LOVING YOU A MILLION TIMES By Havali Adam (LAST CHAPTER 11)

LOVING YOU A MILLION TIMES 

By

Havali Adam

Last Chapter 11

"Eng thil nge?" a thil min pek tum en chung chuan ka ti deuh hû a, pâwna kan awm dun tawh avangin ka ṭawng zawi lo hle bawk.

"Lá rawh, pass lawmna present a nih hi!" hmel dam deuh hian min en a, chuti maia lâk erawh ka tum hauh lo. 

"A ngai lo ni rawh se" ka vin hran lo nà chu ka aw a fiah fak thung.

"Nunu?" min ngen ni maiin ka hria, min din hnaih sawt a, present bâwm chu ka kutah a hmehbel zui nghal chawt bawk.

"Ka lakah hian lungàwi lohna tam tak i nei tih ka hria, i thinlung nâ tidam turin hun min pe la ka duh; hetianga min pehhel reng lo hian" a rawn tih leh chuan ngawi rengin ka lo en kar ringawt. 

"A hma ang khan awm leh tawh ang...imm?" min biakna aw dam dap chuan chawp leh chilhin ka rilru a tino a, kan inṭhen zan kha ngaihtuah chhuah loh theih pawh a ni lo. 

"I tân ka hnawksak ṭhin i tih khâ?" dul raihin a mitah tak ka en a, ka ṭah a chhuak ru em em bawk. 

"Ni lo, i hnawksak reng reng lo, ka tân hian i hlu a, ka nunah hmun pawimawh tak i chang tawh asin" a rawn tih chuan

"Min ning ṭhin alawm" ka lo ti ve vat a, ka aw chu a lawi deuh rât bawk. 

"I hre sual a nih dâwn chu! Kei hian ka ning ngai lo che a, ka rilruah i awm reng ṭhin zâwk alawm, â lutuk teh suh Nunu" ka lû ka lo thing thuai a, ka rilru a insual buai nasa lutuk chu ka tum loh dan deuh deuhin ka awm a ni ber.

"Keimah avanga i thinlung hliam tidam tur hian ka theih tawp ka chhuah ang, ka tiam a che" ka rin loh hlauh ang hrim hian a ti leh charh charh a, ka ṭap chhuak ta nge nge. 

"Nât nawn ka duh tawh lo" a âwma min kuah beh rual chuan ka ti ṭiau a, ka insut ri feih feih zui zat a, a taksa lûm nuam em em te chuan ka ṭah a tichhuak zual hle bawk.

"Ka tihpalh, ka tihpalh tak zet" nghet zeta min kuah chung hian a biang chuan ka chhip a nâwk deuh nawk nawk a, amah avanga ka nâtna te chu bo nghal duak lo mah se amah vekin a tibo thei tih erawh ka hre chiang viau thung.

Ka khabe rawn châwi detin mamawh tawh lutuk ang mai hian min fawp zui nghal mawlh mawlh a, kei paw'n ka lo chhâng lêt lo thei bik lo. Mittui nena inchiahpiah nuaihin ka fawp lêt ve tawn tawn a, chal insi chiala kan awm hnu chuan kan thaw lâk pawh a rang dun hle a, kan thin phû chenin a rang dawt dawt hle bawk. 

"Ka hmangaih che" ka biang tawn tawn dawma min en chung hian a ti hniam ruih a, a aw chu a dam dap a, dâwt a sawi lo tih ka va hre chiang si êm. 

"Kei paw'n ka hmangaih che, ka thinlung hi tinâ tawh lûl suh" tia kuah nghal thlawpin ka ṭap leh ta nge nge.

"Ka tinâ leh tawh ngai lo ang che, ka tiam a che ka hmangaih" nautê ang mai hian a taksaah chuan min pawm bet nghet hle a, thutlukna siam sualah pawh ka inngai lo, a chhan chu ka hmangaih tlat a tin a ni!

"Zawh tur che ka ngah" ka tih chuan

"I duh dûh min zâwt thei ang" a lo ti ve nghal a, kan inkâr a ṭha leh tawh lutuk chu ka va hlim pha tak êm.

"Khang thla liam ta chhung zawng khan eng nge i tih ṭhin? Min be ngai lo va, i reh hmak a, ka tân kha chuan a hrehawm asin" ka ti niah niah a, ka mita mittui la châmbáng nuaih te chu ka hru pah zeuh zeuh bawk.

"Khang hun lai kha chuan ka rilru a buai em em a, ka pa damdawi in awm thu ka hre leh zel bawk nen ka ngaihtuahna kha a buai mup mup a, rilru fim tak pû chunga inngaihtuah ngaiin ka inhre ta a, chu vanga zin bo vang vang pawh chu ka ni, mahse khatiang thil kha a thleng leh tawh lo ang" a ṭawng tawp lamah chuan ka rin ngam loh a hlau tih a hriat hle.

"Tlaiah khan i pa nen kan inhmu a" ti sepin kan thil sawi dun chungchang chu ka hrilh ta melh melh a, hmun hahdamthlak taka awm ang maiin ka inngai a ni ber.

"A hma chuan huat namên lovin ka haw ṭhin alawm, tunah erawh ka huatna kha a kiam tial tialin ka hria, i hlawhtling e" a tawp khar dan avang chuan ka nui sen sen a, ani pawh a bang chuang lo. 

"Palâi ka rawn tir tawh mai dâwn asin, i remti em?" a rawn tih zawm leh nghal zat a, chu zawhna dawng tur chuan ka lo la inring hman reng reng hleinem. 

"Eng lo, Master hi zir zawh law law phawt ka duh ê; ka neih duh loh vang che pawh ni lovin" ka ti hliai a, chu chu ka rilru dik tak a ni bawk. 

"Min ngaihtuah ve la, kum 35 ka tling tawh dâwn a nia, la tlangval reng tur chuan ka upa mah mah tawh i ti ve lo em ni?" a fiamthu emaw tiin ka nui a, ani erawh fiamthu hmel réng a lo pû lo.

"Nâaaa......" ka ti vawng vawng ta ringawt a, chhan dan tur hre tawh lo miau hek!

"Kan inneih hnuah pawh i duh chuan i zir chhunzawm thei tho ang" a rawn ti leh a, theih chu a theih ngei ang a, mahse a chhûngte laka inthlahrun a nâ duh dâwn lutuk tih ka hre lâwk vek!

"A rei tawh chuang hleinem, kum khat chauh alawm ngai tawh" ka tih leh ṭalh chuan a lungàwi hmel ta vak loh. 

"Ngaihtuah chiang ve la, mo nih hnua MZU kal ni tin kha a mawi dâwn miah lo a nia, nge zir zawm tawh lo turin min duh zâwk?" ka ti deuh tan tan a, mi pawh a chhâng lo hrim hrim. 

"Kan ṭha ve chiah a, kan buai leh nghal dâwn der chu a nia" ring vak lo hian ka ti thawp sep a, min en rang teh e!

"A ṭha e, ka nghak ang che, a bak engmah a awm tawh tur a ni lo" a rawn tih chuan hlim zetin ka nuih nghal var var a, ka chala mi nam dâk deuh dat pah hian

"Phakar reuh lutuk" a ti leh sup a, a âwm chu nghengin ka bei ta hle hle. 

"Eng nge a chhûngah hian awm a?" naupangchhe aw zet hian ka ti a, pass lawm nâna a thil min pek chu eng nge a nih rin ngaihna rèng ka hre lo, a intuam vek bawk si. 

"I hriat duh chuan hawng mai la" a lo ti sam mai a, ka hawng zui ve nghal mai bawk.

"Ehê....ṭhi elo? A to viau lo maw? Hetiang te chu inpêk mai mai chî a ni hleinem, a to viau em?" a chhûnga awm ka hmuh rual chuan ka ti zui mawlh mawlh a, awlsam tê bawk hian

"Chutiang lam ngaihtuah buai duh suh, a ho lutuk" a rawn ti deuh hnup a, ṭhi tê chu a rawng a mawiin hmuh a nuam tawp! 

Bâwm chhûnga ṭhi chu a rawn là chhuak a, amah hnung chhawn zawngin min dintir a, muangcháng hian ṭhi chu min awrhtir zui zat a, a ṭhi min awrhtir chu ka en nawn chhen a, a mawi bakah a simple ka ti tak zet!

Zan hun ka hman dan leh kan inkâr kan inchinfel danin a zir na ngâng bawk a ni ang, a tuk zinga ka tho te reng reng chu ka zâng vah a, hmân ang kha ka ni leh tawh ni maiin ka hria. MZU bus-a kan chûan lai chuan u Hruaia nena kan chungchâng Adeline-i ka hrilh a, a lawm em em paw'n ka hre lo. Ka rilru a dam hma thu min hrilh lêt ta zêk a, kan inṭhen dan teh tawp avang khan min lo la nâtpui ve reng a ni mahna.

Kei erawh ka thinlung nâ leh hiam a dam tawh a, keimahah ipikna réng a awm tawh lo va, hmun pawh an chang tawh hek lo. Ka ngaihtuah chet chet a, a hun lai khan ka rilru a nâ hma mah mahin ka hre bawk. A tân kha chuan hnawksak àwm réng pawh ka ni a, a pa nen an inpawh theih nâna ka beihna kha ka ngaihah ṭha viau mah se a tán erawh thil ninawm tak a ni thei tlat a ni.

"Kâr leh aṭang khian in pui lama insawn ka tum tawh ta mai" a hmel chu ka en nghal thuai a, a rilru a inthlak danglam nasa tawh lutuk chu ka lawm tak zet.

"A va'n ṭha ve, nangmah paw'n nuam i tih daih zâwk ka ring" ka ti siam siam a, ngaihtuah thui hmel zet hian a hawi vung vung a, hlim hmel pawh a pû lo hrim hrim.

"Ka insawn tlaiah zanriah i lo ei ang chu ka tia" a thusawi dan kalhmang aṭang chuan ruahmanna a lo nei lâwk sa diam tawh tih a hriat mai. 

"A zahthlak àwm ê" ka tih chuan

"Zahthlakna a awm lo, ka nupui ni mai tur i ni tih nen lam an hre vek tawh" a rawn ti sam mai a, kan rilru a inang lo hle a nih hmel. 

"Awm ve tho e" ka ti leh hram a, engmah a rawn sawi zawm tawh lo thung. 

Kan awmna hmun aṭang chuan Aizawl vêng ṭhenkhatte chu an lang chiang em em a, a zawng zawng erawh an lang kim thei lo. Kan inkâr thu sawi fela huatna leh inhmuhthiam lohna ai inhmangaih tawn zâwk reng kan thlan zan aṭang khan hmun fianrial lama min awmpui a hrat chho viau a, kan tlatna fianrial ṭhin mah se humsual dai theihna lam kawng kan zawh ngai lo hrim hrim thung. 

Hmuh theih khawpa langsar hian amah avanga ka lo nât tawhna te chu thawi dam a tum tih a lang chiang em em a, min ngaihtuahna leh min ngaihsakna ka dawng awl lo va, ka hre ni tin zan tin a, a hmâ zawng ai khan mipa innghahna tlâk leh rin tlâk tak a nihzia ka hmu fiah mawlh mawlh a ni ber.

Tin, Adeline-i paw'n zawi zawiin a hmu pangngai chho ve leh ta tial tial a, hmu pangngai lovin lo haw reng ta pawh ni se ka tân erawh huat rei theih a ni lo, amah ka hmangaihna hi a chak tawh lutuk tlat, engmahin an khum zo kher tawh lo ang. 

Hun te chu chelh din rual lovin an liam zel a, u Hruaia pawh a pa te inah, an in pangngaiah a insawn ta ngei a, a chhungte ber chu an lawmin ka hria. A insawn tlai chuan min hrilh lâwk tawh ang ngeiin ka zui a, a vawi khatna atân an inah zanriah ka kil ve ta nge nge bawk. Pa Dinga chenin min lo dawngsawng thiam em em a, nu Bec-i leh Hannah-i te phei chuan min be deuh reng a, keimah ber pawh ka tlângnêl sâwt nghal hle.

Zan khat chu zanriah kan kil ṭhap laiin u Rosanga chuan nupui neih a duh thu a rawn sawi ta riap mai, ka nu leh pa mitmeng chu a buai deuh nak a, Adeline-i nen an inngaizawng tih an hre ve vek tawh a, an inngaihzawn aṭang khan thla 5 lai chu a liam ve leh der tawh nghe nghe. 

"A la hma deuh lo maw Bawiha?" ka pa chuan a ti dam dap a, kei tak paw'n hmanhmawh ka ti ang reng. 

"Ka mamawh tawh alawm" u Rosanga chhàn dan teh thlawt chu a va han mawlmang mai mai tak, ka pa pawh a nui chhuak ṭhawt ringawt. 

"Engti zawnga mamawhin maw?" ka pa chu ka en zawk a, nui sun sun chung hian u Rosanga a en reng a, u Rosanga erawh a thutak run thung. 

"Ka mamawh a ni mai" pakhata lah chuan a ti leh deuh tawp a, ka nu pawh a nui chhuak ta hak hak. 

"Ṭawngkam hi tlêmin han thiam deuh phawt la, chumi hnuah kan la ngaihtuah ṭha leh dâwn a nia" ka pa chu a fiamthu tih ka hre ran a, mahse u Rosanga ber chu a thutak a, ka pa fiamthu pawh zu han man miah lova maw le.

"Adeline-i saw ka nupui atân in duh lo a ni maw?" a la rawn ti ta deuh deuh, kei ngei pawh ka nui chhuak hak a, min rawn en chiah chu ka nui tawp chiang hle. 

"Neih loh i va han hlau awm em em ve maw le, ren run che hian" tiin ka nu chu a nui zui hak hak a, Lawmtêa chenin kan nui ta vek!

"In va ho dun tak!" ti hlukin u Rosanga chu a kham nghal daih a, a ngaihtuahna a fim tawh a nih ka ring. 

"Fapa ṭawngkam thiam lo lutuk neih zawng a buaithlak a nih hi!" tum nei ran hian ka pa chuan a ti deuh pung pung a, u Rosang chu a lo ner nasa mai. 

"Nakinah sawi ṭha ang, mi dang awm loh hunah, mi dang an awm ve chuan a dik thei lo" a rawn ti nuah nuah a, chutah amah bawk chuan min melh run chung hian

"Engmah sawi suh ang che" a rawn tih zawm leh nghal zat a, Adeline-i bula ka sawi chhuah a hlau tih ka hrethiam mai. 

"Awi, ka sawi dâwn chiang, i awm dan zawng zawng hi ka hrilh vek ang a, pasal atân a duh che pawh ka ring lo" ka ti zawt zawt a, min melh hrep chung hian

"Chutiang mi a ni lo" a rawn ti khauh a, hmui pet sawiin ka ner khum sak nghal.

"I inla hre chiang a nih mai chu! Nang ai ka hre chiang fê zâwk!" ka ti lêt ta zêk a, a room lam panin a kal phei nul nul a, ka pa pawh a lo nui vur vur ringawt. 

"A ti ve tak tak a nih dâwn kha!" ka pa chuan a ti sup a, ngaihtuahna a sén zui nghal hmel hle bawk. 

"Adeline-i kan mo a nih hunah chuan kan bengchheng àwm hlawm" ka nu chu enin ka nui vak vak a, a sawi dik chiah, kan in chhung hi a reh dâwn lo tih ka chiang.

"Awi, innei tawh tak tak reuh se ka ti ê, han inhauin han intihtauh khum vel se maw" tiin duhthu chu ka sam zui nghal ta lûam a, ka hma zawna ṭhu ka pa chuan

"A nih nang ni hì?" a rawn ti thluk hniam dut a, ka nui tawp chiang ngei mai.

"Keini chu a la hla deuh ang" tih chauhin ka chhâng ta ringawt.

"A pawi loh chu! Nupaa insiam tur chuan inngaihzawn rei ve deuh te hi a ṭha a nia, kan inhre chiang nge nge" ka pa bawk chuan a ti leh dap dap a, thil ni thei tak a ni.

Chaw kan ei kham a, ka tifel nghal a, rei lo tê hnuah u Hruaia a rawn lêng a, tun lai chu a rawn lêng hmâ a, a haw leh hmâ ṭhin viau bawk. A kâ aṭang tak chuan hre dawt lo mah ila Hannah-i kâ aṭang zâwkin a pa nen an inkâr a ṭha chho tial tial tih ka hre ve zel a, a lawmawm tak tak a ni. Inngeih tawh se, inpawh tawh se, innêl em em bawk tawh se ka duh ber.

Chawlh kâr a ral a, u Rosanga leh ka pa pawh an sawi ṭha leh ngei ni tur a ni. Thla thara palâi tirh an ti tlu ta nge nge a, Adeline-i erawh engmah ka hrilh lâwk duh bik lo. Vêng chhungah hi chuan an inzui tam deuh tawh avangin an inngaizawng tih kan hrethiam fur hlawm a, innei tur êm chuan ring chiah lo an la tam ka ring. 

Thla thar kan chûang kâi dek dek a, u Rosanga chuan ka pa a tur nghal deuh chhen ta mai, a hmanhmawh tut tut lutuk chu a nuihzatthlak lehling zâwk! Ka pa paw'n kâr khat hnuah palâi kal a remti ta nge nge a, a ṭum hnihnaah Adeline-i te lam paw'n thu leh hla ngaihnawm tak an lo hawntir a, man hlan nî tur mai bakah an inneih nî tur nen lam an ruat fel ta vek a, u Rosanga pawh a lawm kher mai. 

"I û chuan min hmakhalh daih mai a" u Hruaia chu ka thlek chho zeuh a, tlêm chuan ka inthiam lo ve deuh! 

"Khirh bik min ti em?" ka ti ta ringawt a, a lakah chuan ka inthlahrung ru ang reng viau bawk. 

"Ti lo e, ka nghak thei che alawm, hun a kal chak a, kan ti ve thuai mai ang" ngaih ṭhat hmel deuh hian a rawn ti daih a, ka awm a nawm loh phah a hlauh vang a nih ka ring.

"I fel ngawt mai" ka ti ta thlawt a, ka tân hi chuan a fel ve chiang êm a ni. 

"Kan ngaih pawimawhte tân chuan a fel loh theih hleinem" inla zei deuh hian min en a, a duhnaah hi chuan a nghal ve zêk ṭhin. 

Hun a kal zel a, kâr lovah u Rosanga leh ka ṭhian ṭha ber Adeline-i te inneih nî pawh a rawn inher chhuak ta! Inneih nî hma chiah zanah Adeline-i nen kan riak dun a, an inah a ni nghe nghe a, zan khua deuh thawin man inhlannaa a chet chhiatna kan sawi dun char char a, amah ber berin sawi nuam a ti a, u Rosang pawh dim bak sak hauh lovin a rêl hrep bawk.

A mizia ang law law hi a ṭha ka ti, zep a nei sî sê lo va, dâwt a sawi ngai mang lo va, dâwt a sawi hi chuan a hmelah leh a che ziaah a lang nghal vek zel. Ka ṭhian ṭha em em ni ṭhin kha tunah chuan kan chhungkaw mo, ka unaunu ang a ni tawh dâwn chu a ni si a, hun kal tawh ngaihtuah lêt phei chuan rilruah mak tihna a la awm lo thei lo, mahse ka hlimin ka lawm em em thung. 

An inneih nî chuan biak in khat ṭânin mipui inkhawm kan awm a, biak in gallery nen lam kan khat vek a, u Hruaia nen pawh mo neitu chhûngte ṭhutna lamah kan ṭhu dun ve ngei a, a chhûngte pathum erawh an rawn kal ve ta lo mai. Bialtu pastor-in thu a sawi lai chuan u Hruaia nena kan awm dan tur ka lo suangtuah lâwk daih a, kan la hma chhawn ve ngei awm si a, a zâmawm duh dâwn hian ka hria a ni.

"Ka peih lo reuh ê, mahse ka phur tho bawk sia" Adeline-i chu ka nem dâk âwrh nghal a, engah mah a ngai eih lo, a en ngai a en tlawk tlawk ringawt. 

"A ni alawm, boruak awm dan vel hi ka peih lo leh thut, mut san daih mai ka duh" a la rawn ti ta deuh deuh!

"Mawli" tih bak sawi tur ka hre lo. 

"I tawn hunah i hrethiam ve mai ang, ka awm ang chiah hian i awm dâwn tih ka chiang" a rawn tih leh chuan

"Awi, i buaithlak êm mai! A hma zawnga i phur phur nen, in nupa room turah va lut tawh rawh, u Rosanga pawh a lo lut ṭep ang" ka tih khum mawlh mawlh a, tuna taka han peih loh leh thut, ka awih thlawt lo. 

"Phur ang ngawt kha a lo ni leh si hleinem" ti niah niahin u Rosanga room lam a pan ta nal nal a, kan thil sawi ho zet chu kan chhûngte'n an lo hria ang tih a hlauhawm lehling zâwk e a! 

Zan dâr 12 a rik dâwn meuh chuan thawm a reh ṭhiap tawh a, ka mut a chhuak mai bawk si lo nen ngaihtuahna a kal thui duh ang reng hle. Tlai lama mo lawm luhna kan neih dan te chu ka ngaihtuah lêt vel mai mai a, lawichalin u Rosanga eng eng emaw ni a tihtir nual kha a ni a, mahse kha khan boruak a tihlimawm viau thung.

Hun leh nî te an ral a, nî thar, kâr thar leh thla thar te pawh chhum lo chat lovin kan hmang liam zung zung a, kei ngei pawh zirna lamah final semester ka ni ve leh reng tawh a, buai erawh a nâ ṭhin khawp mai. Dissertation buaipuia kal kual lâwp lawp châng a tam thei hle a, Research kan nei a ni ber a, hahthlak ang reng viau mah se a hlawkthlak hle thungin ka hria.

Kâr lovah final semester exam hun pawh a rawn inher chhuak thuai a, kum tawp lam kan hnaih leh der tawh chu a ni hawt e. U Rosanga leh ka ṭhiani pawh an hlim dun nak nak thei hle a, ka nu leh pate paw'n an nupa mizia an hre chiang bawk a, fiam dan tur an hre thei khawp mai. Chutiang zelin putea te paw'n fapa an nei tawh a, krismas rawn hman an tum leh nghe nghe bawk.

"Pa Dinga hi a ṭha chak ka ti, in puia i insawn hnu hian a dam chak zualin ka hria" zan boruak nuam tak hipin u Hruaia nen kan ding dun chial a, kan pahnih chauha kan awm tawh hi chuan kan taksa hi a inhlat thei meuh lo ṭhin. 

"A lawmawm khawp mai" a ti hniam ruih a, a lawm ve tak takin ka hria. 

"Kâr leh aṭang khian in exam ṭan dâwn ti raw?" a rawn ti leh chuan

"Imm...ni e, zawh thuai thuai ka châk tawh! Exam zawhah presentation kan la pe dâwn zui, neuh neuh a tam reuh tak tak a ni" ka ti zui nghal niah niah a, ani erawh a lo nui suk thung. 

Kan inthlah fel hnu chuan a tlan liam thlengin ka thlir zui dauh dauh a, a chhûngte bula a lêt tâk aṭang hian hmâ a sawn viauin ka hria. A ruka thil vei reng nei hmel ang kha a hmelah hmuh tur a awm tawh lo va, tunah chuan a hahdam hmel ngawih ngawih tawh, chu chu ka hlimna tizualtu pakhat a ni. 

Kâr thar kan chûang kâi a, exam kan ṭan nghal chu a ni mai. U Hruaia pawh kan exam chhûng zawng chuan a rawn lêng khât ang reng hle a, phone kaltlangin kan inbe ziah thung. A hnen aṭang zir ṭha tura fuihna ka dawng zan tin a, kan exam zawh vela palâi rawn tirh nghal a duh thu a sawi tel ve ziah bawk. 

A thil sawi dan aṭang reng reng hian min neih thuai a duh tih a hriat thei hle a, a chhûngte leh ka chhûngte ni se an inpawh phian bawk si, engkim chu a tluang vel vek a ni ber. Kan exam zawh zan chuan palâi hmel kan hmu nghal a, chu kher chu ka beisei miah lo, hrilh pawh min hrilh lâwk miah lo, palâite hmai pawh zah zo lovin u Hruaia ka be nghal thuai a, ani lah chuan

"In exam zo tawh alawm" tiin ṭanhmun a lo sawh nghet tlat a, tih ngaihna hre lo zet hian ka hui pap pap ta ringawt.

"Min hrilh lâwk ve tur che alawm" ka tih lahin

"Chhuanlam dang i siam leh ka hlau a" a lo ti sam mai a, tih theih ka nei tlêm teh e!

Chumi zan chuan palâite chu ka nu leh pa'n an titipui a, thingpui lûm leh semin ka awm deuh tawp a, an thil sawi dan kalhmang leh an inbiak dan chu a zahawmin an hawihhâwm hlawm khawp mai. Puitling nge nge, mawihnâi tak hian an inthlah thlap a, ka pa chuan kan thu leh hla ngaichanga lo kal nawn leh turin a chah thlap nghe nghe.

"Pasal neih lam i lo rilruk ve reng tawh chu a ni si a" ka nu chu ka en vat a, a lungngai hmel pawh ka hmuh hmaih lo nasa. 

"Khatiang khan awm lo teh nu, palâi an lo kal chauh a nih khâ" tih leh a lam pan ka rual a, min en chung hian a nui sak a, inhmu tawh lo tur angah a inngai nghal ringawtin ka hria.

"I mu teh ang u, naktuk thawh hma te kan ngaih kha!" ka pa chuan a rawn ti hlauh a, tlêmin ka nu hmel pawh a pangngai leh ta deuh! 

Ka mut dâwn tê ah u Hruaia nen kan inbe leh a, palâi lo kal te thu rawn neih dan min zâwh chuan sawi tur ka hre lo nasa mai. Thil dang ka sawipui daih a, inneih lam bak a rilru ah a lang thei chuang lo. Kan inneih huna kan awm dan tur te, kan zinna hmun tur te, min duat hle a tum thu te a sawi ve lûam a, min neih a phur tawh tak zetin ka hria. 

Ka duh ang ngeiin M.A ka zir chhûng zawng min nghak tawh a, kan exam result la chhuak chiah lo mah se M.A zir zo tawh ang chu ka ni mai a, tunah chuan a duh dan ka zahsak ve tawh ang. Kan result chhuah hun nghak khawtlai tawh lova inneih a duh a, kan innei mai a ni ang chu! 

Palâite an lo kal nawn leh zan chuan u Hruaia nena kan inkâr chungchâng sawiin engkim an rêl fel ta, kan innei dâwn chiang ta e! Adeline-i paw'n min lawmpui ve hle a, kan chhungkaw mo a nih hnu hian kan inzawmna a nghet lehzual a, tunah chuan pianpui unau ang tak takin ka en tawh a, kan inṭhian ṭhatna pawh a bo chuang lo; a nghet telh telh zâwk!

Thla tawp lama innei mai tawh tur kan nih avangin a hnai nghal kuarhin ka hria, thla thar pawh nghak zo lovin min neih a duh tawh chu a ni si a, eng pawh ni se, a ṭha vek tho e! Ka mipa hmangaih nen alawm kan inneih dâwn, buaina leh harsatna engmah awm lo se a ṭha a ni mai.

Adeline ber chu a phur leh ta, ka kal dan tur te, hmel hlim taka awm dan tur te, inchei dan tur te, lawiṭhat zana ka awm dan tur nen lam min hrilh mawlh mawlh a, mi dang hriat ve chî pawh va ni suh! Zan rei tak tak thleng ka room-ah kan titi ṭhin a, u Rosangan mut a lo duh tawh ṭhin bawk si, an inpawm phei tawp châng pawh a tam narawh e! 

Tin, Adeline-i chhûngte nen pawh kan inlén pawh fô va, vêng khata awm kan nih avang hian inhmuh leh inkal pawh hi a harsa hran lo va, u Rosange leh Adeline-i pawh chaw an ei chhuak zeuh zeuh ṭhin nghe nghe.

Ṭum khat u Rosanga whatsapp status chuan min tinui nasa ngei mai! Hmeichhe thawmhnaw inthlep fel thlap leh inrem thlap thlalak tam deuh hi a hmang mawlh mawlh a, a tawp berah chuan 'nupui te'n status tur an tih chuan status tur a ni mai' tih hi a hmang tel bawk a, tun hnai hian Adeline-in thawmhnaw a zuar ṭhin a, a zawrh dan hi social media kaltlangin a ni ber a, an lo in-status-tir ni ngei tur a ni. 

Thawhlehnî a ni a, man hlan nî a nih avangin u Rosanga paw'n office a kal lo va, Adeline-i pawh mo ṭhian tur a nih ang ngeiin a inchei mawi ve hle a, chutiang bawkin u Hruaia leh a ṭhianpa pawh an inthuam zahawm dun hle. 

Chawhnu her a nih meuh chuan ka man pawh tih fel a ni tawh a, lei fel ka ni ta! Lungngaihna leh hlim lohnain hmun an chang tawh lo va, naktuk maia u Hruaia nupui ka ni ve tawh tur chu ka hlim tak zet bawk.

A tawp a tawpah chuan u Hruaia nena kan inneih nî pawh a rawn inher chhuak ta nge nge a, zing kâr phat aṭangin Adeline-in min buaipui a, kan inchei fel vek hnuah u Rosangan u Hruaia te vêng biak in lamah min phur phei a, phurawmin hlimawm viau mah se biak in kan hnaih telh telh tâkah chuan ka zâm ru veng veng a, ka awm dana tih lan en rawh ka tum hulhûal thung.

Minute tam a liam a, 'tiam tlat e' tiin u Hruaia nen chuan kohhran mipui hmâah leh pastor hmâah thu kan chham ve ve ta, Pathian hriatpuina ngeia nupa kan han ni ta mai chu ropui ka ti a, ka hlimna chuan a vawrtawp a tawng pha hial te'n ka hria. Biak in kawtah thlalakna hun kan hmang leh a, inkhawm kan ṭhahnem bawk nen kalna tur pawh a awm ṭha hlei thei meuh lo.

Thlalakna hun kan hman zawh meuh chuan ka chau deuh râwihin ka hria, mahse ka bulah u Hruaia a awm reng a, min ngaihtuahna awkâ leh min ngaihven tih hriat zeta a che chu hmuh nuam ka ti a, ka hlim lutuk vang nge pawh ka hre lo, ka hnuk a ulh dâwn ringawt bawk. 

Kan pûal bikin inneih ruai min lo dah hransak thlap a, u Rosanga pawh u Hruaia ṭhianpa a thik deuh tlat avangin kan bulah a ei ve ta ringawt a, Adeline-i lah a zak deuh bawk si, mi dang awm laia zilh ngam chiah bawk si lo ang hian a awm a, u Hruaia ṭhianpa chu a nuih a za vur vur teh e! 

A thu hrimah u Rosanga reng reng pawh a nupui a ni tawh a, mipa dang nen awm pawh ni se thik chî pawh a ni lo, ti àwm ang lo leh lutuk mai. Mi dang hmuh loh laiin keimah zâwkin ka zilh ta hlak hlak a, engah mah a la ngai lo zui, kan kalna hmun apiangah min zui zel a ni ber a, ka pa paw'n a ko pêng hlei thei lo.

U Hruaia te ina mo lawm luhna hun kan hman zawh hnu chuan thla lá turin kan inkhalh chhuak zui nghal a, u Rosanga bawk chu a buaithlak leh tawh! A kip a kawiin min zui zel a, han zilh lah hian mi a chhâng lêt ngai lo ná chu a awm ngaiin a awm reng thung a, thla làtu pakhat paw'n Adeline-i nen thla a lâk dunsak ta ringawt a, u Hruaia ṭhianpa lo felin lo hawihhawm hlauh lo phei se chu sawi zui kan hlawh viau ang ka ring.

"I chau em?" ka pasal chu mit lá sawn lêk lo hian ka en reng a, a nui hmel te, a mitmeng te, a engkim chu a va'n ṭha chiang êm. 

"Min en reng dâwn nge ka zawhna i chhâng dâwn?" nui suk hian a ti leh a, ka nuih lêt ve ta sak! 

"Chau hran lo ve" ka ti dam diai a, ka bula a rawn ṭhut rual chuan ka lo khan nghal chial bawk. 

"Nupa chu kan ni ve ta mai si a, i hlim em?" tih leh ka chala rawn fawh zeuh a rual a, kan awm dan chu a nuam thlawt a ni. 

"Hlim lutuk, ka nuna ka la hlim ber ṭum a ni ang, ka hlimna hi a zual zel ka ring bawk" ka tih chuan thlamuanawm zet hian a nui nghawr dat a, zan a rei lam tawh bawk nen kan inbe thawm tih loh chu thawm ri va hriat tur a tlêm hle.

Ngawi reng hian kan nupa khumah chuan min nem mû riai riai a, kan tih tur pawh kan hre chiang dun hle bawk. A mi fawhna te, a mi sawngbawlna te, a mi khawihna engkim chu ka tân chuan khawvela thil dawnsawn ninawm loh ber a ni a, hmangaihna nena nupa nun min hmanpui lai te chuan van sâng taka lêng dun delh delh ang mai hian ka inngai a, kan khawvel hman dun mêk chu a lungàwithlak hliah hliah a ni.

A tuk aṭang chuan pasalte ina mo dik tak ang ka ni ve ta, ka chhungkaw thar te chu ka lakah an fel siam siam hlawm hle a, a tak ngeia han chenpui tâkah chuan beisei phâk bakin an fel a, an bula awm a nuam tak zet bawk. U Hruaia ṭhiante'n kan nupain chaw eiah min sâwm deuh nûal a, a zawng zawngah erawh kan ei ta lo mai.

A ni telin ka nun dan chu a danglam tial tial a, puitlin kawng ka zawh mêk ni maiin ka hria. Ka nulat laia ka hriat loh thil chinchâng tam tak ka hriat belh a, ka nu paw'n phone kaltlangin min rawn be deuh reng zel a, ka chhungkaw thar te hmuhmawh zawngin ka khawsa palh ang tih a hlau a ni ber.

Thla khat hnuah kan exam result a chhuak a, ka lo pass ve hlauh a, a nihna takah chuan ka pass ṭha viau zâwk a ni. Ka pass chu kan lawm nghe nghe a, kan lawm zan chuan ka chhûngte an zavaiin an lo phei a, thilpek chi hrang hrang ka dawng neuh neuh a, min pe ṭha hlawm ve leh nghal. 

Pathian malsawmna avang liau liauin kan inneih aṭanga thla hnih hnu maiah nau ka pai a, u Hruaia ka hrilh hmasa ber a, ka rai thu a hriat rual rualin School aṭang a rawn tlan haw nghal thuai a, a thil sawi hmasak ber chu 'ka lawm e' tih leh 'ka hmangaih che' tih a ni a, kei tak pawh ka lawm hle. 

Nupa han nih tâkah chuan kan inngaihzawn lai ai lêt khan kan inhre chiang tulh tulh a, ani ang mipa hi ka lo tawng lo ang tih ka hlau zâwk! Kawng engkimah min ngaihtuah a, phâi lama a zin dâwn paw'n min hruai tum châng a ngah a, thil mawi nia ka hriat loh avangin vawi tam chu ka hnial ṭhin a, mahse a zawng zawng chu a ni bik lo, zui châng ka ngah ve mai.

Ka pum chhûnga nautêin thla 7 hmel a hmuh thlaah Adeline-i rai thu kan hre ve leh a, u Hruaia ka neih hnu hian hlimna hlirin min um  zui zel ni berin ka hria. Ka pum a puar len deuh tâkah chuan chet kawngah Hannah-in min awl hneh thei hle a, inthlahrun lek lêk châng pawh ka ngah ṭhin, mahse mi rilru zau leh mi fel tak an ni hlawm a, an bulah hi chuan sual tak pawh an sual rei theih ka ring lo.

Thla tin doctor bulah in-check up-in kan kal ziah a, nau pai laia ei tur ka ei hmaih ngai lo va, puih ka ngaihna laia min pui turin ka kiangah ka pasal a awm reng ṭhin bawk. Thil ka sawi melh melh lai te hian hmangaihna mita min en chungin a lo ngaithla ran ṭhin a, ka rai avanga ka rilru a hah deuh châng leh ka inthunun hman loh châng paw'n thinrim a hnêkin min dawhthei em em zâwk a, min kuah tawh hi chuan ka hahna leh ka ipikna zawng zawng a bo duak ṭhin bawk.

Pathian zârah harsatna leh buaina tâwk miah lovin nautê neih thla kan chûang kâi leh ta der a, kâr leh maia nei tawh tur ka ni nghe nghe a, mahse beisei loh lam daih thil a thleng thung. Kan nupa room-a kan awm laiin ka pum a rawn nâ riai riai a, u Hruaia chuan camera a siam ṭha mêk a, ka pum nâ chu a reh ve leh nghal mai ka rin avangin hrilh pawh ka hrilh hran lo. 

Amaherawhchu, ka tui bawm a rawn keh leh ta zel a, u Hruaia pawh ka ko ta nge nge. Min buaipui nghal sawk sawk a, a chet dan leh a rilru erawh a buai chuang miah lo. Ka nu leh pate hrilhin damdawi in lam min panpui nghal zung zung a, ka pum pawh a rawn nâ telh telh a, a chang leh a reh duak a, a chang leh a rawn nâ em em leh lawi a, ka thaw pawh a sâ ṭha hat hat tawh hle.

Minute tam fê Doctor te'n min buaipuia min fuih tlauh tlauh hnu chuan fa ka hring ta nge nge a, fapa ka hring chhuak nghe nghe a, ka chau lutuk chu nautê lam engmah ka ngaihtuah thei rih lo. Ka mu tawp a, ka mitmeng pawh a dul raih a, ka taksa a khamin a nâ deuh ṭhum bawk.

Tlêma ka harh chian hnu chuan ka fapa chu ka ngaihven thuai a, ka hmai bul chêtah ka pawm a, a va'n hmelṭha tehreng êm! Rei lo tê hnuah mi dangho pawh an lo lut ta sap sap a, u Hruaia chu ka bul chêtah ṭhuin ka chalah a rawn fawp zeuh a, hmel hlim zet hian a fapa chu a en vung vung a, a hmelah a lawm tih hmuh hmaih rual a ni lo va, kan chhûngte pawh chuan min lawmpui hlawm hle.

Damdawi ina dârkâr eng emaw chen kan awm hnu chuan kan inphur haw ve ta nge nge a, ka hlim viau nà chu a rukin ka la chau viau a, ka awm dan aṭangin ka pasal chuan a lo hrethiam vek bawk. Ka bulah a awm deuh chawt a, mi dangin kan fapa an pawm laih laih lai paw'n ani chu ka bulah a awm reng a, ka thla a timuangin ka hah pawh a tidam khawp mai.

A ni telin kan fapa chuan hma a sawn ve zel a, a meng fiah bawk si, a pa chiah chiah hi a ni mai. A pa lah chu a hna lamah pawh a kal thei ngai meuh lo, a châng leh hruai te a tum thul, phal ngat ila zawng a hna thawhna hmunah a hruai duh tak tak ang ka ring. A lo haw apiangin kei leh kan fapa min pan hmasa ber zel a, kan fapa paw'n a hre hrang ve tawh viau bawk. 

"Het het het, ṭah loh tur le! Anu kha a hman lo alawm, a hman veleh anu khan a pawm ang che aw" ti dam dap dapin u Hruaia chuan kan fapa, thla hnihna hmang ve mêk tawh chu a awi hliau hliau a, hneh zeta pawm chung hian a suk pui delh delh a, kan fapa pawh a la ṭap lo hram hram e! 

"Ka zo ṭep a nia, lo pawm lawk mai teh" hmanhmawh thei ang berin thleng chu ka sil zung zung a, tukin bik chu ka indaih lo khawp mai.

"Ka hman e" ka sil zawh rual rualin an awmna lam ka pan nghal a, u Hruaia pawh chuan kan fapa chu min lo hlan ve mai bawk. 

"Ka fapa hmelṭha em em pa, anu hnutê tui hi hne rawh aw" tih leh ka kawr hlim ka rual a, ka bula mi chuan

"A pa a chhun miau a, a hmelṭha lo thei lo" a lo ti dut a, ka hmui ka tihsawih khum nasa teh e! 

"Ka kal mai dâwn asin, ka lo haw hmâ ang" a rawn tih chuan

"Hmmm....i lo haw hmâ lo ngai hleinem" ka lo ti khauh a, min din hnaih nghal sawt bawk. 

"Kan fapa hi i thik chiang" tih leh ka khabea rawn chawi a rual a, thle sawn vat pah hian

"Awi, a teuh lo mai a!" ka ti niah niah a, ani erawh a nui ta hawk hawk!

"Ka rilru i hre chiang alawm Nunu, kan fapa êm chu thik lo teh" a rawn ti nawn leh ngat a, dik tak chuan ka thik chiang alawm, eng nge a chhan pawh ka hre lo.

"Ka thik bawk lo" ka la ti hram a, thik anga lan ka hlau a ni ber. 

"Min en teh" tih leh ka hmuia rawn fawh a rual nghal zat a, rei ni lo mah se dawnsawn a nuam vawng vawng hle.

"Min lo ngai lutuk lo la" a nui sun sun a, kei pawh ka nui ve leh ta nge nge. 

"Vawiin hi ka pa birthday a nih kha aw, lo sawi miah suh, eng emaw tihsak ka tum a nia" a rawn tih leh chuan ka lo bu nghauh nghauh a, a pa nena an inkâr ṭha tawh lutuk te hi ka hlimna tizualtu pakhat a va ni chiang êm.

A sawi ang ngeiin tlaiah chuan a lo haw hma a, kan zavaiin kan lo awm kim ṭhap a, ka nu leh Hannah-i chuan zana ka pa birthday kan lawm dan tur an sawi melh melh a, a chângin min rawn râwn der ve leh zauh ṭhin bawk. Nautê paw muhil pahin ei rawng ka bâwl a, mi dang erawh sitting room-ah an ṭhu ṭhap thung. 

Kan nupa room aṭangin u Hruaia chu a rawn chhuak a, a kutah chuan bâwm kil lî nei chî, lian lutuk lo hi a hum ran a, pa Dinga ṭhutna lam chu a pan hnai zel a, choka aṭangin ka lo thlir deuh tlawng ringawt. Engmah sawi chuang lo hian a bâwm ken chu a pe a, pa Dinga chuan en chho deuh hû chung hian a lo lá ve mai bawk. 

"Piancham chibai le" u Hruaia chuan a ti sup a, pa Dinga hmela mak tihna lang chu hmuh hmaih theih pawh a ni lo. 

"Ka lawm e" tih leh pa Dinga chuan bâwm chu hawn a rual a, sana mawi leh man to hmel zet hi a lo ni a, ngawi reng hian pa Dinga chuan a thlek vung vung a, a hnuah phei chuan a indawm kun ta daih nghe nghe. 

"I hnen aṭang hian hetiang thilpek dawng tlâk pawh hi ka ni lo asin" ti hniam chhalin pa Dinga chuan a hmai a hup a, kun ngul chung hian a lû chu a thing dat dat zui nghal bawk.

"Hun kal tawh chu hun kal tawh alawm a nih ka pa, inthiam lo reng renga hun hmang lovin hlim deuhin i awm tawh zâwk ang u" tiin u Hruaia chuan a pa chu a kuah a, hmuh an nuam tak zet!

Birthday present an inpêk fel hnu chuan u Hruaia chu kan awmna lamah a lo phei ve leh nghal a, ka lo nuih sen sen a, ani pawh a hlim tih hai rual a ni lo. 

"Khawi, ka lo puak chhawk ang che" ti dam dapin kan fapa chu a pawm zui nghal zat a, a hma thlak zawnga puak a tum lai chuan keiin a nghawngah puakpuan ka lo suih mial mial a, a'n paw fel chiah chu kan fapa pawh a lang tê nghal kâwkin ka hria. 

"Vawi tam tak hmangaih ngai dâwn che pawh ni ila ka hmangaih kumkhua ang tho che" ti rilru rauh ruah pahin an pafa chuan ka en vawng vawng a, u Hruaia nen kan mit a intawn tâkah chuan chhungril hlimnaa khatin ka hawi sawn ve ta hram.

The End