialpa ka nih thu ka sawi tlang tawp ang a, chutiang bawkin nang pawh ka chhungte bulah ka puangzar tawh ang che"

"Enge engkim kan tifel ang i tih chu a awmzia? A thu hrimah Junior-a pawh hian min duh ka ring lo, pi Rinpuii phei chuan min ngaina viau mahse i kawppui atan min duh ka ring lo, ka zia a ṭha lo si"

"Ni lo, i hre dik lo. Junior-a pawh ka sawipui tawh a, nu a duh thu chu a sawi ngei alawm, a nu i ni dawn tih a hriat chuan a lawm khawp ang"

"Junior-a chuan chutiang chuan a sawi maw!? Ka awih thei rih lo, a nu atan chuan min duh ka ring thei lo a ni. Kei chuan ka ngainain a bula awm nuam ka ti em em a, mahse ani chuan a Miss ka nihna ang chiahin min ngaina zawk a ni"

"I hre sual ziah, Junior hian a nu atan a pawm dawn che tih ka hre chiang a ni. Ka pi leh ka pu pawh ngaihzawng ka neih thu ka hrilh daih tawh, an phur khawp mai" a rawn tih leh chuan mak ka ti hle a, kei aiin a chhungte a hrilh hmasa zawk tih ka hrethiam nghal mai bawk.

Engtin tin emaw nia kan inthlem hnu chuan keipawh ka pangai ve leh mai a, mahse ka zirna bawk chuan ka rilru a la kap ru reng tho.

A tuk tlai dar 2 velah a hnen aṭang call ka dawng a, Mizorama a awm tawh thu leh min hmuh a duh thu a rawn sawi a, kei tak pawh chuan a hmel ka hmu châk tawh a ni.

Kan han inhmu chiah mai chu eng dang sawi lovin min fawp vawng vawng a, kan awmna hmun chu zahpah pawh a nei tawh lo a ni ber. Motor chhunga min luh tirin min tlan chhuahpui vang vang a, hmun reh deuh laia kan awm hnu chuan a ngaite bawkin min fawp leh a, min ngai ve tak tak niin ka hre ve ta.

A âwmah chuan min kuah bet ran a, an ina chaw ei turin min sawm zui nghal bawk. Keipaw'n chaw ei chu rem ka lo ti ve mai a, zan lama kan ina rawn len a tum thu a sawi leh chuan a thil tih tum chu a la serious hle tih ka hrethiam nghal.

Chhuanlam dangdai tak siamin chaw ka ei chhuah lawk tur thu ka chhungte ka hrilh a, Junior-a hming lam tel lo ila chuan an phal pawh ka ring lo.

Henry-a te ina kan luh rualin pi Rinpuii chuan min lo be nghal siam siam a, Henry-a'n zanriah ka ei dawn thu a sawi phei chuan a lo lawm khawp mai.

Junior-a paw'n min lo nuih ver ver a, a pa chu an room lamah a hruai chho daih bawk. Zanriah kan ei laiin Henry-a chuan a bialnu ka nih thu leh a nupui ka nih dawn thu chu a rawn sawi ta mai, ka va han zak ru tak.

Ka beisei loh lutukin pi Rinpuii leh a pasal chu an lo phur em em a, min tihamhaih letling mah zawk. Chutah Junior-a tê chuan phur tak hian

"Yes! Miss, anu i ni tawh dawn tihna ti raw? Ka va'n lawm tak, chuan kan pahnihin painting pawh kan ti dun thei tawh ang a, rap pawh a rhyme thar ka duh leh tawh a nia, min zirpui leh thuai thuai rawh Miss, anu ni thuai thuai teh" a rawn ti nghal mawlh mawlh a, chaw pawh ei tawh lovin ka bulah chuan a rawn ding a, a awm dan leh a thusawi avang chuan kan nui ta vek.

Henry-a nen kan inngaizawng tih an hriat vek hnu chuan a hma ai zawngin ka rilru a hahdam a, chaw chu hlim takin kan ei ho ta dar dar.

Chutah ka zia dik tak chu a rawn chhuak leh a, ka va han ṭawng duh bawrh bawrh leh mai mai tak em. Junior-a lahin engkim hre vek emaw min ti a, zawhna a ngahzia chu pui tak a ni.

Pi Rinpuii leh a pasal chuan min mo chei em em nghal ringawt a, an bula awm a nawm em avang chuan tumah ka zah buai tawh lo.

A hmaa kan inbiak siam siam ṭhin ang chiahin kan inbe bawrh bawrh a, inzep ṭit ṭeta awm ai chuan a let tam takin a nuam.

Zan dar 7 velah kan in lamah kan inkhalh phei ve thung a, kei angin Henry-a chuan zam hmel emaw pawh a pu eih lo. A awm pangaiin a awm tawp a, kei aiin kan inah chuan a lut hmasa zawk nghe nghe.

"Eng thil lam pang nge pu Henry? Hlutei lam bawk em ni? Tution lam a nih chuan in dil hranpa kher a ngai tawh hleinem" ka pa chuan a ti a, Peksanga leh ka nu erawh chuan chik zetin min lo en a, inhnaih takin Henry-a nen kan ṭhu dun kher bawk sia an mitah chuan rinhlelhna mitmeng ka hmu thei a ni.

"Hlutei lam bawk chu a ni a, mahse zanina ka thil rawn dil tur che hi chu a dan a dang deuh thung" Henry-a chuan a ti te tê a, ka pa chuan thingpui in pah hian

"Eng lam nge min dil duh a? I va thutak hmel phian ve" a lo ti ve leh mai a, Henry-a chu chik deuh tak hian a en ran a, ka sawi tur ni lo mahse ka lo zam ve em em ringawt.

"In fanu Hlutei hi ka nupui atan ka dil che a ni ka pu" Henry-a chuan a rawn ti dam dap a, ka kut chu min en miah lo hian a rawn hum chat a, kei chu zah avangin ka lo kun ta ringawt.

"A va mak daih daih ve le, nangni pahnih hi in inngaizawng reng reng em ni? Hlute in inngaihzawn lai ka va hre lo ve, engmah i sawi bawk si lo, inngaizawng chiang em?" tiin ka pa chuan min lo zawt daih a, a hmel ka en chuan hlim hmel pakhatmah ka hmu tawh lo.

"Aw ka pa" ka ti thawp sep a, kan sir lam aṭangin Peksanga chu a lo ê vak kher a, ka va en chuan min lo la nuih ang ver ver a, ka nu erawh chuan en tlang vek tum ang mai hian min lo en reng thung.

"Engtianga rei nge in lo inngaihzawn tawh chu ka hre miah lo va, mahse tun atan chuan kan fanu hi i nupui atan ka la phal rih lo" ka pa chuan a rawn ti nghet charh a, a thusawi chuan namen lovin hlauthawnna min pe nghal.

"Ka pa!" ka lo ti hluai a, Henry-a kut chu na zetin ka hmer a, ka pa ber kherin chutiang thu a rawn sawi chu mak ka ti a ni. Henry-a erawh ka lam hawiin a lo kiai suk a, a nuih chhan chu ka hre hauh lo bawk.

"Lo ṭawng rih suh Hlute, tunah chuan i inrawlh a fuh ber lo. In inngaizawng tih pawh kan hre ve miah lo va, kan fanu tana i ṭhat leh ṭhat loh hre chiang tur paw'n kan bulah i la tal tam lo hrim hrim" ka pa chuan a rawn ti leh a, ka pa awm dan chu mak ka titawp thei lo.

"Ka pu" tia Henry-a lo ṭawng chhuah a tum chu ka pa chuan a kutin a lo vai a, Henry-a pawh ṭawng chhunzawm lovin a ngawi ve leh mai bawk.

"Tukin lawkah kan fanuin bialpa a nei tih kan hria a, mahse a bialpa chu tunge a nih kan hre chuang lo. A bialpa chu nang i lo ni a, chutah a enga mah hmanin kan fanu nupuiah min dil leh thâwr a, i chet dan hi a mawi lo hle a ni"

"Enge ka tih ang ka pu? Min hrilh rawh ka pu, Hlutei hi neih ngei ka duh si a ni" zângkhai tak hian Henry-a chuan a rawn ti ve leh thuai a, a hmela thinrimna ka hmu ve miah lo chu mak ka ti, kei ka thin a rim ropui tawh nen nen.

"Inneihna hi thil namai a ni lo, hmeichhe tan phei chuan an kumkhaw nun a ni. Lo inṭhen leh ta si ula nang ni lovin kan fanu hian a tuar nasa zawk ngei ang, hmeichhia phei chu khawtlangah an mualpho awlsam hle leh nghal. Chuvang chuan keini hian kan hriat chian hmasak phawt che a ngai, i hnena Hlutei hlan kumkhua tur chuan i mizia kan hmuha kan lo hriat chian ve a ngai a ni" ka pa thusawi avang chuang ngaihtuahna dang daih ka pu nghal a, ka thin pawh pakhat mah a rim tawh lo.

"Ka hrethiam e ka pu, ka lo ngaihtuah tawi avangin min hrethiam dawn nia. I sawi dik e, in fanu tan ṭha tawka min hriat hma chu Hlutei hi ka nei lo vang" Henry-a chuan a rawn ti nghet charh a, a lam ka hawi chhoh rualin ka lam a rawn hawi thla ve a, min la nuih suk zui.

"I hriatthiam chuan a ṭhat chu! Hlutei pawh kan lo titipui dawn nia, a la hriatthiam ve loh hmel ropui bawk si" nui chung hian ka pa chuan a rawn tih leh ang lawi a, a nui leh daih thei te chu mak ka ti nasa a ni.

"Aw le, ka va haw hnai ang e" tiin Henry-a chu a ding uai a, keipawh ka ding ve nghal. A kalna lamah chuan ka zui ve zel a, ka pa nen chuan ṭha takin an inthlah leh diam thei nia, an awm dan chu ka hrethiam thlawt lo.

"I thin a rim miah lo em ni?" a motor bula kan inkuah lai chuan ka ti a, ani erawh a rawn nui nghawr dat thung.

"I pa thusawi khan ka rilru a tikal thui khawp mai, makpa ṭha tak ka nih theihna'n in ina leng tam turin min hrilh a nih kha!" a rawn tih chuan

"A ni maw!? Chutiang a sawi awm pakhat mah ka lo hre lo reng reng, engtik lai khan nge a sawi a?" tiin ka lo ṭawng vat a, a hmel ka en chuan min lo nuih suk duh lek chauh.

"In la naupang a, nakinah in hrethiam ve mai ang" tiin a hawi sang vâh vel a, ka thin ter tet a chhuak leh ta nge nge. A âwmah chuan ka chum ri dawt a, ani chuan ka tihdan chu engah mah a lo ngai eih lo.

"I upa tih te chu ka hre ve reng, ka pa thusawi awmzia dik tak kha min hrilh vat mai rawh" ka tih chuan rawn kun hniamin mi lo fawp a, ka ngawi chiang ta hle. Kan dinna lai chu a thim lai a nih avangin kan awm dan pawh chu ka care vak lo, a nuam rih em a tin ni!

"Kar tawp chu kan leng chhuak dawn nia, lo inring rawh" kan infawh zawh chuan a rawn ti lum ham ham a, kan hmui chu a la inhnaih ṭha hle bawk.

"I hman ang maw? Phone-ah kha chuan ka sawi ve mai mai a nih khâ, ka ti tak tak lo" buai ru reng chung hian min len chhuahpui a lo tum ang tih ka hlau, kei lah ka lo vui kual vel kher tawh bawk si.

"Hman ang, chu bakah i bulah hian hun ka hmang hnem lo em mai, phone aṭanga inbiak hi chu a ho tlat" a rawn ti leh chuan ka lo nuih a, dam zet hian min lo fawp leh a, keipaw'n ka thiam ang tawk chuan ka lo chhang let ve nghal.

Motor bulah chuan kan awm dun ta reng a, ka ngaih thu chu ka hrilh mawlh mawlh a, ani chuan ṭawngka ni lovin chetzia zawkin min ngaih ve zia a tilang thung.

Pawna darkar chanve lai kan awm dun hnu chuan an in lamah a tlan haw a, ka rilru chhungril chu a hlim leh veng veng tawh.

Chapter 17

In chhunga ka luh leh chuan min lo en ṭhap a, a ṭhenin nui hmel min hmuh laiin ṭhenkhat erawh mak an la tih hmel hle. A nihna takah chuan tukin lawkah bialpa ka neih thu hrilh chiah a, chutah zanin maiah ka bialpa chu kan inah ka hruai lut let a, an mak tih theih turin ka mipa hruai luh chu Mizoram Health Minister ni lai a ni leh khanglang bawk si.

Ka nu leh pa hmel chu ka zah a, an hmel pawh en rei duh lovin tui ka in ta ringawt. Ka pa chuan thingpui lum turin min lo hrilh a, keipaw'n ka lum zui ve nghal. Thingpui pe tura sitting room ka va thlen chuan kal leh nghal mai ka tum a, mahse ka pa chuan ṭhu rih turin min ti ta tlat.

A hmel pawh en ngam lovin ka ṭhu ngawi reng a, ka pa lah chuan ṭawng lawk a tum hmel si loh. Ka nu leh Peksanga te reng reng pawh an ṭawng miah lo va, hrehawm duh tak a ni.

"Engatinge i chhungte hi Henry-a nen khan in inngaizawng tih pawh min hrilh miah loh?" ka pa chuan a rawn ti ta kauh mai, chhan ka va han huphurh tak em.

"Ka tihpalh ka pa" ka ti thawp sep a, ka tidik lo hle a ni tih pawh ka hre nghal. Ka pa lakah chuan ka inthlahrung a, kut min thlakin min hau hrep dawn lo mahse amah chu ka zah em em hi a ni tawp.

"Ka bulah hian lo ṭhu phei teh" a rawn tih chuan a hmel chu ka en nghal zawk a, thinrim hmel emaw hlim hmel emaw pawh ka hmu lo. A sawi ang chuan a bulah ka va ṭhu a, min en ta ran mai.

"Master lam te hi zir zawm i tum tawh lo em ni? Engatinge kan hriatpuina pawh tel miah lova pasal neih i lo tum ringawt? I pasal atan ani kha i ring zo em ni? A nupui ni kumkhua turin a duh tak tak ang che maw?" tiin zawhna chhan sen loh chu min zawt a, a aw aṭang chuan min ngaihtuahzia ka hre thei.

"Master lam chu ka ngaihtuah ve alawm, zir zawm pawh ka tum a, mahse Henry-a khan zir zawm tawh lova a nupui ni turin min sawm a, ka rilru hi a la buai ve tho. Ka hre lo ka pa, amah hi ka ring ngam tawh lutuk te pawh a nih ka ring" ka hma lam thlir dauh dauh chung chuan ka ti a, ka pa erawh chuan min la en reng thung.

"Engtianga rei nge in inngaihzawn tawh?" a rawn ti leh a, a tir te aṭangin Henry-a nen kan inngaihzawn thu lo hrilh ni ila chuan chutiang em emin ka pa chu a dilchhut ka ring lo.

"Thla 2 dawn chu a ni tawh" ka ti chhuak sep a, ka pa erawh ka thusawi vang nge ni a rawn thaw deuh hawk a, a hmel ka en chuan lungngaih hmel fe hian min leh daih tawh.

"Thla 2 pawh in la inngaizawng tling lo va, chuti chung chuan amah chu i ring nghal em em i tihna em ni? Enteh Hlute, i tisual ang tih hi ka hlauhpui che a ni" a rawn ti leh a, chutah ka nu chuan

"U Kim, i ti lutuk ang e. Tik tak êmah chuan keini pawh kha kan inngaihzawn rei miah lo khâ, rei lovah nupaah kan insiam thuai a, tun thlengin kan la hlim chho zel chu a nih hî" a rawn ti ve ta, min ṭan zawnga a rawn ṭawng avang chuan ka awm a va nawm phah si em.

"Keini nen a inang lo, kei chuan ka hmangaih che alawm, chuan ṭhen leh tawh lo turin ka nei bawk che. Min han hrilh teh Hlute, Henry-a hi i hmangaih reng reng em ni? Amah hian a hmangaih che em?" tiin ka pa chuan zawhna min rawn zawh chhunzawm a, a zawhna min zawh chu ka thil ngaihtuah lo lam tak a la ni zui.

"Aw ka pa, Henry-a hi ka hmangaih tawh a ni" ka inngaihtuah vang vang hnu chuan ka ti chhuak sep a, ka hmangaih tawh miaua ka inhriat avangin ka thusawi chu sawi sualah ka inngai lo.

"A nih leh amah hian a hmangaih ve che em?" ka pa chuan a rawn ti leh ta kauh mai, ka meng buai nghal vek a, chhan mai dan tur pawh ka hre tawh lo.

"I mak em mai u Kim, nupui atan hial i fanu hi a rawn dil tawh a, chuti chung chuan a hmangaih loh i la ring em ni?" ka ngawih reng avangin ka nu chuan a lo a ti a, ka pa paw'n min enna aṭangin a mit chu a la sawn a, ka nu chu a en ta ran.

"Lo inrawlh rih lo teh Sawmte, kan fanu hian a dai sual ang tih ka hlau alawm, a dai sual vaih chuan a nun zawng zawng a danglam vek phah ngei dawn tih hi ka hria a ni" ka pa chuan a rawn ti leh a, a thaw zui hawk bawk.

"Ka hre lo ka pa, Henry-a hian min hmangaih em tih ka hre lo a ni. Ka bula a awm dan leh a chet dan velah hi chuan min ngainain min duh ve tak zet tih ka hria a, a nupui ni tura min sawm hnu phei kha chuan min hmangaih ve ka ring tawp. Chuan min thlahthlam loh tur thu min hrilh a, kum tam tak hnua a hmeichhe thlan ka nih avanga min ṭhen a tum tawh loh thu a sawi bawk, ka thusawi hi ring rawh ka pa" ka pa kut chelh chung chuan ka ti a, min en dan chuan ka ṭah a ti chhuak em em leh nghal.

"A nih leh a chhungte'n an hre ve tawh em? A fapa pawh khan nu atan a duh reng reng dawn che em ni? I thinchhe ve si, ṭawng thei si, harh si, kut ram si" nui chunga a rawn tih avang chuan a âwmah ka bei thlawp a, ka lungchhiatna te chu hlimnain an rawn thlak zui nghal.

"Zanina ka chaw ei chhuahna kha Henry-a te in a ni a, chutah chuan a nupui ka nih dawn thu a sawi a, a chhungte paw'n min duh lutuk. Chuan Junior-a paw'n min ngaina a, a nu ni tur chuan min duh thu a sawi chhen bawk" a âwma la bei reng chung chuan ka ti a, ka pa nui ri pawh ka hre ve leh ta. Ka hnung chu a beng thek thek a, ka rilru ipik ru em em chu a kiang leh vek tawh bawk.

"Inla Baby vel ê, khatiang khan pasal neih te i tum ve chu a ni si a, a zahthlak zawk e a!" Peksanga chuan a rawn ti a, ka melh leh ta hrawk.

Ani paw'n mi tham loh hmel zet hian min lo en a, ka pa chu a rawn nui ri leh hawk bawk, keini erawh kan la inmelh no lo nasa mai.

"I châk ve vang a nih kha! Ka pa kuah ve i châk a, min thik tih ka hria alawm, sawi ve mai ta che" melh vak chung chuan ka ti a, a hmuh laiin ka pa chu ka kuah lui deuh vak kher a, a hmelah chuan min ei hmel hlawl lo.

"A teuh lo mai, ka kuah châk bawk lo. Mipa leh mipa lo inkuah chiam chiam te chu a, tuai bakin chutiang chu an ti ngai lo" a rawn ti zo chiah tihah

"Tuai i ni na nge? I ni emaw ka lo ti char char asin" tiin ka lo chhang let vat a, a thin a va han rim mai mai tak! Mi melh rawl rawl pahin sitting room aṭang chuan a kal sawn a, a room-a a luh dawn chuan

"Pu Henry-a kha lo leng leh teh se, i mizia zawng zawng hi zep nei hauh lovin ka hrilh vek ang, a hriat hunah a ngaizawng peih hauh lo vang che" a rawn ti leh hram a, lei ka lo chhuah khum vak vak ringawt.

"Eng pawh chu ni se Henry-a pawh kan inah lo chuang kai tam se la, keini paw'n kan lo bel chiang ve ang a, chutianga mi rinawm lo chu a nih ka ring hran lo, ti raw nui?" tiin ka pa chuan ka nu chu a va bia a, ka nu hmel ka en chuan a lo awm deuh hmuk a, ka pa biakna pawh chhang let lovin a ngawi reng bawk.

"Âwwwwww, engati nge i lo tihtauh leh ṭhin? Khawi lai ber kha nge i titauh chhan ni leh tawh?" a awm dan hrethiam zetin ka pa chuan ka nu chu a be leh a, kei erawh ka nu awm dan avang chuan ka lo nui leh ta ver ver.

"Ka mu dawn a nia" tiin ka tho chhuak a, ka room chhunga ka luh dawn chuan ka pate awmna lam chu ka hawi leh hram.

Ka nu tal feih feih lai ka pa'n a kuah ka hmuh chuan ka nui chhuak hawk a, an awm dan vel chu a hmuhnawm thlawt a ni!

Mu turin ka insiam a, ka hmai te chu ka phih zung zung a, Henry-a be chunga muthilh leh daih chu ka châk a ni. Henry-a call ka tum lai takin Engzuali hnen aṭangin phone call ka dawng a, ka pick up zui nghal.

Thil eng eng emaw sawiin kan nui dun leh ta vak vak a, an result a chhuah tawh thute a rawn sawi a, keipaw'n kan result a chhuah tawh thu chu ka hrilh zui ve nghal bawk.

Ani pawh a lo pass chhe lo hle a, kan inlawmpui nghal mawlh mawlh. A bialpa chanchin a rawn sawi kai a, keipaw'n Henry-a nena kan awm dan ṭhenkhat chu ka hrilh ve ta zuah zuah.

Kan inbiak zawh meuh chuan zan dar 10 a lo ri fel leh der tawh a, ani nen hi chuan sawi tur kan ngah dun thei bawk sia kan inbe rei thei ngar ngar hle, mahse a nuam ka ti em em tho.

Henry-a chu ka call zui nghal a, ani paw'n rei pawh a la ring lo vang tihah a lo pick up ve mai bawk.

"I pa kha a zahawm ka ti khawp mai, ka hnathawh lam en miah lova khatianga min zilh ngam kha thil ṭha tak a ni" ka ṭawng ṭeuh hnu chuan a rawn ti a, kei paw'n ka pa chu ka ngaihtuah zui ve nghal.

"Ka pa chuan lo leng tam turin a duh che hi a lo nia, min titipui ṭeuh hnuah ka hrethiam ve chiah alawm" hlim rilru zet chuan ka ti a, a hmel hmu lo mah ila ka khi reng mai.

"Ni e, ka lo leng tam dawn nia, ka tihtur pawh a ni reng" a rawn ti ve mai a, thawm ri neuh neuh avang chuan a bulah mi an awm ve ni maiin ka hria.

"I mu tawh em? I bulah khan mi dang an awm em ni? Thawm ri neuh neuh ka hre tlata ka hriat?" ka ti leh tawp a, ani erawh a rawn nui ri suk a, a nuih avang chuan ka nui ve leh ta ringawt.

"Aw awm e, Junior-a nen kan awm dun alawm" a rawn tih chuan ka ngaihtuah tawizia ka hre nghal a, mut hun a ni tawh tih pawh ka hre chhuak zui nghal bawk.

"Ni tak! Ka va'n â em! In mu dun dawn tih te chu lo hre ve tur ka ni asin, Junior-a chu a muhil tawh hrim hrim em? Ka ṭawng te hi a lo hre vek lo maw? A va chi loh tak!" ka ti zui nang nâng a, Junior-a chuan min ngai eng emaw vek ang tih ka hlau a ni.

"Muhil titih chu a ni mai, ka âwma hi a bawk ran a, a kut tiche vel hi i lo hria a nih dawn chu!" a rawn tih chuan ka thaw a veng huai a, sawi leh mai tur pawh ka hre tawh lo.

"Kan bulah hian lo mu ve thei tawh la ka ti khawp mai" a rawn ti sup a, ka rilru chhungril chu a hlim nghal veng veng. Ka mit chu ka chhing a, a hmel chu ka suangtuah zui nghal bawk.

"Henry...ka..iiiih....eeee.....a ngai leh lo mai, ni dangah ka hrilh zawk ang che" ka tih deuh nuai a, amah ka hmangaih thu chu hrilh hun a ni chiahin ka la hre rih lo, hmai chhanah emaw remchang dangah hrilh ila a fuh zawk ka ring.

"Hmelṭha nu, duhawm em em nu, i thil min hrilh tur chu eng pawh ni se ka lo nghak reng ang e" a rawn ti zawi sup a, a aw aṭang chuan a nui tih pawh a hriat hle. A zin lai ang bawkin phone-a inbe reng chungin kan inmitthla tawn a, ka muhil rang kher mai.

Henry-a'n ka pa nupui atana kei ve mai mai a dil zan aṭanga thla 2 a liam leh meuh chua engkim a danglam vek a, chhungte hriatnpuina ngeia inngaihzawn chu nuam haih haih tak a ni. Henry-a pawh kar khatah zan 4 te a rawn leng ṭhin a, a va duhawm ngawih ngawih thei tak!

Pathlawi hmelṭha lutuk ni mahse tlangvalin nula an rim ang chiahin kan inah chuan a rawn leng ṭhin a, a chang chuan Junior-a pawh a rawn hruai ṭhin nghe nghe.

Junior-a a rawn tel hi chuan ka room lamah kan pahnihin kan awm hrang daih zel a, ka chhungte paw'n Junior-a chu an ngaina ve tawh em em a, amah tê hi a ngainatawm bawk em a ni.

Peksanga phei chu Junior-a chuan ka nu leh pate aiin a ngaina lehzual a, a chhan pawh PUBG a khelh ṭhin miau vang a ni. Ni lo, PUBG mai a ni lo, naupang lawm zawng thil tih a peih em avangin Junior-a chuan a ngaina hle bawk.

Kei phei chuan a bawl kual vel peih lutuk chu ka zilh nghe nghe a, ani lah chuan engah mah a lo la ngai lo zui. Dik tak chuan Junior-a chu ka thisen zawmpui leh ka fapa ang tak takin ka en tawh a, a pa ka hmangaih em em ang bawkin ani pawh chu ka hmangaih tawh hle a ni.

Kha zan, ka chhungte hnena Henry-a ka hmangaih thu ka sawi chhuah zan aṭang kha chuan vawi khat mah ka ka aṭangin hmangaihna thu a chhuak leh ta lo va, Henry-a pawh ka hmangaih thu chu ka hrilh leh ta lo law law.

A chhan chu ka la lai ru deuh tlat a, chu bakah a hun lo ka la ti a ni. Kan inneih dawn hnaihah emaw chauh hrilh chu a fuh ka ti a, amah paw'n min hmangaih thu a la sawi lo hrim hrim.

Ka rilru a kal sual chang phei chuan amah zawkin min hmangaih thu sawi hmasa phawt se ka ti ṭhin a, ka tha a nat tlat avangin min hmangaih thu min hrilh hma chu hrilh tum lohna rilru ka pu nghe nghe ṭhin.

Ka laka a awm dan aṭang erawh sawi chhuak kher lo mahse min hmangaih ve ni mai hian ka hre ṭhin a, mahse kei chuan a ka aṭang ngeia min hmangaih thu a sawi chu ka phut ru em em ṭhin thung.

Amaherawhchu chutiang thu sawi tur chuan phut ru em em mah ila ka sawi lang ngai chuang lo, a chhan pawh ka ṭawng theih leh ka rilrua âwm awm sawi chhuah chu sim ka tum tawh tlat a ni.

Ka nu ber hian min zilh nasa ṭhin a, nupa kan nih hmaa ngam tak tak leh engkim hrilh lo turin min fuih nasa ṭhin. A ni reng bawk a, nupate chu ni tawh ila chuan zep nei lova awm bawrh bawrh pawh a pawi tawh lo, mahse tunah chuan nupa kan la ni rih lo tlat, insum theihna ka mamawh a ni.

Junior-a te paw'n class an ṭan leh tawh a, ka fapa ang maia ka ngaih Junior-a'n class 6 a zir thleng ve ta mai chu ka lawm a ni. Ani paw'n cass 6 a zir thleng ta chu nuam a tiin a inla puitling nghal sawt em em a, a pa hruai pawh a duh tawh lo vel.

Amaherawhchu kei chuan ka hruai ziah a, a changin Henry-a chuan min lo hruai zeuh zeuh tho. School aṭangin Taxi in kan haw deuh ber a, Henry-a erawh min hruai hman lek lova buai a ngah thei khawp.

Chuvang chuan keipaw'n a hman lo chung chung chu min hruai tawh lo turin ka ti tawp a, ani erawh chuan ka thusawi chu engah mah a ngai lo.

A hmana hun a nei a nih phawt chuan min rawn hruai a ṭhulh ngai lo va, driver nei reng si ama'n a khalh tlat te chu mak ka ti ṭhin.

Vawi khat phei chu ka zawt nghe nghe a, ani chuan kan bula awm tam a duh thu leh ama motor khalh ngeia kei leh Junior-a chuan tir min duh thu a rawn sawi daih.

Mak ve tak phakhat chu Chanchin thar vela thu a sawi reng reng hian fiamthu deuh pawh ni se a nui ngai mang lo va, a hnuaia thawk te pawh nuih khat paw'n a nuih ngai lo.

"Hlute, Scooty chu i duh ve tak tak ang maw? I chesual ngun lutuk hi damdawiin lam kan lut reng mai ang e" chaw ei laiin ka pa chuan a rawn ti a, Peksanga chuan min lo thik hmel hle.

"Duh tak tak e, Junior-a pawh Scooty in ka hruai thei tawh ang a, ka châk tawh teh asin, chuvang chuan ka neih chu phal vat mai teh pa" tiin chaw bar ṭhulh ṭhak khawp chuan ka dil leh a, ka dil ngun mawlh mawlh tawh khawp mai.

"Aw le, vawiinah Peksanga nen in va en dawn nia" a rawn tih chuan ka khi ver ver a, ka lawm lutuk chu ka chaw ei te thlengin a tui nghal vek a, ka chaw ei pawh ka kham hma hle.

Chaw eina vel ka tihfel hnu chuan chhuak turin ka insiam nghal malh malh a, rei lovah insiam zovin kan chhuak zui nghal.

"Khalh ka zirtir peih miah lo che a nia" showroom lam pana kan tlan laiin Peksanga chuan a rawn ti a, a hnungah ka chum ri leh dawt nghal.

"Min zirtir loh te'n ka thiam tawp nâng" ka ti a, a hma ang em em chuan ka kut a ram tawh lo va, mahse LALPEKSANGA lakah hi chuan insum rei a har thlawt a ni.

"I duh leh pu Henry-a inzirtir mai la, ka zirtir che ai chuan nuam pawh i ti zawk ngei ang" nui hek hek chuan a rawn ti a, a inla zei vel lutuk chu ka chum zawt zawt châk kher mai.

"A hman ringawt hleinem, ni lengin a buai tih hre ta che" ka tih chuan amah ang lo takin a ngawi ve ran a, rei lovah Scooty an zawrhna showroom pawh kan thleng a, an zawrhna hmun tih takah Scooty chu a lo inhung hnem hle.

Scooty kan en kual lai vel chuan Henry-a'n min lo call a, ka hun hman dan min zawh chuan kan thil tih chu ka sawi a, kan awmna hmuna lo kal a tum thu a sawi chuan mak ka ti hle. A aw aṭang lah chuan a nelawm loh nghal em em a, an office lamah thil thleng a awm a nih ka ring ta ringawt.

Chutah kan Scooty leina tur dawr neitu chu Delhi ka awm laia min lo ngaizawng em em tu kha a lo ni a, a hma ang em em chuan a hmelchhe tawh bik lo. A hmel chu a puitlin ve hmel deuh tawh a, a ṭawngkam pawh a hawihhawmin hriat a nuam khawp mai.

Ka bul chêtah chuan a rawn ding ve zel a, ka kalna apiangah a rawn kal a, Peksanga lah chuan min hmu ve der si lo. A awm dan aṭang chuan min la duh tih ka hrethiam mai a, kei erawh chuan ka duh ve der si lo.

"I lo hmelṭha lehzual hle mai, Scooty pawh kan in tlawm dawn nia, chuan i phone number min pe thei ang em Hlute?" ka beng bul chêtah chuan a rawn ti a, Peksanga erawh a awmna a hla vang vang hle.

Min rawn hnaih thut avang chuan eu deuh hlek chungin ka en hâw a, min lo la nuih vur vur zui.

"Ka number chu" ka tih lai chuan tha chak tak hian ka hnung lamah min pawt phei lâwp a, min pawttu taksa ka va nghen rual chuan en kher lo mah ila tunge a nih ka hre chiang hle.

"I duh chuan ka number i la thei ang" ka kawnga chelh reng chung hian Henry-a chuan a ti ram hmak a, ka zak viau dawn a, mahse ka zak leh lo, kan awm dan chu a nuam ka ti ru ta phian zawk.

"A ngai lo e" inthlahrung aw zetin kan hmaa mi chuan a rawn ti a, a kal sawn zui nghal nal nal. Henry-a hmel chu ka en chho a, a la rum ṭha ngei mai.

Ka en reng hnu chuan ka nui chhuak ta tawp a, thik thu a pe chhe vel lutuk chuan min tihlim a ni.

"Enge i nuih? Ka hmelhriat loh mipa dang bulah hian ka hmu leh tawh tur che a ni lo" min chhuk melh run chung chuan a rawn ti khauh fak a, nuih ka duh tawh lo bawk sia nuih ka insum nasa hle.

Kan haw hnu thleng chuan Henry-a chu a la tum bur reng a, a rukin ka nuih char char.

Scooty kan lei tuk tlaiah Peksanga chuan khalh min zirtir a, keima'n ka ngam hrim hrim bawk a, ka thiam titih nghal der. Tlu ṭep ṭepin Peksanga chu ka phur a, mahse ka thiam chak khawp mai.

A tukah chuan inla huai takin ka khalh chhuak ve hmiah a, Traffic police te paw'n min man lo tluan ve zak! Junior-a te school lamah ka inkhalh phei a, ka huai em em chu ka thiam chakna chhan ni ta berin ka hria.

Junior-a lah chuan ka phura chuan a lo châk hle a, ka hnunga a chuan lai te chuan hlauhna chhe tê mah a nei lo. A pa hna bang in chhung a lo luh rualin Junior-a chuan

"Pa, Miss hian Scooty a khalh thiam asin, vawiinah pawh min lo hruai a, kan tlu ṭep ṭep tih loh chu a nuam lutuk, Miss a nih vang a ni ang ka hlau lo reng reng" a lo ti zet zet a, min hek dan vel chu naupang ni mahse ka ngei kher mai, ngei ru zetin ka nui lui hram hram a ni.

"A ni maw!!!!? Chuti chu Miss hian min lo phur ve chhin teh se!" a fapa hmuh laia phur hmel zet hian a rawn ti ve a, a awm dan vel chu amah a ang lo bawk sia pi Rinpuii nen chuan kan lo nuih ta chiam.

Henry-a chuan a lo ti mai mai lo tawp a, ka phurha chuan chu a tum ta tlat mai, ka va han huphurh mai mai em. Pawn lamah chuan min kai chhuak a, Scooty chu a tinung a, khalh turin min ti zui nghal.

"I rit ê, nang ang renga rit hi ka la phur ngai lo" confi lo zeta khalh chung chuan ka ti mawlh mawlh a, ka balance ka hlauh mai dawnin ka hria.

Ka hnunga mi lah chuan ka kokiah a lu a rawn dah ang leh ta nghal a, min tibuai zo vek!

"Ka office kal turte hi i Scooty hian min hruai ziah la a ṭha ngawt ang" nui chung chuan a rawn ti vel a, kei lah chuan hnung lam hawi chung hian

"Min lo be tawh suh!" ka ti hmuk a, ka hma lam ka hawi leh chiah chu ka balance ka hlauh ta vek mai.

Ka ṭe vak a, kawng chhak lam chu ka su tawh dawn emaw ka ti hman hial a, mahse kan din thut avangin Scooty hma chu ka bawh rawp a, ka sir lamah ka tlu zui nghal.

"I ṭha em Hlute? I na em?" tiin Henry-a chuan min lo buaipui nghal a, kei chu leiah tlu mah ila ani chu engtin mah a lo awm ve lo.

Ka Scooty chu ka en leh vat a, hmel hemna nei lova a lo inhun ṭhat diam avang chuan kan chesual lovah ka ngai hmiah.

"I rit ropui si ka phur peih tawh lo che, nangma'n khalh haw rawh" ka ti hmawk hmawk a, ani erawh chuan min lo nuih ver ver a, nuih hun a ni pawh ka ti lo e a!!!!

"Aw le Boss" phur zet hian a rawn ti a, formal deuha inthuam chung chuan Scooty chu a khalh haw ve mai a, kei ve thung chuan a hnung lam aṭangin ka lo kuah a, a pumah chuan ka kut ka suih ran bawk.

Thursday a ni a, Henry-a pawh Shillong-ah a zin leh daih tawh, hnenawm! Zin reng mai, inngaizawng ve si awm dunna hun pawh kan nei mang lo ṭhin. Keiin ka ngai thei em em a, ani ren run lah chuan zan rei lam tih lovah chuan min biakna hun a nei ngai der si lo.

Pi Rinpuii te nen pawh phone kaltlangin kan inbe ngun hle a, Junior-a ber chuan a pi phone aṭang chuan min be peih ta a ni. A painting leh thil eng eng emaw ni te chu min hmuh ṭhin a, nuam a tih ang bawkin keipaw'n nuam ka ti thei hle.

Sana chu ka en a, dar 11 a lo hnai leh kuar tawh. Henry-a lah a reh vawng vawng mai si, chutah vawiin ni lengin kan la inbe lo zui. Amah ka ngai tawh lutuk chu biak mai ka duh a, mahse a buai ka ring deuh tho bawk si.

Chutiang thil ka lo ngaihtuah melh melh lai chuan Henry-a hnen aṭang chuan phone call ka dawng ta, ka va hlim nghal si em.

"Hello" ka pick up rual chuan ka ti a, a hmel hmu lo mah ila ka khi ver ver mai.

A nuam em alawm, he khawvel ram zauah hian mahni mipa hmangaihte nena inbiak bak baka nuam a awm lo.

"I aw chu a va zângkhai ve, chuan ka hman chiah e!" a rawn ti a, a aw ringawt pawh chuan min thlamuan nghal sawng sawng mai.

"I hmel ka hmu châk Henry, in video call ang aw" tiin ka video call zawm nghal a, a hmel ka hmuh rual chuan ka nui ringawt. Kamis var hi a lo ha a, necktie pawh a awrh lo va, a lan dan chuan a tilang sexy thlawt a ni.

"Duhawm em em nu, i mut a chhuak tawh em?" a rawn ti a, a la nui suk zui. He pa hi chu a pa chiang alawm, a thawmhnaw inbel reng rengte lah hi a inhmeh thei bawk si.

"Chhuak ve tawh tho e, zana thil ei pawh ka ching tawh miah lo. Ka nu'n a phal tawh lo va, min zilh nasa lutuk hi ka danglam vek tawh ni maiin ka hria" ka tih chuan a rawn nui a, khumah chuan a inthuamna ang angin a lawn zui nghal.

"Min lo ngai em? Kei chuan ka ngai hle che a ni" pa lutuk tak mai hian a rawn ti sup a, ka lu chu ka lo bu nghauh nghauh a, chutah ka rilrua thil lo awm leh hmasa ber chu sawi chhuak thutin

"Ka hmangaih che Henry, ka hmangaih lutuk che, i hmai te kha ka khawih châk lutuk" ka ti thawp raih a, ka mittui chu a lo tling nghal pam a, amah ka ngai lutuk chu ka ṭah a chhuak vek ni berin ka hria.

"Eng thu nge i sawi kha!? Han sawi ṭha leh teh! Min hmangaih thu kha han sawi ṭha leh teh" inperh tho zawk hian a rawn ti thuai a, a hmel aṭang chuan a buai phili hmel hle.

"Ka hmangaih che Henry, ka hmangaihna che hi a rei tawh, ka sawi duh lo mai mai zawk alawm" ka ti nawn leh ngat tâkah chuan thawk a la hawk a, kei chuan a awm dan chu ka lo thlir reng thung.

"Lalpa le! Naktukah kan lo thlawk haw dawn a, chawhnu lamah a ni ang. Ka beng hriatah ngei kha thu kha sawi leh ang che aw, i ti thei ang em?" a rawn tih leh chuan ka lu ka lo buk khum nghauh nghauh a, ani chuan phone camera chu a rawn fawp vawng vawng a, a hmel ka hmuh leh chuan a hlim ve hle tih ka hre thei.

"Ka lo thlen zanah ka lo leng ang a, i pa pawh ka dil ṭha leh tawh ang, min pawm ve ngei ka ring tawh" a rawn ti nghet charh charh a, a phur tawh lutuk avangin a aw aṭang chuan thinrim te pawh a ang hial zawk.

Ka harh leh meuh chuan zing a lo ni der tawh a, zan lama ka awm dan chu ka ngaihtuah let a, Henry-a chu kan inbiak laiin ka lo muthilhsan daih tih ka hre chhuak zui nghal.

Nizan zet zawng a hlim ve hle a ni ang amah ang lo takin a ṭawng ve duah a, min ngaih thu leh a thinlung neitu ka nihzia chu a sawi reng a, mahse a ṭawng chu a chhumbung thei em em thung.

A thinlung neitu ka nih thu a sawi lai kha chuan ka hlim lutuk avangin ka au vak vak lo chauh a, min hmangaih thu sawi dawt lo mahse kei ang bawkin ani chuan min hmangaih ve tawh tih ka chiang a ni.

Chawhnu her a lo nih chuan ka rilruah tu dang reng an awm thei tawh lo, Henry-a tih chauh lo chu! Ka inbual fai a, ka inbual zawh chuan Junior-a class pe leh turin ka insiam a, chutia ka insiam lai chuan pi Rinpuii hnen aṭangin phone call ka dawng nawlh a, mak ka ti ang reng hle.

"Hello" mawza bun ṭha mawlh mawlh pah chuan ka ti a, mahse pi Rinpuii thu rawn sawi chuan min va han ṭhawng chiang tehreng em.

Mawza bun tuma ka che pawh chu ka tawp chat a, ka thu hriat chuan ka rilru zawng zawng a khawih buai vek nghal. Ṭawng ri lawng lawng chu ka hre ngei mai, mahse ka thu hriat hmasa ber avang chuan eng thu mah ka rilruah a lut thei tawh lo a ni. Ka rilru chhungril chu a chiai a, ka mangang a, awm dan tur ber pawh ka hre rih lo a ni ber.

Chapter 18

"Hlute! Hlute! I la awm em? Ka ṭawng i hre thei em? Hmanhmawh rawh aw, ka hlauthawng lutuk" tih thu pi Rinpuii'n a rawn sawi leh chu ka thu hriat tawp ber a ni a, bianga mittui luang zawih zawihin ka phone chu ka off a, khumah chuan mi â ang maiin ka ṭhu ngawi ta reng bawk.

Ni lo, a theih loh, a ni thei lo, ka phal lo, ka phal thlawt lo. Ka bianga mittui luang mek te chu ka hru tawk a, khum aṭang chuan rang takin ka inperh tho at a, mawza pawh bun ta lem lo chuan room aṭangin ka chhuak zui nghal. Ka chhungte pawh ka ngaihsak tawh lo va, engmah ka rilruah chuan a awm thei tawh lo zawk a ni.

Chak takin Scooty chu ka khalh chhuak a, ka tlan chhuah dawna ka nu min lo biakna pawh chu ka hre reng, mahse ka ṭawng chhuak a nih chuan ka ṭap vak vak thei mai dawna ka hriat avangin ka chhang duh lo hrim hrim.

Hospital lam pana ka tlan lai te chuan Horn ka pe ri phei tuar tuar a, mi dang pawh chuan ka hmanhmawh thawkhat a ni tih hriain min lo kian sup sup a, ka hmanhmawh luatah ka tlu nghe nghe.

Ka tho leh vat a, ka Scooty chu rang takin ka tung ding a, ka ban thi ser ser pawh chu na tihna pakhat mah ka nei tawh lo a ni ber. Hospital Area ka thlen chuan a rem remah Scooty chu ka park tawp a, chak takin ka tlan zui nghal bawk.

"Hlute!" min hmuh rualin pi Rinpuii chuan a rawn ti nghal a, a hmela aṭang chuan a ṭap nasa tawh hle a ni tih a hriat ngawih ngawih. Junior-a chu a pu nen ṭhutthlengah an lo ṭhu a, min hmuh chuan min lo pan nghal chat bawk.

"Hlute! Kei chu a pawi ka ti em mai" tiin pi Rinpuii bawk chuan ka kut a rawn chelh a, kan mittui chu a tling nasa dun hle. Chutah Junior-a chuan min lo kuah thlawp a, keipaw'n ka lo kuah let ve nghal vat.

"Miss, engati nge apa hi hetiang hian a awm bik kher? Ka duh lo, apa awm dan hi ka duh lo, ka ngaina miah lo" Junior-a chuan ṭap chung hian a rawn ti hawm hawm a, ka va han khawngaih tak em.

"A hlauhthawnawm hleinem Junior, apa chu a ṭha leh vat dawn alawm" tiin ka pawm kang a, mahse kei ngei pawh hian ka thusawi chu ka hre chiang lo.

"Ṭap tawh suh le, ṭhutthlengah sawn ṭhu ang aw" tiin ka pu lo ṭhutna bulah chuan ka ṭhut phei pui a, kan bulah pi Rinpuii pawh a rawn ṭhu ve nghal mai bawk.

"Ka pi, Henry-a'n accident a tawh dan hi min lo hrilh ṭha leh mai teh. Phone aṭang kha chuan i thusawi engmah ka ngaihtuah chiang thei lo, ka chiai vek a tin ni!" lungngai tak chuan ka ti a, Junior-a paw'n min kuah nghet hle. Ka pu meuh pawh a lungngaih hmel a, tu pawh chu kan lungngai vek a ni.

"A chanchin min lo hrilh kha chuan Lengpui Airport piah lawka Truck motor nen an insut thu a lo ni a, min lo betu pawh kha mi dang daih a ni. Civil Hospital lam an panpui mek thu min lo hrilh a, keini pawh kal ve nghal turin min ti nghe nghe" a thusawi tawp lamah chuan a rawn ṭap chhuak hawk a, keipawh ka mittui ka dang seng bik lo.

"Tunah hian Doctor te'n an zai mek a, enge a an dawn pawh kan la hre thei bawk si lo, ka rilru hi a hahin a buai tak zet a ni. An insu na thawkhat a ni ang a driver phei chu a hmunah ka pawh chhawn lovin a boral nghal a ni awm a, kei zawng Henry-a Bawiha hi a thi ve mai ang tih ka hlau em mai" ka pi chuan a rawn tih chhunzawm leh a, ka pu dar ngheng chuan a ṭap zui ta feih feih.

"I lungngai leh lutuk a nih khâ, Henry-a chu a rawn dam ṭhat leh ngei ka ring, hetiang mai chuan a fapa hi a kalsan duh ka ring lo" tiin ka pu chuan pi Rinpuii chu a lo hnem a, lungngaih hmel lo ang takin lan tum mahse ka pu chu a hlauthawng ve tak zet a ni.

Junior-a chu a hmel en tumin ka'n thlek deuh a, ka dara bawk chung hian a lo muhil daih tawh. Nghet tak chuan ka kuah a, a la naupang bawk sia ka khawngaih hle a ni.

Ka mittui chu tlin loh lai a awm lo va, engkim chu ka thiam loh ni ta berin ka hria. Ka hmangaih thu te kha lo hrilh thawt thawt lo ila chuan accident an tawk miah lo vang, ka hmangaih a ni tih a hriat khan a phur em em a, lo haw thuai thuai a châk a nih kha!

A hmanhmawh lutuk avangin driver kha tlan chak tur emaw te khan a ti ngei ang a, chuvanga accident tawk chu an nih ngei ka ring bawk.

Âwwww, engati nge ka lo hrilh kher kher? Engati nge ka hmangaih thu kha ka lo hrilh kher kher? Tunah lah ka thusawi avangin engmah hre lovin a awm a, a thi dawn nge a dam dawn tih pawh kan hre si lo.

Chutia lungngaihna nena rilru ka hman lai chuan phone call ka dawng a, min lo call tu ka en chuan ka nu a lo ni. Kan han inbia a, sawi pawh sawi ṭha hlei thei lovin ka ṭap a, ka awm dan avang chuan ka nu chu a rawn hlauthawng nghal hle.

Ka ṭah chhuak lutuk a reh hnu chuan Henry-a chanchin ka hriat ang ang chu ka sawi a, ka nu chuan an lo kal nghal vat tur thu a sawi a, a aw aṭang chuan a chiai ve hle tih a hriat.

Darkar 1 hnu velah Junior-a a rawn harh a, a rawn nuar ta. A pa a hmuh duh thu sawiin a ṭap vak vak a, a awm dan chuan min tibeidawng zual. Henry-a chuan min thihsan mai ang tih ka hlau lutuk, ka hlau tak zet tawh a ni. Chanchin lah engmah kan la hre thei bawk si lo.

Junior-a chu ka theih tawp chhuahin ka thlem a, mahse ka thlem bang thei chuang lo. Ka chhungte pawh an awm vek tawh a, Peksanga'n tih hlim a tum pawh chuan a lo duh lo nasa.

Ka mangang buai tawh nen ka vin ta vak a, ani pawh chuan min hlau a ni chek ang a ngawi ta hmak. Nghet taka min kuah chung hian a ṭap khur det det a, ring taka ṭah chhuah ve hawm hawm mai ka duh.

A hnung chu hmangaih takin ka chul a, ka nu phei chu kan awm dan avangin a lo ṭap ve tawp. Hmeichheho leh Junior-a chu kan tuar a zuau bik a, mipaho erawh an mittui far khat pawh a tla lo.

Ka pa chuan ka pu chu a ṭhut hnaih a, eng eng emaw ni a sawipui a, Peksanga tak ngial pawh a lungngaih hmel hle a ni. Room chhung aṭangin Doctor pakhat a lo chhuak a, a thawmhnaw inbel aṭang chuan Surgeon a ni tih a hriat hle.

"Enge chanchin Doctor? Henry Bawiha chu a ṭha em? In zai hlawhtling em?" pi Rinpuii chuan a lo ti zung zung a, mi dang pawh chuan Doctor chu kan kal hnaih ve vat.

"Tunah rih chuan hlawhtling takin kan zai zo a ni tih hre phawt ula, a lu tih lovah chuan hliam a na em em a nei tawh lo" Doctor chuan a rawn ti a, chutah kei chuan ka bula mite ṭawng pawh nghak zo lovin

"Enge i sawi awmzia Doctor? Henry-a chu a ṭha leh thuai dawn i tihna em ni?" ka lo ti ve thuai a, ka insum hman tawh lo a ni. Ṭha leh vat se, awm duh vat ila, a nupui ni thuai thuai ila ka duh ber tawh.

"Ka hre lo le, mak tak maiin a puma hliam awm hian pawi thui tak a khawih hran lo. Amaherawhchu a lu hi a sawh na thawkhat hle a, chu chu kan buaina ber a ni tawh. Eng pawh ni se lo lungngai lutuk lo ula, keini'n theih tawp kan chhuah tawh bawk a, Pathianin min ṭanpui dawn alawm" hriat nuam tak hian Doctor chuan a rawn ti a, tlem chuan ka hlauhthawnna pawh a reh ve ṭan ta deuh.

"A nih chuan a rawn dam leh ngei ngei dawn ti raw Doctor? Engtikah nge a lo harh chhuah thei ang?" ka lo ti leh vat a, zah lam reng ka hre tawh lo, Doctor chu ka si lo chauh tawh zawk a ni.

"Chu tak chu ka la sawi chiang fak thei lo, mahse a thih em chu ka ring lo a ni. A lo harh chhuah hun tur hi hriat a ni lo va, mahse in rilru nawmna'n ni 2 emaw hnu velah chuan a lo harh chhuah ka ring. Tunah hian oxygen pek mek a ni a, Cabin-ah kan sawn nghal bawk ang. Lo hlauthawng lo ula, ICU pawh kan la thlen em loh hi!" ka dara beng thek thek chungin Doctor chuan a rawn ti leh a, min nuih lui sakin a kal sawn zui nghal.

Ṭhutthlengah chuan zawi hnuangin ka ṭhu phei leh a, Junior-a pawh Peksanga'n a pawm fel tawh. A ṭah nasat lutuk avangin a ṭap muhil leh a, chutiang taka naupang rilru na hmel kan hmuh avang chuan kan khawngaih hlawm hle.

Doctor sawi lawk ang ngeiin rei lovah Henry-a chu an lo nawr chhuak a, a hmel mawlh chuan ka ṭah a ti chhuak leh ta. Engmah hre lo tih hriat zet hian a mit a chhing tlat a, a hmai vel te chu amah ang lo takin a dang hle a, a lu chu a intuam bur bawk.

Ka insum thei lo chuan a lam chu ka pan a, a hmai chu ka chul sak a, min lo en thut palh tâkah tiin ka nui lui sak bawk. Cabin-a an dah luh thleng chuan ka zui zel a, Nurse te pawh chuan min hrethiam ve mai. Ka mittui chu dan ka tum ve ṭhin, mahse ka dang seng thlawt lo a ni.

Mi dang pawh Cabin-ah chuan an lo lut ve nghal a, mahse Nurse te chuan chiai lutuk lo turin min hrilh ta zung zung.

Mi pahnihin an awmpui theih thu an rawn sawi chuan ka awmpui tur thu ka lo sawi vat a, mi dangho pawh chuan min hnial an tum bik lo a ni ang an ngawi ṭhap.

Kei ang bawkin ka pi chuan a awmpui tur thu a rawn sawi ve a, ka hawi kual chuan ka chhungte mitmenga min khawngaihna chu ka hmu thei, nasa takin min khawngaih a ni.

Zing dar 3 a pel tawh a, muhil lovin ka la meng kar mai. Engmah hre lova mu mek Henry-a kut chu ka chelh reng a, a kut vawt thler chuan a thi emaw min tihtir rum rum ṭhin.

A lu bul lawka khawl awm chuan a thi lo tih min hriattir lo phei se chuan ka thih ve theih mai ka ring, mahse chu khawl ringawt pawh chuan thlamuanna leh hahdamna min pe tawh zawk a ni.

Ka hmaah chuan pi Rinpuii pawh a bawk muhil a, tar lam a ni ve tawh bawk sia a chau ngawt ang ka ring. A tupa lah heti mai hi a ni a, a tan chuan namen lova rilru hahna tham a tling khawp.

Junior-a leh ka pu pawh kan in lama riak turin ka pa'n a sawm a, ka pu pawh chuan a lo remti ve mai. Kei leh pi Rinpuii tih loh chu zan dar 9 velah in lam panin an haw a, kan ril a ṭam hlauvin ei tur pawh min hnutchhiah ṭeuh nghe nghe.

Kei ang bawkin pi Rinpuii chuan Henry-a kut chu a chelh ve reng a, a muttui theih tak tak pawh ka ring lo, mahse a chauh thlak em avangin a muhil ni maiin ka hria.

Ka insum thei leh pek lo chuan Henry-a hmai leh chal vel chu ka han fawp a, ka mittui chu a hmaiah a far zawih zawih bawk. Hmangaih leh duat takin a hmaia ka mittui awm ho chu ka hru fai a, ka ipikin ka rilru a hah tak zet a ni.

Ni 5 hnuah pawh Henry-a chu a rawn la harh miah lo va, chung avangte chuan Doctor pawh kan ko deuh chhen. Doctor lah chuan tih ngaihna mai a hriat tawh lo thu min hrilh a, nghak hram hram tura min tih bak sawi tur a nei tawh bik lo.

Ka beidawng dâwn dawn ṭhin a, Henry-a chu a thi mai ang tih ka hlau ṭhin, mahse a lu bula khawl bawk chuan beiseina min pe hram hram lo thei lo a ni.

Henry-a accident tawhna chuan Social Media leh News lam a luah khat hneh hle a, mipuiho paw'n pawi an lo ti ve hle. Dam ṭha leh vat tura thu post te chu a awm fur a, a accident tawh dan te thlengin an chhui chiang nghe nghe.

Mizoram Health Minister laiin chutianga accident a tawk thut mai chu mak an ti a, ruahmanna awm sa avanga accident a nih leh nih loh te chu an han chhui a, mahse a tawpah erawh accident pangai dik tak a nih thu chu an hmu chhuak ta tho a ni.

Tin, Engzuali paw'n kan chanchin a lo hre thuai a, min lo be ngun malh malh thei hle. A hlimawm zawnga thil a sawi pawhin ka nuih pui thei tawh ngai lo va, a beidawng hman hial ṭhin.

Ni e, kei hi ka mipa hmangaih awm dan avang hian ka zuai vek tawh a ni. Ka ze harh leh thawveng zet kha chuan keimahah hmun an chang rih tawh lo, lungngaihna tih chauh lo chuan!

"Henry, lo harh tawh la, aw? Ka ngai tawh em mai che, min ngai ve miah lo em ni? Engati nge i mit i la chhin tlat? Ka hmangaih che thu pawh hmai chhana hrilh tur chein min tih khâ, lo harh tawh rawh Henry, khawngaihin lo harh tawh hram rawh Henry" amah bawh chung chuan ka ti a, ka ṭap zui feih feih bawk. Chutia ka ṭah lai chuan a ban chu a rawn che ta tlat mai, ka va han ṭap tawp chiang em.

"Henry! Henry i harh em? I harh ti raw? Min hmu em? Ka ṭawng i hre thei em?" ti zungin zungin a hmel chu ka en vat a, ani erawh chuan chung lam a lo en a, ka biakna chu hria ang pawhin a awm lo.

"Henry! Pathlawi, min en teh, min en teh ka tih chû" ka tih leh vak chuan ka lam chu a rawn hawi a, ka va han lawm si em. Ka lawm lutuk avangin a lamah ka kun hniam a, a chalah chuan hmangaih em em hian ka fawp ta vang vang.

"Ti hian lo la meng reng rawh aw? Lo maimitchhing tawh miah suh, Doctor ka va ko thuai thuai ang e" tiin ka thawhsan a, room aṭang chuan ka tlan chhuak thuai bawk.

Doctor hnena Henry-a a lo harh tawh thu ka sawi chuan a lo lawm thiam ve hle a, hmanhmawh takin Henry-a awmna Cabin chu ka pan zui nghal bawk.

"I harh ṭha tawh maw pu Henry? I lo harh har phian a, kan lo hlauthawng hman alawm" tia biak pahin Doctor chuan Henry-a chu a check zung zung a, Henry-a erawh a la ngawi reng thung.

"Mi dang ka'n hrilh ve vat ang e, an lawm ve ngawt ang" tiin ka phone chu ka phawrh a, ka chhungte chu ka be zui nghal.

Chanchin ka hrilh chuan an lo lawm ve hle a, an vaia an lo kal tur thu chu min hrilh zawm zat bawk. Pi Rinpuii erawh chhun thil ei tur la tura a chhuah bo lai tak a ni a, a lo let leh thuai ka rin avangin ka call buai duh ta lo.

"Lawk lawk lawk!" tiin Doctor chuan Henry-a a mutna aṭanga thawh a tum ringawt chu a lo be vat a, pakhata chuan a melh rum kher mai. Doctor chuan a darah a chelh tlat a, Henry-a chuan a la dah thlaksak hmak zui.

"Ka ṭha tawh e, eng vanga damdawiina awm nge ka nih?" tiin Henry-a chu a rawn ṭhu awn duai a, Doctor pawh chuan engkim chu a hrilh fiah ta mawlh mawlh. Min lo en lai chuan hlim tih hriat tak hian ka lo nuih sen sen a, ani erawh a ngaite bawkin a la meng rum hle.

"A ṭhat hmel phian tawh hi â, ka chhuahsan rih ang che u, harsatna in neih chuan min lo ko leh mai dawn nia" tiin Doctor chu room aṭangin a chhuak a, kei chu Henry-a awmna lamah ka ṭhu phei ta vat.

"Ka ngai tawh lutuk che Henry, i lo harh har si" tiin a hmuiah chuan ka fawp a, mi pawh a rawn chhang let eih lo, vel lutuk hian a!

A hmel ka en chuan mak tih hmel deuh hian min lo en a, kei erawh lawm lutuk avangin ka nui reng ringawt. A kut chu la kangin ka fawp leh vang vang a, ani paw'n ka chet dan vel chu min lo en chik hle.

"Min ngaih thu sawi ve tawh la, i ṭawng peih lo viau a nih paw'n kei tal chu min be ve la, a hrehawm ka ti teh mai a nia aw" ti nui nuiin ka titau der vel a, min thlem leh dawn tih ka hriat chian lutuk avanga titau lui pawh ka ni. Min buaipui vel dan tur mawlh chu ka hre châk, ka hre châk tawh lutuk.

"Tunge i nih?" tiin a kut ka chelhna chu zawimuang hian a la sawn a, a thusawiin min ṭhawn lutuk avangin chet mai na chang pawh ka hre lo. A hmel ka en lah chuan rum zet hian min lo melh a, min chik hmel hle bawk.

"Awi awi awi Henry pathlawi, in la che romantic kual vel kher suh, a pathlawi nih thlak em mai a! Min ngaih chuan ka ngai che ti ve mai rawh" tia nui sen sena ka ṭawng laklawh lai chuan

"Tunge i nih?" a rawn ti nawn leh ngat a, ka nui tawp ta riai riai nghal. A hmel chu chiang takin ka en a, a mitmeng chu ka chhiar thiam leh ta hauh lo.

Rei lovah hlauhthawnna in ka khat nghal a, ka thin phute chu a rang sawt hle. Chutih lai tak chuan kan chhungte an lo lut a, Junior-a phei chuan ring zet hian

"Pa!" a rawn ti a, Henry-a lam chu hlim leh hmanhmawh zet hian a rawn pan a, mahse a pa a kuah dawn chiah tihah Henry-a chuan a darah a lo nam ding ta chat mai. Henry-a awm dan chu mak kan ti hlawm hle a, ka nu phei chuan zawhna mitmengin min lo en nghal.

"Pa, ka kuah châk che a nia" tiin Junior-a chuan a pa chu kuah a tum ṭhin, a pa lah chuan a lo nam ding tlat bawk si.

Chutia an pafa awm dan kan en ṭhup lai chuan pi Rinpuii pawh a rawn lut a, Henry-a a hmuh rual chuan a rawn au nghal chûl bawk.

"Henry Bawiha, awi ka va lawm em, i ṭha em? I ṭha tawh tak zet ti raw?" ti mawlh mawlhin Henry-a hmai vel chu a va chul a, mahse Henry-a chuan pi Rinpuii kut pawh chu a lo phih thlaksak leh ta hmak mai. Thil a kal dik dawn lova ka hriat avang chuan

"Peksang, Doctor va ko rang rawh, hmanhmawh rawh, Henry-a hi a la dam chiang miah lo a nia" ka ti vat a, ka hmel aṭang chuan ka hlauthawng hle a ni tih a hriat theih ngei ang.

Ka sawi angin Peksanga pawh chu a tlan chhuak thuai a, Doctor pawh rei lovah a rawn lut ve nghal. Doctor chuan kan vaia chhuak rih turin min ti a, keini pawh kan chhuak ta vek. Minute 10 hnu velah Doctor chu room aṭangin a lo chhuak a, kan lo bawr luih nghal a, zawhna pawh kan ngah hlawm hle.

"A pawi ka ti khawp mai, ka lo hlauhthawn ruk ang ngeiin pu Henry-a hian accident a tawh avang khan a hriatna tam tak hi a hloh a ni. Ama hming tak ngial pawh a lo hre tawh lo va, kan inbiak khan a hming leh Health Minister a nih thute chu ka sawi a, mak a la tih hmel khawp mai. Tin, nangni pawh a chhungte in nih thu ka sawi a, ani chuan tumah a hriat tawh lo che u thu a sawi ve a, a rilru a la buai hmel khawp mai" Doctor chuan a rawn ti ta mai, kan va han meng phawk nasa tehreng em.

"I sawi awmzia chu a fapa tak ngial pawh hi a hre tawh lo tihna em ni?" Doctor kawra pawt ṭawng ṭawng chung hian pi Rinpuii chuan a ti a, kei erawh lei lam enin ka tawlh hnung hret hret a, ka mang vek ni mai hian ka hria.

"Tunah rih chuan a fapa pawh hi a hre tawh lo a ni. Amaherawhchu hriatna hlohte hian an hloh hlen vek kher lo va, chuvang chuan pu Henry-a'n a hriatna a neih let leh theihna kawngah hian mawhphurhna in nei sang hle a ni tih hria ula ka duh. In va lut ang a, in va bia ang a, mahse chim huai huai lo vang che u. Lu na tih vel a neih thu engmah sawi lo mahse na thut thei a la ni a, lu na vel a neih chuan inbuaipui a harsa tawh zawk maithei a ni" Doctor chuan a rawn ti leh a, kei erawh chuan thil pakhat chiah ka ngaihtuah daih tawh thung.

"Doctor, engtin nge a hriatna hi a neih kir leh theih ang? Eng pawh sawi rawh, Henry-a hian a hriatna a nei kir leh dawn a nih phawt chuan ka ti vek ang" tiin Doctor awmna lam chu ka pan a, ka bianga mittui te chu ka hru hul sawk sawk a, intih chak thar chu ka tum ruh ta hle.

"Engkim, a tir te aṭangin a lo nun tawh dan zawng zawng in hrilh vek ang a, a thil lo tih tawh ṭhinte in tih nawn pui leh vek bawk ang a, chu chuan zawi zawiin a hriatna a pe kir leh thei ang. Amaherawhchu a hriatna hi a nei kir leh ngei dawn em tih ka chiang lo va, mahse ka sawi anga in awm thei a nih chuan chance pawh a awm tho. Enga mah hmain lungngai nghal lo ula, beidawng lovin thil chi hrang hrang tihpui ula, kan theihna kawng a nih phawt chuan keini paw'n kan pui zel dawn che u a nia" tiin Doctor chuan min lo chhang a, kei erawh tûmah rawn lovin Henry-a awmna room chhungah chuan ka lut zui ta hmak.

Room chhunga ka luh chuan min lo en reng a, ṭah chhuak em em chung chuan ka nuih lui ta sak. A hmaah chuan ṭah leh ka tum tawh lo, ka mipa hmangaih hi a hriatna ka pe kir leh dawn, chu chu ka mawhphurhna a ni.

A hma ang bawkin a kut chu ka hum ran a, chiang takin a mit chu ka en bawk. Ni lo, ka en rei thei lo, ka en rei a nih ngat chuan ka ṭap chhuak thei mai ang.

"Henry, i bialnu ni lai mek Hlutei ka nia, chuan fapa i nei bawk aw? Nichin maia mipa naupang kha i fapa a ni a, a lo luh hunah chuan lo kuah ngei ngei tawh rawh aw? I lo harh chhuah hma aṭang tawh khan a ngai em em che a, i thih kha a hlau lutuk, chuvang chuan lo nam ding tlat tawh lovin lo kuah hle hle tawh ang che" hmel hlim pu lui hram hram chuan ka ti chhuak dap a, ka aw pawh chu a zawiin a dam ve hle.

"Ka hre lo, ka fapa a ni em tih pawh ka hriat loh chu ka kuah thei ringawt hleinem, nang pawh hian ka kut hi thlah vat la a ṭha ang" a rawn ti chang fak a, a hmel leh a awah chuan nelawmna pakhat mah a awm lo.

"Aw le, ka tihpalh. I kut chu ka'n thlah ang e, mahse i fapa tal chu lo kuah ngei ngei rawh aw? Naupang mai a la ni a, khawngaihin a duh ang chuan lo awm hram hram ang che" tiin a kut ka chelhna chu ka thlah a, ani erawh a hawi sawn daih thung.

"Pa!" kawngka lam aṭangin Junior-a chuan a rawn ti a, Henry-a chuan a fapa chu a en zawk a, keimahah a mit a rawn fuh leh nghal. Kei chuan lu ka lo buk khum nghauh nghauh a, ani paw'n Junior-a lam chu a hawi ve leh thuai bawk.

"Pa, engatinge min hriat loh? Engatinge ka kuah che kha i phal loh?" tiin Junior-a chuan Henry-a chu a rawn kuah nghal a, Henry-a erawh chuan a lo la kuah let duh mai lo. Ka mitin kuah let ve turin ka signal a, inthlahrung hmel zet chuan a kuah let ve leh mai bawk.

"Henry Bawiha, a va'n zia lo tak em. Doctor hnen aṭangin i hriatna tam tak i hloh tih i hre vek tawh tho ang ti raw? Kei zawng a pawi ka ti em mai" pi Rinpuii chuan a ti a, a aw aṭang ringawt pawh a lungngai tak zet a ni tih a hriat theih.

"Min hrethiam ula, tûmah hi ka hre lo che u. Ka chunga thil thleng sawi vek turin Doctor kha ka lo ti tawh a, ani paw'n thil thlen dan engkim min hrilh vek, mahse a tua te mah hi ka la hre chhuak thei chuang lo che u a ni" Henry-a'n a rawn tih lai chuan ṭah chhuak zet hian

"Ka hmangaih che Henry, ka hmangaih lutuk che. I hria em, nizan lawkah pawh ka hmangaih che thu kan awm dun hnua sawi leh turin min tih khâ, khang tal te kha chu hre chhuak hram teh" ka lo ti leh tawp a, intih chak tum em em si kha ka keh chhe hneh leh ta hle.

"Enteh ṭhiannu, tunge i nih ka hre lo che ka tih mawlh mawlh kha maw le, khatiang thu kha ka beng hriatah sawi tawh lo la ka duh khawp mai" a rawn ti chang ta fak a, hrehawm ka va han ti tehreng em.

"Chuan, min kuah mektu naupang hi ka fapa a nih chuan khawnge ka nupui chu a awm? Khawnge ka fapa nu hi a awm?" tih zawhna chu a rawn sawi zawm leh nghal a, kan vai chuan kan ngawi ta ṭhap mai.

"Henry Bawiha, chutiang thute eng vanga sawi nge i nih chu le? Junior-a nute chuan fa a hrin aṭang khan mipa dang a umsan daih tawh che u alawm" kan ngawih vang vang hnuaah pi Rinpuii chuan a lo ti chhuak ta nge nge a, Henry-a erawh chuan a pi thusawi chu a awih loh hmel hle thung.

"Ka fapa hi tihfahrah ka duh reng reng hleinem, a nu chu ka zawn chhuah a ngai a nih chu! Hei, i nu chu i la hmu miah lo tihna em ni?" tiin Henry-a chuan Junior-a chu a bia a, a hming pawh a hriat miau loh avanga a fapa a mawl biak tawp ri chu hriat a hrehawm ngawih ngawih.

"Mâw pa? Anu maw!? Ka la hmu ngai lo hrim hrim, nangmah paw'n hmuh i phal ngai hleinem" Junior-a chuan a pa en kar chung chuan a lo ti a, Henry-a thil sawi vel dan leh awm dan vel chuan min tilungngai tawlh tawlh tawh.

"I awm dan leh i hmel ka en hian ka fapa i nih ngei ka ring thiam tawh, a chhan chu naupangin dawt an sawi ngai lo. I nu pawh kan zawng hmu leh ang a, fahrahin ka awm tir lo vang che" Junior-a chal fawp zeuh pah chung hian Henry-a chuan a ti nghet charh a, Junior-a erawh chuan a pa chu a en ta hâw.

"Pa! Anu te chu Miss hi a ni dawn i tih vek tawh khâ, nu dang ka duh hleinem, Miss hi nu atan kei chuan ka duh alawm" Junior-a chuan min kawk chung hian a rawn ti ve thuai a, a fapa thusawi avang chuan Henry-a mit leh ka mit chu an intawng ta chat mai.

"Nichin khan ka bialnu i nih thu kha i sawi a, mahse kei chuan ka hre hauh lo che. Min hrethiam hram dawn nia, ka fapa nu dik tak lo hi chu ka fapa hi nu neih tir ka tum lo, ṭhiannu" ka mit taka min en chung hian Henry-a chuan a rawn ti ta, ka insum theih ngâng tawh loh avangin ṭap chung chuan ka tlan chhuak ta tawp.

Ka nu hmel chu rei lovah ka hmu a, min lo kuah chuan a aia nasain ka ṭap zui nghal. Ka nu chuan hrethiam hram hram turin min ti a, mahse ka tan chuan a na thlawt a ni. A na a, hriatthiam mai lah thil harsa tak a ni bawk.

Ka pi hmel pawh ka hmu thuai a, ka thil tawn mek chu ka tuar thiam lo a ni. Henry-a thusawi khan min tina lutuk, ka â thei mai dawn. Min hre miah lo tih chu ka hria, a bialnu ka ni tih tak ngial pawh a hre tawh lo chu ka dem lo, a chhan chu a hriatna a hloh miau alawm.

Theih tawp chhuaha a hriatna nei kir leh tura puih tumna rilru ka siam fel laiin Junior-a nu dik tak zawn hmuh lam a rawn sawi a, a sawi satliah mai ni lovin a fapa chu nuhrawn neih tir a tum loh thu min hrilh a nih kha! Ka va na tehreng em, ka keh chhe vek ni mai hian ka hria.

Chapter 19

HENRY POV

Accident ka tawh aṭangin thla khat lai a liam leh tawh a, vanneih thlak taka ka thi lo hlauh chu a lawmawm ka ti hle. Ka puma hliam awm ve te chu kar khat hnuah a dam titih der a, mahse a buaithlak ber erawh ka hriatna ka hloh ta chu a ni.

Hospital aṭanga kan in lam pana kan haw te chuan ka ni huih a, ka awmna hmun chu khawi lai hmun nge tih tak ngial pawh ka hre thei lo.

Ka fapa, a hming pawh ka la hriat loh chu ka pawm ran a, ka pawm châk vang pawh a ni lo. Amah te chuan ka pawm a duh tlat a, min tihnat hlau takin ka mal chungah chuan a ṭhu ran bawk.

Taxi in kan in lam chu kan pan a, minute 20 hnu velah kan in awmna hmun chu kan thleng a, a fal ka ti rilru hle. Ka chal pawh ka la tuam bur a, mahse na erawh ka nei tawh miah lo.

In chhung kan luh te chuan ka thil hmuh ngai pakhat mah a awm lo, engkim chu ka tan chuan thil thar vek a ni. Ka hming tak ngial pawh ka hre tawh lo kha a ni a, Doctor khan min hrilh lo phei se chuan ka buai viau ang ka ring.

Ka pi chuan ni leng leh zan tinin Album chi hrang hrang min en pui ṭhin a, thlalak vel ka hmûh ka hmuh tâkah chuan ka chhungte chu ka ngaina chho ṭan ve ta chauh.

Ka nu leh pate an boral tawh thu ka hriat chuan ka rilru a na nghal em em a, ka pa hmel ka hmuh chuan ka rilru a buai leh ta nak mai.

Amaherawhchu ka pi chuan ka awm dan hrethiam zetin ka pa chu Vai a nih thu min hrilh a, a awmzia chu Mizo leh Vai thlah pawlh ka ni tihna a nih chu!

Ka pi chuan ka naupan lai chanchin zawng zawng min hrilh vek ṭhin a, Mizoramah pawh awm lova Delhi hlira kan awm tam zawk thute min hrilh ṭhin a, lehkha ka zir chhoh dan zawng zawng leh ka hna chelh mek te chu min hrilh fai vek bawk.

A bik takin ka fapa chu ka khawngaih a, a tira ka lo hriat miah loh avang chuan ka inthiam lo hnuhnawh ta hle bawk. Tin, ka pu paw'n min titi pui nasa ṭhin, an vai chuan ka hriatna ka neih let leh theihna'n an ṭangrual hle tih ka hmu thiam a, mahse ka tum ngial pawha ka hriatna ka la nei let thei rih mai loh avang chuan hrehawm ka ti ve em em tho.

Ka fapa pawh Henry Lalsangzuala Junior tia a hming phuah a ni tih te ka hre ve tawh a, ka pi leh pute'n Junior tia an koh avang chuan keipaw'n ka ko ve ta mai bawk.

Ka chhungte laka ka inthlahrun ruk em avangin ngaihdam ka dil ta tawp a, mahse chu erawh ka hriatna ka neih let leh tawh vang a ni lo, ka chhungte ka lo hre miah lo chu ka inthiam loh vang a ni zawk.

Ka fapa Junior-a pawh ka bulah a tal chawt zel a, kar hnih chhung chu keimah avangin school a kal lo ve nghe nghe. A thiam ang tawkin min buaipui a, a ṭawng duhin ka ngaina tawh hle a ni.

Painting lam a lo tui viau a, min tihpui nasa ṭhin hle bawk. Amaherawhchu keimah zawk hi ka khawr tlat a, ka la lai tlat a, anni chu ka chhungte dik tak an ni tih hre tawh tho mah ila engtin emaw ni taka inthlahrun rukna ka la nei lian em em a, a tua te mah chu ka duh thua kuah hmasak ka la nei lo hrim hrim zawk hial a ni.

Min kuah tam ber tu chu ka fapa Junior-a a ni a, ani chu ka fapa a nih vang nge ni ka pi leh pute bul ang em emin a lakah chuan ka inthlahrung hran lo, mahse inthlahrunna leh mak tihna chu ka la nei ru reng tho.

Vawi khat phei chu zanah painting kan tihpui a, Junior-a chu a hlim hle bawk. Ka hnarah te chuan rawng chu a lo tat a, kei erawh chuan nui suk hian ka lo en mai a, ka awm dan avang chuan a nui tawp ta riai riai a, ka hrethiam lo hman hle.

"Pa, min kuah ve tawh la, a hrehawm em mai. Kuah pawh min tum ngai bawk si lo, engati nge i hriatna i hloh kher pa? Min hre ve tawh teh pa" tiin a rawn ṭap chhuak hak a, ka hmel pawh en lovin kun chung chuan a ṭap a, a awmna lam chu ka pan rang hle.

"Ka tihpalh Junior, ka tihpalh lutuk. Ka tum dawn alawm, hriat chhuah leh vek che u ka tum dawn alawm" tiin ka fapa chu ka kuah vat a, ka khawngaih reuh lutuk avangin ka kuah a ni ber.

"Pa, ka hmangaih che" tiin Junior-a chuan min lo chhoh melh ran a, kei erawh a thusawi avang chuan ka hamhaih nasa hle.

Sawi mai tur pawh ka hre lo va, ka fapa lah chu a mittui a la tling pam bawk si, engtia chhan let tur nge pawh ka hre lo.

"Pa, min hmangaih ve tawh lo em ni? A hmate kha chuan min hmangaih thu i sawi ṭhin khâ, i sual em mai pa" ka ngawih tâk reng avang chuan ṭap chung hian ka fapa chuan a rawn ti leh ṭuau a, ka kuahna aṭanga tal pitin room aṭang chuan a tlan chhuak ta daih a, keipawh chuan ka um zui ve nghal vat.

"Pi, engati nge apa hian a hriatna a hloh bik kher? Mi dang pawhin an hloh si lo, engatin nge apa kher hian a hriatna a hloh? Apa hian ka hmangaih thu ka hrilh pawhin min chhang let duh tawh lo pi, apa hi ka ngaina tawh miah lo" tiin Junior chu a ṭap chhuak hawm hawm a, ka pi chuan mittui tla pur hian Junior-a chu a lo kuah hle hle a, kei erawh chuan kawngka bula ding chung hian an awm dan chu ka lo en reng thung.

"Inbe teh ang" ka pu chuan min kal pel pah hian a rawn ti hmuk a, min en dan aṭang chuan a thin a rim hmel hle.

Thawk la hawkin ka pu kalna lamah chuan ka kal phei ve mai a, ka rilru chu a nuam bik reng reng lo.

"I hriatna chu i hloh ngei e, mahse i fapa duh dan ang tal hi chuan awm tum ta che. Naupang mai a nih hî, i tikhawngaih thlak zo zai tawh lutuk. I ngainat theihna'n a theih tawp a chhuah ve tih te hi hriatsak la, nangmah hi insiam ṭha ve thuai thuai ta che" ka pu chuan a ti ram hmak hmak a, choka daiha kan awm avangin ṭawng zawi lo mahse ka pite chuan an hre pha chuang lo vang.

"Ni lo ka pu, Junior-a hi ka ngaina" tia ka ṭawng laklawh lai chuan a hma ai zawnga ram leh thinrim hmel hian

"Ṭawng suh, i ka aṭang khan dawt ka hre duh lo. I fapa hi i la ngaina miah lo tih ka hre chiang lutuk, i fapa a nih vang mai maia a bula tal ve pawh i ni. Zanin aṭang chuan i bulah a mu leh tawh lo vang, a ngaiin a thlahlel hle dawn che tih hre mah ila i awm dan hian a rilru a tibuai vek zawk ang tih a hlauhawm tawh tlat" a rawn ti a, min melh na hle bawk.

"Tum rawh, tum em em rawh, tum satliah mai ni lovin i theih tawp chhuah rawh. Keini paw'n i hriatna i neih let leh theihna'n hian kan theih tawp kan chhuah ve asin, i hria em?" ka pu chuan a rawn ti vin leh ṭhawt a, a hmel ka en chuan hnuk ulh hmel deuh hian min lo en a, a va han hrehawm duh tak em.

"Ka tihpalh ka pu, i sawi ang chuan ka awm ngei ang tih ka tiama che" tiin ka pu chu ka va kuah ta tawp a, kan boruak chu a ṭha lo kual vel vek a ni.

"Henry Bawiha, i chhungte hian kan ngai em che a ni, i hriatna hi hloh hlen miah suh ang che aw?" ka pu chuan zawi raih hian rawn ti leh a, a taksa a chet dawt avang chuan a ṭap tih ka hrethiam nghal.

"A pawi ka ti ka pu, engmah ka hre chhuak thei tawh rih lo hi keipawh hian hrehawm ka ti a ni" tiin ka pu chu a hma aia nghet lehzualin ka kuah a, ka lungngai ve tak zet tawh a ni.

Chu zan la lâ chuan ka rilru ka siam thar a, ka hriatna chu neih let leh ka tum nghet bur ta a ni. Ka pite room aṭangin Album ho zawng zawng kan room lamah ka la chho vek a, ka bula ka phone dah hmang chuan ka hun kal tawha ka lo awm ṭhin dan chu ka en pah reng zel bawk.

Khumah te chuan mu ve mah ila chhin khat pawh chhing lovin ka meng kar a, ka bulah ka fapa a awm tawh bawk si lo nen ka ruak huai mai.

A tukah pawh chuan ka la inthlahrung dûk a, ka fapa chu ka en leh vawng vawng zel. Ka chaw ei pawh a tui lo, a tui thlawt lo. Ka fapa chu a pi leh pute'n an zilh tih hriat tak hian chaw a ei mial mial a, vawi khat mah mi pawh a en lo.

Chutia chaw kan ei mial mial lai chuan hmeichhe pakhat hi a lo lut hlawl a, a hmel ka en chuan damdawiina ka bianu a nih thu min hrilhtu kha a ni tih ka hre nghal.

Khang thla kal ta chhung zawng khan ka bialnu ni lai mek nia insawi nu chu ka pi nen an inbe awl lo va, ṭah chang pawh an nei dun fo.

Chu nu hmel a hmuh rual chuan Junior-a chu a ṭhutna aṭangin a tho vat a, a chaw ei lai kalsan hmakin kawngka bula lo ding reng hmeichhia chu a va pan nghal hmak.

"I lo thleng ta maw Hlute? Chaw te i ei tawh em? Lo ei ve nghal ta che" tiin ka pi chuan a lo be bawrh bawrh nghal a, ka pi koh dan aṭang chuan a hming ka hre ve leh ta chiah.

"Ka inei puar tawh alawm ka pi, chuan Junior nang i inei puar tawh em ni? Engati nge chaw ei lai laiin i rawn thawh daih?" tiin chu nu, Hlutei chuan ka fapa chu a biak zawm daih a, ka fapa sam chu a chul pah reng bawk.

"Aw Miss, ka kham tawh a ni mai. In chungah chho ila Miss, min lo insiampui" tiin Junior-a chuan Hlutei chu a lo chhang a, min lo en daih avangin Hlutei nen chuan kan mit a intawng ta chat.

Rei pawh min en ta lo chuan a hawi sawn daih a, ka fapa nen chuan in chung lamah an chhoh zui nghal bawk. Step-a an chhoh lai te chuan chaw pawh ei lovin ka thlir reng a, Hlutei leh ka fapa an innel lutuk chu ka hrethiam lo lek lek zawk.

"Hlutei khan min lo awmpui rih dawn a, a free in Junior-a pawh tution a pe tawh dawn bawk. Hlutei kha i bialnu a ni tih hre reng tawh rawh aw Henry Bawiha, nakin lawka Junior-a nu a nih tur thu nangmah ngei pawh hian i sawi a, ani chuan i hriatna i neih let leh theihna'n puih che a duh a ni" ka pi chuan a rawn ti dam diai a, a thusawi te chu mak ka ti leh ta hle.

"Ka pi, chutiang thleng thleng chuan a ni maw kan lo kal thui tawh, ngaihtuahna sen dan tur pawh ka hrethiam tawh lo" ka ti ve ta sup a, ka rilru chu a buai nuai nuai mai, enge tih tura enge tih loh tur tih pawh ka hre tawh lo.

"Aw ni e, damdawiina Junior-a nu chungchang i sawi te khan Hlutei tana a nat dan turzia hi ka ngaihtuah a, ṭhen hmak mah che se la ka dem miah lo vang. Ani erawh chuan nangmah ngaihtuah reng rengin rilru a seng a, a zirna pawh a chhunzawm loh phah hial zawk asin" a rawn ti leh chuan ka pi chu ka en a, rilru nat hmel deuh hian min lo en ve reng a, ka hawi sawn ta ringawt.

"Chuvang chuan Hlutei lakah hian ṭawngkam hriat nuam loh ang chi kha chu chhak chhuak tawh suh, ani chuan a thinlung zawng zawngin a hmangaih che a ni. I hmelhriat ṭhan tak anga biak tum la, i bialnu ang chuan en pawh a la har deuh maithei, mahse a bula i tal tam chuan i ngainat leh thuai ka ring" ka pi chuan a rawn tih zawm leh zat a, a kham zui nghal daih.

"I nupui hlui Junior-a nu hi zawng buai tawh lo vang che, i zawn chhuah pawh a phu lo" ka pu chuan a rawn ti ve hmuk a, ani pawh rei lovah a kham ve nghal.

Kei erawh ka ṭhut ngaiin ka la ṭhu reng a, chaw pawh ka ei chuang der lo. Minute 10 lai ngawi renga ka ṭhut hnu chuan Junior-a leh Hlutei chu in chung lam aṭang hlim hmel deuh hian an lo chhuk a, ka lo en leh ta reng.

Ka fapa chuan school uniform a lo inbel diam tawh a, mahse vawi khat te pawh min lo en lo. School kal tura an chhuak tur te chu ka lo thlir reng a, Hlutei chuan min lo nuih seih a, kei erawh chuan engtin mah ka lo ti ve lo.

An kal liam hnu chuan ka hmaa chaw chu ka melh leh vawng vawng a, chaw ei miah lovin ka kham ta ringawt bawk.

Chhun lamah chuan phone call ka dawng chhen a, chu pawh sawrkar lam aṭangin a ni nghe nghe. Min lo betu te chu pakhat tê mah hriat a lawi ka nei lo va, anni lah chuan min be tui nasa mai si.

A chang leh Laptop phawrh chhuakin News te ka en thul, ka beisei loh lutukin ka chanchin chu a lo tam ngei mai. Post ṭhenkhatah chuan accident ka tawh avanga dam thuai thuai turin min ti hlawm a, Twitter-ah nen lam ka thlalak a tam khawp mai.

Instagram post pakhata ka thlalak hmuh chuan ka mit a la ta riau a, caption-ah chuan

"Mizoram Health Minister ni lai mek pu Henry-a kawppui thar hi tunge a nih hre thei rawh" tih hi a lo inziak a, thlalakah chuan ka hlim hmel hle a, hmai hup chunga ka bula ṭhu hmeichhia lah chu a zah hmel ngang mai.

Ka Laptop aṭang bawk chuan News ka ngaithla a, kei chu ka dam ṭhat hma loh chu hna ka zawm theih dawn loh thu an lo puang a, ka awm loh chhunga ka ai lo awh tura ruat thar pawh an lo nei nghe nghe bawk.

Ka Laptop chu off in khumah chuan ka zangthal a, in chung chu ka en reng a, ka nun mek dan chu a khawhar thlakin a buai chuar ka ti hle.

Ka mit chu ka chhing vang vang a, ka hun kal tawh zawng zawng chu hriat chhuah tumin ka bei nasa, mahse ka hre chhuak thei chuang lo.

Ka mitthlaah chuan a tak ni si lo hian thlalak ringawt an rawn lang a, ka nu leh pate hmel tak ngial pawh thlalaka aṭanga ka lo hmuh tawh tih chauh lo chu ka mitthla thei tawh lo.

Ka tih ngaihna hre lo chu ka meng leh ta nge nge a, thawk te ka la leh hawk zel a, mahse eng thil man ka hriatna chu min pe kir thei chuang si lo. Khum aṭanga tho chhuakin bathroom lam chu ka pan a, ka inbual ta ringawt.

Ka inbual zawh chuan in hnuai lamah ka chhuk a, mahse tûmah ka hmu lo. Ka fapa chu ka inbual hma khan a lo haw tawh tih ka hre ngei a, ka inbual lai chang ni awm takin kan room-ah pawh thawm dim takin a lo lut nghe nghe.

Chokaah chuan ka kal a, tumah an lo la awm chuang lo cheu. Pawn lam aṭang chuan nui uar uar thawm ka hria a, ka chhungte chu pawn lama an awm ringin ka chhuak ve nghal thuai.

Ka rin ang ngeiin pawnah chuan an lo awm kim ṭhap a, kawngka bul ṭhutthlengah chuan ka pi leh ka pu chu hlim tih hriat tak hian an lo ṭhu a, kan in kawt tualah chuan Hlutei leh ka fapa chu an lo infiam bawk.

Ding rengin ka fapate hlim taka an infiam lai chu ka thlir a, Hlutei chu a nel ngang mai, kei ai pawhin a bulah chuan a hlim emaw tih theih tur a ni.

Zanriah kan ei lai chuan min be bawrh bawrh hlawm a, a bik takin Hlutei chuan min be nasa a, keipaw'n ka lo chhang ve zel tho.

Amaherawhchu a ṭawng chu ka ning lek lek ṭhin, sawi hreh a nei bawk si lo, a ṭawng theih em avang chuan han chhan duh loh pawh ka nei nual nghe nghe. Ka fapa paw'n min ên min en ve tawh a, nelawm takin keipaw'n ka lo nui suk zel.

Zan mut hun a lo ni a, a ngaite bawkin keimahin khumah chuan ka mu leh ran mai. Ka fapa tel lova zahnih ka mutna tur ni mahse ka awm thiam lo nghal viau a, ka pi leh pute thil tih dan pawh chu ka dem hran lo.

Kan room piah chiah room leh lamah chuan Junior-a leh Hlutei chu an mu a, mut dawna an inchhaih nui ar ar te chu ka bihthla châk hle a ni.

Zan dar 12 a lo ri hnai a, keimahah chuan eng emaw riau hi a awm a, ka khingbai tlata inhriatna ka nei. Ka mutna aṭang chuan ka tho chhuak a, tukverh hawngin thla eng riai chu ka thlir a, ngaih pawh nei hran chuang lovin ka lung a leng ru veng veng.

Ka awmna room leh lam aṭang chuan a thawm a rawn awm a, kawngka inhawng ri ni berin ka hria. Banga ka beng nghat meuh chuan ka ngaithla ta kar a, mahse thawm reng hriat tur a awm leh tawh lo.

Chutia uluk taka thawm ka ngaihchan lai chuan ka awmna room kawngka chu pawn lam aṭangin tu emaw ni hian a lo kik a, lo kiktu lah chu han rin thiam ngaihna ka hre lo hle.

Thawm dim thei ang berin kawngka lam chu ka pan a, kawngka ka hawn ruala ka mi hmuh avang chuan ka meng zim nghal sun a, ani erawh chu a lo nui ver ver thung.

"Henry, Chocos ei ang aw" tiin ka kutah chuan a rawn vuan a, ka chhan let hmain min kalpui ta nal nal.

Keia reng reng pawh chuan min kaihna chu thin thlak ka lo tum bik chuang lo va, a chhan pawh rilṭam tlata inhriatna ka nei a tin ni! Chokaah chuan min hruai lut a, kei chuan a che vel chu ka lo thlir reng ringawt.

"Kha le, kei chu ka ril a ṭam tawh lutuk" min nuih sen sen hian plate-a ei tur awm chu ka lamah a rawn hnawl phei a, keipawh chuan ka lo ei ve mai bawk.

"A hma chuan hetiang hian kan awm dun ziah a, zan 12 a lo rik tawh hi chuan Chocos hi kan ei dun ziah a, i zin bo lai pawh ni se phone kaltlang talin kan ei dun ṭhin" hlim hmel zeta min be reng thei chu a mak ka ti, kei lahin ka la pawh ṭha ngam vak bawk si lo.

"Kan intawnna hmasa ber chu thlawhnaah a nia, chuan Vai emaw ka tih che avangin Vai changkanga tiin i hmingte ka phuahsak vel che a, mahse chu erawh i hre ve miah lo thung. Awi kha mi ni zet kha chu min ṭhawng ve chiang alawm, Mizo ṭawnga min be thut te kha mak ka ti hle a ni" a rawn ti chhunzawm leh zet zet a, Chocos chu tui tih hmel tak hian a hawp pâwk pawk bawk.

"Eng lo, ṭawngkam hriat nuam lo deuha ka lo biak che avang khan min hrethiam dawn nia" inthlahrung ru tak chuan ka ti sup a, a laka ka awm dan avangin Hlutei chu ka hmai zah ve ta deuh a ni.

"A ho lutuk, ka engah mah a thawk leh tawh lo. Chuan maw, thlawhna vela kan intawn hnu chuan kan inhmu thei hle a, Health Minister i ni tih ka hriat tirh te khan awih lo vet vet tak ka ni" hun kal tawh ngaihtuah zui vawng vawng ang mai hian a rawn ti leh a, nui mahse a hlim hmel ka ti chuang lo.

"Kan lo inngaizawng ṭhin ni khan i sawi a, ka pi phei chuan ka nupui atan hian nang hi ka thlang tawh che tih min hrilh nghe nghe. Eng pawh chu lo ni se kei hian ka hmangaih che em? Nang hian kei hi min hmangaih em?" ka tih chuan min lo en rang hle a, a thil ṭhial lai pawh chu a ṭhial tawp hmak.

"Ka hmangaih che alawm Henry, ka hmangaih lutuk che. Accident i tawh hma zanah khan ka hmangaih che thu hi ka sawi a, nang phei chuan i lawm lutuk avangin i lo haw huna sawi leh turin min ti hial. Tichuan i lo haw ta chêng a, vanduaina i tawk ta a ni. I rawn harh tirh khan nasa takin ka lawm a, mahse i hriatna i hloh tih ka hriat khan ka hlimna zawng zawng chu natna in a rawn thlak ta a ni" a en ngai en ngawt ngawt chung chuan a rawn ti a, a mittui chu a tling nasa hle bawk.

"Min lo hrethiam mai teh aw, ka ṭap ringawt dawn alawm" nui ver vera min lo en chung hian a rawn ti a, mahse a nuihna phenah chuan lungchhiatna nasa tak ka hmu thei. A mittui tling te chu a khap let zung zung a, a nui ri leh hak ṭhin.

"Kei chuan ka thinlung leh tih tak zetin ka hmangaih tawh che a, nang erawh chuan min hmangaih thu i la sawi chhuak lo hrim hrim a, mahse i thinlung neitu ka nih thu min hrilh thung. Ka rin dan chuan sawi dawt lo mah la min hmangaih ve tawhin ka hria a, ka zirna pawh ka chhunzawm i phal lo, a chhan chu nupuia min neih i duh vang a ni" a rawn ti leh a, kei chuan sawi tur reng ka hre lo.

"Shillong aṭanga i lo zin haw zanah chuan lo len i tum a, ka pa hnenah kei hi i nupui ni tura dil i tum bawk. I vawi hnih dilna tur a nia, i dil hmasak zawk chuan ka pa'n a pha lo va, chuan" a rawn tih leh siam siam lai chuan

"Engati nge i pa chuan a phal loh?" ka lo ti vat a, chu chu ka rilrua lo lang hmasa ber a ni.

Min hmangaih thu a sawi a, ka thinlung neitu a nih thu a sawi a, mahse engati nge a pa chuan ka nupui atan a phal leh si loh? Ka hrethiam lo a ni.

"A chhan chu kan ina lo leng tam turin a duh che alawm, i mizia zawng zawng lo hriat ve an duh avangin i vawi khat dilnaah a phal nghal mai lo a ni. Nang pawh chumi zan aṭang chuan kan in i rawn chuang kai ngun ta hle a, ka pa nen pawh in inkhawm ngeih thei hle. Ni lo, ka pa chiah ni lovin ka nau leh ka nute paw'n an nel em em tawk zawk che a, Junior-a nen kan ina lo len pawh in ngah hman viau bawk" zan a rei tawh bawk nen a aw chu zawi viau mahse a fiah ṭha hle a, a thusawi lai chuan min en ngai lo, hmun dang daih a en ṭhin.

"Enteh Hlute, tunah rih hi chuan ngainatna che ka nei miah lo, hmangaih pawh ka hmangaih miah lo che. Amaherawhchu chutiang taka kan inkara thil a lo thlen tawh si chuan keipawh hian ka tum ve ang, mahse tun atan chuan hmelhriat satliah ang emaw ṭhian ang emaw bakin ka la en thei rih lo che, min hrethiam dawn nia" ka tih chuan min nuih ver ver chung hian a lo bu nghauh nghauh a, ka thusawi avang chuan a rilru a nat ka ring kha a nia, mahse a na hauh lo.

"Ka hrethiam che alawm Henry, chuan i hriatna i neih let leh theihna'n hian ka theih tawp ka chhuah ang a, ka beidawng mai mai lo bawk ang. Doctor in min hrilh angin kan lo awm dun ṭhin tawh ang zawng zawngin ka awmpui leh che ang a, zawi zawiin i hriatna pawh i nei let leh maithei asin" phur hmel tak chuan a rawn ti thuai a, tu emaw ni an deuh chu a nei chiang alawm.

"Ni e, chu chu a ṭha ang, chuan ka han mu tawh ang e" tiin ka ṭhutna aṭang chuan ka tho a, choka ka chhuahsan ṭep tawh tihah a lam chu ka hawi let leh a, ani chuan nui ver ver hian min lo en leh reng tawh!

"Ihhh.....eng lo....zan hun hman.....ni lo...mang nuam tak...ah..ihhhh...tui takin" ka tih bah nuai lai chuan a kutin ṭawng tawh lo tur hian min lo vai a, amah lah chu a la nui nasa em em zui.

Kei erawh nuihzat thlak ka hriat miau loh avangin ka ngawi reng a, rei lo te hnuah ani pawh chu a nui tawp ve leh mai bawk.

"Muttui le ti mai rawh Henry" a rawn tih chuan ka lo nui ve ta suk a, chutiang ṭawngkam sawi awlsam lutuk pawh ka ngaihtuah chhuak thei miah lo chu mawl ka inti hle.

"Muttui le" ka tih chuan nui sen sen hian a lo bu nghauh a, inherin choka chu ka chhuahsan zui nghal.

Thui pawh ka kal hmain Hlutei hmel chu hmuh leh châkna riau ka nei a, thawm dim thei ang ber chuan choka lamah ka let leh a, ka va thlen chuan ani chu dawhkan bawhin a lo kun daih. A awm dan aṭang chuan ka thawm engmah a hre lo tih a hriat hle a, biak tuma ka ân zuai lai chuan

"Ka beidawng lo vang, ka beidawng thiang lo. A tum ve dawn thu a hrilh tawh che kha LALRINHLU, beidawnna rilru kha neih tum hlek suh. A hriatna a nei let leh ang a, hlim taka awm dun leh turin inngai tawp rawh" tiin amah leh amah chu a inbe mawlh mawlh a, a la kun tlat bawk sia biak pawh ka be leh ta lo.

Thawm dim tak chuan in chung lam chu ka pan leh ṭhem ṭhem a, room chhung ka luh te chuan thawk ka la leh hawk ringawt. Khumah chuan ka ṭhu ngawi reng a, thla eng te chuan ka hriatna chu min pe kir thei mai se ka ti a ni.

Chapter 20

Ka bula Junior-a a mut loh aṭang kar khat lai a liam leh tawh a, ka fapa chu la hre chhuak thei lo mah ila ka ngai tawh tak zet a ni. Ka fapa a ni miau a, ka thisen a nih miau avangin a bula awm chu ka châk a ni. Ka fapa chuan painting leh thil chi hrang hrang min tihpui ṭhin a, chuvang phei chuan ka ngaiin ka ngaina lehzual.

Amaherawhchu mak tak maiin ka mumangah chuan nausen hi ka hmuh ziah tawh a, mahse chu nausen chu Junior-a a ni ngei em tih ka la hre chhuak thei chuang lo ta fo.

Ka mumangah chuan ka sik theih loh leh ka tawh phak loh hian a lo awm ziah a, a hmel pawh ka hmu chiang thei lo ṭhin. Ka ṭhan harh apiangin ka ngaihtuah let vak vak zel a, mahse engmah ka ngaihtuah let thei tawh ngai lo.

Tin, zan reiah Hlutei chuan thil min eipui ta ziah a, kan nun hlui pawh a sawi nasa thei hle. A sawi lai te chuan a nui sen sen zel a, amah ka hriat chhuah vang pawh ni lovin a lakah chuan ka inthlahrung telh telh.

A chhan chu kei chuan duhna chhete mah ka nei lo va, hmangaih pawh ka hmangaih lo va, ani erawh chuan min hmangaih nasat hmel ropui si.

Ka pi min hrilh dan phei chuan ka hriatna nei let tura min puih a duh avangin kan inah min lo awm chilh a, min hmangaih luatah a zirna lam pawh a chawlhsan ṭhak a nih kha!

"Ka pi, ka thei tawh lo. Ka fapa hi ka ngai tawh lutuk, ka bulah mu ve tawh rawh se" chaw kan ei lai chuan ka ti chhuak tawl a, ka thusawi avang chuan min lo en rang hlawm hle.

"Pa! Min hre chhuak tawh em ni pa?" tiin Junior-a chu ka bulah a rawn ding phei nghal a, ka chhan let dan tur chang ni awm tak hian mi dangho chu an lo ngawi ṭhap.

"I rilru tina lo la maw Junior, ka la hre chhuak thei lo che, mahse ka bulah lo mu leh tawh rawh. Ka theih tawpin ka duat che ang a, chuan i duh dûh ka tihpui ṭhin bawk ang che" ka tih chuan ka fapa hmel chu a rawn hnual nghal vek a, lungngaih hmel tak hian min en ran bawk.

"Ni lo pa, min hriat chhuah hma chu api te paw'n i bulah mu tawh lo turin min ti alawm, ka duh ang pawhin i awm ngai bawk si lo. Api leh apute chuan ka rilru nat an hlau a, chuvang chuan i bulah ka mu thei rih lo pa. Miss bulah ka mu thei a, a nuam pawh ka ti zawk daih" a rawn tih chuan ka insum thei tawh lo, chaw kan ei mek tih pawh ngaihtuah tawh lovin ka fapa chu ka kuah nghal thlawp.

"Ka tum dawn alawm Junior, ka hre chhuak leh ngei ang che tih ka tiam e. Ka bulah lo mu leh tawh rawh aw, ka ngai tawh em mai che" tiin a sam chu ka chul hliau hliau a, ani pawh a rawn ṭap ve leh ta nge nge.

"Chuan keimahah hian thil thar chu a awm chiang a ni" ka tih leh chuan puitlingho chuan min lo en nghal ṭhap a, keipawh ka fapa pawm chung chuan ṭhutthlengah ka ṭhu chho zui nghal bawk.

"Henry Bawiha, eng thil thar nge nangmaha awm chu ni a? Thil ṭha lam a ni ang ti raw?" ka pi chuan phur hmel fê hian a rawn ti thuai a, keipawh ka lo nui suk.

"Ka mumangah hian nausen ka hmu zing tawh lutuk, a hmel erawh ka hmu chiang thei ngai lo va, mahse chu nausen chu ka fapa hi a nih ngei ka ring" ka tih chuan an lo lawm hmel hlawm hle a, Hlutei pawh mittui nen min lo nuih leh sen sen tawh. Engtin em em nge a ṭah lai pawh chuan a nuih theih bik ni!

"A va ṭha em, hma kan sawn zel e. I hriatna hi nei let leh vek tawh la ka ti Henry Bawiha, i neih let leh hunah chuan kan hlim tlang dawn lutuk tih ka chiang a ni" ka pi chuan a rawn ti chuai leh raih a, ka fapa pawh chu ka thusawi avang chuan a hlim ve hmel ta hle.

"Pa, i bula ka lo mut chuan Miss hi amah chauhin a mu dawn asin, Miss hi kan bulah mut tir ve ila, a khawngaih thlak alawm" ka fapa chuan a rawn ti a, ka chhang let dawn chiah tihah Hlutei chuan

"Keimah pawhin ka mu thei alawm Junior, min ngaihtuah duh suh. Kan inah pawh keimah char charin alawm ka mut ṭhin, ka huai teh mai a nia" a rawn ti ve thuai a, ka fapa hmuh tur tak chuan a nui lui hram bawk.

"Miss chu kan bulah a mu ve dawn nia, i duh dan a nih phawt chuan kan pathumin khum khatah kan mu dawn nia Junior" tiin ka fapa chu ka hrilh a, ka pi leh pu leh ka fapa hmela lawmna ka hmuh rualin Hlutei hmelah chuan mak tihna ka hmu thung.

Hlim tak chuan zanriah chu kan ei chhunzawm a, Junior-a phei chu Hlutei nen kan inkarah a ṭhu zui nghe nghe. A nuam ka ti, chutianga hlim taka awm ho chu a nuam ka ti hle a ni. Ka hriatna lah chuan hma a sawn chak lo ang reng bawk si a, keimah ber chuan hrehawm ka ti a ni.

Ka chhungte pawh a hma zawng aiin an hlim a, a hmaa ka laka an awm dan nen chuan inthlau tawh tak a ni. A hmate kha chuan ka lak aṭangin an inla hrang ru tlat a, mahse an awm dan chu ka dem hran lo. An inlak hran rualin ka hun kal tawha ka lo awm ṭhin dan min hrih chawl lo va, ka pi phei chu ka ning lek lek ṭhin zawk.

Chhun lamah ka pi hnen aṭangin ka nun hlui chanchin ka hre nawn tluk tluk a, zan lamah lah Hlutei ka aṭangin ka hre leh bawk a, an ṭawng a kal dun bawk sia ka hne lek lek zawk ṭhin.

Chaw kan ei kham chuan ka fapa chuan painting tih puiah min sawm a, keipaw'n ka lo remti ve mai. Ka fapa tê chu a fel reuh em em a, naupang mah ni se min tih dan vel chu a puitling reuh khawp mai.

Zan dang ang bawkin Hlutei nen chuan chokaah thil kan ei dun leh a, mahse ka ei tam ngai lo. A hming mai maiin ka ei a, ani erawh chuan tui a tih hmel thei khawp.

"Naktuk chu thil ka tihpui ang che aw? Min hnial miah suh" mi nel tak hian Hlutei chuan a rawn ti a, keipawh ka lo khi ve suk ringawt.

"Eng chu nge min tihpui i tum a?" ka hmaa ei tur chawk kâwi chawk kawi chung chuan ka ti ve mai a, ei tur chu ka ei châk thlawt rih lo a ni.

"Thil chi hrang hrang a ni mai" nuih insum aw zeta a rawn tih chuan a hmel chu ka en a, min nuih reng thei chu a mak ka ti, kei lah chu a lakah ka nelawm vak bawk si lo.

"Kei chu ka duh tawk, ka ei peih tawh lo" tiin a tho tharh a, kei erawh ka ṭhutna ngaiah ka lo la ṭhu reng thung.

"I la ei duh em? I ei duh vak tawh loh chuan ka lo sil ve nghal daih dawn em ni?" tia min lo biak chuan ka lo buk khum nghauh a, ani paw'n ka hmaa plate chu a rawn la ve leh mai.

"Dik taka sawi chuan hetianga zan reia thil ei hi chu ka sim daih tawh, mahse nang nena kan thil lo tih ṭhin a ni bawk sia ka eipui leh mai mai che a nih hi" plate vel a sil zawh chuan a rawn ti a, ṭhutthlengah chuan a ṭhu zui nghal bawk.

"I inpekna zozai avang hian i lakah pawh ka inthlahrung khawp mai, kei lah chuan ka la hnaih ṭha ngam bawk si lo che a, i tan pawh a nuam lo duh khawp ang" tiin ka rilru dik tak chu ka sawi chhuak a, a rawn ṭhen ta sak.

"Hmangaihna hi a lo mak ve em a ni, ka tum pawh a ni bik lo. Nang ang pathlawi hi ka hmangaih thei ang che tih reng ka hre lawk hleinem, mahse tunah erawh chuan ka hmangaih em em tawh bawk che si" ka mita min en reng chung chuan a ti a, keipaw'n ka lo en ve reng tho.

"Chuan Junior-a nu dik tak chu i la zawng chhuak dawn fân em?" a rawn tih zawm leh nghal zat a, a zawhna daih daih chu ka rin loh lam tak a ni.

"Ka hre lo le, han zawng vak dawn pawh ni ila a hmel leh a awmna pawh ka hre tawh lo hrim hrim a, ka zawng dawn nge dawn lo ka la hre rih lo" ka tih chuan min enna aṭangin a hawi sawn vat a, a awm dan chu mak ka ti hle.

"I rilru tihnat tuma sawi ka ni lo a nia, ka zawng chhuak dawn nge dawn lo tih chu ka hre lo tak tak alawm" ka inthlahrun ruk em avang chuan ka ti leh ta ringawt.

"A pawi lo, zawn chhuah i sawi hian ka rilru a lo na leh thut ṭhin a, min hrethiam dawn nia" tiin nui chung hian min lo chhang a, nui eng ang mahse a mittui tling te chu a khap let zo seng chuang lo.

"Henry, ka lo kuah te'ng che a, ka ngai em mai che" thutak deuh hian a rawn ti a, chhan let dan tur ka va han hre lo chiang em. A hmelah chuan lungngaihna nasa tak ka hmu a, lo phal loh ngawt lah chu thil mawi a ni si lo.

"Aaaa....ihhhh..nia..aw, i duh chuan min kuah thei alawm" ka tih chuan a ṭhutna aṭangin a tho chhuak a, keipawh ka ding ve nghal mai. Nghet tak hian min lo kuah a, ka taksaah chuan a bet hneh hle.

"Min kuah let ve thei ang em Henry? Khawngaihin" a rawn ti leh a, kei lah chu ka lo la ding tlawn zûl zui. Ngampa em em lo chuan ka kuah let ve ta ringawt a, engtin emaw ni tak hian ka awm leh ta nghal a!

"Ka lawm e Henry" minute 2 vel chhung kan inkuah hnu chuan a rawn ti sep a, a awm dan siam ṭhain ka taksa aṭang chuan a awm sawn a, a ṭap a ni ngei ang a biang chu a tuai pah zeuh bawk.

"Eng lo, i duh hûn hunah min kuah thei ang" ka tih chuan hlim tih hriat tak hian a lo nui a, ka kut chu la kangin a fawp vang vang a, min tih dan vel chuan ka thin phu a tirang hle.

"Chho tawh ang aw, dar 1 a ri mai dawn" tiin ka kutah chuan min kai a, choka aṭang chuan min chhuahpui zui nghal. Keipawh a mi tih ang ang chuan ka awm tawp a, min vawnna chu phih thlak pawh ka tum hran bik chuang lo.

Khum khatah chuan kan mu ta ngei a, Junior-a chu a laiah kan mut tir a, a sir tawn tawnah kei leh Hlutei chu kan mu bawk. Darkar tam a liam hnu pawh chuan ka la meng kar a, ka mit ka chhin pawhin ka muhil thei chuang lo. Ka bula mite erawh tui takin an muhil tawh a, an thaw ri sek sek a, ka awt ru khawp mai.

Junior-a chu kuah tumin ka ban a, mahse Hlutei kut ni ngei tur chu ka tawk ta. A kut ka tawh rual chuan ka sa nghal vek thei, ka awm dan pawh chu ka hrethiam lo kher mai.

Tim dai hian ka ban leh dê de a, a kut no leh nem tak chu ka hum a, danglamna nasa tak chu a awm chiang alawm. Ani erawh muhil tui tih hriat tak hian a thaw ri sek sek a, a harh ka rin loh avang chuan a kut chu ka hum nghet ta sauh.

Chutia Hlutei kut ka vawn hnu chuan mut chhuahna hian min rawn zem riai riai a, men pawh meng rei peih lovin ka mit ka chhing zui ta vang vang. Ka ban za mer mer avang chuan ka harh a, mahse ka meng nghal duh mai lo.

Zawimuangin ka meng dere a, Hlutei chuan nui ver ver chung hian ka bana hmul awm vel chu a lo zut a, a kut leh lam chu ka lo la hum ran bawk. Junior-a erawh a la harh lo va, Hlutei chu ka khawngaih ta ber a ni. Ka harh tih hria se chuan a thil tih lai chu a tawp san duh hial ka ring, chuvangin keipawh chu la muhil reng angin ka awm tlang ta law law.

Thawm ri keuh keuh a awm avang chuan ka meng châk ngei mai, ka lo muhil der ve khanglang tawh bawk si. Hmui nel thep hian ka biang chu a rawn tawk a, ka bianga lo fawptu chu tu dang ni lovin Hlutei ngei a ni tih ka chiang.

"Ka hmangaih che Henry, min hre lo hlen miah suh aw" tiin dim te hian ka sam chu a chul a, a ṭawng pawh chu min tihharh hlau tih hriat tak hian a zawi hle.

Kawngka a rik khep hnu chuan ka meng vat a, ka ṭhu chhuak zui nghal bawk. Thawk chu ka la deuh hawk a, ka chunga thil thleng mek chu ka hne tawh tak zet a ni. Ka fapa muhil bam chu ka en vawng vawng a, ka fapa tih loh chu han ngaihnat tak ka la nei thei rih bawk si lo.

Chutia ka thlir reng lai chuan a rawn che ṭiah ṭiah a, la maimitchhing reng chung chuan ka mutna chu a dap a, a harh tak tak hlauvin ka mu thla leh ta thuai. Ani pawh chuan min lo kuah ve vat a, mahse a la meng peih chuang lo.

Ka fapa awm dan avang chuan ka khi suk a, chawi kangin ka âwmah chuan ka bawh tir ta daih. A chalah te chuan ka fawp deuh chhên a, ani erawh chu a mut a la chhuah hmel ngâng mai. Chet pawh a che peih eih lo va, ka khawih ang ang chuan a awm tawp.

Chutia kan pafaa kan awm lai chuan room kawngka chu a lo inhawng a, Hlutei hmel chu ka hmu zawm zat. Nui ver ver chung hian a lo phei a, thingpui leh chhang a lo chawi lut bawk. Kan khum piah lawka dawhkanah chuan a thil ken chu a dah a, kei chuan a che vel chu ngawi reng hian ka lo thlir reng thung.

"Tho tawh rawh u le Henry, Junior-a kha School kal a ngai a nia, tunah pawh hian a tlai ṭan tawh viau. Lo tho thuai ula, dawhkana mi hi ei in ula, Junior-a pawh insiam nghal mai a ngai ang" a rawn ti ta zung zung a, keipawh chuan kan room chhunga sana chu ka en a, a lo tlai tawh tak tak hle.

"Hei Junior, tho tawh ang aw, School kan tlai mai ang" tiin ka fapa chu ka ṭhut chhuahpui a, ka âwm aṭang erawh ka la awm sawn tir chuang lo.

"Chuan Henry, vawiin chu nangma'n School-ah min hruai rawh aw, ka ring che a nia" Hlutei chuan a rawn ti a, amah chu ka en nghat vat.

"Ka thei lo vang, motor ka khalh thiam ringawt hleinem" ka tih chuan ani pawh a rawn meng buai nak a, a thil min tih tir tum chu ka ngainat zawng a ni hauh lo.

"Ni lo Henry, i khalh thiam alawm, i motor khalha chuan a nuam lutuk ringawt. Chuvang chuan vawiin chu nangmah ngei hian min hruai ang, min hnial suh aw?" a rawn ti ve thuai a, motor khalh chu ka ngam chiah lo a ni.

"I duh chuan Junior-a pawh kha i zawt thei ang, ka thusawi chu i awih loh hmel em mai" a rawn tih leh chuan ka fapa chu ka sawi harh a, a mut a lo la chhuah hmel khawp.

"Hei Junior, harh tawh rawh le. Motor khalh ka thiam em ni? Min han hrilh teh, i pa hian motor ka khalh thiam em?" ka tih chuan a mit a rawn nuai nang nang a, a la thophang hle a ni.

"Aw pa, motor te chu i khalh thiam ṭhin lutuk alawm" a rawn ti ta mai. Hlutei chu ka en vat a, nui lui sak hian min lo buk khum a, ka tih ngaihna hre lo chuan Junior-a chu ka thawhpui ta ringawt bawk.

Bathroom-a ka fapa nen kan intihfai lai te chuan motor khalh lam ringawt chu ka la ngaihtuah a, ka hlauthawng a ni. Ka khalh thiam tih pawh ka inhre lo va, ka fapa leh Hlutei chu ka accident pui ang tih mawlh ka hlau a ni.

Bathroom aṭanga kan chhuah chuan ei turte eiin Junior-a chu Hlutei'n a siam nghal zung zung a, kei erawh ka zam chhe tak zet. An insiam zawh chuan in hnuai lamah kan chhuk a, pawn kan thleng te chuan ka thin phu a rang tawlh tawlh.

Kan in kawta Car var lo awmah chuan Hlutei leh Junior-a chu an lut zui nghal hmak a, kei erawh ka la pangai thei lo. Ka thate chu a khur a, Hlutei'n motor chhunga lut tura min lo koh leh hnuaah chuan zam tak chungin ka lut thei ve ta chauh.

Awihawm loh khawpa makin ka kut te chuan motor tihnun dan te chu an lo hria a, ka risk dik a ni mah zawk. Ka fapa chuan phur tak hian min lo fuih reng a, Hlutei pawh a bang bik chuang lo.

Muangchangin ka tlan chhuah pui a, Junior-a phei chu lawm lutuk avangin a au vak nghe nghe. School kal kawng chu ka hre leh ta lo va, mahse ka hnunga mite chuan min lo hrilh rang hle.

An sawi ang zelin ka tlan a, a tawpa tawpah chuan School awmna chu ka thleng thei ve ta hram. Sana ka en a, ka tlan muang thawkhat bawk a ni ang School ṭan hun a lo pel duai tawh.

Junior-a an School-a a luh fel zawh chuan haw nghal mai ka tum a, mahse Hlutei zawk chuan a phal leh ta tlat lo. Coffee leh egroll chu a va lei a, ṭhutna remchang lo awma ṭhu chungin kan ei dun a, kan awm dan chu hun kal tawha kan awm dan a nih thu min hrilh ta mial mial.

Hunte chu a liam zung zung a, kei lah chuan hmasawn lam reng reng ka pan thei bawk si lo. Hlutei'n min awm chilh hnu aṭang thla 3 chu a liam leh ta phawt mai, ka awm dan chu ka hne ngawih ngawih.

Engmah ka hre chhuak thei bawk si lo, duh ang thalin mi dang ka la pawh ṭha ngam bawk si lo, ka chhungte chu an rilru a hah tawh hle a ni.

Hlutei chuan a mut dawn apiangin min kuah ta ziah a, keipaw'n a taksa mam han chu sik a nuam ka ti. A taksa leh ka taksa a insik tawh hi chuan ka sa pup zel a, a chhan erawh ka hriat loh lam tak a ni.

Ni tin min titi pui a, thil hlimawm tak tak min tihpui a tum ṭhin, mahse kei chu a hlim ang em emin ka hlim ve thei chuang si lo. A chang phei chuan hmai hup chunga ṭah ngawt ngawt te a nei a, mahse ka hmuh lai chuan a ṭap tam lo hle.

Hlutei awm dan avang chuan keimah leh keimah ka inhua a, ka lu chu ka ṭhiah sawm vek ka châk hluah hluah. Hlutei chu ka hmangaih miah lo, duh pawh ka duh hek lo, mahse ka khawngaih a ni.

Ka unaunu ang maiin ka en tawp tawh a, ka khawngaih lutuk avang chuan ka kuah leh tawp zel. Ka kuah hmasak hi chuan a rawn ṭap chhuak ngei ngei a, ama duh thua min kuah hi chuan hmel hlim sâng hian min kuah ṭhin thung.

A theih tawp chhuahin ka hriatna ka neih let leh theihna'n a bei a, hmun hrang hrangah min kalpui a, Scooty te pawh ka khalh thiam tih min hriattir nghe nghe bawk.

Ka fapa pawh a la fel tluang zel a, a pa min enkawl thiam reuh lutuk chu ka ngainat phah a, ka hmangaih ṭan ve tawh dawn bawkin ka hria. Ka hun kal tawh zawng zawng kalsanin ka hun hman lai mek chu hman ka tum tawp tawh a, ka beidawng ve tawh a ni.

"Naktuk aṭang chuan in in lamah haw phei tawh mai rawh aw Hlute" sitting room-a kan ṭhut khawm ṭhap hnu chuan ka ti sup a, thil sawi tur ka neih avanga ko khawm pawh ka ni.

"Engati maw Henry? I hriatna i neih let leh hma chu ka awm chilh dawn che alawm, i bulah ka awm reng ang" Hlutei chuan hlauhthawn hmel fê hian a rawn ti thuai a, mahse kei chuan a duh ang veka awm tir chu ka tum tawh lo.

"Ni lo ve, i haw phei a ngai. In in lamah i va haw ang a, i zirna lam i chhunzawm leh ang a, keimah lam reng reng min lo ngaihtuah tawh suh ang che" ka ti ram hmak a, keimah avanga a hma hun a chhe vek tur chu ka ngai ngam lo a ni.

"A teuh lo mai HENRY LALSANGZUAL, ka kalsan dawn hauh lo che. I hriatna i neih let leh hma loh chu i bulah ka awm reng ang, min hriat chhuah hma chu pasal pawh ka nei lo mai ang. Chuvang chuan khatiang thu kha min hrilh tawh suh, awmzia a awm dawn bawk lo" ding chung hian a rawn ti hrawk a, keipawh ka ding ve nghal. Mi dangho chu an lo ngawi ṭhap a, Hlutei nena kan inbiakna chu an lo ngaithla a ni ber.

"Min hnial suh, haw phei la a tawk! Kei chuan ka hriatna hi ka neih let leh theih ka ring tawh lo, ka beidawng tawh. Engatinge min la buaipui tlat? Engatinge ka lakah hian beiseina i la neih tlat?" ka ti vin hrawk a, ani pawh chuan rang zet hian

"A chhan chu ka hmangaih che lawm pathlawi, suala, nunrawng pa. Ka hmangaih lutuk che avangin i lakah hian beiseina sang tak ka la nei asin, engatinge nangmah zawk hian min hnar tlat?" a rawn ti ve tuar a, a mittui chu a biangah a luang nghal zawih zawih.

"Ka hmangaih ve lo che, ka hmangaih ngai bawk hek lo vang che. Duhna che pawh ka nei lo, engtikah mah ka duh theih che pawh ka ring lo. A chhan chu ka khawngaih tlat che a, kei chuan ka nau ang mai chauhin ka en che a ni. Nakin zelah i tan pawh a nuam lo tulh tulh ang a, ka lakah hian i la beidawng ve thuai dawn tho tho" ka ti ve leh ta hrawk a, ka pi chu a rawn ṭap chhuak ta hawk.

"Aih!!!! A theih loh! I lakah hian ka beidawng ngai lo vang, beidawn pawh ka duh lo. Min en teh Henry, ka mit takah hian en rawh" tiin ka lam chu a rawn pan a, a kut pahniha ka biang dawmin min chhoh melh ta ral.

"Henry, Suala, Pathlawi, Vaia, Vai changkang pa, khatianga ka koh ṭhinna zawng zawng che kha i hre chhuak thei tawh lo tak tak em ni? Hriat chhuah tum rawh, khawngaihin hriat chhuah tum rawh. Thla 4 lai a ni tawh, engkim hre chhuak tawh rawh" a rawn ti mawlh mawlh a, kei chuan a kut chu ka lo pawh thlaksak hmak.

"Min buaipui tawh suh, keimah vang hian i na hnem tawk tawh mah mah. Kei chuan ka hre chhuak ngai dawn lo va, ka chhungte hi chu ka hriatna hloh pawh ni ila ka chhungte an ni. Nang erawh mi hrang i ni a, chuvang chuan i hma lam hun ngaihtuahin min kalsan thuai zawk rawh" ka tih chuan

"Mi hrang maw" tiin ka ṭawngkam hman zinga mi chu a awi zawi tak hian a rawn sawi nawn sep a, a dinna aṭang chuan a tawlh hnung tial tial bawk.

"Aw le, ka thiam loh a ni e. Ka lo â hle mai, nang ang renga mipa nunrawng ka lo hmangaih che hi ka nuna ka thil tihsual lian ber a ni. I sawi kha a dik chiah, kei chu mi hrang ka nih avangin ka va haw phei ang e" a mittui hru tâwk chung chuan a rawn ti a, a aw ah chuan thinrimna a lang tawh lo va, amah khawngaihna hlir chuan ka khat nghal.

"Hlute, a ngai lo. Haw phei suh" ka pi chuan a lo ti ve vat a, ṭap pur hian ka pi chuan min lo en a, a thin a rim hmel hle bawk. Junior-a pawh a awmna lama tlan phei vatin

"Aih Miss, haw suh, i haw chuan i bulah ka lo kal ve duh" a ti ve nghal thuai a, chutah ka lam lo hawi lehin

"Pa i sual em mai, engatinge Miss hi haw turin i tih kher? Ka duh tawh lo che, nang ang pa sual hi ka duh tawh lo che" a rawn ti ve phiar phiar a, ka tih ngaihna hre lo chuan vanva dakin thawk ka la hawk ringawt.

"Henry, ngaihtuah chiang rawh" ka pu chuan a rawn ti ram ve hmak a, mahse kei chuan vawi tam tak ka ngaihtuah tawh zawk. Hlutei tan chuan phurrit mai ka ni tih ka inhria a, chuvanga min kalsan tura thutlukna siam pawh chu ka ni.

"Vawi tam ka ngaihtuah chiang tawh alawm ka pu, Hlutei hi an in lamah haw tawh zawk rawh se, ka tihrehawm tam tawh em mai" ka tih chuan rang tak hian Hlutei chuan

"Ni e ka pu, ka haw phei hi a ṭha tawk zawk a ni. Khawvela mipa dawihzep ber ka lo hmangaih hi ka inchhir hle a, zanin aṭang chuan in mit hmuhah ka rawn inlan leh tawh lo vang" Hlutei chuan a rawn tichang fak a, Junior-a ban chu a pawt phel zui hmak bawk.

"Miss phei suh, haw suh, i bulah ka lo kal ve duh" tiin Junior-a chuan Hlutei chu a kuah leh vat a, mahse Hlutei chuan a ban chu a lo lak kian sak leh ta tho.

"Awm ṭha rawh le Junior, tun aṭang chuan inhre ngai lo angin awm tawh ang aw" tiin ding tak hian Hlutei chuan in chung lam a pan chho mawp mawp a, ka fapa in um zui a tum chu ka lo man bet chat a, Junior-a chu a ṭap zui nghal vak vak.

"Henry Bawiha, enge a haw kher chu a ṭulna? I hriatna i neih let leh beiseiin hetah a lo awm chilh che a, engatinge beidawng takin i siam tâk mai? Awi kei zawng Hlutei hi ka khawngaih em mai, i tan hian a inpumpek nasa asin" hmai hup chung hian ka pi chuan a rawn ti a, kei erawh chuan chhan pawh chhang lovin ka fapa chu nghet takin ka kuah bet ringawt.

Minute 5 hnu velah in chung aṭangin Hlutei chu a thawmhnaw bawm nen a rawn chhuk a, a chet dan chu ka lo en reng a, ani chuan tumah min en tawh lo hrim hrim. Ngawi rengin kawngka lam chu a pan hmawk hmawk a, mahse kawngka a hawng tur chiah chu a ding ta chat. Chiang tak hian min lo en a, ka mita min en reng chung chuan a lo kal phei a, keipaw'n ka lo en chik hle.

"I thutlukna hi i la sut thei a nia Henry" ka dinna bul a rawn thlen chuan a ti thawp raih a, a ṭah chhuak insum hmel chu hmuh hrehawm ka va ti tehreng em.

"Ni lo ve, va haw zawk rawh Hlute. Kei min ngaihtuah lovin i hma lam hun chauh ngaihtuah la, i zirna kawngah hlawhtling ngei turin duhsakna ka hlana che" ka ti ṭial deuh ruih a, a awm dan avang chuan ka tawt ve up up hian ka hria.

"Enteh Henry..ihhhhh..min hre chhuak ve tawh em em la" ṭah chhuak lutuk avanga aw sin raih hian a rawn ti a, kun chungin a ṭap khur det det zui nghal bawk.

Ka hmu rei thei lo, ka khawngaih lutuk avang chuan amah chu ka kuah thlawp a, Junior-a pawh chuan a lo kuah ve nghal.

"Ka hmangaih che Henry" tiin ka kuahna aṭang chuan a tal chhuak a, ka hmuiah tak chuan a rawn fawp vang vang a, ka sa chhuak leh ta vek mai. Ka fawp let dawn chiah tihah min fawhna aṭang chuan a awm sawn thut a, chutah amah vek chuan min nuih lui sak chung hian

"Mangṭha aw Henry pathlawi" a rawn ti leh a, kawngka lam chu panin a chhuak zui ta vang vang. Junior-a chu ka vawnna aṭanga tal chhuah tumin a ṭap vak vak a, mahse ka thlah duh der lo.

"Henry thil hi ngaihtuah chiang rawh, tun ang zanah engtin nge amah maiin i kal tir theih zawk?" ka pu chuan thinrim aw tak hian a rawn ti a, ka harh chhuak ta zawk.

Junior-a ka vawnna thlah chuan ka tlan chhuak thuai a, mahse kan in piah lawka Taxi lo tlan chhuak chiah ka hmuh chuan ka um thui duh ta lo.

Chapter 21

Hlutei'n min hawsan hnu chuan a hma ai zawngin kan in chhung boruak a chhe lehzual a, ka fapa Junior-a phei chu ka bulah a mu duh tawh lo nghal. Hlutei chu zui ve phet a tum a, mahse a pa berin ka phal miau loh avangin a zui ngam bik si lo, a tih ngaihna hre lo chu a ṭap leh tawp zel.

Ka pi leh pute room-ah a riak leh ta char char a, mahse mak tak maiin ka mumangah chuan thil dang hmuh tel ka nei tawh. Nausen mai ni lo puitling pahnih hi ka hmu tel tawh a, ka chhungte erawh ka la hrilh duh lo.

Ka hrilh a nih chuan a enga mah hmain beiseina ka siam leh vak ang a, a hnuah beidawnna ka siam leh emaw kha a ni ang a, an rilru tihnat loh law law ka duh zawk.

Ka nun dan chu ka ning tawh, ka ning tawh tak zet a ni. Engmah ka hre chhuak thei bawk si lo, chutah ka mumanga mite pawh ka la hre chhuak thei chuang lo leh ta zel bawk si.

Dik tak chuan Hlutei khan nasa takin hriatna neih kir duh lehna rilru min put tir a, ka beidawn tawh thu hrilh mah ila a awm loh hnuah chuan ka tum ka tiruh lehzual.

Zan tin keimahin chokaah ka kal ziah a, Hlutei chu ka mitthlaah a lo lang nghal vawng vawng zel. A hmel nui sen sen te, tui taka kan nun hlui min hrilh laite chu ka mitthlaah an lo lang a, ka rilru chu luah loh lai reng a nei lo.

Min awmpui tura kan ina awm tir reng te chu dik tak chuan ka duh ngei alawm, mahse ka duh dan ang vekin ka awm tir thei bawk si lo. Keimah min buaipui lovin a zirna lamah kal se, a kum a la naupang bawk nen hma hun eng tak a la nei zawk a ni. Ni e, a sawi kha a dik chiah, kei hi khawvela mi dawihzep ber ka nih ka ring.

Thla 1 a ral leh meuh chuan ka eng tih mah a tui tawh lo lehzual a, mahni inthah daih châknain ka khat hial a ni. Chutiang bawkin ka fapa paw'n a tuar a, Hlutei'n min hawsan hnu aṭang phei chuan thil a ei ṭha duh tawh lo hrim hrim.

Ka hmel a hmuh apiangin min huat thu a sawi vak vak zel a, a tawpah phei chuan a ṭap leh nge nge zel. A hmelte chu a tla dûk reuh a, ṭap reng ang mai hian a mit pawh a bui chûk zel.

A nihna takah chuan ka fapa chu ka hmangaih tawh, ka hmangaih tawh lutuk, mahse chu erawh ka hriatna ka neih let tawh vang a la ni lo leh ta cheu. A va han mangan thlak ngai em!

A duh lo chung kuah luih changte ka nei fô va, ka hmangaih tawh thu ka hrilh tak ngial pawh a awih duh tawh lo. A lungawina'n ka sawi mai mai emaw a ti tlat tawh a, chungte chuan ka rilru an tina zual.

A pi leh pute paw'n an hrilhfiah nasa ṭhin, mahse tû thusawi mah a awih duh tawh lo. Hlutei chu a lam reng zel a, ka fapa ka khawngaih lutuk avang chuan hruai let leh mai ka duh rum rum ṭhin, mahse chu erawh thil tih chi a ni tawh der bawk si lo.

Ka pi erawh chuan rilru na ru takin min buaipui chhunzawm zel a, ka pu tak ngial paw'n min hrawk nasa hle. Min zilh lai te chuan ka ngawi reng a, ka chhang let duh lo hrim hrim.

A insawi ang ngeiin Hlutei pawh a reh ta vang vang a, dik tak chuan ka ngai ru ve reng. Thla 3 chhung zet min han buaipui kha a ni a, ka unaunu ang maiin en tho mah ila ka ngai ru ve em em tho.

Kawngka aṭangin ka pite room-a muhil bam ka fapa chu ka thlir reng a, a peih loh lutuk avangin School pawh a kal lo va, ni dangah erawh kal loh pawh a nei vak ngai lo, mahse a hmelah chuan hlim tak tak hmel ka hmu tawh ngai lo thung.

"Henry Bawiha" tiin ka hnung lam aṭangin ka pi chuan min lo ko a, ka hawi let chuan lungngaih hmel tak hian min lo en reng.

"Hlutei hi va lam leh mai teh, Junior-a hian a ngai em mai. Vawi tam call ka tum pawhin Hlutei phone chu a tlang thei tawh lo, i fapa vang tal pawh hian Hlutei hi va ko leh mai teh" a rawn ti leh a, ka pi rilru na hmel hmuh chu a hrehawm ka ti ngei mai.

"Ka hre lo le ka pi, keimah zawk hi thi daih zawk ila a ṭha mai hian ka hre tawh, mahse ka fapa hi tih fahrah ka duh bawk si lo. Ka nun dan hi keipawh hian a hrehawm ka ti tawh em mai, ka fapa hi awm lo se chuan ka intihhlum tawh ka ring"

"Henry Bawiha! Khawngaihin thihna lam chu sawi tawh suh, sawi tawh lul suh! Ka chan duh tawh lo che, i nu chan tawh mah ila nang lehzel hi chuan min kalsan tawh suh" min lo kuah vat chung hian a rawn ti thuai thuai a, a aw aṭang pawh chuan a hlauthawng ngawih ngawih tih a hriat.

"Aw le, ka intihlum lo vang ka pi, ka intihlum dawn hleinem, ka beidawn changa ka ngaihtuahnaa lo awm ṭhin ka sawi mai mai alawm" tiin ka pi chu ka kuah let ve vat a, ka thusawi chu a dik lohzia ka hre chhuak nghal.

"Ka chau riai mai ka pi, ka han mu mai teh ang" kan inkuah reng hnua ka tih chuan ka pi chu a tawlh sawn a, a kut pahnihin ka biang chu a khuap a, min kuai kunin ka chalah chuan a fawp vawng vawng bawk.

"Ni e han mu rawh, i hmel aṭang pawh hian i mu ṭha lo tih a hriat lutuk Henry Bawiha" min ngaihtuah fê chuan a rawn ti ve mai a, keipawh chu thu dang sawi tawh lovin in chung lamah ka chho ve nghal.

Mu nghal mai lo chuan ka inbual hmasa leh te tê a, ka mitthlaah lah chuan Hlutei hmel a la cham reng zui. Bathroom aṭanga ka chhuah te chuan khuma Hlutei awm ang tlatin ka mitthla a, kan fapate nen kan pathuma kan mut ho lai te chu ka ngaihtuah chhuak zui nghe nghe bawk.

"Kan hnam i ni lo, i vun aṭang pawh hian i ni lo tih chu a hriat reng alawm. Indian ni lovin Chinese alawm i nih, in ramah lehkha han zir zawk ta che"

"Mizo nih tum suh, Vai i nih kha! A zah pawh i zak lo em ni? Haw rawh, Vai ramah haw rawh"

"Ni lo, a theih loh, min thihsan suh u! Eng vanga accident kher kher nge in nih bik?! In tupa tal hmu hman rawh u, kal ringawt suh u"

"Vawi khat mah min hmu turin lo kal tawh lo vang che, naute hi chu ka enkawl thei, i tel lo pawhin ka enkawl ang, thlawk bo rang rawh"

"Enga!? Tunah khan min ko em ni? Ka fapa min han ko leh teh, ka beng hriat lai ngei hian pa min han ti leh teh"

"Nang Henry Lalsangzuala hi, Mizoram Health Minister ni turin ka ruat che a, vawiin ni hian i ni tih ka puang nghal bawk e"

"Khatiang khan min si reng reng suh aw Vaia, hri len lai laiin an inkhawih du du ngai lo"

"Vai i ni lo ti raw pa? Vai ni tur pawhin ka duh bawk lo che. Ka kal duh tawh lo pa, kan School-ah sawn ka kal duh tawh lo"

"Nang hian eng vanga min zui ru reng nge i nih? Police hnenah ka report duh tak tak tawh ang che, fimkhur rawh"

"Nupui hi nei leh mai rawh Henry Bawiha, i khua a har tih pawh ka hria, Junior-a vang tal pawh hian nei leh rawh, i hmu zo dawn lutuk tih ka hria a ni"

"Ka hmangaih che pa, keipawh hian ka hmangaih che Junior, ka hmangaih che ka fapa, ka hmangaih lutuk che"

"Khatiang pawh khan min en suh, nang ang pathlawi leh nghal ka duh ma lêk ang che, pathlawi tan chuan ka ṭha mah mah"

"Ni lo, nangmah hi alawm zan pawh mu thei lova min awm tirtu chu nî, chaw ei tura ka lo hruai kha chu ka PA a nih kha! Ani nen khan ruahmanna kan siam a, ka laka i rilru put hmang ka rinhlelh fô ṭhin avangin ka PA puihna kha ka dil ta tawp a ni. Tichuan nang tê reuh hian i laka ka rilru put hmang ang chiahin ka lakah rilru i pu ve tih ka hre ta a, ka lawm asin"

"Ding ve rawh Henry, mi dang pawh an ding vek a nia, a nawm tehreng nen. I zak a ni maw? I va ho reuh tak!"

"Pa, engkim kha Miss nena kan plan vek a nih kha! Miss hian min zirpui vek a, ka surprise che em pa? Surprise tehreng mai ka fapa, min tizak hman alawm"

"Tukin lawkah kan fanuin bialpa a nei tih kan hria a, mahse a bialpa chu tunge a nih kan hre chuang lo. A bialpa chu nang i lo ni a, chutah a enga mah hmanin kan fanu nupuiah min dil leh thâwr a, i chet dan hi a mawi lo hle a ni"

"Lalpa le!!! Naktukah kan lo thlawk haw dawn a, chawhnu lamah a ni ang. Ka beng hriatah ngei kha thu kha sawi leh ang che aw, i ti thei ang em?"

"Ka hmangaih che Henry, ka hmangaih lutuk che. I hria em, Shillong aṭanga i lo haw dawn zanah pawh ka hmangaih che thu kan awm dun hnua sawi leh turin min tih khâ, khang tal te kha chu hre chhuak hram teh"

"Enteh ṭhiannu, tunge i nih ka hre lo che ka tih mawlh mawlh kha maw le, khatiang thu kha ka beng hriatah sawi tawh lo la ka duh khawp mai"

"Pa! Anu te chu Miss hi a ni dawn i tih vek tawh khâ, nu dang ka duh hleinem, Miss hi nu atan kei chuan ka duh alawm"

"A teuh lo mai HENRY LALSANGZUAL, ka kalsan dawn hauh lo che. I hriatna i neih let leh hma loh chu i bulah ka awm reng ang, min hriat chhuah hma chu pasal pawh ka nei lo mai ang. Chuvang chuan khatiang thu kha min hrilh tawh suh, awmzia a awm dawn bawk lo"

"Ni e ka pu, ka haw phei hi a ṭha tawk zawk a ni. Khawvela mipa dawihzep ber ka lo hmangaih hi ka inchhir hle a, zanin aṭang chuan in mit hmuhah ka rawn inlan leh tawh lo vang"

Chung ka ngaihtuahnaa lo awm nuai nuai te avang chuan ka au chhuak vak a, ka lu chu a keh mai dawnin ka hria. Men pawh meng ṭha hlei thei lovin ka awm a, keimah chu ka sa chhuak vek.

"Henry Bawiha, engatinge? Engatinge hetiang hian i awm? Ka duh thei lo, a khawsik hi a sang lutuk tlat a, Doctor ni lo, Hospital lamah tlan vat ang, hmanhmawh ang" tih ri chu ka thil hriat tawp ber a ni a, ka taksa chauh lutuk avangin a bak engmah ka hre zawm thei tawh lo.

"Pa i lakah ka sual tawh miah lo vang, lo harh tawh rawh. Thih suh aw pa, min thihsan miah suh. Miss bulah pawh ka awm duh leh lo, i bulah chiah ka awm duh pa, thi suh aw pa" tia ka fapa min biak mawlh mawlhna aw ri chuan min tiharh a, naupang mai ni mahse a aw aṭang chuan a lungchhe ve tak zet tih ka hre thei. Zawimuangin ka mit chu ka meng a, ka fapa chuan ka kut vuan chung hian min lo bawh ran.

"Junior" ring vak lova ka tih chuan rang zet hian min lo en a, a hamhaih ve hmel hle. Room chhungah chuan ka fapa tih loh chu tumah an lo awm lo va, mak ka tiru hle.

"Pa! I lo harh tawh maw!? Pa, min thihsan miah suh aw, ka duh lo" tiin min lo kuah thuai a, keipawh chuan hmangaih em emin ka lo kuah let ve nghal.

"Khawiah nge i pi leh i pute?" ka tih chuan pawna Doctor te nen an inbiak thuin min lo chhang a, a hmai khawih pah chuan ka nuih suk a, ani pawh a rawn nui ta ver ver.

"Ka bulah hian han mu teh le Junior, chuan a bawk khup zawngin mu rawh aw" nui chunga ka tih chuan mak ti zet hian min en a, mu tura ka signal leh zeuh hnu chuan a mu ve mai bawk.

"Pa, engatinge mi bawh khup tir kher a?" tiin zawhna chu min lo zawt ta ngei a, kei chuan a zawhna pawh chhang lovin a kawr chhungah chuan ka zen lut a, ka kut chuan a hnung chu awmze neih deuh hian ka zut a, ka thil tih avang chuan min lo en rang kher mai.

"Pa, engatinge khatiang khan ka hnung kha i zut? Min zut tawh ngai tawp si lo" a rawn ti leh chuan ngawi reng hian ka lo en a, ka nuih suk bawk.

"Engatinge pa min la zut reng a? Min zut rawh pawh ka ti tawp si lo che a, tunge hetiang hian ka hnung zut ka duh tih hrilh che a? Api leh apute'n an hrilh che em ni?" a rawn tih chuan ka lu ka lo thing a, zawhna a ngah viau pawh chu ka dem hran lo.

"ka hre chhuak tawh che alawm Junior" ka tih chuan rang tak hian a mutna aṭangin a inperh tho zawk a, chiang zet hian ka mitah chuan min en a, kei erawh chuan ka lo nuih leh suk thung.

"Min hre tawh tak tak em pa? Maw!? Min hre chhuak tawh tak tak em pa? Min hre chhuak a nih chuan eng music nge ka ngainat ber?" tiin ka dar tawn tawnah chuan a rawn chelh reuh a, khuma ṭhingṭhi chung chuan min en ran bawk.

"RAP" nui chunga ka tih chuan rang zet hian min rawn kuah vat a, a theih tawpa nghet chuan ka hnung chu a vuan a, chutah ṭap chung hian

"Apa in min hre chhuak tawh....min hre chhuak tawh...Apa in min hre chhuak tawh....min hre tawh....min hre chhuak tawh chiang lutuk....Apa in min hre chhuak tawh...min hre tawh" a rawn ti lawm lâwm a, a lawm lutuk avang chuan a tal vak vak a, ka insum thei lo chu ka ṭap chhuak ve ta hawk.

"Apa in min hre chhuak tawh....min hre chhuak tawh" ṭap hawm hawm chunga a rawn ti leh te chuan ka dinpui thuai a, room chhungah chuan pawm chungin ka kal kualpui a, ka mittui chu ka dang seng bik lo.

"Apa in min hre chhuak tawh" a duh tawk tawh mai dawn emaw ka tih pawh chuan a rawn ti leh hram ṭhin a, a ṭah nasat lutuk avang chuan a aw te chu a lawi vek a, ṭawng pawh a ṭawng thui thei tawh lo.

"Junior!" kawngka lam aṭangin ka pi chuan hlauhthawn hmel tak hian a rawn ti a, a bulah chuan ka pu leh Doctor pawh an lo ding ve ran bawk.

"Api, apa hian min hre chhuak tawh. Ka music ngainat ber pawh a hre tawh a, ka hnung pawh min chulsak a, apa hian min hre chhuak tawh" ṭap pur hian Junior chuan a ti a, ka fapa awm dan avang chuan ka ṭap ri leh ta hawk.

"Tak tak a ni em Henry Bawiha? Min han hrilh chiang teh, Junior-a thusawi hi a dik em? I fapa hi i hre chhuak tawh tak tak em?" men pur hian ka pi chuan a rawn ti thuai thuai a, ka dinna bul chu a rawn thleng phei rang hle.

"Aw dik e ka pi" tih pah chuan ka fapa chal chu ka fawp vang vang a, kan pafa chuan kan mittui te chu kan dang seng thlawt lo a ni e. Chutiang taka ka fapa ka lo chu ka inthiam lo va, ka ngai em em bawk.

"A nih leh keini hi min hre ve tawh em?" ṭap pur chung hian a rawn ti leh a, kei chuan nui chungin ka lo buk khum nghauh nghauh a, chutah zet zawng ani pawh chuan min rawn kuah ve ta.

"Ka pu" tiin ka pu awmna lam chu ka pan leh a, ṭap ve lo mahse a awm dan aṭang chuan a hnuk a ulh tih ka hre thei. Junior-a pawh ka la pawm reng a, amah chuan chhuk a tum lo hrim hrim zawk.

"Ka hriat chhuah mai hlawm loh che u avangin ka tihpalh a ni e" ka pu kuah chung chuan ka ti sup a, ani pawh chuan min lo kuah let nghet hle.

"I hriatna i nei let leh ta chu a va lawmawm em pu Henry, dam ṭha zel turin duhsakna ka hlana che" hmel hlim tak pu chung hian Doctor chuan a lo ti a, keipawh chuan lawmthu ka hrilh let ve nghal mawlh mawlh.

"Haw thuai teh ang u, thil pawimawh tak mai tihtur ka nei" ka tih chuan tûma'n ka tihtur chu min zawt lo va, a chhan pawh ka thil tihtur chu an hre chiang hlawm em a tin ni!

Taxi in kan haw a, keimahin Hlutei te veng lam chu ka kal a ni mah zawk. Mi dang erawh an haw tlang nghal vek a, fimkhur tawh turin min chah nasa hle. Hlutei te in lam ka pan lai te chuan amah hlir chu ka ngaihtuah a, a chunga ka chet dan chu a mawi lovin a nunrawn thlak ka ti hle.

Ka hriatna min neih let tir a tum dan te chu ka ngaihtuah let a, a awm dan leh a hmel ka mitthla a, a tan chuan a harsa dawn lutuk tih ka hrethiam ve ta chiah.

A haw dawnah pawh ka thutlukna ka la sut theih thu min hrilh hram kha a ni a, kei lah chuan sut a hnêkin ka haw luih tir ta tho a nih kha!

Ka thutlukna siam tawh zawng zawngah Hlutei ka lo haw tir kher kher chu ka la inchhir ber, ka thinlung neitu ka lak aṭanga a duh lo chung ka hnawt bo chu ka inchhir ngawih ngawih.

"I thiam loh a ni lo, tû thiam loh mah a ni lo. Nangte chuan i hriatna i hloh a, i beidawn tawh luatah kha thutlukna kha siam mai i ni. A hma hun i ngaihtuah avangin Hlutei chu i kaltir a, i tan kha chuan duh thlan tur dang kha a awm lo alawm" tiin rei lo tê te chu mahni leh mahni ka inhnem ve tak na a, mahse mahni inhnem tlak pawh ka ni lo tih chu ka hre chhuak leh zel tho.

"Mi hrang" tia ka ṭawng khum te kha atan chuan a va na dawn tak em, ka lo mawlin ka tidik lo tak zet a ni.

Ani te kha chuan min hmangaih avangin theih tawp a chhuah a, ka hriatna ka neih let leh theihna tur a nih phawt chuan pasal neih loh hial te a inhuam a, chutiang taka min hmangaihtu hmeichhe ṭha leh rilru thianghlim chu kei chuan beidawnna khurah ka hnuk tlat si.

Ni lo, a beidawng lo. Hlutei kha a beidawng ve miah lo, keimah zawk kha ka beidawng a ni. Ani te chuan beidawng awkaa ka biak pawhin min bansan loh tur thute min la hrilh zawk a, hmeichhia a zawnga min hmangaih ber tu chu a va ni chiang em.

A chhuah dawn te khan min hmangaih thu a la sawi thei cheu a, a rilru na taka ka siam hnuah pawh min la nuih thei cheu a, a tan kha chuan ka bula awm kha a va han hrehawm lulai dawn chiang tak!

Damdawiinah te khan ka nupui hlui zawn chhuah ka tum thute kha ka sawi khum a, a nat lutuk avangin a tlan chhuak tawp a nih kha!

Junior-a pawh hre lova ka awm laiin ka fapa a nih thu min hrilh a, ka fapa chu ka fapa a nih avanga kuah tura min tihna te khan hmeichhe rilru ṭha a nihzia leh hmeichhe tuarchhel tak a nihzia a lantir a ni.

Ka hmuh loh lai te khan vawi engzah nge a lo ṭah ang? A hlim lo chûng chung pawha hlim hmel min hmuh te kha engtiang chiaha hrehawm leh harsa nge a nih ang? Ka hriatthiam phak loh leh ka tawrhpui thiam phak loh khawpa thukin Hlutei chu ka lo tina reng a, kei erawh chuan ka hre der si lo.

A sawi kha a dik chiah, khawvela mipa dawihzep ber ka ni e. Ka beidawng hma lutuk a, min ṭanpui inhuam taka a awm lai pawhin ka beidawng tlat vel a nih kha!

Amah ngaihtuah tak angin haw tur te'n ka ti a, a zirna lam chhunzawma hlawhtlingna chang tur te'n duhsakna ka hlan vel a, mahse a mipa hmangaih kalsan kha a tan chuan a harsa dawn lutuk tih reng ka lo ngaihtuah tawh si lo.

Amah ka ngaihtuah emaw ka tih laiin ka ti na zawk a, amah ka khawngaih emaw ka tih laiin beidawnna ruamah ka lo nawr lut reng si, ka va han inchhir tak em.

Hlutei te in kawt kan thlen chuan pawisa pawh ka lo ak lo tih ka hre chhuak a, mahse driver chuan min lo free hlauh. Hmanhmawh takin an kawngkhar lam chu ka pan a, kik pawh kik buai lovin ka hawng nghal ṭhuai.

"Nang maw!?" min hmuh rualin Peksanga chuan a lo ti a, a hmelah chuan mak tihna ka hmu nasa mai.

Ka hawi kual vel a, mi dang tumah ka hmu lo. Hlutei room lamah chuan ka kal phei phawk phawk a, ka in ni lo mahse zah reng ka hre tawh lo. Hlutei room chhung ka luh chuan tumah ka hmu lo va, khum te chu mut ngai lohna ang maiin a lo inpawt mar ṭha hle.

"Khawiah nge Hlutei Peksang?" room aṭanga ka chhuah rual chuan ka ti a, ani chu ka hmel a hmuh tirh ai ai chuan a rawn meng phawk tawh zawk a, a phone chu ṭhuthlenga dahin a rawn ding chhuak ta hial.

"Ka hming i hria maw!? Engtin nge ka hming i hriat leh theih pu Henry? Min hre tawh lo a ni lo'm ni?" chik zeta min en chung chuan a rawn ti a, ka zawhna pawh chhang lova chutiang zawhna daih daih min zawh avang chuan ka thinrim ṭun nghal.

"I u awmna chu sawi vat mai rawh, ka hriatna ka nei let leh tawh" vin taka ka tih chuan a phu zawk a, min hlauh hmel tâk em avang chuan ka inthiam lo hnuhnawh leh ta zawk.

"U Hlutei te chu aaaa.....ni lo ni lo, ka hrilh thei lo che pu Henry" a rawn tih chuan ka thinrim leh nghal hle a, a bulah chuan ka kal phei thuai a, a dar chu ka chelh zui nghal bawk.

"Min hrilh mai teh Peksang, Hlutei hi ka hmuh ngei ngei a ngai" a dara sawi vak vak pah chuan ka ti vin leh tuar a, ani pawh a thin a rim ta a ni ang ka âwmah chuan a rawn nam pawp a, ka din danin a lo zir lo bawk nen ka tawlh hnung nghal dawr.

"Nangmah a ni lo'm ni zirna chhunzawm tura titu kha!? Enteh pu Henry, Health Minister lai ni mah la i mawl ka ti thlawt che. Khatiang khawp khan a bei nasa a, inah hial a rawn awm chilh che a, mahse a tawpah ani chuan a duh lo chung haw luih tir bak a hlawh chhuak lo" a rawn ti vin ve hrawk a, ka thiam loh vek a nih avangin chhan pawh ka chhang lo, ṭhutthlengah chuan ka ṭhu hnawk ringawt.

"U Hlutei reng reng pawh hi a mawl ka ti lutuk, zirna chhunzawm tura i tih kha a chhungte thusawi ai pawhin a la ngaipawimawh ber cheu zawk a nih chu! Nang chuan i hre leh tawp nâng, hriatna ka hloh alawm pawh i ti maithei, mahse kei chuan i hloh tak tak pawh ka ring tawh lo" a aw aṭang chuan ka lakah a lungawi lo hle tih ka hre thei.

"Tunah chuan ani pawh zirna avangin a awm bo leh tawh a, a kal dawn te khan a phur lutuk kha mak kan ti zawk. A phur em emna chhan lah chu nangin hlawhtlinna chang tura duhsakna i lo hlan vel vang lek chu niin, atthlak lulai lutuk!" a rawn tihzawm leh hmawk hmawk a, kei chuan ka en ngai en reng bak tih theih ka nei rih lo.

"Kan inah hian lo kal tawh suh pu Henry, kei chuan bei ngial mah la u Hlutei nen hian in inngaihzawn leh theih ka ring tawh lo, i rin phak bakin a luhlul ang. Va haw tawh rawh pu Henry, ka pate pawh i chanchin lawmawm hi, kei chuan lawmawm pawh ka ti vak lo, ka lo hrilh chhawng leh vek mai dawn nia"

"Khawi hmunah nge Hlutei chuan zirna a chhunzawm?" hmai hup chung chuan ka ti thawp sup a, inchhir eng ang mah ila engmah a danglam thei tawh si lo.

"I beisei sang ve hle mai pu Henry, ka zah lo che pawh min ti mah la a pawi pawh ka ti lo nek lo e! Beidawng em ema i lo haw luih tir u Hlutei hi zawn buai tum tawh suh, kal rawh, haw vang vang rawh, kan inah hian lo kal leh tawh suh" tiin ka zakah chuan min rawn pawt tho a, kawngka lamah chuan min kai phei a, min nawr chhuak ta hmak.

Peksanga min tih dan chu huat enah pawh ka en lo, a awm hliah hliah ka ti zawk. Dawihzep man, nunrawn man, leh sual man ka hmu ta ber niin ka hria. Kawngpuiah chuan zawimuangin ka kal chhet chhet a, motor lo tlan te chu hlauhna pakhat mah ka nei tawh lo. Thi vang vang ka châk a, ka hriatna chu nei let leh tawh mah ila ka hriatna ka hloh lai aiin ka lungngai daih zawk.

"I mawl em ni!? Eng vanga kawng lai taka kal nge i nih!? Thih i duh em ni!?" driver pakhatin a rawn tih tuar avang chuan ka inthing harh vat a, a hmel ka en chuan a thinrim hmel ngei mai.

"Ka tihpalh a ni e" tiin kawng sirah chuan ka kal sawn vat a, min lo su tak tak ang tih chu ka hlau hnawhnawh hle a ni.

A chhan chu ka fapa Junior-a ka ngaihtuah chhuak tawh a, Hlutei chu ka beisei phak loh leh pawh ngam tu pawh ni tawh lo mah ila ka fapa tal ka la nei a ni tih chu ka hre chhuak a ni! Lo intihlum ta ila engtin nge ka fapa a awm ang? Ka tel lovin engtin nge awm se ka lo tih reng reng ni!

Chapter 22

HLUTEI POV

"Hlute tun ṭum chu ka vawi thum sawmna che a ni tawh, min len chhuahpui ve tak tak tawh teh" tiin Sawma chuan min lo bia a, ani hi zawng tlang taka ka hrilh tawh hnuah pawh a beidawng duh ṭhak lo.

"Enteh u Sawm, lehkha zir ka ngai alawm" ka tih chuan chek tlâk tlak hian min en vawng vawng a, a laka ka inthlahrun lutuk avang chuan en pawh ka en ṭha ngam lo zawk.

"Engatinge lehkha zir i la tih reng a? Tunah Master result i nghak mek a, min hnar danah pawh hian dawt a tam tawh mah mah a ni Hlute" a rawn ti fak a, nuihza em em lo chuan ka ṭhen sak ringawt.

"Ihhhh.....lehkha zir chu ka la ngai ngei alawm, i sawi takah chuan zir dan tur vel min lo hrilh zawk teh a u Sawm? Kar leh leh pek maiah hian Entrance ka pe dawn a, Diploma course a nia, ka tling ve hlauh a nih ngat chuan Doctorate degree lam pawh tih a awlsam sawt dawn a" phur tak chuan ka ti ta daih a, engtinnge u Sawma chu ka ngaihtuah chhuah vat loh theih zawk reng reng ni!

"Phakar nu, i va han phakar tak! Lehkha chu ka zirpui ang che, mahse vawiinah chuan eng pawh ni se kan leng chhuak phawt ang, a ṭha em?" ka sam tuai vak vak paha a rawn tih chuan ka lo bu ringawt a, a luhlul ve bawk sia ka hnial duh ta lo mai.

U Sawma chuan Lodhi Garden-ah min len chhuahpui a, a hmun kan thlen chuan inngaizawngte kal dunna ṭhin tih hriat takin nula leh tlangval an lo tam hle a, chhungkua pawh an awm deuh tho, mahse an tam lo thung.

Lodhi Garden chu khawpui Area aṭanga hla vak lovah a awm a, a boruak a dangdaiin a thengthaw nuam hle. Keimah zawk hi ka chhuak vak tam lo hrim hrim a, ka kal ngai lohna a lo ni kher bawk nen a nuam ka ti ta phian.

Rei pawh awm lovin Lodhi Garden aṭang chuan kan chhuak a, hmun hrang hrang min fanpui a, thil te kan ei dun bawk a, min be peih bawk sia u Sawma bula awm chu a nuam ka ti.

Vawi khat phei chu a bialnu ve deuh reuh, amah lo ngaizawngtu hmeichhe pakhat hian min lo kek vak vak ringawt a, a chet dan chu ka hrethiam lo hman hle.

Department room chhunga ka awm lai a ni bawk si a, ka classmate te hmuha chutianga min rawn khawih pawp pawp avang chuan ka zakin ka thin a rim ve hle.

Ka ṭhiante chuan chu nu, tu nge a nih pawh ka hriat loh chu an lo pawt hrang thuai a, min ankhum hrep hnuah a thinrim chhan chu ka hre ve chiah. Zak lo ka tih lutuk avangin ka'n kek let ve tak tak mai a nih kha!

Rei pawh ka keh hmain ka ṭhiante chuan min lo ṭhelh leh vat a, chutah kan Professor chu class la turin a la rawn lut zui.

Kan Profesesor chuan ka insualpui nu chu student a nih leh nih loh a zawt a, chu nu lah chuan pawr tak hian a nih loh thu a sawi a, rapthlak ka va tih tehreng em. Kan Professor chuan ka keh let hrep nu chu University Campus aṭanga chhuak turin a ti zui nghal a, keipawh a office-a hmu turin min hrilh zui nghal bawk.

Kan Professor chuan ka chet dan leh awm dan chu mawi a tih loh thu min fah chamchî a, ka nihna nena a inmil loh thu pawh min hrilh ṭeuh. A tawpah erawh pangai takin thu ṭha tak tak min hrilh leh thlap a, kan Professor chu ka zahin ka awm dan avang chuan ka zak ta hle.

Kan in luaha ka haw hnu chuan u Sawma chu ka call a, thil thleng leh kan awm dan zawng zawng chu thinrim takin ka hrilh bawrh bawrh a, min rawn hmu leh tawh lo turin amah pawh chu ka hrilh zui nghal.

Rei lovah ani paw'n min lo call back vat a, min hmuh tawh loh a theih loh thu a rawn sawi nasa hle a, ka insualpui nu chu a hmel hriat satliah ve mai a nih thu pawh min hrilh nasa hle bawk.

A sawi dan chuan ka insualpui nu hmeichhe zak thei lo zet chu Delhi-a Coaching kal mek a lo ni a, u Sawma chu a lo bialpa chei ve vak a ni awm e. U Sawma chuan tih tak zet hian ngaihdam min dil a, min dil lo tur zawkin min dil daih avang chuan a lakah pawh ka inthlahrung leh ta hle zawk.

Ngaihdam a ngaih loh thute chu ka'n hrilh ve luam a, mahse ngaihdam min dil chu a ṭhulh duh chuang der lo. A tawpa tawpah chuan inthlahrung ru zetin ka ngaihdam thu chu ka hrilh ve ta tawp a, ka hrilh tirh te chuan a thaw hawk a, hahdam huai hmel a pu zui nghal bawk.

U Sawma hi IRS niin Delhi-ah an post a, a hma chuan Chennai-ah leh Maharsatra tih velah a awm ṭhin. Amah hrim hrim hi a chhuanawm thlawt, a felin a ngainatawm bawk si. Ka tan phei chuan ka u ang mai a ni a, kan inhriat hun chhung ngaituah phei chuan ka ngaina tawh hle.

Ani paw'n min ngaina ve hle a, inkhawm ka peih loh chang te hian min hruai lui hram hram zawk ṭhin. Kum khat zên zawn kan inhriat hnuah min duha min vei rukzia thu chu min hrilh a, min hrilh tirh te chuan hamhaih lutuk avangin ka meng phawk hrâw a, sawi ve tur engmah ka hre lo.

Min duh thu min hrilh aṭanga kar khat hnu velah a laka ka rilru puthmang chu min zawt ve ta nge nge a, keipaw'n ka rilru dik tak chu ka hrilh ve ta vek.

Ani erawh chuan ka thusawi ngaipawimawh lo zet hian min nghah theih thu min hrilh a, amah a zahawm bawk sia a lakah chuan ka inthlahrung zual.

Min beisei lo law law tur chuan ka hrilh nasa ṭhin, keimah ni lo hmeichhe dang ngaizawng tur pawhin vawi tam tak ka hrilh tawh, mahse ka sawi ang chuan a awm duh ṭhak chuang lo.

Thla khat hnuah phei chuan ka u ang chiaha ka en thu ka sawi leh tawp a, ani erawh chuan ka thusawi chu engah mah a lo la ngai lo zui. Ka u anga ka en te chu a lawm hlei hlei a, a hman apiang hi chuan kan in luaha lo kal a ṭhulh ngai lo va, mahse kan inah ber kher chuan a lo kal tam lo khawp.

U Sawma chu IRS (Indian Revenue Service) lai a ni ve bawk sia a buai mawp mawp thei khawp mai, a buai em em ṭhin chu a awm pawh ka ti lutuk. Min ngaihzawng chei tawp tawh avang chuan ngaihzawng neih ka theih tawh lo thu chu ka hrilh tawh ngai bik lo va, ani ang mipa fel leh ṭha lutuk lakah chuan ka inthlahrung tawh em a ni.

Kar khatah kan in luahah chuan vawi hnih te a rawn leng tlangpui a, rawn kal loh tawp kar pawh a nei ṭhin tho. Amaherawhchu keimahah chuan a lo kal leh kal loh chuan danglamna min siam vak lo, ka ngaihzawng angin ka en ve lo miau a tin ni!

Ani ve thung chuan a lo len loh lai pawhin phone hmanga min lo biak a ṭhulh ngai lo va, kan in luahna neitute phei chuan u Sawma chu an ngaina hle.

Vai tih takah kan inluahna neitute chuan u Sawma chu an ngaisangin an zah em em a, a hna chelh vang a ni tih pawh ka hria, a chang phei chuan an Pathian biak lo chauh ṭhin zawk a ni!

Zirna chhunzawm tura Delhi ka chhuk tirh kha chuan engkim kha a lo lai kual vel vek tawh a, kum laklawh lai a lo ni kher bawk nen thla khat tawp kha chu zirna ka chhunzawm lo nghe nghe.

Ka theih tawp chhuahin kan Professor te chu kum laklawh pawh ni se zirna chhunzawm ka dil a, kan Professor te kaltlangin kan University Vice Chancellor nen kan inbia a, kan Vice Chancellor in ka chhunzawm theih thu min hrilh tirh te chuan lawm haih haih tak ka ni.

Amaherawhchu kan Vice Chancellor chuan thu min tiam tir thlap a, ṭha taka lehkha zir turin min ti a, ka awm dan leh ka exam result an lo thlithlai reng tur thu min hrilh bawk.

Master of Science chu theih tawp chhuahin ka zir a, ka chhungte pawh ka be mumal ngai lo. Phone kaltlang paw'n ka be hmasa ngai lo va, anmahni hlir chuan min lo be ṭhin zawk.

Ka chhungte chu ka be duh lo pawh a ni bik lo, lehkha ka zir ngawrh lutuk avangin biak nachang ka hre lo a ni ber zawk. Ka ṭhiannu Engzuali tak ngial pawh ka call hmasa tawh ngai lo va, amah hlir chuan min rawn call zawk ṭhin.

Kan inbiak changte chuan nuihna tur te chu a awm teh meuh mai, mahse hmân anga han nuih thler duai duai kha kan nei tawh lo, kan lo upa ve ta te pawh a ni ang e.

Engkim a hriat ve vek tawh avangin vawi khat pawh Henry-a te lam a sawi ri ngai lo va, Henry-a chu tu nge a nih hriat ka duh tawh lo bawk. Ka Henry-a kha chuan zirna lama hlawhtling turin min ti a, duhsakna min hlan ang ngeiin ka hlawhtling bawk ang.

Ni e, tunah chuan kei LALRINHLUI hi ka danglam nasa tawh lutuk a ni. Mizoram ka chhuahsan aṭang kum 2 lai a ral leh tawh a, Master pawh ka zo titih der tawh zawk. Final result nghak mekin ka awm a, kan exam result pawh thla leh maia a chhuah tur thu Notice a awm tawh bawk.

A lo mak ngawt mai, mihringte hi hetiang em em hian kan danglam thei ang tih rin ngaihna reng ka nei ngai lo. Khang kum 2 chhung zawng khan harsatna em em ka tawk lo va, hlawhtlin ngei tuma hun hmang ka nihna chuan beiseina nasa tak min pe a ni.

Ka pa mawlh chu ka fak lo thei lo, khawvela pa ṭha ber a va ni chiang em. Vawi tam Mizorama haw tur pawhin min ti ṭhin a, mahse kei chuan Vacation-ah tak ngial pawh haw ka tum tawh lo, a chhan chu ka hlawhtlin hma chu Mizoram boruak hip ka tum tawh lo bur.

Ka chhungte phei chuan min ngaihtuah lutuk avangin Peksanga min awmpui tura rawn tirh an tum fo va, mahse keimah ber zawk chuan ka duh lo tlat a ni. Ka Mizopui te nena in kan luah ho thute ka hrilh hnu chuan tlemin an ngaih pawh a ṭhe deuh, mahse min la ngaihtuahzia chu a hai theih mawlh chuang loh.

Ka pa chuan ni tin Pathian thu min lo thawn ziah a, Pathian thu hnuaiah chuan ka ni hman dan tur tawi tê hian a rawn ziak thlap zel. Keipawh chuan min lo thawn ang chuan awm ka tum ta ziah a, chu chuan ka nun a hruai ngil a, tun thleng hian ka la awm ta zel a nih hi!

Delhi ka awm aṭanga kum khat hnuah Peksanga chuan Henry-a'n a hriatna a neih let leh vek tawh thu min lo hrilh a, min hrilh zan chuan chhin khat pawh ka chhing lo, ka ṭap tlaivar ṭhak.

Zinga ka hmel a danglam nasat lutuk avangin ka ṭhiante chu an chiai hle a, an ngaih ṭha lo lutuk chuan Hospital-a kalpui min tum hial.

Kei erawh chuan Hospital-a kal chu ka lo duh lo va, a chhan tak sawi lo mah ila ka ṭah tlaivar thu ka hrilh hnu chuan min hrethiam ve leh ta mai bawk.

"Eng Diploma Course ber maw zir leh i tum a!? Min hrilh ṭha duh bawk si lo, awm alawm" u Sawma chuan a rawn ti nui nûi a, a awm dan avang chuan ka nui ta ṭiah ṭiah. A upa ve tawh tho si a, a awm naupang chhia reuh lutuk chu ka lawm tawp.

"Nangmah chiah ka hrilh ang che, mi dang tûmah ka la hrilh lo, ka chhungte tak ngial pawh! Tuna ka entrance pek turah hian ka tlin ve hlauh chuan London-ah daih Diploma Course hi ka zu zir dawn a, mahse maw chance a sang lo lutuk. Kum 3 danah Diploma course hi an hawng ṭhin a, India ram phei chuan seat khat chiah kan nei. Chutah keini phei chu North East State kan ni leh nghal a, beiseina nei em em lovin ka try ve mai mai a nih hi!" ka tih chuan chik hmel zet hian min lo en a, sawi mai tur ka hriat loh avang chuan ka nuih leh ta ringawt.

"Nangtê hi i lo va mak reuh ve, a rukin puitlin i lo zir a ni mâw? Ka bulah i awm reng emaw tia, ka hriat loh laiin i lo putling ru zek mai" tiin ka sam chu a rawn tuai a, min nuih ve ta suk bawk.

"Tak tak chuan i thil tih tum dan vel hi a ṭha phian mai, North East State kan nih leh nih lovah kha chuan buai duh suh, i tlin dawn chuan i tling tho tho ang. Keipawh tuna ka hna chelh tur hian kum 3 lai chu ka hmangral asin, mahse a tawpah chuan inthliarhranna kara pawh IRS chu ka ni ta tho a nih hi! Tun ang lai khawvelah phei chuan dikna hi kan ṭan huai ve tawh a, kan hun lai ngaihtuah chuan in vannei tawh lutuk zawk" a rawn ti dam leh dap a, zaidam aw taka min biak hi chuan mi hriat chhuah ka nei lo thei lo ṭhin, mahse ka mi hriat chhuah chu ngaihtuah zui ka tum ngai chuang lo.

"Ni e i sawi chu a dik ang u Sawm, chuan i sawi a nih vang hrim hrim pawhin ka awih bawk e" ka ti deuh kher a, ka ṭawng dan avang chuan min ei loh hmel teh e!

"Em em che hian, hmeichhia ve si nghal reuh lutuk mai!" tiin Note book leh pen chu ka lamah a rawn hnawl a, entrance atana ka zir tur chu a lo ziak thla ṭeuh hman leh vek tawh.

"Ka va han lawm tak! Nang hi chu awm lo la chuan âw" thluk âwn duaia ka tih lai chuan chik zet hian min lo en a, ka sawi zawm dan tur chu a hriat châk hmel hle bawk.

"I awm lo a ni mai" nui ver ver chunga ka ti chiah chu rum deuh hian min melh a, mi pawh en rei peih lovin hmun dang chu a hawi sawn ta daih. A awm dan avang chuan ka nui dir char char a, ka nui lo thei lo a ni.

"Nui tawh suh" a tih pawh chuan ka Note book bawh meuhin ka la nui char char a, ka nui tawp hlei thei lo a ni.

Chutia ka nuih lai chuan ka darah a rawn ṭham a, nui vak vak pahin ka lo tal a, min ṭhamna chu pial palhin ka hnute chu a rawn ṭham ta chat mai. Ka va han nui tawp chiang mai mai em, kei ang bawkin a ni pawh chuan min lo en ve ta kar.

"Hlute" ti supin ka lamah chuan a rawn riai riai a, ka hmuiah chuan min lo fawp ta. Chhan pawh chhang let lo chuan ka lo dawh tawp a, lo dawnsawn dan tur reng ka hre lo.

"Ni lo!" a âwma ka nam sawn vak hnu chuan ka ti thut a, ani pawh a awm hla dawr nghal. Ka ṭhutna aṭanga thovin amah chu ka hnung chhawn thuai a, kan awm dan chu ka duh loh zawng tak a ni.

"Hlute min hrethiam teh, ka duh em che a tin ni!" tiin ka hnung lam aṭang chuan min rawn kuah a, kei erawh min kuahna aṭang chuan ka tal chhuak leh vat a, ka ding hlat zui nghal bawk.

"Min duh suh u Sawm, i inchhir mai mai ang. Min hrethiam zawk rawh, zanin aṭang chuan in hmu tawh lo ila a ṭha ang" zawi raih chuan ka ti a, hun kal tawh ka lo ngaihtuah chhuak hman kher bawk nen ka ṭah chu a chhuak ngawih ngawih.

"Engatinge ka lakah hian i inkharkhip tlat Hlute? Chiang takin i laka ka rilru put dan zawng zawng pawh i hria a, eng vanga inthiar fihlim zel nge maw i la nih cheu le? Kum 1 tal tawp chu i rilru hneh na'n hian ka bei ve tawh asin, min duh ve mai rawh, lungngaiin ka siam ngai lo vang che" a rawn ti dam dap a, a aw dam vel lutuk chuan min tiṭap ta nge nge.

"Lo inngaizawng ta pawh ni ila lungngaiin min siam dawn lo tih te chu ka hria alawm u Sawm, mahse kan inngaihzawn hnuah chuan i peih rei chuang lo vang. A chhan chu maw he ka thinlungah hian mipa pakhat chauh a awm a, thai reha paih bo vang vang duh mah ila a theih loh, ka tum nasat pauh leh amah ka hre chhuak zel zawk ṭhin. Chuvang chuan min duh tawh suh u Sawm, i hmai ka zah lulai tawh em mai. Kei chu hmangaihna lamah hian ka tluang ve lo, kan inngaizawng a nih chuan nang pawh i tluang lo ve mai ang" ṭap khur khur ngawt ngawt chuan ka ti chhuak ṭuau a, ani chuan rang tak hian min lo kuah zui nghal.

"Ka tum nasa tawh lutuk, mahse ka thei chuang lo u Sawm. Kha pa, ka mipa hmangaih hmasa ber leh awm chhun kha engtik lai mahin ka theihnghilh thei lo, tun thleng hian min duhsakna tihhlawhtlin tumin ka la bei ṭauh ṭauh a nih hi! Ani chu ka tan a thi tawh a, thi tawh mahse hlawhtling tura min duhsakna chu ka thinlungah a awm reng a, chu thil ka tihhlawhtlin hma chu awm nuamin ka awm thei lo" ka tih zawm leh nghal zat a, min hrethiam tawh mai se ka duh a ni.

"Enteh Hlute" tiin a âwm aṭang chuan min nam hla hret a, ka bianga mittui luang te chu a kutin a chul hul mawlh mawlh a, kei erawh chuan lungchhe lutukin ka lo chhoh melh ral thung.

"I hun kal tawh chu i hun kal tawh a ni a, inrawlh tumna pawh ka nei lo, mahse i hun hman mekah hi chuan tel ve ka duh a ni. Min hmangaih rawh ka ti lo va, min duh rawh pawh ka ti thei lo che, mahse tum ve reng reng la. Kei chuan ka ang chhungah ka lo kuangkuah tlat ang che, chu chuan zawi zawia a tihdanglam che ka ring nghet bur bawk" tiin chala fawp vang vang a, u Sawma ang mipa ṭha lutuk hi kei hian ka phu hlawl lo a ni.

"Inngaizawng ve tawh mai ang aw Hlute? Ka bialnu han ni phawt mai la, a bak chu kan hma chhawn dun zel mai dawn nia" a rawn ti dam leh diai a, ka laka a beidawng har lutuk chuan min tibeidawng tawh zawk a ni.

"Min dawhthei dawn em ni u Sawm? Ka rilruah mipa dang an awm tih i hre reng a, chuti chung chuan ka bula awm chu nuam i ti thei ang mâw? Dik tak chuan maw kum 2 lai chu theihnghilh ka lo tum ve tawh, amah avang pawhin zirna lamah ka tihṭhat phah hial a, mahse amah avang vek khan mipa dang rin leh theihna ka hloh nasa tawh em em thung" beidawng aw tak chuan ka ti chuai raih a, u Sawma chuan min duh tawh lo se atan a ṭhat daih zawk ka ring.

"Nuam ka tih theih ka ring, nang nen a nih dawn phawt chuan harsa mahse ka tuar thei em em ang. Eng pawh ni se tun aṭang chuan ka bialnu i ni tawh a, theih tawp chhuahin i thinlung hneh ka tum dawn tih hria la, i hun hmasa lam ka ngaihven lo tih hre bawk ang che" tiin ka biang chu a kut pahnihin a rawn dawm a, dam zet hian ka hmui chu a rawn fawp zui nghal a, a em em ka tih tawh avangin keipawh chuan ka lo chhang let ve ta tawp.

Chu ni aṭang chuan u Sawma chu bialpa anga en ka tum ve ta ngar ngar a, a chhan pawh ani ang mipa baka rin tlak tur chu ka hre tawh lo a ni.

Zan lama kan inbiak te chuan ṭhian ang maiin min be ṭhin a, inngaizawng tawh mah ila inngaizawngte ṭawngkam ang pawh a phuh chhuak tlem hle a, a sawi ngai lo tluk a ni.

Ka laka a awm dan vel aṭang chuan a fimkhur hle tih ka hria a, zawi zawia ka rilru hneh a tum dan te chuan amah min tingaisang zual.

A sawi ang ngeiin keipaw'n u Sawma chu ngaihzawng anga biak ka ching chho ve ṭan a, mahse engkim chu tihluihna vek a ni.

Thinlung chhungrila hmangaih nei reng chunga mipa dang hmangaih leh han tum chu thil namai a ni lo, a harsatzia lah a tawngtu te bakin an hrethiam pha lo vang.

Kan inngaihzawn aṭanga kar thum a ral leh meuh chuan Entrance pawh ka pe fel der tawh a, ka tling lo palh a ni paw'n ka tha a nat lutuk ka ring lo.

Entrance-a ka tling lo a nih chuan Coaching Centre vela thawh emaw Competitive Exam lam beih ka tum a, u Sawma a lo awm tawh bawk nen inbuatsaih dan tur pawh ani'n min hrilh theih vek ka ring.

Kan inngaihzawn ni aṭang u Sawma chuan min fawp leh tawh lo hrim hrim a, ka laka a dawhthei em avang chuan hmangaiha duh ve ka châk ngawih ngawih, mahse awlsam takin ka hmangaih thei tawh bawk si lo, ka tan chuan a harsa kual vel vek tawh.

"Hlute, engtinnge i theih zawk? I va han turu rem rem ve le, kan Department-ah Gold Medalist i nih thu kha i hre tawh em?" ka classmate Diya-i chuan min sawi nawk nawk chung hian a rawn ti a, u Sawma nena kan awm dun lai a ni bawk sia a thusawi chu ka awih ther te lo.

Kan result chhuah ni a ni tih chu ka hre ru ve reng, mahse ka result chu ka hre peih rih lo. Ka hriat peih loh avangin u Sawma len chhuahpui ah ka sawm a, ani pawh vawi khat sawmna a nih vang nge ni a lo phur khawp mai.

Min rawn lam tur thu a sawi a, hlauthawng reng renga result nghah ai chuan u Sawma nena Park vela len dun chu ka châk daih zawk tlat a ni.

"Ka awih lo, nangmah zawk kha Gold Medalist chu i ni chiang mai" tiin ka lo chhang let zawk ta daih a, ka bula ding erawh chuan min en reng tih ka mit sirin ka hmu thei vek.

"A ni bawk aw, tunah hian University pumpuia Gold Medalist tur tunge tih an en leh mek! Hetah hian hmu lo phei che ila chuan i result pawh i hre dawn miah lo tihna a nia, eng pawh ni se ka lawmpuia che" tiin min rawn kuah thuak thuak a, kei ve thung chu ka lo la bo huih. Bah deuha lawm thu ka hrilh hnu chuan Dyia-i pawh a kal sawn ve leh mai a, mahse ka rilru tak chuan Gold Medalist ka nih ka la inring chuang lo.

Ka phone chu ka phawrh vat a, kan Department group-ah chuan ka lut a, PDF a lo awm vâng mai. PDF chu download thuai thuaiin result chu ka en a, Dyia-i sawi ang ngeiin Gold Medalist chu ka lo ni tak tak!

"Enteh u Sawm, hei kan Department-ah Gold Medalist ka ni tak tak a ni hî, awi ka lawm lutuk" tiin ka zuang tawr tawr a, ani pawh chuan hlim hmel zet hian min lo nuih a, kan awmna hmun chu khawi lai nge a nih tih lam reng ka ngaihtuah tawh lo.

"Kan pahniha kan lawm ngei a ngai ang" tiin u Sawma chuan min rawn pawm kang a, ka lawm lutuk chu nghet takin ka kuah let vak ringawt.

"Ka chhungte ka'n hrilh ve nghal ang e, anni pawh an lawm ve dawn lutuk" tiin ka khi ver ver a, u Sawma pawh chuan min dah thla ve mai bawk.

Ka chhungte call tuma phone ka khawih mial mial lai chuan message dang a rawn thlen zawm mawlh mawlh a, ka thil hmuh avang chuan ka hamhaih leh ta hle.

"Ehêeeeee, enge awmzia? Eng thilah hian nge min lo lawmpui leh ringawt tawh hî" tiin kan Department group-a min lo lawmpui sup supna chu ka en tlawk tlawk a, chutia ka en lai chuan u Sawma chuan ka phone chu a rawn la hmak a, eng thil nge ka buaina chu tih ni awm fahran hian a en zui nghal.

"Hlute le! Lehkha thiam chung chuang tak bialnu ka lo nei reng a nih ber hi! In Professor Kumar-a hian University pumpuia pahnihna i nih thu a rawn sawi a, i Grade point nen lam a rawn post thlap mai. Pakhat nen hian in Grade point a inthlau lo ang reng hle leh nghal, Hlutei lehkha thiam thei tak i lo ni e" tiin ka phone chu min pe let a, ka en chuan ka ṭah nuih tawp.

"U Sawm, engtin nge a nih theih zawk!? Ka awih lo em mai, mahse engkim hi a tak tak vek a ang bawk si" ka ti ta ringawt a, u Sawma erawh chuan min lo nuih mai mai.

"Khang zawng zawng i hmu vek tawh chung pawha i la inringhlel a nih fô chuan in University Website-ah khan lut la, han en ṭha leh chhin teh" tiin thu chu min lo rawn ve leh mai a, keipawh a sawi ang chuan ka che chhuak vat.

"Âwwwww, a va'n mak ngai em. Kum laklawha lut ve mai ka ni si a, Website-ah lah chuan pahnihna ka nih thu a inziak vek bawk si, ka va han lawm tak em" ka result dik tak ka hrilh hnu chuan ka ti chhuak sep a, u Sawma pawh chuan nui ver ver chung hian min lo kuah leh a, ka ṭap leh ringawt dawnin ka hria.

"Hmelṭha em em te, vun nalh te, nang ang hmeichhia bialnu ka nei che hi ka lawm a ni. Engkim hi i thawhrim vang a ni a, tunah chuan i hma hun a eng ṭan tawh e. I nun hlui kalsanin hma lam pan zel la, keipawh engtik lai pawha nangmah pui thei tur chein ka lo awm reng ang" ka hnung chul chuan a rawn ti dam thlup a, ka va han hlim tehreng em.

"Ka chhungte chu ka'n hrilh ve tak tak tawh ang e, ka result an hriat hunah chuan kei ang bawk hian an hlim ve dawn tih ka chiang a ni" tiin ka awm sawn a, ka phone chu ka phawrh zui nghal.

Ka result ka chhungte ka hrilh chuan a ṭe hian an rawn ṭe vak a, ka pa phei chuan a khap nghal nghe nghe. Ka nu chu a rawn ṭawng nghal zawt zawt a, an pathum chuan min biak an inchuh a ni ber.

"Bawhi, tun ṭum chu rawn haw ve tak tak tawh la, rei awm rawh pawh ka ti lo che. I chhungte hian kan ngai che a nia, min ngai ve miah lo em ni?" ka pa chuan a rawn ti sup a, a aw aṭang chuan min ngaihzia ka hre thei.

"Ka ngai lo che u pawh a ni bik lo pa, ka ngai ve lutuk zawk che u. Nia, lo haw chu a pawi pawh ka ti chuang lo, mahse thil tih laklawh deuh ka la nei a, ka hman veleh lo haw chhoh ka tum dawn nia" ka tih chuan ka bula mi chu a lo thaw hawk a, amah ka en rual chuan a la hawi sawn daih zui.

"Aw le, a nih chuan i lo chho thei turah ngai phawt mai ang. Kha i nute nen hian inbe leh tawh rawh u" tiin ka pa chuan ka nute chu phone a pe zui nghal a, ka nute pawh rei em em kan inbe chuang lo, minute 10 vel kan inbiak hnuaah kan titawp zui ve nghal.

"Mizoramah haw i tum tihna em ni?" ka phone ka bag chhungah ka dah luh rualin u Sawma chuan a lo ti a, a hmel ka en chuan a lungngaih hmel hle.

"Ka hre lo, Entrance result a zir a ni mai. Entrance-a ka tling lo a nih chuan Mizoramah ka haw chho zuai ang a, ka lo chhuk leh vat ang. Ka lo chhuk leh hunah i puihna ka mamawh hnem turu buru dawn lutuk tih kha lo hria la, min puih duh loh vaih chuan i châk lo vang" tiin ka nuih sen sen a, ani pawh ka chhan dan avang chuan a rawn nui ve leh thuai.

"Haw tawh ila, vawiin chu ka hman ni te a ni bawk sia ka lo peng kawi ang. I pass ṭha bik bawk si, thil tê tê ka tihsak dawn che a nia" tiin min kuah chung chuan min kal pui a, keipawh chu ka ṭhen ve ta sak.

Kal kawngah chuan kan titi mawlh mawlh a, mahse thil sawi paha ka hawi kân tawh hnu chu ka va han en leh rang kher em. Ding dawt khawpin ka en reng a, ka thil hmuh avang chuan u Sawma ṭawng ri te chu hre mah ila enge a sawi pakhat mah ka hre tawh lo. Ka hmuh sual a nih ringin ka mit te chu ka nuai ṭhin, mahse chutianga ka tih hnu pawh chuan ka thil hmuh chu a la ngai reng bawk si.

Chapter 23

"Hlute!" ka dara chelh pahin u Sawma chuan a rawn ti hluai a, a lam ka hawi chhoh chuan riatthiam loh hmel zet hian min lo en a, ka tih ngaihna hre lo chu nuihza em em lovin ka nui ringawt.

"Ka ṭawng kha pakhat mah i hre lo va, i ngaihtuah lo hrim hrim zawk, chuan khawnge nichin maia i hlim hmel kha a awm?" tiin zawhna chu min rawn zawm nghal zat a, chhan mai dan tir pawh ka hre lo.

"A ho lutuk u Sawm" tiin ka lu chu ka thing thuai a, mahse eng thil nge thleng ta hi! U Sawma nena kan inbiakna hre pha ni awm tak hian ka mi hmuh chuan ding chungin min lo en reng a, rang takin ka hnung chhawn ta vat.

"Kal ang, haw vat ang, hmanhmawh ang" tiin u Sawma chu ka kai dawr dawr a, u Sawma chuan thui pawh kan kal hmain min pawt ding ta nge nge.

"I awm dan hi a dik miah lo, eng vanga hetianga awm thut nge i nih? Min hrilh chian hma chu ka haw pui lo vang che, min hrilh rawh le Hlute" a rawn ti a, a aw aṭang chuan a thinrim duh hmel hle bawk.

"Miss!" rawn titu an awm avang chuan u Sawma chu aw lo chhuahna lam a hawi nghal a, kei erawh ka hawi let ve duh tawh lo, a hmel hmu kher lo mah ila a aw aṭang chuan Junior-a a ni tih ka hre chiang lutuk.

"Miss!" rawn ti lehin ka hnung lam aṭangin min rawn kuah a, ka tha zawng zawng chu a khur nghal vekin ka hria. Junior-a lah chuan nghet tak hian min kuah bet tlat a, kei chu inher pawh ka la inher duh chuang lo.

"U Sawm, haw ang" ti hmukin Junior-a kut chu ka phih thlak sak a, mahse thui pawh ka kal hmain Junior-a bawk chuan ka hnung lam aṭang min lo kuah leh nghal. Min kuah dan lah chu a hma aiin a nghet lehzual a, a ban lak sawn ka tum pawh chuan ka thei tawh lo.

"Enge thil awmzia hi!?" tiin u Sawma chuan ka darah a lo chelh a, kei erawh chuan lei lam ka bih ngur ngur a, eng vangin nge Junior-a chu ka mit hmuhah a rawn inlan leh kher kher nî?

"Mama, Hlutei hi i hmel hriat a ni em ni?" tiin u Sawma chuan min kuah tlattu Junior-a chu a zawt ve leh nghal a, ka theih loh miau avangin Junior-a ban pawh chu dah thlak ka tum buai duh tawh lo.

"Aw hre lutuk, Miss hi ka hre chiang lutuk" ṭah chhuak aw zet hian a rawn ti a, ka rilru a lo kal kawi leh hman tawh bawk nen ka mittui chu a baw ta zâwih mai.

"A nih chuan Hlute nang pawh awm ṭha tawh teh, naupang nen hian han inhma chhawn teh u. Eng thil chiah nge nangni pahnih inkarah hian awm? Ka hre duh, ka hriat hi ngai tak zet" u Sawma aw ah chuan hlauhthawnna a khat a, a lakah chuan ka inthiam lo em em nghal.

"Miss, engatinge min hnung chhawn tlat? Ka hmel i hmu ve châk miah lo em ni? Kei chuan ka hmu châk em em che asin, i thlalak pawh ni tin ka en ziah, engatinge i kal bo kher?" Junior-a chuan a rawn ti ve leh ta. Keipawh rilru tipaukhauhin ka inher a, Junior-a hmel mawlh chuan mi tu emaw min hriat chhuahtir lo thei lo a ni.

"Ka kal bo kha a ngai alawm Junior, i lo va lian tawh em em ve, min chen thuak tawh a nih hî" nui lui sâng chuan ka ti a, ani erawh chuan ṭah chhuak hmel deuh hian min lo en thung.

"Min kalsan tawh suh Miss, a hrehawm êm mai" tiin ṭap chung hian min rawn kuah leh thlawp a, ka ṭap ve leh ta nge nge. Kan bula awm te ngaihsak miah lo chuan kan ṭap dun tlawk tlawk a, tu hmai mah kan zah zo tawh lo.

"Engtin nge heti lai daih daihah hian i awm theih Junior? Enge i rawn tih?" kan ṭah zawh hnu chuan ka ti a, a bianga mittui la chambangte chu ka hru hulsak pah reng bawk.

"Vacation kan lo hmang a, thla 2 chhung chawlh kan neih avangin Delhi-ah hian kan lo zin alawm" a rawn ti a, 'kan' a tih avang chuan ka rilruah mi pakhat a lo lang nghal.

"Miss, apa hmu ve rawh aw? A hmuh che chuan a lawm ve ngawt ang, a hriatna pawh a nei let leh vek tawh" a rawn tih leh chuan nui chungin ka lu chu ka thing vat a, Henry-a hmel chu hlawhtlinna ka neih hmâ hmuh ka tum tawh lo bur.

"Henry-a chu ka hmuh a thiang tawh rih lo alawm Junior, tun atan chuan ka hmu thei lo a ni. I pa nen chuan lo dam ṭha zel rawh u, kan inhmuh thu hi i pa pawh chu engmah hrilh suh aw?" ka tih chuan rang tak hian

"Ka thei lo vang Miss, apa chu kan inhmuh thu hi ka hrilh ngei ngei a ngai. Apa chu a dam lo, a dam lo nasa lutuk" a rawn ti vat a, a thusawi avang chuan chawp leh chilhin ka hlauthawng nghal.

"A ṭha vek tawh i ti a ni lo'm ni? Engatinge a la dam loh cheu? Eng natna nge a neih?" tiin ka zawt nghal zung zung a, mi â ni leng tan lo chuan ka awm dan chu a hriatthiam theih vek.

"Eng natna mah a nei lo, a rilru lam a dam lo zawk a ni. A hriatna a neih let hnu khan kan inah a lo hruai haw dawn che emaw kan ti vek a, amah chauhin a rawn haw thung" lungngai aw tak chuan a ti a, kawng sira ṭhutthlengah chuan a ṭhu zui nghal daih.

"Enge i sawi awmzia Junior? A hlim hle turah ka lo ngai tawh asin, chutiang bawkin nang pawh" tiin a bulah chuan ka ṭhu thla a, ani erawh chuan a khup bawh chung hian

"A teuh lo, a teuh lo lutuk Miss! I awm loh aṭang kha chuan kan hlim thei tawh lo, lehkha zir pawh ka châk loh phah vek zel. Vawi tam tak apa chu i awmna ka zawt ṭhin a, mahse ani chuan min hrilh duh ngai lo" a rawn ti ṭuau a, a ṭah chu a chhuak leh tak zet tawh tih ka hre thei.

"Henry-a chuan ka awmna a hre reng reng em ni?" a sawi dan aṭang chuan ka awmna hria a ang em a tin ni!

"Hria e, a zawng hmu vek tawh che alawm, mahse i awmna tak tûmah min hrilh duh chuang lo. Keiniho chu nangmah tibuai thei tur ang zawnga awm lo turin min ti tlat a, tun thleng hian i awmna min la hrilh duh lo hrim hrim"

"Miss lo let leh tawh rawh, ka ngai tawh em mai che" tih zawm leh zatin ka mitah chuan min lo en a, a mitah chuan mittui tam tak a awm a, ka khawngaih lutuk chu chhan pawh chhang let lovin ka kuah tawp ringawt.

"Ka thei tawh lo ka tih khâ Junior, ka lo let thei tawh rih lo. Eng pawh ni se tun bak hi chu kan hmu leh tawh lo vang. Tho rawh le, khawi laiah nge in awm reng reng? Nangmah chauhin i chhuak leh nghal, mi sualin an ruk bo daih che i hlau lo em ni?" tiin ka kai tho a, ani pawh a rawn ding ve nghal mai.

"Kan awmna a hla hleinem, saw lai lawkah sawn kan awm alawm Miss. Apa chuan Hotel a lo nei reng a, chu chu ka hriatna pawh a la rei bik lo. Kan Hotel-ah chuan kan thleng alawm, Miss apa chu lo hmu ve hram la, aw?" ngen ngawl deuh chuan a rawn ti leh a, ka thawte chu a chham lek lek dawnin ka hria.

"Keipawh hian ka ngai lutuk che u Junior, mahse tunah chuan Henry-a hmel chu ka hmu thei lo a ni. I duh chuan kan inhmuh thu i hrilh leh thei si ang, mahse beisei theih ka ni tawh lo tih erawh i lo hrilh tel dawn nia" rilru na taka ka tih chuan

"Engatinge Miss!? Engatinge apa tan beisei theih i nih tawh loh?" a rawn ti nghal vat a, a mitmengah chuan manganna ka hmu thei a, a nu atan chuan min la duh hle tih thlengin a hriat.

"A chhan chu pasal hual ka nei tawh alawm Junior, u Sawm hi ka pasal hual lai mek a ni a, kan inneih har tawh dawn lo" ka tih chuan

"Aih!! A theih loh!!! Apa hmel lo hmu ve rawh Miss, chuan pasal hual i nei thei lo bawk" a rawn ti vak a, dawt chiangbal sawi chu ka duh dan a ni bik reng reng lo, mahse ka sawi lo a nih chuan ka tum aia hmain Henry-a hmel ka hmu dawn bawk si.

"Miss, apa ka va ko ang aw? Hetah hian min lo nghak reng rawh aw?" tiin mittui tling pam chuan a tlan ta nal nal. Junior-a chu ka khawngaih tak zet a ni.

"Engatinge dawt i hrilh kher? Dawt tel lo pawh khan pangai takin i hrilh thei reng alawm, naupang mai a la nih khâ" u Sawma chuan a rawn ti deuh hmuk a, engtin mah ka chhang let lo, chhan let châkna pawh ka nei lo.

"Tun atan chuan engmah ka zawt rih lo vang che, min hrilhfiah vek chu ka phut thung" a rawn ti leh chuan u Sawma chu ka en a, a lakah chuan ka inthlahrung tak zet a ni.

"U Sawm haw thuai teh ang, kan haw vat a nih loh chuan thil a kal dik miah lo vang" ngen ngawl zet chuan ka ti a, ani pawh chuan ngawi rengin ka kut a rawn vuan a, min kalpui zui nghal ve mai bawk.

Kan haw te chuan ṭawng chãkna reng reng ka nei lo va, ka awm dan hrethiam takin u Sawma pawh chuan min be lui leh tawh lo hrim hrim. Master result chhuah ni te a ni ve a, result ṭha tak neiin University pumpuia pahnihna ka nih thu ka hriat ni te a ni ve a, hlim em em tur ka nih laiin ka hlim thei tlat lo.

Ni lo, ka hlim ngei alawm, Junior-a hmel ka hmuh hmate kha chuan ka hlim hle a nih kha! Junior-a hmel ka hmuh hnuah erawh u Sawma min biakna pawh chhang thei lo khawp leh ngaihtuah zui thei lo khawpin ka danglam a, chawp leh chilhin ka rilru a buai nghal vek a ni ber e.

Dik tak chuan hmel ka hmuh tirh khan Henry-a emaw ka ti dâwn dawn zawk a, mahse a hmela nuapan riauna awm khan Junior-a ngei a ni tih min hriat zui tir nghal a ni. Min ngai takin min kuah a, kum 2 chhung zet hmel kan inhmu tawh lo bawk nen a lo ṭhang ṭha tawh hle bawkin ka hria.

Zep lovah chuan ka ngai lo bik a ni miah lo, khatiang khawpa ka lo tal tam pui naupang chu ka rilruah a awm ve reng a, sawi chhuak kher lo mah ila ka ngai ve em em ṭhin zawk. Junior-a ngat phei chu ka tan chuan naupang dang ang a ni lo va, engtikah mah a ni ngai lo bawk ang.

A pa nen kan lo inngaihzawn ṭhin tawh miau avangin ka nel a, ka duat a, ka hmangaih a, ka hrin chhuah ni lo mahse ka fapa ang tak takin ka ngai hman a ni.

Amaherawhchu kan thil duh loh zawng tak chuan min rawn tlak buak a, chu chuan engkim siam ṭhat leh theih tawh loh khawpa nasain thil a rawn thlak danglam zui ta a ni.

Kum 2 hma lamte kha chuan pasal nei hial tawh turah ka inngai hman a, mahse chu erawh thil theih loh leh thleng ngai lo tur a ni ta zawk si.

Mak ka tih deuh pakhat chu Henry-a'n ka awmna a hriat vek tawh thu Junior-a ka aṭanga ka hria kha a ni. A sawi tirh kha chuan ka lo hlauthawng hman em em a, ka bul hnaih taka awm tura ka ngaih avangin ka hlauthawng a ni.

Amah avanga hauhthawn vel chu ka duh tawh miah lo va, amah avanga danglam pawh chu ka duh tawh hek lo, mahse chu erawh tum eng ang mah ila ka thunun theih piah lam thil a ni thung.

Engati nge ka awmna hria si chu min rawn biaka min hmuh a tum ngai loh? tihna rilru ka la nei fân a, ka ngaihtuahna leh ka rilrua awm chu âthhlak ka ti hnuhnawh hle.

Henry-a chu pathlawi fa pakhat nei tawh ni mahse ka mipa hmangaih hmasa ber a ni a, a awm chhun leh a tawp ber a nih pawhka ring.

A chhan chu ani chuan mipa dang ngaihvena hmangaih leh thei lêk tawh lo turin amah min hmangaih tir a, chutah na takin min siam zui leh bawk a, ka rinna zawng zawng chu amah nena kan inṭhenna chuan a liam pui fai vek zui nghal bawk a ni.

A mak a ni! Kum 2 chhung zet kha chu hmangaih tawh loh ka tum ṭhin, lehkhabu te chhiarin thil chi hrang hrang ka ti kual a, a tawpah erawh amah ka hriat chhuah leh tho ṭhin avangin ka ṭap leh nge nge ṭhin.

Ka thinlung chhunga hmangaihna awm hi duh dûhin sîk sawk thei ngat ila chuan amah ni lo mipa dang ka hmangaih duh zawk ngei ang, a bik takin u Sawma te ang mipa hi!

Hmangaihna erawh chuan chutianga tihdanglam vel chu a lo duh teuh si lo va, mahse chu chu ka nuna hmasawnna rahbi thar min petu a ni ve leh tlat thung.

Kan in luah kan thlen chuan pangai takin u Sawma chu ka thlah a, mahse ka ṭawng chhuak aṭang chuan ka la pangai lohzia a hriat theih vek.

U Sawma pawh rawn len luh a tum lo law law a, a mawiah tiin sawm ve mah ila a haw tlang ta tho. Zan lama lo len a tum thu a sawi a, keipaw'n a lo len hun nghakhlel ang takin ka lo chhang a, ani erawh min en vawng vawng hnuah a tlan chhuak thei ta chauh a nih kha!

Ni e, tu mipa in nge hrethiam lo teh lûl ang? Tu mipa in nge hun kal tawh avanga an bialnute buai vek chu hmuh kân thei teh lûl ang ni!? U Sawma chu ka ngaihtuah let rauh rauh a, a tan chuan ka awm dan chu a rilru nat thlak dawn hian ka hria a ni.

A awm laite khan Junior-a nen Henry-a chanchin kan sawi kai thuak thuak a, chutah dawt chiangbal ka la sawi zui, min ngaihnep phah ngawt ang ka ring.

A sawi lawk ang ngeiin u Sawma chu zanah a rawn leng a, ka mit te chu Henry-a nen kan intawn hma ang ni ngat se chuan chhe lo ka ti thei ngawt ang. A sang a, a hmelṭha a, hmeichhe tan chuan ani anga mipa perfect chu an vâng ve khawp ang ka ring.

Kei, a bialnu ni lai mek lah chuan beidawn rukna mitmengin ka thlir a, kan tawpna tur ka hriat lawk sa vek avangin u Sawma chu ka khawngaih lawk a ni.

Ka tum lo pawh a ni bik lo, hmangaihin duh thei ngat ila chuan u Sawma chu ka hmangaih ngei ang, mahse ka thinlunga hmangaihna awm chu mi pakhat tan chauh a ni a, a ni kumkhua reng bawk ang.

Ka Master result a chhuah aṭanga kar khat hnuaah DMZP lam chuan lawmman min hlan a, ka bialpa u Sawma chu DMZP president a lo ni kher bawk nen amah tak chuan min hlan a, ka zak ru ve hle. Mi dangho lah chu u Sawma nen kan inkawp tih an hriat vek tawh avangin lawmman kan inhlan lai chuan an lo au vak vak kher a, nuam lo duh tak a ni.

Ka chhungte lam paw'n min rawn be awl lo va, ka hman ve ta deuh bawk nen keimah chuan ka bîa ka be hmasa ve tawh. Ka chhungte bakah Engzuali chu ka be ve leh ta fô va, ka call hmasak ber ni chuan mak a tih thu hlir a sawi.

Lehkhate zir sangin lung fing lam kan lo hnaih chho ṭan ve tawh bawk nen han nuih ûar uar leh ṭawng vak vak te chu ka sim titih tawh a, keima tawkah ka awm dan chu a zahawm ve khup tawhin ka hria.

Chu bakah ka bialpa u Sawma chu a en tawn tlak em em a, a thil thlir dan leh nungchangte chu ka zir ru char char a, chu chuan keimahah hmasawnna nasa tak min pe a ni.

Lehkhabu chhiar te chu ka tui chho a, mahse chu pawh tihluihna vang a ni ber. A tirah te chuan ka hne lutuk, thil lem pawh awm lo lehkhabu chhiar ngawt ngawt chu ka mizia nen a inmil thei khan ka hre lo ṭhin.

Amaherawhchu danglama ka zirna kawnga hlawhtlin ka tumruh em avangin ka tilui a, ka chhiar lui a, tui luih ka tum a, a tawpa tawpah ka tui ve thei ta chauh zawk a ni.

Ka tui chho ṭan ve chiah tihah Henry-a bawk chu ka hre chhuak leh a, lehkhabu chhiar ngaina tak a ni tih ka hriatna chuan min tiṭap leh nge nge ṭhin.

Thla 1 a ral leh hnuah chuan kan Entrance result Selected result a lo chhuak a, ka result zet chuan min va han ṭhawng leh chiang em. India ramin seat khat chauh an neih laiin chu seat khat chu ka chang ve hlauh hi a lo ni a, kan Professor te min hrilh dan phei chuan Entrance Exam result ai mahin ka Post Graduate result chu an lo duh a ni awm e.

Ka lawm rualin Mizoram lama ka chhungte chu ka khawngaih leh tlat thung a, zirna avanga haw chho lova India ram pawna ka zin chhuah leh daih a ngaih dawn avang chuan an lakah pawh ka inthlahrung hle a ni.

Ka chhungte mai ni lovin ka bialpa ni lai mek u Sawma lakah pawh chuan ka inthlahrung a, Diploma Course chu zir leh lo mai tur pawhin min hrilh nghe nghe. Kei erawh chuan ka lo hnial tlat thung a, dik tak chuan tihsual leh ka duh tawh loh vang a ni pakhat.

Ka hun kal tawh lamah khan hmangaihna avangin ka zir zawm theihna chance ka hloh a, tunah chuan chance ṭha tak ka tana inhawng mek chu ka bawhpelh thei tawh lo a ni.

London lama zirna ka chhunzawm a ngaih thu ka chhungte ka hrilh chuan tûmah an rawn ṭawng nghal mai lo va, min lawmpuina ṭawngkam pakhat mah an chhak chhuak lo bawk.

An ngawih reng avangin keimah zawk chuan thil nih dan leh ka zir hun chhung tur te chu ka sawi nghal zung zung a, hlim aw takin sawi mah ila an awm dan avang chuan ka hlim bik reng reng lo. Ka nu phei chuan ṭah chhuak aw zet hian

"Hlute lo haw la, heti lamah lo awm ve tawh rawh. Nagmah leh nangmah hi i intichhe zo mai dawn, hna pawh i hmu em em ang, kan bulah lo cheng ve tawh rawh. Chu bakah London em ema zir zawm tur chuan pawisa pawh kan nei lo, kan chawm thei tawh lo vang che" a rawn ti tawp a, a ṭah a chhuah lutuk avang chuan a aw ri pawh a zuih ral vek thei.

"Ni lo ve nu, keimah leh keimah ka intichhe dawn hleinem, hmeichhe fing leh chak tak ka ni tawh zawk asin. Chuan maw nu, zirna senso tih vel lamah kha chuan buai a ngai lo, Scholarship a nih avangin engkim hi a free vekin ka zu zir dawn alawm, min ngaihtuah lutuk duh suh u" tiin keipawh chuan an rilru damna'n ka lo chhang ve thuai thuai a, mahse an thawm aṭang chuan an la lungawi hmel teh chiam lo thung.

Ka theih tawpin ka chhungte chu ka kal dan tur leh ka awm dan tur chu ka hrilhfiah a, darkar tam fê kan inbiak hnuah an rilru chu ka hmin ve thei ta hram. Ka zirna lama hlawhtlinna kawng ka zawh chho mek chu an lawmzia an rawn sawi ta ṭeuh a, ka pa nen phei chuan thil chi hrang hrang kan sawi kai nghe nghe.

Ka pa chuan ram dang a nih tawh dawn avangin fimkhur lehzual turin min hrilh nasa hle a, a chhan pawh hri vang leh hmeichhia ka nih vang a ni. Tû hriat lovin mi kut ka tuar ang a, ka thi mai tih chu a hlau ber. Chu bakah hri ka kai ve palh hlauh ang tih a hlau a, chungte chu thil ni thei leh thleng thei vek a ni.

Thil tam tak kan sawi hnuah kan inbiakna chu kan titawp a, inbe zo chiah ni mah ila ka chhungte chu ka ngai nghal veng veng. U Sawma pawh London-a ka kalsan dawn thu a hriat aṭang chuan kan ina rawn len a uar lehzual a, ka ṭhiante phei chuan an nel ve tawh hle.

Mizo vek kan nihna lai chuan min innel tir lo thei lo ve bawk a, kan titi pawh a inrual khai thei hle bawk. U Sawma ber chuan lehkha thiam tih takah min titipui a thiam a, kan ngaihtuah ang zawng hian thil min sawipui chat thei ṭhin.

London lamah ka kal dawn tih kan hriat hnu chuan Visa lam buaipui nghal a lo ngai a, chu pawh ka chet buai vak ngai lovin u Sawma bawk chuan engkim min tihfel sak leh thlap. A hnathawhin a lo zir bawk nen hmelhriat a ngah em em a, Airport-a hnathawk ṭhenkhatte chuan an zah thei hle.

"Kei chu rei hi ka ti dawn em mai Hlute, i thil tih tum hi cancel leh mai rawh. I tel lova kum 1 lai hun lo hman chu ka theih ka ring lo, ka ngai dawn êm mai che" ngawi renga waiting shed-a kan ṭhut laiin u Sawma chuan a rawn ti sup a, ka kut chu a hum hneh hle bawk.

"Ka thei lo u Sawm, ka hlawhtlin ngei ngei a ngai. COVID-19 hri awm hmate chuan Diploma Course hi kum 2 emaw kum 3 emaw a ni ṭhin zawk asin, tunah te chuan kum 1 chauh alawm ka zu awm dawn" a rilru hneh tum tak chuan ka ti a, a hmelah erawh kal lo tura min duhzia a la lang tam hle.

"Imperial College London-ah khuan ti raw i zu zir dawn? Nang chu i bawn bik ê, keini kal phak lohna hmunah i zu kal vel bik dawn a nia" thawk a lak hawk hnuah chuan a rawn ti a, a ṭawngkam chhuak chu a ngainatawm leh tawh kher mai, a insiam rem zung zung zel hi amah ka ngainat a ni.

"Nâaaaaa, ti khan ti bik kher lo la. Nang pawh London te chu i kal vek tawh khâ, i thlalakah pawh ka hmu vek. France-ah te hial i kal tawh bik a, min hmusit vel viau suh aw" ka ti ve nui nûi a, nui hawk chung hian min rawn kuah ta hle hlê.

"Ka zu zir tur hi Research Guide lam pang a ni ber a, a harsa lutuk lo turah ngai ang. Chu bakah phone a awm a, nangmah nen pawh kan inbe reng thei dawn tho alawm" a ngawih leh reng tâk avang chuan ka ti leh sep a, mi pawh chhang let lovin ka chhipah chuan a rawn fawp ta vang vang.

"Passenger te'n thlawhna lam i pan tawh ang aw" Mic aṭanga khawk rum rûma an lo puan hnu chuan kan inthlah a, kan ṭhutna aṭanga kan din chhuah rualin Airport chhunga mite pawh an lo che chhuak ve nghal sung sûng.

"Tluang deuhin i kal dawn nia aw" tiin u Sawma chuan ka sam te chu a rawn tuai ṭha hliau hliau a, keipaw'n nui sen senin ka lo buk khum ve nghauh nghauh.

"Ka ngai dawn hle mai che Hlute" tiin ka hmuiah chuan a rawn fawp vawng vawng a, keipawh chuan ka lo chhang let ve mai a, min fawh dan chu inhmu lo hlen vang vang tur te pawh a ang lek lek.

Thlawhna chhunga ka luh dawn te chuan ka hawi let leh hram a, u Sawma chuan nui ver ver hian min lo en reng a, min biak a tum thu chu a kut zaizirin min hmuh zeuh bawk.

Thlawhna chhunga ka ṭhut luh hnu chuan u Sawma dinna lam chu ka hawi thla leh a, mahse u Sawma chu a lo kal sawn daih tawh. A buai tih ka hriat avangin min thlah kher lo tur paw'n ka ti nasa a, mahse ani chuan min thlah lui tlat a nih kha!

Ka mit ka la sawn dawn chiah tihah thil dang hmuh ka nei leh ta tlat mai, a va mak ngai em. Engtin nge an lo kal theih!? Engtin nge Airport lamah ka awm tih an hriat theih zawk!?

Mask te chu vuah eng ang mahse ka thinglung leh ka mit hian tu te nge an nih a hre chiang lutuk, ka thiung hian anni chu hai thei mawlh lo.

Junior-a chu a hawi kual vak vak a, a mitmeng aṭang chuan min zawng tih ka hre thei. Henry-a mawlh chu a ni ka mit fûkna ber ni leh ta, a hmel chu a lo va han danglam sawt em em tawh ve le.

Amah ang lo takin a hmel chu a tla deuh dûk a, a sam te chu kan inngaihzawn lai ang lo takin a buk ang reng hle a, mahse a hmelṭhatna leh a vun ngona chu a la bo chuang lo.

Junior-a chu a beidawng ta a ni ngei ang chhuat bawh chungin a ṭap khur det det a, Henry-a chuan a kuah thuai bawk. An awm dan avang chuan Security te paw'n an din hual hial a, mahse man an tum vang a ni lo.

Anni ang bawkin ka mittui te chu ka biangah a luang thla zawih zawih a, rei pawh ka en duh lo, ka rilru a na em a tin n!

"Miss, i ṭha em?" ka awm dan avangin Air Hostess chuan min rawn tih phah ta hial reng a, ka mittui te chu hru hul sawk sawkin ka ṭhat thu chu ka lo hrilh ve vat bawk.

Henry-a leh Junior-a te awmna lam chu ka hawi thla leh hram a, anni chu an awm ngaiin an lo la awm reng. Thlawhna chuan van sang lam a pan tial tial a, an hmel hmuh reng châk mah ila ka hmuh phakah an awm ta lo. Thawk la hawkin ka mit chu ka chhing vang a, Henry-a chu ka ngaiin ka kuah châk ngawih ngawih.

Chapter 24

HENRY POV

Ka tlai leh ta nge nge e! Ka ât luatah keimah chauh ni lo ka fapa paw'n a tawrh phah a, ka hun kal tawha ka thil tihsual chuan ka tun hun thlengin min vaw let a, pawm thiam tum ṭhin mah ila a harsa thlawt a ni.

Ka rilru dawihzep lutuk avangin ka thinlunga riak reng hmeichhia chu ka kal tir a, beiseina nena min vuan tlattu chu beidawnna ruamah ka paih thla a, a chunga ka chet dan avang chuan ka inchhir tak zet a ni.

Kum 2 kal ta khan ka mawl lutuk avangin ka chan tawh a, nasa takin a awmna pawh ka zawng nghe nghe. Ni lo, ka chan ni lovin ka kaltir law law zawk a nih kha! Hma lam panin a kal mek a, hlawhtlin tum em ema lehkha a zir laiin kei chuan lo tihbuai vel ka duh tawh lo, a kawng tikhaihlaktu nih ka duh tawh lo hul hûal a ni.

Thla 2 chhung vel chawl lova ka zawn char char hnuah a awmna tak ka hria a, an University thlengin ka hre vek, mahse ka pawh ngam tawh loh mai bakah ka pawh duh tawh lo law law a ni.

A hmel chu hmu châk thei em em mah ila hmuh loh ka tum lui char char a, a chhan pawh a hmel ka hmu a nih ngat chuan ka inthunun zo dawn lova ka hriat vang a ni.

Ka chhungte chuan vawi tam tak Hlutei chu zawng hmu leh turin min hrilh ṭhin a, ka hmuh tawh thu ka sawi ni kha chuan min va han zawt zing mawlh mawlh tak! Kei lah chuan engmah ka hrilh duh lo va, a zirna tikhingbai vek khawpa inrawlh leh chu ka zuam tawh ngâng lo a ni.

Ani chuan ka thusawi awih takin lehkha a zir chhunzawm a, a nau Peksanga phei chuan ka thusawi a awih lutuk avangin a ngei phah hial a nih kha!

Ka hriatna ka neih let aṭanga thla 3 hnu velah ka pu chuan Stroke natna a nei tih kan hmu chhuak a, beisei lo takin a natna chuan a taksaah pawi a lo khawih nasa tawh khawp mai.

Kan zawh chian tak tak hnuah ka pu chuan Stroke natna a vei tih a inhriat daih tawh thu a sawi a, chungte phei phei chuan ka pi rilru a tina. Kan hriat loh hlanin a lo check up tir reng zel hi a lo ni a, mahse a natna chu a dam hlei thei chuang lo.

Stroke natna a nei tih kan hrait aṭanga kar thumna ah ka pu chuan min peih loh san ta ngei a, chutah ka rin loh lutukin thil a la kal zui. Ka pi chuan ka pu thihna chu a tuar em em a, a ṭah nasat lutuk avangin a hnang a, a thaw a chham a, tum tak têin tum mah ila kan kai tho zo ta ngang lo a ni.

Veng chhung YMA lam pawh an buai zui nghal mawlh mawlh a, a ni zawn deuh thawin ka pi leh ka pu chu kan chan ta ringawt a ni ber. Chung kan thil tawn vel avang chuan Junior-a chu ka khawngaih lehzual em em a, ka dar nghengin a ṭap reng ringawt.

Ka fapa chu ka hmangaih zual a, pi leh pu tih tur pawh a neih tawh loh avangin khawiah mah kalsan ka tum tawh lo. Ka pi leh ka pute thih hnuah phei chuan a eng tih mah a tui tawh lo va, ka khawngaih lutuk ka kuah leh vawng vawng ringawt zel.

A hma zawnga Art lam tuia painting ti nasa em em ṭhin kha a danglam vek a, colour leh thil dang pawh a khawih tawh ngai lo. A music ngaihthlak ṭhin Rap Music te pawh a play tawh ngai lo va, a sakpui tawh ngai hek lo.

Naupang mai mah ni se a mit khurte chu a tla dûk reuh a, tihhlim tuma ka beih ngial pawhin hlim taka nuih ni a nei ngai tawh lo.

Ka awm dan zawng zawngte thlak danglam vekin ka hna chelh lai zawng zawng chu ka chawlhsan vek a, ka nun pumpui chu ka fapa Junior-a tan ka hlan tawp tawh a ni.

Ka thinlung chhungah erawh Hlutei chuan awm loh ni reng a nei lo va, ka thinlung neitu ni mahse amah chu ka hmu ngam chuang lo.

A hmel ka mitthla loh leh ka phone-a kan thlalak dunna te chu ka en tlawk tlawk zel a, chu ringawt pawh chuan hlimna min pe thei. A taka a hmel hmuh ai chuan chutianga a hmel hmuh chu nuam ka ti a, a lakah pawh ka inthlahrung lo va, khi suk suk chunga a hmel ka hmu thei chu nuam ka ti daih zawk.

A takah te chuan inhmu nâ ila zawng a tua te mah chuan kan inen rei theih ka ring lo, ni lo Hlutei chuan min en rei thei ngei ang. Ani chuan kei angin tihsual engmah a nei lo va, min hmangaih miah tawh lo mahse awm ka ti hliah hliah zawk a ni.

A chhungte pawh vawi khat mah ka tlawh tawh ngai lo va, kei ang bawkin ka fapa Junior-a chu a leng chhuak tawh ngai lo bawk. Ka huat vang leh ka hmuh dik loh vanga tlawh tawh ngai lo ka ni lo va, an hmai ka zah lutuk vang a ni zawk.

Khatiang khawp khan an fanu duat lai beidawngin ka haw tir a, ka chet dan avang khan tu nu leh pain nge min haw lo reng ang ni!

Hlutei pa ngat phei chu zah tak tê hian ka zah tlat tawh a, a fanu tana kei min ring ngam nghal mai lo kha a tifuh ka ti tawh hle. Ka awm danin a zir si lo, a fanu tan chuan engtikah mah kei ang mipa hi min pawm theih ka ring tawh lo.

Sawrkar lam aṭangte chuan vawi tam phone call ka dawng ṭhin a, Health Minister hna chu chelh leh ngei turin min la duh hlawm hle a, mahse kei chuan zahawmna te leh hmingthanna te aiin nunna chu ka ngaipawimawh tawh zawk a ni.

Ka neih chhun tak meuh ni tawh ka fapa chu chan leh ka duh tawh lo va, a tel lo chuan ka awm theih pawh ka ring lo. Ka fapa Junior-a leh ka thinlung neitu Hlutei te chu ka nunna an ni a, ka ngaihtuahna leh ka rilru luah khat rengtu an ni a, anni pahnih chu ka engkima engkim an ni.

Ka fapa chuan natna a nei pawh a ni lo va, mahse a nun chu a hloh tial tial tih ka hre thung. Chuvanga Health Minister hna pawh bansan ka ni a, mi ṭhenkhat kam tam deuh phei chuan min ngei a, min sawisel nasa hle bawk.

Social Media ṭhenkhatah phei chuan ka hriatna hloh hlen hmak ang te paw'n an lo ziak a, kei erawh chuan ka ngaihven hran lo, mahse ka fapa bawkin keimah avanga a lo tuar tel ve zel chu ka en liam thei lo a ni.

Vawi khat chu zirlai naupang pakhat nen School-ah an lo insual leh hi a ni a, an insual chhan lah chu ka chungchang bawk a la ni zui.

Ka fapa lo insualpui naupang chuan ka hriatna ka hloh hlen a lo ti a, Junior-a lahin ka hriatna ka hloh hlen lohzia hriain a lo chhang let ve a, chung vel avang chuan an lo insual hi a ni a, thinrim viau dawn mah ila ka thinrim em em thei tawh lo.

Kei chuan hriatna hloh hlen hmak ang pawhin min ngai mahse pawi ka ti lo va, chutiang thil ho lutukah chuan ka rilru tihnata ngaihtuahna sen pawh ka tum tawh lo.

Sawi leh sawi hnu, ka fapa Junior-a awm dan chuan ka awm a tinuam hlei thei ṭhin lo. Naupang harhvang leh ṭawng duh ve tak ni ṭhin kha a inthlak danglam vek tawh a, chutianga ka fapa awm chhan chu keimah ka inpuh lo thei lo.

Ka phal loh aṭangin vawi khat tê pawh Hlutei hming emaw a chanchin emaw pawh a sawi ri leh tawh ngai lo va, infiam pawh infiam lovin lehkha chu a zir leh tawp zel. A lehkha zir te chu ka enthla ṭhin a, a chang phei dawhkan bawh hian a kun leh vawng vawng ṭhin.

Ka theih tawp chhuahin ka fapa chu tihhlim ka tum fô va, mahse ka hlawhchham ziah tho. Kei lah a zei lo chi leh fate enkawl dan thiam lutuk lo chi ka lo ni kher bawk nen Junior-a tan chuan phurrit tam tak ka siam tih ka hria, Junior-a mamawh chu nu a ni tih thlengin ka hre vek.

A pian tirh ata a nu dik tak hmel vawi khat mah a la hmu lo va, kei phei chuan a them pawhin hmuh tir ka tum lo hrim hrim. A nu dik tak chuan nu nih a phu lo va, a phu ngai bawk hek lo vang.

Junior-a rilruah erawh enge awm tih chu ka hre chiah lo va, mahse a nu atan chuan Hlutei ang bak baka duh leh ngainat hmeichhia a la nei lo tih ka hria.

Kum 2 a ral chuan Junior-a paw'n class 8 a rawn rap chho ve tawh a, class ṭan tak tak hmain ka zin chhuahpui ta daih bawk. A nihna takah chuan a rilru tihthawnvenna atana zin khawthawnpui ka ni a, Delhi kan thlen hnu chuan a hma daih aṭanga hrilh ka lo tum tawh atana Hotel ka neih thu chu ka hrilh ve ta chauh.

Ka hrilh tirh phei chuan mak a ti em em a, a awih lo hial zawk. A mit ngeia kan Hotel a hmuh hnuah erawh a awih ve ta a, Hotel-a kan awm hmasak ber zan chuan a hlim ve reuh hle bawk.

Health Minister hna ka chelh tirh aṭang daih tawh khan Delhi-a kan inhmunah Hotel tur ka sak tir tawh a, chu Hotel chu ka fapa enkawl tur atana sa ka ni.

Chutianga Hotel lian tham zet mai ka sa mek tih an hriat hnuah ka pa chhungte lam chuan min chuhpui an lo tum ve ringawt pek a, a hun lai kha chuan thinrim taka inbiain kan intibuai lo chauh a ni.

A dik zawk ka nih miau avangin Court-ah te chuan ka kal lawp lawp a, min hlau ta a ni ngei ang Court lama ka chuan kai hnuah chuan ka pa chhungte lam pawh an reh zui hmak.

Mizoram aiawha ka zin chhuah changte khan Hotel chu ka tlawh kawi pah reng zel a, a na zawnga thil sawi chhuak vâk vak chi ka lo ni lo bawk nen ka Hotel sak chungchang pawh chu ka zep thei ngar ngar khawp mai.

Kum khat hnu velah Hotel chu sumdawnna anga kalpui theih tur angin ka mi chhawr te'n an sa zo va, kan Hotel hmingah pawh ka fapa hming kaih tawi 'H L J" ngei chu ka dah a, naupang mai a la nih avangin Hotel neitu nihna chu ka la chang rih thung.

A lo puitlina thil chinchang a hriat hunah erawh Hotel neitu hming chu ka fapa hminga dah ka tum sa dîam a, a nun chu nuam takin hmang se ka duh a ni.

Delhi-a Vacation hmang tura ka fapa ka awmpui hnu pawh chuan Hlutei chu hmuh ka la tum lo fân a, Junior-a pawh a awmna lai ka la hrilh duh lo hrim hrim. Kei chuan a in luahna nen lam ka hre vek a, duh chuan ka hmu thei ngei mai, mahse hlawhtlinna kawng a zawh laia lo tiṭhuanawptu nih chu ka tum nawn leh tawh lo a ni.

Tlai khat Junior-a kan Hotel piah lawk Park aṭanga rawn tlan haw chuan Hlutei ngei a hmuh thu leh an inkuah thute chu ṭap zawih zawih chungin min hrilh a, an titi dun thu thlengin min hrilh bawk.

Ṭhutthleng khata ṭhuin an inbiak thu min hrilh laite chuan a hlim hmel em em a, kei erawh a hmuh atan ka lo nui lui vel mai mai a ni.

Hlutei'n pasal hual a neih mek thu a rawn sawi chuan ka thinlung chhungril chu a rawn na nghal zawk a, ka fapa thusawi avang chuan ka na tial tial leh nghal.

A hmate kha chuan ka tihnat em avangin ka inchhir a, Hlutei chuan mipa dang hmangaih tawng leh se, keimah ang ni lo mipa ṭha tak kawppui nei se tih te khan ka lo suangtuah ṭhin a, a taka pasal hual a neih thu ka hre zet zawng pa pawh ni tawh mah ila ka na tak zet a ni.

Hlutei'n pasal hual a neih thu min hrilhtu lah chu awih loh theih lovin ka fapa a ni miau a, ka tan chuan Hlutei chu beisei leh ngam chi reng a ni tawh lo.

Chu tlai vekah chuan Junior-a chuan Hlutei chu min hmuhpui nghal tum a, ka fapa awm dan vel chu ka khawngaih thlawt a ni. Hlutei a hmuh thut avang chuan a chi ai ve vek a, a thate hial a khurh ve avangin a ṭawngte chu a ri phawlh phawlh ni mai hian ka hria.

Kei chuan a hriatthiam theih dan tur ang berin Hlutei chu kan pafa tana beisei phak a nih tawh lohzia ka hrilh mawlh mawlh a, ani erawh a lo ngawi kar a, ngawi rengin kan thlenna Hotel room-ah chuan a chho ta daih.

Kan room chhunga ka luh chuan tukverha dak vauh vâuh chung hian pawn lam chu a lo thlir reng a, ka taksaa kuah beh leh tawp loh chu tih theih ka nei tam lo hle.

Chu tlai aṭang chuan kum 2 liam taa mi ang maiin a khua chu a rawn har hmel leh ṭan ta a, kei lah Hotel lam buaipui zeuh zeuh a lo ngai ṭhin bawk nen Mizoram ang em emin a bulah pawh ka tal tam leh ta lo.

Hmun lar leh mi tlawhpawh tamna hmunah te chuan ka fapa chu ka chhuahpui ziah a, mahse Hlutei te awmna Street lamah chuan ka kalpui duh lo hrim hrim thung.

Zan khat phei chu ka fapa ka khawngaih lutuk avangin Hlutei te in luah awmnaah chuan ka kal a, mahse a pasal hual ni ngei tur nena an lo chhuak dun lai ka hmuh avang chuan en pawh en rei duh lovin ka tlan chhuak zui nghal daih.

Ka fapa khan pasal hual a neih thu min hrilh tawh ngei a, a sawi tirh pawh khan ka rilru a na lutuk, mahse ka mit ngeia mipa dang nen hlim taka an awm dun lai ka han hmu chiah chu awm ngaihna ka hre lo.

Hotel lam pana ka tlan laite chu chuan Steering chu ka chum pawp pawp a, ka thinlung neitu'n mipa dang laka min kalsan tih ka hriatna chuan namên lovin min tina a ni.

Thla khat deuh thaw Delhi-a kan awm hnuah pawh Junior-a chuan Mizorama haw chho a duh tlat lo va, a va han buaithlak leh zel ṭhin tak em. A haw chhoh duh loh chhan ka zawh lahin Hlutei zawn chhuah a duh thu ringawtin min chhang a, mahse thinrim leh awka vin takin min biak a ching tawh lo.

A tawpah erawh Hlutei hmel hmuh leh a châk lutuk avang chuan a dam lo thei tak ngial dawna ka hriat avangin hmuhpui leh ka tum ta tawp a, Hlutei kan hmuh dawn thu ka hrilh tirh te chuan lawm lutuk avangin a hmel nguai zawng zawng chu a reh nghal vek thei hial.

Ka fapa nen chuan Hlutei awmna lam chu kan pan a, kan kal lam te chuan a nui deuh reng mai. Zam ru takin Hlutei awmna in chu ka lut a, ka fapa pawh a kutah ka chelh reng bawk. A room mate te thu rawn sawi erawh chuan min ṭhawng chiang hle a, che chhuak thutin Airport lamah kan tlan chhuak zui nghal.

Airport kan va thlen chuan passenger ho zawng zawng chu thlawhnaah an lo lut fel vek tawh a, ka fapa erawh Hlutei hmel hmuh tumin a la hawi kual nasa mai.

Thlawhna thlawk kang ṭan mek ka hmuh avangin kei chuan ka zawng buai duh tawh lo va, zawng tawh lo tura ka hrilh hnuah pawh Junior-a chuan a la zawng lui ngar ngar a, ka insum thei tawh lo chuan

"Junior! Duh tawk rawh! Ani chu London lam panin a kal tawh, zawng buai duh tawh suh!" ka ti deuh hluai a, chutah zet zawng chhuat bawh chung chuan ka fapa chu a rawn ṭap chhuak ta.

A bula kal pheiin ka âwmah ka kuah bet thuai a, a ṭap ring ang reng bawk sia Security te pawh chu an lo kal phah nghe nghe.

"Sir, puih in ngai em?" security guard pakhat chuan a rawn ti a, ṭawng pawh ṭawng lovin ka lu chu ka lo thin khum a, anni erawh chuan keini pafa chu min khawngaih hmel hle. Kal sawn mai ta lo chuan an ding ve reng a, Junior-a pawh a la ṭap uar ngar ngar hle.

A vawi hnihna atan Hlutei chu hmuh leh tumin tha ka seng ve ngei a, mahse kum 2 liam taa mi ang bawkin ka tlai leh ta tho. Ka fapa chu ka kai tho a, a zawi vek avangin ka paw ta tawp.

Motor awmna lam pana ka kal phei pui laite chuan ka hnung bawh chungin a la ṭap reng a, naupang chhia tak ni tawh lo mahse Hlutei chu a nun aṭang a la paih chhuak thei bik lo a ni e.

A hma kha chuan kum 2 lai a hmuh tawh loh avangin a theihnghilh ve theih mai ka ring a, mahse ka lo ring sual chiang kher mai.

Ni e, Hlutei zawng keini pafa tan hian a pawimawh em mai, kan thinlung aṭanga vawm bova theihnghilh mai mai theih chi a ni lo. Zan lamah chuan Junior-a chu a dam lo ta hial a, ka va han mangang nasa tehreng em.

Ka fapa chu ka neih chhun tak meuh a ni tawh a, a pite angin min thihsan ve mai ka hlau a ni. A dam loh chhante chu ka ngaihtuah let a, engkim chu keimah vek a tawp a ni. Hlutei kha chhuak turin lo tilui tlat lo ila chuan ka fapa in harsatna a tawk lo ang a, ka pi leh pute pawh an boral kher ka ring lo.

Ka fapa tan chuan Hotel-a lo kal chilh tur Doctor pakhat ka ruai tawp a, ni 3 hnuah ka fapa pawh a rawn ṭha ve leh mai bawk. A taksa te chu dam tawh mahse a chhungril nun kei ang chiahin a dam bik lo tih ka hria a, chungte chuan zan min timu thei lo fô.

Vacation pawh kar khat chhung chauh kan hmang thei tawh a, kar khat hnuah chuan Mizoram lama kan haw ngei ngei a ngai tawh ang.

"Sir, vawiin tlai lama kan Reservation neih chu an hrawl ṭha hle mai a, bill dik lo deuh pawh siam ila an sawisel miah lo vang ang ka ring" Hotel Manager atana ka dah Ishaan-a chuan nui hek hek chung hian a rawn ti a, kei erawh ka lo nui miah lo thung.

"Bill dik lovin siam miah suh ang che, a dik takin ti rawh, ka awm loh lai velin bill dik lova siam i lo nei ṭhin lo maw?" ka tichang fak a, ka hmel a rawn en rual chuan ka thu takzia hriain a nui tawp nghal riai riai.

"A teuh lo mai Sir, a teuh lo lutuk! Nangmah nen pawh kan sawi dun vek tawh khâ, thil dik lo i ngainat lohzia hre reng chung chuan dik lo taka sumdawn ka ngam hleinem, ka ti ngai lo bawk ang. Ka fiamthu ve mai mai alawm, ka tihpalh a ni e" a rawn ti nghal thuai thuai a, a hmelah chuan a serious ve ta hle.

"A ṭhat chu! Eng pawh ni se kan room-ah ka awm dawn a, buaina emaw min mamawhna emaw a awm a nih chuan min lo ko dawn nia" tiin ka inher a, kan thlenna room lam chu ka pan zui nghal.

Room chhunga ka luh chuan tûmah an lo awm lo va, tlema tlemah ka buai hman ṭep alawm le. Airport aṭanga kan haw hnu aṭang khan Junior-a chu Park lamah a leng ta ziah a, Hlutei hmel hmuh leh a inrin vang ni ber.

Hlutei chu zirna avanga London-a a kal daih tawh thu ka hrîlh ka hrilh hnuah pawh Junior-a chuan a la awih duh tlat lo va, hmuh leh inbeisei em emin Park-ah chuan a kal ta ziah a ni.

Khumah chuan ka bawk thlawp a, ka mit ka chhing vang a, mahse muthilh tumna ka nei chuang lo. Ka mitthlaah chuan Hlutei hian min lo nuih sen sen a, a hmelṭha lutuk leh a ze ngainatawm em em chu a tak tak ni thei se ka ti ngawi ngawih.

Ka meng zawk a, khumah chuan ka zangthal a, Hlutei hmel mitthla zawm turin ka mit ka chhing zui leh nghal. Hlutei nena kan inngaihzawn lai te chu a hun laia awm ang chiahin ka mitthla leh a, insum theihna tlachham tih hriat taka a ṭawng zet zet lai te chu ka hma lawka awm ang maiin ka hmu a, chu chuan ka thinlung chhungril a tihlim veng veng thei.

"Pa" tia ka fapa min kohna thawmah chuan ka harh riai riai a, ka tum loh deuhin ka lo muhil palh a ni ngei ang.

"Kaih thawh che pawh ka tum lo, i awm dan a dik lo emaw ka ti alawm, muhil leh zawk rawh" Junior-a chuan a rawn tih zawm leh zat a, kei chuan ka lo nui suk ringawt.

"Ka lo muhil palh a nih dawn hi! Muthilh pawh ka lo tum hleinem, lo mu zawk rawh Junior" tiin khum aṭang chuan ka tho chhuak a, pawn lam ka en chuan khua a lo thim vek tawh.

"Aw le" tiin ka thusawi ang chuan khum lam chu a rawn pan ve mai a, keipaw'n kawngka lam chu ka pan zui ve nghal.

Kawngka ka hawng dawn chiah tihah ka hnung lam aṭangin Junior-a chuan min rawn kuah thut a, a chet dan avang chuan

"Junior" ka ti deuh sup a, ani erawh chuan min kuah nghet reuh khawp mai. A lama inherin ka fapa hmel chu ka en a, a hmelah chuan lungngaihna nasa tak ka hmu thei.

"Pa, Miss hi engatinge kan bulah a awm theih tawh miah loh? I ngai ve tho ti raw pa? Kei ang bawkin Miss kha i ngai ve ti raw? Hruai let leh mai la pa, duh leh London-ah chuan zu kal chilh mai ila" mittui tling pam hian a rawn ti a, min chhoh melh ral bawk.

"Ni lo ka fapa, ani chu keini pafa tan chuan beisei ngam chi a ni tawh lo. Nangmah paw'n pasal hual a neih thu i sawi vek khâ, pasal hual a neih tawh avangin hruai let leh kha a chi tawh hleinem, hriatthiam tum rawh Junior" ka kut pahniha a biang dawm chung chuan ka ti a, ka fapa lungngai hmel hmuh reng chu a hrehawm ka ti a ni.

"Kei chu Miss hian pasal hual a neih ka ring thei lo, a chhan chu a mit aṭang khan dawt a sawi tih ka hre thei alawm pa. Miss khan kan ina kan awm ho lai kha chuan dawt a sawi ngai miah lo, mahse pasal hual a neih thu a sawi kha chu dawt a ni tih ka hre chiang a ni. A pasal hual nia a sawi pa pawh khan mak a ti a, ka hrethiam ve vek!" men pura a rawn tih chuan ka kuah leh ta nge nge.

"A tawk e Junior, sawi tawh lo vang. Khumah sawn mu ang aw, ka lo mutpui ang che" tiin ka fapa chu ka pawm phei a, kan mut hnu pawh chuan a rilru a la na khawp mai.

Rei lovah Junior-a chu a muhil thuai a, ka thawhsan dawn chuan a chalah ka fawp leh vang vang. In hnuai ka thlen thlak chuan dawhkan awl lo awmah ka ṭhu hnawk a, hnathawk te chuan ei tur an rawn chhawp nghal ringawt. Ka ril chu a ṭam hran lo, ka fapa nena kan ei dawn te a nih loh chuan thil ei chu ka tum lo hrim hrim.

"Pu Henry!? Nang maw!?" tunge a nih pawh ka hriat loh chuan a rawn ti lawng lawng a, ka ṭhutna opposite-ah chuan a rawn ṭhu thla zui ve nghal bawk.

"Enge heti lai daih daihah i rawn tih a?" a rawn ti leh nghal ringawt a, Mizo chu ni ngei mahse a awm dan vel avang chuan hawihhawm ka ti hran lo.

"Kan lo zin lawk a" pangai tak chuan ka lo ti mai a, ban pharin ei tur chu a la chah zui leh ta deuh deuh a, a hmel chu ka en chian tak ngial pawhin tunge a nih ka hre thei lo.

"A nih chû, Mizoram Health Minister hlui te i ni bawk si a, i hmel ka lo hre rang khawp mai. Kei hi Malsawmtluanga ka ni a, Delhi-ah hian IRS hna chelhin ka awm ve mek a, ka hmu che chu ka lawm hle mai" tiin a kut chu a âwm zawnah a phar chhuak zeuh a, a hawihhawm leh si êm avang chuan keipaw'n ka âwm zawn velah ka kut chu ka lo phar chhuak ve thuai. Hri len lai a nih avangin kan fimkhur dun em em a, inchibai pawh kan inchibai ta lo a ni.

Eng eng emaw ni sawiin Dinner chu kan ei dun ta ringawt bawk a, a ṭawngkam leh a chezia vel chu ka ngaih ang a lo ni lo tawp mai. Ka hmuh tirh te kha chuan engtin emaw ni ka hmu nghal ringawt a, a chet dan vang kha ni berin ka hria.

Dinner kan ei lai chuan Health Minister ka nih laia min lo chik theihzia te, ka hmalak dan ṭha a tih thute a sawi luam a, kei erawh chuan ṭawngkaa chhang em em lovin ka lo nuih liam pui mai mai thung.

"Wash room-ah ka va kal lawk ang e, ka lo let har lo vang" Dinner kan ei zawh chuan a rawn ti a, a ṭhutna aṭanga thovin a kal zui nghal.

Wash room lama a kal hnu rei lotê ah dawhkana a phone awm chu a rawn eng vâ va a, kan dawhkan chu dawhkan lian lutuk a nih loh avangin phone Wallpaper chu ka hmu chiang hle.

Ka hmuh sual a nih ringin a phone chu ka ban vat a, hmel hriat chian loh phone ni mahse zah ka hre tawh lo. Ka en chian hnu chuan phone Wallpaper chu Hlutei ngei a lo ni e, mahse eng vangin nge Hlutei chu he pa hian Wallpaper-ah a hman kher? Enge inzawmna an neih?