𝐃𝐎𝐂𝐓𝐎𝐑 𝐌𝐀𝐑𝐄𝐌𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟏𝟑 - 𝟐𝟒)

DOCTOR MAREMA 

By 

Havali Adam

16 December 2021

Chapter 13

Kan in chhung kan luh chuan ka putea leh ka nu chu an a lo awm lo va, naupang ho pawh an lo awm chuang lo. Ka pitei chuan u Marema chu a lo be siam siam a, mi hawihhawm tih takah ka pite chuan a mikhual chu a lo dawng sawng ṭha hle.

"Tunge Mambawihi awm leh awm loh lo zawngtu kha ni ang âw ka lo tirilru vawng vawng a, Mambawihi ṭhianpa lek chu i lo nia" ka pitei'n a rawn tih chuan

"Pite u Marema hi i lo hmu tawh maw!?" ka ti vat a, u Marema chu ka en deuh hâw bawk.

"Aw, nichin mai khan hei hi Mambawihi te in a nih leh nih loh thu min rawn zawt a, a nih thu leh i awmna ka lo hrilh a nih kha! A tirah kha chuan kan in kawta Car lo ding kha mak ka ti deuh a, mikhual kan neih ka lo ring ve tawp" ka pite chuan a rawn ti a, thingpui chu a rawn chawi phei zui zat bawk.

"Pite, khawiah nge ka nu leh putea te hi?" ka tih lai chuan ka nu leh putea te chu an rawn inzui lut a, ka bula ṭhu run u Marema ka nu'n a hmu chiah chu mak a ti ve hle.

"Doctor Marema daih daih chu, enge hetah te i rawn tih ve? I hna thil lampang em ni?" ka nu chuan ka ep chiah ṭhutthleng awma a ṭhut thlak rualin a rawn ti a, ka bula mi chuan a lo kal chhan dik tak a sawi ringawt ang tih ka hlau ta hle.

"Ni lo ve ka pi, ka lo kal chhan tak chu Ma" a tih lai chuan kei chuan rang zet hian

"Hemi khuaa Health Sub Centre vel khi a lo en dik dawn a, thlenna tur a nei si lo va, hetah hian a lo thleng tawp a nih hi" ka lo tih zawm vat a, u Marema chuan min tizak mai dawnin ka hria.

"Aw a nih chu, hetah i thleng ve reng anga a ni mai alawm" ka nu pawh chuan a rawn ti ve leh mai a, mahse a hmel aṭang chuan dawt kan sawi tih a hre vekin ka hria.

Eng eng emaw ni kan sawi a, kan titi pawh a kal hlawm ta phian. Ka nu chuan keini nufa tana u Marema ṭangkaizia leh kan inhriat chhoh dan vel chu a sawi a, ka putea leh ka pitei paw'n ngaihnawm tih hmel tak hian an lo ngaithla kar bawk. Ka putea ber chuan u Marema chu titipui nuam a ti a, u Marema chu an ngaihsan hmel tawp.

A awm dan leh chezia vel a zahawm mai bakah a hnathawh a sang a, thingtlang mi tan chuan lo ngaihsan ruk loh theih pawh a ni lo. Kan mut dawn chuan u Marema ber chu ka ngaihtuah a, engtinnge a mut ang tih mawlh chu ka ngaihtuah a ni. Aizawl lamah awm se chuan a khum dup nuam zetah a mu ngei ang a, hetah erawh chhuat lo chu mutna tur a awm hauh lo.

Mi dang zawng zawng an muthilh lai pawh chuan ka la harh kar a, ka muhil thei lo hrim hrim. Kan awm dan vel chu ka ngaihtuah let a, a nuam dangdai ka ti ta phian. Chutia a reh ṭhap lai chuan u Marema ren run chuan thawm a rawn chhuah a, thlasik a nih tawh avangin vawt a ti ang tih ka hlau ru hle. Mahse vawt ti se chuan phone a nei a, keiin ka nei bawk a, min lo message mai tur ah ka ngai. Ka phone chu hmet engin dar zat chu ka en a, dar 11 leh a chanve lai a lo ni reng tawh.

Thawm a rawn awm leh ṭhin avangin ka khum aṭang chuan ka tho chhuak ta nge nge a, mahse u Marema lam ngaihven tuma kal ta lo chuan ka la ṭhu deuh reng. Room chhunga mu ve te chu ka ngaichang a, an awm dan ka thlithlai a, an muttui hmel hlawm kher mai.

Ka putea phei chu a hnar bawrh bawrh a, ka nu pawh a thawk rik sek sek danah a mutui ve hlein ka hria. Zawitein room pawn lam chu ka pan a, chhuat chu thing a nih avangin a lo chik deuh ṭat ṭat bawk. Thawm dim thei ang ber chuan ka kal a, rizai ka keng ṭun bawk nen ka tlu thlawrh ang tih a hlauhawm hle.

U Marema mutna bul ka thlen chuan ka rin ang ngeiin vawt a lo tih hmel hle a, mite pawh rawn hrilh ve mai tur alawm ka ti rilru neuh neuh. U Marema hmel chu ka en a, light off vek tawh mah ila a hmel chu tukverh aṭanga thla eng lo lut avang chuan ka hmu thei vek tho. Rizai chu a harh hlau tak chuan ka sin tir a, a maimitchhin reng avang chuan a muhil ni turah ka ngai. Chutia rizai ka sintir zo kal sawn mai ka tum chu a rawn che hrut a, kan inmelh chiang ta hle.

"Mambawihi" a rawn ti thum dup a, kei chuan a ṭawng rin hlau zet hian

"Ṭawng ring suh, mi dang an mu vek tawh a nia" ka lo ti vat a, ka tho kang tur chu a bulah min pawt tlu nghal.

"Mambawih la kal mai lo teh, hetianga ka bula mut tir che hi ka châk tawh lutuk" a awma min kuah bet vang vang pah chuan a rawn ti sup a, kan awm dan chu khaw vawt karah pawh nuam ka ti ngei mai.

"Vawt i tih hmel sia rizai ka rawn sin belh tir che a nih hi, ka phei vat a ngai a nia u Marem" ka ti sep sep a, ka putea hnar ri bawrh bawrh chuan kan ṭawng ri chu a hliah khuh vîauin ka hre bawk.

"Vawt ka ti lo, i putea hnar ring lutuk sawn min timu thei lo zawk a ni" a tih chuan ka ṭhen sak a, nuih rik pawh châk mah ila a ria nuih chi a ni reng reng hleinem.

"I taksa hi a lum nuam, mei lum ang mai a ni" ka ti deuh phawng a, chu thu chu ka sawi tum pawh a ni lo.

"Ti hian riak dun mai ang, zing karah i duh leh i phei mai dawn nia" a rawn ti sup a, mahse a thusawi avang chuan a âwma ka beina aṭangin ka inla hrang ta vat.

"Ni lo u Marem, hetianga riah dun hi a ṭha lo. Min thlah la, ka phei zawk ang e" tiin a hmel chu ka en a, a hmelṭhain a pa thlawt a ni.

"Aih, ka phal tawh lo. Naktuk zing karah ka kai tho ang che, zanin chu ti hian min riahpui rawh" a rawn ti leh ta tlat mai.

"U Marem, a tih chi loh" te chu ti ve mah ila kan awm dan chu nuam ka ti a, a taksa lum tak nghenga mut chu ka châk em em bawk.

"Tih chi loh a awm lo, kan chesual dawn pawh a ni hleinem" a rawn tih chuan ka thla a lo muang nghal sawng sawng a, u Marema te ang mipa ṭha lutukin min duh ve em em chu ka lawm a ni.

"Min kai tho ngei ngei ang che, mi dangin hetianga kan riak dun tih an hmuh vaih chuan a zahthlak dawn lutuk" ti sepin ka kuah let ve a, ani pawh chuan rizai min sin ṭhat tirin min kuah zui ve nghal.

"Lawk, min lo en lawk teh Mambawih" min kuah khawm vek tawh hnu chuan a rawn ti a, ka hawi chhoh theih turin min kuahna leh rizai te chu a tikau zui bawk.

"Enge?" tia a hmel ka en chuan min rawn fawp a, a hmui lum thar thar leh nem em em chuan ka engkim a tidanglam leh ta vek mai.

"I hmui hi ka fawh kham theih pawh ka inring lo, hetiang em em ka hmeichhe duh, ka ta ni turah ka duh tlat nang ka kianga i awm hi ka lawm a ni" rei fe kan infawh hnu chuan a rawn ti a, kei erawh a thusawi avang chuan ka lo lai leh hle.

"Mu vat ang, thawh kan hai palh chuan a pawi thui dawn lutuk" tiin a âwm lamah chuan ka insawn thla a, a ni pawh chuan a hma ang bawkin min lo kuah ṭha ve leh mai bawk.

"Hetianga kei ang chiaha min thlahlel ve tih ka hriat hian ka lawm a, ka thinlung chhung hi a hlim a ni" a rawn ti leh sup a, ka chhip sam chu a fawp zui vang vang.

Tûmah kan ṭawng tawh lo va, ka putea hnar ri bawrh bawrh tih mai loh chu thawm hriat tur reng a awm lo tluk a ni. Ka mit chu ka chhing vang vang a, ka bula u Marema a awm vang nge ni ka Christmas hman dan tur chu a nuam dawn hle in ka hria.

"Hei Mambawih, thawh a hun tawh a nia" tiin u Marema chuan ka muthilh tui lai chuan min lo kai tho a, ka mut a la chhuak lutuk chu men pawh ka meng peih lo.

"Lawk aw, rei lo te" tiin u Marema chu a aia nghetin ka kuah a, a taksa lum nuam zet chu kalsan mai atan chuan a uihawm ve em bawk a ni.

"Hei Mambawih, zing dar 5 a ri tawh a nia, i nute min lo hmuh i duh miah loh khâ" a rawn ti leh chuan ka harh zawk a, ka lo awm dan vel chu a zahpuiawm ka ti ta hle mai.

"Aw le" tiin ka tho chhuak vat a, mi dangin min lo hmuh ka hlau bawk nen thawm dim thei ang berin room lam chu ka pan ta vat.

Ka lo muhil leh a ni ngei ang ka harh chuan zing 7 leh a chanve vel daih a lo ni tawh a, nula ve si chutianga ka tho tlai ta viau chu nuam lo ka ti ngei mai. Amaherawhchu ka pitei chu a fel em em a, ei rawng bawl pui dawn pawhin a ngaih loh thu leh min awl theih thu a lo sawi mai zel.

Kan in kawt vela ka chhuah chuan ka putea leh u Marema chuan ar an lo puah mawlh mawlh a, an titi tui hmel hle bawk. Kei chuan kan in veranda aṭang chuan u Marema chu ka lo en reng a, eng pawh ti se a inhmeh vel vekin ka hria.

Christmas ni a ni bawk a, tape nei apiang chuan Boney M hla an play ṭhup ṭhup mai. Kan la nawi ve deuh bawk nen chhuat leh ṭhutthleng tih vela chaw ei chu kan awm a, puitling pangai chin erawh chuan dawhkanah kan ei thung. Chaw eina ah te chuan u Marema chu an be tlangnel em em a, ka rin ai takin u Marema chu a insiamrem thiam. Tukṭhuan kan ei kham chuan inkhawm turin kan insiam a, u Marema chuan min en leh vawng vawng ṭhin a, chungte chuan ka che te chu min ti khawr zual.

"I inkhawm ve dawn ti raw? Inkhawm loh kha i tum ringawt ang e" room lama ka nute an insiam lai chuan ka ti a, che sawn miah lovin ṭhutthlengah chuan a ṭhu rei ve bawk em ni.

"Ka hre lo le, hei chiah hi thuamhnaw ka rawn inkeng a, ka hmu châk lutuk che avang khan thuamhnaw ken nachang pawh ka lo hre lo a ni" a rawn ti deuh duah a, a sawi tum chu ka hrethiam ve mai bawk.

"Ti pawh khan inkhawm tawp mahla a pawi hleinem, inkhawm ve rawh. Ka putea bulah emaw i ṭhu mai ang a, a harsa dawn lo lutuk"

"Ka inkhawm chuan i bula ṭhut ka duh dawn asin" leh tlat ṭhin hian âw.

"I ti ho e a! Kei te chu hmeichhe lênah ka ṭhu ang a, nang chu mipa lênah ka putea nen in ṭhu dawn nia.

"Ka sawi ang chuan inkhawm ve tawp mai rawh" ngawi renga min en reng avang chuan ka ti leh a, titau te pawh a ang alawm le.

"Inkhawm banah khawiah emaw min kalpui thei, kan pahnih chauha awm dun hi ka châk tawh lutuk" a rawn ti daih a, keipawh chuan a inkhawm loh ka hlauh em avang chuan ka lo aw ve ta ringawt.

Inkhawm hun a lo thlen chuan biak in lam panin kan inzui phei a, u Marema chu khawpui tlangval tih takah a sangin a langsar fal hle. Ka sawi ang chuan ka putea bulah a ṭhu ve a, mite chuan mikhual a nih ringin an en duh hlawm hle.

Inkhawm ban chuan biak in kawtah thingpui in tur leh chhangban hi an lo chhawp a, inkhawmte chuan kan ban luai luai bawk. U Marema chu a awm danah min zawng tih ka hria a, mi tu tu emaw niin an lo biakna chu a hne hmel tawh hle bawk. A hawi vak vak hnua min lo hmuh chuan ka lo nui sak a, ani pawh a rawn nui ve nghal.

Kan ina kan awm hnu chuan biak in bul deuh lawka awm kan ni bawk nen in leng kan ngah hle a, kan khaw pastor thlengin kan inah chuan an leng lut a, chuti taka in leng kan ngahna chhan chu ka putea leh ka pitei vang niin ka hria. Thingpui ka lum zo chiah emaw ka tihin mi dang an lo lut zel a, siam ve zel an ngai bawk nen u Marema bula awm pawh ka hman ta thlawt lo.

Chini pawh a hek duh ang reng hle a, zep lovah chuan ka putea chu an inphal zau ka lo ti khawp. Chutiang tak chhungkaw hausa leh awm thei pawh an ni bik lo va, mahse mi tu pawh chu an lo lawm lut peih em em thung.

Christmas ruai ṭheh ni kan thlen chuan ka awl dawn vîau emaw ka tih laiin ka awl leh ta hauh lo, chaw hma lam phei chu ka buai tluan leh ṭhak.

"I motor-ah ka lo chuang" ka putea fapa naupang ber chuan a ti a, thingpui siama ka awm hlat deuh mah ila u Marema leh putea fapa inbiakna chu ka lo ngaihven ru em em.

"I chuang châk em ni?" u Marema chuan a lo ti ve mai a, pakhat lah chuan aw tihna'n a lu a lo bu vat a, u Marema pawh a nui ve ta suk.

"Motor-ah chuang ang aw" tiin u Marema chuan naupang chu a kai chhuak a, a naupang melh dan leh biak dan vel chu ka lo hlimpui ve em em ringawt.

"Au Mambawih, hnah la turin kan kal dawn aw, a pa leh a nute kha lo hrilh mai rawh" putea fapa upa ber chuan a rawn ti a, chem leh ipte chu a keng zui nghal bawk.

"Aw le, fimkhur la aw, a chet sual theih a nia" tiin ka lo chhang ve vat a, inkhawm lai khan ruaiṭheh hnah la turin kohhran secretary in a puang reng a ni.

In leng kan neih rem deuh hnu chuan putea chu a fapa kalna vel ka hrilh a, u Marema te chu ka zawng ru deuh a, mahse motor emaw an hmel emaw pawh hmuh tur a awm lo hrim hrim. U Marema chuan motor in a tlan kualpui vel a nih ka ring ta ber a, ruaiṭheh hmaa an lo haw hman turah ka ngai ta tawp. Dar 2 leh a chanve velah chuan u Marema te chu an lo haw a, ka rilru pawh a nuam ta huai. A awm loh chhung lek pawh khan ka ngai hman em em a, ani lah chuan naupang a buaipui daih si.

Ruai kan ṭheh lai te chu u Marema mawlh chu ka khawngaih, a chhan chu a ṭhu tung ût a, a chaw ei te chu a tui hmel vak loh a ni. Savun ṭhutthleng kan indaih loh avangin ken kep tur ka nei lo va, chuti ni lo se chuan ṭhutthlenga ṭhuin hahdam takin ruai a ṭheh thei ngei ang. Tin, amah a pa lian ang reng sia chaw a bar dawn te chuan a kun thla leh dûk duk ṭhin. Kei erawh chuan changel hnah ngeia ruai ṭheh chu a Christmas bik hliah hliah ka lo ti a, mahse ka chaw ei a tui hran bik em em lo.

"Hetianga awm hi ka châk tawh lutuk" min kuah reng chung hian u Marema chuan a rawn ti a, a motor passenger seat lamah chuan kan awm ran bawk. Khaw pawn daiha awm kan nih tawh avangin mi han venthawn tur an awm lo va, kan zalen rih a ni ber.

"I ei puar em? Kan ṭhut danin a zir lo bawk sia kei chu ka puar vat" kan ngawih leh vang vang hnu chuan ka ti a, ani pawh chuan

"Puar a ni mai, ka piantirh ata hnaha ka vawi khat ruaiṭhehna a ni hial mai" a rawn ti ve mai a, dawt a sawi chu ka ring hauh lo.

"Mambawih, naktukah ka chhuk ngei ngei a ngai dawn a" a rawn ri hlawl a, a aw aṭang chuan a peih lo hmel ngei mai.

"Maw!? Aaaaa..nia, Doctor i ni sia khu lamah an mamawh tawh ngawt ang che" ka lo ti ve vat a, a chhuk ngei ngei a ngaih thu chuan min ti hnual ta vek.

"Ka chhuk peih lo khawp mai, ka rualin lo chhuk ve nghal mai rawh"

"A chi nâng, keimah chauha kan in luaha awm tur chuan ka nu'n min ngaihtuah lutuk ang. Chu lovah nulate kan ni a, eng pawh tawk thei kan ni"

"Ka awm hi Mambawih, zan tin i bulah ka lo kal ziah ang a, ka awm chuan i him lo miah lo vang"

"Chutiang ringawt a ni hleinem, ka chhuk leh hnuah phei chuan enge ka tih ber ang tih pawh ka ngaihtuah thiam rih lo. Chawhmeh zawrh chu ka tum leh a, mahse ṭhutna tur hi a dang zawn a ngai tawh dawn thung a ni"

"Chawhmeh zuar tawh lo turin ka duh che a ni Mambawih, i hnathawh tur chu ka lo zawnpui ang che. A nih loh pawhin nupuiah ka nei vat che ang a, nuamsa takin i awm thei dawn alawm"

"Ni lo u Marem, chawhmeh ka zuar tawh dawn lo a nih pawhin keimah ngei hian ka hnathawh tur chu ka zawng ve tawh ang. A hma kha chuan ka insit a, dawr vela thawk tur pawh khan tling zo lo ka inti ru thei hle. Mahse tunah chuan keimah ngeiin ka hnathawh tur chu zawn hmuh ka tum tawh ang a, chuan ka hlim phah pawh ka ring bawk"

"Ka tel ve chu i duh lo tak tak em ni?"

"Aw duh lo, mahse u Marem thinrim phah chuang suh aw?" a rawn hmarh deuh hmuk avang chuan a thin a rim ka ring ve tawp.

"Thinrim lo e, i lakah hian ka thinrim phal lo va, tih thinrim che hi ka duh ngai lo bawk" tiin min lo fawp a, min fawh tir lama dam em em si kha min fawh rei tak hnu chuan a rawn duhthaw ta hle.

"U Marem, kan awm dan hi a dik lo" thaw deuh hlawp hlawp chung chuan ka ti a, a âwmah chuan la nam ṭai bawk.

"Ka hria alawm, ka tina dawn lo che a, thil ṭha lo ka tihpui dawn lo bawk che Mambawih" tiin min lo fawh zawm leh nghal a, a thusawi chu ka rin vang nge ni ka lo dang buai duh ta bik lo.

Tlai khaw thim tirh velah kan haw a, ka nu chuan min lo en chik leh ngei mai. U Marema nena kan inkar chu a hriat vek tawh ka ring a, a hmaa ka zah tlatna ang kha ka nei tawh lo bawk. Min zawt a nih pawhin ṭha taka sawi mai chu ka tum a, u Marema nena kan inngaizawng chu thil sual pawh a bik hleinem.

Zan kan mut dawn chuan u Marema chu ka en leh ṭhin a, a tuk maia chhuk a ngai chu a peih loh hmel tak zet a ni. Tin, ka putea te paw'n an ui der thiam ve em em a, a zin apianga an ina thleng tur te pawhin a hrilh ve nasa hle bawk.

Chapter 14

A tuk a lo nih chuan u Marema chu a chhuk nghal mai turah ka ngai a, mahse a teuh lo. Chhun lamah chuan ka putea chhang deng chu a pui a, a lian bawk nen a kut thlak a nan ngei mai. Naupang ho lah chuan

"A mawngkhâk lai ka duh, deng leh rawh" an lo ti chûl a, u Marema chu thingtlang mi ni lo mahse thil a thiam ve zung zung zel chu mak ka ti thei hle. Ka putea meuh paw'n

'Keini'n chhang denna'na hun tam kan hman laiin nang chuan rei lote ah i deng zo vat mai" a ti ve hîal a, u Marema pawh a nui ve suk suk.

"I chhuk dawn lo em ni?" kan in bul tuikhura kut a sil lai chuan ka ti a, a awm dan chu chhuk leh loh mai tum a ang.

"Chhuk dawn e" a lo ti awlsam mai a, min en chuang lovin a kut chu a nuai mawlh mawlh.

"I chhuk dawn chuan chhuk vat rawh, i chhuk har chuan a ṭha lo zawk"

"Chû, chhuk turin min va duh tawh awm ve"

"Chutiang lam pawh a ni lo, khaw thim khera chhuk i tum ang tih ka hlau. Zan lama i chhuk chuan chhun ang takin kawng a lang fiah lo va, chu chuan accident a ti awlsam bik"

"Min va ngaihtuah ve a, Pathian zarah accident chu ka tawk em bik lo turah ngai ang"

"Ngaihtuah e, Pathiana innghah a ṭhat rual hian mahni pawh hian zir ve a ngai tho. Tlan chak na nâ na chuan accident tawh theihna chance an ngah a, chuvangin tlan chak viau lo vang che. I tlan chak loh pawhin mi dang tlan chak khan an lo su palh thei tho a, engkimah khan fimkhur la a ni tawp mai"

"Âw, ka nupui han ni tawh mai la ka va ti em" tiin min lo kuah a tum a, kei erawh ka lo tawlh hla thung.

"Khatiangin min kuah ringawt tum ṭhin suh, khaw en a nih tawh hi! Chuan tunah kan inngaizawng ṭan ve chauh a, i nupui ni tur chuan kan la inngaihzawn fê a ngai ang" ka tih chuan a rawn nui chhuak hawk a, keipawh chuti tho.

"Aw le, kan inhriat tirh aṭang tawh nang tê hian min tikâwi min tikawi a nih ber hi!" a rawn ti ve leh sup a, a kut a sil zo tawh bawk nen kan in lamah chuan kan inzui phei zui ta bawk.

"Ka pi, Mambawihi hi Health Sub Cnetre lamah ka kalpui lawk dawn aw, ka chhuk hma han endik leh lawk ka duh a" kan in chhunga kan luh rualin u Marema chuan a rawn ti a, a thusawi avang chuan amah chu ka en hû.

"E aw, a nih chû, han kalpui rawh" tiin ka nu pawh chuan thil awmzia hre miah lovin a lo phal ve mai a, u Marema chuan a hmaa ka dawt sawi chu a hmang ṭangkai ta chiah mai.

U Marema nen chuan motor ah kan chuang a, Health Sub Centre lamah kan kal dawn emaw ka lo ti a, hmun dang daihah min tlan pui thung. Khaw pawn lam chu kan pan a, tûmah chu kan ṭawng lo bawk. A nihna takah chuan ka ngai dawn a, a chhuk daih tur chu ka phal lo a ni.

Amaherawhchu chung ka rilru vel chu hrilh kher ka tum lo va, ka hrilh chuan a cham reng duh tak tak mai ang tih ka hlau. Doctor a ni a, kei aia mamawh zawk dam lo tam tak an awm a ni. Kei chuan a bula awm chu ka châkin ka thlahlel tak meuh mai, mahse keia lo thlakhlelhna te ai chuan nunna chu a pawimawh zawkin ka hria.

"Ka rual chuan lo chhuk ve mai rawh Mambawih, i hmel hmu lova awm chu a hrehawm dawn em mai" kawng zau lai deuh sira kan din hnu chuan a rawn ti a, aw ka lo chhuk ve dawn tih mai chu ka duh rum rum.

"Kum tharah kan lo chhuk leh dawn alawm, tuna lo chhuk thawt thawt chu a fuh ber lo a ni. Heti lamah ka putea te paw'n min ngai ve a, kan chho khat vîau ṭhin bawk si" ka tih lai chuan

"I putea te ai chuan ka ngaiin ka mamawh daih zawk che" a rawn ti hmuk a nih chu!

"U Marem i ti mak thei em mai, i upa tawh em hî" ka ti ta ringawt.

"A ho, ka bula i awm theihna'n chuan ka upat leh upat loh lam a pawimawh lo" a rawn ti leh hmuk a, a awm dan vel chu a naupang chhia ngawi ngawih.

"U Marem" tiin ka bula ṭhu tum run chu ka ko a, hawi pawh a lo hawi duh lo.

"U Marem" ti lehin a lamah chuan ka tawlh phei a, a hmai ka zut rual chuan min rawn en nghal.

"Ka ngai dawn lutuk che" tiin a hmuiah chuan ka fawp zeuh a, ka thil tih chu hmeichhe tih atan mawi lo vîauin hre mah ila u Marema chu ka ngai dawn êm a ni.

"Mambawih" tiin ka ṭhutnaa ka ṭhu phei turin chu ka darah a rawn chelh vat a, min fawp zui nghal mial mial.

Min fawhna te chuan rei lovah ka taksa chu a rawn tidanglam leh ta vek a, min khawihna te chu a hriat bik ngawih ngawih. U Marema tih chauh loh chu ka rilru ah eng dang reng a lang lo va, ka men deuh ria ria chuan motor hnung lamah kan lo ṭhu awn duai tawh. Engtik laiin nge kan awmna chu kan insawn hman ka hre lo va, min fawp pah reng bawk nen ka ngaihtuahna te chu a fim lo a ni ber.

"Mambawih, engatinge i taksa ka sik hian ka insum theihna te hi a bo mai dawn ṭhin le" rawn ti hluaiin min fawp leh mial mial a, ka hmuiah mai ni lo ka nghawngah te chuan a fawp a, a hmui lum tak chuan zauthauna nasa lutuk min pe zawm bawk.

Keipawh chuan engvanga u Marema min tawhna te chu dawngsawng ṭha em em ṭhin nge ka nih leh envanga a bula inphal zua em em ṭhin nge ka nih chu ka hre lo va, amah chu ka thlakhlelh mai bakah ka duh em em bawk a ni.

U Marema chuan min fawh mai duh tawk lovin ka taksa chu a zut kual a, chungte phei phei chuan min tizauthau lehzual. Kei ang bawkin a ni pawh chu a danglam tih ka hria a, a kap pawng ṭûl chuan min do ran bawk. Kan ṭhutna inthleh vek tawh avangin a hnung lamah chuan kan mu a ni deuh ber a, khaw en lai ni mahse zah lam reng ka ngaihsak tawh lo.

Rei fe chutianga kan awm dun hnu chuan kan inthlah ve thei ta hram a, nu leh tlangval inngaizawng te chu keini ang tho chuan an inthlahlel ve ang em tih ringawt chu ka ngaihtuah ta a ni. Kan in lam pana kan haw te chuan kan inbe lo hrim hrim a, amah ka ngaih dawn lutuk avang chuan ka ṭap thei mai dawnin ka hria.

U Marema nen chuan la inngaizawng rei lo mah ila a tel lova awm chu ka thiam tawh lo tih ka hre chiang em em a, chutak chu a ni Aizawl lama min chhuksan tur ka huhphurh em emna chhan.

Tlai lam dar 3 bawr velah u Marema chuan Aizawl lamah min haw thlaksan ta a, a awm lo chiah chu ka ruak huaiin ka hria. U Marema awm laia chaw ei tui thei deuh kha a chhuk tlai chuan ka ei tui thei reng reng lo mai a, chutiang khawp chuan u Marema chu ka lo duhin ka lo vei ang tih ngaihna reng ka hre lo. Ka putea chhang deng te chuan chaw hma lama u Marema deng lai chu min ngaihtuah chhuah tir a, ni khat pawh la ral em lo mahse u Marema chu ka ngai hman em em tho.

"Mambawih, lo kal teh" tiin ka nu chuan pindan lamah min ko lut a, ka putea leh pitei te chu in leng an neih avangin an titi tui hle.

"Doctor Marema nen hian in inngaizawng ti raw?" khuma ka ṭhut thlak rualin ka nu chuan a rawn ti a, kei chuan lo zep buai vel chu ka tum tawh lo.

"Aw inngaizawng e" ka ti ve sep a, ka nu hmel erawh ka la en ngam chuang lo.

"Ka ring ru deuh reng a, hmân aṭang tawh a bula i awm dan vel leh a ngaihtuahzia che ka hmuh hian nang hi a ngaizawng chiang che alawm" min hauh ka rin tehreng nen min hauhna aw ka pakhatmah a la chhak chhuak lo.

"Nu, u Marema nena kan inngaizawng hi pawi i ti em? I duh chuan min hau bawrh bawrh rawh, mahse amah ka duh ve tho avangin ka lo hnar thei mai bik lo a ni" ka ti leh sep a, u Marema nena kan inngaihzawn tawh avang chuan ka nu chu a lung a nih loh ngei ka ring.

"Engatinge ka hauh ringawt ang che? Ka fanu i ni a, i hlimna hi ka duh ber alawm"

"I thin a rim miah lo em ni? U Marema nena kan inngaihzawn avang hian i thin a rim miah lo maw!?" mak ka tih em avang chuan ka ti leh hluai ringawt.

"Engatinge ka thin a rim ang? I nu ka nih hí Mambawih, i hlimna chu ka hlimna a ni asin"

"A nihna takah chuan ka pa'n min boralsan hnu aṭang kha chuan nang kalsan emaw pasal neihsan che hi ka tum lo hrim hrim a, mahse maw nu a mak lutuk, u Marema hi ka ring em em ringawt a ni. Ani chuan lo inngaizawng emaw lo innneih ta pawh ni ila nangmah kan thlahthlam loh tur thu min hrilh a, chu chu ka ring ve tawp a ni. Tin, u Marema te ang chhungkaw hausa ka ngaihzawn hi i phal ka ring lo va, inzawmna neihpui pawh i duh ka ring lo a ni"

"Mambawih ka thin a rim reng reng lo, Doctor Marema te chu mi fel tak leh mi ngaihtuahna ngah tak niin ka hria. Amaherawhchu Mambawih, i tisual ang tih hi ka hlau ru hle a ni. Tunah hian lo induh tawnin inthlahlel vîau mah ula nakîn hun thleng kha ngaihtuah la, i hma huna harsatna i tawk dawna i hriat chuan ṭhen thuai mahla pawi ka ti chuang lo"

"Nu, u Marema hi i ring ve lo em ni?"

"Ka ring alawm, mahse thil awm thei ka sawi mai a ni. Doctor Marema chu mi ṭha tak a ni tih ka hria, mahse kei chuan amah mai ni lo a chhungte thlengin ka ngaihtuah vek a ni"

"U Marema chuan a chhungte ngaih dana buai lo turin min hrilh a, amah chauh ring turin min ti bawk"

"Doctor Marema chu i lo ring hman hle tawh a ni maw?"

"A mak lutuk nu, ka pa tih lovah chuan ani tluka mipa rin hi ka la nei leh lo a ni. Ani chuan a thusawi engkimah min ngaihvenzia leh min duh ve zia a tilang ṭhin a, kei chauh ni lo nang thlengin asin a ngaihtuah ṭhin" ka nu chuan u Marema chu ka kawppui atan a duh vak lo tih hre tho mah ila chuti ngawtin ka ṭhen phal mai bik tawh si lo.

"Eng pawh ni se in lo inngaizawng tawh a, in pahnih inkarah chuan inrawlh ka tum lo. Putling i nih tawh avangin i tana ṭha tur chu i hre tawh a, chu bakah kei aiin Doctor Marema zia pawh i hre chiang zawk ngei ang. Doctor Marema hi ka ngaina ve em em a, a felin a puitling em em bawk a, ka fanu ngaihzawng atan leh pasal atan pawh ani hi chu a ṭhat ngei ka ring. Amaherawhchu tuna kan hmuh ang ngawt hian a nungchang a lo awm lo ve thei a, inngaihzawn lai chuan kan ze ṭha lai ber kan pho chhuah ṭhin avang hian ka lo hlauhthawnpui mai che a ni" tiin a thawk a la zeuh a, chutah mah vek chuan

"Lo inneih ta ula, khawpui tlangval chuan chhungkaw hausa leh hmeichhe changkang tak bawk an duh leh mai ang tih ka hlau a ni. In pahnih hian inṭhen rawh u ka tih miah lo va, mahse ngun takin ngaihtuah ang che Mambawih" tiin a rawn sawi chhunzawm leh nghal dap a, a ṭhutna aṭanga tho chhuakin choka lamah min pheisan a, a kal hnu thleng chuan ka nu thusawi chu ka ngaihtuah zui char char.

Ka nu thusawi engkim chu ka ngaihtuah fê hnuah pawh a dik zia ka hri a, u Marema a duh loh vang ni lovin a fanu hma hun chhe vek thei chu a ngaihtuah tih pawh ka hria. Ka rilru chu a buai ta hle a, kan kal thui tak tak hmain u Marema chu ṭhen leh mai ṭha tein ka hria a, mahse han ṭhen em chu ka ngaingam bik chiah si lo.

Marema POV

Tunah chuan Mambawihi ka aṭangin min duh thu ka hre tawh a, kei ang chiaha min thlakhlelh ve zia ka hre tawh bawk a, ka rilru chu a hlim em em a ni. Mak tak maiin Mambawihi taksa te chuan min tidanglam a, ka sik rei phei chuan mipat hmeichhiatna hman duhna rilru ka pu hman hial ṭhin.

Kimtei nena kan awm dun erawh kha chuan ka insum thei ṭhin em em a, keimah aiin amah kha a insum thei ṭhin lo zawk. Khatia kan boruak a dik loh chhoh tâk hnu khan Kimtei chu ka hmu leh tawh ngai lo va, ka nu ka aṭanga ka hriat danin Mizoram pawn lamah a zin rih a ni awm e.

Kei erawh a hna chelh lai chu ka lo ngaihtuah thleng daih a, a hna bansan meuha a zin chu ka lo uipui khawp. Amaherawhchu a duhthlanna a ni a, a duh danin thutlukna pawh a siam ni ngei turah ka ngai. Kimtei mai ni lo a chhungte hrim hrim chu kan inah pawh an rawn chuang kai tawh ngai lo va, chutiang bawkin ka nu pawh chuan min hau min hau tawh bik lo.

Mambawihi ka ngaih em avangin thingtlang khua, ka hriat ngai pawh ni lovah Christmas hmang turin ka kal a, ka pa paw'n ka kal chu mak a ti khawp mai. A awm ve reng, vawikhat te pawh ka nu leh pate bul lova Chriatmas la hmang sawn ngai lo khan hmun dang ka pan tlat alawm.

Ka beisei ai daihin thintlang lam chu a lo vawt a, mahse a nuam ka ti phian. Chhang ka deng ve ringawt te kha ka pa emaw ka nute'n hmu ta se mak an va ti leh dawn tak. Chumai a ni lo, chhuata ka mu ber kha ka nu chuan hmu se a sa khawp ang le.

Tunah chuan Aizawl lama ka chhuk aṭangin ni thum lai a liam leh tawh a, kum hlui thlah zan pawh kan hnaih leh ta hle. Ka chhuk hnu khan thil theihnghilh chiang lutuk mai ka nei tih ka hre chhuak a, Mambawihi te tana ka pawisa lo khawl ka keng chho lo chu pawi ka ti ngei mai. A putea te awm lai ngei khan pe ila, ka thilpek pawh chu an lak duh mai ka ring. Chutiang ni lo va tun hnua pek ka tum chuan an lak duh pawh ka ring lo.

"Marem lo kal teh, khi lama i Christmas hman boruak pawh ka la hre miah lo a nia" ka pa chuan a rawn ti a, ka nu erawh a dawr aṭangin a lo la haw lo a nih hmel.

"A nuam a ni mai"

"A ni mai chuah maw!? I chhoh dawn te kha i phur phur nen"

"Ka rin ai daihin thingtlang lam chu a lo nuam reuh, mahse Aizawl ai chuan a vawt deuh zawk"

"I han kal chhan ber lah chu i la sawi duh mang si lo va, han sawi tawh teh. Nang hian thintlang lam mi ngaihzawngte hi i nei a ni lo maw?"

"Eng lo a nia, Mambawihi nen khan kan inngaizawng tawh a" ka tih laiin ka pa chuan

"Ka ring reng a ni. I awm dan leh i ṭawngkam vel aṭangin kha chawhmeh zuarnu kha i duh a nih ka ring a, tunah chuan ka lo rinhlelh chu a dik ta chiah mai" a rawn ti ve nghal a, ka pa thil hre thei lutuk hi chu a buaithlak lek lek zel.

"A nih leh thil ka zawt ang che aw" ka tih chuan ka pa chu a lo bu nghut a, kan awmpui te awm hlat leh hlat loh te chu ka thlithlai leh ta phawt bawk.

"Mambawihi chuan kan chhungkaw dinhmun inthlau lutuk hi a harsatna ber a nia, ka lakah amah chu a insit tlat ṭhin a, dinhmun hi chu a pawimawh ber kher lo ti raw? Chhungkaw dinhmun inan loh avang hian kan inṭhen leh mai ang tih ka hlau" ka tih chuan ka pa chuan min lo en reng a, min chhan dan tur chu ka ngaichang reng bawk.

"Dinhmun te chu hmangaihna leh inngaihnzawnna kawngah chuan a peng ve mai chauh alawm a nih, inkawp tura Pathianin a duan te chu eng thil mahin a dal thei lo. Nang hian Mambawhi i tih chu i hmangaih tawh te hi a ni lo maw?"

"Awih awm loh ê pa, ka thlahlelin ka duh em em tih chu ka hria a, mahse ka hmangaih em tih erawh ka la hre bik lo a ni" ka ti sup a, Mambawihi chu ka hmangaih leh ngaih loh ka chiang lo a ni.

"Ni ve tho mai, in inngaihzawnna pawh a rei ka la ring chiah lo va, hmangaih tur em chuan a la hma mah mah maithei a ni. Mahse vawikhat inhmuhna aṭanga inhmangaih nghal te pawh hi an awm a nia, kei ngei pawh hian i nu hi ka vawikhat hmuhna aṭangin ka hmangaih nghal alawm. Ka tum a ni lo va, ka thunnun theih piah lam thil ni maiin ka hria" ka pa chuan a rawn ti a, a awm danah an hun kal tawh a ngaihtuah let tih ka hre bawk.

Doctor hna ka thawh aṭang hian Doctor nih chu a lo namai lo hle tih ka hre chhuak a, mahse buai em em chung pawhin Mambawihi chu ka be hram hram zel. A aw ka hriat ringawt te chuan ka hah a dam vawng vawng thei a, chu chuan amah ka mamawhzia min hriattir ṭhin.

An lo chhuk hun tur ka zawh lahin kum thar lamah a ti mai zel a, ka piana hnu lama kum thar ka nghahhlelh ber kum a la ni ang. Chuta karah kum thar nghakhlel vîau e ti lo chuan ka hna lamah ka buai em em a, inhliam leh mi zai ngai neuh neuh an lo tam leh ta phian.

"Doctor Marem, i chawlh lak ve lah chu loh theih lohna avangin i lo kal a ngai leh ta sia, i ning awm" coffee sa ṭha tak mai ka in laiin Doctor Tetei chuan a rawn ti a, kan hahchawlh ve theih lai a ni bawk nen ka ṭhu hahdam ngei mai.

"Nang i nia ka hrilh tlang tawp ang che, chawlh la lo ang vel ka ni" ka ti deuh hmuk a, ani erawh a rawn nui chhuak hak thung.

"Chu i lungawi vak lo a ni maw? Enge chawlh i lak chhan te pawh min la hrilh ve miah lo a nia, i ṭhiannu ka nih ve hi âw" a rawn ti leh nui nûi a, kei chuan Mambawih ringawt ka lo ngaihtuah daih.

"Mâw? Han sawi teh" a rawn tih leh chuan a zawhna pawh chhang lovin ka lo ngawi reng tih ka hre chhuak ve ta chiah.

"Ka bialnu nena hun hman dun ka duh ve alawm, kan pute pawh hi an ti awm ang lo ve ê, kei lo han koh mai tur pawh an awm tho si. Kei, a chawlh la bera min han ko kher a!" ka chawlh lak a rei lo lutuk chu ka lung a la awi thei lo a ni e.

"Ehe! Ehe! Ehe! Bialnu i nei leh maw!? A pawi miah lo, a hmaa i nupui nasa deuh kha chu ka va han ngei mai mai tak e âw. I nupui hual ni lo se chuan engtin emaw ni tak khan tih let ve ka duh a, mahse nangma hmai ka zah em avangin ka che leh duh ta lo a nih kha!"

"I lo ti let hrep lo a nih khâ" ngaihsam fe chuan ka lo ti a, chutah ani chuan rang tak hian

"Ve a che! I duh huam huam em kha, ka hre vek alawm" a rawn ti nghal a, a thusawi erawh chu ka lawm zawng a ni teh vak lo.

"Ka lo â ngawt mai, khatiang hmeichhia kha engtinnge ka lo duh theih zawk ni! Eng pawh ni se tunah chuan ani aia let tam taka ṭha leh fel ka tawng tawh tho" ka'n ti deuh salh a, Tetei chu ka ṭhian ṭha tak anga ka en avangin Mambawihi chanchin pawh chu ka hrilh hreh chuang lo.

"I bialnu thar chu min la hmuhtir ve la a ṭha ang, i sawi danah a fel hmel ropui si" a rawn ti ve leh a, coffee pawh a sa vîau emaw tih laiin ka lo in zo leh der tawh.

Ni khat a ral leh meuh chuan kum khata ni tawp ber kan chuang kai leh ta reng mai, chu kum tawp ni chuan thingtlang lama awm Mambawihi chu min ngaihtuah tir leh vawng vawng a, ka ngai a ni. Theih ni se kum thar lam thlenga a bula hman ka duh a, mahse ka hna chuan a bula kal thei lo turin min pawt bet tlat bawk si.

Awl lovin zan lamah Mambawihi nen chuan kan inbe ziah a, a aw ri ringawt te chuan min tihlim thei nîa. Tin, a sawi danin a nu chuan kan inngaihzawn thu chu a hre tawh a, ka engah teh vak mah a thawk hran lo. Kei chuan hre vat se ka duh zawk a, kei chuah ni lo Mambawihi tan pawh a thawven thlak zawk ka lo ring ṭhin.

Chhun a lo ral a, lungawi lo ru ṭunin kum hlui thlah zan chu ka hmang ta ringawt. Kan inah chuan kan chhungte ho an lo leng nasa hle a, riah tum pawh an awm nual. Amaherawhchu kei chuan Mambawihi te lam bawk ka ngaihtuah leh a, a tel lo chuan ka hlim thei tawh miah lo tih chu ka hre chiang tulh tulh.

Ka room-ah chuan ka tawm leh deuh chawt a, ka pa nau fapa chu ka bula rawn riah tumin ka khumah chuan games a khel ve ran bawk. Kei chuan ka phone phawrhin Mambawihi chu ka call a, chu kum hlui zan chu ka lung a la len ber ṭum a ni ang.

"Hello" a rawn ti thawp sep a, a bula awma kuah ka châk dan chu pui tak a ni.

"Mambawih, ka ngai lutuk che hi ka â thei mai dawnin ka hria" ka ti nghal thuai a, ani erawh a rawn nui ri hak hak reuh.

"Min ngai ve miah lo em ni?" titau aw tak chuan ka ti a, mahse ka titau der ve vel mai mai zawk.

"Ngai ve tho e"

"Ngai ve tho chiah maw i sawi dawn? Min ngaih ve dan min han hrilh teh, ka lo ngaithla reng ang"

"I ti ho em mai u Marem, chutiangte chu ka sawi zak e a!"

"Zak suh zak suh, ka bulah ngat phei chuan zak suh. Min ngaih thu sawi te mai mai chu i inbual zo ka hmuh ai khan a zahthlak loh daih zawk"

"U Marem! Min tihzah dan hi thiam vîau suh, ka sawi lo tawp mai ang" a rawn ti vak reuh a, min ngainat ve tawh lutuk avang chuan ka rilru chungril chu a hlim veng veng.

"Le! Sawi rawh le, ka ngaithla reng che a nia" ka ti leh a, ani chu a rawn thaw huai reuh.

"Ka ngai che, i chhuk rual khan ka ngai nghal che" a rawn ti sep a, thu ril tak ni lo mahse ka tan chuan a hluin a ril em em thung.

"Keipawh hian ka ngai lutuk che Mambawih, rawn chhoh leh mai ka tum a, mahse he lamah kan buai lutuk avangin ka thei ta ngâng lo a ni" ka tih zawh rual chiahin Mambawihi chuan

"U Marem, kum thar chibai aw" a rawn ti a, sana ka en chuan dar 12 leh minute 3 vel a lo ni reng tawh.

"Kum thar chibai le Mambawih" ka lo ti let ve sup a, kan inbiakna chu tihtawp mai ka la tum lo hle.

"Engtikah nge in lo chhuk ang? A hma thei ang berin lo chhuk tum ula"

"Nia kan lo chhuk hma ka ring, ka nu hi an lo call tawh a, kum thar ni tuk chiah emaw a tuk leh velah kan lo chhuk ka ring"

"A ṭhat hloh chu, in lo chhuk chuan i zin bo leh mai mai ka phal tawh lo vang" ka lo ti hmuk a, ani pawh a rawn nui ve nghal.

Eng eng emaw ni sawiin ka inbe char char a, a chhungte lam pawh ka zah zo tawh bik lo a ni. Dar 2 a chanve vel dawn thleng chu kan inbia a, a tawpa tawpah chuan ui takin kan inbiakna kan titawp thei ta hram a ni. Ka khuma ka mut chuan ka pa nau fapa chu a lo mutui tawh hle.

Ani te hi chuan mi dang ang lo takin min ngaina ve tlat a, keipaw'n ka naute zingah chuan ka ngaina ber ang. Pianpui unau dik tak nei lo ka nih avangin ka nu leh pate chuan kan chhungte fa ho chu kawm tam turin min ti ṭhin a, mahse ka peih der lo. Amaherawhchu tûmah ka be duh lovin ka haw hran lo va, anmahni chuan min nel lo ve tawp zawk niin ka ngai.

Chapter 15

Mambawihi POV

Ni leh hun te chu chawl lova an kal reng avangin kan chhuk hun pawh a rawn her chhuak thuai a, kum thar ni chuan u Marema ka ngai ngei mai. Ani nen chuan phone kaltlangin inbe ṭhin mah ila amah ka ngaihna chu a bo chuang lo va, a âwm lum nuam taka awm chu ka châk leh tawh hle.

Kum thar ni te chuan a hman dan te ka zawt a, ani erawh chuan a hoh thu chiah a rawn sawi. Kum thar ruai kan ṭheh zawh chuan Aizawl lama chhuk turin ka nu nen chuan kan inbuatsaih nghal a, keimah ai aiin ka nu chuan chhuk a duh tawh zawk a ni. A chhan chu kawr leh eng eng emaw ni ṭhui tur an neih hnem tawh a, chubakah an thawhna neitunu'n chhuk tura a tih tawh vang a ni bawk.

Tin, keimah pawh chuan chhuk thuai thuai chu ka duh ru ve reng tawh a, u Marema hmel hmu theia awm chu ka châk leh tawh a ni ber. Inngaizawng tir chauh ni mah ila u Marema chu ka ngainain ka duh em em tawh a, ka bula a awm loh chuan thil kim lo awm tlat hian ka hre ṭhin. Ka duh ang chiahin min duh ve niin ka hre bawk a, u Marema chu ka nu ai pawhin ka ring tawh hialin ka hria.

Khatia ka nu'n ka hman hun lam a ngaihtuah vanga thu tam tak min hrilh ni kha chuan u Marema chu ṭhen leh mai ka tum ûk a, mahse biak emaw pawh ka tum chuang der lo. A nihna takah chuan u Marema chu ka ṭhen phal chiah tawh lo va, hmeichhe dang ngaihzawng a ni mai tur chu ka thikin ka duh lo ni maiin ka hria. Amah nen zan tin kan inbia tih lam thlengin ka nu chuan a hre vek a, a thusawi awih lo leh u Marema la ṭhen miah lova ka awm chu a thinrim phah ang tih ka hlau ru thei khawp.

Amaherawhchu kei chuan u Marema ṭhen aiin ṭhen loh ka la thlang rih a, engpawh ka chungah thleng dawn se tûmah mawhpuh ka tum lo a ni. Ka nu sawi ang takin u Marema chu mi fel leh mi ngaihtuahna ngah tak a ni a, mahse a chhungte'n min pawm ve kher ang tih lam chu ka rilruah a awm lo thei lo ṭhin.

Ama'n min duhin min thlahlel ve em em mahse kan chhungkaw dinhmun inan lohna chuan kan inkarah khi a siam mai ang tih hlauh chang ka nei a, mahse a tawpah erawh u Marema ah bawk chuan ka rinna leh beiseina te chu a awm thung.

Thingtlang khaw lam aṭangin zing dar 9 vel bawrah Aizawl lam panin kan chhuak a, kawng a ṭha lutuk lo nen han zin vei vah hi chuan taksa te hi na ve vek thei. Sumo-a chuang kan nih avangin hla ka ngaithla leh daih a, a chhan pawg signal awm loh ṭhin avang leh mi betu chuanpui ka neih lutuk loh vang a ni. Kei ang lo takin ka nu chuan hmelhriat leh biak tur a nei reng a, kei chuan ngawia renga ṭhuin hla ka lo ngaithla mai mai zel.

Tlai lam dar 3 velah Aizawl chu kan thleng thla a, kum thar leh Christmas boruak vel a ni tih hriat hran theih miah lovin motor tlan chu an tam leh hle tawh. Dar 4 a lo rik meuh chuan kan in luah chhungah chuan bungruate indah felin kan awm fel der tawh a, a hun tawh tho avangin ei rawng chu ka bawl zui nghal. Ka nu ve thung chu kawm thlang lamah chhukin an hnathawhna dawrah a kal lawk a, a lan dan chuan ṭhui tur an ngah vîau a nih hmel.

Chutia ei rawng ka bawl melh melh lai chuan phone call ka dawng a, ka beisei loh takin u Marema a lo ni a, a chhan pawh a ni chuan chhun lamah min biakna hun mumal a nei ngai tlat lo alawm. Ka dem ngai lo va, ka vui ngai lo va, a hnathawh ka ngaihtuahin zan lama min lo be ziah thei chu a mak ka tiin ka inthlahrung híal ṭhin zawk.

"Hello" behlawi kan tur zai chung chuan ka ti a, ka chaw chhuan chu a phit a hun ṭan tawh avangin ka en deuh chhen bawk.

"I buai em? Tun ang hunah ka rawn be thut che sia mak i ti lo maw?" nui ri deuh sak chung hian a rawn ti a, a mood a fuh hmel phian leh nghal.

"Buai em em lo ve, ei rawng ka bawl mek a, chuan engatinge i lo call a? Thil thleng a awm em ni?" mak ka tih ve deuh avangin ka lo ti a, zanah bak inbe ngai hek lo.

"Nia vawiin chu ka rin loh takin tihtur ka nei tlem a, ward fan leh thil ho te te endik vel chiah a ni mai"

"A nih chû, i chau tawh em? I hnathawh hi a hahthlak awm ṭhin sia, hah lutuk lova thawh hram hram tum ṭhin rawh. Chuti lo chu a Doctor ber kha i dam lo ang a, dam lote lo bawihsawmtu tur ber i dam loh chuan a pawi thui zawk ang"

"Chu min ngaihtuah ve tihna em ni? Nang hian ka hnathawh dan tur thleng thleng i lo ngaihtuah ve em ni?" a rawn tih chuan ka thil zai lai chu ka tawp chat a, ka rilrua thil awm ka sawi chhuak tih ka hre chawpchilh zui bawk.

"Ka tih awmzia chu, ih... eng lo a nia, i dam loh chuan a pawi thui dawna ka hriat vang mai mai maw le" amah ka ngaihtuahzia chu thup hram hram ka la tum a, ka thup rei thei ngut ang em tih erawh ka hre lo.

"Mambawih, engatinge ka lakah hian i la zah fo mai le âw, keimah ka nih hi chuan inthlahrung lovin awm tawp tawp zel la, chu chuan min tihlim ṭhin daih zawk asin" u Marema chuan hrilh chawp ngai lovin ka rilru chu a rawn hre leh ta vek mai.

"Zak suh intih theih pawh a ni ringawt bik lo âw, kan la inngaizawng rei lo ve a, ka zak te hi chu a awm hliah hliah zawk" ka tih ngaihna hre lo chuan ka lo ti ve pang pang a, lehlama mi lah chu a la rawn nui ri hawk hawk zui.

"Aw le ka hrethiam e, mahse khatianga i ṭawng pang pang reuh hmel kha a takah ka hmu châk tawh lutuk" a rawn ti a, kei lah chuan

"I duh chuan min hmu turin i lo kal thei reng alawm" ka lo ti ve hmak a, ka ṭawng chu a tluangtlam vak lo bawk.

"I bula rawn chhoh leh mai ka châkzia chu i hriat vek kha Mambawih, mahse he lamah dam lote bawihsawm an ngaih mai bakah tihtur neuh neuh a tam em em bawk si a nih hî" a rawn tih chuan u Marema chu kan chhuk hun tur dik tak leh Aizawla kan awm tawh thu ka la hrilh lo tih hre chhuak chiah.

"Mambawih, lo chhuk thuai mai teh u, in lo chhuk hun tur lah chu naktuk mai ni tawh mahse ka ngaiin ka hmu châk tawh che em mai" a rawn ti leh nghal a, zep lovah chuan keipawh hian u Marema chu ka ngai tawh tak zet.

"I duh chuan min lo hmu thei alawm, i duh leh duh loh a ni mai" kan in luahah kan innghat fel leh tawh tih chu ka la hrilh duh lo lui ve tlat.

"Khatiangin ti ziah lo teh" a rawn ti ram hmak a, kei erawh ka nuih a lo za ru em em thung.

"Nang hi! Mambawih in lo chhuk tawh em ni? Hetiang em ema min chona chhan hi in lo chhuk tawh vang a ni em?" engatinge thil a ma chak em em bik zel le âw.

"Aw chhuk tawh e, vawiin khan ka lo chhuk alawm" ka tih zawh rual chuan hmanhmawh hmel tak hian

"Engatinge min hrilh ṭhat ve mai loh? Zaninah ka lo leng ang a, i lo chhuk tih pawh min hrilh miah loh avang hian hremna i hmuh lo inring bawk rawh" a rawn ti thuai a, thinrim ang deuhin rawn ti mahse a thinrim tak tak chuan ka hre bik lo.

"Nâ, hremna kher maw? Hrem ngai khawpin tihsual ka nei hauh lo, chuan zanin chu" ka tih lai chuan phone kaltlangin u Marema chu mi tu emaw hian

"Doctor Marem" a rawn ti sep a, a aw aṭang chuan u Marema lo kotu chu hmeichhia a ni tih ka hre zui nghal.

"Nangmah chiahin i lo awm bik a, ka lo zawng char che asin" chu nu chuan a rawn ti a, u Marema lah chuan nui deuh hak chung hian

"Nia hei mi ka lo bia lawk a, lo ṭhu rawh kan ei dun dawn nia" a lo ti ve mai a, kan inbiakna chu kan la tihtawp loh avangin an ṭawng ri chu phone kaltlangin ka hre pha vek.

Ka rilru rawn kal dik loh thutin kan inbiakna chu keimah zawkin ka titawp hmak a, an ṭawng chu ka chawhmeh zai lai tawp meuhin ka ngaithla kar bawk a nih kha! Ka thin chu a rim et et a, ka awm a nawm loh phah ta vek bawk. Ka thinrim chhan ber nia ka hriat chu u Marema leh hmeichhe pakhat inbe vel chu a ni a, innel hmel taka an inbe thawm vel chu ka ngaithla reng peih lo a ni.

Kan inbiakna ka tihtawp hnu rei lovah u Marema aṭangin phone call ka dawng leh nghal a, mahse lo lak buai vel chu ka tum der lo. Ni e, kei hian ka thik chiang a ni. Kha nu, ngaihnatawm taka a biak nu kha ka thik a ni. Ka awm dan chu ho vîau angin lang mahse ka awm dan a ni miau a, ka duh hun huna ka tihreh theih pawh a ni lo. Ka phone chu vawi thum lai a ring ral ṭhak a, chumi hnu chuan a rawn ri zawm leh tawh lo.

Ei rawng ka bawl fel zawh chuan u Marema laka ka chet dan chu ngaihtuah letin ka inthiam lo leh hnuhnawh ru deuh a, mahse hmeichhe pakhat nena an inbe thawm thu hriat reng a nuam lo ve em avangin inthiam lohna ka nei rei duh ta chuang lo. Dar 5 bawr velah ka nu chu a rawn haw a, chaw ei siamin kan ei zui nghal bawk.

"Mambawih, zanin chu ka zan chhuah a ngai leh dawn a nia" kan chaw ei laiin ka nu chuan a rawn ti a, a thusawi avang chuan ka nu chu ka melh nghal zat.

"Nu, vawiinah Aizawl kan thleng thla ve chiah a, chauh pawh i chau ve miah lo em ni? Chu lovah naktuk lamah pawh in ṭhui thei reng a, engatinge zanin kher?" amah ka ngaihtuah em avang chuan chung thute chu ka sawi lo thei lo a ni.

"Chau lo ve, chu bakah ka ṭhui kher an lo duh hlawm a, chuan ka thla tin hlawh hi an san dawn bawk a nia aw Mambawih" hlim hmel pu deuh hian a rawn ti a, tlem chuan amah ka ngaihtuah lutukna pawh chu a zia ve ta deuh.

"Nangin hah taka i thawh laiin kei lah chuan eng hna pawh ka thawk bawk si lo, hetianga hna i thawk hi i taksa lamain a tuar ang tih ka hlau hle a ni nu. Chawhmeh kan zawrh lai ai kha chuan i hah lo deuh mai thei a, mahse a hma ai khan mut mu lam hi i tuah ṭha lo sawt teh a nia nu"

"Mambawihi ṭhin tak hi chu âw, min ngaihtuah tih chu ka hria alawm, mahse keimah hian nuam ka ti viau asin. Han men rei deuh chang te chu nei ṭhin mah ila ka taksa lamah engmah harsatna ka tawk lo va, ka ṭha lutuk zawk a ni. Chuan zanin chu nangmaha i lo awm leh a ngai dawn a, kan Doctor Marema hi lo len a tum em? A tum chuan kawngka lo kalh kher pawh a ngai hran nâng ti raw?"

"Nia, a lo len chuan kalh kher pawh chu a ngai lo ang. Mahse nu, lo haw tlai lutuk lo ang che. In dawr leh kan in hi inhnaih viau mahse thil pawi a thleng thei lutuk tho a nia"

"Ka hria alawm, lo haw har ka tum dawn lo a nia" tiin a kham a, keipawh ka puar tawh tho avangin ka kham zui ve nghal.

Kan chaw eina dawhkan tifelin thleng chu ka sil a, ka nu pawh kal vata lo haw leh vat a duh avangin dawr lam a pan tawh bawk. Kan pindan luhna bul banga sana intar ka en chuan dar 7 a lo hnai kûar tawh a, kawngka pawh ka la kalh leh rih ta hman lo. Ka rin loh deuhin tui a rawn haw a, ka ṭhu hahdam thei tawh dawn emaw ka tih chu a teuh lo mai.

Motor chuan chauh nen tui buaipui vel chu ka peih lo rilru hle a, mahse ka tih ngei a ngai bawk si. Kan ṭhutthleng hnuaia pipe chu lain ka vuah a, bathroom lamah ka pipe chhawng a, bucket velah chuan tui lo haw chu ka thun khat nghal zung zung bawk. Chutia tui buaipuia ka buai em em lai chuan ka hnung chu tu emaw ni hian a rawn dek a, ka phut em avangin ka ṭe chhuak ta vak.

"Hei Mambawih" u Marema chuan a rawn ti thuai a, kei erawh ka phut em avangin bathroom chhuatah chuan ka lo ṭhu sawp hnuang. Chutah amah vek chuan

"Ka tihpalh Mambawih, khatianga lo tih phut che kha ka tum a ni lo" a rawn ti leh a, kei erawh ka thinphu leh ka awm dan a la dik hlei thei lo.

"Engatinge i lo kal? Engatinge thawm engmah pawh nei lova i lo luh?" ka lo ti vak a, ka thin chu a rim em em ringawt.

"Ka tihpalh Mambawih, mahse kawngka pawh ka lo kik vek asin, i hre lo mai mai zawk alawm"

"Engatinge min rawn khawih reng reng? I duh leh hmeichhe dangn kha va khawih ta che, i hmel pawh hi ka hmu peih rih lo" tlai lama ka lungawih lohna te chu lo chhuak lehin ka ti vak a, taksa chauh nen ka mood chu a off hneh hle.

"Maw? Hmeichhe dang a!? Tu hmeichhe dang nge khawih se min tih a?"

"Min lo be buai reng suh, tui ka buaipui tih min hmuh reng hî" ka tih leh rual chuan min rawn pawm kang lawp a, bathroom pawnah chuan min pawm chhuakin min dinpui ta reng a, ka tal nasa ngei mai.

"Min dah thla vat rawh" ka tih vak pawh chuan min dah thla duh chuang lo va, ka theihtawp chuan ka tal ve chiang alawm.

"Min dah thla rang teh u Marem, hetianga awm hman ka ni lo, tui sawi ka buaipui ngei ngei a ngai" ka tal vak vak hnu pawha min dah thlak duh loh hnu chuan ka ti ta tawp a, ka ṭah lah chu a chhuak ru em em bawk.

"Aw le, ka dah thla ang che" ti supin ṭhutthleng lam chu min panpui daih a, ṭhutthlenga min ṭhut tir zawh hnu chuan

"Keima'n tui saw ka buaipui dawn a, hetah hian lo ṭhu reng ang che" a rawn ti nghet charh a, kei lah pek chuan

"Dah khah dan tur pawh i thiam ringawt lo, keima'n ka buaipui mai ang" ka lo ti ve hlar a, thawh kan mai ka tum chu min chelhna avangin ka ṭhu thla leh chiang hle.

"A ngai lo, keima'n ka dah khat vek ang a, thil sawi dun tur kan nei bawk" tiin kan bathroom lam chu a pan phei a, kei chuan ṭhutthleng aṭangin a chet dan vel chu ka lo en ngawt ngawt ringawt.

Doctor tih takah u Marema hi chuan T-shirt lam aiin Kamis lam a ha hnem zawk hrim hrim ṭhin a, tunah pawh a vun kap eng tak Kamis rawng ṭial a rawn ha leh thlap tawh. Tin, leather jacket lam hi a ha uar viau bawk a, chu chuan amah chu a tilang pa leh viau lawi si ṭhin.

A leather jacket chu phelhin bathroom bula kan chaw eina dawhkan awmah chuan a dah a, a Kamis kawr ban thleh pahin ka lam chu a rawn hawi a, chutah lo nui deuh suk chung hian

"Ti khan min lo en char char rawh aw, thinchhe ve reuh te" a rawn ti kher a, amah ka enna aṭang chuan ka lo hawi sawn hmak thung.

Nui ri hawk chungin u Marema chuan thawm a rawn nei a, a lam chu ka hawi leh ta nge nge. A chhan chu engtiang chiahin nge a chet hriat ka châk em vang a ni. A cht dan vel ka en reng hnu chuan mak tihna ka nei leh ta. Vawi khat chiah, vawi khat chiah u Marema chuan tui ka buaipui min la pui mahse engkim chu ka tih ṭhin dan ang thlapin a ti a, pipe kawi dan tur leh chhun khah tur thlengin a tidik thlap.

Kan thleng silna bul vela bucket ruak thun khah theih chi zawng zawng a tih khah vek hnu chuan bathroom lamah a insawn a, a kawr hmaah emaw a kekawr velah pawh chuan huh vel a awm lo hrim hrim. A hma te kha chuan a intihuh phung a, keima tana inthlahrun awm khawpin a intihuh chîar vel zawk a nih kha maw le!

Tunah erawh zawng a tih ṭhan tawh ang takin a che a, a che vel reng reng chu a dik vel thlap bawk si. Kei lah chuan a che vel chu mit tla lo lêkin ka lo en a, ka sawi thiam dan ber chuan u Marema tui buaipui dan vel chuan min barakhaih chiang hle a ni. Tui vel a dah khat ṭha tawh thawkhata a inhriat hnu chuan bathroom aṭang chuan a rawn chhuak a, chutah u Marema chuan

"Khawiah nge ka dah leh ang?" a rawn ti thut a, kei erawh ka lo phu zawk ringawt.

"Aaa..ihhhh.....a ngai tawh lo ve, a dang kha chu ka lo buaipui tawh ang" tiin ka ṭhutna aṭang chuan ka tho a, tui kan pipe chhawn lehna chu sut tumin a awmna lam chu ka pan a, u Marema bawk chuan min lo dang leh hmak.

"Zanin chu keima'n ka ti vek ang" a lo ti leh ta tlat a, a va han buaithlak thei tak.

"Tui pipe saw sut ka tum mai alawm"

"Ka kutah dah rawh" tiin tui pipe chu a va sut nghal a, kan ṭhutthleng hnuaiah pipe kan dah ṭhin tih thlengin a lo hre leh ta vek mai.

"Le! Eng chu nge i thin lo tirim em em? Eng chu nge nang ni lova hmeichhe dang khawih tura lo ngaihtir tu che chu!? Min han hrilh teh le Mambawih" ṭhutthlenga min ṭhutpui hnu chuan a rawn ti dam dup a, a chhan tak chu ka zak leh hnuhnawh.

"A ho lutuk, ka motor chuanna avangin ka chau deuh a, ka lo thinchhe palh mai mai a ni e" pangai tak chuan ka ti chhuak sep a, mahse ani ve thung chuan

"A ni lo, i motor chuanna kha chu chhuanlam mai a ni. Hmeichhe dang kha engvanga rawn sawi lang nge i nih? Chuan engvangin tlaiah khan ka phone call kha i lak duh miah loh?" a rawn ti leh a, a chhan te chu a hre vek zawk lo em ni?

"Dik taka sawi chuan tlai avang khan ka la lungawi lo reng a, a chhan chu kei min biakna pawh ngaihsak lek lova mi dang min biaksan daih kha hrehawm ka ti a ni. Chutah i mi biak chu hmeichhia a ni a, kei atan chuan in inbiakna lo ngaihthlak reng kha thil nuam tak a ni lo asin" ka tih chuan a âwmah min kuah bet nghal a, a rawn thaw deuh hawk bawk.

"Kha chu ka thiam loh a ni e, nangmah ka ngaihsak loh vang che pawh ni lovin min betu kha ka lo chhang laklawh ve em a ni. Chuan, tu emaw ni chuan thik a nei chiang mai" a tawp bera a thusawi avang chuan a âwm aṭangin awm sawn ka tum a, mahse ani erawh chuan a aia nghetin min kuah tlat.

"Ka thik lo e a! Keini te ang chuan i bulah tu pawh lo awm se kan lo thik pha ve hleinem"

"Mambawih, khatiangin nangmah inhmu hniam ziah suh" rawn ti eng ang mahse khawpui nula te lakah chuan mahni insit chang ka nei lo thei lo ṭhin a ni.

"U Marem, ka nu sawi kha a dik mai ang tih ka hlau a ni. I chhuk hnu khan ka nu chuan fimkhur turin min chah a, a chhan pawh ka hma hun a chhiat vek theih vang a ni"

"Han sawi chiang teh, eng lam nge i nu chuan a lo hrilh che" a rawn ti thuai a, mi mah sawi chhuah hreh ruk nak a lai a!

"Ka nu chuan nang nena kan inngaizawng hi ka tisual ang tih a hlau a ni. A sawi dan chuan nangin min duh viau mahla i chhungte lamin min duh loh chuan buaina kan la tawk ngei dawn a, chuvang chuan kan la inṭhen tho tho a ring a ni. Chu chuan tun thleng hian ka rilru a tibuai a, rilru nuam takin ka awm thei rih tawh lo a ni" ka tih lai chuan a lo ngawi reng a, chutah kei chuan

"A nihna takah chuan ka phu loh i ni a, in hausa a, in changkang mai bakah kan dinhmun leh nun dan a inthlau em em bawk. Ngaihtuah chian neuh neuh hi chuan nang leh kei hi awm dun tur kan ang lo ka ti u Marem, nakina buaina kan la tawk dawn thova ka hriat avangin i lak aṭang hian inlak hran ka tum tawh a ni" tiin ka sawi zawm leh nghal a, chutia ka sawi zawh rual chuan

"I sawi awmzia chu min ṭhen chu i duh tihna em ni?" a rawn ti ram hmuk a, a thin a rim a ni ngei ang.

"Ka hre lo" tih chauhin kei erawh chuan chhan dan tur ka lo hre thung.

"Ni lo, nang leh kei hi kan inṭhen lo vang, kan inṭhen ngai lo bawk ang"

"U Marem, thui tak ngaihtuah chunga heng thil zawng zawng hi hrilh che ka ni asin"

"Ka thutlukna hi sawh sawn ka tum lo va, nang hi ka nupui i ni ngei bawk ang. Min ṭhen tum mahla kei chuan ka ṭhen ve dawn chuang lo che"

"U Marem" ka ti thawp sep a, ka ṭawng chu a ring lo viau bawk.

"Sawi teh, han sawi teh Mambawih, nang hian min duh tak tak lo em ni? I mipa duh zawng ka ni lo em ni?" ka khabea lo chawi kang pah hian rawn ti a, min en dan chu lungrun tak a ni.

"Chutiang lam a ni lo u Marem, ka duh che tih chu ka pha lo, mahse kan induh tawnna ringawt hian thil a thlak danglam chuang thei hian ka ring lo zawk a ni"

"A thei ang, a thei dawn lo a nih pawhin kan theih tir mai tur a ni. Mambawih, nang hi thlahthlam emaw ṭhen che ka tum lo va, ka ṭhen ngai lo bawk ang che" tiin min lo fawp a, u Marema chu ka duh ve em avangin ka lo hnar phal thlawt bik lo a ni.

"Mambawih, ngaihtuahna dik lo lô i put hma hian ka nupui ni vat mai rawh, i tan chuan engtik lai pawhin pasal ṭha ka nihzia ka lantir reng ang" kan infawh zawh rualin a rawn ti a, a thusawi avang chuan a hmaa hlauhthawnna ka neih te chu an bo deuh duak a, an bo vek erawh ka la ti thei lo.

"Nichin maia ka thusawite kha ngaihtuah dik lo ka put vang a ni lo asin, thil thleng thei vek a ni zawk. Lo inngaizawng rei tawh ta pawh ni ila, i chhungte hian kei ang chawhmeh zuar ṭhin mai mai nula hi i kawppui atan leh i nupui atan an duh ka ring lo a ni. Nang pawh hian an duh chu i ring reng reng em ni? U Marem, inngaizawng tawh mah ila ka bula i awm loh hi chuan hlauhthawn ruk riauna ka nei leh ṭhin a, i laka insit ruk riauna te pawh an lo awm leh nge nge ṭhin. Chuvang tak chuan kan kal thui lutuk hma hian inṭhen hi a ṭha zawk mai lo maw?"

"A teuh lo mai, ka ṭhen dawn lo che. Chuan ka bula i awm thuai a ngai a nih chu, hlauhthawnna i neih tawh lohna'n"

"Khatiang ringawtin thil ngai awlsam ṭhin lo la, inneih dawn te chuan an inngaizawng fê phawt zel alawm"

"A nih chuan kan inngaizawng fê anga a ni mai alawm, nang te hi chuan min va tikawi kual chiang tak em"

"Ka tihkawi kual vel che pawh ka hre lo e a!"

"I hmel hmu châkin leh i taksa si châkin ka lo kal ve a, nang lah chuan min lo la thinrim khum zui"

"Thinrim loh theih pawh a nih loh khâ, min biakna pawh ngaihtuah lovin mi dang i be daih a, kei atan kha chuan kan inbiakna tihtawp mai loh chu tihtur a awm lo a ni"

"Chuan hremna kha i la hria em? I lo chhuk tih pawh min hrilh loh avanga hremna ka sawi kha!" eng thu nge a rawn sawi leh tak hî!

"Hre bawk lo, keini ang rualah in hrem tih vel a ho tawh lutuk" ka lo tih khum daih thung.

"Hlauthawng suh, hremna nuam chi a ni ang" tiin ka hmuiah chuan a rawn fawp leh a, a kut chu a hlei ṭan ta.

Ṭhen duhna rilru ka neih te bo ṭhak khawpin u Marema chu ka fawp let ve tawn tawn a, ani pawh chuan min fawp reng chung siin ka dul vel chu a zut thla zal zâl bawk. Chutah a kut chuan ka dul mai ni lo ka mal vel te chu a zut thla riai riai ṭan a, kan awm dan chu a dik lo tih hre reng mah ila chutiang ngawtin ka lo dang thei bik hauh si lo.

Rei fe chutianga kan infawh hnu chuan kan inthlah a, kan thaw pawh chu a rang dun hle. Kan awm dan avang chuan zak hnuhnawh lehin ka hmai te chu a sa vek a, nupa pawh la ni lovin chutiang thil pawi kan ti hman ṭep chu ka inthiam lo a ni. Kan inthlah fel hnu chuan ka kawr hak lai te chu ka siam ṭha vat a, ka bula mi erawh chuan ka che vel chu min lo thlir reng thung.

Dar 8 leh a chanve bawr vel a nih chuan ka nu chu a rawn haw a, u Marema nen pawh an titi tui leh ta phian. Ka nu chuan u Marema chu kei min ngaihtuah avanga ṭhen turin min duh mahse keimah berin ka la ṭhen miau loh avangin engmah a sawi leh tawh ngqi lo va, ani chuan a hma ang chiahin u Marema chu a lo be leh thei tawh zawk a ni.

Kei chuan tih tur em em pawh ka neih loh avangin an titi chu ka lo ngaithla a, a changin ka phone chu ka khawih zeuh zeuh bawk. Ka nu chuan zawhna chi hrang hrang a zawt a, u Marema pawh chuan a lo chhang ve mai zel.

U Marema chu mi puitling, zir sang leh mi thil hre thei tak a nih avangin ka nu lawm zawng leh titi duh zawng a vawrh thiam em em a, amah aiin ka nu chu ṭawng tam zawkah a ṭang ve ziah. Zan dar 10 a rawn rik chuan u Marema chu a tho ûai a, haw a rawt zui nghal.

Zan dang ang thova ka tih ṭhin danin u Marema chu kawngpui thleng ka thlah leh a, ani pawh chuan haw mai ta lo chuan min fawp leh vang vang a, amah chuan amah thlahlel turin min siam thiam hlein ka hria.

Amaherawhchu kan hma hun ka hre lo va, engtinnge kan inkar chu a awm dawn tih pawh ka hre lo va, chungte chuan hlauhthawnna min lo thei lo ṭhin a ni. U Marema chu ka ring ngei a, mahse ka la ring fumfe thei lo te pawh a ni ang.

"Mambawih, ka sawi lo vang ka ti zet na a, mahse ka sawi leh si zawk mai ang. Doctor Marema nena inṭhen chu in tum miah lo em ni?" khuma kan mut fel hnuin ka nu chuan a rawn ti a, a ngawi rei ve tawh bawk a ni e.

"Inṭhen a ṭhat thu chu ka sawi tawh ngei a, mahse amah hian min ṭhen a tum lo hul hûal a ni. A nihna takah chuan keipawh hian amah ka duh ve tawh em avangin ṭhen ai ṭhen loh chu ka la duh fan a, mahse i thu min hrilh te kha a thleng dik ang tih ka hlau ru tho bawk si"

"Mambawih i rilru tur chu ka hrethiam alawm, kei hi sual min ti zawk vîau em? Inṭhen turin ka ti reng bawk si che u a, mahse ka ngaihtuah vang che a ni tih chu i hriatthiam ngei ka beisei"

"Ni lo nu, sual ka tih theihna tur chein i awm lo va, i thu min hrilh zawng zawng hi a dik vek zawk a ni. Mahse nu, tunah rih chuan u Marem hi ka ṭhen thei rih mai bik bawk si lo, engtia awm tur nge pawh ka hrethiam tawh lo"

"A pawi lo Mambawih, mihring ve tho i ni a, duh zawng leh hmangaih zawng te chu i nei ve thei alawm. An hausak avang ringawtin i nei thei lo tihna a ni lo va, chhungkaw dinhmun leh nun dan hi i dah pawimawh ber lo zawk teh ang"

"Maw nu? I rilru chhungril takin u Marema nena kan inngaihzawn chu i phal chiang tawh tihna em ni?" a thusawi tawp ber chu mak ka ti em a ni.

"Aw Mambawih, ka ngaihtuah luatah che i rilru ka lo ti khingbâi vek zawk a, tun aṭang chuan ka thusawi te ngaihtuah miah lovin Doctor Marema nen hian in awm dun tawh dawn nia. In theih chen chen in inngaizawng ang a, Pathianin ṭul a tih chuan a pawt ṭhen zawk ang che u, keia lo sawi ve theih a awm lo ve" a rawn tih leh chuan

"Nu, ka lawm e, nu ṭha ber hi chu i va han ni ve chiang tak" ka ti lo ti thuai a, chutianga pangai taka u Marema nen kan inngaihzawn a phal tâk avang chuan ka rilru chhungril tak chu hlim tak hi a ni ringawt.

Nite a ral leh chuan keipawh chuan hna thawh tur ka zawng char char a, mahse ka hmu thei mai bik lo. Kar khat chuang engmah ti lova ka awm hnu chuan zing lam hna ka hmu ta hlauh a, chu ka hna hmuh chu kawngpui phiah fai lam daih a ni thung. Ka nu chuan a puan ṭhuina hmanga kan inchawm theih tur thu chu min hrilh nasa eng ang mahse kei chuan ka hna hmuh thar chu thawh loh ka tum der lo.

Tin, inrinni bik chu veng tin KṬP te'n inhlawhna tana an duh ve avangin kan chawl thei dawn hlauh a, chumi a nih avang chuan inrinni zing bika chawhmeh zawrh tur chah ka rilruk leh ta zui bawk. Ka nu bawk chuan ka tum dan chu min hnial leh a, mahse keipawh chuan a tih tlang ka tum lui leh ta tho.

U Marema chu zan tin deuh thaw a rawn leng ṭhin a, a rawn len hman dawn loh hi chuan min lo be hmasa thlap zel. Amah berin min zawh miau loh avangin u Marema chu ka hna hmuh chungchang engmah ka la hrilh duh lo va, ka hrilh duh lo tih a hriat hunah chuan a va lungawi lo leh nasa dawn tak. Ka hrilh duh rih lohna chhan chu chutiang hna ka thawh chu a phal leh dawn lo tih ka hria a, hna dang min zawn hmuhsak tlat a tum leh dawna ka hriat vangte pawh a ni bawk.

Amaherawhchu inrinni zing bika chawhmeh ka zawrh dawn thu chu ka hrilh ve a, chu erawh amah nen kan intawn hmaa ka tih ṭhin a nih vang nge phal lohna em em a nei lui duh tawh lo a ni. Kan inngaihzawn tirh tak tê kha chuan chawhmeh zawrh kha bansan turin min ti a, mahse khatah pawh khan a thu awih lovin ka zuar lui zel tho chu a nih kha!

"Mambawih, i lo kal tawh em?" phone ka lak rualin hnathawhna lama ka ṭhian chhar thar Lawmtei chuan a lo ti a, February thla kai tawh mah ila zing lam boruak chu a la vawt ang reng hle.

"Aw ka hman a ni mai" tiin kan in aṭang chuan ka chhuak a, ka nu tih harh ka hlauh em avangin thawm pawh ka dim hle.

"A ngaiah khan ka lo nghak ang che aw" a rawn ti leh chuan keipawh chuan

"Aw min lo nghak rawh, ka lo thleng ṭep, step-ah ka rawn chho mek e" ka lo ti ve thuai a, kan inbiakna pawh chu kan titawp zui ta bawk.

Lawmtei te hi Aizawl khaw hmun ngheta cheng an ni a, kan veng piah deuh lawka awm an ni bawk. An chhungkua hi la hre chiang em em lo mah ila keini anga chhungkaw inchawm chawp an ni lo tih ka hre tawh a, mahse chutianga kan bula kawngpui phiat faia a inhlawh ve ṭhinna chhan chu ka hre hauh lo.

Kan inhmuh hnu chuan kan hnathawhna hmun tur lam chu kan pan a, tenis court kawngpui chho vel leh city park kawng phei vel aṭangin kan phiat fai ṭan ber ṭhin bawk. Kan hnathawh chu ho viau angin lang mahse a awlsamin a hlawk ka ti phian a, mi mit hmuhah chuan hniamin zahthlak mahse kei chuan ka zak duh der lo. Ni lo, ka zak ve ngei a, ka tilui mai mai zawk a ni.

Zing lam dar 6 vel a lo rik chuan kan phiah fai chin tur chu kan phiat fai zo a, keini group chin hi member pali kan ni a, nu ni tawh pahnih leh nula pahnih kan awm a ni. Ka thawhpuite chu an fel hlawm em em a, Hotel changkang taka ka thawh ve zuainaa ka thawhpuite nen chuan inang lo tak an ni.

Zing kara kawngpui phiat faia ka thawhpuite chuan ka mimal nun lam leh chhungkaw dinhmun lam pawh min zawt ngai lo va, an ngaihsak ngai lo va, hlim tak leh inpawh takin kan inkawm ho ṭhin zawk.

Chumai a ni lo, zing kara kan thingpui in tur te chu min treat chang an ngah a, keini nula pahnih la nuih duh ve tak te chu min tihlim thiam hle. Kan thawhpuite chu chhungkaw hausa lutuk an ni bik lo va, Lawmtei te chu kan zingah an hausak ber ka ring. Mahse chu pawh ka rin dan mai mai a ni a, a dik em tih pawh ka hre chuang lo.

Chutiang hnathawk chuan zing tin ka tho a, zing lama thawh hma ka ngaih ṭhin avangin zan lamah chuan ka mu hma hram hram ṭhin. U Marema pawh a fel ngaiin a la fel a, a hmelṭhat ngaiin a la hmelṭha a, mi ngaihtuahna ngah tak a nih angin min ngaihtuah thei hle. Zan tin erawh a rawn leng thei tawh bik lo va, Hospital lamah an buai ve ṭhin tho bawk nen u Marema chu ka khawngaihin ka hrethiam thei hle.

Ni a ral a, kar a ral a, thlate chu an liam zung zung a, hriat loh karin u Marema nena kan inngaihzawnna pawhin thla thum hmel a lo hmu ve reng tawh. U Marema chu kan inngaihzawn hnu chuan keini ang mai mai min ngaihzawn avangin a danglam telh telh ka ring a, min duhna te chu a tlak hniam tial tial ringin kei lo mi dang duh a neih vat ka ring kha a ni a, mahse thla thum hnuah pawh amahah chuan danglamna emaw min duh lohna lampang hmuh tur a awm lo hrim hrim.

A lo sawi lawk ang takin ka nu chuan u Marema chu ṭhen tur emaw hlauhthawnna ka neih theihna tur lam chu min hrilh tawh ngai lo va, u Marema phei chu a makpa chei viau tawh zawkin ka hria. Ka nu awm dan vel avang chuan Marema pawh chu a hma ai zawngin kan bulah a tlangnel a, ka nu tan phei chuan fapa fel tak ang mai a ni.

Kan pahniha inhmuh theihna hun pangai tak kan neih ve theih hun chu zana a lo len hun hi a ni mai a, a chang zeuh zeuhin kan chhuak dun ṭhin bawk. Chhuak dun tihah bazar tura chhuak kan ni ngai lo va, awm dun kan duh vang hrim hrima chhuak kan ni ṭhin zawk. Thil min leisak a tum apiangin ka hnial ziah a, chutiang maia a duh dûh min lei tur chu ka duh lo a ni.

A nihna takah chuan u Marema thil min lei tum ho chu a to hlawm thei em em a, ka pasal êm pawh a la nih loh avangin a pawisa lo hmansak pawp pawp chu dikin ka hre lo bawk a ni.

Inrinni zing a ni a, chawhmeh zawrh tur ka chah lawk vek tawh avangin thil zawrh pawh ka tum ran. Zing kara ka thawh lai chuan ka nu chu a lo harh a, ka bula lo kal a tum ve ringawt a nih chu! Keimaha ka tih theih vek thu ka hrilh pawhin ka nu chuan min hnial tlat a, a tawpah chuan zing kar chhung tal chawhmeh min zawrhpui tur chuan ka pawm ta tawp.

Kan in bul step kan chhuah chhoh chuan a hmaa kan chawhmeh zawrh tur kan dahna ṭhin Kudam lam chu kan pan a, kan Kudam ve chu mi in kawt ti ila kan sawi sual tam lo vang. Ka nu chuan a hmelhriat Taxi driver a call a, khua a la vawt ve deuh tho bawk nen kawr lum pawh ka hak thuah ṭun mai. Chutia Taxi driver kan chan lai mek chuan kan hma takah Car pawl fai tliang var hi a rawn ding a, chu chu tu Car nge tih ka hai lo chiang hle.

"Tun ang hunah enge i rawn tih dawn?" motor aṭanga u Marema a lo chhuah rual chuan ka lo ti thuai a, a rawn chet dan teh thut chu ka hrethiam lo hle.

"Ka lo pui dawn che u, nizan khan tukin zing lama in awm dan tur kha i sawi a, mut pawh muhil ṭha lovin ka ngaihtuah zui char char che u alawm" a rawn ti heu mai.

"A ngai lo lutuk, kan ti ve thei reng alawm. Haw la, va mu lum ṭha leh rawh, i che mak thei lutuk" ka ti leh vat a, a inthuam te lah chu zing kar khaw vawt hre lo ang mai alawm a nih le.

"Ni e Doctor Marem, kan tih ngai loh pawh a ni lo va, keini te chuan i tel lo pawhin kan ti thei lutuk alawm" tiin ka nu pawh chuan ka thusawi lai chu a rawn chhunzawm ve a, kan hmaa mi pa lah chu a la nui ang suk zui a!

"I tih ṭhan a ni tih chu ka hria alawm ka pi, mahse Mambawihi telna apiangah chuan ka tel ve tawh dawn a ni. Khang thla kal ta teah kha chuan puih duhna ka neih loh vang ni lovin a nachang ka hriat loh vang zawkin ka pui ngai lo va, tukin zing aṭang erawh chawhmeh ka zawrhpui ziah tawh dawn a ni" u Marema chuan a rawn ti a, kei chuan thawk ka lo la vak ringawt.

"Phal lo eng ang mah ila i tilui leh tlat awm bawk si a, min pui mai teh" ka nu'n a tih chuan

"Nu, engtinnge Taxi driver te kha ni ang? I biak lawk vek tawh khâ" ka lo ti vak a, u Marema min puih ka duh loh em em vang pawh a ni chuang lo.

"Mambawih, engatinge ka puih chu i va duh loh hmel ve?" ka awm dan avang chuan u Marema chuan a rawn ti sup a, amah chu en pawh ka en peih rih lo.

"Ka duh leh duh loh lam pawh a ni lo, thil hi ngaihtuah thui ve deuh ṭhin la u Marem. Chawhmeh min zawrhpui chuan i chhungte lakah inthlahrunna tur a tam leh mai mai, chu lovah i chhungte'n i thil zuar lai an hmu leh lo vang che tih pawh a sawi lawk theih miah loh" ka ti zo chiah chu

"Ka chhungte chauh ngaihtuah lovin keimah zawk hi min ngaihtuah ve ta che Mambawih, puihna duhna thinlung ka nei te hi hlu i ti zawk lo em ni? Kan hausak avangin chawhmeh ka zuar thei lo tihna a ni lova, a ṭul chuan ka zuar mai tur a ni" a rawn ti nghal a, ka nu ngawih rei theih em em danah chuan lo inrawlh a tum miah loh tih ka hria.

"A nih i pa khan i thil zuar lai min lo hmu leh ta se engtinnge i tih ang?"

"Ka pa a bazar ngai lo"

"A nih chuan i nu pawh a bazar ve ṭhin ngei ang a, i nu phei chuan i chawhmeh zuar lai chu a hmu thei hauh lo vang. Chuvangin va haw leh la, tichuan keini tan pawh i nu leh pate laka kan inthlahrunna tur chu a awm dawn lo zawk a ni"

"Ka nu a bazar tawh ngai lo, kan awmpuite bak chawhmeh leiin an bazar ngai lo" min chhan dan vel chuan ka thinrimna a ko chhuak mai dawn.

"Mi hnial hrat viau ṭhin suh, ka sawi ang chuan awm mai rawh" ka ti deuh vak a, u Marema chu a rawn la nui thei cheu nia.

"A teuh lo mai, nang tê hian i duh dûhin min tikawi tawh dawn lo"

"Nû, han hrilhfiah ve teh, kan tlai mai dawn" ka beidawng chuan ka ti ta tawp a, ka nu erawh a rawn nui ri hak thung.

"Mambawih, a puih che chu duh mai rawh. Doctor Marema khan a sawi dik chiah alawm, puih duhna thinlung a pute hi lawm viau zawk ta che. Ani te chuan a pui duh mai che a, kei chuan pawi tihna pawh ka lo nei tawh hleinem"

"Nûuuu, i fanu ka nih hî, engatinge u Marema lam i ṭan daih a?" ka ti leh ringawt a, ka thusawi naupan chhia lutuk avangin an pahnih chuan a rawn nui chhuak nghal.

"Le ka pi, khaw nge in bungrua vel? Ka motor hian i inphur phei teh ang u" u Marema chuan a ti sawk sawk a, ka nu pawh chuan a lo hrilh ve mai bawk.

Ka titauh deuh avangin ka nu leh u Marema che vel chu ngawi rengin ka lo thlir a, ka pui duh lo lui ve tlat a ni. Motor-a bungrua an hlan fel zawh chuan kan ṭhutna tur lam panin kan tlan chhuak a, u Marema chet dan vel chu ngaihtuah letin ka nuih te chu a rawn za leh vel a, mahse ka la tihtauh deuh avangin an hriat laiin ka nui chhuak duh kher lo.

"Ka pi, engatinge heti lamah daih kan tlan tâk? A hma kha chuan Mission veng lam hi kan pan ngai si lo va" Sikulpuikawn kan thlenin u Marema chuan a rawn ti a, ka nu pawh chuan

"Nia, a hmaa kan ṭhutna hmunah khan kan ṭhu thei tawh lo va, Thakthing tlang lamah ṭhutna tur kan hmu thei hram zawk a ni. Inrinni zing chauh a ni dawn a, Thakthing lam LC min lo hrethiam khawp mai" a rawn ti ve mai bawk.

Hotel-a ka thawh hnu leh ka nu dawra a thawh hnu aṭang kha chuan chawhmeh zuarin kan awm tawh lo bawk nen kan ṭhut ṭhinna chu mi dangin a lo luah daih a, nu Amawii phei chuan a bula kan ṭhut leh a lo hlau ngei mai. Ka nu hriat lova ṭhut leh ka va dil te khan amah ber chuan a lo phal lo nasa leh a, keipawh chuan ka dil zui vak duh ta bik lo.

Tichuan inrinni zing tal pawh a ṭha alawm tiin ṭhutna tur chu ka melh chho leh ṭan a, ka hna zawng ang maiin a lo vang pharh. Amaherawhchu vanneih thlak takin Thakthing tlang lamah chuan hmun awl leh thil zawrhna remchang deuh tur ka hmu ta hlauh a, chuta ṭang chuan inrinni zing tin chu ka ṭhu ve ta ziah a ni.

Thakthing tlangah chuan kan inrem fel a, chuti takin mi lo ṭhu pawh an la tam vak lo. Keini ang thovin mite chu chawhmeh zuar turin an inphah mawlh mawlh a, keini ang lo takin zawrh tur chu an la ngah hlawm em em zui. Kan thleng hma nge pawh ka hre lo mi lo kal tam tak hmain kan inphah fel vek hman a, ni a chhuak ṭan dek dek lai chuan kan in peih fel hman tawh a ni.

Ni a chhuah tawh avangin ka nu chu kan in lamah a phei leh tawh a, a hna lama kal a ngaih dawn avangin leh ei rawng vel bawl turin a haw a ni ber. Ka nute chu inrinni ah pawh hna an chawl ngai lo va, Pathianni tih lohah chuan an thawk regular thei khawp.

"He lamah chawhmeh a tlawm e, lo lei zel r'u" ka bula ding u Marema chuan a rawn ti leh ta tawp mai.

"Hei u Marem, khatiangin ti ringawt suh, an duh chuan an lo pan ve mai dawn alawm" tiin ka lo pawt ṭhu vat a, chawhmeh zawrh kher hi chu a chem kalna a ni lo a ni ngei ang.

"Âwwww, i hmuh ang hian mi pawh an lo kal tam tawh a, kan thil zawrh lei tura lo au kha chu a ṭha daih zawk lo em ni?" a rawn ti ve bui bûi a, ka nui chhuak teuh hle.

"A ṭha tho a, mahse tun atan chuan a ṭul rih lo. Chu bakah hetiang hian nang chuan min lo ṭhutpui mai mai la, a hma kha chuan duh lo vîau mah ila ka bula i awm hi ka lawm tawk em em tawh a ni" amah pawh en chuang lo chuan ka ti a, chutah ani chuan ka biang lo piai vakin

"Lal hmelṭhanu, i thu chu ka'n awih leh rih phawt ang e" a rawn ti a, kei erawh chuan a kut chu ka lo vai thla vat thung. Mi zawng zawng hmuh theihin kan awm a, tizahthlak thei lutuk mai.

"Ehêeeee, Doctor Marem, enge hetah i tih? Chawhmeh hi i zuar ve em ni?" chutia kan inkhawih buai lai vel chuan mi pakhat hian a rawn ti a, kan inkhawih vel chu kan tawp chiang hle bawk.

"Aw ka zuar ve a nih hi! Min lo dawr ve nghe nghe teh Dina, kha... kha laia mite kha i duh dûh lo thlang rawh, kan lo buk dawn nia" a lo ti let ham hâm ngam nia maw le.

"Aw hâw, nang berin lei tura min tih te chuan kan lei lo ngam nâng. Nui enteh, hei hi ka ṭhianpa Doctor Marema a nih hi" tiin kan hmaa mi pa chuan a bula hmeichhe ding ve reng chu a bia a, kei erawh chu lo zak tak ka ni.

"A reng reng thuah engatinge khatia chawhmeh te i zawrh ve? I hna i chan ti dawn ila hmanni lawkah pawh ka hmu bawk si che a, nge nang hian Doctor hna aṭanga bangin chawhmeh hi i zuar zawk?" nui huah huah chung hian u Marema hmelhriat chuan a rawn ti a, u Marema chhan dan tur chu lo ngaichan loh chu tih tur ka nei rih lo.

"Chan em lo ve, ka bula ṭhu hmai sen tan tân hi ka ṭhutpui a nih hi!" u Marema ṭawng dan ka huatzia chu pui tak a ni.

"E a ni mâw, i nau em ni?" chu pa han dilchhut reuh zia chu!

"Ni lo ve, nakin lawka ka nupui ni mai tur a nih hi!" awi awi awi, eng thu nge u Marema hian a sawk tâk?

"Chu, nupui nei lam i rilruk leh ta a ni maw? Chuan, a hmaa mi nen kha chuan an va inang ta lo ve" engatinge chu pa leu luau pawh chu a kal vat mai loh le.

"Nia, nupui chu ka neih thuai ka ring, i sawi tâkah chuan tuna mi hi chu a hmaa mi nen kha chuan innang lo vet vet tak an ni. An inan lohzia chu maw hei, a bulah zah pawh hre lovin ka ṭhut ve lûau mai hi!" nui ri hak chung hian u Marema chuan a rawn ti a, a hnungah chuan ka sik vak ringawt. Chutah amah chuan a hnung lama ka kut chu hma lama hum chhuakin

"Kan inneih hunah chuan in lo kal ve ngei ka beisei ang aw" te chu a la ti leh ta nghal a, ka kut a humna pawh thlak ka tum pawh chuan vuan nghet turu lutuk.

"Aw le aw le, kha le chawhmeh man, kan kal phawt ang e" tiin chu mite pawh chu an kal ve ta hram a, rang zetin ka kut chu ka phih thla nghal bawk.

"I mawl em ni? Engatinge khatiang thute kha i sawi vak a? Inneih te i sawi leh nghal"

"Ka sawi kha dawt a ni hleinem, nang nu te reuh hi nupuiah ka nei vat dawn che tih lo hre rawh" he pa hi chu hauh vak emaw thinrim khum vak hian awmzia a nei hlawl lo.

"Hei, khatiangin Bandana te kha hreng vel kher suh" a chala hren a tum chuan ka lo ti vat a, chhe te them maha a zak lo chuan min tihlim ta phian.

"U Marem, i zak ve miah lo em ni? Hetianga ka bula thil zuar ṭhut vel hi zahthlak i ti lo em ni? I awm danah hi chuan nuam i ti vîau zawk te pawh a ang ka ti"

"Zak teh nâng, i bulah tih hreh leh zah reng ka nei tawh lo tih hre ta che Mambawih, nakin lawkah nang hi nupuiah ka nei bawk ang che"

"U Marem i nupui lo ni tawh ta ila, kei chuan min iai vata min zahpui hi ka ring tlat" mi vei vak tam loh lai tak chuan ka ti zeuh a, min chhan dan tur chu hre sa vek mah ila ka hre nawn leh châk a ni.

"Ka rilru put hmang dik tak chu i hria alawm, nang ka zahpui dawn lo che tih thlengin i hre vek ang chû. Le! Kan hmaa mi ho hralh zo vat ila, vawiin chu i leng chhuak teh ang" a rawn tih zawm daih a, chutia kan inbe zo kan hawi chhuah rual chiah chuan kan hmaa nu pakhat lo ding hian

"Marem, enge khatah i tih? In hnuaiah i awm emaw ka tia" a rawn ti a, chu nu chu tunge a nih ang tih rin thiam dan pawh ka nei lo.

"Nu, i bazar maw!? I bazar tawh ngai si lo a!" u Marema chuan a lo ti vat a, a ṭhutna aṭang chuan a ding chhuak zui bawk.

Kei chu ka hawi chhuak ngam tawh lo va, u Marema nu hmel chu ka hmu ngam teuh lo. Ka hlauhthawn ang ngeiin u Marema nu chuan kan pahnihin min rawn hmu ta a, engtia lo awm tur nge tih reng ka hre lo.

Chapter 17

"Ka duh hûn hunah ka bazar thei alawm, engatinge ka bazar pawh chu mak i va ti awm ve" aw nem lutuk lo hian u Marema nu chuan a rawn ti a, a bulah hmeichhe pakhat inkhai bawr ṭûn hi a awm ve bawk.

"Mak tih loh theih pawh a ni hleibem, i bazar khât ve tawh bawk sia. Chuan nu, hei kan thil zawrh ho hi lo lei ve teh" u Marema chuan a ti a, ka zak lutuk chu tlan bo daih mai a nia ka duh.

"Enga!? Lei ve teh a!? He nu hi em ni i ngaihzawng chu!? Engatinge hetianga thil i zawrh ve ringawt? A zah pawh i zak lo em ni?" u Marema nu chu a ṭawng zawi vak bawk si lo va, zak tak ka ni.

"Nu! Khatiangin ṭawng ring lui kher lo teh, keima duh thu ngeiin ka pui a ni. Hetianga chawhmeh zawrh hi ka zak reng reng lo, chuan min dawr ve ngei ngei rawh, i fapa ang ni lovin chawhmeh zuar angin min han en phawt mai teh" tia lo chhang letin u Marema chuan kan inkara polythene chu a phawrh a, bawkbawn bawk chu a rut nghal mial mial.

"Kha le Mambawih, ka nu hian kg 3 a lei dawn nia, han buksak vat teh" min en chungin u Marema chuan a rawn ti leh a, kei chuan a nu chu ka lo en daih thung.

"Enga!? Em ema che LALREMRUAT, chutiang zat zat ka lei dawn lo bawk" u Marema nu chuan a rawn ti a, enge tih ber tur pawh ka hre lo.

"I mak thei em mai nu, bawkbawn te chu kan hmeh ve ziah khâ, lei mai mai teh" ka bula mi chuan a ti leh tlat bawk si.

"Ka lei dawn lo pawh ka tih loh khâ, kg 3 thum em em te chu a, siam zawh hmain a ṭawih chhe hman vek ang asin. LALREMRUAT min lei tir vak tum suh, ei pawh i ei ṭhat peih loh kha!"

"I lei dawn hi a ni hrim hrim, bawkbawn chauh lo pawh min leisak zawk ang. Hei tomato te hi lei bawk rawh, keipaw'n ka ei châk a nia, chuan sawhthing te hi kan thlakah i duh theih em kha!" tiin u Marema chuan chawhmeh ho chu khai theih turin polythene chhungah a khung mial mial a, kei chuan

"U Marem, i ti awm ang lo thei em mai, i thil tih lai hi tawp vat rawh" lo ti ve mah ila a tawp duh der lo va, amah zawk zawk chuan

"Lo buk ta che, bawkbawn kha lo va buk rawh" a rawn ti a, ka zak bawk si nen anu lam pawh hawi chho tawh lovin a sawi ang chuan ka ti ve ta tawp.

"Awi awi awi, ka fapa chu i ni ve sia maw, i va han danglam ta em em ve le, inbe lawk teh ang" an kal sawn mai dawn emaw ka tih laiin u Marema nu chuan a rawn ti a, kei ni lovin u Marema chu a bia tih ka hre chiang khawp.

"Nu, hei thil kan zawrh hî, ka kal bo daih te chuan mi an lo kalin a buaithlak vek dawn asin"

"Âwwwww kha, i bula mi khan a lo en ve mai dawn alawm, lo kal mai mai teh, rei pawh kan rei lo vang. Chuan Tlanzo, ka lo phei hma chu kha tah khan lo awm reng ang che" tiin a kal sawn a, u Marema pawh chuan a zui ve mai bawk.

"Hei ka lo lei belh ang aw" tiin ka hmaa hmeichhe la upat hmel vak loh chuan a rawn ti a, kei chuan amah chu ka lo en vat thung.

"A ngai lo a ngai lo, min dawr hnem tawh em kha, i duh chuan lei lovin khangte kha chu la rawh" ka lo ti ve a, a duh chu man tam tak pawh a ni hleinem.

"Ni lo, ka lo lei ang e" tiin pawisa chu min rawn pe lui hram a, inhralh kan la mamawh ve deuh nûal avangin ka lo hnar leh ta chuang lo.

"Ihhhh.... eng lo, min lo hrethiam la, u Marema nau em ni i nih?" tiin ka hmaa mi chu ka zawt a, a nihna takah chuan u Marema te chhungkaw lampang chu ka la hre tam lo hle a ni.

"Ni teuh nâng, kei chu an awmpui mai chauh ka ni e. A hma chuan lângin ka kal char char a, mahse hmanni deuh lawk aṭang khan ka riah chilh tawh" a rawn ti ve thuai a, a zia te chu a fel hmel reuh.

"Chuan nang hi u Marema ngaihzawng chu em ni i nih? U Marema pa hian u Marema hi i chawhmeh lo zawrh chhan chu i ngaihzawng vang lek kha a lo nia tiin a fîam a fiam ṭhin a, i hming ri si lo hian i chanchin chu kan hre tam vîau tawh asin"

"Maw? U Marema pa chuan u Marema chu keimah vangin a fiam ṭhin maw!?" ka lo ti hluai ringawt.

"Aw fiam ṭhin tehreng mai, mahse an hlim phah vîau zawkin ka hria. La hre chiang lo che mah ila i chanchin an sawi danah chuan i fel hmel ka ti"

"Engatinge ringawt mâw? Ka fel teuh lo a nia, u Marema te chuan an sawi uar mai mai a ni ang"

"Sawi uar hran lo ve, u Marema chuan a nupui tur chu chawhmeh zuar nula tiin a nu leh pate a hrilh tak asin" a thu rawn sawi avang chuan ka zak leh em em ringawt a, mahse chutianga lo zah vel chuan sawtna a nei der si lo.

"Chutiang chuan u Marema chuan a sawi tak tak maw!?" a thusawki chu awih deuh si awih duh si lovin ka awm.

"Aw sawi tak tak e, zing kara an chaw ei laiin a sawi nghe nghe alawm" ringhlel ru viau mah ila thu dik a sawi ngei ka ring ta ringawt.

"Chuan enge i hming ni reng reng? I hming ri mang si lo hian i chanchin kan hre tam hlûr ringawt a" tia min lo zawh chuan keipawh chuan

"Mambawihi tiin min ko ve mai rawh, mi dang pawhin chu chu min kohna ber a ni. Chuan nang zawk, engtinnge ka koh ve ang che? U Marema lah chuan a lei luihtir ṭeuh bawk si che u a, a nuam lo tak tak a ni" ka lo ti ve duah a, enge a chhan pawh ka hre lo amah chu a ngainat awm reuh tawp.

"Tlani tih emaw Tlanzo tih emawin min ko mai rawh keipawh, saw ka pitr pawh an lo phei e" a rawn tih chuan a hawina lam chu ka hawi ve nghal a, u Marema lah chuan min rawn la nuih suk zui.

"Ti rawh le, i kal teh ang, duh aiin kan bazar rei dawn tlat" u Marema chuan a rawn ti deuh hmuk a, amah chu a changkang bawk sia biak hmasak a huhphurh awm hmel ka ti.

"Chuan ka thusawi kha theihnghilh lo la, he i ngaihzawngnu hi lo hrilh ang che" tiin ka bul maia ding u Marema chu a rawn be leh a, engmah pawh sawi chhunzawm tawh lovin an kal zui nghal bawk.

"Ka awm loh chhung khan i lo va inhralh hnem hman ve, hei kan thil zawrh pawh a kâm duak alawm" kan ṭhut hnu chuan u Marema chuan a rawn ti a, a thusawi avang chuan ka nui ri ve ta hek hek.

"A awih awm loh ber kher ê, i kalna hnu kha chuan tûma'n min rawn dawr tawh lo hrim hrim. Chuan u Marem, ih...eng lo" ka tih lai chuan

"Aw enge? Sawi la, ka lakah hian inthlahrung ṭhin suh, i inthlahrunna te hi tlem chuan a reh ve tial tial tawh tih hre mah ila" a rawn ti ve nghal.

"Eng lo a nia, i nu nen khan enge in sawi? Ka chachin in sawi em? Ihhhh....zawh awm che a ni em tih pawh ka hre lo va, mahse ka hre châk tlat bawk sia ka zawt tawp che a nih hi!"

"Sawi chiang e, i chanchin bak sawi tur kan nei reng reng hleinem"

"Maw!? Engtinnge in sawi? Nâaaaa, kha kha a nia, min lo ṭhutpui suh ka tîh ka tih pawhin i tilui tlat a, ka hlauhthawn ang ngeiin i nu'n min hmu dun bawk si"

"A ho êm mai Mambawih, khatiangin hlauthawng duh vak suh, thil ṭha lo lam kan sawi lo"

"Han sawi vat teh, engtin chiah nge i nu chuan min sawi? Ṭhing min ti awm ê, i ngaihzawng ka ni hi a duh loh vîau ka ring"

"A va mak tak e âw, khatiangin ka nu chuan i chanchin a sawi reng reng lo. Chuan ka nu chuan hmelṭha a tih thu che min hrilh a"

"Dawt sawi suh, pangai deuhin sawi teh u Marem, kan chawhmeh zawrh lai pawh hi ka ngaihtuah hlei thei tawh lo"

"Ka nu chuan hmelṭha a tih loh che i ring em ni?"

"Uang lo teh, sawi vat la kan thil zawrh lai hi zuar zo vat vat zawk teh ang" ka ti nâng nâng a, ani erawh chuan

"I va'n lawmawm reuh tak" tiin ka hnar chu a rawn tawk zeuh a, min hrilh duh mai loh avang chuan ka hmel ta hrawk mai.

"Hei hei hei, khatiang khan min melh rum vak suh, nakinah ka hrilh ang che. Tun atan chuan kan chawhmeh zawrh laiah hian rilru i pe phawt teh ang"

"Ka duh bawk lo, min hrilh hmâ chu ka be tawh lo vang che" ka ti ta hmuk a, ka titau chu a ni der.

"Aw le, min be tawh dawn lo mah la min be leh dawn tho tho tih ka hriat avangin kei chuan chawhmeh ho hi ka'n hralh zo daih teh ang" tiin a ding ûai a, min ngaihsak miah lova a awm chu ka run tawp.

A chawhmeh zuartu tur dik tak zawk e ti lo chuan kan thil zawrh lam chu ka zuar ṭha peih lo va, chutah u Marema chu a la inhralh thei em em leh ta nghal a, a inhralh theih tâk vîau avang chuan ka mood off pawh chu a rawn pangai leh ta vek.

Chhun dar 11 velah kan inhralh zo ta vek a, ni dang zawng zawng aiin ka inhralh zo hma bawk. Kan in luahah chuan kan lut a, pawisa te chu a kim em tih leh a dik em tih te chu ka endik a, chutia ka awm lai chuan u Marema chu ṭhutthlengah lo ṭhuin a phone a lo khawih mial mial thung.

Kan pawisa dawn vel ka chhiar zawh chuan ka zi mar ṭalh ṭálh a, dawhkana tui in tur lo awm chu ka in zui nghal bawk. U Marema chu biak tumin a lam ka hawi a, mahse ani chu a lo muhil daih. Thawm dim takin a bulah chuan ka ṭhu phei a, a hmel ka en chuan ka khawngaih ngei mai.

Ani chuan zahpui miah lovin chawhmeh te min zawrhpui a, a tih ngai loh a nih avangin a tan chuan a chauh thlak reuh dawn lutuk. A kawr hak te chu ho vîau angin lang mahse a taksa nen chuan a inhmeh thlap a, amah a ngo bawk nen a eng kawr pawh ha se a inhmeh ka ring a ni.

Thawm dim tak bawkin ka tho a, ka kal ṭhem ṭhem a, kan in pawn ka thlen ka thaw huai mai. Kan kawm thlang dawrah chuan kalin Waiwai bawm nga chu ka lei a, chhun rilṭam a hun ve tawh tho bawk nen kan ei tur atan ka lei a ni ber. Kan ina ka luh leh chuan u Marema hmel reng reng chu hmuh tur a lo awm tawh lo va, enge tih mai tur pawh ka hre lo.

"U Marem" ka ti deuh vak ringawt a, chutia ka koh zawh rual chiah chuan ka hnung lam aṭanga min lo kuahtu hi an awm a, a taksa lum danah chuan u Marema chu a ni tih ka hre nghal.

"I haw daih emaw ka ti a, ka ngaih a lo ṭha lo hman teh asin. Chuan maw u Marem, i duh chuan i mu thei reng a nia, kan khumah pawh sawn i mu thei reng a nia" a laka ka inthlahrun em avang chuan ka ti leh a, chutah ani chuan amah en tura min kuai herin

"Ka chau hleinem, khawnge i lo kal daih, ka lo zawng hman ṭep alawm" a rawn ti sup a, ka hmuiah chuan a lo fawp zui nghal zat bawk.

"Ka lakah hi chuan dawt sawi ṭhin suh u Marem, i muhil tih ka hmu vek che alawm" kan inthlah hnu chuan ka ti a, a âwmah chuan chhun e chhun lo e ka bei leh ta ran mai.

"I ril a ṭam em? Thil ka zu lei a, kan ei dawn nia" tiin a âwm aṭang chuan ka tawlh sawn a, Waiwai ho chu ka siam zui ta mawlh mawlh.

"U Marem, min siam zawhtir vat teh, kei ang thovin i ril a ṭam ve tawh tih ka hria a nia" ka hnung lam aṭanga min kuah beh tlat avang chuan ka ti leh a, ani erawh chuan awm sawn a tum chuang lo.

"Mambawih, hetiang hian in khatah awmin ka nupui ni tawh la ka ti ngei mai, nang lah chuan min thlahlel ve der si lo"

"Ka thlahlel lo bik che pawh a ni lo, pasal nei tur chuan ka la inpeih chiah lo alawm. Chu bakah ka nute hi ngaihtuah ve la"

"Ka ngaihtuah tel vek alawm, i nu hi thlahthlam ka tum reng reng lo"

"Ka hre ve tho a" ka ti leh sep a, Waiwai chu ka siam malh malh pah bawk.

"Aw le, ka nghak thei lutuk che tih hi hre reng la, i inpeih hma chu ka nghak char char mai ang che" thaw hawk chung hian a rawn ti a, chutianga a duh anga ka awm thei rih lo chu nuam ka ti bik chuang lo.

Waiwai chu gas-ah chhuangin ka vil pah a, ani erawh min kuah bet reng tawh bik lovin ṭhutthlengah a lo va ṭhu phei leh tawh zawk. Ka che vel chu min lo en reng a, inngaizawng rei ve deuh tawh mah ila a bulah chuan ka lai leh lek lek zel. Ka thil chhum a hmin hnu chuan dawhkanah ka chhawp a, a lawnga ei tawp aiah tiin chaw chu plate-ah ka chhawp bawk.

"Engatinge i duh vak lo em ni? Nge nang hian i ei ngai lo hrim hrim zawk? Ka va'n â tak, engatinge i duh ve leh duh ve loh te kha ka lo zawh miah loh che le" ka thil ei mawlh mawlh lai tawp meuh chuan ka ti a, chutah u Marema chuan

"Ni lo, ka ei duh alawm. Ei chu ka ei ngai lo ngai lo ngei a, mahse i bulah hi chuan eng pawh ka ti theiin ka ei thei tih hre ta che" a rawn ti thuai a, keimah ka insit leh a hlauh avanga min ngaihtuahna aw ka chuan ka rilru a ti no vek dawn.

"Ka lawm e u Marem, hetiang taka min ngaihtuaha min duh ve avang hian, ka phu lo che tih hre reng chung hian ka thlah thei mai bik si lo che a"

"Keipawh ka lawm e Mambawih, ka thil thiam loh leh hriat loh tam tak min ziritr avangin" a rawn ti ve nghal a, kan nui dun ta hak hak.

"Le! Kei chu ka ril a ṭam tawh a nia" tiin a hmaa mi chu a ei nghal mial mial a, keipawh chuti tho.

"E! U Marem, min la hrilh miah lo a nia, i nu nena in sawi dun kha min hrilh tawh rawh" ka ti chhuak phawng a, ka hriat chhuah lai tak a ni bawk.

"Ka nu khan kan ina lenpui tur chein min ti a, amah chuan a rang lamin ti mahse i hman hun hunah a ni mai"

"Awi le! Ka zak êeee, i nu leh pa rawn hmuh chu ka zak ve deuh"

"A ho lutuk, zak duh suh. Ka nu hi chu a ṭawng ve hlawk hlawk ṭhin a, ka pa phei chu i ngaina dawn tih ka hre sa"

"A ho hi i ti leh ringawt zel a, hmeichhia i nih loh chuan a hoh lohzia i hrethiam phak chuang lo vang. Nâ, kei chu ka hmu zak rih êeee"

"Zak duh suh ka tih khâ, ka bulah i awm tlat dawn alawm. Chu bakah kan inzuina ngaituah phei chuan kan ina i lo len chu hun i ti ve tawh lo em ni?"

"Ti ve deuh tawh tho a maw, mahse i nu leh pate hmu tur em chuan ka la inngai ngam chiah lo zawk a ni"

"Inngai ngam tawp rawh, ka nupui ni tur leh ka ngaihzawng ni tur hian i tling tawk a, i ṭha tawk tih hi hre reng la, ka nu leh pate chu i hmu zak lo mai ang" a sawi chu dik viau mahse chutiangin a awlsam der si lo.

Kan inei puar zawh hnu chuan ka inbual fai a, a hma ang em emin inbual zawh pawh chuan ka zak tawh bik lo. A hmate kha chuan ka taksa a hmuh hlauin khati khawp khan ka awm a, pawnah te hial ka awm tir a nih kha! Amaherawhchu tunah chuan u Marema chu ka ngaihzawng a ni tawh a, amah ka nel ve tawh em avangin ka zak ṭut tawh lo a ni.

U Marema chu inbual fai ve nghal tura ka tih pawh chuan a duh lo tlat a, an in lama intihfai a duhah ka ngai ta mai. Chawhnu lamah a haw phei ve a, zan lama rawn len a tum thu min hrilh bawk. Tlai dar 4 vel dawnah ka nu chu a lo haw a, ka lo muhil sek bawk nen ei rawng pawh chu ka lo la bawl reng reng lo.

"Mambawih, chaw kha chhum tam deuh rawh aw, chaw eipui tur kan nei dawn a nia" chaw ka sil laiin ka chuan a rawn ti a, keipawh chuan

"Tunge kan chaw eipui tur chu ni a nu?" ka lo ti pangai ve mai a, buhfai chu chaw belah chuan ka suah belh zui nghal bawk.

"Amah chuan sawi a phal rih lo va, a lo thleng ṭep ang. Eeeee...kha...a lo thleng chiah alawm" tiin kawngka lam chu a hawi a, kan ina lo lut mek chu tu dang ni lovin u Marema lek chu a lo ni.

"Heta chaw i ei duh te chuan engatinge chhun lamah khan i sawi ve mai loh?" ka lo ti nghal thâwr a, mi hrilh ṭhat ve mai tur hi a nia.

"Ka hrilh che chuan kei ni lovin ka nu leh pate bawk i ngaihtuah hmasa leh ang a, nangmah aiin i nu ka hrilh ta zawk a nih kha!" a rawn ti hmak a, a sawi chu a dik phian bawk si.

"Chuan hei pi Siam, chawhmeh atan sangha ka rawn lei e ka tia, zanin chu chaw lo ei ṭeuh ka tum a nia" nui chung hian a rawn ti leh nghal a, ka nu pawh chu a thusawi avang chuan a lo nui tawp.

"Êee i duh zât zat i ei dawn nia, buhfai pawh kan ngah alawm" ka nu chuan a lo ti ve mai bawk.

Zana chaw kan ei chuan kan chawhmehin a zir vang nge ni ka chaw ei chu a tui em em a, chutiang bawkin ka bula mite pawh chu an chaw ei a tui ve thovin ka hria. Thil eng eng emaw ni kan sawi a, kan inngaihzawn hnua u Marema nui ka la hmuh tam ber a ni ang.

Kan chaw ei velna chu u Marema chuan min tihpui a tum leh tlat a, kei lahin ka lo phal leh ta tlat lo. Kan inhnial buai lai vel chuan ka nu chu a lo nui char char a, ka luhlul ve hle emaw ka tia kei ai daihin u Marema chu a lo luhlul tih te ka hriat phah.

"Ka pi, zanin chu ka lo riak dawn aw?" eng thu nge he pa hian a sawi leh ringawt tâk hi!

"Doctor Marem, han riah êm chu a tih chi dawn em ni?" ka nu pawh chuan a lo ti ve vat.

"Tih chi lohna tur pawh a awm hleinem, kei chuan nangni te chu ka chhungkua ang maiin ka en tawh che u alawm"

"U Marem, i â em ni? Kan bulah i riak thei ringawt lo, chu lovah" ka tih lai chuan nui suk chung hian

"A sawi leh dawn ta, ka nu leh pate bawk i rawn sawi leh dawn tih ka hria Mambawih, ka uang mai mai a nih kha!" a rawn tih chhunzawm a, riah phet a tum leh tak tak mai ang tih ka lo hlauthawng hman tak tak.

"Tak takin ka va phei hnai tawh zawk ang e, zanin ka chaw rawn ei chu ka puar khawp mai, rawn ei phei ziah tur a nih hi" tiin a tho vut a, a awm dan thut thut chu eng a hria nge ni!

"A la hma alawm, la leng ve rih rawh" ka nu chuan a lo ti a, sana ka en chuan zan danga a haw hun chu a lo ni ve leh reng tawh.

"Ngai lo nu, haw tawh rawh se, a awm rei chuan riah phet kha a tum leh mai ang. Lo kal rawh u Marem, ka lo thlah ang che" kei chuan ka lo ti sawk sawk a, ka awm dan leh ṭawngkam avang chuan u Marema chu a rawn nui ta hawk hawk.

Step-a kan chhoh lai te chuan ka kut chu a rawn hum a, a kut lum nuam tak chu chelh reng mai ka châk. Inbe em em lo mah ila kan awm dan hrehawm tihna ka nei hran lo va, nuam ka tiru em em zawk. A chang leh ka kut chu la kangin a fawp thul a, a hmui hmul vel leh a biang vela hmul awm te chu sik a nuam ka ti phian a, a taksa chu sik a nuam vekin ka hria.

"Chuan engtik maw kan inah chuan i lo kal theih ang?" min kuah vang vang chung chuan a rawn ti thum dup a, zan dang ang lo takin Bike a lo keng a, a Bike bulah chuan kan ding reng tawh bawk.

"Tunah hi chuan ka hrethiam rih mai lo ê, i sawi ang khan i nu leh pate pangai taka hmuh chu hun ka ti ve tawh tho a, mahse âaaaa, ka duh rih lo" ka ti nâng nâng a, chu chu ka rilrua awm dik tak a ni.

"Aw le, ka hrethiam e. I inpeih hûn hunah kan inah chuan ka hruai che ang a, ka hruai hnu che chuan nang hi nupuiah ka nei har tawh lo vang che" a rawn ti sup a, ka chhip sam chu a fawp deuh chhen bawk. Zan a rei tak tak hma chuan

"Mangṭha muttui le" tiin kan inthlah a, ani pawh a Bike ti rumin a tlan chhuak ve mai.

Kan in lam pana ka chhuk thlak thui hma chuan thil ri tûarh hi ka hria a, ka hawi let chuan Taxi leh Bike hi an lo insu a, Bike bula mihring bawk run chuan ka mit a la ta tlat. Hmanhmawh takin Bike leh Taxi insutna hmun chu ka kal phei a, a chhan pawh Bike bula let reng chu u Marema a an em vang a ni.

Bike bul ka thlen chuan ka hlauhthawn ruk ang ngeiin lo let hlawm reng chu u Marema a ni a, ka mangan phili dan chu pui tak a ni. A bulah chuan ka ṭhu thla nghal a, a harh leh harh loh en tumin ka mal chungah a lu chu ka nghat bawk. Taxi driver chu a rawn chhuak ve vat a, ani chuan hliam emaw na emaw pawh a nei lovin ka hria.

"Âwww a va pawi tak, ka lo hmu lo palh alawm le" tiin ka bulah chuan Taxi driver chu a rawn ṭhu thla ve nghal a, kei erawh u Marema awm dan avang chuan ka lo ṭap pur.

"Ṭhiannu, damdawiin lamah i kalpui vat zawk teh ang" tiin u Marema chu a rawn pawm a, pawm pawh hlei thei lovin a hnuk a ni mah zawk.

Passenger seat lamah chuan u Marema, engmah hre lova awm chu ka ṭhutpui a, damdawiin lam pan chuan kan tlan chak khawp mai. Minute rei lote hnuah Civil Hospital chu kan thleng a, nurse te chuan u Marema chu an hmelhriat sa a nih vang a ni ngei ang an lo buaipui zung zung a, nusre mai ni lo Doctor pangai chenin an lo che nghal zung zung.

Nurse te chuan u Marema phone leh Wallet vel chu min lo pe a, u Marema chu room pakhatah an nawr lut zui daih bawk. Kei leh Taxi driver pa chu ṭhutthlengah kan ṭhu ngawi reng a, u Marema accident tawhna chhan keimah vangah ka puh ta ber.

Chutia kan mangang em ema ka awm lai chuan ka nu hian min lo call a, keipawh chuan ka lo chang ve vat a, thil thleng chu ka hrilh zui ta mawlh mawlh bawk. Ka nu chuan in lamah ka chhuk har deuh nia a hriat avangin min lo call hi a lo ni a, mahse ka thu hrilh chuan ti chiai ve hle.

Hospital lama a rawn kal ve nghal tur thu min hrilh a, ka rilru a buai vek tawh avangin aw leh aih pawhin ka lo chhang let lo hrim hrim. Chutah ka nu nena kan inbiak zawh rual deuh thaw chuan u Marem phone chu a ri leh a, a lo call tu ka hmuh phei chuan chhan loh mai ka duh rum rum.

"Hello" ka ti sep a, ka rilru lampang dik loh vang nge ni ka aw te chu a dik lo vek.

"Zanin chu i lo va haw tlai deuh ve, a tlai tak tak hma hian lo haw tawh rawh Marem. Ni lo, tunge lo chhangtu hi?" u Marema nu chuan a rawn ti a, han insawi vel chu huphurh tak ka ni.

"Ihhhh......Mambawih ka nia" ṭi dai chuan ka ti a, chutiang chuan kan inbia ang tih rin ngaihna reng ka hre lo.

"Kha chawhmerh zuarnu kha maw, engatinge ka fapa phone i kawl? Khawnge Marema a awm?"

"Ihhhh...ka pi, u Marema hi kan in aṭanga a lo haw tur kha Taxi nen an insu a, chuan tunah hian Civil Hospital-ah kan awm mek" tiin ka lo chhang a, zep buai vel lova hrilh tlang tawp chu a ṭha ka hriat vang a ni.

Engtin chiah nge u Marema nu chuan min lo chhan dawn ka hre lo va, a ṭawng hriat chu huphurh tak têin ka huphurh a ni.

Chapter 18

"Enga!? Marema chuan accident a tawk maw!? Kan lo kal nghal ang, chuan nang kha khawiah mah lo kal sawn lo la, ka lo thlen hma chu kha tah khan lo awm reng ang che" a rawn ti hmawk hmawk a, kan inbiakna pawh chu amah zawk a hmet tawp zui nghal.

U Marema nu leh pate chu ka va han hmu peih lo ber em, engtinnge an lo thlen hunah chuan ka lo hmachhawn tâk ang? Engkim chu ka thiam loh vekah ka puh a, u Marema chuan ka rilru zawng zawng a luah khat vek a, a thi mai ang tih chu ka hlau ngawih ngawih.

U Marema nu leh pate lo thlen hmain ka nu chu a rawn thleng hmasa hlauh a, ka nu ka hmuh phei chuan ka ṭah a rawn chhuak zual sauh. Ka nu chuan thil awm dan leh thlen dan chu min zawt a, mahse ka hriat chian lutuk loh avangin ka sawi thei mai bik lo.

A tawpa tawpah chuan ka insum theihna chu keh chhiain ka nu kuah chung chuan ka ṭap chhuak ta hawk a, u Marema awm dan mawlh chuan ṭap lo thei lovin min siam tlat a tin ni! Thil thlen dan vel chu kan bula lo awm ve reng Taxi driver chuan ka nu chu a hrilh zung zung a, amah pawh chu a inthiam lo ve hle bawk.

Kan inbiak aṭanga minute 20 ral hnu velah chuan u Marema nu leh pate chuan Hospital an rawn thleng a, ka inthiam loh lutuk avangin an hmel chu en pawh ka lo en ṭha ngam lo. Ka hawi chhuak zeuh a, u Marema nu min lo en dan avang chuan ka hawi thlak rang leh hle bawk.

U Marema pa zawk chuan ka hminga min ko chung hian thil awmzia min lo zawt a, engtinnge ka hming chu a hriat ka hre hauh lo. Chutah ka ṭawng ve ngai miah lovin Taxi driver chuan thil thlen dan leh an insut dan vel chu a lo sawi vat a, u Marema nu leh pate lakah chuan keini nufa chu insitna hlirin ka khat a, an fapa in accident a lo tawk kher bawk nen nuam lo duh tak a ni.

"Nang hian ka fapa i su a maw!? Motor i va khalh thiam awm lo ve, engatinge mi tlan ṭha lai mai mai te i sut? Tunah hian ka fapa chu i motor khalh thiam loh avangin biak theih lohvin a awm reng a, nang lah chuan inthiam lohna pawh i neih hmeh eih si loh" tiin u Marema nu chuan Taxi driver chu a ankhum bawrh bawrh a, u Marema pa chuan

"Nui insum teh, a sawi lai pawhin a inthiam loh ve em khâ, vanduai palh a awm ve thei alawm" tiin u Marema nu chu a lo khap vat a, u Marema nu thinrimna chu awm ka ti hliah hliah.

"Ka pi ka pu, ka thiam loh a ni tih chu ka hria alawm, chuan ka inthiam loh tak zet bawk a ni. Tun atan chuan ka haw ngei ngei a ngai a, ka hman veleh ka lo kal leh nghal ang" inthlahrung tak hian Taxi driver chuan a rawn ti a, chu pa pawh chu ka khawngaih hle.

"Êeee va haw rawh khai, he lam chu ngaihtuah ngai em emin kan awm lo turah ngai ang, inthlahrung reng reng suh" u Marema pa chuan a lo ti a, u Marema nu erawh a lung a nih loh hmel ngei mai.

"Ka lawm e ka pu, ka lo kal leh vat ang" tiin Taxi driver pawh chu a kal chhuak zui nghal a, a hmanhmawh hmel khawp mai.

Chutia Taxi driver ber a kal tâkah chuan keini pali chu kan awm ho ta reng a, u Marema nu chu min en loh laiin ka en zeuh zeuh a, hmuh hrehawm khawpin a thin rim hmel. Chutah u Marema pa chuan

"Mambawih, dar eng zat velah nge Marema hian accident a tawh?" tiin min lo bia a, kei pawh chuan ka aw te thian te tein

"Dar 11 velah khan ni ang" ka lo ti ve mai.

"A zia lo hle mai, Doctor Marema hi chu mi fel tak a ni asin" ka nu'n a tih zawh rualin u Marema nu chuan

"Zia lo tak a ni" a rawn ti deuh hlar a, ka nu tan pawh han biak zawm vak chi a ni lo.

"Nui, i fapa ngaihtuah viau mahla khatiangin ṭawng ṭhin lo teh, anni pawh keini ang thovin an hlauthawng ve tih hre ta che" u Marema pa bawk chuan a lo ti leh vat a, pa zaidam leh fel tak chu a nih ka lo ring ve ringawt.

"An hlauthawng tak tak teh nâng, anni te chuan ka ngaihtuah ang hian Marema hi an ngaihtuah hauh lo vang" u Marema nu'n a tih zawh rualin ka nu chuan

"I ngaihtuah ang em chuan kan ngaihtuah lo maithei a, mahse Doctor Marema hi chu kan ngaihtuah ve hle asin. Keini nufa tan chuan mi fel tak a ni a, mi hrang en pawhin kan lo en tawh lo hîal zawk a ni" a rawn ti ve nghal a, ka nu thusawi chu u Marema nu chuan a ei loh hmel ngei mai.

"Ti teh u, i sawi duhtawk rih ang u! Vanduaina kan tawk palhah ngai ila, Marema pawh a rawn harh chhuak leh thuai turah i ngai phawt teh ang u" u Marema pa chuan a rawn ti dam dap a, a nupui chu ṭhutthlengah chuan a ṭhut thlakpui zui bawk.

Chumi hnu chuan a tua mah kan ṭawng leh tawh lo va, kan inbe leh tawh lo hrim hrim zawk. Dar 2 dawn hnuah Doctor pakhat hi a lo chhuak a, u Marema pa chuan chanchin chu a lo zawt vat a, keini pawh kan lo ding ve ûai a, u Marema result chu ka hre châk hlawm tlang hle te pawh a ni ang.

Doctor chuan u Marema dinhmun chu a pangai ṭan tawh thu a rawn sawi a, a pum lama a hliam neih chu a buaipui awm ber a lo ni. An zai nghal a, hlawhtling taka an zai thu pawh a rawn sawi a, tlem chuan ka rilru pawh a nuam ve ta deuh. Doctor kal liam hnu chuan u Marema pa chuan kan in lama haw turin min ti a, mahse kei chuan haw mai ka lo tum teuh lo mai.

"Nu, i duh chuan lo va haw rawh, vawiin chu chawlhni te a ni tho a, kei chu heti lamah ka la awm dawn" ka ti tlat a, zing lam dar 6 velah chuan ka nu pawh chu a haw phei ve ta mai bawk. Doctor lo chhuak kan hmuh apiangin

"Engtik nge a lo harh ang?" kan lo ti deuh chhen zel a, Doctor pawh chuan

"Ka hre lo le, ni khat hnu lamah hi chuan a rawn harh nghal mai kan ring" a lo ti ṭha ve mai zel a, u Marema chu lo harh vat vat se ka ti tawh a ni.

Chutia u Marema ber an zai zawh hnu chuan u Marema bulah chuan kan lut a, a tam berah pahnihin an awmpui theih avangin u Marema nu nen chuan kan ṭhu ngawi dun ta reng. Eng thil mah pawh in ei puar lovin u Marema lo harh chu ka nghak tlawk tlawk a, ka ril a ṭam lo lam pawh ni lovin thil ei châkna reng ka nei lo zawk a ni.

"In inah rawn leng lo se chuan ka fapa hian hetiang thil hi a tawk miah lo vang" kan ngawih vang vang hnuin ka bula mi chuan a rawn ti a, kei erawh chuan a sawi chu dik ka lo ti hle.

"Ni e, kan inah chuan lo leng lo se hetiang hian u Marema hi a awm miah lo vang, chuvang chuan ka inthiam lo hle a ni"

"I inthiam loh tak tak pawh kei chuan ka lo ring hleinem, ka fapa hi a sum i duh vang chauhin i lo ngaizawng a nih ka ring zawk a ni"

"Ka pi kan rethei tih chu ka hria a, mahse u Marema hi a sum duh vanga ngaizawng ka ni lo"

"Ka hrilh tlang tawp ang che, ka fapa nupui emaw kawppui atan hian nangni ang hmeichhia hi chu ka duh vak lo va, chuvang chuan ka fapa hi lo zar buai chhen lo la ka ti ngei mai"

"Ka pi, u Marema hi ka phu lo tih chu ka hria a, nangni'n min duh loh phei hi chu ka lo rin sa a ni a, mahse chutiang ringawtin u Marema hi ka ṭhen thei bik mai tawh lo a ni" ka huaisen zawng zawng sawm khawmin ka ti chhuak sep a, amah chu en lovin u Marema chu ka en daih bawk.

"Enga!? Chutiang ringawtin i ṭhen theih loh thu i sawi maw!? Ka hrilh ang che, pawisa i duh chuan ka pe em em ang che, chuan ka fapa hi lo ngaizawng tawh suh"

"Ka pi ka pawisa duh avanga i fapa ngaizawng hi ka ni lo ka tih tawh khâ, ama'n min duh ang bawka ka duh ve avangin ka thlah thei lo mai a ni"

"Khawia nungchang nge i maw i neih reuh ni! Aia upa zahna pawh i nei reng reng lo a nih dawn hi!" a rawn ti leh hmuk a, kei chuan chhan let aiin chhan let chu ka thlang ta zawk.

Chhun ni leng chuan a harh lo va, u Marema pa chuan ei tur a rawn keng hlauh a, a tih chi tak tak. Sawi kher lo mah ila ka ril chu a ṭam ru em em tawh a, mahse u Marema harh laia lo awm loh chu ka duh si lo. Ka nu paw'n min lo call a, ka la awmpui rih dawn thu ka lo hrilh ve hmiah. Ka nu chuan u Marema chu a ngaihtuah ve tak tak a, a fapa ang maiin a ngaihtuah ve ni berin ka hria.

Chawlhni zan a lo nih chuan zing lama ka hnathawh ṭhin avangin loh theih lohvin ka haw a ngai a, ka haw te chu ka zuai tawp. Zing kara hnathawk tura kan kal te chuan ka rilruah u Marema tih chauh loh chu a awm thei lo va, Lawmtei pawh chuan ka awm dan chu ni dang a ang lo a ti a, mak a tih hmel hle.

"Mambawih, enge i chungah thleng? Enge dik lo awm a?" thingpui kan in lai chuan a rawn ti ta nge nge a, ka thingpui in pawh chu a tui leh tui loh ka hre lo.

"U Marema an zai a, tun thlengin a la harh lo" ka ti chhuak deuh tawl a, engtia han sawi ber tur nge pawh ka hre tawh lo.

"Tunge u Marema i tih chû? I u em ni?" ka sawi chhuak danin a zir lo vei bawk nen Lawmtei chuan u Marema chu a hre lo hle.

"U Marema chu ka bialpa a nia, kan in aṭanga a leng haw lam kha Taxi nen an insu a"

"A va zia lo ve, chuan an zai hlawhtling em? Engtikah nge Doctor te'n a lo harh chhuah an beisei?"

"Zai chu an zai hlawhtling ngei a, vawiin hi a lo harh hun tura an sawi chu a nia"

"I ngaihtuah hle a ni maw, mahse a awm ve tho. Kan mi hmangaihte hi chu an thih hi kan hlau ngawih ngawih a, min kalsan mai ang tih chu kan hlau ṭhin reng alawm" a thusawi avang chuan thil hriat chhuah ka nei nghal zawk.

Ni e, kei hian u Marema hi ka ring satliah mai a ni lo va, ka thlahlel satliah mai a ni lo va, ka duh satliah mai a ni lo va, ka thinlung leh tih tak zetin ka hmangaih tawh zawk a ni. Ani chu ka tan sangin ka phu loh nimahse ka hmangaih em em tawh a, mahse ka hmangaih thu chu amah hrilh kher ka tum lo.

Zing lam hna kan thawh zawh chuan kan in lamah ka haw thuai a, chaw te eiin Hospital lama kal chu ka tum leh nghal bur. Ka nu chu a hna ngaiah bawk chuan a kal leh a, a ei rawng bawl hah ngai lovin ei rawng chu ka lo bawl fel vek a, a tih tur chu ei dawna chhuan lum chauh a ni mai.

Tlai dar 3 vel a lo nih chuan Hospital lam chu ka pan a, u Marema nu leh pate pawh ka kal dawn tih ka hrilh hmasa hran chuang lo. U Marema awmna room chu luh nghal mai ka tum a, mahse nurse pakhat chuan room chhunga mi pahnih an awm tawh thu a lo sawi avangin pawnah chuan ka ṭhu ta ringawt. Room chhunga awm te chu u Marema nu leh pate an nih ka ring ve tawp a, mahse room aṭanga ka nu lo chhuahpui chu mi dang daih a ni.

"Lo ngaihtuah reng reng suh, keimah ka awm hi, Marema a harh veleh ka lo call dawn che a nia" tiin ka nu chu u Marema nupui hual lo ni tawh chuan a thlah a, kei chu an piah deuh hleka ka lo ṭhut avangin min hmu lo ve ve.

"Ṭhiannu, i duh chuan i lut thei tawh e" tiin keimah ang rual vel nurse hian min lo bia a, u Marema nu kal liam ka thlir zui nasat lutukna lamah engmah ka lo ngaihtuah hman tawh hleinem le.

"Aw...aw le, ka lawm e" ka lo ti bah nuai ringawt.

Room chhunga ka luh chuan u Marema ngaihzawng hlui leh nupui hual hlui chu a lo ṭhu ran a, phone a lo khawih mial mial bawk. Ka thawm hriain ka lam chu a rawn hawi a, ka hmel chu a en chiangin a en rei ngei mai. Chutah amah zawk chu rawn ṭawng chhuak hmasain

"Nang hi ka hmu tawh tlat chein ka hria, inhmuh tawhna kan nei em? Engatinge hetah hian i lo luh ve?" a rawn ti deuh zung zung a, kei chuan pangai taka awm ka lo tum thung.

"Aw inhmu tawh e, ka lo kal chhan chu u Marema hi ka lo awmpui dawn a" tiin a zawhna te chu ka lo chhang a, ka chhan dan avang chuan mak a ti ngei mai.

"Maw? Marema rawn awmpui tur hian a enge i nih a?" a inla tatu vak ringawt chu ka hrethiam hauh lo.

"Kei hi u Marema bialnu ka nia, chuan nakin lawka a nupui tur ka ni bawk" ka tih khum ve ta sak a, min biak dan leh awm dan vel chuan ka rilru chapona a kai chhuak tlat alawm.

"I va zak lo mai mai reuh tak! I sawi tâkah chuan nang hi hmeichhe che ṭawp zet kha i ni tih ka hre chhuak, engtinnge Marema te ang hi i beisei ngam zawk?"

"Mihring ve tho ka nia, duh zawng leh hmangaih zawng te chu ka nei ve thei alawm"

"Hmangaih a!? Nang hian Marema hi i lo hmangaih hman vel i tihna em ni?" a ṭawngkam chhuak tinah chuan mi dangte hnuaichhiahna hlir a tel.

"Aw hmangaih e, ka hmangaih ang bawkin ani paw'n min hmangaih a, nupuia min neih a tiam bawk" dawt mu hlum hlaka u Marema'n min hmangaih thu ka sawi chhuak chu ka inthiam ru hle a ni.

"Nang nu te hi i va nasa reuh ve le, hmeichhe ṭha tak zawng i ni hauh lo vang. Ka hrilh ve mai mai ang che, Marema hian nang ang hmeichhe che ṭep leh inhlawh chawp ve mai mai hi a duh rei che ring suh, a tawpah rilru na takin a ṭhen ve leh dawn tho tho che" a rawn ti a, a nui pah hak hak bawk.

"Khatiangin u Marema chanchin sawi chhe ringawt suh, ani tluka mipa ṭha hi an awm lo asin"

"Hahaha....kei a nupui hual lâi lo ni hman tawh pawh min ṭhen leh thei a nia, nang phei chu a hre zui rei duh hauh lo zawk ang che"

"Engatinge chungte chu i sawi vâk vak? Min ṭhen leh ṭhen loh chu ama thu thu a nia, keini lo sawi theih pakhatmah a awm hleinem" ka thinrim ru ṭûn nen ka aw chu a nem em em tawh bik lo va, a thusawi chu a dik ang tih ka hlau hle bawk.

"A nih vel tak chu! Coffee ka in lawk dawn, ti khan lo ṭhutpui lawk rawh, ka awm loh lai khan thil ṭha lo kha lo ti lo la" tiin a tho tharh a, a chhuak zui nghal. Eng thil ṭha lo nge ti se min tih? Ha! U Marema'n ani kalsana kei min duh ya chu ka lawm thar hnuhnawh vel.

Chutia ka inhnialpui ber a chhuah tâkah chuan u Marema awmna lamah chuan ka ṭhu thla a, a hmel ka en chuan ka lainat tawp. Keimah vang chu ni chiang bal lo mahse keimah vanga accident tawkah ka ngai tlat a, a chhan pawh kan inah keimah min hmu turin lo leng lo se chuan accident a tawh kher ka rin loh vang a ni. A kut engmah hre lo chu ka la kang a, ka fawp vang vang a, lo harh thuai thuai se ka ti a, min duatna aw kâ ka hre leh châk tawh a ni.

"Lo harh tawh rawh u Marem, a hrehawm em mai" ka ti sep a, u Marema bialnu hlui chu a awm rih lo bawk nen ka ṭah chu a chhuak leh et et tawh.

"U Marem" ti lehin ka ṭap chhuak ta feih feih a, a hmai vel chu ka chûl ka chul bawk.

A bianga hmul awm te chu khawih nuam ti mah ila a putu ber a harh miau loh chuan nuam tih tak takna ka nei lo va, u Marema chu ka khawngaihin lo harh se ka ti tawh tak zet. Ka phone chu hmet engin dar zat ka en a, tlai lam dar 4 a lo ri der tawh. Doctor te kha chuan ni khat hnua a harh hman an ring a, mahse u Marema lah chuan harh hmel reng a la pu bawk si lo.

"Mambawih" rawn ti ṭial ruai tu an awm avang chuan ka maimitchhing lai chu ka meng kawk a, min kotu chu tu dang ni lovin u Marema ngei a ni.

"U Marem, i lo harh tawh maw!? Âwww ka va lawm tak em, engatinge nge i lo harh vat loh?" dam lo a nih leh nih lo lam reng ngaihtuah hman tawh lovin ka ti lo ti sawk sawk a, ka zawhna te chu atan chuan chhan a la harsa khawp ang.

"Hei Mambawih, ṭap lo khan min lo pui teh, ka pum hi engatinge? A ni ṭung mai" tiin rawn thawh kan a tum a, kei chuan a tho kang tur chu lo dang vatin

"Ni lo u Marem, thawh tum suh. I pumah hliamah i nei a, an zai che a, chu chuan i taksa hi a la tina dawn a ni" ka lo ti a, ani pawh chuan thawh luih a tum ta bik lo.

"A ni maw, kei chuan engmah kha ka hre zawm tawh lo va, hei Mambawih, khatiang hmel kha min hmuh reng bik lo la" a rawn tih chuan ka ṭah chhuak hmel chu thup hram hram ka tum a, mahse ka thei thlawt lo.

"Ka ngaihtuah lutuk avang che hian ka ṭah a chhuak alawm, keimah avangin accident i tawk leh ta nghal a" ka lo ti ṭuau a, dim tein a ban chu ka bawh zui ta bawk.

"Hei Mambawih, accident ka tawhna chhan hi nangmah i ni reng reng lo, kut tlat lo khan min han en teh le!" tiin a ban chu a rawn ti che a, keipawh chu insum ṭawk ṭawk chungin ka hawi chhuak ve leh mai.

"Kan inah, keimah min hmu tur te leh kan ina chaw ei tur te khan lo leng lo la chuan accident i tawk tawp nâng"

"Khatiangin nangmah in mawhpuh ṭhin suh, i thiam loh a awm miah lo tak tak a nia" a harh vang lutuk leh a ṭawngkam chhuak pangai ta vîau chu mak ka ti letling ta zawk.

"Lo hnai teh, ka hmuiah hian min lo fawp teh Mambawih" a rawn ti leh chuan a lam chu ka hawi a, ani chu a lo thutak hmel hle.

"I mittui te kha ti tla tawh lovin ka sawi ang kha han ti teh le, min duat ka phut teh mai a nia" u Marema chu na nei tawh lo ang maia a ṭawng theih avang chuan ka en hâw, a lo harh tawh vang nge ni ka ṭah chhuak lutuk pawh chu a reh ve tial tial bawk.

"A chi loh u Marem, mi an lo lut thut ang, i bialnu hlui, ka sawi awmzia chu i nupui hual lai lo ni tawh kha hetah a awm ve reng a nia" ka ti ta ringawt a, u Marema ka thlahlel lo bik pawh a ni lo, mi tu emaw niin min lo hmu ang tih ka hlau em a ni.

"Kimtei chu hetah a lo kal maw!? Engtinnge accident ka tawk tih a hriat?"

"Accident i tawk tih a hriat dan chu ka hre bik chiah lo va, mahse tunah hian coffee in turin a chhuak mek, a lo let ṭep tawh zawk ang"

"Ka nu leh pate hi khawiah nge an awm? An hmel ka va hmu lo ve, mahse nang i awm chuan mi dang chu ka mamawh hran lo"

"Ihhh.....i nu chu nichin deuh lawk khan a haw a, ani pawh a lo let leh thuai ang"

"Eng pawh ni se min lo fawp phawt mai teh Mambawih, i hmui fawh nuam tak kha ka fawp châk a nia"

"A chi loh u Marem, mi an lo luh thut chuan a zahthlak dawn lutuk, ni dangah ka fawp zawk ang che"

"Khatiang zawng khan maw i tih dawn? Mi pawh lo lut se a zahthlakna a awm lo, kei chuan nang hi nakin maia ka nupui i ni tih hre vek tawh se ka ti asin" tiin a hawi tau reuh hmak a, a awm dan chu a lawmawm thlawt.

"A nih lo hawi rawh, chuan maimitchhing nghal bawk rawh" a tawpa tawpah chuan ka ti leh ta nge nge a, ka fawp châk ru ve tho alawm le.

"Rei deuh aw" a hmui ka si ṭep tawh tihah chuan a rawn ti leh sup a, nui sek chungin u Marema chu ka fawp zui nghal.

"Ka va'n kham lo tak, chu lovah a rei lo ê, ka dam ṭhat hunah chuan ka va fawp nasa dawn tak che em" kan inthlah hnu chuan a rawn ti chhuak hawk a, kei chu ka lo nui vak vak ringawt.

Chutia kan awm dun lai chuan u Marema nu leh u Marema bialnu hlui Kimtei chu an lo lut a, Kimtei chu kei aiin upa mahse kan boruak a ṭhat loh vang nge ni ka u duh bik kher lo. An rawn nui lut dun hak hak chu an tawp chat a, chutiang bawkin keini nui dun pawh ka tawp ve ta riai riai.

"Aw le! Ka fapa i lo harh ta maw, ka va lawm em" tiin u Marema nu chu a rawn phei vat a, kei chu min nam sawn deuh dâwr nghal bawk.

"Khawnge ka pa hi?" u Marema pawh chuan a lo ti ve mai a, Kimtei pawh chu u Marema bulah a phei ve ta daih.

"I pa chu an buai rih a, chu lovah ka lo kal ve em em a, i pa i lam leh daih a, i pa ai chuan ka ngaihtuah fê zawk reng che sia" u Marema nu chuan a ti leh ta hlawk hlawk mai.

"Chuan engatinge Kimtei hi hetah a awm ve? A hmel hi ka hmu peih vak lo asin, chu bakah anni nen chuan inzawmna pawh ka nei tawh hleinem" u Marema chuan a ti ta piap mai le!

"LALREMRUAT, Kimtei awm ve reng laiin khatiangin ṭawng suh, ani chu a ngaihtuah vang chein a lo kal zawk zawk a!"

"Min ngaihtuah ka ngai hleinem, nang leh ka pa in awm a, Mambawihi te nufa an awm bawk a, mi dang mamawh ka nei hran hleinem"

"Kimtei hi mi hrang angin en nghal ringawt suh, inṭhen tawh mah ula ani te chu kan tan chuan fanu ang mai alawm a nih" u Marema nu chuan Kimtei chu kei aia a duhzia ka awm lai ngeiin a sawi a, ka tan chuan ngaihthlak a va nuam si lo em.

"Nu, i tum hi ka hre ṭan dawnin ka hria. Kimtei hi ka ṭhen fel tawh a, inzawmna neihpui leh pawh ka tum lo. Chuan Mambawihi hi ka nupui tura ka hmeichhe thlan a ni a, ani tih loh chu nupuia neih tum ka nei hauh lo"

"Chutiangin inzawmna nei leh rawh u pawh ka tih tawp loh khâ, chuan Mambawihi hi ṭan nghal hlur suh, a zia tak pawh i la hre chiang tawp nâng" u Marema nu chuan ka hming a lam ti ve ta, mahse min sawi duh dan erawh ngaihthlak nuam a ni chuang lo.

"Ka hre chiang tawh khawp mai, Mambawihi tluka hmeichhe ṭha hi ka la tawng lo" u Marema chuan a rawn ti leh hmarh a, kei leh Kimtei chu kan lo ngawi reng ringawt.

"I inchhir ang tih ka hlau ber alawm, ani ang hmeichhiate hi chu i nupui ni tur chuan a inhmeh lo deuh a ni" u Marema nu chuan a rawn ti leh a, u Marema tan harh tirh nen a va hrehawm dawn tak.

Ka inthlahrun êm avang leh keimah avanga an nufa inhau chu hmuh hrehawm ka tih em avangin kawngka lam chu ka pan a, ka tan chuan an ṭawng hriat lovah kan in lama haw vang vang a ṭha zawk.

"Mambawih" tia u Marema min kohna chu kawngka ka hawn rualin ka hria a, mahse hawi let lovin ka chhuak lui ta tho.

Ka thin a rim lo va, ka awm ṭula ka hriat loh avangin ka haw a ni ti ila chuan dawt tlem a tel ngei ang. Min hnuaichhiah leh min duh lohzia tih hriat taka u Marema nu ṭawngkam chhah chhuah chuan ka lai a chhun a, keimah chu an laka insit lo thei lovin min siam ta zawk a ni.

Kan in ka thlen chuan ka nu chuan ei rawng a lo bawl a, u Marema chanchin min zawh chuan a harh ṭhat tawh thu leh ngaihtuahawm tak a nih tawh loh thu chu pangai takin ka lo hrilh ve mai.

Chapter 19

A tuk ni leng chuan u Marema chuan thawm reng a rawn nei lo va, keipaw'n ngaihtuah ru vîau mah ila va biak vel chu ka duh rih loh avangin ka be ta lo law law. Khatiang khawp khan ka awm lai ngeiin a nu khan u Marema tana ka tlin lohzia leh ka phu lohzia a sawi a, u Marema chu ṭhen tak tak mai ka duh tawh zawk a ni.

Ka rilru te chu an insual nuai nuai a, u Marema ka lo hmangaih hman thawt thawt ber chuan ṭhen min ti harsa leh ta tlat. Ṭhen mai duhna rilru ka nei a, mahse amah ka lo hmangaih ve miau tawh avangin ṭhen ngawt chu ka phal leh chiah bawk si lo. Ka nu chu ka rilrua awm leh ka thil tawn te chu hrilh ka tum ûk a, mahse chu pawh ka hrilh leh ta chuang lo.

"Enge i bialpa chu a an a, a lo harh tawh em?" kawngpui hmun phiat tura kan kal laiin Lawmtei chuan a rawn ti a, keipawh chuan

"Aw harh tawh e, a zia tawh khawp mai" ka lo ti ve mai.

"Enteh Lawmte, thil ka zawt ang che aw?"

"Aw min zawt rawh, eng lampang nge min zawh duh chu ni a?"

"Ihhh....eng lo a nia, inngaihzawnnaah hian chhungkaw dinhmun nge pawimawha i hriat induh tawnna emaw inhmangaihna?" ka ti deuh tawl a, kan thawh dunna a lo rei ve tawh tho bawk nen Lawmte chu ka ring ve em em ringawt.

"Âww a hriat sa reng alawm, chhungkaw dinhmun tih vel mai mai ai chuan induh tawnna leh inhmangaihna te chu a pawimawh daih zawk alawm. Engatinge? I bialpa nen chuan buaina in nei em ni?"

"Amah nen tak chuan kan nei hran lo, amah chuan min duh viau zawk a ni. Amaherawhchu a nu leh pate chuan kan dinhmun inthlau chu an hrethiam chiah lo va, a nu phei chuan ka awm lai reng pawhin min duh lohzia ṭawngkam a chhak chhuak hial asin"

"A ho, a nu tih te mai mai a ho lutuk, amah berin a duha a hmangai tlat che chuan hlauthawng vel duh suh"

Chutiang ringawt a ni lo, a chhungte'n min duh loh tlat chuan a tawpah kan inṭhen ang a, chung hunah chuan tun ai let hian ka na dawn a ni"

"I ngaihtuah thui mah mah a nih chû, tun atan chuan a thusawi chu ring tawp mai rawh, nakin hun chu Pathian kutah dah la, ani chuan a rel fel vek mai ang"

"Tunah chuan ka ring em em tawh zawk a, chuvangin nakin hun lam chu ka ngaihtuah lo thei lo a ni. Ngaihtuah ve la, i mi rin deuh khan rilru na takin siam leh si che se la i duh dawn bik em ni?"

"I va mak e âw, tuna i bialpa hi i duh tak zet em? I hmangaih em Mambawih?" Lawmte chuan a rawn ti ta thlâwt a, hnial reng ka tum pawh a ni bik lo ka hlauthawng rih em a ni.

"A hma chuan ka hmangaih em tih pawh ka hrethiam ngai lo va, mahse tun hnaia accident a tawh avang khan ka lo hmangaih em em tawh zawk a ni tih ka hre chhuak a ni"

"I hmangaih chuan tu dang mah ring lovin amah chu ring tawp la i rilru pawh a nuam thei zawk ang, chuan i bialpa chuan a hmangaih ve chein i hria em?"

"Ka hre lo, ani chuan ka beng hriatah min hmangaih thu a la chhak chhuak ngai lo va, kan pahnih hnîh chuan kan la sawi lo ve ve zawk. Kei chuan ka hmangaih em em tawh a, mahse ani chuan min hmangaih ve em tih lam ka ngaihtuah ngai hauh lo"

"Engtinnge i bulah a awm ṭhin? A duat che em? A ngaihsak tawk chein i hria em? Mipa te hian an hmangaih tak tak te hi chu an nat pawh an phal ngai lo va, mipa dang lakah hian a hauh bur zel bawk" nui ri hak chung hian a rawn ti a, a thusawi chu dawt nge thu tak a nih ang tih lam pawh ka ring thiam rih lo.

"Ih maw, min ngaihsakin min duat viau chuan ka hria a, mahse chutiangin mipa dang laka min hauh bur vel awm chu ka la hre miah lo. Amaherawhchu a che maksak thei tawp, a thil tih ngai miah loh ka lo tih chuan min tihpui ve phet a tum ṭhin a, phal lo eng ang mah ila a tilui tlat zel. Zan khat phei chu min insukpui a, an hausa bawk sia insuk te kha a ti ngai miah lo ang, mahse min insukpui leh tlat a, a chang hi ka dan theih pawh a ni lo ṭhin" u Marema nena kan hun hman dun dan ka ngaihtuah let avang chuan ka ṭhen sak bawk.

"Kei chuan a hmangaih ve che a nih ka ring Mambawih, i sawi dan aṭang phei chuan sawi lang kher lo mahse a duhin a hmangaih ve hle che niin ka lo hria"

"Engtinnge i hriat ngawt theih? I lo hre sual ve reng thei tho a nia, kei chuan anni ang mi awm thei te chuan keini ang mai mai chu min fiam vel mai mai ka ring tu ṭan tawh zawk asin"

"Khatiang rilru kha i put tlat chuan a hmangaih ve che leh ve loh che chu i hre thei nâng, amah chu ring tawp phawt mai rawh"

"Rin tawp kha a harsa ve alawm, ka theih ang angin ka ring a, mahse a nu ṭawngkam vel khan hlauhthawnna min lo pe lo thei lo a ni. U Marema chuan nupuia kei lo neih a tum loh thu sawi mahse thil hi vawi leh khatah a danglam vek thei a, rilru na takin ka awm ang tih ka hlau a ni"

"Chu leh nghal, enge i la buai em em a? Amah berin nupuia neih che a tum thu a sawi tawh a, a chhungte thusawi ai chuan i bialpa thusawi chu ring tawp zawk rawh, i tihsual ka ring lo zawk Mambawih"

Lawmtei nen chuan kawngpui phiah fai pahin kan titi char char a, a hnen aṭang chuan thurawn ka la a ni ber zawk. Kawng ṭhenkhatah hi chuan mahni nu leh pate hrilh vek chi loh te hi a awm ve a, anmahni rin loh vang pawh ni lovin anni ai chuan kan ṭhiante thurawn lak chang hi a awm ve ṭhin a ni. Thingpui kan in lai chuan Lawmtei thu min hrilh ho chu ka ngaihtuah zui a, sawi dik se ka ti ngei mai.

"Mambawih, vawiin lamah Doctor Marema va kan i tum em?" chaw kan ei laiin ka nu chuan a rawn ti a, chhun lama ka awm dan tur ka lo ngaihtuah lai tak a ni bawk.

"Aw ka tum deuh a, tihtur dang ka nei thut te a nih loh chuan ka va kal ang"

"A ṭhat hlauh chu! Kei lah hi dawr lamah ka awm chawt a ngai ṭhin bawk si a, hman ila chuan rawn kal ve mai pawh ka duh khawp mai"

"Keimah ka kal chuan a tawk mai alawm, u Marema pawhin a hrethiam lutuk ang che" tiin chaw chu ka bar zui mawlh mawlh a, bai chu a tui bawk a, ka hawp nâwn ka hawp nawn mai.

Chaw kan ei kham hnu rei lutuk lovah ka nu chu a hnathawhna dawr lamah a kal a, keipawh u Marema kan turin ka insiam zui ve nghal bawk. Dar 10 leh tih velah chuan Hospital chu ka va thleng a, nimin lam boruak dawng ṭha lutuk lo mah ila u Marema chu hmuh loh ka tum phah der lo. Ni e, amah u Marema ngeiin min duh loh thu leh min ṭhen a duh thu a sawi te a nih ngawt loh chuan u Marema chu rin bur ka tum ta zawk a ni.

"Ṭhiannu, Doctor Marema hmuh i tum a nih chuan an chhuak tawh a, nimin lam khan an in lama inenkawl turin an inla chhuak nghal daih alawm" u Marema awmna room hawn ka tum laiin nurse pakhat hian a rawn ti a, mak ka ti ngei mai.

"Aaaaa....ihhhh...eeeee..awww..a nih chû" tiin ka kawngka vawnna chu ka thlah thla riai riai a, ka hawng hman teuh kher mai.

Hospital pawn ka thlen chuan engtia awm tur nge ka hre mai lo va, u Marema chu an ina va kal chilh a ṭha mai ang em tih ka ngaihtuah rauh ruah bawk. Ka phone chu ka phawrh a, kal hmaa amah biak chu ka duh hrim hrim. Chu bakah an in awmna tak pawh ka kal ngai lutuk loh avangin ka hre leh tawh lo va, catering kan va tih kha ka vawi khat kalna leh hmuhna a ni a, khami ni lo kha chu an veng emaw an in lamah ka kal leh tawh ngai lo.

"Hello" hmeichhe aw hian a lo ti daih a, ka rin sual loh chuan u Marema phone lo latu chu a nu a ni ngei ang.

"Awww....ihhh....ka pi, u Marema a biak theih em? Ka lo be lawk teh ang a" ka ti ringawt a, amah ber kherin a lo la bawk sia sawi tur a vang nghal hle.

"Biak theih rih loh, a muhil a, i sawi duh chu ka hnenah hian sawi mai rawh" a rawn ti ram hmak a, ṭawng leh chu huphurh tak tein ka huphurh.

"A nih chuan ka pi, in in awmna hi min lo hrilh chiang thei deuh em le? Rem i tih chuan u Marema lo kan ka duh ve a" inthlahrung tak chuan ka ti a, engtin tak min lo chhang leh ang maw!

"Kan in awmna i hriat chian loh chuan lo kal lo mai zawk ta che, a hrim hrimin ka sawi chian viau tawh khâ, Marema hi lo zar buai chhen tawh lo zawk teh, a duh rei tak tak dawn lo. Nupuia neih che te kha a sawi ve a, tunah phei chuan a rilru a thlak leh zawk tawh maithei a ni" a rawn ti deuh hmawk hmawk ri chu ngaihthlak a nuam vak lo.

"Maw? U Marema chuan a rilru a thlak maw!?" a thusawi awih chiah lo chuan ka ti a, a sawi dik reu reu ang tih ka hlau.

"I hrethiam miah lo em ni? Nimin ni leng pawhin a rawn biak miah lo che khâ, chuvangin ka thu awih la Marema hi kalsan thuai teh"

"Ka thei lo ka tih tawh kha ka pi, chuti maiin u Marema hi ka kalsan ringawt thei tawh lo" inti huaisen chawp chuan ka ti leh a, u Marema lo chu ka ring dawn lo hrim hrim bawk.

"Nang biak reng che hi a ṭul lo ve" tiin kan inbiakna chu a titawp hmak a, mahse kei chuan u Marema chu hmuh ka la tum lui ta tho.

Khatla aṭangin Bus in Kuilikawn lam chu ka pan a, chhuak khât tih takah Kulikawn veng vel chu ka bel lo hle. Kawng peng a tam bawk si, motor tlan vel an tam bawk si, ke ngawta u Marema te in lam han pan chu a awlsam zawk zawk lo hle. An in panna kawng ni awma ka hriat dan dânin ka kal mawp mawp a, ka lo hre ve deuh nial nual tho bawk nen ka la kal dik ve zel chuan ka hria.

"Ka pi min lo hrethiam lawk mai, khawi laiah hian nge u Marema, ka tih awmzia chu Doctor Marema te in hi a awm i hre mial em?" tiin kalna tur ka hriat loh chinah chuan dawrkai pakhat chu ka zawt ta tawp a, lo hre ngei se ka ti.

"Civil Hospital- thawk kha em ni i sawi chû?" ka mi zawhnu chuan a lo ti ve mai bawk.

"Aw, Aizawl Civil Hospital-ah sawn a thawk mek" ka lo ti ve leh vat a, a hriat loh ai a hriat ka rinna chu a tam tawh zawk.

"Khû lama kawng chhuk thlaah khuan i kal zel ang a, kawi khat vel a lo awm ang a, kawgpui bul deuha in rawng sen leh var lian ang reng deuh kha an in chu a nia, an in a lian bawka i hmu har lo vang"

"Aw le, ka lawm lutuk e ka pi" tiin ka kalsan a, motor tlan an awm deuh chhen avangin ka kal sir thei hle.

Dawrkainu min hrilh ang ngeiin kawng kawi zawhah chiah chuan in lian pui hi a lo ding a, a hmaa ka lo kal tawhna nen chuan ngaihbelin a hmun leh awm dan vel chu ka hre chhuak uar uar nghal. U Marema te in chu Gate hian a lo inhung kual ṭhap a, in kawtah chuan u Marem Car pawl pawh a lo inhung vang mai. Tin, phul lem vel chu in kawtah an phah ṭhup bawk a, chungte chuan a ti mawi zual.

In chhung luhna ber tur ni awm tak kawngka bulah chuan ka ding a, door ber chu ka hmet ri zui nghal bawk. Thawm engmah ka hriat loh avang chuan ka hmet nawn leh a, kawngka hawn tum ni awm tak thawm chu ka hre ta a, eng pawh ni se u Marema chu ka hmu dawn hi a ni tawp mai.

"Nang bawk maw!?" Kimtei chuan kawngka lo hawn pahin a rawn ti a, u Marema te ina a awm daih daih chu mak ka ti lutuk ringawt.

"Nang maw!?" ka mak ti leh sawi tur hre lo chuan ka ti ve hluai ringawt.

"Marema sum chu i lo duh hle a ni maw? An inah te hial i rawn kal chilh a, ani aia hausa Mizorama an tam tam nen" a ṭawng ngei awm thiam lutuk chu ka thin a rim.

"Kimte, min dan tum mahla u Marema hi ka hmu dawn tho tho a, chuvangin ka lo lut zawk ang e" kei aiin changkangin hausa mahse ka ngaisang chhe te them bik lo.

"Enga!? Tunah khan Kimte te min ti vela maw!? Nang aiin ka upa daih tih i hre lo em ni? Nangni ang rual chuan min u ngawih ngawih tur in ni zawk asin"

"Nangmah be tur che leh inhnialpui tur chein ka lo kal lo a nia, khawngaihin kawng min lo kian hram teh" a thusawi pawh ngaihsak duh lovin ka ti ta daih.

"I zak lo ka ti hle mai, i duh phawt chuan rawn lut mawlh teh" ti hmukin a kal sawn a, keipawh chu in chhung lamah ka lut zui ve nghal.

Kimtei chu in chung lamah a chho hmawk hmawk a, keipawh chuan ka zui ve zel. In chung pan chhohna step ka thlen lai chuan u Marema pa nen kan intawk a, biak pawh inbe lovin kan inkal pel ringawt. A chhan chu u Marema pa chuan phone in mi a bia a, kei chuan min biak chu ka ring lo hrim hrim zawk a, hman pawh a hman lo.

"Marem ka fapa i ni a, i tihsual hi ka hlau alawm, ani hmeichhia hi chu i tan a ṭha tawk lo" Kimtei luhna room ka lut dawn chiah tihah u Marema nu aw chu ka hria a, lut lova an inbiak dan ngaihthlak chu ka duh ta zawk.

"Khawngaihin khatiang zawngin sawi tawh lo teh ka nu, Mambawihi chu ka tiam vek tawh a ni. Ani chu nupuia ka neih dawn thu ka tiam vek tawh a, chu ka thutiam chu sut ka tum reng reng lo"

"Khatiangin nupui nupui ti chhen suh, nang aiin i tana ṭha lo leh ṭha ka hre zawk asin"

"Kimtei hi ka tan a ṭhain i hria em ni? Ka tana a tlin lohzia leh a ṭhat lohzia chu kan hriat vek tawh khâ, nge i lo theihnghilh hman tawh zawk?"

"LALREMRUAT, Kimtei a awm ve reng hî, i ṭawngkam kha uluk rawh. A hrim hrimin he i hmeichhe sawi ve ziah Mambawihi hi nupui atan chuan i duh tak meuh em? I hmangaih em? An dinhmun avanga khawngaih leh lainat te hi i nih ka ring kei chuan"

"Ka nu, i sawi tum hi ka man lo emaw ti suh, Mambawihi min ṭhen tira Kimtei nupuia min neihtir phet i la tum hi ka hrethiam thei lo"

"Neih tir phet che ka tum pawh a ni lo, i nupui em ni tur chuan a tling lo va, a phu lo che ka ti mai a ni. Han sawi teh, Mambawihi chu i hmangaih reng em?" u Marema chhan dan tur mawlh chu ka ngaihthlak châk rualin ka ngaithla ngam chiah lo va, mahse ka awm hmun chu ka sawn chuang hauh si lo.

"Ka hre lo" u Marema chuan a rawn ti a, a thusawi chuan min va tina tehreng em.

"Kha maw, i hmangaih loh phei chuan i kawp rei dawn hauh lo tih ka hria a, chuvangin ani ang hmeichhia ni lo hi ngaihzawng dang nei leh thuai rawh"

"Ka nu, ka hmangaih lo ka tih miah loh khâ, thil hi la kawi vak zel ṭhin suh. Chuan dam lo ka nih hi, ka rilru tibuai reng suh, in pahnih khan min chhuahsan thuai teh u, keimaha awm ka duh rih a ni"

"Nimina kan thu hrilh che kha i awih lo tih chu ka hre tho a, mahse ngun takin ngaihtuah la, tlem chuan he i hmeichhe kawp mek hi chik ve deuh teh"

"Ka nu, ka hre tam tawk tawh vîau e! Khawngaihin min chhuahsan tawh zawk teh u, keimah chauha awm ka duh"

"Thil pakhat leh lawk, nangmah hmu tur chein a lo kal dawn a" tia u Marema nu'n a sawi lai chuan Kimtei chuan

"A lo kal daih tawh zawk, inah hian a awm reng tawh alawm, in hnuai lamah khuan a awm maithei" a lo ti vat a, kei chuan thawm chhuah emaw ka la tum lo hrim hrim.

"Maw? Mambawihi kan inah a lo kal maw!? Ka nu min zu kohsak teh, lo luhtir vat teh u" u Marema chuan a ti nghal a, kawngka lam pana thawm an rawn neih avang chuan room-a luh tum ang deuhin ka lo awm zaih.

"Va lut rawh" ka hmel min hmuh rualin u Marema nu chuan a lo ti deuh hmuk a, keipawh chu engmah hre lo ang maiin room lamah chuan ka lut zui ve mai bawk.

"Hei u Marem, i ṭha maw?" a hmel ka hmuh rual chuan ka ti a, ani chuan a lama kal turin min lo hui a, keipawh chuan ka pan ve nghal.

"Ka ngai lutuk che Mambawih, min lo ngai ve em? Engatinge nimin khan i haw daih? Min lo be tawh bawk si lo" tiin a âwmah chuan min kuah beh a tum a, mahse kei chuan

"Ni lo u Marem, ka tina ang che, ka delh lo law law zawk ang che" tiin ka lo dang ve tlat a, tihnat chu ka hlau tak tak.

"A ho lutuk, i bula ka awm hi chuan na ka nei ngai hleinem, ti teh ka kuah châk che a nia" tiin a âwm ngheng tur chuan min kuah leh a, ka lo dang duh ta bik lo.

"Le! Min han chhang teh le, engvangin maw nimin khan min lo biak miah loh? I haw daih chhan kha chu ka hria a, pawi pawh ka ti khawp mai" a rawn ti sup a, engatinge ka biak loh chhan chu a hriat châk viau? Amah paw'n min lo be bik tawp si lo.

"Nimin kha chu phone ka khawih peih lo hrim hrim, ka mu daih alawm. A nihna takah chuan ka rilru a na a, ka lo be ta lo che a nih kha!" zep ka tum deuh kha a nia, mahse ka hrilh leh ta nge nge.

"A pawi ka ti khawp mai Mambawih, keimah avanga ṭawngkam hriat nuam loh tak tak i hria kha pawi ka ti. Chuan i haw hnu khan ka nu leh Kimtei khan i chanchin min hrilh a, mahse ka awih duh ta chuang lo"

"Engtinnge min lo sawi a? U Marem, kei chu kan inngaihzawn rei theih hi ka ring tawh miah lo, ka hlauthawng a ni"

"Hei, khatiang zawngin ngaihtuahna nei duh suh, kei chuan ṭhen che hi ka tum ngai reng reng lo tih hria ang che"

"Ka ring che alawm, min ṭhen i tum lo tih hi ka hria a, i chhungte thusawi ai chuan nangmah hi ka ring ber che asin"

"Ka lawm e Mambawih, keimah chiah hi min ring zel turin ka duh che a ni" tiin ka chhip sam chu a fawp vang vang a, mahse kei erawh ka chhungril tak takin ka hlim thei tawh miah lo.

Kan awm dun chhung zawng chuan an nute nena an inbiakna ka hriat thu chu ka sawi chhuak lo va, kan boruak chhe tur chu ka phal lo a ni ber. A changin kan infawp a, a changin kan nui dun a, a changin kan inkuah leh vawng vawng zel. Amaherawhchu kei min hmangaih leh hmangaih loh a hriat loh thu a nu leh Kimtei te bula a sawi lo tak chuan ka rilru a tina lo thei lo va, kei chuan amah chu ka hmangaih viau thung tawh zawk si.

Chhun thingpui te chu keimah ngeiin a room-ah chuan ka pe a, a nihna takah chuan ka chet dan vel chu zak tho mah ila ka zak lo lui det hmiah hmiah. U Marema nu leh Kimtei chuan min be leh tawh lo hrim hrim a, an pahnih chuan an ṭhu hrang deuh kher bawk. Mahse u Marema pa zawk chuan min leh thut thut ṭhin a, ani hi chu pa fel tak a nih ka ring.

Kar khat a ral leh chuan u Marema pawh a ṭha chho viau tawh a, a hna lamah erawh a la zawm lo thung. Zanah te chuan lo len a châk thei em em a, mahse keimah zawkin a taksa ka ngaihtuah avangin ka phal lo ta ṭhin a ni. Amah pawh chuan motor khalh leh kal vel chu a pum an zaina avangin a ṭha rilh lo tih a hre vek a, mahse min hmuh châk em avangin lo kal luih a tum mai zawk a ni.

Khatia min hmangaih leh hmangaih loh a hriat loh thu a sawi lai kha chuan ka rilru a na em em a, inṭhen chu kan hmabakah ka ngai hmiah. Amaherawhchu ka ngaihtuah ngial pawhin ṭhen ka la duh lo fo va, ama'n inṭhenna thu a sawi a nih loh chuan ṭhen aiin ṭhen loh chu ka la thlang ta hram a ni. Ka rilru a nat rual rualin hlim chang ka nei a, Lawmtei min hrilh angin u Marema chuan min hmangaih ve ngei ka ring ru ta ringawt bawk.

A ṭawngkama min ngaihtuahzia leh min thlakhlelhzia a lantirna te chuan amahah rinna min neih tir a, hmangaihna thu min la hrilh lo mahse kei ang tho va min hmangaih ve chu ka ring a, keipawh chuan a sawi hma chu amah ka hmangaih thu sawi chhuah ka tum ta bik lo a ni. U Marema nena kan inngaizawng chu thil sual a niin ka hre lo va, kan pahnih tan chuan a ṭha kher ang em tih ka hre lo thung.

Tin, ka nu chuan phone kaltlangin u Marema chu a be ve ṭhin a, ka nu nen chuan an inbe tui thei khawp. A chang phei chuan ka nu chu ka lo thik ṭhin a, mahse u Marema chuan a lo hre leh vek zel. Ka nu awm laia kan inbiak hi chuan loud speaker-ah ka dah tlangpui a, ani paw'n ka nu chu a be tel ngei ngei zel.

Nilaini a ni a, u Marema te in aṭangin haw deuh chauh mah ila ei rawng chu ka bawl zung zung a, zan lama rawn len a tum thu pawh min hrilh nghe nghe. Chutia ei rawng ka bawl lai chuan u Marema hnen aṭangin phone call ka dawng a, ka nui ta sak.

"Hello"

"Aw Mambawih, ihhhh....eng lo a nia, ka nute'n han phone ve hrim hrim teh an tia, kan ina i awm lai khan pawisa i lo hmu mial em? Ka tih awmzia chu tun mai khan ka pa pawisa a bo a, an Construction fund lampang a nih hmel" a thu rawn sawi chu ka hriat loh zawng tak a ni.

"Ka hmuh awm ka va hre lo ve, ka hmu miah lo u Marem" ka lo ti ve mai a, pawisa awm reng an ina ka awm lai khan ka hmu lo.

"Aw a nih chû, lo hlauhthawng chuang suh aw Mambawih, kan ringhlel che tihna pawh a ni lo a nia"

"Aw, ka hrethiam alawm" ka lo ti ve mai a, rei pawh inbe lovin kan inbiakna chu kan titawp zui ta bawk.

Ei rawngte ka bawl zawh chuan ka bag vel chu dah fel tumin kan pindan lam chu ka pan a, mahse ka bag ka khai tur chuan thil hmuh ka nei ta tlat. Ka bag chhung chu ka en chiang a, khawi aṭanga lo awm nge tih pawh ka hriat lohvin ka bag chhungah chuan pawisa tam tham zet hi a lo awm a, hlauhthawnna hlirin ka khat ta.

Chu pawisa chu ka ta a ni lo va, tu ta nge a nih lah ka hre hek lo. Rang takin ka phone chu ka phawrh a, u Marema chu ka call zui vat a, a la la thei miah lo zui. Ka tinawn leh a, rilru hlauhthawnna nen phone chu ka bengah ka nem bet ran bawk.

Chapter 20

"Aw Mambawih" ka call a lak rualin u Marema chuan a rawn ti a, thawm a awm deuh mur mur bawk.

"U Marem, ka bag-ah hian pawisa a lo awm ṭeuh ringawt a, ka hrethiam miah lo a nia, i pawisa sawi kha a nih duh hmel ka ti" ka tih chuan

"Enga!? Pawisa chu i bag-ah a awm maw!?" a rawn ti nghal a, ka chhang leh dawn chiah tihah a bul hnaia mi chuan

"Kha maw, ka sawi kha, he i ngaihzawngnu hian pawisa chiah a duh ka tîh ka tih khâ" a lo ti ri chu ka hre pha a, a aw aṭang chuan a nu a ni tih ka hre bawk.

"Ka nu, thil engmah hi a la chiang lo, chutiangin Mambawihi hian thil a ru hauh lo vang. Mambawih, ka lo kal ang, ka lo hruai lawk ang che aw" tiin u Marema chuan min rawn biak zawm a, mahse taksa na nei chunga min lo hruai ai chuan

"A ngai lo, keimah zawk ka lo kal ang, tunah ka lo kal nghal ang" ka lo ti vat thung.

"Hei Mambawih, hlauthawng miah suh aw, chuan nangmah kha thil dik lo tiah inngai lo ang che" u Marema chuan a rawn ti leh hram a, mahse kei chuan chhang let tawh lovin kan inbiakna chu ka titawp hmak.

Bus-a ka chuan lai te chuan ka rilru chu a inpawlh nuai a, zawhna leh hlauhthawnna te chuan ka rilru leh ngaihtuahna an luah khat chiang hle. An in awmna ka hre chiang tawh bawk nen u Marema te in kawt chu ka thleng phei rang hle a, khawmuan pawh khawmuang duh lovin an door bell chu ka hmet zui nghal bawk.

"Aw hei, kan rukrui pawh a lo thleng ta alawm" in chhung ka luh rualin u Marema nu chuan a lo ti hmarh hmarh a, rukru tia min sawi kher chuan ka rilru a tina.

"Ka nu, khawngaihin lo ṭawng tawh rih lo teh, thil i tibuaithlak vek zel. Mambawih lo kal rawh, heti lamah i ṭhu teh ang" tiin u Marema chuan min lo buaipui vat a, keipawh chu a mi hruai nâ naah chuan ka kal ve tawp.

"Mambawih, pawisa chu i bag-ah a lo awm ngei a mâw? Khaw maw pawisa chu han phawrh teh, kan pawisa bo nen chuan inmil reng em i lo en teh ang" sitting room-a kan ṭhut hnu chuan u Marema pa chuan a rawn ti a, keipawh chuan ka bag chhunga pawisa lo awm ringawt chu ka phawrh chhuak ve mai bawk.

"A lan dan hi chuan i bag-a i pawisa awm leh kan pawisa bo hi a inzat chiah chiah a, a inang chiah chiah a, mahse engtinge i bag-ah a lo awm daih theih?" tiin u Marema pa bawk chuan min lo zawt a, kei chuan a chhan ka hre teuh si lo.

"Ka hre lo ka pu, ka hre lo tak zet. Engtinge ka bag chhungah khan khatiang zat pawisa kha a lo awm ringawt ka hre lo va, keipawh hian mak ka ti lutuk" ka tih zawh rual chiahin u Marema nu chuan

"Engatinge thu dik chu i sawi mai loh? Pawisa ka mamawh sia ka ru a, in fapa hi pawisa vang chauhin ka ngaizawng tih te kha sawi tlang law law la, tichuan keini chuan kan ngaithiam daih zawk ang che" a lo ti hmawk hmawk a, ka awm dan chu a hrehawm thlâwt.

"Ka pi, ka pu, u Marem, kan rethei tih chu ka hria alawm, mahse rukruk hmang ka ni lo. In pawisa hi ka ru lo va, thil ruk hrim hrim hi ka duh lo" ka ti chhuak thuai a, ka ṭah chu a chhuak tak zet tawh.

"Mambawih, hetiang thil hi i ti dawn lo tih ka hria a, he thil hi i tih a ni lo tih ka hre bawk. Chuan ka nu, khatiangin Mambawihi hi mawhpuh ringawt suh, nang hian ruahmanna i lo siam zawk te hi a ni lo maw?" u Marema chuan a ti ta hmiah mai.

"Enga!? LALREMRUAT, kha nu khan thil a ru tih hre reng chungin i nu hi min la mawhpuh thei maw!?" u Marema nu chuan a rawn ti vin leh ta ṭhak mai.

"Duh tawk teh u, a pawisa bera kan hmuh let tawh a, ruk a ni emaw ni lo emaw buaina i neih chhunzawm lo teh ang u" u Marema pa chuan a rawn ti a, engkim chu ka tih angin a lang ta vek mai.

"Lo kal rawh Mambawih, ka room lamah i chho rih teh ang" tiin u Marema chuan min kai tho a, a pum lam an zaina avangin a la ding mar ṭha lutuk thei lo tih a hriat hle.

U Marema room lam pana kan chhoh lai te chuan thil thleng vel chu ka ngaihtuah let a, a rang thut thut lutuk chuan min la tihrilhhai ru reng. U Marema chu a la nat ve deuh avangin kan kal chak lutuk lo va, a nu leh pate'n kan che vel chu min lo en reng tih hre mah ila ka hawi let duh lo. Ka hawi let duh loh mai bakah an hmel chu ka hmu ngam lo va, a nu ngat phei chu ka hmu duh lo lehzual.

"Mambawih thil ni lo lô kha ngaihtuah suh aw, kei chuan pawisa kha i ruk a nih ka ring lo va, thil ru duh tur khawpa mize ṭha lo i ni lo tih ka hre chiang hle bawk" a room-a kan luh hnu chuan a rawn ti thuai a, min ngaihtuah hmel tak zet.

"U Marem, pawisa kha ka ru lo tak tak, engtinnge khatiang khan ka bag-ah a lo awm ka hre lo. Nang tal chuan min ring ti raw? Min ring hram rawh" ka ṭap thei mai dawnin ka hria.

"Hei hei hei, ka ring che alawm. Ka ring lutuk che, chuan i ṭah chhuak hmel kha min hmuh tawh suh, i inhmeh lo" a kut pahniha ka biang khuap chung chuan a rawn ti a, a âwmah chuan min kuah bet zui ta bawk.

"U Marem keini pahnih hi chu inngaizawng lui lo zawk mai teh ang, kan inṭhen hi a ngai a ni" kan ngawih vang vang hnu chuan ka ti sep a, a âwma erawh ka la bei ran mai.

"Eng thu nge maw i sawi le Mambawih? Thil thleng vel vang hian i rilru a na tih chu ka hria alawm, mahse inṭhen lam hi chu sawi tawh lo teh ang"

"Ni lo u Marem, tunah pawh heti hi kan ni a, nakinah phei chuan kan la buai dawn chauh zawk a ni. Kan dinhmun inan loh chu thuhran, i nu leh pate hian min duh hlawl bawk si lo va, inṭhen zawk mai ang"

"A buaithlak ka ti, hetianga keimah avanga buaina i tawk hi hrehawm ka ti a, han tih reh mai dan lah chu ka hre mai bik rih si lo"

"A reh dan ṭha ber chu maw keini pahnih inṭhen hi a ni mai, kan inhmuh lohva kan inngaihzawn tawh loh na nâ na chuan buaina leh harsatna pawh kan tawk tawh lo ang"

"Inṭhen chu i la duh ṭâlh em ni? Kei chuan ṭhen che hi ka duh ngai lo va, mahse tun lai chu kan pahnih inkar hi ka ngaihtuah nasa thei khawp mai"

"Aw, inṭhen mai ang u Marem" aw lawi tak chuan ka lo ti a, a hmuh laia ṭah loh hram hram dan chu ka zawng char char.

"Ka nu ka aṭangin ka pawisa vang chauha min ngaihzawn thu ka hre ni tin ṭhin a, chu ringawt pawh chu ka rilru tibuaitu pakhat a ni. Amaherawhchu nang chuan pawisa avangin min ngaizawng lo tih ka hre chiang a, kei lah chu ka lo damsam lo kher bawk nen ka lo hmu khât ṭhin che te pawh hi ka inthiam lo hle a ni" thawk chu a la hawk a, ka hnung chu a chûl a chul bawk. Chutah amah vek chuan

"Aw le, nangmah ka ngaihtuah em che avangin chawl lawk ang aw Mambawih, mahse ka nupui tur chu nangmah chiah i ni tho tho tih hre reng ang che. Engkim hi ka thiam loh tih ka hria, ka taksa dam ṭhat loh vanga ka lo leng tam thei lo te hi ka inhaw lutuk" a rawn ti leh nghal a, a thaw leh huai ṭhin.

"U Marem, tuna kan inṭhen loh chuan nakinah kan rilru a la na mai mai zawk dawn a ni. Chawl lawk ni lovin kan inṭhen hlen hi a fuh ber a, chuan nang paw'n i dinhmun mil tak i kawp tawh dawn nia" tiin min kuah behna aṭang chuan ka tal chhuak a, amah pawh en tawh lo chuan room chu ka chhuahsan zui hmak.

In hnuai lama ka chhuk thlak chuan u Marema nu leh pate chuan min lo en reng a, mahse ngawi rengin ka kal chhuak lui ta tho. Kawngpui ka thlen chuan u Marema te in chu ka hawi let leh hram a, u Marema chuan a room aṭang min lo en reng. Ka hriat tawk lekin

"Ka hmangaih che u Marem" ka ti sep a, a taksa a la dam ṭha vak lo bawk nen ding mar ṭha hlei thei lo chuan min lo thlir a, ka khawngaih hle a ni.

Kan ina ka lut chiah chu ka ṭap ta nge nge a, ka insumna a rei tawh bawk a, ka khumah bawkin ka ṭap khur char char. Ka na a ni. Ka rilru chhungril hi a na a, inṭhen loh duh mah ila kan inṭhen a ṭul tlat si. Tunah lo inṭhen lo pawh ni ila nakinah keimahni tana natna tur kan siam mai mai dawn zawk a ni. In ka thlen chuan ka nu chu a lo la haw lo va, ka ei rawng bawl lai kalsan meuhin u Marema te in lam ka pan kha a nia, gas bul vel te pawh chu a lo la hnawk ṭha khawp mai.

Ka nu a lo haw chuan ni dang ang bawkin chhun lam chanchin chu min zawt a, chhan harsa ka va ti tak em. Thil engkim, thil thlen dan zawng zawng chu zep nei miah lovin ka hrilh a, ka ṭap chhuak leh hawk bawk. Ka nu chuan chutianga kan boruak a awm ta mai chu pawi a ti ve em em a, min hnem dan erawh a thiam vak bik lo. Chaw kan ei lai te chuan ṭawng pawh ka ṭawng peih lo va, ka chaw ei chu a tui leh tui loh pawh ka hre lo.

Chutiang em em chuan u Marema chuan ka taksa leh rilruah nghawng a lo nei hman ang tih ngaihna reng ka hre lo va, a chhan ber nia ka hriat chu amah ka lo hmangaih lutuk tawh vang a ni. Ka hmangaih a, mahse ani chuan min hmangaih ve si lo. Lawmtei khan a hmangaih ve che a nih chû ti khan min hrilh a, awih lutuk lo mah ila ka rilru erawh a hlim ru hman em em tho a, mahse khang ka hlimna te kha tunah chuan a thamral leh ta vek si a nih hi!

Zing tin chu ka hna ngai thawkin ka tho hma ṭhin a, u Marema chuan min rawn be leh tawh lo hrim hrim. Min lo biak chu ka ring lo ka tih chuan dawt a ni ngei ang, min lo biak chu ka la ring ru fan a, kan inṭhen ta mai chu hrehawm ka ti ru em em bawk.

Nge nia u Marema chuan min lo duh ve tak tak miah lo zawk? Kei chuan ka thinlung leh tih tak zetin ka hmangaih tawh a, min hmangaih ve lo tih hre tho mah ila min duh ve hle a ni tih ka hriatna chuan min tihlim tho a, mahse chu pawh chu tunah chuan ka ringhlel zo leh ta vek.

"Mambawih, tun lai chu i hmel a va nguaiin i va ngawichawi ve, dam lohna i nei em ni?" Lawmtei chuan a rawn ti a, kawngpui chu kan phiat fai pah reng bawk.

"Dam lo lo ve, chutianga ka nguai pawh ka lo hre hleinem" ka lo ti pangai ve mai.

"A hma kha i ang miah lo alawm, a hma te kha chuan i hlim hmel te kha ka hmuh ngun a, tunah chuan hmuh tur mumal pawh a awm tawh lo hrim hrim" Lawmtei chuan ka awm dan chu a lo hre chiang hle a nih dawn hi!

"Eng lo a nia, ka ṭhian i ni a, ka hrilh tawp ang che. U Marema nen kan inṭhen a,chuan ka rin ai daihin ka lo la na a" Lawmtei chu ka tan chuan ṭhian ṭha tak a ni ve tawh bawk nen hrilh pawh chu pawi ka ti hran em em lo.

"Âwwww, a va pawi ve, in inṭhen chhan te min hrilh chi a ni em? I hmangaih tawh miau avangin nang chuan in inṭhen chu i la na a nih chu! Lungngai lutuk suh Mambawih, nakinah mipa ṭha tak i tawng leh mai ang"

"Kan inṭhen chhan chu a nu leh pate'n min duh hlawl lo va, kan chhungkaw dinhmun a inthlau lutuk bawk nen a nu leh pate ngaihdan pawh awm ka ti lo hran lo. Kei chu maw mipa dang tih vel lam ka buaipui duh tawh lo, ka nu hi enkawla awmpui char char ka duh tawh zawk"

"Chutiang ringawtin an ngaihtuahna an pu ngai lo. Hmeichhia i ni a, pasal emaw ngaihzawng emaw te chu i nei thiang alawm. I nu leh pate kha inneih lo se chuan i piang bik tawp nâng, chuvangin tuna i bialpa nen in lo inṭhen pawh a ni thei, mahse mipa dang i la hmangaihin pasalah i la nei thei tih hre ta che"

"Ka hre lo le Lawmte, u Marema ka lo hmangaih hman kher hi ka inchhir hnuhnawh ber. Lo duh satliah ringawt chu ni ila ngaihzawng dang han neih leh te ka thei mai ang, mahse ka lo hmangaih ve hman tlat sia alawm"

"Tuna mipa dang ngaizawng thei tawh lo tur khawpa amah hmangaih anga i inngaih tlatna kha nakinah chuan a bo ve tial tial thei a, i lo hmangaih tak tak lo ve thei tho asin. Chu bakah engatinge a nu leh pate reng reng pawh chu chhungkaw dinhmun lam an ngaih pawimawh vak, a tun lai tawh lo em mai. Chuan i bialpa pawh chu a â ka ti dawn nge a mawl zawk, nge nia a lo hmangaih ve miah lo zawk che?"

"Ni e, i sawi dik Lawmte. U Marema chuan min hmangaih ve reng reng hleinem, ka hriat lai ngeiin min hmangaih leh hmangaih loh a hriat loh thu a sawi asin"

"A va nep ve, chutiang mipa chu i lo hmangaih ve em em chu a ni si a! Mambawih, i ṭhen hi inchhir lo la, lawm hle zawk rawh"

"Kei chuan u Marema chu ka dem ngawt thei bik lo, ani tan pawh a harsa ve dawn lutuk tih ka hria. Amah hringtunu berin ka chanchin dik lo tak taka a hrilh reng na nâ na chuan min ringhlel lo thei lo ang a, chu chuan kan inkar a tichhe vat dawn tih pawh ka hria, chuvang a nia keimah zawkin inṭhen ka rawt tak ni!"

"Ka hrilh leh ang che Mambawih, chutiang mipa rilru nghet lo leh ngaihtuahna pawh hmang thiam lo mipa i ṭhen chu inchhir reng reng suh" a rawn ti leh hluai a, Lawmtei chuan rilru tina lo turin min hrilh eng ang mahse a ruk tak chuan ka rilru a na em em tho.

Tunah chuan u Marema nena kan inṭhenna aṭangin thla khat lai a liam leh tawh a, min lo biak ngai loh ang bawkin keipawhin ka be tawh ngai lo. Zep lovah chuan chutia ka inbe ta miah lo leh kan inhmu ngai ta miah lo chu a khawhar thlak ka ti a, u Marema chu ka ngai a ni. A rim ka ngai a, a ṭawng ri ka ngai a, min fawh ṭhinna te ka ngai ngawih ngawih.

Zing khat chu Lawmtei chuan chhun lama inhlawhna tur a awm thu min lo hrilh a, darkar 3 chhhung vel leka cheng 1000 hlawhna a la ni zui. A hna thawh tur lam ka zawh chuan hmun phiah fai tho a ni a, mahse kan thawhna hmun tur chuan thawh min tihreh leh deuh. Kan hnathawhna hmun tur chu Civil Hospital a ni a, u Marema mawlh chu ka hmu ang tih ka hlau ta a ni.

Mask ka vuah tlat avangin u Marema emaw keimah min hre ṭhin chuan min hriat theih mai a rinawm loh a, kei ang bawkin ka thawhpuite chuan an vuah fur bawk. Hospital building chu keimahni chauhin kan tifai dawn emaw ka ti a, mahse keimahni chauh ni lovin mi dang pawh an chhawr nual mai.

Keini ho chuan floor 2 kan chang a, mahse bathroom zawng zawng nen tihfai a ngaih avangin a hna chu awlsam leh hautak lo a ni miah lo. Kut kawr kan bun vek a, in entir tum ho te pawh chuan kawng min lo kain sup sup zel. Bathroom kan tihfai lai chuan maimitchhing chunga tihfai chang te ka nei a, a rimchhiain a ṭawp ve thei êm bawk a ni.

"Mambawih" ka thawhpuite nena thil kan ei laiin mipa aw hian a rawn ti a, mi kotu aw chu ka hai lo chiang hle. Min hmuh hlau em emin ka awm ve a, min hmu ta tho chu a nih hi!

"Mambawih, enge hetah i tih?" min ngaihtuah hmel tak hian a rawn ti leh a, mask ka vuah loh lai a ni kher bawk nen han inthup vel chuan awmzia a nei vak tawh lo.

"I hmelhriat em ni Doctor Marem?" a bula Doctor thuama inthuam ve tho hmeichhe pakhat lo ding chuan a lo ti a, chhun thil ei hun a ni tawh avangin thil ei tur an nih ka ring.

"Mambawih, inbe lawk teh ang" tiin a bula mi zawhna pawh chhang lo chuan ka banah a rawn vuan a, ka lo tal pit vat thung.

"Tete, min lo va kalsan mai rawh, chuan ka rawn phei hman kher ang em ka hre lo. Mambawih, lo kal rawh le" tiin ka ban bawk chu lo vawn leh a tum a, mahse ka awm sawn zel thung.

A sawi angin a bula hmeichhe lo ding chu a kal ta vang vang a, ka hna thawhpuite pawh chuan min en duh hle. Kei lah chuan thil ka ei mial mial a, u Marema hmel chu ka en duh lo lui tlat bawk. A hmel ka hmu a nih chuan ka rilru a rawn no ang a, insum hman lovin ka ṭap chhuak mai ang tih ka hlau a ni. Lawmtei ber chuan thil hrethiam takin ka mitmei chu a rawn en zeuh zeuh a, kei chuan ka thil ei lai chu ka la chawl duh ṭhak chuang lo.

"Min lo hrethiam lawk mai teh u aw ka pi" tiin u Marema chuan ka banah a rawn vuan a, ka thil ei zo ka insiam vel mek a ni bawk a, min pawhna chu ka lo dang hman lo chiang hle.

"Min thlah rawh" mi vei vak awm te hriat hlau tak chuan ka ti a, chutia min pawt tho ringawt chuan ka thin a tirim a ni.

"Ni lo, kan inbiak ngei hi a ngai" tiin min pawt dawr dâwr a, step-ah chuan min chhohpui hmawk hmawk bawk.

Chutia in chung lam pana min kal chhohpui lai chuan mite chuan min lo en haw haw hlawm a, ka zak tak zet. Ka inthuamna leh a inthuamna chu inthianghlim hleih tak a ni a, chu ai zawng chuan kan awm dan chuan min tizak ber. A chung zawl kan thlen chuan min thlah ta hram a, kei chuan a hmel chu ka la en duh ta chuang lo.

"Mambawih, min en teh" tiin ka darah chuan a rawn chelh a, accident avanga a hliam pawh a dam tawh a ni ang a ding ngil thei tawh em mai.

"Engatinge khatiang hna kha i thawh? Engatinge kan Hospital-ah kher i lo thawh?" a rawn ti a, intihuaisen luiin a mit chu ka en ve ta kar.

"Kan inkarah engmah a awm tawh hleinem u Marem, min lo zahpui ru viau mahla ka pawisa hmuhna a ni tlat a, i lo sawi theih a awm lo" tiin ka dar a chelhna chu ka dah thla a, hmun dang chu ka hawi sawn zui daih.

"Ka zahpui reng reng lo che Mambawih, ni lo, dik taka sawi chuan khatiang hna i thawk tih ka hmuh khan keimah zawk hi ka lo zak a ni. A chhan chu nang hi nakin lawka ka nupui ni mai tur i ni a, khatiang hna hniam lutuk i thawk kher kha ka duh lo a ni"

"Kan inṭhen tawh khâ u Marem, kan inṭhenna pawh thla khat lai a ni leh tawh. Chuti chung chuan i nupui ni tur ang te min la sawi a, kei hi i nupui ka ni ngai dawn lo tih hre ta che. Chuan maw ka hnathawh lamah lo buai tawh lo la, nang ni angin pawisa ka nei ve mai mai thei lo tih lo hria ang che"

"Khatiang khan thu la kawi ṭhin suh, khang thla kalta chhunga ka lo biak ngai lohna chhan che chu ka rilru a buai em vang a ni. I tan harsatna chi hrang hrang ka siam a, i inkiltawih theihna'n ka nu'n a ṭawngkhum ṭhin che a, chu pawh keimah avangin"

"Ni e, i sawi dik alawm. Ka inkiltawih theihna'n i nu khan i hriat loh hlante khan min ṭawngkhum ṭhin asin. Tunah chuan kan inṭhen tawh a, kan inngaizawng tawh lo va, i nu leh pa thu chu lo awih zel a, Kimtei kha i nupui leh kawppui atan chuan a tling ber"

"Ka thusawi zawh hmain khatiangin thil ni lo lô sawi ṭhin suh Mambawih, Kimtei chu ka nupui hual lai ni tawh mahse ka ṭhen tawh avangin kawp leh tumna ka nei lo"

"Chuan keipawh kan inṭhen tawh avangin min lo ngaihsak tawh lo la, vawiina ka thawhpuite hmaa i awm dan te kha a mawi lo khawp mai"

"I hmel ka hmuh khan thil mawi leh mawi lo lam ka ngaihtuah hman tawh lo a ni. Chuan hre rawh, nang nen hian kan la inṭhen reng reng lo"

"Engatinge kan inṭhen lo anga i la sawi tlat? Thla khat, thla khat chuang lai kan inṭhen tawh zawk a nih hî.

Chawhnu lamah floor pakhat tihfai ngai kan la ngaih avangin ka chhuksan phawt mai ang che" tia kal sawn ka tum chu ka darah a rawn chelh nghal a, kal sawn thei chi zia zâng ka ni leh ta lo.

"Min ngaithla teh Mambawih, min ngaithla rawh" a rawn ti hrâwk a, min thing deuh vak vak pah bawk.

"Nang nen hian kan la inṭhen reng reng lo va, kan inṭhen ngai bawk lo ang. Ka nu avanga ṭawngkam ngaihthlak nuam lo lutuk i hre ṭhin kha khawngaih che a, nangmah ka ngaihtuah vang chein chawl lawk kha ka titlu ta a ni" a rawn ti leh hrâwk chuan ka mittui chu ka biangah a rawn luang thla nghal a, mahse thawm erawh ka chhuah chuang lo.

"Ka tihpalh Mambawih, ka thusawi hi awih mai ṭhin la chuan khatiang khan ka vin miah lo ang che. Chawhnu lamah pawh i thawh ka phal tawh lo, thawk tawh suh" a rawn tih chuan

"A teuh lo mai, kan inbe fel vek tawh. Chuan i sawi avang ngawtin ka thawk lo ringawt thei lo va, inzawmna pawh kan neih tawh loh avangin ka chungah thuneih tum suh ang che" ka lo ti vin hlar a, ka bianga mittui luang chu ka hru tâwk bawk.

"Mambawih, engmah hi a la danglam lo tih hre rawh. Tunah chuan ka dam fel tawh bawk a, a hma aiin ka ngaihsak lehzual tawh ang che" engtinnge chutiang thute chu a la sawi theih zawk?

"I mawl em ni u Marem? Kan inṭhen tawh, nang pawhin min lo biak ngai tawh miah loh khâ, engatinge tuna taka inzawmna min siampui leh i tum? I duh hun huna inzawmna neihpui thei che hmeichhiaah min ngai em ni?"

"Ni lo, kan la inṭhen reng reng lo ka tih khâ, nang pawh hian enge i hriat? Ka thusawi hi awih ve mai ṭhin rawh. Inṭhen rawttu pawh nangmah i ni a, mahse kei chuan nangmah ka ngaihtuah vang zawk chein inṭhen ni lova chawlh lawk a nih kha ka sawi"

"I hre vek, inṭhen ka rawt chhan pawh i hre vek, chuvang chuan khang thil te kha sawi tawh lo vang. Ka chhuk dawn, min tibuai tawh suh u Marem, khawngaihin"

"Khawngaih kha min dil tei vet suh, khawngaih min dilna chhan tur a awm lo. Aw le, vawiin atan chuan ka duh tawk phawt ang, mahse zanah ka lo kal ang a, engkim thlak danglam leh theih tawh loh turin kan sawi fel ang" tiin ka dara a chelhna chu a thlah a, keipawh chuan chhang buai duh tawh lovin in hnuai lam chu ka pan ta vat.

Chapter 21

Kan tihfai leh tur floor ka thlen chuan minute 10 vel laiin ka tlai tawh tih ka hria a, ka thawhpuite lakah chuan ka inthlahrung ngei mai. Ka thawhpuite chuan engmah min zawt lo va, keipawh chuan ka sawi hran chuang lo. Mi â ni leng ni lo tan chuan u Marema nena kan boruak awm ang tur chu a hriatthiam vek theih a, an fel em avangin engmah min zawt zui duh lo mai mai zawk a ni.

A hrim hrimin u Marema chuan engatinge min ṭhen duh si lo chu vawi khat pawh min lo biak duh loh? Engtinge ui chûng chung leh hmangaih chûng chungin ka ṭhen tih te chu a hriatthiam duh loh? Engatinge a nu ṭawngkam ka tawrh zawh tawh loh vanga ṭhen ka ni tih te chu a hmuh kân tlat? Ka ngaihtuahnaah chuan zawhna chi tinreng a awm a, ka hnathawh lai pawh chu ngaihtuah lovin ka thawk mawlh mawlh.

A hma zawnga ten chhe em em leh maimitchhing chunga ek in leh zun in vel tifai kha chawhnu lamah chuan ka meng kur a, a chhan pawh ka thil tihfai lai aia u Marema thusawite leh kan inbiakna te'n ka rilru a luah hneh em zawk tawh vang a ni. Ka en reng a, thil tenawm tak tak te chu ka tifai mial mial a, mahse ka rilru erawh hmun dangah daih a awm thung.

Lawmtei chuan min biak a châk hmel thei em em a, mahse ani ang mi fing leh fel ta re re chuan min be duh chuang miah lo. A zawhna neih tur awm ang te chu ka hre lawk ti tih deuh a, ka rin sual loh chuan u Marema chu ka mi hmangaih em em kha a nih leh ni loh min zawt ngei ang.

Ni e, ani tan chuan a mak ve ang. U Marema te chu chhungkaw hausa an nih mai bakah Doctor fel tak a ni a, Civil Hospital-ah ngat phei hi chuan lar ve vet vet tak a ni. Ni lo, Lawmte mai ni lovin ka thawhpui dang te pawhin mak ti deuhin min lo en a nih kha! Anni chu sawi loh Lawmtei tak ngial pawh u Marema hnathawh chungchang ka la hrilh lo va, chhungkaw hausa an nih thu chiah ka la sawi.

"Mambawih, enteh nichina mi pa khan sâw lai aṭang sawn min lo thlir char char a nia, a awmna a rei tawh lutuk" zun in leh ek in ka tifai zawh ruala ka din mar laiin Lawmtei chuan a rawn ti a, min be châk tawh khan ka hre reng a ni.

"Tu chu maw i sawi? Khawi maw" tiin a sawina lam chu ka hawi phei ve a, ka mi hmuh avang chuan ka hawi sawn rang kher mai.

"Enteh Mambawih, saw pa sawi i bialpa, i sawi ve ziah kha em ni?" a rawn ti leh a, u Marema te ang mi changkang ka bialpa a ni chu mak a la ti ve hle a nih dawn hi!

"Aw ni e, mahse nang paw'n kan inṭhen fel tawh tih i hriat vek khâ, khami chanchin kha chu sawi tawh lo teh ang Lawmte"

"Chutiang ringawtin ka sawi tawp thei mai lo e a! Engatinge Doctor a nih thute hi min hrilh ve miah loh? Engtinnge saw tiang mipa chhe lo leh ngo leh changkang saw i ṭhen phal zawk?"

"Lawmte, i mak em mai, ka sawi chhunzawm peih vak lo a nia. Chuan ka hrilh ve mai mai ang che, pawn lam lan dan aiin chhungril nun hi thlir ṭhin zawk tur"

"Awi, i sawi awmzia chu saw Doctor pa saw a sual viau em ni? In inṭhen thu min hrilh lai kha chuan ka ngei em em a, mahse a hmel ka hmuh hnuah erawh ka ngei vak tawh lo" he nu hian enge a hriat tâk?

"A sual ka ti reng reng lo, ka ṭhian i nih chuan ka lamah ṭang ang che, u Marema lamah ni lo sawn"

"Awi Mambawih, i lamah ka ṭang lo pawh a ni lo, engtinnge i inṭhen theih zawk ka ti leh hnuhnawh a nih ber hi!"

"I hriat vek khâ, a nuin pawisa ru ah te min puh a, pawisa ka duh vang chauha ngaizawng ang tein u Marema chu a lo hrilh ṭhin asin. Nang ni la i ṭhen lo thei dawn em ni?" ka ṭawng chhuak chu a nem em em hran lo va, ka insum hman tawh lo a ni.

"Khatiangin thinrim vak kher suh, i bialpa ṭhen saw a chhe lo ka lo ti ve mai alawm"

"A nih chuan va nei daih rawh, ka pe ang che, kan inṭhen tawh tho a, chhe lo i tih thute kha va hrilh nghal rawh" ka ti hlawk hlawk a, thinrim ru tak ka ni.

"Ka duh teuh lo mai, kei hian i bialpa hlui saw ka bialpa ni tur chuan ka duh kher lo. Ani ni lo saw mipa Mizoramah hian an tam ve chiang em mai, chu lovah ani te saw chu a zia a ṭha vak lo vang, chhe lo ka tih rei pawh ka ring lo" a rawn ti leh zuah zuah a, u Marema chu a en ran bawk.

"Leh lawi si che chuan, engatinge a tir aṭang khan ka lam i ṭan ve vat mai loh, a tawpah i ṭang leh tho si"

"Nangma'n ka lam ṭang ang che i ti tlat a nih khâ, inhnial lovin kan hna hi thawk zo vat zawk teh ang, mipa vang mai maia inhnial buai hman kan ni lo" a rawn tih chuan ka lo chhang let duh tawh bik ta lo va, a sawi ang chuan kan hmabak chu ka tifai ve leh nghal.

Marema POV

Mambawihi leh a ṭhiannu che vel chu ka en reng a, ka awmna chu hla deuh mahse an thil tih fai mek rim chhiatzia chu ka hre pha vek tho. Ka coffee in lai tak ngial pawh an thil tih fai rim avang chuan ka in tui hlei thei lo va, in zo lovin ka paih ta ringawt. Ka Mambawihi, nakin lawka ka nupui ni mai turin chutiang hna a thawk chu ka zak a, amah ka zahpui lam vang em em pawh ni lovin ka zak tawp a ni mai.

Engatinge saw tiang hna saw a thawh kher? Hna dang thawh tur a tam lo'm ni? Nge nia a ni hian saw tiang hna ni lo hnathawhna tur a hmu lo zawk? Lo hmu lo ta pawh ni se ka pui thei reng a, engatinge kei tal chu min hrilh ve mai loh? Ni lo, kei hian thil ka hre sual a ni. Mambawihi hian ka puihna avanga hna neih a duh dawn lo tih ka hria, mahse enge maw tal chu kei hian ka tih a ngai.

Pangai taka ka nu leh pate hmaah Mambawihi chu inhmelhriattir ka tum ve kha a ni a, mahse hma hun erawh kan sawi lo lawk thei der si lo chu a nih ber hi! Ka nu pawh khan Mambawihi chu kan ina lenpui turin min ti ve a, kha thu min hrilh ni a mak ka tihzia leh ka lawmzia kha! Lawm lo thei pawh ka ni lo, ka nu chu Mambawih tan ka huphurhpui ber a ni a, ka pa hi chuan a pawm theih mai ka ring.

Ka nu hi chuan a rilru dik tak chuan kan chhungkaw dinhmun mil deuh ngaizawng turin leh nupuia nei turin min duh tih ka hria , kei chauh ni lo ka pa pawh hian a hriat ka ring. Kei erawh chuan chhungkaw dinhmun tih vel lam ai chuan mihring rilru put hmang zawk hi a pawimawh ka ti a, ka ti tawh ti ila a dik zawk ang.

Mambawihi ka tawn hmate kha chuan tlema hausa deuh te chu kan kawppui tur te ah ka ngai ve ngawt a, mahse Mambawihi ka'n tawng chiah chu ka ngaihdan engkim a danglam ta vek a ni.

Khatia thla khat chhung teh meuh mai Mambawihi ka be lo kha hrehawm ka ti em em a, ka biak loh chhan ber pakhat chu ka nu'n thla khat chhung i biak loh hnu pawha i la theihnghilh theih loh chuan ka pawm tawh ang a tih vang a ni. Tun hnua ka ngaihtuah let hian khang thil te kha Pathian remruatna vek zawk niin ka ngai tawh a, Mambawihi tan pawh kan in chhunga boruak hip a nawm phah deuh ka ring tawh bawk a ni.

"Doctor Marem, khatah khan enge i tih reng a, i Doctor uniform lah chu i ha tawh bawk si lo, haw i tum tawh em ni?" Tetei chuan min lo be hlawl a, a inkeng bawr deuh ṭûn bawk.

"Haw dawn lo ve, thil eng emaw ni tih tur ka nei a, hetah hian mi ka lo nghak lawk a nih hi!" tiin ka lo chhang ve ta ringawt a, tih tur pawh chu ka nei hran chuang hauh si lo.

"A nih chû, ka kalsan phawt mai ang che, chuan i mi nghah chu tunge a nih hre kher lo mah ila a pawimawh hle a ni ang i room chhungah pawh i lo nghak lo a nia" min kal pel pah chuan a rawn ti leh hram a, kei chuan ṭawngkaa chhang let lovin ka lo nuih let suk ringawt.

Dam lote ka en fel zo tawh a, ziah tur neuh neuh leh thil thlak thleng ngai neuh neuh ka ti fel zo tawh bawk nen ka hna lam chu ka ngaihsak em em hran tawh lo va, thil dang zawng aiin Mambawihi mawlh chuan ka rilru a luah ta zawk a ni. Darkar 1 leh tih vel ka nghah leh vang vang hnu chuan Mambawihte chu an lo chhuak a, amah leh a bula mi tih loh chu an hmel aṭang chuan nu emaw an ni tawh ngei a rinawm.

"Mambawih" step-a chhuk thlak nghal mai an tum lai chuan ka lo ti vat a, min hmu lo der tlat tih chu ka hre vek tho.

"Mambawih" ti lehin a banah chuan ka va vuan a, a bula a ṭhiannu chuan min lo en ta kiau mai.

"Ka lo zu chhuk ang, kawngpui velah khan ka lo nghak dawn che nia" tiin a ṭhiannu chu a chhuk zui daih a, Mambawihi pawh chu chhuk ve a tum leh ta tlat a, mahse a bana ka vawn tlat avangin a chhuk thei ta lo mai zawk a ni.

"U Marem min thlah teh, haw vat ka ngai a nia, ei rawng te bawl ka ngai bawk si haw ka duh tawh" tiin a rawn tal a, mahse ka thlah duh chuang der lo.

"Ka tih duh ber leh tih châk ber ka la ti hleinem, ka tih hma chu i kal lo vang" tiin Mambawihi chu ka âwmah ka kuah bet a, chutah amah zawk chuan

"U Marem ka uihin ka rim chhe teh a nia, min kuah ringawt suh" a rawn ti tan tan a, amah ka kuahna tur a nih phawt chuan uih leh rim chhiat te chu ka ngaipawimawh hauh lo.

"A ho mai mai" tiin ka âwm aṭang chuan ka nam sawn deuh a, a hmui takah chuan ka fawp zui nghal.

Thla khat chhung te meuh a taksa ka si tawh lo va, thla khat chhung te meuh mai a hmui nem leh thlum leh fawh nuam tak chu ka fawp tawh lo va, ka fawp leh chiah chu ka taksa a rawn danglam nghal vek thei ni maiin ka hria. Kan awmna chu khawi lai nge a nih ka ngaihtuah si se peih tawh lo va, khawlai a ni emaw ni lo emaw engmah ka ngaihtuah kual vel duh rih lo. Chutia ka fawh ngawng ngawng lai chuan Mambawihi chuan min nam sawn dâwr a, a thin a rim hmel hle bawk.

"Engvanginnge min fawh ringawt? Min va hmusit ve, vawi khat mah min lo hmu tawh lo vang che" a rawn ti vin hlar a, ṭawng erawh a ṭawng ring ngam chiah lo.

"Ka fawhna chhan che chu ka bialnu i ni a, ka nupui ni mai tur i ni bawk. Chuan vawi khat mah hmuh tawh loh te kha sawi reng reng suh, zaninah i inah ka lo kal dawn" ka lo ti khum ve hmak.

"Lo kal miah suh ang che, lo kal tawh suh u Marem" thinrim hle mahse a ṭawng tawp lam chu beidawng aw te pawh a ang zawk.

"Ka lo kal dawn hrim hrim, min dan tum mah la i thei chuang lo vang"

"Engatinge hetiang hian i awm leh tlat tawh â? A hma zawng pawhin min rawn ngaihven ngai lo va, enge tuna taka min ngaihtuah tak anga i awm leh tlat si?" min en ran chung chuan a rawn ti a, a aw leh hmel aṭang chuan a ṭah a chhuak tih ka hria.

"Khang kha chu zaninah kan sawi dawn nia, tunah chuan ka tih châk ber ka ti tawh a, i ṭhiannu in a nghak reng tawh bawk che si chhuk tawh rawh" tiin step lam pan tur chuan ka nam phei a, ani chuan mak tih hmel tak hian min lo en a, nuih sakin ka kal sawn zui ta daih.

Ka hnathawh ban hun a lo thlen chuan ka thuamhnaw chu ka bang ṭha a, haw turin ka insiam a, ka chhuak zui nghal bawk. Kan in lam pana ka inkhalh haw lai te chuan ka rilru chu a zâng vah a, ni dang anga rilru hah leh buai ang kha chu ka nei tawh lo hrim hrim. Kan in ka luh chuan ka nu chuan kan awmpuite chu ei rawng a lo bawlpui a, ka lut tih pawh a hre lo.

"U Marem, thingpui i duh ang em? Ka lo siam ang che aw?" kan awmpuinu Tlanzoi chuan min hmuh rualin a rawn ti a, keipawh chu aw tihna'n ka lo bu nghut a, choka lamah chuan ka phei zui ve mai bawk.

"Marem, zanin chu thil min tihpui teh aw, ka dawr thil vel a nia" ka nu chuan a rawn ti ve a, Mambawihi ka biak tawh lo aṭangin ka nu hian min be ṭha rîau bawk.

"Zanin ber kher chu ka va'n hman awm lo ve, chhuah ka lo tum asin" thingpui in pah chuan ka lo ti a, thingpui lah chu a la tui zek leh nghal.

"Enge i tih dawn? Engatinge min pui tura ka tih velah hman loh thu i sawi?"

"Chutiang lam pawh a ni lo, chhuah ka lo tum sa hrim hrim alawm"

"Khawnge i kal dawn reng reng?"

"Nu, i hriat ve vek kher hi a ngai lo, min ngaihtuah tih chu hre tho mah ila a lutuk hi a awm ve a nia"

"Sawi mai mai teh, i nu ka nih ang hian hriat vek ka phu ve alawm"

"Mambawihi ka hmu dawn, Mambawihi te inah ka leng dawn"

"Engatinge ani chu hmuh i la tum ṭalh a? In inṭhen tawh a ni lo'm ni?"

"Kan la inṭhen reng reng lo ka nu, thla khat chhung ngawt chu i thu ka awih tawh a, nang pawhin i hriat vek kha! Tunah chuan khang thla kalta chhung pawh khan Mambawihi hi ka la theihnghilh thei lo tih ka hria a, ka hrilh duh lo mai zawk che a ni"

"Chuan kha nu kha kawp leh i tum em ni? Nupuia neih chu i la duh ṭâlh tihna em ni?"

"Aw, ani lo saw chu hmeichhe dang nupuiah ka nei dawn lo. Ti khan ka rilru i hre tawh bawk a, i pawm tawh ngei turah ka ngai"

"A mak hi ka ti, lo inneih pawh ni ula in inneih rei thei chuang lo vang, chuvangin ṭhen hlen law law zawk teh Marem"

"Ka nu, i thutiamah khan ding reng ang che. Chuan kan inneih rei leh rei loh chu Pathian thu thu a ni, keini lo sawi theih a awm lo"

"Ka duh lo ka ti lova ka pawm lo pawh ka ti miah lo bawk, chutia kawp i la duh tlat chuan kei chu in inkarah ka inrawlh buai tawh lo vang, mahse inchhir hlek suh ang che"

"Ka inchhir lo vang" tiin ka room lamah chuan ka chho a, ka thuamhnaw hak lai hlipin bathroom lamah ka lut a, ka inbual zui nghal.

Mambawihi POV

Zan lamah chuan ka nu chu an dawr lamah a kal leh a, chhun leh zan thawk kawp khawpa an buai chu mak ka ti. Chaw pawh ka ei hma vîau a, duh lo rih hle mah ila u Marema chu a lo kal ka ring ru leh ta tho. Zan dar 6 a lo rik chuan kan ei leh inna vel ka tifel vek tawh a, kawngka pawh ka la kalh ta em chuang lo.

Dar 6 leh a chanve velah chuan u Marema chu kan inah a rawn lut ta ngei a, a luhlul ve bawk nen a lo kal kha chu ka ring sa hrim hrim. A lo luh lai chuan biak pawh ka lo be lo va, a hawi kual danah ka nu a zawng tih ka hre thei. Ṭhutthlenga a ṭhut vang vang hnu pawh chuan ka la be duh ṭhak lo va, ka be peih rih thlawt lo a ni.

"Mambawih, i ngawi reng dawn em ni? Min be ve em em la" kan ngawih reng hnu chuan a rawn ti a, ka la chhang duh teuh lo mai.

"Hei Mambawih, hetianga i ngawih tlat chuan hrehawm ka ti ve tho a nia" tiin ka ṭhutna bulah chuan a rawn ṭhu phei a, a rim chuan ka hnar a verh nghal zar bawk.

"Haw rawh, kan inbiak hi a ṭulna pakhatmah a awm tawh lo, khati chen min be lova i awm theih chuan keipawh hian ka be lo ve thei chiang che em mai" ka lo ti vin deuh hlar a, u Marema chu ka zah buai vak peih tawh lo.

"Chu ka biak loh che chu i lo va la na awm ve, keipawh hian ka be châk thei lutuk che alawm, mahse ka nu thu kha ka awih ngei ngei a ngai bawk si"

"A nih chuan i nu thu chu lo awih zel la, va haw rawh. Kan inah hian lo kal leh tawh suh, chu chu i nu duh dan tak pawh a ni ang"

"Ni lo Mambawih, khatia ka lo biak loh tlatna chhan che chu ka nu nen inremsiamna kan neih vang a ni. Tunah chuan ka nu paw'n a pawm tawh che, thla khat chhung te meuh a duh anga ka awm avangin"

"U Marem, kei hi in nufa inremsiamna atan lek maw min lo hman? Tunah chuan a chiang tawh e, nang nen hian inkawp leh ka duh tawh lo"

"Ka thusawi tur hi ngaithla phawt rawh, inremsiamna'n ka hmang reng reng lo che. Kan pahnih tana a ṭhat zawkna'n ka lo be ngai lo che tih hrethiam ve zawk ta che, Mambawih" tiin min kuah thut a, ka lo tal nasa ngei mai.

"Min thlah rawh, min thlah rawh u Marem" tia tal chhuah ka tum pawh chuan min kuah bet tlat a, ka tal chhuak thei bawk si lo nen ka ṭap ta hawk.

"Ka tihpalh Mambawih, ka tihpalh lutuk. Ṭap tawh suh le, eng pawh ni se i lak aṭang hian ka inthiarfilhlim leh tawh ngai lo vang. Ka tiam a che, nang hi ka nupui i ni ang a, i ni kumkhûa bawk ang"

"Engatinge min lo biak ngai loh? Inṭhen ka rawt chhan pawh i hre vek a, biak pawh min lo be duh lo a nih khâ, engatinge? Engatinge ka duh ang hian thil te hi a awm ve theih loh? Engatinge chhungkaw hausaah ka lo pian ve mai loh? Lo piang ni ila chuan maw u Marem, i nu leh pate pawh hian min duh ve mai awm si a" ṭap chung chuan ka ti ta zuah zuah a, sawi awm leh awm loh pawh ka ngaihtuah tawh lo. Ka hun kal tawh te ka ngaihtuah let a, ka rilru chu na tak a ni.

"Eng mi ah pawh piang la ka tan chuan i tling vek tih hre rawh Mambawih, nangmah inhmu hniam zawngin ṭawng tawh suh. Min en teh le Mambawih, nang hi ka ta i ni a, zanin aṭang chuan i ni reng tawh ang" tiin ka khabe chu a rawn chawi a, dam em em hian ka hmuiah chuan a rawn fawp zui nghal bawk.

Min fawp rei telh telh a, a duhthaw telh telh a, kan awm dan chu a dik leh dik loh pawh chhut turin rilru mumal ka pu thei tawh lo. Vawi leh khatah min pawm kang nawlh a, khum lamah chuan min insawn phei pui ta daih. Min khawih ang ang chuan ka lo dawh tawp a, lo dan emaw lo duh loh kual vel chu ka tum lo hrim hrim zawk.

Ka hmuiah mai fawp tawh lovin ka hnute te chu a fawp a, a chang leh a ṭham tawn tâwn a, chutianga min khawihna te chuan tisa châkna nasa takin min pe bawk. Ka thiam ang tawkin ka lo chhang let ve a, ka zei lo tih chu inhre mah ila ka thiam ang tawk chu ka chhuak ve chiang alawm. Ka meng diar diar a, a taksa mawi tak leh ngo tak chu ka hmui zui nghal bawk.

Chutia a taksa lawng tawp ka hmuh hnu chuan kan awm dan chu a dik lo ṭan tih ka hre chhuak a, mahse min khawihna te chu ka lo hnar thei chuang hauh si lo. Ka thuamhnawte chu engtik laiin nge a lo inphelh hman ka hre lo va, ruak vekin ka lo awm tawh zawk a ni. Min fawh ngawng ngawngna chu titawpin

"Mambawih, ka insum thei tawh lo" a rawn ti thawp sup a, a thusawi avang chuan amah chu ka en ta reng bawk.

"U Marem, ka la ti ngai miah lo a nia, ka duh lo" ka lo ti phelh phang a, ani erawh chuan engmah sawi lovin min lo fawp zui daih. Chutah amah vek chuan

"Ka hria alawm, a na tuar rei lo vang, ka phal bawk lo" tiin min fawp zawm leh nghal a, ka lai te chu a fawp thla zen zen a, ka hnute chu a kut lum tak chuan a ṭham tawn tâwn bawk.

Muangchangin a hmui chu ka kap lamah chuan a insawn thla a, chuta a thil rawn tih erawh zet chuan min va thlak danglam chiang em. Ka tawn ngai loh leh ka la dawnsawn ngai loh a ni a, nuam tak a ni. Keimah chu ka za chhuak vek ni berin ka hria a, khawi hmuna awm nge kan nih pawh chu ka hre tawh lo hial zawk.

Vawi leh khatah ka kap chu a rawn na thut a, ka taksa chhunga lo lut mek a len em avang chuan ka kap nat dan chu ka sawifiah thiam lo. U Marema chuan min fawp chung hian a thil tih lai chu a ti mial mial a, mahse a hmanhmawh hran lo. Chutia muangchanga chet a lak lai pawh chuan ka vawi khatna a nih vang nge ni na ka la hre reng a, a tir ang em ema na erawh a ni tawh lo.

Zawi zawiin a na chu a rawn reh ṭan a, a tawt ṭha bawk nen muangchanga a chetna chuan a na lutuk pawh chu a tizia tawlh tawlhin ka hria. Ka theih ang angin a hnung chu la lo vuan ve ṭai ṭai a, a chang leh a banah te chuan ka vuan thul. A hmaa la na riai awm kha rei vak lo hnuah chuan nawmnain a rawn thlak a, ka thaw chu rang tawh tak a ni.

U Marema chuan ka hmuiah ni lo ka taksa hmun hrang hrangah chuan a fawp kual pah reng a, a hma aiin a che hmanhmawh ta viau bawk. A hma ai zawngin ka awm dan chu a dik lo lehzual a, chutiang bawkin u Marema pawh a hmanhmawh zual. Nupa chauhin an hmang tur nia kan sakhuanain min ziritir ṭhin kan tih zawh chuan kan thlan a tla phung a, u Marema chuan a âwmah min kuah bei ta hle hle.

Kan thil tih zawh chiah avang chuan inchhirna rilru ka nei dawn emaw ka ti a, mahse ka nei hauh lo. Ni e, kei hian u Marema nena kan awm dan chu pawi tihna ka nei miah lo va, ka hlim em em pawh ka hre chuang lo. Ka inchhir loh chhan chu ka mipa hmangaih ber hnenah ka thianghlimna ka hlan tlat alawm.

"Mambawih, i laka ka chet dan avang hian i thin a rim em? Ka ngai em em che a, ka insum thei tawh ngâng lo a ni" ka chala rawn fawh zeuh pah chuan a ti a, chhan let pawh ka tum chuang lo.

"I bulah hi chuan ka danglam a, ka inthunun thei lo va, ka bula i awm reng chung pawh hian ka thlahlel em em ṭhin bawk che. A chhan chu nang hi ka hmangaih tawh che a ni" a thu sawi tawp ber avang chuan amah chu ka en chho hâu a, u Marema hian min hmangaih ve tak tak em ni?

"U Marem, min hmangaih maw!? Kei ve mai, chawhmeh zuar ve mai, thil tifaia inhlawh ve ṭhin mai mai hi min hmangaih i tihna em ni? Ni lo, nang chuan min khawngaih avangin min hmangaih emaw i ti zawk a ni ang" ka ringhlel lo thei lo a tin ni!

"Ni lo Mambawih, ka hmangaih che alawm"

"Min hmangaih tih pawh i hriat loh khâ, i nu leh i nupui hual hlui hnenah pawh kei min hmangaih leh hmangaih loh i hriat loh thu i sawi vek tawh khâ, engtinge tuna i thusawi hi ka awih ngawt theih ang" a nute nena an inbiak lai vel chu ka mitthlaah a rawn lang a, u Marema thusawi chu rin duh mah ila ka la ngam zân lo a ni.

"Kha thu ka sawi lai kha i lo hre vek a ni mâw, min en teh Mambawih, ka mitah hian min en teh" tiin amah en thei tur chuan ka khabe chu a rawn chawi a, keipawh chuan ka lo en ve ta kar.

"Ka hmangaih che, ka hmangaih lutuk che" tiin ka chalah chuan a rawn fawp a, chutah zet zawng u Marema thusawi chu ka ring lo thei tawh lo.

"Keipaw'n ka hmangaih che u Marem, inṭhen hrang tawh lo vang" amaha ka rinna zawng zawng nghat chung chuan ka ti sep a, ani chuan

"Kan inṭhen tawh lo vang, kan chhungte vang pawh ni se kan inṭhen leh tawh lo vang" a rawn ti thum dup a, a thutak hle bawk.

A âwmah chuan ka bei vat a, min hmangaih thu a sawi avanga ka lawmzia chu pui tak a ni. Kei hi khawvela hmeichhe vanneih ber ka ni hial lo maw, u Marema te ang mipa fel, hmangaihna ngah, hmelṭha leh hausain min hmangaih ve chu a ni si a, ka hlim a ni.

Chapter 22

"U Marem, nep min ti em? Khati mai khan ka thianghlimna ka hlan che a, min hmuh dan tidang kher suh aw" ka rilrua awm ngut ngut chu ka sawi chhuak leh ta nge nge.

"A teuh lo Mambawih, ka lawm em em zawk asin. I thianghlimna min hlan phal tih ka hriat khan sawi lo mah la keimah ang chiahin min hmangaih ve tih ka hria a, chu chuan ka thinlung chhungril a tihlim tak zet" a rawn tih chuan a aia nghetin a âwmah chuan ka bei a, ka pa tih lovah amah ang renga mipa rin hi ka nei leh tawh pawhin ka ring lo.

A âwm ngo taka hmul lo awm siar siar te chu ka khâl neuh neuh a, kan awm dan chu a nuam tak zet. Chutianga nupa anga awm tawh mai chu ka châk a, mahse nupa ni tur chuan hmabak leh tih tur kan la ngah hle si. Tun maiah khan pasal ka neih hmâ chu ka thianghlimna ka vawng nung reng ang tia ka lo intiam ve char charna chu ka bawhpelh zo chiah a, mahse u Marema hnehah kher ka hlan avang chuan inchhirna ka nei lo hrim hrim.

"Mambawih, i nu hi a lo haw thut mai ang a!" kan ngawih vang vang hnua a rawn tih chuan ka meng kawk a, ka nu chu lo haw thut thei a ni tak tak.

"Awi le! U Marem tho vat teh ang" tiin ka tho vat a, ka mut chhuak deuh riai riai pawh chu vawi leh khatah a bo nghal vek.

"Aaaa! Ti hian awm rih ang, i nu pawh a lo la haw bik em nâng? Khi, dar 8 pawh a la ri hleinem" tiin a âwmah bawk chuan ka ṭhu kâng tawh chu min pawt bet leh a, mut leh chu ka duh tawh teuh lo mai.

"A tih chi loh lutuk, tho vat ang, ka nu chu dar 9 velah a lo haw ṭhin alawm. In tihfai te ka ngai a nia, kawngka saw i kalh reng reng em ni?" ka ti zung zung a, ani pawh chuan min kuahna chu a phelh ve tawh bawk.

"Kalh vek hman e, ka lo luh khan ka kalh nghal daih alawm"

"A nih chuan nang hian engkim kha tum nei rânin i lo ti tihna maw!?"

"Chutiang lam pawh a ni lo, nichin maia kan thil tih zawh chiah kha chu ka tum pawh a ni em em bik lo. Ka tum ber chu tûma min tihbuai theih lova nang awmpui che kha a ni a, thil sawipui che kha ka tum ber bawk. Mahse i hmelṭha tak ka hmuh khan ka buai a, i taksa ka sikna te khan ka insum theihna an rawn tichhe ta a ni"

"Eng pawh ni se i tho phawt teh ang u Marem, nang pawh intihfai i duh ve lo em ni?"

"Intifai dawn chiang e, chuan kan pahnihin kan intifai dun ang" tiin khum aṭang chuan a rawn tho a, ka inrin hmain min pawm kang nghal nawlh a nih chu!

"Hei min dah thla rang teh, hetianga awm hi a dik miah lo a nia, nupa pawh kan la ni bawk si lo" a bana chum taih taih chung chuan lo ti ve mah ila min dah thla lo chiang hle.

"Nupa chu kan ni thuai dawn alawm, mahse dan khatnaa kan inneih thei dawn ta lo erawh i rilru a na ang tih ka hlau" a rawn ti daih thung.

"Chutiang lam sawi a la hun lo, min dah thla vat teh u Marem, kan bathroom phei chu in bathroom angin a lian ve miah lo a nia"

"A lian lo tih chu ka hria alawm, mahse tun atan chuan khawi hmun pawh ni se kan intifai rual dawn hrim hrim"

"Luhlul tlat ṭhin lo teh, ka nu kher ni lo mi dang pawh an lo lut thut thei a nia, an lo luh vaih chuan kan awm dan hi an hrethiam nghal vek ngei ang" ka tih rual chuan min pawm kanna aṭangin min dah thla a, bathroom chhungah chuan kan lo awm reng tawh.

"Ka luhlul hleinem, mi dang chuan kan awm dan chu duh leh lo hre mai mai rawh se. Chuan zanin aṭangin nang hlat hian ka awm leh tawh dawn lo hrim hrim" tiin bathroom kawngkhar chu a kalh zui hmak.

"U Marem, chhuak vat teh, ka intifai hmasa ang a, i duh leh ka zawhah i intifai ve zawk dawn nia, aw?" tlawn aw tak chuan ka ti ta ringawt.

"Aih, i pasal angah min ngai tawp tawh la, ka bulah chuan zak miah lovin awm tawp tawh rawh, chu chu ka duh dan ber a ni"

"Zak suh zak suh min ti ringawt ṭhin suh, hmeichhia i nih loh chuan i hre ve thiam chuang lo vang. Ka taksate hi a na a, intihfai vat vat ka duh, lo va chhuak phawt teh" ka ti vin ta hlur a, ani erawh chuan min lo la nuih mai mai thei nia.

"Ka chhuak dawn chuang lo tih kha han hre phawt mai la, i kut khan i taksate kha khuh buai vel duh suh, ka hmu vek tawh tho tho. Nge nia nang hian ka tihfai kher che i lo phut rilru reng zawk?" a va han luhlul ber kher chiang em.

"A teuh lo lutuk. Nâaaa u Marem chu, i buaithlak ṭhin em mai. Aw le, a nih chuan min en miah suh, kawngka lam kha hawi rawh" a tawpa tawpah chuan ka ti ta nge nge.

"Ka hmuh vek tawh kha Mambawih, hmu mai ni lovin i taksa chhungah hial ka lo lut tawh nghe nghe zawk. Chuvang chuan zak lo la, awm tawp tawp rawh"

"Khatiangin sawi ringawt suh, miin an lo hria ang e. I hawi lo a nih chuan ka rilru ka thlak ang, nang hi pasalah ka nei miah lo vang che, ka ti tak tak" ka thusawi chhe te them maha a ngaipawimawh duh miah lo chuan ka thin a tirim tawh tak zet.

"Âw i va mak reuh tak, min hmangaih tawh avangin mi dang pasal atan chuan min phal bik dawn lo tih ka chiang"

"U Marem ka uang tawh miah lo tih hi i hrethiam lo em ni? Nupa pawh kan la ni lo va, nupa anga awm chu kan la thei lo. Ka hmangaih che tih chu ka pha lo, mahse ka thusawi te hi tlem chuan ngaihsak ve la, mihring ve tho ka nih avangin zahawmna ka nei ve asin" thinrim aw pawhin ka ṭawng peih tawh lo. Ka thutak a ni tih hrethiam takin u Marema pawh chuan min en ta kar a, chutah keimah vek chuan

"I hawi sawn lo a nih chuan zanin hi nang leh keiin inzawmna kan neih tawp berna tur a ni ang, hmeichhia ka nih avangin ka thusawi hi ngainep lo hram bawk rawh" ka tih zawm leh zat a, ani chuan min rawn kuah vat thung.

"Ka tihpalh Mambawih, i thin a rim tak tak pawh ka lo ring hleinem. Ka lo fiamthu rei deuh te pawh a ni ang e! Nang te reuh hi chuan min tikawi zet zet reuh ziah a, kei aiin i la naupang fê zui" tiin ka hmuiah chuan a rawn fawp leh zeuh a, min hnungchhawn zui ta bawk.

"Ka lawm e" ti sepin keipawh chu ka intleuh fai zawk zawk a, engkim hmu vek tawh eng ang mahse a bulah chuan ka la zakin ka la zam em em tho.

"Hei hei, chhuah mai i tum em ni?" tiin bathroom aṭanga chhuah ka tum lai chuan min lo chelh ding a, a lam hawi zawngin min kuai her zui nghal.

"Ka chhuah mai loh te chuan tih tur ka nei tawh hleinem" bang bo zet chuan ka lo ti ve mai a, ani chuan min lo fawp leh vawng vawng a, a kut chuan ka taksa ruak kang chu a chul a, a hun tawh lo tih chu hre mah ila ka dang thei mai bik lo.

"U Marem insum teh, ka duh tawh rih lo. Ka taksa te hi a na ṭhem ṭhum a nia" ka hnute a fawh lai chuan harsa ti tak hian ka ti chhuak thei hram a, u Marema pawh chuan a thil tih mek chu a chawl ve mai.

"Ka hmangaih che Mambawih" rawn ti supin ka hmuiah chuan a rawn fawp leh zeuh a, tisa châknaa khatin min en reng bawk.

"Keipaw'n ka hmangaih che alawm u Marem" tiin ka che sawn thut a, bathroom kawngkhar chu hawng vatin ka chhuak zui ta daih a, u Marema nui hawk hawk ri chu ka hre hman hram.

Ka nu chu dar 9 pel hret velah a lo haw a, u Marema hmel a hmuh chuan mak a ti ve hle tih a awm dan aṭang chuan a hriat theih. Amaherawhchu a awm dan chu a siamṭha vat a, u Marema chu a be leh bawrh bawrh thei tho. U Marema chuan ka nu chu nupuia kei min neih a dil thawr a, min hrilh lawk bawk si lo nen ka lo hamhaih khawp.

U Marema chuan nupuia min neih a duh thu leh a tum dan zawng zawng chu ka nu a hrilh vek a, ka nu erawh a lo ngawi reng thung. Khatia kan inṭhen titih avang khan ka nu chu u Marema lakah a lung a awi em em bik lo va, mahse huat tak tea hua erawh a ni hran lo. A awm ka tihpui a, keimah min ngaihtuah avanga lungawi lo a ni tih pawh ka hria.

U Marema chu zan dar 10 leh a chanve vel thleng kan inah chuan a leng a, zan dang aiin a leng rei bawk. A haw dawnah te chuan ka nu chu a nui leh hak hak tawh a, u Marema hi chu a huat rei theih tak tak kha ka ring lo reng a ni. Keipawh chuan a Car awmna thleng chu ka thlah leh thlap a, a motor chhunga a luh dawn chuan min fawp leh hram.

Chu zan ang em ema ka hlim leh ka muttui chu ka la hre lo va, ka zing tho te chu mood ṭha tak ka ni. Ka nu chuan chaw kan ei laiin thil awmzia min zawt fiah ta ngei a, keipaw'n kan chesual tih chauh lo chu engkim ka hrilh fai ta vek. Ka nu pawh chuan kan inkar a ṭha leh ta mai chu lawmawm a ti a, u Marema chhungte lamin min pawm tawh pawh chu a lawm hle bawk.

Ni a liam a, kara a ral a, thla te hial chu an lo liam leh ta zung zung mai. U Marema chuan a hma ai zawngin min ngaihsakzia a tilang a, hun awl a neih apiangin min hmu turin kan inah a lo kal ziah a, a changin min chhuahpui ṭhin bawk.

Min chhuahpui ṭhinna hmun te chu ka kal lutuk ngai lohna vek a ni a, mi lo awm ve te chu an changkang hlawm thei em em a, mahse u Marema bula ka awm tlat tawh avangin mahni insitna ka nei duh tawh bik lo.

"Nu, tun lai hi i va chera ka hriat, thil hi ei ṭha deuh rawh" chaw kan ei lai chuan ka ti a, ka nu chu ka hmu cher riau a ni.

"Ka cher awm pawh ka va hre lo ve, tun hnai te hi thil chu ka ei thei lo khawp mai" a rawn ti ve mai a, min en duh miah lo leh nghal.

"Nu, zep i nei em? Ka lakah hian zep nei miah suh aw, i fanu ka nih hi! I thawk hah bawk si, ei tur tal hi chu i ei ṭhat a ngai"

"Hlauthawng suh Mambawih, ka thau ve leh mai ang" a rawn ti mai a, mahse ka ngaih erawh a la ṭha chuang lo.

Tunah chuan u Marema nena kan inkar a ṭhat aṭanga chhutin thla 2 lai a liam leh tawh a, u Marema te inah chuan a ngaihzawng dik tak angin ka kal tawh a, pangai takin a nu leh pate bulah chuan inhmelhriattirna ka nei thlap tawh bawk. U Marema nu awm dan ber chu mak ka ti a, min hua emaw min duh lo emaw ang vel pawhin a awm tawh miah lo chu mak ka ti lo thei lo.

U Marema'n chhun lama ka thil tih ṭhin min zawh chang chuan ka awm mai mai thuin ka lo chhang mai zel a, engmah ti ngai lo hek. Thil dang engmah min zawh ngai miau loh avangin zing lama ka hnathawh ṭhin chu ka la hrilh duh chuang lo va, ka nu pawhin a hriat theih tur ang zawngin ṭawngkam a nei ngai lo bawk. Amaherawhchu a chang chuan u Marema chuan min rinhlelh hmel thei em em a, zing kara kawngpui kan phait fai ṭhin tih chu a hria ang tih ka hlau ru tak zet.

A hria a nih ngat chuan a lung a awi lo emaw te kha a ni leh ang a, hna min zawn sak leh phet a tum mai ang. Ka hnathawh chu ka zahpui hran lo va, hna sang ni lo mahse a thianghlim ka ti zawk daih.

Khawi office lianah emaw te thawk ta ila chuan ei ruk thil velah inhnamhnawih a awl dawn tih a chiang reng a, chuvang reng chuan kawngpui phiah faia inhlawh chu a hlawh tam lûa lo mahse nuam ka ti daih zawk a ni.

"Kei chu i vanneih ka ti ê Mambawih, i bialpa kha an hausa si, chhe lo bawk si" Lawmtei chuan a rawn ti a, zing dang aiin chu zing kar chu a vawt deuhin ka hria.

"Nâaaaa, ti khan ti bik kher lo la, mahse keipawh hian vanneih chu ka inti teh asin. Ani angin min duha min hmangaih ve tlat hi ka lawm a, amah ka hmangaih zual phah sawt bawk a ni"

"Eee chuan, a chhungte khan an duh ta che em ni?" a rawn ti leh a, ka lo la hrilh miah lo tih ka hre chhuak nghal.

"Aw, min pawm ve tawh chuan ka hria. Chuan maw Lawmte, a mak lutuk, a nu ber kha a lo la nasat ka ring a, mahse u Marema'n inhmelhriattirna min neihpui ni kha chuan min lo lawm thiam em em thung tawh"

"A ni thei lutuk ang, mahni fate berin an hmangaih tlat chuan nu leh pate chuan an lo duh lo reng bik tur thu che va awm suh"

"Enteh, min lo dawnsawn dan vel ka hmuh tirh phei kha chuan mak ka tih lutuk avangin ka meng phawk hle a, ani lah chuan min lo la nuih sen sen zui"

"A va mak tak ve, a inthlak danglam nasa hle a nih dawn chu!"

"U Marema pa kha chu ka hmuh tirh aṭang tawh pa zaidam leh fel kha a nih ka ring sa hrim hrim a, min be lutuk lo mahse min lo lawm thiam ve hle. A nu ber kha a ni mak ka la tih chu! Nui sang khan min be thei zel a, kei atan kha chuan lo biak chhiat chi reng a ni lo"

"Âww, i bialpa chuan a lo hrilh lawk ve te pawh a ni ang chû, chu lovah chutiang hun tawhah te chuan a nu pawh chu a lo sual reng duh bik nâng"

"Ni ve tho mai, i sawi chu a dik tak ang, u Marema chuan a lo hrilh lawk a nih ka ring ta"

"Ti daih ila tun hnai hi ka va hmu eng che ve Mambawih, bialpa neih leh hi i ngeih viau zawk em ni ang" nui hak pah chung chuan a rawn ti a, thingpui chu kan in zo titih der.

"Awih awm loh ê, kan inang reng. Min bawl vel vak vak lo khan i thingpui kha in zo vat rawh, kan haw thei reng tawh a nia"

"Ka ti tak tak alawm, kha chen kan thawk dun tawh a, tun ang renga i hmel eng leh vun nung hi ka la hmu lo" leh ta tlat ṭhin hian a!

Chutia titi paha thingpui kan in lai chuan kan thingpui ina bulah hian Car pawl hi a lo ding a, chu Car aṭanga lo chhuak ka hmuh chuan hnung lam hawiin ka inher ta vat. Min hmu ang tih hlau zetin u Marema chu ka hnungchhawn tlat a, ka bula mi lah chu a hmu ve lo nge ni a la ṭawng siam siam zui.

"Ka hman e Mambawih, haw ila" Lawmtei chuan a rawn ti ta mai, ka hming a lam ri kher kher chu ka va han ngei mai mai tak em.

"Engatinge min koh kher? I hman chuan kal vat ang" a hriat tur tho si zawi deuh tak chuan ka ti thuai a, ka kalpui zui nghal.

"Mambawih" rawn ti an awm avang chuan ka kal chak zual sauh a, min lo kotu chu tunge a nih ka hre chiang lutuk tlat.

"Mambawih" rawn ti lehin ka banah u Marema chuan a rawn vuan a, mi lah chu a la vuan nghet em em leh ta nghal a!

"Ka hre lo che emaw i ti em ni? Hetah enge i tih? Tun ang hunah hian enge i tih?" kan inhmachhawn hnu chuan a rawn ti ta.

"Ṭhiannu, enge in tih? Nangmah zawk hian min han hrilh teh" tiin ka chhan duh loh avangin u Marema chuan Lawmtei chu a zawt ta daih a, chutah Lawmtei lah chuan zep nei miah lo hian

"Kawngpui phei vel hi kan phiat fai ṭhin a, thla eng emaw zat chhung chu kan thawk ho tawh alawm, engatinge?" a rawn ti heu mai.

"Enga!? Hetiang hna bawk hi maw i lo thawh leh tâk Mambawih? Lo kal teh, inbe lawk teh ang" tiin u Marema chuan min lo pawt dâwr a, a thinrim ni berin ka hria.

"Ka lo va haw mai ang" tiin Lawmtei chu a kal zui ve mai a, a lakah pawh ka inthlahrung ru ta hle.

"Engvangin nge min hrilh loh? Engatinge hetiang hna hi i thawk tih min hrilh duh loh? Hrilh tlakah min ngai lo em ni?" a motor chhunga kan ṭhut luh hnu chuan a rawn ti a, a aw chu a nem lo hle bawk.

"Ni lo, hrilh tlak lova ka ngaih vang che pawh a ni lo. Ka hrilh che chuan i phal lo leh ngei dawn a, mahse kei chuan hetiang hna hniama i ngaih hi ka thawk duh tlat bawk si" ka ti ve thuai a, engvanga hlauthawng em em nge ka nih chu ka hre hauh lo.

"Ka hmangaih che tih i hria a ni lo'm ni? Chutiang bawkin nang pawhin min hmangaih bawk, nge nang hian min lo hmangaih ve tak tak miah lo zawk"

"Engatinge chutiang te i rawn sawi daih? Ka hmangaih che tih chu i hria alawm u Marem"

"Min hmangaih si chuan hetiang thil serious lutuk te hi chu min hrilh ve ta reng che, nakin lawka ka nupui ni mai tur i nih hî" a thinrim tih hai rual a ni lo.

"Ka sawi tawh khâ, ka hrilh che chuan thawh i phal lo leh ang a, kei lahin hnathawh nei lova ni hman ral ka duh si lo alawm"

"Ka phal loh chu i ti lo mai tur a ni. Thawk suh ka tih ang chu thawk lo la, tichuan i tan leh ka tan pawh a ṭha zawk"

"Chutiang ringawt a ni thei bik hleinem, khawi aṭangin nge pawisa kan neih ang? Thawk lo ta ringawt ila khawi aṭangin nge in luah man tur leh kan mamawh vel leina tur pawisa kan neih theih chuan ang?" ka dinhmun chu a hrethiam lo nge a hrethiam lo der tlat zawk pawh ka hre lo.

"Ka hnen aṭangin in nei thei ang. Mi hrang enin min en tawh suh Mambawih, nang hi ka ta i ni a, chutiang bawkin keipawh i ta ka ni bawk. Chuvangin zep nei miah lovin thil min hrilh ṭhin la, min ring ngam zawk ta che" a aw nem lo tak tak chu hriat reng a ninawm ṭan lek lek tawh a ni.

"Ka ring che asin, ka mipa rin ber i ni hial asin. Nangin thawk suh i tih kha kei chuan ka thawk lo ringawt thei lo va, sum ngah eng ang mah la i pawisa hmansak thei che ka ni lo"

"I ni, i ni chiang khawp mai. Engkim, ka ta zawng zawng chu i ta a ni vek tawh tih hre rawh"

"Aih, ka duh lo. Nupa pawh kan la nih loh hî u Marem, engatinge thil hi i hriatthiam loh luih tlat?"

"A dik, nupa kan la ni lo. Mahse kan ni thuai ang, zaninah palai ka rawn tir nghal dawn"

"Thawt thawt che chuan, eng ber hi nge i buaina? Engvangin nge hetiang hna ka thawh chu duh lo em em nge i nih?"

"A chhan chu ka venhim duh vang che a ni. Mite'n ka nupui tur chu kawngpui phiata inhlawh ṭhin a ni tih hre lo se ka duh a, an hriat chuan sawi chhiatna leh thil ni lo lô i hre leh ang a, nangmah i insit leh ang a, chung chu thleng lo se ka duh a ni" ka dar rawn chelh meuhin a rawn ti a, a sawi chu a dik ve reng tho.

"Chuan keimah hi ka mualpho thei bawk. Ka nupui tur ngaihsak lo angin mite hmuhah ka lang thei a, hmangaih miah lo che angin ka lang thei a, dawt nimahse chung thil thleng thei te chu ka tawng peih lo a ni" a rawn tih zawm leh zat a, sawi mai tur pawh ka hre lo.

"Ka lo ngaihtuah pha miah lo" ka ti sep ringawt a, a thinrim viau pawh kha awm ka tihpui ta khawp.

"Min tiam teh Mambawih, hetiang hna hi i thawk tawh lo vang tih min tiam lul teh"

"Ka thei rih lo, chu bakah thla laklawh lai te a ni a, chutianga awlsamin ka bansan ringawt thei lo. Thla bia thawk kan ni ve a, kan hlawh pawh thla tawpah kan la ziah alawm. Tuna ka ban thut chuan engkim ka ti khaihlak vek ang a, hlawh inpek pawh a buai phah vek dawn asin"

"Aw le, a nih chuan tun thla chiah hi i thawh ka phal ang. I hrethiam em? Min tiam rawh, chu tal chu min tiam ngei ang che"

"Aw le, ka thawhpuite pawh ka lo hrilh ve hrim hrim ang a, ban chu ka lo tum dawn nia. Mahse enge ka tih ang? Eng hna nge ka thawh ang? Ka nu ringawt hna thawk bik turin ka phal hleinem"

"Kha lam kha chu lungngai suh, ka awm alawm. Engkimah min ring la, engtik lai pawhin min rinchhan reng ang che. Chuan zaninah palai ka rawn tir dawn tak tak a nia"

"A la hma deuh i ti lo em ni u Marem? Pasal han nei mai tur chuan ka inpeih em chiah em tih pawh ka la hrethiam rih lo, hlauhthawn rukna riau ka la nei tlat a ni" ka rilru dik tak chu ka zep duh ta lo.

"Engatinge i la hlauhthawn reng mai ni âw Mambawih? Kan inneih hnua kan inṭhen leh palh i hlau a ni ti raw?" ka bianga dawm chung chuan a rawn ti a, kei chu ka lo bu nghauh nghauh.

"Hlauthawng tawh suh, nupuia ka neih che chuan ṭhen leh mai mai che ka tum hleinem. I nu i ngaihtuah tih pawh ka hria, i nu pawh kan bulah a rawn cheng ve dawn nia. Ka pa pawh ka be vek tawh a, pawi tihna a nei lo" a rawn ti a, insum thei tawh lovin amah chu ka va kuah nghal thlawp.

"Ka lawm e u Marem, hetiang taka min hmangaihtu nang ka tawng che hi ka lawm a ni. Nang chu kan nufa tan chuan ka pa ang mai i ni a, ka mipa hmangaih ber i ni bawk a, ka lawm lutuk" tiin ka insut feih feih a, ka ṭap lo thei lo a tin ni!

"Le! Haw tawh ang aw" ka hmuia a rawn fawh zeuh hnu chuan a ti a, keipawh chu ka ṭhu ṭha ve leh mai bawk.

Chhun lamah chuan ni dang bawkin ka awm leh mai mai a, ka phone chu ka khawih mial mial a, a nihna takah chuan u Marema min lo biak hun ka chang a ni mah zawk. Zing lamah khan min lo biak tur thu a sawi a, chu pawh chhun chawlh hun velah a ni. A hman lo ve thei hle tih ka hria a, a hnathawh leh amah chu a inhmeh em em a, ka ngaisang tak zet bawk.

Chhun dar 12 leh a chanve velah chuan ama hnen aṭangin call ka dawng a, ka chhun thil ei lai tak a ni a, keipawh chuan ka lo la ve vat. Eng eng emaw sawiin kan inbe rei phian a, a ṭawng danah chuan thil ei pahin min be ve tho tih ka hria. Kan thil sawi chu ka nuihpui leh chiam ṭhin a, ani erawh a nui miah lo thung. Ka mood chu a fuh em em ringawt a, zing lam boruak vangte pawh a ni maithei a ni.

U Marema nen kan inbiak zawh hnu minute rei lote ah ka nu hnen aṭangin phone call ka dawng leh a, chutiang huna min lo biak ngai loh avangin min lo call chu mak ka tirilru khawp. Muangchang lovin ka phone call chu ka la ta vat a, chutah ka nu aw ni miah lo hian

"Hello, hei hi pi Siamin fanu a ni em âw?" a rawn ti a, mi dangin ka nu phone hmanga min lo be ta daih chu ka hrethiam lo hle.

"Aw ni e, engenita? Engatinge ka nu phone hian min lo biak daih a? Tunge âw? Ka va'n hre mai lo che" ka lo ti ve zung zung nghal.

"Nia min hre lo vang, ka sawi duh ber zawk chu pi Siami hi a tlu a, tunah hian Civil Hospital lam kan panpui dawn mek a, chanchin ka lo hrilh lawk che a nih hi!"

"Enga!? Ka nu a tlu maw!? Aw...aw..ka lo kal ang" ka ti bah nuai a, rang takin phone chu ka hmet tawp a, hamhmawh tak chuan chhuak turin ka insiam zui ta bawk.

Ka hmanhmawh em avangin Taxi chu hire rate in ka la tawp a, Civil Hospital lam kan pan lai chuan ka rilru a hahdam lo hle.

Chapter 23

Civil Hospital ka thlen chuan Nurse lo vei vak te hnenah ka nu an lo hmuh leh hmuh loh chu ka zawt tawp tawp a, ka chiai vek tawh a ni ber. Nurse te erawh chuan chutianga emergency-a dam lo buaipui ngai an awm thu an lo hre lo va, chungte hlei hlei chuan ka rilru an tihah. Ka rin dan ber chuan ka nute chuan Hospital an la thleng lo a ni ngei ang.

Ka nu chuan ka ngaihtuahna zawng zawng a luah khat vek a, engvangin nge a tluk tih mawlh chu ka hre châk a ni. Ani hi a lo dam lo ru reng zawk em ni? Lo dam lo ni ta se engatinge min hrilh loh? Kei te chu a fanu ka ni a, a dam loh chuan min hrilh ve awm tak. Ni lo, ka nu hi a dam lo lo vang, a taksa chak tawk loh avangin a tlu mai chauh a ni zawk ang.

Ni e, kei hian ka nu hi ka ngaihtuah tawk lo a ni. Ani chuan chhun zan zawmin hna a thawk ṭhin a, kei lah chuan a mamawh ang pawhin ka ngaihtuah ngai si lo. Kei hi ka â tak zet, mahni nute ngaihtuahna pawh nei lo fanu mai ka lo ni e. Ka rilru chu a kawkalh nuai a, a hahin a buai tak zet bawk. Ka nu chu ngaihtuah namen lovin ka ngaihtuah a, ṭhutna remchangah chuan lo ṭhuin ka lo nghak ta ngawt ngawt.

Thil hre chhuak thutin ka phone chu ka phawrh a, u Marema chu ka call zui nghal. Ka phone call a lak rual chuan aw zângkhai zet leh ngainatawm zet hian min lo chhang a, kei erawh mood off tak ka ni. U Marema chuan ka ṭawngkam aṭangin thil dik lo a awm tih a rawn hre ta vat a, min ngaihtuah ta viau bawk. Min zawh avangin ka awmna chu ka hrilh a, ka bula a lo kal nghal tur thu min hrilhin kan inbiakna chu amah zawkin a titawp nghal.

"Mambawih" min hmuh rualin u Marema chuan a rawn ti a, ka ṭhutna bulah chuan a rawn ṭhu thla a, min ngaihtuah hmel hle.

"U Marem" ka lo ti ve sep a, amah ka hmuh chuan ka ṭah a rawn chhuak zual sauh.

"Enge thil dik lo awm? Min han hrilh teh Mambawih, i awm danah hian thil dik lo a awm ngei tih chiang takin ka hria" tiin ka biang chu a kut pahnih chuan a rawn chelh a, ka ṭap chhuak ta hawk.

"Hei Mambawih, ṭap lo khan min han hrilh teh, hetiang taka lungngaia i awm chhan hi min hrilh rawh le! I dam lo em ni?" min ngaihtuah zet hian a rawn ti leh zung zung a, keipawh chu ka ṭap reng duh ta bik lo.

"Ni lo, ka dam lo hleinem, ka nu zawk a nia ka rilru hahna chhan. Ka nu chu tunah Hospital an lo panpui mek a, ni khaw hre lovin an hnathawhna hmunah a tlu a, ka nu chu ka ngaihtuah tak zet a ni u Marem" tiin a âwmah chuan ka bei thlawp a, ani pawh chuan min kuah nghet ta hle.

"Lungngai reng reng suh Mambawih, ka awm alawm. Eng pawh ni se i nu chu a ṭha turah ngai phawt ila, keima'n engkim ka lo buaipui dawn nia" tiin ka hnung chu a beng thek thek a, min hnem dan vel chuan thlamuanna min pe a, ka pa âng chhunga awm ang mai niin ka inhria.

"Le! Ṭap tawh suh le! I nute pawh chu an lo thleng ṭep ang, hetianga i ṭah pur chuan i nu pawh buaipui thei lovin ka awm palh zawk mai ang e" tiin ka mittui te chu a kutin a rawn hru fai a, min nuih sak bawk.

A sawi ang ngeiin ka nute an lo thlen chuan u Marema chuan engkim a lo buaipui a, ka nu pawh chu ama'n room hranah a luhpui nghal a, lo hlauthawng lo tur pawhin mi hrilh nasa hle. Amaherawhchu chutiang maiin ka nu ka ngaihtuahnate leh ka hlauhthawnna te chu ka tibo thei mai lo va, thihna hial thlen thei khawp natna a lo nei reng ang tih ka hlau ta ber. Pawnah chuan ka lo ṭhu reng a, ṭhut pawh ṭhu lovin ka kal kûal ka kal kual zawk a ni.

Darkar khat hnu velah chuan u Marema chu ka nu an hruai luhna room aṭang chuan a lo chhuak a, mahse a hmelah erawh lungngaihna ka hmu thei ta tlat mai. Enge ka nu chungah chuan thleng ta ang? Engatinge u Marema chuan hlim hmel min hmuh miah loh? Hmanhmawh takin a awmna lam chu ka pan phei vat a, a bul chu ka thleng phei rang hle bawk.

"U Marem, enge chanchin? Ka nu chu engvanga ni khaw hre lova tlu ringawt nge a nih?" a kuta chelh chung chuan ka ti sawk sawk a, ani erawh min hmuh tirh aṭang khan a la ṭawng miah lo thung.

"Sawi teh u Marem, min tihlauthawng zual a nia, hetianga i ngawih tlat chuan ka rilru a hah zual a, ka buai vek tawh a nih hî" mi mit mei veng reng renga ṭawng rin pawh ka hlau tawh lo a ni ber.

"Mambawih" a rawn ti sup a, thawk chu a la zui deuh hawk bawk.

"Muangchang lo khan min hrilh vat teh u Marem, ka nu chu a ṭha ti raw? Nge a taksa a lo dam lo nasa viau zawk?"

"Engatinge i nu hi a dam lo tih min hrilh miah loh?"

"Maw? Ka nu chu a lo dam lo ngei i tihna em ni? Engmah, engmah ka hre bik lo u Marem, ka nu dinhmun chu min hrilh chiang vat teh" hlauhthawnnaa khat aw chuan ka ti a, ka ṭap chhuak thei mai dawnin ka hria.

"I nu hi a dam lo a ni. A taksa hi nasa takin a dam lo a, tunah hian Pumpui Cancer natna a vei mek. Mahse i thiam loh a awm lo tih hria la, i nu dinhmun avang hian nangmah inthiam lo lutuk suh" eng thu nge a rawn sawi tak hi!

"Enga!? Ka nu chuan Cancer natna a vei maw!? A theih loh, a ni thei lo u Marem. Ka nu hian min kalsan leh dawn i tihna em ni? Ka duh lo, ka phal tawh lo" ka ti thuai thuai a, a tawp lam phei chu ka aw a lawi vek a, ka ṭap chhuak ta nge nge.

"A pawi ka ti lutuk Mambawih, engkim hi ka thiam loh vek zawk a ni. Doctor ni ve si hian i nu hi a dam lo tih pawh ka lo hre lo a nia, ka thiam loh a ni e Mambawih" a âwma min kuah bet chung chuan a rawn ti ve thuai a, kei erawh ka ṭap bang thei rih lo.

"Ka nu hi i la tidam thei ang em u Marem? Cancer nazawng an thi vek kher lo a ni lo'm ni? A nunna hi chhan leh hram rawh, khawngaihin u Marem?" ṭap ṭuau chung chuan ka ti a, thi mai tur chuan ka nu chu ka la ui lutuk.

"Mambawih" a rawn ti thawp sup a, min chhan dan chu ka duh khawp lo.

"I chhan thei ang ti raw u Marem? Doctor i nih khâ, i chhan ngei ngei a ngai, ka nu hi ka tan chuan a pawimawh lutuk" ka ti leh vak a, u Marema chuan a hma ai zawnga nghetin min kuah ta vat.

"Mambawih, dawt ka hrilh thei lo che. I nu hi tunah hian Stage 4 a ni tawh a, hetiang Terminal Stage hi chu tihngaihna a awm tawh lo a ni. A awmzia chu a nunna hi ka chhan thei tawh lo, tun ai hian thla hnih thla thum vel talin lo hre hma ni ila chuan ka chhan thei ngei ang" a thu rawn sawi avang chuan min kuahna aṭangin ka tal pit a, chutah ring tak hian

"Ni lo, a thi thei lo. Ka nu hi ka chan thei lo, Doctor i nih chuan tidam ang che, i tidam ngei tur a ni" ka ti leh vak vak a, a âwmah chuan ka chum vak vak pah bawk.

"Mambawih, a pawi ka ti" tiin min lo kuah bet leh nghal a, tal nasa viau mah ila min thlah chu a tum tawh loh hmel hle.

"Khawngaihin u Marem, khawngaih takin" ka ti chhuak leh thei hram a, ka ṭah nasat lutuk vang leh ka rilru nat lutuk avang chuan ka chau vek a, chu thu ka sawi zo chu engmah ka hre zui tawh lo.

Marema POV

"Mambawih, ka tihpalh tak zet, engkim hi ka thiam loh vek a ni" rilru na tak chuan ka ti a, mahse ka mi kuah beh mek chuan thawm reng a rawn chhuah tawh lo.

"Mambawih" tiin ka kuahna tithawlin amah chu ka en a, a lo zawi vek a, engmah hre tawh lo ang mai hian a mit a lo chhing daih tawh bawk.

"Lalpa le! Mambawih, harh teh" tia sawi harh ka tum pawh chuan mitthi ang maiin a lo zawi vek a, hlauhthawnna chuan ka khat nghal.

Mambawihi chu ka pawm kang lawp a, rang takin ward lamah chuan ka phei pui a, khum lo ruakah chuan ka dah thla ta vat. Nurse te chu min pui turin ka au ṭhawt ṭhawt a, chutiang taka awka nem lova ka biak thut vang nge ni Nurse te chuan min hlauh hmel hlawm hle. Doctor hna ka thawh tirh aṭang tawhin ka Doctor pui te leh Nurse te chu ṭawngka mawi lovin ka be ngai lo va, vin phei chu ka vin ngai lo hrim hrim zawk.

Nurse te chuan hmanhmawh takin Mambawihi chu an buaipui zung zung a, keipawh chuan hmanrua te lain Mambawihi chu ka endik nghal vat bawk. Chutianga ni khaw hre lova a tluk ve ringawtna chhan chu a rilru nat lutuk vang a nih ka ring a, mahse chu mai chu a lo ni hauh lo. Ka result hriat chu ka awih mai ngam lo va, check ṭhat leh ka duh avangin ka office lamah Nurse te chu hruai phei turin ka ti zui leh nghal bawk.

Ka office chhunga Mambawihi an dah luh hnu chuan Nurse te chu keimaha ka tih theih tawh thu ka hrilh a, an chhuah dawn chuan tûmah lo lut rih lo turin ka hrilh a, keimah chauha Mambawihi chu en ṭhat leh ka duh vang a ni.

Uluk takin ka tih tur chu ka ti mawp mawp a, Mambawihi erawh chuan engmah a hre lo thung. Vawiin zet zawng ka va buai em, ka nupui ni mai tur ka buaipui a, chutah ka pizawn ni mai tur chu Cancer natna a vei thu ka hre leh bawk a, rilru a hah duh khawp mai.

Dimdawi takin Mambawihi chu ka buaipui a, a nih dan tur ang thlapin ka bawihsawm bawk. Mahse eng thil nge ka hriat leh tâk hi!? Ka check hmasak zawk khan ka hre tawh a, mahse khatih lai kha chuan a tak a nih ring nghal mai duh lovin ka ringhlel a nih kha! Tunah zet zawng ka check ṭhat leh hnu paw'n result chu a la ngai reng a, rilru hahna karah pawh ka thil hriat avang chuan ka va hlim si em.

A thu hrimin engtinge kei hian ka hriat miah loh theih zawk? Doctor chu ka inti ve si a, Doctor thil hre thei lo tak ka ni ngei ang. Mambawihi hmel chu ka en a, a hmaite chu ka chul a, ka khawngaih hle a ni. A tan chuan a nu chu a pawimawh em em tih ka hria a, chutah a nu chuan Cancer natna a lo vei reng tih a hre leh ta zel a, ni khaw hre lova a tlu te chu awm ka ti hliah hliah.

Mambawihi chu ka office-a ka dah tho avangin ka chhuahsan a, a nu ngaihven tur chuan ka chhuak a, ani erawh a lo harh ṭha tawh a, ni khata an nufaa han buaipui chu dam lo dangte ang ngawt chuan ka en thei lo a ni. Mambawihi nu mutna bul ka va thlen chuan min lo hmu mai lo va, ka awmna lam hawi lova mi che vel en daih a nih vang a ni.

"Ka pi, i harh ṭha tawh em?" aw zângkhai taka ka va tih chuan Mambawihi nu chu a lo hawi a, min hmuh chuan mak a tih hmel hle.

"Aw, ka harh ṭha tawh e. Chuan engatinge drip te hi kan khai a? Drip khai ngai khawpin ka na hleinem, min lo phelhsak vat teh Doctor Marem" rilru hahna nei miah lo hmel deuh hian a rawn ti a, a awm dan chu mak ka lo ti letling zawk.

"Ka pi, Doctor ka nih hî, ka lakah hi dawt sawi miah suh. Engtik aṭang khan nge Cancer natna hi i vei tih inhriat tawh?" tlang tak chuan ka ti ta tawp a, Mambawihi nu pawh chu a nui tawp ta riai riai.

"Ka natna chungchang hi Mambawihi'n a hre tawh em? Hrilh miah suh aw, a hriat chuan min ngaihtuah lutuk avangin thil ṭul lo tak tak a ti leh mai ang" ka zawhna pawh chhang ta lo chuan a rawn ti thuai a, hetiang em ema nufa inngaihtuah tawn hi ka la hre lo.

"Ka pi, Mambawihi chuan a hre tawh a ni. Ani pawh i chanchin a hriat avangin ni khaw hre lovin a awm a, tunah hian ka room-ah ka enkawl mek a, mahse ngaihtuahawm em em a ni tawh lo"

"Âwww ka fanu chu ka va khawngaih tak em, a nu lah chu heti mai hi ka ni si a, a pa tal kha la dam se chuan zep nei miah lovin ka natna pawh hi ka hrilh ni mai tur" a mittui chu a biangah a rawn luang a, mahse a ṭap ri chuang lo.

"Ka pi, engtik aṭang nge Cancer natna hi i nei tih i hriat? Engatinge kei tal chu min hrilh loh?"

"Thla hmasa mai khan keipawh hian ka hre ve chiah a, ka thi ngei dawn tih ka hriat khan ka lungngai asin. Pumpui cancer ka ni ang tih rin ngaihna reng kha ka hre lo va, puan ka ṭhui laia ka pum a rawn nat riai riai lai te khan ka inentir duh ngai lo ṭhin. Cancer ka ni tih ka hriat chinah khan ka dam hun chhung rei lote ah tal hi chuan Mambawihi tan pawisa tam tak thawh chhuah ka duh a ni"

"Ka pi, lo boral dawn ta pawh ni la Mambawihi tal hi chu i natna hi hrilh tur i ni asin, hrilh lawk la chuan tawrh dan pawh a thiam deuh ngei ang"

"Ni e, hrilh kha ka tum ve ṭhin a, mahse ka hrilh chuan hna ka thawh kha a phal lo leh ngei dawn a, chu chu kei chuan ka duh dawn der si lo. Chuan Mambawihi chu a ṭha tak tak maw?" tiin zawhna chu min zawh zawm ta daih.

"Aw a ṭha tawh e, ka pi ngaihdam dil che ka duh a" ka tih chuan mak a lo tih hmel hle a, a thih hma hian hriat ve chu a phu a ni.

"Eng thilah chuan nge ngaihdam min dil duh a? Ka va hrethiam lo ve Doctor Marem"

"Ka pi, Mambawihi nen hian kan chesual tawh a ni. Tunah hian ka fa thla hnih mi a pai mek a, mahse ka thlahthlam dawn lo tih min hriatsak dawn nia. Mambawihi hi nupuia neih ka duh a, i rem tih chuan neih ngei pawh ka tum a ni" ka ti a, a rilru natna tur belhchhah dawn mah ila a hriat ve ngei chu a ngai a ni.

"Maw? Mambawihi chu a rai maw!? A awmzia chu kei hi pi ka ni dawn tihna em ni?" a rawn ti ta daih a, rilru na tura ka ngaih laiin ani erawh a rawn hlim viau thung.

"Aw ni dawn e, chuan ka pi hna hi thawk tawh suh aw, keima'n ti hian damdawiinah ka enkawl char char mai ang che" ka tih chuan

"Chutiang ringawt a theih hleinem, ka dam ve ṭawk ṭawk chhung chu ka thawk dawn" a rawn ti nghal a, Mambawihi nen danglamna an awm lo.

"Doctor, i office-a mi kha a lo harh a, mahse i thu lo chuan kan lo chhuahtir duh bawk si lo va, a buaithlak khawp mai saw" ka ṭawng leh dawn chiah tihin Nurse pakhat hian a rawn ti a, keipawh chu tho vatin ka office lam chu ka pan ta vat bawk.

"Ka chhuak duh ka tih chû, min lo dang suh u, ka nu ka hmu dawn" ka office ka thlen chuan thinrim tak hian Mambawihi chuan a lo ti phiar phiar a, inthununna chu a tlachham tawh tak zet a ni.

"Lo va chhuak r'u" tiin Nurse te chu ka hrilh a, a chhuak zui sap sap a, Mambawihi chuan min lo melh rum ngei mai.

"Mambawih" ka tih rual chuan

"Awm sawn rawh, ka nu ka hmu dawn, min lo dan tum miah suh" tiin min kal pelh a tum a, mahse ka dang lo thei lo.

"Mambawih, i rilru a hahin a na tih chu ka hria, mahse rilru fim put hram hram tum teh" ka ti deuh hrawk a, mittui tling pam hian min en a, ka vin leh ta vak chu ka inchhir hnuhnawh ta hle.

"Min vin vak zel suh" tiin a rawn ṭap chhuak hawk a, tunah chuan a ṭah belh em emna chhan pawh chu ka hrethiam vek tawh.

"Ka tihpalh Mambawih, mahse ka thu hi zawm rawh, i tan pawh a ṭha zawk ang. I chiai tih ka hria alawm, mahse i rilru nat avanga i intihnat palh chuan kan naute tan a ṭha lo a ni" ka tih chuan a ṭap lai tawp chatin min lo melh a, ka lo nuih suk thung.

"Naute a!? Khawia naute nge i sawi? Kei hi ka rai em ni? Ni lo, chu phei chu thil theih a ni lo. Ka nuin hria se engtinnge min ngaih ang, ka rai lo ti raw u Marem?" a rawn ti nawk nawk a, a rilru put hmang tur chu ka hriatthiampui khawp.

"I rai ngei e Mambawih, nang hian ka fa thla hnih mi i pai mek a, chumi avang chuan kei chu ka lawm viau asin. I nu paw'n nichin deuh mai khan a hre tawh a, ani pawh pi a nih tawh dawn avangin a lawm hle zawk a ni"

"Ni lo u Marem, rai thei ka ni lo. Kei hi mi lak tlak loh tak ka ni e. Ka nu pawh ka ngaihsak ṭha hman lo va, keimah avangin he Cancer natna hi a vei a ni"

"I thiam loh pakhatmah a awm lo Mambawih, keimah zawk hi ka tlaw em a ni. I nu hi ka ngaihsak tur thu i hnenah ka sawi a, mahse hetiang natna a vei leh vei loh pawh ka lo hre lo a ni a, nang ni lovin keima thiam loh zawk a ni"

"Ka la awih thei lo a ni u Marem, engatinge ka nu kher hian he natna hi a neih? Engatinge mi dang an nih mai loh? Ka nu hi khawvela ka thisen zawmpui dik tak awmchhun a ni tawh asin, a thih hi ka phal thlawt lo a ni"

"I ngaihdan tur chu ka hriatthiampui lutuk che alawm, tunah tut tut a thi nghal dawn tihna pawh a ni lo va, a thih hma hian hlimna hun a la nei zawk asin"

"Ka nu chu a harh tawh em? Tunah ka hmu duh a ni. U Marem, min hruai vat teh" a rawn tih chuan ka lo kuah vat a, ani erawh a lo tal leh phat phat reuh tawh.

"I nu chu kan hmu dawn nia, mahse i hlim ve miah lo em ni? Nau i pai avang hian i hlim ve miah lo em ni? Kei chu pa ka ni mai tawh tur hi ka hlim viau asin"

"Ka hre rih lo u Marem, tunah chuan chutiang ngaihtuah hman ka ni lo, ka nu ka hmu duh a ni. Ka nu awmna ah chuan min hruai vat teh"

"Aw le, ka hrethiam e. I nu hmu tur chuan kan phei dawn nia, amah paw'n a hmuh châk ve hle che ka ring. Amaherawhchu thil pakhat min tiam rawh"

"Eng thil nge tiam tur chea min duh chû? Ka kal vat duh a nia" tiin a rawn tal leh a, kuah ṭung tawh lovin a darah ka chelh tawh bawk.

"I nu hmaah i ṭap tur a ni lo, i ṭah chuan i nu rilru a na dawn tih hria la, insum hram hram ang che"

"Ka tiam thei lo che u Marem, mahse ka tum ang, ṭah loh hram ka tum ang" a rawn tih chuan a hmuiah ka fawp zeuh a, a nu awmna lam chu ka panpui ngal bawk.

Ka office aṭanga kan chhuah chuan min en duh tawk an lo tam em em a, a bikin Nurse ho chuan min lo en nasa. A chhan pawh ka hre vek, Mambawihi chu a kutah ka kai miau alawm. Ka mi kaihnu ber pawh chuan engmah a sawi lo va, tumah a en lo va, a ngaihtuahnaah a nu tih chauh lo chu an awm lo tih ka hre thei a ni.

Mambawihi chu ka bialnu, ka ngaihzawng ni lai mek, nakin lawka ka nupui ni mai tur a ni a, thil thleng vel avang chuan thlahthlam phah ka tum lo va, ka hmangaih zual sauh zawk a ni. A tawrh chu hmeichhe tawrh atan chuan a nasa lua deuh ka ti a, chutah thihna ngat phei hi chu tû tawrh atan pawh a ṭha lo hrim hrim. Mambawihi nu awmna kan va thlen chuan a nu chuan

"Mambawih" a lo ti hluai a, keini pahnih pawh a bula ṭhutna lo awm chuan kan ṭhu a, Mambawihi chuan a nu kut chu a chelh tlat bawk.

"Nu, engatinge engmah min hrilh loh? Engatinge dam lohna i nei tih tal min hrilh loh? I fanu ka ni lo em ni?"

"Chutiangin ngai suh Mambawih, ka ngaihtuah em che avangin ka hrilh duh lo che a, ka hrilh ngam lo zawk che a ni"

"Ka tihpalh nu, i mamawh ang pawha ka ngaihsak loh che avagin ka tihpalh a ni nu. Kei lah chu mi hur herh ang maiin ka lo rai thawt thawt a, fanu lepchiah tak zawng ka lo ni e"

"Hei he hei, khatiangin nangmah leh nangmah kha inngai suh, nang chu ka fanu fel leh hmelṭha, nun mawi leh nun dik nei i ni alawm" a nu chuan a rawn ti vat a, kei chuan an nufa inbiakna chu ka lo ngaithla a ni ber. Chutah Mambawihi nu bawk chuan

"Kei chu pi ka ni tawh mai tur hi ka lawm em em a, mahse ka hmu hman dawn lo erawh pawi ka ti. Mambawih thil min tihsak ta che, ka thih hmain Doctor Marema nen hian thil min tihsak ula ka duh a ni" a rawn ti leh a, kei min sawi tel ta daih chu mak ka ti hle.

"Enge kan tihsak ang che ka pi? Eng pawh sawi rawh, kei chuan ka tih theih apiang chu ka tihsak ngei ngei ang che" ka lo ti vat a, Mambawihi erawh a ṭawng duh mai lo.

"In kut kha lo la teh u" a tih chuan Mambawihi nen chuan kan kut chu kan pe a, kan kut pahnih chu a hum ta ran bawk.

"Ka thih hma ngei hian nangni hi innei ula ka duh a ni. Doctor Marema pawh hian a hmangaih che tih ka hria Mambawih, chuvang chuan lo thi ta pawh ni ila a hnenah hian ka hlan ngam tawh che a ni" a rawn ti leh a, ka beisei loh lam daih a rawn sawi.

"Ni lo nu, thi tur ang khan in sawi ringawt suh, i dam ṭhat hma chu pasal ka nei dawn lo" Mambawihi chuan a rawn ti leh tlat a, mahse a nu chu a dam rei tawh dawn lo tih ka hre chiang ropui si.

"Ka thi thuai dawn alawm Mambawih, chu chu i hria tih ka hria. Inṭhen tawh lo tura in pahniha in awm dun lai tal hi chu ka thih hma ngei hian hmuh hman ka duh a, chu chauh chu ka duh a ni"

"Ka pi kei chuan inneih chu ka duh tawh reng a, Mambawihi inpeih hun hi ka la nghak mai mai zawk a ni" ka lo ti ve thuai a, a nu duh dan chu Mambawihi chuan pawm mai se ka ti.

"Mambawih" a ngawih reng avangin a nu chuan a rawn ti leh a, Mambawihi ṭawng chiah kan ngaichang tawh a ni ber.

"Aw le nu, ka nei ang. Pasal chu ka nei ang, i hmuh lai ngeiin u Marema nen hian kan inneih ang" a rawn ti ṭuau a, vawi leh khatah a tlan chhuak thut bawk. Keipawh chuan Mambawihi chu ka um ve nghal a, ka va hmuh chuan step-a ṭhu chung hian a lo ṭap khur char char.

"Âwww Mambawih, lo kal teh, i nu hmuh laia i ṭah duh loh avang khan ka lawm e" tiin step-ah chuan ka ṭhu thla ve a, ka âwmah chuan ka kuah bet zui nghal.

"Cancer hi ka hua, ka haw lutuk. A hmain ka pa min laksak tawh a, tunah ka nu min laksak a tum leh a, thih daih mai ka duh u Marem"

"Hei khatiang thu kha an sawi ngai lo, i thih daih te chuan kei hi i tel lovin ka awm thei nâng"

"Theih se chuan ka nu tawrh ai hi tawrh vek ka duh, mahse a theih ngawt si loh" a ti zo chiah chu a rawn ṭap ri ta hawm hawm a, ka kawr hnung chu a theih anga na chuan a hmer tawn tawn bawk.

Kan thawm avangin inentir tuma mi vei vak leh Nurse ṭhenkhat te chuan min en duh hlawm hle a, mahse tûmah ka zah lo. Ka hmangaih chu ka âwmah a ṭap a, ka ṭâng belin a awm a, kei chuan mi mitmei ven aiin ka hmangaih chu duat taka kuah ka thlang zawk a ni.

Chapter 24

Zan lamah chuan Hospital-a enkawl chilh ngai khawpa dinhmun derthawngin Mambawihi nu chu a rawn awm thut a, ICU-a dah luh theih Stage-ah a awm reng tawh tih chu hre tho mah ila chutiang êma a rawn chak loh thut chu ka ring hran lo va, a chhan pawh chhun lama a dinhmun a ṭhat pangai em vang a ni. Enkawlna changtlung leh uluk zawkin kan buaipui a, kei chauh ni lo ka thawhpuite pawh chu an buai ve hle.

Mambawihi erawh a nu bulah a awm chawt a, kalsan a tum leh tawh lo hrim hrim zawk. Keipawh chuan ka awmpui deuh reng a, mahse ka duh ang takin an bulah chuan ka tal tam hman lo.

Ka thawhpuite pawh chuan chutiang taka ka lungngaih chu an la hre lo va, Mambawihi chu ka tan tunge a nih an hre hek lo. Zan dar 9 thleng Hospital-a ka awm reng tâkah chuan ka nu hnen aṭangin phone call ka dawng a, ka haw hman loh thu chauhin ka chhang hman tihah phone chu amahin a tawp daih.

A hnu rei lote ah ka pa hnen aṭangin phone call ka dawng leh a, zep lovah chuan ka buai bawk nen phone lo lak vel chu ka hman lo hle a, mahse min lo biak tum tute chu ka nu leh pate an ni tlat. Ka thil tih lai chu dah felin phone call chu ka la a, kan inbiak rei loh em avangjn ka nu chu a thin a rim leh ngei ka ring.

"Aw ka pa" ka lak rualin ka ti a, ka pa chuan

"Engatinge phone call i va la thei lo ve? In buai viau em ni?" a rawn ti a, ka nu chuan khawi keima'n ka lo bia a lo ti deuh chhen ri chu ka hre pha vek bawk.

"Aw buai ve e, engenita?" ka lo ti ve mai a, chutah ka nu chuan

"Nichin khan i off em ni? I lo haw har lutuk a, kan ngaihtuah che a nih hî, engatinge tih lampang zawhna inzawh chi pawh a ni lo" a lo ti deuh hmak hmak a, ka pa phone aṭanga min biak theih danah loud speaker on in min bia a ni ngei ang.

"Ka off lo hrim hrim, network a chhe thut a ni ang"

"I lo haw tawh dawn em? Zan dang aiin i rei zek leh nghal a, in la buai viau em ni?"

"Aw la buai khawp mai, zanin chu kan inah khan ka riah ka ring lo, Hospital-ah hian ka awm a ngai a"

"Em em che chuan, engatinge? Dam lo serious tak an awm em ni?" a rawn tih laiin ka pa chuan

"Nui, i ṭawngkam kha duhthaw lutuk ṭhin suh, tun hnai hian i ching thar riau a nia" a lo ti ve sup a, a sawi dik reng bawk.

"Dik chiah, i ṭawngkam hi fimkhur ve deuh teh nu. Chuan ka pa nen khan lo la meng r'u aw, ka lo haw lawk dawn, thil pawimawh deuh mai sawi tur ka nei. Chuan ka let leh vat a ngaih dawn avangin kan awmpuinu khan ei tur tam deuh hlek emaw lo siam mahse a pawi miah lo vang, thil pawh ka la ei mumal lo" ka tih chuan ka pa zawkin

"Aw le, lo haw thuai la, chanchin pawh chu i lo thlen hnuah i sawi zawk dawn nia, phone kaltlang hi chuan a buaithlak em mai" a rawn ti ve a, kan inbiakna pawh chu kan titawp zui nghal.

Mambawihi te awmna Cabin-a ka luh chuan an lo muhil ve ve a, ka haw lawk tur hrilh tuma lut kha ka ni a, mahse an awm dan avang chuan hrilh lovin ka chhuahsan leh ta zawk. Kan in lam pana ka inkhalh haw lai te chuan engtinge ka nu leh pate chu ka hrilh ang tih ka ngaihtuah a, han sawi mai dan tur chu ka hre lo a ni. Mambawihi nu duh dan chu an lo rem ti lo mai ang tih ka hlau rilru hle a, mahse ka sawi tum chu Mambawihi nu duh dan chiah a ni lo tih ka hre chiang hle.

"Eng thil pawimawh maw i sawi duh chu ni a Marem?" sitting room-a kan ṭhut thlak rualin ka pa chuan a rawn ti a, ka nu pawh chuan ka thil sawi tum chu hriat a châk hmel viauin ka hria.

"Mambawihi hi nupuiah ka nei dawn, tun thla ngeiah hian ka neih a ngai. Ni lo, tun karah emaw kar leh emaw zawkah pawh hian a ni maithei" ka tih chuan ka nu chuan mak a lo tih hmel hle a, chutiang bawkin ka pa pawh.

"Engati thawt thawt nge? I va hmanhmawh ve, ka pawm ang ka tih avang khan nupuia i neih nghal mai ka phal tihna a ni hleinem" ka nu chuan a rawn ti a, ṭawng a châk khan ka hre tawh reng a ni.

"Nu, tun hi i phalna lak hun a ni lo, ka pa'n a phal chuan a tawk. Ni lo, ka pa paw'n phal lo eng ang mahse Mambawihi hi nupuia ka neih ngei a ngai"

"LALREMRUAT, i nu ka ni hî, zah lo deuh hian min be ṭhin suh, ka dawhthei mah mah tawh zawk che a ni"

"Ka nu i ni lo ka ti reng reng lo, ka zah viau zawk che asin, mahse nang chuan i awm dan i thlak duh lo tlat a, Mambawihi te kha i lo be ṭha der vel mai mai em ni? Engatinge tuna taka ka nupui atan chuan i duh leh si loh?"

"A rei lo lulai em alawm le, a hrim hrimin Mambawihi pawh chu ka en thli thlai a ngai ve alawm. A fel em tih te, kan ina mo ni turin a nungchang a ṭha tawk em tih te ka hriat ve phawt a ngai alawm"

"A fel, a fel lutuk. Kan ina a lo awm hnuah chuan kan phu lohzia i hre mai ang" ka ti ve leh ta salh a, ka sawi tum ber pawh ka la sawi thei lo.

"Duh tawk teh u, khatianga inhnial lo khan Marema pawh engvangin nge Mambawih chu neih i duh thut? Ni dangah i sawi ngai bawk si lo, a chhan te chu sawi ve vat ta che" ka pa chuan a rawn ti ram ta hmak a, lo inrawlh lo se chuan keini pahnih chu kan inhnial zankhûa leh thei mai ang.

"Aw le ka pa, Mambawihi ka neih duh chhan chu ka hmangaih vang a ni. Tun tut tuta ka neih duh chhan chu a nu'n inneih tura min duh vang a ni a, a chhan" ka tih lai chuan ka nu chuan

"Enga!? A nu duh dan vang mai maiin nupuia neih chu i tum maw!?" a rawn ti a, chutah ka pa chuan

"Lo ṭawng tawh rih suh, chuan nang pawh sawi chhunzawm rawh" a rawn ti leh hmuk a, ka nu pawh chu a ngawi chiang hle.

"A chhan chu maw pa, tunah hian Mambawihi nu hi Cancer natna veiin ka enkawl mek a ni. ICU-a dah theih dinhmunah a ding reng tawh a, a dinhmun a ṭha lo tak zet bawk. Ani chuan a thih hma ngeiin a fanu chu nupuia nei turin min duh a, chu chu a duhthusam hnuhnung ber a nih thu min hrilh bawk a ni" ka ti chhuak dap a, ka pa chuan chik zet hian min lo en ran bawk.

"Chu chu em ni nupuia neih i duh thawt thawtna chhan chu!? Chutiang a nih chuan" tia ṭawng zawm a tum lai chuan sawi hmaih ka nei tih ka inhre chhuak nghal.

"Lawk pa, thil dang a la awm. Tunah hian Mambawihi hian ka fa a pai mek a, ka fa chu thlah hnih mi a ni tawh bawk. Vawi tam ka ngaihtuah hnu pawhin ka hmangaih vanga neih ka tum chu thu hran ni se, ka fa a pai vang hrim hrim pawhin Mambawihi hi ka neih ngei ngei a ngai a ni" ka tih chuan mak a tih hmel hle a, ka nu pawh a bang chuang lo. Mambawihi'n ka fa a pai mek lai tak chu mak an ti a nih ka ring.

"Chutiang thleng thleng in lo kal hman tawh a ni maw, inneih pawh lo duh ta ula dan khatna chuan in thei tawh lo chiang a, a hriat tak tak hmaa in inneih pawh chu a ṭul zawk maithei a ni" ka pa chuan a rawn ti a, chutah ka nu chuan insumna tlachham zet hian

"LALREMRUAT le! Dan khatna ngeia nupui i neih ka lo ring asin, engkim lah chu a thleng vek tawh bawk si" a rawn ti a, ka pa paw'n a pawimawh a hriat tawh tho avangin a khap buai duh tawh lo.

"Ni e nu, engkim a thlen vek tawh miau avang hian sawi sawiin awmzia a nei lo. Pa, palai chu a rang thei ang bera tirh ka duh a ni" tiin ka pa bawk chu ka be leh ta daih.

"Chutianga Mambawihi nu a awm si chuan keini lam paw'n hma kan lak vat a ngai a nih chu! A hrim hrimin tunah enge Mambawihi nu dinhmun chu ni reng reng?"

"Ka lo kalsan dawn lai kha chuan a muhil rih a, ka hriat sual loh chuan Mambawihi nu hian hun tam a nei tawh lo. A pawi ber chu a natna kan hre chhuak har leh ama'n a hre har lutuk hi a ni"

"Engtik nge palai tirh chu i duh hrim hrim? A hmanhmawh thlak ang reng fû bawk si a, i duh hun hunah kan tir mai dawn nia"

"Ka hre lo le, zaninah a theih chuan Mambawihi te pawh ka lo bia ang a, a har lo turah ka ngai ve hmiah"

"A ṭhat chu! Pi leh pu kan ni ve ta mai tur chu a lawmawm rual rualin Mambawihi nu chu a lainatawm hle mai"

" A lainatawm tak tak a ni. Chuan nu, ei tur chu i lo siamtir em? Mi pathum vel ei tur a nia, tam deuh hlek siamtir turin ka tih che kha aw" tiin ka nu chu ka be zawm ta daih a, ka nu pawh chuan

"Aw siamtir e, Tlazovi ka lo siamtir vek tawh kha! Pai phei theih turin a siam nghe nghein ka hria" a lo ti ve mai a, keipawh chu ka ṭhutna aṭanga tho chhuakin kan choka awmna lam chu ka pan zui nghal.

"Pa ka lawm e, ka thuthlukna min pawmsak avangin. Chuan nu nang pawh ka lawm e, Mambawihi i mo atana i pawm dawn avangin" kan ina aṭanga ka chhuah dawn chuan ka ti leh hram a, ka pa pawh a lo bu nghauh mai. Ka nu erawh a ṭawng miah lo va, ka thusawi chu engtin mah min lo chhang let ve lo.

Ei tur nen Hospital lamah chuan ka inkhalh phei leh a, ka chhungte berin ka nupui neih an rem tih avang chuan tlemin ka rilru pawh a zângkhai leh ta deuh. A hma te kha chuan ka ngaihtuahna chu a buai nuai a, ni khat thil thua ka thil tawn ho chuan rilru hahdam paw'n min siam hman lo a ni ber zawk. Hospital ka thlen chuan peng kual vel lovin Mambawihi te awmna lam chu ka pan a, mi ṭhenkhat min lo biakna te chu ka kalpah chhan ta vel mai mai.

"U Marem" Cabin chhung ka luh rualin Mambawihi chuan a lo ti a, keipawh chu ka nui lut ta suk a, a nu erawh a lo la harh leh lo a nih hmel.

"Khawnge i kal a? Ka zawng deuh che a, ka hmu mai bawk si lo che a, keimahni avangin i buai viau ta hi ka inthlahrung khawp mai"

"Mambawih, min mi hrang en tawh suh ka tih khâ, i pasal ni tawh angah min ngai la, ka lakah hian inthlahrunna nei tawh miah suh"

"Aw le, i fel lutuk hi ka inthlahrung leh tlat zel alawm. Chuan khawnge i kal bo daih a?"

"Kan inah ka haw lawk a, ka nu leh pate pawh engkim ka hrilh tawh e. Mambawih, khawiah nge palai kan tirh ang? I putea te lamah em ni ang?" ka zawha avang chuan mak a tih hmel ta hle.

"Ka hre lo, ka nu hi rawn harh ṭha deuh phawt se, ka nu tih dan dan a ni mai"

"Aw le, mahse inneih har thei kan ni lo tih hria la, a rang thei ang berin palai chu kan tir dawn tih lo hre bawk ang che. Chuan i nu enkawlna man lamah hian buai suh aw"

"Ihhhhhh..eng lo a nia, zep lovah chuan ka lo buai ru reng tawh zawk a, damdawi in hman man leh drip khai man te hi a to awm si a, ka rilru dik takah" a tih lai chuan ka kutin a hmui chu ka lo hup vat a, amah a inhmu hniam leh ṭan tawh tlatin ka hria a tin ni!

"Mambawih, thil pakhat chu maw, nang ka hriat hnu thla khat vel aṭang khan in nufa tan pawisa ka khawl ṭhin a, Christmas boruak velah pawh khan pek che u ka tum a, mahse keimah zawkin ka theihnghilh leh si avangin ka pe leh ta lo che u a ni"

"U Marem"

"Kan sawi zo phawt Mambawih, chuan chu pawisa chu ka ta a ni lo tih hria la, in ta a ni tih hria ang che. Tun hunah hian chung in pawisate chu kan hmang ang a, a daih loh chuan ka pawisa kan hmang ve chauh dawn nia" ka tih zawh rual rualin Mambawihi chuan min lo kuah thlawp a, min kuah nghet reuh em em leh nghal.

"Ka lawm e u Marem, ka lawm lutuk. Nang ang mipa ṭha ka tawng che hi ka lawm a, ka hmangaih ang chiaha min hmangaih ve tu nang ang mipa ṭha, ka phu miah loh ka nei che hi ka lawm lutuk" a rawn ti a, a thusawi chuan min va tihlim tak.

"Keipawh ka lawm alawm Mambawih, nang ang hmeichhe hmelṭha leh rilru ṭha ka tawng che hi ka lawm lutuk" tiin a chhip samah chuan ka fawp a, amah a lian lutuk lo bawk nen ka âwmah chuan ka kuah bet hneh ang reng hle.

"Mambawih, thil ei lawk ang aw, i ril a ṭam tawh ang, engmah i la ei lo tih ka hria a nia" ka tih chuan ngawi reng hian min kuahna chu a thlah ve leh mai a, a awm dan te chu a lawmawm reuh tawp.

Zan dar 10 velah a nu chu a rawn harh hlawl a, ka awm lai tak a ni bawk nen a dinhmun chu ka enfiah ta zung zung. Mambawih ber chu a lung a la dam thei lo va, atan chuan hriatthiam a har ve dawn bawk em a ni. Mambawihi nu chuan min rin thu te, a fanu enkawl tur atan leh pasal atana kei chu ka ṭhatzia te a sawi a, a thusawi avanga ka lawm rualin amah chu ka khawngaih em em thung.

Zan lamah chuan Mambawihi nu chu a harh ṭha rei phian a, muhil leh tura ka tih pawh chuan a duh tawh ṭhak lo. Chutiang chuan keini pathum chu kan inkawm a, eng eng emaw sawiin kan nui ho leh thei ta. Mambawihi chuan thu lungchhiat thlak lam emaw reng reng a sawi tawh lo va, a nu chu tihlim hram hram a tum ta zawk a ni.

"Nu, Stage 4 lai i ni tawh si a, engatinge i sam hi a la tam em em si? U Marem, ka nu hi Cancer a ni leh lo a ni lo maw? Hei en mah la, a sam hi a la ṭhat em hî" Mambawihi chuan a rawn ti chhuak phawng a, kei erawh chuan a nu sam chu a lem a ni tih ka hre chiang hle.

"Mambawih, ka lo la hrilh lo palh che a ni mâw, ka sam hi a tak a ni tawh hleinem" ka chhan hmain Mambawihi nu chuan a rawn ti ve ta vat.

"A ni maw!? Mahse nu a tak a va'n ang em em, a lem a ni tih ka hre miah lo"

"Cancer ka vei tih ka inhriat ṭanna kha chu ka sam hi a ni a, keipaw'n khatia ka sam a rawn tlâ a rawn tla ta mai kha mak ka ti ṭhin hle. I hriat lovin Doctor te pawh ka hmu ṭhin a, kan dawra kal lo khan a ruka Doctor te hmuh kha ka ngah khawp mai"

"Nu, kei min hrilh duh lo a ni paw'n u Marema tal hi chu hrilh ta che, ani chu Doctor a ni a, enkawl dan tur che pawh a hre daih zawk awm si a"

"Ni ngawt mai ti raw, a tirhah te kha chuan keipawh hian amah ber hi rawn ka tum a, ka sam a tlak mawlh mawlhna chhan kha zawh ka tum hial alawm. Mahse ka hrilh a nih chuan nang hrilh ngei che a duh dawn a, chu chu keiin ka phal leh si lo ang a, Doctor Marema'n ka natna a hria tih i hriat chhuah hunah ani chu i haw leh ang a, in inkar hi ka tibuai duh lo alawm" Mambawihi nu chuan ka rin phak bakin thil a lo ngaihtuah thui daih.

"Nang chuan min ngaihtuah em em a, u Marema nena kan inkar a chhiat lohna'n tiin i natna pawh i zep a, thihna hial i tawh phah si. Ka nu, nang hi khawvela nu ṭha ber i ni a, i ni reng bawk ang. Min la dampui ṭawk ṭawk chhung chu i hlimna tur hlir siam ka duh a, min han dam rei pui thei la chu duhthusam a ni" Mambawihi chuan ṭap miah lo hian a rawn ti a, chuti taka insum thei a nih tih ka hmuh avang chuan nupui ka nei sual dawn lo tih ka hre chiang em em zui bawk.

"Ka thi dawn tih ka hriat khan ka lungngai a, a chhan pawh nang ka ngaihtuah vang che a ni. Amaherawhchu tunah chuan i kiangah mipa ṭha, rin tlak leh nangmah hmangaih em em tu che a awm tih ka hre tawh a, chu chuan rilru hahdamna min pe a ni. Kan Doctor Marema pawh ka fanu hi thlahthlam mai lo la, chhungkaw hausa aṭanga sei lian a nih loh avangin thil tam tak i zirtir ngai a awm dawn tih hria la, hmangaih taka ka fanu hi enkawl turin ka ring tawk em em che a, ka rinna che hi ka thih hnuah pawh ti chhe lo hram ang che" a rawn tih leh chuan

"Ka pi, ka tiam a che, i fanu hi ka hmangaih a, ani tluka min hiptu leh ka hmangaih hmeichhia hi ka nunah an la awm lo a ni. Chuvang chuan kei chuan eng pawh tawk se ka hmangaih ang a, ka thlahthlam mai mai lo vang. Chuan heti taka min rin ngam avang hian ka lawm a, i rinna hi engtikah mah ka ti chhe ngai lo bawk ang" ka lo ti ve thuai a, Mambawihi nu pawh chu lawm hmel zet hian a lo bu nghauh nghauh a, chutiang bawkin Mambawihi pawh chu a lo nui ve sen sen.

A tukah chuan Mambawihi nu chu a dinhmun a pangai leh ta viau a, zan lama palai tirhna hmun tur ka sawipui hman loh avangin chung thil vel chu sawipui ngei ka tum tawh bawk. Doctor Tetei chuan Mambawihi te nufa chanchin chu min zawt ve ziah a, keipaw'n engkim chu ka hrilh ve ta vek. Mambawihi'n ka fa a pai mek tih ka hrilh tirh te khan mak a ti em em a, chutianga ka che ve ta mai chu mak a ti a ni berin ka hria.

Ni e, keipaw'n nupui neih hma chuan mipat hmeichhiatna lam kawnga fihlim ka tum hram hram ṭhin a, Mambawihi ka tawn hma kha chuan ka fihlim thei a nih kha! Amaherawhchu Mambawihi ka tawn hnuah erawh mak tak maiin ka danglam a, Mambawihi taksa ka tawhna te chuan inthunun theihna min tlakchham tir ta a ni. Mahse khang thil ka ti te kha inchhirna ka nei miah lo va, pawi tihna pawh ka nei hran lo va, Mambawihi chu ka hmangaih tawh vangte pawh a ni ang.

"Ka pi, ka nu leh pate ka be vek tawh a, khawiah nge palai hi kan tirh ang? Mambawihi pute te lamah hian kan tir mai dawn em ni?" kan pathuma kan awm lai chuan ka ti a, Mambawihi nu pawh chuan ka thusawi chu a rawn ngaihven hle.

"A ṭhat mai ka va ring em, kei lah heti hian Hospital-ah ka awm daih bawk si a, Mambawih i putea te lam chu i be pawp tawh ti raw?"

"Aw nu, nizan khan ka hrilh a, vawiin lamah lo chhuk a tum alawm. Ka pitei kha chu naupang ho enkawl an la ngai bawk nen lo chhuk loh law law a tumin ka hria, anni lam paw'n an ngaihtuah khawp mai che" Mambawihi pawh chuan a lo ti ve mai.

"Vawiinah ka nu leh pate lo kal an tum a, an lo thleng ṭep tawh maithei a ni" ka tih chuan Mambawihi chuan min lo en vat a, mak a ti tih ka hre thei.

"A va inthlahrunawm duh awm ve le, mahse a lawmawm tho bawk si" Mambawihi nu chuan a rawn ti a, kei chuan

"Inthlahrunawm lo ve, ka pa phei chuan thil sawipui che a duh a, palai lam hi a nih ka ring" ka lo ti ve vat thung.

Chawhma lam dar 10 leh a chanve velah ka nu leh pate chu an lo thleng a, amah ang lo takin ka nu pawh chu a hawihhawm khawp mai. Ka sawi lawk ang ngeiin ka pa chuan Mambawihi nu chu palai tirhna tur lam chungchang a zawt ta ngei a, a dinhmun avanga pawi a tih thute a sawi a, an inbe tui ta phian. Chutah ka nu chuan Mambawihi chu a be ve chhen reuh bawk a, ka nu leh Mambawihi awm dan phei chuan ka lung a tiawi thlawt a ni.

Chawhnu lamah chuan Mambawihi putea chuan kan Hospital a rawn thleng a, ka pate an lo la awm bawk nen inchibaiin thil tih dan tur te an sawi zui nghal bawk. Ka nu chuan Mambawihi chu eng eng emaw ni a sawipui a, bazarpui lampang te a sawipui thânin ka hria. A ṭha ka ti tho mai, Kimtei kha ka nupui hual a nih hma aṭang tawhin a bazarpui ṭhin a, Mambawihi chu a bazarpui ka lo ring hrim hrim.

"Ka nu nen khan enge in sawi a? Ka office-a ka kal hlan khan enge a lo sawipui che?" Mambawihi nen chauha ka office-a kan awm dun lai chuan ka ti a, Mambawihi chuan ka kut chu a hum ran bawk.

"A dawr vela min hruai a tum a, a dawr chu kan inneih hnua ka enkawl tur a nih thute min hrilh a, bazar dun te pawh a sawi tel"

"A ni maw!? Ka nu chuan a dawr chu i kuta hlan a tum maw!? Ka rin loh lam daih a ni. Mahse Mambawih, rei lote chiah i thawh ka phal dawn a nia, duh leh enkawl tur ka chhawrsak mai ang che"

"A ngai kher lo vang u Marem, thil harsa pawh a ni nâng. I nu sawi ang khan dawr chu ka enkawl ang a, i nu mit ka tlun ngei theihna'n ka theihtawp ka chhuah dawn a ni. Tunah rih chuan ka nel loh ang bawkin min la nel tak tak lo tih ka hria a, mahse kan inneih hnuah chuan min nel ngei theihna'n ka awm ang"

"I rilru hi a va ṭha tak em Mambawih, ka lawm e. Chuan ka hmangaih em em bawk che" tiin a biangah chuan ka dawm a, ani pawh chuan min en kar chung hian

"Keipaw'n ka hmangaih che u Marem" a rawn ti a, ka âwmah chuan a bei zui nghal zat bawk.

"Mambawih, dan khatnaa kan innei lo tur hi pawi i ti em? Kei lah chuan engkim ka tidik lo vek bawk si a"

"Aih, hrehawm ti hran lo ve, eng dan pawh ni se nangmah ka pasal i nih dawn phawt chuan pawi ka ti lo" a thusawi avang chuan ka rilru chu a hlim lehzual a, a chhipah chuan ka fawp ta vang vang.

Vanneihthlak takin Mambawihi nu chu a dinhmun a ṭha leh ta phian a, ICU-a indah luh rum rum ngaia kan la awm lo chu ka lawm hle a, Mambawihi nu chuan kan inneih hun thleng min dam pui se ka ti ve hle.