Zirtawpnî a ni a, Muani chu la lungâwi lo tluang zelin a pindanah a inkalh khum tlat a, tukṭhuan ei tura a piin a kohna te chu a hre lo lui a, class kal loh hial a tum bawk. Tukṭhuan ei kham àwm velah a nu chuan a pindan kawngka a rawn chum ri leh dat dat a, a nu aw a hriat apiang chuan a ṭah a chhuak ting a, kum kha leh chen a laka thu zep a lo nei char char chu a thinlung tinâ bertu a ni.
"Bawihi, lo hawng teh, inbia ang," Zotei chuan a ti a, a fanu chu a khawngaih a, mahse tih theih a nei tlêm em em si.
"Biak che ka duh a ni," Zotei chuan a han ti leh hap a, kawngka chu a ri rak a, chhûng lam aṭang chuan a rawn inhawng a, Zotein a fanu a hmu chiah chu a kuah nghal thlawp a, a fanu hmêla rilru nàtna lang zut zut chu a hmuh hmaih lo chiang hle bawk.
"Engtin nge heng zawng zawng hi i hriat chhuah theih? Engtin nge i pa a la dam tih i hriat?" Zotei chuan a ti a, Muani chuan, "Ka hmu alawm, nimin khan kan inhmu asin, ka darah a chelh a, zawhna min záwt a," tia chawl deuh dat hian, "Ih e.... nu, a hmêl ka hmuh rual khan ka mumang emaw ka ti hman hial a, mahse engkim kha a tak vek a ni si, 'pa' tia koh mai kha ka châk a, mahse ka hlauthawng èm a ni," a tih zawm sap sap a, chutah amah vek chuan, "Nimin ka rawn haw khan ka hmâa bike khalh pa a accident a, buaipui lo thei ka ni si lo a, damdawi in kan thlen hnuah a chhûngte ka be pawp a, chutah chuan ka pa ngei mai chu ka hmu a, accident chu a fapa a lo ni reng tih ka hre ve chauh bawk," tiin a pa nena an inhmuh dan zawng zawng chu a hrilh ta vek a, Zotei chuan a beisei loh lam hlir a hria a ni ber.
"A fapa hming chu i hria em?" Zotei chuan a ti thuai a, a fapa Andrew-a ngei mai kha a ni ang tih a hlau a ni.
"Hre lo, engati nge ka lakah hian ka pa a la dam tih i zep tlat nu? Engati nge a chanchin min hrilh ngai loh?" a bianga mittui luang tuai hul thuak thuak pah hian Muani chuan a ti a, Zotei chuan, "A chhan chu i pa a thi tawh emaw i tih ang chiah hian ani paw'n fanu a nei che tih a inhre lo, kan inṭhen hnu khan Delhi-ah a inbengbel zui nghal a, keini lam chu min rawn ngaihtuah zui ta lo a ni. Thil tam tak sawifiah tur a la awm a, mahse tunah chuan ka thei rih lo," tiin a fanu chu nghet zet hian a kuah a, a thinlung chhûngril chu a nâ takzet a ni.
Chumi ní chuan Zotei chu ni dang ang bawkin dawr lamah hun a hmang leh chawt a, a rilruah chuan a fapa Andrew-a kha a châm reng a, accident táwk chu ni lo hram se a ti bawk. Tin, a pasal hlui Sangzuala chuan nupui dang a nei leh tawh ang a, fapa dang an nei leh tawh a nih te a ring rum rum a, a rilruah chuan thil dang a awm mawh hle.
Muani chu class kal lovin inah a awm a, a pi hnenah a zawhna neih ang ang te a záwt a, a pi pawh chuan a fanu Zotei nunhlui lainatawm tak chu a tunu hnenah chuan a hrilh ta vek a, a sawi zâwngte chuan a ṭap a, a nu leh pate awm hran chhan Muanin a hre chiah chu a nu a khawngaih thar hle.
Engkim a hriat hnu chuan pangngai taka awm tumin dawrah a nu a pui a, a nu hmêla pawi tihna te, inthiam lohna te chu a hmu lo der a, a hmangaihin a khawngaih em em záwk a ni. Chumi zan chuan Zotei chuan a fanu hnenah û a neih thu te, a hming chu Andrew-a a nih thute a hrilh a, Muani chuan thil ngaihtuah chhuak thutin kha pa, accident tàwka hliam nâ tak tuar kha a unaupa a lo ni reng thei tih a hrechhuak chawpchilh nghal bawk.
A tukah chuan rilru nei takin Muani chuan hun a hmang a, accident tàwk pa kha va tlawh a duh a, a hming a hriat chian duh vang a ni ber. Inrinni a nih ang ngeiin dawrah a nu a pui leh a, ina a haw lawk tur thu chhuanlamin Muani chuan damdawi in lam a pan vat a, eng pawh ni se accident tàwk pa kha a û a nih leh nih loh va chian ngei a duh a ni.
Damdawi in a thlen chuan muangchâng lovin a thil hriat duh ang chu a záwt nghal zung zung a, dam lo hmingah chuan 'Andrew' tih a lo inziak ta kalh mai. A nghing deuh dawt a, a hlim phah lo a, a lungngaih zual phah hek lo, awm dan tur a hre lo a ni.
Chumi nî aṭang chuan a pa chungchang emaw, a unaupa chungchang lam rèng a sawi ri leh tawh lo a, a pa hmu chàk ru viau ṭhin mah se a nu laka a chet dan chu dik a ti lo a, a pa a la dam tih a hriat hmâa a nun dan ang khan nun a tum ngar ngar ṭhin.
Thla a vei a, Sangzuala chu ram lei chungchangah buaiin Lunglei leh Aizawl a kar tawn zak zak a, a fapa Andrew-a pawh a dam ṭha leh tawh a, mahse bike khalh a phal tawh rih lo thung. Driver an chhawr a, chu an driver chhawr chuan nitin Andrew-a class kal a thlah a, a lam leh thlap ṭhin.
Nikhat chu khua a cheng leh ang reng hle a, Sangzuala paw'n engmah a ti lo a, inah a awm tawp a, a bula Cynthia-i ṭawng siam siam ngaihthlak chu a tih theih awmchhun a ni. A ngaihtuahna chhûngrilah erawh tu dang ni lovin a nupui hlui Zotei bawk a awm leh reng tawh a, a dawra va kal a rilruk leh ta thut bawk.
A chhuak tur chu Cynthia-i chuan a zui a, Sangzuala paw'n a rem ti ve mai a, dawr an va thleng chu an ṭhu lut nghal a, Cynthia-i chuan chutiang hmuna an kal a beisei lo hrim hrim a, mak a ti ru viau nghe nghe.
"Eng nge i ei duh ang? I duh duh lam rawh," Sangzuala chuan a ti a, Cynthia-i erawh chuan ei ber tur pawh a hre lo.
"Engati nge hetah kher kan kal a?" Cynthia-i chuan a ti zawi sap a, an awmna hmun chu nuam lo a ti tih thup tum viau mah se Sangzuala chuan a hrethiam vek thung.
"Engati nge?" Sangzuala chuan a ti a, Cynthia-i chuan, "Ka zàwt mai mai che maw le," a lo ti ve leh mai a, nuam erawh a ti chiah lo chu a ni.
Zotei chuan an dawr chhûnga Sangzuala leh hmeichhe pakhat lo lut chu a hmu ru reng a, chutia a pasal hlui, a fanu pa ni bawk leh hmeichhe dang rawn inzui lut a hmu chu a dawnsawn dan pawh a dang hle.
Sangzuala chuan Zotei ei tur lo châwi phei chu a lo en reng a, a bula ṭhu Cynthia-i ṭawng chu a ngaihven thlawt lo a ni ber e. Zotei chuan a awm dan chu dik lo riau hian a hria a, tukin aṭang tawh khan lu hai thut a nei leh zauh ṭhin kha a ni a, Sangzualate hmuh lâi khera chutianga awm chu a duh lo hle bawk.
"Zote....?" a hminga kotu chu a hre sual emaw tiin a melh zawk a, chutia a hming ngeia a pasal hluiin a han ko leh ta mai chu a ṭhawng ngei mai.
"I hnar kha a thi...." Sangzuala chuan a tih zawm zat a, Zotei pawh chu a bangbo hman viau a, mahse a awm dan a siam ṭha nghal vat thung.
"Kha, hei hian hru rawh," tia Sangzualan rawmawl pek a tum chu a lo hnar a, "Ka ṭha, a reh ve leh mai ang," tiin ei siamna lamah a phei thuai a, Sangzuala chuan a en zui duh vawng vawng hle.
"I hmêlhriat a nih vang em ni hetah kan kal?" Cynthia-i chuan a lo ti chat a, a hmâa ei tur inchhawp chu a ei zui mial mial bawk.
"Aw...." tih bakin Sangzuala chuan a chhâng lo a, sawi zui tur lah a hre hek lo.
Zotei chu a chau nghulh a, inphih harh mah se a taksaah chuan thil dik lo a awm tih a hre chiang em em a, a hnar thi chu tuiin a silfai ta thuai bawk. A ruh te chu a nâ ru et et hian a hria a, a thil tih tum pawh a ti hleithei der lo mai.
"I ṭha maw nu Zote?" Fela chuan a lo ti nghe nghe a, Zotei chuan, "Ka ṭha e, ka lu a hai deuh thut alawm maw le," a ti mai a, a ṭhat ve leh mai pawh a inring a, mahse chutiang a thleng hauh si lo.
Zotei chu a awm dan a dik lo tial tial a, khawsik tur ang mai hian a taksa chu a awm a, ei tur pawh siam hlei thei lovin a chal a dawm vang vang a, lu thing deuh nawk nawk hian intihharh hram a tum a, thil kanna bêl a chelh chiah chu tha rèng a nei tawh lo.
Thawm ri deuh ṭhuai lamah chuan dawr chhûnga awmte chu an hawi phei ṭhap a, thil dik lo a awm tih hriain Sangzuala chu a tho thurh a, ei siamtu pakhatin Zotei a lo buaipui a hmuh rual chuan a hnaihchilh nghal thuai a, a chet dan chu ngaihtuah chianna nachâng a hre lo a, tu dang mah a ngaihven tawh lo bawk.
Zotei taksa zawi hnuang chu a pawm nawlh a, a motor park-na lam a panpui a, a hnungah chuan Cynthia-in a lo zui dat dat a, Sangzuala chuan Zotei chu motor chhûngah a mut a, a rang thei ang berin damdawi in a panpui nghal thuai bawk.
Damdawi in an thlen hmâin Zotei chu motor-in a sawh harh a, a mit a han meng chu a ngaihna a hre lo hle a, Sangzuala hmêl a hmuh rual chuan motor tiding turin a hrilh a, mahse Sangzuala erawh a ding duh hauh lo.
"Ding rawh, ka chhuk duh," Zotei chuan khauh ang reng tak, ring si lo hian a ti a, Sangzuala chuan, "Damdawi in thleng phawt ang," a lo ti duh lek chauh a, a nupui hlui, a huat em em mah ni se tun dinhmunah chuan chutiang lam engmah a rilruah a lang thei lo a ni.
"Ding rawh Sangzual, i buaipui ka ngâi lo, keimahin ka inbuaipui thei," Zotei chuan a ti leh a, tlêmin a aw chu a ring ta deuh bawk.
Sangzuala chuan motor a tiding ta nge nge a, Zotei chu a chhuk nghal thuai a, Sangzuala chuan en zui reng mah se ngaihsak emaw buaipui emaw pawh a tum tawh lo.
"Tu nge a u Sangzual, i ṭhian hlui em ni?" Cynthia-i chuan a ti sap a, Sangzuala erawh a ngâwi reng a, motor chu a her kual a, chak zet hian in lamah a tlan a, Cynthia-i chuan zawhna a zàwt zui tawh lo chiang hle.
In an thlen hnu chuan Cynthia-i chu a pindanah a lut nghal sawk sawk a, a awm dan chuan Hlimpuii mit a lo la nghal chat bawk. Hlimpuii chuan zui lut ve nghalin Cynthia-i chu eng thil nge thleng a zàwt a, chutah Cynthia-i chuan nu pakhat avanga Sangzuala a thinrim chhan te, a bula awm a nawm loh thute chu a hrilh mawlh mawlh a, a sawi lâi chuan a ṭah a chhuah hmêl viau bawk.
Chutia Cynthia-i laka a unaupa awm dan chu Hlimpuii chuan a ngaithei leh ta hauh lo mai a, a unaupa pindanah chuan a va lut a, chhuat lo hnawk rum a hmuh rual chuan thil thleng eng emaw tak, Cynthia-in a hriatthiam hauh loh a awm ngei a ni tih a hrethiam nghal a, a unaupa thinrim hmêl te hlei hlei chuan a tichiang zual a ni.
"Eng thil nge thleng a?" Hlimpuii chuan a ti a, Sangzuala chuan dawhkan nem run chung hian, "Engmah," a lo ti tawi hmuk a, thawk a la hawk a, zawi zawiin a hmêl chu a pangngai chho tial tial bawk.
"Cynthia-i lo luh danah khan a rilru tinâ zawngin i khawsa leh tawh a nih ngei ka ring," a nau thusawi chu Sangzuala chuan a ngaihtuah chiang a, ding marin pindan aṭang chuan a chhuak nghut a, Cynthia-i chu biak ngei ṭulin a hria a ni.
Cynthia-i pindanah chuan a va lut ta ngei a, a khawsak dan mâwi lo zet avang chuan thupha a châwi a, Cynthia-i paw'n hawihawm taka lo dawngsawngin a lo hrethiam ve leh mai bawk. A pindan lama a let phei leh hnu chuan ṭhutthlengah a ṭhu hnawk a, ngaihtuahna mumal a pu thei der lo.
Muani class bângin khuma a nu lo mu bám hmêl a han hmu chu a pan hnai thuai a, a pi hnenah chuan eng thil nge thleng a zàwt a, a pi pawh chuan a khua a sik thu te, a khawsik a sàn thute a lo hrilh a, damdawiin a chhawk rih avanga a muthilh thu a hrilh lâi chuan Muani chu a ngâwi ran a, a nu chu a melh ngawt ngawt bawk.
"Damdawi inah kal ila a ṭha lo maw pi?" Muani chuan a ti a, a pi chuan, "Kal ka rawt paw'n amah záwk hian a duh lo tlat a, ka tilui duh ta lo a ni," a lo ti a, Muani chuan, "A nih, engtin nge dawr lam?" a ti leh a, a pi chuan an khar hmâ thu a hrilh ve leh mai bawk.
Khua a thim a, Sangzuala chu a fapain zanriah ei turin a rawn ko a, ani pawh in hnuai lamah a chhuk thla ve nghal mai a, mahse a rilruah chuan Zotei a la awm reng thung. A hnâr a thi chhan te, a tluk chhan te kha a ngaihtuah rauh rauh a, ngaihtuah zui loh tum viau mah se a thei tlat lo a ni.
Chumi zan chuan Zotei dam lo chu zan reiah a rawn tlun vak a, Muani leh a pi chuan theih tawpin an buaipui a, chutiang taka a nu dam lo nâ chu a la hmu ngai lo a, a hlauthawng hle bawk. Damdawi in an panpui ta nge nge a, doctor leh nurse te'n an lo buaipui chawt a, khâwl hmangin Zotei taksa chu an endik a, a dam ṭhat leh thuai an rin tehlul nen, an beisei loh lam tak thu an dawng ta tlat mai.
Doctor te sawi dan chuan Zotei thisen chu a lo cancer reng a, Muanin chu thu, a nu a cancer a ni tih a hre chiah chu a ṭhu sawp hnawk a, a rilru nâ lutuk chu ṭah pawh a ṭap thei lo a, doctor te'n treatment ṭha tak an pek tur thu sawia an hnem lâi te chuan eng thil dang mah a ngaihtuah thei tawh lo, a nu tih chauh lo chu!
A hriselna pawh ngaihven lova amah chawm seilian tu leh hmangaihtu a nu chu a lainat em em a, nàtna azawnga ṭihbaiawm ber cancer a vei te chu pawi a ti tak zet a ni. A nu tân chuan tih theih nei se a ti ngawih ngawih a, mahse doctor te meuh paw'n tih theih an nei tam si lo.
A tukah chuan Zotei chu a rawn harh a, a awmna hmun chuan a ṭhawng hle a, thawh mai a tum chu a fanuin a lo dang vat a, a fanu mitmenga lungngaihna leh manganna chuan a lairil a chhun a, a ṭhat tawh thu sawi mah se a fanu hmêl chu a danglam phah der lo a, ṭah chhuak hmêl tak a pu te hlei hlei chu a hrethiam lo a ni.
"Min ngaihtuah suh Bawihi, ka ṭha tawh alawm," tia a fanu sam a chùl lâi chuan Muani pi chuan, "Ni lo Zote, i ṭha lo, i hriselna a pan lutuk," a lo ti sap a, Zotei erawh chuan a taksa dinhmun dik tak a la hre lo a, a nu leh a fanu awm dan chu mak a ti hle.
"Bawihi, doctor emaw nurse emaw va ko teh, i haw teh ang u," Zotei chuan ti mah se a fanu chu a awm ngaiin a awm tlat a, chutah a fanu chu rawn ṭawng chhuakin, "Nu, i dinhmun hi a ṭha lo," tih leh ṭah a rual a, lungchhe tak hian a ṭap khur ngawt ngawt a, Zotei pawh a meng buai ve ta map mai.
"Ka nu, eng nge thil awmzia hi? Engati nge ka dinhmun chu a ṭhat loh?" tiin Zotei chuan a nu chu a melh thuai a, a nu chuan, "Zote......." ti chuai raih hian a tawp leh rih a, chutah insut deuh fap chung hian, "I thisen a cancer," a ti thawp ta raih a, chutah zet zawng Zotei paw'n sawi tur rèng a hre tawh lo.
"Ka thiam loh vek a ni Zote, i nu hi ka mawl em a ni. I taksaah hian danglamna awmin ka hre ṭhin a, i cher ta riau te hian ka hria a, mahse ngaihṭha lohna ka lo nei ngai lo kha ka tihsual a ni, min ngaidam lûl teh ka fanu," Muani pi chuan a hniam raih raih a, a fanu kut chu chelhin a ṭap zui nghal feih feih bawk.
Zotei chuan engmah sawi tur a hre lo a, a rilru a mang a, thi mai tawh tur nia a inhriatna chuan a taksa mai bakah a rilru nen lam a hmet chau a, a tel lova a fanu leh a nu an khawsa tur te chu a dâwn a, a ngaingam lo a, hun rei tak chhûng dam thlahlel viau mah se thihna kotlangah a ding reng tawh tih a inhre chiang em em thung si.
"Nu, i chanchin hi ka pa ka hrilh dâwn aw....?" a fanu zawhna chuan a tiharh zawk a, a lû a thing nghal nawk nawk bawk.
"Ni lo, i hrilh thei lo, a hre tur a ni lo," Zotei chuan a ti thuai a, hrisel ṭha tak ang mai hian khum aṭang chuan thawh a tum a, mahse a taksa chu a rin phak bakin a lo chak lo a ni.
"Hahdam i mamawh ka fanu," tiin Muani pi chuan a lo chelh thuai a, chutah Muani chuan, "Engati nge ka pa chu hrilh i phal loh?" a rawn ti leh a, Zotei chuan thinrim zet hian, "I nuin hrilh a ngâi lo ka tih chuan a ngâi lo a ni mai, ka beng hriatah vawikhatmah a chanchin sawi ri tawh bawk suh!" a ti ta hrawk a, Muani pawh chu a ngawi hmak a, an boruak tawn mêk chuan a lungngaihna a tizual hle.
Chumi nî vek chuan Zotei chu damdawi in aṭangin a chhuak a, doctor te'n la awm rih turin ti viau mah se haw a duh tlat mai bawk si a, tih ngaihna dang a awm lo a ni. Muani chuan doctor sawi apiang damdawi chu a lei haw nghal a, a rilru tak chuan in lama inenkawl ngawt chu dikin a hre thei lo.
Chawlhkâr a ral a, Sangzuala chu Lunglei lamah a zin phei leh a, ram pawh a lei fel tawh a, a ram lei chu a zauh ṭhat mai bakah a hmun hmâ a rem a, a suangtuahna anga Hotel changtlung tak a din theih ngei pawh a ring.
Aizawla a let leh hnu chuan Zotei dawr a tlawh kawi a, mahse ṭum dang ang lo takin dawr chu a lo inkhar a, mak a ti deuh a, ngaihṭhat lohna erawh a nei hran lo.
Nî leh thlate an vei a, Zotei dinhmun chuan hmâsawn aiin zual lam a pan zel a, taksa bawrhsawmnain a tlakbuak a, a hmêl te chu a cher telh telh a, a rihna a tla hniam bawk a, loh theih lohna avangin damdawi inah an lut leh ta nge nge bawk.
Muani mangang chuan a nu hriat lova a pa zawn chhuah chu a tum ruh bur a, a pi hnenah chuan a pa awmna vêng a záwt a, mahse a pi chuan a lo hrilh duh mai lo a, a chhan chu a fanu Zotei zahawmna humhim a duh vang a ni.
Muani chuan ngen tak meuh hian a ngen a, eng ang mi pawh ni se a nu dinhmun chu a pa hriattîr a tum tlat a, a piin a pa awmna vêng hrilh lo mah se zawn chhuah chu a la tum fan a ni.
Zan khat chu Zotei dinhmun a derthawng leh a, doctor leh nurse te'n an buaipui chûk chúk a, cancer nàtna chuan a taksa a ei chhe tawlh tawlh a, Zotei chuan hun a nei tam tawh lo tih a hrethiam a, a mangang ru em em bawk.
A fanu dinhmun avang chuan Muani pi chu a rilru a buai a, a lungngai a, a tunu hnenah chuan a pa awmna vêng chu a hrilh ta nge nge a, a fanu hnenah erawh engmah a sawi lo thung, a sawi leh sawi lovin awmzia a nei thui hek lo.
Thawhlehnî a ni a, Muani chu in changkang leh lian tak kawtah chuan a ding ran a, kawngkapui sîra door bell chu a hmet a, rei lovah kawngka chu nu pakhat hian a rawn hawng a, Muani chuan, "Pu Sangzuala a awm em le?" a ti sap a, a mi biak chuan, "Aw, awm e," a lo ti a, chutah hmeichhe pakhat, a nu te rual vel tur hian, "Tu nge a nu Chhuan?" a rawn ti lang lang a, nu Chhuani chuan, "Ka hre lo, Sangzuala awm leh awm loh min rawn zàwt a nih hi," a ti ṭha mai a, Muani chuan a lo en tawn zak zak ringawt!
"Eng nge ni ta?" Sangzuala nau Hlimpuii chuan a ti a, a hmâa nula ding chu a hmuh tawh hnu ni tlatin a hre bawk.
"Pu Sangzuala ka hmu lawk thei ang em? A pawimawh lutuk a, ka hmuh theih chuan ka lawm ngawt ang," Muani chuan a ti ta zung zung a, Hlimpuii chuan, "Nang hi khawiah emaw ka hmu tawh tlat chein ka hria, eng atân nge ka û chu hmuh i duh hrim hrim a?" a lo ti a, Muani chuan, "Thil pawimawh a nia, ka hmuh ngei ngei a ngai, khawngaihin," a han ti leh a, Hlimpuii chuan ngaihṭha zan lovin a luhtîr ve mai bawk.
Nu Chhuani chu in chung lamah chhovin Sangzuala chu hmu duh tu a neih thu a han hrilh a, in hnuai lamah an rawn inzui thla a, an in chhûnga nula chu Sangzuala chuan a hmuh tawh hnu a ni tih a hre nghal chat a, a fapa accident ṭuma damdawi in hruai thlengtu kha a ni tih a hre chhuak nghal bawk.
"Eng nge ni ta?" Sangzuala chuan a han ti dap a, Muani chuan, "Khawngaihin a fâlin kan inbe thei ang em?" a ti thuai a, chutah Hlimpuii chu lo inrawlh nghalin, "Eng nge a fâla inbiak kher a ngaihna?" a lo ti a, Sangzuala chuan, "Min lo zui rawh," tih leh a pindan lam pan a rual a, Muani chuan a zui chho ve nghal a, chutiang taka in ropui chhûngah chuan a pa a cheng a ni tih a suangtuahnaah pawh a ring pha ngai lo.
"Ka fapa chunga i thiltih avang khan ka lawm khawp mai," pindan an lut fel ta maw tihah Sangzuala chuan a ti thum dap a, Muani erawh chuan, "I fapa chungchang sawipui tur chea lo kal ka ni lo," a lo ti thung.
"Eng chungchang nge?" Sangzuala chuan a ti leh mai a, Muani chuan, "I nupui chungchang," a ti a, chu veleh Sangzuala chuan, "Nupui ka nei hleinem," a lo ti a, Muani chuan, "I fapa nu, i nupui hlui chungchang kha a ni," a ti leh a, Sangzuala chuan a melh nghal zawk bawk.
"Engtin nge nang hian chutiang thil chu i hriat?" chik zeta melh ran hian Sangzuala chuan a ti a, Muani chuan, "A chhan chu a fanu ka ni alawm, tunah hian ka nu chu damdawi inah a awm mêk asin," a ti a, a mittui a tling pam a, a fanu a nih thu chu hrilh nghal law law a chàk tak zet a ni.
"Engati nge? Dam lohna a nei em ni?" Sangzuala chuan a ti a, Muani chuan ṭah chhuak zet hian, "A thisen a cancer, hun tam tak a nei tawh lo," a ti ṭiau a, chutah amah bawk chuan, "Khawngaihin....?" a tih zawm leh a, Sangzuala rilru chu a buai ta hle.
Zotei hmuh a tum apianga dawr a lo inkhar ziah chhan te kha a ngaihtuah lèt a, Zotei fanu thu hrilh zawng zawngte nen chuan a hmehbel a, engkim chu a inzawm vel vek a ni. A thinlungah chuan hlauhthawnna a awm a, rilru siam dan tur pawh a hre mai lo.
"He thu ka rawn hrilh che tih hi ka nu chuan a hre lo, a phal lo a, a chanchin hriattîr che a duh lo a, mahse kei chuan ka thei ve lo, ka hriattîr ngei che a ngâi a ni," Muani chuan a ti leh sap sap a, chutah Sangzuala chu harhchhuak thut hian, "Engati nge kei kher min rawn hrilh, ani nen inzawmna kan nei tawh hleinem?" a ti chhumbung hmuk a, Muani tân chuan thudik sawi loh theih a ni ta lo.
"A chhan chu kei hi i fanu ka ni, ka nu nena in fa," Muani chuan a ti ta nge nge a, a mittui a tling pam a, mahse Sangzuala erawh chuan a thusawi chu awih enah pawh a en lo.
"Thil theih a ni lo," Sangzuala chuan a ti hmuk a, Muani chu za lo zet hian a nui lui sak a, insawifiah a tum tawh lo a, a sawi tur àwm ang chu a sawi zo tawhah a ngài.
"Ka kal ang e," tiin Muani chu pindan aṭang chuan a chhuak a, Sangzuala erawh ngaihtuahna sêngin a la ding ngâwi reng thung.
Comments
Post a Comment