𝐃𝐎𝐂𝐓𝐎𝐑 𝐌𝐀𝐑𝐄𝐌𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟐𝟓 - 𝟑𝟔)

DOCTOR MAREMA 

By 

Havali Adam

16 December 2021

Chapter 25

Mambawihi POV

Chutia ka nu ber Hospital-a enkawl chilh ngai a nih tâkah chuan zing kara ka hnathawh ṭhin chu ka chawl hmak a, Lawmtei paw'n chuti teh thuta ka chawl chu mak a ti hle. Amaherawhchu kan dinhmun leh thil thlen dan ka hrilh vek a, chutia ka hrilh hnuah erawh chuan ka chawl chu pawi a ti lo nasa. Lawmtei chuan ka nu chu a rawn ngaihven ve em em reuh a, Hospital-a ka nu lo kan ve chu a tum a, a lo kal ta ngei bawk.

Lawmtei chu u Marema nena kan inneih dawn thu ka hrilh a, mo ṭhian atana amah ni lo ṭhian ka neih loh thu ka sawi chuan min hnial a tumna pawh a sut leh ta hlauh. A zahthlak ka ti, hetiang em ema ṭhian han neih loh mai chu! Lawmtei chu ka ṭhian ṭha tak a ni a, ka hnathawhpui ṭhin a ni a, ani tluka min hre chiang leh ka kawm ngeih ṭhian hi an awm lo ti ila ka sawi sual lo maithei a ni.

Tin, u Marema nu chuan mo kawr vel tur leh engkim chu min buaipui vek a, la nel em em lo mah ila a awm dan avang chuan ka be chhe ngai lo. A hmaa a mizia zawng zawng chu a thlak vek emaw tih theih turin ka lakah chuan a awm a, mahse nui hmel emaw pawh min hmuh ngai chuang hlei lo a! Mo thuam kan en ni te chuan ka pawisa lo khawl ve aṭangin keima'n lei luih ka tum tlat a, u Marema nu chuan a lo phal lo nasa ngei mai.

A nu nena kan bazar chanchin vel u Marema ka hrilh chuan a lawm hmel hle a, kei erawh chuan lawm tur a nih leh nih loh pawh ka la hrethiam lo ta cheu. A mak ve em asin. Khati khawp khan min duh lo va, hriat nuam loh tak takin min ṭawngkhum a, a fapa nupuia atana min duh lo em em ni ṭhin khan tuna taka min ngaina thar thut chu mak ka ti a ni. U Marema erawh chung ka ngaihtuahna te chu ka hrilh vek kher lo va, a hriat pawh ṭul ka ti lutuk lo.

Kan chetsual tawh miau avang leh nau ka pai tawh miau avangin Pastor in min inneihtir thei ta dawn lo va, kohhran upa in min inneihtir zawk dawn a ni. Nau ka pai tih ka hriat tirh kha chuan ka nu dinhmun avangin engmah ka ngaihtuah chiang hman lo va, mahse tunah chuan ka pum chhunga awm ka naute chu ka hmangaih nghal em em a, ka hlimpui dawn tih ka hre chiang em em bawk.

U Marema ka aṭanga ka hriat danin min inneihtir tu tur kohhran upa chuan chutianga ranga inneih kan tum deuh thut avang chuan mak a lo ti hle a, mak pawh ti se a awm ve hliah hliah. Kan Mizo danah chuan palaite an kal phawt ang a, a rei lo berah palai kal aṭanga chhiarin thla khat emaw hnu velah chauh inneih hun an siam tlangpui ṭhin. Amaherawhchu kan thil tawnin a zir lo em a, keini tan chuan inneih thuaih chu a fuh ta zawk a ni.

Ka ngaihtuah ṭhin a, u Marema leh a chhungte tan chuan a mualpho thlak dawn tih ka hria a ni. Anni chu an vengah pawh mi zah kai pha an nih ka ring a, chutianga vawi leh khata an mualpho mai tur chu hrehawm ka lo ti ve em em a ni. A bikin u Marema chu ka khawngaih a, kohhranah te an puang ve ngei awm si a, ani lah chu Doctor hna lai a lo chelh bawk nen a lakah pawh ka inthlahrung hle.

Ka nuin pumpui Cancer natna a vei tih kan hriat aṭanga kar khat hnu lawkah u Marema nen chuan dan hnihnain kan inneih a, chutiang taka ranga kan inneih thawt thawt chhan chu ka nu dam lai ngeia inneih kan duh vang a ni ber. Engkim chu u Marema te lamin an buaipui deuh vek a, keini chhungte lam tel ngai lovin an buaipui vek ti zawk teh ang. Dan hnihna nimahse kei chuan ka ngai hlu a, chu kan inneihna chu ropui ka ti em em tho.

Kan inneihna chu dan khatna ni lo mahse ka beisei ai daihin mi lo kal an tam a, a lo kal chin chu mi mai mai an ni lo tih an hriat hlawm khawp. Chutianga patling leh nutling changkang fe fe ka hmuh avang chuan thil hriat chhuah ka nei leh ta nge nge a, loh theih lovin ka pa chuan ka ngaihtuahna a rawn luah leh ta a ni.

Ka pa chu la dam ve se chuan ka nu hian Cancer natna a vei kher ka ring lo va, a chhan chu hnathawh a phal dawn loh vang a ni. Tin, keipawh zirlaite ka chhunzawm ang a, tunah phei chuan ka rualpui te angin hna ka nei ve tawh ngei ka ring.

Chung ka thil ka ngaihtuah te avang chuan ka mittui chu a rawn hnâm sawk a, ka mittui te chu an lo luan chhuah mai lohna'n ka khap let zung zung bawk.

Biakin Hall lam pana kan kal lai te chuan mi ṭhenkhat, ka hmelhriat pawh ni lo hmeichhe pathum rual hian

"A mak ê, engtinnge Doctor Marema hian a duh theih le"

"Chu chiah, an inngaihzawn lai pawh kei chu ka hre lo"

"Chu lovah Doctor Marema te chu a fel viau khan ka hre si a, an lo chesual hman hial te hi mak ka ti a, Doctor Marema hian hetiang thil a ti hi ka la awih fumfe thei rih lo, a ka ngeia a sawi lai ka hria te a nih ngawt loh chuan"

"I ngaihtuah tawi ê, a hmeichhia zawkin a zar buai hnenh viau te pawh a ni ang chû"

"Ni ve leh thei tlat, tun laiah te chuan sum alawm kan um ber tawh. A nupui tur pawh hian a sum chauh a duh a ni lo maw? Ani hian nau a lo pai hman tawh si ang a, Doctor Marema lah mi ṭha na nâ na chuan hmangaih miah lovin a neih a ngai te pawh a ni maithei a ni" an lo ti zet zet a, kal pel tawh mah ila an thusawi ka ngaihthlak duh avangin bang phen deuhah chuan ka ding ta reng.

"Mambawih, engatinge i din? Kan luh a hun viau tawh a nia" Lawmtei'n a rawn tih chuan ka harh ta zawk mai.

"Ka zam deuh a" tih te chuan ka chhang a, zam ru tho mah ila ka din chhan kha chu thil dang daih a ni.

Biak in chhung pangai ni lo mahse kan ṭhut lai te chuan ka zam ve em em a, chumai bakah nichin lawka ka thu hriat khan ka ngaihtuahna chu a luah ta reng. U Marema chu ka nei leh lo mai dawn em ni ang? Mahse heti chen kan kal tawh a, han neih loh chu a tan a zahthlak lehzual dawn lutuk. LALRINMAWI, u Marema hi i hmangaih a ni lo'm ni? Mi thusawi avang mai maiin inti lunghnnur tawh suh.

Ni e, kei hian u Marema hi ka thinlung zawng zawngin ka hmangaih a, ka pum chhunga naute pa a ni a, eng pawh ni se ani hi pasalah ka nei ngei tur a ni. Chu chu ka nu duh dan a ni a, a duhthusam hnuhnung ber a ni lo vang tih pawh a sawi theih loh.

Fim takin thil chu ka ngaihtuah a, kan hmaah chuan kohhran upa chuan Bible chang a lo chhiar mek bawk a, kan inneih tibuai khawpin thil ka lo ngaihtuah kual vak vak ang tih te pawh a hlauhawm dawn dawn alawm le.

Tin, ka nu pawh a taksa a chak lutuk rih loh avangin wheelchair hmangin kan inneihna chu min hmanpui a, a hmel cher ta lutuk leh a taksa chak lo ta lutuk avang chuan ka ṭah a chhuak ru et et a, han ṭah lah chu a chi der si lo. Inneih zungbun kan inbuntir lai vel te chuan ka zam em em a, a kut lum nuam zeta u Marema min vawnna chuan tlemin min ti zam lo ta deuhin ka hria.

Chutia min inneihtirtu kohhran upain thu a sawi lai chuan ka nu chu a rawn buai ta tlat mi le! Thawha va kal mai chu ka tum deuh ut ut a, mahse u Marema chuan ka awm dan hrethiam ni awm tak hian ka kut chu a rawn chelh vat a, kal sawn lo turin min duh tih pawh ka hria.

Rang takin u Marema pa leh ka putea te chuan ka nu chu an buaipui a, pawnah an zawn chhuak nghal daih. Kan boruak a dik lo chho ta nuai bawk nen thusawitu pawh chuan a sawi vat a, inkhawm kan ṭin chu a ni ti tih der.

Mipui chu an ṭawng ri mur mur a, an thil sawi lai chu ka nu chanchin bak a ni lo tih pawh ka hre chiang hle.

U Marema pawh hunserh kam hmang zo tawh bawk a, a tlan chhuak vat a, chanchin hriat a tum a nih ka ring. Hall pawna Lawmtei nen kan chhuah chuan u Marema chu kan awmna lam pan hian a lo letleh a, chutah amah chuan min en kar chung hian

"Mambawih tunah kan kal vat a ngai, i nu dinhmun hi a ṭha lo leh riau a nia, in pahnih khan ka Car-ah sawn lo chuang lut rawh u" a rawn ti a, keini pawh kan che nghal ta vat vat.

U Marema chuan a pate'n Hospital lama ka nu an hruai thu a sawi a, chu bak tumah kan ṭawng leh tawh lo. Inhmelhriat loh ang maiin kan ṭhu ngawi ran hlawm a, u Marema pawh chuan a motor khalh lai chiah chu a ngaihsak ni maiin ka hria. Thu dik erawh tu paw'n ka nu kan ngaihtuah tih ka chiang a, chumi avanga ṭawng lo kan ni tih pawh chu ka hre chiang hle a, kan hlauthawng vek ni berin ka hria.

Rei lovah Hospital chu kan thleng a, Car aṭanga ka chhuk dawn chuan ka pheikhawk sang chu ka phelh ta daih. Mo thuam nena ka la awm ṭhup avangin ka kawr hak lai chu ka ning hle a, hliha kawr pangai hak ka châk tak zet. Kei ang bawkin ka bula hmanhmawh taka kal te chuan an inthuamna chu an la thlak bik lo va, kan inthuam dan vang nge ni mi ho chuan min lo en duh hlawm hle.

Ka nu awmna cabin kan thlen chuan u Marema chu a che zung zung a, a coat chu a phelh a, a kamis var sar leh thianghlim tak chu a kawr banah a thlep chho a, a che lo en tih chauh loh chu tih theih ka nei ri lo. Ka nu chu engmah hre lo hian khumah chuan a mu bam a, a thi mai ang tih chu ka hlau a ni. U Marema chuan drip te a khaisak leh zung zung a, a lan danin ka nu chu Hospital an thlen puina a la rei bik lo a nih hmel.

"Mambawih, ka lo va haw lawk ang aw, inthlakna tur thuamhnawte ka lo ken che ang a, ka ta chu i ha tawk mai ang" lungngai taka u Marema che vel ka thlir laiin Lawmtei chuan a rawn ti a, keipawh chuan

"Aw le, a pawi miah lo, ka kawr hak lai hi thlak tawh ila ka ti hle a ni" ka lo ti ve mai a, a tan pawh chutiang kawr hak reng chu a ninawm ve bawk ang.

Lawmtei kal hnu chuan ka nu mutna lam chu ka thlir a, u Marema pawh a la buai cher cher ngei mai. A thlen aṭangin ṭhut pawh a la nei eih lo va, chuti taka ka nu a ngaihsak ve chu ka lawm a ni. Chu mai bakah u Marema nu leh pa, ka nu leh ka pa ni tawh te chuan min awmpui ve ṭhap a, inbe vel kher lo mah ila an awm ve hrim hrim chuan ka thla an timuang a, ka putea a awm ve lehzel chu ka lawm a ni.

U Marema chuan ka nu chu oxygen a hip tir a, chutianga ka nu awm ka hmuh avang chuan ka pa bawk ka hre leh ta. Ka pa a boral dawna a awm ang chiah khan ka nu chu a awm tih ka hria a, chutah

"Ni lo" ti chhuak tûarin ka ṭhutna aṭang chuan ka ding a, chak takin room aṭang chuan ka tlan chhuak zui ta bawk.

Marema POV

"Mambawih" ka ti hluai a, mahse ka kohna pawh chu ngaihsak lovin a tlan chhuak zui ta daih.

"Pa, Mambawihi nu hi lo en mai teh u aw, tunah chuan a ṭha leh rih tawh a, oxygen a mamawh rih mai chauh a ni. Buaina a awm chuan min lo call vat la, Mambawihi kha ka va buaipui lawk ang e" ka ti thuai thuai a, Mambawihi chu engtin tin emaw ni a lo awm ang tih ka hlau a ni.

"Aw le, va kal vat teh khai, chutia a hlauhthawnawm em em hran tawh loh chuan heti lam chu lo ngaihtuah duh suh" ka pa'n a rawn tih chuan hmanhmawh takin room chu ka chhuahsan a, Mambawihi chu khawiah nge a kal ang ka hre mai lo.

"Nurse, nurse, lo ding teh" in chunga lo chhuk mek Nurse ka hmuh chuan ka lo ti a, ani pawh chuan ding mai ta lovin min lo pan nghal.

"Aw engenita Doctor?" hawihhawm zet hian a rawn ti a, amah pawh chu tu ber nge a nih pawh ka hre chuang lo.

"Ka nupui i lo hmu em? Mambawihi kha in chung lamah a lo kal mial em?" ka lo ti thuai thuai a, Mambawihi awmna chu hriat vat ka duh tawh a ni.

"Mo kawr ha kha em ni i nupui chu Doctor?" a rawn tih leh chuan

"Aw, ni e, in chung lamah a lo chho em ni?" ka lo ti nghal vat.

"Aw lo chho e, kan intawk alawm. Ka en zui pawh khan in chung bera chhoh tum a ang ka ti, ṭap chung khan a kal chho zel bawk sia" a rawn ti zo chiah chu hmanhmawh takin in chung lamah chuan ka tlan a, Mambawihi chu ka ngaihtuah tak zet a ni.

Hah pawh sawi lovin ka tlan chho char char a, hah ka hre lo zawk a ni. In chung zawl ka thlen chuan Mambawihi chu ka hmu nghal mai dawn emaw ka ti a, mahse ka hmu nghal hauh lo.

"Mambawih, khawnge i awm? Lo chhuak teh" ka ti ta vak a, chutia ka au tak chiam vang nge pawh ka hre lo Mambawihi chu Sintex phen aṭang chuan a rawn chhuak a, a mittui te chu a biangah a luang nuai bawk.

"Lo kal suh, lo kal miah suh" a bula va kal phei ka tum lai chuan a rawn ti hrâwk a, keipawh chu ka ding ve chawt nghal.

"Ni lo Mambawih, ti suh, i thil tih tum kha ti reng reng suh" a chet dan avang chuan ka ti ve ta ṭhawt mai.

Mambawihi chu Building tlang zawl laiah chuan a ding chho ta vang a, mittui baw zawih zawih hian min en ran bawk. A awm dan chuan hlauhthawnna namen loh min pe a, a awmna aṭang chuan chhuk vat se ka ti ngei mai.

"Ka hmangaih che u Marem, ka hmangaih lutuk che" ṭap ṭuau chung hian a rawn ti a, kei erawh rilru hahdamin ka la awm thei lo.

"Lo chhuk rawh Mambawih, lo chhuk hram teh, khatiang thil kha ti lûl suh" tia va pan hnaih ka tum leh rual chuan

"Lo kal suh, pen khat pawha ka lam i lo pan leh a nih chuan heta ṭang hian ka zuang thla ang" a rawn ti phiar a, awm ngaihna reng ka hre lo.

"Mambawih min tihlauthawng a nia, i awmna aṭang khan lo chhuk thuai teh"

"U Marem, ka hria a ni. Ka nu hi a thi thuai dawn, tunah hian ka pa awm ang chiah khan a awm asin. Chu pawh keimah avangin, engatinge ka lo pian ve kher kher? Nakin lawkah ka nu a thi ang a, ni lo, thih ve daih ka duh zawk a ni"

"Thihna lam sawi suh Mambawih, nangmah kha indem lovin rilru fim tak put hun zawk a ni asin. Lo thi ta la kei hi engtinnge awm se min tih? I tel lovin ka awm thei tawh lo Mambawih, i dinna aṭang khan lo chhuk hram rawh"

"Ni lo u Marem, ka tel lovin i awm thei ang tih ka hria. Nang chuan nu leh pa, nangmah hmangaih em emtu che i la nei a, an la dampui che a, kei erawh ka neihchhun tak meuhin tunah min thihsan leh dawn chu a nih hî"

"Nu leh pa nei lo tur ang mai khan inngai suh Mambawih, ka nu leh pate hi i nu leh pate ve tho a ni alawm. I nu hi chhan thei ila ka ti ngawih ngawih, mahse ka tih theih a awm tawh bawk si lo"

"Ka hre vek asin u Marem, kei hi mi tana harsatna thlentu mai ka ni tih hi! Ka nu pawh hian min chawmna'n hna thawk lo se chuan he natna hi a vei miah lo vang, chuvangin kei chu he khawvela awm ve tlak hi ka ni lo"

"Mambawih khawngaihin i dinna aṭang khan lo chhuk hram teh, ka dam chhan i ni tih hi i inhre lo em ni? Khawvelah hian chhan nei ṭheuhin asin kan pian, nang pawh hi ka tana piang i ni a, i tana piang ka ni bawk"

"Ni lo ve, kei hi i tan chuan ka tling hlawl lo a ni. Khawtlangah ka tihmingchhia che u a, keimah avangin mi sawisel i kai a, i hnung lam aṭanga miin an sawi ṭhin dan che te hi ka hre ve vek ṭhin asin. Tunah chuan mi lo sawi ṭhin kha a dik tih ka hre tawh, kei hi i nupui ni tur chuan ka hniam mah mah a ni"

"Chutiang thu dik lo phiangsen chu tunge lo hrilh che sawi rawh, tunge sawi? Min han hrilh teh Mambawih, kei hian a sawitu chu ka chhuah hauh lo vang" a thu rawn sawi avang chuan ka ti ta hrawk a, ka thinrim dan chu pui tak a ni.

"A sawitu lam a pawimawh tawh lo u Marem, kei hi chhiatna thlentu mai ka ni tih ka hria a, chu chu phat rual lovin thu dik a ni. Hlim takin ka tel lovin i nun hmang la, keimah ni lo hmeichhe ṭha tak, hmangaih em em tu che leh mite laka timualpho ve lo miah lo tur che i tawng dawn nia" tiin a che hrut a, ring tak chuan

"Ti suh" ka ti vak a, kan awmna inhlat lo se chuan va kalh chilh mai ka duh a, mahse kan inhlat phian bawk nen ka kal chhungin a zuang thla hman mai ang tih ka hlau a ni.

"Ti suh, Mambawih, khawngaihin zuang thla suh, keimah vang tal pawhin, ka dam chhan i ni asin" ka tih chuan a rawn nui a, mahse hlim vanga nui ni lovin beidawn vanga nui a ni.

"Ka hmangaih che u Marem, keini hi chu awm dun tur kan ni lo te pawh a ni ang"

"Ni lo, i sawi dik lo, kei leh nang hi Pathianin intawng tura a ruat kan ni. Mambawih, khawngaihin i thil tih tum kha ti suh aw, keimah vang leh kan naute vang tal pawh khan ti suh, i zuan thlak chuan tualthat i ni dawn asin, tualthah chu i duh em ni?" ka tih chuan a rawn meng buai nak a, a hmel lungngaihna chu mak tihna in a rawn thlak ta vek.

"Kan naute" ti sepin a dul a chul a, enge a ngaihtuahnaah chuan awm ang tih reng ka hre thei hauh lo. Chutah rawn ṭap chhuak feih chung hian

"U Marem, ka tihpalh" a rawn ti a, a hmai hup chuan a rawn ṭap chhuak hawk a, chu veleh min en loh lai chuh chuan rang takin Mambawihi dinna lam chu ka pan phei a, ka pawm thla zui vat bawk.

"Ka tihpalh, ka tihpalh lutuk u Marem, ka tihpalh tak zet" ka âwma ka kuah beh hnu chuan a rawn ti nawn awn âwn a, ring tak hian a ṭap zui hawm hawm bawk.

"I thiam loh a awm lo Mambawih, mahse khatiang kha chuan vawi khat mah min tihlauthawng tawh suh aw, ka â thei mai dawnin ka hria" tiin ka kuah bet run a, cement chhuatah chuan kan ṭhu sawp hnuang bawk.

Mambawihi chu a ṭap ri hawm hawm a, uar takin a ṭap a, nghet takin min kuah ve ran a, amah chu ka khawngaihin ka hmangaih tak zet a ni. Rei fe a ṭah hnu chuan a ṭap bang ve thei ta hram a, mahse min la kuah nghet em em thung. Keipawh chuan duat takin ka kuah a, ka nupui a nih tawh avangin engkim chu tawrhpuia tihhlim leh chu ka tum a ni.

"Mambawih" ka ti sup a, ani erawh chuan min chhanglet lo hrim hrim.

"Mambawih" ti lehin a hmel chu en ka han tum a, a awm dan kan hmuh hnu chuan ka nui chhuak teuh ngei mai.

Mambawihi chu ka âwm ah, ka ang chhungah ngei mai a lo ṭap muhil a nih chu! A awm dan te chuan min tihlim a, in hnuai lama kan chhuk a ngaih avangin Mambawihi chu ka pawm a, pawm chung chuan inhnuai lam ka panpui ta ringawt. Chutia ka pawm lai pawh chuan a la muhil ta cheu a, a ṭawng vai chuan

"Ka tihpalh" a rawn tî a rawn ti leh ṭhin.

A chet dan avang chuan a inchhir ni maiin ka hria a, khatia rilru mangang avanga mahni inthah a tum lai kha chuan nau a pai tih a inhre lo te pawh a nih ka ring. In hnuai kan thlen thlak chuan Nurse te chu ka signal zeuh a, khum ka mamawh tih chu hrethiamin dam lo an dahna ṭhin khum chu an rawn nawr phei nghal bawk. Mambawihi nu awmna Cabin-a lut ta lo chuan ka office lamah ka pawm lut a, Nurse te pawh chuan min chhuahsan ve leh vat.

Mambawihi hmel chu ka en a, ka lainat tak zet a ni. Kan inneih ni te chu han ni ve teh mahse inneih ni lo ang maiin buai a ngai a, ni dang zawng aiin ka hah zawkin ka hria. Ka hna lamah ni se Mambawihi nu ka buaipui a, chutah Mambawihi chuan hlauhthawnna namen loh min siam leh ta nghal a!

"I lo harh ta maw" a rawn meng diar diar lai chuan ka lo ti a, a kut chu ka fawp vang vang bawk.

"Ka tihpalh u Marem, ka tihpalh lutuk. Ka awm leh tawh lo vang, khatiang khan ka awm leh tawh ngai miah lo vang" ṭap feih feih chung hian a rawn ti bah deuh nuai a, nichin maia a awm dan avang khan a inchhir ve hle a nih dawn hi!

"I tihpalh a ni tih chu ka hria alawm, khatiang khan i awm tawh dawn lo tih pawh ka hria, chuvangin ṭap tawh lo la, ka ngaidam vek tawh che tih hre rawh aw" aw dam tak chuan ka lo ti ve a, amah leh amah a inthiam lo leh lutuk tur chu ka duh lo a ni.

"Dik taka sawi chuan ka rilru kha a mangang a, ka nu chu a thi dawn tih hre tawh tho mah ila a thi dawn tih ka hre lo lui der tlat a, min thihsan tur chuan ka phal lo a ni. A thih aia thih hmasak chu ka duh ta thut a, mi ṭawngka ka lo hre kher bawk nen i tana ka hnawksak zia ka hria a, dam ve tlakah ka inngai ta lo a ni" a rawn ti thawp sep sep a, ṭap tawh lo mahse a mittui chu a la tling pur tho.

"Han sawi teh Mambawih, tunge ka tana i tlin lohzia sawia ka tana i hnawksak zia lo sawi vel tu chu!?"

"Ka hre bik lo, inneihna hmun kan lo kal lai khan hmeichhia ho hian an lo sawi a, tichuan ka inngaihtuah lungpuam a, thih vang vang kha ka châk ta a ni. Mahse maw u Marem, thih ka la duh lo, kan naute tan hian nu ṭha tak, ka nu ang maia nu ṭha nih ka duh a, chuan i bula awm kumkhua ka duh bawk a ni" a tih zawh rual chuan a biangah mittui a lo luang leh ta nge nge.

"Ka ka aṭanga i hria te a nih loh chuan tû sawi mah hi awih mai mai ṭhin suh Mambawih, ka nu leh pate thleng hian. I pasal ka ni tawh a, i thih hi ka phal reng reng lo" tiin a mittui te chu ka hruk hul sak a, tlem chuan kan boruak pawh a ṭha chho leh ṭan tawh.

"Min ngaidam rawh aw u Marem, ka tihhlauhthawn che avangin" a rawn ti leh sep a, mahni inkiltawih chi a lo ni bawk nen ka ngaihdam loh chu a hlau ni berin ka hria.

"Ka ngaidam tawh che alawm Mambawih, ngaihdam kha min dîl min dil tawh suh"

"Aw le, ka lawm e. Vawiin te chu i chawl hahdam ve ni a ni ang chu ka lo ti a, mahse ka nu a rawn buai leh ta thut sia ka khawngaih hle mai che. Chuta karah kei lah chuan mahni intihhlum te ka lo tum vel a, ka pasal ni tawh mahla i lakah hian ka inthlahrung tho tho. Tun aṭang chuan pangai takin ka awm tawh ang a, i tan ka nung ang a, kan naute tan ka nung ang a, ka nu pawh a dam chhung chu tihhlim hram hram ka tum tawh ang" a kut pahniha ka biang lo dawm pah chuan a rawn ti a, min lo fawp zeuh bawk.

"Nupui hmelṭha, fel leh rilru ṭha em em nu" tiin a tawlh sawn leh tur chu chelh betin ka fawp ve leh nghal.

Chapter 26

Mambwwihi POV

"Oh! Ka tihpalh" rawn titu awmna lam chu u Marema nen kan infawh lai chuan ka hawi hram hram a, Lawmtei lek chu lo niin u Marema pawh ka nam sawn ta vat.

"Lo kal rawh Lawmte, khawi min thlah teh" ti sawk sawkin u Marema ban chu dah thlak ka tum a, ani erawh chuan dah thlak a lo duh aw zâwng lo.

"Min thlah teh, hei Lawmtei pawh a awm ve reng hî" ka tih pawh chuan ka darah a la chelh tlat a, min en run bawk.

"Ka lo va chhuak ang, heta hi i kawr tur ka dah âw Mambawih" Lawmtei zawk chuan a rawn ti a, rang takin u Marema room aṭang chuan a chhuak zui nghal daih bawk.

"Khâaaa, Lawmtei pawh a awm rei duh miah loh kha! Nangmah vang vek, ani te chuan ka thuamhnaw hak tur min lo pek a tum a, i tizahthlak thei em mai u Marem" ka dara a chelhna a la thlah duh chuang loh avang chuan ka ti leh ta ringawt.

"Min thlah tawh teh, min en reng bawk si, khawi, ka inthlak dawn" ka ti zo chiah chu chiang tawk hian ka hmuiah a rawn fawp a, a tirah te chuan lo tal ve deuh mah ila keipawh chuan rei hnar duh lovin ka chhang let ve leh nghal mai bawk.

"U Marem, kan awmna hi a fuh miah lo a nia" ka ti chhuak thei ṭawk ṭawk a, ka ir a fawhna leh ka hnute a ṭhamna te chuan min tidanglam vek a tin ni!

"Aw le, i bulah hi chuan insum theihna hi ka tlachham ṭhin a ni e" thaw chhuak hawk hian a rawn ti a, a mitmeng chu tisa châkna in a khat vekin ka hria.

Chutia kan inthlah fel hnu chuan Lawmtei thuamhnaw min lo ken chu ka ha a, mo kawr hak nen chuan hak innawm hleih tak a ni. Ka nu awmna lamah chuan kan phei a, u Marema nu leh pate pawh an lo la ṭhu reng. An hmuh laia ka tlan chhuak vel kha ka ngaihtuah chhuak a, ka zak thar hnuhnawh hle.

Ka bulah chuan u Marema chu a ṭhu ve reng a, ka kut chu a kut lum nuam tak chuan a hum reng bawk. U Marema pa leh ka putea chu an inbe deuh reng a, mi dang ho erawh chu sawi tur kan nei lo emaw tih theih turin kan ngawi ṭhap thung.

Lawmtei pawh a ṭhu ve reng a, a lakah pawh ka inthlahrung tak zet. A phone chu a khawih mual mual a, tih tur leh sawi tur a vang ve bawk em a ni. Chutiang bawkin u Marema nu chuan a phone a khawih ve a, kei leh u Marema erawh chuan phone khawih aiin inkuah chu kan duh zawk te pawh a ni ang. U Marema chuan min kuah run a, nupa kan ni tawh bawk nen tute mah chu kan zah tawh lo a ni.

Khatia mahni intihhlum ka tum ta ringawt kha ka inchhir a, ka lo ngaihtuah tawi zia ka hre chhuak chiang hle. Ka naute ka lo theih nghilh a, min hmangaih em emtu u Marema chu rilru na takin ka siam thei tih ka theihnghilh bawk a, tual ka thah ṭhelh a nih ber zawk kha!

Tin, u Marema lo puitlinzia leh felzia chu ka hre thar bawk a, ka inthat mai ang tih hlau em em chunga ka rilru min hneh thei te kha ropui ka ti a, amah ka ngaihsan zual phah ta hle.

Zan a lo ni a, u Marema âwmah chuan ka bei reng a, kamis chauh ha mahse a taksa chu a lum nuam em em tho. A kamis hak a pan vang nge ni ṭum dang aiin a taksa chu a lum lehzualin ka hria. A thin phu chu ka ngaithla kar a, ani pawh chuan duat tak hian min kuah ve ran bawk.

Dik taka sawi chuan kan boruak chu chutiang teh nuai chu ni lo se chuan ka awm dan chu ka zah ka ring a, mahse tuna atan chuan zahna lam aiin hahdamna ka mamawh zawk tlat.

"Marem, eng kan ti em lo vang chu mâw, i nu nen hian kan lo va haw mai dawn em ni?" u Marema pa chuan a rawn ti a, a tlai ve deuh tawh bawk em a ni.

"Aw pa, in duh chuan lo va haw rawh u. Ka nu nen hian lo va haw ula, Mambawihi pawh hi hruai haw ve nghal rawh u, a chau tawh ang" tiin u Marema chuan a lo chhang a, haw tir min tum ringawt chu ka duh teuh lo mai.

"Ka haw dawn lo u Marem, ka nu hi ka awmpui ve duh alawm, chauh pawh ka chau reng reng lo" ka tih chuan

"Mambawih, va haw ve zawk rawh, nangmah chiah i ni tawh lo leh nghal a, chawlh hahdam i mamawh lutuk" a lo ti vat a, ngun thluk fe hian min en bawk.

"Ni e Mambawih, kan rual chuan lo haw ve zawk rawh, i nu pawh tun tut tutah a boral nghal dawn pawh a ni lo va, nau pai lai phei chuan inenkawl uluk a ngai a nia" u Marema nu chuan a rawn ti ve teh mial a, ka naute chu ka ngaihtuah lo bik pawh a ni lo, u Marema bul leh ka nu bula awm chu ka duh tlat bawk si a ni.

"Ka ngaihtuahawm lo vang, hetah pawh ka mu thei tho a, chu lovah ka nu bulah hian awm ka duh rih a ni" ka lo ti ve leh thuai a, inneih zan te chu han ni ve mahse u Marema te ina awm ai chuan Hospital-a awm chu ka duh daih zawk.

"Mambawih, i duh tak tak maw? Ka ngaihtuah viau che a nia, heta awm chu i duh chiang em?" u Marema chuan a rawn ti ve leh a, min ngaihtuah hlawm lutuk chu a inthlahrunawm.

"Aw, duh tak tak e. Ka nu pawh zan lai velah emaw zing kar velah a lo harh thut thei a, a harh huna lo awm loh kha chu ka duh lo alawm"

"A nih chuan nu, pa, min lo va hawsan mai rawh u. Ka pu nang pawh kan in lamah awm ve rih mai rawh, mahnia riah ngawt ai chuan a nuam zawk ang" tiin u Marema chuan ka putea chu a be zawm leh nghal zat.

"Ka lo sawm vek tawh alawm, chutia Mambawihi berin awm a duh tlat si chuan kan va haw san phawt mai ang che u" u Marema pa chuan a lo ti a, tlema tlemah Lawmtei chu ka lo theihnghilh hman ṭep alawm le.

"Lawmte, awi le! Keimahni avangin i buai ve ta hrep a, a zia lo hle mai, u Marem Lawmtei hi va thlah lawk ila, ka nu dinhmun a chhiat em em loh chuan" ka ti ta sawk sawk a, Lawmte chuan

"A ngai a ngai lo, Taxi ka la ve thei alawm" lo ti mahse kei ni lovin u Marema zawk chuan

"Kan va thlah ang che, Mambawihi nu pawh zual lam a pan thutte a nih ngawt loh chuan a rawn harh mai ka ring lo. Kan kal chhunga lo vil turin Nurse te pawh ka hrilh dawn nia" a rawn ti ve ta tlat a, Lawmtei pawh chuan a hnial duh ta bik lo.

Ka nu awmna Cabin aṭanga kan chhuah chuan u Marema chuan Nurse te chu a awm loh chhunga ka nu lo vil turin a chah a, pawn kan thlen chuan u Marema nu leh pate leh keini chu kan kal tumna lamah kan inṭhen darh zui nghal.

Motor-a kan chuan lai chuan Lawmtei chu ka be siam siam a, a chau ve ngawt ang ka ring. Lawmtei kan thlah zo Hospital lama kan tlan let leh lai chuan sawi tur a vang ka'n ti khawp a, u Marem lah chu a ngawi ngul bawk si.

Inbe miah lovin Hospital chu kan inkhalh thleng a, zan rei lam ni tawh mahse building bul velah chuan mi vei vak an lo la tam phian. A ṭhenin thil an ei a, zep lovah chuan ka ril chu a ṭam ru ve reng, mahse han sawi thâwr chu ka la zak deuh tlat bawk si.

U Marema chu ka pasal a ni tawh ngei alawm, mahse chuti takin a bulah chuan ka la ngampa thei rih lo a ni. Ka hmangaih loh vang a ni lo va, ka hmangaih em em zawk a, nupa kan la ni rei lo bawk nen tlemin ka la zak deuh mai chauh a ni.

"Mambawih, i ril a ṭam ve em? Ei tur vel saw ka va lei ve dawn em ni ang? Thil i la ei miah lo ti raw?" mi thil eina vel kan tlan pelh dawn laiin u Marema chuan a rawn ti a, ka awm dan leh ka thil en vawng vawng chu a hrethiam a ni chêk ang.

"Thil chu la ei miah lo ve, mahse ka ril pawh a ṭam hran lo" engavanga dawt muhlum chu la sawi hram chu nge ka nih ka hre miah lo, ka ka chu ka veng hman lo ni berin ka hre ta zawk.

"I ril a ṭam dawn tih ka hria alawm, thil i la ei miah lo leh nghal, ka tihpalh a ni e"

"A ho lutuk, i thiam loh a awm hleinem. I lei dawn chuan va lei vat zawk la, ka nu pawh a lo harh mial maithei asin"

"Aw le ka pi, i thu bawk si, hmelṭha bawk si, fel bawk si, chutah ka nupui i la ni lehzel zui" a rawn ti ve leh duah a, a fiamthu tih hre mah ila ka lawm em em tho.

"Uang uang lo khan va kal vat rawh, ka nu bulah awm vat teh ang" nui chunga ka tih chuan ngawi rengin Car aṭang chuan a chhuak ve mai a, eng thil thil nge va lei a tum erawh ka hre lo.

Zing lam dar 1 a ni tawh a, zing lam tih lemah khua a la thim vek avangin zan tih pawhin a la sawi theih tho ang chu! U Marema nen chuan kan ṭhu dun a, a dar ka ngheng a, ani pawh chuan a ban pakhatin min kuah reng bawk.

Ka nu erawh a la rawn harh miah lo va, a ṭha nge ṭha lo pawh ka hrethiam ve lo. U Marema chuan a rawn harh ve leh thuai a rin thu min hrilh a, ani ang pasal innghahna tlâk leh min hmangaihtu ka nei hi ka lawm tak zet.

"U Marem, a pawi ka ti, kan inneih zana hetiang kan tawk hi a pawi ka ti hle a ni" ka nu bula kan ṭhut ngawih reng lai chuan ka ti a, nuam lo ka ti tak tak a ni.

"A pawi ti suh Mambawih, kan duh dan ang vek hian Pathianin thil a thlen tir ngai hleinem, kan inneih zan te a ni a, ka duat viau ang che ka lo ti rilru hman asin le" a thusawi tawp lamah chuan a rawn nui ri deuh suk a, kei chuan a âwmah ka lo chum taih ringawt.

"Khatiangin sawi tawp suh, ka nu a awm ve reng hi âw, a lo hriat palh vaih chuan a zahthlak dawn lutuk"

"A muthilh daih hî, engtinnge hria se i la tih theih? Chu lovah enge zah tur awm, ka duat ve duh che a ni mai a, ka nuipui hmelṭha em em hi ka duat châk tawh alawm" tiin a rawn kun hniam a, ka hmuiah chuan a rawn fawp zui zat bawk.

"U Marem, a chi miah loh a nia, ka nu a awm reng hi âw" min fawh rei tak em avang chuan amah nam sawn deuh pahin ka ti chhuak hawk a, min fawhna avang chuan ka aw te chu a phel deuh phang bawk.

"A nih chuan hetah lo hian awm rih mai teh ang" enge he pa hian sawi a tum pawh ka hre lo e a!

"Maw? Enge i sawi awmzia? Heta kan awm lovin khawiah nge kan awm ang?"

"Ka office-ah phei lawk ang, phei lawk ang aw Mambawih, i nu chu a lo harh mai mai rih lo vang" tiin a ṭhutna aṭang chuan a tho a, ka banah chelhin min pawt tho ve nghal.

"Enge kan tih dawn? Ka tel lo pawhin i office-ah chuan i kal thei reng alawm, kei chu hetah hian ka lo awm ang, nang pawh i lo let leh thuai ang chû" tia ṭhut leh ka tum chu ka ṭhu hman lo chiang hle.

"Enge kan tih dawn maw! Haha, Mambawih, vawiin hi kan inneih ni a ni tih hre ta che, chuan zanin hian mite lo tih ṭhin dan ang thovin inneih zan hun nuam tak ka hmanpui dawn che a ni"

"Nâaaaa, ka duh rih lo e a! Chu bakah ka zak, mite'n min lo hmu palh ta se engtinnge ni ang? Hetah hian awm zawk ang, aw?" tlawn ti tih deuh chuan ka ti a, chutah u Marema chuan

"A nih chuan hetah hian hun nuam tak chu kan hmang dun anga a ni mai lawm, ṭha mai em?"a rawn ti leh ta. He pa hian enge a hriat? Amah chu khawngaih ru tho mah ila kan thil tih tum chu a hun lo ka ti a ni.

"U Marem, a chi dawn em ni? Hospital a nih hî, Nurse te'n min lo hmuh leh si chuan a ṭha miah lo vang"

"Min hmu lo vang" tiin ka banah chuan min kai a, engmah sawi leh tawh lovin a office lam chu min panpui nghal daih.

Cabin pawn kan thlen chuan Nurse te chu chhun lam ang em emin hmuh tur an tam tawh lo va, zan lama duty tur te tih ho loh chu hnathawk pawh an awm tawh lo. Ngaw rengin u Marema min hruai ang ang chuan ka kal ve mawp mawp a, ka ngaihtuahnaah erawh kan thil tih tur chiah chu a awm.

Enge kan tih dawn chu zawh hran ka ngai tawh lo va, ka hre chiang em em zawk a ni. A office chhung kan luh rualin u Marema chuan kawngka chu a kalh nghal a, ka lam lawi hawi min lo fawh a tum chuan

"Lawk u Marem, a chi tak tak ang maw? Nau pai lai ka ni bawk si, naute tan hian a lo ṭha lo palh hlauh ang e" ka lo ti leh hram a, a nihna takah chuan kan thil tih tur avang chuan ka zam ru hle a ni.

"A pawi lo turah ngai ang" a rawn ti sup a, min fawh a tum rualin a âwmah chuan ka lo nam leh ta ṭai mai.

"I va chiang lo ve, ti leh lo zawk mai ang" ka tih chuan a rawn nui chhuak hawk a, a nuih chhan erawh ka hre der lo.

"Mambawih Doctor ka nih hî, i tana pawi tur leh kan naute tana pawi tur reng reng chu eng thil mah ka ti lo vang" tiin min lo fawp a, min fawhna dam em em chuan zawi zawiin ka zamnate chu an ti bo tial tial ta bawk.

A hmaa min lo mut tir tawhna khumah chuan min hlang kai a, min fawp pah reng a, keipawh chuan ka thiam ang tawkin ka lo chhang let ve zel a, u Marema chuan a duhthaw sawt hle. Min fawhna titawp thutin ka thuamhnaw chu min phel sak a, a kut lehlam chuan ka hnute chu a la khâl reng thung. A kut pakhat ringawt pawh chuan nawmna nasa tak min pe a, engtinnge a theih zawk pawh ka hre lo.

Ruak veka min awm tir hnu chuan ka tawn ngai loh thil min tawn tir leh a, engkim chu la tawng tam lo mah ila a nuam em em vek bawk si. Ka thawte chu a rang sawt hle a, mahse nuam tih vanga rang a ni thung. Ka hnute leh ka lai vel a fawh lai te chuan a samah ka lo ṭham tawn tâwn a, mak tak maiin ka lai vel a fawh lai chuan a za dawn emaw ka tih chu a za miah lo. A fawptu zir te pawh a ni mahna.

U Marema chuan a thil tih lai chu a tawp thut a, ka meng chhuak rang hle. Amah ka en chuan khum aṭanga chhukin a thuamhnaw hak lai te chu a phelh phawk phawk a, chuti taka a hmanhmawh chu ka hrethiam hauh lo. A ruala a kekawr leh a boxer a phelh chiah chu ka hawi sawn rang hle, ka awm dan avang chuan u Marema chu a rawn nui ri hak a, kei erawh ka lo zak hle thung.

"Mambawih zak mah ta che, i pasal alawm ka nih, ka taksa leh ka engkim hi i ta vek a ni a, chutiang bawkin i taksa leh i engkim hi ka ta vek an ni" tiin min lo fawp leh bawrh bawrh a, hetiang em em hian u Marema hi a duhthaw ang tih rin ngaihna ka hre lo.

Nupa nun kan hman hmasak zawka a chet dan ang lo takin a che chu a dam em em a, hmanhmawh viau anga lang si kha ka taksa chhunga a rawn luh hnu chuan a hmanhmawh leh ta lo hle. A chet dan avang chuan min tihnat a hlau emaw ka ti hial a, mahse a nuam ka tihna erawh a bo chuang lo. Ka hnung lam aṭang chuan ṭan a la la char char a, a che dan dam lutuk chuan amah a nihzia a tilang chiang hlein ka hria.

"Mambawih, i taksa a na tawh lo ti raw?" a rawn ti thawp sup a, ka beng bul lawka a thawk ham vang vang avang chuan a ṭawng ring lo hle.

"Aw" tih chiahin ka lo chhang a, chutah u Marema chu a inperh tho zawt a, ka chung lamah chuan a lo bawk ta ran mai.

"Ka hmangaih che Mambawih" rawn ti thum dupin ka taksa chhungah chuan a rawn luh zawm leh nghal a, tunah erawh a chet dan a dang ta zar mai.

Ka chhunga a rawn luh laiin chuan thawk pangai pawhin ka thaw ṭha hlei thei lo va, ka sa chhuak vek ni maiin ka hria. Zawi zawiin a che chu a rang tial tial a, ka hmuiah chuan a rawn fawp leh ngawng ngawng ṭhin. Ka hmuia a fawh loh chuan ka ir velah a fawp ber a, min fawp reng chung chuan a chet a chawl chuang hauh lo bawk. Rei lovah ka awm dan chu a rawn dik leh ta lo va, u Marema erawh a la che chhunzawm mial mial.

Âm taka nupa nun, kan awmna hmun pawh ngaihtuah lova kan inneih zan ngeia kan hman hnu chuan kan inkuah hle hle a, intihfai lam pawh kan ngaihtuah lo ve ve a ni ang kan ngawi dun kar a, vawt kan ti lo dun hle bawk. Thlan tla phungin han awm dun mah ila a tua mah chu kan inten lo va, kan inhmangaih em em zawk a ni. Kan thlante a hul deuh hnu chuan ka che ṭual ṭual a, u Marema hmel chu ka en de de a, a mit a lo chhing daih.

"Ka hmangaih che" ka hriat tawk leka ring chuan ka ti sep a, a muhil a nih ringin ka tho kang ṭhem ṭhem a, chutah u Marema chuan a âwma min pawt bei thlawp chung hian

"Keipaw'n ka hmangaih che" a rawn ti a, a hmel ka en chuan a lo la meng chuang miah lo.

"Ka sawi kha i hre pha vek maw!? Engtinnge i hriat a, ka sawi zawih zawih nen" ka ti nang nang a, a lo hre pha chu mak ka ti deuh tlat alawm.

"Hre pha vek e" a rawn ti a, a la nui nghawr dat zui a, keipawh chu ka nui ve leh ta ringawt bawk.

A tukah chuan u Marema nu leh pate leh ka putea te chu an lo kal leh a, puitling tih takah an inbiak dan vel chu an hawihhawm khawp mai. U Marema pa erawh a kal a ngaih avangin a awm rei hran lo va, u Marema nu leh ka putea chuan min awmpui chawt a ni. U Marema erawh Doctor a nih miau avangin duh hle mahse ka nu ringawt a buaipui hman lo va, chhun lamah phei chuan ka bulah a awm hman meuh lo zawk.

Tlai lam khaw thim det det hun lai velah ka nu chu a rawn harh a, ka va han lawm hlawm tak em. U Marema pawh ka nu dinhmun en turin a lo kal vat a, a ṭhat thu a sawi te chuan ka rilru a hahdam huai nghal thei. Ka nu chu ei tur leh eng eng emaw ka ei tir a, ani pawh a ril a lo ṭam a ni ngei ang a ei ve duh mai. A ngaite bawkin u Marema nu chuan min hawsan leh a, ka putea erawh a inthlahrung pawh a ni maithei kan in lamah zawk a haw thung.

U Marema leh u Marema nu erawh chuan ṭul an ti lo hle a, chaw eina tur awm reng laia kan ina mahni chauha va inbawl vel tur chuan ka putea chu an duh lo hle. Amaherawhchu amah ka putea berin a duh miau si a, an dang thei ta lo a ni.

Beisei loh takin ka nu chu a ṭha chho leh ta phian a, eng eng emaw sawiin a titi tui ta viau bawk. Keipawh chuan nuam ka ti a, chutianga ka nu nena kan titi dun lohna chin pawh ka hre tawh lo.

Tunah chuan ka nu a rawn harh aṭangin kar khat lai a liam leh tawh a, u Marema te inah erawh mo ka nih aṭangin ka la lut miah lo thung. Tin, u Marema chuan kan inneih zan tih loh chu nupa nun min hmanpui a tum tawh ngai lo va, min ngaihtuah em em te chuan amah min hmangaih zual tir sauh sauh. Ina awm lo kan ni na a, u Marema chuan rai lai ka nih avangin ei tur ṭha chi hrang hrang min pe reng a, thla hnih lek la nimahse ka pum chu a rawn puar lian ve ṭan tawhin ka hria.

"Mambawih in pasal te inah i la lawi lut miah lo em ni?" ka nu chuan a rawn ti a, a thutak hmel viau bawk.

"Aw nia, ka la lut lo law law a nih hi! U Marema nen Hospital-ah hian kan awm deuh chawt a, anmahni paw'n an phal vek alawm"

"Âwww Mambawihi ṭhin hi chu! I va ti ho thei tak, anmahni'n phal mahse in pasal te inah chuan i awm lo tur tihna pawh a ni hleinem, i awm ngei ngei zawk tur asin"

"Hetiang dinhmuna i awm lai hian maw nu? A teuh lo mai, ka haw dawn rih lo. U Marema paw'n a phal a, a nu leh pate paw'n an phal bawk a, an phalna la vekin alawm ka awm"

"A nu leh pate tih, i nu leh pate ve tho an ni tawh alawm, khatiangin mi hrang ang maiin sawi tawh suh. Tun aṭang chuan pasal i neih tawh avangin i pasal nu leh pate chu ka nu ka pa tiin ko tawh la, anmahni pawh an hlim sawt ngei ang"

"Nâaaaa nu, chhan awm lova ka nu ka pa han tih ringawt chu ka zak deuh ê, chu lovah inbiak pawh kan la inbe hman em em lo"

"I va mawl ṭhin tak, ka kalsan hunah che phei chuan i pasal nu leh pate bak hi nu leh pa i nei tawh dawn lo va, zah tak leh hmangaih takin i enkawl dawn nia"

"Nu! Khatiang khan kal tawh mai tur ang khan in sawi miah suh, ka duh miah lo a nia"

"Aw le aw le, ka sawi tawh lo vang. Doctor Marema lakah leh a chhungte lakah hian ka inthlahrung khawp mai, mahse anni lah chuan min ngaihtuah hlawm em em bawk si. Mambawih, i pasal hi ka ring tawk a, engtikah mah a thlahthlam duh che ka ring lo. Chuvang chuan eng pawh tawk ula, hmangaih tlatin amah chauh hi ring ṭhin ang che"

"I sawi dik ang ka ring nu, u Marema anga mipa ṭha leh min hmangaihtu hi ka tan hian an awm leh theih pawh ka ring tawh lo"

"Ehem, ka hming in sawi thânin ka hria" kawngka lam aṭangin u Marema hian a rawn ti lut a, fiamthu thawh hi chu zei lutuk lo mahse a awm dan hian nuih a tiza ṭhin zawk.

"Lo kal teh Doctor Marem, i chungah hian lawmthu sawi sen loh ka ba a ni. Hetah hian lo ṭhu ve teh khai" tiin ka nu chuan a lo ti a, u Marema ka bulah chuan a rawn ṭhu thla ve nghal mai.

"Ka pi Doctor tih khan min ko bik tawh kher lo la, ka makpa te min ti zawk tawh rawh" nui ri hak chungin u Marema chuan a ti a, ka nu pawh a nui ve ta ver ver.

"A nih chuan ka makpa Marem, ka lawm e. Kei mai min buaipui duh tawk lova ka fanu lehzel i buaipui te, hmangaiha nupui atan hiala i neih avangte hian ka lawm a, ka fanu in nang ang mipa ṭha a tawng che hi Mambawihi pa pawh a hlim ve ngei ka ring" ka nu chuan a lo ti a, a thusawi tawp lam chu a hnuk a ulh deuhin ka hria.

"Kei deuh hi ka lawm asin ka pi, hetiang khawpa fanu hmelṭha leh fel ka nupui atana min pek phal avang hian ka lawm hle zawk a ni" u Marema thusawi avang chuan ka lo lai hle a, ka lai tih hrethiam tak hian min lo kuah deuh kher bawk.

Zan a lo nih chuan ka nu'n min nawr luih nasat em avangin u Marema te in, ka in ni ve tawha haw tur chuan ka insiam a, min ngaihtuah avangin u Marema chuan min hawpui a tum leh hram bawk. Ka va hmangaih sual lo tak em! A Car park na lam pana kan kal lai chuan hmeichhe pakhat hi kan tawk a, a lan dan chuan chu nu chu Doctor a ni ngei ang.

"Doctor Marema te chu in haw dawn em ni?" hawihhawm zet hian a lo ti a, u Marema pawh chuan

"Aw kan va haw lawk ang e, Nurse ho kha ka hrilh tawh tho nângin ka pi khi min lo ngaihvensak deuh teh aw, zanin i night dawn tho a ni lo'm ni?" a lo ti ve nghal zung zung a, chu nu chuan aw a lo ti a, rei pawh inbe lovin u Marema Car awmna lamah chuan kan chhuk a, kan tlan chhuak zui nghal.

Chapter 27

"Êeee hei Marema te pahnih pawh an lo haw ve hlawl mai, Tlanzo thingpui kha han lum nghal teh" in chhung kan luh rualin u Marema nu chuan a lo ti hluai a, u Marema pa paw'n kan awmna lam chu a rawn hawi vat.

"Marem in lo haw ve thei ta maw, Mambawihi nu chu a ṭha deuh tawh em ni?" u Marema pa chuan sitting room aṭang hian a rawn ti deuh lawng lâwng a, keini pahnih pawh chuan sitting room lam kan pan phei nghal.

"Tunah rih chuan ngaihtuahawm a ni rih lovin ka hria, chu bakah ka thawhpuinu kha lo en thlithlai deuh turin ka chah a" ṭhutthlenga kan ṭhut thlak rualin u Marema chuan a rawn ti a, a nu pawh a pa bulah chuan a lo ṭhu phei ve tawh bawk.

"A nih chuan zanin chu heti lamah in riak thei dawn tihna em ni?" u Marema pa bawkin a rawn ti leh a, chhan ka tum lai takin ka bula mi chuan

"Tum ve deuh chu a ni a, Mambawihi ber hi a chau tawh dawn lutuk a, a rai kher bawk nen ngaihtuah a tina a ni" a lo ti a, kei erawh ngaihtuah ngai ka inti hauh lo.

"Ka ṭha alawm min ngaihtuah duh suh u, ka ṭha tak tak a nia" ka ti ve hluai a, chutah u Marema nu ve thung chuan

"Chutiang ringawtin an ngai ngai lo, nangmah mai bakah naute i keng tel tawh a, i taksa ringa ṭhang lian a nih tawh avangin i inenkawl uluk kha a ngai hle zawk a ni" a rawn ti a, an sawi chu a dik ve tho avangin han chhan let leh mai dan tur chu ka hre lo.

"Ni e Mambawih, nangmah chiah i ni tawh lo tih hria la, keini phei chuan in awm loh hlan khan pi leh pu nih kan châk tawhzia hlir kan lo sawi a nia" u Marema pa chuan a rawn ti a, mi dang ho pawh chu an lo nui ve suk hlawm.

"A zia lo hle mai ka nu ka pa, ka pasal inah pawh lawi lut ṭha hman lovin ka awm a, in mi hriatthiamna ka dil tak meuh e" ka ti ve leh a, an lakah chuan ka inthlahrung ve tak tak a ni.

"A ho lutuk, kan thil tawnin a zir lo ve em bawk a ni. Hun a kal ang a, nang te chu kan inah hian i la awm dawn chauh alawm" u Marema nu chuan a rawn ti a, a danglam em em tawh chu mak ka la tiru reng tho.

"Thingpui a in theih aw" tiin Tlanzoi chuan dawhkanah chuan a thingpui lo chawi phei chu a dah a, min lo en hian min nuih seih bawk.

Thingpui in pahin eng eng emaw ni kan sawi a, ka in lama ka thuamhnawte lak phei dan tur thlengin an sawi kai a, u Marema nu pawh chuan min be duh ta viau. Thingpui kan in zawh chuan u Marema room ni ṭhin, kan nupa room ni ta lam pan chuan kan chho a, room chhung kan luh te chuan a rim chu ama rim a nam ngawih ngawihin ka hria. Mipa room ni awm rengin rawng lar vut ang chi hmuh tur a awm lo va, rawng thim lutuk ni si lo hian room chhung chu hmuh a hahdam em em thung.

Tui lum chuan ka inbual fai a, kan in lama ka thuamhnawte kan la lak luh loh avangin thuamhnaw ngai chu ka ha leh ta ringawt. Ka zawh veleh u Marema chu a intifai ve nghal a, bathroom aṭanga a lo chhuah chuan khumah ka lo mu fel diam tawh. Kawr vel a hak fel hnu chuan nui sukin hian min lo pan a, khuma lo lawn kaiin ka bulah chuan a rawn inthawlh ve nghal. Keiin ka hnung chhawn a, ani erawh chuan ka hnung lam aṭangin min kuah bet run.

Ka mut a chhuah em avang chuan ka inlet a, a âwm bei chunga muthilh chu ka châk a ni. Ka awm duh dan hrethiam zet hian ani pawh chu a lo insiam rem a, ka duh dan taka ka awm hnu chuan ka mit ka chhing ta vang vang.

Kan ngawi dun reng a, ngawi reng mah ila nuam erawh ka ti tho. Ka muthilh tak tak hma tiin a hmel chu rem leh rem lovin ka en chho ṭawk ṭawk a, tui taka muhil tawh ang mai hian a lo awm daih.

Ni e, u Marema tan chuan a chauh thlak ve em dawn asin. Kar khat deuh thaw kei leh ka nu min buaipui a, ka nu vangin mutmu pawh a tuah ṭha thei lo va, mihring ve tho a nih avangin a chau khawp ang le!

Ka nu dinhmun a la ṭha rih bawk nen rilru hlim tak chuan a âwmah ka bei thla leh a, tun atan chuan muthilh vang vang ka mamawh ber ang ka ring. Ka lo muhil ngei a ni ang min sawi det dettu an awm avang chuan ka meng diar diar a, min sawi harhtu chu u Marema lek a lo ni.

"Mambawih, i mutui lai ka tiharh a ngai che hi pawi ka ti, mahse tunah hian Hospital lamah kan kal nghal a ngai" u Marema chuan a rawn ti a, ka meng chiang ta hle.

"Engatinge u Marem? Ka nu a zual em ni? Min han hrilh chiang teh" hlauhthawnnaa khat aw chuan ka ti a, u Marema chu ka en ran bawk.

"Doctor Tetei khan min lo call a, tunah hian ICU lamah an dah lut mek a nih hmel, tho ila i kal vat teh ang" a rawn tih chuan

"Maw? Aw, aw, kal ang, kal nghal ang" ka lo ti bah deuh nuai a, u Marema bulah awm lo ngat ila zawng ka buai leh vek tawh ang ka ring.

Khum aṭanga tho chhuak vatin Hospital lam pan tur chuan kan insiam sawk sawk a, kei phei chu insiam pawh ni lovin kawr lum ka hak belh a ni ber. Kan inpeih hnu chuan in hnuai lamah kan chhuk thla rawk rawk a, kan hmanhmawh lutuk tawh vang nge ni thawm pawh kan dim lo hle. Pawn kan chhuah chuan a lo vawt deuh sûk a, chutah u Marema chuan

"Vawt i ti em Mambawih?" a rawn ti a, engtinnge ka rilrua thil awm te hi a hriat chat theih bik ṭhin le.

"Zep lovah chuan vawt chu ka ti reuh" ka tih chuan a Leather Jacket chu a hlip sawk sawk a, min rawn haktir zui nghal.

"Hei, vawt i ti ve lo em ni? Kawr dang han ha leh lawk la" ka lo ti vat a, ani erawh chuan

"Ti hran lo ve, nangmah ber hi kei ai chuan ngaihtuah i ngai alawm, Car-ah sawn AC kan on dawn nia" tiin a Car awmna lam chu min panpui a, a sawi ang ngeiin Car-a kan ṭhut luh hnu chuan AC chu a on zui ta vat.

"Hlauthawng suh aw Mambawih? Eng pawh thleng se Pathian remruatna vek a ni tih i pawm thiam hram dawn nia" Hospital lam pana kan tlan laiin u Marema chuan a rawn ti a, keipawh chuan a sawi anga awm chu ka tum ruh hle a, mahse ka thei kher ang emaw!

Hospital kan thlen chuan u Marema chuan ka kuta min kai chung hian ICU awmna lam chu min panpui thuai thuai a, ICU awmna kawt kan thlen chuan Nurse te chu an lo phe sung sung a, mamawh an lam khawm zung zung bawk. Chutih teh thuta ka nu a awm leh ta mai chu a mangan thlak ka ti a, min thihsan dawn a nih ro ro pawhin a kianga kan awm lai tal ni se ka ti a ni.

"Mambawih tah hian min lo nghak reng rawh aw, ka va check zawk zawk ang a, ka lo chhuak leh vat ang" ka dara chelh chungin u Marem chuan a rawn ti a, min en chhuk run bawk.

"Aw le va kal rawh, ka ngaihtuahawm lo vang, i kawr lum hi ha leh tawh la" ka tih chuan

"A vawt ka ti ve vak hleinem, ka kal aw" tiin a kal sawn zui nghal a, hmuh tur awm tawh lovin ICU room an tih chhung lamah chuan a lut nghal.

Nurse ṭhenkhatte chuan min en hrek hrek a, kei lah chuan mipa Leather Jacket ka lo ha kher bawk nen min leh zeuh zeuh ṭhin chu a awm ka ti. Ṭhutna lo awmah chuan ka ṭhu a, mi dang erawh tûmah ṭhu an awm ve lo. U Marema Jacket chu ka hnim vang vang a, mangang em em mah ila a rim ringawt pawh chuan min thlamuan theiin ka hria.

Chu bakah a awm hla lo tih ka hria a, ka bula a lo kal leh thuai tur thu a sawi chu ka ring em em a ni. Chutia keimah ngawta ka ṭhut lai chuan phone hi a lo ri a, phone ri chu u Marema phone a ni a, a Jacket min hak tir miau avangin iptea phone awm chu ka phawrh a, lo call tu chu tu dang ni lovin a nu a lo ni.

"Aw ka nu, keimah Mambawihi zawk ka nia, u Marema chu a buai lawk a" phone call ka lak rual chuan ka lo ti zung zung a, chutia ka nu ka tî ka ti ve ta chu nawm dan riau a awm.

"A nih chû, i nu chu a dinhmun a ṭha lo leh thut em ni Mambawih? In thawm kha kan lo hre mai lo va, mahse motor thawmah khan kan harh ve chiah alawm"

"Aw nia, ka nu chu tunah chuan ICU lamah an sawn lut tawh a, u Marema'n a buaipui mek e, kan mut laiin u Marema an lo call a ni awm a, kan kai tho duh ta lo che u a nih kha!"

"Âwww, a va zia lo ṭhin tak, hei keini pawh kan insiam mek a, i pa nen pawh kan lo phei thuai ang ka ring"

"In duh chuan in lo phei lo thei tho a nia, in muttui lai tak a ni awm si a, a zia lo hle mai"

"Kan muttui lai a ni emaw ni lo emaw thih leh dam inkar a nih tawh hi hre ta che Mambawih, hei kan lo phei dawn chiah e, ka dah rih mai" tiin kan inbiakna chu a titawp a, lo phei ve mahse pawi ka ti hran chuang miah lo.

Mak tak maiin a hma ang em emin ka nu dinhmun avang chuan ka ṭah a chhuak tawh miah lo va, enge a chhan pawh ka hre lo. A boral dawn tih chu ka pawm thiam tawh te pawh a ni mahna.

Ni e, thihna hi zawng keini lo do theih a ni lo va, Pathian tih chauh lo chuan thihna leh damnaah hian thunneihna kan nei lo. U Marema chu ka rin ai takin a rawn chhuak har ta phian a, phone hmet enga dar zat ka en chuan zing dar 2 leh a chanve a lo ri der tawh.

Rei lovah u Marema nu leh pate pawh an rawn thleng a, han inhnemin han inbe vak lo mah ila ka mal lo a ni tih ka inhriatna hrim hrim chuan thlamuanna min pe tho tho. Ka putea chu ka call a, Hospital lam lo pan turin ka hrilh ve ta bawk.

Kan kal tirh kha chuan u Marema'n a check vel ang a, ka nu chu a ṭha leh mai tura ngaiin ka putea hrilh chu ṭul ka ti hran lo kha a ni a, mahse u Marema berin chanchin a rawn sawi har tâk em avang chuan ka nu dinhmun chu ka hrilh ve ta a ni.

Zing lam dar 3 a lo rik chuan u Marema hmel kan hmu ve thei ta, mahse eng thu nge ka hriat tâk hi! U Marema chuan kei ni lovin ka putea zawk chu a be daih a, kan awmna a inhlat loh avangin an ṭawng chu ka hre pha vek tho.

U Marema chuan ka nu mar phu an hmuh zawh tawh loh thu a rawn sawi a, mahse kei chuan ka awih lo, chuti mai chuan ka nu'n min kalsan ka la ring lo a ni. U Marema chuan a nu leh pate lam chu a hawi a, min la en ve miah loh avang chuan ka thin a rim tak zet tawh.

"Mambawih" a tawpa tawpah chuan ka hming lamin min lo en ve ta, mahse a hmel chu a va lungngaih hmel si em.

"U Marem, dawt a ni ti raw? Ka nu chu a mar phu i hmu tawh lo tak tak em ni?" ka aw chhuak chu tum viau mah ila a dik hlei thei lo va, insum erawh ka insum nasa hle.

"Lo kal teh Mambawih, i chhuak dun lawk teh ang" tiin ka banah chuan min kai a, min tih ang ang chuan ka awm tawp.

A ding tawh mai dawn emaw ka tih pawh chuan min la kalpui ta char char a, min kalpui a tumna hmun erawh ka hre hauh lo. Kan kal zel a, a Car awmna kan thlen chuan kawngka hawngin min ṭhut luhtir a, ani pawh a rawn ṭhu lut ve nghal. Motor chhunga kan ṭhut luh hnu pawh chuan a la rawn ṭawng chhuak mai lo va, chutiang bawkin keipawh chuan ṭawng châkna reng ka nei rih lo.

"Mambawih" a rawn ti thum dup a, kei chuan amah pawh en lovin kan hma lam chu ka lo melh ngar ngar.

"Mambawih, min en teh" tiin ka biang chu a rawn dawm a, a hmel ka hmu chuan ka ṭap chhuak thei mai dawnin ka hria.

"I nu hi, ni lo ka pi hi, a chat thla tawh. Ka lo chhuah laia ka thusawi kha dawt a ni lo" a rawn tih chuan ka biang a dawmna kut chu ka phih thla sawk a, ring zet hian

"Ka awih lo, a theih loh, ka nu hi a thih ka phal lo" ka ti tuar tuar a, ka nu thih tur thu chu ka pawm thiam tawh emaw ka inti a, mahse a thih thu ka han hriat tâkah chuan ka lo la pawm thei awzawng lo a lo ni.

"A na dawn tih ka hria Mambawih, mahse i nu hi kan chan tawh a ni tih hriatthiam tum hram ang che" tiin min lo kuah a, tal chhuah ka tum chuan min kuah nghet sauh.

Ka ṭap hawm hawm a, chutiang taka rilru naa ka ṭah chu ka la hre lo. Ka pa a boral ni kha rilru na taka ka ṭah awm chhun a ni a, mahse tuna ka ṭahna hi chu ka pa thihna ai khan ka rilru a na zawk. A chhan chu he khawvelah hian thisen zawmpui dik tak ka nei tawh dawn lo tih ka hria a, chu chuan namen lovin ka rilruah hmun a khuar a ni.

U Marema chu a ngawi reng a, min ṭawng thlamuan pawh a tum hran lo. Tum pawh ni se ka thla a muan phah tawh chuan ka ring lo va, ka nu thih thu chuan min tina em a tin ni!

"Mambawih, kan chho leh tawh dawn em ni ang? I ṭha tawh ti raw? Heta ka hruai chhan che chu mi hmuh laia i ṭah ka duh loh vang a ni a, hmeichhe huaisen leh chak tak i ni tih lantir la ka duh vang a ni" ka duh tawka ka ṭah hnu chuan a rawn ti a, a âwmah chuan ka la bei hle hle.

"Aw le, ka tawrh thiam ka lo inring ve ringawt tawh a, ka pawm thiam te kha ka lo inring ve ringawt a, mahse zep lovah chuan ka nu thih thu hian min la tina em a ni" ka ti ve sep a, ka aw chu a zawi ang reng hle.

"Ka hria e, i na dawn tih hi ka hre lutuk, mahse i bulah ka awm reng dawn tih theihnghilh lo ang che" aw dam zet hian a rawn ti leh a, nui lui sak chuan amah chu ka en ve ta.

"Ka hmangaih che u Marem, nang hi ka tan chuan ka pa i ni a, ka pasal i ni a, kan naute pa tur i ni bawk a, min thihsan ve tawh miah suh aw, nang leh zelin min kalsan chuan awm ngaihna ka hre tawh lo vang"

"Ka tiama che Mambawih, ka dam chhung chuan i bulah ka awm reng ang a, ka hmangaih reng bawk ang che" tiin ka chhip samah chuan a rawn fawp vang vang a, tunah chuan ṭah chhuakna ka nei tawh rih lo.

Hospital chhunga kan luh leh chuan ka beisei loh takin mi an lo tam tawh a, ka hmelhriat lutuk loh te pawh an lo ṭhu thup. Amaherawhchu chung mite chu kan venga mite an ni tih ka hria a, engtinnge ka nu a boral tih chu an lo hriat dâih daih ka hre lo.

Puitling deuh vek an ni a, a pawi an tih thu leh min tawrhpui thu chu ka dawng ngun khawp. Aizawl lama kan tal tam zawk miau avang leh ka pa awmna hmun nghet a nih avangin ka nu chu Aizawl lama phum an ti tlu ta a, ka putea paw'n a pawm thiam khawp mai.

Khua a lo en pangai hnu chuan kan veng lamah kan phei a, engkim chu Khatla venga mite chuan min buaipui sak vek a, an felin an zahawm ka ti ngawih ngawih. A chhan chu keimah paw'n chanchin engmah ka hrilh lo va, an hriat hriatin an lo hre ve tawp a, chutah min la buaipuisak vek zui.

Pastor in vuina hun a hmang a, ka bulah chuan ka putea nupui pitei pawh a ṭhu ve ran. Ka pitei chuan ka nu chanchin kan hrilh rual rualin Aizawl lama lo chhuk nghal a tum a, an khaw sumo pawh ni lovin a hmel hriatte bike in a lo inphur thlak tir ta tawp a ni.

Thlanmual lam kan pan lai te chuan U Marema chuan ka kut chu a chelh reng a, ka awm dan engkim chu a chikin min ngaihtuah hle tih ka hria. Ka nu kuang an dah thlak lai chuan kei ni lovin ka pitei chu a rawn ṭap hawm hawm a, ka putea chuan a lo buaipui ve vat.

Keipawh chu ka bang bik lo, ka ṭap khur char char a, mahse ka ṭap ri ring em em hran lo. Min chelh mai duh tawk lovin u Marema chuan ka darhah a rawn kuah a, kei chuan a kamis dumah chu ka lo pawt ve ṭai bawk.

Tin, ka hnathawhpui ṭhin Lawmtei leh mi dangte chu an lo kal ve a, keini nufa ve mai maiin chutiang taka ṭawiawmtu kan nei chu ka lawm rualin ka lung a chhia a ni. Chutah khawvela ka hmel hmuh duh loh ber te ka la hmu leh ta cheu a, an hmel ka hmuh chuan ka thin a va han rim tak em. Ka nu kan thlah fel tawh bawk nen u Marema min kuahna aṭanga chhuakin an lam chu ka pan a, anni pawh chuan min lo en ve kar.

"Engvanginnge in lo kal? In chhungte kan ni em ni? Lo kal ve ngam tur pawh hi in ni lo asin" an bul ka thlen chuan ka ti phiar phiar a, mi pawh chuan min en duh hle.

"Ka tunu" ka pa pain a rawn tih rual chuan rang tak hian

"Khatiang khan min ko reng reng suh, i tunu ka ni lo va, ka ni ngai lo bawk ang" ka lo ti leh hrawk a, min en zeuh zeuh paha mi kal vel chu ka zah buai peih tawh lo a ni.

"Mambawih" tiin u Marema chuan ka kut a rawn chelh a, insum turin min ti tih a mitmeng aṭang chuan ka hre thei.

"Enteh u Marem, anni hi ka nu thihni ah an lo lang ngam a nih chu! Kha leh chen kha min en hrang a, keini nufa avangin ka pa kha an tuithlar hial a, engvangin nge tuna taka an lo kal leh si? An hmel pawh hi ka hmu peih lo a ni" ka ti hlawk hlawk a, u Marema nu leh pate pawh kan bulah chuan lo awm tawh mahse ka thinrim lutuk chuan khua ka hmu tawh lo a ni ber.

"A tawk e a tawk e Mambawih" tiin u Marema chuan min lo khap vat a, mahse kei erawh chuan duh tawk ka la tum teuh lo.

"Haw rawh u, in hmel hi ka hmu duh lo a ni. Nangni nen hian inzawmna pakhatmah kan nei lo va, min lo hmuh pawh tum buai duh tawh suh u" ka ti leh phiar a, chutah ka pa pa chuan

"Ka tunu, i nu thihna chu kan tawrhpui khawp mai che. I thin a rim tih pawh ka hria, mahse i duh phawt chuan kan bulah i awm thei reng a nia" a rawn ti a, a thusawi avang chuan ka nui chhuak hak.

"In bula rawn awm maw!? A teuh lo mai, engtikah mah nangni bulah hian ka awm ngai lo vang. Chuan min tawrhpui vel te kha ka mamawh hauh lo, ka tunu tih khan min ko tawh miah bawk suh, ka duh loh mai bakah i tunu ka ni lo tlat" aw nem lo tak chuan ka ti leh a, a nupui leh a fanu chu an ding ngawi reng bawk.

"Tun atan chuan kan kal rih phawt mai ang, ni dangah kan inbe ṭha leh dawn nia" a rawn tih zawh rualin u Marema zawk chuan

"Ka pu, hmuh leh che u a duh tawh loh thu leh inzawmna neih a duh loh thu in hre vek a ni lo'm ni? Engatinge Mambawihi hi la hmuh hram chu in tum a?" a rawn ti ram ve ta hmak a, ṭawng ka tum pawh chu ka ṭawng leh ta lo.

"Marem, i inrawlhna tur a ni lo" u Marema pa chuan a lo ti vat a, ka bula min chhan taka ding u Marema erawh chuan

"Ni lo ka pa, Mambawihi hi ka nupui a nih angin a telna chu ka telna a ni ve zel tawh ang" a lo ti nghet leh charh a, a thu tak hmel viau vang nge ni u Marema pa pawh chu a ngawi ta hle hle.

"Ka nu ka pa, kan haw dawn em ni ang? Ka ṭha tawh e" pangai tak chuan ka ti a, u Marema nu leh pate pawh an lo bu ve nghut.

Ka pa chhungte chu kan kal pel ta vang vang a, min en reng pawh ka ring. An suah sual avangin kan chhungkuain kan tuar hnem em em a, zah lo taka ka ṭawngkhum hmawk hmawk te chu inchhirna ka nei lo va, mahse u Marema nu leh pate hmuh laia ka insum hman lo erawh nuam lo ka tiru ve reng tho. U Marema nu leh pate chu motor hranah an chuang a, keini pawh u Marema Car-ah chuangin kan in, ka mona in lam pan chuan kan tlan chhuak zui nghal.

U Marema te in, kan in ni taa kan luh hnu chuan ka hahdam huai huai ni mai hian ka hria. Kan nupa room-ah chuan kan chho a, wardrope thar lo inhung ka hmuh chuan mak ka ti hle.

U Marema chu bathroom lamah intifai turin a lut daih a, kei erawh chuan wardrope lam chu ka pan thung. Ka hawn chuan ka thuamhnaw ṭhenkhat leh thuamhnaw thar a lo inkhai ṭhup a, rai kawr ang reng deuh te pawh a awm nual mai.

"I duh zawngte an ni em? Nangmah pawh rawn lo chein ka nuin a lo lei a, keipaw'n nichin deuh lawk khan ka hre chauh alawm" u Marema chuan a rawn ti a, a sam chu a hru mawlh mawlh pah bawk.

"Aw ni tehreng e, ka duh zawng tak alawm a nih" nui sen sen chung hian ka lo ti ve vat a, boxer nen chauha a awm vang nge ni amah chu ka en ṭha ngam leh ta tlat lo.

"A ṭhat chu" ti supin ka lam chu a rawn pan phei a, awmze nei lo zetin kawrte chu ka hai vel ta ringawt.

"Va intifai ve nghal daih rawh, chuan kan mu daih dawn nia" a rawn ti leh tâkah chuan ka thil tih ṭul lo zet chu ka tawp chat a, bathroom lam chu ka pan nghal vat.

Ka inbual zawh chuan kawr ha sa vekin bathroom aṭang chuan ka chhuak a, u Marema chuan ka thawm hriain min lo en ta reng. Ka nuih seih a, ani pawh a rawn khi ve suk. Khuma ka lawn kai rualin a lamah min kuai phei a, a taksa nghenga ka mut châk tawh dan chu pui tak a ni.

Ka nu kan vui zan chauh la nimahse ka rilru chu a hrehawm em em tawh lo va, a chhan pawh min hmangaihtu u Marema ka la neih vang a ni. Tin, ka putea leh ka pitei te chu u Marema te in lamah an lo insawn phei ve rih a, naktuk lama haw an tum thu an sawi nghal bawk.

Tui takin kan mu a ni chêk ang ka harh meuh chuan zing dar 8 lai a lo ri tawh a, u Marema pawh a lo la muhil ve reng. Kaihthawh ka'n tum deuh ûk a, mahse muthilh tir chu ka duh leh ta zawk.

In hnuaia ka chhuk tih a hmuh rualin Tlanzoi chuan min lo be siam siam a, thingpui chu min pe zui nghal zat bawk. Sitting room lamah chuan ka putea te leh u Marema pate chu an lo titi a, a lan dan chuan an inkawm ngeih hmel hlawm dar dar hle.

"Hei, engatinge min kaih thawh loh?" ti supin u Marema chuan ka hnung lam aṭangin min lo kuah a, kan hma maiah Tlanzoi a awm bawk nen ka zak ta hle.

"Khawi maw awm sawn teh u Marem, i ti ho thei em mai" tiin ka lo tal ve nang nang a, ani erawh chuan a aia nghet hian min kuah leh ta tlat mai.

"I zak em ni? Tlanzoi hi i zah em ni? A zahthlak loh lutuk, a hmuh lai hian ka'n fawp nghe nghe teh ang che" tiin ka hnung lam aṭangin ka biangah chuan a rawn fawp a, zah tih piah lamin ka zak.

"A ho ê ti raw u Marem? Kei te min lo zah mai mai, nupa in ni tawh alawm" Tlanzoi chuan nui ver ver chung hian a lo ti a, chutah ka bula mi chuan

"Dik chiah, ka nu leh pate hmaah sawn ka fawh nghal loh che" a rawn ti nui nui a, a nui nghawr dat bawk. A thusawi avang chuan ka nuih pawh a za lo, inhmu thei ngat ila chuan ka hmai chu a sen vek ka ring.

Chapter 28

Ni a ral a, kar a ral a, tunah chuan ka nu boral aṭangin thla hnih lai a liam leh ta reng mai. Ka nu chu ka ngai a, amah mai ni lovin ka pa pawh ka ngai thar leh em em a ni. Amaherawhchu u Marema chuan min enkawl thiam em em a, ka lungngai deuha a hriat chuan min tihhlim dan phet hi a zawng ṭhin.

Tin, u Marema nu leh pa leh Tlanzoi te pawh chuan min be peih hlawm em em a, an bula awm hrehawm viau tura ka lo ngaih kha chutia ka awm chilh tâkah chuan a nuam ta phian zawkin ka hria.

Engkim, a tir te aṭangin ka inzir a, mahse an hmuh laia thil hre lo deuh leh inzir ang deuha lan chu ka duh chuang lo. Kan thleng silna hmanrua te chu a danglam a, chaw bel leh thleng dahna chenin a danglam a, mi hausa in tih takah a felfai thlap bawk.

Ka pum a la puar len em em loh avangin chet chu ka chuh ve ṭhin a, chet harsa ka la ti rih lo a ni ber zawk. U Marema erawh chuan a lo pha lo nasa mai a, awm mai mai turin min ti ṭhin a, mahse rai avanga awm mai mai tur ka nihna ka hre lo a ni.

Ka dul te puar lianin thla tam han rai tawh te chu ni ila thu hran a ni a, chutiang pawh ni lova lo awm hahdam thawt thawt chu ka duh lo a ni. Tlanzoi chu a lo fel reuh em em a, min be peihin nuih a duh viau bawk. Ka ngainatna chhan ber nia ka hriat chu kei ang thova mize changkang a neih loh vang a ni a, ani pawhin min ngaina ve tawh viau chuan ka hria.

Ka pum pawh lian em em lo mahse a puar ve âl reuh a, mahni chauha ka awm laite chuan ka chul ka chul ṭhin. Chhun lamah chuan awmpui an awm ve miau avangin tih tur em em ka hre ngai lo va, Tlanzoi chuan min awl hneh ve em bawk a ni. U Marema nu a dawr lamah a kal ni tin a, u Marema pawh Hospital lamah a kal ziah a, chutah ka pa leh zel pawh in lamah a awm hman meuh lo.

Kei leh Tlanzoi chuan in kan nghak deuh tlawng zel a, keini pahnih chu inpawh tawh tak kan ni. Tlanzoi chuan u Marema nena kan fa chu a hmuh châk tawh thu a sawi reng zel a, kei tak pawh chuan ka hmu châk tawh a ni. Eng hmel nge a put ang ka hrethiam lo va, u Marema chhun em em se ka ti a ni mai. Tin, kan naute chu mipa ni se ka ti hle a, kei ai aiin u Marema chuan fapa a awh ka ring bawk.

Fa atan mipa nge hmeichhia a duh thu chu ka la zawt ngai miah lo va, ani pawh chuan a la sawi ri ngai lo hrim hrim ve tho. Keini aiin u Marema nu leh pate chuan an sawi ri hnem zawk a, pi leh pu nih an châk tawh lutuk chu a nuihzatthlak letling zawk. Tin, u Marema pa driver chhawr chu a lo leng ve zeuh zeuh zel a, in hnuai lamah amahin in a luah ve a, an sawi dan chuan a nau te Hostel-a dahin a chawm niin ka hria.

Thla hnih a'n vei leh meuh chuan ka pum pawh a rawn puar lian chho ṭan tawh a, thil huat leh duh loh erawh ka la nei hran lo. Ka thil ei a tui em em zel a, ka ei châk hun lah chu a la dangdai thei em em zui.

A chang leh zan laiah te a ni a, a chang leh zing karah te a ni leh daih zel. Amaherawhchu u Marema chuan min buaipui zel a, ka sawi apiang leh ka ei duh apiang min lo hawn ṭhin a, zana thil ei ka châk changte chuan ngawi reng hian min buaipui mial mial zel.

Chutianga a muttui laia kaih thawh ziah chu nuam ka ti bik lo va, a hriat lovah thawh ka tum lai tak lah chuan a lo harh ve ziah zui. Mamawh ka nei a nih phawt chuan amah kai tho zel turin min ti ṭhin a, kaih thawh loh pawh tum mah ila amah zawk chuan ka tho tih a lo hre leh vek zel. Chutiang chuan kan inbuaipui chho ṭhin a, u Marema tan pawh chuan ka hahthlak ve reuh ngawt ang ka ring.

"Engatinge hetiang thil hi i lo tih leh ṭhin?" tiin u Marema chuan ka hmun phiah vawn lai chu min laksak a, amah ka en chuan a lo thleng deuh chiah a nih hmel.

"Ka phiah laklawh em khâ, engatinge i lo lak thawt thawt? Chu bakah thil har pawh a ni lo, khawi maw min lo pe teh" tiin a kuta mi chu va lak ka tum a, ka ban phak lovin a lo dah sawn daih.

"I chet ka phal lo a ni lo'm ni, engatinge hetiang thil hi i lo tih ve leh ṭhin?" tiin a office bag chu dawhkanah a nghat a, ka hmun phiah lai chu a rawn phiah chhunzawm nghal.

"A va'n ṭul lo ṭhin tak, hetiang tih te mai mai chu a awl em mai, chu bakah Tlanzoi pawh a hman lo ve lutuk a, keia lo tih te chu a awm hliah hliah zawk" ka ti nang nâng a, ka hmaa mi ve thung erawh chuan a thil tih lai chu ngawirengin a ti mial mial.

"Enge Tlanzoi chuan a tih reng reng? A hman lo a nih pawhin a hman hunah a ti mai dawn alawm" a phiah zawh hnu chuan a rawn ti hmuk a, engatinge hmun phiah mai mai pawh chu a phal loh kher?

"A hman lo a nih chuan kei ka hman reng a, lo tih fai chu ka tih tur alawm a nih"

"Ti suh ka tih chuan ti lo la a ni mai, nangmah ka ngaihtuah vang zawk che a nih hî hre ta che"

"Min ngaihtuah tih chu ka hria, mahse chutiangin chet pawh ka la harsat lo va, ka chet te hi ka tan chuan a ṭha daih zawk ang"

"A ṭha hauh lo, exercise lak erawh a ṭhat rualin in chhung vela chet hi a ṭul ber lo. A ṭul a nih chuan keima'n exercise ka lakpui che ang a, hun ka tih hunah chauh kan kal ṭhin ang" a rawn ti ram leh hmuk a, chutiang thil ho lutuk avanga a thinrim ringawt chu mak ka ti.

"Engatinge i thinrim kher a? Hetianga awm tlawng hi ka thiam hlei nem, che lova awm te chu hrehawm ka ti alawm" ka aw chu a nem em em bik tawh lo.

"Tlanzo, lo kal teh. Vawiin aṭangin Mambawihi hian in chhung thil vel leh tih fai tih lampang vel engmah a khawih tawh tur a ni lo, i hre chiang em?" tiin bathroom aṭanga Tlanzoi insu zo lo chhuak chu a lo hrilh nghal khawl a, a thin lah chu a la rim hmel em em zui.

"Aw le, ka lo hre reng dawn nia" inthlahrun hmel zet hian Tlanzoi chuan a lo ti ve vat a, a awm dan avang chuan ka khawngaih reuh lutuk.

"Ka duh ringawt lo, keimah berin chet ka duh te chuan engatinge i phal ve mai loh? Tunge mahni mona ina awm tawp ngai? Tûma'n an rai lai pawhin chet an ṭhulh ngai lo" hre tawh ang mai chuan ka ti ve ta tawp a, kan thin chu a rim tet tet tawh.

"Chutia chet i duh viau chuan exercise ka lakpui tawh ang che, a hun ve ṭan tawh tho alawm" a rawn ti leh hmuk a, ka thin a rim tawh laklawh bawk nen titau nghawng nghawngin kan nupa room lamah chuan ka chho ta daih.

Room chhung ka luh te chuan ka ṭah a la chhuak em em a, ka rilru a no hma lutuk chu ka rai vang a ni tih chiang takin ka hria. Insum ka tum a, ka theih tawp chuan ho te tea rilru no neih chu pumpelh hram hram tum ṭhin.

Amaherawhchu vawiin tlai zet zawng ni dang ang lo takin u Marema kha a rawn thinrim ringawt a, khang khan ka ṭah a ti chhuak vek a ni. Kan nupa kawngka a rik thlep danah u Marema chu a lo lut tih ka hrethiam mai a, mahse a hmel en tuma hawi vel chu ka tum rih lo.

"Mambawih" ka bula lo ṭhut thlak paha a rawn tih chuan ka sa chhuak vek a, ka thin te chu a phu dawt dawt a, ṭah chhuak tawh tak ka ni.

"Min en teh Mambawih" tiin a lam hawi zawng chuan min kuai her a, nichin lawka a aw nen chuan in dam hleih tawh tak a ni.

"I chet ka phal miah lohna chhan hi i hrethiam lo em ni? Kei chuan i intih nata nau i chhiat mai hi ka hlau a, inven fimkhur hun lai tak a ni asin"

"Chu pawh ni se ṭha takin min hrilh thei lo em ni? Thinrim aw taka min biak kha ka duh lo, ka hlauthawng a, ka ṭah an ti chhuak" ka ti ṭuau a, ka ṭap titih chu a ni ber tawh.

"Ka tihpalh a ni e, tun aṭang chuan ka vin tawh miah lo ang che" a âwmah chuan min kuah bei thlawp a, chu ngei chu a ni ka lo thlakhlelh em em tawh chu!

"Vawiin chu ka ngai hle mai che, min lo ngai ve em?" a rawn ti thum dup a, kepawh chuan la ṭap deuh feih chung hian

"Aw, ka ngai lutuk che" ka ti a, ka ṭawngka chhuak vang a ni ngei ang u Marema chu a rawn nui che dat.

Ka khabe chu kuai dakin min lo fawp a, khumah chuan min tluk zal pui nghal a, keipawh chuan ka thiam ang ângin ka lo chhang let ve zel a, chu chuan rei lovah rilru danglam min puttir zui nghal bawk.

A kut chu ka taksaah te chuan a vah kual tir reng a, chungte chuan awlsam takin nupa nun hman châkna min pe a ni. Kei ang bawkin u Marema chu a awm dan aṭang a danglam tih ka hria a, kan thil tihtur chu ka hre chiang hle.

Inhmangaih taka nupa nun nuam tak kan hman zawh hnu chuan rizai lain min mutpui a, keipawh a âwmah ka bei leh ran tawh. Room light kan on vek avangin ka mut a chhuak em em lo va, ka mood chu fuh leh tawh tak a ni.

A âwm chu ka chul a, a âwma hmul awm neuh neuh te chu ka khal niap niap a, mipaah chuan a ngo pawl a lo ni bawk nen âwm hmul chu a inhmeh ka ti tak zet. Tin, a ṭhi awrh silver rawng chu a inhmeh ka ti em em bawk a, u Marema hi chuan eng pawh inbel se ka hmu inhmeh vek tho ang ka ring.

"I duh ve em?" a rawn ti sup a, kei chuan a thusawi awmzia chu ka hre lo chhah hle.

"Eng chu maw?" ka lo ti hû a, a hmel chu ka en chho thuai bawk.

"Ṭhi kha maw le, i en reng bawk sia i duh ka lo ring ve tawp" a rawn tih leh chuan inhmeh ti taka a ṭhi awrh ka lo en vawng vawng chu min lo hmu reng tih ka hrethiam ta chiah.

"Duh pawh a awm chuang lo, i inhmeh em a, chuvang alawm ka en reng tak ni!" zep nei lo chuan ka lo ti ve mai a, u Marema chuan ka chala lo fawp zeuh pah hian

"I ṭhi tur ka lo hawn ve dawn nia, nang phei chuan i inhmeh dawn si a, i awrh lai ka hmu châk tawh che" a rawn ti sup a, ka lo nui ringawt.

"Chuan i thil tih lai hi i tawp a nih loh chuan hun nuam tak kan hmang dun leh ngei ka ring" a rawn tih leh chuan a âwm hmul ka khawih neuh neuh lai chu ka tawp chat a, rizai hnuai lamah chuan ka kut chu ka dah lut ta vat. Mahse enge ka zu tawh fuh tâk hi!

"Euuuu, kha chu!" nui nghawr dat hian a rawn ti a, ka kut ka lak sawn leh ranzia chu pui tak a ni.

"I zak em ni Mambawih? I ta vek ka nih hî hre ta che" tiin ka kut chu a rawn la a, rizai chhung lamah chuan min zen thlak tir nghal.

"U Marem" ka lo ti hluai a, ka kut lak sawn ka tum pawh chuan a phal der lo.

"Nang chu chiang takin ka hmu vek tawh a, kei chu i la hmu ve miah lo a nia, khawih pawh i la khawih lo" a rawn tih chuan ka zak lutuk chu ka maimitchhing tawp a, ka bula mi lah chu a rawn nui ri huah huah thung.

"Le! Ṭang ṭun tawh suh le, i khawih hunah chuan a lo lian telh telh mai ang" tiin a rawn nui ri leh hak a, ka kut chu a kap lamah a sawn thla riai riai a, kei chu men pawh ka lo la meng ngam lo.

Chutah khawih tura min tih ka zuk khawih chiah chu engtin emaw ni hian ka awm a, ka awm dan chu ka sawifiah thiam lo. Hlauhthawn vang pawh ni si lo hian ka thin te chu a phu dawt dawt a, u Marema lah chuan a la hum hnan ran zui.

Ka khawih tirha awm mai mai leh zawi deuh hlek kha minute khat pawh ka khawih hman lo vang tihah chuan a rawn khauh telh telh a, a rawn lian chho tulh tulh ni maiin ka hria.

Zawimuang hian u Marema chuan ka kut chu a chet tir a, ka thil khawih lai lah chu nunna nei ang mai hian a lum vung vung a, chungte chuan engtin emaw ni tak hian min tidanglam a ni. U Marema chuan ka hmuia fawp vawng vawng chung hian rizai chhunga ka kut chu a chet tir mial mial a, keipawh ka thil khawih vang nge ni a hma ang chiahin ka rilru chu a rawn awm leh tawh.

"Ti leh lawk mai ang aw" rawn ti supin u Marema chu ka chungah a rawn bawk thuai a, ṭawngkain chhang kher lo mah ila ka duh ve tho tih chu a hre chiang em em.

Kan zawh fel meuh chuan kan thlan a tla leh phung a, a bulah hi chuan keipawh hi ka insum zo bik meuh ṭhin lo. A mi tawhna te, min fawhna te hian awihawm loh khawpa nasain min tizauthau ṭhin a, ka engkim chu a hnena hlan duh vek duhna rilru nei tur khawpin min siam ṭhin a ni. Chu chu, chu ngei chu nupa nun an lo tih ṭhin chu a nih ka ring a, han zak deuh ṭhin mah ila a ṭul chuan zah loh ve mai te pawh zir ka ngaiin ka hre ta bawk.

"Ka peih lo lawk ê" naupang chhia deuh hian a rawn ti nang nâng a, eng tak chu ngaihtuah ang maw!

"Eng thil maw i peih loh?" a sawi tum hre châk deuh chuan ka lo ti ve mai a, ani paw'n min lo en chhuk run mai.

"Tun lawka kan tih zawh chiah ang kha kan hmang thei tawh rih dawn lo va, chu chu ka peih lo lawk maw le" awi awi awi, eng thu nge a sawi tak hi! A hmelah lah chuan sawi zahna emaw nuam lo tihna emaw pawh a lang eih si lo.

"I va'n sawi ho tak! Lo kal rawh, tho ila in hnuai lamah chhuk ang, ka nute an lo haw chuan heta lo awm reng hi a mawi miah lo a nia"

"A ho hleinem Mambawih, naute i neih hma chu ka insum tluan thei turah ngai ila, ka thei lo a nih leh a nih nih kan ni tawh mai a ni ang chu!"

"Nâaaaa u Marem, khatiang lam ringawt sawi lo teh, tho ila chhuk thla vat zawk ang"

"I zak em ni Mambawih? A zahthlak hleinem, nupa kan nih tawh hî, zak duh reng reng suh. Chuan ka nu leh pate mitmei veng reng reng hian awm ṭhin lo teh, ka hre vek zel che a nia"

"Inthlahrun ka tum em em pawh a ni bik lo, anmahni hi an zahawm em alawm, ka pa phei chu fel viau mahse a zahawm ka ti lehzual"

"Ka nu leh pa ang chauhin ngai lo la, i nu leh pa dik tak angin ngai ve rawh, chu chuan anmahni pawh lehzualna a pe zawk ang che"

"Nia, ka lo tum dawn nia, mahse tun tut tutah ka thei bik lo maithei a nia aw"

"A pawi lo, zawi zawiin i insiam rem chho ang a, nang chauh ni lo ka nu leh pate pawh an lawm zawk ang" a thusawite chu a dik vek tih ka hria a, keipaw'n insiam ṭhat chu ka tum ruh ta hle.

"Chuan engatinge i lo haw khan i rawn thinrim vek kher a? I thinrimna a ho ropui si, min siam ṭah chhuak vek alawm" ka hriat chhuah thut a vang chuan ka ti leh ta phawng mai.

"Dik tak chuan Hospital lamah thil duhawm loh lam ka tawng a, chu chuan ka mood a rawn ti off vek ta a ni. Chutah nang khan hmun te i lo phiat leh vel a, kun pawh kun hlei thei lova i lo che vel khan ka thinrim lawkna chu a tibelhchhah ta a ni"

"Eng thil duhawm loh nge vawiinah chuan i tawn a? Min hrilh ve chi a ni em?" ka lo ti sep a, a chhan pawh dil chhut taka thil han zawh vel chu ka inthlahrung leh tlat tawh a tin ni!

"Hrilh chi ni tehreng e, nang ber ka hrilh loh che chuan a dik thei nâng. Kimtei kha vawiin chu a rawn lang hlawl a, a rui deuh nge ni a rawn ṭawng nasa khawp mai"

"A nih chû, fel lutuk chu ni lo mahse chutianga rui duh tur khawp chuan a awm ka lo ring miah lo"

"Kan inngaihzawn ve lai kha chuan ruih theih thil a tih awm pawh ka hre lo, mahse kan inṭhen hnu aṭang khan a lo ti ṭan a ni awm e"

"Engatinge in inṭhen a? I nupui hual lai kha a ni hman tawh a, chutah i nu leh pate'n an duhpui ropui che si" ka ti leh ta tawl mai.

"A chhan chu nang hi ka nupui tur dik tak i ni tih ka hria a, ka hriat chhuah veleh a ranga rangin i lam ka rawn pan ta tawp a nih kha!"

"A awihawm loh ber kher ê, a pawi lo mai, min hrilh ṭha duh lo a ni ang e" tiin amah hnungchhawn zawnga mut chu ka tum a, chet pawh che sawn rei hman lo khawpa rangin min kuah bet nghal vat.

"Tak tak chuan Kimtei khan mi dang keimah ni lo ngaihzawng a lo nei reng a, chu chu kan inṭhen chhan deuh ber a ni mai" a rawn ti ve mai a, kei chuan mak ka lo ti rilru hle.

"A ni maw!? A van mak ve le, in inneih teuh tawh tawh nen ngaihzawng a lo nei chu a mak hle mai"

"Chu bakah keimah kha ka dik lo hrim hrim a, Kimtei kha a hmai chhanah tlang takin nupui neih ka la inpeih loh thu ka hrilh tawp alawm"

"Nang pawh chu le! Inhmangaih taka inngaizawng in ni emaw ka lo ti a, mahse in lo ni hauh lo a ni maw"

"A dik ang, amah ka hmangaih emaw ka tih kha nang ka tawn hnuah che chuan dawt mai a lo ni tih ka hre chhuak a ni"

"Kei chu bialpa emaw ngaihzawng emaw pawh neih kha ka tum ngai lo hrim hrim a, a chhan pawh ka nu kalsan daih kha ka hlauh vang a ni pakhat" ka tih chuan u Marema chuan

"A ni ngei ngei ang, nang nei tur chea ka beih nasat zia kha! Kan infawh hmasak ber lah khan min la beng zui" a rawn ti a, a nui ri hak zui bawk.

"Kha te kha chu! Ka inring lo bawk si a, ka manang leh ka rilru kal dik lovin ka beng tawp che a nih kha, mahse a hnuah khan ka inchhir ve nasa teh a nia aw" ka tih chuan a hma aiin a rawn nui ring ta deuh a, keipawh ka lo nui ve sen sen.

"I vawikhatna a ni tih kha ka hre chiang ropui mai si a, nang ang rilru thianghlim lutuk tan chuan khatianga i che pawh kha awm lo ka ti hran lo. Chuan, min vei zui viau dawn tih pawh kha ka hre nghal vek"

"A ni maw!? Engtinnge i hriat theih? Ka vei zui tak tak che asin. Khami zan aṭang khan ka rilruah i awm reng zel a, i bula ka thlamuan ruk riau ṭhinna te khan nangmah ka duhzia che leh ka rin ngam tawh zia che min hriattir ta bawk a ni"

"Chu min lo duh ru reng si i lo va inthup thei ve a, kei chuan ka duh thu che ka hrilh nghal pawp che a, sawi ve mai ta che" amah ang lo takin vawiin tlai chu a ṭawng naupang chhia reuh riau mai.

"A zahthlak ve alawm, hmeichhia kan nih hî, chu lovah in hausak hmel sia kha tih hun lai kha chuan ka sawi ngam teuh lo mai"

"Eng pawh ni se ti leh lawk ila, vawiin bak chu kan theih tawh hmel si loh" a rawn ti ta daih a, min la nuih vur vur zui.

"Eng chu maw? I sawi tum ber pawh ka hrethiam lo" a thusawi chu hrethiam ṭep, mahse hrethiam si lo vel ka awm.

"Hre lo der kher lo la, kan naute pawh a rawn hmelṭha sawt mai ang" a rawn ti leh chuan ka melh kar a, a sawi tum chu ka man chiang ta hle.

"Aaa!!!! Ka duh tawh lo, chu bakah naute tan a ṭha lo vang. Tho ang, in hnuai lama kan chhuk a hun tawh vîau chuan ka hria" ka tih chuan ka chungah a rawn bawk leh run tawh a, nam sawn ka tum pawh chuan a awm sawn duh der lo.

"Min hnar dawn lo tih ka hria, a chhan chu kei ang bawka min mamawh ve tho vang a ni. Ka rei lo ang, i chet hah ve vak pawh a ngai lo bawk ang" tiin min lo fawp a, chutah min fawhna chawl chung hian

"Chuan zaninah kan ti leh ang a, naktuk aṭang chuan insum vang vang ka tum tawh tak tak ang" a rawn ti zeuh a, nui sak chung chuan min rawn fawp leh nghal.

A sawi lawk ang ngeiin a che hmanhmawh hle a, rei pawh la ni lovah chuan ka zawi leh ta hnâp mai. Ani erawh a chet ngaiin a la che zawm reng a, chu chuan zauthauna nasa tak min pe leh nghal. Kan zawh fel meuh chuan chau ve lo ang mai hian min pawm kang lawp a, bathroom lam chu min panpui ta bawk. Ruak vekin kan awm a, keipawh a hma ang em emin ka zak tawh bik lo.

Kan inbual fai zawh hnu chuan bathroom aṭangin kan chhuak a, thuamhnawte inbelin in hnuai lam chu kan pan ta nghal. Kan thlen thlak chuan u Marema nu chu a lo haw tawh a, ka pa pawh sitting room-a lo ṭhu vâng tawh bawk. U Marema nu chuan eng eng emaw ni hi a rawn hawn a, a ṭawng leh siam siam tawh.

Chaw kan ei lai te chuan ka ṭawng ve ta zeuh zeuh a, zawi zawia anmahni va pawh hmasak chu ka tihtur niin ka hria. Mo leh nupui ka ni a, ka pasal leh a chhungte chu ka chhungte an ni ve tih ka infuih ru char char.

Chapter 29

Thla thum a ral leh meuh chuan ka pum chu a puar lian tawh hle a, u Marema nu phei chuan naute thuamhnaw tur a lei lawk vek tawh zawk. A lei dawn te chuan kan chhungkua chu kan inhnial a, inhnial tih lemah kan inchawi a ni ber zawk. Kan naute lo piang tur chu mipa a nih leh nih lovah kan inchawi a, hmeichhe hovin hmeichhia ni turin kan duh a, mipa lamin mipa an duh ve leh tlat bawk.

Kei, u Marema nu leh Tlanzoi te chuan hmeichhe kawr lam hlir kan thlang a, u Marema leh a pa leh an driver Zira te chuan mipa kawr lam hlir an lei thung. An lei pawh a ni lo, an hmelhriat hmeichhiate an leitir zawkin ka hria. Amaherawhchu kei chuan hmeichhe lam chu ṭang mah ila kan fa lo piang tur chu mipa a nih zawk mah ka ring a, a chhan chu a che a nat theih em vang a ni.

Kei chuan mipa emaw hmeichhia emaw pawh hring chhuak ila pawi ka ti lo ve ve a, nu ka ni tawh tur hrim hrim chu ka lawm zawk a ni. Ka ei in, ka che leh ka thil tih reng reng chu tupawh mai chuan min ngaihtuah hlawm em em a, an felin ka tan chuan chhungkaw ṭha tak an ni. Ka pasal leh a chhungte mai ni lo, an awmpuite leh an driver te pawh chuan min ngaina em em tawh a, Zira phei chuan min bia min be ve ta mai.

Zira nen hian inrual khat vel kan ni a, chuvang chuan ani pawhin min u ta bik lo. A tirah kha chuan ka pasal chu a lo u ṭhin avangin min u ve kha a ni a, mahse kum zat te kan inzawh hnu kha chuan min u kher lo se ka duh ta zawk a ni. Tin, Tlanzoi chu ka naute neih tur chungchangah chuan a phur tawh em em a, kan pahnih chauha kan awm lai te chuan a sawi uar thei khawp.

Khatia u Marema'n engmah min tih tir lo tura a hrilh hnu kha chuan eng thil mah ka tih a phal tawh lo va, ka lo rai lian ve tawh tho bawk nen chet vel chu ka tum bik ta lo a ni. Ka harsat ber chu inthiar leh step kal tih vel a ni a, chung tih lovah chuan ka infit khawpin ka hria. A chhan pawh u Marema chuan hun awl a neih apiangin exercise min lakpui ziah alawm.

Zan lamah chuan tihtur em em ka nei hran lo lehzual a, kan inneih thlalak te chu u Marema nen kan en dun vel mai mai zel. A hun lai kha chuan kan buai vang nge ni inneih thlalak kan neih awm reng kha ka lo hre lo va, mahse kan lo nei ve kiau tho. Thlalakah chuan zungbun kan inbuntir lai te, register lehkhabua hming kan sign lai te leh a dang kan hriat loh laia an lak tih chiang reng rengte chu a awm nual bawk.

Zirtawpni a ni a, naute ka neih thla kan chuang kai leh tawh a, u Marema phei chuan ngaihven tak tê hian min ngaihven lehzual. U Marema nu chuan thil thleng thut thei a ni tawha a hriat avangin a dawr lamah pawh min kalsan duh ta lo va, mahse ṭhenawm vela len chu a ching thung.

Kei leh Tlanzoi chuan chhun thingpui in tur kan siam a, kan titi leh malh malh tawh. Chutia kan titi lai chuan kawngka aṭangin mi an lo lut a, u Marema nu a ni dawn emaw ka lo ti a, mahse a hmel ka hmuh chuan a lo ni teuh lo mai.

"Kha i va puar lian tawh ve, kan mi ṭawpi chû" Kimtei chuan a rawn ti a, ani hi chuan kan in hi lo chuang kai tawh miah lo mahse pawi ka ti miah lo asin le.

"Lo kal rawh, thingpui kan siam mek a, i duh ve nghal ang em?" ka thinrimna te insum hram hram chung chuan ka ti a, ani erawh chuan min ei loh hmel zet hian

"A der kha chuan min be ṭha vel duh suh, chuan thingpui in tur pawha lo kal ka ni nek lo ve" a rawn ti leh a, a awm dan chu ruih nei a ang ka ti.

"Zu i in em ni? Zu in hi a ṭha lo asin, hmeichhe tan ngat phei chuan a mawi lo"

"Ve a che! Kei aia naupang fê hian min zilh vela maw!? Zah pawh i zak lo em ni?"

"Kimte, i duh chuan kan in aṭang hian i haw thei ang, min sawisel tur leh min tham lo kual vel tur ringawta lo kal hi a hlawk vak lo" ka lo ti ve ta hmarh a, ka insum thei lo ṭan lek lek tawh a ni.

"Ka haw leh haw loh chu ka thu thu, he in phei hi chu nang aiin ka hre chiang daih zawk ang"

"Kei aia i hriat chian leh chian lovah ka buai lo ve, min hawsan thuai la a ṭhat zawk ka ring"

"Ngawi mai teh, i thu lo em mai. I zei awm si lova i pasal chuan a ning ru thei viau lo che maw, keini kha chuan vanram tla fual kha vawi tam kan chen ve hman a, a nuam pawh kan ti dun thei khawp" engtinnge chung thute chu a sawi ngam zawk? A â tawh tak zet a nih dawn hi!

"Khatianga i insawih theih vel khan nangmah bak i intimualpho miah lo a nia, chuan u Marema hian kan inneih hmain kei tih chauh loh chu sex hmanpui a nei lo bawk" ka ti ve leh ta salh a, Tlanzoi erawh chhang vel zai pahin a lo ngawi kar thung.

"A nih chuan dawt hrilh chein a lo bum kual reng zawk che a ni ang maw, a room chhunga kan tal dun tamzia te a la hrilh miah lo che tih ka hrethiam mai"

"Dawt muhlum sawi sawi lo khan kan in hi chhuahsan vat rawh, chuti lo chu u Marema ka call a ni mai"

"I duh chuan call la, ka thusawi kha dawt a nih leh nih loh te zawt la, tichuan engkim chu i hre vek mai ang"

"I thusawi hi pakhatmah ka awih lo va, i sawi hian awmzia a nei bawk lo. I ṭawng hah thlawn mai mai tih hria la, haw vat zawk rawh" ka ti vin deuh hlar a, ka insum thei tawh bik lo a tin ni!

"A lo nih vel tak chu!" tiin kawngka lam chu a pan a, a chhuak ve ta hram chu ka thaw huai mai.

Chhun thingpui kan in a, ka rilruah erawh Kimtei thusawi chiah kha a lang rih. A awm lai kha chuan awih lo hul hual ang khan ka lang a, mahse a thusawi te khan ka rilru an luah tlat si a ni.

Tlaia ka pasal a lo haw te chuan ni dang ang bawkin ka lo be siam siam a, mahse Kimtei thusawite chu ka zawt chiang duh kher ang em ka la hre lo. U Marema chu rin ka duh a, mahse Kimtei sawi te kha a awm ang em em bawk si.

"U Marem, thil ka lo zawt che?" kan nupa room-a kan awm lai chuan ka ti a, ani pawh chuan a paper keu mawlh mawlh pah chuan

"Aw sawi la, ka ngaithla alawm" a rawn ti ve mai a, zanin chu tihtur a ngah deuh nge ni a buai hmel riau.

"Keimah ni lo hmeichhe dang sex i hmanpui tawh em?" ka ti tawl a, ka thil sawi avang chuan a thil tih lai tawp meuhin min lo en nghal.

"Thil dik lo a awm em ni? Engatinge chungte chu min zawh?" ka zawhna pawh chhang chuang lo chuan a lo ti daih.

"Awm lo ve, ka zawt mai mai che" ka lo ti ve leh mai a, ka zawhna tak a chhang lo chu ka lungawi lo ru ngei mai.

"Mambawih" a rawn tih chuan

"Aw engenita?" ka lo ti ve thuai a, ani erawh chuan ka thil ngaihtuah mek chu hriat tum awm tak hian min melh run thung.

"Thil dik lo a awm ti raw? Engatinge khang thu kha min zawh? Ka chhanna tur chu i hre chiang a ni lo'm ni?"

"Nia, ka zawt mai mai che a nih kha! A ho lutuk, i thil tih lai kha ti leh tawh rawh" nui lui sak chung hian ka ti a, ka awm dan aṭang chuan ka nui lui tih chu a hre chiang dawn lutuk tlat.

"Mambawih" tiin khumah chuan a lo lawn a, a kut pahnihin ka hmai chu a chelh ran bawk.

"Nang lo chu tu hmeichhia mah sex ka la hmanpui lo va, ka hmanpui ngai lo bawk ang. Engvangin nge heng thute hi min zawh? Tunge hmeichhe dang sex ka hmanpui lo ti reng reng?"

"Chhunah khan Kimtei a lo kal a, he kan nupa room ngeiah hian in lo tal dun nasat tawhzia leh nupa ang maia in khawsak tawh thute a rawn sawi a, a thusawi chu ka awih tihna pawh ni chuang lovin ka rilru a kap ema ka zawt tawp che"

"LALENGKIMI chu kan inah a rawn la kal ngam vel a ni maw, a va zak lo zawk ve. Hre rawh Mambawih, ani khan chiang takin dawt a sawi a ni. Hmeichhe taksa chhunga ka luhna hmasa ber chu nang hi i ni a, a tawp ber pawh i ni bawk ang. LALENGKIMI khan ka mipatna hi a tak pawhin a la tawk lo va, kekawr chhanah te chuan a khawih ve tawh maithei, ka hre chiang tawh lo"

"Aw le aw le, sawi duh tawk ang. Ka rin loh vang che pawh a ni miah lo a nia aw u Marem, ka zawt chiang duh hrim hrim che a"

"Eng pawh keima chungchang i hriat reng rengte hi ka ka aṭanga i hria te a nih ngawt loh chuan awih tawh suh. Chuan, i khawih leh duh em?" a tawpa a zawhna min zawh chu a mual bovin ka bo.

"Eng chu maw ka khawih duh ringawt ang?" hrethiam lo fe chuan ka lo ti hû a, amah chu ka en ran bawk.

"Nangmah tih loh tûmah pawh ka khawih tir phal ve loh i khawih tawh kha, khawih leh la, kei chuan nuam ka ti teh mai a nia aw" Lalpa le! Ka duh leh duh loh te chu min la zawt leh ta nghal a!

"Aih ka duh tawh lo, kan kal thui leh palh ang. Chu ai chuan mu vat zawk ila, i hman tawh tho chuan" tiin thil dang chu sawipui ka tum ta daih.

"Hman chiah lo mah ila min sawmtu hi ka hnar thei lo che, chutah eng emaw ni min la khawih sak dawn zui" tiin rizai chuan min lo khuh a, he pa hian min tihtir leh tak tak mai ang tih ka hlau.

"Ka ti tak tak a nia u Marem, kan kal thui leh palh ngei ngei ang, ka rai puar len tawh em hî"

"Ka tiama che, engmah ka tihpui lo vang che. Le! Khawi maw i kut" tiin ka kut chu a rawn la a, a thil min khawih tir avang chuan ka thluak a buai leh vek tawk.

"Nâaaaaaa u Marem, engtin emaw ni ka awm a nia, a chi loh tak zet" ka ti ta ringawt a, ka awm dan chu sawifiah thiam lo mah ila ka thil tih châk chu ka hre chiang em em thung.

"Ka hria alawm, kei ang thovin i châk ve tho tih ka hria, mahse naute i neih hma chu kan insum rih a ngai tawh bawk si, keima'n ka nawr lui zel che a ni loh chuan nang chu i insum thei dawn tih ka hria"

"A nih chuan ka kut hi ka la sawn dawn a nia, i tan a hrehawm mai mai zawk ang"

"A hrehawm loh Mambawih, kan ti thei lo erawh hrehawm ti tho mah ila i kut vang hian nuam ka ti tho"

"I sawi tawp tawp zela u Marema chû, ka la zak deuh tlat zel a nia aw, ka khawih khât bawk si"

"I sawi awmzia aṭang chuan khawih ngun i duh tih ka hrethiam ta mai e! Zanin aṭang chuan i khawih ziah tawh ang" nui nghawr data a rawn tih avang chuan

"A teuh lo mai, khatiang khan ka thusawi lo la kawi suh" ka ti deuh vak a, ka kut chu ka la sawn rang hle bawk.

"A mak Mambawih, ka fiamthu ve a nih khâ" tiin ka kut chu lo lak leh a tum a, kei erawh ka lo ṭang ṭung thung.

"Khatiang fiamthuna chi pawh a nih loh khâ, ka mizia zawng zawng pawh i hre vek a, ka zak dawn tih thlengin, ka la ti ngai bawk si lo" ka ti hmuk a, u Marema chu a rawn nui ta huah huah mai.

"Aw le ka fiam tawh lo vang che, ka nuipui hmelṭha leh rilru thianghlim em em nu, min hmangaih avangin ka duh ang i ti dawn tih pawh ka hria" nuih insum aw tak hian a rawn ti a, ka kut bawk chu rizai chhung lamah a dah thla zal zal a, ka lo dang buai duh ta bik lo.

"Engtinnge a awma i hriat? Min han hrilh ve reng reng teh Mambawih" engatinge zawhna mak tak tak hi min zawh chhen mai le.

"Min zawt mak thei êeee, i zawhna kha chhan chi a nih leh nih loh pawh ka hre lo e a!"

"Chhan chi alawm a nih, min han hrilh ve reng reng teh, i ka aṭanga ngeia i feel dan ka hre chak teh mai a nia"

"Ihhhhh.... eng lo....a mak ka ti, a lum vung vung bawk sia, chuan âaaaaaaa.... ka hrethiam lo" ka ti bah ta nuai a, ka sawifiah thiam ṭhai lo.

"Han sawi zel teh, i sawi rual khan i ṭawng lo hre ve ang maiin a lo che ve zel a nia" a sawi ang tak tak chuan ka thil vawn lai chu a rawn che ve ṭual ṭual.

"Ih maw, ka khawih tirh kha chuan a lian ka ti em em a, chutiang lo chuan ka sawifiah thiam tawh lo"

"A ngai reng a ni si a, tunah chuan lian i ti tawh lo tihna em ni?" a rawn tih chuan engmah pawh ngaihtuah chiang hman lo hian

"Lian ti êeeee" ka lo ti deuh vak kher a, ka chhang rang lutuk chu ka inchhir a, ka ṭawngkam hman avang chuan ka zak ngei mai.

"Duhawm em em nu, lai hma bawk si, ka va hmangaih tak che em" tiin ka biang sa ham hamah chuan a rawn fawp nawk nawk a, ka kut pawh ka la phei ta daih.

"Bathroom-ah ka kal lawk ang a, ka lo let leh thuai ang" tiin a tho kang a, ka bula a awm lo chiah chu ka ruak huai mai.

"Enge i tih dawn?" bathroom lam a pan lai chuan ka ti a, ka bulah chuan la mu mai mai se ka ti a ni.

"I kut kha han en teh" a rawn ti daih a, ka kut ka en chuan ka kut zungṭang hmawr vel chu a lo hnâng deuh nuai hian ka hria a, amah ka va en leh chuan nui chung hian

"Kan ti thei si lo va, eng emaw ni ka'n ti mai ang e" a rawn ti a, zah avang chuan rang lutuk tak maiin ka inkhuh nghal.

"Ka lo phei leh hunah chuan i dul chung lam tal kha chu ka chang ang aw" nui huah huah chunga a rawn tih teh chu hre tho mah ila chhan chi a ni pawhin ka hre tawh lo.

A tuk zing chu zing dang ang lo takin ka tho nuam vak lo va, thawh nawm loh ka neih khât khât nen mak ka ti ang reng hle. Sawi tawh ang khan rai laia han huat em em hi ka nei hran lo va, inthiar leh step kal vel chu ka hrehawm tih ber a ni.

Zawi muangin step-ah chuan ka chhuk thla a, ka kal chak lo ngei mai. Ni dangah te chuan u Marema'n min kalpui ziah ṭhin a, mahse tukin chu a la muttui bawk nen ka kaitho duh ta lo.

"I nuam vak lo em ni Mambawih?" inhnuai ka thlen thlak rualin u Marema nu chuan a lo ti a, thingpui chu ka ṭhutna tur lamah a rawn dah phei zui bawk.

"Tukin chu a mak lutuk ka na deuh riai riai a, ka pum pawh hi a ni chiah em tih pawh ka hrethiam lo" ka ti zo chiah chu ka kap lamah chuan thil dik lo a rawn awm a, ka hlauthawng nghal hle.

"Awi le! Ka zung ringawt a nia ka nu, enge awmzia?" ka ti hluai a, ka mal leh chawn velah chuan a rawn luang thla zur zur bawk.

"Aw Lalpa, i tui bawm a keh a nih khâ, hmanhmawh ang, naute i nei dawn Mambawih, khawnge Marema pawh hi a la tho lo em ni?" ka nu chuan a rawn ti zung zung a, a chhan pawh ka hriat si loh hian ka hlauthawng em em ringawt.

"Marem, Marem, lo chhuk teh, kan hmanhmawh a ngai a nia, i pa a awm bawk si lo" ka nu chuan a ti lawm lâwm a, mahse u Marema hmel reng hmuh tur a la awm rih lo.

"LALREMRUAT, tho la lo chhuk vat rawh, i fa hi ka hrin i duh lo em ni?" ṭap ṭuau chung chuan ka ti vak a, ka ṭah chhan pawh chu ka hre chuang lo.

"Mambawih" step tawp aṭanga rawn ti hluai tu chu kan chhoh en ṭhap a, u Marema chu a rawn thlawk thla hi a ni ringawt.

"A kotu a ṭha bawk a, a lo chhuk vat alawm hei" ka nu chuan nui chung hian a lo ti a, kei erawh ka nuih a za lo nasa.

"Kal ang, ka nu ka motor chahbi kha lo keng mai teh" tiin u Marema chuan min kuah chhuak a, min zo bawk a, min chaw titih ni berin ka hria.

"Hmahmawh rawh u Marem, ka pum hi a na tial tial a nia" Vanapa Hall zawn vel kan tlan lai chuan ka ti a, naute chu a rawn chhuak mai dawn emaw ka ti tawh.

"Kan thleng ṭep, lo tuar hram hram rawh" a rawn ti a, a hma aiin a khal chak deuh sawt bawk.

Hospital kan thlen chuan a la zing ve deuh bawk nen mi an tam lutuk lo va, khum nawr kal theihah chuan min hlang a, hmanhmawh takin Labor Room tih intarna lamah chuan min nawr lut thuai bawk.

U Marema chuan uniform pawh ha lem lo hian min buaipui nghal char char a, Doctor Tetei tia a sawi ṭhin chu phone-a biain kan bula lo kal nghal turin a ti vat bawk. Minute rei lote hnuah Doctor Tetei pawh a rawn thleng a, nurse te nen an lo lut ṭhup.

"Enge i tih? Kal rawh, khata aṭang khan kal sawn rang rawh" u Marema'n ka kap lam en a tum chu ka lo ti tuar a, â leh lutuk mai.

"Naute hi a lo chhuah dan ka endik a ngai alawm Mambawih" hriatthiam loh hmel fe hian a rawn ti a, naute hrin chhuah tuma ka san laklawk lai a ni bawk nen hrehawm tak a ni.

"Ka duh teuh lo mai, en reng reng suh, nangmah lo mi dang kha en tir ta che" ka ṭawng chhuak chu a la nem lo tluang zel.

"I va ho tak e âw, a hma pawhin ka hmuh vek tawh kha" chu a thusawi chuan min va tithinrimin min va tizak lehzual tak em.

"LALREMRUAT, khatiang sawi hun pawh a ni lo, mawla, naute hi ka hrin chhuah i duh lo em ni? Ka hring chhuak lo tawp zawk mai daw em ni?" ka ti leh tuar tuar a, an lo nuih ṭhu hlawm avang chuan ka thinrim a so sang zual ta hle bawk.

"A va buaithlak tak, Tete nangma'n han ti mai teh" tiin u Marema chuan ka lam a rawn pan a, ka kut chu a rawn vuan nghal.

"A chhuak ṭep a nia Mambawih, sang zel rawh le" Doctor Tetei chuan a rawn ti a, ka theihtawp chuan ka lo sang ve ngar ngar.

"Mambawih, han sang leh hram hram teh, naute kan nei ṭep tawh a nia" u Marema chuan a rawn ti su sû a, chutah kei lah chuan min be vel chhen chu ka ngaithei leh ta ṭhak lo.

"Ka san reng hî LALREMRUAT, min hmu lo em ni? I upat tawh tawh nen, a harsatzia te hi i hria em? A dawt lehah chuan i pai ve tawh ang" ka tih khum phiar phiar a, ani lah chu a la rawn nui mai mai zui.

"Mambawih ṭawng vak vak a hun rih lo, a lo chhuak ṭep, a teuh tawh lutuk" Doctor Tetei'n a rawn tih avang chuan ka theihtawp chhuahin ka sang leh a, naute ṭap ri ka hriat tâkah chuan ka zawi ta hnawk.

"Fapa in nei e" an rawn tih chuan maimitchhing chung hian ka lo nui seih a, naute hrin chhuah lo hautak zia ka hre ve chiah.

"Ka hmangaih che Mambawih, fapa min pek avangin ka lawm e bawk" tiin min lo fawp a, ka chauh em avangin chhan pawh ka chhang let peih lo.

U Marema nena kan fa, ka fapa chu hrisel takin ka hring chhuak a, a hrin chhuah lai tak a hrehawm e tih mai loh chu a hlimawm ta phian. Amaherawhchu u Marema ka vin vak vak vel chu hnathawk te titi ti tam tu ber a lo ni a, ka awm dan ka ngaihtuah let chuan ka nuih a za ngei mai. Zah enah pawh ka en tawh lo va, ka nuih a za em em ringawt. Doctor Tetei phei chuan

"Khatiang em ema kan Doctor neih chhuan tawlawl i vin kual vel kha chu a mak a ni. Ani lah khan a hlauh hmel em em leh nghal che a, kei mai ni lovin Nurse te mak tih a tling vek alawm" a ti hial a, kan awm kim lai a ni bawk nen kan nui ta huah huah.

"Ka ngaihtuah let hian ka awm dan khan ka nuih a tiza lutuk" ka ti ve ta ringawt a, ka nui zui hak hak pah bawk.

"Khawi maw ka tupa chu, ka lo pawm ve teh ang, ka pawm châk tawh a nia" u Marema pa'n a rawn tih lai chuan ka nu chuan

"Ka hrilh tawh che khâ, pawm chi a la ni rih lo, a la sen lutuk. I zei lo si, chu bakah naute hian hnute a mamawh rih" a lo ti thuai a, chutah ka pa lah chuan

"Zei lo viau pawh ni mah ila Marema pawh a nau tet lai chuan nang aiin ka pawm tlei theih ziah kha aw, chuvangin ka tupa hi chu ka pawm dawn hrim hrim" a rawn ti ve ta khalh a, kan zavai chuan kan nui ho leh ta dar dar.

"Pa, inchawinaah khan kan chak a nia, chuan hmeichhe hovin thil show tur an neih bawk kha aw" ka bula mi ren run chuan a lo ti a, u Marema pa bawk chuan

"Ni e, tunah chuan mipa kan nei ta si a, eng emaw chu hmeichhe lamin in show ngei a ngai ang" a rawn ti ve nghal vat.

"Kei chu mipa a nih kha ka ring sa hrim hrim a" ka tih lai chuan u Marema pa driver Zira chuan

"A'n ti zaih a! Phakar mai mai, u Marem Mambawihi hi hriatthiam bik awih loh a nih kha!" a rawn ti a, mipaho chu rin aiin an lo nghal hlawm zek.

"Ka hre lo le, min tihlawm thiam leh thiam loh a ni mai" u Marema chuan a rawn ti a, a sawi tum ka hre chiang bawk sia ka melh vak ringawt.

"Le le le! Kan tupa hi a hming tur i phuah nghal ang u" u Marema nu chuan a rawn ti a, phuah nghal pawh chu pawi ka ti miah lo.

"Invin vak vak hnua lo chhuaka ti ila" Zira'n a rawn tih chuan kan fapa hming tur kan ngaihtuah muk hlawm tawh tawh kan nui leh ta vek.

"Sap hming chhawm tel tir in duh em?" ka nu chuan a rawn ti a, ka chhan hmain u Marema zawk chuan

"A pawi lo vang, Sap hming chu chhawm tel se a ṭha. Nakîn zelah a la ṭangkai zawk ang a, Sap hming kan neih avang hian kan Mizo ta viau lo tihna pawh a ni chuang hleinem" a rawn ti thuai a, a sawi chu a dik ka ti ta khawp.

"A nih chuan a Sap hming tur atan chuan a pa hming chanve hawhin MARCUS ti ila, mahse mawi in tih loh chuan a thlak leh theih tho" ka lo ti ve a, u Marema chuan min lo en ta ral mai.

"MARCUS tih chu a ṭha ang, mahse enge a Mizo hmingah kan phuah ang, han ngaihtuah leh zung zung teh u" u Marema nu chuan a rawn ti leh thuai thuai a, a phur ve lutuk chu a nuihzat thlak zawk.

"Mipa lam kan chak bawk sia tun ṭum chu ka hming chawi ve tawh rawh se, Marema lah ka pa hming chawiin kan phuah daih tawh bawk si. Kan tupa Mizo hming atan chuan LALRINKIMA tiin ka phuah e" u Marema pa chuan a rawn ti a, u Marema nu erawh a lo lungawi loh hmel ngei mai.

"A ṭha ngawt ang pa, Mambawihi hming chanve tho a ni ve dawn a, LALRINKIMA tih chu ka thlawp e" ka bula mi chuan a rawn ti thuai a, ka pa pawh a lo bu nghauh nghauh mai.

"MARCUS LALRINKIMA chu han ni phawt mai teh se, hmeichhia a nih hunah chuan in chang lo vang, chan pawh lo inbeisei suh u" u Marema nu chuan a rawn ti a, a thusawi a naupang chhia bawk nen kan zavai chuan kan nui leh ta vek.

Hospital-ah chuan zan khat kan riak a, hliam em em ka neih loh avangin ka pangai chak viau bawk. Ka fapa, MARCUS LALRINKIMA mawlh chuan ka lung a dum a, ka duhthusam ang ngeiin a pa a chhun tak zet.

Ei ṭha chi tinrenga ka pasal berin min chawm avangin hnute tui chu ka ngah pangai hle a, hnute tui kan inpe deuh char char hi a ni ringawt. U Marema chuan kan fapa chu pawm pawh a la pawm ve lo va, u Marema pa zawk chuan min pawm chhawk chhen mai.

U Marema nu sawi ang tak takin u Marema pa chuan naute pawm a zei lo ve hle a, mahse engtin tin emaw ni chuan an inpawm muhil ve zel tho.

Chapter 30

Naute ka neih aṭanga thla hnih hnu velah kan fapa MARCUS LALRINKIMA chuan kohhranah baptisma a chang ve a, baptisma a channi chuan keini ang thova naute nei thar an lo la tam reuh em em zui. A baptisma chang tur aiin kei chu ka zam daih zawk a, ka hnungah u Marema lo ding lo phei se chuan ka zam lehzual ka ring. Naute dang ang lo takin Marcus-a chu pastor in a baptis lai chuan a ṭap ve miah lo va, tui chu a lawm zawk a ni ngei ang a lo nui ver ver reuh a nih chu!

Ka putea te lam pawh naute kan neih tawh thu kan hrilh ni chuan an lo lawm ve em em a, kan fapa an hmuh châk thu ringawt an rawn sawi mai. Tlema Marcus-a a tlangval deuh huna zin chho tur chuan min chah deuh chhen a, kan la zin chho ngei ang ka ring. A chhan chu keimah mai ni lovin u Marema paw'n zin chhoh a châk thu a sawi ve alawm, chu chuan kan la zin chhoh ngei ngei dawn tih min rin tir ta bawk a ni.

Hun chu a kal zung zung a, naute ka neih aṭanga thla 5 a ral leh meuh chuan Marcus-a pawh nau sen lutuk a ni bik tawh lo va, U Marema phei chuan a fapa chu khuma mut tirin a chhaih nui uar uar thei tawh zawk.

Thla 5 mi lek la ni mahse a fing reuh em em a, a pa chu a hre ve tawh tawp. A pa ang maiin u Marema chuan nua pawm chu a zei vak bik lo va, mahse a naute pawm chu hmuhnawm ka lo ti em em ṭhin thung.

Ka nu chu a dawr lama puih ka tum ve ṭhin a, mahse amah zawk chuan a phal leh ta tlat lo. Ka fapa chu la enkawl rih zawk turin min ti a, kum hnih kum thum a nih hnuah chauh a dawra thawh chu a phal leh ta daih. Naute neih hma leh rai lai pawha inthlahrun tawh nak a lai a, chutianga engmah ti lova han awm leh ngawt chu dikin ka hre lo hle.

Amaherawhchu an ngaihdan tur ka hrethiam vek a, naute chu a nu ngeiin enkawl se an ti tih chu hai rual lovin a hriat a ni. Naute neih chu ka ngeih emaw tih theih turin ka thau tûng tung a, ka lang mawi lo lek lek zawk dawnin ka hria. Lawmtei pawh kan inah chuan a rawn leng ve zeuh zeuh ṭhin a, mahse a hman lutuk bik loh avangin a rawn leng ngun em em lo.

A rawn len chang chuan kan titi tui thei em em a, kan titi a inrual khai bawk a, Tlanzoi nen pawh an innel rang hle. Tlanzoi chuan naute ka neih tirha u Marema ka vin kual vel vak vak chanchin chu thupuiah a hmang ṭhin a, kan sawi thui hi chuan keimah ber chu a nuihza leh a nui hnem ber berah ka ṭang ṭhin.

A nuihzat thlak ve em alawm, a dawt leha nau pai ve tawh tur te khan ka ti vel a, Doctor leh Nurse te tan kha chuan ka vin kual vel dan kha mak tih loh thei pawh a ni lo vang.

"U Marem, kei hi ka thau mah mah tawh i ti ve em? Zing hi ka tho hma ang a, exercise hi ka la ve tawh dawn emaw ni le ka lo tia" thuamhnaw vel thleh fel pah chuan ka ti a, ani erawh chuan Marcus-a bawk a buaipui thung.

"Ka thusawi kha i hre miah na nge?" amah en kar chung chuan ka ti a, Marcus-a ringawt a buaipui bik chu ka thik a, ka fapa pawh ka thik chu a zah thlak ka ti.

"Hria e" tih tein min lo chhang a, Marcus-a chu a chhaih nui uar uar zui leh daih.

"A nih chu!" ti deuh hmukin ka thil tih lai chu ka ti ta hmawk hmawk a, titua rual pawh ni tawh lo mah ila ka titau chiang a ni.

"Anu saw a thinrim chiang ti raw? Anu thlem kan ngai a nia aw, lo kal rawh va thlem ang le" tiin a fapa chu a be mawlh mawlh a, engtinnge Marcus-a chu a tih nuih reng theih bik pawh ka hre lo.

"Anu titau tawh lo la, i tih tauh reng chuan Apa nen hian hrehawm kan ti teh a nia" ka bul an rawn thlen rualin u Marema chuan a ti a, ngaihsak pawh ka ngaihsak peih lo.

"Ka thusawi pawh bengkhawn duh lovin i fapa kha i ngaihsak bawk a, awi mu nghal ang che. Zanin chu nangmah ngeiin awi mu ang che" ka ti deuh hmuk a, ka mood chu thil ho te avangin a off ta vek mai.

"Bawiha enteh, anu hian a thik chiang che a lo nih hî, anu hi a nuihzat thlak ti raw, nu ve ûai tawh si mahni fapa te a thik a nia" u Marema chuan a rawn ti leh a, thinrim tak hian ka lo melh ta hrep.

"Ka nuihzat thlak hauh lo" tiin ka thuamhnaw thleh lai chu ka dah fel a, ka ti zo vat a, in hnuai lamah ka chhuk thla ta daih.

U Marema chu ka ngai a, a bula awm ve ka châk a, ani lah chuan a lo haw ve chhunah pawh Marcus-a ringawt a ngaihsak bik a, a nupui hi min ngai ve hlawl lo a lo ni ang e. Mood off zetin thingpui chu ka in a, Tlanzoi min biakna pawh chu a ri chauh ka hria. Ka ngaihtuahnaah erawh thil dang daih a awm a, hnathawh lampang chungchang bawk a ni ka rilru luah leh ta ber chu!

Ka pasal, u Marema chu a hnathawh a zahawmin keini nufa chawmna'n sum a thawk chhuak hnem tih chu hre tho mah ila keimah ber chuan tlem tala lo thawh chhuah ve ka duh a, chawmhlawm tawp nih chu nuam ka ti lo a ni.

U Marema pa in hnathawh a phal lo va, u Marema nu in a phal leh rih lo bawk a, chutah ka pasal ber pawh chuan hna thawk lo turin min duh leh bawk a, an zavaia ka hnathawh an phal lo bur chu a dikin ka hre bik lo a ni. Mo ka nih angin inchhung khur velah chuan ka che teh meuh mai, mahse kan awmpui Tlanzoi chuan min awl hneh lam hret chu a ni.

"Chho tawh ila, i thingpui in lai pawh a zo vek tawh khâ" ka hnung lam aṭanga rawn ti tu chu melh pawh ka lo melh peih rih lo.

"Lo kal rawh le" tiin ka darah chuan a lo chelh a, min kawih her a tum chu ka lo ṭang tlat thung.

"Tlanzoi nen kan lo titi a, nakinah ka lo chho ang" pangai tak chuan ka ti ve mai a, a hma ang em em kha chuan ka thinrim tawh bik lo.

"Tunah ka chhohpui duh che alawm" a rawn tih chuan Tlanzoi chu a lo nui ver ver a, a duh huna huna chhohpui chu ka tum lo chiang hle.

"Chuan engtin zel? Sawi zel rawh, ani hi chu engah mah ngai lo mai rawh" tiin Tlanzoi chu ka biaksan ta daih a, Tlanzoi erawh ṭawng tum tawh lo ang maiin ngawi ta ran.

"Ka ngai viau che a nia" ka bula mi chuan a lo ti leh a, amah ka ngaih ang leh ka thlakhlelh angin min ngai ve lo tih chu ka hre vek tho.

"Marcus-a a mu tawh em ni?" a thil sawi lai pawh sawi chhunzawm duh tawh lovin ka ti leh ta daih a, u Marema thil sawi vang nge ni Tlanzoi chu no sil turin a kal sawn nghal vat.

"Mu tawh e" a rawn ti ve leh mai a, banga sana lo intar chu ka en a, dar 10 chu a lo ri hnai ve leh kuar tawh.

"Ka pawm chhoh i duh em ni? I duh hi chuan sawi ve mai ṭhin ta che" tih leh min rawn pawm a rual a, a chak bawk si nen tal vak vak mah ila min thlah duh der lo.

"Kan tlu ang e aw, na ka tuar peih miah lo a nia" kan nupa room panna step-a kan kal chhoh lai chuan ka ti a, ka thau ve tawh tho bawk sia min tlukpui mai ang tih ka hlau.

"Tlu lo ve le, hei en la" tiin min han vawr kang mai a nih chu! Ka ṭe chhuak tûar a, a banah rang takin tla thla leh mah ila ka hlau hman em em tho.

"I mawl em ni? Khatiang khan vawi khat mah min ti tawh suh, â leh lutuk mai" ṭawng rin hlau takin ka ti hrawk a, kan nupa room kan thlen hnaih tawh vang a ni pakhat.

"Mambawih, min ngam sawt viau lo maw, i pasal hi min cho sawt viau chuan ka hria a ni" nui deuh suk chuan a rawn ti a, a sawi dik reng.

Kei hian ka pasal hi ka nel tawh em em a, ka inneih tirh aiin ka hmangaih lehzual tawh bawk a, ka ring ngam a, ka vin bawrh bawrh ngam ve tawh a, a chhan chu engtin mah min ti dawn lo tih ka hriat chian em vang a ni.

Amaherawhchu ka nela ka vin bawrh bawrh avangin a zahawmna chu ka hmuh hmaih sak chuang lo va, ka pasal leh chhungkawpa a nih angin amah chu ka zah em em zawk a ni. Min hmangaih tih ka hria a, ka ringhlel buai vel duh lo va, a laka han titauh vel chu nuam ka ti em em ṭhin a ni.

"Min dah thla tawh la, ka mut pawh a chhuak ṭanin ka hria" ka tih chuan min dah thlak tum hmel loh zet hian min la pawm run a, ka sawi chu a hre lo zawk nge ni!

"Hei, khawnge min kalpui i tum? Enge kan tih dawn?" ka ti chhuak leh vat a, engvanga bathroom lam pana min pawm phei leh ta nul nul nge a nih chu ka hre leh ta hauh lo mai.

"Tah hian lo awm ang che" tiin bathroom chhuatah chuan min dah thla a, bathroom kawngkhar chu a chung lamah ah a la kal daih zui.

"Enge kan tih dawn? Ka chhuak duh a nia, enge tih i tum?" ka ti leh hluai a, kan tihtur chu ka bo ve em a ni.

"Ka zung lawk dawn maw le" min chhan dan avang chuan ka melh hrawk a, ani lah chuan min la nuih char char zui.

"Nangmah pawhin i zung thei reng si a, engatinge min hruai tel ve kher? Ka chhuak duh a nia, kawngka khi min lo hawn teh" ka tih chuan min hnungchhawn daih a, a zung ri ta pur pur mai.

"Che naupang chhia viau ṭhin lo teh u Marem, Marcus-a pawh a lo harh maithei a nia aw, a hrim hrimin engatinge kawngka hi chung lamah i kalh kher kher?"

"I chhuah ka hlau alawm maw le, i chhuah chuan i lo va titau leh vel ang a, i awm dan tur ka hre sa vek"

"Ka titau tawh lo, chuvang chuan kawngka hi lo hawng thuai a, Marcus zawk a nia ka ngaihtuah daih ni"

"Bawiha chu ngaihtuah suh, a mutui viau ang. Min lo nghak lawk rawh, ka zung zo a ni mai" a tih hnu rei lote ah ka lam a rawn hawi a, min lo kuah leh ringawt tawh.

"Min kuah lo hian kawngka khi hawng vat teh, ban pha na ila chuan ka chhuahsan na che a rei tawh khawp ang" ka tih chuan kawngka chu a han hawng a, a rang a rangin ka chhuak nghal.

Khumah chuan ka inthawlh a, ka sira ka fapa muhil chu hmangaih takin ka en tlawk tlawk bawk. Khum lo hniam sut danah u Marema chu a lo mu ve tih ka hria a, min bia emaw min khawih emaw a nih chuan pangai taka lo chhan let chu ka tum tawh zawk a ni. Han titauh reng pawh chu a dik bik chiah lo, mahse amah ka thlakhlelh avangin thikna hian ka rilru an lo luah khat leh ṭhin mai chauh a ni.

"Mambawih, ka lam lo hawi teh" tiin min kuai her a, a âwmah chuan min pawm vang vang a, ka lo ngawi kar thung.

"U Marem, min ngai ve ngai miah lo em ni?" kan ngawih reng hnu chuan ka ti chhuak phawng a, ka zawt lo thei lo a ni.

"Ngai tehreng mai, ka nupui ber ka ngaih loh te'n mi nupui ka ngai daih dawn em ni?" min chhan dan vel kher chu ka va lawm lo tak.

"A nih si chuan engatinge Marcus-a chauh i buaipui ṭhin? I lo haw te ka lo nghakhlel ve em em zel a, nang lah chuan kan fapa chauh i ngaihsak leh daih zel si, chutah ka thusawi pawh i hre lo der hmak duh a nia" zak buai vel duh lovin ka rilrua awm chu ka sawi chhuak ta tawp.

"Âwwww ka Mambawih, keipawh hian ka ngai lutuk che alawm, mahse kan fapa pawh hi ka ngai ve tho. Chuan i thusawi kha ka hre vek a nia, naktuk zing aṭangin ka bulah exercise lo la ve tawh la a ṭha ang"

"I hriat vek si chuan engatinge min chhan ve nghal mai loh? I fapa i chhaih chung pawhin khatiang thu sawi te kha chu a har awm loh loh nen"

"Mambawih le! Hetiang taka kan fapa i thik hi ka la hre ngai lo, mahse ka rilru i va tihlim si em. Ka hmangaih em em nu, tun aṭang chuan ka duat lehzual ang che" tiin min lo fawp a, keipawh chuan ka lo chhang let ṭha kher mai.

"U Marem, nau pai ka duh rih lo a nia aw, Marcus-a a la te bawk si" kan awm dan a dik loh ṭan leh tâk avang chuan ka ti sep a, nupa nun kan hman dun lohna pawh a lo rei ve leh tawh hle.

"Kan insum rei viau tawh i ti zawk lo em ni? Chu bakah eng em a thleng kher bik nâng, a lo thlen tâk leh a ṭha hlei hlei" a rawn tih chuan chhan let tumin ka lo ang zuai a, ṭawng hman loh khawpa rangin ka hmui chu a hmuiin a rawn khar zui hmak.

Min sawng bawl dan chu ka tan chuan thil thar vek ang mai hi a ni a, amah ka mamawh tih chu ka pha lo, mahse han rai leh thawt thawt chu ka hlau a ni. Ka taksa chhunga a rawn luh lai te chuan ṭum dang ang bawkin a tawt ṭha leh hle a, a tir lamah hi chuan a hmanhmawh vak ngai lo tlangpui. A rei telh telh a, a che rang tial tial a, kei chuan a hnunga lo ṭham tawn tawn tih mai loh chu tih theih ka nei lo.

Kan zo chiah emaw ka tih laiin min saisir tir a, ka hnung lam aṭang chuan ṭan a rawn khawh leh ta zawt zawt mai. Ka thaw a dik tawk lo va, ka rilru a fim lo vek a, ka ṭe chhuak mai ang tih chu ka hlau a ni. A chhan pawh ka hma lawkah kan fapa Marcus-a a mu bam a, amah tiharh zawnga thawm ka chhuah lohna'n ka hmui chu ka pet fan fan.

A che zawk a nih vang nge ni u Marema chuan kei anga thawm neih châkna a neih ngai ka hre lo va, a rum leh deuh ngut ngut ṭhin tih mai loh chu! Nge nia ani hi a lo insum ve char char zawk?

Kan insum rei tawh vang nge ni a che duhthaw em em a, a rei hnuah phei chuan min dim tawh lo hle. A tawpa tawpah chuan a vawi hnihna atan vanram tlafual chu kan thleng dun leh ta a, a vawi khatnaah pawh khan ka chau deuh tawh a, a vawi hnihnaah phei chuan ka chau hnâwp thei.

Min kuah hle hle a, keipawh chuan ka theih anga nghet chuan ka kuah let ve ṭai bawk. Kan thil tih laia Marcus-a a lo harh miah lo chu a vanneih thlak ka ti hle a, harh na se chuan engkim a buai zo vek a ni mai.

"Naktuk thawh hma kan ngai si a, intifai tawh lovin mu nghal hmak ang aw" a rawn ti thum dup a, chhan pawh chhang lovin ka mit chu ka chhing zui ta vang vang.

Zingah chuan naute ṭap ri chuan min tiharh a, kei chauh ni lo u Marema pawh chu a rawn harh ve nghal. Khuma ka thuamhnaw lo awm darh nuai chu lain ka inbel ṭha sawk sawk a, Marcus-a chu pawm vatin hnute ka pe ta zung zung. Chutah u Marema chu a rawn tho chhuak a, bathroom-ah lut zuaiin a rawn chhuak leh a, exercise la turin a insiam zui ta bawk.

"Tukin chu ka ti leh lo mai dawn em ni le, Marcus-a hi ka ngaihtuah leh ta riau mai, tunah muhil leh pawh ni se nakinah a ngaihtuahawm dawn riauin ka hria" ka fapa awi hliau hliau chung chuan ka ti a, u Marema pawh chu ka en tawh lo.

"I thu thu a ni mai alawm, thau emaw i intih avang khan ka lakah insit lo la, ka mitah chuan nang tluka ṭha an awm lo tih hre reng ang che" a rawn tih chuan ka lo nui mai a, a thusawi avanga nui ka ni bawk.

"Mi dang pian nalh leh chhe lo deuh deuh te hmu ta la chuan khatiang rilru kha i put reng ka ring miah lo" a rilru chu ka hre châk tlat a tin ni!

"Pian nalh leh nalh lovah ka buai hleinem, thinlung leh rilru lam zawk hi alawm kei chuan ka en"

"Ka awih kher lo ê, mipa chuan hmel leh pian lam an en ber ṭhin tih pawh Lawmtei ka aṭangin ka hre vek"

"Mipate hi kan inang vek hleinem Mambawih, chuan mi dangte anga mipa lerh leh nupuite thlahthlam duh mi ka ni lo bawk. Hmeichhe ṭhenkhat, nupui ka neih hnu pawha min iai lo te pawh an awm ve nual asin" a thusawi tawp ber chu ka bengkhawn ta hle.

"Maw? Hmeichhe ṭhenkhat chuan an lo hel ṭhin che i tihna em ni? Nupui i nei tawh tih hre chung pawh hian maw!?" ka la hre ngai bawk si lo va, mak chu ka ti ve deuh.

"Hel ṭhin e le, i pasal hi ka luck teh mai a nia aw" nui vur vur chung hian a rawn ti a, zep lovah chuan ka hlauthawng ru em em.

"A nih chû" tih chiahin ka chhang a, amah pawh en tawh lovin Marcus-a hnute hne lai chu ka en ta daih.

U Marema pawh kan nupa room aṭang chuan a chhuak a, inhnuai bera a Gym room-ah a kal leh dawn tih ka hre mai. Kei erawh ka ngaihtuahna a kal thui em em a, engtikni ah emaw ni chuan keia pian nalh leh hmelṭhate hnena min kalsan mai ka hlau a ni.

Tukṭhuan ei hun a lo ni a, chaw ei tur chuan dawhkan chu kan kil ṭhap a, Marcus-a pawh ka pawm ran mai. Chaw ei thei rual a nih tawh avangin Marcus-a chu chaw ka barh a, rin ai takin chaw hi a duh viau bawk. Chaw duh chu a ṭha a, chak pawh an chak hma an tih kha maw le.

A bik takin Marcus-a chuan a pa leh a pu chhaih chu a hre hrang deuh bik a, kei tih lovah chuan pawm tlei zing ber an ni ang. Ṭah belh em em a ni lo va, a intihnat palh chang erawh hi chuan a ṭap uar thei reuh khawp.

Chhantu ngai ngawih ngawih ang mai hian a ṭap ve ṭhin reuh a, a ṭah tawh hi chuan ka thinlung chhung hi a lo na ve vawng zel a, thlema ṭah tir loh dan ka ngaihtuah vat ṭhin reng bawk.

Chhun lamah chuan ka fapa chu puain ka awi hiau hliau a, a muthilh hnu chuan kan nupa room lamah chhovin ka mut fel zui nghal. Ka chhuk leh chuan in chhunga chetna awm ngai vel ka en zung zung a, Tlanzoi khawih hman loh leh a ṭûl ṭul chu ka lo tifel ve mai. U Marema chuan ka nau pai lai ang em emin chet chu a khap bur tawh lo va, mahse che tam tur chuan min ti chuang lo.

"Tlanzo, u Marema Gym room lamah hian ka kal lawk dawn a nia, min mamawhna i nei a nih chuan min lo ko mai dawn nia" ka ti a, ani pawh chuan aw tihna'n lu min lo buk khum ve nghauh.

Gym room ka luh chuan ka vawi khat luhna ni lo mahse a awm kim ka ti em em a, ka phone chu ka kutah ka hum ran bawk. Exercise lakna kawr te ka inbel ve thlap a, mahse ka pian a nalh loh vang nge ni ka inhmeh teh chiam lo. Ka phone chu ka lek kang a, tih dan tur ka downlowd sa ho chu ka en leh ta phawt. A hmasa berah chuan zuan a lo ngai a, mahse zuan san erawh a ngai hran lo.

A dawt leh atan chuan Squad tih a lo ngai a, chu pawh chu ka ti ve leh mai. Amaherawhchu ka vawi khat tihna vek a nih avangin a nih dan tur dik tak ang pawhin ka la ti hlei thei lo. Ka chau hma em em a, mahse ka tilui hram hram tho.

Nitin darkar khat zel tal ka tih theih chuan zawi zawiin ka pian a mawi phah ka ring a, u Marema erawh ka tum dan vel chu ka hrilh leh ta lo. Zing lamah te kha chuan ti lo mai turin min ti a, a thusawi avangte khan ka rilru ka thlak leh a ring ngei ang.

Kei erawh chuan nupui fel leh ṭha, an pasal te'n an iai vat lohna'na hriselna ngai pawimawh leh exercise la ṭha mi nih ka tum ruh hle thung. Kei ve mai mai, mi hausa nun dan leh khawvel changkanna pawh pawl pha em em lo ṭhin kha u Marema nen kan inneih hnuah hi chuan ka danglam vek tawh a, hmasawn ka ngaihzia ka hriat avangin ka inzir tlâuh tlauh reng mai. Kan bungbel hman dan leh chawhmeh siam dan te a inang lo va, kan ṭawngkam hman dan a inang lo va, kan inchei duh dan thlengin a inang lo vek zawk a ni.

Tunah erawh chung zawng zawng chu ka nunpui thiam ve tawh a, a ṭul chuan changkang takin ka inchei a, a ṭul leh thuamhnaw ṭawp lampang pawh ka ha hreh leh chuang lo.

Han chhuah em emna tur ka nei zing ngai lo bawk a, mi hausa ang maia inchei vel chu ka nei khat khawp mai. U Marema chhungte lam an lo len dawn hi chuan ka lo intuai thar ve vat ṭhin a, ka pasal chu keimah avangin an hmu eng emaw ang tih ka hlau a ni.

A tawpna'n tiin a tira ka tih hmasak ber chu ka ti leh hram a, chutah ka zuang kang lei ka rap leh chiah chu ka ke ka rap sual ta. Ka ṭe ṭhawt a, ka ke chu ka bilh ni maiin ka hria.

Ka thawm hriain Tlanzoi chu Gym room-ah a rawn lut vat a, ka ke chu a rawn en ve nghal. Ka ke chu na ka ti em em a, Tlanzoi pawhin First Aid box chu va lain ka lam a rawn pan leh ta vat. Bandage chuan kan tuam ta tawp a, buaipui vak dan kan hre lo duh hle.

Tlanzoi chuan u Marema hrilh mai turin min ti a, mahse hrilh chu a ṭulin ka hre ta kher lo. Ani chuan ka ke nat dan zawng zawng chu a hre ngei ang a, keini pahnih ai thlawt chuan buaipui dan pawh a thiam zawk ngei ang. Tlai a lo haw huna hrilh law law chu ka duh ta zawk a, bai auh auh chung chuan ka kal ve thei ta hram a ni.

Ni danga a lo haw hun ṭhin ah pawh u Marema chu a lo la haw lo va, chu bakah ni dang ang lo takin vawiin ni lengin min lo la be lo hrim hrim. A rawn haw tlai tâk em avang chuan ka call ta tawp a, a rawn haw mek thu a sawi chuan ka rilru pawh a hahdam ta huai.

Kan in a rawn thlen chuan chaw ei ka lo siam zung zung a, a ngawi ngul a, biak huphurhawm khawpin a hmel chu hmuh a nuam lo.

Ka thil hrilh tum ber pawh chu ka hrilh leh ta chuang lo va, a mood a fuh rih lo bawk nen hrilh chu ṭul berin ka hre lo a ni. Kan nupa room-a kan chhoh chuan a thuamhnaw hlip sawk sawkin bathroom lamah a lut zui nghal a, keipawh chuan a thuamhnawte chu balbawmah ka lo dah ṭha ve nghal. Khuma ṭhuin a lo chhuah hun chu ka châng a, thil dik lo eng emaw chu a awm chiang a ni.

A rawn haw tirh te khan a fapa pawh a be miah lo va, a nupui ngei pawh min be lo va, a pa zawhna chiah a nih kha a chhan. A pa pawh khan lo be hmasa lo se chuan a ṭawng chhuah duh pawh ka ring lo hial zawk. Chutiang khawpa mood fuh lova a lo haw chu ka hre ngai lo va, a nupui ni mah ila biak hmasak chu a peihawm loh tak zet.

Bathroom aṭangin a lo chhuak a, ngawi renga ka lo en avang chuan mak tih hmel zet hian min lo en a, mahse min la be ta chuang lo cheu.

Inhru hul mawlh mawlhin khuma a kawr hak tur ka dah chhuahsak sa chu a la a, a inha ṭha zui nghal bawk. Ka bulah awm reng mahse a awm dan vel chuan ka ngaih a tiṭha lo va, hlauhthawn ruk riauna ka nei a ni.

"I mood a va'n off awm ve u Marem?" cream a inhnawih lai chuan ka ti sep a, a hnung lam aṭang chuan ka kuah ran bawk.

"Off khawp mai" tih te hian min lo chhang a, eng pawh ni se a mood a off em emna chhan hi ka zawh a ngai.

"Engatinge i mood chu a off viau a? Min hrilh ve thei ang em?"

"Kimtei te inah ka kal a" a thusawi avang chuan ka kuahna chu ka la thla zal zâl a, hmeichhe dang laka min kalsan ka lo hlauthawng sa bawk nen a hma zawng aiin ka hlauthawng lehzual.

Chapter 31

En pawh min en lo va, chutah Kimtei te ina a kal thu a la sawi zui. Enge Kimtei te inah chuan a tih ang? Zawt ta ila min hrilh duh ang em? Kimtei te lam nen chuan inzawmna an nei tawh lo khan ka hre si a, mahse engatinge vawiin tlaiah a kal leh si? Ni lo, u Marema hian kal chhan ṭha tak a nei ang, chutiang ni lo se a kal bik tawp nâng. Nge nia u Marema leh Kimtei hi an lo la inhmu reng ṭhin zawk?

Ka rilru chu a insual nuai nuai a, eng ber nge tihtur pawh ka hre lo. Zawh chu ka tum ûk a, mahse a mood off lutuk chuan min ti zawt peih lo vek bawk si. Bai deuh auh auhin kan khum lam chu ka pan a, mawza ka bun thuah tlat avangin ka ke chu tuam a ni tih pakhatmah a hriat loh. Rizai chuan ka inkhuh zal zâl a, mut erawh ka tum hran chuang lo, ka tihtur hre lo lutuk leh sawi tur hre lo lutuk chu khumah ka awm ni maiin ka hria.

Ka lam a lo hawi a, ka awm dan chu min en leh a, chutah min kal pelin kan nupa room aṭang chuan a chhuak ta daih. A kal liam thleng chuan kawngka chu ka la en reng a, a awm dan chu mak ka tiin ka rilru a tibuai. Thinrimna emaw a nei a nih te chuan sawi ve mai se, a nupui ka nih angin a mood off chhan chu min hrilh ve mai se ka ti.

Keimahin ka ṭhu tlawk tlawk a, mut nghal mai chu ka duh ta rum rum. Marcus-a chu ngaihtuah viau ka tum a, mahse u Marema'n a rawn pawm chhoh ka rin tho avangin in hnuai lama chhuk chu ṭul kherin ka hre leh ta lo.

Ka lo muhil a ni ngei ang Marcus-a nui ri uar uarah chuan ka harh a, ka mit ka men chuan a pain a lo chhaih vel mek chu ka hmu nghal zat. Ka mut a chhuah deuh tawh avangin ka chhing leh nghal a, u Marema chuan Marcus-a chu ka bula a rawn mut ṭhat tir ve mai ka ring bawk. Engtin tin emaw niin u Marema chuan a fapa chu a bia a, pakhat zawk pawh chuan a aw a chhuah ve nasa reuh khawp.

"A na!!!!!" u Marema'n ka ke na lai tak a rawn sik rual chuan ka ti zawk a, Marcus-a chu ka hmaah a lo muhil bam tawh bawk.

"Mambawih, i ṭha em?" min ngaihtuah taka a rawn tih chuan ka lo ngawi reng a, a hmaa a awm danin ka rilru a tibuai bawk nen ka ṭah chu a chhuak ta hle.

"Mambawih" a rawn ti leh chuan ka awm dan chu ka siam rem a, ani chuan a bana indo kang chung hian min lo en reng.

"Ka ṭha e, min ngaihtuah suh" tiin ka hnungchhawn a, ka hmaa ka fapa muhil chu ka kuah zui daih.

"I ṭha miah lo, na i nei em ni? I khawi lai nge na?" a rawn ti leh zung zung a, tuna taka min be peih leh si chu ka ning dawnin ka hria.

"Na ka nei lo, min ngaihtuah duh suh, muhil vat zawk rawh. Vawiin lamah te i chau awm si a, min be lo khan muhil vang vang la a ṭha zawk ang"

"Ni lo, na chu i nei chiang alawm, i khawi lai nge na? Min hrilh teh Mambawih, min hrilh hma chu ka mu thei dawn miah lo a nia"

"Ka ke ding lam leh ka thinlung a na" ka ti ta nge nge a, ka sawi hma chu min zawt emaw min enkual emaw kha a ni leh dawn tih ka hre lawk vek.

"Enga!?" rawn ti thuaiin rizai chu a hlim a, ka ke ding lam chu a en ta reng a, mawza chu a phelh ta vat bawk.

"Lalpa le! Engtinnge i tihnat Mambawih? A ruh lam a va nih duh hmel ve, a tuamna hi ka phelh dawn a nia" tiin u Marema chuan dimte hian ka ke chu a khawih a, ka ke chu a intuam tawh lo tih hriat tak hian a vawt sung sung mai.

"A lan dan chuan i ke i tiulh a nih dawn hi! Engtinnge i tihulh theih reng reng Mambawih? Fimkhur deuh hian che ṭhin rawh, nge nang hi i lo che leh vak tawh zawk?"

"Ka chetna vang pawh a ni lo, thil dang vang zawk a nia. Aw kha lai kha, kha lai tak kha a na a nia, zut dim deuh teh aw" a na lai ber a zut lai chuan ka lo ti a, ani pawh chuan a zut dim ta hle.

"A nat lutuk lohna'n ruhna damdawi ka'n kap ang e" tiin khum aṭang chuan a tho tharh a, rei lovah lo let lehin ka ke chu a spray hit ta mem mem.

"Ti hi chuan a zia deuh tawh ang, naktuk lamah erawh a la vun dawn avangin dim hle ang che. Chuan, eng chu maw i ke i tihnat chhan hi!?" a rawn ti a, ka ke chu a zut pah reng bawk.

"Gym room-ah ka kal a, exercise ka la ve maw le" ka tih chuan a lo chek tlak tlak a, a zut vang nge ni ka ke chu a dam ta huaiin ka hria.

"Nang hi pian nalh i duh avangin i lo zu kal lui te chu a ni em lo maw? A ṭul kher lo ka tih khâ" a rawn ti leh a, kei erawh chuan ka lo chhang duh tawh rih lo.

"Min han hrilh teh Mambawih, pian nalh chu i duh viau em ni?" min en chunga a rawn tih chuan

"Aw duh e, hmeichhe dang pian nalh leh hmelṭha deuh deuh te laka min kalsan ka hlau alawm" ka lo ti ve leh ta nge nge a, a rawn nui ri suk ringawt a nih chu!

"Engatinge maw nang te reuh hi thil hrilhfiah i ngaih ṭhin ni âw, ka nupui hi ka phatsan ngai dawn lo che tih hre ta che" a rawn tih pawh chuan awih lo zet hian ka lo en a, ka rilru a na laklawh tawh tlat.

"Ka hlauthawng alawm maw le, nichin lawka i awm dan vel aṭang phei kha chuan min hne tawh i ang. Min biak châkna reng kha i nei lo va, i nupui biak ngam loh khawpin i awm a nih khâ" ka tih chuan a rawn insawn chho a, Marcus-a lam chu ka hawi leh nghal daih.

"Ka tihpalh Mambawih, ka thin a rim bawk sia ṭawng kha ka peih hlawl lo alawm" ka hnung lam aṭanga min kuah chung hian a lo ti a, a thinrimna chhan te pawh chu sawi ve nghal mai awm.

"Engatinge i thinrim? I nupui ka ni a, min hrilh chu i hreh em ni? I nupui hi hrilh tlakah min ngai lo em ni?"

"Ni lo ve, chutiang zawng pawhin ngaihtuahna ka lo pu lo hrim hrim. Hrilh che chu ka tum tho a, mahse ka fapa kha ka pawm hmasa duh leh ta thut zawk a ni"

"I lo haw tirh pawhin i pawm duh miah loh khâ, i fapa lo en ṭawk ṭawkna che pawh i hmu lo va, zanin kha chu i danglam thlawt a ni"

"Aw le, ka fapa leh ka nupui chungah hian zanina ka awm dan avang khan ngaihdam ka dil e"

"A nih chuan sawi tawh rawh le, engatinge khatiang em ema mood fuh lo khan i lo haw?"

"Kan insual a" a rawn tih chuan rang tak leh phawk zeta amah en chung hian

"Enga!?" ka lo ti hluai a, an insual thu a sawi chu ka mak tih a tling em em a ni.

"Vawiin tlai lam khan Kimtei kan Hospital-ah a rawn kal leh a, a ṭawng hnem lutuk kha an in lamah ka hruai haw ta tawp a, chutah a u mipa te kha ka lakah an lo thinrim daih a, nang chenin an sawi ri che a, ka insum thei ta lo alawm"

"A va ho tak, insual hi a ṭha miah lo a nia aw, tlangval mai mai ni tawh lovin pa leh pasal i nih tawh tih hi hre reng rawh. Chuan na te i nei em? An khawihna lo che maw?" hlauthawng tak hian ka ti thuai thuai a, ani ve thung chuan nui ri hak chung hian

"Na te chu nei hman lo tak ka ni. Min hneh lo lutuk kha hnek pawh ka hnek rei duh lo, ka kutthlak an dawl lo lutuk" a lo ti sam et mai.

"Kimtei te inah chuan kal tawh miah suh, kal turin ka duh tawh lo che. I kal tih ka hriat khan ka thinlung hi a rawn na a, i nupui hual lai a lo ni ve tawh bawk nen in inngaizawng leh mai ang tih ka hlau a nia"

"Mambawih, nang chu ka hmangaih che a, ani te chu ka hmangaih ve hleinem. Chuvangin hlauthawng lo la, ka hmangaih em che avang hian ka phatsan dawn lo che tih hi hre reng bawk ang che" a rawn tih chuan a lam hawiin ka insiam rem a, ka hmai chu a kutin a rawn nul ve nghal.

"Ka Mambawihi hian pian nalh te i lo duh ve a, ka mitah chuan nang tluka pian nalh leh hmelṭha leh min hmangaihtu hi an awm reng reng lo" khi suk chung hian a rawn ti leh a, chutah kei chuan

"Pian nalh te chu a ṭha alawm, chuan mipate hian in duh tih ka hre bawk. Mawng lian te in ngaina a, hnute lian te in duh a, nang pawh hian i duh dawn chiang lutuk. Chuvang chuan exercise te lak ka duh a, i mit tlung zo ngei hmeichhia nih ka duh a ni" ka ti ve leh ta phawng mai.

"Nang nu te reuh hi! Khang thute kha khawi aṭanga i hriat nge? Ni dangah i sawi ngai bawk si lo, tu emaw ni tak chuan an hrilh chiang che a ni"

"Lawmtei'n min hrilh vek alawm, chuan thil eng emaw ni ah ka chhiar bawk. Pha suh, ka sawi kha a dik tih ka hria alawm"

"Kei chu ka nupui mawng hi ka duh tawk chiah a, a hnute te hi lian vak lo mahse khawih a nuam ka ti tawk chiah a, duh leh mipa dang chuan lian pui pui chu lo nei mai rawh se" tiin ka mawng tam chu a rawn ṭham a, ka hnute pawh a rawn khawih zawm nghal.

"Phakar pa" tiin a âwmah chuan ka chum taih taih a, chutah keimah vek chuan

"I laka ka thinrim viau pawh hian ho te tein min tihlim leh thei mai zel a, enge a chhan pawh hi ka hre lo" ka ti nang nâng a, ka rilru a hneh hma thei lutuk chu a mak a ni.

"A chhan chu maw nang hian i thinlung leh tih tak zeta min hmangaih vang a ni. Kan hmangaih te chu haw viau mah ila kan haw rei thei tak tak ngai lo va, eng dang zawng aiin hmangaihna chu a chak zawk miau a ni" a rawn tih chuan a âwmah ka bet nghal chat a, a thusawi ril tak chuan ka rilru leh thinlung chhungril a hneh hle.

"I va sawi dik tak" tiin ka kauh vak a, ani pawh ka awm dan avang chuan a rawn nui chhuak ve ta hial.

A tukah chuan dar 6 velah ka tho a, in hnuai lama chhuk nghalin ei rawng chu ka bawlpui a, Tlanzoi pawh a ṭawng leh siam siam tawh. Rei lote hnuah u Marema nu leh pate an lo tho chhuak ve a, thingpui pawh ka lo siam ve vat.

U Marema pa chuan Marcus-a a la thawh leh thawh loh min zawt a, keipawh chuan a la thawh loh thuin ka lo chhang ve mai. U Marema nu leh pate hi chuan an tupa hi an lawm em em a, a ṭah loh lai hi chuan an pawm hnem ve ta khawp mai.

Dar 7 leh a chanve velah u Marema chuan Marcus-a chu a rawn pawm thla a, Marcus-a chu a rawn nui thla leh uar uar reuh tawh. Chutah u Marema pa chuan Marcus-a chu pawm a lo chuh vat a, pakhata pawh chuan a lo duh ve mai.

U Marema chu kan awmna lamah a lo phei a, ka hnung lam aṭangin min lo kuah leh ringawt tawh a nih chu! Kan hma lawkah a nu leh Tlanzoi an awm ve reng bawk si a, zak tak ka ni.

"Marem tun lai in buai em? Chawlh i la zawk thei ang em?" tukṭhuan kan ei laiin u Marema nu chuan a lo ti a, u Marema pawh chuan chaw bar mawlh mawlh chung hian

"Buai chu buai em em lo ve, engenita?" a lo ti ve mai.

"Bungrua min zu laksak leh teh ka ti a, i hman chuan Delhi lamah dawr bungrua vel min zu laksak teh" a nu chuan a lo ti a, kei chuan Marcus-a chu chaw ka lo barh mial mial.

"Khû lam aṭangin lo thawntir mai la nu, tunah chuan ka peih vak tawh lo ê, chu bakah Mambawihi leh Marcus-a pawh ka ngai lutuk dawn asin"

"Âwwwwww, a hma zawng pawhin min laksak ziah khâ, Mambawihi te pawh i lo haw hunah i hmu leh dawn tho alawm"

"Ka hre lo le, keimah ni lovin ka nupui hi dil phawt la, Mambawihi'n a phal te chuan ka kalsak dawn che a nia" a thusawi avang chuan u Marema chu ka melh ta vat.

"Phal loh tur thu a awm dawn em ni? Keimah berin ka mamawh che a, sumdawnna thil a nih tawh hi hre ta che" u Marema nu chu a thin a rim ṭanin ka hria.

"A hma ang kha ka ni thei tawh bik hleinem, tunah chuan ka nupui leh ka fapa an awm ve tawh alawm"

"Nui, khu lam aṭanga lo thawn chhoh chu a theih mai lo em ni?" u Marema pa chuan a rawn ti ve ta nge nge a, chutah u Marema nu chuan lungawi lutuk loh hmel pu chung hian

"A harsa alawm maw le" a lo ti deuh hmuk a, a ṭhutna aṭanga tho chhuakin a kham zui ta daih.

Ka nu awm dan avang chuan namen lovin ka inthlahrung a, u Marema pawh chu kalsak ve mai awm a nia te ka ti ta rum rum. Amaherawhchu kal ta se ka ngai dawn chiang a, a tel lova ni rei lote awm pawh chu hrehawm ka ti dawn tih ka hre chiang em em thung.

Rei pawh ei lovin Marcus-a chu ka thawhpui a, tun atan chuan kan nupa room lama awm chu ka duh rih zawk a ni. Marcus-a ka biak vel lai chuan u Marema chu kan nupa room-ah a rawn lut a, a thuamhnaw hak tura ka lo dah chhuah sa chu a inthawlh zui nghal.

"Ka nu avang khan nuam lo ti suh aw Mambawih, kum dangah ka kalsak ṭhin sia a lungawi lo ve deuh a nih kha" hna kal tura a insiam mawlh mawlh lai chuan a rawn ti a, nuam lo ka tihna erawh a bo chuang lo.

"Kalsak leh mai mahla a pawi hleinem, ka hmingte kha sawi ri lo zawk la a ṭha tur a nia" ka lo ti ve sep a, u Marema nu chuan min ngaih dik loh vek ka ring.

"Ka sawi rik loh te'n a chi nâng, min ngai lutuk hi ka kal hlanin i lo ṭap zankhûa mai ang asin"

"Keimah lam chu eng pawh lo ni se ani te chu i nu a ni a, a thusawi kha zawm zawk la a ṭha ka ti khawp mai, kei chu min ngaihtuah suh"

"Ani chu ka nu a ni meuh mai, mahse nang chu ka nupui i ni tlat. Pumkhat kan nih tawh avangin in kalsan mai mai hi ching tam lo zawk a, kan inngai ve ve dawn si" min en chuang lo chuan a rawn ti a, a sawi chu a dik ve leh reng tho bawk si.

"A nih chuan engtinnge i tih dawn? I kal dawn nge dawn lo? Ka hmingte kha i sawi ri ringawt leh nghal"

"Nangma'n i phal leh phal loh a ni mai alawm, i phal chuan ka kal ang a, i phal loh chuan kal lovin tih dan tur ka ngaihtuahsak ang"

"Ka phal alawm, ka phal lutuk. Bungrua vel chu zu la la, tluang deuhin i lo haw leh zawk dawn nia. Ka nu nena kan inkar tihchhiat hi ka duh lo va, ka duh ngai lo bawk ang" ka tih chuan ka lam a lo hawi a, khumah chuan a rawn ṭhu thla ve nghal.

"I phal chiang tak zet maw? Ka nu thinrim i hlauh vang mai mai a ang ka ti, i rilru dik tak min hrilh tlang tawp rawh Mambawih" ka bianga dawm chung chuan a rawn ti a, min ngaihtuah hmel hle bawk.

"Zep miah lovah chuan u Marem, i tel lova lo awm chu a khawhar thlak dawn hian ka hria a ni. I cham hun chhung tur chu ka hre lo va, mahse ka huphurh ve deuh"

"Aw le, ka kal lo ang. Min ngaih ang chiah hian ka ngai ve che a, chu bakah Marcus-a pawh hi ka ngai dawn em mai" a rawn tih avang chuan

"Ni lo, i kal ngei a ngai zawk. Nang i ni a, ka rilru dik tak ka sawi mai mai a nih khâ, ka thusawi avang khan kal loh tum phah ringawt suh" ka lo ti ve thuai.

"I sawi vang pawh ni lo mahse kal ai chuan kal loh ka duh hrim hrim alawm, a chhan chu keimah chauha mut ka peih teuh lo mai"

"I va sawi ho tak, uanna chi pawh a nih loh hi aw, ka nu chu i kal dawn thu zu hrilh vat rawh, a lung a awi vak bawk si lo"

"Ka uang hleinem le Mambawih, i bula ka mut loh te chuan ka muhil thei nâng, muhil thei turah min ngai reng reng em ni?"

"Chu lam pawh a ni lo, ka nu nen hian kan inkar a chhiat phah palh ang ka ti mai alawm. Kan inngaihzawn lai pawhin khati khawp khan min duh lo va, kan inneih hnuah erawh ka chungah a ṭha leh em em a, kan inkar boruak tikhaw lo thei thil reng reng chu awm lo se ka duh a ni"

"Ka kal loh avangin in inkar boruak a chhe dawn tihna pawh a ni hleinem, ka nu chu ka hrilhfiah vek mai ang, hlauthawng suh" a rawn ti mai a, thil thlen dan tur chu hre lawk lo mah ila u Marema nu nena kan inpawhnate chu thil hote avangin a chhe vek mai ang tih ka hlau ru em em tho.

U Marema kal hnu chuan in hnuai lamah ka chhuk a, u Marema nu chu a lo awm ve ran mai. Ni dangah te chuan a dawr lamah a kal ṭhin kha a ni si a, vawiin taka a kal miah lo chu ka hrethiam lo hle. Min hmuh rualin Marcus-a ka pawm lai chu min lo laksak a, ka fapa paw'n a lo ban ve mai.

Ka ke a nat deuh avangin ka pen chak lutuk thei lo va, mahse ka nu hmuh lai chuan ke na ang deuhin ka awm duh chuang lo. Insuk tur awm ang âng chu Washing Machine-ah ka nuai tir a, ka nu chu a dawr lamah a kal dawn lo tak tak a ni ang Marcus-a a pawm rei tawh em mai.

"Ka nu, vawiin chu i dawr lamah i kal dawn lo em ni?" tiin pangai tak chuan ka bia a, han inbiak loh reng chu nuam ka ti lo a ni.

"Ka kal leh kal loh chu i va ngaihsak ve, kan awm loh laia thil tih tum te i nei zawk em ni?" a rawn ti daih a, min chhan dan avang chuan ka en ta vat.

"Aih, a teuh lo mai, chutiang engmah a awm lo" ka ti ta ringawt a, ani erawh chuan hmel hlim loh hmel zet hian min en kar thung.

"Thla leh aṭang khi chuan ka dawr lamah min pui ve tawh la a ṭha ang, Marcus-a pawh keima'n ka lo awm thei tho a, nakin lawka ka dawr enkawl tur i ni bawk si" a rawn ti leh a, a ṭawngkamah chuan ṭha taka inhrilhna aiin thupek aw a lang tam zawkin ka hria.

"Nia, a pawi hleinem, ka lo kal ve tawh dawn a nia" ka ti ve sep a, ngaihtuahna thui zet pu chung chuan Machine-a insuk ho chu ka phawrh pah reng bawk.

"A har lo lutuk, i va thawk ang a, ni khatah a tih dan tur i va hrethiam nghal vek ang ka ring" a rawn ti deuh hmawk hmawk a, zing lam boruak avang khan a la thinrim a nih ka ring ta.

"Eee tak e! Kan room-ah sawn i pa nena kan thuamhnaw suk tur tlem a awm a, lo su ve nghal daih teh" pangai tak chuan a rawn ti leh lawi a, keipawh chuan

"Ka lo su nghal daih ang, a hun lai tak alawm" ka lo ti ve mai.

Rin ai takin insuk tur chu a rawn keng chhuak hnem a, tlem ti si kha a tam ta viau. Tlanzoi chuan min tihpui a tum a, mahse u Marema nu zawk chuan tihtur dang hrilhin a lo tir kawi char char. Eng dang vang ni lovin ka nu chu zing lama kan boruak chuan a mood a ti off tih ka hria a, a lungawi lohna chu reh ve leh vat se ka ti ngei mai.

Zanriah kan ei laiin u Marema chuan bungraw thawn dan vel tur a buaipui fel thu a sawi a, kei chu ka lo hlim rilru khawp. U Marema nu ka va en chuan a lo la lawm hmel teh chiam lo va, chhun lama a hmel ni deuh hmur ang kha a la pu reng mai. Rei pawh en duh lovin ka chaw chu ka bar mawlh mawh a, Marcus-a a muhil tho bawk nen pangai takin chaw ka ei thei ve hlauh.

"U Marem, thla leh aṭang khian ka nu dawr lamah ka thawk ve dawn a nia aw" kan nupa room-a kan awm hnu chuan ka ti a, dawra hnathawh chu pawi a tih chuang pawh ka ring lo.

"Engatinge? Ka nuin thawk turin a ti che em ni?" a rawn ti daih a, min chhan let dan chu ka rin loh lam tak a ni.

"Ti tho a, mahse keimah paw'n thawh chu pawi ka ti em em hran lo. Marcus-a pawh ka kal hlanin a lo awm ziah thei ang a, ka ngaihtuah lutuk lo deuh ang"

"Ka nu chu âw, kan fapa paw'n kum a la tling lo va, engatinge maw thawhtir che chu a tum mai le, ka lo be dawn nia"

"Aih a ngai lo u Marem, ka nu chu be suh aw, dawra thawh chu pawi ka ti reng reng hleinem"

"Pawi i tih leh tih loh lampang pawh a ni lo, i aia thawk turin mi dang ka chhawrsak mai ang chû"

"A chi nâng maw le, ka nu sawi ang chuan ka thawk zawk dawn a ni. Ani chuan a dawr enkawl turin min duh a, inzirna'n tiin bul min ṭantir dawn a nih hî u Marem, hrethiam ve ta che"

"A ṭul ka va'n ti ber lo tak, ka hlawh hian ka chawm zo em em che u asin, ka nu dawr chu enkawl i duh reng reng em ni?"

"Duh vak nâng, mahse ka nu thu chu ka awih ngei a ngai. Thinrima sawi pawh a ni lovin ka hria, i lo ngai kawi ang e"

"Ka phal lo, duh leh ka nu chu mi dang ka chhawrsak tak tak mai ang" leh ta tlat ṭhin hian âw.

"I mak em mai u Marem, ka thusawi chu awih ve mai la, mut chhuah nen inhnial reng lo teh ang" ka ti ta ringawt a, ka mut chu a chhuak tawh tak zet.

"Ni dangah kan sawi ṭha dawn nia, tunah chuan mu phawt ang le. Vawiin chuan enge i lo tih?" tiin min kuai mu a, keipawh chuan

"Ka insu a, insuk tur leh tih neuh neuh tur kha a lo tam phian bawk nen ka chau deuhin ka hria" ka lo ti ve mai a, ka nu min biak dan vel erawh ka sawi duh rih lo.

"Che vak ṭhin suh ka tih khâ Mambawih, hlawh neia kan chhawr Tlanzoi pawh a awm reng a, engatinge chutiang thil te i lo tih ve leh ṭhin?"

"Ka tih ngai loh pawh a ni hleinem, chu bakah awm awl tawp kha ka thiam lo alawm, ka che nasa hran lo, ka chau ve hrim hrim a ni ang"

"Naktuk aṭang chuan che vak vak tawh suh aw, ka phal miah lo a nia, vawiin lamah te khan min lo ngai ve em?" a rawn ti daih a, ka nui ve ta sak.

"Ngai tehreng mai che, kei chauh ni lo kan fapa pawh hian a ngai che. I lo haw har a ti lutuk a, a ṭap vak vak mai"

"Chuti a nih si chuan Bawiha chu naktuk lamah ka duat ang a, zanin chu nangmah kan duat mai ang che" tiin a âwmah chuan min pawt phei a, ka hnung chuan a âwm lum nuam tak chu a hre rang hle.

"Ka lam hawiin min lo kuah ve dawn miah lo em ni?" a rawn ti leh a, nui ri hak chung hian

"Marcus-a hi ven a ngai deuh ang chu ka lo ti a, chu bakah hetianga ka hnung lam aṭanga min kuah hian nuam ka ti alawm" ka lo ti ve leh mai bawk.

"I thusawi naupang chhia zet zet hian min tihlim leh tlat zel, eng pawh ni se i muhil phawt mai teh ang" a rawn ti a, keipawh ka chhing ta vang vang.

Chapter 32

Thla thar kan kai a, keipawh ka nu dawr lamah chuan ka kal ni tin ta mai. Ka thawh tirh chuan u Marema chuan a nu chu a hau a, a hau tih lemah dawra ka thawh a phal loh thu a hrilh a ni mah zawk.

U Marema nu erawh a lo ṭeu hlar thung a, keimah avanga an nufa inhmu thiam lo mai tur chu ka duh loh avangin u Marema chu ka khap ta tawp. U Marema pa awm loh lai a lo ni leh zel a, ani tal awm se chuan an inchhang thinrim vakin ka ring lo.

A tawpa tawpah keima'n ka tum luih tlat avangin u Marema chuan a phal ve thei ta hram a ni. Ni e, ka ngenna ni lo se chuan dawra ka thawh chu a phal ka ring miah lo.

Tin, ka hun awl apiangah ka taksa chu ka sawizawi ve ta ziah a, a tira phal lo ber ber kha ka bula exer lak nuam ti ah a ṭang a, zinga a thawh te hian u Marema chuan min kai tho phur thei khawp mai.

U Marema nen chuan kan chhuak dun ziah a, kan kalna tur inang lo mahse a rual lova kal chu a phal leh tlat lo. A fel a, a hmelṭha a, a pa em em a, ka hmangaih em em a, mahse a duh lohna ah chuan a khirhin a luhlul ve ngawih ngawih.

Mipa ṭhenkhatte anga inla pa chawp leh intifel chawp a ni ve lo va, Pathian siam dan ang takin a awm tawp mai a ni. Fiamthu hi chu a thawh zei vak bik lo va, naute pawm tih nen, mahse engkima a insiama rem zung zung thei zel hi ka ngaisang thlawt.

Tunah chuan dawra ka thawhna pawh thla thum lai a lo ni ve leh reng tawh a, hnathawkte nen pawh kan innel tlang hlawm tawh hle. Rin ang em emin dawra thawh chu a lo har lo va, mahse a changa han tlai vak te pawh kan nei ve tho.

Tin, u Marema nu chu a rawn lang deuh chhen a, min endik ni ber hian ka hria. Amaherawhchu kei chuan ngaitheih loh enah pawh ka lo en lo va, a awm dan vel chu ka lo hre lo der mai mai zel.

Hun a kal ral zel avangin rei lovah Marcus-a paw'n kum khat a tling ve tawh a, kum khat leh thla nga lai a ni ve tawh zawk. A hma aiin ṭawng a hre lehzual tawh a, a pa aw phei chu puitling pangai ang mai hian a hre hrang hle.

Kei ve chu a thil duh leh a ṭah chauhin min pan a, chuti ni lovah chuan ka bulah aiin a pa bulah chuan a tal tam daih zawk. Pawi pawh ka ti hran lo va, a pa thlazar hnuaia hlim taka a awm theih phawt chuan ka hlim em em hi a ni.

Tin, kan fapa tê chuan fiah vak lo hian 'PA' tih ṭawngkam chu a sawi thei tawh reuh a, ka hriat tirh kha chuan a mak ka va'n ti mai mai tak. Ka pawm laiin a pa ko turin ka hrilh a, chu pawh a beng bul teah leh nghal. U Marema'n a fapa ka aṭanga PA tih ri a hriat rual chuan a kal lai a tawp chat a, mak tih hmel tak hian Marcus-a chu a rawn pan zui nghal.

"Han sawi leh teh Bawiha, tunah khan min ko em? Mambawih Marcus-a hian min ko in i hre ve em?" a rawn ti sawk sawk a, keipawh chuan nui ver ver chung hian

"Ko chiang e maw le, keima'n a beng bulah ko tur chein ka hrilh a, a rawn ko che a nih kha!" ka lo ti ve vat a, chuta u Marema hmel hlimzia chu pui tak a ni.

"Ka fapa, ka duat em em te" tiin a fapa chu a pawm kang a, a âwm leh a khabe hnuai velah chuan a hmuiin a nawr vak vak a, Marcus-a lah chu a lo nui uar ve em em zui.

"Chuan Mambawih, a ko ve thei tawh che em? Han inkoh tir ve teh, ka hre ve châk a nia" a rawn ti leh a, a fapa chu a la chhaih pah reng bawk.

"Tih tir ka tum a, mahse N vel kha lam a la harsat deuh a ni ang a lam ri ṭha hlei thei lo. Phone vel aṭangin ka en a, naute ho hian P vel aṭanga inṭan hi chu an lo lam thiam hma khawp mai" ka ti ve ta duah a, u Marema pawh chuan

"A nih chû, mahse a la ko ve vat mai ang che" a rawn ti ve leh nghal mai.

"Khaw maw ka fapa te hi, PA tih te'n min lo ko thiam tawh vel a nia, ṭawngthei tawh reuh lutuk mai" tiin a fapa chu chhaih zawm zat a, chu ni kherah chuan an pafa inchhaih lai ang baka hmuh nuam chu ka hre lo.

Nilaini a ni a, ni dang ang bawkin u Marema chuan a motor chhungah min phur leh ta ran mai. Chutiang chuan ni tin kan inphur ziah a, kan dawr lama lo pen hmasak ziah chu a ning ve lo emaw ni!

Chu bakah Hospital lamah emergency te a awm thei a, a lo peng kawi hmasa ziah chu a dikin ka hre lo a ni. Vawi tam min thlah kher ka ngaih loh thu ka sawi tawh a, mahse ka thu a zawm duh der lo.

"Mipa dang kha a them pawhin melh suh ang che, i hmelṭhain i pian a nalh tawh ropui si" kan dawr zawna motor a tihdin rualin u Marema chuan a rawn ti a, a nui sak bawk.

"Pian nalh deuh ang khan min sawi ziah suh, pian nalh ka châk tawh tawh nen min inhmuh hniam tir leh vek zel"

"A ni tak tak alawm, i in prove chakzia hi i hre lo em ni? I hmelṭha si, pian nalh bawk si, mahse mipa dangte kha i lo chhai vel ang e! I chhai na chuan ka chet dan tur pawh ka sawi lawk thei lo"

"Awi le! Nangmah a nih kha aw pian nalh leh hmelṭha chu! Nula te khan an lo bawr leh luai luai lohna'n che i office-ah khan tawm tlat la, rawn hmu pha tawh lo che mah ila chutianga i awm chuan ka hlim em em zel tho" kan inchhang tawk vel reuh lutuk chu a nuihzat thlak.

"Lo hnai teh, ka lo fawp phawt teh ang che" a rawn tih chuan nui sen sen hian a lamah chuan ka awn phei a, nam sawn vat lo ila chuan min fawp rei leh khawp ang le!

"Ka la kham lo asin" a rawn ti nang nâng reuh a, patling ve uai tawh si naupang chhia reuh lutuk mai.

"Bye aw, ka kal a nia" tia chhuk ka tum lai chuan u Marema chuan ka banah a rawn chelh a, amah chu ka en nghal vat.

"Thil hrilh tur che ka la nei alawm" a rawn ti a, chutia a sawi tâk avang chuan keipawh chu chhuk ta lo chuan ka ṭhu ṭha ve leh mai bawk.

"Sawi la, dawr ka hawn a hun tawh dawn a nia" a ngawih deuh vang vang hnu chuan ka ti a, sawi ve vat mai tur hi a nia.

"A ngai leh lo mai, zan lamah ka hrilh zawk ang che. Kal tawh rawh, dawr hawn te i ngaih kha!" a rawn ti leh ang lawi a, mi mah hriat châk tawh nak a lai a!

"I ti ve ziah, teuh deuh deuh hian i sawi a, min hrilh leh lawk duh ngai bawk si lo. I sawi loh chuan vawiin ni lengin ka ngaihtuahnaah a awm leh reng dawn a nia, chuvangin sawi mai mai teh u Marem"

"Ni lo, tun hi chu a hun rih lo zawk" a rawn ti leh tlat a, a hun a tih hma chu min hrilh leh duh dawn chuang lo tih ka hre chiang em em.

Dawr ka hawn hnu rei lote ah kan dawra thawk te pawh an lo thleng ve nghal mai a, Sawmtea pawh a rawn ṭawng duh leh bawrh bawrh tawh hle. Sawmtea hi kan dawra thawk mipa awmchhun a ni a, a felin a zuan a zâng khawp mai.

A ṭawng duh em em a, kei ai chuan upa deuh mahse ka rualpui chei ve hmiah hmiah. Ani paw'n min fiam bawrh bawrh a, chutiang bawkin keipaw'n ka ṭawngkhum ve bawrh bawrh zel.

Mipa awmchhun ni ta na nâ na chu bungrua lak vel leh rem fel velah hian a ṭangkai thei em em a, u Marema nu paw'n a lo fak viau ṭhin kha a awm lo ka ti hran lo. Kan dawr chu lian lutuk tia sawi tur ni lo mahse a lian thawkhat em em a, a awmna hmun hi Chanmari daih ni mahse tlai tin chu u Marema'n min lo hruai ṭhin. Ka haw hman tawh chuan ka call mai zel a, nghah rei lutuk ngai hian a awm ngai lo.

Dawra ka thawh hnu chuan timing zawng zawng chu u Marema'n min thlaksak vek a, ṭan hun leh ban hun chu ama duh dan ang vekin a thlak ta hmak. A thil tih avang chuan kei ni lovin u Marema nu bawk chu a thinrim leh a, hrehawm ka va'n ti thei tak.

Kan pahnih chauha kan awm pawhin ka pasal chu ti lo turin ka ti nasa ṭhin a, mahse ka thu a awih duh der lo. Ka tana ṭha tur leh hahdam thlak zawk a ti tih chu ka hre tho a, mahse a thil tih avanga a nu nena kan inkar a chhe chho ṭan mek chu hrehawm ka ti ropui si.

Zing dar 9 ah dawr hawng ṭanin tlai lam dar 4 velah kan khar ziah a, tlema han tlai zual chang te pawh kan nei ve tho. Kan tlai deuh ni chuan u Marema chuan min lo kal chilh mai zel a, biak pawh min be em em lo hian a lo ṭhu ngawi ve run ṭhin.

Mak tak maiin u Marema lo kal chang hian Sawmtea hi a awm hman lo ziah a, awm se chuan an titi dun theih ka ring ṭhin. Keini lah hmeichhia vek kan ni a, kei phei chuan ka be ṭha hman ngai lo zawk. Ani paw'n kan buai tih hrethiamin min be chhen lo va, amah hre chiang lo tu tan chuan a nelawm vak hian ka ring lo.

Ni dang ang bawkin u Marema chu ka call aṭanga minute 10 hnu velah a lo thleng a, keipawh chu a motor-ah ka chuang lut ve nghal. Vawi khat phei chu Bus-ah ka chuang haw ve ringawt a, a thinrim dan chu pui tak a ni.

Zan lamah min hau hrep a, a thusawi ho lah chu a dik vek bawk si. Khata ṭang kha chuan Bus-a chuan emaw a motor-a chuan loh emaw chu ka tum leh tawh lo hrim hrim a, loh theih loh a nih ngawt loh chuan ka pasal thusawi chu awih loh ka tum tawh lo.

"Tlanzoi kha a bang aw" u Marema nu chuan a rawn ti deuh tawl a, Marcus-a ka pawm lai tak a lo ni bawk nen a thusawi avang chuan amah chu ka en nghal vat.

"Engatinge a ka nu? A va mak teh thut ve, nizan te kha chuan hetah a la awm reng khan ka hre si a" pangai tak chuan ka lo ti ve mai.

"Harsatna a nei deuh a, ban a duhna a lo rei tawh zawk a ni awm e" a hmelah chuan lungawi loh hmel a neih awm pawh ka hre lo.

"Âwwww a nih chu maw le" ka ti awn deuh ruai a, Tlanzoi chuan engmah min hrilh lawk bawk si lo va, mak ka ti hle.

"I va huphurh hmel ve, dawr kal leh in chhung sekrek khawih kawp te chu a hahthlak vak hleinem, keipaw'n a hmate chuan ka ti char char zel alawm" a rawn ti leh a, ka huphurh lam pawh a ni tawp si lo.

"Aih, huphurh lo ve, thil dang daih a nia ka lo ngaihtuah ni! Nia, i sawi ang khan ka ti thei lutuk ang, thil harsa a awm hleinem" ka lo ti ve leh ta vat.

"Tlem chuan i tan pawh a khawhar thlak deuh maithei, mahse kan awm tho alawm"

"Ka hre lo le, Tlanzoi chu ka lo nel hman viau tawh asin le, i tan pawh chhuna Marcus-a nen chauha awm chu a khawhar thlak ve tho dawn a nih chû" ka fapa awi pah chuan ka ti a, Marcus-a chu a muhil ti tih tawh.

"Khawhar thlak vak lo vang, ṭhiante ka nei ve alawm" a rawn ti ve leh mai a, Marcus-a muthilhna'n hla eng emaw sa chung chuan kan nupa room lam chu ka pan chho ta daih.

"A muhil tawh em ni?" room chhunga ka luh rualin u Marema chuan a lo ti a, en pawh min en chuang lo.

"Aw muhil chu a ni mai, ka'n mut ṭha nghal daih ang e" tiin khumah chuan ka fapa chu ka mut thla nghal a, a mutui bawrh bawrh tawh reuh hle.

"Enteh u Marem, Tlanzoi kha a bang daih, nichin lawk khan ka nuin a sawi a" tiin a bulah chuan ka va ṭhu phei a, ani pawn min lo en ve nghal.

"A bang a!? A va mak teh thut ve, ka nu chuan awmpui dang lak leh lam a sawi em?

"Sawi hran lova maw, mahse ka ti ve thei alawm, dawr kal leh in chhung chet vel chu ka ti kawp thei tho"

"A ṭul hauh lo, dawra i thawk pawh lungawi tawh loh nak a laiin in chhung khura i chet leh zel chuan i chau dawn lutuk, chaw ei hunah awmpui lak chu ka rawt dawn nia" a rawn ti ram hmak ta mai.

"A chi loh u Marem, tun lai phei chu ka nu nen hian kan inkar hi a ṭha lutuk lo a nia, ka thusawi hi awih hram rawh" a sawi leh tak tak mai ang tih ka hlau.

"Ka ngaihtuah che alawm Mambawih, i hah lutuk chuan a ṭha lo. Dawr kal chauh emaw in chhunga chet chauh emaw te hi chu ni se pawi pawh ka ti lo, mahse a pahniha tikawp tur chuan ka phal lo che"

"Hriatthiam tum ve la u Marem, tun hun hi ka nu nena kan inkar chhe ṭan mek siam ṭhatna hun ṭha tak a ni asin. Mo ka ni a, in chhung khura chet vel hi chu ka tihtur dik tak a ni"

"Chaw ei hun han thleng phawt se ka rawt dawn em tih chu ka la ngaihtuah ṭha leh ang, engvangin nge Tlanzoi chu a ban hrim hrim?" tiin zawhna dang chu min lo zawt ta daih.

"Ka nu kha chuan harsatna a neih thu min hrilh a, enge a harsatna chu a sawi chuang lo. E chuan, ban a lo tum ru reng tawh zawk a ni awm e"

"A mak hle mai" a rawn ti sup a, kei tak hian a nia mak ti chu, ani te chu a thawk tluan turah ka lo ngai hmiah tawh.

Zanriah kan ei lai chuan u Marema chuan awmpui lak chungchang vel chu a sawi ang tih ka hlau khawp a, awmpui lak lam a sawi dawna ka hriat chuan a malah ka va sik vak zel.

Ani pawh chuan min lo en chuang lo hian thil dang a sawi daih zel a, ka thaw leh huai ṭhin. Mipa pahnih chu an inbe deuh chawt a, hmeichhe pahnih erawh kan inbe tam lo hle.

Nelawm tak leh zâng khai takin ka nu chu ka be lui hram hram a, mahse min chhang bul thei khawp mai. Kan bula mite chuan an inbiak tui ṭhin em avangin kan awm dan chu an rawn ngaihven vak lo va, engmah an hre ve lo.

Chaw kan ei kham chuan dawhkan tifaiiin thlengte chu ka sil a, u Marema pa thingpui in tur chu ka chhuang nghal bawk. Ani hi chuan chaw ei khama thingpui in hi tih ṭhanah a nei tawh a, siam a harsa lo bawk nen ka ning ngai chuang lo.

Marcus-a chu a piin a pawm a, ṭawng an inzirtir leh char char tawh. U Marema erawh in chung lamah a chho a, a lo chhuk leh tawh lo hrim hrim. Kan chaw eina vel ka tihfel hnu chuan in chung lamah ka chho ve daih a, in hnuai lama awm ai chuan u Marema bula awm ka châk daih zawk.

"I va buai awm ve, puih te i ngai em? Ka tih theih te a awm chuan ka lo pui ve ang che" tiin u Marema bulah chuan ka ṭhu phei a, a lo buai hmel khawp mai.

"Min puih i duh maw!?" nui chung hian a rawn ti hluai a, en pawh min en chuang lo.

"Duh ve deuh e, i buai hmel ropui bawk sia ka ti maw le" ka lo ti ve mai a, ani erawh chuan

"Min puih dan ṭha ber chu ka mal kha min lo malis sak teh, chaw ei laia min sih vak vak avang khan a na vek a nia" a rawn ti daih a, a la nui ri hawk zui.

"Ka va'n awih kher lo tak" ti nui nuiin a mal chu ka hmeh sak ve mai a, a mal lian zet chu keia kut te tak te chuan ka hmeh nawm zawh pawh ka ring lo.

"U Marem, feet engzah nge i nih?" tiin ka zawt leh ta ringawt a, ka zawh chhan ber pawh chu ka hre lo, biak vel chu nuam ka ti te pawh a ni ang.

"Ka tlangval lai kha chuan feet 6 leh inchees 1 khat vel ka ni ve ṭhin a, tunah hian engzat nge ka nih chiah ka hre tawh lo, ka inteh ngai tawh lo a" ka bula buai em ema chuan a rawn ti ve mai.

"Ka ring reng a ni, i mal leh chawn vel len danah hian" ka tih chuan nui chung hian

"Ka mal leh chawn vel chauh pawh lian i tih loh kha âw, thil eng emaw ni chuan lian i tih em kha" a rawn ti a, a hnungah chuan ka lo chum ri dawt nghal.

"Hmâna i âwma ka ṭah hmasak ber lai kha chuan ka pa emaw i nih ka ti a, mahse kuah let ka tum che khan i hnungah hian ka kut pahnih kha ka suih zawm thei miah lo va, khatah tak khan ka pa i ni lo tih ka hre ve chiah" a hnunga kuah chung chuan ka ti a, hun kal tawh chu ka ngaihtuah let zui vawng vawng bawk.

"Khata ka khawngaihzia che kha aw, khata ṭang daih tawh khan ka hmangaih che" a rawn ti ve sup a, thil chu a la ziak pah mawlh mawlh tho.

"I ang chhunga ṭah tluka thlamuan thlak kha ke hre lo, ka mipa hmangaih em em mai ka pasal i ni ta mai te hi ka lawm asin"

"Zanin chu i va ril ve ka Mambawih" nui ri hak chung hian a rawn ti a, kei erawh chuan naupang ang maiin a hnung lam aṭang ka lo kuah bet ṭai thung.

"Marcus-a hruai chhoh ka zu tum ang e, a mut a hun leh tawh viauin ka hria" tia kal sawn ka tum chu rang tak hian min pawt let a, a hmui leh ka hmui chu a intawng leh nghal chat.

"Khawi teh, khawi maw u Marem, a za a nia" a hmui lum ham hama ka nghawng vel a rawn fawh vak vak avang chuan ka ti a, ka nui chhuak uar uar bawk.

"Lal duhawm em em nu" tiin a hma ai zawngin a thil tih chu a rawn ti uar a, a khabe hmul vel leh a hmui vel chuan nui lo thei lovin min siam chiang hle.

Mittui tla phungin ka nui a, u Marema hi chuan kan inhriat tirh aṭang tawh ṭawngkam aiin chetzia in min tinui hnem ṭhin zawk reng a ni. A tawpa tawpah chuan min thlah ve ta hram a, ka kal sawn tur chu min pawt letin min fawp leh vawng vawng hram. In hnuai ka thlen chuan Marcus-a chu a puin a lo pawm muhil daih a, a pi erawh khawnge a awm ka hre lo.

"Zanin chu in va hlim awm ve" u Marema pa chuan a rawn ti a, a thusawi avang chuan lai tak hi ka ni ringawt. Sen ṭawng ṭawng chung chuan

"Khawi ka pa, Marcus-a chu ka lo pawm ang, ka lo han mut tawh ang e" ka ti ta ringawt a, ka pa chu a rawn nui ve ta suk.

"Ka pa'n a lo hre vek a nia aw, min la chhaih zui, ka nui ring viau emaw ni le" khuma ka fapa ka mut fel hnu chuan ka ti a, u Marema erawh a lo nui mai.

"Le! Ka hman ta, i bulah khan ka rawn mu châk tawh lutuk. Ka zung phawt ang a, ka lo mu nghal vat ang" tiin a ṭhutna aṭang chuan a tho a, bathroom lamah chuan a tlan a, a awm dan vel avang chuan ka lo nui leh ta hrep.

"Rizai te kha lo siam sa vek rawh aw, ka zo ṭep a nia" bathroom chhung aṭang chuan a rawn ti lawng lâwng a, patling ve uai tawh si a che naupang chhia reuh lutuk chu ka lawmah a tla leh tlat pek a!

"Ka hman ta" tiin bathroom aṭang chuan a rawn tlan phei a, khuma a rawn kai lai te chuan a hmanhmawh em em a, rang takin min kuah leh chiai tawh.

"Chhuna i thil sawi tum kha sawi tawh rawh le, min la hrilh miah lo a nia" ka hriat chhuah thut avang chuan ka ti a, ani erawh chuan

"Naute siam leh tawh ila, Bawiha pawh kum khat a tlin ve tawh tho hî" a rawn ti daih.

"Sawi phawt rawh, chhuna mi kha i sawi hmasak phawt a ngai, chumi hnuah naute lam kha chu kan sawi ṭha dawn nia" ka lo ti ve ta hmak.

"Chhuna ka thil sawi tum kha chu naute lam hi alawm, mahse kan awmna hmun kha sawina chi a ni leh lovin ka hria a, ka sawi duh leh ta lo a nih kha"

"Ka va'n awih lo êeee, thil dang a awm miah lo maw? Zep i neih vaih chuan i chungah ka lung a awi dawn lo teh mai a nia"

"Naute lam hi sawipui che ka tum tak tak alawm, chuan naute neih leh lam chu enge i ngaih dan? Neih leh chu pawi ti lo em?"

"Ka hre lo le, ka nu nen kan inkar te hi han ṭha phawt se a fuh zawk lo maw âw te ka lo ti"

"Ka nu lam bawk maw i sawi leh dawn, kan chhungkaw thilah ka nu emaw ka pa emaw sawi lut rih lo vang" a rawn ti ta hmak mai.

"Naute neih leh chu ka duh tho a, a la hma mah mah lo em ni? Kan buai phah viau zawk ang tih ka hlau" ka tih chuan thatho aw zet hian

"Buai phah lo vang" tiin ka chungah a rawn bawk a, amah vek chuan nui vur vur chung hian

"Zanin aṭang hian siam ṭan ang aw, kei chu naute neih zung zung ka duh a nia" a rawn ti a, chutah keipawh chuan fiamthu deuh tak hian

"Min pai chhawk thei dawn te a nih chuan nei zung zung ila a ni mai alawm" ka lo ti ve a, ka fiamthu tih hrethiam takin ani pawh a rawn nui ri ve hak hak.

"Hmanni khan Marcus-a hian nau hmeichhia a awh thu a sawi a nia, hmeichhia chhuak tur chuan ka chet dan ka thlak a ngai dawn a nih hmel"

"A va awihawm loh thei tak, zanin chu ti lo phawt mai ang" tiin ka nam sawn a, chutah rang zet hian a rawn lawn kai leh a, tisa châknaa khat mitmenga min en chung chuan

"A teuh lo mai, ka inpeih vek tawh" a rawn ti deuh hmuk a, a awm dan lawmawm zet avang chuan ka lo nuih ta ringawt.

"Marcus-a kan tih harh chuan a buaithlak dawn tih hria ang che" ka biang vel a hmuia a rawn nul thuak thuak lai chuan ka lo ti a, u Marema chuan mei nei zet hian

"Chungte chu ka thiam zawng tak alawm" a rawn ti a, ka hmuiah chuan min fawp zui ta nghal.

"Pian nalh em em tawh nu" ti supin ka lai thla vek chu a hmuiin a nul thla riai a, a hmui hmul leh khabe hmul vela min tawhna te chuan tisa châkna nasa takin min pe zui bawk.

Ka âwm bawr lamah a rawn tawlh chho leh a, ka tisa châkna tichhuak thei zawnga a che zei lutuk chu ka mak tih a tling. Doctor a nia a hre ve bawk ang chu han ti ringawt dawn ila Doctor zawng zawngte hi u Marema ang an nih ka ring chuang lo.

A nih loh pawhin amah ka hmangaih lutuk tawh avangin min sawngbawl dan chu nuam ka ti a ni maithei, mahse tû hmeichhia pawh a chet dan avang chuan a lakah an insum rei theih bik ka la ring lo ta fan.

Chapter 33

Thawhtanni tlai a ni a, chu ni chuan ni sakei a nihzia rawn tarlangin kan buai hle. Engkim u Marema'n min chah thlensak leh tawh avangin bungruate chu kan hlang lut mawlh mawlh a, ban lam hnaih deuh tawh mah ila vawiin chu ka tlai leh deuh a ngai dawn a nih hmel.

A tua te pawh chu kan phe suau suau a, a ṭhenin thawmhnaw an lo khai ṭhat laiin a ṭhen erawh chuan bungrua kan hlang lut mek bawk. Sawmtea chu awm lo ngat phei se chuan ti tur rawih chawp leh te a ngai ang a, sum chu kan hmang ral leh ṭeuh ngei ang.

Kan dawra thawkte chuan dawr ka enkawl hnua sum kan hmuh tam chakzia min hrilh ṭhin a, a tirah chuan awih lo mah ila an sawi ngun tâk em avang chuan ka awih ve ta tawp.

U Marema nu erawh a hma ang em emin dawr lamah pawh a rawn kal ngun tawh lo va, hnathawkte paw'n nuam an ti sawt viau chuan ka hria. A hma te kha chuan an ṭi dek zel a, ṭawng pawh kha an ṭawng ri tam em em ngai lo ni berin ka hria.

"Khawi kha chu ka lo ti ang" ka percal bawm chawi tur chu Sawmtea chuan a lo ti a, keipawh chuan ka thil tih tum chu ka ti leh ta bik lo.

"Sawmtea hi zawng i va fel reuh tak" ka lo ti a, a huat tawk a tling leh dawn tih chu ka hre chiang em em.

"Ve a che! Reuh tak te chu min ti ve khanglang a, nang aiin ka upa aw" a rawn ti ve nghal a, ka rin tawk chiahin ka ṭawngkam hotê chu a lo haw leh ran tawh.

"I boss ka nih hi aw, khatiangte khan min chhang let zet zet suh, ka ban mai ang che" fiamthu hmel loh deuh chuan ka ti a, ka nuih chhuah lohna'n ka insum hram hram a ni.

"Ka boss ni eng ang mah la ka hlau der lo che, min ban phal dawn lo tih ka hriat ang bawkin kei lo he dawra thawk thei tur an awm lo tih ka chiang, chuvang chuan ka hlawhte hi pun thûr thur ta che" a rawn ti leh bawrh bawrh a, min nel tawh lutuk chu a buaithlak zawk.

"Awi awi awi, mipa chu i inti ve sia maw, i va han ṭawngthei reuh tak, i sawi ai reng rengah i hlawh ka san hauh lo vang" ka ti ve tak na a, san chu ka tum ru reng tho.

"Dawt bawk i sawi leh ta, ka hlawh i san thuai dawn tih pawh ka hre vek a nia, chuvangin lawm thu ka hrilh lawk a che" tiin dawr chhung lamah chuan a lut zui daih a, keipawh chu ka lut ve mai.

"Lo awm sawn deuh teh Mambawih, kha lai deuhah khan hei hi dah zawk ila a ṭha ang" tia bungrua lo dah phei a tum chu a inpal a, keimah tak min bawh zawng chuan a rawn tlu ta mai.

Loh theih lovin Sawmtea chu ka chungah a lo bawk a, tho ta mai lo chuan min en reng a, tho vat se ka ti ngei mai. Hmeichhe dang ho eitur lei tura ka tirh lai tak a ni hlauh zawk a, chuti ni lo se chuan ka zak lehzual ngawt ang. Sawmtea chu a âwmah ka nam ṭai a, mahse mak takin a tho duh chuang miah lo. Zawi zawiin a rawn awn thla a, kan awm dan chu a dikin ka hre tawh lo.

"Mambawih" rawn ti tu chu tu dang ni lovin ka pasal, u Marema ngei a ni.

"Awm sawn rawh" tiin Sawmtea chu ka theih tawpin ka nam vak a, u Marema aw a hriat vang nge ni ani pawh a tho ve ta vat.

"Enge in lo tih a?" thinrim aw tak hian u Marema chuan a rawn ti ram hmak a, Sawmtea nen chuan kan awm dan a lo fuh lo kher bawk nen hrehawm ka ti tak zet.

"Engmah, engmah kan ti lo u Marem" ka tih zawh rual chiahin Sawmtea chuan

"Engmah kan ti miah lo a nia, bungrua dah ṭhat ka tum kha ka tlu sual palh a, ka tum loh deuhin Mambawihi hi ka bawh ta alawm" a rawn ti thuai a, mahse enge thleng ta hi!

A ṭawng zo âwr ang tih velah u Marema chuan Sawmtea chu a hnek let tawp a, a tlu tawh chu ṭhut chilhin a hnek zui ta mial mial a, amah a lian bawk sia ṭhelh ka tum ve na pawh chu eng tham mah a ni lo.

Ka mangang leh tih ngaihna hre lo chu ka ṭe vak a, u Marema pawh chuan min lo en ta vat. Ka ṭap pur tawh a, thil thlen dan chu ka duh lo tak zet a ni. Mit sen ram hian u Marema chuan min lo en a, chutah Sawmtea lam chu hawi thla lehin a pawt tho dâwrh nghal.

"He dawrah hian i hmel ka hmu leh a nih chuan kha aia nasa khan ka che ang" u Marema chuan a ti phiar a, chutah kei chu lo inrawlh vatin

"Ni lo u Marem, i ngaih ang khan engmah kan inkarah a awm lo, Sawmtea te chu kan dawr tan hian mi ṭangkai tak a ni zawk asin" ka ti a, ka thusawi vang nge ni u Marema chuan min tihnat châk hmel zet hian min melh run mai.

"I va ṭan ve a, in thil tih kha ka hmu hman lo emaw i ti em ni? Engkim kha chiang takin ka hmu vek asin" a rawn ti leh hrawk a, hmeichhe lo lut te pawh chu thil dik lo a awm tih hrethiamin an ṭi dek hlawm mai.

"Khar rawh, dawr hi tunah khar nghal ang che, chuan kan haw nghal bawk ang" a rawn ti leh chuan ka bag chhunga chahbi chu ka phawrh a, amah ka hlau lutuk chu ka khur thei hial maw le.

U Marema chu tute pawh chuan kan hlau a, hnathawkte phei chu ka khawngaih zawk. An tihsual pawh awm miah lovah u Marem thinrim an tawng a, thil pawh ei ta lo chuan dawr chu min kharpui ta sawk sawk. Sawmtea pawh a inchul mawlh mawlh a, a rawmawl chuan a hnar thi chu a hup bet ran bawk.

U Marema chuan Sawmtea ngawt chu a lo en char char a, pakhat zawk lah chuan a en ṭha ngam der bawk si lo. Kan boruak chu thawk leh khatah a dik lo vek a, ka ṭah chu a chhuak ngawih ngawih.

"Khawi keima'n" tiin dawr kharna pawh thlak tur chu min lo pawh sak a, min nek na lutuk lo mahse ka balance ka lo hloh kher bawk nen ka leng deuh dâwr.

"Nang kha!" tiin Sawmtea kal mai tum tawh chu a ko leh hram a, Sawmtea pawh chuan a hlauh hmel ngei mai.

"Ka sawi kha hre reng ang che, he dawra i hmel ka hmu leh a ni ngat chuan ka khawih na tawh viau ang che" tiin ka ban chu a rawn pawt a, a car kawngka chu hawngin min luhtir nghal zat.

Kan in lam pana kan tlan lai te chuan ṭah chhuak si ṭap chhuak ngam si lo hian ka awm a, ka awm dan avang chuan ka thaw a chham thei mai dawnin ka hria. U Marema lah chuan ngawi reng hian hma lam chu a en ngur a, a thin a la rim em em tih pawh ka hria, ka pasal nena inbe miah lova chuan dun chu hrehawm ka va'n ti tak em.

Ni dang angte chu ni se eng eng emaw ni kan sawi leh ang a, kan hlim haw dun leh hle a ni awm si a, vawiin tlai zet zawng ka beisei phak bakin a hrehawm ta a ni. Tin, Sawmtea leh u Marema chu an inkawm ngeiha an titi dun theih te kha ka lo ring vel a, mahse a teuh lo nasa lutuk. Pakhatah chuan kan awm dan khan a lo zir lo ve em a, mahse a ngaih ang em ema awm chu kan ni lo, engkim hrilh fiah chu ka tih ngei ngei tur a ni.

Kan inkawt kan thlen pawh chuan ngawi reng hian a chhuak a, a thinrim ang anga en lian tawp chu a fuh rih zawkin ka hria. Ka inthlak fel hnu chuan kan nupa room aṭangin choka lamah chuan ka chhuk thla a, u Marema erawh ka chhuah lai chuan a inbual mek thung.

Chaw leh chawhmeh bel vel ka en chuan engmah siam a lo la ni lo hlawm a, mak ka ti ang reng hle. Marcus-a leh a pi lah chu hmuh tur an awm mai bawk si lo, ka rin sual loh chuan an leng a ni ngei ang.

Fridge chu hawngin chawhmeh lo awm ang ang chu ka phawrh a, parbawr chu siam a awlsam deuha ka hriat avangin ka zai a, a tlai ve tawh bawk nen siam awlsam sam leh hmin hma tur tûr chu ka siam tawp.

Hmun dangah chaw ka chhuang a, a dangah parbawr ka kang a, buh nena ka anṭam bai chu ka vil pah reng bawk. Chu mai a ni lo, chhun thil eina vel ni awm tak chu thleng silna hmunah chuan a lo la awm hnawk nuai a, note nen lam engmah sil lovin a lo la awm ṭhap.

Ka thil kan ka chawh loh chhungin no vel chu ka sil pah zeuh zeuh a, buai viau mah ila mo ka nih anga ka tihtur ah ka ngai thei leh ta hram. Ei rawng bawl a ni miah lo leh thil eina sil a la ni miah lo ka hmuh tirh kha chuan u Marema nu chu ka rilruah a rawn lang hmasa ber a, ka dem hman hial a, mahse ka ngaihtuahna ka tifim leh ta vat zawk a nih kha!

U Marema chu chhuk pawh a rawn la chhuk lo hrim hrim a, hrilh fiahna hun tak ngial pawh ka la nei bawk si lo nen a hmel chu ka hmu hreh ngawih ngawih. Amaherawhchu a nupui ve lai ka ni a, ka thusawi chu a rin ngei ka ring ru tho.

Parbawr chu chawh a hun avangin ka chawk leh mawlh mawlh a, vawiin tlai zet zawng buai a na ngei mai. Chutia ka thil chhuanna lam kalsana plate leh no vel ka sil lai chuan Marcus-a leh a pi chu an rawn lut a, an rawn hlim dun khawp.

"Kan leng lawk a, ei rawng bawl pawh ka lo theihnghilh daih alawm, mahse kha i tih theih viau tho kha a" u Marema nu chuan a rawn ti a, keipawh chuan

"Ka ti thei lutuk alawm, hetiang te chu thil harsa pawh a ni hleinem" ka lo ti ve mai a, ka thil sil lai dahin chaw chu ka off a, parbawr chu ka chawk zui leh sawk sawk nghal.

"A sa!" tiin ka kut chu ka la sawn zawk a, tel so sa em em mai chuan ka kut chu a rawn per a, a na lutuk chu chawh pawh ka chawh chhunzawm thei lo.

"Âwwwwww, i intih per em ni? Fimkhur ve deuh ṭhin ta che, i hmanhmawh lutuk chuan i intipalh reng mai ang. Khawi keima'n ka lo chawk ang, i thil tih lai saw va buaipui zawk rawh" u Marema nu chuan a rawn ti bawrh bawrh a, ngawi reng chuan thleng silna lam chu ka pan a, ka kut chu ka la dawm vang vang.

"Ka nu, Goolgate hi ka hmang lawk dawn a nia aw, kang vela intihpem hian a ṭha an ti ṭhin a, tam pawh a ni lo vang" ka ti a, Goolgate chu ka hmet chhuak zui nghal.

"Khawi aṭanga i hriat nge a nih chu hre lo mah ila a va awihawm loh ve, pem damdawi atana Goolgate lo hman te chu a ṭhing lutuk" tiin a nui zui hak a, ka lo dil vel ta reng reng pawh chu ka inchhir hle.

Min nuihsawh viau mahse ka hnawih lui ta tho a, ka kut chu a lo duk kal mai. Chu chuan a nat thawkhatzia a ti chiang a, ka thleng sil thleng chuan chet a tiharsa ve ṭalh mai. Ka sil zawh chuan Marcus-a lam chu ka pan a, ani erawh toys khalhin a lo tlei hle.

Ka hmel a hmuh rual chuan min lo ban ve reuh a, kei chuan rang takin ka lo pawm nghal vat. Kan in pawn lamah chuan ka chhuahpui daih a, ṭhutthleng lo awmah chuan ka ṭhutpui a, hnute a hnek lai te chuan min en kar reuh bawk.

A mitmengah chuan a pa mitmeng ka hmu a, chu chuan ka ṭah a rawn ti chhuak zual. Ka mittui chu a far ta nge nge a, mahse Marcus-a erawh chuan ka ṭap tih a hrethiam ve tak tak dawn chuang lo. Ka mittui te chu ka hru zeuh a, ka fapa chu hlim ang takin ka chhaih ve leh mai bawk. Amaherawhchu hlim lo chung chunga han chhaih vel chu harsa ka ti em em a, pasal ka neih hnuah chu ni chu ka hun tawn a zawnga la hrehawm ber a nih hial ka ring.

"Khawnge i lo kal daih? I thil chhuan pawh i ngaihsak leh tawh si lo, i awm dan hian min tilungawi lo khawp mai Mambawih" in chhung kan luh rualin ka nu chuan a lo ti a, ka va meng buai nasa em.

"Ka tihpalh lutuk ka nu, i lo en chhunzawm mai dawn emaw ka ti a, Marcus-a ka lo pawm chhuak daih alawm" inthlahrung tak chuan ka ti vat a, chutah ka nu chuan aw ngaihthlak nuam lo zet hian

"Engatinge min rin ringawt? I ei rawng bawl lai te chu ngaihsak ve ta che, dawra i thawh hnu aṭang hian i inla eng emaw riau ṭanin ka hria" a rawn ti a, min ngaih dan chu a dik lo nasa tih hre mah ila ka chhang buai duh tawh rih lo.

"Ka tihpalh a ni e, khawi ka lo ti ang, nang chu lo va awm hahdam zawk rawh ka nu" tiin gas lam chu ka pan a, ani pawh ka sawi ang chuan sitting room lam a pan ve mai bawk.

Ei rawng ka bawl lai zawng zawng pawhin u Marema chu in hnuai lamah a rawn inlan lo hrim hrim a, ka lakah thinrim mahse a fapa tak ngial pawh a ngai ve lo em ni? Dar 5 vel dawnah Marcus-a pu pawh a lo haw a, Marcus-a chuan a pu aw chu a lo hre leh khawp mai. A toys khalh lai dah meuhin a lo ban a, a pa a la hmu bawk si lo nen a pu chu a lo ngai hle tawh ni ngei tur a ni.

"Mambawihi kha tel sa in a intihper palh a, i ngaihsak deuh dawn nia Marem" chaw kan ei laiin ka nu chuan a rawn ti a, chutah u Marema chuan min lo en a, rang zet hian ka chaw bar lohna lam chu a en nghal bawk.

"Engatinge min hrilh loh?" u Marema chuan a rawn ti thuai a, engtinnge ka biak ngam ang che tia chhan let hrep mai ka duh rum rum.

"Engmah a ni lo, a na tawh lo" tiin ka kut chu a vawnna aṭang chuan ka pawt thla a, ka pawh thlak rual erawh chuan a rawn na leh zawk.

"Mambawihi khan a kut pemah khan Goolgate a hnawih a, a makin a dangdai ka ti tawp" tiin u Marema nu chu a rawn nui uar uar a, min nuihsawh ni ber hian ka hria.

"Goolgate te chu kang velah an hmang ṭhin alawm, hmân aṭanga kan hman uar em em a ni zawk asin" u Marema pa chuan a rawn ti ve a, chutah ka nu chuan

"Ka hre tho a, mahse tun laia lo la hman te chu a ṭhing tawh em alawm. Hmânah te chuan hmang ṭhin mahse hmân a ni miau a, tun laia Goolgate lo la hman te chu a hawizau loh thlak ka ti" a rawn ti leh hram.

"Ka nu, Mambawihi tana hriat nuam loh zawnga ṭawng kha i bansan tawh emaw ka lo ti a, tun hnai hian Mambawihi hi i hmu mawh sawt riauin ka hria" u Marema chuan a rawn ti hmuk a, a nu lah chuan

"Hmuh mawhna pawh ka nei hleinem, a chet dik lovin ka hau ang a, thil kalphung leh changkanna in a ken tel thil hrilh te chu ka tihtur alawm" a la rawn ti ham ham mai.

"Ka nu, i mak ṭhin em mai, ka chaw ei pawh i titui lo vek" tiin u Marema chu a kham daih a, Marcus-a pawmin in chung lamah chuan a chhohpui nghal hmak.

Eina vel ka tihfel zawh chuan in chung lamah ka chho a, kan nupa room ka luh dawn te chuan ka zam vel nia maw le. Kawngka bul aṭang chuan u Marema leh a fapa inchhaih thawm chu ka ngaithla reng a, a hnu deuh fê ah ka lut ve ta chauh. Mut nghal mai inpeihin bathroom lamah chuan ka hmai te ka va phih hmasa a, ka chhuah lai chuan u Marema chuan a fapa chu a lo pawm muhil leh der tawh.

Khumah chuan ka lawn kai a, u Marema chuan Marcus-a chu a lamah a mut tir daih. A ngawi reng a, keipawh ka ngawi reng a, khum aṭangin a tho tih bak chu hriat tur a awm lo. Ka hawina lamah chuan a lo kal a, damdawi bawm nen chuan ka hmaah a rawn ṭhingṭhi nghal.

Ngawi reng chuan rizai chhunga ka kut chu a rawn la a, a chet dan chu ka lo thlir reng ringawt. Telin ka kut a tih kanna lai chu eng emaw ni a hnawih a, a rim pawh a na khawp mai.

"U Marem i ngaih ang kha engmah a thleng lo a nia aw, i hmu sual mai mai a nih kha" tiin a ṭawng chhuak hmasa zawkah ka ṭang ta nge nge a, ani chuan ngawi reng hian ka kut chu a buaipui mial mial thung.

"U Marem, min ring lo em ni? I ngawih reng hian hrehawm ka tihzia i hria em? Eng emaw tal sawi teh" ka ti leh ta tawp.

"Kha pa nena infawh in tum lai vel kha ka hmu sual i tihna em ni?" khauh fak chuan a rawn ti a, a sawi ang chuan kan awm lo nasa mai bawk si.

"Kha tak kha alawm i hmuh sual, engtin mah kan awm lo. Awm kan tum lo va, ani nen khan dawr neitu nu leh a hnathawk ang bakin inzawmna kan nei lo" ka ti ve vat.

"Kal tawh lo vang che, dawrah hian thawk tawh miah suh. Ka thu hi awih la, buaina a awm lo a ni mai" a rawn ti leh hmuk a, a ṭhutna aṭanga thovin a kal sawn zui nghal.

"U Marem, min ring lo ti raw? I nupui thusawi tal hi chu i awih ka lo ring ve asin, mahse chung ka lo rinna te chu engmah lo mai an ni si" khuma a rawn mut hnu chuan ka ti sep a, ṭawng zawi viau mah ila a hre phak vek tho.

"Nangmah inhmu hniam zawngin thil ngaihtuah lo la, tuna tan chuan ka thin a rim rih em mai naktuk lamah kan sawi ṭha dawn nia" tiin a che hrut a, en kher lo mah ila min hnungchhawnin Marcus-a lam a hawi tih ka hrethiam mai.

"Aw le, eng pawh ni se ka tihpalh a ni e, muttui le" ka ti chhuak ve sep a, chet pawh ka che sawn peih eih lo.

An thawk rik seng seng danah an muhil tawh tih ka hria a, mahse kei chuan chhin khat pawh ka la chhing thei lo. A tir te aṭangin thil thlen dan zawng zawng chu ka ngaihtuah kual a, a hmuh lai taka Sawmtea nen kan lo inbawh te chu ka haw hluah hluah. Thil ho te avangin leh ni miah lo ni anga a hmuh tlat avangin kan nupa inkar chu a chhe mek a, chhe tur chuan ka phal ngang si lo a ni.

Ka ṭah a chhuah em vang chuan ka tho ṭhem ṭhem a, bathroom lam chu ka pan ta nge nge. Bathroom chhuatah chuan ka ṭhu tawm ngul a, ṭap ri ngam em em si lo hian ka ṭap khur ta char char.

Ka mipa hmangaih em em leh ka pasal chuan ka thusawi pawh a awih duh lo va, chu chuan ka thinlung chhungril hi a tina tak zet a ni.

Chutah ka fapa pawh ka bula muttir phal lo ang maiin a mutna lamah a sawn daih a, ka mal ta lutuk chu awm thiam har ka ti a, mut pawh ka muthilh theih ka ring lo.

"Mambawih, enge khatah khan i tih?" rawn ti tu an awm avang chuan mittui nen bathroom kawngka lam chu ka en a, u Marema chuan min lo en ran mai.

"Dar 1 lai a ri tawh asin" tiin a rawn pen lut a, bathroom kawngkhar ka lo kalh theihnghilh chu pawi ka ti ngei mai.

"Lo kal rawh le" tiin a kut chu ka lamah a rawn phar a, kei erawh kun thla leh vatin ka ṭap zui leh nghal feih feih.

"Ti teh Mambawih, mut a hun viau tawh a nia aw" tih pah chuan min lo kuah a, ka hnung chu a chul heuh heuh zui bawk.

"A hrehawm lutuk u Marem, hrehawm ka ti lutuk. Ka thinlung hi a na asin, awm ngaihna pawh ka hre lo" ka ti chhuak thei hram a, ṭap chunga sawi ka nih avang chuan ka aw pawh a lawi vek.

"Ka tihpalh a ni e Mambawih, ka tihpalh lutuk" tiin min pawm kang a, khum lam chu min panpui nghal.

"Ṭap tawh suh le, i ṭah reng chuan i thawm hriain Marcus-a hi a lo harh palh mai ang e aw" khuma kan mut hnu chuan a rawn ti a, kei erawh ka la ṭap bang thei chuang lo.

"Min rin ve ka ring asin u Marem, ka thusawi i awih lo tih ka hriat khan na ka ti lutuk" ṭap ṭuau chung chuan ka ti a, chutah u Marema chuan aw dam zet hian

"Ka awih lo tih ka sawi miah loh kha Mambawih, naktuka sawi ṭhatah ka ti mai alawm" a rawn ti a, min hmangaih ve tawh lo ni maia ka ngai ta chu ka tum pawh a ni bik lo.

"Marcus-a pawh ka bulah i mut tir duh lo va, nang pawh ka lam i lo hawi duh lo va, engatinge mal tak hian min siam u Marem? Ka mal tawh viau asin, he khawvelah hian thisen zawmpui tia sawi tur tak ngial pawh ka nei tawh lo asin" tiin ka ṭap chhuak ta hawm hawm a, ka rilru chu a na em a ni.

"Hei hei hei, i mal lo, i mal miah lo, kei leh Marcus-a hi i tan kan awm reng alawm, i chhungte kan nih hi hre ta che" tiin min kuah nghet sauh a, kei erawh ka lo ṭap khur char char.

"Engtinnge ka thlem ang che? Engtinnge i lung ka tihawi ang? Hetiang em em hian i rilru a na dawn tih hria ila chuan ka thinrim rei hauh lo vang" a rawn ti chang rut a, kei erawh chu lo chhang thei chi zia zâng ka ni rih lo.

"Mambawih ṭap tawh lo teh, i ṭah reng chuan nuam ka ti miah lo a nia, enge ka tih dawn? Min han hrilh teh, i lungawina tur a nih phawt chuan i sawi apiang ka ti ang"

"Ka thusawi pawh i awih duh loh tâkah kha chuan min hmangaih ve tawh lo ni maiin ka ngai asin, ka thinlung hi a na lutuk" ka tih leh chuan rang tak hian

"Ni lo, ka hmangaih che alawm Mambawih. Ka hmangaih em em che a, ka hmangaih reng bawk ang che. I thinlung tinatu ka ni hi pawi ka ti a, keimah ngei hian ka tidam leh ngei ang" a rawn ti thuai a, ka taksa chu a lamah kuai herin a âwmah chuan min pawm bet nghal bawk.

"Ka tihpalh aw Mambawih, bang tawh rawh le. Chuan ka hmangaih che, ka hmangaih lutuk che. Nangmah kha mal angin inngai lo la, nangmah hmangaih em emtu i pasal ka awm tih hi hre reng ang che" tih pah chuan ka hnung chu a chul a, ka chalah chuan a lo fawp leh vang vang a, ka ṭah chhuak lutuk pawh a reh ve ta deuh.

"Khawngaihin bang tawh teh Mambawih, hrehawm ka ti teh mai a nia" ka la ṭah deuh feih feih avang chuan a rawn ti leh a, min ngaihtuah leh ta lutuk chuan min hmangaihzia min hriattir leh vek tawh.

"Ka tihpalh u Marem" a hnunga kuah let ve chung chuan ka ti sep a, chutah u Marem chuan

"Keimah zawk hi alawm thiam lo Mambawih, ngaihdam dil tur zawk che chu ka ni e. Chuan ka hmangaih che tih i hria ti raw? Ringhlel tawh miah suh aw, ka thinlung zawng zawngin ka hmangaih che tih hi theihnghilh lo vang che" a rawn ti thum dup a, a aw aṭang chuan a thutak hle tih a hriat theih.

"Immmm" tih tein ka lo chhang a, ka mut chhuak ta lutuk chu ka ṭah vang a nih ngei ka ring.

Aw thum bula a ṭawng chu ka hre riai ruai a, chutianga a ṭawng thawm chuan ka mut an rawn tichhuak vat a, rei lote hnuah engmah ka hre zui ta lo.

Chapter 34

Marema POV

Zinga ka harh chuan Mambawihi chuan ka âwm a lo delh ran a, nam sawna thawh mai ka tum chu a hmel awm dan vang chuan ka ṭhulh leh ta zawk. A hmelṭha tak te, a vun ngo leh no em em te, a hmui duhawm em em mai leh a awm dan lamawm zet chu ka thlir ning thei lo a ni.

Ka en reng a, a bianga val deuh kalah thil inrin thla chu a mittui luanna tih ka hre nghal. Zan lamah khan bathroom-ah a lo ṭap a, rilru na taka a ṭap ka hmuh kha chuan ka tihdik lohzia ka hre chhuak zui a nih kha!

Ka mut hrim hrim kha a tui teh chiam lo va, zan dang anga ka muttui loh avangin ka harh hlawl a, ka fapa hmel chu ka hmu hmasa ber. Men pawh meng ṭha peih lovin Mambawihi awmna lamah chuan ka inher a, kuah ka tum erawh kha chuan a mutna a lo ruak huai a, chu chuan chiang takin min men pangai tir ta nghal a ni.

Bathroom aṭang chuan ṭap feih feih thawm ka hria a, bathroom light a in on bawk nen bathroom-ah Mambawihi chu a awm a nih ka ring ta nghal a, ka rin ang ngeiin a lo awm reng bawk.

Khuma ka mutpui hnu pawh khan a ṭap bang thei mai lo va, a laka ka awm dan avang khan ka va han inthiam lo tak. A malzia leh hrehawm a tihzia a sawi phei kha chuan ka rilru a lo na ve vawng vawng a, a pasal hriat lai pawha a ṭap ri ngam lo te chu ka khawngaih lutuk.

Tunge a pasal chu!? A pasal chu kei hi ka ni a ni lo'm ni? Engvangin nge keia pawh khan thinrim duh tawk tawh mai lova a rilru nat thleng ka lo la thinrim khum reng reng mai ni!

A nihna takah chuan kha mi lak tlak loh pa nena an lo awm dun vel kha ka thinrim chhan em em a ni ber lo, ka thinrim chhan ber zawk chu ngaihzawng nei anga thu ka dawn vang a ni.

Ni e, nimin khan ka number hriat loh aṭangin message ka dawng nawlh a, tu number nge tih hriat tumin bei mah ila ka hre chhuak thei der lo. Eng dang zawng aiin ka message dawn leh ka thlalak dawn chuan ka ngaihtuahna a tibuai a, chuvanga rang taka dawr lam pan kha ka ni bawk.

Tunge a nih pawh ka hriat loh hnen aṭangin Mambawihi leh ka nu dawra thawk hlun mipa thlalak, inhnaih tak taka an awmna leh hlim taka an nuih dunna vel chu ka dawng a, message-ah lah Mambawihi chuan ngaihzawng min neihsan thu leh ka sum chauh a duh avanga kei min neih thute a rawn sawi ṭeuh a, call ka tum lahin a tlang thei bawk si lo.

Khami hnu kha chuan ka rilru chu buai tak têin a buai a, dawr ka thlen lah khan rinhlelh tur takin an lo la awm dun zui bawk si, insumna ka nei hman ta lo a nih kha!

Eng pawh ni se tuna atan chuan Mambawihi lakah pawh ka thin a rim tawh lo vang a, zan pawh mu thei lova a lo ṭah ngawt ngawtna khan a pasal hi min phatsan dawn lo tih min hriat chian tir ta hle.

A hmel chu ka thlir ning thei lo va, chutiang em ema hmeichhe duhawm ka nupui a ni chu ka hlim a ni. A hmel leh taksa mai chauh ni lo, a rilru lam thlengin a thianghlim a, chuvang chuan mipa dang lakah pawh hauh ka pe na hle.

Gym room-ah pawh kal ta lo chuan ka nupui chu ka mutpui ta char char a, min mamawh a nih phawt chuan a kiangah ka awm zel ang. Chutia duat taka Mambawihi ka kuah lai chuan ka hnung lam chu ka fapa te chuan a lo tlawh neuh neuh a, a awm dan aṭang chuan a harh tawh tih ka hre mai.

Fiah hlei lo hian a rawn au a, min be ve ni maiin ka hria. Mambawih ka kuahna ban pakhat zawk chuan Marcus-a chu ka va ban a, ka kut mai mai pawh a hlimpui leh reuh tawh hle.

Nuih a duh reuh em em a, ka chhaih phei hi chuan a nui uar thei lutuk chu Mambawihi zawkin min hau ṭhin. A nuih nasat lutuk chuan a irhfiak emaw a chil vel emaw a hak palh a hlau a, mahse chutiang em chu kan la tawng chuang lo. Ka fapa chuan ka kut chu a khal niap niap a, ka chhaih tawh loh vang nge ni en pawh min en tawh lo. Ka kutzungṭang chu ei mai te a tum vel a, a thil tih avang chuan ka lo nui sak.

Chiang zet hian min lo en reuh a, keipawh chuan hmangaih tak hian ka lo en ve reng. Chutah ka lamah chuan rawn bawk vak pheiin min lo bawh a, a aw a chhuah leh ta ul ul mai.

Kei lah chuan a nu a tiharh ang tih ka hlau si, ka ban chuan ka âwm sirah ka kuah bawk ta ringawt a, chutah pawh thawm a la rawn chhuah chhunzawm zel tho. Kei chuan zawi tak hian a beng bul chêtah chuan

"Anu tiharh lo vang aw, anu kha a mutui lutuk a" ka zu ti zeuh a, ka fapa chuan min lo en vat reuh a, a la rawn nui ver ver zui.

Ka ban nghenga a bawhna aṭang chuan a rawn tho kang a, a nu ang maiin ka khabe hmul leh hmui hmul vel chu a khal leh niap nîap tawh. A kut te tak te chuan ka hmui hmul chu a chul thla den den a, tunge ka âwmah chuan mu tih pawh ngahtuah lovin a rawn lawn chho nghal zat.

A awm dan avang chuan Mambawihi chu a rawn harh chiang ta hle. A rawn meng buai nak a, mahse kei leh a fapa min hmuh tâkah chuan rizai pawt khawmin ka sir lamah chuan a insawn phei a, a mu ṭha leh nghal.

Marcus-a chuan ka hnar te chu ei zawh tum ang mai hian a rawn hmuam a, a ha te reuh te hmanga min sehna vel chuan ka ti a tiza ṭep a ni. Ka biang hmul awm lohna lai te chu ei a tum a, a ei theih lohna hmun chu kalsanin hmun dangah a pakai ve leh zel.

Ka sam buk lutuk lo chu a ṭham tan tan reuh a, a chang leh ka bengte chu a pawt thul. A kut te tak tê chu a tiche reng a, a chak reuh bawk sia kum 4 emaw kum 5 emaw vel rual a nih hunah phei chuan a chak tawh khawp ang le.

Ka lu chung lam aṭangin ka hmui zawnah a rawn insawn thla a, ka fapa chuan ka hmui chu a rawn fawp vel reuh a nih chu! Chutah zet zawng ka insum thei tawh lo, ka fapain ka ti a tihzat dan chu pui tak a ni.

"Ka fapa te hian min fawp vela maw! Apa hi i fawp vela maw! Ka fawh i duh em ni? Kha le, apa hmui a lo thlawk thla mek e" leh thal thutin ka ti sawk sawk a, a hmui te reuh tea ka zu fawh chuan hrethiam ni awm tak hian a lo dut let ve ngar ngar.

"Marcus-a khan infawh pawh a la thiam lo, ei che a tum a nih kha!" rizai hnuai aṭangin Mambawihi chuan a rawn ti deuh hmuk a, a ṭawngkam aṭang chuan a la lungawi fumfe lo niin a lang.

"Awihawm loh, min fawp let ve ngei alawm, a fawh ve loh che avangin min thik a nih kha!" rilru nui vur vur chung chuan ka ti a, ka thusawi avanga a hmel awm dan tur chu hmu thei ila chuan nuih ka insum rei theih ka ring lo.

"Ka thik bawk lo che, naupang kum khat leh tih lekin infawh awmzia pawh an hre lo" a rawn ti leh hmuk a, chutah kei chuan meinei zet hian

"A nih chuan infawh awmzia hria hian ka fawh a lo duh ru reng a ni lo maw" ka ti zeuh a, Mambawihi chu a ngawi chiang ta hle a, a ngawih reng danah a hmai a sen leh vek tawh a ni ngei ang.

"Bawiha, anu hian ka fawh kha a lo châk ve lutuka maw, ka va fawp ve lawk ang a chuan nangmah nen kan infiam daih dawn nia" tiin Mambawihi awmna lamah chuan ka inlet phei a, a rizai sin lai ka si ṭan dek dek tihah chuan

"Ka châk bawk lo, min ring duh miah lo tu hmui chu sik leh châkna pawh ka nei tawh lo" a rawn ti vin hlar a, nizan khan kan ṭha vek tawh emaw ka lo ti hman asin le.

"Awm sawn rawh, khawi teh" a rizai keua ka luh thut avang chuan a rawn ti nghal a, a dul mawi takah chuan ka hmai chu a awm ran tawh.

"Keima'n ka fawp châk che alawm" tiin a dul zawn aṭang chuan ka insawn chho a, min nam ve ṭang ṭang mahse ka tawlh chho zel tho.

"Awm sawn vat teh u Marem, ka mood a fuh lo teh mai a nia aw" a rawn ti thluk deuh duai a, kei chuan chhan pawh chhang let lovin a hmuiah chuan ka fawp nghal hmiah.

Ka fawp vawng vawng a, dam tak chuan a hmui chu ka pet ne ne a, a ka chhungah chuan ka lei chu ka la rawlh lut duh mai lo, a la hun lo bawk. Thlek sawn chu a tum ṭhin tak na a, a lu ka dawm tlat avang chuan a thle sawn thei chuang lo.

Lungrun em em chuan ka fawp a, a hnu rei lote ah ani paw'n a hmui chu a rawn chet ve ṭan ta. Chu chuan a hma ai zawngin min tiphur a, mahse nupa nun hmang tur ang maia chet nghal buan buan chu ka tum kher lo.

A changin a hmui chung lam chu ka pet a, a changin a hnuai lam chu ka pet leh a, a inpeih ta maw tihah a ka chhungah chuan ka lei chu a lut zui nghal.

"Ka hmangaih che, ka hmangaih lutuk che" duh tawka kan infawh zawh hnu chuan ka tisup a, a a tawp kharna'n tiin a hmuiah chuan ka fawp leh vawng vawng.

"I la lungawi lo reng em ni Mambawih? Inngeih takin awm dun leh tawh ila" a chunga bawk run chung chuan ka ti leh a, kan hmai a inhnaih bawk a, a thaw rimtui tak chu ka hre vek thei.

"Aw, lungawi lo" a rawn ti leh hmuk a, a biang sira fawh zeuh pah chuan

"Eng thil nge i lungawi theihna'n ka tih ang? Vawiin chu hna ka chawl mai dawn em ni? Ka awm che i duh em? Kan leng kual dawn em ni ang? Kan chhungkua bil bik hian leng kual ila a ṭha tak ang a?" ka ti zung zung a, vawi khat mah kan lo la leng chhuak ngai reng reng lo tih chu ka hre chhuak leh ta nghal bawk.

"Ka hre lo" a rawn ti deuh tawp a, a hmelah chuan la lungawi chiah lo mahse a inthlahrung leh ṭan tawhin ka hria.

"Ka hmangaih che Mambawih, i rilru a la nat hmel bawk sia ka hmangaih em em che thu hi ka sawi reng mai ang" ṭhen suka ka tih rual chuan a nghawnga bei turin min kuai kun vat a, chutah amah vek chuan

"Keipaw'n ka hmangaih lutuk che u Marem, ka hmangaih em che avang hian mipa dang lakah ka phatsan thei lo che a, phatsan che pawh ka duh lo" a rawn ti nghal a, thawh kana a hmel en ka tum chu min kuah ngheh phah sauh.

Ni e, ani hi ka nupui ka hmangaih leh duat em em mai a ni a, min phatsan theih hi ka ring lo hulhual a ni. Ni dangte chu ni se rit min tiin awm sawn turin min ti leh chhen tawh awm si a, tunkin zet zawng kan boruakin a zir viau a ni ang ka kal sawn eih pawh a phal lo.

Ka fapa min kohna thawmte chu ka hre reng a, a nu lah hian kal sawn pawh phal lo ang maiin min kuah bet run bawk si. Nghet takin ka kuah let ve a, chutah

"A chunga i awm ve hun" ti supin ka inleh pui nawk a, ani pawh chuan ka âwma a bei hnu chuan engmah a sawi leh tawh bik lo.

A nu nena kan awm dan chu ka fapa Marcus-a chuan min lo en kar a, a thil tih tawp meuhin min lo en a, mak tih hmel tak hian a rawn bawkvak phei zui nghal. Ka ban pakhat zawk chuan ka lo ban thuai a, ani pawh a rawn lawn kai rang hle.

A aw chu a rawn chhuah leh ul ûl tawh a, a aw lah chu a la lian reuh em em zui. A nu awm dan chuan awm ve nghal a tum a, a nu sam te chu a khawih niap niap a, a nu chu nam sawn a tum ve vel nîa.

A nu lah chuan awm sawn a tum hmel loh ropui mai si a, an awm dan avang chuan ka nui chhuak ṭep a ni. Marcus-a chu a nu ang chuan ka âwma hmun awl tlem te la awmah chuan a rawn bawk a, a awm hle hle dawn emaw tih nak a laiin a tho leh thuai a, a nu chungah chuan a bawk ta ran mai. Ka bana ka kuah phak tho avangin an pahnih chuan ka kuah khawm vek a, ka fapa pawh a awm ve ta hle hle.

"Naute pahnih awm tur ka lo nei reng a nih hî, fanu lian tawh leh fapa la sen tak enkawl dun chu a dangdai khawp mai" ka ti sup a, ka âwma bawk run te pahnih chuan thawm pawh an rawn la chhuah chuang lo.

"Mambawih, dar 8 a ri tawh a nia, i pa kal hma a ngai si, ei rawng pawh kan la bawl miah lo a nia" kan room kawngka kik pahin ka nu chuan pawn lam aṭangin a rawn ti lawng lâwng a, chutah Mambawihi chu rawn che thuaiin

"Dar 8 a ri tawh maw!?" a rawn ti vat a, ka fapa chu ka banin lo chelh lo ila chuan a thawh thut avangin a leng dâwrh ngei ang.

"Engati thut thut nge? La mu leh rawh, ka pate chu chaw ei lo paw'n a kal ngun alawm" tiin ka la kuah bet run a, mahse ani chuan thawh chu a la tum fan.

"Ni lo, ka chhuk a ngai, ei rawngte pawh ka bawl a ngai alawm, min kaltir teh u Marem" a rawn tih chuan

"A nih chuan i lungawi tawh thu leh min ngaihdam tawh thu sawi phawt rawh, chuan ka kaltir ang che" ka lo ti ve ta zaih.

"Ka ngaidam che, ka lungawi lo tawh lo" rawn ti thuaiin a innem kang a, keipawh chuan ka kuahna chu ka lo thlah dul ve ta mai bawk.

Ka nu reng reng pawh chu ama'n lo bawl ve mai tur a nia ka ti rilru neuh neuh a, thil harsa tak a ni paw'n ka hre lo. Thla hnih thla thum hnu vel aṭang khan ka nu hian Mambawihi a en dan hi a dik lo leh ṭan tawh tih ka hria a, eng buaina vak mah Mambawihi'n a la tawk lova ka hriat avangin ka la titipui leh ta rih lo mai zawk a ni.

Amaherawhchu a hma ai thlawt chuan Mambawihi chu a hmu mawh tih ka hmu thiam vek a, eng thil emaw ni tak chu dik lo a awm chiang a ni.

Ka âwma ka fapa a rawn lawn kai avang chuan ka ngaihtuahna aṭang chuan ka harh zui nghal a, a hmel ka en chuan min lo nuih leh ver ver tawh. Ka hmui bawkah chuan min lo fawp leh a, he pa te hian ka fawh chu a duh tak tak reuh chiang alawm.

A hmuiah mai ni lo a khabe phir têkah te chuan ka fawp a, ani erawh a rawn nui leh uar uar tawh. Ka âwma pawm bet chungin khumah chuan ka lum pui vak vak a, ka thil tih avanga a hlimzia chu pui tak a ni.

Chaw ei hun vel awmah in hnuai lamah chuan ka chhukpui a, a awm danah a pu chu a zawng tih ka hrethiam. Ka nu chuan pawm tumin a lo ban a, Marcus-a paw'n a lo ban let ve mai.

A chhungte hi chu duh loh pawh a nei hran lo va, mahse a hmuh ngai loh pawm hi chu a duh ṭhak bik lo. Zira tak ngial paw'n a tum nasat fê hnu pawhin a pawm thei lo va, chutiang bawkin Mambawihi ṭhiannu paw'n a pawm hlei thei bik chuang lo a ni.

In hnuai kan thlen thlak chuan ka pa chu a lo awm tawh lo va, a kal tawh tih pawh ka hre mai. Ka pa hi zawng zin chhuah leh chhuahna tur neuh neuh hi a ngah thei lutuk a, a hna leh a nihna pawh hi a hahthlak ve ngawt ang ka ti ṭhin.

Mi ṭhenkhat hi chuan MLA nih te hi an châk em em zel a, mahse kei chuan ka pa a nih tawh vang pawh a ni maithei nih ka châk lo hle thung. Ei ruk sum vel a tam hmel si, a thianghlim hian ka hre thlawt lo. Amaherawhchu ka pa chuan mi dangte angin a ei ru lo tih ka chiang a, a ei ruk duh ngai pawh ka ring bawk hek lo.

"Ka nu, Mambawihi hi dawrah thawk tawh suh se aw, duh leh mi dang keima'n ka chhawrsak mai ang che" chaw kan ei lai chuan ka ti a, Mambawihi zawk chu a lo meng phawk ngei mai.

"Engati leh ta ringawt nge? Hetiang thil te tham leh tih awl lutuk te chu a tihtheih ka lo ring ve asin" ka nu chuan a lo ti a, a ṭawngkam chu ka huat zawng tak a ni.

"Nia ka ti thei alawm u Marem, nimin thil thleng avang kha chuan hlauthawng suh, dawrah chuan ka la thawk zawk ang ka ring ka nu" Mambawihi chuan a rawn ti a, chutah ka nu chuan

"Enge niminah chuan thleng a? Dawr lamah buaina a awm em ni?" a rawn ti ta fak mai. Ka bula mi chuan zep awm miah lo hian

"Nia, buaina tlem te chu a awm ve deuh. Sawmtea nena bungraw rema kan tlu dun kha u Marema'n min lo hmu a, inngaizawng emaw min ti a, chuvang chuan a thin a rim deuh lawm, mahse tunah chuan a thin a rim leh tawh lo" a rawn ti tawl a, ka nu chu hrilh ve vek kher chi ah pawh ka ngai lo asin le.

"Nang hian ngaihzawng chu i lo nei a ni lo maw? Tun lai phei chu i a ṭang si, pasal la nei lo ang maiin i taksa i enkawl a, mipa tan phei chuan mitmei hmûh hmuhtu hmeichhiate chu zuam an awl dawn teh a nia" ka nu chuan a rawn ti a, a thusawi avang chuan ka thin a rim ve ta phat.

"Ka nu, i duh tawk thei tawh em? Engatinge Mambawihi hi mil lo leh ta em em nge i nih? I lakah tihsual a nei em ni?" aw nem lo zet chuan ka ti chhuak hrawk a, chutah Mambawihi chuan

"U Marema" tiin ka mal chu a rawn vuan a, thinrim lo turin min signal mahse ka thinrim em tawh avang chuan ka insum thei leh ta pek lo.

"Ka ngawi dawn lo Mambawih, chuan ka nu dawr hi i enkawl lo vang a, a thawh pawh i thawk tawh bawk lo vang. Nang chuan kan fapa hi i enkawl nî tin ang a, in chhungah hian che la a tawk mai" ka ti nghet leh charh charh a, ka thusawi avang chuan ka nu chu a lo chek ri tlak tlak zui bawk.

"LALREMRUAT le! I nupui hian mipa dang a umsan che ka hlauh vanga sawi ka nih khâ hrethiam ta che. Tun ang laiah chuan hmeichhiate hi an rapthlak tawh bawk si, rin ngam tur pawh hi an awm tawh lo tluk a ni" ka nu chuan a rawn ti leh a, a ṭawngkam chhuak Mambawihi tana ngaihthlak a nawm loh dan tur chu ka hrethiam ve vek.

"Ka nu! I mak em mai, Mambawihi hian ka hming ka hriat chian tluk zet hian mipa dang lakah min phatsan dawn lo tih ka chiang. A pasal ka ni a, ka phalna lo chuan i dawrah sawn a thawk tawh dawn lo" ka ti khauh ve leh ta fak a, ka aw a nem vak lo bawk nen Marcus-a chuan min lo en kar mai.

"U Marem duh tawk tawh rawh, ka nu hlauhthawn pawh kha a awm lutuk alawm. Amaherawhchu ka nu, u Marema hi ka hmangaih a, chuvang chuan engtikah mah mipa dang ka umsan ka ring lo a ni" aw dam tak hian Mambawihi chuan a rawn ti ve a, chutah ka nu chuan a thusawi awih loh hmel zet hian

"Tuma'n hma hun kan hre hleinem, mipa dang umsan chu tum buai vel lo phawt la a ni mai" a rawn la ti hram a, ka chaw ei lai pawh tawp hmakin ka nu chu ka melh ta ral.

"Kan in dang a ngai tawh ni maiin ka hria, Mambawihi i ngai thei lo a nih chuan i fapa pawh hi min ngai thei lo tih i hre dawn nia ka nu" ka ti ta hmuk a, chutah Mambawihi chuan rang zet hian

"U Marem!" a rawn ti leh hluai a, ka kut chuan lo ṭawng ve rih lo turin ka lo khap vat a, ani pawh a ngawi ve leh ta mai bawk.

"Marcus-a kha a inei puar tawh em? Ka kham dawn a, ka lo pawm daih dawn em ni ang?" tiin pangai tak chuan Mambawihi chu ka biak chhunzawm daih a, ka nu hmel chu en pawh ka en chhunzawm peih rih lo.

"Aw, aw ei puar tawh e" a lo ti bah deuh nuai a, ka ṭawngkam inthlak danglam thut chu mak a ti a ni ngei ang.

Ka ṭhutna aṭang chuan ka tho a, kut ka silfai hnu chuan Marcus-a chu pawmin pawn lamah ka chhuahpui ta daih. Kan in kawt phul velah chuan kal ka zirtir a, kawnga kal te chuan min en duh hle. A ṭhen chuan min lo bia a, ka fapa chu hmelṭha an tih thu leh a len tawh thute an sawi a, kan inanzia chu an sawi tam ber.

Ka pa meuh paw'n inang min ti ve a, chutiang taka ka fapa nena kan inang chu ka hlim phah hle a ni. A mit takah hian min chhun a, a dangah erawh a nu lam a kal deuh chuan ka hria. Amaherawhchu mit hi a lo pawimawh khawp a, a mita kei ber min chhun avang chuan mi dangte chuan a engkim chu min hmu inang vek lo thei ta lo a ni.

Rin ai takin kal chu a zei phian a, a kal ve sauh sauh mai. Hetiang renga tha a ngah chuan kal pawh a theih vat ka ring. Naute te'n taksa tana ṭha tur an ei chi chu hmaih awm lovin ka leisak vek a, ni tin a nu chuan a pe ziah bawk.

Tin, ka fapa ang bawkin Mambawihi tan pawh nu tana ei tur ṭha chi tinreng ka ngaihtuahsak reng a, amah zawk hian ngai a ti lo ṭhin. A chhan pawh sum a ui a, kei lah chuan ka nupui leh ka fapa tan chuan ka lo ui lo nasa mai.

"Apha!" fiah vak lo hian ka fapa chuan a rawn ti a, min koh dan avang chuan ka nui ta ver ver.

"Aw ka fapa, min mamawh em ni? Ka lo kal e" tiin a dinna aṭang chuan ka pawm kang a, chutah amah vek chuan

"Apha! Apha!" a rawn ti leh a, ka hmuiah bawk chuan min lo fawp leh reuh a nih chu!

"Eih a! Eih a! Ka fapa, ka hmangaih em em te, khaw maw ka'n fawp teh ang che" tiin a awm sawn tawh chu ka fawp a, a âwm vel ka hmuia ka nawr vak vak chuan a rawn nui leh ta uar uar mai.

"Bawiha, anu han ti ve teh, ka beng hriat lai ngei hian anu han ti ve teh" ka ti a, a nu hming chu ko ve thei tawh se ka ti, thei tawh se chuan Mambawihi pawh a lawm ve khawp ang le.

"Apha!" a rawn ti leh daih a, a rawn ṭawng dan avang chuan ka nui chhuak ta huah huah.

"Apa ni lovin anu han ti teh le" tiin a mitah chuan chiang zet hian ka en a, chutah ka fapa Marcus LALRINKIMA chuan fiah mangkheng hian

"Nu! Anu!" a rawn ti a, awihawm loh khawpa a ṭawng fiah avang chuan amah chu mak tihna mitmengin ka en ta vawng vawng.

"Lut ang, in chhungah lut ila anu kha a hriat laiin ko ve rawh aw" tiin ka inher pui thuai a, ka beng chu ei tum ang maiin a lo hmuam leh ta vak vak.

In chhunga kan luh chuan Mambawihi chuan thleng a lo sil mek a, a bulah ka nu pawh a lo ding ran mai. Ka nu chu a ṭawng char char a, Mambawihi erawh a ṭawng awm reng ka hre lo. Muangchang chuan ka phei a, ka fapa lah chuan ka beng pawt ngawng ngâwngin ka khabe hmul te chu a khal niap nîap pah reng bawk.

Mambawihi leh ka nu awmna bul ka thlen hnaih chuan ka nu chuan Mambawihi chu a lo zilh malh malh tih ka hre nghal a, ka nu hi ka hrethiam thei thlawt lo. A hmate kha chuan a ngainain a kawm ngeih ve tawh em em a, tun hnai a mizia a inthlak hlawk chu mak ka ti lo thei lo a ni.

Chapter 35

Mambawihi POV

"I pasal lakah hian i lo vui kual vel em ni? Engatinge dawra thawh chu a phal loh tlat? Nang pawh hi a! i rilru hi a no kual vel ṭhin lutuk a, dawra thawh te chu thil harsa pawh a ni hleinem" ka nu chuan ka bula ding reng chung chuan a ti zuah zuah a, kan inmil lo ta lutuk chu hrehawm ka ti ngawih ngawih.

"Ka nu engtin mah ka awm hleinem, u Marema lakah phei chuan ka vui ngai lo hrim hrim. Nimin thil thleng avang khan a la lungawi pawh a ni maithei a, nakin lawkah ka thawh a phal ve leh mai ang"

"Marema hi ka hriat chian loh i ring em ni? Nge a nu ka ni tih hi i theihnghilh zawk? Ka fapa a ni a, nang letin a mizia ka hre chiang zawk asin, dawrah hian a thawhtir mai mai tawh lo vang che"

"Ka theih tawpin ka lo sawipui dawn nia, mahse ka vui kual vel lo tak tak a nia aw ka nu, phal lo mahse dawra la thawh hram chu ka tum ang"

"Eng pawh ni se dawrah chuan la thawk ang che, i thawh hian sum pawh kan la lut chakin ka hria. Chuan ngaihzawng chu i nei reng reng em ni? Rinhlelh theih tura i awm a nih chuan i lo nei ru rengte hi a ni lo maw?"

"A teuh lo mai ka nu, ngaihzawng pakhat mah ka nei lo, neih pawh ka duh bawk lo"

"A nih si chuan engatinge i pasal hian a rinhlelh si che? Hetiang vel hi lawm a thlen ka hlauh, in inneih hma aṭang tawh khan ka hre lawk deuh ruai ruai a ni" a mo ni mah ila min rinna chhete mah a nei lo chu mak ka ti thlâwt.

"Ngaihzawng ka nei lo a tî a ti a ni lo'm ni? Engatinge i lo la sawipui chhen a ka nu? Kan nupa inkarah leh kan chhungkaw inkarah hi chuan lo inrawlh tam lo la ka duh khawp mai" kan hnung lam aṭanga u Marema'n a rawn tih chuan ka nu chu a ngawi zui hmak a, kei chu ka khawng ti tih nghal vek.

"Enga!? LALREMRUAT min va zah lo sawt ve a, inrawlh lo tur te khan min ti ngam vela maw!? I pa ka hrilh hunah chuan a ngawi mai mai tawh bik lo vang, a dawh rei tawh che em mai" ka nu chuan thinrim tak hian a rawn ti phiar a, u Marema erawh chuan ka banah a lo kai a, ngawi rengin kan nupa room lam chu min panpui nghal daih.

"Min thlah teh u Marem, thleng kha ka la sil zo miah lo a nia, ka zu sil zo law law ang" step-a kan chhoh lai chuan ka ti a, mahse ka pasal chuan min thlah eih pawh a tum lo.

"Chhang ve ta che, engvangin nge i aw dam tak te khan i chhan vel? I diknaah chuan huai takin ṭawng ṭhin rawh, ka nu emaw mi dang tu pawh ni se diknaah chuan hlau reng reng suh" room-a kan luh rual chuan a rawn ti hmuk a, nuam lo ka tihna a zual.

"A ho lutuk u Marem, ṭhatnain ka nu hi ka hneh thei tih ka chiang. Ka bei ṭang ṭâng ang a, a hma ang khan inngeih takin kan la awm dun leh theih ngei ka beisei" a thinrim khap daih tum em em chuan ka ti a, chiang zet hian min en ta reng.

"Engtin pawh ka nu khan hrilh che mahse keiin ka phal loh chhung chu ka nu dawrah hian i thawk leh tawh ngai lo vang, chu chu ka thutlukna tawp ber a ni" min khawngaih nge a thinrim tih pawh chu ka hrethiam tawh lo.

"Tukin maiah nimin thil thleng avanga kan inkar nuam lo tak kan siamṭha zo chiah a, engatinge tunah buaina i siam leh? Engatinge ka thawh chu i phal loh bur kher? Engatinge i thinrim em em?" ka ti ta thlâwt a, u Marema chuan Marcus-a chu khuma dah thla zawkin min lo en leh nghal.

"Ka khawngaih che alawm Mambawih, ka hmangaih tluk zet chein hrehawm i tuar hi hmuh hrehawm ka ti a ni"

"Eng hrehawm mah ka tuar hleinem, ka nu paw'n dawr lam enkawl turin min ring ve em em tawh zawk asin. Ka enkawl hnua sum kan lakluh hnem sawtzia te min hrilh a, chuvanga la thawk tura min duh em em a ni bawk"

"Ni lo, kei hian ka hre sual reng reng lo. Dawra i thawh paw'n i hah tih ka hria a, ina i lo haw lahin Tlanzoi a awm tawh bawk si lo nen i che leh vek zel a, i awm dan engkim hi ka hre lo emaw ti suh"

"Chungte chu ka tihtur alawm, ka nu tih turah i lo ngai em ni? Ka pa tih turah i ngai em ni? Mo tan chuan a pasal in chhung khura chet vel chu a tihtur a ni a, tûmah a phut tur a ni lo. Hmeichhe tan chuan pasal kan neih hian neuh neuh kan chhawm ṭeuh a, chungte chu min hriatthiampui mawlh teh u Marem"

"Ka hrethiam, ka hrethiam lutuk Mambawih. Ka hriatthiam lutuk che avangin in dang pawh ka rilruk vek tawh a, ka pa rawn chauh a ni mai tihtur la awm chu!" ka bianga rawn dawm pah chuan a ti a, ka meng phawk nasa hle.

"In dang kha i ti tak tak em ni? I tak tak lo ti raw? I tiawm ang lo thei em mai u Marem"

"Ka ti tak tak, tunah hian in lei tur ka zawng mek a, kan hmu rih mai lo a nih pawhin mi inhnuai luahin ka in dangpui tho ang che u"

"Aih ka duh lo, ka tan paw'n a zahthlak lulai lutuk. Kum khat leh a chanve âwr chuah he inah hian ka la awm a, mite paw'n mak an ti lutuk ang. Chu bakah ka tan te hian ngaihtuah ve teh, in dang hi a la fuh rih lo u Marem"

"Tunah kan in dang nghal dawn tihna pawh a ni lo va, mahse in lei tur ka hmuh veleh kan in dang nghal ang. Kan chhungkua bika awm ho te hi kei chuan ka châk tawh asin, i châk ve miah lo em ni?"

"Ka châk lo bik pawh a ni lo, chungte ka châk ve lutuk zawk alawm. Amaherawhchu kan thil tih châk zawng zawng hi tih nghal vek chi a ni lo va, thil reng reng hian hun bik an nei ṭheuh asin u Marem"

"In dang chungchang chu kan la sawi ṭha dawn nia, mahse dawra thawh kha chu tum buai tawh suh. Engti kawng paw'n min dil mahla ka phal tawh dawn chuang lo, i hria em pian nalh em em tawh nu?" tiin ka lungawi lo hmel chu min rawn tihhlim a tum zawm zat a, kei erawh ka kal sawn ta daih.

"I'n titau kual ve vel a, ka Mambawihi hi i hlim leh thuai dawn tih ka chiang lutuk" tiin mi pawh buaipui lo chuan Marcus-a lam chu a va pan daih a, tukverh aṭang chuan pawn lam ka thlir ta hle hle.

"Marcus, anu saw pawna i koh ang khan han ko leh teh le, a hriat lai ngei sawn sawi tawh rawh le" u Marema thil tih tir tum chu Marcus-a chuan a thei dawn lova ka rin lutuk avang chuan ka ṭhen sak a, an lam pawh ka hawi lo hrim hrim.

"Anu! Anu! Nu!" fiah zeta ka fapain a rawn tih chuan rang takin an lam chu ka hawi a, vawi thum lai min koh avang chuan ka hriat sual ka ring hauh lo.

"Awi ka fapa, min ko maw!? Tunah khan min ko ve thei tawh maw!? Min han ko leh teh, min ko leh teh Marcus" an lam pan chuan ka ti nghal chûl a, u Marema pawh chuan

"Anu kha ko leh rawh le, tlangval fel chuan apa thu an awih ṭhin kha" a lo ti ve a, chutah a ban te tak tea min lo ban ṭawk ṭawk chung hian

"Anu!" a rawn ti leh a, kei chuan rang zet hian ka lo pawm vat a, ka fapa ngeiin min ko ve thei ta chu ka hlim a ni.

"Anu kha a va'n hlim leh tawh si em ti raw Marcus, nangni pahnih in hlim hi chuan kei chu ka hlim ve veng veng zel" tiin u Marema chuan keini chu min lo kuah a, amah a lian bawk nena a taksaah chuan kan leng vek tho.

"Leng chhuak turin insiam ṭan ang aw, vawiin chu nuam takin hun i hmang teh ang u" a rawn ti leh chuan amah chu ka en chho hâ a, a rawn ṭhen suk mai.

"Hospital lam in buai dawn lo em ni? I chawlh tur thu pawh i la hrilh lawk tawp nâng, tukinah chauh len chhuah i sawi bawk si. Duh leh ni dangah ti ila, kar tawpah te pawh a remchang zawk ang chû" ka ti ve ta duah a, min chhang lawk lo hian ka chalah chuan a rawn fawp leh vang vang ringawt.

"Tun hnai chu kan buai lutuk hleinem, chu bakah Doctor Tetei khan min lo awl thei mai ang. Nakinah vawiin ka chawlh tur thu chu ka hrilh dawn nia, tunah chuan insiam tawh ang u le" tiin Marcus-a ka pawm lai chu a rawn la a, a kut phah lian taka din tirin a be zawm nghal.

"Haw haw haw, ti hian ka kutah hian lo ding reng la, ka'n insiam ang e aw" tiin a fapa chu a bia a, pakhat lah chuan hrethiam ve ang mai hian

"Pha! Pha! Pha!" a lo ti ve zet zet a, ka pasal leh ka fapa hlim taka an awm dun hmuh tluka hmuhnawm tih ka nei ta lo.

"Anu kha lo insiam ve rawh le, min en reng chuan thil eng emaw ni kan ti leh palh mai ang, ti raw ka fapa?" tiin a fapa chu pawm pangai tawhin a virpui vak vak a, pakhat te lah chu hlau miah lo hian a lo nui uar uar zui.

"Bleeh! I thil sawi kha a ṭul thlawt lo" nui ver ver chung chuan ka ti a, drawer lam panin ka thawmhnaw hak tur chu ka thlang zui ta daih.

Kan chhungkuaa leng chhuak tura kan inpeih hnu chuan kan nupa room aṭangin kan chhuak a, in hnuai kan thlen thlak chuan thleng silna chu ka en hmasa ber. U Marema nu hmel hmuh tur a awm lo va, mahse thleng erawh a sil chhunzawm a ni ngei ang a lo inrem fel vek tawh. Kan in compound aṭang chuan motor in kan tlan chhuak a, khawi lam nge kan pan dawn pawh ka hre lo.

Bazar lamah chuan kan tlan char char a, motor pawh an tam khawp mai. Kan kalna hmun tur ka zawt hran lo va, a duh duhna hmunah chuan min hruai phawt mai teh se. Kan tlan fê hnu pawh chuan kan la ding mai lo va, a khalhtu pa lah chu vei nei ve lo ang mai hian a awm tlat bawk si. Kan tlan pelh tawhna lamah te chuan kan tlan let leh vel a, u Marema chu ka en ta haw.

"Khawnge min hruai dawn? Kan va tlan rei tawh ve" ka ti ta nge nge a, ani chuan min chhang lawk lo hian kan hnunga motor tlan te chu kawng a kian a, zawi muangin motor chu a tiding zui nghal bawk.

"Kan chhuah tirh kha chuan Hmuifang lam ka rilruah a lo lang a, mahse a tlai tawh bawk sia kal kha a chi leh lovin ka hria. Chuan Folkland lam ka rilruah a lo lang leh a, mahse an hawnni a ni lo tlat" a rawn ti sup a, kalna mai tur chu a hre bik lo hle ni tur a ni.

"A nih chuan khawnge kan kal ang? Enge kan tih dawn? Haw leh mai ila, kan inah khan awm mai mai ila a nuam zawk lo maw?"

"Ni lo ve, kan chhuak ta sa sa thil enge maw tak chu kan ti tur a ni. Bazar mai ang u aw, Millenium velah emaw khawiah pawh bazar mai ang u"

"Bazar pawh kan ngai vak em ni? Thil lei tur pawh ka hre lo, pawisa kan tihek mai mai. Haw leh zawk ang? I duh lo em ni?"

"Haw lo ve, keima'n lei tur chu ka hre ṭeuh mai. Baby walker pawh kan la neih miah loh hî, chungte chu kan lei ang a, eng eng emaw ni pawh kan lei dawn nia"

"Ni tak! Marcus-a kal zirna tur hi kan la lei miah lo, ka va han ṭawp thei tak, bazar ngei ngei kan ngai zawk" ka fapa tana thil pawimawh lutuk ka theihnghilh avang chuan ka ti ta zung zung a, u Marema erawh a lo nui mai.

"Sâw lai deuhah sawn motor hi ka va park ang e, he lai hi chu parking area pawh a ni lo" tiin motor chu a tirum a, a sawina lamah chuan a khalh phei zui nghal.

Rin ai takin kan chhungkuaa kan bazar vel chu nuam ka ti leh ta phian a, miin u Marema an en duh viau ṭhin erawh ka lo ngai thei lo lek lek zel. Ka ngaihtuah let hian a tan khan a lo hrehawm awm hi ka tia.

Hmeichhe dangin an en ringawt pawh ka lo thik a, chu mai duh tawk lovin ka fapa hial pawh ka thik a nih kha! Kei ve kha chu mipa dangin min bawh a, hmui insi ṭepin kan awm a, a tan kha chuan thinrim lohna chi zia zâng a ni lo.

Baby walker kan leina ah chuan Marcus-a chu a chuang chhin vel a, a kal chhin vel a, nuam a ti khawp mai. Aw chhuah ul ulin a kal a, a kal pawh ni lovin a tlan ti tih zawk.

A pa chu a ko deuh chhen a, keipawh min ko bang chuang lo. Dawr nghaktute chuan Marcus-a chu hmelṭha an tiin an lawm em em a, pakhat tea lah chu kan in ang maiin a tlangnel em em mai bawk si.

Kan thil lei chu u Marema chuan motor-ah a dah nghal daih a, a fapa koki chhuanin hmun dang chu kan pan leh nghal. Millenium centre-ah kan lut a, u Marema'n hmelhriat a lo ngah lutuk chu nuam ka ti lo vek zawk.

Mi chi hrang hrangin an lo bia a, a ṭhen chu a patient hlui te an nih thu a sawi nghe nghe. Ka duh lo chung thawmhnaw min en pui a, mawi leh to em em mai chu min leisak lui ṭâlh a, chu a kawr min leisak mawizia chu sawi pawh ka sawi thiam lo.

A remchang ema tiin Marcus-a pi kawr tur lei haw ve chu ka rawt a, u Marema chuan lo phal lo nasa mai. A phal loh leh tâk bur avang chuan ka lei lui duh ta bik lo va, ka pawisa kawl ve pawh pakhat mah min hmantir duh lo hrim hrim.

A wallet-a pawisa chu a phawrh zel a, a wallet chhungah chuan card pawh a lo tam khawp. Kan inneih tirh khan ATM card pakhat min pe a, pawisa pawh a awm hnem hle. Amaherawhchu card chu ka lek chhuak ve vak ngai lo va, a hmingin ka kawl ve mai mai ti ila ka sawi sual tam lo vang.

Tlai lam dar 2 leh a chanve velah kan haw a, kan in chu a lo inkalh ṭhiap mai. Chahbi spare a kawl lai chu phawrhin u Marema chuan kawngka chu a hawng a, in chhunga kan luh hnu chuan Marcus-a chu walker-ah a chuantir zui nghal. Kei chuan a hun ve tawh tho bawk nen ei rawng bawl lam ka tum a, fridge-a chawhmeh awm te chu ka phawrh a, alu chu ka vel ta mial mial.

Ka fapa leh a pa inchhaih vel chu ka thlir pah reng a, an thawm a ring ṭha bawk nen ralkhat aṭangin ka lo nui ve ta chiam. U Marema chuan a fapa chu a um der vel a, pakhat zawk lah chu ṭe tuar tuarin a lo tlan kual ve zel bawk. Dar 3 a lo ri hnai a, chaw chhum chu ka hmanhmawh vak rih loh avangin anṭam chu ka bai leh ta daih.

Anṭam bai ka chawh lai chuan thawm a reh tâk em avangin u Marema te awmna lam chu ka hawi a, anni pahnih chu ṭhutthlengah an lo muhil bam mai. An hmel leh awm dan ka hmuh chian châk em avang chuan an bulah ka kal phei a, chuta ka thil hmuh chuan min va tihlim si em.

U Marema chuan Marcus-a chu a âwmah a kuah bet run a, Marcus-a pawh a pa âwma bei thlep chungin a lo mutui khawp. Pafa tih takah an inang em em a, ka phone chu phawr vatin thla ka laksak zui nghal.

Khi ver verin choka lamah chuan ka phei leh a, ka nun chu a hlim a ni. Pasal ka nei a, ka pasalin min hmangaih em em a, chutah fa duhawm tak kan la nei leh zel bawk. Chutia ka nun hlimawm viau emaw tia ka ngaihtuah lai chuan u Marema nu chu ka rilruah a rawn lang a, zawi zawiin ka hlimna te chu a reh zui ta bawk.

Engtinnge ka siam ṭhat ang? Engtinnge ka nu nen hian a hma anga inpawh takin kan awm leh theih ang? Eng emaw tak chu ka tih a ngai a ni. A tirhah kha chuan u Marema min ṭan lutuk avang khan a lung a awi lo emaw ka ti hman a, mahse thla fê a liam hnu hi chuan chu vang chauh chu a ni tawh lo tih ka hrethiam ta telh telh.

"Enge i tih a?" tiin ka bulah chuan u Marema chu a rawn bawk zal a, zan mut lam hnaih tawh mah ila ka mut a la chhuak der lo.

"Facebook-ah acount ka siam thar a, Lawmtei'n min siamsak a ni mah zawk. Hei hi, he thlalak hi ka post dawn a nia aw?" tiin tlaia a fapa nen an mut dunna chu ka hmuh a, a rawn nui ri ta suk.

"Nangmah han awm ve leh chiah la chuan a mawi dawn kha le, post te chu i thu thu alawm" a rawn ti ve mai a, mahse ka khawih ngai lo bawk nen post dan ka thiam leh ta tlat lo.

"Hei........ post dan ka theihnghilh daih a nia, hmanni kha chuan ka thiam vek asin le, a va'n mak em em"

"Khawi maw ka lo post sak ang che. Hetah hian, he lai hi i hmet ang a, chuan thlalak hi i select ang a, thu i ziah duh chuan he laiah hian i ziak thei bawk. I ziak kher duh em?" zirtirtuin zirlai naupang a zirtir ang mai chuan min hrilh a, nuam ka lo ti phian.

"Ka hre lo, ziah kher pawh a ngaiin ka hre lo. E, khawi maw ka duh leh si, ka lo type ang" phone chu ka laksak a, ka type ta zawt zawt.

"Facebook hi i khawih ve miah lo em ni u Marem? Hman zanah pawh ka zawng che a, ka hmu miah lo che" thlalak ka post fel hnu chuan ka ti a, ani pawh kei ang thovin a phone chu a khawih ve mial mial.

"A hmate kha chuan khawih ve e, mahse mi tutu emaw ni te khan min lo message chhen a, ka deactivate ta daih. Chu bakah nuam ka ti vak lo hrim hrim a, Whatsapp leh phone call a awm hi chuan a tawk ka ti rih"

"Kei chu tun lai khawvel a ni tawh bawk si a, hriat zauna'n hrim hrim pawh ka khawih ve zel dawn. Khawih ngai vak hlawm lo mah ila a thiam chawp ve zel theih mai ang. E tak a! Instagram pawh ka khawih asin, instagram hi chu FB aiin a nuam ka ti deuh zawk"

"I sawi tâkah chuan Instagram account siam ka ngai tak e, ka thawhpui te leh ka dam lo enkawl ṭhin te'n siam ve turin min ti nasa lutuk a, siam ve chu ṭulin ka hria"

"Nangni ang tan ngat phei chuan a ṭul alawm, i thil post aṭang khan mite pawh an lo inzir thei a, i hriat loh laiin mi tan thil ṭha i lo ti reng thei a nia"

"Doctor Tetei pawh khan min hrilh tawh a, inenkawl dan leh thil neuh neuh an sawi ṭhin a ni awm e. Video an upload a, zawhna pawh a tam thei khawp mai"

"A ni reng ang chu, hei hmai enkawl dan tih te leh thil chi hrang hrang an sawi ṭeuh zel, a lo ngaithlatu tan pawh a bengvar thlak thei lutuk"

"Ka'n siam ve nghal ang e, playstore-ah hian a awm em ang chu maw?" tiin playstore-ah chuan a lut a, a zawn chhunzawm nghal.

"Awm chiang e, siam dan i thiam loh chuan ka siamsak thei reng che a nia" intithei fê chuan ka ti a, ani pawh a rawn ṭhen ve leh ta suk.

"Min han siamsak teh khâ, ka install zo chiah" tiin a phone chu min lo pe a, keipawh chuan ka lo ban ve mai.

"Lawk aw, a va'n mak, ka tidik thei leh ta miah lo mai, ka'n tiṭha leh lawk" tiin Instagram-ah chuan ka lut leh a, chutia ka khawih lai chuan a phone chu a rawn la ta daih.

"I va hmelṭha tak, i mak ti hmel vel kha i duhawm lutuk" tiin min lo fawp a, chhan pawh ka chhan let hmain a awm sawn leh nghal.

"Ka siam thiam reng alawm" nui vur vur chung chuan a rawn ti a, ka va ngei mai mai tak.

"A nih chuan a tir aṭang khan siam ve mai ta che, min tihbuai hi i thiam ve ê, ninawm"

"A nuam ve mai mai alawm, i buaina kha chhe te a awma a ni mai. I tihdik tluan teuh teuh nen i tawp leh daih a, min lo zawt la chuan ka lo hrilh che ni mai tur"

"Awi awi awi, i thiam tih hre hek lo. Ka mu dawn, en pawh ka enpui peih tawh lo che" tiin Marcus-a bulah chuan ka mu phei a, min lo kuah leh vat dawn tih ka hriat lawk tawh avang chuan ka khi sak.

"Ka siam zo ta, follow tih vel hi chu naktuk lamah a ni tawh mai" tiin a rawn che sawt sawt a, ka beisei ang ngeiin min rawn kuah leh ta ran mai.

"I chau em? Vawiin te kha nuam i ti em? A nuam ti raw? Ka len chhuahpui khât lutuk che u a ka inthiam lo deuh" a rawn ti thum dup a, ka beng bul velah chuan a thaw lum ham ham bawk.

"A ho lutuk, len chhuahna hun te chu a awm ve mai zel alawm. Chu bakah hun hi i nei lo ve êm a, in hnate ang ngat phei hi chu a namai lo si" ka lo ti ve mai a, mut chhuah vang pawh ni lovin ka meng tawh lo hrim hrim.

"Chuan i chau em? Vawiina kan len chhuahna avang khan i chau em? Min han hrilh teh"

"Chau lo ve, a nuam pawh ka ti khawp mai, mahse hmelhriat i ngah lutuk kha chu a nuam lo ka ti ṭep"

"I chauh loh chuan ti ila?" ka thusawi pawh ngaihtuah em em lo ang mai chuan a rawn ti daih a, eng thil chu nge min tihpui a tum leh tak reng reng ni!

"Eng chu maw kan tih ang? Sawi pangai ve mai ṭhin la, tawite hriatthiam mai thei loh hian i sawi ṭhin a, a buaithlak"

"I taksa chhungah ka lo lut leh châk tawh, ka châk tawh lutuk hi ka za zek zek mai" a rawn ti ta tlawng mai.

"U Marem! Kan bul lawkah kan fapa a mut reng hi aw, i sawi chiang thei lutuk" ka lo ti vat a, chutah ani ve thung chuan

"Ka sawi hmasak khan i hrethiam si lo va, tlang takin i hriatthiam theih turin ka sawi a nih khâ, nangmah paw'n sawi pangai ve mai ṭhin rawh min tih kha aw" a rawn ti bui bui a, ka thusawi chu ṭan chhan atan tak a la hmang zui.

"Hei, ka phalna la hmasa lo khan khawih ringawt suh" ka hnute a rawn khawih avang chuan ka lo ti a, zep lovah chuan ka châkna chu a rawn chhuak ve nghal.

"A hma zawng pawh khan i phalna ka la hmasa kher ngai lo, a chhan chu nang hi ka ta chauh i ni" tiin ka chungah chuan a rawn bawk a, amah vek chuan

"Hei te hi ka ta, he lai pawh, hei pawh" rawn ti lehin ka taksa te chu a fawp kual den den a, nasa takin ka châkna chu a chhuak tawh.

"He lai phei chu ka ta lehzual" tiin ka kap lamah chuan a hmui chu a sawn thla a, engtik laiin ka kekawr te chu a lo inphelh vek hman ka hre lo.

A thil tih mek avang chuan awm ngaihna mai ka hre lo leh tawh a, ka vawi khat tawnna ni lo mahse ka tawn ngai loh ang mai chuan nuam ka lo ti em em zel. Zei takin a che a, ka inpeih tawh lutuk chu a zahthlak letling zawk. Ka sira lukham chu ka ṭham tawn tâwn a, a chang leh a ban chu ka lo vuan leh tawp zel.

Ka taksa chhunga a rawn luh rual chuan ka lo ang deuh hlawi a, ani chuan ka hmui chu a rawn fawp nghal chat. Min fawp reng pahin a rawn che ta zawt zawt a, a muangchang lo bawk nen kei chuan vanram tla fual ka thleng rang hle.

Ani erawh chu a la che char char a, a chetna avang chuan rei lote hnuah ka dik lo leh nghal vat. A tawpa tawpah chuan vanram tla fual tia an lo sawi fô ṭhin chu kan thleng rual ta a, a tua te ve ve pawh chu kan thlan a chhuak nasa hle.

"Kha chu hmeichhe lam kan duh si a, a dan a dang zaih lo maw?" khi vur vur chung chuan a rawn ti a, chhan pawh chhang lo vin a âwmah chuan ka chum ta ringawt.

Chapter 36

Hun a kal bek bek emaw tih laiin thla hial kan lo hmang ral leh tawh a, keipawh u Marema berin a phal tlat tawh loh avang chuan inah ka awm ta mai mai. Awm mai mai tih chu a dik chiah lo, u Marema nu'n tihtur chi hrang hrang a dawr kal dawna min pek ṭhin chu ka tih ziah ṭhin. Awm mai mai tih atan chuan a awm ang lo lam deuh chu a ni. Ni tin Marcus-a nen chuan kan in awm a, fiah vak lovin ṭawng ve ṭhin mahse ṭawng a hre chak lutuk leh a thiam chak lutuk chu mak ka ti a ni.

Kan fapa chuan Kum 2 a tling ve tawh a, walker pawh ngai tawh lovin a kal pangai thei tawh bawk. Kal thei satliah mai ni lovin a tlanin a tlan thei tawh a, a la tlan chak thei lutuk lo mai zawk a ni. A pa a lo haw hi chuan rang tak hian a pan ṭhin a, an lo in welcome dan vel chu video-a lo laksak pawh ka ngah ta mai.

Kan fapa chuan a pa lo haw chu a nghakhlel zual thei em em a, a mak hi ka ti ṭhin zawk. Eng thil nge u Marema hian hetiang em ema a fapain a ngaih theihna tur hian a tih ni!? Pafa chu an ni meuh mai, mahse hetiang em ema a fapain a ngai hi mak ka titawp thei lo a ni.

Marcus-a chuan fumfe si lo hian thil sawi ve neuh neuh a ching ṭan bawk a, chungte hlei hlei chu a pi leh pute lawmah a tla thung. A pi leh pute chang ni lo a nu leh pate pawh hian a lawmawm kan ti em em a, hauh te lah chu a hre ve tawh em em leh nghal. Marcus-a chu fing ve tawh tak hi a ni ringawt, kan mood leh kan ṭawngkam aṭang kan thinrim leh rim loh a hre hrang titih thei tawh a ni.

Tuk khat chaw kan ei laiin u Marema chuan a pa chu in dan a dil ta ngei a, mahse a lo phal lo hlauh. Ka rilru tak chuan ka lawm a, a chhan pawh keimah ngei hian a ruka boruak chhe tak kan neih chu ka siam ṭha thei tih ka hria a ni.

A ṭul chuan ka pasal puihna pawh ka dil mai ang a, engti kawng zawng pawhin ka siam ṭha dawn hi a ni tawp. Ka thei ngang lo a nih leh a nih nih kan ni tawh mai ang a, mahse ka theih tawp chu ka chhuah tho ang.

Ṭhawhṭanni a ni a, insuk tur pawh a tam leh hle. Nimin kha Sunday a ni bawk a, thawmhnaw suk tur a tam viau pawh chu awm ka ti deuh tho mai. Marcus-a ka awih muthilh tawh avangin tlem chuan ka thaw a veng deuh hawk a, kum 2 a tlin hnu hian a hma ai khan awm tlei a har daih.

A mut dawn te hian a ṭap vak phawt zel a, kei aiin u Marema chuan a timuhil hma ṭhin daih zawk. Han pawm vel leh awih mut vel a zei loh loh nen hian a fapa lah chuan a duh tlat bawk si, leh lam kawng zawng takah chuan ka hahdam phah sawt ṭhin.

"Ehêee, Machine hi a chhia emaw ni le, engatinge a vir theih miah loh le" ka ti nang nâng a, keimah leh keimah chu ka inbia hi a ni ringawt.

U Marem chu call ka tum uk a, mahse ani ber kherin Machine chhiat leh ṭhat a hre dawn lova ka hriat avang chuan ka call leh ta lo. U Marema nu phone number chu ka hmet chhuak a, ka call zui nghal. A la mai lo va, a ring ral ta ṭhak zawk.

A buai a nih ringin ka phone chu dawhkanah ka dah a, Machine chu awmze hre map lovin ka endik zui ve leh mai bawk. Ni thei ngânga ka hriat loh avang leh kuta insuk ka peih loh em avang chuan u Marema nu chu ka call leh ngat a, beisei loh takin a lo la ve hlauh.

"Hello" thaw deuh hlawi chung hian a rawn ti a, a hah hmel hlein ka hria.

"Aw ka nu, Washing Machine hi a chhia em ni? A vir thei miah lo va, a ri ṭawk ṭawk ringawt" ka ti thuai a, biak rei chu a chi vakin ka hre lo.

"Ka hre bik nâng, dawrah ka awm daih alawm. I tichhia em ni nang hian? A hmate kha chuan a ṭhat reng khâ, nizan maiah pawh kan hmang reng sia" a rawn ti deuh hmuk a, a thaw leh deuh hawk ṭhin bawk.

"Keipaw'n chu tak chu a nia mak ka tih, ka tihchhiat a ni miah lo a nia aw ka nu, engmah hi ka hrethiam bik lo" ka ti leh ta zung zung.

"Âaaaa ka hre tawh bik lo, vawiin chu i tih tih khan lo ti mai teh, thil harsa pawh a ni hleinem le. Ka buai a, ka dah mai" tiin a rawn off zui hmak a, ka insuk tur thawmhnaw tam tham zet chu ka en ta tlawk tlawk.

Kuta ka suk hun min lo nghak ni awm takin thawmhnaw suk tur chu a tam em em a, Washing Machine kan hman ṭhan lutuk tawh vang nge ni kuta suk chu ka huphurh thlawt.

Zawimuangin ka che a, tunah chuan insu zo thuai thuai ila ka awm mai mai ang tiha ka lo rilruk chu a theih dawn ta hauh loh mai. Bucket-ah chuan tui leh surf inpawlh chu ka tiphuan bawrh bawrh a, thuamhnaw ho pawh chu ka dah thla zui hmawk hmawk.

Dik taka sawi chuan u Marema nu chu ka ngei ve ta thlawt a ni. A duh chuan siam tur pawh a rawn tir thei reng awm si a, mahse a rawn tir miah lo. Rilru titau nghawng nghawng chung chuan ka su hmawk hmawk a, ni danga minute rei lotea insu zo ṭhin kha darkar 1 dawnah ka insu zo ta chiah.

Kan in kawta thawmhnaw phonaah chuan ka pho leh nghal vek a, in chhunga ka luh leh chuan chhuat bal deuha ka hriat lai ho chu ka hrut thuak thuak zui nghal bawk.

"Naktuk chu Washing Machine siam tur kan koh a ngaih hmel, a nih loh paw'n a thar lei mai pawh a fuh zawk maithei" zanriah kan ei laiin u Marema nu chuan a lo ti a, u Marema chuan

"Engatinge? A chhia em ni?" a lo ti ve nghal vat a, u Marema pa pawh chuan thil awmzia chu a lo hriat châk hmel khawp.

"A chhia a nih hmel, vawiin khan Mambawihi hi khawlin a insu thei lo va, a chhiat chhan lah chu kan hre ve si se tawh der si lo" min demna awka tel ngeiin ka nu chuan a rawn ti deuh hmuk a, chhun aṭangin ka mood a fuh tawh lo bawk nen ka nu ṭawngkam chu ka run khawp mai.

"Siamtir vel ai chuan a thar lei a ṭha zawk lo maw? Siam hi chu a ṭha rei tak tak ngai lovin ka hria" u Marema pa chuan a rawn ti a, u Marema erawh chuan ka nu chu a melh run thung.

Engmah pawh sawi tawh lovin ka kham ta daih a, min en zui vawng vawng danah u Marema nu chuan ka titau emaw a ti ngei ang. Ka titau chiah em pawh ka hre lo, mahse ka nu ṭawng chhuak reng reng chu ka hre châk thlawt lo tih ka chiang em em.

Chaw an ei kham fel hnu chuan choka lamah kalin ka tifel zung zung a, tih zawh vata mut daih ka duh. A chhan chu ka chau, ka chau lutuk tlat. Ka dar te chu a kham ṭhûm a, naktuk lamah ka rawl viau dawn tih pawh ka chiang hle.

"Engatinge min lo call loh? Machine a chhiat thu kha rawn sawi ta che" kan nupa room-a ka luh rualin u Marema chuan a lo ti deuh hmuk a, a thinrim ve ringawt chhan chu ka hre lo.

"A ṭul kher hleinem, chu bakah a chhiat chhan kha i hre dawn bik si lo va" pangai tak chuan ka ti chhuak hram hram a, mut loh chu tih peih ka nei rih lo.

"Ka hre dawn emaw dawn lo emaw min lo call hrim hrim ta che, kut ngatin i la sui zui, a hahthlak dawn lutuk tih ka hrethiam vek"

"U Marem inhnial emaw inbiak reng hi ka peih rih lo a nia, ka chau lutuk. Chuan ka mut a chhuak em em bawk, min lo be tawh lo hram teh" tiin khumah chuan ka mu zui daih a, min en reng tih pawh ka hria.

"Aw le" tiin ka hnungah chuan a rawn thawlh a, ka dar chu a kut hrawl leh lum tak chuan a rawn hmet niap niap nghal.

"Ti hian ka hmet che anga i taksa na ṭhem ṭhum tur pawh a ziaawm deuh mai ang" a rawn ti sup a, kei chuan chhan pawh chhang lovin ka mit ka lo chhing vang vang.

"Muttui aw" a rawn ti sup ri chu ka hriat tawp ber a ni a, a bak eng thil dang mah ka hre zui tawh lo.

A tukah chuan Machine chu siamtir lovin a thar kan lei ta ngei a, home delivery pawh kan leina dawr te'n an rawn ti thlap. U Marema nu bawk chu a ṭawng ngaihno bei lo leh a, Machine man to thu leh lei mai mai chi a nih loh thu a sawi leh ta ṭeuh.

U Marema leh a pa an awm lo bawk a, a an hla chu kei chuan ka lo ngaithla a ni deuh ber mai. U Marema leh a pa an awm lai hi chuan min ṭawngkhum vak lo ṭhin a, an awm loh chinah hi chuan min hnuai chhiah thei khawp mai.

"E hêee Sawmtea chu! Enge kan inah te i rawn tih ve teh mial a? Ka nu'n a rawn tir che em ni? Theihnghilh a nei em ni a?" kan ina lo lut mek Sawmtea ka hmuh chuan ka lo ti nghal zung zung a, ani pawh chuan a hma ang tho khan min rawn nuih leh ta ver ver mai.

"Tir lo ve, dawrah khan ka thawk tawh lo tak tak alawm. Khatianga u Marema'n min tih hnu kha chuan ka thawk ngam tawh teuh lo mai" nui chung hian a rawn ti ve mai a, thinrim miah lova a sawi thei te chu mak ka ti.

"Kha thil thleng kha chu a tua te ve ve tan pawh a pawi khawp mai, kan awm dan lah khan a lo zir lo bawk sia u Marema pawh ka dem chuang lo"

"A ni ngawt mai, nangmah lam i ṭha em? Kha thil avang khan kut hial te a thlak lo che maw?"

"Aih a teuh lo mai, u Marema te chuan kut min thlak ngai hleinem. Chhun thingpui in a hun der mai a, ka siam kep ve nghal dawn che a nia" tiin gas-ah chuan thingpui chu ka chhuang lum a, chhang bawm pawh ka la chhuak nghal.

"Chuan eng maw i rawn tih ber dawn? Heng hengah te i rawn kal vang vang bawk sia" tiin thingpui chu ka chawk malh malh a, ani pawh chuan min nuih sun sun chung hian

"Saw laiah sawn kan lo kal lawk a, ka lo peng zawk mai mai a nih hi" a rawn ti ve leh mai a, chutia kan inbiak lai chuan Marcus-a chu a rawn ṭap ta ruah ruah mai.

"Ka han chho lawk ang e, mangchhia a mang pawh a ni maithei a ni" tiin in chung lamah chuan ka tlan chho nghal a, Marcus-a'n min hmuh chuan a lo ṭap uar sauh.

"Nu, apa ngai, apa ngai lutuk" tiin a rawn ṭah chhunzawm leh nghal a, pawm kangin ka awi ta hliai hliai a, rei lote hnuah a ṭap muhil ve leh thei mai bawk.

Marcus-a ka mut ṭhat tir hnu chuan in hnuai lamah ka chhuk leh a, Sawmtea chuan phone a lo khawih mial mial. Ka thawm a hriat veleh min lo en a, a rawn nui leh ta sun sun. A hma ang chiah khan a la nelawm a, a ṭawng duh a, fiamthu a thawh peihin nuih a duh em em bawk.

"In inbuaipui fel thei maw? A aw aṭang chuan in fapa pawh chu a va len tawh hmel ve" thingpui in tura ka tih hnu chuan a rawn ti a, keipawh chuan

"Nia a lian ve tawh reuh lutuk, muthilh laia a harh tawh hi chuan a ṭap ngei ngei a, a pa hi a ngai reuh lutuk hi a ṭap leh hawm hawm zel" ka lo ti ve mai.

"U Marema hi zawng fate tana pa ṭha leh pasal ṭha tak hi chu a ni ve chiang alawm, nang lah nu leh nupui ṭha tak i ni tho bawk si, in inhmeh thlawt a ni" a rawn ti ve leh a, min sawi dan kher chu phu lo ka inti hle.

"Tui vawt ka'n la ang e aw, thingpui leh chhang kha a thlum ang reng sia i induh ang" tiin ka tho a, fridge ka hawng chu ka dik ta miah lo.

"Mambawih, i ṭha em?" ka awn deuh riai riai avang chuan a rawn ti a, chhan pawh chhang hman lovin lei lamah chuan ka tlu a, a hnu rei lote ah engmah ka hre zawm zui tawh lo nghal bawk.

Ka mit chu ka meng diar diar a, in chung ceiling chu ka hmu hmasa ber a, en vel kher lo mah ila khumah ka mu tih chu ka hria. Khawi khumah nge ka mut erawh ka hre lo va, ka ngaihtuahna chu a fiah lo ruai mai. Zawi muangin ka mu chu ka innem kang a, ka ding lamah chuan tu emaw ni an lo mu ve tlat mai le!

Ka harh deuh kawk a, ka bula mu hmel ka en chian chuan Sawmtea a lo ni. Hlauhthawnnain ka khat a, ka taksa ruak vek chu rizai chuan ka khuh nghal a, ka thawm hriain Sawmtea chu a rawn harh zui ve nghal a, a la rawn nui thei nia.

"I lo harh tawh maw? I va nei nuam ve a, ka duhthusam ang tak a ni" nui ri hak chung chuan a rawn ti a, chutah zet zawng ka insum thei ta lo.

"Mi tenawm pa" tiin rem leh rem lo chuan a hmaiah ka beng ṭhuai a, a ri ring bawka a na ve khawp ang le.

"Chhuak rawh, chhuak nghal rawh, Police hnenah ka report khawp ang che" ka ti leh tuar tuar a, ani chuan nui chung hian ka sam chu a rawn la chul ngam vel a nih chu!

"Lalpa le! Ka duh thei lo, eng thil nge ka hmuh tâk hi!" chu aw lo chhuahna lam chu rang takin kan hawi a, chutah Sawmtea chu khum aṭanga tho vatin a inha ṭha ta sawk sawk.

"Ding rawh, ding nghal rawh, khawiah mah kal sawn tum reng reng suh" a tlan chhuak tur chu u Marema nu chuan a lo ti hrawk hrawk a, mahse Sawmtea chu chak zetin a tlan chhuak lui ta tho a, u Marema nu pawh a sutna avangin a leng lawp.

"Che suh, nang mi hurherhnu kha che sawn reng reng suh, i pasal ka call dawn. Marema hian i awm dan hi hmu ve teh se, a zah pawh i zak miah lo em ni?" tiin a phone chu a lek zui vat a, kei chuan lo ṭah tawp loh chu tih theih ka nei lo.

"Aw rawn haw nghal rawh, rawn haw rang rawh, aw aw Mambawihi lam ni e, hmanhmawh rawh" phone-ah chuan a ti leh phiar phiar a, u Marema lo ṭawng dan erawh ka hre thei lo.

U Marema chu lo thleng ta se engtinnge min tih ang? Min van haw dawn tak em? Kei lah chuan eng thil mah ka hrethiam bik si lo. U Marema nu chuan ka chet sawn eih pawh a phal lo va, ṭah ngawt ngawt loh chu tihtheih ka nei lo.

"Enge? Eng thil nge thleng?" u Marema chuan hlauhthawn hmel fe hian a rawn ti lut a, chutah kei min hmu chiah chu a ngawi ta hmak.

"En rawh, i hmu em? Ka sawi lawk a ni lo'm ni? I nupui hian kha a bialpa lakah khan a uire san che chu a nih hî" u Marema nu chuan a lo ti hlawk hlawk a, u Marema ber chu a ni meng buai ta.

U Marema chuan ka lam a lo pan a, amah pawh en ngam lovin ka lo maimitchhing ta tawp. Ngawi reng hian rizai te nen chuan min pawm kang a, room aṭanga min kal chhuahpui a tum laia a nu lo ṭawng tur chu a khap vat a, kan nupa room lamah chuan min kal chhohpui ta bawk.

Room kan luh chuan bathroom lamah min hruai a, ruak veka ka awm chu ṭawng miah lo hian min bualfai a, min bualfai hnu pawh chuan ngawi rengin thawmhnaw min haktir leh thlap.

"Le! Sawi rawh le, dawra thawk ṭhin pa nen chuan in lo mu dun em ni Mambawih? Keimah chauh min en la, i thusawi chiah ka ring ang" dam deuh hian a rawn ti a, a zawhna chu ka va'n chhang hreh tak em.

"Aw" ka ti sep a, chutah zet zawng a insum thei ta bik lo a ni ang a tho vut a, keipawh chu min pawt tho nghal.

"Ka hmangaih che asin LALRINMAWI, ka hmangaih lutuk che asin, engtinnge hetiang thil hi i tih theih?" a rawn ti vin tuar a, chutah kei chuan ṭap pur chung hian

"Ka hre lo u Marem, ka hre lo tak zet. Kan mu dun tih chu ka hria a, mahse thil thlen dan kha engmah ka hre lo, khawngaihin min ring rawh" ka lo ti lawm lâwm a, min rin loh hmel nasa mai bawk si.

"A hrai rui che i tihna em ni? Dawt sawi a hun lo LALRINMAWI, ṭawng pawh ṭawng ve tawh suh, ṭawng tawh miah suh"

"Ni lo u Marem, engmah ka hre" ka tih lai chuan vin mangkheng hian

"Dawt, dawt, ṭawng tawh suh ka ti a ni lo'm ni?" a rawn ti leh tûarh a, min ben tumin a kut chu a lek uai bawk.

"Ka tihpalh u Marem, min ngaidam hram rawh" a hmaah chuan kut suih chungin ka ṭhingṭhi ta tawp a, tih ngaihna thlawt ka hre tawh lo a tin ni!

U Marem chu rawn au vakin a thil ziah ṭhinna dawhkante chu a chawi lawp a, chhuatah chuan a vawm ri pawp pawp a, ṭhutthlengte chu a theh thal ṭhuai ṭhuai a, amah ka hlauh dan chu pui tak a ni.

Kan thawmah chuan Marcus-a chu a harh lo thei ta lo. A harh rual chuan a rawn ṭap chhuak nghal a, a pa lah chu a thinrim nasa ropui mai bawk si. Chutah u Marema chu kan lama lo kal phei chung hian

"Nang te kha lo ṭap tei vet suh, i bengchheng" a rawn ti hrawk a, a vin em avang chuan Marcus-a chu a rawn ṭap uar leh ta sauh.

"U Marem kei min hua a nih paw'n khawngaihin Marcus hi chu haw tel ve suh, ka ngen a che. I fapa a nih hi" ṭap feih feih chung chuan ka ti a, room aṭang chuan hmanhmawh takin ka pawm chhuak ta daih bawk.

"Engati rum rum nge? Marema mi au vak vak kha!? Eng thil nge thleng?" in hnuai kan thlen thlak rualin u Marema pa chuan a lo ti a, a lo thleng chiah a nih hmel.

"Ka pa" tih te chiah chu ka sawi a, ṭawng hlei thei lo chuan ka ṭap ta ringawt bawk. Ka pa chuan Marcus-a ṭap hliam hliam chu min lo laksak a, hmai hup meuhin ka ṭap ta.

"I sawi mai dawn emaw tih lahin i sawi duh bawk si lo, ka'n sawi mai ang e. Kan dawra thawk ṭhin Sawmtea nen khan an lo mu dun a, chu chu Marema'n a hre chhuak leh ta si a, chutiang vel chu kan buaina a ni e" u Marema nu chuan a rawn ti hmuk hmuk a, thiam thu sawi tur reng ka hre lo va, ka pa min hmuh dan pawh a dang vek tawh ngei ang.

In chung lam aṭang chuan thawm a rawn ri thla bawl bawl a, u Marema chuan luggage hi a rawn hnuk thla a nih chu! Min hnawh chhuah loh reng ka ring tawh lo va, min hnawt chhuak pawh ni se dem thei ka ni lo. Kan lam pana a lo kal phei lai chuan min melh run a, en pawh ka lo en rei duh lo. Kan ngawih ṭhap laiin u Marema pa chuan aw nem lo tak hian

"Engvanga khang thawmhnaw bawmte kha lo keng thla nge i nih?" a lo ti a, u Marema nu erawh a lo ngawi leh kar tawh.

"Kan chhuak dawn, kan in dang dawn ka pa, kan in dang hi a ṭul a ni" min hnawh chhuah tur thu sawi lova kan in dang tur thu a sawi daih chu mak ka lo ti em em.

"LALREMRUAT eng thu nge i sawi? He mi hurherhnu hi nupui atan neih i la tum ṭâlh maw!? Kei chuan kan ina awm atan pawh ka duh tawh lo" u Marema nu chuan a rawn ti ve ta hrawk.

"Ni reng e, i duh lo tih ka hriat vang alawm ka chhuahpui dawn. Ka hmuh hmaih hauh lo ka nu, LALRINAWMI i en dan leh i tih dan vel hi ka hre lo a ni miah lo" engatinge chutiang thute chu u Marema chuan a rawn sawi daih le.

"He nu uirena ah hian kei min puh daih i tum em ni LALREMRUAT? Eng rilru nge i put? Engatinge i mawl em em?"

"Ka puh hauh lo che, chuan LALRINAWMI hi lo uire pawh ni se ka nupui a ni kumkhua tho ang. Buaina neuh neuh neih a awl em mai, he in hi keini tan a him tawk lo a ni ang e" tiin a che hrut a, chutah a nu chuan

"Chhuak mawlh ang che u, i thil tih hi i la inchhir telh telh ngei ang. Chuan i motor saw chhuahpui reng reng suh, ka lei a nih saw" a rawn ti vin tûar a, u Marema chu elhsen hmel fê hian a rawn nui chhuak ta hawk.

"I Car min lei saw ka kawl reng peih teh hrep lo ve, nang hi ka nu pawh i nih ka ring nek tawh lo e a!" a ti zo chiah chu a hmai a ri nghal chawrh a, a nu ni lovin a pa zawk chuan a lo beng a lo ni. Marcus-a chu a rawn ṭap a, ka lo la ta vat.

"I va sual sawt ve LALREMRUAT, i nu a nih hi i zak lo em ni?" a kawr awma ṭham chungin a pa chuan a ti ve ta hrawk mai.

"Ka pa min dan tum buai duh suh, ka chhungkuate hi ka in dangpui dawn tho tho, in pawh ka lei fel vek tawh" tiin min lo melh rû a, chutah khauh zet hian

"Min lo zui rawh u" tiin luggage pahnih chu a hnuk a, a nu leh pate chuan tih ngaihna hriat loh hmel fê hian an en zui ta ringawt.

Kawngpui kan thlen chuan Taxi a phar a, khawi lam nge kan pan dawn pawh ka hre lo. Marcus-a chu a ṭap muhil leh tawh a, keini pahnih chu a hnung seat-ah chuangin u Marema chu driver bulah a chuang thung.

Driver chuan a be ve ṭhin tak na a, a be ṭawng lo chiang teh e. Inbe mang lo chuan kan tlan zel a, Chaltlang lamah kan tlan chho a, u Marema chu rawn ṭawng ri zeuhin driver chuan building pakhat hmaah chuan motor chu a tiding zui nghal.

Ka lo rin rilruk ang ngeiin chu building chu a lei a lo ni a, a chhung kan luh chuan in pangai ang mai hian bungrua vel a lo awm kim hle. Marcus-a chu a muhil bam a, a hmel ka en chuan ka khawngaih reuh lutuk.

U Marema chu a ngawi reng a, room chhungah luggage te pawh chu a keng lut zui daih. Keipawh chuan room lam chu ka pan ve mai a, a chhunga ka luh chuan khum lian tak pakhat hi a lo awm a, mi pawh en lo hian ani chu a chhuak zui leh nghal.

Marcus-a chu ka mut ṭhat tir tawh a, mahse rizai emaw puan emaw pawh ka ken loh avang chuan ka kawr lum chu ka sintir ta ringawt. Rei lovah u Marema chu a rawn lut leh a, blanket a rawn pawm lut ta ṭeuh mai.

Khumah chuan a rawn dah a, keipawh chuan ngawi rengin sin theih tur chuan ka lo siam ṭha a, ka mut erawh a chhuak hran lo. Mu pawh ni ila ka muhil thei kher lo vang, a chhan chu ka rilru leh ngaihtuahnaah hian mahni inthiam lohna leh u Marema laka inthlahrunna hlir a khat a tin ni!

"Muhil rawh" a rawn ti hmuk a, chutiang taka a thinrim pawh chu ka dem hran lo, a chhan chu keimah zawk hi ka thiam hlawl lo a ni.

"Ka thei lo" ka lo ti ve sep a, chu chu ka rilru dik tak a ni bawk.

Kan ngawi leh ta reng a, kan nupa inkar chu a va chhe tawh tehreng em. Khum lu lamah chuan ka ṭhu tawm kuk a, ka ṭap zawih zawih bawk. Ka mittui chu ka biangah a luang thla awl lo va, mahse thawm engmah ka neih loh avang leh room light a in off vek avangin u Marema chuan ka ṭap tih a hre kher lo vang.

Ani chu min hnung chhawn zawngin khum tlangah chuan a ṭhu a, kan na dun tak zet a ni. Kei chu thil thleng avangin ka na a, a ni chu ka uire avangin a na thung.

Khua a var thleng chuan kan muhil lo ve ve a, biak khat pawhin kan inbe lo bawk. Ka ṭap tawh em bik lo va, mahse ka lungngai ngawih ngawih. U Marema pawh min hlat deuh takin khum lu lamah chuan a rawn ṭhu chho tawh a, a hma zawn chu melh ngurin a ngaihtuah muk hmel hle.

A tir kha chuan min ṭhena in aṭanga min hnawh chhuah kha ka lo ring a, mahse chutiang chu a ti hauh si lo. Ka phu lo, u Marema ang mipa ṭha lutukin min hmangaih hi kei hian ka phu hlawl lo a ni.

"Khawi vengah nge a awm?" kan ngawih reng lai chuan a rawn ti a, Sawmtea te veng chu min zawt ni maiin ka hria.

"Ramhlun South" ka lo ti ve sep a, ani erawh khum aṭang chuan a chhuk a, room kawngka lam chu a pan zawm zat.

"Khawnge i kal dawn?" room aṭanga ngawi renga chhuah a tum lai chuan ka lo ti vat a, na zet hian min rawn en let nghal.

"Kha mihring, kei aia i thlan kha ka that dawn, ka kut ngei hian ka that ang" ti hrawkin a kal chhuak zui nghal a, chutah rang zeta thovin u Marema chu ka um ta vat.

"U Marem, khawngaihin ti suh, khawngaih takin ti suh" kawngka pui a chhuah dawn lai chuan ka ti chiam a, ṭhingṭhiin a keah chuan ka kuah bet tlat bawk.

"Min thlah nghal rawh LARINMAWI, ka thah pawh chu i va phal awm lo ve, nge nangni pahnih hian ruahmanna in lo nei ru reng zawk?" min lo en chhuk run chuan a ti leh hrawk a, chhuah mai inringin kawngka handle chu a chelh ran tawh bawk.

"I duh dûh danin min ngai rawh u Marem, mahse eng ruahmanna mah kan nei lo. Khawngaih takin kal suh, i va thah chuan Marcus-a hi tualthattu fapa a ni dawn asin, khawngaih takin Marcus-a vang tal pawh hian kal suh" ka ti lawm lâwm a, ka ṭap chhuak zui hak bawk.

"Min ngaihtuah ang deuh khan lang vel suh, i mutpui hma te khan min ngaihtuah zawk ta che, i thil tih avang khan ka na dawn lutuk tih te ngaihtuah hmasa ta che LALRINMAWI" nelawmna pakhat mah tel lo hian a rawn ti leh a, kei chu ka lo ṭap pur tawh mai.

"Ka hre lo, ka hre lo tak zet a ni u Marem. Ka thingpui siamah khan thil pawlh a nei chiang alawm, khatianga rang khan ka taksa a zawi thut ngai lo. Min ring hram rawh u Marem, min ring hram rawh" ka ti ta thlâwt a, ka beidawng tawh tak zet.

"Eng pawh ni se amah chu ka va hmu ang a, engkim a chiang mai ang" tiin a ke chu a rawn phih pawp a, ka kuahna chu thlahin chhuatah chuan ka bawk ta thlawp.

Kawngka a inkhar rik ṭhuai danah u Marema chuan in chu a chhuahsan tawh tih ka hrethiam mai a, bawk chung chuan ka ṭap tlawk tlawk ta ringawt. Lalpa min pui teh, min pui lul teh tiin ka rilru chu a rum vawng vawng a, thih daih mai te chu ka duh rum rum.