DUHTHUSAM (Mizo Novel) By Havali Adam

DUHTHUSAM

By

Havali Adam

April 2022

Chapter 1

Thli thaw thaw seng seng han dawn reng tâkah chuan vawt ka ti ru ta hle a, ka bula ding ngawi reng erawh chuan vawt a tih ve hmel vak lo thung. Chhoh en var var ngai khawpin kei ai a sang a, pian leh tihrawlah pawh kan inlen hleih khawp mai.

Vawt a ti lutuk lo tih hriat takin kawr atan T-Shirt nghawng nei chauh a ha a, kekawr atan Cotton Jean a ha bawk. Gym kal ṭhang tih takah a kawr ban te chu a tawn mar ṭang a, a tan chuan a tê mah mah emaw tih theih tur a ni. A banah Water Proof Sana a bun a, changkang hran lo mahse amah nen chuan a inhmeh ka ti tho.

Kan awmna hmun chu a reh ruih a, kawngpui bul maiah kan ding bawk. Arsi chu a phe tûar a, chung thil mawi leh ropui siamtu Pathian chu nih ka châk rum rum. Ni thei ngat ila chuan ka hun kal tawha ka awm dan zawng zawng ka siam ṭha ang a, rilru hahna nei miah lovin ka nung ngei ang, mahse chu zawng thil theih a ni si lo.

"U Billy, engtin nge kan tih dawn?" rilru mumal lo zet chuan ka ti a, dik tak chuan rilru mumal thei pawh ka ni lo.

"Ka hre bik chiah lo, mahse ngaihtuah chian vat chu a ngai ang" a ngawih vang vang hnu chuan a rawn ti ve ta.

"Ka chhungte ka hrilh ngam miah lo a nia aw, tun tut tutah hre chhuak nghal dawn lo mah se an hre chhuak thuai ang" ka tih leh chuan min lo en zawk a, rei ni lo mah se a mitmeng aṭang chuan a rilru a buai ru ve hle tih ka hre thei.

"Dem thei che ka ni lo tih ka hria, keima thiam loh a ni" a thu rawn sawi daih daih avang chuan ka en ta hâw a, enge a sawi tum tak ka hre lo.

"Mipa hrisel ṭha tan chuan insum theih kha a har em a, ka insum zo lo ta reng a ni" a tih zawm leh zat a, chutah erawh Sex kan lo hman dun tawh chungchang a sawi tih ka hrethiam chiah.

Ka kuta rawn vuanin kawngpui sir lam chu min pan pui a, a motor hunna hmun kan thlen rualin min ṭhut luh tir zui nghal bawk. Inbe miah lovin Aizawl khawpui chhungah chuan kan tlan lut a, ka tih tur hre lo chuan ka pum chu ka chul neuh neuh a, inbe lova awm reng chu a hrehawm ru thlawt a ni.

"Enge!? Enge kan tih dawn? Engati nge hetah hian kan din?" kan inkawta kan din rual chuan ka ti chhuak nghal thuai.

"Nupuiah ka nei dawn che maw le, chu chu ka tih theih awmchhun a ni" a rawn ti ta mai, lawm tur nge lawm loh tur pawh ka hre lo.

"Maw? I chhungte paw'n kan inngaizawng tih an la hre miah lo va, chutiang bawkin ka chhungte paw'n an hre bik lo" 

"An hre chawp mai dawn alawm"

"I chhungte'n min lo duh lo ta se" zam ru tak chuan ka ti a, a chhungte hmel chu vawi khat pawh ka la hmu lo.

"Ka chhungte'n an duh leh duh loh che a pawimawh ber hleinem, chhuk ang le" tiin motor aṭang chuan a chhuk nghal tharh a, rilru nuam chiah lovin ka chhuk ve ta ringawt.

"Kan tih tur hi a dik ber ang maw u Billy? Kei chu a rang teh thut ka ti, ka rai thute hi hre ve phawt se" ka tih chuan

"A hun tak zawk a ni e, i tih tur zawng chu min rin a ni mai" a rawn ti sup a, ka kut chu chelhin kan in lam min pan pui zui ta nghal.

Kawngka bul kan thlen chuan u Billy-a chu ka pawt ding leh rih a, zep lovah chuan ka chhungte hmai chu ka zah tak zet a ni. Ka rai thu leh u Billy-a nen kan inngaihzawn thu hrilh ta ila engtin chiah nge min lo tih ang? Ni lo, anni chuan ngaihzawng ka neih thu pawh an hre tawp nâng. Tunah lah ngaihzawng ka neih leh neih loh pawh hre lovin ka rai thu an hre nghal pawp dawn a ni a, ka tan chuan an hmel hmuh zah loh ngaihna a awm lo.

"Zaninah chuan hrilh rih lo mai ila, ka zam tak zet a ni" ka ti ta thlawt a, ka lam hawi zawngin ani pawh chu a rawn inher ve leh nghal. 

"Zanin hian hrilh a fuh ber ka lo ti asin, naupang chhia pawh kan nih tawh lo hî" a tih chuan kan in kawt lamah ka kai phei leh hnuhnawh a, kan tih turah chuan inlungrual hmasa phawt ila ka duh a ni.

"U Billy, ka tana a nawm loh tur zia hi i hre miah lo em ni?" ka tih chuan a ngawi reng a, ka en chian ang bawkin min en chiang ve hle bawk.

"Zanin hian engkim chin fel a ṭha ber zawk alawm, nakina kan hma chhawn tur tho a ni a, kei chuan zanin ngeia kan chhungte hrilh hi ka duh a ni" a rawn ti nghet ta charh mai.

"A va'n buaithlak tak, engmah lah hi min hriatthiampui loh hmel bawk si. Hmeichhia phei chu kan mualpho hma tih i hre vek alawm, veng chhungah ka thang luai luai dawn asin"

"Eng pawh ni se zaninah hian kan chhungte kan hrilh ngei tur a ni. Ka tan pawh a zahthlak ve tho alawm, ka mualpho ve dawn tho" a tih chuan rang zet hian

"Mipa leh hmeichhia kan inang lo, kan mualpho dan pawh a inang lo, engtikah mah kan inang ngai bawk lo vang. Nangmah ngeiin i sawi khâ, nikum maiah a ni kha i sawi" ka ti thuai a, thawk a la ri ve leh ta hawk.

"Engati nge Sex kha kan lo hman kher le, ka rai dawn tih hria ila chuan ka hnar ngei ang che" ka tih leh sep a, a meng rum ṭha khawp mai.

"Ka fa chu i pai duh lo tihna em ni? Han sawi teh, ka laka i rilru puthmang dik tak leh naute chungchanga i rilru dik tak hi sawi rawh" a aw chu a ram hmarh a, kei erawh ka ngawi reng thung.

"RAMENGMAWI" a tih vin ṭhawt chuan amah chu ka en thuai a, a hmel aṭang chuan kut min thlak duh hial ka ring. 

"I fa ka pai duh lo ka tih miah lo khâ u Billy, kan awmna aṭang hian kal sawn ila, hmun dangah sawi ṭha zawk teh ang. Heti lai hi chu a ualau em mai, ka chhungte paw'n kan ṭawng thawm an lo hre palh ang"

Ka ṭawng zawh rualin a motor lam min panpui hmawk hmawk a, a thin tirim zawnga sawi ka tum miah lo, ka rilrua awm ka sawi mai chauh a ni. Ani erawh ka thusawi avanga thinrim tih hriat takin a hmel leh a awm dan chu a danglam nghal vek a, motor a khalh lai te chuan biak leh ngam hi a ni tawh lo.

Zan rei tak a la nih loh avangin motor tlan pawh an la tam ang reng hle a, Zemabawk kan thlen chuan a ding ta chauh. Kawng reh leh thim deuh lai takah chuan a tiding a, motor la rum ri vut vut chu off in a chhuak zui nghal. Motor aṭang chuan ka chhuak ve mai bawk a, mahse va biak dan tur leh thil sawi ṭan dan tur chu ka hre lo hle a ni. 

A bulah chuan ka ding ngawi reng a, Aizawl khawpui eng de sep sep chu kan en dun tlawk tlawk hi a ni ber. A ṭawng duh bawk si lo, kei lah chuan han sawi mai dan tur ka hre bik bawk si lo, kan boruak chu a ṭang ṭha ngei mai. A kerkawr ipte chu a zen tlat a, a bulah ka ding ve reng tawh tih hre mah se ka lam a lo hawi lo hrim hrim.

"U Billy" inthlahrung aw zet chuan ka ti chhuak sep a, chutah erawh ka lam chu a lo hawi rang hle thung.

"Eng lo....ngawi reng lo ila, sawi fel ila" mawlmang zet chuan ka ti leh tawp a, mipa a nih angin thu bul ṭan zawk se ka duh a ni. 

"Ka fa i lo pai duh lo tih hi ka hre miah lo Rameng" a aw chu pangai ang deuhin ri chhuak mah se a la khauh ru hrak thung. 

"Ni lo u Billy, i fa ka pai duh lo a ni hauh lo, thil i hre sual zawk a nih khâ" ka tih pawh chuan min la melh run a, ka awm chu nuam lo zual tak a ni.

"Dik tak chuan i Student hlui ka ni a, Student hluiah pawh a thar lam ber te zinga mi ka ni a, ka tan chuan thil thleng hi ngaihtuah thiam a har alawm" ka ti leh ta ringawt. 

"Hmanni lawkah ka Graduate a, hna te neih ve phawt ka duh a, mahse nangmah ka duh loh vang che leh i fa pai ka duh loh vang a ni lo" ani ṭawng tum lo mah se kei tal chu ka ṭawng ngei a ngai bawk si.

"Sex kan hman dun lai kha chuan hrehawm tihna i nei miah lo, chutiang bawkin kei paw'n hrehawm tihna ka nei lo. Tuna taka ka fa pai duh lo ang zia zânga i ṭawng erawh ka lung a ni lo khawp mai, pasal atan min iai em ni?" 

"Khati ang zawng khan ngai ziah suh u Billy, ka rilru ni lo pui angin min chhuah suh" ka lo ti thuai a, a ṭawng ve chhunah pawh ka rilru tina zawnga a ṭawng kher chu hrehawm ka tih zual phah. 

"I duh chuan i titla thei ang, mahse ka rilru erawh i tina khawp mai" a rawn tih leh chuan ka  buai vek, naute tih tlak chu ka duh reng reng lo. 

"U Billy!!!" ring zetin ka ti tûarh a, ka ṭah chu a chhuak et et tawh, ka mipa duh leh vei em emin a fa titla tura min ti ta mai chu dawnsawn a har a ni.

"Engati nge!? Engati nge ka thusawi i lak kawih tlat? Kan zirtirtu i ni a, ka ngaisangin ka zah em em che a, ka dinhmun hi min hriatthiam puia ka thusawi awmzia te kha i hriat ka ring asin" tiin ka en ran a, ka aw chu a khur ru der der bawk.

"Aw le, i thu ang chuan naute chu ka titla ang. Min lo ngaihtuah tawh miah suh, min lo ngaihtuah tawh lo tak tak ang che" tiin ka kal sawn a, mahse ka thleng thui lo hle. 

"Min thlah rawh" ka tih pawh chuan ka hnung lam aṭang min kuah bet tlat a, a palianin a chak bawk sia ka tal ve na te chuan awmzia a nei lo tluk a ni. 

"Min thlah rawh u Billy" ka ṭawng zo chiah chu ka ṭap chhuak ta hawk a, ka hmui pawh ka hup zui nghal thuai bawk.

"Ka tihpalh Rameng" ti supin a lam hawi zawng chuan min kuai her a, ka ṭah lah chu a la rawn chhuak em em zui. 

"Ka nupui nih i hreh tlatin ka hria alawm, ka rilru chapona ka khap dai hman lo a ni e" tiin a âwmah chuan min kuah bet a, ka ṭap chhuak leh ta nge nge. 

"Kan in lamah kal ang aw, ka chhungte pawh hmu ve reng reng la a ṭha ang" kan ngawih vang vang hnu chuan a ti dam dap a, a taksa aṭang chuan ka awm sawn ta thuai. 

"Hlauthawng suh, nangmah ka ngaihtuah vang zawk chein engkim hi ka ti dawn a ni. I pasal ka ni ang a, ka chawm vek ang che" a tih leh chuan hmun dang ka hawi a, ka tisual ang tih chu ka hlau a ni. 

"Hmeichhia chu pasal kan neih fuh loh vaih chuan kan nun zawng zawng a chhe vek dawn asin, mipa erawh ngaihzawng nei leh mah ula tûma'n an sel rei peih tak tak ngai lo che u"

"I tan pasal ṭha tak ka ni dawn alawm, kan fa lo piang tur leh nangmah hi ṭha takin ka enkawl ang che u" a tih chuan

"Naute titla turin min tih zawh chiah khâ" ka lo ti hmak a, thawk la ri hawkin ka biang chu a kut pahnih chuan a dawm zui nghal bawk.

"Kha chu ka tihpalh a nih khâ, ka sawi zawh rual khan ka ṭawng sual tih ka inhre nghal alawm, min hrethiam dawn nia" 

"Ka rilru i tina hman hle asin u Billy, naute titla turin min ti tawh miah suh. Lo inṭhen ta pawh ni ila titlak ka tum chuang lo, tual thah ka duh lo a ni" ka tih chuan a ngawi leh ta reng. 

"Kal ila, i chhungte min inhmelhriat tir dawn chuan kan kal thuai thuai a fuh ang. Ka thinlung leh tih tak zeta ka duh ve miau tawh che avangin i chungah ka rinna ka nghat dawn a, min phatsan zawng emaw ka rilru tina zawnga i awm loh hram ka beisei" ka tih leh chuan

"Ka phatsan ngai hauh lo vang che" tiin ka hmuiah chuan a fawp vawng vawng a, kham loh hmel zetin a awm sawn thei hram.

Khawpui chhunga kan tlan luh leh hnu chuan ka rilru pawh a pangai ta deuh a, kei aia lung fing zawk leh upa zawk a nih avangin u Billy-a ngaih dan chu ka ṭawmpui mai a ngai ta niin ka hria a ni. Kawng sira Momo leh Arsa bawp hem hmin thar zuar awmna bulah chuan min dinpui a, chungho chu ka ei atan tiin a lei ṭeuh a, hnial nasa hle mah ila awmzia a awm lo. 

An veng kan thlen chuan zan dar 8 leh a chanve vel a ni tawh a, a chhungte ka vawi khat hmuhna tur a ni bawk sia ka zam ru ve tak zet a ni. Ka kut chu a chelh reng a, an in chhung kan luh chuan hmuh tur an lo awm mai lo. An awmpui pakhat hian min lo chhawnchhaih vat a, u Billy-a chuan a chhungte awmna chu a zawt a, an awmpui chuan room-a an awm a rin thu leh a koh nghal tur thu a sawi nghal bawk.

Sitting room-a Sofa-ah chuan min ṭhutpui a, ka kut chu a la vuan reng a, hlauthawng lo tur te chuan min hrilh ve mah se ka hlauthawng ru em em tho. A chhungte chuan min duh lo nasa viau ang tih ka hlau, kan kum lah chu a inthlau nasa mai ropui bawk si. Chutah kei chu Graduate hlim hlawl ka ni a, a chhungte chuan mo ṭha tak ka nih an beisei hauh lo vang. 

Minute 2 hnu velah u Billy-a nu leh pate ni awm tak chu room pakhat aṭang hian an lo chhuak a, in chung lam aṭang hmeichhe hmel changkang zet pakhat hi a lo chhuk bawk. Sitting room-a kan ṭhut ṭhap hnu chuan zam tak ka ni, engkim lah chu a thleng mek bawk si, a rei lo thei ang ber chu ina awm chu ka duh hle a ni. 

"Ka nu, ka pa, hei hi Ramengi a nia, chuan ka bialnu a ni bawk" u Billy-a chuan tlang tak hian a ti a, ka lo zak ru chem chem. 

"A ni mâw, ngaihzawng nghet te i lo nei ve reng a ni mâw, engtik aṭang khan nge in inngaihzawn a?" a nu zawk chuan a lo ti a, u Billy-a pawh chuan

"Thla 3 liam ta aṭang khan kan inkawp chho ve a, chuan thil eng emaw sawipui che u ka duh a" a lo ti ve nghal a, u Billy pa chu a rawn ṭhu ngil nghal zawt.

"Nupui neih lam han ni hram teh se, kum 40 i kai tawh mai dawn Billy" a pa chuan a rawn ti phawng a, ka bula mi chu a nui suk ringawt. 

"I duhthusam ang ngei a ni ka pa, kei hian ka bialnu ni lai mek Ramengi hi nupuia neih ka tum a ni" a tih chuan a pa bawk chuan phur hmel zet hian

"Aw, a va ṭha dawn em. Tunah chuan ṭhenawm khawvengte paw'n an sâwi an sawi tawh dawn bik lo che a nih hmel" a rawn ti a, a nui zui nghal huah huah bawk. 

"Nupui i neih tur thu hriat chu a lawmawm rualin in va tirang teh thut ve Billy, thla 3 chhung lek han inngaihzawn chu a rei lo mah mah lo maw" a nu chuan a rawn ti ve leh ta. 

"Chutak chu a nia ka sawipui duh che u, tunah hian Ramengi hian ka fa a pai mek" u Billy-a chuan a ti a, a kut chu ka hmer na sawt hle. 

"Enga!? In che sual tawh maw!? A va zia lo ve le, dan khatna ngeiin nupui i neih ka lo ring asin Billy" a nu ṭawngkamah chuan min duh chiah lohna aw ri ka hre thei. 

"Zanin hian Ramengi chhungte lam pawh kan hrilh ve nghal dawn a, kan inah kan lo kal hmasa zawk a nih hi!" u Billy-a chuan engthawl hmel zet hian a ti a, kan sira hmeichhe lo ṭhu erawh a la ṭawng ve lo hrim hrim. 

"Tunah hian naute chu thla eng zat nge a nih tawh?" a nu chuan min lo en reng a, zam lutuk avangin ka aw chu ka thian kharh kharh ringawt.

"Thla 1 a ni vel chiah chiah, ka hriatna pawh a la rei bik lo" ka tih chuan a lo bu zeuh a, min en leh tawh lovin ka bula mi chu a en leh ta zawk. 

"Sawi rem vat in ngai a nih ber chu, hmanhmawh ila kan tifuh zawk ngei ang" a pa ve thung chuan a rawn ti a, min duh lohna sawi miah lo mah se nuam ka la ti tak tak thei lo. 

"Chu chu kan pahnih duh dan pawh a ni alawm, Ramengi te in lamah hian kan va phei ve phawt ang e" tiin u Billy-a chuan min thawhpui a, ngawih reng loh chu tih tur vak ka hre lo.

"Pekte, i u nupui tur chungchang hi i sawi ve dawn miah lo em ni?" u Billy-a pa chuan a ti a, u Billy-a nau Pektei, hmel changkang zet lam chu kan hawi ta ṭhap. 

"A nuapang mah mah lo maw Mam, nau pai tawh mah se han inzui leh deuh ula ka ti, in rilru dik tak pawh in hre chiang leh zual ngei ang" u Billy-a nau chuan a rawn ti ta kauh mai, ka zak ru chem chem. 

"Thla 3 chhung inzui pawh hi ka tan chuan a tawk viau e, kan pahnih hian nupa ni tur khawpin kan inngainatawn tawh alawm Pekte" pangai takin u Billy-a chuan a ti a, a nau erawh a hawi sawn hmak thung. 

Thil dang sawi leh tawh lovin u Billy-a chuan min kai chhuak a, kan in lama kan tlan lai chuan min en zeuh zeuh a, min biak tum ang deuhin awm ṭhin mah se min be ngai chuang lo. Kan in kawt chu kan thleng a, hreh buai kual vel tawh lovin kei pawh ka chhuk ve nghal mai a, thil pawi thleng tur a thlen vek tawh tho avangin hnung chhawn lova hma chhawn tawp chu kan tih theih awmchhun a ni.

A hma kha chuan ka chhungte laka ka inthlahrun lutuk avangin ka rai thu leh u Billy-a fa ka pai thu chu kan chhungte la hriattir loh ka duh kha a ni a, a awmzia chu hma chhawn lova hnung chhawn kha ka tum a ni ber. Ka duh ang diak khan kaltlang ta ila chuan kan hma hun a pik zual ang a, hun hman nawm ni reng ka nei lo leh zual zawk ngei ang. 

Tunah erawh u Billy-a chhungte lam talin kan inngaihzawn thu leh ka rai thu an hre tawh a, chu ringawt pawh chuan ka rilru ipik lutuk chu a tikiang hret hret thei a ni. A zawng zawng chuan a kiang chuang lo, a chhan chu ka chhungte hma chhawn a la ngai ve tlat. Ka chhungte min ngaih dan tur chu ka suangtuah thiam hauh lo, min hauha min hrawk hrep erawh ka beisei tawp.

"Lo lut rawh" u Billy-a'n kawngka a kik karh karh hnu chuan chhung lam aṭang ka nu aw ngei chuan a lo ti a, keini pawh khawmuang buai lovin kan lut zui nghal.

"Engtê" min hmuh rualin ka nu chuan a lo ti hluai a, ka pa leh ka nau chu a ep chiahah an lo ṭhu ve bawk.

"Nu" ka ti ringawt a, sawi tur dang chu van tak ka ni, ka pa lah chuan min lo la en chiang em em zui.

"Tu nge i ṭhianpa hî Engtê?" hawihawm zet hian ka nu chuan a rawn ti leh a, ka chhan ngai lovin u Billy-a zawk chuan

"Billy-a ka ni e, ka pi" a lo tithuai a, a aw chu a zângkhai ang reng hle bawk.

"Khawi vengah nge i awm Billy?" ka pa chuan a lo ti ve nghal mai a, a kap karah kan naupang ber Amos-a chu a ṭhu mu awn duai a, TV a en tui bawk a ni ang ani chuan min ngaihsak teh chiam lo.

U Billy-a chuan an veng awmna te chu a sawi nghal zung zung a, ka kut lah chu a la thlah duh miah lo leh nghal. A pawi ka ti hran lo, ka kut a vawnna chuan ka zam lutuk tur a tireh zawkin ka hria, engtin emaw ni tak min thlamuan a ni. Ka pa chuan thil chi hrang hrang a zawt a, ka nu erawh min en char char thung a, kei lahin ka lo hmu lo der hmak bawk. 

"Sir Billy!" mak tih hmel zet hian ka u chiah; kan upa ber ni bawk u Thanthani chuan a lo ti a, a room aṭang a lo chhuak chiah a nih hmel.

"Thanthan! Nang maw!?" u Billy-a aw ah pawh chuan mak tihna a lang a, ka u leh u Billy-a chu an inhria tih reng ka lo hre lo. 

"Engtêi ṭhianpa nen hian in inhria em ni Thanthan?" ka nu chuan a lo ti thuai a, u Thanthani chu kan en ta ṭhap.

"Hria e maw le, Sir Billy-a te chu MZU kan kal laia Professor lar alawm a nih, engtin nge Engtêi nen hian in inhriat zawk Sir?" nel hmel deuh hian u Thanthani chuan a ti nghal sawk sawk a, u Billy erawh a aw a thian kharh kharh ringawt.

"Sir Billy-a nen hian in inngaizawng em ni Engtê?" nui ver ver chung hian u Thanthani chuan a rawn ti leh a, pangai lo zetin

"Aw...aw....kan pahnih hian...aw" ka ti deuh mawlh mawlh a, ka kut chu zawimuangin ka pawt chhuak riai riai a, u Billy-a pawh chuan a lo thlah ve mai bawk.

"Awi a va'n mak reuh, in inngaihzawng ang tih reng ka lo ring miah lo. Thingpui ka'n lum ang e aw Sir, lo leng ve reng rawh" u Thanthani chu a che zung zung a, a awm dan chuan kan thil sawi tur chu sawi min tihuphurh zual.

U Thanthani chu choka lamah zai rât rat pahin a che a, a hlim lutuk leh a thawveng lutuk chu ka hrethiam lo. Zan dangah chuti ang chuan a awm ngai lo, tlangvalin an lo rim paw'n thingpui a siam ṭhat peih ngai lo zawk ṭhin kha a ni si a, zanin taka a phur em em chhan chu ka hre hauh lo a ni. Kei chauh ni lo ka nu pawh chuan mak a ti ve deuh chuan ka hria, mahse kei angin a en chik em em hran lo.

Minute 10 hnu velah u Thanthani chu thingpui nen Sitting room lamah chuan a lo phei a, dawhkana thingpui a dah lai chuan ka pa leh u Billy-a chu a lo inbe zeuh zeuh a, an vawi khat inhmuhna a nih ve tho avangin sawi tur erawh an hre lutuk bik lo. Thingpui sa khu rum rum chu kan in a, taksa chhunga ka lem thla duak ang chuan kan thil sawi fel tur chu sawi duak tawh ila ka ti khawp mai.

"Thil sawi duh ka nei a ka pu, chuvanga zanina lo lang hlawl pawh chu ka ni" u Billy-a chuan a ti ta nge nge a, kei chu ka lo zam nghal viau.

"A ni mâw, sawi duh nei hmel kha i putna a rei tawhin ka hre reng a ni" ka pa chuan a lo ti ve sup a, mi dang chu lo ṭawng ve kan tum lo tlang hlawm a ni ang thawm a reh ṭhuap mai.

"Ramengi hian ka fa a pai mek a, ani hi nupuia neih ka duh a ni. Rem in tih chuan a rang lama palai lo tirh pawh ka duh nghal a, zanin khan ka chhungte pawh kan hrilh ve chiah" u Billy-a chuan a ti ta.

"Enga!?" ka nu leh ka u chuan a lo ti rual ṭhawt a, u Billy-a nen chuan min en tawn ta zak zak.

"Engtê, i ṭhianpa thu sawi hi dawt nge thu dik?" ka pa aw chu a khauh hran lo, mahse mak tihna leh lungawi lohna a awm thung. 

"U Billy-a sawi zawh chiah kha thu dik a ni e ka pa, keini paw'n vawiinah khan ka rai tih kan hre chiah. In rilru ka tina tih ka hria, mahse u Billy-a hi pasala neih ka duh a ni" ka tih chuan ka pa chu a ding hluai a, ka lo hlauthawng ru em em bawk. 

"Billy, i lo va haw phawt dawn em ni ang? Zan dangah i chhungte nen pawh in lo leng leh ang a, chutah chuan thu sawi pawh a sawt deuh mahna" ka pa ṭawngkam chu zawm loh chi reng a ni tawh lo. 

"Aw le, ka va haw ang e. Min lo thlah lo mai rawh, ka lo bia ang che" ka ṭhutna aṭanga ka thawh ve ûk avangin u Billy-a chuan a lo tih zawm zat a, kei pawh chu ka ṭhu pangai ve leh nghal mai. 

U Billy-a a chhuak chiah tihah ka pa chuan rum tak hian min melh a, kei chuan ka lo en rei ngam teuh lo. A ding ûaih bawk si a, ka tan chuan hlauhthawnawm duh tak a ni. Ka nu leh u Thanthani pawh an bang bik chuang lo, ka rai thu chuan an zavaiin a ṭhawng vek a ni. Amos-a tak ngial paw'n min en kar a, chungte hlei hlei chuan ka awm a tinuam lo zual. 

"I rai maw!?" ka pa chuan a ti ṭha leh ngat a, a aw chu u Billy-a awm lai ai khan a khauhin a ram daih tawh zawk bawk. 

"Aw" tih chiah chuan ka chhang a, a kawng dawm meuhin a thaw chhuak hawk a, ka pa chuan min khawih hrep duh hmel a pu a ni.

"Engtia rei nge in inngaihzawn tawh?" ka nu ve thung chuan a lo ti a, thla 3 chhung kan inngaihzawn thu ka sawi chuan an rilru a hah hmel zualin ka hria.

"Heti ang hi i nih ka ring miah lo asin Engtê, hlawhtling takin i nun i hman chhoh ka rin laia i hma hun zawng zawng a chhe ta hi hriatthiam a har rih hle mai" ka pa chuan a ti hap a, Amos-a pawmin an room-ah a lut zui ta daih. 

"Rameng, i ṭhianpa fa kha a ni tak tak em? I rai tak tak em? Rai lo hlauh la ka va ti em, i la naupang bawk si" ka nu chu ka bulah a lo ṭhu phei a, rai loh chu duh viau mah ila ka rai ngei si a ni.

"Ka pum chhunga naute awm mek hi u Billy-a fa ngei a ni e ka nu, kei hi chiang takin ka rai a ni. Ka rinhlelh avangin vawi eng emaw zah chu ka test ngei alawm, mahse result chu a ngai vek" ka tih chuan u Thanthani chu a tho tharh a, a room-ah a lut zui hmak. 

"Ka lungawi lo khawp mai RAMENGMAWI, i zahpuiawm ka ti hle bawk che a ni. Nge nia i lo hur thak viau zawk? Mipa i mamawh viau em ni?" ka nu ṭawngkam chu ka rin phak bak a ni.

"Ka nu!" ka tih chuan ka hmaiah chu a beng ri nghal sawk a, a mitmengah chuan min huatna hlir a lang bawk. 

"Zanah emaw chhunah emaw pawh ni se i chhuak tawh tur a ni lo" a ti ram hmarh a, thinrim hmel zeta min en chungin a kal sawn zui ta vang vang. 

Sitting room-ah chuan keimahin ka ṭhu ngawi reng a, tûma'n min lo ngaihsak eih lo va, min ngaihsak pawh ka phut lo hrim hrim. Ka chhungte chu ka thiam loh hran lo, zan khat thil thua hriat atan chuan ka rai thu chu thu dengkhawng a tling ve em a ni. Ka beisei aiin min hau na lo zawk, ka pa phei chuan min hrawka min hauh bawrh bawrh ka ring zawk hial a, mahse chuti ang engmah a thleng lo. 

Zan a rei deuh hnu chuan kawngka te kalh ṭhain ka room-ah ka lut a, ka muthilh theih pawh ka ring lo. U Billy-a hnen aṭanga call lo lut te chu ka reject hmak hmak a, a tawpah phei chuan ka phone chu ka switch off daih nghe nghe. Mu ta lo chuan ka ṭhu ngawi reng a, pawn lam aṭanga ka room kawngka an lo kik avang chuan ka phu nasa hle.

"Inbe lawk teh ang" tiin kawngka ka hawn rualin u Thanthani chu a lo lut nghal a, eng nge sawi tur kan neih awm ka hre ve miah lo.

"Engtin nge Sir Billy-a nen khan in lo inhriat? Engtin nge ani nen khan in inngaihzawn daih theih reng reng?" min en ran chung hian a ti a, kei chuan a nih dan dik tak sawiin

"U Billy-a chu kan Sir alawm a nih, chuan kan induh tawn avangin kan inngaizawng" ka lo ti mai a, ani chuan elhsen zet hian min nuih zui hak. 

"Ni dawn tak e! I naupan ngaihtuaha en liam mai mai chi i lo nih tawp loh hi a, i hur ru reuh ngawt ang. Sir Billy-a fa i pai tak tak pawh hi kei chuan ka ring lo, mipa mutpui i ngah phian tawh lo maw?" a ṭawngkam tin chuan min khei ngar ngar hle. 

"I ngaih dan kha a dik vek lo, u Bily-a tih loh mipa mutpui ka la nei lo bawk. Engati nge heti ang hian ka chungah i awm thut? Engati nge u Billy-a nena kan inkarah hian i lo buai em em?" ka ti ve ta fak a, ka hmai chu a thip nghal zawk.

"Min zah ve deuh rawh RAMENGMAWI, i u ka nih hi! I hma hun tur ka ngaihtuah vanga lo buai ve cheng ka ni, Sir Billy-a hi i rin ang a ni lo vang?" a tih leh hmawk hmawk chuan

"Eng nge i sawi awmzia!?" ka lo ti hû a,  ka u chuan kei aiin u Billy-a chu a hriat chian hmel daih zawk, chu chu ka mak tih chhan ber pakhat a ni. 

"Pasal neih tum ringawt lo hian ngaihtuah chiang rawh Rameng, ani kum 40 a nih tawh dawn laiin nang chu kum 22 lek i la nih hî, chu bakah hmeichhe pakhata lungawi chi a ni lo" 

"U Billy-a hi i hre chiang viau em ni? Engtin nge hmeichhe kawp lawr tak a ni tih chu i hriat theih?" ka tih chuan

"U Billy-a...Ha!! Keini'n Sir Billy-a kan tih laiin nang chuan u Billy-a i lo ti vel a nia, i zei phian ang ka ring Rameng" a rawn ti leh daih a, huatthlala deuh deuha min be reng chu ka hre ning.

"Ka zawhna chhang thuai teh u Thanthan, thil dang chu nakinah kan la sawi dawn nia" ka ti nghet ve charh a, ani chuan min lo melh rum leh tawh hle.

"Mawli, Sir Billy-a te chu kan hun lai aṭang tawh MZU-ah chuan a lar ber alawm, hmeichhia pawh a kawp hnem lutuk, pakhatah a lungawi ngai lo" a tih chuan ka ngawi ta ran. 

"A fa i pai mek ni khan i sawi a, naute hi chhiat chiah la chuan a ṭhen nghal vang vang ang che. Lo innei ta pawh ni ula chuti tho chu, ngaihzawng dang a neihsan dawn che tih ka chiang sak!" a ti leh hmarh hmarh a, amah leh amah chu a inang thinrim a ni mah zawk. 

"Kan inngaihzawn chhung hian chuti ang chuan a la awm ngai miah lo, ka tan chuan mipa rinawm leh dawhtheihna ngah tak a ni" ka ti sep chuan

"A zia dik tak a chhuah duh bik nâng, a lerhzia chu i la hre chawp zel mai ang. A hre chiang deuh phei chuan a hur tel an ti asin, i nat tak tak hma hian ṭhen thuai rawh ka nau" a lo ti hmarh hmarh a, ka rilru chu a buai ru ta hle.

"I thu sawi zawng zawng hi thu dik lo ni ta se engtin nge ka pum chhunga naute hi ni ve ta ang? Keimaha ka enkawl zawh i ring em ni?" 

"Titla mai rawh, a la sen tho damdawiin that mai rawh" ka u thu min hrilh chu khawvela ka thil tih duh loh ber leh ka hlauh ber a ni. 

"I mawl em ni? Tual thah ka duh hauh lo, that tur pawhin dikna ka nei lo bawk" 

"Mi mawl chu nangmah zawk hi i ni, natna tawrh i duh leh titla lo la a ni mai" tiin kawngka lam chu a pan a, a chhuah dawn ṭepah chuan 

"Tihtlak i duh chuan ka pui ang che, rilru na taka i awm ka duh loh avangin khang thu zawng zawng kha ka hrilh che a ni Rameng" a rawn ti leh hram a, a chhuak zui nghal hmak bawk.

Khuma ka mut hnu thleng chuan ka ngaihtuah nawn char char a, u Thanthani thu min hrilh zawng zawng chuan ka rilru a tina lo ka tih chuan dawt chiang tak a ni ngei ang. A tina ru em em zawk, a sawi dik phei chuan u Billy-a chu ka hmuh dan a dan nghal vek ka ring hial a ni. 

Ka phone chu ka switch on a, a khawih theih rual chiah chuan missed call tih screen-ah chuan a lo intlar thla dul a, chu pawh u Billy-a hnen aṭang veka phone call lo lut a ni. Whatsapp-ah chuan ka lut leh a, u Billy-a message chuan ka mit a la leh ta bik hle. A message 12 zet lo awm ka open chuan

"I ṭha em?"

"I chhungte'n engtin nge an tih che?"

"Ka phone call i la duh bawk si lo"

"Ngaihtuah ngawih ngawih ngai hian awm ṭhin suh!"

"Rameng"

"RAMENGMAWI!"

"Ka phone call lo pick up tawh rawh, i pick up lo a nih chuan ka lungawi lo viau ang" tih vel chu a lo intlar tûarh a, chhiar zawm duh tawh lovin ka chhuak daih. 

Ka phone ka hmeh thim rualin phone call ka dawng nghal zat a, chu chu tu dang ni lovin u Billy-a bawk a ni. Whatsapp message a lo thawnna kha chu a rei tawh fû si a, a mut tawh ka ring hial mahse a lo la muhil lo tawp chu a nih dawn hi! Pick up mai lovin ka inngaihtuah khawmuang leh tê tê a, a tawpah chuan ka pick up ve ta nge nge.

"Ka rilru i tihbuaizia leh min tihmanganzia hi i hria em RAMENGMAWI!?" a rawn ti nghal thâwr a, a aw chu hriat nuam zawk zawk a ni lo.

"Min chhang rawh" khauh zet hian a rawn ti leh a, ani nena inbiak reng chu ka peih rei ka ring lo.

"Naute hi ka titla dawn" ka sawi tun em em pawh a ni lo, ka thinrim lungpuamin ka sawi ringawt a ni ber.

"Enga!?" a ti vin nghal tûarh a, ka beng aṭang phone chu ka dah hla deuh dâwr bawk.

"Bum nuam tak ka lo ni ngei ang ti raw u Billy? I chanchin ka hriat hnu hi chuan pasal atana neih che ka ngam leh chiah lo, naktukah kan sawi ṭha dawn nia" tia dah ka tum lai chuan

"La dah hauh suh RAMENGMAWI" a rawn ti leh hrawk a, phone chu ka hmet tawp lui ta tho.

A lo call leh tlûk tluk ka hlauh avangin ka switch off zui nghal daih a, ka ṭah chu chhuak tet tet mah se ṭah ka tum hauh lo. U Thanthani thu sawi chu awih loh ka tum ve tho, mahse ka unaunu a ni miau a, a tam zawk chu a sawi dik dawn tih ka chiang. Nau tihtlak erawh ka ngaihtuah buai duh lo, eng tikah mah ka titla dawn chuang lo.

Chapter 2

Tukṭhuan kan ei lai chuan tûma'n min be lo va, ka tan chuan ṭawng ngam a ni lo hrim hrim. Amos-a erawh a ṭawng melh melh a, zing dang ang lo takin ani paw'n min be miah lo bawk. Ka nu leh pa chuan min be lo turin an hrilh ti dawn ila ka ring chiah bawk si lo, ka nu hlei hlei chuan ka chawhmeh siam chu a ei peih loh hmel kher mai. U Thanthani ve thung chu a zing tin tih ṭhin danin phone khawih mial mial pahin chaw a ei a, ka pa tak ngial paw'n a la hau lo teh tlat. 

Tuk dangah te chuan phone khawih a phal ngai miah lo va, u Thanthani lahin a thu sawi a awih duh ngai bawk si lo, mood fuh lo zeta hna kal chang pawh a ngah thei khawp. Mak ka tih deuh pakhat chu ka nu chuan a hau ve ngai mang lo, a awm âwma awm tirin a en liam tawp tawp ni ber hian ka hria, mahse kei erawh thil tisual hlek ila min hau awlsam em em leh thung lawi si. 

Dik tak chuan ka nu aiin ka pa chu ka ngaina fê zawk a, a zin bo changte hian ka ngai thei lutuk, phone-a biak hmasak pawh ka ngah thei mai. Ka nu chu a sual em em pawhin ka hre chuang lo, a mizia ve hrim hrimah ka ngai thei mai a, mahse amah ai thlawt chuan ka pa chu ka hmangaihin ka ngaina zawk maithei a ni. A chhan chu amah aiin ka pa hnen aṭang duatna awkâ ka hre tam miau a, mahse a thu zawm loh ka neih phah chuang ngai lo.

"Thanthan" ka pa chuan a ti deuh hmuk a, ka rin aiin a hau har ka ti tawh reng a ni.

"Aw eng nge?" hawi chhuak miah lo hian u Thanthani chuan a lo ti ve mai a, ka pa hmel hmu ve ngat se chuan a awm dan a siam ṭha khawp ang. 

"LALTHANZUAL!" ka pa chuan a ti leh ṭhawt a, a aw chu fiah ṭha kêk kawk tak a ni.

"Eng ngê?" ka pa'n a hmingpuma a koh vanga lungawi lo tih hriat zet hian ka u chuan a ti ve leh a, ka nu chu a lo inrawlh ta vat.

"U Cham, buaina dang siam lo teh ang u! Rilru buai tawh sa nâk a laiin buaina dang ka duh tawh rih lo, ka chaw ei pawh a tui lo" ka nu awah chuan min demzia ka hre thei.

"Buaina dang neih belh ka duh bik hauh lo, LALTHANZUALI hian ka lung a tiawi lo zual a nih hî" ka pa chuan a ti leh hmuk a, Amos-a tih loh puitlingho chu kan chaw ei a tui teh chiam ka ring lo. 

"Ka hming pumin min ko ziah suh!" ti vin hlarin u Thanthani chuan ka pa chu a melh rum ṭha hle a, chutah ka pa chuan kutthlak a tum ta mai.

"Ka pa!" kut a thlak tak tak ka hlauh avangin ka lo ti vat a, ka nu pawh hlauthawng tih hriat takin a lo rak chul mai.

"Eng lo, ka'n kham ang e. Keimah avangin in lungawi lo tih pawh ka hria, ka nu sawi ang khan buaina neih belh lo ang u ka pa" tia thawh ka tum rualin ka pa chuan

"Ṭhu nghal rawh RAMENGMAWI, thil sawi dun tur kan nei" a lo ti ram hmuk a, ka ṭhu leh rang khawp mai.

"LALTHANZUAL, i chaw ei khamah Amos-a hi school-ah thlah ang che" ka pa bawk chuan a ti leh a, a mood chu a fuh lo tak zet a ni.

"Ninawm!" ti vakin u Thanthani chu a ṭhutna aṭang a tho tharh a, thleng pawh a dah ring ṭhuai ṭhuai hle. 

"RAMENGMAWII avangin Thanthani chunga ṭuan kher kha a ngai em ni? Boruak i ti chingpen leh zual vek zawk, hna kal i ngaih kha!" rawn titu chu ka nu a ni.

"I fanu ṭan zawngin lo ṭawng ziah suh" ka pa chuan a ti leh hmuk a, ka nu pawh thaw hluaiin a ṭhutna aṭang a tho zui nghal.

"Nang pawh hi a! Ninawm!" ti hmarhin a kal nghal nal nal a, a thleng pawh thleng silnaah a dah lo, a thin a rim hle a ni ang. 

"Apa, vawiin chu school ka kal peih loh ê" Amos-a chuan a lo ti a, ka pa chu a insiam ṭha nghal vat bawk. 

"I kal a ngai si alawm Amos, nakinah lehkha thiam deuh i ni mai ang. Chaw i ei kham chuan va insiam la, au Thanthani nen school-ah in kal dawn nia" dam zet hian ka pa chuan a ti a, kei erawh chaw ei chu ka tum tawh lo hrim hrim.

"Ka kham tawh" tiin Amos-a chu a tho a, Chair chu a nawr tawlh nghal a, ka pa nen chauh chuan kan awm ta. 

"Min tibeidawng hle mai" ka pa aw chu a khauhin a ram hmuk tawh lo, mahse a aw zawawi tak chuan ka inthlahrunna a ti zual daih zawk. 

"Ka tihpalh ka pa" ka ti sep a, chu lo sawi tur dang reng ka hre lo, min duat em em ṭhintu ka pa chu ka zah tak zet a ni.

"Survey in neih lai vel aṭang khan em ni ngaihzawng i neih?" a rawn ti chat a, a thu sawi chu a dik a ni tih nemgheh nân ka bu ta nghat.

M.A ka Graduate aṭanga kar khat velah kan department chuan Professor te hnen aṭang inhlawhna tur offer kan dawng a, Professor te chu pathum chiah ni mah se zirlaite erawh kan ṭhahnem viau. Kan zavai chuan kan Professor te hnuaiah kan awm a, kei chu Professor Billy-a Team-ah ka awm ve bawk. Ani team ber khera ka awm thei chu nuam ka ti a, ka mipa ngainat leh duh hmasak ber a ni nghe nghe.

University kan kal ṭan tirh aṭang tawh pa ka ti em em a, a aw leh a hmel leh a pian chu a inhmeh vel vek a ni ber. Ka ṭhiante paw'n a ruka kan Professor ka duhzia chu an hre vek a, a hnuah phei chuan kan classmate te zawng zawng chuan an hria a, office-a kal a ngaih chang paw'n keimah deuh kher min kal tir ṭhin. Kei lah chuan nuam ka lo ti em em zawk a, a perfume rim ringawt ka hriat paw'n ka ni leng mood a dik vek thei hial a ni. 

Chuti ang khawpa ka mipa vei ruk leh duh em em chuan amah pui turin kan team aṭang mi pakhat a thlang chhuak a, chu a mi thlan chhuah chu keimah ka ni hlawl mai. Ka ṭhiante phei chuan min chhaih nghal sup sup a, kei erawh lawm avangin ka zuang tawr tawr thung. Ka hlim, ka hlim lutuk, Professor Billy-a nen kan awm dun dawn avang chuan ka lawm ngawih ngawih hi a ni tawp. 

Kan pahnih chauha Survey neia kan zin kual hnuah phei chuan amah ka duhna a zual a, ṭawng tam zawk zawk ni lo mah se mi kaihhruai dan a thiam em em thung. Thingtlang lama kal lawp lawp changte pawh kan nei ngun hle a, ka hlawh pawh Guest Lecturer te hlawh zat daih a ni bawk. Survey neia thla khat kan tal dun hnu chuan min duh thu a sawi ta mai, amah pawh zah zo lovin ka ṭe vak ringawt.

Chuta ṭang chuan kan inngaizawng chho ṭan ta a, kan kum erawh inthlau deng deng tak a ni. Kan inngaihzawn hnu chuan koh dan ka thiam lawk lo va, ka tan chuan a hminga koh bawl lah a mawi bawk si lo, Sir tih lah a duh bawk si lo, ka u ta ringawt a, mahse chuti ang koh chu a lo duh reng zawk a lo ni. Chuti ang vel chuan inngaihzawnna lamah bul ka ṭan chho a, u Billy-a chu ka bialpa hmasa ber a ni bawk.

"Sawi mai tur pawh ka hre lo, ka inthiam lo tak zet tih erawh hria la ka duh ka pa. Ka chungah i duh duh i tithei ang, pasal neih i phal loh chuan ka nei lo mai ang" ka tih chuan a ngawi ran a, en pawh min en lo. 

"Pasal chu i nei ang" ti hmukin a tho vut a, pangai takin ṭawng tum mah se a inveng hman lo, ka pa awm dan chu ka dem hran chuang lo. 

Kan thil eina vel ka seng fel mawlh mawlh lai chuan Amos-a chu uniform inbel diamin ka pate room aṭang a lo chhuak a, u Thanthani pawh rei lovah ka hmu zui nghal. Ka awmna lam panin a lo kal a, ka nu leh pa hmel erawh ka hmu tawh miah lo thung. Sawrkar hna nei ve ve an ni a, ka pa chu Department pakhata Director niin ka nu erawh College-ah lecturer a ni thung. 

"Nangmah vangin ka thil tih peih loh tak ka ti leh dawn ta, ka kek hrep lo che hi lawm hle rawh" u Thanthani aw chu a nem lo ngei mai, rin pawh a ring lo. 

Amos-a kai sawk chung chuan in aṭang an kal chhuak a, Amos-a chu ka khawngaih reuh ngei mai. Ka pa kha thinrim viau lo se chu keima'n an school thleng ka thlah leh ngei ang, chu chu ka ni tuk tin tih dan ṭhin a ni. Tlema mi ang lo deuh a nihna lai chu ka khawngaihna tizual tu a ni a, ka nu leh pa paw'n an duat rawn em em bawkin ka hria. A ṭhiante paw'n nuihza siam nân te an lo hmang ṭhin a, a school kalna pawh kan thlak ngun khawp mai. 

Thleng ka sil zawh chuan tihfel tur ka dap leh nghal a, M.A graduate hlim hlawl ka nih avangin hna pawh ka la nei lo. Survey kan neih aṭang pawisa chu thawk chhuak ve mah ila a ho lam lutuk, khawiah emaw ni hna nghet neih ve chu ka duh a ni. Chu chu ka nu leh pa duh dan a ni bawk, mahse tunah chuan keimah vekin ka hma hun zawng zawng ka tichhe ta vek si chu a nih hi!

An tih fô ṭhin ang bawkin ka nu leh pa chu an chhuak rual a, ka nu chuan ina tawm tlat turin min chah bawk. U Thanthani pawh lo hawin chhuak turin a insiam leh nghal sawk sawk a, School pakhata zirtirtu hna a hmuh ve avangin a buai thei khawp mai. A nghet erawh chuan a la thawk bik chiah lo va, mahse a thawh reia naupang zirtir dan a thiam phawt chuan a ngheh thuai ka ring. 

Ka phone ka switch on chiah chu missed call a lo intlar thla leh pût a, chu pawh u Billy-a hnen aṭang deuh vek a ni. A message pakhatah chuan lo kal a tum thu a awm a, lo kal mah se pawi tihna ka nei lo. Zan lamah kha chuan pasala neih ka ngam leh chiah loh thu ka sawi ngei a, ka pa lah chuan pasala min neih tir a tum thu a sawi bawk si. 

Eng pawh ni se kan inbiak phawt a ngai, kan pahnih inkarah chuan thil sawi fel ngai a awm nual maithei bawk. Chhun dar 11 a rik chuan in chhung tihfai tur vel leh tihtur ṭul ang ang chu ka tifel titih der a, hna nei lova awm tlawng chu nuam lo duh tak a ni. Chutah mi dangte'n hma an sawn laiin kei lah chu ka la rai zui, ka hmakhua chu a ping ni berin ka hria. 

Dar 1 a rik hnu pawh u Billy-a hmel reng reng ka la hmu lo va, zan lamah u Thanthani hnen aṭang a chanchin ka lo hre kher bawk nen ka ring lo zo vek mai dawn, a lakah chuan ka thin a rim ru deuh ṭung bawk. Chawhnu dar 2 a rik chuan a lo kal ka ring buai duh ta lo, Amos-a hruai tur chuan ka insiam ta ringawt.

"Awi!" ka ti deuh ṭhawt a, ka room aṭanga ka chhuah ruala u Billy hmel ka hmu thut chu ka phu lutuk, a lo luh lai ka hre lo hrim hrim. 

"Khawiah nge i kal dawn?" pangai tak chuan a ti a, ka chhungte an awm lo tih hrethiam zetin ṭhutthlengah chuan a ṭhu thla zui nghal bawk.

"Amos-a ka hruai dawn" tiin kawngka lam chu ka pan a, min pawt ding chiang lutuk chu ka kal thui hman lo kher mai.

"Nizan khan eng vangin nge pasala min neih i ngam leh chiah lo thu i sawi?" a hmel chu ka en chho hâ a, mipa meng no lo ve tak chu a ni.

"A chhan chu i chanchin ka hria a, i lo lerhzia te ka hre vek alawm, chuan khati ang thu kha ka sawi ta a ni" tia tal chhuah ka tum chu thei lo chiang bal bal tak ka ni.

"Kal sawn sek tum lo hian inbe teh ang, thu awmze nei lo mai mai sawina hun a ni tawh lo bawk. Nupuia neih che ka tum a, nang paw'n i hria"

"Hria e, ka hria alawm, mipa lerh tak fa ka pai tih thlengin ka hria" ka tih chuan a thin a rim hmel kher mai. 

"Enteh, khawi aṭangin nge hun kal tawha ka nun dan i hriat ka hre hauh lo, mahse tunah chuan ka lerh tawh kher lo"

"A hre chiang phei chuan i hur tel thu an sawi bawk" rum taka melh chunga ka ti chiah chu a lo nui chhuak hawk a, a nuih chhan chu pakhat mah ka hre lo. 

"Ngaithla teh Rameng, mipa hrisel ṭha pangai leh mipa pangai reng reng hur lo kan awm lo, mahse a hun leh a hmun kan thliar thiam thung" kiai suka a tih chuan keimah chu ka zak let daih.

"A nih chu!" ti hmakin a ban chu dah thlak ka tum a, a ngaite bawkin min thlah emaw min kaltir a tum loh hmel ngei mai.

"Ka sawi duh ka la sawi zo hauh lo, kal sawn chhen tum lovin ka thu sawi tur hi chiang takin ngaithla rawh" a tih chuan ka ngawi ta kar.

"Zaninah palai rawn tirh nghal kan tum a, i chhungte pawh lo hrilh ve ang che. A awmzia chu nang leh kei hi kan innei dawn tihna, hmân lai thil sawi chhuak tawh lo vang aw" pangai taka a tih leh chuan

"Ka ring sual ang che tih ka hlau" ka ti sep a, min en chiang kher mai, a hmel aṭang chuan a lungawi hmel teh chiam lo bawk.

"I rin ngam loh khawpa rinawm lovin ka awm tawh em ni?" a ti deuh hmuk a, dik tak chuan u Thanthani thu min hrilh khan ka ngaihtuahna a tibuai a ni. 

"Awm chuang nâng, mahse kan inneih hnuah beisei bo ṭhakin min siam ang tih ka hlau a ni" ka ṭawng zawh rualin a âwmah min kuah bet thlawp a, kuah let pawh ka tum hran lo.

"Beisei bo ṭhaka siam che duh tur khawpin i lakah rilru ṭha lo ka pu ngai lo vang, ka chiang a ni. Vanduaina emaw thihna emaw kan tawk te a nih ngawt loh chuan ka nupui i ni reng ang, hlauthawng suh Rameng, chuan i chhungte'n engtin nge an tih che?"

"Ka pa chuan pasala ka neih dawn thu che tukin khan min hrilh ngei alawm, eng thil dang mah a thleng lo" zawhna mitmenga min en run avang chuan ka ti a, thil thleng zawng zawng hrilh a fuh berin ka hre lo.

"Aw le, kei pawh ka nu khan kan la inngaihzawn rei loh em avangin hlauhthawnna chen a nei che a, mahse chung a hlauhthawnna te chu nangin i tihbo sak thung dawn a ni" ka meng phawk deuh hrâ mai, a nu khan min lawm vak lovin ka hre rêng a ni!

"Sawi tawh rih lo vang, ka nau hruai ka ngai" tiin a ban chu ka vuan a, ani paw'n zawimuangin a lo dah thla ve mai bawk.

"Engin nge i kal dawn?" a phone bih zeuh paha a tih chuan 

"Bus-in a ni mai" ka ti mai a, mi pawh be leh tawh chuang lovin a phone chu a hmet mual mual a, han chhuahsan ringawt lah a dik chiah si lo.

"Chhuak ila, ka kal a hun tawh viau a nia" ka tih chuan a lo hawi zawk a, bu zeuhin ka lam pan pahin mi dang a be zui nghal.

"Vawiin chu ka period kha lo chang mai rawh, naktukah i period-ah class chu ka la mai ang, ka hman leh lo tlat mai" kawngka ka kalh fel vel mek laiin a ti a, a mi biak chu Professor zinga tu emaw ni ber a ni ngei ang. 

"Aw le, a lawmawm e. Ni e, mahse zanin chu ka hman chiah lo, ni dangah ni zawk mai rawh se" ti lehin phone chu rei lovah a hmet tawp zui nghal. 

"A nih ka kal a nia" tia kal sawn ka tum chu ka banah a lo chelh thuai a, kan awmna a langsar ang reng phian bawk sia ka hawi kual nasa hman hle.

"Keimah nen i nau chu kan pahnihin kan hruai dawn alawm, min kalsan daih te'n a dik nâng" khi suk pah hian a ti a, ka rilruah zawhna a lo lang nghal.

"Min kalpui i tum vang em ni MZU lamah kal i tum loh?" ka zawhna avang chuan a kiai leh suk a, ka inrin hmain ka biangah a rawn fawp zeuh bawk.

"Maw!?" min chhan mai loh avang chuan ka ti leh a, ka thu sawi chu a dik a ni tih nemngheh nân a lo bu ta nghat. 

"A ṭul miah lo, MZU-ah chuan zu kal leh zawk rawh" te chu ti ve mah ila phur takin a Car hunna lamah min nawr kal det det a, tha chu kan inneih tam hleih khawp.

"Ka ti tak tak a nia u Billy, min kalpui i tum vanga Class i la lo ringawt tur hi a dik miah lo" a la ngawi reng a, a hnuah phei chuan ka ṭawng buai peih tawh lo.

Mipa luhluh leh thu duh ve tak chu a ni chiang alawm, mahse chu chu amah tipatu leh a mizia ve reng a ni thung. Tin, tlangval senior thil hriatthiam loh nei lo khawpa fing leh thluak hmang thiam ang hiala ngaih ni mah se thik thu a pe chhe em em a, a kum mil lo deuha awm chang leh a nihna mil lo deuh hreta awm chang a ngah thei hle. Chung zawng zawng erawh chu min duh ve lutuk vangah ka ngai hmiah a, ka lawm daih zawk ṭhin.

Amos-a chu kan pahnihin kan hruai ta ngei a, ina kan let leh hnu chuan a ṭhu khawmuang zui nghal bawk. Thingpui ka siam a, ka pek vel lai takin u Thanthani a lo haw a, fel leh hârh hârh tawh tak a ni. Ka hrethiam lo lek lek ṭhin, u Billy-a chu a duh ti dawn ila ka pasal ni mai tur leh ka pum chhunga awm naute pa a ni tih a hre vek bawk si, a awm dan hawr hawr chu ka hrethiam lo a ni.

U Billy-a erawh chuan a rul tawk chiahin a zawhna leh a biakna a chhang a, u Thanthani chuan ei rawng a bawl tur thu min hrilh vel a nih chu! Awihawm loh zawk, ka nu leh pate'n hre ve ngat se chuan kei ang bawkin mak an ti ve khawp ang. Kum eng emaw zat chhung kan chengho tawh a, kan tettê aṭang tawh u Thanthani chuan ei rawng a bawl mang ngai lo, chuvanga awihawm loh ti leh mak ti em em pawh chu ka ni. 

"A ngai lo, ti khan u Billy-a nen khan lo inkawm zawk rawh u" u Billy-a awm laia a chet sual ka hlauh avang chuan ka ti a, ani paw'n aw nem tak hian

"A nih leh i tih tlat si chuan vawiin tlai chu bawl mai rawh, Sir Billy-a hi thingpui tal ka'n siam ang e" a lo ti ve nghal a, mahse u Billy-a chuan a in châk lo thu a lo sawi vat thung.

Zan dar 8 a rik chuan chhun lama min hrilh lawk tawh ang ngeiin in leng kan nei ta reng a, kan in lengte chu palai an ni tih pawh ka hrethiam mai. Ka pa chuan chhungkuaa kan lo inrawn tur thu leh lo kal ṭha leh ngei turin palaite chu a thlah liam a, pasal ka neih dan tur chu a hlimawm lutuk hran loh a ni. U Billy-a ka duh loh vang leh ka neih peih loh vanga hlimawm loh a ni lo va, ka chhungte awm dan chuan min tihlim lo zawk a ni. 

Mut hmunah u Billy-a nen chuan kan inbe leh char char a, amah nen chauha kan awm dun emaw kan inbiak hi chuan hlauhthawnna pawh ka nei hran lo, mahse kan inbiak loh chiah hi chuan u Thanthani thu min hrilh te kha ka ngaihtuah chhuak leh nge nge zel. Phone kaltlanga kan inbiak ringawt paw'n ka hlimin ka thaw a veng nghal em em zel a, rin ngam lova a awm ngai miau loh avangin a thu sawi chu ka ring fai vek ṭhin.

"I va hlim hmel ve" ka nu aw ka hre thut chu ka phu chiang teh e! A thawm engmah ka hre bawk si lo, phu tak ka ni.

"Ka...eng lo...ka hlim pawh ka hre lo" ka ti deuh nawk nawk a, ka thil chhuan lai chu ka chawk leh ringawt bawk.

"Pasal neih chu i phur hmel hle si alawm, kan bula awm i châk vak tawh lo a ang" a tih fak chuan a lam ka hawi a, min ngei hmel kher leh nghal.

"I ngaih ang ngawtin thil a ni vek turah ngai suh ka nu, ka rilru ni lo pûi pui i sawi a ni" ka tih chuan tûr zet hian min en a, kei chuan ka hnung chhawn ta daih.

"Awi ka chau lutuk" kawngka lam chu ka hawi buai peih lo, u Thanthani chu a lo haw chiah tih ka hre vek, ei rawng bawl a peih loh chhuanlam a ni tih thlengin ka hre tlang.

"Ramengmawii'n pasal a neih daih dawn hâwrh hawrh avangin nang pawh khan ei rawng bawl hi i tih turah ngai tawp rawh, tun lai kan in chhung boruak hi ka hne ngawi ngawih" ka nu chuan a ti hmarh hmarh a, a ṭawng dan chuan ka rilru a tina ru khawp mai.

"Ninawm a! Awmpui hi la mai ang u ka nu, kan buai hlawm bawk si" u Thanthani chuan a lo ti daih a, mahse a sawi fuh teh chiam lo.

"LALTHANZUAL, awmpui lak kha sawi tawh reng reng suh!" ka pa chuan a ti vin nghal ṭhak a, a ngawi rei mah mah tawh ka ti reng a ni!

"Ka pa! Ka chau ve tho a nia, ka hming pumin min ko ziah bik suh" ti let vakin u Thanthani chu a room lamah a kal tau nghawng nghawng a, kawngka pawh a khar na hle.

Maian bai chawk zeuh zeuh pahin Bean chu kan turin ka zai mial mial a, ka nu leh pa titi thawm pawh hre reng mah ila ka ṭawng peih tawh lo, ka ṭawng châk hlawl lo a ni e. A chang chuan ei rawng bawl tur leh in chhung sekrek vel khawih tur ngawr ngawra an chhawr ṭhin awmpui hi ang ka inti thut zel, ka ei rawng bawl deuh hlir ei ṭhin mah se a sawisel peih ber chu ka nu leh ka u an ni. Ka pa leh Amos-a chu mipa an nih vang nge ni an ei thei mai zel a, ka nu leh ka u erawh sawisel lova an ei pawh ka la hre lo.

Zanriah kan ei lai chuan pasal ka neih tur chungchang lam pakhat mah kan sawi leh ta chuang lo va, ka chhungte awm dan avang chuan pasal neihsan daih chu ka châk ve ta rum rum. A ṭul hle te a nih ngawt loh chuan min be ngai lo va, kei ve thung chuan biak châk mah ila an laka inthlahrunna ka neih tlat tawh avangin ka be ngai lo mai chauh a ni. Ka pa leh Amos-a chuan mi biak zeuh zeuh an ching a, ka pa ber chu ka rai tih a hriat hma a ang tawh hlawl lo.

Amos-a ber kher chu hriatthiamna chen ka la nei zawk, a chhan pawh ani chu tlema rilru lam chiang lo deuh hlek a ni a, hmân aṭang tawh ani chuan min be vak ngai lo hrim hrim. Ka nau a nih avangin ka be peih em em ṭhin zawk a, kan chhungkuaah kei leh ka pa'n kan be peih ber ang ka ring. Ka nu leh ka u erawh a awm awmin an awmtir a, en liam tawp chu an tih fô dan a ni. Ka nu chuan duat ang deuhin be ṭhin mah se a duat tak tak lo tih ka hre thei, chu chu a pawi ka lo ti ru vawng vawng ṭhin. 

"I nei lui tak tak dawn em ni?" u Thanthani chuan a ti chang deuh fak a, ka room-a a lo luh lai chu hre reng mah ila ka hmu lo der hmak.

"Palai an lo kal vek tawh khâ" pangai tak chuan ka lo ti ve mai a, a zawhna chu ka chhang châk zawk zawk hran lo, inbiak chhen pawh chu ning ru tak ka ni. 

"A sut leh theih tho alawm, an lo kal leh hunah lo duh lo tlat la, in innei lo a ni mai" a thu sawi avang chuan en lo thei ka ni ta lo.

"Engati nge u Billy-a nena kan inneih hi i duh loh em em a? A lo kal lahin a lakah ṭhat i chhuah leh em em lawi si, i awm dan hi ka hrethiam lo" ka ti ta thlawt a, ani chu a lo nui hak thung.

"Mi zahna hi tlachham viau ṭhin suh, in inneih ka duh loh chhan chu Sir Billy-a mizia ka hriat chian em vang a ni" min elhsen deuh hian a ti a, ka chhang buai peih tawh lo.

"Pasal lerh tak neih i duh loh chuan palai lo kal leh hunah lo duh lo tlat ang che, ka thu hi awih la i tifuh ang" ti hmawk hmawka a chhuak thawm chu hre reng mah ila a lam ka hawi eih lo.

"Ka thu thu" keima hriat tawk lêk chuan ka ti sep a, a nihna takah chuan ka thu thu a ni ve chiang alawm, puitling lo pawh ka ni tawh bik lo. 

Chu bakah u Thanthani awm dan chuan ka ngaih a tiṭha lo letling zawk, ka rilru sual a chhuah chang phei chuan run luih ka châk zek zek ṭhin. Ka unaunu a ni a, mahse kan mizia chu a inang lo ti ila a dik ber ang. Tin, kei aiin ka nu chuan a duat deuh bik bawk a, hre lo angin awm mah ila ka hre vek, ka vui kawi peih lo mai mai zawk a ni. 

A chang chuan ka thik ve ṭhin reng, chhul khat chhuak ṭheuh ṭheuh si min en dan leh min duat dan a inang lo ṭhin lutuk chu lungawi lohna tham a tling ve reng a mi. Amaherawhchu ka nu ang lo takin ka pa chuan min duat em em thung a, a thu pawh ka awih khawp mai. Chu tak chu ka u chuan a lo thik ve leh ṭhin a, ka pa chuan ka u aiin tlem chuan min duat tih ka hre ru ve kar tho, a chhan pawh thu kan inawih hleih ve em bawk a ni. 

Eng pawh sawi se ka pa thu chu awih loh ka nei ngai lo, ka tet tê aṭang tawh ka ngainain ka zah em em ṭhin zawk. Ka u ve thung chuan han hnial pang pang chang a nei a, ka pa chuan kut a thlak mawh ka lo ti thei khawp mai. Chutah ka nu lah chuan a lo ṭan ve chhen zel bawk si, ka nu leh ka u chu ka laka an ṭuan leh ziah bawk a, ka tan chuan ka pa lo chu ngainat loh ber theih pawh a ni lo.

"Zaninah lo kal leh kha an tum deuhin ka hria" kan ngawih ṭhap laiin ka pa chuan a ti a, kar khat a liam vel chiah tak e!

"In pahnihin zanin chu lo ṭhu lang tawh ang che u" ka nu chuan a ti a, palai lo kal hmasak zawk zan kha chuan kei chu thingpui lumin ka awm daih a nih kha!

"A ṭul teh kher lo ê, pasal neih tum ber hi awm se a tawk mai. Kei chu Lesson Plan te siam ka ngai a, ka hman lo vang" rawn titu chu u Thanthani a ni.

"Rei pawh a ni dawn lo, inneih ni tur vel sawifel kha a ni tawh mai. I nu sawi ang khan in pahnihin in lo ṭhu ang, thingpui pawh in pahnih bawkin in sem ang" ka pa ṭawng zawh chuan tûmah kan ṭawng leh tawh lo.

A hmasaa an lo kal hun awm velah tho palai chu an lo kal leh a, ka pa thu awihin kan chhungkua chuan kan ṭhu kim ṭhap mai. Ka pa bulah phone khawih chungin Amos-a a ṭhu a, ani chuan ka pa leh palaite titi chu a ngaihsak lo hle. Ka nu pawh ka pa bulah a ṭhu a, kei leh u Thanthani erawh thutthleng khatah kan ṭhu a, kan inbe lo chiang hle. Min be peih lo tih ka hria, kei paw'n min be peih lo tu chu ka be peih bik vak lo. 

Minute 10 hnu velah ka pa chuan thingpui lum turin min ti ta ngei a, keini pahnih pawh choka lamah kan phei nghal thuai a, mahse keimah chauh ka che leh ta mial mial. U Thanthani chuan a phone a khawih mual mual a, a chang leh a nui ri hak hak a, chet chu a tum lo hrim hrim, kei paw'n ka phut buai vel peih lo. Chu bakah chet dun vel chu ka châk lutuk lo, ani phei chuan kei aiin a peih lo leh zual ngei ang.

Thingpui chu kan sem diat diat a, Amos-a in tur pawh ka siamsak ve a, a sem hunah chuan u Thanthani paw'n min pui ve ta hram alawm, Lesson Plan te chu siam daih se pawi ka ti lo daih zawk. Dar 9 a rik fel meuh chuan kan inneih hun tur pawh a chiang ta, palaite leh ka pa chuan thla leh maia inneihna awm turin thu an titlu a, hnai nghal viau mah se ka pum puar len hmaa inneih vat chu a fuh ber ka ring.

Palai haw aṭanga darkar pawh tling lovah u Billy-a hnen aṭang phone call ka dawng a, ka room-ah ka lut zui nghal thuai a, hlim ruk dan riau ka nei tlat pek a nih chu! U Billy-a chuan report pe tura min tih miau avangin kan awm dan tlangpui chu ka sawi thuak thuak a, chutia ka sawi lai chuan bang chu leh lam aṭang an lo chum ri dawt dawt a, u Thanthani a ni tih ka hre nghal.

"Ka dah lawk dawn aw u Billy, ka room bang an lo chum a, kan inbe ṭha leh dawn nia" tiin min chhanna pawh nghak lo chuan ka off a, rei lovah u Thanthani ngei mai chu ka room chhungah a rawn pen lut ta. 

"Mut hun tawhah phone hmang reng zel suh, Lession Plan pawh ka ti hlei thei lo" a rawn ti hlawk hlawk a, a buainaah chuan ka thiam lohna pakhat mah a awmin ka hre lo.

"Ka biak rin loh em khâ, chu bakah zan rei tak pawh a la ni lo" ka ti ve salh a, ka u mah ni se ka laka a awm dan chu a hneawm ngawih ngawih.

"Phone hmangin mi be tawh lo vang che, i aw hrim hrim hi ka hre hne" mi dangin kan inbiak dan vel chu hria se zawng unau kan nih pawh an ring hauh lo vang. 

"I sawi ho em mai a!" ka tih chuan pawr fiah fak hian

"Ka sawi ho hauh lo, pasal i neih dawn avang hian za cheng suh" a ti leh hmarh a, ka zat cheng pawh ka hre tawp si lo. 

"Ni lo lô hian min sawi ṭhin lo teh, phei tawh rawh, ka mu duh" tiin bathroom-ah chuan ka luhsan ve hmak a, thawm a neih tawh loh avangin a room-ah a phei tih ka ring thiam nghal mai.

Khuma ka mut fel hnu rei lotê ah u Billy-a hnen aṭang bawk phone call ka dawng leh a, ka en chiang chu Video call zawk a lo ni. Hmel inhmu chunga inbiak chu a nawm rualin ka lai deuh tlat, kan inneih a hnai ve tawh phian bawk sia chuti anga awm vel chu a naupangchhia ka ti reuh tawp. Ani lah chuan sawi tur a hre phian a, a hnuah phei chuan amah aiin ka ṭawng hnem leh ta nge nge.

"I dul ka lo en chhin" a tih chuan ka ngawi nghal dâk a, ka room piah chiaha awm u Thanthani'n a lo hre ve kur ang tih ka hlau nghal hle. 

"A teuh lo mai, a zahthlak!"

"Zahthlak loh, ka hmuh hnu vek a nih khâ, i dul chauh lo pawh chiang takin ka hmu vek tawh" a awah fiamthuna ri tel mah se chuti ang zawnga fiamthu thawh chu ka ngaina lo. 

"Ka dah dawn" zak ru zeta ka tih chuan

"La dah suh, i dul ka hmu châk mai alawm, i pum chhungah khan ka fa a awm tih hria la, i dul chu min hmuh lawk mai teh" a lo ti nghal thuai a, a ho ka va'n ti tak.

"U Billy" ka ti thluk awn duai a, a takah aiin phone kaltlanga ka dul tihlan vel chu ka zak deuh tlat pek a, ka inhrethiam chiah bik lo.

"I dul chu han hlim teh le Rameng, chuan kan duhtawk dawn nia" pangai deuh hian a lo ti leh mai a, peih lo zetin ka dul chu a hmuh theih turin ka hlim ta nge nge.

"A tawk" ti vatin ka kawr chu ka pawt thla a, ani erawh a lo nui chhuak hawk hawk thung, ka hlim lan chhung kha a rei lo ve êm bawk a ni.

"Zak viau mah la chiang takin ka la hmu fô dawn tho tho, mahse tunah chuan ka hrethiam rih ang che" a tih chuan ka lo nui ve hak a, ka mood chu a fuh ang reng leh ta phian bawk. 

Video call ni tawh lovin phone call pangai chuan kan inbe zawm zat a, a aw thum bul bul chuan ka mut a tichhuak riai riai a, a tawpah phei chuan ka mut a chhuah tawh thu sawiin ka off ta ringawt. Men pawh meng ṭha peih tawh lovin rizai ka sin a, lukham chu nghet taka kuahin ka insiam rem a, tunah ber kher chuan mut bak thlakhlelh ka nei rih lo.

A tuk zing ka tho te chu engtin emaw ni tak hian ka zâng vah a, ka tho hma ang reng hle bawk. Chaw chu ka chhum nghal a, chaw vil pahin thingpui sa ver vawr chu ka in a, chuti anga thawh hma leh ei rawng bawl vel chu ka tih turah ka dah tawp. Ka beisei loh lutukin ka pa hmel ka hmu hlawl a, min en chian em avang chuan ka hawi sawn vat a, ka pa chu ka melh ṭha ngam der lo. 

Ngawi rengin a thingpui tur ka siam sak a, dawhkana ka hun lai te chuan kan la inbe lo hrim hrim. Min en reng tih chu ka hria, mahse kei chuan ka hnung chhawn tlat thung. Ngaihdam dil te chu la duh ru tho mah ila awmzia a awm tawh lo, tunah chuan ka pasal neihna tur engkim tihfel a ni vek tawh zawk a ni. A thaw ri deuh hawk a, ka lo phu nasa em em mai leh nghal. Inbe ta chuang lo chuan a kal sawn a, nuam lo ka tihna chu a reh thei thlawt lo.

Kar thum a ral meuh chuan kan inneih hun pawh a hnai kûarh tawh a, College aṭanga ka ṭhian kawm ngeih em em Maltei chu ṭhian atan hman ka tum nghet bur a, ani paw'n min hnial hran lo. A hmeia pain ṭhian hi chu ka ngah ve ang reng a, ṭhian siam awlsam mi ka lo ni bawk nen min kawm peih pawh an tam ve viau. College-ah ṭhian ka nei nual a, University-ah ka nei leh nual bawk a, ṭhian kawm hi chu nuam ka ti hrim hrim.

Kar thum chhung chu zan awl pawh awm mang lovin U Billy-a a lo leng ziah a, ka pa nen pawh an titi a rualkhai ṭan viau tawh a, ka nu erawh a ṭawng tam lo hle. Chuti ang bawkin u Thanthani pawh a room-ah a tawm chawt a, ngaina viau anga lang si kha u Billy-a lo len apiangin room-ah a tawm bo daih zel. Amos-a paw'n u Billy-a chu a lo la hre kar a, chu erawh kan beisei lo lam tak a ni. 

"I va zak lo ve a" tiin min kek bawrh bawrh a, kei paw'n ka theih tawpa nain ka kek let ve tho, na tawrh rengin awmzia a nei lo.

"RAMENGMAWI, mi hurnu" ṭap ṭuau chung chuan min kek leh lawp lawp a, min pawt sawk sawk bawk a, ka insum theih tawh ngâng bik loh avangin ka sual let ve tawp a ni ber.

"LALTHANZUAL! RAMENGMAWI!" ka pa aw fiah khauh ṭha tak chuan keini pahnih chu min khapdai zo hauh lo, min pawh ṭhen hnuah erawh ka inthlah ve thei chauh. 

"In zak chai lo'm ni?" tiin ka hmaiah tak a rawn beng a, kei ang bawkin Than dawhehi hmaiah chuan a beng ri ve sawk bawk.

"Insual rual pawh in ni tawh lo, eng vanga insual nge in nih?" in chhung khawk rum rum khawpa ringin ka pa chuan a ti ṭhawt a, dawheh zep zuapi chuan

"Ka Lipstick a lo tichhe vel a nih khâ" tiin a ṭap zui nghal hawm hawm a, ka pa nen chuan kan inmelh no lo chiang khawp mai.

"RAMENGMAWI, eng vangin nge i u Lipstick chu i lo tihchhiat kher? Kar leh maiah pasal i nei dawn, i va zak lo ve!" ka chala nam sawk pahin ka pa chuan a ti ram hmuk a, ka tuar thei ta bik lo. 

"Ka tih chhiat a ni lo, Amos-a tih chhiat a ni a, i fanu sawn kutthlak a tum a, ka lo chhanna lamah kan insual mai chauh a ni" ka tih pawng pawng lai chuan ka hmai a ri leh ta thlawrh.

"Min zah lo tak khan ṭawng reng reng suh" a tih chuan rilru na takin ka ṭap chhuak hawk a, rilru na lutukin chu in aṭang chuan ka tlan chhuak zui nghal nal nal bawk. 

Chapter 3

Ka ngaihtuahnaah u Billy-a a lo lang hmasa ber a, chungte chuan ka ṭah a tichhuak zual. Ka phone chu ka hmet eng a, mittui tling pamin u Billy number chu ka dial a, a hman dawn lo tih hre vek mah ila biak ka mamawh tak zet a ni. Vawi hnih lai a ring ral tir ṭhak a, mahse ka beidawng duh lo, rei lotê tal a bula awm ka duh a ni. 

"Class ka nei mek asin, ka buai rih viau a" phone pick up ruala a tih chuan ka ṭap a ni tih a hriat hlau takin

"Kan inhmu thei ang em?" ka ti lawi rât a, ka ṭawng zo chiah chu ka ṭah rik mai loh nân ka hmui ka hup tawp bawk.

"Ka buai rih ka tih khâ...." nin hmel zet hian a lo ti leh a, mahnia awm chu ka chan tawk mai a ni tain ka hria.

"E..aw...aw le, a nih aw" ka ṭawng tawp lamah chuan ka ṭap chhuak tel hak a, a hre hman hrim hrim ang, ka insum zo tawh thlawt lo a ni. 

Rilru tipaukhauh luiin ka ṭap tawp hmak a, ka pa min ben vang leh ka u nena kan insual vang chuan ṭah ka duh tawh lo. Ka pa khan min hauh paw'n ṭawngkam vin takin min hau mai zel a, mahse tun ṭum chu a kut ka tuar ve ta. Min benna chu na chu ka ti lo, min beng hrim hrim kha ka rilru tinatu a ni.

Zing kar aṭang u Thanthani kha a mood a fuh lo nghal em em ringawt a, a hnaa a kal peih loh thu leh kal a tum loh thu a sawi nghe nghe bawk. Amos-a lah an zirtirtute'n chawlh an puan avangin school kal a ngai lo ve leh zel a, Lipstick vang mai maia kan buaina chu a ho thlawt a ni. Ka nu erawh a hna lamah a kal tawh hlauh zawk a, awm ve phei se chuan u Thanthani zawk a chhan leh ngei ang. 

"RAMENGMAWI, lo lut teh" Veranda aṭanga min kotu ka pa lam chu ka hawi a, an hmuh laiin ka va han ṭap tawh dawn lo chiang tak!

Ka pa chu a lut zui leh nghal a, kei pawh in lam pan chuan ka kal ve leh mai bawk. Ka phone chu a lo ring a, caller ID ka en chuan u Billy-a a ni tih la hre nghal. Pick up duh lovin ka ak ṭha hmak a, mahse a ring ral hnu lawkah a rawn call nawn leh ngat a, ka aw thian hmasa tê tein ka pick up ve leh ta nge nge.

"Khawiah nge i awm?" a aw chu a fiah ṭha hle a, thawm ri mur mur awm tawh loh danah class a la tawh lo a ni ngei ang.

"Ka ṭha e" pangai tak chuan ka ti a, ka intih luhlul luih ve tlat avangin ka aw pawh a dik chho ṭan hle.

"I ṭha hauh lo Rameng, i ṭap tih ka hre thei. Ka lo chhuak chiah, khawiah chuan nge i awm?" a rawn tihnuhnawh leh a, ka ṭah chu a chhuak ru leh tlat tawh.

"Lo kal a ngai lo, zanah i lo leng zawk dawn nia" ka tih pawh chuan MZU Campus a tlan pelh tawh thu a sawi a, ina ka awm thu chu ka sawi ta ringawt bawk.

In chhung ka lut chu sitting room-ah u Thanthani a lo ṭhu ngawi ngul a, a ṭah a la chhuah hmel khawp. Ka pa lah chu a ding ngawi run a, a hnaah kal a tum lo a ni ngei ang. Ni e, min zilh teh se, min hau bawrh bawrh pawh ni se eng thil mah tihsual ka nei hauh lo. Engkim ka sawi ang, u Thanthan-i'n Amos-a kutthlak a tum dan zawng zawng chu ka sawi chiang khawp ang. 

"In zak miah lo em ni? In inkarah buaina a awm leh tih ka hriat vaih chuan ka thin a rim khawp ang, hna kal ka ngaih avangin zanriah ei hunah kan sawi ṭha leh ang" ka pa chuan a ti hmuk a, ka rin aiin min hau na lo daih.

"I hmel hur hmel tak pawh hi ka hmu peih ther te tawh lo ve, pasal chu nei mawlh rawh, awm bo vang vang la, he inah hian lo let leh tawh lo vang che" ka pa hna kal hnu chuan u Thanthani chu a ṭawng ve leh ta hmarh hmarh mai.

"Sawi lo mah la pasal chu ka nei dawn tho tho, nau titla tura min tih thute kha ka pa hnenah ka sawi vek mai ang" ka tih chuan

"I duh tawkin sawi rawh, vawi za pawh sawi mah la ka tan pawina engmah a awm lo" tiin a room-ah a lut a, lo chhuak lehin in aṭang chuan a chhuak ta vang vang. 

Ka pa khan min hau hrep se chuan engkim ka sawi ngei ngei ang, mahse sawi a hun lo a ni ang mi pawh a hau rei lo. Amos-a pawh a hruai daih a, keimah chauhin inah chuan ka awm leh ta tlawng. Len chhuah ve daih te chu ka tum ûk a, mahse u Billy-a'n lo kal a tum avangin ka ṭhulh leh ta zawk a ni. Kan ina a lo luh lai chuan ka lo en reng a, ani paw'n min en chiang khawp.

"Eng vanga ṭap nge i nih? I chhungte'n an hau che em ni? Engati nge i biang hi a sen deuh hlar?" min ngaihtuah tih chu ka hai lo chiang hle.

"A ho lutuk, engmah a ni lo. Vawiin chu leng chhuak ila, kan innei ṭep tawh bawk sia len dun ka châk mai mai maw le"

"Ka zawhna kha chhang la kan leng chhuak dawn nia" chuti ang thu chu a sawi dawn tih ka hre lawk vek, a chhan chu a mizia a ni ve miau a!

"U Thanthani nen kan insual a, chuan ka pa'n min beng bawk a, chu zawng chu a ni mai, a tawk em?" ka nui lui sak a, ani erawh a hma aiin a meng rum zawk.

"Ka hria alawm Rameng, i chhungte hian pasal i neih hi an phal vak lo tih an awm dan aṭang ka hria a ni. I chungah pawh an lungawi lo ngawt ang, mahse kan innei ṭep tawh tih hre reng ang che" 

"Nia, pasal ka neih hi an hlau ni berin ka hria, mahse tunah chuan nei thuai tura min tih chang pawh an nei leh tawh thung" ka tih chuan

"Kan inru mai dawn em ni?" a rawn ti hlawl a, ka lu ka lo thing vat thung, inruk te chu ka duh teuh lo mai. 

"U Thanthani nen hian engtin nge in inhriat?" ka zawh châk em em ṭhin chu ka zawt ta daih a, chu hun baka remchang chu a awmin ka hre lo a ni. 

"Engati nge?" zawhna bawkin min chhang let a, chu chuan an inhriat dan hriat min tichâk zual suah.

"Hriat chian hmel deuhin a sawi reng zel che a, i nun hlui engkim pawh kha a hma hnen aṭanga ka hriat vek a ni" zep ka tum ve kha a nia, ka zep rei leh thei ta lo.

"A ṭhiannu nen kan inngaizawng tawh alawm, thil dang sawi tawh lo vang" tiin kawngka lamah min kai a, an inhriat dan chu ka beisei loh lam daih a ni.

"Khawiah nge kan kal dawn?" khawi lamah tak min hruai ang maw! Zan a meng rei deuh pawh a ni maithei, dark circle a nei thânin ka hria.

"Ka hre lo" ti supin Steering chu hnehsawh zetin  a herh kual a, a duh dûhna hmunah chuan min hruai teh se, rilru hahdam taka awm ka duh a ni.

Ka pasal ni mai tur a ni a, kan inneih ṭep tawh tho avangin ka buaina tawh leh ka chhungte min tih dan thlengin ka hrilh ta chu a nia, ka rin ngam tawh em vang a ni pakhat. Ngaihzawng hlui pawh tam tak a nei ngei ang, mahse kan intawn hmaa thil thleng vek tawh a nih avangin buaina neih phah ka duh lo, nupa ni phawt ila kan inkar chu a ngheh sawt ka ring bawk. 

MZU kawng lamah kan tlan a, kan Department Building-ah min hruai reu reu ang tih ka hlau ru hle. Tanhril lamah chuan a tlan chho hlauh a, lawm ru tak ka ni. A office-ah min hruai na se chu kan Lecturer te nen kan inhmu ngei ang a, u Billy-a nen kan inngaizawng tih hre vek mah se ka tan an hmel hmuh chu a nuam zawk zawk lo, kan inneih hunah an lo kal ve hlawm awm ngei sia ka zak lawk. 

Motor a tih din rualin ka hawi chhuak a, kan hmaah chuan in an lo sa mek a, eng nge kan tih tur ber pawh chu ka hre lo. Hnathawkho chuan u Billy-a chu an lo hre khawp a, an lo be siam siam a, an inbiak dan aṭangin chu in sak mek chu u Billy-a in a nih hmel. Min kal kual pui a, ram chu a zauin a sei ṭha khawp mai. A lo berah a sei zawng chu metre 100 vel a tlin ka ring, a zau zawng erawh a zau mawi tawk hle.

"Nangma ram lei nge in ram ni sa?" ka tih tawl a, Aizawl khawpui hnaiha mimal ram atan chuan a zau em em ve êm a ni.

"Keima ram lei bik, Aizawl khaw hmun dik tak hi kan nei hleinem" a tih chuan mak ka ti lutuk, Aizawl-a piang leh seilian emaw ka ti char char.

"A ni maw!? Min van hrilh ngai lo em em, khawi khua nge in nih?" ka tih chuan ka kut a rawn hum a, kan awmna hmun chu a daihlim nuam bawk sia ka hahdam sawng sawng thei.

"Champhai khua alawm kan nih, mahse kan haw ngai mang lo. He lamah hna kan nei deuh fur a, Aizawlah hian kan pem a ni ber"

"Champhaiah chuan in in nei tho tihna maw!?" dilchhut zeta ka tih leh chuan a nui suk a, kei pawh ka nui ve leh ta ringawt bawk.

"Aw nei e, mahse ka nite'n an enkawl thung. Champhaiah awm nghet ila chu innei turin kan zin chho vang vang maw le, mahse kawng a thui ve ang reng" a tih chuan

"Champhai khi ka kal châk teh mai a nia aw, Rih dilah te khian ka kal châk, kal châkna ka ngah mai" ka lo ti leh vat a, a nui chhuak ta hawk.

"Kan la kal dawn nia, Champhaiah Honeymoon han hmang nghe nghe ila a ṭha tak ang" nui chunga a tih chuan phur nghal tak ka ni, Honeymoon hman châk vang ni lovin Champhai kal châk vanga phur ka ni daih.

"Eng lo...engtik kumah nge ram hi i lei a? Ka zawh chhan che chu a sei ṭha bawk si a, tun laiah ram leh in hmun a to tawh viau a, ka hre châk mai mai" kan ngawih deuh vang vang hnu chuan ka ti leh ta ringawt.

"Kum 10 liam ta khan ka lei daih tawh alawm, chung hun lai chuan tun ang em em hian ram man a to lo. Nuai 30 velin ka leiin ka hria, chu ai chuan a tam maithei bawk" 

"Awi! I va'n hausa em em, A!!!! Ka sawi awmzia chu eng lo...ka..." ka ti bah deuh nawk nawk a, sawi zawm dan tur pawh ka hre tawh lo, a va nuam chiah lo tak!

"Hausa chu ka ni chiah lo, he ram lei tur hian ka thawk rim ve bawk alawm, Delhi ka awm lai aṭang khan pawisa chu ka thawk chhuak daih tawh zawk a ni" tiin ka biang chu a piai kher a, a thil tih avang chuan lai tak ka ni.

"Lo kal rawh, tui pe dun ang" tih leh min kalpui a rual a, kan tih tur chu ka bo ang reng hle a, mahse min hrilhfiah tâkah chuan ka hrethiam ve leh mai bawk. 

Cement-a Plaster vek tawh bang chu tui kan pe a, ka beisei ai daihin chuti anga awm chu a nuam, ka nui deuh reng mai. DDT kah nâna an hman ṭhin bur chhungah chuan tui kan thun a, bang chu kan phuh huh ser ser a, inpawh takin kan titi dun char char bawk. Mizoram leh ram dang in sak dan inan loh dante a sawi kai a, kan knowledge chu inzau hleih vet vet tak a ni. 

Eng pawh sawi ila ani chuan min sawipui thei zel a, hmeichhe lam deuh pawh ni se a lo sawi ve thei zel a, Associate Professor ni awm reng pawh a ni. Min sawpui ve ṭhin tak nâa a ṭawng thui lo thei em em thung a, kan thil sawiin a sawi tum tak chu a sawi chat chat zel. A hnuah phei chuan a Student ka nih lai a sawi chhuak nghe nghe a, ka thiam loh vang pawh ni miah lova mark min pek chhiat thu a sawi chuan ka chum dawt ringawt.

Vawi leh khatah a thil tih lai dahin bangah chuan min nawr bet thut a, ka ṭawng dawn lai tak chuan min fawp a, mahse rei tak kan infawp lo. Kan piah lawkah hnathawk an awm ve reng a, Cement chawk khawl a ri reng bawk nen kan thawm leh kan awm dan chu an lo hre kher lo maithei a ni. Kan kal mai dawn emaw ka tih laiin min fawp leh tawk a, u Billy-a hi chu a zei thlawt a ni.

Kan haw lam chuan Maltei hnen aṭang phone call ka dawng a, ka hmuh châk thut avangin u Billy-a chu MZU lamah ka inher tir leh lawi a, a tlai ve deuh tawh avangin kan Lecturer hluite nen kan inhmuh loh hram ka beisei. Maltei hi kei ang bawkin u Billy-a student hlui ve tho a ni a, mahse ani chuan B.Ed a training mek thung. 

Kan inhmu chiah chu a nui var var a, ka mi kalpui pa vang chuan a tim ang reng hle, ṭawng pawh a insum viauin ka hria. U Billy-a lah chuan biak a tum hmel der si lo, Maltei tan tak pawh a nuam lo khawp ang. A bana sik zeuhin be ve turin ka hrilh ta nge nge a, u Billy-a chuan 

"I ṭha maw?" a ti duh lêk chauh a, ka ṭhiani leh ka pasal ni mai tur u Billy-a chu inpawh takin awm ve se ka duh a ni. 

"Aw ṭha e Sir, i ṭha zawk maw?" Maltei chuan a lo ti ve mai a, pakhata paw'n a buk khum leh ringawt tawh.

Thil eng eng emaw ni kan sawi kual nuai a, chuti ang chuan thil kan sawi kual vak ṭhin hrim hrim. A tirah thupui nei ran sawi ve ṭhin mah ila a rei hnuah kan pakai kual ṭeuh zel tho tho. Monday zinga kan inneih dawn avangin thawmhnaw en dun te chu kan sawi a, u Billy-a chuan lo kal ve a tum thu a sawi a, ka lo phal lo nasa mai.

"I ti mak thei em mai u Billy, kei leh Maltei'n kan ha chhin vel ang a, chu zawng chu a ni mai, i lo kal ve kher a ngai lo" ka tih chuan naupangchhia zet hian

"I inhmeh leh hmeh loh ka hre duh alawm, phal lo mah la ka kal ve tho ang" a ti deuh tlat a, Maltei erawh a lo nui char char thung.

Ka hnial buai peih ta lo law law, a sawi ang chuan mo kawr en turin kan bulah a lo kal ve dawn tih ka chiang. Maltei chu haw rual pui duh mah ila class a la neih avangin kan haw san a, kan haw meuh chuan dar 3 a lo hnai kûar tawh. U Billy-a chuan kan veng lama kan tlan laiin chaw eiah min sawm thut a, a tih chi loh lutuk avangin ka nui ringawt. Ani lah a lo thutak hmel em em thung a, nuih pawh a nui eih lo.

Ka hnial fê hnuah motor aṭang chuan ka chhuk ve thei ta hram a, puitling ṭhan kin tawh mah ni se naupang ang maia awm a ching leh thut ṭhin chu a inhmeh lo thei tawp, mahse min tihlim thei em em thung. MZU-ah Associate Professor hna a chelh mek a, a hna chelh nen phei chuan luhlul tlat leh tleirawl ang maia awm vel chu a inhmeh hlawl lo, mûk deuhin awm se a inhmeh daih zawk, ka mitah leh ka hmuh danah chuan chuti ang chu amah nen a inmil chiah bawk.

Zanriah kan ei laiin ka pa chuan min zilh ta ngei a, a ṭawngkam pawh a nem hran lo. Kei chu ka ngawi kar a, u Thanthani erawh a thiam thu a sawi zawt zawt thung. Ka sual let a ni tih ka nu'n a hriat chuan tûr zet hian min melh hrâw a, kan inhma chhawn bawk sia hmuh loh der chu har tak a ni. Ka pa lah a ṭawng tui mai bawk si, kham daih chu duh teh mah ila a chi teuh lo, ka pa chuan nasa takin min hauh zawm nghal a ni mai.

Ka pa a ṭawng zo chiah tihah ka nu a rawn ṭawng chhuak ve leh nghal a, inzilhna mai ni lo thinrim hrik thlakna awkâ hriat reng chu hne ru tak ka ni. Ka nu chuan engkimah min burbun nghal vek a, ka rin tawk chiah a ni. U Thanthani ṭan zawng bakin engmah a sawi lo, u Thanthani chu hau ve mah se keimah ang em emin a ṭawngkhum ve chiam chiam lo bawk.

A mak hi ka ti ṭhin, a chang phei chuan a fanu dik tak ka ni lo emaw ka ti hial ṭhin a ni. Kum 22 chhung chu kan chengho ve tawh a, ngaihtuah let paw'n kawng tam takah kei aiin u Thanthani a duhsak zawk tih chu ka mitthla nghal ruai ruai thei. A ni tlat alawm, a tan chu u Thanthani chu a fanu hliah hliah bik hi a ni ringawt. Ka pa ve thung chuan min duat dan a inang rengin ka hria, u Thanthani'n min thik ve khanglang ṭhin mai pawh a!

"A chi ang maw, nuam ka va'n ti lo tak" inthlahrung ru zet chuan ka ti a, Maltei lah chuan a lo la ngai awlsam em em zui.

"A ho lutuk, kan Department-ah class ka chawl khât ber alawm, kan Teacher te paw'n min hrethiam em em ang" a lo ti mai a, tlem chuan nuam lo ka ti lo ta deuh.

"Naktukah pawh kan kal thei tho a nia, naktuk chu inrinni a ni zawk a, vawiin chu kan ṭhulh mai dawn em ni?" ka tih chuan

"A ngai lo, vawiinah mo kawr chu kan va en dawn nai, duh leh naktukah pawh kan en leh tho ang chû" a lo ti zung zung a, ka lo remti ve leh ta tawp.

Zirtawp mah ni se mo kawr kan enna tur dawr neitu chuan ha chhin vel turin min hrilh lawk tawh miau a, dawr neitu chu Maltei hmel hriat a ni nghe nghe bawk. Maltei chuan u Billy-a lo kal ve dawn tak tak leh tak tak loh min zawt a, a kal ve dawn thu leh kan lam tur thu chu ka hrilh a, nizan khan kal ngei a tum thu a sawi nasa em mai, min lo be ṭep tawh zawk ang.

Dar 10 a ri tawh a, mahse u Billy-a hnen aṭang phone call ka la dawng hauh lo. Whatsapp message chu ka hnutchhiah a, chu pawh a en leh ta chuang lo. A buai dawn loh thute kha a sawi lawk vek a, chuvanga a hman ring ve tawp pawh chu ka ni. Minute 10 vela dar 10 a pelh chuan ka phone ta nge nge a, mahse a phone lo pick up tu chu amah a ni miah lo, a nau aw ngei a ni. 

"Nakinah ka lo biak tir dawn che a nia" ti hmakin phone chu a hmet tawp zui daih a, ṭawng tak ngial pawh ka ṭawng ve hman lo.

U Billy-a nau awm dan chu ka hrethiam pha chiah lo, min ngaina lo tih chu hre tho mah ila chuti ang teh tlawnga min biak chu ka ring lo a ni. A sawi ang ngeiin rei lotê hnuah u Billy-a chuan min lo call a, kan veng lam pana a lo tlan mek thu a sawi bawk. Amah ber a lo kal tawh avangin a buai leh buai loh pawh ka zawt duh ta lo, a nau nena kan inbiakna hriatthiam har zet pawh chu ka sawi lang duh kher lo, a ṭul chiahin ka hre lo a ni. 

Maltei chu kan van lam ta ngei a, a seat hnungah ka ṭhutpui daih bawk. U Billy-a chuan motor chhunga darthlalang aṭang chuan min lo melh zeuh zeuh a, a hnunga ka ṭhu chho daih chu a lungawi loh hmel khawp. Maltei chuan mo kawr ka hak chhin vel tur thlalak chu min hmuh a, an chei dan leh a design chu a sawifiah mawlh mawlh bawk a, dawr awmna chu kan thleng har lo hle.

"Kha kha a va ṭhat hmel si ve, a dang hak chhin pawh a ngai vak tawh em ni?" dawr neitu chuan a ti a, a dang hak leh vel chu a ṭul vakin ka hre tawh bik lo.

Maltei chuan ka inhmeh thu a lo sawi nghal char char a, ka vun rawng nena a inmil thute chu a sawi mawlh mawlh a, u Billy-a erawh dawr chhunga kan awm hnuah a la ṭawng lo hrim hrim thung. Dawr neitu chuan ka hak lai mek mo kawr chu a siam ṭha zeuh zeuh a, thla te min laksak nghe nghe a, thlalak ah chuan ka inhmeh ve viau chuan ka hria. Maltei erawh a lo thlang fel diam tawh a, ani chuan hak chhin pawh a duh lo. 

"A mawi em? Eng nge i ngaih dan?" lo kal ve duh tlat pa lam hawi zeuh chuan ka ti a, ka khi deuh var var bawk.

"A ṭhat kha!" u Billy-a chuan a lo ti mai a, a hmelah erawh ṭha tih hmel a lang leh chuang miah lo, ngawi renga min en chu a duh tawk a ni ang.

"A dang hak buai vel ngai lovin hei hi ka lo confirm nghal mai ang, hawh man hi pek nghal tur em ni?" ka tih laiin u Billy-a chuan

"Kan lo lei ang" a lo ti thung a, a lam chu ka hawi let rang kher mai.

"Lei kher a ngai lo, mi dang paw'n an hawh ṭhin alawm" dawr neitu chuan a lo ti ve mai a, kei paw'n lei ka tum lo hrim hrim, inneih chhung hak hawha dah let leh chu ka tum a ni.

"Eng zah man nge?" tiin u Billy-a chu a ṭhutna aṭang a tho chhuak a, a uang miah lo leh nghal, ka tana a nawm loh dan tur a hre lo a ni ngei ang. 

"U Billy, lei a ngai miah lo tak tak a nia" ka tih pawh chuan min ngaihsak lo zet hian a phone a khawih mual mual a, mo kawr chu ka hlip thuai thuai zui nghal bawk.

"Ka pi, eng zat man nge?" a tih nawn leh ngat chuan dawr neitu chuan a lo sawi ve mai a, Maltei chuan mak a tih hmel hle.

A phone aṭangin ka mo kawr hak tur man chu a pe fel vek a, nuam lo ka va'n ti tak, han hnial vak dawnin mi dawr a ni bawk si. Maltei pawh haw lamah chuan a ṭawng tlem ta hle a, kan inbe zeuh zeuh tih loh chu ṭawng kan awm vak lo. Maltei chu kan thlah hmasa leh phawt a, kan ina peng kawi tur pawhin ka sawi buai duh lo. A peih leh dawn chuang lo, kan inkawm tirh aṭang tawh ka chhungte chu a mil lo ve tawp, a chhan sawi tur pawh a hre bik lo.

"Nuam lo ti suh, nuam lo tihna chhan tur pawh a awm lo" kan in kawt kawngpui sirah kan ding reng tawh a, ka la chhuk duh mai loh avanga ṭawng chhuak hmasa pawh a ni.

"Nuam lo tih lohna chi a ni hleinem u Billy, i ti awm ang lo thei em mai. Hnial che kha ka duh a, mahse mi dawr a ni bawk si" ka ti ta thlawt a, ka tawn ang chu tawng se tu hmeichhia paw'n nuam an ti bik kher lo vang. 

"I dinhmun ka hre chiang a, i pasal ni mai tur ka ni bawk. Kan inneih dawn avangin i chhungte pawh i lakah an lungawi vak lo tih ka hria, i tan pawh pawisa dil a nuam lo vang"

"Ka nei ve reng alawm, Survey kan neih laia ka hlawh kha ka la hmang mang hleinem, mo kawr man kha ka pe let dawn che a nia" 

"A ṭul hauh lo Rameng, la innei chiah lo mah ila kei chuan ka nupui ang maiin ka ngai tawh che. Chuvangin nupa kan nih hnuah chuan i mamawh apiang min dil la, ka lo pe ṭhin ang che" 

"Ngaihtuah chiang ve la, tu hmeichhia mahin an pasal te mo kawr tur an lei tir ngai lo. I phone number ka nei tho, zaninah ka lo Gpay mai ang che" ka tih chuan

"I duh leh pawisa chu i lo thun dawn nia, mahse a letin i hlawk dawn tih hre tawp rawh" a lo ti nghal hmak a, a sawi awmzia chu ka hre chiang hle.

"Zanin i lo leng dawn em?" ka ti ta ringawt a, thil dang sawipui chu a fuh berin ka hria, lungawi lo deuha in chhung luh chu ka duh chiah lo a ni. 

"Ka hre lo le, ni 2 vel chiahin kan inneih ni a dal tawh bawk si a, ka inthlahrung ve tawh deuh. Ka lo len i duh em?" zawhna mi zawh let ching ve tak zawng a va ni chiang em.

"I inthlahrun chuan a ngai lo, mahse i lo len hi chuan nuam ka ti tho" ka ti pangai ve mai a, dik tak chuan lo leng se ka duh, a awm chuan ka boruak hip pawh a dang hlak ṭhin.

"Ka hrethiam e, ka lo leng dawn nia" tiin a lam hawi zawng chuan min kuai her a, ka chala a fawh vang vang hnu chuan motor aṭang ka chhuk ve mai bawk.

Ka peih loh ruk ang ngeiin zanriah kan ei lai chuan kan awm leh ta, Amos-a leh ka pa inbiakna lo chu ṭawng thawm reng a awm leh tawh lo. Keimah avangin an hlim lo tih ka hria, pasal ka neih hnuah erawh an hlim tawh ngei ka beisei. Rei pawh ṭhu lovin ka kham daih a, ka chaw ei a tui hlawl lo a ni. Mi dang paw'n an ei tui bik lo tawp ang, chuti ang em em chuan thawk leh khatah kan chhungkaw boruak a chhiat ka ring ngai lo.

Zanah chuan u Billy-a leh ka pa chuan eng eng emaw ni an sawi dun leh a, zan dang aiin ka nu pawh a ṭawng tam ve ta deuh. Amos-a erawh a mu daih a, u Thanthani pawh room-ah a tawm leh tlat tawh. Kei chuan thingpui ka lum a, u Billy-a ber nen pawh kan la inbe ta chuang lo. Thingpui ka siam peih fel hnu chuan sitting room lamah ka chawi phei nghal a, ka nu chuan ri si lo hian min lo nuih hak a, a nuih chhan chu ka hre bau lo.

U Billy-a chu zan dar 9 leh a chanve vel thleng a leng a, thingpui pawh vawi hnih ka lum a, ani paw'n min nuih suk hman chauh, ka pa biakna chu a chhang char char a ni ber. A haw hnu chuan tih tur ka neih hran tawh loh avangin room-ah ka lut a, mut chu ka tihtur awmchhun a ni mai. Ka phone ka khawih lai chuan thil ka hre chhuak thut a, u Billy-a chu pawisa pek ka tum ûk a, ka ṭhulh leh ta nge nge. 

Vawi khat pawh a thil min lei sak man ka thawn let ringawt pek a, ka pek leta tam a rawn thawn let ve leh nghal a, khata ṭang phei kha chuan thil inleitir vak ka duh tawh lo, a dawngtu tan a nuam lo duh êm mai. Sum chu a ngah tih ka hria, a nazawngin a hmang mai mai ngai lo bawk. A facebook account-a a thlalak post ṭhin pawh lehkhabu hlir a ni ṭhin, lehkhabu lei nân pawisa a hmang hnem tawh ngawt ang ka ring. 

Ka duh tirh lai kha chuan ka chhui nasa thei maw le, Social media aṭang khan ka zawng kual vak vak zel a, thlalak a post ngai lo lutuk kha ka ngei lek lek zel. Ka ngei rei ngai hran leh chuang tawp lo va, ni khat lêk pawh class a lak loh kha chuan ka mood a off vek ṭhin. Chuti ang khawp chuan ka lo duh ru ve ṭhin tawh a, kan inngaihzawn hnu phei kha chuan ka duh zual sauh leh ta nghal.

Monday zing a ni a, Biak in Hall-ah chuan kan ṭhu ta ran mai. Kan hmaah kohhran upa a ṭhu a, kan hnungah mipui an ṭhu ṭhup bawk. Thu kan chham lai te chuan ka tha a khur vel a, Hall-ah vek chuan Joint Reception Programme kan hmang tlang nghal bawk. Wedding Photo Shooting kan nei leh thlap bawk a, video-in an siam nghe nghein ka hria, en let theia a awm tur ringawt pawh chu a hlu a ni. 

"Lalthanzuali nau lek maw i lo nih? Ha! A awm tho e, ni awm tak pawh i ni" ka bengbula rawn titu chu ka hre chiang khawp mai.

Min hnung chhawn zawnga a kal sawn lai chu ka en reng a, min ngaina lo ve chiang alawm, chu bakah engtin nge u Thanthani te nen an lo inhriat ka hre lo. Pasal ka neih hunah chuan tlema a zia awm ve deuh ka ring kha a nia, mahse u Billy-a nau u Pektei mizia chu a tawrhhlelhawm dawn khawpin ka hria. A nu erawh beisei loh takin a fel em em thung a, min be peih viau bawk.

Kan inneih zan a ni tawh bawk a, boruak pawh a reh lo hle. Kan ṭhiante chuan After Party lam buatsaih an tum a, mahse kei leh u Billy-a'n ṭul kan tih vak loh avangin an cancel leh a, chuti anga tih eng emaw vak chu kan ngaina lo a ni ang. Thil dang zawng aiin u Pektei min ṭawngkhum dan chuan ka rilru a luah tlat a, u Thanthani nau ka nih avanga min hnuaichhiahna awkâ kha ka hrethiam lo a ni.

Zan dar 1 lai a ni tawh a, kei leh u Billy-a chu kan la harh ṭha dun khawp mai. Pasal a nih angin a che mial mial a, lawi ṭhat zan kan hman zawh hnu chuan kan inbual dun leh thlap bawk. Tunah chuan pasal ka nei ve ta, mahse ka chhungte hnen aṭang phone call vawi khat mah ka dawng lo. An thei hi ka'n ti khawp a, u Billy-a nen inkuah chialin mu dun mah ila thil ka ngaihtuah kual leh vak avangin ka muhil thei lawk lo. 

A em em ve ê ka ti, chhun lamah te khan an hmelah hlim hmel ka hmu lo hrim hrim. Kei erawh ka hlim ru viau thung a, ka chhungte mah ni se ka chhungte dik tak an ang lo tak zet. Ka ṭhiante hnen aṭang lawmpuina leh thil pek kan dawng nual a, kan Professor te pawh an lo lang ṭhap mai, zakthlak ve duh tak a ni. Chuti ang boruak vel chuan rilru dang min puttir hlauh zawk a, ni lo phei se chu ka awm a nawm pawh ka ring lo. 

"La tho bik lo la" maimitchhing reng chungin u Billy-a chuan a ti ṭial deuh ruih a, mahse thawh ka tum lui ta tho.

"A chi nâng, mo thar tuka thawh hma loh te chu a mawi lo em mai" a ban chu ka dah sawn sak a, a ngaite bawkin min kuah leh nghal.

"U Billy" ka tih chuan a rawn che thut a, ka chungah a bawk ta ran mai, a thil tih tum chu a hun tawh lo tak zet. 

"A chi tawh loh" ka lo ti deuh tawp a, ani erawh a nui duh lêk chauh.

"Eng maw chi tawh loh?" a hmuia ka ir leh ka nghawng vel nul reng pah chuan a ti a, kei chu danglam nasa tak ka ni.

"Eng lo...ih....nizana mi ang kha" ka tih chuan a nui nghawr dat a, ka lo zakin ka lo lai chhe em em thung, ka taksa dik lo lo phei se chuan chu aia ka laih ka ring.

"Tunah hian dar 5 a pel vel âwrh a, ka nu leh pate hi dar 6 emaw 6 leh a chanve velah an tho tlangpui ṭhin" a tih chuan

"Eng nge i sawi awmzia?" ka lo ti hû a, a thu sawi awmzia hriatthiam chu a har ve em a ni.

"A awmzia chu maw darkar 1 dâwn hun kan la nei" nui sun sun hian a rawn ti ta mai, a sawi tum chu hrethiam lo ka ni tawh lo chiang khawp mai.

"I tak tak em ni?" ka tih chuan naupang thu awih deuh ang mai hian a lo bu nghauh nghauh a, ka nui hmel a hmuh rualin a chet dan turin a che zui nghal mawlh mawl bawk. 

Dar 6 rik hmain min thawh pui a, thingpui min lum pui bawk a, an bungbel dahna ṭhenkhat min hrilh zung zung lai te chuan ka lo chhinchhiah kar a, rei lovah ka nu leh pa hmel kan hmu zui nghal. Thingpui chu fimkhur takin ka chawi phei a, mo thar tuk a nih avangin ka che sual ang tih ka hlau a ni. Vanneih thlak takin chet sualna ka nei lo hlauh, lawm tak ka ni. U Billy-a lah chuan ka awm dan chu chik zetin a lo en a, ka ṭhenkhum vak ringawt. 

"Chuan engtin nge i ruahman dan chu?" tukṭhuan kan ei laiin u Billy-a pa; pa Thangtea chuan a rawn ti a, u Billy-a a bia tih kan hriat avangin kei leh nu Nguri leh u Pektei chu kan ngawi ṭhap thung. 

"Champhaiah zin pui ka tum a, ka nite paw'n kan nupaa min hmuh an châk viau mai. Nizan zan tir lam khan min lo bia a, kan chhoh tur thu pawh ka hrilh nghal nghe nghe"

"A ṭhat nasat chu, mahse han cham rei lutuk lo ula, in han che sual vel ang e. Fimkhur takin awm ula, thihna hi kan bulah a awm reng a nia" pa Thangtea chuan a ti leh a, a sawi dik ka ti khawp.

"Naktukah chhoh nghal mai kan tum asin, keimah tak pawh hian chawlh ka la rei thei lo. Exam a hnai tawh a, kan lo let leh vat chu a ngai ngei ang" u Billy-a chuan a ti a, nu Nguri a lo ṭawng ve ta.

"Nia, fimkhur tak leh hlim takin hun han hmang phawt mai teh u" a rawn a ti a, u Pektei erawh ṭawng thei lo ang maiin a ngawi leh ran tawh. 

Chapter 4

"Hei! Min lo tibuai suh, ka nu leh pate an lo kal thut ang e" thleng ka silh mawlh mawlh laiin u Billy-a chuan ka hnung lam aṭang min lo kuah thut a, a kut pawh a hlei ṭan hle.

"U Billy!" ring vak lovin ka ti leh hluai a, nupa ni tawh mah ila chuti ang vela han awm dun chu ka zak ru tlat, pa Thangtea te nupa leh u Pektei hmai ka zah vangte pawh a ni ang. 

"U Billy, ka awm i tinuam miah lo a nia, thleng sil mek ka nih hi aw, min kuah duh ṭâlh a nih chuan i kut tal hi tawlh thlak tir rawh" ka tih chuan a nui nghawr dat a, ka dul zawnah a kut a suih nghal bawk.

"Ka tawlh thla zel dawn asin" a tih ruala a kut a sawn thla riai riai chu ka man chat a, ka kut phuan chu a kai ve ta luai.

"I mak a! Awm dan chin tawk hre teh, naupangchhia pawh i ni tawh lo" a lam hawia inherin ka ti a, ani chuan nui sukin min lo fawp chat.

"A tir aṭang khan lo hawi la chu ka nghal miah lo vang" min tihzah a châk ve hrim hrim nge a fiamthu pawh ka hre lo.

"Lo hawi rawh pawh i ti hleinem, chu bakah thleng sil ka ngai alawm, ka buai tih pawh i hmu reng" 

"Duhawmnu, kan inngaihzawn lai aiin ka nupui i nih hnu hian i hmelṭhain i duhawm daih zawkin ka hria" tiin min fawp leh vang vang a, a thu sawi chuan engti ang chiahin nge keimahah nghawng a neih a hre ve der si lo.

"Inher suh" ka inher tur chu min dawm ding chat a, a hmel en ngam lo mah ila chiang takin min chhuk melh run tih ka hre vek.

"Sawi sual ka nei em ni? Engati nge i kun deuh tlat?" ka khabeah a rawn chawi a, tunah chuan kan inen lo thei ta lo.

"Hmaitai duhawm em emnu" nui chunga a rawn tih leh lêk phei chuan awm dan tur reng ka hre tawh lo, ka kuah tawp ringawt. 

"Sawi tawh suh, inla zei taka thu thlum deuh deuh i sawi khan ka zak a nia" ka tih chuan a taksa aṭang min nam hla deuh hlek a, ani lah chu kei angin a zak ve der lo leh nghal.

"Ka inla zei bawk lo, i nihna leh i lan dan dik tak ka sawi mai a ni" ti supin min fawp leh a, mo thar tuk a ni bawk sia kan awm dan chu a em em hretin ka hria.

"Min fawp ngun mah mah lo maw? Sap pawh kan ni lo a nia, Mizo kan nih hi!" ka thu sawi avanga chal tichuar nangin min en a, ka dar tawn tawnah chuan min la chelh reng bawk.

"Mizo pawh ni ila ka fawp thei tho che alawm, ka nupui i nih tawh miau avangin ka duh hunah chuan ka fawp mai ang che. Ka nu leh ka pa leh ka nau i hmai zah tih ka hria, i pasal hi min zah ber rawh" 

"I lerh!" ka ti ringawt a, sawi tur ka hre hlawl lo, a sawi dik vek bawk sia keimah zawk chu ka zak leh tlat tawh. 

"Thleng sil dun ang" a rawn ti leh thut a, a mizia chu ka hriat ngai a ni hauh lo, nupa kan nih hma khan a lo inthup ve nasa ngawt ang. 

"Min en reng chuan ka hmui hi i hmuiah bawk a awm leh chawt dawn a nia" kiai suka a tih chuan ka hawi sawn rang kher mai.

"I lo sil ve pawh a ngai lo, i ti awm ang lo thei em mai u Billy" a ban chu ka dah chhuahsak a, anih lah chu a la nghal em em zui.

Chutia kan nupaa thleng kan sil dun lai chuan u Pektei a lo lang hlawl a, Fridge hawngin tui bottle a la chhuak a, damdawi hmawm zeuha tui a in lai chu ka lo mitsir ru reng. Eng hna tak nge a thawh ka la hre ve chiah lo va, mahse a chhuak dawn a ni ngei ang a inchei em mai. U Billy-a chuan a nau thawm chu a hre ve vek tho, mahse kei angin a ngaihsak ve kher lo.

"Thaibawih nghal ve!" a kal sawn dawnah u Pektei chuan a rawn ti deuh kher a, u Billy-a chu a hawi let lo hrim hrim.

A kal liam hnu thleng pawh chuan ka awm a nuam thei lo, mo thar tuka mahni pasal te nen thleng sil dun chu a dik chiah lo alawm, mahse ka pasal u Billy-a berin min sil pui a duh miau bawk si. Rilru nuam lo zetin thleng chu ka sil zung zung a, u Billy-a chuan ka sil tawh ho chu a lo tleuh zel thung. Thleng kan sil zawh chuan kan nupa room lamah kan chho a, eng nge kan tih leh dawn ka hre mai lo.

"Zanin chu va leng phei ang aw, makpa induh deuh ka ni emaw te min lo ti nghal palh ang" u Billy-a thu sawi avang chuan ka nui zeuh a, ani erawh a uan hmel teh chiam lo. 

"I châk vak lo em? Len phei loh tawp aiah kan leng dawn nia, awm pawh ka awm rei pui lo vang che" a ti leh nghal a, chu zawng ai chuan chhuak tur ang maia a insiam chu ka hrethiam lo.

"Khawiah nge i kal dawn? MZU-ah i kal dawn em ni? Nge hmun dangah zawk?" ka ti ta nge nge a, ani chuan nui suk hian

"Kan leng chhuak dawn maw le, vawiin chu hun nuam tak kan hman ka beisei" a rawn ti a, a thawmhnaw inbel chu a inhmeh chiang kher mai.

"Kei chu khua a duai deuh ruih bawk sia ina awm pawh pawi ka ti lo, mahse i tih tlat chuan kan leng chhuak dawn nia" tiin thawmhnaw chu ka la chhuak a, a ngawih reng avangin len chhuahpui chu a fuh zawk ka ring. 

Chhuak tura kan insiam fel meuh chuan dar 10 a lo pel daih tawh a, khua lah chu a duai tawlh tawlh leh nghal. Kan nupa tih loh kan chhungte chu an chhuak vek tawh a, mahse eng hna tak nge an thawh hlawm ka la hre lo, nakinah u Billy-a ka la zawt ang. Bazar lamah kan tlan a, dik tak chuan a len chhuahna khua viau lo a ni.

"Lehkhabu lam lawk ka ngai pah a, chumi zawh chuan kan haw leh daih dawn nia" min ngaihtuah hmel zet hian a rawn ti a, ka awm dan a hrethiam a ni ngei ang. 

"Rameng" a rawn tih leh chuan a lam ka hawi vat a, mahse ani chuan hma lam a lo en daih thung, ngawih reng chu a dik bik chiah lo a ni.

"Nia, i thu thu alawm" ka ti ve ta ringawt a, khaw duai avanga boruak hit sûk chu ka dawng hne ta deuh pawh a ni ang Glass chu ka up zawm zat bawk.

Chanmari lamah kan tlan tlang zel a, motor a tih din rualin motor chhunga lo ṭhu reng turin min ti a, ani pawh muangchang lovin a chhuak zui nghal. Lehkhabu a tih khan pakhat vel lek turah ka lo ngai a, mahse a rawn keng lut chiah chu rih hmel ka lo ti khawp. Seat hnung lamah a rem diat diat a, Student ho ta tur a nih chu ka ring chiah lo, a chhan chu chi hrang hrang a ni tlat. Ama chhiar tur emaw a ni zawk leh si ang, kei chu ni ila chuti ang lei nân chuan pawisa ka hman ka ring lo. 

"Kan haw thei e" min nuih suka a tih chuan ka lo nui ve mai a, Chanmari aṭanga inhera kan tlan chhuah rualin ruah chu a rawn sur zui nghal buan buan.

Khaw awm dan en kha chuan sur ṭeuh awm reng pawh a ni, a duk chak em mai. Chutah Traffic a la jam leh ta nghal a, ina awm chu châk tawh tak ka ni. Kan in kawt kan thlen lai paw'n ruah chu a la sur tam ang reng hle a, nghah han deuh lawk ka duh avangin motor chhungah chuan kan la ṭhu dun reng bawk. Ruah lah chu min runluih emaw ti tur khawpin a sur tam a, a tawpah phei chuan huh inhuamin chhuah ka rawt ta tawp.

In chhung kan lut chiah chu kan inhru hul sawk sawk a, u Billy-a erawh nihliap nen lehkhabu la turin a chhuak zui leh nghal. Veranda aṭang puih a ngaih leh ngaih loh thu ka zawt a, mahse ani chuan vawi khatah a lo pawm lut nghal vek a, lehkhabu pawh a huh lo hrim hrim. Thingpui inna hun atan a la hma viau bawk si a, lum ta lo chuan kan nupa room-a chho mek ka pasal chu ka zui ve leh ta ringawt.

"Eng lehkhabute nge ni hlawm a? A chhah ṭha hlawm si, ka chhiar peih chi loh tak a ni" a lehkhabu lei keu thuak thuak pah chuan ka ti a, ani erawh a lo inthlak vel mek thung. 

"Pakhat, pahnih, pathum, pali" tia lehkhabu ka chhiar laklawh lai chuan vawi leh khatah ka kang dâwrh a, u Billy-a ni lo se chu ka au ṭhawt ang ka ring.

"Mu ang" tih leh khuma min mut pui a rual a, a taksa lum nuam tak nghenga mut daih chu a fuh phian ang, khau a chhe bawk si. 

"Muhil zawk teh ang" ka âwm bawr a zût a zut lai chuan ka ti halh a, a rilrua awm chu ka hai lo chiang hle a ni.

"Mu ang ka tih khan awmze thui tak a nei alawm" a mitmengah chuan tisa châkna hlir a lang a, han hnial lah chu ka duh bik chiah si lo.

"Khua a chhiat em hî, mu lum mai mai zawk ila, chu bakah naute ka pum chhungah a awm bawk si" ka tih lai chuan a kawr a lo phel nghal der.

"Tun ang khua hi a hun tak zawk a nih hmel, chuan naute lam kha chu ngaihtuah suh, eng pawi mah a thleng lo vang" tiin ka chungah a rawn bawk a, lo hnial reng chu ka thei ta bik lo. 

Dar 1 pelh velah kan tho chhuak ve ta chauh a, ruah erawh a la tla cher cher thung. Nupa nun kan hmang zo deuh chiah bawk nen ka mut chu a chhuak ru hle a, mut leh daih mai te chu ka duh rum rum. Fridge chu ka hawng a, siam tur a awm lutuk lo leh nghal. Dawrah kal dawn ringawt ila ruah a sur tlat bawk si, Plate-a chaw ṭhing inhung chu kan ka tum ta ringawt. 

"Rice ka kang dawn aw" u Billy-a chu ka rawn ve thlap a, in hrang chana kan pahnih chauha awm vel chu ka suangtuah chhuak zui nghal.

A nuam reuh ngawt ang, u Billy-a nena in hrang chan vel chu ka ngaihtuah zawng ringawt pawhin ka phur thei maw le. Amaherawhchu chuti angin kan in dang mai mai nghal dawn lo tih ka hre chiang khawp, mo thar hlim hlawl ka ni a, ka ngaihtuahnaa lo awm leh ka thil tih châk chu a atthlak letling zawk ka ti hnuhnawh hle a ni. Pa Thangtea te nupain hre phei se chu an nuih a za miah lo vang, min ngei ngawt zawk ang ka ring.

"Aw" a lo ti tawi sup a, vawt ti ve lo ang maiin kawr lah chu a la ha duh der lo zui, a taksa hmuh reng pawh chu nupa ni tawh mah ila a nuam chiah lo.

"Eng lo...ih....i kawr ha tawh la, a nih loh paw'n han inbual la" sawi fak ngam si lo chuan ka ti ta nge nge a, rin aiin ka thil hmeh nawi mek chaw ṭhing chu a vawt phian leh nghal.

"Engati nge?" zawhna bawkin min chhang leh ta, ka bul hnaih takah a rawn ding zui nghal a, lai zetin ka nui leh ta ringawt. 

"Engati nge Rameng?" a rawn ti nawn leh ngat a, nuihza insum hmel deuh hian min en reng a, a awm dan vel chu ka rualpui emaw ka ti dawn awm le. 

"A chhan chu i mi uap a na, min ti awm thiam lo" zep nei hauh lovin ka ti a, hlim tih hriat zetin a nui ri ta hawk hawk. 

"Nui suh, fiamthu ka thawh miah lo a nia" te chu ka'n ti ve tak nâ a, keimah bera pawh chu ka nuih a za ru em em thung. 

"Aw le" naupang thu awih zet ang mai hian a hmui chu a chip hmak a, ka insum rei thei ta ngâng lo.

"I ninawm, khati ang hmel kha min hmuh ziah suh" tiin a chalah ka nam deuh sawk a, nui ver ver chungin Gas awmna lamah ka kalsan ta daih. 

Chhun thil kan ei lai chuan ka ṭawng melh melh a, ani'n ka sawi apiang a lo sawi chhunzawm ve zel a, kan inneihna la rei lo mah se chuti anga inpawh taka awm dun chu a nuam tawp. Nupa nih chu a nuam ka ti, kan inngaihzawn lai ai letin nuam ka ti zawk a ni. Zana kan in lama len phei chuchang kan sawi kai a, dik tak chuan ka peih lo lutuk lo. Ka nu hmel hmuh ka châk lo va, u Thanthani hmel lah ka hmu châk hek lo. Ka pa leh Amos-a hmel erawh ka hmu châk em em thung, anni pahnih chu a ruk takin ka ngai a ni.

"Han inbual tawh rawh, kei pawh i inbual zawhah ka inbual ve ang" kan thil eina vel seng fel mawlh mawlh pahin ka ti a, ani pawh thu awih takin a chho ve mai bawk. 

Tlai dar 4 velah pa Thangtea a lo haw a, thingpui lo siam sak nghalin a chauh leh chauh loh te ka lo zawt luam a, nu Nguri leh pa Thangtea hi chu biak an nuam ngawih ngawih. Anni ang lo takin u Pektei erawh ka lakah a nelawm loh nghal em em ringawt a, a chhan tak sawi tur ka hre chuang lo. Dar 4 leh a chanve velah nu Nguri a lo haw ve leh a, ka biakna pawh min chhang ṭha khawp mai.

"Pekte, Engi nen hian ei rawng bawl dun r'u aw, bungbel leh kan thil dahna vel a la hre vak lo vang" in chhunga u Pektei lo luh rualin nu Nguri chuan a lo ti a, ka va han phur lo ber kher em.

"A ngai lo ka nu, keimah paw'n ka bawl thei alawm, chu bakah u Pektei chu a chhuak bawk sia a chau palh ang" ka lo ti thuai a, u Pektei erawh ngawi rengin in chung lamah a chho daih. 

"A ngai lo tak tak a nia ka nu, tukin khan u Billy-a'n ei rawng bawlna bungbel vel awmna chu min hrilh tawh alawm" ka ti nawn leh a, u Pektei lakah chuan ka inthlahrung ve bawk em a ni.

"I thei tak tak ang maw? Keimah tal hian ka lo bawl pui ang che, i sawi ang khan Pektei kha chu a chauh hmel riauin ka hria" min puih a tumna chuan min intithlahrung zual sauh.

"Nang phei chu a ngai lo leh zual ka nu, ei rawng bawl leh in chhung khur sekrek khawih chu mo tihtur alawm" ka huaisenna sawm khawm chawpin ka lo ti vat a, ka biak bawrh bawrh nghal ngamna chhan chu ama'n a zir em a ni. 

A mak lutuk, nu Nguri chu ka rin aiin a lo fel daih. Kan inhmuh tirh leh u Billy-a bialnu ka nih lai kha chuan mi ti fak fak emaw thinchhe ve hlirh hlerh tak a nih ka ring kha a nia, mahse ni khat pawh kan la chen dun hmain ka chungah chuan a fel nghal em em thung. Chuti ang bawkin pa Thangtea chu a ṭawng duh a, a nui huah huah zel a, ngaina taka min biak phei chuan ka pa ka hre chhuak lo thei lo ṭhin.

"I ti ve tlat bawk si a, i inthlahrungin ka hria, inthlahrun a ngai lo. Hmeichhe pathum kan awm a, ei rawng han bawlho te chu a nawm daih zawk ka lo ring asin" ka beisei lo daihin thu a sawi leh ta. 

"E...hei Pektei pawh a lo chhuk alawm, ei rawng bawl pahin thil eng eng emaw kan inhrilh dawn nia" a tih zawm nghal zat a, u Pektei chu ka bulah tak a la ṭhu zui. 

"I tel ve kher a ngai lo a nia ka nu, kan pahnih pawh hian kan ti thei" u Pektei aw chu a chhuak pangngai viau a, a nu lakah chuan a ṭawng nem ve te pawh a ni maithei a ni.

"Aw le, thil ziah fel tur ka nei nual a, ka pheisan mai ang che u. Engi hi bungbel awmna vel lo hrilh zel la, ka lo lang tawh lo maithei a nia" tiin nu Nguri chu choka aṭang a chhuak a, u Pektei nen chuan kan ngawi dun ta kar. 

Maian chu kan hik dun mial mial a, a tua mah chuan inbiak kan tum loh hmel khawp. Han biak hmasak te chu ka duh ru ve tho, mahse a hmelah min biak châkna pakhatmah a lang bawk si lova kan ngawi dun ta reng ringawt. Fridge aṭang chuan Alu a rawn la chhuak a, a kawr chu a vel zawm zat bawk. Maian kan hih zawh tawh avangin Alu velah kan bur leh chawt a, u Pektei nena ei rawng bawl dun chu a nuam teh chiam lo a ni.

"Lalthanzuali nau i ni tak tak em?" a tih chuan amah ka en reng kher mai, mahse ani chu a lo hawi chhuak miah lo thung.

"Aa..Aw..aw ni e"  ka ti bak deuh nawk nawk a, min biak ka rin loh lutuk avanga ṭawng buai pawh chu ka ni. 

"Engtin nge u Thanthani nen chuan in inhriat a?"  biak let ve chu a ngai, chuti lo zawng kan inpawh lo lutuk palh ang. 

"Ani nen maw!? Ha! Kan inhriatna a rei tawh alawm, ani nen chuan ṭhian ṭha tak kan ni e" ti deuh salhin a tho a, Alu chu a kang zui nghal bawk. 

U Thanthani nen ṭhian ṭha an nih thu sawi mah se ka awih chiah lo, kan inneih ni te khan inhuat hmel takin an inmelh zawk a nih kha! Thil ṭul lo ngaihtuah buai reng duh lovin Gas bulah chuan ka ding ve leh ta ngawt a, eng thu mah kan sawi leh tawh chuang lo. Ngawi rengin thir bel hmaah a ding a, thil eng emaw tal chawhmeh atana rawt awm se ka duh avangin ka kal sawn a, Fridge hawngin purun chu ka la chhuak zui nghal bawk. Ka thil rawt ri chu chokaa thawm ri  ring ber a ni a, chutah u Pektei chuan

"A hmin, chawhmeh dang siam a ngai lo. Chawhmeh ṭhingho chhuang lum la a tawk mai, ka chho dawn a nia" a lo ti deuh bawl bawl a, thil dang sawi leh tawh lovin choka aṭang chuan a chhuak zui ta nghal. 

U Pektei thil kan chu ka tem chhin a, tui tak a ni. Chu pawh ka beisei loh leh bawk, maian leh alu kan pawlh chu ka siam ṭhin aiin a tui hialin ka hria. A âl dan a tawk si, aieng a tam lutuk bawk si lo. A thar lam rim a nam chêk a, a han dan te chu a tawk chiah bawk. Mak ve deuh chu ei rawng ka bawl apiangin a tui leh tui loh ka tem ziah a, chutia ka tih loh chuan ka awm thiam lo, ka chawhmeh siam chu tui tihna pawh ka nei ngai lo ṭhin. 

Ka thil rawt lai chu dawhkana dahin purun ka zai belh leh a, ka duh aiin purun chu a la tlem deuh a ni. Ka vanneiha siamin ka la che chhe miah lo leh nghal, ka ṭhiante'n min hrilh tam ber pawh chet chhiat kha a ni a, mahse ka la che chhe lo tluang zel. Ei rawng ka bawl zawh chuan tlai dar 5 a lo ri thuak tawh a, engtik hun velah nge chaw ka siam ang ka hre ta hauh lo. Kan nupa room-ah chuan ka lut a, u Billy-a chuan lehkhabu a lo chhiar tui hmel hle.

"Zanriah hi a tlangpuiin dar eng zat velah nge in ei ṭhin? Ei rawng chu bawl zawh a ni tawh a, min han hrilh teh" ka tih chuan min lo en zeuh a, a bana sana en leh zeuhin 

"Dar 6 velah hian kan ei tlangpui, lo hnai teh" a lo ti ve mai a, kei pawh a lehkha chhiarna dawhkan bulah chuan ka phei ve mai bawk.

"Tun tut tuta chhiar a ngai em ni? Chawlh i la ve em em a, hahdam ve deuh la" a sam khawih niap niap chuan ka ti a, a lo kiai leh ta suk.

"Pasal ngaihtuah deuh nupui ka nei a ni maw?" min fiam dan avang chuan kan nui dun hak hak a, kan tawpna chu inpawm leh infawh a ni leh ta.

"Chhiar leh rawh, ka tibuai palh ang che. In hnuaiah ka lo zu awm ang, ka pa paw'n zanriah ei hmain thingpui in a duh maithei asin" tia thawh ka tum chu min pawm nghet sauh.

"Tibuai chiang e, nangtê hi lehkha chhiar lai paw'n ka rilruah i awm reng mai. Engati nge i hmelṭhat sawt em em a Rameng? Heti ang tak hian kan inngaihzawn lai khan ka hmu hmelṭha lo che, mahse i duhawm em em thung"

"Sawi tawh suh, sawi tawh lo hram teh u Billy. Nang chû, khati ang khan ṭawng tawh lo teh. Min tizak a nia, awm dan tur leh chhan dan tur che pawh ka hre lo" ka beng te chu a sa hut hut leh vek tawh. 

"I va duhawm tak" tia nui var varin min fawp leh nge nge a, ni khat chhunga kan infawh ngun ber a ni hial ang ka ring.

"Chuan kei ve hî, hmelṭha min ti ve em? Hmelṭha min tih thu hi ka hria pawhin ka la hre lo, han sawi ve teh. Ka hmelṭha tawk lo em ni?" a rawn ti leh ta, ka va ning tak!

"I ninawm a! Inla zei vel suh, min thlah thuai zawk teh, ka chhuk duh a nia" lai em ema ka tih pawh chuan min thlah duh ṭhak lo.

"Sawi rawh le, hmelchhia min ti a nih paw'n sawi hreh suh" a rawn ti leh ngat a, a duhnaah hi chuan a luhlul ve chiang alawm.

"Ngaihtuah let ve la, hmelchhia ka tih che i ring reng reng em ni? University kan kal tirh aṭang tawh ka duh ru ve ngar ngar che a, hrethiam ve rawh. Ni lo, nang hian i hrethiam reng, i duh chuan i fing lutuk, sual a" tiin a darah chuan ka bawk vat a, zak ru reuh tak ka ni.

"Eheu....zanin chu inpuanna kan neih a va ngaih hmel ve" a tih leh lêk phei chuan a rem remah ka sik vak a, ani erawh na tih loh hmel zetin a lo nui daih thung.

"Min lo duh ru ve ṭhin tho maw!?" awi ka ning, chuti ang teh tawpa in zawh chu a nuam lo ve ê, chhan pawh ka chhang peih rih lo. 

"Min en teh" tiin min awm ṭhattir a, tunah chuan inhmachhawn loh theih pawh a ni leh ta lo, a luhlul ve ang reng bawk si. 

"In class-a ka lo luh hmasak ber ni khan ka duh nghal che, ka office-a ka phei thlengin ka mitthlaah leh ka rirluah i awm reng" u Billy-a hian min lo duh ru ve reng maw, awihawm loh zawk.

"Ka va'n awih loh tak! Nang pawh zaninah inpuanna i neih a ngai, keimah chauhin ka nei bik tur a ni lo" ka ti ve ta zaih a, a nuih lai tak chuhin a taksa aṭang chuan ka chhuk ta hmak.

Kan nupa room aṭanga ka chhuah hnu thlengin a nui ri chu ka la hre pha a, kei pawh ka bang chuang lo, ka khi ver ver mai. Kum inthlau viau e ti lo chuan kan inpawh em em lawi si, u Billy-a chu pasal atan ka neih fuh loh ka ring thei lo. Mipa puitling leh thluak ṭha em em a ni a, tu pawh titi pui thei khawpa fing leh thil hre hnem a ni a, dik tak chuan u Billy-a te ang mipa hi ka mipa ngaihsan chi an ni. Professor dangte ang a ni lo, mi hriatthiamna a ngah lutuk. 

A student kan nih lai te khan a class kha a hmeia pain nuam kan ti ber zel, a chhan chu zirlai ngawr ngawr min zirtir ngai lo. Kan zirlai topic behchhan tho siin lehkhabu chi hrang hranga mi a thur chhuak a, a class-ah chuan Group Discussion pawh kan nei ziah bawk. A tuate ma'n kan pawngpaw ngam hluak lo va, nelawm viau mah se kan zah em em hlawm thung.

Third Semester kan nih laiin Tour kan nei ve a, chutah chuan ama'n min kaihruai vek bawk. Guest lecturer pakhat nen min kalpui a, chu nu lah chuan a la nel em em zui. Khati anga an awm dun lai ka hmuh te khan ka lo thinrim ve em em ṭhin a, mahse tunah chuan mipa zahawm leh hmeichhiate duh rawn kha ka pasal a ni ve ta mai chu a nia, ka hlim rualin mak ka la ti tho. 

Kan inngaihzawn hma khan ngaihzawng eng zat chiah nge a lo neih tawh ang? Kum eng zat te nge a nih pui tawh hlawm ang? Chung zawng chu ka hre hauh lo, mahse keini inngaihzawn chhung kha chu a rei lo ve êm a ni. A rei berah thla 3 emaw thla 4 emaw vel lek a nih ka ring. Chutah ka beisei loh lutukin kan inkawp nghet phian a, khata ṭang kha chuan ka ṭhiante thu sawi kha ka awih duh tawh lo a ni.

An sawi tam tak kha chu a dik ve chiang alawm, khang hun lai khan u Billy-a khan ngaihzawng a nei kual duahin ka hria. A chang leh English department-a mi an ti thul, an chang leh Library-a thawk an ti a, a chang leh University Miss ni lai an ti bawk, a dik ang. Amah paw'n a hmaa a lerh ṭhin thu a sawi tak alawm, a lerh bakah a luck ve hrim hrim bawk. Luck lo thei pawh a ni lo, University-ah kha chuan amah anga pian ṭha leh hmelṭha an awm lo ve tlat a ni.

Kan inngaihzawn hnuah erawh mak tak maiin a danglam a, min kawp awm paw'n ka hre ngai lo, min kawp lo reng bawk. Kei chuan kan Guest lecturer thar kha ka thik ber ṭhin, a nel huam huam vel lutuk kha la lo thik thei tawp. Amah avanga tihtauh changte chu ka nei ve ṭhin tak nâ a, ka tihtau rei lo thei hle thung. Eng thu emaw sawi se ka lungawi leh nghal vek zel.

Thla hnih kan inngaihzawn hnuah kan department chuan kan inngaizawng tih an hre ta a, chhaih pawh kan tawk nasa dun hle. HOD tak ngial paw'n min chhaih ve a, a hun lai kha chuan zirlai ka la ni bawk sia a va'n a nuam lo duh tak. U Billy-a awm lai te khan Professor dangte khan min chhaih vel a, u Billy-a erawh tlangval senior tih takah kei angin a lo zak lo nasa mai. 

"Ka pa, zanin chu ka puzawnte inah va len phei kan tum a nia" zanriah kan ei laiin u Billy-a chuan a ti a, ka chaw ei lah chu a tui em em leh nghal.

"I sawi tâkah chuan kan vaiin va leng phei teh ang u, in inneih hma pawh khan vawi hnih khat chiah kan leng tak alawm, a inthlahrunawm ve deuh tlat" pa Thangtea chuan a lo ti deuh duah a, pa fing hi chu a ni ve chiang a ni.

U Billy-a nen kan inneih hma khan zanah nu Nguri nen an lo leng ṭhin ngei alawm, ka nu leh pa dik takte lo dawnsawn dan thlengin an hre vek ang. Len fô châkawm loh leh len nuam lo khawpin ka nu phei kha chuan a lo awmkhum ṭhin a, keimah tak pawh hi ka lo zakin ka lo inthlahrung ṭhin. Chuti ang zawng zawng hre vek chung chuan chhungkuaa len phei kan la tum ta deuh deuh a, nu Nguri lah chuan pa Thangtea thu sawi chu a lo thlawp nasa mai bawk si.

"Ka peih lo, ka hman lo bawk" u Pektei chuan a lo ti a, a awm ve tih reng ka lo ngaihtuah leh tawh lo, a lan dan hi chuan u Thanthani nen an inkarah thil eng emaw tak thleng tawh a ang. 

"Eng nge i tih dawn?" U Billy-a chuan chaw bar mawlh mawlh pahin a ti a, mahse u Pektei erawh ṭawng leh tawh lovin a ngawi reng thung. 

"Ṭul lutuk emaw zanina tih ngei ngei tur a nih loh chuan chhungkuaa len phei chu a va ṭha ve Pekte" dam thlup hian pa Thangtea chuan a lo ti leh a, a sawi zawh rualin nu Nguri paw'n

"Nia, va leng phei ṭhup ang u. Engi nang paw'n lo hrilh lawk suh aw, kan ṭhawng thut dawn a nia" tiin a lo tuihnih ve leh a, nui zeuhin ka lo buk khum ve mai bawk. 

"Peki, Ramengi lakah hian eng lungawi lohna nge i neih?" u Billy-a chuan ti ta tawl mai, kan mood zawng zawng chu a danglam nghal vek.

"Hehe!" tiin u Pektei chu ngeiawm rawngkai lek lek hian a lo nui ri hak a, ka tan ber chuan a nuam lo ta a ni.

"Engati nge u Billy? Engati nge heti anga i awm thut a? U Pektei hian ka lakah lungawi lohna a nei lo hrim hrim, i lehkha chhiar a dik lo zawk em ni?" chaw ei tawp hmakin ka ti a, u Billy-a chu a la pangngai loh hmel hle.

"Ramengi lakah hian i lungawi lo chiang alawm, a chhan tak ka hre lo thung. Ka nau i ni a, tukina i ṭawngkam mei nei zet pawh kha ka hrethiam lo emaw ti suh" u Billy-a chuan keimah min timualpho daih zawk.

"U Billy! I dam lo em ni? Ka sawi vek tawh khâ, u Pektei nen kan inkarah eng thil ṭha lo mah a awm lo" ka tih chuan u Pektei chu a kham daih a, chungte hlei hlei chuan ka awm a tinuam lo.

"Billy, i nupui kha ṭan nghal bur ringawt mah ta che. Amah paw'n an inkarah harsatna a awm loh thu a sawi mawlh mawlh a, chaw ei khamah han bia ang che" pa Thangtea chuan a ti a, nu Nguri pawh a lo ṭawng ve leh nghal.

"I dam lo tak tak zawk em ni? Engi tan pawh khan hrehawm tihna i siam mai mai zawk, mo hlim hlawl a ni tih hre ta che" nu Nguri aw chu a nem hran lo, kei ngei paw'n u Billy-a chu dik lo ka ti a ni.

U Billy-a chu rei lovah a thleng chawiin a kham ve nghal daih a, zanriah kil tirha kan boruak a ṭhat nen u Billy-a chuan a tichhe ve ta vek a ni ber. Chaw kan ei kham chuan hmanhmawh ru takin kan ei inna vel chu ka tifel zung zung a, ka inthlahrung em em bawk. U Billy-a khan eng emaw dik lohna chu a nei alawm, keimah min ṭan avanga u Pektei a hau ringawt te kha ka tan chuan en liam mai mai theih chi a ni lo.

Tihfel tur ang zawng zawng ka tihfel zawh hnu leh ka pa thingpui tur ka siam zawh hnu chuan kan nupa room lamah ka kal chho thuai thuai a, mahse hmanhmawh tak angin ka kal chuang lo. Room chhunga ka luh chuan u Billy-a chu ka hmu lo va, bathroom-ah pawh a awm hauh lo. Ka pa sawi ang khan u Pektei a biak chu ka ring ve ta ringawt a, a hau hrep ang tih ka hlau a ni.

Kan nupa room leh u Pektei room inkarah hian Store Room deuh reuh hi a awm a, chu chu in chung store room atana hman a ni deuh bik bawk. Store room kawngka zawn ka thlen rualin ring lutuk lova u Billy-a ṭawng thawm chu ka hria a, mahse eng tak nge a sawi ka hre thei lo. A ṭawng ri bawl bawl tih chu ka hre ngei a, a aw pawh a nem vak lo. Tin, u Pektei aw pawh ka hre tel, chutia keimah avanga an unaua an inhau ringawt chu hrehawm ka ti ngawih ngawih.

"Hun kal tawh avang khan intihbuai reng tum suh, ka nupui laka i ṭuan lêk phei chuan ka en liam mai mai dawn lo che a nia" u Billy-a aw chu hriat nuam lo lam lek lek a ni.

"Ha! Hun kal tawh avangin ka intibuai lo, ka hun tawn mek avangin ka buai zawk. Ni e, i nupui nuapang tak hi ka ngaina hlawl lo" u Pektein a ti chiah chu u Billy-a chuan

"Kut thlak i duh loh chuan ka beng hriatah khati ang zawng khan ṭawng tawh suh, i ngainat loh avangin ka nupui lakah hian suah sual chhuah suh ang che" a ti ram hmak a, an thu sawi han ngaihthlak ruk ringawt pawt chu a dik ka ti chiah lo.

"I nupui naupang zet chu i ṭan nghal hle mai maw, a u ang maia lepchiahin a uiresan thuai zawk lo che maw" tham lo zeta a tih rualin u Pektei hmai chu a ri ta thlawrh a, kei pawh ka lo ṭe chhuak thut bawk. 

"U Billy!" an dinna lamah chuan ka tlan phei titih nghal a, u Billy-a chu room aṭanga hruai chhuah a fuh ber, chuti lo chu buaina dang a awm palh ang.

"Hre rawh LALPEKHLU, ka thu sawi kha hre reng ang che. Insiam la, kan rualin i kal bawk ang" ka pawh ṭawng ṭawng laiin u Billy-a chuan a ti leh hram a, kan nupa room-a kan luh chuan ka lungawi lo kher mai.

"Engati nge keimah vangin khati ang khan i chet? I mak thei em mai u Billy, ka tana a nawm loh dan tur te hi dawn ve ta che" ka ti hmawk hmawk a, thirim bawk si nuam ti bawk si lovin ka awm a ni.

"Ka ngaihtuah vang che alawm Rameng, ka ngaihtuah che avangin ka hau mai a ni" a tih chuan kawng dawmin thawk ka la hawk a, ka rilru nawm loh dan chu pui tak a ni.

"Min ngaihtuah la chuan ka tana nuam lo tih tur khawpin i awm lo vang u Billy, kan inneih tukah kan inhau titih nghal chu a nia" ka ti hap a, min lo pan rang hle bawk. 

"Kan inhau hleinem, i laka ka nau awm dan hi ka hre vek alawm, nang aiin ka hre chiang maithei a ni" a tih chuan chiang takin a mitah ka en a, ani paw'n min en chiang khawp.

"Kan inkarah buaina lo awm pawh ni se ka hrilh loh che chuan lo inrawlh tum suh u Billy, chinfel dan ka zawng mai dawn alawm, i lo inrawlh chuan ka nu leh pate min hmuh dan pawh a dang vek mai ang"

"Inrawlh ngei ka duh si alawm, ka nupui i ni bawk" a tih chuan ka dara a kut chu ka dah thlak sak a, ani chuan a rawn dah chho leh ngat thung.

"Enteh u Billy, u Pektei hian min ngaina lo tih chu ka hre ve tho. Chuvang chuan keimah pawh hian kan inkar siam ṭhat ka duh, pasalte unaunu nena inngeih lo deuha awm chu tu mo mahin an peih reng bik lo vang"

"Duhawm em emnu" a thu sawi teh daih chuan min tithinrim mai dawn, chuti anga pangngai taka awm leh tur si chu kut thlak loh mai tur alawm le.

"Ka rilru i tihah" tiin kal sawn ka tum a, ani chuan min pawm nghal nawlh thung.

"Ka tihpalh aw, i sawi kha a dik e. Ka lo inrawlh tawh lo vang, hmeichhe buaina chu hmeichhia bawkin in chingfel tur a ni" ka biangah a fawp zeuh a, ka hmuia fawh a tum leh chu ka lo thle sawn daih.

"I titau vel tihna em ni?" min tihhlim tum zet hian a ti leh a, ka lungawi lo tih chu a hre chiang khawp ang.

"Ben kher kha a ṭul lo, ngaihdam dil ngei ngei ang che" a lam hawia ka tih rualin min fawp tawk a, tum pawh ni ila ka lo thle sawn hman teuh lo.

"Aw le, rilru ṭha nu" tih leh khuma min bawh a rual a, tal chhuah ka tum tehreng nen kan inlen hleih lutuk avangin ka tal chhuak thei leh ta pek lo.

"Kan in lama kan len phei dawn khâ, awm sawn la insiam teh ang" ka thu sawi pawh zawm lovin min fawp mial mial a, ka pasal a ni tawh miau avangin ka lo hnar thei bik ṭhin si lo, kan tlai phah leh ta vek. 

Kan in kan thlen chuan beisei loh deuhin ka nu chuan min lo lawm thiam viau a, ka pa'n a zilh emaw a ni ngei ang. U Thanthani pawh chuti bawk, thingpui a lo lum ve thlap. Amos-a chu ka bulah a awm chawt a, ka ngaih ang bawkin min lo ngai ve a ni. Ka pa leh u Billy-a pa chu an titi bawrh bawrh a, ka nu leh u Billy-a nu erawh an inbe tam hran lo. Chuti ang bawkin u Thanthani leh u Pektei chu an inen duh ṭhak lo, an inkarah eng emaw tak chu a awm tawh chiang a ni.

Dar 9 leh a chanve velah kan haw a, in chhung kan luh te chuan u Pektei lakah ka inthlahrung ru em em a ni. Keimah avangin u Billy-a'n a beng a, peih lo ru zetin kan inah a leng bawk a, ka tan chuan rilru nawmna chi a ni lo. A laka u Billy-a chet dan chu min ngaihtuah vang mah ni se a mawi lo, ka tan a mawi loh mai bakah a inthlahrunawm a ni. Hmeichhia kan ni a, kan inkara inpawh lohna awm chu keimahni bawkin kan siam ṭha tur a ni. Kei ngei paw'n ka tum ang, ka pasal unaunu nen chuan inngeih taka awm ka duh a ni. 

Chapter 5

"Tlan chak lutuk suh u aw, damdawi te kha in ei lawk tawh em?" nu Nguri chuan a ti mawlh mawlh a, Champhaia Honeymoon kan hman dawn avangin kan bungrua chu u Billy-a'n a dah lut mek bawk a, pa Thangtea leh u Pektei erawh an hna lamah an kal tawh thung. 

"Aw ei tawh e, u Billy-a hian a ei leh ei loh chu ka hre lo" ka lo ti ve mai a, motor rui chi ka ni bawk sia ka peih lo lawk khawp mai. 

"Ani te chuan ei a ngai ve kher nâng, Champhai leh Aizawl inkar chu a kal ṭhang alawm" nu Nguri'n a rawn tih leh chuan ka lo bu zeuh a, u Billy-a'n kan ken tur bungrua vel a dah luh zawh tâkah chuan chhuah kan inpeih a ni mai. 

"Kal ang le, kan tlan muan dawn phei chuan kan zan thlen mai ang, zan thlen ka peih lo" nu Nguri nen u Billy-a lam chu kan hawi rual a, motor-a ṭhu lut turin min hrilh zui nghal bawk. 

Nu Nguri chuan fimkhur turin min chah mawlh mawlh a, hna kal tlai ṭhak khawpin min thlah a, a ngai lo kan tih pawhin ama'n ngai a ti tlat bawk si a, a inthlahrunawm rualin rilru a tinuam viau. Aizawl khaw pawna ṭawngṭaina hmunah kan ding kawi zawk a, u Billy-a chu tluang taka kan thlen theih nân a ṭawngṭai a, thu tam sawiin chham kual ve duah lo mah se a sawi kim em em thung. Aizawl khawpui piah deuh lawka thei leh ei tur chi hrang hrang zawrhna kan thlen chuan kan ding leh lawk a, ka duh lo chung ei tur min leisak a, ka duh rih lo ka tih paw'n

"Naute tan khan a ṭha alawm" a ti mai a, eng lehkhabu emaw ni berah chuan a chhiar leh diam tawh a ni ngei ang, chuti ang mi chu a ni ve tlat. 

Grape thlum tui zet chu ka ei mial mial a, ei duh lo vel khan tui ka ti leh hle si a, kan nui dun ta hak hak. Ka ei tir ve dawn te chuan ka barh ngei a duh vel a, hlim taka inbarh pahin kawngah chuan kan titi bawrh bawrh a, u Billy-a bula awm chu a thlamuan thlak mai bakah a nuam a ni. Khaw chi hrang hrang kan tlan pelh hnu chuan ka ril a ṭam nghal ringawt a, ka ngawih rei em avangin u Billy-a chuan min zawt nghe nghe a, ka rilṭam thu a hriat chuan a nui ringawt. 

"Rilṭam avanga titauh kher, duhawm nu, i duhawm tawlh tawlh mai" nui reng pah chuan a ti a, kei erawh ka lung a lo ni khawp.

"Ka titau bawk lo, ka rilṭam thu ka sawi hreh ve a ni mai a, chu bakah rilṭam hun atan chuan a la hma ve em alawm" ka ti deuh duah a, a nuih zawnga a biang sum lang te chuan a tiṭha zual a ni. 

"I pasal ka nih tawh hi maw le Rameng, ka lakah chuan sawi hreh nei suh. Ka nu leh pate emaw ka nau bulah sawi hreh nei pawh ni la ka lakah chuan nei suh, a chhan chu i pasal ka ni tlat"

"I inla nupui nei vel e a!" rilru chhungril hlim zet chuan ka ti a, ani lah chuan ka sawi ang deuh chiah hian

"Nang pawh i inla pasal nei ve tho, nimin tlaiah leh nizanah te kha chuan min duat thiam em khâ" a rawn ti deuh kher a, zana ka chet dan chu ka ngaihtuah chhuak nghal. 

"Sawi lo zawk teh, ka tum a ni lo. Awi, ka va'n ṭe chhuak palh tawh dawn lo chiang em, Nghala. Chu bakah ka tum a ni reng reng lo, tihpalh thil thu mai a nih kha!" 

"Tihpalh thil thu pawh ni se hriat a nuam viau asin, i pasal hi min ngam sawt viau lo maw" nui chunga a tih chuan ka thil kenin ka vawm chawrh lo chauh. 

"I ninawm, i lo mak hle mai VANLALHRIAT. Ka ril a ṭam tih i hre reng a, dawrah pawh min chawlh pui leh tawp si lo, min chawlh pui ma lek rawh" ti hmakin ka ṭhu ṭha sauh sauh a, a nuih te chuan ka lo ngei em em thung. 

"Ka hming pum te'n min ko ngam ve tawh a nia, i rai vang ni lo se chuan min ko ngam tawp lo vang. Chawlhna tur ṭha deuh ka hriatah kan chawl zawk dawn alawm, i hmaa ei tur awm kha ei mawlh mawlh phawt teh" a tih chuan ka melh kha kha a, min la hmu lo der hmak zui.

"Chawlh chawlh a ngai lo, rilṭamin ka thi mai ang" ti hmawk hmawkin ka hmaa ei tur awm chu ka ban leh lawi a, ka hmawm rualin a lo nui leh ta.

"Nui tawh lo teh" han ti vel mah ila a nuih a za zual sauh a, a hnuah phei chuan ri si lova a nuih reng avangin ka nui ve leh ta ringawt. 

Min chawlhpui a duhna hmun tak kan thlen chuan min chawlh pui ta ngei a, ka titau rei lo chiang kher mai. Tihtauh tumin motor-ah ka ṭhu tlat vel a, mi dang awm ṭhup laiin min pawm chhuak mai a nih kha! Zah lutuk avangin a banah ka chum a, ani chuan min dah thla duh der lo. Hmel hriat loh ho chuan min lo la en duh em em zui a, a ṭhen phei chuan min nuih nghe nghe. Chutah ka ei turin Rice plate hnih lai a lam ringawt bawk a, min ngaihtuah vang nge min tihzah a duh vang pawh ka hre tawh lo. 

"Plate hnih em em ka ei zo thei bik nâng, ka hne vek dawn asin" lungawi lo ru zeta ka tih chuan 

"I puar hnâp khawpa tam ei tawp rawh, i titau zing lo deuh ang" a lo ti deuh kher a, nghal chikimin a nghal thiam thlawt a ni. 

"Motor ka ruiha ka luak a nih vaih chuan nangma thiam loh a ni ang" ka sawi zawh rualin ka hmui ka hup nghal.

Kan bul hnaia ṭhute mitmei veng lêk lova luak chungchang ka sawi chhuak phawng chu mawl ka inti hnuhnawh, M.A lai ni ve tawh si ka awm dan leh ṭawngkam chu a mawi lo tawp. Ka bula mi lah chuan ka thu sawi engah mah ngai lo tih hriat zetin a ei mial mial a, ṭawng tawh loh chu a ṭha ber rihin ka hria, chuti lo chu ka ṭawng sual leh palh ang. Mi dang chuan min ei loh hmel hlawm bawk si, min en hrek hrekin ka hre leh nghal. 

Kan thil eina bulah chuan rei lotê chawl khawmuangin thlate kan la dun a, nupa kan nih hnua thawmhnaw pangai haa kan lak dun leh hmasa ber a ni nghe nghe. Hmuifang aṭanga kan tlan chhuah hnu chuan ka mut a chhuak nghal em em a, ka puar pingpeng ve êm bawk a ni. Plate hnih kha ka ei zawh theih loh ka ring ve vel a, ka ei zo fai chiang khawp mai. U Billy-a ai pawhin ka ei hnem daih zawk, mahse a bulah chuan ka zak hran lo, ka pasal a ni ve dim diam tawh tlat.

Kilometre 185 kan tlan dawn chu a ni si a, a chanve pawh kan la thlen bawk si lo, motor chu ka rui dawn tlatin ka hre leh nghal, ka ruih vaih chuan a chi loh khawp ang. Muthilh daih tumin ka ṭhu awn duai a, ka mit chu ka chhing tlat bawk. Ka meng reng a nih chuan thli thaw ka dawng reng ang a, ka mit chu a na mai mai. Thawm ri sur sur ri chuan min tiharh a, ka men chuan glass te chu a lo in up vek tawh a, thawm ri sur sur chu AC ngei a lo ni. 

U Billy-a lama thlein ka en vawng vawng a, ani chuan ka harh tih a hre lo a ni ngei ang. Hnehsawh takin Steering chu kawng kawi kan thlen apiangin a herh kual a, Tshirt pangai mai mai ha mah se a inhmeh ka ti em em tho. Ka duhthusam ang ngeiin mipa vun ngo lutuk lo a ni a, mahse hang a ni leh chuang hauh lo. A fai a, a rimtui a, a hmel a ṭha a, ka pasal ni lo mah se ka mipa ngainat chi a ni hrim hrim. Amah ngeiin

"Mihring hi chu kan fai chuan kan lang pangngai thei viau mai, hmelṭha mah se a balh leh si chuan a hmelṭha tak tak thei lo" a tih ang deuh khan ka mitah ani chu a fai a, a ṭha em em bawk a ni. 

Harsatna nei miah lovin Champhai lam pan chuan kan tlan zel a, kawng erawh a chhe chho ṭan viau mai. Ka tum loh deuhin ka rilruah u Pektei a lo lang hlawl a, kan haw veleh ngaihdam dil ka ba a ni. Tukinah lah khan a tho har ang reng bawk si a, a thawh rualin chaw a ei leh daih a, biak hman lovin a chhuak leh bawk si, biakna hun kha ka nei thlawt lo a ni. Ka nu leh pate'n an sawi chhuah loh danah u Billy-a'n a ben thu kha a sawi lo a ni ngei ang, a mizia chu mak ka tih zawng tak a ni.

Champhai thlen nân Kilometre 20 vel chiah a awm tawh thu u Billy-a'n a sawi chuan ka lawm ru em em a, mah se ka kawchhung chu a dik lo nasa em em tawh thung. Kan thleng ṭep tawh tho tiin ka sawi duh lo ve char char a, ruih loh nân damdawi pawh ka ei nawn nghe nghe. U Billy-a motor khalha chuan chu a nuam lutuk, ka rui har ngawt zawk alawm, mahse tunah chuan ka rui a ni ber tawh a ni. 

"Ding....ding mai teh, ding tawp mai teh. Ka rui...ka rui nasa tawh lutuk" ka ti chhuak thei hram a, u Billy-a chuan motor a tiding rang hle bawk.

U Billy-a chuan motor aṭang min pawm chhuak thuai a, kawngpui sira min din tir rualin ka luak nghal bawrh bawrh a, ka hnar chhung chu a thip em em bawk. Ka chalah a lo dawm a, min ṭawng thlamuan char char mah se ka rilruah a thu sawite chu pakhat mah a lut lo tluk a ni. Ka luak zo mai dawn emaw ka tih hnuah ka luak leh ṭhin a, a hnuah phei chuan ka ṭap tawp. Motor-a ka chuan thui ber a ni a, Kilometre 50 vel lêk pawha rui ṭhin tan chuan rui loh theih a ni lo a ni.

U Billy-a chuan ka chal dawm rengin luak zel tur chuan min ti a, kei paw'n ka taksa chhunga thil dik lo nuai nuai chu paih chhuah vek ka duh lutuk, ka luak chhuah tawh ho chu tam viau mah se ka pum a la dik hlei thei lo. Zinga kan chawhmeh te chu ka luak chhuak leh vek a, ka thil lo ei tawh zawng zawng deuh thaw ka paih chhuah tâkah chuan ka chau hnawk thei.

"I ṭha em?" a mal chunga ka lu a ngah rualin u Billy-a chuan a ti a, ṭap deuh purin lu ka lo thing vat thung.

"Motor in kan kal leh tawh ngai lo vang, Helicopter hman i duh leh duh loh ka zawh lai che khan sawi mai ta che" a aw chuan ka ṭah ti chhuak zualin ka ṭap ta chhuak ta feih.

"Pawisa ka ui alawm" ṭap feih feih chung chuan ka ti ṭuau a, ani chuan khawngaih hmel zeta min en chungin ka biang leh ka sam vel chu a lo chul hliau hliau zui nghal.

"Pawisa ka ngah alawm, kan haw lamah chuan Motor in kan chhuk tawh lo vang" ti hmukin min tung tho a, tuiin ka hmai leh hmui vel chu a tifai a, ka la chau ang reng khawp mai.

Darkar chanve vel kan din hnu pawh chuan ka la dik hlei thei tlat lo, khua lah chu a tlai tial tial tawh mai bawk si. Ka phone chu hmet engin dar zat ka en a, dar 4 leh a chanve a lo ri vel chiah. Zan thlen a peih lo tih ka hriat avangin a lakah pawh chuan ka inthlahrung, kal rawt ngawt dawn ila ka la dik chiah bawk si lo, taksa na nen rilru chu a buai duh khawp mai. Kilometre 20 vel chauh awm tawh mah se ka rui leh ang tih ka hlau ber, ka ruih tak tak lai kha chuan ka thi mai dawnin ka hre hial a ni.

"Kal ang" ka ti sep a, ruih leh inhuama kal rawt pawh ka ni a, a chhan chu u Billy-a hmai ka zah ve deuh vang a ni. 

"I ṭha chiang tawh em ni? I la dik chiah loh chuan kalpui che ka duh lo, kan la chawl rih thei tho" min ngaihtuah zeta a tih chuan

"Ka ṭha tawh alawm, thleng thuai zawk ila ka duh" ka lo ve thung a, la dik chiah lo mah ila thlen thuai thuai chu ka duh daih zawk a ni.

"Aw le, ka khalh muang tawh ngawt ang" tiin min pawm leh nawlh a, ka lo duh lo buai vel peih lo, kal tur tak ngial paw'n tha ka la nei mumal lo tlat.

A sawi ang tak takin a tlan muang sawt em em a, kawng kawiah te chuan a kual uluk sawt hle bawk. Ka hmaa ei tur awm chu ban ka tum a, a lo phal lo nasa hle. Thil ei tawh rih lo turin min ti a, kei paw'n ei luih chu ka tum bik ta lo. A tlan muang thawkhat bawk a, zan dar 6 velah Champhai chu kan thleng a, kan ṭawng tam lo dun hle. HOTEL HRANGA PLAZA tih inziahna building kawtah kan ding a, Hotel chhunga kan luh laite chuan mak ka ti em em a, a nitei te inah kan thleng dawn emaw ka ti char char.

Kan room chu a felfaiin hmuh a nuam phian a, khum rawng te chu a mawi reuh tawp. Rui leh tawh lova ka awm te chu a vanneih thlak, rui leh ngat ila chuan ka buai tawh ngawt ang. Bathroom-ah inti faiin ka thawmhnaw ka thlak sawk sawk a, keimah tak pawh chuan rimchhia ka inti a ni. Luak rim ka nam deuh tlatin ka hria, u Billy-a lah khan ten miah lovin min buaipui vel a, a ruk tak chuan rimchhia min ti hrim hrim ang.

Bathroom aṭanga ka chhuah chuan phone hmangin mi tu emaw ni a lo bia a, a ṭawng dan aṭang chuan a nutei a nih ka ring. An inbiak zawh chuan ka ṭhat leh ṭhat loh thu min zawt nghal a, ka ṭhat thua ka chhan chuan bu nghatin bathroom-ah a lut zui ve leh mai bawk. Kan intihfai zawh chuan zanriah ei turin kan chhuak a, kei pawh ka ṭha chho ve tial tial a, ka mut a chhuak ru em em bawk. Zanriah kan ei chuan kan room-ah kan tawm leh chawt a, han len kual vel chu ka la châk rih lo a ni. 

"Engati nge Hotel-ah kan thlen daih a? I nitei te inah kan thleng dawn emaw ka lo tia, ka hamhaih hman khawp asin" khuma kan mut hnu chuan ka ti sep a, room chhung chu a vawt deuh sûk leh nghal.

"A chhan chu i ṭe palh leh duh dawn sia, ka nitei te chhungkuain an lo hre vek palh ang tih ka hlau alawm" a tih chuan ka melh hrawk a, fiamthu thawh nân a hmang ziah chu ka duh lo.

"Sawi ziah lo teh, fiamthu ang zawng pawhin ka hre duh tawh lo. Nang chu i senior tawh a, i zak lo pawh a ni maithei, mahse kei chu ka zak teh mai a nia"

"Mi dang hriatah ka sawi pawh a ni hleinem, nupa kan nih tawh avangin inpawh takin awm ang. Khati anga i zah reng te chuan a dik nâng, nge zah loh dan ka zirtir dawn che"

"Hei!! Min bawh ringawt suh, ka la chau teh mai a nia, zanin chu ka peih rih lo" ka chung lama a awm thut avang chuan ka ti a, ani erawh a lo nui ringawt. 

"I rilru ka hre thei aw, min mamawh ve tho tih ka hre chiang lutuk Rameng. Chu bakah kan kal chhan ber a nia, insum buai ka tum reng reng lo" 

"Ka la chau" ti hmakin a âwmah ka nam a, a nihna takah chuan ka chau tawh lo, zanriah kan ei kham hnu aṭang kha chuan ka taksa pawh a pangngai leh viau tawh zawk.

"I chau tawh hauh lo, i rilru ka hre thei ka tih khâ duhawm nu, lai hma si" min va han hre chiang tak, a zahthlak zawk.

"A nih chuan nizana kan tih loh kha ti phawt ang, han inpuang hmasa phawt teh" ka tih chuan thaw hluaiin a mu ṭha a, a âwmah min kuah bet zui nghal chial bawk.

"I phakar ve reuh si, ka mamawh tawh teh mai che a nia" a rawn ti bui bui vel a, a hmel awm dan leh a ṭawngkam avang chuan ka nui chhuak ta hak hak. 

"I puitling tho bawk si a, naupangchhia deuha i awm hian i lawmawm reuh ê u Billy. I inhmeh lo ti dawn ila i inhmeh lohna ka hre bawk si lo, heti ang mizia hi i nei ang tih rin ngaihna reng ka hre lo" 

"Lawmawm chu nangmah alawm, nang ang baka hmeichhe lawmawm leh duhawm hi ka la hre lo. Motor ruih avanga i ṭap hmel te kha a va ṭha reuh tak, motor rui ṭap ka vawi khat hriatna"

"Nghal leh dawn ta, ninawm a! Han inpuang tawh teh le, nang ang tlangval luck hian min lo duh ru ve reng maw!?" tiin ka zawh duh ber chu ka zawt a, chu chu nizana ka zawh hman loh leh a sawi hman loh a ni bawk.

"Duh ru ve e maw le, hmeichhhe dang ang lo takin" a tih chuan hlim tak ka ni, ani angin min lo duh ru ve reng chu intihtheihna tham a ni. 

"I tlangval lai khan i va'n lerh awm em em, keini paw'n bialnu i neih kual duah thu kan lo hre ve a nia, ka thik thei hlawm tawp" ka tih chuan a nui hawk a, kan boruak chu a nuam a ni.

"Mi hian lerh tiin min sawi ve ziah a, ka inhmu lerh zo vek tawh a ni ber. Ka lerh hran lo Rameng, mahse nula han kawp rei peih tak tak kha ka nei lo. Anmahni kha ka duh lutuk lo hlawm hrim hrim, nangmah ang lo takin"

"University-a lar tur khawpa i awm chuan i lerh thawkhat a ni ang, sawi neuh neuh a awm hi chuan sawi neuh neuh chhan a awm tlangpui" 

"I va mak reuh tak, ka ngaihzawng tam zawk kha chu ka duh pawhin ka hre hlawm lo. Anmahni zawkin min nel em em a, inngaizawng emaw tih theih tura min be ṭhin an tam hle bawk"

"I inla luck vel e a! An pawh ngamin i awm tlat a ni ang chû, chuti ni lo se chuan an lo be bik tawp nâng che" ka la ti hram a, fiam vel chu a nuam riau.

"Nangtê hi! I dilchhut der vel tihna em ni? A hun lai kha chuan nupui tur ka zawng ru deuh a, mahse ka duh tûmah ka hmu lo. Nupui êm atan chuan ka ngaihzawngte zingah khan duh ka nei lo"

"Ka awih lo, Library-a thawknu nen khan in inngainat hmel viau kha le. Kei phei chuan ka en thla nghe nghe che u, lehkhabu hawh ṭhulh ṭhak khawpin ka en thla che u" 

"Chuan eng nge i hmuh?" nui nghawr dat hian a ti a, nupa kan nih tawh avangin hun kal tawh chuan min tibuai lo ve ve chiang hle.

"I fawp vel a, ka lo thinrimzia chu pui tak a ni. Khami ni aṭang kha chuan kan Professor i ni bawk si a, duh tawh loh law law che kha ka tum a, ka chan phakah ka ngai ta lo che a ni"

"Ka fawh ni khan i hmui ka suangtuah daih asin, Julie-i nen khan inan dan riau in nei alawm, amah lah khan min lo nel phian bawk si" a sawi dik maithei, kha nu nen khan kan vun pawh a inang lek lek a, kan intiat viau bawk ang ka ring. 

"Kha nu kha i bialnu nghet emaw kan ti char char a, thil te kha in ei dun ngun ropui bawk si. A nih leh mi dang aiin i duh ve deuh tak tak em?" ka tih leh chuan

"Duh ve deuh tak tak e, nang lah ka zirlai i ni bawk si, ka zirlai han ngaihzawn kha ka tha a na tlat pek alawm maw le. Ka lo senior ve tawh tho bawk si a, ka chhungte'n nupui nei tura min tih chhen avangin nupui tur ka zawng ru deuh tawp" a lo ti awlsam mai a, nuih pawh a nui chuang lo.

"Ka rilru aṭanga paih chhuah che ka tum a, mahse ka hlawhchham chiang hle. Kar khat ngawt i lo kal loh phei kha chuan ka thinchhe khawp mai" a ti leh a, a laka ka lungawi loh avangin kar khar chawl hmiah a, khang hun lai kha a ngaihawm rum rum mai.

"Ka titau alawm, i lakah ka lungawi loh rualin ka chan phak i nih ka ring bawk si lo. Min duh thu kha sawi lo la chuan ka bansan tak tak che ka ring, ka thei ang em tih erawh ka hre lo"

"Thil reng reng hian hun bik an nei ṭheuh a, ka sawi hun pawh kha a hun tak a ni. Chuti ang bawkin tun hi ka chet hun chiah a ni bawk, min hnial suh, min hnial hlek suh" ka hnial hlau zeta a tih mawlh mawlh chuan ka nui dir char char ringawt.

Pasal a nih angin a chet dan tur dik takin a che zawm mial mial a, kei paw'n nupui ka nih angin ka tihtur leh awm dan tur ka hai lo chiang hle. Kan inngaihzawn lai aiin nupa kan nih hnua nupa nun hman chu a dang dai zawk a, a nuamin a hahdam thlak daih zawk bawk. Kan inngaihzawn lai kha chuan kan hman zawh hnuah pawh rilruah a awm tlat a, thil dik lo a nih avangin rilru thlamuanna tak tak ka nei thei lo. Tunah erawh nupa kan ni tawh a, nupa nun hman chu thil thiang lo a nih tawh loh avangin ka thla a muang em em tawh zawk a ni.

Zan lam boruak a ṭha bawk a ni ang zingah chuan kan tho hma dun hle a, min fan pui a tumna hmun vel te chu a sawi melh melh a, ka kal châk tawhzia chu pui tak a ni. Kan len kual tak tak hmain a nitei te inah chuan kan leng hmasa phawt a, min lo lawm thiam khawp mai. Inneihnaa an lo kal theih loh avangin thupha a chawi mawlh mawlh bawk a, u Billy-a nitei chu a nu ang maia ṭawng duh leh biak nuam a ni. A pasal erawh hna lamah a kal a, chuti ang bawkin a fate pathum pawh school an kal a nih hmel. 

U Billy-a nite te in aṭanga chhuakin Rih dil lamah kan tlan leh a, Rih dil tui chu bura thuna hawn ve ngei ka duh. A kal tawh te sawi ang a la ni em ka hre châk, a lo ni tak tak phei chuan mak ka ti ngawt ang. Rih dil kan thlen chuan ka rin aiin mi an lo tam a, mahse ka nuam tihna a bo chuang lo. Ni a sa vût lo va, thla lak mawi tawk chiahin ni chu a sa a ni. U Billy-a phone camera a ṭha tho bawk nen thla pawh kan la nual a, hmân aṭang tawha kal châk ka ni bawk a, nuam ka ti kher mai.

Ni khat atan Rih dil tlawh chu kan duh tawk rih a, ni eng emaw zah chamna hun kan la neih avangin a tahtawl tê tea hmun fan vel chu kan duh zawk a ni. Kan thlenna Hotel lama haw lovin u Billy-a nitei te in lamah kan inkhalh haw a, chaw ei turin min lo sawm zui nghal bawk. Keini paw'n chaw ei chu kan hnial lem lo va, u Billy-a nite pasal pawh kan hmu ve ta. A lo fel khawp mai, a ṭawng duhin u Billy-a chu a ngainat hmel hle bawk. Mipa pahnih an inkawm a, hmeichhe pahnihin ei rawng kan bawl a, chuti ang tak chuan pasal neih chu a nawm ka lo ring ngai lo. 

Zanriah ei khamah pawh kan haw nghal mai lo va, thingpui in leh tê tein kan ṭhu khawmuang a, kan hlim dar dar hle bawk. An fate chuan u Billy-a an lo nel ngâng mai, a bulah an tal deuh chawt a ni ber. U Billy-a nitei paw'n ei leh in fimkhur turin min ti a, rai laia ei tur leh thil tih tur chin bituk thiam a ngaih thu te a sawi a, a sawi dik hmel hlawm khawp mai. Fa pathum lai nei tawh a ni a, a hre chiang tawh ngawt zawk ang. Keini ve chu fa pakhatna nei turin kan la rai ṭan chauh a, naute neih chu ka châk ru ve reng tawh. 

"Hello" tiin u Billy-a phone chu ka lo laksak tawp a, a nu hnen aṭanga call ni lo se chuan ka la kher lo vang.

"E...Engi, khawiah nge Billy-a? In ṭha maw? Min rawn be leh tawh si lo, in awm lo chiah chu kan khua a har nghal viau a nia" nu Nguri chuan a lo ti nghal zung zung a, chutih lai chuan bathroom aṭang u Billy-a a lo chhuak chiah bawk.

"Aw, kan ṭha e. Saw u Billy-a chu bathroom aṭang a lo chhuak chiah e, i biak duh chuan inbia ula" ka tih lai chuan

"A ngai kher lo, nangmah ka hrilh che chuan a tawk mai. Anṭam kha lo hawn teh u, heng lai bazara an anṭam zawrh ai hian ka ei châk tlat" a rawn ti leh a, rei pawh inbe lovin phone chu kan off ve leh mai bawk.

"Eng nge a?" u Billy-a chuan a rawn ti sup a, a sam chu a la huh ṭha khawp mai, a la hru lo hrim hrim bawkin ka hria.

"Ka nu'n Champhai anṭam lo hawn turin min duh a, kan hawn theih tur thu ka lo sawi ve ringawt" ka tih chuan

"Kan hawn dawn nia, nitei te pawh khan an nei tak ang" a ti ve leh mai a, a sam a hruk hul zawh rualin khumah a rawn lawn zui nghal zat bawk. 

Engmah a inhnawih lo va, cream tak ngial pawh a inhnawih lo, mahse chuti anga rim fai em em chu ka ngaina hle thung. A body wash hman rim chu amah nen a inhmeh hlein ka hria, Hotel kan thlen hi chuan min inbual hmasak tir ve ziah a, chuvangin a inbual zawh meuh hi chuan ka lo inpeih diam tawh ṭhin. Thil eng eng emaw kan sawi neuh neuh a, kan taksa chu a inhlat lo hrim hrim bawk. A taksa ngheng chunga ṭawng siam siam te chu hahdam thlak ka ti a, a taksa leh ka taksa erawh a inlen hlei hle a ni.

Champhaia kar khat leh a chanve kan cham hnuah Aizawl lamah kan haw thla a, mahse motor ni lovin Helicopter hmangin a ni tawh thung. Motor-a chhuk ka duh leh viau nâa ka zuam lutuk tawh lo, chu bakah u Billy-a'n a phal tawh lo hrim hrim bawk. Ṭhuampui Heli Pad-a kan ṭum hnu chuan Taxi-in kan veng lam kan pan a, kan Honeymoon hman dan leh kan nupa boruak chu a nuam a ni. 

Mi ṭhenkhat chuan ram dangah Honeymoon an hmang ṭhin a, ka sawisel pawh a ni lo. An duh a nih phawt chuan hmang rawh se, kan Honeymoon hmanna hmun a changkan leh changkan loh aiin nupa inkar boruak ṭha se a dik ber mai. Hmun changkang tak taka Honeymoon hman duna nupa inchul nel lo tak nih leh si ai chuan hmun changkang lo ve taka hlimna nen Honeymoon hman chu a thlanawmin a thlakhlelhawm zawk a ni.

U Billy-a motor chu hlawh neiin Champhai khuaa a hmel hriat pakhat kan khalh thlak tir thung a, min ngaihtuah deuh tu pasal neih zawng a hahdam thlakin a lungawi thlak ngei mai. Kan in kan thlen chuan a lo reh ṭhiap a, mahse a reh hun lai tak a ni hrim hrim. Nu Nguri leh pa Thangtea te an hnaah an kal ngei ang a, chuti ang bawkin u Pektei pawh a hnaah a kal ngei ang. Inbual faiin awm hmun kawr chu ka ha a, ei rawng bawl nân chuan a la hma deuh hret a ni.

Kan Honeymoon hman dan te chu ka ngaihtuah let roh rôh a, ka hlimin ka lungawi thlawt a ni. Nupa nun pawh hman loh zan kan nei ngai lo, mahse chu chu a nih dan tur dik tak a ni. Thla khat leh tih chauh ka pum chhungah naute a la awm bawk a, u Billy-a chu chuti angin a che dim vak ngai lo, keimah ber paw'n thil pawi em a thlen em ka ring hran lo, thil pawi thleng thei ni se chu u Billy-a chuan a hre leh vek zawk tawh ngei ang. Min duat a, min dawm a, min tihlim thiam a, chuti ang chuan awm reng thei se ka ti a ni. 

Hun a kal ang a, a nupui mah ni ila engtik niah emaw chuan kan inneih tirh ang em ema min ngaihsak loh châng leh min duat loh chang a la nei ve khawp ang, mahse engtik lai pawha min hmangaih phawt chuan thil dang duh ka nei lo. Ni e, kan inneih ni chiah kha hmangaihna thu a sawi ka la hria, kan inngaihzawn lai tak ngial pawh khan min hmangaih thu a sawi ngai lo. Kei paw'n ka sawi ngai bik hlei lo va, mahse ka hmangaih tawh em em thung.

Kan inneih hma; inneih kan tum hnu tawh si lai vel kha chuan ka hmangaih leh hmangaih loh ka chiang lo va, mahse ka chhungte'n min tih dan zawng zawng ka hrilh hnu kha chuan ka hmangaih tih ka hre tawh. A sawi ngai loh avangin ka sawi duh ngai bik lo va, ka sawi loh avangin ka hmangaih lo tihna pawh a ni chuang lo. Ka ngaihtuah ṭhin, tlangval senior ngaizawngin pasalah ka neih ka inring ngai lo, mahse u Billy-a chu ka mipa hmangaih a ni miau a, ka pasal a nih kumkhua ka ring bawk. 

"Anṭam chu kan ring rei ta ngei mai, kei chu ka hne ṭan lek lek tawh" nui chungin nu Nguri chuan a ti a, anṭam chu a silfai pah reng a, kei pawh ka lo nui ve mai.

"Beisei aiin in lo hawn hnem daih a, i pa pawh hian a ning tawh hrim hrim ang, a sawi duh lo mai mai a nih hi!" a ti leh a, anṭam chu kan ring rei ve tawh em bawk a ni. 

"Nia, bazar leh hunah chawhmeh dang ka lo lei dawn nia, kei pawh hian ka ning ve deuh tho" nui chunga ka tih chuan

"A ni em em ang, a tua te pawh hian kan hne ṭan tawh alawm, kan ṭhenawmte saw vawk chaw atan kan pe ṭhen dawnn nia" a ti leh mai a, a ṭhat phian ka ring.

Zanriah kan ei lai chuan nu Nguri a ṭawng deuh char char a, ka pasal nu leh pate chu nel tawh tak ka ni. Kan inneih aṭang thla khat lai chu a liam ve leh tawh a, a tua te mah chu sawisel turin an awm lo bawk. U Pektei erawh a awm ngai ngaiin a la awm reng a, min biak châk loh hmel zeta a awm lai paw'n ka be lui hram hram zel a, kan inkar chu siam ṭhat ka duh a ni. Nin hmel viau mah se ka biak chuan min chhan loh a nei ngai chuang lo, min chhang hmuk hmuk zel tho. 

Tlai tin ei rawng kan bawl dun ziah bawk a, kan inneih tirh letin ka lakah chuan a nelawm loh leh zual, mahse chu chu ka tan a pawi lo zawk. Min nel loh pôh leh a nel tura awm ka tum a ngai a ni mai, chu chu ka tih ngei ngei a ngai. U Billy-a'n keimah vanga kut a thlak ber kher kha a pawi ka ti, kha khan thil a tibuai chho leh vek. Kut thlak lo se chuan thla khat lai kan awmho ve tawh a, innel hun chu a ni ve tawh reng.

Chapter 6

Sik leh sa a inthlak danglam a, khaw lum lutuk pawh hre hman lovin thlasik thla kan kai chho ṭan a, a zia phian mai. Zing lamah ni chhuak ve ṭhin mah se zan chuan thima hliah khuhin a liam pui zel a, chu chu khawvela hun inher danglam dan a ni rêng bawk. Kan duh hun hunah kan tidingin kan chelh thei ringawt lo va, engkim siamtu Pathian chauh lo chuan hun leh ni leh thil engkim chungah thuneihna kan nei ve lo a ni.

U Billy-a pawh Mizoram University lamah a kal ni tin a, class a neih loh lai chuan kan inbe ziah ṭhin. Kei erawh hna pawh nei lovin nupui ka ni deuh tlawng a, ka pasal nu leh pate an fel em avangin inthlahrun nachang pawh ka nei lo lek lek ṭhin hial a, pasal nu leh pate nen innel taka kan awm thei chu a hlimawm rualin u Pektei nen erawh kan la innel tak tak thei lo thung. Inkal pelh dawn paw'n biak ka ṭhulh ngai lo va, ani chuan min chhang tawi thei hle bawk. 

"I pum a nuam em? Vawiin chu ka lo haw hma maithei, chawhnu lam class ka nei lo" u Billy-a aw chu a dam thlup a, hriat reng chu a hneawm loh tak zet a ni.

"A ṭhat chu, lo haw hma daih rawh. Hmeichhia te khan an lo melh nasa leh viau che ang e, pa i nih tawh dawn hi" tiin ka fiam ve zeuh a, a nui ri chu phone aṭang paw'n ngaihthlak a nuam ngawih ngawih.

"Enteh, nupui ka neih hnu hian ka tlangval lai ai khan ka luck in ka hria, ka hmelṭha deuh sawt em ni Rameng? Han sawi teh, i sawi a nih chuan ka awih deuh mahna" a rawn tih chuan

"Ka hre bik nâng, kei chuan ni tin zan tinin ka hmu che a, i hmel chu a ngai rengin ka hria, mahse tlema i thau tâk deuh vang pawh a ni maithei" ka lo ti ve ta duah a, kei ngei pawh hian ka pasal a nih hnu hian ka hmu hmelṭha chiang alawm, ka sawi duh lo mai mai pawh a!

"Ka thawhpuite hian nupui neih i ngeih min ti zel a, dawt nge thu dik a nih pawh ka hrethiam lo. Eng pawh ni se lo haw hma ka tum, nangmah chiahin em ni i awm leh tawh?" 

"Aw ni e, mahse min ngaihtuah viau ṭhin lo teh. Min ngaihtuah chûng chung hian u Pektei mit kan tikham a nia, ka rilru chu i hriat vek kha!"

"Pektei tih reng mai, i tum dan anga awm tir che ka duh ve tho bawk si, a rei tawh mah mah lo maw Rameng? Keima'n ka zilh leh deuh ang a, kei chuan a zia mai ka ring asin"

"Ni lo ni lo, i zilh leh phei chuan kan boruak a chhe ting a ni mai. Chu ai chuan ka kutah dah tawp rawh, engtik niah emaw chuan kan la inkawm ngeih em em ang"

"Rilru ṭha nu, ka dah dawn, class ka nei ṭep, ka lo haw hma ang" ti zung zungin phone chu a hmet tawp a, lawm lovin ka nui leh ta ver ver. 

Tunah chuan Billy-a nen nupa kan nih aṭang thla 3 lai a lo liam ve leh tawh reng a, ka pum erawh a puar lian lutuk hran lo, rai lian lo chi ka nih ka ring. Thla 3 laia upa naute ka pum chhungah a awm a, ka nu lian vak lo bawk nen rai puar lian lo tak ka ni. U Billy-a ve thung chuan inhmeh min ti daih zawk a, a sawi fô ṭhin lawmawm tih chu a kâ aṭang ka hre ngun leh khawp, chu chuan min tihlim thei hle bawk.

Ka nu leh pate in lamah pawh kan leng phei ngai vak ta lo, len phei chhen chu kan ning tlang hlawm a ni ang. Chu bakah min lo dawnsawn dan a lem thei bawk si a, kei phei chuan a dera inbiak reng chu ka ning a ni. Ka pasal nu leh pate paw'n len phei an rawt tawh ngai lo va, u Billy-a paw'n a rawt ngai hek lo, kei phei chuan len phei châkna ka nei lo hrim hrim. U Pektei ngat phei chu sawi lo zawk teh ang, u Thanthani a haw em em zawk a, a huat chhan erawh ka hre lo.

Ka pa hnen aṭanga phone call dawn zeuh zeuh ka nei a, kar khatah vawi thum vel bawr chu min lo be ṭhin nghe nghe. Ka pa a ni a, a thisen ka ni a, min ngai ve te pawh a ni ang. Kei tak pawh hian dik tak chuan ka ngai ve tho, ka pa leh Amos-a chu ka ngai ru ve veng veng zel. Lem chang thiam pahnih ka nu leh u Thanthani te erawh an reh hmak a, anmahni pahnih chu ka pasal chhungte len châk lohna chhan pakhat an ni bawk. 

Dar 12 leh a chanve velah u Billy-a chuan in a lo thleng a, min hmuh chuan khawiah mah kal hmasa lovin ka bul a lo pan nghal chat a, ka thil ei avang chuan a ner nasa hle. Waiwai emaw Noodles vel ei hi a phal lutuk lo va, kei paw'n a phal loh thil chu tih loh ve mai ka duh, mahse ka rawp theih lutuk avangin ka ei leh tawp ṭhin. Ani paw'n min hrethiam takin ka ei tawh hi chuan min hau ngai hran lo va, ei tam lo turin min hrilh zawk ṭhin.

"Min lo barh, ka ei ve chhin châk" ka bula ṭhut thlak pahin a ti deuh kher a, ni dangah a ei ngai tawp si lo.

"I duh lo vang, a hma zawng paw'n i ei duh ngai loh khâ, ei ve lo mai rawh" ka tih rualin a kâ a an zawm nghal a, barh chu phut vet vet tak a ni.

"Kha! Tui i tih loh vaih, chhak chhuak hlek suh ang che, ka ui a nia" tiin ka barh ta nge nge a, a chhak chhuak lo tak tak leh nghal. 

"Vawiin chu i lo ṭha em? Anu hi i lo tibuai hrep lo maw?" ka dul chu en vung vungin a be mawlh mawlh a, a tih loh dan pawh a ni chuang lo. 

"Khawi maw ka'n fawp teh ang che" ti supin ka kawr chu a hlim a, lian lutuk lova ka dul puar ve âl chu a fawp vawng vawng a, a lei a chet tir rualin ka lo rak ṭhat.

"Liak ziah suh, kal rawh, va inbual rawh" ka nawm sawn rual chuan a lo nui hawk hawk a, min fiam ve dan lah hi a mak thei si. 

"Min ngaih em khâ, i thil ei zawhah kan inbual rual dawn nia" kal sawn pawh a tum chuang lo, a phone khawih mual mualin ka bulah a ṭhu ngawi reng a, keiin thil ka ei mial mial thung. 

Chutia kan nupa kan awm lai chuan ka pa a lo lang hlawl a, amah chauhin a ni lo leh nghal. Amos-a chuan School Uniform a la ha a, a hruai a nih ka ring. Ka awm lo chiah chu an buai ru ve thei khawp ang, u Thanthani leh ka nu lah chuan Amos-a an hruai ṭha peih ngai bawk si lo. Ka pa hmel chu a cher deuh tlatin ka hria, mu ṭha lo hmel a pu a, rilru hahna nei te pawh a ang mah zawk.

U Billy-a chuan ka pa chu a lo be nghal vat a, min hmuh rualin Amos-a pawh ka lamah a lo kal a, ka thil ei lai chu a ei châk thu a sawi zui nghal bawk. Ka pa leh u Billy-a te titi laiin dawrah ka kalpui a, Noodles chu lei belha chhum sak ka tum a ni. Dawr aṭanga kan haw lai te chuan a hlim reuh em em a, mi pangai angin ṭawng fiah thei deuh phe se chuan naupang ṭawng duh tak a nih ka ring. 

A rilru a kim chiah lohna leh a ṭawng fiah lutuk theih lohna lai tak chu mi hmuhsitna chhan a ni a, ka ngaih dan chuan a hmusittute zingah ka nu leh u Thanthani pawh an tel vein ka hria, Amos-a chu duat viau angin lang mah se an duat tak tak lo. A hma kha chuan an duat tak tak emaw ka ti a, thil awm dan ka hriatthiam hnuah leh ka upat tâk deuh hnuah hi chuan an duat tak tak lohzia ka hre tawh a ni. 

Ka pa leh u Billy-a chuan eng thil nge an sawi dun chiah ka hre lo, chokaah Amos-a nen ei tur siamin kan awm daih a, ani lah chuan a ei châk tawh em em leh nghal. Ka pa chuan minute 20 hnu velah Amos-a chu a rawn au a, Amos-a paw'n a ei zo vel hman chiah bawk. Chokaah ka pa leh u Billy-a chu an lo lut a, ka pa hmelah chuan vun nung sârh ang chi kha a awm tawh lo hrim hrim.

"I dam ṭha maw?" tiin an kal dawn tak takah ka pa chuan min bia a, mahse min en miah lo, hmâna ka pa ka ngainat em em ṭhin kha a ang tawh lo tak zet.

"Aw dam ṭha e, nang ni zawk? Ka nu leh u Thanthani an ṭha em?" pangngai tak chuan ka lo ti ve mai a, ani chu a hma zawn en ngar ngarin a bu nghut thung. 

"Pa, i cher deuhin ka hria, i dam lo em ni?" ka tih leh chuan ka lam a lo hawi a, kei hian ka pa mitah chuan rilru hahna nasa tak ka hmu chiang a ni.

"Ka cher pawh ka lo hre hleinem, inenkawl ṭha ang che, kan kal a nia" nui lui sukin a ti a, an kal liam lai te chu ka thlir reng a, ka pa chuan natna vei ruk a nei a nih ka ring ta ber. 

In chhung ka luh chuan ka pasal lo awmna chokaah ka kal phei nghal a, amaha thingpui a lo insiam melh melh avang chuan ka nui tawi tak a, ka nui thei tak tak lo a ni. Ka pa khan ka rilru a luah tlat, dik lohna eng emaw tak chu a nei ang, mahse ka hre sual ve thei tho bawk. A hnung lam aṭang ka pasal chu ka kuah a, ka lam lo hawi chuang lovin ka kut chu la kangin a fawp zeuh a, thingpui a in châk te chuan min lo nghah ve lawk mai tur alawm maw le.

"Ka siam kep ve nghal dawn che em?" ka lam hawi zawnga inher pahin a ti a, ka biangah dawmin min fawp leh ta zeuh a, kan pahniha kan awm dun hi chuan min fawp deuh reng zel.

"A ngai lo mai, ka in châk lo. Chu ai chuan ka pa hmel khan ka rilru a tibuai u Billy, a hmel kha i lo en chiang ve em?" tiin ka zawt let ta zawk a, min ṭhut pui pahin

"A cher deuh lo maw, ka hmuh khât vang pawh a ni maithei" a lo ti ve mai a, chu tak chu ka rilru tinuam lo tu a ni leh ta zel.

"Kei paw'n ka hmu cher tlat, natna vei ruk nei a ang ka ti u Billy. Ka hlauthawng ru teh mai a nia, Cancer natna te hi a lo vei reng ang tih ka hlau"

"A chhe lam hlir i ngaihtuah nghal ringawt a nih khâ, zan mut ṭhat loh vang paw'n a cher theih lutuk alawm, hlauthawng lutuk duh suh"

"Chuti ang ringawtin ka hlauthawng lo thei hleinem, hmun dangah awmsan tawh mah ila ka pa a nih tho avangin ka ngaihtuah a ni"

"Inbual dun ang, chuan i rilru pawh a pangngai mai ang" ngaih sam fê hian a rawn ti daih a, min pawm kang lâwpin kan nupa room lamah min chhoh pui a, ka rilru tihthawven tum takin ṭawng mah se ka rilru a nuam tak tak thei rih lo.

Zan kan mutna ka sawi chhuak leh a, ka pasal chuan min titi pui dan vak a hre tawh lo a ni ang a ngawi ta reng a, kei lah chuan ka pa ngaihtuahna thu hla hlir ka chhak chhuak bawk si, ngawi renga min kuah hle hle hnuah chuan ka ṭawng tawp ve thei ta chauh. Thinrimin engmah ka sawi lo va, ka awah chuan hlauhthawnna hlir a awm thung. Mahni pate han ngaihsak loh ringawt chu thil dik a ni lo alawm, ka nu nen an inhau ti dawn ila ka ring chiah bawk si lo. 

Kar thar kan chuang kai a, kei pawh ka rilru a pangngai leh vek tawh. Rai lai ka nih vang nge ni rilru danglam thut thut chang ka ngah a, u Billy-a tan ber chuan hriatthiam ka har thei ngawt ang. Thil ei ka duh bawk si, ka damdawi pawh ka ei awl lo, ka pasal chu fapa duhawm tak amah chhun zet hrin sak ka châk a ni. Kei ang bawkin u Billy-a nu leh pate chuan pi leh pu nih an châk thu an sawi reng a, chaw ei laia han nuih ho dar dar pawh kan nei zing ta hle.

In chhung sekrek khawiha ni tin hun hman ni len chuan ni chhiar dan pawh hriat fak a har a, hna nei lova awm tlawng te chu a nuam lutuk lo. Vawi khat chu u Billy-a ka sawi pui tawh ngei a, Group D emaw vel tal hna thawh tur ka zawng dawn emaw ni ka ti a, ani chuan a lo phal lo nasa mai. Chu chu kan inneih tirh tak tak lai vel kha a ni a, a thlawnin ka pasal hnen aṭang pawisa dawng thla tin ṭhin mah ila a nuam duh bik chiah lo a ni.

"Lo lut rawh" tiin door bell ri lo awm chu ka lo chhawn a, lo lut chu ka chhungte an nih ka ring chiah lo va, an ni lo reng bawk.

"Teh hlawl che chuan, eng nge i lo tih dawn a?" pangngai tak chuan ka ti a, ani pawh ka pa ang bawkin a cher kuam leh tawh, eng thil emaw tak chu dik lo a awm chiang a ni. 

"Ka lo len i phal vak na nge? I rilru pawh a mi hausa rilru ṭâlh tawh mai a, pasal neih chu i ngeih khawp a nih dawn hi!" a ṭawngkam tin chu a kha deuh fak a, ka u ni lo se chuan ka chhuah tir nghal daih ang. 

"In dam ṭha maw? Ka nu eng nge a an? A ṭha em? Nang pawh hi i va cher ve, ka pa ang bawkin i cher a nia" chhang buai duh lovin ka ti ta zawk a, ani chuan nui hak chung hian

"Min ngaihtuah ang deuh khan awm der vel suh, i ngaihtuah ka ngai lo ve, ka pa chu a lo kal ka ring reng a ni. Thil eng emaw ka hriat hma kha chuan ka dam ṭha lo va, ka hriat hnuah erawh ka ṭha var var nghal" a lo ti a, a sawi tum ka man hauh lo.

"Eng thil nge i hriat chu ni a?" ka tih chuan Fridge lam a pan a, inthlahrung lo zetin Frigde-a tui bottle chu a la a, a in lai te chuan ka lo en chik ngar ngar hle. 

"Hre ve duh suh, kei angin i hlim ve phah tak tak dawn chuang lo" a tih hmak a, thawm dim lo zet hian Fridge chu a khar a, zahna a nei lo hrim hrim zawk. 

"School-ah i kal lo em ni?" kan ngawih reng hnu chuan ka ti leh a, ṭha taka biak reng chu a ninawm lamah a kal ṭan tawh.

"Kal lo chu a nih hi, hetia mahni chauha awm chuan uire a va awl duh awm ve le. I duh hûn hunah mipa i hruai lut thei dawn a nih hî" thingpui siama ka chet mial mial laiin a rawn ti a, leh hawiin

"U Thanthan!!" ka ti deuh ṭhawt a, a ṭawng dan leh min tih kual dan vel chu ka ngaithei tawh lo, haw vang vang mah se pawi ka ti lo lutuk.

"Hehe! Thil thleng thei ka sawi mai alawm, huat vak tur pawh a awm hran lo" min tham lo fê hian a ti leh a, thinrim takin kawngkapui lamah ka kai phei dawr dâwr zui nghal hmawk hmawk a, thingpui pawh in ma lêk rawh se.

"Lo leng tawh suh, lo leng tawh miah suh, i ṭawngkam bawlhhlawh tak tak kha ka hre peih lo" ka ti ve ta phiar phiar a, ka thin a rim ve em a ni.

"I thu lo ê, i in tak tak pawh a ni hleinem. I pasal ve lah hi ka ngaihzawng hlui a ni leh nghal, i awih leh chuang tawp nâng" 

"LALTHANZUAL!!" ka u a ni tih chu ka hre lo der hmak tawh, chuti ang taka hmeichhe rapthlak a nih chu ka ring lo a ni.

"Ka hming pumin min ko ve khanglang suh RAMENGMAWI, i pasal hi ka bialpa hlui a nih hi!" thinrim zetin a rawn ti ve leh a, ka awih chhe tê lo.

"I kâ a kua a, i sawi ve mai mai a ni e. Nang ang hmeichhia hi a duh bawk lo ang che, nangmah zawk hian i duh tih ka hre ve vek, ka sawi duh lo mai mai a ni"

"I duh leh amah pawh zawt la, kan inkarah eng thil chiah nge thleng lo zawt vel la, dawt ka sawi lohzia chu i hre mai ang"

"A teuhin a hnai lo, i sawi ai reng rengah ka zawt kher lo vang" ti hmakin kawngka chu ka khar a, ani pawh thinrim zetin a kal zui nghal bawk.

Chokaah lutin Fridge aṭang tui bottle ka la chhuak a, ka in nghal khawlh khawlh a, ka thin chu a rim ve khawp mai. Dawt bak a sawi hauh lo vang, u Billy-a nen hnuhma an lo neih dun tawh pawh ka ring nek lo. Gas chu ka off a, pangngai takin ṭawng se chu thingpui pawh siam ka tum reng a, ka unaunu a nih avangin han titi dun te chu a phurawm ve deuh ka lo ti a, mahse a teuh hian a hnai lo. Amah zawk zawkin elhsen leh tham lo zetin min be reng a, ka tan chuan insum theih a har a ni. 

Zanriah kan ei dawn chuan u Pektei a nuamsam lo thut a, chaw pawh ei peih lo khawpin a dam lo va, ka nute buaipui ngai lovin keima'n ka buaipui a, ka biakin awmzia nei lo mah se biak ka ṭhulh chuang lo. Tun lai chu thla dang aiin zan a meng rei ṭhin hrim hrim, zana chhuah pawh a ngah deuh hlek. A awm dan aṭang chuan dam lo na tak a ni lo tih chu ka hria, mahse awm tinuam lo thei khawp chuan a dam lo ve a ni. 

"Ṭawng reng lo teh, a hneawm" a ṭawng chhuah ve chhunah chuan a ti deuh hmuk a, ka bula ding ngawi reng u Billy-a chu ka lo khap vat nghal. 

"Kan nupa room-ah lo va awm rih la, ka lo phei har lo vang" tiin ka pasal chu ka chhuah tir a, chuti lo chu u Pektei ṭawngkam avang chuan a insum thei lo leh ngei ang.

Damdawiin a chhawk deuh a ni ang ka thil sin tir chu sin peih tawh lovin a dah sawn a, thawh mai a tum chu a tlu ṭhelh a ni. Lo dawm vatin khumah ka ṭhut tir leh a, khuma awm reng chu a nin tawh hmel hle bawk. A tih tur hre lo chu a mu leh tawp a, sawi tur a vang khawp mai. Kan nupa room-a pheisan ngawt lah chu a chi chiahin ka la hre si lo, amah lah chuan min hmuh a châk loh hmel bawk si, rei lotê tal awm chu ka tum ta leh ringawt.

"Waiwai emaw Noodles emaw i la kawl em?" a thil min zawh teh daih chu mak ka va ti tehreng em, a chhan chu u Billy-a te chhungkua hian Noodles emaw Waiwai emaw pawh an ei ngai lo tlat.

"Maw? Aw...aaaa...la kawl e, aw...Fridge-ah ka la nei nual mai" ka ti bah deuh nawk nawk a, ka aw te chu ka thian vel ringawt bawk. 

"Min lo pui lawk teh" ti lehin thawh a rual a, a sawi ang chuan ka pui vat a, in hnuai lama chhuk a duh thu a sawi chuan ka chhuk pui zui nghal.

Engtin emaw ni tak hian rilru nawm dan riau ka nei a, u Pektei Noodles ei tur ka siam lai te chuan kan awm dan ka ngaihtuah let a, pangngai taka min biak hmasak berna a ni hial maithei a ni. Mi ṭhenkhat ngaihah chuan ka chet dan chu a hnuaihnung thlak ang zawng pawhin a ngaih theih ang, mahse kei chuan chuti ang rilru chu ka pu hauh lo thung. Hma ka sawn ve chiang alawm, u Pektei chuan min ngaina lo em em hran tawh miah lo tih ka hrethiam bawk.

Tui tih hmel zetin ka Noodles siamsak chu a ei a, zanriah a ei lo bawk a, ka siam tam tam nen a ei zo vek. Ei bang nei ta pawh ni se ei mai ka tum a, mahse ka ei tur pawh awm lo khawpin a ei zo chiang hle. Damdawi ei leh zeuhin in chung lamah kan chho a, chhoh lamah chuan ka puih a ngai tawh lo, a harh ṭha pangngai tawh khawp mai. Kan nupa room ka luh chuan ka pasal muhil bam chu ka hmu hmasa ber a, a chau ve hle a ni ang a muhil hma em mai. 

A puan sin lai chu a pawt tawm deuh vek a, vawt a ti a nih ka ring. Rizai lak chhuah belhin ka sin thuah tir a, a bulah chuan ka inthawlh ve nghal bawk. Ka pum a la puar lutuk lo bawk a, a hnung lam aṭanga kuahin ka mit ka chhing vang vang a, mahse a dul zawna ka kut awm chuan a tiharh rang kher mai. Che deuh hrut hrutin ka lamah a lo inher a, kei erawh ka lo la maimitchhing tlat thung. Ka biang chu a kutzungṭang pakhatin a chul riai riai a, a va nuam mai mai tak.

"Ti leh rawh" a thil tih lai a tawp daih avang chuan ka ti sep a, hmu lo mah ila a meng nur nasa dawn tih ka mitthla thei.

"I harh reng maw!? Duhawm nu, i va pakhar reuh tak!" ka biang chu a kut lian zet chuan a khuap a, ka men rualin min lo fawp nghal chat. 

"I va'n chau awm ve le" tiin ka hnung chhawn a, naute ang maiin a taksa chu ka ngheng a, ani paw'n ka awm duh dan hrethiamin min lo kuah rang khawp.

"Ka chau pawh a ni lo, ka lo muhil sek mai mai alawm" ti supin ka chhip sam chu a hmuiin a tawk zeuh zeuh a, mut chhuaka ka hriat chu a harh ṭha ta viau.

"Zanin chu awl ang aw, hetia awm mai mai hi ka châk lutuk, a nuam bawk si" ka tih chuan min kuah nghet sauh a, ka mawng bawr vel chu a mipatna chuan min do run thun.

"Awl ka lo ti vak lo asin le, pawi lo mai. Ka insum hle a ngai dawn a nih hi, min duat hle a ngai bawk" a tih chuan ka nui sen sen a, ka hmel hmu lo mah se ka awm dan tur a ngaihruat thiam leh vek tho ang.

"Muttui" ti leh sepin a kut chu ka dul zawnah ka dah a, boruak a vawt deuh sûrh tawh avangin tui taka muthilh vang vang chu ka duh a ni.

A tukah chuan u Pektei pawh a tho harh ṭha viau a, a nu leh pa biakna te chu tuk dang ang lo takin a chhang ṭha hlawm hle. U Billy-a'n a chhungte min hmel hriattir zanah kha chuan no taka che vel tur leh ei rawng pawh bawl ngai lo turah ka lo ngai ve nghal ngawt pek a, han chenpui meuh chuan a lo ni teuh lo. A hman chang chuan u Thanthani ang lo takin ei rawng min bawlpui ziah zawk a, keini aiin hausa mah se a nu leh pa thu chu a hnial ve vak vak ngai lo, u Thanthani chu ni se a hnial leh nasa ngawt ang. 

"Ehê..ka damdawi ei lai a zo der mai" keima hriat tawk lek chuan ka ti a, mahni chauhin ka awm leh tawh bawk a, in chhung chu a reh leh tawh khawp.

Pharmacy dawra kal turin ka insiam a, ka chhuah khât em avangin han tei chhuah vel chu a phurawm ru phian mai. Ka damdawi lei ṭhinna dawr bawk chu ka pan leh chawt a, dawr nghaktu chuan min lo hre ṭha tawh khawp. Calcium leh Vitamin ka lei nual a, rai puar tana ṭha damdawi chu ei zel ka duh, chuti ang bawkin u Billy-a paw'n min enkawl uluk hle. Ka haw lam chuan mi ka su chawrh a, min lo su a ni mah zawk.

"Ka tih" ka ṭawng chhunzawm ta hauh lo, ka mi sut chu tu dang ni lovin u Thanthan a ni a, a thin a la rim hmel em em zui.

"Fimkhur ve ta che" a rawn la ti zawk za mah a, khawlai a ni bawk sia a ṭawng zawi lo bawk nen ka zak ru khawp. 

"A ngai lo, i kalna turah kal thuai zawk rawh" min puih tum a lo ṭhut hniam rualin ka lo ti chang fak a, mahse ani ang em emin ka ṭawng ring lo.

"Hehe! Ka pui ma lêk ang che" ti hmakin a tho tharh a, ka damdawi thlauh ho chu chhar zung zungin kei pawh ka ding leh thuai bawk. Hmanni lawkah kan inhmu eng emaw hle kha a ni a, chuvang chuan a hmel hmuh leh pawh chu ka châk hlawl lo. 

In ka thlen chuan ka pangngai leh vek tawh a, u Thanthani reng ka rilruah a awm tawh lo. Rai puar lian tak ka la ni lo bawk nen ka che nghal zung zung a, ka tleirawl aṭanga in chhung chet vel ti ṭhang ka ni bawk a, in chhung sekrek khawih chu hrehawm ka ti lo hrim hrim. Mi sawi ka hriat dan chuan tun lai mo ṭhenkhat chuan in chhung sekrek khawih an ning ṭhin a, hna te neiin an inla vei a, mahse kei chu chuti ang mo nih chu ka duh teuh lo.

Khawvel changkannain min chiahpiah na meuh mai, chumi avang chuan kan Gender role kan thlahthlam tur tihna a niin ka hre lo. An sawi tam tak chu a dik ang ka ring, hna neiin officer pawh ni mah ila hmeichhia kan nih miau avangin kan tihtur a danglam phah lo. Mo kan nih chuan in chhung vawn fai kan thiamin kan pasal chhungte tan kan nelawm tur a ni a, hna kan lo nei a nih paw'n kan hah zual a ngai a ni mai. 

Hna kan neih chuan hah kan inhuam tur a ni a, hna kan neih chhan ṭha tak a awm bawk tur a ni. Pasal ṭhenkhat hi chu hna nei lo te an ni hlawm a, thil hi an ngaihtuah thui lo ṭhin ka ti, chhungkaw chawmna tur tal eizawnna neih dan dap se ka lo ti thei khawp. Kei erawh hmeichhe dangte ang lo takin ka vannei a, ka pasal chu a rintlak mai bakah ka pasal chhungte an fel em em a, ka pasal chuan hna ka thawh a phal lo leh ta zel a, ka rai vang pawh a ni thei tho, mahse rai lo ta pawh ni ila u Billy-a chuan hna ka thawh a phal kher ka ring lo.

"Engi, zanin chu thingpui min siam suh aw, ka'n hmu hma teh ang. Ka chau riau mai, mut hahdam ka mamawh tlat" pa Thangtea chuan a rawn ti a, a thingpui tur ka chhuan lai tak a ni bawk. 

"Âw, i sawi hma ve deuh lo a ni. Hei a chhuang mek asin, kei pawh ka lo mu thuai ang" nu Nguri chuan a lo ti a, ṭawng ka tum zet naa room chhunga ka pa a luh hman tawh avangin ka ngawi leh ta zawk.

"Rai lian vak chi i ni dawn lo emaw ni le, a lang tê riauvin ka hria" thil ziak fel paha nu Nguri bawkin a rawn tih leh chuan

"A ni ang, kei pawh hian a lian mawh ka ti, mahse thla 3 vel chauh a la ni hrim hrim a" ka lo ti ve mai a, a thil tih laiah a insawrbing bawk a, min be leh tawh chuang lo.

"Ka nu, ka chho mai dawn asin" ka tih chuan chho turin min ti a, tih tur ka nei vak lo bawk nen u Billy-a bula chhoh chu ka duh a ni.

Kan nupa room ka luh chuan ka rin ang ngeiin lehkhabu nen ka pasal chu a lo inchhawp hnawk rup a, lehkha chhiar a peih dan em em hi a mak zawk. Inchhiar zau na nâ na chu thil pawh a hre zau reng a, lehkha chhiar tam a ṭha tih chu hre ve tho mah ila ka peih hlawl lo, lehkha chhiarah hi chuan ka tla ve chiang a ni. Ka lut thawm hre mah se min en miah lo va, a chhiar tui hle pawh a ni ang. A mal chungah chuan ka ṭhu tharh a, chuti anga awm chu ka châk tlat a nih chu!

"Awi, ka van ngai reuh" ka ti chhuak tawl a, ka thil hmuh chu a ngaihawm ve reuh em alawm, M.A kan kal lai ka hre chhuak ûar uar mai.

"Eng chu maw i ngaih reuh chu ni a?" min en chuang hlei lo va, a lehkhabu rawng zawng zawng chu kan zirlai ang chiah chiah kha a la ni.

"I lehkhabu chhiar lai mek hi maw le, Feminist Approach tih vel min zirtir lai kha ka ngai alawm" nui chunga ka tih chuan a lo nui ve mai a, a chhan pawh ka hriat lovin lehkhabu chu a khup ta thak.

"Khumah awm daih ang" tiin min pawm phei a, a mal chungah ṭhu vel lo ila chuan a la chhiar ngei ngei ang, chuvang chuan ka thiam lo deuh.

"Va chhiar tho la, ka lo tibuai tawh lo vang che" khuma kan mut hnu chuan ka ti a, ani erawh thawh a tum tawh loh hmel khawp.

"Ka chhiar duh lai ka chhiar zo tawh, naktukah MZU ai awhin TV-ah ka lang dawn a, mi dang pawh an lang ve tho ang"

"A nih chû, nang chu buai hi i inhmeh bik ê. Professor in nih hian engtin nge in awm? Ph.d in tih lai vela in buai ang khan in buai tawh loh ka ring ve ngawt a, in buai hmel daih zawk" 

"Ph.d ka tih lai aiin ka buai daih zawk, Professor nih hi a lo namai lo hle a ni" ti supin min fawp zeuh a, titi chu a nuam dawn riauin ka hria.

"Ph.d hi ti ve ta ila ka Proposal ziah te min endik sak vel ang a, ṭha dawn lutuk. Apply leh theih veleh ka ti ve chhin ang, ka tling chiang sa" nui chunga ka tih chuan

"A teuh lo mai, ka phal teuh lo. Lo apply pawh ni la ka titla nghal ang che, buai natzia i hre lo mai mai a nih kha!" a rawn ti nghal a, ka fiamthu tih a hrethiam miah lo emaw ni le. 

"Awi, ka ngaihtuah chian pôh leh ka phur tawlh tawlh mai. Proposal pawh min ziah sak vek ang a, Research zawng zawng pawh i kutah ka nghat vek thei ang a, i va ṭangkai dawn tak" 

"Rameng le! Zawt zawt reuh che chuan, i hriat tur chu ka phal lo tih hi a ni" nui ri hak chunga a tih chuan ka ngawi hmak a, ka titau der dawn chiang khawp mai.

"Hna neih ka duh ve alawm" ti hmakin ka hnung chhawn a, min kuai her let chiang teh e.

"Hna i nei alawm, khawvela hna ropui ber i nei tawh sa reng alawm, hmeichhiate hian pawisaa lei theih loh khawpa hna ropui in nei bik asin" a thu sawi awmzia chu a mual bovin ka bo.

"Eng i sawi tumna nge?" ka ti hâw a, duat zetin ka biang chu a chul a, hahdam hmel zetin min nuih suk bawk.

"Hmangaih taka pasal leh fanau enkawl hi in hna ropui ber chu a ni" tawi fel ât hian a ti a, ka ngaihtuah nawn paw'n a thu sawi bak baka dik chu ka hre lo.

"Eng lo, min hmangaih em?" ka ti leh ringawt a, kan inneih ni tih lovah kha chuan kan kâ aṭang hmangaihna thu a chhuak khât ve em bawk a ni. 

"I va â chhichhe reuh tak, hmangaih lo che ila nupuiah ka nei dawn che em ni le" nui ruh ruh hian a rawn a ti a, a thu sawi chuan mi ti hlim kher mai.

"I fa hi pai lo ta ila nupuiah min nei tho ang em?" ti lehin a âwmah chuan ka bei a, chuti ang zawhna hlir chu ka rilruah a awm tlat, a chhan pawh ka hre bik lo.

"Nei lo vang" a tih chuan rang zetin a lam ka hawi chho a, ka hlauhthawn tehreng nen ani chu a lo nui var var daih.

"Ka fiamthu a nih khâ, i va hlauhthawn hmel tik tek ve le. Ka fa pai lo ta pawh ni la kan inngaizawng reng ang a, kan inneih thuai tho ang" a tih leh chuan a âwmah bawk ka bei leh thân a, ani'n ka sam chu a lo chul hliau hliau thung.

"Eng lo" tiin ka ngawi deuh vang vang a, u Thanthani thu sawi ka hriat chhuah chu zawh ka tum rilru kha a ni a, mahse hun kal tawh chuan min tibuai lo se ka duh hnuhnawh leh zawk, chu bakah u Thanthani khan dawt bak a sawi ka ring lo.

"Eng nge eng lo?" a rawn tih chuan sawi tur dang chu ka dap nghal zung zung a, sawi tur lah chu ka hre lawk lo leh nghal.

"Kan inhmangaih tho sia kan sawi khât dun ê, kei chu i sawi ngai loh avangin ka ngawi mai chauh a ni a, nang erawh a chhan ka hre lo" a rilru la peng tur thu dang ka sawi thei hlauh chu a lawmawm.

"Sawi i duh chuan ka sawi ziah tawh ang, ka hmangaih che Rameng" ka chalah a fawp vang vang a, kei paw'n nghet taka kuah chungin

"Ka hmangaih ve tho che" ka lo ti ve nghal a, ka rilruah thil dang a awm leh tawh lo, hlimna leh lungawina tih chauh lo chu!

Chapter 7

Harsatna em em awm lovin October thla kan chuangkai a, ka naute pai mek paw'n thla 4-na a hmang ve ta. A lo chhuah hma aṭang ringawt pawh u Billy-a chuan a duat nghal em em a, ka pum puar lian lo ve tak chu mi nung ang maiin a be mawlh mawlh zel. Ka naute chu thla 4 lai ni ve tawh mah se chet ka harsat lo khawp a, insuk leh engkim chu ka la ti thei vek a, u Billy-a erawh chuan indim ṭan turin min hrilh thung. 

Ni e, indim chhoh ve te pawh a ngai ang, naute hrisel tak hrin chhuah ka duh chuan ka taksa pawh enkawl ṭhat a ngai ve bawk a ni. U Billy-a chuan min rawn hmasa miah lo hian chaw ei laiin awmpui lak a rawt thut a, ka va han inthlahrung mai mai tak. Nupa kan nih avangin engkim sawi dun turah min ngai ngei awm si a, ani lah chuan awmpui lak chungchang engmah min sawi pui hauh si lo.

"A ngai lo, awmpui lak a ngai lo. Keimah chauh pawh hian in chhung hi chu ka enkawl zo alawm, ka nau pai pawh a lian hleinem" mi dang ṭawng hma chuan ka ti vat a, dawhkan hnuaia u Billy-a mal chu ka sik vak bawk.

"A ngai lo tak tak maw?" nu Nguri chuan a rawn ti a, fel ta reng reng kha a ni a, min ngaihtuah hmel nghal khawp mai.

"Aw ngai lo ka nu, in chhung tihfel leh ei rawng bawl vel hi harsa tihna ka nei lo" ka lo ti ve leh mai a, u Billy-a lakah chuan ka lungawi lo ru hle a ni.

"Sawi hreh lo la, i duh phawt chuan awmpui chu kan la dawn nia" dam zeta pa Thangtea'n a rawn ti ve leh chuan ka lo bu nghat a, ka chunga an fel lutuk chu ka tan a nuam lo letling zawk.

Ei inna vel ka tihfel hnu chuan hmanhmawh ru takin kan nupa room-ah ka chho a, u Billy-a chu biak a ngai a ni. Room ka luh chuan hna kal turin a lo insiam melh melh a, tuk dang chu ni se a incheina chuan ka mit a la leh ngei ang, mahse tukin erawh chaw ei laia a thil sawi avangin ka rilru a dang daih thung. Hna kal turin a insiam zo thawkhat chu a ni mai a, kal mai lovin a phone chu a la bih deuh ngur a, kal tum pawh ni se ka kal tir rih dawn lo.

"Engati nge chaw ei lai khan khati ang thu kha i rawn sawi chhuah? Ka tana a nawm loh dan tur te ngaihtuah ve la, ka nute khan min hmu dik lo vek dawn asin" ka tih chuan a lo nui mai a, fiamthu ka thawh hauh si lo.

"Nangmah ka ngaihtuah che alawm, rai lai chuan chet tam loh a him zawk Rameng. Hahdam takin lo awm mai mai la, chu bakah i khua a har lutuk ka hlau maw le"

"Min ngaihtuah tih chu ka hria alawm, mahse awmpui lak lam kha chu sawi tawh miah suh. Ka rai len viau hunah i duh chuan i sawi chauh zawk dawn nia, tunah chuan a la hun lo em mai"

"Thu i duh ṭan riau mai" kiai suka tiin a lama min pawh a rual nghal a, ka dul zawnah chuan a hna kal dawn apianga a tih ṭhin danin a ṭhu hniam zawm zat bawk.

"Anu hi lo tihbuai loh tur aw, anu hi a thinchhe ṭan dawn tlatin ka hria, thu pawh a duh ṭan tawh hle a ni" a tih chuan ka lo nui hak a, a lakah chuan ka lungawi lo leh tawh miah lo.

"Class i neih loh veleh min lo bia ang che" ka tih chuan a rawn ding a, min fawh leh vawng vawng hnuah a chhuak ve ta chauh.

Mahni chauha awm hi chuan ka naute chu biak mawlh mawlh te ka ching a, hring chhuak thuai thuai ila duat taka awm ka châk tawh a ni. Mipa nge hmeichhia a nih dawn pawh ka la hre lo, mahse mipa chu ni se ka duh khawp mai. Naute tana ṭha tur engkim ka ei a, Calcium leh damdawi dang pawh ka ei ṭha viau a, ka taksa hriselna chu ka ngai pawimawh thiam ve ṭan tawh lutuk, chu pawh u Billy-a min hrilh leh vek a ni a, ani ang mipa rintlak leh min hmangaihtu pasala ka nei hi ka vannei tak zet.

Noodles leh Waiwai tih vel pawh a hma ang em emin ka ei tam lutuk tawh lo, ka ei châk tawh miah lo zawk a ni. Ka damdawi neih te chu chawi ei kham apiangin ka ei ziah a, mahse ka thil ei châkna a bo tial tial tih erawh ka hre chiang em em. Ka thil ei châkna a bo chhan chu ka hre bik lo, doctor pawh ka la rawn chuang lo va, eng tik niah emaw chuan rawn a ngai a ni. Ka chaw ei thlengin a tui mawh ṭan hle a, khawrh khat te chu ka ei zo ṭawk zel.

Ka pasal leh a chhungte erawh kei ang lo takin an pangngai vek a, kei chuan dik loh dan riau ka nei chiang alawm, ka tui hal huam huam ṭhin te chu ka hrethiam tawh bik lo. Chuti anga ka awmna chu a la rei lo, kar khat vel bak a la ni lo vang. U Billy-a pawh ka la hrilh duh tingtang lo va, chu bakah a buai ve mawp mawp lutuk a, biak buai ka inthlahrung ru deuh hrim hrim.

Zan kan mut hnua han thawh leh te ka nei ta nual a, ka tui a hal em em ṭhin a, mahse rei lovah ka zun a rawn chhuak leh ṭhin bawk si, mutmu ka tuah ṭha lo a ni ber. Ka pasal erawh a muttui theih em avangin ka tho tih pawh a hre ngai lo, ka awm dan dik lo chu ka hrilh ang ka tih apiangin ka hrilh dawn veleh ka theihnghilh leh ziah lawi a, ka dik lo hle tawh tih chu hai theih a ni tawh lo.

"U Billy lo haw lawk mai teh a, damdawi inah min kal pui la a ṭha ang" phone a pick up rual chuan ka ti a, damdawi in ka sawi vang nge ni a ngawi ta vung vung.

"I tlu sual em ni? I pum a na em ni?" ṭawng ka tum lai tak hian a rawn ti a, thawm ri set set aṭang chuan a Office Bag a ak a nih ka ring.

"Eng lo...ka dik lo, hrilh ka tum ṭhin che a, ka theihnghilh leh daih zel. Lo haw la, ka awm dan engkim ka hrilh ang che" ka ti leh chuan mi pawh chhang lovin phone chu a off hmak a, a lo haw dawn tih chu hrilh leh chuan ka ngai lo.

Rilru tawt ru tak mah se nghakhlel ru tak chung siin u Billy-a in lo thlen hun chu ka lo ngaichang a, engmah ka la chet fel loh avangin in chhung chu ka hmu hnawk hle bawk. Chaw ei kham aṭang ka awm a nuam lo zual a, mahse taksa na lam a ni lo, ka rilru lam zawk a nuam lo a ni. Thleng tak ngial pawh ka la sil peih lo va, ka pum ṭhang lian mawh em em te chuan ka ngaih an tiṭha lo kual vel vek tawh.

Bathroom-a ka luh dawn lai tak chuan ka kap aṭang thi a rawn put ta mai, thi ka nei thut chu thil mak a nih rualin thil ṭha lo tak a ni. Ni lo, a ni thei lo. Kei hian nau ka chhiat zawk em ni? Rai lai chuan thi an nei ngai lo a ni lo'm ni? Ka kap aṭang chuan thi a put miau bawk si, ka rilru a va han mangang tak em. Tuiin ka kap chu ka silfai thuai thuai a, ka rilru chu chawmawlhin hlauhthawnna hlirin a khat tawh a, nau chhiat lo hram ila ka ti a ni. 

"U Billy" in chhunga a lo pen luh rualin a lamah ka kal phei nghal a, ani paw'n min ngaihtuah hmel hle bawk.

"I eng nge dik lo? I dam ṭhat hmel viau si a, han sawi teh Rameng"

"Ka dik lo tak zet u Billy, thi ka nei. Rai lai chuan thi neih loh tur a ni a, ka awm dan hi ka hrethiam tawh bik lo. Ka thil ei châkna leh ei tuina a kâm tial tial a, ka tui a hal huam huam ṭhin bawk. Hmanhmawh ang, damdawi inah kal vat ang" 

"Eng nge i sawi awmzia? Eng vangin nge i thil ei a tui tawh loh? Engati nge i tui chu a hal ṭhin? Min hrilh chiang teh, i awm dan hi ka duh dan a ni lo tawp mai"

"Ka hre tawh bik lo u Billy, engmah hi ka hrethiam bik lo. Doctor bulah kal vat zawk teh ang, kan doctor rawn ṭhin kha va rawn mai ang" ka tih chuan ka banah min kai a, ngawi rengin min chhuahpui zui nghal bawk.

Damdawi in kan thlen chuan kan doctor rawn tur ber awmna room lam kan pan nghal a, ka hlauhthawn ang thil chu thleng lo hram se ka ti. Ka pum ka ngaihtuahin a puar lian mawh ka ti bawk si, thla khat emaw thla hnih emaw vel leka upa ni mai awmin a puar a, chu tak te chuan ka hlauhthawnna a tibelhchhah a ni. Mite chu thla thumah chuan an lang pangngai tawh viau a, kei erawh thla 4-ah pawh a la lang thei tak tak lo.

"Thi chu i nei maw? A va mak ngai dawn ve le, rai laia thi neih chu a ṭha lo asin" doctor-in a tih laiin u Billy-a chuan

"Eng thil chiah nge in sawi hi ka hre ve thiam lo, min hrilhfiah thuai teh u" a lo ti ram deuh hmuk a, a aw aṭang chuan a hlauthawng hle tih ka hre thei.

"Hmeichhiate hian an rai laia thi an neih chuan naute an chhiat emaw an taksa chhungah thil dik lo a awm tihna a ni mai" doctor-a chuan a ti a, u Billy-a chu a ngawi chiang ta hle.

"I ei tura damdawi ka chawhho che kha in lo keng em?" doctor-in a tih chuan kan ken loh thuin ka lo chhang a, kan hmanhmawh em avangin ken nachang pawh kan hre lo a ni.

"I pasal hian damdawi chu va la lawk se, keini'n i pum chhunga naute awm hi lo check hrim hrim ang aw, thil ei sual i neih vangte pawh a ni maithei" doctor-in a rawn ti leh chuan u Billy-a chu room aṭang a chhuak nghal a, a che reng reng chu a muagchang lo khawp mai.

Doctor chuan a room chhungah khawl thil eng eng emaw a fit kual a, khuma min mut tir hnu chuan ka pum chu a endik zui nghal a, mahse a hmel inthlak danglam zawk chuan ka awm a tinuam zual sauh. Khawl chu a off a, a on ṭha leh ngat a, a chet ang ang chuan ka lo thlir tawp a, min en zeuh zeuh tih loh chu khawl bak a en lo. Engmah lah chu ka hrethiam ve der bawk si lo, rilru chu a nuam lo duh khawp mai.

"A tawk e" hriat nuam zetin ti mah se doctor hmelah chuan thil dik lo a awm tih ka chiang, ka naute chungah eng emaw tak thil ṭha lo thleng a awm a ni.

"Doctor, eng nge result? Eng nge ka dinhmun?" ka tih chuan

"A pawi ka ti khawp mai, nau i chhiat a ni. I pum chhunga naute hi kar 1 chhung vel chu a thi tawh ngei ang, damdawi dang ei i nei em ni? Nge i tlu sual palh zawk" a rawn ti ta mai, ka mit sulhin ka hria.

"Maw? Enga!? Kei hian nau ka chhiat maw!? Ka chhiat thei lo, engmah chet sualna pawh ka nei lo asin, i hre sual a ni ang Doctor" ka ti mawlh mawlh a, ka naute chu chhiat ka duh reng reng lo.

"Hriat sual chu ka duh khawp mai, mahse i chhiat miau si a ni. I chet sual si loh chuan i damdawi ei a rinhlelhawm ber, ka damdawi chawh che tih loh damdawi dang ei i nei em?"

"Nei lo, i sawiho chiah kha chaw ei khamah ka ei ziah, dawt ka sawi lo doctor" ka tih chuan thaw deuh hawkin

"I pasalin damdawi a lo keng ang a, kan endik hrim hrim dawn nia" a rawn ti a, a rilru chu a hah ve hmel hle bawk.

U Billy-a lo thlen lai te chuan ka rilru a buai zual a, mahse ka ṭah a chhuak hauh lo thung. Hamhaihna leh mak tihna chuan min luah khat vek a, doctor-in damdawi a en dik laite chuan ka ngawi kar a, u Billy-a min biakna pawh chu engmah ka chhang lo. Ka chhang thei lo va, ka chhang peih lo bawk. Kei ang bawkin doctor chuan u Billy-a biakna chu a chhang bik lo va, ka ngaihtuah let ngial paw'n naute ka chhiat theih dan kawng chu ka hre hlawl lo a ni.

"A dik vek bawk si a" doctor chuan a ti sup a, damdawi bur chhin hawnga a bun chhuah diat diat laiin u Billy-a chuan

"Nangni pahnih hian min chhang teh u, eng thil nge thleng?" a rawn ti deuh hmuk a, nau ka chhiat thu chu hre ve ta se engtin tak awm ang maw!?

"Hemi damdawi hi khawia i lei nge? A bur hi chu a dik ngei a, a chhunga mi erawh naute tana ṭha lo tak damdawi a ni thung" doctor chuan a rawn ti a, ka buai ta nak mai le.

"Ka damdawi lei zawng zawng hi hmun khata mi vek a ni alawm, Pharmacy dawr pakhata mi a ni e" aw pangngai lo zeta ka tih chuan

"I kal ang u, chutah chuan kan kal nghal a ngai. A zuartu pawh chu naute thah theihna damdawi a zawrh avangin a case a hniam lo vang" a lo ti leh fak a, rilru thlamuanna reng ka nei tawh lo.

"I nupui hian naute a chhiat, damdawi dik lo a ei avangin naute a chhiat a ni" u Billy-a lam hawiin a ti leh a, chuta u Billy-a hmel chu ka en rei ngam thlawt lo, a hamhaih lutuk chu ka khawngaih a ni.

Pharmacy dawr lam kan pan laite chuan kan ṭawng lo ve ve a, u Billy-a hmelah chuan lungawi lohna tam tak ka hmu thei, a lungawi loh chhan chu ka naute chhiat vang a ni tih ka hre chiang ropui mai bawk si. Dawr kan thlen chuan kan ṭawng ngai lovin doctor chu a ṭawng nghal char char a, dawr neitu nu lah chu a lo âng thei pap pap hle bawk. Ka damdawi bur lei ang chiah damdawi bur dang chu a endik tir vel a, amah lo chu rinhlelh tur kan nei bawk si lo.

"In mi puhna avang hian ka lawm lo khawp mai, nang nu pawh kha a hma zawngin damdawi ṭha lo ka pe ngai lo che tih i hre vek a ni lo'm ni?" min kawk chungin a ti hlak hlak a, chutah kawng kal velin min la en ṭhup zui.

"Khati angin ka nupui hi ṭawngkhum hlek suh, i damdawi pek dik loh vang a nih hi nau a chhiat, i zak miah lo em ni?" u Billy-a chuan a lo ti vin ṭhawt a, ṭawng vin lo turin ka khap nghal ta thuai.

"I nupui naute chhiat chungchangah chuan inrawlh ka nei hlek lo ve, min mawhpuh tum ringawt hlawm suh u, ka dawr aṭang hian chhuak thuai zawk rawh u"

"Ni e, i kal phawt teh ang u" doctor chuan a lo ti a, a motor hunna lama a phei chuan zui kan rual nghal a, thil thleng hriatthiam har zet chuan min tichau ru ngawih ngawih. 

"A mak kher mai, an damdawi zawrh kha chu a dik ve bawk si a, nangma'n damdawi i thlak ti dawn ila i thlak loh hmel bawk si" doctor-in a tih chuan u Billy-a'n min lo en nghal vat a, chutah doctor vek chuan

"Ka thu sawi avang khan inhmu thiam lo suh u, in vanduai palhah ngai tawp mai rawh u. Chhui erawh chhui ula chu ka duh khawp mai, ka kal phawt mai ang, a pawi ka tihpui khawp mai che u" a rawn ti leh nghal zat a, a motor chhungah lutin a tlan chhuak zui nghal bawk.

Kan in lama kan tlan lai chuan a hma ang bawkin kan ngawi ve ve leh a, biak chu duh viau mah ila u Billy-a chu ka be ngam thlawt lo. Naute ka chhiat chhan chu ka thiam loh a ni tih ka hria, ka damdawi ei tur te kha lo en chiang ila chuan ka chhiat miah lo ang maw le. In chhung kan luh rualin kan nupa room lamah a chho nghal a, biak khat pawhin min la be lo hrim hrim. 

Kan nupa room-a ka luh chuan chiang zet hian min en a, a hmel aṭang chuan a thinrim hle tih ka hria, thinrim pawh ni se a awm hliah hliah, engkim chu ka thiam loh vek a ni. Doctor khan chhui tur te khan min ti vel a, mahse kei chuan chhui dan tur tak ngial pawh ka hre lo, ka hre lo tak zet a ni. U Billy-a hmel lah a rum ṭha bawk si, en pawh en rei duh lovin ka hawi sawn ta tawp.

"Ka fa pai hi i châk hlawl lo em ni Rameng?" a zawhna min zawh avang chuan ka khawng deuh awt a, chuti ang chu min zawt ang tih rin ngaihna pawh ka hre lo.

"Ni lo, a teuh lo mai. I fa ka pai avanga ka hlimzia te kha i theihnghilh ta em ni? Engati nge huat hmel zet khan min en?" ka tih chuan

"A chhan chuan nangmah hian kan fa chu i that si alawm, thah duh lo la chuan naute tana ṭha lo damdawi i ei miah nâng" a ṭawng tawp lamah chuan a khi deuh sak a, a awm dan vel chu u Billy-a a ang lo tak zet a ni.

"Ka hre bik hauh lo, nau chhiatna damdawi ka ei tih ka hre bik lo hrim hrim, min mawhpuh nghal ringawt lo teh u Billy, nuam ka ti lo teh mai a nia" 

"Inbe rih lo zawk teh ang, ka chhuak lawk dawn" tiin min kal pel a, room a chhuahsan chiah chu khumah ka ṭhu hnawk a, ka rilru chu a na ngawih ngawih.

Ka mitthlaah ka naute hmel tur vel chu a lo lang a, ka ṭap chhuak ta hawk. Ka insum thei tawh lo, damdawi ina kan awm lai aṭang daih tawh khan ka ṭah a chhuak a, ka insum mai chauh a ni. Tunah erawh kan nupa room-ah ngei ka awm a, u Billy-a min ṭawngkhum dan te chuan ka rilru a tina hle bawk. Ka ṭap rei hran lo va, ka laka u Billy-a chet dan te pawh chu ka thiam loh hran lo, a bul ber chu ka tlaw vang a ni, ka tlaw vang vek!

In hnuai lamah chhukin thleng ka la sil loh te chu ka sil a, rilru dang put tum mah ila ka thei thlawt lo. Ka ṭah erawh a chhuak em em tawh lo, mahse ka rilru chu lungngaihna hlirin a luahkhat thung. Ka thlamuanna leh min hnem ṭhintu ber u Billy-a lah chu a chhuak vang vang bawk si, ka mal ngawih ngawih a ni. Dar 3 velah u Pektei a lo haw a, a room-ah chho tlangin a lo chhuk leh a, tlai dang ang bawkin a ṭawng tam lo leh hle.

"I ṭap em ni?" sawhthing rawt tur vel mawlh mawlh pah hian a rawn ti a, ka hmelah chuan ka ṭap tih a hriat viau pawh a ni maithei a ni.

"Ka u nen in inhau em ni?" ka chhan loh avangin a rawn ti leh a, eng tak hria ni maw! Ni dangah min biak hmasak khât theih tehreng nen, vawiin tlai taka min be hmasâ min be hmasa chu a mak ve deuh.

"Eng lo, naute ka chhiat a, chuvang chuan rei lotê ka ṭap alawm maw le" zep nei lova ka tih chuan

"Enga!? Naute i chhiat maw!?" a rawn ti hluai a, hlim hmel pu lui hram hramin nuih mah ila ka nuih chu a za hauh lo.

"Aw, a pawi tak tak a ni" ka lo ti ve mai a, ani chuan a thil tih lai a chawl chuang lo va, mahse mak chu a ti ve deuh tho a nih hmel.

"Ka u in a hre tawh em?" a tih leh chuan a hriat tawh thu ka lo sawi a, chu bak engmah kan sawi zui leh tawh lo. 

Zanriah kan ei laiin nau ka chhiat thu chu ka sawi chhuak a, nu Nguri phei chuan min khawngaih hmel khawp mai. Kei erawh ka intihlim chawp hram hram a, fa dang neih leh thuai thuai chu ka duh a ni. Ka nau chhiat chhan min zawh chuan a nihna ang angin ka sawi a, ka bula ṭhu u Billy-a chuan min lo ei loh hmel khawp. A hmate kha chuan eng pawh sawi ila min thlawp em em zel kha a ni a, tunah erawh min biak châkna a nei hlawl lo a ni. 

Khumah chuan kan mu dun ngei a, mahse vawi khat mah kan inbe lo. A lo mu har khawp mai, khum a rawn chuankai meuh chuan zan dar 12 a pel titih tawh zawk a, kei lah chuan a taksa ngheng lova muthilh ka hreh bawk si, ni khat thil thuah kan nupa inkar chu a zau nghal dâwrh a ni ber. U Billy-a chuan thiam lohna engmah a neih ka hre lo, thiam lo leh fimkhur lo chu keimah zawk ka ni, hun liam tawhah let leh thei ila chuan damdawi pakhat mah ka ei hauh lo vang.

Ka rai tirh khan damdawi ei em em a ngaih loh thu doctor chuan  min hrilh ngei a, mahse hrisel taka naute hrin chhuah ka duh luatah damdawi ka inchawh tir ta ṭeuh a, lo inchawh tir lo tawp zawk ila ṭha tur, hma huna thil thleng tur hi kan lo va hre lawk lo tak em. Ka naute chhiat chungchang chuan kan nupa inkar a pawt zau nghal vek leh ta nghal a, engkim chu siam ṭhat leh theih se ka ti a ni. 

U Billy-a hmel chu ka en chho dê de a, a muhil tawh a ni ngei ang a mit a lo chhing a, mahse a thawk dan aṭang chuan muhil a ang ka ti chuang lo. Tim daiin a ban chu ka chawi kang a, hnung chhawnin a âwm chu ka ngheng a, a ban chu ka inkuah tir zui nghal bawk. Zan dang chu ni se chuti ang chuan a awm mai mai lo vang, ka chet ngai lovin amah zawk chuan min kuah ngei ang le!

Chumi ni aṭang chuan ka thi ka nei chhunzawm nghal a, Pad pawh ka hreng leh ta tawp. La rei lo mah se ka rai ve lai te chu ka ngai em em a, hrisel taka naute hrin chhuah ka duh ve na te chu engmah lo mai a ni ta. Ka naute chhiat chungchang chu ka zawi zawiin ka pawm thiam ve mai a, mahse ka laka u Billy-a awm dan erawh hriatthiam a har tulh tulh thung. 

A ṭul tawp khawk lovah chuan min be ngai lo va, khum khatah mu dun mah ila a hma angin inpawh taka inbiak kan nei tawh ngai lo thung. Nau chhiat vanga rilru nat tawh sa nen u Billy-a awm dan chuan ka rilru a tina zual, mahse hmeichhe nep tak anga ṭah ka tum lo, ka chunga thil thleng chu Pathian remruatna ang zawnga pawm hram hram ka tum zawk ṭhin. 

Ka chhungte lam paw'n naute ka chhiat thu chu an hre ve thuai a, u Billy-a nu leh pate'n hrilh lo se chuan an hre kher lo vang. Kei phei chuan hrilh enah pawh ka en lo, an hriat hriatin hria se ka lo ti ve mai a, mahse pa Thangtea chuan a lo phal lo nasa khawp. Ka chhungte an ni a, ka chhiat leh ṭhat lam an hriat ve a ngaih thu min hrilh let ta hrep zawk a, pa Thangtea chu ka zah thar phah hle bawk.

U Billy-a awm dan chu tu paw'n kan hai lo, naute chu a ui ve tak zet tih pawh kan hria, nu Nguri phei chuan zawldawh taka be hram hram turin min ti nghe nghe. Zawldawh taka biak zawk tur chu nau chhiattu keimah ka ni a, mahse kei aiin ka pasal chuan ka naute chhiat chu a tuar na a nih hmel. Ni e, ka chhel leh zual a ngai a ni mai. 

Naute ka chhiat aṭanga thla khat a liam hnuah pawh u Billy-a nena kan nupa inkar chu hma a sawn mawh khawp a, a danglam ta lutuk chuan min tibeidawng lek lek ṭhin, mahse beidawn ka duh bawk si lo. Dik tak chuan naute chhiattu chu keimah ka ni a, duat taka enkawl ka mamawh fê zawk, mahse min duat tura ka duh ber lah chuan min pehhel zel bawk si. 

Kan nupa room-a ka awmin ani a chhuak a, ka awm lovin ani a awm leh a, chuti ang vel chuan kan inhel zak zak ṭhin. Zanriah leh tukṭhuan kan ei lai paw'n a ṭawng mang ngai tawh lo va, nu Nguri chuan insiam ṭha turin a hrilh mawlh mawlh zel. Ka tana a nawm loh dan tur te chu a sawi a, min vengthawng em em ṭhin mahse ka mamawh ber u Billy-a'n min hnaih duh loh tâk tlat avang chuan nuam ka ti tak tak thei lo a ni.

"Naute vang chiah hian min lo nei tak tak emaw ni le" ti roh rôh changte chu ka nei rum rum a, mahse chuti ang a nih ka ring phal bawk si lo.

"Inṭhen a duh a ni ang" ti dawn ila inṭhen a duh thu a sawi ngai bawk si lo, chu bakah inṭhen tur em chuan kan la innei rei lo lutuk tlat.

Thla 5 vel âwrh chauh nupa kan la ni a, inṭhen chu a zahthlak letling zawk a ni. U Billy-a chuan zana chhuah a ching sawt hle bawk a, mahse nau ka chhiat tirh ang em em kha chuan min huat hmel tawh lo, ka biak paw'n a rul tawk chiaha mi chhan a ngah ve ta mai. Ngaihzawng a neih ka ring ngai lo va, nei duh tur khawpa mawl a ni lo bawk. Ka nun chu hahthlak ka ti ru ṭhin ta hle a, ka pasal nu leh pate'n rilru tihthawvenna tur lam min sawipui ṭhin lo phei se chu ṭah hawm hawm ka ngah ngawt ang ka ring. 

In hnuai lama ṭawng ri lawng lawng thawm avang chuan ka harh deuh zawk a, banga sana intar ka en chuan dar 3 a lo pel vel chiah. Mut zal mai mai tum kha ka ni a, mahse ka tum aiin ka lo mu rei a nih dawn hi! Room aṭanga ka chhuah chuan hmeichhe pahnih ṭawng thawm chu ka hre chiang ta hle a, nu Nguri leh u Pektei an nih ka ring mai a, mahse pakhat zawk aw chu nu Nguri aw ni theiin ka hre lo.

"Hehe! Inhmuh pawh a khat alawm le, mahse min hmuh i inbeisei loh ang bawkin kei pawh hian ka hmu peih lo che tih i hre dawn nia" titu chu u Thanthani ngei a ni. 

"I zak lo ve ngawt mai, ka keh hrep i duh loh chuan kan in aṭang hian chhuak thuai rawh, ka insum rei peih miah lo a nia" u Pektei leh u Thanthani aw chu a nem lo dun kher mai.

"Nang hmu tur che pawh hian ka lo kal bawk lo, Ramengi hmu turin alawm ka lo kal. Aw le, i sawi vang ni lovin ka kal ang, fahrah mai mai hmu tura ka lo kal hi ka inchhir hle bawk"

"A ṭhat hlauh chu, haw vang vang la, i nau pawh rawn hmuh tum buai duh tawh suh" 

"Ka nau a ni lo, ani ang fahrah mai mai kha ka nau a ni bawk lo, ka nau atan pawh ka duh lo" ti hlawk hlawka kal sawn a tum chu min hmuh avangin a ding chawt a, mak tih hmel zeta min en chung hian 

"Ram..Rameng!!" a rawn ti bah deuh nawk a, a thu sawi zawng zawng kha ka hre vek, fahrah min tih chhan chu hriat chian ka duh ta hle bawk.

"Fahrah ka ni maw!?" chik zeta en chunga ka tih chuan a hmelah chu a pha deuh dui a, mahse a siam ṭha leh thuai.

"Aw ni e, ka tum loh deuhin ka sawi chhuak palh a, ka rin loh deuhin i lo hre palh bawk" inthlahrunna nei miah lova a tih chuan ka nui hak a, ani ang hmeichhia chu ka unaunu an nih theih pawh ka ring lo. 

"Dawt sawi hi i lo thiam ber a nih dawn hi a, u Pektei sawi ang khan haw thuai la, kan inah hian vawi khat mah lo kal tawh suh" ka ti ve ta hmak a, ani ang unaunu neih pawh chu a zahpuiawm lek lek tawh a ni.

"Hehe! Dawt sawi emaw min ti vel a, i duh chuan ka nu leh pa i zawt thei ang. Ka nu leh pate inhauh laia an ṭawng ka hriat fuh tirh chuan ka hlim teh asin, ka unaunu i ni lo hi lawm tak ka ni" ngeiawm zeta nui chung hian a ti a, kan in aṭanga a chhuah lai pawh hre lo khawpin ka rilru a buai ta vek.

"Khaw'nge kal i tum?" u Pektei min biakna chu ka hre lo der hmak a, ka nu leh pate chu ka zawh chian ngei a ngai a ni.

"Kal ang, ka lo hruai ang che" u Pektei chuan rawn ti lehin a Scooty chu a tinung a, ka lo hnial lo nasa khawp mai. 

Thumal khat pawh chhak chhuak lovin Scooty-ah chuan kan chuang dun a, ṭawng châkna pawh ka nei lo va, min bia pawh ni se ka chhang kher lo vang. U Thanthani thu sawi kha a tak tak a ni chiah ang em? Dawt sawi thiam tak hmeichhia a ni tih chu ka hre ngei a, mahse tun ṭuma a thu sawi zet zawng dawt a ang chiah lo, thu dik ni tur erawh chuan ka duh loh bur. 

"Engi" in chhung ka luh rualin ka pa chuan a lo ti a, mak a tih hmel hle bawk.

"Ka nu, lo phei lawk teh, thil sawipui duh che u ka nei" tiin ka nu chokaa ei rawng bawl mek chu ka ko leh a, u Pektei awm ve lo se chuan ka koh a nih vang hrim hrim paw'n a lo phei duh lo ngei ang.

"Fahrah ka ni em ni?" ka pa nen sitting room-a an ṭhut dun hnu chuan ka ti tawl a, ka pa zawk chu rang zet hian a rawn ding chhuak zui nghal.

"A teuh lo lutuk, chuti ang dawt muhlum chu tu nge lo hrilh reng reng che?" ram hmak hian a rawn ti a, chutah kan sir lam aṭangin u Thanthani chuan

"Keima'n ka hrilh ka pa, nangni paw'n thu dik tak hrilh ve mai rawh u. Dawt sawi angin min chhuah tum mah ula ka nu nena in ṭawng dan zawng zawng ka hre vek, chuvangin hrilh tlang law law rawh u" a rawn ti zuah zuah a, ka pa chuan

"LALTHANZUAL, ngawi hmak rawh" a ti vin phiar a, u Thanthani erawh chu zam lo takin a lo nui mai mai thung.

"A pawi zo ta a nih hi! Thu dik tak chu hrilh mai teh, fahrah a nih thu sawi mai rawh" ka nu chuan a rawn ti ta, chutah zet zawng u Thanthani thu sawi te chu dawt a nih ka ringhlel ta lo.

"Lo ngawi rawh nang pawh, lo ṭawng tawh miah suh" ti vin leh tûarhin ka pa chuan ka nu chu a hrawk a, ka lam a lo hawi zawm nghal zat bawk.

"Fahrah maw ka lo nih? Engati nge a hma aṭang daih tawh khan min hrilh loh? Min hrilh la chuan dawnsawn dan ka thiam zawk ngei ang, i kâ aṭang ngei thu dik ka hre duh ka pa" mittui tling pam chuan ka ti a, min ngaihtuah hmel zet hian

"I ni lo, ka fanu alawm i nih, i ni reng bawk ang" a rawn ti a, mahse kei chuan a thu sawi awih lo zetin ka lu ka lo thing nang nang thung.

"Ni lo ka pa, dawt sawi mah ta che. I mit aṭang khan fahrah ka ni tih ka hmu thei alawm, tunah chuan min lo huat rawn em em ṭhin chhan pawh kha ka hrethiam ta e"

"Ni e, fahrah chu i nei ngei alawm, Home aṭanga kan lak che i ni, mahse ka haw lo che tih leh ka fanu dik tak angin ka en che tih i hre dawn nia" ka pa chuan a rawn ti zawi raih a, ka rilru a na tak zet.

"Kei aia u Thanthani in duat bik ṭhin te kha a lo awm lo tawp lo ve, in thisen ka ni ve lo miau a! I fanu ka nih loh vangin ei rawng te min lo bawl tir ṭhin bik ti raw ka nu? A pawi lo, a pawi miah lo, u Thanthani thik tur pawh kha ka lo ni lo hrim hrim zawk a ni" sawi zawm thei tawh lovin ka ṭap chhuak ta nge nge a, ka pa chuan min lo kuah thuai bawk.

Kum eng zat nge ka nih tih te, mi nupui ka ni tawh tih te leh ka awmna hmun theihnghilh ṭhak khawpin ka ṭap hawm hawm a, naute ka chhiat lai letin ka rilru chu a na a ni. Kan chhungkuaa ka hmel a danglam bik thu mi sawi ṭhin te kha mak pawh ka ti tawh lo, anni kha chuan an thisen ka ni ve lo tih an lo hrethiam daih tawh zawk a ni. Ka pa min kuahna aṭang chuan ka tal chhuak a, lungngaih hmel zeta min enna te chuan min ṭah tir leh thei mai dawn.

"Kan kal ang e, tun aṭang chuan nu leh pa nei lo ka ni tih ka lo hre reng tawh dawn nia. Ka nu, ka rawn tibuai tawh ngai dawn si lo che u a, i lawm ngawt ang ti raw? U Thanthan nang pawh, i lawm ngawt ang chû. Zan in aṭang hian in zingah ka leng tawh lo tih ka lo hre reng ang, mang ṭha ule"

"Engi" ka pa min kohna chu ka chhang duh lo, hmun thawveng deuhah awm ila au vak vak ka châk, ka châk lutuk tak zet.

"Pawi ti suh, in inang lo ka tih rukna a rei tawh mai. Anni angin rilru chhia i pu ve lo hlauh zawk a, lawm ngawih ngawih rawh" u Pektei chuan a rawn ti a, ka pa aw pawh kan hre pha tawh lo.

Kan in kan thlen chuan ei rawng pawh bawl peih lovin room-ah ka chho nghal a, vawiin tlai tal chu min lo awl mai teh se. Bathroom-ah lutin ka ṭap chhuak zui nghal hawk hawk a, u Billy-a a lo la haw lo bawk nen ṭah chu ka insum buai duh tawh lo a ni. A hma kha chuan ka laka u Billy-a awm dan avangin kan ina haw zawk te kha ka ngaihtuah vel a, mahse hawna tur reng kei hian ka nei lo. A chhan chu fahrah mai ka ni, ka chan hi a va chhe tehreng em. Kan room kawngka inhawng thawmah chuan ka ṭap tawp hmak a, u Billy-a a lo haw tawh a nih ka ring. 

Chapter 8

"I lo haw tawh a ni maw, i chau em?" bathroom aṭanga ka chhuah rual chuan ka ti a, chu chu a lo haw apianga ka tih ṭhin dan a ni. 

"I ṭap em ni?" min en thuak khan ka hre si a, ka ṭap tih a rawn hre chat chu a mak ka ti hman hle a, mahse phone-a ka hmel ka en chuan ka mit a lo bui nasa ngei mai. 

"Lo inbual rawh, in hnuaiah u Pektei ka zu pui ang e" a zawhna pawh chhang lo chuan ka ti ta daih a, ka ṭah leh ṭah loh chu a hriat kher ṭulin ka hre lo.

Ei rawng bawla kan chet dun mawlh mawlh lai chuan a tua mah kan inbe lo va, tlai dang ang chu ni se ka ṭawng chhuak hmasa leh ngei ang. Thla hmasa lawkah nau ka chhiat a, rilru na taka ka awm laiin fahrah ka nih thu ka hre leh a, tunah chuan u Billy-a te lo chu belh tur ka nei tawh lo. Kan nupa boruak lah chu hip luh hrehawm khawpa nuam lo a la ni leh ta zel a, rei lotê chhung kal bo rihna tur tal pawh ka nei lo chu vanduai ka inti ngawih ngawih.

Mahni inkhawngaih ka duh bik reng reng lo, mahse ka nihna dik tak chuan mahni inkhawngaihna nei lo thei lovin min siam tlat bawk si, ka nu leh pate dik tak tal chu hriata hmuh ka va'n châk tehreng em. Tunah chuan zawng dawn pawh ni ila hmuh an harsa tawh dawn lutuk, anni paw'n min zawng ta se min hmu mai mai tawh lo vang. Ka rilruah chuan hrehawm tihna, lungngaihna, beidawn rukna leh ṭah châkna a inawm pawlh nawk nawk a, chung zawng zawng chu paih chhuah tum mah ila ka thei lo. 

"Zanin tlai chu chaw ka ei peih kher lo vang, siam vak tur pawh a awm tawh lovin ka hria, ka han mu zal mai mai ang e" ka tih chuan

"Aw, pawi lo, han mu rih rawh. Ka nute hrilh ka duh rualin i mimal chungchang thil a ni bawk si a, i sawi loh chuan ka sawi dawn lo a nia" a rawn ti a, fahrah ka nih thu a sawi tih chu ka hrethiam nghal.

"Nia, hrilh kher pawh ṭulin ka hre lo. Lo hre ta pawh ni se min hmusit ngawt dawn lo tih ka hria, chuvang chuan heti hian ngawih liam pui mai mai zawk ang"

"Leh lawk, hrilh chu i duh lo tak zet em? Ka u tal chu hrilh la, in nupa inkar ṭha viau lo mah se a thlamuan theih che ka ring"

"Ka lo ngaihtuah dawn nia, ka'n chho ang e" tiin in chung lamah ka kal a, fahrah ka nih thu chu u Billy-a hrilh a ṭha ang em ka hre lo. 

Kan nupa room-a ka luh chuan lehkhabu chhiarin a lo ṭhu ngawi reng a, min en miah loh avangin ka en rei duh ta bik lo va, khumah mu zalin rizai chuan ka inkhuh ta daih. Ka mit ka chhing vang vang a, ka naupan lai thleng chuan ka ngaihtuah let a, engkim chu ka hrethiam chho nghal vek. U Thanthani a awm mai mai laia chhuat ka nawh bik ṭhin lai te, engmah hrethiam lova ka nu min tirhna zawng zawng hlim taka ka tih lai te chu ka mitthlaah an rawn lang zut zut a, naupang tan chuan hriatthiam kha a har ve em a ni. 

Ka pa min enkawl danah ka pakai leh a, mahse ka pa chuan min duat em em lawi si. Ka nu angin min hau ve chhen lo va, min tir kawi reng ve lo va, ka mamawh engkim min tih sak ṭhin thung. Class 1 ka zir aṭanga Master Degree ka Graduate thlengin ka zirna senso zawng zawng min tum sak vek a, ka pa lakah chuan bat tam tak ka nei a ni. Ni lo, kei hi inngaihtuah hnual thei ka ni lo, min lo enkawl tawhna zawng zawng chu ka rulh a ngai a ni. 

"Puitling i ni tawh, hna zahawm tak i thawk bawk, ngaihtuah chiang ang che Billy. Kum naupang têin pasalah a nei che a, kei phei chuan ka iai nghe nghe a, mahse a kum phu lova a puitlinzia ka hmuh hian ka rilru a danglam vek tawh" nu Nguri aw chuan min tiharh zawk a, ka lo muhil hman a ni ngei ang. 

"Chu bakah in inneihna pawh a la rei lo, naute in chan avanga hetia awm hi i ni tih pawh kan hria, i nupui hi i ngaihsak deuh chu a ngai a ni" nu Nguri bawk chuan a ti leh a, min ṭantu awkâ chuan min tiṭap thei mai dawn.

"Ka thu sawi hi hre reng rawh Billy, in nupa hi in hlim lo teh mai a nia, chuvang chuan nangmah pawh hian tihhlim tum ṭhin ang che" tih leh kawngka khar ri chu a inzawm deuh zat a, nu Nguri chu a chhuak ta a ni ngei ang.

Ka rizai chu a lo inkeu dêk dêk a, rawn keutu chu u Billy-a a ni tih ka hai lo. Ka biang chu dim zet hian a chul bawk a, meng chhuak lo tura ka insum nasatzia chu pui tak a ni. Rei lovah min sin ṭhat tir lehin khum chu a rawn hniam sut a, ka hnung lam aṭanga min lo kuah chuan ka meng lo thei ta lo. Tho phang ang deuhin ka awm vel a, mahni pasalte bula lem han chan ngawt chu a nuam lo hle a ni. 

"Mu rih rawh" min kuahna a ban lak sawn ka tum lai chuan dam zet hian a rawn ti thum dup a, a hma aiin min kuah nghet sauh bawk.

"Chaw in ei tawh em? Ka lo muhil tlang daih a ni maw, a va zia lo tak" ka muthilh tlang daih avang chuan nuam ka ti lo tak tak.

"I dam lo a" a rawn ti leh sup a, min kuah beh run avang chuan thawh ka tum ta bik lo, dar zat ka en lah chuan dar 9 lai a lo ri tawh leh nghal.

"A va awihawm loh ve, ka dam ṭha alawm, khawi maw min thlah teh, in hnuaiah ka zu chhuk ang e" ti zung zungin a phal lo chung chu ka tho lui a, mahse ka lu a hai em avangin ka dam lo tak tak a nih ka ring.

"I dam lo ka tih khâ" ti bung deuh hmukin min kuah mu leh a, naute ka pai lai ang chu ni se nuam ka tih dawn vei nen tun ṭum erawh kan awm dan chu nuam ka ti ta hauh lo.

"In hnuaiah min chhuk pui la, ka ril a ṭam deuh tlat" ka tih lai chuan ka nghawngah a thaw lum ham ham a, chuti ang chuan awm lo se ka duh, min ngai tak ang chuan awm lo law law zawk se ka duh a ni.

"Keimahin ka chhuk mai ang" pangngai thei ang ber chuan ka ti leh a, mahse ka thawh rualin a rawn tho ve leh lawi si, nupa mah ni ila kan va han inpawh lo sawt tak em. 

"Kal ang le" a rawn ti dam thlup a, mahse kei chuan ka la pawh tak tak ngam lo, a lakah chuan ka inthlahrung ru tlat tawh a ni. 

Choka kan luh chuan thleng ka la nghal zung zung a, lu hai chu la nei deuh riai riai mah ila chet harsa em em a ni hran lo va, chaw pawh ka ei tui ang reng hle. Chaw ei kham vela mut nghal mai ka duh loh avangin chokaah chuan ka ṭhu khawtlai a, chuti ang bawkin u Billy-a pawh a ṭhu ngawi ve reng a, kan inṭhut hlat khawp mai. Phone tal ka lo keng thla lo chu ka inchhir, sawi tur leh tih tur a vang tak zet a ni.

"I duh chuan lo han mu la, ka la puar em mai nakin deuhah ka lo chho ang" ka tih chuan a ngawi reng a, mi pawh a en chuang lo. 

Choka aṭang chuan zawimuangin ka pen chhuak a, kan in kawt zawl zau ve deuh tak lam chu ka pan a, boruak vawt seng seng chu dawn nuam ka ti phian bawk. Pawn vawt nuam taka ka din hnu chuan kan in lam chu ka hawi a, u Billy-a chu kan nupa room-ah a chho a ni ang a rawn chhuak ve tawh lo. Khaw vawt avangin ka thawte chu a khu rum rum a, chuti ang mai mai chuan min tinui thei a nih chu! 

"Engtin nge ka awm zel ang le?" keima hriat tawk lek chian ka ti sep a, thla leh arsi hmuh tur awm lo te chuan min tibeidawng zual ni berin ka hria.

U Billy-a chu han ṭhen ringawt dawn ila kalna tur ka nei bawk si lo, chu bakah kan inneihna pawh a la rei lo va, inṭhen chiah ila chu mi sawi kan kai nasa ngawt ang. Ni lo, engati nge maw kei hian inṭhen lam ringawt ka ngaihtuah le? Ṭhen thei ka ni lo, a chhan chu ka hmangaih tlat, hmangaih miah lo te chu ni ila thuhran, ka thil ngaihtuah avang chuan mahniin ka nui leh hak ṭhin. Chutia ka rilru ka kawm melh melh lai chuan ka hnung lam aṭang puan min lo sin tir a, a rim aṭang u Billy-a a ni tih ka hre zui nghal bawk.

"Lut ang le" min ngaihtuah hmel taka a ṭawng reng mai chu ka hrethiam lo leh lek lek ṭhin, a nu'n a zilh vang pawh kha a ni maithei a ni. 

In chhungah min kuah lut a, khuma kan mut hnu thleng chuan min la kuah reng a, kei pawh rilru hnual pu reng tawh bik lovin ka awm ṭha ve mai bawk. Kan ṭawng lo ve ve a, biak chu ka duh ru reng tho, mahse ka be ta lem hlei chuang lo. Zing ka harh thlengin min lo la kuah a, ka muttui em em chhan chu ngaihtuah buai a ngai lo khawp. A ban dah sawnin ka tho ṭhem ṭhem a, a muhil hmel hahdam lutuk ka en chuan ka khi sak a, ka rilru na zawng zawng tidam thei awmchhun chu u Billy-a chiah hi a ni.

Fahrah ka ni tih ka inhriat hnu aṭang chuan ka tihtur pawh ti lova thil dang daih lo ngaihtuah veng veng ka ching chho ṭan a, a chang phei chuan tlai dar 2 dawn velah te ka che chauh zel. Ka ngaihtuahna luahtu ber chu ka nu leh pa dik tak te an ni a, vawi khat tal an hmel hmuha biak chu ka châk tak zet. Nge an ni hi an lo thi tawh zawk ni ang? Ka pate lah khan engmah an hriat hmel bik bawk si lo, chu bakah ka pate inah chuan kal leh ka tum tawh lo hrim hrim a ni. 

Ka beisei loh takin ka lakah u Billy-a chu a ṭha chho ṭan a, mahse chu chuan min tihlim thei tawh tlat lo. Kan inneih tirha min duata min biak ang kha chuan a la awm chiah lo nâ a, naute kan chan tirh lêt khan a insiam danglam leh tawh a ni. Zanriah kan ei laiin a nu leh pate'n an zilh zan tin a, ka awm ve lai rengin min ngaihsak zual tur te chuan an hrilh ṭhin a, kei chuan engmah ka lo sawi ve tawh ngai lo. A hmangaihna, a duatna awkâ leh a mi ngaihsakna te chu ka thil mawmawh ber a ni meuh mai, mahse a lak aṭang chuan ka phut ngam tawh rih lo hrim hrim thung.

Ka phone-ah chuan message a lo thleng a, u Thanthani hnen aṭang bawk a ni. Kar 2 liam ta aṭang khan min lo biak a ching a, mahse a them paw'n chhan let ka tum ngai lo. Phone call ni lovin Whatsapp message hlirin min lo be ṭhin a, ka chhan let duh loh vanga rawn an chiam chiam pawh a ngah thei mai. Eng thil chiah nge a duh hre tur paw'n a message ka en chik em em ngai lo va, u Billy-a nena an thlalak dunna te chu a rawn thawn ṭhin nghe nghe bawk.

"Sir Billy-a hian a hne tawh che emaw ni le, MZU lamah chuan a lar leh tawh khawp mai" tih thu leh thlalak pakhat; u Billy-a leh hmeichhe  pakhat thil ei dun lai hi a rawn thawn a, ka ning ve em em ta.

"Min lo tibuai tawh suh, ka hne zozai lutuk tawh che. Nangni nen inzawmna pawh kan nei tawh lo, ka duh loh zawnga i awm reng chuan ka insum mai mai tawh lo vang, i nau ka ni tawh lo tih hre bawk la" phone call a pick up rualin ka ti phiar phiar a, ka thaw a chham lek lek hial.

"Awi awi awi, i lo va han ṭawngthei rapthlak lulai ve le! I zia dik tak chu i chhuah ta alawm, chu bakah in inneih hma paw'n sawi lawk lo pawh ka ni lo va, ka lo khawngaih ve mai mai che maw le" nui hak paha a tih chuan

"Hre reng rawh LALTHANZUAL, nang hian kan nupa inkar tih chhiat i tum tih ka hre vek, mahse chu chu engtikah mah ka thlen tir ngai lo vang" ka lo ti nghal hmarh hmarh a, ka zah buai duh tawh teuh lo.

"RAMENGMAWI, i zak" a ṭawng laklawh lai chuan phone chu ka off hmak a, biak pawh ka be reng peih lo, min lo tibuai leh a nih ngat chuan insual pawh ka hreh tawh hauh lo vang.

U Billy-a chu ka call zui nghal a, lo haw se thil zawh chian ka duh tawh a ni. Heti ang em em hian u Thanthani'n a sawi peih a, a sawi peih chuan eng emaw tak a awm tihna a ni mai. Amaherawhchu ngaihzawng nei tur em chuan ka ring phal chiah lo, ring phal lo ni mai lovin ka phal lo a ni. Ka pasal a ni a, ka nunna tluk zetin ka hmangaih tawh a, inṭhen ka duh reng reng lo bawk. 

"Hello" a rawn tih chuan

"Lo haw lawk teh, ni lo, lo haw ngei ngei rawh, inbiak kan ngai" ka ti nghal sawk sawk a, chuti ang chuan vawi khat mah u Billy-a chu ka la be ngai lo, mak a ti ve ngei chu ka ring.

"Thil thleng a awm em ni? Ka hman lutuk lo asin, a pawimawh viau chuan ti hian sawi nghal mai rawh, ka lo ngaithla ang"

"Hmeichhe dang nena hlim taka thil ei dun vel chu a nuam i tih ngei ka ring, i nupui lakah i hman loh thu hial i sawi phah a, a pawi lo e, ka mamawh lo angah che ngai rawh"

"Rameng, thu awmze nei lo sawi lo teh. Class ka la dawn chiah a, ka lak zawhah ka rawn haw nghal ang" phone off ka tum lai chuan a rawn ti a, ka off loh phah nghe nghe bawk. 

"Enteh u Billy, i lakah inthlahrung em emin ka awm a, ka dik lo emaw te ka lo ti char char a, mahse nangmah zawk hi i dik lo a ni" 

"I va han ninawm chhen ve maw le Rameng, ka lo haw ang, ka lo haw khawp ang. Class lak ṭhulh ṭhak khawpa ka lo haw chhan a ṭhat leh si loh chuan hre rawh, i lakah ka lungawi lo nasa khawp ang" 

"I lungawi ngai hleinem" ti leh sepin phone chu ka off khalh ta zawk a, ka mi biak zawh chiah te pahnih vang chuan chet pawh ka che zawm peih leh ta lo.

Ni e, lo haw rawh se. Kan nupa inṭhenna tur êmah pawh ka ngai lo, sawi fel vek a ṭha zawk a ni. Ngaihzawng lo nei tak tak ta pawh ni se ka ṭhen dawn chuang lo, amah lo chu belh tur ka nei lo miau a ni. Ni lo, kei hian ka ti mah mah em ni le? Âw, ka va'n mawl tak! Zanah pawh kan nupa room-ah kan sawi dun thei reng a, ani lah chu class la lovin a lo haw mek awm si a, thil ngaihtuah chian loh hi a pawi a ni.

Keimah leh keimah chu ka inthiam lo hnuhnawh leh ta hle zawk a, ka rilru kal dik loh laia ka lo ṭawng pawp pawp te chu ka inchhir, engmah lah chu a siam ṭhat theih tawh der si lo. Nghet taka ka phone hum chungin u Billy-a lo haw chu ka lo nghak tlawng a, tunah chuan nuam lo tihna hlirin ka khat tawh. Kan in kawta motor ding thawm te chuan min tizam a, u Billy-a thinrim hmel tur chu ka hmu hreh ngawih ngawih a ni.

"Eng thil chiah nge min sawipui chu i duh a?" ka hmel a hmuh rual chuan a rawn ti chang deuh nghal bawl a, a meng rum ang reng hle bawk.

"Ka...eng lo..thil hmuh tir duh che ka nei, chuan sawipui tur che ka nei bawk" zam ru tak chuan ka ti a, a lungawi lo hmel chuan min ti zam lo thei lo a ni. 

"Kha hei hi en rawh" tiin ka phone chu ka pe zui nghal a, u Thanthani nena kan inbiakna a en lai te chuan a hmelah danglamna pakhat mah ka hmu lo.

"Thlalaka ka thil ei pui hi chu ka ṭhian hlui mai chauh a ni e, i ngaihtuahna kha seng vak duh suh" ngaihsam zeta a tih chuan

"Ṭhian hlui maw, thlalak hnuaia inziak kha sawi tel ta che. I bialnu hlui a nih thu a inziah kiau kha, i sawifiah dawn miah lo em ni?" ka lo tih zawm zat a, ani chuan phone chu min pe kir ringawt thung.

"U Billy, i sawifiah loh chuan ka awih dawn a nia, ngaihzawng i nei tak tak em ni? Kei hi min hne ta em ni? Nau ka chhiat avang khan min hmangaih tawh lo em ni?" lungngai zet chuan ka ti a, a hmuh laia ṭah chu ka duh lo bur.

"Thil ni lo lô ngaihtuah ṭhin suh, ka hne hauh lo bawk che. Aw le, thlalaka hmeichhia kha ka bialnu hlui a ni alawm, mahse tunah chuan ka bialnu a ni tawh lo. I unaunu hian thu a vei vir thiam mah mah, be tawh miah suh"

"Chuti chu u Thanthani thu sawi zawng zawng kha a lo dik vek a ni maw, i bialnu mai duh tawk lovin a ṭhiannu u Thanthani leh zel i kawp a"

"Dawt muhlum a nih chu, i unaunu hian min zar buai reng zawk ṭhin. I unaunu thu sawi awih lovin ka thu sawi awih zawk rawh, i tan pawh a ṭha zawk" 

"Kan intawn hmaa i lo awm ṭhin danah hian buai ka duh ngai lo asin u Billy, buai loh dan hram zawngin theih tawp ka chhuah ṭhin, mahse tunah chuan ka rilru a na hle a ni"

"Ka thu sawi chauh ring rawh Rameng, i unaunu hi ngaihzawng angin melh khat paw'n ka melh ngai lo. Hmeichhia ve tho i ni a, min duh huam huamzia chu in ina ka lo len ṭhin lai pawh khan i hriat vek ka lo ring asin"

"Sawi tawh lo zawk teh ang, inhauh ka duh ngai miah lo kha a ni a, mahse tunah chuan kan inhau ta chu a nih hi!" tiin ka kal sawn a, min en zui tih pawh ka hre thei.

MZU lamah let leh daih mah se pawi ka ti miah lo, a ni loh paw'n chhuak daih rih se a ṭha ka ti zawk, ka chet thlengin a tinuam lo vek a ni. Engmah chu kan sawi zui tawh lo tak tak a, in chung lama a chhoh lai te chuan a hmuh hlau ru takin ka en a, chuti ang chuan kan inkarah buaina a awm ka ring ngai lo. Min hmangaih a, ka hmangaih bawk a, chu bakah nupa kan ni a, hlimna chuan kan nupa inkarah ro rel reng se ka duh a ni. Nge u Billy-a hian min lo hmangaih ve tak tak lo zawk? Ka rai vang chiahin min lo nei emaw ni le? 

Ka ngaihtuahnate chu an insual nuai nuai a, ka rilruah chuan thil chi hrang hrang a inlan chhawk zawk zawk bawk. U Thanthani thu sawi leh u Billy-a thu sawi chu ka buk tawn sek a, a tawpah erawh ka pasal u Billy-a thu sawi zawk awih turin rilru ka siam fel leh ta nge nge. A thu sawi chauh awih turin min ti a, ka pasal a nih avangin ka awih mai tur a ni. Amah chiah rin ka duh, rin zel ka duh, ngaihdam ka dil pawh a ngai ngei ang. 

Ka pa chu phone hmanga u Thanthani awm dan zawng zawng hrilh chu ka tum ûk a, mahse va kalh chilha engkim hrilh a fuh ka rin avangin ka ṭhulh leh ta zawk. Tlai tak a la ni lo va, u Billy-a nu leh pate pawh an lo la haw lo. Ei rawng ka bawl peih diam tawh avangin tihtur ṭul ka nei hran tawh lo va, zanriah ei hma va kal zawk chu ka duh a ni. Taxi hmangin kan in lamah chuan ka kal a, awm rei pawh ka tum lo hle.

"Eng nge i lo tih dawn?" min hmuh rualin ka nu chuan a lo ti a, ṭul hle lo se chu ka kal hauh lo vang maw le.

"Khawiah nge i fanu?" ngeiawm tak chuan ka ti deuh kher a, thinrim hmel taka min melh lai chuan ka mi hmuh duh ber awmna room lam chu ka pan ta daih.

"I lo kal leh maw!? Lo kal i tum tawh loh thute kha ṭap chungin i sawi ve zuah zuah si a, i thu sawiah i va ding nghet lo ve" a room-a ka pen luh rualin u Thanthani chuan a lo ti a, a ṭawngkam nelawm loh zet chu ngaiah ka nei tawh.

"Nang hian lo kal lo thei lovin min siam alawm, vawi khat mah message duk dak lo tak tak min lo thawn tawh suh. Ka pa pawh ka hrilh vek dawn, zilh hrep che se la a ṭha ang" ka tih chuan

"I pa a ni hauh lo, ka pa chauh a ni. Ka pa tih paw'n ko ve tawh suh, haw vang vang rawh" a rawn ti let ta zêk a, mahse a thu sawi chu engah mah ka ngai lo.

"Saw bur saw engati nge i kawl ve? I rai em ni?" ka rai laia ka ei ṭhin ang chiah chiah damdawi bur ka hmuh avang chuan ka ding chawt a, a room aṭang chuan chhuak teuh tawh tak ka ni.

"Ka..ka...a teuh lo mai, i hriat tur pakhat mah a awm lo" a ṭawng tir lam bah deuh nuai mah se a tawp lam chu a vin ṭha hle a, a hlauthawng hmel te chuan ka nuih a tiza zawk.

"I buai ve nak dawn e!" elhsen zeta tih khumin room aṭang chuan ka chhuak a, ka pate room-a ka luh chuan amah pawh a lo awm ngei e.

"I fanu hian message leh thlalak eng eng emaw thawnin min lo tibuai ziah mai a, pangngai takin ka hrilh che a ni e. Khawngaihin i lo zilh dawn nia, chuan i fanu hi a rai mek bawkin ka hria" ka pa chuan mak tih hmel zetin min en a, ngawi rengin ka chhuak ta nal nal. 

U Thanthani chu a rai ka ring tlat, mahse tu fa nge a nih lam erawh ka hre tawh lo thung. A dawhkana rai laia ei chi damdawi bur lo intung ka hmuh kha chuan mak ka ti hle a, a rai loh reng ka ring lo. Lo rai ta pawh ni se ka buaina tur a ni lo, min tibuai a nih chuan ka tibuai let ve zel tawh bawk ang. Ṭhat reng pawh hian awmzia a lo nei lo ve, ka'n ṭhat pôh leh min hmu hniam tulh tulh zawkin ka hria, chuvang chuan ṭhat dan chin tawk ka thiam a ngai a ni.

"Eng vangin nge i kalna tur pawh sawi lova i kal chhuah RAMENGMAWI?" kan in ka luh rualin u Billy-a chuan a lo ti deuh hrawk a, a thinrim chhan chu ka hre hauh lo.

"Billy, vin vak kher kha a ngai lo" nu Nguri chuan a lo ti thuai a, ka hamhaihna te chu rehin ka ṭah a chhuak ru tet tet a, u Billy-a chuan min vin khât ve êm bawk a ni. 

"Ka hriat lovin khawiah mah chhuak tawh hlek suh" a rawn ti leh hmuk a, nu Nguri leh u Pektei awm ve reng mah se insum a tum loh hmel hle.

"VANLALHRIAT, i ṭawngkam kha uluk rawh. Inhauhna innei a nih paw'n ṭha takin a sawi fel theih reng alawm, chaw ei siam ula i ei teh ang u" tiin ka nu chu choka lamah a kal a, awm lo se chuan kei leh u Pektei chu kan ṭawng ngam pawh ka ring lo.

U Billy-a chu in chung lamah a chho leh lawi a, zanriah ei a hun titih tawh reng a, tihtur a nei te a nih ngawt loh chuan chhoh chhan tur a awm lo. U Pektei nen chuan chaw ei kan siam malh malh a, pa Thangtea pawh tlai dang aiin a lo haw tlai hrim hrim. Chaw kan ei lai chuan kan nupa inkar siam ṭha turin nu Nguri bawk chuan min hrilh leh a, pa Thangtea'n a lo tuihnih zeuh zeuh bawk a, mi dang erawh tûmah kan ṭawng lo thung. 

Chaw ei kham chuan ei inna ka seng fel nghal zung zung a, u Billy-a chu pangngai taka thil sawipui ka duh a ni. Chhun lamah lah dik lo takin ka ring ringawt bawk si, ka hlauhthawn luatah leh ka rilru fim loh luatah ka ṭawngkhum vel a, ngaihdam dil ka ba tak zet a ni. A thu sawi pawh ring zo lova u Thanthani thu sawi ring awm taka ka awm te kha a tan chuan a tha nat thlak ngawt ang, a nupui berin ka rin vak loh miau chuan thinrim pawh ni se a awm thawkhat e.

"U Billy" tim dai chuan ka ti a, room-a ka luh lai paw'n min lo en zeuh duh lêk chauh kha a ni a, a lungawi lo tak zet tih chu a hriat hle a ni.

"Eng lo..ka tihpalh, vawiina ka awm dan avang khan ka tihpalh. Class te i lak loh phah hial a, khati ang khan vawi khat mah ka awm tawh lo vang" ka ti leh a, ani chuan min la en duh chuang lo.

"U Billy, inngeih leh tawh ila, heti anga awm reng hi chu a hrehawm em mai" ka thu sawi ngaihsak lo tih hriat zetin lehkhabu chu a keu ri hlarh a, rilru a va nuam lo duh tak em.

"U Billy" ti leh sepin a darah chuan ka kut ka nghat a, ka thiam loh nia ka hriat miau avangin tihlungawi chu ka tihtur a ni.

"Ka lo va mu ang aw, i hman hunah i lo mu ve mai dawn nia" zanin atan chuan ka bei a dawng ta deuh, a la ngawih reng bawk si avangin mutsan mai chu a tan leh ka tan pawh a ṭha zawk ang.

A saisir zawngin khumah chuan ka mu tawm kak a, u Billy-a lehkha chhiar lai chu ka en reng bawk. Tun hnai hian a buai a zual em em a, MZU lamin ram chungchangah buaina neuh neuh an lo nei bawk nen haw pawh a lo haw hma lutuk ngai lo. Chanchin tharah pawh MZU ram chungchanga buaina chinfel hleih theih loh chu an puang ziah a, ka pasal nu leh pate paw'n chanchin an zawt fo reng bawk. A buai em vang pawh chu a ni ang tlêmin a mit khur a thuk deuhin ka hria, hahdam leh mut ṭhat a mamawh laiin kei lah chuan rilru hahna ka lo siam leh ta nghal a!

A hmel chu ka hmu phe tial tial a, ka mittui hnam ṭiam ṭiam vang tih hre reng mah ila khap let pawh ka tum chuang lo. A hmuh laia ṭah chu ka duh lo na meuh mai, chuvanga hnung chhawn ta daih pawh chu ka ni. Darkar 2 bawr vel muhil lova ka la men kar lai chuan thawm a rawn nei a, khuma a lo lawn rualin ka mit ka chhing nghal a, mahse min en chiang se chu ka lo muhil lo tih a hre thei nghal vek ang ka ring.

"Ka tihpalh" ka beng bulah chuan a ti thawp sup a, men chhuaha chuti ang thu a sawi chhan chu zawh mai ka duh rum rum.

Ka dul zawnah rawn kuahin a lamah min pawt hnai a, a taksa nghenga ka awm chiah chu ka ṭah a chhuak nghal em em a, u Billy-a chu ka ngai tak zet a ni. Khum khatah kan mu a, taksa insi rialin kan mu dun bawk a, mahse kan rilru chu a va inperhsan ta si em. Engkim chu ka thiam lovah bawk ka ngai leh tawp a, a nih pawh a ni reng. Ka chhuah dawn tal khan ka kalna tur lo sawi ila ṭha tur, chuti ni se chu kan inhau miah lo vang maw le. Muthilh der thei tawh ngang lovin ka meng chhuak a, a lam hawia ka inher chuan min lo en chiang hle.

"Ka tihpalh u Billy, i thin tirim zawnga awm ka tum lo. I thu sawi awih lova u Thanthani thu sawi ka awih ringawt te kha ka thiam loh a ni e, i thu sawi chiah ka awih tawh ang" a mita enin ka ti sep a, kan inmelh hnaih em avangin ka ṭawng ring hran lo.

"A pawi lo, i thiam loh a awm lo. Kei hian ka tihpalh zawk alawm, kan naute that duh tura ka ngai ringawt che te kha ka ti dik lo a ni" aw dam zeta a tih chuan

"Kan naute kha chan ka duh bik reng reng lo asin, mahse kan chan miau bawk si. Engkima kha ka thiam loh a ni, ka damdawi ei kha lo en chiang ila chu kan chan miah lo vang" ka lo tih zawm zat a, nghet takin ka kuah zui nghal bawk.

"Min en teh" tiin ka khabe chu a rawn chawi kang a, a lam ka hawi chhoh rualin ka hmuiah chuan a lo fawp zeuh a, tawi têa a nui hmel chuan kan nupa inkar a siam ṭha thuai dawn tih ka ring thiam nghal.

"I laka ka awm dan avangin min haw ru viau tih ka hria Rameng, mahse zanin aṭang chuan engkim ka siam ṭha ang. Naute te chu kan nei leh mai dawn alawm, lungngai tawh lo vang" 

"U Billy!" hlim lutuk avangin ka lo ti thuai a, a ṭawngkam chuan min va hneh tehreng em, nunna nei tawh ngai lo tur mah se nei leh thut si ang vel ni maiin ka inhria.

"Ka haw lo che, ka haw miah lo che. I lakah hian ka inthlahrung em em zawk, ka fimkhur loh luatah naute kan chan si a, nasa takin ka inthiam lo a ni" 

"Min haw miah lo tak tak maw!? Kan naute duh ve lo anga ka ngaih lai che pawh khan min haw lo maw!? Ka awih chiah lo Rameng, min haw ngei ang"

"Ka rilru chu i tina ngei alawm, mahse engkim kha ka thiam lovah ka pawm vek" ka tih chuan lungchim zet hian min fawp a, kei paw'n ka lo chhang let ve nghal zat bawk.

Thil chi hrang hrang sawiin kan titi zawm malh malh a, chuti anga nupa inngeih tak kan ni leh thei chu ka lawm ngawih ngawih, tawrhchhelna leh dawhtheihna min petu Pathian chungah pawh ka lawm a, a rukin kan nupa inkar a ṭhat theih nân ṭawngṭai fô ṭhin lo ila chuan chuti anga kan awm dun leh theih pawh ka ring lo, tun aṭang chuan ka pasal chauh ka ring tawh tak tak ang, eng pawh sawi se mi dang thu sawi aiin ka ngai pawimawh zawk tur bawk a ni.

Chapter 9

Thla 1 a ral leh meuh chuan Christmas pawh kan hnaih vet vet ta hle a, boruak vawt sûrh te chuan a ti Christmas hliah hliah a ni. Chutah a ti Christmas zualtu bera ka hriat Boney M ho hla chu ṭhenawm khawveng te'n an play chuah chuah hlawm bawk a, keini inah ngei pawh kan play a, mahse zan lamah deuh chiah kan play ṭhin thung. Music hi chu ngainat bik tê ka nei reuh a, ka duh tê lo hi chu ka ning thuai thuai zel. Hla ngai play nawn tluk tluk te hi ka ning ṭhin, a hun lai a nih avangin Christmas hla erawh play ngun deuh mah se ka ning lem chuang lo.

Christmas kan han hnaih tak tak tâkah chuan ka pa ka ngai ngei mai, ani kha chuan kawr thar min lei ziah bawk a, ka pa dik tak ni phei se chu an in lamah pawh ka leng phei ngei ang maw le. Amaherawhchu fahrah leh van laia tla mai ka ni tih ka inhriat chhuah hnu kha chuan va pawh ngam tak takna ka nei tawh lo, a bik takin ka pa lakah chuan ka inkiltawih thar ngawih ngawih zawk a ni. Ka bank account-a u Billy-a pawisa thun ṭhinte chu a hma angin ka hmang ngai tawh lo va, kum 20 chuang min lo chawm tawhtu ka pa chu rulh let ka duh a ni.

Ka thil tih tum chu a dik ber ang em ka hre lo, mahse chu tal chuan ka inthlahrunna tam tak an tikiam thei deuh mahna. Pawisa pe dawn ta tehreng pawh ni ila engtin nge min lo dawnsawn ang tih ka ngaihtuah thiam lo, ka pa tak chuan a lo duh loh hle erawh ka ring rilru thung a, ka nu leh a fanu u Thanthani te chuan an lo duh viau thei tho bawk. Kum kha leh chen kha kan lo chengho ve tawh a, sum an duh nufa zia chu ka hre ve thawkhat chuan ka hria.

"Tanhrila ka in sak tir mek khu an zo thuak tawh a, kan luah thla thuai dawn nia" a bag chhunga lehkhabu dah lut mawlh mawlh pahin u Billy-a chuan a rawn ti a, kan nupa inkar ṭha ta lutuk chu a nuam chiang a ni.

"A ṭul kher lo a nia, heti lamah pawh hian kan awm thei tho alawm, chu bakah ka nu leh pate pawh hian an phal kher lo vang" ka lo ti ve mai a, eng emaw khung theihnghilh a nei a ni ngei ang a hawi kual nasa em mai.

"Eng nge i theihnghilh? I va zawng nasa ve, ka lo zawn pui dawn che em ni?" tih leh a bula kal chu ka rual a, ka biakna pawh min chhang leh ta chuang lo.

"Sawi la, ka lo zawn pui ang che" ka tih leh chuan note book tê ang reng tak pakhat hi a lo lek chhuak vâ a, ngainatawm zet hian a kiai zui suk bawk.

"Hei tê hi maw le, vawiinah exam result kan puang dawn a, ken theihnghilh chi miah loh" tiin chu note book tê reuh tê chu a khung zui nghal a, keiin a che vel chu ka lo en reng thung. 

In hnuai lamah kan inzui thla a, mi dangho chu an chhuak vek tawh a, u Billy-a chu dar 10 leh a chanve inkar velah hna lama kal turin a chhuak tlangpui ṭhin hrim hrim. Mi dang chu an chhuak hma thei hlawm khawp mai, hna an neih fûr bik avang chuan hna neih ve ka châk leh thut zel. U Pektei hi Airtel Company-ah a thawk a, mahse eng ang chiahin nge a thawh ka hre lo. Nu Nguri pawh New Secretariat lamah a thawk a, pa Thangtea nen an hnathawhna a inan avangin an kal dun ziah bawk.

"Hei, ringawt a che! Ka chheh velah hian in tam tak a awm tih i hre lo em ni?" min fawh a tum lai chuan ka lo thle sawn daih a, a meng nur vel chu a lawmawm leh tawh khawp mai.

"Lungawi lo ringawt suh, kawngpui bul maia infawh vel kher hi a mawi lo, Sap pawh kan ni lo" ka tih laklawh lai chuan min rawn fawp a, min fawp rei phian leh nghal. 

"Mi dang mitmei veng reng reng hian awm ṭhin suh, i veng seng dawn chuang lo. Chu bakah nupa inhmangaih tak kan nihzia tilangtu a ni tih an hre thuai mai ang, min awt ru viau zawk maithei asin" a awm hlat hnu chuan a ti sup a, sawi dik lo se chuan ka chhang chiang ngawt ang.

"Kal tawh rawh, i tlai ang" ka ti ta ringawt a, ka hawi kual zuk zuk lai chuan kawngpui piaha School naupangho chuan min lo en ṭhap a, ka zak ru ngei mai.

"Mi dang mitmei i ven ai reng rengah ka kal tak tak hma min fawp thei" a rawn ti daih a, a fiamthu emaw tiin a hmel chu ka en a, a lo fiamthu teuh lo.

"I ho" in chhunga luh mai ka tum chu min pawt ding chat a, ka ban chu thlah tum lo tih hriat zetin a la chelh ran zui.

"I tih hma chu ka kal dawn lo a nia, ka kal loh chuan eng nge thleng dawn pawh i hre vek, result ka puang thei lo a ni mai" he pa hian min vau nge a fiamthu mai mai zawk, a nui duh bawk si lo.

"Ka kut hi thlah la, kal thuai rawh. Heti anga awm rual pawh i ni lo, i upa tawh lutuk tlat" tia ka ban lak sawn ka tum chuan a aia nghetin a chelh a, ka va han ning ru tawh tak!

"A harsa lo em mai Rameng, ti ngai lo pawh kan ni lo. I pasal thil phut hi a ho teh mai a nia aw, min fawp rawh le" 

"U Billy, ti tak tak lo teh, kan piah lawkah sawn School naupangin min en ṭhup leh nghal" lungawi lo zeta ka tih chuan a hawi let a, nui zeuh chung hian

"Kan veng Middle School naupang an nih saw, a ho lutuk, i tih hma chu ka kal dawn lo tak tak a nia" a rawn ti zui hmak a, a va han luhluh ve chiang tak em.

"Ninawm" ti deuh hlarin ka fawp ta nge nge a, awm sawn leh vat ka tum chu ka thei lo chiang hle, min fawp duhthaw thiam em em zui leh nghal.

"Kha kha a ni mai alawm, thil harsa pawh a ni lo. Sap chu kan ni miah lo, sap nih pawh ka duh lo. Hmangaihna avanga infawh te chu a thiang alawm, kan ti zen zen pawh a ni hleinem" a tih chuan

"Ka lut dawn, mi chhan let dan tur i hre ropui si" tiin ka kut a chelhna chu ka dah thlak sak a, ka awm dan chuan a tihlim a ni ngei ang a rawn nui chhuak ta hawk hawk.

"Chhunah ka lo Video Call ang che" a tih te chu hre pha vek mah ila ka hawi let lem chuang lo va, in chhung ka lut chiah chu lawm lovin ka nui ringawt. 

Ka zah rual rualin ka hlim ru em em lawi si a, pasal nei ni tawh mah ila ka awm dan chu a naupangchhiat thlak thawt a ni. U Billy-a nen kan inkar a ṭhat leh tawh avangin ka nihna lam ngaihtuah buai lova hlim ka tum bawk a, zawi zawiin ka hlim chho ve zel chuan ka hria. A chang chuan fahrah ka ni tih ka inhriatna chuan nun thlakhlelh lohna te min pe a, mahse mahni inthah tih vel ka ngaituah ngai lo thung. Fahrah ni tura khawvel eng ka hmu thei ringawt te chu lawmna tur a ni tih ka hria, ka nihna pawm thiam chung zela nun nuam tak hman chu ka tihmakmawh a ni.

U Pektei nen pawh kan inkar a pangngai chho ṭan viau a, fahrah ka ni tih a hriat aṭang chuan mi biak hmasak a neih ve zeuh zeuh ta. Ni e, min khawngaih te pawh a ni mahna, khawngaih nih erawh ka duh lo hle. Kei aiin fahrah ka nih thu a hre hmasa zawk a, keiin u Thanthani nen an inbiakna zarah fahrah ka nih thu ka hre ve leh a, ka duh dan tak chuan ka pasal chhungte chuan ka nihna chu hre miah lo se ka ti, mahse u Pektei chuan a hre tlat. Mak tak maiin a thu sawiah a ding nghet a, mi dang bulah ka nihna chu a la sawi chhuak miah lo. 

"Engi, tukin chu ka lo bazar pui ang che, Christmas a hnai tawh ang reng bawk sia chhangban chhum tur pawh lei a hun tawh viau mai" inrinni zing bazar tura ka kal dawn lai takin nu Nguri chuan a lo ti a, a thawh lai reng ka lo hre lo.

"A pawi chuang hleinem, mahse keimah paw'n ka bazar thei tho a nia ka nu, i lei duh tur sawi la ka lo lei zawk mai dawn em ni?" ka tih chuan

"A ngai lo, kan pahnihin kal ang. Vawi khat mah kan la bazar dun hleinem le, i han kal dun ve reng reng teh ang" a rawn ti ta zawk a, nu Nguri nen hian kan lo la bazar dun ngai miah lo tih ka hre chhuak nghal.

"I rawn mo hma chuan Pektei nen kan kal mai ṭhin a, i lo awm hnuah erawh a ring nghal tawp che a, zilh deuh chu a ngai. Nang lah hian phut i tum bawk si lo, i unaunu ang chiahin en la phut ve bawrh bawrh rawh" a tih zawm nghal zat a, kei erawh ka lo nui mai thung.

"Chuan Billy-a nen hian in inkar a ṭha leh deuh tawhin ka hria, i hmel pawh hi i rawn lawi tirh ang deuh khan a no leh deuh sûrh tawh" insum thei lovin ka nui chhuak hak a, min tilai dawn alawm le.

"Awihawm loh em mai ka nu, ka hmel te chu a pangngai reng. I sawi ang khan u Billy-a nen chuan kan ṭha tawh alawm, naute kan chan kha kan tuar na ve ve êm a ni"

"In nupa inkar kha a nawm loh hmel ka lo ti thei khawp a, mut hmunah i pa nen pawh kan rel rek rek ṭhin che u asin, inngeih takin awm char char tawh r'u, naute te chu in nei leh thei alawm" 

"Nia, Pathian zarah kan nei ve leh mai ang" zing kar aṭang ka mood chu a fuh nghal em em a, nu Nguri a hman chuan chhuah kan rual nghal bawk.

Kan veng hnai maiah kan bazar dawn emaw ka ti a, Thakthing Bazarah Bus-in kan kal a, mahse kan veng aiin thlai zawrhho chu a lo tuihnai daih. U Billy-a chawhmeh duh em em bawkbawn leh sam ṭawk leh chingit bai siam ka duh avangin ka lei tur ang tak chu ka thlang malh malh a, nu Nguri paw'n thlai zuartute a lo titi pui nasa hle. Nu Nguri hi nu ṭawng duh ve bawrh bawrh tak a ni a, zep em em pawh a nei hran lo. Pa Thangtea laka a lungnih loh chang paw'n zep lovin a sawi tawp a, darkar chanve pawh hi a thinrim hman ngai lo thung.

Chuti ang mizia nei chu a ni a, ka tan chuan nu ṭha tak a ni. A fapa leh fanute ai aiin min ngaihtuah emaw tih theih khawpa awm chang a nei a, ka tan chuan a inthlahrunawm lek lek ṭhin. Pa Thangtea lah a zaidam phian bawk si, nu Nguri nen chuan nupa ni awm tak pawh an ni. A chang phei chuan ka pa nen inang ka ti thut ṭhin, nge mipa mizia ve reng zawk. U Billy-a pawh a bang chuang lo, ṭawng tam lo hian an nupui te min dawhthei em em hlawm a, pasal ṭha tak chu an va ni chiang em.

Christmas ni kan thleng zet chu ka pa leh Amos-a ngai tak ka ni, va len phei mai chu ka duh rum rum a, mahse a mawi chiah tawh si lo. Thil nih dan dik tak a nih avangin ka pa chu ka pa dik tak ang lova en ka tum ṭhin a, mahse a har thlawt a ni. Kum 20 chuang ka pa dik tak anga ka lo en tawh chu vawi leh khata pa loh ringawt zawng thil namai a ni lo, ka lungngaiha ka thinrim em em lai paw'n ka pa chu mi hrang hlak angin ka en thei chuang lo.

Christmas zan te chuan lunglen rukna nen hun ka hmang a, ka awm dan chu u Billy-a chuan a lo hrethiam khawp mai. Ka pate in lama len phei mai a rawt a, mahse kei chuan ka duh lo tlat thung. Nu Nguri leh pa Thangtea paw'n vawi khat chu len phei an rawt tawh ngei a, u Pektei'n harsatna siam tlat lo se chu kan leng phei hrim hrim ang. U Pektei chuan min ngaihtuah vanga harsatna siam a ni tih ka hria, ka tan chuan va len phei ringawt kha thil fuh ber a ni lo tlat. 

Ka pate tel lova Christmas ka vawi khat hmanna a ni a, chuvang pawh chu a ni ang ka ngaih em em. Amaherawhchu ka khawhar min hnem ve bertu ka ṭhian ṭha em em Maltei nen chuan kan inbe awl lo thung a, thla eng emaw zat chhung kha chu a thil training avangin inbe lo mah ila tun hnaiah erawh kan inbe ngun hle. U Billy-a phei chuan mipa ka bia emaw tiin a thik hman hial a, ka laka thik thu a pe chhe em em zel te chu ka lawm daih zawk a ni. 

Kum thar kan chuangkai a, ruai te kan ṭheh a, ka rilruah erawh ka pate bawk an awm leh reng a, engkim chuan anmahni min ngaihtuah chhuah tir lo thei lo a ni. Engati nge fahrah ka nih kher bik? Engati nge ka pa fanu dik tak chu ka nih mai loh? Ka nihna dik tak avangin kan inkar a chhiat phah a, lo hre lo law law zawk ila ka tihnuhnawh ngei mai. Fahrah ka ni tih hre lo ila chuan ka pa leh Amos-a hmuh châk vang tal paw'n kan len phei ṭhin ka ring, a chhan chu ka ngai em a ni.

U Pektei room kal pelh mai ka tum chu ka thei tlat lo, lungngaih hmel taka khuma a lo ṭhu ka hmuh chuan a lam ka pan a, Christmas leh kum thar chhung zawng khan a hlim hmel ka hmu lo hrim hrim. A kutah chuan thlalak pakhat hi a lo keng ran a, mahse ani chuan thlalak en lovin ni tla tur lam chu a hawi daih thung a, ka thawm chu hre lo angin awm mah se a hriat ka ring tho. Ka aw ka thian kharh a, thawk la hawkin thlalak chu a hmer vak a, a hnu lawkah a insiam ṭha leh thuai bawk. 

"Lalthanzuali ka huat em em chhan i hre duh em?" min en miah lo hian a rawn ti a, ka beisei loh lam daih a rawn sawi avang chuan mak ka ti hle.

"Eng nge i sawi awmzia?" tiin khumah chuan ka ṭhu thla a, a awm dan leh a thlalak ken leh hnaa a kal loh chhan chuan inzawmna an neih ka ring ta ringawt.

"Ka bialpa, ka hmangaih em em Ṭpa kha a lo ngaizawng a, Ṭpa nen chuan che sualin a rai ta hial a, a rai thu kha chu in hriat ve vek tho ka ring" a rawn tih chuan mak tih lutuk avangin

"U Thanthani a rai maw!?" ka lo ti hû a, kha leh chen kha awm dun tawh mah ila a rai awm reng ka hre lo. 

"Rai e, Ṭpa nena an fa a pai alawm, mahse Ṭpa kâ aṭang bawk naute a tihtlak thu ka hre leh thung. Ṭpa chuan ngaihdam min dil a, mahse ka thinlungah hliam ser thuk tak a siam tawh avangin ka pawm thei tawh ngang lo a ni" 

"Chuti ang chuan i bialpa nen in inkarah u Thanthani a lo awm ṭhin maw!? A va mak ngai ve le, a mizia a ṭha lo tih chu ka hre tho a, mahse chutiang em em a tih duh pawh ka ring lo" ka tih chuan 

"Chuvang alawm ka huat em em, a ṭhiannu leh ka u an inngaihzawn lai paw'n a ṭhiannu thikin ka u hi a ngaizawng ngam a nia, ka u kha a taksa hmangin a lêm kual nasa thei asin aw" a ti vawng vawng a, ka thu hriatte chu awihawm loh khawpa mak a ni. 

"A nau i ni tih ka hriat khan ka haw nghal em em che a, biak pawh ka be peih lo ṭhin che a, mahse in mizia a innang lo ta lutuk kha mak ka ti a ni" tiin keimahah chuan a rawn pakai a, a thil lo tawn tawh ngaihtuah chuan ka laka a awm dan te kha ka dem hran ta lo.

"Nelawm loh taka ka awm chung paw'n min be reng zel a, nangmah avanga ka u'n min ben te khan haw tak che ka ni. Thla tam fê hnuah fahrah i ni tih ka hre leh a, mahse ka lawm zawk, Lalthanzualite thisen i kai lo ringawt pawh hi thil lawmawm tak a ni" a ṭawng tawp lam chu hriat a nuam ta lo hle.

"I chunga thil thleng ngaihtuah chuan ka laka i awm danah khan ka dem lo che, a awm hliah hliah zawk a ni. Chu bakah kei chuan ka nihna dik tak hi ka pawm thiam tawh alawm, ka nih ang ang hian ka inpawm thlap" ka tih chuan min lo en a, a rawn nui a nih chu! 

"Kei paw'n ka sawi chhuak ngai lo vang, ka nu leh pa leh ka u te hrilh erawh i thu tlukna a ni e" a tih chuan ka lo bu nghat a, engtik niah emaw chuan hrilh pawh ka la hrilh ve mahna. 

Chumi tlai aṭang chuan u Pektei nena kan inkar chu a ṭha chho tial tial a, nu Nguri leh pa Thangtea leh u Billy-a paw'n an hrethiam lo lek lek ṭhin. A hmate kha chuan min biak hmasak paw'n mi dang awm loh lai zelin min bia a, mi dang hriata min biak kha a hlau a ni ber. Tunah chuan mi dang mitmei pawh zah zo tawh lovin min bia min be ta a, innel tir tuma ka beihnaah chuan ka hlawhtling thawkhat tawhin ka hria.

Nilaini a ni a, February thla tawp lam ni tawh mah se khua chu a la vawt deuh sûk a, boruak chuan thlasik rim a la nam ther ther bawk. Ni pawh a lang rei lutuk lo, tlai dar 3 vel a ni tawh hi chuan kan vengah ni eng a lang tawh ngai lo tih theih tluk a ni. U Billy-a paw'n min duat zual em em a, class a lak loh apiangin min lo bia a, a chang chuan Vidoe call te'n kan inbe ṭhin bawk. Hlim taka ka awm thei te, fahrah ni chunga lungngai miah lova ka awm theih chhan chu u Billy-a a ni a, min hmangaihin a nupuiah min siam lo se chu chuti taka ka hlim theih ka ring lo.

"Hello" ka pa hnen aṭang phone call ka dawng hlawl a, han lak loh ngawt lah tih chi a ni bawk si lo va, ka la ve ta ringawt a ni.

"Engi, i hman chuan lo leng phei lawk ta che. Thu pawimawh tak sawi pui tur che ka nei a, lo kal thuai la ka duh khawp mai" a rawn ti zawi fiah raih a, a aw aṭang chuan dam lo te pawh a ang.

"Ka va hman chiah lo ve, chu bakah lo kal ka duh tawh vak lo asin" tiin ka lo hnial ve deuh tak na a, ka pa hmel chu ka hmu châk ru ve deuh tho.

"Hman lo mah la lo kal hram mai teh, ka zep thei tawh ngang lo. Lo kal tawp rawh, engkim i hriat a hun tawh a ni" phone chu a off daih a, a aw te chuan ka ngaih a tiṭha lo zual.

Washing Machine ri vut vut chu ka off a, tlai lama ka insuk chhan pawh insuk hmaih ka lo neih vang a ni a, ka pa'n leng phei tura min tih miau avangin ka insu zo leh ta chuang lo. Len phei tâk rau rau dawn chuan awmhmun kawr ringawt inbel lovin tlêma thawmhnaw mawihnai ve deuh chu ka inbel a, mahse chu pawh inchei vur ka ni lo hle. Veranda ka thlen rualin kan in kawtah u Billy-a motor a lo tlan lut a, Taxi phar buai ngai lovin min kal pui lawk se a ṭha tak ang. 

"Khawiah nge kal i tum? I va hmanhmawh hmel ve, ka lo haw ve chiah hî, min len chhuahsan lo la" fiamthu deuh reuh taka u Billy-a min biakna chu ka nuih pui thei lo.

"Kan inah min va hruai teh u Billy, ka pa nen kan inbe zo chiah a, thil pawimawh tak sawi tur a nei a ni awm e, amah tak pawh kha a ṭhat loh hmel" tih leh motor-a luh chu ka rual a, ani pawh a lo ṭhu lut zui ve leh nghal mai bawk. 

"I pa chungah thil dik lo a thleng em ni? I hlauhthawn hmel bawk si, min hrilh teh Rameng" kan in lam pana kan tlan laiin a rawn ti a, sawi mai tur pawh ka hre lawk lo. 

"Ka hre lo, ka pa chungah eng nge thleng ka hre lo. Kal phawt mai ang, thil pawimawh tak min hrilh tur a neih thu chiah a sawi" ka tih lai chuan kawng kawiah u Pektei kan tawk a, inbe hman lo mah ila kan inhmu chiang khawp mai.

Ka in lam pana kan tlan chhung zawngin ka pa bakin ka rilru a luah lo, thihna khawp hial natna a lo vei ru reng ang tih ka hlau. Lo vei ta pawh ni se ṭawng tam lo leh thil sawi mai mai lo a ni a, ka nu emaw u Pektei chu a hrilh kher lo vang ka ring. Hmânah pawh khawsikin a tlun vak tawh a, ka nu awm loh lai a lo ni kher bawk nen amahin a inbuaipui a, damdawi te eiin a tuar tluan zak tawh, khata ka inthiam lohna nasatzia kha! Inah khan ka awm ve reng a, a khua a sik tih pawh hre lova ka awm kha mawl ka inti ngawih ngawih a nih kha! 

"Engi" in chhunga ka pen luh rualin ka pa chuan a lo ti thuai a, Amos-a thlengin an lo awm kim ṭhap a, eng thil chiah nge thleng ka hrethiam hauh lo.

"Hetah hian lo kal teh Engi" ka pa bawk chuan a rawn ti leh a, a hmel chu ka hmuh tum loh dan deuh a ni.

"Hei hi eng nge a nih i hria em?" ṭhutthlenga kan ṭhut hnu chuan damdawi bur var hi ka lamah a rawn lek a, chu damdawi bur chu ka hre chiang khawp mai.

"Hei te chu rai laia damdawi ei chi alawm, i fanu room-a ka hmuh avangin a rai ka rin thu pawh ka sawi nghe nghe kha" ka ti deuh salh a, u Thanthani hming chu ka lam châk zawk zawk lo a ni. 

"Ni lo, Lalthanzuali hi a rai hauh lo, ani hian thil pawi tak i lakah a ti a ni. Damdawi bur hi a ta a nih loh thu leh a ṭhiante ta a nih thu a sawi a, mahse kei a pa hian a hmel aṭang dawt a sawi tih ka hre vek thung" a tih chuan

"Eng nge i sawi tum?" eng thil chiah nge kan sawi dawn pawh ka hre lo, ka nu leh u Thanthani an ngawi tlat te chu a mak a ni. 

"Naute, i naute chhiat chhan kha tu dang ni lovin Lalthanzuali vang hi a ni. Eng tik lai paw'n a chhui che a, a en thla zel che a, a tawpah chuan i damdawi ei tur thlakna chance a hmu ta a, nangin i chhiat phah ta reng a" 

"Enga!? Eng thil maw i sawi? U Thanthani hian ka damdawi ei tur kha a lo thlak maw!? Ka pa sawi hi a dik em u Thanthan?" ding chhuakin u Thanthani kun ngul lam chu ka hawi a, thu dik a nih chuan ka insum zo lo ngei ang.

"Thu dik a ni e Engi, kei pawh hian ka zep rei mah mah a ni. Ni kum lam khan ka hre daih tawh a, ka fanu ngeiin heti ang a ti duh hi rapthlak ka ti a, ka zak em em bawk. Vawi eng emaw zah ka chhuia ka dawp hnuah thu dik min hrilh ta a ni" ka pa'n a tih chuan che thutin

"Mihring i ni lo em ni? Khawngaihna leh hmangaihna tal i nei ve lo em ni? Khawvel eng hmu tur thah kha hrehawm i ti ve lo em ni LALTHANZUAL?" tiin ka theih tawpa nain ka kek bawrh bawrh a, ka pa chuan chhe tê paw'n min lo ṭhelh a tum lo.

"A tawk Rameng, a tawk tawh e" u Billy-a zawk chuan min lo kuah sawn vat a, mahse ka rilru a nat lutuk avangin ka insum thei tawh ngang lo a ni.

"Eng vangin nge...eng vangin nge ka naute kha i thah? Ka naute, ka fa lo piang mai tur kha ka hmangaih asin, mihring i ni lo tak tak em ni LALTHANZUAL?" ka ṭawng tawp lamah chuan ka ṭap chhuak ṭep a, ka thin chu a na tak zet bawk. 

"Sawi rawh LALTHANZUAL" ti leh hrawkin u Billy-a min kuah ngheh loh lai chu remchangah la zeuhin ka kek leh bawrh bawrh a, mahse ka mi kek nawk nawk nu chu rawn ṭe chhuak ve ta.

"A chhan chu engkimah ka neih tur thil min neih khalh zel alawm, kei chuan unaunu ang pawhin ka en ngai lo che. Nang fahrah ve mai mai kut thlawn hi ka ba peih ther te lo a nia, kan inah pawh hian lo kal tawh suh" a la rawn ti ngam a nih chu!

"LALTHANZUAL!" ti vin ṭhawtin ka pa chuan a beng hawi sawk a, ka nu chuan an lo chhan vat bawk a, kan ni ta nuai nuai mai.

"Ka nupui hi fahrah ti reng reng suh, ka beng hriata khati ang thu i sawi leh a nih chuan kut ka thlak hreh lo che a nia," min chhan tak hian Billy-a chuan a lo ti vin ve ta hrawk a, ka nu chu a rawn meng rum kher mai.

"Hehe! I nupui nep zeti chuan a lo la hrilh ve pek na che nge? Amah kha zawt la, zawt ta che. Amah khan fahrah a nih thu chu a hrilh thei ngei ang che, kum 20 chuang kan chenpui ve duh te hi lawm hliah hliah tur a ni" a ti leh laiin ka pa chuan

"Ngawi tawh rawh LALTHANZUAL, i thil tih pawizia haider luia i la ṭawng zawt zawt ngam te hi zak ngawih ngawih zawk rawh" a lo ti vin phiar a, ka nu chuan u Thanthani chu a lo ṭan ve chhen bawk.

"Ka hne, ka hne lutuk. Kan naupan lai aṭang tawh i duat bik em em a, ka duh ang paw'n ka lakah i awm ve ngai lo. Ani ang fahrah; home aṭanga in lak mai mai pawh kei aiin i duat zel a, ka dawn tur leh neih tur min neih khalh zel bawk a, ka thik pawh hi a awm hliah hliah asin" 

"Ka fanu ve ve in ni a, ang khat bakin ka en ngai lo che u. Hauh chu ka hau ngun zawk maithei che, mahse i thu awih loh ṭhin vang a ni. Ramengi erawh ka thu a awih em em a, nasa takin i tluk lo ve bawk a ni" 

"Ka tluk bawk, ani ai letin ka ṭha a, ka fel bawk. A naute chiah kha ka that hreh reng reng lo, amah pawh hi thah daih ka duh, a dam ve reng hi chuan ka nun a nuam lo" a tih laklawh laiin a hmaiah ka beng ri sawk a, ka ṭah chhuah tawh dan chu pui tak a ni. 

"Mi rapthlak nu, mihring pawh i ni lo. Fahrah ka nih thu pawh sawi reng tur i ni lo, fahrah nih hi ka duh reng reng lo, ka nu leh pa fa dik tak i ni thei bik ringawt te hi lawm hliah hliah ta che, ka awh em em laia i nei thei te hi lawm hle tur i ni asin" tiin kawngka lam chu ka pan hmawk hmawk a, u Billy-a hmuh laia ṭah ka duh lo hul hual a ni.

U Billy-a min kohna leh thinrim taka a ka pate a ṭawngkhum hrawk hrawk ri te chu ka hre hla tial tial a, pawna u Pektei Scooty chunga lo ṭhu te chu mittui tlin vangin ka hmu phe vek tawh. Scooty aṭanga chhukin min ngaihtuah tih hriat zet hian u Pektei chuan min lo en a, a bul ka thlen laia min biakna te pawh chhang lovin thawk la la hawk a, hmun reh taka kala ṭah chhuah vak vak ka châk lutuk, ka châk lutuk tak zet.

"Rameng!" min kuai her lawp tu chu u Billy-a a ni tih ka hai lo, a mitah chuan zawhna tam tak ka hmu nghal zawt zawt bawk.

"I chhungte hi i chhungte dik tak an ni lo maw!?" hriatthiam loh hmel zeta a tih leh chuan ka mittui chu ka dang zo seng lo tak ngial dawn.

"Khawngaihin...khawngaihin i Scooty hi ka lo hawh lawk mai u Pekte, mahni chauha awm rih ka duh a ni" tiin u Pektei lam chu ka hawi ta zawk a, ani paw'n Scooty chahbi chu min lo ve mai a, u Billy-a chuan ka banah a lo chelh ta tlat.

"Ni lo u Billy, khawngaihin min lo zui suh aw, i hmuh laia ṭah ka duh lo, keimah chauha awm ka duh, khawngaih takin ka ban hi thlah rawh le" ka ti ṭuau a, ka ṭawng leh a ni ngat chuan ka ṭap chhuak tawh ngei ang.

"U, kal tir rih rawh, khati anga i chelh chuan a rilru i tina zual mai mai" u Pektei'n a tih chuan zawimuangin ka ban chu a thlah a, chu veleh chak zetin ka tlan chhuak zui nghal. 

Ka Scooty khalh lai chuan ka ṭap chhuak ta nge nge a, Traffic Police te chuan min en duh em em a, mahse engkim chu ka rilru natna leh lungngaihna chuan a hliah khuh vek tawh a ni. Khawi lam nge pan tur pawh ka hre lo, thih daih te chu ka châk rum rum a, ka nihna ang anga inpawm thiam ka tum chu ka thei lo chiang hle. Ka thei tawh emaw ka lo inti a, mahse u Billy-a mita min khawngaihna ka hmu chiah kha chu ka keh chhe vek ni berin ka hria. 

Kawngpui sirah Scooty chu ka tiding a, khawiah nge ka din pawh ka hre lo, ka ṭah châk lutuk avanga ding tawp pawh ka ni. Ṭhingṭhi hnawkin ka ṭap hawm hawm a, ka rilru a nat lutuk avangin ka âwm chu ka chum dat dat a, ka awmna phul chu ka kut leh lamin ka hmer ngawt ngawt bawk. U Billy-a khan hre miah lo se chu heti ang em ema ka nat ka ring lo, ka hre lo, min khawngaihna hmel ka hmuh khan mahni ka inkhawngaih thar a, ka mipa hmangaih ber mita min khawngaihna lo lang khan min tipuak kek lo chauh a ni.

"Ka pa dik tak leh ka nu dik tak te u, kei in fanu hi min hmu châk ve lo em ni? Min lo zawng chhuak lûl teh u, nu leh pa nei lo nih ngawt zawng a hrehawm em mai" ṭap chung chuan ka ti lawm lawm a, ka thinlung chhungril na zet avang chuan ka thi mai dawnin ka hria.

Tha reng nei tawh lovin phulah chuan ka mu zawi hnuang a, ka mittui te chu a luang thla zawih zawih bawk. Phul te chu hmer ṭawng ṭawng ka duh teh lûl nen ka thei tawh lo, tha leh zung ka nei tawh tlat lo a ni. Ka mit ka chhing a, thi mai tura inngaihna te ka nei hial a, thi daih pawh ni ila a nawm zawk hial ka ring ta rum rum a, mahse motor ding thawm chuan min tiharh ta zawk. Ka mit chu men ka tum ve ringawt a, ka thei tawh teuh lo, ka mit vun tak ngial pawh ka zo tawh lo a nih ber.

"Rameng! Lalpa le! Rameng, harh teh, harh mawlh teh" ka biang beng thek thek paha rawn ti sawk sawk tu chu a aw aṭang u Billy-a ngei a ni tih ka la hre ve thei ṭawk ṭawk a, a bak hre zui tawh lovin engkim chu a rehin a thim ta mup.

Chapter 10

"Awi kei chu ka va'n khawngaih tak em, a la naupang bawk si, heti ang em em hian a tuar a chhel ang tih rin ngaihna pawh ka hre lo" tia ṭawng melh melh thawm chu ka thil hriat leh hmasak ber a ni a, nu Nguri aw ni ngeiin ka hre bawk.

"Peki nang pawh min hrilh thuai thuai ta che, mahni chauha tawrh tir hi thil dik a ni lo. Kan hriat hlau em emin a awm ṭhin awm si a, ka khawngaih tak zet a ni"

"Hrilh che u chu ka ṭum ve ṭhin ngei alawm, mahse a mimal thil a nih avangin lo sawi chhuahsak kha ka duh lo a ni. Chu bakah amah paw'n sawi chhuah nghal a duh lo va, a inpeih huna a hrilh mai che u ka ring a"

"LALPEKHLU, ka lung i tiawi lo zual khawp mai. Kei tal hi min hrilh ta che, ka nu leh pa i hrilh duh lo a ni paw'n kei tal chu min hrilh tur i ni" ram hmaka titu chu u Billy-a ngei a ni.

"I nep lutuk leh Ramengi i tikhawngaih thlak lutuk kha ka ngei che a, biak pawh ka be peih lo che alawm, mahni nupui te rilru na leh lungngai hmel pawh hrethiam lo i ni kha ka haw em em bawk. I hna letin i nupui hi a pawimawh asin, a ṭhen lo che te hi a mak ka ti ṭhin zawk" u Pektei ṭawng chu a nem hran bik lo hle.

"Inhau rih lo teh u, inhauh hun pawh a ni lo. Damdawi inah khan awm hle hle se ka tih tih nen, i phal lo tlat bawk si" nu Nguri'n a tih zawh rualin u Billy-a chuan

"Damdawi in khum nuam lo zeta mut tir kha ka phal reng reng lo, Doctor berin in lama awm a phal chuan damdawi ina a awm a ṭul lo" a lo ti bul hmuk a, a mood a chhiat hmel hle mai.

"Rameng!" ka men rualin u Billy-a chuan a lo ti nghal thuai a, min lo en reng a ni ang ka harh tih mi dang chuan a hre nghal lawk lo.

"I ṭha em? Min en teh, na i nei em?" a lo ti leh nghal zung zung a, meng buai deuh nakin a kut chuan ka biang leh lam leh lamah a khuap bawk.

"Ka ṭha alawm, ka ṭha tawh e" ti sepa ṭhut chhuah ka tum chu min lo pui vat a, ka nghen turin lukham chu ka hnungah a dah zawm zat a, min ngaihtuah lutuk chu amah a ang lo zawk.

"Min chhuahsan rih teh u, tunah chuan kan pahnih chauh hian awm ka duh" nu Nguri leh u Pektei te lam hawi chuan a ti a, an chet sawn mai loh avangin

"Ka nu!" a ti leh deuh hmuk a, lainat hmel taka min en vawng vawng hnuah nu Nguri chu a chhuak ta chauh a, chuti ang bawkin u Pektei paw'n a zui chhuak ve nghal bawk.

Ngawi rengin u Billy-a chuan min kuah hle hle a, ka chal leh ka hmai chu a fawp leh vang vang ṭhin bawk. Ka dul chu duat zet hian a chul a, a awm dan chuan ka thla a timuang hliah hliah. Engtin chiah nge ka awm zui tâk kha ka hre ta lo va, mahse nu Nguri sawi danah kha chuan damdawi inah ka awm zuai hman a nih ka ring. Ka rilru a nat rualin ka taksa a chak lo em em kha a ni a, ka zawi riai riai chhan te kha ka hre lo, dam lohna ka neih awm ka hre bawk si lo.

"Rameng min ngaihdam lûl teh, i manganna leh lungngaihna hre lova ka awm ringawt pawh hi ka inthiam lo hle a ni. Min ngaidam thei ang ti raw?" thawk a lak hawk hnu chuan a ti thawp sup a, ka ngaihdamna a ngaiin ka hre ve hauh lo.

"Ka lakah engmah tihsual i nei hleinem u Billy, ngaihdam min dil chhan tak hi ka hre lo. Min dil tawh suh, ka tan hian a nuam miah lo a nia"

"Ni lo, i lakah hian kei i pasal hi ka inthlahrung tak zet a ni. Engati nge...engati nge kei tal chu min hrilh loh? Fahrah pawh ni la ka tan chuan engamah a danglam lo, ka hmangaih reng che a, ka hmangaih zual zel ang che" a thu sawi chuan ka thin a tiphu rang tial tial a, ka tawt et et bawk.

"Ni tak e, i chungchang min hrilh ngam loh tur khawpin i lakah ka awm miau alawm, dem tur zawk chu keimah ka ni e" a rawn tih leh chuan a kuahna aṭang tal chhuakin ka ṭhu ngil a, ka ṭah chhuah dan chu pui tak a ni.

"Khawngaihin...khawngaihin u Billy min chhuahsan rih teh, mahni chauha awm ka duh a ni" ka aw pawh thunun thei tawh lova ka tih chuan nghet zet hian min kuah thuai a, ka aw chu ṭap aw te pawh a ang lek lêk tawh zawk.

"Aih, a teuh lo mai, ka chhuahsan dawn teuh lo che. Ṭap rawh, i duh tawkin ṭap rawh, ka taksa ngheng hian ṭap bawrh bawrh rawh" tiin min kuah nawn mawlh mawlh a, a taksa aṭanga ka tal chhuah chu a hlau tak zet a ni.

Eng nge a chhan ber pawh ka hre lo, min hmangaihna leh duatna awkâ ngeia ṭap tura min tih tâkah chuan insumna tlachham lutukin ka ṭap chhuak hawm hawm a, mi dang lo hriat pawh ka pawisa tawh lo a ni ber. Mahni nihna pawm tuma beidawnna nen ka beih lai te chu ka ngaihtuah chhuak a, ka lungngaihna leh rilru natna te chu ka mittui luang chhuak ang mai chuan luang chhuak zung zung vek se ka ti, hlimna chauhin ka nunah chuan ro rel tawh se ka duh a ni. 

U Billy-a chuan min hnem lo va, min thlamuanna thu pawh a sawi lo va, mahse ṭap reng chung chuan ka thla a muang ru em em thung. Amah chauh lo chu khawvelah hian innghahna leh dam chhan ka nei tawh lo, a chhan chu ka pasal a ni tlat a, pasal la nei lo ila chuan mahni ka intihhlum hial ka ring. Ka chiang, pasal nei lo ni ngat ila chuan ka nu leh pa dik takte ka hriat loh rual khan nun beidawnna leh nun thlakhlelh tawh lohna avangin ka intihlum ngei ngei ang. 

Amaherawhchu pasal ka nei tawh miau a, ka pasal chu ka lu a ni a, ka nunna ai pawha ka hmangaih a ni a, dam thlakhlelh lohna nei lo tura min siamtu chu amah chauh a ni. Ka nu leh pa dik tak te'n fahrah tura min hnutchhiah hnuah pawh a ni chuan min hmangaih a, kumkhauin min hmangaih reng se ka duh bawk Ka pa kha, ka pa bawk kha, ka hmangaih asin, mahse ani chu ka pa dik tak a lo ni si lo. 

"Ka tihpalh aw, ka tihpalh ngawih ngawih Rameng. I mi ngaihdamna hlawh chhuak tur hian eng pawh ka ti ang, i rilru tur pawh dawn lova ka lo thinrim khum che te khan min tina zual a ni. Min ṭhen duhna rilru te i pu em? I pu lo ti raw?" a ṭawng tawp lam chu hlauthawnna in a khat a ni ber.

"Ṭhen che maw! Ni e, ṭhen tumna che rilru chu ka pu ngei alawm, mahse ka" ka tih laklawh lai chuan

"Ni lo, a theih loh, nang hi ka ṭhen ngai dawn lo che. Engtikah mah..engtikah mah nang nen hian kan inṭhen dawn lo, chan che hi ka duh reng reng lo" a tih zawm mawlh mawlh a, ka ṭah chhuak a reh tawh emaw ka tih chu a lo la reh teuh lo. 

"U Billy" ti thawp raihin ka inhnit feih feih a, a âwmah chuan ka lu ka nghat a, a mangang hmel leh a mangang aw te chuan min tilungchhe zual a ni.

"Tum mah la ka phal dawn chuang lo Rameng, kei hian engtiakah mah inṭhenna ka awm tir ngai lo vang. Min huain min ngaidam thei lo mah la kan inṭhen dawn lo, a teuh lo lutuk" a ti mawlh mawlh a, min kuah na lek lek tawh bawk.

"Ṭhen ta che ila belh tur ka nei hleinem, khawiah nge kal se min tih a? A nu leh pate dik tak paw'n an enkawl loh fahrah mai ka nih hî, nang chauh hi ka belh tur awm chhun i ni asin" ṭap purin a lam ka hawi chho a, a hnukulh hmel chuan min ti ṭap leh ta nge nge.

"Ka hmangaih lutuk che, ka thinlung leh tik tak zetin ka hmangaih che, mahse ka khawngaih em em bawk che si. Min ṭhen dawn lo ti raw? Min hrilh teh Rameng, min ṭhen dawn lo ti raw?" a awah chuan inrin tawkna reng a lang tawh lo. 

"Aw, ka ṭhen dawn lo che u Billy. Ka hmangaih che a, nupa niin pumkhat kan ni tawh a, i nupui atan min duh tawh ngang lo a nih loh chuan engtikah mah ka ṭhen dawn lo che" mittui nen nui lui hram hramin ka ti sep a, bianga mittui baw zawihin min fawp zui ta vawng vawng.

"I sawi dik, i sawi dik chiah a ni. Keini pahnih hi Pathian hmaah pumkhat ni turin thu kan tiam dun tawh a, inṭhen leh mai mai thei kan ni lo" ka chal leh a chal chu insik tirin hnai takah kan inen a, tawi tê hian a kiai zui suk bawk.

"Thihnain min ṭhen hma zawng ka hmangaih reng che ang a, nang pawh ka pasal ni reng la, ka neihchhun tak meuh i ni tawh tih hria la ka duh a ni" ka tih chuan hmangaih takin min fawp leh vang vang a, ka lungngaihna zawng zawng kiam lo mah se hlimna chuan keimahah hmun an chang hnem tawh zawk.

"Thihnain min ṭhen hma loh zawng ka hmangaih reng ang che" ka sawi ang chiah chuan a rawn ti ve sup a, tunah chuan hlim avangin ka nui ve thei ta. 

"Hetah hian, hetah tê hian kan fa a awm mek a, indim i ngai a nia aw" ka dul zut paha a tih leh chuan ka en hâw a, ani erawh a lo nui suk thung.

"Eng nge i sawi awmzia u Billy? Kei hi ka rai leh tihna em ni?" ka thin phu ri te chu a hriat phak hial ka ring, ka lawm nge ka hlauthawng pawh ka hre lo.

"Aw rai leh e, ka fa i pai mek a ni. A hma ang mai mai kha chuan ka awm tawh lo vang, ṭha tâwpin ka enkawl tawh ang che" a sawi zawh rualin ka kuah vak a, lawm lutak avangin ka men pur bawk.

"Eng damdawi mah ka ei tawh lo vang, chhiat leh ka duh tawh lo u Billy. Chuan ka lawm...ka lawm e" tiin ka ṭah nuih hak hak a, u Billy-a chu kuah nghet tak ka ni.

"Het het het! Ṭap tawh suh le, min en teh" ka ban chu kuai thlain a hmel ka hmuh theih turin min siam rem a, tunah chuan lawmna hlirin ka khat tawh.

"Lawm thu sawi tur zawk chu keimah ka ni a, kan fa hi ṭha taka i hrin chhuah theih nân ka theih tawp ka chhuah bawk ang. Ka tiam a che, i rilru tina zawnga awm ka tum tawh lo vang" ril ruiha a tih chuan ka lo bu nghat nghat a, chutah amah vek chuan

"Duhawm em em nu, nangmah anga fanu duhawm hi ka duh a nia" a rawn ti leh a , a nui hmel mawi lutuk avang chuan ka fawp lo thei lo.

"Nangmah anga hmelṭha leh fel mipa hlir neih ṭeuh ka châk, a chhan chu an nu nih a nuam dawn lutuk tih ka hre lawk thei a ni" nui var var chuan ka ti a, ani pawh a rawn nui chhuak ve ta hawk hawk. 

"Mipa a ni emaw hmeichhia a ni emaw kei chu kan fa a nih phawt chuan ka duh vek, tun atan chuan muhil rih ang le duhawm nu" ka bianga piai zeuhin a ti a, nupa kan nih hnuah chuti ang taka ka hlim chu ka la hre lo. 

Scooty ka khalh laia u Pektei nen min zui zel dan te chu a sawi melh melh a, phula ka tlu tih a hmuh ruala a manganzia te, doctor-in ka rai mek thu a hrilh laia a hlim rukzia te leh ka pate a ṭawngkhum dan thlengin a sawi vek a, kei chuan a aw thum bul bul chu thawnthu ngaihnawm tak ngaithla ang maiin ka lo ngaithla thung. A chang leh ka dul chu a zut a, ka âwm bawr lama tawlh chhoh chang pawh a nei, mahse kei chuan dan buai ka tum lo. A tawpah phei chuan âm takin nupa nun kan hmang dun zui ta nghe nghe a, u Billy-a chu hmangaih tawp lova hmangaih ka duh a ni. 

Fahrah ka ni tih an hriat hnu chuan ka pasal chhungte chu ka chungah an ṭha sawt em em a, a hma zawng aiin min duat a, nau ka lo pai leh tawh kher bawk nen ka chet pawh an phal mang tawh lo. Dik tak chuan hrehawm ka ti lek lek zawk, chuti ang em em min awl tir an tum chu a nuam hlawl lo. Mo ka ni a, rai lian tak pawh ka la ni lo, mi chettir an duh loh avangin langa hnathawk tur an la ringawt bawk a, ka lawm rualin nuam ka ti chiah lo a ni. 

A bikin u Billy-a chuan min ngaihven zual a, MZU-a kal lova mi awmpui nilen te a tum ṭhin a, ka nuih hi a tiza lek lek ṭhin. Naute chhiat leh ka hlauh em avangin damdawi pawh ka ei tawh ngai lo tluk a ni a, ka ei tur lam ka ti ṭha em em thung zawk. A hmingin Calcium te chu ka ei ve tak na a, ei loh chang ka ngah mai. Doctor-in ei turi min ti tlat a, damdawi lei thlengin u Billy-a chuan min awl vek zel.

Kar 2 hnu velah ka pa a lo lang hlawl a, a hmel tla lutuk chuan ka mang a ti ang ru em em bawk. Ka laka u Thanthani chet dan nunrawng zet avang chuan ngaihdam min dil mawlh mawlh a, sawi mai lova a zep avangte chuan ngaihdam min dil bawk. Nu Nguri leh pa Thangtea te chu an lung a lo awi lo hle a, ka pa fanu dik tak ka ni lo tih an hre tawh bawk sia min fanu en nghal tawp a ni ber. Ka hnenah chauh ni lo u Billy-a hnenah pawh ka pa chuan ngaihdam a dil a, chuti ang taka ka pa tlawm hmel chu hmuh hrehawm ka ti a ni.

"Lo kal teh, lo kal thuai teh" u Pektei chuan chokaah min pawt lut sawk sawk a, ka lo rai puar lian ve tawh tho bawk nen ka kal chak thei lo hle.

"Eng nge ni ta? I va hlim hmel ve le, thil lawmawm a thleng chiang mai" a mood hrethiam zetin ka lo ti ve nghal a, a sawi hma te  chuan a nui leh rih ṭhin.

"Enteh, mipa ngaihven thar deuh ka nei a, mahse kei aiin ani chuan min ngaihven zawk. Ka inhrethiam lo, ka duh em em tawhin ka hria, ka mumangah pawh ka hmu zing tawh lutuk" a hmela hlimna lang chuan min tihlim ve thei hial.

"Awi a va ṭha dawn ve, eng ang mi nge? A fel hmel em? Ka va lawmpui tak che em, hma lam panin nung zel rawh u Pekte" ka lo ti ve hluai a, a mi sawi pa chu a duh ve tak tak a ni ang a hlim em mai.

"Eng hna chiah nge a thawh ka hre lo, thla 3 chhung ngawt chu kan dawrah SIM vel chhuanlamin min lo len chilh tawh, tlai lamah a lo kal deuh tlangpui ṭhin. Min duh em em thu min hrilh a, ka thawhpuite phei chuan inngaizawng emaw min ti vek"

"I va zep thei ve a u Pekte, chuti ang te chu min hrilh vat tur che alawm, i thil tawn zawng zawng theihnghilha hlim taka siam leh theitu che hi mi namai chu a ni lo tawp ang"

"Nia, ka tan chuan mi namai a ni lo chiang khawp. Zanin hian zanriah ei chhuah puiah min sawm a, ka remti ve hmiah. Ka nute bulah chhuanlam eng emaw min lo siam sak mai rawh, anni em em chu ka la hriattir duh lo" 

"Kha lam kha chu lo ngaihtuah suh, chhuanlam ṭha deuh la lo siam sak ang che" ka tih chuan sawi hmaih nei tih hriat zet hian

"E chuan maw, amah chu ka u te ang rual a nih bakah pathlawi a nia, ka nute hian an duh lo vang tih ka hlau. Pathlawi tih lemah a nupuiin a thihsan a, fa pawh an nei hman lo" a rawn ti leh nghal zung zung a, kei chuan a hlauhthawn ang chu a thlen ka ring lo.

"Duh lutuk ang, an fanu neih chhunin mipa i duh leh hmasak ber a ni a, an duh pui em em ang che. Hmeichhe tan hi chuan ngaihzawng emaw pasalah mahni aia upa neih hi a fuh tlangpui an ti asin, kei chuan tu pawh kawp la ka thlawp vek che a nia u Pekte" 

"I sawi dik tho rualin ka nu leh pa leh ka u te ber hi ka hlauthawng, pathlawi a nih vang hian an iai ang a, min inṭhen tir ang tih ka hlau a ni" a rawn tih chuan

"I hmangaih tawh chiang mai u Pekte, i mipa sawi chu i hmangaih tawh tih ka hre thei. I awm ang chiah hian u Billy-a pawh kan inngaihzawn lai khan ka ngaihtuah ṭhin alawm, mahse ka hmangaih tih ka hre lawk lo thung" ka lo tih zawm zat a, ka sawi dik a ni mahna a bu ta nghat.

"Nia, ka hmangaih tawh pawh a ni maithei, hmangaih neih leh hi ka tum tawh miah lo, mahse tuna mi hi chu maw vei loh theih pawh a ni lo, a zunah ka uai nasa lutuk hi amah te reu reu hian a hria ang tih a nia ka hlauh ni!" a tih chuan kan nui dun hak hak a, pathlawi zuna uai chu a na an tih kha maw le.

"Awi kei chu ka zâng hahin ka hria, ka room-ah insiam turin ka chho dawn a nia, ka nute lo haw hma hian ka chhuak daih dawn" ti leh choka aṭanga chhuah a rual a, u Pektei awm dan chuan ka rilru a tinuam veng veng.

Zanriah kan ei lai chuan nu Nguri'n u Pektei kalna min zawt ta ngei a, mahse a ṭhiante nen chaw an ei khawm dawn thuin ka lo chhang ve hmiah. Dawt han sawi ngawt chu nuam ka ti lutuk bik lo, ka bula ṭhu u Billy-a lah chuan min la en chiang em em zui, a awm dan chu dawt ka sawi tih hria te pawh a ang lek lek. Pa Thangtea chuan ka pum nawm leh nawm loh lam min zawt leh nghal a, harsatna ka neih loh thute chu ka sawi ve luam a, min duat lutuk chu ka no phah vek ang tih a hlauhawm. 

Zan dar 10 velah u Pektei chu a lo haw a, motor pakhat aṭanga a lo chhuak lai te chu kan room aṭang ka hmu vek a, u Billy-a bathroom luh lai tak a ni bawk. A mipa zawk chuan a kal mai tur chu pawt letin a fawp a, an awm dan chuan u Billy-a nena kan awm dan te min ngaihtuah chhuah tir a, lawm lovin ka nui ver ver ringawt. Bathroom kawngka inkhar thawmah chuan ka hawi let vat a, tukverh parda chu a ranga rangin ka siam ṭha nghal sawk sawk bawk.

"Eng nge i nuih ringawt?" lai zeta ka nuih avang chuan a rawn ti a, ka awm dan chu rukru te pawh ka ang zawk e a!

"Ka hlim êm alawm" ka ti ringawt a, ka hlim vanga nui chu ka ni chiang alawm, mahse ka hlim chhan chu u Pektei te lam daih a ni thung.

U Billy-a chuan nui suk hian a hmai a hru hul mawlh mawlh a, min en loh lai tak chuan parda chu ka keu dek dek a, an lo awm tawh lo hlauh e! A hma zawnga parda zar ṭha sawk sawk si khan ka pawt tawl leh vek a, u Billy-a chuan khuma ṭhuin min lo en reng a, ka nuih var var pawh chuan a nui ve ta hauh lo. Khumah lawnin a bulah chuan ka inthawlh sawk sawk a, ani erawh a la rawn mu thla duh miah lo zui. A nghawnga vuanin ka kuai kun a, a rawn mu ve ta chauh.

"Thil dik lo a awm em?" zawhna mitmenga min melh reng chung hian a ti a, kei lah chuan lu ka lo thing vat a, ka nui reng chu min ringhlel zual a nih ka ring. 

"Sawi la, zep i nei tih ka hria a nia Rameng. Chuti lo chu ka duh angin ka che a ni mai, i rai lai leh lai loh ka ngaihtuah dawn miah lo" thu tak ang deuhin lang mah se a fiamthu tih ka hre vek.

"Ka zep thei ṭep a, mahse i bulah chuan ka zep lo mai ang. U Pektei hian bialpa thar a nei a, chumi chu ka lawmpui em a, ka hlim a nih hi" nui var vara ka tih chuan

"I va ho reuh tak! Nei rawh se, a khawhar rei tawh bawk alawm" a lo ti mai a, a nau khawharna leh tawrhna te chu a hre ve tak tak emaw ni le.

"U Pektei leh a bialpa inkara u Thanthani chet dan te kha i hre ve em?" ka ti ta tawp a, a hriat hmel ti ru tho mah ila ka zawt sual ang tih ka hlau hle bawk.

"Hre vek e, nang aiin ka hre chiang zawk ang. I unaunu vanga kan inneih tirha a huatzia che pawh kha ka hmuh hmaih reng reng lo, ka inrawlh kha phal la chuan rilru natna i tuar hnem lo zawk ngei ang" ka thaw huai a, engkim a hria chu ka lawm a ni. 

"Aaaa!!!! A che, naute a che, a mak lutuk, tunah khan naute hi a che u Billy" ka pum chhunga mi a rawn chet thut avang chuan ka ti chhuak phawng a, ka ṭawng deuh thut bawk nen a hamhah hmel kher mai.

"Tak tak maw!?" rawn ti ve thuaiin ka pum chu a kutin a rawn hup a, chutia a khawih lai tak chuan ka pum chhunga naute chu a rawn che leh nghal zat a, kei ang bawkin mak a ti ve khawp.

"Mipa a ni dawn e, fapa duhawm tak kan nei dawn e" ti mawlh mawlhin ka pum chu a fawp a, a awm dan lawmawm zet avang chuan ka lo nui ringawt.

"Hmeichhia i duh khâ, mipa a ni kher nâng" ka tih chuan min en chuang lo hian a lu a thing vat a, ka pum chauh chu a duh emaw tih theih turin a melh ngawt ngawt a nih chu!

"Mipa a ni dawn alawm Rameng, thla ruk mi lek a nih aṭang paw'n a thawm natzia hi ka hre thei. Kei chu mipa leh hmeichhiaah ka buai lo, kan fa a nih phawt chuan ka lungawi em em a ni" a tih chuan a samah ka lo chul a, mi pawh ngaihsak lovin ka pum chu a biak zawm ta mial mial.

Naute chet leh beiseiin rei tak min men pui a, a chang peih ngar ngar lutuk chu ka ning hial. Mu tura ka tih lahin engah mah a ngai der bawk si lo, puitling ni lovin naupang a ang mah zawk a ni. Ka dul puar ul chu a ngaithla vel a, a ṭawng tawh bawk si lo nen a chet dan chuan thinrim rei thei lovin min siam leh nge nge zel. Dar 3 thleng kan men tâkah chuan a beidawng ta deuh pawh a ni ang a mu ṭha ve ta hle hle a, mahse a ruk chuan naute chet a la ngaichang ru reng tho.

Chumi zan aṭang chuan MZU-ah pawh awm se kan inbiak apiangin naute a chet leh chet loh min zawt ta ziah a, a chet thu sawia ka tihder chang phei chuan lo haw a tum mai zel a, u Billy-a chuan ka fiamthu tih tak ngial pawh a hre tawh lo ṭhin. MZU aṭanga a lo haw apiangin ei tur min lo hawn ziah a, a bikin pa Lala dawr; MZU Gate luh hmaa mi sachek chu min lo hawn ziah ṭhin. Sachek ka ei châk tlat te chu mak ka ti ve tho, PG kan zir laiin ei ve ṭhin mah ila duh tak erawh ka ni ngai lo, mahse tunah chuan ka rawp leh em em lawi bawk si.

Ka nau paiin thla 7 hmel a'n hmu chiah chu ei ka thei zual em em a, chaw te ka ei hnem viau emaw ka tih paw'n ka ril a ṭam leh vat ṭhin. U Billy-a chhungte lakah pawh ka inthlahrung ru em em ta reng a, mahse anni chuan min lo hrethiam hlawm khawp mai. Eng pawh ei se ka ei ve thei zel a, u Billy-a phei chu a ngaih a ṭha lo nghe nghe. Ka ei chin tawk tur a bituk tawp a, chuti lo chu ka inei dik lo leh vek ang tih a hlau a ni. A pawi pawh ka ti lo, mut chhuak em em chunga ka ei thei zel te chu a ṭha lo a ni. 

"Engi" a lo luh lai paw'n ka lo be duh lo kha a ni a, a cher kuam bawk sia a ruk tak chuan ka khawngaih hle a ni.

"Min ngaidam thei lo em ni? I paah min pawm leh ta che, ka fanu suah sualna avanga i tawrhna hi a namai lo tih pawh ka hria, mahse ka fanu i la ni reng asin" a rawn tih chuan

"Dam lohna i nei em ni? Khawiah nge ka pa i nih laia i vun ṭha sûrh ṭhin te kha a awm zawh tâk? I taksa hi enkawl ṭha ta che, natna vei ang mai i ni" ka lo ti daih thung a, ngaihtuah loh theih pawh a ni lo.

"I pa ka nih leh theih nân eng nge ka tih ang? Min ngaidam thei mai lo'm ni?" ti ṭial ruaiin ka hmaah chuan a ṭhingṭhi a, ka puak keh ta nge nge.

"Tho rawh, tho nghal rawh, engati nge ka hmaah hian i ṭhingṭhit ringawt? Heti ang hian awm suh, heti anga i awm hian min tina em em zawk" thei leh thei lovin a bulah chuan ka ṭhingṭhi ve nghal a, ka ṭap chhuak feih feih bawk.

"Engi, ka fanu, ka fanu duat, i pa hi ka lo sual êm a ni ti raw?" a âwma min kuah beh rual chuan ka ṭap uar sauh a, fiah mang hlei lo hian

"Engati nge pasal ka neih tir te khan min lo biak ngai loh? Ka ngai em em ṭhin che asin, i sual em mai pa, i sual lutuk" tiin ka ṭah ṭawng zuah zuah a, ka pa lo chu pa dang neih ka duh reng reng lo.

"Ka tihpalh ka fanu, ka tihpalh tak zet. Pasal i nei ringawt tur kha pawm thei lo mah ila i neih ngei a ngai bawk si a, i lakah khan ka lungawi lo mai a ni" tih leh nghet taka min kuah a rual a, kan ina hnathawk awm pawh chu ka zah zo tawh lo. 

"I laka ka inthiam loh lutuk avangin i nu leh pa dik tak ka zawng asin Engi, mahse vanduai thlak takin an lo boral ve ve tawh, a pawi ka ti tak zet a ni" a rawn ti leh chuan ka kuah nghet sauh a, ani chuan ka chhim sam chu a lo fawp zeuh bawk.

"Ka duh lo, pa dang ka duh lo, ka mamawh bawk lo. Nangmah chiah hi ka pa i ni a, min duat em emtu leh ka hmangaih em em ka pa kha i la ni a, thisena inzawmna nei lo mah ila ka pa i ni reng ang" ṭap tawh lo mah ila ka aw erawh a la lawi nasa hle.

"Ka hmangaih che ka fanu duat, tun aṭang chuan kumkhuain ka fanu i ni reng tawh ang" a tih chuan thlamuang zetin ka awm a, inhuatna aiin hmangaihna chu a chak zawk tih ka hre chhuak zui nghal bawk.

Chhuat aṭang tho chhuakin ka pa nen chuan kan inkuah ṭha leh a, ka hlim tawh tak zet a ni. Mak tak maiin ka nu leh pa dik tak te thih thu chuan engtin mah min tidanglam lo, ka engah mah a thawk lo a ni ber. Anni ai chuan ka pa chu thi ta se ka tuar na fê zawk ang, a chhan pawh ani chu tet tê aṭanga min enkawl sei liantu ka pa kha a ni miau a, ka tan chuan a ni tluka pa hlu khawvelah hian an awm lo.

Ka nu leh pa dik tak te pawh demna chen ka nei ve tho mai, mahni fa ngei mi dang enkawl tura an dah tawp chu a dawihzep thlak ka tih rualin a dawn thui loh thlak ka ti a, kei chu ni ila eng ang paw'n hun harsa tawk ila ka fa chu fahrah turin leh mi dang daih enkawl turin kan dah phal ngai lo vang. Amaherawhchu dinhmun a inang lo miau a, fahrah ka nihna pawh chuan rah ṭha tak a chhuahin ka hria. Hmangaihna ropuizia ka hre thar a, thisen ai paw'n hmangaihna chu a chak zawk a ni. 

"Nichin khan ka sawi hmaih palh a, i pasal Billy-a nen hian i nu leh pa dik tak chu kan zawng alawm, mahse an thih tawh thu kan hriat tâk si ah chuan sawi chhuah loh law law a tum thu a sawi thung" ka pa thu sawi chuan min deng leh ta dawt mai.

"Eng nge i sawi awmzia ka pa?" hrethiam lo zet chuan ka ti a, kan thingpui in lai ve ve chu kan in zawm lo chiang hle bawk.

"Amah nen sawi dun zawk rawh u, nang paw'n i lo hau chiam ringawt ang e, i tan theih tawp a chhuah tih hriatsak zawk rawh" tih leh thawh a rual a, thingpui a in zawh lai reng ka lo hre lo.

"Aw le, ka lo zawt mai dawn nia, chuan i taksa kha enkawl ṭha rawh ka pa, i cher teh mai a nia" ka ṭhutna aṭang ka tho ve nghal a, dam zet hian a lo nui var var a, cher lo phei se chu a hmel hmuh a nuam ngawt ang.

"Zan ka mu ṭha ang a, ka dik vek mai ang. Ka kal mai dawn, Amos-a lam ka ngai a, chuan ka hlim hle a ni tih i hre bawk dawn nia" tiin kawngka lam chu a pan a, kan in kawt aṭang a  tlan liam thleng chuan ka thlir a, tunah chuan u Billy-a'n ka rilru a luah leh ta ber.

Chapter 11

Ei rawng ka bawl laia u Billy-a lo haw thawm chu ka hre reng a, mahse tun tut tuta zawh leh titi pui chu ka tum lo, zanah ka nupa chauhin sawi dun ila ka duh zawk a ni. Ka hnung lam aṭanga min lo kuahin ka biang chu a hmuiin a nul thuak thuak a, ka pum puar lian ve em em tawh chu a chul reng pah bawk. Kan bul lawkah chuan kan awmpuinu pawh ei rawng bawlin a awm ve reng a, u Billy-a chu ka sawisel buai duh tawh lo, chuti anga awm tawh lo tur chuan ti mah ila awmzia a awm dawn chuang lo a ni. 

Kan awmpuinu tak chu zah tawh lo mah ila nu Nguri leh pa Thangtea erawh ka la zah deuh ṭut a, a nuam lo ve êm alawm, an hmuh laia inkuah leh in duat taka inbiak vel chu ka la inthlahrung tlat a ni. Ka zah ang hûa zahthlak lovin an fel em em thung a, engkim min ngaihtuahsak ti ila a dik ber ang. Ka nu leh pate fa dik tak ka lo ni lo kher bawk nen min duat zual lutuk chu a ṭha lo letling zawk, u Pektei chuan min thik ang tih te hial a nia ka hlauh ni!

"Lo chhuak tawh se âw" u Billy-a thu sawi avang chuan ka ṭhen sak a, kei ang bawka a nghakhlel ve chu a nuam ka ti zual, kan naute chu mipa ni ngei bawk se ka duh.

"Phawrh tawp thei ila, na tuara nau i hrin ngai lo hian ka la chhuak daih ang" a rawn ti leh chuan ka nui ri chhuak ta nge nge a, a ṭawngkam chu a lawmawm thlawt a ni.

"Naute kan neih hunah chuan min awl vek ang che, ka che hah peih miah lo a nia" fiamthu ru tak chuan ka ti a, nei tawh ila chuan a pawm ngai lovin ka pawm reng peih zawk ang ka ring.

"Tehreng mai, kan fapa chu ka awi mu ziah bawk ang. Ka pawm ang a, ka fawp ang a, ka va hmangaih dawn tak!" a ti nghal luam a, ka lo nui leh ringawt.

"Ka Shampoo hman lai khi i hmang ve leh pek em ni? A rim i nam leh tawh, hmeichhe hman tur bik ka tih tawh khâ, duh leh a dang lei ve mai ta che" ti nang nângin ka inher a, kan awmpuinu nui ri ngam lo hmel chu ka hmu zawm zat bawk. 

"I sam rimtui tak ang hi ka nei ve duh alawm, phal lo mah la ka hmang zel dawn tho" a tih bui bui chuan ka melh deuh vak a, a tawpah erawh kan nui dun leh ta hak hak. 

Tlai dar 4 a rik chuan kan chhungte chu an lo haw kim vek tawh a, u Pektei phei chuan a room-ah min hruai lut nghe nghe a, a mipa vei em em chanchin chu min sawipui mawlh mawlh bawk. Kei paw'n hlim zetin ka lo titi pui a, u Pekti mizia chu ka hmuh hmasak ber ṭuma a mizia nen kha chuan dang tawh tak a ni. Tunah chuan sawi lo mah se min ngaina ve lutuk tawh tih ka hria, nu Nguri hrilh chi loh min hrilh pawh a ngah thei hle. 

Zanriah ei khamah kan nupa room-ah kan awm leh tlawng a, Step kal ka harsat ve ṭan tawh avangin chaw eina vel chu seng fel turin min ti tawh ngai lo va, kan nupa room-a awm tawp chu ka tih theih a ni mai. Ni e, ka chet an phal tawh lo pawh chu a awm ve tho mai. Thla 7 lai ka pai ve tawh a, thla 7-na a zo leh ṭep tawh zawk. Kar khat a ral leh chuan ka pum chhunga naute paw'n thla 8 a tling ve leh der tawh a nia, ka pai tluang lutuk chu ka hlim a ni. 

Kan vai chuan nau ka chhiat leh ang tih mawlh kan hlau tlang hlawm bawk a, duat namên loh hian min duat a ni mai. Min duat tura ka duh ber u Billy-a chuan mi dang aiin min ngaihsak zual a, ka mamawh engkim chu amahah a awm vek ni mai hian ka hre ṭhin. Khang thla kal ta chhung zawng khan ka rilru tina zawngin vawi khat pawh a awm leh lo, a thu sawiah chuan ding nghet tak a ni.

Ka meng riai riai a, tukverh lam ka hawi chuan khua a lo var ṭan a, ni erawh a la chhuak lo thung. Ka bula tui taka muhil chu ka en a, nizan khan titi pui ka tum vîau kha a ni a, ka theihnghilh chiang hle mai. Ni lo, ka mut a chhuak lutuk zawk a ni. Zanriah kan ei lai aṭang tawh khan ka mut a chhuak ru reng a, a chhan pawh ka hre chuang lo, ka mut kha a chhuak a ni tawp mai. 

A hmui chu ka kutzungṭang pakhatin ka tawk dê de a, mahse tihharh ka hlau ru hle thung. A hmel pa hrak leh thau ve tawh tak chu lungawi zet hian ka thlir dauh dauh a, ka mipa duh zawng hmel leh mizia a nei kim vek a ni. Coat Suit emaw Formal Dress taka a inthuam aiin Casual Dress deuh hleka a inthuam chu inhmeh ka ti zawk tlat a, awmhmun kawr mai mai te a inhmeh ka ti daih zawk ṭhin. Gym pawh a kal tawh ngai lo, kei phei chuan kal ngai pawh ka ti tawh lo. 

Chu bakah mipa sek deuh hi ka ngaina lo, a mawi tawka sek lek tihrawl nei ṭha ang chi hi ka duh zawk. Chuti ang chiah chuan u Billy-a taksa chu a awm a, a dulah Six Pack tih ang reng vel awm lo mah se a khauh ṭung ṭhung a, taksa sawizawi a uar em avangin a Fit em em bawk. A chang chuan nupa nun kan hman te hian ka tlin lo lek lêk ṭhin, a hun lai chuan hrehawm tihna nei lo khawpin min siam thiam a, a hnuah erawh ka rawl deuh ṭhum zel.

"Ka insum thei tawh ngâng lo a" a hmui nem tak ka fawh avanga a rawn men rual chuan ka lo ti sep a, ka nui sen sen hmel te chu a la hriatthiam loh hmel kher mai.

"Nizan khan thil sawipui che ka tum a, mahse ka theihnghilh daih" tiin a âwmah ka bei nghal zat a, ani chuan min nam hla rang hle thung. 

"Min han fawp leh teh, ka lo chhang let tawh ang che" a nui miah bawk si lo va, a fiamthu nge a thutak pawh ka hrethiam rih bik lo.

"Ka fiamthu lo a nia, nupa nun ka hmanpui dawn lo che" a rawn ti leh chuan zawi tê hian ka nui hak a, ani erawh a la nui duh lo ta cheu.

A hmui nem lum nuam takah chuan ka fawp leh ta siah a, kan infawp rei ngat ngat hle bawk. Tho phang hmel pu mah se a hmel chu a ṭha ka ti zual, ho deuh deuha a awm hian a inhmeh tlat a ni. A sawi ang ngeiin nupa nun chu kan hmang dun lo ngei a, mahse nupa kan nih tawh miau avangin infawh leh induatna awka erawh ka dawng awl lo ta thung. A duh tawk mai dawn emaw ka tih tawh hnuah pawh a duh tawk duh der lo, em em ṭhin hian a!

"Engati nge ka pa nen ka nu leh pa dik tak te in zawng tih min hrilh ve loh? I nupui ka ni a, min hrilh ka lo phut ru ve asin" ka tih chuan

"Ka pu chuan a hrilh ta che em ni? Kan inah hian a lo kal em ni?" a rawn ti zawi deuh sup a, min hrilh lo chu ka lungawi lo em em hran lo, min hrilh loh chhan chu ka hre duh ber zawk.

"Aw lo kal e, engkim min hrilh vek bawk" pangngai takin ka lo ti ve leh mai a, u Billy-a rilru awm ang tur chu ka hrethiam chiah lo, ka awm dan avang chuan a inthiam lo nghal ringawt ang tih erawh ka hlau ru deuh thung.

"I nu leh pa dik tak te an thih tawh miau avangin hre lo law law la ka duh leh zawk a, mahse tun hnai khan hrilh che a fuh berin ka hre leh ta zawk. Ka pu'n a lo hrilh hmasa che chu a pawi lo, ka hrilh angah che ngai mai rawh"

"I kâ aṭang ngei ka hre duh alawm, kan nupa karah hian thu zep emaw thil zep emaw awm lo se ka duh a ni" ka tih chuan ka khabe a rawn chawi a, kan inmelh chiang leh ta hle.

"A pawi ka ti Rameng, i nu leh pa dik tak te chu an thi tawh, an thihna pawh kum 3 vel a liam tawh nghe nghe. Home-a kan va kal khan chu chu kan hre ve chiah a, namen lovin ka khawngaih bawk che a ni" dam zeta a tih chuan a âwmah ka bei thuai a, ka ṭah chu a chhuak ru tet tet zui nghal.

"Rilru na taka i awm hmel hi ka hmu duh lo, pumkhat kan nih tawh avangin i nat chuan ka na ve zel tih hria la ka duh Rameng. Keimah leh kan fa lo la piang tur zawng zawngte nen nun tharin bul ṭan la, engtikah mah keini chuan kan thlahthlam ve lo vang che" a thu sawi leh avang chuan ka mittui chu a baw ta zawih.

"Min en teh le" a aw hniam raih leh thuk raih te chuan ka thinlung chhungril ber a thleng a, min ngaihtuahna awkâ leh a rilru na hmel chuan thlamuan ruk riauna min pe thung.

"Ka hmangaih che, ka hmangaih lutuk che. Nu leh pa dik tak nei tawh lo mah la khawhar tak angin inngai suh aw, kei i pasal Billy Vanlalhriata hian ka thih hma zawng ka hmangaih reng ang che" a rawn tih leh chuan ka ṭah nuih ta hawk.

"Ka vanduai viau emaw ka intih lai pawha ka vanduai lohzia ka hriat chhuahna chu nang hi i ni asin u Billy, chuan pa chu ka nei reng alawm, ani chu ka pa a ni reng bawk ang" ka tih chuan

"I sawi awmzia chu ka puzawn hi i paah i pawm leh tawh tihna em ni? Pawm leh thei hram la ka ti khawp mai, i lakah a inchhir thu a sawi hreh bawk si. Kut a thlak che thu thlengin min hrilh a, a inthiam lo ngawih ngawih a ni" a rawn tih zawm zat a, ṭah chhuahna reng ka nei leh tawh lo.

"Nimin khan ngaihdam dilin ka hmaah a ṭhingṭhi a, ka natzia chu pui tak a ni. Thisena inzawmna nei lo mah ila ka hmangaih em em a, ka ngai em em a, a ni bak pa atan khawvelah hian duh dang ka nei lo, ka nei ngai lo bawk ang"

"Heti ang em ema hmeichhe tuarchhel leh hmangaihna ngah nupuia ka nei che hi ka lawm a ni Rameng, i laka suah sual ka chhuah lai pawha min ṭhen lo te kha i tawrhchhelzia pholangtu leh min hmangaihzia tilangtu a ni" tih leh nghet taka min kuah a rual a, ka chal chu a fawp vawng vawng bawk.

A la hma ang reng bawk nen kan tho peih ta lo law law a, thawh aiin muthilh leh daih chu ka duh zawk hrim hrim. Chu bakah tho ta pawh ni ila eng ka tih mah an phal leh dawn chuang lo, ka chhungte chuan ei rawng ka bawl tak ngial pawh an phal tawh lo a ni. Kan lo muhil leh tak tak a ni ang khum aṭanga kan thawh meuh chuan zing dar 8 a lo hnai kûar tawh a, in hnuai lama kan chhuk paw'n an lo tho vek tawh nghe nghe.

U Pektei leh kan awmpuinu chu inkawm ngeih hmel tak hian ei rawng bawl pahin an titi siam siam a, kei aiin kan awmpuinu chuan a ngaina mah zawkin ka hria. Ka pasal chhungte hi zawng mi sual chhungkua chu an ni lo ve chiang alawm, anmahni aṭang hian kan rin dan ringawt hi a dik ber lo tih ka hre chhuak hial a ni. A tirah kha chuan an nelawm loh ka ring nghal em em a, mahse an bulah kum khat deuh thaw ka'n cheng ta chiah chu a lo ni teuh lo mai.

Tin, mi tu pawh hian nun hlui kan nei ṭheuh a, mahse kan inhriatthiam pui tak tak hlawm lo mai chauh a ni. U Pektei ngei paw'n a nun hlui avangin min nel lo va, min be peih lo va, a chang phei chuan kei ngei paw'n harsa ka ti ve ṭhin. Inphah hniam taka han biak hmasak zel kha thil nuam zawk zawk a ni lo, mahse a thil tawn angte kha lo tawng ve ta ila chuan a awm ai leta ka awm ka ring, ka u nupui chu ka nel mai mai thei bik lo vang.

"Eng nge i rawn tih dawn?" nelawm loh zet hian ka ti deuh hmuk a, ani erawh ka zawhna pawh chhang lovin a rawn lut tlang nghal hmak.

"Ka pa hi lo hmu tawh suh, thisena inzawmna pawh in nei tawh lo. Tunah phei chuan nangmah avangin ka nu ṭhen a tum hial a, nangmah vangin kan chhungkua kan buai hle a ni" zam map lo hian a ti hmarh hmarh a, a zak lo hi ka ti ve thlawt.

"Ka pa chu ka hmu ngai hauh lo, amah zawk hlir a lo kal ṭhin. I nu ṭhen a tum a chhan chu ka hre hauh lo va, hriat pawh ka duh lo" ka lo ti ve salh a, a sual reng thei chu a mak ka ti letling tawh zawk.

"Ka pa a ti ve leh ringawt ta, i pa a ni ziah lo. Ka nu leh ka pa an inṭhen a nih vaih chuan i thiam loh a ni ang, i chungah hian tih hreh ka nei miah lo a nia" eng vanga inṭhen tum nge pawh ka hriat ve si loh!

"Kan in aṭang hian chhuak rawh, i chhuak lo a nih chuan u Billy-a ka Call ang a, min ṭawngkhum dan zawng zawng hi engkim ka hrilh ang. Ani chuan kan ina i lo kal leh pawh hi a phal tawh lo, a hmuh che chuan a thin a rim khawp ang le" ka tih lai chuan

"Ka duh hûn hunah ka chhuak a, ka thu thu. Ka ning lutuk che, thah daih che hi ka duh" ti vin tûar tûarin a bula thil awm remchang chu a vawm keh chuai chuai a, kan awmpuinu pawh Bathroom aṭang a rawn chhuah phah hial.

"LALTHANZUAL!" ka ti ve ta tûar a, a awm dan chu mi â chiah chiah a ni ringawt, a kut te chu a thil vawm keh avangin a thi phung tawh bawk.

"Nang, nang hi awm lo la engkim a dik a ni mai" tih leh Plate keh hmawr zum chu lak a rual a, ka va han hlauthawng mai mai tak em.

"U Billy! Lo haw vat rawh, hmanhmawh rawh" phone a pick up rualin ka ti zung zung a, u Thanthani chuan min thah a duh tak tak ka ring, a chiang tawh lo tak zet a ni. 

"Eng nge thleng?" tia a rawn ṭawng laklawh lai chuan u Thanthani chu ka bulah a lo ding reng tawh a, ka phone chu phih thla sawkin a vawm darh nghal chuaih bawk.

"Awm sawn rawh" tiin kan awmpuinu chuan a nam sawn dâwrh a, mahse ani paw'n kei ang bawkin u Thanthani chu a hlau ve tho tih a hmel aṭang chuan ka hre thei.

"Nang awmpui ve mai mai khan min nam ngam vela maw!?" tiin kan awmpuinu lam chauh chu a en a, eng thil emaw tak dik lohna chu a nei chiang a ni. 

Kan awmpuinu chuan a theih tawp hian a lo nam leh sawk a, mahse u Thanthani chu kaw chhunga ramhuai lut ang maiin a chak tawh thung. A samah kekin a theh tlu tawp a, a na a ti ngang a ni ang a rawn ṭap chhuak ta hak. Rai puar lian ve tawh tak ka lo ni kher bawk nen ka chan chu a va chhe ta em, rai lo ngat ila zawng engtin tin emaw tih dan pawh a awm ngei ang. Ka dinna lama a lo kal lai takin kan awmpuinu chuan a hnung lam aṭang a nam leh pawp a, a tlu tur chuan min sut ṭhelh nghe nghe.

"Lo kal rawh, Bathroom-ah lut ang, hmanhmawh ang" kan awmpuinu chuan ka kutah a rawn vuan a, Bathroom chhunga tawm him tawp loh chu tih theih kan nei rih lo a ni. 

"I phone i ak em?" ka tih chuan a lo bu nghat a, chutih lai chuan Bathroom kawngka chu u Thanthani'n a rawn chum ri dawt dawt a, ṭawngkam bawlhhlawh a chhak chhuak nasa hle bawk.

"Kha" tih leh a phone chu min pek a rual a, kei pawn ka pa number chu ka hmet chhuak thuai a, u Billy-a aia a lo thlen hmasak zawk ka rin vang a ni. 

"Hello" tia ka pa aw ka hriat rual chuan

"Pa, lo kal thuai teh. U Thanthani kan inah a lo kal a, engmah pawisak pawh a nei tawh lo, min thah a tumin ka hria" ka ti nghal phawlh phawlh a, ka hlauthawng ru ve tawh tak zet a ni.

"Engi!" hamhaih zet hian a rawn ti a, mi dang phone aṭang ka biak vang pawh a ni maithei, ka phone lah chu a chhe hneh ropui bawk si.

"Lo kal vat mai teh pa, engmah sawina hun tak tak pawh a awm lo. Bathroom-ah kan awmpuinu nen kan inkalhkhum mek a, u Thanthani'n hawn tumin a bei mek bawk" ka tih leh chuan

"Aw le, lo chi ai lutuk lo ula, ka rawn thleng thuai ang" a ti ta thuai thuai a, eng thil dang mah sawi tawh lovin phone chu a off zui nghal hmak bawk. 

Pawn lam aṭang u Thanthani chuan ṭe tûar tuar hian kawngka chu a rawn chum pawp pawp a, a tawpah phei chuan hmanraw dang hmangin kawngka chu hawn a tum ta mai, kei leh kan awmpuinu chu hlau leh thlabarin kan awm tlawk tlawk ringawt. Kawngka chu rei lovah a rawn chhu pawp hawk a, engtia lo awm tur nge tih leh eng nge tih tur reng kan hre lo. Kawngka a rawn tichhe mai dawn emaw kan tih lai chuan thil keh darh chuai leh ri vut thawm hi a awm a, mahse eng nge a nih kan hre lo.

"Rameng, i ṭha em? Keimah Billy-a, kawngka hi lo hawng rawh le" a aw ka hriat rual chuan hahdamna aiin ṭah chhuahnain ka rilru a rawn luah khat nghal a, min venghimtu tur an awm tawh nia ka hriat vang pawh a ni maithei.

"U Billy!" tih leh Bathroom kawngka hawn chu ka rual nghal a, kan inhmu chiah chu ka tum lo puiin ka ṭap chhuak hawk bawk. 

"Hlau tawh suh le, i bulah ka awm alawm, tuma'n an tina lo vang che" duat taka ka sam chul hliau hliau chung hian a ti dam dap a, kei chuan ka lo kuah nghet em em ringawt.

"I ṭha em nang?" tiin kan awmpuinu chu a biak zawm zat a, ani paw'n a ṭhat thuin a lo chhang ve thuai a, mahse a aw aṭang chuan a la hlauhthawn hmel hle.

Chutia kan awm lai tak chuan ka pa pawh a rawn thleng hlawl a, u Thanthani hmel awm dan leh ka hlauthawng hmel a hmuh chuan a rilru a nain u Billy-a pawh a hmai zah a ni tih ka hria, a loh theih loh, u Thanthani chu a mangan thlak ve êm a tin ni! U Thanthani chu chiang nial lo zet hian chhuatah a la bawk deuh run a, a kutah eng hmanrua mah a awm tawh lo bawk. Ka pa chuan a pawm tho lâwp a, mahse u Thanthani chuan a lo duh teuh lo mai. 

"Min khawih suh, min khawih hlek suh! RAMENGMAWII avangin ka nu ṭhen i tum vel a, RAMENGIMAWII hian kan kawng a dal hnem tawh lutuk" ti vin hlarin min rawn melh leh chat a, hlau ru tho mah ila ka bula u Billy-a a awm tawh miau avangin ka hlau em em tawh lo. 

"Billy, Police lam Call rawh le" ka pa chuan a rawn ti ram deuh hmuk a, u Thanthani tal chhuah tum chu a kuah bet hneh hle bawk. 

"Ka pa, chuti ang thleng thleng a ngai dawn em ni? Haw pui la, ṭha takin zilh zawk la a ṭha ang" ka tih chuan lu thing vat chung hian

"Ni lo ve, vawi tam ka zilh tawh alawm, hetia ang fanu ka neih hi kei ngei pawh hian ka ring thei lo a ni. Call rawh le Billy, hremna te han hmu se a ṭha chhuak ve mai ang" a lo ti leh hmuk a, u Billy-a pawh a che chhuak ta nge nge. 

Minute 15 hnu velah Police hmel kan hmu ta ngei a, Police-in Motor-a an dah luh lai te chuan u Thanthani chu bawlhhlawh tak takin a la ṭawng tûar tûar a, Police zinga hmeichhe pakhat phei chuan kut a thlak nghe nghe. Motor chhung aṭang min thah a tum thu leh kan naute thlenga zuah a tum loh thu a rawn la chhak chhuak a, tunah chuan ka unaunu dik tak a ni lo chu ka lawm hliah hliah tawh zawk a ni. 

Ka pa chu a hna lama let leh nghal mai lovin a ṭhu ngawi reng a, a ngaihtuah mûk hmel khawp mai. U Billy-a chuan kan awmpuinu hnenah thingpui siam turin a hrilh a, kei pawh hahdam taka kan nupa room-a min mut tir a tum a, mahse kei chuan ka muhil thei dawn chuangin ka inhre lo a ni. Chu bakah ka pa chu biak ka duh, eng vangin nge ka nu nena inṭhen an tum reng reng? Keimah vang a lo nih tak tak phei chuan a ṭha miah lo, inngeih takin awm zawk se ka duh a ni. 

"Pa, engati nge ka nu nen inṭhen in tum? U Thanthani khan keimah vanga inṭhen in tum thu a sawi a, chu chu thu dik a ni em?" ka ti ta nge nge a, ka pa hmelah chuan hlim hmel reng a lang lo.

"Dawt sawi a lo thiam khawp a nih dawn hi a, nangmah vanga inṭhen tum kan ni hleinem. Amos-a a ngaithei lo ṭhin a, hauh pawh kan inhuah tam phah khawp. A fapa ngei a buaipui duh tâk lovah chuan inṭhen ka rawt a, amah paw'n a duh hmel khawp mai" a rawn ti dam dap a, ka nu chu mak ka ti ru ta hle.

"Sawi ṭha leh ula, inṭhen ringawt zawng a dik miah lo a nia ka pa. Amos-a tan leh u Thanthani tan pawh nakînah a la buaithlak ang, ka nu nen chuan inbe ṭha leh zawk rawh u" 

"Sawi ṭhat leh pawh ka rawt alawm, inṭhen rawt hmasatu ni mah ila amah zawkin inṭhen a duh nghet bur bawk si a, tih ngaihna vak a awm tawh lo. Amos-a te chu ka enkawl thei lutuk alawm, min ngaihtuah suh" a rawn tih chuan

"Ka nu chuan ngaihzawng a nei em ni? In inhmangaih hle khan ka hre si a, ngaihsak zual la in inkar chu a ṭha leh thei mai lo em ni?" ka lo ti thuai a, nuihzat vang pawh ni miah lo hian a rawn nui chhuak ta hak.

"Ngaihzawng a nei te pawh a ni mahna, ka ngaihsak leh ka ngaihtuah a phu tawh pawhin ka hre lo. Eng pawh ni se ka fanu ai awhin ngaihdam ka dil e, in chhungkaw lakah hian ka inthlahrung hle a ni" tiin u Billy-a chu a en daih a, thup tum mah se a rilru chu a na tih ka hre vek.

"Inthlahrung duh suh ka pu, Tanhril lamah kan insawn thla thuai dawn asin, kan bulah Amos-a nen chuan lo awm ve daih ula" a thu sawi avangin u Billy-a chu ka en hâw, sawi awm leh awm loh pawh a hre lo emaw ni le.

"Ni e, kan lo awm ve daih tak tak dawn emaw ni le" ka pa chuan nui chung hian a ti zui sup a, ka rilru erawh a ni ve teuh lo mai.

"U Billy, i sawi awm ang lo thei em mai. Ka nu leh pa hi inṭhen se i duh a ni ringawt alawm, sawi tawh miah suh" tia ka zilh hlak chuan a lo ngawi mai mai duh teuh lo. 

"Pafa chauha awm te chu a khawhar thlak dawn em asin Rameng, ka pu hi nang aiin ka ngaihtuah daih zawkin ka hria" nuih insum deuh hian a rawn ti a, a fiamthu tih hre chhuakin a banah ka chum zawt ringawt.

Thingpui kan in zawh chuan ka pa chu pawn thleng kan nupain kan thlah thlap a, ka khawngaih reuh tak tak a ni. Keini lam aṭang tih ngaihna vak a awm bawk si lo, ka nu nen an inkar tal chu ṭha se ka duh ngawih ngawih, amah chauha Amos-a a enkawl lek phei chuan a tan pawh hna kal a buaithlak khawp ang. Kan nupa room-ah chhovin thil thlen dan u Billy-a chuan min zawt zung zung a, engkim chu ka hrilh ve ta vek.

Sawi kher ngai lova ka hriat avangin kan chhungte chu thil thleng vel hrilh loh law law kan ti tlu a, zanriah kan ei lai te chuan engmah hre lo tih takah min be leh siam siam tawh. Chhun lama thil thleng hria se chu u Thanthani mai bakah ka pa an hmuh dan a dik lo nghal ang a, chu chu ka duh lo a ni. Ka pa hi mi sual a ni lo, rilru ṭha lo pawh a ni hek lo, mahse u Thanthani'n a tihmingchhiain a timualpho hneh ve êm bawk a ni.

Zirtawp tlai a ni a, u Pektei chu ka bulah ṭhuin a titi melh melh a, zan lamah a bialpa a rawn len dawn avangin a phur a ni ber. Awmpui kan neih tawh avangin ei rawng bawl pawh a tum bik lo, kan titi tui dun khawp mai. U Billy-a a lo haw tawh a, mahse room-ah lehkhabu a chhiar thung. Nu Nguri leh pa Thangtea te erawh an lo la haw lo va, zing lamah khan an lo haw tlai dawn thu an sawi lawk hrim hrim tak e!

"Enteh, duh lo hmel emaw zak hmel emaw pawh a pu miah lo, mipa hi chu an puitling bik e" kan ṭawng tawp tawh mai dawn emaw ka tih laiin u Pektei chuan a rawn ti leh a, a vei ve chiang a ni.

"Ni chiah, kan inngaihzawn lai pawh khan u Billy-a hian ka chhungte kha a hmu hreh miah lo, keiin ka hreh tehreng nen" ka tih chuan a lo bu nghat a, a nui tawp riai riai bawk. 

"A hun lai kha chuan ka nelawm loh thei ngawt ang, i lakah khan ka sual ve hraw hraw thei bawk si a, i peih hi ka ti zawk, kei ni ila chuan ka pasal hnenah in dan ka sawi vat ang ka ring" a inthiam lo tih chu ka hria, mahse hun kal tawh a nih avangin ka engah mah a thawk tawh lo.

"A ho lutuk, i nun hlui khan a zir êm alawm, ka lakah inthiam lo duh suh u Pekte. Pathlawi a ni bawk sia zanina lo leng tur chu dul kiar pui hi a ni mai ang a, ka hmu vat châk" ka tih chuan ei loh hmel zet hian min en a, a hauh na nghal vel lutuk chu a nuihzat thlak letling.

"A teuh lo mai, u Dinthara chu maw a pian a dik thlap. A hnuaia thawkte paw'n an duh ru thei lutuk, kei phei chuan ka thik ṭhin" a tih lai takin nu Nguri leh pa Thangtea an lo haw a, kan sawi zawm duh ta bik lo. 

Zanriah ei hmain kan nupa room-ah ka chho leh hram a, u Billy-a koh ka duh vang a ni pakhat. Ka pum lam tan erawh a ṭha vak lo, Step kal ngat phei chu tluk sual a hlauhawm si. Ka pum chhunga naute chuan thla 9-na a hmang ve leh mek tawh a, ka neih thla kan chuangkai thei te chu Pathian awmpuina vang liau liau a ni. A rih pawh ka rit sawt em em a, u Billy-a sawi ang tak takin mipa ka neih ka ring, a thawm a na reuh em mai.

"Hei, i va chhiar tui awm ve a, chaw ei a hun der tawh a nia" ka aw a hriat rualin a lo hawi nghal vut a, a lehkhabu chhiar lai chu a khup thak bawk.

"Engati nge i lo chhoh? Ka rawn chhuk mai dawn alawm, nangmahin em ni i lo chhoh?" a tih chuan ka lo bu zeuh a, min ngaihtuah tih hriat zeta a chal a tichuar vel te chu hmuh a nuam hle thung. 

"Chhuk ang aw, khawi ka lo pawm ang che" tih leh min pawm a rual nghal a, tun hnai phei chu mi ngaihtuah a pe na zual, ka chhiat leh ang tih mawlh chu a hlau a ni. 

Zan riah kan ei kham chuan sitting room-ah kan ṭhu ṭhap a, u Pektei bialpa hmel pawh kan hmu ve ta alawm, ka rin aiin a hmel a tar lo daih. Pathlawi a nih vang khan tlema hmel chal deuh turah ka ruat a, chu bakah pathlawi hi chu tlangval lai ang em emin an inenkawl uluk peih vak tawh lo turah ka ngai a, u Pektei bialpa erawh a hmel a fai sar sar hle mai. U Billy-a ang lo takin mipaah chuan a ngo pawl tak a ni a, u Pektei lah a ngo ve tho bawk nen nupa inhmeh tak an nih theih ka ring.

Tlai khat chu ka pa hnen aṭang phone ka dawng leh hlawl a, keimah tak pawh hian biak hmasak ka tum ve ṭhin, mahse tun lai chu ka haihawt thar tak zet. Ka nu nena an inṭhen fel thu a rawn sawi a, amah khawngaihnain ka khat nghal. Ka pum chu puar lian tak la ni lo se chu va len phei ka duh a, mahse a nazawnga Motor chuan Doctor-in a phal der bawk si lo. Ka thiam ang ang chuan ka hnem ve tak naa awmzia erawh a awm ka ring lo, chu bakah ka nu chu ka dem ve tak zet.

U Thanthani chanchin ka zawh chuan a tlawh zeuh zeuh thu a sawi a, khawngaih ru viau mah ila a sualte a sim theih nân hremna tuar ve se ka duh a ni. Min that miah lo va, mahse min thah a tumna hrim hrim chuan Case a lo nei lian khawp mai. Police te'n min lo biak pawh khan ka pa duh danin hrem turin ka ti kha a ni a, mahse kum 2 hnuah a Bail theih dawn tho avangin ka lungngai ta em em bik lo.

"Kei chu u Pektei hi ka lawmpui e, inngaizawng nghet reng se ka ti" kan nupa khumah kan mu a, hun a kal chakin naute ka neih kar pawh a ni ve leh ta reng mai. 

"Eng nge khatia min en vak kher a? I pawi ka sawi em ni? Ṭawng duh bawk si lo, meng rum si" ka tih chuan a awm ngai rengin a la awm a, eng tak chu ngaihtuah leh ang maw!

"I sawi ngun mah mahin ka hria" a rawn ti bul deuh hmuk a, a awah chuan lungawi lohna lang mah se a lungawi loh chhan ber chu ka hre deuh reuhin ka hria.

"Ka lawmpui ve a ni mai alawm, a bialpa lah kha a chhe lo si, a ngo bawk si, an inneih theih hlauh phei chuan u Pektei hi ka thik rum rum ang" runluih rilru taka ka tih chuan 

"RAMENGMAWI! Ka nupui i nih hi, ka beng hriatah mipa dang chhe lo i tih thu sawi tawh hlek suh, fiamthu pawh ni se ka ngaina hauh lo" a ti vin deuh ṭhawt a, a la thinrim tak tak zui. 

"Ka tihpalh..eng lo.. ka thik hma lutuk a" aw nem deuh zawk hian a rawn ti leh nghal zat a, min vin avanga ka hamhaih hmel chu a hrethiam a ni ngei ang.

"Ka fiam ve mai mai che a nih khâ, i hrethiam vek turah ka ngai a, thik thu lah chu i la pe chhe tluang em em zui" ka tih chuan sawi fuh inti zet hian

"Ka rilru leh ka hmel a ṭhat chuan a tawk" a rawn ti zaih a, kan pangngai leh tawh avangin kan nui dun zui ta hak hak. 

"Lalpa le! Ka tui bawm a keh, tunah khan ka tui bawm a keh" bathroom lut tura ka kal lai chuan ka ti chhuak hlawl a, ka ke pen lai chu ka tawp chat bawk.

"Eng nge a awmzia? I neih hun te chu tun kar tawp a ni lo'm ni?" mak tih hmel zeta a tih chuan 

"Chuti ang in zawhna hun a awm lo, ka nu emaw u Pektei ko vat rawh, naute ka nei dawn" ka ti deuh hmawk hmawk a, ka aw chu ka thunun hman tawh lo.

Rang taka thovin room aṭang chuan a tlan chhuak thuai a, ka nu leh u Pektei hmel ka hmuh chuan tlêmin ka hahdam ve ta deuh. Hospital kan thlen dawn ṭepah nau chu ka vei ve ṭan ta chauh a, a tih chî tak tak a ni. Nau vei chauh hrep hnua naute neih chu ka peih lo, ka huphurh bawk. Darkar 2 leh a chanve vel hun ka hman hnu chuan naute ka nei ta, chutah mipa ngat a la ni zui. Piang hlim tih hriat taka a ṭap ngek ngek thawmte chuan ka hnuk a tiulh mai dawn, fapa ka nei ve ta chu ka lawm em a ni.

"Zanin chu kan chhungkua chauh hian awm kan duh, naktuk lamah min lo hmu leh mai dawn nia" tiin u Billy-a chuan a nu leh pa leh a nau chu a hnar haw a, ka pa pawh nui sun sunin a haw ve mai bawk. U Billy-a'n kan chanchin a hrilh tih reng ka lo hre lo, a hmel ka hmu hrim hrim pawh chu ka lawm a ni.

"Engati nge i haw tir vek kher a? Naute thar an hmu ve châk em em a, ka inthlahrun phah leh vek" khuma kan mut dun hnu chuan ka ti a, ani erawh a lo nui suk ringawt.

"Piang nawn leh dawn pawh ni ila nang bawk hi ka nupui atan ka thlang ang che, ka hmangaih che Rameng, fapa duhawm tak min pek avang hian ka hmangaih zual sauh che" a rawn tih sup chuan

"Engati nge kei kher min thlan ang? Intawn pawh kan intawng lo maithei asin, kei phei chu fahrah ka ni leh nghal, min hre tawp lo vang" ka lo ti nghal zat a, ani chuan min kuah nghet sauh thung. 

"A chhan chu maw nang hi khawvela ka hmeichhe duhthusam awm chhun i ni alawm, intawng lo mah ila ka rawn zawng hmu tho ang che" a thu sawi chuan min tihlim tak zet.

"Nang pawh khawvela ka mipa duhthusam awm chhun i ni alawm u Billy, fahrah ka ni tih hre reng chunga min hmangaihtu hi ka thinlung zawng zawngin ka hmangaih che, fa tam tak pek che pawh ka duh"

"Rilru ṭha nu, hmangaih loh harsa nu" tih leh ka hmuia fawh chu a rual a, ka hnute hne mek kan naute chu en vawng vawngin

"Lalhruaitluanga, chu chu i hming a ni ang aw ka fapa Hruaite" a rawn ti thum dam leh dap a, kan fapa hming chu a phuah awlsam ka ti kher mai.

"Ka rilruah chu hming chu a lo lang tlat a, ka ngaihtuah lawk miah lo" a tih chuan a lam hawi chho deuhin ka fawp zeuh a, kan fapa hming chu mawi ka ti thar em em bawk.

Hringnunah hian hnual chang te, lungngaih chang te leh harsatna tawh laite tawng ṭhin mah ila hlimna a awm tih kan hre tel lo fo ṭhin, chu hlimna chuan keini chhungkuaah ngei pawh hmun a rawn chang a, chuti ang chuan hlim reng thei ila ka ti, mahse engtik niah emaw chuan buaina kan la tawng leh ngei dawn tih ka hria, chumi hunah erawh hmangaihna bawk a chak ber fo vang.

Tanhril lama u Billy-a'n kan chhungkua bika kan awmna tura a lo tih chu remchan zawkna avangin Hostel-ah kan siam ta daih a, u Pektei lah pasal nei thei reng dinhmunah a lo ding ve tawh tho bawk nen in hrang chan ai chuan chan loh kan titlu ta zawk a ni. U Billy-a nu leh pate ngei pawh chuan chu chu an duh dan ber a ni a, in hrang chan kan sawi ringawt paw'n an lungngai thei hial a ni. Ka pa chu ka rawn ve ngei a, ani erawh chuan ka pasal thu thu a nih thu min hrilh daih.

Hunte chu kal zung zungin kan fapa Hruaitea paw'n thla 2 a tling ve leh reng tawh a, pa Thanga chuan chaw ei khawm rawtin Champhai lama a naute chu a ko thla a, ka pa leh Amos-a pawh a sawm tel nghe nghe. Ka pa chu a fala thil sawi puiin ka nu chanchin ka zawt a, mahse ani chuan ngaihzawng nghet a neih tawh thute a sawi a, ka khawngaih khawp mai. Ka nu chu ka dem ve thlawt, a fapa leh a pasal kalsana a awm thei chu a awihawm loh letling zawk. Ka pa ve thung chuan a nun a nawm sawt thute min hrilh a, a sawi dik a ni ang a hmel pawh a hma angin a ṭha leh tawh hle.

Nilaini a ni a, khumah Hruaitea muhil chu ka mut a, dawhkana Card lo awm chuan ka mit a la ta hle. Room chhungah ka awm reng kha a ni si a, mahse chu Card chu ka hmuh awm ka hre miah lo. Card chu lain ka endik hmasa tê tê phawt a, hawn chi a ni ang em tih ka hrethiam bik lo a ni. Hawng lovin ka dah leh rih a, mahse ka awm a nuam chuang lo. A tawpa tawpah chuan ka hawng ta nge nge a, lehkha var hanah chuan

"Piancham chibai ka hmangaih, nang hian ka duhthusam engkim i nei a ni. Nangmah hmangaih em emtu i pasal" tih tê hi a lo inziak a, thu tam inziak lo mah se ka va han hlim tehreng em.

"Rameng" aw lo chhuahna lam chu ka hawi thuai a, a hmel ka hmuh rualin a lamah ka tlan phei nghal a, ani pawh chuan min lo kuah nghal chat.

"Ka duhthusam engkim neitu, nang tê reuh hian i pasal hi hlimna chhiar sen loh min pe a ni" ti supin min fawp vang vang a, a âwma ka bek nghal chialin

"Thluak ṭha em em pa, ka piancham thlengin i theihnghilh lo leh pek bik tawh a ni hi! Nang pawh hian hlimna chhiar sen loh min pe alawm, ka mipa duhthusam pa" ka ti ve mawlh mawlh a, hlim taka a nuih hawk hawk lai chuan ka lo nui ve var var bawk. 

A TAWP DAIH!

Hehe!!!

.