𝐏𝐑𝐎𝐓𝐄𝐂𝐓𝐈𝐕𝐄 𝐇𝐔𝐒𝐁𝐀𝐍𝐃 (𝐂𝐡𝐚𝐩𝐭𝐞𝐫 𝟏𝟏 - 𝟐𝟎) 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

PROTECTIVE HUSBAND

By

Havali Adam

28 March 2022

Chapter 11

Kan chuanna motor neitu hming chu Alfred William-a a ni a, a hawihawmin sawi tur a hre ang reng hle. Motor-a kan chuan chhung zawngin a titi char char a, a tlangval lai chanchin te chu chhum lo chat lovin a sawi a, Hunter-a phei chuan a nin hmel thei hle bawk. A motor-a kan chuan miau avangin a awm dan chu sawisel thei kan ni lo, mahse kei chuan chuti vakin a ṭawng chu ka ning hran lo a ni.

Pu William-a chu Denmark mi a lo ni reng a, Denmark ram thleng tura Motor kan hmang kher te chu a ṭul ka ti lo. Kilometre sang chuang fê tlan a ngai a, mahse kawng a ṭhat purh avangin ni hnih thum vel chauh chuan kan ngai tawh tih chu ka hre kar thung. Pu William-a chu a chauh deuh avangin seat hnung lamah kan mut tir a, Hunter-a'n motor chu khalh chhawkin a bulah kei ka lo ṭhu ve ran thung.

Hotel-a kan chawlh apiangin zan lamah Sex kan hmang ta ziah a, kei chuan Hunter-a taksa leh tihrawl lian tak tak te chu ngaiah ka la nei thei der lo. Ani erawh chu vawi eng emaw zat hmeichhia lo mutpui tawh ṭhin ang maiin a zei em em a, ka châkna tichhuak turin mi tihphur a thiam hle bawk. Ni tak, ani ang mipa hleitling leh pian ṭha te chu tu hmeichhia mahin an hnar rei thei hauh lo vang.

A mipatna hmang miah lovin a kut leh a lei ringawt hmang te chuan min thlak danglam vek thei hial a, min sawngbawl ṭhin dan chuan nawmna vawrtawp vawi tam tak min thlen tir ṭhin a ni.

Sex kan hman zawh apiangin ka beng bul chêtah a ta chauh ka nih kumkhua tur thu a sawi thum dup zel a, chu tak te chuan ka thinlung chhungril a tihlim vawng vawng zel a ni.

Denmark ram kan lut chiah chu ka taksa a na ṭhem ṭhum mai, motor kan chuang rei ve em bawk a ni. Thil eng eng emaw tihfel ngai laiah chuan pu William-a chu a che zung zung a, awlsam takin kan tlan tlang ve mai zel bawk.

Pu William-a chuan khawpui lama hna a thawh ṭhin avangin ama Personal Apartment-ah min chawlhpui hmasa phawt a, mahse Hunter-a thung chuan thingtlang lama khawsak a duh thu a lo sawi nghal vat.

Motor hmang bawk chuan thingtlang kil khawr ve deuh reuh takah kan kal a, chu lai hmun chu pu William-a ram vek a ni. Hunter-a chuan chu hmun chu a duhthusam a nih thu a sawi a, mahse kei chuan a fal ka ti mah mah thung.

Kan pahnih chauhin kan awm hmel bawk si a, mi sualin kan in chu an rawn luh chilh duh mai ang tih ka hlau a ni. Chu lai hmun aṭanga hla vak lovah chuan in a ding nghal thluah a, mi cheng pawh an awm ve nual bawk a, chungte chu tlêma ka hlauhthawnna tinep tu pakhat a ni.

Chu lai ram leh in lo ding sa chu Hunter-a chuan lei a dil nghal a, pu William-a pawh chuan a lo phal ve mai bawk. Hunter-a chuan khawpui lamah min hruai let leh a, kan kalna hmun tur a sawi bawk si lova khawiah nge kan kal dawn ka ring thiam mai lo.

Kei ang bawkin pu William-a pawh chuan a hriatthiam loh hmel hle. Khawpui chhunga kan tlan luh leh rualin Hunter-a chuan Bank awmna a zawt a, chutah chuan a tih tum awm ang ka hrethiam ta chiah.

"Lo kal rawh le Darling" tiin kawngka chu a lo hawng a, motor chhung aṭang chuan min hruai chhuak nghal.

Bank chhunga kan luh chuan mi vei vakte chuan min lo en duh hlawm hle a, a chhan pawh kan inthuam dan chu a nih ngei ka ring. Bank kan dawr lai chuan pu William-a chu kan bulah a ding ve reng a, engmah sawi lovin Hunter-a che vel chu a en reng ringawt.

Hunter-a'n Danish ṭawnga mi dang a be thei chu mak hi ka ti zawk, ṭawng eng zat chiah nge a thiam ang ka hre ta hauh lo.

"A rei tawh lo vang, a la kim em tih an check mek e" ti supin ka chhipah chuan a fawp zeuh a, ka lung a lo muang ve nghal em em ringawt.

Kan hmaa hmeichhe pakhat chuan nui var var hian Hunter-a chu a rawn bia a, lehkha var tê pawisa inziahna hi a pe tel nghal bawk. Chu lehkha var ka en ve chiah chu meng phawk nasa tak ka ni, chutiang em ema pawisa tam chu ka la hmu lo bawk.

Eng zat nge a nih hriat tumin chhiar te chu ka'n tum ve tak nâ a, number a tam em avang chuan ka chhiar thiam der lo.

"Khai âaa..." pu William-a pawh chuan a lo ti ve hial a, kei ang bawkin pawisa chu tam a ti ve a ni ngei ang.

Hunter-a chuan Danish ṭawng bawkin kan hmaa hmeichhe kum upa tawh lam chu a be leh a, ani pawh a bula phone chu hmangin mi dang a be kual nghal zung zung a, kei leh pu William-a chuan tih ve tur reng kan lo hre lo.

Hunter-a chuan ngawi rengin ka kut chu a chelh a, an inbiakna awmzia tal chu min hrilh ve mai se ka ti, eng thil tak sawi ang maw!

"Lo kal rawh le, kan haw thei" minute 10 chhung vel kan din hnu chuan a rawn ti sup a, ka kuta kaiin pawn lam pan chuan min chhuahpui nghal.

Kan motor bulah chuan motor dang pahnih hi a lo ding a, chu motor-ah chuan pawisa hlir a khat vek, a tam zia chu pui tak a ni.

Thingtlang lama inkhalh pheiin kan hnungah motor pahnih chuan min zui zel a, pu William-a phei chu a ṭawng duh sawt hle. Hunter-a chu a tlawn ni berin ka hria, pawisa a ngahzia a hriat hma kha chuan chutiangin a tlawn hauh si lo.

Kan ram lei leh kan in leina hmun chu khawpui aṭanga kilometer 20 chuang zet a ni a, thlen na'n erawh kan tlan rei lutuk lo. Chu thingtlang khuaa chengte chuan min lo en duh hlawm em em a, keini lah motor pahnihin min zui zel bawk si a, nuam lo ve duh tak a ni.

Kan in thar tur leh kan ram lei tur awmna hmun kan thlen chuan pawisa chu in chhung lamah an dah lut zung zung a, ka dam chhung pawhin pawisa chu ka hman zawh sen ka ring lo.

"Dollar ang zawng hian ka pe che ang a, in ram pawisaah i chantir leh mai dawn nia" Hunter-a chuan a ti nghet charh a, pu William-a pawh a lo bu nghauh nghauh.

"Ram man leh in man tur leta tam chu a ni ngei ang" tiin Bag pakhata a pawisa khung mawlh mawlh chu a pe a, chu ringawt pawh chu kei chuan tam ka lo ti ngâng mai.

"Engtin nge hetiang em ema tam hi pawisa i neih theih? Billionaire i nih lohna hi tlem tê a ni ngei ang, eng hna nge i thawh ṭhin? Sumdawng hausa em ni i nih?"

"Ka hnathawh ṭhin lam chu i hriat a ṭulin ka hre lo, pawisa kha hawn la, kan in hi chhuahsan thuai zawk teh" Hunter-a aw ah chuan nelawmna pakhat mah a awm leh tawh lo.

"Aw le, mahse fimkhur viau ula ka duh, in pawisa tam tham zet hi mi tu emaw ni tak chuan chhuhsak che u an duh ngei ang" pu William-a thusawi chuan min tihlauthawng leh ta vek.

"Heng lai hmuna chengte hi an sual em ni? Chu chu i sawi tum a ni em?" ka lo ti nghal thuai a, Hunter-a pawh a lo meng rum hle.

"Mi sual tam tak chu an awm chiah lo maithei, mahse ruk hmang leh mi sual chu an awm ve chiang alawm, khawi ramah pawh hetiang mi hi chu an awm fûr zawk"

"Ka lak aṭanga pawisa an ruk chu beisei buai duh suh se, eng tikah mah an ru chhuak thei dawn chuang lo, chhuak tawh la a ṭha zawk ang" Hunter-a mitmeng chu a sen ram a, a thinrim hmel viau chhan chu ka hre lo.

"Ni e, ka kal ang e, hun nuam tak in hman ngei ka beisei" nui sanga pu William-a'n a tih zawh rualin Hunter-a chuan

"Ka beisei" a lo ti ram nghal hmarh a, a hma zawnga innel leh inngeih hmel tak ni si kha an inngeih hmel teh chíam ta lo a ang.

Pu William-a a kal bo tâkah chuan Bathroom-ah ka inbual fai a, ka inbual lai chuan Hunter-a a rawn lut ve ta hlawl. Ka lo nuih ringawt a, ani erawh a inphelh nghal mial mial.

Shower hnuaiah chuan kan pahnihin kan ding a, taksa insi rialin kan infawp a, ani phei chuan Shower chu a tawng pha titih hial zawk.

"Kan hun hlu tak hi nang nena âm taka hman dun ka duh Darling" ti supin ka biangah chuan a rawn dawm a, kei pawh chuan nui sen sen chung hian

"Nang ang bawkin i bula hun hman ka duh tih chu i hria alawm" ka lo ti ve thuai a, kan hmui chu a inbawh thuah rang zui hle.

Ka kawnga chelhin min chawi kang lawp a, bangah chuan min nawr bet zui nghal a, kan hmui chu a la inchuktuah mial mial bawk.

A kut hrawl leh zei tak chu ka taksaah a vah kual tir reng a, ka kap lam a khawih thlen rualin a ka chhungah ka thaw lut ham ham a, ka taksa a sawngbawl dan chuan ka lung phu thlengin a tidanglam leh vek tawh.

Ka tana lian lutuk leh ka taksain dawngsawng thiam lo tura ka lo ngaih a mipatna khawng lian zet, lumna nasa tak pai bawk si chu ka taksa chhungah a rawn nawr lut riai riai a, kei erawh insum hman lovin ka lo rum chhuak hak hak a, a thil tih mek avang chuan thawhah nei ang maiin ka thaw hlawi hlawi a, ka boruak hip tur chu a tlem deuh mah mah ni mai hian ka hria.

"Thawm chhuah rawh le Darling, nuam taka ka siam che avangin thawm chhuah mawlh teh" Hunter-a aw chu ka hre deuh ruai ruai a, muang lo taka a chet zawt zawt avang chuan ka insum zo leh tawh lo.

"Ka hmangaih che...Ka hmangaih che Hunter" tih chauh chu ka thu sawi theih awmchun a ni tawh, a bak thu dang sawi thei lovin ka ṭe chhuak zui nghal mawlh mawlh.

Amah nen chuan vanram fang ang maiin ka inchan ta ringawt a, a chet dan mawlh chuan taksa tihfai lam reng min ngaihtuah tir thei tawh lo a ni. A dar hlai leh chhah ṭha tak chu ka lo chul kual ruai ruai a, a chang leh a sam chu ka ṭham tawn tawn bawk.

Tui nena kan awm avangin ka thawm chu a zawi lo hle a, mahse ka thil tawn mek a nawm em avang chuan chuti ang thil chu ka ngaihsak buai peih tawh lo.

Inhmangaih tawn tak leh duhthaw zeta Sex kan hman hnu chuan kan intifai thei ve ta hram a, Hunter-a chu ka pasal ang maiin ka ngai tawh a ni ber.

Kan inbual zawh hnu chuan thawmhnaw kan lo la lei reng reng lo tih leh eitur kan nei lo tih chu kan hre chhuak a, kei phei chu naupang chhia takin ka nui vak vak ringawt.

Kan awmna hmun thar, thingtlang khaw lian leh boruak nuam ve takah chuan Bus a service a, chumi hmang chuan khawpuiah kan kal nghal a, lei tur leh tihtur kan ngah khawp mai.

Khawpui kan thlen rualin thawmhnaw leh thil chi hrang hrang kan lei nghal ṭawk a, home delivery thlengin kan tih tir nghal vek bawk.

Hunter-a chuan Pick Up Truck a lei leh a, a thil lei ber kher lah chu amah nen an inhmeh thlawt a ni. Amah a palianin a sang bawk si, a thil lei lah a tê chhe zawk zawk bawk si lo, kei chu Truck leh amah lakah chuan tê tak ka ni.

Dinner tur leh Breakfast tur te thleng chuan kan inlei haw nghal vek a, kan in thara bungrua neuh neuh a awm sa thlap avangin thil dang chu kan lei buai duh rih ta lo.

Dinner kan ei dun lai chuan sawi tur hre lo ang mai hian a ngawi reng a, kei erawh ka ṭawng duh bawrh bawrh hle. Kan awm dan zel tur te chu ka sawi pui a, a sawi tawi thei khawp mai.

A tum dan chuan kan in chu sak ṭhat titih deuh vek a duh a, a sawi tâkah chuan kei paw'n ka duh hnuhnawh ve leh nghal.

"Kan la him chiang lo a nia" khumah taksa insi rialin kan mu a, a thu rawn sawi chuan ka hlimna a thlawh bo tir nghal vek.

"Enge i sawi awmzia? Hmun hla takah kan kal tawh a ni lo'm ni?" amah en ran chung chuan ka ti a, ani paw'n min en chiang hle.

"Kal tawh ngei e, mahse kha putar mitmeng duham zet kha eng tik niah emaw chuan a lo kal leh dawn"

"Pu William-a kha maw!? Engati nge a lo kal leh ang? Amah chu em ni kan la him chian loh chhan nia i sawi?" ka lo ti thuai thuai a, eng tak nge a sawi tum chu ka hre lo.

"Aw, sum tam tak kan nei tih a hria a, chu chuan a rilruah thil sual tih hreh lohna a awm tir a ni. Naktukah pawh a ni thei, zaninah pawh a ni thei, inring renga kan awm a ngai" a aw chu a chang tluan chhuak vek.

"Pu William-a ber kher maw!? A va mak ngai dawn ve le, ani chu kan tan mi ṭha takah ka lo ngai hman asin" a âwma bei chung chuan ka ti a, ani paw'n min lo kuah khawm nghal hlun hlûn.

"A tirah kha chuan i ngaihtuahna ang tho kha ka pu hman, mahse tunah chuan a rilru chhungril kha ka hmu thiam vek tawh"

"A nih chuan min chhuahsan ngai miah suh, kan in ni tawh mah se i tel lo chuan ka hlau ru tlat a nia" ka tih rualin ka chalah a rawn fawp zeuh a, thaw veng deuha awm tum tawh si kha ka hlauthawng ru leh ta em em zawk.

"Ka bulah i awm reng ang, engtik lai pawhin ka bulah i awm reng ang, i awm lo thiang lo" tiin min kuai dak a, min fawp leh nghal chat.

"I mu zawk teh ang Hunter, zing tho thei lo khawpin kan chau palh ang e" min fawh laia ka nam sawn avang chuan min en hâw a, a hmel chu a nuihzat thlak tawp.

"Ka chau hleinem Darling, ka mamawh lutuk zawk che" a tih chuan nui ver ver hian ka lo melh a, a thusawi tawi tê chuan min tihlim tak zet.

"Min mamawh maw Hunter!? Min mamawh thu chu hriat nuam tak zawng a va ni em, hriat fô ka duh tih i hriatthiam ngei ka ring bawk" tiin ka che thut a, a mal chungah chuan ka ṭhu nghal hmak.

"Hriat fô i duh phawt a hnu le Darling, mahse i hre ning thuai ang tih erawh ka hlau khawp mai, a chhan chu engtik lai paw'n ka mamawh reng si che a"

"I sawi uar mah mah lo maw Hunter, kei ang hmeichhia thil chin chang pawh la hre lo hi engtik lai pawha min mamawh ka ring leh chiah lo a ni"

"Ka thusawi awih leh awih loh chu i thu thu alawm, thudik ka sawi zia erawh ka fiah thei thung, tun darkarah ngei pawh hian"

"Fiah mawlh rawh Hunter, kei ang bawkin min mamawh ṭhin tih leh min thlahlel ve ṭhin tih chu han fiah teh le" ka ṭawng zawh rualin a rawn che nghal thut a, ka lung a tawp hma chu ka mipa hmangaih ni reng se ka duh.

A tuk zingah chuan ka rin ang ngeiin thawh kan hai chiang hle a, mahse a hlimawm letling phian. Min mamawhna a sanzia tih lan na'n vawi tam Sex min hman pui kha a ni a, kei chuan ka lo ringhlel phal tawh lo hrim hrim. Min mamawh rawh se, min thlahlel ve em em rawh se, chu chu ka hlimna tur leh ka duhthusam a ni.

Khawpuia hnathawk ṭhin te leh kan awmna thingtlang khuaa hnathawk ṭhin te chu kan in siam ṭha turin a ruai ta reng a, mahse a langa pau takin pawisa erawh a phawrh tawh ngai lo.

In sak ṭhat man leh siam man zawng zawng pawh a rate dik tak vekin a pe zat zat tawh a, pu William-a laka a chet dang ang mai mai chuan a che tawh lo chiang khawp.

Kar khat chhung in siam ṭhat na'n hun kan hmang a, hnathawkho awm lai chuan Hunter-a chu ka hmuh phak lovah a awm ngai lo.

English ṭawng an lo thiam deuh fûr avang chuan kan inbe pangai thei em em a, inbiak tui deuh chang kan neih te chuan Hunter-a chu a lo meng ling nasa thei khawp. Ka bulah kher dingin ka mi biakte chu a en chhuk run zel a, ka laka a awm dan vel chu nuam ka ti thlawt.

"Nizan lamah khan i phur viauin ka hre si a, i phur leh vak na nge?" harh chhuak zawkin Hunter-a lam chu ka hawi a, ka nui sen sen nghal bawk.

"Ka phurzia chu i hria alawm, hun kal tawh ka lo ngaihtuah let mai mai maw le" ka tih chuan ngawi reng hian min en a, a lungawi loh hmel leh ta hle.

"Hun kal tawh ngaihtuah let tawh suh ka tih che khâ, thil awmze nei lo mai a ni" a rawn ti chang rût a, ka lo nui lui sak.

"Awmzia chu a nei chiang alawm, hmelma niin chhiahhlawh ni lo ila chuan keini pahnih hi kan intawng miah nâng"

"I kal teh ang, thil pawimawh tak tihtur kan nei tih i theihnghilh hma hian" ka banah chuan a rawn vuan a, min kai zui nghal.

"Theihnghilh bik lûl lo ve, vawiina kan thil tihtur hi mang ramah pawh ka la mang ngai lo" a hruai ang anga kal pah chuan ka ti a, ani erawh a ṭawng leh tawh lo hrim hrim.

Nupa, chu thumal khat lek chuan ka rilru zawng zawng a luah khat vek a, a chhan pawh Hunter-a nen chuan nupa kan nih ve tawh dawn vang a ni.

Khawpui lam pana kan kal lai chuan hlim tih hriat takin ka nui deuh reng a, ka bula mi erawh kei angin hlim hmel pawh a pu lo. A zia ve hrim hrim kha a nia, ka phut buai duh lo, ngaiah ka nei tawh a ni mah zawk.

Court-ah kalin inneihna lehkhaah chuan kan hming kan ziak a, kan hming chu kan Sign hnan thlap bawk. Chumi tih na'n chuan hun rei tak pawh kan hmang lo, kan inneihna chu a awlsam khawp mai. Register-ah kan hming chu kan ziak leh thlap bawk a, chu ni chu kan tlan bo hnua ka hlim ber a nih ngei ka ring.

Inneihna kan tih fel hnu chuan hmun hrang hrang kan fang kual a, Honeymoon hman kher erawh ka phut lo, a bula awm chu ka tan chuan Honeymoon a ni mai.

Dinner pawh khawpui chhunga Hotel changkang takah kan ei a, han titi pui lûam tura ṭawng tam chi a nih loh avangin thil kan sawi tam lutuk lo ṭhin, mahse ka biak hi chuan min chhang ve leh mai zel tho.

Kan in kawt kan thlen chuan motor ka hawn hmain min lo hawn khalh thuai a, zo tak hian min pawm a, in chhung lamah min kalpui zui nghal bawk.

A nghawngah te chuan ka lo kuah ve tak nâ a, ka kuah nghet hran lo, min thlauh dawn lo tih ka chiang lutuk a ni. Khuma min nghah rualin a thawmhnaw chu a phelh sawk sawk a, kan tihtur chu ka hai lo chiang hle.

Denmark rama thla 1 kan awm hnu chuan thingtlang khuaa mite paw'n min lo hre chho ve ṭan a, khawlaia inbiak chang pawh kan nei ve ta nual.

Hunter-a hnenah chuan hming thlak a ṭhat leh ṭhat loh ka zawt fô va, mahse ani chuan ṭul a ti vak lo a ni ang a sawi thui duh ngai lo.

Ka pasal berin a duh loh chuan hlauthawn awmah ka ngai ta bik lo, kei aiin a ngaihtuah kim dawn tih ka hria a ni. Ka duhthusam ang ngeiin khawpui lam aṭang pangpar tam zet ka lei haw ṭeuh a, tunah chuan kan in kawt leh a chheh velah chuan an awm leh fur tawh zawk.

Keiin pangpar ngaina em em mah ila ka pasal Hunter-a ve thung chuan a ngaina teh chiam lo va, enkawl pawh enkawl vak lo turin min ti nghe nghe.

Ni tin hun kan hmang dun a, chhun leh zanah inhmu nitin ṭhin mah ila amah ka thlakhlelhna chu a bo ngai chuang lo. Ka ei rawng bawl lai te chuan tihtur nei lo hian ka bulah a lo ding ngawi reng zel a, ka nui leh tut tut ṭhin.

"Daisy!! Harh rawh le Daisy" chu aw ka hriat rual chuan ka meng nghal thuai a, Hunter-a chuan min lo en chiang hle.

"Khum hnuaiah hian lo awm rih lawk rawh aw, a rei lo vang" ka tho phang bawk nen a thusawi chuan min tibo zual.

"Eng...Enge i sawi awmzia Hunter?" tiin ka aw chu ka thian kharh a, ani erawh ngawi rengin min pawm a, khum hnuai bulah chuan min awm tir ta tak tak.

"Rukru kan inah hian an awm mek a, mahse hlauthawng lo vang che, hun tam ka hmang lo vang" khum hnuiah chuan min nawr lut a, tihtur pawh ka hre lo.

"Thi suh aw" kal sawn mai a tum lai chuan ka lo ti a, ka kut la kanga fawp vang vangin min buk khum zauh a, a kal sawn zui nghal.

A kal liam aṭanga rei lotê ah silai puak thawm ka hre zui nghal a, mahse silai puak ri chu a ring miah lo, a zawi ang reng hle. Chumi hnuah mipa rum ham ham thawm ka hre zawm leh zat a, ka hlauthawng ru tawh tak zet.

Rukru ni lovin Hunter-a chu a thi ang tih ka hlau, a thih chuan ka thi ve nghal a ni mai. Ni lo, a thi lo vang, Hunter-a chu a thi hauh lo vang, thi thei a ni lo.

Thawm a reh vang vang hnuah kan in kawt aṭang motor thawm ka hre leh a, thil awmzia pakhat mah ka hre tawh lo. Motor rum vut vut thawm chu a hla tial tial a, a hnuah phei chuan a reh tlawk tlawk hi a ni ringawt.

Darkar 1 dâwn vel khum hnuaia ka bawh ngut ngut hnu chuan kan in kawt aṭang bawk motor in park thawm ka hre leh a, Hunter-a ni hram se ka ti.

"Daisy, Darling" Hunter-a aw ka hre chiah chu ka hawi chhuak thuai a, khum hnuaia aṭang chuan tawlh chhuak rang tak ka ni.

"Engati nge i reh vang vang? Ka ngaihtuah em em che asin, min thihsan ang tih ka hlau lutuk" mittui parawl ṭuam chung chuan ka ti a, ka biang chu a kutin a rawn khuap nghal.

"Ruang ka va paih mai chauh a ni" tiin ka hmuiah chuan a fawp zeuh a, nghet zetin ka kuah thlawp ringawt.

"Min kalsan tawh suh, min kalsan tawh miah suh" a kawra pawt ṭai chung chuan ka ti leh a, min pawm chho nghal dâwrh.

"Aw le, ka kalsan tawh lo vang che" tiin khumah chuan min mutpui a, awlsam takin ka hlauhthawnna chuan kiam lam a pan ta zung zung bawk.

"Kan nun hi a hahdam lo ka ti Hunter, nang nena thlamuang taka nun ka châk ve ngawt mai" ka ti sep sep a, min chhan dan tur chu ka ngaichang ru reng bawk.

"Nun thar kan mamawh" thum dupa a rawn tih chuan a hmel chu ka en thuai a, a ngaihtuah bing hmel hle.

"Pawisa, heng pawisa zozai hi tual ka thah ṭhin vanga ka neih a ni a, tunah chuan nang nena thianghlim taka hringnun hman ka duh tawh a ni"

"Aw Hunter, chutiang chu nangmah dik tak tur a ni" a thusawiin min hneh em avang chuan ka lo ti vat a, min en turin ka kuai kun zui nghal.

"I hmelma leh i chhiahhlawh ka nih lai aṭang tawh khan i rilru a chhe lo tih hi ka hre daih tawh asin, i thinlung chhungah hian hmangaihna tam tak a awm tih ka hre bawk" ka tih chuan a la ngawi ran mai.

"Ka hmangaih che" ti leh sepin a hmuiah chuan ka fawp zeuh a, a âwmah ka bei leh ta hle hle bawk.

PROTECTIVE HUSBAND

By

Havali Adam

Chapter 12

"Vawiin chu lo haw hma la Hunter, khawpui lama Dinner ei chhuah ka châk riau mai" tiin ka pasal hnathawka a chhuak tur chu ka ko ding a, ka lam chu a rawn pan ve leh mai bawk.

"Tehreng mai Darling, haw hma ka lo tum dawn nia" ka hmuiah a fawp zeuh a, ka dul puar lian ve leh tawh tak chu a fawp leh bawk.

"Ka hmangaih che" nui sen sen chuan ka en a, tun lai chu a tel lova hun rei lotê awm pawh a hrehawm zual, ka rai vang pawh a ni maithei.

"Kei paw'n" ka hmuiah chuan lungchim zet hian a fawp leh vang vang a, hmanhmawh hmel zetin a kal chhuak ta vut.

"Mommy, Daddy bulah khan ka kal ve châk tawh ê, a phal lo zel a" Hunter-a nena kan fapa Brian Hudson; kum 6 mi chuan a rawn ti nang nâng a, ka lamah ka lo hui thuai.

"Daddy chu hna a thawk dawn alawm, a hnathawhna hmunah chuan ramsa hlauhawm pui puite pawh an awm asin, i hlau ngawt ang" ka tih chuan ka taksa a rawn delh a, a ngaihtuah thui ve hmel khawp.

"Insiam ang le, School kal kan ngai a nia, Bus pawh a lo thleng ṭep tawh ang" tiin room lamah ka luh pui a, School kal turin ka siam zui nghal mawlh mawlh bawk.

Kan fapa Brian Hudson-a chu Elementary School-ah a kal ve thei tawh a, School a kal ṭan kum a nih avangin Grade 1 chiah a la ni bawk. Naupang fel leh harhvang lo tak mai hi a ni reuh a, mahse a pa ngen a ching em em ṭhin thung.

Kindergarden-a a kal lai phei chuan nuar ni len ṭhak te a nei ṭhin a, chu erawh a pa bula awm a duh vang a ni. Tunah chuan tlêmin kan lo lei kang ta deuh bawk a, nuar ni len emaw School kal duh loh tih vel a nei tawh ngai lo.

Kan in aṭang Bus Stand chu minute 10 vel kal a ni a, a kal dawnah ka hruai thlap a, a lo haw awm velah ka lo chang ve leh mai ṭhin bawk. Term tawp lam a ni leh der tawh avangin Brian-a pawh nakin lawkah Grade 2 a ni dawn a, amah pawh a phur tawh khawp mai. A zia zawiin harhvang lo mah se zawhna a ngah thei em em thung a, kei ai mahin a pa nen an inkawm thei zawk.

Ka fapa pa, ka pasal, ka mipa hmangaih em em Hunter Hudson-a chu ka fak lo thei lo, ka hmangaih lo thei lo bawk. A chhan chu ani ang mipa rilru nghet leh rilru ṭha lutuk ka tawng miau a, ka chhungte kha lo dam leh mah se ka pasal chu an ngaina ve ngei ang ka ring. Ka hmangaih a, ani paw'n min hmangaih bawk a, amah nena chhungkua kan din thei te chu lawm a ni.

Kha kum, Hunter-a nen Switzerland ram aṭanga kan tlan chhiat kum aṭang khan engkim a danglam vek a, kan nun dan thlengin a danglam chho vek a ni.

Kan sum neih zawng zawng tam tham zet chu ka pasal chuan Charity Fund-ah a chhung lut vek a, ka va han hmangaih zual phah tehreng em. Charity Fund lama sum lo vawngtu te phei chuan

"Ka pu, Billionaire i ni em?" an lo ti hial a, chutiang tak pawisa tam chu tumah hian an hlan phal emaw an pek duh ka ring lo.

Pawisa tam tak mi harsa zawk te ṭanpuina atana kan chhun luh ni chuan a Donate tu hming ziah a lo ngai a, mahse keini nupa chuan kan ziak duh lo ve ve.

A Donate tu hming zawnah chuan Unknown tih ziak mai turin thu kan ti tlu ta a, kan haw lamah te chuan hlim tak ka ni. Mi dang ṭanpui chu a nuam ka ti, mi dang ṭanpui theia kan awm ringawt te chu ka lawm tak zet.

Brian-a ka pai chhoh lai vel a ni a, sum kan mamawhna pawh a sang ang reng khawp mai. Kan pawisa neih lah a bei tham em em a, mahse lungngaihna pakhatmah ka nei lo.

A chhan chu ka pasal chuan ka mamawh engkim min leisak a, min ngaihtuah sak zung zung a, lungngai thei ka ni lo hrim hrim.

Lungngaih a hnekin ka hmangaih tulh tulh zawk a, ka thisen zawm pui dik tak te ai pawhin ka hmangaih tawh zawk hial a ni.

Ka pasal chu ka khawngaih ṭhin, ka tana hna a thawh rim lutuk avang chuan ka khawngaih ṭhin a ni. Kan awmna khuaa Factory pakhatah ni tin hna a thawk ṭhin a, a hlawh erawh kan pahnih chauh tan pawh a tam lo hle.

Min chawm zawh a tum luatah zan lam thleng thlenga hna thawh te pawh a nei fo va, kei chuan a lo haw hun ka lo nghakhlel thei hle.

Vawi khat phei chu eng hna ber nge a thawh tih hriat tumin ka zui ru a, mahse ka thil hmuh chuan min tiṭap lo chauh. Hunter-a, ka pasal Hunter-a chu amah aia tê zawk fê te'n chhiahhlawh ang maiin an lo tir kual zet zet a, ani lah chuan hnial eih lovin a ti zel mai a, a awm dan chuan ka rilru a tina tak zet. Kan ina ka luh rualin ka ṭap hawm hawm a, ka pasal chu ka khawngaih lutuk.

Chumi ni chuan nasa takin ka ngaihtuahna ka seng a, Charity Fund-a kan Donate tawh chu tlêma zawng tal lak chhuah leh mai ka duh, chuti lo zawng ka pasal chu hah lutuk avangin a thi mai ang tih ka hlau a ni.

A lo haw lai chuan chauh hmel zet hian a rawn lut a, min hmuh lawk loh vang a ni bawk. Min hmuh rualin a hmel a siam ṭha nghal thuai a, chik zetin ka lo en thung.

"Hna thawk tawh suh" tiin ka ṭawng chhuak tawl a, a hriatthiam loh hmel ngei mai.

"Hna thawh chu ka ngai si alawm" a rawn ti tawi ve ta sup.

"Ni lo, i duh chuan i thawk lo thei reng. Charity Fund-a kan Donate tawh kha tlêm tal la chhuak leh mai ang Hunter, chu chuan bul ṭanna lian tham pawh kan nei theih zawk ka ring"

"Ka sawi ngun viau khan ka hre si a, engati nge i sawi chhuah leh ṭhin Daisy? Thil thleng a awm em ni? I pum a nuam lo em ni?" ka dul chu a chul nghal ruai a, kei erawh ka lung a chhe ru tawh lutuk.

"Thil thleng chu a awm chiang alawm, vawiin khan ka zui ru che Hunter. Min hrilh teh, chhiahhlawh ang maia hna thawh kha nuam i ti em ni?" insum thei tawh lovin ka ṭap chhuak ta hak.

"Darling!! Min zui ru maw!?" hamhaih aw zeta a tih chuan ṭap feih feih chungin ka lo bu nghut a, a âwmah min kuah bet zui nghal.

"Khang pawisa te kha thisen chhuaha ka neih te an ni a, ka kawl duh tawh hleinem. Tunah chuan ka bulah i awm a, eng hna pawh thawk ila ka hlim lutuk tawh zawk"

"I hlim lo, hrehawm i ti ve tho, ka hre vek" ka lo ti ṭuau a, ka pasal nun dan inthlak danglam nasa lutuk chu ka khawngaih a ni.

"Ka hlim ka tih tawh khâ, hna ka thawh lai pawhin nangmah hlir ka ngaihtuah che a, ni lengin ka awm a nuam ṭhin zawk alawm" thum dupa tih pahin min pawm a, room lamah min luhpui zui nghal.

"Kan naute hi a lo pian hunah chuan tun let hian kan buai dawn a nia, hna dang tal zawng mai la" ka ṭah chu a chhuak hran tawh lo, mahse ka la pangai thei chiah lo thung.

"Ka hria alawm, vawiin khan ka kai sang chiah a" a tih chuan ka en nghal thuai a, a kai sanna chu ka thil hriat châk tak a ni.

"Eng hna nge i thawh dawn? Harsa deuh kha an thawh tir bik kher che ang e aw, ka phal miah lo che a nia, ka duh dan tak chuan khawpui lamah hna zawng zawk la ka ti"

"Khawpui lamah chuan zawn loh a fuh ber ang, naktuk aṭang chuan ramhnuai lamah ka che tawh dawn"

"I sawi awmzia chu thing i kit ṭhin tawh dawn tihna em ni?" chu bak ramhnuaia hna thawh tur awm ang ka hre lo, a nih ngei ka ring bawk.

"I sawi dik alawm, naktuk aṭang chuan i pasal hi thing kittu ka ni tawh dawn e. Min ngaihtuah suh Darling, ramhnuai ah ka tal ṭhang alawm, ka châk zawng tak a ni bawk"

"An chhawr lutuk bik che ang e aw, i tha chakzia hriain an tih ai zawng zawng an tih tir vek ang che tih ka hlau. Chu bakah ramsate an awm dawn a nia, fimkhur viau ang che"

"Aw le Darling, min ngaihtuahna aw kâ hi ka hre ning thei lo, i pum chhunga kan naute awm lai reng hian i taksa chhunga luh ka châk hle a ni" tiin min fawp zui buan buan a, ka lo nam sawn thuai.

"Inbual phawt rawh, i inbual hlanin keiin Dinner ka lo buatsaih ang e" ka tih chuan ka chungah a rawn bawk a, ka tal chhuak thei leh ta hauh lo.

"Chu rimchhia min ti deuh tihna em ni?" a hmelah chuan nuih insum hmel ka hmu tlat, chu chu khawvela ka thil beisei loh ber a ni.

"Hunter!! I nuih a za em ni?" mawl hmel zet chuan ka ti chhuak phawng a, ha langin a rawn nui ta, keimah zawk chu ka buai vek a ni ber.

"Oh My God!!! Hunter!!! I nui maw Hunter!? Han nui leh teh, i ha lang khan han nui leh teh Hunter" ka tih chuan a rawn nui leh a, rang takin ka âwmah ka kuah bet zui nghal hmak.

"Nui rawh, nui ziah rawh, i nui hmel hi ka hmu châk thei lutuk. I hun kal tawh ka ngaihtuah a, i nui ngai lo tih thlengin ka hria, mahse tun ṭum chu i nui hmel min hmuh avangin ka lawm tak zet a ni"

"Nui ve thei lo turah min lo ngai tlat tihna em ni? Mihring ve tho alawm ka nih, engati nge chuti ang em em tur chuan min lo ngaih?" ka âwmah chuan a la bawk run a, mahse ka pum ngaihtuah takin min delh na lo hle.

"Ka Maid pui te khan an sawi vek alawm, kei paw'n chu chu ka ring mai bawk. Tunah erawh ka hmuh lai ngeiin i nui a, ka lawmzia hi i hria em? Min en teh Hunter, ka mit hi en teh" ka tih chuan a awm dan a siam ṭha ve nghal.

"Ka hmangaih che, ka hmangaih lutuk che" a bianga ka kut pahnih nghat chung chuan ka ti mawlh mawlh a, a rawn che rang khawp mai.

"Khum lai zawlah nge Bathroom-ah i duh? Sawi thuai teh Darling, ka insum zo lo mai dawn" a zawhna avang chuan ka lo nui var var a, ani chuan ka taksa rem lai lai chu a fawp chhen tawh thung.

"Bathroom-ah a ni mai, i mitmeng aṭang pawh khan inbual dun i duh tih ka hmu thiam vek alawm" ka tih chuan ka nghawng vel fawp reng pah hian

"Duh i thlang sual lo e Darling" a rawn ti sup a, Bathroom chu kan thleng phei rang khawp mai, Dinner buatsaih pawh ka rilruah a lang ta lem bik chuang lo.

Chu zan aṭang chuan hlimna chhiar sen loh ka dawng ni tin ta a, pasal mi duat thiam tak ka nei tih chu ka hre chho chhunzawm nghal mawlh mawlh bawk.

Thla 6 a liam hnu chuan fapa ka hring a, a hmingah Brian Hudson tiin ka pasal chuan a sa a, a tirah chuan mak ka lo ti khawp mai. Kan fapa hming tawp leh kan nupa hming tawpa Hudson tih a la awm reng chhan ka zawh apiangin

"Nakinah i hre mai ang, tunah chuan hlim takin awm ang" a ti mai zel a, ka zawt zui lui duh ngai ta bik lo, min hrilh hun erawh a la neih ngei ka ring.

Kum 2 zen zawn chutianga hna a thawh tâkah chuan a hna thawh puite nen pawh an innel ve viau tawh a, Hunter-a pawh mi dang aiin la ṭawng tlem zawk mahse a ṭawng duh ve tawh khawp mai.

Ramhnuaia chetla ṭhang tih takah a thawh puite kâ aṭang pawh a chakzia leh tha a hman thiamzia chu ka hre fô va, mi pangai ang taka a nung chho thei chu ka lawmpui a ni.

Kei leh kan fapa chu min duat awl lo va, a rawn haw apiangin thil eng emaw tal hi min lo hawn ziah ṭhin. A kut ngeia a thah ramsa lo hawn leh nulh hi a ching reuh hle bawk a, Dinner pawh kan ei tui thei khawp mai.

Brian-a kum khat a tlin aṭang thing hmanga siam Toys chi hrang hrang lo hawn a ching leh a, chutiang mizia chu Hunter-a'n a nei ang tih tûma'n an awih ka ring bik lo.

"Darling, zanin chu Dinner kilpui tur mi pahnih pathum vel kan nei ang aw" insiam mawlh mawlh pah hian a ti a, Brian-a chuan a pa a lo ko ri lawng lawng bawk.

"Tute nge ni dawn a? Kan inah mi dang i vawi khat rawn hruai luhna tur a ni si a, ka hamhaih deuh, i ṭhiante em ni?" ka tih chuan khi suk chung hian

"Ṭhiante!" tiin a phun sup a, a nui tawi ang reng hle.

"Ṭhian chu a ni mai, ṭhian ka nei ang tih pawh ka ring miah lo Darling, anmahni zawk hian min be peih viau lo se chuan ka ngaina tehchiam lo vang" a rawn tih zawm leh zat a, a nui ri zui hak bawk.

"Ṭhian neih chu a ṭha alawm, hun kal tawha mi ang khan awm tawh lo la, ṭhian tam tak nei zawk rawh" ka tih lai chuan Brian-a bawk a rawn au ri leh lawng lawng reuh a, eng tak chu duh ang maw!

"Ka lo kal e" tiin Hunter-a chu a fapa kohna lamah chuan a phei a, rei lovah ṭap thawm ka hre zui nghal.

"A dang ka siam leh thei alawm, ṭap tawh suh le Buddy" Hunter-a chuan a fapa chu a rawn pawm chhuak a, Brian-a erawh a la ṭap hliam hliam tho.

"Engati nge i ṭah leh tâk Brian?" ka lo ti ve nghal zat a, a thil eng emaw tak chu a chhia a nih ka ring.

"Daddy Toy min siamsak kha a chhe daih, keima'n ka tibung palh a, ka ui lutuk" a pa dara vuan ran chung hian a rawn ti a, ka chhan ngai lovin Hunter-a zawk chuan

"Vawiinah ka lo hawn leh ang che aw, vawiinah tam deuh ka lo hawn dawn che a nia" tiin a fapa chu a thlem a, a biangah chuan a fawp zeuh bawk.

"Promise em?" a tih rualin Hunter-a chuan rang zet hian

"Promise chiang lutuk" a lo ti thuai a, lawm tih hriat zet hian Brian-a chuan a pa chu a kuah a, a ṭap tawh lo hrim hrim.

"Ka hmangaih che Daddy" kan fapa tê chuan a rawn ti leh reuh a, ka pasal chuan a chhaih nui uar uar nghal.

Chhun pachan lai tak a ni a, kan in kawta Daisy par thli thawin a len phe suau suau chu ka en reng a, ka hun hman mek leh ka hun kal tawh chu ka tehkhin lo thei lo a ni.

Hmânah te kha chuan tleirawl mai niin pangpar hnuaia mut te kha ka ching a, tunah erawh chhungkaw nu niin fapa hial ka nei tawh a, naute neih leh thuai beiseiin ka rai leh mek bawk.

Tihtur ṭul lutuk ka neih loh avangin nuate kawr tur chu ka phiar a, kan Veranda-a ṭhu thleng buk auh auh theiah chuan ka ṭhu hle hle a, ni sa deuh mah se chhun boruak chu hip a nuam ang reng hle a ni.

Ni a sa e ti lo chuan thli a thaw heuh heuh pah reng a, tun lai tak phei chu thli tleh leh ruah sur a awm zeuh zeuh a, ni pawh a lang rei ngai lo.

Brian-a te School Bus lo thlen hun awmah chuan kawngpui bulah ka lo ding reng tawh a, ka hmaa School Bus a din rualin ka fapa chu a lo chhuk nghal a, ka kutah a rawn vuan zui nghal hmak bawk.

Kan haw kawngah chuan ka be siam siam a, ani pawh a hlim khawp mai. An thil zirlai te chu ka zawt a, kawnga lungtê chhuih neuh neuh pahin min chhang ṭha thei hle.

In kan thlen hnu chuan a thawmhnaw ka thlak sak a, Bathroom-ah hruai lutin ka inbual tir nghal bawk. Ni dang ang bawkin ngawi reng hian a nghal leh reuh a, tui hmangin kan infiam leh ta chiam.

Ka pum chhungah naute a awm tih theihnghilh ṭhak khawpin ka lo infiam pui leh ṭhin, Hunter-a chuan min hmu se min hau leh ngei ang, ani chuan pangpar ka buaipui tak ngial pawh a phal lo.

"Mom, Daddy hi a lo haw tawh dawn em? A lo haw har ê, ka Toy tur ka hmu chák tawh" motor lem lema chuang chung hian ka fapa chuan a rawn ti a, ka lo nur nang thung.

"Daddy chu a lo haw hma dawn alawm, chu bakah vawiin chu i va ngai hma ve, thil hrilh tur i nei em ni?" ka tih chuan a bu nghauh ngauh a, Hunter-a chiah chiah hi a ni mai.

"Chuan maw kan Miss te'n Carnival kan nei dawn an tia, next week-ah kan nei dawn a, tah chuan Daddy nen in lo kal ve a ngai aw Mom"

"Aw le ka fapa duat, lo kal teh" tiin ka pawm kang a, lian ve viau tawh mahse ka la pawm thei zel tho.

"I pum chhunga naute awm hi ka hmu châk tawh ê, Daddy khan mipa a ni dawn a tia" a rawn ti leh reuh a, a ṭawng duh ta viau chu ka hrethiam lo lek lek.

"Nang chu châk i ngah ê Brian, Daddy te lo haw huna eitur siam daih ang aw" tiin chhuatah ka nghat a, choka lamah ka phei pui zui nghal.

Ka pasal leh a ṭhiante an lo haw huna eitur chu ka siam mawlh mawlh a, Brian-a erawh a Toys khalhin ama room-ah a infiam leh daih tawh.

Ka thiam ang angin Beef Enchilada Casserole leh Chicken Tortilla Stack chu ka siam a, ka têm ka tem chhin paw'n a tui ve viau chuan ka hria.

Beef chu Hunter-a sa duh ber a nih avangin kan lei lawk ṭeuh zel a, kan khuaah chuan sa lei tur tam ber a ni nghe nghe. Chicken lam hi chu zuar awm tho mah se a tam lo, mahse kei chuan ka duh deuh mah zawk thung.

Drinks atan Juice chi hrang hrang ka siam lawk vek bawk a, ka theih ang tawka ṭhain ka lo inbuatsaihna nasa ve khawp mai.

Ka pasalin kum 6 hnua a ṭhiante kan ina a rawn hruai luh hmasak berna tur kha a ni miau a, kan chhungkaw tan leh Hunter-a atan chuan ni chhinchhiah tlak tak a ni.

Ka tan ngei pawh hian a chhinchhiah tlak, engkimah ka pasal tan chuan nupui ṭha ber ka nih theih na'n a duh anga awm zel ka duh bawk.

Tlai dar 3 velah Hunter-a leh a ṭhiante pathum chu an lo thleng a, an lo bengchheng lut khawp mai. Min fawh zeuh hnuah Hunter-a chu a fapa room-ah a lut nghal a, chu chu a lo haw apianga a tih dan a ni.

A hmel ka hmuh tirh khan a kutah thing hmanga siam thil eng emaw ni a keng khan ka hria a, a fapa tana a lo hawn a nih ngei ka ring.

Hunter-a ṭhiante pathum chu pa an ni deuh vek tawh a, tlangnel taka awmin an titi tui bawrh bawrh hle. Kei pawh ka ei rawng bawl lai mi fiam zeuh zeuh an ching a, hawihhawm takin ka lo nuih pui ve mai zel.

An zinga pakhat erawh a ṭawng dan leh min biak dan chu ka ngaina lutuk lo, min biak paw'n a ṭhiante angin ka chhang ṭha vak duh lo nghe nghe.

Dinner kan ei lai chuan Hunter-a ṭhiante chu an ṭawng leh malh malh hlawm a, kei leh ka pasal leh kan fapa chu a ṭawng tlêm pawl kan ni daih zawk.

Ṭhian an nih miau avangin Hunter-a chuan an titi a zawm ve zeuh zeuh a, a fapa biakna erawh a ṭhiante biakna ai paw'n a ngai pawimawh ber thung.

"I pasal tha chakzia hi Factory lamah chuan kan sawi ber zel asin pi Hudson, ani hi awm lo se chuan kan hnathawh pawh a sawt mawh thei khawp ang" Hunter-a ṭhiante zinga pakhat chuan a rawn ti a, a sawi dik pawh ka ring.

"A lawmawm lamah ngai ang, mahse in lo chhawr hah lutuk ang e aw" fiamthu deuh tak chuan ka ti a, ka mi biak bera pawh chu a rawn nui chhuak ve hawk.

"Hah reng a hre ve lo i pasal hian, hetiang em ema tha nei ṭha mihring hi ka la hre lo. Vawi khat phei chu kan thing kihin min delh ngei turah ka ngai tawh a, mahse i pasal hian amah chauhin thing chu a lo nam sawn maw le" a tih laiin a bula mi chuan

"Kha chauh a nih loh khâ, sanghal pawh amah chauhin a that thei a nia, nupui fanau humhim thei tur pasal ṭha tak i nei hi lawm hle rawh" a rawn tih zawm zat a, min nuih sun sun bawk.

"Duh tawk teh u ṭhiante u, in sawi uar mah mah a nih khâ, chutiang em emin ka tha a chak bik hleinem" Hunter-a chu a rawn ṭawng chhuak ve ta, mahse a ṭhiante chuan a thusawi chu an pawmpui loh hmel hle.

"A nih reng kha maw le, intihbuai ni khuaa mi dang i ṭhelh hnehzia te kha sawi chhuak law law ang u. Bul han ṭan teh Kyle, sawi ngaihnawm dan i thiam ber ang" a ṭhianpa pakhat chuan a ti a, a bula ṭhu chuan aw a rawn thian ta kharh kharh.

"Kan thawhpui pakhat hi hlawhah a lungawi lo va, chumi ni chuan buaina a chhuak nasa khawp mai. I pasal hian a ṭhelh hlawm thuai a, thing tliak ṭhuai ṭhuai khawpa an vuak pawh khan i pasal hi a pai chhe tê lo, amah chauh khan a ṭhelh fai vek zawk" Kyle-a chuan a ti siam siam a, Hunter-a lam hawiin ka phawk deuh hrâ bawk.

Dinner chu tui ti tak leh inngeih tlang takin kan ei ho a, rawn ei ziah turin ka sawm nghe nghe. Ka pasal ṭhiante zinga ka ngainat vak loh chuan zu hi a lo keng ru reng a, Dinner ei zawh chuan an in ta sap sap mai.

Hunter-a chu ngawi rengin ka en a, zu in ka phal lo tih a chian em avangin a ṭhian te'n an thlit sak pawh chu a lem duh lo hrim hrim.

Ka ngainat lutuk loh pa chu a rui berah a rawn ṭang ta, a ṭawng dan chuan ka awm a tinuam lo telh telh bawk. Min it thu leh rai ka inhmeh thu te chu rui tawh tih hriat takin a sawi chhuak phawng phawng a, a ṭhiante pawh chuan an khap dai zo ngang lo. Ka awmna lama lo kalin ka hnute chu a rawn si ringawt mai a, a kut ka beng sawn nghal thuai.

"Haw thuai ula a ṭhat zawk ka ring" Hunter-a aw chu a thum ṭha rem rem hle a, ka hnute lo khawihpa chu zo zet hian a pu lâwp bawk.

"Nia, kan va haw ang e, a rui tawh mah mah a nih dawn kha!" pakhat chuan a lo ti leh a, pawn lama chhuak Hunter-a chu an zui ve nghal mai.

Motor thawm vel a reh fel hnu chuan ka pasal chu a rawn lut a, a hmel chu a rum ṭha khawp mai. Tui chu a in ri khawlh khawlh a, dawhkanah bottle chu a nghat per chhawk bawk. A chet dan avang chuan ka lo phu zawk a, ani chuan min ngaihtuah tawh lo hrim hrim.

Kan room lamah vung zet hian a kal a, a thinrim chhan ber chu a ṭhianpa'n ka hnute a khawih hman vang kha a niin ka hria, mahse khawih tir kha ka tum a ni bik hauh lo, a rawn chet thut vang a ni mah zawk.

Kan nupa room-a ka luh hmain Brian-a chu a mut ṭhat tawh leh tawh loh ka en dik hmasa thlap a, a lo mutui tawh khawp mai.

Kan nupa room ka luh chuan tukverh bula ding run ka pasal chu ka hmu a, pawn lam hawiin min hnung chhawn tlat bawk.

Ka thawm chu a hre vek tih ka hria, mahse a che sawn lo hrim hrim. A thinrim lai a nih avangin biak loh law law chu ka duh ta zawk a, mahse ka awm chu nuam lo tak a ni.

A saisir zawngin khumah chuan ka inthawlh a, thawm dang chhuah tawh lovin ka ngawi kar bawk. Kan nupa khum hniam sutah chuan ka maimitchhing vat a, min rawh kuah rual chuan ka ṭang nghal ṭung.

A lamah min pawh phei tum ni awm tak hian ka darah a rawn kuai a, mahse ka lo ṭang tlat thung. A thaw ri deuh hawk chu ka hre reng, a lam erawh hawi ka tum lo a ni.

"Darling" a aw ka hriat rual chuan rizai chhungah ka kut ka hum ruh nghal a, nghet takin ka mit ka chhing thuai bawk.

"Daisy" tia min kawih her a tum pawh chuan ka lo la ṭang tlat a, ngawi renga min chawi kan lâwp lai te chuan ka mamitchhing tlat.

"Meng rawh le" a taksa chung lama min bawh tir hnu chuan a ti sup a, ṭawng lovin kei chuan ka lu ka lo thing ta vat.

"Min en hram teh Darling, ngaihdam dilna tur che ka nei a nia" a tih chuan ka chhungril chu a sa pup pup a, ka ṭah chu a rawn chhuak zual sauh.

"Meng rawh leh Darling" ka biang zut paha a rawn ti leh chuan zawimuangin ka meng chhuak a, a mitah chuan thinrimna ka hmu tawh lo.

"Ka tihpalh, nichin lawka ka awm dan avang khan ka tihpalh" tiin ka hmuiah chuan a rawn fawp zeuh a, kei erawh ka ṭap chhuak ta feih feih.

"Kum tam tak, kum tam khati anga i thinrim hmel kha ka hmu tawh lo asin, i hlauhawmzia i hre lo a ni Hunter" ka tih chuan nghet zet hian min kuah a, a hma aiin ka ṭap ring zui nghal.

"Min hlau suh, hmana i hriat ṭhin Hunter kha ka ni tawh hleinem Darling"

"I thinrim kha chu awm ka ti ve tho, mahse i ṭhianpa kha ka taksa sik tir ka tum bik reng reng lo, ka inrin hmain amah khan a lo si ringawt a nih kha"

"Ka hria e Darling, ṭap tawh suh le" dam zet hian a rawn ti a, ka chhip samah chuan a fawp vang vang bawk.

"Min hmuh tawh suh Hunter, i thinrim hmel kha ka hmu duh tawh lo, hlauthawng takin min siam tawh suh" mittui nen amah en kar chung chuan ka ti a, ani paw'n duat hmel takin min en ve ran bawk.

"Aw le, ka thinrim khum tawh miah lo vang che" a tih chuan a âwmah bawk ka bei leh a, ka dul puar chuan min do deuh tlat avangin ka saisir ta thuai.

"Ka thei tawh emaw ka ti asin le, mahse zanin zet kha chu ka insum hman lo leh ṭep a ni. Ka kut hian mi thah a la châk zek zek zel a, mahse nang nen nun thar kan hman tawh avangin a thiang tawh si lo" a aw aṭang chuan a lungngaih ve hmel hle.

"Vawi khat mah ka ṭhiante ka rawn hruai lut leh tawh lo vang, chu chu kan chhungkaw tan a ṭha ber bawk" nghet charh hian a ti leh a, a thusawi ang chuan a tih ngei ka ring.

"Ka tihpalh a ni e Darling, chuan kan fapa lo piang tur hnenah pawh ngaihdam ka dil nghal ni rawh se" a ngawih vung vung hnu chuan a ti leh sup a, kei chu ka lo pangai tawh viau.

"Mipa a ni ringawt bik nâng, kei chu hmeichhia ni zawk se ka ti" ka tih chuan a lo rum nghut a, ri si lovin ka nui ru ver ver.

"Hudson thlah reng reng hi mi ṭha an awm ngai lo, mahse kei chuan chu chu ka thlak dawn a ni. Brian-a leh kan fa lo piang tur hi chu ṭha takin ka enkawl seilian ngei ang"

"Enge i sawi tum Hunter?" ti sepin a dar chu ka ngheng ṭha a, a âwm chu kawr chhanah ka khawih pah neuh neuh bawk.

"Keimah aṭang hian Hudson thisen hi mi ṭha takah ka chhuah dawn alawm Darling, ka thei ngei bawk ang. Ka fate hi keimah ang lo takin nun pangai ka pe ang, tual thah hmang ni ve lo turin"

"Ka hmangaih che" ti sepin ka mit chu ka chhing vang vang a, ka pasal thusawi chuan ka rilru chhungril kil khawr lai ber pawh a tihlim thei a ni.

"Chuan muthilh i tum ringawt a!?" min biak dan vel kher chuan ka nuih a tiza, nghet zeta kuah chung chuan ka nui chhuak ta hak.

"Min ngaidam a ni tih nemngheh na'n eng emaw tal chu ka tih i phal dawn lo em ni?" a mut dan chu a siam rem a, ka lam hawi zawnga lo saisirin a ban min kham tir nghal zat bawk.

"Ka pum chhunga mi hi i ngaihtuah leh ngaihtuah loh a ni mai" meng chuang lovin ka lo ti ve ta kauh, chuti anga han infiam vel chu a nuam reuh tawp.

"Ngaihtuah tehreng e, a lo chhuah thuai theih na'n hian ṭan lak a ngai a ni" ka biang leh ka nghawng vel chu a fawp a, ka mawmawh zia chu sawi lo mah ila a hriatthiam vek ka ring.

"Darling, ka dim viau ang che" ti leh supin a nih dan tur tak chuan a chet zawm ta mial mial a, min sawngbawl dan leh min tawhna te chu nuam ti em emin ka rum chhuak leh ta hawk.

PROTECTIVE HUSBAND

By

Havali Adam

Chapter 13

Friday chawhma lam a nih chuan Brian-a te School-ah Carnival a awm dawn avangin kan buai tlang hle a, Hunter-a pawh a hna lam ṭhulh ṭhakin kal a tum ve bawk. Brian-a chuan lem chan tur a nei reuh a, an Section bikin lem an chang dawn a ni mah zawk. A thawmhnaw hak tur ka leisak sa chu phawrh chhuah harsa lo turin Bag-ah ka dah a, amah Brian-a ber pawh a phur tawh hle.

Hunter-a hovin kan chhungkaw motor-ah chuan kan chuang a, Brian-a chu a pa kap karah a ṭhu kâk a, motor khalh ang maiin thawm a chhuah nasa ve khawp. A kutah a pa siam sak Toy pakhat chu a hum reng bawk a, a bulah chuan engtin pawh awm se a thlamuang hliah hliah a ni tih a hriat hle. Thil eng emaw sawiin ka ṭawng deuh barh barh a, Brian-a leh Hunter-a erawh an ngawi leh ran tawh.

School kan thlen chuan ṭan hun aiin la hma viau mah se mipui an lo tam phian a, kan zi nuai nuai mai. Maksak deuh deuha inthuam naupang pawh an kat fûr a, chu chuan Brian-a chu a tiphur hle tih ka hre ru kar bawk. Rai puar ka nih avangin ka kal chak lutuk thei lo va, ka pasal chuan min ngaihsak thiam khawp mai.

Mi pasalte angin mawi takin inthuam lo mah se a inthuam dan chuan ka lung a tiawi em em tho a, a chhan chu ka pasal a nih mai bakah ka mipa hmangaih a ni tlat.

A nun hmasa lama a lo hak fô ṭhin Coat suit tak ngial pawh a ha duh tawh ngai lo va, Jean kekawr chu a kekawr ngainat ber leh a hak ngun ber a ni ta zawk.

Eizawnna lamah pawh mi pasalte chu a tluk miah lo, an thla khat hlawh leh ka pasal thla khat hlawh chu a inthlau viau ang, mahse ka pasal chuan a chhungkua min chawm zo em em tho.

Kan mamawh lei na'n leh kei leh a fapa chawm na'n rim takin hna a thawk ṭhin a, ama thil tur pawh lei tura ka tih paw'n a lei ngai lo hial zawk ṭhin.

Kei a nupui lah hian eng hna mah thawh ka tum leh bawk si lo, thawh tum leh pawh ni ila a phal lo leh ngei ang. Vawi eng emaw zat kha chu pangpar dawrah thawh ka tum tawh ṭhin a, duh chu ni ila ka thawk thei reng bawk, mahse Hunter-a ber chuan a phal lo tlat zel a ni.

Hunter-a chuan a hnathawh haw apianga kan in ngeia ka hmel hmuh a duh ṭhin a, chuvanga hnathawh phal ngai lo pawh chu a ni.

Ani chuan atan Dinner lo siama in chhung lo enkawl vel chauh chu a duh a, amah nen fa tam tak nei ila a duh bawk a, chu tê chauh chu a thil duh a ni.

Chu bak thil dang duh a neih thu a sawi ngai lo, amah ang em ema mihring inthlak danglam leh rilru ṭha chu khawvelah ka la hre lo.

"Kan fapa chu âw, ka va'n hmu châk tawh reuh tak! Kan pahnihin kan en bawk si a, nuam a ti viau ang ka ring" ti siam siamin ka bula ṭhu ka pasal chu ka bia a, ani chuan ṭawng lovin ka kut chu a rawn hum ringawt thung.

"Ka rin aiin mipui hi an tam phian bawk, chhungkuaa len chhuah hi kan la nei miah lovin ka hria" ka tih leh chuan min en zeuh a, hma lam a en zui ve leh mai.

"Kan leng chhuak dawn nia, hun awl ka neih hmasak berah ka len chhuahpui dawn che u a nia" a rawn tih tâkah chuan a darah ka lu ka nghat a, a sawi ang chuan a ti leh ngei dawn tih ka chiang.

Stage-ah chuan naupangho an lo chhuak sup sup a, mipui lam pawh kan lo au nasa hle. Brian-a te Section chuan thiam tak mai hian hman lai thawnthu an chang sep sep reuh a, a sipai kawr chu inhmeh tak a ni. A rualpui te zingah pawh a lian deuh bik lârh a, chu chuan a pa a chhun dawn tih a tilang chiang hle.

Lemchan a zawh chuan Brian-a chu Stage aṭanga chhukin a nu leh pate min lo zawng nghal thuai a, min hmuh chuan a nui ta ver ver. A inthuam dan ngaiin a la inthuam reng a, an Teacher te'n phelh an la phal loh vang a ni. A pa kap karah a ding awn dûai a, eng eng emaw chu a sawi ve leh ta neuh neuh.

Hall pawn kan chhuah chuan an lo phusa nuai nuai hlawm a, naupang ṭhenkhat chu an lo inhliam hman bawk. Brian-a chu a ṭhianpa pakhat hian a lo ko hrang a, keini paw'n a kal chu kan lo phal ve mai.

Kan fapa a ni a, ngaihtuah ru hle mah ila kan awmna aṭang a awm hla lo tih kan hriat tlat avangin kan hlauthawng em em hran lo.

Hunter-a nen chuan kut inkai rialin kan kal kual vel a, titiin be siam siam ṭhin mah ila a rul tawk chiahin min chhang ṭhin thung. Kan hnung lam aṭang puitling vin taka ṭawng vak vak thawm hi kan hria a, keini nupa pawh chuan thawm lo chhuahna lam chu kan bengkhawn rang hle. Puitling pakhat hian naupang pakhat hi a lo hau vak vak a, chu naupang chu Brian-a ni tlatin ka la hre zui.

Hunter-a kut la vuan reng chung chuan an lamah ka kal thuai a, chu puitling pa lian ve tak chuan kan fapa Brian-a ngei chu a lo hau ngei e. A ṭawng dan aṭang leh a awm dan aṭang chuan a rui a nih ka ring, vin takin ṭawng mahse chhan enah pawh ka en duh lo, kan intimualpho mai mai zawk.

Hunter-a chuan Brian-a chu a pawm sawn thuai a, kan fapa lo hau mawlh mawlhtu hnung chhawnin Motor lam min panpui nal nal a, chu pa chuan buaina siam a châk ve hrim hrim te pawh a ni ang. Kan hnunga lo kalin a la ṭawng hmawk hmawk a, a tawpah phei chuan Hunter-a chu a cho ta hial mai.

"Hunter!" hlauthawng zeta ka tih chuan a nui suk a, motor kawngka chu a khar zui nghal hmak.

"I hlauhthawn ang khan thil a thleng dawn lo" ti supin a inher a, a bul lawka ding pa pakhat chu dawhthei zetin a en zui nghal.

"Eng vangin nge ka naupang hauh lai kha i lo pawm vel a? A pa pawh ni la ka hlau teuh lo che a nia, khati ang naupang fimkhur lo lutuk kha zilh hlek ka duh" chu pa chu a rilru a chhiat hle ka ring, naupang mai mai pawh a khing duh a nia.

"Ka fapa aiawhin ngaihdam ka dil a, chuan buaina kan duh lo bawk e" dam zet hian Hunter-a chuan a ti a, a insum nasa ngawt ang ka ring.

"I fapa khan buaina min siam alawm, min lo dang hauh suh ang che" tiin chu patling chu kan lam panin a rawn kal a, a tih tum chu ka hre nghal.

"Ka pu, buaina siam belh lo teh ang" tiin Hunter-a chuan a pawt let dâwr a, chu patling lah chu leiah a tlu tawp a, chutiang chuan tih tlutk a tum lo tih Hunter-a hmelah chuan ka hmu thei.

"Min nam vela maw!? Min cho tak tak em ni? I duh chuan ti chiah ila, ka khawih na khawp ang che" lei aṭanga thawh pahin a ti vin ṭhawt ṭhawt a, kei chu ka rilru a lo buai vek tawh.

"Ni lo, nam tluk che kha ka tum a ni lo" a ti hman ṭâwk tihah chu patling chuan Hunter-a chu a hnek zui nghal buan buan a, mahse pakhat mah a hnek fuh lo.

"Ka pu, duh tawk teh" tiin Hunter-a chuan a hnekna chu a lo bum hman zel a, mipuiho chuan an en duh khawp mai, ṭhelh pawh an tum lo.

"Hmela, ka kut hi i tuar dawn khawp, i tawrh hma chu buaina hi kan ching fel lo vang" tiin a hnek leh mial mial a, a tawpa tawpah chuan Hunter-a chu a indawh ta tawp.

"Ti khan min hnek fuh tawh e, buaina hi a reh tawh ka besei" Hunter-a chu kan lam panin a lo kal a, a hmelah chuan na tih hmel pakhat mah a lang lo.

Motor a khalh lai chuan a hmel ka en leh ṭhin, duh ngat se zawng a duh tawkin a sawp thei ngei zawk ang. Nasa takin a insum tih ka hria, amah cho em em tu leh a vawi khat kut thlak pawh dawl lo turin a cho tlat kha chu a tan chuan a tha nat thlak ngawt ang. Chutah buaina a duh loh avangin kut a inthlak tir ta zawk a, Hunter-a chu ka khawngaih ru tak zet.

Kan in kan thlen chuan Brian-a ka tifai nghal sawk sawk a, ka fapa aiin ka pasal chu ngaihtuah a ngai zawk mahin ka hria. Tlai chhe lutuk lo a la ni a, Dinner buatsaih na'n chuan a la hma mah mah deuh a ni. Ka fapa ka bual fel hnu chuan kan nupa room-ah ka lut a, mahse ka pasal hmel ka hmu hauh lo.

Room aṭanga chhuakin ka pasal chu ka zawng nghal a, hna thawk tura a chhuah leh daih ka hlau a ni. Veranda ka thlen chuan ka pasal hmel ka hmu ta, ka rin loh lutukin Daisy pangpar bulah a lo ding ngawi reng a, eng nge a tih ang tih pawh ka ngaihtuah thiam mai lo. A awm dan chu a mak ka ti, ni dangah chutiang chuan a awm ngai tawp si lo.

A dinna lam pan chuan ka kal a, min hnung chhawn avangin ani chuan min hmu lo hrim hrim a, ka thawm pawh a hre kher lo vang.

Daisy par chu a khawih neuh neuh a, Hunter-a mizia hre chiang tan chuan a awm dan chu a mak thlawt a ni. Pangpar a ngaina ngai lo va, sik pawh a si duh ngai lo hial ṭhin zawk.

"Hunter" ti sepin a hnung lam aṭang chuan ka kuah a, ka dul chu puar lo se chuan ka kuah nghet ngawt ang.

"Nichin maia thil thleng avang khan pawi ka ti, i rilru tur ka ngaihtuah phei hi chuan i tan khan a harsa dawn lutuk tih ka hria" ka tih leh chuan a rawn inher a, a hmelah chuan a lungngai nge a pangai tih ka hre thei lo.

"I thiam loh engmah a awm hleinem Darling" ti thum dam dupin ka biang chu a rawn chul a, a khi zui suk bawk.

"Engtin nge i rilru ka tih nawm ang? Engtin nge i Mood hi ka siam ṭhat ang? Han sawi la, ka tih theih zawng a nih chuan i sawi apiang ka ti ang" ka thusawi avang chuan ha langin a rawn nui ve leh ta.

"Ka pangai tawh alawm Darling, Factory lamah ka va kal lawk dawn emaw ni ka lo tia" ka chala sam awm hui kiang pah chuan a ti a, a thu sawi chu ka pawm zawng a ni hauh lo.

"I la pangai miah lo Hunter, chuan kal lo mai rawh. Chawlh i la ve em em a, hna thawk tura i kal leh daih te'n a dik nâng" ka ti ta vat reng a, a palianin a sang bik bawk sia ka chhoh en deuh reng mai.

"Min ngaihtuahna awkâ hi hriat a nuam mang e!" tiin ka chalah chuan a rawn fawp zeuh a, Factory lama kal tumna a la nei tlata hriatna ka nei.

"Factory-ah chuan i kal lui dawn em? Hna va thawk pawh ni la i che sual mai ang, i la dik famkim miah lo tak tak a nia Hunter"

"Ka ṭha tawhah ngai rawh Darling"

"I ṭha tawh tak zet maw? I hmel leh awm dan aṭang hi chuan i la pangai lo chiang alawm Hunter, nupa kan nih angin ka lakah hi chuan engmah zep lo la ka duh a ni"

"Ramhnuaia va kal a, ramsa ṭhenkhat thisen va chhuah ka châk zek zek leh tawh. Ka kut hi, he ka kut hi ka Control zo lo mai ang tih ka hlau a ni Darling" tiin a rilru dik tak chu a sawi chhuak ta, ka va'n khawngaih ngawih ngawih tak em.

"Ni lo Hunter, i danglam tawh, hmâna Hunter Hudson-a kha i ni tawh lo. Tunah chuan ka pasal, khawvela ka mipa hmangaih ber, Brian Hudson-a pa leh ka pum chhunga naute pa i ni tawh"

"Darling" beidawn hmel taka min en chung hian a ti thawp ṭial ruih a, a hmel chu a khawngaih thlak tak zet a ni.

"Aw, i Darling-i ka ni e. Ka ni zel ang, ka ni kumkhua bawk ang. Chuvang chuan thisen chhuah lam ngaihtuah tawh suh Hunter, keimah nen nun thar kan nei tawh alawm, chhungkaw thar nen"

"I sawi dik, i sawi dik chiah Darling. I pasal Hunter Hudson-a ka ni e, hmâna tual thah hrata lar Hunter Hudson-a kha ni tawh lovin" tia a nui ve leh thei ta chu ka lawm hle.

"Min han fawp teh Hunter, insan hleih viau lo ila chuan ka fawp tawh ngei ang che" ka tih chuan a nui leh suk a, ka kawngah chawiin min pawm kang nghal nawlh.

"Ka fawh thlahlelnu" ti zeuhin min fawp ta vawng vawng a, min fawh dan ril zet chu ka tan chuan dawnsawn a nuam em em zel a ni.

"I hmui tê tak tê, thlum tui zet leh zun ngah em em bawk si hi ka kham thei lo" kan infawh zawh chuan a ti chhuak hap a, ka lo khi ver ver ringawt.

"I bula awm a thlamuan thlak si, i taksa chhunga rawn luh mai te hi a nia ka duh ni!" ka tih chuan awih loh hmel zet hian min en a, kan in lam panin min pawm phei zui nghal bawk.

"Mipa alawm taksa chhunga lut tur chu Darling, min mamawh thu i sawina ri a va ang deuh ve" awmze nei zet hian a ti a, ka nui tawp ta hmak.

"Ni lo Hunter, i ngaihtuah ang kha ka sawi tum a ni hauh lo, ka sawi awmzia i hriat ngei ka ring" ka tih chuan

"Eng nge ka ngaihtuah chu ni reng reng a?" a la rawn ti hram a, ani hian fiamthu a thawh ve tihna em ni!?

"Hunter Hudson, ka sawi ngai lovin i hre chiang lutuk" a taksa aṭanga tawlh thlak ka tum chu min pawm ngheh em avangin ka thei lo chiang kher mai.

"I kâ aṭanga chhuak ngei ka hre duh si alawm Darling" a rawn ti leh ta, ka rum chhuak hawk ringawt.

"I taksa ka nghen leh ka sik ringawt te hian ka thla a muang ṭhin a, i taksa chhunga awm phei chu a thlamuan thlak hliah hliah dawna ka hriat vang a ni" tiin a ban chu ka nam deuh a, a la thlah duh chuang lo.

Ka nghawng vel chu a fawp zeuh zeuh a, ka sam te chu a hnim leh vang vang ṭhin. Choka lamah min luh pui a, ei rawng bawlna dawhkan chungah chuan min nghat a, kan taksa erawh a la insi reng thung.

Ka kut chu la kangin a fawp neuh neuh a, a hnuah phei chuan a kâ chhungah a dah vel, a thil tih avang chuan ka nui chhuak ta hak!

"Hunter le!" tiin a samah chuan na vak lo hian ka kek a, a thil tih mek chuan ka taksa chhungril a timur leh er er tawh.

"Darling" ti supin a kutzungchal hrawl zet chu ka kâ chhungah a rawlh lut a, min en chiang khawp mai.

"Ka chet ang hian che ve rawh le" ti lehin a kâ chhunga ka kut awm chu thiam zet hian a liak kual a, khuaiin pangpar zu a dawt ang mai hian a che zei a ni.

"Hunter" ka kâ chhunga a kut a la awm tlat avangin ka ṭawng chhuak chu a puam deuh ṭawlh a, Hunter-a erawh a lo meng de sawr tawh thung.

Min en reng avang chuan ka thiam ang angin a kut chu ka leiin ka hawl kual ve a, nuam tih hmel tak hian a maimitchhing a, kan pahnih hnîh chuan nuam kan ti a nih ka ring.

A kut chu phawi thutin min fawp leh tawn tawn a, kei paw'n ka lo chhang let uar khawp mai. Choka aṭanga min pawm sawnin room-ah min luh pui a, kan tihtur chu ka hre chiang ta hle.

"Hunter, kan tih tum hi a fuh ber lo a nia, nau pai ka ni bawk sia kan hmang zing mah mahin ka hria" khuma min nghah thlak rual chuan ka ti a, ani erawh a thawmhnaw a la phelh mial mial.

"A rei lo vang, chuan vawiin chu a dangdai dawn lutuk" ruak vek chuan khumah a mu zangthal a, a lamah min pawt phei zui nghal.

"Che rawh le Darling, Factory-a ka kal leh loh chhan ṭha tak pawh a nih ngei ka ring" tiin a kiai suk a, ti tura min tih chu vawi khat mah ka la ti ngai lo.

"Ka thiam lo Hunter, hmeichhe dang angin ka zei lo a nia, ka vawi khat tihna tur a ni bawk" ka tih chuan ka kut a chelh a, a lai zawn vel thlenga bawk chho ruah a mipatna hrawl leh sei tak chu min vawn tir nghal.

"I khawih ringawt pawh hian nasa takin ka phur a ni Darling" ka kut chu a mipatnaah a hum hnan a, kei chuan ka hum hneh zo lo a ni ber.

"Tlai takah Dinner kan buatsaih a ngai leh ngei dawn asin Hunter, Brian-a pawh ngaihtuah ve la" ka tih pawh chuan tisa châknaa khat mitmeng hian min en a, che turin min signal zeuh bawk.

"Darling! I chet loh chuan ka che thei tho a nia, i pasal hi nuam takin min han siam teh" a duh anga ka la chet mai loh avang chuan a rawn ti chhuak leh hawk a, a insum theih loh hmel tawh hle.

"Eng lo...ka zam alawm" tiin ka rilru dik tak chu ka sawi chhuak ta phawng a, a mipatna lah chuan min tur et et ni mai hian ka hria.

"Darling le! Ka lo zirtir har deuh che a ni" tiin a inperh tho zawk a, khumah chuan min mut zangthal tir ta zawk.

Ka rai kawr hlimin ka hmeichhiatna chu zei leh thiam zet hian a sawngbawl zui mial mial a, awm ngaihna hre lêk lovin a sam chu ka ṭham ta tawn tawn. Rei pawh ni lovah a vawrtawp chu awlsam takin ka thleng nghal der a, ka thlante chu chhuak nasa hman tak a ni.

A duh tawk mai dawn emaw ka tih laiin a kutzungṭang pakhat chu ka taksa chhungah a rawn luh tir leh zawt zawt a, ka bula lukham chu na zet hian ka hmer a, ka ṭe chhuak zui ta hial.

Nuam tih lutuk avangin ka mal chu ka tawm deuh sek a, mahse Hunter-a chuan a nam kau leh nghal zel. A kut chet tir reng chungin a lei chu zei zetin a la chet zawm reng bawk a, a vawi hnihn atan a vawrtawp chu ka thleng leh ta. Ka kawr hak lai chu phelh sawk sawkin chhuatah a vawm thla a, ka hnute chu a hap buan buan a ni ber.

A kâ chhunga dah vek tum ang mai hian a che a, rang zetin a ka hnute hmur chu a liak zawt zawt bawk. Ka hmui lamah rawn ṭuan lehin min fawp bawrh bawrh a, a kut chu ka kap lamah zei takin a la chet tir reng a, mahse ka taksa chhungah a ni tawh lo thung.

A chet dan chu ka vawi khat dawnsawnna a ni hauh lo, mahse engtik lai pawhin min sawngbawl dan chu ka vawi khatna ang vek a ni ṭhin.

"I hun a ni ve ta Darling" ti supin a chung lamah min bawh tir a, kei pawh chuan ka thiam ang tawka ka pasal chu siam nawm ve ka tum ta.

A mipatna hrawl zet chu ka hum a, mahse ka hum hneh zo ngang lo. Ka kut pahniha humin ka thiam ang ang chuan ka che ve ṭan a, ani pawh nuam tih hmel takin a lo chhing ve diar diar bawk.

Ka hmeichhiatnaa a lei a chet tir ang chiah chuan ka lei chu ka hmang ṭangkai ve ta a, a rawn meng nghal zawk a, ka thil tih lai chu ka tawp ringawt.

"Oh God!! Darling! Che rawh, khati ang khan han che zel teh, thil thiam chak tak i ni Daisy" aw phelh deuh phung hian a ti chhuak hap a, kei pawh a thusawi awih tak chuan ka che ve leh ta mial mial.

A mipatna hrawl zet bul lam aṭang chuan ka lei ka chet chhoh tir a, nuam a ti ve a ni ngei a ni ang a lo phu ve deuh zawk zawk. A tira aṭanga che chho zelin a hmawr lam chu ka kâ chhungah dah ka tum ve ringawt a, a len loh dan chu pui tak a ni.

Ka kã chhunga dah tum ta lo chuan ka lei chu ka chet tir ta zawk a, nuam tih hmel tak hian a rawn rum chhuak ve ta ham ham.

A mitchhing reng chungin ka kut chu a rawn hum hnan leh a, amah kaltlangin ka kut chu a chet tir ta zawt zawt a, a hmanhmawh hle bawk.

A thil min tih tir ka en reng laiin vawi leh khatah a mipatna hmawr aṭang chuan thil tui hnang var tam zet hi a rawn chik chhuak puat puat a, a ṭhen phei chu ka taksaah leh ka hmaiah a kai nûaih nghe nghe.

"Darling, thil zawngchhang chi tak a ni" ti supin min lehthal thut a, ka ke chu kuai kakin ka taksa chhungah chuan a lut zui nghal ta zawt zawt.

Duhthaw taka hmangaihna kan chen hnu chuan inkuah chialin kan mu a, a mipatna zawi vek tawh nia ka hriat chu a rawn che leh ta ṭuah ṭuah mai. Chu chu ka vawi khat hriatna a ni lo, hmangaihna kan chen zawh hnu apiangin chutiang chu ka tawng ṭhin.

Inpeih leh hle tawh mah se ka chau tih a hriat avangin hmangaihna min chen pui leh nghal zung zung ngai lo va, min hrethiam em em ṭhin zawk.

"I tho ang le, ei rawng min bawlpui ngei ka beisei" nui sen sen chuan ka ti a, ani pawh a nui nghawr ve dawt.

"Factory-a ka kal loh chhan ṭha tak zawng a ni ngei e" tiin ka chalah chuan a fawp zeuh a, hlim avangin ka nui ta ver ver.

Ei rawng chu kan nupa chuan kan bawl ta ngei a, nuam pawh kan ti dun hle. Ei rawng bawl mang lova mi kuah beh tlat te a ching a, thil tih chu a sawt mawh khawp mai.

Chutah Brian-a chuan kan inchhaih hlim thawm hriain kan bula lo awm ve a châk a, tlai dang ang lo takin kan chhungkua chuan ei rawng kan bawl ta ringawt bawk.

Kan hmuh theih loh leh khawih theih loh hun te chu a ral a, a liam zung zung a, chelh din tumin bei mah ila a liam zel tho ang. A chang chuan kan hlim lai nite chu chelh dina cham tir reng mai ka duh a, ka pasal leh ka fate nena hun hlimawm tak tak kan hman lai te chu dah ṭhat daiha duh hûn huna phawrh chhuah leh theih mai se ka ti ṭhin, mahse chu erawh thil theih loh tawp khawk a ni tlat si.

Ka nu leh pate'n ka hming an sak chhan Daisy pangpar par chuai ṭan tawh te chuan hringnun min ngaihtuah chian tir a, ka hun kal tawh leh ka tun hun thlengin ka ngaihtuah let a, engkim chu a nih dan tur vek a ni tih ka hrethiam ta.

Hunter-a nena kan intawn dan te, kan inhmangaih tawn dan te, chhungkua kan din dan thlengin chung lam ruahmanna vek zawk a lo ni.

Kan fapa Brian-a pawh ni tin School a kal a, School-a thil zir chu haw kawngah ka sawi pui ṭhin a, amah paw'n sawi nuam a ti thei khawp.

Chuti ang bawkin Hunter-a pawh a hna lamah a kal ni tin a, a lo haw hi chuan a nupui leh a fapa hi chu kan lo hlim em em zel hi a ni tawp.

Brian-a lah chuan a pa hrei chelek vel ṭhin chu hmuhnawm a ti thei hle a, Weekend-ah hi chuan a pa bulah tal chawtin thing an ek dun ṭhin nghe nghe.

Kei phei chuan an intih nat palh ka lo hlau thei em em a, thing an eh dun tawh hi chuan rilru nuam takin ka awm ngai mang lo.

"Pu Wooden, engati nge vawiin chu i va tlai hmel ve, hna lamah i kal lo em ni?" tum loh deuha Hunter-a ṭhianpa Kyle Wooden-a ka hmuh hlawl avang chuan ka ti a, Brian-a te School Bus nghakin ka ding ran bawk.

"Vawiin chu ka chawl a, pu Hudson-a erawh a kal ang ti raw? Nge a chawl ve tho" hawihawm taka a tih chuan

"Chawl lo ve, ani chu zing lamah khan a chhuak tawh alawm" ka lo ti ṭha ve mai a, ka bulah chuan lo ding zawm zat mah se sawi tur erawh ka hre em em tawh lo.

"Pu Hudson-a chu a ṭha zel maw? Hmanni lah khan an vaw leh a, thing ni lovin thir a ni bawk si a, na a neih haw ka lo ring ve ringawt" a thu rawn sawi chu ka hrethiam hauh lo.

"Eng nge i sawi awmzai pu Wooden? Ka pasal chu tu in nge vua a? An insual em ni?" ka ti ta thuai a, ka rilru chu a hlauthawng nghal hle.

"A hrilh miah lo che em ni? Roger-a khan a cho tlat mai a, in ina Dinner kan lo ei tuk aṭang khan a cho tlat ṭhin alawm, mahse i pasal erawh a ngawi reng zel thung"

"Han sawi chiang deuh teh pu Wooden, ka pasal chuan engmah min hrilh lo hrim hrim" amah chu ka en kar a, thil thlen dan chu kimchang taka hriat ka duh a ni.

"Kar hmasa khan Roger-a nen an intibuai deuh reuh a, i pasal erawh chuan a tibuai lo tluk a ni. Roger-a chuan thir hian a lu ah tak a vua a, i pasal pawh a pai ve chhawn chhawm alawm, mahse kan pute'n Roger-a chu an ban nghal hmak"

"Engati nge min hrilh miah loh le" ti sepin hma lam chu ding takin ka en a, pu Wooden-a ṭawng ri chu hre reng mah ila ka chhang lo hrim hrim.

Minute 5 chhung vel mi â ang maia ka din ngawih reng hnu chuan Brian-a te School Bus chu ka hmaah tak a rawn ding a, chutah chuan ka harh chhuak ve ta chiah.

Ni dang ang bawkin Brian-a nen chuan kut inkaiin kan kal leh a, mahse ka rilruah ka pasal Hunter-a chiah a awm thung, Brian-a min biakna tak ngial pawh chu chhan loh ka ngah mai.

In kan thlen hnu pawh chuan ka la pangai thei lo, ka pasal chu an hnathawhna hmuna va kal chilh tawp mai ka duh rum rum. Ka hriat loh hlan hian eng thil chiah nge a lo tawrh ṭhin ang tih te chu ka ngaihtuah a, Hunter-a awm dan chu ka duh lo tak zet a ni.

Tlai 4 vel a ni tawh a, ei rawng pawh ka la bawl thei lo tluang zel a, Brian-a chu a room-ah a awm a ni ang thawm engmah a rawn nei lo.

Kan in kawta Motor thawm chuan ka thin a tiphu dawt dawt a, mahse ka hlauhthawn vang a ni lo thung. Ka chhungril chu a tawt et et a, a tawt chhan lah ka hre chiang ropui si, paih thawl ka mamawh tak zet a ni.

In chhunga a rawn pen luh rualin Brian-a chu a room aṭang a lo tlan chhuak a, a pa chu ngai em em hian a kuah zui nghal bawk.

An pafa chuan room lamah an inpawm lut a, thil eng emaw a hawn leh tawh a ni ngei ang Brian-a chuan a hmangaih thu a sawi leh ta vak vak.

Minute 10 hnu velah chokaah Hunter-a chu a lo pen lut a, ngawi reng leh che miah lova ka lo ṭhut avang chuan min en chik hle tih pawh ka hria, ka bianga a fawh zeuh lai te chuan ka che lo hrim hrim.

"Darling" a tih sup chuan a lam ka hawi chho a, a hmel avang chuan ka mittui te chu an rawn hnam nghal ta ṭiam ṭiam.

"Darling, eng nge thleng? Ka awm loh laiin eng nge thleng? Min han hrilh teh, i awm dan hi a dik miah lo" a tih chuan ka hawi sawn a, a lam hawi turin min kuai her leh nghal zat.

"Daisy, han sawi teh" a tih leh chuan ka mittui chu a baw zawih a, a hmel aṭang chuan a hamhaih tih ka hre thei.

"Ka hriat loh laiin eng nge i chungah thleng zawk?" ka mittui te chu ka hru buai duh lo, awmzia awm dawn chuang lo.

"Maw? Engmah..ka chungah eng thil mah a thleng lo Darling, i awm dan hi a dik miah lo" tiin ka hmai chu a rawn khawih a, ka lo dah thlak sak nghal thuai.

"Roger-a...Roger-a khan....ani khan i lu ah thirin a vua a ni lo'm ni?" hmui pet fan fâna ka tih chuan phawk zeta meng chung hian

"Enga!?" a rawn ti a, ka ṭhutna aṭanga thovin choka chu chhuahsan ka tum a, min chelh ding chiang hle.

"Engati nge engmah min hrilh ve loh? Thil sawipui tlak loh ka ni em ni?" ka tih leh chuan a ngawi reng a, min en reng ringawt.

"Ni e, ani thei lutuk ang. Kei chu i hmelma fa, i chhiahhlawh mai mai ni ṭhin kha ka ni miau a, thil sawipui tlak ka ni miah lo vang" a la ngawih reng avang chuan ka ti leh ta nge nge.

"Daisy" a tih sup chuan a kut chu ka kut leh lamin ka lak thlak sak a, kan nupa room-a ka luh rualin kawngka chu ka kalh zui nghal hmak bawk.

"Daisy" kan nupa room kawngka chu a chum ri det det a, kei erawh kawngka ngheng chuan ka ṭap ngawt ngawt thung.

"Daisy, hawng teh le, ka tihpalh a ni. Darling, a bul aṭang engkim ka hrilh ang che, lo hawng hram teh" a ṭawngkam tin chuan ka ṭah an ti chhuak zual ni berin ka hria.

"Min biak tum lo law law teh Hunter, ka rilru hi i ti na em mai" ka ti chhuak thei hram a, ka rilru chhungril chu a hma zawng aiin a tawt zual.

Thawm chu a reh vang vang a, kal sawn daih rih mah se pawi ka ti lo. Dik tak chuan keimah chu nep ka inti a, ka inhmu hniam a ni. Thu sawipui tlak loh nupui nih chu ka duh reng reng lo, nupui ṭha tak nih ka duh a ni. Nge nia Hunter-a hian min lo hmangaih tak tak lo zawk?

Kan room tukverh chu a ri ṭek ṭek a, thawm awmna lam ka hawi chuan Hunter-a chu a lo lut fel der tawh. Kawngka lam chu a rawn pan thuai a, a hmela rilru natna langte chuan ka lung a tichhia a ni. Ka awm ang ang chuan min pawm kang nawlh a, ngawi rengin naute ang mai hian min pawm ta hle hle.

"Min hmangaih ve miah lo em ni Hunter? Kei chuan ka thinlung leh tih tak zetin ka hmangaih che asin, i lakah hian thu zep ka nei ngai lo, neih pawh ka duh lo" ka ṭah chhuak zualpui a reh hnu chuan ka ti a, ani chuan thawk a la hawk thung.

"Min lo hmangaih ve miah lo tak tak em ni? Eng thil chiah nge i hmangaihna te, i rin ngamna te, i duh ang ngei nupui ka nih theih na'n hian ka tih dawn?" a ngawi reng bawk si a, ka rilru chu a hlauthawng ru tawh tak zet a ni.

"Ka thinlung zawng zawngin ka hmangaih che alawm, ka hmangaih kumkhua bawk ang che" a tih chuan mittui tling pamin ka en a, ani pawn min en ve reng bawk.

"Min hmangaih si chuan engati nge i lua an vuak thute kha min hrilh ve loh? Kar hmasa daiha mi a ni tawh asin, pu Wooden-a khan min hrilh lo phei se chuan ka hre miah lo vang"

"Ka hrilh loh chhan che chu i rilru tihbuai ka duh lo alawm Darling, rai lai i ni bawk si a, hahdam takin awm la ka duh a ni" a tih chuan

"Ka rilru a hahdam i ring reng reng em ni? Pasal te titi pui theih loh khawpa nupui tlak tlai lovah ka inchan zawk asin, thi ta la engtin nge awm se min tih a?" ka lo ti vat a, ṭah chhuak lutuk avangin ka men pur tawh.

"Ṭap tawh lo teh Darling, keimah avangin ṭap tawh suh. Ka thiam loh a ni e, ka tihpalh tak zet" tiin khumah chuan min mutpui a, a âwmah ka lu chu a kuah bet zui nghal bawk.

"I thih.....i thih chuan ka thi ve a ni mai Hunter, chuti ang khawp chuan ka tan hian i hlu a ni" tiin ka ṭap chhuak leh ta nge nge a, naupang ang maiin ka ṭap uar hle.

"Ka thih i phal hma chu ka thi lo vang, ka thi lo vang tih ka tiam a che Daisy. Min en teh Darling, ka Darling em em te" hmangaihnaa khat aw hian a ti sup a, a aw ri ngawt pawh chu ka khawvel a ni.

"Nun thar min petu nang tê reuh hi ka hmangaih em em che a ni tih hria la, theinghilh ngai suh" tiin ka hmuaiah chuan a fawp a, ka lo ṭah nuih ta hawk.

PROTECTIVE HUSBAND

By

Havali Adam

Chapter 14

"Awm ṭha teh ang, khawi maw i lu chu ka lo en" tia thawh ka tum chu min la kuah bet tlat a, ka rilru chhungril pawh a pangai leh deuh ṭan tawh.

"Hunter!" min la kuah run avang chuan ka ti leh hluai a, a hmel ka en chuan muhil ang maiin a lo maimitchhing daih.

"I lu chu ka en duh a nia, hnuhnawh tawh viau mah se damdawi hnawih te pawh a ngaih ngei ka ring, min thlah rawh le" ka tih leh chuan min thlah ve ta hram.

A sam buk lutuk lo chu ka keu den den a, a chhipvir bulah chuan pem a lo awm ta ngei mai. A nun hmasa lama sam buk ve deuh ṭhin ni mahse kum 6 kal ta aṭang kha chuan a kawlh lampangin a met ziah tawh a, chuvang chuan a lua hliam awm chu a nat loh reng ka ring lo. Chik zetin a lua pem awm chu ka en chiang a, ka pasal chu ka khawngaih thar khawp mai.

"A la na em? Damdawi ka va la ang e, kan hnawih dawn nia" khum aṭang chhuk ka tum chu min pawt ding chiang hle.

"A na tawh lo, damdawi a ngai lo bawk. Ka damdawi chu nangmah hi i ni a, min lo kuah la ka dam a ni mai" kiai suk hian a ti a, ka nui ve thei hauh lo.

"Chuti ang ringawtin an ngai ngai lo, damdawi chu kan hnawih ngei a ngai ang" tia ka tal rualin a âwmah min pawt bei thlawp a, ka awm sawn hlau takin min kuah bet nghal run bawk.

"Ka damdawi alawm i nih Darling, a hma phei chuan zanah hian ka mu ngai lo. I taksa sia ka mut erawh hi chuan hahdam takin ka muhil thei ṭhin, chutiang khawp chuan ka tan hian i pawimawh tih hre rawh"

"Ka hria alawm, mahse ka ngaihtuah em mai che Hunter, i lua hliam awm hian nangmahah nghawng a nei palh ang tih ka hlau a ni. Lua invuak ngat phei chu hriatna hloh a awl si, chuvang alawm ka hlauhthawn em em" ka tih chuan

"Min vuak tirh khan a na ve zawk a, ka lu pawh rei lotê chu a hai ve, mahse na han tih tur chi a ni lo. Min hriat kha Darling, ka hun hmasa lam i hriat vek tawh khâ" a rawn ti a, a bawp sei zet chuan min khan nghal chial bawk.

"Engti ang chiahin nge in inzirtir chu ka hre lo, mahse mi pangai tawrh zawh loh tuar thei tura in inzirtir chu ka ring" ka tih chuan

"Ni chiah e, mi pangai tawrh theih loh tuar thei turin ka pa khan min zirtir ṭhin a ni" a lo ti ve nghal vat.

"Mommy" kan room pawn lam aṭanga kan fapa aw chuan min tiharh zawk a, Hunter-a chu nam sawnin khum aṭang chuan ka tho nghal thuai thuai.

"Mommy, ka ril a ṭam tawh ê, Dinner kan ei tawh dawn em?" kawngka ka hawn rualin Brian-a chuan a lo ti a, Dinner tur engmah ka la siam reng reng lo tih ka hre chhuak nghal.

"Ka tihpalh Brian, Dinner tur siam ka lo mangnghilh daih alawm maw le. Ka'n siam thuai thuai ang aw, min lo nghak hram hram rawh" tia ka fapa ka biak lai chuan kan hnung lam aṭang Hunter-a chuan

"Daddy leh Mommy leh nangmah nen Dinner tur chu siam leh ang aw Buddy, kei chu ka phur tawh khawp mai, i phur ve em?" a rawn ti a, kan bul chu a lo thleng titih nghal der.

"Aw Daddy, ka phur tawh lutuk. Eitur khan infiam leh ang aw Daddy, eitura infiam kha a nuam ka ti" Brian-a chuan a pa kut chu a vuan nghal a, Hunter-a paw'n a lo pawm ve leh mai.

"I kal ang u le, tunah chuan eitur siam phawt ang u" tiin ka pasal chuan ka darah a kut a rawn nghat a, choka lam kan pan lai te chuan ka chhungril chu a hlim leh ta veng veng.

Ei rawng kan bawl lai chuan mipa tih takah an pafa chuan an infiam leh char char a, min puih pawh an tum leh ta hauh lo. A changin ka lo nuih pui chiam a, a chang leh ka hau thul. Ka hauh apiang lah chuan nuam an ti zual sauh emaw tih theih turin an awm a, ka hau rei peih buai lo ta law law a ni.

Zan dar 7 dawn velah Dinner pawh kan ei ve thei ta chauh a, mahse tui kan tiin kan puar tlang hlawm hle. Dinner kan ei zawh chuan Sitting Room-ah kan chhungkuain kan ṭhu ṭhap a, kan Movie en lah chu a la lem em em zui. Brian-a chuan Superman Movie en a duh tlat avangin kan hmeh chhuah sak a, keini a nu leh pa chu kan ngawi reng ringawt.

"Daddy, engati nge Carnival-a zu rui pakhat kha i hnek duh miah loh?" Brian-a chuan a rawn ti hlawl mai, kei ang bawkin Hunter-a chuan a fapa chu a en rang hle.

"Mi dangte kutthlak mai mai loh tur alawm Buddy, kut kan thlak a nih chuan Police-i'n min man daih mai ang" Hunter-a chuan a ti a, Brian-a erawh a ngaihtuah thui hmel hle thung.

"A nih leh engati nge hnektu che kha Police-i'n an man loh?" a rawn ti leh ta kauh a, Hunter-a chu a nui suk ringawt.

"Min hnek lai khan Police an awm hleinem Buddy, Movie khi en leh tawh rawh le!" tiin a fapa chu hma lam a hawi tir a, Brian-a pawh a ngawi ve leh mai bawk.

"Daddy, engati nge i kut hi a len em em a? Superman kut ai pawh khian a lian zawk, a lian ê Daddy" kan ngawih ṭhap tawh hnuah Brian-a bawk chuan a rawn ti leh a, a ṭawng duh ta viau chu a mak a ni.

"Superman kut ai khian Daddy a lian daih zawk alawm, mi sual i hmuh vaih chuan Daddy kut hi i ko vak zel dawn nia" an pafa inbiak dan vel chu hriat a nuam phian a, kei chuan Hunter-a dar ka lo ngheng chial ringawt.

"Daddy, insual dan tur min lo zirtir" kan fapa thu sawi chuan min ṭhut ngil tir chiang hle mai, a thu sawi avang chuan Hunter-a chu ka melh rang hle bawk.

"Engati nge insual dan thiam i duh Buddy? Insual chu a ṭha hleinem, inven dan ka zirtir zawk ang che" an pafa thu sawi chuan ka ngaih a tiṭha ta lo tawp mai.

"A chhan chu School-ah min tibuai an awm ṭhin a, min hnek ka hlau thei lutuk" ka fapa chuan a rawn ti leh ta, a nu leh pate chuan a thu sawi chu kan bengkhawn ta hle.

"Buddy, insual rual pawh in la ni hleinem, tu nge hnek tum ṭhin che chu ni a? Nangmah aiin a lian nge a tê?" Hunter-a aw chu a khauh ta deuh fak.

"Keimah aiin a lian" Brian-a chuan a lo ti mai a, ka ṭhutna aṭanga thovin kan nupa room-ah chuan ka lut ta daih.

Brian-a thu sawi chuan khuma ka ṭhut hnu thlengin ka rilru a luah a, naupang mai mah ni se buaina a tawk chu ka duh lo a ni. Chutah a pa hnenah insual zirtir turin a dil a, Hunter-a chuan a zirtir ngei dawn tih ka hre sa vek.

Keimah ber hian Brian-a chu a kal sual ang tih ka hlau, insual a thiam chuan ka fapa chu tual thah hmangah a chhuak dawn tlata hriatna ka nei.

Minute 15 hnu velah Hunter-a chu kan nupa room-ah a lo lut a, ka mood hrethiam zetin min be lo va, intifai turin bathroom lam a pan ta zawk.

A lo chhuah leh hnu pawh chuan ka ṭhut ngaiin ka lo la ṭhu reng a, ka dara chelhin min mut zal pui ta nghal. Ka khabe chu a chawi a, a mitah chuan zawhna tam tak ka hmu thei.

"Brian-a hi i nun hmasa lama i awm ṭhin dan ang khan a awm ang tih ka hlau" ka ti sep a, ani erawh a lo nui mai.

"Ka hlau tak tak a nia aw Hunter, insual leh inven dan i zirtir dawn tih chu ka hre lawk sa vek a, mahse tual that ṭhang turin zirtir lo hram ang che" ka tih leh chuan

"Mahni invenna chauh ka zirtir dawn alawm Darling, hlauthawng miah suh. I pum chhunga naute pawh hi a lo pian hnuah chuan ka zirtir tho ang, mahse tual an that ngai lo thung ang" a rawn ti ve ta sup.

"Ka ring ang che, ka ring zel ang che, engtik lai pawha rin che ka duh" tiin a âwmah chuan ka bei a, ka mit chu ka chhing zui nghal.

"A hma aṭang daih tawh khan Brian-a hi a dik lo tih ka hre tawh a, a ṭhiante zingah kutthlak a neih tawh ngei ka ring bawk. Ka thisen kha a ni miau a, dem thei ka ni lo" a ṭawng chu ka ngaithla kar a, chuti ang chuan kan fapa a awm tih ka lo hrethiam ve hauh lo.

"Kum 10 emaw kum 15 emaw a nih hunah chuan mi sawisak a châk ngei ang, mahse chu chu kei hian ka dang dawn thung a ni" a tih chuan ka hah a dam sawng sawng.

"Keimah aṭanga chhuak reng reng chu mi ṭha lovah ka chhuah dawn lo, chu chu ka thil tum a ni" a tih leh chuan nghet zetin ka kuah a, ka pasal chuan ka rinna zawng zawng a nei a ni.

Kar thar kan chuan kai hnu chuan an pafa chu an inawm deuh chawt a, an tihtur pawh ka hai lo hle. Kan in awmna hi ram zau ve ang reng tak a ni a, hmun dang ang lo takin a la ngaw ṭha phian bawk.

Chu lai hmun zau tak chu pawisaa kan lei tawh miau avangin kan ram a ni a, thingte chu kitin engtin pawh awm ila tûma'n min sawisel thei lo a ni.

A bik takin kan awmna khua chu mahni ram chin vawng uluk leh hauh pe na hle an ni hlawm a, kan ramah chuan tûmah an rawn tla duh ngai lo hrim hrim bawk.

Vawi khat phei chu ram vangin ṭhenawm pahnih an inti thiam lo va, an inthah ṭhelh hial a ni. Buaina khap daitu te zingah ka pasal chu a tel ve a, mak tak maiin ka pasal hian buaina a khap dai thei fû zel.

"Mommy, vawiin tlai chu Daddy hi a lo haw har dawn emaw ni le?" ka fapa chuan a ti a, pawn lam thlirin kawngka bulah chuan a ding reng bawk.

"Ka lo haw hma ang a tih khâ, ramhnuaiah in kal leh dawn a ni lo'm ni?" ka lo ti ve mai a, lo phei a tum lai takin kan in kawtah motor inhung thawm a rawn awm ta chiah.

"Yes!! Daddy a lo haw" tiin Brian-a chu kawngka hawng sawk sawkin a tlan chhuak a, a pa lo haw hun a nghakhlel tawh em bawk a ni.

Hunter-a leh Brian-a lo inpawm lut chu hmel hlim sangin ka lo en a, chokaah pheiin ka pasal intur Orange Juice chu ka siam nghal a, mi pawh be hman lo khawpin Brian-a chuan a pa chu a be mawlh mawlh bawk. An pahnih chuan Orange Juice chu ka pe ve ve a, choka aṭanga chhuakin an la titi zawm mial mial.

Store room lamah Hunter-a chuan a luh pui a, a hnathawhna hmanrua a dah ṭha dawn te pawh a ni ang. Rei lovah an lo chhuak leh a, Brian-a chu a pa khabe hmul vel chul pahin a la titi siam siam reuh a, an pafa chuan inkawm ngeih tak an ni.

Thawm reh duak avang chuan Sitting room lam chu ka thlek a, ramhnuai lamah an kal tawh tih hriat zetin an hmel pawh ka hmu leh tawh lo.

Chuti ang chuan tlai tin an chhuak dun ziah a, engtin ber nge inven dan an inzirtir chu ka hre ve thiam lo. An lo haw huna an eitur lo siam a, an inbiak dan lo ngaihthlak chu ka tih theih awmchhun a ni mai.

Zan lamah erawh Brian-a chu a chau ang reng thei hle a, a mu hma thei khawp mai. Keini nupa pawh kan mu har ngai chuang lo.

Chaw hma lam a la ni a, Brian-a chu ka thlah zo chiah bawk. Keimahin inah chuan ka awm leh tlawng a, mahse hrehawm tihna ka nei tawh lo. A hma kha chuan ka khua a har a, thil hlauh te ka nei ṭhin nghe nghe.

Tunah chuan ka pasal leh ka fapa an lo haw har dawn lo tih ka hre kar tawh a, thil hlauh pawh ka nei tawh ngai lo ti ila a dik ang.

Naute thawmhaw tur ka phiar mawlh mawlh lai chuan kan in kawta motor ding thawm ka hria a, Hunter-a bak a nih ka ring lo.

A hmanrua a ken theihnghilh a ni ngei ang, ni dangah chuan theihnghilh a nei ngai miah lo asin le. Kawngka lo kik karh karhtu lam chu ka hawi a, kawngka lo kiktu chu Hunter-a a ni awzawng lo.

Rang takin ka ṭhutna aṭang chuan ka tho nghal a, ka thil tih lai pawh chu ka dah zui hmak. Kawngka hmaa ding chu kum upat hmel deuh tawh hi a ni a, amah chauhin a ni bawk.

A kik nawn leh tâkah chuan harh chhuakin kawngka lam chu ka pan a, hawn sak loh ringawt pawh chu dikin ka hre lo, mahse Coat Suit dum a inbel avang chuan ka hlauthawng ru em em.

"Pu Hudson-a chenna in a ni em?" kawngka ka hawn sak hnu chuan a lo ti nghal a, kei pawh chu ka lo bu ve mai bawk.

"Ka lo lut thei ang em?" hawihawm taka a ti leh chuan a luh theih thu ka hrilh a, ani pawh lawm thu sawiin a lo lut zui nghal.

"Min hrethiam la, ka hre mai lo che. I hming leh enge i lo i tih dawn tih min hrilh thei ang em ka pu?" ṭhutthlenga kan ṭhut hnu chuan ka ti a, a ni pawh a rawn bu ta nghat nghat.

"Min hre lo vang, kei pawh hian ka hre miah lo che. Ka hming chu Alexander Carter ka ni a, pu Hudson-a nen hian eng inzawmna nge in neih?" tiin min zawt ve leh ta kauh mai.

"I zawhna ka chhan hmain pu Hudson-a chenna chu hei hi a ni ngei a, mahse i zawhna ka chhan thiam nân a hming tir lam min hrilh hmasa phawt thei ang em?" zawhna bawk chuan ka chhang let ve leh a, fimkhur tluk a awm lo tlat a tin ni!

"Ka mi zawn mek hi Hunter Hudson-a a ni e" a tih chuan ka phu deuh dâwrh a, ka hmaa ṭhu putar chu Hunter-a pate pawla mi a nih loh reng ka ring tawh lo.

"Khawngaihin min chhuahsan zawk ta che ka pu, ka awm a nuam lo em mai" ka tih chuan hmel nelawm zet hian

"Ni lo, min hlau a nih khâ, min hlau duh suh. Denmark ramah hian ka awm ve alawm, Hunter Hudson-a a awm tih thawm ka hriat khan ka lo zawng mai a ni" a rawn ti a, chu chuan ka hlauhthawnna a ti belhchhah.

"He in hi Hunter Hudson-a chenna in a ni em?" pangai tak hian a rawn ti leh a, kei chu ṭawng chhuak duh rih lovin ka lo bu ringawt.

"A enge i nih? I rai bawk si a, a nupui em ni i nih?" a tih chuan

"Aw, a nupui Daisy Hudson ka ni e" ka lo ti ve sep a, chhan loh reng kha a mawiin ka hre lo a ni.

"A va mak ngai ve le, Hunter Hudson-a'n nupui a nei hi thil mak tak zawng a ni e" tih pahin a ngawi vang vang a, a nui chhuak leh hak bawk.

"A mak tak zet, Hunter-a ka hriat ṭhin kha a ni lo emaw ni le" amah leh amah chu a inbia a ni ber.

"Khawiah nge i pasal chu a awm? A hmel ka hmuh hma chu ka lo nghak thei ang em? A bak engmah ka dil lo vang che, i rem tih chuan" min biak dan vel chuan mi hneh theih dan riau a nei.

"Ka hre lo, ka pasal hian pawn lam mi len luh hi a duh lo hle a ni. Nang pawh hi a hmuh hunah che chuan a haw tir thuai ang che, chuvangin haw zawk la a ṭha ang"

"Ka hmel a hmuh hunah i pasal chuan min haw tir duh ka ring chiah lo pi Hudson, a chhan chu i pasal nen hian ṭhian ṭha tak kan ni alawm"

"Khawngaihin min chhuahsan zawk teh, i duh chuan tlai dar 4 hnu lamah i lo kal leh zawk dawn nia" ka ṭhutna aṭang chuan ka tho a, ka hlauthawng lutuk tawh tak zet a ni.

"Min hlau viau pawh hi a awm lo hran lo, mahse ka tina dawn hauh lo che tih erawh hria ang che. I sawi ang ngeiin tlai dar 4 hnu lamah chuan ka lo kal leh ang, Dinner pawh min lo buatsaih kep ngei ka beisei" tiin a chhuak ta nal nal.

Ka awm ngaihna hre lo chu ka hmai ka phih vak vak a, ka thinphu rang lutuk chu a reh thei der lo. Alexander Carter-a tia insawi pa lah chu a kal bo leh daih tawh a, mahse ani chuan lungmuan lohna min hnutchhiah tlat a ni. Hunter-a bula va kal tawp chu ka duh ta ber a, mahse chu pawh Brian-a te School ban a hnaih tawh avangin a tih chi bawk si loh.

Brian-a te School Bus changin kawngpui sirah chuan ka ding ngawi reng a, min betu lo awm ta pawh ni se ka chhang kher lo vang ka ring. Pu Carter-a thu sawite chu ka ngaihtuah mûk em em a, ka rilruah Hunter-a leh a thu sawi chiah chu an awm rih a ni.

Rilru buai ruk lutuk avang leh hlauhthawn ruk avangin thawk te chu ka la leh hawk ṭhin a, ral aṭanga min hmutu te tan chuan mi â ka ang ta ber ang.

Brian-a ka hmuh rualin kan in lam pan lovin Hunter-a hnathawhna hmun lam chu ka panpui nghal a, mahse kea kal thlen chi niin ka hre lo thung.

Motor lo tlan pakhat chu ka phar ding tawp a, kan kalna hmun tur te chu ka hrilh mawlh mawlh a, a hmanhmawh thlak avanga min pui turin leh pawisa ka pek ngei ngei tur thu ka hrilh hnu chuan kan tlan chhuak thei ta chauh.

Hunter-a hnathawhna lam kan pan lai chuan Brian-a chuan zawhna min zawt sek a, kan kalna hmun tur te chu min zawt chhen a, mahse pakhat mah ka chhang lo.

Motor khalhtu pawh chu a ngawi reng a, darthlalang aṭang min mitmei zeuh zeuh tih pawh ka hre vek, min bia pawh ni se min be ṭawng thei kher lo vang.

"Hetah hian min lo nghak lawk la, ka pasal nen kan lo thlen hunah pawisa chu ka pe ang che, tunah chuan engmah ken ka nei rih lo" kan din hnu chuan ka ti a, mahse motor khalhtu chuan

"Pawisa pek a ngai lo ve, i hmanhmawh em mai" a lo ti tlat a, pawisa pek ka tum thu ka sawi fê hnuah pawh a kal lui tlat a, lawm thu hrilhin kan invai liam ta ringawt.

Factory Area-ah chuan ka fapa kut vuanin kan kal lut a, hnathawk ṭhenkhat chuan min lo en duh hle. A tua te mah chu ka hre lo va, ka la hmu ngai lo bawk.

Mi pakhat hian min lo pan a, kan mamawh leh kan kal chhante chu min zawt a, ka pasal kan hmuh ngei ngei a ngaih thu ka sawi chuan a bu ta nghauh ngauh.

"Rei lotê lo nghak lawk ula, pu Hudson-a chu a lo thleng thuai ang. Ani zawng a ṭuan a ṭha a, lo thlen nân hun rei a hmang tawp nâng" hawihawm zet hian a ti a, kei erawh ka ṭawng leh tawh lo.

Min lo betupa chu let lehin tlangval hmel tak pakhat hi a hrilh ru ser ser a, chu tlangval chuan buk khum nghutin a tlan zui nghal. Ka fapa chuan zawhna min lo zawt leh a, pangai takin a pa kan hmuh dawn thu chu ka sawi ve ta mai bawk. Brian-a chu a hlim nghal em em a, a pa hmuh hlan chu a nghakhlel leh ta viau.

Rei lutuk lo hnuah chuan Hunter-a hmel ngei chu ka hmu a, a kut ding lamah hrei rih hmel tak chu a la keng reng a, keini a nupui leh a fapa min hmu chu mak a tih hmel hle.

Kan lam a lo pan laiin Brian-a chu a pa lamah a tlan phei thuai a, a pa'n a pawm rual chuan a ṭawng melh melh a, a hlim leh hle tawh.

"Darling, a va mak teh thut ve, thil thleng a awm em?" a tih chuan ka lo bu zeuh a, nuihza lo zetin ka nui lui sak bawk.

"Hetah hian a sawi chi em? Ka hna thawh lai kha a laklawh ang reng khawp mai a, heta sawifel theih a nih chuan let leh mai pawh pawi ka ti lo" a rawn tih leh chuan

"Ni lo Hunter, heta sawifel theih a ni lo. Min hawpui thuai zawk la ka duh ngawt mai, thil pawimawh tak hrilh tur che ka nei" ka lo ti ve thuai a, a hrethiam a ni ang a bu ta nghut.

Brian-a la pawm reng chung chuan Factory lamah a kal phei a, a kal muang hran lo hle bawk. Mi tu tu emaw ni a va bia a, rei lovah an lo let leh nghal.

Kan in lam pana kan tlan lai chuan zawhna pakhat mah min zawt lo va, Brian-a ṭawng melh melh ri chu ṭawng ri awmchhun a ni mai. Chu bakah ṭawng chu ka châk rih lo, min be miah lo chu a pawi lo zawk.

In kan luh rualin Brian-a chu a room chhungah ka awm tir a, Hunter-a chuan a hmanrua te a dah ṭha mial mial bawk. Brian-a room aṭanga ka chhuah chuan ani pawh bungraw dah ṭhatna room aṭang a lo chhuak ve chiah a, be lovin sitting room lamah chuan ka kal a, ani paw'n min lo zui ve nghal mai bawk.

"Tu nge Alexander Carter-a?" ka tih chuan phawk zet hian min en a, mahse rei lovah a insiam ṭha leh nghal thuai.

"Tu nge Alexander Carter-a ka tih chu Hunter?" a bul hnaiah chuan ka ding a, a hmel chu ka en chiang hle.

"Ka nun hmasa hriat chhuah chhen hi ka kham a nia Darling, Alexander Carter-a chu ka hriat ngai a ni tawh lo. Eng vanga ani hming daih daih min zawt nge i nih?" a tih chuan

"Chawhma lamah khan nangmah hmuh tumin kan inah a lo kal a, thil awm dan hian ka awm a tinuam lo tak zet a ni" ka lo ti nghal a, tunah chuan a hma ai zawngin a meng phawk ta.

"A lo kal maw!?" a ti hluai a, a hmel chu a buai ve ta nak mai le, thil ṭha lo a thleng dawn chiang a ni.

"Aw, lo kal leh a tum bawk. Tlai lamah lo kal a tum a, chuan Dinner siam kep turin min ti bawk" ka tih chuan a ṭhu hnawk a, a rilru a hah hmel ta hle.

"Min hrilh rawh Hunter, thil thleng tur chu i hriat nghal vek ka ring. Zep nei lovin min hrilh rawh, kan tlanchhiat a ngai leh dawn em?" tiin a bulah chuan ka ṭhu thla ve nghal a, ani chuan chhuat a en reng ringawt.

"Ni lo, kan tlanchhe tawh lo vang, thil thleng thei chu ka hre chiang khawp mai" a ngawih vang vang hnu chuan a ti ta nge nge a, a kut chu ka hum ruh zui nghal.

"Hlauthawng suh Darling" tiin ka kut chu a kut pahnihin a rawn hum ve a, ka lam lo hawiin min en chiang hle bawk.

"Alexander Carter-a hi a hma chuan ka ṭhian ṭha tak a ni a, ka pate rual daih mah ni se engkimah min pui ṭhin" a thu sawi chuan ka rilru a tihnawm phah hauh lo.

"Buaina kan tawh tak tak hma hian tlanchhe thuai zawk mai ang Hunter, chu chu kan tan a ṭha ber a ni" ka tih chuan a lu a lo thing nasa mai.

"Ni lo ve Darling, thil hi a thlen dan tur dik takin a thleng tur a ni. Engtik niah emaw chuan min lo la zawng chhuak dawn tho tho, chuvang alawm tun thlenga ka hming leh ka thlahte hming thlak ka duh loh"

"A nih chuan engtin nge kan awm dawn? Kei chu i chhungte'n min lo zawn hmuh pawh ka ring tawh lo asin, kan him tawh emaw ka lo ti hman asin" lungngaihna hlirin ka rilru chu a luah khat leh tawh.

"In him dawn alawm, in him ngei ang tih ka tiam a che Darling. Ka chhungte hian min zawng hmu hnai tawh tih erawh ka hria, mahse anni chu ṭhatna in ka hneh zawk dawn a ni" a thu sawi chuan awmzia a neih ka ring hauh lo.

"I pa leh Griffin-a mizia chu kan hre chiang dun khawp alawm Hunter, engtin mah ṭhatna hmangin i hneh thei lo vang" ka ti sep a, ka ṭah chu a chhuak ru tak zet.

"Thei ang, ka danglam tawh zia leh nun thar ka nei tawh tih an hriat chuan an rilru pawh a danglam ngei ang. Ṭhatna hian mi sual ber thinlung a hneh thei tih nangmah aṭang hian ka hre tawh alawm Darling, min en teh" a tih chuan a hmel chu ka en a, min nuih suk pah hian

"Hlauthawng suh aw ka Darling tê, ka chhungte an nih angin an rilru ka hneh theih ngei ka ring" a rawn ti leh sup a, ka hmuiah chuan a fawp zeuh bawk.

"Pu Carter-a hmel pawh chu hmuh leh a châkawm ve tawh hrim hrim alawm, ani paw'n nun pangaia ka nung ta daih hi min awt let zawk ngei ang" hlim tak anga a awm tlat chu ka hrethiam lo a ni.

"Hunter" ka tih chuan nelawm zet hian a nui suk a, a ṭhutna aṭanga thovin choka lamah chuan min hruai phei ta daih.

"Vawiin tlai chu eitur siam dun ang aw, chu bakah ka ngai riau mai che. I pum te kha a nuamsam em, keima'n ei rawng chu ka lo bawl vek leh si ang" tiin Chair-ah chuan min ṭhut tir a, a che zui nghal mawlh mawlh.

"Hunter" tiin ka ṭap chhuak hak a, ṭah leh hlau zetin ka hmui chu ka pet ngar ngar bawk.

"Darling!" ka ṭap thawm a hriat rualin ka bul a lo thleng nghal a, ngaihtuah hmel zeta min en chung chuan a meng nur hle.

"Ka hlau Hunter, min thihsan hi ka hlau a ni. Ka thihsan ang che u tih ka hlau a, Brian-a hi kan chan ang tih thlengin ka hlau em em bawk" tiin ka kuah a, ani chuan min pawm kang nghal nawlh.

"I hlauhthawn chhan hi hrilh ka ngai lo ve, mahse ka dam chhung chuan nang leh ka fapa hi in thi dawn lo tih hria la ka duh a ni" tiin kan nupa room lamah min pawm a, khuma min muttir hnu pawh chuan ka thla a la muang tak tak thei lo.

"Ka hmangaih che a, ka hmangaih lutuk che avangin min thihsan ang tih ka hlau alawm" ka tih chuan a nui suk a, min fawp leh ta vawng vawng.

"I engkim hi ka hmangaih vek, chuan kan naute lo piang tur pawh hi" tiin ka dul puar lian ve tawh tak chu a fawp zui zeuh bawk a, ka nui ve ta seih.

"Ti hian lo mu rih la, vawiin tlai chu i pasal hian ei rawng ka'n bawl ang e. Ṭhian hlui Dinner kan kilpui dawn bawk si a, tui taka ka siam ngei chu a ngai ang" nui ri dat chunga ti lehin room aṭang chuan a chhuak zui nghal.

Room chhunga sana ban inkhawng ri thawm chuan thil chi hrang hrang min ngaihtuah zawm tir a, chu sana ban inkhawng ri chuan Hunter-a pa leh a unuapa ṭawngkam min hriat chhuahtir ruai ruai bawk. Eng pawh ni se ka pasal thusawi chu ka hnial thei lo, engkimah amah chu ka ring zawk tur a ni.

Ni e, a sawi kha dik lûl teh se! Kum 6 lai a liam tawh a, pu Robert-a leh Griffin-a rilru pawh a danglam ve tawh mahna, mahse an sual ngaiin an lo la sual reng ang tih chu a hlauhawm khawp mai. Chuti ang a nih vaih chuan kan thi ngei ang, chu chu khawvela ka thil duh lo ber a ni.

Tlai dar 4 a pelh hnu rei vak lovah mipa ṭawng thawm hi ka hria a, room aṭang chuan ka chhuak zui vat. Chokaah chuan Hunter-a leh pu Carter-a chu an lo inkuah a, Hunter-a chu a hlim hmel hle.

Pu Carter-a chu a ṭawng siam siam nghal a, a nui huah huah bawk. Kei pawh chuan ka va fin ve ta vat a, ka awm dan chu a mawi lo deuh a ni.

"I lo thleng tawh maw pu Carter? Chawhma lama i chunga ka awm dan avang khan min hrethiam dawn nia, ka pasal hnen aṭang hian i chanchin ka lo la hre ngai lo a tin ni!" tih pahin ka nui a, ani pawh a lo nui sun sun.

"Hunter Hudson-a i nih tak tak hi ka la ring lo run rum, engtin em em nge i danglam theih zawk?" tiin pu Carter-a chuan ka pasal chu a a be leh ta daih.

"A lo danglam theih khawp mai, heti anga nun thar min petu hi chu tu dang lovin ka nupui Daisy Hudson-i kha a ni e" min chhuan hmel tak hian ka pasal chuan a ti a, tawi tê hian a nui zeuh bawk.

"Ei rawngte i bawl vel a nia, thil awih harsa tak zawng a ni chiang alawm pu Hudson" pu Carter-a chuan a la ti fan a, awih chu harsa a la ti ve ngang a ni ang.

"Kum 6 liam taa min koh ang pawh khan min ko thei reng a nia, inthlahrunna tur a awm lo. Min awt viau zawk lo maw pu Carter, nun pangai neiha chhungkaw din hi thil nuam tak a ni"

"Ka awh leh awh loh che pawh ka hre lo, heti anga ka hmu che hi mak ka la ti em a ni. I hmel, i pian leh i vun rawng te chu la ngai vek mahse i rilru erawh a danglam nasa tawh hle a ni Hunter"

"Fapa kum 6 mi pawh ka nei tawh tak asin pu Carter, va hruai lawk mai teh a Darling" ka pasal sawi ang chuan ka kal thuai a, Brian-a hmel a hmuh chuan pu Carter-a chu a nui nghal var var.

"I pa i chhun hle mai, fapa ṭha tak i nei e Hunter" a tih chuan Hunter-a chu a lo nui tawi ve tak a, Brian-a erawh ngawi rengin a room-ah a phei leh daih.

Dinner chu hlim takin kan kil a, pu Carter-a chuan fiamthu a ngaina ang reng hle bawk. Brian-a biak hlim dan leh a duh zawng sawipui dan te chu a thiam em em a, kan fapa paw'n rei lovah a nel nghal ta thuai. Ka rin aiin pu Carter-a chu a nelawm viau bawk, chhun lamah kha chuan ka hlau hle zawk a nih kha!

Dinner kan ei zawh chuan ka che zung zung a, ka pasal leha ṭhianpa erawh sitting room lamah an ṭhu phei a, Brian-a pawh a room-ah a awm leh daih tawh. Ka chet zawh hnu chuan Juice nen sitting room lam chu ka pan a, an lo titi tui barh barh hmel hle bawk.

"Naupang awm lai kha chuan ka sawi duh lo law law a, an lo hmuh chhuah thuai che u ka ring Hunter" ka ṭhut hnu rei lovah pu Carter-a chu thu dangah a rawn pakai ta.

"Ka hria alawm, nang berin min lo zawn chhuah theih hi chuan an awm hlat ka ring tawh lo, mahse an beisei angin ka che dawn lo a ni" ka pasal aw chu a chhuak pangai hle a, pu Carter-a chuan a en chik hle.

"Engtin nge chet lak i tum a? I awm loh hnu aṭang phei kha chuan Griffin-a zawk a inluling nasa em em a, i pa paw'n khap daih theih loh chang a ngah mai"

"Ṭhatna hmangin ka hneh dawn maw le pu Carter, keimah ang chiah hian nun pangai an hman theih nân ka bei dawn a ni"

"Â lutuk teh suh Hunter, i pa leh i nau mizia chu i hre chiang alawm, kum 6 lai liam tawh mah se an nungchang leh awm dan i theihnghilh mai mai dawn lo tih ka chiang"

"Ni e, ka theihnghilh hleinem, kei hian ka pa leh ka nau chu nun thar ka pe ve dawn a ni. A nuam lutuk pu Carter, hetia nun hman hi a nuam lutuk tak zet" nui chung hian ka pasal chuan a ti a, pu Carter-a chuan Hunter-a chu mawl a tih hmel hle.

"Eng pawh ni se puihna i mamawh dawn tih ka hre lawk sa thlap a, ka mite pawh ka lo ven tir dawn che a nia, fimkhur takin awm rawh Hunter. I pa hian in fapa hi a duh ngei dawn, laksak che u a tum ngei ang"

"A theih loh" ka lo ti nghal thuai a, kan fapa Brian-a min laksak chu eng tikah mah ka phal ngai lo vang.

"Pi Hudson, phal lo mah la i pasal hian a bei let a nih loh chuan in fapa hi in chan ngei ang. Ka sawi ṭhaih che a ni lo, Robert-a mizia ka hriat chian zawk vang a ni" a tih leh chuan ka ṭhutna aṭang ka ding a, ka kut chu hum ruh tawh tak ka ni.

"Khawngaihin kan in aṭang hian chhuak rawh pu Carter, thu thin ṭhawng tak tak min hrilh tur chuan lo kal tawh miah bawk suh" ka ti hmiah a, Hunter-a chuan min lo khap dai ta vat.

"Ka nupui hi a rai mek bawk si a, khati ang lam kha chu sawi tawh lo zawk mai teh ang pu Carter" min thlamuan tum zet hian ka pasal chuan a ti a, ka chalah a fawp zeuh bawk.

"Aw le, ka kal ang e. In in vengtu tur chu ka lo kaltir dawn nia, in mamawh ngei ka ring" tiin pu Carter-a chu a ding ûaih a, Hunter-a chuan

"Kan mamawh lo vang, i thei a nih chuan kan inah hian lo chuangkai tam lo zawk la ka duh khawp mai pu Carter. Min pui tih leh min zawng chhuak tih ka pate'n an hriat chuan i tuar ngei ang, chuvang chuan kalbo thuai la a fuh ang" a ti nghet ve ta charh.

"Ni lo ve, kum 6 hma lamah khan ka pui hman lo che a, tun ṭum chu ka pui ngei ang che. A thu hrimah Denmark ramah hian ka awm rih dawn alawm, a nuam riau bawk" nui var var hian pu Carter-a chuan a ti a, ngawi rengin kan in aṭang chuan a chhuak zui nghal.

PROTECTIVE HUSBAND

By

Havali Adam

Chapter 15

HUNTER POV

Hlauhthawn hmel taka ka nupui kan room lam pan lai chu ka thlir vawng vawng a, a tan chuan hlauhthawnna lohna chi reng a ni lo. Pu Carter-a thu sawi zawng zawng kha thu dik tak vek a ni a, sawi sual pakhat mah a nei lo hial zawk.

Ka pa leh Griffin-a hma chhawn ka tum dan ka sawi te khan mawl min tih hmel em em a, ka nun hmasa lama ka awm dan leh mizia hre chiang tan chuan ka thil tih tum dan chu a âtthlak reng a ni.

Kan nupa room-a lut ta mai lo chuan chokaah ka lut leh rih a, mahse engmah tih tur ka hre lo. Dawhkana ka kiu nghatin ka chal ka dawm vawng vawng a, ka rilru chu ka nupui ang chiahin a buai ru ve a ni.

Nun thar ka neih tawh miau avangin tual thah leh chu ka duh tawh lo va, mi nunna laka tual thah leh ngei ngei ngaiin ka dinhmun a awm ang tih chu ka hlau hle bawk.

Pu Carter-a berin ka awmna a hriat tawh chuan ka pate'n min zawng chhuak har tawh dawn lo tih ka hria, chu chu chiang takin ka hria a ni.

Eng pawh tawk dawn ila ka chhungkua chu ka humhim ngei a ngai, chhungkaw pa ka nih angin chu chu ka tih tur a ni bawk, mahse tharum leh thisen chhuah lam ni lova ṭhatna hmangin ka pate chu ka hneh ngei ngei a ngai thung.

Kawngka kalh ṭhain kan nupa room-ah chuan ka pen lut a, ka nupui Daisy-i chu saisirin khum sirah a lo mu tawm chawih a, ṭawng thlamuan chu a mamawh tak zet a ni.

Khuma ka lawn rualin a che deuh hrut a, ka lam pawh lo hawi lovin rizai chuan a inkhuh zui ta daih. A rizai inkhuhna chawp chuan ka kuah khawm vek a, a lu lam chu keuin a chalah chuan ka fawp ta vawng vawng.

"Darling" ka ti thawp sup a, ani erawh ṭawng lovin a rawn ṭap chhuak nghal hak hak.

"Darling, ṭap suh le! Ka venghim dawn che u alawm, kei hian ka chhungkua hi ka venghim tlat dawn che u alawm" ka tih pawh chuan a la ṭap tawp thei hauh lo.

"Intilungngai lovin thil dang sawi daih ang aw, vawiin lamah i pum a nuam em? I pum hi a puar lian ve tawh ang reng si a, chawlh ka la lawk dawn em ni ang?" tiin ka be leh a, ṭap ri tawh lo mah se a la insut feih feih tho.

"Engkim hi...engkim hi ṭha vek se ka ti, engati nge hlim tak hian kan nun kan hman ve theih loh? Pu Carter-a min hrilh kha a thlen dik tak tak phei chuan awm dan tur pawh ka hre lo ngei ang, buaina tawh hi ka duh tawh lo" a tih chuan ka lam hawi zawngin ka kuai her ta thuai.

"Zep neih ka duh loh avangin ka hrilh tlang tawp ang che Darling, ka pa hian Brian-a hi a duh ngei dawn, mahse i lak aṭang leh ka lak aṭang kan fapa hi khawiah mah a kal sawn lo vang tih ka tiam thung a che"

"Chu chu alawm ka hlauh, kan fapa humhim i tumna lamah thihna chance tam tak i nei a ni. Nangmah ngaia hmangaih em emtu kei hi min ngaihtuah ve lul teh Hunter, tlanchhe leh zawk mai ang"

"Ni lo Darling, tlanchhe lova kan lo hma chhawn a ngai tawh zawk a ni. Pangai takin kan awm dawn alawm, ka kutah dah tawp rawh" ka tih leh chuan ka kuahna aṭang a tal chhuak a, a thin a rim hmel hle bawk.

"I nupui hi min ngaihtuah ve miah lo a nih hi!" tiin khum aṭang chuan a tho tharh a, a ban vawn ka tum chu a lo ṭeu nghal hlar.

"Khum khata mut dun pawh hi ka duh chiah em ka hre tawh lo Hunter, ka rilru hi nasa takin i tina a, i tibuai bawk a ni" a tih zawh chuan room aṭang a chhuak nghal hmak a, kei pawh ka tho ve nghal.

Ka fapa room kawngka ka chum rik rualin a tel lova mu mai turin room chhung lam aṭang chuan min hrilh a, a rilru tihhah belhchhah ka duh loh avangin ka kal sawn ta ringawt.

Kan nupa room-ah chuan ka ṭhu ngawi reng a, muthilh chu ka tum buai duh lo law law. A chhan chu ka nupui taksa si lo chuan kei hi ka muhil thei lo, tum pawh ni ila ka thei ngai chuang lo.

Nun bul thar ṭanin kum 6 lai liam tawh mah se ka nupui tel lova ka mut apiangin ka mi thah tawh te chu ka mumangah ka hmu ziah a, hun kal tawha ka nun dan nunrawng zet avang chuan ka inchhir ngawih ngawih a ni.

Thlak danglam tum ṭhin mah ila hun kal tawh a ni miau a, thil tih theihna chak tak ka nei te a nih ngawt loh chuan ka thlak danglam thei tawh lo tih ka hre chiang hle.

Kan nupa khumah chuan ka ṭhu tlaivar ta ṭhak a, zan rei lai phei chuan ka fapa leh ka nupui mutna room kawngka bulah ka ding char char nghe nghe.

Rilru nat avang leh rilru hlauhthawn avanga ka nupui ṭap feih feih thawm te chu hriat loh der a va har tehreng em, kei a pasal hian a rilru ka tina mek chu a ni si a!

Ka nupui thu sawi chu awihin tlan bo ta ila enge sawt ang? Engmah a sawt dawn chuang lo, kan nun chu ralṭi reng rengin a awm kumkhua zawk ngei ang.

Chuvangin ka pate chuan min zawn chhuah hûn hunah min zawng chhuak se, kan tan chuan tlanchhe lova lo hma chhawn tawp chu thil ṭha ber a ni.

Kan lo hma chhawn avangin ka nupui leh ka fapa chu na tawrh tir ka tum reng reng lo, humhima an tihnat theih lova awm tir ka tum zawk a ni. Ka humhim dawn avangin tharum lam hman ka tum lo va, thisen chhuah zawng leh mi nunna la zawnga chet ngat phei chu ka tum lo leh zual.

Zingah chuan Breakfast tur ka buatsaih mawlh mawlh a, tuk dang ang chu ni se ka hna lamah ka kal leh tawh ngei ang. Ka nupui ngainat ber chi eitur chu Breakfast atan ka siam a, a bulah chuan pangpar ka hung tel bawk.

Kei chuan eng pangpar nge a nih tih leh a hming pawh ka hre lo, ka nupui rilru hah leh na chu thawi dam ka duh avangin ka lo chhawp mai a ni.

Ka nupui ni lovin ka fapa zawk chu a lo tho hmasa a, an eitur ka siam mek tih a hmuh rualin ka lam a lo pan nghal chat. Ka bula chair-ah chuan a ding a, ka nghawnga kuah pahin a ṭawng zet zet reuh a, pawn lamah ngawichawi viau ṭhin mah se a nu leh pa bulah hi chuan a ṭawng tam ve thei khawp.

Ka thil siam mek chu ka tem chhin tir vel a, a tui thu sawiin min fak vel chiam reuh a, ka fapa chuan kei ang mihring nuih nachang pawh hre lo hi min tihlimin min tinui ngun hle a ni.

Kum 6 lai a ni ve tawh reuh a, a rualpui te aiin a lian bawk a, a sawi dan chuan an section-ah amah aia lian chu pahnih khat chiah an awm nghe nghe.

Zing dar 8 chu a ri hnai ta kûar a, ka nupui erawh thawm a la rawn nei eih lo. Kawngka hawngin ka va bih dêk dek a, a lo muttui hmel kher mai. Ka fapa nen chuan breakfast kan ei dun a, kei chuan ka ei ve lo tluk a ni.

Ka fapa chuan school ban thuai thuaia insual dan leh inven dan zir chu a châk thu a sawi reng a, thisen chhuah châk zawngin a ṭhanglian ang tih erawh ka la hlau ru hle.

Thutlukna ka siam tirh khan ka ngaihtuah chiang vek tawh a, mahni inven dan leh insual dan satliah tal chu ka zirtira a thiam ve a ngai a ni. Nakinah hun a kal zel ang a, nupui fanau te a la nei ve ngei ang a, a chhungkua venghim zo tur khawpa mihring ṭuan ṭha a nih theih nân a naupan lai aṭanga lo zirtir chu ka tihmâkmawh a ni thung.

Brian-a chu Bus-a kal lovin an School thleng ka va thlah a, haw lamah pawh ka hruai leh a phut hle. Kei pawh chuan ka hruai leh ngei tur thu ka hrilh ve mai a, a hlim hmel chuan ka rilru chhungril a tihlim veng veng thei.

School-a an Miss te'n an hruai luh thlengin ka lo ral thlir reng a, an luh dawn tak tak chuan ka lam lo hawiin min lo bye bye leh hram bawk.

Ka motor-a ka lut tur chu tu emaw ni hian ka hmingin min lo ko a, aw lo chhuahna lam chu ka hawi rang hle. Min kotu chu Roger-a lek hi a lo ni a, han inhmuh reng pawh chu thil nuam tak a ni lo. Keimah avangin kan pute'n a hna aṭang an ban phah a, chuvanga ka laka la thinrim hmel reng pawh chu a ni.

"Dawihzeppa" tiin min nuihsawh leh hle tawh a, ka motor chu a chum khuar dawk a, ka thin chu a rim ru ve reng tawh.

"I ṭha maw?" hawihawm thei ang ber chuan ka ti a, ani erawh nui sukin ka motor kawngka chu a chum ri leh ta pawp.

"I fapa pawh hi ka fapa school kalna hmunah luhtir ve tawh suh, he khua aṭang hian chhuak thuai teh u" elhsen tak chuan a ti leh a, ka lo nui mai mai thung.

Dik taka sawi chuan keimah vanga hna aṭanga ban a ni tih chu hre tho mah ila a tam zawk chu a thiam loh a ni tlat, kan pute awm laiin min cho reng zel lo se chuan ban a nih kher ka ring lo. Ka lua min vuak ṭum pawh khan na ka ti em em lo, mahse tlêm chuan ka lu a hai ve deuh chhak a nih kha!

Hriat nuam loh zet zet ṭawngkam a chhah chhuah hnu chuan a kal sawn ve ta hram a, kan in lam pana motor ka khalh lai te chuan thinrim lutuk avangin ka puak keh lo chauh.

Ka insum zo lo tak ngial dawna ka inhriat avangin kawng sirah motor chu ka tiding thuai a, chuti lo zawng in control zo lovin ka che sual mai ang tih a hlauhawm zawk.

Ramhnuaiah chuan chak takin ka tlan lut a, mi hmuh theih loh chin nia ka hriatah chuan ka ding a, ka bul hnaia thingkung ding awm remchang hmasa ber chu ka hnek hek ta hlawih hlawih.

Ka thinrimna a reh tial tial hnu chuan ka che tawp ve mai a, thinkung aṭanga chuan a hnai a lo luang chhuak zawih zawih nghal bawk.

Chuti ang chuan vawi tam tak ka awm ṭhin, ka insum zo dawn lova ka inhriat apiangin ka kut chu a za zek zek zel. Mi kutthlak ka duh tawh bawk si lo, kut ka thlak palh a nih chuan a na thawkhat dawn tih ka hre chiang em em. Ka nupui leh ka fapa hriat lovah pawh chuti anga awm chu ka nei tawh ngei alawm, mahse vawi khat chiah a ni thung.

Kha ni, zu rui pakhatin ka fapa a hauh hrep ni khan ka buai vek a, zan pawh mu thei lovin ka awm a, ka nupui leh ka fapa muthilh hnuah ramhnuaiah ka thinrimna chu ka va hri thla ta ringawt.

Daisy-i nen kan inneih kum phei kha chuan ni tin mi hmuh loh laiin ka kal ṭhin hial a, mahse nun bul thar ka zawh mek chuan awlsam taka ka thinrim ṭhinna te chu an khap dai tial tial ve tho bawk.

Kan in ka thlen chuan ka nupui hmel ka la hmu lo ta cheu a, Brian-a room ka luh chuan a lo ṭhu ngawi ran mai. Ka biakna chu hre lo ang maiin a awm a, chokaa ka hruai phei lai te chuan a la ṭawng chhuak duh miah lo.

A bulah ṭhuin eitur chu ka barh a, ngawi rengin a lo ei ve mai bawk. Ka nupui awm dan chuan ka rilru a tina, chutia anga a awm chhan lah chu ka hre chiang ropui mai bawk si.

"Engati nge i kut hi a thi?" eitur barh leh ka tum lai chuan a rawn ti ta chat mai, barh luih ka tum pawh chuan a duh ta hauh lo.

"Engati nge i kut hi a thi? Sawi rawh, engtin nge i tihhliam theih?" a rawn ti nawn leh ngat a, eitur chu barh ka tum zui duh ta bik lo.

"Nat pawh a na lo, a ho lutuk" ka tih chuan chiang zet hian min en a, thi ser ser mah se ka kut chu na tihna ka nei lo hrim hrim.

"A nat leh nat loh ka zawt lo che, eng vanga thi nge a nih tih lam a ni ka sawi" a ti leh hmak reuh a, a hmuiah chuan ka fawp ta ringawt.

"Hunter!" ka âwma a nam vak hnu chuan a rawn ṭuau a, ṭah chhuah hmel zet hian min en ran bawk.

"Ṭah tum tawh lo teh Darling, ka kuta hliam awm hi chu ka tan eng tham mah a ni lo" ka tih chuan a che thut a, kal sawn a tum chu ka kuah bet rang hle.

"Min thlah teh Hunter, i awm dan hi min hmangaih vang niin ka hre tawh lo. Min hmangaih ni la chuan thu zep i nei lo ang a, i pate'n min zawn chhuah theih lohna hmunah min kalpui tawh ngei ang" a tih chuan ka kuah nghet ta sauh.

"Min thlah la, i hnaa kal turin insiam rawh, i tlai mai ang" kan ngawih dun vang vang hnu chuan a rawn ti leh a, hnaa kal ka tum reng reng hleinem.

"Vawiin chu ka awm dawn che" ka tih rualin ka ban pakhat zawk chu a chawi thla a, a ṭap tawh lo tala ka rilru pawh a thawveng deuh hawk.

"A nih chuan Brian-a va hruai ang che" a rawn ti pangai ve leh mai a, kan room bul chiah bathroom-ah chuan a lut zui nghal hmak.

Ka nupui chu ka khawngaih khawp mai, a rilru tihah loh hram chu a ngai a ni. Chhunah chuan kan in kawta thing ka la eh loh ho chu ka ek a, a tam lutuk loh avangin ka ek zo rang hle.

Brian-a te school ban hun awmah ka nupui chuan min lo ko a, ka lunch tur a siam sa chu min ei tir bawk a, mahse a ṭawng tam lutuk lo thung.

Thla a liam a, ka nupui nau neih hun pawh a hnaih ve leh ta khawp mai. Kei chuan mipa bawk a nih leh ka ring a, ni leh ngei se ka ti bawk. Ka hna lamah pawh ka buai leh mawlh mawlh hle a, thingkih leh khawl thil vel khawiha ei zawn chu a nuam ka ti tawh hle bawk. Ka thawhpui te phei chuan ka thawh tur dik tak a nih thute min hrilh a, ka lo nui mai mai zel thung.

"Hudson-a hi chu âw, khangte kha engtin nge i chawi zawh zawk reng reng ni!?" kan thawhpui pakhat kum upa lam tawh chuan a rawn ti a, a chek ri tlak tlak bawk.

"A pian te reng reng hi en la, chawi zo tur chu a ni ve tho mai, mahse amah hian thahruai a ngah ve hrim hrim a ni. Ngawi teh, pa chak inelnaah khan tel ve la a ṭha ang" a bula mi chuan a lo ti ve leh a, chhang chuang lovin ka lo nui ringawt.

"Ni tak e, tel ve tak tak la a ṭha ang Hudson. Thla lehah khian a awm dawn a, mahse nang chu exercise lak hranpa vak pawh i mamawh lo" ka ṭhianpa ve em em Kyle-a chuan a rawn ti ve leh ta.

"Duh tawk teh u, kei zawng chuti ang thil vela tel hman ka ni lo. Thla leh khi ka nupui nau neih thla a ni a, chawlh pawh ka la nual zawk maithei a ni" ka tih chuan Kyle-a bawkin

"Pakhatna chuan Krone tam tak an dawng dawn asin, kan thla khat hlawh daih kha ni khatah an dawng dawn alawm" a lo ti thuai a, ka lu ka lo thing ta vat.

"Ka hman lo tak tak ang, chu bakah chuti ang vela tel chu ka ngaina hran lo. Nangmah kha tel zawk mai rawh Kyle, pakhatna i nih chuan i hausa nghal thur thur dawn a nih ber chu!" ka ti ve mai a, ani erawh a rawn nui ta vak vak.

"Nang ang hian thahruai ngahin chak ngat ila zawng thing kit mai mai hian ei ka zawng lo vang, ka chakna hmangin ei ka zawng zawk ngei ang" a lo ti ve leh ta zat zat.

"Eng pawh ni se, ramhnuaiah ka va kal tawh ang e" tiin ka kal sawn zui nghal a, inbiak chiam ai chuan ramhnuaia thing va kih chu ka châk daih zawk.

Ka awmna hmun tur ka thlen chuan thli a thaw vûk vuk a, khua erawh ṭha pangai mah se thli chu ni dang aiin a thaw nasa riauin ka hria. Ka piah lawkah chuan mi pahnih thum thawk ve an awm a, mahse chumi te nen chuan kan inbe ngai lo thung.

Keimah ber hian biak hmasak ka nei mawh khawp a, ka thawhpui te chu ka thawh tirh aṭang tawh ka be hmasa ngai lo hrim hrim zawk.

Thing kitin ei zawng ṭhin mah ila thing phun kan uar em em thung a, pakhat kan kih hian pahnih te ka phun ṭhin a, kan thing vawi khat kih chuan hna a tisawt thei khawp mai.

Darkar 2 zenzawn hna ka thawh mial mial hnu chuan thing hnah te chu a lo tla chum chum a, a innawk ri nasa sawt hle bawk.

Ka ngaih chu a ṭha lo dâwn dawn a, mahse thil ni theiin ka hre bawk si lo. Amaherawhchu ka ngaihtuahnaa awm ang nih theihna chance chu a awm ve leh tho mai, a chhan chu pu Carter-a'n kan awmna a hre tawh tlat a ni. Pu Carter-a'n kan awmna a hriat chuan mi dang paw'n min zawng chhuak har tawp lo vang tih chu ka hre chiang a ni.

Ka piah lawka hnathawk awm nia ka hriatte thawm lah chu a reh diak a, an ṭawng ri melh melh thawm ka hriat ṭhin pawh a reh lai ka hre hauh lo. Ka thil tih lai chawlin boruak inher dan danglam zet chu ka en reng a, zawimuangin khaw dur chuan khaw ṭha lai reng chu a luah khat riai riai bawk.

Kei hian ka hria, ka hre chiang a ni. Chuti ang chuan ni dangah khua a awm ngai lo, a awmzia chu ka nun hmasa lama ka lo hriat fô tawh angin chu ramah chuan mi thar lo lut an awm chiang a ni. Rang taka thil ri vuk vuk lo hnai zel chu enge a nih ka hre chiang hle a, ka bek a fuh hmain en lovin ka lo man ta chat.

"Hrei maw!" ka hriat tawk leka ring chuan ka ti hluai a, mi dang hmuh hlau zetin ka kuta hrei awm chu ka dah thla thuai.

Ka hawi kual zawk zawk a, ka chet zawh chiah dan chu hmu an lo awm palh ang tih ka hlau ru hle a ni. Thawm ri vut vut avang chuan ka hawi chhuak rang kher mai, mahse engmah ka ti hman lo. Mi pakhat hian min lo bawh pawp a, a hnuai lama ka awm rualin min hnek zawm mawlh mawlh nghal.

Kei chuan khawih let lovin ka lo indang char char a, min khawih na lo hrim hrim bawk. Ka kawr awma ṭhamin min paih leng lawp a, ding chunga kan inhma chhawn chuan kei ai tlêmin a tê hret tih ka hmu zui nghal. Ka lamah lo phei pawk pawkin min hnek thlu tawp a, tu nge a nih hre chiah lo mah ila tute tirh nge a nih chu ka hre thung.

Min khawih deuh mawlh mawlh a, ka hmaia vawi tam a hnek hnu chuan ka kâ aṭang pawh thi a rawn chhuak ve ta. Ka bei let buai peih lo, tum pawh ka tum lo, a chhan chu mi thar ka ni tawh tlat. Factory lamah chuan min hnuk phei hmawk hmawk a, min sawisatu hmuhah chuan chau ang takin ka lang tawp.

Factory kan thlen rualin min theh let leh tawp a, ka thawhpui te pawh chu coat suit ha mi 5 chuang velin an lo din hual ṭhap mai.

A ngaihna an hriat loh hmel hlawm hle a, kei lah chu ka pumah an chhuih pawp pawp bawk si, ka kâ aṭang chuan thisen a lo chhuak leh zawk zawk zel. Ka nghawngah rekin min tung ding a, chungho chu ka la hmuh ngai loh vek an ni.

"Mawla! Phiangsen che hian! Sawisa turin ka tih hauh lo che, awm sawn rang rawh" an hotupa nih hmel ber chuan a ti hrawk a, min rek tu chu a hnek thal tawp bawk.

"Sir, ka tihpalh, ka lo hrilh chiang lo deuh a ni, min ngaidam dawn nia" an hotupa chuan a rawn ti a, ka hmaah a ṭhingṭhi zui nghal bawk.

"Tute nge in nih ka hre lo che u" tiin a hma zawnah chuan ka ṭhingṭhi ve nghal a, mak tih hmel zet hian min lo en nghal.

"Pu Robert-a hnen aṭang thupek kan dawng a, kan lo ngaihven che a ni e Sir. Khawngaihin kan zingah lo haw leh tawh rawh, kan rualin lo haw nghal thei la chu duhthusam" a tih chuan

"Min hrethiam teh u, in thu sawi awmzia hi pakhat mah ka hre lo" ka lo ti tlat a, ka nihna dik tak chu ka hna thawhpui te chuan hre lo se ka duh a ni.

"Ni lo, i hre chiang khawp mai Sir. Kan hotupa Robert Hudson-a fapa i ni a, i pa chuan a hnena nangmah hruai let turin thu min pe a ni" tiin a ding a, kei erawh ka la ṭhingṭhi reng thung.

"Lo let i duh lo a nih chuan tharum hman pawh a remti a, khawngaihin tharum min hman tir suh Sir" a rawn ti leh a, ka awm ngaiin ka la awm reng tho.

"Heng laia mite lakah hian i nihna dik tak i thup tih ka hria, kan ruala i lo haw lo a nih chuan heng pawi sawi lo te hi thah kan hreh miah lo a nia" a thu sawi chu ka bengah a lut nawn mawlh mawlh a, ka dinhmun chu a khirh tawh tak zet.

"Heng mite bulah hian i nihna dik tak sawi rawh Sir, sawi thuai rawh" ti hrawkin min tlawh let tawp a, Kyle-a chuan min lo pui nghal vat bawk.

"Nangniho hi Police hnenah ka report mai tur che u asin, he lai hmun aṭang hian kal bo thuai rawh u" a vin ve hrawk a, mahse keimah ang bawkin an tlawh tlu ve ta tawp.

Kyle-a chu an man bet zui nghal a, a chet sawn leh hma chuan a nghawngah chemtêin an tin ran a, Kyle-a chu a hlauhthawn hmel nghal hle. Khawpui rawn riin kawl a phe zuk zuk a, ruah chu rei lovah a sur zui nghal ta buan buan.

Ka pa rawn tirh zinga an hotupa bawk chuan an bula ka let dawn leh dawn loh thu min zawt leh lawng lawng a, a aw chu a nem fahran lo.

"Hunter Hudson, i nihna dik tak kha lan chhuahtir rawh. Chu bakah i pa bula i lo let leh ngei ngei a ngai, ka thusawi hi i zawm lo a nih chuan he pa hi ka that nghal ang" ruah sur tam viau mah se a aw chu a ring ṭha khawp mai.

"Ka that tak tak dawn a nia, hengho hnenah hian i nihna dik tak sawi la, kan ruala i let tur thu sawi bawk rawh" a tih leh pawh chuan ka la ngawi reng tho.

Lei ro tak ni ṭhin kha ruah sur avangin a diak pur a, a diak kawi deuh laiah chuan tui a tling fur bawk. Tui tlingte chu ruah mal chuan a far per chhawk chhawk a, ka bul maia hrai let reng chuan awm dan tur min tihrethiam lo leh zual.

Ka ṭhian kawm ngeih ve em em han thihtir ringawt chu dikin ka hre si lo, ka nihha dik tak ka sawi chhuah loh chuan thahah an vo leh tlat bawk si, ka rilru chu a buai nuai nuai a ni ber.

"Aw le, eng pawh ni se thisen chhuah a ngai ta a ni ang e" a tih leh rualin ka che thut a, ka bula hrei chu Kyle-a te lamah chuan ka vawm phei nghal vat bawk.

"Boss" mi dangho chuan an lo ti hluai hlawm a, kei erawh tu mitmei mah veng lovin ka che zui ta mawlh mawlh.

Thir rit leh sei ve tak hmangin chung mihring pawh ni lo chu ka vaw tlu nghal chawrh chawrh a, ka tha tawpa ka vuak hlawm avangin ka vuak chin chu an lo tho leh tawh lo hrim hrim.

Silai chu an keng na meuh mai, mahse silai an phawrh hman loh khawpa rangin ka che tlat a ni. An lu aṭang chuan thi a chhuak phung hlawm a, mi â ber tan pawh an thi tawh tih chu a hriat ngawih ngawih.

An taksa aṭanga thisen chhuak chu leiah chuan a luang nuai a, ruah tui leh thisen chu an inawm pawlh nuai bawk. Ka tiang ken chu ka thlauh ri bawl bawl a, ruah sur pawh a reh ta tial tial.

Kyle-a awmna lam chu ka pan a, min lo hlauh hmel kher mai. Ṭhu chung chuan a tawlh hnung thuai thuai a, min hlau lutuk chu a thaw hlawih hlawih bawk.

"Ni lo, keimah ka ni lo. Ka sawi awmzia chu ka...eng lo...tuna mi kha keimah ka ni lo" ka ṭawng sual nawk nawk a, a din fel rualin Kyle-a chuan hmanruain min tin zui nghal.

"Eng ramsa chiah nge i nih?" Kyle-a bula mite chuan an lo ti a, an vai chuan hmanrua an keng vek tawh a, ka thil tih dik lohzia chu ka hre chhuak zawm zat bawk.

Van vadakin thawk chu ka la hawk a, ka bul maia nunna nei lo let reng chala hrei bur vâ chu ka phawi a, ka chet dan ringawt pawh chu an lo hlau tawh hle.

Hrei ka lek kan rual chuan an lo au nghal dual a, mahse kei chuan ramhnuai lamah ka vawm ta lawng lawng. Inherin Factory Area chu chhuahsan ka tum a, mahse ka hnungah chuan an lo vaw ri ta chawrh.

"Ramsa, sakawlh, sakawlh hi ṭhianah ka lo nei reng che a maw!?" ka hawi let rualin Kyle-a chuan a lo ti a, min vuakna chu ri chawrh mah se na pawh ka hre eih lo.

"Ka tihpalh a ni e, mahse mi pangai taka nun ka duh ve tawh avangin ka chanchin ka hrilh duh ngai lo che u a ni" ka tih chuan thinrim hmel tak pawhin min en tawh lo, a ngawi reng ringawt.

"In zavaia chungah ka lawm e, hna thawhpui nuam tak in ni e. Vawiin aṭang chuan ka lo kal leh tawh lo vang, ka kal ang e" tiin ka inher a, ka motor hunna lam chu muangchangin ka pan ta hnak hnak.

Motor ka khalh lai chuan ka nguai em em a, ka hun tawn mek chu hringnun hrehawm tak zawng a ni chiang a ni. Harh chhuak thutin ka speed chu a chak thei ang berin ka up a, ka nupui leh ka fapa ka hre chhuak har lutuk chu ka inthiam lo nasa hle. Horn te chu ka pe vak vak a, ka rilru chhungril chu thinrimna leh hlauhthawnna hlirin a khat tawh a ni.

In kawta ka motor ka tihdin rualin ka chhuk thuai a, ruah chu a tam lutuk lovin a la tla seng seng bawk. Dimna nei miah lovin kawngka chu ka hawng ṭhuai a, ka nupui leh ka fapa chu ka zawng zui nghal a, ka la hmu mai lo zui.

Ṭawng melh melh thawm awmna lam chu ka pan vat a, bathroom-a ka nupui leh ka fapa hmel ka hmuh rual chuan ka kuah thlawp ve ve nghal.

"Hunter!"

"Daddy!" an lo ti rual ṭhawt a, ka fapa chu lawm avangin nui ver ver mah se melh pawh ka melh rei peih lo.

"Inbual rawh u" ti nghutin ka kuahna chu ka phelh a, bathroom aṭang chuan ka kal chhuak rang hle.

Chokaah lutin tui chu ka in khawlh khawlh a, keimah chu ka buai vek tawh. Ka thisen te chu a rawn chhuak mai dawnin ka hria, kum 6 hnua ka tual thah leh hmasak berna chuan keimahah nasa takin nghawng a nei a ni.

Ka fapa leh ka nupui inbe thawm chu ka hre reng a, khang mite khan nupui fanau ka nei a ni tih hria se chuan ka chan ngei ang.

"Room-ah awm rih tur aw Brian, ruah a sur bawk sia muhil daih rawh" tia kan fapa a biak hnu chuan ka lam panin ka nupui chu a lo kal a, ka awm dan chu a chik hle bawk.

"Eng thil chiah nge thleng Hunter? Khati ang em ema hlauthawng hmel kha i la pu ngai miah lo a nia, i thawmhnaw te lah chu a la huh vek bawk si" a tih chuan ka din hnaih vat a, min chhoh melh ta ran mai.

"Tual ka that Daisy, kei hian loh theih lohna avangin tual ka that a ni. Anni kha ka that lo a nih chuan ka ṭhiante an that dawn si, ka tan chuan tih ngaihna a awm lo" ka tih chuan

"Eng nge i sawi awmzia hî? Tute nge i mi thah chû? Sawi chiang teh Hunter, kan dinhmun hi a derthawng tawh lutuk em ni?" a lo ti nghal a, a hmelah chuan hlauhthawnna nasa tak ka hmu thei.

"An lo thleng hnai tawh, keimah min hruai let tura ka pa mi tirh te vawiin khan ka that a ni. Nangni hi khawiah emaw ka dah ṭhat che u in ngai, chuti lo chu thil pawi a thleng ang tih ka hlau"

"Ka duh hauh lo Hunter, i tel lovin awm kan duh teuh lo, kan rualin i biru ve tur a ni" a tih chuan a bianga dawm chungin

"Ni lo, kei hian a tawp nân tak tak tual ka that leh ang. Tun ṭum chiah hi tual ka that leh ang a, buaina awm mek leh awm thei zawng zawng hi kei hian ka tireh vek dawn a ni" ka tinghet charh charh a, ani erawh a hlauhthawn hmel zual sauh.

"Hunter, i thil tih tum hi a hma ai khan ka ngaina lo daih zawk, khawngaihin min tlan bo pui thuai mai teh" phelh phang hian a ti a, ka lu ka lo thing vat thung.

"Pu Carter-a lo kal leh hûn hunah ka tel lovin in kal bo ang a, ka lo zawng chhuak leh ang che u" ka tih chuan pawr fiah tak hian

"Ka duh lo" a ti tuar a, ka insum rei thei ta bik lo.

"Ka thu hnial hlek suh Daisy, ka tel lovin in kal bo khawp ang, chu chu ka thu tawp a ni" ka ti hrawk a, ka aw a khauh ṭha lutuk chu a khawk thei hialin ka hria.

"Nunrawngpa" ti leh tûarin ka nupui chu ṭap chung hian kan room lamah a tlan phei nghal a, kei pawh rilru hah avangin ka ṭhu zawi ve ta hnawk.

A theih chhung chu tual thah tawh loh ka tum kha a ni a, mahse loh theih lovin ka that leh ta si. Chu chuan ka rilru zawng zawng a thlak danglam nghal vek a, a hmaa ṭhatna hmanga ka pate hneh ka tum pawh chu ka sut leh ta vek. Thisen vekin buaina hneawm zet inzam kual nuai chu tihreh ka duh, ka duh tawh lutuk.

PROTECTIVE HUSBAND

By

Havali Adam

Chapter 16

Kar 3 a liam leh meuh chuan ka nupui nau neih thla kan chuang kai der a, ka beisei aiin ka pate chu an lo lang har leh lawi si bawk. Kan in hnuaia ka ral thuam dah te chu ka phawrh chhuak vek tawh a, ka fapa leh ka nupui chuan engmah an hre lo thung. Ka nupui chu a ngawi reng zel a, ka biak pawhin min chhang tawh ngai lo hrim hrim. Khum khatah tak ngial pawh kan mu dun ngai ta lo va, ka bulah ni lovin Brian-a bulah a riak daih zel.

Ka biak chu a hre vek a, ka thil sawi leh ti tura ka tih te chu thu awih takin a ti mai a, mi â ang maiin ka lakah chuan a awm a ni. Thinrim aw emaw vin takin ka be leh tawh ngai lo va, ka lo vin vak kher kher te chu inchhir tak ka ni. A pum puar lian tawh viau mah se a chet a chawl lo va, Brian-a school kal hlan chuan pangpar bulah a tal chawt a, naute kawr tur tak ngial pawh a phiar duh tawh ngai lo.

Pu Carter-a lah chu a lo lang har phian leh nghal a, mahse Denmark ram chu a chhuahsan mai mai dawn lo tih ka hre chiang hle thung. A hmel rawn inlan leh vat se, ka nupui leh ka fapa chu ram hla takah hruai bo rih se ka duh a ni. Chutih chhung chuan keiin ka pa leh Griffin-a te lo bei ila, chu chu ka ruahman dan dik tak a ni bawk.

Lunch ei a hun chuan ka nupui chu ka zawng a, ka rin ang ngeiin kan in kawta pangpar awm tlar duahna hmunah chuan a lo awm leh vâng tawh. A lam panin ka phei a, a bul ka thlen te chuan min lo bengkhawn lo hrim hrim. A hnung lam aṭang ngawi rengin ka kuah a, a awm dan a la tidanglam eih lo.

Lunch eitur ka buatsaihsak thu ka sawi chuan a aw a thian kharh a, mahse kal sawn emaw chet sawn emaw pawh a la tum ta chuang lo. Ka hna aṭang ka ban thu leh ka thawhpui te'n ka nun hlui an hriat tawh thu ka hrilh vek tawh a, chungte chuan a rilru an tihah zual a nih ka ring ber. Naute nei ṭep tawh a nih avangin a rilru tihhah reng chu ka duh bik lo, hlim taka siam chu ka duh ngawih ngawih zawk.

"Darling, engkim hi nang leh ka fapa tana ti ka ni asin" ka tih chuan ka lam hawi zawngin a lo inher a, min buk khum zeuhin in lam chu a pan ta nal nal.

Thli thaw deuh vûk vuk chuan ka ngaih a tiṭha chiah lo va, kan ram chhungah chuan mi thar an lo awm nawlh ang tih ka hlau ru khawp. Thlithlai turin ramngaw lamah chuan ka kal a, thli awm dan chu a reh ve leh mai avangin ngaih ṭhat lohna pawh ka nei leh ta lo. Khua erawh a dur deuh ruih a, ruah sur chu a hnaih hmel viau bawk.

Muangchangin ka haw ve leh mai a, kan in chhunga pen luh chu ka châk zawk zawk hran lo. Ka nupui hmel chuan ka rilru a tina tlat a, chuti ang hmel pu tur chuan a bul chu keimah ka ni leh bawk si. Ral kawnga School Bus tlan ka hmuh chuan Brian-a te pawh an lo ban tawh ka ring thiam mai a, ka nupui chuan a hruai leh thlap tawh zawk ang.

In chhung ka luh rualin kawngka chum ri dawt dawt thawm ka hria a, mak ka ti ang reng hle. Ka nupui chu Brian-a kawngka hmaah a ding a, kawngka hawng turin a lo au lawm lawm bawk. Min hmuh rualin kawngka chu a chum nasa zual a, a bul ka thlen phei chuan room chhung aṭanga ka fapa ṭap thawm chu ka hre zui nghal.

"Buddy, kawngka hi hawng rawh le. Daddy nen hian inbia ang aw, ṭap lovin lo hawng rawh le Buddy" ka ti ve thuai a, kawngka erawh ka chum duh ta lo.

"Buddy" ka tih deuh ṭhawt rualin a ṭap thawm chu a reh hmak a, kawngka a hawn chuan min rawn kuah nghal thuai bawk.

"Engati nge ka fapa hi heti ang hian a awm?" tiin ka nupui chu ka zawt a, ka fapa ṭah chhan leh a hmaia hliam awm chhan chu ka hriat ngei a ngai.

"Ka...ka hre bik lo, Bus Stand aṭang khan ṭap chungin a tlan haw alawm, a chunga thil thleng ka zawh pawhin a sawi duh tlat lo" a lo ti ve thuai a, ka fapa chungchang ni lo se chuan a ṭawng chhuah kher ka ring lo.

"Sawi rawh le Buddy, Daddy hi min han hrilh teh. Tu nge i hmai hi hliam? In insual em ni?" sitting room-a ka hruai phei hnu chuan ka ti a, a lo bu ta nghauh.

"Nangmah aiin a lian em ni?" ka tih leh chuan men pur chung hian

"Aw" a rawn ti a, ka lo thaw hak thung.

"Ka zirtir vek che khâ, nangmah aiin lian mah se beih let dan tur ka zirtir vek tawh che alawm Buddy, hmang ṭangkai ta che" rilru tawt zet chuan ka ti a, chutah ka fapa chuan ṭap hliam hliam chung hian

"Naupang a ni hleinem Daddy, naupang a ni lo" a rawn ti ta mai, kei leh ka nupui chu inen chiang tak kan ni.

"Eng nge i sawi awmzia? Min hrilh chiang rawh Buddy, tu nge i hmaia hliamtu che hi!?" ka aw chu a nem hran tawh hauh lo, ka tawt et et tawh zawk a ni.

"Michael-a pa" ka fapa thu sawi avang chuan rang takin ka ding a, ka fapa ṭap hawm hawm chu ka nupui chuan a lo kuah vat bawk.

"Phiangsen che chuan le Roger!" ka ṭawngkam chu ka dang hman tawh lo, vung takin kan in aṭang chuan ka chhuak zui nghal.

Michael-a pa Roger-a bawk maw lo ni leh ta? Ha! Tun ṭum chu ka insum thei tawh bik lo Roger, engtin ngei ka khawih dawn che tih erawh ka hre bik lo nâ a, i taksa eng emaw tak chu a nat ngei ka ring. Kei chauh min nuihsawhin min khawih ni la chuan ka hrethiam che, mahse ka fapa leh zel i lo hliam erawh pawi i ti vawng vawng khawp ang, chuti ang tur chuan ka siam dawn che a ni.

Thinrim takin Roger te inah chuan ka lut a, amah ber chu a lo la awm lo zui. A nupui chuan Bar-a a kal thu leh haw pawh a haw tam loh thu a lo sawi a, khawngaih ru viau mah ila a pasal chuan ka kut a tuar dawn hrim hrim. Chak zetin Bar lamah chuan ka tlan a, Bar kawt ka thlen chuan ka chhuk thuai a, ka kut te chu a za zek zek tawh.

Bar chhungah chuan mi dang pawh an lo tam khawp a, a ṭhen phei chu an chatthla tawh nghe nghe. A la harhfimho chuan min lo en ṭhap a, a them paw'n a tua mah chu ka zah buai peih tawh lo. Table kil ber bula Snooker khel zingah chuan Roger-a hmel chu ka hmu ta, pan ding vet vet tak ka ni.

"Roger!" ka ti hrawk a, amah chauh ni lo a bula awm ve dangte pawh chu an lo hawi chhuak rang hle.

"Aw...dawihzeppa chu i lo kal ngam ve a ni maw" tiin a nui huah huah a, min ngainep tih hriat zeta Snooker a khelh zawm daih te chuan min tithinrim zual.

"Eng vang phiangsenin nge ka fapa kut i lo thlak?" Bar chhung khawk rum rum khawpa ring chuan ka ti leh hrawk a, ani pawh chuan pawr tak hian

"Ka duh a ni mai, ka duh hûn hunah kut ka lo thlak ang, sawi theih pakhat mah i nei lo dawihzeppa" a rawn ti ve fak a, ka kut chu a che chhuak nghal.

A hmaiah tak ka hnek avang chuan a hnunga awm zu bur intlar tam zet chu a delh keh rum a, a rawn tho leh tawh lo hrim hrim. Chu pawh chu ka duh anga nain ka la hnek lo mah mah, ka tha tawpin hnek nâ ila chuan ka pawh chhawn lovin a thi ngei ang, thi nghal turin a point tak chu ka hre chiang em em bawk, mahse ka hmelma a nih hran loh avangin ka that lo mai chauh zawk a ni.

Ka lu chu ka hnung lam aṭang tu emaw ni hian a rawn vaw chawrh a, a hmanraw hman chu a keh darh chuai bawk. Ka tan chuan chuti ang lek chu a na tham lo, na lo tak a ni. Ka hawi let chuan keimah ang vela palian nen hian kan inhma chhawn a, min vuak a tum leh chiah chu ka lo man ta chat. Hmanrua chu ka kut khing khatin ka ṭhuai tliak rawp a, thinrim tak ka ni.

"Hrep hlawm che u chuan!" ti vin hrawkin Snooker Board chu ka hnek pâwp hawk hawk a, ka vawi thum hnek hnuah chuan hman tlak lovin a chhe vek a tih theih.

"Ka kut i tuar duh a nih loh chuan ka kawng dal suh" khauh takin ka hmaa ding chu ka bia a, a tawlh sawn rang hle.

In ka thlen chuan ka nupui leh ka fapa chu an lo la inbuaipui a, Daisy-i chuan ka fapa hmaia pem awm chu damdawi a hnawih a, min biak chu a châk hmel hle bawk. An inbuaipui fel hnu chuan ka lamah ka fapa chu a lo tlan phei a, ka lo pawm nghal chawt. Duat takin ka pawm a, ani erawh a ṭap thung. A room-ah ka pawm lut daih a, ka fapa chu ka khawngaih reuh tak tak a ni.

Ka mit chu ka chhing vang vang a, ka fapa khum chu ka tan chuan a te mah mah a ni. Bawp tawmin ka mu saisir a, ka bula ka fapa thaw ri sêk sek chu ka ngaithla reng a, nun hahdamna chu lei theih ni ngat se zawng ka lei chiang ngawt ang. Ka nupui leh ka fapa rilru a nat chuan ka na ve zel a, a chhan chu ka tan an pawimawh em vang a ni.

Brian-a room kawngka chu a inhawng ri khep a, lo lut mek chu ka nupui a ni tih pawh ka hre reng a, mahse ka meng duh rih lo thung. Thawm a dim hle a, min tihharh a hlauh hmel hle bawk. Dim zet hian ka kut chângah chuan damdawi a hnawih a, ka kut chu a hliam tih pakhat mah ka hre leh pek ta lo.

Chutia thawm dim tak leh min tihharh hlau taka damdawi a hnawih lai chuan ka meng thut a, mahse ani chuan ka meng tih a hre hauh lo. Ka kut chu a en ngawih ngawih a, a chhem heuh heuh a, a tan chuan ṭhut hniam chu a harsa lam hret a ni. Ka lam a lo hawi thut a, ka lo en reng avang chuan a phu hle bawk.

A awm dan siam ṭhain a tho thuai a, room aṭang chuan a chhuak zui nghal. Kei pawh ka fapa mut dan chu ka siam rem a, ka thawhsan hnu pawh chuan a la mutui hle. Ka fapa room aṭanga ka chhuah rualin kan nupa room-a ka nupui lut chiah chu ka hmu hman a, ka nupui chu biak ngei ngaiin ka hria a ni.

Kan nupa room chhung ka luh chuan khum mar sa thlap te chu a zut mar leh vel a, Table Lamp bula thil inhung ṭha sa thlap te chu a rem fel chawp leh vel a, a awm dan chuan min tihamhaih letling viau zawk a ni. A hnung lam aṭang chuan ka kuah a, a che tawp ta hmak. A taksa chu a ṭang ṭung a, a thin phu chu a rang hle bawk.

"Darling" ka ti chiah chu a rawn ṭap chhuak hak a, ṭah leh hlau zet hian a hmui chu a hup rang hle.

"Ka Darling tê" ti leh supin ka kuai her a, min hmu hreh a ni ngei ang a mit chu a la chhing tlat thung.

"Meng rawh le Darling, min en rawh le" aw dam taka ka tih chuan zawimuangin a meng a, mittui nen chuan min chhoh en ta ral.

"Ka....ka ngai lutuk che Hunter" tih chu a sawi chhuak thei hram a, a ṭah zawm nghal hawm hawm.

"Daisy, Daisy Hudson, Darling, kei pawh hian ka ngai tak zet che a ni" ka ti chhuak ve thuai a, kan taksa chu inhlattir ka phal leh tawh lo.

A dul teh hrep chu ka ning ru hle mai, puar lo se chuan ka nupui chu duh tawka kuah ka châk a ni. Ka taksa ngheng chuan uar zetin a ṭap hawm hawm a, ka puak keh thei mai dawnin ka hria. A chalah leh a chhip samah chuan ka fawh chhawk mawlh mawlh a, a hnungte chuan duat zetin ka chul nawn sek bawk.

"Ka tihpalh, ka tihpalh lutuk Hunter" a duh tawka a ṭah hnu chuan a rawn ti a, ṭap tawh lo mah se a aw chu a la pangai thei chiah lo.

"I thiam loh a awm lo Darling, vawi khat mah awkâ vinin ka be leh tawh lo vang che, ka vin avang che khan ka inchhir lutuk asin Darling" ka ti sup a, ka inchhir tak tak bawk.

"Ni lo, ka thiam loh a ni. Ka awih ang, i thu ka awih tawh ang. Kal bo tura min duh a nih phawt chuan kan kal bo ang, mahse min thihsan a nih si chuan eng tikah mah kei hi ka inngaidam thei tawh lo vang"

"Ka thih i phal em ni?" ka tih chuan lu a thing vat a, ka biang chu a kut pahnihin a dawm a, kan infawp leh ta vawng vawng.

"Hre reng rawh Darling, nang hian ka thih i phal hma chu ka thi lo vang. Lo phal ta pawh ni la kei hian thihsan che u ka duh reng reng lo, i hria maw?" kiai suka ka tih chuan a rawn nui ve leh thei ta.

"Ka hmangaih che Hunter Hudson, nangmah be lova khang ni ka hman ral tâk te kha kum tam tak ang mai a ni" a tih chuan ka nui a, khumah chuan ka mutpui zui nghal bawk.

Min hnung chhawn zawngin a mu a, keiin a duh ang takin ka kuah a, ka taksa nghen chu nuam a tih thu a sawi neuh neuh a, kar eng emaw zat chu ka nui tawh lo tih ka hre chhuak nghal. A pum chu ka chul reng a, ani'n ka kut chungah a kut a nghat thung a, kan nupa inkar boruak ṭha ta chuan min tihlim leh tawh hle a ni.

"I va that em ni?" kan ngawih dun vang vang hnu chuan a ti sep a, a sawi tum hrilh nawn ka ngai hran lo.

"That ṭep, ka that teuh teuh tak tak a ni Darling"

"I that ringawt ang tih ka lo hlau teh asin, i that lo hlauh chu ka lawm hle mai"

"Sawi tawh lo vang, hahdam ka mamawh a ni. I bulah chauh lo chuan ka hahdam thei lo, i taksa ka sik loh hi chuan ka muhil thei lo bawk" ka tih chuan

"Kar thum chhung zawng khan i mu ṭha bik na nge?" a rawn ti a, min thlek deuh hâ bawk.

"Muhil turin min beisei hauh suh Darling, i lo ring a nih chuan i ring sual chhiavâ a ni. Nun thar ka neih hnua kar hrehawm ber a ni hial ang, nang erawh chu i mutui viau ang chû"

"Ni lo Hunter, mutmu ka tuah ṭha bik teuh lo mai. Muhil lo tawp chu ka ni lo va, mahse ka mu tlem em em thung"

"Mut ṭhat loh kha naute tan a ṭha lo a ni lo'm ni?" tih pahin a biangah ka fawp zeuh a, ka mut chu a chhuak dawnin ka hria.

"Doctor chuan a ṭha lo a ti ngei a, mahse kan boruak khan a zir lo em a tin ni!" a tih chuan inbeng kang deuh hlekin a hmuiah ka fawp a, min lo chhang let rang hle.

"Boruak ṭha lo neih belh tawh lo vang aw ka Darling tê, ka venghim tlat dawn che u tih hre reng bawk la ka duh" ka tih chuan nui sen sen chung hian

"Aw le, thihna ata min chhan chhuak thei awmchhun kha i ni miau a, i thi mai mai dawn lo tih hi tunah chuan ka hre chiang tawh a ni" a rawn ti a, a kâ aṭanga chuti ang thu hriat chu a nuam hle.

"Muhil lawk ang le, i taksa sia mut hi ka mamawh tak zet tawh a ni" ka tih chuan insiam ṭha sawk sawkin min khan chial a, khawvela ka neih rohlu ber chu a va ni chiang em.

images (3) (31).jpeg

Kar khat chu kan hmang ral leh ta, ka nupui nau neih hun pawh a hnai tial tial a, chuti ang bawkin ka pate an lo thlen hun pawh a hnaih viau ka ring tawh. Thla tawp lama naute nei tur kan ni a, hmun ralmuang leh him chinah ka nupui chuan naute nei se ka duh a ni. Hna lama kal ngai tawh lo na nâ na chu ka fapa ka hruai ni tin ṭhin a, a chungah chuan kan hmuh loh hlanin thil eng emaw a thleng leh palh ang tih ka hlau ru thei khawp.

Kar khat leh ni hnih a nih chuan pu Carter-a hmel kan hmu ta hlawl mai, ka rilru chhungril chu a hahdam huai thei hialin ka hria. Pu Carter-a lah chu a hmanhmawh hmel loh ropui mai si a, ka fapa paw'n a lo la hre ve hle. An infiam a, an insual der vel a, an awm dan chuan ka nupui a tihlim hle tih ka hre bawk, mahse kei chuan anniho chu kal bo thuai thuai se ka duh daih zawk a ni.

"I kutah engkim ka dah tawp a nia aw pu Carter, ka nupui hi tun thla tawpa naute nei tur a nih avangin min lo ngaihvensak hram dawn nia" ka tih chuan a lo bu nghauh nghauh a, ka fapa lam chu hawi lehin

"Daddy hi kiss rawh le" ka ti sup a, ani paw'n ka sawi ang chuan a ti rang khawp mai.

"Daddy, lo kal ve nghal mai la, Mommy nen kan rualin lo kal ve nghal mai rawh" a rawn ti niah niah a, ka lo nui suk thung.

"Ka lo kal thuai dawn alawm, apu Carter-a khan hmun nuam deuhah a hruai che u ang a, chutah chuan ka lo kal ve dawn alawm" ka tih chuan

"Min promise rawh Daddy" a lo ti leh a, a hma zawna ṭhingṭhit pah chuan

"Ka promise thlap e Buddy" ka ti ve nghal a, kan kutzungtê chu kan insuih zawmtir zat bawk.

"Motor chhungah sawn Mommy lo nghak rawh le, Mommy pawh a lo phei har lo vang" ka tih chuan thu awih takin a kal phei nghauh nghauh reuh a, ka nui leh ta suk.

"Darling" ka tih chuan ka nupui rai lian ve tawh tak chu a lo nui lui sâng a, mahse a ṭah a chhuak tih chu ka hre chiang hle.

"Fimkhur rawh aw" tiin ka kut chu a chelh ran a, nui lui tawh lo mai se ka ti, ṭap chhuak hawk zawk se ka duh a ni.

"Ṭap rawh le ka Darling tê, min hmangaih lutuk avang leh min ngaih dawn lutuk avangin ṭap rawh le" ka ti ta nge nge a, ani pawh insum buai lovin a rawn ṭap chhuak zui nghal.

"I thinlungah khan i thih ka phal lo tih kha hre reng la, min thihsan tum reng reng suh ang che" a tih chuan a ṭap tawh lo va, a hmel chu a hlim sang tawh zawk thung.

"Aw le, ka thih miah lo vang. Buaina ka chinfel zawhah chuan in bulah ka lo let ngei ang tih ka tiam a che, ka lo let leh ngei bawk ang"

"Ka hmangaih che" ti sepin min kuai kun a, lungchim takin kan infawp zui ta mial mial.

"Kal rawh le, i lung a phut chhung kha chu ka dam turah ngai tawp rawh" nui chung chuan ka ti leh a, ani pawh a lo nui ve leh ta seih.

"Ka hmangaih Hunter, min han fawp leh teh. Nangmah ngaia ka thih mai loh nân min fawp leh la, min hmangaih thu min hrilh mawlh teh" hla pawh a kal hma chuan mangang hmel zet hian a ti phawlh phawlh a, ka lama pawtin ka fawp leh ta vawng vawng.

"Khawvela ka neih rohlu ber i ni Daisy, ka hmangaih lutuk che. I hmel te, i rim te leh i taksa no chêk te hi ka ngai dawn lutuk ka hmangaih Daisy" ka tih chuan amah zawkin min lo fawp leh a, kan inthlah hlei thei lo chu a ni ber.

"Kan kal a hun viau chuan ka hria, vawiin khaw awm dan hi a danglam riau a nia Hunter" pu Carter chu lo ṭawng lo se chuan kan inthlah leh tawp lo vang.

"Kal rawh le ka Darling tê, i lung a phut chhung chu ka dam tih i hre dawn nia aw" ka tih chuan inti phur chawp tih hriat tak hian a lu a bu nghauh nghauh a, pu Carter-a motor lamah chuan a phei zui nghal bawk.

download (3).jpeg

download (3).jpeg (4.66 KiB) Viewed 1875 times

In kawt aṭanga chak taka an tlan chhuak lai chu ka thlir vawng vawng a, nuihzat vang ni miah lovin ka nui ri suk a, ka awm dan chu mi â te pawh ka ang zawk. Pu Carter-a sawi ang tak takin khua chu a dul deuh ruih a, ka ram chhungah chuan mi thar tu emaw tak chu an awm ngei ka ring thiam nghal. Pu Carter-a leh ka nupui te hlei hlei chu an hmu hman ang tih ka hlau a, ka nupui leh fapa te chu him dam takin awm se engkim a ṭha vek a ni mai.

Rei lovah khua chu a thim a, ka nupui leh ka fapa chu ka ngai tak zet bawk. A bik takin Daisy-i chu ka ngai, amah ngaia ka buai vek loh nân zu te chu ka in nghe nghe a, kei leh ka pate inkara thil chinfel tur awm chu chingfel thuai ila ka ti tawh khawp mai. Thisen chhuah chu a ngai ngei dawn tih ka hria, chumi ti tur pawh chuan ka inpeih tawh hle bawk.

Thil ri khep ri lo awm avang chuan ka beng ka chhi leh zual a, pawn lam aṭanga hmuh theih lohna hmun bang kil phenah chuan ka biru zui nghal thuai bawk. Thawm dim zet hian Body Guard pakhat hi a lo lut ṭhem ṭhem a, thawm nei miah lova tukverh hawn chu a thiam khawp mai. Engmah lah chu ka keng lo va, hmanrua ka lo keng hman lo chu inchhir tak ka ni.

A kutah chuan eng hmanrua mah a keng bik lo va, Coat suit ha thlap mah se a chet dan chu tual thah tuma che a ang lo tlat, chu chu ka mak tih tak pakhat a ni. Ka duh chuan a hnung lam aṭang ka that thei reng tawh, mahse a che vel chu ka thlithlai tlawng ringawt. Chokaa a luh te chuan mi pangai ang maiin a kal a, chu pa chu tu nge tih leh tu rawn tirh nge tih lah chu ka hre der si lo.

Sakebaknei te'n an sa seh tur an pel ang chuan thawm dim thei ang berin ka kal phei ṭhem ṭhem a, ani chu sitting room-ah a awm leh daih tawh thung. Chutia a lam ka pan lai chuan ka thah dawn leh dawn lovah ka rilru a la buai ta cheu a, ka rilru chu ka hrethiam tawh bik lo. Min hmuh rual chuan a nghawngah ka banin ka chilh bet a, ka ban chu a lo beng nasa ngang mai.

"Ka...ka.....ka ni lo....ka ni lo.." a rawn ti thei ṭawk a, a theih tawp chhuaha ka ban kuai kau deuh hlek chung chuan

"I hmelma ka ni lo" a rawn ti leh ṭawk ṭawk a, kei pawh ka chet dan chu thlakin chhuatah ka nam bawk ta thlawp.

"Tu nge i nih? Tu lo tirh che nge i nih? Ka thah nghal lohna chhan tur che ṭha tak sawi rawh, minute 2 chhung hun i nei" ka ti khur khur a, ka vo a ni mah zawk.

"Kei chu ka" a tih lai chuan kan in kawngka lam aṭang hian

"Hunter" tih thawm hi a lo awm a, ka hawi phei chuan ka mi hmuh avangin ka meng phawk nasa hle.

PROTECTIVE HUSBAND

By

Havali Adam

Chapter 17

"Amelia!" ka awmna hmun dik tak chu a hriat ka ring lo, chu lai hmuna a hmel hmuh chu rin pawh ka lo la ring chhin ngai lo hrim hrim zawk a ni.

"Unaupa" nui sen sen hian a rawn ti leh a, ka ding ngil hnu chuan ka lam pana lo tlanin min kuah ta thlawp.

"Engtin nge!?" tih bak chu sawi tur dang ka hre rih lo, engtin nge ka awmna a hriat tih leh eng vanga a lo kal nge a nih ka hre lo a ni.

"A mak ti raw?" ti leh sepin thlamuan hmel tak hian ka taksa chu nghet zet hian a kuah a, ka lo kuah let ve mai bawk.

Ka chet dan chuan a ṭhawng hle a, mak tih hmel deuh hian min en phawk hrâ a, mak a ti pawh chu ka dem hauh lo. Ka nun hmasa lamah te kha chuan min kuah pawhin ka kuah let ngai lo va, vui pawh a vui nasa thei hle. Kei lah chuan engah mah ka ngai ngai lo va, ka unaunu pawh ni se kuah let nachang ka hriat loh mai bakah ka tum lo ṭhin a nih kha!

"Hunter! Min....min kuah let ve maw!?" a hmelah chuan hamhaihna hlir a lang a, kei erawh bu nghatin ka lo nuih suk ringawt.

"Oh my God!!!!! I nui.....i nui chiang lutuk Hunter! I chungah hian eng thil chiah nge thleng? Ka...ka unaupa Hunter Hudson-a kha i ni tak tak em? Nge i hriatna i hloh zawk?" a buai phili vek a ni ber.

"Amelia!" ti hluaiin ka nui chhuak hawk a, chungte hlei hlei chu mak a ti zualin ka hria.

"Han nui ri leh Hunter, vawi khat chiah han nui ri leh teh" a tih chuan ka tum loh deuhin ka nui leh a, a rawn ṭap ta ringawt.

"Engtin nge? Engtin chiah nge heti ang em em hian i danglam theih? I taksa ka sik hi chuan nangmah dik tak i ni bawk si, thil awmzia hi min hrilh fiah lul teh" a tih chuan a bianga mittui chu ka hruk sak a, ka nuih leh suk bawk.

"Ka danglam tawh alawm Amelia, ka danglam tawh a ni. Kei hian nun thar ka nei tawh a, chhungkaw thar thlengin ka nei tawh asin" chhungril hlim zet chuan ka ti a, ani erawh a lo kâ hau mai.

"Khaw'nge Daisy-i hi a awm? Nge amah ni lo hmeichhe dang chhungkua i dinpui zawk?" a hmelah aṭang chuan Daisy-i a ngaihtuah hle tih ka hre thei nghal.

"Ni lo Amelia, Daisy-i chu kum 6 liam ta khan ka nupui a ni daih tawh alawm, fapa pawh kan nei tawh asin, tunah hian a rai leh mek bawk" ka tih chuan a awm sawn a, a meng buai leh ta vek.

"Khawiah nge Daisy-i chu a awm? Khaw'nge in fapa chu a awm? Ka hmu châk lutuk, han sawi thuai teh" a ti leh nghal mawlh mawlh a, a awm dan chu a nuihzat thlak reuh, Hudson thlah a ang lo lek lek zawk a ni.

"Ka nupui leh ka fapa chu an kal bo tawh, ka pate lak aṭanga ka venhim theih nân ka kal bo tir rih a ni. Engtin nge ka awmna hi i hriat theih?" ka tih chuan a hawi sawn daih a, chair-ah chuan a ṭhu nghal bawk.

In chhungah chuan kei leh Amelia-i chiah kan lo awm tawh a, nichin maia ka thah ṭep Body Guard kha chu ka hmu leh tawh lo, khawiah nge a awm tih pawh ka hre hek lo. Amelia-i lah chuan ngawi rengin chhuat a bih ngawt ngawt a, a rilru a hah hmel hle a ni. Chair chu pawt chhuakin a bulah ka ṭhu a, ka thawm chu hre reng mah se ka zawhna erawh chhan a la tum loh hmel khawp.

"Amelia" a mal chunga a kut vawn sak pah chuan ka ti leh a, a khabe chawi kanga a hmel ka en chuan a mittui a lo tling pam mai.

"Amelia" ngaihtuah zet chuan ka ti leh a, ani erawh ṭap chhuak hawkin min lo kuah leh ta thlawp.

"Jerome-a...ka pate'n Jerome-a an man mek, an thah ka hlau tak zet a ni Hunter" ka zawhna tak pawh chhang lovin a ti a, a mipa sawi chu ka hriat zawng a ni hauh lo.

"Tu nge Jerome-a chu?" ka tih sup chuan a awm dan a siam ṭha a, a bianga mittui te chu hru hulin a ṭhu ṭha nghal sawk sawk bawk.

"Jerome-a chu ka ngaihzawng a ni a, vawi tam tak ka pa leh Griffin-a'n ṭhen turin min ti ṭhin bawk, mahse ka ṭhen thei si lo. A chhan chu ka hmangaih tlat a, ka thinlung zawng zawngin ka hmangaih tlat a ni"

"Chuan engtin zel?" ka lo ti mai a, thlem dan tur emaw lo sawipui chiam dan tur ka hre lo a ni.

"Thla eng emaw zat chhung chu an man tawh, mahse a la thi lo tih chu ka hre tho. A thih loh avangin ka lung erawh a muang tak tak thei chuang lo, thi thei reng dinhmunah a ding a ni"

"Engati nge ka bulah hian i lo kal?" ka lo ti leh nghut a, a mipa hmangaih Jerome-a chhan chhuak tur chuan min pun a duh niin a lang.

"A chhan chu engkim hi ti tawp la ka duh Hunter, nangmah chiahin heng buaina zawng zawng hi i tireh thei a ni" tiin thawk a la deuh hawk a, chuti anga a hmel khawngaih thlak tak chu ka la hmu ngai miah lo.

"Ka tireh dawn alawm Amelia, engkim hi ka tireh vek dawn a ni. Engtin nge ka awmna hmun hi i hriat chat theih?" ka tih leh chuan

"Pu Carter-a khan min hrilh alawm, ani khan nang pui tur che hian min ti bawk. Tunah hian ka hote'n in hi an veng vek a, i puihna ka mamawh rualin ka puih i ngai ve tho Hunter" a lo ti a, mahse ka ngaih dan a nih vak lo.

"Jerome-a chhan chhuak tur chuan ka pui ngei ang che, mahse i puihna ka mamawhin ka hre lo Amelia. He lai hmun aṭang hian kal sawn thuai la, i sa himna tur ngaihtuah zawk rawh"

"Ni lo, ka puihna mamawhin inhre lo mah la i mamawh ngei a ni. Ka pate paw'n i awmna dik tak hi an hre tawh, an lo thleng har tawh miah lo vang" kei chuan ka pate chu ka lo beisei ru reng tawh zawk.

"Ka hria alawm, anni lo hma chhawn tur chuan ka inpeih vek tawh e. Ka nupui leh ka fapa pawh vawiin khan ka thawn bo chiah a, him taka an thlen ngei pawh ka beisei"

"Pu Carter-a khan a hote min kaihhruai tir bawk a, ka pate ang em emin tam dawn lo mah ila ka ṭha thawkhat viau chuan ka hria"

"Amelia, kei chuan i sa himna zawngin kal bo ve rih zawk la ka ti khawp mai. Keimah pawhin ka ti thei tih chu i hriat chian viau khâ, chu bakah ka pate chu ṭha taka sawipui ka tum hmasa phawt dawn a ni" ka tih chuan lu a lo thing rang hle.

"Ṭha taka sawipui theih in beisei suh Hunter, eng tikah mah a thleng ngai chuang lo vang. Fapa i nei tawh leh nghal, chu chu ka pa'n a duh ngei ang"

"Duh dawn chiang e, mahse fapa ka nei tih a hre dawn hleinem. An hriat hmain ka nupui leh ka fapa ka thawn bo tih pawh hi an hre kher lo vang, chuan tun ṭum chiah hi tual ka that leh ang"

"Daisy-i leh i fapa chuan Denmark ram hi chhuahsan hman hram se ka ti ngawt mai, thlawhna te khan an kal ang tih ka hlau" a tih chuan

"Kal lo vang, pu Carter-a'n a hruai mek alawm, chuvanga lungphang lutuk lo pawh chu ka ni" ka lo ti nghet charh a, ani pawh a bu ta nghauh.

"Engtik velah nge ka pa leh Griffin-a hmel kan hmuh i rin?" kan ngawih vang vamg hnu chuan a lo ti leh a, kei pawh chuan pangai takin

"Ni hnih emaw ni thum hnu velah a nih ka ring, boruak awm dan hi a danglam chak hle bawk" ka lo ti ve mai a, chu chu ka rin dan dik tak a ni bawk.

Zanah chuan kan nupa room-ah ka ṭhu ngawi reng a, Amelia-i leh kei chu kan muhil dawn lo tih ka chiang khawp mai. Chu bakah a ṭap te kha mak ka la ti ru reng, Amelia-i chu hmeichhia ni mah se ka pa zirtirna a dawn ve tho avangin a ṭap lai ka la hmu miah lo, a ṭah chuan a ngaihzawng Jerome-a chu a hmangaih tawh hle tihna a ni mai.

Amelia-i nen chuan kan inbe leh tawh chuang lo, kei room chhungah awmin ani chu chokaah a che ri rak rak a, eitur a siam ni berin ka hria. Kan in bul vel ka thlithlai chuan a sawi ang tak takin Body Guard ṭhahnem tak hi an lo ding ṭhap a, zah takin chibai min buk liam liam bawk.

Ka tawn lohna a rei ve tawh bawk nen ka laka an awm dan te chu mak ka ti dâwn dawn a, mahse langsar takin ka awm dan ka tihdanglam phah chuang lo.

Zing dar 1 vel a nih chuan ramhnuai lamah ka tei phei a, boruak chu a thiangin a dai nuam viau bawk. Thing hnah te chu ka hnim vang vang a, thla eng fiah tak chuan hlimthla a siam nasa hle. Thingkung pakhatah chuan ka lawn chho zawt zawt a, thingzar lian takah chuan ka mu zui nghal bawk.

Ka mit ka chhing vang vang a, ka nupui leh ka fapa chu ka mitthlaah an lo lang a, lawm lovin ka nui leh ta suk mai. Ka nupui chuan min lo nuih ver ver a, hmangaih takin kan infawp a, chung zawng zawng chu a tak ang diakin ka hmu a, mahse ka tual lo thah tawhte thisen leh hmel chuan min tiharh chiang hle.

Meng kawkin ka thaw chhuak ham ham a, thla eng pawh a lang fiah lutuk tawh lo, chhumin a hliah lai tak a ni bawk. Ka lawn tirh ang lo takin thingkung chu a insawi deuh dul dul a, thli te lah chu a thawt dan a dang tlata hriatna ka nei. Ṭhu ngilin boruak inlinglet vel chu ka ngaichang reng a, mi dang an awm ve tlatin ka hre ta.

Inring ranin thingkungah chuan ka awm a, ka hma lawkah chuan mihirng ngei mai hi a lo ṭum ta chat, mahse ani chuan a hnungah ka awm tih a hre miah lo thung.

Lei lama zuan thlak a tum lai takin ka che thut a, thawm a chhuah loh nân a ka ka hup a, ka kawng sira chemtê phawrhin ka that zui nghal hmak.

Minute khat vel a khurh der der hnu chuan thi tih hriat takin a che tawh lo va, thli chu thaw ri nasa tawh tak a ni. Ka mi thah chu thingkungah chuan ka ṭawn bet a, lei lama ka pa hote ni ngei tur kal ṭham ṭham chu ka hmu zui nghal bawk.

Ka silaiah hmawrah chuan Silencer ka vuah thuai thuai a, thingkunga pakai zawt zawtin an chung lam aṭang chuan ka kap thlu phawk phawk a, a tua mah chu an che hman lo hrim hrim a ni.

Lei ka thlen chuan ka mi thate chu an thi chiang nge chiang lo tih ka fiah leh thlap a, an thi chiang nia ka hriat hnu chuan hnim karah ka dah ṭha nghal vek bawk.

Minute eng emaw zah chhung chu lo kal an awm leh palh tâkah tiin thawm ka ngaichang a, mahse dakar chanve hnuah pawh chuan thawm emaw hmelma rim emaw pawh ka hre tawh lo.

"In mit chhi fiah zual ula, in beng tivar zual ula, an lo kal mek" tiin kan in bula Body Guard te chu ka hrilh a, an zinga hotu ber chuan

"Aw le Sir, i thu ang chuan kan lo awm ngei ang" a lo tifiah nghal ṭhak a, min zah tih hriat zetin chibai min buk zeuh bawk.

In chhunga ka luh chuan Amelia-i chu ka zawng nghal a, ka hmuh mai loh avangin in hnuaia ka ralthuam dahna room chu ka pan leh tawp a, ka thlen thlak chuan a lo la awm kip ṭhap mai.

Silai puak ri ka hriat rualin ka che sawk sawk a, Amelia-i chu ka ngaihtuah ta ber a ni. In chung ka thlen chhoh chuan silai hum rana lo ding Amelia-i chu la hmu zui nghal a, a lo hlauhthawn hmel hle bawk.

"Amelia, in hnuai lamah khuan chhuk la a fuh ka ring, chhuk thuai rawh" ka tih chuan chhuk tum lo zeta thaw huai pah hian

"Ni lo Hunter, nang pui tur chea lo kal ka ni. Ka pa leh Griffin-a ni kher lo se chuan ka zam hauh lo vang, mahse an suah sualzia ka hriat chian em avangin ka zam ru mai chauh a ni" a lo ti a, silai chu pawn lamah a puak ri leh ta pawp pawp mai.

"Chhuak suh, chhuak reng reng suh Amelia" chhuah a tum ringawt chu ka pawt let dâwrh a, a chhuah vaih chuan thi tluk a ni.

"Ngaithla rawh, heta an lo kal chhan chu keimah a ni a, an bula let leh tura min duh avangin min that dawn lo tih hre tawp rawh" a la tal ngat ngat avang chuan ka ti leh ta hrawk.

"A nih kei ve hi, ka thi dawn tho alawm, Jerome-a pawh an that tawh ngei ang, chuvang alawm ka pa emaw Griffin-a emaw thah ka duhna chhan" beidawng zet hian a ti a, a rilru tur chu ka hriatthiampui khawp.

"Ka dam chhung chu i thi lo vang, i thi lo vang tih ka tiam a che. Jerome-a pawh chu an la that lo vang, thil tum an nei tih ka chiang"

"Eng thil tum nge nei se i tih a? Nang chu mipa i ni a, ka pa fapa chhuan ber leh a thlahte zinga tual thah thiam ber i ni a, kei erawh hmeichhia ka ni tlat!"

"Ka thu sawi kha i theihnghilh ka ring hauh lo, ka dam chhung chu i thi dawn tei vet lo Amelia Hudson, hlauthawng mah la hlauthawng suh"

"Hudson thlah nih hi ka duh tawh lo bawk, ka mipa hmangaih Jerome Cooper-a hming tawp chhawm ka duh tawh zawk e"

"Hudson thisen chu i ni miau si alawm Amelia, tunah hian hming mai maia buai hman kan ni lo" tiin ka kai dawr dâwr a, ka ralthuam dahna room-ah chuan ka nam lut zui nghal hmak bawk.

"Hunter! Hunter! Lo hawng leh lawk teh, thil pawimawh tak sawi tur ka nei" kawngka ka khar rualin a lo ti leh hram a, thinrim ru takin ka hawng leh ta nge nge.

"Eng thil phiangsen chiah nge min hrilh tur i neih Amelia? Hun kan ngah tawh lo, i awmna hi an hre tur a ni lo bawk" kawngka hawn pah chuan ka ti hrawk a, pawn lamah chuan silai puak thawm a tam sawt hle.

"Daisy-i te hi an ngaihtuahawm dawn tlatin ka hria, Motor-a he ram chhuahsan tur chuan ni 1 emaw ni 2 emaw ni 3 emaw tal an hmang ngei ang" a thu sawi avang chuan ka thinrimna chu a reh ta tial tial.

"Ni lo, a theih loh, pu Carter-a khan a hruai bo hman ngei tur a ni" ka ti deuh sup a, ka rilruah chuan hlauhthawnna chiah a awm tawh.

"Vawiinah an kal bo ni khan i sawi a, an intawk ang tih ka hlau tak zet Hunter" mangan hmel deuha a rawn tih chuan

"Boruak awm dan inthlak danglam chak lutuk hi ka chhiar thiam lo te pawh a ni ang, ka beisei aiin ka pate hian min lo nangching hma a ni" ka lo ti ringawt a, min biak leh hmain kawngka chu ka khar ta hmak.

In chunga ka chhoh lai te chuan ka nupui rai puar mek Daisy-i, ka fapa Brian-a leh ka ṭhian ṭha em em pu Carter-a te chiah chu ka ngaihtuahnaah an awm ngut ngut a, Amelia-a thu sawi te chu thil thleng thei vek a ni.

Denmark ram chhuahsan nân chuan a rei lo berah ni 1 leh a chanve an hmang ngei ang, mahse vawiinah ram chhuahsan turin an chhuak chiah a nih kha!

Sitting room-a ṭhutthlengah chuan hlauhna pawh nei miah lo leh ngaihtuahna buai em emin ka ṭhu ngawi ngul a, silai puak ri thawm te chu ka bengin hre ve mah ila ka hlau chhetê them lo.

Tukverh darthlalang te chu pawn lam aṭang an lo kap keh chuai chuai a, ka thi dawn lo tih ka hriat chianna chuan hlauh min neihtir lo a ni ber.

Kawngka inhawng ri te chu ka hre reng a, ka ṭhutna lam pana lo kal thawm te thlengin ka hriat hmaih hauh lo. A rim atang leh a ke pen thawm aṭang chuan tu dang ni lovin ka pa ngei a ni tih ka hria, mahse kei chuan hawi chhuak lovin zu ka lo in mial mial a, pawn lama silai puak bengchheng tak tak pawh a reh zui ta tial tial.

"Ka fapa...aw ka fapa" tiin ka pa chuan ka ṭhut ang ang chuan min kuah a, kuah let erawh ka tum lo nasa a ni.

"Min en teh ka fapa, ka va ngai tehreng che em" ka pa awm dan chu ka hmu lem vek, a rilru dik tak ka hriat chian em avangin min ngaih chu ka ring hauh lo bawk.

"Han ding teh le, i hmel a danglam tawh khawp mai" amah en loh theih lovin ka khabe chu a chawi a, min pawh thawh ang ang chuan ka awm tawp.

"Nasa takin i hmel leh i taksa hi a danglam a ni ka fapa, exercise i la ṭha tawk lo tih hriat takin thau i ngah mah mah bawk" a ti leh siam siam a, kei erawh ka la ngawi ngul thung.

"I ṭhu teh ang Hunter, nang nena zu no dawm dun pawh a khât alawm le, hmân ang chiah khan hlim takin i titi leh tawh teh ang" tih pahin zu chu a thli ri karh karh a, in chhunga Body Guard awm te chu an ṭhahnem phian mai.

"Ka lo haw dawn lo tih hria ang che" ka ti ram hmak a, ani chuan ka thu sawi chu a ngaihsak loh hmel hle.

"Khati ang lam kha chu sawi rih lo teh ang, kum 6 hnua kan inhmuh leh hmasak bernaah hian thinrima inbiak ka duh lo" dam dap hian a ti a, chhan pawh ka chhang buai peih ta lo.

"Khawiah nge chhiahhlawhnu kha a awm reng reng? Nangmahin hetah hian i cheng ngar ngar tihna nge? Pangai takin inbe teh ang Hunter, dawt tel lovin" a tih chuan

"Daisy-i chu a thi tawh, tui khawh thlaa kan zuan thlak ni khan a thi tawh a ni" ka lo ti deuh hmuk a, dawt lo chu sawi tur dang a awm lo.

"A va pawi ve le, mahse a thi chu i tan pawh a ṭha daih zawk alawm Hunter. Nupui i duh a nih te chuan ṭha takin min hrilh la, dan ṭhenkhat chu khawih danglam a ni maithei asin"

"Thu awmze nei lo sawi lo teh ang ka pa, i lo kal chhan ber hi sawifel ang. Ka rilru chu i hriat ka ring, i hnenah ka lo let tawh dawn lo" ka ti ta fak a, ani pawh a nui tawp ta riai riai.

"Chhiahhlawhnu kha a thih tawh ber chuan i lo let ngei a ngai ang, ka mamawh che alawm Hunter"

"I fapa Griffin-a a awm alawm, min lo tibuai tawh lo zawk teh. Ka rilru i hre tawh a, min letsan thuai la ka duh khawp mai"

"Engati nge kan zinga tel i duh tawh loh? Engati nge lo let chu i tum tawh loh bur? Chhan ṭha tak a awm a ngai, thil eng emaw zep i nei a ni" thil zep ka nei tih chu a hriatna a rei tawh zawk ngei ang.

"Mi pangai anga nun nawmzia hi tem chhin la chuan kei ang bawk hian tual thah i bansan duh ngei ka ring ka pa, chu chu ka thu zep i hriat châk em em chu a ni"

"Engti ang chiaha nuam nge a nih te han sawi ve reng reng la, chuti lo zawng i sawi mah ni se awih mai chu ka harsat tlat" a nui ri deuh hak a, sawiin awmzia a nei dawn lo tih ka hriat avangin ka ngawi leh ta run.

"Nangniho kha! Chhuak teh u, kei leh ka fapa hian inbiak kan mamawh" tiin Body Guard te chu a hnawt chhuak a, ka tan chuan a inrin loh laia thahna remchang tak a ni.

"Enge i tih ṭhin? Khang kum 6 chhung zawng khan nangmaha i awm a nih chuan enge i tih ber ṭhin?" pangai tak hian a ti a, chhan loh aiah

"Thing kitin ei ka zawng" ka ti tawi sup a, mak a tih hmel ngâng mai, mahse rei lovah a nui chhuak ta hawk hawk.

"I va hnehsawh dawn rem rem ve, i tan chuan thing kih mai mai chu a awlsam khawp ang" la nui deuh var var hian a ti a, a hlim der reng chu ka hmu hne tawh tak zet.

"Haw mawlh teh ka pa, nang leh Griffin-a suah sualna vangin Daisy-i ka chan tih ka hriat chhuah lo lai hian min haw san rawh" ka ti bul hmuk a, ani pawh a nui tawp chiang hle.

"Hre chhuak ta la eng nge i tih theih chuang ang? Min that ang maw!? Nge nia kei i pa hi chhiahhlawh mai mai thihna avangin min bei ang?" a tih chuan khauh fak hian

"Aw, ka bei ang che. Ka that che ang a, Griffin-a pawh ka that bawk ang" ka ti nghal a, a ṭhutna aṭanga ding meuhin a rawn nui leh ta.

"I pa hi min that dawn lo tih ka chiang lutuk Hunter, i unau dangte aia ka ngainat em em chhan che chu i tet tê aṭanga min ngainat em vang a ni" a thu sawi chu dik lo a awm hauh lo, mahse a sawi dik tih sawi kher ka tum lo thung.

"Khawngaihin let leh rawh ka pa, Switzerland ramah let leh la, min lo tibuai tawh suh" ka tih leh chuan

"Khawngaih a!?" a lo ti thuai a, a hmelah chuan mak tihna bak a lang lo.

"Khawngaih tih ṭawngkam sawi chhuak thei tur khawpa i danglam ta hi a mak, kimchang takin kum 6 chhunga i nun hman dan min han hrilh teh ka fapa"

"Chu zawng i hriat a ngai lo ve, khawvar tak tak hma hian let leh zawk thuai rawh" ka ti zo chiah chu ka hmai a ri thlawrh a, ka va han insum nasa tehreng em.

"I pa hi thu min pe miah suh, ka thisen leh ka fapa i nih hi!" thinrim zet hian a ti a, chu chu ka pa mizia dik tak zawk a ni.

Ka chet dawn lai tak chuan kawngka a lo inhawng a, Griffin-a hmel ngei chu ka hmu zui nghal. Chet a la hun rih lo tih hre karin ka inkhap dai a, Griffin-a lah chu a la nui heu zui. A hnunga lo lut mek ka hmuh rualin ka ding ngil nghal zawt a, ka kut chu hum ruh vet vet tak ka ni.

"Enteh ka pa, kawngah thil ka lo chhar a, mak i ti ve tho ang ka ring" nui var var hian Griffin-a chuan a ti a, ka thinrimna tibelhchhah turin ka fapa chu a la pawm zui.

"Nang ni maw!? Hunter, chhiahhlawhnu saw a thi tawh kha i ti si a, dawt mai maw min lo hrilh a!" ka pa chuan rum zet hian min melh a, ngeiawm zetin ka lo kiai suk thung.

"Nang pawh maw!? Carter, nang leh zel pawh maw!? Inphatsanna ropui tak a ni e, ṭhian emaw kan nih ka lo ti char char asin" ka pa chuan a ti leh a, chutah pu Carter-a chuan

"Ṭhian chu ni chiah lo ve, i fapa nen zawk khan alawm ṭhian chu kan nih, nangmah nen ni lovin" a ti khauh ve fak a, Griffin-a chuan a inrin loh lai takin a tlawh let nghal tawp.

"Daddy" ka fapa chuan ṭah chhuak zet hian a ti a, ka che tur chiah chu ka pa chuan ka bekah tak silaiin min lo tin nghal thuai.

"Ṭap hlek suh naupang!" Griffin-a chuan a ti hrawk a, an chet hmaa ka lo che lo chu inchhir tak ka ni.

"Griffin, duh tawk rawh. Naupang mai a nih khâ, chutah ka tupa a la ni leh zel a, a va'n ṭha kher em" tiin ka pa ka fapa leh ka nupui awmna lamah chuan a phei a, chet chhuah ka tum rualin

"Min bei let zawnga i che a nih ngat chuan i fapa leh he chhiahhlawhnu hi ka that nghal ang" a lo tih zawm zat a, chet ka tum ûk tawh chu ka tawp ta hmak.

"Anni pathum khan i pawi pakhat mah an sawi lo, in tina ringawt thei lo bawk. Min chhuahsan thuai ula, lo lang leh tawh lo zawk rawh u" ka ti phiar phiar a, ka nupui leh ka fapa hmangin min vau lo se chuan ka that chiang khawp ang.

"Ni lo Brian" ka pa'n Brian-a pawm a tum rualin ka nupui chuan a lo ti thuai a, chet tum mah se an ṭawn beh tlat avangin a che ṭha thei der lo.

PROTECTIVE HUSBAND

By

Havali Adam

Chapter 18

"Nang chhiahhlawh mai mai kha lo rak suh, bengchheng i siam leh a nih ngat chuan ka that hreh hauh lo che a nia" ka pa chuan vin tak hian a ti a, hlau tih hriat taka Daisy-i ṭap khur beuh beuh chuan ka rilru a tina tak zet a ni.

"Ngawi teh, ni leh lo, tlêm chuan ka that hreh leh si ang che. A chhan chu ka tu tur i pai leh mek a, mipa a nih leh ngat phei chuan i chungah pawh zahngaihna ka lantir mahna" a ṭawng dan avang chuan thinrim tak hian

"Ka pa!" ka lo ti tûarh a, ka sa chhuak vek tawh a ni ber, zep lovah chuan thisen ka chhuah châk zek zek tawh bawk.

"I dinhmun khirh tak hi thawk leh khatah a kiam duak thei tih chu i hria alawm Hunter, ka bulah lo let leh rawh" tiin kum 6 kal taa ka ṭhi pek ngei mai chu ka hma zawnah a lo theh phei a, awrh erawh ka tum tawh lo nasa a ni.

"Ṭap tawh suh le, ka tupa duattê. Nangma Grandpa ka nih hi âw, inkawm daih ang aw" ka pa chuan Brian-a chu ṭhutthlenga ṭhut puiin a mal chungah a ṭhut tir a, ka fapa lah chu a ṭap bang hmak ang leh ta nghal a!

"Keima Grandpa maw i nih? Grandpa ka nei ve maw!? Ka ṭhiante paw'n Grandpa chu an nei vek asin, School-ah te an hruai ṭhin" nel takin ka fapa chuan a ti a, kei chu thinrim tak ka ni.

"Aw, nangma Grandpa dik tak ka ni e. I hmingpum eng nge? Min han hrilh teh ka tupa, i pa i chhun ngar ngar hle mai" ka pa'n a tih chuan ka fapa chuan

"Brian Hudson-a ka nia, chuan School banah Daddy nen insual kan zir ṭhin" a lo ti nghal thuai a, ṭah chhuak hmel reng a pu tawh lo.

"Âw i hming tawp aṭang pawh chuan ka tupa i va ni chiang tak em, insual te i thiam maw!? Grandpa nen hian infiam i duh em? Insual chhin i duh em?"

"Aw, duh lutuk, mahse Mommy saw engati nge in ṭawn tlat? Chuan maw sual hmel deuh deuh ka hmu ṭeuh a, keima Grandpa i nih chuan kal bo tir vek rawh" ka fapa chuan a ti daih a, ka pa chu a nui chhuak ta hawk.

"Ka tupa le! I va han fing reuh ve le, ka hnung zuitu ṭha tak i ni dawn e. Griffin, ka tupa sawi ang khan Body Guard te kha kal bo tir rih rawh, mahse awm hlat tir lutuk lo la"

"Ka pa! I â zo ta em ni? Naupang mai mai thu sawi awih suh, i tupa a nih tak tak pawh ka ring lo" Griffin-a chuan a lo ti hrawk a, a aia vin zawkin ka pa chuan

"Min hnial lo mai rawh, he naupang hi ka tupa ngei a ni e. Chhiahhlawhnu kha phelh la, i u bulah sawn a kal châk tawh viau ang" a ti ve leh nghal a, Griffin-a chu ka pa thu sawi ang chuan a che ta nge nge.

Daisy-i chu ka lam panin a lo tlan vat ta reng a, min kuah rualin nghet zetin ka lo kuah ve nghal. Pu Carter-a erawh an la ṭawn thlap a, a vawi khat chet an tan a hlauhawm tham tih an hriat vang a ni ngei ang. Ka nupui chuan ka kut a rawn chelh a, chiang takin min en bawk.

A mitmeng aṭang chuan beidawnna leh manganna ka hmu thei, mahse chung zawng zawng chu ka tihreh sak dawn a ni. Kei Hunter Hudson-a hian ka nupui chu thlabar leh manganga siam ka duh lo, rilru hlim taka awmtir ka duh zawk a ni. Kan fapa lah chu a hlim em em mai bawk si, chu tak te chuan kei leh ka nupui rilru a tina a ni.

"Ka ching fel vek ang, ka ching fel ang Darling, ka tiam a che. Naute i neih hun ṭep tawha heti ang buaina kan tawk leh ta mai hi pawi ka ti, ka tihpalh aw" ka tih sup chuan a lo bu nghat a, hun remchang awm veleh ka che chhuak dawn khawp.

"Engtin nge in inhmuh theih? Fimkhur taka in kal chu ka ring a, an khawih na che em?" ka tih leh chuan

"Khawih na lo ve, mahse min tihlau em em thung. Kawnga kan tlan laiin min zuitu an awm thu pu Carter-a'n a sawi a, rei lovah min nangching zui nghal a ni" a lo ti ve mai a, rilru hahdam lai reng a nei lo chu ka khawngaih a ni.

"Insual chu i va thiam ve le ka tupa, Grandpa hian ka hneh dawn miah lo che a nia" tiin ka pa chuan Brian-a chu a be siam siam a, an insual der vel pah reng bawk.

"Daddy min zirtir vek a nih hi! Daddy chu a kut a lian lutuk a, mahse mi dang kutthlak mai mai a duh ngai lo" Brian-a chuan a ti leh a, ka pa erawh a nui tawp ta riai riai.

"Engati nge Daddy chuan mi dang kutthlak a duh lova ka tupa?" insual derpui tawh lovin ka fapa chu pawm nawlh a, Griffin-a erawh an pahnih awm dan avang chuan a lo ner nasa hle thung.

"Ka hre lo, Daddy chu miin kut an thlak paw'n a dawh mai mai zel a, a lo inveng ringawt ṭhin" ka fapa thu sawi a hriat rualin ka pa chuan min lo en a, a hmelah chuan mak tihna ka hmu thei.

"Daddy te nen hian thil kan sawiho lawk dawn a, ṭhutthlengah hian lo awm rih rawh aw" tiin Brian-a chu ṭhutthlengah a ṭhut tir a, a nghawnga a khawih zeuh hnu chuan a zawi ta vek.

"Brian!" ṭe chhuak thuta ka nupui chet tum chu rang takin ka lo chelh thuai a, a hmel chu a buai nghal nak.

"A thi lo Daisy, Brian-a saw a thi lo, a muhil ringawt a ni e" ka tih pawh chuan a la lungngaih hmel reng a, ṭah erawh a ṭap hauh lo thung.

"Le, thil sawi chian a hun ta e. Lo let turin a tawp nân ka sawm leh ang che Hunter, ka ro i khawm dawn tih hre reng bawk la" ka pa'n a tih chuan keini lovin Griffin-a chu a lo ṭeu hlar a, thinrim aw zet hian

"Ka pa, i ti mah mah lo maw! Hunter-a hi phatsantu mai a ni tawh a, chuan i ro chu keima'n ka khawm ngei tur a ni" a lo ti thuai a, a meng no lo hle a ni.

"A hma kha chuan khawm tir che ka tum alawm, mahse ka duh loh zawng tam tak i tih nasat em avangin i hming ka nawt reh ta a ni. Ka ro i chang dawn lo ka ti lo va, i neih tur chin ka bituk mai a ni"

"Ni lo, chuti ang ringawtin thil tisuh ka pa. Kum 30 ka tling ve tawh, Hunter-a let hian ka ṭha bawk. Khang kum 6 chhung khan ka awm dan chu i hre chiang alawm, i thu ka awihzia thlengin"

"I awm dan chu ka hre chiang khawp mai Griffin, Hunter-a tluk pha tur erawh chuan inzir ngai tam tak i la nei a ni. I ṭha ve tawh lutuk tlat, mahse rilru khingbai chang i neih fô avang hian i lakah rinna ka la nghat tak tak ngam lo zel chu a nih hi!"

"Eng thil chiah nge ka tih la ngai dawn a ka pa?Hunter-a tluk tura ka beih nasatzia kha i hre lo em ni? I thisen ka ni ve lo em ni? Engati nge heti ang em em hian min hmuh dan bik?"

"A chhan chu hmeichhe rilru put chang i ngah em alawm, ka thisen ringa nung reng reng chu keimah ang diak an ni tur a ni. Amelia-i pawh hi ka tlan bo e te a ti a, a duh zawng ka kawl tlat avangin a lo let leh tho ang" keiniho chuan ka pa leh Griffin-a inhnialna chu kan ngaithla a ni ber.

"Carter-a kha hruai chhuak rih la, thah nghal pawh a pawi lo ang. Keiin heti lam hi ka lo ching fel ve thung ang a, haw leh thuai kan ngaih kha!" ka pa'n a ti chiah chu

"Pu Carter-a emaw ka tana mi pawimawh te reng reng in that a nih chuan ka lo let hauh lo vang" ka ti nghal hrawk a, min en ta ṭhap.

"Hunter!!" awmze hriat loh hmel zet hian ka nupui chuan a lo ti thuai a, ka thil tum erawh sawi chhuah ka tum der lo.

"Enge i sawi awmzia Hunter?" ka pa chuan a rawn ti vat a, Griffin-a pawh a tihtur ti ta lo chuan a ding ngawi ta reng.

"Ka sawi awmzia chu i hre chiang alawm" ti hmukin ka hmaa ṭhi chu ka chhar a, awrh ka tum rualin ka nupui chuan

"Hunter! Ni lo, i let leh tawh tur a ni lo" a lo ti nghal vat a, mahse tum nei ranin ka awrh lui ta tho.

"Ka va lawm si em ka fapa, i lo let leh chuan ka hlim sawt dawn a nih hi!" ka pa chuan a ti a, mahse ka beisei loh lutukin Griffin-a a lo ṭawng chhuak ta.

"Ka tuar thei tawh ngâng lo ka pa, ka tuar thei tawh lo" ti vak vakin a silai chu a phawrh a, min tin ta chat.

"Ti hauh suh Griffin, i silai kha dah thla nghal rawh" ka pa aw chu vin vet vet tak a ni.

"A teuh lo mai, min ring duh lotu thu ka awih chhan tur hi ka hre tawh lo" tiin ka pa zawk chu a kap ta mai, min ṭhawn lutuk avang chuan

"Ka pa!!" ka ti chhuak hrawk a, ka che tur chiah chu silai a puak leh nghal a, mahse ka nupui chu ka hliah khuh vek hman tho.

"Tlanchhe rawh u" pu Carter-a chuan thei leh thei lo hian a lo ti a, a ke chuan Griffin-a chu a lo chelh tlat bawk.

"Phiangsen che chuan le Griffin!" ti leh hrawkin ka silai chu ka phawrh a, ka kah tak tak hmaa pu Carter-a kap hluma a tlan chhuak hman chu ka ngei hle a ni

"Brian!!" Daisy-i chu kan fapa bula a ṭhu hniam nghal a, a hlauthawng hle bawk.

"Daisy, tunah hian a rang thei ang bera in kal nghal a ngai" ti thuai thuaiin Brian-a chu ka pawm a, Amelia-i ka biruk tirna room lam ka panpui lai te chuan kan in chhungah silai mu a lut nasa tawh hle.

"Daisy! Hunter! Awi, eng thil nge thleng?" kawngka ka hawn rualin Amelia-i chuan a lo ti sawk sawk a, mahse chhang hman pawh ka ni lo.

"Kan chhuah vat a ngai, hmanhmawh ang" tiin Brian-a chu ka pawmtir a, keiin ka nupui ka pawm thung.

Daisy-i chu rai mahse ka tan chuan a la zâng em em tho, hliam a nei palh ang tih chu ka thil hlauh ber a ni. Ka ralthuam dahna room aṭang chuan ramngaw lam panin kan tlan chhuak a, chung lai hmun chu kei tluka bel an awm kher lo vang. Keiin hma ka hruai zel a, Amelia-i'n ka hnung a rawn zui zel thung.

Ngaw tawp kan thlen chuan hmân aṭanga ka lo dah lawk tawh lawngtê pakhat chu tuipui cham dêlh chungah a lo la inthlung a, lawm ru tak ka ni. Eng emaw palh thil thu atana ka dah leh ka siam kha a ni hrim hrim a, tual that tawh ngai lo mah ila thil thleng thei ka hriat kar avangin ka lo inring lawk diam zawk a ni.

"Amelia, Italy-ah kalpui la, ka lo lan hma chu khawiah mah lo kal sawn lo vang che u" tiin lawngah chuan ka nawr lut a, mahse ka nupui chu a lo ṭang ta tlat mai.

"Ka duh lo, ka duh tawh bawk lo. I tel lovin ka kal tawh dawn lo Hunter, kan ruala i lo kal loh chuan ka kal duh bik lo" Daisy-i chu thinrim takin ka melh a, a awm dan chu a hun lo lulai tak zet.

"In kal ngei a ngai, ka lo lang thuai ang. Lawngah hian a rang thei ang berin chuang rawh u, chuti lo zawng an hmu hman mai ang che u" ka ti ram hmak pawh chuan a la che duh ṭhak lo.

"Daisy!!" vin tak chuan ka ti hrawk a, mahse Griffin-a leh a hote'n kan thawm an hriat palh ka hlauh avangin ka ṭawng ring hran lo.

"I tel lo chuan kan him tak tak lo, i tel lova kal ka duh tawh lo alawm" inhnit feih feih hian a ti a, ka nupui mah ni se hun a khawh ral tam mah mah.

"Ka lo lang thuai dawn, ka tiam thlap a che. Engkim ka chinfel hnuah chuan in bulah ka lo kal dawn alawm, ka lo kal ngei ngei ang" aw pangai deuh zawka ka tih chuan

"Thi ta si la i lo kal dawn lo asin, chu chu alawm ka hlauh" a lo ti ṭuau a, insum thei tawh lovin ka kuah chawt ringawt.

"Ka thi dawn lo Darling, i lung kha a phut chhung chu ka thi lo vang, a chhan chu nang leh kei hi engtik lai pawha nung dun tur leh awm dun tur kan ni" ka tih pawh chuan a la insut feih feih a, theih se chuan an ruala kal chu ka châk ve daih zawk.

"Anih chuan fimkhur hram rawh aw, fimkhur lutuk rawh aw" mittui tling pama a tih chuan ka bu nghat a, ka kuahna aṭanga inla hrang deuhin min chhoh melh ral bawk.

"Ka hmangaih che" ti supin lungchim zet chuan ka fawp a, Amelia-a te awmna ah chuan ka hlang kai zui nghal ta thuai thuai.

"Amelia, nang lo chu rin tur ka nei tawh miah lo a nia, Jerome-a pawh ka lo hruai let sak ngei ang che" ti nghet charhin lawng sira hrui chu ka pawt a, mahse a kal mai loh nân ka la chelh ding hram.

"Lawng hian metre eng emaw zah thleng chu a hruai dawn che u a, khawl a vir tawp hûn hunah tih dan dang in lo dap dawn nia" tiin lawng ka chelhna chu ka thlah a, chak zetin tui chungah a tleng ta zal zal.

Kan sulhnu langsar leh chhui dawn theih mai tur awm ang ho chu ka tireh zung zung a, thawm an la rawn neih miah loh danah Griffin-a leh a hote chu an la awm hla hle a ni ngei ang. Kan kalna tak pawh hriat a har ve hrim hrim ang, kan kalna chu hmuh awlsam tak a ni lo tlat a tin ni!

Thingkungah bawk chuan ka lawn kai leh zawt zawt a, Griffin-a leh a hote chu ka hneh dawn tih ka chiang lutuk tlat. Chuti ang aia tam leh rorum zawk pawh vawi tam ka lo bei tawh a, keimah chauhin ka that fai vek ṭhin, Griffin-a chuan hum sual a dai chiang a ni tih ka hriattir khawp ang le.

Thlipui tleh tur ang maiin thli chu a thaww ri vûk vuk a, lawm avangin ka khi ta suk. Chu thli thaw chuan vanneihna min pe dawn tih ka hre chiang, kum 6 hnua ka lam ṭanga thli thaw ri awm ka hriat leh hmasak ber a ni nghe nghe bawk. Ka hmanrua hman tur leh ka mamawh chu ka kawl ṭha thlap a, ka tihtur chu ka hmelmate thah chauh a ni tawh mai.

Minute 10 chhung vel thingkunga ka awm hnu chuan ka beisei ang ngeiin Griffin-a hote chu fimkhur hmel takin an lo kal a, amah Griffin-a ber erawh ka hmu ve hauh lo thung. Ka bomb ken chu an kalna tur phulah chuan ka theh thla a, bomb ka theh thla tih tak ngial pawh hre thei lo tur khawpin thli chu a thaw nasa a ni.

Body Guard ho chuan boruak che vel leh thawm ri hum hum chu an hlauh hmel hle a, Griffin-a hmel ka hmuh hma chu chet pangaia chet a la fuh ber lo. Ka hneh dawn tih leh ka that nghal vek thei tih hre tho mah ila ka che sual ve thei tlat a, fimkhur taka ka chet a ngai zawk a ni.

"Mi dawihzepho, hma lam panin kal ta che u" ti hrawk tu lam chu an hawi ṭhap a, Griffin-a hmel ka hmuh chuan thah châk lutuk avangin ka khi leh ta suk.

A hun awma ka hriatah bomb chu ka hmet puak a, an ke leh ban chu a per darh chuai hlawm mai. A hmaa aia inralring leh zualin an awm a, Griffin-a'n vau khur khur lo se chuan kal zawm an châk tawh lo tih an awm dan aṭang chuan ka hmu thei. Bomb bawk chu ka vawm thla leh a, ka hmeh puah rualin mi panga chuang chu an thi pheng phung leh ta.

Ka chet a hun chiah tih hre ranin thingkung aṭang chuan ka zuang thla a, ka silai chuan ka kap thlu nghal phawk phawk a, kawlphe ang maia rang ka nih miau avangin tûma'n hnim karah ka awm tih an hre lo. Griffin-a chu a hnung tawlh tial tial a, ani tak ngial paw'n min la hmu hauh lo.

Leh khalh thuaiin ka chet dan chu ka thlak a, Griffin-a chu a tlanchhe hman ang tih mawlh ka hlau a ni. Ka silai mu lah chu a la zo thut zui, mahse chemte hmang ringawt paw'n ka that vek thei tih chu ka hria, kei Hunter Hudson-a hi ka zam chhetê lo. Ka kawng dal apiangte chu ka that nghal mawlh mawlh a, an rak hman ṭawk tih tur vel a ni.

A tawpah chuan Griffin-a nen chauh kan dam ta, ani chuan min la hmu chiah lo mah se min kah risk nasa khawp mai. Thingkung phenah chuan ka ding a, a aw ah chuan hlauh rukna nasa tak ka hre thei.

Ka pa bulah khan min tluk tura a beih nasat thu a sawi vel a, ka pa khan a lo sawi dik chiah, kei hi eng tikah mah min tluk thei ngai lo vang.

Che thutin a silai ken lai chu chemtê hmangin ka vawm tla nawlh a, a chhar leh hma chuan ka che phei nghal vut a, ka din chilh rang kher mai.

Min hmuh rualin min sual nghal a, mahse ka nê pawh a la tluk lo vang tih vel tur a ni. Bawlhhlawh tak taka ṭawng chhuakin min hnek a tum ṭhin, mahse vawi khat mah min hnek fuh eih lo.

A remchan lai tak chuan a khabeah ka dawm chho a, ka kutthlak dawl lo tih hriat zetin a pai nasa hle. A tlu lek lek zawk a, a bula silai chu chuhin min kah a tum a, mahse ka lo vawm chhiat hman vek avang chuan ka nui suk. Chemtê chu phawiin ka lam a rawn pan a, min la cho âr âr lutuk chu ka insum thei ta bik lo.

"Hrep tak che hian le!" ti hrawkin ka che vut a, chemtêa min vih a tumna chu bum zeuhin ka hnek leng lâwp a, thah ka tum lai tak chuan mi dang aw ka hre ta.

"Pu Hudson!" ka hmaah Kyle-a chu a lo ding reng a, mak a tih hmel hle bawk.

"Heta ṭang hian kal sawn thuai rawh Kyle, i nunna atan a hlauhawm mai bakah i hmuh loh tur thil i hmu a ni e" ka ti khauh fak a, chet erawh a tum loh hmel khawp.

"Hudson!" a tih rualin ka pum chu a rawn thip zawk a, Griffin-a phiangsen chuan ka inrin loh laiin min vit tih ka hre chhuak zui nghal.

"I thi dawn khawp mai Hunter" tiin Griffin-a chuan min vit leh sawk a, taksa chhung dik loh avangin phulah chuan ka let ta tual.

"Nang pawh kha i thi dawn" ti vin hlarin Griffin-a chuan Kyle-a lam chu a pan nghal a, ka harh chhuak ta zawk.

Thei leh thei lovin ka tho thuai a, thinrim taka a hming ka lam tûarh rualin Griffin-a chu a lo hawi a, vawi khat hneka thih ngei ngeina chu ka hmang chhuak ta.

A bekah tak chuan ka thei tawpa nain ka hnek a, ka pum lamah hliam nei lo ngat ila zawng a luruh keh chhe vek tur khawpa nain ka hnek ngei ang.

Griffin-a ka hnek zawh rualin ka tlu leh nghal a, thisen pawh ka hloh hnem tawh viauin ka ring. Griffin-a chu a ding khawng reng a, a chemtê ken lai pawh a thlauh miah lo. A mit chu a sen tial tial a, a thi ngei dawn tih ka hriat avangin ka nui suk a, rei lovah Griffin-a chu a tlu khawng ût zui nghal bawk.

Griffin-a chu thi lo thei a ni lo, chuti ang khawpa kutthlak na chu min thlahtute zingah kei leh ka pa chiah kan awm a ni. Kum 10 ka nih lai aṭang tawh ka kutthlak a nat em avangin ka pa khan thil hrang hrang min zirtir nghal a, mihring luruh hnek chhe rawp thei turin min zirtir daih tawh a ni ber.

Mihring luhruh a chhe vek kher lo a ni paw'n thihna tho, a chhan chu bek thahruai zawng zawng chu a chah tho tho dawn vang a ni.

"Hudson!!" tih thawmah chuan ka harh zawk a, Kyle-a chuan mangan hmel zet hian min en a, ka harh chiang telh telh zui nghal.

Phul aṭang chuan min kuah tho thuai a, kan inlen hleih deuh hret avangin min kalpui chak hlei thei lo. A motor hunna lam chu min panpui a tum a, mahse ka lo duh mai lo.

In chhunga luh leh chu ka duh tlat a, ka lung phut dan dik lovin chiang lo ruai tawh mah se ka pa hmel chu a tawp nân hmuh leh ka duh a ni. A chhan chu ka pa a ni miau a, a ni reng bawk ang.

"Ka pa" ka aw chu a chhuak ṭial deuh ruih a, hlim ka neih avangin a zawi ang reng hle bawk.

A kut chu la kangin ka fawp vang vang a, ka nupui hnen aṭang hmangaihna leh mi dang khawngaih theihnate zir chhuak lo ila chuan chuti ang chuan ka awm kher lo vang.

Chu chu Hunter Hudson-a hmasa zawk kha a ni a, mahse tunah chuan mi dangte khawngaiha hmangaih thei Hunter Hudson-a ka ni tawh zawk a ni.

"Mang....mangṭha aw...ka...ka pa, ka..." ṭawng chhunzawm thei lo tur khawpin ka lung chu a chhe ve tak zet, ka taksa na nen ka tawt up up ni berin ka hria.

"Ka ngai ngawt ang che ka pa, thi tawh mah la ka pa i ni reng bawk ang. Ka nu kha lo hmangaih tawh la, hlim takin in awm dun dawn nia" ti leh supin ka tho ṭuah ṭuah a, Kyle-a chuan min lo pui thuai bawk.

"Intih harh luih hram tum rawh aw Hudson, Hospital lam kan pan mek e" tih chu motor kan chuan hnua ka thil hriat leh hmasak ber a ni a, ka chau ang reng tawh hle a ni.

"Engati nge i lo kal?" ka pum dawm reng chung chuan ka ti a, thisen chu a put duh zaih zaih khawp mai.

"I laka ka awm dan avang khan ka inthiam lo va, ngaihdam lo dil che ka tum maw le, mahse ka beisei loh deuh thil ka rawn hmu ta thung" a tih chuan police hnenah min report mah se pawi ka ti hran lo.

"A hma chuan tual thatin ei ka zawng ṭhin alawm, mahse hmangaihna avangin ka bansan ta a ni" ka ṭawng chu a zawi viau nâ a, a hre vek tho.

"Lungngai suh Hudson, thihna lak ata min chhanchhuah vang hrim hrim pawh khan i lakah hian bat ka ngah lutuk, thil thleng zawng zawng hi ka thup sak ang che" a tih chuan ka khi suk a, engmah ka hre zui tawh lo zui nghal.

Thil tut ri vak vak chuan min ti harh zawk a, chu ri chu eng chiah nge a nih pawh ka hre lo. Ka awmna hmun chu hre lo mah ila khum dup nuam lutuk lovah ka mu tih ka hria, ka ngaihtuahna a fim hnu chuan khawl thil ri tut tut chu ka hrethiam ve ta chiah. Hospital-ah ka awm tih ka hre chhuak zui leh nghal bawk a, ka la dam avang chuan ka lawm hle a ni.

Dik tak chuan Griffin-a min vihna kha a fuh em em a, kha khan min thihtir thuai ka ring bawk. Kei ni lovin mi dang vit se chu an thi ngei ang, a chhan chu kei angin an tuarchhel ve dawn miau lo tlat a ni. Ka pa hnen aṭang zirtirna a dawng ve vek a, kei ang em emin hlauhawm lo mah se mi thah dan tur chu a hre ve khawp mai.

"Hudson!" Kyle-a hmel chu ka hmu hmasa ber a, ka taksa chhungah chuan na pakhat mah a awm tawh lo ni mai hian ka hria.

"Ni lo" khum lu lam nghenga ṭhut ka tum rualin Kyle-a chuan a lo ti leh a, mahse ka ṭhu lui ta tho.

"Heti ang em ema mihring taksa dam chak hi ka la hre lo, a mak khawp mai" a bula Doctor chuan a lo ti a, kei erawh chuan mak pawh ka ti hran lo.

Tettê aṭanga thil ei pawh fimkhur kha ka ni a, chu pawh ka pa min zirtir leh hrilh vek a ni. Mi pangai thil ei ang lo pui pui ei ka ngah a, ka taksa ṭhatna tur bak ka ei ngai lo tluk a ni. Ka ruh a lena ka tihrawl leh tha a chak theih nân a ngai ngawt ngawt ka ring ṭhin a, hne thei tak ka ni.

Kum 15 ka tlin hnuah erawh ngaiah ka nei fel vek tawh a, chaw pangai leh eitur pangai chu kum 30 ka pelh hnuah ka ei ve chauh zawk. Ka pa chuan a nih dan tur ang thlapa ka taksa a awm tawh avangin eitur pangai ka ei a phal mai chauh zawk a, chuti ni lo se chuan taksa chakna bak ka ei leh tawp lo vang. A bul chu ka pa vek a ni a, min zirtirna leh kaihhruaina dawng lo ila chuan ka thih ngei ka ring.

PROTECTIVE HUSBAND

By

Havali Adam

Chapter 19

DAISY POV

"Amelia, ka...ka pum hi a na" ka ti chhuak sep a, Brian-a ka vei lai ang chiah khan nau ka vei ni maiin ka hria.

"Tuar hram hram rawh Daisy, lawng dang kan hmuh veleh kan ding thuai dawn nia" a tih chuan ka lo bu zeuh a, ka pum chu a na ru tawh tak zet.

Amelia-i chuan Brian-a chu a la pawm reng a, ka fapa chu a la harh miah lo bawk. Amelia-a chuan hlauthawng lo turin min ti a, ka fapa chu a thi lo tih leh ni khaw hre lovin a awm mai chauh a ni tih min hrilh chamchi bawk.

Amelia-i chuan pi tia koh a duh tawh lo va, a hming pangaia ko turin min hrilh ngun hle. Kan in leh ka pasal kan kalsan tirh te khan ka la pi hram a, kum tam tak lo pi tawh ṭhin tan chuan vawi leh khata han pi loh thut chu thil har ve tak a ni.

Ka pasal Hunter-a chu ka rilruah a awm reng a, ka pum lam nuam lo bawk nen a duatna awkâ hriata a taksa nghen ka châk tak zet, mahse tun atan chuan kan inawm hlat viau bawk si. Eng dang zawng aiin a thi ang tih mawlh chu ka hlau, Griffin-a lo sual rapthlakzia kha ka hre ve chiah. Mahni thisen zawmpui ngei that duh mihring a nih kha ka ring ngai lo, mahse a pa pawh a that duh a nia, mihring sual tak chu a va ni chiang em.

Ka pum chu a na tial tial a, a nat tawh lutuk avangin ka hmui chu ka pet fan fan bawk. Lawng dang emaw min ṭanpuitu tur mi tu emaw tal lo lang hlawl se ka ti, damdawi in kher lovah pawh nau chu neih mai ka duh tawh a ni. Amelia-i chu ka ko leh tawp a, a ṭhutna bula Brian-a mutin min lo buaipui nghal a, mahse a awmzia a hriat hmel hlawl lo.

"A pawi ka ti Daisy, engtin mah ka buaipui thiam lo che" a rawn ti hluai ta reng a, chutih lai tak chuan lawng changkang zet pakhat hi a lo lang hlawl a, ka lawmzia chu pui tak a ni.

"Min ṭanpui teh u, min ṭanpui hram teh u, kan dinhmun hi a hmanhmawh thlak lutuk" ban phar vak vak pahin Amelia chu a au va, kan awmna bula lawng a lo din chuan kan inhlang kai thuai bawk.

"Hospital panpuina hman a awm tawh lo, hetah hian naute nei mai rawh se" an zinga pakhat chuan a lo ti sawk sawk a, ṭhutthlenga min muttir lai te chu ka hre mumal tak tak thei tawh lo.

"Sang rawh le, i chau tih chu ka hria, mahse i san thuai thuai a ngai a ni" tia min be rengtu chu ka en hauh lo, a chhan chu ka meng peih tawh lo a ni.

"Sang leh rawh le, a chhuak ṭep tawh a nia aw" chu aw chu Amelia-i aw a ni tih ka hria, ka kut chu a chleh nghet hle bawk.

"A chhuak teuh tawh lutuk, a chhuak dawn e" mi dang ṭawng thawm chu ka hre ruai ruai a, a hnu lawkah naute ṭap thawm ka hre ta.

"Awi le! Mipa i nih hî, a va'n hmelṭha kher em" tiha ṭawng thawm leh ṭawng dang chu ka hriat pawlh nawk nawk a, ka taksa chu a chau ang reng hle a ni.

"Buaipui zung zung ang u, naute nu hi a chauh hmel viau leh nghal" chu thu ka hriat rual chuan

"I ṭha em Daisy? Naute i nei tawh aw, Hunter-a hmel chhun em em fapa i nei a nia" tih chu ka hre zawm leh zat a, chu chu Amelia-i aw ngei a ni.

Meng lui hram hram chungin ka nui a, ka pawm theih tura ka fapa min pek rual chuan hmangaih takin ka lo pawm nghal. Duat takin a hnung leh a lu chu ka chul a, chau viau mah ila ka pasal Hunter-a hmel a chhunzia chu ka hmuh hmaih hauh lo. Brian-a pawh ngaihtuah lovin ka fapa neih thar chiah chu ka ngaihtuah ngawt ngawt a, Hunter-a awm ve se chu a lawm ngawt ang ka ring.

Amelia-a chuan Italy rama kal thuai thuai kan ngaih thu chu a sawi zung zung a, kan chuanna lawng neitute pawh chuan an lo hrethiam khawp mai. Kan thil tawn leh tute nge kan nih tih erawh a sawi lang hran lo va, Denmark ramah chuan chawlh hmanga zin kan nih thute a sawi luam a, chuti ang lo chuan sawi dan tur a vang ve em a ni.

Ka fapa pianghlim chu hnute ka hnek tir a, damdawi ka ei tawh avangin keipawh ka harh ṭha tawh viau bawk. Ka fapa chuan ka hnute chu a hne dâwk dawk reuh a, thil a hre chak phian dawnin ka hria, ka fapa awm dan avang chuan lawm lovin ka nui leh ta ringawt.

A u Brian-a chu a la muhil reng a, mahse Amelia-i leh ka pasal berin a thih loh thu an sawi avangin ngaih ṭhat lohna pawh ka nei hran tawh lo.

Lawng chuan Airport hnai ber lam kan pan a, thlawhna hmanga kan zin tur chu ka lo hlauthawng nghal hle. Amelia-i pawh kan tan thlawhna hmanga ram chhuahsan a him loh thu ka hrilh a, mahse ani chuan duh thlan tur dang kan neih loh thu a sawi thung. Risk la tak meuhin Airport lam chu kan pan a, Italy chu him dam takin thleng thei ila ka ti ngawih ngawih.

Darkar chuang fê lawnga kan chuan leh hnu chuan khawpui kan thleng a, Brian-a pawh a lo harh leh tawh avangin kan awm dan chu a hrethiam lo hle. Amelia-i chu a hlau ru deuh tlat a, hlau lo tura ka hrilh paw'n awmzia a awm rih lutuk lo.

Ka bulah a ṭhu chawt a, a nau thar chuan a tihlim ve chiang a ni. A kut tê tak tê te chu la kangin a fawhsak vel a, a duat thiam viau dawnin ka hre nghal.

Airport kan thlen chuan Ticket kan la nghal sawk sawk a, khua pawh a var thiang ṭha tawh hle. Buaina tawk miah lovin thlawhna chhungah chuan kan ṭhu lut thei hlauh mai, ka lawm kher mai. Thlawhna chhunga kan chuan hnuah erawh Brian-a chuan a pa awmna min zawt chhen a, chhan mai chu harsa ka ti ṭhin.

"Lo kal teh Brian, ka bulah hian lo kal lawk teh, chuan Daddy awmna chu keima'n ka hrilh ang che" Amelia-i'n a tih chuan Brian-a chuan min lo en daih a, a mitmeng aṭang chuan a la pawh ngam lutuk lo tih ka hre thei.

"Aunty bulah sawn va kal a, ani saw chu mi sual a ni hleinem, Daddy Sister alawm a nih" nui chunga ka tih tâkah chuan Amelia-i ṭhutna lamah a phei ve mai a, Amelia-a chuan a lo pawm kang nghal thuai.

"Daddy chu khawiah nge a awm? Ka ngai tawh, engati nge kan bulah hian a awm ve loh?"

"Daddy chu a zin lawk a, nagmah leh i nau thil tur pawh a lo hawn dawn asin, a zin bo chhung chu fel taka awm tur aw"

"Khawiah nge Daddy chu a zin?"

"Switzerland-ah a zin daih a, Daddy nen chuan kan awmna a inhlat em avangin a lo thleng har ang"

Amelia-i leh ka fapa inbiakna chu ka ngaithla reng a, Amelia-i'n Switzerland-a Hunter-a a zin thu a sawi chu mak ka ti ru deuh a, chutah hlim hmel zetin a la ṭawng zui.

Ka pasal chu a thih mai ka ring bik lo, a chhan chu a thih dawn loh thu min hrilh tlat a ni. Kan thil tawn mek chu hahthlakin buai nuai mah se kan tawn mek a ni miau a, kan bulah Hunter-a tal chu awm se zawng rilru pawh a hahdam deuh mahna.

Darkar 2 leh a chanve vel thlawhnaa kan chuan hnu chuan Italy ram chu kan thleng a, ka vawi khat kalna a ni nghe nghe. Airport-ah te chuan English ṭawng ni lovin Italian ṭawng vek an hmang a, an thu sawi awmzia chu pakhat mah ka hre lo. Italy rama awm ṭhang tih takah Amelia-i chuan Italian ṭawng chu min lehlin sak zel a, hrethiam takin ka bu ta nghat nghat.

Brian-a chu ngawichawi viaua ka ngaih kha a ṭawng duh leh ta em em a, a hriat loh vek a nih avangin zawhna pawh a ngah leh tawh khawp. Amelia-i chuan hlim hmel pu chung leh a hriatthiam theih ngei turin a lo hrilhfiah zel a, ka fapa chuan a nau thar leh kei chu min hre chang tawh lo a ni ber. Amelia-i kut vuan chungin a kal a, hmun hrang hrang a kawk zet zet a, a hlim hmel khawp mai.

Kei erawh ka ngaihtuahna chhungril berah ka pasal chauh a awm a, amah ka ngaihtuah nasat luatah ka fapa la sen ve tak chu ka lo theihnghilh lek lek ṭhin. Ka fapa hming chu a awm loh laia sak nghal mai ka duh rum rum a, mahse Hunter-a hming sak ngei ni leh se ka ti ta zawk.

Brian-a a piantirh khan amah ang lo taka ropui turin a duh a, chuvanga Brian Hudson tia a hming sa chu a ni nghe nghe. A awmzia ber chu tual thah tir ve a duh lo va, mi pangai ni reng chunga mi ropui nih tir a tum zawk a ni.

A nihna takah chuan Hunter-a leh a chhungte chu Irish thlah an lo ni reng a, tual thah hmanga ei zawng ṭhin an nih avangin Switzerland ramah an inbengbel mai chauh a ni.

Amelia-i chenna hmun kan thlen chuan ka besei aiin a lo changkang daih a, Apartment mai maia a awm ka lo ring chu ka tisual hle a ni. Hmun ualau lo deuh takah in chu a lo ding a, Body Guard pawh an awm thlap bawk. Chhiahhlawh ka nihna hmun ang em ema in lian leh changkang chu a ni lo, mahse mahni chenna atan chuan a lian thawkhat hle a ni.

Amelia-i chu thil thleng zawng zawng ka hmuh vek avangin ka hrilh a, Griffin-a'n a pa a that tih ka hrilh lai te chuan rilru na takin a ṭap a, a ṭap hmel chuan ka ṭah a tichhuak ve vek nghe nghe.

Ka hrilh zan chuan amah chauha awm rih a duh thu min hrilh a, Brian-a pawh Amelia-i bula kal lo turin ka chah nasa hle. Amelia-i tan chuan a rilru nat thlak dawn lutuk tih ka hria, mahni pa dik tak te thihna chuan tu mihring rilru mah hi a tina lo thei lo vang ka ring.

Ka fapa; a hming pawh ka la sak phal loh leh a pa ngeiin a hming sa se ka tih chu hmangaih takin ka en a, a mitmeng a fiahin a hmel ṭha khawp mai. Hunter-a'n kan fapa thar chu hmu ve se a lawm ngawt ang, a duh ang ngeiin mipa chu ka hring bawk si, ani hi zawng sawi dik loh leh tihdik loh pawh a nei ngai lo. Chuvangin beseina nen ka lo nghak ang, ka pasal hmel ka hmuh rih loh avangin lungngaiin ka ṭap tur a ni lo bawk.

"Mommy, Brian-a nau hi ka pawm chak ê" Brian-a'n a lo tih chuan ka nui hak a, vawi tam pawm a ngen paw'n ka phal lo zawk ṭhin.

"Daisy, thla khat a tling ve tawh tho a, pawm tir ve tawh la, a tina em bik nâng" Amelia-i chuan a lo ti ve nghal a, pawmtir chu ka tum ve deuh tawh hrim hrim.

"Aw le, na deuha kuah lo tur aw" tiin ka fapa hnute hne lai chu a u banah hlan thlak ka tum a, mahse a lo duh teuh lo, a awm dan tê chu a nuihzat thlak zawk.

"A duh miah lo" naupangchhia zet chuan ka ti a, ka hnute hne lai mek tê reuh lah chuan a u chu a la melh kar zui.

"Nâaaaa...Brian-a nau chû, ka pawm châk che alawm" ti nang nângin Brian-a chuan a ban lui ngat a, mahse a nau chu a rawn ṭap dawn ta mai.

"Het het het! Ṭah nghal tum loh tur aw, a û khan a pawm châk che alawm, pawm rih lo mai rawh Brian" ka tih chuan Brian-a chu a kal tau ta nal nal.

"Thlem lam kha chu ka kutah lo dah tawp rawh Daisy, ka tan thlem lungawi chu thil har a ni hleinem" Amelia-i chuan nui chung hian a ti a, ka lo nui ve mai bawk.

"Thla khat a nih aṭang ringawt pawh a pa ang maiin a luhlul nghal a nia, a puitlin hunah phei chuan a nasa reuh khawp ang" Amelia-i bawk chuan a lo ti leh a, fiamthu a nih avangin kan nui dun ta hak hak.

A eitur siam lai chu ka bula dawhkanah a lo hung a, zep lovah chuan nuam ka ti miah lo. Chhiahhlawh ni ṭhin ka ni a, Amelia-i'n min buaipuia eitur leh eng ilo zawng zawng min tihsak vek ṭhin chu a lakah pawh ka inthlahrun phah a ni.

Ti tawh lo tur leh ka tih ve theih reng thu ka sawi paw'n naute nei hlim ka nih avanga enkawl uluk ka ngaih thu a sawi mai zel a, chu pawh lehkhabua a chhiar thu a sawi nghe nghe.

A thu hrimah kei pawh chu ka buai ve deuh hrim hrim, Brian-a nau lah thla khat laia upa ni ve tawh mah se ka pawm emaw ka mutpui loh chu a duh ṭhak lo reuh a, Amelia-i'n pawma mutpui a tum paw'n uar em emin a ṭap vak vak zel. Chuti ang vel chu kan nufa awm dan a ni a, mahni tawkah ka buai ve thei hle a ni.

"Daisy, Brian-a nau hming hi pangai takin nangmah hian sa mai la, Brian-a ber pawh hian koh a châk tawh viau ang. Heti anga hming nei lova awm tir reng chu a dikin ka hre lo, nge keimah hian ka sa mai dawn?" Amelia-i'n a tih chuan

"Ni lo ve Amelia, a pa Hunter-a ngeiin kan fapa hming hi phuah leh rawh se. Hunter-a lo haw hma chu kan fapa hmingah hian Brian-a nau ni reng se, a lo haw veleh a hming hi kan thlak chauh dawn nia" ka lo ti vat a, ka rilru hrethiam takin a bu ta nghauh.

"Heti ang taka ka unaupa hmangaihtu leh nun pangai pe theitu i nih hi ka ring ngai lo, kan inhmuh tirh aṭang khan ngaina viau che mah ila chhiahhlawh i nih tlat avangin ka hnaih duh lo lui ṭhin che alawm" ka bula ṭhu ṭha chung chuan a ti a, keiin ka fapa chu ka awi hliau hliau bawk.

"Hunter-a pawh hian a hmangaihzia che ka hria, dik tak chuan chhungkua in din tih ka hmuh hian ka awt ru em em che u a ni" a tih leh chuan hnem aw takin

"I lungngai a nih khâ Amelia, Hunter-a'n a lo hruai let tur thu min hrilh vek tawh alawm, a thu sawi tihhlawhtlin loh a nei ngai lo" ka lo ti a, Jerome-a nen an chungchang ka hriat ve vek tawh avangin ka khawngaih ru khawp.

"Ni e, i sawi dik chiah. Hmân aṭang tawh Hunter-a hian a thu sawi tawh tihhlawhtlin loh a nei ngai lo, Jerome-a chu ka hnenah a lo hruai ngei ang" tih sep pahin a hmai chu a tuai zeuh a, khawngaih avangin ka kuah tawp ringawt.

Van pawl mawi tak kara chhum thianghlim sârh te an tawlh sawn zung zung ang maiin kar leh thlate chu a liam a, tunah chuan ka fapa naupang zawk Brian-a nau paw'n thla 5 a tling ve ta reng mai. A pa, ka pasal Hunter-a lah chu a reh rei ka ti ru em em tawh a, ka thinglungah chuan a reh ri a ring vawng vawng tawh hle a ni.

Brian-a chu Amelia-i bulah a tal deuh chawt tawh a, a nau erawh a la pawm hlei thei lo tluang zel. Pawm luih changte chu a nei ṭhin a, mahse a pawm rei thei lo. A nau ṭahna chuan a tiṭap ve mai dawn ṭhin a, ka hnenah a hlan leh vat zel. Brian-a awm dan chuan kawng leh lam zawng takin min tihlim a, a nau tê chu thla 5 lek la ni mah se a hmangaih em em tawh tih ka hre tlat a ni.

Brian-a nau chu fiah lo taka ṭawng leh au ul ûl a ching chho ṭan a, a naupan ngaihtuahin a aw chu a lian reuh khawp mai. Mi dang ngainat leh ngainat lovah pawh hma kan sawn chho ve zel a, kei chauh ni lo Amelia-i pawm chu a duh ve ṭan tawh a, Brian-a pawm erawh a la duh ṭhak lo reuh, em em hian a!

Amelia-i'n a pawm tirh phei chuan mak a ti em em a, a duh kha a lo la ring lo deuh ni tur a ni. Tin, Brian-a nau chuan thil a hre chakin a thiam zung zung a, a bawkvak chak ve thei tawh hle bawk.

Brian-a chuan a infiampui ṭhin a, pawm a tum loh hi chuan an unau paw'n an tlei thei phian, unau inhmangaih tak niin ṭhang lian chho zel se ka ti a, chu chu ka duhthusam a ni bawk.

Kei pawh thla 5 a ral meuh chuan ka pangai ang reng tawh hle a, taksa na emaw chet theih loh pawh ka nei hran tawh lo. Inah kan awm ni tin deuh chawt hlawm a, eitur siam leh tihtur ang zawng zawng chu Amelia-i chet ngai lovin ka ti vek ṭhin.

Ani chuan Brian-a nau a lo awm ṭhin thung a, an inpawm muhil rang thei khawp mai. Naute a ṭah tawh hi chuan ka thil tih laklawh lai pawh ni se ka pawm tho tho a ngai, a chhan chu keimah tih loh Brian-a nau ṭap thlem bang thei an awm lo a ni.

"Aunty, ka kal dawn aw, Body Guard te nen kan infiam leh dawn" Brian-a chuan a ti lâng lâng a, Amelia-i pawh chuan a phal thu leh fimkhur turin a hrilh zui nghal a, Brian-a chu a chhuak rang hle.

Italy rama kan awm hnu thla khatna aṭang khan Brian-a chu Body Guard te nen an infiam ziah a, a insualpui ṭhin a ni ber. School a kal tawh bawk si lo, ṭhian kawm tur a nei bawk si lo, Brian-a chuan a pa a ngai ṭhin khawp mai.

A ngaihtuah chhuah chang phei chuan a ṭap leh tawp zel a, Amelia-i'n thlemin tihlim leh ṭhin lo phei se chuan kan inbuaipui rei thei viau ang ka ring.

Wednesday a ni a, chawhma lama khua ṭha viau si kha chawhnu lamah chuan ruah a sur buan buan a, thli a tel hialin ka hria. Ka fapa chu ka mutpui a, ani chu kei ang lo takin a mutui hle bawk.

Tukverh darthlalang pawn lama ruah mal lo per chhawk chhawk te chuan hun kal tawh min ngaihtuah chhuahtir leh ta nge nge a, Hunter chu ka ngai tak zet a ni.

Zana muthilh theih loh changte pawh ka nei ṭhin a, amah ka ngaih lutuk avang chuan rilru dik lo put changte pawh ka nei ta zeuh zeuh. A reh rei em avang chuan a thi tawh emaw te ka ti rum rum ṭhin a, mahse chuti ang ngaihtuahna ṭha lo leh ka beiseina tichhe thei thil chu ka paih bo vat zel. Ka pasal Hunter-a chu a la thi lo, a chhan chu ka lung a la phu tlat. Amah ngeiin

"Ka thi dawn lo Darling, i lung kha a phut chhung chu ka thi lo vang, a chhan chu nang leh kei hi engtik lai pawha nung dun tur leh awm dun tur kan ni" tih thu min hrilh a, chu chu ka beiseina awmchhun leh ka innghahna a ni.

Zan lamah chuan ruah a sur tawh lo va, boruak lum leh uap deuha ka hriat te chu a reh vek a, boruak chu a thiang kâk tawh zawk a ni. Kan ṭhut khawm ṭhap lai chuan pawn lamah thawm a ri nuai nuai a, rei lovah Body Guard pakhat a rawn lut zui nghal bawk. Chu Body Guard chuan zah taka chibai buk hmasa phawtin Amelia-i hnenah chuan

"Ka pi, mikhual i nei. Ani chuan a hre chiang hle che a, kan lo luhtir dawn em?" a ti a, Amelia-a chu en pawh a en ṭha ngam lo.

"Mikhual maw!? Eng ang mikhual nge? A hming eng nge?" Amelia-i chu a ṭhutna aṭang a tho nghal a, a hriatthiam bik loh hmel hle.

"A hming chu Jerome Cooper a ni a, ralthuam engmah a keng lo bawk" Body Guard chuan a ti a, chu veleh Amelia chuan ṭe nghal chulin

"Oh My God!!! Jerome-a maw!? Ka Jerome-a maw!?" a ti mawlh mawlh a, Body Guard chu su deuh lâwpin pawn lamah a tlan chhuak zui nghal.

"Aunty!" tia Brian-a'n umzui a tum chu ka lo khap vat a, Amelia chu ka lawmpui rualin Hunter-a ka ngaihtuah chhuak lo thei lo.

Minute 5 hnu velah Amelia-i chu mipa pakhat hian a lo pawm lut a, chu pa chu Amelia-i mipa hmangaih em em Jerome-a a ni tih ka hrethiam mai. Amelia-i chu naupang ang maiin a âwmah chuan a bei a, a ṭah ṭawng zuah zuah bawk. A pawmtu Jerome-a pawh chuan hmangaih tih hriat tak hian a thlem a, a ṭawng loh laiin a fawp deuh chhen bawk.

"Pi Hudson, hei hi pu Hudson-a hnen aṭanga i thil tur ka lo ken a nia, i chhiar dawn nia" Jerome-a chuan lehkha min lo pe a, ka ken hnu pawh chuan chhiar ka la tum hauh lo.

"Khawiah nge amah? Khawiah nge ka pasal? Khawiah nge Hunter-a? Engati nge i rualin a lo kal ve loh?" ka ti mawlh mawlh a, ka ṭawngkam chu a hawihhawm leh hawihhawm loh lam ka ngaihtuah hman tawh lo a ni ber.

"Ireland ramah a kal lawk tur thu min hrilh a, i pasal ang em ema mihring mak kha ka la hre lo" a tih chuan a bula ṭhu Amelia-i chuan

"Eng nge i sawi awmzia? Eng nge mihring mak a nihna chhan chu Jerome?" a lo ti nghal a, a aw chu a lawi deuh rât bawk.

"Amah chiah khan Body Guard zawng zawng kha a that fai vek maw le, silai paw'n an kap fuh hman lo. Min dahna room kawngka te kha a chhah tehreng nen a kut lawngin a khawih chhe vek a, mak tak a ni!" Jerome-a'n a tih lai chuan ka lo nui zeuh a, ka nuih tak erawh chu a za lo.

"Amah a ṭha i tihna ah ka ngai ang, mahse eng vangin nge Ireland lamah a kal? A chhan i hre ve mial em?" ka tih chuan Amelia-i zawkin

"Engkim titawp turin a kal Daisy, ka pa lo thawhpui tawh te ho zawng zawng a be dawn tih ka hre thei. Ireland ramah chauh a kal dawn lo, ram hrang hrangah a kal dawn tih ka chiang" a lo ti a, Hunter-a chu kan bulah lo awm thuai se ka duh tawh a ni.

"Ka hrethiam e" ti sepin ka fapa pawm chung chuan ka tho a, kan room lam panin ka kal a, ka hnungah Brian-a chuan min lo zui ve nghal bawk.

Room chhunga ka luh rualin naute chu ka awi hliau hliau a, Brian-a erawh khumah a bawk zal nghal. Amelia-i bulah mipa dang an awm tih a hrethiam ve a ni ngei ang Amelia-i room-ah pawh a lut duh lo va, kei chuan pawi ka ti hran lo. Kan riak dun khât ve tawh hrim hrim a, ngaihsak lo lutukah te min ngai ang tih a hlauhawm a ni.

Brian-a leh a nau an muthilh hnu chuan tukverh bulah ka ding ngawi reng a, pawn lam boruak thiang tak karah chuan ka pasal Hunter-a hmel chu chiang takin ka hmu a, mahse ka mit ka khap rualin a bo leh nghal daih. Thil hre chhuak thutin lukham hnuaia ka lehkha dah chu ka la a, ka pasal kut ziak ngei chu ka hmu ta.

"Darling Daisy,

Ka ngai hle mai che, ka tihtur ka tihfel zawh veleh in bulah ka lo let thuai ang. Naute kan neih tawh ngei ka beisei, ka hmu châk tawh hle bawk a ni. Ka hmangaih che u ka chhungkuate u, min lo nghak leh lawk rawh u.

Hunter"

tih hi a lo inziak a, ka pasal kut ziak awmna lehkha chu ka chul nawn sek bawk.

Khumah chuan mu zangthalin ka âwmah ka pawm bet a, ka pasal berin nghak leh lawk tura min tih chuan ka nghak tur a ni. Thu sawi hlen ngei ngei mihring a ni tih ka hria, chuvang chuan ka lungphang tur a ni lo.

Hmun hrang hranga a kal dawn thu ka hriat tirh khan ka lungngai nghal em em a, vanduaina a tawk palh ang tih ka hlau kha a ni a, mahse tunah chuan a lehkha ziah ringawt pawh chuan ka chhungril a tihlim thei a ni.

Ka fapa te zawk; Brian-a nau chuan thla 6 a tling chho a, a la naupan tehreng nen ṭawng a zir nghal ringawt mai. A aw a lian ang reng si a, a thawm chhuah chuan Amelia-i leh Jerome-a chu a tihlim thei khawp mai.

Thla 1 chhung chauh mah ni se Jerome-a chu mipa fel tak a ni tih ka hria, Amelia-i pawh engkimah a ngaihsak thiam thei hle.

Awrawl a chhuah nasat theih em avangin ka fapa chu ṭawng ka zirtir chhunzawm ta zel a, a pa chu ko thiam hmasa ber se ka ti a ni. Daddy tih chu ka zirtir deuh reng a, kei ang bawkin Brian-a chuan a zirtir nasa thei khawp.

Thla 6 a tling chiah chu a mizia a danglam em em a, a hma zawnga duh ngai si lo kha a u pawm te chu a duh leh tlat tawh vel a, a ngeiawm reuh bawk sia ka nuih leh tawp zel.

Tlai khat chu ka fapa chuan ka zirtir ang ngeiin a pa a ko thiam ta thut mai, ka va han hlim tehreng em. Ka hlim lutuk avangin ka fawp nawk nawk a, ka thawm hriain mi dangho chu an lo kal phah hial a, Hunter-a lo haw hun mawlh chu ka nghakhlel tawh a ni. Zan tin a tan vanduaina a tawh loh nân ka ṭawngṭai ṭhin a, him dam takin ka pasal chu hmuh ka duh a ni.

Hunter-a nghak reng chung chuan ni kan vui liam ve ta zel a, ka duh aiin a lo lang har tawh mah mah a ni. Kei leh ka fate'n kan ngai si, a tel lo chuan hlimna tluan tling tak tak kan nei thei lo a ni.

Chutih rual erawh chuan Amelia-i leh Jerome-a chu an hlim em em thung a, inneih thleng thlengte chu an sawi lang a, ka rilru chhungril tak aṭang pawhin ka lawmpui a ni.

"Daddy! Daddy!" ka fapa ṭawng thawm avang chuan room aṭang ka tlan chhuak thuai a, Hunter-a hmel ka hmuh rualin ka kâ chu ka hup zui nghal.

"Mommy, Daddy a lo haw tawh" tih lawm lawm pahin Brian-a chu a pa lamah a tlan phei a, Hunter-a paw'n a fapa chu a lo pawm kang nghal thuai.

"Daddy, ka ngai lutuk che Daddy... ka ngai lutuk che Daddy" ṭap chungin Brian-a chuan a ti char char, ka fapa awm dan leh ṭawng dan vel chuan ka mittui a ko chhuak lo thei ta lo.

"Kei pawh hian ka ngai che alawm, ṭap tawh suh le" tiin ka pasal chuan a fapa chu a thlem mawlh mawlh a, Brian-a erawh a la ṭap bang thei lo.

"Ka ṭah a chhuak alawm Daddy, ka ngai lutuk che Daddy" tih chu a ṭah hla a ni ta ber a, ka bianga mittui luangte chu ka hru hul seng lo mai dawn.

Nghet taka kuah chungin ka pasal chuan a fapa chu a thlem a, a chal leh a hmai vel chu a fawp tawn sek bawk. Ka pasal leh ka fapa awm dan avang chuan ka ṭap char char thei mai dawna ka hriat avangin room-ah ka lut ta ringawt a, mahse ka la ṭap feih feih tho. Ka lawm a, ka hlim a, ka fapa chu ka khawngaih bawk a, ka ṭah chhan ber chu sawi tur ka hre lo a ni.

Brian-a ṭawng thawm chu a lo hnai tial tial a, room lam an lo pan nia ka hriat avang chuan ka mittui te chu ka hru hul sawk sawk bawk. Ka rin lawk ang ngeiin room chhungah an pafa chu an lo inpawm lut a, hlim hmel zetin ka lo nuih a, khuma muhil bam a fapa hmel a hmu chiah chu a kiai suk nghal.

Brian-a chu chhuata dah thlain min fawp zeuh a, a fapa ngawr ngawr chu a rilru luahtu a ni rih pawh a ni ngei ang. A fapa thla 6 leka upa chu dim zet hian a pawm kang a, Brian-a nau lah chu a la harh miah lo zui.

Hunter-a chuan dim zet hian a biang leh hmui vel chu a fawp kual den den a, Brian-a chuan hlim zetin an awm dan chanchin leh a pawm a duh loh ṭhin thute chu a lo sawi zet zet a, ka rilru chhungril chu a hlim lutuk tawh a ni.

Hunter-a chuan naute chu khumah dim takin a mut leh a, a fapa biakna pawh ngaihsak hauh lovin ka lam a lo hawi a, min fawp ta ngawng ngawng. Kan fapa te pahnih an awm ve tih pawh chu ka ngaihtuah buai duh bik tawh lo, ka mipa hmangaih em em chu ka fawp let lo thei lo tlat a ni.

"Ka hmangaih Daisy, ka Darling tê" ti ril ruihin khumah chuan min bawh a, hlim lutuk avanga ṭap chungin ka lo fawp let ve mial mial bawk.

"Daddy, nangni chu in phakhar em mai" Brian-a thu sawi avang chuan a nui suk a, thlahlel zeta min fawh leh vang vang hnu chuan a awm sawn ve thei ta hram.

"Lo kal teh Buddy, i nau hi eng nge a hming?" a tih chuan ka fapa chhan hmain

"Hming a la nei lo Hunter, nangmah ngeiin a hming hi sa leh la ka duh a ni. Kan lo nghak char char che a, a tawpah chuan kan nghak chhuak ta che a ni hi!" ka lo ti a, ka pasal chuan mak a tih hmel hle.

"Ka hrethiam e" ti thum dupin khuma a fapa muhil bam chu a pawm kang leh a, mahse tun ṭum erawh Brian-a nau chu a rawn harh ve ta.

A meng fiah chiah chu che miah lo leh mit khap miah lovin amah pawmtu chu a en kar a, tal pawh a tal eih lo. Amah pawm mektu chu a zir chiang hmasa tê tê phawt emaw tih turin a awm reuh a, a awm dan chuan a pa ngei pawh a tinui chhuak ta hawk. A pa'n a hmuia a fawh zeuh lai te chuan mak a tih hmel reuh em em a, naute mai mah ni se a fing lutuk chu a lawmawm zawk.

"Daddy ti rawh le, nangmah pawmtu che kha Daddy alawm" ka aw a hriat rualin ka lam a lo hawi vat a, a nu leh a pa chu min en tawn sek vel a nih chu!

"Daddy ti rawh le" ka tih leh chuan phur zetin Brian-a chuan ti turin a nau chu a lo hrilh ve nghal a, a pa lah chuan chhaih nui emaw pawh a la tum der si lo.

"Dadda" kan fapa chuan a rawn ti thut a, chu veleh Hunter-a chuan a hmai leh biang chu tawp chin nei lo tur ang maiin a fawp nghal ta mawlh mawlh.

"Ka fapa, ka fapa duh tak, i hmingah chuan Aiden Hudson tih ka sa e. Tun aṭang chuan Aiden-a i ni tawh aw, ka fapa meng fiah kirker reuh tê" tiin a fapa chu a pawm kang leh vak vak a, Brian-a pawh a lo ṭe chul mai.

"Kha le Buddy, Little Bud hi lo pawm lawk la, Sitting room-ah awm rih tur aw" tiin a fapa te pahnih chu a nawr chhuak a, ka lo nui tawp ringawt.

"Ka ngaihzia che hi i hria em? I hre lo vang, i hre miah lo vang Darling, a chhan chu kan inawm hlat em a ni" ti phawlh phawlhin min fawp bawrh bawrh a, sex kan hman erawh ka ring chiah lo.

"Kei tak hian asin ngai che, i hmel aṭang hian engkim i ching fel tawh tih ka hre thei Hunter. I tel lova awm leh ka duh tawh lo a nia, chuan i hawrawp chhiar a nuam hle bawk" nui sen sena ka tih chuan

"Lehkha tal hnutchhiah lo che ua kal tawp kha chu thil dik niin ka hre lo tlat alawm" a lo ti ve sup a, ka rilru hahna zawng zawng leh ka ipikna te chu an bo fai vek tawh.

"Khawiah nge Ameli-i leh Jerome-a te?" a tih chuan an len chhuah lawk thu ka hrilh a, ngaiin thlahlel em em mah ila room chhunga tawm reng chu thil dik ber a ni lo a ni.

"Chhuak ang, Brian-a leh Aiden-a te pawh ngaihtuah an ngai tawh, an inbuaipui hlei thei hauh lo vang" ka ti zung zung a, ka inrin loh lai chuan min pawm leh ta nawlh.

"Zanin chu ka mutui ngawt ang" ti supin kawngka chu a hawng a, ka pasal mai bakah kan fate pahnih inchhaih hlim thawm chuan hahdamna min pe a ni.

Dinner ei dawn ṭepah Amelia-i leh Jerome-a chu an lo haw a, Amelia-i'n Hunter-a a hmu chiah chu a ṭe chhuak nghal vak ringawt. Hunter-a chu a kuah zui nghal a, insum theihna tlachham tih hriat zetin a ṭap chhuak feih feih a, ṭap chungin a pa thih thu chu a sawi chhuak bawk. Ka pasal chuan aw dam takin a hnem a, a pa a ngaih thute chu a sawi ve a, an unau chu ka khawngaih tak zet.

Maid ka nih laite chu ka ngaihtuah chhuak leh a, ka pasal chuan a pa chu ngai awm reng pawh a ni. Khati ang khawp khan an awm dun tam a, Dinner leh Breakfast ei lai pawhin a pa titipui ber chu Hunter-a a ni a, leh lam kawng zawng tak chuan Griffin-a tan pawh thik loh kha a har ngawt ang.

PROTECTIVE HUSBAND

By

Havali Adam

Last Chapter 20

EPILOGUE

"Aiden! Lo khawih tawh rih lo teh, in Lunch tur ka siam mek alawm" ka tih deuh ṭhawt chuan a phu zuk a, a harh zik zek reuh lutuk chu buaina pakhat a ni ve chiang a ni.

"Ka tihpalh Mommy" inthlahrung aw taka a tih chuan ka khawngaih leh tlat tawh, nuam tih loh avangin thawk ka la zui hak bawk.

"Lo hnai teh le" aw dam taka ka tih chuan ka bulah a lo ding thuai a, ka ṭhut hniam laite chuan min lo en chik hle.

"Daddy leh Big Buddy te va ko la, Lunch ka peih fel ṭep tawh aw" tiin a biang chu ka fawp zeuh a, ani pawh phur takin a tlan chhuak nghal.

A mak ve ngawt mai, tunah chuan Aiden-a paw'n kum 4 a tling ve tawh a nia, hun kal chak dan em em hi! Kum 4 leka upa ni mahse Brian-a letin a harh a, a ṭawngthei zawk a, zawhna pawh a ngah zawk ṭhin. Ka pasal lah chuan chuti ang mizia a nei chu a lawm teh tlat thung a, ka tel lo pawhin an pafa chuan inchhaih hlim thei tak an ni.

Italy rama thla 1 kan awm hnuah Switzerland ramah kan let leh a, kan let hnu kar 2 hnu lawkah Amelia-i leh Jerome-a te chu an innei nghal bawk. Ka thinglung takin ka lawmpui a, keini nupa leh anni nupa tuak tharte inkarah chuan hmangaihnain mihringte min lo thlak danglam nasat theihzia a lang chiang hle a ni.

Amelia-i chuan kan bula awm chu a duh deuh tlat a, mahse ka pasal ve thung chuan a lo phal hauh lo mai. Jerome-a tan pawh a nawm dawn loh thu leh nupa ang taka in leh hmun nei hrang turin a hrilh ta zawk a, chuti ang chu Jerome-a duh dan pawh a ni. A hma paw'n Jerome-a chuan an zin kual reng theih thu a hrilh fô ṭhin, mahse Amelia-i zawk chuan hlauhthawnna a la nei ru tlat a ni.

Hunter-a'n chiang fek fawk leh hriatthiam awlsam taka a hrilhfiah hnu chuan Jerome-a nena inhrang chang turin thutlukna a siam thei ve ta hram a, Hunter-a sawi ni lo se chuan a la hlauhthawn tlat avangin Switzerland ramah an awm deuh chawt ka ring. Jerome-a lah mi ṭha tawp ang chi kha a ni a, a nupui duh zâwng chuan awm a hreh lo khawp ang.

Amelia-a chuan an inneih hma aṭang daih tawh hlauhthawn rukna a la neih thu min hrilh ṭhin a, ka pasal erawh a hrilh ngai chuang lo. Kei ve thung chuan eng buaina mah kan tawh leh ka ring lo ve tawp, a chhan chu ka pasal thu sawi engkim chu ka awih em em vek zawk a ni. Kan hnena a lo haw zan khan engkim min hrilh a, ka thla a muang vek tawh a ni.

A sawi dan phei chuan inzawmna chhut chah duh lotute pawh a that fai vek hial a ni awm e, Jerome-a'n mak a ti pawh kha ka dem hran ta bik lo. Kum sawm chuang nupa lo ni ve tawh mah ila kei ngei paw'n amah chauha mi tam tak a thah theih ka ring ngai lo va, mahse ka pasal chuan a thei tlat, chuvangin a thu sawi engkim chu kei leh kan fate tana ṭha lo tur a awm ka ring lo a ni.

"Mommy" ṭap ṭep chung hian Aiden-a chu a lo lut a, ka thil tih lai dah sawk sawkin ka lo ngaihven vat nghal.

"Engati nge Aiden? Engati nge ṭah i tum ringawt? I tlu em ni?" nu tih takah zawhna chu ka ngah nghal mawlh mawlh hle.

"Daddy leh Big Buddy te'n sakawrin min tlansan daih alawm, ka koh pawh an hre lo, an bulah ka kal ve duh Mommy" a tih chuan pawm kang pahin

"Awi awi awi...Daddy leh Big Buddy te chu ka hau dawn chiang lutuk, engati nge ka fapa duat Aiden-a hi an lo kalsan reng reng ni! An lo haw hunah ka lo hau hrep dawn nia, ka bulah awm daih rawh aw" ka tih chuan

"An bulah ka kal ve duh alawm" a lo ti ṭuau a, a ṭah zui nghal avangin ka tan chuan ka fapa thlem chu thil tih hmasak ber tur a ni leh ta.

"Nakinah kan pahnih chauhin sakawr chungah chuan kan chuang ve daih dawn nia, ṭap tawh suh le" ka tih pawh chuan

"Aih!! Daddy nen sakawr chungah chuan ve ka duh alawm, Daddy nen chiah ka duh" a ti leh tlat a, a mut a chhuak tawh a nih ka ring ber.

"Aiden, ka duattê, i mut a chhuak tawh em ni?" tiin ka awi hliau hliau a, a rilru a lian reuh bawk sia min chhang leh duh ṭhak tawh lo.

Pawn ni lum ai pahin ka fapa chu ka awi a, ani pawh ka dar bawhin a ngawi ran bawk. Kan in kawt leh compound vel chu thlir nin a har ngawih ngawih. Hmâna bang chhah tak tak inhung kual ṭhap ṭhin te kha a chhe vek tawh a, mawi taka phul hring ṭo siar siar tawpah chuan kawngpui a lang vâ va tawh thung.

Chuti ang bawkin kan awmna in tih loh chu kan compound-ah in dang reng a awm tawh lo tluk a ni a, Hunter-a nen kan tlan chhuah dawn zana kan awmna hmun pawh ṭhiah a ni vek tawh a ni. Sakawr thlunna tur intê pakhat a awm a, motor dahna tur intê a awm leh bawk a, chung tih loh chu in ding a awm lo hrim hrim, kan in leh a vel chu a thawveng nuam em em tawh zawk a ni.

Kan awmna in ber pawh chu kum 4 liam taa sak ṭhat vek a ni a, a rawng zawng zawng nen kan thlak vek bawk. Rawng thim lam aiin a eng lam ka hnawih tir a, kan chhungkua leh kan in thim khup tur chu a inhmeh dawnin ka hre lo a ni. Chhungkaw thar kan din tawh a, chuvangin kan in pawh a tharin hmuh a nuam tur a ni.

Boruak hip tinuam zual turin ka pasal chuan kan insira thingkung zawng zawng a mawi tawk chiahin a cut fai vek a, kan ram piah lawka tui khawh thla sang tak pawh a hmuh theih hial. Kan in kawt kawngpuia motor tlan te chu an ding leh thut ṭhin a, zin veivak an ni tih hriat takin an camera ken chuan kan in lam an lo tin vang vang zel.

Kan in chu a hma angin chhawng sang a ni tawh lo va, chhawng hnih leka sang a ni tawh zawk a ni. Zin veivak mite'n thla an la ṭhin pawh chu ka dem lo, kei ngei pawh hian kan in chu mawi ti tak ka ni. Kawngpui aṭang ngat phei chuan a bula thing dingte nen mawi tak hi a ni ringawt, awm a châkawm hliah hliah.

Sakawr ṭe thawm ka hriat rualin Aiden-a room aṭang ka chhuak nghal a, Aiden-a erawh a mutui ngang mai. Kan Lunch eitur pawh ka siam fel titih tawh bawk a, ka buai em em tawh lo. Kawngkapui hawnga ka fapa leh ka pasal lo lut chu ka melh zeuh a, ka fapa naupang zawk avangin an pahnih chungah chuan ka lo lungawi lo ve ringawt a ni ber.

An thawmhnaw leh an thil ken ṭhenkhat chu kawngka bulah an khai ri sawk sawk a, Brian-a chuan a pa chu thil eng emaw a sawipui neuh neuh bawk. Choka lama an lo phei lai te chuan en pawh ka lo en duh ṭhak lo, mahse ka pasal chuan min mitmei ru reng tawh tih ka hre kar thung.

"Mom, ka inbual dawn aw" tia Brian-a min biakna pawh chu ka chhang let duh lo, mahni naute pawh a duat lo em mai.

"Darling" ti supin ka pasal chuan ka bianga lo fawh a tum a, ka lo thle sawn hmak thung.

"Thil thleng a awm em?" a zawhna chu ka la chhang duh lo tluang zel a, nghet zeta ka hnung lam aṭang min kuah chuan ka tal chhuak lo chiang khawp.

"Engati nge Aiden-a in kalsan? A pa i ni a, a ngai ve em em che a, i bula awm te a châk ve a, i tikhawngaih thlak lutuk" a ngawih reng tâk avang chuan ka ti chhuak ta nge nge.

"Kan bulah Little Bud-a a lo kal maw!?" hriatthiam loh hmel zet hian a ti a, hre lo tak tak te pawh a ang mah zawk.

"Kal chiang e, Lunch ei a hun titih tawh avangin ka rawn kohtir che u a, nangni pahnih lah chuan sakawrin in lo tlansan daih leh nghal" ka tih chuan

"Min koh thawm tak ngial pawh ka hre lo" ti dam dapin ka biangah a lo fawp a, chu chauh chu a duh tawk leh ta mai lo.

A lam hawi zawngin min kuai her a, ka hmuiah chuan a fawp leh ta vang vang. A awm hrang deuh hlek a, min en vang vang hnuah min fawp leh a, chuti ang chuan minute 10 chhung chuang a awm nghe nghe. A chet dan avang leh ngawi renga min fiam dan vel chuan min tinui chhuak hawk a, a bulah hi chuan a der tak ngial paw'n ka thinrim rei thei lo.

"Va inbual ve thuai thuai la, Lunch ei zawhah Aiden-a i ngaihven dawn nia" nui var vara ka tih chuan a lo khi suk a, a kal sawn hma chuan min fawp leh hram.

An pafaa an inbual zawh chuan Lunch ei turin an lo kal leh ve ve a, engmah hre lo tih takah Brian-a chuan hlim zet hian min be bawrh bawrh bawk. Kum 10 lai a ni ve tawh a, zirna lamah pawh Grade 5 lai a pass ve tawh a, lehkha thiam thei tak a ni.

Thla eng emaw zat chhung kha chu kan chhungkaw buaina avang leh kan in pangaia kan insawn leh avangin zirna lamah a chawl deuh a, mahse thla rei lotê chhungin ngai a awh leh vek hman tho. An Section-ah phei chuan a tiṭha berte zinga mi a ni ṭhin nghe nghe a, chuti ang taka fapa lehkha thiam thei ka nei chu ka hlim hle a ni.

A nau Aiden-a ve thung erawh hi chu nuar chikimin a nuar thiam a, Kindergarden-ah pawh kan la dah duh lo. Chu bakah keimah ber chu ka khua a har hrim hrim, ka pasal lah hna thawkin khawpui lamah a chhuak daih zel bawk si. Weekend tih lovah chuan chhun lamah kan bulah hun a hmang ngai lo tluk a ni a, ngai em em ṭhin mah ila ka sawi lang duh ngai chuang lo.

Lunch kan ei zawh rualin ka pasal chu Aiden-a room-ah a lut nghal a, rei lovah Aiden-a ṭap thawm chu kan hre zawm nghal zat. An lo inpawm chhuah laite chuan ka lo en reng a, Aiden-a chu a lungawi mai mai dawn lo tih ka hria, chu chu amah ti Aden-a tu ber a ni bawk. A pa chuan tihhlim tum takin a thlem ve ṭhin a, ṭawngkam a thiam vak bik bawk si lova a dawhthei hi ka ti letling ṭhin zawk.

"Aiden, ṭap tawh kher lo la, Lunch in ei zawhah Daddy nen khan sakawr chungah in chuang daih dawn alawm, Big Buddy chu a chuang ve miah lo vang" ka tih chuan ka pawm a rawn ngen nghal hmak.

"Ṭap tawh suh le, naupang pawh ni tawh lovin tlangval i nih tawh khâ" ka tih leh chuan a ṭap bang ve thei ta hram a, a pa chuan eitur a lo barh nghal zat bawk.

Ka taksa aṭanga tal chhuakin a pa chu a kuah leh ang lawi a, an infawh zeuh hnuah an nui dun leh ta var var. Fiam zeuh zeuh pahin a pa chuan thil a ei tir a, minute 5 hnuah phei chuan hlim leh tawh tak a ni. Chuti ang vel chu kan fapa Aiden-a mizia a ni ve khanglang a, a hma phei chuan ka hlauthawng ṭhin nghe nghe.

Brian-a thikin a nuar reng zel ang tih ka hlau a, an unau inkarah chuan hmangaihna chauh awm se ka duh ber. Ka pasal erawh chuan hlauthawng lo turin min hrilh ziah thung a, Brian-a pawh chuan Aiden-a chu a duat thiam reuh khawp. School aṭang thil eng emaw ni a lawm zawng tak a lo hawn ṭhin a, thil inhawn chu an pafa inthlahchhawnah ka ngai hmiah.

"Naktuk chu khawpui lamah kan leng chhuak ang chu ka lo tia, kan fate pawh hian an châk viau chuan ka ring" khuma kan awm hnu chuan a ti sup a, ka pasal taksa nghenga mut zawng a nuam chiang a ni.

"Ka phur tawh" tia nui sen senin a lam hawi zawng chuan ka inlet thawk a, ka awm dan naupangchhia lutuk chuan a nuih a tiza ngang mai.

"Kar lehah khian Italy ramah kan zin lawk a ngaih kha aw" dam zet hian a ti thum leh dap a, a nu leh pa thlan kan tlawh dawn tih hrilh ka ngai tawh lo.

"Aw le Boss" ka tih zeuh chuan a âwmah min kuah bet vak a, a ti ka tiza leh tawh a ni ngei ang.

"Eng lo, Wednesday-ah tal hi chuan inah awm thei tawh la" kan ngawih vang vang hnu chuan ka ti phawng a, sawi loh ka tum zet nâ a, ka sawi ta tho chu a nia.

"Engati maw?" a aw aṭang chuan a mut a chhuak tih ka hre thei, mut chhuak pawh ni se a awm ve tho mai.

"Ka ngai ṭhin che alawm, Aiden-a a muthilh daih phei chuan ka khua a har thei teh mai a nia aw" ka ti bui bui a, ka ṭhen sak bawk.

"Weekend-ah ka lo haw ziah tho alawm" a tih chuan ka nui tawp hmak a, amah hnung chhawn zawngin ka inher nghal thak bawk.

"Darling" a rawn tih leh chuan ka lo ngawi lui tlat a, chuti anga tauh der vel chu a nuam thlawt a ni.

"Aw le, Wednesday apiang chu ka chawl tawh dawn nia" a ti chiah chu a lamah ka inher leh nghal a, lawm avangin ka khi ta ver ver.

"I tider tih kha ka hre vek" kiai suk paha a tih chuan ka nui tawp leh ta hmak, he pa hi chuan min va han hre chiang tak em.

"Dik tak chuan maw i chau lutuk ang tih ka hlau, ngai ṭhin tho che mah ila hahdam ve deuh la ka duh Hunter. I hnuaiah mi tam tak an thawk a, ni khat lek i chawlh chhungin an buai phah bik chuang nâng" ka ti siam siam a, ani chuan ka hmui a lo en daih thung.

"Min ngaihtuah viau tihna em ni?" a zawhna chu chhan enah pawh ka en lo, nui sun sun mah se tihtauh der leh vel ka châk tlat.

"Zawhna min zawh a ṭul miah lo, ka rilru dik tak chu i hre chiang ber alawm" tia inher hmak ka tum chu ka thei lo chiang hle, min kuah nghet lutuk chu ka thaw ṭha thei lo mai dawn zawk.

"Thil hrilh tur che ka nei Darling, mak i ti ve ngawt ang" min kuahna a phelh thawl hnu chuan a ti a, kei pawh chu ka dak chho rang ngei mai.

"Tun kar Thursday khan ka office-ah ka muhil asin, mak ka ti lutuk, ka ngaih loh vang che pawh a ni lo" a tih chuan

"Enga!?" ka lo ti thuai a, mang ṭha lo nei miah lova a muhil thei chu mak ka tih rualin ka lawmpui lutuk.

"Ni lo, i ngaih ang kha a ni lo. Ka tihpalh, ka ngaihna che leh ka hmangaihna che a kiam phah miah lo a nia" inthiam loh hmel zeta a tih chuan ka nui chhuak tawp.

"Ka hria alawm Hunter, ka hre lutuk. Mang ṭha lo nei miah lova i muhil thei chu mak ka ti a, ka hlim lutuk zawk alawm" tiin a chungah ka bawk zui nghal a, ka fawp zeuh bawk.

"Ka mumangah chuan ka pa ka hmu asin" a ti leh chiah chu ka kâ hau mai, ani pawh lungngaih avangin a nui lui ta sak.

"Kei pawh hian mak ka ti lutuk, a thih meuh tâkah chuan ka ngai ve tak zet a ni Darling" ti supin a âwmah min kuah bet a, ka rilru a lo na ve vawng vawng.

"Kan chhungkaw lakah sual hle mah se i pa a ni miau a, ka hrethiam lutuk che Hunter. Kei chuan ka thihsan ve phal lo che, kan thi rual dawn te a nih ngawt loh chuan thihsan che ka duh lo bawk"

"I thih ka phal reng reng lo" ti leh supin rizai chuan min khuh a, biak reng chu a fuh bera ka hriat loh avangin ka ṭawng zui duh ta bik lo.

A tukah chuan pangai takin a awm leh vek tawh a, a nui hmel pawh ka hmû ka hmu leh tawh zawk. Weekend tawpna ni a nih avangin khawpui lama len chhuah chu kan tum ta a, zan lama a sawi ang ngeiin Brian-a leh Aiden-a pawh an phur khawp mai. Company lam buaipui chunga a chhungkuate min uap hneh em emtu ka pasal chu kan tan a hlu a, khawvel mipa zawng zawng zingah ka hmangaihin ka ngaisang ber bawk.

Ka pasal chuan Company pakhat enkawl mek a nei a, chu erawh ama din liau liau a ni thung. A pa khan ro tam tak a tan a lo hnutchhiah ngei a, mahse ka pasal chuan bul ṭanna atan tlêm tê chauh a hmang thung. A hman bang zawng zawng chu kan lo tih tawh ang bawkin Charity Fund lamah a chhung lut leh vek a, thianghlim taka thil ti duh mi ka pasal chu ka hmangaih ngawih ngawih hi a ni tawp.

Company a din tirh chuan ka lo beidawnpui lek lek a, a chhan pawh mi mak tih a hlawh em vang a ni. Ka pasal erawh chu a kal ngaiin a kal mawp mawp a, hnathawk tur pawh a hmu nghal mai lo. Amah chuan bul a ṭan tawh ang bawkin a thawk mial mial zel a, kei ngei paw'n a chang chuan mi hman duh loh thil leh bawlhhlawh lak khawm vel chu ka lo tha nat pui ṭhin.

Kum 1 a ral meuh chuan ka beisei loh lutukin hmasawn lam a pan a, mi tam takin bawlhhlawh mai mai emaw kan tih hmanga thil ṭha tak tak a siam chhuak thei chu mak ka ti a ni. Kum 1 leh a chanve hnuah phei chuan mi hriat a hlawh leh zual a, a Company-a thawk tur te chu an intlar fur tawh zawk. Ka pasal chu khawvela pasal ṭha ber a ni a, ka chhuangin ka hmangaih tak zet bawk.

A nun hmasa lam ngaihtuah chhuah chang phei chuan mahnia ṭah rek rek chang ka nei fô va, ka pasal tawrh leh thil paltlang chu a nasa ve em a ni. Mi rorum leh tual thah hmang kha min hmangaih avangin a inthlak danglam vek a, keimah nena nun thar hmang tura a inpumpekna te chu ropui ka ti thlawt, mi dang tan eng teh lua pawh lo ni lo mah se ka tan chuan a ropui lutuk tak zet.

Switzerland ram kan awm leh aṭanga kum 2 hnih hnuah chuan hah taka a thawh ngai tawh lo khawpin hnathawk chhawr a ngah tawh a, a tan pawh a hahdam thlak sawt ta hle. Amaherawhchu Company ngaihthah lai a neih awm pawh ka hre lo, hna thawk ve kher tawh lo mah se hnathawkte vil tur talin khawpui lamah a kal ni tin ṭhin.

"Daddy, eng nge kan tih dawn?" thlawhnaa kan chuan laiin Aiden-a chuan a ti a, Brian-a erawh kan kalna tur leh kan kal chhan a hriatthiam vek tawh avangin a ngawi mai mai thung.

"Granpa leh Grandma kan hmu dawn alawm, muhil daih rawh le" ka pasal chuan a ti ṭha ve mai a, Aiden-a pawh ṭawng tawh lovin a pa taksaah a tawm leh ta kâk mai.

Italy ram kan thlen chuan Hotel changkang tak pakhatah kan thleng a, a hmaa kan lo awm ve tawhna in kha chu mi dangin an lei daih tawh. Amelia-i Body Guard ho zawng zawng pawh ka pasal chuan a ban vek a, bulṭanna tur pawisa te chu a pe hnem hlawm khawp mai. Anni paw'n lawm takin pawisa chu an la ṭheuh a, an kal bo zui ta vang vang hlawm a ni.

Hunter-a chu a nu leh pa thlan hmaah ngawi rengin a ding a, a kut leh lâm leh lam chu a fate pahnih chuan an chelh ran bawk. A nu leh pa chu a ngai ve tak zet tih ka hre thei, a pa ruang pawh Police ho hmuh hmaa la sawn duh leh ngat mihring kha a ni a, min hrilh tirh te khan mak ka va'n ti tak!

Italy a lo thlen hma daih khan a pa ruang chu a lo kawl ṭha tawh reng a, Griffin-a ruang erawh a buaipui zui lo thung. A pa ruang chu doctor te hnenah rimchhe lo turin a dah rih a, buaina zawng zawmg a chin fel hnu chuan a pa ruang nen Italy ram an lo thleng a, kan bula a lo kal tak tak hmain a nu thlan lung bulah a pa thlan lung chu a phuntir ve ta a ni.

Chung zawng zawng chu a ti hman ang tih rin ngaihna pawh ka hre lo, a nupui mah ni ila kei hian Hunter-a chu ka la hre chiang lo hle a ni. Ani ve thung chuan ka engkim, ka rilru puthmang leh ka taksa danglam dan thlengin a hre fai vek a, hre chiang viauin inhre ve tawh mah ila a nungchang chu mak tih chang ka la ngah mai, mahse min hmangaih tih ka hriat miau avangin ka hlim em em tho.

Italy ramah chuan kar khat kan cham a, nuam pawh kan ti tlang hle. Kan cham chhung chuan Colosseum te kan tlawh ve thlap a, Camera hmangin thla te kan la ṭeuh a, chhungkaw inhmangaih tak nih zawng a nuam chiang a ni. Venice lam kan pan leh a, tui mawi em em chunga lawnglenga chuan chu a nawm dan a dangdai tawp, an in sak dan te chu mak ka ti ang reng hle bawk.

"Brian, phone saw lo la lawk mai teh" ka thil tih lai a laklawh em avang chuan ka ti a, Brian-a pawh a kal zui ve nghal mai.

"Hello, aw..Aunty, in lo zin dawn maw!? Yes! Lo zin thuai thuai r'u aw" Telephone hmanga ka fapa ṭawng mawlh mawlh chu ka en rang ngei mai.

"Mom, Aunty Amelia-i leh Uncle Jerome-a te an lo zin dawn" phone a dah hnu chuan ka lam a lo pan nghal a, a hlim tih chu hai rual a ni lo.

"A nih chû, engtikah nge lo zin an tum?" pangpar Pot siam mawlh mawlh pah chuan ka lo ti ve nghal a, Amelia-i leh Jerome-a te chu ka hmu châk ve tawh khawp mai.

"Naktuk tuk lehah an lo zin dawn, Aiden-a ka va kai tho teh ang" ti leh nghal zatin a nau room lamah a tlan a, an intih ṭah loh hram beisei ang.

Thil hre chhuak thutin ka che sawk sawk a, ka tlan a ni ber. Telphone chu ka bengah vuahin ka pasal Office phone number chu ka chhu zung zung a, lo haw thuai se ka duh a ni. A ring râl râl hnu rei vak lovah a aw ngei chu ka hre ta, Amelia-i te nupa lo zin tur thu chu ka hrilh rang kher mai. A theih chuan lo haw hma turin ka hrilh nghal bawk a, rei pawh inbe lovin ka dah ve leh mai.

Zanriah kan ei lai chuan Brian-a leh Aiden-a chu an inṭawng chhawk char char a, Aiden-a tê lah chuan puitling ang maiin a u thu sawi chu a lo tuihnih ve zel a, ka nui leh nge nge zel. Amelia-i te nupa lo zin tur thu ringawt chu an sawi a, an lo ngai ve tawh hle bawk a ni ang.

"Fa nei leh tawh ila" ti sup tu chu tu dang a ni lo, khuma kan mut tirh aṭang tawh a che sêk khan ka hre reng a ni.

"Maw Darling!?" ngen ngawl deuha ti chungin min kuai her a, ka pasal chu a va han lawmawm chiang tak, hmelṭha bawk si.

"I thu thu alawm" ka tih chuan ha langin a ṭhen suk a, chungte hlei hlei chuan ka nuih a tiza zual.

Ka taksa chhunga a lo luh lai chuan thawhah ang maiin ka awm leh tawh, Sex kan hman apiangin thaw hlei thei lovin min siam ve ziah, chu erawh nawmna nasa lutuk ka dawn vang a ni thung. A chet ran chang phei chuan nuam tih vang leh awm ngaihna hriat loh avangin ka lo si hliam hliam a, tun hnaiah kan hmang khât bawk nen min mamawh tawh hle a ni ang a vawrtawp a thlen paw'n rei lovah a che leh nghal zawt zawt tho.

Aiden-a kan neih hnu aṭang kha chuan a hma ang em emin Sex kan hmang ngun lo va, min enkawl thiam lutuk leh min ngaihsak lutuk chu ka inthlahrung lek lek zel. Sex hmang ngai miah lo chu kan ni lo, mahse naute erawh ka pai leh tawh miah lo thung. Chu chu keini nupa chuan chung lam rorelnaah kan ngai hmiah a, a hunah erawh ka rai ve leh mai ka ring bawk.

Ni hnih hnuah Amelia-i te chu an lo thleng a, kan titi tui dun bawrh bawrh nghal hle. Nau a pai a tih hriat zetin a pum chu a puar ve âl a, naute neih a châk thu a sawi reng bawk. Hunter-a leh Jerome-a pawh Company-ah te kal dunin an inkawp deuh chawt a, Jerome-chuan ka pasal chu zah thiam tak a ni. Dinner ei lai pawh ni se ka pasal thu sawi chu a pawm vek zel a, ka pasal lah chuan sawi sual a nei ngai bawk si lo.

"I ṭha em?" ka awm dan hrethiam zetin Amelia-i chuan a lo ti vat a, zep buai duh lovin ka lu ka lo thing vat.

"Na i nei em ni?"

"Ka lu a hai, ka awm a nuam lo riai riai mai" ka tih chuan ka chal chu a dek a, mahse khawsik ang zawnga na ka ni hauh lo.

"Rei lotê lo nghak rawh, Jerome-a ka'n ko ang e" tiin a tho nghal tharh a, kei erawh eitur tak ngial pawh ka siam zawm peih lo thung.

Motor-a min hlan lai te chuan chiang nial lo zetin ka awm a, harh deuh si mah se harhfim si lovin ka awm a ni ber. Amelia-i chuan Aiden-a zawhna a chhang char char a, Jerome-a erawh motor a khalh avangin a ṭawng lo hrim hrim. Khawpui lam kan pan tih chu ka hria, chutah ruah a la sur zui, thil dang chu ka hriat belh thei ta ngang lo.

"Darling" ka men rualin ka pasal hmel ka hmu hmasa ber a, ka kut chu a hum hneh em avangin a lum nuam hle bawk.

"Ka tihpalh" inthiam loh hmel taka a tih leh chuan ka lo nui mai a, inthiam lohna a neihna tur awm reng ka hre lo.

"Ka ngaihtuah tawk lo che tih ka hria, vawiin aṭang chuan ka bulah hlir i awm tawh ang" min ngaihtuah zeta a tih chuan

"Ni lo, chuti anga tih kher a ngai lo. Ka nuam lo deuh thut a, ka tihbuai viau zawk lo che maw" ka lo ti ve nghal vat a, luhai pawh ka nei tawh lo hrim hrim.

"Company lam chu i sawi ang khan ka mi chhawr te'n an enkawl hneh viau, kei chuan nang leh ka fate chauh hi ka enkawl tawh ang che u"

"A ṭul lo ka tih khâ Hunter, Wednesday-ah leh Weekend-ah ni lengin i awm ziah tho alawm" ka tih lai mekin ka hmui chu a kutin a rawn si nghal hmak.

"Min hnial suh aw Darling" ti supin min fawp zeuh a, ka pasal hnial zawnga ṭawng chu ka tum ta bik lo.

Chutia kei leh ka pasal chauh room chhunga kan awm lai chuan Amelia-i te leh Doctor pakhat an lo lut a, chuta Doctor thu sawi chuan min va han ṭhawng chiang em. Thla 1 mi nau ka lo pai reng a, mak ka ti lutuk chu ka meng phawk nasa kher mai. Inrinhlelhna ka nei miah lo te chu a awihawm loh zawk, Brian-a leh Aiden-a ka pai lai kha chuan inrinhlelhna ka nei vek, tuna taka ka nei miah lo chu a mak thlawt a ni.

"Ka hmangaih che Daisy Hudson, fanu min pek leh dawn avangin la lawm e. Ka ta i ni a, i ni kumkhua bawk ang" ka pasal chuan lungchim zetin min fawp a, Aiden-a chu a lo ṭe chhuak ta.

"Lo kal teh Little Bud, Little Sis i nei dawn a nia aw, i lawm em?" ka pasal ṭhin tak hi chu aw, mipa nge hmeichhia ka pai tih tuma'n kan la hre hauh lo.

"Little Sis ka nei dawn maw Daddy?" Aiden-a chuan a ti ta vat reng a, a pa chu a en chiang hle bawk.

"Aw, nei dawn e" Hunter-a lah chuan a lo ti mai a, mahse ka pasal rin dan chu a dik leh nawlh ngei ang ka ring.

"Mom" Brian-a aw ka hriat rualin ka hawi chhuak thuai a, Uncle Jerome-a'n School aṭang a lo hruai haw a ni hrim hrim, chuti ni lo se Brian-a leh Jerome-a te chu room chhungah an lo lut dun tawp lo vang.

"Brian, kei chu Little Sis ka nei dawn bik bik asin, Daddy paw'n min hrilh zo chiah" Aiden-a chuan a lo ti zet zet reuh a, Hunter-a pawh a nui chhuak hawk nghe nghe.

Hlim taka ka pasal nui hmel chu ka en vawng vawng a, ka tan chuan khawvela pasal ṭha ber a va ni chiang tak em. A ni reng ang, thihnain min ṭhen hran hma chu a ni dawn tih ka chiang. Chuti ang chu ka pasal mizia a ni tih ka hre ve tawh tlat, kei leh kan fate tan chuan hmangaih loh theih lovin a awm reng ṭhin. Thihna lak ata vawi eng zat fakau nge min chhanchhuah tawh ka hre seng lo, kan chhungkua chu a thla zar hnuaiah kan him hliah hliah a ni.

"Ka hmangaih che" tiin nui var var chunga min en lai chuan ka lo phun sep a, ka lama lo tawlh phei set setin ka hmuiah leh ka chalah chuan a fawp vang vang a, ka hlim tak zet a ni.

A TAWP TA