Thil hre chhuak thut ang hrim hian vawilehkhatah a che phut a, in hnuai lam panin a pen thla pawk pawk a, in kawt a thlen rual chuan motor a la chhuak nghal a, Hlimpuii leh Cynthia-i te'n an lo biakna chu hria ang paw'n a awm lo.
"Rawn lut rawh," tia rawn betu chu Muani chuan a melh ran a, a pa mah ni se tun dinhmunah chuan mi hrang hlak ang an ni.
"Rawn lut vat rawh, khawiah nge i nu chu a awm?" a pa chuan a rawn ti leh a, a awah chuan dawhtheihna a tlachham tih a hriat hle bawk.
Muani chu a chûang lut ve mai a, damdawi in an pan chhûng zawng chuan engtin mah an inbe lo a, an rilru ve ve an kawm a, hlauhthawnna leh manganna chuan an boruak hip mêk chu a luah hneh khawp mai.
Damdawi in an thleng chu Sangzuala chuan a fanu nia insawi, a hmâa nula kal chu a zui deuh tawp a, kum 25 liam ta khan Zotei nen fa pakhat chauh an nei hman a, chu chu an fapa Andrew-a hi a ni a, chutia kum 25 hnua fanu a neih thu a hre thut chu thudik a nih rin harsa a ti a, Zotei a zawh chian phawt loh chuan awih mai a tum lo chiang hle bawk.
Cabin pakhatah hian an lut a, dam lo khuma lo mu chu doctor-in a lo endik mêk a, dam lo bulah chuan a pizawn hmêl ngei mai chu a hmu a, sawi mai tur a hre lo a, a hun tawn mêk avang chuan khawvel hran daiha awm ang maiin a inngai a ni.
"Sangzual....." a pizawn chuan a lo ti sap a, Sangzuala chuan engkim chu mak a ti a, dam lo khuma lo mû hmêl a hmu chiah phei chu a chhûnglam a sâ hut hut a, a tawt up up ni ber hian a hria.
Doctor chu dam lo a endik zawh hnu chuan a chhuak a, thawm a dai nghal duk a, a tua mah ṭawng tum lo ang hian an awm hlawm a, Muani chu cabin aṭang chuan a chhuak a, thawk a la halh a, khawvela a neih rohlu ber a thi mêk a ni tih a hriatna chuan a hmet chau tak zet a ni.
Sangzuala chuan khuma mu Zotei hmêl dâng lap chu a thlir reng a, chutah a melh ngai melh reng chung hian, "Fanu ka nei em ni?" a ti thum dap a, Zotei lam hawi mah se a pizawn záwk a ni a biak nì!
"Fanu ka nei em ni ka pi?" ti lehin Sangzuala chuan a pizawn lam chu a hawi ta nge nge a, a pizawn chuan mitmeng beidawng tak hian a lo en a, "I nei alawm," tia chawl dat hian, "Zotei fanu, Muani hi i fanu, i thisen ngei a ni," a tih zawm sap a, Sangzuala chuan hun kal tawh a chhui kir nghal vawng vawng bawk.
"Fanu ka nei maw....." ti hniam supin a ṭhu ngâwi run a, a pizawn meuhin fanu a neih thu a hrilh a, a tân chuan awih loh rual a ni ta lo.
"Kei hian fanu ka lo nei reng maw....." Sangzuala chuan a ti leh ṭhin a, a melh ngai a melh ngawt ngawt a, a rilru chhûngril chu hun kal tawh bakin a luah thei lo a ni.
"Engtin nge?" a khupa a bân nghatin chhuat chu a melh ngur a, a zawhna chhànna chu a ngaichang ran bawk.
"Min hrilh rawh ka pi," a ti leh a, chutah a pizawn chuan, "Zotei i hnawhchhuah hnu khan i fa a pai tih kan hrechhuak a," a rawn ti a, Sangzuala chu lo inrawlh nghalin, "Ka hnawhchhuah chhan kha chu a uire vang a ni," a lo ti nghet churh a, a pizawn chuan, "Ni lo, ka fanu hi a uire reng reng lo, in hre sual a ni. I fa a pai tih kha rawn hrilh che a tum a, in inah pawh a rawn kal ngei a, mahse i tân chuan i fa paitu thusawi kha ngaihpawimawh thamah i ngai lo a, i lo dang chat hmak a nih kha," a ti ta mawlh mawlh a, Sangzuala chuan thil hriatthiam loh a nei nghal!
"Chutiang thil engmah ka ti lo," a ti zo chiah chu a pizawn chuan, "I ti ngei alawm, i fa a pai tih i hriat theih nân kawng a dap hram hram a, mahse i thu zawmin i nau Hlimpuii leh i nu khan in in chhûng rah pawh an lo phal lo a nih kha, a tân kha chuan beidawng taka lo haw mai loh kha chu tihtheih dang a awm lo a ni," a ti leh dat dat a, Sangzuala chuan, "I thusawi hi engmah ka hrethiam lo," a lo ti thuai a, an inawm hlat lo bawk a, an ṭawng ring lo dun hle.
"I hriat ngei ka ring, ka fanu i huatna kha a nasa èm a, in inkâr engkim i titawp a, Mizoram chhuahsanin ram dangah i awm ta daih bawk a, keini lam tân kha chuan tihtheih engmah a awm tawh lo a ni," a pizawn chuan a rawn ti leh a, a ṭawngkam aṭang chuan a fanu a khawngaih tih a hriat hle bawk.
"Ka fa a pai tih pakhat mah ka hre lo," Sangzuala chuan han ti leh mah se a pizawn erawhin, "Chu lam zawng kan buaina a ni tawh lo," a lo ti hmak thung.
Sangzuala chu a inngaihtuah chian pôh leh a rilru a buai ting a, a pizawn thusawi zawng zawng chu lo dik ta pawh ni se engtin nge engmah a hriat loh theih, a rilruah chuan a nu leh a nau an rawn lang zui nghal a, a ding ta thut bawk.
"Ka lo kir leh ang," tiin Sangzuala chu a chhuak zui nghal a, cabin pâwna lo ṭhu ngâwi reng a fanu chu a melh záwk a, biak erawh a be lo, tunah rih chuan ina a haw ngei a ngâi a ni.
Chak zet hian motor chu a khalh a, a mitmengah chuan zawhna tam tak a lang zut zut a, a pizawn thusawite kha a dik a nih vaih chuan fanu a nei tih a hriat loh chhan chu tu dang ni lovin, ama thiam loh ngei a ni dâwn tih a hre chiang hle.
In chhûng a luh rual chuan, "Hlimpui...?" tiin a nau hming chu a lam nghal a, nu Chhuani chuan, "A pindanah Cynthia-i nen an awmin ka hria, ka han ko dâwn em ni ang?" a lo ti a, Sangzuala chuan, "A ngai lo," tih leh in chung lama chhoh a rual a, a thleng chho har lo hle bawk.
"Min hrilh teh, Zotei nen kan inṭhen hnu khan min hmu turin Zotei a lo kal em?" Sangzuala chuan a ti tlang nghal rawk a, Hlimpuii chuan, "Chutiang thil hlui tawh lutuk te engtin nge hrereng se min tih a," a lo ti sam than a, thil dang buaipuia a hawi sawn daih chu Sangzuala chuan a ngaithei der lo.
"Ka zawhna chu chhâng mai rawh LALHLIMPUI, a lo kal em? Min hmu turin a lo kal em?" Sangzuala chuan a ti hrawk a, Cynthia-i chu a lo phu kher mai.
"Eng nge i hriat a?" Hlimpuii pawh chuan a ti ve ta ṭhat a, Sangzuala chuan, "Kum 25 liam taa thil thleng kha engkim ka hre duh, thil nih dan dik tak, thudik min hrilh lo a nih vaih chuan a sawhkhawk a nâ khawp ang," a ti ṭhuai a, an bulah mi dang an awm tih a ngaihtuah sî sê hman tawh lo a ni.
"A lo kal ngei alawm," Hlimpuii chuan a ti ta nge nge a, chu veleh Sangzuala chuan, "Engvangin nge a lo kal tih min hrilh loh?" a lo ti nghal a, Hlimpuii chuan, "I hmuh duh tawh lo ka ring a, a lo kal tih kha ka ngàwihbopui ta a ni," a ti a, Sangzuala chuan, "Ka hmuh duh loh thu pakhatmah ka sawi lo, engvanga min hrilh lo nge i nih?" a ti leh ṭhawt a, chutah zet zawng Hlimpuii pawh a insum thei ta bîk lo.
"A chhan chu ka hua alawm, kan chhûngkuaa mo ni tlâk a ni reng reng lo. Kei chang ka ni lo, ka nu paw'n i nupui atân ṭha a ti lo a, in inngaihzawn lâi paw'n ṭhen turin vawi tam a hrilh che a, mahse i ṭhen duh lo a, nupuiah i nei lui a, ka nu khan u Zotei kha a ngaina ngai reng reng lo. Andrew-a hi a tèt lâi khan ka nu hian vawikhatmah a pawm ngai lo, a chhan chu u Zotei kha a duh lo êm a ni," Hlimpuii chuan a ti ta phiar phiar a, hmeichhe nasa tak a nihzia a lang chiang hle.
"Khami ni, nangmah hmu tura a lo kal nî pawh khan ka nu nen pâwna kan awm lâi a ni a, nang chu Andrew-a nen in pindanah in awm daih a, u Zotei khan sawi duh a nei tih ka hria, mahse ka nu khan a rang thei ang bera haw tur leh kan in rawn rap leh tawh ngai lo turin a lo hrilh a, keiin i hmuh duh tawh loh thu ka lo hrilh ve bawk. Engvanga heng thil hi tuna taka min zàwt leh nge i nih? Thil awmze nei tawh loa inhambuai tur hian ka upa táwk tawh, ka kham lutuk," Hlimpuii chuan a ti leh hmawk hmawk a, a hmêla thinrimna chu hmuh hmaih theih a ni lo.
"Nang leh ka nu avang hian fanu ka nei tih ka hriat loh phah asin, hetiang em ema mi nasa hi maw in lo nih a, in thil tih pawizia hi in la hre khawp ang," tiin Sangzuala chu a pen sawn nghal a, Hlimpuii chuan, "Fanu a! Tu fanu maw?" a lo ti vat a, chutah Sangzuala chu inher leh nghutin, "Ka fanu," a ti chhumbung hmuk a, in aṭang chuan a chhuak ta nal nal bawk.
Damdawi in a va thlen leh chuan a pizawn leh a fanu, tun hmâ zawnga a hriat ngai reng reng loh chu an lo awm a, Zotei erawh a la muhil rih a, a harh hun nghah tawp loh chu tihtheih dang a awm lo a ni.
Khua a hniam zel a, Sangzuala chuan a fanu chu biak a duh a, mahse biak dan ber tur a hre si lo. A fanu lakah chuan inthiam lohna nasa tak a nei a, inhnaih takin awm mah se an inkâr erawh a hlâ em em si.
Zanriah ei hun àwm velah Zotei chu a rawn harh a, Sangzuala hmêl a hmu thut chu mak a ti a, a mitvai mai emaw tiin a han en chiang a, a fanu pa, Sangzuala ngei a ni tih a hriat rual chuan a nu lam a hawi nghal thuai a, a nu erawhin a lo melh ṭha duh miah lo thung.
"Ka nu, nang tal hi chuan ka rilru tur i hriatthiam ka lo ring asin," Zotei chuan a ti thawp sap a, a nu chuan, "Ka fanu, ka hrethiam che alawm," a lo ti thuai a, Zotei chuan, "Ni lo, min hrethiam lo, hetia ka chanchin a hriat avang hian hlawkna pakhatmah ka nei lo, ka zahawmna ka hloh záwk asin," a ti fiah fak a, a nu chuan, "Hriatthiam tum záwk teh ka fanu, tun ṭum hi chu zahawmna lam ngaihtuah hun a ni rih lo alawm, ka tunuin i chanchin a pa hnena a thlen hi a tisual lo, thil dik tak a ti záwk a ni," a ti dap dap a, Zotei chu a thaw chhuak halh a, a ṭah a chhuah hmèl hle bawk.
"Engati nge i rawn kal?" Zotei chuan Sangzuala chu a melh ral a, Sangzuala erawh chuan sawi mai tur a hre lo.
"Engati nge an thusawi i awih? Lo kal lo tawp tur i ni asin, haw tawh rawh," Zotei bawk chuan a ti leh a, Sangzuala tân chuan thil engkim chu a thleng teh thut hlawm lutuk a, awm dan tur a hre lo a ni.
"Muani, eitur zu lei ang hmiang?" tiin Zotei nu chuan a tunu chu a sâwm a, an chhuak zui nghal mai bawk.
"Engati nge uirenu hi min rawn ngaihven?" an ngàwih vang vang hnuah Zotei chuan a ti thawp ta raih a, chutah amah vek chuan, "Engati nge in aṭanga i hnawhchhuah hnu hi min rawn ngaihven? Min hmusit tur em ni i lo kal?" a tih zawm leh a, Sangzuala pawh a ngâwi reng thei ta bîk lo.
"Doctor ka bia ang a, phâi lamah kan inenkawl dâwn a nia," Sangzuala chuan a ti a, Zotei chuan, "Ni lo e, haw la, lo kal tawh lo záwk rawh," tiin a lu a thing nàng nàng a, hun kal tawh a dâwn kir a, a ṭah chu a chhuak tak zet a ni.
"Kan inṭhen hnu khan engtin nge i awm? Eng nge i tih ṭhin?" Sangzuala chuan pangngai tak hian a ti dam dap a, Zotei chuan, "Ka fapa hmangaih em em kalsan ngâi khawpa min hnawhchhuah hnu khan em ni i tih? Uireah min puh bawk kha a ni a, ka hun hman dan zawng zawng kha i hnenah hian sawi a ṭulna ka hre lo," a ti fiah raih raih a, Sangzuala chu a melh kal bawk.
"I uire ngei si alawm," Sangzuala chuan a rawn ti sup a, Zotei chuan, "Enteh Sangzual, hmân ang kha ka ni tawh lo, i laka insawifiah tum reng ringawt hian awmzia a nei lo a, i nu leh i naute bum kual mai mai theih ka ni ve hek lo, chuvangin haw la, min rawn ngaihven tawh suh," a ti thâm chhal a, a khuh zui kharh bawk.
"Kan nupa pindan aṭang khan mipa i lo chhuahpui ngei kha," Sangzuala chuan a la ti fan a, Zotei chuan ngaihthlak liam mai a tum a, mahse a thei ngàng lo a ni.
"Ka lo chhuahpui ngei alawm, ani khan min ngaizâwng ngei bawk, mahse ani kha chu ka ṭhian mai chauh a ni. Ka tân chuan nangmah bak an awm lo, nangmah chiah kha ka thinlung neitu i ni ṭhin a, mahse nangmah vekin chu chu i ṭhiat sawm a, i paih darh a, thawmṭhat theih tawh lovin i siam zui ta a ni. Ka thusawi ai i nu leh i nau thusawi i ring záwk a, min hnawhchhuah hnuah pawh i fa ka pai thu la rawn hrilh hram che ka tum a, mahse nang chuan ka hmél hmuh chu sawi loh, ka thusawi takngial pawh hriat i duh tawh lo a nih kha!" tiin Zotei chuan a thinlung tawt up up chu a au chhuahpui a, mahse a hahdam phah chuang der lo.
"Tuna ka thusawi zawng zawng pawh hi hmân ang chiah khan i la awih thei chuang lo tih ka hria alawm, a pâwina a awm lo, i mi rin ka phut lo e," ti thâm ṭiakin Zotei chu a saisîr zâwng hian a mu ta daih a, Sangzuala chuan a thlir reng a, a rilru chu a insual buai nasa em em bawk.
A pizawn leh a fanu an lo luh hnu chuan a tho thurh a, a chhuak ta vang vang a, in lam pana motor a khalh lâi chuan Zotei thusawi zawng zawng kha a ngaihtuahnaah a ri nawn tluk tluk a, rin duh viau mah se amahah chuan rinhlelhna a la awm tlat si a ni.
"Khawiah nge i kal a pa?" in chhûng a luh rualin a fapa Andrew-a chuan a lo be hmâsa ber a, Sangzuala chuan chhàn pawh a chhâng lo.
"Khawiah nge i pi leh i nîtei, ka be duh tih han hrilh rawh," tiin Sangzuala chuan a fapa chu a tir nghal a, rei lo tê hnuah a nu leh a nau an lo lang, a nu chuan thil awm dan a hriatthiam loh hmèl hle.
"LALHLIMPUI, dàwtin min chhâng suh ang che, Zotei kha a uire em?" Sangzuala chuan a ti khauh hmuk a, Sangzuala nu chu a lo meng phar nghal awn a, mak a ti viau bawk.
"Enga!?" Hlimpuiin a ti dek dek chu Sangzuala chuan, "Thudik min hrilh rawh, ka nupui kha a uire em? Nge ni a, i huat avang mai khan min lo bum reng záwk?" a ti nghal hrawk a, chutah anu chu lo inrawlhin, "Engati nge hetiang chungchang hi in sawi? Eng nge a awmzia?" a lo ti a, Sangzuala chuan, "Lo inrawlh rih suh ka nu," a ti nghut a, a nu meuh pawh ṭawngkam pangngaiin a be thei tawh lo chu a ni.
"Sawi rawh LALHLIMPUI! Chiang taka ka nupui uire lâi hmu ang khan i insawi a, kha kha thudik a ni em?" Sangzuala chuan a ti leh a, a aw chu a zawi lo hle bawk.
"Ka....ka hre lo," Hlimpuii chuan a ti zawi raih a, a tha a khur a, kum tam tak kal taa a dawt sawi rawn lang chhuak ṭan chuan a tihlauthawng tak zet a ni.
"Ka hre lo i tih chu eng nge a awmzia?" a û aw vin fiah hrawk chuan a tihlauthawng zual a, sawi ber tur pawh a hre tawh lo.
"Ka.....ka hmu lo, engmah ka hmu chiang bîk lo, in nupa pindan aṭangin an lo chhuak tih loh kha chu engmah ka hmu lo," tha khur zawih zawih hian Hlimpuii chuan a ti muang ban charh a, chutah hlauthawng leh ṭah chhuak hmèl zet hian, "Ka tihpalh," a ti zui leh sap a, a thusawi chuan Sangzuala insum theihna a tikehchhe hneh chiang hle.
"LALHLIMPUI le!" ti ṭhawtin a hmâa dawhkan chu a chum ri ṭhuai a, chutah a nu chuan, "Duh tàwk rawh, hun kal tawh avanga intihbuai reng a ṭul lo," a lo ti thuai a, chu veleh Sangzuala chuan, "Nang pawh ka nu, hetiang em em hian a ni maw i hmâ i lo sial, ka nupui kha mi hausa chhûngkua aṭanga seilian ni se chuan i ngaina em em ang. Hre rawh u, ka laka in thil tih, min bum dan zawng zawng hi ka hre reng tawh ang. Nangmahni pahnih avang hian fanu ka nei tih rèng ka hriat loh phah a, tuna chinah erawh a pa ka nih ang ngeiin ka tihtur dik tak ka ti tawh ang," a ti khawk rum rum a, a nu chu a meng phar awn awn a, a ṭhawng tak zet a ni.
"Fanu i nei maw?" tia a nu zawhna chu Sangzuala chuan, "Aw, nei e, khang kum kal ta chhûng zawng min bum avanga ka hriat loh ka fanu, ka thisen ngei a ni. Tun ṭum chu in inrawlh a thiang tawh lo, chuti lo zawng ka thisen zawmpui in ni tih theihnghilh rap khawpin ka che duh mai ang," a ti nghet churh churh a, in chung lamah a chho zui nghal bawk.
Andrew-a chuan a pa chu a zui chho a, unaunu a lo nei reng tih a hriatna chuan a ṭhawng a, zawhna tam tak a nei a, chung a zawhna zawng zawng chhâng theitu chu a pa a ni tih a hre chiang em em bawk.
A pa pindan a lut chu kawngka a kalh nghal a, ngâwi renga a pa dinna lamah chuan a phei a, a hmêlah chuan pâwi tihna a hmu a, an hun tawnin zir lo viau mah se a rilru chhûnga zawhna chu a ngawihbopui thei si lo a ni.
"Pa, min hrilh chiang teh," tia rawn betu a fapa chu Sangzuala chuan nghet zet hian a lo kuah a, hun kal tawha a thil lo tihsual avang chuan a rilru a nâ a, a inchhir ngawih ngawih a, siamṭhat theih a ni tawh lo lâi tak chu a pawi a ni.
"Ka fapa, min ngaidam teh, kei hian thil lian tham tak ka tisual a ni," Sangzuala chuan a ti hniam dap a, a fapa chuan, "Engmah tihsual i nei hleinem pa, nîtei thiam loh vek záwk alawm," a lo ti a, Sangzuala chuan, "Ni lo, ka thiam loh vek a ni. Tunah hian i nu, i nu damdawi inah a awm mêk," a ti leh a, chu thu chuan Andrew-a chu a ṭhawng kher mai.
"Ka nu a la dam maw!? Ka tèt lâiin min thihsan i ti a ni lo'm ni?" tiin Andrew-a chu a pa kuahna ata a tal chhuak a, Sangzuala chuan, "I nu a uire anga ka hriatna khan ka thinlungah huatna nasa tak a piantîr a, nu ni tlâkah ka ngai lo a, thi tawh anga i hriat mai kha ṭhain ka hria a, dàwt ka hrilh ta che a ni," a ti dap dap a, a pa thusawi avang chuan Andrew-a chu a ding khawng awt ringawt!
"Khawi damdawi inah nge ka nu chu a awm min hrilh teh pa, ka dem lo che, engkim hi nîtei thiam loh a ni. Ka nu awmna chu min hrilh rawh, a la dam a, hmuh ka duh a ni," an ngàwih deuh vang vang hnuah Andrew-a chuan a ti ta zung zung a, a nu a lo la dam reng tih a hria chu a lawm a ni.
"I lakah hian engmah ka zep thei tawh lo ka fapa," ti hniam dapin Sangzuala chuan, "I nu chu tunah hian cancer nàtnain a taksa a ei chhe mék a ni," a tih zawm dap a, Andrew-a chuan, "Min hmu duh ang em?" a lo ti a, Sangzuala chuan, "A laka ka chet dan nunrawng zet avang khan kei chu min hua a, mahse nang erawh a haw ve lo ang che, i nu chu chutiang mi a ni lo. Hmangaihna ngah tak a ni a, a hmuh rual rual chein a hmangaih nghal záwk ang che," a ti hniam ruih a, a awah chuan inchhirnna bak a lang tawh lo.
Chumi zan chuan Sangzuala chu chhin khat pawh a chhîng lo a, a thinlung nâa rum ri chu hriat theih se zawng a nasa khawp ang. Zotei leh a fanu lakah a inthiam lo ngawih ngawih a, bum a nih lam a ngaipawimawh tawh lo a, engkim chu ama thiam loh vekah a ngâi pumhlum tawh záwk a ni.
Sangzuala ang bawkin a fapa Andrew-a chu a pindan chhûngah a ṭhu meng ran a, a pa a demna ai mah chuan a nîtei leh a pi a demna chu a lian záwk a, nu leh pa kâra seilian a nih theih reng laia a nunkhua an tichhiatsak vek chu a thinrim thar hle.
A tukah chuan Andrew-a chu a pa pindanah a va lut a, a pa chuan a nu nena an thlalak, hlui ve tawh ang reng tak chu a lo keng a, a lut thawm chu hria ang paw'n a awm lo.
"Pa, class ka kal dâwn lo, engtikah nge ka nu chu kan hmuh ang?" a fapa aw a hriat rual chuan Sangzuala chu a hawi chhuak a, a fapain huatna a nei miah lo chu mak a ti lek lek záwk a ni.
"Min huat viau ka lo ring asin," Sangzuala chuan a ti sup a, Andrew-a erawh chuan, "Khang kum kal ta chhûng zawng kha dawt min hrilh a, ka nu lakah thil i tih sual tih pawh ka hria, mahse ka huat phah lo che, a chhan chu engkim hi i thiam loh ni lovin ka pi leh nîtei thiam loh vek záwk a ni," a lo ti daih thung.
A rilru hah hluah hluah lâi mah ni se a laka a fapa rilru puthmang chuan a awm a tinuam sawng sawng a, fapa rilru puitling tak a nei tih a hriat phah nghe nghe bawk.
A fapa nen chuan damdawi in lam panin an inphur chhuak a, kawng tluanin Zotei chanchin an sawi a, damdawi in an thleng chu Zotei awmna cabin an pan ding nghal a, Andrew-an a tak ngeia a nu hmêl a hmuh rual chuan a pan hnai thuai a, sawi tur hre lovin a ngâwi reng ringawt!
"Ka fapa Andrew-a kha i ni ti raw? I ni chiang mai, i mitmengah hian ka hre thei, ka hre thei a ni, ka fapa Andrew-a ngei kha i ni," Zotei chuan a lo ti mawlh mawlh a, insum zo lovin a ṭap a, Andrew-a pawh a bang chuang lo.
"Nu..." ti hniam chhalin a nu kut chu a biangah a chelh bet a, a mittui a tling pam bawk.
"Hetiang tak hian i lo ṭhang ṭha a ni maw ka fapa, aw, kei zawng, kan hun tawn hi harsa ka va'n ti èm," tiin Zotei biangah chuan mittui a luang zawih zawih a, Sangzuala chuan, "Andrew, i pi leh i nau kha pâwnah lo va awmpui lawk mai ta che, i nu hi kan be lawk ang e," a ti dam dap a, mi dang chu rei awm lovin an chhuak zui nghal mai bawk.
"Kan fapa chu i enkawl ṭha hle mai," Zotei chuan a ti fân raih a, Sangzuala chuan, "Nang paw'n kan fanu ṭha takin i lo enkawl alawm," a ti ve nghal zat a, thil dang sawipuina hun a ni rih lo tih hriain Sangzuala chuan, "Doctor ka bia ang a, phâiah treatment ṭha záwk leh changtlung záwk i dawng ang a, i dam leh ngei ang," a ti a, Zotei chuan, "Hmâna ka hriat ṭhin Sangzuala ang mai kha i ni, min ngaihtuah hle mai," a lo ti daih thung.
"Ka ngaihtuah che alawm," Sangzuala chuan a ti a, Zotei erawh za lo tih hriat takin a lo nui a, "Min ngaihtuah a ngâi hleinem, phâia insawn lah ka duh hek lo. Ka thi dâwn tho tho a, hetah, ka hmangaihte kianga thih hi ka duh a ni," a ti ban charh charh a, Sangzuala chuan, "I thi dâwn lo, i dam leh dâwn, i dam theihna tur a nih phawt chuan eng pawh ka ti ang," a lo ti thuai a, a rilru dik tak a sawi bawk.
Comments
Post a Comment