Salmon-a hnena engkim thlen ka châk a, mahse ka hrilh a nih vaih chuan thil pawi záwk, ka inchhir ngawih ngawihna tur thil a thleng ngei dâwn tih ka chiang si, ka tân chuan ngáwih a, engmah sawi chhuah lo a, min vautute duh anga thil tih ngawt loh chu duhthlan tur dang a awm lo a ni.
Mut hmunah nen lam ka la ngaihtuah zui reng a, thinthiin ka mu thei lo a, zîng 4 dâwn tawhah pawh rilru hah avangin ka la meng reng a, a châng leh file chhûnga lehkhaho chu ka en leh ngawt ngawt ṭhin a, ka bei a dawng rum rum ṭhin bawk.
File chhûnga lehkhate chu Jeremy-a leh a hote thiltih zawng zawng inziahna a ni a, Salmon-a ka pe a nih chuan buaina ṭhenkhat a kiang huai ang a, mahse chu thil vek chuan ṭahna leh rumna nasa záwk a rawn thlen ngei dâwn tih ka chiang a ni.
Zîngkhua a lo vâr a, hmâ takah ka tho a, dik tak chuan ka muhil lo hrim hrim záwk! Ka awm dan chu ka nu'n mak a ti deuh a ni ang, ka ṭhat leh ṭhat loh min zàwt a, pangngai tak hian ka chhâng a, ngaihṭhat lohna nei hmêl a pu a, mahse zawhna dang min zàwt zui lo hlauh!
Chhunah chuan dawrah ka ṭhu nguai bui a, dâr 12 pelh hretah Salmon-an min rawn bia a, engkim, thil nih dan dik tak ka hrilh chàkzia chu pui tak a ni.
Ṭawngkam ka chhep sual ṭep ṭhin a, ka aw leh ka ṭawng dan aṭang chuan thil dik tàwk lo a awm tih a hre ngei a, mahse ka rilrua thil awm a rawn hria ni lovin ka dam lo emaw a ti thung.
Khaw thim dâwn hnaihah a rawn lang hlawl a, engnge a hriat ka hre lo, min thlah tura a lo kal thu a sawi chuan mak tiin ka meng â hau a, kha leh chen kha kan inhre tawh a, mahse chutiang chuan a la awm ngai reng reng lo.
"Thil thleng a awm em?" ka tih chuan, "Ṭhiante bialpa i lo inthlahtîr leh palh ka hlau a," a lo ti sup a, a nui miah lo a, thutak run hmêl erawh a pu chuang lo.
Kan inhriat tirh ata min duh thu emaw, min ngainat thu a sawi emaw ka la hre lo hrim hrim a, mahse a châng hi chuan ṭawngkâin sawi ngai lo mah se, ka rilru ang tho puin, min duh ve tak tak ni hian ka hre ṭhin.
"Maruata kha i thik a ni maw?" hriat chák nei ran hian ka ti a, "Mi dang thik rual ka ni tawh hleinem," a lo ti mai a, mahse ka awih chiah lo.
"I thik tlatin ka hria," ka ti leh ngat a, "I ngaihdan mai mai a nih chu," a lo ti duh lek chauh!
"A nih, engati nge khami tlai khan i thin a rim viau si? Mî bialpa inthlahtîr tawh lo tur te khan min hrilh a, i lung a áwi lo a, ka chungah i ṭuan bawk a, khang zawng zawng kha engvang nge?" ka ti ta duah a, engtiang takin nge min lo ngaih tih hriat ka duh avangin ka kar et et a ni ber e.
"Ruah a sûr dâwn a va ang ve...." ti supin ka zawhna chu a pehhel daih a, khawpui a rawn ri zui nghal dur dur bawk.
"Salmon.....?" amah melh ral paha ka tih chuan, "Immm....." a lo ti thum dut a, "Ka zawhna kha chhâng la," ka ti leh a, ka lam a rawn hawi zawk a, mahse min chhâng chuang miah lo.
Kan awm dan chuan kan inkârah eng inngaihzawnna mah a la awm lo tih a tichiang viau a, keiin duhin hmangaih mah ila a tân chuan hmeichhe pangngai ve mai ka ni tih ka hre chiang ta sawt a, dem thei dinhmunah ka ding lo tih ka chiang viau bawk.
Kan vêng kan thleng chu ruahpui vanawn sûr ang mai hian ruah a sûr buan buan a, kan kawmchhakah kan ding reng a, ruah a tam èm avangin ka chhuak thei rih lo a, inbiakna tawi tê tè kan nei a, a beng verh záwng tak thil ka sawi chhuak palh ang tih ka hlau ru ṭhin khawp mai.
Ruah a tla tlém deuh ta maw tihah ka chhuak ve ta chauh a, a kawr hak lâi, t-shirt chunga a kamis hak chu hulhiap atân min hmantîr a, hawi pawh hawi let tawh lovin in lam ka pansan ta vang vang bawk.
Chumi zan vek chuan a nupui hlui Rinkimi hnen aṭangin phone call ka dawng a, amah a ni tih hre lova call pick up ka ni a, ka bula Salmon-a a awm leh awm loh min rawn zàwt a, a awm loh thuin ka chhâng a, min thlah thu kha chu hrilh ka tum buai lo.
"Keini pahnih hi inbiak kan ngai, naktukah ka rawn hmu ang che," tiin kan inbiakna chu a hmet tawp hmak a, a awm dan chuan min tibuai pha eih lo hrim hrim!
Salmon-a kamis, navy blue rawng chu ka ti rô a, a duh hun huna a lo lam theih thu hrilh ka tum zet nà a, mahse ka hrilh leh ta lo, amah ngeiin a sawi chhuak emaw min dil te a nih ngawt loh chuan ka pe let phal tawh kher paw'n ka ring lo.
Ka thawmhnaw dahnaah ka khâi a, ka kawr khai dangte lakah chuan a lianin a hlai ṭha hlup hlup bîk khawp mai. Zankhuain ruah a sûr a, thil hrechhuakin drawer-a ka file dah ṭhat chu ka phawrh a, hming pakhat, 'Lawrence' tih hming pu ka zawng chiam a, mahse ka hmu lo hrim hrim!
A tukah chuan khua a cheng ang reng hle a, fur kan hnaih chho ta bawk nen a àwm viau mai. Tin, Rinkimi hnen aṭangin phone call ka dawng leh a, ka dawr awmna lama a lo kal mêk thu leh a lo thlen hnaih tawh thu a sawi chuan engtia lo hmâchhawn tur nge ka hre chiah lo a ni.
A sawi ang ngeiin rei lo tê hnuah a rawn thleng a, damdawi leia lo lut an awm leh zauh ṭhin avangin kan inbe mumal lawk thei lo a, sawi duh a nei tih a hmêlah a hriat viau a, eng pawh sawi se, ka tâna thil pawimawh leh ṭangkai a nih loh chuan uksak vak ka tum hran lo.
"Thu zep ṭit ṭet ka thiam vak lo a, ka hrilh tlang law law ang che," a rawn tih chuan a lam pawh ka hawi lo a, dawr chhûngah kan pahnih tih chauh lo chu tûmah an awm tawh lo bawk.
"Salmon-a hnaih zâwng hian khawsa tawh suh," a rawn ti leh a, "Ka thei lo ti ta ila," ka lo ti nghat a, a nupui hlui a ni tih hre tho mah ila chuti maia Salmon-a chàn ka tum bîk reng reng lo.
"Enteh, engmah tih hreh ka nei miah lo a nia, lo hnaih tawh lo la, lo zar buai tawh hek suh," a rawn ti ta fak fak a, min ṭawngkhum duh dan chuan ka thin a ti sâ nghal zak!
"Engvangin? Engvanga a bul hnaiha ka awm chu duh lo viau nge i nih?" ka ti ve ta salh a, "A chhan chu ka bula lo lèt leh a tum mêk a, a rilru pawh a danglam ṭan tih ka hria, mahse nang hian thil i lo tikhaw lo leh ṭhin a, ka fapa pa a nih ang bawkin a fapa nu ka ni a, tun hmâa kan lo khawsak ṭhin dan anga awm dun leh kan rilruk mêk a, chuvangin Salmon-a lak ata hi lo inthiarfihlim ang che," mi hmai zahna nei miah lova a tih siah siah lâi chuan ka ip deuh chawih a, mahse chuti maia tlawm ka la tum bîk chuang lo cheu!
"I thu min hrilh zawng zawng hi ka awih lo ni mai rawh se," ka ti fiah kalh a, a meng ling nasa kher mai.
"I awih leh awih lo ah ka buai lo, i la hre dâwn tho tho, amah Salmon-a kâ ngei aṭanga hriat i duh te pawh a ni mahnà," ti hmarhin bag aṭang chuan phone a phawrh a, eng eng emaw ni a hmet a, chutah amah bawk chuan, "Kha, ngaithla rawh," tih leh hmeh a rual a, "Engkim hi hmân ang chiah khan a awm leh ang, ka theihtawp ka chhuak bawk ang," ti dam daptu Salmon-a aw ngei ka hre chiah chu ka thin a phu rang hle.
"Ti kha chuan ka thusawi zawng zawng kha thudik vek a ni tih i hre tawh ngei ang, chuan, nang hi chu a khawhar inhnem nâna a hman mai mai i ni tih inhre bawk la, lo hnaih tawh lo la, ngaihtuah pawh lo ngaihtuah tawh hek suh," Rinkimi chuan a rawn tih zawm charh charh a, ka bangbo a, engmah sawi tur rèng ka hre lo.
"Hre reng rawh, i tâna ṭha tur bak a ni lo a nia," ti lehin dawr aṭang chuan a chhuak a, ka rilru a nâ ru nghal veng veng bawk.
Ka rilruah Salmon-a hlir a awm ngawt ngawt a, ani nena kan inkâr chuan ka ngaihtuahna a tibuai a, ka thinlung aṭanga paih chhuak tur chuan ka beih fê a ngai dâwn tih pawh ka hria, mahse engkim, khang zawng zawng, Rinkimi thu min hrilh leh ka ngaihthlak zawng zawng hnuah kha chuan ka rilru a pangngai hle hle thei tawh lo a ni.
Nimahsela, amah, Salmon-a ngei ka zawh chian phawt a ngâi, chuti maiin Rinkimi thusawi zawng zawngte kha ka ring pumhlum ngawt thei lo. A hnenah Salmon-a let se a duh luatah dawt tam tak sawi tel te pawh a nei thei a, kei nena awm dun a phal loh avangin min lo haw ru viau thei bawk.
Ka phone ka phawrh a, Salmon-a ka call a, dawra a lo kal dâwn leh dâwn loh ka zàwt a, ka haw hun àwm vela lo kal a tum thu a sawi chuan ngaihngam takin kan inbiakna kan titawp a, a hun lo thleng se, ka zawhna a chhàn dan azirin engnge ka tih ang a, engtin nge ka awm zui ang tih lam chu ka ngaihtuah thiam mai ka ring.
Khua a hniam ṭan a, chhum a zîng pik chûk a, tlai dâr 5 velah Salmon-a a lo thleng a, a hmêl ka hmuh rual chuan a kamis kha ka hrechhuak zawk a, mahse engmah a sawi ri si lo a, ka sawi ri duh bík lo, amah záwkin a rawn sawichhuak a nih ngawt loh chuan pek lèt ka tum lo hrim hrim!
"Vawiin lam in buai em?" car chhûnga kan chúan dun hnu chuan ka ti a, kan vêng lam panin kan tlan mêk bawk.
"Buai hran lo e," a lo ti mai a, a mood a fuh hmèl viau lehnghal!
"Thil thleng a awm em ni, ka tihna chhan chu i lan dan a dang riauin ka hria," ka ti leh a, "Chuti maw....." a ti tawi sup a, ṭawngkam bungrua hi chu a nei tam lo ve ngawt mai.
"Thil zawh duh che ka nei a," ka tih chuan, "Immm.....sawi la," a ti dam dap a, ṭawng tuma ka àng chiah tihah phone call a dawng a, ka hmui ka chip riai riai a, caller ID-ah chuan Rinkimi hming ka hmu zui nghal zat bawk.
"Hello....." kei min biak lâia a awkâ dam dap ang chiahin Salmon-a chuan a ti a, "Tih dan lo ngaihtuah rawh, ka lo thleng har lo ang," a tih zawm zat a, a hmâ lawka a awkâ chhuak nen kha chuan a inperhsan hle.
"Ka in lamah kal kawi hmâsa phawt mai ang," a rawn tih chuan, "Engati nge? Engnge thleng a?" ka lo ti thuai a, "In chhûngah kangmei a chhuak a nih hmêl, kan hmanhmawh a ngai," ti supin car chu a khalh chak zual sauh a, kan boruak a danglam ta bawk nen ka zawh tum tak pawh ka zàwt thei lo.
Minute 10 hnu velah in kawt kan thleng a, kan tlan muang lo bawk a, kan thleng rang khawp mai. Car aṭanga kan chhuah chuan ruah a hmî seng seng a, Salmon-a chu hmanhmawh zet hian a tlan lut thuai a, ka lut ve nghal vat bawk.
"Salmon...." Rinkimi chuan a lo ti chul a, a hmaite chu a bal nuaih a, Salmon-a erawh choka lamah pheiin kangmei tihmih a tum a, "Tui lo lak belh rawh," a rawn tih chuan ka che vat a, meialh awmna lai apiang kan theh a, kan ṭhelh mih meuh chuan a khu rum rum a, thil pawi tham a kang chhe hman lo hramin ka hria.
"Salmon...." tiin Rinkimi chuan Salmon-a chu a kuah thlawp a, hlauthawng tih hriat tak hian a ṭap hawm hawm a, Salmon-a paw'n nghet zetin a lo kuah a, ka awm dan a lài leh ta kher mai.
"Intifai rawh," a ti dapa Salmon-a inlak hran tum chu Rinkimi chuan, "Aih, min kalsan tawh suh Salmon, khawiah mah min kalsan tawh lûl suh," tiin a kuah nghet zual sauh a, Salmon-a chuan ka lam a rawn hawi zawk a, ka lo hawi sawn rang hle.
"Engtin nge kangmei a chhuah theih?" sitting room-a a ṭhut pheipui hnu chuan a ti a, Rinkimi chuan, "Ka hre bîk lo, gas kha a rawn puak pawp a, chuan, mei a rawn alh nghal hluah hluah a, ka buai vek a, ka hlauthawng a, ka thi tawh dâwn emaw ka ti hman hial a, ka lo call tawp che a nih kha," a ti zuah zuah a, Salmon-a ṭângah a la bei reng a, Salmon-a erawhin a kuah tawh lo thung.
"Khawiah mah min kalsan tawh suh Salmon, ka hlau, ka hlau lutuk," a tih leh lâi chuan ka mit leh Salmon-a mit a intawng chat a, awm dan tur hre lo zetin ka lo nuih tawi tap ringawt!
"Intifai la, keiin Mimii hi ka lo va thlah lawk ang," Salmon-a chuan a ti sup a, chu veleh Rinkimi chuan rang lutuk tak mai hian, "Ka duh lo Salmon, khawngaihin ka hlauhthawnna hi tibelhchhah suh, khawngaih takin," a ti chuai raih a, a ṭap zui feih feih bawk.
"Engmah hlauhthawn tur a awm lo," Salmon-a chuan ti mah se Rinkimi erawhin a kuah bet tlat a, ka ṭawng chhuah a ngai ve tain ka hria.
"Thlah ka ngai hleinem, keimahin ka haw thei alawm," pangngai tak hian ka ti a, Salmon-a chuan ka lam a rawn hawi rang hle.
"Zira ka'n bia ang e, a lo thleng har lo ang," tia chet zui mai a tum chu ṭawng zawm nghal vatin, "A ngai lo Salmon, mahni in haw kawng hre lo pawh ka ni tawh hleinem, ka'n haw ang e," tih leh in aṭanga chhuah ka rual a, dik tak chuan ka rilru a nâ a, Rinkimi thiknain ka khat a, mahse engmah tih theih a lawi ka nei chuang si lo.
Vanneihthlak takin kawngpui ka thleng chho chu taxi phar tur a lo awm nghal hlauh a, haw kawng tluanin ka mitthlaah Salmon-a leh Rinkimi awm dan kha a châm zui vawng vawng a, duat taka Rinkimi a kuah te kha ka tân chuan nàtna a tling lo thei lo a ni.
Zanah lah ni se min rawn be lo hrim hrim a, message takngial pawh a hnen aṭangin ka dawng lo a, mahse mi dang, ka hriat ngai loh hnen aṭangin ka dawng thung.
Phone number lawng tawp aṭang hian a ni a, ka chet dan tur leh ka tihtur a rawn inziak tlar thla duah a, message aṭang chuan kha pa, cafe-a ka hmuh pa ngei kha niin ka hria.
Ka rilru hah lâi a ni bawk nen, chutiang message ka dawng lehzel chu ka mang a ang zual a, damdawi in khuma Zodini mu lâi thlalak ka dawng leh chiah chu awm dan tur pawh ka thiam tawh lo, ṭe vak a, ṭah vak mai ka duh rum rum hial a ni.
A tuk aṭang chuan a hnen aṭangin nîtin message ka dawng ta ziah a, che thuai thuai tura min nawrna a ni tlangpui a, mahse thil ṭha lo tih chu ka huphurh tlat si, ka ngam lo a, ka theih ka ring lo bawk.
Tin, Salmon-a nena kan inkâr ni se a zau tial tial ni mai hian ka hria a, khami zan, a ina kangmei a chhuah zan aṭang kha chuan min rawn be zui leh ta miah lo a, dawrah pawh a lo kal tawh ngai hek lo.
Rinkimi thu min hrilh zawng zawng, min vauna zawng zawngte kha a dik ni mai hian ka hre tawh a, phone call tak ngial pawha kan inbe tawh lo chu hrehawm ka ti a, mahse be hmâsatua ṭan erawh ka tum tawh bîk lo a ni.
Ni khat chu dawra ka awm laiin message ka dawng leh a, 'Tun thla ral hmâ ngeia i che chhuak lo a nih chuan mi pakhatin nunna a chân ang' tih hi a ni a, ka rilruah Zodini a rawn lang hmâsa ber a, ka hlauthawng a, mahse an thil duh ang tihsak chu ka la zuam chuang lo cheu!
A châng chuan Salmon-a biak mai ka rilruk rum rum ṭhin a, engkim hriattîr vek ka châk ṭhin. Amaherawhchu, ka ngam tak tak bawk si lo. Thil eng emaw a thlen palh hlauin Zodini ka tlawh ngun zual a, ka inring ru reng a, a chungah thil pawi, thihna hial a thleng a nih vaih chuan kumkhuain ka inngaidam thei tawh ngai lo ang.
Hlauthawng rèng rèngin nî ka vui liam nitin a, message erawh ka dawng zui zel ta rih lo a, mahse chu chuan ka hlauhthawn rukna a tireh chuang hauh si lo. Thil ṭha lo a rawn thleng phut ang tih mawlh chu ka hlau a, dang thei ila ka ti tak zet bawk.
Kâr a liam a, zan khat chu ka khuma ka mut der der laiin number lawng aṭang hian message ka dawng leh nawlh a, hmeichhe hmai thi hnuang thlalak ka hmu chiah chu ka ṭe chhuak ṭhawt a, ka en chiang a, Salmon-a nu ni tlatin ka hria.
Chumi phone number vek aṭang chuan phone call ka dawng zui zat a, ka tha a khur a, ka pick up lawk thei lo a, a ring tawp dâwn tawhah ka pick up ve ta chauh a, mahse engmah ka kâ aṭangin a chhuak thei lo.
"A dawt leh chu i ṭhiannu a ni tawh ang, tun kâr ral hmâ ngeiin che ang che," mipa aw hian a rawn ti chhur chhur a, ka tih ngaihna hre lo chu ka ṭap tawp ringawt!
Ka mittui hru hul thuak thuakin Salmon-a ka call thuai a, mahse Rinkimi záwkin a lo chhâng a, rawng taka Salmon-a nu thah a nih thu leh a nau, Awitei ngei paw'n hliam a tawrh thu min rawn hrilh a, chung thil thleng te avang chuan Salmon-a be buai rih lo turin min hrilh zui nghal mawlh mawlh bawk.
Kan inbe zo chu khumah ka ṭhu hnawk a, ka melh ngai ka melh tlawk tlawk a, ka kut ka hum ngawt ngawt a, engtin nge chutiang thil rapthlak chu an tih tak tak ngam ka hre lo a, ka ngaihtuah pha thiam lo a, mahni indemnain ka khat a, ka hah hluah hluah a, an sawi anga ka lo ti mai lo kha ka inchhir hnuhnawh tak zet a ni.
Dârkar a liam a, Salmon-a nu thihna rapthak tak chuan social media a luah a, ka nu leh pate tak ngial paw'n an hre tawh a, Salmon-a nu a ni tih ka hrilh lai chuan pawi an ti dun hle.
A tukah chuan dawr ka khar a, Salmon-a ni lovin Awitei záwk biak ka tum a, mahse ka ṭhulh leh a, mahnia an in awmna zawn chhuah chu a finthlak záwka ka hriat vang a ni pakhat!
Tun hmâ zawng khan Awiteite inah ka kal ngai lo a, an in awmna lah ka hre hek lo. Amaherawhchu, an vêng ka hre tal a, zawn hmuh a harsa lutuk lo turah ka ngai, a ṭul a nih leh mi dang ka zàwt kual lawp lawp tawh mai a ni ang chu!
Vanneihthlak takin an in zawn hmuh nân hun tam ka khawhral lo a, an in ka thleng chu mipui an lo khat hmur a, Salmon-a hmêl ka zawng ru deuh a, mahse ka hmu mai lo.
Kawngkapui sîra ṭhutna awmah chuan ka ṭhu a, ruang bula Awitei ṭap hawm hawm chu ka thlir reng a, ka mittui a hnâm ṭiam ṭiam a, engvanga a nu chu thi nge a nih tih hria se zawng min haw ngawt ang ka ring.
Pastor-in vuina hun a hman lai te chuan Awitei chu a ṭap bang hleithei lo a, tlangvahoin kûang an zawn chhuah lâi te chuan chau tih hriat tak hian a ṭap chhang rawih rawih a, ka khawngaih lutuk chu ka mittui ka dang seng tawh ngang bîk lo.
Chutih lâi tak chuan Salmon-a a rawn lang hlawl a, khawi aṭanga lo kal nge ka hre lo a, a lo lang thut a ni ber.
"Salmon....." tiin ka lo ko thuai a, mahse ka kohna chu hria ang paw'n a awm lo.
"Lo kal teh!" ti hlaka min kai sawn sawk sawktu chu tu dang ni lovin Rinkimi a ni a, ka hmu sual nge ka hre lo, a hmêlah chuan lungchhiatna rèng a lang lo hrim hrim!
"Engati nge i lo kal luih hram a? Salmon-a rilru buai lai chuhin ṭan rawn khawh tum reng reng suh!" a ti siah siah a, ka kut a chelhna chu ka phih thla chiang hle.
"Chutiang thil engmah tih ka tum lo," ti hmakin ka kal sawn nal nal a, min ngaihdan dik lo lutuk chu ṭawngkhum lèt hrep a châkawm záwk rum rum a ni.
Salmon-a awmna lam ka pan hnai zel a, Awitei kuah pahin a kalpui a, an hnung chiahah ka kal a, chutih lai vek chuan Rinkimi rawn langin Salmon-a kut leh lam, Awitei a kuah lohna lam chu a rawn chelh zui zat a, an hnungah ka kal laklawh tawh bawk si nen hmuh hrehawm ka ti ru hle.
Thlan khura Salmon-a nu an dah thlak riai riai lâi chuan Awitei chu namên lo hian a ṭap a, a chau tawngkhawng tawh te pawh a ni ang, nikhaw hre lovin a awm hial a, Salmon-a chuan a pawm kang lawp a, rilru hah hmèl zetin a kal sawnpui nghal vang vang bawk.
Ina ka lèt hnu thlengin ka awm a nuam lo a, ka rilruah Salmon-a te unau bak an lang thei lo a, phone call rawn lut pawh pick up nachâng ka hre lo hial a, mahse call a lo luh nawn leh avangin ka pick up ve ta chauh!
"Tun hi i chet hun tak a ni, hmanhmawh ang che, kal thuai rawh," mipa pakhat hian a rawn ti a, a thusawi awmzia chu ka hre chiang khawp mai.
Kan inbiakna a hmet tawp zui nghal hmak a, 'min ngaidam hram ang che Salmon' ti rilru vawng vawng chungin in ka chhuahsan a, Salmon-a te inah bawk chuan ka va let leh a, tû mah an lo awm tawh lo a, in kawngka, tala pawh tel loa inhawlh kalh ringawt chu ka hawng a, ka lut zui nghal a, ka hlauthawng ru hle bawk.
In chhûng ka luh rual chuan message ka dawng a, ka kalna room tur mai bakah chabi awmna chenin min rawn hrilh a, ka hrethiam lo hman hle. Engati nge engkim, a awmna leh tihtur zawng zawng hre chunga kei kher min tihtîr chhan chu ka hre lo a ni.
"Muangchang suh, i ṭhiannu Zodini nunna ngaihtuah tel ran la," tih message ka dawn leh rual chuan ka thaw halh a, an thusawi ang apiang ka zawm lo thei lo.
Dawhkan têa chabi chu ka la a, pindan ka hawng a, khum bula thir thingrem lam chu ka pan ding nghal a, tih dan tur engkim min hrilh zel avangin thil harsa tak a ni hran lo a, mahse ka hlauhthawnna chuan min tuam mup mup a ni ber.
Thingrem ka hawn rual chuan file dum pakhat, chhah ṭha zet mai hi ka hmu a, min hrilh ang ngeiin ka la thuai a, thingrem chu ka kalh ṭha leh vek a, hmanhmawh takin ka che zui a, mahse pindan ka chhuahsan hmâ chuan thawm dang ka hre ta tlat mai.
Hmun thim lâiah ka biru thuai a, phone ka bih sek a, ka chhuah dan tur min hrilh beisei takin ka nghak a, mahse chutiang eng message mah ka dawng zui hauh si lo, ka hlauthawng zual tak zet!
Vawilehkhatah pindan kawngka chu a rawn innam hawng ṭhuai a, mipa rum nghut nghut ri ka hre zui zat a, Salmon-a ngei niin ka hria, min hmu ta se engtin nge ka chhàn ang tih mawlh chu ka rilruah a awm a, thil dang rèng ka ngaihtuah thei tawh lo.
Comments
Post a Comment