𝐀 𝐋𝐀 𝐓𝐀𝐖𝐏 𝐋𝐎
"Min ngaihtuah a, ka lawm, mahse i mi buaipuina leh ngaihsakna dawng thei ka ni tawh lo, i ṭhiannu kha va ngaihsak zàwk la a ṭhat ka ring," Zotei chuan a ti fiah raih a, Sangzuala chuan, "Ani nen khan eng inzawmna mah kan nei lo, nang nen erawh inzawmna thuk tak kan nei," a ti nghet dap a, Zotei kut chu a chelh zui nghal bawk.
"Ni lo e, kei leh nang hian inzawmna kan nei tawh hleinem, kum 25 liam ta ah khan nangmah ngei hian i chhu chat tawh alawm, tunah chuan mihrang kan ni tawh," tiin Zotei chuan Sangzuala kut chu a nawr sawn a, Sangzuala chuan vuan leh ngatin, "Insawifiah ka tum lo, engkim kha ka thiam loh a ni tih ka pawm e. Amaherawhchu, tunah rih chuan i hriselna hi a pawimawh ber, thi thei i ni lo, i dam a ngâi," a ti a, Zotei mitah tak chuan a en a, tih theih nei hram se a ti a ni.
Engmah sawi zawm tawh lovin Sangzuala chuan Zotei kut chu a hum a, a fawp leh vawng vawng ṭhin a, Zotei erawh a muhil riai riai a, damdawiin a taksaah hna a thawk a, engmah a hre zui ta lo.
A dinhmun chu a ni telin a tlahniam zel a, Sangzuala chuan doctor te a bia a, phâi lama hruai thlak mai chu a dil a, mahse doctor te chuan awmzia a neih thui dâwn tawh loh thu an hrilh a, chungte hlei hlei chuan Sangzuala rilru chu a tihah a, a fate nu chu dam leh ngei se a duh tak zet a ni.
Andrew-a chuan class bàn apiangin a nu chu a tlawh kawi ziah a, a nau Muani erawh a chawl tawp a, zir zawm tumna pawh a nei tawh lo. A nu bulah a awm chawt a, mamawh leh lam ngai apiang a lam a, thin thiin a mu ngai lo a, a nu chuan a kalsan ang tih mawlh a hlau a ni.
Chutiang bawkin Sangzuala pawh damdawi inah hun a hmang nîtin a, Lunglei lama Hotel sak a tum tawh chu a sut leh vek a, Hotel din aia pawimawh a fate nu ngaihsak leh bawihsawm chu a tih turah a ruat hmiah a, thil dang rèng a buaipui thei tawh lo.
Zotei taksa chu a chhe telh telh a, a dinhmun a ṭha lo tial tial a, amah ngei paw'n a hun tawp a hnai tih chu a hrethiam a, a la dam ve ṭawk ṭawk chhûng chu hlim taka hman a tum hram hram a, a kianga a fate awm chuan a thla an timuang hle bawk.
Nikhat chu damdawiin a chhawk tih hriat tak hian a taksa a harh ṭha phian a, a mit a men ruala a hmuh hmâsak ber chu Sangzuala a ni a, mi dang erawh a hmu mai lo a, khaw'nge an awm lah a hre hek lo.
"I hmêl te pawh tunah chuan a lo patling ve ta hle mai," ti sapa a hmai rawn chûltu Zotei chu Sangzuala chuan khawngaih zet hian a en a, a kut chu chelhin a fawp vawng vawng a, a biangah chuan a hum hnan leh a, Zotei hmêl lan dan mawlh chuan a thinlung a tinâ ngawih ngawih a ni.
"Kan fate hi ṭha takin lo enkawl rawh aw," Zotei chuan a ti leh sap a, Sangzuala chuan, "Chutiang sawi suh, i thi dâwn lo," a lo ti thuai a, Zotei chuan, "Pumpelh theih ni se ka ti ngawt mai," a ti chuai raih a, a aw chhuak reng reng chu a dam dap a, Sangzuala tân chuan khawngaih loh theih a ni lo.
"I damna tur a nih phawt chuan eng pawh ka ti ang," Sangzuala chuan a ti leh a, Zotei chuan, "Engmah tih theih i nei lo," a lo ti dam diai thung.
"I hmêl hi ka hmuh leh pawh ka ring tawh lo a, hetiang hian i hmâi hi ka tawh leh theih pawh ka ring tawh hek lo, mahse tunah chuan ka hmu leh thei che a, ka tawk leh thei che a, ka lawm tàwk em em a ni," tiin Zotei chu ngainatawm tak hian a nui a, a awm dan engkim chu Sangzuala tân chuan rilru nàtna mai a ni.
"Engmah sawi tawh suh, i thih hi ka phal dâwn lo tih hria la a ni mai, i tello chuan kan fanu hi enkawl dan tur pawh ka hre lo, chuvangin i dam ngei ngei a ngâi," Sangzuala chuan a ti a, a mittui chu a parawl ṭeu a, a tân chuan insum a harsa ngawih ngawih hle.
"I thiam ang, kan fapa pawh ṭha takin i enkawl thei alawm, i hria em, kan fanu hian a piancham apiangin a mumangah tal a hmuh theih nân che a dil ṭhin asin, la khawsaho ngai reng reng lo ni mah ula, thisena inzawm in ni tlat a, in inngaina thuai mai ang," Zotei chuan a ti leh dat dat a, Sangzuala mita mittui tling chuan a lung a tichhe thar a, a biangah mittui a luang thla ta zawih bawk.
"Ka thil lo tih sual zawng zawngte avang khan min ngaidam ang che," ti hniam ruihin Sangzuala chuan Zotei hmui hil bal chu a fawp vawng vawng a, an biangah chuan mittui a luang a, an thinlung a rum a, theih ni se zawng engkim, a bul aṭanga ṭan ṭhat leh vek an duh a, mahse chu erawh khawvelin a pianpui loh thil a ni.
"Kan fapa khan a chhun tak zet che a ni," ti sepin Zotei chuan Sangzuala biang chu a chûl riak riak a, nupa an nih lâia a tih ṭhin dan kha a ni a, Sangzuala paw'n a dawh hle hle ringawt!
"I lo harh a ni maw nu?" kawngka ri rak an hriat rualin Muani awin a rawn zawm nghal a, a hnungah chuan Andrew-an a lo zui lut a, a pi erawh in lamah an chawlh hahdamtîr rih thung.
"Lo hnai teh Bawihi," tiin Zotei chuan a fanu chu a lo hui a, "Ka awm loh hunah chuan i pa bulah hian i cheng ang a, i zirlai pawh i zir zawm leh ang a, ani chuan kei ang lo takin sum tam tak a nei a, in ropui leh changkang tak nen, nun nuam deuhin i hmang dâwn a nia," a ti zui dap dap a, Muani chuan lu thing nawk nawk chung hian, "Aih, ka duh lo, in ropui leh changkang chu ka awm ṭhanna a ni lo a, ka hlim lo ang a, awm dan ka thiam lo ang a, nuam ka ti hek lo ang. Chu ai chuan i bulah, in naran ve mai chhûngah, hlim taka awm ka thlang záwk, i dam hunah chuan dawrah ei te kan siam duh leh ang a, u Fela paw'n ei siampui tur a nei leh ang a," tia sawi zawm thei lovin a hmai a hup a, kun chungin a ṭap khur dat dat a, Sangzuala chuan a fanu awm dan chu a lainat a, a lo kuah nghal thuai bawk.
"I hmuh châk em em ṭhin i pa bula awm chu i thlahlel lo em ni? Nun nuam tak i neih theih phah dâwn tih ka hria asin, i pa mai ni lo, i û nen in inkawm thei bawk ang a, i hlim ngei pawh ka ring," tiin Zotei chuan a fanu sam chu a chul dap dap a, Muani chu a pa kuahna aṭanga tal chhuakin a ding tharh a, "Ka hmu châk tawh lo, a bulah pawh ka awm châk lo, i bulah bak ka awm dâwn lo, khawiah mah ka awmsan dâwn lo che," a ti ta mawlh mawlh a, Zotei chuan, "Chutiangin an ti ngai lo, hriatthiam tum teh Bawihi," a lo ti thuai a, mahse Muani chuan a nu thusawi chu ngaihthlak a tum tawh lo.
"He khawvela ka chhûngte chu nang leh ka pi chauh in ni, chuvangin an bula awm turin min nawr lui tawh suh," tiin Muani chu a chhuak ta daih a, chu veleh Sangzuala chuan, "Andrew..." a lo ti zauh a, Andrew-a chu a pa mitmeng hrethiam takin a nau ngaihven tur chuan a chhuak ve nghal bawk.
"Hrethiam rih rawh, a rilru a la buai rih êm a, nakinah chuan a reh ve leh mai ang. Fanu fel tak a ni a, i thu pawh a awih ang a, a ngaina em em bawk ang che tih ka hria a ni," Zotei chuan zawiawi deuh hian a ti a, ṭah a tum tawh lo a, hmêl pangngai put hram hram chu a tum tawh záwk a ni.
"Andrew-a pawh khan a nau a nih angin a duat ngei ka ring," Zotei chuan a ti leh a, Sangzuala chuan, "A nih kei, kei hi engtin nge awm se min tih? Kan fate ringawt ngaihtuah lo hian vawikhat tal min ngaihtuah ve thei lo em ni?" a ti hniam dap a, Zotei erawh chuan, "Nang nena kan inkâr hi chu engmah lo mai a ni tawh alawm," a lo ti dam thlap thung.
"Ni lo, chutiangin sawi suh," Sangzuala chuan ti mah se Zotei chuan, "Khang kum kal ta chhûng zawng kha ka thi nge dam tih pawh hre lovin i nung thei a, ka tel loa nun chu i thiam em em ang, eng ang paw'n siamṭhat duh mah ila nang chu ka tân chuan mi hrang i ni tawh a, ka ngaihtuah phak i ni tawh lo," a ti sap sap a, a mittui a tlâk mai loh nân a insum nasa hle.
"I mitmengah hian i inthiam lo tih ka hria, mahse chu chuan engmah a thlak danglam thei tawh lo a ni," Zotei chuan a ti leh a, Sangzuala chu a thaw chhuak hawk a, sawi mai tur pawh a hre lawk lo.
"Hun min pe leh thei ang em?" inchhir rilru tak hian Sangzuala chuan a ti ta dap a, Zotei chuan, "Hun chu engtik lâi paw'n i nei alawm, mahse kei ni lovin kan fate hi ngaihsak záwk rawh," a lo ti dam diai thung.
"Ka thei lo, ka ngaihtuah lo thei lo che a ni," tiin Sangzuala chuan Zotei chu a melh ngawt ngawt a, Zotei chu tawi tè hian a nui a, Sangzuala hmui leh a chheh vela hmul ṭo ser ser chu a chûl kual dan dan a, hun kal tawh a ngaihtuah kîr a, an hlim lâi nîte kha a ngâi vawng vawng bawk.
"Keini pahnih hi chu awm dun tura ruat kan ni lo Sangzual, chu chu kan hriatthiam a ngâi a ni," tia chawl datin Zotei chuan, "Ka mamawh em em lâi che khan ka kiangah i awm lo a, ka ngáih em em ṭhin lâi che khan nang chu hmun dangah i awm a, kan fanuin pa a mamawh em em lâi khan hmuh phak loh leh biak phak lohah i awm a, mahse maw engkim kha Pathianin ka tawrhchhel nâna rem a lo ruat vek záwk a lo ni a, ka fanu, ka rila rah chu keimah ngeiin, harsa takin ka enkawl seilian a, engkimah hian vuina tur ka nei lo, vui thei lah ka ni hek lo," a tih zawm sap sap a, Sangzuala erawh chuan sawi ve tur rèng a hre lo.
"He khawvelah hian ka awm tawh dâwn lo tih hre mah ila, ka va'n huphurh si èm," Zotei chuan a ti chuai leh raih a, Sangzuala chuan, "Ni lo, i thi dâwn lo, i dam leh dâwn alawm, i dam ang a, kan fate kan enkawl dun ang a, kan chhûngkuain, hlim takin kan awm dâwn alawm," tiin Zotei lungchhia chu a hnem zui mawlh mawlh a, mahse engmah a danglam phah si lo.
"Chu chu ka duhthusam a ni ṭhin asin, kan inṭhen hnu pawh khan i lo lèt leh kha ka la ring fan a, nang nena kan fate enkawl dun kha ka duhthusam a ni ṭhin a, mahse kum tam tak ka nghah hnuah che pawh nang erawh chuan rawn lèt tih nî rèng i nei lo a, ka tân kha chuan beidawn loh a har asin," Zotei chuan a ti thâm chhal a, a mittui chu a dang zo lo leh ta nge nge bawk.
"A pawi ka ti, ka ti tak zet, nang aia mi dang ka lo ring kha ka nuna ka thil tihsual lian ber a ni," chu thu bak chu Sangzuala chuan sawi tur a nei lo a, inchhirin a rum tlawk tlawk a, chu chu a tih theih chhun a ni.
"Hun kal tawh chu hun kal tawh a ni a, tunah chuan engkim a danglam tawh a, nang pawh i danglam tawh a, chutiang bawkin kei pawh ka danglam tawh, kan ngaipawimawh ber tur chu kan fate hi an ni," Zotei chuan a ti a, Sangzuala chu harsa ti zet hian a thaw chhuak halh a, Zotei lakah chuan a inthiam lo a, a zah a, a hmêl pawh a melh ṭha ngam tawh lo.
"Kan fate lo luh hunah min kai tho rawh aw, ka mut a chhuak riau mai, ka'n muhil lawk ang e," Zotei chuan a ti zawi nghial a, Sangzuala chuan, "Ni e, i chau ang, muhil leh tawh rawh," ti dam dapin Zotei chu puan a sintîr a, Zotei pawh a muhil har lo hle.
Nî tla tur chuan kâwl a chhun sen phût a, kawngpuiah lirthei an zi nuai nuai a, kawngpui sira ṭhutthleng awmah chuan Muani chu a ṭhu ngâwi reng a, a bulah chuan mi dang an awm tih hre mah se biak pawh a be lo, ngaihven pawh a ngaihven duh lo a ni.
"Hetia i awm avang hian engmah a danglam phah dâwn lo, ka nu hlimna kan ngaipawimawh ber tur a ni záwk asin," a bula ding, a unaupa Andrew-a chuan a rawn ti a, chhàn enah pawh a en lo.
"Ti rawh, ka hruai haw ang che, zanin chu ka nu ka lo awmpui ang, nang chu ka pi nen in lamah lo chawl hahdam rih rawh u," Andrew-a chuan a ti leh a, a nau dar chu a zu chelh a, Muani erawhin a lo thingthla vat thung.
"Aih, ka riahpui dâwn, khawiah mah ka kal dâwn lo," Muani chuan a ti nghet charh a, Andrew-a chuan, "I hmêl te kha inen ta che, i chau tih a hriat lutuk, zanin chu ka lo riahpui ang," a ti leh a, Muani chuan, "Ka duh lo, ka riahpui dâwn," a lo ti tlat a, Andrew-a chuan awkâ dam vak lo hian, "I û ka nih hi, ka thu chu zawm mai rawh, zanin chu ka pi nen in lama chawlh hahdam nân hmang rawh u," a ti ta nghut a, Muani chu a ngâwi chiang hle.
Andrew-a chuan a nau chu an in thleng a thlah a, an unau hmêl a hmuh rualin a pi chuan a lo be nghal a, Andrew-a chu thingpui in turin a lo sâwm a, Andrew-a pawh damdawi inah a pa a awm tho nen a nute inah chuan a awm khawtawi rih ve mai bawk.
Khua a thim ta maw tihah Andrew-a chu an in lamah a haw a, nu Chhuani hnenah chuan mi pathum eitur siam a ngaih thu a hrilh a, zawhna pawh zàwt chuang lovin nu Chhuani chuan a lo siam ve nghal mai a, chutih lâi chuan Cynthia-i a lo lang a, Andrew-a chu a ko pêng a, a pa chanchin zawh a duh vang a ni.
"Damdawi inah em ni i pa a la awm?" Cynthia-i chuan a ti a, Andrew-a chuan, "Aw," a lo ti mai a, "A ṭha em?" Cynthia-i chuan a ti leh a, Andrew-a chuan, "Ṭha e, zanin chu kan lo haw ka ring lo," tiin a hrilh tlang ta law law a, Cynthia-i paw'n thil hrethiam takin zawhna dang a zàwt zui tawh bîk lo.
Andrew-a chu a pindanah chhoin a intleuh fai a, in hnuai lama a chhuk leh meuh chuan nu Chhuanin eitur a lo siam peih diam tawh a, sitting room-ah chuan a pi a lo ṭhu ran bawk.
"Khawiah nge i kal leh dâwn? Khaw'nge i pa a awm? Chaw ei a hun tawh a nia, engati nge a lo la haw loh?" tia a pi biakna chu Andrew-a chuan, "Zanin chu damdawi inah ka pa nen kan riah ka ring, kan lo haw lo ang," tiin a chhâng a, a chhuak zui nghal nal nal a, biak châkna rèng a nei lo a ni.
Damdawi in a va thlen chuan a nu kut, cher riak chu a pa'n a lo hum ran a, a ei tur ken chu a phawrh a, a pa chuan a nu rawn harh huna eiah a ti thung. Chutih lâi chuan a pa chuan phone call a dawng a, Cynthia-i hnen aṭangin a ni a, a pick up lawk lo nghe nghe!
"In lamah thil thleng a awm em ni?" tiin Sangzuala chuan a fapa chu a záwt a, Andrew-a chuan, "Chutiang engmah a awm àwm ka hre lo," a lo ti mai a, Sangzuala chuan phone call chu a pick up ve ta chauh bawk.
Cynthia-i chuan hmuh lawk a duh thu a rawn sawi a, Sangzuala chuan a lo remti ve mai a, eng vanga hmu duh nge a nih erawh a hre lo a, rin dan tur pawh a thiam lo. Sangzuala leh Cynthia-i chu dawr pakhatah an inhmu a, Cynthia-i chuan, "I rilru a hah hmêl hle mai, i khabe hmul vel pawh ziah a ngâi tawh a nih kha," tiin a nuih sen sen a, Sangzuala pawh a nui ve suk nghe nghe.
"Eng lo a nia u Sangzual, ka hmuh duh chhan che chu, naktuk hian Delhi-ah ka chhuk dâwn a," Cynthia-in a tih chuan Sangzuala chuan a melh nghal ralh a, chutah Cynthia-i bawk chuan, "Engmah ngaihṭhat lohna tur a awm lo, ka tibuai rei lutuk che hi keimah záwk ka inthiam lo a ni," a ti leh dat dat a, Sangzuala chuan, "Min tibuai hleinem," a lo ti sup a, a thusawi chu Cynthia-i chuan a awih loh hmèl hle.
"Kum 5 tal tawp i kianga awm châkin hun ka hmang ṭhin a, mahse ka lo tisual a ni. Tunah chuan engtin mah ka tibuai zui tawh lo ang che, hun kal tawha thil thleng zawng zawng ka hriat hnu kha chuan ka awm lohna turah ka lo awm char char tih ka hre chhuak a, min ngainat loh chhan pawh ka hre tawh, mahse ka dem lo che a nia, fate nu nge nge hi chu thinlunga a thawh dan a dang a ni ang e. Thil pakhat leh, natuka chhuk ka tum tih hi mi dangin an hre lo a, i hrilh loh theih chuan ka lawm ngawt ang," tiin Cynthia-i chu a nui seih a, kal tumin a tho titih nghal bawk.
"Cynthia," tiin Sangzuala chuan Cynthia-i kal mai tur chu a ko ding leh rih a, "Engkim avangin ka lawm e, kei hian ka phû lo che a, kei aia fel leh ṭha kawppui tur i hmuh ngei ka duhsak a che," Sangzuala chuan a ti dam thluam a, Cynthia-i chu bu nghatin a kal liam zui ta vang vang a, Sangzuala chuan a khawngaih ru hle.
Damdawi ina a lèt leh hnu chuan thil dang ngaihtuah tawh lovin Zotei bawk chuan a rilru a luah leh nghal zat a, Zotei pawh a lo harh tawh a, lungàwi hmèl tak hian a fapa Andrew-a leh Zotei inbia chu a en reng a, an titina ah chuan va inrawlh a tum lo hrim hrim bawk.
Chumi zan chuan Sangzuala leh a fapa chuan Zotei chu an riahpui a, beisei loh takin Zotei chu a harh ṭha phian a, zan rei thleng Sangzualate pafa nen chuan thil an sawi a, a fapain a ngaina nghal em em te chu Zotei chuan nuam a ti a, a hlim hle.
A tukah erawh Zotei dinhmun chu a ṭha lo leh ta viau a, doctor te chuan khawl hmangin an buaipui a, tih theih erawh an nei tam lo. Enkawlna ṭha thei ang ber a dawng chung paw'n Zotei taksa dinhmun chu a tla thla tial tial a, a hmêl lan dan chenin a danglam ta.
A ni telin Zotei hriselna chu a pan zual zel a, thi mai thei dinhmuna din châng pawh a nei ta fô mai. Damdawi hmangin a la nung ṭawk ṭawk a ni ber a, Sangzuala leh a fate chuan an awmpui reng ṭhin a, an hun tawnin zir lo viau mah se Sangzuala leh a fanu pawh zawi zawiin an inhnaih ṭan a, Sangzuala chuan zawldawh tak hian a be hmâsa ṭhin a, Muani tân pawh a pa pumpelh reng chu thil theih a ni bîk lo.
Zan khat chu zan tlai tawh takah Zotei a rawn harh hlawl a, a bula ṭhu Sangzuala chuan a lo ngaihven vat a, Zotei chuan, "Ka bulah hian i awm reng ni maiin ka hria," a ti thawp sap a, Sangzuala chuan, "Ka tih theih awmchhun alawm," a lo ti mai a, Zotei chuan, "Khaw'nge mi dang," a ti leh a, Sangzuala chuan, "Zanin chu kei leh nang chauh kan ni ang," a lo ti ve leh mai bawk.
"Engati nge hetiang hian i awm Sangzual? Engati nge min ui tak ang mai hian i awm le?" Zotei chuan a ti thâm chhal a, a aw aṭang ringawt pawh chuan a dam lo tih a hriat hle.
"A chhan chu i kianga hun hman ka duh a ni," Sangzuala chuan a ti hniam dap a, Zotei biangah chuan a dawm a, "Keimah záwk hian hetiang nàtna neih hi ka phû asin, nang ni lovin, nang chu thil tihsual nei lo, tû pawi mah sawi lo i ni a, kei erawh, a nupui pawh ring zo lova mi dang ring, a nupui hnawtchhuaktu, a nupui leh a fanute'n an mamawh lâia awm ngai lo, pasal leh pa nihna hlen zo lo ka ni a, chuvangin hetiang taka dam loh hi i phû lo a ni," Sangzuala chuan a ti dam thluam a, patling mah ni se a mittui chu a dang zo lo mai dâwn hian a hria a, hmun dang a melh ta daih bawk.
"Thil pakhat min tiam thei ang em?" Zotei chuan a ti a, Sangzuala chuan, "Eng pawh sawi rawh," a lo ti a, Zotei chuan, "Ka awm loh hunah kan fanu leh ka nu hi lo enkawl chhunzawm rawh aw, i bulah lo chuan thlamuang taka an awm theih ka ring lo a ni," a ti sap sap a, Sangzuala chuan, "Ka tiam a che, ka ensan ngai lo ang," a ti thum dup a, rilru leh tih tak zeta sawi a ni a, Zotei chu a awm a nawm phah hle.
Zan khuain Zotei chuan Sangzuala kut chu a chelh a, a hahdam sawng sawng hian a hria a, Sangzuala paw'n Zotei chu chhin khat pawh chhîng lovin a ṭhutchilh zankhua a, chumi zan chu an inbiak tawpna ber tur a ni dâwn tih rèng an hre si lo.
Zotei taksa dinhmun a ṭhat loh zual zel avangin Doctor te chuan ICU-ah an sawn a, Zotei chuan harh tih nî rèng a nei tawh lo a, an innghahna awm chhun chu a hnuk a la chat lo tih mai chauh a ni.
Kâr khat a liam leh meuh chuan nu taima tak ni ṭhin, nun dam tak, mî pawisawi hlau em em leh a chhûngkua hmangaih em emtu Zotei chuan mihring a chang zo ta ngáng lo a, chutia a nuin a thihsan mai chu Muani chuan a tuar thiam lo a, tawrh ngaihna a hre lo, a pa, a û leh a pite'n buaipui lo phei se chu damdawi ina enkawl ngâi khawpin a awm ngei ang.
Lei hnuaia Zotei ruang an zalh nî chuan Sangzuala pawh patling mah ni se insum theihna a tlachham hle a, a fate nu Zotei chu a ui ngawih ngawih a, Zotei ai chuan amah záwk thi se a la ti fan a, mahse engkim chu a nih tur ang a ni vek tawh si.
Hun leh nîte'n an lungngaihna chu a liampui ang a, pangngai taka hringnun an hman chhoh ve leh mai an ring a, mahse Sangzuala ber chu buaipui ngâi leh ngaihsak ngâiah a ṭang tlat a, Zotei thihna chu mi dang zawng ai a tuar nâ emaw tih tur khawpin a nun dan a danglam a, inthiam lo reng rengin nî a vui liam ṭhin bawk.
Zotei thlana kal a ṭhulh ngai lo a, amah chauh te hian a kal a, hnawmhnawk a lo awm deuha a hriat chuan a tifai mai zel a, a fate tân pa ṭha tak nih tum mah se a fate nu, a thinlung neitu Zotei chu theihnghilh ní rèng a nei lo a, a ngâi a, a thlahlel a, mi nung rawn ni leh se a ti ngawih ngawih ṭhin.
Inrinnî tlai a ni a, Sangzuala chu ṭhutthlengah ṭhuin káwla nî tla tur a thlir dauh dauh a, a kutah chuan Zotei nena an thlalak, Zotein Andrew-a a pai lâia an thlalak dunna ngei mai chu a awm vàng a, "Tunah chuan kan fanu paw'n min ngaina ve tawh lutuk asin, nang nena enkawl dun theih ni se ka va'n ti èm," a ti zawi sup a, tawi têa kiai suk chung hian, "I dam lâi khan kan inkârah engmah a awm tawh loh thu i sawi a, mahse kha kha chu a dik lo a ni Zote, ka thinlung hi i tâ chauh a ni reng tawh ang. Mi nung khawvelah awm tawh lo mah la, nang nen hian inzawmna thuk tak kan nei a, kan inkâr pawh hi a la tawp lo a, a tawp ngai bawk hek lo ang," a ti dam dap dap a, a mitthlâah chuan Zotei nen nupa hlim tak an nih lâi te kha a rawn lang zut zut a, suangtuahna kawmin hun liam tawhah a cheng zui ta vawng vawng bawk.
Comments
Post a Comment