Sitting room-ah ka ṭhu ngâwi reng a, Rinkimi chu a ṭap feih feih a, an inhnem thawm chuan thil chi hrang hrang min ngaihtuah kaitîr a, Salmon-a hawtute thil tih bawk a nih leh ka ring deuh rum rum a, remchâng hmâsa bera zawh chian a ṭhain ka hria.
An inṭawng thlamuan thei a ni ngei ang, a tawp a tawpah chuan Rinkimi ṭap thawm a reh ta hmak a, pindan aṭanga Salmon-a a lo chhuah chuan ka pan vat a, a hmêla thinurna lang chu ka hmuh hmaih lo a, biak ka hreh phah deuh a, mahse ka be ta tho.
"Engati nge a Salmon? Engnge a chungah thleng?" ka tih chuan min chhâng lo a, washroom-ah a lutin a hmai a phih a, ka en zui reng a, a lungàwi lo a nih paw'n ka biakna tal chu pangngai takin chháng se ka ti hle.
"Salmon....?" washroom aṭanga a lo chhuah hnu chuan ka ti leh a, engmah sawi lo bawk hian a thaw chhuak hulh a, zawhna zawh reng chu ṭhain ka hre ta bîk lo.
"I chaw ei tur ka'n siam ang e," tia kal sawn ka tum chu, "Ka ril a ṭam lo," a lo ti nghut a, a awm dan chu ka hrethiam lo, mi dang hlak a ang mah záwk!
"I kal hmâ khan ei pawh i ei ṭha hman hleinem, tlèm tal ei rawh," ka ti leh a, a kal hnu khan engmah ka ei zui bîk lo tih hriattîr ka tum lo hrim hrim!
"Ka rilru tibuai zual záwnga i awm loh theih chuan a lawmawm ngawt ang," a rawn ti ta hmuk a, ka ngâwi chiang hle.
"Ka thlah ang che," ti lehin kawngka lam a pan nghut nghut a, a awm dan chu ka hrethiam lo tak zet, min hrilh duh lo a nih paw'n ka chungah a thinurna lantîr kher lo se ka ti!
Kawng tluanin engmah a sawi lo a, eng thu mah ka chhakchhuak bîk bawk hek lo. Kan kawmchhak kan thlen chuan ngâwi reng hian ka chhuak a, ka rilru a nuam lo veng veng a, hmanhmawh tih hriat fahrana a tlan zui nghal nal nal chu ka thlir dauh dauh a, a ngaihna hre lo zetin ka thaw leh halh ṭhin ringawt bawk.
Chumi zan aṭang vek chuan engtin emaw ni hian a awm dan, a nungchang leh min biak dan thlengin a danglam tial tial a, kan inah pawh a rawn lang khât ta pharh a, a lo kal khàt chhan ka zawh lahin tihtur dang a neih thu bakin min chhâng ngai bawk si lo, a awm dan chu ka hrethiam lo tak zet a ni.
Ni khat chu Zodini pa hnen aṭangin phone call ka dawng a, a fanu a harh tawh thu a sawi chiah chu hmanhmawh takin damdawi in lam ka pan nghal thuai a, lawmna leh hlimna chuan min tuam a, ka ṭah te lam a chhuak hial a, a hmêl ka hmuh huna ka tih hmâsak ber tur chu ngaihdam dil a ni.
Rei lovah damdawi in ka thleng a, ka ṭhiannu Zodini hmêl ngei ka hmuh rual chuan ka insum zo lo a, ka ṭap a, ani pawh a bang chuang lo. Engmah sawi lo hian min en a, a biangah mittui a luang zawih zawih a, taksa dam ṭha ver vawr ni se, kuah vawng vawng ka chàk tak zet!
Damdawi inah chuan ka awm zui ta reng a, ka ṭhutchilh ran a, thinlung leh tih tak zetin ngaihdam ka dil a, mahse ani erawhin eng thu mah a la chhakchhuak lo a, rei lo té hnuah a muhil leh ta daih bawk.
Chutia ka ṭhut ngàwih reng lai chuan mi pakhat hi a lo lut a, ka hmèlhriat ngai a ni lo a, ka hmuh àwm pawh ka la hre lo. Zodini chhûngte erawhin an lo be thuai a, an inhre sa tih chu a chiang viau mai.
"Mimii i ni ang maw?" tiin chu pa chuan ka lamah a kut a rawn lek a, lo chibai pah hian, "Aw ni e, engtin nge min hriat a?" ka ti nèm deuh diai a, "I ṭhiannu hian i chanchin min hrilh ṭhin alawm," a lo ti mai a, tunge a nih ka la hre chuang lo.
"Mâruata ka nia," hriat nuam táwk chiah hian a rawn tih leh dap a, a hming ka hriat rual chuan thil hriatchhuah ka nei nghal zawk!
"E he....ka hria che, Zodini nen hian i chanchin kan sawi dun nasa thei lutuk," ka ti ta hluai a, Zodini ngaizawngtu kha a ni tih ka hriatchhuah rual chuan mak ka ti hran tawh lo, a chhan chu Zodinin an inngaihzawn thu min hrilh tawh tlat a tin a ni!
Zodini bula ṭhut pahin kan titi dun malh malh a, a ṭawng ngaihthlak a nuam a, mi puitling tak a ni a, titipui pawh a nuam viau mai. Tin, Zodini chhûngte paw'n an ring ngam tih a hriat a, a awm chhûng zawng chuan an rawn inrawlh lo hrim hrim!
Maruatan Zodini hmai duat taka a chûl ka hmuh rual chuan ka rilruah Salmon-a a rawn lang a, kan inkârah buaina awm lo mah se kan ṭha chiah lo a, mahse ka ngâi ru veng veng tho.
A bula awm ka châk a, a aw thum dam dap hriat leh ka chàk a, a mi uapna hnuaia awm leh ka chàk a ni. Nimahsela, tunah rih chuan biak buai emaw zar buai chì a ni lo tih ka hrethiam a, a rilru a pangngai hunah ṭha taka min rawn biak ve leh mai ka ring bawk.
Inbiak hi chu kan inbe ṭhin ngei a, mahse amaha thil danglam awm a la kiam lo tlat a, kan inbiak paw'n keimah hlirin ka call ṭhin. A hnen aṭangin phone call ka dawng ngai lo hrim hrim záwk a, kâr khat dâwn chutiang chuan kan awm tawh a ni.
Khua a hniam a, Mâruata chuan min thlah a tum a, ka hnar bîk lo. Kawng tluanin thil chi hrang hrang kan sawi dun a, a ṭawngkam hriat a nuamin a fel bawk si a, titipui a nuam tak zet!
Kan kawmchhak dawr bulah motor a tiding a, lawmthu sawiin ka chhuak a, ani pawh a tlan liam zui mai a, mahse kan in pan thlakna step bula lo ding ngâwi reng Salmon-a ka hmu chiah chu ka thin a phu nghal dawt dawt a, thil tisual man ang mai hian ka awmin ka hria.
"Khaw'nge i kal ang?" a bul ka thlen phei hnu chuan a lo ti nghut a, "Zodini a lo harh tawh a, damdawi inah ka va kal a," pangngai tak hian ka ti a, "Kha pa kha tunge?" a rawn ti leh a, ka hlauhthawn ruk làwk ang ngeiin min zàwt ta chiah e.
"Mâruata a nih kha," ka ti mai a, "Tu Mâruata nge?" a la rawn ti hram a, a awm dan chu ka hrethiam leh ta hauh lo.
"Zodini bialpa Mâruata a nih kha, i hriat mi em ni?" ka tih chuan, "Mi bialpa inthlahtîr tawh suh," a lo ti bung nghut a, tak run hian min en a, a thik deuh emaw ni te ka ti!
"A remchâng èm a," ka ti leh chiah chu, "Min call thei reng alawm," a lo ti hmuk a, a thik chiangin ka hria.
"Engnge min thlah chu a pawina a awm em ni?" ka ti lui ngat a, ka zawh ngai lovin amah ngeiin a rilru sawi chhuak ve teh se!
Ngâwi reng hian ka bânah a chelh a, a car-ah min nawr lut a, khawiah nge min kalpui a tum ka hre hauh lo. Thui kan tlan hmâin kawngsîrah a ding a, kan awmna hmun chu a reh ṭha hle bawk.
"Mipa dang inthlahtîr tawh lo ang che," kan ngàwih duh vang vang hnu chuan a ti hniam sup a, a aw chu tlèmin hriat a nuam ta deuh!
"A remchâng èm a, chuti ni lo se chu bus-in ka haw ang," ka tih chuan, "Min call thei reng," a lo ti vut a, "Ka inthlahrung alawm," ka ti ve leh nghal zat a, a ngáwi ta run mai.
"Thil dangah i buai ṭhin èm a, chu bakah i rilru tibuai zual zâwnga awm ka duh lo," ka ti leh nghat nghat a, a thaw deuh hulh a, ka kut a rawn chelh rual chuan muangchâng hian ka pawt chhuak zal zal a, min rawn en a, mahse a lam ka hawi duh lo lui tlat thung.
"Engtik zan nge i hman ang?" dam dap hian a ti a, "Eng ti turin maw?" ka lo ti ve mai a, "Kei nena hun hmang dun turin," a rawn tih chuan, "Ni lo Salmon, tun ṭum chu ka hnial che a ngâi, i buaina, ka hnena engmah i sawi duh loh hi chingfel phawt la, chumi zawhah chuan zalen takin hun kan hmang dun záwk dâwn a nia," ka ti dat dat a, a ngâwi ta reng a, thinrim hmêl erawh a pu lo.
"Engtik ni ah emaw engkim ka la hrilh ang che," ti supin ka kut chu a rawn chelh a, a fawp zui vang vang a, chutah zet zawng a lam ka hawi lo thei ta lo.
"Kan awm dan hi ka hrethiam lo Salmon, hrehawm ka ti," ka ti hap a, ka mitmenga amah ka thlakhlelhna chu a hmuh thiam ngei ka ring.
A lamah min pawt hnai a, duat tak hian a âwmah min kuah bei a, ka chalah fawp zui zatin ka hnung a chûl a, ka thla a muang nghal huai huai a, chutiang chuan awm reng thei ila ka ti ngawt mai.
"Min rawn be ngai bawk si lo," ka ti leh a, dik tak chuan pangchan ka châk tak zet a ni.
Chutia kan inkuah lâi chuan a phone a rawn ri ral ral a, caller ID-ah chuan 'Rinkimi' tih hi a chuang kalh a, min kuahna ata ka inla hrang rang hle bawk.
"Lo haw tawh la, hei, chaw ei ka peih tawh a nia," phone call a lak rualin Rinkimi chuan a rawn ti a, loudspeaker-ah a dah loh nàin a ṭawng ka hre pha vek thung.
"Ka rei lo ang," ti thum dutin Salmon-a chuan an inbiakna chu a hmet tawp a, ka lo nâ ru veng veng!
Chumi hnu chuan engmah kan sawi zui leh ta miah lo a, kan in lamah min phur haw a, Rinkimin a rawn biak aṭang khan engkim a danglam nghal vek ni maiin ka hria.
"Ka lo bia ang che," ti dap hian car aṭanga ka chhuak tur chu ka bânah a rawn chelh a, engtin mah ka chhâng lo.
Ni dang ang lo takin a tlan liam ka thlir lo a, amah záwkin in lam pana ka chhuk thla hmawk hmawk chu min en zui reng ka ring.
In chhûng ka lut chu ka nu'n chaw ei a lo siam mêk a, ka pui nghal a, Zodini a lo harh tawh thu te, a taksa dinhmunin hmâ a sawn sawt thute chu ka hrilh a, kei tluk zetin an lawm ve hle.
Chumi zan chuan Salmon-a hnen aṭanga phone call dawn ka inbeisei ru ran a, dâr 12 dâwn thleng ka nghak a, mahse phone call rèng a lo lut lo.
Ka rilru a nâ vawng vawng a, a nupui hlui Rinkimi thiknain ka khat a, hun an hman dun ngei pawh ka ring.
Ka rilru a kal thui zel a, Salmon-a pawh hian a mi hrang en ngawt thei bîk lo niin ka hre ta! Ni e, a àwm lutuk, a nupui hlui a nih mai bakah a fapa hmangaih em em nu a ni leh zel a, kei nen chuan tehkhin rual kan ni lo.
Nimahsela, ka thinlungah hmasialnain hmun a chang a, mi dang laka Salmon-a chân tur ang mai hian ka inngai a, mahse chutiang thil a thlen ka phal hauh si lo.
Rilru nuam lo zetin ka mu a, ka muhil lawk thei lo a, ka ngaihtuahnaah Salmon-a nena kan inkâr ngawt chu a awm a, chuti maia beidawnsan ka tum lo hrim hrim bawk.
Zíngah ka nu'n min rawn kai tho a, ka mu tlai bawk nen thawh ka hai chiang hle. Nilêngin dawrah hun ka hmang a, Salmon-a chanchin engmah ka hre zui lo a, chutiang hun tawhah lehzel pawh min la rawn be miah lo chu ka lung a âwi lo ve tak tak ta!
Zan hun a lo inherchhuak a, zanriah ei kham, ka pa thingpui tur ka siam lai chuan a rawn lang hlawl leh ang lawi a, mahse a laka ka lungawi lohna chu chuti maia reh thei a ni tawh lo.
Ka awm dan chìk tih hriat tak hian min en leh zauh ṭhin tih ka hria, ka hmu lo lui ngar ngar a, min be lo a, ka be bawk hek lo a, ka nu leh pate nen an titi hlauh chu a ṭha phian záwk!
A awm rei zèk lehnghal a, a lakah ka lungàwi lo sa bawk nen, haw turin duh ru viau mah ila hnawh haw ngawt lah a chì bawk si lo, chutah ruah a la rawn sûr zui, a lam hawiin ka melh ràwm a, ani erawh a lo khi suk duh lek chauh!
Ka nu leh pate chu pindanah an lut a, kan pahnih chauhin kan awm ta, ṭawng hmâsak ka tum lo bur! Sawi duh a nei a nih leh a sawi ang a, kei erawh engmah sawi ka tum lo, duh leh ka lungâwi lo a ni tih hre mawlh rawh se!
"I hlauhawm reuh hle mai," ti supin a nui hul huk a, fiamthu a thawh ve nge pawh ka hre lo, ka nuih a za lo teh e!
"Naktuk chu i ṭhiannu kan tlawh dâwn em ni ang?" a rawn ti leh a, ka la ngâwi tlat a, min rawn biak loh chhan te kha sawi a tum lo nge, a hre tawh lo záwk, a pehhel char char ni ber hian ka hria.
"Lo hnai teh," ti dam leh dapin ka kut a rawn chelh lum vung vung a, dik tak chuan a lamah ka tawlh phei chák lutuk, mahse a duh dûha tihkawi theih nih chu ka duh lo a ni.
"Mimi....." ti thum chhalin amah záwk chuan min ṭhut hnaih a, a mi uap a nâ leh ngang mai.
"Naktuk chu ka lo lam dâwn che a nia," ti leh supin ka kut chu a la kang a, a fawp vang vang a, a lam ka hawi ta nge nge!
"I buai lo em ni? I rawn lang ve teh mial a," pangngai tak hian ka ti a, engmah sawi chhan ka nei lo a, a buai leh buai loh chu ka thil hriat duh tak záwk a ni.
"Zanin chu buai lo e, naktuk pawh," a tih chuan ka bu nghat a, sawi zui mai tur ka hre lo.
"Eng thil nge Rinkimi chungah khan thleng a? Shillong-ah a awm emaw ka lo tia," kan ngàwih deuh vang vang hnu chuan ka ti a, "Khami zan khan va nangching lo ila chuan a thi hman ngei ang," a rawn ti chiah chu ka meng phawk hle.
"Engati nge? Eng thil chiah nge thleng?" ka ti nghal thuai chu," Hlauthawng suh, tumah an nâ dâwn lo," tiin min hnem a, mahse ka hlauthawng tho.
"Enteh Salmon, i hna hi bansan mai rawh, police hna i thawh chhûng hi chu kan him tak tak theih ka ring lo," ka ti ta thlàwt a, a ngâwi run a, a ngaihdan kalh zawng tak ka sawi tih pawh ka hria, mahse ka inthunun hman tawh lo a ni.
"Hlauthawng lo phawt rawh," min ṭawng thlamuan a tum tih hriat tak hian a ti a, "Ka thei lo," ka lo ti vat a, a mitah tak ka melh ral bawk.
"Ka hriat sual loh chuan engkim hi Jeremy-a pa ruahmanna a ni, mahse nangni chu in tel tawh lo, ka chhûngte záwk tawrhtîr a tum a nih hmêl," a ti ta nghut nghut a, mak ka tihna a zual hle.
"Enga!?" ka ti hman chiah tihah, "Engkim sawi vek theih a la ni rih lo," a lo tih zawm zat a, zawhna ngah viau mah ila zawh zui rih loh chu a him záwk a ni.
Chumi zan chuan ruah avangin rei tak a lêng a, dik tak chuan nihliap pawh a awm reng, mahse engmah ka sawi ri duh lo a, ani paw'n a sawi bîk hek lo.
Zodini chungchang ka sawipui a, ka khawngaihzia te, dam thuai thuai se ka tih thute ka sawi lúam a, ani paw'n ka ṭhiannu chunga thil thleng chu pawi a ti ve hle.
A tukah chuan kan pahnihin damdawi inah kan kal a, Rinkimi hnen aṭangin phone call a dawng tih ka hmu ru reng a, mahse a pick up duh miah lo, ka mitmei a vêng te pawh a ni maithei.
Damdawi in chhûnga kan awm laiin a rawn call leh a, pick up mai turin ka hrilh a, thil pawimawh a nih ka rin vang a ni pakhat! Amaherawhchu, a pick up duh ta chuang lo a, ka awm a nuam chiah lo náin ka ngaihtuah zui reng duh bîk lo.
Nîte an liam zel a, Zodini taksa dinhmun pawh a ṭha chho tial tial a, nitin ka tlawh ṭhin a ni ber a, Salmon-a erawh a hna lamah a buai a, Jeremy-a pa an la chhui mêk avangin thil dangah a insawrbing thei lo a, ka hrethiam khawp mai.
Ni khat chu dawrah tlangval pakhat a lo kal a, damdawi a rawn lei dâwn emaw ka ti a, mahse a ni hauh lo. Lehkha min pe a, a chhuak lehnghal daih a, a kal liam hnu chuan lehkha chu ka chhiar a, pen tui sen hian a lo inziak a, ka chhiar chiang chiah chu mak ka ti hle.
"Nung dama Salmon-a a awm i duh chuan zaninah min lo hmu ang che, amah i hrilh tur a ni lo," tih hi a lo inziak kalh a, Salmon-a thlalak ngei mai, silaia an tin lâi hi a awm tel a, a tawpah chuan kal hun tur leh kalna hmun tur a inziak thlap bawk.
Dawr aṭangin ka chhuak thuai a, nichin maia mipa pakhat lo kal kha khaw'nge a kal hriat tumin ka mit ka len a, mahse ka hmu tawh reng reng lo. Pa Vâla ka zàwt a, a lo ngaihven zui miah loh thu a sawi a, rilru nuam lo zetin dawr chhûngah ka lut ta ringawt!
In ka thlen thlengin ka awm a nuam lo ru hle a, Salmon-a hrilh ka duh rum rum a, mahse ka hrilh a nih chuan thil pawi záwk a thlen ka hlau bawk si, ka hrilh loh lahin kei chang ni lo, ka nu leh pate chungah thil ṭha lo tak a thlen ka hlau si, ka awm dan chu a buai ru ngawih ngawih a ni.
Zanriah ei kham a ni a, chhuak turin ka insiam a, ka lehkha dawna kalna hmun tur inziahna lam ka pan a, ka phone ka hum ran a, ka chungah thil thleng palh a awm a nih vaih chuan Salmon-a call ka inring ran a, ka thiltih tum mêk chu kan tâna ṭha lo a ni ang tih mawlh ka hlau!
Phone number lawng tawp aṭang hian call ka dawng a, mipa pakhat hian a awmna hmun min lo hrilh a, a sawi angin ka kal zel a, dik tak chuan Salmon-a vang ni lo se chu a thu ka zawm zelna chhan tur pakhatmah ka hre lo.
Cafe changkang pangngai tak pakhatah hian ka lut a, mipa pakhat, bân lo phar zauh ka hmuh rual chuan ka pan a, tunge a nih ka hre lo, mahse engtin nge min hriat a, engtin nge ka phone number a neih ka hre hauh lo thung.
Dawhkana file chhûng aṭang chuan lehkha chi hrang hrang a rawn phawrh a, "Heng lehkhate hi kawl ṭha hle ang che," tiin file chawp chuan min pe a, ka bo map mai.
"Heng lehkha zawng zawng hi engnge?" ka tih chuan, "I kawl tih tûmah i hrilh tur a ni lo, Salmon-a ngei pawh, a nih loh chuan Salmon-a mai ni lo, i nu leh pa leh i ṭhiannu, la damkawr tak thlengin an thi ang," a rawn ti ta mai, ka meng phar awn awn a, khang buaina leh harsatna zawng zawng, kiam vek tawh emaw ka tih te lakah khan kan la him reng reng lo tih ka hre chawpchilh nghal!
"Tunge i nih? Engati nge hetiang thil hi ka chungah i tih? I pawi ka sawi em ni?" ka ti mawlh mawlh a, nui hak pah hian, "Ka tih a ni hleinem, keite chu chhawr mai alawm ka nih," a lo ti sam than a, ka hrethiam lo tak zet a ni.
"Chuan, hei hi hre bawk la, nang leh i chhûngte lakah hian eng buaina mah thlentîr ka duh bîk lo, a bul ber chu Salmon-a pa a ni, ani khan pu Lawrence-a lehkha pawimawh tak a kawl a, chu chu nang hian min laksak ang, chuan, eng buaina mahin a zui tawh lo ang che," a rawn ti leh dat dat a, a thusawi zawng zawng chuan ka rilru a tihah ting zàwk, tunge pu Lawrence-a lah ka hre si lo.
"Engtin nge chutiang chu kei hian ka tih theih in rin reng reng?" hlauthawng ru tak hian ka ti a, "A chhan chu Salmon-a hnaih bertu i ni a, ani chuan hetiang hi i ti dâwn tih a ngaihtuah pha thiam hauh lo bawk ang," a rawn ti a, ka buai lohna tura buai tel reng chu ka kham ngawih ngawih a ni.
"Ni lo, Salmon-a hnaih bertu chu kei ni lovin a nupui hlui alawm, tunah pawh in khatah an cheng dun mèk," ka ti ta hlak hlak a, ka ṭawng zawi thei tawh hek lo.
"Thil i hre lo ve hle mai, anite chu....." tiin a chawl dat a, "I la hre chawp ve zel mai ang," tih zawm lehin a ding uaih a, "Coffee kha a man ka pe tawh a, i duh chuan i in thei a, i in lo thei bawk, ka kal ang e, ka thu hrilh zawng zawng che kha pakhat pawh i hmaih thiang lo," ti lehin a kal nal nal a, rilru hah leh ipik zet hian ka lû ka dawm a, ka ngaihtuahna chu a buai nuaih nuaih a ni ber.
Comments
Post a Comment