𝐇𝐄𝐍𝐑𝐘 𝐋𝐀𝐋𝐒𝐀𝐍𝐆𝐙𝐔𝐀𝐋𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟏 - 𝟏𝟐)

HENRY LALSANGZUALA

By

Havali Adam

15 January 2022

Chapter 1

“Hlute kei chu ka ngaihtuah em mai che, vawiinah kher lo haw lo mai rawh. Vawiin phei chu khua a chhe ang reng si” phone-a aṭangin ka nu chuan a rawn ti a, ka chhang let dawn chiah tihah ka pa chuan

“Ngaihtuah lutuk ṭhin suh, Pathian zarah tluang takin a rawn haw thleng ve mai ang. I ngaihtuah lutuk chuan i buai leh ang a, buaipui i harsa si” a lo ti ve vat a, kei ni lovin ka nu chu a bia tih pawh ka hria.

“Dik chiah ti raw pa? Ka nu hi chu min ngaihtuah leh lutuk ṭhin a, kan chesual dawn pawh ni hlei lo” ka lo ti ve a, ka thusawi avang chuan ka pa pawh chu a lo nui ri ve hawk.

“Nangni pafa hi chu in va han inang tak, in duh leh thi daih rawh u” ka nu chuan a rawn ti hmawk hmawk a, chutah ka pa chuan

“Âww, a va buaithlak leh dawn tak em” a lo ti thluk awn duai a, a ṭawng thawm ka hriat tawh loh danah ka nu chu a kal sawn tawh a ni ngei ang.

“A ho lutuk pa, a lungawi lo rei leh dawn chuang lo tih i hriat vek kha!” nui ver ver chung chuan ka lo ti a, ka nu chu a thinrim rei tak tak dawn lo tih ka hre chiang ve em.

“A lungawi lo rei dawn lo tih chu hre tho mah ila ka hna tur a tam alawm, thlem vel leh a ngai ang a, vawiin ni leng hi chu a lungawi lo tluan leh zawk maithei a ni” a rawn ti ve leh nghal nui nui.

“Âww, a hma zawnah khan i lam leh vel ang a, i zei loh lutuk avangin a rawn nui ve leh vat mai ang. Khatiang kha tih leh chi tak a ni ang ka pa, a fuh dawn lutuk” rilru chhungril nui vur vur chung chuan ka ti a, min lo chhanlet dan tur mawlh chu ka hre châk tawh.

“Kha thil kha sawi ri ve ziah suh, ka hne teh mai a nia, i delete tawh em? Ka lam lai ka hriat loh hlana i lo lak velna kha i delete tawh em?” a rawn ti nghal hmuk a, ka pa mah ni se ka va lawm reuh tak!

“A teuh lo mai, ka delete phal teuh lo. Ka roh roh nen, ka thih hma chu ka kawl ṭha char char dawn. I birthday-ah te hman ka tum zawk zawk a, i birthday thleng thuai thuai se lo tih nak lai a!” ka lo ti ve hmak a, ka nuih erawh a va za si em.

“Bawhi kha thil kha delete mawlh teh, i pa hi ka zak ve tho a nia aw? Pawisa ka pe ang che, delete la pawisa ka pe ang che. Pawisa chauh lo pawh i duh min dil la, i delete dawn phawt chuan ka pe ang che”

“Ka phal lo ka tih kha ka pa, i lam zei bawk si, video ka en lai phei hi chuan ka hmangaih tlawrh tlawrh zel che. I hmelṭha si, pa si, fel si, chutah kohhran upa i la ni leh zel bawk si. Âw ka pa, ka va hmangaih tak che em” ka ti deuh duah a, chutah ka pa chuan rang zet hian

“LALRINHLU le! I nu siar i nu siar, engtik niah emaw chuan ka la delete tho tho ang. I lo haw hunah pawh ka duat hauh lo ang che, Peksang chauh ka duat ang” a ṭawng tawp lamah chuan tihtauhna aw ka hre ve ngei a, ka pa tak hi chu!

“I sawi tâkah chuan kan mi harh ṭawng thei turu burua chu ka lo be ve lawk dawn emaw ni le, kan lo chhuah a hun ṭep tawh a, tlem te chiah an lo chuang lut tawh lo” ka ti ta daih a, ka pa pawh chuan ka nau chu a au ve nghal lawng lawng.

“Enge enge enge? Ka khel laklawh teh mai a nia, nangmah vanga min knock vaih chuan aw i chak lo vang” ka pa’n phone a pek rualin LALPEKSANG chuan a rawn ti zawt zawt a, he pa hi chu ka nau ni lo se chuan a ṭawng theih em avang hian tuai emaw ka ti hial ang.

“Zawt zawt che chuan ka be lo tawp zawk dawn che emaw ni le, games kha khel reng suh. Ka pate kha pui ve la, online-in class in la ṭhin tho sia dawrte kha va nghah chhawk ve ṭhin rawh, mut te kha mu reng zel suh” ka ti ve ta hlawk hlawk a, a bulah hi chuan ka ṭawng thei lehzual ṭhin.

“Ka zilh e te chu min ti ve leh nghal a, mi khelh laklawh lai lain min lo be chhen suh. I duh chuan ngawi reng pawhin i lo haw thei reng alawm, min lo biak vel kher hi a ngai hleinem”

“LALPEKSANG, i thil ka rawn hawn tur hi heng laia Vai awm ho hi ka pe daih dawn. Min biak lai hian games i khel pah vel em ni? Silaia inkap thawm vel ka va hre ve”

“Khel pah chiang e maw le, mifing tan chuan kan inbiakna hi tihtawp a hun khawp mai” ngeiawm tak hian a rawn ti a, ka thin chu rim tak têin a rim nghal hlur.

“Chhe ve! Ka be reng peih bik lo che, i thil tur pawh hi i chang lo vang tih lo inhre rawh. Khawi maw ka pa kha phone pe teh, kan rawn chhuah tak tak hmain ka lo be leh lawk” ka tih chuan

“Pa, hei i fanu special-in a be leh duh che” a ti lawm lawm a, min sawi dan vel ber kher chu ka haut tawk a lo tling leh em em.

“Aw Bawhi, in lo chhuak hnai tawh em?” phone a lak rualin ka pa chuan a lo ti a, keipawh chuan pangai tak hian

“Chhuak dawn tawh ang, thlawhnaa chuan laiin kan inbe thei awm si lo va, ka lo be leh lawk mai mai che” ka lo ti ve mai.

“Aw le, tluang deuhin in lo thleng dawn nia, mahse vawiin hi ka rawn hruai hman dawn che em ka hre lo. Peksanga hi a hman chuan ka lo tir ang a, tun lai chu a ṭhiante nena inhlawh hi a hrat leh zuk zuk ṭhin a, mahse vawiin chu khua a cheng bawk sia a hman mai ka ring”

“A ho lutuk pa, in hman loh chuan a pawi lo. Taxi pawh hman tur a awm ve mai ang chu ka lo ti a, a awm tâk loh leh ka lo call dawn che u a nia”

“Min lo call ngei ngei ang che, Mizoram i rawn thlen veleh min lo call ang che. Kei zawng vawiin chu i nu chhiahhlawh rinawm ka’n ni leh phawt mai ang e” a rawn ti a, a nui ri hak bawk.

“Nang tluka a rilru hmin hma thei he khawvel ram zauah hian an awm hleinem ka pa, beidawng reng reng suh” ka lo ti ve leh kher a, ka pa erawh a rawn nui nasa ngei mai.

“Pa, hei kan chhuak tawh dawn a, duh tawk rih phawt mai ang aw? Airport ka thlen hunah ka lo be leh zawk dawn che u a nia” ka tih tâkah chuan ka pa chuan aw min lo pawh vat a, kan inbiakna pawh chu kan titawp zui nghal.

Ka bungrua chu ka ṭhutna chungah chuan ka thun lut fel vek tawh a, ka inhawn kim titih bawk sia ticket man mai bakah pawisa pawh ka chawi belh ṭeuh nghe nghe. Bag khat ringawtah pawh an tito em em a, he khawvel hi sumdawnna khawvel a ni tawh tih ka lo theihnghilh palh leh ṭhin.

Ka bag chu keuin a chhunga head phone chu ka la chhuak a, ka phone-ah connect in hla chu ka ngaithla chhunzawm zat. Ka bula seat chu a lo la ruah huai avangin ka mal ṭhut dawn tawhah ka ngai mai a, mahni chauha ṭhut chu nuam ka ti fe zawk hrim hrim.

Mizoram pawna lehkha zir tura ka kal tirh kha chuan thlawhna chuan lai vela phone khawih emaw internet connect zawnga thil tih vel an phal lo kher ṭhin chu mak ka ti thei em em a, mahse a hnuah chungtiang vel chuan thlawhna khalhtute inbiak pawhna signal a tidanglam palh thei tih ka hre leh a, ka hriat hnu erawh kha chuan ka insiam rem ve leh thei mai bawk.

Chutia hla ka ngaihthlak mial mial lai chuan ka bula mi pakhat lo ding ni awm tak ruangam chu ka hmu a, ṭawng miah lova min lo en reng avangin keipawh chuan ka headphone la thla meuhin ka en ve ta haw.

A hmel ka en chuan Mizo a ang lo ka ti hle a, Vai a ang mah ka ti zawk. Vaiah pawh tlema Vai hausa leh Vai chang deuh ang chi hi a ang ka ti. A mit chu a thuk hriam raih a, a vun pawh a ngo mawi tawk hle.

Kei ai erawh chuan a ngo kher lo vang, a chhan chu ka ngoin ka vun a nalh tawk ve em a tin ni! Kamis dum tak zar hi a ha a, chu chuan a vun ngo tak chu a tilang chiang em em a, a hmel chu a tilang fresh lehzual.

A kawr ban tawn tawn a thleh tawm chhoh avang chuan a ban ngo tak chunga hmul awm deuh thur chu ka hmu vek thei a, chu chuan Vai a nihzia a tichiang bawk. Awi awi awi, kei hi engvanga hetiang Vai mai mai lo ngaihtuah chiam nge maw ka nih le? Ka va han â mai mai tak! Chu pa hmel ka en rengna aṭang chuan ka mit chu ka la sawn vat a, ka vei lam tukverh darthlalang aṭang chuan pawn lam chu ka en leh ta daih.

“Miss min lo hrethiam lawk mai” sap ṭawnga rawn titu an awm avang chuan thawm lo chhuahna lam chu ka hawi a, min betu chu Air Hostess a ni tih ka hre zui nghal bawk.

“Aw engenita?” hawihawm tak chuan ka lo ti ve mai a, a ngaite bawkin Vai changkanga chu a lo la ding ve run mai. A ngawi reng a, a ṭawng thei lo zawk emaw te pawh a ni ang.

“Miss thil hriat sual palh i nei a, i awmna seat kha Mr. Henry-a seat tur zawk a nia” rawn tiin a bula ding ngawi renga chu sap ṭawngin thil a hrilhfiah zeuh a, pakhata lah chu a lo la ngawi reng thung.

“Lawk aw” tiin ka bag aṭang chuan ka thlawhna ticket chu ka en a, ka seat number chu 21 a ni a, chutah ka thut mekna seat ka en leh chuan 22 tih a lo inziak kuau mai.

“Ka tihpalh lutuk, I’m so sorry” tiin ka bula mite hnenah chuan ngaihdam dilin ka ding nghal vat a, rang takin ka ṭhutna tur zawkah chuan ka ṭhu phei ta thuai bawk.

Engtinnge ka chuan tirh te khan ka lo hriat loh theih zawk le? Ka ṭhutna kha a dik emaw ka lo ti char char a, tukverh bula ka ṭhute kha ka lo lawm hman viau tawh asin. Ka ṭhutna tur dik taka ka ṭhut phei hnu chuan kan Vai changkanga pawh chu a rawn che hrut a, a rawn ṭhu thla ve zui ve nghal.

Ka bul chiaha a rawn ṭhut takah chuan a rimtui inkah rim nam cheng cheng chuan ka hnar a rawn verh zar a, Vai changkang tih takah Mizorama Vai mistiri leh Muṭia ho rim ang mai mai chu a ni lo chiang khawp. A bul chiaha ṭhu ka ni bawk nen a che vel chu ka mitmei ru reng a, mitmei loh pawh tum ila a theih loh.

Leather aṭanga siam ni ngei tur business bag buang uk thak chu a mal chungah a dah a, a zipper chu pawt phei zal zalin a hawng a, a thil rawn phawrh chhuah erawh chu ka rin loh lam daih a ni.

A bag aṭang chuan lehkhabu fai veng vawng leh thianghlim sarh mai chu a lo phawrh a, ka hriat sual loh chuan lehkhabu chhiar lam a tui a ni ngei ang, keiin ka peih loh tehreng nen. A hmel ren run nen pawh a inhmeh ru phian a, mask vuah mahse a hmel leh awm danah chuan tun hnai hmaia lo piang a ni lo tih chu a hriat em em bawk.

Ka ngaihtuahna chu a hriat ka hlauh em avangin amah chu ka en thut a, ka awm dan hrethiam ni awm tak hian ani pawh chuan min lo en ve ta ral mai. Kan inmelh dun ta reng a, ka rilru chuan Vai en mai maiah zam reng reng suh a rawn ti a, kei tak pawh chuan chu Vai changkanga enna aṭanga chuan hawi sawn hmasa zawka tan ka tum lo bur.

A mit chu ka en chiang bawk nen a pawl hring deuh ruai hian ka hria a, Mizote anga mitmu uk dum phurh a nih loh avang chuan Sap emaw Vai emaw thlah a nih chu ka ring nghet lehzual sauh. Ka en lui ve ngar ngar a, mahse ka en rei thei ta hauh lo.

Ka zam ru telh telh a, enge a chhan pawh ka hre lo. A tawpa tawpah chuan a hawi sawn hmasa zawkah chuan ka ṭang ta nge nge a, keimah leh keimah ka inhuatzia chu pui tak a ni.

Chutah ka bula mi ren run chuan hmun dang pawh hawi sawn lek lo hian min lo la en reng a, ka mit sirin a awm dan chu hre tho mah ila amah en let tur erawh chuan ka hawi ngam rih tawh lo hrim hrim. Kei LALRINHLUI, Mizo tia inchhal ve hi ka va dawihzep tak em.

Vai mai mai hmaa ka zam chhiat em avang chuan ka zak a, mahse ka awm dan lah chu ka hriatthiam phak bak a ni tlat lawi si. Vai mai maiin min en reng ringawt chu ka ning hle a, a awm dan chuan ka thinrimna an kai chhuak ta nge nge.

“Hey Mr. Why are you staring at me?” pawr fiah faka ka tih chuan a aia chiang hian ka mit takah chuan min lo en a, kei chuan rum eltiang khun khanin ka lo melh hrep thung.

Thlawhna chu a rawn chet deuh thut avangin ka awm sawn dawr a, ka ṭhut danin a lo zir lo kher bawk nen ka bu liam tawh turah ka ngai zui ta hmiah. Ka bula Vai ker kur chuan ka darah a rawn man a, min chelh hneh em avang chuan ka bu liam ta lo hlauh.

Kan Vai changkanga chuan awn ruaia ka awm chu min pawt chho a, ka ṭhut fel hnu chuan a kut chu lain ka phih thlaksak nghal hmak a, a kut te lah chu rei lote mah ni se khawih a nuamin a la nem lum hrep zui leh ta nghal!

“Don’t touch me” ka ti hrawk a, ani erawh ka ṭawngkam vang nge ni a rawn nui ri suk duh lek chauh. Zep lovah a nui thawm chu mask chhanah pawh ni se hriat a nuam ka ti a, a mit chauh ni lo a hmai zawng zawng chu hmuh kim ka chak ru hle.

Ka thin a rim tih a hrethiam te pawh a ni ta ve ang pangai takin a awm sawn a, a ṭhu ṭha zui ve leh mai bawk. Ka mit zek zuk bawk chuan ka bula mi chu ka melh leh dê de a, mahse ani chuan min en tawh lovin a mal chunga lehkhabu chu a rilruin a lo chhiar daih tawh.

A lehkhabu chhiar lamah chuan ka mit chu a ṭuan thla leh a, engtinnge chutiang thil lem pawh awm lo thuziak tlawng chu a chhiar reng peih reng reng ni! Kan thlawh chhuah ṭan tirh ang lo takin khua chu a rawn hniam lehzual a, rei lovah ruah pawh a rawn sur zui nghal. Ruah chu bang lovin a sur char char a, chutah ka thil ngainat loh ber mai chu a rawn awm ta.

Kawl chu a rawn phe zawk a, khawpui pawh a rawn ri nghal ṭhuai bawk. Ka inring hman lo bawk nen ka ṭe chhuak tuar a, ṭhutthleng ban chu ka theih tawpa nain ka hmer vak a, ka thawm hriain Air Hostess pawh a rawn phei ta vat. Ka ṭhat leh tawh thu ka lo hrilh a, ani paw’n min kalsan ve leh nghal mai.

Chutah ka ṭhutthleng ban vawn lai chu a lum deuh thar thar a, a awm deuh ṭung bawk tih chu ka hre leh a, ṭhutthleng ban a nih leh nih loh en tuma ka hawi thlak chuan ka kut chu ka la sawn vat. Ṭhutthleng ban emaw tia ka lo hmer ngawt ngâwt chu kan Vai changkanga ban lek a lo ni a, ka theih tawpa ka hmerna tih hriat tak hian a lo la sen deuh ram zui.

A ban chu ka en chiang a, a bana hmul ṭhenkhatte chu an lo tla phung a nih chu! Ngawi renga min lo en avang chuan a ban leh a hmel chu ka en tawn ta sek a, insum zo ta lo chuan ka nui chhuak ta chiam. Ani chuan hriatthiam loh hmel zet hian min en a, a hmel leh a thil tawn chu a inhmeh lo vel vek a ni ber.

“Sorry” ka ti chhuak ve thei ta hram a, mittui tla phungin ka nui a, ka nui lo thei lo a ni. Min en leh ta reng a, hetiang em ema mi en nghal Vai hi ka la hre ngai lo.

Ka lo muhil a ni ngei ang ka taksa lo sawi dat dattu an awm avang chuan ka harh a, chiang zet hian ka bula mi chuan min lo en leh reng tawh. Thu tha vatin ka hawi kual a, keini pahnih tih chauh loh chu thlawhnaah chuan chuang an lo awm tawh lo.

Rang takin ka tho a, kan ṭhutna chunga ka bungruate chu ka la thla nghal zung zung. Ka bula mi chuan ngawi reng hian min lo nghak a, a bungrua lak a duh ve tih pawh ka hrethiam mai.

Hmanhmawh rilru tak chuan ka la thla sawk sawk a, ka hmanhmawh luatah ka luggage chu ka la khawng ri chawrh zui. Pawn lam boruak awm dan ka hmuh chuan thlawhna chhunga luh leh mai ka duh ta rum rum a, kan Vai changkanga erawh chuan nihliap lo keng vel thlapin min chhuksan ta daih.

Ka hma maia chhuk thla mek Vai changkanga tia a hming ka phuah chawp pa chu ngaihtuahna em em pawh nei hran chuang lovin ka en zui zel a, ruah tlak lohna chin a thlen chuan a bungrua chu chhuatah a dah thla a, chutah kan chuanna thlawhna lam bawk chu a rawn pan leh nghal.

Ka rin dan chuan theihnghilh a nei ang a, rawn lak a tum leh a ni ngei ang. Step zawn a lo thlen chuan min lo en ran a, a rawn chho mai lo chu mak ka ti a, engvanga ding renga min en ta reng nge a nih chu ka hre hauh lo bawk. A din deuh vang vâng hnuah chuan a rawn chho a, kei chuan a chet dan chu ka lo en kar thung.

"Mr. Henry, puih i ngai em? Thil theihnghilh i nei em ni?" ka bula Air Hostess chuan hawihawm tak hian sap ṭawng bawkin a lo bia a, kei chuan engtinnge a chhan ang tih chiah ka lo ngaihtuah daih.

"No, I don't" ti thum dupin ka bula ka bungraw dah lai chu a rawn la a, kei erawh chuan a chet dan chu mak ka tih lutuk avangin ka hauin ka lo en thung.

"Chhuk ila" Mizo ṭawng dik tak leh paina chhete pawh awm lova a rawn tih leh phei chuan sawi tur reng ka hre lo va, amah chu ka en tlawk tlâwk a, chutiang bawkin ka Mizopui ngei Air Hostess pawh chuan mak a lo ti ve hle bawk.

"Ma..maw...maw?" ka ṭawngkam chhuak reng reng chu ka hamhaih lutuk avangin a phelh nuai a, Vai ni si Mizo ṭawng ngeia a rawn ṭawng avang chuan ka ngaihtuahna chu a buai vek a tih theih.

"Kan chhuk vat loh chuan thlawhna hi kan tikhawtlai mai mai" a rawn ti thum leh dup a, a ṭawngkam chhuak reng reng chu Mizo ṭawng dik tak vek a ni a, han lam pial emaw ṭawng pai emaw pawh a awm loh hrim hrim avang chuan mak ka ti lehzual.

"Maw? Aaaaa.....ihhh....aw....aw le" ka tih bah ta nuai a, a nihliap chuan min zawn a, ka bungrua chu a khai zui ta daih bawk.

Kan chhuk lai te chuan kan kalna pawh en ṭha mumal lovin a hmel chu ka en reng a, a hmelah chuan Mizo nihna pakhatmah ka hmu lo va, mahse a ṭawngkam chhuakah erawh Mizo chiah chiah a ni bawk si.

Kawng zawl kan thlen hnu chuan ka en reng duh ta bik lo va, amah chu Vai Mizo ṭawng thiam nal em emah ka ngaihruat ta ringawt. Ruahin a nan theih tawh lohna lai hmun han chin kan thlen chuan amah en reng chung hian

"Ka lawm e" ka tichhuak sep a, Mizo ṭawng a thiam tho avangin sap ṭawng velin ka be buai duh ta kher lo a ni.

Thip deuh ram chuan min en a, sawi sual ka nei emaw ka ti hman hial zawk. Min en vang vang hnuah ṭawng miah lo hian min kalsan a, a awm dan chu mak ka tih em avangin ka en zui ta vawng vawng. Ruah chu a tla reng a, a tam pangai phian bawk. Ka phone chu ka phawrh a, signal ka lo la nei lo zui.

Vodafone Sim ka lo hmang kher kher chu inchhir tak ka ni. Vai ramah te kha chuan a tlang ṭha em em a, hman pawh a nuam viau a nih kha! Mizoramah ve thung chuan mamawh hunah pawh hman theih a ni lo nghal a, ka Sim chu phawia rah chhiat vek mai a nia ka duh ni!

Khua a chhiat em avangin motor tlan pawh an vang pharh a, chhum te lah chu a la zing leh ta nghal. Chu chhum zing chuan khua a rawn ti vawt zual a, kawr lum ha tho mah ila vawt tih avangin ka khur cher cher mai. Kei ang thova Taxi chang chu an awm ṭhup a, mahse Mizo ni lovin Vai hlang vek an ni thung.

Taxi lah chuan rawn lan tih hun reng an lo nei lawk lo leh nghal a, rilru hmanhmawh tawh nen din reng chu ka hne tawh tak zet a ni. Chutia ka hawi vual vual lai chuan ka hmaah Bolero pakhat hi a lo ding a, chutah driver chuan glass down hian

"Ṭhiannu, ka puin lo chuang rawh a ti" a rawn ti ringawt a, chu driver pa chu khawiah mah ka hmuh awm ka la hre lo, chutiang bawkin a pu pawh chu ka hmel hriat a nih ka ring lo.

"Ka lawm e, mahse ka lo chuang lo mai ang" ka ti ve ta thuai a, tun ang lai khawvelah chuan inruk bo te a tam tawh bawk sia ka chuang ngam teuh lo mai.

"Motor avang ang" a hnunga chuang zawkin glass down-a rawn tih thum charh chuan ka meng buai deuh nak a, min lo betu chu kan Vai changkanga lek kha a lo ni.

"Aaaa....ihh...ka..ka hre lo" ka lo ti ringawt a, amah a nih vang nge ni ka zamin ka ṭawng chu a dik lo leh nghal ringawt tawh.

Ka en reng lai chuan a lu chu a lo thle zeuh a, lut turin min ti tih pawh ka hrethiam, mahse chuan chi a ni ang em tihah ka la buai a ni. Tunge a nih pawh ka hre lo va, chutah Vai a la ang em em zui. Mizo ṭawng a thiam avang ngawtin Mizo a ni ka ti lo a, amah hlauh rukna chu ka nei reng tho.

Thinrim hmel taka min lo melh chuan ka bula mite chu ka en thuak thuak a, Vai ho chuan motor-a chuan chu an lo châk hmel hlawm hle. Chutah eng em ka tawk bik nâng ti rilruin kan Vai changkanga te lamah chuan ka phei a, motor chhunga ka inhlan luh zawh chuan thawk pawh ka thaw ṭha thei dawn lovin ka hria.

Motor chhung ka luh chuan AC on tih hriat takin a lo lum deuh huam a, kan Vai changkanga mi uap nat dan chu turu tak a ni. Ka bul chiahah a ṭhu bawk si a, ka motor chuan tawh zawng zawngah a la nuam lo ber ang.

Ka luh fel hnu chuan driver chu a tlan chhuak nghal a, kan tlan pel tak Vai inkhai bawr tak tak te chu ka en zui ta dauh dauh. Engatinge a hnampui te chu chuan tir ve mai awm ka ti rilru nghal neuh neuh a, ka bula mi lah chu a lo maimitchhing daih thung.

Lengpui Airport aṭang chuan Aizawl khaw chhung lam panin kan tlan zel a, ka mut a chhuak ngei mai. Tûmah chu kan ṭawng lo va, min biak loh danah ka bula ṭhu chu Mizo a nih ka ring lo lehzual.

Mizo chu ni se mahni hnampui te kan ni ve em em a, min be ve ang chu le. Chutah a Mizo zawk driver lah chu a ngawi reng a, ṭawng insum thei vak lo ka lo ni bawk nen kan awm dan chu nuam ka ti lo ta tulh tulh.

Ka lo muhil ta nge nge a ni ang thil che deuh dawtah ka harh a, ka ban bul ding lamah chuan tu emaw ni hian min lo sawi det det bawk. Meng fiah hlei lo chuan min sawina lai ka ban chu ka en a, kutzungchal hi ka hmu hmasa ta ber.

Chutah kutzungṭang dang ho chu an lo inphum ṭhap a, kut chu en chho zelin a neitu ka'n hmu chiah mai chu ka harh kawk a, a kut chu ben thlak sakin ka bag ken lai chuan ka indang ta ringawt. Ani erawh chuan mak tih hmel fê hian min lo en a, mi en a nghal lutuk chu ka kham.

Chapter 2

HENRY POV

“Khatiang khan min si reng reng suh aw Vaia, hri len lai laiin an inkhawih dû du ngai lo” a âwma a bag pawm ran chung hian ka hmaa hmeichhe ṭawng hlawk zet chuan a rawn ti a, tuna taka ka sik a duh lo vel chu a nuihzat thlak zawk.

“Ṭhiannu, ka pu kha Vai a ni hauh lo” ka chhan hmain ka driver chuan a rawn ti deuh hmuk a, ani chuan Vai tiha koh ka duh lo tih a hre chiang em em tawh.

“Eng pawh chu ni se engatinge he lai hmun daih daihah hian min hruai? Kan in awmna pawh a ni reng reng hleinem, min ruk bo in tum zawk em ni? Ka ring reng a ni! A tirah pawh ka hlau ru tawh reng che u a, Police hnenah ka report khawp ang che u” chu nu te chuan duham deuh hian a rawn ti leh zawt zawt a, a lei chu tansak mai a nia ka duh ni!

“Nangmah zawkin engmah i sawi lo a nih khâ, sawi te chu ni la kan phur reng peih bik teuh lo che” a chhan pawh ka chhan buai vel peih loh avangin ka driver chuan a rawn ti ve leh nghal a, ka sira ṭhu nu hmel chu hmuh pawh hmu peih lovin pawn lam chu ka thlir ta daih.

“I va han ṭawng thei ve a, mipa i ni lo em ni? Nge nia nang hian i lo nei kawp reng zawk?” ka bul lawka mi’n a rawn ti leh chuan ka rilruin ka lo nui chhuak hawk a, chutah ka driver chuan thinrim aw tak hian

“Nangmah zawk kha alawm le ṭawng thei leh ṭawng hlawk chu! Kan Mizopuite a nia tiin kan han phur ve ṭawk ṭawk che a, chutah zak map lovin min la ṭawngkum ngam a nia” a rawn ti chang ve fak a, an inchhang tawk reuh phian leh nghal.

“Mipa pawh i lo ni tawp lo ve, ṭawng thei zep zuap lutuk mai. In motor-ah pawh hian ka chuang lo tawp zawk mai ang, chuvangin kan in lamah min thlah phei vat mai rawh u” chu nu han ṭawng theih turu zia mai chu! Ka ngainat zawng pawh a ni teh hrep lo.

“Chhuk daih rawh, motor chhung pawh nang kan phur che avangin a chiar vek tawh, a tihfai lam lah ka hna vek a ni leh si. Chhuk la, lo hawi let tawh lovin kal vang vang ang che” ngam zet hian ka driver chuan a rawn ti leh a, a nau rual vel daih a nih avanga ngam em em a ni tih pawh ka hria.

“I zak lo ê, driver ve mai mai si khan min vin ve khâ kha suh. Hei kan Vai changkanga pawh a ngawih mai mai hi, a thu lo zawk tih hriat lutuk khan ṭawng zuah zuah suh” a rawn ti leh reuh a, Vai min tih ziah avang chuan ka thinin a tuar ta lo.

“Chhuk rawh” ka ti ram hmuk a, na zet hian ka melh a, ani erawh engah mah min ngaih loh hmel zet hian a lo hawi sang vah a, chutiang khawpa hmeichhe mize mak chu ka vawi khat hriatna a ni.

“Ve ringawt a che, nangmah a ni lo’m ni chuang tura phalna min petu kha!? Him dam taka kan in min hruai thlen hma loh chuan ka chhuk awm hlei lo” a rawn ti leh ta fak fak reuh a, a tira ruk bo hlau em em si kha tunah chuan a hlau tawh lo emaw ka ti ta hial.

“Ka pu thu min han pe teh, i bula ṭhu ṭawng tam zeti kha ka theh chhuak vang vang châk lutuk. Mizo dik tak pawh a nih ka ring ik lo ve a, Pawi thlah vel a nih ka ring ta zawk, a ṭawng thei lulai em mai” ka driver chuan insum thei lo zet hian a rawn ti leh a, keipawh chu nu awm dan avang chuan ka thin a rim ṭan lek lek tawh a ni.

“Thlah lam pangte i sawi tihna em ni? Bawitlung ngat kan nih hi aw, i zak chai lo em ni? I ṭawng thei hle mai, ka mipa hriat tawhah chuan i la ṭawng thei ber ang” anni pahnih titi bengchhet zet lo ngaihthlak reng chu ka ning ta hle a, an hnam hming a sawi lah chu kan hnam ang chiah chiah a la ni ve khanglang zui.

“Kal rawh, an awmna hmunah chuan hruai vat mai teh, a ṭawng hi ka hne tawh lutuk” thupe aw tak chuan ka ti ta tawp a, ka driver pawh chuan min lo en zeuhin motor chu a tinung zui nghal.

“Wow wow wow, kan Vai changkanga pawh a lo ṭawng sei ve thei reng a nih hi! Inlak ṭawng tlem vel kher, a hrehawm te pawh a hrehawm zawk lo em ni?” ka bula thuin a rawn tih leh avang chuan kei chu ka thin a rim leh ta phat.

“Ka theh chhuah che i duh a nih loh chuan ṭawng tawh suh” ka ti vin ṭhak a, min hlauh hmel pawh a pu miah lo chu ka mak tih ber pakhat a ni.

“Aw le aw le, ka ngawi ang. Ka ngawi chiang viau ang, min lo be tawh miah suh u. In bula ka lo chuang kher kher hi ka inchhir ta khawp mai, ka pate kha lo phone thei ila a ṭha tur” a rawn ti leh hman ṭeuh hram a, ka melh hraw avang chuan pawn lam tukverh lam hawiin a ngawi zui ve leh ta mai bawk.

Tumah ṭawng tawh lo chuan kan tlan char char a, an veng awmna pawh a sawi leh chuang tawp si lo. A hma zawnga mi chhang zawt zawt leh ṭawng thei em em si kha zezawi ang deuhin a awm leh ang lawi a, ka driver phei chuan a awm dan vel chu a ei thlawt lo. Pawr fiah deuh tak hian an awmna veng chu a zawt ta nge nge a, ka bula mi lah chuan a lo la hre lo der hmak zui.

An inzawh nawn leh tâkah chuan an inhrilh ve leh mai bawk a, an inrunluih kual dan vel chu a nuihzat thlak ka lo ti ta phian. Ka bula mi chu a hmel aṭang reng reng pawha ka fanu rual awm deuh thaw a ni a, mahse aia upa zahna a tlachham mah mah lam hret chu a ni.

Chhum zing vawt tak hnuaiah chuan fog light hmangin kan tlan kual char char a, an veng awmna lah chu kan awmna nen a la inhlat hrep leh nghal.

A tawpa tawpah chuan an in kawt chu kan thleng ve thei ta hram a, an in aṭang chuan chhungkaw harsa lutuk an nih loh hmel. A bungrua pawt ṭai ṭai chungin motor aṭang chuan a chhuak a, rum taka min melh chung hian a kal chhuah dawn chuan pawisa cheng 500 a rawn vawm lut hram.

A pawisa rawn vawm luh chu ka lo lek kang a, ṭawng thei hle mahse tlem chuan a hawihhawm ve tal alawm ka ti rilru neuh neuh. An in chu concrete building a ni a, chhawng hnih vel leka sang a ni bawk. Ka driver chuan tlan chhuah nghal mai a tum a, mahse kei chuan la ding rih turin ka ti thung.

Kan hmeichhe chuanpui ṭawng thei uchuak em emi a awm tawh loh avang chuan ka thaw a veng huai dawn emaw ka lo ti a, mahse a ni hauh lo. A ṭawngkam bawraw tak tak leh a ṭawng laia a hmel awm dan vel chu ka mitthlaah a cham ta tlat a, chu nu te chu hriat rei a awl dawn phianin ka hre ta bawk.

Minute 1 chhung vel chu in hmaa kan din reng hnuah chuan ka driver chu tlan chhuak turin ka hrilh a, ani pawh ka thu awih takin a tlan chhuak zui nghal. Kan in awmna lam kan pan lai chuan ka bag chu ka check ṭha leh ngat a, ka fapa thil tur chu ka hawn theihnghilh ka hlau a ni.

Delhi-a meeting nei tura ka kal dawn khan ka fapa chuan a thil duh min chah tlat a, chu pawh ka rin loh lam daih. Ka fapa berin min chah miau avangin colour chu ka zawng ta hrep a, kan meeting-na hmun bul velah stationary a awm hnai bawk lo nen zawn hmuh pawh a harsa phian. Rei fê ka zawn hnuah ka hmu ve ta chauh a, pakhat mai leisak duh tawk lovin Acrylic leh Water Colour chu ka leisak ta nual bawk.

Ka fapa Henry Lalsangzuala Junior, Junior-a tia tute paw’n kan koh tâk chuan Art lam a tui teh tlat a, a pi leh pute paw’n mak an ti hle. Zirna lamah erawh class 5 chauh a la a ni a, a kum phu lovin lem ziah chu a thiam phian. Competition hrang hrangah te ka tel tir ṭhin a, a category ni lo pui puiah te pawh ka tel tir ṭhin. Ani erawh chuan min hnial ngai lo va, ka tih ang ang chu thuawih takin a ti mai zel.

Vawi khat phei chu Aizawl Art Gallery te’n an buatsiah competition-ah ka tel tir a, ani tih chauh lo chu puitling vek an ni. Mak tak main Junior-a chu pathum a rawn ni ve hlauh mai a, a lawmman dawn puite nen chuan kum inthlau vet vet tak an ni.

Chuta ṭang chuan nuapang te ni siin mi hriat a hlawh ta em em a, kei ngei pawh hian ka fapa chu ka chhuang ve tak zet. A lawmman dawn ṭhinte lah chu a bo bang awm lovin ka hnenah a hlan vek zel a, kei chuan a dahna bawm tur siam tirin a lawmman dawn ho chu ka lo dah ṭhatsak ta ṭhin.

School vela an intihsiak pawh hian lawmman a rawn dawng haw ve ziah zel a, Competition an nei tih pawh kei chuan ka lo hre ngai lo ṭhin zawk. Ka hna chelh mek State khata Health Minister nih chu buai a na thei hle a, District hrang hrangah kan feh chhuak reng zel.

Chuta karah MADS lam lah chuan Exhibition an neih dawn apiangin khual lian atan min sawm ṭhin a, ka fapa in intihsiaknaa lawmman a lo lak ve tawh vangte pawh a niin ka hria.

Tin, Junior-a chu a kum rualpuiah chuan lehkha thiam thei pangai tak a ni a, Mathematics lam hi subject dang ai chuan a harsat deuh hlek thung. Chu erawh harsatna em em a awm lo va, private-in tuition class ka kaltir mai zel. A tutor-in kan in lamah a rawn pan chilh ṭhin a, hlawh pawh kan inpe chhe the chiam lo.

Junior-a tutor chu hmeichhe senior ve lam tawh hi a ni a, min ngaizawng tih pawh ka hre vek. Vawi khat pawh ka fapa chu ka phone number a lo dil a ni awm a, ka fapa lah chuan lo hrethiam ve vekin number dik lo pui a la pe zui. Chung thil vel chu Junior-a chuan min hrillh leh vek a, min hrilh tirh phei chuan kan nui dun nasa hle.

Vanduai thlak takin ka nupui chuan Junior-a pian tirh aṭangin min kalsan a, keima’n ka ṭhen a ni mah zawk. Ka fa pai reng chung si khan ngaihzawng nghet a lo nei reng a, a fapa tak ngial pawh chu enkawl zui a duh loh thu a sawi nghe nghe.

Ka nupui nen chuan rei lote kan inngaizawng a, sex kan hmang dun a, kan tum aia hmaah kan inneih ta a ni. Nau pai saa kan inneih avangin kan inneih hnu thla hnih vel lawkah Junior-a chu a lo piang a, mahse chu chu ka nupui ka hmuh tawp berna a ni.

Kan inneih chhung kha a rei lo hle a, tlangval lai aṭang tawha a kawp lawr chi ka lo ni kher bawk nen amah chu ka hmangaih leh hmangaih loh pawh ka hre lo.

Kan naupan lai kha chuan Mizoramah pawh ka awm ngai lo va, Delhi-ah ka awm char char zel. Ka pa hi Vai a ni a, ka nu erawh Mizo a ni thung.

Ka pa chu Delhi Police officer a ni a, kan colony paw’n kan chhungkua chu min chung en thei hle. Ka pa Vai dik tak ni mahse ka nu chuan ka tet te atangin ṭawng min zirtir a, chuvang chuan Mizo ṭawng leh Hindi ṭawng chu ka thiam hneh hle.

Ka school kalna a ṭha chho leh zel a, Sap ṭawng pawh ka thiam nal viau bawk. Kum tin Mizoram lamah kan zin chho ziah a, ka nu nu leh pa ka pi leh pute paw’n min duatin ka duh zawng an hre hle. Ka pa nu leh pate lam erawh ka ngaina thei ṭhak lo, enge a chhan ber pawh ka hre lo.

An ina kan len ve te hian mi pawh an be vak ngai lo va, a hnu deuhah chuan ka pa lakah an lung a lo awi vak lo tih ka hre hnuhnawh leh ta bawk. An hnampui pawh ni lo ka pa’n nupuia a neih avang chuan ka pa pate chu an lung a la awi thei lo va, ka pa lah chuan Arranged Marriage tih vel lam chu a lo duh der bik si lo.

Kum 10 ka nih thleng kha chuan an in pawh kan tlawh ngai lo va, ka pa erawh chuan min duatin min tihlim thei hle. A office-a min hruai ṭhin te kha ka la hre reng, nuam kha ka va’n ti thei tak.

A thawhpuite paw’n min fiam nasa thei hle a, ka nu nena kal pawh kan nei zeuh zeuh zel. Delhi chu ka pa awmna hmun ber a nih avangin ka nu pawh chuan Middle School-ah hna a hmu vat a, chu pawh kan School-ah a la ni zui.

Ka nu’n zirlai min zirtir te kha nuam ka ti bik thei em em a, ka ṭhiante kha chuan hrehawm an ti thei em em thung. Zan lamah ka nuin ka pa chu Mizo ṭawng a zirtir ṭhin a, kan nui nasa thei dar dar hle.

Ka pa lah a tih loh lamah chuan thil thiam har chi a lo ni ve kher bawk si a, ka nu chu a beidawng lek lek zel. Kei erawh awlsam takin ka thiam zung zung a, a thluk leh a lam dan tur pawh ka pa aiin zir hnuhnung mah ila ka thiam chak daih zawk.

Kum 15 ka nih hnuah phei kha chuan ka duh tawkin ka ṭawng thei tawh a, ka pa chu ka zirtir let ta nghe nghe. Library lamah lehkhabu ka chhiar nasa thei em em a, lehkhabu chhiar lam ka tui tih hriain ka nu chuan Mizo ṭawnga ziak lehkhabu Mizoram lam aṭangin min chah thlak sak ta hial.

A tirah kha chuan ṭawng theih chuan Mizo ṭawng chu a tawk mai turah ka ngai a, mahse a lehkhabu ang zawnga ka neih hnuah erawh Mizo ṭawng ka thiam nasat lehzual phah hle. College te kan han kai chho a, chutah chiah chuan a ni Racism lo tamzia ka hriat tak ni!

Vaiho phiangsen chuan ka vun a ngo em avangin hnam dang emaw min ti nasa thei em em a, ṭawngkam bawlhhlawh tak taka mi koh pawh an ngah khawp mai. Chu chuan ka identity thlak duhna rilru lian tak min pe a, chiang takin Vai thlah chu ni tho mah ila Vai nih duhna reng ka nei tawh lo.

College-ah pawh hnam dang anga min sawi pawh chuan ka lawm ta em em a, Vai ang lo min ti ta viau chu nuam ka ti daih zawk. Ka pa remtihna thlapin ka nute lam hnam hming chu ka ka hming tawpah ka dah ta zel a, Vaiho pawh chuan min sawisel chhen ta lo.

Amaherawhchu Mizo anga ka inngaih tawh miau avangin Mizorama awm chu ka pa ka dil leh a, a lo phal lo nasa hle. Ka pa chu Mizorama awm ka dil ta ngawng ngawng a, a tawpa tawpah chuan Bachelor degree ka neih hnua ka awm theih tur thu ka pa chuan min hrilh ta hlauh.

Hlim leh lawm em emin Mizoram lamah ka chho a, ka pi leh pute paw’n min lo lawm thiam khawp mai, mahse ka hma huna thleng tur chu ka hre der si lo. A nuam viau dawn emaw tia ka lo suangtuah chu a lo ni hauh lo va, chutah ka thil huat ber mai ka la tawng zui.

Ka Mizo puite chuan Vai min ti leh tlat pek a, insualte kha ka insual nasat phah asin, mahse anni sawi vang mai mai chuan Mizo ka nihna chu hlih leh ka duh tawh lo. Bawitlung hnam ka ni a, Vai thlah pawh ni eng ang mah ila Mizo ka ni tawh tho tho, anni lo sawi theih pakhat mah a awm lo tihna rilru ka pu ve ta tlat.

Mizorama Master Degree zirna tur a la awm loh avangin kum khat chu ka awl tawp a, mahse chu kum khat lek chuan thil tam tak min zirtir thung. Tlawmngaihnate ka hre chho a, hawihhawm dan turte ka thiam phah a, mitthi lumen dan leh Mizo hnam zia chi hrang hrang chu ka hre ta ṭeuh bawk.

Thlan lai tura ka kal hmasak ber chuan kan venga mi nen kan insual a, a chhan pawh Vai tia min sawi vang a ni. Mizo ṭawnga ka ṭawng zuah zuah thei te chu mak tihna lam aiin an haw tlat a, kei lahin Vai nih ka lo duh tawh der si lo.

A sual zual ṭhenkhat phei chuan ka dawr kal mai mai te chu min tibuai ṭhin a, nawmnah tak takin min fiam ṭhin bawk. Ṭhenkhat erawh chuan ka hming chu an ngaihven leh em em a, Vai hming tel miah lo hming ka nei chu mak an ti thei hle. Ni e, ka hming leh ka hmel chu a inmil lo te pawh a ni mahna.

Ka nu min hrilh dan chuan ka Sap hming chu ka pa phuah a ni a, ka Mizo hming erawh ama phuah a ni thung. A chhan pawh ka nu chuan Vai hming ka neih a remti lo va, ka puitlin hnu fê ah ka nu chuan ka pian hma aṭang tawh Mizo nih tir min lo duh tih ka hre chhuak ve chauh.

Ka nu leh pate chu an fa dawt leha Vai hming phuah ve tawh turin an inremsiam a, mahse vanduai thlak takin tun thlengin fa dang an la nei leh lo. Doctor te pawh an rawn nasa a, ka pa lam zawk chu a dik lo a lo ni.

Zan khat chu mitthi lumenin ka tlaivar ve a, khata kan veng YMA hruaitu felzia kha tun thleng hian ka la theihnghilh thei lo. A tam zawk kha chu ka hnung lam aṭanga mi rel sep sepin ka bulah pawh an ṭhu duh lo va, mahse kan veng YMA hruaitu chu ka bulah a lo ṭhu hmak. Ka hminga min kovin min be bawrh bawrh a, keipawh chuan ka laka a awm dan chu mak ka ti hman viau.

Rei lovah amah chu ka nel ta vat a, ka titi duh zawng pawh a hre hle. Thil chi hrang hrang kan sawi a, ka nu leh pate chanchin lam thleng kan sawi kai ta bawk. Chu pa chuan ka nu chu a lo hre em em a, an naupan laia an inkawm ṭhin thute min hrilh a, zai chawlh neih paha thingpui kan in lai te chuan min awm hran tir lo hrim hrim.

Mi ṭhenkhat chuan keini phanih awm dan vel chu an en duh hle a, keini lah chu kan titi tui phian bawk si. Zai loh laiin titi tur a rawn vawrh a, kei phei chu ka zai lo hrim hrim zawk. Eng hla mah ka hre lo va, mahse zai dawn lo pawh ni ila mitthi lumen zana tlaivar chu kan hnam tih dan a nih avangin ka ngaipawimawh em em ve hle a ni.

Kum khat tâl tawp zirna chhunzawm lova ka awm hnu chuan ka Mizo lehzualin ka hria a, Mizo nih chu nuam ka ti ta em em bawk. A ṭul hunah kan tlawmngai a, thlan kan lai a, hnatlang kan nei a, engkim chu ka nuam tih chi vek a ni. Ka tan chuan thil thar vek a ni a, thil thar vek ni mahse thiam har ka tih chi a ni lo.

Kum khat teh tawp a sual zual bik te lak aṭanga Racism ka tawh hnuah chuan khawtlang mipuite paw’n min bia min be chho ve ṭan tawh a, keipaw’n ka nel hma hlawm hle. Tun lai anga inbiak pawhna mumal tak a la awm ve loh avangin ka nute nen pawh chanchin kan inhrilh khat hle a, inzinpawh chu chanchin kan inhrilh dan a ni deuh ber.

Ka mamawh lai takin ka nu leh pa chu Mizoram-ah an lo zin chho a, ka pa chuan an bula letleh turin min ti mahse kei chuan ka duh tawh der lo. Mizoram chu ka pian leh murna dik tak ni lo mahse ka ram a ni a, a nuam ka ti a, han awm bosan leh vang vang chu ka duh tawh lo a ni.

NEHU lamah Master degree zir leh turin ka pa chuan admission min tihpui ta ringawt a, kei erawh chuan Mizoram-a ka haw deuh chhen theih dawn avangin ka châk tawh hle thung.

Ka pate chhuk hnu lawk thla khat velah Shillong lamah ka chhuk a, Hostel-a awmin zirna chu ka ṭan ve leh ta bauh bauh. Master degree chin chiah neih tuma lehkha zir kha ka ni a, mahse ka han luh chilh tâkah chuan Doctorate Degree lam neih chu ka duh leh nghal law law a ni.

Kan lecturer te pawhin beiseina min nei sang em em a, ka research tih lai phei chuan min pui nasa hle bawk. A tak ngeia ka lo tawn tawh leh ka lo sual chhuah ve ṭhak Racism lam chu Doctoral Thesis atan ka khawih a, ka thlang fuh vang nge ni kan Expert te paw’n chhiar nuam an tih thu min hrilh ve ta hial. Presentation ka neih laite chuan ka ṭang em em a, sawi kim loh ka nei ang tih mawlh chu ka hlau a ni. A thuziak a ṭhat mai bakah thil relevant tak a nih thute chu ka dawng a, an endik zawh hnu chuan Doctorate Degree chu min pe zui ta bawk.

“Pa!!” motor aṭanga ka chhuah rualin Junior-a chuan a rawn ti lawng lawng a, ka thil khai chu lek va vain ka nuih suk a, chum zing vang pawh a ni mahna khua chu a thim tan titih der tawh.

“Pa i lo hawn em? Ka thil chah che kha i lo hawn em? Chuan kan school-ah i lo kal a ngai bawk aw, kan teacher te’n an hmu duh che a” a bul ka thleng chiah tihah Junior-a chuan ka kut vuan chung hian a rawn ti zung zung a, a lua tuai chung chuan in chhung lamah ka luhpui zui nghal.

“Yessss, i lo hawn tak tak, zaninah ka hmang chhin nghal dawn, i phal em pa?” a thil tur ka phawrh rualin a lo ti leh vat a, a thil tur ka hawn sak te chu a hawng nghal a, min en pah reng avang chuan aw tihna’n ka lu ka lo buk khum ta nghauh nghauh.

“In lo thleng tluang thei chu a lawmawm hle mai, khua a chhe ang reng bawk sia i pu nen pawh kan lo ngaihtuah khawp che asin, i chau em?” ka pi chuan thingpui lo ken phei pah hian a rawn ti a, ka pu hmel erawh ka la hmu lo.

“Chau lo ve, khawnge ka pu hi? Ka va hmu ve lo ve” tiin zawhna chu ka lo zawt let ve nghal a, ka fapa erawh ka bula lo thu awn duai chungin ka thil hawn sak chu a khawih nghal melh melh.

“I pu chu room lamah sawn a muin ka hria, khuain a zir bawk nen a mut a chhuak te pawh a ni ang” ka pi chuan a rawn ti a, ka pu chu va kaih thawh tum ni awm takin room lam chu a pan zui nghal bawk.

Min delh chunga ka fapa che melh melh chu a hnung lam atangin ka kuah a, a thil tih lai chu ngawi rengin ka en a, kei aiin a tih dan tur pawh a thiam daih zawk dawn tih chu ka hre nghal. A kutah chuan rawng chu a tat chhin vel a, ka lam lo hawi thutin ka hnarah chuan a rawn tat ve a, ka lo nui rigawt. A ni erawh a hlim hmel em em a, ka thil hawnsak vang pawh chu a ni mahna.

Chapter 3

HLUTEI POV

"Eng thil chu maw i rawn tihtauh luh bûr burna chhan chu!? Biak che lahin mi pawh i chhang duh mang si lo" inkhuh veka ka mut laiin ka pa chuan a rawn ti a, ka mood a fuh lo bawk nen ka ṭawng peih hlawl lo.

"Bawihi tho teh, kan rawn hruai loh vang che em ni i tihtauh?" tiin ka pa chu khumah a rawn ṭhu a, rizai chhanah ka taksa chu a rawn dawm zui nghal bawk.

"Aw" ka lo ti deuh vak kher a, mahse ka mood dik lo chhan ber chu a ni hauh si lo.

"A nih chuan kan thiam loh a ni e, mahse i lo thleng tawh tih pawh min hrilh bawk si lo alawm" aw dam deuh hian ka pa chuan a rawn ti leh a, tlem chuan ka inthlahrung ṭan.

"Vodafone Sim hi ka thlak dawn, chhe lulai lutuk mai. Lo biak che u ka tum nasat tehreng nen biak pawh ka be thei lo che u. Ṭul lo takin hmelhriat loh motor-ah ka rawn chuan a ngaih phah a, ka mood hi a dik thei hlawl lo" ka inkhuhna aṭanga tho chhuakin ka ti ve ta nge nge a, ka pa chuan min lo en ran.

"I nau paw'n hmang tawh suh a tî a ti che a, i la hmang lui tlat a nih khâ" a rawn tih chuan ka lo ner khum nak a, mahse a sawi dik tho si.

"Mizoram pawnah te chuan a chak ṭha par par em alawm, hman pawh a nuam" hawi sawn deuh hmakin ka ti a, ka pa erawh a lo nui hak.

"Aw le, i mood lah hi i pe chhe ve thei bawk si. Chuan tu motor-ah maw i lo chuan? Hmelhriat loh i ti em ni?" a rawn tih leh a, ka mitthlaah Vai changkanga hmel a rawn lang nghal.

"Inla ṭawng tam duh lo vel Vai changkang leh a driver ṭawng thei zet mai te bulah ka lo chuang, an bula awm hrehawmzia khâ, Vaia ngat phei kha chu a mi uap a na ropui mai bawk si"

"A va han mak awm bawrh bawrh ṭhin ve le âw, khatianga i ṭawng vak vak kha chuan tu mipa mahin bialnu atan pawh an duh lo vang che. Eng pawh ni se him dam takin in i rawn thleng a, titau tawh lovin lo tho harh tawh rawh"

"Hei hi mi ka thil min lo hawn chu?" kawngka lam aṭangin kan nua ṭawng theia chuan a rawn ti a, ka va han meng lian chiang teh kher em.

"LALPEKSANG dah nghal rawh, i tan engmah ka rawn hawn bawk lo" ka ti hrawk a, khum aṭang chuan ka tho titih nghal.

"Ka lawm e, ka u ṭawng tlem ber leh mi khinglet peih lo ber, nau te dawm nachang hre bawk si" tiin a dinna aṭang chuan a kal sawn a, thinrim zet a

"LALPEKSANG rawn la nghal rawh, mi dang ka pek tur a nih kha!" ka tih vak vak pawh chuan a ding duh chuang der lo.

"I va han châk dawn lo tak" tiin ka tlan ve nghal a, kan tluk palh hlaua ka pa lo ṭawng pawh chu ka ngaihtuah si se tawh lo.

Sitting room ka va thlen chuan ka luggage te chu a lo inhawng vek tawh a, LALPEKSANGA chuan a lo check vek tawh tih ka hrethiam nghal mai. Kan han inum kawi tak tak a, ka nu ei rawng bawl lai pawh a rawn ṭe ta vak.

Keini pahnih lah chuan kan thil tih kan tawp duh der si lo, ka nu lah mood fuh bik lo sa bawk nen kan ni ta nuai nuai mai. A tawpa tawpah ka man thei ta hram a, chu pawh ka pa puihna vang liau liau.

A kuta a thil ken chu ka laksak vat a, a hmuh hlau em ema ka dah ṭhat pawh a lo hmu leh zel chu ka haw hle. A samah chuan ka kek vak a, ani erawh a rawn nui char char thung. A hnuah phei chuan ka nui ve ta ringawt a, ka thinrim reng duh ta bik lo.

Zanriah kan ei lai te chuan ka mood fuh loh chhan ka nuin min zawt a, a chhan dik tak pawh hrilh lovin ka Sim hneawm zet chu ka mawhpuh ta daih. Chutah Peksanga lah chuan a thu ka awih loh man a nih thute chu a rawn sawi leh ta vak vak a, a ṭawng thei lutuk chu tlema tlemah kan inkhawng leh lo chauh.

Ka pa chuan thlak thuai turin min ti a, sawi lo mahse ka thlak dawn chiang hi a ni tawp. Ka zirna lam leh Mizoram pawn lam boruak te chu min zawt a, keipawh chuan ṭha takin ka chhang ve zel a, chutia final exam zova kan in ka thleng leh thei ta mai chu an lawm hle.

Class 12 ka pass aṭangin Delhi-ah College zawmin ka awm bo ta char char a, Christmas dawn tih lohah chuan haw pawh ka haw ngai mang lo. Haw ka châk loh vang pawh ni lovin pawisa ka ui ve khanglang vang a ni a, mahse ka chhungte bulah sawi ila chuan an awih lo leh nasa teh ang chu!

Ram danga College ka kal hma zawng kha chuan pawisa heh ve ṭhin thei tak kha ka ni a, mahse Vai ho bula awm rei chuan pawisa inren loh theih pawh a ni lo. Kum 3 chhung teh meuh Vai zakkha ngah ho bulah ka awm a, pawisa chu ren ṭiah ṭiah tawh tak ka ni.

Thil ṭul lo leh awmze nei lovah pawisa ka hmang tawh ngai lo va, mahse chung zawng zawng chu ka chhungte'n pakhat mah an la hre lo.

Delhi-a ka awm tirh kha chuan ka in adjust thiam lutuk lo va, a chhan pawh ka lo nun ṭhin dan kalsana nun a ngaih vang a ni. Ram danga awm ka ṭhat puina em em pakhat chu sum thawh chhuah duhna rilru ka nei ta hi a ni.

A hmate kha chuan zing thawh pawh hre lo, hmeichhia ve si make-up pawh ngaina em em lo leh thatchhe ve zet mai kha ka ni ṭhin a, mahse Delhi-a ka awm hnuah erawh a maka makin ka danglam ta vek mai a ni.

Chutah DMZP lamah ka tel ve a, mahse a hming chauhin ka tel ve mai mai. Inhman lutuk kha ka duh lo hrim hrim a, kan hruaitu pakhat phei chuan min la ngaizawng zui. Min ngaizawngtu ber kher lah chu a'n hmelchhe lulai khawp a, min duh angin ka lo duh ve bawk si lo nen ninawm thei tak tak a ni.

Kei ve tehlul min han duh te chu a lawmawm lamah ngai ila, mahse kei ve mai hian ka mipa duh zawng ngat lo chu pasal emaw bialpa emaw neih ka tum lo bur. Bialpa tiha chhiar tur pakhat pawh ka la nei lo va, chutak chu a ni ka nau ṭawng thei em em LALPEKSANGA min chhaih ziahna chu!

Ka nu leh pate lah chuan nei ve tawh tur te'n min han ti lawm lawm ṭhin a, duh duh neih lah a theih ringawt bik si lo. Ka chapo ve ârh te, ka ṭawng thei lutuk te leh ka thawveng lutuk te chu mipate'n min duh loh chhan a nih ka ring ṭhin a, mahse insiam ṭhat emaw ze thlak emaw pawh ka tum hran chuang lo.

Ka nihna ang anga min duhtu leh ka lo duh let ve mipa lo chu ngaihzawng neih ka tum lo bur a, min duh lo tu chuan min duh lo tluan ṭhak mai rawh se.

Zan lamah chuan ka ṭhiannu ve em em, High School leh Higher aṭanga ka kawm chhoh ve ngat ngat Engi nen chuan kan inbia a, sawi tur pawh kan ngah hle. Kan titi tui lutuk chu Sana kan lo en lo hrim hrim hi a lo ni a, dar zat kan han en chiah mai chu 12 a kawk vang tawh.

Dar 8 leh tih vel aṭanga inbia kha kan ni a, inbe rei ve ngar ngar chu kan ni. Mahni inah alawm kan awm le ti rilru chungin thil nuihzat thlak a sawiah te chuan ka nui uar uar a, ka lo nui ring te pawh a ni ang Peksanga chuan thawm dim deuh tur pawhin min rawh hrilh ta nghe nghe.

Kan inbiak zawh meuh chuan dar 12:30 a lo pel leh der tawh a, sawi tur la ngah zet leh inbe kham lo zetin kan inbiakna chu kan titawp ve ta hram a ni.

Engi te chhungkua hi Aizawl khaw hmun nghet lo an ni a, an khaw dik tak chu Hnahthial daih a ni. Kan inkawm tirh phat aṭangin kan innel em em a, kan thil sawi duh zawng pawh a inang thei khawp mai.

Thisen inzawmna nei hran lo mah ila kan hnam a inan ve khanglang avang chuan kan inti unau em em a, Higher kan kal lai phei kha chuan unau tak tak emaw min ti tawk pawh an tam thei hle.

Pianphung lamah kei aiin a sang hret a, mahse kei ai chuan a hang zawk. Kei chu sang vak lo mah ila ka ngo ve zek a, taksa enkawl lam ka uluk vel bawk nen ngo awm tak pawh chu niin ka inhre ve hliah hliah tho.

A fiamte hi kan infiamna thei em em a, Hnahthial khua District-a an nemngheh hma phei kha chuan thingtlang khua ka ti kher zel. Thingtlang ka hmuhsit vang pawh a ni lo va, ṭhian leh ṭhian inkara inṭawng elhsen na mai mai a ni.

Hnahthial District a nih hnuah pawh hmanni lawka piang tih ang reng te'n ka sawi leh hram zel a, ka ṭawng thei lutuk chu min hne chang a neih ve ṭhin ka ring hial.

Amaherawhchu Engi chuan chutianga na tak taka ka fiam ṭhin chu a haw hran lo va, fiam a dawl em em te chu a ni amah ka kawm ngeih em emna chhan.

Amah tih loh chu ṭhian kawm ngeih tia han sawi tur mumal pawh ka nei lo va, Delhi lama ka Vai ṭhiante ho an ni leh deuh tawp mai.

A tukah chuan Peksanga chuan ka Sim thlak turin min chhuahpui a, mi en zui vawng vawng hlawh khawpin scooty-a kan chuan lai chuan kut kan inthlak phei leh ta hrep. Ka ṭawng thei ve viau emaw tih lai pawhin LALPEKSANGA ber kher hi chu ka hnial hneh ngai lo va, ani anga mipa ṭawngthei uchuak hi an awm pawh ka ring lo.

Ni lo, kan Vai changkanga driver kha a ṭawng thei hle bawk a nih khâ. Kha pa zep zuap pawh kha kan chhungte ni se chuan kut ka thlak hial duh ang. Mi te kha a hnial ang zawt zawt a, Pawi thlah ka nih te kha a ring vel a, amah zawk kha Pawi thlah bak a nih ka ring lo zawk.

LALPEKSANGA chuan bialpa nei ve tawh turin mi rawn ti khang kha lang a, ka lo inngaihtuah thinrim lai a ni kher bawk nen a hnung lam aṭangin Helmet chhanah a lu chu ka beng ri ta pawp. Ka beng na deuh pawh a ni ang a thle nghal lawl a, ka hming pumin min rawn ko nghal tuar bawk.

Traffic Police lah chuan Peksanga ka ben lai vel chu a lo hmu vek a, min lo la nuih ver ver zui. Kan tlan pel dawn te chuan beng leh rawh ti ang hrimin a kut chuan min signal a, ka va han nui tawi teh chiang ve le!

Ka thiam loh ni reng si kha Peksanga lakah chuan ka ṭuan leh a, a thin a rim ve ta bawk a ni ang min chhuahpui tawh loh tur thu a rawn sawi ta bawrh bawrh.

"Va kal rawh, ka buaipui peih vel lo che, mi lah chu i la beng na em em leh nghal" Peksanga chuan a rawn ti nghut a, ka lo beng na tak tak te pawh a ni maithei a ni.

"Ve a che! Ka inhruaitir peih che hi chu lawm hle rawh, nula phur tur pawh i neih ngai tawp loh kha!" tiin ka chhuk nghal tharh a, ka zaidam lo laklawh tawh tlat.

"I va nasa tak! Ka u chu i ni ve sia maw, bialnu te chu ka nei reng. Nangmah khan bialpa nei rawh, pasal i neih phei chuan ka inrulpui lu din ang" min tiel zet hian a rawn ti ve leh nghal a, chhan pawh chhang buai tawh lovin kan hmaa building lam chu ka pan ta daih.

Rin ai takin Sim thlak duh chu an lo tam phian a, chutah a hnung berah ka la ding zui. Ka hmaah mi 5 vel chiah an awm tawh ang tihah ka hnungah chuan mi dang hi an rawn din belh a, mahse tunge lo ding tih vel lam ka ngaihsak lo.

Ka duh ber chu Sim thlak vat vat a, Airtel Sim hman thuai thuai ka châk tawh a ni. Ka hnunga ding chu a rim aṭang chuan mipa a nih ngei ka ring a, chu a rim lah chu ka hriat hnu a la ang em em leh nghal.

Tunge a nih hriat tuma han hawi tawp lah chu a mawi chiah si lo, a rim lah chu a nam chêk reuh bawk sia a hmel hmuh ka châk tawp.

A hmel chu ka chhuah dawnah tal hmuh tumin ka rilru chu ka siam fel ta a, ka thil tih tum chu a ho lamin a nuihzat thlak ngawih ngawih. Chutia thil ho tak tak ka ngaihtuah lai chuan hmeichhe pakhat hian in line te chu tlema tawlh hnung hret hret turin min ti a, kan tawlh hnung nghal ta sup sup.

Ka hmaa mi chiah a la rawn tawlh hnun leh avang chuan ka tawlh hnung ve leh a, mahse pheikhawk ang tak chu ka rap ta chat mai le. Ka thil rak mek ka zu en chuan pheikhawk tliang mawi vel lutuk hi a lo ni a, ka ke pawh la sawn chuang lovin ka pheikhawk rah mek neitu pa chu ka en hmasa leh hram. A neitu ka'n hmu chiah mai chu rang tak hian ka ke ka la sawn vat a, hma lam chu ka hawi nghal vat bawk.

Ka hmuh sual a nih ring zetin ka hawi let leh ngat a, mahse a ngai te bawkin ngawi reng hian ka hnunga mi chuan min lo la en ran. A lu chu a lo met ve ni ngei tur a ni a bek vel chu a kawng deuh han a, amah a lo ngo phian bawk nen a chutianga lumeh chu a inhmeh thlawt a ni.

A hma ang lo takin Kamis pawl deuh riai hi a ha a, a taksa chuan a tawn mar mawi tawk hle. A Kamis hnuaiah tawnzau a ha tih hriat zet hian tawnzau thla chu a Kamis-ah chuan a rawn inrin lang deuh ruai a, a kawr nghawng kilh lo kara a âwm hmul lo lang te chuan a tilang sexy zualin ka hria. Face Mask erawh a la vuah run a, a hmel chu chiang taka hmuh theih ka châk ru hle bawk.

Ka lo en rei deuh a ni ngei ang a kut ding lamin ka lu chu a rawn vuan a, ka hma lam chu zawi muang hian min hawi tir a nih chu! Ka awm dan âtthlak lutuk avang chuan ka zak em em a, ka zak lutuk chu ka kawr tlang ka hmer vak ringawt.

Vai hmaa zam turin ka la indah chhin ngai lo va, mahse he Vaipa hmaah meuh zawng ka khurin ka zam chhe tak zet a ni. Ka hun a lo thlen chuan ka phone number te ka sawi zung zung a, ka hnunga mi avang chuan ka awm dan zawng zawng a dik lo kual vel vek tawh. Chutah ka thil vel buaipui mek tuin

"I ṭha maw" a rawn tih laklawh laiin kei lah pek chuan rang zet hian

"Aw ṭha e" ka lo ti vei thân a, mahse ka Sim vel buaipui mektu chuan

"Sir?" tiin a rawn ṭawng tawp ta daih mai, keimah ni lovin ka hnung zawka mi chu a bia tih ka hre chhuak a, ka zak lutuk chu vir pawp pawpa bo daih ka châk ngawih ngawih.

"Aw, ka ṭha alawm" thum dup hian ka hnunga mi chuan a rawn ti a, chutah ka kawr ka hmer nat lutuk avang chuan ka kut chu a pit zawk a, ka hnung lama mi kap tak chu ka va chum ta zawk.

"Ka tihpalh" ka ti thuai a, rang takin ka hawi let nghal vat bawk. Ani erawh chuan milim ang maiin min lo en leh run a, a hmelah chuan na tih hmel pawh a lang chuang lo.

Sim ka thlak zo te chu a ranga rangin ka petek chhuak nghal a, kan Vai changkanga pawh chuan min en zui deuh hâw tih chu hmu ru reng mah ila ka en let ngam teuh tawh lo.

Ka en let ngam tawh lo awkawngka lutuk hi ka â vek thei zawk dawnin ka hria, chuta karah kawngka bulah chuan a driver ṭawng thei zet kha ka la hmu zui. Mak tih hmel deuh hian min lo en a, ka lo melh ta hrep.

Ani ber kher chu ka ngam ve em mai, mipa ṭawng thei zep zuap hi chu ka zah ther te bik lo. Ka kal pel dawn lai tak hian chu pa ṭawng thei zeta chuan

"Nang nu hian ka pu hi i lo zui kual vel em ni a? Hmuh tur i va tam reuh ve" a rawn ti vei khanglang a, ka thinin a tuar leh ta phat lo.

"I zak em? Driver ve mai mai khan ka nihna lo pui pui nih tir min tum tei vet suh, i hnathawh a hniam hniam nen" ka ti chang fak a, ka aw chu a hretu tan chuan hriat nuam tak a ni lo chiang khawp ang.

"Driver ve mai mai te kha ti reng reng suh, i ṭawngkam leh i awm dan velah hian hnathawh nei lo leh chhungte chawm hlawm i ni tih ka chiang mai. Nang ni angin pawisa ka hmang ral ve mai mai lo va, thla tin sum ka la lut ziah zawk. Chuvangin eng hna mah hi hmusit reng reng tawh suh" a rawn ti ve nghal fak a, chhan let ka tum lai takin kan sir aṭangin aw thum zet hian

"Buaina a awm em ni?" a rawn ti a, chutianga lo ṭawngtu hmel ka hmuh chuan ka hawi sawn rang hle. Driver ṭawngthei zeta chuan

"Awm lo ve ka pu, he laia hmeichhe naupang hi thil ka lo hrilh fiah zuai zuai a" a ti kher a, a huata ka huat dan chu pui tak a ni.

"Chhe ve!!!! I bula mi, i pu ve ziah hmel hi hmu hreh em em lo ila chuan chhan let dan tur che ka ngah mai, mahse ka chhang let lo hram ang che" tiin a dara nek sawk chung chuan ka kal sawn hmak a, mahse ka zahna erawh chu a la reh hauh lo.

Zanriah kan ei lai chuan ka nu leh pate'n min hau mawlh mawlh a, a chhan pawh LALPEKSANGA a lo vui kawih vel vang a ni. Peksanga chuan chhun lama a laka ka chet dan chu a lo la na hle a, ka awm dan pawh chu dik bikin ka inhre lo. Ka pa phei chuan kan pahnih hnîh chuan min hau a, chumi avang chuan Peksanga lah chu a la titau leh ta nghal.

Ka mizia thlak turin min han sermon khum ta tak tak mai a, ka chaw ei pawh a tui loh phah vek. Chaw ei kham chuan a ngaite bawkin Engi nen kan inbe leh a, chhun lam boruak ka sawi chuan a rawn nui nasa hle.

"A thil i va chumsak chu engtinnge a lo awm? A lian em?" a rawn ti tawl a, chhan pawh chhang thei mai lovin ka nui ta vak vak.

"Ka hre lo e a! A lo awm ṭung mai, a zawi ve deuh te ka lo ring a nia" zep si se pawh nei lo chuan ka ti ve ta ringawt a, mahse ka ṭawng ring hran lo.

"Vai ho chu an nei lian duh an ti a nia aw" nui vak vak chung hian a rawn ti a, a thusawi avang chuan keipawh ka nui ve leh ta chiam.

"Kan sawi ho dawn tlat thil dang sawi ang, naktuk chu ka lo zin dawn a nia, VVIP ang khan min lo thleng ang che" ka tih chuan rang zet hian

"Awi tehreng mai, i lo thlen hunah chuan Hnahthial District puizia hi i hre mai ang. Ka fan kualpui che ang a, nuam hi i va han ti dawn tak" a rawn ti nghal zuah zuah a, eng eng emaw sawi chhunzawmin kan nui leh ta vak vak.

A tukah chuan zan lama ka lo dil fel vek tawh avangin Hnahthial lama zin tur chuan ka insiam a, Aizawl aṭanga a hlat tham ve em avangin Sumo ticket chu ka la sa vek tawh bawk. A nihna takah Aizawl-a ka haw leh hma aṭang tawhin ka sawi lawk tawh a, ka nu leh pate paw'n ka zin chu an phal khawp mai.

Ka taksa a chauh an hlau ber a, mahse kei lah chu ka thawvengin ka harh ṭha nasa mai bawk si. Peksanga chuan lo kal ve phet a tum leh tlat a, kan invin leh hrep phah.

Min ngai ang deuh te chuan a awm vel a, min ngaih lohzia chu ka hre chiang ropui mai bawk si. Ka thleng sil huna min silsak vek dawn avanga lo kal ve ṭâlh tum a ni tih pawh ka hria, kei lah chuan ka phal ṭhak si lo.

Hnahthial lam pan chuan kan tlan ta char char a, ka kal ngai lohna lam tak a ni bawk nen khaw hmingte chu mak ka ti hlawm hle. Serchhip kan thleng a, a piah lawk Keiṭum khuaah chuan kan chawl a, an thil siam pawh a lo tui phian. Rin ai takin ei in man chu a tlawm a, mahse Aizawl nen chuan tehkhin chi pawh a ni chuang lo.

Kan han tlan leh deuh hnu chuan Bungtlang kan thleng phei a, Rawpui kan thleng leh a, khaw hrang hrang kan tlan pelh hnuah Hnahthial chu kan thleng ve ta hram. Ka beisei ai daihin a lo pui reuh a, a nih na takah chuan thingtlang khua aia pui hret turah ka lo ngai.

Kan inbiak lawk ang ngeiin Engi chuan min lo hmuak a, COVID-19 hri vel leng lo se chuan kan chhoh rual ngei ka ring. Engi chuan driver chu a be siam siam a, an innel hmel hle. Ka bungrua te chu hlang thla ve nghal mai lovin Engi te in lamah min thlah a, kan Vai changkanga driver nen chuan inthlau vet vet tak an ni.

Engi chhungte'n min hmuh chuan min lo lawm thiam em em a, an bula awm pawh la rei lo mahse a nuam nghal viau mai. Ka thlen tlai tak chu Hnahthial District-a RTPCR khawl bun an tum ni a lo ni a, hri len lai ni mahse ka ṭhiannu te khuaa ka zin chu pawi tihna pawh ka nei hran chuang lo.

"Lo kal teh, khu lai inah khuan i duh tur deuh tlangval a awm a nia aw? Dawr an nei a, thil zu lei lawk ang" tiin Engi chuan in aṭang chuan min pawt chhuak a, a chhungte mitmei veng deuhin ka chhuak ve mai bawk.

"Amah chu Aizawl lamah Assitant Professor hna thawkin a awm ṭhin a, boruak a dik lo ta vek sia online class a pe chhunzawm a ni ang kan khuaah hian a cham rei tawh tawp" kawngpuia min kalpui pah chuan a ti mial mial a, a mi sawi chu ka mipa duh zawng tak a nih hmel.

"Chutiang mipa chu alawm ka duh, khawi maw ka'n inen lawk" tiin ka phone chu phawrh mai ka tum a, ka hmuh mai loh avang chuan ka ken chhuah theihnghilh tih ka hre nghal.

"I va han ṭang tak!" tiin ka bula mi chuan min lo fiam a, kei lah pek chuan thawveng zet hian

"Ṭan a ngai ve alawm, bialpa pakhat pawh ka la nei lo. Ka chhungte phei chuan nei ve tawh turin mi tî min ti a, ka nau phei chuan pasal ka neih chuan in rulpui ludin te a huam hial asin" ka lo ti a, ani erawh a lo nui char char.

"Awi ka va buai tak, engtinnge ni ang âw, sawi lai motor darthlalangah sawn ka va inen tawp mai teh ang" tiin kan sir lama Bolero lo ding lam chu ka panpui a, ka awm dan vel avang chuan Engi chu a nui leh ta vak vak.

"A pawi lo, a ṭha. I phur phawt chuan i hlawhtling ngei dawn tihna a ni mai, i chhungte chu kan barakhaih khawp ang" motor kawngka darthlalanga ka inen mawl mawlh laiin Engi chuan a rawn ti a, ka lo phur tawh khawp.

"Eng ang hmel pu nge? A sang em? A hmelṭha em?" ka sam tuai ṭha mawlh mawlh pah chuan ka ti a, ka hnunga mi lah chuan ka duhthusam a nih dawn thu ringawt a rawn sawi ve char char.

Chutia ka inen mawlh mawlh lai chuan ka inenna darthlalang chu a lo in down thut a, motor chhung aṭanga ka insiam ṭha lai min lo thlir rengtu hmel ka hmuh rual chuan ka au nghal ṭhawt. Ka hnung tawlh dâwr a, ka ṭhiannu pawh chu a lo phu ve hle.

Ngawi reng bawk hian motor chhung aṭang a rawn chhuak a, a tih dan ngai bawkin min en leh reng tawh. Thlawhna kan chuan dun aṭang tawh min en reng zel a, motor-ah kan chuang dun leh a, nimin maiah kan inhmu leh a, chutah vawiin leh zelah kan inhmu leh bawk. Engvanginnge ani nen hian kan inhmuh reng? Hneawm lutuk mai!

Chapter 4

"I mawl em ni? I awm tih te rawn sawi ta che, mi inen tui lai lai a, kan thil sawi te kha i lo hre vek lo maw, thil ngaihthlak ruk i thiam hmel ropui leh nghal" ka ti leh ta phiar phiar a, kan inhmu reng chu ka hne tawh tak zet a ni.

"Hlute!!!" tiin Engi chuan ka banah min lo pawt ṭawng ṭawng a, min kal sawnpui phet a tum chu ka ngei ru khawp mai.

"Nge nia nang hian min zui ru zawk? Nimin maiah Aizawlah kan inhmu a, vawiinah hêtah daih daih kan inhmu leh a, nang hian min zui ru chiang lutuk, a dik em? Police hnenah ka report duh tak tak mai ang che, fimkhur rawh" ka ti salh salh a, ani erawh a la rawn ṭawng chhuak lo hrim hrim.

"Nang bawk maw lo ni leh ta, khawiah pawh hmuh tur i awm reuh a nih hi! Chutah buaina bawk min siam leh a, engvanga kan motor darthlalanga lo in en vel reng reng kha nge i nih?" a driver ṭawng theia chuan a rawn ti a, a hmel ka hmuh chuan ka thinrimna a zual.

"I thaw ve a nih chu! Ka inen chhan i hriat a ṭulna pakhat mah ka hre lo, lo ṭâwng lo ṭawng ve lo zawk mai teh" tiin ka lo chhang let ve nghal a, kan Vai changkanga chuan ram zet hian

"Kal ang" a rawn ti hmuk a, a inla Boss vel lutuk chu ngei ngawih ngawih, a duh leh kal sawn daih rawh se. Chutia a kal sawn mai tawh tur chu Engi chuan a hmaa va ding vat chung hian

"Kan tihpalh lutuk ka pu, ka ṭhiannu saw chu Mizoramah a tal tam lo va, i laka a chet dan avang khan ngaihdam ka dil mawlh mawlh e" a ti a, kei erawh a chet dan vel avang chuan ka lo lung a lo ni lo nasa mai.

"Engzual engatinge ngaihdam te kha i lo va dil ringawt? Ngaihdam dil chhan tur pakhat mah i nei lo, keipawh hian ka nei lo bawk. He mite pahnih hian ka rawn thlawh haw aṭang tawh min la zui char char a, ka ngaih hial an ti ṭha tawh lo" ka ti ta ṭeuh a, Engi chuan mak a lo tih hmel ngei mai.

"Enge i sawi awmzia?" Engi chuan a rawn ti ta ngei a, ka sawi leh dawn chiah tihah kan Vai changkanga driver ṭawngtheia bawk chuan

"Ṭhiannu ṭhian i nei ṭha lo hle mai, a thusawite kha dawt vek a nih kha! Amah zawk hian ka pu hi a zui ru char char alawm, ni lo se engtinnge Hnahthial daih daihah hian kan inhmuh nawlh theih ang ni!" tiin Engi chu a rawn be zuah zuah a, keia thinrim chuan ka lo melh leh ta hrawk.

"I ṭawngkam kha fimkhur rawh aw zep zuap pa, dawt sawi lah chu i la awlsam em em leh ta nghal a!" ka ti zo chiah tihah kan Vai changkanga chuan ram tak hian

"A tawk e! Nang nu te reuh kha i bialpa tur chu zu hmu la, keini pawh kan kal ang" a rawn ti deuh fak a, a aw a thum lian ṭha bawk sia sakeibaknei te pawh a ang dawn dawn alawm le.

"Awi awi awi, i la zak miah loh zui. Tê reuh tih te khan min sawi reng reng suh, a te te hi alawm le ṭha. Chu bakah i sawi hma pawh khan kal kan tum daih tawh, mi ṭawng ngaihthlak ching ropui si, chutah i la inla class ve em em zui leh nghal" tih khum hmakin Engi ban chu ka va vuan a, ka kal sawnpui ta nal nal.

"Engtinnge i ngam zawk? In inchhung em ni? Nge in lo inhre sa tawh zawk?" ka kalpui hmawk hmawk laiin Engi chuan a rawn ti a, mood fuh loh nen chhan pawh ka chhang buai peih rih lo.

"Han sawi teh LALRINHLU, engtinnge ani nen khan in lo inhriat daih daih? Mizoramah pawh i awm ngai tawp si lo, nge khu lamah in lo inhmu ṭhin zawk?" a rawn ti leh a, ka ning ve ta det.

"I ninawm, chutiang engmah inhmelhriat lawkna kan nei lo. Thlawhnaah kan lo chuang haw dun a, a motor-ah kan lo chuang haw dun a, niminah a kap ka khawih palh bawk a, vawiinah Hnahthial District dâih daihah hian kan intawng leh a, chu bak engmah inhmuhna kan la nei lo" ka ti ta duah a, engvanga phur hmel em em chu nge a nih ka hre der lo.

"Awi le! Nimina Vai kap ka khawih i tih kha pu Henry-a kha maw lo ni? Aw Lalpa le! I va han changsang mai mai, bialpa te nei lovin mi dang ang chu ni ila ka va thik dawn rua che em, pu Henry-a kap khawih theih hmeichhia ka hriat awmchhun i ni"

"I thil sawi hian awmzia pakhat mah a nei lo, eng dang zawng ai chuan ngaihdam i lo va dil vel thawt thawtna chhan kha min han hrilh teh"

"Ngaihdam ka lo va dilsak tawp che kha a ngai alawm, nang lah kha i insum thei tawh bawk si lo. In inhmelhriat sa emaw ka ti tak tak alawm, in inngam hlawm mai bawk si"

"Aw a tawk, ka sawi tur chu ka sawi zo tawh. Kal ang, kan Vai changkanga te zet chu ka mood ṭha lai zawng zawng pawh an tichhe leh vek tawh"

"Enteh Hlute, la kal lo lawk teh ang" tiin min pawt ding a, rilru chhungril thinrim deuh ṭun chuan ka ding ve leh mai.

"Pu Henry-a hi i hre miah lo em ni? Mizoramah kum 3 chhung ngawt i awm tawh lo tih chu ka hre tho a, mahse i knowledge aia i hnar kua a zua hi chu ka lo ring ngai lo hrim hrim" Engi chuan nui ver ver chung hian a rawn ti a, a thusawi avang chuan ka en ta hrawk.

"Eng Henry ek e bal e pawh lo ni rawh se, ka hriat chhan tur pakhat mah a awm lo. Science ka la tih hre ta che, engtik lai pawhin lehkha zir reng a ngai. He mihring khamawm zet min zawh ve chhen hi lo hre ta ila exam ka tihṭhat phah sawt ang em? A teuh lo mai, ka tana ṭangkai lo tur chu ka ngaihtuah buai vel peih lo"

"I inla Science student vel bawk si a, nang ang vek hian Science students an awm kher lo. I ti leh lutuk a ni ang chû, i taksa tan pawh a ṭha tawp lo vang"

"Tih leh lutuk lam pawh a ni lo, ka hawi vel pawh hian formula hlir hi ka hmu ṭhin, mahse exam naah ka tihṭhat phah sawt zel" ka tih chuan a lo chek tlak tlak a, ka thin pawh a hma angin a rim em em tawh lo.

"Chutiang chuan lehkha zir tawh reng reng suh LALRINHLU, a nih loh chuan i â vek mai ang, a nih loh paw'n i ngâwng vek mai ang. Han sawi teh, pu Henry-a hi i hre tak tak em? Nge i hre renga i lo hre lo der zawk?"

"I va ninawm mai mai tak! Ka hre lo ka tîh ka tih chû, khatiang Vai mi en nghal un khân lutuk kha hriat pawh ka duh bawk lo ve a!"

"Chhâwi, mawli, News emaw tal te hi chhiarin ngaithla ve ṭhin ta che, pu Henry-a kha Vai a ni reng reng lo. Nichin lawka ngam tak taka i biak pu Henry-a kha maw kan Health Minister ni lai mek a nih khâ, vawiinah pawh Hnathiala RTPCR khawl an bun dawn avangin a lo kal a nih ka ring. I thluak chhungah hian enge awm? Bawng ek khaw ro chiah em ni awm?" ka lua beng kawlh chung hian a rawn ti a, ka ngaihtuahna erawh a thusawi avang chuan a dang chiang hle.

"Ka mawl hauh lo, chuan i thusawi kha ka awih hauh lo bawk. Khatiang Vai kha engti kawng mahin Mizoram Health Minister a ni thei lo vang, a theih pawh a theih ngawt loh"

"I va han mawl chhah tak em, pu Henry-a kha Vai a ni lo, Mizo a nih kha hre ta che. A nihna takah chuan a pa chu Vai a ni a, a nu erawh Mizo dik tak a ni thung. Ani erawh a pa Vai ni mahse tute paw'n Mizo pangai ang vekin an ngai tawh a, a hnam hming pawh Bawitlung ve tho alawm a nih. Chuan Citizenship-ah leh eng ilo vela a chhuah pawh hian Mizo ang vekin alawm a chhuah ṭhin, Physics i lo la kher kher hi chu i ât phah dawn a nih hi!" a rawn ti ta ṭeuh mai.

"Chuvang a ni maw thlawhnaah pawh khan Mizo ṭawnga min biak nawlh ni! Mizo a nih chu ka la awih chiah lo, thlah pawlh emaw tal a ni ang" ka ti leh hram a, Health Minister a ni mawlh chu rin har ka la ti rih.

"I va han buaithlak ngawih ngawih tak em, nu leh pa hnam hrang ve ve a neih chuan thlah pawlh a ni tih a chiang mai alawm" a rawn ti ta thlawt a, ka mitthlaah chuan Vai changkanga hmel ringawt chu a rawn la lang zui.

"Haw leh ang, ka mood pawh a dik lo vek. Bialpa neih châkna pawh ka nei tawh rih lo" ka ti ta ringawt a, ka ṭhiannu Engi chuan min en haw ringawt.

A tihpui tum berin ka duh leh tâk tlat loh avang chuan kan haw leh ta hna hnâ a, mahse haw lamah chuan kan hlim haw leh hman khawp. A bialpa chanchin min hrilh a, ka lo rin ang ngeiin Sumo driver kha a lo ni a, ka lakah khan a fel hluam hluam bawk em a ni.

In chhung kan luh dawn chuan insum thei lovin kan han nui leh chiam a, min hmutu te chuan a zir san loh thlak min ti ve khawp ang ka ring. Engi chhungte pawh chuan min en tawp a, kan nuih nasat lutuk avangin an nui ve ta vek. Keini chhungkua angin naupang chhia tak an awm tawh lo va, Engi chu an chhungkaw zinga naupang ber a ni mai.

Naupang ber an awm tawh lo han tih a ralah chuan a ni leh chiah lo, a ute pahnih chuan fa pakhat ve ve an nei tawh a, pakhat zawk nupui chu a rai mek bawk. Chaw kan ei laite chuan kan rual phian bawk sia a nuam reuh tawp, kan titi lah a in man tlang hlawm bawk si.

Chaw ei kham chuan ka tihfel pui zung zung a, ka chhungte chuan min hmu se an awih lo leh teh ang chu! Kan inah te chuan thleng sil leh hmun phiah hun kan insiam thlap ṭhin a, a bikin Peksanga nen kan intihchhawk ṭhin. Mi inah erawh kan in anga awm a rem tawh lo va, fel tak tak lo mah ila han fel der ve te pawh a ngai alawm.

Dar 8 vel bawrah ka chhungte'n min lo call a, kei chauh ni lovin ka phone kaltlang chuan Engi nu leh pate an be ve bawk. Ka chhungte chuan ka zia thup turin min lo chah nasa hle a, min chah dan ber kher avang chuan an thusawi pawh ngaithla mumal lovin ka nui leh ta chiam.

Ka bulah ka ṭhiannu chu a awm ve reng a, loud speaker-ah ka dah bawk nen Engi pawh a lo nui ve vak vak. Ka zia an hre chiang bawk a, mi bula awm dan tur mawlh chu min chah ngun ngat ngat hle. Ka chhungte nen kan inbiak zawh chuan dar 9 a lo hnai kuar tawh a, mutna pawh kan siam chhunzawm nghal.

Chutia mu tura kan inpeih fel lai tak chuan ka phone a lo ri a, caller ID ka en chuan number lawng tawp hi a lo ni. Company vel bak an nih leh ka rin loh avangin ka off ta hmak a, mahse rei lovah number ngai bawk aṭang chuan phone call ka dawng leh nghal.

"Hello" tia ka lak chuan ṭawng thawm engmah a awm lo va, mahse ka dah dawn ṭep tawh tihah mipa pakhat aw hian

"Nangma'n be zawk la ka pu, keiin ka biak chuan kan inhnial leh nghal ringawt mai ang. E hêee hei a pick up tawh a nih hi, kha ka pu be vat rawh" a rawn ti daih a, keimah min bia ni pawhin ka hre lo ve a!

"Hello" mipa aw thum deuh tak hian a rawn ti a, a hma lawka mipa aw ka hriat nen chuan inang lo tak a ni. A aw aṭang chuan a pa len hmel hle a, a mawi phian bawk.

"Hello, tunge le? Ka hre mai lo che a, han insawi mai teh" inla fel hmel deuh chuan ka ti a, a chhan pawh lampui chang khatah mi an be chhe ngai lo tih ka hre ve kiau alawm.

"I ni leh lo zawk emaw ni le, i ṭawngkam chu a va dang ta ve" a rawn ti thum leh dup a, a thusawi awmzia leh min biak dan vel chu ka hrethiam lo hle.

"Min lo hrethiam lawk min hre bawk si lova ka dah mai ang aw, hei mut kan lo tum tawh a" tia dah mai ka tum chu leh lama mi chuan rang zet hian

"Lawk, ka hria che alawm" a rawn ti thuai a, min hre bawk si keimah ka nih a ring leh bawk si lo chu a mak ka ti ta a ni.

"A nih chuan tunge ka nih? Ka hming enge? Khawi venga awm nge ka nih?" aw dam tak chuan be tawh lo mah ila ning ang deuhin ka lang duh chuang lo.

"Ka hre lo" a rawn ti deuh tawp a, a ṭawngkam tawi hmuk hmuk chu ka hriat hnu ang viau mahse tunge a nih ka hre chhuak thei rih mai lo.

"Engtinnge ka number i neih? Tunge lo pe che? Engi, ka number mi pek i nei em?" tiin ka bula phone khawih melh melh chu ka zawh zawm nghal zat a, ani lah chuan aih tih na'n lu a lo thing vat bawk si.

"Han ṭawng vak vak teh" leh lama mi chuan a rawn ti leh ringawt a, min biak dan vel chu ka thinin a tuar leh ta ngang lo.

"I mawl em ni? Tunge hmelhriat loh hmaah ṭawng vak vak ngai, ka dah dawn, i hawihhawm lo em mai" tia off ka tum chuan

"Puih kan ngai, kan motor ke a chhia" a rawn ti vat a, a thu rawn sawi avang chuan ka nui chhuak hawk.

"Tunge i nih ka hre lo va, chutiang bawkin tunge ka nih i hre lo bawk. Chuan Mechanic ka ni reng reng lo, nula hmelṭha leh mahni lu zo tak ka nih hi!" tih khum deuh hmakin kan inbiakna chu ka titawp a, ka mu ṭha dawn chiah tihah ka phone bawk chu a rawn ri leh nghal.

"Ka hriat nu kha i ni tih i ṭawngkam aṭang khan ka hria, ka hre dik che" phone ka pick up rualin mipa aw thum bul hian a rawn ti a, chu pa chu a ngai bawk kha a ni tih ka hre nghal.

"Min lo hria pawh ni la Mechanic ka ni lo ka tih tawh khâ, kei lo mi dang be rawh u, a vawt bawk si" ka tih chuan

"Mizo dik tak i ni lo tak tak em ni? Mizo chuan tlawmngaihnate hi kan vawng nung tur a ni asin" a rawn ti deuh hmuk a, a aw chu a hriam ta hraih mai.

"I va han ninawm chhen e âw, khawiah nge in awm?" ka ti ve ta nge nge a, khaw pawn km 5 vela an awm thu chu a rawn sawi thuai a, awlsam taka puih ka duh leh ta mai chu ka hrethiam tawh bik lo.

Engi chu ka mipa hmelhriat loh nena kan inbiak dan leh puih an ngaih dante ka hrilh a, ani pawh chuan a ute room lam min panpui ve nghal. Kei ang lo takin a ute pahnih chu an lo tho nghal a, chhuak turin an inpeih titih der mai. A biak bera ka nih miau avangin ka kal ve a, motor pahnih kan keng nghe nghe.

Engi nen chuan a hnungah kan chuang a, kan chuan lohna zawk motor chu kan hnungah a lo tlan ve reng bawk. Ka mi biakpa sawi angin khaw pawn lam chu kan pan char char a, a vawt bawk sia kan inha lum ṭha khawp mai. Kutkawr nen thlap kan kal a, Shawl ka la bat tel hram bawk.

"Saw laia motor ding saw a va nih duh hmel ve ti raw Hlute?" Engi u, u Liana'n a rawn tih chuan a hawina lam chu ka hawi ve nghal a, ka chhan let hmain motor lo dinna lam chu kan thleng phei titih der a, ka chhang lo ta law law.

"In ṭha maw, motor ke spare erawh kan rawn keng lo va, nangmahni lam tur ngawr ngawr angin kan lo kal tawp rih a ni e" u Liana chuan a ti ta zung zung a, kan vai chuan motor aṭangin kan chhuk fel vek tawh bawk.

"Êeee kan tibuai hle mai che u â, a inthlahrunawm hle mai. Kan tlan laklawh laiin a ke hi a rawn chhe ringawt a, kan tlan muang si lova kan accident ṭep nghe nghe asin" ka aw hriat tawh hnu chuan a rawn ti a, ka en chian chuan driver ṭawng theia lek chu a lo ni.

"A pawi lo a pawi lo, Mizo kan ni a, inpuih te chu kan tihtur alawm, chu chu Mizo nih nawmna pawh a ni" u Liana chuan hawihawm tak hian a ti ve leh nghal a, a nau chiah u Puia pawh a rawn ṭawng felfai kher mai.

"In va tilawmawm ve le, zah pawh dawn lovin ka lo call tawp mai che u a nih kha!" motor aṭanga lo chhuak paha lo titu chu ka en nghal a, a chhan pawh tu dang ni lovin kan Vai changkanga a nih vang a ni.

"Ehêee pu Henry, nang ni maw!? In motor a ni tih kan lo hre lo reng reng, Hlutei khan a rawn sawi a, Hlutei nen hian in lo hre reng a ni maw?" u Puia'n phur hmel zeta a tih chuan rang deuh hian

"Aih" ka lo ti vat a, ani lah chuan ka sawi rual chiah chiahin

"Aw" a rawn ti ve nghal a, kan ṭawng chhuak leh kan ṭawng tawp a inrual em avang chuan mi dang ho chuan min en tawn zak zak a, a va han nuam lo duh mai mai tak!

"Hlute pu Henry-a hi i hre miah lo maw!?" u Puia chuan chik zeta min en chung hian a rawn ti a, ka hmel chu motor light in a en deuh bawk nen men pawh ka meng ṭha thei lo.

"Aw hre lo" ka lo ti hmuk a, anni an ni dawn tih hria ila chuan pui turin ka kalpui kherin ka ring lo.

"A va mak ve, a nih pu Henry Hlutei hi i hre hrim hrim em?" tiin kan Vai changkanga chu a zawt ve leh a, chutianga inla Judge deuha min zawt kual vel chhen chu ka ngei reuh tawp.

"Hre hrim hrim e" kan Vai changkanga chuan a lo ti kauh a, ka ngeia ka ngeizia chu lunga vawp pawp a nia ka duh ni!

"Eng pawh ni se tun atan chuan in inhriat leh hriat loh a pawimawh ber lo, zanin chu kan in lamah in riak mai anga ti raw pu Henry?" u Liana chuan a rawn ti thuai a, thu danga kan pakai daih avang chuan ka thaw pawh a veng deuh hawk.

"A ngaih hmel, chhungte kan nei mai bawk si lo" a rawn ti thum dam dup a, engtinnge kan inbiak lai khan a aw kha ka lo hriat loh theih zawk reng reng ni!?

"Lo kal rawh u, i haw phawt teh ang u, a vawt phian bawk si" u Liana chuan a ti leh ta zung zung a, patling tih takah mi han kaihhruai vel dan chu a thiam hle.

Motor-ah chuan kan lut sap sap a, kal lama kan chuannaah bawk Engi nen chuan kan lut a, mahse ka ding lam kawngkhar chu hawngin kan Vai changkanga chu a lo lut ve ta nawlh mai. Phawk deuh hian ka lo en a, ani erawh min hmu lo der hmak.

U Liana chuan Engi chu u Puia te motor-a chuang turin a ti leh ta nghal a, kal lo tur chuan duh viau mah ila a kal a ngai ta tho si. Ka bula ṭhu ren runa chuan engmah a sawi lo va, kan tlan chhuah rualin a phone chu a rawn ri a, a pick up rualin mipa naupang aw hian

"Pa in lo thleng tawh dawn em? In lo thleng har tawh êee" a rawn ti a, video call a nih avangin loud speaker-ah a dah a, motor chhunga awmte chuan an ṭawng chu kan hre ve ta vek.

"Kan motor a chhe daih a, kan riah a ngai dawn a" aw dam taka ka bula mi'n a tih chuan leh lama mi naupang chuan

"Nâaa, ka lo haw dawn i tih vek khâ, ka tihpui ang che i ti a, i lo haw leh tawp si lo. Apa chu dawt min hrilh ziah a, ninawm" tiin a rawn vui nghal nui nui a, kan Vaia changkanga chuan aw dam zet bawk hian

"Hei hei hei Junior, khatiangin titau bui bui suh le, naktukah ka lo haw ang, ka promise e" a lo ti ve vat a, a mi biak erawh chuan a lo chhang let tawh lo.

"Ka dah rih aw, nakinah ka lo be ṭha dawn che u a nia" tiin ka bula mi chuan a fapa nena an inbiakna chu a titawp a, keipawh ka hawi sawn ve nghal vat.

"Pu Henry-a chu i fapa in a ngai tawh viau che a ni maw? Fate ngaihtuah hi chu a na duh si a, zan khat lek han awm bo san pawh hi a hrehawm duh khawp mai" u Liana chuan a rawn ti a, titi tur vawrh a tum ni berin ka hria.

"Nia, a buaithlak tak tak a ni. An project vel tihpuiah ka lo tiam tawh bawk sia, a la naupang bawk nen a lung a awi lo ve a nih kha!" ka bula mi chuan a lo ti ve a, zep lovah chuan a fapa nena an inbiak lai vel kha hmuhnawm ka lo ti tawp.

"Chuan engtin maw Hlute pu Henry-a chu i hriat loh theih zawk?" u Liana chuan nui hek hek pah hian a lo ti ta mai, chhan loh lah chu a mawi tawh si lo.

"Ka hre leh si, nichin kha chuan ka fiamthu mai mai a nih kha!" ka ti ta ringawt a, chutah ka bula mi chuan a mask pawh la phelh lo hian min lo en ta ral.

"Enge eng enge?" tiin u Liana hriat hlau zet chuan ka en let ve ta hrawk a, Health Minister lai ni mahse amah ka ngam em em chhan chu ka hre tawh bik lo.

"A ni vel ang, pu Henry-a te chu Mizoramah hian hre lo pawh an awm tawp nâng, i hriat loh thu i sawi khan mak ka lo ti khawp a, i hai a nih kha ka ring ber zawk" u Liana chuan a lo ti leh a, min biak char char avang chuan ṭawng ve zel a ngai bawk sia a ninawm hle a ni.

"Nia, tunah chuan ka hre chiang tawh khawp mai" ka ti deuh hmuk a, ka bula mi chuan min lo en leh reng tawh tih hre mah ila pawn lam ka hawi san daih.

In lam kan pan chhung zawng chuan u Liana chu a ṭawng char char a, ka bula mi lah chuan tawi te te hian a lo chhang a, a ṭawng lo tluk a ni zawk. Kei erawh ka lo ngawi kur a, hri vel chungchang an sawi phei chuan ka luak lo chauh.

A COVID-19-a pawh tih tawh nak a laiin hri chungchang leh zel an sawi chu ka hne, ka hne hi a ni tawp mai a ni. Mask vuah ṭhat a pawimawhzia te an sawi a, sawi awm reng pawh a ni a vuah rei thei em mai. Minute 20 vel kan tlan hnu chuan khaw chhung kan lut a, a lo tlai ve tawh ang reng bawk sia in eng hmuh tur pawh a tam tawh lo hle.

In chhung kan luh chuan Engi nu leh pate chu an lo la meng a, keini ho chu min nghak a ni mah zawk. Kan Vai changkanga an hmuh phei chuan an lawm ka ti dawn nge an phur sârh a, eng ang paw'n Health Minister ni sawm sarih mahse ka nel chi a niin ka hre lo.

A mi uap a na si, ṭawng mawh si, mi en nghal si, chutah thlah pawlh a la ni zui, a engkim chu ka ngainat zawng a ni lo vel vek. Amaherawhchu hai rual lovin a hmelṭha a, a pian a nalh a, a zahawm tih chu ka hria, chumi a nih avang chuan ka mipa ngainat chi a nih phah chuang der lo.

A hmel aṭang kha chuan pathlawi nih hmel reng a lang lo va, mahse naupang zawk zawk chu a ni lo tih a chiang. A fapa nena an inbiak hnuah erawh pathlawi ngei a ni tih hrilh leh chuan ngai lovin ka hria a, dik tak chuan pathlawiah chuan a hmelṭha chiang alawm.

A rimtui hman a rimtui a, amah a fresh em em a, a vun a ngo bawk nen a hairstyle zawng zawng chu a inhmeh vel vekin ka hria.

Ni lo ni lo, kei hian enge ka ngaihtuah leh vak vak tâk? Ka ngainat chi a ni lo ka ti mawlh mawlh a ni lo'm ni? Kei LALRINHLUI Bawitlung hian Vai thlah mai mai mipa ka duh tur a ni lo, chutah pathlawi a la ni zui.

Chapter 5

"Engi, Hlutei nen in ṭhian dun khan chhuatah mu mai ta che u? Hei Health Minister lai te kan inah an rawn thleng ve a ni a, chhuata lo muttir ringawt chu a chi lo vang" Engi pa, pa Lala chuan a rawn ti a, kan Vai changkanga an ngaisang vel lutuk chu a hneawm ka ti hle.

"Aw nia, a pawi lo pa, keini ṭhian dun te chu chhuatah kan lo mu ang, kan mu ṭhang alawm" LALENGZUALI cheng chung chuan a rawn ti vat a, ngei tak hi ka ni ringawt, kan mu ṭhang tawp si lo.

"A ngai lo ve, chhuatah kan lo mu ang e" Henry Vaia chuan a rawn ti ve vat a, a inla polite ve vel lutuk chu ka nui chhuak leh teuh kher mai.

"A chi nâng pu Henry, nakinah in kal hunah min sawi duh lutuk palh ang" pa Lala chuan nui huah huah chung hian a lo ti ve a, kei chuan chhuata mut dan tur lam daih ka lo ngaihtuah leh tawh.

Tih tak têa an tih hnuah pawh kan Henry Vaia chuan khuma mut chu a duh lo vei ṭhak reuh a, a lawma ka lawmzia chu sawi hian a siak loh! Chhuata peih lo zeta mut tum kha khumah ka mu leh ta thut a, ka lawm em avangin Engi phei chuan min hau zui ta nghe nghe bawk.

Kan mut fel meuh chuan dar 11:30 lai a lo pel tawh a, khumah mu lo ila chuan vawt ka ti khawp ang le. Khua a la vawt phian bawk si a, chhuata mute chu ka ngaihtuah ve ta deuh. Ka mak tih em em pakhat chu engtinnge kan Henry Vaia hian ka phone number a neih daih theih tih hi a ni.

A hma kha chuan Health Minister a ni kha mak ka ti em em a, Mizo ṭawng a thiamte kha mak ka ti em a, mite'n an hre lutuk te kha mak ka ti em em a, he pa hi chuan min surprise loh lai reng a la nei lo.

Zan dar 12:00 a lo rik chuan ka la meng kur a, ka chhungte'n sim tura min tih fô ṭhin zan laia chaw ei chu loh theih lovin ka rilruah a rawn awm ta. Ka ril chu a rawn ṭam em em a, ka pum te lah chu a la ri kang kang zui. Ka pum chu ka hup bet ṭhin, mahse awmzia a nei tam lo khawp.

A tawpa tawpah chuan zah pawh dawn lovin ka bula muttui em em tawh Engi chu ka sawi harh a, ka thusawi pawh ngaithla lovin min hnung chhawn a, min muthilhsan leh ta hmak.

Ṭhiante alawm an nih tiin Engi chu ka sawi harh leh ngat a, a harh lawk loh avangin a rizai sin lai chu ka hlim pawp a, chutah zet zawng a rawn harh chiang ta khawp mai. Hriatthiam loh hmel zet hian min lo en a, kei chuan ṭawng rin hlau tak hian

"Ka ril a ṭam lutuk, thil min va eipui teh. Keimah chauh chuan kan in a ni bawk si lo ka zak, min lo eipui teh" ka ti a, ka thusawi avang chuan a rawn nui ringawt.

"I va han sawi ho tak LALRINHLU, nangmah khan va ei mai la, i zak lo tih pawh ka hria" a rawn ti a, zak lo tura min ngai chu a âtthlak ka ti, hmeichhe awm thawt thawt ni ṭhin mah ila chutiang hunah te chuan ka zak ve tho.

"I mawl em ni LALENGZUAL? Eng theii, min va kalpui mai mai teh" ka tih chuan a rawn thaw huai a, a mutna aṭang chuan a tho ṭuah ṭuah a, min hui zeuh pah chuan room aṭangin a chhuak ve leh mai bawk.

Choka lamah chuan kan phei ṭhem ṭhem a, light on a chi si loh avangin thim zingah chuan kan inkai phei a, Engi lah chuan thawm a la dim lo em em zui. Thawm dim deuh tura ka tih pawhin a inla eng emaw ve leh tlat a, kan hahthlak ṭhin.

Steel plate chu min pe a, chaw bel awmna lam min kawhhmuhin a zun tur thu a sawi a, bathroom lam a pan ta daih. Chhuat rah chim hlau ang fa hran chuan ka dingdihlip phei vel a, chhuata mute pahnih mawlh chuan min lo hmu ang tih ka hlau a ni.

Pakhat zawk lah a ṭawng thei ropui si, pakhat lah a ṭawng mawh leh em em thung a, engtinnge an thawh dun theih zawk ni!? Chutia chaw bel hnaih têa ka din lai chuan thlang lam tukverhah hian mihring ruangam lian zet mai hi ka hmu a, ka lam pana a rawn chet chhoh avang chuan

"Rukru!! Mi sual!!!!" tia ṭe tuar tuarin ka plate ken chuan ka lo vai pawp pawp a, a lu takah ka vaw fuh a ni ngei ang a ri ta lawl mai.

"Hlute eng maw!?" tiin Engi chu bathroom aṭangin hmanhmawh deuh hian a lo tlan chhuak vat a, light chu a on eng ta kuar bawk.

"Nang bawk maw!? I mak ren run thei em mai, engatinge ngawi reng khan i lo kal chhoh vel?" ka mi hmuh avang chuan ka ti a, a chal tuai nawk nawk chung chuan min en rum hle. Tunah chuan thil dang zawng aiin Engi chhungte hmai mawlh chu ka zah a, ka che uklai thei lutuk chu a hrehawm.

"Ṭawngmawhpa, hei hi kan in a ni bik lo. Mualpho zawng hian min siam reng suh, ninawm" mi pawh chhang let lova min en reng avang chuan ka ti leh tawp a, hetianga ka chet chhiat reng chuan engtinnge Engi chhungte'n min ngaih ang? Ṭhian ṭha lo tak angin min ngai tawh ngei ngei ang ka ring.

"LALRINHLU, rukru an awm lo tawp hî" Engi chuan a rawn ti deuh vak kher a, kan thawm a zawi lo bawk nen puitling ho chu an rawn harh ta vek mai le.

"Hlute, eng thil nge i hmuh a?" pa Lala chuan a rawn ti a, a bulah Engi nu chu a lo ding ve ran bawk. Engi nu mai ni lo an mote thleng chuan an rawn chhuak a, zahthlak tak a ni.

"Ihhhh...eng lo...ka hmu sual a, ka tihpalh lutuk pa Lal, ka tihharh che u avangin" tia ngaihdam ka dil lai chuan Henry Vaia driver ṭawng thei zet chu a lo chek ri tlak tlak a, min ei loh hmel tawp, mahse keipaw'n ka ei bik lo.

"Kha pu Henry i la meng em ni? I mu thei na nge? Nge Hlutei au thawmah khan i harh ve tho?" tiin pa Lala chuan ka bula mi chu a rawn bia a, Henry Vaia lah chuan hriatthiam awlsam deuh tur hian

"Ka harh chiang khawp mai" a rawn ti deuh kher a, a chal sir chu a dawm tel leh hram bawk. Chutah LALENGZUALI mai mai chuan

"Nang hian pu Henry-a hi rukru emaw i ti em ni? Nang hian plate khan i vua a ni maw? Awi le! LALRINHLU, chutiang chuan i ti em han sawi teh" a rawn ti ta mai, ṭhian ni ve si ka thlavang pawh hauh tum miah lova chutiang zawhna min zawt chu a run thlak, pil bo daih mai ka duh.

"Amah a ni dawn tih ka hre bik hleinem, ka awmna lam kha a lo pan kher a nih khâ, nang pawh a reng reng thuah lo ṭawng ve ta che" tiin ka insum thei lo chuan ka bula mi chu ka biak zawm a, mahse ka ṭawng sual tih ka inhre nghal.

"Ka hrethiam lo che u, nangniho hi inhre sa vek em ni? In va han inngam piap piap ve" pa Lala chuan mak tih hmel deuh hian a lo ti a, chhan pawh ka chhang peih tawh lo.

"Hre sa e" ka bula mi chuan a rawn ti awlsam et a, ka melh chhoh deuh hrawk avang chuan thip zet hian min lo chhuk melh ve nghal.

"Eng pawh ni se rukru kan awm lo va, i mu leh tawh zawk ang u" pa Lala'n a rawn tih chuan mi dangho chu an kal darh ta sung sung a, ka bula mi erawh a la che eih lo.

Ka tan din ve rengin awmzia a neih loh avangin ka kal sawn thuai a, ka rilṭamna zawng zawng chu a bo leh ta vek mai. Kan boruak danglam lo se chuan puar takin ka inei ang a, tui takin ka mu thei ni mai tur. Tunah erawh engkim a dik lo kual vel vek a, ka ṭhiannute in ni mahse a nuam tihna reng ka nei tawh lo.

LALENGZUALI reng reng pawh zawhna kha min zawt kher lo se ni tur, pa Lala te pawhin min ngaih dik loh vek phah ngei ang. Mutnaah chuan ka hau ta nge nge a, ani lah chuan a lo la ngai ho em em zui. An khaw fan kual te min han sawi hmuh a, fan kual châkna pawh ka nei tawh lo, haw vang vang ka duh tawh zawk.

HENRY POV

Hnahthial District-a RTPCR khawl bun a nih dawn avangin kan kal a, ṭum dang aiin kawng a lo la chhe zui. Hnahthial kan han thleng dek dek a, kha hmeichhe ṭawng tam zeti kha kan la hmu leh ta nghal a!

A motor ang maiin ka motor-ah chuan thuneih a tum a, mi zahna pakhat mah a nei lo. Min hriat loh chu ka ring bik si lo, mahse min hriat hmel bawk si loh, a lei chu a hriam ve thlawt a ni. Nuapang hmel viau siin a chaltlai em em ang lawi a, nge nia chutiang chu tun lai tleirawl ho mizia zawk?

Vaite chu min la ti ziah zui a, a awm dan leh min ṭawngkhum dan vel chu ka haw em em a, mahse mi dangte anga han vin hrawk leh han hauh hrep chu ka ti ngai chuang der lo. A hunah tak hauh hrep tumna ka nei ngai lo va, ka hmuh loh hnuah erawh vin hrep châknain ka khat leh thung a, ka awm dan chu ka hrethiam hauh lo.

Chuta karah zan pawh riak lovin kan haw leh nghal thei ang chu tih nak a laiin kan motor ke khaw pawnah a chhe leh ta hlauh a, ka driver nen chuan Hnahthial mi hmelhriat emaw chhungte emaw pawh kan lo nei lo ve ve bawk si, mahse ka rilruah kha ṭawng tam zeti kha a rawn lan avangin ka call ta tawp a nih kha!

Enge a chhan pawh ka hre lo, mak tak maiin Airtel Sim ka siam tir ni khan a phone number ka lo save ve ringawt a, ṭangkaina a awm pawh ka lo ring chiah lo va, mahse ṭangkaina chu a nei ve ngei e.

Hneawm lutuk tak maiin chu nu te bawk chuan min tibuai leh a, rukru emaw te min ti a, ka chalah tak min la khawng hrep zui, engtinnge plate kha a ken hman pawh ka hre lo e a!

Zing chu hma takah ka tho a, Workshop lam biain kan motor chu a hmunah ka siam chilh tir nghal bawk. Zan khat lek châm mah ila ka thlennate chu an hawihhawmin an fel em em a, pawisa pawh ka pe nghe nghe. Ka pek tirh chuan an la duh lo va, mahse pangai tak leh lak loh theih lova ka tih tâkah chuan inthlahrung takin an la ve hram a nih kha!

Chutia pawisa ka pek lai chuan naupang ṭawng thei zeti chuan ei loh hmel deuh hian min lo en a, a hmui te min peh khum ngam vel. Tunah chuan min hre tawh a, min hmai zah ve deuh kha ka ring a ni a, mahse a teuh lo mai. Chutiang taka ṭawng thei leh kawlhrawng tur chuan eng chawhmeh nge a ei bik pawh ka hre hrep lo ve a!

Tlai lam dar 3 velah kan in chu kan thleng thla a, sawi chhuak kher lo mah ila ka fapa chu ka ngai reuh tawh khawp mai. In chhung ka luh chuan ka pi leh pute'n min lo be vat a, kei erawh chuan Junior-a awmna ka zawt zawm daih thung.

Ka pi chuan School aṭanga a lo la haw loh thu a sawi a, ka hmuh châk ber a lo la haw loh avang chuan inbual turin bathroom lam ka pan ta ringawt. Ka inbual zo bathroom aṭanga ka chhuah chuan khum bula ka fapa lo inphelh mawlh mawlh chu ka hmu a, ka rilru chu a hlim nghal veng veng.

"Junior" ka tih chuan min lo en vat a, mahse lehhawi leh vatin a thawmhnaw chu a phelh chhunzawm leh mial mial. Keipawh ka inha sawk sawk a, ka fapa taksa chu ka si châk tawh a ni.

"Hei Junior" tiin a bula khumah chuan ka va ṭhu a, ani chuan mi pawh a lo en duh tawh lo, a la titau ve reng tih chu ka hrethiam ta mai bawk.

"Ka fapa, ka ngai che a nia" tia a hnung lam aṭanga ka kuah chuan a rawn ṭap chhuak nghal feih feih a, chu veleh duat taka pawm kangin ka kuah nghet ta hle.

"Le le le! Ṭap tawh suh le! Ka fapa lian tawh i nih khâ, i ṭah reng chuan ka zinsan leh daih mai ang che" ka tih chuan ṭap pur hian

"Aih!!! I sual si, min promise vek a, mahse i lo haw leh lo va, nang chuan painting pawh i ngaina ve lo, min tihpui ve duh ngai lo bawk" a rawn ti zuah zuah a, mahni fate ngei rilru nat hmel taka an ṭap han hmuh hi chuan rilru a lo na ve lo thei lo ṭhin.

"Aw le aw le, ka tihpalh, apa hian ngaihdam ka dil mawlh mawlh a che. Apa hi a sual ti raw? Tun aṭang chuan painting pawh kan ti dun ziah tawh ang a, ka zinsan tawh miah lo vang che" tia ka thlem chuan a hma aiin a rawn ṭap uar a, in hnuai lamah ka pawm thla ti ringawt.

"Êee khai, kha Junior-a chu engati bui bui nge? I ṭap khât viau tawh khan ka lo hre si a, engatinge i ṭah leh tâk mai?" ka pi chuan min hmuh rualin a lo ti a, ka fapa la pawm chungin kei chuan coffee ka siam zui nghal bawk.

"Kha maw api paw'n i ṭap khât tawh a ti a nia, ṭap tawh suh le. I la ṭap zel dawn a nih chuan zaninah pawh painting kan ti dun miah lo vang" ka tih chuan rang zet hian

"Aih!!!" a rawn ti leh vak a, a la ṭap tawp duh chuang hauh lo. Chutah ka pi chuan aw dam zet hian

"Khai khai khai, khatiang zawngin i fapa kha thlem tum suh Henry, a ngai ve che a nih khâ hrethiam ve ta che. Naupang an la ni a, nakin lawkah chuan a hlim ve leh vat mai ang. Tunah rih chuan ti khan awmpui la, han duat em em phawt mai teh" a rawn ti a, ka pi sawi chu a dik viauin ka hre ta.

"Min lo ngai viau em ni Junior?" tia a hnung ka ben thek thek chuan pawr deuh tak hian

"Ngai" a rawn ti vak a, a rawn ṭawng dan avang chuan kei chauh ni lo ka pi pawh a rawn nui chhuak ve hawk.

"A nih chuan ka'n duat em em phawt mai ang che aw, Coffee hi i duh ve em? Apa hian ka siam kep ve ang che aw?" tia ka zawh leh pawh chuan la ṭap deuh pur chung hian

"Duh" a rawn ti ṭuau a, a rilru a no rih bawk sia a nuapan laia ka awih ang chuan ka awi ta ringawt bawk.

"Lo pawmsak che chu ka châk viau a, mahse Junior-a ber khan a duh dawn si lo va, ka pawmsak leh lo mai ang che" ka pi chuan a rawn ti a, fridge aṭang chawhmeh siam tur chu la chhuak zui nghalin a buaipui zawm ta malh malh.

"Ka fapa lian tawh hi âw, ṭhu tawh ang aw Junior, apa coffee siamsak che a in theih tawh a nia" tia ṭhutpui ka tum chuan a rawn rum vak a, ṭhutpui a la duh lo tih chu ka hrethiam ve mai bawk.

"Kha a tet lai ai thlawt chuan i awi zei ve tawh deuh alawm, i nau awi lai te hi video-a dah ṭhat tlak a ni ang, nakinah chuan in la nuihpui vak vak tur a nih pawh ka ring" ka pi chuan nui chung hian a rawn ti a, ka nui ri ve ta hawk.

"Junior, i uniform hi han thlak phawt ila? Chuan ka pawm leh dawn che a nia" tiin ka fapa chu ka bia a, mahse min lo chhang lo hrim hrim.

"Junior, hei ka fapa lian ve em em tawh tê, apa hi min chhang dawn lo em ni? Ka pi, Junior-a hi a muhil em ni?" tiin ka pi chu ka biak zawm ta daih a, ka fapa hmel leh awm dan a hmuh theih turin ka insiam rem nghal bawk.

"Awi a lo ṭap muhil daih a nih khâ, Junior-a chu ka va'n khawngaih reuh tak! Nizan pawh khan a ṭap nasa teh asin, nangni lah khan in lo haw dawn loh thu in rawn sawi har ang reng si a" ka pi chuan a lo ti thuai a, ka fapa lakah chuan ka inthiam lo ve ta hle.

"Keipawh hian hrehawm ka ti khawp mai, nizan pawh kha ka muhil thei reng reng hleinem, Junior-a chiah ka rilru-ah a awm"

"Hetianga i fapa ngaihtuah reng renga i awm ngai lo hian nupuite hi nei leh la Henry, i awm loh hlana Junior-a lo awmpuitu tur ang zawng tal pawhin nula lam hi melh ve deuh teh. I duh chuan i hmu dawn tih ka hria, nakinah Junior-a hian hrehawm a la tih ka hlau a ni"

"Ka pi, ka thinlungah hian ngaihzawng lam emaw nupui lam emaw a awm tawh lo tih i hriat khâ, ka fapa chiah hi ka thinlung neitu awm chhun a ni"

"Ka hre tho a, mahse nangmah pawh hi i khua a har tih i pu nen hian kan hmu vek alawm, kan khawngaih che alawm Henry"

"A ho lutuk, nangni in awm a, Junior-a a awm bawk a, ka khua a har lo hrim hrim. Ka nu leh pate kha la dam se chuan ka hlim lehzual ngei ang, an tupa pawh hmu hman lova an liam ta erawh tawrh thiam har ka la ti reng"

"A mak ngawt mai, Pathian remruat dan hi kan duh ang vek ni lo mahse kan tana ṭha tur vek a ni bawk si. Ka fanu kha ka ngai ṭhin asin, chuan i pa pawh kha pa ṭha tak a ni. La dam se chuan an pension ve ve ngei tawh ang a, hlim takin Mizoramah kan awmho thei ni mai tur"

"Pathian hi dem ngawt dawn ila ka ngam bawk si lo, mihringte hi chuan tihtheih kan lo nei tlem em a ni. Chuan ka pi, Junior-a hi nizan chuan in bulah a mu mai tihna em ni?" tiin ka zawh zawm ta daih a, ka fapa chhip chu ka fawp zui vang vang bawk.

"Aw mu e, mahse zan dang aiin a meng rei phian, a muhil lawk thei bik lo va, i fapa hian a ngai tak zet che a ni Henry, tun ai hian ngaihven deuh teh aw?"

"Aw le ka pi, ka lo hre reng ang. Junior-a chu âw, ka khawngaih reuh hle mai. Khumah ka han mutpui rih ang e, hetianga inpawm reng zawng atan pawh muttui a harsa ang" tiin ka ṭhutna aṭang chuan ka tho a, kan room lam chu ka pan chhohpui zui ta nghal.

A hma zawnga khua ṭha em em si kha khawdurin a rawn luahlan a, rei lovah ruah chu a rawn tla ta ser ser. Ka fapa chu khumah ka mutpui a, a vawt dawna ka hriat avangin rizai chu ka sinpui nghal thuai.

Ruah chu a rawn sur tam tial tial a, ka lo rin lawk ang ngeiin current pawh a rawn awm loh chhunzawm nghal vat. Ka fapa tui taka mu chu ka thlir dauh dauh a, a samte chu ka chul reng a, a hmela a nu anna reng a nei lo chu ka lawm a ni.

A hmelah chuan ka pa leh kei min chhun daih a, a vunah erawh ka nu leh kei min chhun ve leh thung. A nghawnga khuavang awm chu ka fapa a nihzia tichiangtu ka ti mai a, a chhan chu ka khuavang awmna ang chiah chiahah ka fapa chuan khuavang a nei ve tlat. Vawi leh khatah kawl lo phe thutin khawpui chu rawn ri dur dur a, chutah ka fapa chuan hlau aw zet hian

"Pa!! pa!!" a rawn ti vak vak a, a hlauh em avang chuan a rawn ṭah chhunzawm nghal zat a, kei chuan rang zeta ka âwma lo kuah bet chung hian

"Heta hi ka awm e Junior, hlau suh le, apa hi i bulah ka awm a nia, ṭap tawh suh le" ka lo ti thuai thuai a, ka aw a hriat chuan ṭap ri tawh lovin nghet zet hian min lo kuah let ve nghal.

A hnungah chuan duat takin ka chul hliau hliau a, a chhip samah chuan ka fawp leh vang vang ṭhin. Ruah lah chuan ban mai a tum hmel bawk si loh, in hnuai lama ka pi leh ka pute pawh ka ngaihtuah hle a, mahse ka fapa chu kalsan chi ah ka ngai rih si lo.

Ka hun kal tawh ka ngaihtuah let mai mai a, a nu tel lova ka enkawl thei chu ka lawm a ni. A tirah te kha chuan harsa ka ti em em a, ka thil tih ṭhin zawng zawng kalsanin ka enkawl a, ka thiam loh lutuk avangin ka pi leh pute paw'n awmpui lak mai an rilruk hman hial a nih kha!

Amaherawhchu kei chuan ka fapa chu mi dang enkawl ka rem ti ve lo va, kei emaw ka chhungte emaw ngeiin an enkawl tur a ni ka ti hmiah. Doctorate Degree te chu han nei tawh mah ila Science subject laka zir ṭhat leh chu ka duh tlat a, a chhan pawh ka fapa ṭha taka enkawl chho thei tura Doctor nih chu ka tum nghet ta bur a ni.

Ka fapa pian hma thla khat lawkah ka nu leh pate Car Accident tawkin an boral ve ve a, kha thihna tluka ka tawrh nat kha ka la hre lo. Ṭah pawh ka ṭap thei lo va, ka khawng vekin ka hria. Chung vel vang pawh chuan ka tum ka ti ruh lehzual a, B.Sc aṭanga ṭan chho lehin Doctor ṭha tak nih tum chuan lehkha ka zir leh ta tlauh tlauh a ni.

Ka lehkha zir chhung zawngin ka fapa chu ka rilruah a awm lo ngai lo va, ka hlata ka fapa awm tir ka phal miau loh avangin ka awmna hmunah ka pi leh ka pute chuan min awm chilh ta hial bawk. Nupui nei tawh leh pa mawhphurhna la ṭan mek tan kha chuan tum tihruh a lo awl khawp mai a, zirlai pawh ka thiam chak hle.

Ka student pui te chuan upa min tiin min en hrek hre ṭhin a, mahse ka zak lo, chhete them mahin ka zak lo. Engkim chu ka fapa tan veka ti ka ni a, ka inchhir ngai lo bawk ang.

Ka fapa chu a lo len hnuah pawh a nu dik tak hriattir ka tum lo va, anu dik tak chuan ka fapa chu a hmu leh ka phal tawh lo hrim hrim. A duh lova a hnawl hnu a ni a, engtikah mah ka fapa chu a kutah ka hlan ngai lo vang, ka phal bawk lo.

Ka lehkha zirna bulah te Junior-a chu ka awm tir ve tawp zel a, a ṭah tawh hi chuan ka pawm loh chuan a tlei thei der lo ṭhin. Pen leh lehkha puan hi ka pe tawp a, a duh dûh hi a lo ziak ve vak vak zel. Nuam hi a ti ve thei em em a, keipawhin nuam ka ti a, ka fapa awm dan chuan ka zirna lam a tihchhiat phah ngai chuang lo.

Kum 6 chhung Science subject laa lehkha ka zir leh tlauh tlauh hnuah ṭha takin PG chu ka zo a, Ph.d lam pawh ka result a ṭhat em avangin ka ti nghal bawk. Ph.d erawh Research lam a ni tawh avangin full time-a class kal ngai a ni ve tawh lo va, Junior-a pawh Mizoram lamah ka letpui ta nghal daih.

Ani pawh school te ka kal chhoh tir a, a kal tirh phei chuan kan inbuaipui nasa hle. Nilenga an school-a awm chângte kha ka ngah thei hle a, Research ka lo ti ve bawk nen buai a na duh thei ṭauh ṭauh khawp mai.

Chutia ka nun hlui liam tawh hnu ka chhui kir lai chuan kawl a rawn phe leh zawk a, chu kawlphe chuan ka hmeichhe hriat tawha zawnga la ṭawng thei ber chu min hriat chhuahtir nghal. Junior-a ang chiahin ani te pawh khan khawpui ri vel a hlau a, a hlauh avangin ka ban pawh kha a hmer vak ngei alawm.

Chutah a la ṭawng thei em em leh ta nghal a, hmeichhe dang ni se chuan ka hauh hrep duh ka ring. Ka la hauh miah loh chhan chu ka ngaihtuah a, ka hre hauh lo. Amah te kha hriat reng a awlsam reuh em em a, kan awmna hmun a la inang thei hrep zui.

Kei ang bawkin ani khan min hmu peih bik lo tih ka hria, mahse engtin emaw ni tak hian min hip tlat a ni. A chang leh min zah hauh lovin ka lakah a awm a, a chang leh min zah hmel zetin a awm leh lawi a, a zia tê kha a mak dangdai ni berin ka hria.

Chapter 6

Monday a ni a, office lama ka kal peih loh em avangin ka chawl ta ringawt. Ka hna ka kal lo tur chu Junior-a mawlh chuan nuam a ti a, chutiang taka ka fapain ka hna chawl tur a lo hlimpui avang chuan ka ngaihtuahna pawh a kal thui leh nghal hle.

Ka fapa chuan ka hna chawlh a lo thlahlel em em a, a pa chuan ka ngaihsak ṭha tawk lo niin ka inhre ta. Tlai dar 2:30 velah Junior-a chu a rawn haw a, inah pawh awm rei pui lovin ka len chhuahpui nghal daih.

A nuam tih zawng leh a kal châkna hmun velah chuan ka kalpui zel a, tlai lam ni tawh mahse Aizawl Art Gallery-ah chuan kan lut leh hram.

Beisei ang ngeiin instructor te leh mi lo awm ve te chuan min lo be leh siam siam a, Coffee te pawh kan in ve leh ta ringawt bawk. Ka fapa chuan Art class kalho chu a en duh hlawm hle a, a kal ve châk a nih ka ring ber.

Art Gallery neitu chuan Junior-a chu class kal tir ve turin min ti a, mahse ka la sawipui duh rih lo, in lama sawipui atan ka khek zawk a ni. Kan haw thei tawh dawn emaw tih laiin Chaltlang lama Art Gallery lamah kal a rawt leh tlat a, kan kal leh ta nge nge.

A ngai te bawkin Art Gallery neitu chuan ka fapa chu Art class kal tir ve turin min lo hrilh a, chhanna mumal pawh pe lovin Junior-a chu ka chhuahpui ta daih.

"Junior, Art class kal kha i châk ve em ni?" kan in lam pana kan inkhalh haw lai chuan ka ti a, ka fapa chuan rang zet hian

"Aw châk e pa, i phal em ni? I phal pawh ka lo ring lo va, ka dil duh lo che alawm, nang chu painting lam emaw drawing lam emaw pawh i tui ve si lo va" a rawn ti a, a duh zawng pawh min dil ngam lo tur khawpa ka lo awm ṭhin chu ka inthiam lo ru hle.

Ka ngawi reng a, ani pawh a rawn ṭawng chhunzawm tawh chuang lo. Ka ngaihtuahna chu ka kawm melh melh a, Art class chu kal rih lo mahse a pawina a la awm lo. Art class a kal chuan tlai lama Maths tution class a kalna hun a nei lo ngei ang a, a routine zawng zawng thlak vek a ngai ngei ang.

Amaherawhchu Art instructor te'n an lo sawi hmuh khanglang tawh bawk si, engtia han sawipui chi nge pawh ka hre rih mai lo a ni. A awm dan ka en chuan pawn lam a lo thlir vauh vauh a, rilru na hmel ang pawhin a awm lo.

Kan in kan thlen chuan khua a thim vek tawh a, kan in awmna a lo fal deuh bawk nen boruak chu a reh ruih mai. Junior-a chu ka Canvas leisak keng chuan a chhuak a, keiin motor chu ka park ṭha zui nghal bawk.

In kan thlen aṭanga rei lovah zanriah kan ei a, chaw ei kham chuan Junior-a chu kan room lamah a chho nghal daih. A lungawi lo ti dawn ila a lungawi lo hmel ka hmu lo va, mahse a hlim hmel pawh ka hmu chuang si lo. Art class chungchang ka la sawipui lawk loh vang a nih ka ring ta ber a, sawipui tur chuan ka chho ve ta tawp.

"Hei Junior, dik lo a awm em?" room-a ka luh rual chuan ka ti a, min lo en ve vat a, khumah chuan a lehkhabuho a lo inchhawp hnawk nuai bawk.

"Aih pa, Home work tih ka tum a" a lo ti ve mai a, ka fapa a puitling ve tawh reuh lutuk chu hmuh a nuam ka ti hle. A che vel chu ka thlir dauh dauh a, rei pawh en lovin a lam chu ka pan phei ta thuai.

"Ka lo tihpui ang che aw, i thiam loh lai a awm a nih chuan kan ti dun zel dawn nia" tiin a bulah chuan ka ṭhu thla a, mahse eng thil emaw ni ka hmu ta tlat.

"Kha kha engatinge? Junior, engatinge i kut kha!?" tiin a kut chu en chian ka tum a, mahse ka ban phak lova awmin a lo tawlh hla thuai a, tho vatin bathroom lamah chuan a tlan lut ta daih.

"Junior, lo hawng teh. Enge thil dik lo awm chu min hrilh ve a ngai alawm, apa hi i hrilh dawn lo em ni? Bathroom chhunga i inkalh hnan reng chuan ka lung a awi dawn miah lo a nia" tiin bathroom kawngkhar chu na vak lo hian ka chum det det a, ani erawh chuan thawm reng a rawn chhuah lo.

"Lo hawng teh Junior, thil sawipui duh che ka nei a nia" ka tih leh lai chuan kawngka chu a lo hawng thut a, ka inrin hmain a rawn tlan chhuak leh ta daih. Kawngkapui hawn a tum lai tak chuan

"JUNIOR" ka ti vin ṭhawt a, ani pawh a ding chiang hle. A bulah chuan ka kal phei vat a, a awmna ka thlen chuan kuai her sawkin a kut chu ka en ta nghal.

"I kut hi engatinge? I tlu em ni? I intina em ni?" tia a hmaa ṭhingṭhi chunga ka zawh chuan kun ngul hian lu a lo thing nang nang a, mi pawh en lo va a awm vel chuan ka ngaih a tiṭha lo zual.

"Min en teh Junior, engatinge i kun tlat?" tiin a khabe chu ka chawi kang a, mittui tling pama min lo en avang chuan ka hlauhthawnna a zual sauh.

"Engatinge ṭah i tum leh ringawt? I ṭah belh sawt em mai, a buaithlak. I kut hi i tina a nih si loh chuan engtinnge a pem theih? Sawi rawh Junior, i ngawih reng chuan ka thin a rim dawn a nia" khauh faka ka tih chuan ṭap ṭuau chung hian

"Kan insual alawm pa, school-a mite'n i pa chu Vai min ti a, ka duh lo. Vai ni turin ka duh lo che, Vai i ni lo ti raw pa? Chuan keimah pawh Vai fa mai mai min ti bawk" a rawn ti zuah zuah a, sawi zawm leh tuma

"Chuvang alawm kan" a tih lai chuan rang takin ka âwmah ka kuah bet thlawp a, ka fapa chunga thil thleng mek chuan ka rilru a va tina si em. Ka rin loh lam lutuk a rawn sawi a, ka buai nghal vek thei.

"A tawk ka fapa, a tawk e. Sawi tawh suh, ka hria e, ka tihpalh" tia pawm kangin ka dinpui nghal vat a, ka lo tawn tawh ang chiah ka fapain a tawn chhoh mek avang chuan ka puak keh lo chauh zawk a ni.

"Pa ka kal duh tawh lo, kan school-ah sawn ka kal duh tawh lo" ṭap chung hian a rawn ti hawm hawm a, a theih tawpa ka hnung a hmer ṭawng ṭawngna chuan a rilru a nat ve zia min hriattir a ni.

"Ka tiam a che, saw school-ah sawn i kal leh tawh ngai lo vang. Keimah avanga hetiang i tawng hi a pawi ka ti Junior, ka thiam loh vek a ni" tiin room chhungah chuan ka kal kualpui a, ka taksa aṭanga a awm hlat hlau em em hian ka pawm nghet hle bawk.

"Ka kal duh tawh lo pa" la ṭap reng chung hian a rawn ti leh a, a zan la laa an school Principal chu va hmuh mai ka duh ta rum rum.

"I kal tawh lo vang, i kal tawh miah lo vang, a ṭha em? Min en teh le, i pa hi engatinge engkim min hrilh loh? Min hlau em ni? I lakah hian ka sual em ni?" ti mawlh mawlhin ka ban leh lam chuan a mittui chu ka hruksak a, ṭah chhuah hmel zet hian

"I buai alawm pa, tihbuai che ka duh hleinem, i zin reng a, zanah chauh ka bulah i awm ṭhin alawm" a rawn ti leh zuah zuah a, chutianga ka fapa berin min han ngai ta mai chu ka thiam loh vek a ni.

"Ka tihpalh Junior, mahse maw nang hi ka tan chuan thil dang zawng aiin i pawimawh ber asin, chu chu hre reng rawh. I thil tawn leh i school kal chanchin pawh min hrilh ngam lo khawpa ka lo awm avangin a pawi ka ti, ka tihpalh a ni e, ka tihpalh ka fapa" tiin ka kuah bet leh nghal a, ani pawh a rawn la ṭap bui bui.

Lehkha pawh zir ta chuang lo chuan ka fapa chu ka mutpui a, kum naupangte ni si a ka tawn hnu a lo tawng ve chu ka la ngaithiam thei thlawt lo. A lan danin naupang leh naupang anni ngei ang a, mahse khawia naupang mahin Vai thlah ka ni tih an hre hauh lo vang, an nu leh pate'n an hrilh a nih ngawt loh chuan.

Tui taka ka fapa muhil chu a chalah ka fawp zeuh a, ka khawngaih lutuk chu thawk ka la leh huai ṭhin. A kut chu ka en ṭha leh ṭhin, naupang mai mai insualna aṭanga chutiang pem a nei chu ka ringhlel a ni. Puitling tu emaw ni talin an tih a nih ka ring a, la sawi duh rih lo mahse ka fapa chuan a kut nat dan dik tak chu min la hrilh ngei ka ring.

Ka thinrim lutuk avang leh ka insum zawh thlawt loh avangin chu zan la lâ chuan an Principal te inah ka va kal a, ka hmel an hmuh chuan mak an lo ti hle. Nui sûng hian min lo bia a, na zeta hnek tluk chawrh mai chu ka châk, nep leh lutuk mai.

Mahni student te chunga thil thleng pawh hre lo Principal a ni chu ka hua a, a mihring ang zawng tak chuan ka haw em em hran chuang lo. Ka fapa school danga ka sawn dawn thu ka sawi chuan mak an ti lehzual a, a chhan min zawh chuan ka sawi ta vek.

Chutianga thil engkim ka sawi hnu chuan a hnuaia thawkte lakah a thin a rim ve nghal a, mahse kei HENRY LALSANGZUALA hian ani chu ka ring chhe te them tawh lo.

Ṭhu hah chawla thingpui in turte chuan min han sawm mawi der leh hnuhnawh vel a, hawihhawm takin min be mahse ka ṭawng chhuak reng reng chu ka thinrim lutuk avangin a hawihhawm ve thei tawh lo.

Min ngaih dan tur pawh ka dawn tawh lo va, eng ang pawhin min sawi vel mahse ka fapa himna leh hlimna tur a nih phawt chuan tûmah ka zah ngai lo vang. Ka awm dan leh ka thil sawi duh dan aṭang khan mi fingta'n chuan Principal ka mawhpuh ber tih a hriat theih a, zah ngawih ngawihna tham a ni.

Mood off zeta kal kha mood off lehzualin ka haw a, kan in ka thlen chuan dar 11 a lo ri daih tawh. Ka pite room aṭanga Junior-a ṭap thawm chu ka hre zui nghal a, ka va luh chuan ka pi leh pute chuan Junior-a chu an lo thlem nasa hle.

"Junior!" ka tih hluai chuan an lo hawi rual ṭhap a, an awmna lam chu ka pan phei nghal vat a, chutah ka fapa chuan uar taka ṭap chung hian

"Engatinge min chhuahsan ziah? Engatinge ka bulah hian i awm ve ngai loh? Ka bulah pawh i mu duh lo, i sual êm mai pa" a rawn ti vak vak a, rang takin ka kuah leh ta ringawt.

"Ka duh lo, kal rawh, ka bulah pawh i mu duh lo a ni lo'm ni? Ka duh lo" ṭap chunga ti tuar tuarin a rawn tal chiam a, mahse ka kuah hneh em avang chuan a tal chhuak thei chuang lo.

"Ka pawm ang che aw, lo kal rawh le! Het het het!! I len tawh em hî ṭap tawh suh le, ka chhuahsan tawh lo vang che" tiin ka pawm kang a, a ke chuan ka kawngah a rawn kherh bet ve nghal vat bawk.

"Engatinge a hriat loh hlanin i lo chhuahsan leh ṭhin? A la naupang bawk si, i tikhawngaih thlak alawm" ka pu chuan a rawn ti chang fak a, ka dik lo tih ka hriat avangin ka chhang buai ta lo.

"Ni chiah mai Henry Bawiha, i fapa hi ngaihtuah lehzual turin ka hrilh vek tawh che khâ, zawm hram hram teh. A hrim hrimin tun hnai hian Junior-a hi a danglam khawp mai, naupang chhia ang tak taka a rilru a no thar leh hi ka hrethiam lo, a chungah hian thil thleng eng emaw tak chu a awm chiang a ni" ka pi chuan a rawn ti ve leh nghal a, sawi mai tur pawh ka hre lo.

"I pi thusawi kha zawm la, i fapa kha thil dang aiin ngaipawimawh hmasa ang che" ka pu chuan a rawn ti leh fak a, keipawh chuan

"Aw le ka pu, ka fapa chunga thil thleng hi tun hnai maia mi chauh a ang ka ti lo, ka la zawng chhuak khawp ang. Eng pawh ni se ka han chhohpui ang e, muttui mai u" tiin an room chu ka chhuahsan a, Junior-a awm dan ka ngaihtuah chuan a rilru lam a dik lo vek hman ang tih ka hlau.

Khuma kan mutpui hnu pawh chuan a la ṭap reng a, a mamawh ang tawka ka lo ngaihven loh avang chuan keimah leh keimah chu ka inhaw hluah hluah. A hun rih lova ka hriat avangin thil dang engmah ka zawh belh duh lo va, ni danga zawh atan ka khek ta mai.

Tin, Art class lam pang pawh sawipui tum viau mah ila sawipuina hman a awm lo va, tunah chuan thlamuang tak leh tui taka mut chu a mamawh ber a ni. Ka kalsan leh hlau ni awm tak hian ka kawr hnung chu a pawt ṭai a, muhil lova a la ṭap reng ringawt mai chu ka mangang tawh a ni. A hmel chu ka en chiang a, chutiang taka a ṭah nasat chu ka la hre lo.

"Ṭap tawh suh le Junior, engatinge i la ṭah reng mai ni âw, a tlai tawh a nia" tiin a mittui te chu ka hruksak a, min en reng avang chuan nuih sakin a chalah chuan ka fawp ta zeuh.

"Ka naupan laia mi ang khan awm leh rawh pa" a thusawi avang chuan amah chu ka en vat a, ka lo hrethiam lawk bik lo nen

"Maw?" ka ti ringawt a, ani erawh chuan ka mit taka min en kar chung hian

"Ka bulah awm leh tawh rawh, ka naupan laite kha chuan ka bulah i awm tam alawm" a rawn ti leh a, chutah erawh a thusawi tum chu ka hrethiam ve ta.

"Aw le, ka awm ang, zanin aṭang hian ka ngaihven lehzual ang che. Kan pahnihin kan leng kual ang a, kan intihlim ang a, ka zinnaah te ka hruai ve zel tawh che ang a, a ṭha em? I châk tawh em?" aw dam taka ka tih chuan nui chung hian a lo bu nghauh nghauh a, ka fapa bawk chuan min en reng chung hian

"Ka hmangaih che pa" a rawn ti chhuak leh phawng a, ka hamhaih lutuk avang chuan chhan let mai nachang pawh ka hre lo. Ka âwmah ka kuah bet thuai a, chutah aw khur dar dar hian

"Kei...keipawh hian ka hmangaih lutuk che ka fapa, ka hmangaih che Junior, ka hmangaih lutuk che" ka ti nawn mawlh mawlh a, a chhan pawh kei hian ka fapa chu vawi khat mah ka hmangaih thu ka la hrilh ngai lo tlat alawm.

Ka âwm nghenga muhil thaw ri sêk sek ka fapa chu ngawi rengin ka en a, ka chhungril chu sawifiah fak theih si loh hian a hlim a ni. Min hmangaih thu a sawi tirh kha chuan ka buai vek a, mahse ka fapa ka aṭang ngeia hmangaihna thu ka dawng tih ka hriat chhuah kha chuan ka hlim ta em em a ni.

Ka nu leh pate kha ka hmangaih thu ka hrilh ngai lo va, mahse ka hmangaih lo tihna pawh a ni lo. Hmangaih thu sawi chhuah chu a harsa ka ti tlat a, ka mizia nen inmilin ka hre thei lo a ni.

Amaherawhchu ka fapa ngeiin min hmangaih thu a sawi kha chuan ka insum thei tawh lo va, ka fapa hnena hmangaihna thu ka sawi chhuak hmasa ber chu ka lawm letling ta hle.

Thla khat a ral leh meuh chuan ka fapa school kalna chu kan thlak ta ngei a, nuam pawh a ti leh tawh khawp mai. Keipawh ka insiam ṭha nasa hle a, ka fapa chu a school kal lam leh haw lam ka hruai ta ziah bawk. A hlim ang bawkin ka hlim a, motor-a zai play sakpui bawrh bawrh thei khawpin a hlim leh tawh a ni.

Khatia kan han inbuaipui lai tak tak kha chuan Psychiatrist ka panpui hial a, tlema tlemah ka fapa rilru chu a lo khawlo vek ṭep a lo ni. A naupang insualpuite chu ka zawng chhuak vek a, naupang ni lovin an nu leh pate chu ka hau hrep bawk. Naupang hma hun chhe thei khawpa ṭawngkam an hmang chu ka hua a, a vo pawh ka vo na hle.

"Ehêeee pu Henry-a chu inah te i awm ve teh mial a ni maw?" Junior-a Maths tutor nula senior lam tawh chuan a rawn ti a, sana ka en chuan Junior-a tution class lak hun a lo hnai leh kûar tawh.

"A nih hi!" ka lo ti pangai ve mai a, ka pi leh ka pute an chhuah lai tak a ni bawk nen ka ṭhutna bul chiahah chuan a rawn ṭhu ve nghal.

"Junior-a hi a thiam châk khawp mai, amah a felin a hmelṭha bawk si a, a chhun khawp mai che" a rawn tih chuan hmun dang daih ka lo ensan daih a, a rimtui hman rim te reng reng pawh chu ka ngainat chi a ni lo.

"Khawnge Junior-a hi?" a rawn ti leh a, min be vel reng chu ka kham ru ngawih ngawih, han hrilh tlawng lah a mawi bawk si lo.

"Vawiin chu an bang tlai dawn a, hruai tura phei pawh a hun reng tawh mai" ka lo ti ve mai a, min awm hnaih viau chu ka ngaithei lo ṭep tawh a ni.

"Pu Henry ka rilru hi i hre vek tih ka hria, ka duhin ka hmangaih em em che tih pawh i hria, min duh ve miah lo em ni?" zak miah lo hian a rawn ti a, ka malah chuan a kut a rawn la nghat pah zui.

"Mawh pu Henry? Min duh ve mai la, kei chuan pathlawi ni mahla ka hmangaihin ka iai hauh lo che asin, nangmah ka hmangaih ang bawk che hian Junior-a pawh hi ka hmangaih" zam lo zet hian a rawn ti leh a, a lam chu ka hawi ve ta nge nge.

"Engtinnge min hmangaih ngawt theih? Kan inngaizawng em ni?" ka lo ti khum hmuk a, a hmel pawh en reng duh lovin hmun dang chu ka hawi leh ta daih.

"Ka hmangaih che alawm, i hmelṭha a, i pian a nalh a, i engkim hi ka duh vel vek a ni" tiin a ṭhutna aṭang chuan a tho a, min lo fawh a tum ta mai, zak lo ka va ti tehreng em.

"Ngawi teh, i awm dan hi ka duh miah lo" tiin a darah chuan ka lo nam ding chat a, chutah a mitmenga tisa châkna khat vek chung hian

"Min hmangaih lo mahla vawi khat tal min mutpui rawh, i fa ka pai duh pu Henry" a rawn ti leh a, a aw te chu ka ten hluah hluah.

"Awm sawn rawh le, i awm sawn lo a nih chuan ka ban ang che" ka ti ta hrawk a, chutah ani chuan zah pawh hre hauh lo chung hian

"Min mutpui rawh, ina i awm hun hi ka nghahna a rei tawh lutuk, vawiinah chuan ni dang ang lo takin ka nghak chhuak che a" tiin ka mipatna chu a rawn khawih a, rang taka a kut ka phih thlaksak rual chuan

"Ka mamawh che pu Henry, ka hmangaih che, i taah min siam rawh" tiin min rawn bawh nghal a, inrin lawkna ka lo nei bik si lo nen ka chungah a rawn awm ta ran mai.

"Chhuk nghal rawh" ka ti vin tuar a, mahse ani erawh chuan ka thusawi chu a la zawm duh chuang miah lo a nih chu!

"Hei hi, hei hi ka mamawh" tiin ka kekawr chu phelh a tum a, ka belt te chu a pawt phelh sawk sawk a, chutah zet zawng ka thinin a tuar thei ngâng ta lo.

"Hur herhnu" ti hrawkin a samah chuan ka kek dak âwr a, ani pawh na tih hmel zetin a rawn ṭhen nghal chai chai.

"In aṭang hian chhuak la, vawi khat mah lo kal leh tawh suh" ti leh hrawkin chhuatah chuan ka theh tlu tawp a, zaidam zawk zawk ka lo ni lo bawk nen a hmelah chuan min hlauh hmel ta viau.

"Ka tihpalh pu Henry, i hmel hmu lovin ka awm thei lo vang, khawngaihin i inah hian min la thawhtir hram rawh, ka fel tawh ngawt ang" tiin a rawn ṭah ṭawng zuah zuah a, lemchan thiam tak a ni tih ka hre ve chiah.

"Kal rawh, chhuak rawh, engtinnge nang ang mi tenawm hi ka fapa bulah ka lo dah phal zawk che ni!" ti leh hmukin ka thawmhnaw chuar leh siam ṭhat ngaite chu ka siam ṭha nghal a, mi an lo lut lo hlauh chu a vanneih thlak hle.

"Min thawhtir loh chuan ka tihmingchhe khawp ang che, dim lo taka hmeichhia kut min thlak thu leh min keh vel te kha Police hnenah ka report vek ang" a awmna aṭanga thovin a rawn ti a, ṭah chhuak hmel reng kha a pu leh tawh lo, lemchan thiam lutuk mai.

"He in i chhuahsan na'n hian minute 1 hun ka pe ang che, i chhuahsan lo a nih chuan CCTV-a mi zawng zawng khi Police ka hmuh zawk ang" ka ti ram hmak a, hmeichhia mah ni se kut thlak chu ka châk hle.

"I tluang bik hauh lo vang" tia min au khum tûarin in aṭang chuan hmanhmawh takin a tlan chhuak a, a dik lo zawk tih hriat takin Police lam thu dik hrilh chu a hlau leh hle si.

Ṭhutthlengah chuan ka ṭhu thla hnawk a, hmeichhe khaw lo zet mai ka fapa zirtirtu atana ka lo ruai chu ka inchhir ta hle. Ka ngaihtuahna aṭanga harh chhuak zawkin ka tho thut a, ka motor chahbi lain ka tlan chhuak nghal. School kawt ka thlen chuan naupang ho chu an lo chhuak dam dam a, Junior-a pawh ka hmu ta ngei e.

Hlim hmel zet hian a ṭhiante nen chuan an inbia a, chutianga ka fapa hmel hlim ka hmu leh thei ringawt pawh chu thil lawmawm tak a ni. Motor chhung aṭanga ka lo thlir reng min hmuh chuan a ban a rawn vai lâwp lawp reuh a, keipawh chuan ka lo chhawn ve mai.

A ṭhiante nena an inthlah fel hnu chuan muangchang vak lo hian a lo kal phei a, a rawn ṭhut luh te chuan school-a an awm dan vel chu a sawi nghal zet zet bawk.

"Junior, i Maths tutor kha a bang daih aw, vawiin aṭang chuan tutor dang ka hmuh leh hma chu tution i kal tawh rih dawn lo a nih chu" motor khalh paha ka tih chuan

"Nâaaaa engatinge? Exam kan nei dawn asin, thiam loh pawh ka nei nual leh nghal" a rawn ti nang nâng a, ka fapa chuan pawi ti mahse kha nu kha chu ka chhawr thei tawh lo a ni e.

"Keima'n ka zirtir dawn che a nia, a nih loh paw'n tutor tur dang kan zawng leh ang a, kan hmu leh vat mai ang" ka lo ti mai a, ani erawh chuan a Maths tutor a bang ta daih chu hun lo a tih hmel hle.

"I hman dawn em ni pa? Tutor dang chu zawng thuai zawk ila, thla leh lawkah khian kan exam tawh dawn a nia, Maths phei chu ka huphurh ropui si"

"Tutor chu kan zawng tho ang a, mahse kan hmuh hma chu keima'n ka zirtir dawn che alawm, ka hman turah ngai ang"

"Chuan pa Art class hi ka lo kal ve tawh teh ang, ka ṭhiante pawh an kal a nia, an kal tih min hrilh khan min ti kal châk ve leh zo vek"

"Kha chu in lamah kan sawi ṭha dawn nia" ka ti ta daih a, Art class ai chuan Maths tuition lam chuan ka rilru a luah hneh rih em a ni.

"I phal lo em ni pa? Pa phal hram la, Maths pawh ka chawk peih sawt ang, min kaltir ve hram teh" a rawn ti ngawng ngawng a, kei chuan nui ri hak chung hian

"Ka phal lo ka tih miah loh khâ, ka phal alawm, mahse Art class lam kha chu nakina sawi chi zawk a ni. Tunah chuan i Maths tutor tur hi buaipui phawt ang, chumi zawhah Art lam chu kan ti dawn nia" ka lo ti ve leh mai a, ka phal tih a hriat chuan a rawn hlim ta khawp.

"Pa i phone ka play dawn a nia" tiin ka kekawr iptea mi ka phone chu a rawn la a, a hla rawn play te lah chu a la mak em em zui.

Rap leh DJ tih vel awmna music chu a rawn play a, a rap pui zuah zuah reuh a, engtinnge a lyrics te chu a hriat theih zawk reng reng ni! An style ang tak tak chuan a su ve vel a, motor chu khalh lo ila chuan ka nuih nasa khawp ang.

In kan thlen hma zawng chu Rap leh hla mak pui pui play in a sakpui vak vak a, kan inkawt kan thlen dawnah erawh a off hmak, phakar reuh lutuk!!!

Chapter 7

HLUTEI POV

Tunah chuan LALENGZUAL eng theii te khua aṭanga hawin kan in lum ngeiah ka awm leh tawh a, an khuaa kan lo han zin vel thawt thawt chu ka zin tawh zawng zawngah a la nuam lo ber ang. Ka ṭhiannu aiin a chhungte'n min duat zawk a, hrehawm tak hi a ni ringawt. Chutah ka hmel hmuh hne em em mai ka hmu leh a, chu pa chu Health Minister a ni tih ka hre leh zel a, engkim chu a nuam lo vel vek.

An haw thlak rual te khan haw ve daih mai kha ka duh rum rum a, mahse an bula chuan kha ka peih leh loh mai bakah Engzuali zik zekin haw a phal rih lo tlat. Ni 4 châmin ka awm a, ka awm chhung zawng khan nuam han tih tur ka hre lo hrim hrim, ka thlen ni aṭang ka mood kha a fuh lo chho nghal vek ringawt.

"Awm awl tawp lo hian hnate hi zawng ve nghal la, chawm i hautak si" LALPEKSANGa'n a rawn tih chuan ka melh hrawk a, mi tihthinrim dan hi chu a thiam thlawt a ni.

"I zak lo ê, hnate chu ka duh hûn hunah ka hmu thei. Ka duh hunah ka zawng ang a, hna ka nei a ni mai, lo buai ve vak suh"

"A ni ringawt lo, i duh leh va zawng chhin la i hre ve mai ang. Tun laiah te chuan a thiam thiam aiin chhungte an tih loh leh hmel hriatte tiin an intitling zel a, chutiang kara nang ber kherin hna i lo hmu thei a nih ngat chuan ka lu hi i met daw nia"

"Awi awi awi LALPEKSANG, zak ve deuh rawh. I u ka nih hi min zah ve ta che, ṭawng thei leh lutuk mai. Ka hmu khawp ang, i sawi ai reng rengah hna chu ka hmu khawp ang"

"Aw le aw le, ka u duh tak thinchhe lo leh zaidam em em nu" tiin min han chhiat khum vel kher a, ka bula chapal chuan ka vawm leh ta pawp.

"Hriamhrei thawh hi hrat viau suh, mipa ni phei la chuan kan insual zing tawh khawp ang, mahni tawkah i hmelchhe ve ropui si" kal sawn pah chuan a rawn ti leh khang lang a, ka chapal khing chuan ka vawm zui leh nghal ṭawk.

Dawhkana vanglaini lo inthlep chu ka la sawk a, LALPEKSANGA min tih dan vel chuan ka tha a tina tlat a ni. A chhung thu pawh chhiar lovin ka keu sawk sawk a, rilru thinrim ṭûnin hnaruak awmna chu ka bih thla den den nghal.

Awmpui an duh thute a inziak a, mahse awmpui chi chu ka ni awkawngka lo, hlawh neiin min hnawt chhuak duh zawk mai ang. High School Teacher tur mamawh a nih thu chu ka hmu leh a, rilru hlim hman viau mahse B.Ed neih a lo ngaih leh tlat avangin ka hnual leh nghal.

Teacher an duhna lam vel chu a tam lutuk lo va, awmpui an duh thu a tam em em ringawt. Sintex tih lam pang vel ka chhiar phei chuan ka nui ringawt a, dawra thawk tur an duh thute chu ka chhiar liam vel mai mai.

A phek vei lam kil sir tê ah hian Mathematics Tutor duh thu hi a lo inziak a, hlawh zat tur pawh a inziak lo va, thu inziak chu a tawi hle. Address vel pawh a inziak lo leh zel a, Mathematics subject kher ni lo se chuan ka ngaihven hauh lo vang.

Kan subject lakin a lo zir bawk nen Mathematics hi chu ka thiam ve hle a, Vai ho karah pawh a thiam pawl ka zu ni ve zak zak alawm. Chu lovah Physics subject te kan Core ve a, Mathematics thiam lo nih te chu a zahthlak zawk.

Thaw huai chungin number intar lang chu ka call a, ka call lai pawh chuan ka rilru a la insual nasa hle. A ring ral ṭhak dawn emaw ka tih tawh hnuah pitar lam aw hian

"Hello" a rawn ti a, keipawh chuan ka aw te thian ṭha sawk sawkin

"Hello ka pi, Mathematics Tutor in duh em ni? Vanglaini ah hian ka lo hmu a, ka hmuh rual rualin ka lo be pawp nghal che u a nih hi!" ka ti ve thuai a, ka ṭhutna aṭanga thovin ka room chhungah ka lut nghal daih bawk.

"Aw duh e, duh tehreng mai. Kan duh tawh lutuk, vawiin tlai hian i lo kal nghal thei ang em? Hlawh chu i duh zat zat a ni mai, i tuition pek tur hi thla leh maiah Test an nei tawh dawn a, lo kal hmanhmawh thei la chuan kan lawm ngawt ang" a rawn ti ta ṭeuh a, ka beisei lo deuha a awlsam leh si avang chuan chhan let dan tur mai pawh ka hre lo.

"Aaaa..ihhhh...vawiin tlai aṭang hian in duh nghal tihna em ni?" ka ti bah deuh ta nuai ringawt a, an hmanhmawh viau tawh chuan kal nghal mai pawh pawi ka ti lo.

"Aw, i hman phawt chuan min lo kalsak nghal mai ta che, hlawh lam chu lungngai suh. Chuan i thawk reng thei bawk ang, i zirtir tur naupang hian zirtur a la ngah lutuk a" a rawn ti ve leh thuai a, hlawh lam buai lo tura min tih avang chuan pitar hausa deuh a nih ka ring ta mai.

"Aw le, vawiin tlaiah chuan rawn kal nghal ka tum dawn nia, in awmna vel min lo hrilh mai ka pi, chanchinbuah hian in tarlang bawk si lo va" ka tih chuan lawm hmel tak hian an awmna vel chu min lo hrilh a, a la hla phian zui.

Tlai dar 3:00 aṭanga tution class ṭan tur angin kan inbe fel a, 2:30 a lo rik thuak tawh avang chuan chhuak turin ka insiam zui ta nghal. A vawi khatna te a ni dawn si a, kal dan tur pawh ka la thiam chiah lo.

Chu bakah ka naupang zirtir tur chu class engzat nge a nih tih pawh ka hre lo va, naupang a ni tih chiah ka hria a ni mai. Ho lam deuhin ka room aṭang chuan ka chhuak a, sitting room-a tûmah ka hmuh loh avangin ka kalna tur pawh sawi lo chuan ka chhuak ta ringawt.

Tution pek vel chu ka tih chi a ni ang em pawh ka hre lo va, ka vawi khatna tur a ni hial. Chutia pawisa hlawh chhuahna tur ka hmu ringawt chu a mak ka ti hnuhnawh hle a, chanchinbu kha chhiar lo ila chuan ka hmu awm tawp si lo.

Taxi in ka kalna tur lam chu ka pan a, khua a ṭha bawk nen boruak chu hip a nuam khawp mai. Tin, darkar 1 emaw darkar 2 emaw vel ka pek ka ring a, chuvang chuan tlai lutuka ka haw pawh a ngai lo maithei a ni. Ka kalna tur in awmna chu a lo fal phian a, a bulah chuan in awm ve pakhat mah a awm lo.

Zan ni phei se chuan a hlauhawm ngawt ang ka ring, chhunah pawh a ṭihbaiawm ru riauin ka hria. In chhung ka luh chuan ka biaknu ni ngei tur pitar hmel changkang deuh hian min lo bia a, a polite in a fel zaih zaih khawp mai.

A nulat lai chuan a lerh reuh ngawt ang tih vel mai mai chu ka ngaihtuah a, a thusawi pawh chu ka lo bengkhawn lo leh lek lek zel. Ka thlen hnu rei lotê ah ka zirtir tur naupang chu a lo haw a, ka bula mi chuan

"I pa khawnge Junior? Hei i Maths tutor thar pawh a lo kal tawh e" a lo ti thuai a, chu naupang te chuan pangai deuh hian

"A office-ah a kal leh lawk a, a lo haw leh vat dawn thu pawh min hrilh. Pi coffe leh chhang a awm em? Ka in châk e" a rawn ti ve nghal a, a bag ah rih hmel zet chu dawhkanah a dah a, a chet chetin a che ve neuh neuh.

"Aw awm e, ka lo siam ang che. Bawihi, i hming min la hrilh miah lo, lo kal rawh coffee i va in hmasa phawt teh ang" tiin ka bula mi chuan min lo bia a, a ṭawngkam dawnsawn a nawm em avang chuan a bula awm chu a nuam ka ti ta phian.

"Hlute min ti mai dawn nia, chuan ka pi engtinnge ka koh ve ang che, kan la inhmu tir bawk sia ti raw" nui ri hek hek chung chuan ka ti ve a, ani pawh a lo nui ri ve nghal tho.

"Pi Rinpui min ti mai dawn nia, chu chu mi min koh dan a ni a, mahse ka pasal hi chuan Puibawih min ti kher zel" a rawn ti a, kan boruak chu a hlimawm ru zek leh nghal.

"Junior, hei hi i Maths tutor thar tur aw, Miss Hlutei a nih hi! Miss i ti mai ang a, khawlaia hmuh ni khuaah pawh Miss tih zel tur" tiin a tupa ni awm tak kan bula coffee in ri thlerh thlerh chu a bia a, min lo en avang chuan ka lo nuih ringawt.

"I hming eng maw Bawiha?" aw nem tak chuan ka ti ve a, ka aw a nem vel lutuk chu keimah ka ang lo zawkin ka hria.

"Junior-a ka nia, apa hming ang ka neih avangin Junior tiin min ko ṭhin" felfai thlap hian a rawn ti vei rauh a, chhang chu a ei zawm mial mial bawk.

"A nih chû, i tlangval tawhin i fel hle mai, naupang fel tak i ni ngei ang. Chuan Junior keimah hi min hmu tawh em? Tunah ni lo hian khawiah emaw inhmuh tawhna kan mial em?" tiin ka zawt leh tawp a, a hmel chu khawiah emaw ni tak chuan ka hmu tawh thânin ka hria a ni.

"Ka va'n hre lo, ka la hmuh awm che pawh ka hre lo. Min hmu tawh em ni?" min en kar chung hian a rawn ti a, a mitmeng tak phei chu ka hmu tawh chiang alawm.

"Ni e Hlute, Junior-a hi i lo hre sa em ni? TV emaw khawlai velah i hmu tawh em ni? Mahse Junior-a te hi chu ṭul tawpah lo chuan a chhuak vak ngai si lo, a pa phei chuan a tel lo chuan chhuah vak a phal lo hrim hrim zawk" pi Rinpuii chuan a lo ti ve a, TV tih vel a sawi avang chuan ka bo chiang hle.

"Ka hre tawh lo, khawiah emaw ni hmuh tawhna neiin ka inhria a, mahse a ho lutuk, ka hre sual ve thei tho alawm" tiin coffe chu ka in a, ka hmaa mipa naupang chu ka en chik hle.

Junior-a chu class 5 zirlai a lo ni a, a hun a lo thlen chuan kan inzirtir nghal mawlh mawlh. Ka beisei ai daihin zirtir a lo nuam a, a ṭawng duh bawrh bawrh reuh lutuk chuan min tingaina vek. A pa nena an room-ah ka zirtir a, an room chu zau mangkheng tak a ni.

Mak deuh chu room chhung rim chu ka hriat hnu a ni leh tlat pek a, mahse khawi aṭanga ka hriat nge a nih ka hre chhuak thei tawh der si lo. Kan inzirtir laklawk lai chuan current a rawn thim a, pawn lam ka hawi chuan khua a lo dur nasa tawh hle.

Room pawh kan chhuahsan hma hmain ruah chu a rawn tla zawm nghal a, Junior-a chu inhnuai lama chhukpui a fuhin ka hria a, mahse kan kal dawn chiah tihah kawl rawn phein khawpui a rawn ti tûar a, ka bula mi nen chuan ring zet hian kan au rual ta ṭhawt. Chutah ka bula mi chuan

"Pa! Pa! Pa" a rawn ti vak vak a, kei erawh chhuata ṭhu sawp nuaiin ka lo awm thung. Current a thim tel kher bawk sia ka hlauhna chu a zual a, chet mai nachang pawh ka hre lo, ka thauah min man ni berin ka hria.

"Junior!! Ka lo thleng e, hlau suh le, i bulah ka awm e" mipa aw thum chhal hian a rawn ti thuai thuai a, chu pa chu hmu thei lo mah ila Junior-a pa a ni tih hai rual lovin a hriat.

"Pa ka hlau a nia" Junior-a chuan ṭap chung hian a rawn ti ṭuau a, engkim chu hre vek mah ila ka che thei lo, ka awm dan chu a hrehawm tak zet.

"Aw le, i bulah ka awm alawm, a hlauhawm tawh lo. Saw saw tunge? Tunge i nih? Junior saw saw tunge?" tiin ka aw hriat hnu chuan a rawn ti thum bul bul a, chutah Junior-a chuan

"Pa saw chu ka Maths tutor thar a nih sâw, kan pahnih khan kan hlau a, kan au vak alawm" a lo ti a, chutia a ṭawng zawh chuan ka lama ke pen thawm chu ka hre zawm nghal zat.

"Hei ṭhiannu, lo kal rawh le, a hlauhawm tawh loh a nia, inhnuai lamah chhuk vat ang u" tiin min lo bia a, kei erawh ka kun ngaiin ka lo la kun reng. Min biakna te chu ka hre vek a, mahse ka khawng tlat bawk si.

"Engatinge a rawn chet miah loh le" ti lehin ka kut chu kut lum nuam tak hian a rawn chelh a, a bak engmah ka hriat zawm tawh lo.

Ka mit ka men leh chuan khum dup nuam zetah hian ka lo mu a, khum rim te chu a tui ngawih ngawih. Men pawh meng rei duh lovin ka awmna chu ka suangtuah zawm a, ka mumang a ni ta berin ka hria.

Room te lah chu a zau ṭha em em a, an light inkhai te chu a changkangin a to hmel hlawm hle. Ka ngaihtuahna chu a pangai vek a, mahse ka awmna chu a mak ka ti bawk si. Kan in a ni lo tih chiang takin ka hria a, chuvangin ka mut mekna room chu vanram emaw ka mumang emaw a nih ka ring ta tawp a ni.

Thil ri ṭhek avang chuan ri lo chhuahna lam chu ka hawi a, chuta ka mi hmuh avang chuan ka va han harh chiang mai mai tak em.

"I ṭha tawh em?" khuma lo ṭhut thlak pah chuan a rawn ti thum dup a, chhan pawh chhang lovin ka lo en reng ringawt. Engtinnge he inah hian a awm daih theih? Engatinge kan inhmuh fuh theih em em le?

"I ṭawng theih em khâ min chhang la" a rawn tih leh chuan ka taksa te chu ka sik niap niap a, ka mumang emaw ka mitthla vel mai mai emaw a nih chu ka la ring fan a tin ni!

"Hlute" min en ran chunga a rawn ti leh phei phei chuan ka mur chhuak vek a, ka awm dan chu a dik dawn lova ka hriat avangin khum aṭang chuan ka tho ta vat vat.

"Engatinge ka mit hmuhah hian i rawn inlan zel a? Ka hriat loh hlanin ka phone number te i lo nei vel a, tunah lah ka hming i lo hre lehzel a, min veh ru reng suh" thinrim tak chuan ka ti bawrh bawrh a, ka thinrim nen nen a ni chu a rawn nui suk thung. Mask a vuah tawh bawk si lova a hmel chu ka hmu kim biai thei tawh a, a nui hmel mawlh chu a ṭha chiang a ni. Ni lo ni lo, LALRINHLU duh tawk rawh!!

"Kan inah i lo kal zawk alawm, Hlute" tiin ka hming chu a rawn lam tel leh kher a, a ṭawng dan vel chuan ka thinrimna a kai chhuak leh ta nge nge.

"Ka hming khan min ko ve ringawt suh, ka duh miah lo a nia. Kan in te i ti vel a, ka awih miah lo. Min zui ruk i duh avangin hetah hian i awm a ni chiang mai, ka hre vek" ka ti leh chuan

"Keipawh hian ka mithmuha i rawn awm thei zel hi mak ka ti ve tho" a rawn ti ve sup a, ring vak lo hian a la nui ri zui. Engatinge min nuih deuh suk suk kher zel chhan chu ka hre hauh lo.

"A tawk a nih chu! Ka haw dawn, min lo zui tawh reng reng suh ang che, min lo zui leh na chuan ka report tawh ang che" tiin room aṭang chuan ka kal chhuak a, in hnuai ka thlen chuan chaw ei an lo siam ta mai, ka va han zak mai mai tak!

"Êeeeeee Hlute i lo harh tawh a ni maw? Hei chaw ei kan siam kep che a nia, i ei ve nghal dawn nia" pi Rinpuii chuan a lo ti zung zung a, min sawm mahse chaw ei te chu khawi lamah a ni ringawt.

"A ngai lo ka pi, ka va haw zawk ang e. Ka tum loh thleng thleng ka awm ta si a, ka chhungte paw'n min ngaihtuah tawh lutuk palh ang" ka tih chuan

"I haw hmain chaw tal hi ei hmasa phawt rawh, chu bakah pawisa pawh kan la pe hleinem che" a rawn ti a, mahse nuih lui sakin ka haw dawn thu chu ka hrilh ta tho.

"Miss bye aw?" Junior-a chuan zâng khai deuh hian rawn ti a, keipawh chuan ka lo bye ve leh mai bawk. Kawngka lam ka pan lai chuan ka hnung lam aṭangin min rawn ko leh a, min kotu lah chu kan Henry Vaia bawk a lo ni.

"Ka va thlah ang che" a rawn ti a, chutia ka lo en ngawng ngawng lai chuan pi Rinpuii chuan nui sen sen chung hian

"Va thlah tak rawh kha, Taxi phar tur pawh tun ang hunah chuan a awm tawh tawp nâng. Chuan Henry, pawisa ka la pe miah lo a nia, i lo pe nghal mai dawn nia" a rawn ti a, kan Henry Vaia lah chuan a thusawi chu a ngaihsak loh hmel em em leh nghal.

"Ka pi, Inverter khawih tur i hmelhriat kha lo ko la, a hman lo leh a nih chuan mi dang pawh lo ko tawp tawh mai rawh, kan inverter chhe reng hi a hneawm tawh" ka bula lo kal phei pahin a ti a, a chhungte bulah chuan a ṭawng thui ve ngei chu a ni sia, ve lutuk hian a!

"Lo kal rawh" ti supin min kal pel a, keia lo din reng thu awm si lo, ka zui chhuak ve nghal. Khua chu a lo reh ṭhiap a, van pawh ruah a tla tawh lo bawk nen a lo thiang kâk tawh mai.

A motor chu tirumin tlan chhuah awlsam tur zawngin a siam rem a, ṭhu lut tura min tih chuan ka ṭhu lut ve nghal mai bawk. A hnungah chuan ngawi rengin ka ṭhu a, ka luh tirh aṭang tawh thinrim hmel takin min melh run a, a pawi ka sawi awm ka hre tawp si lo.

Rei pawh kan tlan hmain motor chu a tiding a, chiang tak hian min lo en a, a hma lama ṭhu tura min tih chuan ei lo zetin ka lo ner khum nak! Thawk la hawkin min titipui a duh thu a rawn sawi a, a ngaite bawkin a hma lama ṭhu tur bawkin min ti leh nghal zat. Luhlul taka ka ṭhut lai chuan a motor kawngkhar hawngin a chhuk a, ka ṭhutna lam chu a rawn pan ta mai.

"I inla ngeng ve reuh sia!" ti hmukin min pawm kang lawp a, ka va han leng nasa mai mai tak em. Min thlah mai dawn emaw ka tih pawh chuan nget takin min pawm a, keiin

"Min thlah nghal rawh, i bulah ka ṭhu peih hleinem" ka tih pawh chuan a thil tih lai chu a chawl chuang lo va, a chak bawk sia tihngaihna a vang thlawt a ni.

"A tirah khan ṭhu nghal la chuan kan buai hauh lo vang" tiin a motor chu a tinung a, chhang châk viau mah ila ka chhang buai peih rih lo.

"Engzat rate in nge tution i pek ṭhin? Engzat nge ka pek dawn che?" kan tlan chhuah hnu chuan a rawn ti a, mi pawh a en lo va, ka lo va en ta kher kher chu a tlawm thlak ka ti hle.

"Ka hrilh peih lo che, i duh leh mi dang zawt mai rawh" ngei awm rawng kai deuh hian ka ti a, ka mood a ti off leh vek tawh bawk sia ka ṭawngkam ṭha chu a phuin ka hre lo.

"Min chhang ṭha rawh, i fiam mai mai rual ka ni lo" a rawn ti hmuk a, a thusawi avang chuan nuihza miah si lo hian ka nui lui vak vak a, ngeiawm deuha awm khum chu nuam ka ti tlat.

"In sawi kher lo mahla i upa tih te chu a chiang reng alawm, pathlawi ngat a nih kha i nih, i duh dûh zat min pe la a tawk mai"

"Engtik thleng nge i thawh theih ang?" ka chhan letna zawm loh deuh chuan a rawn ti daih a, a aw ah chuan thinrimna aw pawh a lang leh tawh lo.

"Vawiin kha ka thawh tawpna, i fapa lo ni kher lo se chuan ka thawh rei theih ka ring, mahse i kaihhnawih hrim hrim hi chu ka hnaih buai peih lo" ka tih khum salh a, ka ṭawngkam chu a na ṭha khawp mai.

"Thawk char char rawh, thla leh lawkah an exam dawn a nia" thinrimna tel lo bawk hian a rawn ti leh a, a aw aṭang chuan a lungngaih hmelin ka hre ve ta deuh.

"Tak tak a! Ka hre lo le, lo kal reng kha a fuh chiah ang em ka hre lo. Tun thleng hian la awih chiah lo che mah ila Health Minister lai te i lo ni ve khanglang bawk si a, mi sawi ka kai mai mai ang tih a hlauhawm, tu tu emaw ni te khan min lo sawi Gold Digger leh ringawt mai ang" ka ti ve luam ta ringawt a, aw vin tak taka biak reng chu a mawi tawh chiah lo ve alawm.

"Mi thusawiah buai suh, i nih loh chuan a tawk" motor steering herh vir pawp pawp chung chuan a rawn ti a, a motor khalha chuan lah chu a nuam phian leh ta nghal a!

"Buai loh tur tih te chu ka hre ve chiang ê, mahse a har ve alawm, nang pawh khatiang khan i ti vel tak naa i buai ve awm tho em mai"

"Mi thusawi ho te te ah ka buai ve ngai lo, a ṭul ka ti lo bawk"

"Eeeee, aw le, a lo ni mâw? Ka lo hre reng dawn nia, pu Health Minister" ngeiawm taka ka tih awn duai kher avang chuan rum zet hian min lo melh a, ka ngam em em chhan chu ka hre tawh bik lo.

"Ka ring che a nia" motor tih din dawt pahin a rawn ti a, ka hawi chhuah chuan kan in kawt kan lo thleng der mai. A thusawi chu ka ngaihtuah let a, ka nui lui ta sak.

"Kal mai teh, i duh leh mi dang zawng mai rawh. A hrim hrimin nangmah paw'n i zirtir thei reng ang chû, Health Minister ni tur chuan science subject te i la ve ngei ang a, nge nang hi Politics vang mai maiin i lo lut zawk?" ka tih chuan

"Politics hmangin ka lut hauh lo lei hriam reuh em em nu, ka thiamna hmang ngata he hna hi chelh ka ni" a rawn ti hrawk a, mahse min vin ring hran chuang lo.

"Kha kha kha, khatiang kha alawm ka peih loh. I fapa chu zirtir duhin khawngaih em em mah ila nangmah berin i zir si lo va, tution chu ka pek chhunzawm lo mai ang e" ka tih chuan

"Ni lo, mi dang zawn leh na'n chuan a tlai tawh. Riah chilh pawhin lo pe mai rawh, i hlawh tur chu a tlem miah lo vang" a rawn ti thuai a, kei erawh chuan ka lo induh khum leh hmak. Ka ngawi vang vang a, ani chuan min en reng thung.

"I thu ang zelin le Boss ti phawt la" ka ngawih deuh vang vang hnua tiin a lam chu ka hawi a, ka thusawi avanga a hmel han danglam nasatzia mai chu pui tak hi a ni.

"Naupang, min fiam kual vel miah suh aw" a rawn ti ram hmuk a, kei lah chuan ka lo nuih mai mai thung. Min en ngur a, min seh hrep duh hmel hle.

"Ti tura ka tih ang che kha i tih loh chuan ka pek chhunzawm lo ang a, i ti a ni erawh chuan ka pek chhunzawm thung ang, i thu thu a ni e. Kei chu i fapa pe kher lo pawhin mi dang ka pe thei a, nangni erawh in dinhmun hmanhmawh thlakzia i hriat vek kha!" ka lo ti leh hmak reuh a, ka rilru chu nui nasa tak a ni.

"I ṭawng thei reuh bawk sia!" a inngaihtuah fe hnu chuan a rawn ti a, ka va han nui chhuak teuh tawh tak em.

"Aw le, a nih i thu ang" a rawn tih lai chuan ka lo pawt chat vat a, a ti dawn ro ro a nih chuan video in ka cover dawn khawp mai, engtinnge ka ngaihtuah chhuah vat loh theih zawk ni!

"Le! Ti hian ti rawh le, ti thuai thuai la kan zo fel a ni mai" ti thet thetin video chuan ka in selfie-a, kan Health Minister bera chu a ngawi leh tlat tawh.

"Ti rawh, i fapa tution ka pek i duh lo em ni? Mizoramah phei chuan ka thiamna ang nei hi an awm miah lo a nia" ka ti chuan min lo en run a, amah a hmelṭha ker kur bawk sia a awm dan chu a nuihzat thlak tawp.

"I thu ang zelin le Boss, phone kha off tawh rawh" a rawn ti ta nge nge a, kan awm dan chu a naupang chhia viau rualin a nuam dangdai ka ti leh tlat pek a!

"Kan inhmu leh dawn nia Henry, min pu rawh ti mahla ka pu buai vel peih bawk lo che. Ti kha chuan ka chunga i fel leh sual a zirin video hi ka upload in ka upload lo ang" nui vak vak pah chuan ka ti a, ka phone lo lak thut a tum avang chuan kan chhuak ta thuai.

Mutnaah thleng chuan kan Health Minister Henry-a nena kan awm dan vel chu ka ngaihtuah let a, ka nui chhuak leh hawk ṭhin. A mak a ni, engatinge thinrim deuh angin a awm duh miah loh le? Ka ṭawng theih theih nen, ka ṭawng na thei ropui si.

Chapter 8

"Bawihi eng hna ber maw i thawh a!? Niminah lah i kal dawnin i sawi bawk si lo, i leng emaw kan lo ti mai asin" tukṭhuan kan ei laiin ka pa chuan a rawn ti a, chaw chu ka ei tui phian, ka mood a dik vang pawh a ni ang.

"Nimin aṭang khan Maths tution ka pe a, hlawh pawh a ṭha dawn khawp e. Ni tak! Ka kal chhuah dawn lai khan ka zawng che u a, tûmah ka hmu si lo che u a ka kal tawp a nih kha!" ka tih chuan min lo en nghal ṭhap a, kei erawh chaw ka lo bar mial mial.

"Tak tak maw!? Ka va'n awih chiah lo, i thusawi hi a lem nge a tak Hlute? Min han hrilh chiang law law teh" ka nu chuan a rawn ti a, ka nu mah ni se min rin loh em avang chuan ka ngei ru khawp mai.

"In duh leh awih ula, in duh leh awih suh u! Hlawh ka lak hunah ka rawn submit hauh lo vang, em em che u hian" ka ti deuh kher a, ka bula ṭhu ṭawng thei uchuaka chuan

"Engtinnge kan rin theih ang che? Dawt i sawi thiam bawk sia rin chu i har alawm, tuna mi pawh hi i len chhuah duh vang mai mai bak a nih pawh ka ring lo" a rawn ti a, ka thin a va han rim leh mai mai tak em.

"Ngawi mai teh, nang phei chuan ka hlawh hi dere pawhi chang lo vang, i ṭawng thei ropui bawk si. Dawt sawi thiam te min ti vel a, nangmah zawk a nih kha dawt sawi thiam, meizial pawh i zu ru ṭhin" a tawp bera ka thusawi avang chuan ka pa chuan chaw pawh bar zawm lovin Peksanga chu a en a, sawi fuh ka va han inti chai chai tak!

"Peksang i u thusawi chu a dik em?" ka pa chuan a rawn ti ram hmak a, chutah Peksanga chuan inthiar filhlim tum ni awm tak hian

"Ka puar e" a rawn ti zaih a, ka pa zawhna pawh chhang lo chuan a kham zui nghal daih. Ka pa chuan ṭawng miah lo hian a en reng a, pakhata lah chuan a hmu lo der hmak bawk.

"LALPEKSANG, i pa zawhna kha chhang ta che" ka nu chuan a rawn ti vin ve ṭhak a, kei chuan chawhmeh tui lai lai chu ka lo suak zung zung thung. Ka khik deuh vur vur avangin ka nu pawh chuan min melh rum hle a, khik loh chu harsa ka ti bawk si.

"Aw ka zu ru ṭhin" tiin Peksanga chu a tlan thut a, ka pa pawh a ṭhutna aṭanga thovin a um ve nghal. Mipa e ti lo chuan LALPEKSANGA chu a tlan rak tuar tuar a, a kham hmakna chhan pawh ka pa'n a um dawn tih ka hrethiam ve ta chiah.

Ka pa chuan a um ve tak na a, a man leh thei chuang tawp lo. Ding turin a fapa harh leh ṭawng thei zet chu vawi tam a hrilh ṭhin a, mahse Peksanga chu a ding duh ṭhak bik lo. A din te'n a chi nâng, a din vaih chuan mualpho a ni mai.

Ka pa hian a fate hi kut min thlak ngai lo va, thil kan tisual a nih chuan ṭawng kam na takin min hau ṭhin zawk. Vawi khat pawh Peksanga zek zawk nen dawrah kan kal a, inchhang bung tih takah khaw laiah chuan kan intithiam lo va, ka pa chu a lo sa kher mai.

Chart paper-ah kan intihthiam loh thu a ziak a, kan veng min han fan tir mai a nih kha! Khata ṭang kha chuan ṭap khawpa khaw laia intihthiam loh kan nei leh tawh ngai lo, nei leh ngam pawh a ni lo hrim hrim.

Kan chaw eina bulah te chuan an rawn inum phei a, hmeichhe pahnih chuan lo tel ve pawh kan tum lo. Kan lo thlir tawp a, ka nu phei chu a nui ver ver tawh. Keipawh ka insum rei thei leh chuang bik tawp lo va, thler duai duaiin ka nui ta chiam.

A tawpa tawpah ka pa pawh a rawn nui a, kawng dawm meuhin a fapa chu a nuih ta ringawt. Peksanga chuan a um tawh dawn lo emaw tiin kan awmna lam chu a lo pan a, mahse ka pa chuan rang zet hian a lo man ta chat mai.

LALPEKSANGA leu luau chu a ṭe vak vak a, vawk til laksak ang mai. Ka pa chuan engmah sawi lovin sitting room lamah a hruai phei a, ani pawh chaw ei lai a ni tih a inhre chang tawh bik lo.

Ka pa chuan a zuk chhante leh thil chi hrang hrang a zawt a, a hau bawk a, Peksanga chu a harhin a ṭawng thei viau e ti lo chuan ka pa thinrim zet zawng a hlau khawp mai. A ngawi dâk a, ka pa lah chuan a hau uar tulh tulh a, khawngaih viau dawn mah ila a ṭawng thei man leh a tihsual man chu hmu se ka duh ve tho.

Meizial zuk a phal lohna a rei tawh a, a chhan pawh taksa tana a ṭhat loh vang a ni. Amah paw'n a zu lo hrim hrim a, chuta kara Peksanga mei lo zu ru ṭhin a hria chu a lung nih loh thlak dawn tih ka hria.

Peksanga chuan ngaihdam a dil mawlh mawlh a, ka pa lah chuan chart paper-ah thil a ziak mual mual thung. Ka nu chu an awmna lamah a va phei ve ta tawp a, a chhan chu ka pa chuan a fapa chu veng chhung a fan tir leh duh tak tak dawna a hriat vang a ni. Ka pa min enkawl dan leh min hrem ṭhin dan chu a sual vang leh min hmangaih loh vang a ni lo va, a fate min hmangaih lutuk zawk vang a ni.

Min hmangaih avang thil sual leh ṭha lo kan tih a duh lo va, kan lo tipalh a nih chuan kan sim vang vang theihna turin min hrem mai ṭhin zawk a ni. Huat enah pawh kan en lo va, kan naupan lai aṭanga a tih ṭhin dan a nih avangin kan chhungkua chuan ngaiah kan nei tawh.

Ka nu chuan ka pa chu a thinrim tihdaih tum ni awm tak hian a be siam siam a, a thil tih tum chu thil ṭul lo tak a ni tih pawh a hrilh tel. Ni e, nula leh tlangval te kan ni ve tawh dawn a, thil awrh chunga veng chhung fang zawnga la inhrem reng chu a hun tawh lo ve tho bawk.

Ka pa chuan a thusawi avangin ka nu chu a melh run a, ka nu lah chuan lo insiam chhiat khumin tihnuih phet a la tum zui. An awm dan tê chu a naupang chhia ka tih rualin an lawmawm phian bawk si a, an fate pahnih chuan kan lo nuih vak vak ta ringawt.

Ka pa pawh la thinrim hmel viau mahse a rawn nui ve ta ringawt a, mahse Peksanga chu han hrem loh ngawt a tum teuh lo mai.

"I inhlawhna aṭanga i pawisa thawh chhuah zawng zawng kha a bo bang awm lovin ka kutah rawn dah rawh" ka pa chuan a ti a, Peksanga pawh a tho ve vat.

"Tunah hian meizial kawl lai i la nei em? I neih chuan rawn la ang che, min bum chuan ka hriat chhuah leh hunah i mualpho nasa zawk ang" pawisa a pek laiin ka pa chuan a rawn ti leh a, Peksanga chu tih ngaihna a hre lo bawk si nen a rawn rum chhuak vak ringawt.

A room ṭangin a meizial la kawl ho chu a va la a, ka pa chuan a lo laksak nghal hmak. Ka pa chu kohhran upa lai ni mahse sual ka ti lo va, a fate min enkawl dan chu a ṭha ka ti letling zawk.

Kan thil tihsual a zirin min hau ṭhin a, thil ho leh tenau a nih hi chuan amah ni lovin ka nu hi a ṭawng zawkah a ṭang ṭhin a, mahse chutiang ni lova thil serious deuh hlek a nih hi chuan a inrawlh vat ngei ngei zel.

Ka nu pawh chutiang hunah chuan a ṭawng lui ngai lo bik lo, a pasal a hmangaiha a huna a zah thiam em em chu ka ngaihsanna a ni. Amaherawhchu ka nu pawh naupang chhia deuha awm a hrat em em a, an la upa dun lo bawk nen an inthlem leh lawp lawp zel.

Ka pa hi kum 50 leh tih âwrh chauh a la ni a, ka nu erawh ka pa aiin kum 5 vel lawihin a naupang thung. Ka nu chu felin pasalte zah thiam viau mahse tihtauh a hrat em em a, ka nu chang ni lo kei ngei pawh hi tihtauh ka hrat turu lutuk, inchhun nufa tak kan ni.

Amaherawhchu eng thil vang pawh ni se kan thinrim reiin kan titau rei ngai lo va, rei lote hnuah kan nui leh vak vak thei tho. Mipa pahnih erawh an dang leh em em a, ṭawng thei lamah Peksanga sang zawk mahse luhlul lamah ka pa chu a sang zawk thung. Anni pawh an han inhau bawrh bawrh a, mahse rei lovah an awm dun ve leh hna hnâ zel tho.

Chaw eina vel chu ka seng fel a, tution pek hma chu ka hman leh ta ṭhak. Engi nen kan inbe zeuh zeuh a, chhun lamah hi chuan kan inbe lutuk ngai lo, zan lamah erawh sawi tur kan ngah thei hle thung. Aizawla rawn awm a châk tawh thu a sawi reng a, mahse an khua chu nuam a ti tih ka hre ru reng, a chhan pawh bialpa a nei tlat alawm.

Awi, ka ning! Engi te ang chhe ve te te paw'n bialpa an nei a, kei ve lah hi tu mipa mah ka kawp ve der si lo, virgin ngatin ka awm kumkhua reng dawn pawh a ni ang, ninawm. Ni lo, engtinnge ka hriat chhuah loh theih zawk!? Mawli mawli, hna i nei tawh, LALPEKSANGA thusawi kha hre reng ta che, â leh lutuk mai.

"Pa, khawnge Peksanga kha!?" tiin bakcheh nen chuan sitting room-ah ka phei thuai a, ka pa chuan mi pawh chhang lo hian ka thil ken lam chu a rawn en daih.

"Khawnge pa? Ka hmuh vat a ngai a nia, min hrilh thuai teh" ka ti leh vak a, ka pa chuan Peksanga ka hmuh duhna chhan chu a hriatthiam loh hmel ang rang hle.

"Peksanga chu a...e..saw, bathroom aṭang a lo chhuak chiah" ka pa'n a rawn tih chuan bathroom lam chu ka hawi a, Peksanga pawh ka hmu zui nghal. Mi pawh en lo hian phone chu a khawih mual mual a, a awmna lamah ka phei tih reng a hre si lo.

"I lu met ang aw" ti kherin a sam chu ka chep pawp pawp a, ka thil tih a hriat hnu chuan a awm sawn rang kher mai. Ka kuta bakcheh chu lain chhuatah a vawm pawp a, a thinrim hmel hle.

"I mawl em ni? Engatinge khatianga ka sam i rawn cheh vak vak ringawt?" a rawn ti vin vak a, kei lah chuan ngaihnep hmel zet hian ka lo nuih hak.

"Mawl teh nâng! Hna ka neih te kha i ring lo vel a, hna ka neih hunah te khan i lu ka meh tur thu i sawi vel a ni lo'm ni? Kha kha chu i chan tawk a nih kha, i ṭawng theih man" ka lo tih khum nghek a, rum lutuk hian min melh ve hraw hraw bawk.

"Suali, u zawng zawngah i la sual ber. Hmeichhia chu ni lo la chuan kut ka thlak duh hial maithei che a ni"

"Enge suala, nau zawng zawngah i la ṭawng theiin i la sual ber ve tho. Meizial zuk ruk ching si, thinrim buai vel lo mai teh!"

"Kal teh, i hmel hi ka hmu hne. I chhe ve si, tu mipa mahin an duh awkawngka lo vang che" tiin min nek per lawp a, kei lah chuan pawr tak hian

"I hre lo ve chiang em mai a! Bialpa ka rawn nei ang a, i hre mai ang" ka lo ti ve nghal a, thinrim tho mah ila ka tihtur ber ka tih tawh avang chuan ka hlim ru tho.

"Pa hmanhmawh teh! Kan leng dawn a nia, hetiang sam nen hi chuan a chhuah chi miah lo vang. Min meh ṭhat sak vat mai teh pa, chuan i fanu saw a sual hle bawk tih hre rawh" tiin ka pa chu a va bia a, ka pa pawh chuan machine la tur chuan a tir ve nghal mai.

Ka khuma ka awm hnu chuan ka chet dan chu ka ngaihtuah let a, sual chu ka inti ve thlawt tho, mahse amah alawm zir lo hmasa le. Ka hna neih te kha ring lo kual vel lo se chuan a sam chu ka chehsak kher ka ring bik lo, ka theihnghilh hman ṭep zawk a nih kha!

Machine ri thawm kara ṭawng mawlh mawlh ri chu ka hria a, chu chu tu dang ni lovin Peksanga ngei a ni. A meh dan turte a sawi zuah zuah a, ka pa leh Peksanga chu chaw ei lai vela inthinrim khum nasa em em si kha an inkawm ngeih leh tawh khawp.

Chawhnu dar 2:00 a lo rik chuan kan in aṭangin tution pe turin ka chhuak a, Two Wheerler Taxi hman tur a lo awm chu a hahdam thlak. Han chawi tam deuh dawn paw'n pawi tihna ka nei lo va, min chhawk zângkhai ve êm bawk a ni.

Traffic jam karah pawh ni se kan kal zung zung thei a, motor dang aiin kan duhna hmunah min hruai thleng rang daih zawk. Ka rin ai daihin khua chu a vawt a, ka kawr lum hak pawh chuan ka duh angin min ti lum thei lo. A khalhtu hnungah ka la chuang zawk zawk a, chuti ni lo phei se chuan vawt tih lutuk avangin ka khur bauh bauh theih ka ring.

Kan Henry Minister-a te in ka thlen chuan pi Rinpuii chuan min lo be leh siam siam a, he pitar changkangi hi chu a nelawm ve thlawt alawm, min be peih bawk sia ka ze mil tak a ni dawnin ka hria.

A ngaite bawkin ka zirtir tur ber Junior-a chu school aṭangin a lo la bang lo va, keimah taka pawh chu nimin aiin ka thleng hma hrim hrim. Pi Rinpuii chuan ngai lo ka ti chung chu coffee min siam lui leh a, mahse hun awl hnawh khahna'n pawh a pawi ka ti leh ta chuang lo.

Kan inhriatna a la rei lo bawk nen sawi tur a vang viau dawn emaw ka ti a, mahse sawi tur leh mi titipui tur chu hre tak a ni. Pi Rinpuii chu nu changkang leh fing tak a nih ka ring a, ka ring sual lo bawk ang.

Kan chhungkaw lam chanchinte min zawt a, ka thil tih ṭhin lam pangte pawh min zawt nual a, keipaw'n a awm chin leh a mawi tawk chu ka lo hrilh ve zel mai. Engkim a kipa kawi leh a nihna dik tak la hrilh chi ah ka ngai lo, nakin lawka boruak dik lo kan neih palh chuan a mualpho thlak dawn em mai.

Amaherawhchu pi Rinpuii chu a dilchhut reuh tawp a, ka lehkha zirna hmun thleng thleng chu ka hrilh ta vek. Chutah Henry Vaia chu Delhi leh Shillong lama a awm ṭhin thu a rawn sawi kai a, mahse Vai fa a nih leh nih loh lam engmah a sawi lang lo. Dik tak chuan ka zawt châk lutuk chu ka za zek zekin ka hria, mahse han zawh phawng lah chu thil mawi a ni lo a tin ni!

Chutia eng eng emaw ni sawi kaia kan titi lai chuan Junior leh a pa chu an rawn lut a, a fapa chu rawn nui lut vur vur mahse Henry Vaia erawh a rawn nui ve lo hrim hrim, thinrim hmel pawh pu chuang lo hian a awm tawp a ni mai.

Thlawhnaa kan chuan dun laia a kawr hak ang deuh hlek kamis dum tak hlarh chu a ha a, a vun zawng zawng nen chuan a va han inhmeh chiang tak em. A che hrim hrim chu ka lo en char char a, a hnung lam aṭang paw'n a che vel chu hmuhnawm tih tham a ni. In chunga a chho tur te chu ka thlir dauh dauh a, amah a sang ṭhain a palian bawk nen a taksa chu model ang zaih a ni.

"Hlute" pi Rinpuii'n a rawn tih ri ah chuan ka harh zawk a, ka awm dan avang chuan ka inthiam lovin ka zak ta hle.

"Ka biak che i hre miah lo va, i duh chuan han chho ve nghal daih rawh. Khi dar 3 a ri dawn hnai a nia, nakinah coffee ka lo dah chho dawn nia" a rawn ti leh zung zung a, keipawh chu in chung lam pan tur chuan ka che chhuak ve nghal vat.

Kan class inpekna hmun tur room ka luh chuan tûmah ka hmu lo va, han koh dawt lah chu ka la zak ve deuh ting tang bawk si. Ngawi reng hian Junior-a chu ka zawng kual a, mahse chu room-ah chuan a hmel reng hmuh tur a awm lo.

Lehkhabu vel a lo inchhawp deuh ṭhupna dawhkan bula ṭhutthlengah chuan ka ṭhu ta ringawt a, a lo kal hun lo nghah mai chu a fuh zawkin ka hria. Chutia tihtur mumal pawh nei lova Junior-a ka lo nghah lai chuan Henry Vaia chu bathroom aṭangin a rawn chhuak ta hlawl mai, a lan dan avang chuan ka ang phuau ringawt.

Towel var thianghlim hmel em em mai chiah hi a kawngah a veng a, a bak chu engmah a inbel lo. A âwm lian leh a duh phiar mawi lutuk mawlh chuan ka mit a la a, chutiang em ema taksa mawi chu ka la hmu lo. A âwm pauh lian ṭha takah chuan a mawi tawk chiahin hmul a ṭo siar siar a, chu chuan sexy ruk riauna a la nei zui.

A dul lah chu Hrithik Roshan ang maiin six pack mawi em em hian a awm a, cher ni miah si lo hian a taksa chu tihrawl mawi takin a khat vek a ni ber. Towel var chhanah pawh a kap chu a pawng ul a, chu zet chuan amah min en tir lo thei ta lo.

Amah ka en chuan ngawi reng hian min lo en ve a, a mit aṭang chuan a mood awm ang tur pawh ka ngaihruat thiam lo. Thip zetin min en ti dawn ila a ni si lo, mak tih hmel tak pawhin min en chuang bawk si lo, min enna avang chuan ka sa vek theiin ka hria.

A hmai ruangam leh a hmel hrim hrim chu a ṭha thlawt a, tu hmeichhia mahin hmelchhia an ti lûl lo vang, an ti dawn lo chiang lutuk. Chutia suangtuahna nena ka en vawng vawng lai chuan aw a rawn thian kharh a, ka harh ta zawk mai.

Ka ṭhutna siam remin ka hawi sawn vat a, ka kawr tlang sih neuh neuh loh chu tih theih ka nei rih lo. Junior-a chu lo kal thuai thuai se ka ti a, mahse a lo la kal mai bik si lo, Henry Vaia nena room khat chauha awm chu ka huphurh, chutah ruak deuh thawin a la awm zui.

Nui ri deuh hak hi ka hria a, min nuih tih pawh ka hrethiam nghal. Ni e, he ka mit zek zawk vang hian kei LALRINHLUII hi nuih tlak ka ni. Ka awmna lamah a lo kal phei tih hriat tak hian thawm a rawn awm a, mahse kei chuan ka lo hnungchhawn hmak tawh thung.

Ka hmaa wardrope chu ka en ta ngawt ngawt a, ka hawi sawn leh a nih chuan Henry Vaia chu ka hmu leh dawn tih ka chiang a ni. Chutia wardrope kan en ngawt ngawt lai chuan ka thil en zawnah kher chuan a lo ding a, a awm dan avang chuan a hmel chu ka en leh ngei ngei a ngai ta.

"I hawi sawn dawn em? Ka inthlak dawn nia, i duh chuan min en reng thei tho" nuih insum hmel zet hian a rawn ti a, kei chuan ngawi rengin a hmel ka lo la en kar thung.

"I thu thu le!" tiin min hnungchhawn a, a Towel ven chu a pawt phelh ta mai, ka va han hawi sawn chiang ber kher em. Ka thil hmuh avang chuan ka awm dan a dik lo nghal vek a, a lum tih vangin ka thlante chu an chhuak mai dawnin ka hria.

"I mawl thei em mai, Health Minister lai i ni ve a ni lo'm ni? Engvanga khatianga che kha nge i nih?" ka ti ta vak vak a, hnungchhawn tawh mah ila ka mitthlaah a mawng tihrawla khat leh ngo mawi tak mawlh mai chu a lang leh tlat tawh.

"I hawi sawn duh lo a nih khâ, i hawi sawn duh tâk si lovah chuan ka inthlak lai min en duhah ngaiin inthlak ka tum mai alawm" ngeiawm deuh hian a rawn ti a, chutah kei chuan rang zet hian

"A teuh lo mai, ka en duh vel hauh lo che. A sawi pawh i inthlahrung lo em ni? Hlawh nei dawn pawh ni ila ka en buai vel peih lo che" ka rilru ni lo pui chu ka sawi chhuak ta ringawt a, ani erawh a rawn nui daih.

"Kha kher kha chu dawt a va ni deuh ve, ka lo chhuah lai pawhin mit tla lek lovin min lo en a nih khâ, nangnu te reuh hian pian nalh min ti hle a ni lo'm ni? Mi rilru hi ka chhiar thei a nia, zep duh suh" a rawn ti ve ṭeuh nia, em em hian a!

"Ve a che! Sawi tawh suh, ka lo en palh mai mai che a nih kha! I pian kha eng emaw ni a an nen nen, khatiang pian ṭhing lutuk kha tu hmeichhia ma'n nalh an ti ma lêk ang" ka sawi tur hre tawh lo chuan ka ti leh ta ringawt, dawt pawh ka sawi chiang hle.

"I mit ka taksa peng hrang hranga i vah kual tir lai vel kha ka hmu reng che alawm, suangtuahna nena ka taksa i thlir lai te khan ka en reng che asin" tiin ka hmaah tak chuan a lo ding a, chutah erawh thawmhnaw pawh a lo inbel fel vek tawh thung.

"I ninawm, khatiang thu ho lutuk kha min sawipui reng suh, sawi tawh miah suh. Chuan khawnge i fapa hi!? A va lo lut har ve? Nang nen hian inbe reng hman pawh ka ni lo, zirtir zawh vat vata haw daih ka duh" ka tih chuan

"Room leh lamah sawn a lo nghak rei tawh ngawt ang che, nang lah chuan Maths zirtir lova ka taksa thlir i thlang tlat zawk bawk sia" a rawn ti ta mai, a thusawi avang chuan ka ding zui nghal. Kei hi room dik lovah ka lut tihna em ni? A ni thei lo.

"Enga!? Engatinge hetah kan zir dawn loh? Niminah pawh hetah alawm kan zir" mak tih zet chuan ka ti chhuak hluai a, bang bo tak ka ni.

"Vawiin aṭangin room piah zawkah sawn in zir tawh dawn tih ka piin a la hrilh lo che a ni mâw? Junior-a khan kan room-a zir hi a duh lo va, kan sawn ta mai" aw dam zet hian a rawn ti a, mahse kei chu ka thinrimna a zual sauh.

"I mak a! Sawi ve vat ta che, nichin aṭang khan min hrilh tawh tur che alawm, i fapa chuan min lo va nghak rei dawn êm, ka tlai leh phah vek dawn a nih hi" tia vin hrepin ka Shawl bah lai chuan ka vawm pawp a, mahse ani chuan a hmai zawnah a lo man nghal chat.

"Min zawt hleinem, chu bakah keimah hi min hmu châk hrim hrimin ka hria" a la rawn ti ngam nia, a va han zah theih loh thlak ve le!

"Awi awi awi, Health Minister ka ni e te chu i ti ve awm si a, mi hnial i va han hrat turru em. En pawh min en tawh suh, nang be tur che hian hun pawh ka nei lo" tiin kawngka lama chu a pan a, chutah Henry Vaia bawk chuan

"I Shawl hi i duh tawh lo em ni?" a rawn ti a, kei chuan rum eltiang mangkheng hian ka lo melh hrep. Nuih insum hmel deuh chuan min lo en a, kei erawh chhe tê them pawhin ka nuih a za ve hauh lo.

"Nei rawh, khatiang i sik hnu ka duh tawh pit lo, min lo be tawh miah suh" tiin ka chhuak tau nghawng nghawng a, a nui ri hawk thawm chu kawgka pawn ka thlen chuan ka hre pha tho.

Junior-a awmna room chhunga ka luh chuan amah hian a lo chawk malh malh a, ka khawngaih reuh khawp mai. Kei lah chuan room dik lovah ka lo awmsan char char a, chutah a pa nen kan la inbauh hrep zui. Ka lut thawm a hriat chuan min lo en vat a, nui hmel min hmuh chuan ka nuih let ve nghal.

Naupang hi chu ka ngaina a, ka thinrim lai pawh ni se an bulah chuan a ranga rangin ka mood ka thlak nghal thei ṭhin. A chawh tawh sa ho chu ka endik zung zung a, ka rin ai daihin tihsual a lo ngah. A tihdik loh lai leh a pattern te chu ka hrilh a, ani paw'n thuawih takin a ti ve leh nghal mial mial.

Chapter 9

Hun a liam a, tunah chuan tuition class pawh kar khat chhung zet ka lo pe ve leh der tawh. Junior-a a fel a, a naupan ngaihtuah chuan a taima zek. Home work ka pek hrim hrim tihhmaih emaw tih loh emaw a nei ngai lo va, mahse a thiam vek zel tihna a ni lo.

A tirah kha chuan a thiam zung zung dawn emaw ka ti a, mahse kan han inzirtir ṭan tak tak chuan ho te te tihdik loh leh thiam loh a ngah ta viau.

A thiam loh laite hrilha chawhpui chu hrehawm tiin ka ning ngai lo va, pawisa ka hmuhna peng pakhat a nih avangin ṭha takin ka zirtir ṭhin zawk.

Tin, amah tê hi a ṭawng duhin a hawihhawm reuh em em a, naupang thuawih thei tak a ni. Ka haw dawn te hian ṭawngkam puitling deuh hian min thlah ziah a, a nuam ka ti veng veng zel. A hneawm lutuk loh na'n tiin thil dang daih te ka sawipui ṭhin a, kan pahnih chuan kan hlim dun thei khawp.

Ka rin loh lam takin lemziah lam a lo tui a, a kum phû lovin a kut chhuak a la mawi reuh em em zui. A school kalna hmasaa lawmman a dawn ṭhin thute a sawi a, engkim min hrilh ve bawrh bawrh avang chuan amah chu ka ngainat zual phah.

A school kalna hmasa aṭanga an insawn chhan ka zawh chuan mi pawh chhang lawk lo hian a ngawi vang vang a, a ngawih vang vang hnu chuan a chhan dik tak chu a rawn sawi ta. A thusawi lai chuan ka lo ip châwi a, a beng hriata a pa Vai ka ti lo chu ka lawm letling hle a, a sawi vang chu nge ni Vai tih ṭawngkam hman chu ka khawr ta riau.

Junior-a'n a pa Vai a nih loh thu leh ni atan pawha a duh loh thu a sawi aṭang chuan ṭawng lamah ka insum hram hram a, a pa chanchin kan sawi ri ngai mang tawh lo te chu a lawmawm ka ti hlei hlei, kan sawi ri a nih vaih chuan vawi khat tal chu Vai tih ka lam dawn tih ka chiang.

"Chutiang taka Vai tih haw si chu engatinge Henry-a hian min hauh vak vak ngai loh le? A duh chuan police lam thleng a ruai thei awm si a" tih te chu ka ngaihtuah chhuak a, ka bula huat hmel lo taka a awm ṭhin chu ka mak tih a tling ta hle.

Kha ni, a mawngtam ngo mawi tak mai ka hmuh tlai aṭang khan inhmuh pawh kan inhmu leh mang tawh lo va, kar khat chhung kan inhmu ta lo chu ka thaw a veng hawk dawn emaw ka ti a, mahse a lo ni teuh lo mai.

Ka rilru leh mitthlaah a hmel a châm reng a, a chhan lah ka hre hauh si lo. Ka beidawngin Engzuali te ka phone thul, mahse hrilh chi nia ka ngaih loh avangin ka hrilh lo leh nge nge zel.

Ka hrilh a nih chuan duh emaw ngaizawng emaw min ti ang a, kei lah chuan kan Health Minister Henry-a chu ka ngaizawng lo nasa ropui mai bawk si.

Kar tir a ni leh tawh a, tlai dang ang lo takin khua chu a dul leh raih tawh. Ruah chu a sur leh mai ang tih ka hlau ru hle a, ruah sur hma tala kan in thlen chu ka tum ran bawk.

Junior-a chuan a tihtur ka pek chu a ti malh malh a, Maths tution class ni mahse English subject chu min zawt leh thut thut ṭhin. Keipaw'n ka hrilh hreh hran lo va, english subject erawh a man chakin a thiam awlsam thei khawp, vawi khat bak hrilh a ngai ngai lo.

Chutia kan inzirtir mawlh mawlh lai chuan Henry-a chu a rawn lut hlawl a, amah chu en pawh ka lo en rei duh tawh lo, a chhan chu mualpho thlak khawpin ka lo en leh reng palh ang tih ka hlau, ka duh tawh teuh si lo.

A fapa bulah chuan a lo ṭhu ve a, Junior-a erawh naupang fel tih takah a buai phah eih lo. Henry-a chuan a fapa sam chu a chul sak deuh chhen a, a fapa chu a duat hmel ngawih ngawih.

Room chhungah chuan mi pathum lai awm ve mah ila tûmah kan ṭawng lo va, Junior-a che thawm vel chu ri awm chhun a ni mai. Ka thei lo, Henry-a chu ka en lo thei lo a ni. A kamis var hak ban chu a thlep tawm chho ve ve leh a, necktie pawh loose deuh takin a la awrh bawk.

Coat erawh a ha lo va, mahse a lan dan chu a pain a zahawm em em tho. Ka bula a ṭhu miah lo chung chuan min thunun hneh em em a, a mi uap a nat lutuk avang chuan ka thawk thlengin a buai leh vek.

Chutia thawk pawh dik hlei thei lova ka lo en lai chuan a che sawn hrut a, mahse min la en chuang lo hrim hrim. Min be lo leh min en miah lo hian room aṭang chuan a chhuak a, zep lovah chuan ka rilru chhungril chu a lo na ve ringawt.

A nat chhan lah ka hre lo va, hriat tum paw'n ka ngaihtuah zui peih lo. Rei lote hnuah Juice leh chhang vel nen hian a lo lut leh a, chutah chiah chuan kan mit a intawng ta chat mai.

Rang takin ka mit chu ka la sawn thuai a, inen rau rauah hi chuan ka hneh dawn lo tih ka chiang, ani tluka mi en nghal hi he khawvel ram zauah hian ka la hre lo.

Ngawi rengin a che vel chu ka lo chik reng a, no ah chuan Juice te chu a thli chhuak a, ka mit taka min en chung hian Juice chu min lo pe ta. Keipawh chuan nui seih hian ka lo ban a, ngawi reng leh mi pawh nuih let ve miah lova min en avang chuan ka nui tawp nghal riai riai.

No ka lak thlak rual te chuan Junior-a chu ka en ta daih a, a fapa chu kan inkarah awm lo se chuan ka insum zawh theih pawh ka ring lo. Henry ker kura chu vin hrep ka châk a, mahse han vin hrep ringawtna chhan tur ber a awm hian ka hre leh tlat lo. Class ka pek chhung zawng chuan a lo awm ve run a, chu chuan ka awm dan a tidik lo vek.

"Vawiin chu ka lo thlah ang che" class ka pe zo room ka chhuahsan dawn lai takin Henry-a chuan a rawn ti a, min biak hmasak avang chuan ka rilru chhungril chu a nui nghal ver ver a, mahse nuih chhuah kher ka tum lo.

"A ngai lo" inthlahrung hmel deuh chuan ka lo ti a, mahse min thlah mahse pawi tihna ka nei miah lo, a bula awm chu ka châk ru tlat a nih chu! Kei LALRINHLUI hian enge ka hriat tâk ni!

Ani chuan min chhang let tawh lo va, kei aiin room chu a chhuahsan hmasa zawk ta bawk. In hnuaia ka chhuk rualin Junior-a chu a lo chhuk ve nghal a, chutia kan pahniha kan chhuk thla lai chu Henry-a chuan a tui in chawl meuhin min lo en reng a, ka ke pen thleng chuan ka buai vek dawnin ka hria.

Pi Rinpuii paw'n min lo be leh siam siam tawh a, a pasal pawh chuan min lo be zeuh zeuh a, Henry-a tih loh chu an bula awm a nuam vek. Junior-a chuan a tih ṭhin angin ka chhuah dawn chuan min lo bye leh thlap a, ṭawngkam mawi takin min thlah zui bawk.

Pawn ka chhuah chuan Bolero chu a lo rum ri vut vut tawh a, Henry-a chu engtik laiin nge a lo chhuah hman pawh ka hre lo. A hnung kawngkhar chu pawh hawn ka tum a, Henry-a chuan a ṭhutna aṭangin min lo en kur mai. Keipawh chuan ka tum thlakin a hma kawngkhar chu ka hawng ve leh mai a, mahse kan la inbe ta chuang lo.

Kan in lam pana kan tlan chhung zawng pawh chuan kan la ṭawng chhuak lo ve ve a, min be miah lo chu mi pangai tan chuan a em em ve deuh ka ti tawh. Ka lakah thinrimna a nei a nih te ka ring ta rum rum a, mahse a huat zawng pakhat mah ka ti bawk si lo.

"I rawn riah chilh thei ang em?" minute tam fê kan ngawih hnu chuan a rawn ti thum dam dap a, min biak thut avang chuan a lam chu ka hawi phei nghal.

"Kar lehah khian an exam dawn a" a rawn ti leh a, min be mahse min la en miah lo thung. Kei chuan ani chu ka lo en haw a, riah chilh lam tak chu ka lo la ngaihtuah ngai lo hrim hrim.

"Ka thei lo vang" kan hma lam en ngur chuan ka ti a, riah chilh chu a awmpui hna mah mah ka ti a ni.

"Thei rawh" a rawn ti leh tawp a, a aw ah chuan thinrimna emaw lungngaihna emaw pawh a lang lo va, chuvang chuan thu min pe nge pe lo tih pawh ka hre thei lo.

"Ringawt ṭhin che hian a! Rawn riah chilh tak tak dawn ila chuan min hnawt chhuak leh vat mai ang, neuh neuh ka ngah si. Chu bakah ka chhungte paw'n an phal lo hrim hrim ang, chutah thisena inzawmna pakhat mah kan nei bawk si lo" a ṭawng thei zawk na nâ na chuan ka ti leh ta ṭeuh.

"I chhungte chu ka dil mai ang, ka dil chuan an phal mai pawh ka ring. Eng chu nge i buaina? Enge neuh neuh i tihawmzia kha?" min en miah lova min biak zel avang chuan ka thinrim mai dawnin ka hria.

"Ka hahthlak, sawi tam vak a ngai lo, ka hahthlak a ni tawp mai. Pi Rinpuiite nupa hmaah ka intimualpho leh ang a, Junior-a paw'n min zah lo vek palh ang. Chu bakah ka lo riah chilh te chuan awmpui ka ang awm em mai, ka duh lo"

"Ka chhungte lam ngaihtuah suh, vawiin tlai chu in inah ka lo lut kawi zawk dawn a nia" a rawn tih avang chuan amah chu ka en leh ta nge nge a, ani paw'n min lo en zeuhin hma lam chu a hawi zawm leh nghal.

"Engvang ringawt chuan maw kan inah i lo luh dawn? Ka duh teuh lo mai, lo lut reng reng suh" ka ti thuai thuai a, ani erawh a lo ṭhen suk duh lek chauh.

"Enteh Henry, ka duh miah lo tak tak a nia, duh leh keima'n ka lo dil vek mai ang, chuvang chuan lo lut reng reng suh ang che" ka tih leh chuan

"Engatinge in ina ka luh chu i phal loh em em a? Hmeichhe dang chuan an ina lut turin min sawm lâwm lawm zawk ṭhin a sin" a rawn ti ve ta kauh mai, insawi luck ve vel lutuk, sawi lo mahse a luck dawn tih chu ka hre vek tho.

"A chhan chu inngaizawng emaw min tipalh ang tih ka hlau alawm, ka chhungte hi i rin ang an ni lo vang, ka nau ngat phei chuan enga mah hmain min chhaih leh vak vak ringawt mai ang. Chuvang chuan lo lut lo vang che, i lo luh luih vaih chuan a ni mai"

"Lo inngaizawng ta pawh ni ila enge? Kei chuan belh chian che ka châk ṭan riau asin, nang lah chuan min hnar dawn lo nasa bawk si" a rawn la ti ngam a nih chu! Zak thei lo leh lutuk!

"Awi awi awi, em em che hian a! I suangtuahna khawvel mai mai bak va ni suh, min ngen lawm lâwm mah la nang ang mipa senior uchuak hi ka bialpa i ni lûl lo vang, chutah pathlawi i la ni zui. Awi kei hi zawng pathlawi tawna vul turin ka mawi mawlh lo, a tum pawh rawn tum buai duh suh" ka tih bawrh bawrh lai chuan a ding deuh thut a, ka hawi chhuah chuan kan inkawtah kan lo ding leh reng tawh.

"Chhuk ang le" rawn ti supin motor kawngkhar chu a hawng a, keipawh chu ka chhuak ve ta vat. Kan in lam pan chuan a rawn kal ta tak tak a, ka mangang nghal hle.

"Enteh Henry ka ti tak tak a nia, kan inkar engmah hre map lovin min chhaih leh chiam dawn tih ka hria, a chhan chu kan inah mipa ka la hruai lut ngai lo. Chuvang chuan lo lut lo mai teh, nuam pawh i ti lo vang" a kalna tur dala ban phar hluai chung hian ka ti ta tawp a, kan in kawngka kan hnaih tawh bawk sia ṭawng pawh ka ṭawng ring ngam lo.

"I lawmawm reuh" rawn ti daihin min kal pel a, a kalna tur ka lo dan ve na te chu su chhe hne tak a ni. Thaw hawkin a kal vel chu ka en zui ta ringawt a, door bell a hmeh ri ah chuan harh chhuak thutin a lam chu ka pan ta thuai thuai.

"Ehêeee, lo...lo lut rawh u! A va'n mak teh daih ve, in pahniha ka hmu dun che u chu, lo lut rawh u" kawngka a lo hawn rualin ka nu chuan a lo ti a, a ṭawng vel duah kher chu ṭul ka ti hran lo hle. A inneitu zawk chu Henry hnungah chuan ka kal a, a zak vel miah lo chu ka ngei tawp.

"Eu eu eu, enge a awmzia? Pu Henry-a chu enge kan inah i rawn tih ve dawn a? Lo ṭhu rawh lo ṭhu rawh, a va mak teh daih ve" min hmuh rualin ka pa chuan a lo ti ve leh nghal a, Health Minister a nih avanga an zah ru em em chu awm ka ti ve tho, kei ve thung lah chuan ka zah lo nasa mai bawk si.

"Nia hei Hlutei hian ka fapa Maths tution a pe ṭhin a, chu chu rawn sawipui lawk che u ka duh maw le" a ti dek dek a, ka nu chuan hlauhthawn hmel fê hian

"Kan fanu hian in pawi a sawi em ni? I fapa chu kut a lo thlak em ni? Awi LALRINHLU i kut ram lutuk hi chu sim vang vang tawh rawh ka tîh ka tih che khâ" a rawn ti nghal zawt zawt a, min la en hraw zui, ka nu ka ngei dan chu pui tak a ni ringawt.

"Bawihi pu Henry-a te inah tution i pe tih i sawi bawk si lo va, i va zep thei ve, i kalna hmun te chu min hrilh ve tur che alawm" ka pa chuan a rawn ti ve nghal bawk.

"Min zawt hleinem, hna ka neih pawh in ring lo va, tunah ti hian in awih fumfe chauh a nih hî" ka lo ti ve khâ kha a, min awih tawh ngei ka ring bawk.

"Chuan Hlutei hian i fapa chu kut a lo thlak tak tak em ni? In pawi chu a sawi em han sawi teh" ka nu bawk chuan a rawn ti a, ka ning ve tawh bawk nen

"Nu!!!!!" ka lo ti vak a, thil engmah hriat chian hmaa min puh chhe em em ringawt nghal chu ka kham, a ri ka hre hne.

"Ni lo, chutiang lam a ni lo. Eng lo a nia, kar leh maiah khian ka fapa te an exam tawh dawn a, ka fapa exam chhung chu Hlutei hian min lo riah chilh sak theih ang em tiin ka rawn dil tawp che u a nih hi" Henry-a chuan a rawn ti ve thuai a, a thusawi zet chuan a ṭhawng chiang hlawm hle.

"Riah chilh maw!?" ka nu leh pa chuan an rawn tirual ṭhawt a, Peksanga a awm lo mah mah zawk, awm ngat se chuan a zak leh dawn der si lo.

"Aw riah chilh se ka duh a, hlawh lamah chuan buai a ngai lo. Ka fapa ka ngaihtuah bawk si a, in hmai pawh zah zo lovin ka lo dil tawp mai che u a nih hi ka pi ka pu" Henry-a chuan a rawn ti dam leh diai a, a aw chu hriat a nuam ka ti, mahse ka bulah chuan chutiang aw dam tak chu a hmang ve ngai hauh lo.

"Aaaa, kan va hrethiam lo ve le, amah Hlutei berin a huphurh lo te a nih chuan duh leh rawn riah chilh mahse pawi kan ti hleinem, a sawmtu lah i zahawm bawk si" ka pa chuan a rawn ti a, ṭawng tuma ka an lai takin Henry-a thawt thawt chuan

"Hlutei chuan a duh alawm, kan lo haw lam khan a châk thu pawh a sawi nasa mai" a rawn ti a, ka va ngei turu buru tak em. Ka nu leh pate awm lo se chuan ka ṭim hrep ang a, ka hrawk chiam tawh ngei ang.

"Awihawm loh" ka lo ti thawp sat a, ka nu leh pate hmuh laia zah lo tak leh ngam taka biak chu a mawi lo ve det.

"Awi Hlute i thei dawn em ni? Mi hausa ina riak tur phei chuan i zia kha aw, i zia mawlh kha, i paih ṭhen loh chuan keini i chhungte hi min timualpho lutuk palh ang" nui chung hian ka nu chuan a rawn ti a, Henry-a awm lai chuan min puan zawh vek a tum zawk a ni ang ka ti ta.

"Hlute riah chilh chu i duh tak tak em? I duh leh duh loh sawi la, keini chuan kan phal vek a nia" pangai deuh hian ka pa chuan a rawn ti ve leh a, Henry-a pawh chuan min lo en reng.

"Ka hre lo pa, ka duh leh duh loh pawh a ni lo. Min mamawhna a sang bawk si a, riah chilh chu ka hnial lo mai ang e" ka ti ve ta ringawt a, Henry-a chu a hahdam huai hmel nghal hle.

"In chhungkaw chungah hian ka lawm khawp mai, an exam laia ka zin ngei ngei ngai lo se chuan riah chilh tir hi ka tum bik miah lo, ram aiawha ka chhuah a lo ngai leh thut bawk si nen min hrethiam hram dawn nia" Henry-a chuan a rawn ti a, a zin dawn thu ka hriat chuan engtin emaw ni taka hnual rukna ka nei.

"Ni e, ram chhungah pawh a lawk ber pawl in ni a, in hna thawh avang hian zin chhuah reng te pawh a ngai ang. A hrim hrimin tun lai COVID-19 hri hi a pun belh leh tawh an ti a, engtia han tihreh chi nge maw ni le" ka pa chuan a ti a, ka nu chuan min lo kheuh zeuhin thingpui siam turin min signal a, keipawh ka tho ve mai.

"He hri hi chu a reh mai mai ka ring tawh lo, inkaichhawn a awlsam si a, a nuna kan nun thiampui hi a ngai tawh ni berin a lang. Min tiṭhuanawp zawnga he hri hi kan hlau reng a nih chuan rei lovah kan ram hi a chhe thuai ang, hlauh loh tur ka tihna lawm pawh ni lovin hlau leh fimkhur em em chunga hmasawn tum tur ka tihna zawk a ni e" Henry-a chuan a ti nghet deuh charh a, a sawi dik ka va ti si em. Choka lamah awm mah ila bang a awm ve loh avangin an ṭawng ri chu kan hre pha vek a, an hmel pawh kan hmu thei.

"In inngaizawng chiang mai" nui ver ver chung hian ka nu chuan a rawn ti sep a, dawt chiang bal a nih avangin ka nu chu ka melh hrep.

"Kan inngaizawng hauh lo ka nu, i ti awm ang lo thei lutuk, kan ngaihzawn phak pawh a ni lo" ṭawng rin hlau tak chuan ka ti a, ka nu chu ka la melh rum hle.

"Khatiang khan min melh suh Hlute, ka hre vek che u. I awm danah khan a bulah chuan i lai a, i duh ru reng tih pawh ka hria. Chutiang bawkin ani pawh sawn a ngaizawng chiang che alawm, ka tawn hnu a nia ka hrethiam vek" a rawn ti leh a, a thusawi awihawm loh lutuk avang chuan ka â thei mai dawn.

"Nu sawi tawh lo teh, amah te reu reu sawn a lo hre pha palh ang e, i thusawi kha a tak tak a ang ropui si. Chu bakah nula hmelṭha leh induh tawk ve tak ka nih hi, pathlawi zunah mai mai uai ka tum hauh lo"

"A hriat ngawt loh, kan Health Minister zunah sawn i uai ṭan der tawh zawk lo mâw? Pathlawi a nihna tak te saw alawm nula te'n an duhna chhan, i hre ve leh pek na nge?"

"Ka nu!!! I hneawm em mai, khatiang lam pang ringawt sawi tawh lo teh, i sawi leh a nih chuan ka pa ka hrilh vek ang. Chuan i sawi ang khan eng rilru mah ani lakah sawn ka pu lo, min ngaihbel mai mai a nih kha!"

"I duh tâwkin i pa bulah chuan min hek rawh, ani ni lo mipa dang hmangaih ka nei lo tih a hre chiang ve em mai a!" nui hek hek chung hian a rawn ti a, chhan let dan tur pawh ka hre tawh lo.

"Ka lo rin lawk ang ngeiin min lo ringhlel a, Peksanga awm phei se chuan ka va han zak lehzual dawn tak! A hrim hrimin bialpa leh pasal nei tur hian min tur chhen tawh suh u, ka nei tak tak mai ang" kan ngawih deuh vang vang hnu chuan ka ti leh a, ka nu erawh a lo nui ri hawk thung.

"Neih te pawh i hun ve tawh alawm ka fanu, chuan i thlan thiam hmel fû saw, pu Henry-a te chu a rin tlakin a rinawm phian ang" ka nu chuan a lo ti leh a, kal sawn hmak ka tum chu min lo la pawt ding hman hram.

"Kha nangmah ngeiin thingpui hi va pe rawh, chuan mark i score sawt a ni mai, hmel hlim sâng khan i pe dawn nia" a rawn ti a, Tray chu ka kutah a rawn nghat nghal hmak a, ani erawh bathroom-ah a lut ta daih.

Kan sitting room lam ka va thlen chuan an lo titi tui hmel hle a, ka pa chuan thingpui chu a la mai a, Henry-a ker kur chuan ka mitah tak mi a en leh bik kher tawh. Ka pa ka hnungchhawn lai tak a ni bawk a, ka lei chu ka chhuah khum vak ringawt.

Nuih pawh min lo nuih let eih lo va, ka chet dan avang chuan ka va han inchhir leh si em. Ka Tray ken laia khawn pawp chu ka duh rum rum a, ka pa a awm ve kur bawk si. Zak leh thinrim zetin choka lam chu ka phei a, Tray pawh dawhkanah ka dah ring ṭha khawp mai.

Ka nu leh pa chuan chaw eiah an sawm nghal a, mahse a lo duh ṭhak lo. Duh chi pawh a ni bawk lo, vawi khat len luhna ina chaw ei nghal te chu a mi an loh thlak em mai.

Ka nu chuan inla zei deuh hian a haw tur chu thlah turin min ti kher a, ka melh leh hrep tak kha! Chutia inthlah tura kawngka lam kan pan lai chuan Peksanga a rawn lang hlawl a, ka bula mi chu a en duh hle.

A chhoh en deuh vawng vawng hnuah chuan nui lui sakin a hawi sawn a, tunge ka bula ding chu a hre tawh te pawh a ni ang.

Ka hnungah chuan a rawn kheuh zeuh a, ka hawi let chuan a lo khi nghal ver ver. Ka luh leh huna min chhaih vel dan tur mawlh chu ka ngaihtuah a, ka chhang buai peih lo lawk a ni.

"Ka lawm e" motor chhunga lut mai lo chuan a rawn ti thawp sup a, min en reng bawk. Chutah ka dinna lamah chuan a rawn tawlh hnai a, enge tih a tum chu ka hrethiam hauh lo.

"I thingpui siam pawh a tui e" rawn ti lehin ka biang sira sam chu a rawn zut a, ka sa chhuak vek ni maiin ka hria. Chutah ka sam aṭang chuan chini a rawn la ta vâ va mai, a va han zahthlak ngai ve le!

"Ka kal a nia, chaw ei tui le" a rawn ti leh a, ka chhan letna pawh nghak chuang lo chuan motor chhungah a lut zui nghal daih. Ka dinna ngaiah ka la ding reng a, a tlan chhuah pah chuan pa deuh hian min lo nuih leh kher bawk.

A tlan liam ta maw tihah ka kut pahnih chuan ka biang chu dawm vat a, a zut zawh chiah ka sam chu ka zut nawn leh sak. Ka thinte chu a phu dawt dawt a, a rawn chhuak thei mai dawin ka hria.

Rilru dik zân lo chuan kan in lam chu ka pan a, ka hlauthawng ti dawn ila ka hlauthawng bawk si lo, ka awm dan chu ka hrethiam tawh nek bik lo e a!

Chapter 10

Hlauhthawn leh beisei ruk ang ngeiin in chhung ka luh veleh Peksanga chuan min lo chhaih zawt zawt a, ka nu lahin a lo tuihnih ve leh zel zui. Ka pa erawh engmah a sawi lo va, min chhaih ve lo hrim hrim.

Peksanga chuan ni lo pui puiin min sawi a, Henry-a te ang daih daih kan ina mipa ka hruai lut chu mak a ti a ni. Ka nu chuan inngaizawng treat ang chiahin min treat char char a, min fiam chhen a, mipa laka awm dan tur te min hrilh leh vak vak bawk.

Henry-a nena inngaizawng tura min sawi vel tlat chu a buaithlak, kan inngaizawng lo nasa mai bawk si. Ani chu pathlawi a ni a, pathlawi bialpa nei tur chuan ka inphal rih thlawt lo, ṭha ka inti ve em a tin ni!

Zan lamah Engi nen kan inbe leh a, mahse zan dang aiin kan inbe rei lo. Henry-a nena kan inhmuh zel dan chu ka hrilh a, ani pawh ka chhungte ang bawkin a lo phur nasa mai.

Ngaizawnga be ṭha tur te'n min rawn hrilh chamchî a, ka lo nui mai mai thung. Pathlawi a nihna chu lo dah ṭha ta ila, ani leh kei kher chu kan inkawp theih hi ka ring lo hrim hrim.

Kei ka ṭawng theiin ngawih mai mai ka thei lo va, ani erawh ka nih lohna ang chiahin a ngawi thei em em thung. Engi chu engkim ka hrilh lo va, han hrilh vek pawh kha a fuh chiah bik lo. Ka hrilh chuan thil ni lo lo min sawipui leh ang a, ka buai phah mai mai.

Chu zan ka mu tur chu ka muhil thei lawk lo va, ka mitthlaah chuan Henry-a hmel chu a awm reng mai. Hmangaih hmel taka ka sam a zut te, aw dam taka min biak lai te chu ka mitthlaah an rawn cham reng a, a tlan chhuah dawna pa deuh taka min nuih suk thlengin ka mitthlaah chuan a awm a ni.

Ka mutui bawk a ni ang mumang nuam tak ka nei a, ka mumangah lehzel pawh Henry-a chu ka la hmu hram. In pakhat fai deuhah hian kan lo awm dun a, kan awm dan chu nupa ang mai kan ni. Duat leh hmangaih hmel tak hian min kuah hlun hlun a, a awm khauh tak leh lian takah chuan min kuah bet ran bawk.

Chutah a lam hawi turin min kuai her a, a hmelṭhatzia chu ka sawi thiam lo zawk. A hmelah chuan a upatna pakhat mah a lang lo va, pathlawi a nihna te chu amah ka hmangaihna zualna a lo ni daih tawh.

A hmui lum nuam leh nel thep chuan min rawn fawp a, keipaw'n a mi fawhna chu ka lo chhang let ṭha kher mai. Tin, chutiang chuan infawh chu a nuam ang tih ka lo ring pha ngai lo va, ka first kiss rutu chu ka duhthusam mipa ngei a ni bawk.

Kan infawh zawh chuan lungchim zetin min chhuk en reng a, ka nuih avang chuan min lo nuih sak bawk. A biang chu ka kut pahnihin ka dawm a, ka chhoh en ran a, mahse fawh tuma ka dingdihlip lai tak chuan ka harh ta daih.

Ka mit ka men chuan ka nu hian min lo sawi deuh nawk nawk a, men pawh meng ṭha peih lovin ka phone chu ka hmet eng a, dar 8 a lo ri diam tawh. Mut kham lo zetin ka tho a, ni lo, mut kham loh vang ni lovin mumang kham loh vang a ni zawk. Intifai tura bathroom ka luh lai te chuan Henry-a bawk chu ka ngaihtuahnaah a rawn awm leh a, a chhan erawh ka hre miah lo thung.

Ni e, dik taka sawi chuan ani chu pathlawi ni eng ang mahse a hmelṭhain a pa thlawt alawm, a kum lam tam deuh tawh mahse kum upa a nihna a hriat loh hrim hrim. A ngo a, a hmelṭha a, a sang a, a pian a nalh tel zel bawk nen eng thuamhnaw pawh inbel se inhmeh vek thei tur chi mipa a ni.

A dik, ka nu sawi kha a dik chiang a ni. Kei LALRINHLUI, mahni lu zo ve tak, hmeichhe induh tawk ve tak leh chapo ve em em hian Henry-a hi ka veiin ka duh chiang alawm.

A hmate kha chuan ka duh lohzia nasa tak takin ka sawi a, pathlawi zuna uai ka tum lohzia te nasa tak takin ka sawi bawk a, mahse nimina a chet dan leh nizan maia ka mumang avang khan Henry-a hi ka duh tih ka hre tawh.

Amaherawhchu ka duh tih ka inhriat chhuah avanga ka chhungte hrilh kher ka tum hauh lo, amah Henry-a phei chuan hre lo hrim hrim zawk rawh se, a hriat vaih chuan min ngainep dawn lutuk. Ka ṭhiannu Engi erawh ka hrilh ve maithei a, mahse ka rilru a la insual nasa khawp.

Tlai tin chuan Maths tution chu ka pe ta ziah a, nuam pawh ka ti pangai tawh hle. Henry-a erawh ka hmu mang tawh ngai lo va, ka haw dawn pawhin a hmel chu zawng ru ṭhin mah ila ka hmu ngai chuang lo.

Zah pawh dawn lovin Junior-a chu ka zawt tawp a, mahse ka zawh dan key erawh a dang daih. Junior-a pawh chuan an buai thu leh zan lamah chiah a lo haw ṭhin thu chu min hrilh ve mai a, hmuh theih chi zia zângah ka ngai ta lo.

Pi Rinpuii pawh a ṭawng duh ngaiin a la ṭawng duh reng a, thil sawi dun nasa thei tak kan ni. Amah ang rual chu ka kawm theih ka inring ngai miah lo, mahse pi Rinpuii chu ka kawm ngeih thlawt a ni. Min be peih em em a, min nel ve tak takin ka hre bawk.

Chutiang bawkin Junior-a chuan min nel em em a, a school kal chanchin zawng zawng min hrilh vek zel chu a mak ka ti hman a, mahse tunah chuan nuam ka ti tawh. A hun hman dan min hrilh loh chuan ka khingbai tlat a, ka awm thiam tawh lo zawk hial a ni. Junior-a tê chuan Rap music leh keini music ngainat ang chu a ngaina ve khanglang a, break kan neih laia a Rap zet zet reuh ṭhin chu ka nuih nasa thei tawp.

Naupang hlim thei tak a ni a, a felin a hawihhawm em em a, a chhungte paw'n an enkawl ṭha hle tih a hriat. Zan lamah te thleng thleng Video call-in kan inbe ta ṭhin a, inbia tih lemah a lemziah min lo hmuh ṭhin a ni mah zawk.

A hmel hmuh châka ka zawn ruk ṭhin Henry-a erawh chutianga kan inbiak lai tak ngial pawh chuan ka hmu ngai lo, a phone kaltlangin inbia ni mah ila a neitupa chu hmuh turin a awm ngai lo hrim hrim.

Ka phone number a neih dan te chu ka ngaihtuah let ṭhin a, ka hre chhuak thei chuang lo. Ka hriat loh laiin ka phone number a lo nei a, ka hriat tirh te kha chuan ka thinrim zawk hle a ni.

Tunah erawh amah ka duh ruk tawh em avang leh a zuna ka uai em tawh avangin ka phone number a nei ve te chu ka lawm a, mahse status a nei ngai lo erawh mak ka ti deuh. Status a neih ngai loh ang bawkin ka status pawh a en ngai chuang lo va, Whatsapp kaltlangi kan la inbe lo hrim hrim.

Monday a ni a, Junior-a te exam ni tur a ni bawk. Kan inbiak lawk vek tawh avangin zing lamah ka phei a, riah chilh tura ka awm tur chu pi Rinpuii leh a pasal pawh an lo lawm hle. Junior-a berin an exam-na hmuna hruai turin min duh teh tlat a, chuvanga thleng phei hma em em ka ni bawk.

Sitting room lama pi Rinpuii nen kan titi lai chuan in chung lam aṭangin Junior-a rawn ṭe vak vak leh ṭap tuar tuar chu a rawn awm a, ka thin chu a phu nghal dawt dawt.

Pi Rinpuii erawh a ṭawng zawm malh malh a, kei chuan a thusawi pawh ngaihsak lovin Junior-a chauh chu ka lo ngaihtuah tawh thung. Thawm a reh vang vang hnuah Henry-a chuan Junior-a chu a rawn pawm thla a, Junior chu a hmel aṭangin a ṭap nasa hle tih ka hre thei.

"Ka pi Junior-a hi lo buaipui mai teh u, ka kal a hun tawh tak zet, thlawhna ka nang hman lo mai ang" Henry-a chuan a fapa la pawm reng chung hian a rawn ti a, a hmelah chuan a hmanhmawh hmel tak tak hle.

"A ni mâw, Junior lo kal rawh le, i pa kha i tikhawtlai vek mai ang" tiin pi Rinpuii chu a ṭhutna aṭangin a tho chhuak a, Junior-a va pawm a tum chu Junior-a chuan a lo duh lo nasa mai.

"Aih!!! Pa ka kal ve duh, i buah ka kal ve duh. I kal ve tawh dawn nia i tih vek tawh khâ, min hruai ve rawh" ṭap chung hian Junior-a chuan a rawn ti vak vak a, a pi ban pawh chu a vai sawn chiang kher mai.

"A theih loh alawm, vawiin aṭangin in exam tawh dawn. Ka lo haw leh vat zawk ang, ka hman veleh zan emaw zing emaw pawh nise ka lo haw vang vang nghal ang" thlem tih hriat takin Henry-a chuan a ti a, Junior-a erawh chuan

"Aih ka duh lo, ka in exam lo mai ang. Pa i bulah ka kal ve duh, ka in exam peih lo" a ti ngawng ngawng a, a ṭap zui hak hak bawk. Junior-a rilru na tih hriat zeta a ṭah avang chuan ka thinlung chu a lo na ve vawng vawng a, an awm dan chu hmuh hrehawm ka ti chi tak a ni.

"Khawi Junior ka lo pawm daih ang che" tia pi Rinpuii'n pawm a tum leh chuan ṭe vak vakin a pa chu a kuah nghet zual sauh a, Henry-a pawh chu zin leh lo mai se ka ti ta rum rum. A fapain a ngai em em a, kal ṭalh a tum chu ka dem lek lek hman a ni.

"JUNIOR!!! Ka tlai dawn, ṭha taka i awm loh chuan ka thin a rim dawn a nia. Sual hi ching suh, ka lo haw leh dawn ka tih vek khâ, ka lo haw leh dawn" Henry-a chuan a rawn ti vin ta ṭhawt a, a pa aw vin a hriat rual chuan a pawmna aṭangin Junior-a chu a chhuk vat a, ṭap zawih zawihin in chung lamah a tlan chho nghal.

"Lo han thlem mai teh u, ka kal a hun tawh. Chuan tu emaw ni phone zawk zawkah khan ka lo be dawn a, ka rawn biak hma chu tihhlim dan in lo ngaihtuah hram dawn nia" tiin Henry-a chu a kal chhuak thuai a, Junior-a laka a awm dan avang chuan ka lo ngei ve em em ringawt.

In chung lamah chuan ka chho vat a, a chhan pawh Junior-a chu exam tura kal a hun tawh vang a ni. Room chhung ka luh chuan khuma bawk chung hian a lo ṭap hawm hawm a, lukham chuan a lu a khuh tlat bawk.

A bulah chuan ka ṭhu thla a, a hnung chu ka chul hliai hliai a, biak chi a ni rihin ka hre lo. A bagah chuan a mamawh tur ang ang chu ka khung khawm sak a, an wardrope hawngin a uniform te pawh ka lak chhuahsak ta ringawt.

A ṭah ban deuh huna insiam tir zung zung ka tum a, a theih ngei pawh ka beisei. Ka che thawm avangin Junior-a chuan mittui nen hian min lo en reng a, a hmel ka hmuh chuan biak a hun tawhin ka hria.

"Junior!!" tukverh lama a tlan thut avang chuan ka ti hluai a, a lam chu ka pan vat bawk. A zuang thla dawn emaw ka ti hman a, mahse a bul ka va thlen chuan motor bula ding a pa chu mittui dir zung zung hian a lo thlir reng thung.

"HENRY LALSANGZUAL, lo haw leh vat ang che, Junior-a i tikhawngaih thlak si" Junior-a bula ding chung chuan ka ti tuar a, Bolero-a a ṭhu lut tur pawh ka koh dan avang chuan a intauh ri ta pawp a, mak tih hmel deuh hian min lo en chho hâw bawk. A hming pumte chu ka hre ve tawh chiang em mai a, chu bakah amah chu ka ngei rih tlat a ni.

"Sual si, lo haw tawh miah suh" ka bula ding Junior-a chuan a rawn ti ve vak a, Henry-a erawh kan lama a kut rawn vai zeuhin a lut zui ta hmak. An tlan liam thleng chuan kan thlir a, Junior-a mood chu a fuh lo zawm hle.

"Junior insiam rawh le, kan kal a hun tawh a nia, nge keima siam che i duh em?" tiin khuma ngawi renga a ṭhu ngul chu ka bia a, a awm dan te chu a pa a chhun duh hmel reuh.

"Ka in exam dawn lo, ka kal duh lo. Miss, apa hian ka ngaih ang pawhin min ngai ve lo, ka hmangaih ang pawhin min hmangaih ve miah lo" ṭap chung bawk chuan a rawn ti leh a, a hmel ka hmu rei thei lo chu ka kuah ta tawp.

"Ni lo, apa kha a zin ngei ngei a ngai alawm, chuan a lo haw leh thuai dawn bawk. Le! Ṭap tawh suh le, kan kal vat loh chuan exam hman lovin kan tlai mai ang" tiin a mittui te chu ka hruksak thuai thuai a, rei fê kan inthlem hnu chuan a rawn ṭap bang ve leh mai.

Exam a neih chhung zawngin an school bula ṭhutna lo awma ṭhuin ka lo nghak char char a, English subject an tih dawn avangin ka ngaihtuah lutuk hran lo. Maths tutor ni mah ila chutianga a exam na leh zela ka hruai chu ka peih lo viau dawn emaw ka ti a, nuam lo ka ti miah lo.

Naupang tih takah an exam zawh chuan a rawn hlim chhuak leh hle tawh a, keipaw'n ka lo ko nghal vat. Kan haw lamah chuan Xerox dawrah ka lut a, lehkhabu kawm tiat zetin Henry-a thlalak chu ka print ta hmiah. A chhan chu Junior-a rilru tihhlimna atana ka tih a ni a, ka thil tihpui tum chuan Junior-a chu a tihhlim ngei ka beisei.

Zanah chuan lehkha ka zirpui leh a, Maths bawk chu kan zir dun leh ta malh malh. Chhun ang em emin zan lamah chuan a rilru pawh a na tawh lo va, kawm pawh a nuam leh tawh hle.

Lehkha kan zir zo ta maw tihah ka bag aṭangin Henry-a thlalak chu ka phawrh a, bangah chuan ka tar nghal kuau bawk. Junior-a chuan chutia a pa thlalak ka tar ringawt chu mak a lo ti hle a, ka bag aṭanga vawm bur ka phawrh a hmuh phei chuan mak a tih hmel lehzual.

Vawm bur chu a kutah ka ken tir a, a pa thlalak chu ka'n suasam pui tak tak mai a nih kha! Junior tê reuh chuan nuam a rawn ti ta em em a, keipawh ka bang bik lo. Henry-a thlalak chu kan vawm chik vek a, kan vawm pahin a thlalak chu kan hau zui mawlh mawlh bawk.

Chutia a thlalak kan vawm chik pawp pawp lai chuan amah taka chu room kawngka bulah a lo ding ta reng mai, kan thil tih zawng zawng a hmu vek bawk nen a ranga rangin a thlalak chik nuai tawh chu ka pawt thla vat a, ani chuan min lo en run thung.

"Pa!" tiin Junior-a chu a pa lamah a tlan phei vat a, Henry-a pawh chuan a lo pawm kang nghal thuai. Kei erawh chuan chutianga a rawn haw hma leh em em si chu ka ngei letling a, ka thil lo tihpui zawng zawng a hmu hman vek bawk si.

"I va'n rawn haw hma leh si ve" ka ti deuh sap a, min en reng bawk sia sawi mai tur chu ka van thlawt a ni. Ka lam pan chuan a rawn kal a, kei chuan ka thil ken chu ka hnung lamah ka dah ta vat.

"Ihhhh...eng....enge tih i tum?" min hnaih zel avang chuan ka ti leh ringawt a, ani lah chu a ṭawng chhuak duh der si lo. Chiang taka a mit ka en lai chuan ka hnung lama ka thil thuhruk chu min en reng chung leh lo awn thla duai chung hian a rawn la hmak a, kan inhnaih thawkhat bawk sia kan hmai chu a insi lo chauh.

"Pa, kan lo sawisa che a, mahse maw a nuam ka ti raps, Miss hi a idea a ṭha tawp" Junior-a chuan a rawn ti zet zet a, a thusawi chu ṭul ka ti lo kher mai. Henry ren runa pawh chuan ṭawng miah lo hian a thlalak kan vawm chik nuai chu a en reng a, min lo en leh zeuh zeuh bawk.

"Ka lo zu chhuk ang e" tiin ka kal sawn thuai a, ka kal sawn lo a nih chuan ka thaw a chham thei mai dawnin ka hria. Kawngka lam chu ka pan mawp mawp a, mahse kawngka ka thleng ṭep tawh tihah Henry-a chuan

"Hlute" a rawn ti thum chhal a, ka ke pen lai tawp chatin ka ding nghal. Zawimuangin an awmna lam chu ka hawi a, Junior-a chu ka nuih lui sak ringawt. Henry-a lah chuan mi en run chung hian ka awmna lam a lo pan a, min hauh loh reng ka ring tawh lo.

"Engenita?" zam aw tak chuan ka ti a, anni chuan ka bul an rawn thleng titih nghal chu a ni mai. Min kotu ber chu a ngawi leh tlat a, an pafa chuan min en chiang dun hle, ka zam chhe vek mai dawnin ka hria.

"Ka lawm e" a ngawih vang vang hnuah Henry-a chuan a rawn ti a, lawm thu min hrilh daih chu ka hrethiam lo leh ta hle. A hmelah chuan lawm thu min hrilh mahse lawm hmel a lang lo va, thinrim hmel pawh a lang chuang lo.

"Maw? Ihhhh....eng....enge i sawi awmzia?" ka ti phelh nuai a, lawm thu min hrilh avang chuan ka la hamhaih hle bawk. A chhan lah a sawi lang bawk si lo va, kei atan chuan hriatthiam a har ve em a ni.

"Ka awm loh chhunga ka fapa i lo enkawl avang leh hlim taka i lo siam avangin ka lawm e" a rawn tih leh daih avang chuan vawi leh khatah ka hlauhthawnnate chu an bo nghal vek a, ka thaw chhuak hawk bawk.

"A ho lutuk, i va rawn haw hma leh si ve" nui chung chuan ka ti a, ka awm dan vel chu ka sawi fiah thiam lo. Ka rilru chhungril chu a hria ang tih ka hlau, haw viau angin lang mah ila ka lo duh ru tawh lutuk tih te chu a hriat vaih chuan ka chhe vek a ni mai.

"Nia, ni 2 emaw ni 3 emaw ni tura an duan kha rokhawlhna avangin ni 1 ah kan zo ta daih alawm" pangai tak chuan a rawn ti ṭha ve mai a, min biak dan a pangai lutuk chu ka awih lo zawk.

"A nih chû, ka lo zu chhuk ang e" tiin ka inher a, in hnuai lam chu ka pan nghal vat. A hmelṭha tak kha ka en reng a nih chuan keimah leh keimah ka intihmualpho leh palh ka hlau a ni.

Sitting room-ah chuan kan ṭhu ṭhap a, pi Rinpuii pawh a ṭawng leh siam siam tawh. Keipawh ka inti tlangnel lui a, Henry-a tih loh chuan min ngaina hlawm tawh hle. Henry-a erawh a fapa tution ka pek aṭangin kan inhmu tam ngai lo va, mi dangte anga min nel tak anga a lang lo pawh chu a awm ve tho bawk.

Mak ka tih zawk chu a fapa tution ka pek hma zawngte kha chuan kan intawng thei em em a, tunah lem amah hmuh châkin khat mah ila kan inhmu khât em em thung si. Ka ngaihtuahna a hriat hlau takin amah chu ka va en a, ani chuan Junior-a pawm chung hian a phone a lo khawih mual mual.

Zing aṭang tawh Junior-a chuan a pa a ngai bawk a, a pa dar nghengin a muhil bam mai. A naupan aiin a felin a puitling reuh ka ti ṭhin tak na a, a pa bulah chuan a no tlat a, naupang chhia takin a pangchang leh tlat ṭhin, mahse chu chu nuapang a nihzia tarlanna a ni.

Dar 10 velah mut zai kan rel a, ka mutna tur in chung lam a nih avangin Junior-a leh a pa inpawm chho chu ka zui a, biak pawh be lovin ka room lamah chuan ka lut ta vat. Zan lai a lo ni a, ka hlauh ruk em em thil a rawn awm ta.

Ka ril chu ṭam tak tê hian a lo ṭam a, chaw ka ei tlem pawh a ni lo, ka tih fô ṭhin a nih vang a ni ang ka ring. Thawm dim thei ang berin choka lamah ka chhuk thla ṭhem ṭhem a, min hmutu an awm a nih vaih chuan a chi loh khawp ang.

Chocos ei tur a lo awm hlauh a, light pawh chu ka on ngam lo. Chutia an hriat hlau taka thil ka ei lai chuan chokaa mi rawn lut an awm ve ta, fridge a hawn ruala engin a hmel a chhun chuan tu dang ni lovin Henry-a ngei a ni.

Amah a nih vang nge ni ka thaw a veng deuh hawk a, mi dang ni lova amah ber kher a ni chu tlemin a zia ka ti. Chutah ka thil ei thawm hriain ka lam chu a rawn hawi a, min hmuh rual chuan

"Lalpa le!" a ti chhuak ṭhawt a, a phut lutuk avangin fridge chu a ngheng che deuh dawt bawk. A bul lawka light chu on in rum mangkheng hian min melh a, kei lah chuan thil ka lo ei khum hmiah hmiah, ani ber kher a nih avang chuan ka zak leh ta lo te pawh a ni ang.

"Tun ang hunah enge kha laiah khan i lo tih?" a rawn ti hmuk a, Juice bur leh no chu rawn kengin ka lam chu a rawn pan phei nghal bawk. Kei chuan ka lo nuih sen sen a, ka tlawn a ni ber zawk.

"Ka ril a ṭam lutuk a, a rukin thil ka lo ei tawp a nih hi! A hma pawhin ka buaithlak thu leh neuh neuh ka ngah thu ka hrilh lawk vek tawh che kha âw, mak tih hmel deuh khan min en duh suh" tiin Chocos chu ka ei zawm a, tui tak hi a ni ringawt. Ani pawh ngawi rengin ka bulah chuan a rawn ṭhu a, Juice chu noa thli chhuakin a in ve nghal mai.

"Chuan enge tun ang hunah te i rawn thawh ve chhan zawk Henry?" ngampa zet hian ka ti leh a, ani chuan mi pawh en tawh lovin a hma lam chu a en daih a, a hawina lam ka en ve lahin engmah en reng tur a awm bawk si lo.

"Ka muhil thei lo" a rawn ti sup a, ka lo rin tawk vel reng a ni. A hmel chu ka en chiang deuh a, a lungngaih hmel hlein ka hria. A sir zawng pawhin a lang pa em em a, a hmelṭha thlawt a ni.

"Health Minister nih vel hi i hne ve ṭhin êm? Buai a nat hmel si a, chutah zin reng a lo ngai ṭhin awm bawk nen kei chu a ninawm hmel ka ti" a bula ka ṭawng châk em em chhan chu ka hre bik lo, mahse chutianga ngampa taka biak reng chu nuam ka ti tih ka hria.

"Hne hran lo ve" kiai suk hian a rawn ti a, ka mitah tak chuan min rawn en a, ka plate lam chu en thla lehin a rawn nui ta suk. A nui hmel chu a va han hmelṭha teh vawk em, Lalhmelṭhabera a ni ringawt alawm.

"A nih leh engatinge i mut theih loh a? Thil i ngaihtuah ngut ngut em ni? A awm ve tho mai, nangni level-ah chuan ngaihtuah tur pawh a tam ngawt ang. COVID hri lah hi ka hne si, nun khua a tibuai vek, Health Minister i nih angin tihreh dan ngaihtuah vat teh" tiin ka thil eina chu ka seng fel mawlh mawlh a, ani erawh ka thusawi avang chuan a rawn nui ri hawk. A nuih chhan ka hre lo va, nuihzat thlak ka sawi awm pawh ka hre lo.

"A nihna takah chuan ka ngaihtuahna aṭanga paih chhuah theih miah loh hmeichhe pakhat ka nei a, chu chu ka muthilh theih loh chhan a ni" a rawn tih chuan amah chu ka en nghal vat a, ani paw'n min lo en ve reng. Amah ka enna aṭanga hawi sawn leh vatin ka thil eina vel chu ka dahṭha a, a lam ka hawi leh pawh chuan min lo la en ta reng mai.

"A nih aw Henry, ka chhohsan mai ang che" tia kal pelh ka tum chu ka banah a rawn chelh thuai a, min pawt let dâwrin a âwmah chuan ka bei ta ran mai. Enge tih ber tur ka hre lo va, kan awm dan avang chuan ka thinphu a rang nghal vek.

"Min thlah teh Henry" tia tal chhuah ka tum pawh chuan tal chhuah theih lek lova nghet hian min kuah tlat a, chutah vawi leh khata min nam hla thutin ka mit takah chuan min lo en a, a mitmeng chu ka chhiar thiam teuh lo.

"Ka kal duh a nia Henry Vai" vin deuh taka ka tih laklawh lai chuan rawn kun hniamin ka hmui takah a rawn fawp a, ka inrin hmain a rawn che bawk nen ka lo dang hman lo hrim hrim.

Ka hamhaih lutuk avangin ka meng kur a, ani erawh a maimitchhing thung. Chutah a hmui chu zawimuang hian a rawn tiche ne nê a, a hmui lum leh nem em em chuan ka hmui chu a rawn pet ta. A va han dangdai chiang em!

Ka tum lawk pawh ni miah lo hian ka mit chu ka chhing zui nghal vang vang, ka rilru chu pakhat mah ka thunun thei tawh lo, ka thunun theih piah lam thil vek a ni tawh. Min fawhna zun ngah lutuk leh dam lutuk chuan thil dang ngaihtuah thei reng reng lovin min siam a, ka mumanga ka hmuh let khan Henry-a nena infawh chu a nuam daih zawk a ni.

Chapter 11

Zawimuangin min fawhna chu a titawp a, a thaw sa ham ham avang chuan keipawh ka meng chhuak ve nghal. Ka men chuan min lo pawm kang daih tawh a, ka awm dan a dik lo tih ka hriat chhuah rualin a ban chu ka chum vak a, ani pawh chuan min dah thla ve mai. Engtik laiin nge min pawm kan hman ka hre lo va, min pawm kan lai phei chu hre lo tak ka ni.

Hmanhmawh lutukin choka chu ka chhuahsan thuai a, zah lutuk avangin step-ah te chuan ka inchhuih chho bawrh bawrh lo chauh a ni. Room chhung ka luh thleng chuan ka awm dan a la pangai thei lo va, min fawh chhan mawlh chu ka hre lo tak zet.

"Engvanga min fawp ringawt nge maw a nih le?" tiin keima hriat tawk lek chuan ka phun sap a, ka hmui chu a ka khawih leh kher bawk.

Rizai chuan inkhuh vek mah ila chiang lutuk tak mai hian Henry hmel chu ka mitthlaah a rawn lang leh tlat tawh a, ka bul maia awm te pawh a ang zawk. Ka awm dan a pangai theih miah loh avang chuann ka ṭhu chhuak hlawl a, min fawp ringawt chu a mak ka la ti a ni.

A hmui han nemzia mawlh mai kha! A lum nuam si, khatiang em em khan infawh a nawm pawh ka lo ring ngai lo. Ka mumanga ka hmuh ang chiahin min fawhna kha a nuam a, ka hnar theih thlawt loh avangin ka lo chhang let ve tawp a nih kha!

Mi pawh la fawp ngai lo hian ka thiam ang tawkin ka lo chhang let ve ar ar te kha a ni si a, han zak vak dawn ila a nuamin a thleng vek tawh sia zahin awmzia a nei lo.

"Henry-a hian ka duh tih a hria emaw ni le? Ni lo, a hre hauh lo vang. Amah zawk hian min duh chiang mai, chutiang ni lo se chuan min fawp ringawt lo vang. Ni lo, min duh thei lo, ani te chuan a ngaihtuahna aṭanga bo thei lo hmechhia an awm tih a sawi miau" tiin keimah leh keimah chu ka inbe mawlh mawlh a, ka thil tawn zawh chiah chuan ka taksaah leh ka rilruah nghawng a la nei nasa em a tin ni!

A rilru aṭanga hmeichhe pakhat paih chhuah theih loh a neih thu a sawi lai kha chuan ka na zawk a, a chhan pawh a hmeichhe sawi chu ka thik, a hmel la hmu miah lo mah ila ka thik nghal ngawih ngawih. Ani tehlûlin a ngaihtuahna aṭanga a paih chhuah theih loh hmeichhia chu hmeichhe class tak a nih ka ring a, hmelṭha leh pian nalh tak a nih ka ring bawk.

Kei lah chu ka beisei lawk hauh lovin pathlawi zunah ka uai der a ni tawh si a, ka rilru put hmang hi Junior-a leh mi dangin hria se chuan min va han hmusit dawn rua em. Maths ka zirtir an phal tawh pawh ka ring lo, chuvang chuan an hriat chhuah theih loh tura ka awm a ngai a ni mai.

Zing ka tho te chu ka rit hnuk a, zan lama ka mut ṭhat loh vang tih ka chiang. In hnuaia ka chhuk chuan pi Rinpuii chiah a lo la tho a, mi dang hmel pakhat mah ka la hmu lo.

Henry-a ber chu a lo chhuk thut ang tih ka hlau a, zan maia thil thleng avang khan a hmel ka hmu ngam rih thlawt lo a ni. Pi Rinpuii nen chuan Mai hmin tui hmel tak hi kan vel a, rei lovah zan lama boruak vel theihnghilh ṭhak khawpin ka titi pui zui nghal.

Thil ho te te kan sawi a, pi Rinpuii ang em ema mi titipui thiam hi ka la hre lo. Ka nu chu lo dah ṭha ta ila, pi Rinpuii hi chu kum upa lam a nihna bo ṭhak khawpin keini ṭhalaite mi titipui dan a thiam.

"Ti daih ila Hlute, i lakah hian keini chhungkua hi kan inthlahrung khawp mai. Zah pawh dawn lovin riah chilh hial te ka rawn ngen che a, nang lah chuan inphal takin i lo remti a, hmeichhe fel tak i ni" pi Rinpuii chuan a rawn ti a, kei chu lai deuh tak hian ka lo nui a, chutiang teh tlawnga han infak chu a zahthlak ve det.

"Ka fel vang a ni hleinem ka pi, Mizo nih te chuan inpuih tawn hi kan tihtur alawm" ka ti chhuak ringawt a, engtik laiin nge Henry-a ṭawngkam chu ka lo copy pawh ka hre lo. Ka hawi kual zuk zuk a, Henry-a chuan ka thusawi chu a lo hre ve palh ang tih ka hlau ru hle.

"Dik chiah, Mizo nih hi a lo nuam ber mai, chuan nimina i chet dan kha a ṭha tawp bawk aw? Kha, Henry-a a hmingpum deuh lawla i rawn koh vak kha! Chutah Junior-a lah khan a rawn au chhunzawm ve leh nghal a, awm lo la chuan Junior-a kha exam tura a kal duh ka ring miah lo" nui hek hek pah hian a rawn ti a, ka va han zak mai mai tak.

"In lo hre vek maw ka pi? A va'n chi loh ve le, in pawi ka sawi a nih chuan ngaihdam ka dil nghal e" ka inthlahrun em avang chuan ka ti ta ringawt a, nimina ka chet dan kha chu a zah theih loh thlak ve em alawm.

"Hre vek e maw le, Henry-a ber khan ka nuih a tiza a ni. A hmingpuma i koh kha a ring lo lutuk a ni ang motor-ah khan a intauh ri chawrh a, a pu phei chu a nui nasa teh asin. A pu hi a nui khât ve viau a nia, nang lah chuan ho têin i tinui thei mai bawk si" hlim hmel deuh hian a rawn ti leh a, nuihza em em lovin ka ṭhen ve ta ringawt.

"Ka tum em em pawh a ni miah lo a nia aw ka pi, ka rilrua rawn lang hmasa ber ka ti tawp a nih kha! Junior-a kha ka khawngaih lutuk a, ka rilru a lo na ve êm a ni" tiin ka insawi thiam ta zut zut a, ani erawh a lo la khi ver ver. Min ngaih dan tur mawlh chuan ka rilru a tibuai leh tawh a, hmeichhe zak thei lo tak anga min ngaih ka hlau ta ber.

"A pawi lo a pawi lo, a ho lutuk, i chet dan avang khan inthiam lo viau duh suh. Thil ṭha tak tiah inngai tawp la, a dik vek a ni mai" tiin gas lam chu min pansan a, mahse kei chu a sawi ang chuan ngaih dan ka pu thei chuang miah lo, tûma'n vawi leh khatah an ngaih dan an thlak thut theih ka ring lo bawk.

Ei rawng kan bawl mawlh mawlh laiin ka pu chu a rawn tho chhuak a, min hmuh chuan lo be vatin thingpui ka lo siam thuai a, ka awm dan chu a housemaid mah mah em aw te ka ti rilru neuh neuh a, a chapo chi ka lo ni ve kher bawk sia ka awm dan chu ka ngai pangai thei lo a ni.

Sana ka en chuan dar 8 a lo pel hret a, mahse Junior-a leh Henry-a hmel reng hmuh tur a la awm lo. Chutiang hun tawh pawha an la tho lo a nih vaih chuan exam turin an kal hman lo ngei ang, tukṭhuan ei nen an tlai dawn chiang lutuk.

A hnung lam aṭangin ka pi ei rawng bawl mek chu ka en a, a buai hmel bawk sia ka rilrua thil awm pawh chu ka hrilh duh ta lo. Ka pu ka en ve leh a, sitting room lamah chanchinbu chhiarin a lo ṭhu leh daih tawh.

Eng em kan ti nâng tihna rilru pu chungin in chung lamah chuan ka chho tawp a, Henry-a hmel hmu hreh mah ila Junior-a vang tal pawhin ka kaih thawh ngei ngei an ngai a ni.

An pafa room kawngka chu ka kik karh karh a, mahse thawm dang erawh ka la chhuah duh lo. Room chhung aṭanga thawm a la rawn chhuah miah loh avang chuan an la muhil ni turah ka ngai a, pawn aṭanga han koh lawng lawng chu ka inthlahrung leh ta tlat.

Kawngka chu ka kik leh a, kik satliah lovin ka chum deuh dawt dawt tawh bawk. Chutia ka chum lai chuan amahin kawngka chu a inhawng riai riai a, an lo kalh reng reng lo tih ka hre ve chiah.

Thawm dim thei ang berin ka lut ṭhem ṭhem a, anni pahnih chu inkuah rial hian an lo la muhil bawrh bawrh a, an inang bawk sia an hmelṭha dun tih chauh lo chu ka rilruah a awm leh tawh lo.

Min hmuh palh hlau em emin ka phone chu ka phawrh thuai a, inkuah chunga an pafa muhil lai thla chu ka la ta vat. Kaih thawh mai tumin ka kut chu ka lek thla zuai a, mahse ka thei rih lo.

Henry-a chuan a fapa chu hmangaih hmel tak hian a âwmah a kuah bet tlat a, Junior-a pawh a pa ang chhunga awm nuam tih hmel zetin a tawm kâk a, a pa âwm ngheng chung chuan a muhil tui hle.

Ka thlir rengna aṭang chuan ka harh chhuak thut a, ka kai tho lo a nih chuan kan tlai dawn tih pawh ka hre chhuak zui leh nghal bawk. Thawk chu ka la hmasa leh hawk a, Henry-a kaih thawh mawlh chu ka huhphurh a ni.

Nizan maiah kan boruak a danglam em em a, chuvang taka a hmel hmu hreh leh kaih thawh hreh em em pawh chu ka ni. Ka kut chu a lu lamah ka dah thla riai riai a, a chal chu ka khawih ta.

"Henry! Henry! Hei Henry, tho tawh rawh u" tiin a lu chu ka nam che det det a, kai tho tur ni mah ila ngampa takin ka sawi che ngam rih chuang lo. Ka sawi na vak lo a ni ang a rawn harh nghal mai lo va, a mutui phian bawk nen inthlahrunawm duh tak a ni.

"Henry! Henry!" tiin a hma aia na zawk chuan ka sawi leh dat dat a, chutah erawh a rawn harh ve ta. Mut la kham loh hmel deuh leh phelh phang chuan min lo en a, kei min hmu thut chu mak a ti ve te pawh a ni ang a rawn meng fiah rang hle.

"Ihhh....eng lo a nia, Junior-a nen in thawh a hun tawh. Tuna in tho lo a nih chuan kan tlai dawn, exam turin kan kal hman lo mai ang" zam ru tak chuan ka ti leh a, ani lah chuan ka thusawi pawh hre lo ang maiin min en reng a, ka zam em avang chuan tlan chhuah daih mai ka duh rum rum.

"He...Henry!" ka tih thawp leh sap chuan min enna aṭanga hawi sawnin chung lam chu a dak chho a, a thaw zui hawk bawk. Muangchang hian room banga Sana intar chu a melh a, a tlai tawh tih a hre chhuak a ni ngei ang Junior-a chu a sawi zui det det bawk.

"Junior, thawh a hun" a ti ṭial thum dup a, Junior-a erawh a pa âwmah chuan a la mutui khawp mai. Chet pawh a rawn che eih lo va, an awm dan vel chu hmuhnawm ka lo ti ru leh tlat tawh.

"Junior" ti thum leh dupin Henry-a chuan a fapa chu a hnar leh biang velah a khawih neuh neuh a, chutah erawh Junior-a pawh a rawn harh ve ṭan ta. Mut la chhuah hmel zet hian a pa chu a en chho hâ a, rei lovah a pa kuah chung chuan a mit a chhing leh nghal daih.

"Ihhh...a..a thawmhnaw vel ka lo va la ang aw? Thil pawh in ei hman ka ring tawh lo, a tlai ve tawh ang reng sia" min lo en leh reng tawh avang chuan ka ti leh ringawt a, ka zam em em chhan chu eng dang vang ni lovin nizan lam thil thleng vang kha a ni tih ka chiang. Ani chuan aw tihna'n min lo buk khum zeuh a, a fapa pawm chung chuan khum aṭangin a tho zui nghal bawk.

Wardrope ka hawn lai chuan bathroom lama an pafa kal phei mek chu ka en leh hram a, an hmuhnawm ka ti ngawih ngawih. Junior-a chu a pa koki bawh runin a mit a la chhing tlat a, a mut a la chhuak ve hle pawh a ni ang.

Ka khawngaih hnuhnawh em avangin ka lo kai tho ta kher kher pawh chu nuam ka ti leh ta lo va, mahse han kaih thawh loh ngawt zawng a chi chuang si loh. Ka kai tho tawh chung paw'n tukṭhuan an ei hman tawh lo tih chiang takin ka hria a, an school awmna nen ngaihtuah phei chuan exam hman lovin kan awm mai ang tih ka hlau a ni.

Bathroom aṭanga an rawn inpawm chhuah chuan Junior-a pawh a meng pangai tawh a, an pafa chuan min en chiang dun hle a, ka lai hman khawp.

"Ka lo zu chhuk ang e, lo insiam thuai thuai r'u" tia room chhuahsan ka tum lai chuan Junior-a zawk chuan

"Miss, min lo siam" a rawn ti a, keipawh an awmna lam chu ka hawi leh vat. Kei ang bawkin Henry-a chuan a fapa chu mak tih hmel deuh hian a en a, ka siam ber kher a duh chu a mak ve a ni. Nimin te kha chu thuhran a ni a, mahse engatinge tukinah lehzel ka siam chu a duh?

"Awww..aw le" tiin keipawh chuan ka lo chhang ve leh vat a, an awmna lam ka pan phei lai te chuan Henry-a chuan min lo en reng a, mahse kei chuan amah en lovin Junior-a chauh chu ka en lui ta char char.

Junior-a ka siam chhung zawngin Henry-a chu a lo awm ve reng a, min en duh hle tih pawh ka miti sirin ka hmu ru reng. Ka hmu ru reng tih pawh a hriat vek ka ring, kan in awm hlat lo em mai.

Kan insiam zawh chuan chaw pawh ei lovin kan chhuahpui thuai thuai a, ka hmelhriat Taxi driver call ka tum lai takin Henry-a chuan min hruai tur thu a rawn sawi nawlh a, mak ka ti teh asin. Kan chhuah dawn lai tak te chuan tlem tal chaw ei turin ka pi chuan min rawn ti lawm lâwm a, mahse chaw eina hun pawh a awm tawh lo.

Amah berin hruai min huam miau avangin Henry-a motor-ah chuan kan ṭhu ngawi leh reng tawh a, Maths subject an tih ni ber kher a nih lehzel avangin Junior-a chu motor-ah pawh ka ennawn pui zawk zawk tho. Subject dang chu thuhran ni se ka subject zirtir bera a tihchhiat leh si chuan a chi hauh lo vang, ka mualpho a ni mai.

Junior-a school lama ka hruai luh lai chuan Henry-a chu hmun dangah a kal daih a, khawnge a kal dawn tih lam ka en si se hman lo bawk nen a kalna lam chu ka ngaihven lo hle.

A exam hmasak laia ka lo nghahna ṭhutthlengah chuan keimahin ka ṭhu a, exam tlai lo tawk chiah chiaha kan thlen hman avang chuan ka thaw a veng hawk bawk.

Thli chu a thaw heuh heuh a, a vawt ka ti lek lek. Ka lam pana Henry-a lo phei mek chu ka lo en reng a, a kut vei lama a thil ken chu eng a nih ka hre chiah lo, a kut ding lama mi erawh Coffee emaw Nestie vel emaw a ni tih ka hria.

Ka bula lo ṭhut thlak pahin Coffee ngei mai chu min pe a, keipaw'n ka lo ban ve mai. Chutah a kut leh lama a egg roll ken lai chu min lo pe leh a, la mai lova amah ka en chuan min lo en chiang hle.

"Ka lawm e" ti sepin ka lama a egg roll lo lek kan vâ chu ka laksak a, ani erawh chuan min chhang let tawh chuang lo.

Ka hnaih takah chuan a rawn ṭhu thla a, ṭhutthleng nghenga a ṭhut avangin kei chu ngheng lovin ka ṭhu ta reng. Ka ngheng ve a nih chuan ka hmel awm dan zawng zawng a hria ang a, a laka ka rilru zawng zawng pawh a hre nghal vek a ni mai.

"Bialpa chu i nei ta em?" a rawn tih chuan ka egg roll seh lai chu ka chawl deuh dat a, mahse a hmel ka la en ngam chuang lo. A chang leh a bulah hian ka zam em em a, a chang leh ka ngampa em em a, ka awm dan hi ka hrethiam hlawl lo a ni e.

"Hnahthiala kan inhmuh khan i sawi khâ" ka chhan let loh avang chuan a rawn tih leh a, a lam chu ka hawi lo thei ta lo. Ani chuan mi pawh en lo hian egg roll chu a lo ei mial mial a, Coffee chu a in leh zeuh ṭhin bawk.

"Nei" ka ti hmuk a, chu thu ka sawi chhan tak pawh chu ka hre leh chuang lo. Nizan thil thleng avanga min ngaihnep ka hlau a ni berin ka hria, engtin emaw ni tak ka thin a rim ru ran leh ringawt tawh bawk.

"Nei suh" ka mit taka min en ran chung hian a rawn ti tawi hmuk a, ka bialpa neih leh neih loh lam thlenga thu min pek a tum chu ka ngai thei leh ta ṭhak lo.

"Enge ka bialpa neih leh neih loh chungchangah i lo buai ve em em? Nizan avang khan min hmu hniam tih pawh ka hria, mahse a thleng nawn tawh lo vang. Chuan i fapa tution pea ka lo riah chilh avang hian i thu hnuaia awm ka ni lo, zahawmna ka nei ve bawk" ka ti ta ṭeuh a, a hma zawnga amah ka zahna leh ka zam rukna te chu a bo leh ta vek mai.

"Nuam i tih em khâ" a rawn ti a nih chu! A thusawi avang chuan amah chu ka en ta hrawk a, ani erawh chuan nuihzat hmel deuh hian min lo la en zui.

"Aw, zep ṭit ṭet nei chi ka nih loh avangin ka pha lo vang. A nuamin a dangdai khawp mai, ka vawi khatna a ni bawk, mahse pathlawi ber kherin ka first kiss i ru kha chu ka la na khawp mai, ka inrin hmaa min fawh avang pawh khan ka hlawh i san ngei a ngai ang" ka ti hmawk hmawk a, chutia ka rilru ka sawi chhuak ta chu ka thawl phah huai mai.

"Ka fawh apiang chein hlawh san min dil ziah dawn tihna em ni?" a la rawn ti ngam a nih chu! A hmel ka en leh chuan ha lang lo hian a lo nui a, nuih pawh a nui sei lo.

"I zak lo ve êeee, ka hmui hi kha i hmui ve mai mai khan a si leh tawh ngai lo vang" tia ka sawi zawh rual chuan rang zet hian ka hmui chu a rawn fawp a, ka nam sawn hmain amah chu a awm phei leh vat bawk. Keiin hamhaih taka ka en laiin ani erawh chuan nuih insum deuh hian min lo en a, a thil tih zawh chiah avang chuan ka tha a va han na mai mai tak em.

"Engatinge ka thu lo leh ka inrin hma hian min fawh ringawt zel HENRY LALSANGZUAL? Khawlai a nih hî hre ta che, miin min lo hmu ta se kan mualpho dawn asin" thinrim tak chuan ka ti hrawk a, ka hmuia a lo fawp leh ringawt chu ka la na thlawt, a thleng vek tawh bawk si.

"A nuam ka ti alawm" ha langa nui chung hian a rawn ti sam êt a, a ha vel lah chu a mawiin a la var rual em em hrep zui, ngeiawm lulai lutuk mai a!

"I zak lo" ti leh vakin a samah chuan ka kek vak vak a, thil kan ei zo tawh bawk nen ka kut chu a ram leh tawh khawp. Ka kek na viau emaw ka tih pawh chuan a rawn nui chhuak hawk a, kan piah lawka mi ding an lo awm avang chuan ka thil tih lai chu ka tawp chiang hle.

"Hei, in ngaih ang kha a ni lo" ka ti tawl a, anni lah chuan nui sun sun hian thla min lo la lak zui. Ka hria, chung mite chuan Henry-a nen hian kan inngaizawng emaw an ti tih ka hre chiang a ni. An hmel aṭang leh an mitmeng aṭang hai rual lovin a hriat theih tlat, an ngaih dan ang erawh a ni lo nasa bawk si.

"In ninawm" kan hmaa mite'n kan thla lak an tawpsan duh mai loh avang chuan ka ti leh vak a, ka tih ngaihna hre lo chu ka kun ta ngawih ngawih ringawt. Ka bula mi ren run lah chu a rawn la tawlh phei ang leh ta nghal a, kun chung chuan ka va han melh rum kher em.

"A tawk e" Henry-a'n a tih chuan kan hma lam chu ka en vat a, an lo kal sawn mek hlawm. Deuh vel kher chuan a! Health Minister lai te a ni ve bawk sia ka thu mai mai ai chuan a thu chu an zawm khawp mai, an kal sawn tâk hnu chuan keipawh ka hawi chhuak ve leh vat.

"I ninawm, tawlh phei rang rawh, khatiang pawh khan min en run zel suh" ngawi renga min en leh reng tawh avang chuan ka ti leh ta nge nge a, a ṭawng thei zawk tih takah ka insum thei thlawt lo ṭhin.

"An lo chhuak e" hmun dang a hawi sawn hnu chuan a rawn ti daih a, a hawina lam ka hawi chuan Junior-a lo kal phei mek chu ka hmu ve nghal. Rei lovah Junior-a paw'n kan bul a rawn thleng a, min entawn zak zakin a la nui ver ver zui.

"Pa, Miss nena min lo nghah hi ka ring miah lo asin, mahse a nuam ka ti, chuan ka ril a ṭam tawh lutuk" a pa kut a vawn hnu chuan a rawn ti reuh a, min lo la nuih sen sen zui, ka tih ngaihna hre lawk lo chuan ka lo nuih let ve ta ringawt bawk.

"Aw le, thil kan eipui dawn che a nia" tiin Henry-a chuan a fapa chu motor awmna lamah a kai phei a, keipaw'n an hnungah ka zui ve nghal. Kan awm dan vel chu chhungkua te pawh kan ang, kan ni chai si lo.

Junior-a chuan dawr chhunga thil a ei lai chuan ei ve turin min ti nasa hle a, mahse ka inei puar fel thlap tawh avangin ka hnial fithla ta ṭhak. A ril a ṭam tawh bawk a ni ang a ei bawrh bawrh a, a tui a tih hmel hle bawk.

A inei puar hnu chuan in lam panin kan haw a, motor chhungah chuan a thiam leh thiam loh te ka zawt a, theihnghilh pahnih pathum a neih thu chu a sawi ve zung zung.

A thiam loh chu a hmaa a thiamsa reng a ni a, mahse a chawh dan a theihghilh avanga thiam leh lo a nih avang chuan a ui ve hle. Kei chuan a tihṭhat thu leh a thiam thuin ka lo hnem ve mawlh mawlh a, Henry-a erawh vawi te khat pawh kan titi naah chuan a rawn tel lo.

Zan a lo nih chuan lehkha ka zirpui leh a, Maths subject chu exam zo tawh mahse lehkha zirpui chu ka tihtur a ni tlatin ka hre tawh. Zan dang zawng aiin Junior-a chu a thawveng a, a lam vak vak a, kan nuih ta chiam.

Zan rei a lo ni a, ka pum chu a rawn ri leh ta rawk rawk mai. Ka rilṭam leh hlau te khan ka inei puar lawk ve vel a, mahse awmzia a nei thui lo kher mai. Rin loh lutukin ka room kawngkhar chu pawn lam aṭangin tu emaw ni hian a rawn kik kârh karh a, ka va hawn chuan Henry-a chu a lo ding run mai.

Mak tih takin a hmel chu ka en a, ani erawh a lua hnuai lam min thlek khum zeuhin a kal sawn daih a, min en chuang lo hian a kuta ei tur a ken chu a rawn keng kang vâ va a, ka ngaihtuah vang vang hnuaah a chet dan vel chu ka hrethiam ve ta chiah.

"Engtinnge ka ril a ṭam tih i hriat chat theih a? Ka pum ri rawk rawk kha i lo hre pha vek em ni?" thil ei mawlh mawlh pah chuan ka ti a, ka ṭawng chhuak pawh a pangai ve tawh khawp mai.

"Zan tin kan ei dawn nia" ka zawhna pawh min chhang chuang lo chuan a rawn ti daih a, kan thil ei lai bawnghnute nena pawlh Chocos chu ei pawh a ei ṭha lo, a chawk kawi mai mai a ni zawk.

"I ei duh ve vak na nge? Keiin a tui ka tih tih nen, chu bakah bawnghnute telna hi chu a tui ka ti hrim hrim" ka tih chuan a thil chawh mek chu a tawp hmak a, zawimuangin a ei ve ta pawk mai. A thil ei lai chu ka lo en leh reng a, a duh ve vak lo a ang.

"Junior-a nen hian inanna in ngah riau" a rawn ti leh daih a, kei erawh ka lo nui mai mai thung. Ka thil ei lai chu ka ei zo vat a, ka ṭhutna aṭanga ka thawh rualin rualin ani pawh a lo tho ve nghal a, a plate chu lak sakin ka sil ta zung zung.

Chu zan chuan nawm dan riau a nei a, kan inpawh tawh bawk sia han invin leh intihthiam loh vel pawh kan nei lo hrim hrim. Kan eina vel ka rem fel hnu chuan in chung lamah kan chho rual a, mangṭha tuma ka lehhawi chuan an room kawngka bula ding chung hian min lo en ve reng.

"Muttui aw" nui chunga ka tih chuan ṭawng miah loh hian min lo buk khum hmuk a, chu chu aw a tihnaah ka ngaihsak ta mai. Room kawngka ka kalh fel chiah tihah kawngka chu ka ngheng nghal a, ka laka Henry-a awm dan chu ka hrethiam lo chho ṭan hle bawk.

Chapter 12

"LALRINHLU, i ni lo tih sawi miah suh! Ka hre chiang che, kan Health Minister ni lai pu Henry-a nena thla la dun hmeichhia kha i ni chiang lutuk tih ka hria. I kun vel a, zah hmel tak te khan i awm vel a, mahse kei hian ka hai mawlh lo che" phone ka pick up rualin Engzuali chuan a rawn ti nghal zawt zawt a, a ṭawng ring ang reng bawk sia pawnah ka chhuak ta vat.

"Enge i sawi awmzia LALENGZUAL? I thusawi hi pakhat mah ka hrethiam lo" ka tih chuan awih loh hmel zet hian a rawn chek ri tlak tlak a, kei lahin a thu rawn sawi awmzia chu ka hre miah loh tak tak bawk si.

"Instagram leh Facebook-ah ka hmu dun che u alawm maw le, pu Henry-a fan account-ah khan in thlalak dunna an post, va en ve rawh" a rawn ti ta mai, thil hriat chhuah zawk ka nei nghal. Nimin maia kan awm dan kha a ni thei mai ang em le tihna rilru ka nei thuai a, chutia ka inngaihtuah lai chuan

"I inzep vel kher a, i ṭhian ka nih hî min hrilh ve mai ta che. Ka phur tehreng nen, in inngaizawn thu hi mi sawi a tam tawp, Social Media chu inluah khat hle mai maw" a rawn ti leh zet zet a, chhan dan mai tur pawh ka hre rih lo, ka ngawi vang vang a, Henry-a nena inngaizawng ang maia kan thang ta chu dikin ka la hre thei lo a ni.

"Ka va'n awih lo tak! Ka'n en ve lawk ang e, ka dah dawn" tiin kan inbiakna chu ka titawp nghal vat a, Facebook chu ka luh zawm nghal.

Engzuali min hrilh ang ngeiin Henry-a nena kan thlalak chu ZOSAP PHOTOGRPHER'S SOCIETY-ah an lo post a, an comment dan lah chu a la nasa em em zui. A ṭhenin fiamthu ang zawngte'n an comment a, a ṭhenin min thik thute'n an comment bawk.

Ka phone chu ka hum ngawt ngawt a, ka thinrim nge rim lo pawh ka hre lo. Ka buai vek tih chu ka hre chîang a, ka zak hle bawk a ni. Kan thlalak an post na group chu ka lut ṭha leh ṭhin, a post tu ber lah chu a profile check tum mah ila a lo Private khanglang avangin ka check thei hauh lo, ngei tak ka ni.

Thlalakah chuan hmai hupin ka kun a, Henry-a erawh ka bul hnaih takah a ṭhu a, a hmel lah chu a la hlim hmel em em zui. Thlalak aṭang ringawt chuan inngaizawng kan ang em em a, mahse a takah erawh kan inngaizawng hauh si lo.

Chutah Instagram lamah ka lut leh a, Henry-a chuan fan account a lo nei ngei e. A fan account-ah chuan a chanchin tam tak leh a thlalak ṭhahnem tak a lo awm nual a, a bikin a fapa nena an thlalak dunna a tam ang reng khawp mai.

An thlalak post hnuhnung ber chu kei leh Henry-a kan ṭhu dun lai a ni a, Facebook lama an post ang bawkin ka thlalakah chuan ka kun tlat a, ka hmel hmuh theih loh lai taka ka awm lai an post hlauh chu a vannneih thlak ka ti letling.

Ni lo se chuan mi zawng zawngin min hria ang a, ka mualpho nasa dawn lutuk tlat. Caption-ah chuan Quiz ang reng deuh hi a lo inziak a, ka chhiar chian chuan

"Mizoram Health Minister ni lai mek pu Henry-a kawppui thar hi tunge a nih hre thei rawh" tih hi a lo inziak a, comment pawh an va ṭhahnem teh kher em.

Comment tam zawkah chuan min thikna thu leh ṭap lai emoji a tam em em a, min lo thik ve vak vak ringawt chu a nuihzat thlak zawk ka ti. An ngaih angin kan inngaizawng lo tih leh a fapa tution ka pe ṭhin tih lam reng an hre ve der tawh si lo, Social media aṭang hian kan nihna lo puia lan a lo awl dawn kher mai ka ti ta.

In chhungah chuan ka lut thuai a, Henry-a chu ka zawng ru nghal bawk. Amah chauha in chung aṭanga lo chhuk a tum lai chuan rang tak hian ka chho vat a, ka hmel a hmuh chuan rawn chhuk thla mai lovin min lo en leh reng tawh.

A bul ka thlen rual rualin a kuta chelh chungin ka pawt dawr dâwr a, hriatthiam loh hmel taka min enna pawh chu ka hmu lo der hmak tawh.

Mi dangin min lo hmuh ka hlauh avangin ka room chhungah chuan ka luh pui thuai a, room kan luh rualin kawngka chu ka kalh zui nghal hmak.

"Enteh hei, ka hlauhthawn ruk ang ngeiin thil a thleng a nia" ka phone-a kan thlalak an post chu ka hmuh a, ani pawh chuan ka phone chu lain a en chiang zui ve nghal mai. A en lai chuan a ngawi reng a, kei angin mak tih hmel pawh a pu lo hrim hrim.

"Engatinge i ngawih leh reng tawh? Kei chu ka zak teh a nia aw, ka sawi lawk vek a, comment ṭhenkhatah phei kha chuan Gold Digger te min tak tak leh nghal" ka ti leh bawrh bawrh a, a nuam chu ka ti lo tak zet a ni.

"Min zahpui em ni?" a rawn ti thum dup a, ka thil sawi nena a inmil loh lutuk avang chuan ka en vak ringawt. A mitmengah chuan thil danglam deuh ka hmu a, mahse a mitmeng aṭang chuan a rilru put hmang awm ka hre thei chuang lo.

"Zahpui leh zahpui loh lam pawh a ni lo, inngaizawng emaw min ti vek tawh a nih khâ, kan inngaizawng lo nasa mai bawk si. Awi kei chu a! Ka hmel hmuh chian hleih theih lovin ka kun hlauh zawk a, chuti ni lo phei se chuan tun let hian ka buai ngei ang"

"Mi thusawiah buai suh" ka phone min pek let pah hian a rawn ti mai a, kei anga a ngai serious ve miah lo chu mak ka ti a ni. Ngawi renga min kal pel hian kawngka lam chu a pan a, hawi pawh rawn hawi let lo hian a chhuak zui nghal daih.

Tukṭhuan kan ei zawh chuan kan zing tin tih ṭhin dan bawkin Junior-a nen school lam kan pan leh ta hna hna a, Junior-a bulah hi chuan ka hlim veng veng zel. Eng ang pawhin ka mood chhe mahse a bulah hi chuan rei lovah ka hlim leh vat zel a, a mak hi a ni tawp.

An teacher pakhat phei chuan ka fapa emaw a nih tiin min titipui bawrh bawrh a, kei lah pek chuan ka fapa a nih loh thu ka sawi duh der bik lo. Sawi nachang ka hre lo pawh a ni lo, ka sawi hreh tlat a ni.

Junior-a chu ka fapa ni miah lo mahse mi dang bula ka fapa a nih loh thu sawi ringawt chu ka thei lo, a harsa ka ti. Min ngaina em em a, ka bulah phei chuan a zia tak tak chhuahin a harh reuh em em a, kei lah a harh chi ka lo ni ve kher bawk nen kan bengchheng thei hle.

Pi Rinpuii phei chuan kan pahniha kan chetla vel chu min nuih vak vak zel a, Junior-a nena kan awm dan chu a hmuhnawm thu a sawi chamchî ṭhin. Chaw eina ah te hian a pa bula ṭhu lovin ka bulah ngat Junior-a chu a ṭhu ṭhin a, keipawh hian mak ka ti ve tho.

Naupang chu ka ngaina ngei e, mahse Junior-a ang em ema min ngainatu naupang chu ka la tawng lo. Pi Rinpuii chuan Maths tutor hmasa zawk chanchin min hrilh zeuh zeuh a ching a, a sawi danin a ban chhan chu Henry-a tih chauh lo chuan an hre miah lo.

Tutor hmasa zawk aia Junior-a'n kei min ngainat fê thute a sawi luam zel a, keipawh lawm avangin ka lo nui ver ver zel. Ka tawn ngaih loh a ni a, mahse a nuam ka ti em em lawi si.

Junior-a te exam kar chhung zawng chu kan inbiak lawk ang ngeiin ka riah chilh ta ṭhak a, a nuam pawh ka ti hle. Ka lakah pi Rinpuii a fel em em a, chutiang bawkin a pasal pawh ka lakah a ṭha hle.

Tin, Junior-a chuan min ngaina lehzual a, engkim thiam turah min ngai vek hi a ni tawp. A lehkha zir chawlh laiin a painting neih sa ho te min hmuh ṭhin a, a chang chuan lehkha zirpui lovin painting chu ka tihpui ṭhin.

Chu chu ani'n nuam a lo ti em em a, a pa'n a tihpui hman ngai loh thute chu vui aw tak hian min hrilh ve nuah nuah zel. Kei lahin a rilru hlimna'n tiin pa chu ka hauh hrep tur thute ka sawi vel ṭhin a, kan inkawm dan chu nu leh fate pawh kan ang ka ti ṭhin.

A changin kan infiam leh vak vak a, ring tak taka zai play pawh kan ngah thei khawp. Rap music lam deuh hlir kan play ṭhin a, in hnuai lam tan chuan a ninawm thei ngawt ang ka ring.

Henry-a nen erawh zing leh tlai leh zan rei tih lovah chuan kan inhmu ngai mang lo va, school-ah phei chuan min hruai ngai tawh lo hrim hrim zawk. Kei chuan a hmel chu ka hmu châk thei em em a, ani lah a buai thei ropui bawk si.

Zinga a tho phang hmel te hlei hlei chu a ṭha thlawt a ni, coat hak vel inhmeh tho mahse Casual dress deuha a inthuam chu hmuh nuam ka ti zawk. Ka hmuia min fawp te kha a hun lai khan duh lo viau mah ila tunah chuan ka lawm hnuhnawh tawh em em a, Henry-a hmeichhia fawh ka ni ringawt te chu ka hlim phah tawh em em zawk a ni.

Amah chu ka vei bur tawh a, pathlawi ni eng ang mahse amah ka duh em emna chu a kiam phah chuang der lo.

Ani erawh ka veia ka duh bur hnuah ka hmu khât leh tlat lawi si a, a hma zawnga inhmu ngun em em kha kan inhmu zen zen tawh lo.

Zan reiah erawh ka duhthusam ang ngeiin a hmel ka hmu ziah a, chokaah kan pahnih chiah chuan kan awm dun ṭhin. Inngaihzawnna lam hawi zawngin kan awm ngai lo va, vawi hnih min fawp tih loh kha chu min fawp leh tawh lo.

Kan pahnih chauha kan awm lai phei chuan eng pawh sawi ila a nui hmel a lang tawh ngai lo va, mahse thinrimna nei awma a awm ngai loh avangin hrehawm ka ti hran lo.

A ngawi reng hmel te hlei hlei chu pa ka ti ngawih ngawih a, engtinnge a hma zawng khan ka lo hmuh kân theih le ka ti ta rum rum.

Zan dar 12 a rik tawh hi chuan ka room kawngka hi a rawn kik ri karh karh zel a, ka hawn chuan ṭawng miah lo hian in hnuai lamah min chhuksan leh daih zel. Chokaa thil kan ei dun chuan thil eng eng emaw ka sawipui ṭhin a, keima'n a ṭawng ngei ngei theihna'n ka siam a ni mah zawk.

Ka hrethiam lo, engatinge a nui hmel mawi leh pa tak chu ka hmaah a pho chhuah duh tawh loh? A pho chhuah lohna chin pawh kar khat deuh thaw a ni tawh a, a hrehawm ka ti ru tak zet a ni. Ni lo, kei hian engvangin nge Henry-a hi ka laka a awm dan tur ka lo beisei san ve em em?

Ani te chuan a ngaihtuahna aṭanga paih chhuah theih miah loh hmeichhia a nei a, kei ang mai mai min duh ve chu ka ring hlawl lo. Ni e, min fawp, Henry-a hian vawi hnih lai chu min fawp ngei alawm, mahse chu chu atan chuan thil ho tak a ni.

A chiang reng alawm, kan infawhna kha atan chuan eng tham mah a ni lo. Kei erawh chuan ka la serious ta em em a, zan pawh muhil thei lo khawpa ngaihtuah let hial ka ching ta a nih ber hi!

Junior-a te an exam zawh fel tawh avangin keipawh kan in lamah ka haw leh tawh a, mahse kan in chu kan in ni mahse nuam tihna pakhat mah ka nei lo. Junior-a ka ngai a, min ngainatu naupang harhvang leh fel em em mai chu ka ngai ngawih ngawih a ni.

Chu mai a ni lo, Henry-a pawh ka ngai tak zet. Zan dar 12 a lo rik a piangin a hmel ka mitthlaah a lo lang a, kan pahnih chauha chokaa kan thil ei lai vel chu ka ngaihtuah chhuak lo thei lo ṭhin a ni.

Min en run ṭhinna mitmeng te chuan mut pawh min mut ṭhat tir thei lo va, ka zan lai thil ei thlengin min ei tui tir thei lo a ni. Kan ei fô ṭhin Chocos te chu lei ve ṭeuh mah ila ka ei tui thei chuang lo, amah nen a nih loh vang tih chu chiang takin ka hria. Henry-a chu ka ngai a ni, ka ngai ngawih ngawih.

Monday tlai a ni a, Junior-a te exam zawh aṭang kar khat lai a liam leh tawh. Tution erawh kan la inpe tlai tin a, kan inpek zawh chuan ka haw ve leh mai zel. Chaw ei tur te chuan min sawm ngawrh thei em em a, mahse ka duh ṭhak bik lo.

Min sawm apianga ka ei zel a nih chuan min hmu hniam thuai ang tih ka hlau, kan hma hun kan hre lawk thei der bawk si lo. Junior-a lo nghah pahin pi Rinpuii nen chuan kan inkawm leh melh melh a, mahse a thusawi te chu ka beng leh lamah a chhuak leh nghal zel ni berin ka hria.

Dar 3 minute 15 vela a rik hmain Junior-a te pafa chu an lo thleng a, hmel hlim deuh hian ka lo nuih a, mahse a hnung bera lo kal hmeichhe zahawm tak ka hmuh chuan chawp leh chilhin ka nui tawp riai riai nghal.

Chutia ka nui tawp hmak chu Henry-a chuan ngawi reng hian mi lo en a, ka hawi sawn rang kher mai. Kei ang bawkin pi Rinpuii chuan chu nula chu a hre lawk bik lo va, a lo be nghal zung zung bawk.

Kei chuan coffee sa em em mai chu ngaihtuah chiang mang hlei lo hian ka in pawp a, ka lei a va han kang chiang tehreng em. Chhah chhuah leh chu ka tum ûk a, mahse a chi loh avangin sa ti chung chung chuan ka lem thei ta hram.

Junior-a chuan ka lam lo pan vatin lehkha tê hi min lo pe a, lehkhaa thu inziak ka hmuh chuan Parents Teachers Meet lam pang hi a lo ni a, kei daih daih min pe ve ringawt chu ka hrethiam lo hman hle. Junior-a chuan hlim hmel zet hian

"Miss, i lo kal ngei ngei a ngai aw? Apa pawh ka dil vek tawh, chuan khami ni ah khan kan result a chhuak dawn bawk. Eee chuan! Teacher te'n ka duh duh perform turin min ti a, min zirpui rawh aw" a rawn ti zung zung a, min sawmna chu lawmawm viau mahse ka kalna chi a niin ka hre lo.

"Ka kal ve a chi lo vang Junior, i pa leh i pi an kal thei reng alawm, chu bakah i pa paw'n ka kal vena chi ah a ngai lo vang" a hriatthiam theih tur ang ber chuan ka ti dam diai a, ani erawh a lo ner nasa mai.

"Miss i lo kal ve ngei ngei a ngai, apa paw'n a phal vek tawh. Kan lo haw lamah ka dil a, Miss apa chuan nangma thu thu a ni mai a ti. Lo kal ve rawh aw, please in" a rawn ti ngawng ngawng reuh a, kan bula pi Rinpuii a awm tawh lo hlauh chu a vanneih thlak zawk.

"Ka hre lo le Junior, in chung lamah chho phawt ang aw, kha chu sawina hun a la tam alawm, nakinah kan sawi ṭha dawn nia" tiin ka ṭhutna aṭang chuan ka ding chhuak a, ka lehkha ken lai ka pek chuan a lo la ve leh mai bawk.

"Ka pi, vawiin tlai chu Grace-i hian chaw a rawn ei dawn a nia, ka hmelhriat tir ang che u" step-a junior-a nen kan chhoh dawn lai takin Henry-a chuan a rawn ti a, a ṭawng a zawi vak bawk si lo nen ka ding deuh dat a, mahse ka awm dan chu a lo hrethiam ang tih hlau takin ka kal chhoh zawm leh nghal.

"A ni mâw? Khawi lam mi nge ni a Henry Bawiha? I ṭhiannu em ni? Nge nang hian ngaihzawng i lo nei reng zawk" nui ri har har chung hian pi Rinpuii chuan a ti a, step tawp thleng tawh mah ila Henry-a'n

"Ka pu nen chaw ei hunah ka hmelhriat tir dawn che u a nia ka pi" tia a chhan letna chu ka hre hman hram a, ka rilru a nain ka ṭah a chhuak tak zet. A hmeichhe rawn hruai chu zan pawh mu thei lova a ngaihtuah reng ṭhin a ni tih ka hrethiam mai a, mahse chu thil ka hriatna chuan min tina hle thung si.

Hetiang khawp hian pathlawi zunah ka uai ang tih ngaihna reng ka hre lo va, han bansan mai lah chu thil harsa tak turah ka ngai tlat bawk si. Henry-a te ang mipa ṭha lutuk leh hmeichhiate bawr rawn ka lo duh ve em em chu thil awm lovah pawh ka ngai lo va, keimah leh keimah chu ka inhnem a ni ta ber.

A chhan chu kei chauh ni lo hmeichhe tam takin an duh ve tho va, a fan account hial te pawh an siam a nih kha! Amaherawhchu kei chu min fawp tlat, hmeichhe dang ang lo takin kei chu min fawp tlat a ni.

Chu tak chuan ka rilru a tibuai a, min fawhnaah chuan zawlaidi a awm ang maiin a zunah ka uai ta ngawih ngawih si. Min fawp eng ang mahse engah mah ani chuan a ngai leh tawh lo va, kei lahin engah mah ka ngai ve thei tawh bawk si lo, a buaithlak kual vel vek a ni.

"Miss" Junior-a'n kut vai lauh lauh chunga a rawn ti chuan ka inthing harh vat a, ka chet dan mawlmang tak avangin Junior-a chuan min lo en kar bawk.

"Aw engenita? I ti zo tawh em ni? Khawi ka lo endik nghal ang, a har i ti em?" ka ti nghal zung zung a, Junior-a chuan ka awm dan chu a hrethiam reuh ang tih ka hlau ta hle. Pangai thei ang berin lan ka tum ṭang ṭang a, mahse a harsa lam hret chu a ni.

"Miss i dam lo em ni? Ni dang i ang lo ê, thil min zirpui la ka tih a nia, ka sawm leh lo mai ang che" Junior-a chuan a rawn ti fel thân a, ka awm dan chu a hriat viau emaw ni ka ti hman hial. Ka nui lui sak a, mahse ani chuan min ngaihtuah ve hmel hle thung.

"Ni lo, ka ṭha alawm, ka dam lo hleinem, chuan thil chu naktukah kan zir mai dawn nia. Kan zir hun a zo leh ta der mai, chhuk ang aw" tiin ka tho ûai a, ani pawh a rawn tho chhuak ve nghal. Thawveng deuh hian Junior-a chu ka bulah a kal a, kei erawh ni dang ang lo takin ka harh lo hle, a chhan pawh Henry-a te vang vek a ni.

"Pa, Miss hi a dam lovin ka hria" in hnuai kan thleng thla ta maw tihah Junior-a chuan a rawn ti a, ka va meng buai hman tak! Ka beisei ang ngeiin Henry-a nen chuan kan mit a intawng chat a, mahse a la sawn hmasa zawkah ka ṭang leh ta nge nge. Pi Rinpuii leh hmeichhe hmelṭhai chuan nui hek hek chungin ei rawng an bawl dun a, kan thawm pawh an hre lo.

"Ka ṭha ka tih khâ Junior, ka dam alawm. Ka haw nghal mai ang, chaw ei tui u" tiin in chu ka chhuahsan thuai a, ka awm reng a nih chuan ka dik dawn lovin ka hria. Ka chhuah dawn pawha min chhangtu an awm miah loh avang chuan ka lungngai lehzual a, hawa muthilh vang vang ka châk.

"Lo chuang rawh" kawngpuia ka din laiin Henry-a chuan a motor chhung aṭang hian a rawn ti a, Taxi driver call ka tum lai tak a ni bawk sia ka awm dan chu a lai hle. Ani chuan min lo en reng a, kei lah luh mai ka tum bik si lo.

"Lo lut rawh, ka lo thlah ang che" a rawn ti nawn leh chuan ka lut ve ta tawp a, min tilungngai viau mahse hawihhawmna ang zawng tal paw'n chuan luh chu a ṭhain ka hria a ni.

Kan tlan chhung zawng chuan kan inbe lo va, hrehawm ka ti ngei mai. Chutah kan tlanna lam chu kan in kawng a ni lo tih ka hre chhuak a, amah chu ka en ta hâw.

"Inbe lawk ang" mi pawh en chuang lo hian a rawn ti sup a, ka rilrua zawhna awmte chu a hrai te pawh a ni ang. Keipawh hlauhthawnna em em nei tawh lovin ka awm ṭha ve leh mai a, minute 10 vel kan tlan hnu chuan motor chu a tiding ta.

"Chhuk lawk ila" a rawn ti dam leh thlup a, kan thil tihtur chu ka hrethiam lo kher mai. A chhuk tâk daih avang chuan ka chhuk ve ta ringawt a, tlang thim vek lam hawi chuan kan ding dun ta reng mai.

"Ka tihpalh, i rilru ka tihnat avangin" a rawn tih avang chuan a hmel chu ka en thuai a, min en dan chuan ka rilru a tina fê zawk. Min ngaihtuah hmel zet hian min en ran a, a hma ang mai mai kha chu ni ila chuan min ngaihtuah tak tak emaw ka ti ngei ang.

"Engtin mah ka rilru i tina hleinem, chu zawng chu i sawi tur a nih chuan ka haw duh tawh a nia, sawi tur vak pawh ka nei ve lo" ka tih chuan ngawi reng hian min lo en a, a ṭawng leh tawh miah loh avang chuan motor lama luh mai chu ka tum a, mahse ka kal thui hman lo hle.

"Ni lo, i na tih ka hria, ka hre chiang lutuk" tia min pawt let dâwrin a âwmah tak chuan min kuah bet a, ka ṭah lah chu a chhuak nghal em em ringawt. Nghet tak hian min kuah a, tal chhuah pawh ka tum hran lo.

"Henry kan awm dan hi a dik miah lo a nia, chaw ei pui tur in neih leh nghal, i haw vat loh chuan a chi loh ang" ṭah insum zet chuan ka ti a, ka ṭah chhuah lohna'n ka hmui ka pet fan fan a, ka aw lawi deuh ruai te chu a hrethiam ang tih ka hlau. A âwm aṭang chuan min nam hla deuh hlek a, aw thawp raih leh ril zet hian

"Ka ngaina che Hlute, ka ngaina lutuk che" a rawn ti a, dam lutuk tak mai hian min rawn fawp zui nghal a, a mi fawh danin zun a ngah lutuk avang chuan ka lo chhan let lai pawh ka hre lo hial zawk.

"Ni lo, a theih loh. Kan awm dan hi a dik lo, min ngaina suh Henry. Nang chuan i ngaihtuahna aṭanga paih chhuah theih lo hmeichhia i nei reng alawm, min thlah thuai la haw vat zawk ang" ka ti zo chiah tihah

"Nangmah hi alawm kha hmeichhia kha, tun thleng hian ka ngaihtuahnaa awm loh lai pawh i nei lo asin, ka inhrethiam tawh bik lo" a rawn ti thuai a, a thusawite chu dawt bak a nih ka la ring duh ta chuang lo.

"Aih, dawt i sawi. Hmeichhe hmelṭha tak pawh chaw ei ah i rawn sawm vek khâ, kha hmeichhe changkang zet kha i hmeichhe sawi chu a ni tih ka hrethiam vek alawm" ka ti a, kan indin hnaih tawh bawk sia ka lung phu ri dawt dawt te chu a hriat vek ka ring.

"Ni lo, nangmah hi alawm zan pawh mu thei lova min awm tirtu chu nî, chaw ei tura ka lo hruai kha chu ka PA a nih kha! Ani nen khan ruahmanna kan siam a, ka laka i rilru put hmang ka rinhlelh fô ṭhin avangin ka PA puihna kha ka dil ta tawp a ni. Tichuan nang tê reuh hian i laka ka rilru put hmang ang chiahin ka lakah rilru i pu ve tih ka hre ta a, ka lawm asin" kiai suk chung hian a rawn ti sup a, ka insum theih tawh thlawt loh avang chuan ka kuah thlawp a, ani paw'n min lo kuah bet hne hle.

"Ka ngai lutuk che Henry, ka ngai tak zet che a ni. Engatinge min biak duh ngai loh? Engatinge i nui hmel pa tak te kha min hmuh duh tawh loh? Min pehhel zel a, hrehawm ka ti asin. Engatinge min be leh duh si lo khan i zunah min uai tir? Suala, engatinge min fawh vel kher?" ṭap chhuak feih feih chung chuan ka ti a, ani erawh kei ang lo takin a rawn nui ri hawk thung.

"Aw le, ka zuna ka lo uai tir che avang leh ka lo fawh vel kher che avangin ka tihpalh a ni e. Nang ang renga hmeichhe danglam leh min tihlimtu hi ka la tawng ngai lo, min zahpui emaw tiin ka hlat che a, mahse nang chuan ka rilru ang chiah i lo pu ve reng si" a aw aṭang chuan nuih a insum tih ka hre thei.

"Ni lo, keini hi inkawp thei kan ni lo Henry. Junior-a ngaihtuah rawh, ani chuan kan awm dan hi a duh miah lo vang" tiin a âwm aṭang chuan ka tawlh sawn vat a, amah chu ka chho en ranah a, a hmel aṭang chuan a ngaihtuahnaa awm tur awm ang ka hre thei lo.

Ngawi rengin min en a, a mitmeng chu a buai ve nak tih a hriat hle. Henry-a chu en reng mah ila Junior mawlh chuan ka rilru luah a, a pa nena kan awm dan chu a duhin ka ring lo. A tan chuan Maths tutor ve mai ka ni a, a pa ngaihzawng êm ni tur chuan min duh theih ka ring lo hle a ni.