𝐃𝐀𝐍𝐆𝐋𝐀𝐌𝐍𝐀 𝐊𝐇𝐀𝐖𝐕𝐄𝐋 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟏𝟕 - 𝟐𝟑)

DANGLAMNA KHAWVEL

By

Havali Adam

27 November 2021

Chapter 17

"Nute" tia min kohna aw chuan min tiharh zawk a, ka awm dan tur vel ka lo suangtuah thui deuh te pawh a ni mahna.

"Aw le, tunah chuan ka rilru ka thlak tawh e. A hma khan i hnenah ka lo let tawh dawn lo ka lo ti tawh a, mahse khang ka thusawite kha ka sut leh e. I sawi ang ngeiin ka lo let leh ngei ang, a chhan chu engtiang chiaha hrehawm nge ka lo tawrh ṭhin tih hi i hriat ve a ngai a ni. Ka lo let lehna chhanah hian hmangaihna a awm tawh lo va, huatna leh phuba lak duhna bak a awm tawh lo tih hre bawk ang che. Engtin pawh lo awm ila i sawi lawk tawh ang khan ka chungah thuneih buai vel tum lo la, i hrehawm tawrh tur pawh a zia deuh zawk ang. Chuan dawr siam ka duh a, pawisa pawh ka mamawh hnem fû ang. Ka ngaihtûah ka ngaihtuah hnu hian i lo sawi dik a ni. Hetianga i chunga ka chet hma loh chuan ka thinlung na hi a dam thei lo va, na taka siam ve che hi ka thil tum ber a ni tawh" ka ti duah a, ka ṭawng chhung zawng chuan ngawi reng hian a lo ngaithla ran bawk.

"Aw le, ka hria e. I che vel te ka hmuh leh theihna tur leh ka bula i awm leh theihna tur a nih phawt chuan eng pawh tawrh ka huam alawm Nute" rei deuh fê a ngawih hnuah chuan rawn ti sup a, a nguaiin a zia chu a harh lo tak zet a ni.

"Dam lohna eng emaw i nei em ni?" a ṭawngkam zawi lutuk leh a awm dan cool vel lutuk avang chuan ka ti ta ringawt a, a awm dan chu natna benvawn vei ang maiin a lang tlat alawm.

"Nei lo ve, min ngaihtuah duh suh" aw tham leh ṭial ruaia a lo tih rual chuan

"Ka ngaihtuah hauh lo che a, ka ngaihtuah pawh i ngai bawk hek lo" ka lo ti nghal vat a, engvanga amah ngaihtuah tak anga han lang ngawt nge ka nih pawh chu ka hre chuang lo.

"Engtik aṭang nge kan inah chuan i lo awm ṭan ang?" kan hma zawn en vang vang chung hian a rawn ti a, kan chuanna motor light chuan kawngpuite chu a en lang rû bawk.

"Naktuk aṭangin ka lo awm ang" ka ti deuh hmuk a, a awm danah erawh chuan an ina ka awm leh tur chu huphurhna emaw hrehna emaw lam pang a lang lo hrim hrim.

A hnena let leh tura ka rilru ka siam tirh lai kha chuan ka buai hman hle a, a chhan pawh Aroma Restaurant-a hna ka lo thawh ve hman tawh vang a ni pakhat. Kei ang bawkin ka nu leh pate khan ka hna hmuh thar ka thawk zawm leh lo mai ringawt tur chu min uipui a, u Hruaia bula chen leh kher ngai lovin ka dawr min siamsak an tum thu pawh an sawi nghe nghe. Amaherawhchu, ka thinlung duh zawng hi ka ngaipawimawh tlat a, chu ka thinlungin ti tura min tih apiang chu tih zel ka duh tawh a ni.

He mi nunrawng leh hmangaihna pawh nei lo LALHMAHRUAIA hi ka dam ve ṭawk ṭawk chhung hi chuan thinlung na takin ka siam ve ang a, a hnena ka let leh avanga inchhir ngawih ngawihin ka siam ang a, chung ka thil tum ka tih hmâ loh chuan ka thinlunga ani ka lo hmangaihna avanga ka lo tawrh tawh zo zâite kha a dam thei dawn lovin ka hria a ni. Ka thinlunga hliam awm te chu a dam vek thei dawn lo tih chu ka hria alawm, mahse he mihring hian tlêm tala ka rilru a nawm phah deuhna'n chuan a tuar nasa ve em em tur hi a ni ringawt.

"A nih chuan naktuk chu ka lo hruai dawn che a nia" tiin a che vut a, motor chu tinungin a tlan chhuak zui nghal. Ka ṭawng leh tawh lo va, ani pawh kei ang thovin a ngawi ve reng tho.

Sawi ri kher lo mahse Aizawl khaw chhung lam panin kan tlan tih chu a chiang reng a, min thlah dawn tih pawh ka ring thiam mai. Zemabawk lam aṭanga kan luh avangin kawng sira thil lo zuar vel chu kan tawk phei zut zut a, Chanmari biak in kan pelh deuh chiah tihah chuan motor chu a tiding thut a, ka awm deuh dâwr avangin amah chu ka lo en hâw. Engmah a sawi lawk bawk si lo va, a chet dan vel hrim hrim chu mak ka lo ti khawp. Chutah motor aṭanga chhuakin kawng chhak lama thil lo zuarte chu a han bia a, eng thil nge an sawi erawh ka hre hauh lo. Minute 2 vel hnuah chuan motor lam a rawn pan leh a, a kutah chuan lehkha vara thil fun a rawn awm vâ tawh bawk.

"Ei lawk ang aw Nute" driver seat-a a rawn ṭhut fel hnu chuan a ti tawi tak a, lehkha intuam aṭanga a thil phawrh ka hmuh rual chuan ka chil chu a put nghal hle. Engtinnge ka ril a ṭam tih chu a hriat reng reng ni?

"Kha ei rawh" ka chhan let mai loh avang chuan a rawn ti leh a, arsa bawp hem hmin sa la khu deuh chîai chiai chu phawrhin ka lamah a rawn lek vâ a, kei erawh chuan lo ban mai pawh tum lovin amah zawk chu ka lo en daih.

"Ei rawh, a tui a nia" a rawn tih leh sup avang chuan ka laksak ve ta nge nge. Lalpa le! Kan mihring nunrawnga thil lei ka'n ei chiah chu tui tak hi a ni ringawt. Tui ti tak chuan ka ei mial mial a, ka ei zo rang hle bawk. Chutah ka inkar boruak ngaihtuah hmasa hauh lovin arsa chu ka ban leh a, u Hruai chuan a thil ei lai chawl mêuhin min lo en a nih chu!

"Enge?" ka tih chuan nui sak chung hian a lu a lo thing a, chutianga ka awm thut chuan a ṭhawng ve hle a ni ang. Arsa ka ban tirh vel lai kha chuan ka hre lo tak tak a, mahse min en reng avang khan ka chet dan chu a dik lo tih ke hre chhuak ta chauh zawk a ni.

Chanmari aṭanga kan tlan chhuah leh hnu chuan inhmelhriat ngai lo ang maiin kan awm dun a, hla pawh zaitir tawh lovin kan ngawi dun ta reng. Kan in kawt kan thlen thlêng chuan kan inbe lo va, biak enah kan inen tawh lo ve ve ni berin ka hria. Kan in chhung ka luh chuan zan dar 9:30 vel lai a lo ni tawh a, ka rin aiin ka haw tlai daih. Ka nu leh pate chuan la mu lovin sitting room-ah chuan TV an lo en dun a, keimah min lo nghak pah tih chu ka hrethiam mai.

"Bawihi, i ṭha maw? I thil tum hi i ti tak tak dawn em ni?" ka room-a lo luh pahin ka nu chuan a rawn ti a, ani hi chuan ka thuthlukna kha a la pawm ve chiah lo reng a ni.

"Nu, ka tih ngei a ngai. Phatsan ka nihna te leh pawngsual ka nihna te chu danglam thei tawh dawn lo mahse kei hian ani saw ka siam hrehawm ve duh tlat a ni. He thil hi ka ti lo a nih chuan ka thinlung na hi a dam theih tak tak ka ring lo bawk" ka ti a, ka nu erawh chuan khawngaih hmel fê hian min lo en a, kei lah chuan ka thuthlukna chu sawh sawn ka tum der si lo.

"Bawihi, let tawh lo mai la ka duh ngâwt mai. Mualphona i hmachhawn leh ka hlau tak zet a, mahni inthah duhna rilrute i neih phah ang tih hi ka hlau em em asin" tiin ka kut chu a rawn chelh a, a fanu hian ka tihsual leh a hlau ngawih ngawih tih chu ka hria a, mahse kei chuan ka tihsual ka ring reng hleinem.

"Nu, i fanu hi ka chak tawk tawh alawm. Mualpho leh hmingchhiat chu ka hlau tawh lo, zahna tih te mai mai chu ka thil tawnte avang khan engah mah ka ngai tawh lo a ni" a rilru hahdamna'n chuan ka ti a, mahse a thla erawh a la muan hmel teh chîam lo.

"A nih chuan thil min tiam rawh" a ngawih vang vang hnu chuan rawn ti ta thlâwt a, ka nu mah ni se ka khawngaih ang reng hle.

"Ka tiam ang che nu, ka tih theih zawng a nih phawt chuan" ka lo ti ve nghal.

"Eng harsatna pawh nei la, a bo bang awm lovin i nu hi min hrilh tur a ni. Chubakah a hma angte khan i tlan bo tawh tur a ni lo, i thil tawn reng reng kei min hrilh lo palh a nih paw'n i pa tal i hrilh tur a ni bawk" ṭah insum zet chuan a rawn tichhuak sep a, kei erawh chuan insumna tlachhamin amah chu ka kuah ta thlawp. A ruk tak chuan ka nu'n ka thuthlukna min pawmpui nghal mai lo kha hrehawm ka ti a, ka tana kawng dik lo a ni leh mai ang tih ngaihtuahna te pawh ka nei hman hial a nih kha!

"Nu, ka lawm e. Tunah chuan i ka ngei aṭangin phalna ka hmu ve ta bawk a, ka rilru pawh a thawveng ta huai mai" ka tih chuan ka tukhum samah a rawn chul hlîau hliau a, a thaw leh deuh hawk ṭhin.

"Nu, i la hlauthawng a ni ti raw?" a lam hawiin ka ti leh thlawr a, ka kuahna aṭanga chuan ka awm sawn tawh bawk. A hmel chu ka en vawng vawng a, a hmel chuan chu zawhna chu min zawhtir lo thei lo a ni.

"Aw, la hlauthawng tehreng mai. I pa lah hian engmah ngaihtuah thui lêk lo hian a phal tlat bawk si, nang lahin i thil tum hi sawh sawn i tum hmel bawk si lo, ka rilru hi a mangang tak zet a ni" min ngaihtuah zet hian a ti a, nute tan chuan fate chu an nunna tluk a ni tawh a, ngaihtuah pawh an pe na nge nge ṭhin reng a ni.

"Nu ka sawi tawh kha, hrehawm takin ka siam ang a" ka ti chiah chu ka ṭap chhuak hawk a, mi dang bula ṭap ngai mang lo kha ka nu bulah chuan ka no ta tlat.

"Bawihi" rawn ti hluaiin min lo kuah nghal a, ṭawng zawm thei pawhin ka awm rih lo.

"Nu, hrehawm ka ti êm mai. Engatinge hetiang em em hian ka vanduai bik le" ṭap ṭuau chung chuan ka ti a, chutah ka nu chuan

"Bawihi, i thil tih tum hi ti leh lo mai rawh" a rawn ti a, chutah ka mittui te chu hru hul sawk sawkin ka lu chu ka thing nang nang a, tlêma tlêmah mi chak lo ang takin ka lang leh mai dawn alawm le.

"Ni lo nu, ani saw hrehawm takin ka siam ve phawt dawn a ni. Kei ka hrehawm ang chiah khan ka siam hrehawm ve ang a, thih châk ngawih ngawihin ka awm tir ve ang" khauh tak chuan ka ti a.

"Bawihi, heng thil i tih avang hian i thinlung na te kha a dam theih tak tak i ring maw?" chu a zawhna chu keipawh hian ka hre chiang bik hauh lo. Amaherawhchu, tunah hi chuan ka rilru damna ber tur niin a lang tlat a ni.

"Aw, a dam theih ka ring. Ka tih tur ka tih fel zawh hnuah chuan ka ṭhen vang vang ang a, chutah chuan hmangaihna hian natna a thlen nasat theihzia a hre chhuak ve khawp ang" ṭah insum zet leh thinrim tak chuan ka ti hriam hraih a, u Hruaia ka ngaihtuah zawng ringawt pawh chuan ka thin a rim thei.

A tukah chuan hna kal turin ka insiam ûk a, ka inthlak leh ta vat. Ka chet dan avang chuan ka awm tlawng a, ka nuih te pawh a za zawk alawm. Kan mihring nunrawnga te inah let leh tum lo ila chuan hna thawk turin ka chhuak daih tawh ang a, phur takin ka thawk leh tawh zawk ngei ang. Ka lo hruai ang che a tih avangin min lo lam chu ka ring ve tawp a, ka pa chu a hna lama kal tawhin ka nun nen chauh inah chuan kan awm bawk. Dar 10 leh a chanve velah chuan kan in compound-a motor rawn ding thawm hi a awm a, ka rilru chuan u Hruaia a nih tawh ngei a beisei. Ka rin ang ngeiin kan kawngkaa lo lut chu kan mihring nunrawnga a ni a, a hmel aṭang chuan a rilru tur ka chhiar thiam hauh lo.

A bula phuba la tur ngawr ngawra ka haw leh ringawt tur chu hreh emaw huphurh ang pawhin a awm lo va, chutih rual erawh chuan a hmelah hlim hmel hmuh tur a awm chuang lo. A awm ngai ngaiin a awm tawp a, nge nia keimah zawk hian a hmel leh awm dante chu a bula ka haw leh dawn avanga inthlak danglam nasa vîau turah ka lo ngai zawk?

"I thuamhnaw zawng zawng kha a ngaiin a la awm ṭha vek alawm Nute, keng vak duh suh" ka bungraw keng ṭun min hmuh chuan a rawn ti a, chutiang thu a sawi ringawt pawh chuan ka thin a khei leh nghal hle.

"Ka ken leh ken loh chu ka thu thu" ka lo ti ram hmak a, kan bulah ka nu a awm tih reng ka lo hre tawh lo.

"I thu thu le" ti leh supin ka bungrua chu a rawn la nghal a, lo dan tum deuh mah ila ka che hman lo. Ngawi rengin a chhuak a, pawnah chuan min lo nghah ngei ka ring.

"Bawihi, i thu min tiam ang khan awm hram ang che aw? I tana ṭha lo engmah ti tawh lo vang che" tiin ka nu chuan kan mihring nunrawnga motor awmna lam ka pan tur chu min hrilh leh hram a, keipawh chuan lo nuih lui ve sakin

"Nu, ka thutiam che kha ka hlen ngei ang. Chuan, i hlauthawn ang thil kha engmah ka ti tawh lo bawk ang" ka ti a, ani chuan inthlahna'n ti ni awm tak hian min rawn kuah chhunzawm nghal.

Motor-a ka chuan luh lai chuan u Hruaia chuan min lo en reng a, hre ru reng mah ila ka hmu lo der hmak thung. Ka lut fel ta maw tihah chuan motor chu tinungin kan tlan chhuak a, mo ka nih laia ka lo lawi tawhna ṭhin in chu ka hmu leh châk teh chîam lo a ni. Mahse tunah chuan nupui ang leh mo anga let leh tur ka ni tawh lo va, phuba la tur chauha let leh ka ni tawh zawk. Tuikual veng kan tlan luh lai te chuan ka hun liam tawh chu ka hre chhuak leh a, hriat chhuah loh pawh tum ila ka awmna chuan a zir êm avangin ka hre chhuak lo thei lo ṭhin a ni.

U Hruaia te in kawt kan thlen chuan a chhuk thuai a, an in luh hmaa gate awm chu a va hawng zau a, motor-a lo chuang lut lehin an in compound chhungah chuan ka tlan lut zui nghal. Motor a park fel hnu chuan kan chhuk a, ka bungrua la tura ka thawh lai chuan min lo chet khalhin ka bungrua chu a lo la vat a, ngawi rengin in chhung lamah chuan a lut zui daih. Kawngka awmna ka thlen chuan lut maithei dinhmunah ka ding tawh tih chu ka hria a, han luh tlawng chu ka ngam leh chiah lovin ka hria. Chutia kawngka hmaa ka din reng lai chuan kawngka chu a lo inhawng thut a, chutah kan mihring nunrawnga chuan

"Lo lut la, zak duh suh, tûmah an awm lo" a rawn ti a, ka zak tih thlenga a lo hre leh hman tawh chuan ka thinrimna a kai tho leh ta nge nge.

"Ka zak hauh lo, lo luh ka tum lai takin i rawn chhuak a nih kha" aw nem lo tak chuan la lo ti ve hmuk.

Kawngka hawng zaua min luhsan hnu rei lote ah chuan ka lut ve a, in chhung awm dan leh a rawng te chu a nupui ka nih lai ang vek kha a lo la ni. Sitting room-ah chuan chhungkaw thlalak lian zeta lo intar kal hi a awm a, chu pawh a ngai a ngaiin a lo la awm. Mo leh nupui ka nih laia ka pate, u Zualtei te, Duati te leh ka pasal ni ṭhin u Hruaia te ho nena kan lakna kha a ni a, engvang tun thlêng thlenga la siam ṭha lo nge an nih chu ka hre hauh lo. Chutia kan chhungkaw thlalak ka en vawng vawng lai chuan thawm a rawn awm a, in chunga kan nupa room ni ṭhin panna step tawp aṭang chuan kan mihring nunrawnga hian min lo en reng a, insiam ṭha vatin ka meng rum hnuhnawh leh vel ta ringawt.

In chung lamah chuan ka chho a, kan nupa room chhung ka hmuh chuan ka ding deuh dawt. Bed sheet te, room chhung rawng te, engkim mai chu ka awm ve laia mi ang vekin a lo la awm a, darthlalang kan dahna chenin an awmna hmun ngaiah an lo la awm ṭhap. Khumah chuan ka ṭhu thla hnawk a, lukham te chu ka hmer tawn tâwn a, nupa inngeih ve tak kan nih lai vel nun hlui chu ka ngai lutuk. Ka awm dan chu inhre chhuak leh thutin ka ding a, kawngka bula min lo en rengtu ka hmuh phei chuan ka phu chiang hle. Ngawi renga min lo en avang chuan ka thin a rim a, engtin pawh awm se ka thin hi a tirim vek a ni ber.

"Ngawi reng hian min lo en ṭhin suh, min tiphu ṭhin" ka ti ta vak ringawt.

"Ka tihpalh" awlsam té chuan a lo ti a, awm sawn ta chuang lo chuan a dinna ngaiah a la ding reng.

"Ka tihpalh ka tihpalh tih chiah hi em ni sawi thiam i neih? Ka tihpalh i tih khan awmzia a nei tawh ṭhin lo, ka tihpalh i tih avang khan ka phut loh phah lo va, ka phut zuk lohna'n awm lo mai zawk la a ṭha ang" ka ti leh hmawk hmawk a, ani erawh ṭawng tum hmel ang pawhin a awm lo.

"I hman hunah lo chhuk la, inbiak lawk kan ngai" a hnu deuhah chuan a rawn ti a, in hnuai lam panin a chhuak zui bawk.

"Ka duh leh ka lo chhuk ang a, ka duh leh ka lo chhuk lo vang" ka ti leh vak a, ka ṭawng chu a hre hman kher ang em ka hre lo.

Room-a han awm reng mai chu a dikin ka hre lo va, mahse ani sawi avanga in hnuai lama chhuk chu ka duh chiah bawk si lo. A chhuk hnu chuan a hmuh hlau takin ka wardrobe chu ka hawng dê de a, ka chhuahsan tak ka thuamhnaw hluite chu an lo la inkhai ṭha vek a, thil awm dan vel chu ka hrethiam lo tulh tulh. Darkar chanve vel lai chu room-ah chuan ka awm a, tih tur em em pawh nei lovin ka awm tawp a ni mai. Chutah room kawngka chu a lo inkhawng ri a, ka hawi phei chuan nunrawnga bawk chu ka hmu leh ta. Room kawngka a rawn khawn rik avang chuan a hmaa thawm nei lova awm tawh lo tura ka tih chu a hre ve reng a nih ka ring ta vel bawk.

"I lo chhuk duh si lo va, hetah hian kan sawi dun mai dawn em ni?" a aw aṭang chuan inthlahrung ve te pawh a ang a, mahse ka laka a inthlahrun erawh ka ring hlawl lo a ni.

"Sawi dun tur vak kan neih pawh ka hre lo" ka ṭawngkam chhuak reng reng chu ngaihthlak nuam lam aiin a nuam lo lam zel zawk a ni.

"Nei e" a rawn ti leh mai a, tawi tak taka a ṭawng ṭhin pawh a lo la bansan lo tawp a nih hi!

"A nih chuan sawi vat vat rawh, ka mu duh a nia" tiin dawt chu ka sawi leh ta ringawt a, chhun lai laia mut chu ka theih loh mai bakah mutthilh hrim hrim chu ka harsatzia keimah chuan ka hre chiang ber.

"Dawr kha siam i duh niin ka hria a, Chawlhhmun lamah khuan kan pahniha in tur ka sak tir chu an sa zo deuh chiah a, ka pate pawh ka la hrilh lo" ṭawngkam pangai tak hian a rawn ti a, a va han zak lo thawt thawt ve le!

"Eng vanga kan pahniha chenna tur in lo sa ringawt nge i nih? Ka ṭhen leh vat dawn che tih kha i theihnghilh em ni?"

"Ka theihnghilh hauh lo, tuna ka in sawi hi chu nupa kan nih lai aṭang tawha ka sak tir zawk a ni" a tih chuan amah ka en nghal kawk a, mak ka ti hle bawk.

"Mahse kan nupa inkar kha beisei loh lam takin a danglam a, tichuan keipaw'n ka khawih zawm tir ta lo" a rawn tih zawm leh zat a, ka lo ngawi reng thung.

"Amaherawhchu, ka hruai let leh theih tak hlauh che chuan tiin ka sak ṭhat tir leh a, thla hmasa khan a pawn lam chu kan zo fel chiah a, a chhung lam erawh design angin kan la thawk ṭan lo" a rawn ti leh a, evanga natna nei awm tak hmel pu reng nge maw a nih le.

"Enge chung Chawlhmuna i in sakte nen kei hi inzawmna kan neih? Inchhir tak ang khan lang kual vel lo la, i awm pangai angin awm mai mai rawh" ka lo tih khum hmak thung.

"Chawlhhmuna in chu kan pahnih tana ka sak a ni a, chuvang chuan i nei thei ang. A chhung khawih a la ni lo bawk a, i dawr siam duh ang ngei chuan i chei bawk dawn nia" a rawn ti leh a, chutiang teh vaka thil min tihsak a tum chu ka duh vak lo va, mahse ka tan pawh dawr siam chu a awlsam phah sawt chu ka ring tho.

"A nih chuan a ṭha e, ka tan thil tih pawh a harsa lo sawt dawn a nih chu!" chapo aw tak chuan ka ti a, chutia hnuaichhiah titih taka ka awm vel chu min ngaithei phian. Ni lo, min ngaithei lo mahse ka dik a, a dik lo zawk chu amah a ni.

"Chuan room hi ka thlak duh bawk, vawiin ni la la hian thlak nghal vek ka duh. Ka thawmhnawte pawh hi ka tiral vek ang, a nih loh paw'n khing ka thuamhnawte khi chu Home lamah ka thawn mai ang" ka tih chuan mak tih hmel tak hian min rawn en a, a beisei loh lam tak ka sawi pawh a ni ang.

"Engvanga chutiang tih tum kher nge i nih?" chal tichuar sung chung hian a lo ti ve vat a, a hrethiam tak tak zawk em ni?

"Khi lai room chhungah khian ka nun hlui zawng zawng kha a châm tih i hre lo em ni? Phatsan ka nihna te, uiresan ka nihna te leh hmangaih tlâk ka nih lohzia ka hriat chhuahna te kha an awm asin. Min tih thinrim hi basan thuai la, i tan pawh ka phuba lak dan tur a zia deuh ang" thinrim tak chuan ka ti leh ṭeuh a, chutia ka sawi tâk chinah chuan a ngawi ta vang vang. Engvangin nge a ngawih mai loh vang ni, engkim kha ama bulṭan a ni mîau alawm.

"Aw le, i duh ang chuan kan ti dawn nia" a hnuah chuan a rawn ti ṭha ve leh mai bawk.

Room aṭang chuan a chhuak a, enge a tih lam chu ka hre zui tawh lem lo. Dar 11 velah chuan mi tu tu emaw hi kan inah chuan an lo lut sup sup a, an lan danah chuan kan room buaipui vel tu turte an ni ngei ang. Ka lo rin lawk ang ngeiin kan ina lo lut ho chu hnathawk tura u Hruaia lo rawih te an ni a, an dipdal zawnga lo awm palh ka hlauh avangin kei chu choka lamah ka chhuk ta daih.

Tlai lamah chuan u Hruaia chuan a chhuah lawk tur thu a sawi a, aw leh aih paw'n ka lo chhang hran lo. A duh leh chuak se, a duh leh chhuak lo se a ni mai. Ka tum ber chu a rilru tih nat leh a sum neih zawng zawng chen rala kalsan a ni. A nun rawn thlakin a hmasial thlak chu ka ti ve ṭhin tho alawm, mahse heng zawng zawng hi ka thinlung a tihchhiat vek avanga ti ka ni. Ka thinlung keh sawm vek tawh hi ṭha thei tawh dawn lo mahse phuba tal ka lak hian ka natnate chu a dam ka ring a, chuvanga let leh ka ni bawk.

"Au Nute, au Nute, nangmah dik tak i ni em?" kawngka lam aṭanga rawn titu lam chu ka en vat a, Duati lek chu a lo ni. A lo ṭhang ve tawh hle a, a hmelṭha lehzual tawh hle bawk.

"Ka laka i thinrim a ni pawhin ka chhungte lakah hi chuan thinrim ve kher suh, an thiam loh pakhatmah a awm lo" ngawi renga Duati ka en laiin kan mihring nunrawnga zawk chuan a rawn ti ram deuh hmak a, Duati pawh ka chhan mai loh avang chuan a tim ve deuh niin a lang.

"Duati, au Nutei hi kan inah a lo awm leh tawh dawn alawm" u Hruaia chuan Duati chu a be leh ta daih a, zep lovah chuan Duati laka chutianga ka awm chu nuam ka ti bik chiah lo. Naupang rilru thianghlim tak chunga sual chhuah tlat chu a dikin ka hre bik lo a ni.

"Duati, i lo dam em? Au Mama sawi kha a dik alawm, in bulah ka lo cheng leh tawh dawn a" hlim hmel tak pu lui chunga ka tih chuan Duati pawh min ṭih hmel deuh chuan a awm ta lo va, a rawn nui sen sen nghal.

"A ni maw!? Ka va'n lawm tak, engatinge i lo haw har em em? Enge min lo hawn?" ka lam pan zawnga a rawn tih leh chuan

"Maw?" ka lo ti hû a, a thusawi awmzia ka hriat loh êm avang chuan u Hruaia zawk ka en vat a, ka meng phili hman hle tih pawh a hre ngei ang.

"Duati, lo kal teh. Au Nutei kha a lo zin haw chiah si a, a chau palh ang. Va inthlak vat la, nakinah kan room ah i lo chho dawn nia" nunrawnga chuan Duati ka lam pana lo kal mek pawt ding pah hian a lo ti vat a, kei erawh chuan Duati zawhna kha man lo tak ka ni. Engvanga Duati chuan thil hawn tur nia min ring nge a nih reng reng?

Thuawih takin Duati pawh chu mihring nunrawnga sawi ang chuan a kal sawn ta hlauh a, thil dang min zawh belh se chuan chhan dan tur ka baih vai khawp ang. A kal liam chu ka en zui vawng vawng a, a lian tawhin a lo ṭawng thei lehzual tawh hle. Tin, a uniform aṭang chuan Mary Mount School-ah a kal tih a hriat a, a vun a lo ngo bawk nen a uniform pawh a inhmeh khawp. Inngaihtuah chhuak zawkin nunrawnga lam chu ka hawi let a, ani chuan ngawi reng hian ka awm dan chu min thlithlai a ni chêk ang min lo en reng thung.

"Engvangin nge Duati khan khatiang thu kha a rawn sawi? Engatinge ka thil hawn te kha a lo beisei? Ka hrethiam hauh lo a nia" ṭawng rin hlau tak chuan ka tikhauh far a, tlêma tlemah ka buai lo chauh zawk a nih kha!

"Duati hian a la hre lo" tih te chu a rawn sawi a, a sawi zawm mai loh avang chuan

"Khatianga thu awmze hriat har deuh khan ṭawng ṭhin lo teh, ka hne lutuk. Eng chu nge a la hriat loh chu sawi mai rawh" ka lo ti leh vat a, ka ṭawng chu tih rin loh hram hram ka tum a ni.

"Duati hian nang nen kan inṭhen tih leh kan in i chhuahsan tih hi a la hre lo" a tih chuan mak ka ti ta hle a, sawi mai tur pawh ka hre lo.

Ka ngaihtuah let a, a nih theihna chen a awm tlat. In ka chhuahsan lai khan Duati chu a pi leh pute bula a awm lai tak a ni a, chutah kei kha ka chhuak teh thut bawk si. U Zualtei paw'n ka chhuak tih a hre lo va, tûmah khan Aizawl ka chhuahsan tih reng an hre lo zawk. Ka pa khan in ka chhuahsan hma zanah khan min titipui a, u Hruaia lo haw hun nghak hram hram tur khan min ti a nih kha! Keipaw'n ṭawngkam mawiah leh amah ka zah em vangin ka nghah tur thu ka hrilh a, mahse ka pa khan dawt ka hrilh tih kha a hre hauh si lo.

"Chuan i zin angin kan la sawi char char a nih hi" a rawn tih zawm leh zat a, Duati'n min hmuh tirha min biak dan ka ngaihtuah let chuan a awm ka ti ta vîau.

"Au Mama, home work kan nei a, min lo tihpui" Duati chuan a lo ti leh a, a lo inthlak fel vek tawh bawk. Kan thusawite kha a lo hre hman reu reu ang tih chu ka hlau a, mahse a awm dan aṭang chuan a hriat hman hmel lem loh.

"Duati, keima'n ka lo tihpui dawn che em ni ang? Kan room-ah kan chho daih ang a" nunrawnga chhan hma chuan ka lo ti vat a, Duati pawh a lo phur khawp.

Kut inkai chungin Duati nen chuan kan room lam chu kan pan chho a, kan kalsan tak u Hruaia chu lehhawiin ka ve en leh ta hram. Ani chuan ngawi reng hian min lo en a, a lu a lo bu deuh nghut bawk. A lu a lo buk chhan erawh ka hre lo va, Duati laka ka chet dan chu ṭha a tihna emaw te ka ti ta vel mai mai. Kan room-a kan luh chuan Duati chu a ding chat a, kan room chhung lo danglam vek tawh chu mak a ti a ni ngei ang. Zawimuanga kalin kan room chu a en kual vel a, thil chik nachang a hriat tawhna te chuan a lo naupan ve tak tak tawh zia a tarlang a ni. Kan khum te chu a chul vel reuh a, lehkha zir tura chho ni si kha lehkha zir lam chu kan ngaihtuah leh vak tawh lo te pawh a ang.

"Duati, mak i va ti awm ve?" ka ti ta nge nge. Ka ṭawng ri a hriat chuan ka lam a lo hawi vat a, a hmelah chuan mak tihna a la lang tho.

"Au Nute, engatinge in room hi a dan vek a?" a zawhna chu ka lo rin lawk ang chiah a ni. A hmelah khan zawhna tam tak ka hmu a, a bang bo hle bawk a nih kha!

"A chhan chu maw kan room rawng kha mawi kan ti tawh lo va, kan thlak daih alawm. Engatinge mawi i ti vak lo em ni?" a sama chul pah chung chuan ka ti a, ani erawh chuan lu lo thing nang nang pah leh ngaihtuah thui lo zet hian

"Aih, a mawi daih zawk. A hma ai khan ka duh daih zawk. Au Nute, i lo haw hma te kha chuan khumah pawh hian ka awm thei ngai lo" a rawn ti leh reuh a, kei erawh chuan a thusawi avang chuan zawhna ka lo nei rilru nghal.

"Engati maw kan khumah hian i awm theih loh?"

"Au Mama'n a phal ngai hleinem, amah pawh a riak ngai lo, kan mikhual room-ah khuan a riak daih zel" a tih chuan nunrawnga chu ka ngaihtuah zui daih a, engvanga kan nupa room-a riak ngai lo nge a nih tih chu ka thil hriat châk tak pakhat a ni leh ta.

"A ni tak tak maw!? Engatinge a riah ngai loh?"

"Ka hre bik lo e a! Khumah te khan mut ka châk theih tehreng nen mut kha phal ngai lo va, khum siampui atan chiah min sawm ṭhin" u Hruaia chuan khum a siam ve ṭhin maw!? Ka va han awih lo lulai ber mai em, lo ni ta pawh ni se thil mak tak zawng chu a ni chiang ang.

"Au Mama'n khum a siam ṭhin tih chu ka va'n awih lo, mi dangin an siam zawk ka va'n ring ê" dawp titih deuh chuan ka ti a, ani erawh a lo ner ve nang nâng mai.

"A ni lo, au Mama'n a siam ṭhin tak tak alawm. Champhai aṭanga a lo haw chang pawhin chhunah leh tlaiah chauh amahin a mu ṭhin a, z anah chuan a mu leh duh chuang miah lo. Ka room atan ka awh awh theih theih nen min pe phal ngai bawk si lo, ka ngei thei a nia aw" a rawn ti ve lûam a, a ṭawngkam leh a chezia vel reng reng aṭang chuan nuapang fel leh ṭawng nuam ti tawk ho vel rual hi a pawl pha tawh tih a hriat hle.

"Duati, au Mama chuan ka zin lai khan mi tu emaw lo hruai luh a nei em? Kan ina cheng turin a ṭhiante emaw hmeichhia emaw rawn hruai luh a neiin i hria êm?" ka rilruah u Sangtei chu a awm lo thei lo va, tun thlenga a hmel ka la hmu leh lo chu mak ka ti deuh.

"Ka hre lo, i zin lai khan tûmah kan chenpui hleinem au Nute" a rawn tih chuan rin loh vîau ka tum a, mahse ka ring leh ta zawk. A chhan chu Duati te ang naupang rilru thianghlim hi chuan dawt an sawi ngai lo va, sawi tur a ni em tih pawh an hre lo.

"A nih chû, lehkha zir tawh ang aw" zawhna dang zawt buai tawh lovin ka ti ta daih a, thil dang hriat duh ka neih tâk leh ni dangah ka zawt tawh mai ang.

Tlai dar 4:00 vel thleng chu lehkha ka zirpui a, ei rawngbawl lam reng ka lo ngaihtuah pha tawh miah lo bawk. Duati nena kan room aṭanga in hnuai lam kan chhuk thlak chuan ka beisei loh thil bawk ka hmu leh ta. Duati chuan a mut a chhuah thu a sawi a, a room-ah chuan a lut zui bawk. Kan choka lam chu ka hawi ṭha leh ngat a, ka mi huat em em leh mihring nunrawnga, a hmaa ka pasal leh ka hmangaih em em ni ṭhin u Hruaia chuan ei rawng a lo bawl a nih chu!

Nupa inkawp chawih tak kan nih ve lai kha chuan kei leh u Zualtei khan ei rawng kan bawl mai ṭhin a, ka pa leh u Hruaia kha chuan khawih enah pawh an en ngai lo hrim hrim zawk. An intih lal vang leh mipa an nih avanga hmeichhiate kuta dah tawp an ni lo va, a nachang an hriat loh vang leh hmeichhiate anga an zei loh vang a ni zawk. Ka ei rawngbawl min puih a tum te khan ka lo phal lo ṭhin a, a chhan pawh ka duh ang taka a tih leh theih ṭhin loh vang a ni.

Tlai khat phei kha chu maian min hihpui ve ngei a, kei ka lo ṭawng tui bawk nen a thil tih dan chu a dik leh dik loh pakhatmah ka lo ngaihtuah si lo, tui lum chhuan so bawrh bawrha maian ka thlak ṭep titih tawhah u Hruaia maian hih chu a dik lo tih ka hre chhuak chauh a nih kha! A kuang zawng zawng chu a lo paih fai vek a, a hnah chiah a lo dah bang hlawm. Ka thinrim bawk si, nuihza bawk si, tih ngaihna ka hre lo chu ka melh rum ta vak ringawt. Gas-a tui chhuan chu a so nasa tawh si a, chawpchilh takin kan frigde-a maian la chambang ho chu la chhuakin ka hik leh ta mawlh mawlh a, a maihan lo hih ve pawh chu a nihna ang ângin ka thlak tel ta tho.

Chutah inbual ka duh bawk nen u Hruaia chu ka chawhmeh chhuan lo vil turin ka ti a, bathroom chhunga ka awm lai chuan soda ka thlak theihnghilh tih ka hre leh ta. U Hruaia chu kan soda bur chhin chanve vela tam lo deuh thlak turin ka ti a, ani lah chuan ka thusawi lo hre sualin chhin khat leh a chanve a'n thlak mai a nih kha! Hauh vak ka tum a, mahse hauh vak chuan awmzia a nei tawh lo tih ka hriat avangin ka hau leh ta chuang lo. Chumi tlaia kan chaw ei chu kan ner nasa hlawm teh è. Tlai dang zawnga ka maian bai tui ti em em ṭhin ka pa pawh maian bai a hawp chiah chu a thlengah a chhak chhuak leh vek a, ngawi reng hian min lo la en zui. Chutah ka bula ṭhu u Hruaia chu thovin a kham daih a, chawhmeh chu ka siam dik loh emaw an tifur hlawm.

Kan nupa room-a ka chhoh leh te chuan u Hruaia chuan min lo nuih sûng a, a thiam loh a ni tih chu hre tho mahse keima'n ka tuar ta vek chu a nuih a za a, ka tihtauh phah ta nghe nghe. Min thlem a, min tihlawm a tum a, kei lah ka lo titau khanglang bawk nen kan inthlem rei ta vîau bawk. Chumi ni aṭang chuan ka ei rawng bawl chu vawikhatmah min pui leh tawh ngai lo va, ka bula a awm duh a nih pawhin ngawi reng hian a lo ṭhu ve mai zel. A tam zawkah kha chuan keimah zawk khan ngawi renga awm dun chu ka thei leh ta tlat lo va, ka titipui leh nge nge ṭhin a nih kha!

Chutia u Hruaia, ka pasal lo ni ṭhin leh nunrawnga tiha ka koh fô tâk ei rawng bawl lai ka hmuh avanga ka nun hlui a rawn lan zawt zawt lai chuan kan in kawngka chu a lo inhawng a, lo lut mek hmel ka hmuh chuan u Zualtei a ni tih ka hre nghal. Hawi pawh rawn hawi chhuak lo hian kan kawngkapui bula bathroom-ah chuan a lut zui daih a, min la hmu miah lo leh nghal. Kei chu sitting room-ah ka lo va ṭhu phei ta daih a, u Zualtei chuan min hmuh hûn hunah min hmu tawh mai rawh se ka ti ta ringawt. Sitting room aṭang chuan u Zualtei bathroom aṭanga rawn chhuak chu ka lo thlir reng a, min la hmu ta lo cheu. U Hruaia awmna lam pan chung chuan

"U Mam, engatinge i lo tih leh ṭhin? Ka lo haw hunah pawh ka ti thei tih i hriat reng kha, khawi ka lo tih chhunzawm ang" a ti nghal zung zung a, u Hruaia pawh chuan a nau chu a lo kian ve mai. Saw pa ber bur sawn a nau saw ka awm ve tih hrilh a tum miah lo em ni zawk?

"Eng eng nge i lo siam tawh? Khaw maw kan en kual ang e? Ka pa hi a lo la haw lo em ni? Tun lai chu keini school lam hi kan bang tlai ṭhin a, a fuh lo tak tak a ni" u Zualtei chuan a ti leh mial mial a, pakhat zawk erawh chuan keimah min lo en ngar thung.

"Hei ka biak che chu, i hre miah na nge?" tiin u Zualtei chuan a u chu a en chho hâ a, a mi biak berin min rawn en tlat avang chuan u Zualtei paw'n a u hawina lam chu a rawn en a, vawilehkhatah ring tawk hian a rawn ṭe chhuak ta thut. A ṭe rin êm avang leh a ṭe thut avang chuan kei ngei pawh ka lo phu dâwr a, chutah hmanhmawh tak hian u Zualtei chu ka lam panin a lo tlan phei zui nghal.

"Nute Nute, nangmah i ni em? I ni chiang mai, i lo let leh tawh maw!? Âwww Lalpa, ka va'n lawm tak em" ka ṭhutna bul chhuata rawn ṭhingṭhi chung hian a ti mawlh mawlh a, sawi ber tur pawh hre lo ang mai hian a awm. Ka mal chunga ka kut chu a rawn vuan a, a hmel ka en chuan a mittui a lo tling pam bawk.

"Aw u Zualte, keimah ngei ka ni e, ka lo let leh tawh alawm" ka tih rual chuan min rawn kuah nghal thlawp a, a ṭap chhuak zui ta bawrh bawrh. Min ngainaa min kawm ngeih ve em em tu, ka unaunu ang deuh thawa ka lo en ṭhin u Zualtei ṭahna avang chuan ṭah châkna chuan min tur et et a, ṭawng leh ngat ila chuan ka ṭap chhuak thei ngei ang. Chutah min kuahna aṭanga awm sawn thut chung hian

"Khawnge naute? Fa i nei tawh em? I rai tawh bawk si lo, Nute nau i chhiat em ni?" a rawn ti a, a mit bul vela mittui pherh phang ka hmu bawk nen ka ṭap chhuak ve ta hawk. Tun ang boruakah chuan ka la sawi thei rih lo a ni.

"Âwwww, a va'n pawi tak em, Nute ka khawngaih êm mai che" tiin min kuah leh a, insum buai duh tawh bik lovin ka ṭap chhuak ve ta hawm hawm. Zawhna ka chhan loh danah u Zualtei chuan nau ka chhiat tih a hrethiam mai a nih ka ring a, amah chu nghet takin ka kuah let zui ve bawk.

Kan ṭah chhuak zual pui a reh hnu chuan kan inthlah a, u Hruaia lam ka va hawi phei chuan rilru nat hmel deuh hian min lo en niin ka hria. Ni lo, ani te chuan naute kha chhiat mah ila pawi a ti tawp nâng. Chuvang chuan a hmela inchhirna ang taka lang te saw a lem leh a der vek a nih ka ring. U Zualtei chuan ei rawng bawl pawh ngaihsak leh tawh chuang lo hian a room lamah min hruai ta daih a, hnial buai lovin min tih kawi ang ang chuan ka awm ta ringawt. A room chhung kan luh chuan a khumah min pawt ṭhu a, tukverh lam thlir veng veng chung chuan a thaw hak a, min lo ngai ve tak zet a nih dawn hi!

"In lo dam ṭha maw?" kan ngawih tak reng avang chuan ka ti a, han biak mai dan tur chu ka khawr ru tlat a, ka zam deuh te pawh a ni mahna.

"Aw, dam ṭha e. Nute, engatinge kan hriat loh lai kher kher khan i chhuah? Engatinge i nu leh pate tal i kalna tur i hrilh loh? Keini chhungkua hian i nu leh pate saw kan hmu ngam tawh miah lo asin" kan inen tawh lo va, kan hma zawn ve ve chu ngaihtuahna dang daih pu chungin ka en tawh zawk.

"Ka thei tawh lo alawm, u Hruaia lakah khan ka beidawng tawk tak zet a tin ni! Ka nu leh pate ka hrilh hrehna chhan ber chu maw an lakah keimah leh keimah hi ka inzahpui a ni. Ka pa khan u Hruaia ka neih hi rem min tihpui vak lo va, mahse u Hruaia chu thinlung leh tih tak zeta ka hmangaih avang khan a rem tih leh mai mai zawk a ni. Chuvangin khatiang boruak duhawm lo tam tak te kha hrilha let leh ai chuan kal bo rih kha ka thlang ta a ni" sawi lo tura ka inup behna a rei tawh bawk nen ka sawi chhuak zo chiah cu ka veng huai ni maiin ka hria.

"Nute, u Mama i lo nei hi i inchhir ngawt ang ti raw? Keini chhungkua chuan natna chi tinreng kan lo pe che a, i tan kha chuan kan chhungkua hi kan ṭha hlawl lo a ni e" inthiam lo aw leh beidawng aw zet hian a lo tichhuak sep a, a thusawi chuan ka awm a tinuam lo leh ta daih.

"I chhuah hnu kha chuan i chunga harsatna tam tak kan siam vang nge ni, vanduaina hrang hrang kan tawk a, mahse ka ngaihtuah chian hnu hian engkim kha kan tawrh tur veka Pathian remruat zawk a nih ka ring ta" a rawn ti zawi leh sep a, ka laka an chhungkua a thiam lo lutuk chu ka khawngaih ang reng hle.

"U Zualte, in chhungkaw thiam loh a awm hleinem, kei chuan u Hruaia ber hi ka hua a, ka mawhpuh ber a ni bawk" hnem ka duh a, mahse a hma ang khan ka ngam pa tawh lo. Keimah zawk hi ka lai ṭut a, a awm dan vel chuan ka awm a tinuam lo hle bawk.

"Ni lo Nute, kan chhungkua chuan i chunga kan sual em em avangin Pathian hremna kan tawk ni maiin ka hria. I chhuah hnu kar khat velah ka pa a accident a, thisen a hloh hnem em avangin kan buai phili hle" a rawn tih chuan

"Enga? Ka pa a accident maw!?" mak tihnaa khat aw chuan ka ti ve nghal thuai.

"Loh theih lovin u Mama chu a lo haw ta a, ka pa chu kan chhan leh thei ta hram a ni. Amaherawhchu, chutah chuan kan hremna tawrh tur chu a la tawp mai lo. Master degree final semester ka exam answer chu ka zirlaipui ṭhenkhatte'n entawn angin min sawi a, social media-ah pawh ka lar phah vîau asin. Chu chuan ka hna dilna thlengin a nghawng a, mahse Pathian kha ka dem ngai miah lo. A chhan chu ani chuan kan tawrh tur tak min tawrh tir niin ka hria. Tunah erawh a malsawmna a zarah Home Mission School-ah ka thawk ve leh thei tawh a, ka lawm em em a ni" ka zawhna pawh chhang chuang lo chuan a rawn ti leh duah a, an chhungkaw thil tawn chu hriatthiampui lutuk lo mah ila kei ang thovin hrehawm an lo tuar ve tih erawh ka hre thei.

Darkar khat deuh thaw kan titi hnu chuan inhnuai lamah kan chhuk thla leh a, mahse tunge ka hmuh tak hi! Sitting room-ah chuan ka pa chu phone khawih chung hian a lo ṭhu thluang duah a, a chal vei lamah chuan ser a lo awm tawh bawk. Chu chu a accident na avanga ser a nih ngei ka ring a, ka ring sual kher lo vang. Chutia ka en reng lai chuan a rawn hawi chhuak a, kan inmelh ta ran. Ka lam pan chuan a rawn kal a, a hmel aṭang chuan ka lakah a thin a rim ang nge a lawm ang tih ka ngaihtuah thiam mai lo.

Chapter 18

"Nute, i lo haw leh maw!? I lo haw leh ngei hi ka ring asin. Ka fapa i hmangaihna avanga i lo haw leh hi ka besei tlat a, tunah chuan ka duhthusam ang ngein kan inah lo lawi leh ta" tiin ka kut chu a rawn chelh a, ina ka haw leh chu a lo lawm zawk a nih hmel.

Amaherawhchu, ka pa hian thil hriat dik loh a nei a ni. Ka haw leh chhan chu a fapa ka hmangaih vang emaw a ti a, mahse a ni tawh hauh lo. Ka haw leh chhan dik tak hi u Hruaia tih lo chuan an hre lo va, an hriat kher pawh ka duh lo. Chaw kan ei laite chuan u Hruaia tih loh chuan min be siam siam a, ka pum a puar tawh loh avangin ka pa chuan zawhna min zawt nghe nghe. Mahse rang takin u Zualtei'n ka pa chu ni danga a hrilhfiah tur thuin min lo chhan khalh a, ka pa paw'n thil awmzia awm ang tur hrethiam takin min zawt zui ta bik lo.

Kar khat ka awm hnu chuan u Hruaia chuan ka dawr siam tur chu min buaipui sak vek a, Restaurant ang reng deuh nimahse Hotel lam pawl lek lekin ka chei tir a, a chhung chei dan tur leh awm dan vel tur pawh ka duh khirh hle. Tun ang lai khawvelah chuan a ṭha ṭha hi mite tlawh pawh an ni a, sum lamah kan buai vak tawh lo tlangpui zawk a ni. Hotel-a riah man te, thil ei man te pawh to vîau mahse a changkâng kang hi kan dawr ngam tawh a, chu chu sumdawng mite tan chuan sum lak luhna peng ṭha tak pakhat a ni. Ka dawr awmna chu Chawlhhmun daih a ni naa a veng mite chu an lo hausa hlawm phian a, kan awmna hmun chuan a lo zir ve tho bawk nen kan hawn tirh aṭangin dawrtu pawh kan nei ṭhahnem reuh hle.

Ka ṭhiannu Feli chuan u Hruaia te ina ka haw chungchang leh dawr ka neih chungchang a hriat chuan min hau vak a, min hauh chhan erawh min ngaihtuah vang leh engmah hrilh hmasa lova ka chet thut vang a ni. A thinrimna chuan rei pawh a awh leh lêm chuang lo va, amah ber ber chuan ka dawr neih thar chu min lawmpui leh lawi si a, MZU-a class an kal banah te chuan a rawn chawl haw ta ziah zawk. Tin, ka nu leh pate paw'n an rilru tak chu hre lo mah ila min lawmpui em em a, awlsam taka dawr lian leh changkang ka nei nghal mai chu mak pawh an ti khawp. Mahse u Hruaia hian pawisa a nei hnem dawn tih ka hria a, dawr siam emaw dawr neih kha chu ka harsat vak ka ring lo va, ka harsat lo ta reng bawk a ni.

Thla nga lâi dawr chu sumdawnna ang tak taka ka kal chhohpui hnuah chuan mite angin dawrtu pawh kan nghah tawh hle a, hnathawk ka lo ruai hnem hlauh chu kan buai loh phah ta daih. A tirah kha chuan inban ṭhen te a ngaih kha ka ring hial a, mahse ka beisei loh lutukin ka dawr siam thar chu mite'n lo hriain min lo pan ta sup sup a ni. Min dawrtu tam ber hi chu veng mite leh Mizoram University-a hnathawk lam aṭang daih a ni a, chu pawh professor ho leh an chhungkhat laina hnaite ho an ni. Rin ai takin Vai ho chuan min lo dawr uar a, keipaw'n kan menu chu ka thlak danglam ta vat. Vai chawhmeh chu ka dah thar ṭeuh a, chuvang chuan dawra Vai lo kal pawh an tam phah hle.

Ka dawr kal lam leh haw lam chu u Hruaia chuan min thlah ziah a, min thlah kawi hman ziah chu mak ka tiru thei khawp. Mahse tunah chuan Aizawl DC a ni tawh lo va, Champhai DC pawh a ni tawh lo va, hna a neih chu ka ring tawh lo ve ringawt. Zan lamah pawh a chhuak ngai lo hrim hrim a, enge a tih ṭhin pawh ka hre zui chuang lo. Mut dawnah erawh kan nupa room-ah chuan a rawn chho ziah a, puan sin tur lain ṭhutthlengah chuan ngawi rengin a mu mai zel. Kei chuan a hriat loh laiin sleeping pills chu ka ei ziah a, amah avanga ka mu thei lo ṭhin chu hria se ka duh lo a ni.

Zan khat chu dar 1 velah ka harh hlawl a, chhuata ṭhu chung leh kan khum ngheng chunga u Hruaia lo mu bam ka hmuh chuan ka phu zawk teuh hle. U Hruaia chuan ka rizai sin chu a lo kuah a, ani erawh ka thawm pawh engmah hre lovin a muhil thung. A awm dan ka hmuh chuan ka khawngaih dâwn dawn a, mahse ka rilru chapona zawk chuan khawngaih miah lo turin min rawn hrilh zawm zat. Zan dangah chuan ṭhutthlengah a mu ziah khan ka hre si a, nge ani hi ka muthilh laiin ka bulah a lo mu ziah ṭhin zawk? Chutiang a lo nih vaih chuan a châk lo khawp ang.

"Hei Mrs Nute, i ṭha maw?" ka dawr lo lut paha rawn titu ka hmuh chuan ka nui sak a, keipawh chuan ka lo welcome ve vat.

"Hei pu Kamal, lo ṭhu rawh i lo kal hun pawh a fuh chaih chaih hle a ni" tiin a ṭhutna turte chu ka lo kawhhmuh a, ka dawra hnathawkte an buai vîau lai hi chuan customer te lo biak hi ka hreh lo khawp.

A hma aṭang pawha lo ti ṭhang tawh ka ni bawk a, Hotel neitu ka nih avang chuan ka mi chhawrte hah taka thawh tir leh keimah engmah ti lo va lo awm vel mai mai chu ka tum lo hle. A ṭul ang ângah chuan ka pui bawrh bawrh a, chung vangte chuan ka mi chhawrte paw'n min nel chak hle. Kan Chef pawh a fel a, a thiam a, harsatna tam tak paltlanga chutiang thiamna chu nei a ni bawk. Chutiang mi chu ka ngaisang a, changkang tak tak aṭanga zir chhuaka thatchhe taka thawk leh ṭhin si ho ai chuan ka chhawr duh fê zawk a ni.

"Enge i ei duh ang pu Kamal? A ngai bawk em ni?" ka tih chuan ṭhen ṭhaw hian a lo bu nghauh nghauh a, ani pawh hi khawi office emaw nia hnathawk lai mek a ni. An office chu Zonuam daiha awm a ni a, chutiang khawp chuan customer te hi kan nei ṭha ve ṭhin.

Kan ei siamna bulah chuan ka kal phei a, order petute nen pawh kan inkalpel nawk nawk mai. Vai ho ei tam ber leh tui tih ber pawl Samosa te, Naan te, Paratha te, Masala te, Dosa te leh Dal te chu chhawp chhuak turin ka naute hnenah chuan ka hrilh a, anni paw'n ka thusawi chu hriain an che ve zung zung. Chutia ka ṭhut hahchawlh lai chuan u Hruaia hi a rawn lut a, ngawi rengin ṭhutna awlah chuan a ṭhu zui bawk. Lunch break hun lai vel hian ka dawrah chuan u Hruaia chu a lo chawl ve ziah a, ka biak ngai loh ang bawkin min be ngai chuang lo.

"Awi saw, ka star deuh pa kha a lo kal leh tawh. Kei chu a hmel ka hmuh ringawt paw'n ka â thei mai dawnin ka hria"

"Enteh, hman ni ah ka hre ve chiah. Saw pa saw Aizawl DC ni ṭhin a lo ni reng a, ka hriat hnu phei kha chuan a hna lo chelh tawh chu a inhmeh leh dawn lutuk. Awi, kei chu a hmuihmul te thleng sawn ka duh, a pa ka ti thlâwt" ka naute pahnih ṭawng ri mer mer chu ka hria a, chutianga u Hruaia an lo sawi ringawt avang chuan a chhan pawh ka hriat si lovin an thusawite chuan ka awm a ti nuam lo ru vîau.

"Le! Titi lo khan customer te saw lo va buaipui rawh u" u Hruaia chungchang ringawt an sawi lai chuan ka va ti a, an ṭawng ri ai mah chuan u Hruaia an star thu vel chu ka hre hne zawk. 

"Kan tihpalh a ni e" tiin thuawih takin an che zawm nghal a, ka mi chhawrte reng reng hi mawng rit tak an awm lo va, an zuan a zâng hlawm em em zawk a ni.

"Ka pi, ka pu sawn a be lawk duh che a, thil eng emaw complaint a nei nge pawh ka hre lo" u Hruaia lama va pheinu chuan ka lama lo let lehin a rawn ti a, ani pui ber bur sawn engtak chu lo sawi ni maw!

"Aw le" tiin ka ṭhutna aṭanga chuan ka che sawn ve nghal mai bawk. U Hruaia chu ka pasal hlui, phuba ka lak duh avanga ka pasal ni leh mek a ni tih ka dawra mite chuan an hre lo va, hrilh kher pawh ka tum hran chuang lo.

"Engenita? Engatinge hetiang hunah hian i lo kal ve ziah? Miin kan inkar hi an hriat vaih chuan a pawi khawp ang" mi hriat hlau tak chuan ka va ti nghal hmawk hmawk a, ani erawh chuan nui lui sak hian min lo en kar thung.

"Tunah chuan min lo zahpui hial tawh a nih hi! Ka sawi tum ber chu vawiin hian Duati hruai ka ngaih avangin ka lo hruai hman dawn lo che" thawp sup hian a rawn ti a, ani hi engvanga chauh hmel em em nge a nih le.

"A pawi lo, ka lo haw thei mai ang" ka lo ti sam ve mai bawk. Min en leh vawng vawng a, chutah ding thutin a wallet aṭangin pawisa a phawrh a, dawhkana dahin a chhuak zui nghal.

A chang hi chuan a awm dan hian min tihrilhai lek lek zel a, a chunga ka chet dan chu nuam lo tih thut chang pawh ka ngah. Mahse, chutianga nuam lo tihna ang chu ka nei rei ngai lo thung. Ka ṭhutna lama ka phei leh hnuah chuan kan customer hlun em em mai Michael hi a rawn lut a, a seat duh ber awmnaah a ṭhu leh nghal hmiah tawh. Min lo hmuh chuan a nui suk a, keipaw'n ka lo nuih let ve seih.

Michael-a hi Mizoram University lama hnathawk a ni a, ka hriat sual loh chuan Psychology department-a an professor a ni. TV lamah pawh an kawmna ka hmu zeuh zeuh tawh a, ṭawngkam a thiamin subject chu a thiam pangai fû a nih hmel. A ei zawh chuan ka awmna lamah lo pheiin pawisa hi a rawn phawrh a, min pe zui nghal bawk.

"Min lo dawr ziah a, kan lawm tak tak a ni. MZU aṭanga lo tlan chhoh vang vangte hi i ning ve lo em ni? Chuan tun lai class te in kal tluang maw?" kal sawn mai lova a din reng avang chuan ka lo ti zung zung a, amah hrim hrim hi chu biak nuam tak a ni a, a ṭawng duh ve pangai vîau bawk.

"Aw, tluang a ni mai. Ka rawn kal chhan hi chu i hria alawm. Chuan thil dil duh che ka nei a, dil tih lêmah khawi hmun emaw nia len chhuahpuia sawm che ka duh ka tihna" a rawn tih chuan ka pawisa khung fel lai tawp meuhin amah chu ka en a, ani chu a lo ṭhen sak ringawt.

"Kei hi maw!?" awih lo fê chuan ka ti a, ani ang hna sang thawk leh hmeichhiate tan pawha kawppui ṭha leh rinawm ni thei tur tlangvalin len chhuahpuia min sawm ta mai chu ka ringhlel a ni.

"Aw, nangmah kha! Zaninah a nia, i rem tih chuan ka lo sawm mai dawn che em ni?" a rawn ti leh zung zung a, engtia han chhan tur nge tih pawh chu ka baihvai ang reng hle.

"Aaaaaaa, ka va hrethiam lo ve" ka lo ti sep a, chhuahpui ka duh lo lam ni lovin zan chhuah chu a fuh kher ang em tih chu ka ngaihtuah zawk. U Hruaia lam ka ngaihtuah lo va, ka pa leh u Zualtei te unau ngaih dan tur ka ngaihtuah thleng daih a ni.

"Hrethiam mai mai rawh, a hrim hrimah hnate hi thawh hah lutuk loh tur. Zanin chu i chawl hahdam pah ve a ni mai a, min len chhuahpui chu rem ti hram la" naupangin a nu thil a ngen ang chiaha a rawn tih leh chuan ka lo nui te vak ringawt a, MZU-a professor ve lai si a che naupang chhia lutuk chuan ka nuih a tiza a ni ber.

"Aw le aw le, min lo lam la, mahse kan rei thiang lo a nia" ka tih chuan

"Yes" hi a rawn ti hluai a, ka lo nuih leh chîam. Michael-a hi chuan kan dawr kan hawn hnu kar khat vel aṭang khan min lo dawr ta ziah a, ka hmuh hmasak ber kha chuan min lo nuih ver ver a, engmah kha ka hrethiam lo nghe nghe.

"Chuan khawi vengah nge in awm? Ka lo lam dawn che chuan in awmna ka hriat ve a ngai si a" a tih leh chuan kan awmna veng chu ka hrilh ṭha ve mai a, a rawn kal ngei tur thu sawiin a chhuak zui nghal.

Michael hian min duh thu hi vawikhat chu a sawi tawh a, mahse engtinmah ka chhang lo a nih kha! Min duh thu ka hriat hnu chuan a bula awm dan chu ka khawr ṭut a, nuam lo ve duh tak chu a ni. Min duh thu a sawi hnu phei chuan ka lakah a ngampain min nel lehzual em em a, mahse thil ṭha lo leh ṭawngkam chhia reng reng a ka aṭanga min biakna ka la tawng miah lo.

Ani ang tlangval fel, hna zahawm thawk leh mi rilru ṭhain min han duh der ve chu lawm tur a ni nge ni lo pawh ka thliar hrang thiam lo. Tin, Michael nen chuan kan inrual khat tlang hle a, kei aia kum hnih âwrin a upa mai chauh a ni. Min fiam peih a, min tihlim thiam a, amah nuih duh mi a lo ni bawk nen kan awm dun tawh hi chuan kan nui leh nghek zel.

Amaherawhchu, keimah ber hi ka buai ta a ni. Pasal ṭhen tawh ka nih thu ka hrilh pawhin ka bulah a tal tam lui tlat a, kei lah chuan ka pasal hluite inah ka let leh tawh tih lam reng ka hrilh duh bik si lo. Tlêm chuan u Hruaia hmai chu ka zah ve deuh ṭhin a, mahse engahmah ka ngai lo lui hmiah hmiah zel.

Dar 2 a lo rik chuan customer pawh kan nei lun em em tawh lo va, ka mi chhawrte nen chuan kan titi vel ta mai mai. Ka mi chhawrte chu kei aiin an naupang deuh vek a, min zah thiam em em hlawm hle bawk. Chutia kan titi melh melh lai chuan Michael bawk chu kan dawr chhungah a rawn pen lut leh a, kan awmna lam a lo pan lai chuan kan lo en ṭhap bawk.

Kan bul a rawn thlen chuan ka naute ho chu an kal darh nghal dial a, chutia ka dawra thawkte an kal tâk dial avang chuan Michael-a chu a rawn nui chhuak hawk a, keipawh nuihza lem lo tak chuan ka lo nui ve ta ringawt. Thil awmzia ka zawh chuan an department an ban hma thut thu min hrilh a, kan in awmna leh kan veng awmna hriat a duh pah bawk nen min thlah haw chu a tum nghet ta bur. A tawpa tawpah chuan min thlah haw chu ka remti ve ta hram a, thil dik lo leh pawi ka ti pawh ni hlei lo. Tichuan Michael-a chuan dawrah chuan min awm chilh hmiah a, kan dawr khar hun thleng chu min nghak tluan ta ṭhak. Dawr kan khar fel hnu chuan pawn lamah kan inzui chhuak a, fiamthu eng eng emaw a thawh avangin ka nui leh ta chîam.

"Nute" rawn titu lam chu ka hawi phei a, u Hruaia chuan Michael-a nena kan nui dun lai chu min en reng hi a lo ni. Ka thin chu a rawn phu dawt dawt a, thil tisual ang maiin ka awm nghal.

"In ka thlenin i lo la haw bawk si lo va, rawn hruai che ka tum mai mai maw le" amah ena ka ngawih reng avang chuan a rawn ti leh a, a ṭawngkam chhuak chu a pangai hle bawk.

"Tunge a?" min chhuk melh run chunga Michael-a'n a tih chuan chhan dan tur ka hre ta hauh lo. Ka pasal hlui a nih thu han hrilh ngawt dawn ila a tan hriat a nuam ang em tih chu ka ngaihtuah a, chutia chhang lo va ka awm reng lai chuan

"A unaupa ka nia" tiin u Hruaia zawk chuan min lo chhan khalh hmak. Unaupa maw!? Engvanga ka unaupa anga insawi ringawt nge a nih chu ka hre reng reng lo.

"A nih chû, vawiin chu thlah haw ka lo tum a, ka lo thlah haw mai dawn em ni ang?" hawihawm tak hian Michael-a chuan a ti leh a, u Hruaia pawh chuan a lu bu nghut chung hian

"Aw le, lo thlah haw mai rawh. Ka thlah ai chuan i thlah kha nuam a tiin a duh zawk ngei ang" a rawn ti ve leh a, nui lui sakin a motor awmna lam chu a pan a, rei lovah a tlan chhuak zui nghal.

Kan in lam pana kan tlan chhung zawng chuan ka mood a off tluan parh a, a derin Michael-a thil sawi pawh chu ka lo nuih liam pui vel mai mai a ni. Tlai chaw kan ei lai chuan ka pa chu zan chhuah ka dil a, a chhan tak sawi chi a nih loh avangin ka dawr lampang chungchang avanga chhuak tur angin ka insawi ta ringawt. Ka pa chuan fimkhur turin min chah nasa hle a, ka thil tawn engkim a hriat ve vek tawh avangin min ngaihtuah ve hle a ni. U Hruaia chu min kalpui tur leh min awmpui turin a hrilh a, mahse keimah zawk chuan ka lo hnial ta vat. Driver min lo hruaitu tur awm sa anga ka sawi hnu chuan ka pa chuan keimaha kal chu a remti ve ta chauh a ni.

"Enge Folkland-ah kher hian min hruai a? Mite hi an va tam reng reng ve" Michael-a nena Folkland park-a kan luh rual chuan ka ti a, thawm pawh a ri nuai nuai.

"Hna i thawk nasa lutuk a engmah hi i hre lo a nih hi" a rawn tih chuan amah ka en hâw a, chutah ani chu a rawn nui chhuak hawk hawk thung.

"Vawiin hi eng ni nge i hre miah lo em ni?" a rawn tih leh chuan ka ngaihtuah nghal vang vang a, awlsam te hian

"Vawiin chu zirtawp a nia, chuan ni 14 a ni bawk" ka lo ti ve mai a, ka chala na vak lova min rawn nam sawk pah hian

"I hre lo tak zet a nih dawn hi! Vawiin hi Valentine's Day a nia, chuvang alawm ka chhuahpui ṭâlh che nì. Chuan khî lai ground ah khian projector hmangin Valentine's Day movie kan en dawn a, ticket pawh ka book kep vek tawh che" tia min hrilhfiah chuan ka hre lo lutuk chu ka nui ta ringawt. Kan movie enna hmun tur kan thlen chuan an lo tam tawh hle a, open air a ni bawk nen thawm ri neuh neuh a tam khawp mai.

Phulah chuan min ṭhutpui a, kei ang lo takin ani chuan movie kan en lai vel tura kan ei tur a keng ṭun bawk. A lo inpuahchah lawk nasa bawk a ni ang, a chet dan chuan min barakhaih zel. Kan bul vela mite ang bawkin Michael-a chuan min kuah a, hrehawm tihna emaw nuam tihna emaw pawh ka nei hran chuang lo. Kan movie en ber kher lah chuan ka nun hlui bawk chu min hriat chhuah tir leh a, a changtunu chan dan vel te hlei hlei chuan min hriat chhuah tir a ni.

Dar 10 leh a chanve velah kan movie en pawh chu a tawp a, keini pawh kan motor awmna lam panin kan haw zui ve nghal. Motor chhunga kan chuan lai chuan fiamthu eng eng emaw hi a thawh leh ṭeuh a, kal lama hlim lutuk lo kha haw lamah chuan ka hlim haw leh tawh vîau.

Kan in ka thlen chuan thawm dim têin ka lut ṭhem ṭhem a, sitting room light leh light ṭhenkhat a in off danah an mu vek tawh a nih ka ring. Pheikhawk sang ka bun ve khanglang avangin ka kal thawm chu a ri ring duh em em a, kan room lam ka pan chhoh dawnah chuan phelhin ka keng chho ta ringawt. Kan room kawngkhar hawnga ka luh rual chuan light chu a lo la in on vek tih ka hmu a, chutah off mai tuma plug ban ka tum chiah chu thil hmuh ka nei ta tlat. Chu ka thil hmuh chu ka beisei loh lutuk thil a ni a, engtia han tih chi nge a nih pawh ka hre lo.

U Hruaia chu dawhkan bawh chung hian a lo muhil bawrh bawrh a, light pawh off ta lo chuan a awmna lam chu ka pan phei zui bawk. A bul ka va thlen chuan zu rim a nam em em a, a bula bottle intung ran chu zu a ni ngei ang. Thil dang zawng zawng aia ka mak tih ber zawk chu kan inneih thlalak dawhkana a lo tung chu a ni. Ni dangah chuan kan inneih thlalak te chu bangah kan tar ṭhin a, en pawh ka en ṭha peih lo zawk ṭhin a nih kha!

Ani lah chu a la muhil bawrh bawrh a, ka awm ve tih leh thawm engmah reng a hre lo a ni. A awmna bul aṭang chuan ka kal sawn a, light chu off mah ila kan inbula street light chuan kan room chhungah êng tlêm a la rawn chhun lut pha tho. Inthlak felin mutsan chu ka'n tum a, ka thei hauh lo mai. Sleeping pills chu ka hmawm tawh ngei a, mahse a thawk lo a nih hmel.

Chutia rizai sina ka ṭhut awn riai lai chuan u Hruaia chuan thawm a rawn siam a, kei lah muhil ka ni lo bawk nen a lam chu ka hawi nghal vat. Engtinnge a awm tih hriat tuma ka va en chuan chhuat aṭang hian a lo tho ṭuah ṭuah a, a muhil tui lutuk kha a dawhkan bawh aṭangin a tla thla a nih ka ring ta ber.

A han tho kang chu a pai deuh chhâwn chhawn a, a tlu lo chauh zawk. Chutah khum lam chu a rawn pan a, a awm danah chuan ka lo ṭhu awn riai tih a hmu lo hrim hrim niin a lang. Khum bula chhuatah chuan a rawn ṭhu thla a, khumah chuan ka awm em tih pawh a ngaihtuah lo. Chutah a kut chuan rizai chhana ka ke chu rawn khawihin

"Happy Valentine's Day, Nute" a rawn tichhuak ṭuau a, a rui bawk nen a aw te chu a ṭialin a fiah lo ruai mai. Mahse, kei Zonumawii hian a thusawi chu ka hre chiang lutuk tlat. A fiah lo emaw a ṭial emaw pawh ni se a thusawi chu ka hre chiang em em a, a chhan ka hriat si loh hian ka thin chu a phu dawt dawt bawk.

Chutiang khawpa rui chung pawha "Happy Valentine's Day" a la tih hrâm avang chuan ka awm a nuam thei ta reng reng lo mai a, a hmaa mut theih tawh loh sa nak a laiin a awm dan vel chuan min timu thei lo lehzual. Ka ke chu a chelh tlat a, ka harh reng a ni tih reng a hre lo. A tawpa tawpah chuan ka tlaivar theih mai ka ring ta zawk hîal.

Chutianga darkar khat dâwn ka ke a vawn tâk rengah chuan ka awm dan chu ka hne ṭan ta deuh a, ani chu a muhil nge muhil lo pawh ka hre thei lo. Muhil ni se a thawk dan aṭangin ka hrethiam ngei ang a, muhil lo pawh ni se a che sawn tawh ngei ang. Mahse, a awm dan chuan a muthilh leh muthilh loh min hriattir thei hauh lo chu a ni si.

"Nute, i harh maw!?" ka ke ka chet rual chuan a rawn ti a, kei lah ka lo ṭhu tung ât zui nen ka kea min vawnna avanga harh turah min ngai a ni ngei ang.

"Ka tihpalh" ti leh supin ka ke a vawnna chu a la thla zal zâl a, eng fiah tak hnuaia awm ni lo mah ila a hmela lungngaihna chu ka hmuh kân thei chuang hauh si lo.

"A pawi lo, ka zun a chhuak a, ka harh mai mai a nih hi" tiin ka tho zui nghal a, bathroom lam ka pan rual chuan sleeping pill bawm chu ka la a, ka keng lut zui bawk.

Bathroom aṭanga ka chhuah leh hnu pawh chuan u Hruaia chu khum bulah chuan a lo la ṭhu thluang duah a, kan room tukverh aṭanga street light êng lo lut chu a thlir vauh vauh bawk. Ka thawm a hriat chuan min lo en zawk a, a tho zui nghal ṭuah ṭuah. Khum tlanga a rizai sin ṭhin ka dah chu lain sofa lamah chuan a phei a, rei pawh a kal hma chuan chhuatah chuan a tlu ta thlawp a, a rui ve hle a ni ang.

Amah puih tum chuan ka pan phei a, ka dara a ban dah sakin sofa lam chu ka pan pui a, a la rit em em zui. Sofa-a ka dah thlak te chuan ka chau hnawk theiin ka hria. A pheikhawk ka phelh sak sawk sawk a, puan chu sin tira kal mai ka tum chu ka bana vuanin min pawt thut a, ka tum loh lutukin a awmah chuan ka bei ta ran. Awm sawn tumin ka tal a, mahse min kuah hneh lutuk avang chuan ka tal chhuak thei der lo. Zu a rui vîau e ti lo chuan a tha chu a la chak leh ang em em lawi si.

"Khawngaihin, khawngaih takin min hrem tawh lûl suh Nute. Min hremna hi la rei lovin thla 5 vel chauh la nimahse i phuba lak hi duhtawk tawh hrâm la, mahse phuba i lak loh chuan ka bulah i awm tawh dawn bawk si lo. I tel lova awm ai chuan i duhtawka min tihhrehawm hi tawrh ka la zuam zawk tho a, mahse a harsa a ni. A harsa tak zet, Nute" nghet taka a awma min kuah bet chung hian a rawn ti ṭial ruai a, a lungphu ri te chu ka hre chiang hle bawk.

"Khawngaihin, khawngaih takin" tal ka tum leh rual chiah chuan a rawn ti a, a rawn ṭap nghawr dat bawk. Lalpa le! U Hruaia hi a ṭap ve maw!? A chunga ka chet dan avang hian a ṭap maw!? Ka ring thei lo a ni.

"Ka ngai thei lutuk che asin. Kei mi nunrawng hian ka ngaiin ka thlahlel em em ṭhin che a, chhuak tura ka tih che kha ka ṭawngkam hman tawha ka la inchhir ber a ni ang. I chunga ka lo chet tawh dan avang khan khawngaih takin min ngaidam rawh, Nute. Ni lo, kei ang mipa laktlak loh zet hian nang hi ngaihdam dil tlak che pawh ka ni lo ti raw" a rawn tih leh chuan a mit hmuhah leh a bul hnaiah ka mittui ka titla leh tawh lo vang tia ka lo intiamna te chu a chhe vek a, insum karna nei hauh lovin ka ṭap chhuak ve ta hawm hawm.

A nihna takah chuan a awma min kuah beh rual khan ka ṭah a chhuak ru reng tawh a, lo ṭap ta ila tih thlengin ka ngaihtuah fel hman vek zawk. In chung lamah chuan u Zualtei room leh kan room chiah luahtu kan awm avangin ka ṭap inthlahrung duh ta lo law law a, u Zualtei paw'n kan thawm chu hria se pawi tihna ka nei lo. Ni lo, pawi tihna chu ka la nei ngei a, mahse ka insum hman tawh lo zawk a ni. A taksaa zu rim nam te hlei hlei chuan ka ṭah an tichhuak tlat pek a! Nupa hlim dun ve thei tak kan nih lai aṭang pawha zu leh ruihtheih thil dang khawih duh ngai reng reng lo mi ni ṭhin khan tunah chuan zu a in ve tawh a, chung thil ka ngaihtuah chhuah leh hnuah phei chuan amah kuah let mêuhin ka ṭap chhuak ve leh ta.

Zingah chuan ka harh hlawl a, dar 5 vel chauh a lo la ni nghe nghe. Min kuah tlat chunga muhil mek u Hruaia chu ka melh chho râl a, ka nui sak bawk. Mahse, ka nui rei lo ngei mai. Ka rilrua chaponate chuan

"Engatinge i nuih? Engvanga hlim ringawt nge i nih? Nizana a thusawite avang khan nem mai lo la, a chhiat rawp thlengin phuba hi la ta che" a rawn ti nghal zawt zawt a, min kuahna chu dim tea pawt sawnin ka tho ve ta ṭhem ṭhem.

Ni e, khatianga u Hruaia thla zar hnuaia ka mut leh theih avang khan ka ka hlim chiang alawm. Ka hlim lovin ka lawm lo ka tih chuan keimah leh keimah ka inbum mai mai zawk a ni. Ding meuhin u Hruaia chu ka en a, a hmelah chuan hmana ka pasal u Hruaia hmel reng kha hmuh tur a awm tawh lo. Tuna ka hma lawka tui taka muhil hi chu a thau tawh hle a, a hmaiah hmul a awm fur tawh bawk. Mahse chung hmul te chuan an ti lang chhe hran chuang lo va, a thua tawh vang nge a hma aiin a patling hmel ve tawh hle. A thau dan lah chu zu in mite thau ang mai hi a ni a, a vun te chu a la sen suk zui.

Ka thawh hma em avangin in hnuai lama ei rawng bawl tur chuan ka chhuk thla a, in hnuai ka thlen chuan tûmah an la tho lo tih hriat takin a reh ṭhiap. Gas chu on in thingpui ka chhuang a, chutia ka chhuan lai tak chuan in chung lam aṭang thawm rawn awm chu ka hria a, u Hruaia a ni reu reu ang tih ka hlau ru khawp. Zan lama kan awm dan avang chuan u Hruaia chu ka hmu hreh a ni ber. In chung lam aṭanga step-a lo chhuk thawm ka hriat chuan ka hawi chhuak vat a, u Zualtei lek chu lo niin ka hlauhthawnna te pawh an kiam ta duak. Engvanga chutiang em ema zam thar nge ka nih pawh chu ka hre lo.

"Nute, i va tho hma awm ve? Nge i mu thei lo zawk?" ka awmna zawn a lo thlen chuan a ti a, bazar bag ang reng tak chu a la keng zui.

"Mu thei e, ka tho hma ve hrim hrim a nih hi! Engatinge tun ang zing kar karah bag te i ken zawk? Enge i tih dawn?" pangai tak chuan ka lo ti let ve a, thil tih tum chu a nei chiang alawm.

"Nia, tukin chu u Mama ka'n thawh khalh ang e. Zing dangah chuan amah hlir a bazar ṭhin a, mahse tukin chu a mu rei phian sia ka bazar chhawk dawn a nih hi!" a tih chuan inrinni zing bazar hun a lo ni leh reng tawh tih chu ka hre chhuak zui zat a, ka â tawh tak zet a nih dawn hi!

"Aw hâw, ka lo hre tawh reng reng hleinem. Ka lo bazar pui dawn che em ni? Ka hman tho asin" ka ti ve ta vat a, inrinni zing bazar hun a ni tih pawh ka hre lo chu ka inthlahrung ve reng.

"A ngai lo, a ngai lo. Ka pate lo thawh huna thingpui an in tur lo siam zawk rawh, kei chu ka lo va kal ang e" a tih leh tâkah chuan ka tum lui duh ta bik lo. Chutah u Zualtei chu a kal chhuak tawh emaw ka tih lai chuan a rawn lang leh hlawl a, keimah min en ran chung hian

"Nute, u Mama hian in i chhuahsan hnu khan a tuar nasa asin, zan mut ṭhat lai a neih ngai pawh ka hre lo. In pahniha in room te khi Duati tak ngial pawh mut a phal lo va, kei phei chuan luh ka tum ngai lo hrim hrim. Chutiang khawpa a nun a hloh hnua tun ang hun thleng thlenga a la muhil tih ka hriat hian ka lawm a, ka lawm em avangin ka ṭah hial a chhuak" a rawn ti a, a mittui chu a hru zeuh bawk.

"Khitianga tuia a la muthilh theihna chhan chu i lo haw leh vang a ni tih chiang takin ka hria a, i lo let leh chhan hi hre vek lo mah ila khawngaihin u Mama hi natna dang pek belh tawh suh. A thinlung zawng zawngin a hmangaih che a, chhuak tura a tih vang che khan inchhirna nen nun a hmang reng ṭhin asin. Ka u a nih avanga sawi ka ni lo va, a hmangaih êm avang chea sawi mai ka ni. Nang chuan i la hmangaih reng leh reng loh ka hre lo va, mahse i hmangaih lo a ni pawhin a bulah awm reng ang che" a lo tih chhunzawm leh sep sep a, ṭawng zawi vîau mahse zing kar a nih avangin a ṭawng chu ka hre fiah vek tho. Chhang miah lova ka awm avang chuan u Zualtei chu a kal chhuak zui ta daih.

U Zualtei chhuah hnu pawh chuan a thusawite chuan ka ngaihtuahna an tikal thui hle a, mahse rin vek erawh chu harsa ka la ti ngâng mai. U Zualtei kha chuan u Hruaia'n min hmangaih thu a sawi a, mahse engvanga min hmangaih thu chu tun thlenga la sawi lo nge a nih tâk ang? Nge min hmangaih thei lo hrim hrim zawk?

U Zualtei chu zahin ring vîau dawn mah ila u Hruaia'n min hmangaih thu a sawi kher chu ka la awih thei thlâwt lo a ni. Ka la hmangaih reng leh reng loh te kha a sawi a, kei chuan ka la hmangaih reng nge reng lo tih pawh ka hrethiam tawh lo. Ka hmangaihna te chu hun kal tawh khan a liampui a, ka hmangaihna sang ber chu hun liam tawha ka pasal khan a neih tawh avangin hmangaihna hi tunah chuan ka la nei em tih pawh ka hre tawh lo zawk a ni.

"I thil chhuan a so" rawn ti thum duptu an awm avang chuan ka harh chhuak zawk a, rang mang khengin gas chu ka off nghal vat bawk.

"Nizan avang khan ka tihpalh, a thleng nawn leh tawh lo vang" a rawn tih leh chuan amah enin ka hawi let ve ta nge nge. Ani chuan min lo en reng a, min hmangaihna mitmeng ni awm reng reng pakhatmah ka hmu lo.

Chhang let tawh chuang lo chuan thingpui chu ka siam mawlh mawlh a, a duh ve ringin ka siam kep bawk. Kan thingpui in lai te chuan kan ngawi dun reng a, a hma ang kha chu ni se ka ṭawng chhuak hmasa leh zawk ngei ang. Mahse tunah chuan a hmaa Nutei, ṭawng insum theihna tlachham zet kha ka ni tawh lo va, beidawnna leh harsatna hrang hrang te'n an tlak buak avanga nun danglam vek ta Nutei zawk ka ni tawh a ni. Rei lovah ka pa pawh a rawn tho chhuak a, chutiang bawkin Duati pawh. Inrinni nimahse dawr chu hawn tho ṭhaa ka hriat avangin kan hawng a, kal lam pawh a tih dan ngaite bawkin u Hruaia chuan min thlah leh thlap.

Hun a kal leh deuh a, kei erawh chuan hnute chu an kal chak ka ti ngei mai. Tunah phei chuan ka dawr chu sumdawnna ang tak takin thla 6 chhung zet kan lo kalpui ve leh reng tawh. Ka beisei phak bakin a lun a, thla 6 hnuah phei chuan dawra hnathawk tur kan inlak belh ta nge nge. Sawi leh sawi hnu, ka mi chhawrte chu an polite in an zuan zâng a, chu chu dawrtu an kan ngahna chhan pakhat a ni.

Michael-a pawh kan dawrah chuan a lo kal reng a, mahse min dawr ṭhang em emtu pu Kamal-a erawh a lo kal khât ta deuh. Vawikhat phei chu Michael-a hian pu Kamal-a chu a hrawk hrep a, a chhan pawh pu Kamal-a chuan ka inrin loh lai taka ka mawng a lo ben vang a ni. Khami ṭuma ka hlauhthawnzia kha chu pui tak a ni! Ka thil lo tawn tawhin a zir bawk si a, ka chi ai hman viau a nih kha! Michael-a chuan mi dangte lakah chuan min ta chei ta vîau a, hrilhfiah vek chu duh mah ila ka rilru sual chuan min sawi tir lo leh nge nge zel.

Nilaini a ni a, Michael-a pawh an ban hma avangin min thlah tumin ka dawrah a awm leh ta ran mai. Khua a lum chho ṭan bawk nen fan chu kan on ni tin tawh a, kan dawr ngaituah hi chuan electric bill te chu kan chawi tam lo fû zel. Michael-a chuan ngaihzawng pangai ang maiin min en tih ka hrethiam a, kei erawh chuan ngaihzawng emaw pasal emaw neih leh lam ka ngaihtuah tawh lo hrim hrim zawk. Pasal ṭhen tawh ka nih thu leh ngaihzawng neih leh ka harsat thu tlang taka ka hrilh hnu paw'n Michael-a chu ka lakah a beidawng duh lo va, lo tih dan vak ka thiam tawh lo a ni.

"Hruai i ngai dawn em?" rawn ti thum duptu an awm avang chuan ka pawisa chhiar lai chu dahin ka hawi chhuak a, u Hruaia bawk chu a lo ni.

"Vawiin chu ngai leh lo mai ang, Michael-a'n min thlah a tum leh tlat tawh a, ka hnial hneh ngai bawk si lo" ka lo ti pangai ve mai a, ani erawh Michael-a zawngin a hawi nghal vut. A hmuh mai loh avang chuan hriatthiam loh hmel zet hian min lo chhuk melh run a, kei chuan a awm dan chu hrethiam takin

"A zung lawk a, hetah a awm reng tawh alawm" ka lo ti vat a, ani pawh a bu ve ta nghut. Rei lote hnuah Michael-a pawh chu a rawn chhuak a, u Hruaia a hmuh chuan kan inkar boruak rit tak leh engmah pawh hre lo hian a lo be zuah zuah a, eng eng emaw a sawi pui ta ṭeuh bawk.

Michael-a chuan dawr danga thil ei chhuahpuiah min sawm leh tlat a, kan dawr a awm ve reng laia tiin dawr danga ei chhuah kher ka peih lo thu chu ka hrilh ve mai. Mahse min sawm lui leh ngar ngar a, a tawpa tawpah chuan ka aw leh ta tawp. A chang hi chuan min nawr lui chhen chu ka ning a, min tihhlim leh thiam em avangin a bula awm chu nuam ka ti leh tho bawk si. Kan dawr aṭanga Michael-a nen kan chhuak tur chu ka mi chhawrte zinga pakhat chuan

"Pi Nutei" ring zet hian a rawn ti vak a, keipawh hmanhmawh takin ka hawi phei ve nghal. Mahse vawilehkhatah Michael-a nen chuan kan leng dâwr a, mi dang ho chu an lo ṭe chul bawk. Chutah eng thil chiah nge thleng tih hriat tum chuan ka hawi chhuak thuai a, mahse eng thil nge ka hmuh tak hi! Ani te chu a haw daih tawh a ni lo'm ni?

Hmanhmawh takin Michael-a chu a tho a, celling fan in a delh beh mek pa chu a va buaipui nghal zung zung. Kei erawh enge tih ber tur ka hre lo va, ka chi ai a, pawngsual ka nih hnua chutiang em ema hlauhthawnnaa ka khah leh chu ka la hre lo a ni. Har chhuak thutin Michael-a te awmna lam chu ka pan phei vat a, ka mittui te chu a tlin nghal pam a, ka mi chhawrte chu Ambulance call turin ka hrilh nghal tûarh tuarh bawk. Celling Fan in a delh beh pa chal sir lam aṭang chuan thi a rawn chhuak zawih zawih a, ani lah chu na tih hmel tak hian a la awm zui. A awm dan chuan min timangang a, ka rilru leh awm dante chu a buai vek a ni ber.

"Ambulance ko lovin ka motor sawn kal vat zawk ang, thisen a hloh hnem chuan buaipui a harsa zual dawn" tiin Michael-a chuan mi dang lo awm ve te punin u Hruaia chu motor chhungah an zawn lut a, a hmaa thil hre deuh riai ruaia awm kha tunah chuan engmah hre tawh lovin a zawi vek tawh.

Chapter 19

Michael-a chuan kan dawr aṭanga Hospital awm hnai ber zawnah chuan motor a tiding a, motor aṭanga chhukin passenger seat lam chu a lo pan thuai a, chutah ka mal chunga engmah hre lova mu u Hruaia chu pu chhuakin Hospital-ah chuan a luhpui zui nghal. Keipawh motor aṭang chhuak vat a, ka rilru chu a hlauthawng satliah mai a ni lo, ka tha zawng zawngte chu a khur vek thei. Doctor te chuan an lo buaipui zung zung a, a lu chauha hliam nei ni mahse engmah a hriat zui loh danah a na thawkhat a ni ang. Kei chu ṭhutthleng awlah chuan la lo ṭhu ngui buai a, u Hruaia chu a thi mai ang tih ka hlau a ni.

"Hei i ṭha em? Hlauthawng lutuk suh, doctor khan thihna hial khawpa na a nih loh thu a sawi tawh alawm. Lo kal teh" ka bula lo ṭhu thla chung hian Michael-a chuan a ti a, a dar ngheng turin min kuai phei bawk.

"Ngawi reng lo khan i dawr lam te va bia la, khatianga i awm reng chuan engtinnge i dawr a awm ang? Ka lo biak sak mai dawn che em ni?" a rawn tih pawh chuan ṭawng châkna reng ka nei lo. Ka ngawi ran a, ka rilruah chuan u Hruaia bak a awm thei lo.

"Aw Hello, Nutei dawr kha lo khar sak mai ula, zan lamah ama'n a rawn be ṭha leh dawn cheu a nia" Michael-a'n ka naute min biak sak laite chu ka hre reng a, ka phone a la laite pawh ka hre reng a, mahse ka engmah ka ti thei rih lo.

"Nute, hlauthawng lutuk duh suh, a ṭha ve leh vat mai ang" a tih leh chuan mittui tling pam hian Michael-a chu ka en chho a, ka ṭah a chhuak tak zet a ni.

"Nute, thil thlen dan kha ka hrethiam lo khawp mai. I naute rawn ṭe ri ka hriat khan i unaupa khan ka hnung lam aṭangin min rawn nam vak a, ka balance ka hlauh nasa lutuk nen nang pawh kha ka rawn nam tlu ve ta tawp che a nih kha!" a tih chuan ka harh kawk. Engvangin nge u Hruaia chuan Michael-a chu a nam sawn kher? A thusawi avang chuan ka ṭah chhuak te chu a reh vek a, ka ngaihtuahna chu zawhna hlirin a khat tawh.

"Enge i sawi awmzia? Engvanga nam sawn che nge a nih?" ka zawt lo thei ta lo. Michael-a pawh chu a rawn thaw huai a, a ngaihna a hre bik chiah lo a nih ka ring.

"Ka hre lo, celling fan in min tlak tur kha min nam sawn a ni ber. A awmzia chu ka tawrh tur chu min nam sawn avangin i unaupa khan a tuar a, thisen hial a chhuak bawk nen i unaupa chungah pawh ka inthiam lo hle mai. Nakinah lawmthu ka sawi ngei a ngai a ni" a rawn ti leh chuan mak ka ti lehzual. Ka ngaihtuahnaa zawhna awm te chu u Hruaia chauh lo chuan an chhang thei lo va, a hmel ka hmuh hunah ka la zawt ngei bawk ang.

"Michael" ka ti sep a, ka thil sawi tum chu sawi kher a fuh ang em tih chu ka hre lo va, mahse ka sawi loh chuan ka inthiam lo tulh tulh mai dawn bawk si.

"Aw enge? I ṭha tak zet maw? Nang pawh hi kan inentir ve nghal daih mai dawn em ni?" a rawn ti zung zung a, a ngaih lohzia lantirna'n ka lu chu ka lo thing vat.

"Ihhhh, eng lo a nia, u Hruaia hi ka unuapa tak tak a ni lo" ka ngawih deuh vang vang hnuah chuan ka sawi chhuak ta nge nge a, mahse Michael-a chuan ngai thu tak lo zet hian

"A lo ni maw, engtinnge in inlaichin a? Amah khan i unaupa a nih thu a sawi mai bawk sia enge a awmzia?" mi veivak melh ralh ralh pah chuan a ti a, ka kut chu a chul neuh neuh bawk.

"Tuna na tuar mek hi ka pasal a ni" ka tih chuan a awm dan leh a thil tih lai chu a tawp chat a, keimah chu min lo en ta vat.

"Enge i sawi awmzia?" hamhaih tak chuan a rawn ti leh a, ani tan chuan thu dengkhawng tak a ni ngei ang. Kei lah chuan a hmain ka lo hrilh hmasa ngai bawk si lo, k thiam loh vek a ni.

"I tawrh aia tuartu mipa hi ka pasal hlui a ni a, tunah chuan a bulah ka let leh tawh. Ka tihpalh lutuk Michael, tun ai hmaa ka hrilh loh che avangin min ngaidam hrâm dawn nia" ka tih chuan a ding thut a, a lam ka hawi chhoh chuan mit sen ram hian min lo en a, a thinrim ve hle a ni ang.

"Aw le, ka thiam loh zawk a ni e. Ka duh lutukna che lamah i rilru tur ka lo dâwn pha lo va, a pawi khawp mai" a thinrimna zawng zawng dah ṭha chung chuan a rawn ti chhuak thei hram a, ka khawngaih lutuk chu ka ṭap leh ta ringawt. Chutah min rawn kuah vat chung hian

"Ṭap tawh suh le, i pasal nen in inkar boruak engmah hre lova ka lo zar buai ve chhen che avangin ka tihpalh zawk a ni e. Nute ṭap tawh suh, saw doctor pawh a lo phei a nia" a tih leh chuan ka ṭap pawh chu ka bang ve ta vat a, doctor te hmuh lai khera ṭah chu ka zak ve tho alawm.

"Tunah chuan kan dressing zo chiah a, amah pawh a harh vek tawh. In duh chuan in va hmu thei ang, chuan in hawpui nghal thei bawk e" doctor chuan nui sâng hian a lo ti a, a awm dan aṭang leh ṭawngkam aṭang chuan doctor hawihhawm leh biak nuam tak a nih ngei ka ring.

"Kan lawm e, doctor. Ti rawh i va kal teh ang, keipawh hian ngaihdam dil ka ba a ni" tiin Michael-a chuan min kuah phei a, a tih ang ang chuan ka lo awm tawp.

"Hei in ṭha maw? In na hman lo maw?" room kan luh rualin u Hruaia zawk chuan chal intuam bûr chung hian a rawn ti let daih a, chutianga a awm vel chuan ka thin a tirim thar leh tlat tawh. A na zawk a ni a, mi fel tak ang maia kan ṭhat leh ṭhat loh min zawh let daih avang chuan ka thin a rim a ni.

"Engatinge chutiang te min zawh? I lakah hian ngaihdam dil ka bat rualin lawmthu sawi pawh ka ba a ni. A hrim hrim thuah engatinge a tirah khan Nutei hi i nupui a ni tih min hrilh ve mai loh? Thil pawi tak ka lo ti hman ṭep asin. I hria em Nute, vawiin ni hian ka tawrh aia tuartu mipa hi i pasal a nih thu sawi lo la chuan nupuia sawm che ka tum tawh asin, mahse ka ti hman lo hlauh chu a ṭha lam zawk a ni e" fel fai tak hian Michael-a chuan a tichhuak dap a, nui sângin min lo chhuk en mahse kei chu ka lo zak chem chem.

"Ka lo thlah haw ang che u, chuan i motor kha chu i lock tho chuan hlauthawng lo la, ni dangah zuk la leh zawk mai rawh u" tiin u Hruaia chu a be zawm leh zat a, Michael-a hmai chu ka zah ngawih ngawih. Hmeichhe khaw lo leh nep min ti dawn lutuk chu ka zak a, a hma ang pawhin ka be bawrh bawrh ngam tawh lo.

Motor-a kan chuan lai te chuan tûmah kan ṭawng lo va, ṭawng mood ah kan cheng lo vek te pawh a ni ang. U Hruaia chu amahin a hnung lamah a ṭhu ngawi reng a, kei leh Michael-a chu a hma lamah kan ṭhu thung. Kan ngawi lutuk leh thawm reh lutuk tih ziaawmna'n tiin Michael-a chuan hla a play a, a hla play ber kher avang chuan darthlalang aṭangin u Hruaia chu ka en lo thei ta lo. Ani paw'n min lo en ve reng a, kan mit chu a intawng chiang hle. En pawh en rei duh lovin ka hawi sawn leh ta vat a, Michael-a lah chuan engmah hre lo hian a la rawn sakpui ang ta deuh deuh a!

Kan in chhung kan luh chuan Duati thlengin an lo kal khawm a, u Hruaia chu a chal a intuam bûr bawk nen kan chhungte chu an lo hlauthawng hlawm hle. Ka pa'n u Hruaia chu a chal a tuam chhan leh thil thleng a lo zawh chuan

"Ka tlu sual palh a" awlsam te hian a lo ti mai a, kei erawh chuan a thusawi avang chuan ka lo en hâw ringawt. Thil serious takah pawh a lu tuam chhan leh thil thlen dan a la zep ṭalh chu mak ka ti a, u Zualtei phei chuan car accident a tawk emaw a lo ti hman hîal.

Kan nupa room lamah chuan kan inkuah chho a, na lutuk angin awm lo mahse a tur ut ut dawn tih chu ka hre vek. A nat thu pakhatmah a sawi ri lo va, keipaw'n zawh ngaiah ka dah chuang lo. Room chhungah chuan kan ṭhu ran a, kei khumah ṭhuin ani chu sofa-ah a ṭhu thung. Thil hre chhuak zawkin ka phone chu ka ban vat a, ka dawr lam chanchin chu ka nau te ka zawt nghal zung zung bawk. Ṭha taka an kalh fel thu leh chahbi an hawn mai thu chu kan Chef chuan min lo hrilh a, a thusawi chuan ngaihngam takin min awm tir zui ta bawk.

"Na i neih chuan min kai tho hreh lo vang che, khumah hian lo mu zawk ta che? I lu kha a nat belh phah palh ang" tiin ka mut dawn chuan u Hruaia chu pangai takin ka bia a, zep lovah chuan ka ngaihtuah tak zet a ni.

"A ngai lo ve, ka mu thei mai ang" a lo ti ve mai a, mahse amah ka ngaihtuahna erawh chu a reh hauh lo.

Ka mu meng kar a, sleeping pill ka la ei lo bawk nen muthilh ka harsat dawn tih chu ka inhre sa. U Hruaia hmuh laia pills ei vel chu tlawm thlak ka la ti leh tlat tawh a, a muthilh hnua ei chu ka tum rilru ta mai. Darkar khat hnu velah chuan u Hruaia chuan thawm a rawn chhuah a, a lam ka va hawi chuan a lo khur bauh bauh.

Hmanhmawh takin a awmnaah chuan ka phei vat a, a chal ka deh chuan a khawsik a sang hle tih ka hria. Damdawi chu ka la zung zung a, tui lain ka ei tir zui nghal bawk. Puan te chu ka sin thuah tir a, ani erawh ngawi rengin ka buaipui ang ang chuan a lo awm tawp. A tlun nasa ang reng si a, u Zualtei emaw ka pa emaw pun mai chu ka duh ta rum rum.

Minute 15 hnu velah chuan a khur leh tlun nasa lutuk pawh chu a zia ta deuh a, a damdawi eiin a chhawk bawk nen lum ti zet hian a rizai sin ho chu chhuatah a hnawl thla vek a, kei chuan a chet dan chu ka lo thlir tawp. A mit chu a la meng lo hrim hrim a, a bul lawka ṭhutthlengah chuan amah ngaihven em emin ka lo awm ve ran tih reng a hre lo niin a lang. Chutia amah ka thlir reng lai chuan a rawn meng thut a, celling te chu a melh tlawk tlawk bawk. Chutah tho chhuak thutin a rawn ṭhu kang a, a chhak lawka amah en chunga lo ṭhu ngawi kar chu min rawn hmu ve nghal.

"Ka tibuai hrep che a, a zia lo tak tak. Va mu tawh rawh, ka ṭha tawh e" dam raih chuan a rawn ti a, ka chhang let lo hrim hrim a, ka en reng avang chuan mak a tih hmel hle.

"Khumah sawn va mu zawk rawh, kei chu sofa-ah khan ka lo mu ang. I tan pawh mut a nuam ang a, i lu na lutuk tur pawh a zia zawk ka ring" tiin ka ding chhuak a, a ṭhutna bula rizai te chu khum lamah chuan ka dah phei zui ta daih bawk.

"Khumah sawn ka mu dawn lo, va mu zawk rawh" ka bana rawn chelh chung hian a ti deuh hmuk a, keipawh ka thil tih lai tawp chatin amah chu ka en chhuk a, ani paw'n min lo en ve reng avang chuan kan inmelh leh ta ran mai.

"Aih ka duh lo, i khawsik a rawn chhuah leh palh chuan buaina a nasa zawk mai mai. Ka thusawi hi awih la, khumah chuan va mu ṭha mai mai teh LALHMAHRUAI" ka ti leh thâwr a, kan inenna aṭanga a hawisawn hmasa zawka ka ṭang ziah chuan ka thin a rawn tirim leh a, mahse u Hruaia mit chu rei ka en thei tlat si lo.

"A nih chuan min lo hruai phei mai ta che, mahnia kal chu ka lu hian min tur deuh bawk sia ka tlu mai ang tih ka hlau" a ngawih vang vang hnu chuan a rawn tichhuak sup a, a aw te chu a ṭial ruai bawk. A thusawi ang chuan keipawh chu ka che chhuak a, khum lam chu pan puiin ka mut tir a, ka kal sawn leh mai tur chu min vuan bet leh ta tlat.

"Nute, khawngaihin zanin chiah hi ka bulah i mu thei ang em?" a rawn tih chuan a hmel chu ka en vat a, nui angin lang mahse a chhungril chu lungngaihnaa khatin ka hmu thung.

"Ni lo, i lu lamah hliam i nei bawk nen ka ti na palh zawk ang che" a bula ka mut châk loh thu leh ka mut duh loh thu chu ka sawi thei miah lo. A chhan chu a taksa ngheng chunga mut chu ka châk em em a, a hria ang tih erawh ka hlau leh em em si.

"Khawngaihin, khawngaih takin Nute" a thinlung chapona zawng zawng dah ṭhaa a thinlung tlawmna zawk lantir chung chuan a rawn ti leh a, keipawh chuan a bula mut ka lo châk ru ve tho avangin min sawm ang chuan ka mutpui ta ringawt.

"Ka taksa si hian lo mu ta che, rem i tih chuan ka kuah dawn che aw Nute?" min rawn ang deuh chuan lang mahse a thusawi zawh rual rualin a lamah chuan min pawt phei zui nghal.

"Thil ka zawt ang che aw?" kan thaw ri dun sêk sek a, ka thluak chhunga zawhna tam tak te hi ani lo mi dang chuan an chhang thei si lo. A bulah hi chuan hmân ata tawh a ṭawng hmasa zawk ka ni ziah a, tun darkar ngeiah pawh hian ka ni leh ta a nih hi!

"Immmm" a rawn ti thum dup a, eng ka hria nge ni a awm chu ka chul deuh kher bawk. Chutah ani pawh chuan ka chet dan mak lutuk avang chuan min lo en vat a, kei erawh chuan ka lo nuih lui sak ringawt.

"Engatinge Michael-a tawrh ai kha i tawrh? Engatinge Michael-a kha i nam sawn kher?" min chhan dan tur chu ka hriat châk rual rualin ka natna tur thil a sawi palh ang tih chu ka hlau ru hle a ni.

"A chhan chu i hlimna tih chhiat sak leh che hi ka duh tawh lo a ni. Kha tlangval bulah kha chuan hlim takin i nui thei a, i nuih theihna mipa in a tawrh ai chuan kei i thinrim ṭhinna mipa hian tawrh kha ka thlang ta zawk a ni" dam raih chuan a rawn ti a, a ṭawngkam tinah chuan inthlahrunna leh natna hlir a awm. Chutah zet zawng ka rilru chapona leh phuba lak ka duhna rilru zawng zawngte pawh dah bovin

"U Hruai" ṭap ṭuau chung chuan ka ti a, ka insum thei tawh thlâwt lo a ni. Ka awm dan leh ṭawng ri avangin ani pawh chuan rang zet hian min lo en chhuk vat a, a ṭawng nghal mai lo bawk.

"Nute, tunah khan ka hmingin min ko ti raw? Ka hming i lam chiang a ni. Ni lo, ka hre sual lo ti raw?" sawi ber tur pawh hre lo ang mai chuan a rawn ti bah nuai a, ka mit aṭanga mittui tla a hmuh phei chuan min en chiang lehzual.

"Nute, engatinge i ṭah? I ṭahna tur thil ka lo sawi leh tawh zawk em ni? Khawngaihin ṭap tawh suh, i ṭah hian ka thinlung chhungril hi a lo na ve vawng vawng zel tih i hria em?" a ban ka khan lama min kuah hnaih pah chuan a rawn ti a, ka ṭah a chhuah em avang chuan ka ṭawng lawk thei lo a ni.

"U Hruai, ka thei tawh thlâwt lo a ni. Ka thei tawh lo, i chunga phuba lak hi ka theih ka ring tawh lo. Khang thla tam tak kal taa ka siam hrehawm che emaw ka intih lai khan keimah leh keimah hi ka intihrehawm char char zawk a ni tih ka hra asin" ka tichhuak thei hram a, ka sawi zo chiah chu ka ṭap khur leh nghal zawih zawih. U Hruaia chuan a ban pahnihin min rawn kuah zawm nghal a, ka chhip sam chu a fawp zui vang vang bawk.

"Nute, i thusawi hi i chiang tak zet maw? Ka dam loh vang mai hian khang thute kha i sawi a ni lo maw? I thusawite hi ka awih dawn nge dawn lo tih tal min han hrilh teh Nute?" nghet taka min kuah chung chuan a rawn ti a, keipawh chuan a hnung lama kuah let ve ṭai chung hian

"Dawt ka sawi lo LALHMAHRUAI, Nunrawngpa, Engatinge? Engatinge ka nat ve leh tlat? I lakah hian nasa taka phuba lak ka la duh asin, engatinge ke theih loh? Nang theihnghilh vang vâng chea nun hman ṭhat leh ka duh asin" ka ti leh phiar phiar a, rilru na taka ka ṭah zawm avang chuan thu dang reng ka sawi belh thei tawh lo a ni. A awma ka hmai phumin ka ṭap zui hawm hawm a, eng thil dang mah ka ngaihtuahnaah chuan a lut thei rih lo a ni.

Thil lum nuam tak ka nghen avang chuan ka meng peih mai lo va, ka mumang ni maiin ka hria. A lum dan lah chu lum vût ni si lo hian a tawk chiahin a lum nuam a, chu thil ang renga lum nuam chu ka la hre lo. Mahse ka thil nghen chu a rawn che ta tlat mai, chutia ka thil nghen lum nuam zet a che tih ka hriatna chuan ka khawvel pangaiah min hruai thla nghal vawng vawng a, chumi hnuah chuan ka meng ve ta chauh. Ka men chuan u Hruaia awm ka hmu hmasa ber a, zan lama thil thleng zawng chu bo bang awm lovin ka thluakah an rawn inlar nghal zawt zawt bawk. Chutah sleeping pills ei miah lovin ka muhil thei tih ka hre chhuak zui leh ta nghal a, zep lovah chuan ka hlim tak zet a ni.

U Hruaia min kuah behna aṭanga tawlh sawnin u Hruaia chu ka en chho râl a, a hmul te chu ka khawih niap niap bawk. Chutia ka chet sek avang leh ka khawih reng avang chuan u Hruai chu a rawn che ṭuah ṭuah a, mahse ka harh tirh ang thovin a meng mai bik lo. U Hruaia chuan a bul hnaiah ka mu tih hre tak hian a awmah min kuah bet leh a, ka hnung chu a chul hliau hliau bawk. A awm dan avang chuan a men tawh leh tawh loh en tumin thei leh thei lovin ka dak chho hram hram a, ani chu a lo la maimitchhing thung. A biang vela hmul leh a khabe vela hmul chu naupangin an toys thar an khal ang mai chuan ka khawih leh neuh neuh a, ani chu maimitchhing reng chunga khi suk hian a rawn rum ve ṭiah ṭiah.

"U Hruai, tho tawh ang" lum ka tih tawh êm avang chuan ka ti a, ani erawh chuan min thlah a la tum loh hmel khawp mai.

"Tukin chu mu rei deuh mai ang" a ṭawng ri ka hriat avang chuan ka nui sak a, ka hlim a ni. Chutianga nupa inhmangaih tak te ang maia kan inbe leh thei tawh chu ka lawm a, ani kalsana ṭhen leh chu ka duh tawh lo a ni.

Ni e, a tirah kha chuan phuba lak ka duh lutuk avangin ka let leh a, keimah ang chiaha hrehawm tuar ve se ka tih avangin ka let leh a, nun beidawng leh chauvin awm se ka ti a nih kha! Mahse maw, ka ruahman lawk anga u Hruaia'n na a tawrh chiah khan keimah zawk hi ka lo na zel a ni. A lungngaih chuan ka lung a lo ngai ve a, hrehawm a tihin hrehawm ka lo ti ve zel a, chung zawng zawng chu eng dang vang ni lovin amah ka la hmangaihna vang vek a ni. U Hruai hi ka hmangaih hmasa ber a ni a, a tawp ber a ni a, ka thinlung chhungrila hmangaihna sang ber neitu chu amah hi a ni.

"Sual min ti em? Ka rawn zawng chhuak mai bawk si lo che a, chutah nang chuan hun harsa tak leh thil rapthlak tak i tawng a, i thil tawn ka hriat tirh te khan ka keh chhe vek asin" maimitchhing reng chung chuan a rawn ti chhuak hlawl a, kei chuan ka nun hlui te chu ka hre chhuak zut zut a, ka ṭah pawh a rawn chhuak leh nghal hle. Chutah a laka ka thinrimna chu rawn chhuak thutin

"Aw, ka mihring hriat tawhah i la nunrawng ber a, i la sual ber bawk. I ngaihzawng hlui avangin min hnawt chhuak a, i uire bawk a, i lakah ka innghat vek tih hre chunga min phatsan te kha i sual vang vek a ni. I hria em, min pawngsual lai" ka tichhuak nghal a, ka ṭap zui ta bawk. Chutia ka ṭah khurh ngawt ngawt lai chuan

"Sawi suh, sawi tawh suh Nute" tiin nghet tak hian min rawn kuah bet a, sawi lo turin min duh eng ang mahse ka sawi ngei a ngai si.

"Min pawngsual lai te khan ka hre chhuak che a, ka mamawh che a, chhantu kha ka mamawh lutuk" tiin ka ṭap zui ta hawm hawm a, min pawngsual laia ka awm dan te, hlauthawng em ema ka tlanchhiat lai te chu ka ngaihtuah chhuak a, chungte chuan ka rilru an rawn ti na thar leh a ni. Ka ṭah chhuak lutuk a reh hnu chuan

"Doctor te'n naute ka chhiat chhan an sawi chu ka taksa chak tawk loh vang a ni an ti a, chu pawh nangmah vang vek. Ka taksa chak loh chhan chu zan ka muthilh theih ngai loh vang a ni a, ka muthilh theih lohna chhan lian ber chu nangmah leh bawk a ni. Ka maimitchhin rual hian ka mitthlaah i hmel ka hmu a, thinrim taka min en lai te, chhuak tura min tih lai te a lo lan fô ṭhin avangin muthilh ai chuan tlaivar ṭhak ṭhak kha ka ngah asin" ka tih chhunzawm leh a, ka inhnit zui feih feih bawk. Ani chuan ka hnung chu duat takin a chul a, a awmah min kuah bet tlat bawk.

"Nute, i chunga thil thleng zawng zawngte hi ka thiam loh vek a ni tih ka hria. I mi ngaihdamna ka phut lo va, min hmangaih leh thei tawh lo a nih paw'n ka bulah tal hian awm hram rawh. Nizan lamah phuba lak i duh tawh loh thu i sawi khan ka hlim em em a, mahse tukin zingah hi chuan ka hlim tawh lo" rawn ti supin ka chhip sam chu a fawp vang vang a, a hlim tawh lohna chhan zawh tuma ka an zuai laiin amah vek chuan

"A chhan chu min ṭhen i tum vang a ni. Na takin min siam a, i bula mipa dang an awm ringawt ka hmuh te khan ka taksa leh ka thinlung chhungril zawng zawng hi a na vek thei. Tunah chuan i lo ruahman lawk angin min ṭhen chiah i hmabak ta a, chu thil ka hriat avang chuan ka lungngai em em tawh zawk a ni" a rawn tih zawm leh zat a, a hnena ka lo sawi lawk tawh te chu thleng dik lo se a ti a, a hlauthawng em em bawk a ni tih a hriat hle.

"U Hruai" ka ti thawp sep a, ka la hmangaihzia leh amah chauh lo chu mipa dang reng reng ka hmangaih theih tawh loh thu hrilh ka duh a, ka rilru paw'n hrilh mai turin min ti a, mahse ka ka zawk hi a chilh tlat avangin ka ṭawng chhuak hlei thei lo a ni.

"Ni lo Nute, sawi rih suh. Min ṭhen i tum thu hi sawi rih suh. Tun ang renga boruak hlimawm hi ka tawng khat êm mai, ka hlim lai hi chuan min ti lunghnur leh lo zawk mai ta che" zawi leh dam raih hian a rawn ti chhuak a, thawk te chu a la hawk a, ka hlim lai ti mahse hrehawm tihna rilru chu a nei reng tho si.

"U Hruai" tih chauh sawiin ka ṭap khur leh tlawk tlawk a, a bulah hi chuan hmân ang tho khan ka rilru a la no a, ka pangchang a, a taksa lum nuam lutuk ka tawhna te chuan ka ṭah a ti chhuak vek a ni.

"U Hruai" ka ṭah ban hnuah chuan ka ti leh ṭuau a, ṭap chhuak lova ka thusawi tum chu sawi chhuah vat ka duh tawh a ni. Ani chu a lo ngawi reng a, ka hnung a chul hlîau hliauna pawh a la chawl chuang lo.

"U Hruai, ka thinlung zawng zawngin ka la hmangaih reng che a ni" a hmel en chho hâ chung chuan ka ti a, ani erawh a taksa chu a lo ṭang nghal ṭung a, a taksa sia ka awm tlat avangin a awm dan chu hai theih a ni lo.

"Nute, enge i sawi awmzia? Ka lawmna'na khatiang thu i sawi dawn a nih chuan sawi tawh suh, min ṭhen hunah ka rilru a nat phah mai mai zawk ang" ka thusawi ringhlel tak chung hian a rawn ti a, amah en thei turin a awm aṭang chuan min nam sawn deuh bawk.

"LALHMAHRUAI, tun ang hunah hian dawt ka sawi i ring em ni? Ka na a, ka thinlung a keh chhia a, beidawnna in min tuam a, nangmah avanga harsatna tam tak ka paltlang hnu pawh hian ka thinlungah chuan i awm reng a, keimah zawk hi ka inhaw ṭhin asin. Theihnghilh hlen vang vang che ka duh a, ka thei si lo. Ka hmangaih tawh lo chea ka inngaih apiang hian keimah leh keimah hi ka inbum tih ka hre reng asin" ring tak chuan ka ti chhuak phiar phiar a, ka mittui te chu ka biangah a luang thla zui zawih zawih a, rang tak hian a awmah chuan min kuah bet leh nghal.

"I sual lutuk, engatinge ka hmangaih ang che hian min hmangaih ve theih mai loh, ka hmangaihna che avang hian ka tuar hnem tawk tawh i ti ve lo em ni?" a awm chum dâwt dawt chung chuan ka ti a, ka ngik zawm feih feih bawk.

"Ka tihpalh, ka tihpalh lutuk Nute. Tunah chuan ka thinlung chhungril hi hmân ang chiah khan a hlim leh ta, ka dam huai tawh a ni" a rawn tih lai te chuan ka lo la insut feih feih a, hmangaihna avang hian ka va ṭap zing ta em. Mite'n hmangaihna chuan natna min pe a, a changin min tihlim leh ṭhin tia an sawi te chu ka hre chhuak âwn awn a, a dik leh dik loh pawh ka ngaihtuah zui thei lo a ni.

"Nute, ka nupui, ka thinlung chhungril zawng zawng luahtu, min la hmangaih reng tih ka hriata ka lawmzia hi ka sawi fiah thiam lo. A hma kha chuan ka ring mai chauh kha a ni a, mahse tunah chu i ka ngei aṭanga ka hriat tawh avang hian ka ring a, ka hlim em em tawh bawk a ni" a ṭawngkam chhuak tin chu a bah nuai a, mahse chungte chuan min va tihlim leh tawh si em, lawm avangin ka mittui te chu ka biangah a lo luang leh ta nge nge.

"Le! Ṭap tawh suh le, i ṭah hian ka thinlung hi a lo na ve vawng vawng ṭhin. Ka ta i ni a, ka ta chauh i nih angin keipawh i pasal, i mipa hmangaih em em ka ni reng bawk ang" ka bianga mittui luang te nuai fai chung hian a rawn ti dam thlûam a, ka thinlung chhungril leh ngaihtuahna te chu hrilh buai ngai lovin a chhiar thiam leh ta vek mai. Ni e, ani hi hmâna ka pasal ngei kha a la ni.

"Inṭhen hrang tawh lo vang aw u Hruai?" ka rilru no lutuk nen ka aw te chu a lawi vek a, ani tel lova awm emaw amah tihrehawm zawnga awm leh chu ka duh tawh lo a ni.

"Tun aṭang chuan kan inṭhen hrang leh tawh ngai lo ang a, kumkhuain ka nupui dik tak i ni reng tawh ang" tiin min lo fawp nghal zat a, a mi fawh dan te chuan zun a ngahin a ngawl vei awl zet kha a la ni reng. Mahse keimah zawk chu ka dik ta hauh lo mai, a chhan erawh ka hre chiang em em bawk.

"U Hruai" ka ir vel fawp paha ka taksa a chul lai vel chuan ka tichhuak sep a, ka thawte chu dik lovin ka taksa awm dan chu ka thunun theih ni lo mahse ka rilru a dik thei tawh thlâwt lo a ni.

"LALHMAHRUAI" ring taka ka tih leh tâk chiam avang chuan a thil tih lai chu a tawp chat a, ka au ring bawk nen min lo en nghal vat bawk.

"Ka tihpalh Nute, ka tihpalh lutuk. I ṭha em? Engtinnge i awm?" ka awm dan a hmuh avanga hlauthawng fê chuan a rawn ti nghal sawk sawk a, kei erawh hlauhthawnnate chuan min la kiansan lo chiang a ni.

"U Hruai, ka thei rih lo. Ka thei lo, ka hlau a ni. Ka hlau lutuk, khang ka thil tawn te kha ka mitthla aṭang hian ka paih bo thei lo a ni" tiin a bulah chuan ka ṭap chhuak leh ta nge nge a, ani chuan a awma min kuah bet leh vat pah hian

"Âwwwww, ka va han mawl tak em! Nute, tun lawka ka chet dan avang khan ka tihpalh lutuk" a rawn ti zui nghal mawlh mawlh a, ka hnung chu duat takin a chul hlîau hliau bawk.

"Nute, engvanginnge kei hi min lo hmangaih reng reng ni âw? I hmangaihna dawng tlâk pawh hi ka ni lo asin, kei lah chuan thinlung natna leh ser reh thei tawh lo chauh ka pe let thung che si a" ka ṭah bawrh bawrh lai chuan a rawn ti ṭial leh ruai a, a thusawite hlei hlei chuan min siam ṭahbelh sauh zawk a ni.

"U Hruai" tia a hming lam bak chu tih theih ka nei lo va, ka hun kal tawh te chu ka ngaihtuahnaah an lo lut zut zut bawk.

"Nute, i zia deuh tawh chuan kan intifai tawh mai dawn em ni ang? Kan chhuk har lutuk chuan kei ni lovin nangmah tho a nia zak leh dawn" ṭap tawh lova a awma ngawi renga ka bei hle hle hnu chuan a rawn ti a, kei erawh ka la che sawn duh mai lo thung.

"Nute" a rawn tih leh rual chuan

"Min pui rawh" ka lo ti nghal ringawt a, ka thusawi mak tak avang chuan a awm dan chu siam danglamin min en chhuk run tih pawh hawi chhuak kher lo mahila ka hre thei a ni.

"U Hruai, keimah mai chuan ka thei lo. Heng ka chhungrila hlauhna nasa lutuk la awm te hi ka paih bo thei lo. Mite anga nun ve ka duh a, mi pangai anga hawi chhuah ngam ve te ka duh tawh a ni" a awma la bei reng chung chuan ka tichhuak sep sep a, a taksa chu a lo ṭang nghal ṭung bawk.

"Nute" a rawn tih leh rual chuan

"Ka thinlunga ser awmte tireh tur leh bei let tur hian ka huaisen tawh emaw ka inti a, hlauhthawnna ka nei tawh lo emaw te ka ti a, mahse ka mi rinte bulah lo chuan khang ka hlauhna te kha an lo chhuak leh tho ṭhin" ka tih zawm leh zat a, chutah u Hruaia chuan

"Nute, âw ka nupui, hetiang taka keimah avanga i tuar nasa hi hrehawm ka ti a, engmah lah chu ka thlak danglam thei tawh si lo. I tawrh aia tawrh vek hi ka duh a, nang chuan hlim hi i phu ngawih ngawih asin" a rawn ti dam dap a, a ṭawngkam chhuak aṭang reng reng pawh chuan a rilru a na ve hle tih a hriat theih.

"U Hruai" ka tih lai chuan

"Nute, ka tiam a che, i rinchhan ngam tur leh nangmah pui turin engtik lai pawhin i kiangah ka awm reng tawh ang. A hma ang khan ka thutiam hi ka bawhchhe leh tawh lo ang a, i hlim theihna tur leh keimah avanga i thil lo tawn rapthlak tak avanga hlauhna i la neih te tibo tur hian ka theihtâwp ka chhuah ang a, ka thih hma loh zawng i bulah awmin ka phatsan leh tawh ngai lo vang che" a rawn ti nghet leh charh a, ka chhip chu a fawp zui vawng vanwg bawk.

Ka pasal ni ṭhin, ka hmangaih ni ṭhin, ka pasal ni leh ta leh ka hmangaih ni leh ta u Hruaia thusawi chu ka ring a, ka nu leh pate thusawi ai pawhin ka ring zawk a ni. A chhan chu amah ka hmangaih tlat a, amah ka hmangaihna chuan amah rin ngamna min pe leh tih ka hre chiang em em bawk. Engtinnge i rin leh mai theih? in ti pawh a ni maithei, mahse kei erawh amah ka hmangaih em avangin amah chu ka ring tlat tawh a ni. A chunga phuba lak tuma ka chet chhung zawng khan a awm dan ka hmuh hmaih lo va, inchhirna hlirin a hringnun a hmang tih ka hmu a, sawi chhuak kher lo mahse ani chuan kei ang chiahin min hmangaih ve tawh tih ka hria a ni.

Chapter 20

Hruaia POV

Engtinnge hetiang khawpa rilru thianghlim leh hmangaihna ngah Nutei ang mihring hi Pathian hian min pek phal zawk ní? Ani ang hi kei hian ka phu hlawl lo, ka phu lo tak zet a ni. A ka ngei aṭanga min la hmangaih reng thu a sawi lai te khan ka hlim leh lawm lutuk avangin ka au chhuak lo chauh a nih kha! A hun kal tawha a thinlunga ser awm chuan a tihbuai ṭhin avangin ka puih te kha min dil a, ka va han pui dawn chiang tawh tak em. Ani chuan amah ka hmangaih let theihna'n leh ka ngaihzawng hlui avanga hmangaih ka neih leh ka hlauhnate chu tihreh tumin nasa takin min pui a, ka tana a pumpekna zozâi te kha ka rul sêng lo zawk a ni.

Tunah chuan amah pui thei turin ka awm tawh a, ka thil tihsual tawh zawng zawngte siam ṭha thei lo mah ila tihsual leh theihna kawng dai turin ka har chhuak tawh a, ka puihna a mamawh a nih phawt chuan engtik lai pawhin a kiangah awmin ka pu tawh bawk ang. Ka rilru danglamin a laka theihtawpa ṭhat chhuah tum eng ang tawh mah ila hun liam tawh chu ka hre chhuak lo thei lo va, chung hun liam tawh ka ngaihtuah chhuah changte chuan keimah leh bawk a ni ka indem ṭhin.

Engvanginng keimah keimah chu ka indem loh teh lûl ang nì? Kei chu mipa lak tlâk loh, pasal dawizep leh nunrawng, mahni nupuite ralṭi khawpa nun tirtu leh mahni fa ngei that duh mi kha ka ni miau alawm. Chutah keimah avangin ka nupui Nutei chuan rilru lamah hlauhthawnna nasa lutuk a neih leh phah a, ka thil tihsual te avang khan ka va han inchhir ngawih ngawih tak em. LALRUATSANGI inah khan lo leng lo ni ngat ila zawng, Nutei kha ṭawngkam mawi lo tak takin lo be lo ni ngat ila zawng, ka nupui Nutei kha kan in aṭanga a chhuah theih thu lo sawi vel lo ni ngat ila zawng Nutei hian eng harsatna mah a tawng lo ang a, pawngsual tawkin a awm lo ang a, kan fa lo piang mai tur pawh a chhiat hauh lo tur.

Amaherawhchu, tunah chuan Pathian hian Nutei nena kan awm dan tur chu a lo ruahman sa vek zawk niin ka ngai tawh mai. A chhan chu ka nupui Nutei, a tel lova engmah ka nih loh hmeichhia chu min hmuh tir leh a, min intawn tir leh dan erawh kan duh ang vek ni lo mahse ka lawm tawk em em tho. Min intawn tir tawh miah lo pawh ni se sawi theih ka nei lo va, kei ang mihring sual leh nunrawng lutuk hi chuan sawisel thei ka ni lo zawk e.

Nutei nena kan inkar a pangai leh hnu aṭangin thla 1 lai a ral leh tawh a, mahse Nutei erawh chuan kan chhungte bula kan inkar boruak ṭha leh ta chu tihlan emaw sawi chhuah kher a duh rih lo tlat thung. Kan inkara inpawhna leh inthlakhlelhnain par a rawn chhuah leh hnu chuan a mize pangai chu a rawn chhuak chho leh ṭan tawh a, mahse thil buaithlak leh naupang chhia thlak tak a awm leh ta.

Naupang chhia takin Nutei chuan accident ka tawhna avanga ka lu tuam chu inhmeh min ti leh tlat tawh a, lu tuam var lû ka inhmeh thu leh hlih a phal loh thu a sawi tirh phei kha chuan a fiamthuah ngaiin ka nui chhuak hawk hawk nghe nghe. Amaherawhchu ka lu tuamna phelh ka han tum khan a phal ta tlat lo va, mak ka la ti em em zui. Inhmeh min ti tlat chu ka awih lo va, ka awih loh thu ka sawi lahin thinrimin min intihtauh khum leh tlat bawk si. A tawpa tawpah chuan ka nupui Nutei duh dan ang ngei chuan awm rem ka ti ta ringawt a, phel lovin ka awm ta char char chu a nih hi!

Thil nuihzat thlak leh ho tak pakhat leh chu ka lu tuamna vel inhmeh min tih piah lam mai bakah ka bianga hmul vel chu mehfai a phal lo leh tlat bawk a, chutianga ka nupui ber a awm leh tak si ah chuan hmâna ka Nutei ngei kha a lo letleh tawh ni berin ka ngai ta. Ka hmul mehfai a phal miah loh chhan ka zawh lah chuan

"I Man alawm, a tirah kha chuan i inhmeh lo vîau dawn emaw ka ti a, mahse tunah chuan hetianga hmul i neih hian i Man a, i inhmeh ngawih ngawih" a rawn ti thân a, min la nuih sen sen zui.

Ka nupui, ka engkim leh ka damchhan ber Nutei'n inhmeh min tiha pa te min lo tih tlat si chuan ka bianga hmul vel chu mehfai ka tum buai lo va, a duh zawng a nih chhung chu ka zuah char char mai a ni ang chu!

Ka lu chu dam vek tawh mahse ka tuam loh phah lo va, ka inbual dawn apiangin ka phelh a, ka awm pangai hnuah ṭul lo tirilru thei takin ka tuam leh hna hnâ zel. Ka chhungte phei chuan mak an ti ang reng hle a, engvanga chutianga intuam var lû zel nge ka nih chu an hre der si lo. Ka la tuam rengna chhan min zawh lahin

"ka tuam hi a la ngai tlat"

ka ti mai zel a, a chhan tak ka sawi chhuah duh lohna chhan pawh Nutei'n a phal loh vang a ni. Ka nupui Nutei duh loh thil leh a rilru natna ni thei reng reng chu tih leh chu ka tum tawh lo va, a tana ṭha tur leh a hlimna tur chu tih hram hram ka tum ṭhin ta zawk a ni.

"Hello" ka phone call pick-up a lehlama mi'n a rawn tih chuan

"Aw Samu, dawr i la inhawng em?" ka lo ti nghal vat a, Nutei erawh bathroom-a a intihfai mek avangin mi ka bia tih a hre lo thung.

"Aw la hawng ve e, hmanni khan i hnen aṭang missed call ka dawng a, mahse ka lo call back che khan i la leh thei tawh bawk si lo va, ka rawn be chhunzawm leh ta lo che a nih kha!" lehlama mi chuan ka zawhna chhan pah hian a rawn ti deuh duah a, ka lo nui ri sak bawk.

"A ṭhat hlauh chu! Phone aṭanga sawi dawn hi chuan sawi tur a tam ang reng si a, i dawrah chuan ka rawn kal phawt mai ang" ka ti nghal sawk sawk a, lehlama mi pawh chuan ka ṭawng dan aṭanga ka hmanhmawhzia hrethiam tak hian

"Aw le aw le, i hmanhmawh viau danah thil pawimawh tak a ni turah ngai phawt mai ang, ka dawr khar hun chu hnai tawh vîau mahse ka lo nghak dawn che a nia" a rawn ti ve nghal a, Samu-a nge nge hmân aṭang tawh ṭhiante tana inpe zo leh rinawm a lo la ni reng e!

Samu-a nen hian Delhi-a lehkha ka zir lai aṭang tawh khan kan inhria a, a felin kawm pawh a nuam khawp mai. Private Hostel-a awm ka nih avang khan ka chhuak lutuk ngai lo zawk a, DMZP (Delhi Mizo Zirlai Pawl) programme vela kan inhmuh tawh hi chuan kan inkawm deuh chawt zel. Lehkha kan zirna hmun inang lo mahse hun awl leh remchangah kha chuan kan inhmu ve ziah a, kei ang thova ngaihzawng buaipui lo a lo ni bawk nen hmun hrang hrang kha kan tlawh kual nasa thei hle.

Samu-a hi chuan mahnia in luahin lehkha kha a zir ve tho a, keipawh a bula awm ve mai turin leh in inluah ṭawm puiah min ṭhin nghe nghe. Amaherawhchu ka pa kha ka hrilh hmasa leh ta ber a, ka pa'n Hostel-a awm chu ka tana a ṭhat zawk rih thu min hrilh avang khan Samu-a chu ka chenpui leh ta lo mai chauh zawk a ni. Tunah chuan kan lo upain hunte a kal liam hnem tawh bawk a, ani paw'n Private Business lam khawihin Psychaitrist hna a thawk mek a ni.

"Ka rin ai daihin i rawn thleng hma leh si" a room chhunga ka luh rualin Samu-a chuan a lo ti a, Nutei pawh hrilh hmasa hawt lova kal ka ni bawk nen ka hmanhmawh ve em a ni.

"Nia, a pawimawhin a hmanhmawh thlak em alawm" tiin keipawh chuan ka lo chhang ve mai bawk.

"Engatinge i lu chû? I va tuam var nasa ve, khawvel i nawr em ni?" nui sak chung hian a rawn ti a, a chhan tak sawi ila chuan kei ai aiin ho a ti ang.

"Tu emaw ni'n inhmeh min ti tlat a, ka la tuam ta vel mai mai a ni e" lo nui let hak chung chuan ka ti ve a, chutah ani chuan

"Eng lam chu nge i lo kal chhan ber ni a? Nangmah lam a nih ka lo ring ngawt pek a, mahse i hmelah erawh rilru hah hmel depression lam neih hmel reng ka hmu bawk si lo" pangai tak leh min en vawng vawng chung hian a rawn ti a, Psychaitrist tih takah ka awm dan chu hrilh ngai lovin a lo hre nghal vek.

"I sawi ang khan ka lo kal chhan hi keimah lama dik lohna awm vang emaw depression ka neih vang a ni lo va, ka lo kal chhan ber zawk tak chu ka nupui lampang a ni" ka tih chuan a lo bu nghut nghut a, chutah ani chuan

"A nih chû, mahse engatinge amah nen in lo kal dun mai loh? Ani tan pawh a ṭhat zawk ka ring asin" a rawn ti leh a, mahse a thusawi erawh chu thil tih chi a ni rih lo.

"Ni lo, ka nupui hian hetianga Psychaitrist pan vel hi a duh dawn lo tih ka hria a, chuvanga a hriat loh laia lo kal pawh ka ni" a zawhna chhangin ka lo ti thuai a, chutia ka sawi hnu chuan ani paw'n Nutei rilru tur a hrethiam a ni chek ang min zawt zui duh ta bik lo.

"Aw le, a awm dan chu han sawi hmasa ber phawt mai teh" thaw huai hian a rawn ti a, a hmaa paper inchhawp hnawk hnuk chu a hui khawm pah bawk.

"Ṭhiana, he thu hrilh tur che hi khawngaihin min zep sak tlat ang tih min tiam phawt rawh" ka ti hmasa tê te phawt a, Nutei chungchang chu ka sawi chhuak hreh hle a ni.

"Aw le, keini chuan kan zep vek zel hrim hrim alawm. Ka tiam e, i thu min hrilh tur hi eng pawh ni se i phalna tel lo chuan ka sawi chhuak ngai lo vang" a rawn ti ve leh ta charh a, amah chu ka ring ngam em em ta bawk.

"Ka nupui hian pawngsual a lo tawh tawh avangin rilru lamah hlauhna a nei a ni. Keimah leh a chhungte ni lo mi dangin an khawih te hian a phu leh zuk zuk zel a, chu thil chu tihbo sak ka duh a ni. Amah ngei pawhin chung a hlauhnate chu thai bo a duh a, ka puihna min dil nghe nghe asin. Kei, a pasal leh a mi rin ve em em chuan tih theih ka nei tlem em em tih ka hria a, mahse ka theihtawpin puih ka duh a ni. A bik takin nupa nun kan hman dawn hian a hlauthawng zual a, kei lah hi ka lo insum zo leh ṭhin si lo" Nutei awm dan zawng zawng ngaihtuah chung chuan ka tichhuak dap a, Nutei chu puih ka duh tak zet a ni.

"Aw le, i sawi chu ka hrethiam e. A hmasa bera ka rawn duh che chu i nupui rilru chu hneh hmasak ber tum phawt rawh. A bulah tal tam la, tlem tlemin ani paw'n zia lam a pan chho thei bawk ang ka ring" min en reng chung hian a rawn ti ve nghal a, mahse tih dan mai tur ka la hre chuang lo.

"A bulah chuan ka awm tam alawm, mahse a bula awm tam ringawt chu a ṭha ber em ni?" tiin ka rilrua zawhna awm te chu ka zawh zawm leh nghal zat.

"Aw ṭha ber tehreng e, mahse awm satliah mai mai lam ka sawi lo. Hetianga vanduaina an tawh avanga Inferior Complexity neite hian an mamawh ber chu Coworkers hi an ni. Coworker te kan han tih ber chu anmahni pui thei tura engtik lai pawha an kianga awm te hi an ni ber. Hetianga hlauh rukna nei te hian a kipa kawiin supporter an mamawh a, an thil tih engkim chu zalen taka ti tura fuih thiam an ngai hle. Amaherawhchu, an thil tih leh ngaih dan chu a dik lo a nih erawh chuan hrilh vat ṭhin tur. Tin, i nupui chu a hlauhna neih te a reh vat theihna'n chuan i titipui hnem a ngai vîau bawk. I nupui a ni a, i nawrluih chang a awm ang a, mahse a taksa awm dan leh a rilru awm dan tur ngaihtuah lawk vekin i che chhuak ṭhin dawn nia" tiin ani pawh chuan min rawn chhang ta duah a, keipaw'n a thusawi aṭang chuan Nutei bula ka awm dan tur chu ka ngaihtuah thiam ve ta bawk.

Thil dang em em pawh sawi tawh lovin kan in lam pan chuan ka haw ta vat a, Nutei leh ka chhungte'n an ei châk tâkah tiin KFC chu ka lei haw pah zaih bawk. In ka thlen chuan Nutei chu ka zawng rilru deuh a, mahse ka hmu mai loh avang chuan kan nupa room-ah a awm ka ring ve ta ringawt. KFC chu kan chokaa fridge-ah chuan ka dah lut a, zana ei atan ka khek a ni ber. Kan nupa room lamah chuan ka chho leh a, room chhunga ka luh chuan Nutei chuan inbual zo chiah tih hriat tak hian a sam a lo khuih mawlh mawlh a, a bul hnai va la thleng lo mah ila a rimtuizia chu pui tak a ni.

"Nute" tiin a hnung lam aṭang chuan ka va kuah a, a hmaa dar thlalang aṭang chuan ani paw'n min lo nuih ve sun sûn.

"Hei, ka laklawh em hi aw, min lo tibuai lo teh" a rawn ti a, kei erawh chuan a thusawi ngai pawimawh lo zetin a taksa chu a hnim a, ka fawp a, phu deuh ûih uih mahse ka tilui zel tho.

"Ka ngai che Nute, i rim a tui bawk si, ka bul hnaiah awm reng mahla ka ngai em em che a ni" tiin ka lam hawi turin ka kuai a, ani pawh chu a sam khuih tawh bik chuang lovin ka tih ang ang chuan a lo awm ve mai bawk.

"Lal Man em em pa, awm sawn hmasa phawt mai teh. Ka sam hi a la ro lo deuh bawk nen i kawr ka tihuh vek palh ang" a rawn tih rual chuan ka che thut a, ka thunun theih piah lamin ka hmui chuan a hmui chu a si zui nghal.

"Nute, ka tina lovang che" ka fawhna aṭanga awm sawn deuh hlek pahin ka ti a, chutah a ranga rangin kan nupa khum lamah ka pawm phei a, khum kan deh rual chuan ka fawp zui ta mawlh mawlh.

"U Hruai" thaw hlîai hliai pah hian a rawn ti a, a taksa awm dan leh a thawk ran dan aṭang chuan a hlauhthawnnate chu an lo chhuak leh tawh tih hre tho mah ila ka thil tih lai chu ka tawp duh chuang der lo.

"Nute, hlauthawng duh suh. Ka tina dawn lo che a, ka tina phal bawk lo che. Ka tiam a che, i inpeih hma chu nupa nun ka hmanpui lo vang che" ka fawh leh ngawng ngâwng hnu chuan ka ti a, ka ti lutuk deuha ka hriat avangin ka thil tih lai chu tawp mai chauh ka ni bawk.

"U Hruai, ka tihpalh" mittui tling pam hian a rawn ti a, chu veleh kei chuan ka kut pahniha a biang tawn tawn khuap chung hian

"Nute i thiam loh a ni lo, keima thiam loh zawk a ni. Ka fawp ringawt dawn che tih lo hria la, ngaihngam takin nang paw'n min chhang let ve turin ka duh che a ni" ka lo ti thuai a, ṭah chhuak hmel pu tak chung chuan a lo bu ve nghauh nghauh.

Chutia ṭha taka ka sawi lawk hnua ka fawh leh te chuan a thiam ang tawkin min lo chhang let ve ta ngei a, ka tana a tum lui ve nasa tih ka hriatna te chuan ka thinlung chhungril chu a tina vawng vawng a ni. Kan taksa a insik reng avangin nupa nun hman ka châkna te chu lo chhuak leh thuai mahse ka insum a ngai tih ka hria a, ka nupui Nutei ṭhatna tur a nih dawn phawt chuan ka insum thei ngei tur a ni.

Chaw kan ei lai te chuan Bawihtei chu a ṭawng siam siam a, Nutei erawh a ṭawng ngai mang lo thung. Ka chhungte a biak peih loh avanga ṭawng tam duh lo a ni lo tih ka hria a, kan nupa inkar ṭha leh vek tawh chu a pho chhuak zak ni berin ka hria. A awm dan avang chuan amah chu ka dem hran lo va, a zahzum tharna te chuan hmâna ka Nutei kha a lo letleh ṭan mek tih min hriattir daih zawk. Bawihtei leh Duati te biakna chu a mawi tawk chiahin a chhang ṭhin a, keimah tih loh mi dangte chuan Nutei chu a la tawhkhirh emaw an la ti vek tih an awm dan aṭangin ka hre thei.

Zanah chuan inkhel en turin in hnuai lamah ka hruai thla a, peih lo ru vîau mahse min hnial chuang miah lo. Chungte chuan a hmaa a lo awm dan avanga ka chhungte laka a inthlahrun tharzia min hriattir a, ka hlim phahin ka va lawm phah si em. Sitting room-ah chuan kei tih loh chu an ṭhu ṭhap a, kei chuan Fridge-a KFC chu ka phawrh mek thung. Fanta bur lian chi pakhat keng telin Sitting room lam chu ka pan phei a, Duati'n ka thil ken vel a hmuh rual chuan a lo tlan phei vat a, a ṭel chul bawk.

"Duati ka theihnghilh daih mai, no panga lo va la rawh le!" ka bul a rawn thlen rual chuan ka lo ti vat a, ani pawh a ei in châk tawh bawk a ni ang hmanhmawh em em hian no la tur chuan a tlan phei thuai.

"Awi u Mam, keipawh i thil rawn lei kha ka ei châk lutuk, lei hun i va'n hre tak! Nang hi zanina i club ṭan em em te an inkhelh dawn vang em ni hetianga i rawn lei deuh nual?" ka thil ken vel min lo pui vat chung hian Bawihtei chuan a rawn ti a, aw tihna'n buk khum zeuhin ka lo nui ve ta suk.

"Au Mama, khawi ka lo thli ve chhin, ka tibaw miah lo vang" Duati chuan a rawn ti leh reuh a, a awm dan vel avang chuan ka bula chiaha ṭhu ngawi reng Nutei pawh chu a lo nui chhuak ve ta.

"Duati i tibaw palh hlauh ang e aw" ka pa chuan a rawn ti ve a, ka pa hi zawng kan bula hun hman tam a ngaihpawimawh avang hian a lo awm ve reng ṭhin.

"Aih apa, ka tibaw dawn lo. School-ah pawh ka ti tawh ṭhin alawm" Duati chuan a rawn ti leh reuh a, a ṭawngkam lawmawm zet leh chezia lawmawm zet avang chuan kan nui chhuak leh ta nge nge.

"Pa, han ti tawh teh, an ṭan tawh dawn khi" KFC hawng malh malh chung chuan ka ti a, pa ber tih takah Duati tih loh chuan Remote kan chuhpui thei der ngai lo. Ni lo, kei leh Bawihtei hi chuan chuh buai enah kan en tawh lo zawk a ni.

"Mama" thil kan ei mawlh mawlh lai chuan ka pa chuan a rawn hluai a, keipawh chu min kohna avang chuan a lam chu ka hawi phei a, mi dang erawh chuan inkhel en leh thil ei chauh an lo ngaihsak thung.

"Aw, engenita pa? Ka thil rawn lei haw lah chu i ei ve duh mang si lo va, ka lei leh hunah chuan i ei duh tur ang ka lei tel tawh ngei ngei ang" amah en reng chung chuan ka ti ve nghal a, ani pawh a rawn nui ve ta hawk.

"A ngai leh lo mai" tiin ka lu lamah chuan a mit chu a rawn fuh zawm nghal a, a en reng danah a ngaihtuahnaa awm áwm chu ka hre thei.

Khatia lu na pawh ni tawh hlei lo ka'n tuam var ta lû reng mai chu ka pa chuan a mit a tih kham thu min hrilh tawh a, mahse kei erawh chuan ka lo nuih liampui mai mai a nih kha! Ka tuam reng chhan min zawh chang lahin ka sawi ṭha duh der si lo, ka sawi chuan ka Nutei chu a zak leh dawn lutuk tih ka hre kar bawk.

Ka club ṭan em em Chelsea inkhel chu kan chhungkua chuan kan en ṭhap a, ka beisei loh takin ka bula ṭhu Nutei pawh chu a lo ṭang ve hle. Ka mal leh a mal inkara a kut ka vawnna chu a rawn hum let leh vak ṭhin a, inkhel en chuan a ṭang ve em em tih hre mah ila a lam chu ka hawi thla duh chuang lo. Ka chhungte chuan keimah avangin Chelsea Club chu an ṭan vek tawh a, a chhan pawh hmaih nei miah lova ka enpui ṭâlh ṭhin vang a ni pakhat.

Minute 85 tih vel bawr, hun tawp dawn lam hnaihah chuan Chelsea zawk chuan goal an rawn thun thut a, ka rilru chu a va lawm em. Goal an thun hma kha chuan ka club te chu an chak lo palh mai ang tih mawlh ka lo hlau a, mahse goal an han thun tâkah chuan ka rilru pawh a hlim ta huai mai. Chutah ka bula ṭhu, nghet taka ka kut lo hum ve ngar ngartu Nutei chuan

"Goal" a rawn tichhuak ve thut a, kei chauh ni lo mi dangte pawh chuan Nutei chu ka en nghal ṭhup. Hamhaih hmel taka kan en deuh ṭhup avang chuan

"Ka tihpalh" a rawn tichhuak leh sep a, a awm dan chuan min va han tihlim chiang tehreng em.

Mu tura kan nupa room-a kan chhoh te chuan chak takin a kal a, a hriatah nui chhuak kher lo mah ila ka thinlung chhungril chu hlim avangin a nui nasa lutuk tlat. Kan nupa room-a ka luh chuan rizai hian Nutei chu a lo inkhuh vek a, a awm dan avang chuan ka nui chhuak ta nge nge. Ani erawh ka nui thawm hriain a rizai inkhuhna chu a rawn hlim pawp a, thinrim hmel tak hian min lo melh hrep zui. A awm dan leh rizaia a inkhuh vel ka hmuh avang chuan kan inngaihzawn chhoh tirh lai vel chu ka hre chhuak a, ka nui lo thei lo a ni e.

"Hei ka nupui, khatianga min en reng a nih chuan ka thi thei mai ang" a bula inthawlh pah chuan ka ti a, ka kuah zui nghal zal zâl bawk.

"Engatinge min lo nuih vel kher LALHMAHRUAI" tiin rizai bawk chuan a inkhuh leh a, nuih chhuah châk vîau mah ila nuih chhuah chu a hun chiah lo.

"Ka tihpalh ka nupui, chuan inkhel i en ve ṭhin em ni?" a inkhuhna rizaite nen lama kuah khawm vek chung chuan ka ti a, a zak lutuk nge ni khum chu a chum deuh dawt dawt bawk.

"Ka zak lutuk, ka ka thawt thawt pawh hi envanga lo veng hman lo nge ka nih ziah?" rizai hnuai aṭang chuan a rawn ti leh chîam a, kei erawh ka lo nui ri sûk suk. Chutah Nutei chu a rawn che thut a, a inkhuhna aṭanga lo hawi chhuakin

"Min nuih ziah suh LALHMAHRUAI, mi mah zah nak a lai a!" tih leh vakin ka samah chuan min rawn kek bawrh bawrh a, na pawh ti chuang lo chuan ka lo nuih leh ta nge nge.

"Aw le aw le ka nupui duhtak, ka nuih tawh lo vang che. Chuan zawhna ka nei a nia" ka nuihza lutuk a reh hnuah chuan amah kuah vak chungin ka ti a, ani ve thung chuan

"Eng zawhna maw?" a rawn ti vin hlar a, a awm dan vel chu ka va lawm reuh mai mai tak!

"Inkhel i en ve ṭhin em ni?" ka ti ta daih a, inkhel kan en lai aṭang tawha ka zawh chãk a ni.

"Ka en ve thei lo em ni? Chelsea te chu ka Club hlun alawm an nih, i pian hma aṭang daihin ka ṭan tawh" duham tak chuan a rawn ti leh phiar phiar a, kei chuan

"Hei, zan a rei ṭan tawh a nia, ṭawng ring tawh lo deuh ang" aw dam deuhin ka lo ti daih a, ka thusawi avang chuan ani pawh chu a inthlahdul ve ta deuh bawk.

"Chuan Chelsea Club chu i lo ṭan ve ngei maw!?" football lam a ngainat ka rin loh lutuk avang chuan ka ti leh sup a, engtin tak min rawn chhang leh ang maw!

"Ṭan ê le, John Terry leh Frank Lampard te kha ka bialpa an nih kha!" ring em em lo chuan a rawn ti a, ani te reuh hian Terry-a leh Lampard-a te chu a hriat phak ka ring hauh lo.

"I hre pha ngawt ngawt em ni? Kan hun laia mite daih alawm an nih" ka ti ta ringawt a, chutah a ni chuan

"LALHMAHRUAI in la senior vel vîau suh, ka duh leh ka hre pha anga ka duh leh ka hre pha lo vang. Chuan annite chu nangmah ai paw'n ka bialpa hmasa daih zawk" a rawn ti leh ta zet zet a, a thusawi hrim hrim chu huat enah pawh ka en phal lo.

"Sâwi sawi suh, anni chu i chang pha chuang lo va, Pathian ruat pawh in ni lo. Keimah hi i ta tur dik tak ka ni a, nang pawh hi ka ta tur dik tak i ni bawk" a huat tâwk lek chuan ka ti leh a, ka thusawi avang chuan a va sa leh reuh dawn tak em.

"Awi aw awi LALHMAHRUAI, in la zei vel vîau suh. Terry-a leh Lampard-a te hi Mizo chu ni ngat se chuan min chang hauh lo vang"

"Ka hmingpum hian min ko lâwl lawl ziah suh, nang aiin ka upa fê bawk si"

"Ka thû thu suala, ka mu dawn" tiin min saisir san nghal a, kan awm dan te chu nuam tak a ni.

"Ka nupui, thlem i ngai tih ka hria alawm, khawvel mipa piang tawh zinga i hmangaih ber hian ka lo kuah ang che aw" tiin a hnung lam aṭang chuan ka va kuah a, chutah ani te reuh chuan

"Thil intihre thei pa" a rawn ti let hrep a, thawm dim a ngaih thu ka sawi te chu a theihnghilh fai leh vek tawh zawk.

"Ka hre dik tho tho" tiin a aia nghet chuan ka va kuah leh a, a taksa chu lian lo mahse ka hahdam ngawih ngawih a ni.

"Mi hnial hrat pa, min si suh" a rawn ti leh hram a, min si suh ti mahse talsawn emaw min namsawn emaw a tum chuang lo.

"Le! Mu ang le, ka nupui. Ka kuahna che avang hian i muttui dawn tih inhria la, zingah i hmel ka hmuh ngei ka inbeisei ang" tiin ka kuah hlun hlun a, ka chhing zui ta vang vang.

Chapter 21

Nutei POV

Ka va hlim leh tawh tak em, u Hruaia nena kan inkar a ṭhat vek tawh avanga hlim leh tawh ka ni bawk. Zing kar lamah erawh a nghal em em zel a, zawi zawiin ka hlauhthawnnate chuan ka hriat loh laiin min kiansan tial tîal tih ka hria a, a chhan pawh ka pasal, ka hmangaih em em u Hruaia vang a ni ber. U Hruaia chuan a hmaa a mizia ang lo takin zan lamah min titipui ta ziah a, mahse mi ṭawngmawh tih takah a ṭawngkam chhuak reng reng chu a chhumbungin a tawi thei hlawm hle.

A thil min sawipui hnem ber chu ka tana ṭha tur leh ka hlauhthawnnate a bo theihna'na ka kianga a awm reng tur thu a ni tlangpui a, kei chuan a thusawi te chu ka lo ring em em zel. Ka taksa te chuan min sikna te, min fawhna te chu lo dawngsawng ṭha em em ṭhin mahse ka rilru chu rawn kal dik loh chang a awm fo va, kei ngei pawh hian chutianga ka awm leh ṭhin chu ka ning tak zet. Ka pasal a nih angin lo puih ka duh a, lo inhawn ka duh a, mahse chutiang maiin ka thei mai bik si lo.

Zan khat phei chu nupa nun kan hmang dun hman ṭep tawh a, mahse keimah zawk chu ka awm dan a rawn dik loh leh thut avangin min hmanpui lui duh ta lo a nih kha! U Hruaia chu kan boruak tawn mekin a zir em avangin bathroom lamah chuan a kal vat a, chutianga a nupui berin a mamawh pawh ka phuhruk zawh loh avanga mahnia a inhri thla ta ṭhin chuan ka rilru a tina a, chung avangte chuan keimah leh keimah chu inhuain ka indem ngawi ngawih. Amaherawhchu ani chuan a laka ka awm dan avangte chuan min dem ngai lo va, engkim chu ama thiam loh a nih thu min hrilh ziah ṭhin zawk.

A nihna takah chuan min fawhna leh min tawhna te chu nuam ka ti tawh em em a, mahse nupa nun hman dawn takah chuan keimah chu ka dik lo leh ta ṭhin a ni. A chang chuan ka hlau chung chung chuan tum lui se, nupa nun min hman luih pui se, chu chuan ka hlauhnate chu an tih bo theih te ka ring ṭhin. Mahse u Hruaia zawk chuan min sual lui ngai lo va, ka rilru leh taksaa natna ka neih leh lohna'n nupa nun min hman luih pui ngai lo va, insum hram hramin a thlazar hnuaiah chuan min awm hahdam tir ṭhin zawk a ni.

"Ka nupui, lal chhe lo nu, hmelṭhanu, inchei vak ṭhin suh, mipa dangin an lo hmu tai palh ang che" ka dawr lama kal tura ka insiam mawlh mawlh laiin u Hruaia chuan a rawn ti a, min rawn kuah leh nghal ringawt tawh.

"Lal Man em em pa, ka insiam lai hi chuan min lo tibuai ziah ṭhin lo teh, ka zo ṭep a nia" tiin keipawh chu ka lo tal deuh a, ani erawh chuan min kuah nghet em em a, ka awm lam chu a zut zal zal bawk.

"Aw le" tiin a thil tih lai chu a tawp chat a, min kuahna aṭangin a tho zui ta daih. A awm dan teh thut avang chuan amah chu ka en deuh hâw a, ani chuan ka nupa khuma ṭhu chung hian min lo en reng thung.

"U Hruai" amah en ran chung chuan ka ti ta ringawt a, min en dan aṭang chuan min sawngbawla ka taksa chhunga rawn luh a châk tak zet tih ka hre thei. Chuvang a nia a hming lama ka ṭawng chhuah tâk ringawt ni.

"Ka lo zuk chhuk ang aw, in hnuai lamah ka lo nghak dawn che a nia" nui lui sak chung hian a rawn ti a, a ṭhutna khum aṭanga tho kangin kan nupa room aṭang chuan a chhuak zui nghal.

U Hruaia awm dan chu ka ngaihtuah zui vawng vawng a, ka hmuia lipstick hnawih ka tumna pawh chu ka ti ta chuang lo. Ani chuan ka nat leh a hlauh avangin a insum hram hram a, keipawh hian a hlimna tur leh a duh dan a nih phawt chuan a sawi angin ka awm ve tur a ni tihna rilru ka put thut avangin ka hmai te chu ka phih ṭha leh vek a, a hma aia nasa lovin ka hmaite chu ka hnawih ṭha leh ta vek. Ni e, u Hruaia hi ka pasal a ni a, a ka aṭangin sawi chhuak kher lo mahse a thiam ang tawkin min hmangaih a, min duat em em tih pawh ka hria. Chuvang chuan a tan chuan a sawi ang apiang chu ka ti thei ang a, ka thei zel bawk ang.

In hnuaia ka chhuk chuan a phone hian mi tu emaw ni hi a lo be mek a, ka pa leh u Zualtei leh Duati te chu hmuh tur an lo awm tawh lo. A awmna bul ka thlen chuan a mi biak lai chu a titawp vat a, min rawn kuah leh vang vâng ringawt. A ṭawng miah lo va, keipawh ka ṭawng chuang lo. Ngawi rengin min kai chhuak a, lal ang maiin ka ṭhutna tur zawna kawngka te chu min hawnsak thlap bawk. Motor-a kan chuan lai te chuan a ṭawng lo hrim hrim a, chungte chuan ka awm an tinuam lo vek thei.

"U Hruai" amah en reng chung chuan ka ti a, ani erawh chu motor khalh laklawh lai a ni bawk nen min rawn en zawk ringawt.

"Ka tihpalh" kan hma lam en ngawt ngawt chung chuan ka ti leh ringawt a, a laka ka awm dan avang chuan ka inthiam lo tak zet a ni. Chutah kawng zawl zau deuh laiah chuan motor chu a tiding a, ka ṭawng tawh lo hrim hrim.

"Ka nupui, min en teh" tiin ka biang tawn tawn chu a kut pahnihin a rawn khuap a, a lam hawi turin min kuai her zui nghal bawk.

"Tukina ka chet dan avang khan nangmah i lo inthiam lo leh tawh tih ka hria alawm, i thiam loh a awm lo a nia Nute" a rawn tih zawm leh zat a, chutah kei chuan

"I thin a rim emaw ka ti asin, i ngawi reng bawk si nen ka awm a nuam lo tak zet a ni" mittui tling pam chuan ka lo ti a, min duat lutuk avang chuan ka rilru te chu an rawn no thar ni ber hian ka hria.

"Âwwww, engatinge ṭah i tum leh mai ṭhin? Ka thin a rim lo tih hria la, ka biak miah loh che avangin ka tihpalh bawk" tiin ka hmuiah chuan a rawn fawp a, uar leh duham takin min fawp kher lo mahse min fawhna chu sawifiah thiam phak baka nuam a ni.

"Le! Tunah chuan kal phawt mai teh ang, hetiang hi chu zan lamah kan tih chhunzawm zawk dawn nia" nui sak chung hian a rawn ti a, kei erawh chuan min fawhna chu kham lo tih hriat zet hian amah chu ka lo en ngawt ngawt thung.

"Ka nupui, i va kham awm lo ve" a rawn tih leh rual chuan ka harh chhuak zawk a, ka awm dan chu ka siam rem ta vat bawk.

"Aaa, ih, kal ang, kan tlai tawh hle a nia" ka lo tih bah deuh nuai a, ka biangte chu a sa hut hut a, ka pasal bulah ka la zak em em chu a ni si a!

"Aw le Lal duhawm em emnu" tiin biang chu a rawn piai leh zeuh a, ka hriat turin sawi ri kher lo mahse ka hmai chu a sen leh vek tawh tih ka hre thei.

Chawlhmun lam chu kan pan ta char char a, Vaivakawn Traffic Point kan thlen chuan hla a rawn play a, ka beisei loh lutukin u Hruaia chu a rawn zâi ve nia. A zaithiam leh thiam loh lam ka ngaihtuah lo va, a thil tih ngai miah lo a rawn tichhuak phawng chuan min ṭhawng ber zawk. Mak ti taka ka en reng avang chuan nasa em em si lo hian min lo nuih let sak a, a awm dan vel avang chuan keipawh chu ka nui chhuak lo thei ta lo. Dar 10 velah chuan ka dawr awmna chu kan thleng thla a, kan Chef chu lo hawng mai tura ka hrilh lawk tawh avangin dawr pawh a lo inhawng huau tawh.

"Nute, vawiin chu tu emaw ni ka lo hruai dawn a nia, ka rawn hruai tum hian a hre chiang khawp mai che" phone call ka pick-up rualin Michael-a chuan a rawn ti nghal a, tu chu nge maw lo hruai a tum ni!?

"A va mak awm ve, tunge i rawn hruai tur lah chu ka hre der si lo" ka tih chuan

"Kan lo thlen hunah tunge ka mi rawn hruai chu i hre mai ang" a lo ti sam et a, kan customer a nih dawn phawt chuan a duh duh chu rawn hruai vel mai mai teh se!

"Tunge a?" ka bula lo ṭhu ngawi ngul pa chuan a rawn ti a, a ṭawng dan aṭang chuan kan inbiak zawh hun chu a lo chang reng tawh zawk a nih hmel.

"Michael-a" tiin keipawh chuan ka lo ti ṭha ve mai.

"Kha pa khan engatinge a la bîak a la biak che?" awi hepa hi enge a hriat a? Michael-a hi a lo thik leh vel tawh em ni? Ka va han inpuan tir leh dawn chiang lulai tak!

"Enge Michael-a ka biak leh biak loh chu i lo ngaihven ve vak a? Ani te chu ka ṭhianpa em em alawm a nih, chutah ka tan a la fel em em zui" ka tih chuan

"Khatiangin ka beng hriatah mipa dang chanchin sawi tawh suh" a rawn ti ram hmak a, kei lah pek chuan

"Engvangin maw?" ka lo ti nghal thuai a, amah chu ka en kar bawk.

"Ka thik alawm, ka thik lutuk"

"Ehêeee, i va'n sawi awlsam tawh em em. Mipa dang i thik thu kha i sawi zak ṭhin si a, i zak tawh miah lo em ni?" mak ti deuh chuan ka lo ti a, mipa dang a thik thu a sawi avang chuan hlim tur ka nih laiin ka hlim phah em em lo va, awlsam mang khenga mipa dang a thik thu a sawi chu mak ka ti lutuk zawk.

"Aw, ka sawi zak tawh lo. A hma kha chuan i hnena mipa dang ka thik thu kha ka sawi chhuak zak ṭhin ngei alawm, mahse tunah chuan nang hi ka chan leh thei che tih ka hria a, nang chan leh ai che chuan ka pa tak ngial pawh ka thik thu ka sawi thei tawh a ni" thutak deuh hian a rawn ti dam dap a, ka mit takah chuan min en ran bawk.

"Lal Man em empa, i va thutak hmel ve" amah nuih let sun sûn paha ka tih chuan

"Ka thutak alawm Nute, ka tihsual avangin hrehawm tam tak i lo tuar tawh a, chutiang bawkin keipaw'n ka tuar ve bawk. Kan pahnih inkar chhiatna engkim kha keimah aṭang vek a inṭan a, tunah erawh chuan tihsual leh ka duh tawh lo a ni" ka kut vuan chung chuan a rawn ti nghet charh a, a ṭawngkam chhuak tinin min hneh lutuk avang chuan ka tuiral lo chauh.

"Hei, hetiang hian awm vel kher suh, customer te sawn min lo en zeuh zeuh a nia" ka ti ta ringawt a, amah chu ka zahpui vang em em pawh ni lovin kan awm dan chu mi dangte lo hmuh atan a mawi loh ka ring ve tawp.

"Nute, min zahpui em ni?" a zawhna chu ka lo rin lawk ang ngei a ni.

"Ka zahpui hauh lo che u Hruai, chuan" ka tih leh laiin a rawn che thut a, min fawp chiang ngei mai. Kei chu ka lo meng kur a, ani erawh a mit a chhing vang vang thung.

"Ehem" tih thawm kan bul lawk aṭanga a rawn awm avang chuan u Hruaia chu ka nam sawn dâwr a, ka hawi chhuah rualin Michael-a chu ka hmu zui nghal.

"Eu eu eu, hmai rawng inthlak thei kan awm a ni maw?" ring leng lawng hian Michael-a chuan a rawn ti a nih chu! A thil sawi chu ka run bawk si, chhan mai dan tur ka hre bawk si lo nen ka melh ta hrep.

"Khatianga min melh rum vel vak vak lo khan ka bula ding hi tunge a nih hriat tumin han en hmasa phawt mai teh" a rawn ti leh chuan a bula lo ding chu rum zet tho hian ka melh a, chuta ka mi hmuh avang chuan ka meng dul ta riai rîai.

"Ehêee, Sir Kim" mak ti tak chuan ka tichhuak hak a, ka ding chhuak zui nghal a, ani pawh ka kohna avang chuan a lo bu ve nghauh nghauh.

"I taima bawk a, tunah chuan dawr lian tak i nei tawh a nih hi!" nui miah lo hian a rawn ti a, he pa pui roh pawh hi u Hruaia te ang mizia nei, an nel tak takte bulah chauh lo chuan nui duh miah lo ang chi kha a ni tlat alawm.

"Âaaa, a teuh lo mai. Chuan enge Aizawl lamah te i rawn tih daih daih a?" ka lo ti ve nghal thuai a, a tua mah chu kan la ṭhu lo hrim hrim.

"Nia, hei Michael-a nen hian Project khawih tur kan nei a, ani hian min pui dawn a nih ber chu!" a rawn ti felfai leh thlap a, Michael-a nen daih daih an inhriat dan chu ka hre châk hle.

"Engtinnge he pa nen hian in inhriat theih?" ka hriat châk em avang chuan ka ti leh ta ringawt a, chutah Michael-a chuan

"He pa ka ni bik kher lo, hming ka nei ve bawk" a rawn ti ve nghal a, a thusawi avang chuan keipawh chuan ka lo melh leh ta hrep.

"Ka Reasearch tihna lam aṭangin a nia, Psychology Department lamah chuan Michael-a hi ka hre hmasa ber a, chumai bakah amah hi a lo thiam khawp mai" Sir Kima'n a rawn tih leh tâkah chuan ka awm dan chu ka siam ṭha vat a, ka nuih ta ringawt bawk.

"Eeee chuan, khawnge Miriam-i? I lo hruai ve lo em ni?" ka tih zawm leh zat a, Miriam-i ka hriat chhuah tâkah chuan ka ngai reuh hle.

"Miriam-i chu Champhai lamah khan hna a la thawk char châr a, phal em em tawh lo mah ila amah berin a duh tlat avangin ka la thawh tir mai mai zawk a ni" Ni tak! Miriam-i te chu Champhai lamah hna a thawk daih tawh alawm, kei hi ka â zo tawh a nih ber hi!

"Awi, a takah in inhmu khât awm si a, i ning ṭhin ngawt lo maw? Tunah han video call teh, ka be châk a nia" ka ti leh nghal thawr thawr a, Sir Kima ka nel ta em em chu ka hrethiam hauh lo.

"Zonunmawi, chin tawk hre rawh. I bula mi re ru khan i awm dan kha a ngaitheih vak ring suh" Michael-a chuan a rawn ti a, chutah u Hruaia ka en chuan min lo melh rum teh e.

"A ho em mai a! Ṭhian hluite kan hmu ve a, kan be ve a ni mai alawm" ngaihsam fê chuan ka lo ti ve hmak a, ka bula mi chu a lung a va awi lo nasa dawn rua em.

"Enge i rawn video call leh tâk ringawt Thlawi Kim? Ka buai a nia" Miriam-i chuan a rawn ti hlawk hlawk a, Sir Kima a koh dan ber kher chuan min va tinui chhuak teuh tak.

"Khatiang khan min ko tawh suh ka tih khâ, kha i ṭhiannu'n a be duh che" tiin a phone chu min rawn pe a, keipawh chuan ka lo la ve ta vat.

"I duh leh khang laia Aizawl hmeichhia ho kha nei vek rawh, nang ang pathlawi" a tih lai chuan nui ver verin phone camera-ah chuan ka awm lang a, Miriam-i pawh chu min hmuh hnu chuan a ṭawng tawp nghal chat.

"I dam maw Miriam? Kan va inbe khat ve le" ka tih chuan

"U Nute, engtinnge ani nen khan in awm dun theih?" a rawn ti daih a, mak a ti ve hle pawh a ni ang.

"Nia, ka dawrah an lo chawl lawk a, Sir Kima zui hian lo zin ve mai mai ta che, inhmuh leh te pawh a châkawm alawm" ka tih leh rual rual chuan

"A têuh lo mai, khatiang pathlawi ka lo duh ve em em kha ka inchhir lutuk. Lerh ki kawi kual vel si, khirh si, inla thu si, chutah fa a nei tawh leh nghal, a hmel pawh kha ka hmu peih lo" uar tak chuan a rawn ti leh hlawk hlawk a, loud speaker-a kan dah sa vek avangin a ṭawng zawng zawng chu ka hmaa ding Sir Kima chuan a hre ve vek a, a thusawi te avang chuan a chek zui tlak tlak bawk. Chutah amah vek chuan pangai deuh zawk hian

"I phone number lo sawi teh u Nute, a hmaa i number kha ka be tlang thei reng reng tawh lo, i thlak daih em ni?" a rawn ti leh nghal a, ka number te chu Aizawl ka awm tirha SIM card thar ka hman aṭang khan a inthlak daih tawh alawm.

"Aw, thlak tawh e. Lo inring rawh, ka lo sawi ang" tiin phone number te chu kan inpe a, rei pawh inbe tawh lovin amah zawk chuan a rawn titawp zui daih.

"Kha le, chuan engatinge Miriam-i kha a va thinrim em em ve?" a phone pek pahin Sir Kima chu ka zawt a, ani paw'n ka thil lek kang chu lo lak thlak pah hian

"Nia, a buaithlak tak tak a ni. Hmânnia kan thawhpuinu nen thla kan lak dunna a lo hmu a, chuvang alawm tunah pawh ka ruala a rawn zin ve duh leh loh, thlalak a hmuh hma te kha chuan a phur teh asin" a rawn ti ve sup a, ri meuhin ka nui chhuak ve ta nge nge.

"A duh ve hle tawh che a nih chû" ka tih chuan

"Nia, mahse ka thlem peih lo ngei mai, a harsa leh reuh vel dawn lutuk a" a rawn ti ve mai a, Miriam-i ngaihtuah ni awm tak chuan a nui ri ve suk bawk.

"U Hruai, hei hi" tia ka ding lampang ka hawi phei chuan u Hruaia hmel reng reng hmuh tur a lo awm tawh lo. Hawi vak vakin ka zawng nghal a, dawhkan pakhata Michael-a nen an lo ṭhu dun daih chu ka va hmu a, Sir Kima nena kan titi tui lutuk avangin anni pahnih chu ka lo ngaihtuah tawh lo hrim hrim zawk hi a lo ni.

"U Hruai, Sir Kima hi ka nunna chhantu kha a nia" a ṭhutna bul kan va thlen rual chuan ka ti a, u Hruaia erawh hawi pawh a rawn hawi chhuak eih lo.

"Enge i sawi awmzia?" Michael-a ve thung chuan a rawn ti a, Michael-a'n pawngsual ka nih tawh thu chu a la hre ve lo tih ka hre chhuak zui nghal.

"Maw?" har chhuak thut hian u Hruaia chuan a rawn ti leh a, rang tak hian a rawn ding a, ka bula ding reng Sir Kima chu a en ta ran bawk.

"Ka nupui nunna i lo chhanhim avang hian ka lawm lutuk, enge ka tih ang? Engtinnge ka rulh let ang che?" u Hruaia chuan a kuta va chibai sawk sawk pahin Sir Kima chu zawt a, Sir Kima erawh a lo nui mai mai thung.

"Êngmah i tih a ngai lo ve, ka thil tih kha phut let neia ti ka ni hleinem. Tuna aṭang chuan i nupui hi mal tlat tir tawh lo la, mi dangin an venhim ngai lo turin nangmah zawk hian venghim tlat tawh zawk rawh" a rawn ti dam dap a, u Hruaia pawh chu ngaihtuah thui hmel deuh hian a lo bu ve nghut.

Michael-a ber chu a rawn che hneawm leh ṭan a, zawhna min zawt chhen bawk nen engkim chu ka hrilh tlang vek ta tawp. Mak tak maiin ka sawi lai te chuan ka ṭah a chhuak tawh miah lo va, mahse ka hlim tihna erawh a ni chuang lo. Michael-a pawh chuan ka thil tawn a hriat hnu chuan min khawngaih thar em em a, ka chunga a lo chet tawh dante chu zahpuiawm tiin a rawn sawi chhuak leh ta hîal. Kei chuan a thiam loh a nih loh thu ka hrilh ve a, ani pawh rei lovah a rawn nui ve leh thei mai. Haw dawn ṭepah Feli chu kan dawrah a rawn lut leh hlawl a, ka va han nui hnem leh mai mai tak.

"Awi awi awi, engatinge kan tlangval senior hausa suala chu i lu te kha i la tuam bûr reng a? I awm dan vel aṭang kha chuan a nat pawh a rinawm tawh loh, nge khangte kha i inlak Vai Hero velna mai mai zawk?" u Hruaia a hmuh rual chuan a rawn ti peng peng a, ani hi u Hruaia hi chu a ngam ve thlawt a ni.

"Vai Hero maw!" tiin pakhat lah chuan chhang let chuang lo hian a lo nuih liam pui leh mai a, a dawhthei zawk hi ka ti ṭhin. Han ti ve khanglang ila, kei te hi Feli ai hi chuan ka ṭawngthei fê zawk awm reng sia.

"Phel tawh rawh phel tawh rawh, a ṭul em em tawh lo" Feli chuan a rawn ti leh hram.

"I thu lo ve chiang ê" u Hruaia chuan a lo ti leh mai a, a thusawi tawi te chuan Feli chu a va run leh dawn tak em.

"A lo nih vel tak chu!" Feli chuan a lo tih khum leh hmak a, an awm dan vel chuan ka nuih a tihzat em avangin ka lo nui dir char char.

Zan lamah chuan a ngaite bawkin kan nupa khumah kan awm dun a, Sakeibakneiin a fate a veng ang mai hian u Hruaia chuan min veng reng hi a ni tawp. Chhun lama Sir Kima laka a chet dan mawi lo tak chu a rawn sawi chhuak leh a, a inthiam lo ve hle a ni ang a sawi reng ringawt mai. Thil chi hrang hrang kan sawi kual a, kan pahnih chuan tu dang reng kan ngai lo. Kan hlim a, kan nui dun a, kan infawp chhen bawk. Chutia kan awm dun lai chuan thil hriat chhuah ka nei a, zawh hun tak pawh a nih ka ring.

"U Hruai"

"Immm"

"Thil ka zawt ang che aw?"

"Aw tehreng, i duh dûh min zawt rawh"

"U Sangtei kha engtinnge a awm tâk zel?"

"Kha zan, i chhuah theih thu ka sawi zan aṭang kha chuan a hmel ka hmu leh tawh nga lo va, a nu leh pate ka han biak avang khan a nu leh pate chuan an rawn buaipui tawh turah ka ngai"

"A nih leh engatinge ka chhuah theih thu kha i sawi? Engatinge ka thusawite kha i rin ve miah lo?" ka tih leh rual chuan

"Nute" a rawn ti thuai a, min ngaihven tak hian min lo en chhuk run bawk.

"U Hruai, sawi rawh, i ka ngei aṭang hian a chhan ka hre duh a ni"

"Ni lo Nute, i rilru natna tur thil reng reng chu tih leh ka duh tawh lo"

"Ka rilru a na dawn lo, i kiangah ka awm tawh alawm u Hruai" nuih luih sen sen pah chuan ka ti a, sawi chu a hreh ve tak zet a ni.

"A chhan chu LALRUATSANGI pum chhunga naute kha ka fa ve tho a ni a, i thah a nih rinna kha ka nei lian ta em em bawk. CCTV aṭang lah khan nangmah ngei khan LALRUATSANGI in tur kha i lo siam kher bawk nen ka ta haw em em che a, ka rilru nat ang chiah khan na ve la ka duh a ni. Ni lo Nute, sawi sawi hian awmzia a nei tawh lo"

"Sawi zel rawh, i insawifiah har tawh mah mah i ti lo em ni?" a awma bei chung chuan ka ti a, ka na tawh dawn lo tia ka lo sawi lawk chu dawt bawk a ni leh ta.

"Aw le, zanin hian kan sawi vek ang a, vawikhatmah kan sawi chhuak leh tawh lo thung ang" a rawn tih ram leh hmak chuan ka lo ngawi reng a, a ṭawng leh chu ka ngaichang reng zawk a ni.

"A nihna takah chuan kha naute kha ka thisen ve tho a ni a, a thi ta mai kha ka rilru a na a ni. LALRUATSANGI nau chhiat avang khan ka rilru a na lo va, ka thisen kai naute a thih avang khan ka rilru a na ta em em zawk a ni" a rawn ti leh charh charh a, kei chuan sawi tur reng ka hre lo.

"Chutah nang kha ka mawhpuh ta vek che a, engkim kha i thiam loh fai vekah ka ngai a, naute thla 5 mi i pai mek a ni tih theihnghilh ṭhak khawpin ṭawngkam mawi lo tak tak ka phuh chhuak bawk a nih kha! Mahse maw Nute, khatia in aṭanga ka pa'n min hnawh chhuah zan la la khan ka dik lo tih ka inhria asin"

"A nih chuan engatinge i rawn haw leh vat loh? Ka thusawi ngaithla tur tal pawhin engatinge i lo haw leh loh?"

"Ka zak alawm Nute, i hmel kha ka hmuh zah mai bakah ka pa hmel kha ka hmu zak bawk a ni. Ka thil tih tenawm tak avang khan ka zah lutuk cheu a, ka lo haw duh ta rih lo a ni ber. Mahse ka lo haw thuai lo kha tun thlenga inchhirna min siamtu a ni a, kumkhuain a ni reng tawh bawk ang" a rawn tih leh chuan ka lo ṭap chhuak hawk a, ka ṭap lo thei lo a ni e.

"Ṭap rawh Nute, zanin chauh hi ka sawi chhuak tawh dawn a, zanin lovah hi chuan eng ang pawhin sawi rawh min ti mahla ka sawi leh tawh dawn lo. I natna thlentu nih ka duh ngai lo va, i rilru tinatu nih lah ka duh ngai hek lo, mahse ka nih duh loh chu ka ni tho bawk si" nghet taka min kuah chung hian a rawn ti ṭial thum dup a, kei erawh ṭah ban zai reng ka rel lo.

"Ka kalna tur pawh hrilh lo chein LALRUATSANGI inah khan ka lo va leng vel a, kei hi zawng phatsantu mai ka lo ni e. Nute, i laka ka lo chet tawh dan avang khan ka tihpalh tak zet a ni tih hi min hriat sak la, i thinlung leh tih tak zeta min hmangaihna avangin min ngaidam pawh ni mahla keimah leh keimah hi ka inngaidam thei ngâng tawh lo a ni" tiin a rawn che nghawr dat a, kei angin thawm hriat tur siam ve lo mahse inchhir lutuk avangin a ṭap tih chu ka hre chiang em em a ni.

Ka mit ka men leh rual chuan khua a lo var tawh a, mahse a la hma ang reng hle tih ka hre thei. Ka bula mu, a taksa lum nuam zet mai ka nghen pa chu ka melh chho a, ngawi reng hian min lo en ve reng. Ka hmai chu a rawn zut a, min rawn fawp zui nghal. Min fawhnate chuan ka tiril a fan a, a nawm dan chu ka sawifiah thiam lo zawk. Vawilehkhata min fawhna chu titawp thut chung hian

"Ka insum thei tawh ngang lo Nute, ti tawh mai ang" tiin a tho tharh a, kan room kawngka chu a va kalh ṭha nghal hmiah. A rawn phei leh lam te chuan a ngaihna hre lo zet hian ka lo en a, a lu tuamna var lû ka hmuh chuan ka nui sak bawk.

U Hruaia chuan khuma lo lawn kai leh vatin min rawn bawh a, min fawp zui ta mial mial. Tuna min fawh dan erawh a hmasaa min fawh dan nen chuan inang lo tak a ni. U Hruai chuan duhthaw em em hian min rawn fawp a, ka hmui maiah a duhtawk ta lo. Ka hmui kalsana ka ir a fawh thlak lai te chuan ka za chuai chuai a, a kut te chuan ka taksa a chul kual ruai ruai bawk. Ka hnute a ṭhamna te chuan châkna nasa tak min pe a, ka mamawh engkim min pe theitu chu amah chiah a ni tih hrilh nawn ka ngai lo chiang hle. Ka hnute a fawh tawn tâwn lai te chuan awm ngaihna reng ka hre lo va, ka mamawh leh duh ber chu a vawrtawp thlen a ni. Ka meng sîai siai a, ka thawmhnaw hak lai te chu khawiah nge an lo awm zawh hman ka hre lo. Thei leh thei lova u Hruaia lam ka en ṭawk ṭawk chuan ruak vek hian a lo awm tawh a, chutiang bawkin keipawh chu ruak vekin ka awm tawh bawk.

"Nute, min mamawh ngawih ngawihin ka siam che ang a, chumi hnuah chauh chuan ka che ang" rawn ti thum dupin ka kap lamah chuan a ṭuan a, ka rin phak bakin ka taksa chu a rawn danglam ta. Ni dang ang lo takin hlauhna ai chuan zauthauna leh tisa châkna te chuan min rawn tuam a, chungte chu ka thunun theih piah lam thil a ni tawh.

Ka **** leh a **** lai te chu ten miah lo hian a rawn liak a, ka hlauhna zawng zawngte chu ka nuam tihna te chuan an rawn chim pil vek tawh ni maiin ka hria. A thil tih lai chu a ti mial mial a, kei erawh nuam tih lutuk avangin ka lo er tawn tawn a, a chang leh a samte chu ka kek thul a, a changin kan bed sheet chu ka hmer leh tawn tawn zel. A tawpa tawpa chuan keimah zawk chuan ka tlin ta ngang lo va, ka taksa chhunga a **** rawn thun miah lo chuan a vawrtawp ka thleng ta der mai. Chutah a aia nuam leh dangdaiin u Hruaia chuan a kut zung ṭang hrawl zet chuan ka **** chu a rawn hawlh zawk zawk a, ka **** te chu a la liak reng pah bawk. Kei chuan engtia lo awm tur nge ka hre lo va, a nawm lutuk avang chuan ka rum chhuak ṭiah ṭiah bawk.

A thil tih lai a tawp hmak avang chuan ka meng diar diar a, zep lovah chuan min sawngbawl dan chu la duhtawk mai lo se ka ti a, ka la kham lo tak zet a ni. U Hruaia chuan ka awm dan avanga rawn nui ri suk chung hian min pawm kang lâwp a, a taksa chung lama min awm tirin a **** chu min vawn tir zui nghal. Ka phu deuh zuk a, a chhan pawh u Hruaia **** chu a hrawl em vang a ni. A **** hmawr lah chu a hnawm deuh chap a, a lum ther ther a, a taksa khawi lai pawh chuan lumna an nei vek emaw ka ti ta hial. Kan hun kal tawh lamah khan nupa nun te chu hmang ve ṭhin mah ila chutiang taka chiang chuan u Hruaia **** chu ka la khawih sak ngai lo va, ka vawikhatna a ni bawk nen ka ngampa lutuk lo hle a ni. A **** ka vawnna kut ka lak sawn vat avang chuan ka bana rawn chelh leh thuaiin

"Nute, min ***** sak rawh" aw phelh phang chuan a rawn ti a, ka kut chu lain a **** chu min khawih tir leh nghal zat. Amah vek chuan ka kut chu a rawn hum hnan a, tih dan tur min zirtir a ni ber.

Ka khawih tirh kha chuan a len leh hrawl em avangin ka zam a, ka khawih ṭha ngam lo zawk a, mahse ama'n tih dan tur awm ang min zirtir hnuah erawh chuan mak tak maiin ka thil tih lai chuan zauthauna nasa lutuk mai min pe ta zawk a ni. U Hruaia pawh chu ka thil tih avanga nuam ti tak hian a chhing diar diar a, a rum ve ṭiah ṭiah bawk. Keipawh ka thil tih avang bawk chuan ka danglam a, ka za vek ni berin ka hria. Vawilehkhatah u Hruaia chu a rawn che thut a, min lehthal nghal bawk. Ka **** chu a nuam tawk chiah hian a rawn nuai vak vak a, a thil tihin nawmna nasa lutuk min pek avang chuan awm ngaihna reng ka hre leh ta lo.

"Nute, min mamamawh thu sawi mawlh teh, i phalna tel lo chuan i taksa chhungah hian ka lut duh lo a ni" a rawn ti a, a kut chu chet tir reng thovin ka hnute te chu a fawp tawn tawn bawk.

"Aw u Hruai, ka mamawh tawh lutuk che. Ti rawh, ti tawh mai rawh" engtik laiin nge chu thu chu ka ka aṭanga a rawn chhuah pawh ka hre lo va, min sawngbawl dan vel chuan ngaihtuahna fim pu thei lek lovin min siam ni berin ka hria.

"Nute, ka nupui, ka dam chhan, keipawh hian ka mamawh lutuk che" tiin u Hruaia chuan ka **** ah chuan a **** lian leh hrawl em em mai chu a rawn thun lut pulh a, ka mur chhuak vek thei. Ka tawn ngai loh nawmna chuan min tuam a, chu thil chuan ka nun hlui zawng zawng ngaihtuah chhuak hauh lovin min siam thei hial a ni.

U Hruaia chu engmah sawi tawh lo leh a thla zar hnuaia awm ka ni tih min hriattir tak hian a che zawm mial mial a, a chet dan lah chu a hmanhmawhin insum theihna a tlachham hle tawh ni maiin a lang. Kei lah chuan nuam ka lo ti em em a, chutiang taka nuam chu ka tawng leh khât tawh êm bawk a ni e. U Hruaia chet dan avang chuan rei lote hnuah ka awm dan chu a rawn dik lo leh ta vat a, ka thin phu a rangin ka taksa chu sawifiah thiam phak bakin a za chuai chuai ni berin ka hria. A vawrtawp ka thleng tawh dawn ngeia ka inhriat lai chuan u Hruai chu a hma ai zawngin a rawn che hmanhmawh a, chungte chuan ka insum theihna zawng zawng chu a rawn tichhe leh ta vek. Ka khur det det a, ka phu euh euh bawk. Chutah ka taksa chhungah chuan thil rawn lum lut pûat puat hi a awm a, chumi rualin u Hruaia pawh taksa phu deuh ût ut leh zawi tih hriat tak hian ka awmah chuan a rawn bawk ta hle hle. Chutianga nupa nun nuam dangdai tak kan hmanna chuan ka hlauhnate chu an lo kiam nasat tawh zia min hriat chhuah tir a, ka hlim ngawi ngawih hi a ni tawp.

"Min la hmangaih reng avangin ka lawm a, ka nupui i nih leh avangin ka lawm bawk" hahdam taka kan mut dun hnu chuan a rawn ti a, ka awm aṭanga lo hawi chhuakin ka hmui chu a rawn fawp leh vang vang bawk.

"U Mam, chaw ei kan peih tawh aw" kan room kawngka lam aṭanga u Zualtei aw rawn ri chuan min tiharh chiang hle a, hmanhmawh takin kan room chhunga sana intar chu ka en vat a, dar 8:30 a lo pel daih tawh.

"U Hruai awm sawn teh, kan mu rei lutuk tawh" tia nam sawn ka tum chu duh lo tih hriat zetin min la bawh lui ngul a, a che naupang chhia leh tlat tawh.

"U Hruai i rit si, kan chhuk vat loh chuan a ṭha lo vang. Intihfai te ka la ngai bawk si, awm sawn hmanhmawh teh" a awm sawn duh mai loh avang chuan ka ti leh a, kan nupa room kawngka pawna u Zualtei a la awm ka hlauh avangin ṭawng pawh ka ṭawng ring ngam lo a ni.

"Aw le, lo kal rawh, intifai dun ang" ka taksa aṭanga a thawh kan rual chuan a ti a, ka hmaah chuan ruak vekin a lo ding teu ta mai. Rang takin ka hawi sawn vat a, ani ve thung chu a lo nui huah huah daih. Chutah ka inrin loh lai chuh ni awm tak hian min rawn pawm thut a, ṭe chhuah ka tum vîau naa mi dangin kan thawm an lo hriat ka hlauh leh si avangin ṭe ta lo chuan a awm chu ka chum vâk vak ta ringawt.

In hnuaia kan chhuk thlak te chuan engvanga zak thar ta em em nge ka nih pawh ka hre lo. Mo thar hlim ang maiin ka che vel chu ka khawr ṭut a, chaw ei ka siam lai te chuan tûma hriat si loh hian ka lai em em ringawt. Ka awm dan vel chu an hriatthiam loh hram ka beisei a, hre awm ang pawhin an awm chuang lo. Zing dang angin u Zualtei chuan titi a vawrh le char char a, ka pa chuan a lo chhawn zeuh zeuh bawk. Chutia kan ei mial mial lai chuan ka pa chuan min lo en thut a, kei lah a lam zawnga ka lo hawi lai tak a ni bawk nen kan mit chu a intawng ta sak. Rei pawh en ngam lovin ka hawi sawn vat a, ka hmaa chaw chu ka ei leh zawm leh mawlh mawlh.

"Nute, tukin chu i va tho nuam awm ve? I hmelah a lang vek mai a" awi awi awi, engtinnge ka chhan tâk ang? Ka hawi sawn hnu pawh khan min en reng tih ka hria a, mahse keimah zawkin ka hmu lo der tlat a nih kha!

"Chutia mi ka pa?" pangai thei ang ber chuan ka ti ta ringawt a, zawhna dang min zawh belh tawh lo hram se ka ti.

"Chutia e" ka chaw bar mawlh mawlh laiin ka pa chuan a rawn ti leh a, ka chaw bar lai pawh ka tawp ta chat. A ṭawngkam te reng reng chuan hmâna ka pa chiah chiah kha a la nihzia min hriat chhuah tir a, zah namen lovin ka zak leh a ni.

"Au Nute, engatinge i hmai kha a sen vek a?" engmah hrethiam lo hian Duati chuan a rawn ti leh ta. Keimah chu ka buai vek a, ka zak lutuk chu kham daih mai ka duh.

"Ka pa, in mawl thei em mai. Nute, ti rawh i kham daih ang" u Zualtei chuan ka awm dan chu a hrethiam a ni chêk ang chu! U Zualtei sawi ang tak tak chuan kham daih mai ka duh a, ka bulah ṭhu ngawi run pa lah chuan min chhan emaw ka pa lo biak emaw chu a tum hmel loh ropui si.

Chapter 22

Chaw kan ei kham hnu te chuan tuk dang ang lo takin ka seng felpui a, u Zualtei paw'n mak ti deuhin ka che vel chu min en reng nghe nghe. Chutianga min en reng chu ka dem lo va, awm ka ti hliah hliah zawk. U Hruaia bula ka let leh tirh aṭanga nizan thleng kha chuan biak hrehawm leh nelawm loh khawpin ka mizia chu ka thlak a, Duati paw'n a hma ang tak tak khan min nel loh phah tih ka hre ru kiau. Min biak pawhin ka chhang tawi hmuk hmuk zel a, u Hruaia hnena ka let chhanah chuan puitling chin chuan thil inphum ru a awm tih an hriatthiam ngei ka ring bawk. Zep lovah chuan chutianga ka mo tirh ang maia ka che vel chuan ka rilru a tihlim a, ka nun pangai kha ka nei let leh tawh ni berin ka hria.

"Engatinge kan chaw ei lai khan min chhan ve mai loh? Suala, ka zah zia kha i hria em? Ka pa lah chu a nghal ngaiin a lo la nghal reng bawk si" kan nupa room chhunga ka luh rual chuan ka ti a, u Hruaia chuan sofa-a ṭhu chung hian min lo nui suk duh lek chauh.

"Lo kal teh" tiin a kut chuan a lama kal turin min hui phei a, keipawh ṭawng chhunzawm tawh chuang lovin ka pan phei ve mai bawk.

"Ka sawi nawn leh ang, a hma ang chiaha ka bula i awm leh theih avang hian i chungah ka lawm lutuk Nute, ka phu miah loh nang ang hmeichhe rilru thianghlim ka tawng che hi Pathianin malsawmna min pek zingah chuan ropui ka la ti ber a, ka la ngai hlu ber bawk" a awma min kuah bet run chung hian a rawn ti dam dap a, a thaw leh hawk ṭhin. Kei chuan a bula ka awm leh ta chu a hlim phah vîau niin ka hria a, chutiang bawkin keipawh a bula awm chu nuam ka ti.

"Nizan ang em ema ka muttui kha ka la hre lo. I hria em, ka chhuahsan hnu aṭang che kha chuan zan mut hi ka harsat thei em em a, a chhan chu ka mitthlaa i cham rêng ṭhin vang a ni. Sleeping pills te kha ka lei ta hîal a, mahse maw sleeping pills ei chung pawha muthilh theih loh kha ka ngah lutuk" ka ti chhuak ve sep sep a, chutia ka ṭawng vel lai te chuan ka chhipah a khabe a rawn nghat a, a kut chuan ka kut chu a hum bet ran bawk.

"Kei ang mipa lak tlak loh min hmangaiha min tawng hi a pawi ngawt mai ti raw? Kei chuan natna hlir ka pe che a, chuti chung pawh chuan min la hmangaih tlat a, chungte chuan ka phu lohzia che hi min hriat nawn tir âwn awn a ni" a tih lai chuan min kuahna aṭangin ka awm sawn deuh a, a hmel chu ka en ran bawk. A hmelah chuan ka chunga a lo chet tawh dan avanga inchhirna nasa lutuk ka hmu a, hmangaihna chuan a laka ka rilru chapona zawng zawng a hneh vek tawh avangin a thusawi te chu dawt a nih leh ka ring thei tawh lo a ni.

"U Hruai, mahni inthiam loh lutuka i awm hian ka na ve tho asin. I hmelṭha tak te leh i hmel pa tak te hliah khuh tur khawpin i inchhirna hmel kha min hmuh tir tawh suh, i nat chuan ka na ve zel a ni" ka tih chuan a awmah bawk min kuah bet leh ta hlun hlûn a, tunah tak hi chuan ṭah chhuahna te aiin hlimna te chuan min tuam khat vek a ni.

"Hetah hian ka fa kha a awm ṭhin a, mahse keimah ngei hian ka that leh a, i chunga ka chet dan rapthlak lutuk avang khan keimah leh keimah hi engtikah mah ka inngaidam thei tawh ngai lo vang" ka dul rawn chul chung chuan a ti a, a hmel en buai ka tum tawh lo va, a ṭawngkam chhuak leh a thusawi chuan a awm dan tur min mitthla tir thiam vek tawh.

"U Hruai, kei chuan ka fapa kha ka hmu hman asin" ka tih chuan a awm aṭangin min nam sawn deuh hlek a, ka mit taka rawn en chung hian

"Fapa maw!? A hma khan naute ka chhiat kha i ti si a, tunah erawh kan fa i hmuh hman thu i sawi leh bawk si. Ka lakah hian zep i la nei em ni? Engkim a kipa kawiin min hrilh rawh Nute" a lo ti thuai a, ka thusawi avang chuan a mangangin leh hamhaih hle a ni.

"Ni lo u Hruai, naute kha chu ka nei hman lo ngei alawm. Ka hrin hun lova ka pum a rawn nat thut avangin doctor te chuan min zai chhuah sak tawp a, mahse naute chu a paitunu taksa chak loh lutuk avangin a lo thi fel der tawh. Ka naute ka chan tih ka hriat khan ka chi ai vek a, ka neihchhun tak meuhin min thihsan leh ta mai kha ka tuar thiam thlâwt lo a ni. Ka naute a thih hma khan ka mumangah a tak ram ang chiahin ka hmu a, kan fapa chuan a chhun tak zet che a ni. A mitah i thisen a nihzia ka hmu a, a hmelṭha reuh tak te kha ka ngai thei lutuk asin" pangai takin ka ti chhuak dap dap a, ka ṭah te chu a chhuak tawh miah lo bawk. Chutah u Hruaia chuan

"Keimah avanga i nat leh dawn ai chuan sawi zawm duh kher suh Nute, ka hrethiam lutuk che alawm" a rawn ti a, mahse ka chhungrila hun rei tak ka lo up beh tawh te chu sawi chhuah a, rilru thawveng taka nun hman ve chu ka duh tawh zawk a ni.

"In ka chhuahsan hnu kha chuan hlimna tlêm te ka la nei a, chu ka hlimna chu ka naute kha a ni. Nang chu engtikah mah ka neih leh theih che pawh ka ring tawh lo va, kan fa tal erawh nangmah ka hriat reng theihna'n che hrin chhuah leh duat taka enkawl kha ka duh ber ṭhin. Mahse ka duh dan vekin Pathian chuan thil a thlen tir lo va, ka dem hman híal asin. Hmangaihna hian natna tam tak min pe a, mahse chu hmangaihna chu ka thinlung leh rilru aṭang hian ka paih bo thei chuang der si lo" a thusawi ngaipawimawh lo lui chûng chung chuan ka ti a, ani pawh a rawn thaw leh hawk ṭhin.

"Ka tihpalh tih hian thil thlak danglam thei se chuan chawl lovin i hnenah hian ka sawi duh ngei ang" tih te chauh chu a rawn sawi a, ka chhang zui duh ta bik lo.

Ka dawr lam ngaihvena ka kal hun a lo thlen chuan u Hruaia chuan min hruai leh a, a motor-ah chuan kan ṭhu dun tluan ta parh. Ni dang ang chu ni se amah nen chauha chuan chu ka ning leh tawh vîau ang a, hrehawm ka ti ru leh em em tawh ngei bawk ang. Amaherawhchu, tunah chuan khang rilru sual leh chhia ka lo pai ṭun ṭhin kha ka nei tawh lo va, ṭawng zet zet kher tawh lo mah ila a bula ka chuan avang chuan ka hlim leh em em tawh zawk a ni. Ka dawr kan thlen chuan a lo inhawng hua tawh a, kan Chef paw'n hawihawm takin min lo be nghal thuai.

"Pi Nute, thil ka lo dil che" ka dawra thawk hmeichhe pakhat hian ka phone khawih mial mial lai chuan a rawn ti a, keipawh chuan nui sânga amah en chung hian

"Aw, tehreng mai. Enge min dil duh chu sawi la, ka pek theih zawng che a nih chuan ka pe ngei ang che" ka lo ti leh ve mai a, ani hi chuan ka hnathawkte zingah pawh min nel ber a, keipaw'n ka nel ve vîau bawk.

"Ihhhh, eng lo a nia, mahse ka sawi zak leh ê" a rawn ti leh ang lawi a, a awm dan vel avang chuan ka nui chhuak ta ringawt. A lawmawm a, ka tleirawl lai tak tak ang maiin a ṭawng duh em em a, Michael-a lo kal ṭhin hi a hne thei hle bawk. Michael-a lah hian na deuh deuh hian a ṭawng khum ṭhin a, ani lah chuan hlauh a hnekin a lo vin let ve khar khar zel.

"Sawi tawp rawh, min zah ṭut lo khan sawi tawp la ka tan pawh a nuam zawk alawm" nelawm tak chuan ka lo ti a, a thusawi tur chu a hreh ru ve hle a ni ang. A hawi kual zuk zuk a, thil tiru tur ang mai alawm a nih le.

"Ihhh maw, zak lo pawh min ti maithei, mahse ka sawi ngei a ngai sia. Ihhh, pi Nute, tun thla hlawh hi advance in min pe thei ang em le?" inthlahrung fê chuan a rawn ti a, ka rin loh lam lutuk a sawi avang chuan ka nui tawp zui riai riai a, a hmel ka en lah chuan zah hmel tak hian a lo awm bawk.

"Thei lutuk e, ka pe dawn che a nia. Eng atana hmanah nge i tih min hrilh ve chi te a ni em? A chi loh chuan min hrilh a ṭul kher chuang lo, ka pek loh phah lo vang che" a inthlahrung lutuk hmel chuan nelawm takin min biak tir lo thei lo a ni. Pawisa bawm chu ka hawng a, a thlabi hlawh chu ka chhiar zui mial mial bawk.

"Ka pa hi zai a ngai thut a, sum kan mamawh tam deuh thut bawk nen kan pawisa lo inkhawl sa chuan min daih chiah lo va, chuvang a nia ka dil tawp che" a thusawi chuan ka beng a verh nghal zar a, puih ngai taka ka dawra hnathawkte chhung leh khat an awm chuan ka pui hreh reng reng hleinem.

"Kha aw, cheng 10000 hi ka pe phawt che ang a, i mamawh belh chuan min hrilh hreh miah suh. Min hrilh lova in harsatna ka hriat leh si chuan ka thin a rim zawk hle ang. Chuan khatah khan i hlawh a awm lo va, ka puih ve na cheu a ni mai" tiin pawisa chu ka pe a, lak mai nachang pawh a hre lo. Ngawi reng hian pawisa chu a en a, keimah chu min lo en leh zeuh zeuh bawk.

"Pi Nute, kan chhungkua min puihna hi ka la rul let leh ngei ngei ang che. Ka lawm lutuk aw" a tawpa tawpah chuan a rawn ti chhuak ta hram a, kei chuan nui sâng hian lu ka lo buk khum a, ani paw'n hlim hmel a rawn pu ve leh ta vat bawk.

"Enge henu té hi i dawrah a la tih reng a? Customer te an lo luh leh luh loh pawh hre lo hi ban daih ta che, a hmel te lah hi a chhe reuh bawk si" Michael-a chuan kan awmna bula rawn ṭhut thlak pah hian a ti a, ka hmaa mi nu chu a thin a rim leh hmel tawh khawp mai.

"I zak lo ê, thil pawimawh tak kan lo sawi a nih khâ. Kan dawrah kher ni lo dawr dang eina tur i hre lo em ni? I hmel hi kan dawr hian a support lo teh mai a nia" pakhati chuan a rawn ti ve phiar phiar a, an inhnial vel dan chuan min tinui chhuak teuh ngei mai.

"Zawk za mah che chuan, kal sawn rang teh. I pi nen hian kan titina tur i dal tlat" ngeiawm fê hian Michael-a chuan a ti leh a, chutah ka naui chuan ngam em ema a beka rawn nam sawk chung hian

"I thu lo ber, kal sawn suh pawh min ti la kal ka tum tawh tho avangin ka kal ang. Chuan chhuak vat ang che, tho i rawn hruai lut tlat" a rawn ti ve leh a, Michael-a chhan letna pawh hre zui duh tawh lo chuan a kal nghal nal nal.

"Henu té reuh tak hi chu âw" Michael-a chuan a ti zui vawng vawng a, engmah chu a sawi belh leh tawh chuang lo. Hemi te pahnih hi chu ui leh kel thlun pawlh ang vel an ni a, hnathawktu dang leh customer dangte paw'n an inngeih lohzia an hmuh châng chuan an hlimpui thei hle.

"Khanu té kha ban vat teh, chuti lo chu ka lo dawr tawh miah lo vang che u" a motor chahbi dawhkana khawng ri kauh kauh chung hian a rawn ti a, kei chu a thusawi hoh lutuk avang chuan ka lo nui vel mai mai.

"I ti ho e a! A naupan ngaihtuah chuan a fel a, a zuan a zâng a, a hna hi a tui phian bawk asin. Chuan tun lai chu chhaih thinrim reng lo teh, a pa an zai dawn a, a rilru te pawh a hahin a buai ve ang. Keipaw'n tih theih ka neih tlêm em avangin pawisa hmangin ka pui a, a lawm thiam reuh em em leh nghal" ka tih chuan min lo en zawk a, hawi sawn lehin a mit chuan a mi chhhaih kawlh ṭhinnu chu a zawng zui bawk.

"A nih chu, keipaw'n ka lo pui ve ang e. I hnenah pawisa chu ka dah ang a, nangma'n min lo pek sak mai dawn nia" a rawn ti ve leh thuai a, a thil tih tum dan chu ka rin tawk chiah a ni.

"Ka duh lo, nangmah ngeiin pawisa chu pe la a ṭha zawk ang" ka lo ti ve hmak a, an inpe tur vel ka ngaihtuah phei chuan ka nui chhuak huk lo chauh a ni. Anni pahnih hi inngeih lo vîau ang hian lang mahse an inngaina tawh lutuk tih ka hmu thiam vek.

"I mawl ka ti, keimah ngeiin ka pek chuan kan insual duh hîal ka ring. A kawlh ve reuh bawk si, nichin paw'n ka bekah min rawn nam leh sawk reuh tawh kha!" chek tlak tlak chung chuan a rawn ti ve leh a, eng pawh ni se pawisa chu ka pek sak dawn lo hi a ni tawp.

"I puih duh chuan nagma'n pe la, kei chuan ka pe dawn miah lo a nia" nui miah lo hian ka ti a, ani pawh a hma ai chuan a rawn thutak ve leh ta deuh.

"Ni e, keimah chuan pek a fuh zawk ang. Mahse enge thleng dawn chu a hriat miah loh, ka pawisa a la duh lo lutuk chu min khawih leh hrep reuh ang tih te a nia ka hlauh. Hmeichhia a ni bawk si, han khin let dawn lah hian ka khawngaih leh ang tlat lawi a" a ti ve nuap nûap a, kei chu ka lo nui chhuak ta nge nge. Ka nuih tâk vak avang chuan ani pawh chu rawn nui ve leh mai bawk a, kan boruak tawn mek chu a hlimawm tlang rih a ni e.

"Chuan vawiin chu in pa hriat loh hlanin ka lo thlah daih mai dawn che emaw ni le?" fiamthu tak hian a rawn ti a, a sawi zawh rual chuan a nui zui hak hak bawk.

"U Hruaia thinrim i tawn peih leh peih loh a ni mai. A lo thleng leh ṭep zawk tawh lo maw, mi fing tan chuan insaseng hun tak a ni" nghal ûn khan chuan ka ti a, ani erawh a lo nui chîam. Ka nghal ve tawh lutuk chu mak ka ti a, mahse ka awmna chhungkuate'n an zir em avanga ṭawngkam nghal tak tak chhak chhuak ve ta ka ni tih chu ka inhre kur tho.

U Hruaia ka pasal a ni tih ka hrilh hnu khan Michael-a chuan ngaihzawng angin min besei chhunzawm leh tawh lo va, lehkha zir sang leh mi puitling tih takah ṭhian ṭha ang chiahin min en zui thei. Kan boruak a danglam avangin kan dawra lo kal a ṭhulh phah lo va, a hma ang bawkin min la rawn dawr ni tin zawk ṭhin. Michael-a chhuah hnu lawkah u Hruaia pawh a rawn lang ve leh nghal a, kan inkar boruak a ṭha tawh bawk nen hmel hlim takin ka lo chhawn ve bawk.

Hun a kal a, keimah ber chu ka la buaithlak chhunzawm leh ta zel mai. U Hruaia chuan a lu tuamna chu a nat tawh miah loh avangin phelh a tum ṭhin a, mahse ka phal leh ta tlat lo. A lu an tuamna te chuan a tilang pa ka ti a, a hmaia hmul te nen chuan inhmeh ka tiin ka hmu hmelṭha leh ta vek a ni. Ani paw'n ka phal loh tlat avangin a lu tuamna chu lung ni lo tak chungin phelh a tum zui leh bik tawh chuang lo va, a hmul pawh meh duh tawh vîau mahse a met fai leh ta chuang lo bawk. Tlai chaw kan ei kham chuan kan nupa room-ah kan chho dun a, tun lai chu mi deka mi fiam hi a uar thar hle.

"Zanin chu rei lo vang aw? Mut hma ka duh dawn tlatin ka hria" kan insiam mawlh mawlh lai chuan ka ti a, ani pawh a lo bu ve nghut.

"Zanin ang em emah chuan ka lu tuamna phelh hi phal ve tawh la, hetianga ka pu zawn leh pi zawnte hmaa va lang tur chuan a mawi lo ve ê" min en tlawk tlawk hian a lo ti a, amah ka en chuan a lo insiam peih fel vek tawh. Mi tam tak sawi dan takah mipa hi chu hmeichhia ai chuan an lo awlsam zawk a nih hi!

"Aw le, mahse kan haw veleh i tuam leh nghal ang, a ṭha em?" ka tih chuan nûr nang hian min lo chhuk melh run a, a chhan sawi turin min duh hmel khawp mai.

"A chhan tal hi min hrilh ṭha ve tawh teh, Man min tih chu ka awih tawh chiah lo a nia, hetianga awmze nei miah lova tuam reng ringawt hi a nuam miah lo bawk" ka rin ang ngei chuan a rawn ti ta nang nâng a, kei erawh chuan ka lo nui seih a, ka awm dan vel chuan a ngaihna a tihre lo zualin ka hria.

"A chhan chu ka sawi vek tawh kha, hetianga i lu i tuam hian i inhmeh ka ti a, i pa sawt ka ti che a, Vai film-a a changtupa thi ve thei lo hi i ang alawm" nui ver ver chuan ka ti a, rawn nui ve sukin ka hmui chu a hmuiin a rawn chuktuah zui nghal.

"I ṭhiannu ṭawngkam kha rawn hmang tei vet lo teh, a thu hrimah Vai film-a a changtupa ber kher chu an ka duh vak lo asin, mahse i thu bawk si a, kei i laka dawl ang maia zawr hnâp mipa hi chuan i thu ka zawm leh mai a ni ang chu!" a rawn ti zui sup a, a ṭawng dan vel avang chuan amah a ni lo emaw ka dawn alawm le.

"Awi awi awi, khatiang khan inla zei vel kher lo mai teh. I hmanhmawh zawk teh ang, haw hma kha ka duh dawn si" tiin a taksa aṭang chuan ka awm sawn a, ka insiam zui leh mial mial.

Kan in kawt kan thlen chuan u Hruaia chu motor aṭang chuan a chhuk duh mai lo va, a zamin ka nu leh pate chu a la hmu hreh ve hle a ni ang. Kan ina len phei ka rawt pawh khan ka pate hmai a zah avangin a duh rih lo hle a, mahse ka tihluih tlat avangin min kalpui ta chauh a ni. A ngaihtuahnaa awm tur ka hriatthiampui êm avang chuan ngawi rengin ka ṭhutpui a, ani paw'n thawm a nei bik chuang lo. Minute 2 hnu velah chuan a rawn che chhuak a, min rawn en chung hian a nui lui suk a, awmze hre lo takin ka lo nuih let ve ta ringawt.

Motor aṭang chuan a chhuak a, motor kawngkhar chu a khar ri dawt bawk. Kei chuan a che vel chu ka lo thlir reng a, amaha ka inchan hian a harsain a hrehawm dawn lutuk tih chu ka hrethiam lutuk tlat. Motor chu hel kualin ka ṭhutna zawna kawngka chu a lo hawng a, a lu thle zeuh chunga chhuak tura min tih avangin keipawh chu ka chhuak ve ta chauh. Kan in kawngka zawna kan din te chuan a lut hmasa zawkah a ṭang dawn emaw ka ti a, mahse a teuh hian a hnai lo. Ka hnungah chuan a ding tlat a, ṭawngkain sawi kher lo mahse lut hmasa tur chuan min duh tak zet a ni. In chhung kan luh te chuan naupang ang maiin min zui zum zût a, ka nu leh pate'n min hmuh chuan mak an lo ti khawp mai.

"Nute, Bawihi" an rawn ti rual ṭhawt a, a awm ve tho e. Kan leng dawn tih pawh ka hrilh lawk lo va, anni tan chuan kan kal chu mak tih loh theih pawh a ni lo.

"Nu, pa, kan lo leng dawn a" tiin ṭhutthlengah chuan ka ṭhu thla a, u Hruaia pawh ṭawng miah lo hian ka bulah chuan a rawn ṭhu ve nghal.

"Nute, enge in lo kal chhan? Thil thleng a awm em ni? Ni dangah in lo kal ngai si lo va" mak ti tak hian ka pa chuan a lo ti ta nge nge a, a hmel aṭang khan zawhna a ngah ka ring reng a ni.

"Paa, i va zawt ho tak. An lo leng ve a nih hî, an lo leng thei lo pawh a ni hleinem" ka chhan hmain ka nu chuan a lo ti vat a, a ni ve chiah. Kan in a ni ve a, kal thei lo leh leng thei miah lo pawh ka ni hleinem.

"Dik chiah ti raw nu? Ka pa hi min ngai ve miah lo em ni? Keiin ka ngaih teh lûl cheu nen" nui chung chuan ka ti ve nghal bawrh bawrh a, chutianga hlim taka ka ṭawng te hlei hlei chuan ka pa chu a tihamhaih lehzual niin a lang.

"Aih, ni lo ve" tih chiah chu a rawn sawi a, a mak tihna erawh a la reh famkim lo chiang hle a, a mak tih chhan bera ka rin chu u Hruaia ka bula a awm ve run leh hlim taka ka ṭawng vel vang chu a ni.

"Nu, pa, zanina kan lo kal chhan chu thil sawi duh kan nei a, chuan khawngaihin min lo ngaihthlak sak hram dawn nia" ka tih chuan an rawn hawi chhuak dun rang hle a, ka pa chuan a TV en lai chu a off zui nghal hmak bawk.

"Ni e ka pu ka pi, in hnenah hian thil sawi duh tam tak kan nei a ni" u Hruaia chuan a rawn ti thum ṭial ve ruai a, chutianga a rawn ṭawng chhuah ve tâk avang chuan an thutakin an awm dan pawh a danglam ta deuh.

"A ni maw, eng lampang nge in sawi duh chu ni a? Bawihi, i ṭhen duh tawh thu i sawi dawnah ngai ta ila, i hlimin chutiang thu i sawi ka ring chiah si lo. Eng thil pawh sawi dawn ula, ngaihthlak nuam deuh zawkin in sawi dawn nia" ka nu chuan a rawn ti thuai thuai a, thu dengkhawng leh rilru tina thei lam hawi zawng sawi turah min ngai ni berin ka hria.

"Kei hi u Hruaia bulah ka cheng hlen tawh dawn a ni. Nu, pa, in bula ka insawi lawk anga ka awm loh avang hian min dem em? Mahse maw khang hun lai pawh khan u Hruaia hi ka hmangaih reng a, ka haider lui mai mai zawk a ni. U Hruaia ka tih nat hian ka na ve zel a, khawvela ka mipa hmangaih ber laka phuba la chhunzawm tur hian ka thinlung hi a huaisen tawk tawh lo va, phuba lak chhunzawm ai chuan a ang chhunga kir leh ka thlang ta zawk a ni" ṭap miah lo chuan ka ti tluan chhuak parh a, ka ṭah miah lohna te chuan ka thusawi chu ka tih tak takzia an nemnghet thung.

"Âwwww Bawihi, i tawrh ang hi tuar ta ila kei chu ka kir leh theih hi ka ring tawh lo a ni. I lo va tuarchhelin hmangaihna i lo va ngah tak em" ka nu chuan mittui tla pur hian a rawn ti a, ka pa chuan lo kuah vatin

"Chutiangin an sawi ngai hleinem nui, hlim taka in cheng dun leh thei dawn a nih phawt chuan kei chuan i thuthlukna chu ka pawm e. In lo cheng dun leh ta a nih paw'n a hma ai zawngin in fimkhur dun lehzual tawh ang a, in thil lo tihsual tawh te hmang chuan in insiam ṭha ang a, in inhmangaihna pawh a zual tulh tûlh zawk ka ring a ni" ka thuthlukna phal lo tur zawk leh pawm harsa ti zawk tura ka ngaih ka pa chuan ka nu kuah chung hian a rawn ti nghet charh a, ka pa berin ka thuthlukna ṭha min tihpui thu a sawi avang chuan ka rilru chhungril chu a hlim sawt hle bawk.

"Ka pu, ka pi, kei hian in fanu hi ka phu lo tak zet a ni. Tun aṭang chuan duat takin ka enkawl tawh ang a, kan nupa inkar boruak ṭha lai tichhe thei khawp thil ka ti leh tawh ngai lo vang tih ka tiam a che u" u Hruaia chuan a lo ti ve a, ka nu chuan ka bula ṭhu chu a en ran a, u Hruaia lakah chuan a lung a la awi chiah lo a nih hmel.

"Ni e, Hruaia pawh i chungah ka lo che lutuk te pawh a ni ang e. Kan fanu hi kan thisen a ni a, rilru na leh beidawnga i siam avang khan ka insum zo ta bik lo a nih kha! Tunah chuan i tihsual te i hre tawh a, kan fanu hi phatsan leh ngai tawh lo turin enkawl tawh ang che. Inṭhenna hial in tawng leh a nih ngat chuan kei hian engtikah mah ka awm dun tir leh tawh ngai lo vang che u" ka pa chuan a rawn ti leh a, chutah u Hruaia chuan

"Ka pu, ka chunga i chet dan avang khan nagmah leh nangmah inthiam lo lovin min khawngaih lo la, kha aia let tam taka na leh hrehawm kha ka phu tih ka hria alawm. In fanu hian thil tam tak min zirtir a, ka hriatthiam loh thlengin min hrilhfiah vek asin. Chuvangin tun hmaa ka thil lo tihsual tawh ang kha a thleng nawn tawh lo ang a, Nutei hi ka dam chhunga ka nupui ni reng turin ka ṭhen leh tawh ngai lo bawk ang" a rawn ti ve ta duah a, ka pa chuan u Hruaia chu a lo en ran thung. An pahnih hnîh chuan an insawisak dan vel chu an ngaihtuah let a nih ka ring.

Chutiang thil vel kan sawi fel hnu chuan kan boruak chu a ṭha ta em em a, ka nu pawh ṭap tawh lovin a hlim leh tawh vîau zawk a ni. Kan kal lama haw hma duh thu sâwi sawitu zawk kha a len rei duh zawk zawkah ka ṭang leh ta tlat a, a tawpah phei chuan riah ka duh ta híal. U Hruaia chuan a chhungte lama a va hrilh a, anni paw'n an lo phal nasa khawp mai. Ka room-ah chuan u Hruaia nen chuan kan mu dun a, mi pakhat len tawk na chauh tura siam khum a lo ni kher bawk nen khumah chuan kan mu tawt vîau. Amaherawhchu, chutianga tawt deuh taka mut chu nuam ka ti a, u Hruaia taksa lum ngheng chunga ka mut avang chuan ka mutui dawnin ka inhre tlat bawk.

"Hei i muhil ringawt dawn em ni? Ka muhil ve thei miah lo a nia" ka nghawng zawna rawn thaw lum ham ham chung hian u Hruaia chuan a ti a, meng chuang lo leh nui sak chung hian

"Kei chu i bulah ka mut hi chuan ka muhil tui dawn tih ka chiang, chuan engvanga mu thei lo nge i nih?" ka lo ti a, ka beng chu a rawn tuai neuh neuh a, a mi khawih dan vel chuan ka mut a tichhuak zual.

"Hetianga tawt tak leh i taksa dek reng chunga ka mut chuan ka zauthau alawm, tunah phei chuan ka inpeih vek tawh. Nute, ti lawk mai ang" tiin a inbeng kang zui a, kei chuan meng sîar siar chung hian

"U Hruai, ka mut a chhuak asin. Chubakah ka nu leh pate'n kan thawm an hre palh ang e, ka duh rih lo" ka ti a, ani erawh chuan ka thusawi ngaipawimawh lo zet hian min rawn fawp a, ka ir a fawh lai te chuan ka châkna te chu an rawn chhuak zui ve leh nghal mai bawk. A mi tawhna te hian awlsam tê tein ka châkna a ti chhuak a, a mi khawih dan chu mipa dangte min khawih dan nen chuan inang lo tak a ni.

"Ka rei lo vang, i duh leh muhil pah rawh" ti leh supin a rawn che chhunzawm nghal mial mial a, ka taksa chu a za leh chuai chuai tawh. Ka mut a chhuak ti si kha nawmna nasa lutuk avang chuan ka muhil leh ta chuang lo va, khawnge ka awm tih theihnghilh ṭhak khawpin ka ngaihtuahna te chu a vawrtawp thlen châknain a tuam khat vek.

Tunah chuan u Hruaia nena pangai taka kan chen dun leh aṭangin thla 2 lai a lo liam leh ta reng mai. Ka pa leh u Zualtei te pawh ka chet dan mawi lo tak takte avangin ngaihdam ka dil a, thisen taka inzawmna nei lo mah ila anni chuan unaunu leh fanu ang maiin min lo en ve niin ka hria. Ka tawrh ngaituah chuan anmahni zawkin ka hnena ngaihdam dil an bat nasat thute ka pa chuan min hrilh a, kei chuan ka tawrhna leh rilru natna te hawisana a hma ang chiaha ka nun leh tawh thute ka lo hrilh ve a, chutianga kan titi hnu phei chuan kan hlimin nghal kan inchhuah siak leh lûai luai tawh.

"Hello" Feli call chu pick-up in ka lo ti a, ani nen hian tun lai chu kan inbe khat riau. Hmanni lawkah a Master degree neih kan lawm a, ka rin ai daihin a pass ṭha leh nghal.

"Ṭawngtheinu, engmah i rawn sawi loh danah hian i lo theihnghilh fai leh vek tawh tih ka hria. A hrim hrimin tun lai hi i haihawt tlat, thil thleng a awm em ni?" a rawn ti zawt zawt a, a thusawi aṭang chuan theihnghilh ka nei tih ka inhre zui zat bawk. Feli te hi thla leh maiah khian Sir Joseph-a nen dan khatna in tiam tlat e an ti ve tawh dawn a, an inkawp rei ve vang vang tawh bawk nen a hun tawh pawh ka lo tihpui khawp mai.

"Ka theihnghilh hauh lo, ka hre renga ka rawn be lo mai mai che a nih hi" ka ti ve ta zaih. Tun lai hi ka haihawt thar rîau mai a, enge a chhan han sawi fak tur lah hi ka hre der si lo.

"Awi i va phakar chiang ve le! Ka sawi aṭangin i thil lo theihnghilh kha i hre chhuak mai mai chauh a nih kha! Chuan kan tlangval senior hausa suala chu i lo be tawh em? Lo phal lo nâ teh se, a châk lo vang" duham tak chuan a rawn tih zawm leh bawrh bawrh a, hetiang hi keini ṭhian dun mizia dik tak a ni ka ti lo thei lo.

"Ka sawipui tawh ngei alawm, mahse u Hruaia hian a awm dan aṭang hian a remtih vak hmel loh niin ka hria. Ka sawipui lai paw'n aw min pawh lo hrim hrim, a chhan tak a sawi bawk si lo. Nangmah hian mi dang i hre mai lo em ni? I classmate vel aṭangte tal paw'n, kei chu nu ka ni tawh bawk nen a zahthlak ve deuh ka ti" ka rilru dik tak chu ka hrilh ve mual mual a, engtin tak rawn ṭawng leh ang maw!

"A va ninawm tak! Ka lo kal dawn, amah pawh kha inah lo awm se, ka be duh tih lo hrilh rawh" tiin phone chu a off zui hmak a, a rawn kal tak tak chu ka ring bawk. A hrim hrim thuah u Hruaia pawh hian engvanga mo ṭhiana ka ṭan chu phal lo tlat nge a nih reng reng nì.

"U Hruai, lo kal teh. Feli a lo kal dawn a, a be duh che a nia, chuan a rawn ang bawrh bawrh maithei bawk" bathroom aṭanga u Hruaia a lo chhuah rual chuan ka lo ti vat a, a sam la huh deuh chûap chung hian min lo en ve thuai. A awmna chu ka awmna aṭangin hnai lutuk lo mahse a rim chuan ka hnar a verh nghal zar a, a hma paw'n a inbual zawha a rim hi tui ka ti ber ṭhin a nih kha!

"Enge lo tih a tum a?" a sam vel hru mawlh mawlh pah chuan a rawn ti a, keipawh a bul hnaiah ka kal phei zui ve mai bawk.

"A ngai kha a nia, kha hmân zana ka sawipui che kha maw le" ka ti pangai ve leh mai a, ani erawh chuan min lo chhuk melh ta run. A hmel aṭanga a lan dan chuan thinrim chiah lo mahse a lung chu a awi chiah lo a nih hmel.

"A theih loh ka tih tawh kha, ka phal lo" a lo ti leh hmuk a, a kekawr hain T shirt dum chu a inthawlh zui zat. Engvanga phal lo nge a nih lah chu a sawi duh leh chuang tawp si lo.

"I phal lohna chhan hi hriat châk vîau mah ila ka zawt rih lo vang che, Feli zawk i phal miah lohna chhan dik tak i lo hrilh dawn nia" tiin ka kal tau ngháwng nghawng a, awmze nei miah lovin ka ṭah chu a chhuak leh et et tawh. Tun hnaia ka mood hi ka hrethiam thei lo, ho té teah pawh ka ṭah a chhuak leh thut zel.

"Hei ka nupui, engatinge i tih tauh leh ṭhin? Ka phal loh chuan aw min pawh ve mai la" tiin ka thawmhnawh thleh lai chuan ka hnung lam aṭangin min rawn kuah a, a phal lo tlat chu awm ang lo ka ti ve êm a ni. Ka ngawi reng a, min biakna chu hre lo ang hmakin ka thuamhnaw thleh lai chu ka tih zawm mial mial.

"Dik taka sawi chuan mo ṭhiana i ṭan ka phal lohna chhan chu i mawi dawn lutuk a, mipa dangin an it dawn lutuk che a, chuvang chuan ka lak aṭanga i taksa a awm sawn tur hi ka phal lo a ni" awi awi awi, a phal loh chhan a rawn sawi hohzia hî. A mawl ti dawn ila Aizawl leh Champhai DC lai a lo ni ve tawh bawk si, nge nia hepa hi a rilru a la naupang lutuk zawk.

"Ka awih ṭhai lo, khatiang thu ho lutuk avang khan i phal loh ka ring lo. A chhan tak chu i la zep a nih ka ring, ka laka thuruk neih te chu i thiam zawng tak a ni tih ka hria alawm" ka ti let salh a, a thusawi chu ka tan chuan rin a har ve êm bawk a ni!

"Ka phal loh chhan ka sawi kha chu a ni tak tak alawm. Ka nupui, mo ṭhiana ṭan chu i duh hrim hrim em ni?" thuamhnaw pawh thlep hlei thei lova min kuah bet tlat chung hian a rawn ti dam leh dup a, a rim chu ka hnar chhungah a lut chiang hle bawk.

"Ka duh leh duh loh lam pawh a ni lo, a ṭhian ṭha ber te ka ni ve a, a best atan chuan kei tluka hman tur a hre kher bik lo vang" ka ti peng peng a, kan thusawi chu ho vîau mahse ka thin te chu a rim ru leh ṭûn tawh.

"A nih chuan kei hi mo neitu ṭhian ka nih ve a ngai ang" a thusawi avang chuan min kuahna aṭangin ka tal sawn vat a, a hmel chu chiang takin ka en bawk. A fiamthu ti dawn ila fiamthu hmel a pu lo va, a fiamthu lo ti dawn ila a thusawi chu fiamthu ang maia ho lam a ni bawk si.

"I mawl em ni? Sir Joseph-a chuan best tur te chu a nei ve bawk ang chû, a zah pawh i zak lo em ni?" ka ti leh thâwr a, a sawi awm ang lo ve bawk êm a ni. Feli bulah sawi ngat phei se chuan engtinnge boruak a awm ang pawh ka hre lo, kei ai aia mak a tih ka ring.

"Ka mawl lova ka zak lo bawk, ka hmelhriat chu ni lo mahse ka hre chawp mai dawn alawm" a rawn ti sam et a, hepa hi chu tih ngaihna a awm thlâwt lo. Ama tawkah hian a luhluh ve em em a, Feli nen inbe zawk se a ṭha ang.

"Ka sawipui peih tawh lo che, i duh leh Feli i lo sawipui dawn nia" tiin room aṭang chuan chhuah ka tum a, ka kal thui hman lo ngei mai. Ka bana chelhin a awmna lamah min pawt let dâwr a, ka dar tâwn tawna vuanin min en chhuk run bawk.

"Ka inbual zawh khan i mitmengah hian enge emaw ni ka hmu tlatin ka hria" awi hepa rilru chak leh thil hriat rei theih si zia hi! Ka awm dan aṭangin engkim kha a lo man thiam leh vek tawh tih ka hre mai.

"Engmah chutiang a awm lo, i rin thu mai mai a nih chu!" ka lo ti ve hmak a, mood off lai a ni bawk nen ani biak reng chu ka hne deuh tlat a, in hnuaia chhuk thlak vat vat chu ka duh tawh a ni.

"Tak tak maw!?" tiin min rawn fawp a, rang mang khenga ka lo chhan let avang chuan ka inhaw ngawih ngawih. U Hruaia min fawhna chu chhan let ka tum pawh a ni lo, ka thunun hmain ka hmui te chuan an lo chhang let zawk a ni.

"Eu eu eu" min fawhna aṭanga awm sawn zeuh pah chuan a rawn ti a, kei lah chuan min fawhna kham lo em em hian ka lo la en let sîai siai zui. A rawn nui ver ver a, min hriat chian êm avang chuan ka nui ve suk ta ringawt.

"Sawi lo mah la kei ang thovin min thlahlel tih ka hria e" tih pahin min rawn fawh zawm leh zat a, a hma ai chuan uar tawh tak a ni.

In hnuaia kan chhuk hnu rei lote ah Feli chu a rawn thleng ve a, a hmuh duh ber u Hruaia pawh sitting room-a sofa-ah chuan a lo ṭhu ve run bawk. Feli chuan u Hruaia chu a nau ang maiin a hrawk hrep a, pakhata lah chuan a tlawm zawk nih hlau tak hian a lo chhang let ve zel. Pakhat a ṭawng ring em em a, pakhat zawk lah a ṭawng zawi leh em em bawk si. Chokaa ei rawng bawl pahin u Zualtei nen chuan kan lo nuih ṭiah ṭiah a, Feli chuan an in emaw a ti ni maiin ka hria. U Hruaia lah a duh lohna lama luhlul chi a lo ni ve khanglang bawk nen an inhrilhfiah rei ngat ngat hle. Ka pa a lo haw hlauh a, Feli chuan ka pa chu thil awmzia hrilhin a dil ta ringawt.

Chutah ka pa'n an thusawi awmzia leh khel ber a hriat chian hnu chuan a nui chhuak ta hawk hawk a, mi fing tan chuan nuih lohna chi pawh a ni lo alawm le. Rei fê ka pa'n u Hruaia a sawipui hnu chuan u Hruaia paw'n mo ṭhiana ka ṭan chu a phal ve ta hram a, chutianga inhnial hrep hnua awlsam taka a phal leh mai si chuan Feli thin a tirim leh ta tlat. Feli chu a lawm vîau dawn emawa kan ngaih laiin u Hruaia chu a hau leh hrep a, chungte chuan ka pa nuih a tiza zual. Feli chuan a an khum bawrh bawrh a, u Hruaia lah chu hre lo ang hmakin a ngawi run a, a phone chu a khawihsan mual mual daih.

Tin, u Hruaia chuan theih pa tawpa min dil ngawng ngâwng avang chuan a lu tuamna chu phelh ka phalsak tawh a, phelh ka phal thu ka sawi tirha a lawmzia chu pui tak a ni. Amaherawhchu, a bianga hmul ver erawh a meh fai ka la phal leh ta chuang lo. Ani paw'n lu tuam ang em emin hmul meh fai chu a la serious lo va, ka phal rih lo tlat bawk nen a inzuah buk chhup mai. A biang vela hmul te chu a tam em em hran lo va, a mawi tawk chiahin a ṭo a, chungte chuan a tihmelṭha zualin a tilang pa em em bawk ni berin ka hria.

Kar thum a ral leh meuh chuan Feli te inneih ni pawh a lo thleng a, ka kawrfual hak te chu mawi ka tiin inhmeh ka inti ngei mai. Tin, Feli mawlh chu a mawiin a simple a, a make-up inhnawih zawng zawng nen mo hmelṭha tak a ni chiang alawm. Dan khatnaa innei an nih avangin ṭawiawmtu leh lawmpuitu te chu an ṭhahnem em em a, u Hruaia nena kan inneih ni ai pawhin mipui chu an tam zawkin ka hria. U Hruaia ber chu a buaithlak ve leh ta tlat mai. Movie-a spy te ang mai hian min enthla ru reng a, tunge ka bulah awma tunge ka biak tih te chu a chik em em a, keimah tak pawh chu ka awm a nawm loh phah vek.

Chhun lam boruak avang chuan ka ni nghulh a, ka chau ve deuh chuan ka hria. Feli'n awm khawtlai tura min tih ṭang ṭang chung pawh khan haw ka duh lui tlat a, chu pawh kan nupa room-a mut siai siai ka châk tawh vang a ni. Ka inbual fai zo tawh bawk nen khumah chuan hahdam tak hian ka mu a, u Hruaia erawh in hnuai lamah a chhuk zawk a, a rawn chhoh leh thuai tur thu min hrilh bawk. Rei lote hnuah u Hruaia chu a rawn chho a, khuma lo lawn kaiin ka bulah chuan a rawn inthawlh ve nghal.

"U Hruai, kan ti ngun mah mâh lo maw?" ka hnute a rawn zen rual chuan ka ti a, ka chau ve deuh bawk nen nupa nun hman chu ka peih vak rih lo a ni.

"Ngun pawh ka lo hre hleinem" tih pahin min rawn fawp a, chau vîau emawa ka inhriat laiin ka taksa te chuan min khawihna chu a lo dawngsawng ṭha leh em em lawi si.

"Min dim deuh ang che" a awma nam sawn deuh pah chuan ka ti a, chutah nui ver ver chung hian min rawn fawh zawm leh nghal zat a, a phur lutuk chu a nuihzat thlak zawk.

Last Chapter 23

Zing a lo ni a, ka rawlin ka tho peih lo hle. Hmeichhiate hi chu mo kan nihna hian ken tel a lo ngah em em a, pasal ka neih dawn khan chutiang zawng zawng chu ka lo ngaihtuah pha lo hrim hrim a ni. Ka bula tui taka mu, hmelṭha em em leh pa em em, ze cool raih leh mi hmangaihna ngah tak ka pasal ngei chu ka en vawng vawng a, ka phal loh tlat avanga a la meh fai loh a hmul te chu a inhmeh ti em emin ka en tlawk tlawk bawk. Ka pasal ang em ema ka mihring hmangaih hi khawvelah an awm leh tawh ka ring lo va, awm leh tur pawhin ka duh tawh bawk hek lo.

Khum aṭang chuan ka tho chhuak a, dawhkana ka file dah chu ka hmu nghal zat. File chhunga lehkha te chu a dik leh dik loh ka ennawn leh thlap a, a tana ka ruahman chu ani chuan a hre hauh si lo. Chutia ka file endik zo ka khung fel lai mek chuan phone vibrate ri hi a lo awm a, a rik dan aṭang chuan message lo thleng a ang mah zawk. A hriat loh laia a phone lo en ruk sak chu ka duh lo vîau na a, ka en châk em avang chuan ka ban ta nge nge. Lock emaw password emaw engmah a lo dah lo va, Whatsapp ka luh chuan message a lo tam khawp mai. Chuta ka mit la em emtu pakhat chu Professor Nunkima tih hi a ni a, message pawh a rawn thawn hnem khawp mai. Ka ngaihtuah neuh neuh laiin ka kut chuan message te chu a lo open hman a, ka thil hmuh avang chuan han ngaihtuah chhunzawm mai dan tur pawh ka hre lo hle.

"I duh chuan i apply ve thei a nia, nang phei chuan NET i nei tawh mai bakah Doctorate degree hial i nei tawh a, i tlin theihna chance a sang khawp mai" tih te chu a lo inziak tlar thla nuai a, chupa thil rawn sawi chu ka hrethiam pha chiah lo.

A phone khawih ka châk ang huin ka thil duh ang ka hmu lo nge ni phone chu a awmna ngaiah ka dah leh vat a, min hmuh hman ka hlau ru hle bawk. Bathroom-ah intifai turin ka lut a, rei pawh awm lovin ka chhuak leh a, ka chhuah leh chuan u Hruaia chu lo tho harh tawhin min lo en ran bawk. A zing tho hi chu a nelawm loh vang ni miah si lo hian biak chîam hi a fuh vak lovin ka hria. Ani hi chu mi ṭawng tam lo leh ze harhvang lutuk lo a ni a, mahse chu chu amah ka duh zualna em em a ni thung.

"U Hruai, ṭawng peih loh hmel vîau mah la thil hmuh tir tur leh pek tur che ka nei a" a bula ṭhut thlak pah chuan ka ti a, enge ka sawi awmzia ti ni awm tak hian a mit hmul chu a lo kan uk bawk. Ka thil sawi tum leh pek tum chu a duh lovin a thinrim phah ang tih ka hlau ru ang reng hle a, mahse kei chuan ama ta tur dik tak niin ka ngai a ni.

"Hei hi i ta tur dik tak a ni a, kei chuan ka ta tur niin ka hre lo a ni. Nangmah rawn hmasa miah lova ka lo buaipui fel erawh min hrethiam la, he ka thil pek che hi pawm ngei turin ka duh bawk che" tiin file chu ka pe a, a lo ban ve mai bawk. File chu hawngin a chhunga lehkha var chu a en a, a ngawih reng danah a rilruin a chhiar tih ka hre thei. Kei chuan a awm dan chu ka lo en reng a, a thinrim ang tih mawlh chu ka hlau a ni.

"Engvangin nge he thil hi i tih? Hei hi chu i tana ka sak a ni a, i ta tur lîau liaua ka pek che a ni bawk" a ngawih deuh vang vang hnu chuan a rawn ti ram hmak a, mahse thinrim lutuk erawh a ni chiah lovin ka hria.

"Ni lo u Hruai, kei chu mo ka ni a, i nupui ka ni bawk. Ka tihtur chu ka lawina in chhunga ka pasal leh a chhungte enkawl a ni a, hna dang thawk lova kan fa enkawl tura pasal nei ka ni" pangai tak chuan ka ti a, ka thusawi chu a pawm zawng a nih loh hmel hle.

"Nute, hetianga hna pangai ka thawh tawh loh avang hian em ni i dawr hi min pek?" a rawn ti chhuak sup a, hna thawk kher lo mahse eng hna hna emaw chu a thawk tih ka hre ru tho a, min chawm hneh hle dawn tih pawh ka hria, mahse amah hian dawr chu enkawl se ka duh ber. Chuan, ani hian ka ṭawngkam pakhat ngaihven loh a la nei tlat mai.

"Ka pek chhan che chu i enkawl tur dik tak a nih vang a ni. I duh chuan hna pawh i hmu thei tih ka hria alawm, i phone-a hna dil ve tura an tihna che pawh a tam a, an message te saw ngaihven sak ve deuh la a ṭha ang. Chuan ka sawi leh ang, kei chu i nupui leh nangmah enkawl tur hmeichhia ka ni a, kan fa enkawl tur ka ni bawk" ka ti nawn leh sak a, min lo en reng a, paper bawk chu a bih leh daih a nih chu!

"Enga!? Nute, eng maw i sawi kha!? Fa i ti em ni? Tunah khan kan pahniha kan fa tur i pai em ni?" thil hre chhuak thut leh hamhaih lutuk avanga sawi ber tur pawh hre mai lo ang hian a rawn ti chhuak thut a, paper chhiar reng a rilruah a lang tawh lo. Tunah chuan ka ṭawngkam hman hre tura ka duh ber a hre tawh bawk a, ka hlim hle a ni.

"Aw u Hruai, hman ni deuh khan ka inringhlel a, ka in test chuan ka lo rai ta ngei a ni. A hmasa zawkah kha chuan ka nu leh ka ṭhiannu kha ka hrilh hmasa ber a, mahse tunah chuan vanduaina ka tawh leh ka hlauh avangin nang ka hrilh hmasa ta ber che a ni. Ka pai puitlina ka hrin chhuah theih ngei pawh ka ring tawh a, tun aṭang hian ka fimkhur ru tawh hle bawk" nui ver ver chung chuan ka ti a, chutah a ni chu rawn che thutin a lamah min pawt phei a, a awmah ka bei leh ta hle hle.

"Ka nupui, nang hi chu ka tan hian malsawmna i va ni chiang em. Dam taka kan fa a lo pian chhuah ngei theihna'n nang hi ka enkawl che ang a, a hmaa i chunga ka tih loh zawng zawng kha ka ti vek tawh bawk ang. Nang ka chawm theihna'n che leh nuamsa taka i awm theihna'n hna ka dil ang a, mipa ka nih angin ka chhungkua ka enkawl bawk ang. Ka lawm e Nute, hetiang em ema min hmangaiha min tihhlim avang hian i chungah ka lawm tak zet a ni" ka tukhum sam chul thla hlîau hliau chung hian a ti a, min duat a tumna ṭawngkam chhuak avang chuan ka lo tuiral lo chauh a ni.

"A dik chiah, tunah chuan hmâna ka pasal LALHMAHRUAIA ngei kha i rawn ni leh ta. Pasal chuan nupui fanau te enkawlna'n hna a thawk ang a, nuamsa tak leh hlim taka a chhungkua a enkawl theihna'n hna a thawk ngei tur a ni. Chu chu phurritah a ngai tur a ni lo va, a tih ngei ngei tur thil a ni tih a hre zawk tur a ni" ka tichhuak ve dap dap a, chutah ani chuan

"Nang té reuh hian ka hriat loh min hrilh a, ka thiam loh min zirtir reng mai a nih hi! Vawiinah in check-up turin kan kal nghal dawn nia" a rawn ti a, aw tihna'n ka lu chu ka lo bu ve nghâuh nghauh.

"Enteh, hmâna ka thusawi kha a la dik reng a nia aw" a hmel en chho hâ chung chuan ka ti a, ani erawh chuan ka thil sawi hriatthiam loh hmel zet hian min lo en chhuk thung.

"I hriatthiam loh hmel bawk si a, ka'n sawi tawp mai ang e. Ka rai thu i hriat hian thil danga min biak ṭhin aiin ka bulah i ṭawng thui ve ziah, chuan tunah pawh hei nangmah ang lo takin i ṭawng thui ve leh hle tawh chu a nih hi!" ka tih chuan a rawn nui nghawr dat dat a, keipawh chuan ka lo nuih let ver ver.

Chaw kan ei lai chuan u Hruaia chuan nau ka pai leh tawh thu a sawi a, kei ai aiin naute neih chu an châk emaw tih theih tur khawpin an awm hlawm. An hmela hlimna lang chuan min tihlim a, naute pawh neih vat vat ka châk phah vek. Chhun lamah chuan a sawi lawk ang ngeiin in check-up turin min kalpui a, doctor te chuan thla hnih leh a chanve lai ka pai tawh thu min lo hrilh bawk. Ka in test khan pregnacy test kit pangaiin ka in test mai a, thla engzata upa nge a nih tih lam reng ka ngaihtuah thleng rih lo a ni. Chawlhhmun lama ka dawr pawh u Hruaia'n a enkawl chhunzawm ta mai a, ka dawr ni tawh lovin ka pasal dawr a ni tawh zawk mah ang chu! Ka dawr enkawl tura ka pek ni kha chuan a duh lo lulai khawp a, a chhan pawh keimah ka lo inkhawl ve bek bek theihna'n leh hlim taka ka nun ka hman theihna'na a hriat vang a ni.

Ka dawr kan hawn tirh te khan u Zualtei leh ka pa khan mak an ti hle a, a chhan pawh u Hruaia'n dawr ang tur híala lian in a lo sa tih reng reng an hriat loh vang a ni. Mahse u Hruaia chuan ka pate chu a bul aṭanga a lo tum rilruk dan engkim chu a hrihfiah vek a, a hnuah chuan mak ti tawh lovin an lungawi ve leh ta mai bawk. Chuta karah kei lah kha ka lo la inla ve leh chhawng a, ka thil chapopui kha ka ta dik tak a ni lo tih ka hre miah lo kha a âtthlak tak zet. U Hruaia chuan ngen namen loh hian dawr chu keima'n enkawl chhunzawm leh mai turin min ngen a, mahse kei chuan dawr chu ka enkawl chhunzawm zui duh ta tlat lo ve thung.

Ka pasal chu ka ring tawk a, pasal leh pa ni mai tur a nih angin dawr chu ṭha lehzual zawka a enkawl chhoh theih ka ring bawk a ni. Kei hian lo enkawl chho zel ta ila, ka rilru a kal sual ka hlau a ni. A chhan chu thil ho tè emawa kan ngaih thil te hian rilru chapona min lo siam thei nasa tih ka hria a, ka enkawl chhung ringawt pawh khan mahni inlulinna rilru leh chapona rilru ka nei hman deuh thaw chu a nih khá! U Hruaia chu dawr hmanga pawisa ka hailuh avanga ka hmuh hniam palh ka hlau a, ka pasal a nih angin zah tak leh hmangaih taka enkawl ka thlang ta zawk a ni.

Nilaini a ni a, dawr lamah chuan u Hruaia chu ka zui a, hnathawk te paw'n min lo en duh vauh vauh hle. A bik takin hmeichhe tleirawl ho chuan min zah a, min en ṭha ngam lo leh hîal zawk. A chhan chu a hma khan u Hruaia chu an star thute kha an sawî an sawi a, kei lah khan ka pasal a nih thu ka sawi duh loh lai tak a ni bawk nen tuna min be zak thar vel chu ka dem hran em em lo. A hawihawm thlak nia ka hriat avangin keimah chuan ka be siam siam hlawm a, la zak ru vîau mahse min chhang ṭha hlawm hle. Zana kan chaw ei kham chu zan dang ang lo takin sitting room-ah TV kan en ṭhup a, eng kan hria ni maw!

"Vawiin khan Lunglei District Court in Zonunmawi d/o Lalrochhuma an pawngsual avanga kum 7 chhung tang tura a tih pahnih Lalengzuala s/o Ramdinsanga leh Vanlalzawma s/o Thawmsailoa te chu bail chhuah an nih thu thuthang a awm a, hei hi news reporter lam te'n ngaihven vatin thu chiang an zawng nghal. A lan danin pawikhawihtute pahnih hi bail chhuah ngei an lo ni a, news reporter te'n a chhana nia an sawi ber chu an pate thil tih theih vang a ni an ti" chanchin thar chuan a rawn ti ta mai. Ka thu hriat avang chuan ka taksa te chu a ṭang ṭung a, hlauhthawnna tam tak ka nei zui bawk.

"He thuthang hi a lar chak em em a, Lunglei mipuite chuan Court an demin a victim ber Zonunmawi chuan he thil thleng hi ngaihven turin an ngen bawk a ni. Lunglei mipuite chuan Court rorel dan chu mak an ti hle a, mi lian fa nih avanga chutianga criminal actor te punishment tawrh hun chhung tur pawh tuar tir lova an bail tir ta mai zawk chu an hrethiam lo hle" tiin chanchin thar chuan a rawn puan chhunzawm leh a, ka khurh nasat lutuk avang chuan ka kut te chu ka thunun thei lo hîal a ni.

"Mi dawihzep ho chu! Keimah ngei hian ka buaipui ang. Nute, hlauthawng suh aw? I bulah ka awm tawh a, ka venghim tlat tawh dawn che a ni" u Hruaia chuan nghet charh hian a rawn ti vat a, ka taksa leh kut khur nasa lutuk chu a lo hmu a ni ngei ang a kut lum thar thar chuan a rawn hum zawm nghal.

"Lunglei District Court reng reng pawh chu an va ti ho ve le, Mama i kal dawn ro ro chuan Aizawl lamah hian case i file ṭha zawk dawn nia, Lunglei chu thil chiang nial lo a awm leh palh zawk ang" ka pa chuan a rawn ti ram ve hmuk a, kei erawh ka awm dan a la dik hlei thei lo.

"A dik chiah u Mam, Aizawl lamah hian thil tih pawh a awlsam a, kan tan paw'n buaipui a hahdam thlak zawk bawk ang" u Zualtei chuan a rawn ti ve nghal zung zung a, ka ngawih reng avang chuan u Hruaia chuan kan nupa room lamah min hruai chho zui ta daih.

"Nute, i la hlauthawng tih ka hria alawm, mahse kei i bula ka awm chhûng hi chuan hlauthawng lo hram turin ka duh che a ni. A bik takin kan naute tan pawh i hlauhthawn lutuk chuan a ṭha lo vang" sofa-a min ṭhutpui pahin u Hruaia chuan a rawn ti dam dap a, a bula awm hi chu a hahdam thlak thlâwt a ni. Chutah ka phone chu a lo ri a, ka rilru buai nen khawih pawh ka khawih peih lo.

"Aw ka pu" tiin ka bula mi chuan ka phone chu min lo pick-up sak a, loud speaker-a dahin a keng kang deuh bawk.

"Hruaia, chanchin thar kha in lo en em? Kei chu naktuk lama chhoh nghal mai ka duh a nia, Nutei kha enge a an hrim hrim?" ka pa chuan lehlam aṭangin a rawn ti zung zung a, a ṭawngkam aṭang chuan min ngaihtuah hle tih pawh ka hre thei.

"Nutei chu a ngaihtuah awm lutuk lo ve, tlêmin a la hlauthawng deuh tih mai loh chu! Naktukah han buaipui nghal tumin chhoh ka lo rilruk a, ka pu i buaipui ngai lovin keima'n ka lo buaipui fel vek thei alawm" u Hruaia chuan a lo ti let ve vat a, anni pahnih chu ka ring tawk em em a, an chin fel theih ngei pawh ka beisei.

"Ni lo ve, ka fanu a ni a, ka buaipui ve ngei a ngai a ni. Kan pahnihin kan kal dawn nia" kal loh tum lo zet hian ka pa chuan a rawn ti nghet leh charh a, u Hruaia pawh chuan

"Aw le, ka lo lam phei che ang a, ka motor in kan kal mai dawn nia" a lo ti ve leh mai bawk. Eng thil dang mahin ka rilru a luah tawh lo va, ka chunga rawng taka che tute chu danin an phu tawk ang chiahin a hrem lo mai ang tih mawlh chu ka hlau a ni.

A tukah chuan ka pa leh u Hruaia chu Lunglei lamah an kal a, an kal chhung zawng chuan min lo be lo va, keipaw'n an tlan lakawh a nih ringin ka be buai duh ta lo. Tlai dar 3 velah chuan phone call ka dawng a, u Hruaia ngei a lo ni. Boruak awm dan a zira an cham dawn leh dawn loh thu min hrilh a, an cham vel ang tih chu ka hlau a ni. A hnu darkar fê ah pawh chanchin min lo la hrilh loh avang leh thawm engmah an rawn la neih loh avang chuan ka rilru a buai tawh hle a, zan riah ngai khawpa an awm a nih vaih chuan sleeping pills hmawm leh ka ngai a ni mai. Khatia u Hruaia ang chhunga thlamuang taka ka let leh hnu kha chuan sleeping pills chu la nei ṭeuh mah ila ka ei tawh ngai lo va, ka ei lohna chin pawh ka hre tawh lo zawk a ni. Zan dar 8 bawr velah chuan u Hruaia chuan min lo bia a, ka hlauh ang ngeiin Lungleia an riah tur thu chu a rawn sawi ta.

"Hei ka nupui, engatinge i ngawih tak reng? Ka lo haw leh thuai dawn alawm" u Hruaia chuan a rawn ti a, chhan let châkna reng ka nei lo va, ka ṭawng chhuah rual ruala ka ṭah ka hlauh avangin ka ṭawng duh lo bawk.

"Hei ngawi reng lo la, keipawh hian ka ngai lutuk che alawm" aw dam taka a rawn ti leh chuan ka ṭap chhuak ta hawk a, ka rai avanga rilru no hma em em ka ni tih pawh ka hria, mahse chutiang rilru no chu ka thunun theih piah lam niin ka ngai.

"Engatinge ka kal ve kha i phal loh tlat? Ka hlauh ang ngeiin in riak dawn ta reng a, i sual lutuk" tiin phone chu ka off zui hmak a, ka ṭah chhan chu ho vîau mahse ka ṭap tawp thei der lo. Ka phone chu a rawn ri leh nghal a, en kher lo mah ila u Hruaia bawk a ni dawn tih ka chiang.

"Hei ka nupui, khatiang khan awm lo teh. I tel lova mut te chu hrehawm ka ti ve tho alawm" phone ka pick-up rualin a rawn ti zawm zat a, kei lah chu naupang ang maiin ka lo la inhnit feih feih.

"Zanin chiah hi riah hram ka tum dawn nia, engtin tin nge ka thil buaipui hi ka chinfel ang tih erawh ka la hre chiang lo nà a" ka ngawih reng avang chuan a rawn ti leh a, chutianga min thlem velna chuan zawi zawiin ka ṭah chhuak lutuk te chu a tireh ve leh mai bawk.

"Aw le, a rang thei ang berin lo haw ang che u. Ka ngaih em emna chhan che hi ka hre miah lo, ka rai vang pawh hi a ni maithei" pangai tak chuan ka ti ve ta. Chutianga pangai taka ka ṭawngri a hriat avang chuan a rawn thaw hawk a, hahdam huai ang mai hian a awmin ka hria.

"Aw le ka nupui, ka lo haw hunah ka duat ngawt ang che" nui ri hak chung hian a rawn ti leh a, keipawh chu a hmaa ṭah chhuak em em kha ka lo nui ve leh thei mai bawk.

Vanneih thlak takin ka pa leh u Hruaia chuan ni khat chhungin an kal chhan chu an buaipui fel thei hlauh a, case pawh Aizawla transfer an dilna angin tihhlawhtlin sak nghal an ni bawk. Lunglei lam aṭanga an lo haw lai te chuan ka hlim em em a, ka rilru chuan awm ngaih a hre lo hi a ni ber. U Zualtei paw'n ka awm dan vel chu lo hrethiamin min fiam hîal a, zah buai pawh ka tum tawh chuang bik lo. Tlai dar 5 velah an lo thleng a, ka lo nghahhlelh tawh lutuk vang a ni ngei ang an lo thleng har ka ti hle. An rawn thlen tirh chuan ka pa a awm ve kur bawk si a, naupang chhia taka ka ngaihzia lo tihlan vel chu ka zak leh deuh. Zanriah kan ei laiin u Hruaia chuan an thil han buaipui dan vel tlangpui chu a sawi a, ṭha kan ti tlang a ni ang ka pawh a bu ve nghut nghut.

"Ka nupui, ka ngaih em emnu, lo kal hnai rang teh. I taksa hi ka si châk tawh lutuk a, awm ngaihna pawh ka hre lo" eina ka sengfel zo kan nupa room-a ka luh rualin u Hruaia chuan min thlahlel ngawih ngawih tih hriat tak hian a lo ti thuai a, a lam pana kal ngai lo khawpin amah zawk chu a rawn che chhunzawm zui bawk.

"Keipaw'n ka ngai lutuk che, i kalna apiangah min hruai ve tawh ang che" a awma bei hle hle chung hian ka ti ve a, a âwm lum nuam taka ka awm leh ta mai chu ka hlim hle a ni.

"Bathroom ka kalna ah pawh maw? Aw le, tun aṭang chuan ka kalna apiangah chuan ka hruai che ang a, ka inbualna ah pawh ka hruai che ang a, ka" a sawi zawm leh tur chu a hmui ka lo hup hmak a, nghal chikima a nghal leh vel tur chu ka hre peih lo lawk a ni.

"Nghal vîau zel suh, tun lai phei chu ka ṭahbelh a zual teh mai a nia. Min duat hle a ngai tih kha hre reng la, ka rilru tina zawngin awm reng reng suh ang che" ka tih chuan a rawn nui suk a, nuih suk te hi a inhmeh bik ngawih ngâwih.

"Aw le, ka nupui. Zan in aṭang hian ka duat hle dawn che tih kha lo hre tawp mai la, engkim a dik vek a ni mai" tiin min lo fawh zawm nghal a, ṭum dang ang bawkin ka taksa chuan min sikna te chu lo dawngsawng ṭha leh tak a ni!

"Tawp lawk teh, nang hian thil min hrilh loh emaw thil min hrilh tum i nei em? I hmel hi ni dang ang a ni lo tlatin ka hria" min fawh ngawng ngâwng laia namsawn chung hian ka ti a, nui miah lova min en run avang chuan ka ṭawng sual emaw ka ti hman.

"I va'n hre thei ve a, nang hian power chak tak i nei a ni chiang mai" a hmel lan dan zawng zawng thlak thutin a rawn ti a, ka sawi chhuah thiam ni chiah si loh hian a hmel chuan thil min hrilh tur a neih thu a sawi tlat alawm.

"Ka hriat chian che a ngai ve bawk alawm, nangin min hriat chian ang bawkin keipawh hian hriat chian che ka duh thei lutuk, mahse tunah chuan i hmel leh awm dan aṭangin i rilru ka chhiar thiam ve ṭan tawh niin ka hria" ka lo ti ve nghal a, ani pawh a lo nui ve sak bawk.

"Hman ni khan ka ṭhianpa'n hna dil tura min tih kha ka dil ve a, vanneih thlak takin ka lo tling ve hlauh tih vawiin khan ka hre chiah a ni. Ka hna thar tur chu Mizoram University-a Assistant professor hna a nia, History department lamah ka thawk dawn a nih hmel" a rawn tichhuak dap a, mite chuan chutianga hna zahawm leh sang an hmuh te chuan an hlim em em zel a, ani ve thung chu lawm emaw hlim ang emaw pawhin a awm lo hrim hrim.

"A va ṭha ve, mahse engatinge i va'n hlim loh hmel em em? Assistant professor hna chu i thawk duh vak lo em ni? I thawh duh loh paw'n ka nawr lui miah lo che a nia, i dawr aṭang pawh hian sum tam tak chu i thawk chhuak tih ka hria alawm" ka ti leh ta duah a, ani chuan ngawi reng hian min pawm kang lâwp a, khum lam min pan pui danah khuma titi chu a duh zawkah ka ngai mai.

"Zep lovah chuan maw Assistant professor hna tih ang vel hi chu ka tui vak lo va, mahse i thusawi kha a dik tih ka hriat hian ka tui loh pawh ka tui chawp mai a ngai a ni" ka thusawi eng ber chu nge a dik a lo tih chu ka hre leh tawh hauh lo va, a sawi tum tak ka hriat loh avang chuan zawhna mitmengin ka en nghal hâw bawk.

"Pa ni mai tur leh pasal ka nih angin ka nupui leh ka fate chu ka chawm zo tur a ni a, an mamawh leh duh leina turin pawisa ka thawk chhuak tur a ni bawk" a rawn ti nghet leh charh a, ka mitmeng aṭanga sawi chhunzawm tura ka duhna chu a hrethiam a ni ngei ang.

"Ihhh maw u Hruai, thatchhia min ti em? I chawmhlawma awm tawp ka tum te hi hrehawm i ti em? A chang chuan hetianga awm hi a ṭha ang em tih ka ngaihtuah ṭhin a, i tan hian phurrit ka siam sak ang che tih ka hlau hle bawk. Mahse maw u Hruai, kei chuan mahni fate enkawl hman lo khawpa hnathawk mi nupui leh mo nih hi ka duh lo va, ka duhin ka ni ngai lo bawk ang. Hna neiin lo thawk ni tin ṭhin ta ila, awmpui emaw nau awmtu emaw kan lak ngei a ngai ang a, chutiang chu kei chuan ka duh lo a ni. Ka hmangaihna zawng zawngin ka fate chu enkawl ka duh a, ka bula an tal tam chuan nuam ka ti ang a, chutiang bawkin anni paw'n min hmangaihin min ngaina ve dawn a ni. Ka fate chuan an pa hna bang lo haw chu phur takin lo hmuak ṭhin ngei se ka ti bawk. Awi u Hruai, kei chu fa neih ka châk tawh lutuk" ka mitthlaa kan fate awm dan tur zawng nena ngaihtuah chung chuan ka ti a, a taksa ka nghenpa lah chuan ka thusawite ngaithla kar chung hian ka dul chu a lo zut zal zâl a, chungte chuan ka mood an siam nuam lehzual hle.

"Ka nupui, khawvela ka thinlung luahtu awmchhun leh ka neih rohlu ber, i ngaih dante hi a va'n thianghlim ṭhin tak em. Kei i pasal lak tlak loh tak hian ka nei lo vang che tih mâwlh hi ka hlau hnuhnawh a ni. Ka lakah inthiam lo lovin inthlahrung lo la, kei chuan i mamawh apiang leh i duh apiang tih sak che hi ka thil tum a ni. I ṭawngkam chhuak te hian mak tak maiin min tiphur a, tunah pawh Assistant professor hna hi thawh ka châk leh zek zêk phah vek tawh" uang miah lo hian a lo ti a, a nui bawk si lo nen a thusawi chu awih lo vîau mah ila thu dik a nih ngei ka ring.

"Hei, khatiang khan pasal lak tlak loh inti ve ziah suh, nang ang pasal ka nei thei che hi ka lawm fê zawk" ka tih chuan

"Ka lawm fê" naupang chhia tak hian a rawn ti ve vak a, a ṭawngkam lawmawm lutuk avang chuan kan nui dun ta chîam bawk.

A tukah chuan u Hruaia chu Aizawl District Court lamah a kal a, thil thlen dan leh nih dan chu kimchang takin a report bawk. Aizawl lama mite chuan Lunglei District Court rorel dan chu an duh lo em em a, an lungawi loh em avangin thuneihna sang zawk neitute lama report pein hnathawktu ṭhenkhatte chu an ban tir zui bawk. Tin, rawnga taka kut min thlaka min pawngsualtute pawh dan chuan hausak leh sak loh a thliar lo a ni tih lantirna'n kum 7 chhung tang tura an lo tih tawh sa chu kum 10 chhung tang turin a pawt sei a, chutianga criminal actor te punishment an pawh sei leh kherna chhan chu information kimchang tak awm lo va bail chhuah an nih vang a ni ber tih u Hruaia chuan min hrilh.

Chutia dan berin mi sualte a hrem takah chuan a hma zawng zawnga ka rilru hlauhthawn ṭhinna te chu zawi zawin a reh a, keipawh chuan rei lova a reh hlen theih ngei ka beisei a ni. Aizawl lama pawi khawihtute an lo hruai thlak hnu lawkah an nu leh pate ni awm tak chu kan inah an lo kal a, an thil sawi vel dan aṭangin ka pa chuan ka nu leh pate chu koh phei ve ṭhain a hria a, keipawh chuan hmanhmawh takin ka call a, an lo phei vat tur thu an sawi bawk.

"Pu Rochhum, pi Lawm, in chhungkaw chunga pawi nasa tak kan fate'n an khawih avang hian pawi kan ti hle a, i chungah pawh ngaihdam kan dil nghal ni bawk se. Kan sawi duh ber zawk chu kan fate thil tihsual hremna hi hei aia rei lo zawk hian min tihsak turin kan ngen tawp che u a ni. Hetianga rei kan fate'n jail an tan chuan an hma hun atana kan thil lo ruahmante hi a chhe vek dawn a, an nun zawng zawng an hloh vek dawn bawk a ni" a tû pa zawk nge pawh ka hriat loh chuan a rawn ti a, Duati chenin sitting room-ah chuan ka ṭhu ṭhap a, ka bula ṭhu pa lah chuan ka kut chu a hum run bawk.

"In thil min dil chu a zahawmin tihhlawhtlinsak theih che u ka duh khawp mai a, mahse kei chuan in fate hi ka ngaidam thei lo va, in thil sawi ang pawh chu ka ti thei lo a ni" tlang tak hian ka pa chuan a lo ti ram hmak a, chutah ka bula ṭhu chuan

"In fate kha ngaihdam tlâk an ni lo ve, ka kut an tuar tam hman lo te hi an vannei zawk asin, kei chuan ka nupui chunga an thil tih rapthlak tak avang hian ka that palh mai ang tih te a nia ka hlauh ni!" a rawn ti a, a aw aṭang chuan a thinrim hle tih pawh ka hre thei.

"Mama insum rawh, khatiangin aia upate an be ngai lo. Kei hi chu he in neitu leh ka mo, fanu ang maia ka en Nutei pasal pa ve mai ka ni a, ka lo sawi ve tur a awm lovin ka hria" ka pa chuan a rawn ti a, u Hruaia pawh ka pa khapna avang chuan a insum hle tih ka hria a, a insum thei lo palh ang tih ka hlau ru khawp.

"Khawngaihin kan fate hi in ngaidam thei mai lo em ni?" an rawn ti leh a, tûmah chu ṭawng an tum lo va, chutianga an zawhna pawh chhang lova an ngawih ṭhup avang chuan keimah zawk chuan nuam lo ka ti hle.

"Aw le, keini lo ngaihdam leh ngaihdam loh lam hi a pawimawh ber lo va, Nutei ber hian a ngaihdam theih chuan keini a nu leh pa hi chuan in fate hi kan ngaidam mai a ni ang chu!" thaw deuh hâwk chung hian ka pa chuan a rawn ti a, thuthlukna chu siam har a ti ve hle a ni.

"Kei chuan in fate'n ka chunga thil rapthlak tak an tih avang khan ka chhiat phah vek a, ka nun zawng zawng a inthlak danglam vek bawk. Amaherawhchu, ka ngaihtuah chian hnu hian ka chunga an chet dante kha ngaihdam mai a ṭhain ka hria a, ka ngaidam tawh zawk a ni" ka hmelhriat ngai loh nutling leh patling te'n min en reng avang chuan ka ti chhuak ve ta nge nge a, mi dang ho erawh chuan min en nghal ṭhup.

"Nute, i chiang maw? I thusawi hi ngaihtuah chiang vat rawh" u Hruaia chuan ka dara chelh chung hian arawn ti thuai a, ka thusawi chuan an za vaiin a ṭhawng vek niin a lang.

"U Hruai, ka ngaihtuah chiang tawh alawm, chuan ka la sawi zo lo va, min lo nghak hram hram rawh" nui lui sak chung hian ka ti a, chutianga ka ṭawng vel te hlei hlei chuan a ngaihna a tihre lo zual.

"In fate hi ka ngaidam tih in hria a, mahse dan a awm tawh avangin dan chuan an thil tihsual man a pe thung dawn a ni. Mihring rilru aṭang chuan harsa ti tak chungin ka ngaidam ngei alawm, mahse dan rorelna hi ka thuneih phakna a ni lo. Keiin lo ngaidam mah ila an ni chuan an tawrh tur chu an tuar dawn tho tho, a chhan chu dan hi mi lian leh mi te thliar hrang lova rorel ṭhin a nih avangin" ka ti leh dap a, u Hruaia chuan a lama min kuai hnaiin ka chalah chuan a fawp vang vang a, tute bulah nge kan awm tih lam reng a ngaihtuah tawh bik lo a ni ngei ang.

"Tunah chuan kan fanu thuthlukna chu in hre tawh bawk a, in pawm thiam ngei ka beisei" ka pa chuan a rawn tih zawm ve nghal a, ka hma zawn taka ṭhu te erawh an lung a lawi famkim loh hmel khawp.

Ka nu leh pate leh pawikhawitute chhung an haw rem hnu chuan kan nupa room lamah ka chho a, u Hruaia erawh ka pa nen thil an sawi dun lawk avangin a la rawn chho mai lo. Ka rilru chu a thawveng tawh em em a, chutiang taka ka rilru a thawven chu ka la hre lo hîal zawk. Khumah chuan ka ṭhu a, ka pum chu ka chûl ka chul bawk. Ka vawi hnih nau paina a ni a, chhiat emaw pai puitlin theih loh chu ka hlau tak zet a ni. Ka naute chu thla hnih leh tlêm la nimahse naute pangai tak tak ang hian ka ngaihtuah ṭhin a, hrin chhuah vata a hmel hmuh chu ka châk tawh hle bawk.

"Hei, min lo ngai leh hman tawh em?" kan nupa room-a lo luh pahin u Hruaia chuan a rawn ti a, eng a hria ni maw a la rawn nui lut vur vur ang zui a!

"Lo ngai leh hman tawh e" lo nuih let ver ver chung chuan ka ti ve mai a, ka bula inthawlhin min kuah leh hlun hlûn tawh. Rei pawh min kuah hmain ka khabe chu a chawi kang a, min fawp zui nghal bawk. Hmangaih tih hriat tak hian min fawp ngawng ngâwng a, kei chuan lo chhan let loh chu ka phal ngâng lo a ni.

"Ka nupui, ka chhuang lutuk che. I thuthlukna siam kha a dik em em a, zanin khan nupui fing tak i ni tih i lantir a, i pasal ka ni hi ka inchhuang hle bawk" min fawhna aṭanga awm sawn zeuh pah chuan a ti a, sawi tur pawh hre lem lo chuan ka lo nui ringawt.

Hun a kal a, a ral a, chutiang zelin mihringte pawh kan danglam zung zung. Tunah chuan kepaw'n naute ka nei ve tawh a, kan naute chu mipa a ni nghe nghe. Ka neih tirha u Hruaia hmel hlimzia kha ka theihnghilh theih tawh pawh ka ring lo, a theih chhung chu fa pek zel ka duh bawk a ni. Mak tak maiin kan fapa chu ka mumanga ka hmuh ṭhin Mapuia hmel chiah chiah kha a ni a, ka hmuh tirh phei chuan uar takin ka ṭap chhuak hawm hawm a, u Hruaia paw'n a ngaihna hre lo zetin min kuah ringawt. Ka duh tawka ka ṭah hnu chuan u Hruaia chu ka ṭah chhan ka hrilh a, amah a inthiam loh lutuk hmel ka hmuh avang chuan ka sawi ta kher kher pawh chu ka inchhir ru hle.

"Hei, vawiin tlai kha i lo haw hma a ngaih kha aw? I theihnghilh vaih chuan i châk lo vang" phone a pick-up rual chuan ka ti nghal bawrh bawrh a, lehlama mi lah chu a lo nui hawk hawk.

"Ka nupui, ka theihnghilh reng reng lo. Class ka la zo chiah a, haw turin ka insiam mek alawm. Chuan kan fapa ni lovin nangmah kha ka ngai hle mai che, lo thlen vat ka tum ang" a rawn ti dam leh raih a, rei pawh inbe lovin kan inbiakna chu kan titawp zui ve mai bawk.

Zirtawpni a ni a, mi tinin hun awl kan neih tlan lai tak chuhin kan fapa Zorempuia, ka fapa hmasa hming chawia Mapuia tia kan koh duat kum khat tlin lawmna neih tumin kan inbuatsaih laih laih a, kan ṭhian leh chhung khat hnaite pawh kan sawm kim ve hle. U Hruaia ber chu a hman lo leh ta tlat a, Mizoram University lama kal ngei ngei a ngaih avangin lungawi lo hle mah ila a kal ta tho. Tin, dawr lam pawh mi dang tu emaw ni chhawr chhawngin a enkawl zui reng a, ka dawr a nih lai letin tunah chuan a changtlung tawh zawk a, Hotel changkang tak a ni tawh ti ila ka sawi sual tam lo ang ka ring.

Kan fapa piancham lawmna programme-ah chuan Feli leh Sir Joseph-a te pawh an lo kal ve a, Feli pum pawh a puar ve ál tawh bawk. Chawhnu lam dar 1 velah u Hruaia chu a rawn thleng ve ta hram a, nui sânga ka fapa nen kan lam a rawn pan danah min tlawn dawn tih ka hre mai. Kan bul a rawn thlen chuan ka fapa chuan a ban te reuh te hian a lo ban ve al âl a, a pa'n a duat bawka Mapuia chuan a pa chu a lo hre ve tawh hle.

"Eu eu eu, mama aia min lo thlahlel zawk an awm tlat mai" tiin ka pawmna aṭang chuan Mapuia chu a pawm kang a, naupang tê mah ni se kan fapa chu a nui ve ker ker reuh a nih chu!

"Ka fapa , papa han ti teh le" u Hruaia chuan a ti a, kum khat lek miin chutiang an tih theih ka rin loh em avang chuan ka lo nui chîam a, ka ring lo tak tak a ni.

"Phaaa...phaaa" naute ṭawng zeta Mapuia'n a rawn tih chuan ka nui tawp hmak a, ka fapa ṭawng chhuak mak ka ti lutuk chu ka ngawi reng ringawt.

"Yesssss, ka fapa hian min ko a nia, min ko thei tawh" tiin a hmai leh nghawng velah chuan a chuk vak vak a, pakhat té lah chu a pa'n a lawm tih hria ni awm fahran hian a lo nui ve ûar uar bawk. Chutah thil hre chhuak zawk hian

"Khaw maw, khaw maw ka lam lo hawi tir teh. Le! Mama ti ve rawh le, ka fapa mama han ti ve teh" ka ti nghal chul a, ka fapa erawh chuan min en kar a, a ṭawng chhuak har ka ti ngei mai.

"Zorempui, i nu hi min han ko ve teh" ka tih leh chuan u Hruaia lam chu a hawi daih a, a darah te chuan a bei vel a nih chu! A pian tirh aṭang pawha a pa a ân tawh tehreng nen, kum khat a tling dek deka a pa siar a pa siar hi a ni ringawt.

Keipawh chu nutling e ti lo chuan ka titau a, tihtauh chu a hun loh em avang chuan titau anga lan duh si lo, rilru tau tho si chu ka titau der vel ta ringawt. Kan beisei phak bakin min lawmpuitute chu an lo kal hnem a, an lo kal kim kan rin loh tehreng nen kan mi sawmte chu an lo kal kim ṭhap mai.

Zanah chuan ka fapa chu kan room chhungah ka awi hlîau hlîau a, ani te hi ka zai loh chuan a muhil duh ṭhak lo ṭhin. Kum khat a nih aṭang hetiang hi a ni a, a puitlin hunah phei chuan a khirh ve khawp ang le.

"Nute, lo kal teh, thil hrilh duh che ka nei" khuma Mapuia ka mut fel tir hnua kan din mar rual chiahin u Hruaia chuan a lo ti a, a hmela a thutak hmel em avang chuan keipawh a awmna lam sofa-ah chuan ka phei ve mai bawk.

"Engenita?" ka mita min en reng avang chuan ka ti ta ringawt.

"Nute, ka hmangaih che, ka thinlung leh tih tak zetin ka hmangaih che" a rawn tichhuak sup a, ka beisei loh lutuk lam a rawn sawi bawk nen ka thunun hman loh khawpa rangin ka mittui te chu an lo tling nghal pam.

"Ka â ti raw? Kei hian i hnenah hian nang ka hmangaihna che thu hi ka la sawi chhuak miah lo tih ka hre chhuak a, a pawi khawp mai" a thusawi avang chuan ka ṭap hawk a, ka ṭah khurh ngawt ngawt avangin ṭawng chhuak thei chi zia zâng ka ni lo.

"Lo kal teh, ka hmangaih em emnu" tiin amah zawk chuan a awmah min kuah bet a, a taksa lum nuam taka min kuah tâkah phei chuan ka ṭap uar ta sauh a, naute a harh ang em? harh lo ang em? tih lam reng ka ngaihtuah pha tawh lo a ni.

"Khumah sawn i mu teh ang" tiin min pawm kang lâwp a, kei erawh ka ṭah chhuak a la reh teuh lo. Min tih ang ang chuan ka awm a, rizai min sin ṭhat tirin min kuah bet zui leh nghal.

"Ṭap tawh lo teh Nute, i ṭah hian ka thinlung chhungril hi a na vek thei ṭhin asin" a rawn tih te hlei hlei chuan ka ṭah chu a chhuak zual sauh a, a ṭawngkam dam leh ril lutuk chuan min tihlimin ka rilru a tino êm a ni.

"Ka, ka, ka lawm lutuk a, ihhhh, ka ṭap alawm" ṭap ṭuau chung chuan ka ti a, a aia nghetin ani chuan min lo kuah a, a awma min kuah beh pahin ka chhip sam chu a fawp leh vang vang bawk.

"Hetiang em ema ka hmangaihna thlahlel i ni tih ka hriat hian ka lawm a, nang ka hmangaih che hi khawvela ka thil tihsual loh ber a nih hîal ka ring"

"U Hruai, min hmangaihna thu min hrilh hian hmân aṭanga thleng se ka tih ber chu a lo thleng tawh asin. Ni lo, hei hi a dawt thu mai mai a ni em? Ka hlawhtling ve tak tak tawh ti raw?" ka ṭah te chu a la chhuak em em a, min hmangaih tih thu a sawi chu ka ringhlel hnuhnawh a ni ber.

"Aw, i hlawhtling tawh e. Kei Lalhmahruaia hian nang Nutei, ka nupui, ka thinlung neitu leh ka neih rohlu ber hi ka hmangaih che a, hmangaih satliah mai ni lovin ka thinlung leh tih tak zetin ka hmangaih che a ni" a rawn tih nawn le tâkah chuan a thusawite chu ka ring lo phal tawh lo. Ka kuah vak a, a kawr awm te chu ka mittui avangin a huh nûai bawk.

"U Hruai ka lawm e, min hmangaih ve avang hian ka lawm lutuk" nui lui sâng chuan ka ti a, ani chuan ka hmel awm dan chu a lo en chiang khawp.

"Nute kei deuh hi asin lawm, engtik lai pawha min hmangaih reng avangin i chungah hian ka lawm em em zawk a ni" ka bianga mittui la chambang vel hru fai pah chuan a rawn ti a, chu hun ang baka ka hlim chu ka nunah ka la tawng lo. A hmuiah chuan ka han fawp zeuh a, hnuai lama insawn thlain a awm lum vung vûngah chuan a fanu ang maiin ka bei leh ta hle hle.

"U Hruai, hmangaihna hian natna min pe ṭhin ni khan ka lo sawi tawh a, mahse zanin hian khang ka thil sawi kha a dik lo tih ka hre chhuak a ni. Hmangaihna chuan hlimna chauh a thlen a, natna min pe reng reng lo. Rinhlelhna te, thikna te, rilru chapona te, hlauthawnna te leh thil dang ṭha lo tam tak te hian natna min pe zawk a ni" a kawrkilh khawih neuh neuh pah chuan ka ti sîam siam a, ani pawh ka chhipa a khabe nghatin ka hnung chu a lo chul heuh heuh ve tho bawk.

"He khawvel hi zawng danglamna khawvel a ni chiang a ni. Hunin hawvel a hruai danglam ang zelin mihringte pawh zawi zâwiin kan danglam ve zel a, chuvang chuan kei chuan he lei kan chen mêk na hi 'DANGLAMNA KHAWVEL' a ni ka ti lo thei lo. Nang pawh hi ka hmangaih theih che ka inring lo hul hûal a, mahse tunah erawh awihawm loh khawpa nasain ka hmangaih tawh che chu a nih hi! Hengte hian ngai renga mihringte kan awm lohzia leh kan danglam nasat theihzia min hriattir a, hetianga kan danglamna te chu keimahni duh dana innghat lovin Pathian duh dan leh a remruatna vek zawk a ni" aw dam tak chuan a rawn ti a, a thusawite chuan ka rilru an hnehin ka ring em em bawk.

A TAWP TA