𝐃𝐀𝐍𝐆𝐋𝐀𝐌𝐍𝐀 𝐊𝐇𝐀𝐖𝐕𝐄𝐋 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐡𝐚𝐩𝐭𝐞𝐫 𝟏 - 𝟖)

DANGLAMNA KHAWVEL

By

Havali Adam

27 November 2021

Chapter 1

Khuanu rorel dante hi mihringte hian tidanglam theiin kan duh ang ângin her rem thei ila ka ti ṭhin, mahse chutiang chu khawvel kalphung a ni si lo. Khawvel eng ka hmuh phat aṭangin ka nu ka hmu hmasa ber a, ka hlim tawk êm em. Amaherawhchu ka han ṭhang lian chho a, pa nei lo ka ni tih ka inhre leh a, hmeithai chhungkua kan nih avanga khawtlangin kan nufa min en dante hai der theih a nih lohna lai tak te chuan ka rilru a tina ṭhin. Ka pa chu ka ngai thei em em a, a hmel vawi khat mah la hmu lo mah ila ka ngai em em tho. A hmel awm dan tur awm ang te chu ka suangtuah ṭhin a, ka nu nena kan bula a lo let leh ngei theihna'n ka ṭawngṭai nasa ṭhin.



Ka nu hnena ka pa chanchin ka zawh lahin tawi tê têin min chhang a, a sawi ṭha duh vak ṭhin lo. A sawi tam ber chu ka pa laka a beidawn tawh thu a ni a, chutianga beidawng taka siamtu ka pa chu huat châng nei mah ila ka ngai em em tho zel. Mahse ka nu chuan lehkha zir ṭâuh ṭauha ka pa zawng hmu tur chuan min fuih nasa thei hle a, keipaw'n ka pa zawn chhuah duhna rilru chu ka nei lian hle a ni. 

Ka nu sawi dan pakhat lehah chuan ka pa chu Aizawl lam mi a ni a, kan khuaa sumdawnna thil avanga lo kal niin ka nu nen chuan an inhmu a, rei lovah induh tawn na nâ na chu an chesual dun ta bawk a ni. Ka pa'n Aizawl lama a chhuksan hnuin ka nu chuan a rai tih a inhre chhuak a, chutah ka nu nu leh pate chuan khawtlang hmai an zah avangin ka nu chu an tuithlar zui bawk.



Mahni thisen zawmpui dik tak te ngeiin chutia an tuithlar tâk avang chuan ka nu chu khaw dangah a pem a, harsatna tam tak paltlangin kei chu min ṭulpui tluan ta ṭhak a ni. Chuti chung pawh chuan ka nu chuan a nu leh pate demna awka ka hriatah a sawi ri ngai lo va, ka zawhna ang âng chu min chhang tawp zel.

Chutiang takin khawtlang mipuite chuan a langa pauvin min deusawh lo mahse min en hran ruk dan chu ka hmu thiam vek a, ṭhian pawh ka neih tlem phah nghe nghe. Ṭhian tih taka han sawi tur chu pahnih khat vel lêk an awm a, chung zinga ka ṭhian ṭha tak te tia ka sawi theih chu Mala leh Sangtei te an ni mai.

Mala te chhungkua hi kan khuaah pawh chhungkaw awm thei pawl tak an ni a, ram an ngahin vawk an vulh ṭeuh bawk. Chutiang bawkin Sangtei te chhungkua pawh awm thei pangai tak an ni a, a pa chu kan khaw Middle School-a Headmaster niin a nu erawh lo lam hna thawk chi tho niin ka hria. 

Mihring chhia leh ṭha hre chin ni ta na nâ na chu hmel duh leh it zawngte kan lo nei ve a, mahse ka hmeichhe duh te hnenah chuan ka duh thu chu ka hrilh mai ngam lo. Mak tak maiin ka lo duh ruk em em Sangtei chuan min lo duh let ve teh mial a, ka ṭhian mah ni se Sangtei chu ka thinlung leh tih tak zetin ka duh a, chutia awlsam taka kan inngaizawng thei ta mai pawh chu mak ka ti leh thut zel.



Chhungkaw rethei tak ni mah ila ka nu min fuihna avangin zirna lamah chuan ka ṭang thei hle a, class 10 exam result-ah pawh kan khua aṭanga Disticntion-a pass thei pathum zingah ka tel ve bawk. Ka result avang chuan ka nu chu a hlim em em a, a hlim lutuk avangin a ṭap ta hîal, mahse kan va hlim rei lo si em. 

Sangtei nena kan feh dun lai chuan kan in luah mek chu a kang tih thu kan khaw lam aṭanga min hrilh turin naupang pakhat hi a lo tlan vang vâng a, an ṭhelh mit nghal theih mai loh avangin khaw pûmin an lo buai phah bawk hi a lo ni. Sangtei pawh ngaihtuah tawh lovin ka tlan haw vat a, kan in ka thlen chuan in tia hmuh tur reng a lo awm tawh lo. Chutah ka nu chu ngaihvenin ka zawng nghal vat a, kan khaw ṭhenawm damdawiina kalpui hman lo khawpin a lo boral hman tih ka hmuh chuan ka keh chhe vek hi a ni ber. Mitthi lumen lai te chuan ka ṭap thei lo va, ka rilru na lutuk chu ka ṭap chhuak thei lo zawk a ni.

Kan in ber a kan tâkah chuan neih engmah ka nei tawh lo va, retheih tawh sa nak a laiin retheih chu a zual hle. Mala nu leh pate chuan min lainat em em a, min khawngaih lutuk avangin an bula cheng turin min hruai phei ta tawp. Mala te ina kan awm hnu pawh chuan ka la pangai hlei thei lo va, ṭawng tlem mi ka lo ni sa nen ka ṭawng tlem lehzual phah hle. 

Ka nu kan vui liam ni chuan kan in kang ṭhelh tumtu te hnen aṭangin thingrem pakhat hi ka dawng nawlh a, a tirah chuan hrethiam lo tak ka ni. Thil awmzia min hrilh hnuah chuan ka nu chuan kan in aṭangin thingrem chu a lo vawm chhuak hman hlauh a, chu thingrem chiah chu ka neih chhun a ni ta. Thingrem chu ka hawng a, balck & white thlalak pakhat leh lehkha vara thil infun chiah hi a lo awm thung. 

Thlalak chu ka en a, ka nu leh mipa pakhat hlim taka an nui dun lai hi a ni a, chupa chu ka pa a nih ngei ka ring bawk. Thlalak hnung lamah chuan '𝘬𝘢 𝘩𝘮𝘢𝘯𝘨𝘢𝘪𝘩 𝘦𝘮 𝘦𝘮 𝘓𝘢𝘭𝘳𝘪𝘯𝘤𝘩𝘩𝘢𝘯𝘢, 𝘬𝘢 𝘧𝘢𝘱𝘢 𝘓𝘢𝘭𝘩𝘮𝘢𝘩𝘳𝘶𝘢𝘪𝘢 𝘱𝘢, 𝘊𝘩𝘢𝘭𝘵𝘭𝘢𝘯𝘨' tih hi a lo inziak kalh a, chu chuan ka lo rin lawkna chu a dik ngei a ni tih a tichiang hle. Chutah lehkha var infun pawng ùl chu ka en ve leh a, enge tia hriat tuma ka hawn hma chuan '𝘏𝘳𝘶𝘢𝘪𝘢 𝘭𝘦𝘩𝘬𝘩𝘢 𝘻𝘪𝘳 𝘻𝘢𝘸𝘮𝘯𝘢 𝘵𝘶𝘳' tih inziak chu ka hmu leh a, ka nu ka ngai lutuk chu ka ṭap chhuak ta hawk.

Keimah berin lehkha zir chhunzawm ka tum nghet bur avangin Mala nu leh pate paw'n Aizawl lamah engkim min buaipui sak a, an phal lo chung chu mahnia in luah ka tum lui tlat bawk. Kei ang thovin Mala leh Sangtei te chuan an zir zawm ve dawn a, Mala chu Shillong lamah niin Sangtei erawh St.Paul's lamah a ni thung. 

Sangtei chu ka nu boral hnu chuan ka hmeichhe rin ngam ber a ni a, ka duhin ka hmangaih tak zet tawh bawk a ni. Ani paw'n min hmangaih a, ka bula awm chu a hne ngai bik lo niin ka hria. Ka zirna lam pang buaipui a ngaih avangin kar khat hnuah Aizawl lamah ka chhuk a, chutah chiah chuan ka ṭhian ṭha em em Mala pate ka tana an ṭhatzia chu ka hrie chhunzawm ta a ni.



Pathian zarah Synod Higher Secondary School-a ka interview na ah chuan a tling zingah ka lo tel ve hlauh mai a, Pathian hnenah pawh lawm thu sawiin Mala leh a chhungte pawh ka hrilh ve nghal vat. Kan school ni tawh mai tur awmna veng, Mission vengthlangah chuan ka in luah tur chu kan hmu a, Synod school nen pawh a inhlat lo khawp mai. 

Vanduaina chu ka ta bik hliáh hlîah emaw tih mai theih turin ka nuin min boralsan a ni a, ka pa dik tak chu la damin hre mah ila a takah vawikhat pawh ka la hmu si lo. Tuna ka tum tâk ber chu ka pa zawn chhuah leh ka nupui ni tura ka duh Sangtei chawmna neih theihna tur atana lehkha ṭha taka zir chu a ni mai. Chutiang taka vanduaina leh hun harsa ka tawh avang chuan ka thinlung chu a ṭap a, a rum a, a chhe vek ni ber hian ka hre ṭhin.

Thihna hi khawvela ka huat ber a ni a, mahse chu thihna chu damna leh zalenna atana Pathian ruat a ni tiin ka nu khan ka naupan lai aṭang tawh min hrilh ṭhin thung. Khang thu a lo sâwi a lo sawina chhante kha hun lo la thleng tur a hre lâwk emaw ka ti ta rum rum a, ka nu'n min thihsan avang chuan Pathian chu dem ka duh rualin ka hlau a ni. Ka nu a boral emaw pa ka nei lo emaw chhungte tia sawi tur ka nei lo emaw pawh ni se, Pathian hi engtikah mah dem thei hian ka inhre lo. 

Ani chuan ka tawrh zawh loh khawpa natna min pe dawn lo tih ka chiang a, thihnain ka nu a hruai bo ni pawh khan '𝘩𝘦𝘪 𝘩𝘪 𝘗𝘢𝘵𝘩𝘪𝘢𝘯 𝘳𝘦𝘮𝘳𝘶𝘢𝘵 𝘢 𝘯𝘪' tiin ka thinlung chuan min rawn hrilh a nih kha! A tirah khan Pathian remruat a nih ka ring lo va, a chhan chu khawvela ka neih chhun tak meuh boralna kha chu a remruat a nih ka ring thei thlawt lo a tin ni!

Mahse........mahse tih hian ngaihtuahna dang min put tir lo thei ta lo a ni. Ka nu hi lo boral lo ta se tun ang em em hian ka hma lam huna thil tihhlawhtlin duhna leh tumruhna ka neih ang hi ka nei thei ang em tih te chu ka ngaihtuah neuh nêuh a, chuta ka rilruin min hrilh dan chuan '𝘵𝘩𝘦𝘪 𝘭𝘰 𝘷𝘢𝘯𝘨' tih tê hi a ni. Chu chu kei chuan a dik ka ring a, engkim chu Pathian remruatna ni ah ka ngai chhunzawm ta hmiah bawk.



A hma zawng aiin ka thinlungah chuan hlawhtlin duhna a lian ta em em a, mahse ka pa erawh ka hlawhtlin hnuah chauh ka zawng ang ka ti thung. A chhan chu mi chak lo leh mi rethei ang mai maia min hmuh ka duh lo va, a tel lo pawhin ka ding chhuak thei tih te, ka hlawhtling thei a ni tih te chu hmuh tir ka duh a ni. Tin, ka pa chu ka zawng hmu thei kher ang em tih pawh chu ka hre chuang lo va, mahse ka hmuh hma chu ka zawng char char thung ang.

"Ka zawn hmuh hunah chuan enge a lo tih ang? Nupui fanau te a lo nei dûah tawh ang em? Min hre awm si lova mak a ti ang em? A fapa ka nih a ring ang em?"tih ang zawhna tam tak chuan ka rilru an luah nasa thei hle a, mahse Pathian kuta innghah tawp loh chu tih theih ka nei rih lo a ni e.

Aizawl ka thlen thlak nite chuan thingtlang khuaa awm ṭhang tih takah sap ram kal ang maiin ka inngai a, thawmte chu thintlang lam ang lo takin a bengchheng a, motor tlan vei vâk chuan kawng zawng zawngte chu an awh a ni ber. Kawng sir ṭhenkhatah chuan thlai thil zuarte, thingpui dawrte leh Taxi lo dingte an awm fùr a, mak pawh ka ti hle. Kan khuaah te kha chuan kawngpui sir vela thil zuar kan awm ngai lo va, thil kan zawrh pawhin paikawng emaw ipte emawa akin kan zuar kual mai ṭhin kha a ni a, Mizoram chhung rau rauah pawh chutiang taka thingtlang leh khawpui inang lo chu ka vawikhat hmuhna a ni. 

A bik takin keimah chuan mak ka ti a, a chhan pawh Aizawl ang khawpui lianah chuan ka kal ngai loh vang a ni. Kan khuaa ka rualpui te leh ka ṭhiante kha chu han zin châng leh awm bo vang vang chângte an la nei zawk a, kei kha chuan kal chhan tur leh kalna tur pawisa kan nei ve loh ṭhin mîau avangin ka zin chhuak ngai lo hrim hrim.

Thla a ral a, keini pawh school kan ṭan tawh. Chutiang bawkin Sangtei pawh St. Paul's School-ah a tling ve a, kan school ṭan hunte chu a inang nghe nghe. Ani chu Kulikawn lamah a awm a, a patea te inah a awmin ka hria. Ka inluah chu a lian lutuk lo va, khum pakhat leh ṭhuthleng pakhat a awm a, bathroom a awm bawk a, light erawh chu a ṭha lutuk lo. A ṭha lutuk lo tih lêmah a eng chu a dim deuh a ni mai. Gas bur khat a lo inchhawp sa a, ka thlen ni te chuan ka in luahna neitu te chuan min buaipui sak zung zung nghal. Aizawl ka awm hnu chuan mobile phone lar lai a lo ni bawk nen phone chu ka lei ve a, Nokia ngat ka lei thei te chu ka hlim ve hle.



Sangtei nen chuan a taka inhmu si lo hian kan in call chhen a, ka in luaha rawn len te chu tum châng nei ṭhin mahse keimah zawk chuan ka phal lo a ni. Chubakah ka in luahna neitute hmai zah pawh a na a, ho tê aṭangin ka mualpho nghal mai ang tih chu ka hlau a ni. Phone-a kan inbiak te hian inrinni emaw chawlhni emawa len dun te a rawn rawt ṭhin a, mahse kei hian ka lo duh lo zel a ni. A chhan chu inrinni tin mi hnuaia inhlawhna hun atan ka hmang a, chawlhni lah mutna hun atan leh school-a kan lehkha zir ṭhin te ennawnna hun atan ka hmang leh mai ṭhin. Amaherawhchu a zawng zawng chuan min sawmna te chu ka duh lo bik lo va, a châng chuan ka inah ni lovin a awmna ina kalh chilhin ka leng ve ṭhin tho. Ani chuan ṭhian a lo nei hman nûal tawh a, kei erawh ṭhian tia han sawi tur pakhat mah ka la nei miah lo thung.



"In awm êm?" ka in luah kawngka kik paha rawn ṭawng thawm avang chuan ka thil chhiar lai chu ka titawp chat a, lehkhabu chu khupin kawngka lam chu ka va pan ve nghal. Chawlhni tlai a nih avangin lehkha chhiar chu ka hna a ni leh mai a, mak tak maiin Sangtei chuan leng turin min lo sawm lo ve teh mial bawk.



"Aw awm e, lo nghak lawk aw" tiin ka kawngka kalh chu ka va hawng a, zan lama ka mut dawna ka kawngka kalh chu ka lo la pawt thla lo tih leh ka zing tho pawn ka la chhuak lo hrim hrim tih chu ka hre chhuak chhunzawm nghal.

"Eee...ka lo lut lawk thei ang em?" tiin tlangval pakhat hian a rawn ti a, kei chuan a luh theih thu hrilhin kawngka chu ka lo hawng zau a, ka inchhung zim téah chuan kan inzui lut ve mai bawk.

"Engenita â?" ṭhutthlenga kan ṭhut fel hnu chuan ka ti a, a awm dan leh min biak dan vel aṭang chuan mi zahawm emaw mi puitling tak emaw a nih ngei ka ring.


"Hei kan vengah i lo awm tih kan lo hria a, duh ang pawhin kan rawn kal hma thei lo zawk a nih hi! Ka lo kal chhan ber chu KṬP lam aṭangin a nia, naktuk khian KṬP inkhawm kim zan kan hmang dawn a, chumi hunah chuan i lo kal ve hman ang em le te ka lo ti a, lo inkhawm ve ngei turin ka rawn sawm che a ni" hawihhawm tak leh felfai tak hian a rawn ti chhuak dap a, kei ang zirlai mai tan chuan a sawmna chu a zahawmin hnar a hrehawm ngei mai.


"Àaa....ka van hrethiam lo êeee....pawl sawmpakhat chiah ka lo ni bawk si a, keini ang rual inkhawm pawh an awm dawn em ni?" inthlahrung tak chuan ka lo ti ve a, keini ang rual inkhawm an awm loh chuan inkhawm chu ka peih vak lo a ni.


"Êeee.....awm lutuk e. Kan vengah hi chuan KṬP a inkhawm tur hian ṭhalaite hi veng dang aiin kan sawm lut hma deuh ṭhin hrim hrim a, chu pawh chu min hriatsak vek mai mai la, chuvang chuan inkhawm kha a inthlahrunawm miah loh" a rawn ti leh a, han hnial tawp pawh chu thil nuam a ni lo ngei mai.


"A nih chû.....nia....chutia keimah ang rual ṭhalai inkhawm an awm dawn chuan inkhawm ka lo tum dawn nia" a tawp a tawpah chuan ka ti ve ta ringawt a, incheina pawh ka nei ṭha lo bawk nen ka lo sawi ta kher kher chu ka inthiam lo leh hnuhnawh.



Chhun lamah chuan school-ah kan kal leh a, zirlai pawh ka ngaihsak ve viau chuan ka hria. A ṭhenin home work min pe a, a ṭhenin test tur min pe bawk. Chhun chawlh apiangin ka tiffin pai chu ka ei mai zel a, kan class-a zirlai tam zawk erawh chu school canteen-ah an ei ṭhin thung. 

School kan kal tirha tiffin ka ei te chuan ṭhian ka nei lo bawk nen mahni chauhin ka ei a, ka ṭhutpui pa lah chu mize chapo pu chi lam pang hi a la ni zui. Rei lovah kei ang thova tiffin ei ṭhin hmeichhiate chuan an bula ei turin min sawm ve ta thuai a, keipawh mahnia ei reng ai chuan tiin an bulah chuan ka ei ve ta ṭhin a ni. Kan class-ah chuan mipa ho chuan tiffin an pai ngai lo hrim hrim a, hmeichheho nen kan ei ṭhin tihna a nih ber chu!



Zanah chuan KṬP hruaitute'n min lo sawm lawk tawh ang ngeiin inkhawm tur chuan ka insiam ve a, thawmhnaw mawi leh nalh zawng dawn ila chuan chhuan tur leh chapo puina khawpa mawi ka nei lo hrim hrim. Zan dar 6:30 ah dar hmasa a ri a, 7:00 ah inkhawm kan ṭan ta chauh. Min sawmtu sawi ang ngeiin ṭhalai keimah ang rual inkhawm chu an tam em em a, KṬP chiah ni mahse chutiang em ema inkhawmnaa tam chu ka la hmu ngai lo a ni. Kan kohhran inkhawm ṭhin zat ai pawhin an tamin ka hria. An incheina leh chezia vel ka thlir chuan mahni ka insit dáwn dâwn a, mahse ka inkhawm chhan chu ka hre chiang em em lawi si.

"Zanin inkhawm chu hmel thar ka hmuh nuâl vang nge ni ka lawm hle mai, a hmasain zanina helai hmuna rawn inkhawm thar zawng zawngte kan Lal Isua Krista hmingin kan lo lawm a che u. Tin, inkhawm a awm apianga rawn inkhawm ve ziah turin kan sawm nghal bawk che u ni se.

Thu tlem té han kam hnih khat ve lawk ka duh a, rei erawh sawi ka tum lo. Kan thupui tur chu 'Rinnaah i chiang thar ang u' tih hi a ni a, he thil chungchang hi ka veina a rei tawh viau bawk. Pathian zarah chanchin ṭha chu pu Buanga leh sap Upate kaltlangin kan lo chang a, chumi chuan kan sakhuana, rinnaah leh kan khawtlang nun dan thlengin min lo thlak danglam zui bawk. Amaherawhchu khang kan ringtu hmasate hun lai leh kan tun hun ka tehkhin hian ṭhangtharte Pathian kan rinna kawngah hian kan tlahniam sawt hlein ka hria a ni. Kan mamawh ber chu kan rinnaa chian leh engkima Pathian dah pawimawh hi a ni. Rinnaa kan chian loh chuan kan buai a, kan kal peng a, thil ni lo lô hlauh kan ngah phah hle bawk.

Kan Bible chuan rinna chu vanram angin a tehkhin a, anṭam chi fangkhat tiat lêk rinna kan neih pawhin tlang hial sawn thei tura chakna ropui kan neih thu min hrilh bawk a nih kha! Pathian hian mihringte hi kan phak loh leh kan theih loh tur thil engmah min ruat sak ngai lo va, kan theih ngei tur leh ka paltlang theih ngei ngei tur thil hlir min ruat sak zawk ṭhin a lo ni. Nun danah pawh Pathian chawimawina lam aiin mahni ropuina leh mahni inchawimawina kan ngai pawimawh a, mi mit tlùn loh kan hlauhna leh khawvel thil kan ngaipawimawh lutukna hian kan rinna a ei hek zel tih erawh kan hre leh tawh ṭhin lo. Hlauh tur dik tak Pathian kan hlauh hunah chiah rinnaah hian kan chian a rinawm.

Chumi thila kan tih hmasak ber tur leh hriat hmasak ber tur chu 'mahni inenfiaha Pathian lam hnaih' hi a ni. Mi nunah te hian kan buai lutuk ṭhin a, hei hi a ṭha teh vûk lo. Inhmangaih taka inhrilhfiah kan nih loh phei chuan buaina leh inhuat tawnna a chhuak mai mai zawk. Tin, Pathian thu kan sawi emaw kan hriat emaw vang ringawt hian Pathian ringtu dik tak kan ni nghal ngawt lo va, Pathian thu chu a nuna nunpui chî leh a zawma zawm chî thil a ni. Tun lai khawvelah hi chuan ringtu, a dera nung kan tam tawh hle bawk. Chuvang chuan Pathiana rinna nghet tak kan neih theih nan Bible thute hi kan zawma kan nunpui a ngai a ni. Pathian thute hi mihring kut ziak nih mahse a nung a, thil a tithei a, Pathian thawk khum a nih avang hian kan ring hle tur a ni.

Pathianin kan thusawi te mal min sawm sak rawh se" kan veng KṬP leader in a rawn tih chuan inkhawm ho chuan 

"Amen" kan lo ti rual ṭhup a, KṬP leader chuan a sawi ṭha ka ti hle a ni. Group tin te item neih eng eng emaw kan en hnu chuan inkhawm chu kan bang a, keipawh ka in luah lam chu panin ka haw zui ve nghal.



Ni tin chu tih dan ngai tê bawkin school ka kal ṭhin a, home work leh class test kan neih reng rengte chu ka la thutak thei em em a, thiam loh leh test-a han tihchhiat vak ka nei ngai lo. Kan class-ah chuan a tiṭha pawl ka ni chho ṭan a, chutia class test leh exam na velah te ka lansarh tâkah chuan kan class-a mi ṭhenkhatte chuan min be ve peih ta deuh. 

Zirlai reng reng chu tum nei râna zir ka nih vang nge ni a thiam pawh ka thiam thei ve hle. Kan zirtirtute pawhin rei lovah ka hmel leh hming chu an chhinchhiah ta vat a, a hnu lawkah kan class CR atan hîal min ruat zui bawk. Ka beisei loh deuhin class CR nih chu a lo namai lo reuh hle a, mualpho a awlsamin mi mitmei ven reng ngai te chu ka ning ru thei hle.

Vawikhat phei chu kan School-ah chuan kan assistant CR nena inngaizawng thanin kan thang ta chîam a, kei chuan zahthlak ka tiin hrehawm ka ti hle. Mi dangte thlirna aṭang chuan inngaizawng te pawh kan ang ve tak ang, zirtirtute'n tihtur an sawi chu kan class mite ai awhin kan tidun zel a, school-ah chuan kan inkawp chawt hi a ni ber. Kan class chhunga mite pawh chuan min chhaih fiam nasa thei hle a, mahse chutianga inchhaih chu ka duh lem lo thung. 

Chutiang boruak leng vel hre tura ka lo ngaihtuah thlen phak miah loh leh ka duh loh ber Sangtei chuan a rawn hre ta daih a, engtin nge a hriat erawh ka hre lo. Kan school chhung chauha thang kan ni emaw ka tih laiin ka bialnu, ka duha nupui atan hiala ka lo suangtuah ṭhin Sangte ber pawhin a lo hre ve leh zel chu nuam ka ti lo ngei mai.



An sawi nasat lutuk vang nge ni kan assistant CR chuan min ngaina thar em em a, a awm dan chu ka lawm zawng a ni chiah lo bawk. Mipa ka ni a, ngaihzawng nghet ka neih thu leh bialnu dang ka duh belh loh thu chu a bulah chuan a fala kan awm dun laiin ka sawi ta tawp a, chutia ka hrilh tlang tawp loh chuan thil a kal dik thei dawnin ka hre lo a ni. 

Mi ṭawngka leh eng eng emaw vel aṭanga ka hriat danin kan assistant CR chuan kan pahniha inngaizawng angin a lo sawi hi a lo ni a, chu lai tak chu a ni kan lar em emna chhan. Chutah chutiang thu belhchian dawl lo leh ngaihbel theih deuh mai Sangtei'n a lo hre ve leh zel bawk nen ka buai phah ta vek a ni. Zirlai naupang ṭhenkhat kan assistant CR nena kan inbe fal lai min lo hmutute chuan chance nei emaw te min lo ti thul, a ni lo nasa mai bawk si.

Chapter 2

Kan School-a thil thleng vel avangin kei, ngaihzawngte pawh be lumlé thiam lo leh thlem thiam lo ve tak chuan ka bialnu Sangtei chu ka han thlem ve a, chutiang chuan ka thlem vel ngai si lo bawk nen ka ni hûihin ka hria. Sangtei thinrim lutuk ka hlauh avangin an inah te ka va leng a, a ni lah chuan min lo tihder lék chu a lo ní. A sawi danah chuan kan assistant CR nena kan lar tak tak lai kha chuan a lo thinrim nasa khawp a, mahse ka han thlem vel dan leh amah tihlawm tuma ka ṭawngkam chhuak vel reng reng zei lo lutuk a han hriat chinah chuan a insum thei ta lo. Amah leh amah chu a rawn inpuang ta tawp a, mipa zawk é ti lo chuan keimah zawk chu ka thinrim hnuhnawh leh ngei mai. A tawp a tawpah chuan pangai deuhin thil awmzia min zawt a, keipaw'n thil awmze dik tak chu ka hrilh ve ta vek.

Hun a kal a, class 11 promotion exam pawh kan zo fel leh ta, Christmas rim chuan boruak chu a luahkhat hneh leh tawh ngei mai. Christmas-a ka haw dawn leh dawn loh chu Sangtei chuan min zawt reng a, kei chuan ngaihtuahna thui fê pu chung chuan ka haw dawn loh thuin ka chhang ta mai. Ni e, kei hian awmna tur in ka nei lo va, thisen zawmpui chhungte tih tlâk lah ka nei hek lo. Kan khuaah chuan lo haw ta pawh ni ila khawnge ka awm chuan ang? Sangtei te inah maw? Nge Malate inah zawk? Ni lo ve, kei hian mi chhungkua ka tibuai hnem mah mah tawh zawk a ni. Inthlahrung reng reng leh mi mitmei veng reng renga nun ai chuan haw loh law law chu ka thlang ta a, Aizawla ka in luah lama awm leh a remchan apianga lo inhlawh chu ka duh zawk ta hrim hrim. Pawisa inkhawlna atan pawh a ṭhat viau ka ring hnuhnawh a, haw lova Aizawla awm tlang chu ka tum nghet ta bur a ni.

Sangtei'n ka haw loh chhan tur min zawh te chuan chhanna mumal pawh nei lovin tihtur ka neih thute ka hrilh ta ringawt. Chumai a ni lo, December thla kan han kai ṭan dek dek a, Mala nu leh pate chuan min rawn ngaihven ta ngei mai. Haw chho turin min phone awl lo va, mahse Aizawl lama tihtur ka neih thuin ka lo chhang fithla ve ṭhak. Tin, Mala chuan haw chho turin a nawrin min rawn nawr leh bawk a, ani pawh chhuanlam neuh neuh siamin ka chhang fithla ve leh thei ta hram a ni. Christmas ni dâwn takah te chuan ka nu ka ngai hle a, a boruak chuan a zir ve êm bawk a ni. Ka khawhar hlauin Sangtei chuan min rawn call ṭhin a, a nu leh pate nen pawh kan inbe ve nasa hle. A chang leh SMS te kan inthawn a, Aizawla Christmas hman chu nuam ka ti ta phian zawk.

Christmas a lo thleng a, ka in luahna neitu te chuan min ko chhovin hun hlimawm tak min hman pui a, an chungah pawh ka lawm hle a ni. A tirah chuan an mi sawmna chu ka duh lo va, mahse in neitu te an ni bawk nen ka hnial hneh ta lo a ni. Amaherawhchu, pawn lam mi chuan chhungril lama khawhar rukna leh hlim loh rukna nei chung chungin an bulah chuan ka awm tih an hre si lo. An hriat atan pawh ka duh lo va, tûma hriat ka duh lo tawp zawk a ni. Chu kum chu ka piantirh ata Christmas awm tawh zawng zawnga ka la ngaih hoh ber leh ka la lunglen ber ṭum a ni ang. Ka nu ka ngai a, Sangtei ka ngai a, ka ṭhiante leh kan khua hrim hrim chu ka ngai a ni. Mahse, chho ringawt thei dinhmuna ding pawh ka nih loh avang chuan chhoh theih a ni si lo.

Mala leh Sangtei bawk chu an fel leh ta a ni. Sangtei hi chu sawi lova lûm a ni a, Mala zawk hi Shillong-a awm chung leh buai chung chungte hian min rawn be fô va, keimah hian biak hmasak nachâng ka lo hre lo leh ṭhin zawk. A tam zawk hi chu ama min rawn call aṭanga inbia kan ni a, kei chuan a châng zeuh zeuhin ka call ve ṭhin. Chutia ka khawhar hlaua min rawn be fôtu ṭhian leh ngaihzawng ka nei te chu ka lawm ru em em a, mahse an bulah erawh ka sawi ngai lo thung. Mala chuan a chângin Sangtei nen kan chungchâng min sawipui a, a chângin keipaw'n a bialnu chungchang ka sawipui ṭhin. Amah ang lo takin hmâna a bialnu nen chuan an lo la inkawp ve reng a, Sangtei chuan hre phei se chuan a awih lo leh ngawt ang. Mala chuan '𝘩𝘦 𝘭𝘢𝘪𝘢 𝘔𝘪𝘻𝘰 𝘩𝘮𝘦𝘪𝘤𝘩𝘩𝘪𝘢𝘵𝘦 𝘩𝘪𝘢𝘯 𝘮𝘪𝘯 𝘥𝘶𝘩 𝘷𝘦 𝘵𝘪𝘩 𝘤𝘩𝘶 𝘬𝘢 𝘩𝘳𝘪𝘢, 𝘮𝘢𝘩𝘴𝘦 𝘬𝘢 𝘣𝘪𝘢𝘭𝘯𝘶 𝘭𝘰 𝘩𝘪 𝘤𝘩𝘶 𝘬𝘢 𝘥𝘶𝘩 𝘭𝘰' tiin ka bulah chuan a sawi ve ngei. Ani hi hmâna ka ṭhian ṭha em em Malsawmkima kha a ang tawh lo hle zawk, mahse amah ngei a ni a, a lerh tawh lo deuh tih mai chauh a ni.

Kum thar a lo ni a, keipawh ka inhlawhna aṭang leh ka nu pawisa min lo khawlsak sà aṭang chuan kawr thar ka lei ve a, inkhawm pûi tlâk tak tak lo hi chu ka lei mawh ve khawp mai. Chhuah vahna tur leh thil tih tur em em ka neih loh vang a ni ber. Kan veng biak in chu a lian thawkhat bawk a, mipui inkhawm chu kan tam hle. Chhiar sî sé kher lo mah ila kan khuaa inkhawmpui kan neih ṭhina inkhawm zat ai chuan an tam tih ka hre thei nghal. Gallery lama ṭhu ka nih avangin kohhran secretary in thil a puan lai chuan inkhawm ho chu ka lo enkual mai mai a, an incheina a mawiin an hmelte chu a ṭha hlawm kher mai. An fai hmel hlawm em em a, an lang zahawm nghal khúp bawk. Mahse, ṭawng neuh neuh leh thil tih neuh neuh an ngah ta lutuk chu ka hrethiam lo a ni. A ṭhenin thil an ei a, a ṭhenin an ṭhiante an be sep sep bawk. Chung ka hmuh te chuan ka lo ngaihsan rilruk lawkna chu a bo nghal vek a, sawi chhuak kher lo mah ila ka mit an tikham letling zawk hîal a ni. Darkar 1 leh tih vel kan inkhawm hnu chuan kan bang a, keipawh in lam panin ka haw ve ta nghal.

Chutia kum thar kan kai chhoh tâkah chuan sawrkarin school te chu an hawng leh tawh a, re lote hnuah kan exam result pawh a rawn chhuak ve nghal. Pathian zarah kan class-ah chuan a tiṭha ber ka lo ni ve hlauh a, chumai a ni lo, Art subject la zingah chuan a tiṭha zual top 10 zingah ka lo tel ve leh zel a, Pathian hnenah pawh lawmthu ka sawi nasa hle. Result chhuah ni chuan zirlai zawng zawngte chu Assembly Hall-ah zirtirtute nen kan awm khawm dial a, chutah kan school principal chuan High school aṭanga tiṭha zual top 10 te, science stream lam aṭanga tiṭha zual top 10 te leh art stream lam aṭanga zirlai tiṭha zualte chu stage lamah min ko chhuak a, nuam tho mahse zak ve tak ka ni. Mi an tam bawk a, kut beng thawm chu a ring ngei mai. Principal chuan zirlai tiṭha zual top 10 hote chu Excursion kan neih tur thu a rawn puan chhunzawm a, zirlai naupang dangte chu an lo phun ri mur mur zui nghal.

Kar a'n ral leh a, zirtirtute lamin zirlai lam kan zir ṭhat leh tak tak hmaa Excursion neih chu fuh zawka an rin avangin Delhi-a Excursion nei tur chuan thu an titlu nghal. Sangtei pawh an result a chhuak tawha ka hriat avangin chanchin ka va zawt ve a, ani paw'n second division-a a pass thu min lo hrilh ve bawk. Mahse, ka rilru dik takah chuan ka beisei aiin a tichhia. Ka result min zawh let ve chuan phur takin ka hrilh ve a, Excursion kan neih nghal dawn thu ka hrilh te chuan a kal châk ve hmel hle bawk. A tihchhiat chhan han zawh deuh tawp chu ka hreh a, mahse zawh loh tawp chu a dikin ka hre bawk si lo. Mahse, a hnuah chuan a bialpa ka nih vang leh ka bialnu a nih bawk avangin ka zawt ta tawp. Ani chuan questions an set har thu leh mark an ren thuin min lo chhang a, chu chu ka lo rinlawk dan ang chiah a ni bawk. Aizawl ka awm tirh aṭang tawh mi ka aṭanga ka hriat danin St. Paul's School hi chu an thiam a, strict pawh an strict bawk ṭhin. Tin, result an nei ṭha ṭhin em em a, Mizorama school-ah pawh a ṭha ber ang hialin an sawi ṭhin.

Ruahman lawk ang ngeiin Delhi pawh chu kan kal a, mahse zirlaiah chuan kal thei lo an awm deuh nuâl avangin mi sawm leh tih vel chiah chu kan kal. Keipawh a tirah kha chuan kal loh kha ka tum a, mahse pa Mala leh a chhungte chuan kal ngei ngei turin leh ka mamawh tur zawng zawng min tum sak an tum thu min hrilh fê hnu kha chuan kal turin ka rilru ka siam fel ta chauh a ni. Mala nu leh pate chungah hian bat ka ngah em em a, ka nu boral aṭang phei kha chuan min fapa chei nghal em em a, chutiang bawkin keipawhin ka ngainain ka en hrang lo ve hle bawk. Chubakah tunah rih chuan anni chauh lo hi chu pawh ngam leh belh tur ka hre lo va, ka puitlina ka hlawhtlin hun thlengin ka chunga Malate chhungkaw ṭhatna hi ka theihngilh ngai lo vang. Delhi-a kan awm chhung chuan hmun lar zual leh hmun pawimawh bik tak tak te chu kan tlawh a, a ṭhen in ropui tak tak an nih laiin a ṭhen chu Museum te a ni thung. Taj Mahal te, India Gate te leh a dang tam tak te chu kan tlawh te ber an ni.

Tin, kan Excursion kal chu thlawhnain kan kal a, kei vawikhatmah thlawhna pawh la chuang ngai lo na nâ ná kha chuan thlawhna a thlawh chhuah tirh te khan ka lo hlau rilru leh hle a nih kha! Mahse van sanga kan thlawh veng veng takah chuan nuam tihna chuan min rawn luah a, tukverh bula ṭhu ka ni bawk nen níin chhum a rawn ên paw chîai te chu mawi ka tiin hmuhnawm ka va han ti tak em. Delhi-a ni nga chhung kan cham hnu chuan Mizoram lamah kan haw leh a, kan haw lamah erawh khua a chhiat avangin nî hmuh tur a awm lo va, khaw dur leh ruah sur tih mai loh chu hmuh tur pawh a awm lo. Khaw awm dan nen a inrem êma tiin ka ear phone chu ka la chhuak a, ngaithlain ka muhil zui nghal. Ka in luah té ve tak ka han thlen leh meuh chuan khumah ka bawk nghal thlawp a, ka ngaihtuahna ah chuan ka kal ang tih pawh ka lo besei ngai lohna hmuna ka kal thei te chu a ropuizia leh Pathian min kaihhruaina vek a nihzia a rawn lut nghal zut zut a, tho leh thutin ka Diary chu la chhuakin kan hun hman dan zawng zawng ka hriat chîn chin chu ka ziak thla nghal mawlh mawlh.

Tunah chuan School pawh kan kal ṭha leh tawh hle a, chutiang bawkin Sangtei te pawh an kal ṭha ve leh tawh. Mak tak maiin Sangtei chu ka ngai thar em em a, a bula awm reng châknain ka khat a ni ber. Phone aṭanga kan inbiak te hian ka kham lo thei em em a, va kalchilh tawp mai chu ka duh ṭhin. Mahse, va kal chilhin va len chilh ta ila ani tan mualpho ve theihna a awm tih ka hriat avangin ka ṭhulh leh ta nge nge ṭhin. Chubakah Kulikawn daiha awm an nih avangin keini awmna Mission Vengthlang aṭang chuan han kal mai chu a harsa ve ṭhin a, bike emaw motor emaw neih loh phei chuan len leh kal vel chu peih awm loh thei tak a ni. Sangtei chuan ka biak hmasak loh chuan mi rawn biak hmasak a tum tawh ngai lo va, zirlai ah a buai a ni ang tiin keimah leh keimah chu ka inhnem chawp ve mai zel. Mahse hun a kal a, kar a ral a, thlate hial a ral takah chuan a awm dan chuan ka ngaih a tiṭha ta lo.

Christmas kan han thleng leh a, kum dang angin Sangtei chuan ka haw dawn leh dawn loh thu min rawn zawt tawh miah lo. Ka rilruah erawh Sangtei chuan awm loh lai a nei lo va, hetiang êm ema ka thinlungin hmeichhia a duh leh hmangaih hi ka la hre lo hial zawk. Chutia thil chinchang leh Christmas vela ka awm dan tur engmah min zawh tak lovah chuan kan khaw lama ka haw leh dawn loh thu chu hrilh pawh ka tum ta em em bik lo. Chutah ka hriat loh laiin Sangtei zawk chu kan khaw lamah a lo haw daih a, min hrilh hmasa miah lova a lo haw ringawtna chhan ka zawh lahin tum lawk bik em em pawh awm lova a haw thuin min rawn chhang a, kei chuan ka lo awih leh mai. Sangtei chu hmeichhe fel tak a ni a, a hmelṭhain dawt a sawi ngai ka hre lo. Chuvang chuan ka lakah chuan dawt emaw thup emaw a neih ka ring lo ve hmiah.

Christmas boruak kan hmang zo a, kum tharin a rawn chhunzawm leh nghal. Chutiang bawkin class 12 board exam pawh a rawn hnai leh ta nghal viau bawk. Hun hi engvanga kal chak em em nge a nih pawh ka hre lo. Kum a thar ṭan tir chauh emaw tih laiin kan exam nî pawh a lo thleng nghal zung zung. Sangtei chu a danglam tial tial a, ka lak aṭang a inla hrang hrang tial tial bawk. Kum hnih lai kan inngaihzawn tawh avangin a zia chu ka hre chiang ve thawkhat tawh a, ka laka a danglam tâk em emna chhan pawh chu zawn chhuak ngei ka tum bawk. Exam hun a lo thleng a, kan school chu exam center-a an hman avangin keini zirlai ho chu hmun danga kal buai tawh lovin kan school-ah chuan kan exam nghal vek. Exam questions te chu ka lo zir lawk leh ka lo thiam bel sa tawh te deuh vek hi a lo ni a, ka va han lawm tak em. Ka tiṭha emaw chhia emaw eng position pawh nei ila ka lawm tawk em em tho ang. Exam kan han zo a, ka lo tum lawk an ngeiin Sangtei chu ka phone nghal.

"Hello" a rawn tih chuan amah ka hmuh châkna a zual sauh a, a aw te chu a danglam rîaua hriatna ka nei a, mahse ka hre dik lo ve thei tho bawk.

"Hei, enge i tih a?" pangai tak chuan ka ti a, a hmel te chu ka mitthla a, a nui sen sen tur ka suangtuah te chuan keimahin lawm lovin ka nui ta vel.

"Ka ṭhiante an rawn leng a, chuan nakinah kan inbe zawk thei ang em?" a rawn ti leh nghal ringawt a, ka nui lai chu ka tawp riai rîaia, min chhan dan chuan ka hlimna te chu an titawp zui bawk.

"I zia hi a dang telh telh a nia, enge a chhan?Ka ngaih êm che avangin tunah pawh ka lo bia che a, nang hian min ngai ve miah lo em ni?" aw nem lo tak chuan ka ti a, mahse ka thinrim rukna chu ka thup hram hram a ni.

"Ngai ve tho é, chutiangin ka danglam awm pawh ka lo hre hleinem, i ngaihbel mai mai a ni zawk lo maw?" zawhna vek chuan min lo chhang let a, kei chu ka lo thaw hawk ta ringawt.

"Ka rawn kal dawn asin, ka hmu chak tawh lutuk che, vawiinah exam kan zo chiah bawk nen nangmah hmuh châkna hlirin ka khat" aw pangai leh zangkhai deuh vâh chuan ka ti hram hram a, thil hriat chian hma chuan lo thinrim kha a fuh ber lo.

"Ni dangah lo kal zawk la? Vawiin chu inleng te ka nei bawk sia" a rawn tih leh chuan tunge a inleng neih chu ni ta ang tih te chu ka ngaihtuahnaah a rawn lut a, min hnar tlatna te chuan ka insum theihna a ti chhe zo tawh bawk.

"A nih leh le! Naktukah kan inhmu dawn nia" ram hmak chuan ka ti a, kan inbiakna chu amah pawh ngaichang lo chuan ka hmet tawp a, ka rilru chapona chu ka thup bet zo tawh ngâng lo a ni e.

Ka tihtur em em hre lo chuan Mala chu ka call a, a la ring ral ṭhak zui. Mahse, a hnuah Mala chu school kal turah ka ngai leh ta tho. Chuti maia ka laka Sangtei a awm ta hmuk hmuk leh min pehhel hram hram a tum ṭhin chuan ka rilru a tibuai hle a, exam kan zo tawh bawk nen an ina len tam leh amah nena chhuah dun tam pawh ka lo rilruk ve vek tawh. Mahse amah zawk hian a zir lo nge keimah hian ka zir lo zawk pawh ka hrethiam lo, kan inkar chu sawifiah thiam chiah si loh hian a zau tulh tulh hi a ni ber. A châng chuan Mala chu kan inkar boruak awm dan chu hrilh mai duhna rilru ka nei zauh zel a, mahse ka tihbuai mai mai ka hlauh avangin ka hrilh lo leh ta nge nge ṭhin.

A tukah chuan Sangtei te in lam chu ka pan a, an in ka thlen chuan min lo lawm hle. Chutia hmel nui sânga min lo chhawn leh tak si ah chuan ka rilru khauh ṭung leh thinrim ṭung pawh a reh leh ta tial tial mai. Inzui chhuakin Tlangnuam View awmna lamah chuan kan kal a, vawiin hian kan inkara thil eng emaw awm hi tihreh ngei ka duh tawh a ni. Kan kal duhna hmun chu kan thleng a, ṭhutna awma kan ṭhut hnu chuan ka kuah nghal vawng vawng. Mahse ni dang ang lo takin Sangtei taksa zawk chu a lo ṭang ṭung a, min thlakhlelhna reng reng nei ve lo a ang zawk.

"Engatinge hetiang hian i awm?" ka awm aṭanga nem sawn deuh pah chuan ka ti a, ani chu ka lam pawh lo hawi lovin hmun dang chu a thlir daih a, chungte chuan ka rinhlelhna a ti zual.

"Engtin vàk nge ka awm a?" zawhna vek chuan min rawn chhang leh ta, a awm dan chu ka duh lo ngei mai.

"Ka lakah hian i inla hrang lutuk hi ka hrethiam tawh lo che, i awm dan hi ka hre lo emaw ti suh" thinrim insum hram hram chuan ka ti leh ta nge nge.

"Kan inkar hi siam ṭhat a ngai tak zet a ni. Ka laka lungawi lohna eng thil emaw i neih chuan min hrilh la, tichuan siam ṭhat dan tur ka lo ngaihtuah zel ang" thlem tih tih chuan ka ti leh a, ka thin chuan a tuar lo ṭep tawh.

"Lungawi lohna pawh ka nei lo, keini pahnih hi kan inṭhen mai a ṭha zawk" uang miah si lo hian a rawn tichhuak ta hlawl mai. A thusawi chuan min ṭhawn lutuk avangin ṭawng mai nachang pawh ka hre lo va, chutah a dara va dawm vat pahin

"Engvanga min ṭhen hi duh nge i nih? Enge i lakah hian ka tlin lohna? Min zahpui em ni? Ka care tawk lo che i ti em ni? Tunah chuan a hma ai zawngin ka ngaihsak tawh che ang a, hun pawh kan hmang duh hnem tawh ang. Inṭhen lampang kha sawi ri tawh miah suh, ṭhen che hi ka rilru pawhin a la ngaihtuah ngai lo. Nang hi ka nupui atan ka hual lawk tawh che a, chu chu thlen tir ngei pawh ka tum" ka ti ta duah a, lunngaih hmel fê hian min rawn en a, a hmaa ka thinrimna te chu hlauhthawnna chuan a rawn luah khat vek tawh.

"Kan inṭhen hi a ngai"

"Ka thei lo, ka ṭhen dawn lo che ka tih kha" mipa ve si a va tlawm theih ngâih ngâih ve le! Mahse, duh tak te neihna tur a nih phawt chuan tlawm mai pawh chu ka tih a ngai tlat si.

"Ka tihpalh" tih ringawt hi a rawn sawi leh a, a dara hmer vak chung chuan

"Engvanga kha thu kha rawn sawi nge i nih? Ka lakah pakhatmah tihsual i nei hleinem?" ka lo ti ve vat a, ani ṭhen chu ka duh lo a ni.

"A chhan chu kei hian ngaihzawng dang ka nei a ni" inchhirna hmel pawh pu lo hian a rawn ti a, min ṭhen a duhna chhan chu ka lungawi thei lo a ni.

"Enga!?"

"Aw, kei hian ka kawp che. Chuan chu pa, ka ngaihzawng leh ka bialpa ni bawk chu ka duhin ka hmangaih em em a, ani nen chuan Sex hial kan hmang tawh bawk. Hruaia, ka inhrethiam bik lo, ka thlahlel tawh lo che ni berin ka hria" a rawn tih leh chiah chuan ka rilru chu natnain a rawn luah khat nghal vek a, rei fê chu ka ngawi ta ringawt.

"Engtik aṭang khan nge?" a taksa pawh si tawh lovin ka ṭhu ṭha a, a hmel te chu ka hmu duh tawh lo a ni.

"Nikum kum tawp vel aṭang khan"

"Engkim a nih dan dik tak min hrilh rawh, tichuan keipaw'n tawrh dan ka thiam deuh ang" ka ti ta thlâwt a, ka hnual nghal râwih bawk.

"Dik tak chuan kan khuaa kan inngaihzawn lai kha chuan ka duh em em che a, i bula awm reng te kha ka châk ṭhin. Mahse, Aizawl kan awm hnu khan keimah zawk hi ka dik lo tih ka inhrechhuak ta a ni. Zawi zawiin ka duhna che leh ka thlakhlelhna che kha a tla hniam a, chutah hmuh theih rengin kan venga mi tlangvalte'n min lo hel ve leh reng zel bawk si. Khawpui mi an nih vang nge pawh ka hre lo, ka ngaisang em em a, an bula awm te chu nuam ka ti. Nang lah khan min rawn ngaihven leh kan ina rawn len i nei tam ngai si lo va, kei ni lova i zirna chauh i ngaihpawimawhna te khan nangma laka thlakhlelh loh tawlh tawlhna che min siam ni berin ka hria. I zei lo tih chu ka hria, mahse tlem te tal chuan min han ngaihsak ve deuh ṭhin la chuan tuna ka rilru puthmang ang hi ka nei kher lo maithei a ni" a rawn ti a, a thusawi tîn te chuan min tina hlawm hle.

"A dik ang, kei hi mi latlak loh tak zawng ka ni e" tih chiah ka sawi tawh thung.

"Nangma thiam loh chiah a ni bik lo tih hria la ka duh. Khatia khawpui tlangvalte'n min rîm min rim tâkah chuan anni nen khan ka tehkhin lo thei lo che a, nang chu ka hmu hniamin ka zahpui ṭan ta bawk che a ni. Nimin pawh khan ka bialpa chu a rawn leng a, chuvang a nia rawn leng rih lo tura ka tih tawp che" a rawn ti leh a, thil awmzia leh nih dan chu pawm harsa ka la ti fan.

"Siam ṭhat leh dan emaw tal a la awm ang em?" ka chapona zawng zawng dahṭhain ka ti leh a, ka tlawm tak zet a ni.

"Hruaia, ka tihpalh a ni. Lo inkawp leh ta pawh ni ila khawpui mite lakah ka sit che ang a, rei kan inkawp thei chuang lo vang" min en ngawih ngawih chung chuan a rawn ti a.

"Aw le, kan inṭhen dawn nia. Tunah chuan ka pa zawn hmuh chiah ka dam chhan a ni ta. Ka nihna leh ka awm dan engkim hre chunga kum hnih chhung ngawt min lo kawp ve avang pawh hian ka lawm hrim hrim e. Le! I haw tawh mai ang hmiang" ngawi renga kan awm hnu chuan ka tichhuak sup a, ka din chhuah rual chuan a rawn ding chhuak ve a, ngawi renga inzuiin kan haw thla zui nghal.

Ni e, chutiang khawpa min lo zahpuitu a nih si chuan keia lo sawi theih a awm lo va, nawr luih theih chi pawh a ni lo. Sangtei ka dem rualin keimah ka indem a, a tawpah ka duh loh ber Pathian hial ka dem ta. Engvangin nge chutiang fakaua ngaihzawngte zahpui leh mi rethei mi chu ka lo nih bik kher? Engvangin nge mite angin awlsam té tèa ka hlima ka nun ve theih loh? Pathian chu a vawikhatna atan mi retheia min duan avangin ka dem ve ta ngawih ngawih a ni. Sangtei chu ka nupui atan hiala ka lo suangtuah ṭhin a ni a, mahse a ni berin min zahpuia min duh tawh loh thu a sawi miau avangin ka ṭhen lo thei si lo.

Kan inṭhen aṭangin thla hial a ral leh ta, mahse Sangtei chu ka theihnghilh thei lo a ni. Ka wallet-ah chuan Sangtei nena kan thlalak dunna chu ka la dah reng a, a bulah chuan ka nu leh pate thlalak pakhat a awm ve bawk. July thla kan thleng a, kan exam result pawh a rawn chhuak ve nghal. Ka lungngaih em em lai te leh ka beidawna amah ka dem em em laite pawhin Pathian chuan mal min lo la sawm reng hi a lo ni. Mizoram pûm puiah kei chu pangana ka lo ni a, kan school-a zirtirtute leh principal te chuan min lawmpui ve hle bawk. Kan school aṭanga Mizoram pûma top 10 zinga langte pual chuan programme an siam a, chutah chuan lawmmnate ka dawng ve bawk.

Kan result a chhuah tirh chuan ka ngaihtuahna aṭanga ka paih bo theih loh Sangtei result chu ka en ve vat a, second division-ah a lo pass tih chu ka hmu zui nghal. Phone kaltlang tal pawha va lawmpui chu duh viau mah ila kan inṭhen tawh mîau avangin va biak pawh chu ṭhain ka hre ta lo. Kan result chhuah nî chuan Mala ka hrilh hmasa ber a, a dawtah a nu leh pate ka hrilh ve leh nghal. Anni chuan min lawmpui thiam em em a, anni chhungkua hi hlimna min petu an ni tih chu ka hre thar áwn áwn ṭhin. Tin, Mala pawh a lo pass ṭha khawp mai. Distinction-ah ve tho a lo pass a, Mizoramah chuan awm se top 10 zingah a lan ve tho ka ring, keipaw'n lawmpuina thute chu ka hlan ve mawlh mawlh.

Mak tak maiin karkhat hnu velah Sangtei chuan SMS in min lawmpui thu a rawn thawn a, ka en nâin ka chhang let duh ta lo. Mala nu leh pate chuan Mala nena kan pass lawm an duh avangin haw chho turin min rawn chah a, mahse kan khuaa haw chu ka hreh tak zet a ni. Mala chu Mizorama a rawn chhoh dawn avangin Sumo counter-ah ka lo nghak a, kan inhmu chiah chu kan inkuah nghal vawng vawng. Ṭhiante ngaih pawh hi a lo na duh khawp mai. Ka in luahah ka inghah tir a, zanah te chuan a haw chhoh châk tawh thu min hrilh ve nasa. A chhan pawh ka hre kar. Sangtei nena kan inkar chu ka hrilh a, mahse a dik tak erawhin ka hrilh duh lo. A ngial ngan ngâna ka hrilh a nih chuan a lo han hau leh hrep emaw te kha a ni ang a, chuvang chuan ka hrilh duh ta vek lo. Tin, a nu leh pate bulah pawh ka chhoh theih loh tur thu lo hrilh turin ka chah a, a chhan min zawh chuan ka sawi tlang tawp. Ani pawh chuan chhuanlam dang leh ngaihthlâk nuam deuh zawk a lo siam tur thute sawiin a tukah chuan kan khaw lamah min chhoh san ve nghal bawk.

August thla a lo ni a, ka pass percentage chuan Mizoram pawna College ṭha tak tak te chu phak ve mahse pawisa ber chu ka buaina a ni. Mala paw'n Shillong lama St. Anthony's College-a a luh dawn thu min hrilh a, chuta lut ve tur chuan min ti nghe nghe. Mahse kei chuan chhuanlam dang siamin Mizoram lama zir zawm ka duh zawk thu ka hrilh a, ani erawh chuan Mizoram College-a zir zawm chu min duhkhawp pui lo hle thung. Vawikhat phei chu Mala pa chuan min lo call a, pa in fate a zilh ang mai hian min rawn zilh ta vak a, mahse ka laka thinrimna leh lungnih lohna neih vanga min rawn zilh a ni lo. An chhungkaw laka ka inthlahrung thei lutuk chu an duh lo va, chumi avanga min rawn zilh hrep pawh chu a ni. Ni e, ṭawng tam lo leh mi inthlahrung mi ka lo ni bawk nen ka mamawh pawh hi an hnenah chuan ka thlen khat khawp mai. Mamawh ka nei a nih chuan ka inhlawh a, ka intuak ngah hunah ka lei mai zel ṭhin. Chutianga nun chu nuam ka ti a, a awlsam ka ti bawk.

College chu Pachhunga University College-ah ka zawm ta a, admission kan tihfel hnu rei loté ah class pawh kan ṭan ve nghal. Admission ti turte zinga ranking nei pha ho hrim hrim chuan direct in admission kan ti thei hi a lo ni a, chuvang chuan keipawh awlsam takin ka luh ve theih phah a ni. Tin, Synod School aṭanga ka classmate te ho pawh kan College-a rawn lut an awm nual a, chutia a tir aṭanga hmelhriat ka han neih nghal ringawt pawh chu nuam ka ti hle. Class chu pangai takin la ṭan lo mah ila nuam ka ti nghal em em a, College boruak hrim hrim chu nuam ka ti hi a ni tawp. Mahse, duh ai chuan thuamhnaw ka nei ṭha tawk lo tih ka inhria. Ka nu khan a boral hmain College ka zir theihna chin tur chiah chiah hi pawisa a lo khawl hman a, mahse ka lungngaih phah lo. Aizawl ang khawpuiah hi chuan hna a tam a, thawh hreh nei lo tan sum chu neih a har lo tih ka hria.

A rukin ka pa chu ka zawng ve reng a, mahse police department lam emaw mi dang emaw pawh ka be buai rih duh lo, keimah ngei hian zawn chhuah chu ka tum nghet bur a ni. A hmaa ka lo ngaih danah kha chuan ka hlawhtlin hnuah chauh ka pa zawn hmuh chu ka tum a, mahse tunah chuan ka duh leh ta lo. Mihringte hian hma hun kan lo hre lo êm mai, ka pa ka zawn hmuh hmain ka thi ve daih thei tih te ka hriat avangin a theih angin angin ka zawng nghal char char ta a ni. Zirlai kan zir ṭan tirh aṭangin ka bei urhsun nghal em em a, bul ka ṭan ṭhat chuan thil harsa a awm lo tihna rilru chu ka pu lian em em bawk.

Inrinni a ni a, a vawi ngana atan ka pa chu ka zawng leh dawn a ni. Ni danga ka tih ṭhin ang bawkin Chaltlang lamah chuan ka zawng a, mahse vanduaithlak takin ka pa chu hre mumal pawh an lo awm lo. A awm ve tho, hmân lai huna awm ṭhin tak tak te kha an awm tawh lo hlawm a, a tam zawk chu tun hnaia cheng ve mai mai leh khaw dang aṭanga rawn pem mai mai te an ni hlawm. Chutia han zawn mawl tawp chu harsat pawh a harsa hle a, Aizawl veng khat lek pawh ni mahse mihring an tam em em tawh a, tû tan pawh hmuh mai chu a harsa ve hrim hrim. A tawpna atan tiin mi han zawh kual leh chu ka tum a, kawng peng ṭhuam a lo awm ta tlat mai. Khawi zawka kal tur nge pawh chu ka hre hran lo, mahse Chaltlang Salem veng lama putar nî lum lo ai chuan ka mit a la ta tlat. Ka rilruin kal tura min tih ang ngeiin Salem veng lamah chuan ka chhuk thla a, putar ni lum lo ai hma taka din pah chuan

"Min lo hrethiam lawk, ka pu. He pa hi i hriat ngai mi a ni em?" tiin ka zawt a, ka bia tih hre reng mahse a rawn hawi chhuak eih lo.

"Ka pu" tiin ka zawhna ngai bawk chu ka zawt ṭha leh a, chutah a rawn hawichhuak ve ta.

"Naupang, ka nî lum ai lai min hliah alawm le, kal sawn thuai teh" a rawn ti vin thar thar a, a tlangval lai chuan a chapo ve dawn a nih hi ka ti rilru nghal vawng vawng.

"Ka pu, ka zawhna che hi min chhansak hram teh...Khawngaihin.....Ka tan he pa awmna hi hriat a pawimawh lutuk" ka ti ta ringawt a, ani leh zelin a lo hre lo a nih chuan zawn mai ngaihna pawh ka hre tawh lo vang.

"I va ninawm reuh e âw....Khawi maw a thlalak chu" tiin a kut a rawn dawh a, keipawh chuan ka lo pe vat.

"Hei chu ka hriat hnu a va ang ve" a ti ta sup mai, chutah beiseina thar nei chung leh a bula ṭhu hniam chung chuan

"I hria maw!? Khawngaihin a awmna min hrilh hram teh" ka lo ti thuai a, ka thil duh chu min hrilh thei hram se ka ti a ni.

"Hmânah chuan Lily vengah khian an awm ṭhinin ka hria, a hming pawh tunge kha âw" a tih vang vang lai chuan

"Lalrinchhana a ni em?" ka lo ti nghal vat a, ani chuan min rawn en let vatin

"Aw, a niin ka hria. Ka hriatna hi a chak lutuk tawh lo a" tiin a lu chu a hiat niah niah a, beiseina chu ka nei tam tial tial bawk.

"Khawngaihin tuna a awmna hmun hi min hrilh thei ang em?" ka ti leh tawp a, ani paw'n a ngaihtuah zui vung vung.

"Ka hriat hnuhnun ber kha chuan nupui a nei tawhin ka hria, a nupui neihnaah te khan kal kan ṭhahnem asin. A nupui neih hnu lawkah Tuikual South velah khuan a insak tharah an awm nghal maithei. Chaltlang lamah chuan a awm tawh lo hrim hrim zawkin ka hria, chiang taka hriat ka nei bik lo" a rawn tih leh chuan lawmthu sawi mawlh mawlhin ka kal sawn a, ka rilruah chuan Tuikual South-a kal hlir a lang tawh.

Chumi ni tlai la lâa Tuikual South lama ka pa zawn nghal chu ka duh ngei mai, mahse Bazar aṭanga Bus service chu traffic jam nasat lutuk avangin a thleng phei rang thei lo va, chutah Tuikual kan thlen chuan khua a lo thim vek tawh avangin kal rih loh law law chu ṭhain ka hre leh ta zawk. Zana ka mutnaah te chuan ka muhil hlei thei lo va, a awmna ni áwm ka hre tawh ringawt pawh chu ka muthilh theih lohna chhan pakhat a ni. Ka pa ka lo ngaihtuah lutuk vang nge ni, Sangtei lam reng ka ngaihtuah tawh lo tihte chu ka hre thar hnuhnawh leh vel. Tunah chuan khawvela ka la dam ve ṭâwk ṭâwkna chhan chu Sangtei a ni tawh lo va, ka nu a ni tawh lo va, ka pa Lalrinchhana chiah chu a ni tawh. Eng mî pawh lo ni se hmuh leh inhriattir chu ka tum hrim hrim a, min lo duh lova min lo hnawl a nih pawhin ka pawm vek ang tiin ka rilru pawh ka siamfel tawh.

Sunday tlai a ni a, ka ngaihtuahna chu a buai ru ngei mai. Ka pa chuan chhungkua a lo din tawh ngei ang a, fate pawh a neih ngei a rinawm tawh bawk. Kei hian tunge ka nih hrilh ta ila, ka lo va tibuai kual leh vel mai mai ang tihte leh an chhungkaw boruak ṭha lai ka tichhe vek mai ang tih hlauhna te chuan ka ngaihtuahna a luah lo thei lo a ni. A tuk a lo thleng a, Tuikual South lama kal ngei pawh ka tum. Mahse, duh duh dan hian ka hma hun te hi kan lo va tikawi kual lo chiang tak em. Kan College-ah programme eng emawni a awm avangin zirlai zawng zawngte chu Multipurpose Hall-ah kan awm vek a, Cultural Day tih vel ni berin ka hria kan programme hman chu! Chutiang programme-a tel ve kher lova Tuikual lama kal chu ka duh zawk ngei mai, mahse a awm lo chu an attendence SU te'n an cut dawn si avangin ka awm ve ta mai mai a ni. Hall-ah chuan zirlai ho chu kan ṭhu khat ṭhup a, kei leh kan department-a ka ṭhutpuipa Eric-a pawh Gallery-ah kan ṭhu ve ran bawk. Thusawi a tam lutuk chu ka ning a, rilru tihthawven nan tiin ka phone-a snake games chu ka khel ta daih.

"Hei, i va ning tawh awm ve? Principal khuan thu a sawi leh ang a, zaithiam hovin stage an chang tawh dawn. Chubakah Live Band pawh a awm ṭeuh mai, kan lam vak vak dawn nia" ka games khelh lai ka dara rawn sawi pahin Eric-a chuan a ti a, ka lo nui ve suk ringawt. Stage lam chu ka hawi thla ve zuai a, ka phone bawk chu ka en leh nghal. Mahse ka phone chu ka en rei lo teh é, stage-a dinga thusawi mek mihring chu ka en leh nghal vat lo thei lo a tin ni!

"Eric, khu khu tunge?" tiin ka zawt nghal a, ani chuan ka luah mi rawn beng fawk.

"I beng i rap bet em ni? Kan College Principal ka tîh ka tih khâ, Games kha dah tawh teh" tiin min hau ve khar khar a, thusawi mêktu chu ka en vawng vawng a, thil hrechhuak thutin ka wallet chu ka phawrh nghal vat bawk. Chuta ka hriat chhuah tak chu ka wallet-a ka pa hmel leh kan Principal hmel chu an inang hle a ni tih hi!

"Khu khu tú maw?" ka tih leh chuan Eric-a chuan min melh rum teh é.

"Ka tih awmzia chu a hming a nia ka tih" ka tih leh tâkah chuan a ngawi vung vung a, a ngaihtuah ve tho a ni tih ka hria.

"Ka hre chiang chiah bik lo, kan College chanchinbu ah khan a awm maithei. Khu le! a sawi zo ta, zaithiam ho an zai tawh dawn a nia" tiin thil dang chu a rawn sawi chhunzawm nghal daih a, keipawh chuan hmanhmawh takin ka bul lawka College chanchinbu chu ka en ve nghal thuai.

"Eric, enteh hei hi kan Principal a ang i ti ve em?" tiin ka nu bula ka pa thlalak chu ka hmuh a, ani pawh chuan a lo en ve nghal.

"Immm....An va inang ve, amah a nih hî, a hriat reng alawm" awlsam tak hian a lo ti a, ka la ringhlel ta tho.

"Fiamthu lovin sawi teh, kha en ṭha leh teh, kei chuan inang ka ti khawp mai" tiin thlalak chu ka pe leh vat a, ani chuan thaw huai hian

"I va mak e aw, khu an zai dawn a nia....Aw...amah a ni chiang khawp mai, mit ṭha lo ka ni lo" ti vakin ding chung chuan sound rawn ri chu a lam rem nghal zat a, kei chu hmanhmawh takin Gallery aṭang chuan ka chhuk nghal daih thung. Hall pawn ka thlen thlak chuan

"Ka pa" keima hriat tawk lék chuan ka ti sep a, kan Principal chu Bolero-ah hian a lo lut chiah a, hmanhmawh takin ka um phei nghal bawk.

"Hei....Hei..Hei....tu emawni khan hmanhmawhin min lo pui teh u, a thi nasa lutuk a nia" tiin kan College-a hmeichhe Usher ho chuan min lo buaipui a, kei chuan ban lo ding thut chu ka su pawp tih chauh kha ka hre hman ringawt. Ka harh chian deuh hnuah chuan ka um ber Bolero chu ka va thlek hram hram a, a lo ding reng ta mai. Thawh tuma ka ding tur chu mi dang ho chuan min lo buaipui nghal sawk sawk a, ka beisei loh lutukin kan Principal chu kan hmaah a lo ding ve ta ran.

"Engatinge?" tiin kan Principal chuan ka hmel chu a rawn en a, a hmel ka hmu chiah chu ka ṭah a chhuak lutuk. Ka pa ngei a ni, ka vawikhat hmuhna pawh nimahse ka thinlung hian ka pa a ni tih a hre thei.

"Kan hre bik lo Sir. A lo tlan phei vak a, chuan hemi ban hi a rawn su chawrh ringawt" tiin min lo buaipuitute zinga hmeichhe pakhat chuan a lo chhang a, kei chuan ṭawng nachang ka hre lo hrim hrim.

"College zirlai i ni tawh a, awmze nei lova tlan vak vak kha a ṭha hleinem. A leh pekah chuan tlan vak vak tawh suh aw?" dam deuh zawk chuan a rawn ti leh a, sawi tur reng ka nei lo. Min biakna pawh chu pakhatmah ka chhan let loh avangin ka bula mite chuan min en nghal hrek hrek a, chutia chhang lova a mit taka ka en reng takah chuan kan Principal zawk chu a rawn ṭawng hmasa leh ta thuai.

"Kha....Hei hian inhrufai rawh, fimkhur tawh ang che" tiin a rawmawl chu min rawn pe a, a motor chuanna lam panin a phei ve leh nghal.

"A va han mawl em em, Principal pawh a zah hlawl lo, thingtlang lam mi a ni ngei ang" mi ṭhenkhat chuan min kal pel pahin an ti zui sep sep a, mahse engmah ka ngaihtuahnaah hian a awm thei lo, ka pa hmel tih chauh lo chu!

"Hei...Engatinge i chal chu? Ka zawng char char che asin. Lo kal rawh, i chal kha eng emaw hnawih a ngai ang, ṭha dawn lutuk" Eric-a'n min hmuh rual chuan a rawn ti nghal thawt thawt a, enge a thusawi awmzia chu ka hre hauh lo.

"Eng chu maw ṭha dawn lutuk?" a thusawi awmzia hre lo zet chuan ka lo ti a, ka bek chu ka dawm deuh chhen bawk.

"I ná hi kan chhuanlam ang a, kan haw daih dawn nia. Lo kal rawh, SU te bulah phei vat ang" tiin min kai phei nghal dawr dâwr a, ka lu a nat leh nat loh lam reng a ngaihtuah tawh lo.

Eric-a sawi ang tak tak chuan ka nâ avangin SU te chuan haw an lo phal a, keipawh Civil Hospital-ah min hruai nghalin ka lua pem awm leh thi ser sér awmna chu Doctor te min tuam tir nghal bawk. Zanah chuan ka hlauhthawn ruk ang ngeiin ka lu chu chhun lam aiin a nâ a, a tur ut ut hi a ni ber. Ná chhawkna damdawi pawh vawihnih lai ka ei a, chumi hnuah chuan tlemin ka awm a nuam ta deuh. Rinhlelhna la nei ru tho mah ila ka ngaihtuah nawn nasat pauh leh kan College Principal chu ka pa ngei a nih rinna ka nei lian tulh tulh a, a rawmawl min pek te chu ka awmah chuan ka dah reng a, ka hlut tak zet a ni. A chhan chu ka pa dik tak hnen aṭanga ka thil dawn hmasak ber chu rawmawl hi a ni. Mi dang tan chuan rawmawl mai mai chu ho lam tak a ni ang, mahse ka tan erawh chuan thil ho lam mai maia ngaih theih a ni lo.

Chutia ka pa ber ka hmuha ka hriat tawh avang chuan zawn leh tumna em em ka nei tawh lo va, ka rin ang ngeiin a awmna veng chu Tuikual South ngei a lo ni. A tirah kha chuan ka hmuh veleh ka inhmelhriattir nghal ang ka ti kha a ni a, mahse inhriattir nghal chu ka duh leh ta lo. College chu kan kal ṭha leh tawh viau a, kan Principal erawh ka hmu khat êm em thung. Kar a ral a, thla a han ral leh a, ka pa chu ngaihtuah loh chang ka nei lo hrim hrim. Ani chuan min ngaihtuah ve ang em? Ani chuan naupang ninhlei hriat chiahin min hria ang em? tih vel te chu ka ngaihtuah roh roh zel. Principal office lam hnaiha department thil tih kan neih zeuh zeuh ṭhin avangin Principal nena tum loh deuh deuha han inhmuh thut chu kan nei ṭhin a, mahse kei chuan a lama ka hmel lantir ka duh rih lo tawp. Vawikhat phei chu kan Principal chuan min rawn be thut a, ka ṭhat leh ṭhat loh thute min rawn zawt thut chu kei lo hamhaih bawk nen ṭawng lovin ka lu ka lo bu ringawt a nih kha! Kan Principal chu ka pa a ni tih ka hriatchhuahna aṭangin thla hnih lai a liam leh ta. Zan tin ka ngaihtuah hnuah ka pa chu inhmelhriattir tawp mai chu ṭha ka ti tawh a, rilru zam tak leh rilru thawveng lo tak chung chuan Tuikual South lam chu ka pan a, ka hmuh châk tawh êm avangin a zana zanin ka kal ta tawp a ni. Darkar 2 hnu velah ka pate inkawtah chuan ka ding ta reng mai. An in chu a ropui em em a, an in lut tur ringawt pawhin School ang maiin Gate paltlang turte a awm thlap. Gate chu hawngin in chhung luhna tur kawngka chu ka pan zui bawk.

"Lo lut rawh" kawngka bula door bell hmeh tur lo awm ka hmeh hnu chuan inchhung lam aṭangin hmeichhe âw hian a rawn ti a, ka zam lutuk chu haw leh zawk mai te ka duh rum rum.

"Lo lut rawh, tunge âw? Enge i duh â?" kawngka rawn hawn pah hian nu pakhat chuan a rawn ti nghal bawrh bawrh a, ka pa nupui a nih ngei ka ring.

"Aaaaa.....Ih.....Pachhunga University College-a zirlai ka nia....Ih......Principal a awm êm?" ṭi dek chuan ka ti a, chu nu hmel hrim hrim chu a hlauhawm.

"Awm e, enge i duh?" a âw ah chuan zaidam âw ri lam aiin thinrim âw ri a tam zawk.

"Ih.....Aaaa......Thil hmuh tir tur ka nei a" ka lo ti ringawt.

"Keima'n ka lo pe mai ang chû? Khawi keimah min lo pe la, ka lo pe chhawng leh mai ang" a rawn ti leh nghal hlawk hlawk a, a hmu tur dik tak hnenah lo chuan pek ka tum hauh lo.

"Ni lo, a theih loh....Ka tihawmzia chu keimah ngei hian ka pek ngei ngei a ngai a ni" ka tih chuan min nin hmel fe hian a awm a, in chhung lama ka luh chu a phal lo ve hle a ni ang.

"Âwww, a va buaithlak tak! A nih chuan lo lut phawt mai teh, kawngka kha ṭha deuhin lo khar nghal bawk ang che" ti leh bawrh bawrhin ka luh chu a phal ve ta hram a, nu zaidam lo ve tak chu a ni ngei ang ka ti rilru nghal vawng vawng.

Inchhung ka lut chu ropui ka ti ngei mai, engkim chu a ṭha chi hmang veka siam emaw tih theih turin a mawi a, bangah te chuan chhungkaw thlalak hi lianpui hian an lo tar a, ka ṭhutna sofa te chu a thianghlimin a dup nuam tak zet a ni. Chutiang in ropuia keini ang mai mai han luh ve ringawt te chu mahni a insit phah theih zawk hial dawn alawm le.

"Ti khan lo ṭhu la, i hmuh duh chu ka han ko ang e, chuan engmah kha lo khawi suh ang che, CCTV kan dah vek a nia" ti leh hlawih hlawihin in chung lam pan chuan a chho a, hausa viau mahse a bula ka awm peih chi a ni lo.

Kan College Principal, ka pa nia ka hriat bawk chu ka hmu hreh leh tawh em em a, mahse ka hmuha engkim ka hrilh loh chuan ka awm a nuam thei dawn chuang si lo. In chung lam aṭanga thawm a rawn awm chuan ka hawi chho zawk a, mahse ka lam a rawn hawi dawn chiah chuan ka hawi sawn leh vat thung. Ka rilru chuan Pathian hnenah ka ṭawngṭai ru mawlh mawlh a, engkim chu ṭha vek turin ka duh a ni. Mahse tûma'n hma hun leh hun lo awm dan tur kan sawi lawk thei bawk si lo.

Chapter 3

Pa Rinchhana / Hruaia Pa POV

"Lo chhuk teh, khu....tu tih hriat loh an lo kal leh ringawt tawh khu" ka nupui chuan ka fanute zirlai ka enpui lai chuan a rawn ti lut leh nghal bawrh bawrh a, ka nupui ṭhin tak hi chu!

"Âww....bawrh bawrh ṭhin che hian, ka hman loh hî, nangma'n lo zuk ngaihven ve mai ta la âw" ti deuh sup chung chuan ka tho ṭuah ṭuah a, chhuk chu ka tum ve mai bawk.

"Chu rêng, kan ina lo kal khuan nangmah ngei hmuh che a duh bawk si alawm, chhuk thuai mai teh" a ti leh nghal hlawk hlawk a, ka nupui âng thawm leh chezia vel hi chu ngaiah ka nei thawkhat tawh.

"Pa, lo chho leh vat teh aw, ka la thiam chiang miah lo a nia" room aṭanga ka chhuak tur chu ka fanu upa zawk chuan a rawn ti a, keipawh chuan ka chhoh leh vat tur thu sawiin in hnuai lamah chuan ka chhuk thlak san nghal. In hnuai ka thlen chuan tlangval pakhat hi kan sitting room-a sofa awmah chuan a lo ṭhu a, a hmel erawh ka hmu thei lo.

"Nang maw? Ka zirlai kha i ni em?" sofa-a ka ṭhut ve tâkah chuan a hmel pawh ka hmu thei ta, naupang ang maia tlan vak vak avanga chesual ta kha a ni tih ka hre chhuak zui bawk.

"Aw ni e, i zirlai ka ni e" inthlahrung deuh chuan a rawn ti a, hlauh nei ang maiin a hawi kual deuh zuk zuk a, a awm dan chu mak ka tiru khawp.

"Nang hi khawiah emaw hmuh tawhna che ka nei em? Kan College Campus velah ni lo" ka tih chuan min rawn en vat a, a hmel leh a mit meng thuk tak ka en chuan khawiah emaw hmuh tawhna nei tlatin ka inhria a, mahse ka lo hresual thei tho bawk.

"Aih, min la hmu ngai lo vang" a rawn ti leh ringawt.

"A nih chuan tun ang zan zanah eng ti tura ka ina lo kal nge i nih?" áw khauh deuh ták chuan ka ti a, thil ruk chîng emaw vel pawh a lo ni maithei asin.

"Ih.....aaaa.....hei hi nangmah i ni em?" tiin a wallet-a mi thlalak pakhat chu a rawn phawrh chhuak a, ka nupui pawh thingpui lo chawi pheiin ka bulah chuan a rawn ṭhu ve nghal. A thlalak min pek ka en chuan ka meng nghal kâwk a, engtinnge chutiang thlalak te ani hian a kawl daih theih reng reng.

"Engtinnge he thlalak hi i kawl theih? Khawi aṭanga i neih nge?" a mita en ran chuan ka ti a, ani erawh chuan min en ṭha ngam lutuk lo.

"Ka nu min pek a nia" a rawn ti leh ta, a nu pek pawh ni se he thlalak hi engtia kawl daih thei nge a nih!

"Tunge i nu chu?" ka tih leh a, anu pawh ka hriat ve hrim hrim a ngai. Engtinnge a nu chuan he ka ngaihzawng hlui nena kan thlalak dunna hi a lo neih daih theih hrim hrim tih pawh zawh a ngai a nih chu!

"Ka nu chu Zorampari a ni a, kei hi a fapa Lalhmahruaia ka ni e" a rawn tifel ât a, a nu hming chuan ka beng a verh ta ber. A nu khua ka zawh lahin ka ngaihzawng hlui Partei te khua chiah chiah chu a ni bawk si.

"A nih chuan engvanga he lai hmuna lo kal nge i nih? Thlalaka mi chu ka ni ngei a, mahse chu nen chuan i lo kal chhanah hian inzawmna a awm em ni?" aw nem lo tak chuan ka ti leh a, ani pawh a zam ve hmel hle bawk.

"Ka nu min hrilh dan chuan kei hi i fapa ka nia, a awmzia chu nang hi ka pa dik tak i ni tihna a nih chu" a rawn ti ta mai. Chutah a birth cerficate hlui tawh zet chu a rawn la chhuak a, chu lehkhaa naupang pa hmingah chuan ka hming chu a chûang vang bawk si. Chutia ka en lai chuan ka nupui zawk chuan thlalak leh certificate chu a rawn phih thla sawk a, kei chuan lo dan pawh ka tum lo.

"Duhtak, hetiang thil te chu tun ang lai khawvelah chuan a siam chawp thei tawh lutuk tih i hriat kha...Chuan, nang hi kan in aṭang hian chhuak rang ang che. Ka pasal hian fapa a nei lo hrim hrim" ka nupui chuan a lo ti nghal phiar phiar a, kei chuan thlalak leh certificate chu lak sak lehin ngawirengin ka lo en tawn zak zak thung.

"Fapa ka nei maw?" ti supin ka thil ken lai pahnih chu ka en tlawk tlâwk a, ka hmaa tlangval ṭhu ka va en chuan ngawireng hian min lo en let ve kar.

"Duhtak, inbumna a ni thei tih hre rawh, ani thusawi hi i awih tihna em ni?" rilru buai tawh sa nak a laia ka nupui lo ṭawng ri bengchheng ve chhen chu ka ning hle mai.

"Ni lo, kei hian fapa ka nei reng reng hleinem. I nu nen chuan tûn hmain kan lo inngaizawng ṭhin ngei alawm, mahse hei chu thil theih a ni lo. Kei ni lo mi dang laka a fa i nih zawk ka ring e" tiin thlalak leh birth certificate chu ka pe let a, a lo ban ve mai bawk.

"Ka nu chuan a dam chhungin ngaihzawng pakhat chiah a nei. Chu a ngaihzawng hming chu Lalrinchhana a ni a, chu chu ka pa a ni bawk" a rawn ti leh reuh a, a hmelah chuan lungngaihna nasa tak ka hmu thei.

"Ani ni lo Lalrinchhana hi Aizawlah leh Mizoramah hian an tam lutuk, i nu chuan a hriat pawlh mai mai a ni ang. Kan mu duh tawha chhuak vat la ka duh khawp mai. Duhtak, enge i la tih reng â? Haw tir thuai ta che, zan a rei mai dawn" ka nupui chuan aw nem lo fê hian a lo ti leh hlawk hlawk a, mi dangte tana hriat nuam lo tur a ni em tih pawh hi a ngaihtuah pha ṭhin lo. A ṭawng zo chu inchung lamah a chho daih a, ka hmaa tlangval ṭhu chuan a en zui nghal vawng vawng.

"Enteh Vala, tunah rih chuan lo va haw phawt mai ta che" ding chunga ka tih chuan a rawn dik chhuak ve nghal a, chutianga han haw tir leh ringawt pawh chu nuam lo ka tiru ngei mai.

"Aw le, ka lo va haw ang e. Ka lo intiam tawh angin hmuh hrim hrim che ka duh a, hetia min duh lova min lo hnawl pawh hi ka nat phah lo vang. Nang chuan fapa i neih loh thu min hrilh tawh a, i fapa chu ka lo ni lo a ni ang e" tiin kawngka lam chu a pan phei nghal a, kei chuan ngawirengin a chet dan chu ka lo thlir thung. Kawngka a hawng dawn chiah tiah chuan rawn lehhawi lehin

"Ih......vawikhat chiah ka kuah thei che ang em?" a rawn ti ta thut a, chhan mai nachang pawh ka hre lo.

"Aaaaa......aw...aw le..." bah deuh nuaia ka tih hnu chuan rawn phei lehin nghet tak hian min rawn kuah zui vat a, kei chuan lo kuah let ve tur a ni em tih pawh ka hrethiam lo.

Ka rin loh deuhin min kuah rei ta phian a, a hmel en ka tum lahin a kun tlat bawk si. Min kuah dan lah chu a nghet em em a, ka taksa chu ka lo tizawi bawk nen a na dâwn dáwn alawm. Minute khat lai vel min kuah hnu chuan min thlah ve ta hram a, min kuah zo a hmel ka lo en chuan a mittui chu a hru zeuhin ka hria.

"In mut hun thlêng thleng ka rawn tihbuai avangin ka tihpalh a ni e, ka....ka...ka pa...Tun hun bak hi 'ka pa' tia koh theihna che ka nei tawh hmel si lo va, min hrethiam hram dawn nia Sir. Chuan, min inkuah tir avangin ka lawm bawk e, tun aṭang chuan i mithmuhah leh i inah hian ka rawn inlan leh tawh ngai lo vang" tia inherin kawngka lam chu a pan a, dimtéa kawngka chu khar lehin a kal chhuak nghal.

A chhuah hnu chuan motor thawm engmah a rik loh avangin mak ka ti deuh a, kawngka bul tukverh parda chu keuin ka enthla ru a, kea kan in compound a kal pel chiah chu ka hmu hman.

Mu tur chuan inchung lamah ka chho a, ka fate pawh an lo muhil diam tawh. Kan nupa khuma ka mu chu ka muhil thei ta reng reng lo mai a, ka fapa nia rawn insawi tlangval hmela manganna leh lungngaihna nasa lutuk mitmeng chu ka mitthlaah a cham ta reng mai. Ni danga minute 1 pawh khuma meng hlei thei lo ṭhin kha ka mu meng ta kar a, thil hre chhuak thutin ka tho leh nghal. Ka nupui chu a lo muttui tawh êm avangin ka hrilh lo ta law law. Engtinnge ka ngaihtuah tawi êm ém theih zawk lê? Ke ngatin ka in a rawn thleng a, ke bawkin a haw leh dawn tih ka hre chhuak har lutuk chu pawi ka ti ngei mai. Tun ang zan rei tawhah leh nghal tawhsual tawh te pawh a hlauhawm hrim hrim tihte chu ka ngaihtuahnaah chuan a rawn lut zut zut a, ka motor chu tinungin ka tlanchhuak nghal zat bawk. Tennis Court ka thleng chho chu khawi kawng berah nge a kal ang tiin ka ngaihtuah vung vûng a, chutah Khatla lam pana mi pakhat kal chu ka va hmu a, ka tlan phei ve nghal. Vanneih thlak takin amah ngei chu a lo ni a, ka hmu chu engtin emaw tak hian ka thawveng huai mai.

"Lo chuang rawh, ka lo thlah ang che" a bul zawn vel ka thlen chuan muang changa tlan chungin ka ti a, ani chuan min rawn en mai lo, mahse motor aṭanga betu an awm tih a ngaihtuah chhuah hnu chuan

"Ka lawm e, ka pu. Ka kal thei alawm, a ngai reng reng lo" a rawn ti deuh lûam a, keimah ka ni tih a hre lo hrim hrim niin a lang. Motor chu tidingin ka chhuk a, keimah ka ni tih a hriat chuan min en nghal kur.

"Lo chuang rawh, tawhsual tawh a awl a nia, Principal ka nih angin thu ka pe a che" ka ti ta ringawt. Chutianga ka tih loh chuan ka motor-a chuan duh hmel a pu bawk si lo.

"Aw le, Sir" tiin ka motor lamah chuan a rawn kal a, motor chhungah chuan a rawn ṭhu lut ve nghal bawk.

Chutia ka mi phurh tur ber a chuan tâkah chuan keipawh driver seat-a ṭhu lutin ka tlanchhuak ve leh vat a, front glass aṭang chuan a awm dan vel chu ka thlithlai reng a, ani chu maimitchhing chung hian a lo dak vang vang. Kan tlan chhung zawng chuan kan inbe lo chiang teh e! Tlanna tur kawng ka hriat tawh loh avangin front glass aṭang chuan ka en leh a, ani chu a lo muhil daih tawh.

Chu tlangval, ka motor-a muhil mek chuan keimahah eng emaw ti tak hian min mawlh a, enge a nih erawh ka hre hauh lo. Minute 5 vel ka din reng hnuah chuan ka kai tho a, ani paw'n tlanna tur leh an veng awmna chu thophang deuh chuan min lo hrilh ve mai bawk. Mission vengthlang lamah kan tlan thla a, kawn kan thlen chuan ding tura min lo hrilh avangin ka ding dat. A chhuk fel hnu chuan ka lo thlir reng a, min en miah lo hian ka ṭhutna lamah chuan a lo kal phei bawk.

"Ka lawm e, Sir. Chuan hei hi ka kawl tur a ni tawh lovin ka hria, tuna aṭang chuan pa ka nei tawh lo tih hi ka pawm thiam a ngai tawh a ni e. Mangṭha le, Sir" tiin a kal nghal nal nal a, a thlalak min pek bawk chu ka en leh vawng vawng.

Thlalakah chuan kei leh Partei chu kan ding dun a, Partei te khuaa kan lak a ni nghe nghe. In lama ka haw chuan mu turin khumah chuan ka inthawlh a, mahse ka tlaivar ta ṭhak. Ka muhil thei thlawt lo chu ka hrethiam lo, ka mitthlaah kha tlangval khawngaihthlak tak hmel kha a lo la lang reng zui.

"Pa, engatinge nizan khan i rawn chhoh hma loh? Vawiinah kan test dawn leh nghal" ka fanu upa zawk Bawihtei chuan vui áw deuh hian ka chanchinbu chhiar laiin a rawn ti a, a lam ka lo hawi nghal thuai bawk.

"Ka tihpalh Bawihte, nizan kha chu ka lo chho hma hman thlâwt lo a ni. Khawi, i zirlaibu va la rawh, tunah ka lo hrilhfiah ang che" ka tih chuan lawm takin a room lamah a tlan phei a, class 10 mathematics bu chu ka hma dawhkanah chuan a rawn dah nghal. Ka hrilhfiah zung zung a, ani paw'n a man zung zung bawk. Chaw ei a lo hun a, chaw ei tur chuan kan phei zui ta bawk.

"I hmel a va nguai ve, nge nia ani kha i fapa tak tak emaw i lo ti leh hman tawh zawk?" ka nupui ṭhin hi chu a va han buaithlak thei tak.

"Chaw kha ei rawh, nakinah kan sawi ṭha dawn nia" ka lo tih khum hmak a, naupang awm laia sawi awm leh awm loh pawh hi a hre ṭhin lo.

"Ka fanute u, chaw kha ei thuai thuai ula in School-ah ka thlah dawn che u nia" tiin ka fate pahnih chu ka biak zawm daih a, ka nupuiin min lo en rengna pawh chu ka hre lo lui der hmak. Chaw eikham chuan ka fate chu ka thlah ve ve a, chumi zawhah inlamah ka haw leh nghal.

"Engtinnge tih i tum â? Ani kha i fapa tak tak emaw chu i ti lo tiraw?" thingpui in chunga phone ka khawih lai chuan ka nupui bawk chuan a rawn ti leh a, ka phone khawih lai dah meuhin a lam chu ka hawi a, a awm dan vel hi ka hne thut zel.

"Enge i hlauhthawn em em â? A ni lo ka tih vek tawh khâ, nang hian ka fapa a ni tih i lo hre ru reng te hi a ni lo maw?" ka tih let ve tâkah chuan a ner nasa ngei mai.

"Chutianga i fapa a ni lo tih i hriat chuan a ṭhat chu! Ka kal a nia" tiin a bag chu a la a, a kal chhuak nghal. Nupa inhmangaih tak hi chu kan va han ni lo chiang em, ani chuan ka sum a duh a, kei chuan kan fate hi tihfahrah ka duh si lo.

"First semester History department-a mi Lalhmahruaia kha a bio data min lo pe lawk ta che. Class 1 - 12 thleng ka duh a nia, a kimchang thei ang berin min lo pe dawn nia" tiin office ka thlen chuan kan Saff pakhat chu ka hrilh nghal zung zung a, re lote hnuah a rawn dah lut zui ve mai bawk.

A bio data ka chhiar chuan Father's name ah Lalrinchhan tih chu a lo inziak tlar thla vek a, chu pawh Class 1 a nih aṭanga Class 12 a nih thlengin. Tin, college a rawn zawmna pass percentage pawh a sang thawkhat viau a ni. A bio data aṭanga a lan danin Class 12-ah chuan Mizoram pûmah pangana a ni a, Class 10 pawh Distinction-ah a pass bawk. En thla zelin a pa contact theihna tur number lo indah chu ka hmu fuh a, ka call chhunzawm nghal. Ni e, he thil hi ka chinfela thu dik ka zawn chhuah a ngaiin ka hria.

"Hello" mipa aw hian a rawn ti a, chu chu a pa a nih ngei ka ring.

"Lalrinchhana a ni em âw?" hawihawm tak chuan ka ti let a, mahni hming ang han zawh te chu a nuam ka ti chiah lo.

"Aaaaa...ni chiah lo ve" ban deuh chapa a rawn tih tâkah chuan thil awmzia ka man thiam riai ruai a, ka thaw pawh a veng ta deuh hawk. Thil awm dan vel a chiangnial loh êm avang chuan Lalhmahruaia pa chu ka nih loh ka ring ve ta ringawt bawk.

"Aw a nih chû, a nih leh aw" tia dah ka tum chuan a rawn ṭawng leh a, phone chu ka bengah ka dah zawm leh zat bawk.

"Enga tan nge chu thil chu min lo zawh hrim hrim a?" lehlama mi chuan a rawn ti ve ta khauh a, a pa a nih loh chuan engvanga chutiang thil te hriat a duh kher?

"Aaa...Lalhmahruai bio data-ah hian hei hi Lalhmahruaia pa niin ka lo hria a, ka rawn phone che maw le" ka lo ti ṭha ve mai bawk.

"Aw, kha kha maw...kei chu a ṭhianpa pa zawk ka nia, a pa hian a piantirh aṭang a chenpui lova mahse a pa hming Lalrinchhana tih erawh hi chu documents velah an dah ta zel tho a ni" a rawn tih leh chuan tlemin ka thutak leh ta deuh a, tunge a pa chu ni ta ang?

"Engatinge i number kher a dah a? A nu number pawh a awm âwm reng si a" ka ti leh hram a, ka rilrua zawhna tam tak awm chu tunge chhang thei ka hre lo a ni.

"A chhan chu a nu pawh hian a boralsan tawh a, ani pa nei lo leh van laia tla ni ta mai chu kan khawngaih a, a chhungte number biak theihnaah chuan ka number hi kan dah ta a ni" a rawn ti leh chuan ka lungphu chu a rang ta ngei mai.

"A nih chuan a nu hi khawi khaw lam nge ni reng reng?" ka ti leh a, Partei khua a lo nih palh vaih chuan thil a buaithlak zo vek ngei ang le!

"A nu hi chu Lungdar khua a ni a, mahse a ngaihzawng leh a fapa pa khawpui mi nen chuan an chesual a, chumi avang chuan a chhungte'n hnawt chhuakin kan khaw lamah hian a fapa chu a rawn pempui a, a rawn ṭulpui ta ṭhak a ni. An khawngaih thlak awm dun nufa asin, chuvang a nia a nu boral hnu hian ka number hi ka dah tâk nî" a rawn ti leh chuan Lalhmahruaia chu ka fapa a nih theihna chance a sang ta hle tih ka hria. Ka ngawih vang vang hnuah chuan lawm thute sawiin kan inbiakna chu ka titawp zui ta ringawt.

"Lalhmahruaia hi tunah ka office-ah lo kal turin hrilh nghal ang che" tiin Staff pakhat chu ka tir a, hmanhmawh tak chuan a tlanchhuak ve nghal.

"Engenita Sir?" Ka office chhunga lo luh rualin Lalhmahruaia chuan inthlahrung tak hian a rawn ti a, a hmel leh awm dan chu chik takin ka lo en kâr thung.

"Engvanga Lalrinchhana tih hi Father's name-a la dah ṭalh nge i nih? Chubakah a contact no pawh hi engatinge amah dik tak a nih loh?" ka ti nghal hrawk a, hlauh nei ni awm tak hian min lo en zui vat bawk. Enge ka thinrimna chhan ber pawh chu ka hre bik lo.

"Sir, nia..ih..kha chu a hmaa ka dah ṭhin dan a nia, mahse tunah chuan ka pa dik tak chu a thi tawh tih ka hre ve chiah a, ka lo siamṭha dawn nia. Khawngaihin min ngaidam rawh, a dawt lehah chuan L (late) tiin ka lo dah tawh dawn nia" mahni inthiam lo leh thil tisual nia inngai tak chuan a rawn ti a, a hmel leh awm dan vel avang chuan ka khawngaih hnuhnawh leh vek.

"Chhuak rawh" ka ti leh ringawt a, ani pawh rang takin a chhuak ve nghal. Kei hi ka dik lo a ni. Engvanga thinrim chîam nge ka nih pawh ka hre lo. Ka fapa a lo ni tak tak ang em tih te chuan ka rilru a tibuai a, lo ni tak tak ta se engtinnge niang? Nupui fanau ka nei bawk nen ka nupui paw'n inṭhen hial a duh phah ka ring.

Thu dik hailana hriat a awlsamna ber tur chuan DNA test chu kan tih mai ngaiin ka hre ta. A tirah chuan DNA test lam ka ngaihtuah bik lo, mahse a chanchin ka han chhui vel aṭang hi chuan a pa dik tak hi keimah ni thei awmin leh rinhlelh theihin a awm fur hlawm bawk si. Eng pawh ni se DNA test kan nei ang a, engkim chu a chiang vek mai ang. Ka thil tih tum dan chu ka nupui hrilh loh ka duh rih a, a chhan chu a enga mah hmain thil vel a kal buai mai mai zawk ka hlau a ni. Kar khat a ral a, kei erawh chuan DNA lam ka ti leh hman meuh lo.

Department tin HOD te nen meeting kan nei a, thil chi hrang hrang kan sawi bakah kan college education system thlak danglam deuh te chu kan rel tel bawk. Tlai khat chu hun awl ka nei hlauh a, Lalhmahruaia chu DNA Test neihpui ka tum rán bawk. Tlai dar 3:00 a lo ri hnai a, History department building kawtah ka driver nen chuan kan lo nghak a, a lo chhuak ka hmuh rual chuan ka driver chu a haw theih thu hrilhin Lalhmahruaia lam chu ka pan chhunzawm nghal.

"Lalhmahruai" ring deuh taka ka koh avangin amah leh a bul hnaia mite chu an rawn hawi rual ṭhap a, min hmuh chuan min hlauh hmel hlawm hle.

"Lo kal teh" min en reng avang chuan ka ti leh a, ani pawh min zah hmel takin a rawn phei ve nghal.

"Vawiin hian khawiah emaw kan kal dun a ngai" ti leh ringawtin ka motor-ah chuan ka lut a, min en deuh vang vang hnu chuan ani pawh a rawn lut zui ve mai. Kan College Campus aṭanga kan tlan chhuah lai te chuan student ho chuan min en duh hlawm hle a, mak pawh ka ti hran lo. Min en duh em emna chhan chu kei hian student tûmah ka la phur ngai loh vang a ni.

"Khawnge kan kal dawn, Sir?" a rawn tih chuan Hospital-a kan kal dawn thu ka hrilh a, amah en kher lo mah ila min rawn en nghal vat tih ka mit sirin ka hmu thei. Engmah sawi chhunzawm leh tawh lo chuan Hospital chu kan thleng a, ka ṭhianpa senior doctor chu biain a office-ah kan lut nghal bawk.

"Le! In thisen hi ka lak a ngai a, in kut kha min lo pe mai dawn nia" doctor chuan tiin a hmanrua vel tur chu a phawrh a, kan kut chu pe pheiin rei lovah kan thisen chu a la zo vat bawk.

"Ṭhianpa, vawiin ni ngeiah hian result ka hre duh nghal a nia, a theih ang em?" ka ti sawk sawk a, nurse pakhat ko lutin kan thisen chu a test tur in a tir zui bawk.

"Aaaaaa....a va buaithlak duh awm ve lé. I hriat sa angin DNA Test Result hi chu a rei lo berah pawh kar 3 tal hi chu nghah a ngai alawm. I hre sa vek sia i va hmanhmawh awm ve?" a rawn tih hniam raih chuan ka hmanhmawh lutukna lamah thil ka lo ngaihtuah chiang lo tih ka hrechhuak chiah.

Keini pawh tihtheih dang a awm loh avangin kan inkhalh haw leh a, kan tlan chhung chuan kan inbe lo hrim hrim. An veng thleng ka thlah thla leh thlap a, lawmthu sawiin a chhuk a, a kal nghal vang vang. Keipawh kan in lamah ka tlan let a, in ka thlen chuan ka fate chuan min lo ngai leh hle tawh. Mahse ka va hlim rei lo em. Ka duh loh ber thil a lo thleng ta. Karkhat hnu lawkah ka nupui chu an thawhpuipa fa paiin a lar ta vak a, kei lah Aizawlah ro ro chuan mi hriat ka lo hlawh ve bawk nen kan mualpho nasa hle.

Chutia ka fate'n nu an nei tawh lo mai tur chu ka ngai thiam lo hle a, mahse ka nupui chu ka ngaidam thei chuang si lo. Beisei loh takin ngaihdam pawh min dil miah lovin a fa paina pa hnenah chuan keini pafate chu min tlansan a, ka va buai phah tak em. A tawp a tawpah chuan rilru siam tharin ka fate chu enkawl ka tum ta a, thil neuh neuh a thlen zawh hnu chuan thla khat lai a lo ral leh hman tawh. Hospital lam ka la ngaihven leh lo tih chu ka hrechhuak a, Lalhmahruaia pawh hruai tawh lem lovin keimahin Hospital-ah chuan ka ta ringawt.

Doctor office-a ka luh chuan ka ṭhianpa chuan min lo be nghal lûam a, mahse ka kal chhan ber chu min sawipui lawk pawh a tum lo. Ka nupui uire dan chanchin min sawipui ṭalh a tum a, kei chuan chhum bung deuh deuh chuan ka lo chhang ve hram hram a ni. A tawpah chuan DNA Test Result chu a rawn phawrh a, chanchin ka zawh chuan en ve mai turin min hrilh leh ang lawi a! File ka hawng tur te chu ka tha hial a khur a, hawn pawh ka hawng ṭha hlei thei lo zawk. File chhunga mi lehkha var sár mai chu ka phawrh a, ka chhiar thla zel a, a tawpa DNA Test Result ka hmu chiah chu ka buai vek. A va mak ngai em, engtinnge a nih theih zawk?

DNA Test result ber ka hriat hnuah chuan ka thawveng hawk dawn emaw ka tih laiin inchhirna leh manganna chuan min tuam vek a, ka in chhunga ka luh te chuan ka fate chuan hlim takin mim lo be siam siam mahse ka nui lui mai mai a ni. Zan mut ṭhat lai pawh ka nei lo va, ka fapa ni ta Lalhmahruaia chu hmuh ka duhin ka hmu châk lutuk. Mahse khatiang khawpa tlawm leh inphahhniam khan ka in ngeiah min rawn kal chilhin ka fapa a nih thu min rawn hrilh a, kei chuan thil awmzia leh thil nih dan dik tak pawh hre lo khan ṭawng mawi lo tak hmangin ka lo hnawt chhuak vel a nih kha! Tu pain nge mahni fate hnawtchhuak ngai? Ka rila rah, ka fapa ngei chu ka hmaa rawn inlan tawh lo tur leh min hmuh pawh duh tawh lo tur khawpin kei hian ka ti na a ni.

Âwwwww, pa a zawnga nep leh dawizep ber ka lo va ni chiang em, ani chuan a nu'n a boralsan tawh avangin kei a pa dik tak nia a hriat chu min loh belh ve a tum zawk kha a ni awm si a. Mizoram College zinga ṭha ber tia an sawi ṭhin Principal pawh hi mi â leh dawihzep, mi lak tlak loh mai ka lo ni. Engmah hrechiang lo va ka lo siam mangang hman lutuk te chuan natna min pe let a, ka taksa aiin ka thinlung chu a na si. A nat dan chu na satliah mai a ni lo, thuk taka na a ni.

"Pa, i ṭha meuh maw? Kha damdawi hi ei rawh, i thawk hah lutuk a ni ang, hahdam ve deuh rawh" ka lehkhabu chhiarna room-a ka awm laiin ka fanu upa zawk chuan a rawn ti a, ka ngaihtuahna aṭang chuan ka hrah chhuak nghal zawk. A damdawi min rawn pek chu thuawih takin ka ei a, tui chu inin ka pe kir ve leh mai bawk.

"Pa, tun lai hi i muṭha lo em ni? I hmel hi a ro tlat" a rawn ti leh reuh a, ka fanu te hian min lo chik ru ve reng a nih dawn hi!

"Aw nia Bawihte, zan hi ka mu hlei thei ṭhin lo a" zep buai ta chuang lo chuan ka lo ti ve mai.

"Ka nu i ngai em ni? Pa, ka nu hi ngaih chhan tur i nei lo. Hetiang khawpa mahni pasal leh fate kalsan duhtu hi nu atan pawh ka duh lo bawk. Kan school-ah pawh amah avangin ka zak thei lutuk, mite hian an sawi duh si. Ka nu chauh ni lo, kan chhungkua kan hmingchhe tel ve zel hi a hrehawm ka ti" a rawn ti ve pang pang a, kei chuan ka kuta lo huiin ka bula ṭhu tur chuan ka ti a, ani pawh ka bulah chuan rawn ṭhu thla ve vatin min ngheng nghal chat.

"Chutiang leh zel i lo tawng chu pawi ka ti, mahse tih theih vak ka nei lo Bawihte. Zan ka mut theih loh chhan hi i nu a ni lo, i nu chu kha thil thleng avang khan ka ngaihdam theih ka ring lo va, ka pawm tawh bawk lo vang" ka lo ti ve a, ka fanu hi puitling chho ṭan a ni tawh bawk a, thil a hrethiam ve tawh hle bawk.

"Ih maw, i thup hram hram tih chu ka hre tho a, mahse ka nu hian i sum chiah a duh tih ka hre ve vek. I awm loh laia kan pathuma kan awm lai te hian ka nu ni lo ang mai hian kan chungah a che ṭhin" insut deuh hlap hlap chuan a rawn ti a, chu a thusawi zawh chiah chuan ka thin a khei ta zak mai.

"Han sawi ṭha leh teh Bawihte, engtin maw Ramluahpuii chuan ka awm loh laiin a lo tih ṭhin che u?" a lam hawi chuan ka ti zui vat.

"Pa, a ho lutuk. Tunah chuan kan bulah i awm tawh a, keini unau chu kan hlim lutuk" a mittui hru pah chuan a rawn ti leh a, a nui lui sak bawk.

"Aw le, hun liam tawh a nih avangin ka ngawi ang. A leh pek thil a awm a nih chuan min hrilh ngei ngei tawh ang che. Rawn tihbuai che u emaw eng emaw thil thleng a awm chuan min hrilh tawh rawh" zaidam aw lo tak chuan ka ti ve thei ta hram.

"Aw le pa" tiin nghet tak hian min rawn kuah a, a chhip sama fawp vang vang pah chuan ka lo kuah let ve bawk.

"Bawihte, awmpui tur lak i duh em? Kan thil tawn vel hian i zirna hi a tibuai ang tih ka hlau" ka tih chuan min kuahna chu thlahin a ṭhu ṭha nghal.

"Kei chuan ngai ka ti lo, ka zirna pawh a buai phah ka ring lo. Ei rawngbawlte chu ka thiam sa alawm, nang kan bula i awm phawt chuan mi dang kan mamawh lo hrim hrim" a rawn ti leh a, a va puitling ve reuh tawh tak!

"A nih, i duh ang chuan le. Ka fanu lian tawh nu, i lo va puitling ve tawh reuh ve a, bialpa te hi i nei tawh lo maw?" a bianga piai sak chung chuan ka ti a, a lo ner nasa mai.

"Pa, naupang chhia ka nih tawh loh hî, ka biangah hian piai tawh lo teh. Chuan eng thil maw zana i mut theih loh chhan chu?" a thusawi tawp ber chuan min tinui tawp chiang ngei mai. Hrilh leh hrilh lohah chuan ka rilru a insual nasa hle bawk.

"Bawihte, tuna ka hrilh tur che hi pawm thiam a harsa maithei a nia aw?" ka tih chuan a lo bu nghauh a, tichuan a tirte aṭanga thil awm dan zawng zawng chu ka hrilh ta vek.

"Pa, dik taka sawi chuan maw, u mipa hi ka áwt thei lutuk" a rawn ti ta daih mai.

"Maw?" ka beisei loh lam tak a rawn sawi avang chuan ka lo ti hû a, keimah min en chung chuan a nui sak bawk.

"U mipa ka duh ṭhin ka tihna a nih chu! Nang chuan i hre ve vek lo ang a, keini ang kum rualpui ah chuan u mipate hi an ṭangkai thei lutuk. An naute mi dang lakah an chhan a, school te an kal ho ṭhin. Chutianga awm ve te chu ka châk thei lutuk, mahse kan unau ah mipa kan awm bawk si lova a theih ve ta lo a ni" a rawn ti ve sep sep a, ka fanu'n harsatna a lo tawrh ruk ṭhin chu ka lo hre ngai reng reng lo a ni.

"Aw le, ka fapa chu lo hruai ta ila pawi i ti lo ang maw?" ka tih leh chuan ani chuan pawi a tih loh thuin min lo chhang ve nghal.

Tunah chuan ka rilru hah rukna pakhat chu a kiang ta phawt mai. Mahse ka fapa ber hian min pawm duh tawh kher ang em tih chu ka rilru tihahtu ber leh ni tin zan tin ka ngaihtuahnaa awm a ni. Ka in aṭanga haw tura ka tih zante kha ka ngaihtuah let hian ka fapa lakah chuan ka inthiam lo thar lehzual.

Âwwwww, pawi hi ka va ti tak em. Ka in aṭanga a haw dawna vawikhat chiah kuah min dilte kha a lo va han khawngaih thlak tak êm. Kei chuan a pa dik tak chu kuah a chak a, mite ang thovin a pa chu a ngai tih lam reng ka lo hrethiam si lo. A tan kha chuan a tlawm thlakin a va beidawn thlak dawn tak em. College-a programme kan hman nî kha ka hmuh hmasak ber ni a ni a, mahse ka fapa a ni tih rêng ka lo hre si lo. Ka biaka zawhna ka zawh te khan a pa dik tak min hmuh thut avangin a ṭawng hlei thei lo a nih kha!

Kan chhungkaw chanchin chhe lai thang nasa lutuk chuan College lama kal pawh min tiphur lo hle a, mahse ka hna a nih vang leh College zirtirtute'n min mamawh avangin ka kal lui hram hram ṭhin. Dan pangai ang bawkin ka hnaah chuan ka kal ni tin a, ka fapa pawh a ruk chuan ka ngaihven ru reng zel. Hmuh tum chuan ka bei nasa ṭhin viau, mahse keimah zawk hi ka zak a ni. Mahni fate hnawt bo duh khawp mihring ka ni chu ka inchhir a, mahse engmah khawih danglam theih a ni tawh bawk si lo. Ni khat chu department tin hun hman dan tur ka en a, chawhnu dar 1 ah chuan History Department chuan Parents Teachers Meet an lo nei dawn a, chutah ka phone la kangin History Department HOD chu ka be nghal.

"Hello, Sir" phone in pick up rualin lehlama mi chuan a rawn ti a, an HOD ngei a ni e.

"Vawiin Parents Teacher Meet-ah khan in student Lalhmahruaia kha engtinnge ni dawn? Nu leh pa a nei tawh lo a ni lo'm ni?"

"Aw Sir, tunah chuan a bio data-a a pa hming inziakah hian L (late) tih a dah thar a, a sawi dan chuan a boral tawh a nih hmel. Vawiin khan min rawn hmu a, Aizawl lamah Gaurdian emaw chhungte emaw a neih loh avangin a harsatna min hrilh a, kan lo hrethiam ta mai a nih kha" lehlama mi chuan a rawn ti leh a, ka rin loh lam daihin ka fapa chu a lo che rang. Mahse, ka tum chu ṭhulh ka tum chuang lo. Dar 1 a lo rik chuan History Department awmna lam chu ka pan a, Parents Teachers Meet chu ka fapa tan tel ve ngei chu ka tum a ni.

"Sir, hetah te enge i lo tih ve teh mial a?" a hmun ka thlen chuan faculty ho chuan an lo ti nghal a, mak an ti pawh chu a awm ve tho.

"Nia hei, Lalhmahruaia kha kal saktu tur a nei awm si lo va, ka lo kal sak dawn a nih hi"

"Aaa Sir, chute chu min hrilh la kan lo awm sak mai dawn alawm" an rawn tih chuan ka awm sak tur thu chu ka sawi lui ta tho a, anni paw'n min hnial lui ta bik lo.

Meeting kan neih chhung chuan zirtirtute chuan nu leh pate tana hriat tur pawimawh leh an fate zirlaia an dinhmun enfiahna file te chu an sem a, keipawh ka fapa hming chuanna chu min lo pe ve bawk. Ka bula mite chuan an fate paper chu an bih a, an nui a, an fak a, thiam pawh an ti hlawm hle. Faculty ho ka hrilhlawk tawh angin kei chu mi pangai mai mai angin ka ṭhu ve a, thusawi tura min ruat an tum pawh ti lo turin ka ti ta kha a nia.

Ka fapa lehkha ka en chuan ka khi nghal suk. Ka fapa chu lehkha thiam thei tak a ni tih ka hria a, zirtirtute paw'n amahah beiseina an nei sang láwk hle. Darkar 1 vel meeting kan neih hnu chuan hun tawp hmangin kan ṭin ṭan a, zirtirtute ho chuan zah takin min lo be nghal sawk sawk. Ka ruala chhuak te chuan chutia zah taka min lo bia chu mak an ti ngei mai. Ka fapa lehkha tur ka kawl avangin pek tumin ka inkhalh chhuak a, rei lovah Mission Vengthlang pawh ka thleng thla ve nghal.

"Ka pu, helai velah hian Lalhmahruaia tih hming pu a awm mial em? College zirlai âwm vel naupang a nia" tiin dawr lo nghaktu putar pakhat chu ka bia a, a hriat ringin ka zawt ve tawp chu a nia.

"Lalhmahruaia tih chu ka hria a, mahse i rawn zawn hi a ni ang em ka hre bik lo. Saw laia puan ṭhuina dawr hnuaiah sawn ka hriat chu a awm a" tiin dawr awmna lam chu min kawhhmuh a, keipawh lawmthute sawiin ka inkhalh phei nghal.

"In awm em?" kawngka chu ka kik a, chhung lamah erawh thawm engmah a awm lo thung. Ka kik nawn leh tâkah chuan thawm chu a rawn awm ṭan ta.

"Lo lut rawh" ka fapa áw ngei ka hriat hnu chuan kawngka chu ka hawng a, ka lut ve nghal.

"Sir, nang maw?" thophang hmel deuh hian min lo en a, in chhungte chu a thimin a rimtui teh chîam lo bawk.

"Aw....aaaa.....hei i lehkha tur ka lo keng a, vawiin khan Parents Teachers Meet-ah ka kalsak che a" ka tih chuan a hmel chu ka sawi thiam lo, sawi duh tam tak nei hmel a pu niin ka hre ber.

"Aaa....ihhh......chhungte ka nei lo va, kan HOD kha ka be fel vek tawh alawm, i hresual a niang Sir" Sir tia min ko reng chu ka ngaithei ṭhak lo, mahse han ṭawng vak lah tih chî a ni chuang lo.

"Ihhhh......dik tak chuan ka tihpalh a ni" ka ti leh ringawt a, ani chu a ngawi reng thung. Kan ngawih deuh vang vang hnuah chuan

"Hei hi han en ve lawk teh" tiin ka iptea DNA Test Result chu ka pe a, ani pawh chuan lo banin a en ve mai bawk.

"Ni lo, kei chuan pa ka nei tawh hleinem. DNA a ni emaw ni lo emaw kei chu ka pain min duh loh nî aṭang khan pa ka nei tawh lo" a rawn tih leh chiah chuan ka insum thei tawh ngâng lo. A lamah chuan phei vatin ka va kuah thlawp a, ani chu talsawn tumin a lo che nghal, mahse ka kuahna chu thlah ka tum eih lo.

"Ka tihpalh, ka tihpalh min ngaidam hram rawh. Nang hi ka fapa i ni tih ka lo hre lova ka thiam loh a ni. Kei hi pa lak tlak loh tak ka ni e. Min ngaidam hram rawh ka fapa" pa tling pawh ni mah ila ka mittui chu ka dang zo thlâwt lo a ni.

"Min hnawl a ni lawm ni? Engatinge ka sawi lai khan i awih loh?" a rawn ṭap chhuak ve ta, chu veleh a aia nghet lehzual chuan ka kuah a, tal sawn pawh a tum tawh bik lo.

"Ka hre lo, awih kha harsa ka ti tlat alawm. Fapa ka nei tih thawm reng engmah ka hre lawk bik bawk si lo nen ka hamhaih lutuk a ni" a rawn ṭap chhuak hawm hawm a, ka khawngaih lutuk.

"Engatinge? Engatinge ka mamawh êm em lai che khan ka bulah i awm loh? Engatinge ka nu nen kan mamawh em em lai che khan kan bulah i awm loh? Ka ngai em em ṭhin che asin, mite angin pa neih ve kha ka châk ṭhin asin. Pa tel lova khawsa kan nih avangte khan mite'n min en hrang a, khatih hun lai khan engatinge kan bulah i awm ve loh?" ṭap zawih zawih chung hian a rawn ti a, a ṭap hmel chuan ka thinlung chhung chu a tina lutuk. Ani ang ṭhalai phei chu intih pa hun lai a ni a, chutiang taka uara ka bula a ṭah theih chuan a rilru a na hle tih ka hre thiam.

"Ka tihpalh, ka tihpalh lutuk. Nang leh i nu bula ka awm loh avangin min ngaidam rawh" nghet tak chuan ka kuah vawng vawng a, ani erawh ṭawng pawh ṭawng chhunzawm thei tawh lovin a ṭap khur char châr.

"Kei hian enh thil nge ka tihsual tâk ni! Nang ka fapa i ni tih hi ka lo hre êm a ni. Ka tihpalh lutuk, ka fapa" ti chhuak hawkin a hnungte chu ka chul a, ka fapa chu ka hmangaih nghal em em a ni.

"Le! I ṭhu ila i nu nen in nun chhoh dan min han hrilh teh. Ka lakah hian thinrim mahla ka dem lo vang che" ka awm aṭanga nam sawn deuh pah chuan ka ti a, ani pawh a ṭah chhuak a reh ta deuh bawk nen kan ṭhutthleng ah chuan kan ṭhu thla zui bawk.

"Ka nu sawi dan chuan min pai laiin ka nu nu leh pate'n an hnawt chhuak a, chuan khaw dangah kan pem ta a ni. Chutia nu chauhin a fa a enkawl reng takah chuan thil ka hrethiam chho ṭan a, pa ka awt lo ka tih chuan dawt a ni ngei ang. Ka rualpuite an pate nen biak ina an inkhawm dun te, ram an kal dun te leh an infiam dun lai ka hmuh te khan ka pa kha vawikhatmah la hmu lo mahila ka ngai em em a, neih ve ka châk ṭhin. Ka nu ka zawh lah khan ka pa laka a beidawn tawh thu leh pa awt lo hram hram turin min ti daih zel. Mahse chuti maiin awhna ka neihte chu ka paihbo thei bik si lo. Ka naupan lai aṭanga ka tum ber chu ka hlawhtlin huna ka nu enkawl leh ka pa zawn hmuh kha a ni a, mahse ka nu'n min boralsan hnuah kha chuan ka pa zawn hmuh thuai thuai chu ka tum leh ta a ni. Heng zawng zawng hi sawi mah ila awmzia a neih ka ring lo a ni. Nang chuan chhungkua i din a, fate i nei bawk ang ka ring. Rawn tihbuai che hi ka duh lo a, inhre lo anga kan awm mai hi a ṭhat zawk ka ring" maimitchhing vang vang chung chuan a rawn ti a, Partei leh ka fapa chuan ka tel lovin an lo va tuar nasa tehreng em.

"Sawi mai tur pawh ka hre lo, ka tihpalh tak zet a ni. Min mamawh lai pawhin ka awm lova ka sual a ni ti raw? Mahse i nu khan ka fa a pai tih pakhatmah ka hre bik lo, i nu kha tun thleng hian ka la hmangaih reng asin" sawi tam tur ka hre hlawl lo a ni.

"Ka rilru tinatu ber chu thlalak leh certificate zawng zawng nen ka hmuh tawh chung che pawha i la awih lo kha a ni. A chhan pawh ka hre lo, khata ṭang kha chuan pa neih hi a nawm pawh ka ring tawh lo" a mit chu a la meng lo hrim hrim.

"Ka tihpalh tak zet a ni. I rilru ka lo tihnat avangin min ngaidam rawh. Khawngaihin i pa min nih tir la, ka inah rawn awm ta che. Ka bulah ngei i awm loh chuan ka rilru hi a nuam thei lo vang" ka tih chuan a rawn a meng chhuak ve ta.

"Ka thei lo ka tih tawh kha, nang chuan nupui fanau enkawl tur i nei tawh a, ka rawn tibuai tawh dawn lo che" ka mita en kar chung chuan a rawn ti a, ṭah chhuak hmel tak hian a awm bawk.

"Khawngaihin, khawngaih takin ka bulah lo cheng rawh. Ka fate chuan kan bula i lo chen ve hun hi an nghakhlel lutuk alawm. Min tibuai dawn lo tih inhria la, duh lo eng ang mahla ka fapa i ni tho tho" a ngenin ka ngen ngawi ngawih tawh a ni ber.

"Ka nu kha la dam ve se ka ti, tunah chuan ka pa ka zawng hmu tawh a, ani chuan min pawm tawh a, a ina cheng turin min sawm tih te hi hre ve se a va hlim dawn em" kun chunga ṭap khur ngawt ngawt hian a rawn ti chhuak ṭiau a, ka lo kuah leh vat.

"I nu boralna chu ka tawrhpui tak zet che. Tunah chuan i pa ka awm tawh a, engtik lai pawhin i nghenchhan turin ka awm tawh ang. Le! Insiam la, ka in lamah i va phei tawh ang. I nau te paw'n min lo nghak rei lutuk palh ang" ka tih chuan a mittui chu hru hulin a thuamhnawte chu a bag-ah a khung khawm nghal sawk sawk a, ka thu a awih ta mai chu ka lawm hle bawk.

"Keng vak duh suh, khang kha chu naktuk lamah pawh a lak leh theih alawm" ka tih chuan min rawn en zawk a, a bu ve ta nghut.

Motor chuan kan in lam chu kan pan phei a, chutia ka khalh lai chuan steering bula a thlalak min pek chu la kangin ka pe let leh a, ani chuan min en hâu hian a lo la ve mai.

"Kha kha chu i kawl ngei ngei tur a ni. Engtik aṭang nge i pa ka ni tih i hriat?" ka tih chuan

"I rawmawl min pek ni khan" a rawn ti ve sup.

"Khatah pawh khan hmuh tawhna che nei ni khan ka inhre tawh sa rêng a ni. Lo hre hma ila a ṭha tur" ka ti leh a, tûmah chu kan ṭawng tawh lo. Ka in chu kan thleng a, in chhunga ka luh rualin ka Duati zawk chu rawn tlan pheiin min lo kuah nghal chat a, ka hnunga rawn lut a hmuh chuan a nui tawp riai riai nghal.

"U Hruaia i ni ang maw? Lo ṭhu rawh, pa chaw ka'n chhum kep nghal ang e" tiin Bawihtei chuan a lo ti zung zung a, ka fapa Hruaia ka en chuan zawn nei hmel deuh hian a hawi kual chhen thung.

"Duati, Bawihte, hei hi a u thar aw? Chuan u Mama tia koh tur aw? Duati, hei Pathianin van aṭangin u a rawn pe che a nih hi aw?" zanriah kan ei lai chuan ka fanu naupang zawk chu ka hrilhfiah nghal mawlh mawlh a, mak erawh a la ti deuh.

"Pathian min lo pek maw?" a tih chuan ka lo bu ve nghauh nghauh a, a hnuah Hruaia enin a nui nghal ver ver a, Hruaia ka en chuan a lo nui ve suk. Duati hi tlai khaw hnua kan neih leh a ni a, thil hrilhfiah thiam hi a ngai deuh ṭhin. Bawihtei erawh engkim ka hrilh lawk vek tawh avang chuan pangai takin a awm thung.

"Pa, lo kal teh" kan chaw eikham hnu fêah chuan Bawihtei chuan min lo ko a, Hruaia erawh a room thar turah a inbual mek thung.

"Engenita?"

"Awi in inang lutuk, u Mama chuan a chhun lutuk che. In chaw ei dante kha hmuhnawm ka lo ti lutuk a, chaw pawh ka ei ṭha thei lo zawk"

"I sawi uar mah mah lo maw?" ka tih chuan ka banah min lo chum nghal pawp.

"Ka sawi uar lo bawk. Pa, a ni tak tak alawm. In chaw ei dante kha a inang chia chiah. Sawi loh ka tum a, mahse ka thei thlâwt lo a ni. I duh leh CCTV aṭangin en rawh, ka room-ah ka phei a nia" tiin ka room chu a chhuahsan zui nghal.

Keipawh chu kan CCTV room-ah chuan ka lut phei a, kan chaw ei lai vel chu ka ennawn a, ka mit ngeia ka hmuh chuan kei ngei pawh chuan mak ka ti. Ka zirtir ni si lovin ka chaw ei ṭhin dan chiah chiahin Hruaia chuan a lo ei ve a, ka nui ta suk. Kut vei lam ka hman ang chiahin chaw te chu a bar ve a, a chawhmeh hriat loh chu a hnarin a hnim a, hmarcha pickle te chu a kutzungtein a pir a, a liak hmasa zeuh bawk. Engkim chu ka tih dan vek a ni a, mi dang tan pawh sawisel theih a ni ta lo tih chu ka chiang em em a, ka fapa a ni chiang lutuk tih ka hriat chuan ka hlim hle bawk.

Tunah chuan Hruaia pawh kan inah thlakhat lai a awm ve leh tawh ta reng mai. Zan khat chu ka ngai riau a, ka room aṭanga chhuakin Hruaia room lam chu ka pan phei a, khum a lo siam danah mut mai tum tawh te pawh a ang.

"Eeeee......i mu tawh dawn em ni?" a room-a ka luh chuan ka ti a, ani pawh a rawn hawi ve vat.

"Aw Sir.......Oh! Ka.....ka pa" bah deuh nuai chuan a rawn ti a, min ko sual tih inhre si mahse ti laklawh tawh si vel hmel inthlahrung ka hmuh chuan ka lo nui ve hawk ringawt.

"I lo kal hlauh chu a pawi lo hle mai, thil sawi duh ka nei a" a rawn ti leh chuan ka nui tawp ve ta chauh.

"Aw sawi rawh, ka hnenah hian i duh duh i sawi thei alawm. Ka tih theih apiang chu ka tihsak ang che" ka ti lo ti ve vat.

"Ih, i pawisa ka lo puk thei ang em? A chhan chu College ka kalna hi sawn ka duh a, min puktir phal chuan ka rul leh ngei ngei ang che" a thu rawn sawi chu ka lo beisei loh lam tak a ni.

"Âw, engatinge i pa bulah hian pawisa puk i dil? I chunga ka chet dan avang khan i paah hian min la pawm thei lo zawk em ni?" ka thin chu a rim ve ṭep tak tak a ni.

"Aih, chutiang lam pawh a ni lo. Ih, ka la inthlahrung ve alawm" hmel lai deuha a rawn tih chuan ka thinrim rukna chu a bo ta duak.

"I pa ka ni a, i mamawh chu ka theih apiang ka pe zel bawk ang che. Chuan khawi College-ah nge kal chu i duh a?"

"Ka duh dan chuan ka pass percentage in a phak tho avangin Jawaharlal Nehru University, Delhi-ah khuan zir ṭhat leh ka duh a, hetianga ka dil nghal ringawt che hi zak lo pawh min ti maithei mahse zirnaah hi chuan a ṭha ber zel hi pan ka duh a ni" felfai tak chuan a rawn ti a, kei chuan ka fapa chu ka lo ring nghal em em.

"Aw le, i duh dan a nih phawt chuan le. Mahse, kei leh i unaute hian kan va ngai awm che ve le" ka ti leh hram.

"Kum tawpah lo haw ka tum zîah dawn alawm" a rawn ti leh a, chutianga thutak chuan min la be ngai lo.

"Ni e, kumin hi kan College-ah zir law law phawt la, nakumah entrance te i pe ang a, ka buaipui dawn che a nia" ka ti ta nge nge.

"Chuan thil pakhat leh chiah aw?" a rawn tih leh chuan ka lo bu nghut a, eng tak chu sawi leh ang maw!

"Kan College-a ka zir chhung hian mite'n ka pa i ni tih an hriat hi ka duh rih lo. A chhan chu ka pa i ni tih an hriat chuan min hmuh dan a dang ang a, chu chu ka duh lo a ni. Keimah hmasa ang khan mite hian min hre zawk se ka duh, Principal fapa ang ni lovin" a rawn tih leh reuh a, a thusawi chuan ka ngaihtuahna a tithui hle.

"Aw le, i duh dan a nih phawt chuan i sawi ang chuan kan awm dawn nia. Amaherawhchu, mi rethei anga i lan avanga zirtirtute leh zirlai naupangte'n dik lo taka an ti che a nih chuan ka ngawi thei dawn lo tih lo hre lawk la" ka ti ve ta sup. Tunge mahni fate hmuhsit lai thlir reng thei ang ní.

Eng eng emaw kan sawi dun hnu chuan kan in mangṭha a, ka Duati leh Bawihtei te room lut kawi zawkin ka room lam chu ka pan zui nghal. Hun a kal a, ka fanute pahnih pawh chuan Hruaia chu an ngaina tawh hle. A bik takin Duati chuan a ngaina lehzual a, Hruaia mize mil lo pui chu tihpuiah a sawm ṭhin a, ani Hruaia lah chuan hreh ru tak hian a lo tihpui ve leh mai zel bawk. Bawihtei leh kei chuan kan lo nuihpui nasa a, a chang leh kan vaia lam ho changte a awm ṭhin bawk.

Chapter 4

Nutei/Zonunmawii POV

"Zonunmawi, khatiang mai mai ei leh hman kan ni lo, kan tlai dawn a nia" kal pahin ka Alu Papawr lei zawh chiah chu ka ei a, mahse ka ṭhiannu ngaih dan erawh a ni lo nasa.

"Enge? Kal pah pawhin ka ei theih reng hi, i duh ve a ni lo'm ni? Kha ei ve ta che" ka ti let ve nghal thar thar a, ani nen hi chuan aw zawi leh zaidam hi kan nei lo ve chiang a ni.

"I zak em? Ka ei ngai lo tih i hriat reng kha! Khatiang thil ṭhing lutuk keini ang High Class tan ei ve chi pawh a ni lo. Ka hmuh ringawt pawh khan ka bal mai dawnin ka hria" henu han ṭawng chapo thiamzia hi chu âw, a duh loh te lah hi a pe ná ve em em zel a!

"Hetianga i hmanhmawh em emna chhan hi ka hre lo emaw ti reng reng suh, ka kal pangai rengin ka kal dawn tho tho" ka ti let ve leh nghal a, kal hlawk hlawk pah chuan min rawn en ta ran mai.

"Zonunmawi, enge i hriat vel chu?" a rawn ti ve nghal zat a, kei erawh ka lo nui sûk duh lek chauh.

"Ka hmanhmawh a nia, kal chak teh" a rawn ti leh ta nge nge.

"Heng hi Sir Joseph-a class first period-a kan neih vang a ni em? Zep lovin min hrilh phawt teh" ka rin dik loh chuan a mak ang.

"Aw aw aw ninawm, kan test tur pawh hi ennawn ka duh pah tho vang a ni bawk" a rawn ti chhuak ta a, ani hi chu ka hre ve chiang ê.

"Sir Joseph-a hi chu i duh ve chiang alawm, mahse ani hi chuan a ngaihven ve der si lo che a" ka lo tih khum ve bawrh bawrh.

"Min ngaihven ve emaw ngaihven ve lo emaw ka pawi sá lo, tunah chuan kal chak phawt mai teh" a rawn tih chuan ka Alu Papawr ei zawh chiahna sarang chu kan College Gate bula Dustbin-ah chuan ka vawm lut a, a duh ang speed ngei chuan kan Department lam panin ka kal thlakpui nghal hmawk hmawk.

Kan Department room chu kan lut a, zirlai naupang dangte chuan kan test tur chu an lo chhiar sup sup. Vawiin phei chu kan test tur portion a tam si, question a set har phei chuan tihṭhat a har leh khawp ang. Sir Joseph-a hi chu a fel a, zirlaiah a duham tih mai loh chu kan teacher te zingah pawh zirlaite chuan kan ngaina ber. Chutah ka ṭhiannu em em Lalrinfeli hian a'n star lulai khawp a, Sir Joseph-a lah chuan hre ru reng mahse a ngaihsak der lo.

Vawikhat phei chu hmeichhia ho chiah classroom-a kan awm laiin Sir Joseph-a chu a rawn lut thut a, Lalrinfeli ber lah chuan a lo lut ti hre hek lo. Zak map lovin Sir Joseph-a chu a crush thar a nih thu kan class hmeichhia zawng zawngte bulah a sawi a, a hnungah mi ding an awm tih ka hrilh te khan min la hau let zawk za mah a nih kha! A hnungah Sir Joseph-a a awm tih a hriatte khan ka bula rawn ṭhu thla nghalin a kun nghal vang vang a, mahse zak lo ang maiin a rawn hawi chhuak leh vat. Chuta ṭang chuan Lalrinfeli hi chu keini a zirlaipuite hi chuan ngaiah kan nei tawh, Sir Joseph-a hi a ta bik hliah hliahin a sawi a, Sir paw'n hre tho mahse engah mah a ngai lo niin a lang.

"Vawiin chu a va han chhe lo leh pek tak em" Canteen-a kan thil ei lai chuan a rawn ti leh a, ka lo ner sâwng thung.

"I sawi har ka ti tawh rêng a ni. Engtinnge ni tin hian a chanchin hi i sawi peih zawk le?" thil ei mial mial chung chuan ka lo ti let a, a hne lo hi mak ka ti.

"Ve a che! Nang pawh i crush kumhlun kha a zan tin i stalk ziah a ni lo'm ni? Khatiang tlangval senior ral kai tawh leh nghal" a rawn tih chuan ka sa ve ta zak mai.

"Fel chapo chekhirnu, khatiangin sawisel hlek suh aw, Sir Joseph-a pawh ka sawisel ngai loh kha! Chubakah ani te chu Sir aiin a let tam takin a ṭha fê zawk hrim hrim" ka ti ve nghal pang pang.

"I daw lutuk, khatiang tlangval senior tawh lutuk khan ka bialpa hi a tluk têuh lo" a rawn ti ve nghal zat.

"Ka bialpa a!? Haha, ve leh ringawt zel che hian, ngawi reng khan i thil chah kha ei mai mai teh" a duh hun hunah te hian a lo bialpa leh ringawt a, kan buaithlak tlang a ni e.

"Nang hi nizan i meng rei leh tawh a ni maw? I mit meng aṭangin ka hre thei, engtinnge i stalk reng peih zawk le ka ti" ka lampang a rawn sawi ve leh ṭan dawn ta. Ninawm, a ṭawng duhthaw leh dawn si.

"A nuam êm alawm, mut dawn apianga a hmel ka hmuh hi chuan ka mutui vek theiin ka hria" ka lo ti ve mai bawk.

"I mak ka ti ê, a nau nen pawh in inhria a, sawi ve mai ta che. Chuan, a ni'n a lo hrilh ang a engkim chu duak a ni mai" a rawn tih chuan

"Chutiang ringawtin a awlai bik hleinem" ka lo ti ve thung.

"Kei chu ni ila ka hrilh daih tawh ang" a lo tih leh chuan amah chu ka en ran a, thil awmzia hi a man lo tlat.

"Sir Joseph-a i duh thu pawh hrilh ngam lo hian min bawl tum miah suh" ka lo ti let ve zat a, mai mai a!

"Awi awi awi, ka hrilh ngam reng, mahse amah ber hian min duh ang em tih ka hre bik hleinem" a tih chuan ka nui ta ringawt.

"Ni rêng e, keipawh khatiang tho kha a ni mai" duh thu han hrilh ringawt chi pawh a ni lo, ani phei chu Mizoram pawnah daih a awm leh nghal.

"Mahse nang te chu kei nen chuan a danglam alawm" a rawn ti leh hram.

"Enge kan inan loh bikna?"

"Âw, nangte chu i duh rukna a rei tawh êm alawm. Ngaihtuah teh, MICE school-a kan kal lai aṭang tawhin i duh tawh a nia, tunah phei chuan kum 5 lai a ni tawh a nia" a kut zung ṭanga chhut niah niah chung chuan a rawn ti a, a sawi te lah chu a dik ve tho bawk si.

"I ho em mai, hetianga lo ralkhat star tluk tluk hi a tawk mai" ka lo ti awlsam hmak chu min ei lo teh ê.

"Mipa dang duhna leh itna hi i nei leh miah lo em ni? I mak ve ê, hetiang em ema duh hi ka hre lo e a!" a rawn ti leh a, a ni ve reng bawk. Ani ka duhna leh veina hi a rei tawh a, keipawh hian mak ka ti zawk.

"A taka i hmuh ve theih chhun lah chu a rawn haw nî khuaa a Bike silfai vel kha a ni mai si a, ka khawngaih letling zawk che" a rawn tih leh chuan

"Awi, a Bike sil laia a hmelṭhat theih zia kha! Ani anga perfect man hi chu ka mitah an awm thei hlawl lo a ni e" ka ti ve ta thlâwt.

"Awi, i duh ve chiang ê, ani lah chuan tunge i nih pawh a hre chai si lo. A rawn haw hun tur i hre leh thlap tawh lo maw?" min fiam ti tih deuh chuan a rawn ti a, ani ka hriat chian ang bawkin min hre chiang tih ka lo theihnghilh leh ṭhin.

"A nau hnen aṭangin ka hre leh vek tawh. A nau hi keini aiin u deuh mahse a fel a, kawm a nuam bawk. Biak inah kan pawl a inang a, chuta ṭang chuan kan inkawm chho ṭan kha a nia, mahse ka kawm sual lo khawp mai" ka ti ve ta duah a, ka crush kumhlun nau u Zualtei te chu a fel êm bawk a ni!

"Ka lo va han peih thei tak ka ti, North lam aṭang khan South lamah i duh em em mihring awm dan bihthlakpui tur chein ka rawn phei vang vang ṭhin a nia, i ṭhiannu hi chu ka fel ve thlâwt a ni" a zia a rawn chhuah chho ṭan leh dawn ta, mahse ka rilru chuan min lo bihthlakpui peih ṭhin chu âtthlakin a peih ka ti tak tak.

"Mahni infak leh sakhi ngalah engmah a bet lo" ka lo ti let nghal zet zet a, ka chalah chuan min rawn nam nghal sawk. Kei lah ka lo inring lo bawk nen, ka thle ta sawk.

Kan College faculty te zingah chhiat tawk an awm thut avangin chawhnu lam period chu kan off vek a, a tih chî phian. Ina ka haw chuan ka nu leh pate chu an lo la haw lo tih hriat takin a reh ṭhiap a, kan awmpuinu pakhat lo awm chu be sawk sawkin ka room lamah inbual turin ka chho nghal. Ka intihfai zawh chuan kan awmpuinu ei rawngbawlpui turin ka chhuk leh a, ani paw'n min lo be nghal siam siam. Tuikual South-ah hi chuan chhungkaw awm thei ve pawl tak kan ni a, mahse awmpui pakhat chiah kan nei thung.

Tin, ka nu leh pate hian kan hausak vang emaw awmpui kan lak vang emaw hian min chhawr loh phah lo va, in tihfel leh inchhung sekrek khawi hrim hrim chu ka hman phawt chuan ti ve zel turin min ti ṭhin. A tir kha chuan ka ning a, mahse tunah chuan min lo tihtir ṭhin lo vang tih ka hlau hnuhnawh leh tawh zawk. Khua a rawn thim dawn hnai a, ka nu leh pate pawh in a rawn thleng ve nghal. Zan riah ei khamah chuan ka room-ah ka chho a, zir tur vak a awm rih lo nen ka online nghal daih.

"Hello" tiin Feli hnen aṭanga call ka dawn chuan ka pick-up a, henu hi chu min be lo hian a awm thei thlâwt lo a ni ang e.

"Facebook ah khan lut teh, Mizoram News ah khan" a rawn tih chuan ho ka ti ngei mai, chutiang mai maia lut hman pawh ka ni hleinem.

"Enge thil nge awm? Min hrilh ve mai la" ka tih chuan lehlama mi chu a rawn pawr nghal teh ê.

"En vat mai teh, i hlim loh emaw i zuan vak vak loh emaw chuan kei hi i ṭhiannu ka ni lo vang" nui vak vak chung chuan a rawn ti leh a, chuti taka min en tir a duh a nih chuan tiin Facebook-ah chuan ka lut a, Mizoram News Group pawh zawngin ka lut zui nghal.

"I hmu tawh em?" lehlama mi chuan a rawn ti leh a, eng chu nge hmu se min tih ber ka hre lo a ni.

"Enge hmuh tur awm? Ka hmuh duh zawng tur engmah a awm lo, ka ṭhiannu chu i lo ni lo a nih dawn hi" ka ti let hrawk a, a chhan pawh hmanhmawh phelênga a thil min en tir duh chu rul man chungchang mai mai lek hi a lo ni a, chubakah an thil post nî te chu '1 day ago' vek alawm a nih tawh lê.

"Mawli, refresh ve ik ta che. Ka dah dawn, i hlim dawn tih ka chiang em mai" tiin phone chu a off nghal hmak a nih chu! Lalrinfeli hi chu a buaithlak a ni. A sawi angin Mizoram News Group chu lut ṭha lehin ka refresh a, chuta ka thil hmuh leh chhiar chuan min va han barakhaih chiang si em.

"Aizawl Deputy Commissioner (DC) thar tur atan kan Mizo púi ngei Lalhmahruaia s/o Lalrinchhana chu Deputy Secretary of BSC Administration Carde chuan an rawn ruat avangin Mizo mipuite chu kan va lawm em. Lalhmahruaia hi nikum lama Mizo zinga UPSC-a inziak tling thei awmchhun kha a ni a, kan chhuangin kan lawmpui tak zet a ni" tia thu inziakin a hnuaiah chuan a thlalak an rawn tarlang a, ka lawma ka lawmzia chû...... Ka lawm lutuk chu ka zuang nghal vak vak a, Feli'n min biak laia a lo sawi lawk chu ka hrechhuak zui zat a, ani hi zawng ka hriat chian ang bawkin min lo hre chiang ve a nih hi!

Ka rilru hlim lutuk chu awm pawh ka awm hle hle thei lo, in hnuai lamah te ka chhuk thla leh vel a, thingpui te ka siam ta ringawt. Tunah chuan Mizoramah, kan vengah leh nghal ka hmuh theihin a rawn awm tawh dawn a, ka hlim tak zet a ni. Ani erawh chuan hetiang tak hian a Mizoram rawn awm tur hi ka hlimpui tih a hre awm der si lo, mahse a hmel ka hmu ni tin tur ringawt pawh chu ka lawm em em tho.

U Hruaia chu kan naupan lai aṭanga ka star tawh a ni a, MICE school-a kan kal lai aṭang tawhin ka duh bur tawh a ni. Chutah a nau chiah u Zualtei nen kan lo inkawm ngeih leh phian a, an ina min hruai luh chângte pawh a ngah mai. Mahse College kan han kal tâk chinah kha chuan an in chhung pawh ka chuang kai duh vak ta lo, a chhan chu Zualtei pa chu kan College Principal a nih vang a ni. Tunge mahni College Principal te ina len luh fo duh ang nî?

"I hlim ê, i bialpa hual a lo haw tawh dawn bawk si" classroom-a kan ṭhut lai chuan Feli chuan a rawn ti a, a va han nghal leh mai mai tak em.

"Tu maw lo hlim?" kan hnung chiaha kan ṭhiannu ve tho chuan rawn ti a, ka lo nui vak vak ringawt.

"Hei, kan Lal fanu hian Lal fapa a lo haw dawn tih a hre tawh a, chuvang mai mai chu maw le" Lalrinfeli chuan a sawi chhuak ang tih ka hlau hman hle.

Kar khat a ral leh meuh chuan ka lo nghahhlelh em em mihring chuan Mizoram a rawn rap tih ka hre ve ta. Instagram leh Facebook velah pawh a lar nghal hle a, Instagram-ah phei chuan followers a nei pung chak khawp mai. Kei chuan ka lo follow na a rei ngar ngar tawh bawk a, a account-a thil thleng awm reng reng chu ka lo hre hneh thei khawp. Mahse ka rilru tina deuhtu pakhat chu hmeichhe ṭhenkhatin comment section-a an duh thu leh an ngaihsan thu an post chhen chu a ni. Keipawh hian ka duh tirh khan Instagram lamah ka zawng a, ka hmuh veleh ka follow zui nghal a nih kha! Kei, hun rei tak lo follow tawhtu leh lo duh ru ve em emtu paw'n comment pawh ka la comment ngam loh laia mi chi hrang hrangin an comment ngam chu ka thik a, lo thik lahin awmzia a nei bawk si lo.

Ka hmuh danah chuan u Hruaia chu ka duh tirh aia khan tunah chuan a hmelṭha lehzualin a thau tawh zawk a, chu chuan ka duhna a ti nasa lehzual. U Zualtei chuan leng tura min sawm chang nei ṭhin mahse keimah zawk hi ka leng ngam lo a ni. A pa kan College Principal a nih chu thuhran, u Hruaia nena han awm dun vel chu ka huphurh a ni. A bula awm ka duh loh vang lam ni lovin a bula awm chu inthlahrunawm tura ka ngaih vang zawk a ni bawk. Mahse ka kal duh lutuk lohna inah chuan loh theih lohvin ka kal a ngai ta. Vanneih thlak takin ka ti dawn nge vanduai thlak takin ka ti zawk dawn pawh ka hre lo, u Zualtei nen chuan KṬP group khatah kan awm ho a, chutah group inelnaa item nei tur zingah kan la tel dun leh zui. Nilaithawhṭan zan a lo ni a, kan item neih tura Convener te remruat sa ang ngeiin u Zualtei te inah chuan kan kal khawm a, kal pawh kan kim viau.

An thusawi dan aṭangin u Hruaia chu inah a awm ve teh mial a, mahse inhnuai lamah erawh a la rawn chhuk miah lo thung. Kan Convener te leh hmeichhe ṭhenkhat chuan a room-a han kal chilhin a hlawhtlinna vel an lawmpui a, kei leh u Zualtei tih loh chu an chho vek zawk. Keini pahnih chuan chawlh lai a nih tho avangin thingpui leh ei tur vel kan lo siam mawlh mawlh a, rei lote hnu ah in chung lama mite pawh an rawn chhuk thla ve leh vat. A tawp bera rawn chhuk thla ve chuan ka mit a'n la leh mai mai khawp a, a kawr hak leh a hmel fai tak te chu a inhmeh vel vek a ni ber. Mahse rei en lovin mi dang mitmei ka veng nghal vat a, kei ang thovin ka thil zirpui hmeichhiate pawh chuan an lo thlir ve dauh dauh tho. U Hruaia chu tû hmeichhe mit atan paw'n a iai awm lo va, an hausak mai bakah a ze cool êm em chu hmeichhiate a hipna pakhat niin ka hria. Ka duh tirh aṭangin a nui hmel hi ka la hmu ngai lo va, hmu tur pawhin kan inhnaih lo hrim hrim zawk.

Thingpui siamtu kan lo nih laklawh avangin u Zualtei nen chuan sitting room lamah pheiin kan sem kual a, u Zualtei Tray chawi phei zawkin kan Convener te lên a daih loh avangin kei chu thingpui la chang lo ho pe tur chuan ka phei ve nghal a, ka pe phei zel a, a kil tawp bera lo ṭhu ka hmuh chuan ka pe peih loin ka zam ru tak zet. A hmuh laiin ka che chhe vel ang tihte chu ka hlau a ni. A bulah chuan an naupang ber Duati chu a lo ṭhu ve a, a u chu a ngai ve hle ni turah ka ngai hmiah. Vanneih thlak takin ka pek chhung chuan chet chhiat vel ka nei lo hlauh a, amah chuan min ngaihsak lo hrim hrim zawk. Mahse ka kal sawn mai tur chu Duati zawk chuan min rawn be ta hlawl mai.

"Au Nute, i va'n rawn leng khât tawh" a rawn ti ta mai, u Hruaia bula awm khawtlai vel ka duh loh tehlul nen ka din ngei ngei a ngai ta. Ka mit sir chuan u Hruaia chuan min rawn en zawk tih ka hria, ka lungphu te pawh chu rang tak a ni.

"Âaaaaa, nia, ka hman lo ve thei lutuk a, ka hman veleh ka lo leng ang a kan inkawm leh dawn nia" ka ti ta rimgawt a, Duati chu a lo nui nghal ver ver a, thingpui a in ve duh thu a sawi chuan la leh turin ka phei zui bawk.

"Tu ta tur nge i siam leh dawn?" thingpui ka chawh melh melh lai chuan u Zualtei chuan a rawn ti a, ani chuan kei ang lo takin thingpui a lo in hman tawh.

"Duati sawn a duh ve a" tiin ka thingpui chawh lai chu ka chawk mial mial a, ka chawh zawh chuan Duati te ṭhutna lam chu ka pam phei nghal.

"Ka lawm e" thingpui ka pek laiin Duati chuan rawn ti a, Duati hi chuan min ngaina ve vîauin ka hria.

"I in tur i lo va siam tir hnuhnawh leh em ni Duati?" u Hruaia chu a rawn ṭawng chhuak ve ta. A hmel chu ka en nghal vat a, ani chuan a nau sam chu duat hmel deuh hian a lo chul hliau hliau thung.

"Immmmmm, ka in ve leh duh thut a" pakhat zawk chuan a lo ti ve leh mai. An unau chuan zankhuaa thlir mai ka náp. Chutia an inbiak lai chuan mi dang thingpui inna note chu seng a lo hun leh der tawh a, kal kualin tray bawk chuan no chu ka la khawm zung zung a, Duati in zo chiah ka hmuh chuan an lam panin ka phei leh nghal.

"I hman hunah chuan lo leng leh ngei ngei rawh aw?" no rawn dah pah chuan Duati chuan a rawn ti leh hram. Chutah Duati ni lo chuan u Hruaia zawk chu ka en a, chiang taka min lo en ran avang chuan ka mit chu la thla rang tak ka ni. Ka zak lutuk chu ka sa vekin ka hria, engvangin nge min lo en ve kher? Ka awm dan hrethiam lo hram se ka ti ngawi ngawih.

"Aw le, aw le" tiin hmanhmawh takin ka pheisan ta vat, chuti lo zawng ka rilru chu an hriat atan ka pho chhuak a ni mai.

"Engatinge i hmai chu? Miin an beng che em ni?" nui chung hian u Zualtei chuan rawn ti a, mahni hmeichhepui nge nge chuan thil pawh an lo man chak e.

"Engtinnge a awm a? Tû man min beng hleinem" ka lo ti ṭha ve mai bawk a, a fiamthu tih hre mah ila ka la zak em em tho.

"A tai hlur a, benna te pawh a ang dawn alawm. Khawi, keiman ka lo sil tawh ang" tiin ka tray ken pawh chu a rawn la nghal a, u Zualtei'n ka hmai a tai a tih avang chuan ka zak a, u Hruaia'n a hmu ve vek dawn tih ka ngaihtuah phei chuan ka zak lehzual.

Kan item zir tura ka va phei leh chuan u Hruai leh Duati chu an lo awm tawh lo va, tlêm chuan ka thaw pawh a veng deuh ta. Zan rei tak thleng kan zir lo va, kan haw dawn chuan ka phone phawrhin u Zualtei te chhungkaw thlalak, lian puia banga lo intar chu thla ka la ru hram. A chhan pawh u Hruaia chu a lang ṭha em em a, ka phone-ah ka dah ṭha lo phal lo. Chutianga u Hruaia thlalak ka nei thei chu ka hlim leh em em a, an in ngeia amah ka hmu thei te chu ka lawm hnuhawh hle.

"Ka zak lutuk" tih chiah chu in ka thlen velah Feli ka thawn a, a hmuh rual rualin min lo call nghal. Keini ṭhian dun hi chu kan inman ve chiang alawm.

"Engvangin maw i zah? Han sawi teh" ka pick-up chiah tiha a rawn ti nghal tawn tawn a, thil thleng vel chu ka hrilh nghal mawlh mawlh a, a changin a lo nui thul.

"Tichuan mo interview i lo va nei bik a ni maw?" nui ralh ralh chung chuan a rawn ti a, mi mah zah nak a lai a! Fiamthuna hun pawh a ni lo.

"Lalrinfel, ka uang lo a nia" vin deuh hrak chuan ka ti a, thinrim em em ni si lo hian ka thin a rim ṭun mai.

"Ka uang bik lo, thinrim der vel kher kha a ngai lo, i hlim ru lutuk tih ka hria" a rawn ti leh a, ka va han ngei tak em.

"Ka be peih tawh lo che, ka dah" tiin ka off nghal hmak a, ka thinrim rei leh dawn chuang lo tih chu a hre leh vek tho ang.

Instagram ka lut a, a ṭhenin an lo live a, a ṭhenin an thlalak an lo post bawk. Zanina ka thil zirpui ṭhenkhatte chuan u Hruaia lan ve na thlalakte chu an post sup sup a, zak miah lovin u Hruaia chu an la tag nghe nghe zui. Engtik laia an lo lak hman bik nge ka hre lo va, an zinga ka tel ve lo leh u Hruaia thla ka lakpui ve lo chu ka rilru a na thar ngei mai. Mahse a nihna takah chuan ka hlim ru tho, a chhan chu ka mipa duh berin ka mitah a en bik tlat alawm. Chutiang ngaihtuahna ka neih leh tak sî ah chuan ka thlalak lak ruk te chu ka edit a, u Hruaia bik chauh chu ka crop nghal daih. Mi dangte anga feed êma post chu mawi lo ka tih deuh avangin story-ah chuan update ka tum ta zawk a, chutah miin an lo hria ang tih ka hlauh hnuhnawh leh avangin a thlalak pawh chu ka hmang leh ta chuang lo. Ka chiangnial thlâwt lo....

"Ka mitah tak min en ve ta, a va han hmelṭha chiang tak" tiin ka Instagram story chu ka update a, entu pawh an lo awm nghal sup sup. A ṭhen phei chuan min lo dm nghal nghe nghe a, mahse fiamthu hlirin ka chhang let thung. Rizai chu pawt chhovin ka inlukhup a, rilru hlim tak chuan ka mu zui ve nghal.

"Nu, khawnge u Siamsiami? A lo kal lo em ni?" zing ka tho choka lama ka chhuk thlak chuan ka nu'n ei rawng a lo bawl teh daih a, tuisik inin ka nu chu ka pui ve zui bawk.

"Aw, a nu kha a dam lo a, lo kal rih lo turin ka hrilh ta a nih kha" ka nu chuan a lo ti ṭha ve mai.

"Ka pa hi a tho tawh em?" ka tih chuan zîngkara inkhel tura a kalna a rei tawh thuin min lo chhang a, ka pa hi chu thawh hma lamah hi chuan ka tluk thei lo a ni e.

Chaw ei hma chuan ka room-ah ka chho leh a, ka phone chu charge pahin ka khawih leh mial mial. Instagram-ah bawk chuan ka lut leh a, ka story chu ka check nghal zat. Ka beisei loh takin viewers an lo tam khawp mai a, viewers neih tam lama ka insawihtheih khum ṭhin Feli hmuh atan tiin ka screenshot nghal bawk. Ka screenshot zo ka thai thla leh chiah chu ka tawp ta chat mai. Instagram profile picture ka hmuh ngun em em pakhat hi a lo awm ve kiau mai a, ringhlel rilru tak leh tunge a nih hre deuh tho si chuan ka check chiang zui nghal. Aw Lalpa le! Ka hlauhthawn ruk ang leh ni se ka lo tih ruk ngeiin u Hruaia a lo ni. Ka rilrua lo lang leh hmasa ber chu '𝘌𝘯𝘨𝘵𝘪𝘯𝘯𝘨𝘦 𝘭𝘢 𝘴𝘵𝘰𝘳𝘺 𝘢 𝘭𝘰 𝘦𝘯 𝘵𝘩𝘦𝘪𝘩 𝘵𝘦𝘩 𝘥𝘢𝘪𝘩? 𝘈𝘯𝘪 𝘤𝘩𝘶𝘢𝘯 𝘮𝘪𝘯 𝘧𝘰𝘭𝘭𝘰𝘸 𝘣𝘢𝘤𝘬 𝘳𝘦𝘯𝘨 𝘳𝘦𝘯𝘨 𝘩𝘭𝘦𝘪𝘯𝘦𝘮" tih chu a ni. Chutah rang zetin min follow back leh back loh chu ka en leh nghal a, ka beisei loh lehzualin mi 200 leh tih a follow zingah min lo follow ve ngei hi a lo ni. Ka lawmna leh hlimna aiin mak tihna ka ngah ta zawk daih. A chhan chu khang kum kalta chhung zawng khan min follow ve lo miauin ka hre tlat a ni. Chutia thil ka lo ngaihtuah lai chuan ka nu'n chaw ei a peih tawh thu min rawn hrilh a, keipawh rilru hlim tak pu chungin ka chhuk thla ve nghal.

"Thil mak deuh ka hrilh ang che" classroom-a Feli nen kan ṭhut lai chuan ka ti a, ka sawi tur chu a awih kher ang em ka hre lo.

"Eng thil mak maw?"

"U Hruaia'n nizana ka story a lo en ve" ka ti ringawt a, a hmel awm dan chu ka lo en kar bawk.

"A ho ê, keipawh Sir Joseph-an ka status a en ve ṭhin tho alawm" a rawn ti daih a nih chu! Henu han sual thiam u chuak zia hi chu âw...

"Lalrinfel, ka thusawi tum chu i hrethiam miah lo em ni? Ka story a en theih chuan min follow tihna a nih chu" ka tih leh vak ringawt.

"Lawm vak suh, a follow back har awm che em mai, nangin i follow na a rei tawh awm awm nen" heti hian ka ṭhian ṭha ber chi a ni ve si a, ani hian min thik chiang a ni.

"Ka lawm tho tho, ka hlim lutuk hi class off mai te ka duh. Class tlanbo i duh chuan vawiin atan chuan tlanbo turin ka inpeih reng e" min lawmpui lo eng ang mahse ka rilru hlim lutuk chu awm ngaihna ka hre lo a ni.

"Sir Joseph-a class awm ila kan kal dawn nia" a rawn ti ve leh mai a, Sir Joseph-a bawk maw a class awm chhan ni leh ta?

Sir Joseph-a class kan lak zawh chuan Bazar lamah kan phei a, scooty ka ken loh avangin ama scooty in kan inphur phei a.

Hruaia POV

Pathian zarah Bachelor leh Master degree chu Delhi aṭangin ka zo ta ngei a, ka pate paw'n min ngaihtuah viau ṭhin mahse mahnia awm ṭhang ka ni bawk a, harsatna ka nei tam lo khawp. Ka chhuk thlak tirh aṭangin tih tak zetin zirlaiah ka ṭang a, hma pawh ka sawn chak hle. Bachelor degree ka zirlai chuan North East aṭanga kal ka nih avangin Hostel-ah tih duh dah leh hnuaichhiah ang chi chu ka tawk ve deuh hlek a, ka pa pawh ka hrilh nghal. Ka pa chuan min tiduhdahtute chu dan hmangin a khin theih thu min hrilh a, chuta ṭang chuan ka hlau ta bik lo. Vai hovin min tiduhdah an tum leh pawh chuan ka dawh mai mai ta lo va, Hostel-a mi pakhat nen phei chuan kan insual nghe nghe. Min han hneh lo luilai letling zawk khawp a, vawikhat chiah ka hnek âwr tihah a tlawm nghal daih. Ka insualpui pa chuan ngaihdam dilin ka hmaah a kun a, Vai ho lo dawihzia ka hriat phah bawk. Chumi hnu aṭang chuan vawikhatmah tihbuai vel chu ka tawk leh tawh lo.

Ka awmnaah chuan hnam dang ṭawng hlir hman a ngaih avangin ka tan chuan inzir thar ngaihna lai a tam ngei mai. English ṭawng chu kan hmang nasa ber a, mahse chutah chuan duhtawk mai ka duh lo. Ka pa bawk chu ka râwn leh a, Delhi a awm laia a lehkhabu dawr kalna ṭhin te chu min hrilh a, chutah chuan kalin Hindi ṭawng zirna lehkhabu vel ka lei ṭeuh bawk. Engkimah ka pa chu ka rawn a, min thlawpna ang apiang chu ka ti mai zel. Ka chhuk dawn te khan min ngai ve tak tak niin ka hria.

Master degree ka neih tirh khan Doctorate degree (ph.d) lampang ka kal ang nge Competitive exam lam ka bei ang tihah chuan ka buai deuh a, ka pa ka râwn chuan ka duhthlanna a nih thu min lo hrilh daih. Ka pa berin chutia a sawi tâkah chuan tiin ka rilruin a buk rit zawk lam Doctorate degree (ph.d) chu ka zawm a, degree ka neih leh meuh chuan kum chu a lo kal duai duai tawh. Nuam ka ti viau dawn emaw ka tih laiin University vela Professor hna thawh chu nuam ka ti leh ta chuang lo, a hnuah rilru siam tharin Competitive exam lam chu ka bei ṭha leh ta zawk a ni.

Ka tana pawimawh em em ka chhungte chu ka ngaina hlawm em em a, chutiang bawkin min ngaina ve niin ka hria. A bik takin kan naupang ber Duati chuan min ngaiin min ngaina hle niin ka hria a, keipaw'n naupang ber tih takah ka duat em em bawk. Tin, Bawihtei tia kan koh mai Zualtei pawh a bang bik chuang lo, min ngaina a, ka tan chuan anni chu ka chhungkua dik tak te an ni. Ka pa ina ka awm hnu thla khatna velah chuan ka pa chu a nupui ka hmuh ngai loh avangin chanchin ka zawt a, thil thlen dan engkim min hrilh ve vek bawk. A ruk tak chuan ka pa nupui kan bula a cheng ve lo tur chu pawi ka ti lo ngei mai, a chhan chu ka ngainat mi a ni lo a tin ni!

Delhi-a ka awm lai chuan kar tawpah ka chhungte nen kan inbe ṭhin a, an ṭawng duh barh barh ṭhin hlawm hle. An bulah chuan hlim loh pawh tum ila a hlim loh theih loh. Ka ngaihtûah ka ngaihtuah hian ka pa chu ka zui haw lo vang tih mawlh ka hlau ta a ni. Ka beidawna awm dan mai ka hriat loh laiin ani chuan chhungkaw thar duhawm tak min pe a, hmangaihna leh hlimna ka la tawn ngai loh min pe bawk.

Tin, Pathian hi ka fak lo thei lo, a chhan chu engkim hi a kaihhruaina vek a ni tih ka chiang em a ni. Ani chuan malsawmnain min vur a, ka beisei phak lohvin UPSC exam-ah te hial min inziah tlin tir a, chutah kan ramah ngei DC in ka la awm dawn zui. Aizawl DC ni tura Mizoram ka thlen tirh chuan ka chhungte chuan min lo hmuak a, Duati'n min rawn hmu chiah chu rawn tlan phei vang vangin min rawn kuah nghal chat. Kei chuan lo kuah letin ka pawm kang nghal nawlh a, ka pa leh Bawitei pawh an rawn thleng phei zui ve nghal.

"I va ṭhang ve Mama, ka chen tawh reng reng hleinem che" ka pa chuan min kuah pah chuan a rawn ti ve sup a, Bawihtei pawhin min rawn kuah nghal chung chung mai.

"Au Mam, enge min lo hawn?" Duati'n a rawn tih chuan ka thil hawn sak chu ka phawrh a, a hmuh chuan a hlim ngei mai. Keimah pawh min ngaihsak tawh lo, ka pa chu a thil thar neih hmuhin a hrilhfiah nghal zet zet. Chutah ka bula lunghnur ru deuha lo ding chu a samah ka tuai vak a, a meng no lo khawp.

"I thil min chah kha ka theihnghilh reng reng hleinem, kha la rawh" tih pahin a phone min chah ang chu ka pe a, a hmel lunghnur tak chu hlimnain a rawn inthlak zui ve nghal bawk.

"Êuuuuuu, ka hriat loh laiin thil in lo chah fel diam bik a ni maw" ka pa chuan nui huah huah hian a rawn ti a, chumi hnuah motor-a chuang lutin kan in lam chu kan pan a, an bula ka awm nghet tawh dawn avang chuan ka hlim hle a ni.

Chutia kan ina ka awm ve tâkah chuan ṭhenawm khaw venga mi vengva deuhte chuan ka haw tih an hre vat a, in leng pawh kan nei nghal zut zut. Duati ber chuan min lo ngai tawh bawk a ni ang a room-ah pawh a riak duh lawk lo va, ka bulah hlir a mu ṭhin. Mahse kar khat hnu velah chuan a room-a mu tawh turin ka ti a, ani pawh ka thu awihin a mu ve ta kha a nia.

Zan khat chu Bawihtei te ṭhian ho chuan kan inah thil an rawn zir a, ka awm tih an hriat avangin an hruaitute leh mi dang ṭhenkhatte chuan ka hlawhtlinna vel chu min lawmpui nghal liam liam bawk. Zualtei bula che ve reng hmeichhe pakhat chu mak ka ti deuh. Kan awmpui ti dawn ila awmpui kan nei ngai bawk si lo, a ṭhian dangte zawng zawngin phone khawiha an ṭhut mai mai laiin a ni chu a che reng a, a hnu ah kan za vaia kan in tur thingpui chu a rawn chawi phei bawk.

Duati chuan thingpui a duh vel leh teh tlat a, ani chuan ngainatawm taka biain a thingpui tur chu a va siam leh nghal sawk sawk. Kan thingpui inna no a rawn seng lai chuan Duati bawk chuan a lo be leh a, Duati ni lovin kei min lo en daih a, kei lahin ka lo en chiang em em bawk si. A hmai zawng zawng chu a tai nghal hlar a, enge a chhan pawh ka hre lo. Kan thingpui in zawh hnu rei vak lovah Duati chu in chung lamah ka chhohpui daih a, ka bula riah leh tumin ka room-ah min zui lut ve leh ta nge nge. Khuma ṭhu chung chuan ka phone chu ka khawihmual mual a, ka bula mu Duati ka en chuan a lo muhil tui leh hman tawh hle. Competitive exam ka beih chhung zawng khan Facebook, Twitter leh Instagram te chu khawih ve mah ila news leh eng eng emaw vel bak ka follow ngai lo thung. Kan hun laite kha chuan Facebook-ah kha chuan Mizo tawh phawt kha chu kan in friend vek zel a, khang hun lai kha ka khawih nasat hun lai ber pawh a ni ang. Chutia phone ka khawih mual mual lai chuan notification chu Instagram aṭangin a rawn thleng chhen a, eng em em nge a nih hriat tumin ka lut zui nghal.

Instagram ka lut chiah chu followers, likers comments thar a lo tam nghal khawp a, ka khawih tirha ka thlalak post te chuan likers an lo ngah hman hle. Min follow tute chu follow back ve ṭhaa ka hriat avangin setting-ah chuan ka lut a, mahse vawikhata follow nghal vak erawh ka duh lo. Comment ṭhenkhata min lawmpuina te chu ka reply ve a, chutiang ni lo thil dang vel te chu chhan loh aiah tiin ka like sak ta ringawt. Chutia ka phone ka khawih lai chuan ka pa chu ka room-ah a rawn lut a, thil sawi duh a nei a nih ringin ka lo ṭhu ngil deuh zawt bawk.

"Duati chu a muhil leh tawh a ni maw?" a rawn tih chuan bu ngauh chung hian

"Aw, a nih hi! Engenita pa?" ka lo ti ve nghal a, ka pa chu ka ngai ru rîaui hian ka hria.

"Vawiinah kan meeting a, Department tin HOD ho khan kan College-a sawm che an ti tlu a, kei chuan ka lo pawm ta a nih kha. Naktuk chu engmah lo ti suh aw, ka rualin i kal dawn nia" a rawn ti dam dap a, keipawh ka lo bu ve leh nghauh a, min sawmna chhan chu ka hlawhtlinna chan vang a nih ka ring thiam mai.

"A nih i hnuaia thawkte leh zirlaite hian i fapa ka nih thu hi an hre tawh hlawm em? Nge i la thup ve char char zawk?" ka zawh lohna a rei vâng vang tawh bawk a, thil awm dan vel chu ka hre châk thut.

"Ka zep hran lo va, ka hrilh kher chuang lo. An hrîat hriatin hre tawh mai rawh se, zep reng theih pawh a ni nang" a rawn ti ṭha ve mai a, ka pa chuan ka rin loh lam daihin min chhang a ni. Ka lo rin lawk danah chuan tu emaw ni tal chu a hrilh tawh ka ring a, mahse a lo la zep ve ngar ngar a nih dawn hi!

"Ni ve tho mai, naktuk chu dar engzatah nge?" ka tih chuan chawhnu lam a nih thu min hrilh a, a chhuak mai tur chu ka ko ding leh a, ka sawi hmaih ṭep alawm le.

"Naktuk chawhma lam kha chu Bawihtei leh Duati hi ka bazar pui lawk dawn a nia" ka tih chuan haw tlai lo tura min hrilhin a chhuak zui leh nghal.

Zing a lo nih chuan zan ka menrei vang nge ka tho peih lo ngei mai. Duati chuan min rawn tiharh chhen a, zing lam phei chu ka hmu ṭha lo. Zing lam tih lemah, zing dar 8 vel chu a ni daih tawh ang.

"Au Mam, harh teh. Min bazar pui dawn kha aw, a u pawh a tho vek tawh, tho teh, mawh? Chaw ei kan la ngai bawk si" tiin Duati chuan min lo tur chhen a, a tawp a tawpah chuan ka tho ve ta nge nge.

"Bawihte, engatinge vawiin i chawlh dawn?" chaw kan ei laiin ka pa chuan a ti a, Bawihtei chu ka bazar pui dawn tih ka hrilh vek tawh sia ka lo ti rilru mawlh mawlh.

"Vawiin chu chawhnu aṭang chiahin class kan nei a, chawhnuah programme dang college in kan nei leh daih dawn bawk sia ka kal peih ta lo law law. Chuan u Mama'n Duati nen min bazar pui dawn bawk" pangai tak hian Bawihtei chuan a rawn ti ve mai bawk.

"Chutiang ringawt tur a ni lo, student zawng zawng kal vek tur alawm, Mama nen kan rualin i kal ve dawn nia" ka pa'n a rawn tih leh takah chuan ka ve en a, hnial châk si hnial ngam si lo hmel hian min rawn en let ve ran.

Chaw kan ei kham a, Bazar lamah chuan ka pa Bolero in kan inkhalh chhuak zui nghal. Duati chuan motor-ah hla a play a, a zaipui mai bakah a lampui leh ṭhin. Ka pa motor-a chutiang hla a awm tih ka hriat chuan ka nuih te pawh a za hîal. Amah nen a mil lo ve lutuk a, mahse a fate hlimna a nih phawt chuan eng pawh hi a pawm mai zel. Mellinium Center-ah chuan kan lut a, thil chi hrang hrang kan enkual ṭeuh bawk. Hmeichhe kalpui hi chu hneawm chang a tam ṭhin. An duh reng emaw tih hi an duh leh lo va, hmun hrang hrang kan enkual ṭeuh phah a, ka ning leh thut zel. Kan lei zo ta maw tihah chuan kan haw a, mahse Duati chuan lei duh pakhat a la neih vangin Mellinium Center lam pan chuan kan tlan let leh ta thuai. Vanapa Hall zawn kan thleng chuan Scooty pakhat hian kan motor chuanna chu a rawn su ringawt a, anmahni zawk chu let tawpin kei paw'n motor chu ka tiding zui vat bawk.

"Min hmu miah lo em ni?" Scooty lo buaipui mektu chuan a rawn ti vin ṭhawt a, chutah hmeichhia an la ni leh ta zui.

"Au Nute" chutia a ṭawng lai chuan Duati chuan a rawn ti ta mai. Chu nu hmel ka en chian chuan hmân zana kan ina mi kha a ni tih ka hre chhuak nghal. Ka hmel a hmuh chiah chuan a ṭawng tawp nghal hmak a, a ṭhiannu lah chu a rawn thinrim chhunzawm ve leh ta chîam.

"He lai kawng hi i pa ta emaw i ti em ni? Kan tlan mek tihte i hre ve lo em ni?" a ṭhiannu chuan a rawn ti vin bawrh bawrh a, a bula mi ai ai chuan a ṭawng thei dawn tih ka hre mai.

"Hei hei hei, ngawi tawh rawh. Nat pawh i nat loh kha, kal vat zawk teh ang" tiin a bula ding a ṭhiannu chuan a lo zilh mawlh mawlh a, pakhat zawk lah chu a lung a la nih loh hmel nasa mai si.

"Nute, a van pawi ve le. In ṭha maw?" Bawihtei chuan a rawn ti ve vat a, engvanga chu nu, Nute tia an koh chu ka nau te chuan hre em em nge an nih le?

"Aw ṭha e, kan kal leh nghal mai ang" Nutei pawh chuan lo tiin a ṭhiannu chu a khap leh a, amah chuan khalhin a tlan chhuahpui nghal bawk.

"Tute nge a?" hre deuh rîai ruai mah ila ka zawt lui ta tho.

"I hre lo em ni? Kan inah pawh i hmuh tawh khâ....Nutei kha kan venga mi a nia, a ṭhiannu kha chu South lampang a ni maithei" a rawn tih chuan ka lo bu ta ringawt. Ka hriat belh châk em em lo va, a ṭul pawh ka ti hran lo.

"Hmai sen deuh kha ami?" tlanchhuah pah chuan ka ti leh hram a, khanu te kha chu hriat belh châk vak lo mah ila engtin emaw ni tak hian ka rilru ah a awm tlat.

"Awi, a hmai sen viau zan kha i lo hre ve a ni maw? Kha nu kha Nutei chu a nih kha" nui khur der der chunga a lo tih leh chuan ka chhang tawh lem lo.

Nutei POV

"Chekhirnu, nang hian kan Principal fapa te motor i su tih i hria em?" thil kan ei mial mial lai chuan ka ti a, amah hi a ni lo'm ni a thinrim zawk zawka la ṭang ngam kha!?

"Principal chhungte an nih leh nih loh ah ka buai lo, enge an rawn lan thut nî" a rawn la ti hram.

"Nangmah a nih kha tlan thut chû! Engtinmah min ti lo hlauh zawk a, a zia phian. Chuan, i lo hmu em?" ka ti leh nghal zat a, kei chuan thil eng emaw ni ka lo hmu hman tlat alawm.

"Enge i lo hmuh leh bik tawh? Ka mal hi a na ru riau leh nghal" a mal zût zut chung chuan a rawn ti a, a mal chu a na tak tak pawh a ni maithei.

"Âwwwwww, u Hruaia kha maw le, a chhiat lohzia kha! A nupui ni ila khatiang khan a motor-ah te min han phur kual ve vel se âw, awi a va han nuam dawn tak" ngaihtuah zui veng veng pah chuan ka ti a, a nupui nih chu châk namênin ka châk.

"I beiseina chu beiseina thlawn mai a ni e, ṭawngtheinu. Ani te chuan nang aia ṭha leh pian nalh, sang bawk si nupuiah a nei daih dawn. Nang ang feet 5 leh inchees 5 pawh pel lo hi chu a duh che ring buai suh" a rawn ti ve leh vak, a mood a fuh lo nen a thinrim chu a kal tluang khawp mai.

"Awi awi awi, san hmel deuh khan awm vel suh, kan inchen reng tih kha hre rawh" ka ti let ve khar khar.

"I theihnghilh leh hmain ni 14 khi ka birthday aw, chuan present atana ka duh chu i hriat kha" a rawn ti leh ham ham.

"I zak lo ê, khatiang thil to lutuk ang chi kha chu i duh leh i pate lei tir mai rawh. Kei chuan thil dang ka pe zawk ang che, ka pek tur che chu i duh vîau zawk ang" ka lo ti vat a, a enga mah hmain ka pek tum chu a'n duh loh hmel em em zui.

"Ka duh ang leh ka sawi ang kha min present loh chuan ka kawm tawh lo ang che" a rawn ti a, dawt bak va ni suh.

"Mahse, ka thil duh min present kher ngai lovin thil pakhat i ti thei thung" a rawn tih chhunzawm leh nghal zat a, a thusawi chu a inkalh deuh nuaiin ka hria.

"I duh ang kha chu ka pe thei lo ang che, pawisa ka neih loh mai bakah ka nu leh pate ka dil ngam têuh lo. Chuan, enge ka tih theih pakhat chu?" tiin ka zawt zui zaih a, pawisa sen ṭeuh ai chuan a duh tih mai a ṭha zawk maithei a ni.

"Ni lo, tunah chuan a la hun rih lo. Mahse ka sawi ang chu i ti dawn tih min tiam phawt rawh" a rawn tih chuan

"Thil hriat chian loha intiam ringawt ka duh hleinem" ka lo ti ve hmak thung.

"Intiam tawp mai rawh, a chhan chu a hnu lawkah ka chunga i lawm dawn avangin" a rawn ti leh a, eng thil nge tih tir min tum chu ni ang?

"Thil ṭha lo leh sual lam chu a ni lo chiang maw?" ka ti leh hram.

"Aw aw aw, i intiam thei tawh em?" a rawn tih leh chuan ka lo 'aw' ve ta nge nge.

Hun a kal a, class pawh kan kal ṭha leh tawh ngei mai. Zan lamah chuan ka zan tin tih danin u Hruaia account ka check ṭhin a, a thlalak post tawh ho sa chiah hmuh tur a awm ṭhin. Mahse tunah chuan min follow back ve tawh a, a nuam hi ka ti ngawih ngawih. A thlalakte chuan likers a ngah hlawm sawt em em a, keimah ai pawhin followers leh likers chu a ngah tawh zawk. Kar khat a ral leh meuh chuan Feli birthday pawh a rawn thleng ta. Valentines day a ni bawk a, class kal kan ṭhahnem lem lo hle. Keini pawh Bazar lamah kan kal daih a, Feli chuan Rose sen no chék pahnih chu a lei a, a lei chhan erawh ka hre lo.

"Enge rose hi i lei ve chhan ringawt? Bialpa i nei tawp si lo" ka ti ta nge nge.

"Sir Joseph-a hi ka bem dawn. Min duh loh paw'n ka ṭap vak ang a, min duh ve mai ang" a rawn ti ta mai.

"I va han ngampa ve tak, mahni birthday-ah mipa i bem dawn a nia. I duh dan chuan ti teh, video in ka lo cover ang" tiin ka sawi phurpui ṭan zaih a, a phur tak tak te pawh a ang zawk. A sawi ang tak taka tih a tum avang chuan kan College chu kan pan a, kan thlen chuan Sir chu ka zawnpui nghal.

"Saw, Sir chu office-ah a awm. Ka lo koh chhuahsak che ang a, chuan saw laiah sawn lo ding la ka lo hruai phei ang" ka tih chuan phur takin a kal a, a hlim vel lutuk chu a tho â emaw ka ti dawn alawm le.

"Sir, ka be duh lawk che a" tiin Sir chu ka ko chhuak a, Feli awmna lamah chuan ka hruai phei ta daih bawk. Feli bul kan thlen chuan Sir chuan a ngaihna a hriat loh hmel ngei mai. Kei chu ka kal sawn vat a, hmun dang aṭangin video in ka lo cover zui nghal.

"Sir, min duh ve tawh la? Ka star che tih pawh i hre vek, mahse i hre lo der tlat si. Chuan, Happy Valentines Day aw?" tiin Feli chuan rose par chu a pe a, Sir pawh chuan nui deuh suk hian a lo la ve mai.

"Enteh, bialnu ka nei alawm. Mahse pangpar vang hian ka lawm e, a lawmmanah i biangah ka lo chuk zeuh ang chû" tiin a kun hniam a, Feli pawh chuan a lo dawh nghal vat. Chutiang thil vel an tih zawh chuan lawm thute sawiin Sir pawh chu a kal sawn ve leh mai bawk.

"Ti kha chuan beisei ngam a ni ta lo, mahse a nuam tho e" ka bul a rawn thlen chuan a ti a, a lunngaih ve hmel tak tak.

"La na lutuk suh, nakinah mipa ṭha tak i la tawng ve mai ang" tiin ka lo hnem ve a, ka thusawi erawh chuan a hnem lo chiang khawp mai.

"Le! I hun ve thung, in vengah han kal phawt mai teh ang" min en chunga a rawn tih chhuah thut chuan ka nui tawp chiang teh ê.

"Enge ka tih ve hun a nih ringawtna chhan?" ka tih chuan a Scooty-ah chuan a chuang zui daih a, a ti rum nghal bawk.

"Lo chuang phawt mai teh" a rawn ti leh chuan ngaihngam zân lovin ka chuang ve leh mai bawk.

Ka hlauhthawn ruk ang ngeiin kan veng lamah chuan kan tlan a, chhuk ka duh thu ka sawi pawh chuan a ding duh der lo. U Hruaiate in zawn chu kan thleng a, Gate hmaah chuan Scooty a park ṭha nghal.

"Enge i hriat a? I tih ang kha ka ti ve duh reng reng lo" ka ti nghal tawn tawn.

"Min tiam vek tawh tih kha han hre chhuak phawt mai la, chuan hetiang hian kan ding reng dawn nge min luhpui dawn?" awi awi awi, a thil sawi hi ka ti duh teuh lo mai.

"I mawl em ni? Ka duh lo, ka zak" ka ti leh vak ringawt.

"Min tiam tawh angin vawiin hian kan tlangval senior hausaa hian i duh thu a hre tawh ngei ngei tur a ni" a la rawn ti a nih chu! Zah theih loh thlak lutuk.

"Ka hrilh duh lo tak tak, hmai chhanah ngat phei chuan ka duh lo lehzual, ka thi thei mai ang" ka huphurh tak zet a ni.

"I tih ka ring reng a! Hetianga i tih duh loh vel ka rin avangin card pawh ka lei lawk vek tawh. Chuan, hetah hian i duh thu ziak tawp mai rawh, a kum nen lam khan. I ti lo a nih chuan ka kawm tawh lo tak tak ang che" he mihring nu han duh khirh dan em em hi! Tih ngaihna dang ka hriat loh avangin Feli sawi ang chuan ka ti ta tawp a, mahse Feli ai thlâwt chuan ka chan a la zia alawm le, hmai chhanah ka hrilh dawn pawh ni hlei lo.

"Au Nute, enge kan in kawtah i tih a?" Duati School rawn bang chuan a rawn ti a, Feli zawk chuan hmanhmawh tak hian a lo hui vat.

"Kha le, i u lo pe rawh aw. Chuan naupang fel i ni mai" Feli chuan a lo ti nghal sawk sawk a, Duati ber kher han pek tir chu ka duh chiah lo.

"A u maw?" Duati chuan a lo ti leh a, a khawi zawk nge kan sawi a la hrethiam lo a tin ni!

"Aih, au Mama zawk kha" tiin keipawh chuan ka lo hrilh ve vat a, a pek ro ro chuan a pesual ang tih kha a hlauhawm ve leh tlat.

"Chuan i u Mama'n tunge tih tir che a tih chuan hmeichhe pahnihin i ti dawn nia aw, chuan nakinah ka lo leng ang a kan infiam leh dawn nia" a petu sawi dan tur thleng chuan ka hrilhfiah nghal vek a, ka hming te chu a sawi lang reu reu ang tih ka hlau hle.

"Kan kal phawt mai ang aw, naupang fel" tiin Feli chuan a bye a, Duati pawh an inah a lut zui ve nghal. Keini chu kan in lamah kan inkhalh chho a, Feli pawh la leng ve rih turin ka sawm nghal zat.

Zan a ni a, a la vawh deuh suk avangin kawrlum lian tak chu la chhuakin ka ha hlûn bawk. Feli nen chuan Whatsapp-ah kan inbia a, chhun lam chanchin vel pawh a sawi leh nasa tawh. Sir Joseph-a'n a hnawlna vel chu a la na viau dawn emaw ka tih laiin a la na vak lo a ang. Mahse Sir Joseph-a a la duh reng thu chu a sawi ve leh luam a, thlah mai chu harsa a la ti ve a ni ang. Chutia kan inbiak lai chuan u Zualtei hian min lo call hlawl a, KṬP thil zir tur a awm ni leh tura ngaiin ka pick-up ve zui vat bawk. Ka rin lawk ang ngeiin thil zir tur chu a lo ni a, kohhran hall lama kal kan ngaih thute a rawn sawi bawk.

A tukah chuan Feli chu a nawm sam loh avangin College pawh a kal peih lo a, ani a awm loh chuan kal pawh ka peih vak lo. Chubakah ka Scooty workshop-a ka dah lai a ni kher nen ani a kal loh leh zel chuan Bus-a ka kal ngei a ngai dawn tih chu ka hria. Chutia Bus ka chan mek lai chuan Bus Stand-ah chuan Bolero hi a lo ding a, glass a in down chuan tunge a nih ka hre nghal.

"In College-ah ka kal dawn" tih zawng rawn sawiin a lu chuan lut turin min rawn signal zeuh a, kei ve thung chuan ka lo en hû ringawt.

Keimah ni lo mi dang a bia a ni ang ti rilru chungin ka hawi kual vel a, ka hnungah lah mi tumah an ding bawk si lo. Ka va en lahin min lo en kar bawk si a, rilru nuam lo takin Bolero seat hnung lamah chuan ka ṭhu lut ve ta tawp. Ka ṭhut luh fel hnu chuan ni pawh chu a tlan chhuak ve nghal a, engmah sawi lova kan chuan dun reng avang chuan hrehawm ka ti ru hle.

"Duati ka thil tur i lo pe em ni?" a rawn ṭawng hmasa ta, mahse a thusawi chuan min va tiphu chiang em.

"Maw?" ka hre lo der lui ve tlat a, mahse a zawhna ngai chîah chiah chu min lo zawt nawn leh nghal. A va'n hrehawm tak, motor pawh ka chuan nuam loh pha ta vek.

"Aih, Duati chuan min hai a ni lo maw?" ka ti ve zaih a, engmah sawi chhunzawm tawh lo hram se ka ti.

"Duati'n nang lo Nutei tih hmingpu a la sawi ngai lo" motor khalh reng chung chuan a rawn ti leh a, ka thi mai dawnin ka hria. Duati pawh chu a sawi dan tur ka hrilhfiah vek kha a ni si a, rilru a va tibuai tak.

"Keimah lo Nutei dang a ni ang, Duati chuan a hre sual ve thei tho alawm" phat mar hram chu ka tum a, vawiin chu ka unlucky day a nih ngei dawn hi ka ti rilru ta vawng vâwng.

"I ni lo tak tak maw?" rei fê kan ngawih hnuah chuan a rawn ti leh ta.

"Áaaa....ihhh....aw, ka ni lo vang" ka ti ban deuh chuap a, front glass-ah chuan kan mit a intawng nghal chat a, ka mit chu ka la sawn chiang teh ê.

"Engatinge kan chhungkaw thlalak kha i phone khan thla i lak kher?" a rawn ti leh ta hmuk mai. Lalpa leh! Ani hian thla ka la ru tih kha a lo hmu vek maw!? Tunah chuan tal chhuah ngaihna a awm tawh lo.

Ka ngaihtuah chian phei chuan ka zak a, chutia min zawt vel kher chu khirh ka tiin ka ngei em em bawk. A bula motor chuan zet zawng a mi uap a na lutuk nge nuam pawh ka ti lo. Ka ngawi ta reng a, chhan chî ah pawh ka ngai tawh lo. Min man chhuak chiang lutuk chu ka zak ngawih ngawih hi a ni tawp. Kan College pawh kan thleng har ka ti êm em a, kan tlan dan aṭang lah chuan chuti maiin kan la thlen hmel si loh. A hmel te chu en ka duh viau rualin front glass lam chu melh khat pawhin ka melh leh tawh lo, min lo en leh kur ang tih ka hlau. Ka piana hnu lama ka motor chuan nawm loh ber a ni hial ang.

Chapter 5

"Chhuk rawh le" dam dapa rawn titu chu front glass aṭang chuan ka en a, ani paw'n min lo en ve reng. Chutah che sawn mai lo chuan a thil sawi awmzia chu ka ngaihtuah chiang te te a, ka hriat chhuah meuu chuan a ranga rangin ka chhuk nghal.

"Ka lawm e" ti sepin ka kal zui ta vang vang. Engtinnge khatiang khan ka lo chuan reng theih zawk? Engtinnge kan thleng tawh tihte kha ka lo hriat loh theih zawk? Thil thui tak taka ngaihtuah hi chu a buaithlak a nih hi!

Kal lam mood off nen, Feli a kal lo kher bawk nen chhun lam College boruak chu nuam ka va han ti lo tak em. Classmate ten min biak velna te pawh chu ka chhang satliah ve mai mai a, nuih luih chang pawh ka nei tho. Ka besei loh takin Sir Joseph-a chuan Feli kal loh chhan chu min zawt ve teh mial a, a chhan nia ka hriat ang chuan ṭha takin ka lo chhang ve mai bawk. Monday a ni bawk nen, ka tan chuan ni sakei dik tak a ni. Mood off em em chung chuan class chu ka awm tluan ve zak a, ina ka haw te chuan ka room-ah lutin ka mu nghal hmak. Tun thla ka la period loh vang nge ni, ka chau hluah hluahin ka hria. Zan a lo ni a, ka thil huphurh leh tih peih loh ber mai chu ka tih ve a ngai dawn ta. Sana ka en a, ka rin lawk deuh ang ngeiin u Zualtei chuan min lo call a, ka lo pick-up nghal.

"Nute, lo insiam rawh. Kan lo sawm dawn che, thil ken tur kha theihnghilh lo la" a rawn tih chuan 'aw le' tiin ka lo chhang a, phone chu kan dah ve leh vat.

Chaw kan ei kham chuan ka room-ah chhoin ka insiam nghal a, kan perform na tur atana ken tur chu ka bag ah dahin kan in kawtah chuan ka chhuak nghal. Inkhawm dar hmasa a lo ri a, rilru chu a khur ru nghal hle. Minute 5 vel pawna ka din hnu chuan u Zualtei te pawh an lo thleng a, mahse ka mi hmuh hreh ber mai a lo tel leh ta tlat. U Zualtei chu an in bula mi kan Convener nen an lo kal dawn emaw ka ti a, mahse ka beisei loh takin u Hruaia nen chuan Bolero in an lo kal thung.

"Lo lut rawh le, ennawn kan ngaih kha" ka zawn an rawn thlen chuan u Zualtei chuan a rawn ti nghal a, thawk la hawkin motor chhungah chuan ka lut ve leh tawp. U Hruaia hmuh laia han perform vel chu ka huphurh lehzual a, hreawm tak a ni.

"U Mama a lo kal ve hi mak i ti em?" u Zualtei chuan motor-a kan chuan lai chuan a rawn ti siam siam a, aw mak ti tehreng mai lo tih chîam mai ka duh.

"Aw, ti ve e. Ka tih awmzia chu aw" ka ṭawng te chu zing lam boruak avangin a kal sual kual vel vek.

"Keipawhin mak ka ti alawm, kan perform lai video-a lo cover a duh tlat bawk si a, a lo kal ve leh hnuhnawh a nih hi! Chumai a ni lo, Duati pawh lo kal ve phet a tum a, mahse ka pa'n a thlem dai thei hram zawk" a rawn ti leh nghal zuah zuah a, Duati reng reng pawh chu ka hmu hreh ngei mai.

"Video cover kher chu a ṭul ka va'n ti lo tak" ka huaisenna zawng zawng sawm khawmin ka ti ve a, u Hruaia hmuh lai han intheh dere vel chu ka châk zawk zawk lo hle a ni.

"Dik chiah ti raw? mi zak ve te!" u Zualtei chuan nui hek hek chung hian a rawn ti a, ka rilru chu dik chiah e a lo ti ve a, mahse ka sawi chhuak lem lo.

"Enge a ṭul lohnâ?" u Hruaia chu a rawn ṭawng chhuak ve leh ta. A aw reng reng hi a hriam hrak reng mai a, chhan hi a peihawm loh ṭhin.

"Âwwwwwwww, miin zak chung chungin an perform ve dawn a, chuta kara video vela lo cover chhen kha chu a ṭul lo ve ê" ka ti ve leh ta duah a, chutia pangai taka ka lo chhang fithla thei chu mak ka ti a, hahdam dan riau ka nei bawk.

"Zah te chuan tel loh mai tur alawm" a hnial hrat ve zek dawn a nih hi le.

"U Mam, i ti ho thei lutuk. Hruaitute'n min ruat chuan lo hnar kha a mawi tawh hleinem" tiin u Zualtei chuan min lo chhan khalh vat.

"Dik chiah" ka lo ti ve leh hram a, front glass aṭang chuan min rawn en nghal. Kei lah chuan ka lo en ve hrawk a, mahse a mit la sawn hmasatu zawk chu ka ni leh ta tho.

Enge ka awmzia pawh hi ka hre lo, u Hruaia laka ka rilru a huai ta lutuk chu ka hrethiam lo a ni. Chutia zak lo ang taka ka chhang let ngam ve te chu mak ka ti a, zing lam thil thleng chungchanga amah ka ngei lutuk vang pawh a ni maithei.

KṬP ho kan inkhawmna tur chu kan thleng a, motor pawh park ṭhain kan chhuk ve nghal. U Hruaia ka en chiang chu a chhe lo hi a ni tawp. A kamis dum hak te chuan a vun a chawi em em a, a kawr hak chuan a faizia a pho lang a tih theih. Inkhawm tura kal hmeichhe dangte pawhin an en duh hlawm hle a, KṬP hruaitu ṭhenkhatte chuan lo biain an chibai nghal sup sup bawk. Inkhawm kan ṭan a, group inelna a nih bawk avangin programme chu kan ṭan chho nghal miah miah.

Secretary in a puan danin keini group female voice chu pathumnaah kan zai dawn a nih hmel. Minute 15 vel a ral leh meuh chuan ka group hun a thleng ve ta, ka huphurh lutuk chu ka sa vek theiin ka hria. Stage-ah kan lawn a, ka Ukulele chu ka lek kang a, ka hmaah chuan microphone chu a stand nen an rawn dah zui bawk. Kan guitarist pakhat nen chuan sound kan check a, ka chek zo ka hawi kual vel chuan u Hruaia ka hmu fuh leh ta tlat. Camera hian keini stage-a awm ho chu min lo tin vang a, ka hawi sawn leh rang ngei mai.

Ka Ukulele chu ka inbuatsaih ang ngei chuan ka'n vai ri vel ta a, mipui pawh an rawn au nghal dur dur. 'Min hruai zel ṭhin' tih hla chu kan han sa rual dap dap a, keipawh ka zai ve nasa hle. Mahse aw sang chi ka nih loh avangin contralto part chu ka chang a, ka part chan tur tak pawh a ni. Zamna bo ṭhak khawpin ka zai ve a, kan zai zo chiah chu mipui lam aṭang chuan thawm pawh a rawn chhuak ṭha ngei mai. Kan zai lai aiin kan zai zo stage aṭanga ka chhuk te chu ka zam zawkin ka hria. Kan ṭhutna hmun ka va thlen leh chuan u Hruaia chuan min lo en reng a, ka nui ringawt. Ani erawh a lo nui lo nasa, ka nui pawh ka tawp rang teh ê. Ka ṭhut thlak rual chiahin u Zualtei chuan ka bul a rawn thleng a, a kalna tur chu lo kianin u Hruaia nena kan inkarah chuan a rawn ṭhu ve nghal.

Kan group zai zawhah chuan group dang pahnih hi an zai leh a, ka bengah chuan a tawp bera zai group te chu an thiam berin ka hria. An music a mawiin an zai thiam hlawm em em a, pakhatna pawh an nih ngei ka ring. Kan bang tawh mai dawn emaw tih laiin kan KṬP leader chuan item pakhat belh zawk a nih thu a rawn sawi leh a, haw vata mut hmak ka chak tawh teh reng nen. Kan KṬP leader chuan kan bula ṭhu u Hruaia chu a ko chhuak a, amah u Hruaia pawh chuan a hre lawk bik lo a ni ang hamhaih deuh chung chuan stage lam chu a pan ve nghal mai bawk.

Chutia stage-a din lai chuan hmeichhe ṭhenkhat chuan a thla an lo la sup sup a, a dinna background in a zir bawk a, u Hruaia chu hmelṭha tak a ni. Kei ngei pawhin u Zualtei hmuh loh hlanin a thla chu ka la ve ringawt. Ka la lo phal thlawt lo a ni. Mahse ka phone-a ka tin lai tak chuan ka lam a lo hawi bik kher a, hmanhmawh mangkhengin ka phone ken lai pawh chu ka dah thla zui ta vat. Chutah ka thlalak ka'n en chiah chu a fuh lutuk avangin ka ṭe chhuak ṭhawt lo chauh a ni.

Kan KṬP leader chuan u Hruaia chu keini ṭhalai rual hmaah chuan hlawhtlinna a chan dan chu sawi turin a ti a, ani pawhin tawi felfai takin a sawi ve mai bawk. A thusawi engkimah chuan Pathian leh a pa a sawi ri chhen a, a pa chu a ngaisang ve hle ni turah ka ngaihbel thiam nghal mai. Mipui lam aṭangte chuan zawhna an zawt a, ani chuan puitling tak leh felfai tak chuan a lo chhang zel a, amah tawp chu a awhawm ni berin ka hria.

A ze cool raih te, ṭawng duah si lova zawhna chhanna dik tak a sawi thei te chuan min hneh a, ka ngaisang thar ngawih ngawih hi a ni tawp. Inkhawm ban chuan refreshment kan ei leh a, a tui phian leh nghal. U Hruaia'n betu leh chibaitu neuh neuh a lo nei bawk nen keini pathum chu kan khawtlai ta deuh. Kan haw meuh chuan dar 9:30 lai a lo ri tawh a, motor chhungah chuan u Zualtei chu kan zai lai video enin a ṭawng deuh reng a, kei erawh Whatsapp-a min thawn dawn tho avangin ka en nghal peih ta rih lo law law.

"In zai thiam khawp mai" u Hruaia chuan a nau en zeuh pah chuan a ti a, u Zualtei hmel ka en chuan a u thusawi awih loh tih hriat tak hian a lo ner nasa mai.

"Awi, ka awih kher lo ê, kei chu Nutei kha thiam ka ti ber, a perh mawi bawk si" u Zualtei ṭhin tak hi chu âw, an titi naah chuan tel loh hram ka tum asin le.

"Ukulele kha i va perh thiam ve" min en chuang lo hian a rawn ti sup a, chhan loh mai chu ka tum uk a, mahse a hnu deuhah chuan

"Chutia mi?" tih chauhin ka chhang ta ringawt.

"Chutia e" a rawn ti ve leh nghal. Ka laka a awm dan leh mi dangte bula a awm dan inang lo lutuk hi mak ka ti.

Kan inzawn kan thlen chuan ka chhuk vat a, kan invai liam hnu chuan inchhungah lutin ka room lam chu ka pan zui nghal. Kan inthlak fel hnu chuan khumah bawkin ka phone chu ka khawih mual mual a, kan female voice group-ah pawh Chat a lo tam leh tawh hle. A tam zawk chuan kan zai ṭhat thute an rawn sawi luam a, a ṭhen chuan kei leh kan guitarist te chu min lo fak ve bawk. Min fakna ka hmuh chuan nuam ti ve tak ka ni. Ukulele hi chu ka perhna a rei tawh a, zaina khawp hi chu ka thiambel ve khawpin ka hria. Number lawng tawp aṭang hian message ka dawng hlawl a, ka khawih laklawh lai a ni bawk nen ka lo open zui ve mai. Video lawng tawp hi a lo ni a, ka rilru chuan u Hruaia a nih ka ring deuh tawp ringawt. A chhan chu Video chu kan zai lai video a nih vang a ni. Engtinnge ka phone number a neih theih tih chu ka ngaihtuah leh neuh neuh a, mahse a nau hnen aṭangin a nei thei tih ka hrechhuak leh nghal.

"Ka lawm e" tih tein ka reply a, a seen nghal a nih hmel a in blue tick zui zat mai.

"A dang pawh a la awm" a rawn ti ringawt a, eng thil dang chu nge a sawi ang le.

"I sawi awmzia ka hre lo" tih chu ka thawn leh ringawt a, video pakhat hi a rawn thleng leh nghal. Ka open chiah chu keimah hlir lanna video hi a lo ni a, engtik lai khan nge a lo hman zawk.

"Nâaaaaaaaa, hei kher chu!" Emoji nui lai lem dah vak chung chuan ka ti a, chhan let mai dan tur chu a vang ve êm a ni.

"Enge?" tih chiah hi a rawn thawn a, chutia ka mipa duh ber kumhlun nen kan han inbe ta ringawt chu nuam ka va'n ti tak.

"Mi'n zak chung chungin kan ti ve a, hetianga lo lak kher" ka ti ve leh a, hmaichhana inbiak ai chuan a nuam daih zawk.

"Nang pawh" a rawn ti leh a, a ṭawngkam te lah chu a la duh tawi thei phian zui.

"Enge kei chu?" ka ti ve leh mai bawk a, kan inhnial chu a ni ta ringawt.

"Mi'n zak chung chungin kan ti ve a, khatianga lo lak kher" ka ṭawngkam ang chiah chiah chuan a rawn ti ve a, a thla ka lak kha a lo la hre reng a ni maw. Thil lah hi a hre rei thei si. A message rawn thawn chu seen mah ila biak zawm vak dan ka hriat tawh loh avangin ka chhang zui ta lo.

Ka hlim a ni. Khawvel mipa piang tawh te zinga ka mipa duh berin ka number neiin min rawn bia a, thil te min sawipui ve a nia. 'Khawvelah maw?' pawh in tirilru maithei, mahse ka duh ve chiang êm a ni. Eng dang a ni lo, a engkim hi ka duh tawp a ni. Chutiang em ema ka mipa duh hi an awm leh theih pawh ka ring tawh lo, duh neih leh pawh ka duh tawh chuangin ka hre lo. Ka hrilh hmaih theih loh leh phal loh Feli chu ka text a, thil awm dan leh ka thil tawn te chu ka hrilh nghal zung zung. Ani pawh a rawn uang leh nghal vat a, a ṭawngkam tin deuh thawah 'tlangval senior hausa' tih chu a rawn ri leh chhen tawh.

Enge a chhan pawh ka hre lo u Hruaia nen chuan kan inhmu fuh thei em em a, mahse min biak loh chuan biak bik pawh ka tum chuang lo. A chang hi chuan u Hruaia hian ka duh ru em em tih hi a hre ru tlat zelin ka hria. A hriat ka duh lo va, chutianga a hriat loh laia lo duh bur chu nuam ka ti rih. A motor-a kan chuan dun ni khan a laka ka rilru put hmang chu a hre vek emaw ka ti a, mahse a hre lo hlauh a ni ang engmah a sawi zui tawh lo. Ka ngaihtuah let hian Valentines Day-a ka thiltih te kha a zahthlak ka tih rualin a hlimawm ka ti leh lawi si a, khang thilte kha lo ti lo ila chuan tun ang hian ka awm miah lo vang.

Ka phone chu ka khawih mial mial a, a ngai te bawkin Instagram chu ka khawih leh nghal char char. U Hruaia account chu ka check leh a, thil post thar a lo nei ve ngei. 'Ka chhungkuate' tiin an chhungkaw thlalak chu a lo post a, comment pawh an ṭhahnem leh ngei mai. Mi comment dan vel chu ka chhiar thla char char a, a ṭhen chu over fe fe an tam khawp. Comments a zawhna ṭhenkhat chu a chhang a, a tam zawk erawh a chhang lo hrim hrim.

Monday aṭanga Friday chu regular takin class kan la a, Saturday leh Sunday-ah hi chuan indah free ve hram hram hi ka duh ṭhin. Saturday zing a lo ni a, ka nu chuan a nawm sam loh deuh avangin chawhmeh lei turin min kai tho a, keipawh insiam sawk sawkin bazar tur chuan ka kal ve nghal. Ka pa erawh a tih ṭhin dang ang bawkin inkhel turin a chhuahna a rei leh tawh thung. Chawhmeh bazarna tur hmun ka thlen chuan zingkar nimahse mi dang bazar ve chu an lo tam tawh em em a, Muṭia ṭhenkhat lahin bungrua an lo phur kawi ve chhen bawk nen kawng pawh a chep khawp mai. Chutah motor te lah chu an la tam em em zui bawk a, mihring an hliam palh tih pawh a hlauhawm zawk.

"I bazar ngai si lo a" ka hnung lam aṭangin mipa aw hian a rawn ti a, keimah ka nih loh ka rin avangin hawi let lovin ka hmaa chawhmeh lo zuarnu chu biain behlawi rah chu a man ka zawh chhunzawm nghal.

"Ka pi, ka lo duh ve ang e" ka hnung lawk aṭang mipa aw bawk hian a rawn ti leh a, a aw chu ka hriat hnu a an êm avangin ka hawi let ta tawp a, u Hruai lek chu a lo ni.

"I va tho hma ve?" min si cheta ding hian a rawn ti leh a, insi deuh thawa kan din avang chuan ka zamin ka awm a nuam lo ngei mai.

"Nia, ka nu a nuam sam lo a, ka awl ve a nih hi" pangai tak chuan ka tichhuak thei hram a ni. Behlawi rah man chu pein chawhmeh dang chu ka en phei nghal zel a, u Hruaia chuan min lo zui ve zel. Enge a hriat ni!

"Nula nih chuan thawh hma tur alawm" ngeiawm rawngkai lek lek hian a rawn ti leh a, ka sa ve ta deuh phat.

"U Zualtei pawh a tho hma bik chuang em ni? Nangmah a nih hi bazar daih" amah en chuang lo chuan ka ti ve a, ka hmazawna tomato awm chu a zuartunu hnena ka duh thu hrilhin ka ding a, u Hruaia pawh chu a ding ve leh ringawt tawh.

"Chuvang alawm nula chu thawh hma tur ka tih" ka beng bul chêtah chuan a rawn ti a, mi dang chuan an hre pha kher lo vang.

"Ka pi, kg 2 ka lo duh ve aw" a rawn ti leh nghal a, a aw te chu a dam leh thluam ang lawi bawk sia.

"Nang hi Aizawl DC thar kha i ni em?" ka chawhmeh leina tur nu chuan u Hruaia en chung hian a rawn ti a, ka bula mi chuan a nih thute chu a sawi ve mai bawk.

"I va hmelṭha em, chuan kha ka lo free ang che" tiin ka ta tur pawh buk hmasa lovin u Hruaia ta tur chu a siam sawk sawk a, a la pe daih zui.

"A ngai lo ve, hah taka in thawhchhuah a ni a, ka lo lei ve ang" tiin ka bula mi chuan kan hmaa mi chu a lo hnar fithla ve ṭhak a, a ruk tak chuan ngei viau mah ila ka ngaisang ru em em tho.

"Ka pi, ka ta tur chu min lo buk ve tawh la" ka tichhuak ta nge nge. Ka bula mi chu a lo nui deuh dawt a, ka en chuan nui hmel pakhatmah ka hmu tawh lo. A nui hmel hi engvanga hmu khat em em nge ka nih pawh ka hre lo. Chawhmeh chu enin ka kal phei zel a, u Hruaia lah chu ka hnungah a lo la kal ve reng.

"I thinrimna a ho ê" engvanga min be reng nge a nih hre chiah lo mah ila ka awm a ti nuam lo. A mi uap a na lutuk hi a hrehawm letling zawk a ni.

"Ka thinrim reng reng lo, nang aiin ka dawr hmasa a, chuvang chuan min pe hmasa mai tur a ni" ka ti nghal bawrh bawrh a, thinrim lo ti mah ila ka ṭawng danah erawh ka thinrim tih a hre vek ang.

"I thinrim tih ka hre thei" a rawn ti leh hram. A ṭawng chu tawi thei viau mahse amah nen chuan inhmeh ka ti ru em em zel tho bawk si. Aaaaaaa....ka inhrethiam lo, keimah zawk hi!

"I va tho hma zawk ve" kan inhnial tak tak mai dawna ka hriat avangin thu dang chu ka sawi ta daih a, ka dinin a ding a, ka lei apiang chu a lo duh ve zel bawk. A awm dan chu ka hrethiam lo, nge a ni hian ka duh ru tih hre chhuakin ka lakah hian thuneih a tum ringawt zawk?

"Ka tho hma ziah alawm" a rawn ti leh mai a, ngei duh tan chuan a ngeiawm ve chiang a ni.

In ka thlen chuan ka nu chu a lo la mu a, kan awmpuinu langa lo kal ṭhin pawh a lo awm ve tawh. Ka chawhmeh leite chu phawrhin kan silfai a, titi bawrh bawrhin chawhmeh chu ka siam dun nghal.

Hun a kal a, vanneih thlak takin KṬP group inelnaah chuan kan group chu a pumpuiah pakhatna kan ni ve hlauh. Lawmanin pawisa a ken tel avangin kan hruaitute chuan group member te inpawh lehzualna atan tiin picnic an rawt a, kan phur hlawm hle. Picnic na hmun tur pawh Nextcom Resort-ah ngat a ni a, member ho chu phur tawh tak ka ni. Feli chu kan picnic tur thute ka hrilh ve leh a, rawn kal ve a tum leh ringawt tawh. A chhan ka zawh lahin a sawi ho nasa mai bawk si. He nu nena kan inbiak hi chuan a changin kan nui a, a chang leh kan thinrim leh em em bawk ṭhin. Nikhat pawh hi inbe lovin kan awm thei lo hi a ni tawp.

Kar khat a ral leh meuh chuan kan picnic ni pawh a lo thleng ve ta reng mai. Kan picnic naa u Hruaia a lo kal ve tur chu ka va'n lawm tak, kei ang thovin hmeichhe dang ho pawh chu an lawm tih ka hre thei. Saturday a nih avangin a hman ve ah ka ngai a, ni lo se chuan a lo kal pawh ka ring lo. A hmun kan thlen chuan u Hruaia te chu an lo la thleng lo va, a hnu deuh hlekah u Zualtei leh kan group hruaitu ṭhenkhatte nen Bolero bawkin an rawn thleng ve nghal. Motor aṭanga a rawn chhuah tirh chuan ralkhat aṭangin ka lo en reng a, a inthuam dan bawk chu a va inhmeh leh tak em. Sunglass dum hi a rawn vuah a, Short pant vut rawng hain T shirt var a ha leh bawk. A ruka thlalak sak tawk chu an awm leh ngei ka ring a ni.

Keipawh ka Camera roh em em Canon ngei mai chu ka keng ve a, mi chetla lai vel chu thla ka lo la ve char char. Thlalak hi chu ka u Hruaia vang vek hian ka tui ve mai mai. Khatia u Hruaia ka star ṭan tirh aṭang khan ka pa chu Digital Camera lei ka dil a, u Hruaia lo haw apiangin a thla ka lak ruk sak ṭhin. Chutia a ruk vela ka'n ti deuh thlap te chu Feli chuan a ei lo thei hle a, a ruka thla la ṭhang tih takah thlalak ruk hi chu ka hneh ve em. A tam zawk chu tuiah an inchiah a, tui hleuh chu thiam em em lo mah ila inchhan thei tawk vel chuan ka thiam vein ka hria. A ṭhenin ei rawng an bawl a, a ṭhen kan intihlim bawk. A kalkawng a hrehawm deuh tih mai loh chu a nuam tak zet.

U Hruaia in chhung vela mi dang nena an inbe lai vel chu ka capture zeuh a, min hmu lo chuan ka hria. Ka bag-ah Camera chu khung ṭhain swimming pool lam chu ka pan a, a ko tlangah ṭhuin ka ke chu ka chiah ve nghal. Chutia ka ke ka chiah lai chuan tui chu mi pakhat hian rawn dive in a rawn hleuh phei nghal a, a hmel tui chhung lama a awm avangin tunge a nih erawh kan hre thei lo thung. Bang tawp a thlen chuan a ṭhu chhuak a, a swimming spec a phel chuan u Hruaia a ni tih ka hre chiah. Tawnzau var ha mahse a taksa chu tuiin a chiah huh vek avangin a lang tlang ti tih a, a duh vel pawh model ang maiin a phiar nalh hle. Chutia a awm vel chu thlalak sak châk hle mah ila ka bag chhungah Camera a awm daih tawh avangin a hmuh loh laia lo en tawp mai loh chu tih theih pawh ka nei lo.

Kan haw tlai lutuk lohna'n tiin tlai 3 velah chuan chaw kan ei a, kan chaw ei lai erawh chuan thla chu ka la ru leh hman hram. Mi dang chuan kan chaw ei vel chu thla ka la emaw tiin an lo in post a, mahse an rin loh deuh thla ka la tih reng an hre si lo. Kan haw dawn tak tak tawh tihah chuan ni tla tur chuan ka mit a la ngei mai. Pool bulah chuan ka chhuk thla vat a, tuia van leh ni vel lang reflect mawi lutuk chu ka hmet nghal mial mial.

"A mawi a ni" tia mipa rawn ṭawng awm thut avang chuan ka phu lutuk chu ka Camera chu tuiah ka thloh nghal a, hmanhmawh taka zuang lutin Camera chu ka zuk chhar leh nghal. Mahse a lo thim vek a, a chhe mai ang tih ka hlau lutuk.

"Ka tihpalh" u Hruaia chu ka bulah rawn pheiin ka Camera chu rawn en a tum a, ka phal ta ṭhak lo. Ka bula a ṭawng thut thut chu ka ngei lutuk. Chubakah Camera chu a chhiat vaih chuan a pawi a ni mai.

"I mawl em ni? Engatinge mi an phut dawn leh dawn loh pawh ngaihtuah lova i ṭawng thut thut? A chhiat vaih chuan aw" ka mi biak mek chu tunge a nih pawh ka ngaihtuah chiang thei tawh lo, ka huh vek bawk nen ka thinrim tak zet. Ani chuan ngawi reng hian min lo en a, nghet takin ka vuan emaw ka tih chu rawn phih thla sawkin Camera chu a endik nghal.

"Ka lo siam tir ang" a rawn ti leh ringawt a, ka lung a va dam phah si lo êm.

"A ṭul bawk lo, khawi keima'n ka siam tir mai ang" ka ti nghal pawng pawng a, lak let tuma ka beih pawh chuan min pe let duh miah lo. Chute chuan ka thin an tirim lehzual a, ṭah vak mai ka châk.

Kan thawm hriain mi dang ho pawh an lo chhuk thla ve sup sup a, hmeichhe ho chuan towel te min pein thil awmzia chu min lo zawt nghal. Keipawh chuan thu khuh ngai si, thinrim ru pah bawk si chuan ka lo hrilh ve liam liam a, thinrim lo ang taka awm chu ka ning ngei mai. Kan haw chuan u Zualtei chuan an bula chuang haw turin min nawr lui leh tlat a, peih lo vîau mah ila ka chuang ve leh ta nge nge. Passenger seat ah chuan ka ṭhu a, a khalhtu ker kur lah chuan front glass aṭangin min lo la en chhen zui. Vawikhat phei chu ka lo melh vak a, u Hruaia chu duhin star viau mah ila ka ngei thlâwt a ni. Ka hlauh ber chu ka thlalak ho kha a bo vek ang tih chu a ni. Ka chhuk dawn chuan u Hruaia chu ka Camera a ken daih chu ka dil a, ani chuan

"ka lo siam ṭha ang" a lo ti duh lek chauh. Ni e, a tih chhiat a ni a, siam ṭha mawlh rawh se tihna rilru ka neih avangin ngawi reng chuan ka chhuk thla nghal daih.

Hruaia POV

Bawihtei'n an group pakhatna an lawmnaa kal ve tura min sawm tlat avangin ka kal ve a, a chhan pawh ka nau hian min ngai nia ka hriat vang a ni. An bula hun ka hmang tam thei lo ṭhin chu pawi ka ti a, a theih phawt chuan an bula awm chu ka tum ve ṭhin reng bawk. Kan kal dawn te chuan Duati bawk chu a buaithlak leh ta. A ute pahnih kalnaah chuan kal ve a tum leh tlat a, ka pa bawk chuan a thlem lungawi thei leh hram. Picnic na hmun kan thlen te chuan mi an lo tam tawh hle a, hruaitute'n ka kal ve chu min lo lawm thiam leh hle bawk. Chutia kan inbiak lai vel chuan ka lam hawi zawnga thla la hi ka zuk hmu a, sunglass dum ka vuah avangin ani chuan ka hmu tih a hre lo thung.

Tuia mi inchaih dai leh cheng vel chu ka en a, ka chen ve chak avangin ka inthlak a, tuiah chuan ka dive lut ve nghal. A tawp ka hleuh thlen chuan ka ṭhu chhuak a, mite chuan min en hrek hrek tih pawh ka hmu thei reng. Min entute ka en let ve chuan nui sang hian min lo chhawn ṭhin a, mahse Nutei erawh chuan ka en apiangin a mit a la sawn ziah thung. Mite chuan min lo be siam siam a, keipawhin ngainat awm takin ka lo chhawn ve zel.

A chang hi chuan ṭawng duah hi ka ning ṭhin, mahse chuti maia min betute lo chhan loh tawp chu tih chi pawh a ni chuang si lo. Ka chhungte hi chu ka chhungte an ni a, a dan a dang. Hnathawhna leh khawlai vela mi dangin min biak te hian ṭha tak chuan ka chhang ve ṭhin ngei alawm, mahse zawhna leh sawi tur an ngah lutuk hi ka ning a ni. An ṭawng mai ni lo, an zawhna ho lam tak tak chhan ngai ve zel chu ka ning thei hle bawk.

Tlai lamah chuan chaw kan ei nghal a, chutia inkhawm ngai pawh ni lo an zinga ka tel ve ta ringawt chu ka inthlahrung hnuhnawh ngei mai. An leader chu ka ko hrang a, pawisa tlema zawng chu ka pe ve tawp bawk. Mi dangte bula sawi lan chu a tum viau a, mahse keimah zawk chuan duh lovin ka khap thei hram a ni. Kan haw dawn chuan ni a lo tla vel dawn chiah a, a mawi ngei mai. Pool bul aṭanga ni tla tur thla la mektu chu ka zuk hmu a, ka en chian deuh chuan Nutei a ni tih ka hre thei. A bulah chuan ka chhuk thla nghal a, ka awm ve ti pawh a hre lo a ni ngei ang.

"A mawi a ni" ka tih chuan a lo phu dawrh a, a Camera chu tuiah a la thlauh zui. Amah pawh chu tuiah chuan a zuang thla nghal a, a zuan thlak danah tui a hleuh thiam ni turah ka ngai ve hmiah.

A rawn chhuah leh chuan a Camera chu a check nghal zung zung a, min hau nghal bawrh bawrh bawk. Ka inthiam loh thu ka hrilh te chuan min melh rum ngei mai, a thinrim ve tak tak niin ka hria. Han thlem dan tur mai pawh ka hre lo va, chutianga ka hmaa thinrim taka min hau ṭhin an la awm ngai loh vang pawh a ni ang ka hamhaih ve hle. Chutah a Camera lak ka tum chu a lo sak ṭalh a, mahse ka laksak lui ta tho. Ka siam ṭhat sak tur thu ka sawi te chuan lawma hlim âwm zawk tak a nia, ani erawh a hlim teuh lo.

Haw lamah chuan ka nauin kan bula chuang tura a tih ve tlat avangin Nutei chu ka motor-ah a chuang haw a, front glass aṭanga ka en te chuan thinrim tak hian min lo la melh vak zui. Ka rilru chu a nui chhuak hawk a, pawn lamah erawh ka nui lang lo thung. A tukah chuan kan inkhawm a, zan lam kan inkhawm bang ka room-a ka lut tur chu ka pa chuan a room-a kal lawk turin min lo hrilh a, keipawh inthlakin ka pa room chu ka pan ve nghal.

"Engenita pa?" a room ka luh rual chuan ka ti a, ka pa hi chu a zahawm khup reng mai a nih hi!

"Lo kal teh hetah hian, thil i sawi dun lawk teh ang" tiin ṭhutthlengah chuan min ṭhutpui a, eng thil chu nge min sawipui ang tih erawh ka hre hauh lo.

"Pa, i va serious hmel ve, eng thil nge?" thil pawimawh tak sawi tur a nei a ni ngei ang.

"Eng lo a nia, nupui tur hi ka zawn sak mai dawn che emaw ni le ka lo tia" ka pa thusawi zet zawng ka besei lo lam daih a ni.

"Pa, chutiang teh daih maw!" a thusawi avanga ka hamhaih em avang chuan ka ti ta ringawt.

"Aw, ka hmuh dan che chuan ngaihzawng hi i nei ngai lo hrim hrimin ka hria. Duhtu che chu an awm ve ngei ka ring a, mahse engatinge tun thlenga ngaihzawng i la neih loh? Nupui te nei la, i fate pawh ka thih hma ngei hian ka hmu ve duh alawm" a rawn ti leh a, a hmel ka en lah chuan a thutak hmel phian bawk si.

"Pa, natna i nei em ni? Engatinge thihna lam i sawi?" ka hlauthawng nghal viau.

"Ni lo, ka ṭha lutuk alawm. Le, ka zawhna che kha min han chhang phawt teh" nui chunga a rawn tih leh takah chuan ka thaw ta huai.

"Dik taka sawi chuan ngaihzawng neih hi ka duh tawh lo a ni. Higher kan zir lai khan hmangaih deuh leh nupui atan hiala ka lo duh ngaihzawng ka nei a, kei anga chiaha min hmangaih ve emaw ka tih laiin ani chuan mipa dang lakah min phatsan a, chu chuan tun thleng hian keimahah nghawng a la nei a ni" ka tichhuak ta sup a, ka pa pawh chuan ka darah a rawn beng nghal thak thak.

"Chutiangin an beidawng mai ngai hleinem, tlangval i nih angin ngaihzawngte hi nei leh la i hlim zawk ang. Ka fapa i ni a, hetianga mal taka i awm hian i hlim lo tih ka hria alawm" a rawn ti dam ve dap a, mahni fate chu min lo chiang nge nge a nih dawn hi!

"Mahse tun hnai hian hmeichhe pakhat, ka ngaihtuahna luah rengtu chu an awm thar a" ka pa chu engkim ka hrilh hian ka thla a muang ṭhin zawk a ni.

"A va ṭha ve, i bel chiang tawh em? I rilrua a awm reng chuan i duh tihna a nih chu" ka pa chuan a rawn ti leh nghal zung zung a, a phur nghal viau chu mak pawh ka ti hran tawh chuang lo.

"Naaaaaaaaaa...... lo ngawi phawt teh pa, ka duh em tih tak chu ka la chiang lo alawm" lai deuh chuan ka ti ve ta vat.

"I ngaihtuahnaa a awm reng chuan i duh tihna ka tih chu maw lé. Keipawh i nu kha ka ngaihtuahnaah a awm reng ṭhin alawm, tun thleng hian a la awm a, ka la hmangaih reng bawk" a thusawi tawp lam chu a lung a chhe deuh a ang.

"A nih amah chuan min lo duh lo ta se" chu tak chu ka thil hlauh a ni. Ka kum chu upain tlangval senior rual kai tawh mah ila ka rilru erawh chu a la dawihzep em em thung.

"Amah chuan a duh ve che niin i hria em?" a rawn ti let ve nghal.

"Ka hre lo, ka en apiangin a hawisawn daih zel. Mahse, chutiang vela a awm chu ka ngaina viau thung lawi sí" Nutei awm dan mitthla pah chuan ka ti chhuak sap a, ka rilru chhung mak tak maiin a hlim bawk.

"Aw le, i duh thu hrilh tawp rawh" ka pa chuan a rawn ti chhuak ta phawng mai.

"Ni lo ni lo, min lo duh lo ta se ka tan a zahthlak dawn lutuk" ka ti ve nghal vat, a tih chi thlâwt loh.

"Âwwwwwwwww ka fapa, Aizawl DC meuh ni ve si hi i va han zei lo lulai êm. Mipa i ni a, hmeichhiate'n an duh thu che sawi hmasa turah ngai suh. Chuta karah i hnathawh hian a lo zir bawk nen an zah lehzual dawn che tih hre ta che" nui huah huah chung chuan a rawn ti a, nuih za em em lo chuan ka nui ve ta suk ringawt.

"Apa, i bulah ka lo mu dawn" Duati chuan room-a rawn luh pahin a rawn ti a, ka pa pawh chuan a mal chungah a lo pawm nghal.

"Duati, engatinge tun lai hi i room-ah i mut duh loh ṭhin?" ka pa chuan a lo zawt a, Duati lah

"Ka mumang a mak thei em mai" a lo ti mai a, mangchhia a mang ṭhin te pawh a ni maithei.

"Pa, anni ang puitling pawh la ni lo hi chu room hrana riah tir kher ṭul ka ti lo a ni. Khawthlang ho tih dan hi kan la lutuk mah mah a, kan hnam leh nihna erawh Mizo tho a ni sia" ka ngaih dan dik tak a ni. Anni ang kum hi chu nu leh pate kara la mu rual lek an ni hrim hrim.

"Ni e, i sawi chu a dik ve chiah tho. Duati, i room-a mut aiin ka bula mut i duh ṭhin em ni?" tiin ka pa chuan a zawt leh a, Duati chuan

"Aw, duh e" a lo ti awlsam ve leh mai bawk.

"A nih chuan zanin aṭangin ka bulah i mu char char tawh dawn nia" ka pa'n a tih chuan Duati chuan a kuah chung chung reuh a, keipawh room chu chhuahsan tumin kawngka lam ka pan nghal.

"Mama, ka sawi kha aw" ka chhuah dawn ṭepah ka pa chuan nui chung hian a la rawn ti hram a, lu buk khum nghauhin ka chhuak ve nghal.

A tuk a lo ni a, ka office lama kal pahin Nutei Camera pawh ka keng ran bawk. Chhun chawlh a lo nih chuan ka tho a, hmun danga thil ei ka duh rualin zing lama Camera siam tura ka dahna dawr chu kal pah ka duh hrim hrim bawk. Dawr ka va thlen chuan an siam tura ka tih chu an lo peih fel vel chiah a, a siamtu paw'n tui aṭanga lak chhuak leh vat a nih avangin siam a harsat lutuk loh phah thute chu a lo sawi ve luam bawk. Camera-a memory card lo awm pawh ka lo phawrh lo hi a lo nia, mahse a siamtute chuan min pekir leh thlap. Pawisa te pea lawmthute ka sawi hnu chuan ka office lamah ka inkhalh phei leh a, Camera erawh ka la en chhin lo hrim hrim.

Ka hnathawk haw in ka thlen chuan ka pa chu a lo la haw lo va, Bawihtei leh Duati chiah an lo la awm. Ka room-ah chhovin ka inbual a, inthlak felin inhnuai lamah chuan ka chhuk leh nghal. Rei lovah ka pa pawh a rawn thleng a, chaw te kan ei kham hnu chuan ka room-ah bawk ka chho leh mai. Ka phone chu ka phawrh a, Nutei chu a Camera a ṭhat tawh thu hrilh ka tum ûk a, ka ṭhulh leh ta rih zawk. A Camera chu a ṭha tak tak em tih chu fiah phawt ka duh a ni. Chuti lo zawng a thinchhe ve sia min lo vin leh hrep reuh ang tih a hlauhawm. Camera chu ka on a, thlalakna te chu ka test vel bawk. Eng thlalak lam nge a tui zawng tih ka hriat chak avangin Camera-ah chuan memory chu ka vuah a, chuta ka thil hmuh chu ka va beisei lo em.

Kan picnic ni a ni tla tur thlalak tih loh chu keima thlalak vek hi a lo ni a, thil awmzia ka hre lo ngei mai. Henu hian min chhui ru ti dawn ila a nih hmel bawk si loh. Delhi ka awm tirh a ka haw leh hnua ka bike sil lai te, tun hnai mai ni lo tun hmaa Mizoram ka awm lai thlalakte chu a lo tam ngei mai. Ka ngaihtuahnaah chuan thil eng emaw a rawn lut zawk a, ka file hawngin ka la chhuak nghal vat bawk. Valentine's Day nia Duati kaltlanga ka card dawn chu ka en a, ngaihbel tum lo mah ila ngaihbel loh theih a ni lo. Ka motor-a kan chuan laia card min thawntu a nih leh nih loh ka zawh khan a nih loh thuin min chhang a, ringhlel deuh mah ila a thusawi chu ka awih ta zawk kha a nia.

"Ka duh lutuk che, kum 5 lai ka duh tawh che" tih card-a inziak leh rose sen mawi tak Valentine's Day-a ka lo dawn tawh chu ka en vawng vawng a, a kum zat inziak chuan ka rilru a pawt peng nghal. Camera chu en lehin ka thla a lo lak ruk kum te chu ka en a, card-a a inziak dan nen a inmil vel vek. Ka duh chiah em tih pawh ka la hriat loh mahse ka ngaihtuahnaa awm reng ni si Nutei chuan min lo duh ru reng tih ka hriat chuan mak ka ti a, ka hlim phah pawh ka hre chuang lo. Ani chuan kum 5 lai min lo duh tawh maw? tih ringawt chu ka ngaihtuah a, a chhanna erawh ka nei hauh si lo. Ni e, ka pa sawi ang khan ka ti tawp mai dawn tiin ka rilru ka siam fel a, Nute chu Whatsapp aṭangin message leh Camera thlalak vel chu ka thawn a, a lo online lawk sa avangin a seen nghal.

"Mission Vengah in vel kan buaipui a, ka hman hunah ka lo lam ang. Chuan, ka lawm e" tih hi a rawn thawn a, mahse chuti mai chuan ka rilru chu a awm mai mai theih hauh lo.

"In awmna sawi rawh" ka ti leh ringawt a, Whatsapp vel aṭanga inbiak hi chu ka peih lutuk lo, mahse kan khawvel changkannain a ken tel a ni tlat bawk si a, ka tilui ve mai mai zel a ni.

"Eng atan?" a rawn ti ve leh nghal.

"Ka lo kal dawn" ka ti a, phone chu khuma dahin ka insiam zui nghal. Ka insiam zawh chuan ka chhuah lawk tur thu ka chhungte ka hrilh a, ka pa chuan a lo hrethiam a ni chek ang a lo khi ver ver mai. Keipawh nui sukin ka chhuah ve tak kha!

"Lo kal kher duh suh, a buaithlak mai mai. Ka hman hunah ka lo lam mai ang" tih message chu motor-a ka ṭhut luh ruala phone ka en chuan a lo awm vang mai, ka tum laklawh tawh avangin ka call chhunzawm nghal zat.

"Hello" a aw té chu a tham reuh em em leh nghal.

"In awmna sawi la" pangai tak chuan ka ti a, ka inkhalh chhuak nghal bawk.

"I lo kal tak tak em ni? Ihhh......kan awmna lai hi Mission Veng daih a nia" a rawn tih chuan ka duh tak min la hrilh loh avangin ka lo ngawi reng thung.

"I lo kal tak tak a nih chuan biak in thlang deuh hlekah khan lo tlan thla zel la, ka lo awm mai ang" a rawn tih chuan ka phone chu ka off a, a sawina lam chu ka pan nghal. A sawi ang chuan ka hmuh ngei turin a lo awm a, a zawn ka thlen chuan min lo en ve kiau.

"A chhungah sawn a park theih a, lo park zawk rawh" tiin gate chhunga in kawt zawl zau deuh chu min kawhhmuh a, mahse la ding reng chung chuan

"Lo chuang lut lawk teh, thil sawi dun tur kan nei" ka ti ta zawk.

"Maw!? Camera chungchang kha em ni?" a rawn tih leh chuan ka lo bu nghauh a, a chhungte awmna lam chu a thlek zeuh zeuh a, a hnu deuhah chuan ka motor-a luh chu a rawn tum ve ta.

"Hetah rawn ṭhu rawh" a hnung lam kawngkhar a hawn lai chuan ka lo ti a, ka hmelah ka thutak tih a hria pawh a ni ang ka sawi ang chuan a rawn ṭhu lut ve mai bawk.

"Camera chu a ṭha tawh tak tak em? Nge nang hian min bum mai mai zawk?" kan tlan lai chuan a rawn ti a, a chhan pawh ka chhang buai peih lo.

"Nang hian ka chungah thil ṭha lo tih i tum em ni?" kan tlan thui ve tawh bawk nen a hmela hlauhthawnna ka hmuh chuan ka inthiam lo ve deuh.

"Tum lo ve" ka ti ve leh mai a, mahse ka chhanna chu a duhkhawp vak lo a ang.

"Khawnge ka Camera chu? Ka lo check ang e" tiin min dil a, keipawh chuan motor khalh pah chuan ka la chhuak a, ka pe ve nghal.

"A ṭhat vek tawh hi, engatinge hetianga min hruai?" rilru nuam zan lo chuan a rawn ti leh a, a ṭawng reng chu ka hne ṭep tawh.

"Kan thleng ṭep" ṭawng loh aiah chuan ka ti a, a thawk hawk avang chuan min hlau ni maiin ka hria.

"Khawnge kan kal dawn?" kan ngawih reng hnuah chuan a rawn ti leh hram a, New capital kawng reh tak chu kan thleng thla a, hmun zawl zau deuhah chuan motor chu ka tiding ve zui zat bawk.

"Engatinge kan din? Nang hian hetiang lai hmun rehah hian min pawngsual i tum em ni?" a hma ai zawnga hlauhthawn hmel chuan a rawn ti a, kawngka hawn a tum chu ka lo lock nghal vat.

"Khawngaihin ka chhuk duh, min chhuk tir rawh" a rawn ti leh ṭiau a, a hmel ka en chuan a lo ṭap tak tak. Eng thil nge ka tih tak hi!

"Engtin mah ka tina dawn lo che" inthiam lo deuh chuan ka ti chhhuak ta sup a, mahse ka thusawi chuan amah awmzia a nei vak lo.

"Khawngaihin min chhuk tir hram rawh" a hlauhthawnna chu a la reh lo tih ka hria.

"Engatinge i la thup reng?" ka ti chhuak ta ringawt a, min lo en vat a, a lam ka hawi phei chuan a hawisawn rang ngei mai.

"Card kha nangma min pek tir ti raw?" pangai tak chuan ka ti leh a, a ṭap ti tih pawh chu a reh ta deuhin ka hria.

"Aih, ka ni lo. Ka sawi vek tawh kha" a rawn ti leh a, ka hriat chu a hlau ve hle a nih dawn hi!

"Engatinge min duh tih hi ka lakah i zep?" ka tih leh chuan ṭah chhuak hmel reng a pu tawh lo.

"Engtinnge i hriat?" rei fé a ngawih hnuah chuan a rawn ti ta ringawt.

"Camera leh Card aṭangin" ka tih chuan a hmai a sen nghal viau a, a chhan erawh ka hre lo hle thung.

"Kan haw thei tawh ang em?" a aw chu a hmai ai chuan anrawn pangai ta deuh bawk.

"Engatinge haw chu i duh?" ka zawt lo thei lo.

"Ka zak alawm maw le" hmai hup chung hian a rawn ti vak a, ka nui chhuak teuh ngei mai. Tunah chuan ka man chiang tawh bawk a, a zep buai peih tawh lo te pawh a ni ang. A sam te chu a pawt vak vak a, a zak ve tak tak te pawh a ang.

"Min duh ti raw?" kan ngawih reng takah chuan ka ti chhuak leh sep a, a ka ngeia min duh thu a sawi chu ka hre châk tlat.

"Enge chutiangte min la zawh ṭalh a? I hriat vek tawh kha, haw tawh hram teh ang. Rizaia inkhuh vang vang ka châk tawh lutuk" a rawn ti leh bawrh bawrh chuan ka nui chhuak ta suk a, mak ti deuh hian min lo en ve reng a, keipawh ka nui chu ka tawp ve nghal riai riai.

"I nui ve maw? A awihawm loh zawk" a rawn ti leh reuh a, chutia ka nui mak a ti chu mak ka lo ti let zawk.

"Ka nui thei lo em ni?" kram deuh hmak chuan ka ti let ve nghal.

"Kha leh chen kha i nui hmel thla lak tumin ka veh de de ṭhin che a, tuna i nui hmel han hmuh thut hi chu ka tan chuan a mak alawm" a zak lutuk chu a zak lo lui vek tawh ni berin ka hria.

"Ka zawhna kha chhang la" ka tih leh chuan min melh rum ngei mai.

"Khawngaihin i chhungte bulah sawi lo teh aw" ka zawhna pawh chhang chuang lo chuan a rawn ti daih a, ka nui leh ta nge nge.

"Ka hre lo le, ka laka i fel leh fel loh a zir a ni mai" ka ti ve ta duah a, a hmel ka en chuan ei loh hmel zet hian min lo en a, a va lawmawm reuh tak.

"A pawi lo, hre tawh mahla. Kan insawn daih dawn tho" a rawn ti leh a, amah leh amah chu a inhnem chawp tawh vel.

"Khawnge in insawn dawn?" kei chuan ka lo ti nghal vat thung.

"Khîta ka lo awmna bula inah khan, ihh..... thil vel hi u Zualtei hrilh miah suh aw, ka zak a nia. Ka zah berna tur nangin i hre tawh a, mi dang hriat kha ka zah loh phah chuang lo" a rawn ti leh nghal zet zet a, he nu té reuh hian min control a tum ve reuh em ni?

"Ka zawhna kha" ka lo ti leh sup takah chuan a thaw hak a, min chhan chu a hreh ngei mai.

"Duh e, ka duhna che a rêi tawh. Mahse, hetianga a ruka duh chea a ruka duh loh leh mai che hi nuam ka ti zawk" a rawn ti ta nge nge.

"Min duh loh lai chu i neih miah lo kha" ka runluih duh ve hrim hrim tlat.

"Enteh, haw tawh teh ang. Zah nen, i zawhna hi ka chhang reng peih lo, ka ning tawh teh mai a nia" a rawn ti leh hmak hmak reuh a, a awm dan leh ṭawngkam lawmawm thláwt a ni.

"Ka lawm e" ka tih chuan a thusawi nen a inzawm lo bawk si a, a rawn hawi â nghal viau.

"Engvang chuan maw?" a rawn tih chuan

"Card avang khan" ka lo ti ve mai bawk.

"Kha kha maw, Feli'n ka zak chung chung min tihluih tir a nih kha! Keini ni lo aṭanga i dawn hnem dawn dawn nen, lawmthu chu sawi der vel lo mai teh. Haw tawh ang" a rawn ti leh luam a, ka zia leh a zia té chu inang lo vîau mahse ka ning chuang hauh lo.

"Nangma hnen aṭang chiah card ka la dawng" a hmel aṭang chuan chu thu ka sawi chhuak chu mak a ti tih ka hre thei.

"Ka awih kher lo ê, nangni chu in hausa a, in hmelṭha a, hmeichhe duhtu leh card thawntu tur pawh in ngah dawn tih ka hria" a ṭawngkam chhuak reng reng chu ka lawmah a lo tla zel.

"Ka hmelṭha tih chu ka hria" ngeiawm deuh tak chuan ka lo ti a, a rawn ner nang mai.

"Ka rin ang i lo ni tawp lo mai, i nghal zêk dawn a nih hi" a rawn ti chhuak leh ta phawng mai.

"I ṭawngkamah aia upate zahna a awm lo" ka tih leh chuan a rawn nui chhuak hawk a, a nui hmel duhawmzia chu pui tak a ni.

"Ni tak e, kan kum hi a inthlau ve bawk si. Ka pu, haw phawt mai teh ang" ngeiawm deuh chuan a rawn ti ve ta.

"I pu rual êm chu ka ni lo"

"Ti leh bawk sia, engtia han koh nge i duh vel kher a?" zahna chu a tlachham tawlh tawlh hi a ni ber.

"Engtinnge ka hriat loh laiin min koh ṭhin?"

"U Hruai ka ti mai, enge?" a ning tawh bawk a ni ang a ṭawngkam chu a pawr ta sawt hle.

"Khatiang khan kan inhmuh ni khauah min ko tawh dawn nia" ka tih chuan a lo ner nasa ngei mai.

"Ka duh têuh lo, ka zak e a! Chubakah nang hi chu LALHMAHRUAIA dang daih i ni tawh, a ruka ka duh ṭhin pa kha u Hruai chu a ni" a rawn ti ve khar khar a, engtinnge thuhmun reng chu kan dang daih theih reng reng ni.

"Hming pumin min ko suh" ka tih chuan a rawn nui ṭiah ṭiah a, ka lo en hrawk thung.

"I lo zak der a ni maw?" a zak lo ta lutuk chu mak ka ti a ni.

"Ka zak lo lui tawh tawp a ni hi! Tunge ka tawn ang hi tawng ta se zak lo bika i rin? Hming puma koh chu i duh lo ve hle mai maw" rawn ti chung chuan a la nui sâwng zui.

"Haw teh ang" ka ti ram hmak a, enge ka thinrimna chhan ber pawh chu ka hre lo.

"I sawi har ka ti tawh reng a ni" a lo ti ve leh nghal.

"Bialpa i nei em?" kan tlan lai chuan ka ti a, min chhan dan tur chu ka ngaichang ru reng bawk.

"Bialpa neih chu natna mai mai, nei lova hetianga star ruk neih hi a nuam ber" a va han ngampa sawt ve le.

Chutia a rawn sawi avang chuan tlêmin a laka ka rilru awm dan chu sawi ka hreh phah a, hrilh lova awm chu ka thlang leh ta zawk. Mahse, a sawi dik chiah. Bialpa emaw ngaihzawng emaw neih chu natna mai a ni. Min lo hmuahna thleng chu ka thlah leh a, keipawh kan in lam panin ka tlanchhuak leh nghal. In ka thlen chuan ka pa chuan

"Mama, enge zanin chu?" hriat chak hmel deuh hian a rawn ti a, kei ai aiin ka pa chu a phur emaw a tih theih.

"A vawikhatna atan chuan a chhe lo turah ngai ang" ka tih chuan a rawn nui vur vur a, keipawh ka nui ve ta suk.

"Eng maw u Mam? Pa, eng thil maw ka hre ve duh?" Bawihtei chuan a rawn ti ve nghal a, ka pa leh kei chu kan lo nui dun hak ringawt.

Ka room-a ka luh chuan inthlak pawh inthlak lovin ka mu zangthal a, Nutei hmel chu ka mitthlaah a rawn lang leh nghal. Min duh thu ka hria tih a hriat laia a hmai sen hlar te kha a inhmeh viau lawi a, amah tawp chu ka ngaina a ni. Sangtei nena kan inngaihzawn hnua ka hmeichhe buaipui hmasak leh ber a ni a, engtinnge kan awm dawn tih chu Pathian leh Hun kutah ka dah tawp.

Chapter 6

Nutei POV

A pawi, a pawi, pawi zawng zawngah a pawi ber. Engtinnge ka ât theih em em zawk? Engtinnge Camera-ah a thlalak a awm ṭeuh tih ka theihnghilh theih zawk? Zonunmawi i ât man i hmu. Keimah leh keimah chu ka inhau a, ka zak ngawih ngawih hi a ni mai. Chutianga han zah leh han inzilh vak chuan sawtna a nei tawh der si lo. Ka room-a ka lut chiah chu ka hmai ka phih a, ka maimitchhin rual chuan u Hruaia'n min man chhuak lai chu ka mitthlaah a rawn lang nghal. Ka va han zak thar hnuhnawh tak em. Ka zak lutuk kha ka zak lo der vel tawp te kha a ni a, mahse hnai taka a nui hmel ka hmu kha chu mak ka tiin nuam ka ti. Ka thil tawn zawh chiah avanga awm ngaihna hre lo leh tih ngaihna hre si lo chuan Feli chu ka call tawp a, ani hian ka rilru pawh a tihahdam leh thei deuh mahna.

"Enge?" a rawn ti pawr vak a, leh vak vak ṭhin hian a!

"I va pawr nghal ve" ka ti let ve vak.

"Ka nu'n min hau a, ka mood a off vek alawm" a rawn ti ṭha ve leh mai bawk.

"I mood kha lo off lûl suh se, kei hi min hnem a ngai" ka tih chuan a rawn chek nghal tlak tlak a, chek tlak tlak mahse min hnem leh dawn tih ka chiang ve em.

"Enge i lo tawn leh bik tâk?" ka counsellor hi chu a ni ve chiang alawm.

"U Hruaia'n a hre tawh. Ka duh tih a hre tawh a, zanin khan min man chhuak. Ka zak lutuk hi awm ngaihna pawh ka hre lo" ka ti nghal zung zung a, ka sawi lai te chuan ka mitthlaah u Hruaia bawk chu a lang leh tawh.

"A ṭhat hlauh chu, hre ve tawh em em rawh se" a rawn ti daih thung.

"Ka zakin ka rilru a hah tih hre rawh, khatiangin min hnem lo teh" ka ti leh nghal tawn tawn.

"Engtinnge a hriat chhuah theih reng reng â?" a rawn ti leh chuan ka thil tawn leh thil thlen dan chu ka hrilh nghal zung zung bawk.

"Tlangval senior tih takah a khirh hle a nih chu, chuan a duh ve che a ni lo maw" a rawn ti leh daih a, min duh tih thu a rawn sawi chu khawvela ka thil awih loh berte zingah a tel ngei ang.

"Chekhirnu, min duh dawn lo rapthlak lutuk, nang pawhin i sawi vek tawh kha" tiin ka chhang leh nghal a, u Hruaia chuan keini ang hmeichhe ṭawngthei lutuk chu min duh lûl lo vang.

"Khatiang khan min ko reng reng suh ṭawngtheinu, a duh loh che chuan a motor-ah pawh i chuang tawp nang. Chubakah chutiang zawhna mak tak tak pawh chu a zawt lo vang che" duhthaw tak chuan min rawn chhang let ve nghal.

"Awi awi awi, ka rilru hahdam nan tiin ka lo call ve che a, ngaihtuah loh tur tûr min ngaihtuah tir leh dawn a nih hi! Ka dah dawn, naktukah min lo sawm dawn nia" tiin ka phone chu ka off nghal hmak a, mahse a rawn call leh nghal zat.

"Enge?" ka lo ti ve vak.

"Ṭawngtheinu, kan veng a inang tawh lo tih hre ta che, kan awmna aṭanga in awmna thleng thleng nangmah rawn hruai tur che chuan min beisei suh. I scooty khan lo kal ve mai rawh, College-ah kan inhmu dawn nia" a ṭawng zo chu phone a off ve nghal hmak.

Eng âng pawhin hun kal tawha kir leh siam ṭhat tum mah ila a theih tawh loh tih ka hriat chian em avangin ka ngaihtuah buai peih tawh lo. College kan kal ni tin a, zan lamah zirlai ka en ve ta fo. Exam a hnaih leh tawh bawk avangin zirna chu ka ngaipawimawh thar hle. Keimah hi thiam thei lo zawk zawk chu ka ni lo va, mahse topper emaw thiam thei over ang chi kha chu ka ni bik chuang lo. Chutiang bawkin ka ṭhiannu pawh kan class-ah chuan a thiam pangai tak a ni a, mahse kei ai chuan lehkha zir lam a thatchhe deuh. U Hruaia'n min man chhuah ni aṭang amah chu ka hmu hreh ta em em a, vanneih thlak takin kar khat hnu lawkah Mission vengah kan insawn phei hlauh. Tlêm chuan hrehawm chu ka ti ve deuh, a chhan chu Felite ina ka len theih tawh dawn loh bakah u Hruaia chu ka hmuk ru theih tawh dawn loh vang a ni.

Ka rin loh deuhin Instagram-ah chuan notification a lo thleng a, mi live vel mai mai a nih leh ringa ka en chiang chu ka kà hau mai. U Hruaia chuan ka thlalak post hmasak ber chu a lo like a, engvanga ka thlalak post hlui ber leh ka chhiatna ber chu lo like kher nge a nih ka hre lo a ni. A awm dan leh ṭawng duh dante hi ngeiawm viau ṭhin mahse ka ngei rei thei lo, ka duhna hian ka ngeinate chu a hneh leh vek zel. Kha zan, min man chhuah zan aṭang khan ka hmu leh tawh ngai lo va, ani pawhin min hmu ngai tawh lovin ka hria. Feli sawi angin min lo duh ve chu ni se ka number a nei a, kan awmna veng a hre bawk a, mahse keini ang naupang mai mai chu min duh ve ka ring thei lo a ni. Ani chuan nula hmelṭha leh hleitling, nula zahawm tak ang chite bak a duh dawn lo tih ka hriat chuan ka lo duh ve vel chu ka insit thar ngei mai.

College lut tir chauh ni mah ila exam chu kan hmachhawn a ngai tho si. First semester kan han exam a, Feli pawh a thiam lo em em bik lovin ka hria. A bik takin Sir Joseph-a subject chu a thiam bel bik em em hi a ni ringawt. Khatia Sir in hawihawm taka a hnawlna khan a tha a tina tlat pek a, beidawn a la tum lo nasa a ni. Keini ṭhian dun hi chu mi kan star vak a, kan va star-a ten' min star let ve der si lo hi a buaithlakna a ni. Kar khat chhung kan exam hnu chuan kan zo fel thei ta, ka thaw pawh a veng hawk. TV vel aṭangin u Hruaia chu ka hmu leh zeuh zeuh zel a, ka ngai a ni. Ka bialpa leh ka ngaihzawng ni miah si lo hi ka ngai em em a, a ruka a hmel hmu tura ka awm ṭhin te kha ka ngai. Tunah chuan veng inang lovah kan awm tawh a, duh viau mah ila ka duh ang chu ka tî ka ti thei tawh lo.

Exam kan zo tawh tho tiin ka khumah chuan ka bawk a, ka phone chu ka khawih leh nghal mial mial. Facebook-ah chuan lutin online ka tum a, rei erawh ka awm peih leh ta lo. Instagram-ah ka lut leh a, thlalak ṭhenkhat chu ka like nghal zung zung. A hnuah Whatsapp-ah ka lut leh a, Feli message pawh a lo awm vang mai. Ka reply nghal a, a ni erawh a online leh tawh lo thung. Chutia ka khawih lai chuan phone call hi a rawn lut a, number lawng tawp a nih avangin vai a nih ringin ka reject ta daih. A hnu rei lo té ah number ngai bawk aṭang chuan phone call a rawn lut leh a, a pawimawh ringin ka pick-up ve ta.

"Hello" ka ti a, a reh vang vang thung. Dah mai ka tum a, mahse ka la ngaichang ru ta tho.

"Rizai chuan i inkhuh ta em?" mipa aw hian a rawn ti thawp sup a, u Hruaia a ni tih ka hre nghal.

"Tunge âw?" hriat loh der vel chu a nuam rîau.

"Ka number hi lo save rawh" ram hmak chuan a rawn ti a, ka save lo phal nang maw le.

"Engtinnge ka save theih ngawt ang che, tunge i nih pawh ka hre si lo" ka ti ve leh a, ka rilru chuan save ka tum daih tawh zawk.

"Min hre reng alawm" a rawn ti tawi leh sup a, ka rilru chu a chhiar thei emaw ka ti hman hial.

"Ka dah aw" induh khum hi a ngai ve tlat tawh, ka duh tih a hriat avang hian min hmu hniam tur a ni lo.

"Lo chhuak rawh" a rawn ti ram leh hmak tawh a nih chu!

"Engvang chuan maw?" dah ta mai lo chuan ka ti leh a, a engah mah hmaa a inla thunei ringawt chu ka ngaithei hauh lo.

"In in kawtah ka awm" tiin a phone chu a off nghal hmak. Enge a hriat? A hnuaia hnathawk emaw min ti em ni zawk?

"Ka lo luh i duh em ni?" chhuak lova ka awm reng avang chuan message chu a rawn thleng leh nghal vat a, mahse ka chhang ta chuang lo. Ani hmuh hi chuan a hnuah ka ngai leh mai mai zawk ang, chuvangin hmu lo law law zawk teh ang.

"Nute, khu i ṭhianpa a lo kal a nia. Ka hmuh hnu a ang em em leh nghal. Lo chhuk teh" ka room kawngkhar rawn hawn pahin ka nu chuan a rawn ti a, ka nu'n i ṭhianpa tia a sawi chu u Hruaia a nih ngei pawh ka ring.

"Êeeeeee, hei a lo chhuk ve ta alawm" sitting room ka thlen rualin ka pa chuan a lo ti a, u Hruaia erawh chuan min lo en kur thung. Kei erawh chuan melh pawh ka melh rei peih lo.

"Chuan khawi lam mi nge i nih a? Zirlai ve tho nge hnathawh nei tawh i nih? Ka hmuh hnu i ang hle mai" ka nu chuan ka pa bula ṭhut pah chuan a ti nghal sawk sawk a, chutiang taka an lo be lúmlâm vel pawh chu awm lo ka ti hran lo, an fanu hian tlangval in leng ka nei ngai lo ve êm a tin ni!

"Zirlai chu ni tawh lo ve, hna chhe tê chu ka nei ve alawm" a va inngaitlawm chapo reuh tak.

"In rem tih chuan Nutei hi ka lo chhuahpui lawk thei ang em? Kan rei ka ring lo" a rawn ti leh nghal zat a, ka nu leh pate lah chuan min lo nuih a, awlsam takin min hruai chhuah phalna an la pe zui.

A motor-a kan chuan hnu chuan tumah kan ṭawng lo va, min biak loh avangin biak pawh ka tum hran chuang lo. A ngaite bawkin New Capital kawng reh takah chuan min hruai thla leh a, tunah chuan min pawngsual emaw ka chunga thil ṭha lo tih emaw tih tumna a neih ka ring tawh lo ve bur ringawt.

"Enge hetianga min hruai chhuah chhan hi?" kawngpui zau taka kan din hnuah pawh a rawn la ṭawng chhuah mai loh avang chuan ka ti ta nge nge.

"Min la duh tiraw?" chu bawk chu maw, ka va hne tak.

"Chutiang zawhna ho lam mai mai sawi turin min hruai chhuak tihna em ni? Haw leh vat zawk teh ang" ka ti leh nghal hmarh hmarh.

"Ka nupui i ni duh ang em?" a thil sawi chuan min va ṭhawng chiang em.

"Duh lo" ka va ui ru tak, a nupui atan hial min sawm a ni a, mahse ani hi chuan ka duh lutuk tih a hriat tawh avangin min chhaih vel mai mai nia rinna ka nei tlat bawk si.

"I duh tih ka hria, innei ang" a rawn ti leh nghal zat.

"Ka duh viau che avang hian i duh dûh danin min ti thei bik chuang lo a nia, hetianga ka chunga i chet reng chuan a ruk pawhin ka duh tawh miah lo vang che" ka ti let nghal tawn tawn.

"Chu lam a ni lo" a rawn ti leh sup a, eng lam chu nge a nih sawi ve mai tur alawm le.

"Eng lam nge ni vak chuang ang a?" ka ti leh ta nge nge, ṭawng chhumbung deuh deuha min bia chu ka ning.

"Ka mamawh che a, ka ngaina bawk che" a thu rawn sawi avang chuan ka thinrimnate chu a reh nghal vek.

"Maw? Min duh ve maw?" ka zawt lo thei lo.

"Ka ngaina hle che a ni. Nangmah tawp hian min hip" ka lam rawn hawi chung chuan a ti a, kei erawh amah ka lo en rengna aṭang chuan ka hawi sawn nghal vat.

"Ka awih lo, khawngaihin dawt chu sawi duh suh. Kum 5 chhung teh meuh ka lo duh ruk che avangin min khawngaih a nih kha" ka ngaihtuahnaa lo awm hmasa ber a ni tlat.

"Ka nupui ni rawh, ka mamawh che. Keimah mai hi chuan ka khua a har lutuk" ka hmai a lam hawi zawnga kuai her pah chuan a rawn ti leh sup a, kan inmelh chiang teh asin.

"Ka fawp chak lutuk che" tih pah chuan min rawn fawp nghal a, kei chu ka lo maimitchhing tawp. A mi fawh dan lah chu a dam thluam a, zun a la ngah em em zui.

"Inngaizawng lovin innei tawp mai ang" min fawh zawh chuan a rawn ti leh a, hawi sawn pawh tum ila min chelh tlat bawk si.

"Inngaizawng lova inneih ringawt chu a ṭha chuang hleinem" ka lo ti ve nghal.

"Inngaihzawn kha i duh lo a ni lo'm ni? Keipawhin inngaihzawn vel hi chu natna mai niin ka hria" aw dam tak hian a rawn ti leh sup a, ka rilru a tibuai leh ta vek mai.

"Ka hre lo, inneih êm tur chuan inngaihzawn chu a pawimawh ka ti tho bawk si. Engvanga hetiang thil hi sawi ve ringawt nge ka nih lê? Ka nei dawn che pawh ni hlei lo" hmun dang hawi pah chuan ka ti leh chiam a, ka rilru chu tihfim hram hram ka duh a ni.

"Min duh khâ, chuan kan innei thei a ni mai alawm" a ṭhutnaa awm ṭha pah chuan a rawn ti leh a, engvanga a nupui ni tura min duh tlat nge a nih ê?

"Ni lo, nang hi chu ka suangtuahnaa ka pasal duh i ni ṭhin ngei alawm, mahse a tak takah hi chuan kan theih ka ring lo. Min be tawh lo teh, ka inpuang zo mai dawn" engvanga ka ka hi chak em em nge a nih pawh ka hre lo.

"Aw le, thla khat kan inngaizawng ang" nui ri deuh suk chung hian a rawn ti a, eng thu nge a rawn sawi rik leh tak hi!

"Enga? Engvangin?" ka ti nghal vat.

"A chhan chu ka nupui i nih dawn avangin" a rawn ti leh mai a, a thusawi tawi tê te chuan thui tak taka thil ngaihtuah chhunzawm turin min siam tlat bawk si.

"Enteh, bialpa pawh ka nei ngai lo. Pasal phei chu ka mumangah chiah ka la nei. Chutah keini ang feet 5 leh inchees 5 pawh pel lo hi chu min ngaina tak tak lo ang a, ka hip che pawh ka ring kher lo. Chuvang chuan i nupui ni em tur chuan min iai ru tho ang" Feli'n min sawi chhiat ṭhin dan angte chuan ka ti leh ang ta lawi a, engtia chhan let tur nge ka hre tawh lo a ni.

"Tunge feet 5 leh inchees 5 chunglam kher ka ngaina tih sawi a?" khi deuh suk chunga a rawn tih chuan

"Ka ṭhiannu Feli'n" ka ti ta ringawt a, ani pawh chu a rawn nui che ve ta dawt mai. Keipawh ka thusawi ho lam lutuk avang chuan ka nui ve tho.

"Le! Haw ang aw, zanin aṭang chuan kan inngaizawng tawh tih hria la" motor tinung pah chuan a rawn ti leh a, a thusawi mal tinte chu ka la awih thei lo a ni.

"Min duh ve tak tak ang maw? Rilru na deuha awm kha ka duh lo a nia" chu chu ka hlauhthawn ber a ni.

"Ka sawi tawh kha" tlan chhuah pah chuan a rawn ti nghet charh a, ka hlauhthawnna leh rinhlelhna zawng zawng chu bo vekin ka nui ta ver ver mai.

"Nui ver ver kher lo la" min en chuang miah lo hian a rawn ti leh a, a thu lo ve chiang em mai a! Ka duh leh ka nui ang a, ka duh leh ka ṭap ang.

"Âwwwwww engê? Ka hlim a ni ve mai a, nang pawh ni la ka awm ang tho hian i awm ang" a bula ka ngampa ta lutuk chu nuam ka ti letling phian.

"Keipawh ka nia nang angin ka awm kher lo" a ṭawngkam hi chu a ngeiawm ve thei alawm.

"Kan inngaihzawn dawn avangin i thu thuin ka awm kher dawn lo a nia, ka duh vang che hian i hnuaia hnathawk ang lekin min chei lo vang che" ka ti leh tawn tawn a, awlsam taka kan inngaizawng tur chu mak ti mah ila ka hlim em em tho.

"Ka nupui i nih hma pawhin thu min pe nghal a nia" nui sak chung hian a rawn ti a, keipawh ka nui ve leh ta nge nge.

"Chuan, ngaihzawng emaw kawp lai emaw i nei miah lo maw? Ka hlauthawng a nia" ka ti leh nghal zat.

"Ka nei lo" a sawi awlsam ngei mai.

"Aw le, a ṭhat chu! Chuan thlakhat chiah maw kan inngaihzawn dawn?" ka tih chuan a lo thaw hawk a, ka ṭawng chu ning te pawh a ang.

"Aw, chumi hnuah kan inneih nghal ang" a rawn ti hmuk ringawt.

"E chuan, u Zualtei la hrilh miah suh, tlêmin ka la zak deuh" ka ti leh a, a rawn nui leh ta.

"Ka hre lo le" tih te hian min chhang a, ni lo, kei hian thil hriat hmaih ka nei.

"Hei hei hei, ding teh" ka tih chuan a ding ve mai a, hriatthim loh hmel zet hian min en nghal kur.

"Ka nei thei leh lo ang che, college ka kal ve ṭan chiah a, Bachelor degree pawh ka la nei ve reng reng hleinem. Ka duh leh lo, ka thil sawi zawng zawng kha ka sut leh dawn" ka tih chuan a rawn meng buai ta hle.

"A theih loh, ka rilru ka siam fel vek tawh. Zirlai i chhunzawm duh chuan kan inneih hnuah pawh i chhunzawm ka phal ang" a rawn ti ram hmak a, min hnial dan tur a hre zel chuan sawi tur min tihre lo zel bawk si, a va buaithlak tak!

"I phal tak tak ang maw?" tia ka zawh chuan a tlan

chhuak zui zat chung hian

"Phal ang" a rawn ti ṭha ve leh mai bawk. Tunah chuan ka thaw a veng leh ta huai mai.

"La chhuk lo teh" kan in zawn kan thlena chhuk nghal mai ka tum chu min ko ding leh a, ka lo en reng thung. Chutah a lama min pawt hnaiin min rawn fawp leh a, tunah chuan ka chhang let ve ta. Min fawh dan aṭang chuan min mamawh ve tak tak te pawh a ang alawm.

In chhunga ka luh chuan ka nu leh pate chuan TV an lo en a, ka thawm an hriat chuan ka lam rawn hawi zawkin TV bawk chu an en leh nghal. Room-a ka chho tur chu ka pa chuan min ko ding a, an bula ṭhu turin min hrilh nghal bawk.

"Nute, kha kha i bialpa em ni?" deuh tlawng mai a, zawhna avang chuan nui ver ver chung hian

"Aw, ka bialpa a nih kha" ka ti ve mai a, ka bialpa a ni hman chiah chiah tlat alawm le.

"Khawi lam mi nge a nih hrim hrim? Amah lah khan min chhang ta bawk si lo, a hna thawhte i hriatpui em?" Ka nu chuan a rawn ti ve thung a, a vawikhatna atan mipa kan inah an lo kal a, zawhna an nghah nghal hle chu a nih hi!

"Âw nû, amah khaTuikual-a mi a nia, khaaaaaaa, pu Rinchhana fapa Delhi-a awm char char ṭhin kha" ka tih chuan a hre chhuak chhunzawm ve mai bawk.

"Aizawl DC hi em ni?" ka pa chuan TV en reng pah chung hian a rawn ti ve leh a, an lo hre deuh tho a nih hmel.

"Aw ni e, mahse a nà zàwnga sawi vak a duh lo a ni ang ka ring" ka lo ti ve leh mai bawk.

"A ṭhat hlauh chu, pasal te hi zawn thiam a ngai a nia. An chhungkaw dinhmun en hmasa ber zel ṭhin rawh" ka nu chuan a rawn ti leh a, a thusawi chuan ka ngaihdan a pel ta deuh.

"Nû, kei chu hausak leh sak loh lam ai chuan hmangaih leh hmangaih loh lam hi dah pawimawh hmasak ber a ngai zawkin ka hria" ka lo ti ve vat.

"Ni tho mahse hausak loh chuan awmzia a awm lo" a la rawn ti hram. Hnial buai tawh lo chuan ka room-ah ka chho a, ka khumah bawkin phone ka khawih zawm nghal.

"Kan inngaizawng tawh, a nuam lutuk" tih chu Feli ka thawn nghal a, a lo seen rang hle.

"Tu ringawt nen chuan maw?" a rawn ti ve vat.

"U Hruaia nen, chuan a nupui ni turin min sawm zui bawk" ka tih chuan emoji nui lai hi a rawn thawn nghal tuarh a, ka thusawi avang chuan a nuih a za ve hle a ni ang.

"Ka sawi kha, a duh ve che a ni ang. Mahse a va hmanhmawh awm ve, a ṭuah tawh hle a ni ang maw?" a rawn ti leh chiam a, ṭawngkam te hi a duh tui lo ve ṭhin a nia.

"Khatiang khan sawi chhe vak vak suh" tiin ka thawn let ve nghal bawk.

"Awi awi awi ṭawngtheinu, i bialpa nimahse hauh nghal bur suh. A senior tawh bawk a, nei ve tawh em em rawh se. Chuan engtinnge inneih puia a sawm che chuan i chhan?" a rawn tih chuan

"Ka duh mai lo va, zirlai ka la ni bawk nen. Mahse kan inneih hnuah pawh ka zir zawm theih thu a sawi sia aw ka pawh ve tawp. Chuan thlakhat kan inngaizawng anga kan inneih dawn a nih hmel" tiin thil awm dan chu ka lo hrilh ve zung zung.

"I vannei ê, i duh ngawih ngawih leh i suangtuahnaa i pasal lo ni ṭhin chu thlakhat hnu maiah i pasal tak tak a ni tawh dawn sia. Mahse a hmanhmawh dan em em hi a ṭha chiah ang em?" ka lo ngaihtuah pha miah lo a, mahse ka tana ṭha lo chu a tih duh ka ring lo.

"Ni lo, min ngainat thu a sawi a, min mamawh thu a sawi bawk. Chutiangin thil ṭha lo ka chungah a tih duh ka ring lo, amah hi ka ring tawp mai" tiin ka chhang let ve leh nghal.

"Awi, ka thik che hi a ni tawp. Kei chu tun thleng hian min la duh ve lo, mi dang ka neih san mai dawn" fiamthu ti tak deuh si hian a rawn ti a, ka lo nui nghal chiam.

"Chekhirnu, min ngaihtuah ve teh. Kum 5 lai beidawng lova ka duh hnuah chauh a nih hi kan inngaihzawn tâk. Nangte chu thla 3 vel lek a la ni zawk zawk" ka ti ve leh a, ka ngaihtuah let chang phei hi chuan ka peih hi ka inti ve thlâwt a ni.

"Ni ve tho bawk sia. Awi, mahse kum 5 em em chu ka theih ve ka ring lo. Mi dang ṭha deuh lo lang vat se a ni mai" a rilru hi chu a va han nghet lo ve tak.

Chu zan ang em ema ka hlim leh ka muttui pawh chu ka piana hnu lamah ka la hre lo. Ka mumangah te chuan u Hruaia chu ka lo hmu vel a, kan lo la innei nghe nghe zui. Kan inneih kawrte chu inhmeh tak ka ni. Chutia hlim tak u Hruaia nen ka infawh dawn lai tak chuan engkim chu a bo nghal duak a, ka thluak a pangai chinah chuan ka nuin min lo kai tho tih ka hre thiam nghal. Ka zing tho reng rengte chu zan lam boruak vang nge ka mood a'n on mai mai khawp a, in hnuaia chhukin kan awmpuinu pawh ka be zui ta siam siam. Kan awmpuinu chu ka ngaina a, ani paw'n min ngaina ve viau chuan ka hria.

Tunah chuan nula leh tlangval inngaizawngte angin kan awm ṭan ve tak tak dawn ta, a nuam ka va ti si em. Mahse phone call emaw whatsapp message emaw aṭang pawhin min lo la be lo hrim hrim a, han biak hmasak ngawt lah chu ka zak ve deuh bawk si. Class kan lak chhung zawng leh kan ban hnu thlêng pawhin a message emaw missed call emaw pawh ka la dawng lo va, tlêm chuan mak ka ti ve deuh. Zing lamah kha chuan a buai a nih ka ring mai a, mahse zanriah ei hnu lamah pawh eng thawm mah a rawn la neih loh avang chuan ka lungawi lo hle. Han tihlan ngawt lah a chi bawk si loh, awm dan tur pawh ka hrethiam lo hle.

Ka ngaihtuahna pakhatah chuan 'dawt a hrilh che a ni lo maw? A fiam mai mai che a ni ang' tihte chu a rawn piang a, a reh rei ta lutuk chuan ka ngaih a tiṭha lo ber a ni. Zan 9 a lo ri hnai a, eng thawm mah a la rawn nei chuang lo. Ka nghah beidawn tâk deuh avangin ka khum lam chu ka pan a, rizai lain ka mu zui nghal. Ka phone lo ri chuan min ti harh zawk a, ka lu bul lawka ka phone ri chu meng diar diar chungin ka en a, u Hruaia ngei chu a lo ni. Sana ka en vat a, dar 10 a lo pel fel vel chiah. Lak loh chu ka tum zet nà a, a ngaih dan tur ka dâwn avangin ka phone chu ka pick-up ta hram.

"Hello" la maimitchhing chung chuan ka ti a, ka mut chu la chhuak tak a ni.

"I mu tawh em ni?" ka lo mut chu a lo la ring chiah lo a ni ngei ang.

"Tun angah mut loh a hun tawh ami?" ka lo ti vin nghal hlar a, ka thinrim lo thei lo.

"Ka lo biak loh che avangin i thinrim ti raw?" ka ngawi ta reng a, a rawn sawi dik bawk si chu chhan mai ka tum lo.

"Ka tihpalh" a rawn ti leh sup a, chungte chuan ka thin a tirim zualin ka hria.

"Ka dah aw, ka mu tawh a, i duh leh ka men hunah min lo be tawh dawn nia" tiin ka off san a, ka mu ṭha leh nghal hmak.

Mood tuitang lo zet chuan ka mu a, ka muhil lawk thei lo leh nghal. U Hruaia chuan a rawn call leh ka rin tehreng nen a rawn ti miah lo, mut luih tumin ka inkhuh a, ka lo muhil leh ngei a ni ang ka thawh chuan zing dar 5 a lo ri vâng tawh. Thawm awm danah ka pa chu inkhel turin a kal dawn chiah a nih hmel. Ka va tho phei a, min hmu chu a nui suk a, min bye pahin a kal chhuak ve nghal. Zing lama ka boruak hip chu a fuh lo vel vek a, kan awmpuinuin min be hlim lo phei se chuan ka mood a off leh khawp ang.

Hruaia POV

Ka laka Nutei awm dan chu ka hrethiam khawp mai, ka bia ang tia ka lo tum rilruk chu ka hna lama ka buai lutuk leh si avangin ka be hma leh thei ta lo kha a nia. Deputy Commissioner nih meuh zawng pawngpaw awh leh it chi ang hna ngawt a lo ni lo a nih hi! Mualphona kara lengin kan awm a, sawisel theihna kova ding reng kan ni pah bawk. Kum tam tak liam hnuah ngaihzawng ka'n nei ṭha leh a, chutah ka kum aia naupang lutuk a la ni zui. Ka pa khan 'mihringte hi kawppui nei tura duan kan ni a, nupui leh fanua neiha chhungkaw din tur kan ni bawk' ti khan min hrilh ṭhin a, ka pa sawi a nih vang nge pawh ka hre lo, ka ring em em ta a ni. Ka ngaihzawng ber lah hi a naupang vîau e ti lo chuan ka ngaina em em lawi si, a bula ka awm hi chuan ka thisen te hi a lum hma em em ṭhin. Ka biak te lah hian min han vin ve ar ar zel a, mahse ka làwm tlat a ni. A awm dan leh ṭawngkam chu ka hlimpui a, kei ka nih avanga zep nei chuang miah lova a ṭawng bawrh bawrh ṭhin hi ka ngainat zualna niin ka hria.

Zing ka thawh chuan ka intifai a, ka hna lama kal ka ngaih avangin ka insiam peih hma hle bawk. Mahse hna kal hma ka ngaih avanga inpeih hma ka ni lo, Nutei hmu tura kal ka duh avanga inpeih zawk ka ni. Min hmuh huna a lo awm dan turte chu ka mitthla a, mahniin ka nui leh suk ringawt. Amah vang té pawh hian lawm lohvin ka nui zing ta khawp mai, amah hian min tihhlim tum miah lo mahse min tihlim tho si. Chutiang khawpa min tihlim thei, thil ho tê tè hmang pawha min tinui thei hmeichhia chu ka tan, ka nupui atan a ṭhat ka ring ve hmiah. A mak hi ka ti zawk, kan inhnaih deuh hi chuan keini ang tlangval senior pawh kan thisen a lum nghal zar thei alawm. A sawi dan takah model te angin sang tak pawh a ni lo, mahse ka thinlung hian a vei tlat si a nih hi! Ka mitah chuan a hmel chu ṭha a, a nungchang erawh a harhvang mah mah a ni.

Sangtei kha mize harh tak a ni lem lo va, mahse ka duhin ka hmangaih em em tho a ni. Hmeichhia reng reng chu Sangtei nen ka tehkhin zel lo thei lo va, Nutei tiamin. Nutei leh Sangtei te mizia hi chu lei leh van ang vela danglam an ni a, mahse hetianga Nutei nungchang harhvang lutuk leh ni thawt thawt reuh hian min tihlim a, ka ngaithei lo der bawk si lo. Zing dar 8:30 a lo rik chuan ka inkhalh chhuak a, kan awmna veng a inan tawh loh avangin Mission veng lam chu ka pan phei nghal. An in bulah chuan ka ding a, a rawn chhuah hun ka nghak a ni. Minute 5 hnu velah chuan a scooty chu rawn khalhin an gate chu a rawn thleng a, mahse gate bula ka lo din tlat avangin a ding ve ta.

"Ka pu, kawng dalin i park a nia. Awm an awm lo emaw ni le, a va buaithlak tak" a ti ve niah niah a, ka motor tukverh glass ka up vek avangin min hmu thei lo a ni ngei ang.

"Nang maw?" glass ka down hnu chuan a rawn ti nghal.

"Lo chuang rawh" ka lo ti ve mai a, ka ṭawng nem ve tehreng nen ka ṭawngkam avang chuan a thinrim hmel leh em em lawi si.

"Awm sawn teh, first period ka nei a nia, ka tlai palh hlauh ang e" pangai tak chuan a rawn ti a, nizan avangin a la thinrim tih ka hre thei.

"I scooty kha va park ṭha la, lo chuang rawh" ka ti nawn leh sup a, ani erawh chuan min en ran chung hian

"Engvang chuan maw?" a rawn ti a, thil hriatsa tur awm ang hi min zawt nawn fô zel mai.

"Ka thlah dawn che" ka tih chuan a rawn meng lian ta vak a, a hnuah nui ver verin a scooty chu a va park ṭha nghal. A rawn ṭhut luh te chuan a hlim leh tawh tih ka hre thei, a hmel te hi ka hmu ṭha zual tawlh tawlh zui zuk nia.

"Awi awi awi, nizan ka ngeizia che kha chu pui tak a ni. Ka chang ve char char che a, ka mut tawh hnuah chauh min lo la call zui" kan tlan chhuah hnu chuan a rawn ti leh bawrh bawrh a, ka lo nuih let suk ringawt.

"Nui lo khan a chhante min hrilh ve la, i bialnu ka nih tawh hi, ka ṭhen tawh mai mai dawn lo che a nia" a rawn ti leh phei chuan ka nui chhuak ta hawk.

"Nimin kha chu ka tum loh deuhin ka buai a, min hrethiam dawn nia" pangai tak chuan ka lo ti ve ta mai bawk.

"Chu pawh ni se, chanchinte chu min lo hrilh ve hrim hrim ta che" a vui aw leh hmel vel chu ngaihnawm ka tiin hmuhnawm ka ti lutuk.

"A lehpek aṭang chuan ka lo hrilh ziah tawh ang che" ka tih chuan a rawn nui leh ta ver ver mai.

"Scooty min dah tir sia min lo hruai leh dawn tihna em ni?" a rawn ti leh chuan chutiang chu ka lo ngaihtuah thleng pha hauh lo tih ka inhre chhuak nghal zat.

"Ka hre lo le" ka hre lo tak tak a ni. Chhun lamah chuan hnaah ka buai ang nge buai lo vang tih pawh a hriat si loh a tin ni!

"Ka ti mai mai a nih kha" a lungawi tawh chiah lo tih chu ka hria.

"Ka lo hruai leh ang che" ka ti ta nge nge. Ka hman loh dawn leh hman luih hram ka tum mai ang.

"A ngai chuang lo, i buai ang tih ka lo ngaihtuah thleng pha lo a ni e" a awm danah chuan a inthlahrung deuhin ka hria a, mahse inthlahrung taka a awm chu ka duh hauh lo.

"Dar eng zatah nge in ban ṭhin" ka ti leh daih a, hruai chu ka tum ve deuh ta bur.

"Vawiin chu dar 3 ah kan bang ang" ṭha tak chuan a rawn ti a, kan ṭawng chhunzawm leh tawh lo thung.

"Hei, chhuk nghal mai i tum em ni?" motor aṭanga chhuk mai a tum ṭhin chu ka ngaithei lo lek lek zel.

"Ka chhuk loh ten, hetah hian ka ṭhu ni lêng dawn tihna em ni?" a ve leh vak vak ṭhin hian âwwwwwwwwwww. Pawt hnaiin ka fawp nghal vang vang a, ka danglam ang chiahin a ni pawh hi a danglam ve a ni.

"Khawlaiah chuan min fawp tawh lo teh, ka zak ve tho a nia, mi kal an tam thei si" kan inthlah hnu chuan a rawn ti leh pang pang a, ka lo nui ve leh ta suk.

"Min zahpui em ni?" a rilru dik tak sawi chhuahtir chu a nuam ka ti tlat a ni.

"Ni lo ni lo, ka zahpui reng reng lo che. Keimah zawk hi ka zak a, i bialnu ka ni hi ka inzahpui deuh thut zel alawm. A chhan chu i lar ve sia, ka kal dawn. Awi, enge ka sawi leh vak tak hi!" tiin kawngkhar chu a hawng a, a kal nghal nal nal. A chezia hi chuan min va han tihlim thei reuh tak, pawn lamah nui em em lo mah ila ka chhungril hi a hlim veng veng zel.

Office ka thleng a, hna erawh nimin ang em emin ka ngah ta lo. Paper endik leh sign fel te, ka hmaa DC ni tawhin a lo kalpui dan ennawnte chu ka hna a ni deuh mai. A changin mi tu tu emaw inleng ka nei a, a ṭhen chuan thil min lo dil bawk. Chhun chawlh a lo nih chuan chhuak buai lovin ka office-ah lunch ka ei a, number hriat loh aṭanga phone call rawn lut chu ka pick-up nghal. Ka beisei loh takin Doordarshan lam aṭang daih hian a lo ni a, an sawi dan chuan zan lamah min kawm an duh a ni awm e! Keipawh chuan min sawmna chu zahawm ka tih avangin ka kal theih tur thu chuan ka lo chhang a, hawihawm taka inthlahin kan inbiakna chu kan titawp zui bawk.

Sana ka en a, dar 2:30 a lo ri leh reng tawh. Ka dawhkan vel chu ka remfel a, thil pawimawh zual chu pawhdawhah ka dah khawm bawk. Office aṭang chuan ka chhuak a, inthlahrung rilru takin ka hnuaia thawkte bulah chuan haw hma ka ngaih thu sawiin ka chhuak zui nghal. Ka haw hma chhante chu hria se zawng ho an va ti dawn em. Ka pate College lam pan chuan ka tlan thla a, a la hma deuh tho avangin Principal office hmaah chuan ka motor pawh ka park ta rih.

"Pa" tia ka pa office-a va luh mai ka tum chu meeting an lo nei hi a ni a, lut ta lo chuan ka chhuak leh rang khawp. Minute 5 pawh a la ral lo vang tihah chuan faculty nge HOD ho pawh ka hre lo, ka pa office aṭang chuan an rawn chhuak sup sup a, min en duh hlawm ngei mai.

"Pa, in va rei si lo ve" ka pa office-a luh pah chuan ka ti nghal.

"Nang meuh ka office-ah i lo kal si a, thil pawimawh awm turah ka ngai ve hmiah. Meeting te chu naktuk lamah pawh kan la nei thei alawm" pangai tak chuan a rawn ti a, ka pa nge nge a fate hi min dah pawimawh hmasa ber ziah a nih hi!

"Pawimawh em em pawh a ni lo, zaninah Doordarshan-ah min interview dawn a nia" ka tih chuan a lo bu nghauh a, a dawhkana chhang awm chu ka ei nghal zat. Kan khawtlang mitah chuan tlangval senior emaw DC emaw lai pawh ni mah ila ka pa bulah hi chuan ka duh dan dânin ka awm ṭhin, a nuam pawh ka ti reng bawk.

"Eeeee chuan maw, ka ngaihzawng thar chu i student hi a nia" ka tih leh chuan

"A va ṭha ve" drawer-a thil khunglut malh malh pah chuan a rawn ti leh mai a, min chhan awlsam em avang chuan ka lo ner deuh sâwng.

"Pa, ka serious vîau a nia, vawiin tlai pawh hian hruai leh a duh avangin ka lo kal alawm" ka tih tâkah chuan ka pa chu a rawn nui chhuak hawk hawk a, ka awm pawh a nuam ta deuh.

"Chu! Min inhmelhriattir nghal dawn lo em ni? Kum tam tak hnua ka fapa ngaihzawng chu ka hmu ve vat duh" uang ti tih tak hian a rawn ti leh a, ka pa hi chu a duhnaah chuan a nghal thiam ve alawm.

"Âaaaaaaa, a la zah ka ring. Inneih hma chuan i hmu hman tho ang" ka ti ṭha ve leh mai bawk. Sana ka en chuan an ban a lo hun reng tawh zawk a, hmanhmawh takin ka chhuak ve nghal.

"Gate bulah ka lo awm aw" ka phone a pick-up rual chuan ka ti a, Gate paltlang tura lo kal student ṭhenkhat chuan min hrek hrek bawk.

"I lo kal tak tak maw? Awi, ka va'n lawm tak. Bus-a chuan haw ka peih lo lutuk a, Feli lah hi bazar lamah ka kal dawn a ti tlat a, nang ka"

"Ka bul i rawn thlen hunah i sawi dawn nia, lo chho phawt mai teh" tiin phone chu ka off ta tawp. Ka duh aiin a ṭawng thui mah mah zel.

"U Mam, enge hetah i lo tih ve? Ka pa i lo hmu em ni?" min hmuh rualin Bawihtei chuan a rawn ti a, 'aw' ka lo ti ve zaih.

"Bawihte, ka pain ka office-ah lo kal lawk teh a ti" Nutei a rawn lang tawh bawk si, Bawihtei hriattir ka la duh bawk si lo chu dawt ka sawi ta ringawt a, ani pawh a kal ve nghal mai.

Ka motor-a a chuan tâkah chuan ṭawng duh leh bawrh bawrh tak a ni. Zan lama ka biak hman tur thu leh ka len hman dawn loh thu ka hrilh a, a chhan erawh min zawt miah lo. Thinrim emaw lungawi lohna nei ang pawhin a awm chuang lo va, chumi avang chuan ka ngaih a ṭha ve em em ringawt. A ṭawng lah chu ni dang aiin a kalin ka hria, chutiang em ema hmeichhe thil sawi tur nei tam chu ka la hre ngai lo. Zak miah lo hian a ṭawng bawrh bawrh a, a bialpa bul ang ni lova a pa bula awm ang velin a awm hmiah hmiah ngam reuh chu ka hlim phah leh em em bawk si. Chaw ei khamah chuan ka insiam sawk sawk a, ka inpeih hnu chuan Durtlang lam chu ka pan ve nghal.

"Engtinnge hetiang dinhmun hi i lo chuan kai theih? Engtinnge UPSC ah khan i inziah tlin theih bik? Doctorate degree i nei bawkin kan lo hria a, a dik reng em?" kan interviewer chuan min zawt nghal zung zung a, a ṭawngkamte chu a felfai thlap bawk.

"Hetiang dinhmun ka thlen theihna chhan chu a hmasa berah chuan Pathian a ni a, Pathian hi chu sawi em em pawh ka tum hran tawh chuang lo. Hetiang ka nih theihna chhan lian tak pakhat chu ka pa hi a ni. Ani hi ka tan chuan khawvel lama ka 'Pathian' a ni a, ka 'Hero' a ni bawk. Ani chuan ka mangan lai te, belh tur ka neih loh lai te paw'n min ngaihsak a, min hmangaih tlat zawk a ni. Ka pa hi awm lo se chuan tunge ka nih pawh hi in hriat ka ring lo. Ka pa hi ka ngaisang em em a, a thu ka zawm hian thil dik lo ka tih pawh ka la hre lo. A dawt leh atan chuan keimah hi a ni. Mahni hi kan lo pawimawh khawp mai. Ni e, doctorate degree kha ka'n nei ve tak nâ a, mahse University vela hnathawh kha ka tui leh ta lo a ni. Tichuan ka pa bawk chu ka rawn leh a, ani chuan Competitive exam ka tum vel chu ṭha min lo tihpui ve hle bawk. Ka pa'n min pawmpui hnu phei chuan ka tlin theih ngei kha ka ring a, Pathian zarah ka tling ta reng a ni" sawi hmaih neih hlau rilru tak chuan ka ti chhuak ve ta dap a, ka piana hnu lama ka la ṭawng thui ber a la ni ang.

"I hlawhtlinna phenah hian i pa chu a pawimawh hle a ni maw?" nui sânga a rawn tih leh chuan

"Ka pa hi ka tan chuan engkim hi a ni mai. Ani chauh ni lo ka nau Duati leh Bawihtei te pawh tiamin" nui let sak chungin ka lo ti ve leh mai a, ka chhungte'n min lo hmuh theih tâkin tiin Camera lam chu ka en hram bawk.

"I chhuanawm hle mai, nang ang hi Mizoram hian kan mamawh hle bawk a ni. Chuan, i pa fa i nih thu hi in zep tih thawmte kan lo hria a, a dik reng em? Lo dik ni ta se engvanga zep kher nge in nih? Hetiang khawpa i ngaihsan i pa hi tu chiah nge?" a zawhna ho chu tlêmin a personal ṭan lek lek ka ti rilru ngei mai.

"Nia....... ka pa hi Lalrinchhana, tuna Pachhunga University College Principal ni mek hi a ni a, mahse a hna chelh leh hausak vanga ngaisang ka ni lo tih min lo hriat tel sak dawn nia. Ka pa fapa ka nih thu kha ka pa chuan zep kher ngai a ti em em lo va, keimah zawkin zep kha ka duh ta zawk a ni. A chhan chu mihringte hian kan nihna a zirin kan inthlir a, kan inhmusitin kan inngaisang mai mai hi a lo ni. Zirlaite'n Principal fapa ka nih thu hre ta se, mi pangai hmuha min hmuh ka rin loh avang leh thil tam tak avangin kan zep ta a ni. Kum khat pawh ka pate College-a ka kal tlin hmain JNU-ah ka insawn thla ta bawk a ni" ka tichhuak leh dap a, zawhna hrang hrang min zawh hnu chuan interview chu kan duhtawk thei ta. Kan in lam panin ka haw nghal a, in ka thlen chuan dar 8:30 lai a lo ri leh hman tawh.

"U Mam, lo kal teh" ka room pawh la chho lova tui vawt ka in laiin Bawihtei chuan a rawn ti a, a bulah chuan ka phei ve mai bawk.

"Enteh, i interview kha kan lo en a, chuan ka pa hmel kha a dik miah lo. A ṭapin ka hria, va phei la va ngaihven teh" a tih chuan ka pa room lam lamin ka phei nghal a, ka pa room ka luh chuan min hnungchhawn zawngin tukverh hmaah hian a lo ding a, ka lut tih pawh a hre lo a nih hmel.

"Pa, i ṭha maw?" tiin a hnung lam aṭang chuan ka va kuah a, a darah chuan ka kun thla zawm zui zat bawk.

"Pa lak tlak loh, fapa a nei tih pawh hre lo, a fapa in pa a awh em em lai pawha a bula awm thei lo, kei ve mai hi i Hero ka ni maw? I lei Pathianah hial min ngai maw? Ni lo, ka tling lo tak zet a ni" amah leh amah a insit lutuk chu hrehawm ka ti a, nghet taka kuah loh chu tih theih dang ka nei rih lo.

"Pa, ka tan chuan i tling tawk em em asin. Ka tan chuan ka nu tluk zetin i pawimawh tih i hre lo em ni?" ka pa awm dan ka hmuh phei chuan ka hnuk a ulh dawnin ka hria.

"Aw le ka fapa, ka lawm e. Nang ang fapa fel leh chhuanawm ka nei hi ka lawm tak zet a ni. Ka hmangaih em em che a, engtik lai pawhin ka hmangaih che tih hria ang che. Ka chunga i ṭha lutuk ka hmuh hian nangmah leh i nu laka ka inthiam lohna te kha a lo chhuak a, ka ṭap lo thei lo a ni" ka lam rawn hawi pah chuan a ti a, a bianga mittui chu a hru hul zeuh bawk.

Chutianga a hmel ka hmu chian leh phei chuan ka insum thei tawh lo, nghet lutukin ka kuah a, ka ṭap chhuak ve hawk. Ani chuan ka hnung chu a rawn chul ve hliau hliau a, min hmangaihzia chu ka hre chiang lehzual. Ka nu a rawn sawi ri te chuan ka ṭah a ti chhuak zual a ni. Kan kum a upa tawh kan ti pawh a ni maithei, puitling tawh emaw pawh kan inti a ni maithei, mahse nu leh pate lakah chuan naute ang lek kan la ni. An bulah chuan naupang chhia takin kan la awm thei a, kan la ṭap thei a, kan la titauin kan la nuar thei thung a ni. Engtik lai pawhin anni chuan min hmangaih a, hmangaih let ve hi an phu ngawih ngawih.

Ka room ka luh te chuan ka rilru chu a thawveng hawk a, ka puitlin hnu tak taka ka pa bula ka ṭah leh hmasak ber a ni ang. Ka inbual zuai a, ka inbual zawh chuan ka phone chu ka khawih zawm nghal. Whatsapp chu ka lut a, Delhi ka awm laia hnam dangho nena kan group pawh a lo lun leh tawh hle, mahse Nutei message chu ka open hmasa ta ber.

"Ka lo en che a, khami vang kha mi i lo len hman loh? I sawi ṭha lutuk, chuan i chhe lo hle bawk" a ká ngeia sawi ni phei se chuan ka nuih vur vur theih ka ring. A la tlai lutuk lo nen reply ta lo chuan ka call nghal a, a ring ral dawn ṭepah a rawn la ve hram.

"Hello, awi awi awi engatinge khatiang khan i inchei kher?" a rawn ti bawrh bawrh a, a thusawi chu ka hrethiam lo ngei mai.

"Engatinge? Ka inhmeh lo em ni?" message-ah kha chuan chhe lo te kha min ti bawk sia.

"Ni lo, i inhmeh lutuk zawk. Interviewer pawh khan zawhna theihnghilh ṭhakin a en che tih ka lo hmuh khan ka thik lutuk. A leh pekah chuan min hruai ve tawh rawh" a rawn ti leh chiam a, ka nui chhuak ta hawk hawk.

"Aw le aw le, ka hruai ve tawh dawn che a nia" ka ti ve ta sup.

"Ka lo kal dawn" ti chhuak thutin phone chu ka off hmak a, a hmel chu ka hmu châk a, ka rilrua awm hmasa ber chu ka ti tawp a ni.

"Engati teh thut nge?" an in bul ka thlen chuan pawnah a lo ding lawk a, ka hmuh theih ngei turin.

"Thla khat hi a rei mah mah dawnin ka hria" tiin ka pawt hnai a, ka fawp nghal bawrh bawrh. Zan a ni bawk nen tuma'n min hmuh ka ring lo. Kan inthlah meuh chuan a tua te ve ve pawh chu kan thaw a rang dun hle.

"I pa kha i ngaihsan hmel tawp, i sawi dan aṭang phei kha chuan a fel ngawt ang" ka awma bei hle hle chung chuan a rawn ti a, a awm dan te chu ka nupui ni tawh mai te pawh a ang.

"Fel lutuk" tih tê sawiin a khabe chu ka kuai dak a, ka fawp leh nghal. Chutiang em ema hmeichhe min hiptu chu ka nunah ka la tawng lo va, an la awm ngai lo bawk.

"I rawn lut duh em? Kan la meng vek asin" kan inthlah hnu chuan a rawn ti a, nui deuh suk chunga

"Lut rih lo mai ang" ka tih chuan min lo en chho nghal hú mai.

"Engatinge?" zawhnate lah hi a ngah ve vang reng ṭhin bawk si.

"Ka hmu chak lutuk che a" ka ti ta daih.

"Ka pate hi kan inneih tur thu pawh ka la hrilh miah lo, kan tum dan hi an ngaih dan a ni lo vang tih ka hlau. Nangmahah ka rilru zawng zawng ka nghat vek tawh bawk si, ka hlauthawng ru reng zel. An chiai lutuk hmain ka hrilh tawp mai dawn?" min rawn pah chunga a ngaih dan a sawi ve vel chu hmuhnawm ka lo ti leh ngei mai.

"I thu thu alawm, palai ka rawn tir dawn aw?" a bianga piai zeuh chung chuan ka ti ve a, a lo meng phawk leh ngei mai.

"Enga!? A va'n hma awm ve, i chhungte leh ka chhungte'n mak an lo ti ang e" a rawn ti leh thuai a, mahse ka taksa leh ka rilru chuan Nutei chu a mamawh tawh êm a ni.

"Ka rawn tirh har chuan inneih hun a tlai mai mai. Ka pa ka lo bia ang a, kan rawn tir vat ang" ka ti leh hmiah. Nutei chu tisa thil lam ngawr ngâwra mamawh pawh ka ni lo, keimah chu ruak huaiin ka inhria a, chumi hnawhkhat tur chuan ani aia ṭha chu an awmin ka hre lo a ni ber.

Ui ru takin kan inthlah a, in ka thlen chuan ka pa leh Duati chu an lo mu tawh a ni ang a lo reh ṭhiap mai. Bawihtei chuan lehkha a la zirin ka hria. Thiam loh emaw mamawh emaw a neih tâkah tiin a room-ah chuan ka va lut a, a lehkha chhiar lai tawp meuhin min lo en ve ran.

"I va meng rei ve, in test dawn em ni?" ka tih chuan a lo bu ve nghauh.

"U Mam, vawiin khan ka pa'n min ko reng reng lo, engatinge dawt min hrilh kher?" a lehkhabu khup hmak pah chuan min en ta kal mai.

"I hre duh tak tak em ni?" a bianga piai chung chuan ka ti a, a lo beng thla vat.

"In ninawm ê ka pa nen hian, ka biangah in piai reng mai. Sawi vat teh" a rawn ti ve pang pang a, hei pawh Nutei ang mai ka naui hi chu ka lâwm tlat.

"Nupui ka nei dawn" ka tih chuan

"Enga?" a rawn ti vak a, a ká ka hup nghal. Mu an awm tawh bawk si a, kan tiharh palh ang tih a hlauhawm.

"Min hmuh tir vat teh, ka hmu chak tawh lutuk. Awi, ka mo tur chu a sual chuan ka va han ti duhdah dawn tak. Tunge a nih hrim hrim?" ka kut chu hui thlain a rawn ti nghal chiam.

"I tiduhdah phal dawn teuh lo, amah chu kei ang chiahin i ngaina dawn lutuk" ka tih leh phei chuan a hre châk lehzual.

"Sawi teh" a rawn ti leh vat a, hre châk tawk lekin ka sawi tih chu ka inhre ru kar bawk.

"Nutei kha a nia" a au leh vak hmain a ká chu ka hup hman hram zawk a ni.

"I sawi tâkah chuan a laka i awm dan hi a dik lo sa reng a ni. Kan ina thil kan zir zan pawh khan nangmah vangin a rawn sen phei a ni chiang. Khatah khan engtinnge i lo tih a? A zah dawn dawn nen" ka kut bawk chu pawt thla lehin a rawn ti leh nghal zat zat a, engtinnge ti se min tih reng reng ni.

"Engtin mah ka ti lo, amah ka en khan a hmai a lo tai hlar ringawt. Enge awmzia ni zawk? Han sawi nghe nghe teh" ka ti let ve nghal.

"Awi awi, ka hrethiam. A lái a nih chu, i hrethiam ve lo em ni? Hmeichhiate hi kan mipa duh deuh te bulah chuan kan lai a, kan hmai a tai vek zel alawm" nui vak vak chung hian a rawn ti a, ka lo nui ve suk ringawt.

"In inngaihzawnna a la rei awm si lo va, inneih te i sawi nghal bawk sia, enge a awmzia?" a rawn ti leh reuh a, lehkha zir lam reng a ngaihsak tawh lo.

"Kei chuan thla khat pawh ka la ngaizawng lo, mahse ani chuan kum 5 lai min lo ngaizawng tawh thung. Ani tluka ṭha hi ka nupui tur atan an awm ka ring lo a ni" ka ti ve ta sup.

"Awi u Mam, chutiang hmeichhia chu movie velah pawh hian an fel duh lutuk. Hei......pakhat zawk zawkin an duhna a lo rei viau tawh phei chuan an inneih rei thei lutuk. Awi, Nutei chu ka chhaih châk tawh ê, a zak hmel ka hmu chak tawh" a rawn ti leh luam a, chu erawh ka phal zawng a ni hauh lo.

"A teuh lo, i chhaih zah ka phal lo. Nang pawh hi hrilh rih lo tur chein min ti a, mahse puitling pahnih chu ka hrilh hmasa ta che u a nih hi" ka ti ve leh ta ringawt.

"Eng tikah nge rawn hruai i tum? Ka pa paw'n a la hmu bik nang?"

"Ka hre lo le, a remchan hûn hunah a ni mai" ka ti chuan a lo nui khi ver ver.

"Awi, kei chu Nutei chu ka hmu chak tawh e, a rawn kal hun chu ka chhaih lai dawn chiang alawm" a tih leh chuan ka tho kang nghal.

"Chimawm chhuah suh ang che, ka phei dawn a nia" tiin kawngkhar lam chu ka pan a, chutah ka naui chuan

"Ka duh min lei loh chuan ka chhuah khawp ang" a la rawn ti ngam nia.

"Ka thu kha awih la a ni mai" tiin a thusawi pawh ngaihsak lo chuan ka chhuahsan ta thuai

Room-a ka luh te chuan ka nui ang vur vûr a, ka inhrethiam lo lek lek. Zanin zet zawng mi pangai leh zahawm tak angin ka awm a, naute ang maia lungchhia leh ṭapin ka awm leh a, a hnuah ka nui leh vur vur a, ka danglam chiang a ni.

Chapter 7

Nutei POV

U Hruaia nen chuan kan inpawh thawkhat tawh vîau a, ka bulah phei chuan a nui hmel ka hmû ka hmu ve ta. Tunah chuan kar thum lai kan lo inngaizawng ve reng tawh, mite inngaizawng angin rei lo mahse nuam ka va han ti tak em. A bulah hi chuan ka ngampa a, min ngaina ve tih ka hriat phei kha chuan ka ngampa lehzual. Min ning viau ṭhin ang hian lang mahse min hau ngai chuang lo.

"Nu, pa, u Hruaia khan palai rawn tirh a tum a?" tim dai chuan ka ti a, a hmain ka lo sawi lawk bik lo nen chutianga han sawi tlawng mai chu nuam ka ti bik vak lo.

"Maw? Pasal neih a!? In inngaihzawn lai pawh kan hre mumal lo va, palai em êm rawn tir turin in lo inzui rei tawh zawk em ni?" ka pa chuan a rawn ti a, ka nu pawh chuan hriathiam loh hmel zet hian min lo en haû.

"Kan inngaihzawnna chu a la rei em em lo, mahse keimah hian ka hmangaih tlat avangin a nupui atana min sawm khan ka lo duh ta ringawt alawm" kan inngaihzawn hun chhung pawh sawi lang duh chuang lo chuan ka ti a, ka nu erawh a lo la ngawi reng thung.

"A va mak ngai ve, keini i nu leh pate hi chuan naute ang lekin kan la ngai che asin. Tin, i zirlai lam te hi i ngaihtuah hrim hrim em? Kei chuan tun thawt thawta i neih hi ka duh vak lo" min en tawh lovin ka pa chuan a rawn ti a, chutah ka nu chuan

"Bawihi, pasal i neih chuan i zirlai lam a buai vek dawn asin, chuan Hruaia chuan a nupui atan a duh tak tak ang che maw?" a rawn tih zawm ve leh nghal zat bawk.

"Aw nu, u Hruaia chuan a nupui atan min duh tih a sawi alawm. Chuan ka zirna pawh kan inneih hnuah ka chhunzawm theih dawn min hrilh bawk" ka lo ti ve thuai a, ka nu leh pate chuan ka duh dan leh tum dan chu pawm se ka ti hle.

"I hmangaihin a bulah chuan i hlim tak zet ang maw? Puitling i nih tawh avangin i duh thlanna hi ka zah sak che a, mahse ka rilru tak chuan a rem ti chiah lo a ni" ka pa chuan a rawn ti chhum buk hmuk a, ka nu erawh sawi belh tur a hre em em lo nge a lo ngawi leh ta hle hle.

"Pa, khawngaihin ka duh thlanna hi rem ti hram teh. U Hruaia hi ka hmangaih a, ka pasal atan pawh amah lo chu ka duh ngai lo hrim hrim zawk. Nu, ka rilru tur chu i hriat ve vek kha, ka pa hi han hrilhfiah ve teh. Ka nu leh pa berin in rem tih loh chuan nuam ka ti bik miah lo a nia" naupang chhia ang maiin ka ti leh tawn tâwn a, ka nu reng reng pawh chu ka pa lo ṭawng thlamuan ve ik awm a nia.

"Âwwwww, a va buaithlak tak. Kan fanu neih chhun i ni a, i pasal thlan hi a fuh lo mai ang tih ka hlau alawm. Mahse, ka fanu berin i hmangaih tlat si chuan i duh dan chu ka rem ti hram mai ang e" ka pa'n a rawn tih chuan lawm lutuk avangin amah chu ka kuah chûng chung a, ka lawm lutuk chu sawi pawh ka sawifiah thiam lo zawk.

U Hruaia chuan a lo sawi lawk ang ngeiin palai chu a rawn tir a, ka nu leh pate ka lo hrilhfiah hman chiah chiah chu ka lawm ngei mai. Ka hmuh dan chuan Whatsapp vela inbiak hi nuam a ti vak lovin ka hria, keiin nuam ka tih tehreng nen. Feli nen chuan kan inbe ziah a, mo ṭhian atana ka hman dawn thu pawh ka hrilh lawk vek tawh bawk. Kei ai aiin a phur emaw tih turin a awm a, chu chuan inneih vat vat min ti châk lehzual.

A hmanhmawh bawk a, kan inneih ni tur pawh kar khat chiahin a dang tawh. Zan khat a rawn leng chu amah ang lo takin a uang ve em em a, mahse a ṭawng tam chuang lo. Taksa khawih leh mi dek tih velin a rawn uang ve nasa, a inhmeh lo lutuk chu ka nuih ṭiah ṭiah a, a la ṭhu tum der ve vel. U Hruaia chu a ṭawng tam lovin a zia a zawi tih chu ka hria, mahse chutiang em ema mi ṭawng mawh ka duh tlat chu mak pawh ka inti. Kan duh leh duh loh turte thleng hian Pathian hian a lo ruat dawn a nih hi ka ti ta. Kan inbiak tam dan ber chu phone call hi a ni mai a, a chang leh kan inah a rawn leng leh tawp bawk. Ka nu leh pate chuan an lo nel ve tawh hle a, a bikin ka nu hian a lo be leh vak zel. A hmelah an be reng ṭhin chu a ning tih ka hre thei, a chhan chu anni aia a zia ka hriat chian ve tawh vang a ni.

"Ka lo leng aw" leh tawp tawp ṭhin hian. Ṭawngkamte lah hi a duh tawi thei si, mahse chu chu amah a nihna ka ti ve leh tlat.

"Ka lo awm ang" tiin ka reply ve a, inha ṭha sawk sawkin in hnuai lamah chuan ka chhuk ve nghal. Rei lo te hnuah a rawn thleng a, ka nu leh pate an lo awm bawk nen ka bulah chuan a ṭhu leh duh nghal mai lo.

"Ka pu, in rem tih chuan Nutei hi zinpui lawk ka duh a, a theih ang em?" U Hruaia ka duh lehzual em emna chu thil puithu deuha min hruai chhuah dawn hian ka pa emaw ka nu emaw hi a dil hmasa thlap zel. Tin, an awm lai chuan mi pangai tak leh zahawm takin ṭhuthleng hrangah a ṭhu daih ṭhin a, ka pa phei chuan titi pui nuam a ti thei khawpin ka hria.

"Aw a ni maw, Nute engtinnge i class lam? A khawih buai dawn loh te chuan i duh leh i kal ve ang a" ka pa chuan min rawn chung hian a rawn ti dam dap a, chutah kei chuan

"Tun lai chu kan exam chawlh lai tak a ni a, in phal chuan kal pawh pawi ka ti hran lo" ka lo ti ve vat. Ka pa chuan u Hruaia chu zui a phal a, ka lawm ngei mai.

A haw dawn chuan ka thlah a, ka duh aiin a haw hma. Ni dangah te chuan dar 10 velah tal a haw ṭhin si a, haw hma a tum ta em em chu mak ka ti ve deuh. Han zawh ngawt chu nel tawh viau mah ila ka duh chiah lo, a chhan chu kan la inneih bawk si lo va, amah ngai lutuk angah min ngai ang tih ka hlau. A nihna takah chuan ka ngai a, a nupui nih chu ka châk hluah hluah tawh zawk.

"Engatinge i ngawih reng? Min mangṭha dawn lo em mi?" motor chhung aṭang chuan a rawn ti a, ka la ngawi ta reng tho. Thawk a la hawk a, ka lam panin a rawn chhuak ve leh mai bawk.

"Hei, i ṭawng zet zet loh hi chuan ka awm thiam tawh lo a nia" min rawn kuah pah chuan a ti a, haw hma a tum lutuk chu ka lung a chhia ni berin ka hria.

"Tihtur ka hria" tiin a motor-ah chuan min nawr lut a, a tih ang ang chuan ka awm tawp.

Kan tlan chhuak a, kan tlan zel a, kan tlanna lam chu kan veng hlui Tuikual lam a ni tih ka hriat chuan mak ka ti ru ngei mai. Ka lungchhe laklawh leh ṭawng duh lo laklawh chu ka ning ru hle a, zawhna zawha ṭawng ka châk tawh lutuk. Ani lah chuan mi thlem vel a tum hmel si loh, ṭawng lova awmte chu kei ai aiin a thei tih ka hrechhuak har lutuk chu ka inchhir. Ka hlauh ruk ang ngeiin an in kawtah chuan min dinpui ta. Ṭawng miah lo chuan ke en reng a, ka biangah piaiin a rawn nui suk ringawt.

"I duhna ah chuan i luhlul ve hle mai maw" nui suk chunga tiin a chhuk a, kei chu ngawi rengin ka la ṭhu ta reng. Ka bula kawngkhar chu hawngin min pawm ta riap mai le.

"Hei, enge i tih?" a chet dan avang chuan ka ti chhuak ta nge nge a, ka ṭawng ring ngam bawk si lo nen min tih dan chu buaithlak tak a ni.

"Ka pawm che" min dah thlak chu a la tum loh hmel hle a, min pawm khawm vek ti tih alawm le.

"Hei, min dah thla teh, engatinge in in lamah hian min hruai phei zel? Mawla, LALHMAHRUAI, min dah thla vat teh" min dah thla chuang lo chuan a nui nghawr dat a, kan buaithlak ṭhin.

"Zanin hian ka chhungte'n an hmu ve tawh dawn che" a thu rawn sawi avang chuan ka tal leh chiam a, min dah thla ve thei ta hram.

"Ka duh rih lo, ka incheinate hi en la, i mawl em ni? Nâaaaaaaaa...... u Hruai min ngaihtuah ve teh, i ti ho thei êm mai" ka ṭah te chu a chhuak ngawih ngawih a, a chhan chu a pa chu tû dang ni lovin kan Principal a ni miau alawm.

"Ka duh dan takin i inchei" a rawn ti leh sup a, ka banah kaiin an inah chuan min luhpui zui zat. A hnuah chuan zak ru em em tho mah ila a chhungte hmuh chu pawi ka ti hran leh ta chuang lo.

"Awi u Mam, pa lo kal teh u, hei u Mama leh tu emaw ni an lo kal a nia" in chhhung kan luh rualin u Zualtei chuan nui sen sen hian a lo ti ngal vat vat a, ka zak nghal hle.

"Bawihte, vak vak ṭhin che hian, ka hrilh lawk vek tawh che kha" tiin u Hruaia chuan a lo khap ve vat bawk. Rei lovah kan Principal leh Duati chu an rawn chhuak a, zam tak ka ni.

"Êeeee khai! Mama i rawn hruai ta nge nge maw?" Principal chuan sofa-a ṭhut thlak pah chuan a rawn ti a, a bulah Duati chu a ṭhu zui ve nghal.

"Au Nute, enge i lo tih dawn a? I lo leng dawn maw?" awi, ka va han chhang hreh tak.

"Duati, au Nutei hi a lo interview dawn a" ka chhan hma chuan u Hruaia chuan a rawn ti a, a chhan dan phei phei chuan min tizak lehzual.

"Mama, han ṭhu phawt mai teh u. Khaaaaa, i ṭhiannu kha a sen vek tawh a nia" awi awi awi, u Hruaia pa ni awm tak pawh a lo ni e, Principal mah ni se a nghal hi ka ti ve thlâwt.

"I hming chu eng maw? Han insawi ṭan teh le" kan Principal a ni bawk si, a nghal bawk si chuan min tizak ngawih ngawih. U Hruaia lah chuan min lo nuih mai mai duh lek chauh.

"Zonunmawii ka nia, pu Lalrochhuma fanu" ka tichhuak thei hram.

"Ka hria alawm, i pate chu ka hmelhriat a nia. Kan vengah hian in awm tawh a ni lo'm ni?" i hriat te chuan engatinge min zawh kher tih chîam mai ka duh.

"Aw" tih chauhin ka chhang a, engatinge an nghal chhungkua em emna chhan chu ka hre lo a ni.

"Aw le, a ṭha e. Ti hi chuan ka mo tur pawh ka hmu tawh a, ka thaw pawh a veng huai mai. Mama, zan a tlai lutuk hmain va thlah haw tawh rawh" tiin a ding nghal uai a, keini pawh kan ding ve nghal.

"Chuan naktuk chu i lo kal ve dawn maw?" a pa bawk chuan min rawn be leh a, kei chuan a kal daih tawh emaw ka lo ti zawk.

"Aw, u Hruaia hian min sawm ve a" in la polite tak chuan ka ti a, zep lovah an bula kal chu châk tho mah ila ka châk lutukin ka hre lo.

"A ṭhat chu, tlai lo ula aw" tiin kal nghal mai a tum a, kei lah pek chuan

"Aw le Sir....aaahhh! ka pu....aaaah! ka..., ka...pa.... Nâaaa" ka lo tih bah nuai tak avang chuan chiang zetin min rawn en leh a, ka zak lutuk chu u Hruaia hnungah chuan ka ding ta ringawt. Khawvela ka la zah ber ṭum dawttu na a ni ang.

"A eng ber chuan nge min koh dawn a?" a va han nghal chiang tak, pu nghala chu!

"Ihhhh....ka hre rih lo" u Hruaia hnunga ding tho chung chuan ka ti leh ringawt a, a hmel hi ka hmu ngam tawh rih lo a ni. U Hruaia kawr hnung chu ka pawt che dat dat a, ani pawh ka lam hawiin a rawn nui ri suk.

"Pa, i sual thiam ve ê mai aw. U Mam, va hruai haw tawh rawh. Nute bye aw" u Zualtei chuan nui ver ver hian a rawn ti a, ka nuih a va za lo tak! U Hruaia chuan ka dara min nawr kal pahin min chhuahpui a, pawn kan thlen te chuan lawm tak ka ni.

"Engatinge khatiang em em khan i pa kha a nghal a? Kan Principal pawh ni se ka ngei ve thláwt a ni. Mawl leh lutuk mai, ka zak lutuk kha intihbo daih theih se chuan min hmu lo nghal vang vang ang" kan tlanchhuah hnu chuan ka ti nghal bawrh bawrh a, ani erawh a lo nui ri ve suk suk.

"Naktuk chu ka lo sawm ang che, lo inpeih sa thlap la" kan in kawta kan din reng takah chuan a rawn ti a, kei chuan

"Enge kan kal chhan ber hi? Khawi hmunah nge ni reng reng?" tiin ka zawt ve leh nghal.

"Ka naupan laia kan khua ni ṭhin a nia, ka nu thlan kan tlawh bawk ang" a rawn tih chuan a nu a boral tawh tih ka hre leh chiah.

"Aw le, bye aw" tia chhuah ka tum chu min pawt ding leh a, min fawp leh ta nge nge.

"Kar khat chiah awm tawh mahse ka mamawh tawh tak zet che" min mamawh thu a sawi hian ka rilru hi a hlim leh veng veng zel.

"Lo nghak hram hram rawh, kan inneih ṭep tawh hi, tunge i ṭhianah i hman dawn?" zawhna dang ka lo zawt daih thung.

"Ka naupan lai aṭanga ka ṭhian a nia, naktukah kan kal ang a i hmu mai ang" a rawn ti ve mai bawk.

A tuk a rawn thleng a, kan tum lawk ang ngei chuan Aizawl aṭangin thingtlang lam khaw pan turin kan chhuak nghal. Kan College Principal, kar leh lawk aṭanga ka pa ni mai tur, u Hruaia pa chu motor chuanna ah chuan a nghal ka ti dawn nge, min fiam ve ka ti dawn zawk pawh ka hre lo. U Hruaia chuan a khalh a, a bulah a pa ṭhu a, keini hmeichhe pathum chu a hnungah kan ṭhu tlar dial. U Hruaia chu a pa nen an titi char char a, an pafa inkawm hlim hmel ka hmuh chuan mak ka tiin nawm hmel ka ti.

Kan kalna tur khua kan thleng chu thingtlang khua deuh turah ka ngai a, mahse a lo ni teuh lo. Aizawl aṭangin khua chu hla viau mahse a pui ru riau a ni. Assam type-a insak aiin concrete building a lo awm fur a, mahse chhawng sang tak hmuh tur a vang hle thung. U Hruaia tih loh chu kan vawikhat kalna vek hi a lo ni a, khaw awm dan leh thil chinchang pawh kan hre lo tlang hle. Khaw luh tak tak hma hian Restaurant hi an lo awm fur a, chutah chuan thil te in ei puarin khaw chhung lamah chuan kan tlan leh nghal. Kan tlan zel a, a tawpa tawpah chuan concrete building chhawng hnih vela sang hmaah chuan kan ding ta. Kan chhuk a, u Hruaia leh a pa chu in chhung lama luh tumin an inzui a, keini pawhin kan zui ve nghal.

"Êeeeeeee, lo kal r'u, lo kal r'u. In va fel hlawm ve heng lai thleng thleng in lo kal a, in chau em?" in chhung kan luh chuan nu pakhat hian a lo ti nghal bawrh bawrh.

"Chau lo ve, in ṭha tlang maw? He lai lo rawn pan mai tur kan hre si lo va, min lo hrethiam hram hram dawn nia" u Hruaia pa chuan a lo ti let ve nghal a, u Hruaia chu ngawi rengin in chung lamah a chho daih.

"Nui, vawksa la awm ho zawng kha i siam dawn nia. Vawiin tlai chu zanriah tui tak kan ei theih beisei phawt ang" chhungkaw pa ber ni ngei tur chuan a rawn ti a, an awm dan leh an inbiak dan vel chu a nawm hmel reuh tawp.

"Bawihte, i nau te nen khan hetah lo phei teh u, ka lo inhmelhriattir ang che u" u Hruaia pa'n a rawn tih chuan kan ṭhu phei ve mai a, Duati chu a laiah kan ṭhut tir nghal bawk.

"A thlang bera mi hi ka fanu upa ber Zualtei, Bawihtei tia kan koh a nia , a laia mi hi a naupang ber Duati a nih hi! Chuan a chhak bera mi hi ka mo ni mai tur leh Mama nupui tur Nutei a ni bawk" felfai takin u Hruaia pa chuan a ti chhuak dap dap a, ka lo zak ru leh tawh ngei mai.

"Engatinge maw in chunga mite pahnih pawh chu an va rawn chhuk har em em ve maw le. Mala, Malsawmkim, Hruaia, lo chhuk thuai teh u" tiin chhungpuinu chuan u Hruaiate chu a ko lawm lawm a, a koh hnu rei lo te ah anni pawh an rawn chhuk ve mai.

"Hruaia, engatinge i chhoh nghal daih? I chhungte hi i tihawihai alawm, â thei lutuk mai" chhungpuinu bawk chuan u Hruaia chu a hau leh nghal bawrh bawrh a, an innel danah an inhre chiang thawkhat bawk a ni ang.

"I va'n ti ho tak, ka pa leh ka nau te ka lo hruai dawn tih ka rawn sawi lawk vek tawh kha" nui chung hian u Hruaia chuan a ti a, keimah min sawi tel ve miah lo chu hrehawm ka ti ta deuh. Ka hrang ta viauah ka inngai nghal a, ka kal ve chu zak lo intihna leh inchhirna ka nei zui bawk.

"Saw saw mi in nu tur chu?" u Hruaia bula ding mi pakhat chuan a ti a, u Hruaia pawh chuan a lo hrilhfiah ve nghal niin ka hria. Chupa chuan keini ho chu min rawn chibai liam liam a, amah chu Mala tiin an ko bawk.

U Hruaia'n min ngaihven lo deuh hleka ka hriatna chuan ka awm a ti nuam lo va, u Zualtei nen u Mala nu ei rawng kan bawlpui lai te pawh chuan ngaihtuahna dang daih ka lo pu. A chang phei chuan min biakna pawh ka hre lo leh nulh zel a, mo tur si ṭawp chu min ti ve ngawt ang. U Hruaia pa leh Mala pa chu an titi char char a, Duati pawh a pa bulah a tal leh chat tawh. U Mala nu chu a ṭawng siam siam a, a bula awm a nuam tawp.

"Nute, Zualte, a dang hi chu ka lo ti vek thei tawh ang. In duh leh in chung lamah han chho ve chhin ula, khaw hawi pawh a nuam reuh phian asin" maian bai tur kan hih zawh chuan a rawn ti leh a, keini pawh kan kutte silfaiin kan chho ve mai bawk.

"Êeeeeee, lo kal r'u, nuam in ti maw kan khua chu?" in chung bera kan chhoh chuan u Mala bawk chuan min lo bia a, u Hruaia chuan min lo nuih ringawt.

"Aw, nuam lutuk" u Zualtei nen chuan kan lo ti ve nghal.

Zanriah kan ei chuan ka ei tui ngei mai, vawksa ai mah chuan maian bai chu a tui ka ti. An maian baia mautuai ang deuh hlek, mahse mautuai aia te si chu enge a nih ka zawh chuan tuaiterek a nih thu min hrilh a, chu chuan a titui lehzualin ka hria. Tin, chawhmeh engkim chu a inhmeh vel vek. Chaw kan ei kham chuan kan sengfel pui a, chuti vaka tihtur tam erawh a ni lo thung. Keimah lo ang takin ka ṭawng duh lo hle a, mahse chutianga ka zia a danglam ta deuh chu tûma'n an ngaihsak pawhin ka hre lo. U Zualtei'n u Mala nu chu a pui a, tihtur ka nei ve lo chu hrehawm ka ti hle.

"Nute, i duh chuan u Mama te bulah han chho la, hei chu ka lo tihpui thei lutuk ang" u Zualtei chuan min rawn ti a, ka chhan dawn lai tak chuan

"Ni e, han chho ve rawh. Chubakah engatinge Malsawmkima pawh hi a kawm hran daih reng reng ni, â leh lutuk mai" u Mala nu pawh chuan min rawn ti ve leh a, nui ver ver chungin keipawh ka chho ve ta mai.

"I theihnghilh thei tak tak ang maw? In inzuina a la rei lo va, in inneih hnuah te khan i buai zawk ang tih ka hlau" tih ṭawng thawm ka hriat chuan in chung ber step ka chho fel zo ṭep ti tih tawh, mahse ka ding nghal chat.

"Ka theihnghilh tawh alawm" u Hruaia aw ve thung a ni. Eng thil nge an sawi hi ni hrim hrim le? Kal chhoh luih ka tum lai takin u Mala chu a rawn ṭawng chhuak leh a, chutah u Mala'n ka hming lam ri meuha

"I la theihnghilh lo tih ka chiang, theihnghilh tawh ni la chuan i wallet-ah khan inthlalak dunna i la kawl reng lo vang. I ṭhianpa ka nih hi, i wallet-a thlalakte hi i tana mi pawimawh lo chu an ni ngai lo. A tlai hma hian ngaihtuah chiang rawh, Nutei tan pawh a hrehawm ang" a rawn tih tâkah chuan ka ding leh ta hmak.

"Sangtei chu ka hun kal tawha ka ngaihzawng a ni a, Nutei hi chu ka tun huna mi a ni. Ni e, engtik lai mahin Sangtei hi ka la theihnghilh lo tih chu ka pha lo" u Hruaia thusawi chuan min va vaw na em, step aṭang chuan dim têin ka chhuk a, u Zualtei leh u Mala nu chu bathroom-ah an lo che dun thung.

Ka mal lutuk leh kawm tur ka nei lo lutuk chu hrehawm ka ti a, Duati tak ngial pawh kawm ka duh viau a, mahse a pa bulah a awm tlat bawk si. Ka tihtur hre lo chu pawnah ka chhuak ta tawp a, an in veranda-a ṭhutthleng lo awmah chuan ka ṭhu nghal daih. Chutah current a rawn awm lo va, thla lah chu a la eng phian zui. Tunah chuan ka lo kal ve ringawt chu inchhirna hlirin ka khat tawh. Â ka inti a, zak lo ka inti hle bawk. A nupui ni tawh ang maia ka zui kual vel chu ka zak a ni. Ka phone ka phawrh a, Feli biak tum eng ang mah ila signal a awm lo tih ka hmuh chuan ka ak ṭha zui leh nghal.

"Bawihte, khawnge Nutei?" in chhung lama u Hruaia aw chu ka hre thei, min zawng ve ni ngei tur a ni.

"In bulah a rawn chho lo em ni? A rawn chhoh ngei kha" u Zualtei aw pawh chu ka hre pha vek a, mahse ka awmna hrilh kher ka tum lo.

"A va buaithlak ṭhin tak, khawnge a lo kal hman ang âw" u Hruaia aw bawk a ni. Kei hi buaithlak min lo ti a maw? A ṭawng chu ngaihkawih phet ka tum pawh a ni lo, ka laka a awm dan chuan min ti ngai dik lo zo vek tawh zawk a ni. Pawn lam pana a rawn pen phei ri pawh ka hre vek a, mahse eng thawm mah lo neih ka duh lo.

"Âwwwwww, hetah a ni maw i lo awm? Ka zawng che alawm?" min hmuh chuan a rawn ti a, a thaw huai bawk. Current a thim avangin hmel tak chu inhmu chiang thei lo mah ila thla eng avangin tunge kan nih chu a hriat theih vek tho.

"Nia, current a thim bawk sia, heta ṭhut hi a nawm ka ring a" pangai tak chuan ka lo ti thei hram.

"Hrehawm i ti em?" a rawn tih chuan 'Aw' tih chiam mai ka duh a, mahse ka insum hram hram a ni.

"Ti lo ve, an fel sia a nuam ka ti" dawt chu ni vek lo mahse dawt lo pawh a ni vek chuang lo.

"Nutei kha i ang lo, i ngawichawi sawt em mai. Thil dik lo a awm em ni?" aw dam taka a rawn tih leh phei chuan lungchhiat rukna avanga ka mittui lo tlingsa chu a rawn baw ta zawîh mai. Current a awm lo hlauh a, ka mittui a luang tih pawh a hriat ka ring lo.

"Lo kal teh" tiin min kuah a, ka ṭap tih a hria ang tih ka hlau hle a ni.

"Engtikah nge kan haw dawn?" ka aw lawi rât aṭang chuan a hriatthiam loh hram ka beisei.

"Naktuk chhunah ka nu thlan kan tlawh ang a, chumi zawh chuan kan chhuk leh nghal dawn nia" a rawn ti dam leh thluam a, chungte chuan ka ṭah an ti chhuak lehzual.

Vanneihthlak takin ka ṭap tih a hre lo va, zan a rei tak tak hmain current pawh a rawn awm leh vat. Mala room-ah chuan hmeichhia ho kan mu a, room pakhatah u Hruaia pa muin chhuatah Mala leh u Hruaia an mu bawk. U Zualtei'n min kawm hlim leh viau lo phei se chu ka hmelah leh ka awm danah thil thleng a awm a ni tih an hre thei nghal ngei ang. A tuk chaw ei khamah chuan motor-ah kan chuang lut a, thlanmual lam panin kan tlan leh nghal. A hmun kan va thlen chuan u Hruaia pa chu a kal hmasa ber a, thlan lung khawih chung hian a kun nghal ngawih ngawih. Ka hma lawka kan College Principal ṭap ka han hmu ta ringawt chu nuam lo ka ti hle a ni. U Hruaia erawh a ṭap lo va, a pa chu a zuk kuah zawk thung. U Zualtei leh Duati pawh an bulah chuan an phei ve nghal a, chutia ngaihsaktu pawh nei lova ka awm ta tlawng chu hrehawm ka va'n ti tak em.

"Hruaia" kan hnung lam aṭang hian hmeichhe aw hian a rawn ti a, kan hawilet nghal ṭhup. Hmeichhe pakhat, hmel fai tak leh hmelṭha lampang tak hi a lo ding a, hetiang khuaah hi chuan a hmelṭha pawl tak a ni ang.

"Sangte" u Hruaia chuan a rawn ti ve thuai a, Sangtei chuan kei min kal pelin u Hruaia te awmna lam chu a pan phei ve nghal.

"I lo kal hi ka beisei reng ṭhin alawm" Sangtei chu u Hruaia ngaihzawng hlui kha a ni tih ka hriat chuan ka thikin nuam lo ka ti nghal hle.

"Ka nu, hei Sangtei pawh a lo kal a nih hi! Min boralsan hma lo la chuan engkim hi i hmu ang a, i hlim ve dâwn dawn nen" u Hruaia chuan a ti leh dap a, an vai chuan thlan lung lam an hawi vek a, an hnungah ka awm ve tih reng an hre lo.

"Nu Parte, a pawi a ni. Keimah vang vek a ni. Hruaia kha lo fehpui lovin i bulah khan lo awm tir zawk ila chuan hetiang thil hi a thleng lo tur" tiin Sangtei chu a ṭap zawih zawih a, ka hmuh lai rengin u Hruaia chuan duat takin a kuah a, aw nem takin a thlem zui bawk.

Kei hian thil ka lo tisual a ni. U Hruaia hian Sangtei hi a la theihnghilh thei lo a, nupui atan pawh a iai hek lo. Kan mualpho tam hmaa inṭhen leh chu ṭha zawkin ka hre ta a ni. Ka thaw ipik lutuk tih thawlna'n tiin ka hawi kual vel ta tawp a, kan chhak lawk kawngpuia motor kan park na bulah chuan Rickshaw hi a lo awm vang mai. Hmanhmawh takin ka chho a, ka thlen chhoh chuan driver pawh a lo awm reng. Rickshaw-ah chuan lut nghalin driver chu kan tlan chhuah tir a, khaw mi a nih leh nih loh ka zawh chuan khaw mi ngei a lo ni. Vanneih thlak tak ka ti dawn nge vanduai thlak tak ka ti zawk dawn pawh ka hre lo, thlanmual aṭanga kan tlan chhuah khan ka hawi thla leh a, tûmah khan min ngaihsakin min hmu lo hrim hrim.

Tlai tak a la nih loh avangin driver chu Aizawl-a Sumo kal tur chu min biak sak turin ka ngen tawp a, rin ai takin driver pawh chu a lo fel phian mai. Vanneih thlak lutuk tak maiin Sumo tlan chhuak tur chiah chu kan phar ding a, seat pakhat a lo la awl hlauh. Lawmthute sawiin Rickshaw driver chu pawisa ka pe a, Sumo-ah chuan ka chuang lut nghal. Mi dang ka chuanpui te nen chuan kan inbe lo hrim hrim a, kan inhre ngai lo bawk nen a awm ve tho.

Ka chhungril tawt up up leh ṭah chhuak lutuka ka awm chu insum zawh loh hun ka nei mai ang tih ka hlau hle a ni. Kan tlan ta vang vang a, Sumo a ni bawk nen kan muangchang viau lo. Ka phone chu ka switch off lawk avangin tunge min lo biak tuma tum lo tih pawh ka hre ta lo. Kan in ka thleng chu ka nu leh pate chuan haw pangai tawh emaw min ti a, pawi pawh ka ti chuang lo. Ka inbual a, ka kawrte chu washing machine-ah ka su nghal zung zung. Inneih ni kan lo rel thawt thawt te chu pawi ka ti hnuhnawh a, ka inchhir ang reng hle bawk. Thil awm dan vel chu Feli hrilh nghal ka tum a, mahse ka hrilh leh ta chuang lo.

Tlai lam chu khua a dur deuh dûk a, thli pawh a thaw vuk vuk mai. Ka rin ai takin kan thleng thla hma a, u Hruaia te chu an lo chhuk vel mek ka ring. Khumah chuan rizai sinin ka mu a, ka ngaihtuahna chu a kal thui ngei mai. U Hruaia chu pasalah ka nei ang nge thil a kal buai hma tak tak hian inneih ka ṭhulh tir ang tihah ka buai hle bawk. Switch off chunga ka phone charge chu ka en a, a lo in charge full tawh avangin ka phawi a, ka phone pawh ka Switch on nghal. Ka phone ka en chuan u Hruaia missed call vawi khat a lo awm a, a dang chu u Zualtei'n vawi nga leh number lawngin vawi khat tho missed call na te hi a lo ni hlawm. Missed call rawn luhna a la rei lutuk loh vang leh thil pawimawh emaw a awm tâkah tiin number lawng chu ka call back ve a, rei vak lo hnuah a rawn pick-up ve nghal bawk.

"Hello, Nute, engatinge i" a ṭawng laklawh lai chuan ka off leh nghal. A aw aṭang khan u Hruaia pa a ni tih ka hre thei.

U Zualtei phone call a rawn luh chhunzawm ve nghal zat a, mahse ka la ta chuang lo. Whatsapp leh eng eng emaw vel chu ka khawih a, ka phone khawih erawh a tui lo khawp mai. Feli chu ka call a, a lo la ve vat. Thil thleng chu engmah ka la hrilh duh ta chuang lo a, Bazar a chhuah dawn thu a sawi chuan ka kalpui tur thu ka hrilh ve nghal. Inah hian ka awm peih rih lo a ni. Ka Scooty-a kan in gate ka tlanpelh dawn lai chuan u Hruaia motor ngei mai chu a rawn thleng ve chiah a, mahse a ranga rangin ka tlan chhuak hman ta tho.

"Ni danga min kalpui hreh em em thei si kha tuna taka i phur viau chhan hi a awm em?" Feli chuan Restaurant-a thil kan ei laiin a rawn ti a, ka awm danah chuan a hriat vîau emaw ni le....

"Awi, chekhirnu ka kalpui ve ziah che, sawi uar lo mai teh" ka lo ti let ve ta zaih.

"Ṭawngtheinu, khatiang khan min ko ve ziah suh. A hrim hrimin i mu em ni? I hmel kha a dik lo" thil ei mial mial chungin a rawn ti leh a, mu anga min ngai pawh chu a awm ve tho e.

"Mu chiang e, khua a duai bawk sia ka mu chak thut alawm"

"Niminah em ni in lo haw? Nge vawiinah?" engmah lah chu a hre der bawk si lo.

"Aw, vawiinah" ka ti ta ringawt.

"Awi, nang chu i lawina turte an hausa bawk sia, an fel bawk nen i vanneih ê" ka sawi peih loh lam tak hi min sawipui phet a tum tlat mai bawk si.

"Nei ve vat rawh, Sir Joseph-a chu bansan la, mi dang zawng leh tawh mai rawh" ka lo ti ve leh a, ani chuan

"Sir Joseph-a nen chuan kan inngaizawng daih tawh" a lo ti heu mai.

"Engvangin nge min hrilh miah lo a?" ka ti nghal thuai.

"I buai em alawm. Lo kal rawh, i ei zo ve tawh tho haw lam hnaih ang. Kar leh lamah chuan mi nupui leh mo i ni daih tawh dawn si, hetianga chhuah dun theih lai hi chuan min chhuahpui char char teh" ding ngila insiamṭha mawlh mawlh pah chuan a rawn ti a, ka rilru chu a buai hle a ni.

Folkland Park-a min kalpui ve lawk turin ka ti a, inpaih thawl chu ka ngai tak zet a ni. Dawr aṭang chuan kan inzui chhuak a, Scooty kan ken ve ve avangin ka hnungah a rawn tlan ve mai bawk. Folkland Park kan thlen chuan an hawn ni a lo la ni lo zui, ka vanduaina kal tluan ni a ni chiang khawp mai. Tlan let lehin hmun fianrial deuh laiah chuan ka dinpui a, Feli pawh chu ngawi rengin a rawn chhuk ve nghal.

"Engatinge Nute, thil dik lo a awm chiang ti raw?" ka bula rawn ṭhut pah chuan a ti a, ka tan chuan sawi loh aiin sawi chhuah a ṭha zawkin ka hria.

"Inneih leh loh hi kan tan a ṭhat zawk ka ring" kan hma rala tlang en vang vang pah chuan ka ti a, ka ngaihtuahnaah te chuan u Hruaia leh u Sangtei awm dan hlir a awm.

"Engvang chuan maw? A chhante sawi ve tal la?" a rawn ti leh a, ka ṭhiannu berin a hriat chu ka ti ta lo law law.

"A chhan chu u Hruaia hian theihnghilh theih loh hmeichhia a nei tlat a ni. An khaw hluia kan han zin khan an inhmu a, an la inngaiin an la induh hmel lutuk. Kei chu awm ve lo ang mai leh mi hrang ang maiin min ngaiin ka hria. Kei hian mi induh tawn em em te inkar ka pawtchhe mai mai niin ka inhre bawk. Ka hrethiam tawh bik lo, u Hruaia ka duh lutukna lamah hian thil ka tisual ni berin ka hria" ka ti chhuak ve sep a, ka ṭah lah chu a'n chhuak em em mai khawp a!

"Kan tlangval senior-a chu a va ti ho ve. Inneih hial duhin palaite a rawn tir tawh a, chutianga i awm laia a chette chuan tu hmeichhiain nge hrehawm ti lo ang a? Ka lo hau hrep dawn em ni?" min thlamuan tum tak chuan a rawn ti vat a, kei erawh chuan

"A ngai lo, tunah chuan awm dan tur pawh ka hrethiam chiah lo. Kan inneih hun thlenna'n kar khat pawh a awm tling tawh lo va, chutah kan inkar boruak hi a ṭha em em bawk si lo" ka tichhuak leh sep sep thung.

"Lunngai suh, eng thutlukna pawh siam la kei chu i lamah ka ṭang dawn a nia" tiin min rawn hnem ve a, chutia ka harsatna ka sawi chhuah avang chuan ka chhungril tawt lutuk pawh chu a veng hawkin ka hria. Kan inkhalh haw a, pangai tak chuan kan inthlah ve leh mai.

Zualtei/Bawihtei POV

"U Mam, i ti ho ve ê. Kei ngei pawh hi ni ila Nutei thil tih ang tho hi ka tih ve ka ring" tiin sofa-a u Mama ṭhu ngawi ngul chu ka hau a, Nutei tan khan a hrehawm dawn lutuk.

"Keia reng reng pawh hi ka lo â êm a ni. Kawm tur kha a nei lo tih ngaihtuah pha miah lo khan in bula rawn chho tur te khan ka lo ti vel a, atan kha chuan inkiltawih lohna chi pawh a ni lo" keimah zawk pawh chu ka inthiam lo tak tak a ni.

"Nutei chu a rawn chho tak tak em ni?" min rawn en chung chuan a rawn ti ve nghal.

"Chho ka tîh ka tih chu maw le, ka Surf la tur khan ka hmu chiang alawm. In bulah a lo kal lo em ni? In hmu lo hrim hrim em ni?" ka lo ti let ve leh vat.

"In chungah a rawn kal lo hrim hrim, ani hian kan thusawi kha hriain a chhuk leh zawk em ni ang?" thil ngaihtuah vang vang chung chuan a rawn ti a, a thusawi awmzia chu ka hre hauh lo.

"Engthil nge in lo sawi à? A tana ngaihthlak nuam lo tur in lo sawi em ni?" thil chu a kal buai vek ang tih ka hlau a, Nutei te ang kan mi hriatchian chu kan chhungkaw mo atan chuan an ṭha ber ang ka ring.

"Mala nen khan nun hlui leh ka ngaihzawng hlui vel kan lo sawi a, chu chu a lo hria a ni hrim hrim ang. Pawna ka hmuh pawh khan a awm dan a dik lo tih ka hria" a rawn ti ve leh sup.

"U Mam, engtia tih nge i tum? Hetianga awm reng hi i tum em ni? Va be ta che, Nutei lo hi chu kan chhungkaw mo atan ka duh miah lo a nia" ka tih pawh chuan thawh a la tum lo hrim hrim.

"A hrim hrimin u Sangtei pawh kha engatinge i lo kuaha i lo thlem vel? Nang ni la, Nutei hi mi pakhatin i hmuh lai rengin duat takin lo kuah vel se hrehawm i tih loh bik i ring em ni? Nge ni a, nang hian Nutei hi i fiam kual mai mai zawk?" Nutei tana hrehawm dan tur ka ngaihtuah hian ka thin a rim lo thei lo a ni.

"Min chhang teh u Mam, Nutei hi nupui atan chuan i duh ngei em?" ka ti leh chuan a rawn ṭhu awn nghal duai.

"Ka nupui ni tur chuan ka duh ngei alawm" maimitchhing chung chuan a rawn ti a, celling lam hawi chuan a dak vang bawk.

"Engtinnge a bulah i sawi?" Nutei laka a chet dan avang chuan ka la lungawi thei lo a ni.

"Ka ngainat thu leh ka mamawh em em thu ka hrilh" a la meng chuang lo.

"I mamawh thu leh i ngainat thu chauh hrilhin nupuia neih nghal mai i tuma maw? I duh thu pawh i la hrilh lo tihna a ni a, ani chuan kum 5 lai a lo duh tawh che avangin a hmangaih em em dawn che tih ka hria. Inneih hun lah chu kar khat pawh a awm tawh si lo, a rilru na lutuk hian ṭhulh a ti mai ang tih ka hlau" ka tih chuan a rawn meng nghal zawk.

"A theih loh, eng ang pawhin tum mahse Nutei hi ka nupui a ni tho ang" tiin a tho vut a, hmanhmawh takin a kal chhuak nghal.

Nutei POV

Zanriah kan ei kham a, zan dang ang lo takin TV chu ka en ve a, chutiang bawkin ka nu leh pate pawh. A changin phone chu ka khawih leh zauh zauh a, ka phone en avang chuan ka nui leh tut tut zel. Instagram-ah chuan ka lut a, mi thlalak post ṭhenkhat chu ka like nghal zung zung bawk.

"Lo lut rawh" kawngka inkik thawm rawn awm avang chuan en miah lo hian ka lo ti a, ka phone chu ka la khawih chhunzawm char char.

"Êeeeee... Hruaia, lo leng rawh. Nute, kha ṭhutna lo kian ta che" ka nu'n a rawn tih chuan ka harh nghal zawk.

"Lo kal rawh u Hruai, motor i khalh char char bawk sia i chau lo em ni? I lo leng duh kher a nih kha" kan inkar boruak chhia chu tihlan loh hram ka duh a ni.

"Tunlai i hna lamah i buai em?" ka pa chuan a lo be nghal a, ka nu pawhin a lo tuihnih ve nghal zel bawk.

"Buai hranpa em em lo ve, chawlh ka la dawn tawh zawk a" u Hruaia pawh chuan a lo ti ve mai.

Zan dang ang lo takin ka bulah a ṭhu ve a, insi deuh thawa ṭhu chung hian kan inkar chu a hla em em lawi si. Zan dar 9 a lo rik chuan ka nu leh pate pawh an room lamah an kal a, kei leh u Hruaia chu kan awm dun ta ran mai.

"Ka tihpalh" kan ngawih dun tâk reng avang chuan a rawn ti a, ka ngaihtuahna chu a kal ding nghal hle.

"A ho lutuk, ka rilru a rawn na thut a, chuan ka haw ta mai a nih kha" zep buai si sê chu ka tum lo law law.

"I rilru tih nat hi ka duh reng reng lo" ka mal chunga ka kut dah rawn hum pah chuan a ti a, a kut te lah chu a la lum nuam em em zui.

"A pawi lo, keimah zawk kha ka inthiam lo a ni. Ka pawimawh lo ve bawk sia, ka lo kal ve ringawt bawk nen in thiam loh a awm miah lo a nia" pangai taka awm chu ka duh a, mahse a harsa lam hret chu a ni.

"U Mala nu leh pate bula ka kal ve tur thu i sawi loh te, i ṭawngkama buaithlak min tih thute kha ka lo la ná ve ringawt bawk a, ka awm dan kha a âtthlak khawp mai. Nangmah ni zawk zawk hi ka timualpho palh ang che u tih pawh a hlauhawm letling zawk alawm" ka tih zawm leh nghal zat bawk.

"Ka ṭawng kha i lo hre vek maw?" a hmel hmuh chu ka duh rih lo, ka ṭap chhuak hawk palh ang.

"Aw, hria e" ṭah insum tak chuan ka lo ti ve leh nghal.

"Inneih ṭhulh lampang i ngaihtuah lo ti raw?" kan ngawih vang vang hnuah chuan a rawn ti a, chu kher chu chhan harsa ka ti, mahse thu dik sawi chu a finthlak zawk a ni.

"Ka lo ngaihtuah alawm" ka tih chuan ka kut a humna chu a ti nghet suah a, ka mitsir chuan min en reng tih ka hmu bawk.

"Inneih chu i duh lo tihna em ni?" min en reng mahse ka en ve duh tlat lo.

"Ih maw, kei hian ka tibuai mai mai che u niin ka hria. Ka zep lo ang, nangin u Sangtei i la duh reng ang bawk hian ani pawh khan a la duh che a ni. Kei chuan ralkhat aṭangin ka lo star leh mai mai che ang a, i thlate ka lo la ru leh zawk ang. Kan mualpho nasat hma hian thuthlukna dik tak siam ve vat rawh, ka natna tur pawh ni se i thuthlukna chu eng pawh ka pawm ang" ka mittui chu ka biangah a rawn luang nghal zawih a, hruk pawh ka tum buai lo.

"Ka thuthlukna chu i pawm thei ang maw?" kan inṭhen dawn ta ngei a nih hi!

"Aw" ṭial ruai chuan ka lo ti a, ṭah hawm hawm chu ka châk a ni.

"Ka thuthlukna chu nang leh kei hi kan innei ang" a rawn tih chuan amah ka en lo thei ta lo.

"Le! Ka thutiam ka sut ve mai mai ngai lo tih hria la, i mittui a tlak hian engtin emaw ni tak hian ka awm ve a nia" tiin ka bianga mittui luang chu a rawn hru a, ngawi rengin ka lo en thung.

"U Hruai, ka duha ka hmangaih em em avang ringawt che hian inneih hi tih ngei ngei tur tihna pawh a ni lo. U Sangtei kha a hmelṭha hle a, i nupui atan pawh a ni tluka ṭha an awm ka ring lo. Kei leh nang phei chu zui pawh kan la inzui rei lo va, chuvang chuan nangni naupan lai aṭanga lo inngaizawng ṭhin na nâ ná chu in ngheh a, nupa hlim tak in nih theih ka ring zawk" ka mittui te chu tla tawh lo mahse a la tling pam mai.

"Kei hian ka duh che alawm" ka beng hriata a vawikhat sawina a nih vang nge mak ka ti ngei mai.

"Ka awih lo, ka lawm nan tiin i sawi mai mai a ni ang" hlauhthawnna hlirin ka khat tawh.

"Ka sawi nawn chhen i duh zawk em ni? Ka lam lo hawi teh" tiin min kuai her a, a tih ang âng chuan ka awm tawp.

"Kei hian ka duh che, ka duh lutuk che" tih pahin min rawn fawp nghal a, ka thinrimna zawng zawng chu a rawn bo nghal duak. Ka va han hlim leh tawh si em, a fawh pawh min fawp rei ngei mai.

"Awi, dawt a ni ang tih ka hlau lutuk" tiin ka kuah chhunzawm nghal a, a lo nui che ve dawt thung. Ka thinrimna a reh hma lutuk chu mak ka ti a, mahse ka thunun theih piah lam a ni.

"Kan ṭha tawh ti raw?" ka chhip sam hnim vang vang paha a rawn tih chuan

"Aw" ka lo ti ve vat. A tlai ve deuh tawh avangin pawnah chuan thlah turin ka chhuahpui nghal bawk.

"Ka ngai leh dawn che ê" motor kawngkhar a hawn lai chuan ka tichhuak leh phawng a, amah hi ka ngai tak tak a ni. Ka thusawi avang chuan a motor kawngkhar hawn tawh chu a khar ṭha leh a, min rawn pan leh nghal.

"Keipawh hian ka ngai che alawm, ka inru daih mai dawn em ni ang?" min rawn kuah pah chuan a ti a, ka en chho nghal hau mai.

"I ti awm ang lo e a! Kar leh maiah khian kan inneih tawh dawn a, tun anga lo inruk daih te chu!" upa ve uai tawh si, â leh lutuk mai.

Inngai tak leh la inthlahlel ru em em chung chuan kan in mangṭha a, keipawh ka room-ah lutin mut nghal ka tum a, mahse Feli chu hrilh ve ṭhaa ka hriat avangin Whatsapp message chuan thil awm dan leh ka rilru hlim leh tawhzia chu ka hrilh a, ani pawhin min rawn reply rang ngei mai.

Kan inneih ni a rawn thleng a, ka phur rualin ka zam ang reng hle. U Hruaia te chhungkua chuan hmelhriat an ngah bawk a, mipui rawn kal pawh an ṭhahnem ngei mai. Ka lo suangtuah ṭhin ai daihin kan inneih chu a ropui ka ti. U Hruaia leh u Mala chuan Coat rawng inang hi an lo ha a, kei leh Feli pawh kan thiam ang tawk chuan kan inchei mawi vein ka hria. Inneih boruak hrim hrim chu a nuam viau dawn emaw ka ti a, a lo nuam aw zawng lo. Mi mit hmuha chetsual hlau reng renga awm ngaite chu ka hne ru hle a, mahse Pastor in min inneihtir lai boruak vel kan hman zawh chuan ka thaw a veng hawk. Biak in aṭanga kan chhuah chaun inneih thlalak programme chu kan chhunzawm nghal a, min lakpuitu te pawh mi lian leh hausa tak tak an tam hle.

Lawmpuina thu leh thilpek pawh a tam viau a, mahse u Sangtei lo kal ka hmuh chuan tlêmin nuam lo ka ti ve deuh. Min lawmpuina thute sawiin min rawn chibai ve bawk. Amah chu a ṭawng siam siam a, a fel viau ka ring. U Sangtei'n min biak laia u Hruaia hmel awm dan chu hriat ka châk hle a, mahse a hmel en tura han hawi chhoh vak vak lah kha thil mawi a ni si lo.

Zan lamah chuan chhun lama kan boruak vang nge ni ka ni nghulh a, ka chau ni berin ka hria. U Hruaia te ina kan awm tawh avangin in leng leh thil eng eng emaw ni tihtur kan nei nûal a, mahse chhun lam ang em em chuan boruak pawh a rit tawh lo. Zan a rei tak tak hmain kan ṭhu khawm a, ka pa chuan thu sawiin min ui tur thute a sawi ve lûam bawk. Ka la naupan chhiatzia a sawi lai te chuan an nui dar dar a, ka zak ru ngei mai. U Hruaia chuan mi chi hrang hrang bulah min kalpui a, chung mite pawh chuan kan inneih chu min lawmpui ve hlawm hle.

U Hruaia room, kan nupa room ni ta ah chuan ka awm a, u Hruaia erawh in hnuai lama kotu an awm avangin a rawn la chho leh tawh lo thung. Room vel chu ka en kual a, eng teh vak mah thil tar pawh a nei hran lo. Thlalak frame pathum hi a lo awm a, a lian ber chu an chhungkaw thlalak a ni. A bulah chuan a pa nen chauha an thlalakna frame hi a lo awm a, u Hruaia chu a hmel aṭangin a la tlangval tir hle tih a hriat theih. Thlalak frame pakhat lehah chuan a pa leh hmeichhe pakhat hi an lo ding a, hmeichhia chu u Hruaia nu ni turah ka ngai hmiah.

"Hello" Feli hnen aṭanga phone call ka dawn avang chuan ka pick-up nghal a, u Mala chuan a thlah tluang turah ka ngai hmiah.

"Ṭawngtheinu, ka enthla chak che u" a va han mawl mai mai tak.

"Chekhrinu, mawl viau ṭhin suh. Sir Joseph-a nen hian inneih ve thuai teh u, ka nghal ngawt ang" ka ti let ve nghal.

"Kei chu College ka kal tluan peih pawh hi ka ring lo, Sir hi ka zui haw daih mai dawn"

"I buaithlak ka ti êm mai, nakin lawkah ngaihtuahna dang i nei leh ang a, ṭha tak khan awm mai mai rawh. I mangan lai hi chuan ka lo ṭangkai ber a nih hi" a rilru hi a thlak hma thei si, buaithlak.

"Ngawi mai teh, thil ka hrilh ê te chu ti ve lo mai teh. I mangan lai khan kei lo chu pan tur i neih ngai loh kha, u Hruaia bulah khan ka puang vek mai ang che" a rawn ti leh chiam a, loudspeaker-ah ka dah bawk nen a ṭawng chu zawi lo tak a ni.

"Ve zawk za mah che chuan, enge min han vo velna chu han sawi teh, ka hre châk a nia" ka ti ve ta salh. Chutah thawm a rawn awm a, thawm awmna lam ka hawi chuan u Hruaia chu kan nupa room-ah a rawn lut tih ka hmu nghal.

"In va la buai awm ve?" Feli ka biakna pawh ngaihsak leh ta lawk lo chuan ka lo ti ve nghal vat.

"Buai deuh a, mahse kan buai tawh lo ve" tiin ka bulah chuan a rawn ṭhu a, min kuah zawm zat bawk.

"Kan tlangval senior hausaa chu a lo thleng tawh a ni maw, a awm lai khan ka'n sawi ang e. Ṭawngtheinu, a thlalakte i mutpui a, i fawh vak vak ṭhin thu kha i pasal kha hrilh ve tawh rawh. Chuan hmâna an ina kan"

"Lalrinfel" ti vakin ka off nghal hmak a, u Hruaia chu ka pasal ni tawh mashe ka zahna chu a awm loh phah lo.

"Euuuu Euuu Euuuuu, min hrilh ngam loh i la nei a ni maw?" ka bula mi chuan a rawn ti ve nghal.

"Awm sawn teh, ka intifai dawn. Chuan, i nghal em em kha chhuah lo vang che" ka ti ve khar khar a, a rawn nui hawk hawk.

"Min hrilh hma chu i intifai lo vang" tiin khumah chuan ka kal mai tur chu min pawt ṭhu leh thut.

"A nih loh chuan kan pahnihin bathroom-ah sawn kan lut dun ang" a rawn tih zawm zat a, a thil sawite pahnih chu ka tih peih loh ve ve an la ni zui.

"U Hruai, awm sawn teh. Mi mah zah nak a lai a" ka ti leh tawp, sawi tur mai ka hre lo.

"I pasal ka nih tawh hi, engmah zah nei suh. Le! sawi rawh le, ka lo ngaithla reng a nia" a rawn tih leh chuan sawi vat vata intihfai thuai chu ka duh ta zawk.

"Ih maw, nui suh aw?" ka'n ti leh té tê a, ani pawh a lo bu ve nghauh nghauh.

"A hma chuan i thlalak hi ka print a, ka lukham bulah dahin ka mutpui ṭhin, chuan ka fawp vak vak zel" ka tih chuan a rawn nui chhuak hawk hawk a, a samah ka lo kek nghal val vak thung.

"Nui suh ka tih kha, ka zak lutuk" tiin ka kek leh chiam a, a la nui mai mai thei nia. Chutah ka kut chu a rawn man bet thut a, min bawh ta ran mai.

"Zanin hian i lo tih ṭhin dan ang khan min fawp vak vak dawn nia" nui sak chung hian a rawn ti leh a, ka va han ngei mai mai tak. Ka nam sawn nghal dawrh.

"LALHMAHRUAI, Tlangval senior, Nghala, in pafa hian in nghal si" ka ti leh chiam ringawt.

"Ka pa i sawi tel ve kher a, ka hrilh leh vek dawn a nia" a rawn tih leh phei chuan ka chi ai vek tawh, ka pa ni bawk kan Principal chu a hrilh leh duh tak tak ang tih ka hlau.

"Mawla, i hrilh vaih chuan zanin hian kan inah ka haw leh ang. Ka intifai dawn a, min lo ko chhen lo vang che" ka tih khum leh bawrh bawrh a, a ni erawh a nui ve nasa mai. Bathroom chu ka lut thuai a, min rawn ti buai êm tawh lo ve.

Chapter 8

Ka beng za mer mer avang chuan ka harh a, mahse ka la meng duh lo lui tlat thung. Ka beng khawih mektu chu ka pasal a ni tih ka hria a, a bula ka mu thei leh a nupui ka ni thei ta mai chu ka lawm em em a ni. Ka mumang a ni mai ang tih te chu ka hlau hle a, ka rilru hlauthawng hnuhnawh chuan a tak tak kan ni nge ni lo fiah nan tiin ka meng diar diar a, chutah ka pasal chuan

"Ka nupui" min en reng chung hian a rawn ti sup a, nui chungin a awmah chuan ka bei zui leh nghal thân.

"Kan tho tlai viau tawh a nia" a rawn tih leh chuan ka nui tawp chiang ngei mai. Chutianga rei tak mut chu nuam lo tihna ka neih rualin ka pasal nena awm dun chu nuam ka la ti tho si, mahse a tawpa tawpah chuan ka tho ta vat tho. Ka tho thut a, khum aṭanga ding chhuakin dawhkana ka phone chu ka en a, dar 8 a lo pel fê tawh.

"Chhuk vat teh ang, engatinge min kaihthawh vat loh? Nâ, ka tho tlai sia, i pa hian min va'n fiam leh nasa dawn tak. Awi, ka peih lo lawk ê" a lam hawi chung chuan ka ti leh bawrh bawrh a, ani chuan ngawi rengin ka min lo en thla diat diat thung. Lalpa le!

"Maimitchhing nghal rawh" tiin ka ṭe chhuak tuarh a, rizai chu pawt thlain ka taksa chu ka inkhuh zui vat. Chutah kei ang chiahin u Hruaia chu ruak vek hian a lo awm ve a, amah hnungchhawn zawngin ka inher chiang hle.

"In ha ta che nghala, in ha ṭha vat teh ang. Maimitchhing la, ka lo inha ang a, chuan i inha ve dawn a nia" amah hnungchhawn chung chuan ka ti leh a, u Hruaia taksa chu ka hmu zak tlat a nih chu!

"Ka nupui" tiin ka hnung lam aṭang chuan ka rizai inkhuhna te nen min rawn kuah a, min uap hneh ngei mai.

"U Hruai ka zak a nia, awm sawn vat teh" ka ti leh ta ringawt.

"Aw le, mahse na i nei lo ti raw?" min la kuah reng chung chuan a ti a, a zawhna erawh ho ka ti vîau.

"Aw, nei lo"

"Na i neih loh chuan nuam i ti tihna em ni?"

"Nghala, inha ṭha rawh. Ka ning ê, min tizak tawh lo hram teh" ka tih chuan a lamah min kuai her a, ka maimitchhing tlat thung.

"Hei ka nupui, meng tawh rawh le. Ka inha vek tawh alawm" a rawn ti leh tâkah chuan ka meng siar siar a, nuih insum hmel deuh hian min lo en reng bawk. Amah ka en chian chuan a lo inha vek hman tawh tak tak.

"Ka ruala chhuk i duh nge nangmahin i lo chhuk duh kher?" he pa hi a â tawh tak zet a nih hi!

"U Hruai, infiamna chi pawh a nih loh hî. Ka thawmhnaw hak tur min lak la, ka lo inha ṭha ve nghal ang. Chuan kan chhuk rual dawn nia" ka tih chuan ngawi rengin a kal sawn a, ka thuamhnaw chu a rawn la ve mai bawk.

"I nghal thei ê, ka zak ka tîh ka tih khâ, min en reng chuan ka inha thei nang" ngawi renga min en avanga ka tih leh chuan a rawn nui chhuak ta hawk.

"Nizanah pawh ka hmuh vek tawh kha"

"Khatiangin sawi tawp zel suh, nizan leh tukin a inang tawh lo. Ṭawng rin loh hunah i ṭawng ring a, ṭawng rin hun turah i ṭawng ring leh duh bawk si lo. Hawi sawn vat mai teh" ka tih leh chiam hnuah chuan min hnungchhawn ve ta hram.

In hnuai lamah kan chhuk thla a, ka la zak ru deuh bawk si nen u Hruaia kawr tlangah ka pawt ṭai mai. A pa ber chu a rawn nghal kual leh vel ang tih ka hlau a ni. Sitting room zawn vel kan thlen chuan U Zualtei chuan min lo be vat a, thingpuite min lo siam nghal zung zung. U Zualtei hi awm lo se chuan he in chhunga awm hi nuam pawh ka ti lo maithei a ni. U Hruaia pa, ka pa ni ta chuan ka thingpui pek kher a'n duh leh tlat pek a, mahse pangai taka a sawi avangin ka ti ve mai.

"Khaw aw, ka pa" sawi fuh inti fê chuan ka ti a, ka pa thingpui ka pek zawh chuan u Hruaia bulah chuan ka ṭhu phei ve leh nghal.

"Engatinge min pa ringawt a?" a rawn ti ta mai, mahse chhan dan tur chu ka hre ve tawh chiang êm.

"Âwwwwww, mote chuan an pasal pate chu ka pa an ti ṭhin alawm" enge chutiang hre lo rual pawh ka ni bik hleinem.

"A dik chiah" u Hruaia chuan a rawn ti ve a, ka va lawm mai mai tak.

"Euuuuuuu, i nupui a nih hma kha chuan i ṭan duh der tawp si lo va, tunah chuan i ṭan ta hle mai maw" ka pa lah chu a la nui duh miah lo zui.

"Nâaaaaaaa pa, Nutei hi a zakzum tih i hriat ve vek kha, tunah chuan ho tê pawh ni se hrehawm a tawrh hi ka phal tawh miah lo a nia" u Hruaia'n a rawn ti leh chuan ka pa zawk chu a rawn nui chhuak ta nge nge.

"A ṭha e! Nupuite hi an hlu a, mipate tifamkimtu an ni bawk a ni. Nang ni nupa tuak thar pawh inngeih takin awm ula, Mama pawh i nau fê a ni tih hre rengin dawm hram hram ṭhin ang che. In pahnih hnih khan hre reng ang che u, nangmahni chiah in ni tawh lo tih hi! I tana ṭha nia i hriat kha ani tan a lo ṭha lo thei, chuvangin engkimah inrawn hmasa ṭhin rawh u. Tin, pasalte hian nupuite hi kutthlak miah loh tur a ni a, nupuite paw'n pasalte tihthinrim phet tum loh tur" ka pa chuan a rawn ti leh a, a sawifiah thiam ka tiin ka pawmpui em em bawk.

"Aw le pa, kan hman tawh chuan chaw ei lam te hi hnaih ila" u Hruaia'n a rawn ti leh a, ka pa tih loh keini hmeichhia ho chu chaw ei siam tur chuan kan tho zui ṭhap. Chaw ei kan siam peih hnu chuan mipa pahnihte chu kan ko a, an rawn phei ve mai bawk.

"Mama, engtik thleng maw i chawlh theih dawn?" kan chaw ei lai chuan ka pa chuan a rawn ti a, a chaw chu a bar zui mawlh mawlh.

"Ka hre chiang lo, mahse a rei vak lo vang" ka pasal pawh chuan a lo ti ve mai.

"U Mam, min lei thei tawh a nia. Nutei lakah pawh chimawm ka chhuah miah lo tih i hria" u Zualtei chuan a rawn ti ve pang pang a, unau inngeih tak hi chu an ni ve alawm.

"Enge in lei in lo indil leh tâk?" ka pa ve thung chuan a rawn ti a, chutah u Hruaia chuan

"Pa, Bawihtei hi Scooty ka leisak dawn emaw ni ka lo tia, College velah a zak ṭhin a ni awm e" chaw ei mial mial pahin a rawn ti ve a, ka pa chuan u Zualtei chu a en nghal bawk.

"Engatinge Bawihte? Ka motor-a chuan i ning tawh em ni?"

"I motor-a chuan ka ning lam pawh a ni lo, Department-a chhuah velnaah hian mi Scooty-ah ka chuang bik ziah a, a nuam lo alawm, lei thei lo pawh kan ni bik tawp si lo" u Zualtei chuan a rawn ti ṭha ve leh mai.

"Lei thei lo chu kan ni lo ngei a, mahse accident emaw te tawk ta la engtinnge ka awm ang? Boral ta daih la i chhungte hi engtinnge kan awm ang? Chung zawng zawng ngaihtuah thlenga la lei tir lo che ka ni tih hi hre reng rawh" thinrim ni si lo hian ka pa chuan a rawn ti leh a, u Zualtei ka en chuan a lo nur ve deuh.

"Mahse pa, Pathian zarah eng êm chu a tawk bik nang, ka leisak chu phal mai la" tiin u Hruaia chuan a nau chu a lo chhan khalh ta vat.

"Dik chiah" u Zualtei chuan a rawn ti a, Duati ve te reuh chuan

"Dik chiah" a rawn ti ve nghal a, chutah ka pa chuan min rawn en ta rán mai. U Hruaia ka va en lah chuan a mit ko a lo san ûk a, sawi ve turin min duh ni turah ka ngai ta tawp.

"Dik chiah" ka ti ve ta ringawt a, chu veleh ka pa chu a rawn nui ta huah huah a, kan za vai chuan kan nui zui ve nghal.

"Aw le, hmeichhe lamin vote an ngah bawk sia Bawihtei Scooty lei chu ka phal mai ang. Mahse Mama i account-a mi la chhuak lovin ka account-a mi zawk kan hmang dawn nia, nang chuan i nuipui leh i fate tan khawl hram hram rawh" ka pa chuan a rawn ti dam leh dap a, ka rin aiin kan chaw ei boruak chu a nuam ta phian.

"Mahse Bawihte, i khalh thiam lawk em ni? Tunge zirtir dawn che? Kei lah chu ka zin dawn bawk sia" u Hruaia chuan a nau en pah chuan a ti a, rang zeta

"Ka lo zirtir ang" ka tih chuan min rawn en nghal ṭhap mai.

"Nute, nang chu ka bulah i kal dawn alawm, Bawihtei i zirtir daih ten tunge ka bulah awm ang a?" u Hruaia chuan a rawn ti nghal a, khawiah nge kan kal dawn pawh ka hriat si loh avang chuan

"Khawnge kan kal dawn?" ka lo ti heu mai.

"Awi awi awi Nute, u Mama hian engmah a sawipui leh tawh na che nge? Ngawi renga thil tih hi a ching lutuk a, a buaithlak. U Mam, i zinpui dawn te chuan hrilh lawk ve em em la" u Zualtei chuan min lo chhan tak hian a ti a, u Hruaia thil sawi chu ka hrethiam lo tak tak a ni.

"Nute, kan zin dawn alawm. Ka sawipui loh che avangin ka thiam loh a ni e" ka pasal chuan a rawn ti ve leh nghal.

"Mahse class kan ṭan tawh alawm, ka kal loh ringawt chuan attendance-ah ka tla ve thei tlat sia" ka ngaihtuahnaa awm hmasa ber chu ka sawi ta ringawt.

"Âwwwwww, chutiangah te engatinge i buai? Kha lam kha chu ka pa kutah dah rawh" tiin a kham a, in chung lamah a chhoin ka hria. Chutah ka pa ka va en leh chuan min lo en ran a, ka pa chu kan College Principal a ni tih ka lo theihnghilh palh leh ṭhin. Min en tâk reng avang chuan ka nuih ta ringawt a, mahse a nuih ve miah loh avang chuan ka nui tawp leh chiang teh é.

"Pa, i tizak anga a haw leh daih mai ang e, ani anga mo ṭha hi i nei tawh tawp lo mai tur a nia" u Zualtei chuan min lo hmu reng a ni ang, ka pa chu a awm dan avang chuan a lo hau leh zui mawlh mawlh.

"Ni tak e, a lo haw leh palh vaih chuan keini aiin Mama a thinrim dawn bawk si, kan kham daih ang e" nui huah huah chung hian a rawn ti leh ang lawi a, ani khan min fiam ve tihna em ni?

"Nute, engah mah ngai duh suh. A nel vang mai mai che a nih kha, ka pa hi chuan fiamthu hi a thawh thiam lo ve thlâwt alawm" tiin ka pa a kal liam hnuin u Zualtei chuan min rawn hrilhfiah zui ta bawk.

"Ka hrethiam alawm, Duati i chaw ei a tui em?" tiin Duati chu ka be ta daih.

"Aw, tui lutuk. Au Nute, in zin hunah chuan thil min lo hawn teh" a rawn ti ve reuh a, ka nui sak.

"Eng thil nge hawn i duh a?" ka tih chuan

"Ka hre lo, i duh duh a ni mai" a rawn ti ve leh mai.

Chaw kan ei kham hnu chuan kan eina vel chu kan sengfel nghal a, u Zualtei chuan thleng sil a la phal mai lo zui. Mahse ka tum luih tlat avangin ka sil ta tho a, ka sil chhung zawngin ka bulah a lo ding a, thleng leh thil dang dahna turte chu min lo hrilh zung zung bawk. A titi siam siam a, KṬP member zinga mi pakhat star deuh a neih thute chu min hrilh ve bawk. Ka sawi duh chi tak a rawn sawi chinah phei chuan kan nui uarh uarh a, mo thar tuk a ni tih lam reng ka hre chang leh tawh lo. Kan tihfel vek hnu chuan kan nupa room-ah ka chho a, ka pasal chu a lo inbual zo chiah a nih hmel.

"Hei, lo kal teh" tiin amah zawk chuan min rawn pan a, ka rin loh deuhin min lo kuah nghal.

"Khawnge kan zin dawn? Enge kan tih dawn?" tlem tlemah chawi ei lai khan ka mualpho lo chauh a nih kha!

"Kan kalna tur chu thup a la ngai rih a, kan tihtur erawh chu nizan ami ang deuh kha a ni mai" a rawn tih leh chuan a awmah ka chum dawt a, a thusawi avang chuan ka sa chhuak leh vekin ka hria.

"Engatinge min hrilh ve loh, chaw eina ah khan ka zak hman alawm. A tir kha chuan kan zin chu ka ring ru tho a, mahse engmah i sawi rik bawk si loh avang khan kan zin chu ka ring lo ve ta tawp" ka tih chuan min kuai dak a, a mit chu ka en ta ran.

"Ka hrilh loh che avangin ka tihpalh, hmai tai duhawm em em nu" tih pahin min rawn fawp a, a mi fawh dan chu ka tan chuan hnar phal chi zia zâng a ni ṭhin lo.

"I va'n rimtui bik tak" tiin ka kuah leh chiam ringawt.

"Nang hi lawm rimtui, kei ai pawhin i rimtui" nui che dawt chung chuan min rawn kuah ve nghal a, ka awm a nuam veng veng mai.

"Chuan" a rawn ti sup a, keipawh chuan a thusawi hriatthiam har zet avang chuan

"Chuan enge?" ka lo ti ve ngal vat.

"Rizaia inkhuh i châk apiangin ka lo tel ve tawh ang" min fiam titih chuan a rawn ti leh a, ka va ning tak!

"Kha thil kha sawi ri ve ziah suh, a hun lai kha chuan ka châk tak tak alawm. Min man chiang mai bawk si a, awm dan tur kha ka hre lo bawk nen haw vang vanga rizaia inkhuh aia thlakhlelh kha ka nei lo vang" ka tih chuan a rawn nui leh ringawt.

"I pasal ka ni a, i mi hmangaih em em ka ni bawk. Chuvangin ka lakah chuan zak miah lovin awm la, chuan i duhawm lehzual a ni mai" ka chal vela sam awm hui sawn pah chuan a ti a, min en chiang khawp mai.

"Engtinnge ka hmangaih che tih i hriat? Lalrinfel chekhirnu-i khan a hrilh che em ni? A va han chak dawn lo tak" ka ti nghal chiam.

"Ni lo, keimah hian ka hre tawp" a rawn tih chuan ka melh ta ran mai.

"Engatinge i hriat theih bik em em a? Ka chet dan leh ṭawngkam velah hian a hriat theih viau ṭhin em ni?" pate bula naupang nuar ang mai chuan ka ti leh ringawt. Rei lote inngaizawng pawh ni mah ila min hrechiang ta lutuk chu mak ka ti a, a thil sawi reng rengte lah chu a dik vel thlup roh ṭhin bawk si.

"A chhan chu nang hi ka nupui tur dik tak i nih avangin" a rawn ti leh sup a, min fawp leh ta nge nge.

Kan zin dawn tê ah u Hruaia chuan Delhi-ah kan kal dawn thu min hrilh a, kal ṭhin tawh tho mah ila ani nen ber kher chuan han kal nawn leh pawh pawi ka ti lo. Delhi chu flight in kan kal a, kan thlenna tur Hotel kan thlen thlak chuan pui ka ti ngei mai. India rama Five Star Hotel ho hi chu TV emaw phone emaw aṭang vel bakin ka la hmu ngai lo va, a taka ka'n hmu chiah chu ropui tak a ni. A lianin a changkang hlawm em em a, hnam dang pawh an tam khawp mai. Chutah u Hruai chu English ṭawngin a ṭawng dawn emaw ka tih laiin Hindi ṭawngin a be ta zel mai, kei chauh ni lo receptionist hote hlei hlei chuan mak an ti. Kan hmel aṭang chuan ram dang mi emaw min ti a, mahse Indian kan nih thu kan sawite chuan mak an ti khawp mai.

Kan awmna tur room kan luh te chuan Delhi a ni lo emaw ka ti dawn alawm. Delhi chu kal ve ṭhin tawh ngei mah ila u Hruaia min hruaina hmun ang chu ka la hmu ngai lo hrim hrim. Five Star Hotel-a riahte phei chu ka suangtuahnaah pawh ka dah ngai lo, tunah chuan ka hmangaih em em ka pasal nen ka awm dun dawn chu a ni si a, ka va han hlim tehreng em. Khawi hmunah pawh, eng thilah pawh ka pasal nen a nih dawn phawt chuan nuam ka tiin ka châk zel a nih hi!

"Nute, kha Duati'n a be duh che?" tiin ka pasal chuan min rawn hrilh a, keipawhin a phone chu ka lo ban ve mai.

"Hello"

"Au Nute, thil chu min lo hawn tak tak rawh aw? Au Mama chu ka chah tawh tho a, mahse nang chu a rukin ka chah che a" a rawn ti ve reuh a, a ṭawng thei ve siam siam reuh lutuk chu a lawmawm.

"Aw le aw le, ṭha tawk tak mai ka rawn hawn ang che. I pa leh i u thu kha lo awih la, ka lo haw hunah i thuawih lawmman ka pe dawn che a nia" ka ti a, Duati pawh a aw aṭang chuan a hlim hmel hle.

"Duati, au Nutei nen kan infiam duh tawh a, duh tawk tawh mai ang aw?" tiin ka phone biak lai chu ka pasal chuan a rawn la hmak a nih chu! Duati ṭawng ri ruai pawh ka la hre pha hman.

"Nakinah ka hrilh ang che, bye" tiin phone chu a off nghal hmak.

"I ti ho thei lutuk, min be ve duh a nih kha, enge a lo sawi leh hrim hrim a?" ka pasal mah ni se a ti awm ang lo ve êm a ni.

"Kan infiam tur thu ka sawi kha eng infiamna nge tiin min lo zawt a, ka la hrilh duh rih lo" a rawn tih chuan a hmel ka en leh nghal.

"I upat tawh êm hi, chutiang bawkin keipawh naupang chhia pawh ka ni tawh lo bawk. Keini ang ruala infiam infiam tih te chu a hun tawh lo êm mai" khum aṭang chuan ka ding zawm zat a, chutah u Hruaia chuan

"La ṭhu teh, chutiangin naupang angin kan infiam dawn reng reng lo. Hei, puitling infiamna deuh bik ang chi hian kan infiam ang" tiin min pawt ṭhu zui nghal.

"Awi awi awi, i sawi tum ka hrethiam chiah. Mi tihzah dan hi thiam viau ṭhin lo teh" a chala nam sawk pah chuan ka ti a, min rawn bawh nghal ringawt.

"Ka hruaina che hi i duhkhawp lo em? Ka hna avangin ka duhna hmun takah pawh ka hruai thei lo che a ni" ka awma a hmai phum reng chung chuan a rawn ti a, a awm dan chuan min ti zam hle thung.

"Aih, hetiang hmunah pawh ka la awm ngai hleinem. Tin, nangmah nen a ni leh zel a, i bulah chuan engtin pawh awm ila a nuam ka tih zel tho ka ring" ka ti ve sep a, min lo enin min fawp a, ka tuiral leh lo chauh tawh.

"Lawk, ka sawi loh chuan ka rilru hi a nuam thei dawn chuang lo" min fawh laklawh laia lo namsawn pah chuan ka ti a, min lo en hu thung.

"Eng chu maw?" a rawn ti ve sup.

"Eng lo a nia. Ih, u Sangtei kan inneihnaa a lo kal khan i la danglam êm? Min chibai lai te khan i hmel awm dan kha ka en châk lutuk a, mahse rawn hawi chhoh hû hu kha a chi si loh" ka tih chuan kan inen chiang bawk nen a hmel chu a rum nghal deuh alin ka hria.

"Chutiang sawi lo teh ang, nang nena kan awm dun lai hi chuan hriatchhuah ka duh lo" a rawn tih chuan ka lung a awi ta chiah lo.

"Aw le" tiin ka namsawn a, bathroom lam ka pan zui ta daih. Bathroom aṭanga ka chhuah leh hnu pawh chuan a awm ngai rengin a lo la awm a, enge tih mai tur pawh ka hre lo.

"Lo kal teh Nute, i thinrim lo ti raw?" keimah min en pah chuan a ti a, keipawh a bulah chuan ka phei ve mai bawk.

"Ka thinrim hleinem, a ho lutuk" pangai tak chuan ka ti a, mahse ka thinrim ru reng tho.

"Sangtei hi theihnghilh ka duh ṭhin a, ka chunga a chet dan avang pawh khan ka hlat hram hram ṭhin" min en kar chung chuan a ti a, ka en let ngam rih lo.

"Ka theihnghilh theih ka ring lo a, mahse tunah chuan ka thei tawh" a rawn ti leh chuan kan mit a intawng ta siah mai.

"I bula ka awm hian nuam ka ti a, ka nun hlui mangan thlak tak tak te kha ka hre chhuak ngai lo. Nang ang em ema hmeichhe min hiptu hi an la awm lo va, awm leh se pawh ka ti tawh lo" tiin min rawn fawp ta vang vang a, keipawh chuan lo kuahin ka lo fawp let ve nghal.

"Chuvang chuan ka bulah awm reng la ka duh" kan inthlah hnu chuan a rawn ti leh a, mahse zawhna ka nei ta tlat.

"I bula ka awm loh chuan i hre chhuak leh dawn tihna em ni?" ka zawhna avang chuan a thin a rim ang tih ka hlau ru hle.

"Ka hre lo, khang ka nun hlui avanga ka saltanna aṭang hian nang ka nupui hian min hruaichhuak la ka duh a ni" min ring tawk taka a rawn tih leh chuan ka insum thei tawh lo, ka kuah bet nghal thlawp.

"Aw le, i nupui ka ni a, i sawi ang chuan ka ti ngei ang. Min nin thlengin i bulah ka awm ang a, i nupui ka ni reng bawk ang" nui sen sen chung chuan ka ti ve nghal.

"Hei, ka ning ngai lo che a, ka nin ngai che pawh ka ring lo. Ka tan hi chuan i special ve a ni" tiin a rawn ṭawng chhuak a, kan infawp zui leh ta. A thusawite chuan min hnehin min tihlim tak zet. A thil sawi ho tê té te hian min tilawm a, amah ka hmangaih zual phah sawt zel.

"Chuan man hlan zana ka sawi kha la na suh aw, ka tum dawn ka tih kha hre reng ang che" rawn ti lehin ka hnung chu a chul a, kei erawh chuan ngawi rengin a thusawi te chu ka ngaihtuah let zui vawng vawng.

Ni e, kha zana a thusawi kha ka la hre reng a, ka theihnghilh mai mai theih pawh ka ring lo. U Hruaia chuan hmangaihna lama harsatna a neih thu min hrilh a, kan inneih ni ah pawh a hming chauha min hmangaihna thu a tiam theih tur thu min hrilh a nih kha! Min hirlh tirh kha chuan ka la na hle a, u Sangtei avanga hmangaih neih a duh leh tawh loh avang khan ka lungawi lo va, mahse min ring ngam taka keimah min hmangaih thei tura ka puihna a mamawh thu min hrilh hnuah kha chuan ka thinrimna aiin ka khawngaihna a tam ta zawk.

Kei chuan ka pasal, u Hruaia ngei mai chu ka thinlung leh tih tak zetin ka hmangaih a, hmangaihna kawnga hlauhthawnna nasa tak a la neih te sut kian pui chu ka tih turah ka dah ta tawp. Ka theihtawp ka chhuah ang a, ani paw'n min hmangaih ve theih ngei ka ring. U Hruaia chuan min duhin min ngaina em em tih ka hria a, chung min duhna leh ngainatna te chu hmangaihnaa chantir ka tum nghet bur a ni.

Delhi-a kar khat kan cham hnuin Mizoram lamah kan haw a, ka pa tih loh u Zualtei leh Duati chuan min lo hmuak ve bawk. In kan thlen hnu chuan Duati chuan a room-ah min hruai vat a, min hruai hranna chhan pawh ka hre chiang hle. Ka thil hawn ka pek chuan a lawm thiam reuh em em a, min han kuah chung chung reuh a nih kha! Duati hi ka ngaina a, ani pawh hian min ngaina ve hlein ka hria.

Kan inneih hnu chuan class pawh College lamah ka kal nî tin ta a, mahse a chang chuan nuam lo ka ti ru ve ṭhin tho. A chhan chu mo ni ve si, mona inah pawh tawm tam lo nih kha ka duh bik chiah lo. Ka pa leh u Hruaia chuan engtin mah min ti lo mahse hrehawm chu ka ti ru em em tho. Ka pa chuan awmpui lak a rawt a, u Zualtei zawkin a lo hnial vat ṭhin. Kei atan chuan inthlahrunawm duh tak a ni. Thla hnih lai chu ka pasal, u Hruaia te inah chuan ka mo ve ta, mahse ka pasal bul tih lovah chuan duh ang takin ka la ngampa lo. Ka pa chuan

"I chhungkaw thar kan ni tawh a, eng pawh sawi ve bawrh bawrh zel rawh. I zia tak tak kha han chhuah tawh teh" fiamthu deuh tak hian min ti ṭhin a, chutianga min tih chang chuan mi dang ho pawh an lo nui ve ringawt zel. Chuta chinah chuan keipawh insiamṭhat ka ngaiin ka hria a, pangai taka awm chu ka tum hram hram ṭhin.

Kan haw hnu lawkah u Zualtei Scooty kan lei a, kan sawi lawk angin Scooty khalh pawh kan inzirtir ta ngei. Chuti maiin khalh a lo harsat lo phian a, ni hnih hnuah phei chuan amahin a inkhalh chhuak thei nghal der mai. Duati ber chuan nuam a lo ti a, a u chu a chhuahna apiangah zui ve zel a tum ṭhin. A tir lamah kha chuan u Zualtei pawhin a lo phal ve mai zel a, mahse thlate a han ral takah chuan a bula kal ve zel chu dik bera a hriat loh avangin a lo hnial ta ṭhin. A changin Duati chu a ṭap a, a chang leh ka pain a thlem leh ṭhin. Ka pa hian Duati hi a thlem thei phian a, a dawtah ka pasal hi a ni leh mai.

"Ka lo thleng ṭep aw" phone ka lak rualin u Hruaia chuan a rawn ti a, a aw te chu ka pasal ni tawh mahse ka hre kham thei lo a ni.

"A ni maw, in va bang hma phian ve"

"Chu lam pawh a ni lo" a rawn ti leh sup.

"Eng lam nge?" tih pahin ka hmaa ka lehkhabu chu ka khup ṭha zui nghal bawk.

"Ka hmu châk tawh che alawm" ṭawngkam lah hi a duh tawi thei si.

"A nih chuan lo haw vat la, kan exam tur hi min lo zirpui teh" ka tih chuan a rawn nui ri ta hawk a, a nui ri hriat reng te hi nuam ka ti.

"Aw le, ka nupui" tiin kan inbiakna chu kan titawp zui ve leh mai. Exam lai mek kan nih avangin class kan chawl rih a, naktuk lama exam leh mai tur kan ni bawk.

A lo haw dawn tih ka hriat tawh vang nge ni, lehkha zir lam chu ka ngaihsak leh tawh teh chiam lo. Bathroom-ah lutin ka inbual a, ka chhuah chuan kan khumah ka pasal chu a lo ṭhu reng tawh. Min en vawng vawng a, a hmel aṭang chuan min itzia ka hre thei. Ka lam panin a rawn kal a, min rawn fawh chuan ka taksa chu a zauthau lutuk. A mi tawhna te chu ka tan chuan a danglamin a nuam thei zel a, chu chu ka mak ti em em pakhat a ni.

"Hei, lehkha zir kan ngaih kha aw, ka inha fel anga kan zir dun dawn nia" tiin ka nam sawn deuh a, ani chuan min lo en kar thung.

"Zan lamah lehkha chu ka zirpui mai ang che" tiin min pawm kang nawlh a, lo tal emaw lo duh loh kual vel chu ka tum lo hrim hrim.

Chaw kan ei lai te chuan ka ṭawng ve siam siam tawh a, ka pa ber hi ka nel thar ta em em a ni. A tir lamah kha chuan kan College Principal a ni bawk nen ka zah em em a, chutah a lo la nghal ve em em zui. Mahse tunah chuan thla thum lai kan inchen chilh tawh a, boruak pawh a nuam tawh phian. Tin, ka pa sawi ang tak takin keipawh chuan ka zia ka chhuah ve tawh ni berin ka hria. Ka thil sawi chu eng a nih bik pawh ka hre lo, an nuih pui leh chiam ṭhin. Kan nupa room-a kan awm hran changa ka pasal ka zawh lahin ka lawmawm thu a sawi daih zel.

"Tih lawm tum vel lo la, tlawn vel huam huam lovin i nihna ang tawp khan a bulah awm tawp rawh. Chu chuan ka pa a tihlim ber ang" tiin ka pasal chuan min hrilh ṭhin a, a dik pawh a dik reng bawkin ka hria.

"Hei hi tunge? I phone aṭanga Instagram ka luh hian ka hmu ve ziah. Hei hetah pawh hian a tag leh tawh che a nih hi! Chubakah engatinge thla hi in lak dun ve ziah a?" dawhkanah ka lehkhabute chu inchhawp tawh mah ila a phone chu ka khawih sak leh hram.

"Kha kha maw, a ho lutuk"

"A ho lutuk tihah ka lungawi mai mai thei hleinem. I nupui ka nih hi" mi a chhang tawi thei lutuk chuan min tithirim ringawt dawn.

"Âwwwww, i va ho tak. Kan office building-a thawk ve a nih kha" a rawn ti leh mai.

"Enge thlate in lak dun kher?" kei nen pawh thlalak dunna kan nei tam lo a, mi dang nena an lo la dun vel chu ka ngaithei ṭhak lo a ni.

"Lehkha zir kan ngaih tawh kha" pangai deuh chuan a rawn ti daih.

"I sawi fel hmâ chu kan zir lo vang" ka ti ve tlat.

"Project pakhat kan ti ho a, chung vel mai mai chu alawm" ka bianga piai zeuh pah chuan a rawn ti a, kei erawh chuan ka lo vai sawn vat thung.

"Chu pawh ni se, thla lak pui kher tawh suh. Ka thik lutuk" ka tih chuan nui ver ver chungin min rawn kuah a, a bulah chuan mi dang ka thik thu zep buai ka tum hauh lo.

"Keimah nen pawh thla kan la dun khat a nia, ani mi hrang daih leh nghal thla i lak pui chhen mai" ka ti leh sep a, chutah ani chuan

"Khawi maw ka phone kha, min lo pe teh" a rawn ti daih a, ṭha tak chuan ka pe ve leh mai bawk.

"He ka nupui duh tak hian ka bula thlalak a lo châk em em a, ka lo hre si lo. Hei en rawh u, a hmai a tai leh vek tawh, tûmah thla ka lak pui a phal tawh lo bawk aw" LALHMAHRUAIA mai mai chu! Awi awi awi, video-in a la cover zui. Ka zak lutuk chu ka hmai a sen vek a, chu chu ka pasal chuan a lo hai lo nasa.

"Duh tawk teh" tiin a phone ken lai chu laksak ka tum a, a video lak lai chu a off ve ta hram.

"Hei ka post chiah, ti kha chuan i lungawi tawh em?" tiin a Instagram account chu min hmuh a, likers pawh an rawn awm nghal.

"Nghala, min tizak ziah suh. Delete leh vat teh, miin min chhaih vak vak palh ang e" delete tur te chuan han ti ve vak vak mah ila nuam ka ti ru em em a, a delete tak tak ang tih ka hlau ru hle bawk.

Chutia kan inchhaih buai vel fê hnuah chuan lehkha pawh kan zir thei hram a, ka rin lawk ang ngeiin ka thiam loh laite chu a lo thiam leh vek bik tawh. Ka pasal hi lehkha thiam thei tak a lo ni a, hriat loh leh sawi theih loh a neih pawh ka hre lo. Zonet leh LPS vel aṭangin sawmna pawh a dawng ngun ve ṭhin hle a, ka hriat loh hian thil eng eng emaw ni ah a lo inrawlh hnem viau bawk. Aizawl DC a nih hi chu thuhran ni se, neuh neuh chhuah vahna tur a ngah lutuk hi ka ning leh thut zel.

"Ka lo kal dawn a nia" phone a pick-up rualin ka ti a, enge a chhan pawh ka hre lo u Hruaia chu a office-a hmuh ka duh tlat.

"Lo kal mawlh teh" a rawn ti tawi leh sup tawh. A nupui ka nih aṭang hian u Hruaia mizia hi ka hre chiang lehzual a, ṭawng tam lo mahse min ngaiin min thlahlel ve em em tih ka hria a ni.

"Hei Nute, exam i chhang ṭha em?" step-a chhoh ka tum lai tak hian kan class-a mi lal Joel-a chuan a rawn ti a, helmet a ken danah a haw dawn a nih hmel.

"Awi lal Joel, enge hetah teh daih i tih ve? Exam chu ka chhang ṭha lutuk lo, chuan naktuka kan tih leh tur hi ka huphurh turu buru a ni mai" amah ka lo nel be bawk nen ka ṭawng leh ta chîam mai.

"I ti ve ziah, kei aiin i chhang ṭha leh tho ang?"

"Awi ngawi mai teh, ka ti ṭha ngai lo bawk" tiin a banah chuan ka chum nghal taih taih a, eng eng emaw sawiin ka nuih leh tak vak vak kha!

"Hei, engatinge khati ker kura min en reng?" a office-a ka luh ruala u Hruaia'n min lo en kur avang chuan ka ti a, kawngka chu ka khar zui nghal bawk.

"Tunge kha pa kha? Engatinge a bulah khan hlim taka i nuih vel?" awi he pa hi min lo hmu vek a ni maw.

"Kan class-a mi a nih kha, chuan enge a bula ka nuih leh nuih loh chu i lo lak thutak vak a? Awi nang hian i thik chiang lutuk?"

"Ka thik kher lo"

"Inzep buai duh suh, i thik tih ka hre tho tho" tiin ka lam khum a, ani lah chuan office-ah kan awm e ti lo chuan min rawn man beh a tum a, kan inum kual leh vel ta hrep.

Exam kan zo a, keipawh ka chhang ṭha pangai ve vîau chuan ka hria. Mahse ka rilru kap tlattu pakhat a la awm, chu chu ka pasal pawh sawipui ngei ka duh a ni. A hna aṭangin a la rawn bang lo va, keini College erawh kan bang hma viau. Tlai dar 3:30 velah a rawn haw a, ei rawng ka lo bawl mek thung. Min hmuh chuan ka hnung lam aṭangin min rawn kuah a, ka hawnga fawp zeuhin in chung lamah a chho ve leh mai. Chaw ei lai chuan ka thil sawi duh chu sawi ka tum úk a, mahse a fala ka pasal hrilh hmasak ka duh leh ta zawk.

"U Hruai, room-ah lo han chho la, thil hrilh duh che ka nei a nia" thleng sil pah chuan ka ti a, a ni pawh chu ngawi rengin a chho ve mai bawk.

"Enge min hrilh duh chu ni a?" ka thleng sil zo kan nupa room-a ka luh rual chuan a lo ti a, a lam ka pan hnai ve nghal.

"Ihhhhh, eng lo a nia" tiin a bulah ka ṭhu tê tê a, a ni chuan min lo en reng thung.

"Lehkha hi ka zir zawm tawh lo mai dawn"

"Engatinge?"

"Han ngaihtuah ve la, mo ni ve si hi ka mona inah pawh ka awm ngai lo a nia" ka tih chuan ka kut chu a rawn la a, a chul heuh heuh bawk.

"Kei leh ka pa paw'n i zir zawm kan phal vek hi" hmeichhia a ni si lo va, a la hrethiam chiah lovin ka hria.

"Ka pa leh nang paw'n phal mah ula keimah ber hian nuam ka ti hleinem, chuan ka zir zawm dawn loh ro ro chuan thil pakhat min tiam turin ka duh che a"

"Engatinge hetianga i awm thut? Thil thleng a awm em ni? Ka chhungte'n buaina an siam che em ni?" a rawn ti nghal sawk sawk.

"Aih, chutiangin thil thleng engmah a awm lo, keimah zawk hian ka duh rukna a rei tawh alawm" a hmel ka en chuan min ngaihtuah hmel hle bawk.

"Dik tak chuan"

"Enge?" a ṭawng zawm hma hma chuan ka lo ti ve nghal. A hrim hrimin sawi zawm ve vat ṭhin mai awm hi a nia, hre chak deuh hian min siam ve ziah.

"I zir zawm chu i tan a ṭha tih ka hria, mahse zir zawm lo mahla pawi pawh ka ti chuang lo" a rawn tih chuan ka thaw ta huai mai.

"Hun thawl pawh kan nei tam zawk ang a, nangmah nen pawh kan inpawh zual phah sawt ka ring a ni. I laka zahna ka la ngah lutuk te pawh hi a reh ve thuai maithei asin" ka ti leh duah a, ani chuan a dar ngheng turin min pawt phei zui nghal.

"Ni e, i ngaih dan pawh chu a ṭha tho mai. Ka pa i hrilh tawh em?"

"Ka la hrilh lo, nangmah rawn hmasak phawt che ka duh a" ka tih chuan ka chalah a rawn rawn fawp a, min thlawp deuh chu ka lawm hle bawk.

"I fel e" tiin a rawn nui nghawr dat a, keipawh chuti tho.

"Chuan thil chu min tiam rawh aw?" ka tih leh chuan kan awm dan pawh kan insiam rem tawh.

"Eng thil chu nge tiam tur chea min duh? Ka theih zawng a nih phawt chuan ka tiam ngei ang che" thutak deuh hian a rawn ti a, a thutiam chu a hlen ngei ka ring bawk.

"Ka thinlung zawng zawngin ka duh che a, ka hmangaih bawk che. Lehkha ka zir chhan chu hlawh neih te ka duh ve vang a ni a, mahse tunah chuan mo leh nupui nihna ka chelh tawh avangin ka duh angin thil a awm vek thei lo tih ka hria. Chuan, i tan leh ka lawina chhungkaw tan hian ka inpumpek tawp dawn a, eng pawh lo thleng se min thlahthlamin min phatsan lo vang tih min tiam rawh. Engkimah nangmahah ka innghat fai vek tawh dawn ka tihna a nih chu, ka duh ang chuan i awm thei ang em?" amah en kar chung chuan ka ti a, ka ṭah a chhuak dawn ringawt alawm.

"Engatinge i hlauhthawn? Ka thlahthlam phal lo che a, engtik lai pawhin min ring thei bawk ang" a rawn tih chuan ka mittui chu a rawn tling nghal pam a, a chhan em em pawh ka hre lo.

"Hei, ṭah hi tum ringawt ṭhin lo teh, ka ngaihsak tawk lo che a ni ti raw? Ka tihpalh a ni e" tiin ka bianga mittui luang thla chu a rawn hru a, engvanga ṭah chhuak tlat nge ka nih pawh ka hre lo.

"Chutiang lam pawh a ni lo" ka ti ṭiau a, min rawn kuah leh ta nge nge, a mi kuahna hi ka thlahlel a ni.

"Aw le, ṭap tawh lo la, i ṭah hi chuan engtin emaw ni hian ka awm ve ziah a nia. Ka pa pawh ka lo hrilh dawn nia" a awma min kuah bet chung chuan a rawn ti leh a, keipawh ka ṭah chhuak tak kha a bo ti tih tawh.

"Chuan, kan semester ho bik kan picnic dawn a, naktukah a nia. Ka kal ve thei ang em? Ka tan chuan a tawp berna tur pawh a ni tawh maithe asin" tlawn deuh pah chuan ka ti a, phal hram se ka ti.

"In chesual ang e, ka hman hunah picnic te chu ka neihpui zawk dawn che nia" a rawn tih chuan min kuahna aṭang chuan ka inla hrang a, a phal lo vang tih mawlh chu ka hlau a ni.

"U Hruai, phal mai mai teh, ka College life chu naktuk aṭang a tawp tawh dawn der a nia. Feli pawh a tel dawn a, a nuam dawn teh a nia. Chuan chetsual vel kha chu hlauthawng suh, tui hleuh ka thiam tih hre rawh" ka ti leh chiam a, ka kal chu phal mai se ka ti tak zet.

"Tui hleuh thiam pawh an chesual thei tho alawm" a hnial hrat leh ṭan dawn ta.

"Phal mai teh, i fel em kha" ka ti leh ngawng ngawng.

"Buaina i neih chuan min lo phone hmasa ber ang che, chuan lawmman ka phut bawk" a ngawih vang vang hnuah chuan a rawn ti chhuak sup a, ka lawmzia chu sawi pawh ka sawi thiam lo.

"Awi, i phal tihna maw? Awi, ka va han lawm tak, enge ka hak ang âw?" tia thawh nghal mai ka tum chu min pawt ṭhu leh a, min en ran bawk.

"Âwwwwww, i va ho tak. Ka duh em em pa" ti lehin a hmuiah chuan ka zuk fawp a, min lo dawngsawng ṭha ngei mai.

"Ka inthuamna tur ka en dawn" kan infawh laklawh lai chuan nam sawnin ka ti thut a, ka kal thui hman lo chiang khawp.

"Kha kha ka lawmman sawi chu a ni lo" tiin kan nupa khumah chuan min pawt tlu thlawp a, min bawh zui nghal.

A tuk a lo ni a, picnic naah chuan zirlai kal pawh kan tam hle. Zirtirtute kal ve an awm loh avangin kan zalen hlawm hle a, a ṭhen chuan in tur lam an keng nghe nghe. Feli nen pawh kan inkawp leh chawt a, kan bengchheng dun leh tawh hle. Tui ka hleuh thiam avangin Feli chu ka zirtir ve vel a, zirtir a harsa ngei mai. A pil mai dawna a inhriat avang chuan a buai leh nge nge ṭhin. Kan inzirtirna chu kawng thleng vela thuk a ni a, tlak pawh a hlauhawm hran lo.

Chutia a tlang sira ṭhu chunga ka lo hrilh lai mek chuan ka sir lamah hian mipa pahnih hi an rawn in um phei a, an speed a dik tawk loh thut nge ni, rawn tawlhthluin keimah chu min rawn tla ta pawp mai. Hmu lawk reng mah ila chutianga an rawn awm chu ka ring lo ve êm bawk a ni. Ka awmna bul lawk tui chhunga step-ah chuan ka lu ka sawh ta sawk a, a na zawk tih loh chu engmah hriat ka nei tawh lo.

Ka men leh chuan ka lu a na ang reng hle a, kan nupa room-ah ka lo mu diam tawh. Ka hriat sual loh chuan min rawn tlawhtu khan min tlawh na thawkhat viauin ka hria. Ka bulah chuan tûmah an lo awm lo va, mahse bathroom chhung aṭanga thawm ka hriat tâkah chuan awm an awm tih ka man thiam mai. Ka rilru chu a harh ṭha vek tawh a, na pawh ka hre vek. Ka lu ber chu a na a, ka khawih chuan a lo intuamin ka hria. Chutia ka khawih lai vel chuan bathroom aṭang ka pasal chu a rawn chhuak a, ka lam a rawn pan nghal.

"Ka sawi kha i hria em, tui hleuh thiam leh thiam loh lam a ni lo" aw nem lo taka a rawn tih avang chuan ka phu zawk a, mahse a sawi dik reng.

"I kal ka phal lo chung kha min dil luia ti raw? Hei, khumah i mut bûr hi" ka la chhang duh ta chuang lo va, a duh duhin a thinrimna chu han hrithla phawt teh se.

"Tun aṭang chuan ka thusawi zawm tawh ang che, naupang chhia pawh i ni tawh lo" a thinrim avangin ka ngawi ang ka ti a, mahse aw nem lo taka min hauh chhunzawm zel si avang chuan hrehawm ka tihna a zual sauh.

"I hria em? Min en teh, i pasal ka ni a, tun aṭang chuan ka thusawi chiah hi zawm tawh ang che" tiin ka khabe ah chuan a rawn chawi a, ka lu chu a rawn na nghal zawk bawk.

"Min chhang rawh, ka thu i zawm tawh ang tih han sawi teh" ram hmaka a rawn tih leh chuan ka mittui chu a luang thla ta zawih zawih. Ani erawh thaw hawkin a kal sawn a, tukverh bulah chuan pawn lam thlirin a ding ta reng.

Ri miah lovin ka ṭap a, hrehawm ka tiin ka mittui chu ka va dang seng lo tak em. Ka lam pan bawkin a rawn kal leh a, maimitchhin loh chu tih theih ka neih rih lo. Tunah chuan ka ṭah chhuahna lam ai mahin ka pasal ka hlauhna chu a nasa tawh zawk.

"Ka tihpalh Nute, i taksaah na i nei tih hre rengin i thinlung thleng ka ti na leh a, ka tihpalh a ni e" ka biang dawm paha dam deuha a rawn ti pawh chuan ka la meng ngam chuang lo.

"Nute, meng tawh rawh le. Ka thinrim tawh lo vang, ka tihhlauhthawn che avang leh ka tihṭah leh che avangin ka tihpalh a ni" a awma min pawm bet chunga a rawn tih leh tâkah chuan ka insum theihna chu puak darhin ka ṭap ri ta hawm hawm a.

"Ka hlautuawng alawm, i thi mai ang tih ka hlau alawm" aw nem tak chuan a rawn ti leh a, ka ṭap hawm hawm châk lutuk.

"Hrehawm ka ti ve tho asin, kut hial min thlak ka ring a, ka hlau lutuk che. Engatinge min vin vak kher?" ṭap ṭiau chung chuan ka ti a, a aia nghet chuan a awmah min rawn kuah bet zui ta bawk.

"Ka tihpalh, kut ka thlak ngai lo vang che. Min hlau tur khawpa ka ṭawngkhum che avang pawhin ka tihpalh" min la kuah reng a, ka tukhum sam chu a chul hliau hliau bawk.

"Le, ka thusawi chiah i zawm tawh ang ti raw? Ka phal lohnaah chuan i kal tawh lo vang ti raw?" min ngaihven deuh chuan a rawn ti a, keipawh a hmel en tumin ka insiam rem ve ta thuai.

"Aw, ka zawm tawh ang" la ṭap deuh pur chuan ka ti a, ani chuan rilru nat hmel tak hian min lo en ve ran.

"Ka tan hian i special a, i hlu a, thihna hial i tawh hi ka phal lo alawm" ti supin ka mittui te chu a hru a, a thil sawite hlei hlei chuan ka ṭah an tichhuak lehzual.

"Mu ang le, zanin chu ka duat lehzual che a ngai a nih hmel" nui deuh suk chung chuan min mutpui a, kei chuan ka lo kuah vat thung.

"I lu chu a la na em?"

"Ka lu na ai chuan ka rilru a na zawk" ka lo ti ve hmak.

"Ka tihpalh ka tih tawh kha" a rawn ti leh hluai.

"Ka lu chu na tak tia sawi tur a ni tawh lo" aw pangai zawka ka tih leh chuan ka chalah a rawn fawp vang vang a, ka awm dan chu hrehawm víau dawnin lang mahse nuam ka ti ta phian.

"Zanin aṭang chuan eng thilah pawh, khawi hmunah pawh kal dawn la ka tel ve zel tawh ang"

"I hman loh chang pawh a awm maithei asin, ngawt ngawt zel che hian" ka ṭah pawh chu a chhuak tawh lo va, ka pangai leh tawh viau zawk.

"Ka hman tawh ang, ka hman loh dawn chuan ka hman chawp mai ang" a rawn ti nghet zui leh charh.

"Awi, chuti a nih chuan chhuahna tur awm leh tawh se ka va'n ti tak, ka rualin kal ve la, min han veng deuh ngei la" ka hlim leh tawh lutuk tlat.

"Ka veng kher lo ang che" a rawn ti ve leh ta hmuk.

"A nih chuan mi tu emaw ni te'n min chhaihin min lem kual vel se i duh dawn tihna em ni?" a rilru ka hre chak.

"Ka rilru hriat tum vel kher suh" hepa thluak han ṭhat em em zia hi!

"Engtinnge i hriat leh tawh bik? I mak ê, i hriat pawhin hre lo der la, min chhang ve mai rawh. I nupui ka nih hi" keimah zawk chuan ka ti leh ta pang pang mai.

"Hriat loh der ka thiam hleinem" mi hnial hi chu a hrat ve a ni.

"Ka bulah chuan thiam mai rawh, i nau fê ka nih hi, ka pa pawhin dawm rawh a tih che kha, min va dawm lo ve. Ṭawngkam tawitê tê te hian min chhang tawh suh, ka pa ka hrilh mai ang" ka tih chuan a rawn nui a, ka thinrim tak tak lo tih chu a hriat vek tho ka ring.

"Ṭawngkam sei deuh deuhin ka chhang dawn che tihna em ni?" a la rawn ti hram.

"Nghala, mi hnial i hrat si, i nupui hi i duat thlâwt lo" tiin ka saisir ta daih.

"Ka nupui, muhil tawh ang le, zanin chu i mutui dawn a nia" ka hnung lam aṭanga min rawn kuah pah chuan a ti a, a awm dan vel chuan ka nuih a tiza leh tlat pek a!