KA NUPUI MANUTEI By Havali Adam (Short Story)

KA NUPUI MANUTEI (Completed)

By

Havali Adam

March 2022

“U Muanpui, i lo cheng ve dawn lo em ni? I tel lo chuan kan kim lo tlat zel a nia, lo kal ve vat rawh” min rawn ti lawm lawmtu Emily-i chu ka en thuai a, ani chuan swimming pool chhung aṭangin min lo nuih ver ver a, ani chauh lo mi dang paw’n nui chung chuan min lo ko ve nghal bawk.

“Ka lo la cheng ve rih lo mai ang, ti khan ka tel lo khan lo cheng mai rawh u, vawiin chu tui chen mood-ah pawh ka cheng lo” tiin pangai tak chuan ka hnuai thawkte min sawmna chu ka lo hnial fithla a, anni erawh ka chhan dan avang chuan an lo ner nasa hlawm hle. 

“I pakhar êm mai u Muanpui, ka lo kal dawn, ka lo hruai dawn khawp mai che” Emily-i bawk chuan nui chung hian a rawn ti leh a, swimming pool aṭanga rawn chhuakin ka ṭhutna lam chu a rawn pan ta nghauh nghauh mai. Ani tê reuh hi chuan min nêl a, keipaw’n ka nêl a, a ngam pawh kan inngam khawp mai.

“Lo kal rawh le, siam i ngai kher em ni? Chu bakah tui hleuh pawh min zirtir a ngai dawn a nia” ka bul a lo thlen rual chuan a ti zung zung a, swimming dress chauh inthuamin a awm bawk sia a taksa chu a lang hnem hle. 

“I va mak reuh tak! Tui chen ka peih vak lo asin, tui hleuh te chu pa Mawia khu zu inzirtir mai rawh” tiin ka lo hnial leh hram a, min din hnaih bawk nen a taksa te chu ka en lo thei lo.

“Ka peih bawk lo, chu bakah pa Mawiate chu ka duh lo hrim hrim, nangmah ngei alawm ka duh, kan picnic hma pawhin min tiam vek tawh kha aw” ti nui nuiin min din chilh ran a, kawng dawm meuhin min en chhuk kar reuh bawk. 

“Aw le, a nih chuan ka va inthlak ve mai ang e. Min sawm lui tlat reuh bawk si a, tuia ka tlâk vaih chuan min lo chhan ang che” fiamthu tak chuan ka ti ve ta nge nge a, ka fiamthu tih hrethiam zetin a ni pawh chu a rawn nui ve nghal.

“I tla hlum dawn lo tih ka chiang, min chhan zawk dawn nia, va inthlak thuai thuai rawh” tiin min nawr phei dawt dawt a, nui ri hawk chungin keipawh inthlak tur chuan ka phei ṭha ve mai bawk.

Ka inthlak zawh chuan tui cheng turin swimming pool-ah ka lut a, mi dangho chuan min chiau âu nghal hle. Ball te kan beng a, tui a thuk vak loh avangin hmeichhiate chuan an ngam ang reng hle bawk. A hma zawnga tui cheng peih vak lo kha swimming pool-a ka awm hnu chuan nuam ka ti leh ta phian a, tui pawh a cheng rei zingah ka tel ta ringawt.

Swimming pool-a ka awm chhung zawngin Emily-i chu ka bul chêtah a rawn tal ve zel a, a taksa chuan min nawk reng zel. Emily-i hi chu nau ang maia ka en a ni a, kan office-ah phei chuan kan thawhpui dangte’n min chhaih fiam hial ṭhin.

Ka hnuaia thawkte zingah chuan Sawmzuali a awm ve a, chu chu ka nupui ṭhian ṭha ber a ni bawk. Ka nupui Lalhriatpuii, Manute tia ka koh chuan a ṭhian ṭha ber chu hna pe ve turin min ti a, keipaw’n a thawh awm tawk te lo ngaihtuah sakin ka thun ve mai bawk. 

Manutei leh Sawmzuali hi thingtlang khaw lam aṭanga Aizawl rawn awm an ni ve ve a, an awm dun tawh hi chuan an titi a inrualkhai thei khawp. Sawmzuali chuan swimming pool pawn aṭang hian min thlir reng a, en pawh en rei duh lovin Emily-i te lam chu ka hawi leh daih.

Tui ka chen zawh chuan ka kawr vel chu ka sawr fu a, hmeichhe ṭhenkhat chuan min lo thlir reng tih pawh ka hria, mahse ka hmu lo der ve zaih. Kei hi nupui nei tawh ni mah ila ka taksa erawh a la mawi em em a, a chhan pawh taksa sawizawi ka uar êm vang a ni. 

Emily-i phei hi chuan hmai chhanah hial ka taksa mawi a tihzia min hrilh a, mi dang erawh min hrilh ngam der lo. Emily-i hi ka nu unaunu fanu a ni a, kan inchhûng hnaiin kan inpawh hle. Keimah kaltlangin hna a hmu ve a, PA hna a thawk nghe nghe bawk.

Keiin unaunu ang chiahin en mah ila ani chuan unaupa angin min en ve thei lo tih ka hria a, vawi tam min en dan chu tidanglam turin ka hrilh ṭhin. Vawi khat phei chu min duh thu min hrilh hmiah a, kei erawh chuan ka lo hnar ve hmak a, a chhan pawh nupui ka neih tawh vang a ni. 

Min duhna leh min thlakhlelhna a tihbo theih loh thute min hrilh vak vak a, a sawi pah chuan ṭap pah hîal. Amaherawhchu nupui nei ka ni tawh miau a, uirena lam hawi zawnga khawsak chu ka duh bik lo. Keimah ni lo tlangval ngaizawng tur te chuan ka ti ta ringawt a, chuti anga kan inbiak velna erawh kan thawhpuite’n an hre ve tawh lo, an hria ang tih te chu a nia ka hlauh ni! 

A tawpa tawpah ani paw’n unau anga min en a tum thu a sawi ve ta nge nge a, min hrilh tirh phei chuan ka thaw a veng huai thei hial. Ka bula a awm dan leh a chezia velah chuan min la duh reng tih ka hrethiam ve vek a, chuvanga hnaih duh lo hram hram ka ni bawk. Mi dang erawh chuan inngaizawng emaw min tih ngeih ka ring, mahse Emily-i nen chuan kan inngaizawng hauh lo, kei phei chuan ka nupui phatsan ka tum lo hrim hrim.

Chutia kawr sawra ka che vel chu Sawmzuali bawk chuan mit la lêk lo hian min lo en a, a awm dan aṭang chuan min chik tih pawh ka hria. Ka awm dan chik reng renga min thlir reng chu ka melh lêt ve ta run a, hawi sawn hmasak ka tum teuh lo. Ani pawh ka en reng hnu chuan a meng khup zal zal nghal a, min lo en zeuh zeuh châng pawha ka lo la en reng avangin a dinna hmun aṭang chuan a kal sawn ta daih bawk. Kei pawh a kal sawn tâkah chuan bathroom lamah ka phei a, bathroom kawngkhar hawnga ka lut chiah tihah ka kalh hmain Emily-i chu a rawn lut ve ta mai.

“Emily!!! Chhuak nghal rawh, i awmna hmun tur a ni lo” ka lo ti hrawk a, ani erawh chuan kawngka chu a la kalh hmak zui. Chutah ka lam lo hawiin min lo fawp bawrh bawrh a, rei pawh min fawh hma chuan ka nam sawn chiang kher mai.

“U Muanpui, khawngaihin min duh ve tawh rawh, ka nghak rei tawh lutuk che, unau ang chuan ka en thei ngang lo che a ni. A hrehawm lutuk, ka tum ngial pawhin ka thei lo” tiin min fawh leh a tum a, a darah ka lo nam ding ta chat. Thinrim tak hian Emily-i chu ka melh chhuk run a, ani erawh lungngaih hmel deuh hian min lo en thung.

“Enteh Emily, i awm dan hi a dik lovin ka lawm zawng a ni lo tawp mai. Mi dangin min lo hmuh phei chuan hum sual dai turah min ngai ngei ang, chuvang chuan tunah hian fimkhur takin chhuak nghal ang che” khauh tak chuan ka ti fak a, kan thawm chu bathroom lem lama awm te’n an lo hre palh ang tih ka hlau tak zet.

“U Muanpui, i tel lo chuan ka awm thei lo, ka hmangaih che, ka duh che, ka vei bur che a ni. Min hrethiam rawh, ka mamawh em em bawk che" tiin ka mipatna chu a rawn khawih a, ka boxer chu a pawt thla zui nghal a, zak lo hi ka va han ti mai mai tak em. Ka thusawi a ngai pawimawh reng reng lo chu ka hua, ka haw tak zet a ni.

“Ding rawh!!!!” ti hrawkin a ṭhingṭhi tur chu ka pawt tho thuai a, ka kut leh lamin ka boxer chu ka siam ṭha vat bawk. Ani chuan tisa châknaa khat mitmeng hian min lo en a, ka thil tih duh loh ber tih a ngai dawn ta in ka hria.

“Heta ṭanga i chhuak nghal lo a ni chuan ka ban ang che, ka unaunu i nihna theihnghilh ṭhak khawpin i hna aṭang hian ka ban ang che. Ka ti hreh tawh miah lo a nia, unau ang chiahin ka en che tih hi i hre lo em ni? Heti anga ka laka rilru tenawm tak i pu reng dawn a nih chuan unaunu ang pawhin ka en thei tawh lo vang che, vawiin aṭang hian ka hnuaia hnathawk pangai ang maiin ka en tawh zawk che tih hria ang che, chhuak rawh” ka ti leh hrawk a, ani pawh chu min hlauh hmel zet hian a chhuak ve thuai bawk.

Intifai ta mai lo chuan thil ka ngaihtuah zui vawng vawng a, ka nupui ka uiresan teuh zia chu ka ngaihtuah lo thei lo. Inthing harhin ka inbual ta zung zung a, bathroom aṭanga ka chhuah chuan pangngai thei ang bera lan ka tum a, mahse a harsa khawp mai. 

Ka motor awmna lamah ka phei hmawk hmawk a, a ruka ka zu ken chu ka phawrh a, ka in ta mial mial. Ka kal dawnah ka nupui khan zu in miah lo tur khan min chah nasa a, mahse ka in lui ta tho chu a ni hi!! Amah reng reng pawh ka bula kal ve tura ka sawm lai khan duh lo kual vel lovin lo kal ve mai tur a nia, hneawm lutuk mai!

Ka zu in zo ṭhut khawmna lama ka phei chu a ngaite bawkin Sawmzuali chuan ṭhutthlenga ṭhu chung hian min lo en leh reng tawh a, kei lah thil tisual ang maiin ka la hlauthawng em em zui. A awmna lam chu ka pan hmawk hmawk a, ka mood a fuh tawh lo laklawh bawk nen ka meng no lo hle bawk. A bul ka thlen chuan mi pawh a lo en ṭha ngam lo ang leh lawi a, a awm dan vel chu ka ngei zawng tak a ni.

“Inbe lawk ang, min lo zui ang che” tiin ka kal pel a, anni pawh chuan thu awih takin min lo zui ve mai. Tûma awm lohna hmunah chuan ka ding a, rei lovah ani paw’n ka bul a rawn thleng zui ve nghal.

“Sawi duh i nei em ni? Eng vanga ka awm dan chîk hmel taka min en reng zel nge i nih?” aw nem lo fê chuan ka ti a, ka inthunun zo lo mai dawnin ka hria.

“Nei lo ve, u Muanpui” tim dai hian a rawn ti a, min koh dan avang chuan ka en hrawk a, ani erawh min enna aṭangin a mit chu a la sawn rang kher mai.

“I pu ka nih hi hre ta che, zah takin min be rawh, zah lo taka inbiak hi ka duh miah lo a nia” ka tih chuan a kun deuh ngul a, min hlauh hmel ta hle bawk. Ka dinna aṭang chuan ka che chhuak a, thui pawh ka kal hmain Sawmzuali chuan 

“Sawi duh ka nei leh si, Sir” a rawn ti leh ang lawi a, a aw aṭang chuan a inthlahrun hmel hle bawk. Ngainatawm loh zetin ka hawi let a, ka mitah pawh min lo en ṭha ngam tawh lo.

“Sawi ta si che” a ngawih leh reng si avang chuan ka ti deuh hmuk a, ka aw a nêlawm fahran lo bawk nen a rawn hawi chhuak ta vat.

“Zep lovah chuan i awmna bathroom aṭang khan Emily-i lo chhuak lai kha ka hmu a, ka rilrua awm ang hi inti lo ti raw Sir?” a rawn ti ta mai, ka thin phu chu a rang nghal dawt dawt a, namen lovin hlauhthawnna chuan ka khat nghal.

“Enge i rilruah chuan lo awm teh hrep a!?” a thusawi avanga danglam lo ang zetin ka ti a, a hmel aṭang chuan ṭawng leh a châk tawh lo tih a hriat ngawih ngawih.

“Ka ṭhiannu hi hmeichhe dang lakah i uiresan ang tih ka hlau a ni Sir, i uiresan lo ti raw? Sawi sual emaw hriat dik loh palh ka nei a nih chuan khawngaihin min ngaidam dawn nia Sir” tiin a kun zui nghal daih a, a zawhna min zawh ber kher chu ka huat zawng tak a ni. 

“Eng vangin nge chuti ang thute chu min zawh? I hriat a ṭul em ni? Ka enge i nih? Ka nupui hi i ṭhian ṭha ber a nih avangin ka lakah erawh tlâk tlum tum miah suh” zu ka lo in hman kher bawk nen ka aw chu a pawr hle a, ka rim aṭang pawhin zu ka in tih chu a hriat theih ka ring.

“Ni lo Sir, chuti ang lam engmah a awm lo, i laka tlâk tlum ka tum miah lo. Ka tihpalh Sir, min ngaidam dawn nia” tiin hmanhmawh tak hian min rawn kal pel ta vat a, kei erawh ka ding leh ta reng thung.

Tlai dar 3 velah chaw kan ei a, min hlau hle a ni ang Sawmzuali chuan min pehhel char char tawh. Ka hmuh theihin a awm lang leh tawh lo hrim hrim a, tihpalh thil thua han inhmuh thut kan neih pawhin a ranga rangin a petek sawn vat zel. A laka ka awm dan chu a dik ka ti bik chiah lo, a hnathawhnaa a pu leh hna petu ni mah ila tham lo taka ka lo hrawk khum vel chu zia lo ka tihnuhnawh a, ka zu in hnathawhah ka puh ta ringawt.

Khaw thim hmain kan haw a, mahse ka rilru a kal dik lo laklawh bawk nen zu in ka châk leh tlat avang chuan haw mai lovin hmun dangah ka peng kawi leh hram. Ka ṭhiante chu ka phone kual a, anni pawh ka awmna hmun ka sawinaah an rawn kal ve vat a, zu pawh an rawn keng hnem hle. 

Chutia zu kan in lai chuan hmel hriat loh mi dang hi an lo kal ve a, kan sirah chuan zu an rawn in a, kan zinga pakhat chuan a va tibuai ta ringawt mai. Ka tum pawh ni miah lovin ka insual ve leh nghal a, kan haw lam te chuan ka hna chelh leh ka awm dan chu inmil lo ka ti rilru hle a, ka bul lawka zu um pawh chu ka pai chhuak hmak.

Kan in ka thlen chuan dar 10 dâwn a lo ri tawh a, zu chu in tho mah ila rui chhe em em ka ni lo va, ka ngaihtuahna pawh a fim pangai vek. Sitting room light zawng zawng a lo in off tawh avang chuan ka nupui chu a mu tawh tih ka ring thiam mai a, kan nupa room-a lut nghal mai lovin bathroom-ah ka lut leh tê tê a, ka ha te chu ka nawt ta ringawt. 

Kan nupa room chhung chu a lo thim ṭhiap a, zu rim ka la nam dawn tlata ka hriat avangin ka inbual ṭha leh nghe nghe. Ka inbual fai zawh chuan eng helh nei lo zet hian ka nupui bulah ka inthawlh a, a hnung lam aṭangin ka kuah zui ngahl bawk.

“U Muanpui, i lo haw tawh maw!? Ka lo muhil palh a ni maw, engati nge min kaih thawh loh?” ka kuah hnu rei lo tê ah ka nupui chuan a rawn ti a, ka lam chu a rawn hawi a, kan inmelh ta ral.

“Kaih thawh che ka duh hleinem, mu tawh ang aw” tiin ka awmah chuan ka kuah bet a, mahse rei lo te hnuah a rawn inher a, min lo en chho ta kar.

“U Muanpui zu in tawh suh ka tih che khâ, engati nge i in leh ṭhin? Zu hi sual bul a ni asin, engati nge i chal hî? In insual em ni? I mak thei êm mai u Muanpui, i nupui ka nihna ang tal hi chuan ka thu awih ve la” a rawn ti nghal zung zung a, mahni nupui te nge nge engmah ka thup thei leh ta lo ve.

“Khawi maw min han en chiang teh, i chal hi a kak deuh a nih hî” min ngaihtuah hmel tak chuan a rawn ti leh a, kei erawh a hmel awm dan vel avang chuan ka lo nui suk.

“Damdawi hnawih tur ka va la ang e” tiin khum aṭang chuan a tho chhuak a, room light on in First Aid bawm chu a rawn pawm phei a, keipawh chu a chet dan lungawi thlak lutuk avang chuan nui chungin ka lo ṭhu chhuak ve mai.

“Vawiin lam boruak chu a nuam em? I lo haw har bawk sia ka lo ngai hman che alawm” nui sen sen chung hian a ti a, ka chal chu damdawi a hnawih pah reng bawk.

“Hei ka la hnawih zo lo” khum lama ka kawih mut thut avangin a rawn ti deuh vak a, First Aid bawm vel chu chhuatah ka hnawl thla nghal vek a, ka nupui chu ka bawh zui nghal.

Ka nupui nen chuan nuam takin nupa nun kan hmang a, ka phurin ka sosang bawk a ni ang vawi khat mai ka duh tawk lo, ka duh tawk ka hmuh meuh chuan a chau hle a ni mahnabmin kuah ta hle hle. Manutei hmel chu ka en a, a hmelṭhain a va han duhawm chiang tak em. Nui sukin a hmuiah ka fawp a, ani erawh a lo muhil fel der tawh. 

Ka tum loh lutukin chhun lama ka awm dan chu ka ngaihtuah chhuak a, Emily-i nena kan awm dan ber chuan ka ngaihtuahna a tibuai a ni. Manutei chu chhuna kan awm dan zawng zawng hrilh mai a ṭhat ringin kaih thawh leh ka tum a, mahse ka thei lo. A hriat hunah chuan sawi lang lo mahse a rilru a nâ hle dawn tih ka hria a, ka lakah rinhlelhna nasa tak a nei nghal dawn tih ka hre bawk.

Ngawi rengin ka meng a, ka mut a chhuak hlawl lo a ni ber. Ka awm nghenga muhil mek Manutei chu ka thlir dauh dâuh a, amah ang em ema hmeichhe hmelṭha leh rilru thianghlim Pathianin min pe chu ka lawm a ni. A taksa ruak kang chu ka chul a, a muhil tui bawk a ni ang chet pawh a rawn che eih lo. Ka âwmah chuan a hma aia nghet lehzualin ka kuah bet a, muthilh tumin ka mit ka chhing zui ve nghal bawk.

Kei hi Adam Lalthlamuanpuia ka ni a, mahni intodelh duh mi ka ni ve a, a tirah chuan ka hlawhtling bik chuang lo. Rim takin ka thawk a, ka bei a, a tawpah hlawhtlinna ka chang ve ta. Private Company dinin hnathawk ka chhawr nûal a, a hma kha chuan private school-ah zirtirtu hna ka thawk mawp mawp a, pen pawh ka peng kual nasa ang reng hle. A chang leh tution te ka pe tel thul, mut pawh kha duh ang takin ka kham lo lek lek zel. Sumdawnna lam ka tui tlat avangin sawrkar hna ka bawhzui lo tawp a, ka tifuh viauin ka hria. 

Kan chhungkua hi member 4 kan ni a, nau hmeichhia pakhat ka nei a, nupui ka neih hnu chuan chhungkaw member 5 kan lo ni ta a, ka nupui Manutei chu kan chhungkaw rohlu hi a ni ringawt. Amah a felin a nun a nem bawk si a, tute pawh chuan kan ngainain kan kawm ngeih hlawm hle. 

Ka nau nen ngat phei chuan an inkawm tawk em em a, inrual pawh an inrual khat viau bawk. Manutei chuan ka nu leh pate lung a dum hliah hlîah a, thingtlang mi ni mah se han hmuhsit emaw han endawng emaw pawh an nei lo hrim hrim. Lo hmusit dawn pawh ni se ka phal lo, min hmangaih êm avang leh ka hmangaih êm avangin a nât ka phal lo hrim hrim.

Sawi tawh angin ka nupui Manutei hi thingtlang lam mi a ni a, ka hmuh tirh phei chuan ka hmusit hman nghe nghe. A chhan pawh kan chawlhna dawrah a lo thawk a, ka pheikhawkah tak soup a tibua a, khata ṭang kha chuan a class chu hniam hle turah ka ngai nghal ringawt a nih kha! 

Amaherawhchu a lo ni teuh si lo, ka tum pawh ni miah lovin ka ngaihtuahnaah a châm reng a, a hmel lungngaih hmel tak te chu ka mitthlaah an awm ta reng zawk a ni. Ka tih ngaihna hre lo chuan a thawhna dawrah bawk ka chawl nawn leh ngat a, a hmel ka en chiang chu ka ngainat chi a ni dawn tih ka hre zui nghal.

A hmel leh a nungchangin min hip em avanga an dawr ka chuan kai tlût tlut hnuah ka be hmasa ta a, ka biak tirh te khan min va han hlauh hmel tak! A thawhna dawr neitu nu kâ aṭangin mobile phone pawh a la neih loh thu leh an in hnuai a luah thu ka hria a, ka thu hriat te hlei hlei chuan amah min hriat chiantir chak zual sauh. 

Thla khat hnu velah ka biakna pawh pangngai takin min chhang ve thei ta hram a, a mizia leh a hmel zawng zawng chu ka duh chi vek a ni. A thawhna dawr neitu nu chuan a hming min hrilh a, a hming ka hriat tirh phei chuan inhmeh ka tih lutuk avangin ka khi ver ver. An koh duatna Manutei tih chuan ka ko ve ta tawp a, ani paw’n customer pangngai anga min ngaiin min be ve ta zeuh zeuh.

A in luaha ka len hmasak ber chuan chempui hian kawngka a lo kalh a, in chhung lut tur khan ka va han bei rei mai mai tak! Luh ka dil pawhin a phal mai lo va, min hlauh thu chu chhung lam aṭangin a lo sawi a, kei erawh ka lo nui mai mai thung. A tawpah erawh amah thil hrilh tur ka neih thu ka sawi a, chutah pawh chuan a la rawn hawng duh chuang lo. Kei lah hawsan e ti lo chuan luh ṭâlh ka tum a, a thawhna dawr neitu nu chu ka pun ta ringawt bawk.

“Manute lo hawng rawh, tlangvalte an nia, an lo rim ve duh che a nih hî” tiin dawr neitu nu chuan a bia a, kan boruak chu a nuihzat thlak bawk sia ka ṭhen deuh reng mai. Manutei lah chuan chhung lam aṭang bawk hian

“Ka duh lo, tlangval ka ngaina lo” a rawn ti hmak a, chutah zet zawng ri meuhin ka nui chhuak ta hawk hawk. A mizia leh a rilru thianghlimzia ka hmuh tâkah chuan ka thlang sual dawn lo tih ka hre nghal a, bialnu atana neih ngei pawh ka tum nghet ta bur.

“Keiin ka ngaina che alawm” ka tih chuan a ngawi zui vang vang a, ka bula mi pawh kan awm dan leh inbiak dan dangdai lutuk avangn a lo nui dir char char.

Dawr neitu nui’n a sawifiah fê hnuah kawngka chu a lo hawng ve ta hram a, ka va han lut rang mai mai tak em. A in luahah chuan bungraw changkang tak tak te awm ve lo mah se a lo felfai phian a, ṭhutthleng pawh pakhat chiah a awm. Thil chi hrang hrang ka zawt a, mahse min la nêl chiah lo bawk nen min chhang ṭha duh lo hle. 

Zep nei lovin ka duh thu chu ka hrilh tlang tawp a, a va han lai nasa mai mai tak em! A khum awmna lamah chuan a tlan phei vat a, rizai la sawk sawkin a inkhuh ta daih. A awm dan lawmawm zet chuan min tinui chhuak hawk hawk a, la inkhuh reng chung hian haw turin min ti vak vak a, keipawh zan tin ka len dawn thu ka hrilh hnuah rilru hlim takin ka haw ve mai bawk.

Ka sawi lâwk ang ngeiin ka hman zan apiangin Manutei chu ka rim ta ziah a, amah a la naupangin a rilru a la thianghlim bawk sia ka nuih leh tawp zel. Ka kuah hmasak ber ṭum chuan thapui tak meuh hian a lo ṭang a, a tal chhuak thei bawk si lo nen a ṭap tawp a, ka khawngaih lutuk avangin ka thlah phah ringawt. Thil awmzia engkim chu ka thiam ang tawkin ka hrilh vek a, a laka ka chet dan chu amah ka duh lutuk vang tih te ka hrilh hnu chuan min lo en kiau a, chutah hmun dang melh chung hian

“Min duh suh, duh tlak ka ni lo u Muanpui. Thingtlang mi ka nih hi, khawpui nulate angin ka changkang lo va, lehkha pawh ka zir sang lo va, ka hmelṭha lo bawk” a rawn ti thawp sep sep a, chuti ang rilru a put avangte hlei hlei chuan amah ka duhna a zual sauh zawk.

“Ka mitah chuan nang aia hmelṭha leh duhawm hmeichhia hi an awm lo Manute, chutah khawpui nulate ang lo takin rilru thianghlim tak i la nei zui, ka hmangaih che chu ka la ti thei lo, mahse ka hmangaih thuai dawn che tih hi ka hre chiang a ni” tiin ka lamah a hmai chu ka kuai a, kan mit chu a intawng ta chat mai.

“Ka fawp dawn che aw, maimitchhing rawh le” tiin a lamah chuan ka awn riai riai a, ani pawh nghet zet hian a lo maimitchhing ve nghal a, a awm dan mawlh chuan ka lung a tiawi hliah hliah. A hmui nem leh fawh nuam em emah chuan ka fawp a, a vawi khatna a nih avangin fawh pawh ka fawp rei duh ta lo.

“Min ngaina ve ti raw? Min duh ve ti raw Manute?” kan infawh zawh chuan ka ti sup a, a mit chu chiang takin ka en ran a, a biang chu a hawi sawn lohna’n ka kutin ka la dawm reng bawk.

“Ka duh ve phak che i ni lo u Muanpui, chuan min duh tak tak lo bawk ang. Haw tawh rawh, inhmu tawh lo zawk ang” tiin a tal chhuak thut a, kal sawn daih a tum chu a hnung lam aṭangin ka kuah leh ta chawt.

“Ni lo, ka duhin ka vei tak zet che a ni. Zinga ka mit ka men rualin i hmel ka hmu a, ka hnathawh laiin nangmah hlir ka ngaihtuahnaah i awm a, zan ka mut dawn thlengin ka rilru i luah asin, chu chuan ka duhzia che a tichiang a ni. Min hrilh teh Manute, kei hi i mipa duh zawng ka ni ve em? Tunah hian min duh nghal lo mah la a pawi lo, min duh theihna’n ka awm mai ang” ti thuai thuaiin ka kuai her a, ani pawh chuan min lo chhoh en ve ran bawk.

“Ka hre lo u Muanpui, ka mitthlaah hian i awm reng zel a, enge a awmzia pawh ka hre tawh bik lo” a rawn ti thawp sep a, rang takin ka âwmah chuan ka kuah a, ka lawm em a tin ni!

“Min duh ve tihna a nih chu, ka vei ang bawk chein nang pawh hian min vei ve a, chuvang chuan i mitthlaah ka awm ta ṭhin a ni” nui ri sak chungin ka ti a, kuah pawh ka la kuah nghet hle.

“A ni tak tak ang maw?” la hlauhthawn hmel zet hian a rawn ti a, ka kuahna ṭang chuan a hmel hmuh ka duh avangin ka nam hla deuh a, a mitmengah chuan rinhlelhna tam tak ka hmu thei.

“Ni tak tak e, zanin aṭang chuan ka bialnu i ni tawh aw, ka ta chauh i ni tawh ang” ka tih chuan laih tak hian a rawn nui a, a va han duhawm ngawih ngawih tak em. 

Chu zan aṭang chuan kan inngaizawng chho ta char char a, rei lovah kei phei chuan a hnathawh lai chu bansan turin ka ti nghe nghe. Ani erawhin a lo duh lo nasa hle a, amah berin a tih tlat avangin kei paw'n a duh dan chu ka zahsak ve leh mai bawk.

Kan han inngaihzawn tak tak hnu chuan min ring ngam tawh bawk a ni ang an chhungkaw chanchin kimchang chu min hrilh a, chhungkaw reithei tak an nih thute chu min hrilh a, ka khawngaihin ka nupui ni vat vat se ka tih phah hle. Min hrilh dan chuan unau pathum an ni a, amah chu unau zinga upa ber niin nau mipa pahnih Middle School kal rual a nei a, a nu leh pate chu kut hnathawka ei zawng an ni bawk.

An harsat ve êm avanga Aizawla lo tlâ thla a ni a, a rêm rem thawh tuma rawn awm a ni ber. A thla tin hlawh chu a chhungte a thawn ziah a, keipaw’n ka thawn ziah. Thawn ve ka tum tirh phei chuan a phal lo nasa hle a, a zak a, ka ngaihnep phah a hlauh thute chu a sawi vak vak a, a thin pawh a rim phah hial a ni. Kei chuan a dara chelh chungin

“Ka hmangaih tawh che Manute, ka hmangaih tawh lutuk che, chuvang chuan i chhungte hi ka chhungte an ni ve tawh a, ka chawm an ngai ve bawk alawm” ka ti hmiah a, ani erawh mittui tling pam hian min lo en thung.

“U Muanpui, ka lawm e. Kei pawh hian nang ang renga mipa hmangaih hi ka la nei bik lo asin, mahse heti anga i pawisa kan tana i hmang reng a nih chuan i chhungte hmel kan hmu ngam nâng” min kuah chawt chung hian a rawn ti a, a ngaihtuahna chu ho viau angin lang mah se a ngaihtuah thui viau tih ka hrethiam.

“Ka chhungte mitmei chu ven a ngai lo, chuan nang hi nupuiah ka nei thuai dawn che Manute. Ka hmangaih che a, nang paw’n min hmangaih a, chuvangin keini pahnih hi nupaa kan insiam vat a ngai a ni” a hnung chul hliau hliau chung chuan ka ti a, ka lung a awiin ka rilu a hahdam sawng sawng a, min hmangaih ve tawh thu ka hriat avanga hlim ru hle ka ni bawk.

Manutei nen chuan inpawh takin kan awm chho zel a, mipat hmeichhiatna lama han chetsual ṭêp ṭep kan neih châng pawh a awm fô. Amaherawhchu kan pahnih hnîh chuan inneih hmaa mipat hmeichhiatna hman kan duh lo ve ve a, kan awm dan chu a thianghlimin a nuam tak zet a ni. High School ka kal lai aṭang tawha ngaihzawng nei thei deuh ka ni ve a, mahse Manutei ang renga ka hmeichhe hmangaih leh duh chu ka ngaihzawng lo ni tawh te zingah an la awm lo.

An khuaah te chuan ka zin ve lâwp lawp a, thingtlang mi ni mah se a nu leh pate chu an zahawm ngei mai. An ṭawngkam a dam thlup a, a pa phei chu titi pui nuam tak a ni. An huan lo ramah te chuan ka feh ve a, ka tih ngai loh ni eng ang mah se ka hmangaih ber tual lo chaina ṭhin a nih miau avangin a nuam ka ti lo thei lo a ni.

Thla 5 chhung ka inngaihzawn hnuah Manutei nen chuan dan khatnain kan innei a, kan inneihnaah chuan mi lo kal pawh an tam khawp mai. Kan chhungkua hi veng khata mi hriat hlawh ve tak kan ni a, ka nu leh pate phei hi chuan veng dang hmel hriat an ngah khawp.

Kan inneih zanah Manutei chuan min ṭawngṭai pui thlap a, mipa zawk ni mah ila chuti ang tih nachang chu ka lo hre hauh lo. Kan inneih zan chu inhmangaih tawn takin kan hmang a, chu zan ang renga nuam chu ka nunah ka la tawng lo hial. Kar khat chhung Manutei chhungte kan inah an awm ve a, ka nu leh pate chuan an lo dawngsawng thiam hle.

Hun a kal a, hriat loh karin thla leh kumte chu an liam zel a, ka nupui Manutei nen pawh kum 2 lai kan lo inneih ve ta der a, mahse fa erawh Pathianin rem a la ti lo nge ni kan la nei lo thung. Kum khat chhung tawp chu kan in puiah kan khawsa a, mahse in dan a ṭhaa ka hriat avangin kan in dang ve ta rawih a ni. 

Kan in awmna chu keimahni in hmun tho a ni a, a tira Assam type-a sak ni mah se ka sak ṭhat tir vek avangin tunah chuan a nuamin a mawi tawh hle. In dan ka sawi tirh chuan ka nu leh pate'n rem an lo ti vak lo va, a chhan pawh chhungkaw member kan tam vak loh vang a ni. Keimah berin in dan ka duh miau a, ka pa chuan in dan a phal ve ta mai kha a ni a, mahse kan inlen pawh awl chuang lo.

Sunday tlai a ni a, inpui lama chaw ei khawm an huaihawt avangin kei leh ka nupui pawh kan in lamah kan phei a, ka nu leh pate chhung lam pawh an awm nual bawk. Manutei chu ka nau nen an inkawp leh nghal chawt a, ei rawng an bawl dun nghe nghe. Ka rin loh deuhin Emily-i pawh a lo kal ve a, mahse melh khat pawhin ka lo melh duh lo thung. 

Nula mah ni se ei rawng bawl pawh a tum ve miah lo va, a phone chu a khawih mial mial ringawt. Vawi leh khatah in chung lam aṭangin hmeichhe rak vak vak thawm hi a rawn awm a, hmanhmawh takin ka tlan chho nghal. Ka thil hmuh avang chuan rang takin Manutei leh Emily-i awmna lamah chuan ka phei a, ka pawt ṭhen nghal vat bawk.

“Eng vanga hetia lo awm hi nge in nih?” vin tak chuan ka ti a, rum tak hian ka melh a, Emily-i a ṭah feih feih laiin Manutei erawh a ngawi ngul a, a thinrim hmel hle bawk.

“Ṭawng ta che u, eng vanga lo insual ringawt nge in nih?” ka ti vin leh ṭhawt a, Manutei chuan mittui tling pam hian min lo en a, Emily-i erawh a lo ṭap uar sauh thung. In hnuaia mite hriat theih tur taka ṭap emaw tih theih turin a ṭap ring a, boruak chu ka hip ning hle a ni.

“Eng thil nge thleng Mama? In va bengchheng em em ve le?” aw nêm lo fê hian ka pa chuan a rawn ti a, aw lo chhuahna lam ka hawi rualin in hnuaia awm ho chu an lo chho kim vek tawh tih ka hmu zui nghal.

“E hêeee u Manute, in insual em ni? I sam te chu a va pawr nasa ve le, u Emily-i nen hian in lo insual em ni?” tiin ka nau chuan kan lam chu a rawn pan a, ka nupui chu a rawn en dik nghal zung zung. Chuti ang bawkin Emily-i pawh a nu’n a banah a lo chelh a, kei erawh a tua te mah thlah ka la tum lo ve ve.

“Emily, tunah hian eng vanga ka nupui nena lo insual ringawt hi nge in nih sawi nghal rawh” ka ti khauh leh fak a, chutah Emily-i chuan ṭap ṭuau chung hian

“Kan insual chhan i hre duh a nih te chuan i nupui kha zawt zawk ta che, kei chuan eng buaina mah ka siam lo, amah khan min lo kek hmasa ringawt a nih khâ” a rawn ti vin vak a, ka nupui chu ka en zui nghal. Ani lah chuan mittui tling pam hian min lo en a, khawngaih ru viau mah ila an insual chhan chu ka hriat a ngai tlat.

“Sawi rawh le Manute, eng vanga Emily-i hi kek ringawt nge i nih?” thinrim insum hram hram chuan ka ti a, ka aw pawh Emily-i ka biak dan ai thlawt chuan a nêm ta deuh.

“Sawi rawh LALHRIATPUI” a ngawih reng avang chuan ka ti vin leh ṭhawt a, a mittui chu a biangah a rawn baw ta zawih. A mittui chu hruk pawh a tum lo va, a luan ang ang chuan a luan tir tawp.

“U Mam!!!” ka nau chuan a lo ti vat a, ka thinrim tawh bawk nen ka nau pawh chu ka melh deuh hrawk. Ka pa chuan awkâ vin zawnga ka nupui be lo turin min lo ti ve vat bawk a, chuti ang bawkin ka nu pawh.

“Ka nu, ka pa, vawiin tlai chu chaw kan lo ei lo mai ang, min hrethiam hram dawn nia” tiin Manutei chuan ka nu leh pate chu a en daih a, a kut ka vawnna chu na zet hian a phih thla a, in hnuai lamah a chhuk zui nghal daih bawk.

“U Mam!!! Engati nge u Manutei kha i vin vak kher? Khuma ka kawr thar dah en lawk turin a chho mai chauh a ni a, u Emily-i nang pawh engati nge in insual chhan chu i sawi ve mai loh?” ka nupui ṭan tih hriat zet hian ka nau chu a rawn ṭawng chhuak a, kei erawh kawng dawm chungin thawk ka la hawk ringawt.

“Vawiin tlai chu kan va haw phawt mai ang e, tui tak khan chaw chu kan tel lovin lo ei mai rawh u” tiin in hnuai lamah ka chhuk a, chokaah chuan ka lut a, mahse ka nupui chu ka hmu lo. Pawnah ka chhuak leh a, ka motor nghengin a lo ding ta ran mai.

Kan in lam pana kan haw chhung zawngin ka be eih lo va, ani pawh a rawn ṭawng chhuak lo hrim hrim. Ka biak peih loh vang pawh a ni lo, ṭawng ka châk loh vang a ni mah zawk. A hmel chu ka en zeuh zeuh a, a ṭah a la chhuah hmel tak zet. Ka ti dik lo tih ka inhria, mi dang awm laia ka nupui ka lo vin vak kher chu ka inthiam lo hnuhnawh hle a ni. Ka hmuh hlau takin a biang chu a tuai zauh a, mahse a ṭap tih chu ka hmu vek tho.

In chhung kan luh rualin choka lamah a lut nghal a, ei rawng a bawl zui nghal mawlh mawlh. Sana chu ka en a, dar 5 a lo ri thuak tawh. A alu zai laklawh lai chuan a banah ka chelh a, ani pawh a tawp ta chat. Mi pawh en miah lo hian dawhkan chu a en tlat a, vawi leh khatah a tho thut a, ngawi reng bawkin chaw chu a chum zui ta daih. Biak a hun rih lova ka hriat avangin biak chu ka tum buai ta lo law law a, alu pawh chu ka zai chhunzawm ve mai. 

Ei rawng bawl chhung zawng pawh chuan kan la inbe lo va, ani phei chuan dawhkan chu sik khat pawhin a rawn si leh tawh lo hrim hrim zawk. Tlai dang zawnga dawkan hlira ei rawng bawl ṭhin chu thleng silna bulah ding chung hian a bawl mial mial a, ka alu zai zawh sa a rawn lak lai tih chauh lo chu ka lam pawh a rawn hawi lo. Chaw kan ei lai te chuan kan ngawi reng a, kei chuan ka la ei lo hrim hrim zawk a ni. Ani erawh ei khalh hlau ang mai hian a ei hmawk hmawk a, ka insum thei ta lo.

“Manute” ka tih chuan a chaw chu a hma ai zawngin a bar chak a, a kâa leng lo khawpa tam chu a hnawh lut pawp pawp a, a kut chu ka chelh leh ta nge nge.

“Manute” ka tih leh rual chuan kun chung hian a rawn ṭap chhuak feih feih a, rang taka thovin ka nupui chu ka kuah nghal vat. 

Vawi leh khatah ka kuahna aṭangin a tal chhuak thut a, a chaw hmuam lai zawng zawng chu thleng silnaah a chhak chhuak vek a, a chet dan chu ka lo thlir tlawk tlawk ringawt.

“Manute, inbe lawk ang” tia ka biakna pawh chu hre lo ang maiin a awm a, tui a in zawh chuan kan room lamah a chho ta daih. Ka nupui awm dan avang chuan thawk ka la hawk a, ka thiam loh a awm rualin ka nupui thiam loh pawh chu a ni ve tho tiin ka inhnem leh ta ringawt bawk.

Kan nupa room-a ka luh chuan khumah a lo mu a, rizaiin a lo inkhuh hmak bawk. Zawimuangin khumah chuan ka mu a, ka kuah paw'n a rawn tal lo hrim hrim. Ka kuah ang angin a awm tawp a, a muhil ti dawn ila a muhil lo tih ka hre chiang em em bawk si. 

A rizai chawpa ka kuah hnu minute 10 velah chuan a rawn che ta, a taksa che nghawr dat datah chuan a tap tih ka hre thei a, rilru nuamin ka awm thei tawh bik lo.

“Manute” tiin a rizai inkhuhna chu ka hlim a, ka lam hawi turin ka kuai her a, ani erawh hmai hupin a lo la ṭap char char. A kut chu muangchangin ka dah thlak sak a, kan mit chu a intawng ta.

“Mi dang awm laia ka vin vak che avang khan ka tihpalh aw Manute, min ngaidam dawn nia, ṭap tawh suh le” tiin a mittui te chu ka hruk hul sak a, nuihza hran lo mah se a hmuh lai chuan ka nui lui hram bawk.

“Le! Emily-i nena in lo insual chhan chu min hrilh tawh rawh le” tiin ka kut chuan a hmai chu ka chul a, ani pawh a ṭap tawh lo. Lungngaih hmel fe hian min lo en a, a thusawi tur chu la hre lo mah ila a hmel avang chuan ka lungngai ru ve hle.

“Kan insual chhan kha mi dangho awm lai leh an hriata ka sawi a nih chuan kei ni lovin nangmah zawk i mualpho dawn asin u Muanpui, mahse i mualpho ka duh loh avangin ka ngawi tlat a nih kha!” a rawn tih chuan mit tizim sun hian ka en a, a thusawi awmzia chu pakhat mah ka hre lo.

“Emily-i khan bathroom khata in awm dun tawh thute min hrilh a, fa ka pek theih loh che avanga ani leh nang in lo inngaihzawn zak zak tawh thute min hrilh a, ka nâ lutuk kha ka insum zo lo a ni. U Muanpui, ka ringin ka hmangaih em em che a, min phatsan hi ka ring ngai lo, ka duh lo bawk. Emily-i thusawite kha thu dik a ni lo ti raw? I kâ ngei aṭang hian a thusawite kha thu dik a ni lo tih min hrilh teh” beiseina mitmenga min en chung hian a rawn ti a, ka rilru chu a va buai teh kher em.

“Manute, bathroom-ah chuan kan awm dun tawh ngei a, mahse i ngaih ang kha pakhat mah a thleng lo” ka tih lai chuan ka kuahna aṭangin a tawlh sawn dâwrh a, khum aṭanga chhuk thuaiin min en ta tlawk tlawk.

“Ka ti tak tak Manute, kan inkarah engmah a awm lo” ṭhu chhuak chunga ka tih chuan a rawn nui a, mahse chu chu a nuihzat vang a ni lo tih ka chiang.

“Kei min nei hi i lo inchhir hle dawn tih ka hrethiam ve ta chiah u Muanpui, ka dem lo che, ka dem miah lo che. I nupui hian ka tilawm thiam lo ve bawk em che alawm ti raw? I awh em em fa pawh ka pe thei bawk si lo che a, chutah nupa nunah ka zei lo bawk si, engkim hi ka thiam loh vek zawk a ni e” a bianga mittui luang zawih zawih chung hian a rawn ti a, a bul chu ka thleng phei rang kher mai.

“Ni lo, a teuh lo lutuk! Khati ang ngaih dan ṭha lo tak kha pu suh Manute, i ngaih ang khan Emily-i nen kan inkarah engmah a awm lo. Fa chu ka awt na meuh mai, mahse nang hi fa neih duh vang mai maia nupui atan nei che ka ni lo, ka ni ngai lo bawk ang. A chhan chu ka hmangaih tlat che alawm, nang ka hmangaihna che hi engtikah mah a dai thei lo bawk ang” tiin ka âwmah chuan ka kauh bet a, chutah zet zawng ka nupui chu ring tak hian a rawn ṭap chhuak ta hawm hawm.

Zan khaw tai rek thlengin kan titi a, chu zan la la chuan Emily-i chu va hmuh ka tum nghe nghe a, mahse ka nupui berin kal lo tura min tih avang chauhin ka kal leh ta lo. Emily-i’n ka laka rilru a put ṭhin dan zawng zawng chu ka hrilh fai ta vek a, ani paw’n a thil tawn ṭhin chu min hrilh ve bawk. 

Ka hriat lo laiin Emily-i chuan Manutei chu message duk dak lo tak tak a lo thawn ṭhin hi a lo ni a, mak ka va han ti tehreng em. A phone-a message a dawn zawng zawngte chu min hmuh a, ka thinrim lutuk avangin ka sa chhuak vek thei hial.

Zan tir lama boruak chhe em em si kha a tawp kan khar dan chu a nuam em em a, hlim takin nupa nun pawh kan hmang bawk. Manutei’n ka laka a inthlahrun theihzia te chu min hrilh a, chutah chiah chuan in chhungkhur ka lo uap lum lo hle tih ka hre chhuak ve ta chiah. Ka nupui chuan ka hmangaihna a mamawh a, hmangaih reng mah ila a mamawh ang tawkin ka duat lo tih te chu ka hre leh zel a, insiam ṭhat tumna chu ka nei lian ta hle.

A tukah chuan Emily-i chu ka office chhungah ka ko lut a, a hna aṭanga ka ban thu ka hrilh chuan a meng phawk nasa hle a, a tap pur bawk. Kut suihin ka hmaah a ṭhingṭhi a, mahse a hmel chu ka hmu lem vek tawh. Kan chhung hnaivai ni mah se Emily-i te ang mihring chuan min hnaih lo law law se ka duh zawk. 

Ka office chhunga a awm lai chuan ṭap chungin a nu a phone a, a nu nena an inbe thawm hriat rengte chu hne tak ka ni. Chhuak tura ka tih hrep hnuah ṭap hawm hawm chungin a chhuak a, Sawmzuali chu ka office-a lo lut turin ka ko zui nghal bawk. Sawmzuali lo luh lai chuan ngawi ngul hian ka lo en a, min la hlauh hmel kher mai.

“I chunga mawi lo taka ka chet dan avang khan ngaihdam ka dil e” pangai tak chuan ka ti a, ka hnuai daiha thawk ni mah se ngaihdam chu ka dil a ngai tlat a ni.

“Eng nge i sawi awmzia Sir?” mi pawh en rei ngam lo hian a rawn ti a, kei lah chuan ka lo en chik bawk si a, ani tan chuan min en reng chu a ngamawm loh ve khawp ang.

“Kan picnic nî kha a nia ka sawi, khata ka ṭawng khum dan che ah khan min ngaidam dawn nia, chuan Manutei paw’n engkim a hre tawh e” ka tih leh chu phawk zet hian min rawn en a, mahse rei erawh min en leh ngam ta chuang lo va, ka khawngaih reuh khawp.

“Ka sawi miah lo a nia aw Sir, in awm dan ka hmuh thu kha Manutei ka hrilh lo hrim hrim” ka dawhkan lam en chung hian a rawn ti thuai thuai a, ka nui chhuak ta ringawt bawk.

“Aw ka hria alawm, ka hauh che i hlau lutuk a nih khâ, ka hau lo vang che. Tunah chuan Emily-i pawh ka ban fel tawh bawk a, ka PA i nih mai a ngai ang” ka thusawi tawp ber a hriat rual chuan min lo en vat a, a hma ai mi pawh a en rei ve ta deuh.

“Ka lawm e Sir, mahse keini chu thingtlang mi kan ni sia ka thiam ve dawn em ni?” a rawn ti a, a aw aṭang chuan amah leh amah a inhmuhsitzia a hriat.

“I inzir zel dawn alawm, a huhphurhawm loh huphurh lutuk duh suh” ka ti chuan a rawn nui ta ver ver a, a hnaa a kaisan thu ka hrilh chu a lawm ve hle ni tur a ni.

Zanah chuan ka nu leh pa leh ka nau chu kan inah an lo leng a, an lo len ka beisei loh lai tak a ni bawk si a, ka hamhaih hman hle. An vai vaia an lo kal chu mak ka tih chhan ber a ni a, thil pawimawh sawi tur a awm ni turah ka ngai ta hmiah. 

A tih fô ṭhin danin ka nupui hmelṭha leh rilru thianghlim zet chuan thingpui a siam leh thlap a, ka nupui Manutei hi chuan ka nu leh pate mit a tlun ve chiang alawm. Ni lo, ka nu leh pate mai ni lovin a pasal mit pawh hi a tlun chiang khawp mai.

“Engati nge ka pa in rawn len thut a? Zan dangah in rawn leng ngai em em si lo, chutah in vaiin in la ni zui” thingpui in pah chuan ka ti a, ka pa paw’n min lo melh ta chat.

“Vawiin lamah Emily-i i lo ban em ni? I nutei pawh kan bulah a lo vui nasa hle a, keini lahin i ban tih reng kan hre si lo” ka pa chuan a rawn ti a, ka nu paw’n min lo en chik hle.

“Aw ban e, a chhan chu ka bul hnaia awm tur leh ka hnuaia hnathawk turin ka duh tawh lo alawm, a mizia a ṭha vak bawk si lo” ka ti ta hmiah a, Manutei leh ka nau chu an lo ngawi kar thung.

“Thil ho mai mai avangin i ban tur a ni hleinem, ka u phei chuan min lo hau hrep nghe nghe asin, nuam lo duh tak a ni. Thil chi hrang hrang a sawi kai a, hmeithai chhungkua an nih avanga kan hmuhsit a rin thute min sawikhum hrep a, chhan pawh ka chhang buai peih lo zawk” ka nu chuan a lo ti ve a, ka nutei chu a âng nasa leh hle dawn tih pawh ka hre nghal.

“Ka nu, thil ho mai mai vangin Emily-i hi ka ban hauh lo. Manutei bulah message chi hrang hrang a lo thawn a, kan nupa inkar khik theihna tur hlir a zawng a, ka hmai chhanah min ngaihzawn thute a sawi hial asin, Emily-i hi in ngaih ang a ni lo. Tin, ka nutei pawh hi in ngaih ang a ni lo. Kan hnathawhpui pakhat nen an inngaizawng reng, khawlai leh kan hmuh lohna chin nia a hriatah chuan nula ang chiahin a awm” ka ti ve ta sak sak a, zep neih ka tum tawh lo hrim hrim.

“Awi le!! U Emily-i chu ka rin táwk vel reng a ni. A hma daih aṭang tawh pawh khan u Mama hi a ngaizawng a nih ka ring tawh a, mahse inchhûng hnai kan ni bawk sia ka ring ngam leh lo mai mai zawk a ni. Tunah erawh u Mama kâ ngei aṭangin ka hre leh a, kei chu u Mama sawi hi a dik ka ring” ka nau chuan a lo ti ve nghal zung zung a, ka pa pawh a bu ta nghauh nghauh.

“Ka u chu ka lo hau ve dawn nia, chuan Emily-i pawh; an awm dan a lo ṭha lo hle a nih chu!” ka nu’n a rawn tih chuan rang zet hian

“A ngai lo ka nu, i hauha i zilh a ngai tawh lo. Emily-i phei chu vawiin lamah ka hau hrep tawh zawk, chuta kara i va hauh leh chuan buaina a punlun mai mai ang” ka lo ti ve thuai a, ka pa pawh chuan

“Ni e, Mama sawi kha a dik ang. I u leh a fanu chu va hau tawh lo la, keini reng reng pawh thu chiang hre hmasa hawt lovin kan lo ṭan nghal bur a, an lo dik lo ve em a nih dawn chu! Amaherawhchu hmuhsit phah lo ula, inhmuh ni khuaah pawh biak loh phah lo ula, kan chhungte an nih tho tho avangin kan en hrang tur a ni chuang lo” a rawn ti ve dap dap a, a thusawi chu ka lo thlawp khawp mai.

Rei lutuk leng lovin ka pate pawh an haw ve leh mai a, Manutei phei chuan riak turin a sawm nghe nghe a, mahse an riak ta chuang lo. A lum ka tih deuh avangin keipawh ka inbual sawk sawk a, Manutei erawh ka inbual chhungin kan mutna tur khum a lo siamfel diam thung. Inthlak zung zungin khumah chuan ka lawn kai a, ka hmeichhe hmangaih em em chu a hnung lam atangin ka kuah zui nghal bawk. Ka ban chu a lo chelh ve ran a, a hlim ve hle chuan ka hria.

“U Muanpui, zanin kha chu ka lo ṭawng ve duh ta lo law law a nih kha! Chu bakah nangmah khan i sawi fel theih ka ring hrim hrim a, chuan Emily-i i ban tih kha ka hre miah lo, min hrilh bawk si lo” ka lam lo hawi pah chuan a ti niah niah a, kei chuan ka lo nui suk ringawt.

“Emily-i i ban chhan hi ka nu leh pate bula i sawi ang kha nge ni a, thil dang daih?” a rawn ti leh a, a hmel ka en chuan hriat chak hmel zet hian min lo en kar mai.

“Ka ban chhan dik tak chu a hmel ka hmu peih tawh lo, hna a thiam lo pawh a ni hran lo. Eeee chuan, Sawmzuali kha ka PA thar atan ka ruat a, a lawm teh asin” ka tih chuan hlim tih hriat tak hian min lo en nghal vat a, min kuah chûng chung vel reuh a nih chu! A va duhawm chiang tak!

“Ka lawm e u Muanpui, kei chauh ni lova ka ṭhiannu chungah leh zel i fel hi ka lawm a ni. Sawmzuali te phei chu keini aiin an harsa ve leh chhawng a, unau pawh a nei lo. A nu leh pate lah an tar ve tawh si, reithei inti hle mah ila anmahni ka hmuh hi chuan kan retheih lohzia ka hre leh ṭhin” ka âwma a hmai nghat chung chuan a rawn ti sep sep a, kei paw’n a hnung chu ka chul ve reng bawk.

“Eng pawh chu ni se muhil ang le, vawiin phei chu ka ngai hle che a ni. Ka mitthlaah i awm reng a, ka rawn phone che lah khan i la thei bawk si lo” tiin ka kauh nghet sauh a, ani pawh chuan min lo kuah let ve nghal.

“Kha kha chu ka insu laklawh lutuk a, ka pho leh khanglang bawk sia ka phone ri pawh ka hre lo hrim hrim alawm, chutah phone khawih lovin ei rawng ka bawl leh nghal daih bawk si” a rawn ti niap nîap chuan ka lo ṭhen sak a, mahse thil ngaihtuah chhuah ka nei ta thut.

“Manute, awmpui hi la ila a ṭha lo maw? I chet hah lutuk hi ka phal lo, i chet tam lutuk vangte hian nau i pai thei lo te pawh a ni maithei a” ka tih chuan a ngawi ta kar a, a ngaihtuahna dang daih a put ka rin avangin

“Ka sawi tum zawk tak chu hahdam la ka duh alawm, nautê lamah ringawt khan i ngaihtuahna i lo sêng leh ang e, nautê ai chuan nangmah hi ka duh daih zawk che” ka tih zawm leh zat a, ani pawh a rawn nui chhuak ve leh ta sen sen.

“Dik tak chuan nautê lam ngawr ngawr ka lo ngaihtuah leh hman tak tak a, mahse i thusawi avang khan ka ngaihtuahna ka thlak leh ta vat a ni. Nang ang mipa ka pasal i ni hi ka lawm u Muanpui, ka lawm lutuk, chuvang a nia ka hmangaih em em che”

“Het!! I pasal hi ka lai mai ang asin, mipa ṭha min ti ringawt a, ka hmel i sawi tel miah lo. Ka hmelṭha lo em ni?” tiin ka lo zawt let zaih a, kan nupa boruak chu a nuam reuh hle.

“Ṭha tih chuan a huam zau alawm, mipa ṭha ka tihna chhan che chu engkima i ṭhat vang a ni. I hmelṭha a, i pá a, i pa lian a, i rilru a puitlingin a ṭha a, i nupui min duat thiam em em bawk a, kei chuan sawiselna tur che ka nei lo a ni. Ka pasal ni tawh mah la ka zah em em tho che a, mahse chu erawh ka hmangaih vang che a ni thung” a rawn tih leh chuan lawm lutuk avangin ka âwm aṭangin ka nam hla thuai a, a hmuiah tak ka fawp ta vawng vawng.

Emily-i ka ban aṭangin thla 2 lai a liam leh tawh a, Sawmzuali pawh rin ai tak chuan hnathawh dan a thiam tawh khawp mai. A tirah te kha chuan amah a insit ru tlat a, chu chuan amahah inrintawk lohna a pe ṭhin. Amaherawhchu zawi zawiin a insiam ṭha a, keipaw’n a tih dan tur dik leh kal hmangte chu ka hrilhfiah ve zung zung zel. 

Sawmzuali chu a hna ka kaisan tir avangin lawm tho mah se ka nupui Manutei ber chu a lawm a, ka chungah phei chuan ṭha tak a ni. Kei lah chuan nuam ka lo ti ve em em bawk a, ka nupui nen pawh kan inkar chu a ṭha khawp mai.

“Mama, tunah Ebenezer Hospital-ah lo kal nghal ang che u” phone call ka lâk rualin ka pa chuan a rawn ti a, a thu rawn sawi daih daih chu mak ka ti hle.

“Eng vang chuan maw ka pa? Tu nge dam lo awm a?” ka thil ziah lai chawl meuhin ka ti a, ka pen pawh chu ka tuai vir ka tuai vir ringawt bawk.

“I nu hian accident a tâwk hlauh mai a, a zia lo tak tak a ni. I nau nen tunah hian kan awm mêk a, nang pawh Manutei va lam la, in lo kal ve nghal dawn nia” a rawn tih leh chuan ka pen tuai vir chu ka tawp chat a, ka ṭhutna aṭanga thovin kan inbiakna chu ka hmet tawp zui nghal.

Chak takin kan in lam chu ka pan a, kan in ka thlen chuan Manutei thil awm dan ka hrilh nghal mawlh mawlh a, ani pawh ka nu chanchin a hriat chuan a lo hlauthawng nghal hle. Ebenezer Hospital lam kan pan laite chuan Manutei chu a ṭawng reng a, ka nu a ngaihtuah thu ringawt chu a sawi bawk. Kei paw’n ka nu chu a lo serious viau ang tih ka hlau ru em em a, a chungah thihna hial a thleng ang tih ka hlau ta ber.

Hospital kan thlen rualin ka pate chuan min lo be nghal a, ka nu chu an zai mek thu an sawi bawk. Ka nau chu a rawn ṭap chhuak hawk a, Manutei chuan a lo kuah ta vat. Ka pa pawh sawi kher lo mah se a hlauthawng ve tih a hmel aṭang chuan a hriat hle a, rei lovah Emily-i leh a nu pawh an rawn thleng ve nghal. 

Emily-i nu chu a rawn ṭap vak vak nghal a, kei chuan ka lo hmu lem vek tawh. Mi dang lo awm ve te pawh chuan a ṭah rin em avangin an en ṭhup a, thu chham ang deuh reuh te a la nei zui.

Darkar 4 hnu velah Doctor te chuan an zai hlawhtlin thu leh thisen a mamawh thu chu an rawn sawi a, ka nu chu inzaina room aṭangin an nawr chhuak zui nghal bawk. Kan chhungkuaah ka nu thisen milpui chu keimah leh Manutei chauh kan awm a, Emily-i chuan ka nu thisen chu a lo mil ve bawk. 

Thisen pe tur chuan kan kal thuai a, ṭawng awm miah lo mah ila kan boruak chu a rit nghal hle. Doctor te chuan kan thisen chu an la zung zung a, kan tihfel zawh chuan Laboratory lamah a thianghlim tawk em tih check turin an keng zawm zat bawk. Ka nu awmna room pawnah chuan kan ding ṭhap a, inbia réng kan awm lo.

“Pu Muanpui, lo kal lawk teh” Doctor chuan a rawn ti a, Manutei ka kuahna aṭangin ka kal sawn a, ka pateho paw'n min lo en ṭhap.

“Engenita Doctor?” a office chhunga kan luh hnu chuan ka ti a, chuti anga min kal hranpui daih kher chu ka hrethiam lo hle a ni.

“Hei a zia lo khawp mai, a lan dan chuan in zingah thisen thianghlim tâwk lo an lo awm palh a, amah taka pawh la hrilh duh lovin nangmah ka hrilh hmasa ta zawk che a ni” a rawn tih chuan mak ka ti ru hle a, tu nge thisen thianghlim lo ber tih chu ka hriat duh a ni ta.

“Tu nge thisen thianghlim lo chu ni a Doctor? Keimah hi em ni?” ka tih chuan a lu a lo thing nang nang a, thil awmzia chu ka hrethiam lo tulh tulh.

“Ni lo ve, nang ka hrilh daihna chhan che chu i nupui thisen hi a thianghlim tâwk loh vang zawk a ni” a rawn tih chuan ka meng phawk kher mai.

“Manutei chu HIV positive i tihna em ni? A va mak ve, engtin nge a nih theih?  Chhuah pawh a chhuak ngai mang lo asin, kan inah a awm tawp zel. AIDS vei te chu sex hman vang emaw ruih theih thil tih vang emaw an ni tlangpui a ni lo’m ni?” ka ti nghal thuai thuai a, ka kut chu ka hum ruh hle bawk.

“Ni vek lo ve, vanduai palh vang liau liaua kai pawh an awm nàwk ṭhin alawm, a pawi ka tihpui khawp mai che, i nupui chu pangngai takin i titipui dawn nia. Eng pawh ni se nangmah hi i la thianghim a, i fimkhur a ngai hle dawn a ni” a rawn ti leh dap a, ka rilru chu a buai tak zet tawh a ni.

“Kan test ṭha leh thei ang em?” ka ti ta tawp a, ka rilruah Manutei tih loh chu a awm tawh lo, ka nupui chu ka khawngaih lutuk.

“I duh chuan kan test nawn thei alawm, mahse kan tisual khât khawp asin, thisen pek ni khuaa lo thianghlim tâwk lo te pawh hi an awm ve leh pheuh pheuh zel. Nangmah ang tho hian anni paw'n test nawn turin min ti ṭhin a, mahse kan test nawn pawhin result chu a ngai reng zel tho” a rawn ti leh charh charh a, ka kiu dawhkana nghatin ka lu chu ka dawm vang vang a, eng nge tih ber tur pawh ka hre tawh lo.

“Test nawn leh chu i duh em? I duh chuan i nupui chu va ko la, mahse a ruk thei ang berin i va ko dawn nia” a rawn tih leh chuan ka lu ka lo thing a, test nawn chu ngai ka ti ta lo a ni.

“A ngai lo ve, chanchin min hrilh vat avangin ka lawm e” tiin Doctor office chu ka chhuahsan a, Manutei te awmna lam pawh pan mai duh lovin bathroom-ah ka lut daih. Ka rilru nâ leh mangang lutuk chu ka thaw leh hawk ṭhin a, ka hmai te chu ka phih vak vak ringawt.

Manutei te awmna lama ka phei lai chuan min lo en ṭhap a, Manutei ber lah chuan min lo la nuih zui. AIDS vei a ni tih hria ngat se zawng min nuih thei hauh lo vang, a ṭap nasa dawn lutuk, ka khawngaih lâwk zawk a ni. 

Ka pa chuan ka nu chu a awmpui tur thu a sawi a, mi dang chu haw vek turin min ti bawk. Ka nau pawh kan in lamah kan hruai phei ta tawp a, Manutei nen chuan an inzui deuh chawt a ni ber. 

Chu zan ang renga muthilh har chu ka nunah ka la tawng ngai lo va, ka tlaivar ta ṭhak.

Ka nu pawh an zai aṭanga darkar tam fê hnuah a rawn harh a, kar khat hnuah phei chuan in lamah kan haw ta daih. Kei pawh Dotor berin fimkhur tura min tih miau avang chuan ka theih tawpin ka fimkhur ve a, mahse ka nupui chu ka la hrilh duh chuang lo. Hmel hlim tak pu chung hian min be zel a, chu chuan min hrilh tir thei lo a ni.

Amaherawhchu hrilh loh tawp ka tum bik lo va, ka hrilh hun tur ka la hre lo thung. 

Thla khat a liam leh meuh chuan keimah chu ka awm thiam tawh lo zawk, ka nupui laka inla hrang reng renga nun hman chu khawvela thil hrehawm ber a ni hial hian ka hria. 

Manutei pawh chuan min en vawng vawng châng a nei ṭhin a, kei lah kuah tih chauh lo chu ka ti ngam tawh bik si lo. A hmuiah te chuan fawh ka duh a, nupa nun pawh hmanpui ka chak ṭhin, mahse chung zawng zawng chu thil tih chi a ni si lo.

“Manute” thawmhnaw a thleh fel mawlh mawlh lai chuan ka ti sup a, ani paw’n min lo en rang hle. Min lo nuih leh nghal sen sen a, kei pawh chu ka lo nui ve leh ta ringawt.

“Manute, inbe lawk ila” ka tih chuan thawmhnaw keng bawr ṭûn hian a lo phei thuai a, ka bula lo ṭhu chung chuan a thleh chhunzawm leh malh malh.

“Vawiin chu u Muanpui ka ngai khawp mai che, hun i neih veleh lêng chhuak ve ila, kan chhuak dun khât ê” a rawn tih chuan ka thil sawi tum chu sawi leh loh mai ka duh rum rum.

“Manute, ka thusawi tur hi chiang deuhin lo ngaithla rawh aw” a dar chelh chunga ka tih chuan min lo en vat a, mak a tih hmel hle bawk.

“Thil dik lo a awm em ni u Muanpui? I va lungngaih hmel ve, i awm dan hi a dik miah lo a nia” a rawn ti ta thuai a, nuihza lo zet chuan ka lo nuih ringawt.

“Ka nu thisen kan pek ṭum khan thisen thianghlim lo pakhat a lo awm a, chuvang alawm Doctor pawh khan min koh hran daih. Doctor sawi dan chuan i thisen hi a thianghlim lo a ni Manute, keipawh hian dawt ni se ka ti ngawih ngawih” ka tih chuan rang zet hian

“Enge i sawi awmzia u Muanpui? Ka thisen a thianghlim lo i tih awmzia chu min han hrilh chiang teh, min tihlauthawng a nia” a rawn ti a, thawk ka lo la hawk ringawt.

“Manute tunah hian HIV positive i ni mek” tiin ka kuah vat a, a ngawih vang vang hnuah a rawn ṭap chhuak ta. Kei ngei pawh chu ka mittui a tling pam a, sawi leh tur engmah ka hre tawh lo.

“Ni lo, a theih loh, AIDS ka vei duh lo” ti tuarhin ka kuahna aṭang chuan a tal chhuak a, a thawmhnaw chu a phel sawk sawk a, a bra leh a underpant thleng chuan a hlip a, hmanhmawh takin bathroom lamah a tlan lut zui nghal.

“Manute!!!” bathroom chhunga a thil tih lai ka hmuh rualin ka ti hluai a, ani erawh ka kohna pawh hre lovin a taksa te chu a silfai vak vak a, ṭap chunga a insil nawn tluk tluk chu ka en reng thei ta lo.

“Manute, ti suh, ti tawh suh” tiin a inleih lai chu ka kuah bet thlawp a, ring tak hian a rawn ṭap chhuak ta hawm hawm. Pawm kang lawpin khum lam chu ka panpui a, rizaia khuhin ka muttui pui ta thuai.

“U Muanpui, ka va tenawm ta êm, sik pawh hi min si tawh suh” tiin a rawn tal a, mahse kei chuan ka hlata awm tir ka lo tum teuh lo.

“Ni lo Manute, i tenawm lo, mite’n i tenawm ti che mah se ka tan chuan khawvela hmeichhe thianghlim ber i ni tho tho” ka tih chuan nghet taka min kuah chung hian a rawn ṭap a, duat taka lo kuah let chauh lo chu tih theih ka nei rih lo.

Chu zan aṭang chuan ka nupui chu inthlahrun tak tê hian ka lakah a inthlahrung a, a va han nuam lo chiang kher êm. Ka eng tih mah a tui lo va, zu pawh ka in nasat phah. Manutei pawh chuan ka zu in chu min thlir tawp zel a, hauh pawh min hau tawh ngai lo. 

Ṭhutthlenga han chah thlak châng te pawh ka ngah a, ka nupui nen chuan khum khatah kan mudun khât ta hle. Ka rilru hah lutuk tihreh nân zan tin ka leng chhuak a, leng chhuak lo thei pawh ka ni lo. Ina ka awm lahin ka nupuiin ka sik a duh lo va, kuah ngawng ngawng ka châk châng pawhin ka nupui chuan thinrim tak hian ka kuah a duh loh thu a sawi zawk ṭhin.

Friday zan a ni a, a ngaite bawkin ka nupui chu ka len chhuahsan leh tawp tawh. Ka sik a duh bawk si lo, ka kuaha ka fawh a duh bawk si lo, ka tan chuan ina awm reng chu a hneawm ve thawkhat a ni. Kan zu inna hmunah chuan nula te chu an awm ve nual a, mahse tumah han it emaw pawh ka nei lo. 

Anmahni zawk chuan min lo hnaih a, min lo be siam siam a, an awm dan aṭang min duh tih pawh ka hrethiam. Kei erawh ka thinlung leh ka lung chu ka nupui tan chuah ka phut tir a, tû hmeichhe lakah mah uiresan emaw kalsan emaw ka tum lo.

Kan ina ka haw chuan light vel chu a lo in off thim ṭhap tawh a, ka nupui chu a muhil tawh a nih ka ring. Kan nupa room-ah pawh chuan ka chho ta lem lo va, ka nupui berin a bula ka mut a duh leh dawn chuan loh avangin ṭhutthlengah chuan ka mu ta daih.

Ka mit ka men leh chuan khua a lo var vek tawh a, ka bana sana ka en chuan dar 9 a lo ri diam tawh. Zan lama puan sin miah lo kha zing lamah erawh ka lo sin fel thân a, choka lama thawm awm chu ka nupui ngei a ni tih ka hre zui nghal.

Ka mutna aṭangin ka tho chhuak a, ka nupui awmna lamah chuan ka phei a, kutkawr bun chung hian chaw ei chu a lo siam malh malh a, min hmuh rualin min lo nuih leh sen sen tawh. 

A awm dan engkim chuan ka rilru a tinâ, ka rilru chhungril a tinâ tak zet a ni. A kut chuan min hui a, chaw ei turin min sawm zui nghal bawk. Kutkawr la bun reng chung hian fianin chaw chu a ei a, zing dang ang lo takin a ṭawng duh hle. Vawi tam tak

“Inkuah leh thil ho mai mai aṭang HIV hi a inkaichhawn theih loh” tih chu ka hrilh ṭhin alawm, mahse ani chuan ka laka a inthlahrun lutuk tawh avangin

“I kai ve palh ang, heti ang hian ka awm a ngai zawk u Muanpui” a tih tlat zel a, ka tih ngaihna hre lovin ka en liam vel mai mai ta tawp.

Chaw kan ei kham te chuan hnaa kal châkna reng ka nei lo va, chutia ka inngaihtuah bing lai tak chuan ka nupui chuan min lo ko a, kan nupa room lama chho lawk tura min tih avangin ka chho ve nghal mai bawk. Kan nupa room ka lut chiah chu ka meng phawk chiang hle. Manutei chuan nui sen sen hian min lo en a, a bulah chuan thawmhnaw bâwm a lo la inhung ran zui. 

“Khawiah nge kal i tum? Eng vanga khang thawmhnaw bâwm kha i bula awm nge a nih?” ka ti ram hmuk a, ani erawh chuan min la nuih thei nia.

“U Muanpui min hrethiam hram ang che aw, kan pahnih hian kan inṭhen a ngai a ni. Kan khaw lamah ka haw ang a, ka lo let tawh lo vang” a rawn tih chuan a lam chu ka pan hmawk hmawk a, a dara thing vak vak chungin

“Mawli, eng vanga ka phalna tel lova min chhuahsan tum ringawt nge i nih?” ka ti hrawk a, ka insum thei tawh lo chuan khumah ka theh thlu tawp a, ka bula thawmhnaw bag lo inhung chu bangah ka vawm ri chawrh bawk.

“Ni e, ka mawl alawm, ka mawl vang a nih hi HIV natna pawh ka kái bîk. Chuvang chuan kei leh nang hi kan chen dun a thiang tawh lo, min dang lo vang che” a rawn ti ve ta hrawk a, a mittui te chu a biangah luang zawih zawih mahse hruk pawh a tum lo.

“Ka dang khawp ang che, chhuah tum reng reng suh. HIV natna ka kâi kha i hlau vela ti raw? Kei chuan ka hlau ve hleinem, ka hlau chhe té them lo” ti vin ṭhawtin a banah ka man bet a, khumah bawk chuan ka theh tlu leh a, a dar leh hnute te chu ka fawp zui nghal buan buan.

“Duh tawk rawh!!” ti tuarin ka hmaiah a rawn beng pawp a, kei pawh chu ka tawp chiang hle.

“Ka hmangaih che Manute, nang ka hmangaihna che hi engmahin an dal zo chuang lo vang” tiin a bianga mittui awm te chu ka hruk hul sak a, ani erawh chuan ka kut chu a lo vai sawn thuai a, khum aṭangin a tho zui nghal hmak.

“Min hmangaih ve ta lo em ni LALHRIATPUI!?” a chet dan hrilhhai thlak lutuk avang chuan ka ti vin leh ta hrawk a, ka insum hlei thei tawh lo a ni ber.

“Hmangaih e, ka hmangaih vang che a nih hi ka chhuahsan dawn che. I kâi ve ka phal lo u Muanpui, he natna tenawm tak hi i taksaa a awm ve ka remti lo” a ṭawng tawp lam chu a zawi hle a, kei ang bawkin a lungngai tih ka hre thei.

“Min hmangaih chuan kan pahnihin he natna hi vei mai ang, chu chu thil tih dan awlsam ber a ni. Kei chuan he natna vei hi ka hlau ve lo va, i kai ai te hian kai thei ila ka ti daih zawk” ka tih chuan lu a lo thing nâng nang a, mi pawh en rei lovin a thawmhnaw darh nuaih chu a rut zui hmak.

“LALHRIATPUI, ka thin tirim zawng hian awm ziah suh” tiin a thawmhnaw chhar lai chu ka phih tho lawp a, ani pawh a lo tal pit rang hle.

“Ka ṭhen dawn tho tho che, engti ang pawhin min dang mah la ka ṭhen dawn tho tho che a ni. Chuvang chuan min dang buai tawh lo la, i hnaah va kal vang vang rawh” thinrim tak hian a rawn ti a, chutah zet zawng ka rilru chapona chu a rawn chhuak lo thei ta lo.

“A tâwk e, kan inṭhen khawp ang. Kan inṭhen ang a, i haw ang a, i duh thlanna avang hian inchhirin ngaihdam min dil ngai suh ang che, a chhan chu ka ngaidam thei tawh lo vang che” ka ti chhuak leh hrawk a, ani erawh a ngawi ta kar.

“Inṭhen i duh vel a, kan va inṭhen dawn chiang êm” tiin a thawmhnaw darh nuaih chu bag-ah ka khung khawm sak hmawk hmawk a, ka khung fel zawh chuan a bana kaiin ka pawt chhuak ta dawr dâwr.

Motor chhungah dim lo bak sak hian ka nam lut pawp a, a intauh na a ni ngei ang a ṭhen nghal chai chai. Thinrim takin an khaw Sumo counter awmna lamah chuan ka tlan a, kan tlan chhung zawng chuan ani pawh a ṭawng lo hrim hrim. Sumo counter kan thlen te chuan ṭawng miah lovin a bag vel chu ka khai thlak sak a, Sumo chhuak tur a lo awm reng chang hlauh bawk nen ka biak fel sak nghal ta zung zung. 

A banah ka kai leh dawr dâwr a, ani erawh kan in kan chhuahsan aṭang khan a ṭawng leh tawh lo hrim hrim. Sumo chhungah chuan ka ṭhut luh tir a, Sumo fare chu ka pek lâwk sak nghal vek bawk. A ṭhutna lamah chuan ka phei leh a, a bula chuang ve mi dangte chuan ka chet dan chu mak an lo tih hmel hle. Ka wallet-a pawisa awm zawng zawng leh ATM card chu ka pe a, ani erawh bianga mittui dir zung zung chung hian min lo en thung.

“Ṭap hlek suh LALHRIATPUI” ka ti hmuk a, kan awm dan chu mi hriat pawh ka hlau tawh lo. A bianga mittui luang chu pawisa a ken lohna lam chuan a hru a, chungte hlei hlei chuan ka thin a tirim. Ka thusawi awih ang takin a awm vel a, hrep tak hian a!

Hawi let leh tawh lovin Sumo dinna aṭang chuan ka kal sawn a, motor chhunga ka ṭhut luh te chuan ka thin chu la rim tak a ni. Ka motor chu tirumin tlan chhuah mai ka tum a, mahse ka thei lo. Ka rilru chuan hawi let lo turin min ti ngar ngar a, mahse chu chu thil harsa tak a ni. 

Motor aṭangin ka chhuak a, ding chung chuan ka en ta reng. An tlan chhuah dawn chuan ani paw'n min lo en a, min lo nuih a, ka hriat loh laiin ka biangah chuan ka mittui a rawn baw ve ta zawih.

A ban chu sang vak lo hian a lo vai a, rei lovah min hnung chhawn zawngin an tlan zui ta vang vang. Motor chhunga ka luh leh hnu pawh chuan tlan chhuak mai lovin ka indawm kun reng a, minute eng emaw zah chu ka awm nghe nghe. 

Ka che thut a, motor chu tinungin ka inher pawp a, Manutei te tlanna lamah chuan ka tlan chhuak zui nghal. Zemabawk thleng chu ka tlan phei hman tawh tihah motor chu ka tiding leh ta nge nge a, um zui leh tur chuan ka chapo tawh lutuk a tin ni!

Ka nupui nen kan inṭhen aṭanga kar khat hnuah pawh ka chhungte chuan Manutei nena kan inṭhen thu chu an la hre lo va, a chhan pawh an rawn lên ngai loh vang leh ka hrilh loh vang a ni. Kar hnih hnuah erawh an ringhlel ṭan a, mahse chuti angin min rawn chik em em chuang lo. Ka nupui chu an hmuh khât thu an sawi ṭhin a, kei lah chuan chhanna mumal pawh awm lo hian ka lo chhang ve mai zel bawk. Kar thum hnuah zet zawng an hre chhuak ta a, ka pa chuan kut min thlak nghe nghe.

Ka chhungte chuan ngaihzawng ka neihsan avanga inṭhenah an ngai a, a chhan pawh kan inṭhen chhan dik tak ka la hrilh duh loh vang a ni. Ka rilru hah lutuk leh Manutei ka ngaih lutuk chu zan pawh ka muhil thei lo va, ka chhungte phei chuan ka nupui chu hruai haw leh an tum nasa hle. 

Amaherawhchu keima’n ka phal tawh lo bur a, kan inṭhen chhan dik tak chu ka hrilh lo thei ta lo. Ka hrilh lo a nih chuan hruai haw ngei ngei an duh dawn si a, chu chu kei chuan ka tih tir thei ta lo a ni.

Kan inṭhen chhan dik tak an hriat meuh chuan ka nau phei chu a ṭap tawp a, ka nu pawh a bang bik chuang lo. Ka pa erawh ka chungah a thin a rim em em a, ka dem hran lo. Engkim chu keimahah bur bun vek se, Manutei chu dem ve miah lo se ka duh zawk a ni. Ka nupui nen kan inṭhen hnu aṭang ka chhungte nen chuan kan inpawh lo sawt em em a, chu chuan Manutei an lo ngainat thuk tawhzia min hriattir ta bawk.

Ka nupui nen kan inṭhen aṭanga thla 2 hnuah Sawmzuali chuan a ṭhiannu nen kan inṭhen tih a hre ve chiah a, ka chungah chuan a lungawi lo ve hle. Manutein kan inṭhen chhan tak a lo hrilh duh bik si lo va, kei lahin ka sawi duh tawh bik der si lo. 

Hna kan thawh lai te chuan kan inṭhen chhan chu min zawt leh tawp ṭhin a, mahse ka sawi duh ngai chuang lo. A tawpa tawpah chuan Sawmzuali chu banna lehkha nen ka office chhungah a rawn lut a, ka hamhaih ang reng hle. A ban chhan ka zawh chuan

“Manutei vanga he hna hi hmu ka ni a, mahse tunah chuan in inṭhen tawh a, ka thawh zawm thei tawh lo vang, min hrethiam dawn nia u Muanpui” a ti mauh mai bawk si. Bâng lo tura ka tih paw’n ka dang zo ta lo va, a hnuah phei chuan Restaurant velah a thawk ta daihin ka hria.

Ka nupui nen kan inṭhen atanga kum 3 lai a liam hnu pawh chuan Manutei chu ka la theihnghilh thei chuang lo, ka tum nasat pôh leh ka thei lo tulh tulh zawk. Theihnghilh tumin nula chi hrang hrang ka kawp kual vel a, mahse chung ka hmeichhe kawpte chu tumah sex ka hmanpui lo, ka duh lo bawk. 

Mahni chauha awm ka nih avangin ina min rawn kalh chilh châng pawh a tam a, mahse chutah pawh chuan tumah ka riah tir ngai lo. A ṭhen phei chu an tihtuah phah a, rei pawh min kawp duh lovin min ṭhen leh vat ṭhin. Kei erawh chuan engah mah ka ngai lo va, ngaihzawng chu a hminga nei ve mai mai ka ni.

Ina ka mi hruai luh hnem ber chu ka ṭhiante an ni mai a, chu pawh zu in tur vel bakin ka hruai lut ngai lo. Kum khat tal tawp chu zu ka in nasa em em a, mahse a kum hnihna aṭang erawh ka bansan ta hmak. Ka muthilh apiangin Manutei chu ka mumangah ka hmu ziah a, zu in lo tura min lo tih ṭhin avangin ka in zawm thei ta lo a ni. Chuti ang khawp chuan ka nupuiin keimahah nghawng a la nei nasa hle a, ka hmeichhe hmangaih hmasa ber a nih vangah ka puh ta ringawt.

A chang phei chuan an khaw lama han kala hruai haw leh mai chu ka duh rum rum a, mahse chu pawh ka rilru chapona avangin ka ti lo nge nge zel. Ka chhungte phei chuan AIDS natna a vei avanga hruai let duh tawh lovah min ngai hmiah a, mahse a ni lo nasa si. 

Theih se chuan AIDS natna chu vei mai ka duh a, hlauhna chhe tê mah ka nei lo zawk. Amah zawkin inṭhen kha duh bur lo se chuan kan inṭhen miah lo vang, ka mipa rilru chapona kai tho zawng takin min ṭawng khum a, ka tan chuan thlan tur dang a awm lo a tin ni!

Monday a ni a, rilru ipik zetin office chhungah chuan ka ṭhu a, engtik lai mahin mood fuh lai ka nei lo a ni ber zawk. Ka hnuaia thawk te phei chuan biak pawh min be ngam tawh lo va, a hmaa min nêl em em ṭhin te chuan a ṭihin min ṭih ta hial. Kei lah biak khat pawhin ka be hmasa ngai lo va, ka hnuaia thawh chu a hrehawm ve ngat ngat khawp ang. Chutia tukverh lam hawia ka ṭhut lai chuan ka hnuaia thawk hmeichhe pakhat chuan min hmu duhtu an awm thu a lo sawi a, kei paw'n lo luhtir turin ka hrilh ve mai.

“Nang maw!!!?” ka office chhunga lo lut mek hmel ka hmuh rual chuan ka ti a, ka ṭhutna atangin ka ding nghal hluai a, ani erawh ṭah chhuah hmel deuh hian min en thung.

“U Muanpui, zah pawh dawn lovin ka lo kal tawp a ni. Khawngaihin Manute te hi pui hram rawh, a thla zawn deuh thawin a nu leh pa a chân zo chiah a, ka khawngaih êm mai” Sawmzuali’n a rawn tih chuan a thusawi tum ka la hrethiam lo hle.

“Enge i sawi awmzia? Engati nge ka puih a ngaih? Kei te chuan ka pui reng alawm, kan inṭhen dawna Card ka pekah khan ka thla tin hlawh ka thun ziah alawm, eng vanga pui tur chuan nge min tih?” ka ti chiah chu a ṭah chhuah hmel zual sauh.

“A hmang duh hleinem, pakhat mah i pawisa a hmang duh lo. A nau te ho leh a fapa enkawlna atan rim takin hna a thawk a, thawh hreh pawh a nei lo asin. Ka theih tawp chuan ka pui ve ṭhin, mahse kan lo harsa ve tho bawk sia ka tlin rei lo a ni. A thu hrimah engatinge in inṭhen reng reng? A tua mah lah hian in inṭhen chhan tak insawi duh bawk si lo” ṭap pur chung chuan a rawn ti ta a, mahse kei chu ka rilruah thil pakhat chiah a awm daih thung.

“Fapa a!!!? Manutein fapa a nei maw!!!? Kan inṭhen hnuah pasal a nei leh em ni?” ka tih chuan a ṭap lai chu a tawp hmak a, kei aiin mak a tih hmel daih zawk.

“I hre miah lo em ni u Muanpui? In inṭhen khan a rai daih tawh alawm, chuvang chuan a nia in inṭhen kha mak ka tih em em” a rawn ti ta mai, ka rilru chu a va han buai tehreng em.

“Thil awm dan hi ka hrethiam bik chiah lo, amah khan min ṭhen duh tlat lo se la chuan kan inṭhen hauh lo vang” thinrim tak chuan ka ti nghet charh a, tukverh lam chu ka hawi leh ta daih.

“Chuan i pui dawn em u Muanpui? Inṭhen tawh mah ula i nupui hlui a nih vang tal pawhin pui turin ka ngen a che. Hmai chhanah ngei amah bia la, i sawi a nih chuan i pawisa pawh a hmang duh em em ang” a rawn ti leh a, thawk ka lo la hawk ringawt. 

Chutia rilru buai nuaiha ka awm lai chuan ka phone a lo ri a, min lo call tu chu ka pa lek chu lo niin. Phone call chu ka pick up a, Emily-i damdawiina a awm thu leh a serious thu a rawn sawi a, mak ka ti hle. Ka ngawih reng hnuah damdawiin lama kal turin min ti leh a, keipawh chuan ka kal tur thu ka sawi ve leh mai a, kan inbiakna pawh rei lovah kan titawp zui nghal bawk. Sawmzuali awmna lam hawia ka inher leh chuan a hmel reng ka hmu tawh lo va, room chhungah chuan keimah chiah ka lo awm tawh. 

Ngaihtuah buai vak duh lovin office chu ka chhuahsan a, Emily-i awmna Civil Hospital lam chu ka pan zui nghal. Ka rilruah erawh Sawmzuali thu min hrilh chu a châm reng a, Manutei bawk chuan ka ngaihtuahna zawng zawng a luah fai leh ta vek. 

Fapa tih te kha a sawi a, mahse Manutei chuan a rai thu pakhat mah min hrilh bawk si lo. Engkim chuan ka rilru a tibuai vek tawh, chutah Emily-i a lo dam lo ve leh khanglang bawk si. Hospital ka thlen chuan ka chhungte chu an lo awm kim ṭhap a, min hmuh chuan mak an tih hmel hlawm hle.

“U Mam, engtin nge i hriat a?” ka nau chuan a lo ti thuai a, ka nu leh ka nutei phei chu an hamhaih hmel hle. A awm ve tho, khang kum 3 chhung khan kan inpawh lo êm bawk a ni.

“Keima’n ka ko a nih kha!” ka pa chuan bang ngheng chung hian a lo ti a, mi dang paw'n en pawh min en zui ta lo.

“Tu nge Muanpuia tih hming pu in awm em?” Doctor in a rawn tih chuan ka meng phawk teh e, kei ang bawkin mi dang pawh chuan mak an lo ti ve tho.

“Keimah ka nia” tiin ka ding ṭha a, chutah Doctor chuan pangngai deuh hian

“Dam lo sawn a hmu lawk duh che a, va lut nghal mai rawh, mahse biak rei vak chi a ni lo vang” a rawn ti leh a, a thusawi chuan kan za vaiin min ṭhawng chiang kher mai.

“Mâw? Aaaaa…aw…aw le” tih bah nuaihin room lam chu ka pan a, room chhung ka luh chuan Emily-i hmel ka hmu nghal a, a lo chauh hmel hle.

“U Muanpui, i lo kal thei maw?” a rawn ti zawi sep a, a aw aṭang reng reng  pawh chuan a chau tih a hriat ngawih ngawih.

“Aw ka lo kal alawm, engati nge kei teh daih min hmuh i duh a?” tiin ka zawt nghal tawp a, min hmuh duh chhan chu ka hre lo chiang em a tin ni!

“Min ngaidam ang che aw u Muanpui, min ngaihdam thei lo a nih paw’n ka dem miah lo vang che” a rawn tih chuan mit tizim sun hian ka lo en a, chutah amah vek chuan

“Manutei kha a positive lo, keimah zawk hi ka positive a ni. I nu thisen kan pek ni khan kei paw'n ka hre ve chiah a, ka hlauthawng lutuk kha ka hmelhriat Doctor ka thurualpui ta tawp a ni” a rawn ti chiah chu ka ṭhutna aṭang rang takin ka tho a, ani erawh chuan mittui tling pamin min lo en thung.

“Eng vanga ti nge i nih Emily? Eng vangin nge Manutei chu positive anga lantir nge i nih?” ka ti hrawk a, dam lo ni mah se ka aw chu ka thunun thei tawh lo. 

“A chhan chu ka thin a rim alawm, ka thik bawk. A nun zawng zawng kha chhe vek se ka duh a, inṭhen ngei ula ka duh bawk, mahse tunah chuan hman anga rilru chhia kha ka pu tawh lo. Min ngaidam rawh u Muanpui, min ngaidam hram rawh” a rawn ti mawlh mawlh a, mahse kei chuan ka ngaihdam theih ka ring lo.

“Tu nge!!? Tu phiangsen nge i thurualpui Doctor chu!? A hming min hrilh rawh, tunah hian a hming min hrilh nghal rawh” ka ti vin leh tuarh a, ka thinrim lutuk chu ka za zek zek tawh.

“Doctor Thlenga, Ebenezer Hospital-a mi, chuan Manutei hnenah khan ngaihdam min lo dil sak mawlh mawlh rawh aw, in inṭhen hnu thleng thlenga ka la tibuai te kha ka inchhir tawh êm mai” a rawn ti sep a, chak mangkhengin room aṭang chuan ka tlan chhuak nghal. Room pawn ka thlen chuan min lo biak an tum a, mahse kei erawh chu biak theih loh khawpa chakin ka tlan ta vang vang.

Motor chu chak taka khalhin Ebenezer Hospital lam chu ka pan nghal a, Horn pawh ka pe thla nasa hle bawk. Mi dang paw'n ka hmanhmawh a ni tih hrethiam tak hian kawng min lo kian zung zung a, ka thinrim lutuk avangin ka thate chu a khur thei hial. 

Hospital Area ka thlen chuan rang takin motor aṭang ka chhuk a, Doctor Thlenga tih chu ka zawng nghal bawk. Nurse pakhatin a awmna min lo hrilh a, thawm ka dim lo bawk nen a office chhung ka luh chuan mak a lo tih hmel hle.

“Nang mi tlak tlai lo pa, hmela, nangmah avangin ka nupui nen kan inṭhen tih i hria em?” tiin ka hnek nghal buan buan a, thah daih mai ka duh. Ani erawh vawi tam kut ka thlak hnuah a chau thuai a, a chet a rem lo ve bawk nen min khawih let hman lo hrim hrim.

Phih tho lawpin a office aṭang chuan ka pawt chhuak dawr dâwr a, chutia ka che vel min lo hmuh chuan Nurse te chu an lo ṭe chiam a, mahse kei chuan tumah ka zah tawh lo. Nurse pakhat chu thinrim takin Director office awmna lam ka zawt a, hlauh hmel tak hian min lo hrilh ve vat. 

Director office chhungah chuan ka mi man beh pa chu ka theh lut pawp a, a chau tawngkhawng tawh a ni ang chhuatah a bawk nghal thlawp. Ka chet dan avang chuan mak ti zet hian Director chu a lo ding a, an Director te thleng thleng chuan sawisak mai ka duh, chuti ang mi tlak tlai lo an chhawr chu ka hua a ni.

Director chuan thinrim tak hian thil awmzia min zawt a, amah aia thinrim zawkin kum 3 kal taa thil thlen dan zawng zawng chu ka sawi ta vek a, Doctor lak tlak loh zet chuan phawk deuh hian min lo en nghal. Keipaw’n rum takin ka lo melh a, mi pawh a en rei ngam ta lo. 

Ka awm lai ngeiin Hospital Director chuan ka thusawi chu a dik leh dik loh a zawt nawn leh ngat a, mahse chhanna mumal erawh a pei thei lo. Awkâ vin tak hian Director chuan a zawt leh a, chutah zet zawng thu dik a rawn sawi ta, ka va han nâ ngawih ngawih tak em.

Hospital Director chuan ka kut vuan meuhin ngaihdam min dil a, Doctor Thlenga chu a suspend nghal tur thu min hrilh a, mahse kei chuan chhan khat pawhin ka chhang lo. Min vawnna kut chu nâ zetin ka thing thla a, thinrim takin room aṭang chuan ka chhuak zui nghal. Ṭhutthleng lo awm remchangah chuan indawm kun ngulin ka ṭhu a, kum 3 liam taa thil thleng chu ka ngaihtuah zui vawng vawng.

Harh chhuak leh thutin ka ṭhutna aṭang chuan ka tho a, ka motor awmna ka thlen chuan tinungin ka tlan chhuak ta vat. Ka pate chu motor khalh pahin thil thlen dan ka hrilh mawlh mawlh a, mahse ka hrilh kimchang em em rih lo. Aizawl chhuahsan zawngin ka tlan ta vang vang a, tlai ni tawh eng ang mah se eng thil mah in dal tir ka tum tawh lo. Ka motor khalh lai te chuan ka thaw leh hawk ṭhin, ka nupui Manutei chu ka khawngaih ngawih ngawih a ni. 

Darkar 3 ka tlan hnu chuan khua a thim vek tawh a, mahse kei chuan ka speed te chu ka down lo hrim hrim. Ka nupui awmna khua lah chu ka la hlat phian bawk si, thlen thuai thuaia a hmel hmuh ka va han châk tawh tehreng em. Keimah chu ka indem mawlh mawlh a, test ṭha leh tura ka lo ti lo te chu ka inhaw hnuhnawh, engmah lah chu a danglam thei tawh bawk si lo.

Motor khalh pahin Manutei chu ka call a, a call tlang theih loh a lo inti leh ta nghal. Ni e, kum 3 lai a liam ve tawh alawm, ani chuan ka biak pawh hlauvin a phone number a thlak daih tawh ang chû. Rilru nuam reng rengin motor chu ka khalh lo va, ka chhungte min lo call sêkna pawh chu ka la buai peih rih lo. 

Ding takin Manutei te khaw lam pan chuan ka tlan char char a, an khaw dai ka thlen chuan zan dar 8 a ri tawh hial. Khaw chhung ka hnaih tawh em avangin ka muangchang deuh a, hmanhmawh ru tho si chuan ka tlan a, zan tlai tak a la ni lo bawk nen in êng pawh a la tam khawp mai.

Manutei te in kawt ka thlen chuan chhuak mai lovin motor chhung aṭangin an in chu ka thlir vawng vawng a, va luh mai pawh chu ka inthlahrung a ni. Pasal ṭawp lutuk leh ngaihtuah kim lo zet ka nih avang chuan ka indem a, engkim chu keima thiam loh vek zawkah ka ngai hmiah. 

Motor kawngkhar chu hawngin ka chhuak a, an in kawngka pawh chu ka kik mai ngam lo. Minute 5 vel ka din reng hnu chuan kawngka chu ka kik a, in chhung lam aṭangin Manutei aw ngei mai hian lut turin min lo ti ta.

“E hêeee, enge i lo tih dawn a u Muanpui?” ka hmel a hmuh rualin Manutei chuan ding meuh hian a rawn ti a, a sir dawhkana lehkha zir mek a naute pawh chuan min lo en ve kar.

“Nangmah hruai haw tawh tur chein ka lo kal alawm” ka tih chuan a mittui chu a rawn tling nghal pam a, mahse a tlâk hlau takin a hawi sawn vat a, a khap let nghal thuai thuai bawk.

“Enge i lo tih dawn? Engati nge kan inah hian i lo kal? I hmel ka hmu duh tawh hleinem, haw leh vat rawh” thinrim tak hian a rawn ti a, a naute chuan min en tawn ta zak zak.

“A teuh tawh lo lutuk, ka lak aṭang hian ni khat pawh i awm bo leh tawh lo vang” ka ti ram hmak a, ani erawh a thin a rim hmel ngâng mai.

“Rina, Fela nen khan va mu tawh mai rawh u” tiin a naute chu a hrilh a, a naute pawh pindan lamah chuan an lut zui nghal daih.

“U Muanpui khawngaihin haw rawh, keini hi inhmu leh tur pawh kan ni tawh lo” a rawn tih chuan rang takin ka kuah thuai a, rawn tal ve mah se ka kuah ngheh êm avangin a tal chhuak thei chuang lo.

“Ni lo ve Manute, i tel lo chuan ka awm thei tawh lo, ka awm duh tawh lo bawk. Engati nge!? Engati nge ka pawisa lo thun ṭhin te kha pakhat mah i hman ngai loh? I mawl em ni? Inṭhen tawh mah ila hnathawh kher ngai lovin nuam takin i awm thei tho asin, mi â nu” ti hrawkin a hma aia nghet chuan ka kuah a, a rawn ṭap chhuak ta.

“Hrehawm ka ti em mai u Muanpui, keini hi zawng kan inkar a zau mah mah a ni” ṭap chung chuan a rawn ti a, a hmel ka hmuh thei turin ka kuahna aṭang chuan ka nam hla ta vat.

“Sawi teh Manute, i chungah hian engtin chiah nge Emily-i a lo chet ṭhin? Min hrilh rawh, engkim ka hre vek duh” tiin a bianga mittui te chu ka hru a, ani paw’n lungchhe fe hian min lo en ve reng bawk.

“Kan inṭhen hnu khan i pawisa min pekte kha pakhat mah hmang leh lo tura i tih thu phone kaltlangin min lo hrilh a, ka rawn call che lahin i la thei ngai bawk si lo. A tawpah chuan Emily-i thusawi chu a dik a nih ka ring ta a, a rang lama i rawn lak vek tur thu pawh min hrilh nghe nghe asin, chuvang chuan tun thleng hian kan inṭhen nia pawisa leh Card min pek kha ka lo la kawl ṭha thlap a ni” tiin ka kuahna aṭang chuan a tal chhuak thut a, pindanah va lutin kan inṭhen nia ka thil pek ngei mai chu a rawn la chhuak a, ka kutah chuan a rawn dah ta chat.

“Manute” thawp raiha ka tih chuan a tawlh hla telh telh a, a lu chu a thing nang nang a, a mittui te chu a biangah a luang thla zawih zawih bawk.

“I hria em u Muanpui, kei hian AIDS natna ka lo vei miah lo asin, a mak ti raw? Kan khuaa ka haw chhoh hnu thla khatna vel aṭangin Emily-i khan min lo be ṭhin a, amah khan engkim chu a ruahmanna a nih thu leh nang ka phu lohzia che min hrilh chamchî a, message-a nangin keimah min sawiselna thlengin min lo thawn ṭhin. Khata ṭang kha chuan ka tan i sâng em em a ni tih ka hre chhuak a, natna vei lo mah ila i bula lo let leh kha keini ang mi rethei lutuk tan chuan a ngamawm tawh lo a ni” a rawn tih chuan ka mit ka chhing vang vang a, a lo tawrh nasat dan tur chu ka hriatthiampui lo, mahse a rilru a nâ dawn lutuk tih chu ka hre chiang a ni.

“Engati nge Emily-i thusawite chu i awih? Engati nge keimah pawh min zawh loh? Ka chhungte tal be ta che, a thusawi chu a dik leh dik loh fiah ta che” ka ti ta thlâwt a, ka rilru a nâ lutuk chu ka puak keh thei mai dawnin ka hria.

“Ka tan chuan rin loh theih a ni hleinem, engkim kha a tak tak ang vek a ni si alawm. Ka phone tlang thei lo che a, tum eng ang mah ila ka thei chuang lo. Ka nu leh pate pawh rawn biak chu ka duh alawm, mahse Emily-i khan AIDS natna vei anga min hriat tawh avangin min biak duh loh thu thlengin min hrilh a ni. Ka tan kha chuan a chep lutuk, tih ngaihna kha a awm tawh lo; a thusawi rin tawp mai loh kha chu!” mittui tling pam hian ka en a, ka hmangaih chuan hun harsa tak a lo tâwk a, kei lah chuan engmah ka lo hre ve si lo.

“A tâwk e, eng thil dang mah i tuar belh tawh lo vang. Ka tiam a che Manute, harsatna i tâwk leh tawh lo vang” tiin a dinna lamah ka kal phei a, mahse a bân chuan ding turin min lo ti vat.

“Min buaipui a ngai tawh lo u Muanpui, kan ṭha tawh e. Tunah chuan i rawn kal chhan ber i kutah a awm tawh bawk a, khawngaihin haw leh tawh zawk rawh” aw dam zeta a rawn tih chuan

“He thil hi ka rawn kal chhan a ni lo, ka mamawh bawk hek lo” ti vin ṭhawtin Card leh pawisa chu chhuatah ka vawm darh chuai a, ka chet dan avangin ani pawh a lo phu zawk.

“Enteh Manute, khawngaih takin ka bulah lo let leh rawh. Tu thiam loh mah a ni lo, engkim hi keima thiam loh vek zawk a ni. Sum tam tak chu ka nei ngei e, mahse chung sum tam tak ai chuan ka mamawh zawk che, ka nunna i ni asin” aw dam deuh zawk chuan ka ti leh a, chutah Manutei chuan

“A nih chuan engati nge khang kum 3 kal ta chhung khan min hruai tura i lo kal ngai loh? I nunna ka nih thu i sawi a, ka tel lova i awm theih loh thu i sawi a, mahse vawi khat pawh i hmel i rawn inlan em? Engtin nge ka awm tih pawh hre turin i rawn kal ngai lo va, engti ang chiaha harsain nge ka awm tih pawh a them paw’n i rawn ngaihtuah lo hrim hrim” a rawn ti ta tuarh tuarh mai.

“Min ngaidam rawh Manute, khang hun lai kha chuan ka tha kha a nâ tlat a tin ni! Hmeichhia zawkin min ṭhen i chak zek zek a, khami avang khan ka rilru chapona kha a lian tawh lutuk bawk, mahse engtik lai mahin ka theihnghilh ngai lo che. Ka hmangaih che Manute, ka thinlung zawng zawng hian ka la hmangaih reng che”

“Dawt!! Dawt min hrilh tawh suh u Muanpui, ka nâ tawh êm mai. Min hmangaih ni la chuan engtin nge ka awm tih tal i rawn ngaihven ngei ang, mahse nang chuan i ti hauh lo. Ṭhen che kha ka duh bik reng reng lo asin, khawvela ka mipa hmangaih ber kha ṭhen ka duh i ring bik reng reng em ni? I kai ve dawn, ka ṭhen loh che chuan natna ṭihbaiawm tak kha i kai ve dawn tlatin ka hria a, mahse kei chuan chu chu ka duh loh avangin inṭhen ka rawt ta a nih kha!”

“Ka hlau lo ka tih mawlh mawlh khâ, natna kai kha ka hlau chhe tê them ziah lo, ka bula i awm theihna tur a nih phawt chuan eng pawh ka huam. Nangmah khan inṭhen i rawt tlat a, ka tan kha chuan a tha nât thlak lutuk” 

“Kha kha ka thil tum ber alawm, i tha tihnat kha ka thil tum ber a ni. Kei chuan ka hmangaih êm che avangin ka kalsan che a, AIDS natna kha vei ve lo turin ka duh che a ni. Nang erawh chuan hmangaihna aiin rilru chapona chu i inhneh tir zawk a, chu chuan min lo hmangaih tak tak lohzia min hriat chhuah tir a ni. Ka dem miah lo che u Muanpui, a chhan chu khang hun lai kha chuan AIDS natna kha ka vei angin min hre miau alawm ti raw? I tan kha chuan a harsa ve dawn lutuk tih ka hria, engtin mah kan awm dun thei dawn bawk si lo. Chu bakah keini ang thingtlang mi hi chu kan nun dan a hniam êm a, nangni nen chuan kan inthlau lutuk a, hmangaih tak tak kan harsa ve ngâwt ang tih pawh ka hria. Kan ṭhing si, khawpui mite angin kan changkang ve si lo, kan hmel lah” a tih laklawh lai chuan nghet lutuk tak maiin ka kuah vat a, ka insum thei tawh ngâng lo.

“Sawi tawh suh, sawi tawh miah suh Manute, ka rilru a nâ lutuk hi ka puak keh thei mai dawn. Âwwww, engati nge ka lo mawl em em? Engati nge rilru chapona kha ka lo inhneh tir reng reng ni!? Engkim hi ka thiam loh vek a ni, ka thiam loh vek! Min ngaidam rawh Manute, min ngaidam hram rawh” tiin ka kuah ta vawng vawng a, Manutei pawh chu uar tak hian a rawn ṭap chhuak leh ta hawm hawm.

“Min hrilh kim loh i la nei chiang ti raw Manute?” tiin kan ngawih vang vang hnu chuan ka ti a, ani pawh a ṭah chhuak zualpui a reh tawh a ni ngei ang a ṭap tawh lo.

“Kan inṭhen hnu lawk khan ka rai tih ka inhre chhuak a, chu chu Emily-i’n min bum tih ka hriat hma ni chiah a ni. Ka beidawng lutuk kha tihtlak mai ka tum a, mahse ka thei thlâwt lo. A hnu lawkah AIDS natna ka vei lo tih ka inhre leh a, khata ṭang kha chuan pai tlang kha ka tum nghet ta bur a ni. Mipa ka hring a, a pian tirh phei chuan nangmah a chhun lutuk che avangin ka ṭap tawp a, nangmah ka hre chhuak lo thei lo che a ni” min chhoh melh ral chung hian a rawn ti a, a mittui te chu a dang seng thlawt lo a ni e.

“A pawi ka ti Manute, chung hun laite chuan min mamawh awm vei nen ti raw? Kei lah chuan ngaihzawng te ka lo nei kual vel a, zu te ka lo in vel a, pasal azawnga pasal nih tlin loh ber chu ka va ni chiang em. Vawi khat chiah min pawm leh rawh Manute, khawngaih takin ka hnenah lo let leh hram rawh” ka kut pahniha a biang khuap chung chuan ka ti a, engkim chu siam ṭhat leh vek theih se ka ti ngawih ngawih.

“Ni lo ve u Muanpui, inṭhen tlang law law tawh zawk mai ang. I bula ka lo haw leh chuan kan inkara tla zep duh tâwk kha an awm leh ang a, ti hian kan zalen ve ve tawh a ni mai. Chu bakah ka naute pahnih hi ka enkawl an ngai tawh a, kumin kum tir lam khan ka nu leh pate an boral ve ve tawh bawk si nen, a buaithlak kual tawh êm mai”

“I hlauhthawn ber Emily-i chu tunah hian damdawiinah a awm mek asin, amah zawk kha HIV positive a lo ni a, heta ka lo kal hma khan min hrilh ve chiah a ni. AIDS natna i taksaah a awm lo tih ka hriat kha chuan ka lawm a, ka thin a rim em em bawk. Emily-i chuan ngaihdam lo dil tur chein min ti a, ngaihdam leh ngaihdam loh chu i thu thu a ni e”

“Min hrethiam rawh u Muanpui, ihhh…..tunah chuan ka ngaidam nghal thei mai rih lo a ni. Rilru chhia min ti em? Sual min ti em? I duh dûh danin min ngai rawh, mahse maw ka nâ êm a tin ni! Min bum avang khan hun harsa tak ka tâwk a, ka nun kha a hrehawm tak zet a ni” aw lawi zet chuan a rawn ti a, ṭah chu a insum nasa hle bawk.

“Chuan haw leh rawh aw? Ngaihtuahawm em em pawh kan ni tawh lo, Puipuia pawh buaipui ngai lutuk a ni tawh lo va, kan inenkawl chho ve thei zel mai ang” a rawn tih zawm leh nghal zat a, amah chu ka en tlawk tlawk ringawt.

“Ka sawi kha i hre tawh lo em ni? Ka hlatah i awm leh tawh ngai lo vang, chuan i naute pawh kan bulah an lo awm mai ang. Khawiah nge!? Khawiah nge ka fap chu a awm? Ka hmu châk a nia Manute, nang ka ngaih luatah che ka fapa pawh ka lo theihnghilh hman ṭep alawm” ka tih chuan pindan lamah min hruai phei a, naupang pahnih chuan ka fapa beng chu an lo hup ran a, kan thawm hriattir an duh loh tih chu ka man thiam ve nghal.

“Âwww ka fapa, ka va inthiam lo tak êm. I pa hi min ngaidam rawh, zanin aṭang chuan ka âng chhungah ngei i awm tawh ang” tiin ka fapa mutui em em lai chu ka pawm a, ei ṭha hmu lo tih hriat zet hian a tê ang reng hle bawk.

Vawi tam haw tura min tih pawh chuan ka awm lui tlat a, zan dar 1 thleng deuh thaw chu kan inhnial ta ṭhak. A tawpah erawh a beidawng hmasa zawkah a ṭang ta nge nge a, ka lawm rilru khawp mai. A thinrim a la kal tluang bawk nen khumah chuan mut tir min phal lo va, keipawh chhuatah lungawi takin ka mu ve mai. 

Zing dar 2 a nih tawh pawh chuan ka la meng kar a, ka mut chu pakhat mah a chhuak lo. Ka tel lova Manutei lo awm dan tur zawng zawng chu ka ngaihruat a, inchhirna hlirin ka khat a ni. Amaherawhchu hlim ruk riauna ka nei tlat bawk a, a chhan pawh Manutei chu ka bula a lo let leh ngei ngei theihna’na beih ka tum nghet bur tawh vang a ni.

Zingah chuan hma takah ka tho a, ka muhil lo hrim hrim zawk. Kei ang bawkin Manutei chu a tho hma ve hle a, a hmel aṭang chuan a muhil bik miah lo tih a hriat hle. Rina leh Fela chuan min la pawh ṭha ngam vak lo va, ka be deuh chhen thung. 

Manutei nena kan inneih tirh kha chuan an la naupang ang reng hle a, tunah erawh kum a lo vei ve dûah tawh bawk nen an lian ve tawh hle. Ka fapa hming ka hriat chuan ka hnuk a ulh dawn a, Manutei phei chu a lo ṭap nghe nghe. Ka nupui chuan ka fapa hmingah LALTHLAMUANPUIA tih hi a lo phuah a, hmangaih nghal em em mah ila a ni chuan min nel lo hle.

Manutei te khuaa kâr khat chhung ka châm hnu chuan ka chhungte'n min lo be ngun mawlh mawlh hle a, keipaw’n hun ka tih tawh avangin engkim chu ka hrilh ve ta vek. Manutei chu an khawngaihin an lainat êm em a, biak pawh an inbe ve ta zeuh zeuh. Ka pa chuan hruai haw ngei ngei turin min ti a, keipaw’n chu chu ka tum ruh hle. Zawi zawiin Manutei nui hmel pawh ka hmu chho ṭan a, ka hlim veng veng thei. 

Kâr hnih ka châm hnu chuan Emily-i boral thu ka chhungte'n min lo hrilh a, Manutei ber chu a inchhir ta daih. A dam laia Emily-i a lo ngaidam fel lo chu a inthiam lo va, a ṭap leh tawp zel. A thiam loh a nih loh thute chu ka hrilh ṭhin a, mahse amah leh amah chu Emily-i lakah a la inthiam thei chuang lo.

“Min ngaidam rawh Manute, ka hmangaih che a, ka hmangaih kumkhua bawk ang che” tia ṭhingṭhi meuha ngaihdam ka dil hnuah Manutei chuan min lo zui haw leh a remti ve ta a, ka va han lawm tehreng em. Ka nunah chu ni ang em ema lawm chu ka la tawng lo, ka la tawng ngai lo hrim hrim. 

A naute leh ka fapa te pawh zah zo lovin ka fawp vawng vawng a, kan pahnih chuan inhmangaih tawn lutuk avangin kan ṭap hial a ni. Kâr thum lai ka awm hnuah chuan ka fapa paw'n min ngaina ve tawh em em a, ka thisen a nih miau avangin min nêl vat lo thei lo a ni. Puitling ang em ema ṭawng fiah tak la ni lo mah se ṭawng vel a peih reuh em em a, a dil chhut rual a rawn ni chho bawk nen min be reng ṭhin te chu ka hlimpui thei khawp.

Aizawl kan thlen thlak ni chuan ka nu leh pa leh ka naute chuan min lo hmuak ṭhap a, hmeichheho chu insumna nei hauh lovin an ṭap a, an inngai hlawm tawh hle te pawh a ni mahna, ṭawng pawh ṭawng ṭha hlei thei lovin an inkuah leh tawp zel. Ka pa chuan ka fapa Puipuia tia kan koh chu a làwm êm em a, a hmuh rual rualin a pawm nghal chawt. Puipuia paw’n duh loh a lo tum bik si lo va, kan chhungkua chu kan hlim tlâng ta hle a ni.

Ka nu leh ka nauin Manutei chu an titipui reng zel a, a nu leh pa’n thla zawn titiha an boralsan thu a sawi lai chuan ka nu leh ka nau chu an insum thei leh ta ngâng lo. Manutei an khawngaih lutuk avang chuan an ṭap tlawk tlawk a, anni ang bawkin Manutei pawh a ṭap ve tho bawk. Manutei berin a tih tlat avangin ka nutei, Emily-i nu chu kan va ral ta ngei a, chu ni chuan Manutei ang em ema hmeichhe rilru ṭha khawvelah an awm ka ring thei tawh lo. 

Manutei chuan Emily-i nu chu tih tak zet hian ngaihdam a dil thlap a, a boral hmaa a lo ngaidam lo te chu a inchhir em em a, ka nutei pawh a bang bik chuang lo. Ṭap chung hian Manutei chu a lo kuah thuai a, a thiam loh a awm loh thu leh ngaihdam a ngaih lohzia te chu a lo hrilh ve mawlh mawlh bawk. An pahnih chuan rilru na takin an ṭap dun tlawk tlawk a, an awm dan ka hmuh rei theih loh avangin pawnah ka chhuak ta ringawt. Darkar chanve vel hnuah hmel hlim tak hian an lo chhuak dun a, an inkar boruak chu a ṭhat tawh hmel hle.

Aizawl kan awm aṭanga thla 1 a liam leh meuh chuan Rina leh Fela pawh an school kalna tur ka ngaihvensak nghal a, rei lovah zirna pawh an zawm ve thuai bawk. Rina leh Fela chuan min zah em em a, ka laka an inthlahrung lutuk chu ka khawngaih lek lek zel. 

A bik takin Fela phei chuan min zah lehzual a, a inthlahrung chi a lo ni kher bawk nen biak pawh min be ngam ngai lo, min hlau lutuk ang hian a awm tlat zel. Manutei chuan ka awm loh hlana a lo zilh ve ṭhin thute min hrilh leh vek zel a, kei pawh a laka nelawm deuh turin min ti nghe nghe.

Vawi khat phei chu tihpalh thil thu tak meuhin ka motor a lo tirang palh a, a inthiam loh lutuk chuan a u Manutei a hrilh vat a, a hlauhthawn lehzualna tur ting tangin kei lah ka lo leng chhuak daih bawk si. 

Zanriah kan ei lai te chuan melh pawh min melh ngam ṭha lo va, motor a tirang tih lam engmah ka lo la hre ve der bawk si lo. Chaw kan ei kham aṭanga minute 10 hnu velah a mu nghal daih a, a awm dan chu mak ka tih em avangin Manutei pawh ka zawt ta tawp.

“Tlaia i len chhuah lai khan i motor hnung khu a tihran palh thu min hrilh a, a hlauthawng lutuk kha a khawngaih thlak zawk. Hlauthawng lo tur pawhin ka hrilh ngun lutuk, mahse a hlauhthawnna chu a la reh thei chuang lo. Hrilh che ka tum hrim hrim a, ka la sawi lo mai mai a nih kha” tiin Manutei chuan Puipuia pawm muhil chung hian Fela awm dan chu min hrilh a, ka tih ngaihna hre lo chu thawk ka la hawk ringawt.

“Chuvang a nih chiah chu ni dang zawng aia min lo hlauh hmel em em, Rina nang tal hian i hrilh ve tawh em? Ka laka inthlahrung lo tur hian i lo hrilh ve ṭhin em?” tiin Rina, Fela u chiah chu ka zawt ta tawp a, Rina pawh chuan

“Ka hrilh nasa tawh lutuk pa Muanpui, a hlauh em em chhan che ka zawh lahin a sawi duh ngai bawk si lo. Fela hi chu a mak lutuk, kan khuaah pawh Teacher te khan biak ṭawng theih loh châng an ngah mai” a rawn ti ṭha ve mai a, zawhna dang ka zawh tawh loh avangin TV chu a en zawm ve leh nghal mai bawk.

“Eng pawh ni se amah titi pui ka’n tum hrim hrim ang e” tiin ka ṭhutna aṭangin ka ding chhuak a, Manutei chuan ka kut rawn chelh chung hian

“Ṭawngkâ vin vel hmang miah suh aw u Muanpui, a hlauh belhchhah palh mai ang che tih ka hlau” a lo ti leh hram a, buk khum nghauhin ka nui ta suk.

Fela room awmna ka thlen chuan kik pawh kik buai lovin kawngka chu ka hawng tawp a, room chhung ka luh chuan Fela chu rizaia inkhuh vek chung hian khumah a lo mu kawm ngul a, a awm dan em em chu ka mak tih a tling tawh. Ngawi rengin khum lam chu ka pan a, khuma ka ṭhut hnu chuan a rizai chu hlim ka tum a, a lo chelh nghet ngei mai.

“Fela, lo tho teh, inbe lawk ang aw” ka theih tawpa aw dam chuan ka ti a, ka aw a hriat hnu chuan a rawn tho chhuak rang hle. Khum aṭang chuan a chhuk vat a, ka mitah pawh mi en ngam lo hian min awm hlat nghal hle bawk.

“Vawiin tlaia ka motor hnung” ka ti hman chiah tihah Fela chuan rang zet hian

“Ka tihpalh, ka tihpalh lutuk, ka tihluih a ni miah lo. Ka inhlawh ang a, pawisa ka neih ngah hunah ka siamtir ang, min ngaidam rawh” a rawn ti nghal thuai thuai a, kun deuh ngul mah se a hmelah chuan hlauhthawnna nasa tak ka hmu thei tho.

“Ni lo, ngaihdam i ngai reng reng lo, motor rang te chu a siam ṭhat leh theih vek alawm, hlauthawng tawh suh” ka tih pawh chuan

“Aih! Ka lo siamtir ngei ngei ang, pawisa ka neih ngah hunah” a rawn ti deuh tlat a, khum aṭang thovin a dinna lamah chuan ka phei ta nge nge.

“Min en teh Fela, ka mitah hian min en rawh le” a dar tawn tawna chelh chung chuan ka ti dam dap a, min hlau tawh lo se ka duh a ni.

“Ka ngam lo” a rawn ti thawp raih a, a aw aṭang chuan a ngam lohzia a hriat hle a, kei lahin a hlauhna chu paih bosak ka duh bawk si.

“Ka hlauh awm loh, ka tinâ dawn lo che, chuvang chuan min en rawh le” ka tih leh chuan zawimuang hian ka lam chu a rawn hawi chho a, ka hnar leh hmai vel chu a en deuh vang vang phawt a, a tawpah erawh ka mit tak chu a rawn en ve ta.

“Engati nge min hlauh em em Fela? I lakah hian ka nêlawm loh viau em ni? Min hlauh em em chhan hi min han hrilh teh le, zanin hian i hlauhna hi tibo tawh ang aw” ka tih chuan

“Ka hrilh thei lo che” a rawn ti tawi tak a, a awm dan avang chuan tih dan dang deuha tih a ngai tih ka hrethiam zui nghal mai.

“Min hrilh lo a nih chuan i lakah hian ka thin a rim hle ang, ka thinrim hmel chu i hmuh ngam ka ring lo, chuvang chuan eng vanga min hlau em em nge i nih sawi rawh?” aw nem lo taka ka tih chuan a hma ai zawngin a rawn hlauthawng a, a taksa chu a rawn khur der der bawk.

“Sawi rawh Fela” ka tih leh hmuk chuan ṭah chhuak aw deuh hian

“A chhan chu nang chu kan tan chuan ‘pa’ alawm i nih, pate chu kan zahin kan hlau hle tur a ni. Anu leh apa'n min thihsan tawh a, pawisa kan neih loh laiin i lo kal a, min enkawl a, min buaipui a, ka tan chuan hlauha zah loh theih i ni lo” a rawn ti ta, ka khawngaih lutuk chu ka kuah tawp. Chutia ka kuah hnu chuan a rawn ṭap chhuak ta nge nge a, Manutei te pawh kan thawm avangin room-ah chuan an lo luh ve phah nghe nghe. 

“Le! Ṭap tawh suh le! Pate chu an hlau tur a ni hleinem, an zah ringawt tur zawk alawm. Zanin aṭang chuan min hlau tawh miah lo la, i pa anga min ngai a nih chuan min ngaina em em tur zawk a ni. Kei pawh hian ka ngaina che a, chuvang chuan nang pawh hian min nel em em tawh ang che aw? Motor hnung rang tih vel lam kha chu ngaihtuah buai tawh lo la, i inhlawh pawh a ngai lo. Pawisa tam tak ka nei alawm, keima’n ka siamtir vek mai dawn nia” ka tih chuan rang zet hian min lo kuah a, a rilru chu a la nât hmel ngâng mai.

Mutnaah chuan Fela nena kan inbiakna chu kan nupa in kan sawi dun leh a, Manutei phei chu a mittui a lo tling pam. Sawi chhuakin tilang kher lo mah se Fela chuan a pa a lo ngai hle tih ka hrethiam ve ta chiah a, ka lo hrethiam har lutuk chu ka inthiam lo lek lek zawk a ni. 

A tukah chuan tum ve mah se Fela chuan duh ang thâlin min la nêl thei lo va, amah nen chauha chhuahpui ka chîn ka chin tak hnuah erawh min nel chho ve ta tial tial. 

Thla khat hnuah phei chuan ka bula ṭi taka hun hman a nei tawh ngai lo va, min nêl ve tawh hle mah se a zia erawh a harhvang hran lo. Ka biak hi chuan ṭha takin min chhang ve mai zel a, ani erawh a ṭul tawp khawk lovah chuan min be ngai lo thung.

Thla 4 hnuah ka pa chuan Rinate unau zinga a tu emaw ni zawk zawk chu an ina awm ve turin min lo hrilh a, an tlem lutuk chu hrehawm an tih thu a rawn sawi bawk. Keini paw'n a harhvang zawk Rina chu kan tir phei a, amah phei chuan a hreh hran lo. 

Fela erawh tir phei ngat ila chuan a lo va inthlahrung leh vel emaw te kha a ni ang a, an inbuaipui rei leh khawp ang. Rina ve thung chu a ri par par nghal a, rei lovah ka pate chuan in chhung boruak a tihnawm thu min lo hrilh vat bawk.

“Manute, naute lam hi ngaihven leh tawh ila” ka tih chuan ka lam hawi zawngin a lo inher a, a hmel aṭangin a rilru tur awm ang ka hre thei nghal.

“Kei chu fa kan neih leh theih pawh hi ka ring tawh lo asin u Muanpui, pakhat neih pawh kan harsat em em si a” a rawn ti sep a, a biang chu ka kutin ka dawm a, Puipuia bawh kânin a chungah ka bawk ta ran mai.

“Hei! A hun lo em mai, Puipuia a awm ve reng hi aw” a rawn ti nghal vat a, kei erawh ka lo nui ringawt. Ngawi rengin Puipuia chu ka pawm kâng a, ṭhutthlengah chuan ka va mut ta daih. Puan lum sin nuam chi te chu ka sintir thlap a, ka fapa chuan min tibuai lo se ka duh a ni.

“I ti tak tak em ni u Muanpui?” khuma ka lawn kai leh laiin a lo ti a, kei lah chuan awlsam te hian

“Ti tak tak e” ka lo ti mai a, zawhna dang min zawh leh hmain a hmuiah ka fawp ta hmak. Duhthaw tak leh inhmangaih tawn takin nupa nun chu kan hmang a, kan inmamawhna chu rin phak bakin a lo sâng dun hle bawk. 

“Kei chu fa kan neih leh theih ka ring tawh lo tak tak” ka âwma bawk ran chung hian a rawn ti sep a, kei erawh nasa takin beiseina ka la nei thung.

“Nei thei e le, han ngaihtuah ve mah teh. Puipuia kan neih theih nân kum 2 lai kan hmang ral a, tun hi fa dang neih leh nân chuan a tawk chiah, a dik chiah bawk ang, chuvangin ti leh nghal mai ang” nui suk chung chuan ka ti a, lai tak hian ka âwm a rawn chum nghal pawp.

“Eng pawh tawk ila ka kalsan leh tawh ngai lo vang che, ka lo ṭhen lui tlat che kha ka thil tih sual tawh azawnga ka inchhir ber a ni. Tunah chuan i bulah ka awm leh tawh a, ka hlim hle bawk. Ka hmangaih che u Muanpui, ka hmangaih kumkhua bawk ang che” nghet taka min kuah chung hian a rawn ti a, kei pawh chuan 

“Ka kiangah awm reng la, ka nupui Manutei ni reng ang che” tiin a chhip sam chu ka fawp a, tui taka mut tumin ka mit ka chhing zui ta vang vang. 

A TAWP TA