𝐃𝐎𝐂𝐓𝐎𝐑 𝐌𝐀𝐑𝐄𝐌𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟏 - 𝟏𝟐)

DOCTOR MAREMA

By

Havali Adam

16 December 2021

Chapter 1

Motor te chuan horn an pe ri nuaî nuai a, Aizawl khawpui tih takah thawmte chu a tamin a bengchheng hlawm hle. Chumai a ni lo, ka awmna chhak lama insa te chuan khawl hmangin hna an la thawk leh ta nghal a, beng chuan khawi ber nge ngaihthlak tur a hre lo a ni. Traffic a Jam nasat lutuk avangin keipawh chu ka motor chhungah chuan ka ṭhu ngawi run a, ruah a sur khêr kher bawk nen ruah sur leh Traffic Jam chu kan tawn ngun êm avangin a inhmeh tawh tak zet a ni. Sikulpuikawn Traffic Point thlen hmaa ding ka nih avangin ka hma lama motor ding tlar tam tak chu ka hmu pha vek a, ka kal tumna ber Civil Hospital awmna chu la hlat deng deng tak ka ni!

Traffic Police chuan Whistle a ham ri tûar tuar a, hmanhmawh lutuk avanga han chesual palh te pawh an awm thul. Ka motor dinna lên lam Traffic Police in a rawn hui rual chiah chuan ka hmaa mite ang bawkin ka tlan chhuak ve nghal a, a tua tê mah chuan khawmuan kan tum lo chiang khawp. Chutia chak ve pangai taka ka tlan lai chuan thil phur chung hian mi pakhat hi kawngpuiah a rawn lang thut a, chutiang teh thut chuan mi an lo kal ang tih ka lo ring lawk bik lo bawk nen ka motor steering chu ka herh kual hman lo lek lêk a ni.

Ka motor ka tih din dawt rual chuan ka bu deuh lâwp a, chutah hmeichhe ṭe thawm a rawn awm avang chuan ka harh chhuak zui nghal zat bawk. Mi ka su hman em tih hriat tumin ka motor kawngka chu hawng thuaiin ka chhuk vat a, ka motor hma lam ke bula hmeichhe pakhat lo tlusawp deuh phang ka hmuh chuan mi ka su ngei a ni tih ka hre chiang ta hle. Chu ka mi sutnu bulah chuan anṭam intel fel sa thlap tam ve ang reng tak hi a lo darh nuai a, a thil phurhna ni awm tak paikawng leh hnamte chu an lo let tûal bawk.

"In ṭha em? Ka tihpalh lutuk, ka pi" tiin ka motor bula lo che ṭual ṭual awmna lam chu ka pan phei vat a, chutah tihpalh thil thu tak meuha ka mi sut chu kum upa tawh lam leh nu lam tawh hi a lo la ni zui.

"I hmu miah lo em ni a? Engatinge khatiang êm ema chak khan i lo tlan reng reng?" hmeichhe pakhat hian ka hmaa nu pakhat buaipui zawm nghal zung zung chung hian a rawn ti hlawk hlawk a, ruah sur avangin an lo huh deuh hnâp bawk nen ka inthiam lo tak zet a ni.

"Ka hmanhmawh lutuk a, ka pi na te i nei em? Khawi maw ka lo en ang che" tia ka ṭhut thlak rual chuan a bula hmeichhia bawk chuan min lo nam ding a, min en ran chung hian

"I buaipui a ngai lo ve, ka lo buaipui mai ang" a rawn ti hrâwk a, keipawh ka tih tum pawh ti ta lo chuan ka ding ngil zûn ta ringawt.

"Mambawih, hlawk hlawk ṭhin che hian, a ho lutuk. Min su hman hleinem, ka ṭha e Vala" tiin ka mi sutnu chuan min rawn be zawm ta daih a, kei erawh inthlahrung tak ka ni.

"Ka pi, i chal a thi ser sêr a nih khâ, ka motor-ah hian lo chuang la damdawiinah ka hruai ang che chû" a pem neih ka hmuh avang chuan ka ti a, ka hnathawhna hmuna kan thlen hun tur tlai phah vek dawn mahse chu mite chu kalsan mai mai ka tum bik lo.

"Nu, a nih hîiiii. Ti teh, damdawiina kal chu a ṭha ang" a tira min lo hau nghal bawrh bawrhtu chuan a rawn ti a, ka mi sutnu chu a ṭawngkam aṭangin a nu a ni tih ka hrethiam zui ta mai bawk.

"Âwww Mambawih, a ngai lo, ka ṭha lutuk e!" ka hmaa nu upa lam tawh chuan a rawn ti ve leh a, chutah a fanu vek chuan

"Nû, tun ang hun hi pawisa renna hun pawh a nih loh hî, i taksa damna tur kha ngaituah hmasak a ngai zawk" tiin a nu chu a kai tho zui a, keipawh chuan ka lo pui ve vat bawk.

"Nu Amawi, khawngaihin kan chawhmeh zawrh kha min lo ngaihvensak mai teh aw, damdawiina kal kan ngai thut bawk sia" tiin Mambawihi tih hming putu chuan ka motor chhunga a rawn luh hma chuan kawng sira nu pakhat lo ṭhu hi a va be leh hram a, kei chu driver seat-a ṭhu lut tawhin Mambawihi nu pawh chu passenger seat lamah ka ṭhut fel tir thlap tawh bawk.

"A va buaithlak tak! Khua a chhe bawk nen lo ṭhu buai duh suh u ka tî ka ti a, tunah chuan ka thusawi in awih loh rah chu in hmu ta ngei a nih hi!" vin hlar leh ngai theih loh hmel zet hian a va biak nu chuan a lo chhang let a, a ṭawng te reng reng chuan nelawmna pakhatmah a nei lo.

"Nu Amawi, khatiang sawi hun pawh a ni loh hî, min lo ngaihvensak hram mai rawh" tiin Mambawihi chu ka motor chhungah a rawn lut zui hmak a, a nu bulah chuan a ṭhu nghal bawk.

"Tlan vat ta che" ngawi ngula a chet dan vel ka lo en reng avang chuan a rawn ti leh a, keipawh harh chhuak zawkin ka insiam ṭha a, hmanhmawh takin ka tlan chhuak zui ta vat.

Vanneih thlak lutuk tak maiin kan inbuaipui lai vel chu Traffic Police in min hmu lo hlauh zawk a, chuti ni lo se chuan pawisa ka chawi emaw min tikhawtlai emaw a ni ngei ang. Zodin Area kan thlen chuan Traffic a rawn Jam leh a, kawng a chep phei bawk nen ka ning ngei mai. Mambawih tiha a nu'n a koh nu chu ka motor chhunga darthlalang aṭang chuan ka bih zeuh zeuh a, a hmel aṭang chuan a lo berah kum 23 emaw 24 emaw vel bak a la nih ka ring lo. Darkar chanve dawn lâi kan tlan hnu chuan Civil Hospital pawh chu hnawm deuh chapin kan thleng phei ve ta hram a, ka motor chu ni danga ka park ṭhinnaa park ṭhain ka chhuk vat a, ka mi phurhte chu ka buaipui zawm nghal.

"Marem, vawiin chu i va tlai ve, kha hliam nei i rawn hruai a ni maw? Ka lo buaipui dawn em ni ang?" Hospital building chhunga kan luh rualin Dr. Tetei chuan a lo ti nghal sawk sawk a, ani nge nge a hawihhawmin min puih hi a hreh lo ṭhin mang e!

"A ngai lo ve, hei chu keima'n ka'n buaipui ang e" tiin ka lo chhang let ve vat a, ka hnunga lo kal nufa te pawh chuan ka kalna lam kawnga lo kal zelin min zui ve dat dat bawk.

"Ka pi, i lu chhung lamah hian na i nei lo tak tak em? I taksa dangah emaw tal na i nei em? Sawi hreh reng reng suh" a chal dressing mawlh mawlh chung chuan ka ti a, ani erawh chuan min lo nuih mai mai thung.

"Na dang ka nei lo ve Vala, i fel hle mai. Doctor em ni i nih? Min bawihsawm dan lah chu a dam thlup bawk si a, ka chal na deuh pawh kha a dam fel vek tawh ni maiin ka hria" min nuih sâng chung hian a rawn ti ve a, keipawh chuan ka lo nuih let ve suk.

"Aw, Doctor ka ni e. Ka pi, ka tihpalh tak zet a ni" ka inthiam loh êm avang chuan ka tinawn leh sup.

"Inthiam lo vak duh suh Vala, ka na tak tak hman hleinem. A nihna takah chuan kei kha chuan min su dawn tawh emaw ka lo ti hman a, ka hlauthawng lutuk kha ka lo tlu hmasa zawk alawm. Nang chuan vanneih thlak takin ka bul i rawn thlen hma khan i motor i tiding hman a, tuna chinah chuan khatiang em em khan khal chak tawh lo vang che" nelawm tak chuan a rawn ti leh duah a, keipawh chuan thuawih hmel tak hian

"Aw le, ka tlan chak tawh miah lo vang" ka lo ti ve thuai a, kan bula nula lo ding reng ka melh chuan min lo en kar a, min en reng avanga ka en let ve tâk reng avang chuan phu zawkin a hawi sawn ta vat.

"Nu, i ṭha tak tak maw? Na dang te i nei miah lo maw? A hun a lai nih hi, Hospital-a kan awm lai ro ro hi chuan i na neih te kha sawi hreh miah suh" tiin a nu chu a be ta daih a, keipawh hawi sawn vein a nu lam chu ka melh zui ve leh ta mai bawk.

"Aw, na dang ka nei tawh lo tak tak alawm. Kan haw a hun a vîau tawh zawk a nia, kan chawhmeh zawrh te kha entinnge an lo awm ang tih mawlhin ka rilru a luah tawh a ni" a nu pawh chuan lo ti a, ka lo rin lawk ang chiahin chawhmeh zuara kawngpui sira lo ṭhu an ni ngei e!

"Nu, nang chu lo va haw tlang nghal ang a, keima'n kan thil zawrh vel kha chu ka lo buaipui vek tawh mai ang" tiin Mambawihi chuan a nu chu a hrilh a, keipawh chuan ka tih tur ka hai lo chiang hle.

"Ka pi, rem in tih chuan in nufa hian ka lo thlah ang che u" ka lo ti ve nghal a, vawiin atan chuan an ni nufa hi ka mawhphurhna an ni tlat.

"Âaaa, kan tibuai mai mai ang che" a rawn tih lai chuan

"Nu, ama'n a phala rem a tih tho chuan a motor-ah chuan i chuang phei zawk teh ang. Bus-a kan phei chuan ṭhutna kan chang lo emaw te kha a ni leh ang a, he Doctor pa motor-a kan chuan theih hlauh chuan kan thleng hma thei zawk dawn asin" Mambawihi chuan a rawn tih khalh thuai a, anu erawh chuan keimah min zah vang nge ni aw emaw aih emaw pawhin a lo chhawn lo hrim hrim.

"Ni e ka pi, ka motor-a in chuan chuan kan thleng phei hma zawk ngei ang ka ring" tiin keipawh chuan Mambawihi thusawi chu ka lo chhunzawm ve thuai a, chutia kei berin ka sawi leh tâkah chuan ani pawh chu a lo bu ve ta ringawt.

A ngaite bawkin passanger seat lamah chuan Mambawihi leh a nu chu an ṭhu a, han biaka han titipui vak dan tur ka hriat mai loh avangin ngawi reng chuan motor chu ka khalh mial mial. Chaw hnu her a ni tawh avangin khaw awm dan chu a inthlak hlawk a, ni pawh rawn eng leh tawhin kawngpuia ruah tui la chambângte chu a en tle sîar siar a, mi veivak pawh an tam leh tawh hle. Minute rei lote hnuah a hmaa an lo ṭhutna hmun chu kan thleng phei a, Mambawihi chu a chhuk zui nghal bawk.

"Doctor" ka ṭhutna zawn a lo thlen ruala a rawn tih lai chuan

"Marema" ka lo ti vat a, chutah ani pawh chuan ka thusawi awmzia chu hrethiam zet hian

"Doctor Marem, khawngaihin ka nu hi kan in thleng min zuk thlahsak thei ang em? Kei lah chuan kan chawhmeh zawrh te hi ka lo vil a ngai bawk si" a rawn ti leh nghal a, amah en kânin an chawhmeh zawrh chu ka va thlek daih a, an bula ṭhute ang em emin an nei tam lo tih ka hmu thei.

"A ngai reng reng lo Mambawih, kein ka haw thei alawm. Chuan Vala min thlah kher a ngai lo a nia, ka haw thei lutuk" ka hnunga mi'n a rawn tih chuan ka ngaihtuahna aṭangin ka harh chhuak zawk a, Mambawihi zawhna pawh chhang lova thil dang daih ka lo ngaihtuah avang chuan ka inthiam lo leh ta hle.

"Aih, ni lo, ka lo thlah ang che. Khawi vengah nge in awm? Sawi ula, in veng lam pan chuan kan tlan chhuak nghal dawn nia" ka ti ta vat a, ka ṭawng chhuah ve tâk vang pawh chu a ni ang ka hnunga mi chuan chhuk a tum leh ta bik chuang lo.

"Kan veng chu Khatla daih a nia, Khatla Bridge bulah khan kan in chu a awm. Kan in chu step chhuk thla bula building-ah khan a nia, zah pawh dawn lovin ka nu hi min lo buaipuisak turin ka dil tawp che a nih ber hi!" Mambawihi chuan a rawn ti leh a, a hmela inthlahrunna ka hmuh avang chuan keipawh chuan

"Aw le, ka lo va thlah dawn nia" ka lo ti ve thuai.

"Kan tibuai ta vak che a, a zia lo tak tak a ni!" kan tlan chhuah hnu chuan ka hnunga mi chuan a rawn ti sep a, an laka keimah zawk inthlahrung tur ka nih laia ka laka anmahni zawk an inthlahrung tlat chu mak ka ti hle.

"Ka pi, min tibuai reng reng hleinem, keimah zawk hian ka tibuai ta vak zawk che u a ni. In chawhmeh zawrh te buaipui thei lo leh buaipui hman lo khawpin ka siam che u a, in lakah hian ka inthiam lo hle zawk asin" ka tih chuan

"Êeee Vala i fel hle mai, mi tam tak hi chuan vawiina i chet ang hian min buaipui zawm ngai mang lo asin" a rawn ti ve a, a thusawi tum chu ka hriat belh châk ta hle.

"Enge i sawi awmzia ka pi?" tiin ka hriat belh châk em avang chuan ka lo zawh zawm ta nge nge a, min biak dan vel reng reng chu a nelawm tawp hi a ni mai.

"Ka sawi tum bera chu mi dang, nang ang thova min han hliam lek lek te hi an awm ve ṭhin a, chung mite erawh nang ang lo takin mi pawh buaipui zui lo leh ngaihsak zui miah lo hian an tlan tlang daih zel alawm" a rawn ti a, chutah keipawh chuan

"An va mawl ve le, chutiangte chu Traffic Police te paw'n hauh tur alawm" ka lo ti nghet ve charh a, keimah ber pawh chu hauh tlâk ka ni reng si a!

"Ni e, Traffic Police te pawh hi an hawi zau lo lek lek zel a ni. A nihna takah chuan vawiin kha chu keima thiam loh zawk a nia, motor an lo tlan tawh lo emaw ka tih avangin kawng kha cross mai ka tum a, ka tlaw ve hrim hrim" a rawn ti leh a, nu zaidam leh fel tak chu a nih ngei ka ring.

"Ni lo, keima thiam loh a tam zawk alawm. Lo tlan chak lutuk lo ila chuan ka hmu hman che ang a, kawng pawh chu i cross hman ngei ang" tiin ka lo chhang let ve leh vat a, chutah amah bawk chuan

"Ni dangah te phei chuan kan chawhmeh zawrh kan siam rem lai te hian min lo tai palh ṭhin a, kawngpui kan hnaih lutuk pawh chu a ni em em si lo" tiin a hmaa a thusawi chu a rawn chhunzawm ve leh daih a, chutianga fimkhur lo taka lirthei khalh ṭhinte chuan man an la tawk khawp ang le!

"A nih chu maw le, chuan ka pi, i sawi hreh loh chuan engtinnge in khawsak ve a? Chhungkua angin em ni in chu in luah?" tiin zawhna dang chu ka zawt zawm ve ta ringawt a, sawi leh mai tur chu a vang ve em a ni.

"Ni lo ve, kei leh Mambawihi chiah hi kan in luahah chuan kan awm" pangai tak hian a rawn ti a, a thusawi avang chuan darthlalang aṭangin amah chu ka en nghal a, ani erawh pawn lam hawiin a lo dak vauh vauh thung.

"Mambawihi pa hi kum 5 kalta khan Cancer natna avangin a boral a, chuta ṭang chuan keini nufa chu kan awm dun ta tlawk tlawk a ni" tiin ka zawh châk em em leh ka hriat châk em em chu a rawn sawi chhuak leh nghal a, sawi zel hrehawm a tih ka rin avang chuan ka zawt zui duh ta bik lo.

"Ka pi, hei Khatla Bridge chu kan thleng der mai" minute 10 vel inbe leh tawh miah lova kan tlan hnu chuan ka ti a, chutah ani pawh ka awmna lam lo hawi chung hian

"A lo ni maw, thil ka lo ngaihtuah kual leh vak vak avangin kan thlen chin pawh ka lo hre reng reng hleinem, khatah khan ding mai rawh Vala" a rawn ti ve thuai a, keipawh chuan dinna tur min hrilhna laiah chuan ka motor chu ka tiding zawm ve nghal mai bawk.

An in awmna thleng chu ka hruai thla thlap a, an in chhungah te chuan lut vein thingpuite chu ka in ve leh ta ringawt. A chezia leh awm danah chuan nu fel tak a ni tih a lang a, a ṭawngkam chhuak reng reng chu ngaihthlak a nuam dap mai. An in chhungah chuan keini in anga in chhung cheimawina bungrua tam awm lo mahse a fai em em a, a zau zawng pawh an nufa luah atan chuan a tawk vel vîau mai.

Civil Hospital lam pan chuan ka tlan chhuak leh a, Mambawihi chawhmeh zawrhna hmuna pen kawi chu ka tum ran bawk. Minute rei lote hnuah Mambawihi chawhmeh zuara a lo ṭhutna hmun chu ka tlan thleng phei a, motor park na mai tur a awm loh avangin a ṭhutna piah deuh hlekah chuan park na tur zawng leh tê tein motor chu ka park thei ta hram. Engvanga Mambawihi chu hmuh duh tlat nge ka nih ka inhre lo va, ka hnathawhna lam ngaihsak lek lova amah hmuh ka tum te chu mak ka ti zawk a ni.

"Mambawih" tia ka kohna avang chuan a rawn hawi chhuak thuai a, chutia ka koh mai loh chuan a hming dang kohna tur ka hre si lo va, han mawl biak tawp lah chu ka duh lo ve leh khanglang bawk si.

"Doctor Marem, ka hming i hria maw?" mak tih hmel taka min en chung hian a rawn ti a, a bula ṭhu nu chuan a awm dan vel chu ei loh hmel zet hian a lo en ran bawk.

"Aw hria e, i inhralh thei em?" tiin zawhna bawk chuan ka lo chhang let ve ta daih a, a bula nutling lo ṭhu bawk chuan min lo en leh ta ran.

"Aw, hralh thei e" Mambawihi chuan a rawn ti vat a, chutah a bula nutling lo ṭhu chuan

"Awi inhralh thei chi zia zâng i ni lo a nih kha, dawt i sawi thei em mai. Ka pu, an rawn ṭhut tirh aṭangin pakhatmah inhralh an la nei lo, dawr pawh dawr duh suh dawt an sawi thei nufa em mai" a rawn ti hlawk hlawk a, nichîn aṭang tawh ṭawng kha a châk tawh hmel reng a ni!

"Dawt i sawi em ni? Engmah chu in la inhralh lo tak tak em?" kan bula nutling thusawi chu ka ring zo lo va, a ṭawngkam hman duh dan aṭangte reng reng chuan a thusawite chu rin chi ah pawh ka ngai lo.

"Aih, kan inhralh tawh alawm, a thusawite hi chu engah mah ngai duh suh" nui lui sak chung hian Mambawihi chuan a rawn ti a, kan bula nutling sawi vang ni lovin a awm dan aṭang leh a hmel aṭang chuan dawt a sawi tih ka hre thei.

"Aw le, tlaiah ka lo kal leh dawn nia" tiin ka tho tharh a, ka motor park na hmun lam chu ka pan phei ta vang vang.

Ka motor-a ka chuan lai te chuan ka hun hman dan chu ka ngaihtuah let a, hahthlak leh hrehawm hmel vîauin lang mahse hrehawm ka tiin ka hlim loh phah leh chuang hauh bawk si lo. Mambawihi, ka vawikhat hmel hriatna leh ka vawikhat hmuhna hnena ka kal leh tur thu ka sawi ringawt te chu mak ka ti a, hmu leh ta pawh ni ila sawi tur ka hriat ka ring lo. Hospital ka thlen rualin Tetei chuan min lo be siam siam a, ani hi zawng thawhpui nuam leh hmeichhe rilru hrisel tak hi chu a ni ve chiang alawm.

Mambawihi POV

"Engvanga khatianga dawt sawi ringawt nge i nih? Nangni ang dawt sawi ching phei hi chu ka ṭhutpui peih vak lo che u a nia" ka bula ṭhu nu Amawii chuan a rawn ti a, ani hi chu a ṭawng na ve thei ngawt mai.

"Nu Amawi, min ṭhutpui peih lo vîau pawh ni mahla Local Council President in helai hmuna ṭhut phalna hi min pe vek tawh a, kan ṭhu sawn dawn chuang lo. Chuan khawngaihin miin an zawt che a nih loh chuan ka nu leh keima chanchin hi a nazawngin mi bulah sawi ṭhin suh, ka duh miah lo a nia" ka ti ve ta duah a, ka nute rual daih nimahse anni ang hi chu han zaha han biak ṭhat vel vak chi pawh an ni lo, mi fak aiin mi hmuhsit emaw en hniam emaw an ching êm mai.

"Aia upate zahna lah hi i tlachham reuh si a, Pathian malsawmna dawng tlâk pawh in nih ka ring nek lo ve" a rawn ti leh hmarh hmarh a, amah zawk chuan inhnialna tur hlir a rawn sawi chhuak hi a ni ber.

"Nu Amawi inhnial ka peih lo a nia, khawngaihin min be tawh lo zawk mai teh" ka ti ta thlâwt a, naupang zawk ni ta na nâ na chu a tlawm zawka ṭan hmasak a ngai leh nge nge ṭhin. Chutia ka tih tâkah hnu chuan min be zui ta em bik lo va, ka lawm tak tak a ni.

Tlai dar 4 velah pawh chuan ka la inhralh tam lo em em a, ka rilru chu a mangangin a hah tawh tak zet a ni. Mi thil zawrh te chu an lêi an lei a, keini chawhmeh zawrh te erawh kal kân leh lei duh loh an ni zel thung. Kan thlai zawrh chu mite aia a thianghlim lohna emaw a mawi lohna pawh a awm hran lo va, chungte hlei hlei chuan kan inhralh ve thei miah loh chu mak min tihtir lehzual. Khua a tlai zel a, mite chuan inseng fel lam an hnaih tawh tih ka hmu reng a, kei erawh chuan inseng fel lam pawh chu ka la ngaituah thei lo a ni e.

"Mambawih" rawn titu an awm avang chuan ka indawm kun ngulna aṭangin ka hawi chhuak a, ka mi hmuh avang chuan ka insiam ṭha rang hle bawk.

"Doctor Marem" ka lo ti ve hluai a, tun ang hunah ani hian enge a rawn tih reng reng ni!?

"Ka tihpalh, kan buai leh thut avangin ka lo thleng tlai hret a ni e" a rawn tih leh te chuan mak ka lo ti em em a, ka laka inthiam lohna ṭawngkam a hmang ringawt te chu ka hrethiam lo hul hûal.

"Ihhh, engatinge ka tihpalh i tih?" ka ti deuh tawl a, a sawi awmzia ka man lo ve bawk êm a ni.

"A chhan chu ka lo kal leh tur thu ka sawi a, chutah ka lo thlen har deuh avangin nang chuan min lo nghak rei ta hrep bawk si a nih hi!" a rawn ti thum dap dap a, chhun lama a thusawite chu ka hre chhuak nghal ûar uar mai.

"Chuan, i chawhhmeh zawrh te hi a vai hian engzat man nge?" ka ngawih reng avang chuan a rawn ti leh a, he pa hian eng thil chiah nge tih a tum ni ang.

"Bawkbawn hi kg 30 vel a la awm a, anṭam hi tel 20 vel a la awm a, bean hi kg 15 vel bawk a ni maithei a, tomato hi kg 10 vel a nih ka ring a, hmarcha hi dut no 30 vel a ni ang a, alu hi kg 20 vel bawk a ni ang a, a vai chuan cheng 3000 man hu vel a ni maithei a ni. Kan lakna hi a to phian a, engatinge hengte hi min zawh?"

"A chhan chu ka lei vek dawn avangin" eng thu nge a sawi tak hi! A thusawi ka awih loh lutuk avang chuan amah chu ka en kar a, ani pawh chuan thutak hmel zet hian min lo en ve ran.

"Doctor Marem, min hmusit em ni? Sum i ngahin i hausa pawh a ni thei, mahse hetianga keini nufa chunga i chet kher hi a ngai lo asin" ka ti ta ringawt a, a chhan chu a thil tih tum chu min hmuhsita min en hniam vang bak a nih ka ring lo a ni.

"Ka hmusit hauh lo che u, he thil hi i nu laka ka inthiam lohzia lantirna'na tih tum mai chauh ka ni. Nangni ka hmuhsit vang che u a ti ka ni lo va, he ka thil tih tum hi i pawm thiam ngei ka beisei zawk" a rawn ti ve thuai a, mahse kei chuan a thil tih tum chu ka pawm thei lo a ni.

Keimah berin ka phal loh tlat avang chuan kan chawhmeh zawrh chu Doctor Marema chuan a lei ta lo va, kan in thleng min thlah a duh thu a rawn sawi leh chuan ka phal ve ta hram a ni. Kan thlai zawrh te chu a motor-ah kan dah vek a, rin ai tak chuan thil tih a tiawlsam a, min tizangkhai hle bawk. Kan in kan thlen te chuan min thiar thlakpui leh vek a, ka nu mawlh chu a lo lawm thiam ngei mai. Ka nu chuan thingpui min lo siam a, chaw ei dawn hnaih ni tawh mahse kan in ta tho. Zep lovah chuan anni ang mi hausa tih hriat reng reng kan in zim leh chhe ve têa an lo lut chu ka zak a, kan in chu ka zahpui a ni ber. Doctor Marema pawh thingpui a in zawh chuan a haw ve leh mai a, kan bula a awm tâk loh avang chuan ka thaw a veng ta hawk bawk.

Ka rilru luah bertu leh tihah bertu chu kan in luah man tur atana pawisa kan la nei daih rih lo chu a ni. Thla tir a ni tawh a, ni 10 hmaa kan pe lo a nih chuan kan in luahna neitu te'n min chhuahtir an hreh dawn hauh si lo. Khatia Doctor Marema'n kan thlai zawrh lai lei zawh vek a tum khan lei tir vek tak tak kha ka duh rilru hman rum rûm a, mahse ka mihring rilru chapona hian a phal leh ta thlâwt lo a ni. Han lei zawh tir vek na ila chuan kan in luah man tur chu la daih lo deuh dawn mahse a daih thuak dawn a, tlêm te chiah thawh belh a ngai tawh zawk ang.

Ni dang ang bawkin nilaini chu kan inhralh tam lo leh hle a, chhun lama kan thlai zawrh te kan phur haw lai chuan inkhawm tura kalte nen chuan ka inpel zut zût a, chungte chuan kan haw tlai thawkhat hle a ni tih a tichiang hle. Kan in chhung kan luh rual chuan ka dar chu ka dawm vawng vawng a, mahse ka nu hmuh lai erawh chuan ka dawm duh miah lo thung. Ei rawngte chu ka bawl nghal sawk sawk a, kan inpeih fel hnu chuan chaw pawh kan ei zui ta mai bawk. Chutia kan chaw eina dawhkan, thleng leh fian vel kan tifelfai zo ṭhutthlenga kan ṭhut lai chuan kan in kawngka chu tu emaw ni hian a rawn kik a, kan kawngka lam pana kan kawngka kalh ka vawn ruala ka mi hmuh avang chuan

"Nang maw!?" ka ti deuh phawng a, chutiang hunah ani chu kan ina a lo kal ka beisei lo hrim hrim a, rin ngaihna pawh ka hre lo zawk a ni.

Chapter 2

"Ka lo lut thei ang em?" ka hmaa mi chuan a rawn ti thum deuh sup a, min biakna avang chuan a luhna tur pawh kian lovin ka lo en ngawt ngawt tih chu ka inhre chhhuak nghal.

"Maw? Ihh, aw, aw le, lo lut rawh" ti bah deuh nuaiin a luhna tur chu ka lo kian vat a, ani pawh chutianga a luhna tur ber ka ken tâkah chuan a rawn lut zui ve mai.

"Êeeee Vala, i lo leng dawn em ni?" ka nu'n Doctor Marema hmel a hmuh rual chuan a lo ti a, engvanga ka nu hian Doctor Marema hi nel em em nge a nih pawh ka hre lo. Haw vîau zawk turah ka lo ngai a, mahse a ni teuh lo.

"Aw ka pi, i lo ṭha zel em? Ka rawn ngaihven lawk hman leh mang bawk si lo che u a, a pawi tak tak a ni" tiin Doctor Marema pawh chuan ka nu zawhna chu chhangin a lo tih zawm ve deuh duah a, Doctor tih takah a ṭawngkam chhuak reng reng chu a puitlingin a dam deuh thlûp mai.

"Min ngaihtuah lutuk duh suh, ka ṭha tawh lutuk e. Khawi vengah nge in awm reng reng a? Aizawl khaw hmun nghet i nih ka'n ring ringawt a, i nih leh nih loh pawh chu ka hre chuang lo" tiin ka nu chuan a zawh chhunzawm leh a, kei erawh chuan an pahnih titi chu ka lo ngaithla tawp a ni ber mai.

"Nia, Aizawl khaw hmun nghet chu kan ni alawm, Kulikawnah sawn kan cheng ve e" Doctor Marema pawh chuan a lo ti ve leh mai a, an pahnih chuan la inhmu tam lo mahse an innel hmel tawh hle.

"Chuan ka pi, zanina ka rawn kal chhan ber chu thilpek che u ka duh a, khawngaihin min pawmsak hram dawn nia" a rawn tih zawm leh a, keipawh chuan a thusawi avang chuan amah chu ka lo en ta kar.

"A ni mâw, eng thilpek lam nge i sawi a?" tiin ka nu chuan zawhna a lo zawt ve nghal a, Doctor Marema thusawi chu mak a ti ve tho tih a lang reng.

"Eng lo a nia" tiin a Leather Jacket chhung lam ipte chu a zen a, a ipte aṭang chuan serthlum rawng envelope ngei mai hi a rawn phawrh a, kei leh ka nu chuan a chezia chu ka lo thlir reng bawk.

"Hei âw ka pi, Pathian zarah i na lutuk lo hlauh zawk a, keimah avanga i inhliam avanga ka thilpek che u ah ngai u la, min laksak hram dawn nia" tiin a envolpe ken chu ka nu a pe a, chutah ka nu chuan

"Enge ni a? Mambawih kha han hawng teh" a rawn ti a, keipawh chuan ka nu envelope ken chu laksakin ka hawng ve nghal mai.

"Engatinge he thil hi i tih? Kan retheih avang hian min hmusit em ni? Hmeichhia ni mah ila pawisate chu kan thawk chhuak ve thei alawm, i thilpek hi kan la thei lo vang" envelope chhunga awm ka hmuh rual chuan ka ti nghal thâwr a, mi rethei leh chawhmeh zuar tak meuha inchawm ni mah ila a thlawna pawisa dawn chu ka thei der lo.

"Eng maw Mambawih?" keimah min en chunga ka nu'n a rawn tih lai chuan

"Ni lo, ka hmuhsit vang che u a ni lo. A chhan chu ka sawi vek tawh khâ, thil dang engmah a awm lo" Doctor Marema chuan a rawn ti thuai a, kan mit chu a intawng chiang hle bawk.

"Nu, hei pawisa min pe ṭeuh ringawt a, keini chuan kan la thei lo vang ti raw?" tiin Doctor Marema nena kan in enna aṭanga hawi sawn chung chuan ka nu chu ka bia a, ka nu chuan lungngaih hmel zet hian min lo en daih a nih chu!

"Mambawih" ka nu chuan a rawn ti thawp raih a, ka nu chu a ṭah mai duh hmel hle.

"Ka pi, in nufa hian ka hmusit lo che u tih hi ring ula, pawisa hi min laksak tum lo mah ula kei chuan hawn let leh ka tum tawh lo hrim hrim a ni. Ka thilpek che u hi in la duh lo a nih chuan in duh leh in paih thei a, in ta tur a nih avangin in duh dûh danin in ti thei ang" Doctor Marema chuan a rawn ti leh vat a, a thilpek chu kan la lo vang tih a hlau tak zet te pawh a ni ang.

"Kan la thei lo ka tih tawh vek khâ" rilru thinrim deuh ṭun chung chuan ka ti leh thâwr a, chutah ka nu chuan

"Mambawih, khatiangin ṭawng vâk vak ṭhin mah ta che, kei chuan Pathianin ka ṭawngṭaina a chhang ni maiin ka ngai" a rawn ti daih a, enge a sawi awmzia tak pawh chu ka hre lo.

"Vala, nang hi Pathianin keini nufa tan hian a rawn tir che tih ka hrethiam ta e! A nihna takah chuan kan in luah man tur pawh hi kan nei miah lo va, kan thlai zawrh te lah kan inhralh ṭha thei ngai bawk si lo. Ka beidawng lutuk kha Pathian hnenah ka ṭawngṭai tawp a, nang hian kan mamawh tak chu min lo pe ta a ni" ka nu chuan a rawn tih zawm leh zat a, ka nu thusawi avang chuan ka lo zak chem chem.

"Ka pi, ka puihna in mamawh a nih phawt chuan min hrilh hreh lo ula, ka theih chhung chu ka pui zel ang che u" Doctor Marema chuan a rawn ti nghet charh a, chutia kan chhungkaw dinhmun leh pawisa kan neih loh thu vel a hriat tâk vek avang chuan ka zak lutuk hi a ni ringawt.

"Vala, keini nufa chunga hetiang taka i inphal hi kan lawm tak zet a ni. Chuan, tlangval fel tak i ni e. Nge nupui fanua nei i ni tawh zawk?" ka nu chuan a rawn ti a, envelope lah chu lak let a tum hmel loh bawk si nen ka keng ta reng ringawt a, pek let tumna rilru pawh chu ka nei lui duh ta bik lo.

"Tlangval ka la ni ve rih e, thla leh maiah khian nupui neih ve ka tum a, nangni pawh kan inneih ni ah te chuan in lo tel ve zawk ang chû" nui deuh hawk chung hian Doctor Marema chuan a rawn ti ve leh a, nupui nei rual a ni ka ti tawh reng a ni.

"Chuan ka pi ka'n kal leh phawt mai ang e, tihtur dangte ka la nei ve bawk sia" tiin Doctor Marema chu a ding uâi a, kan banga sana intar ka en chuan dar 8 leh a chanve a lo pel daih tawh.

"Aw le aw le, kan lawm lutuk e. Mambawih han thlah te che, khatia awm zûn lo khan" ka nu chuan a rawn ti a, ka mi thlah tur pa lam ka hawi chuan min lo en reng a, Doctor Marema chu a lo nui tawp riai rîai bawk.

"Aw le" tiin ka ṭhutna aṭang chuan ka tho chhuak a, ka envelope ken pawh chu ka nu chuan min lo laksak zui nghal.

Step-ah chuan ngawi rengin kan kal chho dun a, kei ang thovin sawi tur a hre bik lo a nih ka ring. A hnung lam ti tih deuha kal ka nih avangin amah ka mitmei ru reng a, a thuamhnaw inbel te chu a changkangin a to hmel hlawm tak zet. A perfume hman rim te chu ka la hriat ngai loh nimahse rimchhia ka ti hran lo va, amah nen chuan a inhmeh ru rîauin ka hria. Kei hi enge ka hriat tâk ni! Engvangin nge amah chu ka lo ngaihtuah ve chiam le? Ka mi hriat chian loh leh ka hmu ṭhan ngai mi pawh ni lo ka ngaihtuah zui ringawt chu mak ka ti hle a, a chhan pawh ka hre chuang lo.

"Mambawih" tia min rawn kohna thawm avang chuan ka hawi chhuak a, Doctor Marema chuan a motor bula ding chung hian min lo en reng.

"Aw, ihh, ka lo vin deuh vak vak ṭhin che avangin min hrethiam hram dawn nia" ka ti ringawt a, a hmaa a laka ka lo chet dan chu mawi lo ka ti hnuhnawh a, ani ang mi rilru ṭha leh mi puih hreh lo lakah chuan ka inthlahrung thar em em a ni.

"Lehkha hi i zir tawh lo em ni?" a rawn ti daih thung a, min en reng avang chuan amah chu ka en ṭha ngam lo hle bawk.

"Aw, class 12 chin kha chu ka zir ve a, mahse chhungkaw lam harsatna avangin a dang chu ka zir zawm ta lo law law a ni" min zawh loh thleng thleng chuan ka ti ta duah a, ka sawi tum pawh a ni miah lo.

"A nih chû, lehkha zir zawm leh i duh em?"

"Zir zawm duh leh duh loh lam pawh a ni lo, chubakah ka nu hi enkawla awmpui reng a ngai tawh a, thil dang ti thei pawh ka ni vak lo"

"I nu ka aṭangin i pa a boral tawh thu ka lo hria a, a pawi ka tihpui khawp mai che u" a motor kawngka zawna ding reng chung hian a rawn ti leh a, motor chhunga lut mai lova min be reng chu mak ka ti hle.

"Nia" tih chauhin ka lo chhang a, ka pa a rawn sawi chhuah avang chuan ka pa chu ka ngai thar hle bawk.

"Doctor Marem" a motor kawngkhar a hawn rual chuan ka ti chhuak thut a, a chhan pawh thil pakhat sawi duh ka la neih vang a ni.

"Aw, enge?" keimah min rawn en chung chuan a rawn ti ve thuai a, a awmzia pawh ka hriat hauh si lovin ka zam em em ringawt.

"Kan lawm lutuk tih hi sawi leh ka duh a, min puihna zawng zawngah hian kan lawm tak zet a ni Doctor Marem" pangai tak chuan ka ti ve thei hram a, ka chhungril erawh zam tak a ni!

"A ho lutuk, chuan Doctor tih lai kha paihin min ko thei reng bawk a nia" nui deuh suka a rawn tih chuan

"Aw le Doctor, oh, pu Marem" ka ti bah ta nuai a, engvanga a bula lai em em nge ka nih leh che khawr em em nge ka nih chu ka hre hlawl lo a ni.

"Pu rual êm chu ka lo ni a nia" min nuih chung chuan a rawn ti leh a, a sawi chu a dik tho bawk si.

"A nih u Marem, kan lawm lutuk e"

"Aw le, min koh dan chu eng pawh ni se ka pawm tawh mai ang e" ka mit taka min en reng chung chuan a rawn ti a, a tawpa tawpah chuan ka ko dik thei ta hram alawm.

Chutia ka ṭawng chhunzawm leh tawh loh avang chuan ani pawh chu motor chhungah chuan a ṭhu lut a, in mangṭhana ṭawngkam emaw pawh awm chuang lovin a tlan chhuak zui ta daih. Ka bul hnaia u Marema ber a awm tawh loh avang chuan ka thaw a veng huai a, a bula awm kha nuam lo ka ti pawh ni si lo hian engtin emaw ni boruak khan rih dan rîau a nei tlata hriatna ka nei. Kan in chhunga ka luh leh chuan ka nu chuan pawisa chu a lo chhiar malh malh a, chutah ka nu chuan hlim hmel taka min lo en chung hian

"Mambawih lo kal teh, hei cheng 10000 lai mai kha tlangval khan min pe a nia, kan thla thum in luah man chu a daih dâih dawn a nih hi!" a rawn ti a, keipawh chu a bulah chuan ka ṭhu thla ve nghal.

Pawisa chu ka chhiar ṭha leh ngat a, a dik loh ring ru mah ila ka chhiar ṭhat leh tâk hnu chuan ka nu sawi chu a dik ngei tih ka hria. U Marema chu ka ngaihtuahnaah a rawn awm a, engvangin nge chutianga pawisa tam chu min pek ka hre lo a ni. A chezia ah te, a hnathawh ah te, a inthuamna leh a motor neih aṭangte chuan an hausa dawn a ni tih ka ring thiam mai a, mahse keini aia rethei zawk te puih tur an tam awm tehreng nen engatinge keini nufa kher min puih?

Marema POV

"Marem, khawnge i lo kal daih a? Kimtei a lo kal a, i room-ah khian a awm ka ring" kan in ka luh rualin ka nu chuan a lo ti a, keipawh chuan lu lo buk khum nghutin ka room lam chu ka pan chho ve nghal mai.

"Hei Marem, tlaiah ka lo kal dawn ka tih vek tawh khâ, engatinge i lo awm leh si loh?" ka room ka luh rualin Kimtei chuan a lo ti a, ka inthiam lo rilru hle.

"Nia, hmannia ka sut ṭep nufate kha ka tlawh leh zawk a, an khawngaih thlak tak tak asin" tiin ka Leather Jacket chu ka phelh a, khumah chuan ka theh thla a, chutah Kimtei chu lo tho kanga ka lam rawn pan chung hian

"Tun lai chu min be khât riau a nia, keiin ka ngaih tehreng che nen" a rawn ti daih a, min lo kuahin ka hmuiah chuan a rawn fawp zeuh bawk.

"Keipaw'n" ti supin ka fawp let ve nghal a, mahse thui erawh kalpui ka tum lo. A chang chuan Kimtei chuan mipat hmeichhiatna chu hman mai a duh ṭhin a, mahse keimah zawk chuan nupa kan nih hmâ chu hman ka duh lo tlat a ni.

"Kan inneih hun hi thleng vat vat tawh se ka ti ê, i nupui nih ka châk tawh" ka âwma bei hle hle chung hian a rawn ti leh sep sep a, kei erawh a thusawi avang chuan ka lo nui nghawr dat thung.

"Nui ringawt suh, ka pasal nih chu i châk ve miah lo em ni?"

"Châk tawh tehreng mai, chuan naktuk kha ka nu leh pate inneih champhaphak vawi 40 na a ni tih theihnghilh lo la, mawi tak khan lo inchei la ka lo lam dawn che a nia" tiin thu dangah chuan ka pakaipui ta daih a, ka thusawi avang chuan ani pawh chu a rawn phur thar leh ta khawp.

"Aw le Boss, nalh tawkin ka lo inchei ang" tiin min lo fawp leh zeuh a, keipawh chuan ka lo chhang let ve leh vat.

Zan dar 9 leh a chanve velah chuan Kimtei chuan haw a duh thu a sawi a, Scooty a lo keng kher bawk nen thlah haw lovin ka vai liam ta mai. Kimtei hi ka ngaihzawng a ni a, kum khat leh a chanve vel lai chu kan inzui tawh a ni. Amah hi MZU ah Geust Faculty in hna a thawk a, chhungkaw harsa tak ni lo mahse mahni kea din duh mi a nih avangin hna chu a zawng lui ve char char zel. Kimtei nen chuan thla leh maia innei tur kan ni a, palai kan tirh fel vek tawh avang leh inneih ni tur kan rual fel vek tawh avang chuan tluang taka kan inneih theih pawh ka ring nghet bur.

A tukah chuan ka tho hma hle a, ka zing tin tih ṭhin angin kan in hnuaia Gym room lam chu ka pan a, thlan tla bawrh bawrhin ka taksa chu ka sawizawi leh ta chiam. Civil Hospital lam pana motor ka khalh lai chuan Mambawihi te chu ka zawng phei pah zeuh zeuh a, an awm dan chu ka hmu châk tlat a tin ni! A tawpa tawpah chuan ka hmu ve ta hram a, an zawn ka thlen dawn chuan ka speed te chu ka down deuh a, a nu tel tawh lovin Mambawihi chiah chuan chawhmeh a lo zuar thung. A ṭhutna hmaa thlai chi hrang hrang a la inhun ṭeuh danah a inhralh lutuk lo tih chu ka hre mai a, enge a chhan pawh ka hre lo Mambawihi chu ka khawngaih tlat a ni.

Ka nu leh pate inneih champhaphak a nih avangin chhun lamah chuan ka tihtur ṭul ang âng leh ka Ward fan tur te chu ka ti zung zung a, haw hma tum rana hnathawk ka ni bawk a, tlai dar 3 leh a chanve velah chuan ka haw thei der. Kimtei lam kawi tur chuan an veng lamah ka tlan a, an ina ka luh chuan a nu chuan min lo be ṭha leh siam siam hle. Kimtei a insiam zawh chuan keini pawh chu kan tlan chhuak ve leh nghal mai a, Catering kan book sa vek tawh avangin ei rawngbawl lam chu kan uksak lo hle. Kan in lam pana kan tlan lai chuan Mambawihi chu ka mitmei phei leh hram a, mahse chawhma lam ang lo takin a ṭhutna hmunah chuan a hmel hmuh tur a awm tawh miah lo. Kan in kan thlen chuan chhungkhat laina hnai leh ṭhian ṭhate chu an lo awm nuai nuai tawh a, ei an lo siam ṭan der tawh zawk.

Tlai dar 5 vel a lo nih chuan chaw chu kan dawh a, chawhmeh te chu a'n la tuihnai hlawm em em leh nghal. Chaw kan dawh ka'n ti tak na a, keimahniin kan insuahin kan inkhawrh a ni ber zawk. Chutia chaw leh chawhmeh vel ka insuak fel kal mai ka tum chu ka hmaa Kimte chu a rawn ṭe vak a, kei ang thovin mi dangte pawh chuan Kimtei chu an en nghal ṭhup. A bula ka va kal hnaih chuan Kimtei kawrhma chu a lo berh nuai a, a thleng ken lai pawh chu chhuatah a lo tla darh vek bawk.

"Engatinge?" ka va tih chuan

"Khu nu ṭawp lutuk luatah khuan ka berh vek a nih hî, chaw ei châkna pawh ka nei hrep tawh lo ve" thinrim tak hian Kimtei chuan a rawn ti a, a ṭawngkam hman dan vel chu ngaina teh chiam lo mah ila a thinrim lutuk vangah ka ngaihsak ta mai.

"Ka pi, ka tihpalh tak zet, lo awm sawn r'u ka tîh ka tih pawh khan i lo awm sawn duh lo va" kan hma chhuata ṭhingṭhi chunga chaw leh chawhmeh vel rut mektu chuan a rawn ti a, chutah kei chuan rum mangkheng hian chu nu chu ka melh chhuk run a, mahse ka mi hmuh avang chuan vawilehkhatah ka mitmengte chu an rawn dul nghal vek.

"Heng ka kawr berh chhanah hian keimah zawk hi min mawhpuh tihna em ni? I va zak lo ve, nangni ang hi chu hnathawka chhawr tlâk pawh in ni lo, ṭawp leh lutuk mai" Kimtei chuan a lo tilet hrep a, kan hmaa chhuat tifai mektu chuan Kimtei chauh a en avangin kei chu min hmu lo hrim hrim a, kei erawh chuan amah chu ka lo en kar thung.

"Ni lo, ka mawhpuh hauh lo che" a rawn tih lai chuan nu pakhat hi kan awmna ah chuan a lo phei vat a, chutah chu nu chuan

"Kan tihpalh tak zet a ni, ka pu, ka pi. Amah hi thawk thar a ni a, khawngaihin min lo hrethiam hram dawn nia" a rawn ti hlawk hlawk a, ka pu tia min koh avang chuan Mambawihi chuan min rawn hmu ve ta.

"U Marem" a rawn ti thawp sep a, a ṭawng chu zawi viau mahse ka bengah chuan a ring em em tho.

"Engtin a!? Tunah khan ka pasal hual hi a hmingin i ko vel em ni? I va han zak thei lo ve le" Kimtei bawk chuan a rawn ti leh phiar phiar a, Mambawihi ṭawng chu a lo hre pha ve ngei a ni ang.

"U Marema hi i pasal hual maw!?" mak tih hmel deuh hian Mambawihi chuan a rawn ti leh tawl a, chutah a bula nutling chuan

"Lo kal rawh, kan inbiak lawk a ngai" a rawn ti ram hmarh a, Mambawihi thil tifai lai chu kai thovin a kal sawnpui nghal hmawk hmawk.

"Kei chu ka mood a off vek, ka kawr lah a berh vek bawk si" Kimtei chuan a rawn ti nang nâng a, mi dangte pawh chuan min lo en ṭhup tawh em bik lo ve.

"Ka room-ah khan lo han intifai la, keipawh ka lo chho ve thuai dawn nia" ka tih chuan a kal tau nghawng nghawng a, kei erawh chuan Mambawihi te kalna lam ngawt chu ka en thung.

Ka thleng ken lai chu dawhkan lo awm remchang hmasa berah chuan ka dah a, Mambawihi leh nutling pakhat chhuahna lamah chuan ka phei zui ve nghal. Mambawihi te chu pawn lam pana an kal zel avangin pawn lam chu ka pan a, khua a thim ve tawh deuh bawk nen ka zui tih chu an hre kher lo maithei. An ṭawng thawm ka hriat avang chuan ka ding chawt a, ngawi renga bang ngheng chung chuan an ṭawng chu ka ngaithla chhunzawm nghal.

"I va ṭawp ve, i thil tih avang khan nangmah ni lovin keimah asin mualpho daih. Kha, cheng 500 hi la la, i haw nghal thei ang"

"Ni lo ka pi, cheng 1000 a ni lo'm ni ka hlawh tur? Enge a awmzia?" chu aw chu Mambawihi aw ngei a ni!

"Engtinnge khatianga buaina i siam hnu khan cheng 1000 chu hlawh i la inbeisei theih zawk? Tuna i hlawh ka pek che pawh hi i phu miah lo, mahse thawk thar i ni bawk nen ka khawngaih mai mai zawk che a nih hi"

"Khawngaihin ka pi, ka tihtur dang ṭhulh ṭhak khawpin ka lo kal ve asin, min chhawr tluan hram mai teh" a aw aṭang chuan Mambawihi chu a ṭap ni maiin ka hria.

"I va mak e âw, nangni ang hi ka chhawr leh tawh ngai lo vang che u" a tih rual chuan ka che chhuak thut a, an awmna chu ka thleng chawpchilh zui nghal.

"Pu Marem" Mambawihi hnathawhna neitu nu ni awm tak chuan min hmuh rualin a rawn ti a, engtinnge ka hmingte chu a lo hriat reng reng ni!

"Ka pi, nangni pawh hi Catering tur hian vawikhatmah kan ruai leh tawh ngai lo vang che u. Chuan, zanin hi kan ina in lo kal tawpna ber tur a nih ka ring bawk" ka ti ve salh a, chuti taka Mambawihi a ṭawngkhum avang chuan ka thin a rim a ni ber.

"Mambawih, lo kal rawh le! Hetiang khawngaihna pawh nei lo mihring bulah hi chuan i awm tam lo zawk teh ang" ti ram leh hmarhin Mambawihi, phula lo ṭhu hnûng chu ka zuk khawih a, ka mit taka min lo en chuan a mita mittui awm te chu ka hmuh kân theih hauh lo.

Engmah pawh sawi lovin a bana ka pawh tho ang ang chuan a rawn tho ve mai a, a kutah chelhin ka motor awmna lam chu ka panpui zui ta hmak. Motor chhunga kan chuan hnu chuan kan in lam chu ka hawi let leh a, kha nutling ṭawng hlawk zet pawh kha hmuh tur a lo awm tawh lo. Motor chu tinungin ka tlan chhuak a, Khatla lam pan lovin Zampuimang lamah chuan ka tlan ta zawk. Kawng reh lai leh zau lai deuhah chuan motor chu ka tiding a, ka bula ṭhu Mambawihi ka va en chuan mittui tling pam hian hma lam hi a lo en reng a, engtia han tihtur nge pawh chu ka hre lo hle.

"Mambawih" ka tih rual chuan a rawn ṭap chhuak hawk a, chu veleh kei chu a awmna lama tawlh phei vatin Mambawihi chu ka âwmah chuan ka kuah bet ta ringawt.

Ka âwma ka kuah beh hnuah phei chuan a rawn ṭap chhuak hawm hawm a, rilru na taka ṭap a ang ber. A ṭah avang chuan ka hriatthiam si loh hian ka taksa te chu a lo ṭang ve ṭung a, Mambawihi chu ka khawngaih tak zet a ni. Ani chuan chawhmeh zawrh aiin Catering-a thawh chu a hlawk zawk ringin a pan a ni ve ngei awm si a, chutah vanduaina a la tawk leh ta nghal. A hnung chu ka chul hlîau hlîau a, chutiang taka ṭah chhuak leh ṭap nasa chu ka piana hnu lamah ka la buaipui ngai lo.

Chapter 3

Mambawihi POV

Engatinge ka vanduai bik em em? Ka theihtawp chhuahin hna ka thawk a, ka nu nena kan inchawm theihna'n hna awm awm ka thawk bawrh bawrh a, mahse ka kawngah chuan vanduaina leh harsatna chi tinreng an khat tlat si. Âwwww Lalpa, ka hlima ka hlawhtlin hi i phal ve lo em ni? Ka nu nena kan hlima kan hausakte hi i phal ve miah lo em ni? Engatinge vanduaina kan tawha mi hmuhsit kan tawh reng bik?

Insum karna nei lek lovin ka ṭap hawm hawm a, ka ṭahna hmun chu a lum nuamin ka pa âwm ang mai a ni. Chutianga âwm lum nuam taka ka ṭah avang chuan ka pa chu ka hre chhuak leh ta nge nge a, a dam laia min kuaha ka lungngaih changa min thlem vel lai te chu ka ngai tak zet a ni. Ka pa chu la dam se chuan rethei taka kan awm ka ring bik lo va, a boral hma lutuk chu pawi ka ti ngawih ngawih.

Ka pa chuan Cancer natna avangin Class 12 ka zir laiin kei leh ka nu chu min boralsan a, amah ka ngaih lutuk avangin exam pawh ka chhang ṭha thei lo reng bawk. Result chhuah ni te chuan ka exam result chu hriat châkna reng ka nei lo va, a chhan pawh ka pa kan kianga a awm ve tawh loh vang a ni. Kan result chhuah ni te khan ka pa chu la dam ve ngat se zawng a Taxi khan min phur kual leh ang a, ka duh dûhna hmunah te min hruai leh ngei awm si a, mahse chungte chu suangtuahna leh mitthla mai chauh an ni tawh.

Nghet taka min kuahtu chu ka pa ni ngeiin ka hria a, a chhan pawh ka pa chuan âwm lum nuam tak a neih ṭhin vang a ni. Duat taka ka hnung a chul hlîau hliuana te chuan ka pa a nihzia min hriattir a, keipawh chuan nghet takin ka kuah let ve ṭai bawk. Mahse, ka mi kuah mek hnungah chuan ka kut pahnih chu ka suih zawm thei ta tlat lo. Ka pa kha chu ka kuah let khan ka kut pahnihte chu ka suih zawm pha chiah chiah zel a, mahse tuna ka pa erawh hi chu ka suih zawm thei tawh miah lo thung.

Ka meng diar diar a, motor chhungah kan awm tih chu ka hria a, chu pawh chu ka pa Taxi ni turah ka ngai hmiah. Mahse ka tum ngial pawha ka kutte chu ka suih zawm theih mai loh avang chuan ka pa âwm aṭang chuan ka awm sawn deuh a, ka pa nia ka lo ngaih nghet taka min kuahtu hmel ka en chuan ka pa hmel reng a lang lo. Chu pa hmel chu ka en vawng vawng a, khawiah emaw ni chuan hmu tawhna nei thânin ka inhre bawk. Zawi zawiin ka ṭah chhuak lutuk te chu an kiam ve tial tial a, chutah ka ngaihtuahna chu a rawn fim chho ta.

Min kuah bet tlattu hmel chu chiang lehzuain ka en a, ani pawh chuan duat hmel tak hian min lo chhuk melh ve run. Ka mitah chuan mittui vel a tam lutuk tawh lo bawk nen a hmel chu ka hmu chiang a, chu veleh a ranga rangin ka awm sawn nghal vat. Ka chet thut avang chuan min lo kuah rengtu u Marema chuan min en deuh hâw a, a hmel chu ka en let ngam tawh lo hrim hrim. Ka awm dan ka siam ṭhat sawk sawk avang chuan u Marema pawh chu a ṭhutna ngaiah a ṭhu phei ve leh thuai a, a laka ka awm dan vel avang chuan ka zak lutuk hi a ni ringawt.

"Ka tihpalh lutuk" ngawi renga kan awm dun hnuah chuan ka tichhuak sep a, ka awm dan chu mawi lo ka tiin a zahthlak ka ti hle.

"Mambawih" u Marema chuan a rawn ti sup a, ka lam a lo hawi tih pawh ka hre reng, mahse kei chuan amah chu ka en let ngam hlawl lo a ni.

"Mambawih, min lo en teh" tiin ka biang chu a kutin a rawn khawih a, a mi khawihna avang chuan ka taksa zawng zawng chu a za vek ni berin ka hria.

"Meng tawh rawh le, i zak em ni?" a lam hawi tura min kawih her hnu pawha ka la maimitchhin reng avang chuan a rawn ti a, a la nui ri deuh suk zui.

"Ka tina dawn lo che a, ka lakah chuan zah pawh zak buai duh suh. Le! meng rawh le" naupang thlem ang maia a rawn ti leh chuan ka meng chhuak ve ta che chê a, mahse a mita en ngam lovin a âwm chu ka melh ta daih.

Chutia a âwm ka en reng avang chuan tun lawka ka lo awm dan vel chu ka hre chhuak ûar uar a, engtinnge a âwm chu ka pa âwm ang te khan ka lo suangtuah theih zawk? Engtinnge a hnunga ka kut suih zawm theih te kha ka lo inrin reng reng? U Marema te chu pa lian leh dar hlai, ka pa ai dâiha lian mipa a ni a, chumi a nih avang chuan engti kawng mahin a hnungah chuan ka kut ka suih zawm thei lo vang. A kawr âwm chu a lo huh deuh dup a, chungte chu ka mittui vanga huh a ni tih ka hre chiang hle bawk.

"Ka âwm chauh en reng lo khan keimah hi min en rawh le" dam raiha ti hian u Marema chuan ka khabe ah a rawn chawi a, chutah zet zawng a hmel chu en lo thei ka ni ta lo.

A vun chu hang lam aiin ngo lampang pâwl a ni a, chu chuan a taksa a vawn nunzia leh a inulukzia a tarlang a ni. A hmai leh biang velah chuan mipa dang ang lo takin hmul hmuh tur a awm nûal a, a hmui chunga hmul ṭo siar siar awm te chuan a ti lang pa em em, a hmelah aṭang chuan la upat lutuk hmel loh mahse a lo berah kum 30 ral chu a kai tawh ngei ka ring. A mitmeng chu a uk dum deuh kâk a, a rum mah mah em âw tih theih turin a mitmeng chu a hriam deuh âl bawk. Chutia ngawi reng leh chik taka amah ka en lai chuan

"Min en zo tawh em" a rawn ti thum leh dup a, inhnaih taka kan lo awm dunna aṭang chuan ka va han tal sawn chiang leh mai mai tak em.

"Ka tihpalh lutuk" ka sawi tur ber pawh hre lo chuan ka ti leh ta ringawt a, engkim chu a kal dik lo kual vel vek.

"In in thleng ka thlah ang che aw" nui ri deuh haka a rawn ti leh pawh chuan khawng âtin ka lo ṭhu a, min biakna phei phei chu chhan let ka tum tawh lo hul hûal.

Ka ṭawng chhuah duh tlat loh avang chuan ngawi rengin kan tlan a, Ngaizel kan thlen chuan kan hma maiah hian chesual an lo awm a, an lo intibuai deuh nuai nuai bawk. An ṭawng thawm vel aṭang chuan petrol la tura tlan lut leh petrol la tawh tlan chhuak chu an lo insu a ni awm a, patling ve ve mah ni se tleirawl thaza rual ang maiin an inkhawih deuh pawp pawp. Ka bula ṭhu u Marema chuan chutianga an chetla vel chu a en reng a, a changin a rawn nui ri leh suk zel. A nuih chhan lah chu ka hre der si lo va, kei erawh ralkhat aṭang pawhin ka lo hlauthawng ve em em ringawt. Chutia muangchanga kan tlan lai chuan u Marema phone chu a rawn ri a, u Marema pawh chuan a phone chu pick-up in

"Hello" a ti a, motor khalh lai a ni bawk nen loud speaker-ah a dah zui nghal.

"Khawnge i awm? Ka lo chho ang i ti a ni lo'm ni? Hetianga i awm bo daih te chuan ka tan pawh a zahthlak a, a hrehawm bawk" lehlama mi chuan a rawn ti vin tûar tuar a, a aw aṭang chuan hmeichhia a nih ngei a rinawm.

"Hmun dangah ka kal lawk a, ka lo thleng ṭep e" tiin ka bula mi chuan awlsam tê hian a lo chhang a, ka rin danin a biak nu chu a nupui hual kha a ni ngei ang.

"Dawt sawi reng reng suh LALREMRUAT, miin kha che ṭawp deuh nu nena in tlan chhuak dun lai kha an hmu vek che u, engatinge khatiang mi ṭawp hnawk mai mai buaipuia kei i nupui hual hi min kalsan?" a rawn ti leh hlawk hlawk a, a biak nu chu a nuipui hual kha a lo ni ngei e!

"I hriat chian loh chuan khatiang khan mi chanchin sawi vak vak suh, a mawi lova a ṭha lo bawk" u Marema chuan a lo ti khauh ve fâk a, keimah avangin an inhau mai dawnin ka hria.

"Enga!? Kei i nupui hual pawh ṭan lovin kha nu, che ṭawp deuhi kha i ṭan zawk tihna maw!? A ṭha e, min rawn hmuh tum buai hlek suh" lehlama mi chuan a rawn ti vin leh ṭhat a, kei erawh chu nuam ti rengin ka thaw tawh lo.

"Aw le" tih khum hmakin u Marema chuan a phone chu a off daih a, a thaw chhuak deuh hawk bawk. Chutah u Marema bawk rei pawh kan tlan leh hmain phone call a dawng leh a, a caller ID ka hmuh hman zeuh avangin lo call tu chu a nu a nih hmel.

"Aw nu" tiin phone chu a pick-up ve leh mai a, loud speaker-ah bawk chuan a dah zui leh nghal mai.

"Engatinge Kimtei hi a ṭah? Khawiah nge tunah i awm? Lo haw vat rawh, hmeichhe dang i hruai chhuak te an ti che a, chu chu a dik em?" a nu chuan a rawn ti fak fak a, kei chuan u Marema chhan dan tur chu ka lo ngaichang hi a ni ber.

"Nu, khatiang lam kha chu Kimtei nen kan lo sawi dun ang. Chuan, ka ṭhiante inah ka leng lawk dawn a nia" tiin ka bula mi chuan a nu chu a chhang let a, anu erawh chuan ṭeu hlar hian

"LALREMRUAT, i mawl em ni? Kimtei hi i nupui hual a ni a, thla leh maia innei tawh tur in ni bawk. Hetianga in inneih hmaa in intîh in intih thiam loh chuan Kimtei hian inneih a ṭhulh duh mai ang asin" a nu chuan a rawn ti leh hmawk hmawk a, an inbiakna chu hriat loh pawh tum ila ka tan chuan hriat loh theih a ni lo.

"Nu, ka dah rih aw" tiin u Marema chuan an inbiakna chu a ti tawp ta daih a, ngawi rengin motor chu a khalh chhunzawm nghal mial mial.

"U Marem, kan ina min thlah lo hian in in lamah chuan haw tlang zawk mai rawh, kei chu ka haw thei mai ang" ka inthlahrun êm avang chuan ka ti chhuak ta tawp a, ka mi biak ber lah chuan min chhan let tum loh hmel zet hian hma lam chu a en ngur a, a thinrim ni berin ka hria.

"U Marem" ka tih leh rual chuan

"In in thleng chu ka thlah ang che" a rawn ti ram deuh hmuk a, kei atan chuan ṭawng chhunzawm leh ngamna chi pawh a ni tawh lo.

Kan boruak a dik loh tâk em avang chuan pawn lampang chu ka hawi ta daih a, zan nimahse mi vei vak leh bike emaw scooty emawa tlan chu an tam em em tho. Sikulpuikawn kan thlen lai te chuan hlim taka mi kal te chu kan hmu zut zut a, an hlim bik lutuk chu ka thik ngawih ngawih. Kei ang thovin mihring an ni a, anni ang thovin mihring ka ni a, mahse kan dinhmun inang lo lutuk leh kan nun dan inthlau lutuk chu hmuh hrehawm ka ti em em a ni.

Marema POV

Engatinge kei hi ka dik miah loh? Ka nupui hual Kimtei ṭap aiin Mambawihi ṭap chuan ka lairil a fan tlat a, chu chu ka hrethiam lo a ni. A ṭah hliam hlîam laia min kuah let ve ṭai te kha nuam ka lo ti ru em em a, ka rilru chu a phatsantu rilru hle tih hre reng mah ila kan awm dan chu nuam ka ti em em tho si.

A nihna takah chuan tunlai chu Kimtei hi ka hne ka ti dawn nge ka hmu ning zawk pawh ka hre lo, chutianga ka nupui hual laka rilru ka put chhan ber nia ka hriat chu a zia a inthlak nasat êm vang a ni. A hma chuan ṭawngkam bawlhhlawh leh nun dahau a nei ngai lo va, a nelawmin ka ngaina em em ṭhin. Amaherawhchu tunah chuan a ṭawngkam chhuak reng rengte chu nun dan mawi hre lo leh lehkha zir sang lo ang mai a ni tawh a, chungte chuan amah min tingaina lo zo vek a ni.

Tun thla tir mai khan Kimtei te inah palai kan tir a, a chhan pawh Kimtei'n pasala min neih thuai thuai a duh tawh vang a ni pakhat. Keipawh chuan Kimtei chu ka nupui atan ka iai lo va, neih ngei pawh ka duh, mahse nupui nei tur em chuan ka la inpeih lo deuh ni maiin ka inhria. Chhungkaw chawmna tur leh nupui chawmna tur pawisa chu ka thawk chhuak nasa tawh tih ka hria alawm, mahse ka rilru chhungril tak hian nupui fanau enkawl chu a la huphurh deuh tlat a ni.

Kimtei hi an unau zinga hmeichhe awm chhun a ni a, a naupang ber niin a u mipate chuan nupui fanau an nei deuh fur tawh. Kan inngaihzawn tirh te khan a chhungte chu ka lakah an ṭha hlawm em em a, ngaihzawng ngaihsak lutuk lo chi ka lo ni kher bawk nen engkimah Kimtei chuan min kaihruai vek a ni ber.

Kimtei chu a hmelṭha a, khawpui mi ni awm rengin amah chu nula changkang tak a ni. Amaherawhchu kum khat lai kan inngaihzawn hnu chuan tlem tlemin a zia a dang tih ka hmu thiam a, a pawina a awm pawhin ka hre chuang lo. A bik takin tun hnai hian a zia a thlak nasa lehzual a, min tih nuih tumin min be siam siam ṭhin mahse hmân ang tak tak khan ka chhungril chu a hlim thei tawh miah lo.

Mambawihi te in bula step chhuk thla zawn kan thlen chuan motor chu ka tiding a, Mambawihi lam ka hawi chuan a lo muthilh tui hmel khawp mai. A thaw sek sek a, tlai lamah lah boruak duhawm loh tak a tawng bawk nen a chau ve hle a ni ang. A sam chu a dum deuh hnâp a, chu chuan a vun var deuh hân chu a kap eng hle bawk. A hmui mawlh chu a sen no chêk a, a hmui len dan lah chu a tawk chiah emaw tih mai tur hian a hmai bathlar zawng zawngte nen chuan a inchawih mawi vel vek. A mithmul te chu nula dang angin a lem vuah ve lo mahse a er tân a, a hmel hrim hrim chu a nuin a hmeichhia bik ngawih ngawih.

Chutiang taka chiang chuan Mambawihi hmel chu ka lo en chiang ngai lo va, a awm danin a zir vang nge ni a duhawm tak zet. Ka hriat loh karin a lamah chuan ka lo ve awn phei leh der tawh a, a hmel chu en chiang tak ka ni. A hmui chu a rawn chet deuh nûap nuap a, a duhawm lutuk chu sawi ngaihna pawh ka hre lo. A awm dan vel avang chuan ka khi deuh suk a, a hmui chu ka hnaih tawh hle bawk. Chutia a hmui hnaih taka ka awm lai chuan a rawn meng thut a, ka va han che buai nasa mai mai tak!

"Kawngka kha a in lock a, ka siam ṭha lawk a nih kha" ka ṭhutnaa ka ṭhut phei rual chuan ka ti ta ringawt a, ka laih lutuk avang chuan min zawt pawh ni hlei lo chu kan insawifiah ringawt chu a ni si a, chutah dawt hlang hlak ka la sawi leh nghal.

"Kan veng kan lo thleng der tawh a ni maw, kan thlenna a rei tawh em?" pangai tak hian a rawn ti a, a lo ṭah hrep tawh avangin a mit chu a la bui deuh chûk bawk.

"Rei lo ve, kan thleng deuh chiah" dawt bawk maw ka sawi leh tâk ni! I muthilh lai khan rei tak ka lo thlir vauh vâuh tawh che ti ta che tiin ka rilru chuan min lo zilh zui mawlh mawlh a, mahse chu erawh ka sawi chhuak kher lo vang.

"Vawiin chu in inah buaina ka siam a, i nupui hual nen keimah avangin in inkar a chhiat phah a, chutah i nu nen in inkar ka tibuai lehzel a, ka inthiam lovin ka tihpalh tak zet a ni" a rawn ti thawp sep sep a, a hmel ka en chuan a inthlahrungin a inthiam lo hle tih ka hre thei.

"A ho lutuk, engkim a ṭha ve leh vek mai ang" a rilru nawmna'n chuan ka lo ti vat a, mahse keimah ber chuan engkim chu a ṭha leh vat dawn lo tih ka hre chiang em em thung.

"Vawiin lama min puihna zawng zawngah khan ka lawm e, u Marem. Zan a rei tak tak hmain va haw tawh zawk rawh, keipawh kan chhuk ang e" tia chhuk mai a tum lai chuan a darah ka lo chelh vat a, ka chet dan teh thut avang chuan ani pawh chu a rawn hawilet rang hle.

"Thil eng emaw pek che ka duh a" ka ti deuh thâwr a, chutia ka tih tâk avang chuan ani pawh chu a rawn ṭhu ṭha ve leh mai bawk.

"Kha le, vawiina lama i hlawh tur ang zat chiah kha ka lo pe ang che" ka Wallet aṭanga pawisa ka phawrh rual chuan ka ti a, chutia pawisa a lama ka va lek phei chuan thinrim hmel tak hian min lo en kar thung.

"Ka la dawn lo, rethei tak pawh ni mah ila i pawisa hi chu ka dawng tawh dawn lo" a rawn ti hmarh hmarh a, ka thil tih ang âng chu lawm takin pawm se buaina a awm lo ni mai tur.

"I la lo a nih chuan in inah ka lo lut ang a, vawiin tlaia thil thlen dan zawng zawng kha i nu ka hrilh vek ang" eng âng pawhin min hnial mahse ka pawisa pek chu a la ngei ngei tur hi a ni tawp.

"Enga!? Eng thu maw i sawi kha!?"

"Ka pawisa hi ka khawngaih vang che a pe che ka ni lo va, i phu vanga pe mai che ka ni" ka ti leh hmuk a, chutah ani chuan

"Ka la dawn chuang lo" a rawn la ti hram.

"A nih chuan in inah chuan i chhuk ang le, i thingpui lum te pawh ka in châk riauin ka hria" tiin a lam chu ka hawi a, ngeiawm rawngkai lek lêk chuan ṭawng mah ila ka fiamthu tawh thung.

"U Marem haw vat mai teh, hetianga i awm reng chuan ka awm a nuam lo zual a nia" thinrimna tel miah lo hian a rawn ti ta ringawt a, min biak dan vel chu a naupang chhia ngawih ngawih zawk a ni.

"Hetianga ka awm i duh loh chuan pawisa hi la vat la, keipawh ka haw ve nghal ang" ka lo ti ve leh ta tlat.

"Nang chû, i ti buaithlak thei êm mai" naupang chhia zet hian a rawn ti leh reuh a, a thusawi avang chuan ka nui chhuak ta hawk a, kei ang thovin ani pawh chu a lo nui ve tho bawk.

"Le! Pawisa hi la la, i mit bui em em chhan te kha i nu bulah chuan ṭha deuhin i sawi dawn nia" ka tih leh chuan min rawn en hâw a, chutah rang zeta a phone camera-a inbih chung hian

"Awi, ka mit chu a lo bui viau tak tak a nih hî, engtinnge ka tih ang" a rawn ti nghal niah niah a, kei erawh a chet dan leh ṭawngkam avang chuan ka lo nui leh suk suk ṭhin.

"Mit a bui vîau hi chuan pawt kau vak vak ila a pangai vek thei" ka tih chuan ka thusawi chu a rawn ngaihven nghal em em a, a mit bui tih reh a duh lutukna lamah ani chuan ka fiamthu tih reng a ngaihtuah pha tawh lo a ni.

"Tak tak maw!?" tiin ka sawi ang chuan a mit chu a kut khing hnihin a pawt kau vak vak a, Doctor ka lo ni vel kher bawk nen ka thusawite chu a ring nghal hmiah a ni mahna.

"Ti kha chuan i lan dan pawh a zia deuh tawh alawm, a hma kha chuan khuai zuk ang mai alawm i nih" a inen mawlh mawlh lai chuan ka lo ti leh a, ani chuan min rawn melh rum ve âl mai. A awm dan vel chu a lawmawm em em a, a duhawm hle bawk a ni.

"Ka lawm e u Marem, keini nufa tan hi chuan i ngilnei a, i ṭha ve thlâwt a ni. Kan chunga ṭhat i chhuah avang hian engtik niah emaw chuan ka la rul let ve ngei ang che" motor aṭanga a chhuk dawn chuan a rawn ti leh a, ka thilpek chu a pawm tawh tih lantirna'n a kutah pawisa chu a hum ran bawk. Chutah kei chuan nui deuh suk chung hian

"Aw le, min la rul let leh ngei dawn nia" ka lo ti ve mai a, ka fiamthu a ni tih hrethiam takin Mambawihi pawh chu a rawn nui ve ta ver ver.

Ka motor ti ruma tlan chhuah ka tum lai te chuan kawngpui sira ding chung hian min lo en reng a, a hmel ka en chuan min lo nuih ver ver a, a ban chu a lo vai lâwp lawp reuh bawk. Chutianga a che vel chuan min ti nui leh ta nge nge a, a awm dan duhawm zet leh lawmawm zet hmu kham lo deuh chuan ka tlan pel thei ta hram a ni. Motor-a ka chuan lai te chuan mahni chauhin chuang mah ila ka khi leh suk suk ṭhin a, a chhan pawh Mambawihi chezia vel ka ngaihtuah let vang a ni. Rei pawh ka tlan hmain kan in kawt chu ka thleng der a, motor chu park ṭhain kan inah chuan ka lut zui nghal.

"Marem, engatinge i bo daih a? Kimtei pawh i buaipui loh avangin a rilru a na a, chutiang bawkin i nu pawh a thin a rim a hle bawk" ka room- ka chhoh dawn lai takin ka pa chuan a rawn ti a, tlai lama ka awm dan vel avang chuan ka inthlahrung ve hle a ni.

"Ka tihpalh pa, hetianga hun hlimawm kan hman nia boruak ka lo tibuai ta nûai hi pawi ka ti khawp mai" ka tih chuan ka pa chuan

"Vawiin atan chuan a tawk rih e, naktuk lamah kan sawi ṭha dawn nia" a rawn ti leh mai a, keipawh chuan ka room lam chu ka pan zawm nghal.

Ka room chhunga ka luh chuan ka Jacket chu ka hlip a, khumah chuan ka bawk nghal thlawp. Kimtei chu ka ngaihtuahnaah a rawn awm a, phone phawrha biak ka tum lahin Switch off a inti zel mai bawk si. Ni e, Kimtei hi engkim ka hrilh a ngai a ni! Ka chunga a chet dan tur chu ka sawi lawk thei hauh lo va, mahse engtin pawh che se dem thei ka ni lo. A chhan chu keimah hi ka dik lo va, Kimtei chu bum ka duh lo ang bawkin keimah leh keimah chu ka inbum thei tawh lo a ni.

Chapter 4

Zing a lo ni a, ka zing tin tih ṭhin danin Gym room lam chu ka pan leh nghal chat. Ka duhtâwka ka taksa ka sawizawi hnu chuan ka room lamah ka chho leh a, shower chuan ka taksa ka inphuhtir zui cher chêr bawk. Chutia tui ka lu aṭanga a inphuh thlak ser sêr lai chuan Mambawihi bawk chu ka mitthlaah a rawn lang leh nawlh a, ngaihtuah pawh ka tum miah loh chu ka rilruah leh ka mitthlaah a rawn awm leh ta reng mai. Mambawihi chu ka ngaihtuahna aṭanga paih chhuah tumin ka lute chu ka'n thing nawk nâwk a, mahse chu ka thil tih chuan sâwtna pakhatmah a nei lo.

Tukṭhuan kan ei lai chuan ka nu chu a ṭawng bawrh bawrh a, zan lama ka chet dan mawi lo tak avang chuan min zilh mawlh mawlh a, kan ina hnathawk tura kan awmpuite paw'n kan chaw ei chu min vil reng bawk. Kan awmpuite chu kan awmpui nimahse keimah chauha chaw ka ei hi chuan kan dawhkana chaw ei ve turin ka ti mai ṭhin a, ka nu leh pate nena kan ei lai erawh chuan ka nute'n an sawm ngai lo bawk nen kan bula chaw ei ve turin ka sawm ngai ta bik lo. Kan ina hnathawk tura kan lâk kan awmpuite hi hmeichhe pahnih an ni a, kan in chu a zau ve tho bawk nen pahnih chu a tawk ka ti hle.

Tun hnua ka ngaituah hian keini chhungkua leh kan thlahte ho hi veng khat mi hausa kan lo ni deuh fur hlawm a, naupan lai te kha chuan thil chik nachang kan la hre lo bawk nen kan chhungkaw hausa kan ni em tih te kha kan rilruah a awm ngai lo hrim hrim. Fa mal ka ni bawk a, ka tet laia thiante thil neih ka awh kha chuan ka nu leh pate khan min leisak ngei ngei zel. Toys te ka lo va han ngah thei tak! A tam zawk kha chu ka nu leh pate min leisak ni lovin ka pi leh pute, ka patea te leh ka nutei te hnen aṭanga ka dawn an ni hlawm.

Tin, ka pa hi Class 12 ka pass hnu aṭang khan MLA a ni a, ka nu erawh chuan a ngai ngaiin Bazar pui lamah thawmhnaw dawr a la enkawl chhunzawm zel thung. Ka pa chuan Driver chhawr a nei a, chu chuan ka in hnuai luahin min awm chilh bawk. Kan inah chuan mi pali kan awm a, kan awmpui langa lo kalte nen chuan paruk ang pawhin a sawi theih tho. Mi tam tak chuan ka pa MLA nihna chu kan chhawr an ring ṭhin a, mahse kan chhungkaw tan leh keima tan chuan chhawrna tur pakhatmah a awm lo.

Saint Paul's aṭangin Class 12 ka pass a, Medical lam leh Surgery lama kal ka duh avangin All India Institute of Medical Sciences, New Delhi-ah chuan entrance ka pe zui nghal a, vanneih thlak takin ka lo tling ve hlauh bawk. Ka thiam leh thiam loh chu thuhran ni se ka tlin chhan ber nia ka hriat chu North East aṭanga entrance pe an awm loh vang leh Scheduled Tribe quota a lo awm ṭhat êm vang a ni.

Zirna avanga New Delhi-a ka awm chhung zawngin ka nu chuan min awmpui a, hetiang technical line kan tih mai medical lam hi academic line te ang ngawr ngâwr a nih loh avangin a zir hun chhung pawh a lo rei deuh bik a, kum 5 leh a chanve vel ka zir hnuah MBBS course chu ka zo a, zir belh leh ka duh avangin kum 2 dang chu Medical lam zirna'n ka hmang zui leh ta bawk. Ka zir chhung zawngin keimah min tibuai thei leh ka zirna tichhe thei thil tawn ka nei ngai mang lo va, chung avangte pawh chuan ka zirlai chu ṭha takin ka zoh theih phah a ni.

Mizorama ka haw leh hnu chuan hna ka zawng nghal a, Aizawl Civil Hospital-ah chuan Doctor an mamawh belh hun lai tak a lo ni bawk nen ka dil ve nghal hmiah bawk. Kan vanneiha zarah Doctor hna thawk tur chuan ka tling ve leh hlauh mai a, kha ta ka tlingte kha sawisel neuh neuh a tamin mi chuan min sawi duh hlawm hle. Ka pa chuan Aizawl Civil Hospital-a thawk hmelhriat a lo nei a, chu a hmelhriatpa lah chu Senior Doctor niin kan inrerview paw'n a ṭhu ve nghe nghe. Mite chuan ka pa sawipuina leh thamna hmanga Doctor ni thei ni tein min sawi a, mahse chutiang chu ka ni hauh si lo.

Ka pa chu MLA a ni meuh mai, mahse ka hna dilna kawngah chuan pakhatmah a inrawlh lo. Vawikhat kha chu sawipui ka duh leh duh loh kha min zawt tawh ngei alawm, mahse kei chuan ka thiamna ngeia tlin ka duh avangin sawipui ka ngaih loh thu leh a hmelhriat pawh awm se lo inrawlh miah lo turin ka hrilh ta zawk a nih kha! Chutianga ka sawi avang chuan a inrawlh miah lo turah la ngai a, a lo inrawlh lo reng bawk.

"I fapa hi chu ka hre tawh a, nangmah lam ka ngaihtuah lo chung pawh hian ani tluka he hna thawk tur hi an awm chuang lo. A zir chhuahna hmun a ṭha a, a percentage a ṭha a, exam leh interview lah a tiṭha em em bawk si, a thawk tur dik tak kan la a ni e" tiin ka pa chuan ka hna hmuh tirhin a ṭhianpa sawi dan chu min hrilh leh chhawng a, ka lawm ve tak tak a ni!

Ka rin ai daihin ka thawhpuite chu an fel a, mipa tam lo mahse hmeichhia ho chuan min be peih em em thung ṭhin. Thla khat ka thawh hnu phei chuan an hming ka hre ve fur hlawm tawh a, keipawh ka hmingin min kô min ko ve ṭhin bawk. Mi tam zawk chuan Doctor Marem tiin min ko mai zel a, Doctor ni mah ila ka hming bula Doctor tih an belh kher chu ṭul ka ti vak lo va, mahse tunah chuan ka pawm thiam ve tawh ta mai. Doctor min tih bik kherna chhan ka zawh chuan ka hna ka tlin vangte, dam lo leh hliam tuarte ka bawihsawm thiam vangte a nih thuin min lo chhang a, an mi hmuh dan leh sawi dan chu ka phu lo tak zet a ni.

Chaw kan ei kham chuan ka hnathawhna hmun lama kal turin ka insiam a, ka insiam zawh chuan ka chhuak zui nghal bawk. Civil Hospital lama ka tlan phei lai chuan Mambawihi bawk chu ka zawng ru leh a, ni dang ang lo takin an chawhmeh zawrh ṭhinna hmunah chuan a hmel hmuh tur a awm hauh lo. Chutia ka hmuh tum ber a awm tak si lovah chuan ka tlan tlang a, Mambawihi erawh chuan ka ngaihtuahna a luah ran tawh. Ka tum ngîal pawha ka theih loh avang chuan Mambawihi chu ka ngaihtuahna leh rilru aṭanga paih chhuah chu ka tum buai lo ta law law a, a awm awmin awm mai teh se ka ti ta ringawt.

"Hello" ka beisei lo deuhin Kimtei chuan ka phone call chu a lo pick-up a, a aw te lah chu a la ṭial deuh ruai ang zui a!

"Kimte, inhmu lawk ang, kan inbiak a ngai" a off mai ang tih hlau tak chuan ka ti thuai a, mi pawh chhang lova a la ngawih reng avang chuan

"Zaninah ka lo lam ang che aw, kan inhmu dawn nia" ka ti leh a, Kimtei chuan min chhang let miah lo hian kan inbiakna chu a titawp zui hmak.

Kimtei awm dan chu ka dem lo va, a pasal hual hi ka che mawi lo ve bawk êm a ni. Kimtei tawn ang chu tawng ve ta ila, ani ai aiin ka che rapthlak zawk maithei a ni. Thil ziah fel neuh neuh ngai leh Ward fan turte ka tih zawh hnu chuan la inthlak a, khua a tlai ve leh duai tawh bawk nen haw mai chu ka tum nghal bawk. Ka motor chhunga ka ṭhut luh rual chuan Kimtei leh a u kawngpui an cross lai chu ka va hmu a, motor aṭanga chhuaha va biak vel chu duh vîau mah ila ka chhuak duh ta chuang lo. A chhan chu Kimtei chu zana hmuh law law chu ṭhain ka hria a, chubakah ka hmel a hmuh duh kher pawh ka ring lo.

Ka haw kawngah chuan Mambawihi te chu ka mitmei phei leh a, mahse tlai dang ang lo takin an hmel hmuh tur a lo la awm lo cheu. Chutia chawhmeh pawh zuar lova an hmel ka hmuh tâk si lovah chuan Mambawhi leh a nu chuan harsatna eng emaw an neih ka ring ve ta ringawt a, motor khalh pahin an awm dan tur chu ka ngaituah zui roh roh bawk. Zanriah kan kil zawh chuan chhuak turin ka insiam a, Kimtei chu call hmasa kher tawh lovin lam phei tawp chu ka tum a ni.

Kimtei te in ka thlen chuan Kimtei chuan TV hi a lo en a, chhuak tur pawhin a lo la inchei lo hrim hrim. A nu leh pate chuan min lo be bawrh bawrh a, an makpa hual kha ka ni ve miau bawk si alawm. Rei ve deuh hlek ka ṭhut hnu chuan Kimtei chu hruai chhuah ka dil a, an lo phal nasa khawp mai. Kimtei chu ngawi reng hian a room lamah a chho a, a insiam turah ka ngai ve hmiah. Kei chuan a nu leh pate chu ka lo titpui ve luam a, innel tawh tak kan ni. Rei lote hnuah Kimtei chu in chung lam aṭang chuan a rawn chhuk a, a hmelah chuan lungawi hmel reng a la lang thei lo.

Kan kalna hmun tur pana kan tlan lai te chuan a la ṭawng chhuak duh lo hrim hrim a, kei lah chuan han sawi mai tur ka vân em em leh nghal. Chhun lama Table ka lo book lawk tawh angin Hotel Regency lam chu ka panpui a, zep lovah chuan min be siam siam lo chu hrehawm ka tiru ve reng. Ni dang ang chu ni se min tlawn leh hâr har ang a, ka nupui a nih châk tawh thu a sawi leh vak vak ngei ang. Building chhung kan luh te chuan ka kalna hmun apiangah chuan ngawi reng hian min zui ve tawp tawp a, kan ṭhutna tur hmuna kan ṭhut thlak hnu pawh chuan a la ṭawng duh chuang lo.

"Kimte, thil pawimawh deuh mai hrilh tur che ka nei a" kan inhmachhawn reng tâkah chuan ka ti a, ani pawh chuan min lo en ve kar.

"Ihhhh, eng lo a nia, inneih hi ṭhulh leh ka duh a ni" ka tih chuan a hma ai zawngin min melh rum a, ka thusawi avang chuan a thin a rim hle tih pawh ka hria, mahse a hnenah hian ka sawi chhuah a ngai tlat a ni.

"Tunge? Tu chu nge kan inneihna lo awm mai tur ṭhulhtir duh khawp chea lo ngaizawngtu che chu!? Sawi rawh, kei hian chu nu chu ka pasal hual a lo ngaihzawn ve avanga inchhir ngawih ngawihin ka siam ngei ang" a rawn ti chhuak phiar a, kan bul hnaia ṭhu ve te pawh chu a ngaihsak tawh lo hrim hrim.

"Kei hian ngaihzawng ka nei lo va, min ngaizawngtu pawh an awm bawk hek lo" ka tih lai chuan

"Dawt, engatinge dawt hi min hrilh reng? Sawi rawh LALREMRUAT, tunge i ngaihzawng chu?" a rawn ti vin leh nghal ṭhawt.

"Ka sawi tawh khâ, ngaihzawng pakhatmah ka nei lo va, min ngaizawngtu pawh an awm lo"

"A nih si chuan engatinge thla leh maia kan inneihna lo awm mai tur hi ṭhulh i duh? Ngaihzawng i neih si loh chuan enge a chhan?"

"A chhan chu nupui neih hi ka la inpeih lo a ni. Nangmah neih ka duh loh vang che pawh ni lovin, keimah lam zawk hian ka la inpeih lo a ni"

"Enge i sawi tum? Tlang takin sawi mai rawh LALREMRUAT"

"Tun ai hian la inngaizawng rei deuh mai ang, chuan keipaw'n nupui neih ka zuam ve tawh mahna" ka tih zawh rual chuan a rawn tho kang a, chutah Kimtei chuan

"Nepa, dawihzep pa" tiin a bula tui chuan ka hmaiah a rawn theh pawp a, thinrim tak hian a kal chhuak zui nghal vang vang bawk.

Kan ṭhutna bula mi lo ṭhu ve te chuan min en hrek hrek a, kan awm dan chu a zahthlak ka ti hle. Kimtei nen chuan puitling, chhia lehṭha hre chin ṭhah ve ve kan ni a, pangai taka kan sawi dun theih ka rin avangin Hotel Regency-ah Table te ka lo book ve thlap a, mahse mualphona bak ka tawng ta chuang si lo. Hotel kawta ka chhuah chuan Kimtei chu ka zawng buai duh lo va, a chhan pawh kan inhauh ni khuaa a tin fô ṭhin angin hruaitu a nei leh thlap tawh tih ka hriat vang a ni.

Ka motor-ah ṭhu chuan lutin ka inkhalh chhuak nghal a, zirtawp zan a ni tih ka hriat chhuah avangin KFC dawr zawnah chuan ka ding a, ka lei ta ṭeuh ringawt. Ka lei chhan ber chu ka ei duh vang ni tho mahse Mambawihi te ina len ka tum hnuhnawh vang a ni. Mak tak maiin Kimtei min tih dan avang chuan zak tho mah ila ka rilrua ka pai ruk reng ṭhin ka sawi chhuah tâk avang chuan ka thaw a veng hawk a, Kimtei chu ka vei zui lo a ni ber. Ka thil sawi avangin Kimtei chu nupuiah ka nei dawn lo emaw ka ṭhen dawn emaw tihna a ni lo va, inneih ka la peih rih lo mai a ni.

Chutianga thil chi hrang hrang ngaihtuah kual chunga motor ka khalh mial mial hnu chuan rei lovah Khatla chu ka lo thleng der a, a la tlai lutuk lo bawk nen motor vei vak pawh an la tam ang reng hle. Motor aṭang chuan chhukin ka inkhai bawr deuh ṭun a, Mambawihi te nufa chuan hrilh lawk miah lova ka kal chu mak an lo ti khawp ang le! Mambawihi te in luah kawngka zawn ka thlen rual chuan kawngka chu ka kik ri karh karh a, chhung lam aṭang chuan Mambawihi nu aw ngei chuan lut turin min lo chhawn nghal bawk.

"Êeee Doctor Marema chu, enge zanin ang ah te kan inah i lo tih dawn a?" min hmuh rualin Mambawihi nu chuan a lo ti sawk sawk a, an fel nufa bawk a, an ina len hi chu a nuam ṭhin mang e!

"Eng ni lo ve, khawiah emaw ka kal a, ka lo peng kawi lawk a ni hi! Chuan, hei ei tur te ka lo keng e ka ti a, in phal chuan zanin chu lo len reng ka tum a nia" nelawm tak chuan ka lo ti ve duah a, anni nufa hi chu nel loh theih pawh an ni lo.

"Êeee tehreng mai, i duh chen chen i leng dawn nia" Mambawihi nu chuan a rawn ti ve leh a, keipawh chuan ka thil lei KFC phawrhin ka ṭhutna bulah chuan ka hung nghal bawk.

"Khawnge Mambawihi hi? Ka va hmu mai lo ve" ka luh tirh aṭanga ka zawn ruk leh ka hmuh châk em em ka hmuh mai loh avang chuan ka ti a, ani te reuh pawh hi khawnge maw a awm reng reng ni!

"Mambawihi chu a in, e....saw, a lo chhuak chiah alawm" tia Mambawihi nu'n min rawn chhan rual chuan a hawina lam chu ka hawi phei ve a, Mambawihi chuan towel var leh thianghlim sar mai chu a awm thlengin a lo bih a, a lu chu towel var thovin a lo tuam bawk. Chutah Mambawihi chu che thutin bathroom-ah chuan a inkalh khum zui daih a, ka bula mi chuan

"Mambawih, i zak em ni? Doctor Marema te chu a zahthlak hleinem, ani te chu kan chhungte angin ngai ta che" a lo ti ve thuai a, Mambawihi awm dan avang chuan ka nui chhuak teuh ngei mai.

Amaherawhchu Mambawihi taksa ka hmuh kha chuan ka nuih a za miah lo a nih ber kha! Inbual zo tih hriat taka a vun fai sâr mai te, a vun var han te, a mal lang chin leh a chawn no tak te kha hmu rei hman lo mah ila hmuhnawm ka lo va ti hman si em. Mambawihi chu an bathroom chhungah chuan a tawm ta tlat a, a nu'n chhuak tura a hrilh hnu pawh chuan a lo la chhuak duh hauh lo. Chutah kei chuan tihtur nei niin ka inhria a, ka ṭhutna aṭang chuan tho kangin Mambawihi tawm tlatna bathroom lam chu ka pan zui nghal bawk.

"Mambawih, engmah ka hmu hman hleinem, ka lakah phei chuan zak duk reng reng suh" bathroom kawngkhar bula din pah chuan ka ti a, ka nuih lah chu a la za ru em em zui.

"U Marem, khatiangin lo ṭawng lo teh, ka zak teh mai a nia" bathroom chhunglam aṭangin Mambawihi chuan a rawn ti deuh bui bûi a, eng ka hria nge maw ni chutianga bang chhana inbiak chu nuam ka ti reuh tlat.

"Zanin chu lo leng lo mai rawh, i haw hma chu bathroom aṭang hian ka lo chhuak dawn lo bawk" a rawn ti leh nghal a, kei lah pek chuan

"Ka lo leng duh alawm, ei tur te ka lo ken ve em em che u a, chutiang mai maiin haw leh ka tum hleinem" ka lo ti ve leh ta tlat.

"Ka fiamthu lo a nia u Marem, sawi lo mahla i hmu hman vek tih ka hria" a rawn ti leh reuh a, enge ka hmuh hman ber chu ni reng reng tih hriat tum tak chuan

"Eng maw ka hmuh hman?" ka lo ti let ve nghal a, kan inbiak dan chu a naupangchhia tak zet a ni.

"Ka âwm kha i hmu hman vek tih ka hria alawm, zanin chu lo leng lo mai rawh u Marem" a rawn ti zui ve leh zat a, ka nui chhuak ta nge nge.

"Nui nui lo khan in inah va haw vat rawh, engatinge kan inah te i lo len reng reng?" thinrim aw deuh tak chuan a rawn ti tan tân a, kan awm dan vel chu a ning ve tawh te pawh a ni ang.

"Ka lo leng châk alawm, nangmah ka hmu châk che a, chuan ka lo kal tawp a nih hi!" ka ti leh thâwr a, mahse a nu hriat laia ka rilru dik tak ka sawi chhuak erawh ka inthlahrung thar hle. Mambawihi nu lam ka va hawi chuan ṭhen ṭhaw hian min lo en reng a, ka ṭawngkam hman sual chu fiamthuah lo ngai se ka ti a, a hriatthiam loh hram ka beisei.

"I over êm mai aw, inthlak ka duh tawh a nia, haw tawh mai rawh u Marem" a ngawih vang vang hnuah chuan a rawn ti leh a, kei chuan

"Ka lo thleng ve deuh chiah a, haw leh nghal mai ka tum hleinem" ka lo la tilui tlat a, ka fiamthu rei mah mah ang tih chu ka hlau ru hle bawk.

"A nih chuan pawnah lo va chhuak rih la, ka inthlak fel hnuah i lut leh dawn mai nia" haw tura min nawr lui tawh lo chuan a rawn ti ta nge nge a, haw tura min tihna lai tak kha ka duh lo reng a ni!

"Aw le, i zak tlat bawk sia ka lo va chhuak mai ang" tiin keipawh chu ka pen sawn a, pawnah chuan ka va ding ngawi ta reng ringawt.

"Ka lo lut thei tawh em, Mambawih? Ka lo lut dawn nia" pawn lam kawngka hmaa ka din deuh vang vang hnu chuan ka ti a, chhung lama mi chuan ka fiamthu a ni tih reng hre lo hian

"Aih, lo la lut suh, ka la inthlak zo lo" a rawn ti thuai a, a aw a rin ṭhat danah ka luh chu a la hlau tak zet tih ka hre thei.

Pawna ka din tâk reng avang chuan thlang lam chu ka hawi a, Khatla East biak in pawh ka hma lawkah a lo in hung run mai. Mi vei vak leh ei chawp dawr hawng chu an la awm neuh neuh a, mihring ṭawng ri lang lâng thawm hriat tur pawh a awm bawk. Ka hawi kual vel a, in chhawng sang tak tak te leh ṭha tak tak te chu ka hmu a, mahse chungte chu sumdawnna peng pakhat ve mai an ni. Tun ang laiah phei chuan in luah man hmangin a inchawm theih tak tak tawh a, sawrkar hnathawkte hlaw aia tam daih in luah man hmangin thla khatah pawisa a lak luh theih tawh zawk bawk a ni.

"U Marem, lo lut rawh" tia Mambawihi min lo biakna lam chu ka hawi a, a mit taka ka en hmain a lut zui nghal daih.

"Ka fanu hi chu lo la hrethiam hram hram mai teh khai, a naupanna hi a rawn lang leh thut ṭhin a" in chhunga ka luh rualin Mambawihi nu chu chuan a lo ti sawk sawk a, min lo nuih sâng bawk.

"A ho lutuk ka pi, mahse nula te a ni ve uai tawh a, khatiang mai mai a zah te chuan bialpa pawh a nei thei nâng" Mambawihi huat tur tawk lek chuan a nu chu ka lo chhang let a, Mambawihi chu ka hmu lo der hmak thung.

"Awi awi awi, ka duh chuan bialpa te chu ka nei ve thei chiang em mai a!" ka rin ang ngeiin Mambawihi chuan a rawn ti nghal vat a, chutah a nu zawk chuan

"Mambawih, i sawi tâkah chuan in school kalpui ṭhin pa kha a lo va leng khât ta ve, in inhmu tawh ngai lo em ni?" a rawn ti a, chutianga mipa dang nena Mambawihi an inhmu vel tura ka hriat avang chuan ka lo thinrim ru nghal ṭun ve ringawt.

"Hmuh chu kan la inhmu zeuh zeuh a, mahse kan ina rawn len hi chu a duh tawh lo a ni ang, kan in lah hi a ṭha vak bik bawk si lo va" tiin Mambawihi chuan a nu chu a chhang a, ka awm laia mipa dang chanchin an sawi chu ka ngaithei ṭhak lo.

"Ka hmuh hlau em em nu chu thingpui lum i tum miah lo em ni? I thingpui lum in châkin ka rawn leng ve vang vâng a, tunah phei chuan ka in châk tawh teh mai a nia" titi dang vawrh tum zet chuan ka ti a, Mambawihi erawh ka koh dan ber kher avang chuan a lo ner deuh sâwng.

"Dik chiah Mambawih, thingpui chu va lum ta che, hei Doctor Marema hian ei tur te a lo keng a nia" tiin a nu chuan Mambawihi chu a tur tho a, Mambawih lah chu mi melh râw raw chung hian a kal ve leh mai bawk.

A hnung lam aṭang chuan Mambawihi chu ka en zeuh zeuh a, a nu nena kan titi avang chuan duh ang takin ka en ṭha thei lo zawk a ni. Mambawihi nu chu a ṭawng sîam siam a, kei chuan ka lo chhawn ve zeuh zeuh bawk. Thingpui a rawn chawi phei lai te chuan Mambawihi chu ka lo thlir reng a, rei erawh ka en reng duh ta bik lo. Ka bula KFC bawm hnih chu ka la kang a, ei mai theih turin ka hawng zui bawk. Mambawihi bawk chuan KFC a ei leh mai duh ta tlat lo va, mahse kan ei tura ka ken a nih thu ka sawi fê hnuah chuan a ei ve ta chauh. A nu chuan ha a nei ṭha tawh vak lo tih hriat tak hian pakhat pawh chu a ei rei hle a, Mambawihi ve thung chuan tui a ti tih hriat tak hian a ei mawlh mawlh.

Zan a rei tak tak hmain keipawh chu ka haw a, ka haw dawn te chuan Mambawihi chuan min lo thlah leh thlap bawk. Zan tir lam boruak chu rit hle mahse zan tawp lam erawh a zâng vah a, a hlimawm a, chutiang zan nuam leh hlimawm chu ka tawng khât hle bawk. Ka khuma ka mut lai te chuan Kimtei ngaihtuah awm zawk tak si chuan Mambawihi chu ka ngaihtuah leh ta tlat a, ka rilrua Mambawihi a awm tlatna chhan chu ka hre lo a ni.

Chapter 5

"Nu, pa, thil sawi duh ka nei a" tukṭhuan kan ei lai chuan ka ti a, ka nu leh ka pa chuan min lo en nghal vat bawk. Chutah ka pa zawk chuan bai hawp pah hian

"Sawi la, kan ngaithla reng alawm" a rawn ti a, ka nu pawh chuan min zawt buai vel leh kher tawh lovin ka pa thusawi chu a ring niin ka hria.

"Nupui neih hi ka la duh lo, thla leh maia kan inneihna lo awm tur hi ṭhulh ka duh a ni" ka chaw pawh ei lova ka tih chuan ka nu zawk chu a rawn hawi kang vat a, min melh chiang ngei mai.

"Enge i sawi awmzia? Engvanga nupui neih leh loh chu duh thut nge i nih LALREMRUAT?" ka nu chuan a rawn ti hrawk a, ka pa pawh chuan min lo melh ve ran mai.

"Keimah hian ka la ngam lo, nupui nei em tur chuan ka la inpeih lo a ni ber. Amaherawhchu Kimtei hi ka ṭhen dawn tihna a ni lo va, kan la inngaizawng reng dawn tho a ni" ka tih leh chuan ka pa ve thung chuan

"A nih si chuan engatinge palai te kha tir tura min tih? Hetiangte chuan keini tan a mualpho thlak rualin Kimtei te lam pawh an mualpho hle dawn asin" a rawn ti a, ka pa sawi dik vîau mahse nupui neih chu ka la inpeih ngâng lo a ni.

"Ka tihpalh pa, mahse Kimtei khan min tur hmanhmawh ve êm bawk a ni. Ka thuthlukna hi min pawmpui thei hram ula ka ti, chuan tun aia hun duhawm zawk leh rem zawk pawh hi a lo la inher chhuah thuai ka ring bawk" ka tih zawh rual chiah chuan

"Ngaihzawng i nei em ni? Kimtei aia ngaihsak leh duh hmeichhe ngaihzawn i nei em ni? LALREMTUAT, hetiang mai mai hian inneihna hi infiamna atan an hmang ngai hleinem" ka nu chuan a rawn ti a, a chaw pawh chu a ei tawh lo hrim hrim.

"Kimtei i sawipui tawh em? Heng chungchang vel i hrilh miah lo a nih chuan hrilh vat la, thil awm dan tur hi keini duh dûha lo tih kawi theih pawh a ni lo" ka pa chuan a rawn ti ve leh nghal a, chutah kei chuan

"Nizan khan Kimtei chu ka hrilh tawh ngei alawm, mahse ka thu hrilh avang chuan a lawm lo khawp mai" thu zep emaw sawi kim loh emaw neih pawh ka tum tawh bik chuang lo.

"Kimtei chhungte lam pawh keimahni ni lovin nangma'n va hmu vat la, engkim a dik takin hrilh la, an thuthlukna ang âng chu keini thuthlukna a ni tawh mai. Marem, i sawi har mah mâh lo maw? Thla leh mai khi in inneih hun tur a ni tawh a, anni pawh an lo inbuatsaih vel mek tawh ang chû" ka pa bawk chuan a rawn ti leh a, ka nu ve thung chuan

"LALREMRUAT le! Fapa lak tlak loh tak i lo ni e, i thil tih hi mi pangai tan chuan lak nat loh chi pawh a ni lo vang" tiin a kham nghal daih a, thleng te chu glass tile-ah chuan a dah ri ṭhuai a, a rik dan aṭang chuan a keh te pawh a ang alawm.

"Nui, vak vak ṭhin che hian, thil ṭha lo tak pawh a la thlen em loh hî" ka pa chuan a lo ti zui lawm lâwm a, ka nu erawh chuan ka pa ṭawng pawh ngaihsak lovin a kal hmawk hmawk thung.

"Marem, i chiang maw? He i thil tih tum hi i ngaihtuah ngun tawh em? Nakîna i inchhir leh na mai mai tur nia i hriat chuan thil hi a la kal buai lo a nia" ka pa chuan min en ran chung hian a rawn ti leh a, ka pa chuan ka nu ai thlâwt chuan min thlâwp ve deuhin ka hria.

"Aw pa, ka ngaihtuah nasa tawh alawm. Chuan ngaihzawng ka nei miah lo a nia, ka nu khan ngaihzawng nei turah min ngai nghal ringawt a, i lo hrilhfiah ve tawh mai dawn nia" thutak zeta ka tih chuan ka pa pawh chu a lo bu ve nghauh nghauh a, ka pa awm dan avang chuan ka thaw a va ven phah si em.

Chhun lamah chuan ka buai leh ta phian a, motor accident tawk neuh neuh an awm avangin ka awl lo a ni ber. Chhun chawlh a lo hun a, Dr. Tetei chuan thil ei chhuahpuia min sawm tlat avangin ka chhuahpui a, Mellinium Centre building chhungah Lunch chu kan ei zui ta bawk. Dr. Tetei chuan thil chi hrang hrang min sawipui a, a nui sen sen reng a, a zia nelawm lutuk avang chuan ka nûi ka nui ve ta ringawt. Chutia kan titi melh melh lai chuan

"LALREMRUAT" hmechhe aw hian a rawn ti a, min kotu awmna lam ni awma ka hriat chu ka hawi phei a, Kimtei ngei a lo ni e.

"He nu hi em ni kan inneih pawh ṭhulhtir duh khawp che a lo ngaizawng kual veltu che chu?" kan ṭhutna bul a rawn thlen pahin Kimtei chuan a rawn ti phiar a, a bulah chuan mipa pakhat keimah aia naupang vel tur awm hi a lo ding ve reng bawk.

"Kimte, i ngaih ang kha a ni lo" ka lo tih lai chuan

"Enge ka ngaih ang chu a nih lohna? Hei a chiang reng alawm, ani hi i ngaihzawng chu a ni chiang lutuk" tiin kan dawhkana Sanpiau plate chu a la a, Dr. Tetei kawr âwmah chuan a theh ta pawp mai le!

"LALENGKIM, duh tawk rawh" ding chungin ka lo ti ṭhawt a, a tel vena pawh ni miah lova Dr. Tetei'n a tuar ve ta ringawt chu ka inthiam lo kher mai.

"Engtin maw tunah khan min koh? Kei i nupui hual ni mek hi he i ngaihzawng nu vang mai mai hian ka hmingpum te'n min ko vela maw!? LALREMRUAT, min phatsan a ni tih sawi miah suh" a rawn ti leh hlawk hlawk a, a ṭawng zawi lo bawk nen mi vei vak leh kan bul hnaia thil ei ve te chuan min en ṭhup mai.

"Khatiangin ngai kawi ringawt suh, ani hi chu ka thawhpui mai a ni e. Chuan, he lai hmuna intimualpho lo hian hmun dangah kan sawi thei reng bawk" aw nem lo tak chuan ka ti ve ta a, ka insum theihna te chuan min kalsan mai dawnin ka hria.

"A lo nih vel tak chu! Ti rawh Bawiha, he mite hmel hi ka hmu reng peih lo, i kal daih teh ang" Kimtei chuan a rawn ti leh a, mahse a bula mi a koh dan chuan ka thin a khei ta tlat.

"Enga!? LALENGKIM tunah khan engtin maw i bula mi kha i koh?" a kal sawn tur a bana pawt let hrawk chung chuan ka ti a, a hmeichhia zawk pawh a zah loh phawt chuan ka zak awm bik lo em mai a!

"I hriat a ṭul si se lo ve, i duh leh i ngaihzawng nu nen khan thil te lo ei dun ziah vel ula, ka buai peih tawh lo ve!" tia min rawn chhang let hrawkin Kimtei chuan a ban ka vawnna chu a phih thla a, a bula mipa chu kaiin a kal chhuahpui nghal daih.

"Tete, i ṭha em? A va'n zia lo tak, Kimtei aiawhin ngaihdam ka dil mawlh mawlh a che, khawi maw i kawr chu ka lo hru fai ang" tiin a kawr hruk fai mial mial lai chu ka rawmawlin ka hru zui nghal a, a lakah chuan ka va inthlahrung tehreng em.

"A pawi lo, ka hru fai ve thei alawm" rawn ti eng mahse a kawr chu ka hruk faisak lui hmiah hmiah tho.

"Enteh Bawiha, enge kan hmu tâk hi? Heti hian ka ngaihzawng a ni lo te chu a ti leh ta nghal a, hei bak baka inngaizawng hi he khawvel ram zau ah hian hmuh tur an awm lo vang" ka hnung lama Kimtei rawn ṭawng ri chu ka hre leh a, a rawn let leh tih chu sawi kher ngai lovin ka hrethiam mai a, engvanga rawn let leh nge a nih ka hre hauh lo.

"Enteh u ṭhiante u, Doctor Marema nen hian kan inngaizawng hauh lo, kan thawk dun mai chauh a ni" Dr. Tetei'n a tih lai chuan Kimtei chuan

"Nang nu kha lo ngawi hmak rawh, lo ṭawng ve ngam tur pawh i ni lo" a rawn ti vin leh hlar a, ka insum theihna chuan a tlin tawh bik ta lo.

"Tete, kha ka rawmawl hian lo inhruk chhunzawm mai rawh" tiin Kimtei leh a bula mipa lo ding ve ziah tei vet lam chu ka hawi a, thinrim taka melh hrawkin Kimtei banah chuan ka vuan nghal chat.

"Min lo zui rawh" tiin ka pawt sawn dawr dâwr a, chutah kan bula mipa ka hmuh hne em em lo awm ve reng ringawt mai chuan

"Hei, engvanga ka phalna la hmasa lo va ka hmeichhia kha hruai ringawt nge i nih?" a rawn ti vin ve hrawk a, tunah khan saw mihring phiangsen sawn Kimtei hi ka hmeichhia a ti em ni?

"Enga!? Engtin maw LALENGKIMI hi koh?" tiin a lamah chuan ka inher vat a, kan inmelh ta ran mai.

"I beng a ngawng em ni? Ka hmei" a tih lai chuan a khabe ah tak ka hnek ta chawrh a, ka thinrim kut thlak a ni bawk nen ka kut thlak chu dawl lo vet vet tak a ni.

"Hmela, i zak em? Ka nupui hual hi ka hmeichhia te i lo ti vela maw!?" tiin a tlu tawh rawn tho kang leh tur chu ka hnek zui mawlh mawlh a, min khân lo bawk nen thisen pawh a chhuak ta nual.

"Duh tawk r'u" tiin patling aw ngei mai hian a rawn ti tûar a, min rawn nam sawn deuh lâwp bawk.

"In zak miah lo em ni? Ka dawr chhungah hian nang ni ang ho hi chu vawikhatmah lo chawl leh tawh ngai suh u, inthlahrunna te nei ve ik ta che u" thinrim tak hian a rawn ti chhuak hlawk hlawk a, chu pa chu kan chawlhna dawr neitu a nih ngei a rinawm.

"Kan tipalh ka pu" ka inthlahrun lutuk avang leh ka chet dan a mawi loh em avang chuan ka ti ta nge nge a, chutah dawr neitu pa vek chuan

"Khatianga ngaihdam min dil leh tur si chuan buainate kha siam loh mai tur alawm, nula leh tlangval vek in nih tawh avangin awm dan mawi leh dik tal chu hre ve tawh ta che u" a rawn ti leh a, a ṭawngkam aṭang chuan a thinrimna a la reh lo chiang hle tih a lang.

"Kan tihpalh tak zet" tiin LALENGKIMI ban chu nghet takin ka vuan a, ka kal chhuahpui nghal nal nal.

Kan thil eina dawr pawn kan thlen chuan a bul vela thawmhnaw dawra lo ṭhute leh mi vei vak te chuan min lo en zui hrek hrek a, ka hriat chian phak si lova an ṭawng rik neuh neuh avang chuan kan chanchin chu an sawi zui tih ka hrethiam mai. LALENGKIMI vanga ka ni hman mek chu ka hne hle a, ka zak a, chutah ka la mualpho phah em em zui. Motor chhungah chuan ka nawr lut hmawk hmawk a, ka bula mi chuan ka thinrim a ni tih a hrethiam a ni chêk ang kam khat pawhin a ṭawng chhuak leh tawh lo hrim hrim.

Motor chu ngawi rengin ka khalh mial mial a, zep lovah chuan ka thin a rim tak zet a ni. Kimtei chu nupuia neih la duh rih lo mah ila ka ngaihzawng ni mek leh ka nupui hual lai a ni tawh a, chutianga mipa dangin ka ngaihzawng ber ka hmeichhia an ti chu ka thinrim chhan ber a ni tawh. Kimtei chu inneih ka duh rih loh avangin ṭhen emaw ka tum phah chuang lo va, kan inngaihzawnna chu pawh sei hret ka duh mai chauh a ni. Engkim chu a kal dik lo kual vel vek a, a bul leh a tir chu keima thiam loh ni tho mahse Kimtei chuan a rawn tih buai belhchhah a ni.

"I phone kha min lo pe teh" ngawi renga kan awm dun hnu chuan ka ti a, kawng zau lai leh reh deuh laiah chuan motor chu ka tiding tawh bawk.

"Maw!?" hriatthiam loh hmel zeta min lo en chunga a rawn tih chuan

"Min pe vat mai rawh" thinrim aw tak chuan ka tih leh hrawk a, a hmelah chuan min hlauhzia ka hmu thei.

"Aw, ihhh, kha" tiin a phone chu ka lamah a lo lek kang a, keipawh chuan ka lo nghal vat.

"Hei hi enge a awmzia?" a phone hawn dawna password a lo dah thlap vel avang chuan ka ti chhuak leh hawk a, a hma te kha chuan password a dah ngai lo miau alawm.

"Kha kha maw, ka u fate'n ka phone khawih an ching thei lutuk a, chuan password ka dah ta mai a nih kha" hlauhthawn hmel fê hian a rawn ti thuai a, hawng tura ka mitmei avang chuan a phone ka ken lai la sawn chuang lo hian a rawn hawng ve nghal bawk.

"Hei hi tunge? Tunge Ricky Bawiha tiha i save hi?" Whatsapp ka luh hnua private message lo awm hnem ber ka hmuh rual chuan ka ti a, an inbiak dan vel chu ka chhiar zawm nghal a, mahse eng thil nge ka hmuh tâk hi!?

"Kha chu ka ṭhianpa a nih kha, LALREMRUAT a dik lo zawk ang hrimin min dawp kual vel suh" a rawn tih lai chuan

"Hei hi i ṭhianpa maw!? I ṭhianpa nen chuan hmangaihna thute in lo inhlan kual vel tihna em ni?" ka ti chhuak phiar a, mipa dang nena an inbiakna chu a hmuh theih ngei turin a lamah phone chu ka lek kang vâ a, min phatsana mipa dang lo ngaizawng ru reng tur chuan ka la ring thei chiah lo a ni.

"Ni lo, kha kha chu ka ṭhianpa tak tak alawm, ka ngaihzawng a ni lo" a thinrim hmel zawng zawng bo vek khawpin a rawn ti thuai a, a hmel awm dan te hlei hlei chuan min lo kawp ru reng tih a tichiang lehzual.

"LALENGKIM, engkim ka hriat hnu pawh hian dawt i la sawi hram dawn em ni? He mihring i biak pa pawh hi nichin maia ka kut tuartu kha a ni tih a Profile picture aṭang hian a hriat vek asin, engkim hi keima thiam lohah ka lo ngai hman hial tawh a nih kha maw le" ti chhuak hawkin a phone chu a lamah ka theh phei a, hriat duh lo mah ila Kimtei chuan kei lo mipa dang a hmangaih tih leh min kawp tih chu ka hre chiang em em lawi si.

"Marem i ngaih ang kha a ni lo, nang lo chu pasala neih ka tum lo hrim hrim, ka ti tak tak" ka bana rawn chelh chung hian a rawn ti a, a aw reng rengte chu a phelh phung mai.

"Enge pasala min neih i tum chhan hi!? Min hmangaih lo tih chu ka hre tawh a, min neih i tum chhan hi han sawi ve reng reng teh" a hmel pawh en tawh lo chuan ka ti chhuak sup a, tlem chuan nuam lo ka ti ve deuh a ni.

"Ni lo, ka hmangaih che alawm" a rawn tih lai chuan

"LALENGKIM, ka beng hriatah dawt sawi belh tawh suh" ka lo ti vin ṭhawt a, min hlau ve bawk a ni ang a rawn ṭap zui nghal.

"I mittui te kha ka hmuh laia titlain ṭap tei vet lo teh, ka hmu hne teh mai a nia. Chuan zaninah in inah ka lo kal ang a, engkim kan sawi fel vek ang" tiin motor chu ka tinung a, chak takin ka tlan chhuak zui nghal.

Hnathawk tura let leh chu duh vîau mah ila ni danga ka ban hun a lo nih duai tawh avangin Hospital lamah chuan ka tlan chho lo ta law law a, ka bula ṭep feih feih nu chu an in lamah ka thlah ta ringawt. Kan in lama ka tlan lai chuan Mambawihi thil zuara a au lauh lauh lai chu ka va hmu a, hmun dang hawiin motor park na tur chu ka zawng nghal chung chung. Chutiang taka ka mood fuh loh lai pawha Mambawihi ka hmu châk em em mai chu mak ka ti a, Mambawihi chuan Magnet ang maiin min hip a ni berin ka hria.

"Mambawih" tia a hming ka koh chuan ka lam a lo hawi vat a, keipawh chuan a bul chu ka thleng phei a ni der.

"U Marem, enge i tih a? Enge he laiah te i lo tih ve dawn?" tiin zawhna chu min lo zawt nghal mawlh mawlh a, inrinni tlai a ni bawk nen mi vei vak leh motor tlan chu an tam khawp mai.

"Chawhmeh hi ka lo zawrhpui dawn che maw le" tiin a zawhna chu ka ti lo chhang awlsam et a, ka thusawi avanga min en hâw avang chuan mak a ti tih ka hre thei.

"Maw? Min inzawrhpui dawn maw!?" hamhaih aw tak hian a rawn ti chhuak phawng a, kei erawh chuan ka lo nuih suk ringawt.

"Le! Vawiin tlai chu inhralh zo vek ila a ni mai alawm" tiin ka kawr chung chu ka bula ṭhutthleng lo awmah chuan ka dah thla a, ka Kamis var ban chu ka thlep tawm chho zui nghal bawk.

"Hei hei hei, a chi loh, i zak lo em ni u Marem?" anṭam tel ken kân tuma ka kun lai chuan a rawn ti a, a kut lawnga ka ban a rawn khawih avang chuan ka taksa chu a rawn za chuai ni berin ka hria.

"Ka tih awmzia chu hetianga chawhmeh zawrh vel hi i zah ka ring a, i duh leh ka bulah hian lo ṭhu la, keima'n ka lo zuar vek mai ang" chhang miah lova ka en reng avang chuan a rawn ti leh sep a, ka ban a vawnna pawh chu a dah thla zui zal zâl bawk. Chutah keipawh chuan har chhuak thutin

"Aw, ka zak hleinem, ka zawrhpui che chuan kan hralh ṭeuh dawn tih ka hre thei a nia" ka lo ti ve vat a, ka thusawi avanga a hmel a la buai em avang chuan ka nui lui deuh suk bawk.

"Ni lo, min zawrhpui lo mai rawh u Marem, i inchei nalh bawk si" ka zawrhpui phal lo deuh chuan a rawn ti leh hram a, kei erawh chuan ka tum chu ṭhulh ka tum teuh si lo.

"Incheina nalh tih vel mai mai a ho lutuk, inzuar ṭan ang aw" tiin anṭam tel chu ka kutin ka lek kang vâ a, chutah

"Hêtah anṭam kam zuar e, anṭam hi" tia a man zat sawi ka'n tum chiah chu ka hre ta hauh lo mai.

"Mambawih, anṭam hi engzah man nge?" Mambawihi lam hawi thla chung chuan ka zuk tihnuhnawh leh vel a, ani pawh chuan nui sen sen chung hian

"Tel khat kha sawmhnih man zel a nia, i duh chuan i ti lo thei tak tak a nia u Marem" a rawn ti ve a, mahse ka tum lui tho tih a hria pawh a ni ang a hma ang em em chuan min dan buai a tum tawh bik lo.

"Hêtah anṭam tuihnai ṭha leh tlawm em em mai kan zuar e, min lo dawr chur chur rawh u le" tiin thil zuar chuan ka au ta lûah luah a, ka beisei loh lutuk tak maiin mi chuan kan thil zawrh chu an lo en ve tak tak.

Kan thil zawrh lei tuma lo en te chuan min lo hre hlawm a, kei lah chuan tute nge an nih ka hre ve der si lo. Keimah ang thovin ka bula lo ding reng nu pawh chuan kan inhralh ta zung zung chu mak a lo ti a, kan thil zawrh lei tuma lo kalte chu biak nachang a hre lo lek lek zawk a ni. Chutiang bawkin kan bula nutling thil zuar ve te pawh chuan min lo en duh hle a, kei lah chu zah a hnekin ka la au rin belh ta sãuh sauh. Chutia chawhmeh zuara ka au lauh lauh lai chuan ka aw hriat hnu deuh hian

"Marem" a rawn ti a, ka hriat sual a nih ringin min kotu awmna lam ni awma ka hriat pawh chu ka hawi ta lem lo va, motor tlan thawm vel a tam em avang chuan tunge ka hminga min kotu chu ka hre mai thei lo a ni.

"Marem" aw ngai bawkin a rawn ti nawn leh tâkah chuan min kotu awmna lam chu ka hawi a, min kotu ka hmuh chuan ka thil tih lai chu ka tawp nghal chat.

"Pa" ka pa hmel ka hmuh avang chuan ka ti hluai ringawt a, sawi tur reng ka hre lo a ni.

"Enge kha laiah te i tih Marem?" motor-a la chuang reng chung hian a rawn ti a, chu veleh keipawh chuan

"Nia pa, ihhh, hei, thil ka zuar a" ka lo ti bah ta nuai ringawt. Chutianga tim daia ka lo en lai chuan ka pa chu a rawn nui chhuak hawk hawk a, keipawh chu ka pa ber a nuih avang chuan awmze hre lo zet hian ka nui ve suk ta ringawt.

"Aw le, khatianga ka fapa meuhin chawhhmeh i zuar a nih chuan chhan ṭha tak a awm ngei ka rin avangin tunah chuan a chhan chu sawi rih lo mai rawh, mahse i inhmeh lo lulai lutuk em mai Marem" la nui khi vur vur chung chuan a rawn ti leh a, ka inhmeh lo viau tak tak em ni lè? Chutah ka pa vek chuan nuih insum hmel zet hian

"Hei Traffic kan ti Jam palh a hlauhawm tlat mai a, tun atan chuan kan han haw phawt ang e. Chuan lo inhralh ṭeuh la, zanah report min pe dawn nia" a rawn ti a, a dirver chu tlan tura hrilh zeuhin min tlan pel zui nghal bawk.

"U Marem, kha kha i pa maw!? Nâaaa, ka va'n zak tak" Mambawihi chuan a rawn ti niah niah reuh a, kei erawh chuan ka pa chuanna motor thlek zui vawng vawnga a awm chu ka lo nuih ringawt thung.

Dar 5 leh a chanve velah chuan kan inseng fel a, Mambawihi paw'n ka inhralhpui ṭeuh avang chuan lawm thu min hrilh chhen mai. Kan chawhmeh hralh bangte chu ka motor chhungah kan khung lut vek a, Mambawihi tan chuan ka motor chhung chu bal dawn pawh ni se ka phal em em a ni ber. Khatla lam pana kan tlan lai te chuan Mambawihi chuan ni dang ang lo takin min be ve sîam siam reuh a, ka inzawrhpui avang chuan a lawm ve tak tak te pawh a ni ang.

An in kan thlen tlai dang ang lo bawkin an ina lut kawi turin min sawm a, mahse kei erawh chuan ka lo hnial ve leh tlat thung. Bungruate chu an in kawt thleng ka dah thlakpui vek a, luh mai chu harsa tawh lo mahse ka haw tlang lui ta tho a nih kha! Kan in lam pana mahni chauha ka chuan lai chuan Kimtei leh zan lama ka thil tih turte chu ka ngaihtuah chhuak a, Mambawihi nen kan awm dun avanga ka hlimna te chu chawp leh chilhin a bo nghal duak bawk. Ni e, zanin ngei hian engkim kan sawi fel a ngai a ni.

Chapter 6

Kan in ka thlen chuan kan awmpuite chuan ei rawng an lo la bawl malh malh a, ka nu ka la hmuh loh danah Bazar aṭangin a lo la haw lo tih ka hre mai. Ka chawhmeh zuar lai vel kha ka pa ang khan min han hmu ngat se zawng, ka nu chu thinrim leh zah lutuk avangin emaw khaw laiah a awm a ni tih hre lek lovin min hauh hrep duh mai ang ka ring. Ka room-a ka chhoh dawn lai tak chuan ka pa chu an room aṭang chuan a rawn chhuak a, min hmuh chuan min lo nuih sun sûn a, a kut chuan sitting room lama ṭhu phei turin min hui bawk. Keipawh chu ka room lama chho ta em lo chuan ka pa awmna lam chu ka pan phei ve mai a, sitting room ka thlen chuan ka pa erawh ṭhutthlengah chuan a lo ṭhu fel thân tawh.

"Eng chu maw khatianga chawhmeh zuara i lo au ve lauh lauh chhan chu?" ṭhutthlenga ka ṭhut thlak rualin ka pa chuan a rawn ti a, a hmelah chuan a nuih a la za reng tih a hriat khawp mai.

"A ho lutuk pa, sawi vak tur pawh a awm lo" nui deuh sâng chung chuan ka lo ti ve a, ka pa erawh chuan ka chhanna chu a lo duhkhawp loh hmel hle thung.

"Min hrilh mai mai rawh Marem, khatiang khan nang hian i ti ngam dawn lo hrim hrim tih ka hria alawm. Chuvang chuan khatianga chawhmeh lo zuar kual vel tur kha chuan tih chhan ṭha tak i neih ngei ka ring a, min hrilh ngei pawh ka beisei" a rawn ti dam leh dap a, a hmelah chuan a fiamthu tawh lo tih ka hmu zui nghal bawk.

"Eng lo a nia pa, ka zawrhpui chhan tak chu keipawh hian ka hre miah lo. Chuan engvanga khatianga zak miah lova chawhmeh zuar ve ringawt nge pawh ka hre lo bawk" ka ti ta ringawt a, chawhmeh zawrh ka zah miah lohna chhan chu ka hre lo tak tak a ni.

"A va mak awm ve, a chhan tak chu zep i la tum hram zawk em ni? I pa ka nih hî, i mizia ka hriat chian ang bawk hian i awm dan leh enge i tih tih te pawh hi ka ngaihven ru reng ṭhin asin" a rawn ti leh a, ka pa chuan ka thusawi chu a ring em em lo tih ka hre reng a, mahse thu dik a ni miau si.

"Ni lo pa, chutiangin i lakah thu sawi hreh emaw zep emaw pawh ka nei lo, mahse ka chawhmeh zawrh chhan kha enge a nih ka hre lo tak tak a ni" tiin ka lo chhang let ve thuai a, ani erawh chuan min lo melh run thung.

"Pa i awih lo tih pawh ka hria alawm, mahse ka hre lo, engatinge Mambawihi bula ka awm khan ka zah miah lo le" ti chhuak supin Mambawihi chu ka mitthlaah a rawn awm nghal a, ka nui deuh suk bawk.

"Euuu, i zah miah lohna chhan chu hmeichhia maw lo ni a? Tunge Mambawihi chu ni reng reng a?" ka pa'n a rawn tih chuan ka suangtuahna aṭang chuan ka harh chhuak zawk a, sawi sual ka nei tih pawh ka inhre nghal.

"Sawi rawh le, tunge Mambawihi chu? Nang meuh chawhmeh zuar zak lo khawpa lo siamtu hmeichhia chu tunge a nih han sawi teh le" chik taka min en ngul chung hian ka pa chuan a rawn ti leh a, a awm dan vel chu mi dawp thiam tak te pawh a ang alawm.

"Mambawihi chu chawhmeh zuar ṭhin a nia" ka tih lai chuan

"I bula hmeichhe tleirawl min lo melh zeuh zeuhtu kha a ni ang maw?" a rawn ti nghal a, keipawh chuan aw tihna'n ka lu ka lo bu ve nghauh.

"Chuan kan inhriat dan ber hi chu a nu ka sut thawi deuh vang a nia"

"Chu, mi i su i tihna em ni?"

"Aw, aih, ka tih awmzia chu ka su ṭep ringawt alawm. Ka sut dawn ṭepah ka motor chu ka tiding hman hram a, Mambawihi nu chuan ka su tawh dawn emaw a lo tih ve tho avangin a lo tlu a, ka sut mai kha a hlauh lutuk avangin a lo tlu lawk a ni ber"

"Âw i va ti ho ṭhin tak, nang ni ang motor lian lam khalh pha chin hi chu in fimkhur lehzual a ngai zawk asin. Mizoram angah te phei hi chuan kawngte hi a te si a, khaw chhungah hi chuan muangchanga tlan hi a him ber"

"Nia, ka hmanhmawh lutuk kha ka tlan chak chhan ber a nia, mahse Mambawihi nu pawh kha kawngpuiah a lo lang thut ve hrim hrim bawk alawm. Chuta ṭang vel chuan Mambawihi leh a nu nen chuan kan inhre chho ṭan a, an laka ka la inthiam loh reng avangin an in luahah ka leng zeuh zeuh ṭhin bawk"

"Chuan han sawi zel teh" enge ka pa hian a hriat a? Enge sawi zel tur chu la awm cheu?

"Enge la sawi belh ngai awm pa? I hriat duh tur awm ang chu ka sawi vek tawh lo em ni?" ka tih chuan ka pa chuan

"Sawi vek nâng, Kimtei nena in inneihna tur i ṭhulh chhan hi Mambawihi i tih nen hian inzawmna a awm ka ring tlat" a rawn ti a, ka pa hian eng thu chiah nge sawi tura min duh hi ni ang le!?

"A teuh lo lutuk pa, eee chuan, thil pawimawh lutuk mai hrilh tur che ka nei a nia, ka nu pawh ka la hrilh lo" Kimtei a rawn sawi chhuah avang chuan Kimtei nena kan inkar boruak chu hrilh nghal vek ka tum a, chaw ei laia sawi ai chuan a fuh ka ring zawk bawk.

"Sawi la" ka pa chuan a lo ti awlsam ve leh mai a, ka pa hi chu ka nu ai thlâwt chuan thu a sawipui tlâk ṭhin reng a ni.

"Kimtei hi ka nei dawn lo hul hûal a, chuan ka sawi tur pawh hi i awih lo zawk ang ka ring" ka tih chuan hriat belh châk hmel deuh hian min lo en ran a, awih dawn lo pawh ni se ka sawi chhuak dawn hi a ni hrim hrim.

"Eng pawh chu ni se i thil sawi i tum chu han sawi hmasa phawt mai teh"

"Kimtei hian keimah ni lo ngaihzawng dang a lo nei reng a, vawiin khan ka man chhuak alawm. A tirah chuan ka awih ngam chiah bik lo va, mahse a phone ka check hnu kha chuan min lo kawp ru reng tih chu awih duh lo pawh ni mah ila thu dik ngei a ni"

"Enga!? Kimtei te chuan a hmangaih vîau che a ni lo'm ni? Chutiang chuan Kimtei chu i lakah a che ngei tih i chiang em? I lo hre sual palh ve thei tho a nia"

"Aih pa, ka hre sual lo chiang khawp mai. Chu a ngaihzawng pa nen pawh chuan vawiin khan kan insual nghe nghe a, min la hneh lo em em leh nghal"

"Hei hei hei, khatiangin an ṭawng ngai lo. Puitling i ni tawh a, hna zahawm tak i thawk tawh bawk tih inhre ta che. Mi mitah i zahawm lo thei a, i hnathawh milin i nungchang pawh i siam rem zel tur a ni. Engatinge chu pa nen chuan in insual reng reng?"

"Enteh maw pa, chu mihring han zah lohzia chu! Ka beng hriat lai ngeiin Kimtei chu ka hmeichhia a ti deuh kher a, chu chuan ka lai a chhun tlat alawm. Chubakah ka thawhpuinu Dr. Tetei chu Kimtei chuan a rawn ankhum chîam ringawt a, ka ngaihzawng emaw te a ti a, kan ei tur chahte chuan a kawr awmah a theh vel bawk asin"

"Ka thu hriat hi a va mak mawlh mawlh ve le, han awih dawn lo ringawt ila a sawitu hi ka fapa i ni tlat bawk si"

"Awih duh lo mahla ka thusawi hi thu dik ngei alawm a nih, vawiinah khan mawi lo tak leh ka nihna nena inmil lo takin che mah ila ka thinrimna kha ka thunun zo lo a ni ber. Buaina kan siam avangin dawr neitu pa khan min hau nghe nghe a, mi pawh khan min en duh vîau chuan ka hria"

"Engatinge Kimtei nena in inkar hi a chhiat telh telh mai le? Inneih thei reng dinhmunah in ding tawh a, hetiang a nih chuan in inneih theih pawh hi ka ring mai mai tawh lo ve"

"I sawi dik pa, kei chuan Kimtei hi ka neih theih mai mai ka ring tawh lo. Kum khat leh a chanve dâwn chu kan lo inngaizawng tawh a, a zia hi thla tinin a inthlak a ni. A tirah kha chuan ka ngaina a, a ṭawngkam chhuak reng rengte kha a ngainatawm vek ṭhin, mahse tunah erawh a zia a danglam nasa lutuk tawh tlat"

"Amah ni lovin nangmah hi i lo danglam reng zawk hi a ni lo maw? Tun hnai chho hian nang pawh hian Kimtei hi i ngaihsak ṭha tawk lo deuh chuan ka va hre ve"

"A nihna takah chuan Kimtei hi ka ngaina tawh miah lo va, a chhan chu hmâna ka ngaihzawn em em leh ka duh em em ni ṭhin Kimtei mizia kha a nei tawh lo tlat a ni. Chuvang chuan pa, engti kawng pawhin harsa se inneih hi ṭhulh ka duh bur tawh a ni" ka tih nghet charh a, ka pa chuan min en vawng vawng a, ka thusawi chu rin duh si ring chiah si lo ang velin a awm ni berin ka hria.

"Chuan thil pakhat leh, Kimtei hi ka ṭhen dawn bawk a ni. Vawiin lama ka thawhpuinu Dr. Tetei laka a chet dan mawi lo tak tak te kha chu ka la ngaidam thei a, mahse keimah ni lo mipa dang a hmangaih thu a hrilh te leh a ngaizawng vel kher hi chu ka ngaidam mai mai thei rih lo a ni. Zanin hian an inah ka va leng ang a, engkim sawiin ka inkar boruak hi ka titawp bawk ang"

"Âww, thil hi a va kal chho buai teh nuai ve le, i nute pawh hrilh ve phawt la, chumi hnuah chuan thutluknate chu i siam chauh zawk nia"

"Ka nu chu ka hrilh dawn alawm, chuan engkim thil thlen dan ka hrilh hnu che hi chuan ka thutlukna siam hi min pawmpui ang ti raw pa?"

"Ka hre lo le" a rawn tih avang chuan

"Pa" ka lo ti deuh vak a, engkim ka hrilh tawh chung pawha min la ring ngam mai lo chu ka hrethiam lo a ni.

"Aw le, ka fapa i ni a, dawt i sawi ka ring lo va, chuan ka rinna che hi tichhe miah suh ang che" a ngawih vang vang hnuah chuan a rawn ti sup a, a thaw zui deuh hawk bawk.

"Min rinna hi engtikah mah ka tichhe ngai lo vang, ka tichhe duh lo bawk" ka lo ti ve nghal vat a, ka pa berin ka thutlukna min pawmpui tur thu a sawi avang chuan ka thaw te chu a veng deuh hawk a, ka rilru chu a hahdam zui ta veng veng.

"Marem, lo kal teh, min lo pui teh" kan in kawngka lam aṭanga ka nu aw ka hriat chuan ka hawi phei vat a, thawmhnaw a lo keng bawr ṭun bawk nen pui tur chuan ka phei ve nghal.

"Eng em em nge i lo hawn ṭeuh hi nu?" tiin ka puih pah chuan ka zawt a, kan in kawngkaa leng lo khawpa lian puana thil ṭawn a lo hawn chu ka hrethiam chiah lo a ni.

"Ka dawra thawmhnaw hlui leh kan lakna rei tawh ho, kan hralh em em si loh te an nih kha! Chhiatna an la nei lovin an la ṭha pangai hlawm phian bawk si a, HOME lama thawn atan ka lo hawn ta tawp mai" tuisik a in inkhawlh khâwlh hnu chuan a rawn ti a, dawhkan bul aṭang chuan ka che vel chu min lo thlir reng bawk.

Ka nu hi chu a ṭawng hlawkin a duh loh pe na vîau ṭhin mahse a chang hi chuan a rawn fel ve leh thut zel a, a fel leh fel loh chu a mood a zir ti ila kan sawi sual tam lo vang. Ka nu thil lo hawn vel ka dah fel hnu chuan chaw ei an siam a, keipawh ka kut te tifaiin chaw ei tur chuan ka phei ve leh nghal mai. Chaw kan ei lai chuan ka nu chu zana Kimtei te ina ka len tur thu leh engkim tih tawp ka tum thu chu hrilh ve ngei ka tum a, mahse a la ṭawng tui laklawh em avangin ka ṭawng chhuak duh ta mai lo.

"Nui, ṭawng tawh rih lo lawk teh, Marema hian sawi tur a nei a nia" a tawpa tawpah chuan ka pa chuan ka nu chu ṭawng tawh lo turin leh ka thusawi ngaithla turin a hrilh ta tawp a, chu veleh ka nu pawh chuan ka lam lo hawiin

"Enge i sawi duh chu ni a? Ka lo ṭawng tui mah mah a ni maw" a rawn ti a, a thlenga chaw te chu a bar chhunzawm leh mial mial bawk.

"Zanin hian Kimtei te inah ka leng dawn a" ka tih lai chuan ka nu chuan

"A ṭhat chu, va leng la, va ngaihsak ve deuh teh" a rawn tih zawm nghal a, engmah lah chu a la hre ve der si lo.

"Ka lenna chhan tur chu engkim tih tawp ka duh vang a ni" ka ti leh chuan min lo melh ta ral a,a mitah chuan zawhna hlir ka hmu bawk.

"Engtia engkim tih tawp maw? Inneih chu ṭhulh i tak tak em ni?"

"Aw, inneih mai ni lovin engkim tih tawp ka tum a ni. Kimtei hi hmân ang khan ka ngaina tawh lo va, ka nupui atan pawh ka duh tawh hek lo. Chuvang chuan kei hian Kimtei hi ka ṭhen ang a, chuan ani nen sawn kan inneih lo bawk ang"

"LALREMRUAT, i â zo tawh em ni? Nge Kimtei sawi ang khan ngaihzawng chu i lo nei tak tak zawk?" ka nu chuan a rawn ti leh phiar a, ngaihzawng nei emaw min ti tie vet chu ka hne tak zet.

"Nu! Ngaihzawng ka nei ziah lo, Kimtei sawi te hi ring fai vek zel ṭhin suh, i fapa thusawi hi ring zawk ta che" thinrim ru deuh tak chuan ka ti ve nghal a, ka pa erawh ka nu nena kan inbiaknaah chuan lo inrawlh a tum miah lo ni maiin a lang.

"A nih chuan engatinge Kimtei hi nupuia neih i duh loh leh thut? I sawi loh te chuan ka thinrim lo thei nâng, thu awmzia te sawi hmasa ṭhin reng ta che"

"Ka sawi chu i awih duh leh tawp chuang lo vang, ka kham dawn a nia. Chuan pa, ka nu hi lo hrilhfiah vek mai rawh" tiin ka ṭhutna aṭang chuan ka tho a, ka thleng chu chawiin kan thleng silna lamah chuan ka phei zui daih.

"Nang pawh hian i lo hre ru reng maw!? Min hrilh ve mai ta che u, hetianga ka vin vak vak ngai kher lo hian, eng ber maw LALREMTUAT hian Kimtei hi a neih duh loh thutna chhan chu min hrilh ve vat mai teh" tiin ka nu chuan a bula ṭhu ngawi reng ka pa chuan a be mawlh mawlh a, kei erawh ka pa sawi dan tur pawh ngaithla lo chuan ka room lamah ka chho ta daih a, ka room ka thlen chuan inthlakin chhuak turin ka insiam zui nghal.

Chhuak tura ka insiam zo in hnuai lama ka chhuk thlak chuan ka nu leh pate chu ka hmu mai lo va, an nupa room-ah an titi a nih ka ring ta ringawt. Pawn ka thlen chuan ka motor chhungah chuan ka lut vat a, motor chu tinungin Kimtei te in lam pan chuan ka tlan chhuak zui nghal. Kimtei in peng ka thlen chuan ka motor chu motor dangin an tai palh thei ang em tih ngaihtuah ran chung chuan ka park fel thlap a, ka duhthu a sam hnu chuan Kimtei ina lut tur chuan ka kal ve thei ta hram. Kimtei in chhunga ka luh chuan Kimtei leh a nu leh pah chiah hi ka hmu ve teh mial a, ni dangah te chuan a u fate leh nupuite ka hmu nual zel a, an pathum chauha an lo awm chu mak ka ti ve deuh a ni.

"Ka pu, ka pi, in hnenah hian thu pawimawh tak mai sawi duh ka nei a ni" Kimtei nu leh pate nena kan titi fe hnu chuan ka ti chhuak tlawng a, anni paw'n ka thusawi tur chu hriat châk hmel deuh hian

"A ni mâw, han sawi la" an rawn ti ve thuai a, an makpa hual thusawi tur chuan a ṭhawng dawn lutuk tih ka hre kar bawk si. Kimtei hmel ka en chuan ka thusawi tum chu sawi lo tur hian min lo ti maiin ka hria a, mahse kan inkar boruak chingchivet tak sawi chhuah chu kan pahnih hnîh tan chuan a ṭha ve ve zawkin ka hre tlat a ni.

"Eng lo a nia, Kimtei nen hian kan inneih leh dawn lo" ka tih chuan Kimtei nu zawk chuan

"Enga!? Enge i sawi awmzia? Inneih nite chu kar thum chauhin a dang tawh a, engatinge Kimtei nen chuan in inneih leh dawn loh?" a rawn ti vat a, ka thusawi a ṭhawng hle tih pawh ka hre thei.

"A chhan chu Kimtei hian keimah ni lo ngaihzawng a nei a, keimah ni lo mipa dang hmangaih a nei a ni" ka ti chhuak ta nge nge a, chu veleh Kimtei chuan

"Nangmah a nih kha inneih duh lo hmasa, nangmah ngeiin a nih kha nupui neih i la inpeih loh thu sawi chhuak hmasa" a rawn ti tawn tawn a, ṭah mai tur hmel a pu ran bawk.

"Kimte, khatiangin ṭawng vak vak ṭhin lo teh, i nu leh pate awm lai hian kan inkar boruak ṭha lo zet hi kan sawi fel a ngai zawk a ni" thinrim insum tak chung chuan ka ti chhuak leh thei hram a, mahse Kimtei awm dan chuan a zir bawk nen thinrim insum chu a harsa ngei mai.

"Han sawi chiang vat teh u, enge thil awmzia hi?" Kimtei pa ve thung chuan a rawn ti ram hmarh a, ka thusawi avang chuan Kimtei nu leh pate chu an rilru a buai a ni ber.

"Ka pu, Kimtei hi nupui atan ka duh leh lo va, ngaihzawng atan pawh ka duh tawh lo bawk a ni. A chhan chu ani hian mipa dang lakah min phatsan a, keimah ni lo mipa dang a hmangaih thu ka hmu bawk asin. Ni e, keimah zawk hian Kimtei chu inneih ka la inpeih rih loh thu ka hrilh ngei alawm, mahse ṭhen kha ka tum reng reng lo. Thla eng emaw chhung chu inngaihzawn leh ka la duh a, nupui atan pawh amah ngei hi neih ka tum a, mahse amah zawk hian ka hriat loh laiin min lo phatsan a ni" aw pangai tak chuan ka ti chhuak dap a, ka thusawi avang chuan Kimtei pa chuan Kimtei chu a melh nghal hrâw bawk. Chutah Kimtei pa chuan Kimtei en chung hian

"LALENGKIM, Marema sawi hi a dik em? Nang hian Marema hi i lo phatsan chiang em?" a ti vin nghal ṭhawt a, Kimtei chuan a pa hmel chu a en ngam lo hrim hrim.

"Min chhang rawh LALENGKIM, Marema sawi hi a dik em ka tih chû" a pa bawk chuan a rawn ti vin leh ṭhawt a, Kimtei erawh chu ṭawng chhuah tum lo ang mai chuan a ngawi reng thung. Chutianga a ngawih rengna te chuan dawt ka sawi lohzia a tichiang a, mi â tan lo chuan thil awmzia chu hriatthiam loh theih pawh a ni lo.

"Ka pu, tun ang hun tawha hetiang thu dengkhawng ka rawn hrilh che u a ngai hi pawi ka tiin ka inthiam lo hle a, mahse ka sawi chhuah loh chuan nakîn zela thil a kal buai nasat zawk ka hlau tlat si. Ka va haw phei mai ang e, maṭha mai u" tiin ka ṭhutna aṭang chuan ka tho a, an pafa inhauh lai vela lo awm chu a nawm teh chîam ka rin loh avang chuan an in aṭang chuan ka chhuak zui nghal ta daih.

Kimtei te in aṭanga ka chhuah hnu chuan ka motor lam chu ka pan a, khawpui lah chu a rawn la ri dur dur ang zui a! Kan in lam pana motor ka khalh lai te chuan mak tak maiin ka hlim haw em em a, chutah chiah chuan Kimtei chu ka lo hmangaih tak tak lo tih ka hre chhuak a, thil tih a hrasat zual hmaa kan inkar ka inching fel thei ta chu ka lawm rilru hle bawk. Kimtei chu ka hmangaih emaw ka inti a, ka lo hmaingaih tak tak hauh si lo. Chutiang bawkin Kimtei chuan min hmangaih emaw a inti a, min lo hmangaih tak tak hauh si lo. Engkim chu Pathian remruat vekah ka ngai a, a hun takah kan inṭhen ngei ngei theihna'n thil a rawn thlen tir a nih ka ring ta ber.

Khatla TBL building ka tlan thlen lai chuan ka har chhuak zawk a, ka motor chu ka tiding nghal chat bawk. Ka motor chuan Khatla Bridge lamah chuan ka back thla riai riai a, Mambawihi hmu lova an in han tlan pel ngawt chu ka thei der lo a ni. Kawng dip zawng emaw motor tlanna dip zawngin ka dah lo ta maw tiha ka inher rem hnu chuan ka motor aṭang chuan ka chhuk a, step-ah chuan chhuk thla thoh thohin Mambawihi te in awmna lam chu ka pan leh ta nge nge. An in kawngka zawn ka thlen rual chuan kawngka chu ka kik kârh karh a, chhung lam aṭangin Mambawihi nu chuan lut turin min lo chhawn nghal bawk.

"Êeee Doctor Marema chu, i lo leng dawn em ni? Kha ṭhutna awlah khan lo ṭhu tawp mai teh, nang i ni bawk a, ka inthlahrung lo law law ta mai" tiin Mambawihi nu chuan min lo be sawk sawk a, ṭhut tura min lo kawhhmuhna hmunah chuan ka ṭhu thla ve nghal bawk.

"Kha i va buai awm ve, tun ang zan zanah te khatiang i tih tâk mai" tiin Mambawihi nu chu ka be ve a, ani pawh chuan hriau hmanga kawr a lo ṭhui mawlh lai chu dahin min lo nuih sak a, chutah amah vek chuan nelawm tak hian

"Nia hei, kuta ṭhui mai loh hi chuan mite angin khawl kan nei ve bawk si lo va, hetiang kan ṭhui ta tlût tlut a nih ber mai hi zawng" a rawn ti ve leh nghal a, ka kal chhan bet Mambawihi chu ka hmu leh mai ta hauh lo.

"Khawiah nge Mambawihi hi a awm? A inbual leh tawh em ni?" nui ri deuh hak chung chuan ka ti a, kei ang bawkin Mambawihi nu pawh chu a rawn nui chhuak ve ta hawk hawk.

"Doctor Marem hmân zan avang khan ka fanu hi chu lo la hrethiam hram mai teh, i haw hnu pawh khan a zah thu hlir a sawi tak asin. Mambawihi chu a chhuak lawk a, a lo let har lo vang" nui heuh heuh pah chuan a rawn ti a, kei erawh a thusawi avang chuan ka nui tawp riai rîai thung.

"Khawiah nge a kal a? Tu nen nge an kal hrim hrim? Enge a tih dawn?" mipa dang nen awm dun tura ka ngaihtuah tlat avang chuan ka ti chhuak zung zung a, a thusawi avang chuan Mambawihi chu ka lo ngaihven ve em em ringawt hi a ni mai.

"Âwww zung zung che chuan, kan kawm thlang lawka dawrah khuan a kal alawm, enge ka lei dawn a tih pawh kha ka hre tawh lo ve a!" a hmaa min biak ṭhin dan aia chik deuh hlek chuan min rawn en a, chutah kei lah chu ka lo la che buai hman teuh em em leh nghal.

"Eee, aw, a nih chû, a thingpui lum ka in châk tawh lutuk a, chuvang mai mai maw le" ka lo ti ve ta ringawt a, keimah ber chuan ka thusawi zawh chiah chu dawt chiang bal a ni tih tih ka hre chiang hle.

"Ei leh in tur min buatsaih, hahchawlhna tur min" tia a sak zawm leh dawn chiah chuan Mambawihi chu a zai tawp hmak a, kawngka aṭang chuan min lo en kar bawk.

"Zai zel rawh, i va'n lo zaithiam reuh ve, Mizo Idol-ah te tel ve ta che" tiin Mambawihi chu ka lo fiam zui leh ta duah a, ka thusawi avang chuan lai tak hi a ni ringawt.

Chapter 7

Mambawihi POV

Awi le! U Marema hi zawng mi va han tizakin min va han tilai thei tak! Mak tih hmel tak hian kan in kawngka hawng paha ka zai lai chu min lo reng a, keipawh chu ka mi hmuh avang chuan ka zai lai chu ka tawp nghal chat. Amaherawhchu u Marema chuan a hmel awm dan chu thlak vatin min lo nuih deuh suk a, ṭawngkam ngeiawm deuh deuhin min fiam zui ta hlâk bawk. A hrim hrimin ani hi engatinge kan inah hian a rawn chuan kai ve ziah mai le, amah ka hmuh lah hian a âwma bei chunga ka lo ṭap vel vak vak kha ka hre chhuak ziah leh nghal.

"Mambawih thingpui kha han lum nghal teh, hei Doctor Marema hian a in châk tawh teh mai a nia" lai taka kan in chhunga ka pen luh rualin ka nu chuan thingpui lum turin min rawn ti nghal a, ka nu reng reng pawh hi thingpui hmeh tur lei tuma chhuak ka ni tih a hre ve reng awm sia, thingpuite chu ka lum dawn tih hriat ve mai awm.

"I thingpui lum pah te khan han zai vel la, ni dang aia a tui sawt ka va'n ring em" u Marema chuan fiamthu rawngkai, ngeiawm em em si hian a rawn ti leh a, thingpui bel keng chunga ka hnungchhawn tlat avangin u Marema thusawi avanga ka hmel ka siam chhe vel chu min hmu thei lo hlauh zawk.

"Chuan engtik maw nupui chu i neih dawn? In inneih hun chu rawn kal ve a va ṭha ve le, kan lakah i ṭhain i fel em em bawk sia" tiin ka nu chuan a lo be zawm daih a, chutah u Marema chuan thawven hmel deuh hian

"Nupui ka nei leh dawn lo" a rawn ti awlsam thân a, a thusawi avang chuan an ṭhutna lam chu ka hawi lo thei ta lo.

"Nupui i nei dawn lo maw!?" a thusawi chu mak ka tih em avangin ka ti chhuak hlawl a, kei ang bawkin ka nu pawh chuan mak ti deuh hian u Marema chu a lo en ve reng a, a thil ṭhui lai chawlh meuhin a en a ni ber.

"Aw, nei dawn lo. Engatinge? Nupui nei tur chuan min lo duh vîau zawk em ni?" ka zawhna avanga nui ri deuh hak chung hian a rawn ti a, ka mitah tak chuan min en ran bawk.

"A teuh lo mai, nupui nei turin ka duh reng reng lo che. Ah, ihhh, ka tih awmzia chu chungte chu i thu thu alawm ka tihna" ka ti bah ta nuai a, ka mit taka min en reng avang chuan ka lai vek a, ka ṭawngkam chhuak leh ka ngaihtuahna thlengin min enna chuan a chawk buai vek.

"Ehe! Mambawihi hian nupui nei turin min lo la duh miah lo a nih hi, ti raw ka pi?" tiin u Marema chuan ka nu chu a be chhunzawm zui ta daih a, kei erawh a ranga rangin kan Gas lam chu ka hawi vat a, thinphu dawt dawtin thingpui chu ka siam zui ta ringawt.

"A lo ni ang e" tiin ka nu pawh chuan u Marema chu nui chung hian a lo chhang ve thuai a, an pahnih chuan an fiamthu tih hre reng mah ila ka awm dan chu a pangai thei tawh lo hrim hrim.

Thingpui ka siam zawh chuan an awmna lamah chuan ka chawi phei a, u Marema chu a mit takah pawh ka en ṭha ngam lo. Engatinge u Marema bulah hian ka zam em ema ka chet dan a khawr ṭut kher zel le? Min si miah lo leh a inhlat deuh taka kan awm chung pawh hian engtin emaw ni tak hian min uap tlat ṭhin a, min uap dan lah chu ka sawifiah thiam leh hriatthiam loh lam thil a ni leh tlat lawi a, a eng ber hian nge min tizama min uap tlat ṭhin hi ka hre thei lo a ni. Tin, zep lovah chuan u Marema chu nupui nei turin ka phal miah lo va, a nupui hual ni lai ngat phei kha chu nei turin ka duh lo lehzual.

"Mambawih, chu pipe saw a ri rek rêkin ka hria, tui a haw dawn a ni ang a?" kan thingpui in laia ka nu'n a rawn tih chuan kan thleng silna ṭhin glass style lam chu ka hawi phei vat a, ka nu sawi ang ngei chuan tui a haw dawn a nih hmel.

"A nih ka ring nu, khawnge kan pipe te kha a awm? Bathroom lamah ka'n pipe chhawng nghal vat ang e, a haw rei lo thei bawk sia pipe khah vat a ngai" tiin ka thingpui in lai chu chhuatah ka dah thla thuai a, hmanhmawh ru taka thovin pipe chu ka zawng zui nghal bawk.

"Âwwww, hmanni te kha chuan ṭhutthleng hnuaiah hian i dah a ni lo'm ni? Thla khatah hian tui hi a haw khât thei lutuk a, kan pipe dahna pawh i hre mang tawh lo a nih kha!" ka nu'n a rawn ti leh chuan kan store room-a ka pipe zawn lai chu ka tawp chat ang, lehhawiin ṭhutthleng lam chu ka pan a, ka nu sawi ang kan tui pipe ṭhinna chu a lo awm ngei e!

"Puih in ngai em? Ka lo pui dawn che u em ni?" ding ûai chung hian u Marema chuan a lo ti ve a, kan che buai vel bawk nen u Marema chu a inthlahrung a nih ka ring.

"Ngai lo ve, ngai lo ve, tui haw chhung hi a rei leh dawn chuang lo va, kan buai hi chu a zo leh vat mai ang" tiin ka nu chuan ka chhan hmain min lo chhan khalh a, keipawh chuan tui lampang chu ka buaipui zawm mawlh mawlh bawk.

"Ka lo pui ang che u" tiin u Marema chu ka lamah a rawn phei lui leh ta hram a, he pa pui reuh hi a duhna chuan a luhluh ve ren run hle dawn a nih hi!

"Khawi, bathroom-ah sawn lo va awm la, pipe hi chu ka lo vuah mai ang. Bathroom lam sawi lo va chhung khat la, keiin helai hi ka lo buaipui ang ka tihna a nih chu" ka bul mai a lo din rual chuan a rawn ti a, amah ka en chuan min puih tum tak hian a Leather Jacket ban chu a lo thlep chho vek tawh.

Min hnaih taka u Marema a rawn awm avang chuan keimah bawk chu ka dik lo leh ṭan a, ka zam em em mai bakah ka che khawr leh ṭut tawhin ka hria. Min biakna pawh chu chhang let chuang lo chuan bathroom lamah chuan ka lut a, ṭin ruak lo awm ah te leh tui dah theihna chi zawng zawngah chuan tui chu ka dah khat vek a, chutianga ka che vel chu kan bathroom kawngka bul aṭangin u Marema chuan min lo thlir reng tih hre ru kar mah ila ka hawi chhuak duh der lo. A hrim hrimin engatinge u Marema hi kan buai lai tak hian a rawn kal fô mai lé, kan buai loh lai leh kan awl lai deuh zanah erawh a hmel hmuh tur a awm leh ṭhin tawp si lo.

U Marema chu min en loh lai leh min hnungchhawn laia a awm lai chuan ka melh ve zeuh zeuh a, a kawr bante chu thlep chho ve mahse a huh deuh tho chuan ka hria. Doctor a ni a, chhungkaw hausa pangai tak an nih ka ring a, mahse keini nufa chhete them maha min puih hreh miah lo chu mak ka ti ngawih ngawih. Anni ang tan phei chuan keini hmelhriat ṭha tak pawh ni lo ina rawn len lûh rawn len luh chu hrehawm leh zahthlak vîau turah ka ngai a, amah lah hian zah hmel emaw hrehawm tih hmel emaw pawh chu a pu chuang hauh si lo.

Tlai lama u Marema'n ka chawhmeh zawrh lai min zawrhpui chungchang chu ka nu ka la hrilh lo hrim hrim a, hrilhna hun a awm loh mai bakah keimah pawh chuan ka lo theihnghilh ve leh hrim hrim bawk a ni e. A mak hi ka ti a ni. U Marema'n ka chawhmeh zawrh lai min zawrhpui ve ringawt kha mak ka ti a, ka hrethiam lo va, enge min zawrhpui chhan ber chu ka hre lo a ni. Chuta karah a pa lah chuan u Marema chu a rawn la hmu leh ta nghal a, kei ang bawkin u Marema kha a hamhaih a nih kha! Chutia sawi mai tur hre lo leh hamhaih taka u Marema a din lai chuan a pa chu a rawn nui chhuak hawk hawk a, kei chuan a pa awm dan chu ka lo hrethiam lo leh pek hle.

Tui vel kan buaipui fel hnu chuan chhuat huh leh chîar vel chu chhuat nawhna chuan ka nawt hul leh vek a, u Marema pawh ka nu bulah a ṭhu phei ve leh tawh bawk. Kan pindan luh dawna sana intar ka en chuan dar 8 leh a chanve lai a lo ri leh reng tawh a, ka tihtur la awm ka ngaihtuah chuan zan dar 10 vel bawrah bak ka mu leh thei dawn lo tih chu ka hre nghal. Chhun lama ka inzawrh ni len avangin ka taksa chu a chau ve deuh a, chuvangin a theih chuan mut hma hram hram ka duh a, ka tum ran bawk. Kan thawmhnaw bal ho kan dah khawm ṭhinna bal bawm chu ka pawm kang a, surf leina tur pawisa ka kawl tho avangin ka nu chu ka dil buai duh ta lo.

"Mambawih ṭhu hahchawl ve deuh phawt la, khangte chu naktuk lamah pawh a tih theih reng alawm" kan in aṭanga kal chhuah ka tum laiin ka nu chuan a rawn ti a, keipawh chuan

"Zanina suk hi a fuh zawk alawm nu, naktuk zing karah kan pho leh hman ang a, ni a sat ṭhat leh phei chuan chhun lamah kan thawmhnawte hi a ro vek hman zawk ang ka ring" tiin ka nu chu ka lo chhang ve thuai.

"Khawnge i kal dawn? Enge i tih dawn?" hriatthiam loh hmel zet hian u Marema chuan a rawn ti a, a insuk ngai loh chu ring tho mah ila ka thil ken vel leh kan ṭawng dan vel aṭang chuan ka insu dawn tih te chu hriat ve mai awm.

"Ka zuk insu lawk ang e" pangai tak chuan ka lo ti ve a, ngampa lutuk lovin a mitah chuan ka en ve reng bawk.

"Ka lo kalpui ang che" a ṭhutna aṭanga lo ding chhuak chung hian a rawn ti leh ringawt a, he pa hian eng thil chiah nge tih a tum leh tâk?

"Aih a ngai lo u Marem, keimah pawhin ka ti" ka tih laiin amah vek chuan rang zet hian

"Nangmah chiaha kal kha a ṭha lo, hmeichhia i nih mai bakah tawhsual tawh te pawh a hlauhawm alawm. Ka lo kalpui che ang a, i tan pawh i bula ka awm chuan a thlamuan thlak deuh zawk ang" a rawn ti nghet leh charh a, a hmel aṭangte lah chuan a la thutak hmel em em leh nghal.

"Chuti tur em ni Doctor Marem? Kha i inchei nalh ang reng si a, Mambawihi bula zu kal chu i tan a buaithlak mai mai zawk lo maw?" ka nu chuan a rawn ti ve thuai a, chutah u Marema bawk chuan

"Buaithlak lo ve ka pi, ka zu kalpui ang e. Khawi le Mambawih, thawmhnaw vel kha ka lo keng ang" tiin ka bal bawm pawm chu a rawn la zui hmak a, ka biak leh hlau awm tak hian a kal chhuak zui daih bawk.

"Doctor Marema ṭhin tak hi chu âw, kan nufa lakah a chet dan hi keini tan chuan a inthlahrunawm thei ṭhin khawp mai. Mambawih zu kal dun mai teh u, amah lah khan i bula kal kha a tum hmel ropui bawk si" ka nu chuan a rawn ti ve ta ringawt a, ka nu pawh chuan tih ngaihna a hre bik teh chîam lo a ni e.

Ka nu sawi ang chuan keipawh chu ka kal chhuak ve ta hna hnâ a, pawn ka thlen chuan kan in kawt step-a u Marema lo ding run chu ka va hmu a, a thil pawm leh a inthuam dan vel inmil lo lutuk avang chuan ka nui chhuak teuh kher mai. Kei atana bal bawm lian em em leh pawm ṭawng ṭâwng ngai ṭhin ni si kha u Marema chuan kan bal bawm chu hahdam hmel deuh hian a lo pawm a, a kut lehlam te chuan phone a khawih mual mual pah bawk. Amah a lian bawk nen kan bal bawm chu a lang te ta em em a, zawimuanga a lam ka pan phei min rawn hmuh hnu chuan a phone a ak ṭha zui hmak bawk.

"Khawi lamah nge kal tur? Heta chhuk char char tur hi em ni?" min melh ran pah chuan a rawn ti a, a hmel aṭang chuan insuk te chu a phur hmel viau ni maiin ka hria.

"Aw, chhuk char char tur" tia ka chhan hnu chuan min enna aṭanga chuan hawi sawnin step lam chu a hawi a, ngawi rengin a chhuk zui ve nghal mai bawk.

Keipawh chu ngawi reng thovin u Marema hnungah chuan ka kal ve mawp mawp a, inbiak vak dan tur chu kan hre lo ve ve te pawh a ni ang. Kawngpui kan thlen thlak rual chuan kawngpui sira dawr lo inhawng lam chu ka pan a, hman tur a tlem deuh tawh avangin surf chu ka lei nghal bawk. U Marema erawh chuan ngawi reng hian min lo en leh reng tawh a, kei chuan amah ka en letna mit chu ka la sawn rang hle. Tuikhur kan thleng a, kan la inbe ta chuang lo. Kei chu ka zam vang leh sawi mai tur ka hriat loh vanga be lo ka ni a, ani hian engvanga min be lo ve ringawt nge a nih ang le!?

"A va mak tak, ka'n hawn theih miah loh chu le" ka surf lei thar ka hawn theih mai loh avang chuan ka ti chhuak sep a, mak tak maiin ka kut te lah chu a la nal tlat zui.

"Khawi keima'n ka lo hawng ang" tiin u Marema chuan ka surf ken lai chu min lo laksak a, keipawh chuan ka hawn theih miau loh avang chuan ka lo dang buai duh ta bik lo.

"Aaa! Sorry" a rawn ti chhuah hluai avang chuan u Marema lam chu ka hawi vat a, ani chuan ka surf lei chu a lo pawt chhe vek a nih chu! A kawr ban leh kawr âwm velah chuan surf te chu a kai nûai a, amah zawk zawk chuan mak tih hmel deuh hian min lo en let daih.

"E hêee, i pawt chhe vek maw!? Tuiah pawh ka la thlak hman lo asin" mak ka tih êm avang chuan ka ti chhuak phawng a, mawi leh mawi lo tur pawh ka ngaihtuah hman bik tawh lo a ni e.

"Ka tihpalh lutuk Mambawih, ka tum pawh a ni lo. Nangmah khan i pawt vak vak sia, ka pawt ve vak ringawt alawm" inthiam loh hmel deuh chuan a rawn ti ve vat a, tih ngaihna a awm tawh miau loh avang chuan kan in lam pana kal ka tum ta ringawt. Chutah u Marema chuan ka dara min chelh pah hian

"Khawnge i kal dawn?" a rawn ti leh hluai a, kei lah pek chuan thinrim ru deuh ṭun chung hian

"Kan inah ka kal dawn maw lé. Pawisa ka han la ang a, surf dang ka lei leh dawn alawm, ka lei leh loh te chuan ka insu thei tawp nâng" ka lo ti ve deuh hmuk a, kan in pan chhohna step chu kal peih lo tak ka ni!

"A ngai lo, keima'n ka lo lei ang" tiin min kalpel zui nghal a, kei chuan a hnung lam aṭangin a chet dan chu ka lo thlir reng ta ringawt. Dawr a va thlen chuan keipawh chu amah ka enna aṭang chuan ka hawi sawn a, Bucket-ah chuan tuikhura tui chu no hmanga suak chhuakin ka chhung lut zui tlauh tlauh bawk.

"Kha le" ka bul a lo thlen rualin u Marema chuan a rawn ti a, keipawh chuan ka lama a thil lo lek phei chu ka lo ban ve mai a, mahse enge a rawn lei tak hi!

"Engatinge hetiangte i rawn lei u Marem? A bawm lian chi te hi chu a to asin, va thleng leh vat rawh" tiin ka thil ken lai chu a kutah ka lo hmehbel leh nghal thuai a, surf bawm lian chi te chu 100 man chuang daih alawm a nih.

"A ṭul tawh kher lo Mambawih, ti khan a daih rei zawk alawm" u Marema chuan a rawn ti awlsam mai a, ka ngaihdan erawh a lo ni lo nasa.

"A ṭul leh ṭul loh lam pawh a ni lo, pawisa kha a uihawm tih hre ta che. Nang chuan cheng 100 te chu ho i ti víau pawg a ni maithei a, mahse a hlutna kha a bo phah chuang lo. Chuvang chuan dawr an khar tak tak hma sawn va thleng leh vat rawh, cheng 10 man kha lo lei la a tawk mai" ka tih leh tâk deuh duah hnu chuan thuawih takin dawr lam chu a pan ve leh ta hna hnâ a, keini tana inthlahrunna tur a siam thiam lutuk hi a buaithlak dawn tlat.

"Kha le, ka rawn lei dik tawh ngei ang. Nang te reuh hian min control zet zet reuh mai, a i thu lah chu i duh phian bawk sia" dawr aṭanga a lo letleh hnua a surf lei min pek pah chuan a rawn ti a, kei erawh chuan ka lo chhang buai vel peih rih lo.

"Hetiang hian zanah nangmahin i insu ṭhin em ni?" engatinge u Marema hian min biak chhen mai le, mut chhuah ruk tawh nen tih zawh vata haw vat ka duh naka lai a!

"Aw" tiin a zawhna chu ka lo chhang deuh tawl a, ka ṭawngkam chhuak aṭang chuan inbiak ka peih rih lo tih a hrethiam ve ngei ang le!

"A va ṭha lo ve, hetiangte chuan tawhsual i tawk mai ang asin. Engtik tikah nge i insuk ṭhin?"

"Thawhṭanni leh inrinni inkara chawhmeh kan zawrh tlût tlut ṭhin avang hian kar tawp lamah ka insu tlangpui"

"I sawi awmzia chu zanin ang hun hi i tihna em ni? Inrinni zanah hian i insu ziah tihna em ni?"

"Aw, ni deuh ber mai"

"A nih chuan inrinni zan apiangin ka lo leng tawh ang"

"Enga!? Engvang chuan maw?" a thusawi mak ka tih em avang chuan ka insuk lai chawl meuhin u Marema chu ka en chho hâ a, ani pawh chuan thutak hmel zet hian min lo chhuk melh ve reng bawk.

"A chhan i hriat kher a ngai lo" tiin ka zawhna chu a rawn chhang deuh hmuk ringawt a, keipawh chu a ngaihna hre lo zet chuan ka insuk chhunzawm ve leh ta mial mial.

Kan insuk zawh chuan kan in lam chu kan pan a, kal lam ang bawkin u Marema chuan insuk ho chu a keng chho leh vek. A kawr hma te chu a huh tih ka hmu reng a, mahse amah ber chu a kawr huh leh huh loh chu a pawisá lo emaw tih theih turin a awm tlat lawi si. Step-a kan chhoh lai te chuan a hnungah ka zui chho det det a, ani ang mi awm thei leh hausain min insukpui ve ringawt chu mak ka ti ru hle bawk. Amaherawhchu zan dang ang lo takin u Marema min insukpuina vang nge pawh ka hre chuang lo ka rilru chu a thlamuang ve em em ringawt a, ka insuk chhung zawng khan tawhsual ka tawk palh ang tih hlauhna pawh ka nei miah lo a nih kha!

"Êeee, in zu insu zo thei ta maw? Doctor Marema chu i chau awm si a, Mambawih thingpuite kha han lum sak leh teh khai" in chhunga kan luh hnu chuan ka nu chuan a lo ti zung zung a, keipawh chuan thingpui chu ka lum zui ve mai bawk.

"Mambawih, zanin chu surf i hmang tam deuh em ni? In thawmhnaw suk ho rim hi zan danga i suk aiin a na rîauin ka hria" ka nu chuan a rawn ti leh a, kei chuan rang taka ka nu lam hawi chung hian

"Nia, aw nu, zanin chu surf kha ka hmang tam deuh alawm" ka lo ti ta vat a, u Marema rim a nih kha han tih chi lah chu a ni der si lo.

"A nih chu, mahse surf hi hmang tam vak ṭhin suh, a tam lutuk hi chuan kawrte hi a mawih duh teh mai a nia" ka nu chuan a rawn ti ve leh mai a, u Marema lah chuan amah leh amah chu a lo la inhnim dûk duk zui.

Ka nu ber chuan chutianga a chet vel avang chuan zawhna a zawt leh thut palh ang tih ka lo hlau ru khawp a, a zawh vaih chuan thil thleng vel kha sawi vek a ngai dawn a, chu chu ka peih lo a ni.

Thingpuite kan in zawh hnu chuan u Marema pawh chuan haw zai a rel ta a, a ngaite bawkin ka nu chuan u Marema chu thlah turin min ti leh tlat tawh. U Marema bula awm chu hrehawm ka ti hran lo va, ka zam em em mai zel chu mak ka ti ber a ni. A motor awmna bul kan thlen chuan a lut nghal mai dawn emaw ka tih chu a kekawr ipte zen chung hian a ding ngawi ta run a, eng tak chu hria ni leh ang maw!

"Mambawih" a rawn ti sup a, chiang mangkheng hian ka mit takah chuan min lo en zui nghal bawk.

"I phone number min lo pe teh a" chhang let miah lova ka ngawih reng avang chuan a rawn thum leh dup a, a thil min dil avang chuan ka va han inngaihtuah buai leh nasa hman tak em.

"Engatinge?"

"Ka hre chiah lo, ka duh a ni tawp mai"

"Enge i sawi awmzia?"

"I phone number chu min pe phal lo em ni?" tiin ka zawhna pawh chhang lo chuan a rawn ti leh nghal daih.

"Phal loh pawh a awm chuang lo" ka lo ti ve leh mai bawk a, chutah a phone to hmel zet chu ka lamah a rawn lek kang a, ka phone number chu chhu tura min tihna nia ka rin avang chuan a phone chu lo lain ka phone number chu ka chhu zui ve nghal mial mial.

"A nih âw, mangṭha muttui le" tia kal sawn nghal mai ka tum chu u Marema chuan min kuai her lawp a, a awmah chuan min kuah bet ta ran mai. Chutah rawn che leh thutin min nam sawn deuh dâwr a, amah vek chuan

"Ka tihpalh" a rawn ti chhuak sup a, rang takin a motor chhungah chuan a lut zui nghal ta daih bawk.

U Marema chu a tlan liam thlengin ka thlir zui vawng vawng a, tun maia a chet dan kha enge a awmzia ni ta ang? Chutia ka thlah tur ber a tlan liam vang vang tâkah chuan keipawh chu kan in lam panin ka chhuk ve leh mai a, a chet dan erawh ngaihtuah zui vung vung mah ila ka la hrethiam thei chuang der lo.

Chapter 8

Marema POV

Engvanga khatiang thil kha ti ringawt nge ka nih? Engatinge Mambawihi kha ka kuah ringawt? Engatinge kuah kha ka châk em em mai le? LALREMMRUAT le! tiin keimah leh keimah chu ka inbe mawlh mawlh a, ka ngaihtuahnnaa ka thil tih zawh chiah a awm reng vang chuan ka motor chu ka tiding ta ringawt bawk. Chuta karah Mambawihi hmel chu ka mitthlaah a lo la châm reng zui a, Mambawihi ka ngaihtuah tlat ṭhin chu ka hrethiam lo a ni. Mipate'n in hmeichhia an ngaizawnga an duh ang hian Mambawihi chu ka duh ti ngawt dawn ila ani chu nau ang maia ka en a niin ka hre si a, mahse a bula ka awm erawhin nau ang mai mai chuan ke en lo tih chu ka hrechiang leh em em lawi bawk si. Âaaaa, thil awm dan hi ka hrethiam tawh bik lo e a!

Ka motor chu ka tinung a, kan in lam pan chuan ka tlan chhuak zui nghal bawk. Ka motor ka park ṭhat hnua kan in ka luh rual chuan sitting room-a ka pa leh ka nu leh ka pa driver te lo titi ho mawlh mawlh chu ka va hmu a, an hlim hmel dar dar hle bawk. Tin, zan rei lam a lo ni ve tawh bawk nen lang kala kan chhawr ṭhin kan awmpuite pahnih chu an hmel hmuh tur a awm tawh lo va, an haw tawh a nih ngei pawh ka ring. Ka nu chuan ka thawm hriain ka lam a lo hawi a, an bula ṭhu turin min lo phei nghal bawk.

"Ka pu, ka chhuk tawh mai ang, hei zan te pawh a rei tawh alawm" tiin ka pa private driver Zira chuan an bul ṭhutthlenga ka ṭhut thlak rual hian a rawn ti a, chutah ka pa chuan nui deuh hawk chung hian

"Chuti tur em ni, Marema a lo haw avang hian chhuk mai te hi i tum a ni lo maw?" a lo ti ve thuai a, keipawh chuan Zira chu ka lo en ve reng.

"Ni lo ve, ka mut a chhuak deuh tawh hrim hrim a, u Marem i leng chhuak em ni?" tiin Zira chuan ka pa zawhna chhang pah tho si hian min rawn be chhunzawm ve ta daih a, Zira hi chuan kan ina hnathawk dangte ang lo takin min nel ve hle bawk.

"Aw leng chhuak ve mai mai, engatinge tun lai hi in chung lamah chaw i va lo ei chho khât ta ve?" tiin keipawh chuan ka lo be zui ve nghal mai bawk.

"Nia, Republic lama ka putea te khan an ina riak turin min sawm tlût tlut bawk si a, he lamah pawh tun lai tak chu ka riak mumal meuh lo. Ka chhuk mai ang, mangṭha u" tiin a ṭhutna aṭang a ding a, keini pawh chuan lo be khawmuang buai tawh lovin kan lo mangṭha ve ta mai bawk.

"Enge chanchin Marem? Kimtei nu leh pate nen chuan in sawi fel thei em? Kei chuan inneih ngei ula ka duh a, Kimtei hi nula fel tak a niin ka hria" Zira a kal liam ta maw tihah ka nu zawk chuan a rawn ti a, kei chu ka nu min koh dan avang chuan ka lo nui chhuak hawk ringawt.

"Engatinge i nuih ringawt? Fiamthu ka sawi pawh ni hlei lo, kum 30 lai i pelh ve tawh hi, â deuh deuh hian che ṭhin suh" ka nu chuan a rawn ti leh ta duah a, ka nu ṭhin tak hi chu âw.

"Min koh dan kha a nia ka nuih chhan ber chu! Tun lai hi khatiang khan min ko khat teh mai a nia aw nu, LALREMRUAT min ti deuh tlawng zel a, tun lai chu engtik lai pawh hian i thinrim reng ringawt maiin ka hria" nuih vur vur paha ka tih chuan

"Kan boruak tawn leh kan thu hriatte hi a hrisel lo hlawm êm bawk alawm le, chutiang ni lo se i hmingpum paw'n ka ko kher lo vang che. Chuan ka zawhna che kha han chhang tawh teh" a rawn tih ve leh nghal a, a nuih ve sûng danah a mood a fuh hle tih ka hre thei mai.

"Ni e Marem, han sawi chiang vat teh, khi mut a hun tawh dawn a nia" ka pa chuan a rawn ti ve a, keipawh chuan sawi a hun tawh vîau chuan ka hre ta bawk.

"Kimtei nen chuan kan inneih dawn ta lo, a chhan chu min lo phatsan avang leh keimah lo mi dang hmangaih a neih avangin ka ngaidam thei lo a ni. Tin, a nu leh pate paw'n thil thleng vel ka sawi chu dawt a nih leh nih loh an zawt a, chutah Kimtei ber chu a ṭawng chhuak duh ta tlat lo a ni. A nu leh pate zawhna pawh chhang tura a ṭawng chhuah duh loh tlatna te chu sawi leh chuan ngai lovin ka thusawite chu a dikzia a tichiang a, Kimtei nu leh pa paw'n loh theih lohvin ka thusawi chu an awih a ngai ta a ni" ka ti chhuak dap a, ka rilruah chuan ipikna emaw Kimtei te lam ngaihtuahna emaw pawh a awm tawh lo hrim hrim.

"Awi kei chu âw, hetiang hi Kimtei mizia a ni ang tih rin ngaihna reng ka hre lo a ni. A hmangaih ve vîau che khan ka hria a, in inkawp fuh ka lo ti khawp asin" ka nu chuan beidawn hmel fê hian a rawn ti a, a tawpa tawpah chuan ka thusawi chu a ring ve ta te pawh a ni ang.

"A ni reng asin nui, a hma pawh khan ka hrîlh ka hrilh tawh reng che alawm. I mo a la ni lo va, bazarpûi bazarpui suh ka tih ṭhin che kha! Mihringte hian mize chi khat chauh kan nei lo va, mize chi hrang hrang kan nei zawk a ni" ka pa chuan a rawn ti chhuak ve leh dap a, ka nu erawh chuan thil ngaihtuah thui hmel deuh hian ka pa thusawite chu a lo ngaithla reng thung.

"Eng pawh ni se, i mu phawt teh ang u" ka nu chuan a rawn ti ve leh mai a, mahse a tho kang tur chu a ṭhu leh nghal.

"Chu eng rim nge? Surf rim a va nam em em ve le" ka nu chuan a rawn ti chhuak hlawl a, a kawrte chu a hnim a, kei erawh ka ṭhutna aṭanga lo tho chhuak vatin kal sawn daih ka tum thung.

"Nang kha ding teh" ka kal pel ti tih tawh chu ka nu chuan min lo ko ding leh a, min man chhuah loh reng ka ring tawh lo.

"Enge nu? Ka mut a chhuak vîau tawh a nia" ka lo ti zaih a, ka pa lah chuan min lo la en chik em em zui.

"Nangmah hi i ni chiang lutuk, min kal pelh rual khan i rim ka hre thei. Engatinge surf rim i va nam em em ve?" ka sawi chhuah peih lo tak chu ka nu chuan min rawn zawt ta nge nge e!

"Eng lo a nia, ka mut a chhuak tawh sia naktuk lamah ka hrilh zawk mai ang che u" tia ka room lam pan ka tum rual chuan ka pa zawk chuan

"La kal lo teh Marem" a rawn ti ve leh ta tlat mai.

"Tun lai hi i va che mak thei ve, vawiin tlai lama thil thleng pawh kha i nu hi ka la hrilh ve miah lo a nia" ka pa bawk chuan a rawn ti leh a, ka pa chu a thil sawi chhuah hun ber kher chu fuh lo ka ti ngei mai.

"Engmaw ka hriat loh thil in lo inhrilh leh bik tâk? Nangni pafa hi mi hrilh duh loh nei ziah suh u, ka kal bosan daih mai tur che u a nia" tiin ka nu chu a rawn ṭawng chhuak ve leh nghal zat a, ka nu ṭawng dan vel avang chuan ka pa chu a lo nui ri hawk hawk a, chutah kei chuan chu hun chu remchangah lain chak zet hian ka room lam chu ka pan chho ta daih.

Ka room chhung ka luh chuan ka thaw huai a, ka nu leh ka pate chuan an hriat ṭul em em loh an hre palh mai ang tih ka hlau a ni. A hrim hrimin keipawh hi engatinge Mambawihi bulah hian ka thil tih ngai loh dêuh deuh hi ka tih ziah mai le? A bik takin ka nu hian chawhmeh ka zuar tih te, tuikhurah ka insu tih te kha hria se zawng mak tih lutuk avangin min hau leh chîam emaw a ni ngei ang.

Mambawihi ka insuk pui chhan bera ka puh tâk chu amah chauha a insuk ka phal lohna kha a niin ka hria a, chu pawh tawhsual a tawh ka hlauh em vang a ni.

Engatinge Mambawihi kha amah chauha insuk ka phal loh? Amah ka hriat hma pawhin ani chu inrinni zan tin a insu ziah awm si a, engatinge Mambawihi a ni tih ka hriat tâk avanga amah maia insuk tir ka phal loh kher? Chu zawhna ka inzawh ruk mawlh mawlh lai chuan ka rilru chhungril kil khata mi chuan

"Ani te chu i nau ang maia i en alawm a nih, mahni nau te chu tû tihnat mah kan phal ngai hleinem" a rawn ti nghal.

Ni e, Mambawihi te chu ka unaunu ang maia ka en alawm a nih, engvangin nge mi dang tih nat ka phal tehreng ang ni!? Amaherawhchu engatinge zanin khan ka kuah leh kher? Engatinge ka taksa khan Mambawihi taksa sîk a châk em em ni ang le!?

"LALREMRUAT Mambawihi hi i duh emaw in ti suh, i duh reng reng lo. Mambawihi hi i khawihngaih lutuk avangin a taksa kha i si châk a, i khawngaih avangin an nufa sawn i pui duh a, chubakah Mambawihi te chu i duh rual pawh a ni reng reng lo" tiin ka rilru bawk chuan min lo hrilh leh a, ngaihtuah zui dan pawh ka thiam tâk loh em avang chuan ka rilru chu ka ring ve ta ringawt.

Khumah chuan ka bawk run a, ka kekawr iptea ka phone ah puar pûng chu ka la chhuak zui nghal. Ka phone chu ka khawih neuh neuh a, contact list-ah lutin Mambawihi bawk chu ka kutzungṭang te chuan ka mit hmuhah an rawn thai chhuak leh ta ringawt mai. Chutia thil ngaihtuah chunga ka phone ka en tlawk tlawk lai chuan Mambawihi chu ka lo call leh ngawt pek a, rang takin call chu ka hmet tawp zui vat bawk. Mambawihi chu biak duh ru vîau mah ila biak hun tak a ni rihin ka hre lo va, khatianga kan awm dun avang khan kei ang thovin a rilru a buai ve dawn tih ka hria a ni.

A tukah chuan Sunday a nih vang nge ni ka nu leh pate chuan zan lama an thil hriat châk deuh chu min zawt zui leh ta miah lo va, ka lawm tak tak a ni. Thawhṭanni zingah chuan tuk dang ang lo takin ka tho har phian a, ka thawh har chhan pawh ka mumang vang ni berin ka hria.

Ka mumangah chuan Mambawihi bawk ka hmu leh a, engvanga ka mumang thleng thlenga hmu ka nih chu ka hrethiam lo tak zet tawh a ni. Ka khum aṭanga ka thawh chhuah chuan ka room-a sana intar chu ka melh a, dar 8 lai a ri vâng tawh. Ka intihfai hnu chuan in hnuai lamah tukṭhuan ei turin ka chhuk a, chaw ei tura ṭhutthlenga ka ṭhut thlak hnu chuan ka nu chuan min lo en ran mai. Ka nu hmelah chuan zawhna hlir a lang ni maiin ka hria a, eng pawh chu ni se chaw hi i bar phawt mai teh ang.

"Sawifiah chu i la tum miah lo em ni?" kan ngawih ṭhup laiin ka nu chuan a rawn ti ta nge nge a, min en rei vawng vawng ka ti tawh reng a ni!

"Eng maw?" a thusawi tum hre lo ang deuh chuan ka lo ti let ve hû a, mahse ka nu thusawi tum tak chu ka va han hre chiang si em.

"Hre lo der vel suh, engvangin maw hmanni chuan chawhmeh te chu i lo zawrh ve vel a!? Khami ni vek lah khan surf rim i rawn nam haw em em leh nghal a, kha chu ka la sawifiah tir rih lo ang che. Tuna atan chuan zah pawh hre lo khawpa i chawhmeh lo zawrh chhan chu min han hrilh phawt mai teh?" huiham, tunah chuan ka sawi chhuah ngei ngei a ngai dawn ta a nih hi!

"Hman deuh khan, a rei ve leh deuh tawh mi sut teuh deuh mai nu pakhat hi ka nei a" ka tih lai chuan ka nu chuan

"Khang kha chu i pa ka aṭangin ka hre vek tawh, chawhmeh i zawrhna chhan tak leh i zawrh zah miah lohna chhan kha min han hrilh teh" a rawn tih zawm leh zat a, chu a zawhna ber kher chu keipawh hian ka hre ta hauh lo mai.

"Ka zawrh zah miah lohna chhan chu ka hre lo a ni" ka ti deuh tlawng a, ka hre lo mîau alawm le.

"Ka va han awih loh ber kher em, i hre reng anga i sawi duh loh tlat a nih kha!"

"A ni lo nu, ka zawrhpui chhan kha ka hre lo tak tak alawm, a nih loh paw'n ka khawngaih vang a ni ang ka ring" ka ti ta ringawt a, chu chu keipawh chuan a chhan ber ni tain ka hria.

"Chu phei phei ka awih lo lehzual, kutdawh i hmuhin i khawngaih avangin kut i va dawhpui dû du ngai kher em ni? A teuh lo mai, pawisa pein i kalsan daih zel a nih kha! A hrim hrimin tunge Mambawihi tih hmingpu hmeichhia chu!?" ka nu chuan Mambawihi chu ka pa hnen aṭangin a lo hre vek tawh tih ka ngaihtuah thiam ta mai.

"Mambawihi chu i ngaizawng em ni? Chu nu chuan Kimtei nena in inṭhen chhanah hian inrawlhna a nei em?" ka ṭawng chhuak dawn chiah tihah ka nu chuan a rawn ti leh nghal a, chutah keipawh chuan ka sawi tum ber pawh sawi ta lo chuan

"A têuh lo mai, ka ngaizawng lo nasa lutuk, Mambawihi te chu nau ang maiin alawm ka en. Ka khawngaih avanga ka puih lah chu i ring duh der bawk si lo va, a nu ka sut ṭep avanga ka puiah ngai tawh mai rawh. Keipaw'n chu chu a nih ka ring ber a, chu lo chu a chhan sawi tur dang ka hre tawh lo" tiin ka rilrua thil chi hrang hrang lo awm chu ka sawi chhuak ve ta duah a, ka nu chuan ka thusawi chu awih ve tawh mai se ka ti tak zet.

"Tun kumah kum sawmthum pakhat i tling ve tawh dawn a, doctor hna thawk lai i ni bawk a, mahse hetiang em ema kan zawhna pawh chhang thei lo leh sawi tur hre lova i awm hi ka la hmu ngai lo che. Mambawih chu i ngaihzawng a ni lo tak tak maw? Ani chu i lo duh lutuk luatah engmah tihzah pawh i nei tawh lo te hi a lo ni reu reu ang e" ka thusawi awih mai harsa ti fêin ka nu chuan a rawn ti leh a, chutah ka pa chuan ka nu zawhna ka chhan let hma chuan

"Âwww nui, chu nu chu Marem hian lo ngaizawng ta pawh ni se enge pawi? Tunah chuan nupui hual nei lai pawh a ni tawh lo ang tluk a ni a, a duh chuan ngaihzawngte chu a nei leh thei reng tawh alawm. Nakinah nangmah ber ber khan i fapa hi i buaipui leh emaw te kha a ni ang a, a ngaihzawng tur te kha i zawnsak leh chîam zawk mai ang" a rawn ti ve leh duah a, ka nu leh pate chuan thil an hre fuh lo kual vel vek a ni e.

"Nu, pa, in mak em mai. Mambawihi chu ka ngaihzawng a ni lo va, ka ngaizawng bawk hek lo. Engatinge nangni pahnih hian Mambawihi chu ngaizawng tura min rin tlat?" ka ti zo chiah chu ka nu zawk chuan

"I awm dan vel aṭang hi chuan Mambawihi in tih ve ziah chu ngaizawng i ang em alawm, a bulah chuan engmah tih pawh i hreh miah loh chû" a rawn tih ve leh nghal a, chutah amah vek chuan

"Chuan surf rim i rawn nam haw em emna chhan kha sawi tawh rawh, inrinni zan khan Kimtei te inah ni lo khawiah nge i len kawi?" a rawn ti zawm leh nghal zat a, ka sawi peih lo berte zinga pakhat chu ka sawi hun a lo thleng ta.

"Khami zan kha chuan Mambawihi te inah ka leng a" leng khât leh leng ngai lo ang deuh ka ti ve zaih a, ka nu leh ka pate chuan min lo melh dun ta ran mai.

"Chu chu chu, nang hian Mambawihi in tih chu i ngaizawng chiang lutuk" ka nu chuan a rawn ti leh zawt zawt a, chhan mai dan tur ka hriat loh lutuk avang chuan ka nui chhuak ta ringawt.

"Chuan surf rim i rawn nam haw chhan chu nang hi i insu vel a ni lo maw?"

"Ehêeee, engtinnge i hriat chat theih a nu?" ka lo ti hluai a, ka sawi chhuah pawh ngai miah lova ka nu'n surf rim ka nam haw chhan a rawn sawi dik chat chu mak ka ti ngei mai.

"Engtinnge ka hriat loh theih ang? Surf te chu insukna atana siam alawm a nih, chawhmehah kan hmeh ngai em ni?" a rawn ti leh bawrh bawrh a, ka nu ṭhin tak hi chu âw ka ti rilru vawng vawng a, chutah ka pa lah chuan min lo nui tût tut leh ta zui a!

"Ka sawi tum ber pawh sawi a ngai tawh lo ve" thaw huaia ka tih lai chuan ka nu bawk chuan

"Awi awi awi LALREMRUAT le! Chutia insuk te i peih ro ro a nih chuan kan inah hian insu ve tawh ang che, i thuamhnawte khi kan awmpuite suk tir tawh lovin nangma'n su ve tawh ṭhin ang che" a rawn ti leh hmawk hmawk a, thinrim ang deuhin lang mahse ka nu chu a thinrim lo tih ka hre chiang ve em.

"I ti awm ang lo ṭhin lutuk nui, chutiang a nih te chuan awmpui kan lak a ṭul kher nâng. Marema pawh Mambawihi tih hmingpu hmeichhia chu ka ngaizawng lo tiin i ṭang kawh tlat bawk si a, i awm dan han en mai che hi chuan ngaizawng i ang em a ni. Eng pawh ni se hetiang thil vel hi chu i sawi duh tawk tawh rih phawt mai teh ang u" dam deuh hian ka pa chuan a rawn ti a, ka nu pawh chu ka pa thusawi vang nge ni a rawn ṭawng chhuak leh tawh bik chuang lo va, chutia kan sawi tawp tawh mai tur chu lawm tak ka ni.

Tukṭhuan kan ei kham chuan ka room lamah ka chho a, Hospital lama kal turin ka insiam zui nghal. Hna kal tura ka insiam zawh chuan inhnui lama chhuk thlain ka nu leh pate chu ka kal tur thu ka hrilh a, pawn ka thlen hnua ka motor ka hmuh chuan thil hriat chhuah ka nei a, ka motor ke chu siamtir a ngai tih ka hmu zui zat bawk. Kar hmasa lamah te kha chuan ka la khalh chhuak lui hram kha a nia, vawiin lamah chuan siamtir ngei ngei a ngai tawh ang. Kan inchhung pawh luh tawh lovin kan kawngka bula bike chahbi intar chu ka la a, a bul lawka Helmet lo awm chu lain pawn lama ka bike dahna lam chu ka pan zui leh ta mai bawk.

Ka bike awmna ka thlen chuan a seat vel hru fai thuak thuakin bike chu ka tinung a, Car ka neih hnuah ka khalh chhuak khât ve tawh deuh bawk nen bike khalh chu nuam ka ti teh chîam tawh lo. Car ka neih hma te kha chuan ni tin zan tin kha ka khalh chhuak ṭhin a, bike khalh kha nuam ka ti em em ṭhin a nih kha! Rei lovah Mambawihi lo ṭhut ṭhinna hmun chu ka tlan thleng a, ka besei ang ngeiin Mambawih hmel chu ka hmu zui nghal bawk. Bike in ka kal tho ti rilruin Mambawihi bula pen khawmuan chu ka tum a, a bul deuh chiah ka thlena ka Helmet phawi ka tum lai chuan a bula ṭhunu chu a lo ṭawng hlawk hlawk a, keipawh chuan Helmet chu hlip ta lo chuan an thusawi chu ka ngaithla ta zawk.

"Hetiang renga in awm dawn chuan kan report hreh miah lo che u a nia, kan sawi lah hian min hnial ve ang pang pâng zel leh nghal"

"Nu Amawi ka sawi tawh khâ, kan tih a nih lo. Keini chuan kan haw dawn apiangin kan phiat fai ziah a, engtinnge a lo hnawk leh vek ṭhin kan hre lo a ni"

"Dawt bak i sawi leh lo vang, in dawthei nufa êm mai. Vawiin chiah hi kan ngaidam tawh ang che u, a dawt leha kan ṭhutnate thleng thlenga hnawmhnawk a lo awm leh a nih ngat chuan in duh emaw duh lo emaw LC lamah report kan pe tawh tak tak ang"

"Nu Amawi, thil awm dan hi ka hrethiam bik miah lo a nia, kan tih a ni lo tak tak" lungngaih hmel fe hian Mambawihi chuan a ti a, a bula nu ṭawng hlawk zet erawh chuan a thusawi chu a lo hre lo der hmak thung.

"Ka pu lo kal rawh, min lo dawr rawh, eng hi nge i duh ang? Anṭam te hi a tlawm a nia" a thil zawrhna hmaa ka va din lan rualin Mambawihi chuan a rawn ti zung zung a, kei chuan a lungngai hmel chu amah dawrtu te hmuhah chuan thup hram hram a tum tih ka hrethiam vek.

"Aw, khawi ka lo pack sak ang che" anṭam tel ka kawh zeuh hnu chuan a rawn ti leh zung zung a, full face-a Helmet ka khum tlat avang chuan ka ṭawng lo bawk nen tunge ka nih a hre lo hrim hrim niin a lang.

"Ka chawhmeh zawrhte i lo lei ṭeuh avangin ka lawm lutuk e ka pu, ni dangah pawh min lo dawr ziah dawn nia" pawisa te ka pek fel hnu chuan hlim hmel tak hian a rawn ti leh a, chutianga a chawhmeh zawrh ka leisak avanga a hlim hmel lutuk chu ka hmu rei tha tlat lo va, ngawi rengin anṭam tel 5 nen chuan ka bike hunna lam chu ka pan ta ringawt.

Chhun lama Ward ka fan lai te, paper neuh neuh ka chhiar lai te leh chhun chawlh kan neih lai te chuan Mambawihi chu ka ngaihtuahna aṭangin ka paih chhuak thei leh ta renh reng lo mai a, anṭam tel nga mai mai ka leisak avanga a hlim lutuk hmel khan ka lai a chhun tlat a, Mambawihite nufa nun chu ka khawngaih tak zet a ni. Anṭam tel nga mai mai ka ti tak nâ a, Mambawihi te nufa tan chuan chung anṭam tel nga man pawh chu a hlu em em si. Kei chuan sum tam tak ka nei a, ka nu leh pate chawm ngai lovin ka thla tin hlawh te chu ka khawl ṭûn ṭun thei a, kei chauh ni lo ka nu leh pate paw'n sum chu an tlachham lo ve hlein ka hre bawk.

Amaherawhchu Mambawihi te nufa ka hriat hnu hian chung ka hlawh neih avangte leh kan chhungkaw hausak avangte chuan ka hlim thei tawh miah lo va, hnam inang leh mihring ni ve ve si chuti taka kan dinhmun a inthlau ta mai chu ka hrethiam thei lo a ni. Kan hausakna te chu anmahni pe ṭhen ve thei ila ka ti a, mahse pek pawh tum ila an ni nufa chuan an lo lak duh kher pawh ka ring leh ta chuang lo. Ni e, kei hian anni nufa hi ka pui ang a, ka pui zel ang a, puih ngai lo khawp emaw ka rilru ka thlak leh te a nih ngawt loh chuan ka theih chhung chu ka pui zel bawk ang.

Chapter 9

Thla te chu a liam leh zung zung a, hriat loh karin ni te chuan ka piancham an rawn her chhuahpui ta thuai mai. Rei lovah December thla tir pawh kan chuang kai thuai a, boruak pawh kum dang aiin a vawt vin leh tak ta mai. Ka nu leh pate'n min rinhleh em avangin Mambawihite in lamah pawh ka leng phei ngai mang tawh lo va, Delhi ka awm laia ka ṭhian kawm ve ṭhin berin Hotel a din thar avangin ka ṭhianpa nen chuan kan inkawm deuh chawt zawk. Ka rin ai daihin ka ṭhianpa chuan Hotel chu a bei changtlung a, rei pawh an hawn hmain dawrtu leh hretu an nei zung zung nghal.

Mambawihi chu an inah te len chilhin va hmu kher tawh ngai lo mah ila Hospital lama ka hna kal lam leh haw lam hi chuan ka thlithlai ru reng zel a, an ṭhutna hmun ngaia an la ṭhut reng avang chuan an bula ṭhute hnen aṭangin buaina an tawk lo ni turah ka ngai ve hmiah. Mak tak mai chu kan inkar boruak a chhiat hnu kha chuan Kimtei chu ka hre chang tawh ngai lo va, ka theihnghilh hmak ti ila ka sawi sual tam lo vang. Chutianga ka theihnghilh hmak theihna chuan amah ka lo hmangaih tak tak lohzia min hriattir a, nuipuiah te khan ka lo nei hman reu reu ang tih chu ka hlau hnuhnawh leh ta hle bawk.

Ka lo tum lawk tawh leh ruahmana ka lo siam lawk tawh angin ka thla tin hlawh aṭang chuan Mambawihite nufa tan pawisa ka khawl ta ziah a, anmahni rawn chunga ka tih chuan an duh dawn lo tih ka hriat avangin engmah hrilh hmasa lovin an tan pawisa chu ka lo khawl ve tawp a ni. Ka tum dan chuan Christmas ni velah pek ka tum a, mahse chu pawh mi dang kaltlang emawa pek ka la tum hram. Ka hriat theih chinah Mambawihi leh a nute hi hausa tak chu ni lo mahse an nun a mawi a, an nun a dik a, chungte chuan anmahni bula ka awm apiang hian inthlahrun rukna min pe ṭhin a ni. Tin, ka nu leh pate ngei pawh Mambawihite tana pawisa ka khawl ṭhin thu chu ka hrilh ngai lo va, hrilh kher ngaia pawh ka ti hran lo.

Nilaini niin chu ni chu ka piancham a ni bawk a, chhuna ka hnathawk te chu ka rilru a hlimin ka zâng vah mai. Ka thawhpui ṭhenkhatte chuan min wish sup sup a, Dr. Tetei pawh a fel leh khawp. Dr. Tetei chuan Lunch min treat a tum tlat a, mahse keimah zawk chuan ka hnial luih tlat avangin min treat ta em lo. Zan lama kan piancham lawmnaa lo kal turin ka sawm a, amah mai ni lo ka thawhpui dangte pawh ka sawm nghal vek. Chhun chawlhah chuan ka ṭhianpa Hotel lam ka pan a, an Hotel hian thil an neih chikim mai bakah an neih tuihnai em avangin ka pan ta char char a ni ber.

"Êeee lo kal rawh Marem, vawiin chu ni dang aiin i va rawn thlen tlai phian ve" Hotel chhunga ka luh rualin ka ṭhianpa Amuana chuan min lo be sawk sawk a, keipaw'n a awmna lam chu ka pan phei ve nghal mai bawk.

"Nia, ka thawhpuite'n min tikhawtlai deuh a, ka rawn thleng tlai mai mai a nih hi! Chuan tun lai hi kar dang aiin in lún lehzualin ka hria, a dik em?"

"Aw nia, hei ka rin ai takin dawrtu hi an lo lut zing a, a tizia tak tak a ni. Nangni tunlai Hospital lamah in buai em? Kei chu vawikhat pian ve mana Doctor han nih tawp mai chu a peihawm loh ka ti"

"Engati maw? Doctor nih te chu nuam ka lo ti vîau zawk asin"

"Doctor te chu an dinhmun a khirh alawm, mihring ve tho nimahse an mihring puite nunna leh thihna chu an kovah a tla a, an hmingchhiat theih vîau rualin an hmingṭha thei vîau bawk"

"I lo thlir dan chu a dik tho mai a, mahse Doctor te hi awm ta miah lo ila emaw nih duh tawk lo awm miah lo ta ila chuan inenkawl dan tur leh nunna chhan dan kawng kan hre thei dawn lo asin"

"Ni ve leh tho bawk sia, Marema tan hian a ei ṭhin kha hetah rawn dahsak mai teh u, kan titi tui dawn tlat" tiin waitress te chu a hrilh zawm zat a, ani hi zawng mi hmuhah pawh ṭhiante chu min tizahawm thiam ṭhin khawp mai.

"Êeee thil min lo tihsak teh Amuan, min tihsak theih chuan ka lawm ngawt ang" waitress ka hmuh avanga thil ka hriat chhuak zawk hnu chuan ka ti ti chhuak thut a, Amuana pawh chuan min lo en ve nghal vat.

"Eng thil chu ka tihsak ang che? Damdawiin lampang kha chu sawi ri lo law law a, a fin thlak zawk ang" nui deuh hak chung hian a rawn ti a, he pa hi chuan damdawiin lam hi chu a ngaina lo ve chiang alawm.

"Ni lo ve, thil dang daih alawm sawi ka tum. Eng lo a nia, waitress hi i mamawh belh em? I mamawh belh chuan hmelhriat ṭha deuh mai ka nei a, ani pawh chuan i lo mamawh tâk hlauh chuan a rawn thawh duh ngei ka ring"

"Ka mamawh belh leh belh loh lam chu thu hran han ni phawt se, i hmel aṭang kha chuan chu i hmelhriat chu ka Hotel-a thawhtir ngei ngei turin min ti zawk a ang deuh lo maw" Amuana chuan nui deuh sûng hian a rawn ti a, ka hmelah chuan a lo hriat vîau tak tak te pawh a ni ang.

"Aaaa, nia..dik tak chuan chhawr ngei ngei la ka ti alawm, amah chu hmeichhe fel tak a ni bawk asin"

"A nih chuan engtik niah emaw min la inhmelhriattir ve la, tichuan keipaw'n chhawr tlak a ni ang em tih te ka lo chik ve dawn nia"

"Aw le, a ṭha e. Zaninah khan lo kal ngei ngei la, chutah chuan ka hmeichhe sawi pawh chu ka lo hruai dawn nia" ka ti ta thlâwr ringawt a, Mambawihi chu ka piancham lawmnaah chuan a lo kal duh ang em tih lam reng ka la hre hauh lo.

"I sawi har ka ti tawh reng a ni. Ni e, zanin chu rokhawlhna dang a awm thut te a nih loh chuan keipawh lo kal ngei ka tum ang"

"A ṭhat nasat chu! Hei ka let leh a hun tawh mai dawn, ka kal phawt mai ang" ka ṭhutna aṭanga tho chhuak chung chuan ka ti a, ani pawh chuan aw min lo chhawn ve vat a, keipawh chu ka kal chhuak zui nghal.

Hospital-a ka hna ka thawh leh te chuan ka phur sârh mai a, a chhan pawh eng dang vang ni lovin Mambawihi hnathawh tur ka hmuhsak theih dawna ka inhriat vang a ni. Tin, a dang leh chu ka piancham a nih vang a ni tho bawk. Ka nu leh pate leh ka cousin te'n engkim an lo buaipui tur thu min hrilh tawh avangin haw hma chu ka tum em em lo va, mahse Amuana nen kan inbiak hnu kha chuan haw hma chu ka duh leh ta zawk a ni. Hospital aṭanga haw vata Mambawihi chu hmuh ka duh a, ka piancham kan lawmna tura lo kal ngei ngei turin ka duh bawk a ni. Tlai dar 3 velah chuan Hospital aṭangin ka chhuak a, Mambawihi chawhmeh zawrhna hmunah pawh pen kawi ka tum ruh hle.

Ka haw hun nen ka chhut a, Mambawihi chu a la haw dawn loh tho avangin haw lam chuan ka khalh chak em em lo va, mahse Mambawihi chu hmuh vat vat ka châk ru hle thung. Ka hmu châk tawh vîau e ti lo chuan a bula ka ṭawng dan turte leh zana a lo kal ngei ngei a ngaih thute ka sawi dan tur chu motor khalh pah chuan ka ngaihtuah rauh rauh a, chuta karah Traffic chu a rawn la Jam leh ta nghal a! Traffic a Jam ve ziah hi ka hne a, hmanhmawh nen phei chuan inmil lo tak a ni.

Tlêm tlema kan inkhalh phei ve bauh bauh reng hnuah chuan Mambawihi ṭhutna pawh chu ka thleng phei thei ve ta hram a, mahse motor park mai na tur chu ka vân leh ta hle. Motor parkna tur a vân em avang chuan rei pawh awm lova ka sawi tur ang ang chu sawi chhuah pawp ṭha maiin ka hria a, chuvangin ka motor chu a ṭhutna hma takah ka tiding ta ringawt.

Mambawihi POV

Ka chawhmeh zawrhna hma taka Car pawl lo ding ringawt chu mak ka ti hle a, ka en ngawt ngâwt ringawt. Chu Car pawl chu ka hmuh hnu a ang ka ti em em a, u Marema Car emaw ka ti hman hîal. Mahse u Marema Car chu a ni thei lo vang, a chhan chu ani chuan min rawn tlawh duh tawh ngai hleinem. Khatia min insukpui zan aṭang khan u Marema chu kan inah a rawn leng tawh ngai lo va, zep lovah chuan ka awm thiam lo hûihin ka hria. Ka zam nasat theih em avangin a bula awm kha nuam ka tih leh tih loh pawh ka hre lo va, mahse a'n awm lo ta chiah chu ka ruak huai ni berin ka hria.

Inrinni zan tin ka insukna hmuna lo kal ve te kha a sawi a, mahse chung a thil sawite chu dawt mai a ni. A nihna takah chuan chutianga a lo kal tawh ngai miah lo chu nuam lo ka tiin a lakah ka vui a, mahse vui thei ringawt ka ni lo tih ka inhre chhuak ve ziah. Tin, ka phone number a neih hnu te kha chuan min lo biak ve kha ka ring ru deuh a, ani erawh chuan min lo be lo hrim hrim. Mahse anni te chu mi hausa chhungkaw zinga mi an ni a, keini in chhe ve takah te chuan an lo lêng an lo leng duh tawp nâng. A nih loh pawhin min insukpui kha a duh leh lo te pawh a ni ang. Anni te chuan kuta insuk ngai lovin Washing Machine ṭha leh changkang tak tak te an nei fur awm si a, kuta insuk tlawng chu tih ngaih loh phei chuan a hahthlak ve bawk êm a ni.

"U Marema maw!?" Car pawl aṭanga mi lo chhuak ka hmuh rual chuan ka ti chhuak sep a, ka ṭawng zawih em avangin ka bula ṭhu nu Amawii tak ngial pawhin ka thusawi chu a hre lo vang.

"Hei Mambawih, i inhralh ṭha em?" ka hma zawna a lo din rualin u Marema chuan a raw ti a, min melhh chhuk run bawk.

"Aw hralh ṭha e" ka lo ti deuh hmuk a, a hmel pawh en rei duh lo chuan kawngpuia motor tlan vel chu ka thlir zui ta daih.

"Eng lo a nia, thil sawipui lawk che ka duh a" a rawn tih leh pawh chuan amah en lovin ka hmaa chawhmeh siam ṭhat ngai miah lo te chu ka rem ṭha vel a, kei hi ka lungawi lo chiang a ni.

"Tunah chuan ka va'n buai ve, chawhmeh ka zuar laklawh bawk sia" tiin ka lo chhang let ve leh hmak a, ka lungawi loh chhan ber nia ka hriat chu zana kan ina a rawn len tawh ngai loh vang a ni.

"Buai lo lawk mai teh, lo kal rawh" ka banah chuan rawn chelhin min rawn pawt tho nghal a, kei chuan hlauhthawn hmel fe hian ka lo en hâw thung.

"Ka sawi rei lo vang Mambawih, ka ti tak tak. Ka pi, Mambawihi chawhmeh zawrh ho kha min lo vilsak lawk mai aw" tiin mi awm tam lohna deuh lamah chuan min pawt phei dawr dâwr a, eng ang pawhin tih din emaw tal chhuah vel emaw pawh tum mah ila ka theih thlawt loh avang chuan ka zui phei ta ringawt.

"Enge i hriat a? Nangni angin sum kan nei ve mai mai thei lo tih i hre lo em ni? Minute khat lek pawh hi keini tan chuan a hlu lutuk asin, pawisa min pek avang khan i duh dûha tih kawi theiah min ngai ta mai em ni?" min dinpui rual chuan ka ti ta phiar a, mi an awm em em loh avang chuan ṭawng rin chu ka inthlahrung ta lem lo a ni.

"Ni lo Mambawih, chutiang lam a ni lo. Thil sawipui che ka duh mai alawm" a rawn tih lai chuan thinrim tak hian

"Thil min sawipui duh a nih pawhin saw tah khan a sawi dun theih reng alawm" ka lo ti ve leh nghal a, ka rilru chu engvanga rawn no em em nge a nih tih leh ka mittui chu engvanga lo tling ringawt nge a nih tih te chu ka hre hauh lo.

"Hei Mambawih, na i nei em ni? Ka kalpui hmawk hmawk che avang khan i taksa a na em ni?" mangan hmel fea min en chung hian a rawn ti a, ka mittui chu khaplet pawh tum mah ila a lo tlin tam tawh em avang chuan ka khaplet thei lo va, a hmel en lo va hnuai lam hawi chu ka thlang ta zawk. Chutah u Marema vek chuan ka khabea lo chawi kang pah hian

"Mambawih" a rawn ti leh sup a, chutia min ngaihtuah hmel taka a rawn tih hnu chuan ka mittui te chu ka biangah chuan an lo baw ta zâwih mai.

"Hei ṭap lo teh, ka tihpalh. Ka lo kai na mah mah che a ni mâw, ka tihpalh Mambawih" tiin a âwmah chuan min kuah bet nghal a, ka rilru chuan ka awm dan chu a dik lo tih min rawn hrilh nasa vîau mahse ka awm dan chu ka thunun thei rih tlat lo a ni.

"Le! Ṭap tawh lo la, chuan ka thil sawi duh chu ka sawi vat ang a, kan phei leh thuai dawn nia" a rawn tih leh chuan min kuahna aṭang chuan ka petek vat a, ka awm dan chu a zahthlak ka ti lutuk.

"Hun kan khawhral nasat loh zawkna'n vawiin hi ka birthday a nia" a rawn tih chuan u Marema chu ka en chho vat a, ani pawh chuan min lo en reng chung hian

"Zaninah kan inah a lawmna kan nei dawn a, chutah chuan ka ruala lo kal ve turin ka duh che a ni" a rawn tih zawm leh nghal zat a, a birthday lawmnaah chuan engvanga kei te min lo sawm ve daih nge a nih le?

"A chhan chu ka ṭhianpa hian a Hotel-a hnathawk tur a zawng a, ka ṭhianpa chu hmelhriat la, hetianga chawhmeh zuar tawh lo hian Hotel-ah chuan thawk daih la ka duh a ni" eng thu nge u Marema hian a sawi hî? Hotel-a thawh maw!? A thusawi chu awih tur a ni nge ni lo pawh ka hre lo.

"Ka thusawi chu i va'n awih loh hmel ve, ti khan ka sawi duh chu ka sawi tawh e. I chawhmeh zawrh lam i ngaihtuah tawh bawk si a, phei vat ang" mak tih hmel taka ka lo en reng avang chuan a rawn ti leh nghal a, chutah keipawh chu harh chhuak thutin u Marema kal phei vang vang tawh chu ka zui phei ve ta vat.

"Kha pa ve ziah kha i bialpa em ni? Nangni ang ho hi mipate ngaihven tura awm in thiam hlawm phian dawn a nih hi!" ka ṭhutnaa ka ṭhut thlak rualin nu Amawii chuan a lo ti leh nghal ringawt a, engmah hre chiang lo va ṭawng a ching lutuk hi a ninawm.

"Aw, ka bialpa a nih kha! An hausa teh mai a nia, nakinah chuan a nupui ka la ni lo vang tih pawh a sawi theih loh" a ṭawng ka nin lutuk avang chuan ka ti chhuak ve ta tawp a, u Marema a awm tawh lo tho bawk nen chutia han chhan let ve fak chu ka châk tlat.

"Awi i bialpa chu a va la inchhir dawn tak em, i zia tak tak hi a hriat chhuah hunah chuan a ṭhen vang vang ngei ang che"

"Nu Amawi, engatinge ka chungah hian i sual em em a? I pawi ka sawi em ni? Engatinge ka nihna ni lo lô te'n min sawi ṭhin?"

"Chutianga ka sual pawh ka lo hre hleinem" tiin hmun dang chu min hawisan ta hmak a, nu Amawii te ang mizia nei hi chu engtikah mah ka mil theih ka ring lo.

Tlai lutuka haw ka duh loh avang chuan ka insengfel thuai a, kan inah tûmah an awm lo bawk nen haw vata ei rawng bawl chu a ṭulin ka hre ta zawk a ni. Kar hmasa lawk aṭang khan ka nu chu kan kawmthlangte kawr ṭhuina dawrah a thawk thar a, chutia chawhmeh zuar tawh lova hna a thawk daih thei chu ka lawm hle a ni. Ka nute ang chu hna hahthlak leh hrehawm thawk vak vak chi pawh an ni tawh lo va, mahse kan ṭul em avangin ani chuan a thawk lui mai ṭhin. Amaherawhchu ka dam chhung hi chuan a ai awh zel ka duh a, bazar kan ṭhut dun lai te khan ṭhu ve tawh lo tur khan ka va'n hrilh ngun thei tak!

"Nu, in bang tawh em ni? Vawiin chu in tlai rîaua ka hriat" khaw thim det deta ka nu kan in chhunga a lo luh rual chuan ka lo ti a, ka nu hi chu thil ṭhui a thiam phian a, a hma ang lo takin mi pawh hian an chhawr duh leh ṭan tawhin ka hria.

"Nia, vawiin chu ṭhui tur a tam ang reng lutuk a, zaninah pawh ka kal leh a ngai dawn a nih hmel"

"Zan zanah pawh maw!? Nu, i hlawhte an pun dawn em? An pun dawn te a nih loh chuan kal lo mahla a pawi miah lo"

"Min ngaihtuah lutuk a nih khâ Mambawih, ka hlawh chu an pun dawn alawm. Chu lovah December thla kan lo chuang kai leh tawh bawk si a, pawisa inkhawl pawh kan mamawh alawm"

"Khangte chu ka hre tho a, keimah pawh hian pawisa te chu ka hlawh chhuak ṭeuh thei tho"

"Aw le aw le, ka lo thawk hahdam lehzual tawh nia, zan chhuah te ka ngai leh dawn bawk sia chaw ei nghal mai teh ang Mambawih" ka nu'n a rawn ti leh chuan chaw ei siam tur chuan ka che chhuak ve leh mai bawk.

Dar 6 velah chuan ka nu chu a thawhna dawr lam panin a chhuk a, ka khawngaih reuh tak tak. Chutia tukverh aṭanga ka nu chhuk thla lai ka thlir reng lai chuan kan kawngka chu a lo ri ṭhawk a, pawn lam aṭang chuan lo hawn tum an awm tih ka hre nghal. Chhung lam aṭanga ka kalh tlat avangin kawngka chu a rawn inpawt ri ṭhawk ṭhawk a, hlauhthawnna hlirin ka khat tawh. Tho chhuakin kan chaw khawrhna chu ka la vat a, chu chu ka invenna neihchhun a ni.

"Tunge?" kawngka bul deuha ka din tawh avang chuan ka ti a, mi sual emaw pawh ni se engtin emaw ni tala lo vau zam chu ka tum ber.

"Mambawih, keimah Marema, kawngka hi lo hawng teh" kawngka pawn lam aṭanga u Marema aw ngei ka hriat hnu chuan ka hahdam sawng sâwng thei.

"I va mawl ve, min lo ko ve mai ta che" kawngka ka hawnsak hnua a lo luh rual chuan ka ti a, ani ve thung chuan ka kuta ka thil ken chu a lo en daih thung.

"Nia, rawn hawn mai ka tum kha a lo inkalh tlat bawk sia, in mu tawh emaw tiin ka ko duh ta lo che u a nih kha!"

"Tun ang hunah mut a la hun hleinem"

"Mambawih, vawiina i laka ka chet dan avang khan i la thinrim reng em ni? Thinrim tawh lo teh, chuan zanin hian kan inah i lo kal a ngai kha aw"

"In inah chuan ka rawn kal duh teuh lo mai, i tizahthlak thei lutuk" engatinge u Marema hian inthlahrunna tur ringawt hi min siam mai le.

"A zahthlak loh, ka bulah i awm char char dawn alawm. Khawnge i nu hî? I nu ka dil ang a, kan kal dawn nia"

"Ringawt ngawt che chuan, ka nu chu puanṭhuina dawrah a thawk a, zanin pawh hian a kal leh lawk a nih hi"

"Chuti i nu a awm loh phei chuan mahnia ina lo awm kha a hlauhawm daih zawk, ka bulah chuan lo kal mai rawh. Ina i awm chuan mi sual te lo kal palh ta se chaw khawrhna khan a chhan dawn der si lo che a, chuvang chuan zanin chu ka birthday lawmnaah chuan lo kal mai rawh" ka kal loh hlau tak chuan a rawn ti a, engtia han hnial chi nge a nih pawh ka hre tawh lo.

"Aaa!! Ka zak e a! Nangni chu in hausak hmel bawk si, chu lovah thuamhnaw mawi hak tur pawh ka nei lo hrim hrim" ka lo ti ve leh tlat.

"A ho lutuk, i duh dûh kha ha tawp rawh. Nangmah leh nangmah kha insit lo la, i hmelṭha ber tih inhre tawp rawh" a thusawi avang chuan a hmel chu chiang takin ka en chho a, chutah keimah zawk chuan mak ti tak aw hian

"Maw?" ka ti chhuak sep a, chutia ka tih vang nge ni u Marema chu a hawi sawn vat a, ka zawhna pawh chu a chhang leh tawh chuang lo. Ka tih tur hre lo chu ṭhutthleng lam ka pan phei chhet chhet a, ka ṭhu ta ringawt.

"Khatianga ṭhu reng lo khan insiam vat rawh Mambawih, kan tlai palh ang e" kan ngawih vang vang hnuah chuan a rawn ti leh a, enge kei kher chu min hruai a duh kher, a ṭhianpa pawh chu ni dangah ka hmu thei reng sia enge zan kher kherah a tih tlat.

"Tuna i incheina nen pawh khan ka hruai hreh lo che a nia, zanin chu ka hruai ngei ngei dawn che hi a ni tawp" a aw chu ram deuh hmak mahse hlauhna ka nei miah lo va, u Marema chuan min tihnat ka ring lo ve tawp ni maiin ka hria.

"Ka ṭhianpa pawh lo kal turin ka hrilh vek tawh a, chuvang chuan i lo kal ngei ngei a ngai Mambawih" a rawn tih leh chuan lo hnial tlat ãtthlak tihna chen ka nei ta a, peih lo ru zet chuan ka insiam ve ta hna hnâ.

U Marema te in kan thlen chuan mi an lo tam em em a, an changkangin an hausak hmel hlawm tak an ni. A hma khan u Marema te in hi chu ka lo kal ve tawh a, mahse an in a ni ang tih ngaihna reng ka hre lo a nih kha! In chhung kan lut chiah chu ka zak ngawih ngawih a, ka lo kal ta kher kher chu ka inchhir thar hle. A sawi ang ngeiin u Marema chu ka bulah a awm reng a, tu tu emaw ni te nen an inbe chhen bawk. Birthday cake an zai lai te chuan kil khat aṭangin ka lo en a, u Marema chu Cake a zai lai tih lovah chuan ka bulah a awm char char. Tin, a nu leh pate bulah chuan min inhmelhriattir a, chutiang em ema ka zah pawh chu ka la hre lo. Tlêm chuan han nei nung ve deuh tal ila chuan chutiang em ema ka zah chu ka ring lo va, mahse kan neinung der si lo.

U Marema min hrilh lawk ang ngeiin a ṭhianpa chu a lo kal a, thil te min sawipui ve luam a, changkang vîau mahse a ṭawngkam chhuak chu a nelawmin an fel hlawm phian. U Marema ṭhianpa chuan a Hotel-a ka thawh theih nghal tur thu min hrilh a, mahse kei chuan kan khaw lama Christmas hman kan tum thu chu ka hrilh vat a, Christmas hma kar thum chhung thawk turin leh kum thar lama thawh chhunzawm turin min ti zui ta bawk.

Chuti taka a Hotel-a hna ka thawh a duh chhan chu ka hre lo va, ka tan chuan malsawmna a ni ringawt.

Kan in lam ka ngaihtuah tawh em avang chuan haw ka duh thu chu u Marema ka hrilh tawp a, a chhan pawh ka nu chu amah chauha awmtir ka duh lo a ni. Chutia haw ka rawt hnu rei lote ah u Marema chuan min hawpui a, nuam ka tih leh tih loh te min zawt a, keipawh chuan nuam ka tih thuin ka lo chhang ve tawp.

"Mambawih" tiin step-a ka chhuk thla tawh tur chu u Marema chuan min lo ko leh a, keipawh chu ding meuhin u Marema lam chu ka hawi phei ve nghal.

"Thil hrilh duh che ka nei a" a rawn ti a, ani chu ka bul maiah chuan a lo ding reng tawh zawk. Engtik laiin nge Car aṭang chuan a lo chhuah tih reng ka hre lo.

"E, a ngai leh lo mai" a rawn ti leh lawi a, chutia amah berin a ngai leh lo a tih leh tâk siah chuan mangṭhe zeuhin step lam chu ka hawi a, ka chhuk thla dawn chiah tihah chuan u Marema chuan min rawn kuai her lâwp a, nghet lutukin a awmah chuan min kuah bet zui hmak bawk.

"Ka thei tawh lo Mambawih, keimah leh keimah hi ka inbum thei tawh lo" a rawn ti chhuak sup a, min kuah ngheh êm avang chuan ka thaw ṭha thei lo mai dawnin ka hria.

"U Marem" min kuahna avanga ka thawk hleih theih loh thu sawi ka tum lai chuan ka dara chelh chung hian kan inhmachhawn theih turin min nam sawn thut a, kei chuan a hmel chu chiang takin ka lo en thung.

"Mambawih, ka vei em em che a, ka thluak chhung aṭang hian ni khat lek pawh i awm lo ngai lo. Hetiang em ema min hiptu nang ang hmeichhia hi ka la tawng ngai lo va, nupui kha ka lo nei hman ang tih ka hlau hle a ni" a rawn ti dam dup a, a hmel chuan a thutakzia a tichiang hle bawk.

"U Marem" sawi tur dang ka hriat hlawl loh avang chuan ka lo ti leh ringawt a, ka zam em em bawk. Ka thinphu te chu a rang em em a, ka thinphu ri te chu a hre pha hial zawk maithei a ni.

"U Marem, min thlah teh" tia a vawnna aṭanga tal sawn ka tum lai chuan ka darah ni lovin ka lu ah chuan a rawn chelh a, chiang lutuk tak mai hian ka hmuiah a rawn fawp a nih chu!

"U Marem" theihtâwp chhuaha ka nam sawn hnu chuan ka ti hrâwk a, a hmaiah chuan ka beng nghal sawk bawk.

"Hetiang em ema i mi hmuhsit ni tur hian enge ka tih? Mi rilru ṭha tak i ni emaw ka lo asin, ka nu nen kan chunga i ṭhatna zo zai te kha a lawmawm lutuk. Mahse khang thil i tih avangte khan min hmusit dawn tih lo hre lawk ila chuan engmah kha kan la lo lui ang a, engmah kha kan tih tir lo bawk ang che" ka ti chhuak hlawk hlawk a, ka phalna pawh la hmasa lova min fawp chu a inzah loh thlakin a inhmuhsit thlak ka ti em a ni.

"Ni lo Mambawih, i hre dik lo. Engtik lai mahin ka hmusit ngai lo che u a, ka hmusit ngai bawk lo vang che u. A bik takin nang phei chu ka ngaina em em che a, hmel inhmu lo mah ila ka rilruah i awm reng zel a, chuvang chuan ka hmusit phal lo zawk che a ni" a rawn ti ve nghal a, a thusawite chu ring turin min duh vîau mahse ka ring thei mai rih lo a ni.

"Min hmusit a nih si lo chuan engatinge min fawh ringawt? Engatinge ka phalna pawh la hmasa lova khang thil kha i tih?"

"Ka insum zo tawh lo alawm, ka fawp châk lutuk che kha ka insum zo tawh lo a ni ber. A hrim hrimin i hmuia ka fawh tur thu ka hrilh hmasak kher che a ngai em ni? Ka fawp dawn che aw tia inhrilh hmasak dû du te chu a, a pa lo em mai" nui lui sak chung hian a rawn ti a, he pa hi min fawp kha a inchhir miah lo tihna em ni?

"Tuna i thil tih zawh chiah kha fiamthuah ngai reng reng suh aw, ka duh miah" ka tih laklawh lai chuan

"Mambawih, ka thil tih zawh chiah kha ka fiamthu reng reng lo. Ka thutak vîau zawk asin, nangmah khan min nam sawn lo phei la chuan ka thutak rei ngawt ang ka ring" a zak ve miah lo chu mak ka ti a, chungte hlei hlei chuan ka thin an tirim zual.

"Chuan eng pawh ni se ka thil tih châk em em ṭhin ka ti tawh a, a nuam tho tho e" a rawn tih zawm leh zat a, ka ngaihtuahnate chu a kal dik thei tawh lo.

"Enga!? Kha thil kha i lo ti châk em em ṭhin maw!?" thinrim tak chuan ka ti a, kawngkal tûmah an awm loh avang chuan ka ṭawng zawi duh der lo.

"Aw, ti châk tehreng e"

"Tenawmpa" ka zak bawk si, ka thin a rim bawk si nen a thil tih chu inhmuhsitnaah ka ngai ni berin ka hria. Inngaizawngte chu an infawp ṭhin tih ka hre tho a, mahse u Marema ber kherin min fawp chu mak ka tih lutuk luatah ka thinrim ni maiin ka hre bawk.

"Hmelṭhanu" engtinnge he pa hi a la nuih suk suk theih zawk?

"U Marem hetianga i awm zel dawn chuan lo leng tawh miah suh, chuan ka tana hna i lo hmuh pawh kha ka thawk leh duh lo" ka tih chuan a nui tawp hmak a, min en nghal run bawk.

"Mambawih, Hotel-ah chuan i thawh ngei a ngai, hlawh pawh a chhe lo vang" a rawn ti thuai a, kei erawh chuan lu thing nâng nang chung hian

"Ni lo ve u Marem, keimah ni lo mi dangin thawk zawk mai rawh se. Keini leh nangni chu kan inhriat hma ang chiah khan inhre lo angin leh zawk ang" ka lo ti ve thung.

"Mambawih, ka chet dan avang khan ka tihpalh. Mahse Hotel-ah hian thawk hram rawh, i thawh chuan len pawh ka rawn leng tawh miah lo vang, ka ti tak tak" a rawn ti leh thuai a, engvanga Hotel-a ka thawh chu duh em em nge maw a nih reng reng le.

"I chiang maw u Marem?" ka ti ve ta ringawt a, lo leng tawh lo se ka duh leh duh lohna lam ai mah chuan min fawp ringawt chu ka la thutak ber a ni.

"Aw" a rawn ti chhum bung hmawk a, a hmel aṭang chuan a thin a rim a ang ka ti. Ngawi rengin ka hma zawn aṭang chuan a kal sawn a, a Car chhungah chuan lutin chak zet hian a tlan chhuak zui nghal.

Chapter 10

Tunah chuan u Marema ṭhianpa Hotel-ah waitress hna chu ka thawk tawh a, ka thawhna Hotel neitupa chuan min hrethiam lutuk chu mak ka ti zawk a ni. Kan khaw lama Christmas hman ka tum thu ka hrilh hnu pawh khan ka thawh theih tur thu leh kar 2 leh a chanve chhung ka thawh tur thu min la hrilh hram kha a ni a, ka hlawh tur zat chu la hre rih lo mah ila u Marema min hrilh lawk angin a tlem chu ka ring chiah lo. A chhan chu ka thawhna Hotel hi Hotel lian leh changkang tak a ni a, thil ei man te pawh a to hlawm vîau bawk. Tin, tlai khawh hnua thawk ka nih vang nge ni ka thawhpuite chu nel an har hle a, min biak leh biak loh chu thu hran ni se an awm deuh hmûk hmuk zelin ka hria.

Kha zan, u Marema'n min fawh zan aṭang khan u Marema chu kan inah emaw min hmu tur emaw pawhin a lo kal leh tawh ngai lo va, a pawi pawh ka ti hran lo. Ni lo, kei hian dik taka sawi chuan u Marema lo leng tawh ngai lo leh min hmu tura a lo kal tawh ngai lo chu hrehawm ka tiru reng a, ka ti lang chhuak lo mai a ni. Zan khat phei chu ka mumangah u Marema hi ka lo hmu a, nula leh tlangval inngaizawng ang maiin min lo kuah bet ran a, kei lah chuan chutianga a âwma awm chu nuam ka lo la ti em em zui. Duat hmel tak hian min lo en vawng vawng a, chutah ka hmui fawh tum ni awm taka a rawn kun thlak lai chuan ka harh ta daih.

Ka nu pawh chuan u Marem lo leng khât ta deuh chu mak a lo ti ve tho a, a lo len tawh ngai lohna chhan lah chu ka hrilh duh der si lo. U Marema chu ka thusawi avanga a hmel rawn lan tawh ngai lo tih ka inhria a, khang ka thusawi avangte ka inchhir hle bawk. Ka thinrim lutuk kha a enga mah hmain thu huatthlala tak tak ka lo chhak chhuak a, u Marema tan kha chuan lo len leh chu a châkawm tawh miah lo vang. Chutah amah vang bawkin Hotel-ah hna ka thawk thei a, duh ni se zawng ka thawh leh lohna'n a hma la nghal ngei ang. Amaherawhchu ani chuan ka thawh ngei ngei theihna'n kan ina lo len tawh loh hial te min tiam a, chungte chuan mi rilru ṭha leh fel a nihzia min hriattir tawh a ni.

"Mambawih, kan in lamah min lo kalpui lawk ta che, Hotel thil tur kan inah ka dah tlat mai" Hotel neitupa pu Amuana chuan a rawn ti a, keipawh ka ṭhutna aṭanga tho chhuak vatin ka lu ka lo bu nghal nghauh nghauh.

Pu Amuana hi u Marema te nen an inrual vel ka ring a, ka lakah chuan a fel khawp mai. Kar khat ka thawh hnuah phei hi chuan a mi chhawrte ang lo takin min nel ve tawh em em a, chutiang bawkin keipaw'n ka nel ve tawh hle chuan ka hria. Mak tak maiin kha zan, u Marema'n ka hmuia a fawh a zan aṭang khan ka dik lo va, u Marema chu ka ngaihtuahnaah a awm reng ta mai. Ani kha chuan min vei thu te, ni khat pawh a thluak chhunga ka awm loh lai a awm loh thute min hrilh a, mahse ka awih chuang der lo a nih kha! Kei chuan khang a thil sawi te avang khan u Marema ka rilrua a awm tlatna chu ka ngaihbel mai mai niin ka ngai a, mahse a hmel ka hmuh loh tak tak erawh chuan ka khua a har ru em em lawi si.

"Mambawih, khawi vengah nge in awm?" pu Amuana chuan motor khalh pah hian a rawn ti a, chutah keipawh chuan pangai tak hian

"Khatla ah sawn kan awm a" ka lo ti ve mai.

"A nih chu, kum engzah nge i nih?" a rawn ti leh a, min en miah lo va, interview tenau kan nei a ni ringawt alawm le.

"Kum 23 ka ni e" felfai tak chuan ka lo ti leh a, mite angin ka kum zat chu ka sawi zak hran lo.

"A nih vel ka ring reng a ni. Chuan enge, enge Hotel-a thawh chu? A nuam i ti em? Hrehawm te hi i lo ti vîau lo maw?"

"Aih teuh lo, hrehawm ka ti hleinem, a nuam ka ti lutuk zawk alawm"

"A ṭhat chu! Chuan Marema hi i enge a nih?"

"Maw? I sawi awmzia ka hre miah lo pu Amuan" a zawhna chu ka hrethiam lo va, a sawi tum awm ang pawh ka ngaihtuah chhuak thiam lo hrim hrim.

"Ka'n tihna chhan chu kan ṭhiana hian a ngaihven si che a, ka zawt mai mai che maw le" a rawn ti ve leh mai a, engatinge u Marema chu a rawn sawi lan daih reng reng ni!

Inbe leh tawh chuang lovin kan chuang duh ta char char a, in lian tak pakhat hmaah hian motor chu a tiding a, chu chu an in a nih ngei a rinawm. In chhunga thil la tura kan luh te chuan pui hi ka'n ti khawp a, mahse ka en rei duh ta bik lo. Rei lote hnuah Hotel lamah chuan kan let phei leh a, Zemabawk lama aṭanga Bazar lam pan kan nih avangin Traffic a rawn Jam leh a, kan la tang rei ta phian zui. Traffic a Jam rei em avangin chawhma lam dar 10 tih vela chhuak chu chawhnu lam dar 1 velah Hotel kan thleng phei ta chauh a, lehlam kawng zawng tak chuan ka hahdam phah ta vîau.

December thla a nih tawh bawk nen khua chu a vawt ve pangai em em a, kan uniform ka hak ṭhin hnuiah chuan kawr pawh ka hak thuah ziah. Ka nu ber chu chutianga hna hahthlak lutuk lo leh pawisa thawh chhuah ṭeuh theihna hna ka thawk ve ta mai chu a lawm a, ka hna hmuh chhan min zawha ka chhan chuan u Marema biak a duh thu a sawi ve ziah bawk. Amaherawhchu u Marema phone number reng ka lo la nei lo tih chu ka hre chhuak a, ani chuan ka phone number a la ngei tih hre mah ila kei chuan va biak pawh dan tur ka hre hauh lo thung.

A ni telin u Marema ka lo ṭawng khum vak avang chuan ka inchhir a, ani chuan kha leh chen kha min lo puih tawh mai bakah Hotel-a ka thawh theihna turin min pui zawk a ni si a, a laka ka lo chet dan avang chuan ka inthiam lo tak zet a ni. A chhan tak ka hriatthiam miah si loh hian u Marema chu ka hmu châk thei em em a, ani chuan nula angin min en mahse kei chuan unaupa ang maia en luih hram ka tum bawk ṭhin. Amaherawhchu min fawh zan aṭang khan unaupa anga en ka lo tum ve na te chu a bo vek a, mahse ngaihzawng ang chuan ka la en ngam ta chuang lo.

Ni e, engtinnge keini ang mai mai hian anni ang chu kan lo ngaihzawn ngam ang ni? Chutiang bawkin u Marema hian min duh vanga min fawp a nih ka ring thei lo va, min hmuhsit vanga ti chu a ni lo tih hre tawh tho mah ila thil dang emaw tak chu a awm ngei ang. Ka rilru kaptu leh tibuai bertu chu min vei a, a thluak aṭanga min paih chhuah theih loh thu a sawi kha a ni. U Marema chuan min duh avangin min fawp han ti ngawt dawn ila min duh thu emaw pawh sawi si lo va, kei ang mai mai min duh chu ka ring thei thlawt lo a ni.

Ni a ral leh fê hnu pawh chuan pu Amuana'n motor kan chuan dun laia u Marema chu ka enge a nih tih min zawhna chu ka rilruah a la awm reng a, paih chhuah ka tum pawhin ka thei der lo. Zan khaw tei rek thlenga ka ngaihtuah hnu pawhin u Marema chu ka tan enge a nih chiah ka sawi fak thei lo a ni. U Marema chu ka tan chuan min puitu a ni ti dawn ila min lo fawp tawh khanglang bawk si, kan chhungte ti dawn ila a ni lo nasa bawk si, thil awm dan chu ka hrethiam thlâwt lo a ni. Amaherawhchu u Marema chu ka unaupa angin en tum lui eng ang mah ila unaupa ang ngawt chuan ka en lo tih ka hre chiang em em a, a bulah chuan ka zamin ka rilru a no hma em em a ni tih chu hriat loh der chi zia zâng a ni lo.

Zirtawpni a ni a, ka hnathawh tawp hun tur pawh ni khat chauhin a dal leh tawh zawk. Kan buai tlang em em a, ka thawhpuite chuan min be vak ṭhin lo mahse Hotel neitupa ber pu Amuana'n min duhsak em avang chuan nuam lo han tihna em em ka nei hran chuang lo. Zan dar 6 a rik tawh pawh chuan tlai dang ang lo takin kan la buai tlang em em a, in lama ka nu amah chuaha a lo awm tur chu ka ngaihtuah tak zet a ni. Ani chuan ka awm dan vel min zawt turin phone a nei ve lo va, chuvang chuan ka hlawh hmasa bera phone leisak chu ka tum ru hle bawk.

"Mambawih, min lo nghak rawh, ka lo thlah ang che" pu Amuana chuan kan chhuah sup sup lai chuan a rawn ti lawng lawng a, kei ang thovin mi dang pawh chuan mak an ti ve hle.

"Maw?" a awmna lama hawi let chung chuan ka ti hû a, ani erawh ka hmel vang nge ni a lo nui ri hawk hawk thung.

"Khatah khan min lo nghak rawh, pawn chu a vawt si" te chu a rawn ti leh ta nghal a, min nel ve tawh tih chu hre tho mah ila min biak dan vel chu ka hrethiam hauh lo.

Ka Hotel thawhna neitupa berin amah nghak tura min tih tlat avang chuan ka ding ngawi ta reng a, pawn lam pana kal chhuak mek ka thawhpuite chuan min sawi zui neuh neuh tih ka hre ru reng bawk. Ka rin ai takin pu Amuana chu a rei leh ta phian a, kei lah chu kawngka bulah ka lo ding ngawi reng ringawt. Ka phone tiengin dar engzah nge ri tawh tih chu ka en a, 6 leh a chanve a lo pel daih tawh avang chuan hmanhmawh ru tawh tak ka ni. Engmah hrilh lova haw mai chu ka duh rum rûm a, mahse Bus tak ngial pawh a service tawh lo tih chu ka hre chiang bawk si.

"Ka hman e, ka innghahtir reng che avangin ka thiam loh a ni e" pawn lampang ka thlir vauh vauh laiin pu Amuana chuan a rawn ti a, kei chuan min biakna chu lo chhan let ve tur nge tur loh tih pawh chu ka hre lo.

"Kal ila" tiin kawngka lam panin min kal pel a, pawn kan thlen chuan vawt ka ti ngei mai.

"Thlah ka duh tlatna chhan che chu thil hrilh tur che ka nei a, min hrethiam hram hram dawn nia" kan tlan chhuah hnu chuan a rawn ti a, a ṭawngkam chu a hawihhawm bawk nen ka lo nuih lui ta ringawt.

"Khatah khan ding mai rawh, ka lo chhuk ang e" kan in chhuk thlakna step zawn kan thlen chuan ka lo ti vat a, ani pawh chu a ding ve mai bawk.

"Hei chhuk mai i tum em ni? Thil pek tur che ka nei a nia" motor ka nam hawng dawn tihah pu Amuana chuan a rawn ti a, keipawh chu ka thil tih lai tawp chatin a lam chu ka hawi phei ve nghal.

"Engenita pu Amuan?" min en reng avang chuan ka ti ve ta ringawt a, eng thil tak chu min pek tum ang maw!?

"Kha le, i hlawh aw, chuan ka bonus bawk che a nia" tiin lehkha chhunga thil infun pawng âl chu min rawn pe a, keipawh chuan ngampa lutuk lovin ka lo ban ve mai bawk.

"Ehêeee pu Amuan, cheng 8000 maw ka hlawh? A va tam em em ve le, mi dangte angin thla kim pawhin ka la thawk si lo" mak ti deuh chuan ka ti chhuak phawng a, ka hlawh chu ka hnathawh dan nena ka chhut chuan a tam lulai deuh a ni.

"Tam lo e, ti khan nei hmiah rawh, i hlawh a nih kha! Bonus lam kha chu Christmas present angin i ngai mai dawn nia, chuan kum tharah chuan i lo thawk leh ngei ngei bawk dawn nia" a rawn ti leh a, pawisa chu tam ri vîau mah ila min duhsak vanga a thil tih ni turah ka ngai ve ta tawp.

"Ka lawm e pu Amuan, min duhsak em avang hian ka lawm hle mai" tiin lawmthu chu ka hrilh mawlh mawlh a, ka chhungril chu a hlim ve em a ni.

"Engtik nge i thawh tawp hun khâ? Naktuk kha i last day em ni ni tawh?" a rawn tih leh chuan

"Aw, naktuk khi ka thawh tawp hun tur a ni tawh e, ka lawm tak zet a ni pu Amuan"

"Lawm thu sawi sawi a ngai hleinem, chuan thil hrilh duh che ka la nei a"

"Eng lam nge ni pu Amuan?"

"Marema kha i enge a nih tih ka zawh che khan engmah i sawi si lo va, in inkarah hian eng thil mah a awm lo turah ka ngai ve ta tawp mai a ni. Chuan nang hi ka bialnu ni rawh, ka duh che" a rawn tih chuan amah chu ka en nghal kâwk a, ani pawh chuan min lo en ve reng bawk.

"Pu Amuan" ka tih lai chuan

"Naktuk aṭang chuan ka bialnu i ni tawh ang a, ka bialnu i nih hnuah phei chuan i hlawh pawh tun ang mai mai hi a ni lo vang"

"Pu Amuan, i thusawi awmzia hi pakhatmah ka hre lo a nia"

"Âwww enge hriatthiam loh tur awm? Ka bialnu i ni tawh ka tih chû" tiin ka lamah a rawn awn phei a, a chet dan chu ka duh lo tak zet.

"Ka duh lo, kha pawisa hi la rawh" tiin ka hmuia rawn fawh a tum lai chuan ka lo nam sawn thuai a, kawngka chu hawngin hmanhmawh takin ka chhuk ta vat.

"Lo la ding teh" tiin step-a ka tlan thla tur chu ka banah vuanin min pawt ding chat a, amah a lianin a tha chu a chak ngei mai.

"Engatinge i hriatthiam loh? Ka bialnu i nih chuan tun let hian i nuamsa dawn asin, lo kal teh" tiin a lamah chuan hnai a, tal vak vak mah ila a sawt lo ngei mai.

"Ka duh lo" ka tih rual chuan ka hmui chu a kut pakhat chuan a rawn hup a, a awm dan chuan min tihlauthawng lehzual.

"ZOMUANSANG" kan sir lam aṭanga rawn ti hrawktu an awm avang chuan kan hawi rual ṭhawt a, chutah pu Amuana zawk chuan

"Marem" a ti hluai a, chutiang huna u Marema a lo kal chu a ring lo ve bawk a ni ang. Kei erawh u Marema hmel ka hmuh hnu chuan ka thla a muang ta sawng sawng a, min chhan ngei pawh ka ring ve ringawt.

"Lo tal tei vet suh" ka tal leh vak vak avang chuan pu Amuana chuan ka lam lo hawi hian a rawn ti leh a, chutah

"Marema" tia u Marema lam a hawi rual chiah chuan ka ka a hup behna thlah hlawkin a leng nghal dâwr a, a pai phei nasa lutuk chu a tlu ta hial bawk. Chutah u Marema chuan pu Amuana chu pan pheiin

"Nang hian engvanga Mambawihi duh lo chung chu lo tih luih ṭâlh tum nge i nih?" tiin a va hnek zawm hmiah hmiah a, awm dan tur reng ka hre tawh lo.

"U Marem" ka tih vak chuan min lo en hrawk a, a hmel aṭang chuan a thinrim hle a ni tih a hriat theih.

"Vawikhatmah Mambawihi hi lo hnaih leh tawh suh" tiin u Marem a tho kang a, chutah a hnek hrep pa chuan rawn tho chhuak ṭuah ṭuah chung hian

"Enga!? LALREMRUAT le! Nangte chuan ani saw chu ka unaunu angin ka en tiin min hrilh a ni lo'm ni? I khawngaih vanga pui i nih thute kha min hrilh a ni lo'm ni? I engmah a nih loh thu min hrilh avanga hetianga hma la ka ni asin" a rawn ti a, a hnar chu a thi deuh phung bawk.

"ZOMUANSANG, khatiang sawi a hun lo. Haw rawh, chuan Mambawihi hi i Hotel-ah sawn a thawk leh tawh lo bawk ang" u Marema chuan a lo ti let ve hrawk a, a thusawi vel chuan ka ṭah a ti chhuak ngawih ngawih.

"Haha! I dawihzep hle mai ka ti LAREMRUAT, Mambawihi hi i tan hian eng chiah nge a nih? Ama hriat lai ngei pawh hian han sawi nghe nghe teh, i khawngaih thute kha sawi chhuak vek rawh" pu Amuana'n a rawn tih laiin u Marema chuan

"ZOMUANSANG, ṭawng tawh suh. Khangte kha chu ka ṭhian i nih angin i zep ve ka ring asin, i lo va nep ve" a rawn ti leh hrawk a, chutiang em ema a thinrim hmel chu ka la hmu lo.

"Aw le, a ṭha e. Mambawihi hi ka tan chuan" a tih lai chuan ka che vut a, kan in lam panin ka tlan thla ta vang vang.

Ka duh lo, u Marema'n min khawngaih thu a sawi chu hriat ka duh lo a ni. Engkim ka min khawngaih vangin maw a lo tih vek? Ni e, keini te chu khawngaih tlak kan ni meuh mai, mahse u Marema tal kha chuan min nel ve tawh vang te, puih min duh tak tak vang tea kan laka ṭha chhuah a nih ka lo ring ṭhin a, chungte chu rinna dik lo mai a ni si.

Kawngka chu pawh hawn ringawt ka tum a, ka beisei loh deuhin a lo inkalh ṭhap. Chutah kan bawlhhlawh bawm hnuai chu ka en a, chahbi chu a lo awm vâng mai. Kawngka ka hawn fel hnu chuan ka lut vat a, chhung lam aṭangin kawngka chu ka kalh leh nghal. Ṭhutthlenga ka ṭhu thla chiah tihah pawn lam aṭang chuan

"Mambawih lo hawng teh, inbe lawk teh ang" tiin u Marema chuan kawngka chu rawn beng deuh dawt dawt a, kawngka a rik leh ṭhet ṭhet avang chuan rawn pawh hawn a tum tih ka hria.

"Mambawih in chhungah khan i awm tih ka hria a nia, lo hawng vat mai teh" a rawn tih leh lai chuan

"Haw rawh, kan inah pawh lo kal tawh suh ka tih che khâ, kan tana mi ṭha tak emaw i nih ka lo ti a, mahsa a ni teuh lo" ka lo vin phiar a, ka ṭah te lah chu a la chhuak em em zui.

"A teuh lo, a hma ang khan i thu ka awih tawh mai mai dawn lo" a rawn ti ve nghal a, chutah amah vek chuan

"Mambawih, kawngka hi ka tichhe mai dawn? I lo hawng duh bawk si lo va, kei lah chuan hmuha biak ngei ngei che ka duh tlat bawk si. Chuan, i ṭawng rin danah khan i nu a awm lo tih ka hria a nia" a rawn ti leh a, ka mood a dik lo bawk nen ṭah chhuah hawm hawm mai ka duh tawh.

"Mambawih, ka tihchhiat chu i phal tak tak em ni?" a rawn tih leh rual chuan

"Ti chhe reng reng suh, ka lo hawng dawn" ka theihtawpa ring chuan ka ti vin tûar a, u Marema awm dan vel chu ka ngei thlawt a ni.

"Khati mai tur kha lawm, lo hawng vat ni la chuan khatianga rawn vo zam che pawh kha ka tum em em lo" kawngka ka hawn rual chuan a rawn ti a, rum taka melh chho hrâw chung chuan

"Enga!? Min lo vo zam vel mai maia maw!?" ka ti nghal a, chutah ani chu a ranga rangin in chhung lamah chuan rawn lut zui zat a, a rawn lu hmaa ka khar hman lo chu ka inchhir ngei mai.

"I sawi duh chu sawi vat la, haw leh vat ang che" ka ti vin leh hrâk a, enge ka thinrin chhan ber chu ka hre lo.

"Mambawih" tiin a rawn che thut a, a awmah chuan min kuah bet zui nghal bawk. Awm sawn tumin ka tal ve tak na a, min kuah nghet bawk nen ka che sawn lo tluk a ni.

"Mambawih, ka tihpalh. Khatiang mihring tenawm lutuk hnuaia ka lo thawh luihtir che avang khan ka tihpalh, ka inthiam lo hle a ni" dam deuh chuan a rawn ti a, chutah ka thil tawn zawh chiah chu ngaihtuah chhuakin ka rilru no chu a rawn chhuak leh ta.

"Engatinge in hausak avang hian keini ang hi min hmuhsit ṭhin? Engatinge tham lo tak taka min biak kher ṭhin? Mihring ve tho kan ni asin, reitheih te hi kan duhthlanna a nih bik in ring em ni? Engatinge nangni ang hian min?" tiin sawi pawh sawi chhunzawm thei lo chuan ka ṭap chhuak hawm hawm a, ka insumna a rei tawh bawk a, ka ṭap uar ngei mai.

"Hei Mambawih ṭap tawh lo teh" tiin a hmel en thei tur chuan min kuahna aṭangin min nam sawn deuh a, ka hmai chu a kut pahnih chuan a rawn khuap zui nghal bawk.

"Ni lo u Marem, min khawngaih hmel tak khan min en tawh suh, ka duh lo" tiin ka hmai a khuapna te chu ka dah thlaksak a, ka mittui te chu hru mawlh mawlh ka tawlh sawn a, mahse hla pawh ka tawlh sawn hmain u Marema chuan ka hnung lam aṭangin min rawn kuah leh ta vat.

"Mambawih, ka awm dan aṭang pawh hian i hrethiam lo em ni? I laka ka rilru put hmang tur te leh ka vei em emzia che hi i hrethiam lo em ni? Nge i hrethiam lo der tlat zawk?" nghet taka min kuah chung hian a rawn ti thuai a, a ṭawngkam chhuak hrim hrim chuan ka rilru a tino vek.

"Aw ka hre chiang khawp asin, nang chuan min khawngaih avangin keini chi min pui a, pawisa te min pe a, chungte chu a tawpah min hmuhsitna'n i hmang leh a, keini nufa te chu kan" ka tih lai chuan min kuai her thut a, a ngai te bawkin ka phalna la hmasa lovin min fawp leh ta.

Amaherawhchu min fawhna chuan mak tak maiin nuam tihna min pe a, min fawh dan chu sawifiah thiam chiah lo mah ila a damin a nuam tak zet a ni. A hmui chu a nem lum nuam em em a, ka taksa te thleng chuan a danglam vek thei. Ka hmui chung lam chu a chang leh a hne a, a chang leh a pet ngawng ngawng a, a chung lam mai ni lo hnuai lam te chu a chung lam ang chiah chuan a rawn ti leh a, chu a thil tih ho têa lang si chuan ka taksa awm dan chu a thlak danglam vek thei nîa maw le.

Chutah le! A lei chu a rawn chet ṭan a, ka ka chhungah chuan a rawn rawlh lut a, a lei sâ ham ham chuan ka ka chhung mai ni lo ka taksa pumpui chu a rawn tisâ chhuak vek ni maiin ka hria. Chutiang taka ril leh nuam chuan tûma'n min la fawp ngai lo va, min fawh dan vel chu ten tur ka nih tehreng nen nuam ka tiin dangdai ka ti hle zawk a ni.

"Ni lo Mambawih, i taksa no tak leh mi hipna ngah tak hian ka duh loh thlêng thleng min tihtir thei mai dawn" min fawh ngawng ngâwngna aṭanga a inlak hran hnu chuan a rawn ti a, ka chala a chal rawn nghatin a thaw ham ham a, kei ang thovin a thawk a rang vein ka hria. Chutah harh chhuak thutin

"Kan awm dan hi a dik lo" ka ti tham chhuak chhal a, min fawhna avang chuan ka aw te chu a dik lo vek thei.

"Dik e, kan awm dan hi a dik alawm Mambawih"

"U Marem haw rawh, ka nu a lo haw phei chuan kan awm dan hi a duh bik miah lo vang"

"Aih ka haw dawn lo, duh leh i nu chuan kan awm dan hi lo hmu mai mai rawh se"

"Engatinge hetianga i awm tlat a? Haw tawh rawh u Marem, chuan lo leng tawh suh" tiin min chelhna chu tihsawn ka tum a, ka va thei lo chiang mai mai tak.

"Hetianga ka awmna chhan chu nang hi ka duh che a ni Mambawih, ka duh lutuk che avang hian ka â thei mai dawnin ka hria" tiin a awmah chuan min kuah bet thlawp a, chutah amah vek chuan

"A tirah kha chuan ka duh che a ni tih hi ka awih lo lui tlat a, ka nu leh pate bulah pawh nang ka ngaihzawn loh thute ka sawi hîal a, mahse khang hun lai aṭang daih tawh khan ka lo ngaizawng reng tawh zawk che a ni" a rawn tih zawm leh nghal zat a, a thusawi chu rin tur a ni em pawh ka hrethiam rih lo.

"U Marem, min duh emaw i tihna kha min khawngaih vang mai mai a ni. Keini chu kan rethei a, mite angin kan changkang" ka tih lai chuan

"Mambawih, in dinhmun hi chhuanlam reng ṭhin lo teh. In retheih leh hausak lam ka en lo va, nang hi ka thin ti phu dawt dawt thei khawpa ka hmeichhe duh awmchhun i ni zawk asin. Zanin aṭang chuan in inah ka lo leng ziah tawh ang a, ka bialnu i ni tawh tih inhre bawk ang che" a rawn ti nghet charh a, a mitmeng hriam lam lek lek chuan min melh chhun run bawk.

"I bialnu ka ni ringawt thei lo, ka duh ve leh ve loh che pawh i hre ngawt ngawt em ni? I upat tawh hmel bawk si" ka ti ve tan tân a, u Marema chu ka haw lo tih ka chiang tawh lutuk tlat.

"Ni ringawt thei e, a chhan chu nang hian min duh ve a ni. Ka fawh che pawhin min lo chhan let ve nasat kha, chuan ka fawh che avanga min ben tawh miah loh avang khan min duh ve tawh tih ka hria. Kei ang chiaha i lung phu a ran ṭhin avangte khan min duh ve tho tih ka hria a, ka bula i awma i zam em em ṭhin avang hian sawi lo mahla min duh tih ka hre vek bawk" awi awi awi, engtinge ka awm dan zawng leh ka rilru put hmang zawng zawng chu a hriat theih bik.

"Ka duh bawk lo che, Doctor i nih avang khan thil intihre víau suh" ka sawi tur hre lo lutuk chuan ka ti ta ringawt a, ka lai tawh tak zet a ni.

"Min duh ve tih ka hria alawm Mambawih, kan rilru chu thup tum mah ila kan taksa te hian an tarlang zel si"

"Ka thei lo u Marem, ngaihzawng emaw pasal emaw pawh kei hian ka nei thei lo" ka ti ta ringawt a, u Marema chu ka duh lo tih ka sawi thei tawh miah lo.

"Engvangin maw Mambawih? Taksa lamah harsatna i nei em ni? Natna i nei em ni? Doctor ka nih hi hre ta che ka tidam vek dawn che alawm" a rawn ti zung zung a, ka sawi tum ber pawh min sawi tir thei lo mai dawn.

"Chutiang lam a ni lo u Marem, ka nu hi ka kalsan thei lo a ni. A mi hmangaih em em ka pa khan a kalsan tawh a, kei chuan ka thei ve lo a ni" ka ti chhuak sep a, chu chu ngaihzawng ka neih duh ngai lohna chhan a ni.

"I nu chu i kalsan dawn hleinem, kan bulah a cheng ve dawn alawm. Mambawih, nang hi nupuia neih ngei che ka tum a, min neih theihna'n chuan eng pawh ka ti mai ang"

"Enga!? Nupui a!? Inngaihzawn pawh kan la inngaihzawn loh hî, ringawt ngawt che chuan"

"Nichin lawk aṭang khan kan inngaizawng tawh alawm, chuan nang hi ka bialnu i ni tawh bawk. Mambawih, kei ang thovin nang hian min duh ve tih thu i ka aṭang ngei hian ka hre ve duh a ni"

"Ka hre lo u Marem, ka duh che nge duh lo che pawh ka hre lo a ni. Ka zam em em ringawt zel a, ka tha te thleng hian i bulah chuan a khur vek thei" tiin zep miah lo chuan ka sawi chhuak ta phawng a, sawi sual intihna pawh ka nei duh tawh chuang bik lo.

"Ka hrethiam e, min duh ve tho mahla i la inhrethiam rih lo a nih kha! Min duh thu i sawi theihna'n ka ngaihven che ang a, ka hmu tam che ang a, tichuan nang chuan min nel telh telhin min duh thu chu i sawi ve tawh mai ang" a tih lai chuan kawngka a rawn ri a, kan va in nam sawn chiang ber kher em.

Chapter 11

"Êeeee Doctor Marema chu! I lo leng a ni maw? Tun lai hi i va reh ve, i rawn kal khât lutuk a, kan lo awm thiam lo mai dawn alawm" ka nu chuan a rawn ti lut bawrh bawrh a, ka nu chuan kan lo awm dan vel chu a hmu hman lo turah ngai ang.

"Nia, tun lai chu ka buai ve deuh a, mahse zanin aṭang chuan ka lo leng ziah tawh ang" u Marema chuan a rawn ti a, kei chu amah chu ka lo en hâw ringawt.

"A ṭhat chu, chuan Mambawih in va haw tlai awm ve, tlai lama ka haw pawh khan inah i lo la haw miah lo va" tiin ka nu chuan min lo be leh nghal a, keipawh chuan

"Nia, kan buai reuh lutuk a" ka lo ti ve vat a, ka ep chiah ṭhutthlenga ṭhu pa chuan min lo en reng tih hre mah ila ka en ve duh ṭhak lo.

"A nih chuan chaw i ei tawh em? Kei lah chu zana thawh ngai a awm leh thu si a, ka kal leh ta daih bawk si" a rawn ti ve leh mai a, chawhmeh vel chu a chhuang lum zui nghal bawk.

"La ei lo ve, ka ril pawh a ṭam em em lo" tiin ka lo chhang ve mai a, mahse ka ril chu a ṭam ru reng tho.

"Ka pi, ka haw phei phawt mai ang. Mambawih, min lo thlah la?" u Marema chuan a rawn ti chhuak hlawl a, a thusawi avang chuan ka melh râw bawk.

"Ni e Mambawih han thlah ta che, a lo lenna a hla veng veng si" tiin ka nu chuan a lo ti ve leh nghal a, ka nu hian engatinge u Marema hi a nel em em mai le.

Step-a kan kal chhoh lai te chuan ka lai ṭut a, kan hun tawnin a zir lo bawk nen ka zak thar hnuhnawh ngei mai. Ka tih tur hre lo leh ka ṭawng tur hre lo lutuk chuan step te chu ka chhiar chho vel ka ta ringawt a, u Marema chu ka en duh lo hrim hrim bawk. Chutia ka kal chhoh beuh beuh lai chuan u Marema chu a lo ding thut a, ka su hman teuh tak tak a ni. A hmel ena ka hawi chhoh chuan ngawi reng hian min lo en a, ka zam chhe lutuk chu ka tlu mai dawnin ka hria. Ka tawlh sawn a, kal pelh mai ka tum chu min lo chelh ding leh ta tlat.

"Kan pahnihin kal rual ang" a rawn ti a, chutah amah vek chuan a ban pakhat zawk chu ka kawngah a rawn rawlh phei a, min kal chhohpui nghal miah miah.

"Hei... ka duh lo, keimah pawhin ka kal ve thei reng" tia awm sawn ka tum pawh chuan min vuan bet tlat a, intitatu tak hian min kalpui ni berin ka hria.

"Kha le! I hlawh hi la rawh" tiin kawngpui kan thlen rual chuan pawisa hi min lo pe leh ringawt a, Hotel-a ka thawhna hlawh kha chu lak ka tum tawh hauh lo.

"Engtia ka hlawh ringawt nge? Hotel lam kha a nih chuan ka la duh lo, chu ai chuan pawisa neih loh pawh ka thlang zawk"

"Mambawih buaithlak vîau ṭhin lo teh, rim taka i thawh chhuah a ni tih hre ta che. ZOMUANSANGA khan bonus a pek thu che kha min hrilh a, ani bonus kha chu i lo ang a, i hlawh pangai tur hi chu la rawh"

"Buaithlak min tih chuan min lo hmu tawh suh, len pawh lo leng tawh suh" tia kal sawn ka tum chu min man bet rang ngei mai.

"Khatiangin ka thusawi la kawi ṭhin suh, pawisa hi la la, chuan engkim a dik vek a ni mai"

"Ka la dawn lo ka tih tawh khâ"

"I lak loh chuan kan inkar thu hi i nu ka hrilh vek ang, chuan nupuia neih ka tum thu thlengin ka sawi ang" engatinge he pa hian hetiang min tih ve ziah, ninawm.

"Khatiang khan ti ve ziah suh, khawi" tiin a kut aṭang chuan pawisa chu ka pawh thlaksak a, a sawi duh tak tak mai ang tih ka hlau em a ni.

"Chuan naktukah kan chhuak dun bawk ang. Ka lo sawm che ang a, i duh loh leh tlat chuan i nu pawh ka dil leh mai ang"

"Enga!? Chutiang ringawtin ti ṭhin suh, ka hman ringawt hleinem"

"I hman dawn tih ka chiang, Hotel-ah te khan hn thawk tura kal te kha i tum ang e, ka phal tawh teuh lo a nia"

"Intithu vîau suh, Hotel-ah chuan ka thawk peih tawh bawk lo"

"A ṭhat hlauh chu! Chuti phei phei i hman lehzual a ni mai alawm. Naktuk chu a va nuam reuh dawn tak, ka bialnu i nih hnua kan chhuah dunna hmasa ber a ni dawn leh nghal" nui ri hak chung hian a rawn ti a, a awm dan vel chuan sawi mai tur pawh min tihre tawh lo.

"Ka chhuk dawn" tih khum hmaka kal ka tum chu min pawt ding leh a, a lam hawi turin min kuai her nghal.

"He thil hi ka tih loh chuan ka mutui thei hauh lo vang" tiin ka hmuiah chuan a rawn fawp a, engatinge min fawhna chuan ka taksa awm dan a tih danglam ziah mai le.

"Hei....khatiang khan min fawp tawp tawp zel suh, ka chhuk dawn" tia nam sawn ka tum chuan a che lo tluk a ni.

"I zak em ni Mambawih? Zak duh suh, ka ta i ni tawh a, ka lakah phei chuan inthlahrung hauh lovin nung ang che"

"I ninawm, ka chhuk dawn" tiin ka nam leh vak a, ani pawh chuan min thlah ve mai bawk.

Kan in chhunga ka luh chuan ka nu chuan chik zet hian min lo en a, chawhmeh chu a chawk pah reng bawk. Ka nu chuan u Marema nena kan inkar chu a hre mai ang tih ka hlau hle a, ani chuan bialpa ka neihsan chu a phal ka ring lo a ni. Dar 8 vel bawr a nih chuan chaw kan ei a, ril ṭam vak lo inti si kha chaw chu ka ei hnem ngei mai. Ka nu chu a titi siam siam a, kan khaw lama haw chhoh pawh a châk thu a sawi a sawi tawh mai. Keipawh hian kan khaw lama haw chu ka châk ve tawh reng a, mahse ka duh ang takin Christmas leh kum thar chhunga kan pawisa hman tur ka la thawk chhuak lo deuh a ni.

"Nu, naktukah ka bazar dawn a nia aw? Bazar tih lemah u Marema nen kan chhuak lawk dawn a" khuma kan mut hnu chuan ka ti a, kei ang thovin ka nu chu a la muhil bik lo tih ka hria.

"Bazar na tur i nei em ni Mambawih? I hlawh i la tawh em ni?" a rawn ti nghal thuai a, keipawh chuan

"Aw la tawh e, vawiin khan ka la tawh a, chuan vawiin kha ka thawh tawpna tur a ni bawk alawm" ka ti ve ta zaih a, ka nu chu ni khat thawh ka la hmabak thu chu hrilh ka duh lo ta law law.

"Keipaw'n vawiin khan hlawh ka la a, cheng 3000 lai ka lo hlawh ve hman reng tawh a, kum thar lama kan in luah man tur pawh kan inkhawl ngah hman hlauh a, a tihzia khawp mai"

"Nu, naktuk chuan i phone tur lei ka tum a, ka hlawh hian lei che ka tum a ni" a ruka tih ai chuan tiin ka nu chu ka lo tum rilruk dan chu ka hrilh a, a hriat chu ka duh leh ta zawk a ni.

"A ngai reng reng lo Mambawih, phone ka mamawh hleinem. Khang i hlawh te kha chu nangma'n hmang la, thuamhnaw thar te lei ve zawk rawh. Chuan i nau te ho thil hawnna'n hmang zawk la, kei chu engmah tihsak ka ngai lo" a rawn ti thuai a, ka putea fate chu thil hawn ka tum sa hrim hrim.

"Leisak che ka tum vek tawh, Hotel aṭanga ka hlawh leh a hmaa chawhmeh zawrhna vela aṭanga pawisa ka lo khawl lawk te hmang hian thuamhnaw chu ka lei ang a, i ta tur pawh ka lei ang"

"A ngai lo ka tih chu, kei chu nu ka nih tawh avang hian nangni angin mamawh ka nei tam tawh hleinem"

"Ka leisak dawn tho tho che" ka lo ti ve tlat a, ka nu chuan duh lo mahse phone chu a mamawh ve tawh hle tih ka hria.

"Âwww Mambawihi ṭhin hi a! Chutianga i tum lui tlat a nih si chuan ka hlawh tal hian ka phone tur chu lei ang che. I hlawh kha chu kan in luah man tur atan leh thuamhnaw thar vel leina atan i hmang ang a, chu chu a fuh zawk ang"

"Ka hlawh chu i va han hmang hreh awm em em ve nu"

"Chutiang lam a ni lo, thil thui tak ka thlir zawk vang a ni"

"Aw le, i sawi ang chuan ka ti hram mai ang" a tawpa tawpah chuan ka ti ve thei ta hram a, ka nu pawh chu a rawn thaw ve huai bawk.

"Chuan Mambawih, Doctor Marema nen hian in inngaizawng em?" a rawn tih leh chuan ka maimitchhing tawh chu ka meng nghal kawk.

"Maw nu? Aih, a teuh lo mai. Kan inngaizawng lo hrim hrim" ka lo ti vat a, ka nu chuan a hre palh reu reu ang tih ka hlau kher mai.

"Tak tak maw? Ani hi chuan a ngaizawng deuh chein ka va hre ve, nang pawh hian i duh ve deuh chuan ka hria" Lalpa le! Eng thil nge ka nu hian a hriat ni! Engtinnge u Marema ka duh ve tih te chu a hriat? Enga!? Tun maiah khan u Marema ka duh tih ka ngaihtuah chhuak maw!?

"Teuh lo mai nu, ka duh teuh lo. Ani paw'n min duh chuang lo, chuan keini te chu ṭhian mai chauh alawm kan nih" tiin ka lo pha char char a, kan awm dan chu han sawi chhuah tlawng ka la zak deuh a ni.

"Engtinnge a duh lo che tih i hriat ngawt a? A awm danah hi chuan a duh ve che a ang ka ti"

"Nû, khawmgaihin sawi tawh lo teh, ka mu duh tawh a nia" ka ti ta ringawt a, chutah ka nu chuan nui ri deuh hak hak chung hian

"Aw le aw le, zep i tum ve bawk sia, ka zawt tawh lo vang che" a rawn ti leh a, min hringtunu te hi chuan min lo hre chiang nge nge a nih dawn hi!

A tuk zingah chuan ka tho harh ṭha hle a, ka tho hma vîau bawk. Ka thawh phat aṭangin ka mitthlaah u Marema hmel chu a lo lang ringawt a, a chhan erawh ka hrethiam lo ngei mai. Ka ei rawngbawl lai te chuan a nui hmel te, min en vung vung hmel te, duat hmel takin min en lai te, min fawh ngawng ngawng lai te chu an lo lang zut zut a, ka lu chu thing thing mah ila ka ngaihtuahna aṭang chuan u Marema hmel chu a chhuak thei chuang hauh lo. U Marema chu ka duh ve ngei a ni tih ka inhre chiang em em a, mahse sawi chhuak emaw amah hrilh ve kher chu ka zak tlat a ni. Tin, sawi chhuah ka zah mai bakah kan dinhmun inthlau lutuk avang chuan kan inngaihzawn rei theih pawh ka ring lo a ni.

Zing dar 8 vel a lo nih chuan ei rawng chu ka bawl peih vek tawh a, chaw ei chiah kan hmabak tawh. Ka nu chu kan in chunga a len lawk avangin chaw ei tur chuan ka lo nghak a, ka rilru chu zing dang aiin a zâng vah tih ka hre bawk. A chhan ni bera ka hriat chu u Marema nena kan chhuah dawn vang a ni. Rei lovah ka nu pawh a rawn chhuk ve leh mai a, a rawn chhuk hnu chuan chaw chu kan ei zui nghal. Ka nu kal chhuah hnu darkar chanve vel lawkah u Marema chu kan inah chuan a rawn lut hlawl a, a lo kal hma ka ti ngei mai.

"Mambawih, i lo la insiam na nge?" min hmuh rualin a rawn ti a, insiam tur pawhin chaw kan ei kham titih chauh alawm le.

"Ka la insiam hman hleinem, i va rawn kal hma em em ve" tiin keipawh chuan ka lo chhang pangai ve mai.

"Chu min lo ngai hman tawh a ni maw? Nizan phei chu ka mu thei miah lo leh nghal" a rawn ti a, eng thu tak chu sawi tum ang maw!?

"Engati maw i mut theih loh?"

"Ka ngaihtuah char char che alawm, zing kar thlengin vawiin lama kan awm dan vel tur ka ngaihtuah a, chhuah dun ka châk tawh lutuk" a rawn ti leh chuan amah chu ka lo en tlawk tlakk a, a thusawi leh amah chu a inhmeh lo tak zet.

"A hrim hrimin Hospital lamah kal i tum lo em ni? In lo buai vîau thei a nia, keimah pawhin ka kal thei reng, ka nu phone tur lei ka lo tum hrim hrim a" ka tih chuan

"Vawiin te chu chawlh ka la ve hmiah mai, ka bialnu thar nen kan leng chhuak dawn bawk sia eng thil dang mah tih ka duh rih lo alawm. Insiam vat vat teh, hun hi a kal muang miah lo a nia" a rawn ti ve leh nghal a, keipawh chu ka insiam ve ta mai bawk.

Bazar kan thlen chuan mi vei vak leh bazar ve tur ni awm tak chu an lo tam em em a, Zion Street kawng chhuk thla te a kal hleih theih loh hial zawk. Ka hnungah chuan u Marema chuan min zui ve zel a, Zion Street kawnga kan kal lai phei chuan min veng hi a ni deuh ber mai. Ka darah a chelh tlat a, kan tawt bawk nen kal chak pawh a har khawp mai. Ni lo, kan kal lo tluk a ni zawk. Kan tam lutuk avangin kan innek thla tial tial a, mahnia kal pawh ngai lovin kan hnunga mite chuan min rawn nawr kal ti ila kan sawi sual tam lo vang.

"Lo kal rawh, saw tah sawn chawl lawk ang" ka ril a rawn ṭam thut avang chuan ka ti a, a chepa chepin keini pawh kan duhna lam chu kan pan phei thei hram hram a ni.

"Hetah hian thil i ei ṭhin em ni? He hmun hi ka hriat awm pawh ka la hre lo" dawr chhunga kan ṭhut hnu chuan a rawn ti chhuak deuh hlawl a, a ṭawng zawi vak lo nen dawra mite chuan min lo en hrek hrek nghal.

"Hei ṭawng ring vak vak suh, helai te chu mi tu paw'n in ei puarna'na an hman ber alawm a nih, an thil siam reng rengte hi a tuiin a tlawm hlawm bawk si" tiin ka lo hrilhfiah vat a, ka ṭawng pawh chu mi hriat hlau tih takah a zawi ang reng hle.

"Aw le boss" a rawn ti deuh kher a, amah ka en lah chuan a lo nui suk bawk.

"I vawi khat chawlhna a nih hmel bawk sia ka ei tur ang ka chah kep ve tawp che a nia" ka tih chuan a lo bu deuh nghut a, a phone chu a khawih zawm ta daih.

Buaithlak leh mangan thlak khawpin u Marema chuan kan thil ei man chu ka pek a phal lo tlat a, a zak ve bawk si lo nen ka pek tir ta tawp. Chu mai a ni lo, ka thil lei engkim man chu ama'n a pe vek a, ka thil leina dawr lo nghaktu te pawh chuan min ringawt zel. Kan haw lamah ka nu phone tur chu kan en phei a, chutah pawh chuan phone man chu pek leh a tum tlat a, mahse ka phal thei tawh bik lo a ni. Ka phal loh avangin phone man chu a pe lo lo va, ka nu a zah avangin phone man chu min peksak lo mai chauh zawk a ni.

Ni te chu a ral leh zung zung a, kan khaw lama kan haw hma zan chuan u Marema chu a rawn leng a, a rawn leng hma ang reng vîau bawk. Zep lovah chuan u Marema chu ka hmu hmelṭha tawlh tawlh a, a pa ka ti ngawih ngawih. A Doctor thuam nen chuan vawi khatmah ka la hmu lo va, la hmu lo pawh ni mah ila a inhmeh dawn tih ka chiang.

Tin, a hmui tam lutuk lo leh a biang vela hmul awm te chu a inhmeh em em a, mipa dangin nei ve ta se chuan inhmeh ka ti kherin ka ring lo. Keimah leh keimah chu dawt ka inhrilh duh tawh lo va, u Marema chu ka duh ru ve hle tawh tih ka hria a ni. Chutianga u Marema te ang tlangval hmelṭha leh hausain keini ang mai mai min lo duh ve ringawt chu mak ka ti a, ka lawm tho bawk si nen awm dan tur ber ka hre lo a ni.

"In khuaah chuan Christmas chu hmang chho kher lo mai ula, i hmel ka hmuh loh ringawt pawhin ka awm hlei thei lo va, Aizawl khaw chhunga i awm loh phei chuan engtinnge ka awm ang? Chho lo mai rawh Mambawih" a Car bula kan din lai chuan a rawn ti sup a, min en run bawk.

"Kan chhoh ngei ngei a ngai alawm, ka putea te'n kumin Christmas chu hmang chho turin min ti tlat a, nakum lam chu kan chhoh pawh ka ring leh tawh chuang lo"

"Lo kal teh, i taksa hi sik reng ka duh a ni. Nang lah chuan min chhohsan daih i tum tlat bawk si, min ngai ve dawn miah lo em ni?" tiin a âwmah chuan min kuah bet a, amah a lian bawk a, min kuah hneh ngei mai.

"Ngai ve dawn tho e" ngaihtuah chiang mang hlei lo chuan ka ti a, chutah amah chuan min kuahna aṭanga min nam sawn deuh chung hian

"Tunah khan min ngaih ve dawn thu i sawi ti raw? Han sawi nawn leh teh Mambawih" a rawn ti thuai a, ka rilru ang ang chu ka lo sawi chhuak tih ka hre nghal.

"Aih, teuh lo mai, ka sawi ve mai mai a nih kha" thin phu dawt dawt chuan ka ti lo ve vat a, ani erawh chuan min lo nuih suk thung.

"Mambawih, engatinge i zep hi i la tum ṭâlh? Keiin ka ngainat chea ka duh ang chiah che hian nang paw'n min duh ve tih ka hria a, chu chu kei ai aiin i hre chiang daih zawk bawk" engtinnge ka rilru chu a hriat vek theih bik ṭhin le.

"U Marem, kan inngaihzawn tak tak hma hian inngaizawng lo zawk teh ang" thil tam tak ngaihtuah chung chuan ka ti a, kan inngaihzawn rei theih chu ka ring thlawt lo a ni.

"Ni lo Mambawih, kan inngaizawng reng tawh zawk a ni. Kan dinhmun lam i ngaihtuah tih ka hria alawm, mahse kei chuan ṭhen che hi ka tum tawh lo. Min ring ngam la, keipawh hian ka kalsan mai mai dawn lo che" a rawn ti a, u Marema chuan ka thil ngaihtuah leh ka rilrua awm te chu a rawn hre leh ta chat mai.

"Mambawih, i ṭawng kain sawi chhuak kher lo mahla tunah chuan min duh ve tawh tih ka hria a, chuan ka nupui i nih theihna'n chuan eng pawh ka ti ang" tiin ka khabe chu a rawn chawi a, min fawp zui nghal. Ni danga min fawh ang bawkin ka taksa te chu an rawn danglam a, chungte chu lo thunun vak pawh ka tum tawh lo.

"Mambawih, i taksa ka sik hi chuan kalsan che hi ka harsat ṭalh ṭhin a nih hi!" tiin a âwmah bawk chuan min kuah bet leh run a, a âwm chu ka pa âwm ang maiin a lum nuam leh em em bawk.

"U Marem, ka chhuk a hun tawh vîau a nia, ka nu paw'n rei min ti tawh ang" tia awm sawn ka tum chu a aia nghet lehzualin min kuah a, han sawi leh mai tur pawh ka hre tawh lo.

"Engatinge i taksa ka sik hian ka inthunun theih miah loh le, he i taksa hian ka tih duh loh lôh min tihtir ang tih ka hlau khawp mai" tiin ka chhip sam chu a rawn fawp vang vang a, kan awm dan chu nuam ka tiru ve em em bawk.

"U Marem, min duh ve tak tak em ni? Keini ai chuan i thawhpui te zingah pawh i kawppui tur ṭha tak tak an awm si a" tiin ka zawt ta thâwr a, a rilru chu ka hre châk tlat a ni.

"Nang aia hmeichhe thlakhlelh leh duh hi ka la nei ngai lo asin Mambawih, tun aṭang chuan in hausak leh hausak loh vang ni lovin nangmah i nih vangin ka duh em em che tih hi hre reng tawh ang che" a rawn ti a, min kuahna pawh chu a la thlah duh ta chuang lo.

"U Marem, ka chhuk a hun tawh tak zet a ni. Ka nu pawh a ngaih a lo ṭha tawh zawk palh ang, min thlah tawh teh" ka tih chuan ka sawi ang chuan min thlah ve mai a, ka taksa te chuan vawt a rawn hre chhunzawm nghal bawk.

"A nih aw u Marem, mangṭha muttui le" tiin ka in lam chu ka hawi a, step ka chhuk thla dawn chiah tihah u Marema chuan a lama min pawt herin min rawn kuah bet leh ta nge nge.

"Mambawih" ti supin min rawn fawp vawng vawng a, keipawh chuan u Marema ka ngai ve reuh hle dawn tih ka hria.

"Naktuk chu Hospital lama kal hma ngei ngei ka ngaih avangin ka lo kal hman dawn lo va, tluang deuhin in kal dawn nia" min fawh duh tawk hnu chuan a rawn ti a, kei ang bawkin a la thaw deuh ham ham bawk.

"Aw le, nang pawh Christmas nuam takin i hmang dawn nia" tiin min chelhna aṭang chuan ka tal sawn a, min kuah beh leh reng hmain ka chhuk ta vang vang.

Ka chhuk dawna u Marema hmel ka en khan a hmelah chuan khawharna ka hmu thei a, a awm dan khan amah min khawngaihtir thei hial dawn zawk alawm le. Amaherawhchu ka chhuk vat lo a nih chuan ka nu'n zawhna min lo zawt tam mai mai emaw te kha a ni leh ang a, chubakah min lo kuah bet leh tlat lo vang tih pawh a hriat miah hleinem.

Chapter 12

Zing ka thawh vel aṭangin kan thuamhnaw ken chhoh tur vel chu ka buaipui char char a, ka nu chuan ei rawng a lo bawl mial mial bawk. Christmas ni tak thlenna'n ni thum vel chiahin min dang tawh a, tu pawh chuan Christmas lo thleng mai tur chu kan nghakhlel tawh hlawm hle a ni. Kan khua ka'n ti ve ngawt pek a, ka nute khua a ni mah zawk. Ka pa hi Aizawl lam mi a ni a, ka nu erawh thingtlang khaw lian lutuk lo lam daiha mi a ni thung.

Khatia ka pa a boral hnu khan ka pa chhungte chuan ka pa motor nen lam min chhuhsak nghal hmak a, ka pate lam hi chhungkaw hausa lutuk chu ni lo mahse an awm thei ve pangai khawp. Sawi tawh angin ka nute lam ve thung hi chu kut hnathawka ei zawng leh inchawm ve mai an ni a, an harsa ve thei ṭhin khawp. Amaherawhchu ka pa nen an inneih hnu chuan tlemin an lo zia chho ve tial tial a, ka pa khan ka nu leh a chhungte mamawh ang chu a pe mai ṭhin.

Tin, ka pa khan ka nu hi a hmangaih ve tak tak tih a chiang em em a, a hna thawh lai bansan khawpin ka nu chu nupuiah a nei lui a ni. Ka pa chhungte chuan ka nu chu an mo atan an duh lo va, chu erawh ka pa ngaihdan a ni ve ta hauh lo. Ka pa chuan an in a chhuahsan a, ka nu chu nupuiah neiin an indang pui ta hmiah mai a ni. A pawisa lo inkhawl lawk ve sa aṭangin ka pa chuan Taxi a lei a, ni tin service in chu chu kan chhungkaw inchawmna a ni ta ber bawk. Ka pa chuan ka nute khaw lama awm chu a duh lo va, a chhan pawh khawpui lama awm chuan hmasawnna a tam a tih tlat vang a ni.

Aizawla kan awm avang ringawtin ka pa chuan ka nute khaw lam leh a chhungte chu a thlahthlam ngai lo va, a theihtawpin a ngaihtuah ve ṭhin. Ka pa chuan Christmas tin deuh thaw chu ka nute khaw lamah min hman chhohpui ṭhin a, ka nu chhungte paw'n nuam an lo ti ve thei khawp. Ka nute lam hi unau pathum an ni a, ka nu nu leh pate erawh an boral tawh thung. Kei phei chuan ka pi leh pute chu ka hmu hman lo hrim hrim a, thlalakah tak ngial pawh ka la hmu lo. Chutiang bawkin ka pa chuan a nu leh pate chu min hmuh tir duh ngai lo va, ka pate chhung lam pawh chuan min rawn hmu ngai bik hran lo.

Amaherawhchu vanduai thlak takin ka pa chuan Cancer natna avangin ka nu leh kei chu min boralsan ta hlauh a, khata aṭang chiah khan kan nun chu a hma ai zawngin a khrih chhoh ṭan ta a ni. Vawi tam ka nu hnenah chuan ka putea te bula awm chhoh ve mai ka rawt a, ani erawh chuan tihbuai a duh loh thu leh Aizawl khawpuia awm chu kan tan a ṭhat zawk thuin min chhang mai zel. Kei ang bawkin ka putea te lam chuan chho turin min rawn chah fo va, mahse ka nu chuan a duh tlat lo a ni.

Ka pa boral aṭanga ni rei pawh a liam hmain ka pa chhungte chu an rawn kal a, an rapthlak hlawm ngei mai. An rawn kal chuan pitar emaw putar emaw hmel reng ka hmu lo va, ka nu rualpui deuh ho hmeichhe pathum an lo kal a, ka nu chu an rawn ankhum phiar phiar bawk. Ka pate nena kan in luah tih chauh lo chu min chhuhsak ta vek a ni. Aizawl lama chhungte kan neih loh mai bakah ka putea paw'n min pui theih dawn chuang loh avangin ka nu chuan hmalak dan tur a thiam lo va, a tawpa tawpah chuan an duh ang anga chet tira lo thlir tawp mai chu a duh ta zawk a ni.

"Mambawih, i inkhung fel zawh tawh chuan chaw kan ei mai dawn em ni?" ka inkhung fel zo chiah tiha ka din mar rualin ka nu chuan a rawn ti a, sana ka en chuan chaw ei pawh a lo hun leh der tawh.

"Nia nu, Sumo counter lama lo va thlen phei hma kha a ṭhat zawk ka ring" tiin keipawh chuan ka lo chhang a, chaw ei chu ka siampui zui nghal bawk. Chutia chaw kan ei lai chuan kan kawngka chu a rawn inhawng ri pawp a, ka nu nen chuan kan hawi chhuak rang dun ngei mai.

"Mambawih, in la kal lo hlauh maw?" u Marema chuan a rawn ti hluai a, a hmel te lah chu a la hlauhthawn hmel em em leh nghal.

"Doctor Marema teh hlawl chu! Engenita? I va rawn hmanhmawh hmel ve" tiin ka chhan hmain ka nu chuan a lo ti vat a, kei chuan u Marema chu ka lo en reng ringawt.

"Nia ka pi, lo thlah che u ka tum a, nizan lamah Mambawihi hnenah ka hman dawn lo thu ka lo sawi tawh a, mahse ka hman leh ta thut si a nih hi" Lalpa le! Eng thu nge u Marema hian a saw tak, ka nu hian engkim a hriat phah vek tawh dawn a nih hi!

"Âw chutianga min thlah kher pawh a ngai hleinem, Taxi emaw Bus emaw pawhin Counter lam chu kan pan thei reng alawm" ka nu bawk chuan a lo ti a, u Marema reng reng pawh chu engvanga chutiang thute rawn sawi tawp nge a nih, zahthlak lutuk mai.

"Ni lo, ka lo thlah ang che u. Ka hman alawm, a inthlahrunawm loh" te chu a rawn la ti zawk ta deuh deuh a, nizan khan kan inthlah fel vek tawh a ni lo'm ni?

"A nih chuan min thlah i tum hmel bawk si a, ka hnial tawh lo mai ang che. Chuan hei chaw te hi rawn ei ve ta che, kan chawhmeh erawh eng vak ni lo mahse" tiin ka nu chuan u Marema chu chaw eiah a sawm a, u Marema chuan a lo ei duh mai ang tih ka hlau kher mai.

"Ni lo ve ka pi, ka inei puar tawh alawm, in hman hun ka lo nghak zawk ang e" tiin ka nu chu a lo hnial ve vat a, ṭhutthlengah chuan a ṭhu phei zui nghal bawk.

Chaw kan ei kham chuan eina vel ka tifel a, kan ṭhutthlenga ṭhu chungin u Marema chuan min lo en leh reng tawh tih pawh hria, mahse en let ve kher erawh ka tum lo. Ka nu bawk chu a hmai ka zah a, u Marema nena kan inkar zawng zawng chu a hre vek tawh ni berin ka hria.

Kan inpeih fel hnu chuan u Marema Car chuan kan khaw Sumo Counter lam kan pan a, ka nu leh u Marema chu an titi leh char char tawh. Sumo Counter kan thlen chuan kan inhlang thla a, seat kan hauhsa vek tawh avangin kan ṭhutna turah chuan ka nu chu a ṭhu lut nghal a, ka ṭhut luh ve dawn chuan u Marema chu ka va en a, min melh dan mawlh chuan min luhtir thei ta lo a ni.

"Nu, ka zung lawk dawn aw" tiin ka nu chu ka hrilh a, ani pawh chuan mi dang nen an lo inbiak laklawh em avangin aw pawh a rawn ti chuang lo.

"Thil sawi duh i va neih hmel ve u Marem" tiin a bul ka thlen chuan ka ti a, ani chu a rawn thaw hawk thung.

"Mambawih, in khaw lamah chuan Christmas chu hmang lo mai rawh" a rawn ti a, lungrun zet hian min en ran zui.

"I va'n ti ho thei tak, seat pawh kan hauh vek tawh alawm. Chu lovah kum thar lamah kan lo chhuk leh thuai dawn a, tunah chuan kan chhoh ngei ngei a ngai alawm. Min en danah khan thil pawimawh sawi tur i nei dawn emaw tiin ka lo kal phei ve hram hram a, i sawi ho leh vîau si" tiin Sumo lam chu melh zeuh a, phei mai chu ka duh ta zawk a ni.

"A nih chuan ka phone call lo chang rawh aw, ka lo be ngei ngei ang che" a rawn tih chuan ka lo nghauh a, Sumo lam chu ka phei riai rîai bawk.

"Leh lawk" tiin a lamah min pawt thut a, a âwmah chuan ka bet leh ta ran mai.

"Hei miin min hmu ang e, i tizahthlak thei lutuk" tiin a awm sawn vat a, chutah a aia zah lehzualna turin min lo fawp a nih chu!

"Ti kha chuan tlemin ka thla a muang ta deuh a, mahse ka ngai dawn hle chein ka hria Mambawih" min fawh zawh chuan a ti sup a, kawngpuia mi vei vakte chuan min en hrek hrek bawk.

"U Marem i tizahthlak thei em mai, ka kal dawn" tiin Sumo lamah chuan ka tlan phei vat a, u Marema nui ri hawk hawk chu ka hre hman hram bawk.

Dar 9 leh a chanve velah chuan Aizawl aṭangin kan kan khaw lam panin kan tlan chhuak a, Christmas a hnai tawh bawk nen passenger pawh ka full khawp mai. Kan chuanpui te chuan keimah tak chu min hre lo va, ka nu chu an hre fur hlawm zawk.

Kan khua hi Aizawl aṭanga kilometer 130 chuang vel lai a ni ve a, Sumo hi chuan darkar 4 emaw darkar 5 emaw vel tlanin kan thleng tlangpui. Kan chuanpui te chuan a chang zeuh zeuhin min be ve a, ka ṭawng tam lo khawp mai. Min be vak tu leh biak vak tur ka neih loh avang chuan ear phone phawrhin hla ka ngaithla daih a, ka hla ngaihthlak pawh chu ngaihtuah lovin u Marema bawk chu ka ngaihtuah leh ta daih.

Tlai dar 3 leh a chanve velah kan khua chu kan thleng a, thingtlang mah ni se an theihtawpa mawiin khaw chhung chu an lo chei ve nasa hle. Chung an thil chei vel chu zan lama fan kual ka châk ru ta hle a, fan pawh ka tum ran bawk. Ka putea, ka nu nau te in kan thlen chuan a fate ho chuan min lo chiau au vat a, thil kan hawn leh hawn loh min zawt chhen mai. In chhunga kan innghah fel hnu chuan bag aṭangin an thil tur te chu ka phawrh a, ka thil hawnsak ho chu an lawm pui hle.

Ka putea fapa upa ber chu kawr ka hawn sak a, Sacrament department lai a ni ve tawh bawk nen min chen ve hial tawh. Tin, ka putea leh a nupui chuan min lo ngai der thiam ve em em a, ka pa boral hnu aṭang kha chuan kan hmang chho khât ve tawh bawk em a ni. Ka nu leh putea chu inngai tih hriat tak hian an inkuah vawng vawng a, ka nu phei chu a ṭap hialin ka hria. Ka putea te chuan ar an vulh ṭeuh avangin an ar la sa ṭha zet mai chu min zanriah chawhmeh atan min hmehpui a, nuapang an awm ve nual bawk nen kan ri ve nuai nuai mai. Kan hlim tlang hle a, ka putea nupui paw'n min peihin kan titi dun ve nasa khawp.

Zanah chuan current a rawn awm lo va, mahse thla chu a eng em em thung. Thla eng ka hmuh chuan u Marema bawk ka hre chhuak leh a, ka phone chu ka en deuh chhen bawk. Min biak tur thu kha a sawi a, mahse zan thlengin min rawn be leh ta bawk si lo. Ka rilru chhungril tak chuan ka laka a awm dan avang chuan ka vui a, ka vui rukna chhan pawh u Marema chu ka duh ve em tawh vang a ni. Mahse ka duh avangin kan inngaizawng dawn tihna a ni lo va, innei leh thei si lo va inngaihzawn buai vel chu ka duh lo law law a ni.

U Marema chu ka duh em em tawh tih ka hria a, mahse kan dinhmun a inthlauh em avang chuan ka duh ve thu pawh ka la hrilh duh ta lo a ni. Ka duh ve thu ka hrilh loh chhan chu sawi chiah ila chuan engah mah a ngai leh dawn lo va, nupuia min neih a tum thu bak a sawi leh dawn chuang lo tih pawh ka hria.

U Marema chuan nupuia min neih ngei a tum thu min hrilh hnu aṭang kha chuan min duh ve tak tak ni maiin ka hria a, mahse ani ang êm ka pasal ni tur chuan ka insit lulai deuh chu a ni. Chutia pawn ṭhutthlenga ṭhu chunga thil chi hrang hrang ka ngaihtuah kual lai chuan phone call ka dawng a, number lawng a nih avang chuan ka la zui ve nghal.

"Hello" ka ti zo chiah tihah lehlam aṭang chuan

"Mambawih, in thleng tluang em? Ka rawn be lawk hman lo che a, min lo hrethiam hram teh" mipa aw hian a rawn ti a, chu chu u Marema a ni tih ka hre chiang hle bawk.

"Mambawih, ngawi daih lo la, zanin phei chu thla a eng sia ka ngai teh mai che a nia" a rawn tih leh chuan thawk ka lo la hawk a, amah ka ngaih em vang nge ni a ṭawng ri te chuan ka rilru an rawn ti no thei hialin ka hria.

"Aw kan thleng tluang e, current a awm lo va, he lamah pawh thla chu a eng khawp mai" pangai tak chuan ka ti chhuak thei hram a, ka aw erawh a lawi deuh ruih mai.

"Zan dang ang chu ni se tunah te hian in inah ka leng leh tawh ang a, i mi hipna ngah tak khan i bul hnaia awm turin min pawt leh tawh ngei ang. Engating in hman chhoh kher Mambawih? Kei lah chu nangmah ngai em emin he lamah keimah chauhin ka awm a, min ngaihtuah ve miah lo em ni?"

"Kan hman chhoh a ngai alawm, ka putea te hian hmang chho turin min ti ngun tawh bawk sia, chu lovah kan chho khat tawh hrim hrim"

"Min ngai ve em? Min han hrilh teh Mambawih, min ngai ve em?"

"Aw, ka ngai lutuk che u Marem" ka hmel a hmuh theih dawn chuang lova ka hriat avang chuan ka ti chhuak sep a, ka rilru chu zep reng ka duh tawh bik lo a ni.

"Mambawih le! A leh pekah chuan ka tel lovin i va zin bo tawh dawn lo chiang em. Sawi teh, enge in khaw hming hi!?" a rawn ti hrawk a, kan khaw hming daih daih min zawh thut avang chuan mak ka ti hle a, keipawh chuan kan khaw hming chu ka lo hrilh ṭha ve leh mai bawk.

"U Marem duh tawk mai ila, ka pitei te pawh puih an ngai palh ang" kan ngawih dun reng hnu chuan ka ti a, ani chu a rawn thaw ri hak thung.

"Aw le, zanin atan chuan duh tawk phawt mai ang" a rawn ti chhuak dam thlup a, a hma lawka a aw nen chuan inang lo tak a ni.

A tukah chuan khawtlang mipuite chu an ri nuai nuai a, a chhan pawh Christmas inrinni a nih tawh vang a ni. Ka pitei nen chuan tlai lama kan chhangban den tur Idâw chu kan chiah a, kan chiah tam viau danah mi dang pek ve tur kan neih te ka ring ta vel mai mai. Chutia kan chiah mawlh mawlh lai chuan ka phone chu a rawn ri a, thei leh thei lova min lo call tu ka en chuan u Marem tih ka hmu nghal. Thil tisual ang maiin ka pitei chu ka en vat a, min lo ngaihven lo hlauh.

"Aw enge? Thil ka ti laklawh viau asin, i sawi duh chu sawi vat la, ka dah leh vat dawn" phone call ka lak rual chuan ka ti zung zung a, mi min hmuh hlau takin in hnuaiah ka awm ran bawk.

"I va'n buai awm tak tak ve le, nakinah ka rawn be leh mai ang che" tiin u Marema chuan kan inbiakna chu a titawp daih a, kei chuan a thin a rim a nih ka ring.

In hnuai aṭanga ka chhoh hnu thleng chuan ka awm a nuam thei lo va, mahse hmeichhia zawkin va biak hmasak ngawt chu ka zak deuh tlat bawk si. Nula leh tlangval inngaizawng ang chuan awm tawh tho mah ila keimah chu ka la lai ṭut a, a bulah chuan ka zam em em zel.

Zana chaw kan ei laite chuan u Marema chu biak hmasak a ṭha ang em, ṭha lo ang em tih ringawt ka ngaihtuah a, ka chaw a tui leh tui lo pawh ka hre lo. Chaw ei kham thleng seng fel hnu lawkah current chu a rawn awm lo leh a, ka tih tur hre lo nen kan in piah deuha tawlailir lo awmah chuan ka ṭhu ta ringawt.

"Mambawih" tia min kotu an awm avang chuan thawm rawn awmna lam chu ka hawi a, ka mi hmuh avang chuan ka ding zui nghal.

"U Marem" ti hluaiin a lamah chuan ka tlan phei a, ka va kuah nghal chawt. Ni e, kan dinhmun inthlauin ani chu phu lo vîau mah ila a lakah chuan ka rilru put hmang chu ka zep tawh dawn lo, a hrehawm em mai.

"Mambawih le! Ka ngai lutuk che" tiin nghet tak hian min kuah let ve a, a taksa sia ka awm avang chuan ka ṭap chhuak thei mai dawnin ka hria.

"Ti teh, saw lamah sawn i phei teh ang" tiin hmun thim lai deuhah chuan min kuah phei a, a tih ang ang chuan ka lo awm tawp.

"I thin a rim emaw ka ti hman a, min lo be leh tawh bawk si lo, ka lo hlauthawng hman lutuk asin" kan inkuah vawng vawng hnu chuan ka ti sep sep a, a âwmah chuan ka bek ka nghat tlat bawk.

"Ka thin a rim hleinem Mambawih, chuan hetiang taka min lo ngaih ve avang hian ka lawm hle bawk. Min en teh, ka ngaih em em nu" tiin ka khabe chu a rawn chawi a, dam leh duhthaw ru em em si chuan min lo fawp zawm nghal.

"Mambawih, ka duh em che avang hian ka inthun zo lo palh mai ang tih ka hlau ṭhin" kan infawh zawh chuan a rawn ti sup a, kan thil tih zawh chiah avang chuan ka lung phu a la rang hle bawk.

"U Marem keipaw'n ka duh che" ka ti sep a, zak ru em em mah ila ka zak lo lui der ve tlat.

"Maw? Tun maia min duh thu i sawi kha dawt a ni lo ti raw?" ka thusawi awih loh hmel fe chuan a rawn ti a, chutiang thu ka sawi chu a ring lo te pawh a ni ang.

"Aw" ka lu ka lo bu nghauh nghauh a, chutah a hmaia chiang lehzualin min fawp nghal.

"Lawk lawk lawk" min fawhna aṭanga ka nam sawn hnu chuan ka ti a, u Marema chuan tun ang zan zanah kan khuaah hian enge a rawn tih ang?

"Enge?" mit tizim sun chung hian a rawn ti a, current chu awm lo mahse a awm dan vel chu thla eng avangin ka hmu thei vek tho.

"Enge hetah te i rawn tih u Marem? Engtinnge kan khua hi i hriat? Naktuk mai khi Christmas a ni tawh leh nghal" tiin zawhna chu ka zawt sawk sawk a, chutia ka bula a rawn awm ta daih chu a mak ve em alawm.

"I bulah Christmas ka rawn hmang dawn, a chhan chu i tel lo va awm ka duh lo" leh ringawt ngawt zel hian, a nu leh pate paw'n an phal tawp dawn em ni?

"Enga!? I chhungte'n an phal em ni? I tizahthlak thei em mai u Marem, haw leh vat rawh"

"A teuh tawh lo mai, ka chhuk ruala i lo chhuk ve dawn te a nih loh chuan ka chhuk mai mai dawn lo"

"U Marem, i ti ho thei lutuk. Hetiang te chuan i nu leh pate'n engtinnge an ngaih ang, min hmu eng emaw vek dawn asin"

"Ka nu leh pate ngaihdan tur chu ngaihven vak suh, ka pa pawh he lama Christmas ka hman dawn thu ka hrilh vek tawh"

"A hrim hrimin engtinnge kan awmna hmun hi i rawn hriat daih theih? Aizawl aṭang phei chuan a hla ropui si, u Marema haw leh mai la a ṭhat zawk ang"

"I rual lo chuan Aizawl lam ka pan rih dawn lo, chuan in khaw hming te chu nizanah min hrilh vek tawh khâ" a rawn ti hmuk a, a rilru chu sawh sawn a tum loh hmel hle.

"Ni tak! Engatinge keipawh hi ka lo hrilh kher kher che ni, hetiang hian i rawn kal dawn tih hria ila chuan ka hrilh miah lo vang che"

"Ka rawn kal chu i va duh awm lo ve a, kei chuan ka lo kal hi inchhirna ka nei miah lo asin"

"Ka duh lo lam pawh a ni lo, i nu leh pate hmai zah a na alawm. Chutah nangni ang phei chu hetianga thingtlang khaw te ve takah hian in la kal ngai awm tawh si lo va, i nu leh pate paw'n an phal tak tak ka ring lo"

"Ka nu leh pate chu ngaihtuah chhen lo teh, ka bulah i awm hi! Thingtlang ka kal ngai lohna a ni emaw ni lo emaw i bulah hian ka awm dawn, chu chu ka thu tawp a ni"

"I va intithu sawt ve, ka duh thu ka hrilh che vang khan min thunun vak tum suh" ka lo ti ve tan tân a, kuah erawh kan la inkuah reng lo.

"Intih thu vang pawh a ni lo, mipa dangin an lo melh vel tur che ka duh loh avang leh ka thlakhleh em che avang hian i bulah ka awm reng dawn a ni"

"Chuan Amuana khan ngaihdam dil che a duh a, a Hotel-a thawk tur pawhin a sawm nghal che a nih hmel" pu Amuana a rawn sawi ri chu ka ṭang nghal ṭung mai.

"Ka thawk duh tawh lo u Marem, thawh leh ai chuan chawhmeh zawrh pawh ka duh zawk" ka ti sep a, ani chuan ka hnung chu a rawn chul hliau hliau bawk.

"Aw le, thawh leh thawh loh lam kha chu i thu thu alawm"

"A zia lo khawp mai, in inṭhian ṭhatna ka tichhe ringawt chu a ni si a"

"Khatiang khan mahni inhmu hniam ziah lo teh, tunah phei chuan kan in kawm leh vek tawh alawm" a rawn tih chuan mak ka lo tiru khawp mai. Chutia kan inkuah lai chuan current chu a rawn awm a, current awm avang chuan in tin te chuan thawm an rawn chhuah ṭha kher mai.

"Current an nei chu an va lawm awm ve" nui deuh suk hian a rawn ti a, keipawh ka lo nui ve tho.

"Thingtlang lamah te chuan a lawmawm awm, khaw maw min thlah tawh teh, miin min lo hmu ang e" tia tal sawn ka tum chu a phal der lo.

"Mambawih i nu hming hi ka la hre miah lo, enge a hming?" a zawhna avang chuan ka nui chhuak hawk a, kha leh chen kan in luaha lo chuang kai tawh si khan ka nu hming pawh a lo la hre lo a nih chu!

"I hre lo tak tak em ni?" ka tih chuan a lo bu nghut a, ka nui tawp thei mai ta lo.

"Min nuih loh khan min hrilh vat zawk teh, ka pi chu kan chungchang hi ka hrilh vek ang a, in bula Christmas ka hman dawn thu pawh hi ka hrilh bawk ang" a rawn ti deuh hmuk a, a awm dan chu a lawmawm reuh tawp.

"Nu Siam emaw pi Siam emaw ti mai rawh, chuan ka nu hian kan awm dan vel hi a hre tawh thanin ka hria u Marem" ka lo ti ve mai a, min kuahna nghet tak chu a tidul tial tial bawk.

"A pawi lo, hre mahse pawi ka ti lo. Ti teh, i chhungte chu va hmuh i tum phawt teh ang" tiin kan in awmna lam chu min pan phei pui a, engtinnge kan in chu a hriat reng reng ni!