𝐃𝐀𝐍𝐆𝐋𝐀𝐌𝐍𝐀 𝐊𝐇𝐀𝐖𝐕𝐄𝐋 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟗 - 𝟏𝟔)

DANGLAMNA KHAWVEL

By

Havali Adam

27 November 2021

Chapter 9

Ka pasal sawi ang ngei chuan zan lam chu ka'n muttui mai mai khawp a, zing thawh hai ṭhak khawpin alawm le ka mut le. Accident ka tawh avanga ka lu na a zia deuh hnuah chuan ka pa chu u Hruaia nen chuan kan hmu a, kan thuthlukna a hriat chuan pangai takin a lo dawngsawng ve mai. Ka pa hi kan Principal pawh ni lo mahse a awm dan leh a ṭawngkam hi a zahawm ka ti a, tû tan pawha zah loh theih lohvin a nung ve tlat a ni. Hun a'n kal leh deuh a, keipawh chuan College ka zawm tawh lo. Ka ṭhiannu Feli ber chuan min ui pui a, mahse a pasalte chhungkuaa mo a nih hunah chauh ka thil tawn ang chu a hrethiam ve ang. Tin, ka nu leh pate pawh tlang takin ka hrilh a, min uipuia an thinrim ka lo rin lawk tehreng nen ka thuthlukna chu ṭha min lo tihpui vîau thung.

Tunah chuan zirna ka bansan aṭangin kum khat lai a liam leh tawh a, Feli phei chuan BA a chhuak ṭep tawh zawk. Ka pasalte inah pawh kum khat leh a chanve lai ka cheng ve ta reng mai. A chang chuan ina awm a, engmah tihtur hran em em pawh nei chuang lova awm tlawng chu ka ning leh thut zel. Zirna ka chawlhsan avang chuan inchhirna rilru neih loh luih hram hram ka tum a, inchhirna ka neih pawh ka la hre chuang lo. Kan inah chuan awmpui kan nei ngai lo va, neih pawh ṭul em em ka ti lo bawk. Chhun lamah chuan keimahin inah ka awm tlawng zel a, a changin ka pasal chu chhun chawlhah a rawn haw leh zauh zauh zel. In chhung chet vel tur ka tihfel zawh hnu chuan phone call ka dawng a, Feli hnen aṭang a lo ni.

"Aw Fel" pick-up pah chuan ka ti a, lehlama mi chu a lo nui ṭiah ṭiah ringawt.

"Awi, hmâna ka ṭhiannu Zonunmawii kha i ang tawh lo vel lutuk. I mi koh dan vel kha a nu tawh rîau" a rawn ti zawt zawt.

"Awi awi awi, chekhirnu, thil intihre vel lo mai teh. Enge min lo biak chhan ni hrim hrim?" ṭawng vak pawh ka tum lo kha a nia, amah te zik zek hian ṭawng vak lo thei lovin min siam ziah.

"Aw, kha kha, ka ṭhian ṭawngtheinu ngei chu a ni. Ka lo leng dawn, chawhnu kan off a, chuan in inah tunge awm?" a rawn ti ve leh a, class an bang hma a ni ngei ang.

"Lo kal mawlh teh, in min tihfel pui turin ka duh che a nia" a ngaih dan a ni lo leh nasa dawn tih ka hria.

"Awi awi awi, ka tihfel pui nguar ang che. Ka dah dawn, ka lo thleng har lo vang" tiin phone chu a off a, keipawh ei tur vel buaipui turin ka chhuk ve nghal.

Kan inbiak aṭanga darkar chanve pawh a ral hmain Feli chu a rawn thleng a, keimah chiahin ka lo awm bawk nen kan inah chuan an in ang chiahin a rawn tal leh tawh. A hma kha chuan ka thawvengin ka harh ve ṭhin viau a, mahse nupui nihna leh mo nihna ka chelh hnu hi chuan la naupang viau mah ila ka ṭhiante awm ang angin ka awm ve thei tawh lo tih ka hria. Ei tur te kan siam dun a, inkawm ṭhang tih takah kan sawi duh zawng pawh a inang a, kan ṭawng tui thei viau.

"Nute, nau hi i la pai miah lo em ni?" thingpui in pah chuan a rawn ti a, nau pai vat chu châk em em mah ila ka thu a ni der si lo.

"Aw, la pai lo a nih hi" ka lo ti ṭha ve mai bawk.

"A nih, amah hian i pai mai lo hi pawi tihna nei ni âwmin i hria em?" enge chutiang thil te min zawh thut thut le âw.

"Chutianga a awm áwm pawh ka hre lo, engatinge min zawh?" ka ti ta nge nge.

"Ka zawt mai mai che, chuan a duat che em? Han report teh, amah hi a caring hmel reuh ka ti" ṭhu ṭha sawt sawt pah chuan a rawn ti a, kan nupa inkar boruak chu a hre châk vel tawp ta a nih chu!

"Awi, u Hruaia ren run hi maw nghal khatin a nghal. Mi tihzah dan a thiam bawk si, mahse mi chu a ngaihvenin min duat thiam khawp mai, ka dream ang tak tak khan min duat ṭhin ni berin ka hria" intithei fê chuan ka ti a, a lo man nghal chat.

"I va han intithei tak, nei ve tawh rawh min tihna ah ka ngai. Chuan, hetiang hian nangmahin inah i tawp ṭhin em ni?" a rawn ti leh a, kan inah a lo leng khat bawk nen thil chi hrang hrang min zawt pawh chu awm lo ka ti hran lo.

"Awm tawp a ni mai, nakin deuh lawkah Duati a rawn bang ang a, a khawhar thlak lutuk hran loh" ka tih lai chuan door bell a lo ri a, Duati emaw ka chhungte lo haw hun a nih loh avang chuan tunge ni ang tih ka ngaihtuah pha thiam hauh lo.

"Ka lo va ngaihven ang, in pate hi a lo ni rêu rêu mai ang a! No kha ka sil peih loh vang a nia ka lo va ngaihven ang ka tih" ti zawt zawtin kawngka lam chu a pan a, ka nui ta ringawt.

"Nute, lo kal teh. Hei, nangmah an hmu duh che a" ka no sil laiin Feli chuan a rawn ti a, ka thil sil lai dahin keipawh ka phei ve mai.

"Eheeeeeee u Sangte, lo lut rawh. Engatinge kha tah i din reng?" kawngka bula u Sangtei lo ding reng ka hmuh chuan ka ti nghal sawk sawk a, mahse a lo lang thut chu tlêm chuan mak ka ti ve deuh.

"I dam ṭha maw, Nute?" sofa-a kan ṭhut fel hnu chuan a rawn ti a, Feli erawh chuan peih lo rilru takin ka thil sil laklawh chu a lo chhunzawm ve thung.

"Aw, dam ṭha e. Enge kan inah te i lo tih ve mial a? Harsatna i tawk em ni? u Hruaia ka'n call ang aw?" ka lo ti leh zung zung a, ka pasal tel lova ani lo hmachhawn chu ka zam ru deuh.

"A ngai lo mai, ka hrilh lawk vek tawh tho alawm. In in awmna hi ka hre chiang duh mai mai maw le. Chuan, Aizawlah hna ka hmu thar a, chuvangin heti lamah ka rawn awm ve tawh dawn a nih hi" a rawn ti ve luam a, a ṭawngkam chhuak chu kei ang lo takin a felfai thlap bawk.

"Awi, a nih chu. Ka lawmpui hle mai che. Chuan eng hna lam nge i thawh dawn a?" rin ai takin kan titi dun thei phian dawnin ka hria.

"Teacher hna a nia, Mary Mount lamah ka thawk dawn a nih hmel. Ka kal leh zawk phawt mai ang. Tunah chuan in in awmna ka hre tawh bawk a, remchan hunah ka lo leng leh dawn nia" tiin a tho a, kal a tum nghal mai.

"Thingpuite i in duh lo em ni?" tia ka zawh pawh chuan min hnial a, ṭha tak chuan kan inthlah ta tho.

"Tunge ni a? Ka hmuh ngai a ni pawhin ka hre lo" Feli chuan ka bula rawn kal pahin a ti a, a la hmu ngai lo bawk nen u Sangtei chu a hre lo hle.

"U Sangtei a nih kha, u Hruaia ṭhian hlui, ṭhian hlui tih lêmah a ngaihzawng hlui a nia" ka ti pangai ve mai a, zep chi ah pawh ka ngai hran lo.

"Awi Nute, kei chu ka duh miah lo" a rawn ti ringawt a, eng tak nge a sawi tum chu ka hre hauh lo.

"Eng maw i lo duh loh ringawt?"

"A mizia chu ka hre chiang miah lo va, mahse hetianga ngaihzawng hluite an rawn lên an rawn lên hi chuan thil hi a kal buai duh a nia aw" min en ran chuan a ti a, Feli chuan Sangtei'n kan nupa inkar a tihchhiat palh a hlau ni ta berin ka hria.

"I ho em mai a! Kei te chu u Hruaia nupui ka ni tawh a, u Sangtei te chu kan intawn hmaa a ngaihzawng pakhat kha a ni ve mai alawm, ngaituah loh lôh tur hi min ngaihtuah tir ṭhin suh" ka ti let ta zek.

"Ka sawi kha a dik dawn ka tihna pawh a ni chuang lo va, thil awm thei ka ti mai alawm. Mahse kan tlangval senior hausaa hi chuan a lo duh tawh bik kher nâng, a awm danah hian a rilru a ngheh hmel rîau ka ti" a rawn ti leh a, u Hruaia chu mi rilru nghet tak a ni reng a ni.

"Awi, khatiang lam ringawt sawi lo teh. U Hruaia hi chu ka mitah chuan a ṭha thlâwt a, mahse kan Picnic zan ang em ema ka laka a thinrim kha ka la hre lo. A thu ka lo awih lo ve kher bawk nen, amah kha ka hlau a ni tawp mai. Khata ṭang phei kha chuan a thu hi zawm loh ka tum tawh lo hrim hrim" tiin thu dangah chuan ka pakaipui ta daih.

"A ni ang, hetianga ngawichawi leh ṭawngmawh deuh ho hi an thinrim a na an ti ṭhin. Khi a tlai mai dawn, ka phei mai ang" tiin a tho vut a, a lo tlai tawh phian avangin ka chelh khawmuang duh ta bik lo.

Zanah chuan kan nupa room-ah kan awm leh chawt a, ka pasal pawh tih neuh neuh neiin a buai ve leh hle. A taksa hian a zo ka ti dawn nge a ti ṭhang tawh lutuk a ngaiah a nei tawh zawk pawh ka hre lo, ngawi reng hian a hna hi a thawk mial mial zel. A ṭhen phei hi chu a hna chelh tak pawh hi a ni ṭhin lovin ka hria. Chhun lama Feli sawi chu ka ngaihtuah chhuak zawk a, ani hian nau ka pai lawk lo hi hrehawm a ti ang em tih chu ka zawt châk khawp mai. A buai laia han zawh êm chu dikin ka hre bik si lo.

"U Hruai" khumah chuan ka ṭhu a, ani chuan ṭhuthlengah laptop a khawih mial mial thung.

"U Hruai" min chhan mai loh avang chuan ka tinawn leh a, chutah ka pasal chuan

"Im" a rawn ti thum ve ta dup.

"Enge i tih?" naupang inbia ang mai kan ni.

"Hna ka thawk a" min la en lo hrim hrim.

"Aw le, sorry" tiin khumah chuan ka mu ta ringawt a, tun lai hi ka ṭahbelh tawp, a chhan em em ka hre si lo.

"Hei, enge i tih? Khawiah nge min hruai i tum?" ka mu ṭha hle hle lai min rawn pawm lâwp avang chuan ka ti a, a awmna lamah min hruai phei tih chu ka hria.

"Engatinge i lo tih tauh leh ṭhin? Ti hian ka hnathawhna bulah hian lo awm ve mai rawh?" a rawn ti dam thluam a, ka awm dan chu a lo hre leh vek tawh a nih hmel.

"Ka titau pawh a ni lo, ka khua a har alawm" a nghawnga kuah rán chung chuan ka ti a, ka lam lo hawiin min fawp nghal zeuh.

"Room khata kan awm chung pawh hian i khua a har maw? Min tihbuai hi i châk ve hrim hrim a ni lo maw?" nui lui suk chuan a ti a, kei chu ka lo nui hauh lo thung.

"Chutianga tihbuai che ka châk vang pawh a ni lo. I buai thei si a, hna i thawk reng bawk nen biak che hi ka huphurh ṭhin. I bula ka ṭawng loh chuan ka khua a har leh tlat bawk si, awm dan tur pawh ka hre lo va, ka thiam lo bawk" ka ti ve niah niah a, ani chuan laptop lam bawk chu a bih leh daih.

"Ka lo va mu ang aw? i hman hunah i lo phei dawn nia" tia thawhsan ka tum chu a kut ding lam chuan min vuan bet leh ta tlat a, amah ka en lahin laptop bawk chu a bih daih bawk si.

"Min thlah teh, ka lo va phei ang ka tih chu" ka ti leh tan tan a, tun hnai chu min duat lo rîauin ka hre bawk.

"Lo la ṭhu teh, ka mal chunga i lo ṭhut khan hna ka thawk chak sawt a nia" min en miah lo chuan a rawn ti leh a, a thusawite lah chu awihawm loh khawpa lem a ni.

"Tak takin ka lo va mu ang e, ka pasal pawh ka titipui theih loh chuan keimahin ka pai ru ṭan mai ang" min kuah behna chu ka nam vak a, a thil tih lai chu a tilaklawh bawk a ni ang min thlah ta ringawt.

"Ka lo phei har lo vang" min en lo leh ta, min en miah lo va min be thei chu ka hua a ni.

"Lo phei hma a ngai lo, ka ṭhianpa ka'n be daih ang e" ka thil sawi chu hre âwm pawhin a lang leh tawh miah lo va, ka rilru chuan runluih tura min tur nasat em avangin ka pasal chu runluih ka tum khawp mai. Kan class group-ah ka lut a, mipa lo awm hmasa ber chu ka call ta ringawt.

"Hello, ve teh mial che chuan" mipa aw chuan a rawn ti a, tunge a nih pawh ka hre chuang lo.

"I dam maw?" ka ti ve ta ringawt.

"Aw, dam e. Engenita?" a nui tih ka hre thei.

"Ka khua a" ka tih laiin ka pasal chuan ka phone chu a rawn la hmak.

"Kan tihpalh a ni e" tiin phone chu a off zui daih bawk.

"Ka hriat loh laiin mipa be lo la, ka hriat lai phei chuan be reng reng suh. I duh chuan Feli kha be ta che, mipa kher ni lovin" a thinrim viau dawn emaw ka ti a, a thinrim em em bawk si lo.

"Enge mipa ka biak chu i lo phal loh ve vak? Feli chu ka be ngun alawm, chhunah pawh a rawn leng nghe nghe" ka ti ve ta salh.

"Be lo la a tawk a ni mai" a laptop nen chuan khumah a rawn inchawi phei a, min be leh tawh chuang lo chuan a thawh chhunzawm mial mial.

"Ka duh leh ka be thei bawk" zanin chu han inpuang ve teh se.

"Min tibuai reng lo teh, ka zo ṭep a nia" min en miah lo chuan a rawn ti leh a, ka duh ang thil erawh a la rawn sawi miah lo thung.

"Min en miah lovin min be ziah suh" ka ti vin ta hlar mai.

"Huiham, ka pa khan a lo sawi dik chiah a nih hi" thawk a la deuh kher te chuan ka rilru an ti lungpuam ṭan dawn ringawt.

"Enge a sawi dik? Engtinnge ka pa chuan min lo sawi a?" ka aw chu a zawi tawh lem lo.

"Dawm hram hram i ngaih thu hi maw le"

"Suala, tlangval senior em em pa, Feli khan a lo sawi dik chiah a nih hi. Min dawm hram hram peih loh leh u Sangtei kha va nei daih rawh" ka tih tâk chiamah chuan a thil chhut lai chu a tawp hmak.

"Engvanga ani chu rawn sawi lang nge i nih?" a hmelah chuan a fiamthu lo tih a chiang khawp mai.

"Vawiinah a lo kal alawm" ka tih chuan a tho kang nghal nia maw le.

"Lo kal suh tî tih pawh a!" ti zawi supin a phone chu a la a, balcony lam chu a pan a, ka en reng vang nge tukverh chu a kharphui nghal.

A ṭawngkam leh a chezia reng reng chuan min barakhaihin min tina niin ka hria. Kei, a nupuiin amah ka thlakhlelh thu ka sawi pawha ka bula lo kal lawk thei lo kha a ngaihzawng hlui hming ka sawi chuan a tho vat a, lo kal rawh tih ngai lo khawpin a che rang a ni si a. U Hruaia awm dan chu ka duh lo hle a, Feli khan a sawi dik tak tak ang tih ka hlau hnuhnawh ngei mai. A rawn luh leh chuan ka en ngai ka lo la en reng a, ka bulah chuan rawn ṭhuin a laptop chu a khawih leh mial mial. Ka ngawi reng a, ani pawh a ngawi reng tho. Zan rei tawh lam a lo ni ve tho bawk nen thawm te chu a reh hian a reh tlawk tlawk a, ka ngaihtuahna chu ka kawm char char hi a ni mai.

"Le, mu ila. Ka zo chiah e, ka nupui" a awm dan te chu hmuin hre vek mah ila min biakna pawh chu ka chhang buai peih rih lo.

"Lo kal rawh" tiin min kuai mu a, engmah ka la sawi duh chuang lo, ka rilru chu a na ve deuh a ni.

"Eng kha nge i lo lak nat leh ber tawh? A hrim hrimin tun lai hi i pangchang a, i no riauin ka hria" a rawn tih leh chuan mittui tling pamin amah chu ka en a, ka mittui te chu engtia lo awm leh ringawt nge pawh ka hre lo.

"Âwwwww, engatinge ṭah i tum leh mai ṭhin? Lo kal teh" tia min kuah a rawn tum a, ka lo duh teuh lo.

"Kal teh, ka mut a la chhuak lo. Ka tho dawn" tiin ka tho kang tharh a, a hmaa a laptop nena a hnathawhna ṭhutthlengah chuan ka ṭhu phei ta daih.

"Khata i awm daih chuan ka muhil thei bik nâng, lo phei teh. Ka mut a chhuak viau tawh a nia" dam dap hian a rawn ti a, mahse ka che sawn eih lo. Ka ngaihtuahna chu a kal thui tak zet.

"A va buaithlak ṭhin tak" tia thovin ka lam chu a rawn pan a, amah chu melh khat paw'n ka lo melh duh lo.

"Enge i thinrim chhan ber?" ka awm ang ang chuan min kuah hle hle a, awm sawn vel ka tum lo hrim hrim.

"A tam mai" ka ti ringawt.

"Le! ka lo ngaithla ang, han sawi ṭan teh" a rawn ti ve leh mai bawk.

"Ka mamawha ka ngaih em em lai che pawhin i hna ringawt i buaipui a, ka khua a har asin. Room khatah awm mah ila i bul hnai taka ka awm a nih loh chuan ka ngai ṭhin che a, mahse nang chuan chu chu i hrethiam duh der si lo. Pangchang min ti vel a, no te min ti vel a, mipa dang bulah pangchang dawn ila i duh leh âwm tawp si lo" ka ti ta pang pang mai.

"Sawi zel rawh" a rawn tih phei chuan sawi hmaih neih ka tum teuh lo.

"Ka thinrimna chhan ber chu keiin ka bula awm tura ka duh lai che leh ka ngaih ngawih ngawih lai che pawhin ka bulah i rawn kal duh lo va, mahse u Sangtei be tur erawh chuan eng dang i ngaihtuah tawh lo. I tho vat a, biak loh hlau khawpin a nih kha i awm. Kum khat leh a chanve vel lai kan inneih tawh a, hetiang hian ka lakah i awm ngai lo. Min ning em ni?" sawi lang kher lo mah ila u Sangtei chu ka thik êm a ni.

"Ni lo, ka ning ngai lo che tih hre rawh. Ka nupui i ni a, ka ngainain ka mamawh em em bawk che asin. Sangtei chu ka ngaihzawng hlui mai chauh a ni tawh tih hria la, ka biak chhan chu kan ina lo kal tawh lo tura ka duh vang a ni" a rawn ti mai a, zawhna ka nei leh ta tlat.

"Enge a lo kal chu i duh lohna chhan?"

"I hrethiam chuang lo vang, hmâna Sangtei kha a ni tawh lo, a chanchin hi sawi reng lo zawk teh ang" a rawn ti nghal daih.

"A nih thil dang chu dah ṭha ta ila, engatinge mipa dang ka biak kha i phal loh kher?" ka inpuan tir dawn hi a ni tawp.

"Min zawt lui kher ṭhin lo teh" thinrim ang deuh chuan ka melh hrawk a, mahse ka thinrim em em tawh lo.

"Hei, kha ti khan min melh vak suh, ka sawi lo tawp mai ang" ka la melh ran tho.

"Sawi vat mai rawh" ka ti leh hrawk a, zan a rei ve tawh nen ka ṭawng zawi vak lo chu ka inthlahrung ve deuh.

"Ka pa tih loh mipa dang reng reng i biaka i awmpui ka duh lo" a va han sawi hreh ngawih ngawih tak.

"Chungte chu ka hre ve reng, a chhan kha alawm ka hriat duh" ka lo ti ve leh ta hmak.

"Nangnu té hi i va luhlul reuh tak, mu tawh ang le" tia min pawm phei a tum chu ka lo duh lo nasa.

"I sawi hma chuan i bulah ka mu lo ang" sawi vat mai ni se zawng khum khatah kan mu dun daih tawh ang maw le.

"Zanin chu u Zualtei bulah ka riak dawn aw" a ngawih reng tâk avang chuan ka ti a, kal sawn ka tum chu min man bet rang teh e.

"Min thlah teh, ka kal duh a nia" tiin ka tal chhuak a, kawngka ka hawng ṭep tawh tihah min rawn pawm kang nghal nawlh.

"Khumah mu phawt ila ka hrilh ang che" a rawn tih chuan rin tur nge tur loh pawh ka hre lo.

"Sawi rawh le, ka luhlul ve hle tih i hriat kha, i sawi loh chuan ka riak sawn tak tak dawn a nia" khuma min mutpui hnu chuan ka ti a, a rawn thaw ta hawk.

"Ka thik" a awma min kuah vang vang pah chuan a rawn ti sup ta. Ka thinlung chu lawmin a nui ver ver a, mahse a hmuha tihlan kher ka tum lo.

"I sawi zak a ni maw? Keiin hmeichhe dang ka thikin ka tihlan ngam nasat tehreng nen, i upat tawh êm hi zak rual pawh i ni tawh lo" a naupang zawk é ti lo chuan kan zilh ve leh ta chiam a nih kha!

"Ka zak kher lo" tlawm hi chu a hreh ve chiang alawm.

"Awi, kei hi ka lawmna a va han ho ṭhin tak ka ti. Ka pasalin min duh thu a sawi dek dek a, pasala neih ka hnial miah lo. Mipa dang a thik thu a sawi leh a, ka thinrimna zawng zawng a bo leh duak bawk. Engtikah nge ka pasal ka ngei aṭang hian kei ang chiaha min hmangaih ve thu hi ka hriat ang le" a awma awm ka nih avangin a lungphu ri chu ka ngaithla kar a, a phut dan te chu ka hre chiang hle bawk.

"Tun maia ka hmangaih ve thei lo che hi a pawi ka ti Nute, tihsual leh ka hlau tawh a ni" a aw aṭang chuan pawi a ti ve tak tak a nih ka ring a, a hmain hmangaihna lamah a lo vanduai tawh kher bawk nen a awm ve tho.

"A pawi lo, min nei tawh a, ka ṭhen dawn reng reng lo che. Ka ṭhen dawn che a nih chuan i mi hmangaihna thu ka hre hmasa phawt ang" ka ti leh hram.

"Inṭhen hi sawi ri ṭhin suh, a ṭha lo" a rawn ti deuh sup a, hmân aṭang tawh inṭhen sawi rik hi a duh ngai miah lo. Chu chuan mi dang lakah, u Sangtei chenin min phatsan duh loh rinna min neih tir a, min hmangaih ve thuai pawh ka besei bawk a ni.

"Aw le, ka u. I thu bawk si, i thu ka zawm loh lah hian ka vanduaiin ka chesual thei phian bawk si" nui ver vera amah en chung chuan ka ti a, naupang chhaih ang maiin ka biangah a rawn rawn piai leh ta.

"Enteh khi, a tlai tawh zia khi" a rawn tih chuan Sana chu ka en a, dar 12 lai a lo ri tawh.

"Kei chu hetianga titi dun hi nuam ka ti, mahse nangmah ber hi i ṭawng duh lo bik thei lutuk a, a buaithlak. Ka bulah chuan ṭawng duh ve mai rawh" ka ti leh zet zet a, a rawn nui ve ta nge nge.

"Mu ang le" tiin rizai chu a pawt chho a, rizai nen lam min kuah khawm nghal vek.

Chutia rizai hnuaiah leh a taksa lum nuam taka ka beh tak reng avang chuan lum ka ti hma hle a, ka muhil thei lo zawk. Rizai chu ka keu kau a, ka pasal lam ka hawi chuan a lo muhil hman tawh a ni ngei ang a meng tawh lo hrim hrim. A chau ve hle pawh a ni ang, kei lah chuan ka inpuan tir ta hrep bawk si.

"Hmelṭhapa" tiin a hmuiah chuan ka han fawp a, chutah ani chuan nui sukin min kuahna chu a tinghet zual sauh.

"Muttui le" tiin ka inthawlh ṭha a, ka hnunga min rawn zutna chu min chhan letnaah ka ngai mai.

Zing lam chu ka tho harh ṭha em em a, ka tho hma viau bawk. Ka bula mu ka en chuan tui tak hian a lo la mu a, kaihthawh ai chuan thawhsan chu ka duh ta zawk. In hnuai lamah ka chhuk a, a dan ngaite in ka pa pawh a lo tho leh diam tawh. U Zualtei leh Duati chu an la thaw lo a nih hmel, an thawm hriat tur a awm lo em mai. Ka pa chu thingpui a duh leh duh loh ka zawt a, a duh thua min chhan chuan ka siam ve mai.

"Ka pa, engatinge i thawh hma theih bik em em a?" thingpui pek pah chuan ka ti leh a, zing tin deuh thaw hi keini aiin ka pa chu a tho hma tlangpui zawk ṭhin.

"Âaaaaaa, thawh hma ka tum em em pawh a ni lo. Kum upat lamah tawh hi chuan mihring hian mut theih chin hi kan lo nei ve zel a nih dawn hi!" a rawn ti dam dap a, a ni ve tak ang.

"A ni mathei, ka nu leh pate pawh saw an tho hma thei lutuk. Darkar 8 emaw darkar 9 emaw ka mut laite hian anni chu darkar 5 vel lek te an mu ṭhin" ka ti ve hluai a, kan innel tawh khawp.

"A dik ang, keipawh hi chutiang vel bawr chu ka mu tlangpui" a thingpui in rik hrup pah chuan a ti a, a chanchinbu ken chu a bih zui leh daih.

Dar 7 velah chuan Duati a rawn tho a, thingpui ka lo siam ve nghal. Duati tih takah a pa hian a duat em em a, kan in chhungah hi chuan a pa bulah a awm tam ber zel. Ka pa lah hian a hnathawh lai emaw thil a tih laklawh lai pawh ni se, a lo ngaihtuah em em ṭhin. Ka pasal khan min hrilh tawh a, ka pa hian a fate aia dah pawimawh hmasak a nei ngai lo. Duati chu a mu tho chiah emaw tih nak a laiin a pa bula a awm chu a muhil ti tih leh deuh a, ka pa lah chuan chanchinbu chhiar pah hian a lo pawm ve thân bawk.

Ka lawina chhungkuate hi an fel em em a, hma hun chu hre lo mah ila ka chungah hian thil ṭha lo leh sual an tih duh ka ring lo hial a ni. Kan inah chuan a nuapang ber dawttu angin min en a, a ṭhenah chuan min dawm lutuk leh min enkawl thiam lutuk chu nuam lo ve duh tak a ni. Mo ni ve si mo lo ang maiin ka awm ṭhin. Ka pasal ka aṭanga ka hriat danin ka pa nupui chuan ka pa chu a uiresan a, chu nu chu u Zualtei leh Duati nu a ni awm e. Ka pasal nu erawh mi hrang daih a ni a, a nu thlanah pawh kan han kal tawh nghe nghe.

Chutia ei rawng ka bawl lai chuan u Zualtei chu a lo tho chhuak a, ka bula ei rawng min bawlpui tur chuan a rawn ṭhu ve mai bawk. Thil eng eng emaw ni kan sawi a, kan nui leh chiam tawh. U Zualtei nen hian a hmain lo inkawm ṭhin tawh mah ila, hetiang tak hian kawm a nuamin a fel tih ka lo hre ngai lo. Sana ka en a, 7:30 a lo ri der tawh. Ka pasal hmel hmuh tur a la awm lo va, ka ngaih a ṭha lutuk lo. A dam lo a nih te ka ring a, mahse dam lo anga a awm ka hre si lo. Ka thil chhuan lai chu a hmin tawh tho avangin gas chu ka off a, u Hruaia ngaihven turin kan nupa room lam chu ka pan zui ta bawk.

"U Hruai, i dam lo em ni?" khumah a lo la mu reng a, a dam lo emaw tiin a chal chu ka dek a, a rawn men chuan la thophang tak a ni.

"Dam lo angin i awm bawk si lo" ka tih leh chuan min kuai thlu tawp a, min kuah ta vak.

"Min kuah vak ṭhin lo teh, a chang hi chuan min tina ṭhin a nia" ka tih pawh chuan min thlah a la tum hmel loh khawp.

"I awm pangai mai mai pawh kan be ṭawng ṭâwk che a, i zing tho tir phei hi chu kan be ṭawng thei lo zel che chu a nih hi! Tho rawh, kal hma i ngaih phei chuan i tlai vek ang" a la maimitchhing reng a, a la che sawn duh chuang lo reng reng.

"Tho teh" ka ti leh ta duai duai mai.

"Ei rawng pawh ka bawl peih vek tawh a nia, nge nang hi office kal i tum lo em ni?" ka tih chuan

"Im" a rawn ti thum dup a, ka va ngei mai mai tak.

"Chutiang a nih te chuan sawi vat ta che, i dam lo emaw ka ti alawm" ka tih pawh chuan min thlah emaw ṭawng chhunzawm emaw pawh a tum leh tawh lo hrim hrim niin ka hria.

"E tak a! I harh chiang tawh em? Thil sawpui lawk duh che ka nei a, nizan khan ka sawi hmaih daih a" ka tih leh hluai chuan

"Im" tih te hian min rawn chhang a, a awm dan vel chu ka ning ṭan lek lek tawh.

"Ihhhh, nau ka pai mai thei lo hi pawi i ti em? Fate i awt ve awm si a, keipawh hian zep lovah chuan hrehawm ka ti ve tho. Ngawi reng hian hrehawm i lo tiru ve thei tho tih ka hriat hian hrehawm ka ti a, ka sawi chu i hria em? Nge i la muhil duh zawk?" tia ka biak leh chuan chhanna pakhatmah a awm lo. Awm sawn tuma ka che zeuh chu a hma aia nghet lehzualin a lamah min pawt phei a, a awm dan vel chu a ngaihna ka hre lo hle.

"Enge hetianga i awm vel kher a? Min ngai a nih chuan sawi ve mai la?" ka ti leh ta hrep.

"Immmmmm, a zo chiah" a rawn tih chuan ka lo bangbo ngei mai.

"Eng maw zo chiah?"

"Ka mumangah ka hmu che a" pangai deuh chuan a rawn ti a, a va han ho mai mai tak.

"Min hmu pawh ni la enge?" keipawh hian ka hmu ve ṭhin tho alawm.

"Min lo tiharh a, ka ngaihtuah chhunzawm tawp a nih kha" a thusawi naupang chhia lutuk avang chuan ka nui ta ringawt.

"Enge?" hriatthiam loh hmel deuh hian min lo en a, a hnu rei lote ah ka nui tawp ve ta chauh.

"Engmah maw le, chuan ka thil sawi kha i hria em?"

"A eng ber kha?"

"Fa ka pek mai theih loh avang che hian i lungawi lo em? Hrehawm i ti ve ṭhin em? Kei chuan hrehawm ka ti ṭhin" ka ti ta sep sep a, kei ang thova hrehawm a lo tih ve ṭhin chu ka ring ru tho.

"Ti lo" a rawn ti tawi tak a, a ṭawngkam te lah hi a tawi ve thei bawk si.

"A chhante sawi ve mai rawh, khatianga tawite téa in chhan kha ka hua a nia" ka ti vin leh ta hlak mai.

"A chhan ka hre lo" a rawn ti a nih chu!

"I hre lo maw?" ka ti ta hû.

"Aw" a rawn ti leh ringawt.

"A ṭhat chu, chuan eng maw i office lohna chhan chu?" ka ti ve ta daih a, ani pawhin min kuah ṭung tawh bik lo e.

"Saturday a nia" a rawn ti ta mai. Lalpa le!

"Awi awi awi, min thlah teh. Ni ka hai chiang lutuk, tukinah ka la bazar reng reng lo. Ka bazar ngei ngei a ngai a nia" tiin ka tho vat a, min en reng thung. Kal mai ka tum chu min vuan leh tlat tawh, a va han buaithlak ṭhin tak.

"U Hruai, ka hmanhmawh a nia" ka tih chuan a rawn tho chhuak a, min la vuan reng bawk.

"Kan kal dun dawn nia" a rawn ti thawp sup.

"A nih chuan intifai vat vat teh, kan tlai chhe lutuk palh ang e, hmanhmawh rawh" tiin bathroom lamah chuan ka nawr phei dat dat a, ngawi reng hian ka tih ang âng chuan a awm ve leh mai.

Ka thuamhnaw chu thlakin ka insiam mawlh mawlh a, ka pasal pawh a rawn chhuak ve leh vat. In hnuaiah kan chhuk a, ka pa leh u Zualtei chu kan bazar tur thu hrilhin hmanhmawh takin u Hruaia chu ka chhuahpui zui nghal. Kan inneih hnu aṭang a vawikhatna atan kan nupain kan bazar dun a, rin ai takin a nuam phian. Ka bazar bag ken chu u Hruaia chuan a ak a, keiin chawhmeh vel ka lo lei zung zung thung. Bazar ve ṭhenkhat chuan ka pasal chu an en leh deuh haw haw ṭhin a, Aizawl DC a ni bawk nen a bazar ve chu mak pawh an ti a ni ngei ang.

Kan bazar zawh chuan kan in lamah kan haw a, ka pasal in ak bawr vel ve lutuk chuan ka nuih a tiza leh tlat pek tawh. In chhung kan luh chuan kan indah fel a, chaw ei hun chu a lo hnai leh hle tawh bawk. Chaw ei khamah tihfel tur awm ang âng ka ti a, ka tih zawh chuan kan nupa roomah ka chho a, ka pasal chu a lo insiam mial mial.

"U Hruai, enge i tih dawn? Ka office dawn lo kha i ti si a?" a bula va kal hnaih pah chuan ka ti a, a insiam lai chu a la tawp chuang lo.

"Office dawn lo ve" tiin min lo en zawk a, a kawr kilh leh mai a tum chu kuai herin ka lo tih sak ta zawk.

"Chhuna nangmah chauha ina i awm hian i khua a har ṭhin ti raw?" a kawr ka kilh bawk nen min en reng tih chu ka hria, mahse ka en ve lo thung.

"Har tawh lo ve, tunah chuan ka awm thiam tawh zawk" pangai tak chuan ka lo ti ṭha ve mai.

"Ruahmanna thar ka siam a?"

"Eng ruahmanna lam nge ni a?" amah chu ka en ve ta.

"Inrinni leh chawlhni ah hi chuan ka len chhuahpui ziah tawh ang che" a rawn tih chuan ka ka ho mai.

"Mak ti suh, i khua a har tih ka hria alawm" a rawn ti ve leh nghal.

"A ngai lo, chubakah chutianga kan len chhuah ziah te chuan ka pa leh u Zualtei te ka hmu ngam nâng" inthlahrunawm thei lutuk mai.

"Ka hrilh ang a, an pawm ve mai ang" a rawn ti leh sup.

"I ngaih ang ngawta awlsam a ni lo" ka ti leh chiam a, a rawn nui ta ringawt.

"Nui ringawt suh, ka tana a nawm loh dan tur te dawn ve vek ta che" ani nena len chhuah chu châk ṭhin viau mah ila thil mawi ber a ni lo tlat alawm.

"Lungngai suh, insiam la kan chhuak dawn nia" tiin a kal ta daih.

Ka pasal chuan ka pate chu min chhuahpui tur thu a hrilh a, u Zualtei leh ka pa pawh chuan a lo remti viau. Chutianga an remtih tâkah chuan tiin ka phur hnuhnawh leh em em a, motor-a kan chuan laite chuan ka ṭawng leh char char tawh. A changin min chhang a, a changin a ngawi leh vang vang zel. Kan kalna hmun tur ka zawh chuan Hmuifang a nih thu min lo hrilh ṭha ve mai a, amah nen chauha han kal dun vel chu nuam ka ti a ni. Darkar 1 leh tih vel kan tlan hnu chuan Hmuifang pawh kan thleng a, boruak ṭhat lai tak a ni bawk nen phul pawh a lo hring mawi tawk hle.

"Kha le" a rawn ti a, motor aṭanga chhuk ka tum pawh chu ka tawp chat.

"Enge ni a?" tia ka ban chuan a mitko a lo san uk a, hawng tura min tihnaah ka ngai tawp.

"Lalpa le! Awi, 1500D DSLR ngat leh nghal. Ka duh zawng hi i va'n hre tak, ka lawm e. Ka lawm em em e, hmelṭhapa" bawm ka hawng chiah chu ka ti nghal mawlh mawlh a, Canon Company Digital Camera min leisak chu a ni si a, ka hlim tehreng em.

"Han en chhin vel phawt teh, a battery pawh a spare a awm sa vek kha" tiin min lo hrilh leh zeuh a, hlim tak ka ni. A memory nen lam a lo awm sa thlap a, thla ka'n lak chhin vel te chuan a ṭhat zia chu sawi hian a siak loh.

"Kha tah khan ding teh, thla ka lo lak ang che" phula kan awm laite chuan ka ti a, a'n la peih loh hmel em em zui.

"Lo kal teh, Camera chauh buaipui lovin keimah te hi min ngaihven ve tawh la" ka lama rawn kal pah chuan a ti a, ka Camera thar avangin u Hruaia chu ka lo ngaihsak ṭhak hman reng reng lo alawm le.

"Ni tak e, lo kal rawh ka lo duat ang che" ka'n ti vel leh kher chuan a lung a tiawi lo ngei mai.

"Enge enge enge? Khatianga min melh vak kher? Ka duat i duh miah lo em ni?" a te zawk leh naupang zawk ni mah ila ka vin leh khar khar zel hi tih pangaiah ka nei tawh.

Dar 3 velah chuan kan inkhalh haw a, motor-ah chuan ka ṭawng leh ta char char mai. A bula ka ṭawng duh viau hi enge a awmzia pawh ka hre lo, min tina dawn lo tih leh ka ngaina lutuk tawh tih ka hriat vangte pawh a ni maithei a ni.

"A nuam hi ka va'n ti tak, hetianga min phur kual hi ka beisei ru reng zel" ka tih chuan min en chuang lo hian a rawn nui suk a, a ṭawng thei zawk na nâ nâ chu ka ṭawng chhuak hmasa leh ta nge nge e!

"Ka ṭawng reng hi i ning ṭhin em?" ka ti leh zat a, ngawi renga awm chu ka thei hlawl lo a ni.

"I lawmawm" tih te chauh chu a rawn sawi.

"Awi, nang hi chu i zaidam ve thlâwt, chuan pasal fel ber leh ṭha ber i ni ve chiang alawm" ka ṭawng tir dawn hi a ni tawp mai a ni. Thil hi tihluih tir zel a ngai a, a buaithlak.

"Min bawl vel lo la" nui deuh suk hian a rawn ti a, motor khalh te chu a hnehsawh phian bawk si.

"Ka bawl lo che, ka ṭawng thei ve sia i nin ka ring ve ṭhin alawm. I dawhthei si, hmelṭha si, pa bawk si, fel bawk si, si hlir si hlir" ka tih leh chuan a rawn nui ve ta hawk hawk a, keipawh chuti tho.

"Khatiang kha chu zan lamah sawi la, a tih chi viau ang" meinei deuh chuan a rawn ti a, a sawi tum pawh ka man chiang khawp mai.

"Ka duh hun hunah ka sawi thei bawk, kei chu fa neih vat vat ka chak tawh e" ka tih chhunzawm leh ta daih.

"Pathianin min pe ve mai ang" ani paw'n a rawn ti ve sup.

"A nih nei ta ila mipa nge hmeichhia i duh hmasak?" ka ti leh a, a eng zawk nge a duh hamsak ang tih chu ka hre châk thut a tin ni!

"Ka hre lo le"

"I duh ve ve tihna em ni?"

"Aw" mi hi a chhang tawi thei si.

"Min chhang tawi thei si hi ka ning leh thut zel, mahse ṭawng zuah zuah ta la ka duh loh phah vek che ka ring" ka tih chuan a rawn nui ve leh mai a, nuih suk leh ṭawng tawi hmuk hmuk chu a zia nen a inhmeh ka ti tawh zawk.

"A nih chuan ka ṭawng tam lohna chu min duh chhan ber a ni maw?" nui deuh suk pah hian a rawn ti a, kei chuan

"A ni ber lo, a chhan tam tak a awm. Nang, enge min duhna chhan ber?" tiin ka lo zawt let ve leh thung.

"Sawi teh, ka hre châk a nia" a ngawih leh tak reng avang chuan ṭawng turin ka nawr leh ta nge nge.

"I hre duh tak tak em ni?" min en zeuh chunga a rawn tih chuan ka lo bu ngauh nghauh.

"A chhan chu nangmah i nih avangin"

"I va han sawi ho tak, khatiang lek chu ka awih lo. Thil dang sawi hreh i nei chiang mai, sawi vat mai teh" ka ti leh ta chiam.

"A ni tak tak alawm, nangmah i nih avangin ka duh che" a rawn ti ve leh vat a, min rawn chhan ran danah dawt a sawi ka ring ta lo.

"Hetianga kan pahnih chauha kan awm lai hian thil ka zawt ang che aw?" Aizawl kan la luh hmel lo bawk si nen titi tur chu ka vawrh chhen mai a ni.

"Sawi la"

"Thinrim lo la aw?" ka thil sawi tur chu min chhang duh kher ang em tih pawh ka hre chuang lo.

"Aw" a rawn ti ve mai a, kei chu ka lo thaw deuh huai bawk.

"Ihhhhhhh....u Sangtei nen khan engatinge in inṭhen?" ka tih chuan min chhang mai lovin a ngawi ta vang vang a, ka lo zawt thawt thawt pawh chu ka inchhir rilru leh ta deuh.

"A ho em mai, ka zawt leh loah che ngai rawh. Chuan Naktuk chu khawiah nge kan len leh dawn?" tiin zawhna dang chu ka zawt ta zaih.

"Min phatsan a" ka zawhna hmasa zawk chu a rawn chhang daih a, a awm dan ka va en chuan a insehruh hmel hle bawk.

"Nupui atana ka duhthusam a ni ṭhin" a rawn tih chuan ka nghing ta dawt mai. Kei hi min lo duhthusam miah lo em ni tihna rilru chu ka nei a, mahse chu erawh ka ring phal chiah si lo.

"Mipa dang laka min zahpui viau chung khan ka hmangaihna kha a dai thei chuang lo" a ka ngeia a mi dang a hmangaih thu min hrilh chuan sawi belh tur reng hre lovin ka ngawi ta hle hle.

Sawi mai tur pawh ka hre lo va, sawi awm leh awm loh tur pawh ka hre tawh lo hrim hrim zawk. Ṭawng chu ka châk tawk lo hi a ni ber. Ṭawng ai chuan mahnia rilru kawm chu ka thlang ta zawk a ni. Ngawi reng chuan kan tlan a, ani pawh a ṭawng chhunzawm tawh lo hrim hrim bawk. Chutia kan inbiak lo tâk reng hnuah chuan a che hrut a, hla hi a rawn play a, chu a hla rawn play te lah chuan min ti no zualin ka hria.

Aizawl kan luh te chuan min en lo hian a khalh mial mial a, keipawhin ka en reng duh ta bik lo. In kan thleng a, sawifiah thiam si loh hian kan inkar chu a rit ru hle a ni. Kan kal lamte kha chuan kan hlim dun ve tehreng nen, haw lama ka lo ṭawng tam lutuk chu a pawi ka ti hnuhnawh. Zawhnate kha lo zawt lo ila chuan ka na lo tawp tur hi a nia. Kan nupa room-a kan luh rual chuan bathroom-ah ka lut nghal daih a, tui chu bucket zawnah ka herhhaw a, tui haw thla chuan ka thawm hliah se ka ti a ni ber. Ka ngaihtuahnaah chuan u Sangtei a hmangaihna a daih theih lo thu a sawi lai chu a rawn lang nawn awn awn a, ka thawm a hriat hlau tak chuan ka ṭap ta ringawt.

Ka ṭahchhuak lutuk a reh hnu chuan ka inphih fai a, bathroom-ah chuan a rinhlelh theih turin rei tak ka awm lovin ka hria. Bucket-a tui ka herhhaw chu ka off a, pangai taka lan tumin ka chhuak a, ka pasal chuan khuma ṭhu chung hian min lo en ran mai. Min hre chhuak dawn emaw ka ti hman a, mahse ka insiamṭha ta vat zawk.

"Ka zo chiah e, i duh chuan va lut ve nghal mai rawh" towel chu lain ka inhru a, ani pawh bathroom-ah chuan lutin a rawn chhuak ve leh vat. A rawn chhuah chuan kei chu khumah chuan ka lo mu tawh thung a, tunah tak hi chuan muthilh vang vang ka duh a ni.

"Ka tihpalh" ka hnung lam aṭanga min rawn kuah pah chuan a rawn ti a, kan boruak tawn mek avanga rawn sawi a ni tih ka hrethiam.

"A pawi lo" ka lo ti let ve sep a, min biakna aw ka hriat avang chuan ka ṭah chhuak lutuk kha a rawn chhuak leh ni berin ka hria.

"Ka nupui i ni a, ka rin ngam lutuk tawh che avanga i bula sawi ka ni" a rawn ti leh sup a, ka ṭawng tawh miah lo thung.

"Muttui aw" ka beka rawn fawh zeuh pah chuan a ti a, muhil angin ka maimitchhing tlat tawh. Ka muhil lo tih chu a hriat vek ka ring tho.

Ka muthilh theih thlâwt loh avang chuan ka tho ṭhem ṭhem a, khum bul aṭanga ka pasal hmel ka en chuan ka ṭah a chhuak zual. Dim te tea kalin bathroom lam bawk chu ka pan leh a, ka ṭap leh ta chiam. Kum khat leh a chanve vel lai kan inneih tawh a, fa ka pek mai theih loh avangin min phatsan ang a, min ṭhen mai ang tih ka hlau ngawih ngawih. Ka rilru chuan thil ni lo lo a ngaihtuah chhuak a, ka hun tawn chuan a zir ve êm bawk a ni.

Kan khum lam ka pan leh pawh chuan ka pasal chu tui tak hian a lo mu a, ka thil tih leh awm dan vel avang chuan ka inthiam lo thar ngei mai. Ani chuan a nupui ka nih vang te, u Sangtei nena an inṭhen chhan ka zawh avang leh min rin ngam tawh lutuk avanga min hrilh a ni a, keiin ka lo la na ve chiam chu thil dik niin ka hre leh ta lo.

A bulah chuan ka mu thla a, a taksa deka ka mut leh chiah chuan ka hahdam sawng sawng thei. A ngaite bawkin ka muhil leh lawk thei lo va, muthilh chu tum ve ngar ngar tak ka ni. Ka lo va ṭap leh vel kher chuan min ti muhil thei lo a ni. Mahse, tunge a pasali'n a nupui hnenah a ngaihzawng hlui a hmangaihna a daih theih lo thu sawia lungawi thei bik ang nî? Keimah leh keimah te chu ka inthiam chawp leh ta vel a, ngaihtuah thui vak chu ka duh tawh lo a ni. A awmah chuan ka bek ka va nghat a, muthilh hram tumin ka maimitchhing lui ta ngar ngar.

Chapter 10

Hruaia POV

Ka awma thil rit ang reng takin min delh run awma ka hriat avang chuan ka harh a, ka men rual chuan ka awmah ka nupui chu a lo muhil tih ka hmu zawm zat. A ni te reuh hian min tihlim a, ho tê tê pawhin min tinui thei zel hi mak ka ti. Kan inneih zan khan ka hmangaih loh thu leh hmangaih neih leh ka la ngam rih loh thu ka hrilh tlang tawp a, a hriat tirh kha chuan mak a tiin hrehawm a ti niin ka hria. Mahse amah ang thoa ka duh ve tih leh ka ngaina ve tih a hriat kha chuan a rawn lungawi ve leh mai a, kum khat leh tih lai chu ka bulah lungawi lohna tel miah lovin a awm ve leh tawh ta reng chu a nih hi!

A hmel en chian tumin ka hawi thla a, ka kawr awm chu a lo val kalh tih ka hmu bawk. Ni e, nimin lama ka thil sawi kha a ṭahpui tih ka hria a, sawi sual ka nei tih pawh ka hria. Pakhatah chuan engah mah a lo ngaih ka ring tawh lo va, mahse a lo la la na hle chu a ni. Zanriah ei khama kan nupa room-a kan chhoh te khan bathroom lam a pan vat a, a chhan kha ka hrethiam lo hle. Mahse bathroom aṭanga a rawn chhuah leh kha chuan a hmel aṭangin a ṭap tih ka hre thei a, chu pawh ka thil sawi avangin. A hmai ka chul sek avang chuan a rawn harh a, min rawn hmuh chuan a tho kang rang ang reng hle.

"Ka tihpalh, ka rit awm sia a hrehawm em?" engvanga chutiang thute rawn sawi ringawt nge a nih chu le, ka laka inthlahrung tak anga a awm vel chu ka duh lo hle.

"Engatinge i thawh?" ka tih chuan khum aṭangin a lo tho chhuak fel thlap tawh.

"Ka lo zuk chhuk ang, i hman hunah lo chhuk ve mai rawh aw, ka kal a nia" tiin kan nupa room aṭang chuan a chhuak a, hmai pawh a la phih lovin ka hria.

In hnuaia ka chhuk thlak chuan min lo nuih sen sen a, a rilru chu a hlim leh tawhin ka hria. Chutia a hmela hlimna ka hmuh chuan ka ngaih pawh a ṭha ve leh viau tawh. Chaw ei kham chuan kan nupa room-ah ka chho a, ka nupui chu a rawn chhoh mai ringin ka ngaichang deuh a, ka nghah deuh vang vang hnu pawha a lo chho miah lo chu mak ka tiru hle. Tun laia a awm dan hi ka hrethiam lo a ni. A changin a pangchang em em a, a changin a thinte lah chu a rim leh thut thut zel bawk.

Ka office chu ka thleng a, ka hnathawh tur pawh a lo awm leh nûal tawh. Ka hna chelhte hi tui ve viau lo ila chuan hneawm ve tak a ni ang. Keipawh hian a chang chuan ka hne lek lek zel. Tin, pawl eng eng emaw nia ka inhmanna pawh tam tak chu ka pha a, ka tel lo ta hmak hmak. Ka nupuiin ka bula a khawhar thu leh hna ka thawh avanga min biak a hreh thu a sawi khan ka rilru a thlak danglam vek a ni. Mahni nupuite be hman lo leh biak hreh khawpa hnathawk mi nih ka duh reng reng lo. Thil ka sign fel mawlh mawlh lai chuan ka phone chu a lo ri a, Caller ID ka en chuan ka be peih lo ngei mai.

"Enge?" ka ti deuh hmuk a, a number chu save kher lo mah ila tunge a nih chu ka hre chiang khawp mai.

"Zanin chu enge i tih ang? Lo leng ve tawh la, ka inluah thar pawh i la hmu miah lo a nia, ka sawmna che pawh hi a rei tawh hle a ni" lehlama mi chuan a rawn ti a, min sawm ngun tawh vîau mahse kal tumna emaw hmuh tumna ka nei ngai lo.

"Zanin chu ka nupui awm ka ngai a" ka ti ve ta hmak a, Nutei chu a rilru ka tina leh ang tih ka hlau tawh a ni.

"Enteh Hruaia, kan inngaizawng tawh lo tih hre ta che. Ṭhian kan ni a, ṭhianah pawh ṭhian ṭha tak kan ni. Chu chauh chu kan inkarah a awm tawh tih hre rawh, Nutei hi i nupui a ni a, i duh hle tih pawh ka hre vek alawm" pangai tak chuan a rawn ti a, kei chu chhang let lo chuan ka ngawi ta reng.

"Chuan, zanin chu i lo leng thei dawn em? Theih dawn loh chuan sawi ṭha la, a pawi chuang lo" a rawn tih leh chuan min ngun ve ngar ngar tawh bawk nen tlêm chuan ka inthlahrung ve ta deuh.

"Ka rawn kal dawn nia" ka ngawih vang vang hnu chuan ka ti ta nge nge a, a hmasa berna atan leh a tawp berna atan tia kal ka tum mai chauh a ni.

"Aw le, ka lo nghak dawn che a nia. Mahse zan ka mu hma ṭhin a, i lo kal dawn rô ro chuan lo kal tlai lutuk suh aw" a ṭawngkam vel aṭang chuan ṭhian nihna mai bak langin ka hre tawh lo.

"Aw le" ti leh supin kan inbiakna chu ka titawp a, ka thil tih tum chu thil sual a ni pawhin ka hre chuang lo.

Kan in ka thlen chuan ka nupui chu tlai dang ang lo takin ka hmu lo a, ei rawng bawltu lah Bawihtei a ni daih bawk si. Bawihtei ka zawh chuan kan nupa room-a a awm thuin min chhang a, keipawh ka chho ve nghal. Room ka lut chu ka la hmu lo ta cheu a, mahse bathroom lama thawm awm chu amah a nih ngei ka ring.

"U Hruai, i lo haw tawh maw? Hei bathroom hi ka tifai e ka lo ti a, lo va inthlak la i kawr kha ka lo su nghal ang" bathroom kawngka ka hawn chuan pangai tak hian a rawn ti bawrh bawrh a, ka kawr te chu phelhin bathroom lamah chuan ka lut ve ta nghal.

"Hei hei hei, enge i rawn tih dawn? Chhuak teh, nghala" ka nupui hi ka ngai a ni. Boxer nen chauh ka awm a, ani erawh awm hmun kawr nen a awm thung.

"Kan pahnihin tifai ang" ka tih chuan

"I ho em mai a, i upat tawh êm hi, che naupang chhia viau zel suh" a rawn ti let ta zek a, ka nui ta hawk hawk.

"Kei aiin i naupang chhia" ka tih leh chuan min melh rum teh e, a chang chuan han tihthinrima a hmel nur vel hi ka lawm leh tlat zel, a thinrim hian a duhawmin a hmelṭha thlawt a ni.

"Kha i duh leh tifai vek rawh" tiin a no ken chu min pe a, chhuah mai a tum chu ka lo pawt ding chat.

"Ni lo, kan pahnih ngei hian kan tifai dun ang" ka tih tak tlat avang leh a chhuahna tur ka dan tlat avang chuan kan tifai dun leh ta nge nge.

Ka bula awm chu a peih lo viau emaw ka ti a, kan han tifai dun ta reng a, a nuam ti zawk zawkah a ṭang leh lawi si. Ka nupui ang em ema min tinui hnem leh ka ngaih mihring hi ka la tawng ngai lo. Zan a lo ni a, ka nupui nen chuan khumah kan awm a, a awm dan chu ka thlir reng a, ani chuan chhun lama a insuk ro tawh ho chu a thlep fel ve mawlh mawlh.

"Nute, zanin chu ka chhuak lawk dawn aw?" ka tih chuan min rawn en rang khawp mai.

"Maw!? Ahhhhhh, nia a ṭha alawm. Mahse zan dangah min chhuahsan ngai si lo a, mak ka ti ve deuh, thil thleng a awm em ni?" ṭha tak chuan min rawn zawt a, ka chhuah chhan tur dik tak chu hrilh ila chuan ka chhuah a phal ka ring chiah lo.

"Awm lo ve, ka ṭhian pakhatin a inluah thar min hmuhpui rawh a ti tlat a" ka ti ve mai a, dawr erawh a ni vek bik chuang lo.

"Aw, a nih chu. Lo haw har lo la" a rawn tih chuan amaha lo awm chu a huphurh ru tih ka hre thei.

"Har lo vang, lo kal ve zawk la" lo kal ve tak tak se ka duh a, ani nena kal chu a ṭhat ka ring zawk bawk.

"Aih, hetah ka lo nghak zawk ang che. E chuan, ei tur rawn hawn teh aw" a tih tâk tlat avang chuan ka sawm lui duh ta lo.

"Aw le, ka lo haw har lo vang" tiin ka insiam a, ka insiam zawh chuan ka chhuk thla ta vat a, a chhan pawh rei tak len chhuah bosan ka duh lo a ni.

Nutei chu Sangtei in luah tharah ka kal dawn tih ka hrilh mai ngam bik lo va, a chhan chu ka kal phal reng chu si khan keimah vangin a lo ṭap leh ang tih ka hlau a ni. Sangtei chu ka call a, an in awmna lai tak ka hriat loh avangin min lo chang turin ka ti bawk. Tuikhuahtlang lamah chuan ka tlan chho zel a, a tawpah chuan amah pawh ka hmuh theiin a lo ding ta. Ka motor chu park ṭhain ka chhuk a, ani pawhin min lo be siam siamin a in luahna lamah chuan min hruai thla zawm zat.

"Lo ṭhu rawh, thingpui ka lo siam ang che" a tih chuan hnial tumna em em pawh ka nei lo. A hnung lam aṭangin a che chu ka en a, kan nun hluite chu ka hrechhuak lo thei lo a ni.

"Kha aw" rei lote hnuah ka lam lo panin a thingpui siam chu mi lo pe a, ka lo ban ve mai.

"Ka in luah chu enge a an?" a rawn tih chuan

"Mi pakhat luah atan chuan a ṭhat khawp hi" pangai tak chuan ka lo ti ve mai bawk.

"Chuan, nang chu i hnathawh a sang tawh bik sia, chutah i pa dik tak bulah i cheng tawh bawk nen i hlim tawh ngawt ang" a rawn ti leh siam siam a, a ṭawngkam vel aṭang phei chuan hmâna Sangtei kha a ni tawh lo tak zet tih ka hria.

"Ka hlim tawh khawp mai" ka lo ti ve sup ringawt.

"Nang zawk i hlim em?" ka tih chuan a lu a thing niah niah a, a thil sawi tum erawh ka ngaihtuah thiam pha hauh lo. Kei min zahpuia min phatsan ni aṭang kha chuan a hlim ka ring ve tawp a, mahse tunah lem a hlim hmel chuang si lo.

"Hlim lo, Hruaia nang nena kan inṭhen aṭang khan ka hlim ngai reng reng lo. Kei hian thil lian tak ka lo tisual a ni. Lo la inkawp ila chuan tunah hian i nupui ka ni tawh ngei awm si a" nui lui sak chung hian a rawn ti a, a hmel ka en chuan a lungngaih hmel hle bawk.

"Min ṭhen lo la chuan ka nupui chu i ni tawh ngei ang" ka ti ram ve hmak a, ka rilru chuan hun kal tawha natna min pek ang chiah chu pek let ve a châk a ni.

"Min la duh em? Hmân ang khan min la hmangaih reng em?" a rawn ti thut a, amah ka lo en loh lai tak a ni bawk nen a hmel chu ka en rang khawp mai.

"Ni lo, nang hi ka hmangaih tawh lo che. Chuan engtikah mah ka nupui hi ka phatsan lo bawk ang" ka ti nghet charh a, amah avanga hmeichhe dang hmangaih neih leh ka harsat tawh thu erawh sawi chhuah kher ka tum hauh lo.

"Kei chuan ka la duh reng che a, ka la hmangaih reng che Hruaia. Nang pawh hian min la hmangaih tih ka hria alawm, ka thil tihsual min ngaidam la, kan pahnih hian inkawp ṭha leh zawk ang" a rawn ti leh a, a thusawi te chu sawi pawh a sawi ngam zawk e a!

"LALRUATSANG, min phatsantu leh min zahpuitu hnenah hian kir leh ka tum tawh hauh lo. Chuan nang nen hian engtikah mah kan inkawp leh tawh lo vang" ka ti leh hrawk a, ka thusawte chu engah mah ngai lo ang mai hian a rawn la nui thei a nih chu!

"Hruaia, Nutei hian ka in luaha i len thu hi hre ta se a lawm i ring em?"

"Enge i sawi tum? Thil ṭul lo leh ṭangkai lo tih tum reng reng suh" ka thinrimna chu thup hram hram tum mah ila ka thei lo lam hret chu a ni. Thil chu a kal dik dawn lova ka hriat avangin

"Thingpui chu a tui khawp mai, ka haw tawh zawk ang e" tiin ka ding a, kawngka lam chu ka pan zui nghal bawk.

"LALHMAHRUAI, kan inṭhen chhan kha keimah lam a ni lo" a rawn tih chuan ka kal lai chu ka tawp chat.

"Ka inṭhen chhan dik tak kha chu nangmah a ni. Min ngaihsak lo va, min tilawm thiam lo bawk. Tisa nawmna pawh min pe ngai lo va, mi dang kha chuan min pe bik asin" a rawn ti leh chîam a, hmeichhe rapthlak tak zawng a lo nih ngei dawn hi!

"LALRUATSANG, thu lawi lo sâwi sawi suh. Nangmah a ni lo'm ni min phatsana min zahpuitu? Nang hian hrasatna nasa tak ka tawh lai khan ka rilru i tihnat belhchhah asin. Chuvang chuan zanin bak hi ka hmu leh tawh lo che ang a, kan inah pawh vawite khat mah lo kal leh tawh suh. I lo kal lui emaw ka duh loh zawnga i awm lui a nih ngat chuan i pate lam ka hrilh hreh miah lo a nia " ka ti vin leh ta hrawk a, ka thinrimna chu ka upbet zo tawh lo a ni e.

"Ni lo, i sawi dik lo. In inah hîal ka rawn la awm lo vang tih pawh a sawi lawk theih loh" tiin a kawr hak lai chu a phelh a, mak tak maiin a taksa ruak kang ka hmuh chuan tisa châkna nasa lutuk chu ka nei nghal.

"LALRUATSANG, in ha ṭha nghal rawh. Nang hian, nang hian ka in turah khan enge i pawlh?" tiin amah chu ka en reng a, ka hriatthiam phak bakin ka rilru leh taksa chu zaithauna in a khat vek a, chutah ka lam lo panin min rawn fawp bawrh bawrh a, ka awm dan chu in control thei chi zia zâng ka ni tawh lo.

"Hur herhnu, tisa châkna avangin min ṭhen maw?" tiin ṭawngkam mawi lo tak tâk phuh chhuak chung chuan ka fawp let ve ta bawrh bawrh a, sex tih chauh lo chu eng dang mah ka ngaihtuahnaah a awm tawh lo.

Ka harh zawk a, ka harh chiang telh telh a, ka awmna chu kan nupa khum a ni lo tih ka hre chhuak thuai bawk. Kei hian eng thil nge ka tih tâk? Khawvela ka thil tih duh loh ber hmangin ka nupui chu phatsan tihna em ni? Ka nupui bula ka awm dan ang chiaha ka awm thei te kha mak ka ti a, LALRUATSANGI chuan a tir te aṭangin thang a lo kam ru a nih lo reng ka ring tawh lo. Khum aṭang chuan ka tho chhuak a, ruak veka ka awm tih ka inhmuh hnuah phei chuan ka uire ngei a ni tih ka hre ta. Ka inha ṭha sawk sawk a, sana ka en chuan dar 1 lai a lo ri tawh. Ka bula ruak veka lo mu ve pawh ngaihsak tawh lo chuan ka chhuak ta vat vat a, kan in lam pana motor ka khalh laite chuan thil thleng chu ka ngaihtuah let a, sex chu kan hmang ngei a ni tih ka hriat chian chinah phei chuan mahnia inchhirnain ka khat nghal.

Nutei POV

"Ka tihpalh" ka mit ka men rual chuan ka pasal chuan a rawn ti ringawt a, ka harh chian chuan a sawi chhan pawh ka hrethiam ta chiah. Zing khua pawh a lo var vek tawh a, ka pasal chu a tho hma hle ni turah ka ngai.

"A pawi lo, i chhuak tawh dawn chuang hleinem. A hrim hrimah i lo va'n haw har awm ve, ka nghak ve char char che asin" thinrim miah lo anga lan chu thil awi ai tak a ni lo.

"Nia, ka tihpalh Nute. Ka chhuak tawh ngai miah lo vang" inthiam loh hmel deuh chuan a rawn ti ve leh mai a, ka thinrim rei duh ta bik lo.

Ni a ral a, kar a ral a, thlate hial chu a ral leh tawh. Hun hi a kal chak a ni. Tunah chuan u Zualtei pawh a graduate ve tawh a, kan chhungkua bik chuan a pass kan lawm nghe nghe. Keipawhin thil ka present ve a, a lawm thiam leh khawp mai. A sawi dan chuan Mizoram University lamah Master degree lam a bei leh dawn a, phur pawh a phur tawh viau. Ka ngaihdan chuan u Zualtei duh dan chu ṭha ka lo ti khawp a, keiin thei tawh lo mah ila a theih chhung hi chu lehkha hi zir a pawi lovin ka hria. Zanah chuan chhun lama ka insuk thawmhnaw ho chu Almirah-ah ka khai ṭha mawl mawlh a, ka tum loh deuhin Balcony lama ka pasal thusawi chu ka hre palh ta hlauh.

"Min rawn be tawh suh, ka awih chuang lo. Tun bak hi chu i phone call hi ka la tawh lo vang" tiin ka pasal chuan a phone chu a off hmak a, hre lo ang deuhin ka lo awm thung.

Khatiang khawpa thinrim khan ka pasal hian phone-ah mi a la be ngai lo va, chutianga a be thawm ka hriat avang chuan amah chu ka hmu mood fuh lo em em ringawt bawk. Thuamhnaw vel ka khai fel hnu chuan kan nupa khum lamah ka phei a, ka pasal pawh rawn lut vein min rawn kuah leh chûk chuk tawh.

"Tun lai hi i va rit ve, a pawi ka tihna pawh a ni chuang lo" amah leh amah chu a inchhang zawm zat.

"Ka rit ve bawk ang chu, thil ka ei reng alawm. A mak lutuk, ka chaw ei te hi a tui thei tawp. Chuan nang pawh tun lai hi i thawkrim mah mah nge ka hre lo, a hma ai khan i harh vang lo lehzual a nia. Harsatna i nei em ni? I nupui hi min hrilh hreh miah suh" ka ti leh ta nual mai.

"Nei lo ve, tun lai chu ka chau hma khawp mai" a rawn ti ve sup a, a hmel te chu ka hmu thu nghulhin ka hria a, dik lo lah chu a awm bawk si lo.

"Chuan" a rawn ti leh ringawt tawh.

"Chuan enge?" ka lo ti ve nghal.

"Tun lai chu ka ngai em em che a ni" min kuah hlun hlun chung chuan a rawn ti a, ka va hlim ru tak.

"Min ngaih thu i sawi hian a ril bik ê, ka thinlung hi a hneh thei tawp" ka tih chuan ka biangah a rawn piai vak a, a laih emaw mi chhan dan tur a hriat loh hi chuan ka biangah a piai ve ziah.

"Miin ṭha taka kan sawi chuan lo uang ṭhin suh" a rawn ti daih.

"Ka uang reng reng lo, ka uang phal bawk lo. Kei chuan tun lai mai ni lo, engtik lai pawhin ka ngai ṭhin che. Nang chuan hun bik neiin min ngai a, chutah min ngaih thu i sawi ve chhun pawh uan pui turah min la ngai cheu a nia" ṭawng tlem ka tum pawh hian ka thei hlawl lo.

"Aw le, ka nupui. I uang ka ti tawh lo vang. Mu ang le, ka ngaih em em nu" tiin rizai chu a kein a pawt chho a, ka lo nui ta ṭiah ṭiah.

"Enge?" a thil tih lai chawl meuh chuan a rawn ti a, ka nui tawp lawk thei lo.

"I ke vela i pawt chho kher khan ka nuih a tiza alawm, i chau ve hle a ni maw?" nui chung chuan ka ti a, ani pawh a rawn nui ve ta suk.

"Ka hre lo" a rawn ti tawi leh tawp a, rizai chu sin ṭhaa inkuah chialin kan mu chhunzawm nghal.

Zing lamah chuan ka tho hma leh hle a, tuk dang ang lo takin ka pa chu ka hmu mai lo. A lan danah a la tho lo tih a hriat theih mai. Ei rawng ka bawl malh malh a, ka nute lam ka be khat em mai tiin ka phone chuan ka call a, ka rin ang ngeiin rei pawh ring lovin an rawn la hma leh hle. Eng eng emaw ni kan sawi nual a, harsatna ka neih leh neih loh te pawh min rawn zawt ve luam. Nute nge nge han biak chu a hahdam thlakin thla a muang sawng sawng thei alawm. Kan inbiak tawp dawn lamah chuan kan nupaa chaw ei phei turin min sawm a, kan leng phei khat ve êm bawk a ni.

Kan nupa room-ah ka chho leh a, ka pasal chu a la muttui hle. Sana ka en chuan dar 7 a lo hnai kuarh tawh a, ka pasal lah chuan thawh a la tum hmel si loh. Choka lama chhuk thlak leh mai ka tum chu ka pasal phone rawn vibrate avang chuan ka ding deuh dat a, a phone laa caller ID ka en chuan number lawng tawp hi a lo ni thung. Number save loh aṭanga call rawn lut a nih avang chuan ka ngaipawimawh ta bik lo. A ring zo chiah tiha dawhkana ka dah leh chiah chu a rawn ri zawm leh a, chutah erawh thil ho lam tak a nih ka ring tawh lo.

"Hello" phone chu pick-up pahin ka ti a, lehlam aṭang chuan

"Hello, Hruaia a la tho lo em ni?" hmeichhe aw hian a rawn ti a, a aw lah chu ka hriat hnu a la ang em em zui.

"Aw, la tho lo e.Tunge aw?" ka ti ṭha ve mai.

"Nute, keimah Sangtei ka nia. Biak lawk ka duh a, ni danga ka biakin a la ziah ṭhin sia, tun hnai hi a la duh tawh miah lo va, a buaithlak khawp mai" ka rilru a dik lo nge pawh ka hre lo, a ṭawngkam chuan mei a nei deuh tlatin ka hria.

"Eeee, a nih chu. Kan kai tho ang e, thil pawimawh a awm a ni ang" ka tih lai chuan ka pasal chuan ka phone biak lai chu a rawn phih thla pawp a, ka phu dawrh nghe nghe. A rawn thawh lai chu ka hre miah lo va, a chet dante chuan min ṭhawng lutuk.

"Min rawn be tawh suh" tiin phone a en deuh vang vang hnuah chuan a lo call tu chu a bia a, phone chu off in a mu ṭha leh daih.

A awm dan chu ka hrethiam lo, thil dang zawng ai chuan u Sangtei nena an lo la inbe ṭhin chu mak ka ti. Ka chhuak tawh lo vang tih thu min hrilh aṭang khan zan lamah a chhuak tawh ngai lo va, mahse phone chu a be ngun hle thung. Ka pasal chu ka en vawng vawng a, a muhil lo tih ka hria. Kum 2 lai kan cheng dun ve tawh a, a zia chu ka hre ve thawkhat tawh viau a ni. Engvanga la muhil der tlat nge a nih leh u Sangtei nena la inbe tlat nge an nih chu ka hrethiam lo va, ka hre châk em em bawk.

A mood fuh lo bawk nen kai tho ta lo chuan ka chhuksan leh tawp a, mahse ka rilru chu ipik tak a ni. Ka chhuk leh chuan ka pa leh u Zualtei pawh an lo tho chhuak ve tawh a, a hma angin ka rilru chu a pangai thei tawh miah lo thung. Zing chaw kan ei lai chuan zing lama ka nu nena kan inbiakna chu ka sawi ve a, ka pa pawhin kan nupaa chaw ei chhuah chu a lo phal hle. Kal ngei ngei tur leh ka nu leh pate tlawh tlawh tur chuan min hrilh let ta zawk.

Ka pasal hna kal hlan chuan ka nu leh pate inah ka lo awm a, tlai lama chaw ei tur ka ni tho bawk a, awm tlang law law chu pawi ka ti teh chiam lo. Ka pa pawh a hna lamah a kal a, ka nu nen chuan kan inkawm leh chawt. Ka tel lova kan in a ruahzia te chu min hrilh a, ka khawngaih ve tak tak hle. Chhungkaw member tam emaw tlem emaw pawh ni ila, pakhat lek pawh an awm loh hi chuan a dik thei ngai lo tih ka hre ve chiang em. Ka pa'n a hna thila min zin bosan chhungte kha rei ka va'n ti thei tak, kan ngai hman viau ṭhin a nih kha!

"Nute, tun lai hi i va thau ve?" thingpui siam pahin ka chuan a rawn ti a, engvanga thau min ti tlat nge a nih chu ka hre lo.

"Nu, engatinge thau min tih zel a? Ka pasal pawhin rit min tih thu a sawi tawh bawk" ka ti ve niah niah a, keimah tak phei chuan ka rih belh emaw ka thau belh emaw pawh ka hre lo.

"Ka hmu thau mai che a ni mai alawm. Awi Nute, nang hi i rai a ni lo maw?" ka nu thu rawn sawi chuan min barakhaih hle. Ka nu thusawi chu ka ngaihtuah vang vang a, thil ni thei a ni tlat.

"Awi nu, ka rai a ni hrim hrim. Ka period lohna chin pawh ka hre tawh lo, awi lo rai hlauh ila aw. Nu, ka rai a niang" ka ti nghal chul a, ka rai chu ka beisei ve tawp. Ka pasal chu fa hrin sak ka châk em tawh vang pawh a ni maithei, chutia ka phur em em.

"Nute, khatiangin beisei vak suh, i lo rai loh palh chuan i rilru a na mai mai ang" ka nu'n a rawn tih pawh chuan ka ngaihsak tawh lo. Feli chu enge a tih pawh dawn lovin ka call vat a, a la ring ral ṭhak zui. Ka call nawn leh ngat.

"Enge min lo call sek a, class ka la a nia. Sir Joseph-a class a la ni zui" aw dim deuh chuan a rawn ti se se a, chutah

"Ka raiin ka hria, damdawiinah min kalpui teh" ka tih chuan

"Enga?" a rawn ti vak a, a hnuah 'sorry sir' a tih ri chu ka hre leh nghal. Ka ṭawng leh tur chiah chu a off daih a, min lo call back ka ring ve tawp. Ka rin lawk ang ngeiin a hnu rei lote ah a rawn call a, ka lo pick-up vat.

"Mawli, Ṭawngtheinu, nangmah vangin ka bialpa class ka ṭhulh tih hre rawh. Chuan khawi laiah nge i awm? Kal nghal ang" a thu rawn sawi chuan min ti nui chiam a, kei ai aiin a rawn phur tawh zawk.

Kan innghahna tur inhrilhin kan inbiakna chu kan titawp a, kan inhmuh tâkah phei chuan a phur lehzual. Damdawiin kan thlen chuan Doctor chuan rai leh rai loh test-na chu min pe a, ka in test zawha result ka en chuan ka lo rai ta reng bawk. Chutah kei chuan ka pum chhungah naute thla hnih leh a chanve mi lai ka lo pai reng a, engtinnge ka hriat loh theih zawk pawh ka hre lo.Test kit ka hmuh chuan Feli zawk chu a au ta chiam a, Doctor chuan a hau nghe nghe. Keini ṭhian dun hi chu kan thawm a na ve bawk êm a ni.

Kan haw leh vat a, ka nu pawh phone kaltlanga hrilh lovin kan in kan thlen hnuah chauh ka hrilh. Min lawmpui thiam em em a, ka pasal bulah erawh zep rih turin ka ti a, keimah ngeiin hrilh ka duh a ni. Ka sawm ngawrh em avangin Feli pawhin chaw a ei ve a, ka pasal a lo thlen hnu phei chuan zah hi a hre leh tawh lo. A fiam peihin chhaih kawlh phet hi a tum a, pakhat lahin chhang em em chuang lo hian a lo dawh ve tawp zel bawk. Tin, ka rai tih thu ka hriat aṭang chuan kan nupa inkar ṭha lutuk lo chu ka lo hre chang leh tawh lo hrim hrim.

Chaw kan ei kham chuan kan ṭhu khawtlai leh a, zan dar 8:30 velah kan haw ta chauh. Kan nupa room-a kan luh chuan ka hrilh châk tawh lutuk chu ka za zek zek hi a ni mai. Ka pasal chu bathroom-ah a lut a, kei chu inthlak felin khumah ka pasal lo chhuak tur chu ka lo chang reng thung. Ka rai thu a hriat chuan a hlim ve ngei pawh ka ring a, ka ring sual lo bawk ang. A rawn chhuak a, ka lo en reng avang chuan a nui sukin ka awmna lam a rawn pan a, a inthawlh ve nghal.

"Thil hrilh tur che ka nei a" ka lo ti a, chhun lam leh zing lama kan inkar boruak hrehawm ru tak chu ka hre chang tawh lo.

"Min lo en reng danah i neih ka ring reng a ni" ka awm danah a lo hre leh vek tawh a nih hi!

"Ihhhhh maw" tia a kut chu lain ka dulah chuan ka nghat a, ka chet dan avang chuan a lo nui deuh suk.

"U Hruaia ka rai a, keini hian fa kan nei ve tawh dawn" ṭah chhuak deuha ka tih chuan a nui tawp hmak a, mahse a rei lo.

"A ni tak tak em? Hetah hian ka fa a awm maw!? Nute dawt i sawi lo ti raw?" ka dul en pah chuan a rawn ti zung zung a, a awm danah ka rai thu chuan a tihlimin a ṭhawng ve hle chuan ka hria.

"Aw, i fa ka pai ve tawh" ka ṭap chhuak leh ta nge nge a, eng ang pawhin ṭah loh tum mah ila ka thei thlâwt lo.

"Hei ṭap suh, thu lawmawm kan hriatte chuan hlim tur zawk alawm kan nih" a awma min kuah bei thlawp chung hian a rawn ti a, ka ṭah chhan chu rilru nat vanga ṭap ka ni hauh lo.

"Ka lawm lutuk hi ka ṭap tawp alawm. Mawla, ka lungawi loh vanga ṭapah min ngai em ni?" ṭap reng chung chuan ka ti leh vak a, a lo nui nghawr ve dat.

"Aw le, ka hrethiam e. Tunah chuan hlim deuhin i mu phaw teh ang, naktuk lamah ka pate kan hrilh ve dawn nia" a rawn ti leh sup a, ka rilru chu a hlim tak zet a ni.

"I hlim ve tak tak em? Tun lai hi ka lakah i zia a dang lutuk, min ngai lo si. Kei chuan ka ngai em em che a, nang chuan min ngaihsak ve tak tak lovin ka hria. Hrehawm ka tihzia i hre si lo" pangchang tak chuan ka ti a, a hma aia nghet chuan min rawn kuah zui nghal bawk.

"Ka hlim lutuk Nute, nangmah ngeiin ka fa i pai hi ka lawm a ni. Chuan, ka ngaihsak tawk loh vang che pawhin ka tihpalh bawk. Tun aṭang chuan nang leh kan fa lo piang tur hi ṭha takin ka enkawl tawh ang che u. I rit ka tîh ka tihna chhan kha i rai vang hi a ni chiang mai, chuan ka ngaih em emna chhan che pawh hi rai vang a lo nih chiah hi! Eeee chuan, tun aṭang chuan i fimkhur vîau a ngai tawh a nia" tiin ka hmuiah chuan a rawn fawp zeuh a, a ṭawng ve tâk duah avang chuan

"Rai ziah ila a ṭha ang" ka lo ti a, ka thusawi teh daih avang chuan min en chiang hle.

"Enge i sawi tum?" a mual bovin a bo.

"Ka rai i thu i hriat chauhin i ṭawng sei duh tih theih tur khawpin i awm tlat alawm. Ka bulah tal hi chuan ṭawng tam ve deuh rawh, i aw hriat ringawt te hi ka thlahlel ṭhin a nia" vui loh theih pawh a ni lo. Nui chung hian min kuah ta chiam a, hlim takin kan mu dun ta hle hle.

Ka duh dan leh ka besei ang thlapin boruak chu ka rai thu chuan a rawn thlak chiang hle a, ka pasal chhungte'n ka rai thu an hriatte khan min va lawmpui thiam tak em. Duati chenin ka pum chhunga naute awm ve ta mai chu mak an ti a, fa ka hrin thuai thuai chu an duh a ni ber. Kan nupa inkara inpawh ngam loh riauna awma ka lo hriatte chu ka nau pai thu chuan a ti bo chiang hle bawk. Ka pasal chuan min duat lehzual a, mahse zan lama chhuah chu amah ang lo takin a ching leh ta deuh. A chhan leh tihtur ka zawh lahin hna lampang a nih thu min hrilh a, keipawhin ka awih ve mai ṭhin. Rinhlelh tur mi ah ka ngai lo va, min hmangaih miah lo mahse min ngaihsak danah leh min duat danah chuan min hmangaih ve ṭan tawh niin ka hria.

A hna kal pawh a rawn haw hma tlangpui tawh a, amah ka hmuh hi chuan ka pangchangin ka ngaih a zual leh ṭhin. Hetiang em em hian ka pasal hi ka thlahlel ang a, ka bula a awm reng chung pawh hian ka ngai ang tih ka ngaihtuah pha ngai lo. Ka pa khan 'pakhat chiah in ni tawh lo' a tih kha a lo dik ngei dawn a nih hi! Feli bawk chuan min be peih a, ka rai hnuah phei chuan phone ka dawng nitin ti ila a dik zawk ang.

Ka ṭhian leh ka chhungte chuan min ngaihtuah hlawm em em a, nau ka chhiat mawlh ang tih min hlauhpui a ni. Kei pawh hian ka nua pai lai chu ka chhiat mai ang tih ka hlau a ni. Kum hei leh chen fa neih ka suangtuah hnuah a takin Pathianin ka duhthusam chu min tihhlawhtlin sak a, chuta kara lo chhiat vel chu ka duh lo bur. Ka pasal awm dan vel aṭang phei hi chuan kan nupa inkarah hian fanau an awm ve ngei ngei a ngai tawh a ni.

Ka pasal chuan min duatin min ngaihsak viau tho mahse ka rai mai loh avang khan mi nupa, fa nei tawh te ho awhna a nei tih ka hre ru ve reng zel. A sawi lang ngai lo va, ka rilru tihnat ai chuan a ngawi mai mai zawk ṭhin. Kei lah pek chuan tlang tak hian ka zawt leh phawng phawng ṭhin a, a hnuah ka inchhir leh ziah tho. Mahse, Pathian hi a lo ṭha a ni e. Ka rai hnuah phei hi chuan min chet tir loh tawp a tum a, a ti awm ang lo ti tho mah ila ka hrethiam tho. A tan chuan a vawikhatna a ni ang a, chutiang bawkin kei atan pawh.

Chutia ka rai tak avanga ka pasalin min duat leh lutuk chu ka pa bawk chuan a fiam leh zuk zuk zel. Anni pafa ang em ema inkawmngeih leh inhmangaih hi ka la hre lo. Pa leh fanu chu inhmangaih sa turah ka dah a, mahse pa leh fapa hi chu tlema inpawh lo tur leh intithiam lo vel bik kher turah ka lo ngai ṭhin. Ka pasal leh ka pate inbiak dan leh che vel ka hmuh hnuah hi chuan ni tura ka lo ngaihtuah dante chu ka thlak chiang hle.

Tunah chuan naute pawh ka pum chhungah thla 5 lai a awm ve tawh a, rin ai takin rai chu ka haw lo va, ei theih loh tih vel pawh ka nei lutuk lo. A hrehawm ta ber chu inthiar leh zun tih vel hi a ni mai. Ka nau pai chu thla 5 vel âwr la ni mahse a lian ang reng hle a, chutia ka pum chhunga naute awm ta na nâ na chu ka bia ka be ve ṭhin. Thla 5 ka pai tlin hnu hi la rei lo mahse engtin emawni taka awm ka ching chho a, mak pawh ka ti hle. Ka nu ka zawh lahin thil ei sual emaw ka neih a rin thu a lo sawi mai zel a, kei lah chuan ka ngeih loh tur chi thil ka ei ka hre si lo.

"Zanin chu chhuah leh i tum em ni? Tun lai tak chu ka pum hi rawn nawm loh a ching rîau a nia, min awmpui hnem deuh teh aw? Mahse, i buai a nih chuan ka tilui lo che a nia" tiin ka pasal chhuak tura insiam mawlh mawlh chu ka bia a, ani pawh insiam zovin ka bulah chuan a rawn ṭhu thla zawm zat.

"Aw le, ka hria e. Tun hnai têa ka chhuah a ngai leh zauh zauh ṭhin hi a buaithlak khawp mai" ka chala rawn fawp pah chuan a ti a, ka dul chu en vang vangin a fawp zeuh bawk.

"I buai tih chu ka hria alawm. Kan tan hian hna i thawk nasa ve ngawt mai, keini nufa lah hi chawmhlawm mai kan ni bawk si" ka ṭawng laklawh lai chuan a kutin ka hmui chu a rawn hup a, chutah u Hruaia chuan

"Khatiang zawng khan sawi tawh lo teh Nute, nang hi ka nupui i ni a, nang leh fa lo piang tur enkawl che u hi ka tihtur leh mawhphurhna a ni alawm" a rawn ti dam thluam a, ka nui ve ta sak.

"Aw le, ka u. Lo haw har lo la, keimah chiah ka ni tawh lo tih hriain min duat lehzual ang che. Min duat tur hian ka tilui ve ziah che a, nangmah hian i tum ngai bawk si lo" ka tih chuan nui chung hian min lo kuah a, amah hrim hrim hi ka ngai a ni tawp.

"Aw le, ka nau. Min duat rawh i tih ngai lo khawpin ka awm tawh ang" ka ṭawngkam hman ang deuh chiah chuan a rawn ti ve sup a, ka lung a lo awi hman em em tawh.

Zan dar 8:30 vel a ni a, ka lo hlauhthawn ruk ang ngeiin ka pum lah chu a na riai riai bawk. A reh ve leh mai ka rin avangin u Zualtei pawh ka pun duh lo va, a reh zawk hnua a rawn nat leh ṭhin avang chuan ka hlauthawng ru ṭan hle a, ka awm a nuam lo tulh tulh bawk. Ka pasal chu vawi thum lai ka call tawh a, mahse a ring ral ṭhak ṭhak. Ka pum nat dan chuan zual lam a pan zel avangin u Zualtei chu ka call ta tawp a, ani pawh kan nupa room-ah chuan a rawn lut ve vat.

"Engatinge Nute? I dik lo em ni?" a rawn ti zung zung a, a hlauhthawn hmel hle bawk.

"Aw, ka pum hi na lutuk chu la ni lo mahse a nat zual tak tak hmaa damdawiin kal hi a ṭha zawkin ka hria. U Zualte, kan kal mai dawn em ni? Nichîn aṭang khan a na ru reng tawh a" ka lo ti ve vat.

"A pawi lo, a nat tak tak hmaa kal kha a finthlak zawk. U Mama hi a lo la haw lo ami? Kan call ang e" tiin biak a tum a, kei chuan

"Be lo mai rawh. Keipawhin ka call tawh alawm, missed call a hmuh hunah a lo call back vat mai ang. Tunah chuan damdawiin hi kal vat ka duh" ka lo ti vat a, ka pum na tial tial chu ka hlauthawng a ni.

"Aw le, a nih chuan ka pa ka zuk ko vat ang e" tiin a tlan thla a, ka chhiat ang tih mawlh chu ka hlau tawh a ni.

Civil Hospital kan thlen chuan doctor te chuan damdawi ei tur min lo pe vat a, kan ina kan awm laia damdawi ei nachang ka hre miah lo chu âtthlak ka ti hnuhnawh hle. A nat zual lutuk loh nan damdawiin min jection a, ka bulah chuan ka pa, Duati leh u Zualtei chuan min kil ṭhap bawk. Ka pain ka pum nat chhan doctor a zawh chuan ka pum ngeih loh thil ka ei thu a lo hrilh a, mak ka ti hle. Ka thil ei engkim chu a tui vek a, ka ei tui em em vek avang khan ka pum tana ṭha lo thil ka lo ei a ni tih ka lo hre lo pawh a ni mahna. Doctor chuan rai laia ei bik tur thil te chu min pe a, a hming te lah chu a la mak hlawm em em zui.

Damdawia min jection avang chuan ka pum na lutuk tur pawh chu a reh ve leh mai a, nau ka chhiat lo hlauh chu ka lawm a ni. Haw leh mai kan tum a, mahse doctor in minute 15 vel tal nghak tura min tih avang chuan kan awm khawmuang ve ta rih. Duati chu ka bul hnai taka ṭhu hian a titi ve mial mial a, keipawhin a hriatthiam tawk vel chuan ka lo titipui ve zel bawk. Ka pa chuan mi a bia a, tunge a biak erawh ka hre lo. U Zualtei pawh a phone a khawih malh malh a, kan vai chuan kan hahdam tlang tawh hle.

"Au Mama" tiin Duati chu a rawn au chhuak thut a, ka en loh lai tak a lo ni bawk nen ka phu dawrh nghe nghe.

Duati chu kan awmna ward room aṭang chuan pawn lamah a tlan chhuak a, keini pawhin kan zui ve nghal. Pawn kan va thlen chuan ka pasal chuan Duati chu a lo be siam siam a, an bula u Sangtei lo ding ve reng chu mak ka ti ang reng hle thung. Chutah u Sangtei pum chu rai lang puar chho ṭan ang mai hian a lo puar a, mahse kei ang em em chuan a puar lian lo. Ka pasalin keini ho min lo hmuha a hmel inthlak nasa lutuk ka hmuh takah phei chuan thil awmzia ka hrethiam lo tulh tulh.

Ka pasal chuan u Sangtei chu thil a hrilh zeuh a, chutah u Sangtei pawh chu ngawi rengin a kal liam zui ve mai bawk. Ka pasal chu ka lo en kar a, a hmelah chuan inthiam lohna chu ka hmu thei ta tlat. Ka rilrua awm ang chu a tak ni lo hram se ka ti. Duati lah chuan engmah hrethiam lo hian ka pasal kutah chuan a vuan a, a be zet zet bawk.

"Mama engatinge kan phone call i lak theih loh? Enge hetah daih daih i tih? Hna avangin i chhuak a ni lo'm ni?" ka pa aw chu a nem vak lo.

"Min lo call maw!?" tiin a phone chu a phawrh a, kan call tih hre miah lo anga a awm chu mak ka ti hle.

"Call ropui e, Nutei hi a pum a nat avangin kan buai alawm" u Zualtei chuan ka ṭawng hmain min rawn ṭawng khalh ta hlauh.

"Ka zawhna kha han chhang phawt mai teh" ka pa zawk chuan a rawn ti leh a, mahse ka pasal chu a ngawi reng thung.

"I ngawi reng bawk si a, i haw ang u. Damdawiina i mi rawn kalpui kha thlah haw la, in i rawn thlen hunah kan inbe zawk dawn nia" ka pa chuan a ti hmuk a, a lawm bik chiah lo a nih hmel.

In kan thleng a, ka pa chuan kan nupa room-a chho rih lo tura min tih avangin u Zualtei nen chuan sitting room-ah kan ṭhu ngawi ta ran. Kan boruak tawn mek avanga sawi mai tur awm lo lutuk chu hrehawm ka ti. Rei lote hnuah ka pa chu a room aṭangin a rawn chhuak a, Duati a tel ve tawh lo thung. Ka pa rawn ṭhut fel hnu lawka kan in kawngkapui inhawng thawm rawn awm chu en lo mah ila ka pasal a rawn lut tih ka hre thei. Sitting room sofa-a ṭhut thlak lai te chuan u Hruaia chu ka lo en lo hrim hrim a, ka en ngam lo zawk a ni.

"Sawi rawh le, engvanga i nupui rai puar pawh ngaihsak hman lova kan hmelhriat loh mi rai puar ngaihsak zawk nge i nih?" ka pa chuan a ti ram hmak a, kei chu ka hawi chhuak ngam lo hrim hrim.

"A chhan chu ani khan ka fa a pai a ni" ka pasal thusawi chu hriat loh der ka chak lutuk, mahse a theih ringawt si loh. Hawi pawh hawi chhuak lovin kun ngal chuan ka awm a, ka mittui chu a rawn tling nghal pam bawk.

"Enga!? U Mam, nupui nei lai i nih hi" u Zualtei chuan thinrim aw tak hian a rawn ti ve ta.

"Hruaia, eng thil nge i tih tâk hi? I uire i tihna em ni?" ka pa chu a thin a rim ve hle a ni tih ka hre thei, a chhan chu ka pa hian a fapa hi Mama tih hlirin a ko ṭhin a, mahse tunah chuan Hruaia tih meuhin a ko ve alawm.

"Pa, ka tihpalh. Ka tum a ni lo, insawifiah ngaihna pawh ka hre lo" ka pasal ṭawng chu hriat zawm ka duh tawh lo va, ka tana natna tur hlir chu a sawi dawnin ka hria.

"Ka hnenah ni lovin i nupui hnenah hian khatiang thu kha chu sawi rawh" ka pa chuan a ti ram leh hmak a, ka mittui chu ka dang seng ta lo.

"Nute" u Hruaia'n a rawn tih rual chuan ka ding thut a, ka awm thei tawh ngang lo a ni.

"Ka pa, ka awm a nuam lo êm mai ka lo han chho mai ang aw" rawn ang deuh chuan lang mah ila min chhan hma hmain ka chho ta vat.

Kan nupa room-ah chuan ka lut a, khumah ṭhuin ka ṭap ta chiam. Chutia ka ṭah lai tak chuan ka pasal chu a rawn lut a, a rawn luh hnuah erawh chuan ka ṭap lai pawh ka tawp hmak. A hmel chu ka hmuh rih duh loh avangin ka maimitchhing tlat a, a kuta ka kut a rawn vawn te chuan ka ṭah a chhuak zual sauh.

"Nute, ka tihpalh lutuk. Ka tihpalh tak zet" a rawn ṭawng ri ta. Maimitchhing tlat mah ila ka mittui te chu a luang thla zawih zawih a, awm dan tur pawh ka hre lo a ni.

"I rai laia hetiang thu i hria hi a pawi ka ti" ka ṭawng ngam rih lo va, ka meng duh rih lo bawk.

"Nute, meng tawh teh. I ṭah hian engtin emaw ni ka awm ve ṭhin ka tih tawh kha, insawi fiah ngaihna ka hre lo a ni" a rawn tih pawh chuan men chu ka la tum chuang lo.

"Ka hmangaih em em che a, ka pasal i nih angin ka zah em em bawk che" rei tak ka ngawih hnu chuan ka ṭawng chhuak ve ta.

"I hria em u Hruai, ka ngaisang em em che asin. Engatinge min phatsan? Min phatsan loh tur thu kha min hrilh a ni lo'm ni? Fa ka pek mai theih loh che avangin i nupui atan min duh tawh lo em ni? Tunah chuan i fa ka pai tawh hi, engatinge hetiang thil hi ka chungah i tih?" ka tih leh chuan min rawn kuah thlawp a, ri meuhin ka ṭap ta zawih zawih.

"Nute, ka tihpalh tak zet a ni. Ka insawifiahna hi awih dawn lo mahla nang phatsan che hi ka duh ngai lo tih min hriat sak hrâm rawh. Ka hre lo, kha zan khan ka in turah LALRUATSANGI khan thil a lo pawlh ang tih ngaihna reng ka lo hre lo a ni" a ṭawngkam chhuak mal tin te chuan a uirezia a ti chiang a, chu chuan rilru natna tam tak min pe bawk.

"Ni lo, hei hi a tak a ni lo. Ka mumang mai a ni" ka ti leh ruai a, ka aw te chu lawi vek tawh.

"Ka tihpalh lutuk" a rawn tih te chuan a aia ringin ka ṭap a, ka insum thei tawh lo a ni.

Ka harh hlawl a, zing a lo ni der tawh. Zan lam boruak ka ngaihtuah let chuan ka lo ṭap muhil tih ka hrechhuak a, ka tho ta vat. Ka pasal khuma mu chu ka en a, hahdam hmel taka a mu ka hmuh te chuan ka rilru a rawn na thar awn awn. Ngaihtuah buai duh tawh lovin choka lamah ka chhuk a, thingpui chu siamin ka in zui ta mial mial. Chutia ka in lai chuan in chung lam aṭangin ka pasal chu a rawn chhuak thla hlawl a, lo biak chu hreh tak ka ni. Ngawi rengin a thingpui tur ka lo siam a, biak ka duh rih lo a ni.

"Nizan chuan i pum chu engtinnge a nat a?" pangai tak chuan a rawn ti a, chhan ngaiin ka hre lo.

"Nute, kan fa kha ka ngaihtuah ve tho alawm" a rawn tih leh chuan ka melh nghal hrawk.

"Ka pum a nat ṭhin thu hrilh lo che ka ni lo" ka harhfim tawh bawk nen ka thin chu rim tak a ni.

"Ni e, kha chu ka thiam loh a ni. I pum chu engvanga na nge?" a rawn ti nawn leh ngat.

"Ka ṭha tawh e" ka ti ve hmak.

"Thil ni lo lo i ngaihtuah thlen loh hram ka beisei" a thingpui in pah chuan a rawn ti a, engatinge a zia hi a danglam tâk em em le?

"U Hruai, ka hmangaih êm avang che leh hetia i chawmhlawm mai ka nih avang hian min hne tawh tihna em ni? Ka neih chhan che kha i hre vek a ni lo'm ni? Zirlai ka chhunzawm loh chhan thlengin i hre vek a, engtinnge min phatsan theih zawk?" pangai tak chuan ka tichhuak thei hram a ni. A hmel ka en ve ran a, mahse thinrim hmel hmuh kher ka tum tawh lo.

"Ni lo, chutiang lam a ni lo Nute" ka kut vuan chung chuan a rawn ti thuai a, ka kut chu ka la sawn ve vat bawk.

"Engatinge insawifiah i tum miah loh?" ka ṭap leh ringawt dawnin ka hria.

"Insawifiah pawh ni ila i awih tawh dawn chuang lo alawm" a rawn ti leh mai a, a sawi dik reng.

"U Hruai, vawiin ni chhung zawng hi chu min be lo hram teh aw? Ka ngen a che, chuti lo chu thil ṭha lo ka ti palh mai ang tih ka hlau a ni" ka mittui chu a tla leh ta.

"Aih, ka thei lo Nute" ka bana min rawn vawn a tum a, ka lo tawlh sawn hman hram.

"Inṭhen i duh em ni? Ka sawi ang chuan awm phawt mai rawh" ṭawng rin hlau tak chuan ka ti a, ka rilru a kal dik loh vaih chuan ka duh loh thlêng thleng thil ka ti palh ang tih ka hlau a ni.

"Aw le, mahse vawiin chauh a ni ang aw, vawiin chauh" dawhkana kun ngal chung chuan a rawn ti chhuak sup a, a rilru chu nat hmel viauin lang mahse kei ai chuan a nat ka la ring lo.

Chutianga kan nupa inkar a awm ta chu hrehawm ka ti ve tho a, mahse keia duh duha thlak danglam theih a ni si lo. Ka pasal nen chuan kan inpawh lo zual ta em em a, amah chuan min biain min tihhlim a tum leh ṭhin tak ná a, keimah zawk chu ka dik tawh lo a ni. A sawi tawh angin insawifiah a tum lo hrim hrim a, insawifiah pawh ni se ka awih kher ang em tih a ni. Duati tih loh chu ka pasal lakah chuan kan ṭawng tam lo sawt hle a, chhungkaw inngeih tak ni ṭhin chutianga kan han awm ta mai chu a lungngaih thlak ka ti.

Kei, a nupui ai tal hi chuan u Zualtei leh ka pa chuan ka pasal chu an la be tam zawk. Zana chhuah chu la nei tho mahse chhuak lo turin leh ka ngaih thute chu ka sawi duh ta lo, a chhuah chhan lah u Sangtei a ni tih ka hre chiang mai si. Kan boruak tawn avangin thil ka ei ṭha lo va, mut pawh ka mu ṭha lo bawk. Kar khat a ral meuh chuan ka taksaah ka zan mut ṭhat loh leh ka thil ei ṭhat loh a rawn lang chhuak a, u Zualtei phei chuan thil ei ṭha turin min fuih char char ṭhin.

Kan nupa inkara boruak chhe tak inlinglet vel chu ka nu leh pate hrilh ka tum ve viau ná a, la sawi rih loh chu fuh zawka ka hriat avangin ka hrilh leh ta lo. Ka hrilh a nih chuan kei ai aiin an thinrim dawn tih ka hria. Chutiang bawkin ka ṭhiannu Feli pawh ka la hrilh duh ta chuang lo. Phone kaltlanga kan inbiak te chuan an hria ang tih chu ka hlau ru thei hle. Zan khat chu in hnuai lama ka pa ṭawng thawm ka hria a, mak ka ti deuh. A chhan chu ka pa hi ṭawng ring tak mi a ni lo.

Kan sitting room lam chu ka pan a, tute nge ṭawnga tute nge an nih ka zuk hmuh chuan ka kal lai chu ka tawp chat. Ka pasal chuan u Sangtei chu kan inah ngei a rawn hruai lut a nih chu! Ka pa chuan ngawi reng hian ka pasal thusawi chu a lo ngaithla a, a hmelah chuan a lawm hmel vak lo bawk. Ka pa'n min rawn hmuh chuan an bula ṭhu phei turin min ti a, ngawi rengin ka phei a, ka pasalte ṭhutna lam hnaihah chuan ka ṭhu duh lo hrim hrim.

"I thil sawi zawh chiah kha kei ni lovin Nutei hi hrilh la, ani'n a phal leh phal lohah a innghat zawk tawh ang" ka pa chuan ka pasal chu a en run a, ka pasal erawh a kun ngal thung.

"Nute, Sangtei hian ka fa a pai avangin kan bulah a rawn cheng ve rih dawn a" ka pa thupek ang chiah chuan a rawn ṭawng chhuak a, ka lo en reng a, ani chuan min en ngam lo nge ka hre lo hmun dang daih a hawi.

"Engatinge u Sangte? Engatinge kan nupa inkar hi i tih buai kher a? Mi fel tak i niin ka lo hria asin, engatinge hetiang zawng khera i chet? Ka pasal lo mipa dang tam tak an awm tih pawh i hre vek a ni lo'm ni?" ka ti ta daih a, u Zualtei KṬP thil vanga a lo chhuak hlauh chu a zia zawk.

"Ihhh, ka tihsual vek pawh a ni bik lo" inthlahrun hmel tak chuan a rawn ti a, chu u Hruaia chuan

"LALRUATSANG, ka in turah thil i lo pawlh a nih kha" a rawn ti hrawk a, u Sangtei pawh chu a phu dâwr nghe nghe.

"Hruaia, ka pawlh hma pawhin nangmah anih kha min sual hmasa?" chutia ka zawhna pawh chhang lo va an inhrawk kual vel chu ka ning ngei mai.

"In thil sawi khan awmzia pakhatmah a nei tawh lo, duh tawk rawh u" ka pa chu a rawn ṭawng chhuak ve leh a, ka pasal leh u Sangtei pawh an ngawi ta hle hle.

"Nute, enge i thuthlukna chu ni ta?" ka pa chuan min rawn en a, ka rilru dik tak anga kal ka duh a ni.

"Ka pa, u Hruaia hi ka hmangaih em em a, ka zah em em bawk. Ka zirlai meuh chawlhsanin pasalah ka nei a, chuvangin kei hian ka pasal hi ṭhen ka tum lo. U Sangtei rawn awm avang hian ṭhen mai ka tum lo va, mahse a hmaa ka pasal ka zahna ang te, ka hmangaihna ang te kha chu a awm reng thei dawn em tih ka hre tawh bik lo a ni" ka tih lai chuan

"Nute" ka pasal chuan a rawn ti a, kei chuan ka kuta lo ṭawng rih lo turin ka lo ti vat a, a ngawi ve leh mai bawk.

"Ka pa, hetia kan awm khawm lai hian sawi vek a ṭhain ka hria. Heng thil thleng vel avang hian ka pasal hi ka ṭhen phah dawn lo a, u Sangtei pawh rawn awm mahse pawi tihna ka nei lo. Chu chu ka thuthlukna a ni. Ka lo han chho ang e" tiin ka ding a, tûmah chuan min ko ding lo hrim hrim a, min ko ding ngam lo zawk niin ka hria.

Kan nupa room-ah chuan ka ṭhu ngawi reng a, zan mut ka harsat leh ngei dawnin ka hre bawk. Ni thar apiangte chuan lungngaihna min rawn thlen emaw tih theih tur khawpin ka nun chuan harsatna a tawk a, ka lo rai kher bawk nen engkim chuan ka rilru a tihah vel vek. In hnuaia u Zualtei ṭawng deuh lawng lawng ka hriat chuan an inhau ni turah ka ngai. Dar 10 vel bawrah ka pasal chu kan nupa room-ah a rawn lut a, engtin mah ka lo be lo.

"Nute, ka lawm e. Min ṭhen loh avang hian ka lawm tak zet a ni" ka bula rawn ṭhut thlak pahin u Hruaia chuan a rawn ti a, kei erawh chuan lawmna emaw hlimna emaw pawh ka nei thei lo.

"U Hruai, i nupui ka ni hi i inchhir em?" ka ngawih deuh vang vang hnuah chuan ka ti a, chu zawhna chu ka zawt lo thei lo a ni.

"Aih, chhir lo lutuk. Nang hi ka hlimna ber i ni tawh asin" a rawn ti thuai.

"U Sangtei'n i fa a pai ve thu hre lo ila chuan ka hlim ngei ang, i hlimna ber ka nih thu min hrilh avang hian ka hlim dawn lutuk. Mahse, tunah chuan engkim hi a buai zo tawh a ni" khumah chuan ka lawn a, rizai sinin ka mu ta hmak.

"Khawngaih takin min si lo hram ang che aw, zan mut hi ka harsat thei bawk si nen min sik phei chuan ka mu thei lo lehzual ang" ka bula a rawn inthawlh rual chuan ka lo ti a, chutia ka ṭawng avang chuan ani pawh a che lai chu a tawp ve hmak.

"Khawngaih min dil ṭhinna hian ka rilru a tina a, ka thil tih avang hian ka inchhir tak zet bawk. Engkim kha ka hrethiam lo, a thleng thut vek a ni" tiin a che sawn a, min si lo chuan a mu zui ve ta bawk.

Ka pasalin min kuah ṭhinna chu ka thlahlel a, ka mamawh em em bawk. Mahse tunah chuan a mi kuahna te chu ka tan lungchhiatna mai a ni tawh. Ka pasal chu ṭhen tumna rilru nei lo mah ila ka rilru a buai hle. Engtinnge u Sangtei chu a awm ang tih mawlh chuan ka rilru a luah a ni. A rai a, keipawh ka rai bawk. Fa lo nei ve ve ta ila, kan pahnih chuan u Hruaia nupui kan ni dawn tihna em ni ang? Thil thleng mek chu ka zo lo a ni.

Thih daih ka chak a, ka pum chhungah naute chu awm lo ngat se zawng ka pasal hi ka ṭhen loh leh ka thih tawh ngei ka ring. Ka nunah hetiang khawpa ka rilru tina thei ka la tawng ngai lo va, ka lo dawngsawng thiam hlawl lo a ni e.

Chapter 11

Ka pasal chhungte ho chuan ka pasal chu an ngaidam ka ti dawn nge a thil tih sual an en liam thei ka ti zawk dawn pawh ka hrethiam tawh lo, thil thleng chu theihnghilh hmak ang maiin an awm leh tawh. Thisena inzawm nge nge chu inngaihdam pawh a lo awl a ni mahna. Kei chu mi hrang, thisen zawm pawh ni lo leh hmangaihna tel lo va min neih kha ka ni a, ka lo vui ve chiam te chu a nuihzat thlak letling zawk ka ti. Chumai a ni lo, pangai taka ka pasal a awm thei chuan ka thin a tirim a ni.

A hmaa ṭawng zet zet ṭhin leh be reng ṭhin kha tunah chuan ka ngawiin ka ṭawng reng tawh lo va, ka pasal pawh chuan min biak luih em em a tum tawh bik lo. Kan ina mikhual room an siamah chuan u Sangtei chu a riak ṭhin a, u Zualtei ka aṭanga ka hriat danin u Sangtei chu a in luahna ten an hnawk chhuak a ni awm e. Ka pasalin kei chauh ni lova u Sangtei pawh a ngaihtuah tel ve zel chu ka thik a, kei chauh hi a nupui ni ila ka duh ani.

Tunah chuan u Sangtei pawh kan bulah a cheng ve ta reng mai. Biak loh hram hrâm ka tum ṭhin chung hian min lo be hmasa zawk zel a, chhan loh theih pawh a ni lo. Ka hmuh dan chuan u Sangtei chu mize sual tak a ni lo va, ka pasal zawk hi ka dem ta zawk a ni. Kan chhungkaw boruak vel chu Feli leh ka nu leh pate ka la hrilh lo cheu a, ka pasal pa phei chuan hrilh tawh turin min ti nghe nghe. Chutiang bawkin u Zualtei pawhin, mahse mi dang hrilh buai lova ka pai dam theiha ka tawrh chhuah theih ka ring tlat a ni.

Tlai khat chu kei leh u Sangtei chiah chu kan awm a, ei rawng kan bawl dun nghe nghe. Ka be lo va, ani erawh a zai vel a, kan ina a lo awm ve ta mai chu nuam a ti zawk emaw tih theih turin a awm. Mo ka ni a, u Sangtei vang mai mai a ka tihtur ṭhulh ka tum lo hrim hrim. Duati a rawn haw thut a, ka lo be ta vat. U Sangtei tak hi chu ka be peih lo a ni. Duati chu ka inthlakpui a, chumi zawhah choka lamah ka phei ve leh mai.

"Nute, ka room-ah ka phei lawk dawn a nia, ka lo let har lo vang" u Sangtei chuan pangai tak hian a rawn ti a, ka lo bu ringawt.

"Nute, khawngaihin dawhkana ORS kha min lo pawlh mai, ka hman lo lawk a" a rawn tih chuan

"Aw le" ka lo ti a, min be chhe lotu lo biak chhiat reng chu ka thiam lo ve deuh bawk a ni.

ORS pawh chu ka hawng a, no lain tui nen ka chawhpawlh ve mai. Chutiang thil har lo lutuk pawh a ti hman lo a nih chuan a hman lo ni tak tak turah ka ngai. Minute 5 hnu velah chuan a rawn chhuak a, no chu lo banin a in ve nghal mial mial. Kei chuan fridge aṭangin maian hih tur chu ka la chhuak a, maian chu ka ei châk tlat.

Chutia maian ka hih mawlh mawlh lai chuan u Sangtei chu chair pawt chhuakin min lo tihpui a, biak erawh kan inbe miah lo thung. Maian chu hik mial mial mah ila ka ngaihtuahna chu hmun dang daihah a awm. Ka pasal chu ka ṭhen dawn a nih ro ro chuan min hmangaih thu hriat hmasak phawt ka duh a, chutiang a nih loh chuan ṭhen tumna ka nei lo. Ka bul lawka u Sangtei kun ngawih ngawih chu hmuh kan a har ta.

"I ṭha em? Engtinnge i awm?" ka tih chuan min chhang lo va, a la kun reng. A awm dan chu ka hrethiam lo a ni. Chutah ka pasal chu kawngka aṭang hian a rawn lut a, u Sangtei awm dan a rawn hmuh chuan a rawn hmanhmawh hle.

"Sangte, engtinnge i awm?" Engatinge i kun reng" ngaihven fê hian a rawn ti a, zep lovah chuan ka thik tak zet a ni.

"Ka pum hi a na lutuk, enge a chhan pawh ka hre lo" mittui tla pura ka pasal en chung hian a rawn ti a, ka rilru a lo mangang ve hle.

"Engtinnge i pum a nat theih? Thil ei sual i nei em?" ka pasal chu a hlauthawng hle tih ka hmu thei.

"Aih, nei lo. Nutei hian ORS min siam a, chu chiah chu ka la in" ṭap pur hian a rawn ti a, ka pasal chuan min rawn en nghal vat.

"A thil in turah chuan thil dang pawlh i nei em?" a rawn tih chuan

"Aih" tiin lu ka lo thing a, ka thusawi chu a awih loh hmel em em leh nghal.

"A na, Hruaia damdawiinah i kal vat teh ang" u Sangtei awm dan chuan min timangang tak zet a ni. A chhan chu keipawh hian pumna ka lo neih ve tawh avangin.

"U Hruai hmanhmawh rawh, a na tawh a nih kha" ka lo ti ve thuai a, pawn lama a pawm chhuak chu ka zui ve mai bawk.

"Nang chu inah lo awm mai rawh, ka pate an rawn haw veleh chanchin hi i lo hrilh dawn nia" motor kawngkhar hawn ka tum rual chiah chuan ka pasal chuan a rawn ti a, a thusawi chu huat enah pawh ka en lo. An tlan liam thleng chuan ka thlir a, ka lo mangang ve em em ringawt hi a ni mai.

Tlai dar 3:30 velah u Zualtei a lo haw a, thil awm dan vel chu ka lo hrilh vat. Ani pawhin ka pasal chu a phone a, result an ngah mek thu a rawn sawi a ni awm e. Tlai dar 5 thleng pawha an rawn la haw loh avang nuamin ka awm tawh lo va, ka pa pawh rawn haw tawh mahse chaw ei siam nachang pawh ka hre chang tawh lo a ni. Rai laia pum a nat hi chuan nau chhiat a hnai em em a, u Sangtei chuan nau a chhiat mai ang tih ka hlauhthawnpui a ni.

Chaw ei lovin ka pasal leh u Sangtei chu kan lo nghak ṭhap a, ka pasalin ka pa a rawn hrilh dan chuan a rawn haw mek a, traffic jam-ah an tang rih a lo ni. Darkar chanve dawn hnuah ka pasal leh u Sangtei chu an rawn thleng a, mahse enge ka hmuh hi! U Sangtei pum chu a puar tawh reng reng lo, amah lah chu a ṭap feih feih bawk.

"U Hruai" tia chanchin zawh ka lo tum chu min nek thlu tawp a, in chung lam chu hmanhmawh tak hian a pan ding nghal.

"U Mam" u Zualtei chuan a rawn ti vak a, ka pa nen chuan min rawn kai tho bawk.

"Enge thil awmzia?" ka pa chuan u Sangtei sofa-a ṭap feih feih chu a bia a, mahse a rawn chhanglet hauh lo. Chutah ka pasal chu in chung lam aṭangin a rawn chhuk hmawk hmawk a, ka bul a rawn thlen chuan

"Engvanga Sangtei nau pai lai hi that nge i nih ZONUNMAWI? Kei chu min haw mahla pawi ka ti lo, ka fa ve tho a ni asin" thinrim tak hian a rawn ti a, ka hming puma min koh vawihkhatna a nih vang nge ka la na hle a, a thusawi awmzia chu ka hre lo tak zet bawk.

"U Mam, i mawl em ni?" u Zualtei chuan a rawn ti ve leh ta vak.

"Ka mawl hauh lo, doctor khan a thil inah naute ṭhang lian mek that thei khawpa chak tur pawlh a nih thu min hrilh alawm" ka pasal chuan u Sangtei fa chu ka thah a nih a lo ring a nih chu!

"Chungte nen enge Nutei hian inzawmna an neih?" ka pa ve thung chuan a rawn ti hriam hraih a, kei ang thovin thil awmzia an hre bik lo a ni.

"Pa, Nutei hian Sangtei hi in tur a lo siam sak alawm. A tirah chuan ka awih bik lo, mahse CCTV-ah a lang chiang vek" ka pasal chu a thin a rim tawh hle.

"Enge Nutei ringawt i puh vek a? Ani te chuan engmah hre lovin a in turte chu a lo siam a ni thei. U Mam, in nupa inkar chhiat tawh sa nak a laiin tihchhiat belh tum miah suh" u Zualtei chuan a rawn ti leh tawn tawn a, kei chuan ṭawng mai ngaihna pawh ka lo hre lo zawk a ni.

"Chhe vek zawk rawh se" u Hruaia'n a rawn ti leh rualin ka pa chuan a hmaiah tak a rawn beng a, a thle nghal sawk bawk.

"LALHMAHRUAI, ka fapa kha i ni tawh lo em ni? Engatinge hetianga i awm tak? Engvanga khatiang ṭawngkam kha rawn phuh chhuak nge i nih?" ka pa'n thinrim aw taka a rawn tih chuan ka pasal chu a ṭawng leh tawh lo hrim hrim.

"Nang nu pawh kha, engatinge Nutei hi i puh ringawt? I in tura tur pawlhtu a ni tih pawh i hrechiang em ni?" ka pa bawk chuan a ti leh a, keipawh chuan u Sangtei chu ka en ve ta reng.

"Aw, ka chiang. A awm danah Hruaia nena kan fa hi thah a châk zek zek tih ka hria. Ṭha taka ka biak pawhin min chhang duh ngai lo va, ka in tur kha ama min siam sak a ni a, amah loh chu damdawi telh thei tur an awm lo" ṭap pur chung hian a rawn ti let a nih chu! U Sangtei chu ka rin ang a lo ni lo nasa a ni.

"Damdawi chu i pawlh chiang em?" ka pa chuan keimah min en hian a rawn ti ve ta.

"Aih, ka pa. Damdawi engmah ka pawlh lo, a in tur chiah kha ka siam. Min ring rawh u, u Sangtei hian dawt a sawi a ni" ka ti chhuak ve ta.

"Pha lo mai rawh" ka pasal chuan a rawn ti sup a, a lam ka pan phei nghal.

"U Hruai ka tih a ni lo tak tak aw, khawngaihin min ring rawh. ORS-ah khan tur a awm tih ka hre lo hrim hrim, khawngaih takin min ring rawh" tia amah vawn pah ka tum chu min lo namsawn a, min ten hmel taka min enna te chuan ka rilru a tina vawng vawnh thei.

"Ka hmangaih hman ṭep che asin Nute, mahse hmangaih tlak i lo ni lo ve. Tunah hi chuan i hmel hi ka hmu peih rih lo bawk, i duh chuan i in lamah i awm rih thei ang, i chhuak thei ka tihna a nih chu!" a thu rawn sawi zet chuan min va tina tak em. Ka ṭap mai thei lo va, ka chesawn mai thei lo bawk.

"Kal rawh le, kan mi hriatchian loh hmeichhia nen hian chhuak rawh u. Hmâna ka fapa, ka hmangaih em em leh min hmangaih em emtu kha i nih leh hma loh zawng ka inah hian lo let leh tawh ngai suh" ka pa chuan ka pasal chu a pawt dawr dawr a, chutah u Sangtei chu rawn tho kang vatin ka pasal leh ka pa chu a zui ve nghal.

Motor thawm ka hriat chuan ka harchhuak thut a, kawngka lam pana tlan chhuah ka tum chu ka pa rawn let leh chuan min dang ta hmak.

"Ka pa, khawngaihin min kal tir rawh. Ka insawifiah a ngai a ni. U Hruaia bulah khan ka insawifiah a ngai a nia, min dang bet lo hram teh, a kal thui tak tak hmaa ka hmuh a ngai" ṭap hawm hawm chung chuan ka ti a, chuti maia kal tir chu ka duh lo a ni. Ka tih a nih lohzia fiah ka duh a, hrilhfiah ka duh bawk.

"A pawi ka ti Nute, a kal a ngai rih tlat. Heng thil i tih a nih ka ring lo va, engkim hi nangma thiam loh ni lovin LALHMARUAIA thiam loh vek zawk hi a ni. A inhmuhchhuah hun a la awm dawn a, chutah chuan hlim taka lo hmuah tum zawk rawh" tiin ka pa chuan chesawn thei lek lo hian min kuah bet tlat a, engmah ka ti thei bawk si lo leh rilru na bawk si chu ka ṭap ri ta hawm hawm ringawt.

Nasa taka ka ṭah avang chuan ka zawi vek a, ka pa chuan kan nupa room lamah min pawm chho nghe nghe. Tih theih engmah nei lo va ka awm chu hrehawm ka ti a, siam ṭhat theih ka chak ngawih ngawih. Engkim, a bul aṭang rata siam ṭhat ka duh a ni. Ka pa'n a chhuah dawna u Zualtei min riahpui mai tura a hrilh laite chu ka hre ruai ruai a, thih vang vang chu ka châk a ni.

"Nute, u Mama hi hetiang mi a ni lo, a rawn let leh em em ang, lo lungngai lutuk suh aw" ka bula mu u Zualtei chuan a rawn ti a, ka lo ngawi reng thung.

"Hetiang thil hi kan tawng ang tih pawh ka lo ring pha ngai lo va, a ngaihzawng hlui rawn lan velah khan thil hi a kal dik lo a ni" a rawn ti leh a, a bak engmah ka hre chhunzawm ta lo.

Ka harh leh chuan khua a lo var vek tawh a, sana ka en chuan dar 9 a lo inkawk vang tawh bawk. Tho kangin ka mutna bul chu a ka en a, a lo ruah huai danah u Zualtei chu a tho tawh a ni ngei ang. Bathroom-ah ka lut a, darthlalanga ka inen chuan ka mit chu a lo bui ngei mai. In hnuaia ka chhuk te chuan u Zualtei chuan min lo be siam siam a, ka nuilui vel mai mai a ni.

Ka pa chuan ka tel lova chaw ei rem a tih loh avangin Duati chenin min lo nghak a, ka inthlahrung hle a ni. U Zualtei chuan ka pa leh Duatite ka pa room-a awm chu chaw ei turin a va ko a, a hnu lawkah hlim deuh hian an rawn chhuak ve mai bawk.

"Apa, khawnge au Mama hi?" chaw kan ei ṭan chiah tihah Duati chuan a rawn ti ta khauh mai.

"Au Mama chu a zin lawk a, a lo haw leh thuai ang" ka pa chuan dawt sawi chu a hreh hmel tak zet.

"Nâ, au Mama chu thil ka chah duh asin le. U, a kal lai i hria em? Thil i chah hman em?" tiin u Zualtei chu a be ve leh thung a, engmah chu a hre lo tak zet a ni.

"A kal lai chu ka hria a, thil chah nachang ka lo hre miah lo" pangai taka an chhang zel thei chu mak ka ti.

"A nih au Nute, nangma'n min biak sak la, thil min lo hawn teh se. Mahse, ka thil chah duh chu nangmah chiah ka hrilh ang che" nui sen sen hian a rawn ti a, ka lo nuilui leh ta nge nge.

"Duati, keima'n ka chaksak zawk ang che. I duh deuh tur pawh ka hria alawm" ka chhan hmain ka pa chuan a rawn ti vat a, ka lawm ngei mai.

"Apa chu ka duh loh pui pui i chah palh ang, ka duh pawh i hre lo vang" a ti ta reuh a, keimah min biak tir phet a tum ang tih chu ka hlau a ni.

"I duh duh kan chah dawn nia, au Nutei kha chu a pumah naute a awm bawk si, naute i hmuh vat duh phei chuan tihbuai miah loh tur" ka pa chuan min chhan zel chu ka lawm a ni.

"Ni tak, au Nutei chu tibuai leh lo mai ang" tiin chaw chu a ei mial mial a, ka thaw ta huai bawk.

"Duati, ka kham dawn asin. Scooty-a chuan i duh leh lo kham ve daih rawh" u Zualtei chuan a thawh pah chuan a rawn ti a, Duati zia hi chu an hrechiang ve a ni.

"Aw, ka kham nghal" tiin Duati chu a tho tharh a, min be reng dawn nia an hria chu a tih chi phian.

"Nute, ka fapa aiawhin ngaihdam ka dil a che. Kan chhungkua hi min hrethiam hram hram dawn nia. Mama pawh hian inhmuhchhuah hun a nei ang a, a la rawn let leh ngei dawn tih ka chiang. Chutianga mi sual tak a ni lo tih hi ring hram ang che" kan pahnih chauh kan awm tâkah chuan ka pa chuan a rawn tih zawm zat a, kei erawh chuan

"Ka pa, ngaihdam min dil a ngai reng reng lo. Keimah avanga u Hruaia i hnawtchhuak hi hrehawm ka ti zawk hle ani. Chuan ka hre lo le, engtia rei nge ka lo nghah theih dawn hi ka hre lo a ni" ka ti thawp sap thung.

"Engvangin maw?"

"Nupaah chuan inhmangaih tawnna hi a pawimawh alawm. Keiin hmangaihin thlahlel vîau mah ila ani'n min hmangaih chuan loh chuan kan inkawp rei thei tak tak dawn chuang lo" ka tan lo ngah reng chu natna leh lungngaihna mai a ni ve thei a ni.

"I hre dik lo, ka fapa hian a hmangaih lutuk tawh zawk che a ni. Amah hian a la hrethiam lo mai chauh a ni. Lo nghak hram hram rawh, tunah phei chuan nau i pai tawh leh nghal a, a thlahthlam duh che hi ka ring lo a ni" a rawn ti a, a fapa ah chuan beiseina sang tak a la nei tih ka hria.

"Ni lo, ka pa. Thil hi ka hrethiam tawh alawm. U Hruaia hian u Sangtei hi a hmangaih ber a, a thinlungah pawh a awm reng ṭhin zawk" ka tih chuan min lo en ta reng.

"Chuan, kei hi chu a enge ka nih ka inhre thei lo. Ka hmaichhanah ngei u Sangtei a hmangaihna a daih theih loh thu a sawi asin. Ka tan chuan kha aia chiang kha a awm lo" ṭah chu ka insum hram hram a ni.

"Ih maw ka pa, kan inneih zan aṭang tawh khan min hmangaih ve miah lo tih chu ka hre tawh a, mahse min hmangaih ve theihna'n hian ka awm a, min hmangaih ve theih vat pawh ka ring ṭhin. Mahse maw ka pa, a thei thlâwt lovin ka hria" ka tih leh chuan ka mittui ka bianga luang thla chu ka hru ta nge nge.

"Enteh Nute, i thil lo tawn tawh chu a harsa tih ka hria, mahse ka fapa hian a hmangaih che tih hi ring hram rawh" a rawn tih chuan ka nui lui sak.

"Kum hnih dâwn chuang min hmangaih turin ka bei tawh a, nau ka paia fa ka hrinsak hnuah phei chuan min hmangaih ve mai ka ring a, mahse thil awmze nei lo mai a ni" ka ti a, ka beidawng ṭan tawh tak zet a ni.

"Khawngaihin ka ngen a che, ka fapa hi lo la nghak rih rawh, a hmangaihzia che a hriat hnuah phei chuan a rawn kir ngei dawn tih ka chiang a ni" ka pa chuan ka chhuak mai ang tih chu a hlau a ni.

"Aw le, tun atan chuan i thu ka awih phawt ang. Chuan, ka chhungte la hrilh ka duh rih lo aw?" ka la ti hram thei chu mak a ti hle tih ka hria.

"Engvanga i chhungtei hrilh hreh em em nge i nih? Ka tan pawh hian a zahthlak lulai lutuk tawh zawk a ni. Hetianga kan awm reng chuan ka inthiam lo tulh tulh dawn asin" ka pa sawi pawh chu a dik ve chiah tho.

"A chhan chu kei hi ka insit a ni. Tet té aṭangin ṭha takin min enkawl chho a, chutah Bachelor degree pawh nei hman lo khawpin pasal ka neihsan leh daih a, ka pa khan u Hruaia hi neih a phal chiah lo nghe nghe asin, a chhan pawh ka tihsual a hlauh vang a ni. Chuan tunah ka pa thusawi chu a rawn thleng dik chiah a, hetiang boruak zawng zawng hre ve vek tur phei chuan an hmel ka hmu ngam lo alawm" chaw ei châkna reng ka nei tawh lo.

"Chutiangin ngaihtuah mah ta che, nu leh pate chuan fate chu engtik lai pawhin kan hmangaih reng ṭhin zawk alawm. I hrilh hreh anih chuan keima'n ka lo hrilh mai dawn em ni?" a rawn tih chuan amah ka en ta vat a, ka nu leh pate hrilh emaw hriattir chu ka zak ngawih ngawih.

"A ngai lo, ka pa. I thu angin u Hruaia chu ka lo nghak ang a, nang pawhin khawngaihin ka chhungte la hrilh suh" ka ngenna chu pawm se ka ti tak zet a ni.

"I chungah hian ka inthiam lo hle a ni. Zirlai lam hi i chhunzawm duh a nih phawt chuan min be hreh reng reng suh aw?" a rawn ti dam dap a, ka lakah chuan a inthlahrung ve tak takin ka hria.

"Aw le, mahse naute ka neih zawh hnu lamah chauh zirlai ka zawm leh zawm loh tur chu ka sawi chiang thei ang" pangai tak chuan ka ti ve ta sep.

"Awm hahdam tam la, naute mawlh khan a tuar ve ang tih a hlauhawm a nia" kham pah chuan a rawn ti a, ka rilru natna te avangin ka naute lam reng ka lo ngaihtuah tawh lo tih ka inhre chhuak chiah.

"Aw le" keipawh ka tho a, kan eina vel chu ka khawih chhunzawm nghal.

"Nute, lo ti suh. Duati eina vel ka tihfel hnuah kan chuang leh dawn nia, tunah chuan i boss bulah lo va kal rih rawh aw" tiin u Zualtei chuan ka thil seng vel tur chu min lo laksak zung zung a, u Zualtei hi chu a fel hi ka ti ve thlâwt a ni.

"Duati lo kal rawh, keimah nen Scooty chu chuang daih ang" ka pa'n a rawn tih chuan Duati pawh a ranga rangin ka pa lamah chuan a kal phei nghal.

"Paaaaaa, lo chuang suh, i rit si. Chubakah petrol kha a tlem a nia" u Zualtei chuan plate vel la keng ṭun chung hian ka pa chu a au vak a, an awm dan avang chuan tlêmin nuih châkna ka nei ve ta deuh.

"Âwwwwww, Bawihte, kan thun leh mai dawn alawm" tiin Duati nen chuan an inkai chhuak ta daih.

"Ka pa tak hi chu a!" ti niah niah chung chuan thleng chu a sil mial mial a, chutah

"Nute, engmah kha lo khawih reng reng suh aw, lo kal teh thil hrilh tur che ka nei a nia" a rawn ti zawm zat bawk.

"Enge min hrilh duh chu ni a?" a bul ka thlen chuan ka ti ve mai.

"Enteh, ka sawi pa khan len chhuahpuiah min sawm a?" a rawn tih chuan

"Awi, min hrilh chiang teh. Ka hre chak a nia" ka lo ti ve nghal thuai a, u Zualtei chuan min biak hlim a tum hram hram tih pawh ka hre vek.

"Ṭawng ring vak lo zawk teh, ka pate sawn a hre reu reu ang tih a nia ka hlauh" a rawn tih chuan ka nui ve ta nge nge.

"Engati maw?" ka tih chuan a thil sil lai dah meuhin min rawn en nghal.

"Awi awi awi, sawi lo zawk teh ang. Min chhaih peih leh dawn lutuk, chuvang chuan ka hriat tir duh têuh lo" uar fêa tiin thleng chu a sil chhunzawm leh a, kei erawh ka lo ṭhen ṭhaw tawh.

Boruak rit tak, chhe tak leh lunngaihthlak tak ka tawn hnua pangai taka ka nuih leh hmasak berna a ni hial ang. Ka pate, Duati leh u Zualtei te ho awm khawm hrim hrim hian min tihlim ṭhin. Mahse ka hlimna hi a famkim lo a ni. Ka pasal chhuak ta chu ka ngaihtuah lo thei lo va, ka pa'n be rih lo tura min tih tlat bawk avangin phone pawhin ka be duh bik ta lo.

Ka pasal chuan awihawm loh khawpin min be lo thei a, u Sangtei nen chuan an hlim viau ni turah ka ngai tawp. Ka pa chuan kei leh u Zualtei chu ka pasal office-ah kal lo hram hram turin min hrilh char char a, phone pawha biak hmasak a phal lo bur. Ka thinlung erawh chuan hmâna ka pasal, ka hmangaih em em leh ka thlakhlelh em em ṭhin kha a ni tih a theihnghilh ngai hauh lo thung.

Hruaia POV

Nun hi a lo mak a ni e, a changin kan hlim a, a changin kan lungngai leh mai ṭhin. Hlim reng theih te hi ni se kan duh a, mahse a theih si loh. Pa hre lo leh nei lovin ka piang a, chutah retheihna leh hmuhsitna in min la tlakbuak leh ta zui. Ka hlim chho ve ṭan dawn chauh emaw ka tih laiin thihna chuan ka nu min lak bo sak a, engkim mai chuan min ti mangang a ni.

Mihring ni ve ta na nâ na chuan hmangaih ka tawng a, ani chuan ka thinlungah natna hnutchhiahin min phatsan leh ta thuai. Lungngaihna ruama ka tan reng chu Pathian hian a lo phal bik lo ni ngei tur a ni. Ka pa dik tak chu ka zawng hmu a, ani chuan ka nun hlui zawng zawngte theihnghilh thei tur khawpin min enkawl a, chhungkaw thar leh nun thar hlak chu min pe ta a ni.

Kum tam tak liam hnuah ka thinlung chuan hmeichhia a vawi hnihna atan a tawng leh a, mahse ka rilru dawihzep tak chuan ka thinlung duh zawng ang chu a ti ngam mai lo. Ka besei loh takin chu ka hmeichhe duh ruk ve em em chuan a kum tel min lo duh tawh a, naupang mai mah ni se ka thinlung chu a lamah a awn tlat si. Sawifiah thiam phak baka ka duh tak avang chuan kan inngaizawng ta a, rei pawh inzui lovin nuipuiah ka nei ta ngei bawk.

Ka nupui chuan awihawm loh khawpa nasain min tihlim a, keimah chu keimah ka ni ta lo emaw tih hial theih tur a ni. Amaherawhchu, kan innei hnu kum hnih dâwnah pawh fa chu kan nei thei ta tlat lo. A chang chuan mi nupate'n an fate an len kualpui vel ṭhin te chu ka awt a, mahse ka nupui rilru tur ka ngaihtuah chhuah chang erawh chuan awt lo ang taka lan ka tum ṭhin.

Ka nupui chuan ka nun hlui lama ka vanduai avangin amah ka hmangaih thei rih lo tih chu a hre vek a, chuti chung chuan min hmangaihin min la duh em em zawk. Ka nupui anga rilru thianghlim leh nghet hi ka la hre lo. Ka hmangaih ve nghal mai theih loh avanga ka hmuh loh laia a ṭap ṭhin te chu ka hmu reng a, ka hre reng a, mahse han hnem vak dan erawh ka hre chuang lo.

Ka nupui tluka hmeichhe tuarchhel hi ka nunah ka la tawng lo va, ka hriat tawhah chuan nupui ṭha ber leh hlim thei ber a la ni ang. Kei hian ka nupui dinhmun ang hi tawng ta ila, ka tawrh rei theih ka ring lo. Ani chuan ka hmangaih lo tih hre sa rengin min tihlim a tum a, amah ka hmangaih let ve theihna'n theihtawp a chhuah zawk ṭhin. Ka nupui chu hmeichhia zawng zawng zinga ka ngainat ber a ni a, a tel lova awm chu ka theih ka ring lo a ni.

Kum hnih leh tih lai kan inneih hnuah ka nupui chuan a rai thu min hrilh a, ka lawmzia chu ka sawifiah thiam lo zawk. Mahse a chhe lam emaw a ṭha lam emaw eng pawh, kan hma hun leh kan nuna thil lo thleng tur reng reng hi hriat lawk theih a ni si lo. Kan hlim viau lai chuan ka tihsual rah chuan kan chhungkua leh kan nupa inkar vawilehkhatah a rawn ti chhe ta vek mai. Ka nupuiin thla nga lai naute a pai hnu chuan vanduai thil thu tak meuha ka lo uirena leh ka ngaihzawng hlui ni bawk Sangtei chuan min rawn tibuai ta.

Hospital-a ka nupui rai lai kalpui hman lo khawpin Sangtei chu ka buaipui a ngai a, ka chhungte'n Sangtei nena min hmuh dun te khan an hmelah zawhna tam tak ka hmu thei. A chhan chu ka nupui rai lai ni lova mi dang rai lai ka buaipui vang a ni. Chutah Sangtei chu a inluahna ten an hnawhchhuah avangin kan inah ka hruai lut a, chuta chinah phei chuan kan in chhung boruak chu a hahdam thlak tawh hlawl lo. Sangtei chuan a nau pai lai chu ka fa angin sawi tlat mahse ka awih thei ngang lo va, ka fa a nih lohzia hriatna'n chuan a hrin chhuah hun ngah thlen mai loh chu tihtheih dang a awm lo a ni.

Vanneih thlak nge vanduai thlak zawk pawh ka hre lo, Sangtei chuan nau a chhiat ta hlauh mai. A pawi ta ber chu Sangtei nau chhiatnaa mawhphurtu ber chu ka nupui a ni tlat. Sangtei fa chu ka thisen a nih ve tho avangin ka nupui chu ka dem a, an in lama haw tur leh a chhuah theih thu ka sawi a, na taka siam ve ka châk a ni. Ṭawngkam malsawm lo tak tak ka chhahchhuah avangin ka pa chuan min beng a, thiam ka inti bik miah lo. Mahse, ka thinrimnate chu up beh mai a harsa a ni.

Mi dang hriat laia ka nupui ber hmangaih tlak a nih lohzia ka sawi te khan ka nupui hmelah khan natna leh manganna ka hmu a ni. Ka thinrim lutuk khan ka sawi chhuak ni berin ka hria. Ka pa chuan a in aṭangin min hnawt chhuak ta a, awm lo ka ti hran lo. A fapa hi ka sual ve êm a ni. Ka uire a, ka nupui pawh hmangaih lovin ka pa rilru hial ka tina bawk. Ka pa'n min hnawh chhuah zan aṭangin Sangtei chu ka buaipui zawm leh tawh lo va, a bul aṭanga a tawp thlengin a nu leh pate ka hrilh fai vek a, anni paw'n a ranga rangin an fanu chu an rawn hruai ve nghal. Sangtei chu ka ngaihzawng hlui niin ka hmangaih em em ṭhin, mahse tunah chuan chiang takin ka hmangaih tawh lo tih ka hria.

In ka chhuahsan aṭang ka chhungte leh ka nupui hnen aṭang vawikhatmah phone call ka dawng ngai lo va, keipawhin biak ka tum ta chuang lo. An laka ka inthiam loh lutuk avang zawkin ka be ngam lo a ni ber. A bik takin ka nupui chu ka ngai a, ka be châk lutuk, chhuak tura ka lo ṭawng chhuak thawt thawt te chu ka inchhir ngawih ngawih. An hnena ngaihdam dila kan ina haw leh mai chu ka duh rum rum ṭhin a, mahse ka thil tih leh awm dan avanga an rilru na lutuk chu nghah daih deuh phawt ka duh leh ta zawk a ni.

Office te chu ni tin ka kal ve ṭhin tak nà a, ka rilruah hnathawh lam reng a lut thei lo. Kan ina ka awm tak loh chinah chuan Hotel-ah ka riak mai ṭhin a, rilru hah avanga mut theih loh chu ka ngah hle. Mahse ka rilru hah avanga zu emaw ruihtheihthil vel emawa ṭuan kher ka tum lo, a chhan pawh ka pa khan a phal lo a ni. Ka pa khan a vawikhatna atan min beng a, ka rilru pawh a na hle. Mahse min ben avanga na ni lovin a ben theih tur khawpa ka awm chuan ka rilru a tina daih zawk.

Ka nun hlui avangin enge hmangaihna awmzia hi hriat ka duh tawh lo va, hmangaih ka neih leh chuan natna bawk ka tawng leh ang tih ka hlau a ni. Ka nupui chu ka ngai em em a, chu ka ngaih em emna chu hmangaihna ni hlauh se ka ti. Ka nupui ka hmangaih thei lo ni tlata inhriatna ka neih te chu paih bo ka duh a, hmangaih let ve theih chu ka châk a ni.

Ni dang ang bawkin thatho lo takin ka office-ah chuan ka ṭhu a, ka mood chu off tak a ni. Kan in aṭanga ka chhuah hnuah phei chuan thil pawimawh tak ni lo leh inleng satliah neih vel chu ka duh tawh lo va, ka hnuaia mite pawh ka hrilh nghe nghe.Kan thlang lawk kawngpuia motor tlan ri te, horn pe ri te leh thawm chi hrang hrangte chu ka bengah chuan a ri liam vel mai mai a ni. Chutia thil ka lo ngaihtuah veng veng lai chuan ka hnuai hna thawk pakhat hi a rawn lut a.

"Sir, hmeichhe pakhatin a hmu duh tlat che a, loh theih lohvin ka lo luh a ngai ta a nih hi" inthlahrun hmel zet hian a rawn ti a, a na zawnga mi hmuh ka duh loh thu ka hrilh tawh avanga inthlahrung em em a ni bawk.

"Ka hrilh tawh che kha, inleng satliah ka nei peih rih lo. Haw tir rawh" ka ti ram hmak a, thil eng eng emaw min dil tur vel bak an ni leh chuang lo vang.

"Sir, ka hrilhfiah nasa tawh lutuk. A ṭhu tlat a, a ṭap deuh pur bawk" ka mita en pawh en ngam lo chuan a rawn ti a, ka mood chu a fuh lo tak zet a ni.

"Ka va ning tak em, a nih chuan rawn luh tir thuai rawh" ka ti hrawk a, ani pawh hmanhmawh takin a chhuak ve nghal.

"U Mam" ka office kawngka inhawn ruala rawn titu chu ka en vat a, chutah ka mi hmuh avang chuan

"Bawihte" tiin ka ṭhutna aṭang chuan ka tho kang nghal.

"Engatinge i lo haw duh loh? Thla khat chuang lai i awm bo tawh tih i hria em?" ṭah insum tak hian a rawn ti a, va kuah mai ka tum chu a lo tawlh sawn vat.

"Bawihte" ka tih leh chuan

"Sawi rawh, u Mam. Engatinge i lo haw duh loh? I chhungte kan ni lo em ni?" a mittui chu a rawn tla ta.

"Ni lo, chutiang lam a ni lo. Ka thil tihsual avang khan ka inthiam lo lutuk a, ka hmu hreh zawk che u a ni. Kei chu ngaihdam tlak pawh ka ni bawk si lo" ka tih chuan

"Chutiang mai maiah kan buai lo, kan chhungkaw mi i nih chuan a tawk" a rawn ti vak a, a lam chu panin

"Lo kal teh" tiin ka pawt hnai a, ka kuah ta hle hle.

"U Mam, lo haw tawh rawh, i lo haw ngei ngei a ngai" a rawn tih chuan ka ṭang deuh ul.

"Ka la ngam lo a ni. Ka pa ka la hmu ngam lo va, Nutei pawh ka la hmu ngam rih lo va, ka thil tihsual tenawm leh zahthlak tak avang khan ka zak lutuk alawm" ka tih chuan ka kuahna ata chu a tawlh sawn a, min en ran chung chuan

"Engmah i hre lo em ni? Ka pa hian a mamawh che. Tunah damdawiinah a awm mek" a rawn ti a, ka meng ta kawk mai.

"Enga!? Enge ka pa chungah thleng? Engtinnge a awm?" ka ti nghal vat.

"Thisen a mamawh a, kei chuan ka pe tawh a, mahse a la mamawh tho" ka zawhna tak a la chhang lo chuan awm dan tur pawh min ti hre lo.

"Engvanga damdawiina awm nge a nih?" ka aw chu thunun hman a ni tawh lo.

"Nimin khan ka pa chu a accident-a, thisen a hloh hnem bawk nen a serious phian a ni. Lo haw hram rawh, u Mam" tiin a rawn ṭap ta zawih zawih a, rang takin ka awmah ka pawm bet a, ri meuhin a rawn ṭap zui ta hawm hawm bawk.

"Thil ka lo va tisual nasa em, engkim hi ka thiam loh vek a ni e. Bawihte hmanhmawh teh ang, ka pa chu kan chan mai ang" ka ti sawk sawk a, inthlahin ka office aṭang chuan kan chhuak zui ta vat.

Hospital kan thleng a, ka pa chu engmah hre lovin ward-ah chuan a lo mu bam mai. Chutia ka thisen zawmpui ngei mai thi maithei dinhmuna awm ka hmuh chiah chuan ka chi ai mai dawnin ka hria. Ka mangang a, ka nu angin min boral san ve mai ang tih ka hlau a ni. Hmanhmawh takin ka thisen pawh ka test a, an endik fel hnuah ka pe thei ta chauh. Mahse, ka pa'n thisen a mamawh zat kan la nei tling ta lo cheu. Ka hmelhriat zawng zawng ka bia a, ka hnuaia thawkte thlengin ka be kual a, ka pa chu ka chan ang tih ka hlau ber tawh.

Vanneih thlak takin ka pa chuan thisen a mamawh tawk a hmu thei ta hram a, Pathian hnenah leh min puitute chungah pawh lawmthu ka sawi mawlh mawlh. Ka pa an buaipui lai phei chuan awm ngaihna ka hre lo. Bawihtei sawi danin Duati chu loh theih lohvin ka pa nu leh pate bulah a awm rih a ni awm e. Mahse enge ka hriat tel tak hi! Ka nupui Nutei chu an in lamah a haw tih Bawihtein a sawi lai chuan ka â huihin ka hria.

"A pawi lo, a haw kha a tan chuan a ṭha zawk. Keimah hi ka dik lo va, a chungah ka lo sual êm a ni" ka ti thawp raih a, ka nupui chu tih tak zeta ngaihdam ka dil dawn a nih loh chuan han hmuh mai pawh ka ngam lo a ni.

Ni khat a ral a, ka pa harh chiah kan nghak tawh. Doctor te chuan ṭha taka an zai thute an sawi a, mahse ka pa a la harh mai thei lo chu kan buaina a ni. Ka hna lam reng ka ngaihsak tawh lo va, tunah chuan ka chhungte aia pawimawh hi an awm lo a ni. Bawihtei chuan ka chhuah hnua kan chhungkaw awm dan a sawi sep sep a, keiin anni ka ngaih ang bawkin anni pawhin min ngai ve tak zetin ka hria. Ka nupui ber chu ka khawngaih a, a laka ka chet dan dengkhawng lutuk avang chuan ka inthiam thei lo a ni.

Ni e, ngaihdam ka dil ngei a ngai a ni. Ka pu zawn leh pi zawnte hmai pawh ka zah a, hetiang maia an fanu pasal ka awm ta hi a zahthlak ka ti. Ka thei ang, ka thei ngei ang. Hetiang khawpa ka rilru luahtu hi ka hmangaih thei ngei ang. Ka thei dawn loh a ni pawhin ka tum mai ang. Engtin pawh ka chungah awm se ka pawm vek a ngai a ni. A chunga ka chet dan mawi lo tak tak avang khan a awm dante chu dem thei ka ni lo va, keimah zawk hian chhuak lo thei lovin ka siam zawk a ni.

"Hey" tih thawm a rawn awm chuan ka hawi chhuak vat.

"Pa, ka pa, i lo harh tawh maw? I ṭha em?" ka pa'n min lo en reng ka hmuh chuan ka ti ta zung zung.

"Aw" tih chiah ka pa chuan a rawn sawi thung.

"Ka tihpalh pa, ka tihpalh lutuk" ka tih chuan a mittui chu a rawn tling deuh pam a, a kut chu lakangin ka fawp zui vawng vawng.

"Engatinge i lo haw vat loh?" a hmel aṭang chuan a lung chu a chhe hle tih ka hria.

"Pa, ka zak a ni. In chunga ka chet dan tenawm tak avang khan ka hmu ngam lo che a, chutiang bawkin ka nupui pawh" a tua te ve ve pawh chu kan lung a chhia a ni.

"Thil tisual pawh ni la keini chuan kan hmangaih reng che asin" a rawn ti tham chhal a, a ṭawng chu a fiah lo ruai bawk.

"Ka tihpalh pa, min ngaidam hram rawh. In tel lova awm kha hrehawm ka ti lutuk" ka tih chuan

"Keini chuan kan ngaidam daih tawh che alawm, mahse i nupui hi ngaihven rawh" tiin a rawn khuh a, a darah ka lo dawm vat.

"Pa, i ṭha em? Doctor ka'n ko dawn em ni?" ka ti thuai a, a na a chhuak mai ang tih chu ka hlau a ni.

"A ngai lo, hetiang hian inkawm rih teh ang" ṭial ruai chuan a rawn ti a, min ngai ve hle a ni.

"Hetiang khawpa i rilru ka tih nat avang hian ka tihpalh a ni" ka pa hmel chu ka en ṭha ngam lo a ni.

"Kei aiin Nutei rilru a na zawk" thatchhe aw zet hian a rawn ti a, a sawi dik ngei pawh ka ring.

"Ka hria alawm, kei hian thil tam tak ka tisual a ni" ka nupui laka ka chet dan vel chu zahpuiawm ka inti.

"A lo nghak che asin. I rawn haw hun kha a lo nghak asin" a rawn ti thawp raih a, sawi tur reng ka hre lo.

"A haw dawna a beidawng hmel kha hmuh hrehawm ka ti, nang lah chu lo hawh tih ni reng i nei si lo" a rawn ti leh chuan

"Pa, ngaihdam ka dil ngei ang. Tunah phei chuan ka fa a pai tawh leh nghal, ka rawn hruai haw leh ngei ngei hi a ngai a ni" rilru na tak chuan ka ti chhuak ve ta sup.

"Ni e, ka fapa, ka hmangaih em em leh ka ṭhian ṭha em em kha i lo let leh dawn tih hi ka hria asin" lungchhe hmel taka a rawn tih chuan dim takin ka kuah zui nghal.

"Pa, ka tihpalh lutuk. Tun aṭang chuan i thu ka hnial leh tawh ngai lo vang" a awma bei chung chuan ka ti a, ri lo chuan a rawn ṭap nghawr dat ta nge nge.

"Pa, i lo harh tawh maw?" kawngka aṭang hian Bawihtei chuan a rawn ti lut a, keipawh ka lo insiamṭha zui ve nghal.

"Hey, Bawihte" ka pa pawh chuan nuilui sang hian a lo ti a, chutianga khum beta a awm chung pawha a lo la nuih lui thei chu mak ka ti zawk.

"Pa" tiin a rawn ṭap phei a, ka pa chu a lo kuah ve nghal.

"A tawk e, ṭap tawh suh le. I ṭah chuan ka dam lo reng mai ang" ka pa chuan a fiam zeuh a, na nei lo ang maiin a awm.

"Motor pawh nangma'n khalh tawh lovin i driver chhawr chiahin a khalh tawh ang" Bawihtei chuan a ti a, chutah ka pa chuan

"Aw le, chuan khawnge ka Duati ve hi?" a rawn ti ve nghal a, ka pa chu a pangai hle tawhin ka hria.

"Ka pite nen an lo kal mek" Bawihtei chu a ṭah a la chhuak ru reng tih ka hmu thei.

"A ṭhat chu, doctor te chu va ko ula, min check zung zung teh se" ka pa'n a rawn tih chuan ka chhuak vat a, doctor te pawh ka va koh takah chuan an rawn kal zui ve mai.

Tunah chuan ka pa pawh a ṭha chho leh vîau tawh a, in lamah kan inenkawl chhunzawm tawh bawk. Ka duhthusam taka a taksa a la chak tawk loh avangin nurse ka ruai a, lânga kalin kan inah ka pa ka enkawl tir ṭhin a ni. Ka pa chu a dam tial tial a, kan chhungkua pawh kan hlim chho leh tial tial a, keimah ber hi ka dam lo tial tial thung. Ka nupui chu ka mamawh a, a tel lova awm chu hrehawm ka ti. Ni lo, hrehawm mai ni lovin ka thiam lo zawk a ni.

Ka pa min tih angin ka nupui hnenah chuan ngaihdam dil turin ka kal a, eng pawh ka chungah thleng se pawm thiam chu ka tih tur a ni. Ka pu zawnte ber chuan engtinnge min lo tih ang tih ka ngaihtuah pha thiam lo. Tunah chuan an fanu laka ka chet dan tenawm tak te kha an hre vek tawh awm si a, min ngaihdam duh kher pawh ka ring lo zawk a ni. A nih nîh nih huamin ka kal ta phawt chu a ni a.

"Eeeeeee Hruaia lo kal rawh, ve teh mial che chuan" ka nupui pate inchhung ka luh chuan ka pi zawn chuan a rawn ti a, keipawh lutin ṭhutthlengah chuan ka ṭhu ve mai bawk.

"Engati teh thut nge nangmaha i lo kal?" nui sanga a rawn tih leh chuan insawithiam vel chu ka peih lo ngei mai.

"Áaaaaaa nia, ka pa lah a damsam si lo va, ka nau te lah an hman bawk si lo nen min lo hrethiam hram teh u" ka tih pawh chuan thinrim hmel an la pu lo hrim hrim.

"A ni maw, a va zia lo ve. Ka sawi tum tak zawk chu Nutei maw le. Ni dangah chuan in lo leng dun ṭhin si a, a hman bik lo em ni?" Lalpa le! A thil rawn sawi hi ka hrethiam ta hauh lo.

"Maw!? Nutei hetah a rawn kal miah lo maw!?" mak ka ti lutuk tlat.

"Enge i sawi awmzia? A pasal i ni a, in inah a awm ang chû" ka pi zawn nen hlir chuan kan inbia a, ka pu zawn erawh chuan min lo en reng.

"A awm lo, kan in aṭangin a chhuak alawm. Keimah avangin a chhuak alawm" ka tih chuan an rawn ding rual ta ṭhawt.

"Engvanga chhuak nge a nih? Enge a chungah i tih?" ka pu zawn ve thung a ni. Thil awm dan leh nih dan dik tak chu ka sawi chuan ka kawr awmah mi rawn ṭham kang a, engtinmah tih let erawh ka tum lo.

"Nang hian kan fanu hi i lo hmangaih reng reng lo maw? I va zak thei lo ve" min khawi a tum chu ka pi zawn chuan a lo dang vat.

"Duh tawk teh u, Hruaia nang pawh a i va ti mak em em ve, kan fanu hi kan neihchhun tak meuh a ni asin. Tunah hian khawnge a awm?" ka pi zawn chuan aw nem lo tak hian a rawn ti a, ṭah mai duh hmel a pu bawk.

"Ka hre lo" ka lo ti mawl tawp a, chutah ka hmai chu a rawn ri sawk a, ka lo ding nghet lo bawk nen ṭhutthlengah chuan ka tlu chawrh bawk.

"Paa, duh tawk rawh" min rawn hnek leh a tum chu ka pi zawn zawk chuan a lo ti a, a ngai te bawkin ka ding ve leh nghal.

"Ni lo, in duh tawkin min sawisa thei ang, iin thinrimna a reh hma loh chu min khawih rawh u" kun ngul chuan ka ti a, an duhtawkin min khawih mahse ka inthiam lohna chu a reh theih ka ring chuang lo.

"Sawi rawh, khawnge ka fanu chu a awm? A nu lah pate hmu ngam lo khawpin nang hian i lo siam vela maw?" ka pu zawnin a rawn tih chuan ka ṭhingṭhi ta rawp.

"Ka tihpalh tak zet a ni" ka tih chuan ka nupui nu zawk chu a rawn ṭap chhuak hawk a, kei chuan an hmel pawh ka en ngam lo a ni.

"Chhuak rawh, ka in aṭang hian chhuak nghal rawh. Chuan hei hi hre bawk ang che, ka fanu hi dam taka a lo kir leh lo a nih chuan tunge i nih theihnghilh ṭhak khawpin i chungah ka che ang a, ka ngaidam leh tawh ngai lo vang che" ka pu zawn chu thinrim tak a ni.

Lungngai takin ka nupuite in aṭang chuan ka chhuak a, mahse hmanhmawh takin kan in lam chu ka pan ta thuai. Ka chhungte thil awmzia ka hrilh chuan kei ang thovin mak an ti a, a ngaihna an hre bik lo a ni. Bawihtei chu Nutei a khawngaih lutuk avangin a ṭap reng a, kei tak pawh hian ka khawngaih lutuk. A chhungte pan hreh khawpa ka lo siam chu ka inthiam lo va, inthiam lohna hian thil a thlak danglam thei tawh ngai si lo.

Zan a ni bawk nen han zawn mai dan tur ka hre lo va, kan nupa khumah chuan ka awm reng ta tawp. Khumah chuan ka bawk zal a, a lukham kham ṭhin chu pawt hnaiin ka kuah ta vawng vawng ringawt. Kei hian ka nupui hi ka ngai a ni. Mi â ang maiin ka nupui mut ṭhinna te chu ka thlir reng a, thil lo tisual lo ila zawng ka nupui chu ka bulah hlim takin a la mu ngei ang. Chutia ka awm lai chuan thil hmuh ka nei ta tlat mai. Lehkha hi a lo awm a, chu chu ka nupui hnutchhiah a nih ngei pawh ka ring. Ka keu a, lehkhaa thu inziak ka chhiar chuan

"U Hruai, a hmasa bera ka sawi duh chu ka tihpalh tih hi a ni. I hria em, ka duhin ka hmangaih em em che a, min hmangaih lo mahla i bula ka awm phawt chuan a nuam turah ka ngai ṭhin, nawm pawh a nuam reng bawk. I rim te, i hmel te, i aw te leh i engkim hi awm bo mahla ka ngai em em vek ṭhin. Mahse ka hriatchhuah tak chu maw, i nun ka lo tibuai hle tih hi a ni. Min phatsan ngai loh tur thute min hrilh a, min duat tur thute min hrilh a, kei i nupui, i chawmhlawm ve mai hian ka ngaihsana ka zah êm che vangin i thusawi te chu a tak emaw ka lo ti a, mahse i thusawi zawng zawngte chu dawt vek a lo ni si. A tawp ber atan chuan u Sangtei hi i la hmangaih reng a, i nupui dik tak tur zawk a ni e. Ka ṭhen dawn che a nih chuan min hmangaih thu ka hre hmasa phawt ang ka tih kha a nia, mahse nang chuan engtikah mah min hmangaih ve thei ngai dawn lo tih ka hria a, chuvang chuan kei chu ka bei a dawng ta niin ka hria. Mangṭha le" tih hi a lo inziak a, inchhirna hlirin ka khat a, Nutei chu ka khawngaih lutuk.

Ka nupui chu biak pawh tum eng ang mah ila a biak tlang theih loh avang chuan tih ngaihna a awm lo a ni. Ka rilru tihah bertu chu engtinnge a awm ang tih a ni. Chutah rai lai a ni a, a nu leh pate bulah a la kal lo leh zel nen ka ngaihtuah tak zet. A tuk zing aṭang chuan ka zawng ta char char a, zawng tura mi chhawr hial ka nei ta bawk. Zawn hmuh lah chu a la har em em zui. A ṭhiannu ber Feli chu a awmna a hriat ringin ka zawt a, a lo hre bik teuh lo. Chutah thil awmzia min zawh chuan ka sawi a, ṭap pur chung hian min beng ta sawk.

"Hetiang leh mai mai tur hian engatinge nupuiah i neih kher?" Feli chu a ṭap khur char char a, a ṭhian ṭha ber leh a nu leh pate thleng hrilh ngam lova kal bo tur khawpin a nun ka lo ti ralṭi tih ka hriatte chuan keimah zawk chu ka na ngawih ngawih.

Ka nupui chunga ka chet dan zahthlak tak avangin ka pa chuan thei leh thei lo hian ka pu zawnte chu ka aiawhin ngaihdam a dil a, chutianga ka pa thleng thleng ka timualpho chu hrehawm ka ti a ni. Ka pu zawnte chuan a rukin police department lam an fanu an zawn tir tih ka hria a, mi hriat an duh bik lo te pawh a ni ang. Thla thum vel Aizawl khaw chhung leh a chheh vela khaw hrang hrang ngawrh taka ka zawn hnuin sawrkar lamin transfer order an rawn tichhuak thut a, Aizawl chu ka chhuahsan ngei ngei a la ngai leh ta zui. Champhai lamah DC tura sawrkar ruat ka nih avangin ka hnial thei lo va, ka hna a nih miau vangin ka awm sawn ngei a ngai bawk si. Ka pa chuan lunngai lo tur leh an lo zawn ve reng tur thuin min thlamuan a, mahse ka rilru a hahdam phah teuh lo.

Chapter 12

Nutei POV

"Doctor, a buaithlak khawp mai. Inzaina room lamah khan kan nawr lut mai dawn em ni?"

"Aw, hmanhmawh rawh u. Chuan nang khan ani hi lo pui la, keipawh ka rawn phei vat ang"

Ka bul hnai maia mipa leh hmeichhe inbe thawm chu ka hre ruai ruai a, ka taksate chuan chet zai reng an rel lo. Ka theih tawpa ka ngaihtuah luih pawh chuan engtinnge ka awm tih tak ngial pawh ka hrechhuak thei lo va, ka taksa chau lutuk chuan ka rilru thleng a khawih chau zo niin ka hria.

"Mama, mama" chutianga ka fapa rawn ṭawng chhuak thut ka hriat avang chuan ka va han hlim tehreng em.

"Awi ka Bawihpui, min ko thei maw? Tunah khan min ko tiraw? Awi Lalpa" tiin ka hmaa ka fapa kum 1 mi lek Baby walker-a chuang chu pawm kangin ka kuah nghal chûng chung a, a ṭawng chhuah hmasak bera kei min ko chu ka hlimpui a ni.

"Miriam, Miriam, lo chhuk vat teh" tiin ka inluahna te neitu fanu chu ka au a, ka koh thawm hriain ani pawh chu a rawn tlan chhuk ve ta thuai.

"Enge u Nute, thil thleng a awm em ni?" a rawn ti lut ve nghal vat bawk.

"Awi lo kal vat teh" ka fapa chu walker-a dah let lehin ka fapa awmna lamah chuan ka lo pawt phei vat a, thil awmzia ka la sawi lo bawk nen a meng buai nak mai.

"U Nute enge a?" ka tih ang anga awm chung chuan a rawn ti a, chutah kei chuan

"Enteh, ka fapa hian min ko thiam tawh? Mama min ti thei tawh" nui ver ver chung chuan ka ti chul a, chu veleh ani pawh a rawn ṭe ve ta chul.

"Awi, nang chu a nuam awm bik ê. Ka hriat laiin vawikhat han inkoh tir leh chhin teh" a rawn ti leh zung zung a, keipawh chu ka fapa bula ṭhu hniam chung hian

"Bawihpui, a nute Miriam-i hriat lai hian Mama kha han ti leh teh le" ka ti a, ka hlim tak zet a ni.

"Mama" nuapang ṭawng thei tir aw taka a rawn tih leh chuan kei ai aiin ka bula mi chu a rawn au ring tawh zawk.

"Awi, a mak ê. Kan Bawihpuia chu a va'n ṭawngthei tawh bik tak. Mahse u Nute, Bawihpuia hi Bawihpui tia koh hi ka duh lo, thlak daih ang, a la tet lai hian" a rawn tih chuan a lam chu ka hawi vat.

"Engatinge? Mawi i ti vak lo em ni?"

"A mawi ka tih loh pawh ka hre chuang lo, mahse a len hunah te, a lo puitlin hunah te khan Bawihpui tia auh vak vak kha a mawi tawh dawn hleinem. I phal chuan ka lo thlak daih" nui ver ver chuan a rawn ti a, a hmelah chuan a inthlahrung tih ka hre thei.

"Ni ve tho mai. Ni e, a la te bawk a, koh dan han thlak pawh chu a pawina a awm chuang lo. I duh danin a hming chu thlak ila a ni mai alawm, engtia koh nge i duh a?" tiin ka zawt let ve ta mai.

"Ka duh dan chuan Mapuia ti ila, nakîn zelah pawh koh a awlsamin a buaithlak loh zawk ka ring" a rawn tih leh chuan ka lo pawmpui khawp.

"Aw le, tun aṭang chuan ka fapa duh tak hi Mapui tih hlirin kan ko duat tawh ang. I hlim em ka fapa? Han nui teh le" tiin ka fapa chu ka pawm kang a, a rawn ṭap ta vak mai. A ṭap tawp mai dawn emaw ka tih laiin ka fapa erawh chu a ṭap uar zual sauh zawk. Ka fapa ṭap avang chuan ka buai a, ka chi ai vek tawh a ni ber.

"A lo harh e, doctor a lo harh tawh" tih thawm chu ka hre zawm zat a, thil awmzia chu ka man lo hle.

"U Nute, i ṭha em?" ka men rual chuan Miriam-i hian hlauthawn hmel deuh hian min rawn bia a, khawnge ka awm pawh ka ngaihtuah chhuak thei rih mai lo.

"Aw ka ṭha chuan ka hria" ka tho kang tur chu min lo pui vat bawk.

"Chuan khawnge ka fapa?" ka tih chuan Miriam-i hmel chu a rawn inthlak danglam vek a, a ngaihna a hriat loh hmel em em leh nghal.

"Mawh? Khawng ka fapa? Tun angah te chuan i rawn pawm ka lo ring asin" ka tih leh chuan a rawn ṭap chhuak hawk a, mak ti deuh chuan ka lo en kar.

"U Nute, i fa kha, ni lo, kei chuan ka sawi thei lo. Doctor khawngaihin nangmahni zawkin hrilh mai teh u" tiin a sut zui hlap hlap a, chutah doctor chuan keimah min en reng chung hian

"Pi Zonun, a pawi kan ti khawp mai. Kan theihtawp chu kan chhuah a, mahse i fa kha i pum chhungah khan a lo thi hman tawh a ni. A pawi tih mai loh chu sawi theih kan nei rih lo" a rawn ti a, kei erawh ka lo ṭeu hlar thung.

"Doctor in ni a ni lo'm ni? Engvanga dawt sawi ringawt nge in nih? Ka fapa chu ka hmu daih tawh. In â a nih dawn hi!" tia thawh ka tum chu Miriam-i chuan ṭap pur hian min lo chelh a, amah chu ka en kur bawk.

"Miriam, nang pawh hi engatinge i ṭah pur? Min lo pui teh" tia thawh ka tum leh chu

"U Nute, vanduai thlak takin i pum chhunga naute kha a awm tawh lo. A thi tawh, pawi ka tihpui lutuk che" ka tho tur min chelh bet tlat chung hian a rawn ti leh ṭuau a, an thil sawi chu ka hrethiam lo a ni.

"Ni lo Miriam, ka naute chu ka hring chhuak daih tawh. Kum khat leh tih chauh a la ni nghe nghe asin" ka fapa thi tawh ang maia an sawi chu ka duh lo tak zet.

"A ni lo u Nute, i naute chu a awm tawh lo. Doctor te sawi ang khan i naute chu i pum chhunga a awm lai khan a thi daih tawh zawk alawm" ṭah insum zeta a rawn tih leh chuan ka hlauthawng ta viau. Chutah thil awm dan hre chhuak zung zungin ka pum chu ka'n en a, a lo thep huai tawh bawk si nen ka naute chu a thi tak tak ang tih ka hlau rilru tawh hle.

"Doctor khawiah nge ka naute a awm? Naute ka neih hun a la ni reng reng lo. Nangmah a ni lo'm ni thla leha nei tura min hrilhtu kha? Khawiah nge ka naute hi a awm tih tunah hian min hrilh hram teh" ka áw ah chuan hlauthawnna chi tinreng a tel ta.

"A pawi kan ti pi Zonun, i hrin hun chu la ni lo mahse thla kim lova kan piantir tawp loh chuan nangmah ngei pawhin i tawrh theih avangin kan zai ta tawp a nih kha. Mahse kan han zaichhuah khan naute chu i pum chhungah a lo thi fel vek tawh zawk a ni" doctor in a rawn tih leh chuan ka naute chu ka chan ngei a ni tih ka hre ta.

"Ni lo, a theih loh. Ka fapa chu ka mit ngei hian ka hmu alawm. Miriam, nang pawhin ka koh dan i thlak a, Mapuia tia ko turin min hrilh alawm. Ni lo, khang kha ka mumang mai atan chuan ka phal lo" mi â ang maiin ka au chiam a, ṭawng pawh ṭawng chhunzawm ṭha thei lo chuan ka ṭap khur ta zawih zawih.

"A pawi kan ti tak zet. I taksa kha a chak lo bawk nen naute chu kan chhan hman ta ngâng lo a ni" ka bula Doctor ding reng chuan a rawn ti leh a, kei erawh chuan an thil sawi te chu ka la pawm thei thlâwt lo a ni.

"Kan lawm e Doctor, in mi buaipuina ah kan lawm lutuk" tiin Miriam-i chuan a lo chhang a, ka ṭap lai chu min rawn kuah zui ta bawk.

"Miriam, ka la ring thei lo a ni. Ka fapa Mapuia kha ka mit ngei hian ka hmu asin" tiin ka hawi chhuak a, Doctor leh nurse te pawh an lo chhuak vek tawh.

"U Nute, i mumang vek a ni tih hriatthiam tum hram rawh" a rawn tih te chuan ka ṭah a chhuak zual.

"Ni lo, ani kha ka neihchhun tak mêuh a ni tawh asin. Ka phal lo, a thih ka phal lo" ka awm chum chung chuan ka ṭap zui ta hawm hawm a, tute nge kan bulah awm tih reng ka ngaihtuah thei tawh lo.

Hun a ral a, ni tin chuan ka fapa ka ngaihnate chu a zual tulh tulh ni berin ka hria. Zan mu mang lova ṭah tlaivar ṭhak chang te chu ka nei ngun khawp mai. Ka awmna in neitute fanu Miriam-i chuan min kawm hlim thiam em em a, ka khawhar lutuk tur pawh a zia hawk zelin ka hria. Ani hi awm lo se zawng in luah tur ka hmu lo ang a, kha chen nau pawh ka pai theih ka ring lo a ni. Miriam-i chu Lunglei lam pan Sumo-a ka chuanpui aṭangin ka hria a, amah lehkha zir sang a lo ni bawk nen a polite khawp mai. Kan chanchinte chu kan sawi a, rei lovah ka nel nghal thuai. Tichuan in luah tur zawng chawp tur ka nih thute ka hrilh chuan min ngaihvenpui a, Lunglei ka thlen tirh phei chuan an inah ka thleng nghe nghe.

Mak tak maiin an ina kar khat ka awm hnu chuan an in hnuai luahtute chu chhungkaw pa ber hna avangin an insawn chhuak a, tichuan kei chuan awlsam takin an in hnuai chu ka luah zui ta a ni. A tirah chuan ka awm ṭhanna a ni lo bawk nen hrehawm chu ka ti ru viau a, mahse zawi zawiin a insiamrem ve theih zel mai. Thla hnih ka awm hnu chuan ka pangai viau tawh a, sum lamah pawh buaina ka nei em em hran lo. Ka card pakhat zawk chu keima lo inkhawl ve na te leh ka nu leh pate min thunsak aṭanga ka pawisa awmna a ni a, pakhat leh chu ka pasalin ka tana pawisa a dahna a ni thung. Ka rilru a kal sual laklawh bawk nen u Hruaia pawisa chu a them pawha hman ka tum lo hrim hrim. Ka buaina ber chu ka mu thei lo ṭhin chu a ni. Ka mit ka chhin rual apiangin u Hruaia hmel chu ka hmu ṭhin a, chu chuan min timu thei lo a ni. A hmel hmuh leh ka duh tawh lo va, a hnena let leh chu ka tum tawh lo hrim hrim bawk.

Ka lo tum rilruk danah chuan naute ka neih hnuah ka nu leh pate bulah ka let leh ang ka ti kha a ni a, mahse engkim chu a buai zo ta vek a ni. Doctor sawi danin ka naute thihna chhan ber chu keima taksa chak tawk loh vang a ni a, mu miah lova ka tlaivar ṭhak ṭhak ṭhinna chuan ka taksaah nasa takin nghawng a lo nei ang tih reng ka dawn pha lo a ni. Engkimah chuan keimah ai mahin u Hruaia chu ka mawhpuh a, a chhan pawh amah avanga mu thei lo ṭhin ka ni miau alawm.

Ni a ral, karte a ral leh mêuh chuan ka naute ka chan aṭangin thla khat lai kan lo chuangkai leh ta reng mai. Tuna ka rilrua lian ber chu pangai taka nun leh hlawhtling taka ka nu leh pate bula let leh a ni. Naute tel miah lova nun chhoh ka tum dan leh che vel chu Miriam-i chuan min en vawng vawng zel a, min khawngaih tih chu hre tho mah ila ka hre lo der hmak hmak zel. Ka naute thih hnuah pawh chuan ka la muhil thei ta lo cheu a, chutiang em ema ka pasal ka rilrua a bet chu kei ngei pawh chuan a chhan ka hrethiam thei lo a ni. Miriam-i chuan sleeping pills ei ve mai turin min hirlh ṭhin a, mahse side effect a awm an tih vang leh ei ṭul em ema ka hriat loh avangin ka ei ngai chuang lo.

Ṭum khat chu Miriam-i chuan chhun lama ka hnathawh tur min lo hmuh sak hlauh mai a, ka lawm hle a ni. Hah takin hna thawk ila, engmah ngaihtuah buai lo leh ka mitthlaa ka pasal hmel lo lang ṭhin bo hmak thei khawpa muthilh vang vang ka châk a ni. Chutianga awm chu ka châkna a rei tawh lutuk. BA pawh pass chhuak zo lo tih takah ka hna tur awm tak Restaurant-a thawh chu ka hna thar a ni a, hrehawm ka ti hran lo hle bawk. Taima taka ka thawh chuan engtik niah emawni chuan ka la hlawhtling ve ngei ang tihna rilru chu ka nei lian hle.

"Nute, hei hi table number 4 ah khan lo dah mai aw" tiin kan Chef chuan a rawn ti a, keipawh chuan

"Aw le" tiin order chu ka la a, table lam chu ka pan nghal.

Chutiang chuan hun ka hmang ni tin ta deuh char char a, nilai leh zirtawp chu kan hah loh ni a ni tlangpui. Tin, ka nau ang hiala ka en Miriam-i leh a ṭhiante chu ka thawhna dawrah chuan an rawn chawl ṭhin a, an rawn chawlh hi chuan kan hlawk thei khawp. Chutianga dawrtu hmelhriat ka lo neih avangte chuan kan pu ber chuan min nel thuai a, keipawhin a hnuaia thawh chu nuam ka ti hle. A zaidam a, pa zahawm leh thawhhreh nei lo a ni tih ka hriatte chuan ka ngaisang zual sauh. Chubakah ka thawhpuite pawh chu zirlai an lo la ni hlawm a, part-time vekin kan pu chuan a thawh tir hlawm bawk. Hnathawktute zinga tlêm te lo chu full time-a thawk kan awm lo zawk a ni.

"U Nute inkhawm ve tawh la, zanin phei chu ṬKP inkhawm zan a nia" inkhawm zan apiangin Miriam-i chuan inkhawm turin min sawm ṭhin a, mahse inkhawm chu ka tum buai duh rih lo law law ṭhin.

"Ka hre lo le" ka tih chuan

"I ti ve ziah, zanin chu lo inkhawm ve tak tak tawh rawh" a rawn ti leh pang pang a, ka lo nui ta ringawt.

"Dik taka sawi chuan ka peih vak lo alawm. Presbyterian ka ni bawk sia, Baptist kohhrana lo inkhawm ve daih chu mawi pawh a mawi lo vang" ka tih chuan a rawn nur nang.

"I ngaih dan mai mai a nih chu, chutiangin kohhran inenhran bik kher a ngai hleinem. Kan inkhawm dan kalphung chu inang lo deuh mahse a tam zawk chu a inang asin. Keipawh Presbyterian kohhranah ka inkhawm tawh alawm" a rawn tih chuan mak ka lo ti ngei mai.

"A ni maw!?" ka ti ta hû.

"Aw, mi ṭhenkhat hi chuan mi dangte kohhrana inkhawm theih loh bur angah an ngai ṭhin a, chu chu kei chuan dikin ka hre lo a ni" a thusawi ṭhenkhat chu a ni ve thei tho tihna lai ka nei a, mahse inkhawm hrim hrim chu ka châk vak lo a ni e.

"Zanin chu ka inkhawm rih lo leh phawt mai ang" ka tih chuan

"A theih tawh loh, zanin aṭang hian i inkhawm ve tawh ang. A nih loh chuan ka pa ka hrilh a ni mai" a rawn tih chuan amah ka en ta kar.

"Ka chho a nia, ka lo sawm leh dawn che avangin lo insiam peih vek ang che" upa zawk ang maia rawn ti lehin a chho zui nghal.

Min sawm luih tlat avang leh ka thuamhnaw hak tur te nen lama min siam luih tlat avangin Miriam-i chu inkhawm turin ka zui ve ta nge nge a, mahse rilrua phurna pakhatmah ka nei lo. Rin ai takin Baptist kohhran hall chu a lo zau a, Aizawl lama kan kohhran hall ai pawhin a zau daih zawk. Tin, inkhawm pawh kan ṭhahnem fû a, sound a ṭhain zai pawh a nuam phian. Inkhawm pawh tih tawh nak a laia hla zir turte chuan min la sawm ang leh ta deuh deuh a, han hnial ngawt dawnin ṬKP lama an hruaitute an lo ni ve leh zel bawk si. Zan dar 9:30 velah chuan hla zir pawh kan bang ve ta hram a, kea haw pawh kan tam hle.

"Sir hei hi Nutei a ni hi, kan college thlang lawka restaurant-ah khan a thawk a, amah pawh hi a fel lutuk" Miriam-i thusawi chuan min va tizak tak, kan bula kal pa lah chuan min en reng chung hian a lu a bu nghut ringawt.

"Naktuk test tur kha zir ṭha hle la a ni mai" a ṭawng tawh dawn lo emaw ka tih lai chuan a rawn ti a, kei ni lovin Miriam-i a bia tih chu ka hrethiam zui bawk.

"Aw le, Sir " Miriam-i chuan a lo ti vat a, an inbiak vel dan chu ka hrethiam lutuk lo. Rei lote ah kan in peng kan thleng a, kan kalpui pa nen chuan inthlahin kan in awmna lam chu kan pan ve nghal.

"Engatinge Sir i tih a?" kan pahnih chauha kan kal takah chuan ka ti a, ka hre châk tlat alawm le.

"Âw, amah kha college-a kan HOD a nia lawm. A fel lutuk, mahse nupui a la nei lo" nui vak vak chung chuan a rawn ti a, ka lo nui ve ta ringawt.

"A nih chu, a fel hmel sia nupui a nei tawh zawk emaw ka lo ti" ka ti ve mai bawk.

"Ti daih ila, u Nute bialpa emaw pasal emaw neih leh hi i tum tawh miah lo em ni?" a rawn ti daih mai.

"Ka neih theih tawh ka ring lo" kan ngawih vang vang hnu chuan ka ti a, ka theih tawh loh ka ring tak tak a ni.

"Chutiang ringawt a ni hleinem, nei leh ngei ngei rawh. I duh chuan ka lo zawnpui ang che" te chu a rawn ti leh ta nghal a, ka duh teuh lo mai a!

"I ti ho em mai, keimah hian ka duh tawh lo hrim hrim alawm" ka tih chuan

"Engvangin maw?" a rawn ti nghal thuai.

"A chhan chu mipa reng reng hmangaih leh thei tur hian thinlung ka nei tawh lo niin ka inhria a, a dik ngei ka ring bawk. Tin, ka hmangaihna sang ber chu ka pasal hnenah ka hlan tawh a, lak let theih pawh a ni tawh loh avangin ka tum buai lo" ka mittui chu a rawn hnai kuar a, a tla mai tur chu ka khap let sak.

"Ka tihpalh, zawh loh tawp tur che ka zawt a ni" inthlahrung tak chuan a rawn ti a, ka nui lui ta sak.

"A ho lutuk, hun kal tawh mai mai alawm. Engmah a thlak theih tawh lo va, chuvang chuan ka tun hun hi ṭha taka hman ka tum tawh zawk a ni" pawn lamah chuan nui angin lang mah ila ka thinlung chhungril chu a ṭap ru reng thung.

Ka in ka luh te chuan ka zawi em em a, mahse ka mut a la chhuak chuang der lo. Zan lama mut loh ka tihṭhan lutuk avangin ka mu thei lo nge ka mitthlaa ka pasal hmel a lo lan ṭhin avangin ka mu thei lo tih pawh chu ka hre hrang tawh lo. Muhil thei lo han nih tlawng chu ka ning a, ka taksa pawh chuan a tuar viau bawk. Zing a lo ni a, mu lo ta na nâ na chu hna lama kal turin ka insiam peih hma hle. Hnathawhna hmuna kal hmain Miriam-i hmuh lawk chu ka tum a, an in ka luh chuan ani paw'n chaw a lo ei kham ve chiah.

"U Nute, i va hma leh pek ve. Ka hma khalh thei dawn lo che a nih hi" kut hruk mawlh mawlh pah chuan a rawn ti a, kei chuan nui lui saka

"Awih awm loh em mai, Miriam ka be lawk duh che a" ka tih chuan ka lam chu a rawn pan ve vat.

"Eng lo a nia, sleeping pills hi khawiah nge ka lei ang? Sawi miah suh" ring vak lo chuan ka ti a, ka thusawi chu mak a ti te pawh a ni ang a ngawi kar mai.

"A tawpa tawpah chuan i ti ve ta maw, ka va lawm tak. Ih maw, saw Venglai Drug Store-ah sawn an zuar chikim lutuk. Saw tah sawn an nei ka ring bawk, ka ṭhiante pawhin an lei ṭhinin ka hria" min en vang vang hnuah chuan a rawn ti ta zung zung.

"Aw le, ka lawm lutuk e. Ka kal leh nghal mai ang" ka tih chuan Miriam-i chuan pawn thleng min rawn zui a, enge a chhan erawh ka hre lo.

"U Nute, i la mu thei lo reng tak tak em ni?" ka kal tawh mai tur min ko ding leha a rawn tih chuan lehhawi lehin

"Aw, la mu thei lo reng e. Chuvang alawm sleeping pills hi ei tawp mai ka duh tawh nì" ka ti a, ani chuan lungngaih hmel deuh hian min lo en thung.

"Nia, sleeping pills hian a chhawk ngei che ka ring. Ni hman nuam aw" tiin kan inthlah zui ta bawk.

Chhun a lo nih chuan kan dawr pawh a lun leh tawh hle. Mi lut chhuak an awm reng a, kan dawr chu changkangin lian lo mahse pantu a ngah ve viau chuan ka hria. A chhan ni awm bera ka rin chu kan thil siamte chu dawr dang aia a tlawm a, mahse a tui em em bikna chu ka hre chuang lo. Amaherawhchu, kan thil siam engkim chu a thianghlim em em vek thung.

"Nute, table number 10 ah aw" an rawn tih chuan tray chu lain order awmna lam chu ka pan phei a, lo order tu ka hmuh chuan tlemin ka tim deuh.

"Ka pu, hei i thil order aw" tiin a hma zawnah chuan ka va dah a, min lo en ta kal mai.

"Enge i hming kha?" a rawn tih chuan amah chu ka melh a, ka hawisawn leh rang ngei mai.

"Nutei" ka tih chuan

"Nutei" a lo tinawn ve sup a, order vel ka dah fel zawh chuan keipawh chu khawmuang tawh lovin ka phei leh ta thuai.

Table number hrang hrangah order ka dah kual lai chuan table number 10-a mi chuan min en reng tih ka mitsirin ka hmu a, ka hre lo der char char. A eina pawisa a pek te khan

"In thil siam a tui mai bakah order petu pawh a zuan a zang ṭha hle mai" a ti deuh kher a, han ngei ngawt dawnin huat tur thil a sawi pawh a ni si lo.

"Eissss, Nutei'n faktu te a nei vel. In inhresa zawk em ni?" a chhuah hnuah kan pu chuan chhaih titih pah hian a rawn ti a, ka nui hak hak ringawt.

"I sawi duh loh danah i bialpa a ni chiang mai" kan thawhpuinu chuan a rawn ti ve leh vel chîam.

"A teuh lo mai, vawikhat inkhawm bang kan haw ho tawh ringawt alawm" ka tih pawh chuan an lo awih duh tawh lo vel a, rin ai takin ka thawhpuite chuan min tinui hnem ta phian.

Ka hnathawhna lamah pawh ka tluang a, chhun lama ka thawh hah ṭhin vang leh sleeping pills ka ei tak avangin zan lam mut pawh ka harsat em em tawh bik lo. Sleeping pills ei chung pawha zan ṭhenkhat han mut theih loh chang chu la nei ṭhin tho mah ila, ka mut theih a tam tawh zawk a ni. Tin, Miriam-i chuan chhum lo chat lova min sawm tak reng avang chuan inkhawm lam pawh ka ti chho leh ṭan tawh a, Bible te chhiarin keimah chuan hmasawnna rahbi thar kai ka tum ve bur a ni. Lunglei ka awm tirh leh ka naute ka chan tirh kha chuan ka beidawng lutuk khan ngaih dan dik lo min neih tir a, Pathian kha belh loh ka tum ve tawp a ni mai.

Amaherawhchu, thil lian tham leh thui tak ka tisual hman lo hlauh a, ka lawm thar hle bawk. A chang chuan ka nu leh pate ka ngai a, ka ṭhiannu Feli ka ngai ṭhin bawk. Mahse, ho mai maia let leh chu ka tum dan a ni tawh lo. Lunglei chu ka awmna a la rei lo bawk nen kan veng mipuite chuan min hre em em lo va, ka chhuak lutuk lo leh ka inkhawm tam lo chu min hriat chian lohna chhan a ni ang. Kan veng mi leh sa min betu leh hretute chu tlêm té tak meuh an ni a, a chang chuan chutiang biru nun chu ka ning leh thut zel. Ka pate, ka nute leh ka ṭhiante chuan min zawn ve ngei ka ring a, mahse keimah zawk chu ka inthup nasat em avangin min la hmu lo mai mai ni ah ka ngai.

"Saw a lo ṭhu leh ran tawh, nangmah ngei hian va pe leh nghe nghe teh" ka thawhpuinu Dini chuan a rawn ti a, a sawina lam ka en chuan Miriam-i te HOD kha a ni tih ka hre nghal.

"I ho em mai, nangma'n va pe rawh. Kei chu hei hi ka lo tifai ang" tia dawhkan nawhna ka la tur chu min lo dang a, ka lo en hû ta ringawt.

"Ho bawk lo, kha chu ka tihtur alawm. Good luck" tiin ka puan lak tum chu a la a, dawhkan chu a nawt ta zung zung.

"I va ti ho tak" ti nuah nuah chungin order chu ka chawi phei leh ta nge nge.

"Order a lo thleng e, tui deuhin i ei dawn nia" dawhkana ei tur vel ka dahfel hnu chuan ka phei ve leh mai bawk.

"Kei chu a pa ka ti e, ka star tawp" Dintei bawk chuan a rawn ti a, Dintei hi chu kei aiin a la naupang ve leh chhawng a, kan nuihna siam hnemtu ber a ni ṭhin bawk.

"I star viau chuan ka lo sawi zeuh dawn em ni ang? Chuan i star tih a hria ang a, in inngaizawng a ni mai" ka lo ti ve hluai a, a hmel ka en chuan a lo lai ve nasa mai.

"Awi ka zak deuh, mahse ka star tih chu hre tho mahse pawi pawh ka ti chuang lo. Nâ, han hriat tir tawp chu a mawi lo viau em le" kei aia naupang daih a ni bawk a, a la naupang chhia ve hle.

"Mawi lohna pawh a awm hran lo, keipawh nangmah ang rual ka nih chuan i awm ang chiah hian ka awm be ṭhin alawm" a rilru nawmna'n ka lo ti ve a, a ngaih a ṭha ve leh mai bawk.

"Aw le, a nih chuan lo sawi tawp mai rawh. Ho em mai, in star te chu theih loh pawh a ni hleinem" a rawn tih leh chuan

"Dik chiah" tiin dawhkan sengfel tur chuan ka phei a, Miriam-i te Sir pawh chu a lo intifel vel ve mek bawk.

"A tui khawp mai" a bul ka va thlen chuan a hmui hrufai mawlh mawlh chung hian a rawn ti sup a, a zia a harhvang vak bik lo niin a lang.

"Kan lawm e, i lo kal ziah dawn nia. Chuan" ka tih lai chuan a rawn ding a, min en ta ran.

"Ihhhhhj, ka thawhpuinu sawn a star lutuk che a" ka ti ta tawl mai. Ani chu a ngawi reng a, ṭawng leh tawh chuang lo chuan ei man pekna lam chu a pan zui daih.

"Awi u Nute, a chhuah dawn khan min rawn en reng a, ka lo nuih ringawt. Ka lai lutuk kha a hrethiam ang tih ka hlau" tray nena ka va let leh chuan Dintei chuan a lo ti zet zet a, a awm dan vel chuan ka tleirawl laite chu min tihrechhuak uar uar dawn alawm.

"A hrethiam lo vang, a dawt leh aṭang chuan nangmah ngeiin i va pe ziah tawh ang" ka ti ve ta zaih.

"Awi i phakar reuh ê, mahse ka châk ru tho"

"I lo châk ruk rengte chuan engatinge a hma te khan ka kal ai i kal ngai loh? I va pawh tam chuan ani pawhin a lo ngaina thuai dawn che alawm" ka thiam ang ang chuan ka hrilhfiah ve a, min la rin hmel em em zui.

"U Nute i tak tak em? Min ngainat theih ve i ring maw?" dawhkana purun var kheh mawlh mawlh chung chuan a rawn ti a, keipawh chuan customer an awm lutuk lo nen Dintei chu ka tih felpui ve nghal.

"Aw ring e" ka lo ti ve mai.

"A nih u Nute, bialpa i nei em?" a rawn tih chuan ka lo nui ringawt.

"Nui ringawt lo khan sawi ve mai la, i nei a ni maw?" nui ver ver chung hian a rawn ti leh a, chutiang lampang chu sâwi sawi ka peih lo a ni.

"Aih, ka nei tawh lo zawk" ka tih chuan a rawn nui ve ta ringawt a, thuk tak han sawipui ém atan chuan a la nau mah mahin ka hria.

Tlai dar 5 velah chuan ka in chu ka thleng a, intifaiin ei rawngte chu ka bawlzui nghal bawk. Ka lo bazar lawk lo nen chawhmeh han siam tur em em pawh chu ka hre lo va, dawrah kalin ar tui chu ka lei leh ṭeuh ta ringawt. Ka nun hmasa lamah kha chuan mahnia awm thiam lo leh ṭawng pawh ṭawng tlem thiam lo kha ka ni ṭhin a, mahse kan awm dan tur hi kan lo hre hle zawng a nih hi! Tunah chuan keimahin, keimah chauhin in pakhatah ka awm ta tlauh tlauh a, chutianga awm chu ngaiah ka nei tawhin ka hria. Ka awm tirh te khan harsa ka va'n ti thei tak. Ka biak ber leh ka kawm ber ṭhin Miriam-i lah chu class a kal daih zel a, mahnia lo awm tlawk tlawk chu hrehawm tak a ni.

Ka chaw eina vel ka sengfel hnu chuan hahdam takin ka khumah chuan ka awm a, ka phone phawrhin Instagram chu ka lut zui nghal. Ka account hmasa password te chu la hre vek mah ila account thar chu ka siam ta tho a, ka account hlui chu ka khawih leh tawh ngai lo hrim hrim zawk. Chutiangin followers pawh ka la ngah lo va, thlalak phei chu êngmah ka la post lo. Zan danga ka phone khawih ang lo takin u Hruaia account chu ka check chak tlat pek a, enge a chhan pawh ka hre lo. Chutia ka ngaihtuah lai chuan ka kutte chuan u Hruaia account chu an lo hmetchhuak dím diam tawh a, u Hruaia thlalak post ho pawh ka en ta nge nge.

A lan danin u Hruaia chuan thlalak post thar a neih belh lo va, Feed-a thil post ho chu ka hmuh hnu leh a hlui vek an ni. Mahse a profile picture chu a sen bial kiau avangin story a nei mek tih chu ka hrethiam. Chutah en châknain ka khat leh tlat pek a, mahse ka en mai duh lo. Minute 10 vel chhung chu youtube-ah ei siam dan lampang ka en a, ka thil en chuan ka rilru a luah lo ngei mai. A tawpa tawpah chuan Instagram-ah bawk lut lehin u Hruaia story chu ka en ta tawp.

"Hnathawhna hmun a dang ta" tih thu ziakin quarter ang deuh thlalak lek chu a lo upload a, ka lo hlauhthawn ruk ang aia a hoh leh si avang chuan ka nui ta ringawt. Engvanginnge hetiang êm ema min tinatu leh ka bula lo let duh tawh lotu hi ka hmangaih reng tih chu ka inzawt fô va, ka hre hlawl lo a ni. Ka theihnghilh theih miah loh avang chuan keimah leh keimah chu ka inhaw ṭhin.

Chutiang thil ka lo ngaihtuah lai chuan ka account hlui, ka account dik tak zawk aṭang chuan message hi a rawn lut zawm zat a, ni dangah chuan ka clear nghal tawp zel. Notification lo thleng chu message a nih loh avang chuan mak ka tiru hle a, ka acount hlui zawkah pawh chuan ka lut leh ta nge nge. Ka lut chiah chu Feli hian a thlalak post-ah min lo tagged hi a lo ni a, chutah like pawh tum chuang lovin a thlalak post chu ka en a, ka thlalak zawk a ni a lo post nì. Ka thlalak ai mah chuan a caption-a a thu inziak chuan min tihlauthawng ta hle a ni.

"He hmeichhia hi Zonunmawii d/o Lalrochhuma, kum 24 mi niin Tuikual South-a awm ṭhin a ni a, thla li chuang kan zawn hnuah pawh kan la hmuh theih loh avangin khawngaih taka min lo pui turin ka ngen a che u. In hriat awlsamna'n Zonunmawii hi rai puar lai mek emaw fa pakhat nei tawh pawh a ni maithei. Amah hmutu leh a awmna hretu chuan a hnuai phone number-ah khuan min lo call dawn nia" tiin Feli chuan caption-ah thu a lo ziak thla ṭeuh a, ka buaiin ka phili nghal hle.

Ka thlalak a hman te lah chu tuna ka hmel ang deuh thaw a ni a, ka hmel hmutu tan chuan hriat chhuah pawh ka awl khawp ang. A post na a la rei vak lo va, likers pawh an la tam lutuk lo. Ka hlauthawng bawk si leh awm ngaihna hre bawk si lo chuan Feli chu ka call ta tawp. Ni e, ka awmna ka hrilh dawn pawh a ni lo va, ka dam ṭha a ni tih tal chu hriat ve an phu alawm. Ka call aṭanga vawi thum vel a ring hnuah chuan a rawn pick-up ta.

"Hello" ka ṭhiannu Feli aw ngeiin a rawn tih chuan ka lo ngawi reng.

"Hello, tunge âw?" a rawn tih leh pawh chuan ka la ngawi reng ta tho, ka ṭah chu a chhuak et et.

"Hello, min hre thei em?" a rawn ti leh a, chutah kei chuan insum thei tawh lovin

"Fel" ṭial ruai chuan ka tichhuak sep a, ka mittui chu ka biangah a luang ta zàwih mai.

"Nute, Zonunmawi, nangmah i ni em? I ni ti raw?" a ngawih deuh vang vang hnu chuan a rawn ti chiam a, ka lo ṭah nuih hawk.

"Min chhang teh Nute, nangmah i ni tak tak em? Lo ni hram teh" a rawn ti ta mawlh mawlh a, a aw aṭang chuan sawi ber tur a hre lo ve tho a tih theih awm e.

"Aw, ka ni e" ka tih chuan

"Mawli, engvanginnge i tlan bo kher? Khawiah nge i awm? Lo haw rawh, i nu leh pate pawh an khawngaih thlak awm tawh lutuk" ka bo leh nghal mai ang tih hlau ni awm fahran chuan a rawn ṭawng nghal zawt zawt a, kei tak pawh chuan ka nu leh pate chu ka khawngaih a ni.

"Tun atan chuan Instagram-a i thil post kha delete phawt rawh, a lo darh chîam hmain chu chu ti hmasa ber phawt teh. Chuan kan inbe ṭha leh zawk dawn nia" tiin phone chu ka off hmak a, rei lote ah ani pawh chuan ka sawi ang ngei chuan thlalak chu a rawn delete zui bawk.

"Sawi chiang tawh rawh le, khawiah nge i awm?" phone call lo lut ka pick-up rualin Feli chuan a rawn ti a, mahse ka awmna sawi erawh ka tum chuang lo.

"Fel, ka thei rih lo. Ka awmna hi ka hrilh thei rih lo che. Nakinah engkim ka hrilh vek ang che, chuan ka nu leh pate kha ka dam ṭhat thu leh an bula ka lo kir leh tur thu i lo hrilh hram dawn nia" ka nu leh pate hming ka sawi rual chuan ka ngaihzia pawh thup seng lovin

"Ka ngai hle a ni tih min lo hrilh sak bawk dawn nia" ka tih zawm leh nghal zat bawk.

"Mawli, lo haw vat mai rawh. Engtia awm nge i tum hrim hrim? Engtinnge nangmahin i awm theih ang? Naute chu i hring ta em? I naute chu ka hmu ve duh, ZONUNMAWI lo haw vat mai teh" a rawn ti leh bawrh bawrh a, a awm dan chu ka hriatthiam pui khawp.

"Fel, khawngaihin min lo nghak hram hram rawh u. Ka nu leh pate pawh rilru thlamuang taka awm turin lo hrilh la, harsatna dang ka tawh loh chuan ka lo haw leh ngei ngei ang" ka ti ve leh thuai.

"I â tawh a nih hi! Hetah ngaihtuah em em chein keini kan lo awm a, nang lah chuan pakhatmah min ngaihtuah ve bawk si lo"

"Fel, min hrethiam hram rawh. Nang chauh hi ka la rawn bia che a, ka nu leh pate pawh ka sawi chin chiah kha hrilh rih ang che" keipawh ni ta ila Feli lungawi loh ang chiah chuan ka lung a awi loh ve tho ka ring.

"Nute, a harsa dawn lutuk. I nu leh pate'n min zawt ta se engtinnge ka chhan bik ang? I awmna ka hriat loh thu pawh sawi ila an ring tawh dawn chuang em ni? I awmna ka hriat an ring nghet bur zawk ang" beidawng fê hian a rawn ti a, ka khawngaih ngawt mai.

"Ka nu leh pate i la hrilh ngam lo a nih chuan lo la hrilh lo law law zawk mai rawh. Chuan media hmanga min zawn an tumna kawngah khan i theihtawpin i lo dang hram hram dawn nia" ka duh dan chu a khirhin a harsa viau ang tih pawh ka hria a, mahse tun atan chuan a ṭul rih tlat bawk si.

Kan inbiak fê hnuah chuan a rilru ka hneh thei ta hram a, ani chuan mi dang la hrilh loh law law chu ṭhain a hre ve ta zawk a ni. Naute chungchang min zawh chuan ka sawi mai duh lo va, ka haw leh huna sawi atan ka khek zawk a ni. Kan inbiak tawp lamah phei chuan a hma ang chiahin kan nui dun leh thei tawh. U Hruaia chanchin rawn sawi a tum chuan ka ngaihthlak peih loh thu ka lo sawi vat a, ani pawhin a sawi zawm tawh chuang bik lo. Chutia ka ṭhian ṭha ber nena inpawh taka kan han inbe leh thei ta chu nuam ka ti em em a, ka rilru chhungril lungngaihna leh ṭah châknaa khat pawhin hlimna hmel chu a rawn hmu chho ve leh ṭan ta.

"Nute, kha i phone a ri" kan pu chuan a rawn ti a, kan buai lai a ni bawk nen pick up chu ka phur viau lo. Caller ID ka en chuan Miriam-i hi a lo ni a, pawimawh vak a awm ka rin loh avangin ka dah busy ta daih.

"Vawiin chu mi dawrah Dintei nen khan in kal a ngai maithei a nia" purun sen kan zei laiin kan pu ber chuan a rawn ti a, keini pawh 'aw' tihna'n kan lo bu ve mai.

"Kha Nute i phone a ri leh tawh, han chhang phawt mai teh" a rawn tih zawm leh zat a, ka phone chu ka lo bi nghal vat. Caller ID ka en chuan Miriam-i tho a lo ni a, chutia min rawn call nawn takah chuan thil pawimawh a awm a nih ringin ka pick-up zui ve ta bawk.

"Hello" ka tih chuan

"Awi u Nute, phone i va la har ve"

"Nia, kan lo buai deuh alawm le. Engenita?"

"Awi u Nutei chu zing lamah ka hrilh lawk vek tawh che kha, vawiin kan final result chhuakah ka pass ve tih rawn hrilh che ka tum mai mai maw le" a rawn tih chuan zing lama min hrilh chu ka hrechhuak nghal zat.

"A nih chû, ka lo mangnghilh daih alawm. Ka lawmpui lutuk che, chuan engtinnge kan lawm ang?" nui hek hek pah leh purun sen zei pah chuan ka lo ti ve zung zung a, a result chhuah tur thu min hrilh ka lo theihnghilh daih avang chuan ka inthlahrung ve deuh.

"Ka hre lo le, tunah rih chuan i buai hmel rih em mai, i lo haw hunah kan inbe ṭha leh zawk dawn nia" a rawn ti leh takah chuan kan inbiakna chu kan titawp zui ve leh mai bawk.

Ka hna bang ka in lama ka haw tur chu theihnghilh ka nei tih ka hrechhuak a, Miriam-i pass lawmpuina'n tiin thil ka lei a, dawr aṭanga ka chhuah leh meuh chuan khua chu a lo thim fel vek tawh. Hmanhmawh ru takin ka in lam chu ka pan a, ruah a la rawn sur zui. Nihliap ka lo keng lo bawk nen in ka thlen chuan ka huh ta hnuang mai. Ei rawng bawl ka tum lai takin Miriam-i chuna rawn lut a, a result a hriat ni a ni bawk a, a rawn nui lut sâng bawk.

"U Nute, awi ka rin ang chiahin i awm. Ruah i rawn do haw kha ka ring reng a ni. Ei rawng kha bawl duh suh, kan inah chaw i lo ei dawn alawm" gas on-a tuilum ka chhuang tur chu min lo hmu a ni ngei ang.

"A va zahthlak duh awm ve, hetah pawh ka ei thei lutuk alawm" 'aw' lo pawh nghal tawp aiah tiin ka lo ti mawihnai ve a, a lo ner nang thung.

"I va ho tak, ka pass lawmna chaw ei khawm a ni hrim hrim zawk, lo chho vat ang che" tia chhoh leh mai a tum chu

"Miriam lo ding lawk" tiin ka lo ko ding leh ang lawi a, a chho ta bik lo. Ka khuma ka bag lei sak, tun hnaia an rawn uar chhoh em em Shoulder Bag chu ka va la a, a bul ka thlen chuan

"Kha le, i pass lawmna'n hei hi ka lei sak che a" ka ti a, a lo lawm thiam ngei mai.

"Awi u Nute ka va han lawm tak. Awi ka bag duh deuh chi a la ni zui, ka lawm lutuk aw" tiin min rawn kuah ta chûng chung a, chutia ka thil pek a duh zawng tak a lo nih avang chuan keipawh chu ka hlim ve hle.

A mawi awm tawk velah in chung lamah chuan ka chho a, Miriam-i chhungte paw'n min lo lawm thiam khawp. Ka inluah man chu ka keng nghal tho avangin ka pe a, ka duh lo chungin in luah man chu min la tlawm leh ta zui. Ka chaw ei te chu a'n tui lulai khawp a, an chawhmeh siamte chu ka hmeh khat vang nge ka ei tui hi a ni tawp. Chutianga Miriam-i pass kan lawmna te chuan ka hun kal tawh min hriatchhuahtir lo thei lo va, u Zualtei pass kan lawm laite chu ka mitthlaah a rawn lang ngal zut zut.

Pass lawm boruak vel kan zawh hnu chuan ka in lamah Miriam-i nen kan inzui thla a, Miriam-i hi chu han nau chei viau dawn ila kei ai aia puitlin chang hi a nei leh lawi si ṭhin a, Pathian hian ka kawm tur awm tawk tak min pe zel hi ka lawm ṭhin.

"U Nute, thil ka lo dil che" ka thingpui siam lai chuan a rawn ti a, eng thil nge min dil ang tih chu ka ngaihtuah zawm pawhin ka hre thei lo.

"Min dil rawh min dil rawh" pangai tak chuan ka lo ti ve a, thingpui pawh ka chawk zo chiah.

"Ih maw, â...han ṭhu leh phawt si teh" a rawn tih leh chuan thingpui chu dawhkan tèa nghat ka ṭhu thla zui ve mai bawk.

"Han sawi la, enge i thil min dil duh chû?"

"I pasal hlui thlalak ka lo en chhin" ka beisei loh lutuk lam a rawn sawi avang chuan ka nui ta chiam a, ani pawh a rawn nui ve ta tho.

"I va sawi ho mai mai tak, chutiangte inthlahrung deuha in dil kher pawh a ngai hleinem" nui reng chung chuan ka ti a, ka room-ah chuan pheiin ka khum lu bula kan innneih thlalak pakhat ka chhuahpui tak chu ka va la a, Miriam-i lama ka va pek chuan a lo ban ve vat.

"Awi u Nute, in va'n hmelṭha dun ve le. Lawk aw, i pasal hi ka hmuh hnu a van ang" kan nupa thlalak en reng chung hian a rawn ti a, a zawhna chu chhan enah pawh ka en chuang lo.

"Mawh u Nute, i pasal hlui hi a lar em? A nih loh pawhin engtin emawni tak chuan ka hre tawhin ka hria" tia min rawn zawh nawn leh takah chuan

"Nia, Aizawl DC alawm" ka lo ti ṭhe ve leh mai.

"A nih ka ring, TV velah ka hmu tawh chiang alawm. Awi pasal i va'n nei ṭha, in inhmeh tawp" a rawn ti leh luam a, ka lo nui mai mai ta ringawt.

"Chuan engtia zir chhunzawm nge i tum? Master degree neih tumna lam te i nei em?" ka tih chuan

"Hna ka zawng tawh zawk ang, zir vak vak pawh hi a ṭul berin ka hre lo. Hmeichhe tan phei hi chuan a harsa bik si" a rawn ti a, a sawi dik erawh ka ti leh fû.

"A va ṭha dawn ve, nang chu hna sang thawh bak hmabak i nei tawh lo tihna a nih chu"

"A ni kher lo, chutiangin hna ka hmu nghal dawn tihna pawh a ni hleinem. Dik tak chuan maw, kan exam zawh hnu khan hna chu ka dil daih tawh alawm. Naktukah khian result a chhuak dawnin ka hria" chutianga a lo inhmakhua lawk zet zet chu a fing ka ti a, ka awt ru hle bawk.

"A ni maw? Eng hna lam nge ni? I pate i hrilh tawh em? Nge an hriatpui vek zawk che?"

"Aih, ka la hriattir lo hrim hrim. A hna chu UDC lampang daih" a rawn tih chuan ṭha ka lo ti leh khawp.

"A va ṭha ve, han tling leh hram la ka ti khawp mai. Kum lost hi tun ang laiah phei chuan a uiawm tawh lutuk"

"Dik chiah, a lo thlawna kum hman ral mai hi a uiawm. Chuan u Nute BA kha i pass em kha?" a rawn tih ve takah chuan

"Pass ta lo, ka second semester laiin pasal ka nei daih alawm" ka lo ti ṭha ve mai.

"Mahse hna hi zawn lo phah chuang miah suh, hna ṭha tak a la hmuh theih lutuk alawm" min vengthawng deuh chuan a rawn ti a, ka lo bu ve nghut.

A nih châk leh a tum dan hrang hrangte chu min sawipui luam a, keipawh ka lo ṭawng ve leh ṭeuh. Zan rei tak tak hmain kan inmangṭha a, ka mut hmain Feli ka be leh zeuh a, sleeping pills eiin ka mu zui ve nghal.

Chapter 13

Zing a lo ni a, ka tho hma leh hle. Sleeping pills ka ei aṭang hian ka mu thei ta vîau a, thawh erawh ka hai ngai lo. Ka hnathawhna dawr lam ka kal dawn chuan Miriam-i chuan min lo ko ding a, chhun lama a chhuah dawn thu leh kan dawra rawn chawlh a tum thute kan inhrilh luam hnuah kan inthlah ve ta chauh. Nilaithawhṭan a ni a, kan buai hle. Customer te chu an lo inluh chhawk reng a, awl lai reng kan nei lo zawk. Chhun chawlh hun lai velah chuan Miriam-i chu a rawn lut hlawl a, min dawr ṭhang bawk nen kan pu ber pawh chuan a lo be nel leh hle. Ni dang ang lo takin amah te chauh chuan a rawn kal a, thil pawh a lei nasa tih a hriat.

"U Nute, khawnge ka lo ṭhut ang? In full reuh sia" a rawn tih chuan table awl chu ka lo zawng ve nghal.

"Eeeee saw, Sir Kima pawh a lo lut chiah" amah zawk chuan a rawn ti leh a, lo lut mek pa chuan kan ṭawng thawm hria ni awm tak hian kan lam chu a rawn hawi bawk.

"Sir, saw a ruak chiah va ṭhu daih ang" tiin Miriam-i chuan a lo be leh sawk sawk a, pakhat zawk lah chuan a zui ve mai bawk.

"Awi kei chu saw nu saw ka thik ê, a bulah te a ṭhu dawn bik a nia" ka beng bulah Dintei chuan a rawn ti a, ka lo nui sek ringawt.

"Thik duh suh, an Sir alawm a nih" a ngaih ṭhatna'n ka lo ti ṭha ve mai.

"Vawiin chu ka pe peih lo mai, nangma'n va pe zawk mai rawh" a mood te chu a off nghal vek reuh a, ka nui chhuak leh ta ringawt.

"Ngai pawimawh duh suh, student leh teacher an nih avangin an innel mai mai alawm" ka tih pawh chuan a nui duh tawh ṭhak lo va, a awm dan vel chuan ka nuih a tiza lehzual sauh a, thil eng eng emaw ka sawipui leh hnu chuan a rawn nui ve leh ta nge nge.

Darkar chanve hnu velah chuan Miriam-i te pawh ei zovin Sir Kima a tih nen chuan an chhuak a, keipawh ka tihtur lamah ka buai leh ta char char. Tlai lamah chuan kan pu ber chuan office pakhata order dah turin min tir a, peih lo ru vîau mah ila Dintei a haw a ngaih thut avangin keimah chuan ka kal ta hna hnâ. Tun lai phei chu khaw hian chhiat thût thut a ching a, khaw dur danah tlai lam chu ruah a sur leh ngei ka ring. Taxi chuan office lam chu ka pan a, hla over tia sawi tur a ni lo bawk nen a hmun pawh kan thleng ta thuai. Office chhunga order ka dah lut tur chu mi pakhat hian min lo ko hlawl mai a, tunge a nih tih hriat tuma a lam ka hawi chuan mak ka ti khawp.

"Enge hetiang laiah te i ti ve a?" college ka kal ve laia kan section-a mi Joel lek chu lo niin, a hmel ka hmuh chuan a lo thau hle tawh tih ka hre thei.

"E hê, lal Joel-a mai mai chu! Hei, order ka rawn dah lawk a nih hi! I dam maw? Inhmuh a va khat deng deng ve le" ka lo ti ve nghal thuai a, ani pawh a rawn nui suk.

"Aw, ka dam ṭha e. Enge i tih tak? Pasal lah kha i nei daih bawk sia, heti lamah in rawn awm dawn em ni?"

"Nia, aw, awm rih dawn a nih hi!" thil nihna tak pawh hrilh lem lo chuan ka ti ve ta zaih.

"Chuan nang, enge i tih chhunzawm zawk?" ka ti leh a, hnathawh eng emaw tal chu a neih tawh ka ring.

"Hetah hian ka thawk ve a, college ka chhuah khan vanneih thlak deuhin hna ka hmu nghal hlauh a, ka la thawk ta char char a nih hi!" ka rin lawk ang ngeiin hna chu a lo nei tawh ngei. Zep lovah chuan ka zak a, ka classmate ni ṭhin te office-a thil ka deliver kual vel mai mai chu ka zak a ni.

"A va ṭha ve, a hrim hrimin i va thau tawh ve, i hmel pawh a puitling ve tawh khawp alawm" Joel-a hi chu kan section mipaah pawh ka kawm tam ber pawl tak kha a ni a, nel pawh kan innel hman viau.

"Haha, chutianga ka lo thau awm pawh ka hre hleinem. Mahse nang chu kha, pasal neih i ngeih vak lo em ni, ka hmu cher riau zawk che" ka ṭhat lai leh ka taksa a mum ṭhat lai hmutute tan chuan cher lo tih theih pawh ka ni lo.

"Nia, pasal neih hi ka ngeih vak lo a ni ang" nui lui vak vak chung chuan ka ti a, ani pawh a rawn nui ve ta sun sûn.

Joel-a chuan order vel chu min dah luh pui a, a ṭawng duhin a fel ngaiin a lo la fel reng mai. Chutia min be rengtu awm na nâ na chu keipawh ka ṭawng hnem ve leh ta khawp. Ka dawr thawhnaa kan pu berin order ka pek zawha ka haw theih tur thu min hrilh tawh avangin haw lam chu ka hmanhmawh lutuk lo va, Rickshaw emaw Taxi emaw lak buai leh vel ai chuan boruak a lum lutuk lo bawk nen kea haw chu ka duh ta zawk. Mahse, ka va tifuh lo chiang kher em. Ruah chu inrinna hman pawh awm lovin a rawn sur phut a, service stand ka kal pelhna a lo hla leh duai tawh bawk si nen huh zawr leh hnâp hlauvin ka hnaih ber Pharmacy dawr hmaah chuan ka ding ta tawp.

Chutia darkar chanve dawn lai ka din hnu chuan ka dinna dawr hma takah hian motor var pakhat hi a lo ding a, motor aṭang chuan Miriam-i te Sir Kima chu hmanhmawh tak hian a rawn chhuak zui ve nghal. Ruah a sur nasa bawk nen hmanhmawh tak chuan min rawn kal pel a, a awm danah min hmu lo hrim hrim tih a lang reng. Keipawh chuan lo biak leh lo mitmei vel chu ka tum hran lo va, dawr nghaktu nena an ṭawng rik danah damdawi a lei dawn a nih hmel. A lei zo rawn chhuak leh chu min rawn su deuh lâwp a, a thil lei pawh a thlauh ta ngei. Ruah chu nasa takin a sur a, chutiang ruah sur kara a hmanhmawh chiam chu ka hrethiam lo hle a ni.

"Sorry" keimah pawh min en lem lo chuan a rawn ti a, a thil lei thlauh tak ho chu a chhar nghal mawlh mawlh.

"A ho lutuk" ka tih chuan a rawn ding chhuak a, a lo chhar fel diam tawh.

"Nang maw!?" ka hmel a hmuh chuan a rawn ti thut a, lu bu nghutin ka lo nuih let ve sak.

"I va hmanhmawh rum rum awm ve?" inbe mang lo hian kan inhmu zûn a, mahse inhmu ngai miah lo awm dun ai chuan kan innel tawh hlein ka hre thung.

"Nia, ka hmanhmawh khawp mai" kal ta mai lo chuan a rawn ti a, a hmanhmawh thu sawi zo chiah mahse a hmanhmawh leh vak lo a ang.

"Lo chuang phei ta che" a rawn ti leh sup a, min la en leh lo hrim hrim.

"Nâaaaaaaa, a ho em mai, tihian ruah hi ka lo nghak rem vek ang" nui lui sak chung chuan ka ti a, mahse ka rilru erawh chuan chuang ve nghal mai turin min lo tur et et thung.

"Chanchin thar i en ngai em?" a lo ti daih a, a thusawi leh kan thusawi lai inzawm loh lutuk avang chuan ka en ta hû.

"Áaaaaaa, aw, en ve ngai e. Engatinge chungte min zawh daih?"

"Chanchin thar chuan vawiin hian ruah a sur tam dawn hle khan a sawi a, i hre ve lo emaw ka ti" deuh kher ṭhin hian a! Pangai tak pawhin min hrilh thei reng alawm.

"A nih chu" tiin ka chhang ta ringawt.

"Hei khua a tlai chakin a thim hma si a, kal nghal mai ka duh, ka rual chuan i lo kal ve dawn ta em?" ka lampang hawi chung hian a rawn ti leh a, chuan ve mai chu ka duh ta zawk a ni.

"Áaaaa, nia, ruah hi a sur tlem duh der bawk si lo va, i phal chuan ka lo chuang haw ve mai ang" a va han âtthlak ve le! Ka chuan a phal avanga min sawm alawm a nih.

"Kal ang" tiin a kal nghal vut a, hmanhmawh takin ka zui ve ta tawp.

"Apa, i va'n rei" motor-a kan chuan luh rual hian naupang aw ni ngei tur hian fiah lutuk lovin a rawn ti a, seat hnung lam ka hawi phei chuan hmeichhe naupang pakhat te fel àt hi a lo ṭhu kiau.

"Nia, apa kha a tlu a" ka bula mi chuan duat aw deuh hian a rawn ti ve sup.

"Apa, a na em?" hmeichhe naupang té mah ni se a ṭawngkam leh a pa a ngaihtuahna chezia vel chuan min tihlim reuh tawp.

"Na lo ve Bawihte, muhil rawh le" apa'n a tih leh chuan kan hnunga mi pawh chu a maimitchhing ve nghal mai a, an inbiak dan vel chu ka lo nuih chhuahpui ta nge nge.

"Enge?" min en miah lo leh motor steering her kual zung zung pah hian ka bula mi chuan a rawn ti sup a, ka nui tawp leh ta riai riai.

"Eng ni lo ve, a lawmawm reuh lutuk a" ka nuih chu la za deuh mahse ka nui lang duh ém ta bik lo.

"Thil min tihsak teh" a rawn ti leh tlawng tawh. A awm dan vel hian ka pasal kum 2 leh tih lai ka lo hrawn tawh mi zia kha min hriatchhuahtir leh a, inanna eng emaw tak chu an nei a ni.

"Eng chu nge tihsak tur chea min duh a?"

"Miriam-i phone number hi min lo pe teh, mahse amah hrilh lo la" a rawn tih chuan a lam chu ka hawi vat a, ani erawh engmah sawi lo ang mai chuan a lo awm daih thung.

"Ih, thil ka zawt che ang a, chuan ka pe ang che" zak lo hi ka va han inti tak, mahse ka thil zawh tum hi ka hre châk êm alawm. Amah nena kan inhriatna hi chu la rei em em lo mahse u Hruaia mi zia nen a inan êm avangin ka ngaina ṭan ni berin ka hria.

"Sawi la"

"Miriam-i khan nupui i la neih loh thu min hrilh tawh a" tim deuh dai chuan ka ti a, ani pui hian a lo haw reuh ang tih a hlauhawm.

"A dik alawm"

"A nih si chuan fanu i nei tho sia, enge a awmzia?" ka ti leh ta tawl mai.

"Ka fanu nu hian a fanu hi a duh lo va, tihian nupui nei lovin ka enkawl tawp" a rawn tih leh chuan mak ka lo ti rilru khawp.

"A va mak ve, chuan in inngaihzawn laiin naute in nei hman tihna a ni maw?"

"Chutiang deuh chu"

"Mimal chungchang ka'n zawt ta vak che a, min hrethiam dawn nia" thil ni lo deuh hlek zawta kan inhriat avangin ka ti hnuhnawh leh ta ringawt.

"A pawi lo, chuan ka thil sawi kha" a rawn ti ve ta kauh mai.

"I student a ni a, kei min dil kher lovin a phone number te chu i nei thei reng alawm" ka tih chuan min rawn en zawk a, a hawi sawn leh thuai.

"Ka zawng buai peih lo" ve leh tlat mai a!

"I awm dan hian ka ngaih a tiṭha lo" a rawn tih zawm leh zat a, kei min sawi kai ta daih chu ka hrethiam lo ang reng hle.

"Enge i sawi awmzia?"

"Tun hnaia ka research neihah hian psychology lam ka khawih tel a, ka research tih vang nge pawh ka hre lo, i hmel hian thup nei ni tlata hriatna ka nei" a tih chuan ka lo meng phawk nasa. Thup chu nei ngei mah ila mi dang han hriattir ngawt kha thil dik ber a ni lo tih ka hria a, ka theihtawpin chhungril lama hlim lohna leh beidawnna rilru ka neih te chu ka lan danah ka thup hram hram zawk ṭhin.

"I ngaihbel mai mai a ni ang, chutiangin ka hlim lo ngai hleinem" ka tih chuan a awih lutuk lo tih ka hre ru reng.

"Ka ngaihbel lampang pawh a ni lo, i sawi duh loh chuan a pawi lo" a rawn ti leh mai a, keipawh ka ṭawng chhunzawm tawh lo ta law law.

Miriam-i te Sir Kima chuan kan in thleng min thlah a, ka chhuah dawn chuan Miriam-i chu a number ka pek thu sawi lo turin min chah nawn leh ve ngei. Sir kima hi upa lutuk chu a la ni lo tih chu a hriat a, a lo berah kum 28 emaw 30 vel bak a nih ka ring lo. In ka thlen chuan tlai lutuk ni lo mahse ruah a sur avangin khua chu a lo thim vek tawh. Ei rawng chu ka bawl nghal mial mial a, Restaurant velah ka lo thawk kher bawk nen ei siam lam chu nuam ka ti ta phian. Chaw ka ei kham chuan Feli chu ka call a, video call ngatin ka inbe nghe nghe. Mahse, ka in chhung chin te bak chu tihlan ka duh ngai lo. Pawn emaw hmun hriat lai deuh tur vel emaw a hmuh palh chuan ka awmna a hre nghal mai ang tih ka hlau a ni.

Kan inbiak zawh chuan sana ka en a, dar 8:30 chauh a lo la ri. Ruah a tla cher cher bawk nen khuma mut mai chu ka tum a, sleeping pills phawrha ei ka tum chiah chu in chung lam aṭangin hmeichhe ṭe vak ri ka hria a, ka hriat sual loh chuan Miriam-i aw ni ngei a ni. Thil thleng eng emaw a awm a nih ringin ka damdawite chu dawhkanah ei ta lo chuan ka dah rih a, thawm chu ka ngaichang ru ta reng. Minute 5 lai thawm awm leh awm loh ka ngaihchan hnu chuan ka in kawngka chu a rawn inhawng phut a, ka phu nasa ngei mai. Chutah kawngka ka lo kalh reng reng lo tih ka hrechhuak nghal zat bawk. Kawnga rawn lut ka hmuh chuan ka thaw ta huai.

"U Nute ka tling" tia nui ver verin Miriam-i chuan ka lam a rawn pan a, eng thu chu nge a sawi tum ka hre mai lo.

"Chumi hmain enge nichina thawm kha? Nangmah lek hi em ni?" ka rilrua hlauthawnna a la awm reng avang chuan lo ti daih.

"Aw, keimah ka nih kha! Ka lawm lutuk a, ka au ta chîam alawm. Engatinge i lo va hlauhthawn hmel ve?" a rawn tih chuan

"I va mawl tak, ka lo hlauhthawn nak a lai a! I ṭe ring bawk si a, tawhsual in tawk emaw ka tih hman tak tak alawm" ka lo ti zawm zat.

"Sorry, chuan min lawmpui dawn miah lo em ni?" a rawn ti leh nghal a, keipawh chu rilru hahdam huai leh pangai tak chuan ka awm ve leh ta mai bawk.

"Lawmpui lawmpui, khatiangin au tawh reng reng suh. Tunah chuan hna i nei tawh bik sia i hlim tawh awm?" nui ver vera ka tih chuan

"Hlim tak ka ni, mahse Lungleiah hian a ni dawn lo" a rawn ti a, min hrilh lawk miah loh avang chuan mak ka lo ti khawp.

"Khawiah nge i thawh dawn? Min hrilh miah si lo va, i pate pawh i hrilh tawh reng reng em ni?"

"Hrilh ve em em tawh e, ka pa phei chuan min chhuang lutuk" intithei deuh chuan a rawn ti a, kan nui dun ta hak hak.

"Khawiah maw i thawh dawn han sawi vat mai teh, i awm loh te chuan kawm tur ṭhian pawh ka nei nang" ka ti leh a, a awm loh chuan kawm mai tur kan vengah ṭhian ka neih loh tak tak ka ring.

"Champhai lamah daih ka thawk ang, lungngai suh ka lo be ziah ang che" nui sen sen hian a rawn ti a, BA pass zawha hna a hmu nghal mai chu nuam a ti hle.

"Mahse" ka tih chuan

"Enge mahse?" a rawn ti ve nghal.

"Nangmah hlim vîau mahla tu emaw ni chu a hlim ka ring lo"

"Enge i sawi awmzia?" an Sir Kima chuan a la be miah lo a ni ngei ang.

"I number hriat ngai loh aṭangin call emaw message emaw i dawn hunah i hrethiam ve mai ang" ka tih chuan a hma ai aiin a rawn hre châk zawk.

"Sawi mai mai teh, tunge ka number i lo pek?" a rawn ti leh pawh chuan ka nuih liam pui ta mai mai.

"Ti daih ila, in Sir Kima khan fanu a lo nei reng a, nupui a nei lo bawk nen mak ka lo tiru khawp" a hriat chhuah hlau deuh chung chuan ka ti ve zaih.

"Nia, fanu chu a nei ngei alawm" engmah chu a la man pha lo hrim hrim tih ka hriat chuan ka nui leh ta hak.

"U Nute sawi vat teh, min tihre châk a nia. Awi, tunge lo call hi, vai bak an ni lo vang" tiin a phone chu a decline hmak reuh a, chutah ka lam lo hawiin

"Sawi tawh rawh le, ka hre châk tawh" a ngaite bawk chuan a rawn ti leh a, mahse phone call bawk chu a rawn luh chhunzawm leh nghal.

"Ka va ning e âw, tunge?" tiin phone chu a pick-up a, kei chuan a phone chu lo pawh thlak sakin loud speaker-ah ka dah zui hmak.

"Hello, Miriam Lalduhawmi a ni em?" lehlama mi chuan a rawn ti a, a aw aṭang chuan an Sir Kima ngei a ni tih ka hria.

"A, aw, ka ni e. Engenita? Tunge âw?" Miriam-i chuan aw nem deuh zawk hian a lo ti pangai ve leh mai bawk.

"HOD" pakhat zawkin a rawn tih chuan Miriam-i chu a meng â vek.

"Ihhhh, Sir enge thil thleng a awm em ni?" a nel viau emaw ka ti a, mahse Miriam-i chu a hlauhthawn hmel hle thung.

"Awm lo ve, naktukah thil min tihpui lawk hman ang em? Ka lo lam ang che" Miriam-i chuan mak tih hmel deuh hian min rawn en a, ka lo nui ringawt.

"Áaaaa, ihhhhh, nia, enge kan tih dawn â?" a la bo ve khawp mai.

"Naktukah i hre mai ang" an inbiak dan vel chuan ka nuih chu a tiza reuh tawp a, chutia ka nui Miriam-in a hmuh chuan a ngaihna a hre lo lehzual.

"Aaaaaa, aw le. Naktuk chu hman ka lo tum dawn nia" tiin an inbiakna chu an titawp a, Miriam-i chuan engmah a la man thiam lo tih ka hria.

"Enge i lo nuih char char a? Kan HOD hi em ni ka number i lo pek? I va'n tizahthlak tak" a rawn ti nghal niah niah.

"Ih maw, ka hrilh tlang tawp ang che. In Sir Kima hian a duh chein ka hria" ka tih chuan

"Ka awih lo, ka awih lo nasa lutuk" a rawn ti nghal chiam.

"A ni alawm, ka pasal nena kan inngaihzawn lai pawh khan hetiang hian ka pasal kha a awm ṭhin. Min hmuh a duh avangin chhuanlam ho tê té a siam a, min duh thu sawite kha a zak ni maiin ka hria" ka tih chuan a lo nur nang a, ka thusawi chu awih a hreh a ni ber.

"Nâaaaaaa, kei chu ka duh lo ê. Chubakah kan HOD a ni a, ka duh lo. Ka zak" a rawn ti leh ta ringawt.

"A hmel hi i duhzawng a ni em? A mi ziate hi i ngainat zawng a ni hrim hrim em?" ka lo tawng tawh bawk nen inlazei fahran chuan ka ti a, Miriam-i lah chuan a duh hmel mai bawk si loh.

"Awi ka hre lo, chutiang zawng pawhin ka lo ngaihtuah ngai lo hrim hrim. Nâ, min duh ka va'n ring lo ber tak, i sawi pawh hi a ni vel tak tak chuang nang" a ti leh nang nâng a, a awm danah chuan tun hmain ngaihzawng a la nei ngai bik lo tih a hriat vek.

"A ni alawm, naktukah i hre mai ang" ka tih pawh chuan a la awih chiah lo.

Zan dar 10 vel bawrha Miriam-i chu a haw chho a, a chhoh hnu chuan inphih faiin sleeping pills chu ka hmawm a, ka mu zui ve ta nghal. Zing kara ka hmuh te chuan a lo lai nghal em em ringawt a, ka hna ka kal dawn pawh khan

"Good luck" ka ti zeuh a, a duh lo ngei mai. Han inngaizawng tak tak reuh se ka ti, inhmeh pawh an inhmeh phian ang.

Chutianga mipa leh hmeichhe inngaizawng tur vel ka hmuh chuan ka nun hlui bawk chuan ka ngaihtuahnate chu an rawn luah leh a, eng âng pawhin tum mah ila ka thei lo a ni. Ngaihtuah chhuah loh ka tum ngíal pawh hian ka rilruah ka pasal hmel, a nui hmel leh duat taka min kuah lai te chu a rawn lang zut zut zel. Tunah erawh ani chu ka tan chuan mi hrang tluk a ni tawh a, hmangaih vîau mah ila ka tan chuan hmangaih phak a ni ngâng lo a ni e.

Ka ni tin tih ṭhin dan ang bawkin kan dawr lam chu ka pan a, ka va thlen chuan kan pu ber pawh a lo la thleng bik lo. Kan ei siamtute'n min hmuh chuan min lo be sawk sawk a, anni ho hi chu thawhpui an nuamin ka chungah hian an fel ve thlâwt a ni. Ka thawh tirh te kha chuan ṭawngthei ṭhin vîau e ti lo chu ho tê tea zah te kha ka ching ang tlat lawi a, mahse ka mizia leh awm dan mila min biak chhawnchhaih thiam êm avangin keipawhin ka nel ta thuai hlawm a ni. Ka thil tihsual ṭhin kan pu ber hrilh loh changte kha an ngah asin, kei lah zei lo chi leh che bawraw chi ka lo ni ve leh kher bawk nen thawhpui kha chu ka nuam hranpa vak lo vang ka ring. Rei vak lo hnuah kan pu ber leh Dintei pawh an rawn thleng ve a, Dintei chuan ka lam lo panin min titipui leh nghal char char.

"U Nute kei chu ka sawi pa kha ka duh leh lo, chu ai chuan a student-ah hmelṭha tawk mai a awm. Awi, a hmelṭhat dan chu pui tak a ni. A sang bawk si, fai bawk si, mahse vawikhat chiah ka la hmu" a ṭawngkam chhuak reng reng hi a nuihzatthlak reuh tawp.

"A'n ti leh daih a! Duh chuan duh rei vîau tur, a tawpah a hlawhtlin thut theih zawk alawm" ka tih chuan

"Nâaaaaa, ani kha chu ka tan a upa mah mah alawm. Tuna mi hi chu kan u deuh chiah rual vel hi a nia, chubakah tuna mi hi ka duh daih zawkin ka hria" a rawn ti leh ang lawi a, Miriam-i Sir Kima chu a besei zui duh tawh vak lo te pawh a ni ang.

Dintei nen hi chuan kan titi tui thei phian zel a, amah a lo ṭawng duh ve tho si a, chu chu kan inkawm nel theihna chhan a ni ve in ka hria. Dar 9 vel aṭang chuan mi chu an rawn lut ṭan a, zirtawp a nih avangin customer chu kan neih tlem ka ring bawk. Mak tak maiin nilai nî leh zirtawp nî hian min dawrtute hi an tlem thei em em a, dawr dang erawh chu an lun thei hle thung. Chutia kan tihtur ṭheuh kan tih mawlh mawlh lai chuan tlangval pahnih hi kan dawrah chuan an lo chuangkai a, an incheina leh chezia vel aṭang chuan drugs addict emaw mi awm ṭha duh lo lam rawng an kai lek lek.

"Nula lo kal teh" pakhat zawk chuan ṭhutthlenga a ṭhut thlak rual hian zahna pakhatmah nei lovin a rawn ti a, customer pangai ang thoa en hram hram ka tum avangin keipawh chu min kohna lamah chuan ka phei ve mai.

"In ei tur neih tui ber min lo pe rawh aw, chuan i chhe lo khawp mai. Kan bulah hian lo ṭhu ve nghe nghe la a ṭha ang" nui chung hian a rawn ti deuh duah a, a ṭawngkam chhuak reng reng chu ka ngainat chi a ni lo. Ngawi reng chuan ka phei leh a, Chow plate hnih chu siam turin ka hrilh ta ringawt bawk.

"Lo ṭhu ve la, keini pahnih chauh chuan kan ei tui thei lo vang" an ei tur dawhkana ka dah thlak rual chuan pakhat zawk chuan a rawn ti a, chhan pawh ka chhang buai peih lo.

"Min thla vat rawh" ka kal sawn mai tur min pawh beh tâk tlat avang chuan ka ti chhuak hriam hraih a, an awm dan vel chu a ṭha ka ti lo.

"Enga!? Hmeichhia tè te si, min vin ve khang lang suh" tih leh min pawh chu a rual a, ka lo inring lo bawk nen dawhkan chu ka bawh ta dâwr.

"I va ṭawp e âw, kan ei tur pawh i tihbuak vek hi" pakhat zawk chuan a rawn ti vin ve ta ṭhak a, anmahni min tihbuai avanga bua a ni tih an la hre lo der hmak zui.

"Min pawt vak a nih kha, chuti ni lo se chuan ka tibaw kher lo vang. Ṭhiante u, min chhuahsan zawk ula a ṭhat ka ring" khauh fak chuan ka ti a, anni erawh chuan min tham loh hmel hle. An hmel chu ka en kar a, buaina siam tum hrim hrima lo kal an nih ngei ka ring bawk.

"Nang hmeichhia ve mai mai hian thu min pe ve khanglang suh, kan duh hûn hunah kan chhuak ang. Kan ei tur chu rang takin va la ṭha leh nghal rawh" an va han zak lo mai mai tak.

"In chhuah duh dawn loh chuan kan dawr neitupa ka hrilh hreh miah lo a nia, ṭha taka ka sawi lai hian min chhuahsan zawk rawh u" hlau ru deuh tho mah ila hlau lo ang tak chuan ka awm lui ve ngar ngar.

"Nang hi i chimawm zek ka ti, kan sawi ang khan thuawih takin va phei hna hnâ mai teh. Nge ni a, kan bula awm hi i duh riau zawk? I chhe lovin i pian te lah chu a dik phian a, zan khat han tawmpui che ila chuan i zal hnâk mai ang" min tham lo leh nuihsawh fê hian pakhat zawk chuan a rawn ti leh a, a ṭhianpa pawh chuan min lo nuih luih ve sak.

"Khatiang khan min sawi reng reng suh, dan a awm tih hre rawh u. Khatiang ṭawngkam tenawm tak taka min biak te kha Sexual Harassment a nih vek avangin Police lamah ka report thei che u tih hre bawk rawh u" ka ti ve ta salh salh a, kan pu ber chu koh mai ka duh rilru tawh a, mahse buaina awm lo ang maia an chhuah chu ka duh tho bawk si avangin ka la hrilh duh rih ta mai lo.

"Hahaha, ṭhiana henu hi vawikhat na nâ na chu ka lo ****** dawn chiang alawm. Lo kal hnai teh, tunah hian i ti nghe nghe teh ang" tia min rawn man beh leh a tum chu ka tawlh sawn vat a, kan pute bulah chuan hmanhmawh takin ka phei zui nghal.

"Ka pu, saw mite pahnih saw lo hnawt chhuak mai teh. Ka dawh ve ṭang ṭang a, mahse an awm dan sawn a zir hlawl lo" kan pu bulah chuan ka ti ta nge nge.

"A va buaithlak e âw, saw tiang ho saw ka dawrah hian lo leng lut turin ka duh hleinem" tiin a tho kang a, keipawh chuan kan pu kal phei chu ka zui phei ve leh nghal bawk.

"Nangni pahnih kha ka dawr hi chhuahsan nghal r'u, ka hnathawk nena in inbiak vel dan hre chiang em em lo mah ila in awm dan khan ka mit a tikham ru tawh lutuk" kan pu ṭawng chhuak chu a khauh hrâk a, chu mite pahnih pawh chuan an zawm ve mai dawn emaw ka ti a, mahse a teuh lo lutuk.

"Ve a che! Putar, kal sawn rang la kan thil order kha min lo pek tir mai mai teh" an la rawn ti ngam nia.

"Enga!? In va han zak lo mai mai ve le, chhuak rawh u" tiin kan dawr neitupa chuan an kawr awmah a ṭham a, anni pawh an rawn ding chhuak ve nghal.

"Putar, min khawih reng reng suh" tiin an rawn nam sawk a, kan pu pawh chu a awm sawn nghal dâwrh.

"Nangni mi awm ṭha duh lo ho" tiin kan pu chuan pakhat zawk chu a rawn hnek a, ka beisei lo deuhin thil chu a kal sual ta tlat.

"Duh tawk rawh u, min lo pui teh û" tiin ka rak nghal chul a, anni ho intibuai chu ṭhelh ka duh ve tho avangin ka va inrawlh zui ve ta ringawt bawk.

"In va zak lo ve, thlah rawh u, min lo pui teh û" ka ti leh chiah chu ka leng lawp a, ka tlu nghal tawp. Tu emaw ni zawk zawk chuan min rawn hnek ni ber hian ka hria. Chutah kan Chef te pathum chu an lo tlan phei a, pawt ṭhenin kan dawra buaina rawn siamtute chu an sawisa zui ta hrep.

"Duh tawk rawh u, Police lam kha lo phone rawh" kan pu chuan thinrim tak hian Dintei chu a hrilh a, Dintei pawh a muangchang lo hle.

Rei lovah Police lam pawh an rawn thleng a, kan dawra buaina siamtute pawh kutkawl an buntir nghal. Engkim hretu leh hmutu ka nih avangin thil awmzia chu min zawt a, a nih dan dik tak leh ṭawngkam mawi lo tak taka min biak dan vel te thlengin ka hrilh tel ta vek. Hetiang mi sual leh awm ṭha duh lo hi chu an sim rawk theihna'n an tihsual man chu dan hian pe zel se ka ti a ni. Kan inngaihdam tam lutuk avangte hian mi sualte hi kan punbelh chhah te hian ka hre ṭhin.

Buaina vel kan chinfel zawh hnu chuan mi dang chuan min rawn buaipui zawm a, zep lovah chuan ka biang chu na tak a ni. Ka ṭawngte thleng chu a tiharsa deuhin ka hria. Kan boruak a dik loh êm avang leh kut ka lo tawrh leh kher avangin kan pu chuan haw turin min ti a, inthlahrunawm vîau mahse a thusawi zawmin ka haw ta tho. In ka thlen chuan ka biang vel chu tui vawtin ka dep a, thi emaw duk emaw awm lo mahse a chhungril chu a na ru em em. Ka insilfai zawh chuan damdawi leh Sleeping pills eiin mut luih chu ka tum ta ringawt.

Chhun lamah hian ka mu ngai lo tluk a ni a, mahse tun atan chuan muthilh chu ka mamawh ber a nih ka ring. A chang chuan Sleeping pills ei ngai khawpa ka pasal ka theihnghilh thei lo chu mak ka ti a, chutianga ka ngaihtuah chang phei chuan Sleeping pills ei vek chung pawha tlaivar ṭhak chu ka la nei tho zel. Mi ṭhenkhat hi chu ka awm dan leh ka muthilh theih loh ṭhin dante hi hrilh ta ila, an awih kher lo vang. Keipawh hian mak ka ti a, hrehawm ka ti ṭhin. Ka lo muhil ve ngei chu a ni ang, ka harh leh chuan tlai dar 4:30 a lo ri dûai tawh. Ka biang chu la na deuh mahse rei lote ka chhing sekna chuan ka taksa chu a tiharh kawk niin ka hria.

Chaw ei khamah chuan Feli'n min lo call a, eng eng emaw sawiin kan inbe rei leh hle. Ani ka biak hnu aṭang phei chuan ka biang na leh min kam ṭung awma ka hriatte chu a bo vekin ka hria. Ani hi chuan min hrechiang a, a bulah hi chuan ṭawng tam loh theih pawh a ni lo. Ngaihthlak ka duh loh thu ka sawi aṭangin ka pasal chanchin chu a them té pawhin min sawipui tawh ngai lo va, Aizawl lama ka haw thuai thuai chu a duh a ni ber. Ni e, ka la haw leh ngei ang a, chutah erawh chuan mi mai mai leh hna nei lova awm mai mai ka ni tawh bik kher lo vang.

"U Nute, i awm em? Ka lo lut" tih pahin Miriam-i chu a rawn lut a, a hmel aṭang chuan sawi tur a ngah vîau ka ring.

"Hetah lo ṭhu teh, vawiin lam chanchin ka hre châk tawh a nia" ka lo ti ve hluai.

"Awi, sawi pawh ka zak deuh. Thil hmuam i nei em ni?" leh ta thut thut ṭhin hian a!

"Nei nang, engatinge?"

"Chuti chu i biang kha a vung a va ang ve, engtinnge i tih?" tiin ka biang ngawt chu a rawn en daih a, kan mi sual awm ṭha duh lo pahnihte khan min khawih nat reuh êm avang chuan ka biang chu a lan vun deuh tak tak ka ring bawk.

"Nia, vawiin lamah dawrah buaina a chhuak a" tiin thil thlen dan chu ka hrilh a, ka sawi laite chuan a lo thinrim ve khawp.

"Chuan min hrilh tawh rawh, ka hre châk tawh teh a nia" ka tih zawm nghal zat a, ani erawh chuan a lo sawi peih loh hmel hle.

"Sawi chhuah leh vel kher hi ka zak deuh, mahse ka sawi chhuah loh chuan ka thawl dawn bawk si lo"

"Sawi tawp rawh"

"Awi, a mak hi ka ti tawp a ni mai. I sawi lawk ang chiah khan min lo duh a" a rawn tih chuan ka phur zual sauh.

"Chuan engtinge i chhan?"

"Nâ, ka chhang nghal duh teuh lo. Kan Sir a ni bawk si, ka zah ru deuh tlat"

"I ho lutuk, nangma'n i duh ve leh ve lohah a innghat zawk alawm. Aizawla ka ṭhiannu pawh kan Sir a ngaizawng tlat a, a tawpa tawpah chuan kan Sir pawh chuan a duh ve daih asin"

"Chutiangte nen kan inang hleinem, kei chuan ka duh em tih pawh ka la hre lo a nia"

"Mahse i duh loh bik loh tawp kha" a awm danah hian a duh ve thei mai dawnin ka hria.

"I lerh" a rawn ti ta ringawt.

"Awi, nang pawh hian i duh ve chiang a ni" ka tih chuan min melh hrawk a, ka lo nui ver ver chuan a tinui leh ta nge nge.

"Ka duh lo, mahse amah hi"

"Enge amah chu?"

Ãaaaaaa ka hrethiam lo, ka rilru a insual nasa. Ani chuan fanu a nei tawh a, pathlawi a ni tihna a nih chu!"

"Chutiang mai mai a ho lutuk" ka tih chuan

"Enge i hriat a, min duh tir phet i tum le" a rawn ti ta chiam.

"Engmah ka hre lo, nangni pahnih hi ka inngaihzawn tir dawn che u" a vawikhatna atan anni pahnih hi ka sawi ni dawn, chu chu a ni tawp mai.

"I ti awm ang lo em mai a, kan inang lo bawk si" a rawn ti leh hram.

"Han sawi chiang phawt teh, engtin chiah nge a duh thu chu a hrilh che a?" ka hre chak reuh lutuk.

"Awi, ka zak thâwt a ni. Ka lehkhabu remfel laiin ka hnung lam aṭangin min rawn kuah thut a, ka phu zawk alawm. A tirah chuan a ṭawng chhuak mai lo va, keipawh chel lovin ka ngawi ta reng. Chutah a lam hawiin min kuai her a, i lo sawi lawk tawh kher nen a hmel chu ka en ngam lo hrim hrim"

"Chuan engtin zel?"

"Min kuai dak a, min fawp ringawt a nih chu! Ka hmui la virgin ngei chu kan pathlawia chuan a rawn tichhe hmiah maw le, ka khawng vekin ka hria. Min fawh zawh chuan ka beng bulah min duh thu a rawn sawi zauh a, naktuk zan lama a lo len tur thute chu min la hrih zui leh ta nghal a" a thil tawn vel chu ngaihtuah let ni awm tak hian a ner sawng sawng a, la duh chiah lo mahse an awm dan chu hrehawm a ti em bik lovin ka hria.

"A nuam i ti em?" ka lo ti leh hram pek a!

"I va'n ho tak, i tawn vek tawh kha"

"Kei chu nuam ka ti thei lutuk, ka pasal nen kan inngaihzawn laite phei kha chuan ka ṭek chhuai chhauiin ka hria" nui hek hek chung chuan ka ti a, Miriam-i pawh ka thil sawi ho lutuk avang chuan a rawn nui ve leh chîam bawk.

"Mak ka ti lutuk kha engtinnge ka awm pawh ka hre lo. A nih leh u Nute, engvanga i pasal nena inṭhen nge in nih? I sawi ṭha duh ngai si lo va, chutah i rai lai leh nghalin" a rawn tih chuan ka lo ṭawng thui deuh tih chu ka inhre chhuak nghal.

"Nia, eng lo a nia" ka tih lai chuan

"I hmangaih hmel bawk si a, in inṭhen chhan hi ka hre châk mai mai maw le" a rawn ti leh a, a inthlahrung ta deuh a ni ngei ang.

"Ka pasal kha ka thinlung zawng zawng hian ka hmangaih a, mahse kan hma huna thil lo thleng turte hi kan hre lawk thei hauh si lo. Ka pasal chuan kei aia hmangaih hmeichhia a nei a, chu chu kan inṭhen chhan a ni deuh ber" ka ṭawng chu a ring tawh lo hle.

"Chutiang vel chu alawm ka peih loh, Sir Kima nen pawh hian lo inngaizawng ta pawh ni ila kan inṭhen leh thuai ang tih ka hlau alawm" a rawn ti ve leh nang nâng.

"Mipa zawng zawng an inang vek kher hleinem, ani hi chu i tan a ṭhat ka ring tlat" zirtirtu leh a zirlai ni ṭhin an ni a, an inenkawl thiam fû ka ring a ni.

"Ani chuan min duh ngei a, kei hian ka duh ve thei dawn em pawh ka hre lo a ni. Ngaihtuahna pawh ka hmang thiam lo"

"A nih, amah hi enge i hmuh dan?"

"Engtia hmuh danin maw?"

"Hei, a mi zia leh a hmel vel hi maw le" tleirawl ṭha leh ang maiin ka awm a ni ber.

"Sir Kima hi chu a fel a, a subject-ah erawh strict tak a ni. Kan thiam loh te hian min hrem ngai lo va, ni dangah a ni mai a ti zel a, thiam tur min pek reng reng te hi thiam loh chu a zahthlak letling zawk. A hmel hrim hrim hi chu chhia pawh ka ti hran lo, amah ka la zah rukna tak hian thuthlukna min siamtir thei lo niin ka hria" a rawn ti ve duah a, a sawi chu a dik ngei ka ring bawk.

"A nih leh Champhai lama hna i thawh tur thu kha i hrilh em?"

"Hrilh miah loh ka tum a, eng eng emaw min zawh tâkah chuan sawi lan loh chu a theih tawh lo alawm"

"Champhaiah hna i thawk daih dawn tih a hriat chuan a buai awm? Engtinnge a lo tih a?"

"Min ngaih tur thu a sawi ringawt, inngaihzawn pawh kan la inngaizawng tawp si lo va" tiin a rawn nui chhuak pah hak.

"Aw enge, a ngai dawn che a ni ve mai alawm. Luck si, hmelṭha bawk si, chutah hna i la nei leh zel zui. Mipa tan hi chuan i itawm ve alawm"

"Awi awi awi, min bawl vel khanglang lo mai teh" a lai hmel vel chu hmuh a nuam phian.

"Naktukah khan lo che ṭha vîau la a ni mai, a thingpui turte kha siam tui deuh bik kher la" ka tih chuan

"Sawi lo teh, ka huphurh teh mai a nia. Ani phei chu a thusawiah a ding nghet thei si, a rawn len tak tak a nia ka rin" a rawn ti ve nghal.

"Engah nge a rawn len loh i la rin? Amah berin a sawi tawh te chuan a lo leng turah ring tawp rawh. Chuan mawi tak khan lo inchei bawk la, engkim chu a kal dik vek a ni mai" nui sen sen chuan ka ti a, chutah ani chuan

"I ninawm ê, khi dar 11 lai a ri tawh, ka chho dawn" tiin a tho tharh a, a chho zui nghal ta daih. Miriam-i ber a chhoh takah chuan keipawh chu mut hmaa ka tihtur te tiin rizai chu ka la a, ka inhthawlh ve nghal.

"Anu, i lo kal maw?" dawra ka hnathawk haw ka in luah ka luh rual chuan fapa Mapuia hian a lo ti a, mak ka tih dan chu pui tak a ni.

"Mapui, awi ka fapa, i la dam maw? Aw Lalpa, Mapui lo kal teh" tia pawt hnaiin ka kuah vat a, ka hamhaih tak zet bawk.

"Anu, ka lo nghak reng che alawm" Mapuia chu naupang pangai tak tak ang hi a ni tawh a, a ṭhang ṭha hle.

"Lalpa ka va lawm tak em, Mapui i thih hi ka la ring lo reng a ni. Ka fapa i hmelṭhain i ṭhang ṭha hle mai. Chuan i pa a ang lutuk, i pa chiah chiah i ni. Ka fapa min kalsan tawh suh aw, i tel lova awm chu a hrehawm êm mai" ka hlim lutuk leh lawm lutuk chu ka mittui ka dang seng ta lo.

"Ka fapa, i lo dam ṭha em? Ka ngai ṭhin lutuk che asin, tunah chuan i lo let leh tawh bawk a, ka hlim tawh lutuk, dam taka ka bula i rawn inlan leh avang hian ka hlim lutuk, chuan min kalsan tawh lûl suh" tiin kuah ṭha leh a, ka ṭap ta zawih zawih.

Chutia ka ṭah lai chuan vawk hi ring takin a lo ṭe a, ka mit ka men chuan ka fapa reng reng hmuh tur a lo awm tawh lo. Chutah ka fapa la dam emaw ka tihna chu ka mumang mai mai a ni tih ka hre chhuak a, vawk ṭe ring lutuk chuan ka mumang aṭang min hruai chhuak zawk hi a lo ni. Inrinni zing a nih avangin vawk chu an talh dawn a ni ngei ang, ka muthilh leh theih tawh pawh ka rin loh avang chuan ka tho chhuak ta ringawt.

Ka thawh hma êm avangin bazar chu a ṭhain ka hria a, zing dangah chuan dar 7 vel aṭangte hian ka bazar tlangpui ṭhin. Tun ṭum erawh dar 6 vel aṭang ka chhuak a, kal hma na nâ na chuan chawhmeh lei tur pawh a lo la thianghlim daih zawkin ka hria. Chutia ka bazar lai chuan ka rilruah chuan thil a rawn lut a, ka nun hlui leh bawk a ni. Buaina awm miah lovin ka pasal nen khan la innei ni ila chuan kan bazar dun leh ngei awm si a, ani kha ka kiangah awm ve thei se chuan ka chawhmeh leite chu min ahsak leh ang a, ka nau ang mai khan min zui leh hna hnâ ngei ang.

Ka haw lampangah phei chuan kawngah ka kal satliah ve mai mai hi a ni ringawt. Ka nu leh pate, Felite, ka pasal leh a chhungte chu ka ngai thar em em a, chu zing ber kher chuan engtin emaw ni tak hian anniho chu min ngaihtir a ni. Ngaih mai loh chu tih theih ka nei rih lo va, mahse Pathian hian ka hma lam huna ka awm dan turte chu a rel fel sa thlap ka ring thung.

Chapter 14

Thawhṭanni a ni a, khua a chhe deuh bawk nen ni hneawm tak chu a va ni chiang em. Khua a chhiat tawh hi chuan ka eng tih mah hi a tui vak ngai tawh lo ṭhin.Tin, chhun lam chu kan buai pangai leh hlê bawk. Vanneih thlak takin kan pu ber chuan a dawra hnathawkte chu kan hlawh min san ṭheuh a, ka tan pawh inkhawl hnem chu a awlsam leh phah sawt. Mahnia ka awm tak aṭang hian pawisa ren nachang leh pawisa khawl nachang ka hria a, hah taka pawisa thawhchhuah lo hlutzia te pawh ka hriat phah bawk.

Aizawl lama ka awm lai kha chuan ka nu leh pate thla zar hnuaia awmin pawisa te kha ka hmang mai mai ṭhin a, ka ngaihtuah let chang hi chuan ka lo awm ho ṭhin ngawt mai ka ti. Ka pa khan min chawm hneh vîau mahse keini khan tihtur kan neih loh phah chuang miah loh tih te chu ka hre thar âwn awn a, ka nun dan inthlak nasa lutuk chuan zirlai thar min pe zawk ni tein ka hre ṭhin.

Ruah chu sur tawh êm lo mahse boruak chu a la vawt sûk a, khaw awm dan a zira kawrlum ka lo keng lawk hlauh chu a fuh tak tak. Tlai dang ang lo takin ka hnathawk bang chu Bazar lamah ka kal a, a chhan pawh chaw ei chhuah ka duh vang a ni. Ni e, mahni tlawnga chaw ei te, chawhmeh ngai ringawt rin te chu ka kham ve ta deuh pawh a ni ang. Zanriah ei tur ang tak taka chhuak ka nih avangin kal lam chuan ka hmanhmawh em em lo va, ka thil ei duhna ber dawr awmna hmun ka thlen chuan dar 5:30 vel chiah chiah a ni a, zanriah ei vel hun atan pawh a tawk vang vang hle.

"Ka pi, enge i ei duh ang? I lo kal fuh hle mai, vawiin chu kan dawra thil ei man hi kan discount nual a" wiatress chuan hmel hlim sâng hian min rawn bia a.

"A lo ni mâw, a va lawmawm ve le" tiin menu-a ka ei duh zawng te chu ka lo hrilh a, chu waitress chu biak a nuamin in leng lo chhawnchhaih dan a thiam reuh zek.

Ka thil order ka chan chhunga phone ka lo khawih mial mial lai chuan phone call hi a rawn lut a, a caller ID ah chuan Miriam-i a lo inti kiau. Ka nau-i chuan sawi tur a ngah leh dawn tih ka hriat avang chuan ka nui sak a, call rawn lut ka lo pick-up rual chuan

"U Nute, i lo la haw lo em ni? I in hi a la thim vek bawk si a, enge a awmzia?" a rawn ti a, min ngaihtuah em em ṭhintu tih takah ka la haw lo chu a lo mangang ve hle a ni ngei ang.

"Aw, vawiin tlai chu ei tur tuina deuh leh changkang ve deuh an sawin ṭhin Bazar-a Restaurant-ah khan zanriah ei chhuah ka châk thut a, chuvang alawm ka lo la haw loh mai mai"

"A nih chu, zanin chu kan inah lo chho ve tawh la ka tih tih nen, keimah chauha lo hmachhawn vel kha ka peih vak lo va" a rawn tih nang nang chuan thil hriat chhuah zawk ka nei nghal.

Miriam leh an Sir Kima chu thleng se tia ka lo duh rilruk ang ngei chuan inngaizawng ang chiahin an awm tawh a, Miriam-i chuan an ina leng chho tura min tih chang tam mahse ka la leng chho lo hrim hrim. Chubakah mi inngaizawng kara lo awm ve kur kha chu a dik lo alawm. Miriam-i chuan a bula a awma a zam theihzia leh a en ṭhat ngam lohzia te chu min hrilh ṭhin a, Kima anga a duh ve a nih thu ka hrilh te chuan a la pawm ngam mai bik lo. A chhan pakhat chu tihsual a hlauh vang a ni a, a dang leh chu amah leh amah a la inhriatthiam loh vang niin a sawi.

"I ti ho em mai a, ka duh teuh lo. Tikhan nuam takin hun hmang dun hnem ula, nang pawhin ka sawi ang khan i duh ve tih i inhre mai ang" ka tih chuan

"Ka hre lo le" a rawn ti sep a, thil tam tak pawh sawi lem lovin kan inbiakna chu kan titawp zui ta bawk.

"Ka pi, hei i thil order a lo thleng chiah aw? Tui deuhin i ei dawn nia" ka waitress fel tih deuh chuan a rawn ti a, dawr a changkan mai bakah an mi chhawrte pawh an fel hle.

"Aw le" tiin ka thil ei châk em em chu ka ei a, ka awmna hmun lam ngaihtuah tawh lovin ka ei ta bawrh bawrh.

Chhun lam aṭanga lo inkhek rilṭam ka ni bawk a, ka thil ei chu a sain a tui ngawih ngawih. Mi ṭhenkhat hausak hmel deuh deuh thil ei chu an awm ve pheuh pheuh a, ka bul hnai taka awm erawh an awm lo. Ka ei tur ka ei zawh te chuan ka tum loh lutukin ka irh pawng a, ka puar thawkhat ve bawk a ni. An thil siam tui ka ti lutuk chu ka chhuah dawn thlengin an siam dan awm ang tur ka ngaihtuah a, han zawh ngawt lah chu a zahthlak ka ti ve tho bawk si. Ka thil hriat châk pawh zawt ta lo chuan ka kal chhuak a, pawn boruak chu a lo vawt ruih nghal.

Ka phone hmet engin dar zat ka en a, dar 6:30 a lo ri fel der tawh. Khua lah chu zan nimahse a eng deuh khup a, kawngsir vela thil zuar leh chhuak neuh neuh pawh an kat nuk. Taxi lak chu ka tum ûk a, ka la leh ta lo zawk. Boruak awm dan vel chuan ka lung a tileng a, ke ngeia haw chu a nawm ka ring a ni. Khua chu a vawt deuh sûk e ti lo chuan thlate chu a lang leh ang lawi a, chungte phei phei chuan ka lung an tileng. Ka ngaihtuahna nen inkawm melh melh paha ka kal tak rengah chuan kan veng thlen hma kawng kual chu ka thleng a, kal chak ka la inti em em zui. Ka kal phei zel hnu chuan kawngsir thim lai deuhah hian mipa pahnih an lo awm tih chu ka hmu a, ka hmuh tirh chuan ka phu zawk nghe nghe.

"Hei nula, thlah te i ngai em?" an zawn ka thlen chuan an lo ti a, chhan pawh ka tum lo.

"I va hmanhmawh awm ve le, min lo nghak teh" tiin ka banah hian pakhat zawk chuan a rawn vuan ringawt a, thinthlak mai ka tum chu min lo chelh nghet phian avangin ka thei hauh lo.

"Hei, i va zak lo ve, min thlah nghal rawh" min thlah duh mai loh avang chuan ka ti leh a, a la rawn nui huah huah zui.

"Tal chhuah tum buai lo la, thil a harsa lo zawk ang" a bula ding amah aia sang zawk chuan a rawn ti a, ka chunga an chet dan leh an awm dan vel chu ka ngai theih zawng a ni ta hauh lo.

"Enge ka chungah tih in tum? Hetianga hmeichhiate duh lo chung khawih hi danin a hrem thei tih in hre na nge?" ka ti ve ta hrawk.

"Aw haw! Ngawi teh, nang nu tè hi hmâna police min man tirtu kha i ni chiang mai. I la hria em ṭhiana?" a rawn tih chuan an hmel chu ka en chiang a, kan hriat hnu an nih leh nih loh pawh ke hre chuang lo.

"I sawi tâkah chuan kha nu ngei kha a niin ka hria, tun thleng hian kha nu ka huatna kha a la reh theih lo" a bula mi'n a rawn tih chuan ka hlauthawng ru ta hle.

"Min hai a ni lo maw?" an hmel ka lo chhinchhiah kilh kelh tawh bawk si lo va, ka hre lo tak tak a ni.

"Hai lo chiang lutuk, chuan ka sawi kha i la hre reng em?" ka kuta chelh tlattu chuan nui sâwng chung hian a rawn ti a, enge hriat reng tur awm pawh ka hriat miau loh avang chuan

"Eng maw?" ka lo ti ta hû.

"Ka la ****** khawp ang che ka tih kha maw le, tun ang baka hun ṭha hi a awm leh tawh lo vang" tiin a lamah chuan min pawt phei dâwr a, a thusawi chuan tute nge an nih min hriat chhuah tir nghal.

"In va zak lo zawk ve a, ka report thei che u tih hre rawh u" ka hlauh rukna te dah ṭhain leh ka huaisennate chu sawm khawm chuan ka ti phiar a, min khawihin min tibuai lo se tih chu ka duh ber a ni.

"Nanga report ek e bal e kha kan hlau lo, min lo report ta pawh ni la engtinnge min man ngei tih i hriat theih ang?" chapo tak hian pakhat zawk chuan a rawn ti a, dan an hlau lo lutuk chu mak ka ti zawk hîal.

"Report ta che u ila maw? Haha, jail bang in zut ang a, in inchhir kumkhua tawh bawk ang" ka ti ve ta salh salh a, dan chuan an sual miau chuan chutianga hrem theih dan a nei tlat a tin ni!

"I mawl ka ti dawn nge i â ka ti dawn zawk pawh ka hre lo, keini hi chuan jail kan tang rei ngai hleinem nula" nui hak hak chung chuan a lo ti leh a, eng thu nge a sawi tum pawh chu ka man pha lo hle.

"Enga!? Chutiangin a theih ringawt loh, thil in tihsual chuan danin dik takin a hrem tur che u hi a ni hrim hrim" ka tih chuan min rawn beng sawk a, ka hmai chu a thip nghal vawng vawng.

"Ngaithla rawh, kan theia kan tang rei ngai lo chu a nih hì. Lungleia mi hausa leh thil tithei ber berte hi kan pate alawm an nih, chuvang chuan thu lawi lo leh invau zamna ṭawngkam kha chhak chhuak reng reng suh" a rawn ti ram hmak a, a thusawite chu mak ka lo ti khawp.

"Hetianga min tih man hi in la hmu khawp ang, eng âng pawhin chhungkaw hausa ni mah ula ka ngawi mai mai bik hauh lo vang" ka tih rual chuan a sang zawk chuan min rawn hnek chawrh a, ka tlu nghal tawp.

"Zawng hmelchhenu, nang hian min cho ngam vela maw? Zanin hian keini min hmu ngam lo khawpin kan siam dawn che tih hre rawh" ti hrâwkin min kai tho lâwp a, an kutthlak na tak tak han tawrh chu ka dawl lo hle.

Min pawh tho lai chuan ka harh chhuak thut a, an awm dan leh min khawih dan vel chuan hlauhna chi tinreng min rawn pe nghal. Hlau satliah mai ni lovin ka thate chu a khur hial a, hlau lo ang taka ṭawng chi reng a ni tawh lo bawk.

"Ti rawh lé, nuam i chen ang hmiang" tiin kan thlang lamah chuan min kai a, ka lo tal ve nasa hle bawk.

"Min thlah nghal rawh u, ka duh lo. Khawngaihin min tina suh u" tia ka au chhuah lai chuan pakhat zawk chuan

"Ṭe vak vak suh, thil i tiharsa mai mai" tiin ka hmui chu a rawn hup bet a, puan chuan ka hmui chu a rawn tuam zui nghal.

Ka hmuia puan an tuam ngheh em avang chuan ka au chhuak ring thei lo va, ka rilru chu hlauhthawnna hlirin a luahkhat tawh. Ka tal vak vak chung pawh chuan an thil tih lai chu an ṭhulh chuang hauh lo. Min pu lawp a, thlanmual lamah chuan min kalpui zui bawk. Pakhat zawk chuan ka bag khaiin kan hnung lamah min lo zui a, min pawngsual loh reng ka ring tawh lo. Puitu ka mamawh a, chhantu ka mamawh a, mahse ka bul hnaiah an awm si lo. Ka tih ngaihna hre lo leh hlauthawng rilru beidawng tawh lutuk chu ka rilruin ka ṭawngṭai mawlh mawlh a, Pathian chauh lo chuan min puih theih ka beisei tawh lo.

"I châk dawn lo" ti hrâwkin min putu chuan leiah chuan min paih thla hnawk a, thlan lung pakhatah chuan ka insawh chawrh bawk. Ka hmui an tuam tlat avanga ṭawng chhuak thei lo ka nih avang chuan an hmaa kut suih meuhin ka rum vak vak a, ka lam an rawn pan chuan ka lo hlau leh hlê si.

"Kan duh anga kan chet hmain i ṭawng kan phalsak ang che, mahse i ṭawng ring tur a ni lo. I hrethiam em?" zawi leh hlauhawm tak hian min putupa chuan a rawn ti a, kei chu ka lo bu vat vat. Hrethiam lo tih ngamna chi reng a ni tawh lo.

"Le! Chhe lo tè, i sawi duh chu sawi rawh le!" tiin ka hmui an tuamna chu a rawn phelh a, ka mittui hial a tla ta.

"Khawngaihin, khawngaih takin hetiang hian ka chungah che suh u. Pawisa in duh chuan ka bag-a mi pawh kha in la vek thei ang, khawngaihin min chhuah hram rawh u" ka hlauhthawn lutuk avang chuan ṭawng pawh ka ṭawng ṭha hlei thei tawh lo.

"Ni lo ve, pawisa kan duh reng reng lo. Kan duh zawk chu phuba a ni" hriam hraih chuan a rawn ti a, ka bei a dawng tawh tak zet a ni.

"Ka tihpalh a ni. Khawngaih takin min ngaidam rawh u" ka tih pawh chuan

"A hun lai khan min tibuai lo ni la, police te kha min man tir vel kher lo la ni tur" a hnunga ding reng pa chuan a rawn ti ve khâuh a, chet thuta tlan chhuah mai chu ka duh rum rûm tawh.

"Ka chungah hian zah ngai hram teh u, in duh apiang ka ti mai ang" ka ti leh ṭâwk ṭawk a, anni chuan min nuihsawh vel mai mai thung.

"Kan duh ang chu i ti dawn alawm, nang phei chu chet hah ve vak pawh i ngai lo vang. Ṭhiana, i che ang hmiang?" tiin ka lam chu an rawn hnaih a, vawikhat ka ṭe chhuak hman âwr tihah chuan ka hmui chu an rawn tuam zui nghal.

Hmeichhia ka nih chu thu hran, mipa puitling pahnihin min khawih rawn kher chu ka lo do zo bik ngâng lo a ni e. Pakhatin ka kut a lo man bet a, pakhat zawk erawh chuan a kekawr a phelh mial mial thung. Ka hlau leh khur nasa lutuk chu ka tal chîam a, ka kete chu ka leng vak vak bawk. Vawilehkhatah ka tal chhuak thut a, theih tawpa nain ka bula mipa pahnih chu ka tlawh bawk. Anni pawh kan awmna hmun a rual rem lo ve bawk nen an tlu kawi nak a, chutah kei chu a chak thei ang berin ka tlan nghal vat.

Hlauthawng tak chuan pan lam bik pawh nei chuang lovin ka tlan chhuak a, kan in lama ka tlan a nih vaih chuan min man leh nghal dawn nia ka hriat avangin kawng hnuai thim lamah chuan ka tlan thla ta tawp. Ka tlanna chu link road a nih tawh avangin a reh em em a, chungte hlei hlei chuan ka hlauhna a tizual. A nihna takah chuan ka hlau lutuk chu ka ṭap chhuak hlei thei lo zawk a ni.

Chutia kawnga ka tlan lai chuan ka hma lama in eng chu ka hmu a, chutianga in eng mai mai pawh chuan min thlamuan tawh lutuk tlat. Kawng thim chin ka pel fel dawn chiah ti ah chuan ka kat dâwr a, ka samah chuan tu emaw ni hian min rawn kek a, ka hmui pawh an tuam zui nghal. An hmel pawh ka en chian hmain ka hmaiah tak chuan min rawn hnek sawk sawk a, tute nge an nih ka hre chiang ta hle.

Pakhat zawk chuan min pu phei nal nal a, tal tumna pawh ka nei tawh lo. Ka taksa chu a na em em hlawm a, a bik takin ka hmai chu a na hle a ni. Thinkung bul kan thleng a, a bulah chuan vantlang zunin ang tak hi a lo awm bawk. Thing bulah chuan min theh thla hnawk a, ka ban ruh te chu a tliak ni maiin hria. Ka meng dîar diar a, a thim vek bawk nen an chet dan vel chu ka hmu ṭha thei lo. Chutah ka lo hlauhthawn ruk ang ngei chuan an rawn che chhuak ta.

Âwwwwww Lalpa, hetiang mihring kan ram ngeia an lo piang ve hi a va mak ngai em. Hriat loh der ka duh a, ka thei si lo. Ka rilru chuan engkim a hre vek a, an thil tih mek rapthlakzia thlengin ka hre vek. Ka kawr te chu an pawt ṭet hmiah hmiah a, ka chau lutuk leh ka taksa na lutuk avang chuan an tih ang angin ka awm tawp. Ka ngaihtuahnaah chuan u Hruaia a rawn lang a, ani chu awm se zawng min chhan ngei awm si a, mahse ka bul hnaiah erawh tûmah min puitu tur an awm bawk si lo. Ka hmai chu tu emaw ni zâwk zawk chuan a rawn hnek chawrh chawrh a, na vawi thum vel ka hriat hnu chuan êngmah ka hre zawm tawh lo.

Miriam-i POV

Zan dang ang lo takin u Nutei chu a lo haw har em em a, ka ngaihtuah ru viau. Zan dangah chuan a chhhuak ngai mang lo va, a chhuah pawhin amah mai chuan a chhuak ngai lo tluk a ni. A mak lutuk, muthilh ngial ka tum pawhin ka muhil thei lo. Kan in hnuai lama thawm a awm leh awm loh chu ka ngaichang ru reng a, dar 1 thleng pawh chuan u Nutei chu a la rawn haw lo. A ṭhiante inah a riak a ni ang ti dawn ila chuti taka ṭhian a kawm ngeih âwm ka hre si lo. Ka call lahin a tlang thei bawk si lo nen ka rilru chu a hah tawh lutuk tlat. Ka chhungte hrilh ka tum vîau na a, an muthilh bawrh bawrh tawh avangin kaih thawh leh chu ka inthlahrung leh deuh si.

Zing dar 5 thleng chuan ka meng tlang a, u Nutei hmel hmuh tur leh a thawm hriat tur reng a la awm lo cheu. Ka mangang lutuk chu Sir Kima ka call ta tawp a, a la pick-up mai lo zui. Ka vawi thum call naah chuan a rawn la ve ta hram a, a aw aṭang chuan a tho phang hle tih a hriat theih bawk.

"Enge?" a rawn ti ṭial ruai a, kei chuan hmanhmawh tak hian

"Sir, lo kal vat teh" ka ti ve nghal ṭuau a, u Nutei chungah thil ṭha lo a thleng ang tih chu ka hlau tawh tak zet a ni.

"Engtinnge i awm?" ka aw aṭanga chuan dik lo a awm tih hriain a rawn ti ve nghal thuai bawk.

"Lo kal vat rawh" ka tih leh chuan phone a off zui hmak.

Kan inbiak zawh chuan kan unau zinga upa ber u Rohlua chu hmanhmawh takin ka kai tho a, min hmuh chuan mak a ti hle. Ka kaih thawh chhan min zawh chuan u Nutei lo haw loh chungchang leh ka mut miah lo thute chu ka hrilh zung zung a, ani pawh ka thusawi a hriat hnu chuan a thutak ta viau. Rei lovah kan in kawta motor rawn ding thawm a awm a, Sir Kima a nih ngei ka ring. Kawngka hawngin kan unau chuan kan chhuak a, Sir Kima chuan min lo ngaihven hmel hle. Zing kar kara ka call chhan min zawh chuan thil awm dan vel chu ka sawi a, a motor-ah lutin u Nutei zawng tur chuan kan tlan chhuak zui nghal.

U Nutei han zawn mai chu a buaithlak tak zet. A chhan chu Lunglei hi a zau ve a, veng pakhata zawn chhung pawh a rei dawn lutuk. Dar 6 bawr velah pawh chuan kan la hmu lo va, mahse thil hriat chhuah ka nei ta zawk! Sir Kima chu Bazar lam kawngah ka tlan tir vat a, Bazar kan thlen chuan u Nutei sawi Restaurant chu kan pan ding nghal. Dawr neitu leh hnathawktute chu u Nutei an lo hmuh leh hmuh loh kan zawh chuan an zinga pakhat chuan a hmuh thu a lo sawi a, kea a haw thu thlengin min hirlh bawk. Chutah lawmthute sawiin kan chhuak leh vat a, motor-a kan chuan lai chuan ka phone chuan u Nutei chu ka call char char bawk.

Mak lutuk tak maiin u Nutei phone chu a tlang hlauh a, Sir Kima chuan phone kaltlangin mi tu emaw ni a chhui tir nghal a, rei lote hnuah location pawh kan hre thei ta. Kan tlan zel a, location aṭanga a lan danin u Nutei phone awmna chu thlanmual lam a ni tlat mai. Hmanhmawh takin thlanmual lam chu kan pan a, thlan lung pakhat bula bag ka hmuh chuan ka chi ai vek. Bag leh phone chu a la ṭha vek a, mahse khawnge amah ber chu a awm tak ang tih chu ka buaina a ni. Kan thlang lama link road-ah chuan zawngin kan chhuk a, a awmna tur awm ang reng kan hre lo.

"Lalpa le!" tiin Sir Kima chu kawng chhak lama vantlang zunin bulah chuan a tlan chho thut a, hmanhmawh takin kan um phei ve nghal. A bul kan va thlen chuan

"A mar a la awm" hlauhthawnnaa khat aw hian Sir chuan a rawn ti a, a bula saruak veka lo mu ka hmuh chuan ka ṭe chhuak vak.

"U Nute" tia kal hnaih ka tum chu

"Chi aina hun a awm lo, tikhan lo ding tawp rawh" min dang bet chungin Sir chuan a rawn ti a, u Nutei awm dan avang chuan ka ṭap chhuak hawk bawk.

Sir chuan a kekawr leh kawr a phelh vat a, êngmah hre lo leh taksa zawi veka awm u Nutei chu a hak tir nghal mawlh mawlh. Sir chuan boxer leh tawnzau chauh hain u Nutei chu a pua a, thlanmual kawng chhoah chuan a tlan chhoh pui nghal hmawk hmawk. Kawngpui pangai kan thlen chuan ka u nen motor-ah an dah lut a, hmanhmawh takin kan tlanchhuak zui leh ta thuai.

Lunglei Civil Hospital chu kan hnaih ber a nih avangin kan pan a, kan va thlen chuan nurse te pawhin min lo buaipui thuai thuai bawk. A ranga rangin doctor te pawh an rawn lang a, an endik nghal zung zung. Kei erawh ka lungchhe lutuk chu ka ṭap reng ringawt a, Sir Kima chuan a awmah min kuah bet tlat bawk. Tin, u Rohlua chuan police department lam a lo va hrilh ve nghal a, eng dang zawng aiin u Nutei chu a boral mai ang tih ka hlau a ni.

Darkar 3 hnuah chuan doctor chuan pawngsual a nih thu a rawn sawi a, kan rin lawk nimahse a tak tak a'n ni ta mai chuan ka rilru a tina vawng vawng thei. U Nutei chu damdawiinah ka awm chilh nghal a, u Rohlua pawhin ka nu leh pate a hrilh vek tawh bawk. Sir Kima chu thuamhnaw pangai ha turin a haw zawk a, a lo kal leh thuai tur thu min hrilh nghe nghe.

Tlai lam dar 4 vel a ni tawh a, u Nutei chu a la rawn harh lo hrim hrim. Kei leh Sir Kima chuan a lo harh hun kan nghak ngar ngar a, a hmai duk chûr ka hmuh te chuan ka ṭap leh feih feih zel. Beidawng tak leh lungngai taka kan awm lai chuan u Nutei chu a rawn au chhuak thut a, keini paw'n kan lo ngaihven nghal thuai.

"U Nute, u Nute, i ṭha em? Min hre thei em?" amah en ngar chung chuan ka lo ti vat a, a mit chu a chet ruai ruai bawk. Chutah a mit chuan ka lam lo hawiin

"Ka thi lo maw?" a rawn ti chhuak sep a, kei chuan

"Aw thi lo, u Nutei i la dam" nui lui chung hian ka lo ti ve thuai bawk.

"Engatinge ka thih loh? Thih hlen vang vang ka duh asin" tiin a rawn ṭap chhuak hawk hawk a, ka insum thei ta bik lo.

"U Nute, a pawi em mai" tiin tihnat hlau deuh chung si chuan ka va kuah a, kan ṭap dun ta hawm hawm.

Tunah chuan u Nutei chunga thil rapthlak tak a thlen aṭangin ni 3 a ral tawh a, u Nutei pawh a ṭha chho ve leh vîau tawh. Ni lo, a ṭha miah lo, a ṭha lo tak zet. Pawn lam hmuhah chuan pangai ang takin lang mahse a pangai hauh lo va, a chhan chu a chhungril lam nunah ser lian tak a awm tawh tlat alawm. A hmai duk te, a ban ruh tliak te chu zia viau tawh mahse a thinlung chu a zia ve thei tlat tawh lo. Mahse, ka hmeichhe hriat tawh zawng zawngah u Nutei hi a la huaisen ber awm e.

U Nutei chuan ṭap chungin police te hmaah engkim a sawi a, a sawi lai phei chuan ka mittui te chu an lo tla zawih zawih. Chutiang khawpa rilru beidawng leh naa a awm chung pawh chuan amah pawngsualtute chu hremna pek a duh ve tlat a, chu tak chu ka ngaihsan zualna a ni. Kei ni ve ta ila, ka theih kher ka ring lo.

Nutei POV

Ka thih loh avangin lawmna lam aiin thinrimna lam chuan ka rilru a luah khat a, thih daiha tûma tihbuai theih tawh lova nun chu ka châk ngawih ngawih. A hma kha chuan kan chunga thil thleng turte hi Pathianin kan ṭhatna tur atan veka a duan a ni an tih chu ka ring ṭhin a, mahse pawngsual ka nih hnu hi chuan chutiang chu thu lawi lo leh thil dik lo tak niin ka ring ta zawk.

Amaherawhchu, ka thil tawn rapthlak tak avangin Pathian chu ka phatsanin ka rin loh phah lo va, khawvel mite rin dan leh sawi chu thil dik vek a ni bik lo tih ka hre tawh thung. Damdawiinah chuan ni khat ka awm a, doctor te pawhin min ngaihven hle. An hmelah chuan sawi lo mahse min khawngaih hle tih a lang a, kei lah chu khawngaih loh theih lohvin ka dinhmun chu a awm bawk si. Ka rethei emaw hausa emaw mi khawngaih nih hi ka duh ngai lo va, mihring pangai ka nih chhung hi chuan mi khawngaih theih tura awm chu ka pumpelh hram hram zawk ṭhin.

Damdawiin aṭanga ka chhuah hnu chuan police department lam chuan ka ina rawn kal chilhin thil thlen dan chu min zawt a, ka ṭah a chhuah lutuk avang leh ka rilru a nat lutuk avang chuan ka sawi tumte pawh chu ka sawi mai thei lo. Miriam-i phei chu ka bulah a lo ṭap pur a, min khawngaihin min lainat tak zet tih ka hria.

Chutiang taka rawnga min pawngsualtute chu an hming leh veng ka hre mai lo va, police te pawh an buai hman hle. Amaherawhchu, kan dawra buaina lo siam tawhtu te an ni tih ka sawi chuan ka thawh ṭhinna dawr neitupa pawh chu an ko vat a, thil awmzia sawiin min pawngsualtute chu tute nge an nih an zawt nghal bawk. A tirah chuan kan dawr neitu leh ka thawhpuite chuan ka chunga thil thleng an hriat mai loh avangin an hamhaih ang reng hlê a, mahse thil thlen dan an hriat chinah chuan ka thlavang hauh an tina nghal khawp.

Diriam taka min sawisaa min pawngsualtute chu Lunglei district-a mi awm thei leh mi hlun chhungkaw zinga mite an lo ni a, min sawisak vel hmaa an insawi ang tak takin mi hausa chhungkaw zinga mi chu an lo ni ngei e. An pahnih chuan police department chuan manin lock up-ah an khung a, dam chhunga jail tang hial tlak an niin ka hria. Khawvel a lo changkang tawh bawk nen ka chanchin chu media-ah a darh ta chiam a, chanchin tharah te hial ka hming pum nen lam min puang bawk. FB leh Instagram-ah te chuan ka lar hle a, ka chhungte leh ka ṭhiante pawhin an hriata min hmuh ve ngei ka ring tawh.

A hma kha chuan ka awmna leh ka awm dante chu ka chhungte hriattir ka duh lo kha a ni a, mahse tunah chuan pawi tihna pawh ka nei tawh lo. Ka beisei phak bakin ka chanchin chu media lamah a thang a, min khawngaihtu an tamin dan ang taka thil tisualtu te hremna pek chu an au chhauhpui nasa ngei mai. Ka ngaihtuahna erawh chuan

"A sawt tawh lo" tiin min rawn hrilh a, a sawt tawh lohzia chu ka hre chiang khawp mai. Ka thlavang hauh taka an ṭawng chhuahna te chuan thil thleng tawh zawng zawng chu tireh thei se, min khawngaihna te chuan nun pangai neih leh theihna te min pe se zawng rilru na leh kunin ka awm lo tur.

Inah chuan keimahin ka awm leh ta ngat ngat a, ni 4 lai a liam leh tawh. Miriam-i chu hna a zawm ngei ngei a ngaih tawh avangin Champhai lamah kan invai liam a, a kal dawn pawh khan rilru beidawn avanga mahni inthah tumna nei lo turte pawhin min chah nasa khawp. Tin, dawra ka thawhna aṭang pawhin ka bang ta hmak a, kan pu ber chuan min ui vîau thung. Mahse, keimah lam zawkah hian dik lo a awm tlat tawh avangin thawh chhunzawm chu ka theih ka ring tawh lo a ni.

Chanchin thara ka hming, ka awmna hmun leh veng thlenga puan a nih tâkah chuan Feli chuan min lo call awl lo va, chutiang bawkin ka nu leh pate pawhin. Feli hnen aṭangin ka nu leh pate chuan ka phone number thar chu a nei tawh a, min rawn biak tirh phei chuan ka ṭawng chhuak thei lo tluk a ni. Ka pa pawh a bang bik lo, kei ang thovin an pahnih hnîh chuan an ṭap ve bawk.

Ka pa chu a thinrim piah mai bakah a rilru a na a, ka chunga thil thleng avang chuan a insum thei lo lek lêk tih ka nu paw'n a sawi hial. A ni thei lutuk ang. Tunge mahni rila rah fate rawng taka pawngsual a nih thu an hriat hnua thinrim lo awm thei bik ang nì? Ka pa chuan keimah hruai haw tura an lo kal nghal tur thu a rawn sawi a, keipawh chuan lo hnial buai vel tumna pawh ka nei tawh lo.

An duh duhin ka chungah se, ka tana ṭha lo tur chu an tih duh ka ring lo a ni. U Hruaia pasala ka neih dawn khan ka pa khan rem a ti vak lo va, mahse a fanu'n khati khawpa ka hmangaih tih a hriat hnuah kha chuan pasal ka neih chu rem min tihpui mai zawk kha a ni a, thisen ngeia inzawm te nge nge kan lo inhmangaihin kan lo inhre chiang zawk te pawh a ni mahna.

Ka pate chu damdawiin aṭanga ka chhuah hnu ni 5 naah Lunglei an rawn thleng a, an ni chauh ni lovin ka ṭhiannu Feli pawh a rawn tel. Mi ṭhenkhat ṭawng peih deuh hlek te chuan ka nu leh pa dik tak te'na min buaipuina thawm a awm mai loh avangin ka nu leh pate chu an dem a, mahse kei chuan ka dem hauh lo. A nihna takah chuan ka chanchin an hriatna pawh a la rei lo va, an hriat rual rualin Aizawl aṭangin an lo kal vang vãng zawk a ni. Chutiang bawkin ka ṭhiannu Feli pawh chuan a hriatna a la rei bik lo va, a chhan chu ka thil tawn ni aṭanga ni 3 na velah chauh police te hrilhin media-ah ka lar a tin ni!

"Bawihi, Nute" tia mipa leh hmeichhe ṭawng thawm chu keimaha tukverh thlang lam zawng a ka lo hawi vauh vâuh lai chuan a rawn awm a, ka kawngka lam ka hawi chuan ṭah châk et etna chuan min rawn tuam nghal.

"Bawihi, âwwwww, a va'n pawi tak em?" tiin ka nu chuan min rawn kuah a, ka mittui chu dan sen lohvin a dir ta zung zûng. Chutah ka pa chuan

"Nute, ka thiam loh a ni. Engkim hi i pa thiam loh vek a ni" tiin ka nu nen chuan min rawn kuah a, mahni nu leh pate dik tak thlazar hnuaiah ka awm tawh tih ka inhriat hnu chuan ka ṭap ta hawm hawm a, insum buai reng ka tum tawh lo.

"Engatinge nangmah chauha i tawrh? Engatinge engkim min hrilh duh loh? Han sawi teh Nute, awi ka khawngaih lutuk che" ka nu chuan ṭap chung hian a rawn ti chhuak hawk hawk a, kei ang bawkin an sum thei bik ngang lo a ni e.

"Nu, pa, in thu ka awih loh rah ka seng a nih hi" ṭap ṭiau chung hian ka ti a, nghet taka min kuahna te pawh chu an thla riai riai tawh bawk.

"Nute, i chunga ka thin a rim i ring ti raw? I pa ka nih hi, engtin pawh awm la ka hmangaih em em che asin. Hetiang khawp hian i tuar nasa a, ka lung a la awi thei lo a ni" ka dara chelh pahin ka pa chuan a rawn ti leh a, ka ṭap leh ta nge nge.

Kan ṭah chhuak lutuk a zia hnu chuan kan inthlah fel a, chutah hmaia mittui luang ngiai chunga lo ding Feli chu ka hmu zawm zat. Eng thil dang mah sawi lovin ka pan phei a, ka kuah nghal thlawp. Ka ṭhian, ka engkim hretu leh ka thisen zawmpui tih lohva min thlamuantu ni ṭhin ka ṭhiannu chu ka ngai tak zet a ni. Tin, ka pum a puar tawh loh avang chuan zawhna an nei nghal a, ka nau chhiat dan leh a chhan ka sawi laite chuan min khawngaih tih hi a hriat ngawih ngawih. Ṭap feih feih chung chuan ka fapa Mapui ka hmuh thute, a hmel chuan a pa a anzia thute chu ka sawi a, ka sawi tawp lamah phei chu ka ṭawng te chu a fiah lo vek thei.

Chutia boruak kan neih lai chuan kan thawm hriain in chunga mite pawh an rawn chhuk a, ka pate nen inbe felin min hruai chhuk nghal tur thu chu an sawi a, ka in luahnate chuan min ui der ve vîau mahse tih theih an nei si lo.

Aizawl lam kan pan te chuan ṭawng emaw titi châkna reng ka nei lo va, ka chuanpuite chuan an hrethiam a ni chêk ang chu biak pawh min be duh lo hrim hrim. Aizawl kan thlen chuan zan a ni tawh a, kan in ka luh te chuan ka lung a rawn chhe thar leh em em ringawt. Feli chuan keimah min riahpui tur thu a nu leh pate chu phone kaltlangin a hrilh a, anni paw'n an lo phal ve mai bawk. Ka khuma kan awm te chuan min be reng a, a hma ang chiaha min kawm hlim leh chu a tum hle tih ka hria. Keipawh ka rilru ngurchuai lutuk chu a bo ve tial tial a, a lehlam zawng tak chuan min biak rengna chuan ka rilru a tithawl hawk zawk a ni.

Feli chuan ka nun hlui leh hun kal tawh chungchang reng reng chu min sawipui duh lo va, Sir Joseph-a nena an la inngaihzawn reng thute chu min sawipui nasa zawk. An inkara thil hlimawm leh nuihzatthlak tak takte chu min hrilh lûam a, keipawh a tawpa tawpah chuan ka nui ve leh thei ta. Ka nui tirh phei chuan

"Awi, a nui ve leh thei ta" tiin a rawn ṭe chúl a, chungte hlei hlei chuan nuihna tur min siam belh.

Kar khat lai Aizawla ka awm hnu chuan ka rilru pawh a rawn pangai chho leh ta vîau a, mahse Lungleia an pawngsual hrep hnu kha Aizawlah ka awm mek tih chu an hre hlawm lo. Min hre miah lo se ka duh a, mi titi titamtu nih chu ka duh lovin zak a ni. Ka thil lo tawn tawh chu eng pawh ni se sawi dan leh hriat dan hi a inang tawh ṭhin si lo va, a tuartu tan a lo hrehawm bawk nen lansarh loh law law chu ka duh zawk. Min tihlimtu ber Feli chu Mizoram University lama a zir zawm avangin ni tin class a kal ṭhin a, ka bula a awm loh hi chuan ka khua a har thei hle.

Hun awl a neih apiangin a rawn leng a, min len chhuahpui ṭhin bawk. A tirah kha chuan ka hmel an hriata mi sawi kai kha ka hlauh avangin len chhuahpui chu ka hnar fithla ṭhin a, mahse chutianga inkiltawih leh hringnun pawh hmachhawn ngam lo khawpa dawizep nih chu ka duh leh loh avangin ka hnar duh ta lo. Hotel Regency-ah te thil ei chhuakin kan kal ṭhin a, Tuikual lam aṭangin min rawn sawm vang vâng zel. A chang leh Bazar lama thil han lei lâwp lawp te chu kan ching a, a hlimawm phian.

"Bawihi, enge tih i duh? Lehkha zir leh te hi i duh em?" ka nu chuan a rawn ti a, lehkha zir leh lam chu ka lo la ngaihtuah lo hrim hrim.

"Duh pawh ka hre chuang lo, mahse thil eng emaw ni chu tih ka duh" ka tih chuan

"Eng thil nge tih i duh a? Han sawi teh, ka puih theih phawt che chuan ka ti ang"a rawn ti thuai a, ka nu hmela inthlahrunna lang chu ka hmu a, a chhan pawh a fanu chu ngaihtuah tawk lova a inngaih vang a ni.

"Nu, khatianga min ngaihtuah hmel deuh leh hlauthawng hmel deuh khan awm ṭhin lo teh, ka ṭha tawh ka tih kha, chuan ka thil tih duh chu maw dawr siam lam daih a nia"

"Ehê, chutiang lam i tui tih te ka lo hre reng reng hleinem. Kei hi chu nu laktlak loh ve tak chu ka lo ni a nih hi!"

"A mak! Khatiang zawngin inngai hniam zel lo la, i fanu hi chak taka awm turin min hrilh zawk rawh" a inthiam lo hmel chuan ka awm a ti nuam lo vek thei.

"Ni e, i sawi dik alawm. A nih chuan dawr chu kan siam anga ni mai lo'm, eng dawr lam nge siam i duh rilruk deuh?" tia min zawh chuan

"Restaurant lampang daih hi a nia, Lungleia hna ka thawh ṭhin lai khan Restaurant-ah char char ka inhlawh a, khata ṭang khan ka tui thar zual ni berin ka hria" pangai tak chuan ka tichhuak dam dap a, restuarant changtlung tak neih chu ka châk a ni.

"A va ṭha dawn ve, mahse a bulṭanna tur hi a hautak ve deuh lo maw? Ka tih awmzia chu, kan thei lo tihna pawh a ni chuang lo a nia"

"I rilru tur chu ka hrethiam alawm nu, tuna tih tut tut pawh ka ti chuang lo. Ka inhlawh ang a, ka intuak ngah hunah ka ti mai dawn alawm"

"Ni e, i pa pawh kan hrilh ve reng reng ang a, kan la sawi ṭha leh dawn nia" a ti zo chiah chu kan in kawngka chu a rawn inpawt hawng ṭhuai a, ka nu nen chuan ka hawi rang dun hle.

Chutah ka mi besei loh leh ka mi hmuh duh loh tak hmel chu ka hmuh zawm zat a, êngmah sawi lovin ka room-ah chuan ka tlan lut ta vat. Ani kha a rawn lan ka ring tawh lo va, rawn lang leh tur pawhin ka duh tawh lo bawk. Room ka luh velah kawngkhar chu ka kalh hmiah a, tûma biak ka duh rih lo.

A bik takin ani ngat phei kha chu! Ni e, khati leh chen kha min zawng lovin a awm tawh a, min theihnghilh vang vang tawh turah ka ngai a ni. Ani avanga ka tawrhna te, ka nun inthlak danglam nasatzia te ka hriat chhuah leh takah chuan ka ṭah a chhuak leh nghal em em a, mahse ani vang mai maia ka mittui tih tlak leh chu ka tum tawh lo.

"Nute, khawngaihin, khawngaih takin inbia ang? Lo hawng hram teh" kawngkhar chum ri dawt dawt chunga lo titu aw chu ka hre chiang khawp mai, a aw aṭang chuan mangang ve tak tak te pawh a ang alawm.

"Hruaia, i lo kal hun hi a fuh hauh lo. Chubakah i pu Roa a rawn haw vaih chuan boruak hi a kal dik dawn lo tih hre ta che" ka nu chuan a lo ti hrâwk a, pakhat erawh chuan ngai pawimawh lo fê hian kawngkhar chu a la rawn chum ri dawt dawt tho.

"Ka pi, khawngaihin min hmuh tir hram rawh" ti chungin a thil tih lai chu a ṭhulh chuang hauh lo. Chutah thil ri thlawrh hi a rawn awm a, kawngkhar chum thawm a reh tak hmak avangin ka beng chuan ka room kawngkhar pawn lama awm te chu a ngaihven nghal hle.

"I va zak lo ve, hetianga rawn kal ngam leh tur pawh hi i ni em? Ka fanu nun tichhe vektu hi ka lo lawm che i ring em ni? Kan in aṭang hian chhuak nghal rawh, i pu Roa a rawn thlen hma ngei hian chhuak vat rawh" ka nu chuan thinrim tak hian a ti a, a insum theihna chuan a tlin tawh bik lo a ni ngei ang.

"Min beng rawh ka pi, min beng zel rawh. Mahse, Nutei ka hmuh hmâ chu ka chhuak dawn lo. Khawngaih takin ka pi, Nutei hi ka biak min phalsak hram rawh" pakhat zawk chuan a rawn ti leh a, an thawm chu ka ngaithla kar bawk.

"Ni lo ve, a mit hmuha i hmel rawn lan leh tlak pawh hi i ni tawh lo. Ani chuan harsatna tam tak a paltlang a, nun hrehawmna zawng zawng a neih ṭhin chu keini a thisen zawmpui ngei te pawh hrilh ngam lo khawpin nang hian i siam asin. Kei ka lo awm hlauh a, thil pawi a thleng lo hlauh zawk a nih hi! Hruaia, haw rawh, i pu Roa a lo thlen chuan ka inrawlh buai tawh dawn miah lo a nia" ka nu chuan khauh tak hian a tih leh a, a aw aṭang chuan ka pasal nen kan inneih laia aw nem tak taka ka pasal a biak ṭhinna ang kha chu a bo fai vek tawh tih a lang chiang hle.

"Ni lo, ka thei lo. In ngaihdamna ka phut lo va, phut tlak pawh ka ni lo. Mahse, Nutei hi biak ka duh a ni. Ka ngai lutuk, ka ngai lutuk tak zet" chutia a pizawn hmaa zak miah lova min ngaih thu a sawi chuan mak ka lo ti khawp, mahse a thusawi chu pakhat tê mah ka awih lo.

"I ngaihte chuan zawng hmu ta che, pawngsual a tawh hma te khan zawng hmu ta reng che. Nang hian kan fanu hi hmangaihna tel miah lovin i lo nei a, chu pawh chu keini a nu leh pate hian kan tuar thiam tawh lo vîau tih hre rawh. Chutah nangin ani ang mi hlim thei tak leh ṭawng duh ve tak ni ṭhin chu i thlak danglam vek a, nun hahdam lohna leh buaina hmunah i nawr lut tih hi hriain a hmel rawn hmuh tum buai tawh suh" ka nu chuan a ti leh phiar phiar a, chuti taka ka nu'n ka thlavang a hauhna chuan min tiṭap ta nge nge. A sawi zawng zawngte chu a dik vek a, mahse thu dik chuan ṭahna min pe tlat bawk si.

"Ka hria e, ka pi. Ka thiam loh a ni fai vek tih ka hria alawm. Mahse, eng pawh tuar dawn ila Nutei hi hmuh ka tum nghet bur a ni" a la rawn ti hram a nih chu! Ka ṭap chu ka bang hmak a, ka hmel hmuh a la tum lui ṭalh chu zak lo ka lo tirilru hle bawk.

"Nang mihring khan ka inah hian enge i rawn tih phiangsen?" titu aw chu ka pa a ni. Chutah ka nu chuan

"Paa" ti hluaiin thawm dang chu a rawn awm chhunzawm nghal.

"Nang hian ka fanu hi i lo la beisei ngam vela maw?" ka pa chuan a ti hrawk a, ka room kawngkhar pawh chu a rawn ri dawt dawt.

"Ka pu, khawngaihin i fanu hi ka biak min phalsak rawh, ka hmuh ngei ngei a ngai a ni" a tih rual chuan thil ri sawk sawk hi a rawn awm a, chutah a hma zawnga ka inrawlh buai tawh dawn lo titu ka nu chu a rawn ṭe chul a, ka pa chuan u Hruaia chu hnek a ni ngei ang.

"Nute, Bawihi, lo chhuak mai teh, an inkhawih na tak tak mai dawn. Hmanhmawh rawh" hlauthawng aw tak leh ka room kawngkhar beng mawlh mawlh chunga ka nu'n a rawn tih chuan ka tho vat a, kawngkhar lam chu pan pheiin ka hawng ta nge nge.

Kan sitting room bul dawhkanah chuan ka pa hian u Hruaia chu a lo hnek siah siah a, u Hruaia chuan lian zawk mahse khawih let tumna pawh a nei lo. A lo dawh mawl tawp a, a hmai velah pawh thi a chhuak nasa tawh hle. Chutiang taka ka pa thinrim chu ka la hmu ngai lo va, a chet dan aṭang chuan a thah mai duh hmel. Ka nu chuan rang takin a va ṭhelh a, mahse a sawt lo hle.

"Duh tawk rawh ka pa" ring tak chuan ka ti vak a, ka pa chuan ka lam rawn hawi zawkin u Hruaia chu vawikhat leh chiah ti ni awm tak hian a hnek leh chawrh. Chutia ka pa'n a thlah takah chuan u Hruaia chu a rawn khuh bawrh bawrh a, hlauthawnnain ka lo khat nghal ringawt.

"Nute, he mihring phiangsen hi i hmuh ka phal tawh lo, i room-ah let leh rawh" ka pa'n ka dar chelh paha a rawn tih chuan lu ka lo thing nang nang a, mi dawizep anga nun chu ka peih tawh lo a ni.

"Ni lo ve pa, mi dawihzep nih ka duh hleinem. Chuti taka min be duh a nih chuan sawi tur ṭha tak a nei te pawh a ni mahna" ka ti let ve salh.

"Nute, i chiang maw? Ani nena inbiak chu i duh tak zet maw?" min ngaihven fêa a rawn tih leh chuan

"Aw ka pa" ka lo ti khauh ve fak.

"I hmai va phih la, hei hian i hnar kha hru fai ang che" tiin ka nu chuan first aid box-a lapua awm chu u Hruaia a pe a, u Hruaia pawh chuan thuawih takin ka nu thusawi ang chiah chuan a ti ve nghal.

Minute 1 hnu velah chuan u Hruaia chu kan bathroom aṭangin a rawn chhuak a, a hnarkaw chhungah chuan lapua a hnawh tut bawk. Keini chu sitting room-a ṭhutthlengah chuan kan lo ṭhu ṭhap a, ka nu leh pate inkarah tak ka ṭhu bawk. U Hruaia hmel chu ka en chiang hle a, a lo thauin ka pasal a nih ve lai ai khan a lang upa tawh deuh zawk bawk. A hmaiah te chuan hmul a rawn ṭo fur tawh a, hmâna ka pasal hmel fai tak ni ṭhin kha chu a ang tawh lo zawk.

"I ngawih reng dawn chuan chhuak la, vawikhatmah lo kal leh tawh suh" ka pa chuan a rawn ti ram hmak a, u Hruaia chu a ngawi rei ve êm bawk a ni.

"Nute" tia u Hruaia'n min rawn koh chuan ka sa pup pup a, ka thin phu pawh a rang nghal hle.

"Nute, ka tihpalh tak zet a ni" ka mita en ngal chung hian a rawn ti a, ka mittui te chu an rawn tling nghal pam. Ka ṭap lo vang kha ka ti ve tak na a, ṭah loh chu har tak a ni.

Ni e, ani hi hmâna ka pasal chiah chiah kha a la ni. Ani chuan thil a tihsualin ka tihpalh a ti mai zel a, kei lah khan ka lo ngaidam ve leh mai zel bawk. Tunah erawh tihpalh tih mai mai chuan min tilungawi zo tawh hauh lo. Amaherawhchu, chutianga taka lungngaih hmela u Hruai ka hmuh chiah chuan kei hian ka pasal chu chiang takin ka la hmangaih reng tih ka hria. Hmangaih tawh loh emaw theihnghilh emaw ka tum ngial pawh hian ka thei lo va, a chhan chu ka thinlunga hmangaihna thuk ber chu ka pasal ka lo pek tawh vang a ni. Mahse ka la hmangaih reng tih avanga a hnena kir leh chu ka tum tawh kher lo va, a hnena let leha nupa han nih ṭha leh vel chu ṭula ka hriat tawh loh mai bakah kan hlim tluan tak tak pawh ka beisei tawh lo bawk.

"Aw le, ka hria e. Tunah chuan kei min hmuin i sawi duh i sawi tawh bawk a, i haw thei tawh ang" ka bianga mittui luang thla hru tawk chung chuan ka ti chhuak sep a, a hmelah chuan inchhirna leh manganna ka hmu thei.

"Ka tihpalh lutuk, keimah avanga hetiang taka i tuar nasa hi ka inngaidam thei ngai lo vang" hnuai lam bih ngul chunga a rawn tih lai chuan

"Chhuak rawh, tunah chhuak nghal rawh. I thil sawite hian awmzia pakhatmah a nei tawh lo" ṭap pur chung chuan ka lo ti hrâwk a, ani paw'n min en rang hle.

"Ka fanu thusawi kha i hria a nih chuan a sawi ang khan awm mai ta che" ka pa chuan a rawn ti ve hrâwk a, kei chu ka pa awma beiin ka lo ṭap hluam hluam.

"Aw le, in chhungkaw chunga pawi nasa tak ka khawih avang hian ka inthiam lo hle a, min mamawhna in neih phawt chuan eng tikah mah ka thlahthlam lo vang che u. Chuan Nute, ka thil tihsual avang hian ka inchhir lutuk tih tal hi min hriat sak dawn nia" u Hruaia chuan ding hluai chung hian a rawn ti dam dap a, ngawi rengin a chhuak zui bawk.

Ka pa chuan nghet tak hian min kuah a, ka nu paw'n ka dara lo chul chungin min thlem bawk. Uar taka an fanu ṭap chuan an rilru chu a tina ngei ang tih ka hria, mahse anni bulah lo chuan ṭah hawm hawmna tur ka nei chuang lo a ni.

Chapter 15

Hruaia POV

"Zonunmawii d/o Lalrochhuma chu mi sual pahnihte'n rawng takin an pawngsual rawn a" tih thu Chanchin tharin a rawn puan lai chuan ka hnuaia hnathawk, a ruka ka mi chhawr ka biak lai chu ka tawp hmak a, Nutei hming meuh chanchin thara lo lang chuan eng thil dang mah min ngaihtuahtir thei tawh lo a ni.

"Chanchin kan dawn danin Zonunmawii hi Lungleia mahnia in luaha awm a ni a, Restaurant pakhata hnathawk mek a ni bawk. Hetiang thil rapthlak tak titu te pawh hi Police Department lamin an man nghal a, Court in an chung thu a rel zui nghal dawn bawk a ni" chanchin thar puangtu'n a rawn tih leh chuan ka TV bulah ka lo ding reng tawh zawk. Chutah thil hre chhuak zawkin ka phone chu ka lek kang vat a, a ruka ka mi chhawr chu ka call zawm zui zat bawk.

"Hello Sir" a rawn tih rual chuan

"A ngai tawh lo, ka nupui i zawn a ngai tawh lo ve, i hlawh tur chu nakinah ka rawn thun mai ang" ka lo ti nghal thuai a, ka aw te chu ni dang ang lo takin a phelh ta nuai a ni ber.

"Maw? Aw, aw le" ka chhan dan thawt thawt avang chuan a hamhaih ve deuh pawh a ni ang. Chutia ka sawi tur ang ka sawi zawh hnu chuan keipaw'n kan inbiakna chu ka titawp a, ka inthuam dan ngai ang âng chuan pawn lamah ka tlan chhuak zui ta vat.

"Sir" pawn ka thlen rualin ka awmna quarter guard tu leh ka driver chhawr te chuan an rawn ti nghal a, min ngaihven taka ka lam an lo pan lai chuan ka motor kawngkhar hawn lai chawl meuha an lam hawi pahin

"Min ngaihtuah suh u, in hi ṭha takin lo veng ula, ka lo haw leh hun tur erawh ka sawi lawk thei rih lo" ka lo ti thuai a, anni pahnih pawh ka thusawi avang chuan an ke pen lai chu an tawp chat a, ka thu chu an hnial ngam bik lo a nih hmel.

Chutia thu ka pek hnu chuan hmanhmawh takin motor chhungah chuan ka ṭhu lut a, tinungin ka tlan chhuak zui ta bawk. Motor ka khalh chhung zawng chuan Nutei, ka nupui, rilru na taka ka chhuahtir, ka thinlunga chama riak ni tin zan tin ṭhin chu ka ngaihtuah char char a, pawngsual lehzel a lo tawk te chuan ka rilru a tina lutuk. A thil tawn rapthlak tak leh engkim chu keimah vangah ka puh lo thei lo va, rilru na taka ka lo siam tei vet chu ka inchhir ngawih ngawih hi a ni tawp.

Nutei bo thu leh a awmna chin ka hriat loh ni aṭang khan mu leh malin nun ka hmang ngai lo va, Nutei chu ka ngai a, ka mamawh a, mahse a chunga ka chet dan nunrawng tak avanga kal bo leh a thisen zawmpui te pawh a awmna hrilh ngam lova biru a ni si. Engtinnge naute nen an awm anga an khawsak chhoh ang tih mawlh chuan ka rilru a luah a, amah khawngaihna hlirin ka khat a ni.

Âwwwwww, pasal nep leh nunrawng tak chu ka lo va ni em. Nutei kha chuan engkim kalsanin pasalah min nei a, min hmangaih takin ka bulah a awm a, mahse kei lah chuan nun beidawng leh chauva a awm theihna'n a nunah harsatna nasa tak ka lo siam belh zel ṭhin si a nih kha!

Champhaia Transfer Order ka hmuh hnu khan loh theih lovin Champhai lamah ka insawn chho a, mahse a ruka Nutei ka zawnna chu ka chawl duh chuang lo. A chang chuan Nutei chu Mizoram pawna a kal daih te ka ring rum rûm a, hun leh nite chuan Nutei laka ka lo chet ṭhin dan dik lohzia leh ka lo âtzia min rawn hriattir âwn awn ṭhin. Aizawla nasa taka ka zawn hnu khan kan hmuh theih mai loh avangin District danga zawn ka ti thlu a, mi pakhat chauh ni lo mi tam tak a ruka zawng turin ka chhawr nghe nghe.

Aizawl dawtah Serchhip District lam ka zawn tir ṭan a, a ṭhen phei chuan Kolasib, Khawzawl leh ka awmna ngei Champhai District-ah te pawh chuan an zawng ru reng bawk. Amaherawhchu, Lunglei District ber kher erawh ka lo la zawn tir ngai lo hrim hrim a, zawn tir ka lo rilruk lai takin thu lawmawm loh zet mai chu ka hre chhunzawm ta si.

Zan dar 7 leh a chanve tih vel aṭanga chhuak ka nih avangin Lunglei chu ka thlen hma lutuk ka ring lo va, a lo berah zing kar lamah emaw chauh Lunglei chu ka thlen ka ring a ni. Lunglei leh Champhai inkar hi kilometer 250 leh tih chuang lâi a ni ve a, a kawng inan loh lutuk avang leh kawng kikawi a tam lutuk avang hian a inkar hi a hla ni berin ka hria. Steering hmaah chuan ka phone chu ka dah a, Map hmangin darkar engzatnge tlan la ngai ka en pah zeuh zeuh bawk. A tlangpuiin motor pangai chuan Lunglei leh Champhai inkar hi darkar 10 chuang fê tlan a ngai ve a, Helicopter te ka lo book mai lo chu â ka inti hnuhnawh hle a ni.

Ka ngaihtuahnate kawm melh melh pah chuan motor chu ka khalh char char a, ka rilruah Nutei leh kan fa tih chauh lo chu eng thil dang mah an awm thei tawh lo. Ka hmanhmawh lutuk chu accident ka tawk mai ang tih ka hlau ru hle a, chutiang ngaihtuahna ka rilrua a rawn awm hnu aṭang chuan tlemin ka tlan muang ve ta deuh bawk.

Tin, ka motor te chu dimna reng ka nei tawh lo va, Nutei ka hmuh leh theihna tur a nih phawt ka motor te chu chhe vek mahse pawi tihna ka nei tawh lo hrim hrim zawk.

Chutia rilru kawm melh melha motor ka khalh lai chuan ka hmaa ka phone dah chu a rawn ri a, ka hmanhmawh ve tho bawk nen lak pawh ka tum buai lo. Mahse a rawn rik nawn leh avang chuan tunge lo call tih hriat tumin ka phone chu ka en deuh ta hâ a, ka nau Bawihtei lek chu a lo ni.

"U Mam, chanchin thar kha i en em? Nutei kha Lungleiah a awm a nia, engtinnge ni dawn? Tunah i kal nghal nge naktuka kal i tum zawk? Kei chu tlan chhoh nghal mai ka duh, ka kal duh tak tak a nia" phone ka pick-up rualin Bawihtei chuan a rawn ti zung zung a, a aw aṭang chuan a hlauthawng hle a ni tih a hriat theih.

"Ni lo Bawihte, tunah hian Lunglei lam pana ka tlan mek avangin lo kal lo law law zawk rawh u. Chubakah Nutei chuan a hmuh duh cheu ka ring lo va, kei ngei pawh hi min hmuh duh ka ring chuang lo. Mahse kei hi chuan engti kawng zawng paw'n hmuh ka tum bur thung a ni" ka ti nghet charh a, ka thusawi chu ka tum dan tak tak a ni bawk.

"A nih chuan Mama fimkhur hle rawh aw, i hmanhmawh lutukna lamah khan i chesual palh ang tih a hlauhawm a nia, pangai deuh khan tlan la Nutei chu i va hmu ngei dawn nia" ka pa chuan a rawn ti ve a, Bawihtei chuan a phone chu loud speaker-ah a dah tih ka lo ring thiam nghal mai.

"Aw le pa, nakinah chanchin kan inhrilh ṭha leh zawk dawn nia" tiin kan inbiakna chu anmahni pawh ngaichang tawh lo chuan ka titawp hmak a, chutiang em ema ka nuna ka hmanhmawh chu ka la hre ngai lo hîal zawk a ni.

Zing dar 5 vel bawrah chuan Lunglei chu ka thleng ve thei ta hram a, ka tlan chak thawkhat bawk a niang darkar 10 chuang tlan tura ka inngaih kha dar 9 tih chauh ka tlan thung. Amaherawhchu, ka beisei loh lutuk tak maiin buaina ka tawk ta. Ka motor ke chu a lo thep em em a, engtinnge ka motor ke a thep tih reng hre lova ka lo tlan theih zawk ni! Engtinnge ka hriat theih tehlûl ang? Ka motor khalh lam chu ka rilruah a lut reng reng lo va, ka nupui Nutei leh kan naute tih chauh lo chu ka ngaihtuahnaah khan an awm thei lo miau alawm.

Ka awmna chu khaw luh ṭan tirh deuh a nih avangin Puncture Workshop rêng reng hmuh tur a awm lo va, Assam type-a sak in tih chauh loh chu hmuh tur a awm lo zawk a ni. Zah pawh dawn tawh lovin mi inah chuan ka lut a, Workshop hnai ber min kawhhmuh turin leh min biaksak turin ka ngen ta tawp. Anni pawh chuan ka rin loh takin ka sawi ang chuan an ti ve nghal a, an chhungkaw dinhmun en chuan hausa tak tia sawi tur ni lo mahse kei chuan anni chu kei aiin an hausa tih ka hre chiang em em thung.

Engvangin maw nang aia an hausak? Nangte chuan i hman sen loh khawpa tam sum i nei a, engatinge anni chu nang aia hausa tura i ruat? in ti pawh a ni maithei, mahse kei chuan anni chu keimah aiin an hausa ka ti zawk tho tho a ni. A chhan chu kei chuan an sum neih leh chhungkaw dinhmun lam ka en ve tawh lo va, ṭanpui ngaite puih duhna rilru an neihna lai chu kei chuan kei aia an hausakna a ni ka ti lo thei lo. Kei chuan sum tam tak ka nei a, hman sen loh khawpa tam ka bank account-ah ka khawl ṭûn ṭun a, mahse ka puihna mamawha nung ve ṭâwk ṭawk Nutei chu ka pui thei chuang hauh si lo.

Chuvang chuan kei chu khawvela mihring rethei berte zinga mi ka ni ka inti a, min hmangaih em emtu ka nupui Nutei pawh pui thei lova ka awm chu ka inhua a, engkim chu a bul aṭanga siam ṭhat leh theih ni se ka ti ngawih ngawih.

"Ka pu, i motor keah hian Bulṭu a lut a nih hi, Bulṭu mai ni lovin lung pawh a tam khawp mai" ka motor ke en vel mektu chuan a rawn ti a, kei chuan

"Motor ke spare ka rawn keng mai bawk si lo va, khawngaihin tih dan min ngaihtuahpui thuai teh. Pawisa lamah chuan harsatna ka nei lo, ka motor hi min siam ṭhatsak vat theih chuan ka lawm hle ang" chapo aw rawnkai lek lêk chuan ka lo ti deuh thawr thawt a, ka rilru hmanhmawh lutuk avang chuan ka bula mi chu vin deuh hrâwk mai ka duh a, mahse ka insum hram hram zawk a ni.

"Aw le, i hmanhmawh bawk si a, a ke hi kan han thlak zung zung ang e" a rawn ti ṭha ve leh mai bawk a, aw dam tak leh tlawm taka min biak avang chuan chupa chu ka tluk lo tih ka inhre chhuak leh ta.

Kei chuan in lian leh mawi, hna zahawm tak leh hlawh pawh tamna tak ka thawk a, mahse chung in chhe ve tak taka cheng, hna zahawm leh hlaw ṭha pawh ni chuang lo thawkte nun chu ka awtin ka nei ve leh ta tlat lo thung. Anni chuan chapo aw taka ka be chung pawhin zawldawh takin min lo chhang a, an rilrua inngaihtlawmna nei chung leh customer te kan ni tih hre reng chunga min be ṭha thei chu mak ka ti a, keimah zawk chu an lakah ka insit thar leh ta hle a ni.

Ka motor ke an thlak fel hnu chuan ka bana sana chu ka en vat a, zing lam dar 6 dâwn a lo ni leh reng tawh. Kan inkoh buai chhung leh kan inbiak chhung chuan hun a lo kal ral fê hman tih ka hria a, pawisa te inpe felin ka motor-ah chuan ka ṭhu lut a, hmanhmawh phelengin ka tlan chhuak zui nghal. Mahse, kan hmanhmawh ve em emna ringawt chuan awmzia a nei thui vak lo hle.

Khawnge Nutei chu a awm ang tih ka hre lo va, engtia han zawn hmuh chi nge a nih pawh ka hre chuang lo. Thil hre chhuak leh zawkin ka phone chu ka phawrh vat a, zan lama chanchin tharin Nutei te veng a sawi chu ka ngaithla nawn leh ta thuai bawk.

Hmanhmawh takin Rahsi Veng lamah chuan ka inkhalh phei a, Nutei chu ka hmuh ngei ngei ka ring tawh bawk a ni. Kawngpui sirah ka motor chu tidingin ka chhuk a, dawr lo nghaktute leh mi veivak te chu Nutei chenna an hriat leh hriat loh ka zawt zel ta ringawt. Mak tak maiin Nutei chu an hriat ngai mi a nih loh thu an sawi zel a, chungte chuan a nun ka lo siam ralṭit turzia chu min hriattir leh ta a ni.

Ka beidawng lek lek a, mahse beidawng maithei ka ni lo tih chu ka hre reng tho si. Ka hmanhmawh tawh bawk si leh ka beidawng rilru tawh lutuk chuan Police Station lam chu ka pan ta tawp a, a chhan pawh anni chuan pawi khawihtute an kawl dawn tih ka hriat vang leh Nutei awmna tak an hriat theih ka rin vang zawk a ni.

"Ka pu, khawngaihin min lo pui teh. Zonunmawii awmna hi i hre mial em? Pawngsual tawk Zonunmawii kha a nia ka tih" tiin Police Station ka luh rual chuan ka hmuh hmasak ber chu ka be ta ringawt a, a hre dawn nge dawn lo pawh ka ngaihtuah thleng pha tawh lo a ni ber.

"Ngawi lawk aw, saw ta mi saw va be mai teh, kei chuan kha case kha ka khawih lo hrim hrim a" tiin ka mi biakpa chuan mi dang be turin min kawhhmuh a, chu veleh keipawh chu a sawina lamah chuan ka phei ve nghal thuai.

"Ka pu, khawngaihin Lungleia Zonunmawi, pawngsual tawk ta awmna tak hi min hrilh thei ang em?" ka va ti nghal thâwr a, chu Police pa lah chuan min lo en kur a, min la rin loh hmel em em zui.

"Engvanga hre duh nge i nih? A enge i nih reng reng?" a rawn ti khauh fak a, ka thinrim hmanhmawh tawh bawk si nen a mi biak dan avang chuan ka kut chu ka hum ruh ta vak ringawt.

"Kei hi a pasal ka ni e, khawngaihin a awmna chu min hrilh hram rawh" ka thinrimna zawng zawng dah ṭhain ka ti leh a, min hrilh vat vat se ka ti tawh hle a ni.

"Aw le" tiin Nutei chenna chu min hrilh ṭha ve leh mai a, ka thinrim avanga ka chet chhuah hmaa Nutei awmna min hrilh ve leh mai avang chuan ka lawm ru hle bawk.

Hmanhmawh takin Rahsi Veng lam pan bawk chuan ka inkhalh chhuak leh ta vat a, chu ni ka hman dan chu hmanhmawhna rilru nen hlira hman a ngai a ni ber. Nutei in luahna kawngka zawn ka thlen chuan ka tlai tih ka inhre nghal a, mutmu pawh tuah ṭha lova Nutei hmuh ka tumna chu engmah lo mai a ni tih ka hre bawk.

Sâwt tawh lo vîau mahse a in luahna neitute biak hram ka duh avangin ka lut kawi a, chu in neitute thusawi chuan min tinain Nutei ka khawngaihna chu namên lovin a rawn pung zual leh ta sauh. Nutei chuan ka tel lovin nun a hmang chho a, a laka ka suah sualna avangin kan fa lo piang mai tur a chhiat leh ta bawk a, engkim chu ka thiam loh vek a ni.

Ka nupui Nutei, ani chu ka nupui hlui niin ka nupui ni kher tawh lo mahse ka nupui pangai ang chiahin ka la ngai a, ani lo chu nupui dang neih leh pawh ka tum tawh hek lo. Nutei in luahna neitute in aṭanga ka chhuah hnu chuan thil tih hmaih ka nei tih ka inhre chhuak a, a ranga rangin Police Station lam chu ka pan leh ta thuai.

Police Station ka luh rual chuan lock-up lam chu ka pan a, tute ber nge ka nupui Nutei lo pawngsualtute tih chu ka hriat mai loh avangin ka let leh a, hawihhawm tak chuan pawi khawihtute chu ka biak lawk duh thu police officer pakhat chu ka hrilh ve ta zaih.

Ka mi biakpa chuan ka hmelah ka serious tih a hre ve nge thil ṭha lo ka tih duh a ring lo zawk pawh ka hre lo, awlsam tak chuan pawi khawihtute chu ka biak min phalsak a, an awmnate min kawhhmuhin tute nge an nih tih lam nen min hrilh zui ve mai bawk. Ka nupui, na taka ka lo hliam tawh, ka ngaih em em Nutei rawng taka lo pawngsualtute ka hmuh chiah chuan ka insum thei ta ngâng lo.

Kei aia an tet ve ve avang chuan ka kut thlak chu an dawl lo hle a, police te paw'n chutianga ka chet chu an rin loh lutuk avangin min rawn ṭhelh mai lo niin ka hria. Ka thinrimna, ka khawngaihna leh ka tawrhpuina rilru zawng zawng nena hnek ka ni bawk a, chumite pahnih chu chhuatah chuan an let hlawm tawp ringawt.

"Engvanga buaina rawn siam nge i nih?" tiin police pakhat hian min rawn pawt sawn dâwr a, amah ka en chuan a lo thinrim hmel hle a, kan intiat vîau bawk.

"Hetiang hian i duh duhin i rawn che thei ringawt hleinem, i tana buai lehzualna tur ka siamsak hma chein chhuak rang rawh" a rawn leh hrâwk a, keipawh chu a thusawi ang chuan ka chhuak ve leh mai.

Ka chet dan chu a mawiin a dik pawh ka ti bik chuang lo, mahse dik leh mawi lam ngaihtuah pha lêk lo tur khawpa thinrimin anni pahnih phiangsen khan min siam tlat a tin ni! Ka motor chhungah chuan ka ṭhu ngawi reng a, tuna tan chuan ka haw leh rih mai chu a ṭhat zawka ka hriat avangin Champhai lam pan chuan ka inkhalh chhuak leh ta hna hnâ.

Kal lam ang em emin ka hmanhmawh tawh lo va, ka chhungte pawh thil awm dan hrilhin Nutei chu lo va hmu rih lo turin ka chah nawn tlûk tluk ta ringawt.

Champhai ka thlen chuan ka chau hle a, chau tak ka ni. Tlaivar ṭhakin motor ka khalh a, thil pawh ei ṭha lo khawpin motor ka khalh a, mahse chung ka hrehawm tihna te chu Nutei tawrh lakah chuan nep te a ni.

Nutei thil tawn zo zai ka ngaihtuah chhuah chang phei chuan keimah leh keimah chu ka inhua a, a tawrh ai zawng zawng tawrhsak thei ila ka ti ngawih ngawih. Mahse engmah, eng thil mah chu ka siam danglam thei tawh lo va, inchhirnaa khah mai loh chu tih theih ka nei tawh lo a ni.

Lunglei aṭanga Champhai lama ka inkhalh thlen hnu aṭangin kar khat a liam leh tawh a, Nutei chu Aizawl lama kal chilha hmuh duh vîau mah ila ka ngam lo leh ta tlat. Pawngsual a tawh thu ka hriat lai kha chuan rilru fim pawh pu lovin amah hmuh châknain ka khat a, engtinnge min lo dawnsawn ang tih lam reng ka ngaihtuah pha tawh lo hrim hrim a nih kha!

Mahse Pathian chuan engkim a lo ruat fel sa thlap tih ka hrethiam a, inhmu hman lova kan awm te chu Nutei tana ṭha zawkah ka ngai ta hîal a ni. Mipa ni ve si mahni nupui leh fate pawh venghim zo lo nih chu ka zak a, keimah chu ka insit a, engtikah mah ka inngaihdam theih ka ring tawh lo a ni.

"Ka pu min lo hrethiam lawk, ka tum loh deuhin ka hmu thut che si a, ka be lawk thei che ang em?" ka thil ei mial mial lai chuan hmeichhe pakhat hian a rawn ti sawk sawk a, mahni office chhunga lunch ei reng chu ka ning a, chuvanga kan office building bul dawra thil ei chhuak ka ni bawk.

"Nang chuan min hre kher lo ang a, mahse kei chuan ka hmuh tawh che a, ka hre tawh bawk che" chhang let miah lova ka en reng tâk avang chuan a rawn ti leh a, ka ngaihtuah fê hnuah pawh tunge a nih chu ka hre chhuak thei hauh lo.

"Ihhhh maw, u Nutei ṭhiannu ka nia, inṭhen tawh mah ula i nupui ngaihven leh hi i tum miah lo em ni? Tlêm tal chuan ngaihsak ve leh ta che, nupui i neih leh tawh leh tawh loh chu ka hre chuang lo nâ a, pawngsual a tawk tih kha i hre ve reng reng em?" a rawn tih leh chuan ka thil hawp lai chu ka tawp hmak a, amah ka en chuan ka hma takah a lo ṭhu fel thân tawh.

"Tunge i nih?" ka ti tawi sup a, Nutei chungchang chu hre vek tawh tho mah ila engvanga ka bula rawn sawi leh nge a nih ka hre hauh lo.

"U Nutei ṭhiannu ka ni ka tih tawh kha, u Nutei hi a khawngaih thlak lutuk asin. A fapa, i fa a nih ngei ka ring, a chan tirh te khan awm ngaihna a hre lo va, zan te kha a mut theih loh phah hîal ṭhin" a rawn ti leh chiah chuan ka thil ei engmah a tui tawh lo va, amah chu ka en ta ran bawk.

"U Nutei kha chuan mi tihhlim a thiam si a, a bula awm te kha a nuam thei tawp. Mahse a bulah khan hlim ṭhin vîau mah ila ani kha chu a hlim ve ngai lo va, a chhungril hlim lohnate khuh bona'n a hlim der hmel chu min hmuh mai chauh zawk a ni. Hmangaih neih leh a duh tawh lo va, a sawi dan chuan a hmangaihna sang ber chu a pasal hlui hnenah a hlan tawh a ni. Heng ka sawi duahna chhan hi chu nupui lo nei leh tawh pawh ni la, a ṭhiannu ka nih angin khawngaihin u Nutei hi hmu leh la, i lo hmangaih tawh lo a nih pawhin a thinlung chhungril taka a nui leh theihna'n vawi khat chiah bei turin ka ngen a che. Mak i tih ka ring alawm, mahse u Nutei chuan Lunglei a rawn awm tirh aṭang khan mipa dang a melh awm ka hre ngai lo va, chu chuan a pasal hlui chu a la hmangaih reng a ni tih a tichiang bawk. Tuna i nupui neih mek tan pawh ka thil ngen che hi chu a awm lo vîau tih ka hria alawm, mahse kei chuan hetianga ngen che chauh hi ka ti thei a, tih chi loh leh mawi lo i ti a nih chuan i thu thu a ni tawh e" a rawn tichhuak pârh a, a mittuite chu a tling pam bawk.

"Ka kal ang e" tiin a tho tharh a, lo biak emaw lo chhan vel emaw ka tum loh hrim hrim avang chuan a kal liam lai chu ka thlir zui ta vawng vawng ringawt.

Ka awmna quarter-a ka haw hnu te chuan inthlak lovin ṭhutthlengah chuan ka ṭhu awn duai a, a ṭhiannu'n Nutei lo tawrh nasatzia min hrilhna chuan ka ngaihtuahna a rawn luah leh ta. Inbual pawh inbual tum lovin ka che chhuak phut a, ka phone chuan mi ka be ta vat bawk. Ka rilruah chuan Nutei hmuh ngam loh lampang chu a awm tawh lo va, hmu lova han awm leh tawp chu a dawihzep thlak ka ti hle bawk.

Ni e, eng pawh ni se Nutei chu ka hmu ngei tur a ni. Kan inhmuh avangin a hlim dawn em tih ka hre lo va, engti kawng zawng pawhin ka hmuh ngei ngei a ngai a ni tawp. Ka biak lawk ang ngeiin Helicopter lam pawh an inpeih thuai a, keipawh Helipad Rd Vengsang lama ka nau te nen inkhalh chhovin Aizawl lam chu ka pan zui ta vat bawk.

Tlai dar 4 vel bawrah chuan Ṭhuampui Helipad chu ka thleng thla a, motor-a kal ka nih loh avang leh ka pate Aizawl lamah ka chhuk tih thu pakhatmah ka hrilh lawk loh avangin Taxi chu ka zawng nghal a, a man lam pawh ngaihtuah buai tawh lovin ka hire tawp zawk a ni. Mission Veng kan thlen te chuan ka lungphu chu a rang hle a, Nutei mawlh chu ka hmu châk tawh a ni. Nutei te in bul kan thlen chuan driver chu ding turin ka ti a, pawisa te pe felin ka chhuk nghal thuai bawk.

An in kawngka pawh kik lovin ka hawng ṭhuai a, a hma zawnga hmuh ngam lohna rilru ka lo neih ṭhin te chu Nutei ka thlakhlelhna leh ka ngaihnate chuan a rawn luah khat vek tawh a ni ber. Nutei leh a nu chu ka thawm avangin an rawn hawi rual ṭhawt a, Nutei ah chauh chuan ka mit a fuh ta. A hmai te chu tlemin a la duk deuh a, ka kianga a awm lai ai khan a let tam takin a cher tawh zawk bawk.

Chutah hmanhmawh takin a room lamah a tlan lut vat a, keipaw'n ka um zui nghal. A room kawngka a kalh tlat avang chuan ka hawng thei lo va, kawngka chum dawt dâwt pahin ka hmuh duh thu leh inbiak ka duh thu ka sawi ta lawm lâwm.

Ka pi zawn chuan min lo dang a, ka thil tih lai chu tawp turin leh an ina kal leh tawh lo turin min lo vin vak vak bawk. Ka thil tih lai ka tawpsan duh mai loh avang chuan ka hmaiah tak min rawn beng a, kut min thlak ka lo ring bik lo nen ka thil tih lai chu ka tawp ta chat. Chutah mittui tling pam hian min an khum leh ta hrep a, haw turin min ti chhen bawk.

A lo sawi lawk ang ngeiin ka pu zawn chu a rawn haw a, ka hmel a hmuh chuan a thin a rim hle tih pawh ka hria. Ka lam lo panin ka kawr awmah a rawn ṭham a, min hnek zui ta siah siah bawk. Kei erawh chuan lo indan emaw lo khawih let emaw ka tum chhete lo va, min sawisak chu ka phu ngawih ngawih zawk a ni.

Chutia min hnek mial mial lai chuan Nutei aw ngei mai chuan a pa chu tawp turin a rawn ti a, ka pu zawn pawh chu a duhtawk ve thei ta hram. Min sawisaka min hnekna te chuan ka hmai vel chu tina vîau mahse pawi ka ti lo va, keimah avanga Nutei lo tawrh tawhna zawng zawngte aiin chung min sawisakna te chu a nep ka la ti lutuk.

Ka pi zawn chuan thinrim tak hian lapua min rawn pe a, intifai tura min hrilh angin keipawh chuan an bathroom lam ka pan ve nghal. Bathroom aṭanga ka chhuah leh chuan sitting room-ah an lo ṭhu ṭhap a, an hmai chu ka zah hlawm tak zet a ni. Nutei chuan ka sawi tur neih ang chu sawi turin min rawn ti a, mahse sawi mai tur ka hre miah lo thung.

Ka ngawih reng avang chuan ka pu zawn zawk chuan min rawn vin leh ṭhat a, kei erawh chuan ka tihpalh a nih thu chauh lo chu sawi tur ka hre rih tlat lo.

Ka chhuah dawnah chuan Nutei chu a laka ka chet dan nunrawn thlak lutuk avanga ka inchhir thu ka sawi a, Nutei pawh ka thusawi avang chuan a rawn ṭeu nghal hlar.

Ṭap purin an in aṭanga chhuak turin min vin tûarh a, ka thusawite chuan awmzia a neih tawh loh thu a sawi chîam bawk. A ṭap hmel ka hmu leh chiah chuan ka thinlung chhungril chu a na a, chutiang taka rilru naa a ṭah avang chuan a hmel en reng lova chhuah chu ka thlang ta zawk a ni.

Kan in ka luh te chuan ka chhungte chuan mak an lo ti em em a, Duati chuan min lo kuah nghal chûng chung bawk. Duati chuan thil thleng engmah a la hriat ve loh avangin a bula awm thiam a ngai em em a, mahse a hmuha han nuih luih vel chu thil harsa tak a ni. Ka pa chuan a room lamah min ko hrang ta vat a, kan pahniha kan awm dun hnu chuan thil kan sawi ta nûal bawk.

A nihna takah chuan Aizawla Nutei hmu tura ka chhuk lehna chhan ber chu beiseina tlem te ka la neih vang a ni. Ka hmelhriat miah loh miin Nutei'n min la hmangaih reng thu a sawi avang khan a lakah beseina ka la nei a, chu ka beseina chu a tak a ni nge ni lo tih fiah tumin ka bawhzui ta a ni. Mak tak maiin kei hian ka hre thei, kei hian Nutei'n a thinlung leh tih tak zetin min la hmangaih reng a ni tih ka hre thei tlat. Min huain min hmu duh lo hle mahse ka vawikhat hmuh lehna aṭang khan hmâna ka nupui min hmangaih em em ṭhintu kha a ni tih ka hria a, ka thinlung hian a hre chiang a ni.

Engtinnge a theih zawk? Engtinnge hetiang taka nun harsa leh hrehawma ka siam tawh chung hian min la hmangaih reng theih zawk? Kei hian Nutei hi ka phu lo va, ani ang em ema rilru thianghlim leh hmangaihna ngah hi ka nunah ka la tawng ngai lo. Nutei chu ka thinlung luahtu, engtik lai maha ka theihnghilh theih loh hmeichhia a ni tih ka chiang tawh em em bawk.

Chapter 16

U Hruaia kan ina a lo kal aṭangin kar thum vel lai chu a liam leh tawh a, keipawh ka pangaiin ka ṭha chho leh tawh vîau chuan ka hria. Tin, Feli bawk chu ka tan a ṭha a ni. Engkimah leh engtik lai pawhin ka tan a awm a, ka hlimna turin thil chi hrang hrang min tihpui ṭhin. Presentation leh Class test an neih dawn hi chuan min lo hrilh hmasa thlap zel a, ka tan pawh hian a inthlahrunawm lek lek zel. Feli leh Sir Joseph-a te chu an lo la inngaizawng char char a, ka rin ai takin an inkawp rei phian. Feli min hrilh dan chuan Master degree a neih hnua an innnei dawn a, kei chu ka lo phur ru tawh khawp.

Zan khat chu kan chhungkuain chanchin thar kan en a, chutah ka beisei loh lutuk hmel ka hmu zui bawk. Chanchin thar chuan Champhai District Deputy Commissioner ni lai mek LALHMAHRUAIA chu mimal harsatna a neih avanga a hna chelh lai a bansan thu a rawn puang a, kei chu ka lo ṭhu ngil zawt nghal. Chumi hnuah chanchin thar vek chuan u Hruaia live-a an kawmna chu a rawn highlight zawm zat a, chutah News Reporter pakhat chuan

"Pu Hruai, engvanga hetiang teh thuta i hna chelh lai hi bansan nge i nih? Sawrkar lam aṭangin harsatna i tawk em ni? Champhai mipuite phei chuan kan ui vîau bawk che si" a rawn ti a, chutia an kawmna vel ka hmuh chuan u Hruaia chu Champhai DC a lo ni leh daih tawh tih te chu ka ngaihtuah chhuak hnuhnawh leh vel.

"A, han sawi dawn chuan sawi tur a tam khawp mai" tih te chauhin a chhang a, a bula thil zawttupa erawh chuan a chhan dan chu a duhkhawp loh hmel ngei mai.

"I ban chhan dik tak hi min hrilh thei ang em? Chu chu Champhai mipuite hian kan hriat châk ber leh kan ngaihven ber a ni a, khawngaiha ka zawhnate min chhansak turin ka ngen a che" news reoporter chuan a rawn ti leh duah a, kepaw'n a ban chhan chu ka hre châk khawp mai. India ram angah te chuan DC hnate chu a zahawm a, a ropui mai bakah District hmasawnna atan pawha a pawimawh teh lûl nen chutia a bang ta mai chu ka hrethiam lo hle.

"A chhan chu kei hi ka danglam tawh, ka inthlak danglam tawh a ni. Ni e, tun hma anga hna chauh ngaihtuah ṭhin leh rim taka hna thawk ṭhin kha ka ni tawh lo. Tunah chuan heng ka hnate aia thil pawimawh buaipui tur hi ka nei a, chu chu ka tih ngei ngei a ngai bawk. Champhai mipuite pawh in mi hriatthiamna ka dil tak meuh a, kei aia ṭha leh fel zawk DC thar in hrawn ngei ka duhsak bawk che u a ni" u Hruaia chuan a rawn ti chhuak ve sap sap a, mi ṭawngmawh tih takah a ṭawngkam chhuak reng reng chu a muangin a tam lo hle.

Chutia News Reporter te hmaa a ban chhan dik tak a sawi chu ka lo beisei loh dan deuh a ni a, ka rilruah kha chuan hna dang a hmu emaw ka lo ti hman zawk. Chanchin thar puangtunu'n thil dang a puante chu ka bengah lut mahse a chhuak leh nghal zel tawh a ni ber. U Hruaia chungchang chuan ka rilru a luah khat vek a, amah chu huain duh lo em em mah ila a beidawng hmel leh a nui lui hmel te chuan ka ngaih a tiṭha lo hle thung. Ka ṭhutna aṭang chuan tho tharhin ka room lam ka pan a, la hma víau mahse mut chu ka duh tawh hrim hrim. Ka khuma ka lawn rual chuan ka phone a lo ri a, caller ID ka en chuan Feli bawk a lo ni.

"Hei ṭawngtheinu, naktuk chu inrinni a ni bawk sia, bazar ila?" phone ka pick-up rual chuan a rawn ti zet zet a, ani biak hi chu a nuam ṭhin.

"A ti leh ta, ka duh lo chûng chung thil min lei leh ṭawk palh ang" ka tih chuan

"Awi awi awi, i duh phawt chuan ka lei tawh hauh lo vang che. Awi, i hlimna'n tiin ka lo leisak ve char châr ṭhin che a, tunah chuan lei i duh tawh lo bawk nen ka hah a dam ta huai mai. Tun aṭang chuan ka money leh thei deuh tawh dawn a nih hi" a rawn ti leh ṭeuh a, a va han ṭawngthei ve chiang tak.

"Min lei tawh tawp suh, chuan keimah avangin i money loh phah ngai lo bawk, i chhungte kha i dil bonus ziah tih ka hria" a huat tur tawk lek chuan ka ti a, ani pawh chuan nui kar kar chung hian

"Awi i zak hlawl lo, mahse hetianga i rawn ṭawng leh bawrh bawrh tawh hi hriat a nuam ka ti thung" a rawn ti ve leh nghal bawk.

"Ka zak pit ang, chuan ka ṭawng bawrh bawrh thei lo em ni? Ka ka a ni a, ka thu thu" ka tih let ve leh ta chíam.

"Enteh ṭawngtheinu, i pasal hlui LALHMAHRUAIA lel lul chanchin hi i hre ngai em?" ṭawngkam duham taka a rawn tih leh chuan ka ngawi ta vang vang.

"Hei, i pangai vek tawha ka hriat vang alawm ka rawn sawi chhuah, ka sawi loah ngai mai rawh" a inthlahrung leh deuh si a ni ngei ang.

"Chekhirnu, ka pangai tawh ka tîh ka tih kha, khatiang mai maiah ka buai tawh lo. Enge i sawi tum chu han sawi ṭha teh" ka ngaihtuahna aṭanga harhchhuak thutin ka ti zui ve ta vat.

"Ka sawi tum zawk chu u Hruaia chanchin i hre tawh em ka ti maw le, Aizawlah te i awm leh tawh bawk si a, ani ren run hi in inah te hian a rawn kal reu reu lo maw?"

"Kal chiang e le" awlsam taka ka lo tih chuan

"Maw!? A rawn kal tak tak maw? Enge a lo tih a? Kei chu ka khawngaih thar leh vel ê" awi, henu han duplicate zia hi chu âw.

"Chekhirnu, i ṭhiannu ka ni tih theihnghilh miah suh" fiamthu pah leh titak deuh si chuan ka vin ṭhak a, han vui der vel chîam chu ka nuam tih zawng a ni ve rih tlat.

"Ka theihnghilh aw kawngka lo bawk, chuan eng maw a lo tih? I lo beng hrep em?" te chu a rawn ti leh ang lawi a, u Hruaia a khawngaih thu a sawi zo chiah a ni lo'm ni?

"Tak takah Fel, a hmel ka hmuh tirh chuan ka rilru na lutuk kha ka room-ah ka tlan lut daih a, a hmel ka hmuh khan ka thil lo tawn tawh zawng zawngte ho kha an rawn inlar ṭha leh ni maiin ka hria" ka aw chu a ring lutuk tawh lo va, ka mood te pawh a rawn inthlak ta vek bawk.

"A ni thei lutuk ang, chuan thil ka hrilh ang che aw?" a rawn tih chuan

"Imm" ka lo ti ve vat.

"I tlanbo tirha a zawn che khan ka bulah a lo kal a, chuan i chunga a chet dan ka hriat khan a hmaiah ka lo beng chawrh alawm. Khatih hun lai kha chuan maw, ka ngeiin ka haw tak zet. Kei i ṭhian ṭha ber pawh i kalna tur hrilh ngam lo khawpa a lo siam che kha ka thinrim chhan ber pakhat a ni" pangai tak chuan a rawn ti a, ka chhungte leh ka ṭhiante'n chuti taka min lo ngaihtuah chu ka ring pha lo a ni.

"A nih chû, mahse khangte kha chu hun kal tawh a nia, a ho tawh em mai, sawi buai vel tawh lo zawk teh ang" rilrua vei nei tawh miah lo ang zet chuan ka ti chhuak leh thuai a, ka rilruah erawh u Hruaia chu a awm lo thei chuang miah lo.

"Dik chiah, mahse eng maw kan tlangval senior hausa suala chuan in inah a rawn tih?" u Hruaia hminga 'suala' tih a lo belh leh hman tawh chuan min tinui leh nasa hle.

"Biak pawh kan inbe em em lo. Ka room-ah ka inkalh hnan tlat a, chutih lai chuan ka pa a lo haw thut a, ka nu chuan loh theih lovin min ko chhuak ta chauh alawm" ka tih chuan

"I pa chu a sa ve khawp ang le" a rawn ti a, sa ve tur pawh a ni alawm le.

"Sa tak a ni. Ka room aṭanga ka chhuah chuan ka pa hian u Hruaia chu a lo hnek mial mial a, u Hruaia pawh a thi nasa khawp mai"

"A phu tawk chiah a hmu a nih chu!"

"Naktuk chu duh leh kan bazar dawn nia, chuan inhlawhna tur ka zawng bawk ang" tiin thupui dangah chuan pakaipui ka tum ta zawk.

"I chhungte'n i inhlawh an phal reng reng em ni?" ka rin tawk chiah a ni. Ani hi chu engtik lai pawha zawhna ngah liani kha a ni mîau alawm.

"Phal tehreng mai, ka pa phei chuan ka rilru tihthawvenna'n inhlawhte chu ṭha a ti lutuk zawk" ka tih chuan

"A nih lo inhlawh ta la, pawisa chu eng atana hman nge i tum? I ṭhiannu hi in min leisak dawn em ni? Nge ka pasal neih huna insenso ngai zawng zawng min tumsak zawk dawn?" a rawn ti zawt zawt ngam a nih chu!

"Chekhirnu, zak ve lûl teh. I sawi ang chuan pakhatmah thil a thleng lo vang, ka inhlawhna chhan turte chu thil dang daih"

"Inhlawh i duhna chhan chu min hrilh ṭha ve mai ta reng che" a rawn ti ve phiarh a, a zia tak tak hi a chhuak leh fô ṭhin.

"Khatianga ṭawng rin thut thut kha sim vang vang teh, chuti lo zawng pasal tur i hmu lo palh ang e"

"Sawi kâwi sawi kawi lo khan min hrilh ṭha vat mai teh"

"Ka hrilh dawn reng che alawm, dawhthei lo falnu. Pawisa khawl ka duh a, a chhan pawh dawr siam ka rilruk deuh vang maw le" ka tih chuan

"A va ṭha phian ve, mahse lehkha hi zir ṭha leh la ka lo duh nen" a rawn ti sep a, a sawi pawh chu a dik reng tho.

"Nâaaaaaaaa Fel, ka zir zawm tawh lo mai ang. A tirhah kha chuan zir leh ka duh ve tho a, mahse tunah chuan ka duh tawh lo. Lehkha zir zawm leh vel ai chuan dawr siam a, mahni ke ngeia sumdawnna ṭan chhoh chu ka duh tawh zawk a ni" ka tih chuan

"Awi ka ṭhian, i lo puitling tawh hle mai. Nakinah i dawrah chuan min thawhtir ve ngei ngei ang che" nui thler thler vak vak chuan a rawn ti a, keipawh chuan

"Over vel lo mai teh" lo ti ve in kan nui dun leh ta hak hak.

"Chuan, i nu leh pate khan an phal hrim hrim ém? I hrilh tawh ém? Nge i la hrilh lo zawk?" a rawn tih zawm leh zat.

"Ka nu leh pate chu ka sawipui vek tawh a, min hnialna pawh an nei hran lo, min duhpui vîau zawkin ka hria"

"A ṭhat hlauh chu! Keipawh i duh dan chu ka support e, chuan naktuk chu ka lo sawm dawn che a nia" a rawn tih leh chuan

"Aw le" tiin ka lo chhang a, rei lovah kan inbiakna pawh kan titawp zui nghal.

A tukah chuan Feli nen chuan kan bazar a, kan hlim dun leh hle. Chhunah chuan Floria Glamour building-a Aroma Restaurant-ah chuan inhnawh puar turin kan chawl a, an ei siam chu a lo tui hlawm zék leh nghal. Feli chu a titi leh siam siam tawh a, kan piaha mi ang lo deuh hlek lo awm chu engtin tin emaw ni sawisain kan nuih leh tâk chîam kha! Mi ang lo leh rualban lote hi ka khawngaihin ka nuihzat mai mai ngai lo va, mahse Feli'n ṭawngkam awm ang tak taka a'n sawisa chiah chu nuih ka insum thei thlâwt lo. A sawi ang si, chutah ami sawisak pa chuan a lo la zir em em bawk si. Tlai dar 3:30 velah chuan in lam panin kan inphur haw a, thil sawi pahin kan innghawk leh nawk nawk zel.

Zana chaw kan ei kham chuan kan eina vel seng fel sawk sawkin ka room-ah ka lut a, bathroom lam chu ka pan zui nghal bawk. Ka period lai a nih avangin ka pad chu ka thlak mawlh mawlh a, pakhat chiah a lo awm tawh tih ka hmuh chuan lei belh a ngai ngei dawn tih ka hre bawk. Ka room aṭanga chhuak lehin ka nu leh pate chu dawra ka kal lawk dawn thu ka hrilh a, anni pawhin ngaihngam takin min chhuahtir ve mai. Aizawl ka awm aṭanga ni tam tak chhung kha chu ka chhuah an phal mang lo va, thil pawi a thlen leh lohna'n keimah chu min khuahkhirh a ni ber. Amaherawhchu, ka zia a rawn pangaia ka hlim chhoh ve leh ṭan bek bek takah chuan zawi zawiin min hrethiam a, mi pangai cheiin min chei ve tial tial bawk.

"Nute" kawng chhak lam aṭanga rawn titu an awm avang chuan ka phu chiang kher mai. Ka hminga min rawn kotu chu tunge a nih ka hre lo va, ka thil lei haw lam a ni bawk nen hmanhmawh takin ka tlan zui nghal.

"Nute" tiin tu emaw ni bawk chuan ka banah a rawn man bet a, ka rilru chu hlauhthawnna hlirin a khat tawh. A hmaa ka chunga thil thleng tawh chu ka hre chhuak a, a thleng nawn leh ang tih mawlh chu ka hlau a ni.

"Nute keimah Hruaia, hlauthawng suh" ka tal chîam tur chu a rawn ti a, amah a ni ang tih rin ngaihna reng ka nei lo.

"Au suh, hlauthawng lo la, ka tina dawn lo che" hlauh lutuk avanga ka au chhuak tur chu min lo hmu hmanin ka ka chu a rawn hup bet a, ka ka a hup reng chung chuan au chhuak ve mah ila thawm ring tak erawh ka chhuah thei lo.

"Nute keimah ka nih hî, min hlau duh suh. Ka tina dawn lo che a, ka tina leh tawh ngai bawk hek lo vang che. Ka duh zawng chu, nang, ka duh zawng chu i taksa sik leh nang kuah chauh che hi a ni" a rawn ti thawp leh raih a, tunge min min man bettu tih hriat tuma a hmel ka en chuan u Hruaia chu a lo ni tak tak.

"I hmui ka hup behna hi ka thlah dawn a, khawngaihin au chhuak lo hram ang che aw Nute" a tih chuan a mitah tak ka lo en kar a, a hmelah chuan natna benvawn vei ang maia chauhna hmel a lang a, a awm dan vel avang chuan enge tih ber tur pawh ka hre lo zo vek.

"Nute, ka ngai lutuk che, ka ngai ṭhin lutuk che asin. Chuan i taksa hi ka sik min phalsak hram teh, i taksa hi ka kuah châk lutuk tak zet" tiin ka phalna pawh la hmasa ta chuang lo chuan min rawn kuah nghal a, ka hmui a hup behna a lak thlak tawh avangin min kuah nghet ngei mai.

"I chunga ka chet dan tenawm tak leh rapthlak tak avang khan ka tihpalh, khatiang thil i chungah ka thlentir avang khan ka inchhir lutuk asin" min kuah reng chung chuan a rawn ti zui mawlh mawlh a, kawng chhak thim lai deuha min kuah beh tlat avang chuan kawnga kal min hmu thei tur pawh an awm vak lo.

"Nute, khawngaih takin ka bulah lo let leh rawh. Khawngaihin, i tel lo chuan ka awm thiam lo va, i tel lo chuan êngmah ka ni lo a ni" a kuta ka biang tawn tawn vuan chung hian a rawn ti leh a, ṭul lo bak sakin ka mittuite chu an lo tling nghal pam a, a hmaa ṭah ka duh reng reng hleinem.

"Nute, khawngaihin min chhang teh, kei hi min be duh lo em ni?" ṭawng lova ka la ngawih reng avang chuan a rawn ti leh a, zep lovah chuan chutianga min ngaihtuah hmel deuha a awm vel avang chuan ka ṭap chhuak thei mai dawnin ka hria.

"Kan inhmuh tawh loh ngei ka beisei" tiin min chelhna chu ka kuai thla a, kal sawn mai ka tum chu a aia nghet lehzual zawkin ka hnung lam aṭang chuan min rawn kuah leh ta thlawp.

"U Hruai, min thlah teh. Hetianga kan awm hi a theih tawh loh" tiin ka tal a, ani erawh chuan min thlah a tum lo nasa mai.

"Nute, inbe lawk ang aw? Ka motor chhungah rei lote inbe lawk ang, a hmaa i chunga thil lo thleng tawh ang khan i lakah hian ka che ve dawn lo tih pawh i hria alawm. Khawngaihin, khawngaih takin inbe lawk ang" a rawn ti leh thuai a, hamhaih hmel taka ka awm chu a hrethiam a ni chêk ang.

"Engvanga thil min sawipui chu la duh ṭalh nge i nih? Kan inah khan i sawi tur neih zawng zawng chu i sawi tawh a ni lo'm ni?" min thlah vat se ka duh tawh a ni.

"Aih, ka la sawi zo reng reng lo. I hnenah hian sawi tur ka la ngah lutuk, chuvang chuan inbe lawk ang Nute?" tiin kan piah lawka a motor chhungah chuan min nawr lut zui zat a, dan tumna pawh ka nei lo hrim hrim chu mak ka inti zawk.

"Enge ka tih ang?" motor chhunga kan ṭhut ngawih vang vang hnuah chuan a rawn ti chhuak sup a, a thil sawi ka hriatthiam loh lutuk avang chuan amah chu ka en zui ta hâw ringawt.

"Ka bula i lo chen leh theihna'n hian enge ka tih ang Nute? Ka bula i lo let leh theihna tur a nih phawt chuan eng pawh sawi rawh, ka ti vek ang" ka lam lo hawi pah chuan a rawn ti leh a, kei chuan amah ka enna aṭangin ka mit ka la sawn a, ka hawi sawn daih thung.

"I hnena lo kir leh hi ka tum tawh lo" thinglung chhung zawng zawng thinrimnaa khat chung chuan ka ti ve hmak a, ani erawh beidawng hmel tak hian a rawn thaw huai.

"Nute, engvanga i chunga khatiang em ema nun rawng kha nge ka nih hi tun thleng hian ka la hrethiam thei lo, ka hre lo tak zet a ni. Nang ring lova LALRUATSANGI ka lo hruai chhuak ringawt te kha khawvela ka thil tihsual lian ber chu a ni chiang alawm" mahni inthiam lohnaa khat aw hian a rawn ti chhuak sup a, motor steering chu a bawh ngul bawk.

"U Hruai, ka haw duh tawh a nia" ka tih pawh chuan a che sawn lo hrim hrim a, motor kawngkhar hawn ka tum lahin a lock tlat bawk si, ka hmanhmawh rilru tawh vîau a ni.

"Han sawi teh le Nute, ka hnena i lo kir leh theihna'n hian enge ka tih ber ang? Nge min haw kumkhua dawn zawk?"

"Aw, ka haw kumkhua dawn che. Ka tawrh ang kha tuar ve ta la, min ngaidamin ka bula i lo let leh duh hi i inring reng reng em ni? Nge kei hi mimawl emaw min ti zawk em ni?" thinrim aw ki takin ka ti ve ta phiar phiar mai.

"Min haw lutuk tiraw?" a rawn tih chuan

"Aw, ka haw lutuk che LALHMAHRUAI" ka lo nghal vak bawk.

"A nih chuan phuba la rawh"

"Enga?" eng thu chiah nge sawi a tum pawh chu ka hre lo va, kei ang thovin a rilru a buai vek tawh zawk te pawh a ni mahna.

"I tel lova awm ka thei tawh lo Nute, phuba la tur talin ka bulah lo kir la, i bula ka awm leh theihna tur a nih phawt chuan ka tuar thei em em ang. Hrehawm taka ka siam ang chiah che khan min siam ve phawt la, ka pawisa zawng zawngte chen ral la, tichuan i laka ka inthiam lohna te chu a reh ve thei mahna"

"I laka ka thil tihsual zawng zawng i theihnghilh theihna'n ka chungah hian phuba la rawh, Nute. Ni lo, eng ang pawhin ka chungah phuba la pawh ni la i chunga ka chet dan nunrawn thlak lutuk avang khan keimah leh keimah zawk hi engtikah mah ka inngaidam thei leh tawh ngai lo vang" a rawn tih zawm leh nghal zat a, han chhan mai dan tur pawh ka hre rih lo.

"Min haw tir vat teh, ka nu leh pate paw'n rei min ti tawh lutuk ang"

"I duh ang thâla min tihhrehawm hnuah chuan ka tibuai leh tawh ngai lo vang che, nangmah ang chiaha thinlung na leh hrehawma ka awm hunah chuan i duh leh min ṭhen ang a, i zalen kumkhua tawh ang" ka thusawi ngaihsak lo zet chuan a rawn ti leh a, min haw tir vat loh avang chuan ka thinrimna a rawn chhuak leh ta phat mai.

"LALHMAHRUAI, ka thinrimna hi cho chhuak ziah suh. I duh chuan ni dangah pawh kan la sawi dun thei, tunah chuan ka haw ngei ngei a ngai tawh" thinrim tak chuan ka ti leh phiar a, a sama keh bawrh bawrh te chu ka châk lutuk, mahse chutiang tih velna hun a ni ber lo.

"Aw le, i sawi ang ngeiin ni dangah kan sawi ṭha leh ang aw Nute, chuan tun atan chuan ka thlah haw ang che" aw dam taka a rawn tih leh chuan ka ṭawng sual tih ka inhre nghal.

Ngawi reng chuan kan chuang dun a, kan in zawn kan thlen chuan motor kawngka hawngin ka chhuk nghal vat. U Hruaia chu engtinnge a awm tih lam pawh ngaihsak tawh lovin kan in chu ka pan ding a, kawngka hawngin ka lut ta daih.

"Nute, i va rei ve" in ka luh rualin ka pa chuan a lo ti a, ka rin tawk vel reng a ni.

"Nia pa, ka va dawrnu kha a ṭawng tui reuh lutuk a, ka lo haw har ta deuh alawm" mahni pate bula dawt han sawi tlawng chu nuam lo duh tak a ni. Mahse, ka awm dan zawng zawngte leh thu dik hrilh chi lah chu a ni der si lo.

"Aw a nih chu, kan lo ngaihtuah hman che alawm" ka pa bawk chuan a rawn ti ṭha ve leh mai bawk.

Ka room-ah ka chho a, mu turin ka inbuatsaih nghal. Ka khumah chuan ka mu meng kar a, ka thluakah chuan u Hruaia thusawi hlir chu a awm leh ta tlat. Engtik ni ah emaw chuan kan la sawi dun leh ngei dawn tih ka chiang a, thuthlukna siam chu a harsa hle a ni. Ka rilrua a tam zawk chuan

"Let leh la, i chunga a tih ang chiah khan a chungah phuba la ve la, phuba i lak zawhah i ṭhen hlen vang vang dawn nia" an rawn ti a, a tlem zawk erawh chuan

"A ho mai mai, engmah sawtna a awm tawh chuang lo" an lo ti ve thung.

Ka thinlungah chuan tawrh tir ve châkna rilru chu ka nei lian em em a, a chhan bulpui ber chu engtiang chiaha harsa nge ka lo paltlang chu hre ve se ka duh a ni. Ka sual em em vang ni pawhin ka hre lo va, mihring ka nih vang ni ber zawkin ka hria. Mihring chuan rilru sual chang te, dawhtheih tawp hun emaw tih theih loh hun neih chang te kan nei vek a, chutiang hun a lo thlen chuan engmah kan ngaihtuah thui pha tawh lo ṭhin.

Vanneih thlak takin Aroma Restaurant-ah waitress hna ka hmu ve hlauh a, ka lawm tak tak a ni. A tirah chuan vanglaini aṭangin hnaruak ka zawng chho ṭan a, ka hmu mai lo nghe nghe. Mahse kar khat hnu vel lawkah Aroma Restaurant chuan hmanhmawh thil thua waitress hna thawk duh tur an mamawh thu an lo tarlang a, kepaw'n a ranga rangin ka bawhzui nghal. Hna thawk tur an mamawhna a nasat êm tawh avangin a be hmasa bertu keimah chu min lo la a, chutiang ni lo se chuan ka thawh theih kher pawh ka ring lo. Chutia awlsam taka hna ka han nei mai chu Feli leh ka nu leh pate chuan min lawmpui em em a, ka hlimna apiang ka tih chu an duh ni maiin ka hria.

Tunah chuan thla khat lai ka hnathawhna hmun tharah chuan ka thawk ve leh tawh a, hnathawk dangte nen chuan la innel lutuk lo mah ila sual tak leh thawhpui hrehawm tak an niin ka hre lo. Lungleia ka thawh lai khan kan dawr kha lun ka ti thei em em a, mahse tunah ka thawhna hi a lun lehzual zawk. Mi hausa leh awm thei hmel tak tak te chu an rawn inluh chhawk chhên a, thawk hah lutuk lo mah ila mawng hun lai kan nei mang lo. Lunglei lama ka thawh ṭhinna dawr ang lo takin kan dawr neitu chu hmeichhia a ni a, a strict hmel tawp bawk.

Nilaini a ni a, dawrtu chu kan ngah ang reng hle. Aroma Restaurant-a ka thawh hnu aṭang hian ka pa hi kan dawrah lunch a rawn ei ziah a, mahse ka thawhpuite chuan tunge a nih an hre chuang lo. Ka pa hi Art & Culture Department lamah First Class rank hna hi a thawk ve a, a hnathawhna hmun leh kan dawr awmna hmun chu a inkar hla lutuk lo mahse a lo kal ziah peih chu mak ka ti zawk. Ka rilrua a lo lan lai takin ka pa chu kan dawr panin step-ah chuan a lo chhuk a, ka phone-a dar zat ka en chuan ni danga a lo kal hun aiin a tlai deuhin ka hria.

"Nute, ka ei duh zawng kha chu i hriat kha aw" customer te ṭhutnaa a ṭhut fel hnua a bul ka va thlen rualin ka pa chuan a lo ti a, customer dangte ang thova ka lo welcome ve zel a ngai bawk nen a bulah chuan ka kal ziah ta ṭhin a ni.

"Aw le pa, chuan hetianga in office building aṭanga kan dawra lo kal vang vâng hi i ning ve lo em ni?" paper-a a thil order duh tur ziah mawlh mawlh pah chuan ka ti a, zep lovah chuan min lo dawra ka hmuh theiha a awm ni tin ṭhin chu nuam ka ti hle a, a hmel ka hmuh hi chuan hlauhthawn rukna ka nei tawh ngai lo bawk.

"Eng chu nge ning se min tih a? I pa hi min lo zahpui ru reng zawk em ni?" a hmel en kher lo mah ila a fiamthu tih chu ka hria.

"Nâ pa, chutiang zawngin ka sawi lo tih i hriat reng kha"

"A nih eng lampang zawngin nge i sawi?"

"Ka sawi awmzia tak chu in office-ah pawh a thlawnin i ei thei reng a, hetia traffic jam kara lo kal ngai lo hian" ka tih chuan

"Ka fanu hi engtiang chiahin nge hna a thawh tih ka hmu duh alawm, i thil tih duh kan tihhlawhtlin theihna'n i in train mek tih hre rawh" a rawn ti a, nui sak chungin a hmel chu ka en ve nghal.

"Min tiam tawh tih kha ka hre reng dawn a nia, pa ka kal mai ang" tiin ka tho hluai a, lu a lo buk nghut avang chuan ei siamna lam chu ka pan ve mai bawk.

Ka pa chu a ei zawh chuan an office lam panin a kal chhuak ve leh mai a, min ngaihtuah taka a awm leh ka bul hnaia a awm reng zel hi a ruk tak chuan nuam ka tiin ka thla a muan phah ṭhin ka tih tawh kha! A fanu ka ni a, min hmangaih em em a, tawhsual ka tawh leh palh chu a hlau a ni. Ka nu bulah erawh ka thawhna dawra lunch a lo ei ṭhin chu hrilh lo turin min ti tlat a, a chhan ka zawh lahin

"I nu hi chuan pawisa a ren kikawi kual vel leh ang a, lunch eina'na pawisa ka hmangral mai mai te hi a la thutak leh dawn lutuk" a lo ti mai zel.

A dik ve chiah. Ka nu hi chu pawisa ren thiam tak leh chhungkaw mamawh hre zet mai hi a ni a, a ṭul lovah chuan pawisa hman mai mai a phal ngai lo bawk. Amaherawhchu, ka nu hi mi sual leh rilru chhia a ni lo. Mi ṭhenkhat chuan

"Min hringtunu te chu kan fak lo thei nâng, kan hmu felin kan hmu ṭha vek zel alawm" an ti ṭhin a, mahse hetiang ngaih dan hi a dik vek lo. Mahni nu leh pate hi an ṭhat lohnaah chuan faka sawi ṭhat vek hi a fuh ber lo tih ngaih dan chu ka nei lian em em a, hriat loh emaw zilh emaw an ngaih chuan kan hrilhin kan zilh ve mai tur niin ka ngai.

Tin, ka nu hi ṭhenawm khaw vengte hi chuan mi ṭawng hlawk hlawk chi leh mi chikiuh ang chi te'n an ngai a, a ṭawng a zawih loh avang leh ze tlang tak a neih avang chuan mite hian a zia chu an rin thu sawi mai mai zel. Ka nu ṭhat ve lehna êm em chu thil tih dik loh emaw hriat loh emaw a neih hian kan hrilh ve ṭhin a, ani pawhin kan sawi ang chuan a insiam ṭha ve leh mai zel. Ka pa lah ṭawng ring em em lo leh mahni thu duh ve tak mizia a ni a, inmil lo vîau angin lang ṭhin mahse an inhmangaih tawnna chuan nupa inkara innghirnghona chhuak tur chu a tibo daih zel.

Dar khat leh tlêm vel a ni a, kan awl lai tak a ni bawk. Awl tihah customer te buaipui ngaih loh lai tak a ni. Mahse kan ṭhu hahchawl ngai chuang lo va, dawhkan nawh fai vel leh eng eng emaw tih tur chu a awm chawp ve zel. Chutia dawhkan vel ka lo nawh fai mawlh mawlh lai chuan kan dawr chhung lam pana mi lo kal hi ka mit sir chuan ka hmu a, customer an nih ringa lo welcome ka tum chu ka ṭawng thei ta hauh lo. U Hruaia chuan min en reng a, ka awmna hre saa lo kal te pawh a ang ka ti.

"Nute, khatianga ngawi reng lo khan customer te kha lo buaipui ta che, khatiang te chuan customer kan chân kan chan mai dawn asin" kan pi berin a ṭhutna aṭanga a rawn tih chuan ka harh zawk a, ka awm dan chu ka siam ṭha vat bawk.

"Ka tihpalh" tiin kan pi ber chu ka chhawn ve vat a, ka awm dan vel avang chuan kan pi lakah chuan ka inthiam lo ru zui hle.

"Ka pu, lo ṭhu rawh. Eng lam pang nge i ei duh ang?" tiin U Hruaia ka bula ding reng chu ka zawt a, ani erawh ka koh dan veng nge a lo nui suk ringawt. Chutah ṭhu tura ka tihna hmuna ṭhut thlak pah hian

"Chicken Biryani ka lo duh ang e" a rawn ti chhuak sup a, a thil order avanga amah ka en rengna mit chu min en let reng tak avang chuan ka la sawn rang hle.

A thil order hmingte chuan kan nun hlui kohkir theih tawh loh chu min tihre chhuak leh tlat a, nupa kan nih laia kan thil ei nasat ber chu Chicken Biryani kha a ni ṭhin. Kan nupaa len chhuah dunte kha nei tam lutuk ṭhin lo mah ila kan chhuah dun apiang kha chuan kan hlim dun thei hle. A bula awm te kha nuam ka ti a, inpawh taka kan awm hnu phei kha chuan min hmangaih thu a sawi hun chu hnai vîau tawh turah ka lo ngai hmiah zel a nih kha! Mahse vawilehkhatah engkim kha a buai zo a, duh lo hle mah ila kan pahnih tana a ṭhat zawkna'n ka chhuahsan kha a ngai ta tlat si.

"Aw le, rei lote bak nghah a ngai lo vang" tiin kan ei siamna lam chu ka pan phei a, order anga siam turin kan ei siamtute pawh ka hrilh zui nghal.

Order an siam zawh chuan u Hruaia lamah ka chawi phei a, a dawhkana ka dah chuan min en tawh lem lo hian lo banin a ei ve ta mial mial. A awm dan chu ka lo chik ru reng a, dawhkan rin chhana phone khawih mual mual pahin a thil chah chu a ei bawk. Mahse, rei erawh ka en thlithai hman ta lo. Customer dang an rawn luh belh thut a, kan awl lai emaw ka tih chu buai laiin a rawn luahlan zui nghal. Nilaini a nih avangin kan Restuarant chu khar hmain kan bang hma ṭhin a, tlai danga dar 4 emaw 4:30 emaw thleng thawk ṭhin kha nilaini hi chuan tlai dar 3:30 velah kan bang ta thung ṭhin.

U Hruaia ṭhutna lam ka hawi leh chuan a lo ruak huai tawh a, a chhuah lai awm rêng reng ka hre lo. Darkar hnih zen zawn a ral leh hnu chuan kan pi ber paw'n insaseng tur leh dawr khar lam hnaih turin min hrilh a, enge a chhan pawh ka hre lo ban vat vat chu ka châk rilru tawh hle. Dar 3:30 rikna'na minute 15 vel chauh a awm tâkah chuan dawr chu kan inkhar ṭan a, kan inkhar fel a ni deuh ber tawh zawk. Kan dawr piah lawka bus stand awmna chu kein ka pan phei a, thui pawh ka kal hma chuan ka hminga min kotu hi an lo awm a, min kotu chu tunge a nih ka hriat chuan ka hamhaih leh ta hle. Ani hi zawng min tihamhaih reng a, min tina a, awm dan tur pawh hre lo khawpin min siam thei zel zawng a nih hi!

"Nute, ka lo thlah ang che" tiin u Hruaia chu ka bul hnaiah a rawn ding a, ka lo tawlh sawn deuh dâwr thung.

"A ngai lo ve, bus in ka haw thei alawm" pangai tak chuan ka lo ti ve mai.

"Ni lo, ka thlah zawk ang che. Ka thlah duh vang che a nia ka lo ngah char char che" ka kut rawn vuan chung hian a ti leh a, min vawnna chu thin thlak tum mah ila a vuan nghet khawp.

"Kei min nghah a ngai lo va, min thlah pawh a ngai hek lo"

"Miin min en ṭhup a nia, ka motor-ah i lut vat zawk teh ang" ka chhanna pawh ngaihsak tawh lo chuan min kai dawr dâwr a, kawnga kal leh motor-a chuang mi ṭhenkhatte chuan min lo en duh tak tak hle.

"Hetianga ka nawrluih ziah che avang hian min huat belhchhah ngawt ang tiraw Nute?" motor tinung pah chuan a rawn ti a, zawimuang chuan kan tlanchhuak zui nghal.

"Kan inkarah engmah a awm tawh loh avang leh i laka eng rilru mah ka put tawh loh avangin ka haw tawh lo zawk che" keimah ngei pawh chuan dawt chiang bal ka sawi tih ka inhria.

"Haha, min haw reng tih hi ka hming ka hriat chian tluk zetin ka hre chiang alawm Nute" nui ri hak chung hian a ti a, a hlim avanga nui erawh a ni bik hauh lo.

"Hetia min phurh theih avang hian i ngaih tihṭhat phah lo la, i thusawite kha ka la hre reng tih hre bawk ang che" ram hmak chuan ka ti a, ani chuan a phone chu khawih mual mualin hla a lo play daih.

* I tel lova hringnun hman ka zuam mawlh lo,

Suihlung len hian chin lêm a nei si lo,

Ṭah ruai ka nuam ma'ng e,

I tawn leh ni awm si lo,

I tel lo chuan,

I tel lo chuan,

Nun hian awmzia reng a nei si lo *

tih hla chu a rawn play chhuak a, ka ngawi chiang hle. Kan pahnih hnîh chuan kan ṭawng chhunzawm tawh lo va, kan nun hlui chu kan ngaihtuah let ve ve ka ring bawk.

Kei chuan nupa kan nih ve lai bawk chu ka hre chhuak leh a, a hla play te chuan kan nun hlui chu kan hmaa TV screen-a movie chhuak ang maiin a rawn pho chhuak a ni ber. Mizo lengzem hlate zinga kan duh ber chu 'I tel lo chuan' tih hla kha a ni ṭhin a, motor-a kan pahnih chauha kan inphurh kha chuan kan play ngei ngei zel. Kan duhna chhan ber chu inṭhen kan duh loh ve ve vang leh a hla thlûk a nalh em vang a ni a, kei chuan a tel lova awm ka duh loh vang a ni ber zawk. Ani chuan a original version zawk, Albatross band sak kha a duh a, kei chuan Mami Varte sak kha ka duh zawk ṭhin. Ka duh ang version a duh loh avangte chuan ka hnial chîam ṭhin a, a duh ang version chu ka sawisel nasa thei hle a nih kha! Mahse khatianga kan inhnial vel kha a nuam a, kan hlimpui thei hle thung.

Tin, a hla play chu ka duh ang version zawk Mami Varte sak a la ni lehzel a, kan tlanchuah tirh aṭang chuan a la play nawn char char zui. A hla play chu ka ning lo va, ka nin ngai pawh ka ring lo. Ka mit chu ka chhing vang vang a, ka rilru chu a ṭap hawm hawm ni berin ka hria. Pawn lamah erawh ka ṭap lang em lo va, a hmaa ṭah vel chu ka rilru chapona chuan a phal tlat lo a ni. Ka mit ka men leh rual chuan Mission Veng biak in peng kan thleng thla chiah tih ka hmu a, rei lovah kan in kawt pawh kan thleng thla thuai bawk. A hla play chu a off a, chutah ka chhuk tur chu

"Nute, i inpeih tawh em?" a rawn ti a, keipawh chhuk ta lo chuan amah chu ka en ve ta kar.

"Eng thil atan maw?" thil awmzia sawi hmasa hawt si lova zawhna inzawh tawp tawp a chin hi a lo la bansan lo tak zet a nih dawn hi!

"Thil sawi dun tur kan la neih kha" a rawn tih chuan ka taksa chu a ṭang nghal ṭung.

"Ka ngaihtuah fel vek tawh" ka ti ve ta hmak. Ni e, ka ngaihtuah fel vek tawh mîau alawm.

"Aw le, a ṭha e. Zaninah ka lo lam che ang a, zanin la lâ hian kan sawi fel dawn nia" a tih chuan ka chhang let tawh lo. Engmah sawi lovin kawngkhar chu ka hawng a, ka chhuak zui nghal.

"Nute, engatinge i phone i lak theih loh? Rawn lam kawi ka tum che lahin in lo bang daih tawh bawk si, eng thil nge i tih reng reng?" in ka luh rualin ka pa chuan min ngaihtuah zet hian a lo ti a, ka pa chuan min hmuh mai loh avangin min lo zawng nasa leh dawn tih chu ka hre mai.

"Nia pa, kan bang hma bawk sia, mi dangin min lo thlah ta alawm" a hlauhthawn lutukna tihreh ka duh avang chuan ka ti ṭha ve mai bawk.

"Tunge rawn thlahtu che chu ni reng reng? Ka hriat zawng te a ni em?" ka rilru chuan 'I hriat zawng a ni chiang khawp mai' a lo ti a, mahse pangai taka thil sawipui tur ka nei tih chu ka theihnghilh thiang lo.

"Ihhhh, u Hruaia a nia" ka tih chuan

"Kha mihring phiangsen khan a lo la hnaih ngam vel chea maw? LALHMAHRUAIA chuan min va han zah lo ve le" thinrim tak chuan a rawn ti a, ka nu pawh kan thawm hriain room aṭangin a lo chhuak ve nghal.

"Pa, nu, thil sawipui lawk che u ka duh a ni. Chuan, ka thusawi tur hi vawi tam tak ka inngaihtuah hnua ka thuthlukna a ni tih min hriatsak dawn nia" tiin kan sitting room lamah chuan ka phei a, ka nu leh pate pawh a ngaihna hriat loh hmel zet hian an lo phei ve mai bawk.

"Nute, a theih loh , ka phal tawh lo. I nat leh hi ka phal tawh lo hrim hrim" ka thuthlukna leh ka tum dante ka sawi zawh rualin ka pa chuan a rawn ti nghal vat.

"Ni lo pa, i fanu hi a hmaa Nutei kha ka ni tawh lo tih hre ta che. In rilru tur chu ka hrethiam alawm, mahse ka sawi anga ka awm lo a nih chuan ka thinlung hi a dam thei dawn lovin ka hre tlat a ni" ka lo ti ve thuai a, ka pa erawh ka thil sawi avang chuan a lung a la awi thei lo.

"Awi Bawihi, kei chu i thil tih tum hi ṭul ka ti tawh lo êm mai, i hlimna tur emaw i tih hi i natna tur bawk a ni ang tih ka hlau ber" mangang tak hian ka nu chuan a lo ti ve a, min ngaihtuah dun lutuk chuan ka ṭah te hial a tichhuak.

"Nu, pa, tun chiah hi ka thuthlukna min pawmpui leh hram rawh u. Chuan, he ka thuthlukna siamah hian ka inchhir ngai ka ring lo bawk a ni" ka tinghet ve charh a, ka ngaih dan chu min thlawp lo vang tih mawlh ka hlau ru hle.

A tawpa tawpah chuan ka pa chuan harsa ti tak chungin ka thuthlukna chu min pawmpui a, ka nu erawh chuan min la pawmpui fum fe chiah lo thung. Chaw ei a lo hun a, kan chaw ei laite chuan thil chi hrang hrang sawiin ka ṭawng leh bawrh bawrh. Thawkkhat lai kha chuan ka nu leh pate ngaih tih ṭhatna'n an bulah ka ṭawng tam lui ṭhin a, a hmaa an fanu ṭawng zet zet ṭhin ang chiah khan ka awm lui hram hram ṭhin. Amaherawhchu, tunah chuan ka pangai vek tawh a, ka zia dik tak pawh ka nei let leh tawh bawk. Chaw ei khamah chuan ka room-ah ka lut a, chhuak turin ka insiam zui mial mial. Chutia ka insiam lai tak chuan ka phone a lo ri a, caller ID ka en chuan number hlang tawp hi a lo ni.

"Hello" phone pick-up rual chuan ka ti a, lehlama mi chuan

"Pawnah ka lo nghak che aw Nute, i hman hunah i lo chhuak mai dawn nia" a rawn ti a, u Hruaia aw ka hriat avang chuan ka phone chu ka melh tlawk tlawk ringawt. Engtinnge ka phone number chu a lo neih theih? Chutah ka phone chu a rawn ri leh a, ka chhan let miah loh avangin kan inbiakna chu u Hruaia chuan a off a ni ngei ang. Insiam zovin ka room aṭang chuan ka chhuak a, ka pa chuan

"Nute, i ngaihtuahawm loh tak tak ang maw? Keimah hian ka hruai zawk mai ang che" a lo ti leh hram.

"Ni lo pa, u Hruaia hian i hlauhthawn ang khan ka chungah thil ṭha lo a tih duh ka ring lo a ni. Min ngaihtuah lutuk a, i hlauthawng mai mai a nih kha" engtik lai aṭangin nge u Hruaia chu ka chunga thil sual ti lo tura ka lo rin leh hman thawt thawt tawh pawh ka hre lo.

Ka nu leh pate chuan phal lo ru tak chungin min kaltir a, a sawi ang ngeiin u Hruaia paw'n kan in kawtah min lo nghak ran. Motor-a ka chuan luh hnu chuan tinungin a tlanchhuak zui nghal a, a tua mah kan ṭawng lo hrim hrim. Kan tlan zel a, Folkland Park panna kawngah kan tlan ta char char. Kawng chu a reh em em a, thui pawh tlan lovin motor chu a tiding ta daih.

"Helai hmunah hian ka kal ngun khawp mai" a rawn ti daih a, a duh leh lo kal ngun vel mai mai teh se!

"I kal ngun leh ngun loh lam em ni kan sawi dawn?" aw nem lo tak chuan ka ti a, ka thin tihrim dan a thiam em em mai chu ka hua a ni.

"Haha, hmâna ka nupui ni ṭhin Nutei kha i ni chiang e. Nutei, ka nupui, a tel lova ka awm theih loh kha" a rawn ti leh sup a, a thil sawi teh duah chu ṭul ka ti lo hle bawk.

"I nupui ka ni tawh lo tih hi hrilh nawn fô che ngai kher suh" ka thinrim ruk em avang chuan ka lo ti leh hmarh hmarh.

"Thuthlukna i lo siam tawh ngei ka beisei" a rawn ti thum dup a, amah hrim hrim chu a chauh hmel a, natna vei a ang ka ti ber.

"Ka siam tawh ka tih kha" a bulah hian ka ṭawngkam chhuak reng reng hi a nem thei tawh miah lo.

"Chuan, enge i thuththlukna chu ni ta?" u Hruaia chuan a rawn ti dam diai leh ang lawi a, a awm dan chu ka haw vel vek a ni mai.

Ni e, zanin ngei hian ka thuthlukna hi ka sawi a ngai a ni. Ka thinlung nat lehzualna tur pawh ni se ka tih ngei ngei a ngai a, hmangaih em em ṭhin mah ila ka tuar thei em em ang. Ni lo, he thil ka tih avang hian ka na leh tawh lo ang a, na thei khawpa thinlung dawizep leh tuarchhel lo ka nei tawh lo bawk. Tunah chuan Zonunmawii dang, beidawnna leh harsatnate paw'n an tih thih theih loh khawpa tuarchhel leh huaisen Zonunmawii ka ni tawh tlat alawm.